ୱିନୟୱିନିଚ୍ଛୟୋ
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ୱିନୟୱିନିଚ୍ଛୟୋ
ଗନ୍ଥାରମ୍ଭକଥା
ୱନ୍ଦିତ୍ୱା ସିରସା ସେଟ୍ଠଂ, ବୁଦ୍ଧମପ୍ପଟିପୁଗ୍ଗଲଂ ।
ଭୱାଭାୱକରଂ ଧମ୍ମଂ, ଗଣଞ୍ଚେୱ ନିରଙ୍ଗଣଂ ॥
ଭିକ୍ଖୂନଂ ଭିକ୍ଖୁନୀନଞ୍ଚ, ହିତତ୍ଥାୟ ସମାହିତୋ ।
ପୱକ୍ଖାମି ସମାସେନ, ୱିନୟସ୍ସୱିନିଚ୍ଛୟଂ ॥
ଅନାକୁଲମସଂକିଣ୍ଣଂ, ମଧୁରତ୍ଥପଦକ୍କମଂ ।
ପଟୁଭାୱକରଂ ଏତଂ, ପରମଂ ୱିନୟକ୍କମେ ॥
ଅପାରଂ ଓତରନ୍ତାନଂ, ସାରଂ ୱିନୟସାଗରଂ ।
ଭିକ୍ଖୂନଂ ଭିକ୍ଖୁନୀନଞ୍ଚ, ନାୱାଭୂତଂ ମନୋରମଂ ॥
ତସ୍ମା ୱିନୟନୂପାୟଂ, ୱିନୟସ୍ସୱିନିଚ୍ଛୟଂ ।
ଅୱିକ୍ଖିତ୍ତେନ ଚିତ୍ତେନ, ୱଦତୋ ମେ ନିବୋଧଥ ॥
ଭିକ୍ଖୁୱିଭଙ୍ଗୋ
ପାରାଜିକକଥା
ପଠମପାରାଜିକକଥା
ତିୱିଧେ ତିଲମତ୍ତମ୍ପି, ମଗ୍ଗେ ସେୱନଚେତନୋ ।
ଅଙ୍ଗଜାତଂ ପୱେସେନ୍ତୋ, ଅଲ୍ଲୋକାସେ ପରାଜିତୋ ॥
ପୱେସନଂ ପୱିଟ୍ଠଂ ୱା, ଠିତମୁଦ୍ଧରଣମ୍ପି ୱା ।
ସସିକ୍ଖୋ ସାଦିୟନ୍ତୋ ସୋ, ଠପେତ୍ୱା କିରିୟଂ ଚୁତୋ ॥
ସନ୍ଥତେନଙ୍ଗଜାତେନ, ସନ୍ଥତଂ ୱା ଅସନ୍ଥତଂ ।
ମଗ୍ଗଂ ପନ ପୱେସେନ୍ତୋ, ତଥେୱାସନ୍ଥତେନ ଚ ॥
ଉପାଦିନ୍ନେନୁପାଦିନ୍ନେ, ଅନୁପାଦିନ୍ନକେନ ୱା ।
ଘଟ୍ଟିତେ ଅନୁପାଦିନ୍ନେ, ସଚେ ସାଦିୟତେତ୍ଥ ସୋ ॥
ହୋତି ପାରାଜିକକ୍ଖେତ୍ତେ, ପୱିଟ୍ଠେ ତୁ ପରାଜିତୋ ।
ଖେତ୍ତେ ଥୁଲ୍ଲଚ୍ଚୟଂ ତସ୍ସ, ଦୁକ୍କଟଞ୍ଚ ୱିନିଦ୍ଦିସେ ॥
ମତେ ଅକ୍ଖାୟିତେ ଚାପି, ୟେଭୁୟ୍ୟକ୍ଖାୟିତେପି ଚ ।
ମେଥୁନଂ ପଟିସେୱନ୍ତୋ, ହୋତି ପାରାଜିକୋ ନରୋ ॥
ୟେଭୁୟ୍ୟକ୍ଖାୟିତେ ଚାପି, ଉପଡ୍ଢକ୍ଖାୟିତେପି ଚ ।
ହୋତି ଥୁଲ୍ଲଚ୍ଚୟାପତ୍ତି, ସେସେ ଆପତ୍ତି ଦୁକ୍କଟଂ ॥
ନିମିତ୍ତମତ୍ତଂ ସେସେତ୍ୱା, ଖାୟିତେପି ସରୀରକେ ।
ନିମିତ୍ତେ ମେଥୁନଂ ତସ୍ମିଂ, ସେୱତୋପି ପରାଜୟୋ ॥
ଉଦ୍ଧୁମାତାଦିସମ୍ପତ୍ତେ, ସବ୍ବତ୍ଥାପି ଚ ଦୁକ୍କଟଂ ।
ଖାୟିତାକ୍ଖାୟିତଂ ନାମ, ସବ୍ବଂ ମତସରୀରକେ ॥
ଛିନ୍ଦିତ୍ୱା ପନ ତଚ୍ଛେତ୍ୱା, ନିମିତ୍ତୁପ୍ପାଟିତେ ପନ ।
ୱଣସଙ୍ଖେପତୋ ତସ୍ମିଂ, ସେୱଂ ଥୁଲ୍ଲଚ୍ଚୟଂ ଫୁସେ ॥
ତତୋ ମେଥୁନରାଗେନ, ପତିତାୟ ନିମିତ୍ତତୋ ।
ତାୟଂ ଉପକ୍କମନ୍ତସ୍ସ, ଦୁକ୍କଟଂ ମଂସପେସିୟଂ ॥
ନଖପିଟ୍ଠିପ୍ପମାଣେପି, ମଂସେ ନ୍ହାରୁମ୍ହି ୱା ସତି ।
ମେଥୁନଂ ପଟିସେୱନ୍ତୋ, ଜୀୱମାନେ ପରାଜିତୋ ॥
କଣ୍ଣଚ୍ଛିଦ୍ଦକ୍ଖିନାସାସୁ, ୱତ୍ଥିକୋସେ ୱଣେସୁ ୱା ।
ଅଙ୍ଗଜାତଂ ପୱେସେନ୍ତୋ, ରାଗା ଥୁଲ୍ଲଚ୍ଚୟଂ ଫୁସେ ॥
ଅୱସେସସରୀରସ୍ମିଂ, ଉପକଚ୍ଛୂରୁକାଦିସୁ ।
ୱସା ମେଥୁନରାଗସ୍ସ, ସେୱମାନସ୍ସ ଦୁକ୍କଟଂ ॥
ଅସ୍ସଗୋମହିସାଦୀନଂ, ଓଟ୍ଠଗଦ୍ରଭଦନ୍ତିନଂ ।
ନାସାସୁ ୱତ୍ଥିକୋସେସୁ, ସେୱଂ ଥୁଲ୍ଲଚ୍ଚୟଂ ଫୁସେ ॥
ତଥା ସବ୍ବତିରଚ୍ଛାନଂ, ଅକ୍ଖିକଣ୍ଣୱଣେସୁପି ।
ଅୱସେସସରୀରେସୁ, ସେୱମାନସ୍ସ ଦୁକ୍କଟଂ ॥
ତେସଂ ଅଲ୍ଲସରୀରେସୁ, ମତାନଂ ସେୱତୋ ପନ ।
ତିୱିଧାପି ସିୟାପତ୍ତି, ଖେତ୍ତସ୍ମିଂ ତିୱିଧେ ସତି ॥
ବହି ମେଥୁନରାଗେନ, ନିମିତ୍ତଂ ଇତ୍ଥିୟା ପନ ।
ନିମିତ୍ତେନ ଛୁପନ୍ତସ୍ସ, ତସ୍ସ ଥୁଲ୍ଲଚ୍ଚୟଂ ସିୟା ॥
କାୟସଂସଗ୍ଗରାଗେନ, ନିମିତ୍ତେନ ମୁଖେନ ୱା ।
ନିମିତ୍ତଂ ଇତ୍ଥିୟା ତସ୍ସ, ଛୁପତୋ ଗରୁକଂ ସିୟା ॥
ତଥେୱୋଭୟରାଗେନ, ନିମିତ୍ତଂ ପୁରିସସ୍ସପି ।
ନିମିତ୍ତେନ ଛୁପନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ନିମିତ୍ତେନ ନିମିତ୍ତଂ ତୁ, ତିରଚ୍ଛାନଗତିତ୍ଥିୟା ।
ଥୁଲ୍ଲଚ୍ଚୟଂ ଛୁପନ୍ତସ୍ସ, ହୋତି ମେଥୁନରାଗତୋ ॥
କାୟସଂସଗ୍ଗରାଗେନ, ତିରଚ୍ଛାନଗତିତ୍ଥିୟା ।
ନିମିତ୍ତେନ ନିମିତ୍ତସ୍ସ, ଛୁପନେ ଦୁକ୍କଟଂ ମତଂ ॥
ଅଙ୍ଗଜାତଂ ପୱେସେତ୍ୱା, ତମାୱଟ୍ଟକତେ ମୁଖେ ।
ତତ୍ଥାକାସଗତଂ କତ୍ୱା, ନୀହରନ୍ତସ୍ସ ଦୁକ୍କଟଂ ॥
ତଥା ଚତୂହି ପସ୍ସେହି, ଇତ୍ଥିୟା ହେଟ୍ଠିମତ୍ତଲଂ ।
ଅଛୁପନ୍ତଂ ପୱେସେତ୍ୱା, ନୀହରନ୍ତସ୍ସ ଦୁକ୍କଟଂ ॥
ଉପ୍ପାଟିତୋଟ୍ଠମଂସେସୁ, ବହି ନିକ୍ଖନ୍ତକେସୁ ୱା ।
ଦନ୍ତେସୁ ୱାୟମନ୍ତସ୍ସ, ତସ୍ସ ଥୁଲ୍ଲଚ୍ଚୟଂ ସିୟା ॥
ଅଟ୍ଠିସଙ୍ଘଟ୍ଟନଂ କତ୍ୱା, ମଗ୍ଗେ ଦୁୱିଧରାଗତୋ ।
ସୁକ୍କେ ମୁତ୍ତେପି ୱାମୁତ୍ତେ, ୱାୟମନ୍ତସ୍ସ ଦୁକ୍କଟଂ ॥
ଇତ୍ଥିଂ ମେଥୁନରାଗେନ, ଆଲିଙ୍ଗନ୍ତସ୍ସ ଦୁକ୍କଟଂ ।
ହତ୍ଥଗ୍ଗାହପରାମାସ-ଚୁମ୍ବନାଦୀସ୍ୱୟଂ ନୟୋ ॥
ଅପଦେ ଅହୟୋ ମଚ୍ଛା, କପୋତା ଦ୍ୱିପଦେପି ଚ ।
ଗୋଧା ଚତୁପ୍ପଦେ ହେଟ୍ଠା, ୱତ୍ଥୁ ପାରାଜିକସ୍ସିମେ ॥
ସେୱେତୁକାମତାଚିତ୍ତଂ, ମଗ୍ଗେ ମଗ୍ଗପ୍ପୱେସନଂ ।
ଇଦମଙ୍ଗଦ୍ୱୟଂ ୱୁତ୍ତଂ, ପଠମନ୍ତିମୱତ୍ଥୁନୋ ॥
ଦୁକ୍କଟଂ ପଠମସ୍ସେୱ, ସାମନ୍ତମିତି ୱଣ୍ଣିତଂ ।
ସେସାନଂ ପନ ତିଣ୍ଣମ୍ପି, ଥୁଲ୍ଲଚ୍ଚୟମୁଦୀରିତଂ ॥
‘‘ଅନାପତ୍ତୀ’’ତି ଞାତବ୍ବଂ, ଅଜାନନ୍ତସ୍ସ ଭିକ୍ଖୁନୋ ।
ତଥେୱାସାଦିୟନ୍ତସ୍ସ, ଜାନନ୍ତସ୍ସାଦିକମ୍ମିନୋ ॥
ୱିନୟେ ଅନୟୂପରମେ ପରମେ ।
ସୁଜନସ୍ସ ସୁଖାନୟନେ ନୟନେ ।
ପଟୁ ହୋତି ପଧାନରତୋ ନ ରତୋ ।
ଇଧ ୟୋ ପନ ସାରମତେ ରମତେ ॥
ଇମଂ ହିତୱିଭାୱନଂ ଭାୱନଂ ।
ଅୱେଦି ସୁରସମ୍ଭୱଂ ସମ୍ଭୱଂ ।
ସ ମାରବଳିସାସନେ ସାସନେ ।
ସମୋ ଭୱତୁପାଲିନା ପାଲିନା ॥
ଇତି ୱିନୟୱିନିଚ୍ଛୟେ ପଠମପାରାଜିକକଥା ନିଟ୍ଠିତା ।
ଦୁତିୟପାରାଜିକକଥା
ଆଦିୟନ୍ତୋ ହରନ୍ତୋୱ-ହରନ୍ତୋ ଇରିୟାପଥଂ ।
ୱିକୋପେନ୍ତୋ ତଥା ଠାନା, ଚାୱେନ୍ତୋପି ପରାଜିତୋ ॥
ତତ୍ଥ ନାନେକଭଣ୍ଡାନଂ, ପଞ୍ଚକାନଂ ୱସା ପନ ।
ଅୱହାରା ଦସେୱେତେ, ୱିଞ୍ଞାତବ୍ବା ୱିଭାୱିନା ॥
ସାହତ୍ଥାଣତ୍ତିକୋ ଚେୱ, ନିସ୍ସଗ୍ଗୋ ଅତ୍ଥସାଧକୋ ।
ଧୁରନିକ୍ଖେପନଞ୍ଚାତି, ଇଦଂ ସାହତ୍ଥପଞ୍ଚକଂ ॥
ପୁବ୍ବସହପୟୋଗୋ ଚ, ସଂୱିଦାହରଣମ୍ପି ଚ ।
ସଙ୍କେତକମ୍ମଂ ନେମିତ୍ତଂ, ପୁବ୍ବୟୋଗାଦିପଞ୍ଚକଂ ॥
ଥେୟ୍ୟପସୟ୍ହପରିକପ୍ପ-ପଟିଚ୍ଛନ୍ନକୁସାଦିକା ।
ଅୱହାରା ଇମେ ପଞ୍ଚ, ୱେଦିତବ୍ବାୱ ୱିଞ୍ଞୁନା ॥
ୱତ୍ଥୁକାଲଗ୍ଘଦେସେ ଚ, ପରିଭୋଗଞ୍ଚ ପଞ୍ଚପି ।
ଞତ୍ୱା ଏତାନି କାତବ୍ବୋ, ପଣ୍ଡିତେନ ୱିନିଚ୍ଛୟୋ ॥
ଦୁତିୟଂ ୱାପି କୁଦ୍ଦାଲଂ, ପିଟକଂ ପରିୟେସତୋ ।
ଗଚ୍ଛତୋ ଥେୟ୍ୟଚିତ୍ତେନ, ଦୁକ୍କଟଂ ପୁବ୍ବୟୋଗତୋ ॥
ତତ୍ଥଜାତକକଟ୍ଠଂ ୱା, ଲତଂ ୱା ଛିନ୍ଦତୋ ପନ ।
ଦୁକ୍କଟଂ ଉଭୟତ୍ଥାପି, ୱୁତ୍ତଂ ସହପୟୋଗତୋ ॥
ପଥୱିଂ ଖଣତୋ ୱାପି, ବ୍ୟୂହତୋ ପଂସୁମେୱ ୱା ।
ଆମସନ୍ତସ୍ସ ୱା କୁମ୍ଭିଂ, ହୋତି ଆପତ୍ତି ଦୁକ୍କଟଂ ॥
ମୁଖେ ପାସଂ ପୱେସେତ୍ୱା, ଖାଣୁକେ ବଦ୍ଧକୁମ୍ଭିୟା ।
ବନ୍ଧନାନଂ ୱସା ଞେୟ୍ୟୋ, ଠାନଭେଦୋ ୱିଜାନତା ॥
ଦ୍ୱେ ଠାନାନି ପନେକସ୍ମିଂ, ଖାଣୁକେ ବଦ୍ଧକୁମ୍ଭିୟା ।
ୱଲୟଂ ରୁକ୍ଖମୂଲସ୍ମିଂ, ପୱେସେତ୍ୱା କତାୟ ୱା ॥
ଉଦ୍ଧରନ୍ତସ୍ସ ଖାଣୁଂ ୱା, ଛିନ୍ଦତୋ ସଙ୍ଖଲିମ୍ପି ୱା ।
ଥୁଲ୍ଲଚ୍ଚୟଂ ତତୋ କୁମ୍ଭିଂ, ଠାନା ଚାୱେତି ଚେ ଚୁତୋ ॥
ପଠମଂ ପନ କୁମ୍ଭିଂ ୱା, ଉଦ୍ଧରିତ୍ୱା ତଥା ପୁନ ।
ଠାନା ଚାୱେତି ଖାଣୁଂ ୱା, ସଙ୍ଖଲିଂ ୱାପି ସୋ ନୟୋ ॥
ଇତୋ ଚିତୋ ଚ ଘଂସନ୍ତୋ, ମୂଲେ ସାରେତି ରକ୍ଖତି ।
ୱଲୟଂ ଖେଗତଂ ତତ୍ଥ, କରୋନ୍ତୋୱ ପରାଜିତୋ ॥
ଜାତଂ ଛିନ୍ଦତି ଚେ ରୁକ୍ଖଂ, ଦୁକ୍କଟଂ କୁମ୍ଭିମତ୍ଥକେ ।
ସମୀପେ ଛିନ୍ଦତୋ ତସ୍ସ, ପାଚିତ୍ତିୟମତତ୍ଥଜଂ ॥
ଅନ୍ତୋକୁମ୍ଭିଗତଂ ଭଣ୍ଡଂ, ଫନ୍ଦାପେତି ସଚେ ପନ ।
ଅପବ୍ୟୂହେତି ତତ୍ଥେୱ, ତସ୍ସ ଥୁଲ୍ଲଚ୍ଚୟଂ ସିୟା ॥
ହରନ୍ତୋ କୁମ୍ଭିୟା ଭଣ୍ଡଂ, ମୁଟ୍ଠିଂ ଛିନ୍ଦତି ଅତ୍ତନୋ ।
ଭାଜନେ ୱା ଗତଂ କତ୍ୱା, ହୋତି ଭିକ୍ଖୁ ପରାଜିତୋ ॥
ହାରଂ ୱା ପନ ପାମଙ୍ଗଂ, ସୁତ୍ତାରୁଳ୍ହଂ ତୁ କୁମ୍ଭିୟା ।
ଫନ୍ଦାପେତି ୟଥାୱତ୍ଥୁଂ, ଠାନା ଚାୱେତି ଚେ ଚୁତୋ ॥
ସପ୍ପିଆଦୀସୁ ୟଂ କିଞ୍ଚି, ପିୱତୋ ପାଦପୂରଣଂ ।
ଏକେନେୱ ପୟୋଗେନ, ପୀତମତ୍ତେ ପରାଜୟୋ ॥
କତ୍ୱାୱ ଧୁରନିକ୍ଖେପଂ, ପିୱନ୍ତସ୍ସ ପୁନପ୍ପୁନଂ ।
ସକଲମ୍ପି ଚ ତଂ କୁମ୍ଭିଂ, ପିୱତୋ ନ ପରାଜୟୋ ॥
ସଚେ ଖିପତି ୟଂ କିଞ୍ଚି, ଭଣ୍ଡକଂ ତେଲକୁମ୍ଭିୟଂ ।
ତଂ ପାଦଗ୍ଘନକଂ ତେଲଂ, ଧୁୱଂ ପିୱତି ତାୱଦେ ॥
ହତ୍ଥତୋ ମୁତ୍ତମତ୍ତେୱ, ଥେୟ୍ୟଚିତ୍ତୋ ୱିନସ୍ସତି ।
ଆୱିଞ୍ଜେତ୍ୱାପି ୱା କୁମ୍ଭିଂ, ତେଲଂ ଗାଳେତି ଚେ ତଥା ॥
ତେଲସ୍ସାକିରଣଂ ଞତ୍ୱା, ଖିତ୍ତଂ ରିତ୍ତାୟ କୁମ୍ଭିୟା ।
ପୀତଂ ତେଲଞ୍ଚ ତଂ ଭଣ୍ଡଂ, ଉଦ୍ଧରନ୍ତୋୱ ଧଂସିତୋ ॥
ତତ୍ଥେୱ ଭିନ୍ଦତୋ ତେଲଂ, ଛଡ୍ଡେନ୍ତସ୍ସ ତଥେୱ ଚ ।
ଝାପେନ୍ତସ୍ସ ଅଭୋଗଂ ୱା, କରୋନ୍ତସ୍ସ ଚ ଦୁକ୍କଟଂ ॥
ଭୂମଟ୍ଠକଥା ।
ଠପିତଂ ପତ୍ଥରିତ୍ୱା ଚ, ସାଟକତ୍ଥରଣାଦିକଂ ।
ୱେଠେତ୍ୱା ଉଦ୍ଧରନ୍ତସ୍ସ, ମୁତ୍ତେ ଠାନା ପରାଭୱୋ ॥
ଓରିମନ୍ତେନ ୱା ଫୁଟ୍ଠ-ମୋକାସଂ ପାରିମନ୍ତତୋ ।
ପାରାଜିକମତିକ୍କନ୍ତେ, କଡ୍ଢତୋ ଉଜୁକମ୍ପି ୱା ॥
ଥଲଟ୍ଠକଥା ।
ପୁରତୋ ମୁଖତୁଣ୍ଡଞ୍ଚ, କଲାପଗ୍ଗଞ୍ଚ ପଚ୍ଛତୋ ।
ଦ୍ୱୀସୁ ପସ୍ସେସୁ ପକ୍ଖନ୍ତୋ, ହେଟ୍ଠା ପାଦନଖା ତଥା ॥
ଉଦ୍ଧଞ୍ଚାପି ସିଖଗ୍ଗନ୍ତି, ଗଗନେ ଗଚ୍ଛତୋ ପନ ।
ମୋରସ୍ସ ଛ ପରିଚ୍ଛେଦା, ୱେଦିତବ୍ବା ୱିଭାୱିନା ॥
ଭିକ୍ଖୁ ‘‘ସସ୍ସାମିକଂ ମୋରଂ, ଗହେସ୍ସାମୀ’’ତି ଖେଗତଂ ।
ହତ୍ଥଂ ୱାପି ପସାରେତି, ପୁରତୋ ୱାସ୍ସ ତିଟ୍ଠତି ॥
ମୋରୋପି ଗଗନେ ପକ୍ଖେ, ଚାରେତି ନ ଚ ଗଚ୍ଛତି ।
ଦୁକ୍କଟଂ ଗମନଚ୍ଛେଦେ, ଆମସନ୍ତସ୍ସ ଚେୱ ତଂ ॥
ଠାନା ମୋରମମୋଚେନ୍ତୋ, ଫନ୍ଦାପେତି ସଚେ ପନ ।
ଏୱଂ ଫନ୍ଦାପନେ ତସ୍ସ, ଥୁଲ୍ଲଚ୍ଚୟମୁଦୀରିତଂ ॥
ଅଗ୍ଗହେତ୍ୱା ଗହେତ୍ୱା ୱା, ହତ୍ଥେନ ପନ ଅତ୍ତନୋ ।
ଠାନା ଚାୱେତି ଚେ ମୋରଂ, ସୟଂ ଠାନା ଚୁତୋ ସିୟା ॥
ଫୁଟ୍ଠୋକାସଂ ମୁଖଗ୍ଗେନ, କଲାପଗ୍ଗେନ ୱା ପନ ।
କଲାପଗ୍ଗେନ ୱା ଫୁଟ୍ଠଂ, ମୁଖତୁଣ୍ଡେନ ଭିକ୍ଖୁ ଚେ ॥
ଅତିକ୍କାମେୟ୍ୟ ୟୋ ମୋରଂ, ଠାନା ଚାୱେତି ନାମ ସୋ ।
ଏସେୱ ଚ ନୟୋ ପାଦ-ସିଖାପକ୍ଖେସୁ ଦୀପିତୋ ॥
ଗଗନେ ପନ ଗଚ୍ଛନ୍ତୋ, କରେ ମୋରୋ ନିଲୀୟତି ।
ତଂ କରେନେୱ ଚାରେନ୍ତୋ, ଫନ୍ଦାପେତୀତି ୱୁଚ୍ଚତି ॥
ସଚେ ଗଣ୍ହାତି ତଂ ମୋରଂ, ଇତରେନ କରେନ ସୋ ।
ଚାୱିତତ୍ତା ପନ ଠାନା, ଭିକ୍ଖୁ ଠାନା ଚୁତୋ ସିୟା ॥
ଇତରଂ ପନ ମୋରସ୍ସ, ଉପନେତି ସଚେ କରଂ ।
ନ ଦୋସୋ ତତ୍ଥ ଉଡ୍ଡେତ୍ୱା, ସୟମେୱ ନିଲୀୟତି ॥
ଦିସ୍ୱା ଅଙ୍ଗେ ନିଲୀନଂ ତଂ, ଥେୟ୍ୟଚିତ୍ତେନ ଗଚ୍ଛତୋ ।
ପାଦେ ଥୁଲ୍ଲଚ୍ଚୟଂ ହୋତି, ଦୁତିୟେ ଚ ପରାଜୟୋ ॥
ଭୂମିୟଂ ଠିତମୋରସ୍ସ, ତୀଣି ଠାନାନି ପଣ୍ଡିତୋ ।
ପାଦାନଞ୍ଚ କଲାପସ୍ସ, ୱସେନ ପରିଦୀପୟେ ॥
ତତୋ କେସଗ୍ଗମତ୍ତମ୍ପି, ମୋରଂ ପଥୱିତୋ ପନ ।
ହୋତି ପାରାଜିକଂ ତସ୍ସ, ଉକ୍ଖିପନ୍ତସ୍ସ ଭିକ୍ଖୁନୋ ॥
ଛିଜ୍ଜମାନଂ ସୁୱଣ୍ଣାଦିଂ, ପତ୍ତେ ପତତି ଚେ ପନ ।
ହତ୍ଥେନ ଉଦ୍ଧରନ୍ତସ୍ସ, ତସ୍ସ ପାରାଜିକଂ ସିୟା ॥
ସଚେ ଅନୁଦ୍ଧରିତ୍ୱାୱ, ଥେୟ୍ୟଚିତ୍ତେନ ଗଚ୍ଛତି ।
ଦୁତିୟେ ପଦୱାରସ୍ମିଂ, ପାରାଜିକମୁଦୀରୟେ ॥
ଏସେୱ ଚ ନୟୋ ଞେୟ୍ୟୋ, ହତ୍ଥେ ୱତ୍ଥେୱ ମତ୍ଥକେ ।
ତଂ ତଂ ତସ୍ସ ଭୱେ ଠାନଂ, ୟତ୍ଥ ୟତ୍ଥ ପତିଟ୍ଠିତଂ ॥
ଆକାସଟ୍ଠକଥା ।
ଥେୟ୍ୟଚିତ୍ତେନ ୟଂ କିଞ୍ଚି, ମଞ୍ଚପୀଠାଦିସୁଟ୍ଠିତଂ ।
ଆମାସମ୍ପି ଅନାମାସଂ, ଆମସନ୍ତସ୍ସ ଦୁକ୍କଟଂ ॥
ସଂହରିତ୍ୱା ସଚେ ୱଂସେ, ଠପିତଂ ହୋତି ଚୀୱରଂ ।
କତ୍ୱା ପୁନୋରତୋ ଭୋଗଂ, ତଥା ଅନ୍ତଞ୍ଚ ପାରତୋ ॥
ଚୀୱରେନ ଫୁଟ୍ଠୋକାସୋ, ଠାନଂ ତସ୍ସ ପୱୁଚ୍ଚତି ।
ନ ତୁ ଚୀୱରୱଂସୋ ସୋ, ହୋତୀତି ସକଲୋ ମତୋ ॥
ଓରିମନ୍ତେନ ଓକାସଂ, ଫୁଟ୍ଠଂ ତମିତରେନ ୱା ।
ଇତରେନପି ୱା ଫୁଟ୍ଠଂ, ଓରିମନ୍ତେନ ୱା ପୁନ ॥
ଦକ୍ଖିଣନ୍ତେନ ଫୁଟ୍ଠଂ ୱା, ୱାମନ୍ତେନିତରେନ ୱା ।
ୱାମନ୍ତେନ ଫୁଟ୍ଠଟ୍ଠାନଂ, ଅତିକ୍କାମୟତୋ ଚୁତି ॥
ଉଦ୍ଧଂ ୱା ଉକ୍ଖିପନ୍ତସ୍ସ, ଚୀୱରଂ ପନ ୱଂସତୋ ।
କେସଗ୍ଗମତ୍ତେ ଉକ୍ଖିତ୍ତେ, ତସ୍ସ ପାରାଜିକଂ ଭୱେ ॥
ରଜ୍ଜୁକେନ ଚ ବନ୍ଧିତ୍ୱା, ଠପିତଂ ପନ ଚୀୱରଂ ।
ଥୁଲ୍ଲଚ୍ଚୟଂ ୱିମୋଚେନ୍ତୋ, ମୁତ୍ତେ ପାରାଜିକଂ ଫୁସେ ॥
ୱେଠେତ୍ୱା ଠପିତଂ ୱଂସେ, ନିବ୍ବେଠେନ୍ତସ୍ସ ଭିକ୍ଖୁନୋ ।
ୱଲୟଂ ଛିନ୍ଦତୋ ୱାପି, ମୋଚେନ୍ତସ୍ସପ୍ୟୟଂ ନୟୋ ॥
ଚୀୱରସ୍ସ ପସାରେତ୍ୱା, ଠପିତସ୍ସ ହି ୱଂସକେ ।
ସଂହରିତ୍ୱା ତୁ ନିକ୍ଖିତ୍ତେ, ଚୀୱରେ ୱିୟ ନିଚ୍ଛୟୋ ॥
ସିକ୍କାୟ ପକ୍ଖିପିତ୍ୱା ୟଂ, ଲଗ୍ଗିତଂ ହୋତି ଭଣ୍ଡକଂ ।
ସିକ୍କାତୋ ତଂ ହରନ୍ତୋ ୱା, ସହ ସିକ୍କାୟ ୱା ଚୁତୋ ॥
କୁନ୍ତାଦିଂ ନାଗଦନ୍ତେସୁ, ଠିତେସୁ ପଟିପାଟିୟା ।
ଅଗ୍ଗେ ୱା ପନ ବୁନ୍ଦେ ୱା, ଗହେତ୍ୱା ପରିକଡ୍ଢତୋ ॥
ପାରାଜିକଂ ଫୁଟ୍ଠୋକାସଂ, ଅତିକ୍କାମୟତୋ ସିୟା ।
ଉଜୁକଂ ଉକ୍ଖିପନ୍ତସ୍ସ, କେସଗ୍ଗେନ ପରାଜୟୋ ॥
ପାକାରାଭିମୁଖୋ ଠତ୍ୱା, ଆକଡ୍ଢତି ସଚେ ପନ ।
ଓରିମନ୍ତଫୁଟ୍ଠୋକାସ-ମିତରନ୍ତଚ୍ଚୟେ ଚୁତୋ ॥
ତଥେୱ ପରତୋ ତସ୍ସ, ପେଲ୍ଲେନ୍ତସ୍ସାପି ଭିକ୍ଖୁନୋ ।
ଭିତ୍ତିଂ ପନ ଚ ନିସ୍ସାୟ, ଠପିତେପି ଅୟଂ ନୟୋ ॥
ଚାଲେନ୍ତସ୍ସ ଚ ତାଲସ୍ସ, ଫଲଂ ୱତ୍ଥୁ ହି ପୂରତି ।
ୟେନସ୍ସ ବନ୍ଧନା ମୁତ୍ତେ, ତସ୍ମିଂ ପାରାଜିକଂ ଭୱେ ॥
ପିଣ୍ଡିଂ ଛିନ୍ଦତି ତାଲସ୍ସ, ସଚେ ପାରାଜିକଂ ସିୟା ।
ଏସେୱ ଚ ନୟୋ ସେସ-ରୁକ୍ଖପୁପ୍ଫଫଲେସୁପି ॥
ୱେହାସଟ୍ଠକଥା ।
ଗଚ୍ଛତୋ ହି ନିଧିଟ୍ଠାନଂ, ପଦୱାରେନ ଦୁକ୍କଟଂ ।
ଉଦକେ ପନ ଗମ୍ଭୀରେ, ତଥା ନିମୁଜ୍ଜନାଦିସୁ ॥
ତତ୍ଥଜାତକପୁପ୍ଫେସୁ, ୟେନ ପୁପ୍ଫେନ ପୂରତି ।
ୱତ୍ଥୁ ତଂ ଛିନ୍ଦତୋ ପୁପ୍ଫଂ, ତସ୍ସ ପାରାଜିକଂ ୱଦେ ॥
ଏକନାଳସ୍ସ ୱା ପସ୍ସେ, ୱାକୋ ଉପ୍ପଲଜାତିୟା ।
ନ ଛିଜ୍ଜତି ତତୋ ୟାୱ, ତାୱ ନଂ ପରିରକ୍ଖତି ॥
ସାମିକେହେୱ ପୁପ୍ଫେସୁ, ଛିନ୍ଦିତ୍ୱା ଠପିତେସୁପି ।
ପୁବ୍ବେ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ଭାରବଦ୍ଧାନି ପୁପ୍ଫାନି, ଛସ୍ୱାକାରେସୁ କେନଚି ।
ଆକାରେନ ସଚେ ତାନି, ଠାନା ଚାୱେତି ନସ୍ସତି ॥
ଠପିତଂ ପନ ପୁପ୍ଫାନଂ, କଲାପଂ ଜଲପିଟ୍ଠିୟଂ ।
ଚାଲେତ୍ୱା ଉଦକଂ ପୁପ୍ଫ-ଟ୍ଠାନା ଚାୱେତି ଚେ ଚୁତୋ ॥
ପରିକପ୍ପେତି ଚେ ‘‘ଏତ୍ଥ, ଗହେସ୍ସାମୀ’’ତି ରକ୍ଖତି ।
ଉଦ୍ଧରନ୍ତୋ ଗତଟ୍ଠାନା, ଭଟ୍ଠୋ ନାମ ପୱୁଚ୍ଚତି ॥
ଅଚ୍ଚୁଗ୍ଗତସ୍ସ ତଂ ଠାନଂ, ଜଲତୋ ସକଲଂ ଜଲଂ ।
ଉପ୍ପାଟେତ୍ୱା ତତୋ ପୁପ୍ଫଂ, ଉଜୁମୁଦ୍ଧରତୋ ପନ ॥
ନାଳନ୍ତେ ଜଲତୋ ମୁତ୍ତ-ମତ୍ତେ ପାରାଜିକଂ ଭୱେ ।
ଅମୁତ୍ତେ ଜଲତୋ ତସ୍ମିଂ, ଥୁଲ୍ଲଚ୍ଚୟମୁଦୀରିତଂ ॥
ପୁପ୍ଫେ ଗହେତ୍ୱା ନାମେତ୍ୱା, ଉପ୍ପାଟେତି ସଚେ ପନ ।
ନ ତସ୍ସ ଉଦକଂ ଠାନଂ, ନଟ୍ଠୋ ଉପ୍ପାଟିତକ୍ଖଣେ ॥
ୟୋ ହି ସସ୍ସାମିକେ ମଚ୍ଛେ, ଥେୟ୍ୟଚିତ୍ତେନ ଗଣ୍ହତି ।
ବଳିସେନପି ଜାଲେନ, ହତ୍ଥେନ କୁମିନେନ ୱା ॥
ତସ୍ସେୱଂ ଗଣ୍ହତୋ ୱତ୍ଥୁ, ୟେନ ମଚ୍ଛେନ ପୂରତି ।
ତସ୍ମିଂ ଉଦ୍ଧଟମତ୍ତସ୍ମିଂ, ଜଲା ହୋତି ପରାଜୟୋ ॥
ଠାନଂ ସଲିଲଜାନଞ୍ହି, କେୱଲଂ ସକଲଂ ଜଲଂ ।
ସଲିଲଟ୍ଠଂ ୱିମୋଚେନ୍ତୋ, ଜଲା ପାରାଜିକୋ ଭୱେ ॥
ନୀରତୋ ଉପ୍ପତିତ୍ୱା ୟୋ, ତୀରେ ପତତି ୱାରିଜୋ ।
ଗଣ୍ହତୋ ତଂ ପନାପତ୍ତିଂ, ଭଣ୍ଡଗ୍ଘେନ ୱିନିଦ୍ଦିସେ ॥
ମାରଣତ୍ଥାୟ ମଚ୍ଛାନଂ, ତଳାକେ ନଦିୟାପି ୱା ।
ନିନ୍ନେ ମଚ୍ଛୱିସଂ ନାମ, ପକ୍ଖିପିତ୍ୱା ଗତେ ପନ ॥
ପଚ୍ଛା ମଚ୍ଛୱିସଂ ମଚ୍ଛା, ଖାଦିତ୍ୱା ପିଲୱନ୍ତି ଚେ ।
ପାରାଜିକଂ ମତେ ମଚ୍ଛେ, ଥେୟ୍ୟଚିତ୍ତେନ ଗଣ୍ହତୋ ॥
ପଂସୁକୂଲିକସଞ୍ଞାୟ, ନ ଦୋସୋ କୋଚି ଗଣ୍ହତୋ ।
ସାମିକେସ୍ୱାହରନ୍ତେସୁ, ଭଣ୍ଡଦେୟ୍ୟମୁଦୀରିତଂ ॥
ଗହେତ୍ୱା ସାମିକା ମଚ୍ଛେ, ସଚେ ୟନ୍ତି ନିରାଲୟା ।
ଗଣ୍ହତୋ ପନ ତେ ସେସେ, ଥେୟ୍ୟଚିତ୍ତେନ ଦୁକ୍କଟଂ ॥
ଅମତେସୁ ଅନାପତ୍ତିଂ, ୱଦନ୍ତି ୱିନୟଞ୍ଞୁନୋ ।
ଏସେୱ ଚ ନୟୋ ସେସେ, କଚ୍ଛପାଦିମ୍ହି ୱାରିଜେ ॥
ଉଦକଟ୍ଠକଥା ।
‘‘ନାୱଂ ନାୱଟ୍ଠଂ ୱା ଭଣ୍ଡଂ, ଥେନେତ୍ୱା ଗଣ୍ହିସ୍ସାମୀ’’ତି ।
ପାଦୁଦ୍ଧାରେ ଦୋସା ୱୁତ୍ତା, ଭିକ୍ଖୁସ୍ସେୱଂ ଗଚ୍ଛନ୍ତସ୍ସ ॥
ଠାନଂ ମତଂ ବନ୍ଧନମେକମେୱ ।
ପାରାଜିକଂ ତସ୍ସ ୱଦନ୍ତି ଧୀରା ॥
ନିଚ୍ଚଲେ ଉଦକେ ନାୱ-ମବନ୍ଧନମୱଟ୍ଠିତଂ ।
ପୁରତୋ ପଚ୍ଛତୋ ୱାପି, ପସ୍ସତୋ ୱାପି କଡ୍ଢତୋ ॥
ଏକେନନ୍ତେନ ସମ୍ଫୁଟ୍ଠ-ମୋକାସମିତରେନ ତଂ ।
ଅତିକ୍କାମୟତୋ ନାୱଂ, ତସ୍ସ ପାରାଜିକଂ ସିୟା ॥
ଉଦ୍ଧଂ କେସଗ୍ଗମତ୍ତମ୍ପି, ଉଦକମ୍ହା ୱିମୋଚିତେ ।
ଅଧୋନାୱାତଲଂ ତେନ, ଫୁଟ୍ଠଞ୍ଚ ମୁଖୱଟ୍ଟିୟା ॥
ବନ୍ଧିତ୍ୱା ପନ ୟା ତୀରେ, ଠପିତା ନିଚ୍ଚଲେ ଜଲେ ।
ବନ୍ଧନଞ୍ଚ ଠିତୋକାସୋ, ଠାନଂ ତସ୍ସା ଦ୍ୱିଧା ମତଂ ॥
ହୋତି ଥୁଲ୍ଲଚ୍ଚୟଂ ପୁବ୍ବଂ, ବନ୍ଧନସ୍ସ ୱିମୋଚନେ ।
ପଚ୍ଛା କେନଚୁପାୟେନ, ଠାନା ଚାୱେତି ଚେ ଚୁତୋ ॥
ଚାୱେତ୍ୱା ପଠମଂ ଠାନା, ପଚ୍ଛା ବନ୍ଧନମୋଚନେ ।
ଏସେୱ ଚ ନୟୋ ୱୁତ୍ତୋ, ଥେୟ୍ୟଚିତ୍ତସ୍ସ ଭିକ୍ଖୁନୋ ॥
ଉସ୍ସାରେତ୍ୱା ନିକୁଜ୍ଜିତ୍ୱା, ଠପିତାୟ ଥଲେ ପନ ।
ଫୁଟ୍ଠୋକାସୋୱ ହି ଠାନଂ, ନାୱାୟ ମୁଖୱଟ୍ଟିୟା ॥
ଞେୟ୍ୟୋ ଠାନପରିଚ୍ଛେଦୋ ।
ଆକାରେହେୱ ପଞ୍ଚହି ।
ୟତୋ କୁତୋଚି ଚାୱେନ୍ତୋ ।
ହୋତି ପାରାଜିକୋ ନରୋ ॥
ଏସେୱ ଚ ନୟୋ ଞେୟ୍ୟୋ, ନାୱାୟୁକ୍କୁଜ୍ଜିତାୟପି ।
ଠପିତାୟପି ନାୱାୟ, ଘଟିକାନଂ ତଥୂପରି ॥
ଥେୟ୍ୟା ତିତ୍ଥେ ଠିତଂ ନାୱଂ, ଆରୁହିତ୍ୱା ସଚେ ପନ ।
ଅରିତ୍ତେନ ଫିୟେନାପି, ପାଜେନ୍ତସ୍ସ ପରାଜୟୋ ॥
ସଚେ ଛତ୍ତଂ ପଣାମେତ୍ୱା, ଉସ୍ସାପେତ୍ୱାୱ ଚୀୱରଂ ।
ଲଙ୍କାରସଦିସଂ କତ୍ୱା, ଗଣ୍ହାପେତି ସମୀରଣଂ ॥
ଆଗମ୍ମ ବଲୱା ୱାତୋ, ନାୱଂ ହରତି ଚେ ପନ ।
ୱାତେନେୱ ହଟା ନାୱା, ନ ଦୋସୋ କୋଚି ୱିଜ୍ଜତି ॥
ସୟମେୱ ଚ ୟଂ କିଞ୍ଚି, ଗାମତିତ୍ଥମୁପାଗତଂ ।
ଅଚାୱେନ୍ତୋୱ ତଂ ଠାନା, କିଣିତ୍ୱା ଚେ ପଲାୟତି ॥
ଅୱହାରୋ ନ ଭିକ୍ଖୁସ୍ସ, ଭଣ୍ଡଦେୟ୍ୟମୁଦୀରିତଂ ।
ସୟମେୱ ଚ ଗଚ୍ଛନ୍ତିଂ, ଠାନା ଚାୱେତି ଚେ ଚୁତୋ ॥
ନାୱଟ୍ଠକଥା ।
ୟାନଂ ନାମ ରଥୋ ୱୟ୍ହଂ, ସକଟଂ ସନ୍ଦମାନିକା ।
ୟାନଂ ଅୱହରିସ୍ସାମି, ୟାନଟ୍ଠମିତି ୱା ପନ ॥
ଗଚ୍ଛତୋ ଦୁକ୍କଟଂ ୱୁତ୍ତଂ, ଦୁତିୟଂ ପରିୟେସତୋ ।
ଠାନା ଚାୱନୟୋଗସ୍ମିଂ, ୱିଜ୍ଜମାନେ ପରାଜୟୋ ॥
ୟାନସ୍ସ ଦୁକୟୁତ୍ତସ୍ସ, ଦସ ଠାନାନି ଦୀପୟେ ।
ୟାନଂ ପାଜୟତୋ ତସ୍ସ, ନିସୀଦିତ୍ୱା ଧୁରେ ପନ ॥
ଥୁଲ୍ଲଚ୍ଚୟଂ ତୁ ଗୋଣାନଂ, ପାଦୁଦ୍ଧାରେ ୱିନିଦ୍ଦିସେ ।
ଚକ୍କାନଞ୍ହି ଠିତୋକାସ-ମତିକ୍କନ୍ତେ ପରାଭୱୋ ॥
ଅୟୁତ୍ତକସ୍ସାପି ଚ ୟାନକସ୍ସ, ଧୁରେନୁପତ୍ଥମ୍ଭନିୟଂ ଠିତସ୍ସ ।
ୱସେନୁପତ୍ଥମ୍ଭନିଚକ୍କକାନଂ, ଠାନାନି ତୀଣେୱ ଭୱନ୍ତି ତସ୍ସ ॥
ତଥା ଧୁରେନ ଦାରୂନଂ, ଉପରିଟ୍ଠପିତସ୍ସ ଚ ।
ଭୂମିୟମ୍ପି ଧୁରେନେୱ, ତଥେୱ ଠପିତସ୍ସ ଚ ॥
ପୁରତୋ ପଚ୍ଛତୋ ୱାପି, ଠାନା ଚାୱେତି ଚେ ପନ ।
ଥୁଲ୍ଲଚ୍ଚୟଂ ତୁ ତିଣ୍ଣମ୍ପି, ଠାନା ଚାୱେ ପରାଜୟୋ ॥
ଅପନେତ୍ୱାନ ଚକ୍କାନି, ଅକ୍ଖାନଂ ସୀସକେହି ତୁ ।
ଠିତସ୍ସୂପରି ଦାରୂନଂ, ଠାନାନି ଦ୍ୱେ ୱିନିଦ୍ଦିସେ ॥
କଡ୍ଢନ୍ତୋ ଉକ୍ଖିପନ୍ତୋ ୱା, ଫୁଟ୍ଠୋକାସଚ୍ଚୟେ ଚୁତୋ ।
ଠପିତସ୍ସ ପନଞ୍ଞସ୍ସ, ଭୂମିୟଂ ୟସ୍ସ କସ୍ସଚି ॥
ଅକ୍ଖୁଦ୍ଧୀନଂ ଧୁରସ୍ସାତି, ପଞ୍ଚ ଠାନାନି ଦୀପୟେ ।
ଉଦ୍ଧୀସୁ ୱା ଗହେତ୍ୱା ତଂ, ଠାନା ଚାୱେତି ଚେ ଚୁତୋ ॥
ଠପିତସ୍ସ ହି ଚକ୍କସ୍ସ, ନାଭିୟା ପନ ଭୂମିୟଂ ।
ଏକମେୱ ସିୟା ଠାନଂ, ପରିଚ୍ଛେଦୋପି ପଞ୍ଚଧା ॥
ଫୁସିତ୍ୱା ୟଂ ଠିତଂ ଭୂମିଂ, ନେମିପସ୍ସେନ ନାଭିୟା ।
ଠାନାନି ଦ୍ୱେ ଭୱନ୍ତସ୍ସ, ନଟ୍ଠୋ ତେସମତିକ୍କମେ ॥
ଦିସ୍ୱା ୟାନମନାରକ୍ଖଂ, ପଟିପନ୍ନଂ ମହାପଥେ ।
ଆରୁହିତ୍ୱା ଅଚୋଦେତ୍ୱା, କିଣିତ୍ୱା ୟାତି ୱଟ୍ଟତି ॥
ୟାନଟ୍ଠକଥା ।
ସୀସକ୍ଖନ୍ଧକଟୋଲମ୍ବ-ୱସା ଭାରୋ ଚତୁବ୍ବିଧୋ ।
ତତ୍ଥ ସୀସଗତଂ ଭାରଂ, ଆମସନ୍ତସ୍ସ ଦୁକ୍କଟଂ ॥
ଇତୋ ଚିତୋ ଚ ଘଂସନ୍ତୋ, ଥେୟ୍ୟଚିତ୍ତେନ ୟୋ ପନ ।
ସିରସ୍ମିଂୟେୱ ସାରେତି, ତସ୍ସ ଥୁଲ୍ଲଚ୍ଚୟଂ ସିୟା ॥
ଖନ୍ଧଂ ଓରୋପିତେ ଭାରେ, ତସ୍ସ ପାରାଜିକଂ ମତଂ ।
ସୀସତୋ କେସମତ୍ତମ୍ପି, ମୋଚେନ୍ତୋପି ପରାଜିତୋ ॥
ଭାରଂ ପଥୱିୟଂ କିଞ୍ଚି, ଠପେତ୍ୱା ସୁଦ୍ଧମାନସୋ ।
ପଚ୍ଛା ତଂ ଥେୟ୍ୟଚିତ୍ତେନ, ଉଦ୍ଧରନ୍ତୋ ପରାଜିତୋ ॥୫୨୨
ଏତ୍ଥ ୱୁତ୍ତନୟେନେୱ, ସେସେସୁପି ଅସେସତୋ ।
ଭାରେସୁ ମତିସାରେନ, ୱେଦିତବ୍ବୋ ୱିନିଚ୍ଛୟୋ ॥
ଭାରଟ୍ଠକଥା ।
ଦୁକ୍କଟଂ ମୁନିନା ୱୁତ୍ତଂ, ଆରାମଂ ଅଭିୟୁଞ୍ଜତୋ ।
ପରାଜେତି ପରଂ ଧମ୍ମଂ, ଚରନ୍ତୋ ଚେ ପରାଜିତୋ ॥୫୨୨
ୱିମତିଂ ଜନୟନ୍ତସ୍ସ, ତସ୍ସ ଥୁଲ୍ଲଚ୍ଚୟଂ ସିୟା ।
ପରଜ୍ଜତି ସୟଂ ଧମ୍ମଂ, ଚରନ୍ତୋ ୟୋପି ତସ୍ସ ଚ ॥
ସାମିନୋ ଧୁରନିକ୍ଖେପେ, ‘‘ନ ଦସ୍ସାମୀ’’ତି ଚତ୍ତନୋ ।
ପାରାଜିକଂ ଭୱେ ତସ୍ସ, ସବ୍ବେସଂ କୂଟସକ୍ଖିନଂ ॥
ଆରାମଟ୍ଠକଥା ।
ୱିହାରଂ ସଙ୍ଘିକଂ କିଞ୍ଚି, ଅଚ୍ଛିନ୍ଦିତ୍ୱାନ ଗଣ୍ହିତୁଂ ।
ସବ୍ବେସଂ ଧୁରନିକ୍ଖେପା-ଭାୱତୋୱ ନ ସିଜ୍ଝତି ॥
ୱିହାରଟ୍ଠକଥା ।
ସୀସାନି ସାଲିଆଦୀନଂ, ନିରୁମ୍ଭିତ୍ୱାନ ଗଣ୍ହତୋ ।
ଅସିତେନ ଚ ଲାୟିତ୍ୱା, ଛିନ୍ଦିତ୍ୱା ୱା କରେନ ଚ ॥
ୟସ୍ମିଂ ବୀଜେପି ୱା ୱତ୍ଥୁ, ସୀସେ ପୂରେତି ମୁଟ୍ଠିୟଂ ।
ବନ୍ଧନା ମୋଚିତେ ତସ୍ମିଂ, ତସ୍ସ ପାରାଜିକଂ ଭୱେ ॥
ଅଚ୍ଛିନ୍ନୋ ପନ ଦଣ୍ଡୋ ୱା, ତଚୋ ୱା ଅପ୍ପମତ୍ତକୋ ।
ୱୀହିନାଳମ୍ପି ୱା ଦୀଘଂ, ଅନିକ୍ଖନ୍ତୋୱ ରକ୍ଖତି ॥
ସଚେ ସୋ ପରିକପ୍ପେତି, ‘‘ମଦ୍ଦିତ୍ୱା ପନିଦଂ ଅହଂ ।
ପପ୍ଫୋଟେତ୍ୱା ଇତୋ ସାରଂ, ଗଣ୍ହିସ୍ସାମୀ’’ତି ରକ୍ଖତି ॥
ମଦ୍ଦନୁଦ୍ଧରଣେ ନତ୍ଥି, ଦୋସୋ ପପ୍ଫୋଟନେପି ୱା ।
ଅତ୍ତନୋ ଭାଜନଗତଂ, କରୋନ୍ତସ୍ସ ପରାଜୟୋ ॥
ଜାନଂ କେସଗ୍ଗମତ୍ତମ୍ପି, ପଥୱିଂ ପରସନ୍ତକଂ ।
ଥେୟ୍ୟଚିତ୍ତେନ ଚେ ଖୀଲଂ, ସଙ୍କାମେତି ପରାଜୟୋ ॥
ତଞ୍ଚ ଖୋ ସାମିକାନଂ ତୁ, ଧୁରନିକ୍ଖେପନେ ସତି ।
ଅନଗ୍ଘା ଭୂମି ନାମେସା, ତସ୍ମା ଏୱମୁଦୀରିତଂ ॥
ଗହେତବ୍ବା ସଚେ ହୋତି, ଦ୍ୱୀହି ଖୀଲେହି ୟା ପନ ।
ଆଦୋ ଥୁଲ୍ଲଚ୍ଚୟଂ ତେସୁ, ଦୁତିୟେୱ ପରାଜୟୋ ॥
ଞାପେତୁକାମୋ ୟୋ ଭିକ୍ଖୁ, ‘‘ମମେଦଂ ସନ୍ତକ’’ନ୍ତି ଚ ।
ରଜ୍ଜୁଂ ୱାପି ପସାରେତି, ୟଟ୍ଠିଂ ପାତେତି ଦୁକ୍କଟଂ ॥
ୟେହି ଦ୍ୱୀହି ପୟୋଗେହି, ଅତ୍ତନୋ ସନ୍ତକଂ ସିୟା ।
ଆଦୋ ଥୁଲ୍ଲଚ୍ଚୟଂ ତେସୁ, ଦୁତିୟେ ଚ ପରାଜୟୋ ॥
ଖେତ୍ତଟ୍ଠକଥା ।
ଖେତ୍ତେ ୱୁତ୍ତନୟେନେୱ, ୱତ୍ଥୁଟ୍ଠସ୍ସ ୱିନିଚ୍ଛୟୋ ।
ଗାମଟ୍ଠେପି ଚ ୱତ୍ତବ୍ବଂ, ଅପୁବ୍ବଂ ନତ୍ଥି କିଞ୍ଚିପି ॥
ୱତ୍ଥୁଟ୍ଠଗାମଟ୍ଠକଥା ।
ତିଣଂ ୱା ପନ ପଣ୍ଣଂ ୱା, ଲତଂ ୱା କଟ୍ଠମେୱ ୱା ।
ଭଣ୍ଡଗ୍ଘେନେୱ କାତବ୍ବୋ, ଗଣ୍ହନ୍ତୋ ତତ୍ଥଜାତକଂ ॥
ମହଗ୍ଘେ ପନ ରୁକ୍ଖସ୍ମିଂ, ଛିନ୍ନମତ୍ତେପି ନସ୍ସତି ।
ତଚ୍ଛେତ୍ୱା ଠପିତୋ ରୁକ୍ଖୋ, ଗହେତବ୍ବୋ ନ କୋଚିପି ॥
ଛିନ୍ଦିତ୍ୱା ଠପିତଂ ମୂଲେ, ରୁକ୍ଖମଦ୍ଧଗତଂ ପନ ।
‘‘ଛଡ୍ଡିତୋ ସାମିକେହୀ’’ତି, ଗହେତୁଂ ପନ ୱଟ୍ଟତି ॥
ଲକ୍ଖଣେ ଛଲ୍ଲିୟୋନଦ୍ଧେ, ନ ଦୋସୋ କୋଚି ଗଣ୍ହତୋ ।
ଅଜ୍ଝାୱୁତ୍ଥଂ କତଂ ୱାପି, ୱିନସ୍ସନ୍ତଞ୍ଚ ଗଣ୍ହତୋ ॥
ୟୋ ଚାରକ୍ଖଟ୍ଠାନଂ ପତ୍ୱା, କତ୍ୱା କମ୍ମଟ୍ଠାନାଦୀନି ।
ଚିତ୍ତେ ଚିନ୍ତେନ୍ତୋ ୱା ଅଞ୍ଞଂ, ଭଣ୍ଡଦେୟ୍ୟଂ ହୋତେୱସ୍ସ ॥
ୱରାହବ୍ୟଗ୍ଘଚ୍ଛତରଚ୍ଛକାଦିତୋ ।
ଉପଦ୍ଦୱା ମୁଚ୍ଚିତୁକାମତାୟ ୟୋ ।
ତଥେୱ ତଂ ଠାନମତିକ୍କମେତି ଚେ ।
ନ କୋଚି ଦୋସୋ ପନ ଭଣ୍ଡଦେୟ୍ୟକଂ ॥
ଇଦମାରକ୍ଖଣଟ୍ଠାନଂ, ଗରୁକଂ ସୁଙ୍କଘାତତୋ ।
ତସ୍ମା ଦୁକ୍କଟମୁଦ୍ଦିଟ୍ଠଂ, ତମନୋକ୍କମ୍ମ ଗଚ୍ଛତୋ ॥
ଏତଂ ପରିହରନ୍ତସ୍ସ, ଥେୟ୍ୟଚିତ୍ତେନ ସତ୍ଥୁନା ।
ପାରାଜିକମନୁଦ୍ଦିଟ୍ଠଂ, ଆକାସେନାପି ଗଚ୍ଛତୋ ॥
ତସ୍ମା ଏତ୍ଥ ୱିସେସେନ, ସତିସମ୍ପନ୍ନଚେତସା ।
ଅପ୍ପମତ୍ତେନ ହୋତବ୍ବଂ, ପିୟସୀଲେନ ଭିକ୍ଖୁନା ॥
ଅରଞ୍ଞଟ୍ଠକଥା ।
ତୋୟଦୁଲ୍ଲଭକାଲସ୍ମିଂ, ଭାଜନେ ଗୋପିତଂ ଜଲଂ ।
ଆୱିଞ୍ଜିତ୍ୱା ପୱେସେତ୍ୱା, ଛିଦ୍ଦଂ କତ୍ୱାପି ୱା ତଥା ॥
ୱାପିୟଂ ୱା ତଳାକେ ୱା, ଭାଜନଂ ଅତ୍ତନୋ ପନ ।
ଗଣ୍ହନ୍ତସ୍ସ ପୱେସେତ୍ୱା, ଭଣ୍ଡଗ୍ଘେନ ୱିନିଦ୍ଦିସେ ॥
ଛିନ୍ଦତୋ ମରିୟାଦଂ ତୁ, ଅଦିନ୍ନାଦାନପୁବ୍ବତୋ ।
ଭୂତଗାମେନ ସଦ୍ଧିମ୍ପି, ଦୁକ୍କଟଂ ପରିଦୀପିତଂ ॥
ଅନ୍ତୋ ଠତ୍ୱା ବହି ଠତ୍ୱା, ଛିନ୍ଦନ୍ତୋ ଉଭୟତ୍ଥପି ।
ବହିଅନ୍ତେନ କାତବ୍ବୋ, ଅନ୍ତୋଅନ୍ତେନ ମଜ୍ଝତୋ ॥
ଉଦକକଥା ।
ୱାରେନ ସାମଣେରା ୟଂ, ଦନ୍ତକଟ୍ଠମରଞ୍ଞତୋ ।
ଆନେତ୍ୱାଚରିୟାନମ୍ପି, ଆହରନ୍ତି ସଚେ ପନ ॥
ଛିନ୍ଦିତ୍ୱା ୟାୱ ସଙ୍ଘସ୍ସ, ନ ନିୟ୍ୟାଦେନ୍ତି ତେ ପନ ।
ଆଭତଂ ତାୱ ତଂ ସବ୍ବଂ, ତେସମେୱ ଚ ସନ୍ତକଂ ॥
ତସ୍ମା ତଂ ଥେୟ୍ୟଚିତ୍ତେନ, ଗଣ୍ହନ୍ତସ୍ସ ଚ ଭିକ୍ଖୁନୋ ।
ଗରୁଭଣ୍ଡଞ୍ଚ ସଙ୍ଘସ୍ସ, ଭଣ୍ଡଗ୍ଘେନ ପରାଭୱୋ ॥
ୟଦା ନିୟ୍ୟାଦିତଂ ତେହି, ତତୋ ପଟ୍ଠାୟ ସଙ୍ଘିକଂ ।
ଗଣ୍ହନ୍ତସ୍ସାପି ଥେୟ୍ୟାୟ, ଅୱହାରୋ ନ ୱିଜ୍ଜତି ॥
ଅରକ୍ଖତ୍ତା ୟଥାୱୁଡ୍ଢ-ମଭାଜେତବ୍ବତୋପି ଚ ।
ସବ୍ବସାଧାରଣତ୍ତା ଚ, ଅଞ୍ଞଂ ୱିୟ ନ ହୋତିଦଂ ॥
ଦନ୍ତକଟ୍ଠକଥା ।
ଅଗ୍ଗିଂ ୱା ଦେତି ସତ୍ଥେନ, ଆକୋଟେତି ସମନ୍ତତୋ ।
ଆକୋଟେତି ୱିସଂ ୱାପି, ମଣ୍ଡୂକଣ୍ଟକନାମକଂ ॥
ୟେନ ୱା ତେନ ୱା ରୁକ୍ଖୋ, ୱିନସ୍ସତି ଚ ଡୟ୍ହତି ।
ସବ୍ବତ୍ଥ ଭିକ୍ଖୁନୋ ତସ୍ସ, ଭଣ୍ଡଦେୟ୍ୟଂ ପକାସିତଂ ॥
ୱନପ୍ପତିକଥା ।
ସୀସତୋ କଣ୍ଣତୋ ୱାପି, ଗୀୱତୋ ହତ୍ଥତୋପି ୱା ।
ଛିନ୍ଦିତ୍ୱା ୱାପି ମୋଚେତ୍ୱା, ଗଣ୍ହତୋ ଥେୟ୍ୟଚେତସା ॥
ହୋତି ମୋଚିତମତ୍ତସ୍ମିଂ, ସୀସାଦୀହି ପରାଜୟୋ ।
ଥୁଲ୍ଲଚ୍ଚୟଂ କରୋନ୍ତସ୍ସ, ଆକଡ୍ଢନୱିକଡ୍ଢନଂ ॥
ହତ୍ଥା ଅନୀହରିତ୍ୱାୱ, ୱଲୟଂ କଟକମ୍ପି ୱା ।
ଅଗ୍ଗବାହୁଞ୍ଚ ଘଂସନ୍ତୋ, ଚାରେତି ଅପରାପରଂ ॥
ତମାକାସଗତଂ ଚୋରୋ, କରୋତି ୟଦି ରକ୍ଖତି ।
ସୱିଞ୍ଞାଣକତୋ ମୂଲେ, ୱଲୟଂୱ ନ ହୋତିଦଂ ॥
ନିୱତ୍ଥଂ ପନ ୱତ୍ଥଂ ୟୋ, ଅଚ୍ଛିନ୍ଦତି ପରସ୍ସ ଚେ ।
ପରୋପି ପନ ଲଜ୍ଜାୟ, ସହସା ତଂ ନ ମୁଞ୍ଚତି ॥
ଆକଡ୍ଢତି ଚ ଚୋରୋପି, ସୋ ପରୋ ତାୱ ରକ୍ଖତି ।
ପରସ୍ସ ହତ୍ଥତୋ ୱତ୍ଥେ, ମୁତ୍ତମତ୍ତେ ପରାଜୟୋ ॥
ସଭଣ୍ଡହାରକଂ ଭଣ୍ଡଂ, ନେନ୍ତସ୍ସ ପଠମେ ପଦେ ।
ଥୁଲ୍ଲଚ୍ଚୟମତିକ୍କନ୍ତେ, ଦୁତିୟେୱ ଚୁତୋ ସିୟା ॥
ପାତାପେତି ସଚେ ଭଣ୍ଡଂ, ତଜ୍ଜେତ୍ୱା ଥେୟ୍ୟଚେତନୋ ।
ପରସ୍ସ ହତ୍ଥତୋ ଭଣ୍ଡେ, ମୁତ୍ତମତ୍ତେ ପରାଜୟୋ ॥
ଅଥାପି ପରିକପ୍ପେତ୍ୱା, ପାତାପେତି ୱ ୟୋ ପନ ।
ତସ୍ସ ପାତାପନେ ୱୁତ୍ତଂ, ଦୁକ୍କଟାମସନେପି ଚ ॥
ଫନ୍ଦାପେତି ୟଥାୱତ୍ଥୁଂ, ଠାନା ଚାୱେତି ଚେ ଚୁତୋ ।
‘‘ତିଟ୍ଠ ତିଟ୍ଠା’’ତି ୱଦତୋ, ନ ଦୋସୋ ଛଡ୍ଡିତେପି ଚ ॥
ଆଗନ୍ତ୍ୱା ଥେୟ୍ୟଚିତ୍ତେନ, ପଚ୍ଛା ତଂ ଗଣ୍ହତୋ ସିୟା ।
ପାରାଜିକଂ ତଦୁଦ୍ଧାରେ, ସାଲୟେ ସାମିକେ ଗତେ ॥
ଗଣ୍ହତୋ ସକସଞ୍ଞାୟ, ଗହଣେ ପନ ରକ୍ଖତି ।
ଭଣ୍ଡଦେୟ୍ୟଂ ତଥା ପଂସୁ-କୂଲସଞ୍ଞାୟ ଗଣ୍ହତୋ ॥
‘‘ତିଟ୍ଠ ତିଟ୍ଠା’’ତି ୱୁତ୍ତୋ ଚ, ଛଡ୍ଡେତ୍ୱା ପନ ଭଣ୍ଡକଂ ।
କତ୍ୱାୱ ଧୁରନିକ୍ଖେପଂ, ଭୀତୋ ଚୋରା ପଲାୟତି ॥
ଗଣ୍ହତୋ ଥେୟ୍ୟଚିତ୍ତେନ, ଉଦ୍ଧାରେ ଦୁକ୍କଟଂ ପୁନ ।
ଦାତବ୍ବମାହରାପେନ୍ତେ, ଅଦେନ୍ତସ୍ସ ପରାଜୟୋ ॥
‘‘କସ୍ମା ? ତସ୍ସ ପୟୋଗେନ, ଛଡ୍ଡିତତ୍ତା’’ତି ସାଦରଂ ।
ମହାଅଟ୍ଠକଥାୟଂ ତୁ, ୱୁତ୍ତମଞ୍ଞାସୁ ନାଗତଂ ॥
ହରଣକଥା ।
ସମ୍ପଜାନମୁସାୱାଦଂ, ‘‘ନ ଗଣ୍ହାମୀ’’ତି ଭାସତୋ ।
ଅଦିନ୍ନାଦାନପୁବ୍ବତ୍ତା, ଦୁକ୍କଟଂ ହୋତି ଭିକ୍ଖୁନୋ ॥
‘‘ରହୋ ମୟା ପନେତସ୍ସ, ଠପିତଂ କିଂ ନୁ ଦସ୍ସତି’’ ।
ଇଚ୍ଚେୱଂ ୱିମତୁପ୍ପାଦେ, ତସ୍ସ ଥୁଲ୍ଲଚ୍ଚୟଂ ସିୟା ॥
ତସ୍ମିଂ ଦାନେ ନିରୁସ୍ସାହେ, ପରୋ ଚେ ନିକ୍ଖିପେ ଧୁରଂ ।
ଉଭିନ୍ନଂ ଧୁରନିକ୍ଖେପେ, ଭିକ୍ଖୁ ହୋତି ପରାଜିତୋ ॥
ଚିତ୍ତେନାଦାତୁକାମୋୱ, ‘‘ଦସ୍ସାମୀ’’ତି ମୁଖେନ ଚେ ।
ୱଦତୋ ଧୁରନିକ୍ଖେପେ, ସାମିନୋ ହି ପରାଜୟୋ ॥
ଉପନିଧିକଥା ।
ସୁଙ୍କଘାତସ୍ସ ଅନ୍ତୋୱ, ଠତ୍ୱା ପାତେତି ଚେ ବହି ।
ଧୁୱଂ ପତତି ଚେ ହତ୍ଥା, ମୁତ୍ତମତ୍ତେ ପରାଜୟୋ ॥
ତଂ ରୁକ୍ଖେ ଖାଣୁକେ ୱାପି, ହୁତ୍ୱା ପଟିହତଂ ପୁନ ।
ୱାତୁକ୍ଖିତ୍ତମ୍ପି ୱା ଅନ୍ତୋ, ସଚେ ପତତି ରକ୍ଖତି ॥
ପତିତ୍ୱା ଭୂମିୟଂ ପଚ୍ଛା, ୱଟ୍ଟନ୍ତଂ ପନ ଭଣ୍ଡକଂ ।
ସଚେ ପୱିସତ୍ୟନ୍ତୋୱ, ତସ୍ସ ପାରାଜିକଂ ସିୟା ॥
ଠତ୍ୱା ଠତ୍ୱା ପୱଟ୍ଟନ୍ତଂ, ପୱିଟ୍ଠଂ ଚେ ପରାଜୟୋ ।
ଅତିଟ୍ଠମାନଂ ୱଟ୍ଟିତ୍ୱା, ପୱିଟ୍ଠଂ ପନ ରକ୍ଖତି ॥
ଇତି ୱୁତ୍ତଂ ଦଳ୍ହଂ କତ୍ୱା, କୁରୁନ୍ଦଟ୍ଠକଥାଦିସୁ ।
ସାରତୋ ତଂ ଗହେତବ୍ବଂ, ୟୁତ୍ତଂ ୱିୟ ଚ ଦିସ୍ସତି ॥
ସୟଂ ୱା ୟଦି ୱଟ୍ଟେତି, ୱଟ୍ଟାପେତି ପରେନ ୱା ।
ଅଟ୍ଠତ୍ୱା ୱଟ୍ଟମାନଂ ତଂ, ଗତଂ ନାସକରଂ ସିୟା ॥
ଠତ୍ୱା ଠତ୍ୱା ସଚେ ଅନ୍ତୋ, ବହି ଗଚ୍ଛତି ରକ୍ଖତି ।
ଠପିତେ ସୁଦ୍ଧଚିତ୍ତେନ, ସୟଂ ୱଟ୍ଟତି ୱଟ୍ଟତି ॥
ଗଚ୍ଛନ୍ତେ ପନ ୟାନେ ୱା, ଗଜେ ୱା ତଂ ଠପେତି ଚେ ।
ବହି ନୀହରଣତ୍ଥାୟ, ନାୱହାରୋପି ନୀହଟେ ॥
ଠପିତେ ଠିତୟାନେ ୱା, ପୟୋଗେନ ୱିନା ଗତେ ।
ସତିପି ଥେୟ୍ୟଚିତ୍ତସ୍ମିଂ, ଅୱହାରୋ ନ ୱିଜ୍ଜତି ॥
ସଚେ ପାଜେତି ତଂ ୟାନଂ, ଠପେତ୍ୱା ୟାନକେ ମଣିଂ ।
ସିୟା ପାରାଜିକଂ ତସ୍ସ, ସୀମାତିକ୍କମନେ ପନ ॥
ସୁଙ୍କଟ୍ଠାନେ ମତଂ ସୁଙ୍କଂ, ଗନ୍ତୁଂ ଦତ୍ୱାୱ ୱଟ୍ଟତି ।
ସେସୋ ଇଧ କଥାମଗ୍ଗୋ, ଅରଞ୍ଞଟ୍ଠକଥାସମୋ ॥
ସୁଙ୍କଘାତକଥା ।
ଅନ୍ତୋଜାତଂ ଧନକ୍କୀତଂ, ଦିନ୍ନଂ ୱା ପନ କେନଚି ।
ଦାସଂ କରମରାନୀତଂ, ହରନ୍ତସ୍ସ ପରାଜୟୋ ॥
ଭୁଜିସ୍ସଂ ୱା ହରନ୍ତସ୍ସ, ମାନୁସଂ ମାତରାପି ୱା ।
ପିତରାଠପିତଂ ୱାପି, ଅୱହାରୋ ନ ୱିଜ୍ଜତି ॥
ତଂ ପଲାପେତୁକାମୋୱ, ଉକ୍ଖିପିତ୍ୱା ଭୁଜେହି ୱା ।
ତଂ ଠିତଟ୍ଠାନତୋ କିଞ୍ଚି, ସଙ୍କାମେତି ପରାଜୟୋ ॥
ତଜ୍ଜେତ୍ୱା ପଦସା ଦାସଂ, ନେନ୍ତସ୍ସ ପଦୱାରତୋ ।
ହୋନ୍ତି ଆପତ୍ତିୟୋ ୱୁତ୍ତା, ତସ୍ସ ଥୁଲ୍ଲଚ୍ଚୟାଦୟୋ ॥
ହତ୍ଥାଦୀସୁ ଗହେତ୍ୱା ତଂ, କଡ୍ଢତୋପି ପରାଜୟୋ ।
‘‘ଗଚ୍ଛ ୟାହି ପଲାୟା’’ତି, ୱଦତୋପି ଅୟଂ ନୟୋ ॥
ୱେଗସାୱ ପଲାୟନ୍ତଂ, ‘‘ପଲାୟା’’ତି ଚ ଭାସତୋ ।
ହୋତି ପାରାଜିକେନସ୍ସ, ଅନାପତ୍ତି ହି ଭିକ୍ଖୁନୋ ॥
ସଣିକଂ ପନ ଗଚ୍ଛନ୍ତଂ, ସଚେ ୱଦତି ସୋପି ଚ ।
ସୀଘଂ ଗଚ୍ଛତି ଚେ ତସ୍ସ, ୱଚନେନ ପରାଜୟୋ ॥
ପଲାୟିତ୍ୱା ସଚେ ଅଞ୍ଞଂ, ଗାମଂ ୱା ନିଗମମ୍ପି ୱା ।
ଗତଂ ଦିସ୍ୱା ତତୋ ତଞ୍ଚେ, ପଲାପେତି ପରାଜୟୋ ॥
ପାଣକଥା ।
ଥେୟ୍ୟା ସପ୍ପକରଣ୍ଡଂ ଚେ, ପରାମସତି ଦୁକ୍କଟଂ ।
ଫନ୍ଦାପେତି ୟଥାୱତ୍ଥୁଂ, ଠାନତୋ ଚାୱନେ ଚୁତୋ ॥
ଉଗ୍ଘାଟେତ୍ୱା କରଣ୍ଡଂ ତୁ, ସପ୍ପମୁଦ୍ଧରତୋ ପନ ।
କରଣ୍ଡତଲତୋ ମୁତ୍ତେ, ନଙ୍ଗୁଟ୍ଠେ ତୁ ପରାଜୟୋ ॥
ଘଂସିତ୍ୱା କଡ୍ଢତୋ ସପ୍ପଂ, ନଙ୍ଗୁଟ୍ଠେ ମୁଖୱଟ୍ଟିତୋ ।
ତସ୍ସ ସପ୍ପକରଣ୍ଡସ୍ସ, ମୁତ୍ତମତ୍ତେ ପରାଜୟୋ ॥
କରଣ୍ଡଂ ୱିୱରିତ୍ୱା ଚେ, ପକ୍କୋସନ୍ତସ୍ସ ନାମତୋ ।
ସୋ ନିକ୍ଖମତି ଚେ ସପ୍ପୋ, ତସ୍ସ ପାରାଜିକଂ ସିୟା ॥
ତଥା କତ୍ୱା ତୁ ମଣ୍ଡୂକ-ମୂସିକାନଂ ରୱମ୍ପି ୱା ।
ପକ୍କୋସନ୍ତସ୍ସ ନାମେନ, ନିକ୍ଖନ୍ତେପି ପରାଜୟୋ ॥
ମୁଖଂ ଅୱିୱରିତ୍ୱାୱ, କରୋନ୍ତସ୍ସେୱମେୱ ଚ ।
ୟେନ କେନଚି ନିକ୍ଖନ୍ତେ, ସପ୍ପେ ପାରାଜିକଂ ସିୟା ॥
ମୁଖେ ୱିୱରିତେ ସପ୍ପୋ, ସୟମେୱ ପଲାୟତି ।
ନ ପକ୍କୋସତି ଚେ ତସ୍ସ, ଭଣ୍ଡଦେୟ୍ୟମୁଦୀରିତଂ ॥
ଅପଦକଥା ।
ଥେୟ୍ୟଚିତ୍ତେନ ୟୋ ହତ୍ଥିଂ, କରୋତାମସନାଦୟୋ ।
ହୋନ୍ତି ଆପତ୍ତିୟୋ ତସ୍ସ, ତିୱିଧା ଦୁକ୍କଟାଦୟୋ ॥
ସାଲାୟଂ ଠିତହତ୍ଥିସ୍ସ, ଅନ୍ତୋୱତ୍ଥଙ୍ଗଣେସୁପି ।
ଠାନଂ ସାଲା ଚ ୱତ୍ଥୁ ଚ, ଅଙ୍ଗଣଂ ସକଲଂ ସିୟା ॥
ଅବଦ୍ଧସ୍ସ ହି ବଦ୍ଧସ୍ସ, ଠିତଟ୍ଠାନଞ୍ଚ ବନ୍ଧନଂ ।
ତସ୍ମା ତେସଂ ୱସା ହତ୍ଥିଂ, ହରତୋ କାରୟେ ବୁଧୋ ॥
ନଗରସ୍ସ ବହିଦ୍ଧା ତୁ, ଠିତସ୍ସ ପନ ହତ୍ଥିନୋ ।
ଠିତଟ୍ଠାନଂ ଭୱେ ଠାନଂ, ପଦୱାରେନ କାରୟେ ॥
ନିପନ୍ନସ୍ସ ଗଜସ୍ସେକଂ, ଠାନଂ ତଂ ଉଟ୍ଠପେତି ଚେ ।
ତସ୍ମିଂ ଉଟ୍ଠିତମତ୍ତେ ତୁ, ତସ୍ସ ପାରାଜିକଂ ସିୟା ॥
ଏସେୱ ଚ ନୟୋ ଞେୟ୍ୟୋ, ତୁରଙ୍ଗମହିସାଦିସୁ ।
ନତ୍ଥି କିଞ୍ଚିପି ୱତ୍ତବ୍ବଂ, ଦ୍ୱିପଦେପି ବହୁପ୍ପଦେ ॥
ଚତୁପ୍ପଦକଥା ।
ପରେସନ୍ତି ୱିଜାନିତ୍ୱା, ପରେସଂ ସନ୍ତକଂ ଧନଂ ।
ଗରୁକଂ ଥେୟ୍ୟଚିତ୍ତେନ, ଠାନା ଚାୱେତି ଚେ ଚୁତୋ ॥
ଅନାପତ୍ତି ସସଞ୍ଞିସ୍ସ, ତିରଚ୍ଛାନପରିଗ୍ଗହେ ।
ତାୱକାଲିକୱିସ୍ସାସ-ଗ୍ଗାହେ ପେତପରିଗ୍ଗହେ ॥
ୟୋ ପନେତ୍ଥ ଚ ୱତ୍ତବ୍ବୋ, ପାଳିମୁତ୍ତୱିନିଚ୍ଛୟୋ।
ତଂ ମୟଂ ପରତୋୟେୱ, ଭଣିସ୍ସାମ ପକିଣ୍ଣକେ ॥
ପରାଜିତାନେକମଲେନ ୱୁତ୍ତଂ ।
ପାରାଜିକଂ ୟଂ ଦୁତିୟଂ ଜିନେନ ।
ୱୁତ୍ତୋ ସମାସେନ ମୟସ୍ସ ଚତ୍ଥୋ ।
ୱତ୍ତୁଂ ଅସେସେନ ହି କୋ ସମତ୍ଥୋ ॥
ଇତି ୱିନୟୱିନିଚ୍ଛୟେ ଦୁତିୟପାରାଜିକକଥା ନିଟ୍ଠିତା ।
ତତିୟପାରାଜିକକଥା
ମନୁସ୍ସଜାତିଂ ଜାନନ୍ତୋ, ଜୀୱିତା ୟୋ ୱିୟୋଜୟେ ।
ନିକ୍ଖିପେୟ୍ୟସ୍ସ ସତ୍ଥଂ ୱା, ୱଦେୟ୍ୟ ମରଣେ ଗୁଣଂ ॥
ଦେସେୟ୍ୟ ମରଣୂପାୟଂ, ହୋତାୟମ୍ପି ପରାଜିତୋ ।
ଅସନ୍ଧେୟ୍ୟୋୱ ସୋ ଞେୟ୍ୟୋ, ଦ୍ୱେଧା ଭିନ୍ନସିଲା ୱିୟ ॥
ୱୁତ୍ତା ପାଣାତିପାତସ୍ସ, ପୟୋଗା ଛ ମହେସିନା ।
ସାହତ୍ଥିକୋ ତଥାଣତ୍ତି-ନିସ୍ସଗ୍ଗିଥାୱରାଦୟୋ ॥
ତତ୍ଥ କାୟେନ ୱା କାୟ-ପଟିବଦ୍ଧେନ ୱା ସୟଂ ।
ମାରେନ୍ତସ୍ସ ପରଂ ଘାତୋ, ଅୟଂ ସାହତ୍ଥିକୋ ମତୋ ॥
‘‘ଏୱଂ ତ୍ୱଂ ପହରିତ୍ୱା ତଂ, ମାରେହୀ’’ତି ଚ ଭିକ୍ଖୁନୋ ।
ପରସ୍ସାଣାପନଂ ନାମ, ଅୟମାଣତ୍ତିକୋ ନୟୋ ॥
ଦୂରଂ ମାରେତୁକାମସ୍ସ, ଉସୁଆଦିନିପାତନଂ ।
କାୟେନ ପଟିବଦ୍ଧେନ, ଅୟଂ ନିସ୍ସଗ୍ଗିୟୋ ୱିଧି ॥
ଅସଞ୍ଚାରିମୁପାୟେନ, ମାରଣତ୍ଥଂ ପରସ୍ସ ଚ ।
ଓପାତାଦିୱିଧାନଂ ତୁ, ପୟୋଗୋ ଥାୱରୋ ଅୟଂ ॥
ପରଂ ମାରେତୁକାମସ୍ସ, ୱିଜ୍ଜାୟ ଜପ୍ପନଂ ପନ ।
ଅୟଂ ୱିଜ୍ଜାମୟୋ ନାମ, ପୟୋଗୋ ପଞ୍ଚମୋ ମତୋ ॥
ସମତ୍ଥା ମାରଣେ ୟା ଚ, ଇଦ୍ଧି କମ୍ମୱିପାକଜା ।
ଅୟମିଦ୍ଧିମୟୋ ନାମ, ପୟୋଗୋ ସମୁଦୀରିତୋ ॥
ଏକେକୋ ଦୁୱିଧୋ ତତ୍ଥ, ହୋତୀତି ପରିଦୀପିତୋ ।
ଉଦ୍ଦେସୋପି ଅନୁଦ୍ଦେସୋ, ଭେଦୋ ତେସମୟଂ ପନ ॥
ବହୁସ୍ୱପି ୟମୁଦ୍ଦିସ୍ସ, ପହାରଂ ଦେତି ଚେ ପନ ।
ମରଣେନ ଚ ତସ୍ସେୱ, କମ୍ମୁନା ତେନ ବଜ୍ଝତି ॥
ଅନୁଦ୍ଦିସ୍ସ ପହାରେପି, ୟସ୍ସ କସ୍ସଚି ଦେହିନୋ ।
ପହାରପ୍ପଚ୍ଚୟା ତସ୍ସ, ମରଣଂ ଚେ ପରାଜୟୋ ॥
ମତେ ପହଟମତ୍ତେ ୱା, ପଚ୍ଛା ମୁଭୟଥାପି ଚ ।
ହନ୍ତା ପହଟମତ୍ତସ୍ମିଂ, କମ୍ମୁନା ତେନ ବଜ୍ଝତି ॥
ଏୱଂ ସାହତ୍ଥିକୋ ଞେୟ୍ୟୋ, ତଥା ଆଣତ୍ତିକୋପି ଚ ।
ଏତ୍ତାୱତା ସମାସେନ, ଦ୍ୱେ ପୟୋଗା ହି ଦସ୍ସିତା ॥
ୱତ୍ଥୁ କାଲୋ ଚ ଦେସୋ ଚ, ସତ୍ଥଞ୍ଚ ଇରିୟାପଥୋ ।
କରଣସ୍ସ ୱିସେସୋତି, ଛ ଆଣତ୍ତିନିୟାମକା ॥
ମାରେତବ୍ବୋ ହି ୟୋ ତତ୍ଥ, ସୋ ‘‘ୱତ୍ଥୂ’’ତି ପୱୁଚ୍ଚତି ।
ପୁବ୍ବଣ୍ହାଦି ସିୟା କାଲୋ, ସତ୍ତାନଂ ୟୋବ୍ବନାଦି ଚ ॥
ଦେସୋ ଗାମାଦି ୱିଞ୍ଞେୟ୍ୟୋ, ସତ୍ଥଂ ତଂ ସତ୍ତମାରଣଂ ।
ମାରେତବ୍ବସ୍ସ ସତ୍ତସ୍ସ, ନିସଜ୍ଜାଦିରିୟାପଥୋ॥
ୱିଜ୍ଝନଂ ଭେଦନଞ୍ଚାପି, ଛେଦନଂ ତାଳନମ୍ପି ୱା ।
ଏୱମାଦିୱିଧୋନେକୋ, ୱିସେସୋ କରଣସ୍ସ ତୁ ॥
‘‘ୟଂ ମାରେହୀ’’ତି ଆଣତ୍ତୋ, ଅଞ୍ଞଂ ମାରେତି ଚେ ତତୋ ।
‘‘ପୁରତୋ ପହରିତ୍ୱାନ, ମାରେହୀ’’ତି ଚ ଭାସିତୋ ॥
ପଚ୍ଛତୋ ପସ୍ସତୋ ୱାପି, ପହରିତ୍ୱାନ ମାରିତେ ।
ୱତ୍ଥାଣତ୍ତି ୱିସଙ୍କେତା, ମୂଲଟ୍ଠୋ ପନ ମୁଚ୍ଚତି ॥
ୱତ୍ଥୁଂ ତଂ ଅୱିରଜ୍ଝିତ୍ୱା, ୟଥାଣତ୍ତିଞ୍ଚ ମାରିତେ ।
ଉଭୟେସଂ ୟଥାକାଲଂ, କମ୍ମବଦ୍ଧୋ ଉଦୀରିତୋ ॥
ଆଣତ୍ତୋ ‘‘ଅଜ୍ଜ ପୁବ୍ବଣ୍ହେ, ମାରେହୀ’’ତି ଚ ୟୋ ପନ ।
ସୋ ଚେ ମାରେତି ସାୟନ୍ହେ, ମୂଲଟ୍ଠୋ ପରିମୁଚ୍ଚତି ॥
ଆଣତ୍ତସ୍ସେୱ ସୋ ୱୁତ୍ତୋ ।
କମ୍ମବଦ୍ଧୋ ମହେସିନା ।
କାଲସ୍ସ ହି ୱିସଙ୍କେତା ।
ଦୋସୋ ନାଣାପକସ୍ସ ସୋ ॥
‘‘ଅଜ୍ଜ ମାରେହି ପୁବ୍ବଣ୍ହେ, ସ୍ୱେୱା’’ତି ଅନିୟାମିତେ ।
ୟଦା କଦାଚି ପୁବ୍ବଣ୍ହେ, ୱିସଙ୍କେତୋ ନ ମାରିତେ ॥
ଏତେନେୱ ଉପାୟେନ, କାଲଭେଦେସୁ ସବ୍ବସୋ ।
ସଙ୍କେତୋ ଚ ୱିସଙ୍କେତୋ, ୱେଦିତବ୍ବୋ ୱିଭାୱିନା ॥
‘‘ଇମଂ ଗାମେ ଠିତଂ ୱେରିଂ, ମାରେହୀ’’ତି ଚ ଭାସିତୋ ।
ସଚେ ସୋ ପନ ମାରେତି, ଠିତଂ ତଂ ୟତ୍ଥ କତ୍ଥଚି ॥
ନତ୍ଥି ତସ୍ସ ୱିସଙ୍କେତୋ, ଉଭୋ ବଜ୍ଝନ୍ତି କମ୍ମୁନା ।
‘‘ଗାମେୟେୱା’’ତି ଆଣତ୍ତୋ, ୱନେ ୱା ସାୱଧାରଣଂ ॥
‘‘ୱନେୟେୱା’’ତି ୱା ୱୁତ୍ତୋ, ଗାମେ ମାରେତି ଚେପି ୱା ।
ୱିସଙ୍କେତୋ ୱିଞ୍ଞାତବ୍ବୋ, ମୂଲଟ୍ଠୋ ପରିମୁଚ୍ଚତି ॥
ଏତେନେୱ ଉପାୟେନ, ସବ୍ବଦେସେସୁ ଭେଦତୋ ।
ସଙ୍କେତୋ ଚ ୱିସଙ୍କେତୋ, ୱେଦିତବ୍ବୋୱ ୱିଞ୍ଞୁନା ॥
‘‘ସତ୍ଥେନ ପନ ମାରେହି, ଆଣତ୍ତୋ’’ତି ଚ କେନଚି ।
ୟେନ କେନଚି ସତ୍ଥେନ, ୱିସଙ୍କେତୋ ନ ମାରିତେ ॥
‘‘ଇମିନା ୱାସିନା ହୀ’’ତି, ୱୁତ୍ତୋ ଅଞ୍ଞେନ ୱାସିନା ।
‘‘ଇମସ୍ସାସିସ୍ସ ୱାପି ତ୍ୱଂ, ଧାରାୟେତାୟ ମାରୟ’’ ॥
ଇତି ୱୁତ୍ତୋ ସଚେ ୱେରିଂ, ଧାରାୟ ଇତରାୟ ୱା ।
ଥରୁନା ୱାପି ତୁଣ୍ଡେନ, ୱିସଙ୍କେତୋୱ ମାରିତେ ॥
ଏତେନେୱ ଉପାୟେନ, ସବ୍ବାୱୁଧକଜାତିସୁ।
ସଙ୍କେତୋ ଚ ୱିସଙ୍କେତୋ, ୱେଦିତବ୍ବୋ ୱିସେସତୋ ॥
‘‘ଗଚ୍ଛନ୍ତମେନଂ ମାରେହି’’, ଇତି ୱୁତ୍ତୋ ପରେନ ସୋ ।
ମାରେତି ନଂ ନିସିନ୍ନଂ ଚେ, ୱିସଙ୍କେତୋ ନ ୱିଜ୍ଜତି ॥
‘‘ନିସିନ୍ନଂୟେୱ ମାରେହି’’, ‘‘ଗଚ୍ଛନ୍ତଂୟେୱ ୱା’’ତି ଚ ।
ୱୁତ୍ତୋ ମାରେତି ଗଚ୍ଛନ୍ତଂ, ନିସିନ୍ନଂ ୱା ୟଥାକ୍କମଂ ॥
ୱିସଙ୍କେତନ୍ତି ଞାତବ୍ବଂ, ଭିକ୍ଖୁନା ୱିନୟଞ୍ଞୁନା ।
ଏସେୱ ଚ ନୟୋ ଞେୟ୍ୟୋ, ସବ୍ବିରିୟାପଥେସୁ ଚ ॥
‘‘ମାରେହୀ’’ତି ଚ ୱିଜ୍ଝିତ୍ୱା, ଆଣତ୍ତୋ ହି ପରେନ ସୋ ।
ୱିଜ୍ଝିତ୍ୱାୱ ତମାରେତି, ୱିସଙ୍କେତୋ ନ ୱିଜ୍ଜତି ॥
‘‘ମାରେହୀ’’ତି ଚ ୱିଜ୍ଝିତ୍ୱା, ଆଣତ୍ତୋ ହି ପରେନ ସୋ ।
ଛିନ୍ଦିତ୍ୱା ୟଦି ମାରେତି, ୱିସଙ୍କେତୋୱ ହୋତି ସୋ ॥
ଏତେନେୱ ଉପାୟେନ, ସବ୍ବେସୁ କରଣେସୁପି।
ସଙ୍କେତେ ଚ ୱିସଙ୍କେତେ, ୱେଦିତବ୍ବୋ ୱିନିଚ୍ଛୟୋ ॥
ଦୀଘଂ ରସ୍ସଂ କିସଂ ଥୂଲଂ, କାଳଂ ଓଦାତମେୱ ୱା ।
ଆଣତ୍ତୋ ଅନିୟାମେତ୍ୱା, ମାରେହୀତି ଚ କେନଚି ॥
ସୋପି ୟଂ କିଞ୍ଚି ଆଣତ୍ତୋ, ସଚେ ମାରେତି ତାଦିସଂ ।
ନତ୍ଥି ତତ୍ଥ ୱିସଙ୍କେତୋ, ଉଭିନ୍ନମ୍ପି ପରାଜୟୋ ॥
ମନୁସ୍ସଂ କିଞ୍ଚି ଉଦ୍ଦିସ୍ସ, ସଚେ ଖଣତିୱାଟକଂ ।
ଖଣନ୍ତସ୍ସ ଚ ଓପାତଂ, ହୋତି ଆପତ୍ତି ଦୁକ୍କଟଂ ॥
ଦୁକ୍ଖସ୍ସୁପ୍ପତ୍ତିୟା ତତ୍ଥ, ତସ୍ସ ଥୁଲ୍ଲଚ୍ଚୟଂ ସିୟା ।
ପତିତ୍ୱା ଚ ମତେ ତସ୍ମିଂ, ତସ୍ସ ପାରାଜିକଂ ଭୱେ ॥
ନିପତିତ୍ୱା ପନଞ୍ଞସ୍ମିଂ, ମତେ ଦୋସୋ ନ ୱିଜ୍ଜତି ।
ଅନୁଦ୍ଦିସ୍ସକମୋପାତୋ, ଖତୋ ହୋତି ସଚେ ପନ ॥
‘‘ପତିତ୍ୱା ଏତ୍ଥ ୟୋ କୋଚି, ମରତୂ’’ତି ହି ୟତ୍ତକା ।
ମରନ୍ତି ନିପତିତ୍ୱା ଚେ, ଦୋସା ହୋନ୍ତିସ୍ସ ତତ୍ତକା ॥
ଆନନ୍ତରିୟୱତ୍ଥୁସ୍ମିଂ, ଆନନ୍ତରିୟକଂ ୱଦେ ।
ତଥା ଥୁଲ୍ଲଚ୍ଚୟାଦୀନଂ, ହୋନ୍ତି ଥୁଲ୍ଲଚ୍ଚୟାଦୟୋ ॥
ପତିତ୍ୱା ଗବ୍ଭିନୀ ତସ୍ମିଂ, ସଗବ୍ଭା ଚେ ମରିସ୍ସତି ।
ହୋନ୍ତି ପାଣାତିପାତା ଦ୍ୱେ, ଏକୋୱେକେକଧଂସନେ ॥
ଅନୁବନ୍ଧେତ୍ଥ ଚୋରେହି, ପତିତ୍ୱା ଚେ ମରିସ୍ସତି ।
ଓପାତଖଣକସ୍ସେୱ, ହୋତି ପାରାଜିକଂ କିର ॥
ୱେରିନୋ ତତ୍ଥ ପାତେତ୍ୱା, ସଚେ ମାରେନ୍ତି ୱେରିନୋ ।
ପତିତଂ ତତ୍ଥ ମାରେନ୍ତି, ନୀହରିତ୍ୱା ସଚେ ବହି ॥
ନିବ୍ବତ୍ତିତ୍ୱା ହି ଓପାତେ, ମତା ଚେ ଓପପାତିକା ।
ଅସକ୍କୋନ୍ତା ଚ ନିକ୍ଖନ୍ତୁଂ, ସବ୍ବତ୍ଥ ଚ ପରାଜୟୋ ॥
ୟକ୍ଖାଦୟୋ ପନୁଦ୍ଦିସ୍ସ, ଖଣନେ ଦୁକ୍ଖସମ୍ଭୱେ ।
ଦୁକ୍କଟଂ ମରଣେ ୱତ୍ଥୁ-ୱସା ଥୁଲ୍ଲଚ୍ଚୟାଦୟୋ ॥
ମନୁସ୍ସେୟେୱ ଉଦ୍ଦିସ୍ସ, ଖତେ ଓପାତକେ ପନ ।
ଅନାପତ୍ତି ପତିତ୍ୱା ହି, ୟକ୍ଖାଦୀସୁ ମତେସୁପି ॥
ତଥା ୟକ୍ଖାଦୟୋ ପାଣେ, ଖତେ ଉଦ୍ଦିସ୍ସ ଭିକ୍ଖୁନା ।
ନିପତିତ୍ୱା ମରନ୍ତେସୁ, ମନୁସ୍ସେସୁପ୍ୟୟଂ ନୟୋ ॥
‘‘ପାଣିନୋ ଏତ୍ଥ ବଜ୍ଝିତ୍ୱା, ମରନ୍ତୂ’’ତି ଅନୁଦ୍ଦିସଂ ।
ପାସଂ ଓଡ୍ଡେତି ୟୋ ତତ୍ଥ, ସଚେ ବଜ୍ଝନ୍ତି ପାଣିନୋ ॥
ହତ୍ଥତୋ ମୁତ୍ତମତ୍ତସ୍ମିଂ, ତସ୍ସ ପାରାଜିକଂ ସିୟା ।
ଆନନ୍ତରିୟୱତ୍ଥୁସ୍ମିଂ, ଆନନ୍ତରିୟମେୱ ଚ ॥
ଉଦ୍ଦିସ୍ସ ହି କତେ ପାସେ, ୟଂ ପନୁଦ୍ଦିସ୍ସ ଓଡ୍ଡିତୋ ।
ବନ୍ଧନେସୁ ତଦଞ୍ଞେସଂ, ଅନାପତ୍ତି ପକାସିତା ॥
ମୂଲେନ ୱା ମୁଧା ୱାପି, ଦିନ୍ନେ ପାସେ ପରସ୍ସ ହି ।
ମୂଲଟ୍ଠସ୍ସେୱ ହୋତୀତି, କମ୍ମବଦ୍ଧୋ ନିୟାମିତୋ ॥
ୟେନ ଲଦ୍ଧୋ ସଚେ ଲୋପି, ପାସମୁଗ୍ଗଳିତମ୍ପି ୱା ।
ଥିରଂ ୱାପି କରୋତେୱଂ, ଉଭିନ୍ନଂ କମ୍ମବନ୍ଧନଂ ॥
ୟୋ ପାସଂ ଉଗ୍ଗଳାପେତ୍ୱା, ୟାତି ପାପଭୟା ସଚେ ।
ତଂ ଦିସ୍ୱା ପୁନ ଅଞ୍ଞୋପି, ସଣ୍ଠପେତି ହି ତତ୍ଥ ଚ ॥
ବଦ୍ଧା ବଦ୍ଧା ମରନ୍ତି ଚେ, ମୂଲଟ୍ଠୋ ନ ଚ ମୁଚ୍ଚତି ।
ଠପେତ୍ୱା ଗହିତଟ୍ଠାନେ, ପାସୟଟ୍ଠିଂ ୱିମୁଚ୍ଚତି ॥
ଗୋପେତ୍ୱାପି ନ ମୋକ୍ଖୋ ହି, ପାସୟଟ୍ଠିଂ ସୟଂକତଂ ।
ତମଞ୍ଞୋ ପୁନ ଗଣ୍ହିତ୍ୱା, ସଣ୍ଠପେତି ସଚେ ପନ ॥
ତପ୍ପଚ୍ଚୟା ମରନ୍ତେସୁ, ମୂଲଟ୍ଠୋ ନ ଚ ମୁଚ୍ଚତି ।
ନାସେତ୍ୱା ସବ୍ବସୋ ୱା ତଂ, ଝାପେତ୍ୱା ୱା ୱିମୁଚ୍ଚତି ॥
ରୋପେନ୍ତସ୍ସ ଚ ସୂଲଂ ୱା, ସଜ୍ଜେନ୍ତସ୍ସ ଅଦୂହଲଂ ।
ଓପାତେନ ଚ ପାସେନ, ସଦିସୋୱ ୱିନିଚ୍ଛୟୋ ॥
ଅନାପତ୍ତି ଅସଞ୍ଚିଚ୍ଚ, ଅଜାନନ୍ତସ୍ସ ଭିକ୍ଖୁନୋ ।
ତଥାମରଣଚିତ୍ତସ୍ସ, ମତେପ୍ୟୁମ୍ମତ୍ତକାଦିନୋ ॥
ମନୁସ୍ସପାଣିମ୍ହି ଚ ପାଣସଞ୍ଞିତା ।
ସଚସ୍ସ ଚିତ୍ତଂ ମରଣୂପସଂହିତଂ ।
ଉପକ୍କମୋ ତେନ ଚ ତସ୍ସ ନାସୋ ।
ପଞ୍ଚେତ୍ଥ ଅଙ୍ଗାନି ମନୁସ୍ସଘାତେ ॥
ଇତି ୱିନୟୱିନିଚ୍ଛୟେ ତତିୟପାରାଜିକକଥା ନିଟ୍ଠିତା ।
ଚତୁତ୍ଥପାରାଜିକକଥା
ଭୱଂ ଅଧିଟ୍ଠାୟ ଚ ୱତ୍ତମାନଂ ।
ଅଞ୍ଞାପଦେସଞ୍ଚ ୱିନାଧିମାନଂ ।
ଝାନାଦିଭେଦଂ ସମୁଦାଚରେୟ୍ୟ ॥
କାୟେନ ୱାଚାୟପି ୱା ତଦତ୍ଥେ ।
ଞାତେୱ ୱିଞ୍ଞତ୍ତିପଥେ ଅଭବ୍ବୋ ।
ୟଥେୱ ତାଲୋ ପନ ମତ୍ଥକସ୍ମିଂ ।
ଛିନ୍ନୋ ଅଭବ୍ବୋ ପୁନ ରୁଳ୍ହିଭାୱେ ॥
ଅସନ୍ତମେୱତ୍ତନି ୟୋ ପରସ୍ସ ।
ଦୀପେତି ଝାନାଦିମନନ୍ତରଂ ସୋ ।
ଜାନାତି ଚେ ହୋତି ଚୁତୋ ହି ନୋ ଚେ ।
ଜାନାତି ଥୁଲ୍ଲଚ୍ଚୟମସ୍ସ ହୋତି ॥
ସୋ ଝାନଲାଭୀ’’ତି ଚ ଦୀପିତେ ଚେ ।
ଜାନାତି ଥୁଲ୍ଲଚ୍ଚୟମସ୍ସ ନୋ ଚେ ।
ଜାନାତି ତଂ ଦୁକ୍କଟମେୱ ହୋତି ॥
ଅସନ୍ତମେୱତ୍ତନି ଧମ୍ମମେତଂ ।
ଅତ୍ଥୀତି କତ୍ୱା ୱଦତୋଧିମାନା ।
ୱୁତ୍ତୋ ଅନାପତ୍ତିନୟୋ ପନେୱଂ ।
ଅୱତ୍ତୁକାମସ୍ସ ତଥାଦିକସ୍ସ ॥
ପାପିଚ୍ଛତା ତସ୍ସ ଅସନ୍ତଭାୱୋ ।
ଆରୋଚନଞ୍ଚେୱ ମନୁସ୍ସକସ୍ସ ।
ନଞ୍ଞାପଦେସେନ ତଦେୱ ଞାଣଂ ।
ପଞ୍ଚେତ୍ଥ ଅଙ୍ଗାନି ୱଦନ୍ତି ଧୀରା ॥
ପଠମେ ଦୁତିୟେ ଚନ୍ତେ, ପରିୟାୟୋ ନ ୱିଜ୍ଜତି ।
ଦୁତିୟେ ତତିୟେୟେୱ, ଆଣତ୍ତି ନ ପନେତରେ ॥
ଆଦି ମେକସମୁଟ୍ଠାନଂ, ଦୁୱଙ୍ଗଂ କାୟଚିତ୍ତତୋ ।
ସେସା ଚ ତିସମୁଟ୍ଠାନା, ତେସମଙ୍ଗାନି ସତ୍ତ ତୁ ॥
ସୁଖୋପେକ୍ଖାୟୁତଂ ଆଦି, ତତିୟଂ ଦୁକ୍ଖୱେଦନଂ ।
ଦୁତିୟଞ୍ଚ ଚତୁତ୍ଥଞ୍ଚ, ତିୱେଦନମୁଦୀରିତଂ ॥
ପଠମସ୍ସଟ୍ଠ ଚିତ୍ତାନି, ତତିୟସ୍ସ ଦୁୱେ ପନ ।
ଦୁତିୟସ୍ସ ଚତୁତ୍ଥସ୍ସ, ଦସ ଚିତ୍ତାନି ଲବ୍ଭରେ ॥
ତସ୍ମା ସଚିତ୍ତକଂ ୱୁତ୍ତଂ, ସବ୍ବମେତଂ ଚତୁବ୍ବିଧଂ ।
କ୍ରିୟା ସଞ୍ଞାୱିମୋକ୍ଖଞ୍ଚ, ଲୋକୱଜ୍ଜନ୍ତି ଦୀପିତଂ ॥
ଇଦମାପତ୍ତିୟଂୟେୱ, ୱିଧାନଂ ପନ ୟୁଜ୍ଜତି ।
ତସ୍ମା ଆପତ୍ତିୟଂୟେୱ, ଗହେତବ୍ବଂ ୱିଭାୱିନା ॥
ମୁଦୁପିଟ୍ଠି ଚ ଲମ୍ବୀ ଚ, ମୁଖଗ୍ଗାହୀ ନିସୀଦକୋ ।
ପାରାଜିକା ଇମେ ତେସଂ, ଚତ୍ତାରୋ ଅନୁଲୋମିକା ॥
ଭିକ୍ଖୁନୀନଞ୍ଚ ଚତ୍ତାରି, ୱିବ୍ଭନ୍ତା ଭିକ୍ଖୁନୀ ସୟଂ ।
ତଥା ଏକାଦସାଭବ୍ବା, ସବ୍ବେତେ ଚତୁୱୀସତି ॥
ଇମେ ପାରାଜିକା ୱୁତ୍ତା, ଚତୁୱୀସତି ପୁଗ୍ଗଲା ।
ଅଭବ୍ବା ଭିକ୍ଖୁଭାୱାୟ, ସୀସଚ୍ଛିନ୍ନୋୱ ଜୀୱିତୁଂ ॥
ପଣ୍ଡକୋ ଚ ତିରଚ୍ଛାନୋ, ଉଭତୋବ୍ୟଞ୍ଜନୋପି ଚ ।
ତୟୋ ୱତ୍ଥୁୱିପନ୍ନା ହି, ଅହେତୁପଟିସନ୍ଧିକା ॥
ପଞ୍ଚାନନ୍ତରିକା ଥେୟ୍ୟ-ସଂୱାସୋପି ଚ ଦୂସକୋ ।
ତିତ୍ଥିପକ୍କନ୍ତକୋ ଚେତି, କ୍ରିୟାନଟ୍ଠା ପନଟ୍ଠ ତେ ॥
ୱିନିଚ୍ଛୟୋ ୟୋ ପନ ସାରଭୂତୋ ।
ପାରାଜିକାନଂ କଥିତୋ ମୟାୟଂ ।
ତସ୍ସାନୁସାରେନ ବୁଧେନ ଞାତୁଂ ।
ସକ୍କା ହି ସେସୋପି ଅସେସତୋୱ ॥
ୱିନୟେ ୱିୱିଧେହି ନୟେହି ୟୁତେ ।
ପରମତ୍ଥନୟଂ ଅଭିପତ୍ଥୟତା ।
ପରିୟାପୁଣିତବ୍ବମୟଂ ସତତଂ ॥
ଇତି ୱିନୟୱିନିଚ୍ଛୟେ ଚତୁତ୍ଥପାରାଜିକକଥା ନିଟ୍ଠିତା ।
ସଙ୍ଘାଦିସେସକଥା
ମୋଚେତୁକାମତାଚିତ୍ତଂ, ୱାୟାମୋ ସୁକ୍କମୋଚନଂ ।
ଅଞ୍ଞତ୍ର ସୁପିନନ୍ତେନ, ହୋତି ସଙ୍ଘାଦିସେସତା ॥
ପରେନୁପକ୍କମାପେତ୍ୱା, ଅଙ୍ଗଜାତଂ ପନତ୍ତନୋ ।
ସୁକ୍କଂ ୟଦି ୱିମୋଚେତି, ଗରୁକଂ ତସ୍ସ ନିଦ୍ଦିସେ ॥
ସଞ୍ଚିଚ୍ଚୁପକ୍କମନ୍ତସ୍ସ, ଅଙ୍ଗଜାତଂ ପନତ୍ତନୋ ।
ଥୁଲ୍ଲଚ୍ଚୟଂ ସମୁଦ୍ଦିଟ୍ଠଂ, ସଚେ ସୁକ୍କଂ ନ ମୁଚ୍ଚତି ॥
ସଞ୍ଚିଚ୍ଚୁପକ୍କମନ୍ତସ୍ସ, ଆକାସେ କମ୍ପନେନପି ।
ହୋତି ଥୁଲ୍ଲଚ୍ଚୟଂ ତସ୍ସ, ୟଦି ସୁକ୍କଂ ନ ମୁଚ୍ଚତି ॥
ୱତ୍ଥିଂ କୀଳାୟ ପୂରେତ୍ୱା, ପସ୍ସାୱେତୁଂ ନ ୱଟ୍ଟତି ।
ନିମିତ୍ତଂ ପନ ହତ୍ଥେନ, କୀଳାପେନ୍ତସ୍ସ ଦୁକ୍କଟଂ ॥
ତିସ୍ସନ୍ନଂ ପନ ଇତ୍ଥୀନଂ, ନିମିତ୍ତଂ ରତ୍ତଚେତସା ।
ପୁରତୋ ପଚ୍ଛତୋ ୱାପି, ଓଲୋକେନ୍ତସ୍ସ ଦୁକ୍କଟଂ ॥
ଏକେନେକଂ ପୟୋଗେନ, ଦିୱସମ୍ପି ଚ ପସ୍ସତୋ ।
ନାପତ୍ତିୟା ଭୱେ ଅଙ୍ଗଂ, ଉମ୍ମୀଲନନିମୀଲନଂ ॥
ଅମୋଚନାଧିପ୍ପାୟସ୍ସ, ଅନୁପକ୍କମତୋପି ଚ ।
ସୁପିନନ୍ତେନ ମୁତ୍ତସ୍ମିଂ, ଅନାପତ୍ତି ପକାସିତା ॥
ସୁକ୍କୱିସଟ୍ଠିକଥା ।
ଆମସନ୍ତୋ ମନୁସ୍ସିତ୍ଥିଂ, କାୟସଂସଗ୍ଗରାଗତୋ ।
‘‘ମନୁସ୍ସିତ୍ଥୀ’’ତି ସଞ୍ଞାୟ, ହୋତି ସଙ୍ଘାଦିସେସିକୋ ॥
ଲୋମେନନ୍ତମସୋ ଲୋମଂ, ଫୁସନ୍ତସ୍ସାପି ଇତ୍ଥିୟା ।
କାୟସଂସଗ୍ଗରାଗେନ, ହୋତି ଆପତ୍ତି ଭିକ୍ଖୁନୋ ॥
ଇତ୍ଥିୟା ୟଦି ସମ୍ଫୁଟ୍ଠୋ, ଫସ୍ସଂ ସେୱନଚେତନୋ ।
ୱାୟମିତ୍ୱାଧିୱାସେତି, ହୋତି ସଙ୍ଘାଦିସେସତା ॥
ଏକେନ ପନ ହତ୍ଥେନ, ଗହେତ୍ୱା ଦୁତିୟେନ ୱା ।
ତତ୍ଥ ତତ୍ଥ ଫୁସନ୍ତସ୍ସ, ଏକାୱାପତ୍ତି ଦୀପିତା ॥
ଅଗ୍ଗହେତ୍ୱା ଫୁସନ୍ତସ୍ସ, ୟାୱ ପାଦଞ୍ଚ ସୀସତୋ ।
କାୟା ହତ୍ଥମମୋଚେତ୍ୱା, ଏକାୱ ଦିୱସମ୍ପି ଚ ॥
ଅଙ୍ଗୁଲୀନଂ ତୁ ପଞ୍ଚନ୍ନଂ, ଗହଣେ ଏକତୋ ପନ ।
ଏକାୟେୱ ସିୟାପତ୍ତି, ନ ହି କୋଟ୍ଠାସତୋ ସିୟା ॥
ନାନିତ୍ଥୀନଂ ସଚେ ପଞ୍ଚ, ଗଣ୍ହାତ୍ୟଙ୍ଗୁଲିୟୋ ପନ ।
ଏକତୋ ପଞ୍ଚ ସଙ୍ଘାଦି-ସେସା ହୋନ୍ତିସ୍ସ ଭିକ୍ଖୁନୋ ॥
ଇତ୍ଥିୟା ୱିମତିସ୍ସାପି, ପଣ୍ଡକାଦିକସଞ୍ଞିନୋ ।
କାୟେନ ଇତ୍ଥିୟା କାୟ-ସମ୍ବଦ୍ଧଂ ଫୁସତୋପି ୱା ॥
ପଣ୍ଡକେ ୟକ୍ଖିପେତୀସୁ, ତସ୍ସ ଥୁଲ୍ଲଚ୍ଚୟଂ ସିୟା ।
ଦୁକ୍କଟଂ କାୟସଂସଗ୍ଗେ, ତିରଚ୍ଛାନଗତିତ୍ଥିୟା ॥
ଭିକ୍ଖୁନୋ ପଟିବଦ୍ଧେନ, କାୟେନ ପନ ଇତ୍ଥିୟା ।
କାୟେନ ପଟିବଦ୍ଧଞ୍ଚ, ଫୁସନ୍ତସ୍ସପି ଦୁକ୍କଟଂ ॥
ଇତ୍ଥୀନଂ ଇତ୍ଥିରୂପଞ୍ଚ, ଦାରୁଲୋହମୟାଦିକଂ ।
ତାସଂ ୱତ୍ଥମଲଙ୍କାରଂ, ଆମସନ୍ତସ୍ସ ଦୁକ୍କଟଂ ॥
ତତ୍ଥଜାତଫଲଂ ଖଜ୍ଜଂ, ମୁଗ୍ଗାଦିଂ ତତ୍ଥଜାତକଂ ।
ଧଞ୍ଞାନି ପନ ସବ୍ବାନି, ଆମସନ୍ତସ୍ସ ଦୁକ୍କଟଂ ॥
ସବ୍ବଂ ଧମନସଙ୍ଖାଦିଂ, ପଞ୍ଚଙ୍ଗତୁରିୟମ୍ପି ଚ ।
ରତନାନି ଚ ସବ୍ବାନି, ଆମସନ୍ତସ୍ସ ଦୁକ୍କଟଂ ॥
ସବ୍ବମାୱୁଧଭଣ୍ଡଞ୍ଚ, ଜିୟା ଚ ଧନୁଦଣ୍ଡକୋ ।
ଅନାମାସମିଦଂ ସବ୍ବଂ, ଜାଲଞ୍ଚ ସରୱାରଣଂ ॥
ସୁୱଣ୍ଣପଟିବିମ୍ବାଦି, ଚେତିୟଂ ଆରକୂଟକଂ ।
ଅନାମାସନ୍ତି ନିଦ୍ଦିଟ୍ଠଂ, କୁରୁନ୍ଦଟ୍ଠକଥାୟ ହି ॥
ସବ୍ବଂ ଓନହିତୁଂ ୱାପି, ଓନହାପେତୁମେୱ ୱା ।
ୱାଦାପେତୁଞ୍ଚ ୱାଦେତୁଂ, ୱାଦିତଂ ନ ଚ ୱଟ୍ଟତି ॥
‘‘କରିସ୍ସାମୁପହାର’’ନ୍ତି, ୱୁତ୍ତେନ ପନ ଭିକ୍ଖୁନା ।
ପୂଜା ବୁଦ୍ଧସ୍ସ କାତବ୍ବା, ୱତ୍ତବ୍ବାତି ଚ ୱିଞ୍ଞୁନା ॥
ସୟଂ ଫୁସିୟମାନସ୍ସ, ଇତ୍ଥିୟା ପନ ଧୁତ୍ତିୟା ।
ଅୱାୟମିତ୍ୱା କାୟେନ, ଫସ୍ସଂ ପଟିୱିଜାନତୋ ॥
ଅନାପତ୍ତି ଅସଞ୍ଚିଚ୍ଚ, ଅଜାନନ୍ତସ୍ସ ଭିକ୍ଖୁନୋ ।
ମୋକ୍ଖାଧିପ୍ପାୟିନୋ ଚେୱ, ତଥା ଉମ୍ମତ୍ତକାଦିନୋ ॥
ପଠମେନ ସମାନାୱ, ସମୁଟ୍ଠାନାଦୟୋ ପନ ।
କାୟସଂସଗ୍ଗରାଗସ୍ସ, ତଥା ସୁକ୍କୱିସଟ୍ଠିୟା ॥
କାୟସଂସଗ୍ଗକଥା ।
ଦୁଟ୍ଠୁଲ୍ଲୱାଚସ୍ସାଦେନ, ଇତ୍ଥିୟା ଇତ୍ଥିସଞ୍ଞିନୋ ।
ଦ୍ୱିନ୍ନଞ୍ଚ ପନ ମଗ୍ଗାନଂ, ୱଣ୍ଣାୱଣ୍ଣୱସେନ ଚ ॥
ମେଥୁନୟାଚନାଦୀହି, ଓଭାସନ୍ତସ୍ସ ଭିକ୍ଖୁନୋ ।
ୱିଞ୍ଞୁଂ ଅନ୍ତମସୋ ହତ୍ଥ-ମୁଦ୍ଦାୟପି ଗରୁଂ ସିୟା ॥
‘‘ସିଖରଣୀସି, ସମ୍ଭିନ୍ନା, ଉଭତୋବ୍ୟଞ୍ଜନା’’ତି ଚ ।
ଅକ୍କୋସୱଚନେନାପି, ଗରୁକଂ ତୁ ସୁଣନ୍ତିୟା ॥
ପୁନପ୍ପୁନୋଭାସନ୍ତସ୍ସ, ଏକୱାଚାୟ ୱା ବହୂ ।
ଗଣନାୟ ଚ ୱାଚାନଂ, ଇତ୍ଥୀନଂ ଗରୁକା ସିୟୁଂ ॥
ସା ଚେ ନପ୍ପଟିଜାନାତି, ତସ୍ସ ଥୁଲ୍ଲଚ୍ଚୟଂ ସିୟା ।
ଆଦିସ୍ସ ଭଣନେ ଚାପି, ଉବ୍ଭଜାଣୁମଧକ୍ଖକଂ ॥
ଉବ୍ଭକ୍ଖକମଧୋଜାଣୁ-ମଣ୍ଡଲଂ ପନ ଉଦ୍ଦିସଂ ।
ୱଣ୍ଣାଦିଭଣନେ କାୟ-ପଟିବଦ୍ଧେ ଚ ଦୁକ୍କଟଂ ॥
ଥୁଲ୍ଲଚ୍ଚୟଂ ଭୱେ ତସ୍ସ, ପଣ୍ଡକେ ୟକ୍ଖିପେତିସୁ ।
ଅଧକ୍ଖକୋବ୍ଭଜାଣୁମ୍ହି, ଦୁକ୍କଟଂ ପଣ୍ଡକାଦିସୁ ॥
ଉବ୍ଭକ୍ଖକମଧୋଜାଣୁ-ମଣ୍ଡଲେପି ଅୟଂ ନୟୋ ।
ସବ୍ବତ୍ଥ ଦୁକ୍କଟଂ ୱୁତ୍ତଂ, ତିରଚ୍ଛାନଗତିତ୍ଥିୟା ॥
ଅତ୍ଥଧମ୍ମପୁରେକ୍ଖାରଂ, କତ୍ୱା ଓଭାସତୋପି ଚ ।
ୱଦତୋପି ଅନାପତ୍ତି, ପୁରକ୍ଖତ୍ୱାନୁସାସନିଂ ॥
ତଥା ଉମ୍ମତ୍ତକାଦୀନଂ, ସମୁଟ୍ଠାନାଦୟୋ ନୟା ।
ଅଦିନ୍ନାଦାନତୁଲ୍ୟାୱ, ୱେଦନେତ୍ଥ ଦ୍ୱିଧା ମତା ॥
ଦୁଟ୍ଠୁଲ୍ଲୱାଚାକଥା ।
ୱଣ୍ଣଂ ପନତ୍ତନୋ କାମ-ପାରିଚରିୟାୟ ଭାସତୋ ।
ତସ୍ମିଂୟେୱ ଖଣେ ସା ଚେ, ଜାନାତି ଗରୁକଂ ସିୟା ॥
ନୋ ଚେ ଜାନାତି ସା ୟକ୍ଖି-ପେତିଦେୱୀସୁ ପଣ୍ଡକେ ।
ହୋତି ଥୁଲ୍ଲଚ୍ଚୟଂ ତସ୍ସ, ସେସେ ଆପତ୍ତି ଦୁକ୍କଟଂ ॥
ଚୀୱରାଦୀହି ଅଞ୍ଞେହି, ୱତ୍ଥୁକାମେହି ଅତ୍ତନୋ ।
ନତ୍ଥି ଦୋସୋ ଭଣନ୍ତସ୍ସ, ପାରିଚରିୟାୟ ୱଣ୍ଣନଂ ॥
ଇତ୍ଥିସଞ୍ଞା ମନୁସ୍ସିତ୍ଥୀ, ପାରିଚରିୟାୟ ରାଗିତା ।
ଓଭାସୋ ତେନ ରାଗେନ, ଖଣେ ତସ୍ମିଂ ୱିଜାନନଂ ॥
ପଞ୍ଚଙ୍ଗାନି ଇମାନେତ୍ଥ, ୱେଦିତବ୍ବାନି ୱିଞ୍ଞୁନା ।
ସମୁଟ୍ଠାନାଦୟୋପ୍ୟସ୍ସ, ଅନନ୍ତରସମା ମତା ॥
ଅତ୍ତକାମପାରିଚରିୟକଥା ।
ପଟିଗ୍ଗଣ୍ହାତି ସନ୍ଦେସଂ, ପୁରିସସ୍ସିତ୍ଥିୟାପି ୱା ।
ୱୀମଂସତି ଗରୁ ହୋତି, ପଚ୍ଚାହରତି ଚେ ପନ ॥
‘‘ୟସ୍ସା ହି ସନ୍ତିକଂ ଗନ୍ତ୍ୱା, ଆରୋଚେହୀ’’ତି ପେସିତୋ ।
ତମଦିସ୍ୱା ତଦଞ୍ଞସ୍ସ, ଅୱସ୍ସାରୋଚକସ୍ସ ସୋ ॥
‘‘ଆରୋଚେହୀ’’ତି ୱତ୍ୱା ତଂ, ପଚ୍ଚାହରତି ଚେ ପନ ।
ଭିକ୍ଖୁ ସଙ୍ଘାଦିସେସମ୍ହା, ସଞ୍ଚରିତ୍ତା ନ ମୁଚ୍ଚତି ॥
‘‘ମାତରା ରକ୍ଖିତଂ ଇତ୍ଥିଂ, ଗଚ୍ଛ ବ୍ରୂହୀ’’ତି ପେସିତୋ ।
ପିତୁରକ୍ଖିତମଞ୍ଞଂ ୱା, ୱିସଙ୍କେତୋୱ ଭାସତୋ ॥
ପଟିଗ୍ଗଣ୍ହନତାଦୀହି, ତୀହି ଅଙ୍ଗେହି ସଂୟୁତେ ।
ସଞ୍ଚରିତ୍ତେ ସମାପନ୍ନେ, ଗରୁକାପତ୍ତିମାଦିସେ ॥
ଦ୍ୱୀହି ଥୁଲ୍ଲଚ୍ଚୟଂ ୱୁତ୍ତଂ, ପଣ୍ଡକାଦୀସୁ ତୀହିପି ।
ଏକେନେୱ ଚ ସବ୍ବତ୍ଥ, ହୋତି ଆପତ୍ତି ଦୁକ୍କଟଂ ॥
ଚେତିୟସ୍ସ ଚ ସଙ୍ଘସ୍ସ, ଗିଲାନସ୍ସ ଚ ଭିକ୍ଖୁନୋ ।
ଗଚ୍ଛତୋ ପନ କିଚ୍ଚେନ, ଅନାପତ୍ତି ପକାସିତା ॥
ମନୁସ୍ସତ୍ତଂ ତଥା ତସ୍ସା, ନନାଲଂୱଚନୀୟତା ।
ପଟିଗ୍ଗଣ୍ହନତାଦୀନଂ, ୱସା ପଞ୍ଚଙ୍ଗିକଂ ମତଂ ॥
ଇଦଞ୍ହି ଛସମୁଟ୍ଠାନଂ, ଅଚିତ୍ତକମୁଦୀରିତଂ ।
ଅଲଂୱଚନୀୟତ୍ତଂ ୱା, ପଣ୍ଣତ୍ତିଂ ୱା ଅଜାନତୋ ॥
ଗହେତ୍ୱା ସାସନଂ କାୟ-ୱିକାରେନୂପଗମ୍ମ ତଂ ।
ୱୀମଂସିତ୍ୱା ହରନ୍ତସ୍ସ, ଗରୁକଂ କାୟତୋ ସିୟା ॥
ସୁତ୍ୱା ୟଥାନିସିନ୍ନୋୱ, ୱଚନଂ ଇତ୍ଥିୟା ପୁନ ।
ତଂ ତତ୍ଥେୱାଗତସ୍ସେୱ, ଆରୋଚେନ୍ତସ୍ସ ୱାଚତୋ ॥
ଅଜାନନ୍ତସ୍ସ ପଣ୍ଣତ୍ତିଂ, କାୟୱାଚାହି ତଂ ୱିଧିଂ ।
କରୋତୋ ହରତୋ ୱାପି, ଗରୁକଂ କାୟୱାଚତୋ ॥
ଜାନିତ୍ୱାପି କରୋନ୍ତସ୍ସ, ଗରୁକାପତ୍ତିୟୋ ତଥା ।
ସଚିତ୍ତକେହି ତୀହେୱ, ସମୁଟ୍ଠାନେହି ଜାୟରେ ॥
ସଞ୍ଚରିତ୍ତକଥା ।
ସୟଂୟାଚିତକେହେୱ, କୁଟିକଂ ଅପ୍ପମାଣିକଂ ।
ଅତ୍ତୁଦ୍ଦେସଂ କରୋନ୍ତସ୍ସ, ତଥାଦେସିତୱତ୍ଥୁକଂ ॥
ହୋନ୍ତି ସଙ୍ଘାଦିସେସା ଦ୍ୱେ, ସାରମ୍ଭାଦୀସୁ ଦୁକ୍କଟଂ ।
ସଚେ ଏକୱିପନ୍ନା ସା, ଗରୁକଂ ଏକକଂ ସିୟା ॥
ପୁରିସଂ ୟାଚିତୁଂ କମ୍ମ-ସହାୟତ୍ଥାୟ ୱଟ୍ଟତି ।
ମୂଲଚ୍ଛେଜ୍ଜୱସେନେୱ, ୟାଚମାନସ୍ସ ଦୁକ୍କଟଂ ॥
ଅୱଜ୍ଜଂ ହତ୍ଥକମ୍ମମ୍ପି, ୟାଚିତୁଂ ପନ ୱଟ୍ଟତି ।
ହତ୍ଥକମ୍ମମ୍ପି ନାମେତଂ, କିଞ୍ଚି ୱତ୍ଥୁ ନ ହୋତି ହି ॥
ଗୋଣମାୟାଚମାନସ୍ସ, ଠପେତ୍ୱା ଞାତକାଦିକେ ।
ଦୁକ୍କଟଂ ତସ୍ସ ନିଦ୍ଦିଟ୍ଠଂ, ମୂଲଚ୍ଛେଜ୍ଜେନ ତେସୁପି ॥
‘‘ଗୋଣଂ ଦେମା’’ତି ୱୁତ୍ତେପି, ଗହେତୁଂ ନ ଚ ୱଟ୍ଟତି ।
ସକଟଂ ଦାରୁଭଣ୍ଡତ୍ତା, ଗହେତୁଂ ପନ ୱଟ୍ଟତି ॥
ୱାସିଫରସୁକୁଦ୍ଦାଲ-କୁଠାରାଦୀସ୍ୱୟଂ ନୟୋ ।
ଅନଜ୍ଝାୱୁତ୍ଥକଂ ସବ୍ବଂ, ହରାପେତୁମ୍ପି ୱଟ୍ଟତି ॥
ୱଲ୍ଲିଆଦିମ୍ହି ସବ୍ବସ୍ମିଂ, ଗରୁଭଣ୍ଡପ୍ପହୋନକେ ।
ପରେସଂ ସନ୍ତକେୟେୱ, ହୋତି ଆପତ୍ତି ଦୁକ୍କଟଂ ॥
ପଚ୍ଚୟେସୁ ହି ତୀସ୍ୱେୱ, ୱିଞ୍ଞତ୍ତି ନ ଚ ୱଟ୍ଟତି ।
ତତିୟେ ପରିକଥୋଭାସ-ନିମିତ୍ତାନି ଚ ଲବ୍ଭରେ ॥
‘‘ଅଦେସିତେ ଚ ୱତ୍ଥୁସ୍ମିଂ, ପମାଣେନାଧିକଂ କୁଟିଂ ।
କରିସ୍ସାମୀ’’ତି ଚିନ୍ତେତ୍ୱା, ଅରଞ୍ଞଂ ଗଚ୍ଛତୋପି ଚ ॥
ଫରସୁଂ ୱାପି ୱାସିଂ ୱା, ନିସେନ୍ତସ୍ସାପି ଦୁକ୍କଟଂ ।
ଛିନ୍ଦତୋ ଦୁକ୍କଟଂ ରୁକ୍ଖଂ, ତସ୍ସ ପାଚିତ୍ତିୟା ସହ ॥
ଏୱଂ ପୁବ୍ବପୟୋଗସ୍ମିଂ, କୁଟିକାରକଭିକ୍ଖୁନୋ ।
ୟଥାପୟୋଗମାପତ୍ତିଂ, ୱିନୟଞ୍ଞୂ ୱିନିଦ୍ଦିସେ ॥
ୟା ପନ ଦ୍ୱୀହି ପିଣ୍ଡେହି, ନିଟ୍ଠାନଂ ତୁ ଗମିସ୍ସତି ।
ହୋତି ଥୁଲ୍ଲଚ୍ଚୟଂ ତେସୁ, ପଠମେ ଦୁତିୟେ ଗରୁ ॥
ଅନାପତ୍ତି ସଚଞ୍ଞସ୍ସ, ଦେତି ୱିପ୍ପକତଂ କୁଟିଂ ।
ତଥା ଭୂମିଂ ସମଂ କତ୍ୱା, ଭିନ୍ଦତୋପି ଚ ତଂ କୁଟିଂ ॥
ଗୁହଂ ଲେଣଂ କରୋନ୍ତସ୍ସ, ତିଣପଣ୍ଣଚ୍ଛଦମ୍ପି ୱା ।
ୱାସାଗାରଂ ଠପେତ୍ୱାନ, ଅଞ୍ଞସ୍ସତ୍ଥାୟ ୱା ତଥା ॥
ଦେସାପେତ୍ୱାୱ ଭିକ୍ଖୂହି, ୱତ୍ଥୁଂ ପନ ଚ ଭିକ୍ଖୁନୋ ।
କ୍ରିୟତୋୱ ସମୁଟ୍ଠାତି, କରୋତୋ ଅପ୍ପମାଣିକଂ ॥
ଅଦେସେତ୍ୱା କରୋନ୍ତସ୍ସ, ତଂ କ୍ରିୟାକ୍ରିୟତୋ ସିୟା ।
ସମୁଟ୍ଠାନାଦୟୋ ସେସା, ସଞ୍ଚରିତ୍ତସମା ମତା ॥
କୁଟିକାରସିକ୍ଖାପଦକଥା ।
ଅଦେସେତ୍ୱା ସଚେ ୱତ୍ଥୁଂ, ୟୋ କରେୟ୍ୟ ମହଲ୍ଲକଂ ।
ୱିହାରଂ ଅତ୍ତୱାସତ୍ଥଂ, ଗରୁକଂ ତସ୍ସ ନିଦ୍ଦିସେ ॥
ପମାଣାତିକ୍କମେନାପି, ଦୋସୋ ନତ୍ଥି ମହଲ୍ଲକେ ।
ତସ୍ମା କ୍ରିୟସମୁଟ୍ଠାନା-ଭାୱଂ ସମୁପଲକ୍ଖୟେ ॥
ପମାଣନିୟମାଭାୱା, ଏକସଙ୍ଘାଦିସେସତା ।
ସମୁଟ୍ଠାନାଦିକଂ ସେସଂ, ଅନନ୍ତରସମଂ ମତଂ ॥
ମହଲ୍ଲକକଥା ।
ପାରାଜିକାନି ୱୁତ୍ତାନି, ଚତୁୱୀସତି ସତ୍ଥୁନା ।
ଭିକ୍ଖୁନୋ ଅନୁରୂପାନି, ତେସୁ ଏକୂନୱୀସତି ॥
ଅମୂଲକେନ ଚୋଦେତି, ହୁତ୍ୱା ଚାୱନଚେତନୋ ।
ସୁଦ୍ଧଂ ୱା ୟଦି ୱାସୁଦ୍ଧଂ, ତେସୁ ଅଞ୍ଞତରେନ ୟୋ ॥
ଗରୁକଂ ତସ୍ସ ଆପତ୍ତିଂ, କତୋକାସମ୍ହି ନିଦ୍ଦିସେ ।
ତଥେୱ ଅକତୋକାସେ, ଦୁକ୍କଟାପତ୍ତିୟା ସହ ॥
‘‘କୋଣ୍ଠୋସି ଚ ନିଗଣ୍ଠୋସି ।
ସାମଣେରୋସି ତାପସୋ ।
ବ୍ବତିକୋସି ଉପାସକୋ ॥
ଦୁସ୍ସୀଲୋ ପାପଧମ୍ମୋସି, ଅନ୍ତୋପୂତି ଅୱସ୍ସୁତୋ’’ ।
ଇଚ୍ଚେୱମ୍ପି ୱଦନ୍ତସ୍ସ, ଗରୁକଂ ତସ୍ସ ନିଦ୍ଦିସେ ॥
ସମ୍ମୁଖା ହତ୍ଥମୁଦ୍ଦାୟ, ଚୋଦେନ୍ତସ୍ସପି ତଙ୍ଖଣେ ।
ତଂ ଚେ ପରୋ ୱିଜାନାତି, ହୋତି ଆପତ୍ତି ଭିକ୍ଖୁନୋ ॥
ଗରୁକଂ ସମ୍ମୁଖେ ଠତ୍ୱା, ଚୋଦାପେନ୍ତସ୍ସ କେନଚି ।
ତସ୍ସ ୱାଚାୟ ୱାଚାୟ, ଚୋଦାପେନ୍ତସ୍ସ ନିଦ୍ଦିସେ ॥
ଅଥ ସୋପି ‘‘ମୟା ଦିଟ୍ଠଂ, ସୁତଂ ୱା’’ତି ଚ ଭାସତି ।
ତେସଂ ଦ୍ୱିନ୍ନମ୍ପି ସଙ୍ଘାଦି-ସେସୋ ହୋତି ନ ସଂସୟୋ ॥
ଦୂତଂ ୱା ପନ ପେସେତ୍ୱା, ପଣ୍ଣଂ ୱା ପନ ସାସନଂ ।
ଚୋଦାପେନ୍ତସ୍ସ ଆପତ୍ତି, ନ ହୋତୀତି ପକାସିତା ॥
ତଥା ସଙ୍ଘାଦିସେସେହି, ୱୁତ୍ତେ ଚାୱନସଞ୍ଞିନୋ ।
ହୋତି ପାଚିତ୍ତିୟାପତ୍ତି, ସେସାପତ୍ତୀହି ଦୁକ୍କଟଂ ॥
ଅକ୍କୋସନାଧିପ୍ପାୟସ୍ସ, ଅକତୋକାସମତ୍ତନା ।
ସହ ପାଚିତ୍ତିୟେନସ୍ସ, ୱଦନ୍ତସ୍ସ ଚ ଦୁକ୍କଟଂ ॥
ଅସମ୍ମୁଖା ୱଦନ୍ତସ୍ସ, ଆପତ୍ତୀହିପି ସତ୍ତହି ।
ତଥା କମ୍ମଂ କରୋନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ନ ଦୋସୁମ୍ମତ୍ତକାଦୀନଂ, ହୋତି ପଞ୍ଚଙ୍ଗସଂୟୁତଂ ।
ଉପସମ୍ପନ୍ନତା ତସ୍ମିଂ, ପୁଗ୍ଗଲେ ସୁଦ୍ଧସଞ୍ଞିତା ॥
ପାରାଜିକେନ ଚୋଦେତି, ୟେନ ତସ୍ସ ଅମୂଲତା ।
ସମ୍ମୁଖା ଚୋଦନା ଚେୱ, ତସ୍ସ ଚାୱନସଞ୍ଞିନୋ ॥
ତଙ୍ଖଣେ ଜାନନଞ୍ଚେୱ, ପଞ୍ଚଙ୍ଗାନି ଭୱନ୍ତି ହି ।
ଇଦଂ ତୁ ତିସମୁଟ୍ଠାନଂ, ସଚିତ୍ତଂ ଦୁକ୍ଖୱେଦନଂ ॥
ଦୁଟ୍ଠଦୋସକଥା ।
ଲେସମତ୍ତମୁପାଦାୟ, ଭିକ୍ଖୁମନ୍ତିମୱତ୍ଥୁନା ।
ଚୋଦେୟ୍ୟ ଗରୁକାପତ୍ତି, ସଚେ ଚାୱନଚେତନୋ ॥
ଚୋଦେତି ୱା ତଥାସଞ୍ଞୀ, ଚୋଦାପେତି ପରେନ ୱା ।
ଅନାପତ୍ତି ସିୟା ସେସୋ, ଅନନ୍ତରସମୋ ମତୋ ॥
ଦୁତିୟଦୁଟ୍ଠଦୋସକଥା ।
ସମଗ୍ଗସ୍ସ ଚ ସଙ୍ଘସ୍ସ, ଭେଦତ୍ଥଂ ୱାୟମେୟ୍ୟ ୟୋ ।
ଭେଦହେତୁଂ ଗହେତ୍ୱା ୱା, ତିଟ୍ଠେୟ୍ୟ ପରିଦୀପୟଂ ॥
ସୋ ହି ଭିକ୍ଖୂହି ୱତ୍ତବ୍ବୋ, ‘‘ଭେଦତ୍ଥଂ ମା ପରକ୍କମ’’ ।
ଇତି ‘‘ସଙ୍ଘସ୍ସ ମା ତିଟ୍ଠ, ଗହେତ୍ୱା ଭେଦକାରଣଂ’’ ॥
ୱୁଚ୍ଚମାନୋ ହି ତେହେୱ, ନିସ୍ସଜ୍ଜେୟ୍ୟ ନ ଚେୱ ୟଂ ।
ସମନୁଭାସିତବ୍ବୋ ତଂ, ଅଚ୍ଚଜଂ ଗରୁକଂ ଫୁସେ ॥
ପରକ୍କମନ୍ତଂ ସଙ୍ଘସ୍ସ, ଭିକ୍ଖୁଂ ଭେଦାୟ ଭିକ୍ଖୁନୋ ।
ଦିସ୍ୱା ସୁତ୍ୱା ହି ଞତ୍ୱା ୱା, ଅୱଦନ୍ତସ୍ସ ଦୁକ୍କଟଂ ॥
ଗନ୍ତ୍ୱା ଚ ପନ ୱତ୍ତବ୍ବୋ, ଅଦ୍ଧୟୋଜନତାଦିକଂ ।
ଦୂରମ୍ପି ପନ ଗନ୍ତବ୍ବଂ, ସଚେ ସକ୍କୋତି ତାୱଦେ ॥
ତିକ୍ଖତ୍ତୁଂ ପନ ୱୁତ୍ତସ୍ସ, ଅପରିଚ୍ଚଜତୋପି ତଂ ।
ଦୂତଂ ୱା ପନ ପଣ୍ଣଂ ୱା, ପେସତୋପି ଚ ଦୁକ୍କଟଂ ॥
ଞତ୍ତିୟା ପରିୟୋସାନେ, ଦୁକ୍କଟଂ ପରିଦୀପିତଂ ।
କମ୍ମୱାଚାହି ଚ ଦ୍ୱୀହି, ହୋତି ଥୁଲ୍ଲଚ୍ଚୟଂ ଦ୍ୱୟଂ ॥
ୟ୍ୟ-କାରେ ପନ ସମ୍ପତ୍ତେ, ଗରୁକେୟେୱ ତିଟ୍ଠତି ।
ପସ୍ସମ୍ଭନ୍ତି ହି ତିସ୍ସୋପି, ଭିକ୍ଖୁନୋ ଦୁକ୍କଟାଦୟୋ ॥
ଅକତେ ପନ କମ୍ମସ୍ମିଂ, ଅପରିଚ୍ଚଜତୋପି ଚ ।
ତସ୍ସ ସଙ୍ଘାଦିସେସେନ, ଅନାପତ୍ତି ପକାସିତା ॥
ଞତ୍ତିତୋ ପନ ପୁବ୍ବେ ୱା, ପଚ୍ଛା ୱା ତଙ୍ଖଣେପି ୱା ।
ଅସମ୍ପତ୍ତେ ୟ୍ୟ-କାରସ୍ମିଂ, ପଟିନିସ୍ସଜ୍ଜତୋପି ଚ ॥
ପଟିନିସ୍ସଜ୍ଜତୋ ୱାପି, ତଂ ୱା ସମନୁଭାସତୋ ।
ତଥେୱୁମ୍ମତ୍ତକାଦୀନଂ, ଅନାପତ୍ତି ପକାସିତା ॥
ୟଞ୍ହି ଭିକ୍ଖୁମନୁଦ୍ଦିସ୍ସ, ମଚ୍ଛମଂସଂ କତଂ ଭୱେ ।
ୟସ୍ମିଞ୍ଚ ନିବ୍ବେମତିକୋ, ତଂ ସବ୍ବଂ ତସ୍ସ ୱଟ୍ଟତି ॥
ସମୁଦ୍ଦିସ୍ସ କତଂ ଞତ୍ୱା, ଭୁଞ୍ଜନ୍ତସ୍ସେୱ ଦୁକ୍କଟଂ ।
ତଥା ଅକପ୍ପିୟଂ ମଂସଂ, ଅଜାନିତ୍ୱାପି ଖାଦତୋ ॥
ହତ୍ଥୁସ୍ସଚ୍ଛମନୁସ୍ସାନଂ, ଅହିକୁକ୍କୁରଦୀପିନଂ ।
ସୀହବ୍ୟଗ୍ଘତରଚ୍ଛାନଂ, ମଂସଂ ହୋତି ଅକପ୍ପିୟଂ ॥
ଥୁଲ୍ଲଚ୍ଚୟଂ ମନୁସ୍ସାନଂ, ମଂସେ ସେସେସୁ ଦୁକ୍କଟଂ ।
ସଚିତ୍ତକଂ ସମୁଦ୍ଦିସ୍ସ-କତଂ ସେସମଚିତ୍ତକଂ ॥
ପୁଚ୍ଛିତ୍ୱାୟେୱ ମଂସାନଂ, ଭିକ୍ଖୂନଂ ଗହଣଂ ପନ ।
ଏତଂ ୱତ୍ତନ୍ତି ୱତ୍ତଟ୍ଠା, ୱଦନ୍ତି ୱିନୟଞ୍ଞୁନୋ ॥
ଇଦମେକସମୁଟ୍ଠାନଂ, ୱୁତ୍ତଂ ସମନୁଭାସନଂ ।
କାୟକମ୍ମଂ ୱଚୀକମ୍ମଂ, ଅକ୍ରିୟଂ ଦୁକ୍ଖୱେଦନଂ ॥
ସଙ୍ଘଭେଦକଥା ।
ଦୁତିୟେ ସଙ୍ଘଭେଦସ୍ମିଂ, ୱତ୍ତବ୍ବଂ ନତ୍ଥି କିଞ୍ଚିପି ।
ସମୁଟ୍ଠାନାଦୟୋପିସ୍ସ, ପଠମେନ ସମା ମତା ॥
ଦୁତିୟସଙ୍ଘଭେଦକଥା ।
ଉଦ୍ଦେସପରିୟାପନ୍ନେ, ଭିକ୍ଖୁ ଦୁବ୍ବଚଜାତିକୋ ।
ଅୱଚନୀୟମତ୍ତାନଂ, କରୋତି ଗରୁକଂ ସିୟା ॥
ଦୁବ୍ବଚେପି ପନେତସ୍ମିଂ, ସଙ୍ଘଭେଦକୱଣ୍ଣନେ ।
ସବ୍ବୋ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ଦୁବ୍ବଚକଥା ।
ୟୋ ଛନ୍ଦଗାମିତାଦୀହି, ପାପେନ୍ତୋ କୁଲଦୂସକୋ ॥
କମ୍ମେ କରିୟମାନେ ତଂ, ଅଚ୍ଚଜଂ ଗରୁକଂ ଫୁସେ ॥
ଚୁଣ୍ଣଂ ପଣ୍ଣଂ ଫଲଂ ପୁପ୍ଫଂ, ୱେଳୁଂ କଟ୍ଠଞ୍ଚ ମତ୍ତିକଂ ।
କୁଲସଙ୍ଗହଣତ୍ଥାୟ, ଅତ୍ତନୋ ୱା ପରସ୍ସ ୱା ॥
ସନ୍ତକଂ ଦଦତୋ ହୋତି, କୁଲଦୂସନଦୁକ୍କଟଂ ।
ଭଣ୍ଡଗ୍ଘେନ ଚ କାତବ୍ବୋ, ଥେୟ୍ୟା ସଙ୍ଘଞ୍ଞସନ୍ତକେ ॥
ସଙ୍ଘିକଂ ଗରୁଭଣ୍ଡଂ ୱା, ସେନାସନନିୟାମିତଂ ।
ୟୋପିସ୍ସରୱତାୟେୱ, ଦେନ୍ତୋ ଥୁଲ୍ଲଚ୍ଚୟଂ ଫୁସେ ॥
ହରିତ୍ୱା ୱା ହରାପେତ୍ୱା, ପକ୍କୋସିତ୍ୱାଗତସ୍ସ ୱା ।
କୁଲସଙ୍ଗହଣତ୍ଥାୟ, ପୁପ୍ଫଂ ଦେନ୍ତସ୍ସ ଦୁକ୍କଟଂ ॥
ହରିତ୍ୱା ୱା ହରାପେତ୍ୱା, ପିତୂନଂ ପନ ୱଟ୍ଟତି ।
ଦାତୁଂ ପୁପ୍ଫଂ ପନଞ୍ଞସ୍ସ, ଆଗତସ୍ସେୱ ଞାତିନୋ ॥
ତଞ୍ଚ ଖୋ ୱତ୍ଥୁପୂଜତ୍ଥଂ, ଦାତବ୍ବଂ ନ ପନଞ୍ଞଥା ।
ସିୱାଦିପୂଜନତ୍ଥଂ ୱା, ମଣ୍ଡନତ୍ଥଂ ନ ୱଟ୍ଟତି ॥
ଫଲାଦୀସୁପି ସେସେସୁ, ଭିକ୍ଖୁନା ୱିନୟଞ୍ଞୁନା ।
ପୁପ୍ଫେ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ପୁପ୍ଫାଦିଭାଜନେ କୋଚି, ଆଗଚ୍ଛତି ସଚେ ପନ ।
ସମ୍ମତେନସ୍ସ ଦାତବ୍ବଂ, ଞାପେତ୍ୱା ଇତରେନ ତୁ ॥
ଉପଡ୍ଢଭାଗଂ ଦାତବ୍ବଂ, ଇତି ୱୁତ୍ତଂ କୁରୁନ୍ଦିୟଂ।
‘‘ଥୋକଂ ଥୋକ’’ନ୍ତି ନିଦ୍ଦିଟ୍ଠଂ, ମହାପଚ୍ଚରିୟଂ ପନ ॥
ଗିଲାନାନଂ ମନୁସ୍ସାନଂ, ଦାତବ୍ବଂ ତୁ ସକଂ ଫଲଂ ।
ପରିବ୍ବୟୱିହୀନସ୍ସ, ସମ୍ପତ୍ତିସ୍ସରିୟସ୍ସପି ॥
ସଙ୍ଘାରାମେ ୟଥା ୟତ୍ର, ସଙ୍ଘେନ କତିକା କତା ।
ଫଲରୁକ୍ଖପରିଚ୍ଛେଦଂ, କତ୍ୱା ତତ୍ରାଗତସ୍ସପି ॥
ଫଲଂ ୟଥାପରିଚ୍ଛେଦଂ, ଦଦତୋ ପନ ୱଟ୍ଟତି ।
‘‘ଦସ୍ସେତବ୍ବାପି ୱା ରୁକ୍ଖା’’, ‘‘ଇତୋ ଗଣ୍ହ ଫଲ’’ନ୍ତି ଚ ॥
ସୟଂ ଖଣିତ୍ୱା ପଥୱିଂ, ମାଲାଗଚ୍ଛାଦିରୋପନେ ।
ହୋତି ପାଚିତ୍ତିୟେନସ୍ସ, ଦୁକ୍କଟଂ କୁଲଦୂସନେ ॥
ଅକପ୍ପିୟେନ ୱାକ୍ୟେନ, ତଥା ରୋପାପନେପି ଚ ।
ସବ୍ବତ୍ଥ ଦୁକ୍କଟଂ ୱୁତ୍ତଂ, ଭିକ୍ଖୁନୋ କୁଲଦୂସନେ ॥
ରୋପନେ ଦୁକ୍କଟଂୟେୱ, ହୋତି କପ୍ପିୟଭୂମିୟଂ ।
ତଥା ରୋପାପନେ ୱୁତ୍ତଂ, ଉଭୟତ୍ଥ ଚ ଭିକ୍ଖୁନୋ ॥
ସକିଂ ଆଣତ୍ତିୟା ତସ୍ସ, ବହୂନଂ ରୋପନେ ପନ ।
ସଦୁକ୍କଟା ତୁ ପାଚିତ୍ତି, ସୁଦ୍ଧଂ ୱା ଦୁକ୍କଟଂ ସିୟା ॥
କପ୍ପିୟେନେୱ ୱାକ୍ୟେନ, ଉଭୟତ୍ଥ ଚ ଭୂମିୟା ।
ରୋପନେ ପରିଭୋଗତ୍ଥଂ, ନ ଦୋସୋ କୋଚି ୱିଜ୍ଜତି ॥
କପ୍ପିୟଭୂମି ଚେ ହୋତି, ସୟଂ ରୋପେତୁମେୱ ଚ ।
ୱଟ୍ଟତୀତି ଚ ନିଦ୍ଦିଟ୍ଠଂ, ମହାପଚ୍ଚରିୟଂ ପନ ॥
ଆରାମାଦୀନମତ୍ଥାୟ, ସୟଂ ସଂରୋପିତସ୍ସ ୱା ।
ୱଟ୍ଟତେୱ ଚ ଭିକ୍ଖୂନଂ, ତଂ ଫଲଂ ପରିଭୁଞ୍ଜିତୁଂ ॥
ସିଞ୍ଚନେ ପନ ସବ୍ବତ୍ଥ, ସୟଂ ସିଞ୍ଚାପନେପି ଚ ।
ଅକପ୍ପିୟୋଦକେନେୱ, ହୋତି ପାଚିତ୍ତି ଭିକ୍ଖୁନୋ ॥
କୁଲସଙ୍ଗହଣତ୍ଥଞ୍ଚ, ପରିଭୋଗତ୍ଥମେୱ ୱା ।
ସଦ୍ଧିଂ ପାଚିତ୍ତିୟେନସ୍ସ, ସିଞ୍ଚତୋ ହୋତି ଦୁକ୍କଟଂ ॥
ତେସଂୟେୱ ପନତ୍ଥାୟ, ଦ୍ୱିନ୍ନଂ କପ୍ପିୟୱାରିନା ।
ସିଞ୍ଚନେ ଦୁକ୍କଟଂ ୱୁତ୍ତଂ, ତଥା ସିଞ୍ଚାପନେପି ଚ ॥
କୁଲସଙ୍ଗହଣତ୍ଥାୟ, ପୁପ୍ଫାନଂ ଓଚିନାପନେ ।
ସୟମୋଚିନନେ ଚାପି, ସପାଚିତ୍ତିୟଦୁକ୍କଟଂ ॥
ପୁପ୍ଫାନଂ ଗଣନାୟସ୍ସ, ପୁପ୍ଫମୋଚିନତୋ ପନ ।
ହୋତି ପାଚିତ୍ତିୟାପତ୍ତି, କୁଲତ୍ଥଂ ଚେ ସଦୁକ୍କଟା ॥
ଗନ୍ଥିମଂ ଗୋପ୍ଫିମଂ ନାମ, ୱେଧିମଂ ୱେଠିମମ୍ପି ଚ ।
ପୂରିମଂ ୱାୟିମଂ ଚେତି, ଛବ୍ବିଧୋ ପୁପ୍ଫସଙ୍ଗହୋ ॥
ତତ୍ଥ ଦଣ୍ଡେନ ଦଣ୍ଡଂ ୱା, ୱଣ୍ଟେନପି ଚ ୱଣ୍ଟକଂ ।
ଗନ୍ଥିତ୍ୱା କରଣଂ ସବ୍ବଂ, ‘‘ଗନ୍ଥିମ’’ନ୍ତି ପୱୁଚ୍ଚତି ॥
ଗୋପ୍ଫିମଂ ନାମ ଗୋପ୍ଫେତ୍ୱା, ସୁତ୍ତାଦୀହି କରୀୟତି ।
ଏକତୋୱଣ୍ଟିକା ମାଲା, ଉଭତୋୱଣ୍ଟିକା ଚ ତଂ ॥
ୱେଧିମଂ ନାମ ୱିଜ୍ଝିତ୍ୱା, ବୁନ୍ଦେସୁ ମକୁଲାଦିକଂ ।
ଆୱୁତା ସୂଚିଆଦୀହି, ମାଲାୱିକତି ୱୁଚ୍ଚତି ॥
ୱେଠିମଂ ନାମ ୱେଠେତ୍ୱା, କତଂ ମାଲାଗୁଣେହି ୱା ।
ୱାକାଦୀହି ଚ ବଦ୍ଧଂ ୱା, ‘‘ୱେଠିମ’’ନ୍ତି ପୱୁଚ୍ଚତି ॥
ପୂରିମଂ ପନ ଦଟ୍ଠବ୍ବଂ, ପୁପ୍ଫମାଲାହି ପୂରଣେ ।
ବୋଧିଂ ପୁପ୍ଫପଟାଦୀନଂ, ପରିକ୍ଖେପେସୁ ଲବ୍ଭତି ॥
ୱାୟିମଂ ନାମ ଦଟ୍ଠବ୍ବଂ, ପୁପ୍ଫରୂପପଟାଦିସୁ ।
ପୁପ୍ଫମାଲାଗୁଣେହେୱ, ୱାୟିତ୍ୱା କରଣେ ପନ ॥
ସବ୍ବମେତଂ ସୟଂ କାତୁଂ, କାରାପେତୁଂ ପରେହି ୱା ।
ଭିକ୍ଖୂନଂ ଭିକ୍ଖୁନୀନଞ୍ଚ, ବୁଦ୍ଧସ୍ସପି ନ ୱଟ୍ଟତି ॥
ତଥା କଲମ୍ବକଂ କାତୁଂ, ଅଡ୍ଢଚନ୍ଦକମେୱ ୱା ।
ଅଞ୍ଞେହି ପୂରିତଂ ପୁପ୍ଫ-ପଟଂ ୱା ୱାୟିତୁମ୍ପି ଚ ॥
ପିଟ୍ଠକାଚମୟଂ ଦାମଂ, ଗେଣ୍ଡୁପୁପ୍ଫମୟମ୍ପି ଚ ।
ଖରପତ୍ତମୟଂ ମାଲଂ, ସବ୍ବଂ କାତୁଂ ନ ୱଟ୍ଟତି ॥
କଣିକାରାଦିପୁପ୍ଫାନି, ୱିତାନେ ବଦ୍ଧକଣ୍ଟକେ ।
ହୀରାଦୀହି ପଟାକତ୍ଥଂ, ୱିଜ୍ଝନ୍ତସ୍ସପି ଦୁକ୍କଟଂ ॥
କଣ୍ଟକାଦୀହି ଭିକ୍ଖୁସ୍ସ, ଏକପୁପ୍ଫମ୍ପି ୱିଜ୍ଝିତୁଂ ।
ପୁପ୍ଫେସୁୟେୱ ୱା ପୁପ୍ଫଂ, ପୱେସେତୁଂ ନ ୱଟ୍ଟତି ॥
ଅସୋକପିଣ୍ଡିଆଦୀନଂ, ଅନ୍ତରେ ଧମ୍ମରଜ୍ଜୁୟା ।
ପୱେସେନ୍ତସ୍ସ ପୁପ୍ଫାନି, ନ ଦୋସୋ କୋଚି ୱିଜ୍ଜତି ॥
ଠପିତେସୁ ପୱେସେତ୍ୱା, କଦଲିଚ୍ଛତ୍ତଭିତ୍ତିସୁ ।
କଣ୍ଟକେସୁପି ପୁପ୍ଫାନି, ୱିଜ୍ଝନ୍ତସ୍ସପି ଦୁକ୍କଟଂ ॥
କପ୍ପିୟଂ ପନ ୱତ୍ତବ୍ବଂ, ୱଚନଂ ୱତ୍ଥୁପୂଜନେ ।
ନିମିତ୍ତୋଭାସପରିୟା, ୱଟ୍ଟନ୍ତୀତି ପକାସିତା ॥
ନ କେୱଲମକତ୍ତବ୍ବଂ, କୁଲଦୂସନମେୱ ଚ ।
ଅଥ ଖୋ ୱେଜ୍ଜକମ୍ମାଦି, ନ କତ୍ତବ୍ବଂ କୁଦାଚନଂ ॥
କାତବ୍ବଂ ପନ ଭେସଜ୍ଜଂ, ପଞ୍ଚନ୍ନଂ ସହଧମ୍ମିନଂ ।
କତ୍ୱାପ୍ୟକତୱିଞ୍ଞତ୍ତିଂ, କା କଥା ଅତ୍ତନୋ ଧନେ ॥
ତଥା ମାତାପିତୂନମ୍ପି, ତଦୁପଟ୍ଠାକଜନ୍ତୁନୋ ।
ଭଣ୍ଡୁକସ୍ସତ୍ତନୋ ଚେୱ, ୱେୟ୍ୟାୱଚ୍ଚକରସ୍ସପି ॥
ଜେଟ୍ଠଭାତା କନିଟ୍ଠୋ ଚ, ତଥା ଭଗିନିୟୋ ଦୁୱେ ।
ଚୂଳମାତା ଚୂଳପିତା, ମହାମାତା ମହାପିତା ॥
ପିତୁଚ୍ଛା ମାତୁଲୋ ଚାତି, ଦସିମେ ଞାତୟୋ ମତା ।
ଇମେସମ୍ପି ଦସନ୍ନଞ୍ଚ, କାତୁଂ ୱଟ୍ଟତି ଭିକ୍ଖୁନୋ ॥
ସଚେ ଭେସଜ୍ଜମେତେସଂ, ନପ୍ପହୋତି ନ ହୋତି ୱା ।
ୟାଚନ୍ତିପି ଚ ତଂ ଭିକ୍ଖୁଂ, ଦାତବ୍ବଂ ତାୱକାଲିକଂ ॥
ସଚେ ତେ ନ ଚ ୟାଚନ୍ତି, ଦାତବ୍ବଂ ତାୱକାଲିକଂ ।
ଆଭୋଗଂ ପନ କତ୍ୱା ୱା, ‘‘ଦସ୍ସନ୍ତି ପୁନ ମେ ଇମେ’’ ॥
ଏତେସଂ ତୁ କୁଲା ୟାୱ, ସତ୍ତମା କୁଲଦୂସନଂ ।
ଭେସଜ୍ଜକରଣାପତ୍ତି, ୱିଞ୍ଞତ୍ତି ୱା ନ ରୂହତି ॥
ଭାତୁଜାୟାପି ୱା ହୋତି, ସଚେ ଭଗିନିସାମିକୋ ।
ସଚେ ତେ ଞାତକା ହୋନ୍ତି, କାତୁଂ ତେସମ୍ପି ୱଟ୍ଟତି ॥
ଅଞ୍ଞାତକା ସଚେ ହୋନ୍ତି, ଭାତୁନୋ ଅନୁଜାୟ ୱା ।
‘‘ତୁମ୍ହାକଂ ଜଗ୍ଗନଟ୍ଠାନେ, ଦେଥା’’ତି ଚ ୱଦେ ବୁଧୋ ॥
ଅଥ ତେସମ୍ପି ପୁତ୍ତାନଂ, କତ୍ୱା ଦାତବ୍ବମେୱ ୱା ।
‘‘ମାତାପିତୂନଂ ତୁମ୍ହାକଂ, ଦେଥା’’ତି ୱିନୟଞ୍ଞୁନା ॥
ଅଞ୍ଞୋପି ୟୋ କୋଚି ପନିସ୍ସରୋ ୱା ।
ଚୋରୋପି ୱା ୟୁଦ୍ଧପରାଜିତୋ ୱା ।
ଆଗନ୍ତୁକୋ ଖୀଣପରିବ୍ବୟୋ ୱା ।
ଅକଲ୍ଲକୋ ଞାତିଜନୁଜ୍ଝିତୋ ୱା ॥
ଏତେସଂ ପନ ସବ୍ବେସଂ, ଅପଚ୍ଚାସୀସତା ସତା ।
କାତବ୍ବୋ ପଟିସନ୍ଥାରୋ, ଭିକ୍ଖୁନା ସାଧୁନାଧୁନା ॥
ପରିତ୍ତୋଦକସୁତ୍ତାନି, ୱୁତ୍ତେ ଦେଥାତି କେନଚି ।
ଜଲଂ ହତ୍ଥେନ ଚାଲେତ୍ୱା, ମଦ୍ଦିତ୍ୱା ପନ ସୁତ୍ତକଂ ॥
ଦାତବ୍ବଂ ଭିକ୍ଖୁନା କତ୍ୱା, ତେସମେୱ ଚ ସନ୍ତକଂ ।
ଅତ୍ତନୋ ଉଦକଂ ତେସଂ, ସୁତ୍ତଂ ୱା ଦେତି ଦୁକ୍କଟଂ ॥
ଅନାମଟ୍ଠୋପି ଦାତବ୍ବୋ, ପିଣ୍ଡପାତୋ ୱିଜାନତା ।
ଦ୍ୱିନ୍ନଂ ମାତାପିତୂନମ୍ପି, ତଦୁପଟ୍ଠାୟକସ୍ସ ଚ ॥
ଇସ୍ସରସ୍ସାପି ଦାତବ୍ବୋ, ଚୋରଦାମରିକସ୍ସ ଚ ।
ଭଣ୍ଡୁକସ୍ସତ୍ତନୋ ଚେୱ, ୱେୟ୍ୟାୱଚ୍ଚକରସ୍ସପି ॥
ଦାତୁଂ ପଣ୍ଡୁପଲାସସ୍ସ, ଥାଲକେପି ଚ ୱଟ୍ଟତି ।
ଠପେତ୍ୱା ତଂ ପନଞ୍ଞସ୍ସ, ପିତୁନୋପି ନ ୱଟ୍ଟତି ॥
ଗିହୀନଂ ପନ ଦୂତେୟ୍ୟଂ, ଜଙ୍ଘପେସନିୟମ୍ପି ଚ ।
ସତ୍ଥୁନା ଦୁକ୍କଟଂ ୱୁତ୍ତଂ, କରୋନ୍ତସ୍ସ ପଦେ ପଦେ ॥
ଭଣ୍ଡୁମାତାପିତୂନମ୍ପି, ୱେୟ୍ୟାୱଚ୍ଚକରସ୍ସ ଚ ।
ସାସନଂ ସହଧମ୍ମୀନଂ, ହରିତୁଂ ପନ ୱଟ୍ଟତି ॥
କୁଲଦୂସନକମ୍ମେନ, ଲଦ୍ଧଂ ଅଟ୍ଠୱିଧେନପି ।
ପଞ୍ଚନ୍ନଂ ସହଧମ୍ମୀନଂ, ନ ଚ ୱଟ୍ଟତି ଭୁଞ୍ଜିତୁଂ ॥
ଅଜ୍ଝୋହାରେସୁ ସବ୍ବତ୍ଥ, ଦୁକ୍କଟଂ ପରିଦୀପିତଂ ।
ପରିଭୋଗୱସେନେୱ, ସେସେସୁପି ଅୟଂ ନୟୋ ॥
କତ୍ୱା ରୂପିୟୱୋହାରଂ, ଅଭୂତାରୋଚନେନ ଚ ।
ଉପ୍ପନ୍ନପଚ୍ଚୟା ସବ୍ବେ, ସମାନାତି ପକାସିତା ॥
ୱିଞ୍ଞତ୍ତିନୁପ୍ପଦାନଞ୍ଚ, ୱେଜ୍ଜକମ୍ମମନେସନଂ ।
ପାରିଭଟୁକତଂ ମୁଗ୍ଗ-ସୂପତଂ ୱତ୍ଥୁୱିଜ୍ଜକଂ ॥
ଜଙ୍ଘପେସନିୟଂ ଦୂତ-କମ୍ମଞ୍ଚ କୁଲଦୂସନଂ ।
ଅଭୂତାରୋଚନଂ ବୁଦ୍ଧ-ପଟିକୁଟ୍ଠଂ ୱିୱଜ୍ଜୟେ ॥
ନ ଦୋସୁମ୍ମତ୍ତକାଦୀନଂ, ପଟିନିସ୍ସଜ୍ଜତୋପି ତଂ ।
ସମୁଟ୍ଠାନାଦିକଂ ସବ୍ବଂ, ସଙ୍ଘଭେଦସମଂ ମତଂ ॥
କୁଲଦୂସନକଥା ।
ଜାନଂ ୟାୱତିହଂ ୟେନ, ଛାଦିତାପତ୍ତି ଭିକ୍ଖୁନା ।
ଅକାମା ପରିୱତ୍ଥବ୍ବଂ, ତେନ ତାୱତିହଂ ପନ ॥
ଆପତ୍ତି ଚ ଅନୁକ୍ଖିତ୍ତୋ, ପହୁ ଚାନନ୍ତରାୟିକୋ ।
ଚତୁସ୍ୱପି ଚ ତଂସଞ୍ଞୀ, ତସ୍ସ ଛାଦେତୁକାମତା ॥
ଛାଦନନ୍ତି ପନେତେହି, ଦସହଙ୍ଗେହି ଭିକ୍ଖୁନା ।
ଛନ୍ନା ନାମ ସିୟାପତ୍ତି, ଅରୁଣୁଗ୍ଗମନେନ ସା ॥
ଦ୍ୱେ ଭାଣୱାରା ନିଟ୍ଠିତା ।
ତିୱିଧୋ ପରିୱାସୋ ହି, ତିୱିଧାପେତଚେତସା ।
ପଟିଚ୍ଛନ୍ନୋ ଚ ସୁଦ୍ଧନ୍ତୋ, ସମୋଧାନୋତି ଦୀପିତୋ ॥
ତତ୍ରାୟଂ ତୁ ପଟିଚ୍ଛନ୍ନ-ପରିୱାସୋ ପକାସିତୋ ।
ପଟିଚ୍ଛନ୍ନାୟ ଦାତବ୍ବୋ, ୱସେନାପତ୍ତିୟାତି ଚ ॥
ୱତ୍ଥୁଗୋତ୍ତୱସେନାପି, ନାମାପତ୍ତିୱସେନ ୱା ।
କମ୍ମୱାଚା ହି କାତବ୍ବା, ଦାତବ୍ବୋ ତସ୍ସ ତେନ ଚ ॥
‘‘ୱତ୍ତଂ ସମାଦିୟାମୀ’’ତି, ‘‘ପରିୱାସ’’ନ୍ତି ୱା ପୁନ ।
ସମାଦିୟିତ୍ୱା ସଙ୍ଘସ୍ସ, ଆରୋଚେତବ୍ବମାଦିତୋ ॥
ପୁନପ୍ପୁନାଗତାନମ୍ପି, ଆରୋଚେନ୍ତୋୱ ରତ୍ତିୟା ।
ଛେଦଂ ୱା ୱତ୍ତଭେଦଂ ୱା, ଅକତ୍ୱାୱ ସଦା ୱସେ ॥
ପରିୱାସୋ ୱିସୋଧେତୁଂ, ନ ସକ୍କା ତତ୍ଥ ଚେ ପନ ।
ନିକ୍ଖିପିତ୍ୱାନ ତଂ ୱତ୍ତଂ, ୱତ୍ଥବ୍ବଂ ତେନ ଭିକ୍ଖୁନା ॥
ତତ୍ଥେୱ ସଙ୍ଘମଜ୍ଝେ ୱା, ପୁଗ୍ଗଲେ ୱାପି ନିକ୍ଖିପେ ।
ନିକ୍ଖିପାମୀତି ୱତ୍ତଂ ୱା, ପରିୱାସନ୍ତି ୱା ତଥା ॥
ଏୱମେକପଦେନାପି, ପଦେହି ଦ୍ୱୀହି ୱା ପନ ।
ୱତ୍ତଂ ନିକ୍ଖିପିତବ୍ବଂ ତଂ, ସମାଦାନେପ୍ୟୟଂ ନୟୋ ॥
ନିକ୍ଖିତ୍ତକାଲତୋ ଉଦ୍ଧଂ, ପକତତ୍ତୋତି ୱୁଚ୍ଚତି ।
ପୁନ ପଚ୍ଚୂସକାଲସ୍ମିଂ, ସଦ୍ଧିମେକେନ ଭିକ୍ଖୁନା ॥
ପରିକ୍ଖିତ୍ତୱିହାରସ୍ସ, ଦ୍ୱେ ପରିକ୍ଖେପତୋ ବହି ।
ପରିକ୍ଖେପାରହଟ୍ଠାନା, ଅପରିକ୍ଖିତ୍ତତୋ ବହି ॥
ଲେଡ୍ଡୁପାତେ ଅତିକ୍କମ୍ମ, ଓକ୍କମିତ୍ୱା ଚ ମଗ୍ଗତୋ ।
ଗୁମ୍ବେନ ୱତିୟା ୱାପି, ଛନ୍ନଟ୍ଠାନେ ଠିତେନ ତୁ ॥
ତେନ ଅନ୍ତୋରୁଣେୟେୱ, ୱତ୍ତମାଦାୟ ୱିଞ୍ଞୁନା ।
ଆରୋଚେତ୍ୱାରୁଣେ ତସ୍ମିଂ, ୱୁଟ୍ଠିତେ ତସ୍ସ ସନ୍ତିକେ ॥
ନିକ୍ଖିପିତ୍ୱା ତତୋ ୱତ୍ତଂ, ଗନ୍ତବ୍ବଂ ତୁ ୟଥାସୁଖଂ ।
ଅନ୍ତୋୟେୱାରୁଣେ ଭିକ୍ଖୁ, ଗତୋ ଚେ ୟସ୍ସ କସ୍ସଚି ॥
ଆରୋଚେତ୍ୱାୱ ତଂ ୱତ୍ତଂ, ନିକ୍ଖିପେ ପୁନ ପଣ୍ଡିତୋ ।
ସେସଂ ସମୁଚ୍ଚୟସ୍ସଟ୍ଠ-କଥାୟ ଚ ୱିଭାୱୟେ ॥
ଆପତ୍ତୀନଞ୍ଚ ରତ୍ତୀନଂ, ପରିଚ୍ଛେଦଂ ନ ଜାନତି ।
ୟୋ ତସ୍ସ ପନ ଦାତବ୍ବୋ, ‘‘ସୁଦ୍ଧନ୍ତୋ’’ତି ପୱୁଚ୍ଚତି ॥
ଏସେୱ ପରିସୁଦ୍ଧେହି, ସୁଦ୍ଧନ୍ତୋ ଦୁୱିଧୋ ମତୋ ।
ଚୂଳସୁଦ୍ଧନ୍ତନାମୋ ଚ, ମହାସୁଦ୍ଧନ୍ତନାମକୋ॥
ଦୁୱିଧୋପି ଅୟଂ ରତ୍ତି-ପରିଚ୍ଛେଦଂ ଅଜାନତୋ ।
ଏକଚ୍ଚଂ ସକଲଂ ୱାପି, ଦାତବ୍ବୋ ୱିମତିସ୍ସ ୱା ॥
ଇତରୋପି ସମୋଧାନ-ପରିୱାସୋ ତିଧା ମତୋ ।
ସୋ ଓଧାନସମୋଧାନୋ, ଅଗ୍ଘମିସ୍ସକପୁବ୍ବକୋ॥
ଆପଜ୍ଜିତ୍ୱାନ୍ତରାପତ୍ତିଂ, ଛାଦେନ୍ତସ୍ସ ହି ଭିକ୍ଖୁନୋ ।
ଦିୱସେ ପରିୱୁତ୍ଥେ ତୁ, ଓଧୁନିତ୍ୱା ପଦୀୟତେ ॥
ପୁରିମାପତ୍ତିୟା ମୂଲ-ଦିୱସେ ତୁ ୱିନିଚ୍ଛିତେ ।
ପଚ୍ଛା ଆପନ୍ନମାପତ୍ତିଂ, ସମୋଧାୟ ୱିଧାନତୋ ॥
ୟାଚମାନସ୍ସ ସଙ୍ଘେନ, ଦାତବ୍ବୋ ପନ ଭିକ୍ଖୁନୋ ।
ଏସୋଧାନସମୋଧାନ-ପରିୱାସୋ ପକାସିତୋ ॥
ତଥା ସମ୍ବହୁଲାସ୍ୱେକା, ଦ୍ୱେ ୱା ସମ୍ବହୁଲାପି ୱା ।
ୟା ୟା ଚିରପଟିଚ୍ଛନ୍ନା, ତାସଂ ଅଗ୍ଘୱସେନ ହି ॥
ଆପତ୍ତୀନଂ ତତୋ ଊନ-ପଟିଚ୍ଛନ୍ନାନମେୱ ୟୋ ।
ସମୋଧାୟ ପଦାତବ୍ବୋ, ପରିୱାସୋତି ୱୁଚ୍ଚତି ॥
ନାନାୱତ୍ଥୁକସଞ୍ଞାୟୋ, ସବ୍ବା ଆପତ୍ତିୟୋ ପନ ।
ସବ୍ବାତା ଏକତୋ କତ୍ୱା, ଦାତବ୍ବୋ ମିସ୍ସକୋ ମତୋ ॥
ପରିୱୁତ୍ଥପରିୱାସସ୍ସ, ମାନତ୍ତଂ ଦେୟ୍ୟମୁତ୍ତରି ।
ଛ ରତ୍ତିୟୋ ପଟିଚ୍ଛନ୍ନା-ପଟିଚ୍ଛନ୍ନୱସା ଦୁୱେ ॥
ତତ୍ଥ ୟା ଅପଟିଚ୍ଛନ୍ନା, ହୋତି ଆପତ୍ତି ୟସ୍ସ ତୁ ।
ତସ୍ସ ଦାତବ୍ବମାନତ୍ତଂ, ଅପଟିଚ୍ଛନ୍ନନାମକଂ॥
ୟସ୍ସାପତ୍ତି ପଟିଚ୍ଛନ୍ନା, ପରିୱାସାୱସାନକେ ।
ତସ୍ସ ଦାତବ୍ବମାନତ୍ତଂ, ‘‘ପଟିଚ୍ଛନ୍ନ’’ନ୍ତି ୱୁଚ୍ଚତି ॥
ଗନ୍ତ୍ୱା ଚତୂହି ଭିକ୍ଖୂହି, ପଚ୍ଚୂସସମୟେ ସହ ।
ପରିୱାସେ ୱିନିଦ୍ଦିଟ୍ଠ-ପ୍ପକାରଂ ଦେସମେୱ ଚ ॥
‘‘ୱତ୍ତଂ ସମାଦିୟାମୀ’’ତି, ‘‘ମାନତ୍ତ’’ମିତି ୱା ପନ ।
ଆଦିୟିତ୍ୱାନ ତଂ ତେସଂ, ଆରୋଚେତ୍ୱା ୱିସାରଦୋ ॥
ନିକ୍ଖିପେ ସନ୍ତିକେ ତେସଂ, ୱତ୍ତଂ ତେସୁ ଗତେସୁ ୱା ।
ଭିକ୍ଖୁସ୍ସ ପୁବ୍ବଦିଟ୍ଠସ୍ସ, ଆରୋଚେତ୍ୱାନ ନିକ୍ଖିପେ ॥
ତସ୍ସ ଦାନୱିଧାନଞ୍ଚ, ରତ୍ତିଚ୍ଛେଦାଦିକୋ ନୟୋ ।
ଞେୟ୍ୟୋ ସମୁଚ୍ଚୟସ୍ସଟ୍ଠ-କଥାପାଳିୱସେନ ତୁ ॥
ପୁନ ତଂ ଚିଣ୍ଣମାନତ୍ତଂ, ସଙ୍ଘୋ ୱୀସତିୱଗ୍ଗିକୋ ।
ଅବ୍ଭେୟ୍ୟ ୱିଧିନା ଭିକ୍ଖୁ, ପକତତ୍ତୋ ପୁନବ୍ଭିତୋ ॥
ଛାଦେନ୍ତିୟାପି ଆପତ୍ତିଂ, ପରିୱାସୋ ନ ୱିଜ୍ଜତି ।
ନ ଚ ଭିକ୍ଖୁନିୟାପତ୍ତି, ଅତ୍ତନୋ ଛାଦୟନ୍ତିୟା ॥
ଛାଦେତ୍ୱା ୱାପି ଆପତ୍ତିଂ, ଅଚ୍ଛାଦେତ୍ୱାପି ୱା ପନ ।
କେୱଲଂ ଚରିତବ୍ବନ୍ତି, ପକ୍ଖମାନତ୍ତମେୱ ତୁ ॥
ୱିନୟନୟମତିବୁଦ୍ଧିଦୀପନଂ ।
ୱିନୟୱିନିଚ୍ଛୟମେତମୁତ୍ତମଂ ।
ୱିୱିଧନୟନୟୁତଂ ଉପେନ୍ତି ୟେ ।
ୱିନୟନୟେ ପଟୁତଂ ଉପେନ୍ତି ତେ ॥
ଇତି ୱିନୟୱିନିଚ୍ଛୟେ ସଙ୍ଘାଦିସେସକଥା ନିଟ୍ଠିତା ।
ଅନିୟତକଥା
ରହୋ ନିସଜ୍ଜସ୍ସାଦେନ, ମାତୁଗାମସ୍ସ ସନ୍ତିକଂ ।
ଗନ୍ତୁକାମୋ ନିୱାସେତି, ଅକ୍ଖିଂ ଅଞ୍ଜେତି ଭୁଞ୍ଜତି ॥
ପୟୋଗେ ଚ ପୟୋଗେ ଚ, ହୋତି ସବ୍ବତ୍ଥ ଦୁକ୍କଟଂ ।
ଗଚ୍ଛତୋ ପଦୱାରେନ, ଗନ୍ତ୍ୱା ଚସ୍ସ ନିସୀଦତୋ ॥
ନିସଜ୍ଜାୟ ଉଭିନ୍ନମ୍ପି, ପୟୋଗଗଣନାୟ ଚ ।
ହୋତି ପାଚିତ୍ତିୟଂ ତସ୍ସ, ବହୁକାନି ବହୂସ୍ୱପି ॥
ସମୀପେପି ଠିତୋ ଅନ୍ଧୋ, ଅନ୍ତୋଦ୍ୱାଦସହତ୍ଥକେ ।
ନ କରୋତି ଅନାପତ୍ତିଂ, ଇତ୍ଥୀନଂ ତୁ ସତମ୍ପି ଚ ॥
ଚକ୍ଖୁମାପି ନିପଜ୍ଜିତ୍ୱା, ନିଦ୍ଦାୟନ୍ତୋପି କେୱଲଂ ।
ଦ୍ୱାରେ ପିହିତଗବ୍ଭସ୍ସ, ନିସିନ୍ନୋପି ନ ରକ୍ଖତି ॥
ଅନନ୍ଧେ ସତି ୱିଞ୍ଞୁସ୍ମିଂ, ଠିତସ୍ସାରହସଞ୍ଞିନୋ ।
ନିସଜ୍ଜପଚ୍ଚୟା ଦୋସୋ, ନତ୍ଥି ୱିକ୍ଖିତ୍ତଚେତସୋ ॥
ନ ଦୋସୁମ୍ମତ୍ତକାଦୀନଂ, ଆପତ୍ତୀହିପି ତୀହିପି ।
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ॥
ପଠମାନିୟତକଥା ।
ଅନନ୍ଧାବଧିରୋ ୱିଞ୍ଞୂ, ଇତ୍ଥୀ ୱା ପୁରିସୋପି ୱା ।
ଅନ୍ତୋଦ୍ୱାଦସହତ୍ଥଟ୍ଠୋ, ଅନାପତ୍ତିକରୋ ସିୟା ॥
ଅନ୍ଧୋ ଅବଧିରୋ ୱାପି, ବଧିରୋ ୱାପି ଚକ୍ଖୁମା ।
ନ କରୋତି ଅନାପତ୍ତିଂ, ତିସମୁଟ୍ଠାନମେୱିଦଂ ॥
ଦୁତିୟାନିୟତକଥା ।
ଇତି ୱିନୟୱିନିଚ୍ଛୟେ ଅନିୟତକଥା ନିଟ୍ଠିତା ।
ନିସ୍ସଗ୍ଗିୟକଥା
ଖୋମଂ କପ୍ପାସକୋସେୟ୍ୟଂ, ସାଣଂ ଭଙ୍ଗଞ୍ଚ କମ୍ବଲଂ ।
ଚୀୱରଂ ଛବ୍ବିଧଂ ୱୁତ୍ତଂ, ଜାତିତୋ ପନ କପ୍ପିୟଂ ॥
ଦୁକୂଲଞ୍ଚେୱ ପତ୍ତୁଣ୍ଣଂ, ଚିନଂ ସୋମାରପଟ୍ଟକଂ ।
ଇଦ୍ଧିଜଂ ଦେୱଦିନ୍ନଞ୍ଚ, ତସ୍ସେତଂ ଅନୁଲୋମିକଂ ॥
ତିଚୀୱରଂ ପରିକ୍ଖାର-ଚୋଳଞ୍ଚ ମୁଖପୁଞ୍ଛନଂ ।
ନିସୀଦନମଧିଟ୍ଠେୟ୍ୟ, ପଚ୍ଚତ୍ଥରଣମେୱ ଚ ॥
ଏକାହମ୍ପି ୱିନା ଭିକ୍ଖୁ, ନ ୱସେୟ୍ୟ ତିଚୀୱରଂ ।
ନ ୱସେୟ୍ୟ ତଥାଧିଟ୍ଠା, ଚାତୁମାସଂ ନିସୀଦନଂ ॥
ରଜିତ୍ୱା କପ୍ପିୟଂ ବିନ୍ଦୁଂ, ଦତ୍ୱା ତତ୍ଥ ତିଚୀୱରଂ ।
ଉପପନ୍ନଂ ପମାଣେନ, ଅଧିଟ୍ଠାତବ୍ବମେୱ ତଂ ॥
ପଚ୍ଛିମନ୍ତେନ ସଙ୍ଘାଟି, ଦୀଘସୋ ମୁଟ୍ଠିପଞ୍ଚକା ।
ମୁଟ୍ଠିତ୍ତିକା ଚ ତିରିୟଂ, ଉତ୍ତମନ୍ତେନ ସା ପନ ॥
ସତ୍ଥୁନୋ ଚୀୱରୂନାପି, ୱଟ୍ଟତୀତି ପକାସିତା ।
ଇଦମେୱୁତ୍ତରାସଙ୍ଗେ, ପମାଣଂ ପରିଦୀପିତଂ ॥
ମୁଟ୍ଠିପଞ୍ଚକଂ ଦୀଘନ୍ତଂ, ପମାଣଂ ତିରିୟନ୍ତତୋ ।
ଅଡ୍ଢତେୟ୍ୟଂ ଦ୍ୱିହତ୍ଥଂ ୱା, ସେସେ ଅନ୍ତରୱାସକେ ॥
ଅହତାହତକପ୍ପାନଂ, ସଙ୍ଘାଟି ଦିଗୁଣା ମତା ।
ଏକପଟ୍ଟୁତ୍ତରାସଙ୍ଗୋ, ଏୱମନ୍ତରୱାସକୋ ॥
ଉତୁଦ୍ଧଟାନଂ ପନ ଚୀୱରାନଂ ।
ସଙ୍ଘାଟି ଭିକ୍ଖୁସ୍ସ ଚତୁଗ୍ଗୁଣା ୱା ।
ଦୁୱେପି ସେସା ଦିଗୁଣାୱ ୱୁତ୍ତା ।
ୟଥାସୁଖଂ ୱଟ୍ଟତି ପଂସୁକୂଲଂ ॥
ତୀଣିପି ଦ୍ୱେପି ଚେକଂ ୱା, ଛିନ୍ଦିତବ୍ବଂ ପହୋତି ଚେ ।
ସବ୍ବେସୁ ଅପ୍ପହୋନ୍ତେସୁ, ଦେୟ୍ୟମନ୍ୱାଧିକମ୍ପି ୱା ॥
ଅଚ୍ଛିନ୍ନଂ ୱା ଅନାଦିନ୍ନଂ, ଧାରେନ୍ତସ୍ସ ତିଚୀୱରଂ ।
ଭିକ୍ଖୁନୋ ଦୁକ୍କଟଂ ୱୁତ୍ତଂ, ଦୁବ୍ଭୋଗେନ ଚ ସେୱତୋ ॥
କୁସିଂ ଅଡ୍ଢକୁସିଞ୍ଚାପି, ମଣ୍ଡଲଂ ଅଡ୍ଢମଣ୍ଡଲଂ ।
ୱିୱଟ୍ଟଂ ଅନୁୱିୱଟ୍ଟଂ, ବାହନ୍ତମ୍ପି ଚ ଭିକ୍ଖୁନୋ ॥
ଦସ୍ସେତ୍ୱାୱ ୱିଧିଂ ସବ୍ବଂ, ପଞ୍ଚକାଦିପ୍ପଭେଦକଂ ।
ଛିନ୍ନଂ ସମଣସାରୁପ୍ପଂ, କାତବ୍ବଂ ତୁ ତିଚୀୱରଂ ॥
ଦାନେନଚ୍ଛିଜ୍ଜଗାହେନ, ୱିସ୍ସାସଗ୍ଗହଣେନ ଚ ।
ହୀନାୟାୱତ୍ତନେନାପି, ସିକ୍ଖାୟ ଚ ପହାନତୋ ॥
ପଚ୍ଚୁଦ୍ଧାରୱିନାସେହି, ଲିଙ୍ଗସ୍ସ ପରିୱତ୍ତନା ।
ସବ୍ବଂ ଭିଜ୍ଜତିଧିଟ୍ଠାନଂ, ଛିଦ୍ଦଭାୱେ ତିଚୀୱରଂ ॥
କନିଟ୍ଠସ୍ସଙ୍ଗୁଲସ୍ସେୱ, ନଖପିଟ୍ଠିପ୍ପମାଣକଂ ।
ୱିନିୱିଦ୍ଧଂ ପନଚ୍ଛିଦ୍ଦ-ମଧିଟ୍ଠାନୱିନାସନଂ ॥
ଏକୋ ତନ୍ତୁପି ଅଚ୍ଛିନ୍ନୋ, ଅଧିଟ୍ଠାନଂ ନ ଭିନ୍ଦତି ।
ସେତଭାୱଂ କରୋନ୍ତେନ, ଧୋତମ୍ପି ରଜକେନ ୱା ॥
ପଠମଂ ଅଗ୍ଗଳଂ ଦତ୍ୱା, ପଚ୍ଛା ଛିନ୍ଦତି ରକ୍ଖତି ।
ଘଟେତ୍ୱା କୋଟିୟୋ ଦ୍ୱେ ୱା, ପଚ୍ଛା ଛିନ୍ଦତି ରକ୍ଖତି ॥
ଚତୁରଟ୍ଠଙ୍ଗୁଲା ଓରଂ, ଏକଦ୍ୱିନ୍ନଂ ତିରୀୟତୋ ।
ତିଣ୍ଣମ୍ପି ଦୀଘତୋ ଛିଦ୍ଦଂ, ଭିନ୍ଦତେୱ ୱିଦତ୍ଥିୟା ॥
ନିସୀଦନସ୍ସ ଦୀଘେନ, ଭୱନ୍ତି ଦ୍ୱେ ୱିଦତ୍ଥିୟୋ ।
ୱିତ୍ଥାରେନ ଦିୟଡ୍ଢା ଚ, ସୁଗତସ୍ସ ୱିଦତ୍ଥିୟା ॥
ହୋନ୍ତି କଣ୍ଡୁପ୍ପଟିଚ୍ଛାଦି, ତିରିୟଂ ଦ୍ୱେ ୱିଦତ୍ଥିୟୋ ।
ଦୀଘତୋପି ଚତସ୍ସୋୱ, ସୁଗତସ୍ସ ୱିଦତ୍ଥିୟା ॥
ଦୀଘତୋ ସୁଗତସ୍ସେୱ, ଭୱନ୍ତି ଛ ୱିଦତ୍ଥିୟୋ ।
ୱିତ୍ଥାରେନଡ୍ଢତେୟ୍ୟାୱ, ସିୟା ୱସ୍ସିକସାଟିକା ॥
ମୁନିନା ତୀସୁ ଏତେସୁ, କରୋନ୍ତସ୍ସ ତଦୁତ୍ତରିଂ ।
ଅଧିକଚ୍ଛେଦନଂ ତସ୍ସ, ପାଚିତ୍ତିୟମୁଦୀରିତଂ ॥
ମୁଖପୁଞ୍ଛନଚୋଳସ୍ସ, ପଚ୍ଚତ୍ଥରଣକସ୍ସ ୱା ।
ପମାଣଂ ଅପ୍ପମାଣେନ, ନ ଚେୱ ପରିଦୀପିତଂ ॥
ସଦସଂ ଅଦସଂ ସବ୍ବଂ, ପଚ୍ଚତ୍ଥରଣଚୀୱରଂ ।
ମହନ୍ତଂ ଖୁଦ୍ଦକଂ ଏକ-ମନେକମ୍ପି ଚ ୱଟ୍ଟତି ॥
ମୁଖପୁଞ୍ଛନଚୋଳେକଂ, ଦ୍ୱେପି ୱଟ୍ଟନ୍ତି ସବ୍ବଥା ।
ସଦସଂ ଅଦସଂ ୱାପି, ସଦସଂୱ ନିସୀଦନଂ ॥
ଅଦସା ରଜିତାୟେୱ, ୱଟ୍ଟତାଦିନ୍ନକପ୍ପକା ।
ୱୁତ୍ତା କଣ୍ଡୁପ୍ପଟିଚ୍ଛାଦି, ତଥା ୱସ୍ସିକସାଟିକା ॥
ଗଣନଂ ୱା ପମାଣଂ ୱା, ନ ପରିକ୍ଖାରଚୋଳକେ ।
ପମାଣଗଣନାତୀତି, ଭଣନ୍ତି ପକତଞ୍ଞୁନୋ ॥
ସୁଗତଟ୍ଠଙ୍ଗୁଲାୟାମଂ, ଚତୁରଙ୍ଗୁଲୱିତ୍ଥତଂ ।
ୱିକପ୍ପନୁପଗଂ ହୋତି, ପଚ୍ଛିମଂ ନାମ ଚୀୱରଂ ॥
ପରିସ୍ସାୱପଟଂ ପତ୍ତ-ପୋତ୍ଥକତ୍ଥୱିକାଦିକଂ ।
ଅଧିଟ୍ଠେୟ୍ୟ ପରିକ୍ଖାର-ଚୋଳଂ ପଚ୍ଛିମଚୀୱରଂ ॥
ବହୂନି ଏକତୋ କତ୍ୱା, ଅଧିଟ୍ଠାତୁମ୍ପି ୱଟ୍ଟତି ।
ମାତୁଆଦୀନମତ୍ଥାୟ, ଠପିତେ ନତ୍ଥି ଦୋସତା ॥
ୱସ୍ସମାସେ ଅଧିଟ୍ଠେୟ୍ୟ, ଚତୁରୋ ୱସ୍ସସାଟିକଂ ।
ପୁନ ପଚ୍ଚୁଦ୍ଧରିତ୍ୱା ତଂ, ୱିକପ୍ପେୟ୍ୟ ତତୋ ପରଂ ॥
ତାୱ କଣ୍ଡୁପ୍ପଟିଚ୍ଛାଦିଂ, ୟାୱ ରୋଗୋ ନ ସମ୍ମତି ।
ଅଧିଟ୍ଠହିତ୍ୱା ତତୋ ଉଦ୍ଧଂ, ଉଦ୍ଧରିତ୍ୱା ୱିକପ୍ପୟେ ॥
‘‘ଇମଂ କଣ୍ଡୁପ୍ପଟିଚ୍ଛାଦିଂ, ଇମମନ୍ତରୱାସକଂ ।
ଅଧିଟ୍ଠାମୀ’’ତିଧିଟ୍ଠେୟ୍ୟ, ସେସେସୁପି ଅୟଂ ନୟୋ ॥
‘‘ଇମଂ କଣ୍ଡୁପ୍ପଟିଚ୍ଛାଦିଂ, ଏତ’’ନ୍ତି ଚ ଅସମ୍ମୁଖେ ।
ୱତ୍ୱା ପଚ୍ଚୁଦ୍ଧରେୟ୍ୟେୱଂ, ସେସେସୁପି ୱିଚକ୍ଖଣୋ ॥
ଆଭୋଗଂ ମନସା କତ୍ୱା, କାୟେନ ଫୁସନାକତଂ ।
ୱଚସାଧିଟ୍ଠିତଞ୍ଚାତି, ଅଧିଟ୍ଠାନଂ ଦ୍ୱିଧା ମତଂ ॥
ଇତି ସବ୍ବମିଦଂ ୱୁତ୍ତଂ, ତେଚୀୱରିକଭିକ୍ଖୁନୋ ।
ତଥା ୱତ୍ୱାୱଧିଟ୍ଠେୟ୍ୟ, ତଂ ପରିକ୍ଖାରଚୋଳିକୋ ॥
ତିଚୀୱରଂ ପରିକ୍ଖାର-ଚୋଳଂ କାତୁମ୍ପି ୱଟ୍ଟତି ।
ଏୱଂ ଚୁଦୋସିତେ ୱୁତ୍ତୋ, ପରିହାରୋ ନିରତ୍ଥକୋ ॥
ନ, ତେଚୀୱରିକସ୍ସେୱ, ୱୁତ୍ତତ୍ତା ତତ୍ଥ ସତ୍ଥୁନା ।
ତଂ ପରିକ୍ଖାରଚୋଳସ୍ସ, ତସ୍ମା ସବ୍ବମ୍ପି ୱଟ୍ଟତି ॥
‘‘ଅଧିଟ୍ଠେତି ୱିକପ୍ପେତି, ଅନାପତ୍ତୀ’’ତି ଏତ୍ଥ ଚ ।
ଅଧିଟ୍ଠାତବ୍ବକସ୍ସେୱ, ୱିକପ୍ପନୱିଧାନତୋ ॥
ଭିକ୍ଖୁସ୍ସେୱଂ କରୋନ୍ତସ୍ସ, ନ ଦୋସୋ ଉପଲବ୍ଭତି ।
ଏୱଞ୍ଚ ନ ସିୟା କସ୍ମା, ମୁଖପୁଞ୍ଛନକାଦିକଂ ॥
ମୁଖପୁଞ୍ଛନକାଦୀନଂ, ତେସଂ କିଚ୍ଚୱିଧାନତୋ ।
ଅକିଚ୍ଚସ୍ସାମିକସ୍ସସ୍ସ, ଅଧିଟ୍ଠାନଂ ତୁ ୟୁଜ୍ଜତି ॥
ନିଧାନମୁଖମେତନ୍ତି, ମହାପଚ୍ଚରିୟଂ ପନ ।
ୱୁତ୍ତତ୍ତା ଚ ନିସେଧେତୁଂ, ନ ସକ୍କା ୱିନୟଞ୍ଞୁନା ॥
ଚୀୱରଂ ପରିପୁଣ୍ଣନ୍ତି, ନିଦାନୁପ୍ପତ୍ତିତୋପି ଚ ।
ନିଧାନମୁଖମେତନ୍ତି, ୱେଦିତବ୍ବଂ ୱିଭାୱିନା ॥
କୁସୱାକାଦିଚୀରାନି, କମ୍ବଲଂ କେସୱାଲଜଂ ।
ଥୁଲ୍ଲଚ୍ଚୟଂ ଧାରୟତୋ-ଲୂକପକ୍ଖାଜିନକ୍ଖିପେ ॥
କଦଲେରକଦୁସ୍ସେସୁ, ଅକ୍କଦୁସ୍ସେ ଚ ପୋତ୍ଥକେ ।
ଦୁକ୍କଟଂ ତିରିଟେ ୱାପି, ୱେଠନେ କଞ୍ଚୁକେପି ଚ ॥
ସବ୍ବନୀଲକମଞ୍ଜେଟ୍ଠ-କଣ୍ହଲୋହିତପୀତକେ।
ମହାନାମମହାରଙ୍ଗ-ରତ୍ତେସୁପି ଚ ଦୁକ୍କଟଂ ॥
ଅଚ୍ଛିନ୍ନଦସକେ ଦୀଘ-ଫଲପୁପ୍ଫଦସେସୁ ଚ ।
ଅଚ୍ଛିନ୍ନଚୀୱରସ୍ସେତ୍ଥ, ନତ୍ଥି କିଞ୍ଚି ଅକପ୍ପିୟଂ ॥
ଅଧିଟ୍ଠେତି ୱିକପ୍ପେତି, ୱିସ୍ସଜ୍ଜେତି ୱିନସ୍ସତି ।
ଅନ୍ତୋଦସାହଂ ୱିସ୍ସାସେ, ଅନାପତ୍ତି ପକାସିତା ॥
କଥିନଂ ନାମ ନାମେନ, ସମୁଟ୍ଠାନମିଦଂ ପନ ।
ଅଚିତ୍ତମକ୍ରିୟଂ ୱୁତ୍ତଂ, ତିଚିତ୍ତଞ୍ଚ ତିୱେଦନଂ ॥
ପଠମକଥିନକଥା ।
ଗାମାଦୀସୁ ପଦେସେସୁ, ତିପଞ୍ଚସୁ ତିଚୀୱରଂ ।
ଠପେତ୍ୱା ଏକରତ୍ତମ୍ପି, ସଙ୍ଘସମ୍ମୁତିୟା ୱିନା ॥
ଭିକ୍ଖୁନୋ ପନ ତେନସ୍ସ, ୱିପ୍ପୱତ୍ଥୁଂ ନ ୱଟ୍ଟତି ।
ହୋତି ନିସ୍ସଗ୍ଗିୟଂ ୱିପ୍ପ-ୱସତୋ ଅରୁଣୁଗ୍ଗମେ ॥
ଚୀୱରଂ ନିକ୍ଖିପିତ୍ୱାନ, ନ୍ହାୟନ୍ତସ୍ସେୱ ରତ୍ତିୟଂ ।
ଅରୁଣେ ଉଟ୍ଠିତେ କିଂ ନୁ, କାତବ୍ବଂ ତେନ ଭିକ୍ଖୁନା ॥
ଦୁକ୍କଟଂ ମୁନିନା ୱୁତ୍ତଂ, ନିସ୍ସଗ୍ଗିୟନିୱାସନେ ।
ତବ୍ଭୟା ପନ ସୋ ଭିକ୍ଖୁ, ନଗ୍ଗୋ ଗଚ୍ଛତି ଦୁକ୍କଟଂ ॥
ଅଚ୍ଛିନ୍ନଚୀୱରଟ୍ଠାନେ, ଠିତତ୍ତା ପନ ଭିକ୍ଖୁନୋ ।
ନ ତସ୍ସାକପ୍ପିୟଂ ନାମ, ଚୀୱରଂ ଅତ୍ଥି କିଞ୍ଚିପି ॥
ନିଗାସେତ୍ୱା ଗହେତ୍ୱା ଚ, ଗନ୍ତ୍ୱା ଭିକ୍ଖୁସ୍ସ ସନ୍ତିକଂ ।
ନିସ୍ସଜ୍ଜିତ୍ୱା ପନାପତ୍ତି, ଦେସେତବ୍ବାୱ ୱିଞ୍ଞୁନା ॥
ପରସ୍ସ ନିସ୍ସଜ୍ଜିତ୍ୱା ତଂ, ଦୁକ୍କଟଂ ପରିଭୁଞ୍ଜତୋ ।
ପୟୋଗେ ଚ ପୟୋଗେ ଚ, ହୋତି ପାରୁପନାଦିସୁ ॥
ଅନାପତ୍ତି ତମଞ୍ଞସ୍ସ, ଭିକ୍ଖୁନୋ ପରିଭୁଞ୍ଜତୋ ।
ଅଦେନ୍ତସ୍ସ ଚ ନିସ୍ସଟ୍ଠଂ, ଦୁକ୍କଟଂ ପରିୟାପୁତଂ ॥
ଥେରେ ଚ ଦହରେ ମଗ୍ଗଂ, ଗଚ୍ଛନ୍ତେସୁ ଉଭୋସୁପି ।
ପତ୍ତଚୀୱରମାଦାୟ, ଓହୀନେ ଦହରେ ପନ ॥
ଅସମ୍ପତ୍ତେ ଗରୁଂ ତସ୍ମିଂ, ଉଗ୍ଗଚ୍ଛତ୍ୟରୁଣୋ ୟଦି ।
ହୋତି ନିସ୍ସଗ୍ଗିୟଂ ୱତ୍ଥଂ, ନ ପସ୍ସମ୍ଭତି ନିସ୍ସୟୋ ॥
ମୁହୁତ୍ତଂ ୱିସ୍ସମିତ୍ୱାନ, ଗଚ୍ଛନ୍ତେ ଦହରେ ପନ ।
ହୋତି ନିସ୍ସଗ୍ଗିୟଂ ୱତ୍ଥଂ, ପସ୍ସମ୍ଭତି ଚ ନିସ୍ସୟୋ ॥
ସୁତା ଧମ୍ମକଥା ୟସ୍ମିଂ, ଉଗ୍ଗଚ୍ଛତ୍ୟରୁଣୋ ୟଦି ।
ହୋତି ନିସ୍ସଗ୍ଗିୟଂ ୱତ୍ଥଂ, ପସ୍ସମ୍ଭତି ଚ ନିସ୍ସୟୋ ॥
ପଚ୍ଚୁଦ୍ଧାରେ ଅନାପତ୍ତି, ଲଦ୍ଧସମ୍ମୁତିକସ୍ସପି ।
ଅନ୍ତୋୟେୱାରୁଣେ ତଂ ୱା, ୱିସ୍ସଜ୍ଜେତି ୱିନସ୍ସତି ॥
ପଠମେନ ସମାନାୱ, ସମୁଟ୍ଠାନାଦୟୋ ନୟା ।
ଅପଚ୍ଚୁଦ୍ଧରଣଂ ଏତ୍ଥ, ଅକ୍ରିୟାତି ୱିସେସିତଂ ॥
ଦୁତିୟକଥିନକଥା ।
ଅକାଲଚୀୱରଂ ମାସ-ପରମଂ ନିକ୍ଖିପେ ସତି ।
ପଚ୍ଚାସାୟ ତତୋ ଉଦ୍ଧଂ, ଠପେତୁଂ ନ ଚ ୱଟ୍ଟତି ॥
ଦସାହାତିକ୍କମୋୟେୱ ।
ପଠମେ କଥିନେ ଇଧ ।
ମାସସ୍ସାତିକ୍କମୋ ୱୁତ୍ତୋ ।
ସେସୋ ତେନ ସମୋ ମତୋ ॥
ତତିୟକଥିନକଥା ।
ଭିକ୍ଖୁ ଭିକ୍ଖୁନିୟା ଭୁତ୍ତଂ, ୱତ୍ଥଂ ଅଞ୍ଞାତିକାୟ ୟୋ ।
ଧୋୱାପେତି ରଜାପେତି, ଆକୋଟାପେତି ଚେ ତତୋ ॥
ତସ୍ସ ନିସ୍ସଗ୍ଗିୟାପତ୍ତି, ପଠମେନ ପକାସିତା ।
ତଥା ସେସେହି ଚ ଦ୍ୱୀହି, ଦୀପିତଂ ଦୁକ୍କଟଦ୍ୱୟଂ ॥
ସିକ୍ଖମାନାୟ ୱା ହତ୍ଥେ, ଧୋୱନତ୍ଥାୟ ଦେତି ଚେ ।
ସା ହୁତ୍ୱା ଉପସମ୍ପନ୍ନା, ପଚ୍ଛା ଧୋୱତି ସୋ ନୟୋ ॥
ସାମଣେରନିଦ୍ଦେସେପି, ଲିଙ୍ଗଂ ଚେ ପରିୱତ୍ତତି ।
ଭିକ୍ଖୁନୀସୁପସମ୍ପଜ୍ଜ, ଧୋତେ ନିସ୍ସଗ୍ଗିୟଂ ସିୟା ॥
ଦହରାନଞ୍ଚ ଭିକ୍ଖୂନଂ, ହତ୍ଥେ ୱତ୍ଥେ ନିୟ୍ୟାଦିତେ ।
ପରିୱତ୍ତିତଲିଙ୍ଗେସୁ, ତେସୁପେସ ନୟୋ ମତୋ ॥
ତଥା ଭିକ୍ଖୁନିୟା ହତ୍ଥେ, ଦିନ୍ନେ ‘‘ଧୋୱା’’ତି ଚୀୱରେ ।
ପରିୱତ୍ତେ ତୁ ଲିଙ୍ଗସ୍ମିଂ, ସଚେ ଧୋୱତି ୱଟ୍ଟତି ॥
‘‘ଧୋୱା’’ତି ଭିକ୍ଖୁନୀ ୱୁତ୍ତା, ସଚେ ସବ୍ବଂ କରୋତି ସା ।
ଧୋୱନପ୍ପଚ୍ଚୟାୟେୱ, ତସ୍ସ ନିସ୍ସଗ୍ଗିୟଂ ସିୟା ॥
‘‘ଇମସ୍ମିଂ ଚୀୱରେ ସବ୍ବଂ, କତ୍ତବ୍ବଂ ତ୍ୱଂ କରୋହି’’ତି ।
ହୋତି ନିସ୍ସଗ୍ଗିୟଞ୍ଚେୱ, ୱଦତୋ ଦୁକ୍କଟଦ୍ୱୟଂ ॥
ଞାତିକାଞାତିସଞ୍ଞିସ୍ସ, ପଚ୍ଚତ୍ଥରନିସୀଦନଂ ।
ଅଞ୍ଞସ୍ସ ସନ୍ତକଂ ୱାପି, ଧୋୱାପେନ୍ତସ୍ସ ଦୁକ୍କଟଂ ॥
ଏକତୋଉପସମ୍ପନ୍ନା, ଭିକ୍ଖୁନୀନଂ ୱସେନ ୟା ।
ତାୟ ଧୋୱାପନେ ୱାପି, ହୋତି ଆପତ୍ତି ଦୁକ୍କଟଂ ॥
ଅୱୁତ୍ତା ପରିଭୁତ୍ତଂ ୱା, ଅଞ୍ଞଂ ୱା ୟଦି ଧୋୱତି ।
ନ ଦୋସୋ, ସଞ୍ଚରିତ୍ତେନ, ସମୁଟ୍ଠାନାଦୟୋ ସମା ॥
ପୁରାଣଚୀୱରଧୋୱାପନକଥା ।
ୱିକପ୍ପନୁପଗଂ କିଞ୍ଚି, ପଚ୍ଛିମଂ ପନ ଚୀୱରଂ ।
ଗଣ୍ହତୋ ହୋତି ଆପତ୍ତି, ଠପେତ୍ୱା ପାରିୱତ୍ତକଂ ॥
ପୟୋଗେ ଗହଣତ୍ଥାୟ, ଦୁକ୍କଟଂ ପରିୟାପୁତଂ ।
ତସ୍ସ ନିସ୍ସଗ୍ଗିୟାପତ୍ତି, ଗହଣେନ ପକାସିତା ॥
ସଚେ ଅନୁପସମ୍ପନ୍ନ-ହତ୍ଥେ ପେସେତି ଚୀୱରଂ ।
ଅଞ୍ଞତ୍ର ପାରିୱତ୍ତାପି, ଗହେତୁଂ ପନ ୱଟ୍ଟତି ॥
ଞାତିକାୟପି ଅଞ୍ଞାତି-ସଞ୍ଞିସ୍ସ ୱିମତିସ୍ସ ୱା ।
ଏକତୋଉପସମ୍ପନ୍ନ-ହତ୍ଥା ଗଣ୍ହାତି ଦୁକ୍କଟଂ ॥
‘‘ଦସ୍ସାମୀ’’ତି ଚ ଆଭୋଗଂ, କତ୍ୱା ୱା ପାରିୱତ୍ତକଂ ।
ତାୱକାଲିକୱିସ୍ସାସ-ଗ୍ଗାହେ ଦୋସୋ ନ ୱିଜ୍ଜତି ॥
ଅଞ୍ଞଂ ପନ ପରିକ୍ଖାରଂ, ନ ଦୋସୋ ହୋତି ଗଣ୍ହତୋ ।
ସଞ୍ଚରିତ୍ତସମୁଟ୍ଠାନଂ, ଇଦଂ ୱୁତ୍ତଂ କ୍ରିୟାକ୍ରିୟଂ ॥
ଚୀୱରପଟିଗ୍ଗହଣକଥା ।
ଚୀୱରଂ ୱିଞ୍ଞାପେନ୍ତସ୍ସ, ଅଞ୍ଞାତକାପ୍ପୱାରିତଂ ।
ହୋତି ନିସ୍ସଗ୍ଗିୟାପତ୍ତି, ଅଞ୍ଞତ୍ର ସମୟା ପନ ॥
ତିକପାଚିତ୍ତିୟଂ ୱୁତ୍ତଂ, ତଥେୱ ଦ୍ୱିକଦୁକ୍କଟଂ ।
ଞାତକେଞାତିସଞ୍ଞିସ୍ସ, ତତ୍ଥ ୱେମତିକସ୍ସ ଚ ॥
ସମୟେ ୱିଞ୍ଞାପେନ୍ତସ୍ସ, ଞାତକେ ୱା ପୱାରିତେ ।
ଅଞ୍ଞସ୍ସତ୍ଥାୟ ୱା ତସ୍ସ, ଞାତକେ ୱା ପୱାରିତେ ॥
ଅନାପତ୍ତୀତି ଞାତବ୍ବଂ, ତଥା ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଅଞ୍ଞାତକୱିଞ୍ଞତ୍ତିକଥା ।
ଅପ୍ପୱାରିତମଞ୍ଞାତିଂ, ଚୀୱରଂ ତୁ ତଦୁତ୍ତରିଂ ।
ହୋତି ନିସ୍ସଗ୍ଗିୟାପତ୍ତି, ୱିଞ୍ଞାପେନ୍ତସ୍ସ ଭିକ୍ଖୁନୋ ॥
ୟସ୍ସ ତୀଣିପି ନଟ୍ଠାନି, ଦ୍ୱେ ୱା ଏକମ୍ପି ୱା ପନ ।
ଦ୍ୱେ ୱା ଏକମ୍ପି ୱା ତେନ, ସାଦିତବ୍ବଂ ନ କିଞ୍ଚିପି ॥
ସେସକଂ ଆହରନ୍ତସ୍ସ, ଦିନ୍ନେ ନଚ୍ଛିନ୍ନକାରଣା ।
ସନ୍ତକେ ଞାତକାଦୀନଂ, ଅତ୍ତନୋପି ଧନେନ ୱା ॥
ଅନାପତ୍ତୀତି ଞାତବ୍ବଂ, ତଥା ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ତତୁତ୍ତରିକଥା ।
କଲ୍ୟାଣକମ୍ୟତାହେତୁ, ଆପଜ୍ଜତି ୱିକପ୍ପନଂ ।
ଚୀୱରେ ପନ ୟୋ ତସ୍ସ, ଲାଭା ନିସ୍ସଗ୍ଗିୟଂ ଭୱେ ॥
ମହଗ୍ଘଂ ଦାତୁକାମମ୍ହି, ଅପ୍ପଗ୍ଘଂ ୱିଞ୍ଞାପେତି ୟୋ ।
ସନ୍ତକେ ଞାତକାଦୀନଂ, ଅନାପତ୍ତି ପକାସିତା ॥
ଞାତକେଞ୍ଞାତିସଞ୍ଞିସ୍ସ, ଦୁକ୍କଟଂ ୱିମତିସ୍ସ ଚ ।
ସଞ୍ଚରିତ୍ତସମା ୱୁତ୍ତା, ସମୁଟ୍ଠାନାଦୟୋ ନୟା ॥
ପଠମୋପକ୍ଖଟକଥା ।
ଦୁତିୟୋପକ୍ଖଟେ ୟସ୍ମା, ୱତ୍ତବ୍ବଂ ନତ୍ଥି କିଞ୍ଚିପି ।
ତସ୍ମା ଅନନ୍ତରେନସ୍ସ, ସଦିସୋୱ ୱିନିଚ୍ଛୟୋ ॥
ଦୁତିୟୋପକ୍ଖଟକଥା ।
ରଞ୍ଞା ୱା ରାଜଭୋଗ୍ଗେନ, ଭିକ୍ଖୁମୁଦ୍ଦିସ୍ସମାଭତଂ ।
ଅକପ୍ପିୟଂ ସୁୱଣ୍ଣାଦିଂ, ଗହେତୁଂ ନ ଚ ୱଟ୍ଟତି ॥
ରଜତଂ ଜାତରୂପଂ ୱା, ଅତ୍ତନୋ ୱା ପରସ୍ସ ୱା ।
ଅତ୍ଥାୟ ଗଣ୍ହିତୁଂ କିଞ୍ଚି, ଦୀୟମାନଂ ନ ୱଟ୍ଟତି ॥
ଅଞ୍ଞସ୍ସତ୍ଥାୟ ନିଦ୍ଦିଟ୍ଠଂ, ଭିକ୍ଖୁନୋ ପଟିଗ୍ଗଣ୍ହତୋ ।
ଦୁକ୍କଟଂ ତସ୍ସ ହୋତୀତି, ମହାପଚ୍ଚରିୟଂ ପନ ॥
ନେତ୍ୱା ଅକପ୍ପିୟଂ ଭଣ୍ଡଂ, ଇତ୍ଥଂ କୋଚି ସଚେ ୱଦେ ।
‘‘ଇଦଂ ସଙ୍ଘସ୍ସ ଦମ୍ମୀତି, ପୁଗ୍ଗଲସ୍ସ ଗଣସ୍ସ ୱା ॥
ଆରାମଂ ୱା ୱିହାରଂ ୱା, ଚେତିୟଂ ୱା କରୋହି’’ତି ।
ନ ଚ ୱଟ୍ଟତି ତଂ ୱତ୍ଥୁଂ, ସବ୍ବେସଂ ସମ୍ପଟିଚ୍ଛିତୁଂ ॥
ଅନାମସିତ୍ୱା ସଙ୍ଘଂ ୱା, ଗଣଂ ୱା ପୁଗ୍ଗଲମ୍ପି ୱା ।
‘‘ଚେତିୟସ୍ସ ୱିହାରସ୍ସ, ଦେମା’’ତିପି ୱଦନ୍ତି ଚେ ॥
ତଂ ହିରଞ୍ଞଂ ସୁୱଣ୍ଣଂ ୱା, ନିସେଧେତୁଂ ନ ୱଟ୍ଟତି ।
ଆରାମିକାନଂ ୱତ୍ତବ୍ବଂ, ‘‘ୱଦନ୍ତେୱମିମେ’’ତି ଚ ॥
ରଜତଂ ଜାତରୂପଂ ୱା, ସଙ୍ଘସ୍ସ ପଟିଗ୍ଗଣ୍ହତୋ ।
ହୋତି ନିସ୍ସଗ୍ଗିୟାପତ୍ତି, ପରିଭୋଗେ ଚ ଦୁକ୍କଟଂ ॥
ତଳାକସ୍ସ ଚ ଖେତ୍ତତ୍ତା, ସସ୍ସୁପ୍ପତ୍ତିନିଦାନତୋ ।
ଗହଣଂ ପରିଭୋଗୋ ୱା, ନ ଚ ୱଟ୍ଟତି ଭିକ୍ଖୁନୋ ॥
‘‘ଚତ୍ତାରୋ ପଚ୍ଚୟେ ସଙ୍ଘୋ, ଗଣୋ ୱା ପରିଭୁଞ୍ଜତୁ’’ ।
ଇଚ୍ଚେୱଂ ପନ ୱତ୍ୱା ଚେ, ଦେତି ସବ୍ବମ୍ପି ୱଟ୍ଟତି ॥
କାରାପେତି ଚ କେଦାରେ, ଛିନ୍ଦାପେତ୍ୱା ୱନଂ ପନ ।
କେଦାରେସୁ ପୁରାଣେସୁ, ଅତିରେକମ୍ପି ଗଣ୍ହତି ॥
ଅପରିଚ୍ଛିନ୍ନଭାଗସ୍ମିଂ, ନୱସସ୍ସେପି ‘‘ଏତ୍ତକଂ ।
ଭାଗଂ ଦେଥା’’ତି ୱତ୍ୱା ଚେ, ଉଟ୍ଠାପେତି କହାପଣେ ॥
ୱତ୍ୱା ଅକପ୍ପିୟଂ ୱାଚଂ, ‘‘କସଥ ୱପଥା’’ତି ଚ ।
ଉପ୍ପାଦିତଞ୍ଚ ସବ୍ବେସଂ, ହୋତି ସବ୍ବମକପ୍ପିୟଂ ॥
‘‘ଏତ୍ତକୋ ନାମ ଭାଗୋତି, ଏତ୍ତିକାୟ ଚ ଭୂମିୟା’’ ।
ପତିଟ୍ଠାପେତି ୟୋ ଭୂମିଂ, ଅୱତ୍ୱା କସଥାଦିକଂ ॥
ସୟମେୱ ପମାଣସ୍ସ, ଜାନନତ୍ଥଂ ତୁ ଭୂମିୟା ।
ରଜ୍ଜୁୟା ୱାପି ଦଣ୍ଡେନ, ଖେତ୍ତଂ ମିନାତି ୟୋ ପନ ॥
ଖଲେ ୱା ରକ୍ଖତି ଠତ୍ୱା, ଖଲତୋପି ତତୋ ପୁନ ।
ନୀହରାପେତି ୱା ୱୀହୀ, ତସ୍ସେୱେତମକପ୍ପିୟଂ ॥
‘‘ଏତ୍ତକେହି ଚ ୱୀହୀହି, ଇଦଂ ଆହରଥା’’ତି ଚ ।
ଆହରନ୍ତି ସଚେ ୱୁତ୍ତା, ତସ୍ସେୱେତମକପ୍ପିୟଂ ॥
‘‘ଏତ୍ତକେନ ହିରଞ୍ଞେନ, ଇଦମାହରଥା’’ତି ଚ ।
ଆହରନ୍ତି ଚ ୟଂ ୱୁତ୍ତା, ସବ୍ବେସଂ ତମକପ୍ପିୟଂ ॥
ପେସକାରକଦାସଂ ୱା, ଅଞ୍ଞଂ ୱା ରଜକାଦିସୁ ।
ଆରାମିକାନଂ ନାମେନ, ଦେନ୍ତେ ୱଟ୍ଟତି ଗଣ୍ହିତୁଂ ॥
‘‘ଗାୱୋ ଦେମା’’ତି ୱୁତ୍ତେପି, ଗହେତୁଂ ନ ଚ ୱଟ୍ଟତି ।
ପଞ୍ଚଗୋରସଭୋଗତ୍ଥଂ, ୱୁତ୍ତେ ଦେମାତି ୱଟ୍ଟତି ॥
ଅଜିକାଦୀସୁ ଏସେୱ, ନୟୋ ଞେୟ୍ୟୋ ୱିଭାୱିନା ।
କପ୍ପିୟେନ ଚ ୱାକ୍ୟେନ, ସବ୍ବଂ ୱଟ୍ଟତି ଗଣ୍ହିତୁଂ ॥
ହତ୍ଥିଂ ୱା ମହିସଂ ଅସ୍ସଂ, ଗୋଣଂ କୁକ୍କୁଟସୂକରଂ ।
ଦେନ୍ତେସୁ ଚ ମନୁସ୍ସେସୁ, ନ ଚ ୱଟ୍ଟତି ଗଣ୍ହିତୁଂ ॥
ପଟିସିଦ୍ଧେପି ସଙ୍ଘସ୍ସ, ଦତ୍ୱା ଗଚ୍ଛତି ଚେ ପନ ।
ମୂଲଂ ଦତ୍ୱା ଚ ସଙ୍ଘସ୍ସ, କେଚି ଗଣ୍ହନ୍ତି ୱଟ୍ଟତି ॥
‘‘ଖେତ୍ତଂ ୱତ୍ଥୁଂ ତଳାକଂ ୱା, ଦେମ ଗୋଅଜିକାଦିକଂ ।
ୱିହାରସ୍ସା’’ତି ୱୁତ୍ତେପି, ନିସେଧେତୁଂ ନ ୱଟ୍ଟତି ॥
ତିକ୍ଖତ୍ତୁଂ ଚୋଦନା ୱୁତ୍ତା, ଛକ୍ଖତ୍ତୁଂ ଠାନମବ୍ରୱି ।
ୟଦି ଚୋଦେତିୟେୱ ଛ, ଚୋଦନା ଦିଗୁଣା ଠିତି ॥
ଅନାପତ୍ତି ଅଚୋଦେତ୍ୱା, ଲଦ୍ଧେ ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ରାଜସିକ୍ଖାପଦକଥା ।
ଚୀୱରୱଗ୍ଗୋ ପଠମୋ ।
ଏକେନାପି ଚ ମିସ୍ସେତ୍ୱା, ସନ୍ଥତଂ କୋସିୟଂସୁନା ।
ହୋତି ନିସ୍ସଗ୍ଗିୟାପତ୍ତି, କାରାପେନ୍ତସ୍ସ ଭିକ୍ଖୁନୋ ॥
ପରତ୍ଥାୟ କରୋନ୍ତସ୍ସ, କାରାପେନ୍ତସ୍ସ ସନ୍ଥତଂ ।
ଅଞ୍ଞେନ ଚ କତଂ ଲଦ୍ଧା, ସେୱମାନସ୍ସ ଦୁକ୍କଟଂ ॥
ଅନାପତ୍ତି ୱିତାନଂ ୱା, ଭୂମତ୍ଥରଣମେୱ ୱା ।
ଭିସି ବିବ୍ବୋହନଂ ୱାପି, କରୋନ୍ତସ୍ସାଦିକମ୍ମିନୋ ॥
କୋସିୟକଥା ।
କାଳକେଳକଲୋମାନଂ, ସୁଦ୍ଧାନଂ ସନ୍ଥତଂ ସଚେ ।
କରେୟ୍ୟାପତ୍ତି ହୋତିସ୍ସ, ସେସଂ ତୁ ପଠମୂପମଂ ॥
ସୁଦ୍ଧକାଳକକଥା ।
ଅନାପତ୍ତି ତୁଲଂ ୱାପି, ବହୁଂ ୱା ସବ୍ବମେୱ ୱା ।
କରୋନ୍ତସ୍ସ ଗହେତ୍ୱାନ, ଓଦାତଂ କପିଲମ୍ପି ୱା ॥
ଅନୁକ୍କମେନ ଏତାନି, ସନ୍ଥତାନି ଚ ତୀଣିପି ।
ନିସ୍ସଜ୍ଜିତ୍ୱାପି ଲଦ୍ଧାନି, ସେୱମାନସ୍ସ ଦୁକ୍କଟଂ ॥
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ।
ଇମେସଂ ପନ ତିଣ୍ଣମ୍ପି, ତତିୟଂ ତୁ କ୍ରିୟାକ୍ରିୟଂ ॥
ଦ୍ୱେଭାଗକଥା ।
ଛନ୍ନଂ ଓରେନ ୱସ୍ସାନଂ, କରୋନ୍ତସ୍ସ ଚ ସନ୍ଥତଂ ।
ହୋତି ନିସ୍ସଗ୍ଗିୟାପତ୍ତି, ଠପେତ୍ୱା ଭିକ୍ଖୁସମ୍ମୁତିଂ ॥
ଅନାପତ୍ତି ପରତ୍ଥାୟ, କାରାପେତି କରୋତି ୱା ।
କତଂ ୱା ପନ ଅଞ୍ଞେନ, ଲଭିତ୍ୱା ପରିଭୁଞ୍ଜତୋ ॥
ଛବ୍ବସ୍ସାନି କରୋନ୍ତସ୍ସ, ତଦୁଦ୍ଧମ୍ପି ଚ ସନ୍ଥତଂ ।
ୱିତାନେ ସାଣିପାକାରେ, ନିସ୍ସଜ୍ଜିତ୍ୱା କତେପି ଚ ॥
ଛବ୍ବସ୍ସକଥା ।
ଅନାପତ୍ତି ଅନାଦାୟ, ଅସନ୍ତେ ସନ୍ଥତେ ପନ ।
ଅଞ୍ଞସ୍ସତ୍ଥାୟ କାରେତୁଂ, କତଞ୍ଚ ପରିଭୁଞ୍ଜିତୁଂ ॥
ଅନାଦାନୱସେନସ୍ସ, ସୁଗତସ୍ସ ୱିଦତ୍ଥିୟା ।
କରଣେନ ଚ ସତ୍ଥାରା, ୱୁତ୍ତମେତଂ କ୍ରିୟାକ୍ରିୟଂ ॥
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ।
ଅନନ୍ତରସ୍ସିମସ୍ସାପି, ୱିସେସୋ ନୁପଲବ୍ଭତି ॥
ନିସୀଦନସନ୍ଥତକଥା ।
ଗଚ୍ଛନ୍ତେ ପନ ୟାନେ ୱା, ହତ୍ଥିଅସ୍ସାଦିକେସୁ ୱା ।
ଠପେତି ୟଦି ଲୋମାନି, ସାମିକସ୍ସ ଅଜାନତୋ ॥
ତିୟୋଜନମତୀତେସୁ, ତେସୁ ଆପତ୍ତି ଭିକ୍ଖୁନୋ ।
ଅଗଚ୍ଛନ୍ତେସୁ ତେସ୍ୱେୱ, ଠପିତେସୁପ୍ୟୟଂ ନୟୋ ॥
ୟାନେ ପନ ଅଗଚ୍ଛନ୍ତେ, ଅସ୍ସେ ୱା ହତ୍ଥିପିଟ୍ଠିୟଂ ।
ଠପେତ୍ୱା ଅଭିରୂହିତ୍ୱା, ସଚେ ସାରେତି ୱଟ୍ଟତି ॥
ନ ୱଟ୍ଟତୀତି ନିଦ୍ଦିଟ୍ଠଂ, କୁରୁନ୍ଦଟ୍ଠକଥାୟ ହି ।
ତଂ ପନଞ୍ଞଂ ହରାପେତି, ୱଚନେନ ୱିରୁଜ୍ଝତି ॥
କଣ୍ଣଚ୍ଛିଦ୍ଦେସୁ ଲୋମାନି, ପକ୍ଖିପିତ୍ୱାପି ଗଚ୍ଛତୋ ।
ହୋତିୟେୱ କିରାପତ୍ତି, ଲୋମାନଂ ଗଣନାୱସା ॥
ସୁତ୍ତକେନ ଚ ବନ୍ଧିତ୍ୱା, ଠପିତଂ ପନ ୱଟ୍ଟତି ।
ୱେଣିଂ କତ୍ୱା ହରନ୍ତସ୍ସ, ଆପତ୍ତି ପରିଦୀପିତା ॥
ସୁଙ୍କଘାତଂ ଅନୁପ୍ପତ୍ୱା, ଚୋରାଦୀହି ଉପଦ୍ଦୁତୋ ।
ୟୋ ଚଞ୍ଞୱିହିତୋ ୱାପି, ଆପତ୍ତି ୟଦି ଗଚ୍ଛତି ॥
ତିୟୋଜନଂ ହରନ୍ତସ୍ସ, ଊନକଂ ୱା ତିୟୋଜନଂ ।
ତଥା ପଚ୍ଚାହରନ୍ତସ୍ସ, ତାନିୟେୱ ତିୟୋଜନଂ ॥
ନିୱାସତ୍ଥାୟ ୱା ଗନ୍ତ୍ୱା, ହରନ୍ତସ୍ସ ତତୋ ପରଂ ।
ଅଚ୍ଛିନ୍ନଂ ୱାପି ନିସ୍ସଟ୍ଠଂ, ଲଭିତ୍ୱା ହରତୋପି ଚ ॥
ହରାପେନ୍ତସ୍ସ ଅଞ୍ଞେନ, ହରତୋ କତଭଣ୍ଡକଂ ।
ତଥା ଉମ୍ମତ୍ତକାଦୀନଂ, ଅନାପତ୍ତି ପକାସିତା ॥
ଇଦଂ ପନ ସମୁଟ୍ଠାନଂ, କାୟତୋ କାୟଚିତ୍ତତୋ ।
ଅଚିତ୍ତଂ କାୟକମ୍ମଞ୍ଚ, ତିଚିତ୍ତଞ୍ଚ ତିୱେଦନଂ ॥
ଏଳକଲୋମକଥା ।
ସମୁଟ୍ଠାନାଦିନା ସଦ୍ଧିଂ, ଲୋମଧୋୱାପନମ୍ପି ଚ ।
ଚୀୱରସ୍ସ ପୁରାଣସ୍ସ, ଧୋୱାପନସମଂ ମତଂ ॥
ଏଳକଲୋମଧୋୱାପନକଥା ।
ଗଣ୍ହେୟ୍ୟ ୱା ଗଣ୍ହାପେୟ୍ୟ, ରଜତଂ ଜାତରୂପକଂ ।
ନିସ୍ସଜ୍ଜିତ୍ୱା ପନାପତ୍ତି, ଦେସେତବ୍ବାୱ ଭିକ୍ଖୁନା ॥
ରଜତଂ ଜାତରୂପଞ୍ଚ, ଉଭିନ୍ନଂ ମାସକୋପି ଚ ।
ଏତଂ ଚତୁବ୍ବିଧଂ ୱତ୍ଥୁ, ହୋତି ନିସ୍ସଗ୍ଗିୟାୱହଂ ॥
ମୁତ୍ତା ମଣି ସିଲା ସଙ୍ଖୋ, ପୱାଳଂ ଲୋହିତଙ୍କକୋ ।
ମସାରଗଲ୍ଲଂ ଧଞ୍ଞାନି, ସତ୍ତ ଗୋମହିସାଦିକଂ ॥
ଖେତ୍ତଂ ୱତ୍ଥୁଂ ତଳାକଞ୍ଚ, ଦାସିଦାସାଦିକଂ ପନ ।
ଦୁକ୍କଟସ୍ସେୱ ୱତ୍ଥୂନି, ଦୀପିତାନି ମହେସିନା ॥
ମୁଗ୍ଗମାସାଦିକଂ ସବ୍ବଂ, ସପ୍ପିଆଦୀନି ତଣ୍ଡୁଲା ।
ସୁତ୍ତଂ ୱତ୍ଥଂ ହଲଂ ଫାଲଂ, କପ୍ପିୟଂ ଏୱମାଦିକଂ ॥
ତତ୍ଥତ୍ତନୋ ପନତ୍ଥାୟ, ୱତ୍ଥୁଂ ନିସ୍ସଗ୍ଗିୟସ୍ସ ହି ।
ସମ୍ପଟିଚ୍ଛତି ୟୋ ଭିକ୍ଖୁ, ତସ୍ସ ନିସ୍ସଗ୍ଗିୟଂ ସିୟା ॥
ସଙ୍ଘାଦୀନଂ ତମତ୍ଥାୟ, ଗଣ୍ହତୋ ଦୁକ୍କଟଂ ତଥା ।
ଦୁକ୍କଟସ୍ସ ଚ ୱତ୍ଥୁମ୍ପି, ସବ୍ବତ୍ଥାୟ ଚ ଦୁକ୍କଟଂ ॥
ସଚେ କହାପଣାଦୀନଂ, ସହସ୍ସଂ ପଟିଗଣ୍ହତି ।
ୱତ୍ଥୂନଂ ଗଣନାୟସ୍ସ, ଆପତ୍ତିଗଣନା ସିୟା ॥
ତଥା ସିଥିଲବଦ୍ଧେସୁ, ଥୱିକାଦୀସୁ ରୂପତୋ ।
ଆପତ୍ତିଗଣନା ୱୁତ୍ତା, ମହାପଚ୍ଚରିୟଂ ପନ ॥
‘‘ଇଦଂ ଅୟ୍ୟସ୍ସ ହୋତୂ’’ତି, ୱୁତ୍ତେ ୱା ପନ କେନଚି ।
ସଚେ ଗଣ୍ହିତୁକାମୋପି, ନିସେଧେତବ୍ବମେୱ ଚ ॥
ପଟିକ୍ଖିତ୍ତେପି ତଂ ୱତ୍ଥୁଂ, ଠପେତ୍ୱା ୟଦି ଗଚ୍ଛତି ।
ତଥା ଗୋପାୟିତବ୍ବଂ ତଂ, ୟଥା ତଂ ନ ୱିନସ୍ସତି ॥
‘‘ଆହରେଦମିଦଂ ଗଣ୍ହ, ଇଦଂ ଦେହୀଧ ନିକ୍ଖିପ’’ ।
ଇଚ୍ଚେୱଂ ଭିକ୍ଖୁନୋ ୱତ୍ତୁଂ, ନ ୱଟ୍ଟତି ଅକପ୍ପିୟଂ ॥
ଠପେତ୍ୱା ରୂପିୟଗ୍ଗାହଂ, ନିସ୍ସଟ୍ଠପରିୱତ୍ତିତଂ ।
ସବ୍ବେହି ପରିଭୋତ୍ତବ୍ବଂ, ଭାଜେତ୍ୱା ସପ୍ପିଆଦିକଂ ॥
ଅତ୍ତନୋ ପତ୍ତଭାଗମ୍ପି, ପଟିଗ୍ଗାହକଭିକ୍ଖୁନୋ ।
ଗହେତୁଂ ଅଞ୍ଞତୋ ଲଦ୍ଧଂ, ଭୁଞ୍ଜିତୁଂ ୱା ନ ୱଟ୍ଟତି ॥
ୟଂ କିଞ୍ଚି ପନ ସମ୍ଭୂତଂ, ପଚ୍ଚୟଂ ୱତ୍ଥୁତୋ ତତୋ ।
ଭିକ୍ଖୁନୋ ସେୱମାନସ୍ସ, ହୋତି ଆପତ୍ତି ଦୁକ୍କଟଂ ॥
ଅଜ୍ଝାରାମେ ଅନାପତ୍ତି, ତମଜ୍ଝାୱସଥେପି ୱା ।
ଗହେତ୍ୱା ୱା ଗହାପେତ୍ୱା, ନିକ୍ଖିପନ୍ତସ୍ସ ଭିକ୍ଖୁନୋ ॥
ତିକପାଚିତ୍ତିୟଂ ୱୁତ୍ତଂ, ରୂପିୟନ୍ତି ଅରୂପିୟେ ।
ସଞ୍ଞିନୋ ୱିମତିସ୍ସାପି, ହୋତି ଆପତ୍ତି ଦୁକ୍କଟଂ ॥
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ।
କ୍ରିୟାକ୍ରିୟମିଦଂ ୱୁତ୍ତଂ, ଅୟମେୱ ୱିସେସତା ॥
ରୂପିୟପଟିଗ୍ଗହଣକଥା ।
ୱତ୍ଥୁଂ ନିସ୍ସଗ୍ଗିୟସ୍ସାପି, ୱତ୍ଥୁଂ ୱା ଦୁକ୍କଟସ୍ସ ଚ ।
କପ୍ପିୟସ୍ସ ଚ ୱତ୍ଥୁଂ ୱା, ୟୋ ନିସ୍ସଗ୍ଗିୟୱତ୍ଥୁନା ॥
ୱତ୍ଥୁନା ଦୁକ୍କଟସ୍ସାପି, ୱତ୍ଥୁଂ ନିସ୍ସଗ୍ଗିୟସ୍ସ ୱା ।
ପରିୱତ୍ତେତି ଆପତ୍ତି, କପ୍ପିୟେନ ଚ ୱତ୍ଥୁନା ॥
ଦୁକ୍କଟସ୍ସ ଚ ୱତ୍ଥୁଂ ୱା, ୱତ୍ଥୁଂ ୱା କପ୍ପିୟସ୍ସ ଚ ।
ୱତ୍ଥୁନା ଦୁକ୍କଟସ୍ସେୱ, ପରିୱତ୍ତେତି ଦୁକ୍କଟଂ ॥
ୱତ୍ଥୁନା କପ୍ପିୟସ୍ସାପି, ତଥା ଦୁକ୍କଟୱତ୍ଥୁକଂ ।
ପରିୱତ୍ତେତି ୟୋ ତସ୍ସ, ହୋତି ଆପତ୍ତି ଦୁକ୍କଟଂ ॥
ୱତ୍ଥୁନୋ ଦୁକ୍କଟସ୍ସାପି, ତଥା ନିସ୍ସଗ୍ଗିୟସ୍ସ ଚ ।
ଗହଣଂ ୱାରିତଂ ପୁବ୍ବେ, ଇମିନା ପରିୱତ୍ତନଂ ॥
ରୂପିୟନ୍ତି ଚ ସଞ୍ଞିସ୍ସ, ୱିମତିସ୍ସ ଅରୂପିୟେ ।
ତେନ ଦ୍ୱେ ଦୁକ୍କଟା ହୋନ୍ତି, ଚେତାପେନ୍ତସ୍ସ ରୂପିୟଂ ॥
ଅରୂପିୟନ୍ତି ସଞ୍ଞିସ୍ସ, ଅନାପତ୍ତି ଅରୂପିୟେ ।
‘‘ଇଦଂ ଗହେତ୍ୱା ଦେହୀ’’ତି, ୱଦତୋପି ଚ ପଞ୍ଚହି ॥
ସେସଂ ଅନନ୍ତରେନେୱ, ସମୁଟ୍ଠାନାଦିକଂ ସମଂ ।
ଇଦଂ କ୍ରିୟସମୁଟ୍ଠାନଂ, ଅୟମେୱ ୱିସେସତା ॥
ରୂପିୟସଂୱୋହାରକଥା ।
କପ୍ପିୟଂ କପ୍ପିୟେନେୱ, ପରିୱତ୍ତୟତୋ ପନ ।
ହୋତି ନିସ୍ସଗ୍ଗିୟାପତ୍ତି, ଠପେତ୍ୱା ସହଧମ୍ମିକେ ॥
ଅକପ୍ପିୟସ୍ସ ୱତ୍ଥୁସ୍ସ, ତେନେୱ ପରିୱତ୍ତନଂ ।
ନ ଗଚ୍ଛତୀତି ନିଦ୍ଦିଟ୍ଠଂ, କୟୱିକ୍କୟସଙ୍ଗହଂ ॥
ତସ୍ମା ମାତାପିତୂନମ୍ପି, ୱତ୍ଥୁଂ ୟଂ କିଞ୍ଚି କପ୍ପିୟଂ ।
‘‘ଇମଂ ଦେହିମିନା ହୀ’’ତି, ୱଦତୋ ପନ ଦୁକ୍କଟଂ ॥
ସକଂ ୱା ଦେତି ଚେ ଭଣ୍ଡଂ, ଏୱଂ ୱତ୍ୱାନ ମାତୁୟା ।
ମାତୁୟା ୱା ତଥା ଭଣ୍ଡଂ, ସୟଂ ଗଣ୍ହାତି ଦୁକ୍କଟଂ ॥
ସହତ୍ଥଂ ପରଭଣ୍ଡସ୍ମିଂ, ପରହତ୍ଥଞ୍ଚ ଅତ୍ତନୋ ।
ଭଣ୍ଡକେ ପନ ସମ୍ପତ୍ତେ, ନିସ୍ସଗ୍ଗିୟମୁଦୀରିତଂ ॥
‘‘ଗହେତ୍ୱା ୱା ଇଦଂ ନାମ, ଭୁଞ୍ଜିତ୍ୱା ଓଦନଂ ଇମଂ ।
ଇଦଂ ନାମ କରୋହୀ’’ତି, ୱତ୍ତୁଂ ପନ ନ ୱଟ୍ଟତି ॥
ୱିଘାସାଦମଥଞ୍ଞଂ ୱା, ‘‘ଭୁଞ୍ଜିତ୍ୱା ଓଦନଂ ଇମଂ ।
ଛଲ୍ଲିଂ ୱା ପନ ୱଲ୍ଲିଂ ୱା, କଟ୍ଠଂ ୱା ଦାରୁମେୱ ୱା ॥
ଆହରା’’ତି ୱଦନ୍ତସ୍ସ, ୱତ୍ଥୂନଂ ଗଣନାୱସା ।
ହୋନ୍ତି ଆପତ୍ତିୟୋ ତସ୍ସ, ଭିକ୍ଖୁନୋ କୟୱିକ୍କୟେ ॥
‘‘ଇମଞ୍ଚ ୟାଗୁଂ ପିୱ ଭୁଞ୍ଜ ଭତ୍ତଂ ।
ଭୁତ୍ତୋସି ଭୁଞ୍ଜିସ୍ସସି ଭୁଞ୍ଜସୀଦଂ ।
ଭତ୍ତଂ, ଇମଂ ନାମ କରୋହି କମ୍ମଂ’’ ।
ଇଚ୍ଚେୱ ୱତ୍ତୁଂ ପନ ୱଟ୍ଟତେୱ ॥
ଭୂମିୟା ସୋଧନେ ୱାପି, ଲିମ୍ପନେ ୱତ୍ଥଧୋୱନେ ।
ଏତ୍ଥ କିଞ୍ଚାପି ନତ୍ଥଞ୍ଞଂ, ଭଣ୍ଡଂ ନିସ୍ସଜ୍ଜିତବ୍ବକଂ ॥
ନିସ୍ସଗ୍ଗିୟେ ଚ ୱତ୍ଥୁମ୍ହି, ନଟ୍ଠେ ଭୁତ୍ତେପି ୱା ୟଥା ।
ଦେସେତବ୍ବାୱ ଆପତ୍ତି, ଦେସେତବ୍ବା ତଥା ଅୟଂ ॥
‘‘ଇମିନାୱ ଇମଂ ନାମ, ଗହେତ୍ୱା ଦେହି ମେ’’ଇତି ।
ଆଚିକ୍ଖତି ଅନାପତ୍ତି, ଠପେତ୍ୱା ଭଣ୍ଡସାମିକଂ ॥
‘‘ଇଦଂ ମମତ୍ଥି ଅତ୍ଥୋ ମେ, ଇମିନା’’ତି ଚ ଭାସତୋ ।
ସେସଂ ଅନନ୍ତରେନେୱ, ସମୁଟ୍ଠାନାଦିକଂ ସମଂ ॥
କୟୱିକ୍କୟକଥା ।
କୋସିୟୱଗ୍ଗୋ ଦୁତିୟୋ ।
ମତ୍ତିକାୟୋମୟା ପତ୍ତା, କପ୍ପିୟା ଜାତିତୋ ଦୁୱେ ।
ତୟୋ ପତ୍ତସ୍ସ ୱଣ୍ଣା ତୁ, ଉକ୍କଟ୍ଠୋ ମଜ୍ଝିମୋମକୋ ॥
ଦ୍ୱିନ୍ନଂ ତଣ୍ଡୁଲନାଳୀନଂ, ଭତ୍ତଂ ମଗଧନାଳିୟା ।
ଖାଦନଞ୍ଚ ଚତୁବ୍ଭାଗଂ, ବ୍ୟଞ୍ଜନଞ୍ଚ ତଦୂପିୟଂ ॥
ଉକ୍କଟ୍ଠୋ ନାମ ସୋ ପତ୍ତୋ, ୟୋ ତଂ ସବ୍ବଂ ତୁ ଗଣ୍ହତି ।
ମଜ୍ଝିମୋ ତସ୍ସୁପଡ୍ଢୋ ଚ, ତଦୁପଡ୍ଢୋ ଚ ଓମକୋ॥
ଉକ୍କଟ୍ଠସ୍ସ ଚ ଉକ୍କଟ୍ଠୋ, ତସ୍ସେୱୋମକମଜ୍ଝିମା ।
ଏୱଂ ମଜ୍ଝିମଓମେସୁ, ନୱ ପତ୍ତା ଭୱନ୍ତି ହି ॥
ଉକ୍କଟ୍ଠୁକ୍କଟ୍ଠକୋ ତେସୁ, ଅପତ୍ତୋ ଓମକୋମକୋ ।
ତସ୍ମା ନାପି ଅଧିଟ୍ଠାନଂ, ନ ଗଚ୍ଛନ୍ତି ୱିକପ୍ପନଂ ॥
ସେସଂ ସତ୍ତୱିଧଂ ପତ୍ତଂ, ପତ୍ତଲକ୍ଖଣସଂୟୁତଂ ।
ଅଧିଟ୍ଠାୟ ୱିକପ୍ପେତ୍ୱା, ପରିଭୁଞ୍ଜେୟ୍ୟ ପଣ୍ଡିତୋ ॥
ଦସାହପରମଂ କାଲଂ, ଧାରେୟ୍ୟ ଅତିରେକତୋ ।
ଅତିକ୍କମୟତୋ ପତ୍ତଂ, ତଞ୍ହି ନିସ୍ସଗ୍ଗିୟଂ ସିୟା ॥
ୟଂ ପତ୍ତଂ ନ ୱିକପ୍ପେତି, ୟଂ ନାଧିଟ୍ଠେତି ୱା ପନ ।
ୱିନୟଞ୍ଞୂହି ସୋ ପତ୍ତୋ, ଅତିରେକୋତି ୱଣ୍ଣିତୋ ॥
ୱତ୍ତବ୍ବଂ ତୁ ‘‘ଇମଂ ପତ୍ତଂ, ଅଧିଟ୍ଠାମୀ’’ତି ସମ୍ମୁଖେ ।
‘‘ଏତଂ ପତ୍ତ’’ନ୍ତି ଦୂରସ୍ମିଂ, ପଚ୍ଚୁଦ୍ଧାରେପ୍ୟୟଂ ନୟୋ ॥
ଆଭୋଗଂ ମନସା କତ୍ୱା, କତ୍ୱା କାୟୱିକାରକଂ ।
କାୟେନପି ଚ ପତ୍ତସ୍ସ, ଅଧିଟ୍ଠାନଂ ପକାସିତଂ ॥
ପତ୍ତୋ ଜହତିଧିଟ୍ଠାନଂ, ଦାନଭେଦକନାସତୋ ।
ୱିବ୍ଭମୁଦ୍ଧାରପଚ୍ଚକ୍ଖ-ପରିୱତ୍ତନଗାହତୋ ॥
କଙ୍ଗୁସିତ୍ଥପ୍ପମାଣେନ, ଖେନାଧିଟ୍ଠାନମୁଜ୍ଝତି ।
ପିଦହିତ୍ୱା ଅଧିଟ୍ଠେୟ୍ୟ, ଅୟୋଚୁଣ୍ଣେନ ୱାଣିୟା ॥
ୟୋ ହି ନିସ୍ସଗ୍ଗିୟଂ ପତ୍ତଂ, ଅନିସ୍ସଜ୍ଜେୱ ଭୁଞ୍ଜତି ।
ଦୁକ୍କଟଂ ତସ୍ସ ନିଦ୍ଦିଟ୍ଠଂ, ଭୁତ୍ୱା ଧୋୱନଧୋୱନେ ॥
ସୁୱଣ୍ଣମଣିପତ୍ତୋ ଚ, ୱେଳୁରିୟଫଲିକୁବ୍ଭୱୋ ।
କଂସକାଚମୟୋ ପତ୍ତୋ, ତିପୁସୀସମୟୋପି ଚ ॥
ତଥା ଦାରୁମୟୋ ପତ୍ତୋ, ତମ୍ବସଜ୍ଝୁମୟୋପି ଚ ।
ଏକାଦସୱିଧୋ ପତ୍ତୋ, ୱୁତ୍ତୋ ଦୁକ୍କଟୱତ୍ଥୁକୋ ॥
ଘଟସୀସକଟାହୋ ଚ, ତୁମ୍ବଂ ଚସ୍ସାନୁଲୋମିକଂ ।
ତମ୍ବଲୋହମୟଂ ତତ୍ଥ, ଥାଲକଂ ପନ ୱଟ୍ଟତି ॥
ଫଲିକକାଚକଂସାନଂ, ତଟ୍ଟିକାଦୀନି କାନିଚି ।
ପୁଗ୍ଗଲସ୍ସ ନ ୱଟ୍ଟନ୍ତି, ୱଟ୍ଟନ୍ତି ଗିହିସଙ୍ଘିକା ॥
ୟଂ କିଞ୍ଚି ସୋଦକଂ ପତ୍ତଂ, ପଟିସାମେୟ୍ୟ ଦୁକ୍କଟଂ ।
ସାଧୁକଂ ୱୋଦକଂ କତ୍ୱା, ପଟିସାମେୟ୍ୟ ପଣ୍ଡିତୋ ॥
ଭିକ୍ଖୁନୋ ସୋଦକଂ ପତ୍ତଂ, ଓତାପେତୁଂ ନ ୱଟ୍ଟତି ।
ଉଣ୍ହେ ନ ନିଦହେତବ୍ବୋ, ନିଦହନ୍ତସ୍ସ ଦୁକ୍କଟଂ ॥
ମିଡ୍ଢନ୍ତେ ପରିଭଣ୍ଡନ୍ତେ, ଠପେତୁଂ ନ ଚ ୱଟ୍ଟତି ।
ମିଡ୍ଢିୟା ପରିଭଣ୍ଡେ ୱା, ୱିତ୍ଥିଣ୍ଣେ ପନ ୱଟ୍ଟତି ॥
ଦାରୁଆଧାରକେ ପତ୍ତେ, ଦ୍ୱେ ଠପେତୁମ୍ପି ୱଟ୍ଟତି ।
ଅୟମେୱ ନୟୋ ଦଣ୍ଡ-ଭୂମିଆଧାରକେସୁପି ॥
ତଟ୍ଟିକାୟପି ଚୋଳେ ୱା, ପୋତ୍ଥକେ କଟସାରକେ ।
ପରିଭଣ୍ଡକତାୟାପି, ଭୂମିୟଂ ୱାଲୁକାସୁ ୱା ॥
ତଥାରୂପାସୁ ସୁଦ୍ଧାସୁ, ଠପେତୁଂ ପନ ୱଟ୍ଟତି ।
ସରଜାୟ ଠପେନ୍ତସ୍ସ, ଦୁକ୍କଟଂ ଖରଭୂମିୟା ॥
ଦଣ୍ଡେ ୱା ନାଗଦନ୍ତେ ୱା, ଲଗ୍ଗେତୁମ୍ପି ନ ୱଟ୍ଟତି ।
ଛତ୍ତଙ୍ଗମଞ୍ଚପୀଠେସୁ, ଠପେନ୍ତସ୍ସ ଚ ଦୁକ୍କଟଂ ॥
ଅଟନୀସୁ ହି ବନ୍ଧିତ୍ୱା, ଓଲମ୍ବେତୁମ୍ପି ୱଟ୍ଟତି ।
ବନ୍ଧିତ୍ୱା ପନ ମଞ୍ଚସ୍ସ, ଠପେତୁଂପରି ୱଟ୍ଟତି ॥
ମଞ୍ଚପୀଠଟ୍ଟକେ ପତ୍ତଂ, ଠପେତୁଂ ପନ ୱଟ୍ଟତି ।
ଭତ୍ତପୂରୋପି ୱା ଛତ୍ତେ, ଠପେତୁଂ ନ ଚ ୱଟ୍ଟତି ॥
ତୟୋ ଭାଣୱାରା ନିଟ୍ଠିତା ।
କୱାଟଂ ନ ପଣାମେୟ୍ୟ, ପତ୍ତହତ୍ଥୋ ସଚେ ପନ ।
ୟେନ କେନଚି ଅଙ୍ଗେନ, ପଣାମେୟ୍ୟସ୍ସ ଦୁକ୍କଟଂ ॥
ନ ନୀହରେୟ୍ୟ ପତ୍ତେନ, ଚଲକାନଟ୍ଠିକାନି ୱା ।
ଉଚ୍ଛିଟ୍ଠମୁଦକଂ ୱାପି, ନୀହରନ୍ତସ୍ସ ଦୁକ୍କଟଂ ॥
ପତ୍ତଂ ପଟିଗ୍ଗହଂ କତ୍ୱା, ଧୋୱିତୁଂ ହତ୍ଥମେୱ ୱା ।
ମୁଖତୋ ନୀହଟଂ ପତ୍ତେ, ଠପେତୁଂ ନ ଚ ୱଟ୍ଟତି ॥
ଅନାପତ୍ତି ଦସାହସ୍ସ, ଅନ୍ତୋୟେୱ ଚ ୟୋ ପନ ।
ଅଧିଟ୍ଠେତି ୱିକପ୍ପେତି, ୱିସ୍ସଜ୍ଜେତି ୱିନସ୍ସତି ॥
ପଠମସ୍ସ ହି ପତ୍ତସ୍ସ, ପଠମେନ ମହେସିନା ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ପଠମପତ୍ତକଥା ।
ପଞ୍ଚବନ୍ଧନଊନସ୍ମିଂ, ପତ୍ତେ ସତି ଚ ୟୋ ପନ ।
ୱିଞ୍ଞାପେୟ୍ୟ ନୱଂ ପତ୍ତଂ, ତସ୍ସ ନିସ୍ସଗ୍ଗିୟଂ ସିୟା ॥
ବନ୍ଧନଂ ଏକମୁଦ୍ଦିଟ୍ଠଂ, ଦ୍ୱଙ୍ଗୁଲାୟ ଚ ରାଜିୟା ।
ବନ୍ଧନାନି ଚ ଚତ୍ତାରି, ତଥାଟ୍ଠଙ୍ଗୁଲରାଜିୟା ॥
ପଞ୍ଚ ୱା ରାଜିୟୋ ୟସ୍ସ, ଏକା ୱାପି ଦସଙ୍ଗୁଲା ।
ଅପତ୍ତୋ ନାମୟଂ ପତ୍ତୋ, ୱିଞ୍ଞାପେୟ୍ୟ ତତୋ ପରଂ ॥
ଅୟୋପତ୍ତୋ ଅନେକେହି, ଲୋହମଣ୍ଡଲକେହି ୱା ।
ବଦ୍ଧୋ ୱଟ୍ଟତି ମଟ୍ଠୋ ଚେ, ଅୟୋଚୁଣ୍ଣେନ ୱାଣିୟା ॥
ପତ୍ତଂ ସଙ୍ଘସ୍ସ ନିସ୍ସଟ୍ଠଂ, ତସ୍ସ ନିସ୍ସଗ୍ଗିୟଂ ପନ ।
ଅନୁକମ୍ପାୟ ତଂ ତସ୍ମିଂ, ଅଗଣ୍ହନ୍ତସ୍ସ ଦୁକ୍କଟଂ ॥
ଦୀୟମାନେ ତୁ ପତ୍ତସ୍ମିଂ, ୟସ୍ସ ସୋ ନ ଚ ରୁଚ୍ଚତି ।
ଅପ୍ପିଚ୍ଛତାୟ ୱା ପତ୍ତଂ, ତଂ ନ ଗଣ୍ହାତି ୱଟ୍ଟତି ॥
ଅପତ୍ତସ୍ସ ତୁ ଭିକ୍ଖୁସ୍ସ ।
ନ ଦାତବ୍ବୋତି ଦୀପିତୋ ।
ତତ୍ଥ ୟୋ ପତ୍ତପରିୟନ୍ତୋ ।
ସୋ ଦେୟ୍ୟୋ ତସ୍ସ ଭିକ୍ଖୁନୋ ॥
ସଚେ ସୋ ତଂ ଜିଗୁଚ୍ଛନ୍ତୋ, ଅପ୍ପଦେସେ ଠପେତି ୱା ।
ୱିସ୍ସଜ୍ଜେତି ଅଭୋଗେନ, ପରିଭୁଞ୍ଜତି ଦୁକ୍କଟଂ ॥
ନଟ୍ଠେ ଭିନ୍ନେପି ୱା ପତ୍ତେ, ଅନାପତ୍ତି ପକାସିତା ।
ଅତ୍ତନୋ ଞାତକାଦୀନଂ, ଗଣ୍ହତୋ ୱା ଧନେନ ୱା ॥
ସଞ୍ଚରିତ୍ତସମୁଟ୍ଠାନଂ, କ୍ରିୟଂ ପଣ୍ଣତ୍ତିୱଜ୍ଜକଂ ।
କାୟକମ୍ମଂ ୱଚୀକମ୍ମଂ, ତିଚିତ୍ତଞ୍ଚ ତିୱେଦନଂ ॥
ଦୁତିୟପତ୍ତକଥା ।
ସପ୍ପିଆଦିଂ ପୁରେଭତ୍ତଂ, ଭେସଜ୍ଜଂ ପଟିଗୟ୍ହ ହି ।
ସାମିସମ୍ପି ପୁରେଭତ୍ତଂ, ପରିଭୁଞ୍ଜତି ୱଟ୍ଟତି ॥
ତତୋ ପଟ୍ଠାୟ ସତ୍ତାହଂ, ତଂ ୱଟ୍ଟତି ନିରାମିସଂ ।
ସତ୍ତାହାତିକ୍କମେ ତସ୍ସ, ନିସ୍ସଗ୍ଗିୟମୁଦୀରିତଂ ॥
ପଚ୍ଛାଭତ୍ତମ୍ପି ଗଣ୍ହିତ୍ୱା, କତ୍ୱା ସନ୍ନିଧିକାରକଂ ।
ସାୟତୋ ପନ ସତ୍ତାହଂ, ୱଟ୍ଟତେୱ ନିରାମିସଂ ॥
ପୁରେଭତ୍ତମ୍ପି ପଚ୍ଛା ୱା, ସୟମୁଗ୍ଗହିତଂ ପନ ।
ସରୀରଭୋଗେ ନେତବ୍ବଂ, ସାୟିତୁଂ ନ ଚ ୱଟ୍ଟତି ॥
ନୱନୀତଂ ପୁରେଭତ୍ତଂ, ଭିକ୍ଖୁନା ଗହିତଂ ସଚେ ।
ତାପେତ୍ୱାନୁପସମ୍ପନ୍ନୋ, ଦେତି ୱଟ୍ଟତି ସାମିସଂ ॥
ସୟଂ ତାପେତି ଚେ ଭିକ୍ଖୁ, ସତ୍ତାହମ୍ପି ନିରାମିସଂ ।
ତାପନଂ ନୱନୀତସ୍ସ, ସାମପାକୋ ନ ହୋତି ସୋ ॥
ପଚ୍ଛାଭତ୍ତଂ ଗହେତ୍ୱା ଚେ, ୟେନ କେନଚି ତାପିତଂ ।
ୱଟ୍ଟତେୱ ଚ ତଂ ସପ୍ପି, ସତ୍ତାହମ୍ପି ନିରାମିସଂ ॥
ଖୀରଂ ଦଧିଂ ଚାପି ପଟିଗ୍ଗହେତ୍ୱା ।
ସୟଂ ପୁରେଭତ୍ତମଥୋ କରୋତି ।
ସପ୍ପିଂ ପୁରେଭତ୍ତକମେୱ ତସ୍ସ ।
ନିରାମିସଂ ୱଟ୍ଟତି ଭିକ୍ଖୁନୋ ତଂ ॥
ପଚ୍ଛାଭତ୍ତକତୋ ଉଦ୍ଧଂ, ତଂ ନ ୱଟ୍ଟତି ସାୟିତୁଂ ।
ସୱତ୍ଥୁକସ୍ସ ସପ୍ପିସ୍ସ, ଗହିତତ୍ତାୱ ଭିକ୍ଖୁନୋ ॥
ସତ୍ତାହାତିକ୍କମେପିସ୍ସ, ନ ଦୋସୋ କୋଚି ୱିଜ୍ଜତି ।
‘‘ପଟିଗ୍ଗହେତ୍ୱା ତାନୀ’’ତି, ୱୁତ୍ତତ୍ତା ହି ମହେସିନା ॥
ୟଥା କପ୍ପିୟସପ୍ପିମ୍ହି, ନିସ୍ସଗ୍ଗିୟମୁଦୀରିତଂ ।
ତଥାକପ୍ପିୟସପ୍ପିମ୍ହି, ଦୁକ୍କଟଂ ପରିଦୀପିତଂ ॥
ସବ୍ବାକପ୍ପିୟମଂସାନଂ, ୱଜ୍ଜେତ୍ୱା ମଂସମେୱ ଚ ।
ଖୀରଂ ଦଧି ଚ ସପ୍ପି ଚ, ନୱନୀତଞ୍ଚ ୱଟ୍ଟତି ॥
‘‘ୟେସଂ କପ୍ପତି ମଂସଞ୍ହି, ତେସଂ ସପ୍ପୀ’’ତି କିଂ ଇଦଂ ?
ପଣୀତଭୋଜନସ୍ସାପି, ତଥା ସତ୍ତାହକାଲିକେ ॥
ନିସ୍ସଗ୍ଗିୟସ୍ସ ୱତ୍ଥୂନଂ, ପରିଚ୍ଛେଦନିୟାମନଂ ।
ନ ଚାକପ୍ପିୟମଂସାନଂ, ସପ୍ପିଆଦି ନିୱାରିତଂ ॥
ନୱନୀତେପି ସପ୍ପିମ୍ହି, ଗହିତୁଗ୍ଗହିତାଦିକେ ।
ସବ୍ବୋ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ତେଲଭିକ୍ଖାୟ ଭିକ୍ଖୂନଂ, ପୱିଟ୍ଠାନଂ ଉପାସକା ।
ତେଲଂ ୱା ନୱନୀତଂ ୱା, ସପ୍ପିଂ ୱା ଆକିରନ୍ତି ହି ॥
ଭତ୍ତସିତ୍ଥାନି ୱା ତତ୍ଥ, ତଣ୍ଡୁଲା ୱା ଭୱନ୍ତି ଚେ ।
ଆଦିଚ୍ଚପକ୍କସଂସଟ୍ଠଂ, ହୋତି ସତ୍ତାହକାଲିକଂ ॥
ତିଲସାସପତେଲଂ ୱା, ମଧୁକେରଣ୍ଡତେଲକଂ ।
ଗହିତଂ ତୁ ପୁରେଭତ୍ତଂ, ସାମିସମ୍ପି ନିରାମିସଂ ॥
ପଚ୍ଛାଭତ୍ତକତୋ ଉଦ୍ଧଂ, ସାୟିତବ୍ବଂ ନିରାମିସଂ ।
ସତ୍ତାହାତିକ୍କମେ ତେସଂ, ୱସା ନିସ୍ସଗ୍ଗିୟଂ ସିୟା ॥
ଏରଣ୍ଡମଧୁକଟ୍ଠୀନି, ସାସପାଦୀନି ଚତ୍ତନା ।
ଗହେତ୍ୱା କତତେଲମ୍ପି, ହୋତି ସତ୍ତାହକାଲିକଂ ॥
ୟାୱଜୀୱିକୱତ୍ଥୁତ୍ତା, ତେସଂ ତିଣ୍ଣମ୍ପି ଭିକ୍ଖୁନୋ ।
ସୱତ୍ଥୁଗହଣେ ତସ୍ସ, କାଚାପତ୍ତି ନ ୱିଜ୍ଜତି ॥
ଅତ୍ତନା ୟଂ କତଂ ତେଲଂ, ତଂ ୱଟ୍ଟତି ନିରାମିସଂ ।
ସତ୍ତାହାତିକ୍କମେନସ୍ସ, ହୋତି ନିସ୍ସଗ୍ଗିୟଂ ପନ ॥
ଦୁକ୍କଟଂ ସାସପାଦୀନଂ, ତେଲତ୍ଥାୟେୱ ଭିକ୍ଖୁନା ।
ଗହେତ୍ୱା ଠପିତାନଂ ତୁ, ସତ୍ତାହାତିକ୍କମେ ସିୟା ॥
ନାଳିକେରକରଞ୍ଜାନଂ, ତେଲଂ କୁରୁୱକସ୍ସ ଚ ।
ନିମ୍ବକୋସମ୍ବକାନଞ୍ଚ, ତେଲଂ ଭଲ୍ଲାତକସ୍ସ ଚ ॥
ଇଚ୍ଚେୱମାଦିକଂ ସବ୍ବଂ, ଅୱୁତ୍ତଂ ପାଳିୟଂ ପନ ।
ଗହେତ୍ୱା ନିକ୍ଖିପନ୍ତସ୍ସ, ଦୁକ୍କଟଂ ସମୟଚ୍ଚୟେ ॥
ୟାୱକାଲିକଭେଦଞ୍ଚ, ୟାୱଜୀୱକମେୱ ଚ ।
ୱିଦିତ୍ୱା ସେସମେତ୍ଥାପି, ସପ୍ପିନା ସଦିସୋ ନୟୋ ॥
ଅଚ୍ଛମଚ୍ଛୱରାହାନଂ, ସୁସୁକାଗଦ୍ରଭସ୍ସ ଚ ।
ୱସାନଂ ପନ ପଞ୍ଚନ୍ନଂ, ତେଲଂ ପଞ୍ଚୱିଧଂ ଭୱେ ॥
ସବ୍ବମେୱ ୱସାତେଲଂ, କପ୍ପିୟାକପ୍ପିୟସ୍ସ ଚ ।
ମନୁସ୍ସାନଂ ୱସାତେଲଂ, ଠପେତ୍ୱା ପନ ୱଟ୍ଟତି ॥
ୱସଂ ପଟିଗ୍ଗହେତ୍ୱାନ, ପୁରେଭତ୍ତଂ ପନତ୍ତନା ।
ପକ୍କଂ ୱଟ୍ଟତି ସଂସଟ୍ଠଂ, ସତ୍ତାହମ୍ପି ନିରାମିସଂ ॥
ସଚେ ଅନୁପସମ୍ପନ୍ନୋ, କତ୍ୱା ତଂ ଦେତି ୱଟ୍ଟତି ।
ସାମିସମ୍ପି ପୁରେଭତ୍ତଂ, ତତୋ ଉଦ୍ଧଂ ନିରାମିସଂ ॥
ପଟିଗ୍ଗହେତୁଂ କାତୁଂ ୱା, ପଚ୍ଛାଭତ୍ତଂ ନ ୱଟ୍ଟତି ।
ସେସୋ ୱୁତ୍ତନୟେନେୱ, ୱେଦିତବ୍ବୋ ୱିଭାୱିନା ॥
ଗହିତଞ୍ହି ପୁରେଭତ୍ତଂ, ମଧୁଂ ମଧୁକରୀକତଂ ।
ୱଟ୍ଟତେୱ ପୁରେଭତ୍ତଂ, ସାମିସମ୍ପି ନିରାମିସଂ ॥
ପଚ୍ଛାଭତ୍ତକତୋ ଉଦ୍ଧଂ, ସତ୍ତାହମ୍ପି ନିରାମିସଂ ।
ସତ୍ତାହାତିକ୍କମେ ଦୋସୋ, ୱତ୍ଥୂନଂ ଗଣନାୱସା ॥
ଉଚ୍ଛୁମ୍ହା ପନ ନିବ୍ବତ୍ତଂ, ପକ୍କାପକ୍କଂ ଘନାଘନଂ ।
ରସାଦି ପନ ତଂ ସବ୍ବଂ, ‘‘ଫାଣିତ’’ନ୍ତି ପୱୁଚ୍ଚତି ॥
ଫାଣିତଂ ତୁ ପୁରେଭତ୍ତଂ, ଗହିତଂ ପନ ୱଟ୍ଟତି ।
ସାମିସମ୍ପି ପୁରେଭତ୍ତଂ, ତତୋ ଉଦ୍ଧଂ ନିରାମିସଂ ॥
ଅସଂସଟ୍ଠେନ ଉଚ୍ଛୁସ୍ସ, ରସେନ କତଫାଣିତଂ ।
ଗହିତେନ ପୁରେଭତ୍ତଂ, ତଦହେୱ ନିରାମିସଂ ॥
ଉଚ୍ଛୁଂ ପଟିଗ୍ଗହେତ୍ୱାନ, କତେପେସ ନୟୋ ମତୋ ।
ପଚ୍ଛାଭତ୍ତକତୋ ଉଦ୍ଧଂ, ତଂ ନ ୱଟ୍ଟତି ସାୟିତୁଂ ॥
ଗହିତତ୍ତା ସୱତ୍ଥୁସ୍ସ, ସତ୍ତାହାତିକ୍କମେପି ଚ ।
ହୋତି ତସ୍ସ ଅନାପତ୍ତି, ପଚ୍ଛାଭତ୍ତଂ କତେପି ଚ ॥
ସଂସଟ୍ଠଞ୍ଚ ପୁରେଭତ୍ତଂ, ଗହିତଂ ତମୁପାସକୋ ।
ତଦହେ ଦେତି ଚେ କତ୍ୱା, ସାମିସମ୍ପି ଚ ୱଟ୍ଟତି ॥
ସଂସଟ୍ଠେନ ପୁରେଭତ୍ତଂ, ଗହିତେନ ସୟଂକତଂ ।
ପଚ୍ଛାଭତ୍ତଂ କତଞ୍ଚାପି, ସତ୍ତାହମ୍ପି ନିରାମିସଂ ॥
କତଂ ମଧୁକପୁପ୍ଫାନଂ, ଫାଣିତଂ ସୀତୱାରିନା ।
ସାମିସମ୍ପି ପୁରେଭତ୍ତଂ, ତତୋ ଉଦ୍ଧଂ ନିରାମିସଂ ॥
ସତ୍ତାହାତିକ୍କମେପିସ୍ସ, ଦୁକ୍କଟଂ ପରିଦୀପିତଂ ।
ପକ୍ଖିପିତ୍ୱା କତଂ ଖୀରଂ, ହୋତି ତଂ ୟାୱକାଲିକଂ ॥
ଫଲାନଂ ପନ ସବ୍ବେସଂ, ୟାୱକାଲିକସଞ୍ଞିନଂ ।
ୟାୱକାଲିକମିଚ୍ଚେୱ, ଫାଣିତଂ ପରିଦୀପିତଂ ॥
ପଚ୍ଛାଭତ୍ତମ୍ପି ଭିକ୍ଖୁସ୍ସ, ପଚ୍ଚୟେ ସତି କେୱଲଂ ।
କାଲିକା ପନ ୱଟ୍ଟନ୍ତି, ପୁରେଭତ୍ତଂ ୟଥାସୁଖଂ ॥
ଲଭିତ୍ୱା ପନ ନିସ୍ସଟ୍ଠଂ, ତଂ ତୁ ସତ୍ତାହକାଲିକଂ ।
ଅରୁଆଦୀନି ମକ୍ଖେତୁଂ, ସାୟିତୁଂ ୱା ନ ୱଟ୍ଟତି ॥
ଅଞ୍ଞସ୍ସ ପନ ଭିକ୍ଖୁସ୍ସ, କାୟଭୋଗେ ଚ ୱଟ୍ଟତି ।
ଚଜିତ୍ୱା ନିରପେକ୍ଖୋୱ, ଲଭିତ୍ୱା ପୁନ ସାୟିତୁଂ ॥
ଅନାପତ୍ତି ଅଧିଟ୍ଠେତି, ୱିସ୍ସଜ୍ଜେତି ୱିନସ୍ସତି ।
ଅଚ୍ଛିନ୍ଦିତ୍ୱା ଚ ୱିସ୍ସାସଂ, ଗଣ୍ହତୁମ୍ମତ୍ତକାଦିନୋ ॥
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ।
ସଦାକଥିନଚିତ୍ତେନ, ପଠମେନେୱ ସତ୍ଥୁନା ॥
ଭେସଜ୍ଜସିକ୍ଖାପଦକଥା ।
ମାସୋ ସେସୋତି ଗିମ୍ହାନଂ, ପରିୟେସେୟ୍ୟ ସାଟିକଂ ।
ଅଦ୍ଧମାସୋୱ ସେସୋତି, କତ୍ୱା ପରିଦହେ ବୁଧୋ ॥
କତ୍ୱା ପନ ସତୁପ୍ପାଦଂ, ୱସ୍ସସାଟିକଚୀୱରଂ ।
ନିପ୍ଫାଦେନ୍ତସ୍ସ ଭିକ୍ଖୁସ୍ସ, ସମୟେ ପିଟ୍ଠିସମ୍ମତେ ॥
ହୋତି ନିସ୍ସଗ୍ଗିୟାପତ୍ତି, ଞାତକାଞ୍ଞାତକାଦିନୋ ।
ତେସୁୟେୱ ଚ ୱିଞ୍ଞତ୍ତିଂ, କତ୍ୱା ନିପ୍ଫାଦନେ ତଥା ॥
କତ୍ୱା ପନ ସତୁପ୍ପାଦଂ, ସମୟେ କୁଚ୍ଛିସଞ୍ଞିତେ ।
ନିପ୍ଫାଦେନ୍ତସ୍ସ ଭିକ୍ଖୁସ୍ସ, ୱତ୍ଥମଞ୍ଞାତକାଦିନୋ ॥
ତସ୍ସାଦିନ୍ନକପୁବ୍ବେସୁ, ୱତ୍ତଭେଦେନ ଦୁକ୍କଟଂ ।
କରୋତୋ ତତ୍ର ୱିଞ୍ଞତ୍ତିଂ, ନିସ୍ସଗ୍ଗିୟମୁଦୀରିତଂ ॥
ଓୱସ୍ସାପେତି ଚେ କାୟଂ, ନଗ୍ଗୋ ସତିପି ଚୀୱରେ ।
ନ୍ହାନସ୍ସ ପରିୟୋସାନେ, ଦୁକ୍କଟଂ ୱିୱଟଙ୍ଗଣେ ॥
ଊନକେ ପନ ମାସସ୍ମିଂ, ଅତିରେକୋତି ସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଅଚ୍ଛିନ୍ନଚୀୱରସ୍ସାପି, ଅନାପତ୍ତାପଦାସୁପି ।
ନ୍ହାନକୋଟ୍ଠକୱାପୀସୁ, ନ୍ହାୟନ୍ତସ୍ସ ଚ ଭିକ୍ଖୁନୋ ॥
ସଞ୍ଚରିତ୍ତସମୁଟ୍ଠାନଂ, କ୍ରିୟଂ ପଣ୍ଣତ୍ତିୱଜ୍ଜକଂ ।
କାୟକମ୍ମଂ ୱଚୀକମ୍ମଂ, ତିଚିତ୍ତଞ୍ଚ ତିୱେଦନଂ ॥
ୱସ୍ସିକସାଟିକକଥା ।
ସାମଂ ତୁ ଚୀୱରଂ ଦତ୍ୱା, ଅଚ୍ଛିନ୍ଦନ୍ତସ୍ସ ତଂ ପୁନ ।
ସକସଞ୍ଞାୟ ଭିକ୍ଖୁସ୍ସ, ତସ୍ସ ନିସ୍ସଗ୍ଗିୟଂ ସିୟା ॥
ଏକାୟେୱ ପନାପତ୍ତି, ଏକମଚ୍ଛିନ୍ଦତୋ ସିୟା ।
ବହୂନି ଏକବଦ୍ଧାନି, ଅଚ୍ଛିନ୍ଦନ୍ତସ୍ସ ୱା ତଥା ॥
ୱିସୁଂ ଠିତାନି ଏକେକ-ମାହରାପୟତୋ ପନ ।
ୱତ୍ଥାନଂ ଗଣନାୟସ୍ସ, ଆପତ୍ତିଗଣନା ସିୟା ॥
‘‘ମୟା ଦିନ୍ନାନି ସବ୍ବାନି, ଆହରା’’ତି ଚ ଭାସତୋ ।
ଏକେନ ୱଚନେନେୱ, ହୋନ୍ତି ଆପତ୍ତିୟୋ ବହୂ ॥
ଆଣାପେତି ସଚେ ଅଞ୍ଞଂ, ଭିକ୍ଖୁଂ ଗଣ୍ହାତି ଚୀୱରଂ ।
ବହୂନି ଗଣ୍ହତାଣତ୍ତୋ, ଏକଂ ପାଚିତ୍ତିୟଂ ସିୟା ॥
‘‘ମୟା ଦିନ୍ନାନି ସବ୍ବାନି, ଗଣ୍ହା’’ତି ୱଦତୋ ପନ ।
ଏକାୟସ୍ସ ଚ ୱାଚାୟ, ହୋନ୍ତି ଆପତ୍ତିୟୋ ବହୂ ॥
‘‘ସଙ୍ଘାଟିମୁତ୍ତରାସଙ୍ଗଂ, ଗଣ୍ହ ଗଣ୍ହା’’ତି ଭାସତୋ ।
ହୋତି ୱାଚାୟ ୱାଚାୟ, ଆଣାପେନ୍ତସ୍ସ ଦୁକ୍କଟଂ ॥
ୱିକପ୍ପନୁପଗଂ କିଞ୍ଚି, ଠପେତ୍ୱା ପଚ୍ଛିମଂ ପରଂ ।
ଅଞ୍ଞଂ ପନ ପରିକ୍ଖାରଂ, ଛିନ୍ଦାପେନ୍ତସ୍ସ ଦୁକ୍କଟଂ ॥
ଠପେତ୍ୱା ଉପସମ୍ପନ୍ନଂ, ଅଞ୍ଞେସଂ ଚୀୱରାଦିକଂ ।
ଅଚ୍ଛିନ୍ଦତୋପି ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ଏୱଂ ଅନୁପସମ୍ପନ୍ନେ, ଉପସମ୍ପନ୍ନସଞ୍ଞିନୋ ।
ତତ୍ଥ ୱେମତିକସ୍ସାପି, ଅଚ୍ଛିନ୍ଦନ୍ତସ୍ସ ଦୁକ୍କଟଂ ॥
ସୋ ୱା ଦେତି ସଚେ ତୁଟ୍ଠୋ, ଦୁଟ୍ଠୋ ୱିସ୍ସାସମେୱ ୱା ।
ଗଣ୍ହତୋପି ଅନାପତ୍ତି, ତଥା ଉମ୍ମତ୍ତକାଦିନୋ ॥
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ।
ଅଞ୍ଞତ୍ର ୱେଦନାୟେତ୍ଥ, ହୋତି ସା ଦୁକ୍ଖୱେଦନା ॥
ଚୀୱରଚ୍ଛିନ୍ଦନକଥା ।
ୱିଞ୍ଞାପେତ୍ୱା ସଚେ ସୁତ୍ତଂ, ଛବ୍ବିଧଂ ସାନୁଲୋମିକଂ ।
ଚୀୱରଂ ତନ୍ତୱାୟେହି, ୱାୟାପେତି ନ ୱଟ୍ଟତି ॥
ସାମଂ ୱିଞ୍ଞାପିତଂ ସୁତ୍ତଂ, ଅକପ୍ପିୟମୁଦୀରିତଂ ।
ତନ୍ତୱାୟୋପି ୱିଞ୍ଞତ୍ତୋ, ତଥା ଅଞ୍ଞାତକାଦିକୋ ॥
ୱିଞ୍ଞତ୍ତତନ୍ତୱାୟେନ, ସୁତ୍ତେନାକପ୍ପିୟେନ ଚ ।
ଚୀୱରଂ ୱାୟାପେନ୍ତସ୍ସ, ନିସ୍ସଗ୍ଗିୟମୁଦୀରିତଂ ॥
ୱିଦତ୍ଥିମତ୍ତେ ଦୀଘେନ, ହତ୍ଥମତ୍ତେ ତିରୀୟତୋ ।
ୱୀତେ ନିସ୍ସଗ୍ଗିୟଂ ୱୁତ୍ତଂ, ଫଲକେ ଫଲକେପି ଚ ॥
ତେନେୱ କପ୍ପିୟଂ ସୁତ୍ତଂ, ୱାୟାପେନ୍ତସ୍ସ ଦୁକ୍କଟଂ ।
ତଥେୱ ତନ୍ତୱାୟେନ, କପ୍ପିୟେନ ଅକପ୍ପିୟଂ ॥
ଏକନ୍ତରିକତୋ ୱାପି, ଦୀଘତୋ ୱା ତିରୀୟତୋ ।
କପ୍ପିୟାକପ୍ପିୟେହେୱ, ୱୀତେ ସୁତ୍ତେହି ଦୁକ୍କଟଂ ॥
କପ୍ପିୟାକପ୍ପିୟେହେୱ, ତନ୍ତୱାୟେହି ୱେ କତେ ।
କପ୍ପିୟାକପ୍ପିୟଂ ସୁତ୍ତଂ, ମିସ୍ସେତ୍ୱା ତସ୍ସ ଦୁକ୍କଟଂ ॥
ସଚେ ଅକପ୍ପିୟଂ ସୁତ୍ତଂ, ୱାରେନେୱ ୱିନନ୍ତି ତେ ।
ଦସ୍ସେତ୍ୱାୱ ପରିଚ୍ଛେଦଂ, ଅକପ୍ପିୟୱିତେ ପନ ॥
ପାଚିତ୍ତିୟଂ ପମାଣସ୍ମିଂ, ତଦୂନେ ଦୁକ୍କଟଂ ସିୟା ।
ଇତରେନ ୱିତେ ୱତ୍ଥେ, ଉଭୟତ୍ଥେୱ ଦୁକ୍କଟଂ ॥
ଦ୍ୱେପି ୱେମଂ ଗହେତ୍ୱା ୱା, ଏକତୋ ୱା ୱିନନ୍ତି ଚେ ।
ଫଲକେ ଫଲକେ ତସ୍ସ, ଦୁକ୍କଟଂ ପରିଦୀପିତଂ ॥
ଏତେନେୱ ଉପାୟେନ, ଭେଦେ ସବ୍ବତ୍ଥ ସାଧୁକଂ ।
ଆପତ୍ତିଭେଦୋ ୱିଞ୍ଞେୟ୍ୟୋ, ୱିଞ୍ଞୁନା ୱିନୟଞ୍ଞୁନା ॥
କପ୍ପିୟୋ ତନ୍ତୱାୟୋପି, ସଚେ ସୁତ୍ତମ୍ପି କପ୍ପିୟଂ ।
ଚୀୱରଂ ୱାୟାପେନ୍ତସ୍ସ, ଅନାପତ୍ତି ପକାସିତା ॥
ଅନାପତ୍ତି ପରିସ୍ସାୱେ, ଆୟୋଗେ ଅଂସବଦ୍ଧକେ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ସୁତ୍ତୱିଞ୍ଞତ୍ତିକଥା ।
ଅପ୍ପୱାରିତଞାତୀନଂ, ତନ୍ତୱାୟେ ସମେଚ୍ଚ ଚେ ।
ୱିକପ୍ପଂ ଚୀୱରେ ଭିକ୍ଖୁ, ଆପଜ୍ଜତି ନ ୱଟ୍ଟତି ॥
ଦୀଘାୟତପ୍ପିତତ୍ଥାୟ, ସୁତ୍ତୱଡ୍ଢନକେ କତେ ।
ଭିକ୍ଖୁ ନିସ୍ସଗ୍ଗିୟାପତ୍ତିଂ, ଆପଜ୍ଜତି ନ ସଂସୟୋ ॥
ଭିକ୍ଖୁନୋ ଞାତକାଦୀନଂ, ତନ୍ତୱାୟେସୁ ଅତ୍ତନୋ ।
ଧନେନଞ୍ଞସ୍ସ ଚତ୍ଥାୟ, ଅନାପତ୍ତିଂ ୱିନିଦ୍ଦିସେ ॥
ୱାୟାପେନ୍ତସ୍ସ ଅପ୍ପଗ୍ଘଂ, ମହଗ୍ଘଂ କତ୍ତୁକାମିନୋ ।
ତଥା ଉମ୍ମତ୍ତକାଦୀନଂ, ସେସଂ ୱୁତ୍ତମନନ୍ତରେ ॥
ପେସକାରକଥା ।
ୱସ୍ସଂୱୁଟ୍ଠେ ୟମୁଦ୍ଦିସ୍ସ, ଭିକ୍ଖୂ ଦୀୟତି ଚୀୱରଂ ।
ପୱାରଣାୟ ପୁବ୍ବେୱ, ତଂ ହୋତଚ୍ଚେକଚୀୱରଂ ॥
ପୁରେ ପୱାରଣାୟେୱ, ଭାଜେତ୍ୱା ୟଦି ଗୟ୍ହତି ।
ୱସ୍ସଚ୍ଛେଦୋ ନ କାତବ୍ବୋ, ସଙ୍ଘିକଂ ତଂ କରୋତି ଚେ ॥
ଅନାପତ୍ତି ଅଧିଟ୍ଠେତି, ଅନ୍ତୋସମୟମେୱ ତଂ ।
ୱିସ୍ସଜ୍ଜେତି ୱିକପ୍ପେତି, ୱିନସ୍ସତି ଚ ଡୟ୍ହତି ॥
ତସ୍ସଚ୍ଚାୟିକୱତ୍ଥସ୍ସ, କଥିନେ ତୁ ଅନତ୍ଥତେ ।
ପରିହାରେକମାସୋୱ, ଦସାହପରମୋ ମତୋ ॥
ଅତ୍ଥତେ କଥିନେ ତସ୍ସ, ପଞ୍ଚ ମାସା ପକାସିତା ।
ପରିହାରୋ ମୁନିନ୍ଦେନ, ଦସାହପରମା ପନ ॥
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ।
ପଠମେନାକ୍ରିୟାଚିତ୍ତଂ, ତିଚିତ୍ତଞ୍ଚ ତିୱେଦନଂ ॥
ଅଚ୍ଚେକଚୀୱରକଥା ।
ୱସିତ୍ୱା ପନ ଚେ ଭିକ୍ଖୁ, ପୁବ୍ବକତ୍ତିକପୁଣ୍ଣମଂ ।
ଠପେତ୍ୱା ଚୀୱରଂ ଗାମେ, ପଚ୍ଚୟେ ସତି ତାଦିସେ ॥
ଛାରତ୍ତପରମଂ ତେନ, ୱସିତବ୍ବଂ ୱିନା ତତୋ ।
ଉତ୍ତରିଂ ୱସତୋ ଦୋସୋ, ୱିନା ସଙ୍ଘସ୍ସ ସମ୍ମୁତିଂ ॥
କତ୍ତିକେୟେୱ ମାସସ୍ମିଂ, ପଠମାୟ ପୱାରିତୋ ।
ପଚ୍ଛିମେନ ପମାଣେନ, ୟୁତ୍ତେ ସାସଙ୍କସମ୍ମତେ ॥
ସେନାସନେ ୱସନ୍ତୋୱ, ଠପେତୁଂ ଏକଚୀୱରଂ ।
ଚତୁରଙ୍ଗସମାୟୋଗେ, ଲଭତୀତି ପକାସିତୋ ॥
ୟଂ ଗାମଂ ଗୋଚରଂ କତ୍ୱା, ଭିକ୍ଖୁ ଆରଞ୍ଞକେ ୱସେ ।
ତସ୍ମିଂ ଗାମେ ଠପେତୁଂ ତଂ, ମାସମେକଂ ତୁ ୱଟ୍ଟତି ॥
ଅଞ୍ଞତ୍ଥେୱ ୱସନ୍ତସ୍ସ, ଛାରତ୍ତପରମଂ ମତଂ ।
ଅୟମସ୍ସ ଅଧିପ୍ପାୟୋ, ପଟିଚ୍ଛନ୍ନୋ ପକାସିତୋ ॥
ସେନାସନମଥାଗନ୍ତ୍ୱା, ସତ୍ତମଂ ଅରୁଣଂ ପନ ।
ଉଟ୍ଠାପେତୁଂ ୱିଦୂରତ୍ତା, ଅସକ୍କୋନ୍ତସ୍ସ ଭିକ୍ଖୁନୋ ॥
ଗାମସୀମମ୍ପି ୱା ଗନ୍ତ୍ୱା, ୱସିତ୍ୱା ୟତ୍ଥ କତ୍ଥଚି ।
ଚୀୱରସ୍ସ ପୱତ୍ତିଂ ସୋ, ଞତ୍ୱା ଗଚ୍ଛତି ୱଟ୍ଟତି ॥
ଏୱଞ୍ଚାପି ଅସକ୍କୋନ୍ତୋ, ଞତ୍ୱା ତତ୍ଥେୱ ପଣ୍ଡିତୋ ।
ଖିପ୍ପଂ ପଚ୍ଚୁଦ୍ଧରେ ଠାନେ, ଅତିରେକେ ହି ତିଟ୍ଠତି ॥
ୱିସ୍ସଜ୍ଜେତି ଅନାପତ୍ତି, ୱିନସ୍ସତି ଚ ଡୟ୍ହତି ।
ଅଚ୍ଛିନ୍ଦନେ ଚ ୱିସ୍ସାସେ, ଭିକ୍ଖୁସମ୍ମୁତିୟାପି ୱା ॥
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ।
ଦୁତିୟେନ, ମୁନିନ୍ଦେନ, ତେନ ସାସଙ୍କସମ୍ମତେ ॥
ସାସଙ୍କକଥା ।
ଜାନଂ ପରିଣତଂ ଲାଭଂ, ଭିକ୍ଖୁସଙ୍ଘସ୍ସ ୟୋ ପନ ।
ଅତ୍ତନୋ ପରିଣାମେୟ୍ୟ, ତସ୍ସ ନିସ୍ସଗ୍ଗିୟଂ ସିୟା ॥
ସଚେ ‘‘ଅଞ୍ଞସ୍ସ ଦେହୀ’’ତି, ପରିଣାମେତି ଭିକ୍ଖୁନୋ ।
ସୁଦ୍ଧିକଂ ସୁଦ୍ଧଚିତ୍ତେନ, ପାଚିତ୍ତିୟମୁଦୀରିତଂ ॥
ଚୀୱରଂ ୱା ପରସ୍ସେକ-ମେକଂ ୱା ପନ ଅତ୍ତନୋ ।
ପରିଣାମେୟ୍ୟ ଚେ ସଦ୍ଧିଂ, ଦ୍ୱେ ପାଚିତ୍ତିୟୋ ସିୟୁଂ ॥
ସଙ୍ଘସ୍ସ ପନ ୟଂ ଦିନ୍ନଂ, ତଂ ଗହେତୁଂ ନ ୱଟ୍ଟତି ।
ସଙ୍ଘସ୍ସେୱ ପଦାତବ୍ବୋ, ଅଦେନ୍ତସ୍ସ ପରାଜୟୋ ॥
ଚେତିୟସ୍ସ ଚ ସଙ୍ଘସ୍ସ, ପୁଗ୍ଗଲସ୍ସପି ୱା ପନ ।
ଅଞ୍ଞସ୍ସ ପୋଣମଞ୍ଞସ୍ସ, ପରିଣାମେୟ୍ୟ ଦୁକ୍କଟଂ ॥
ୟୋ ପନନ୍ତମସୋ ଭିକ୍ଖୁ, ସୁନଖସ୍ସପି ଓଣତଂ ।
ସୁନଖସ୍ସ ପନଞ୍ଞସ୍ସ, ପରିଣାମେୟ୍ୟ ଦୁକ୍କଟଂ ॥
ଇଦଞ୍ହି ତିସମୁଟ୍ଠାନଂ, କ୍ରିୟଂ ସଞ୍ଞାୱିମୋକ୍ଖକଂ ।
କାୟକମ୍ମଂ ୱଚୀକମ୍ମଂ, ତିଚିତ୍ତଞ୍ଚ ତିୱେଦନଂ ॥
ପରିଣତକଥା ।
ପତ୍ତୱଗ୍ଗୋ ତତିୟୋ ।
ତେନେକୱତ୍ଥୁଗ୍ଗତରଙ୍ଗମାଲଂ ।
ସୀଲନ୍ତମାପତ୍ତିୱିପତ୍ତିଗାହଂ ।
ତରନ୍ତି ପଞ୍ଞତ୍ତିମହାସମୁଦ୍ଦଂ ।
ୱିନିଚ୍ଛୟଂ ୟେ ପନିମଂ ତରନ୍ତି ॥
ଇତି ୱିନୟୱିନିଚ୍ଛୟେ ନିସ୍ସଗ୍ଗିୟକଥା ନିଟ୍ଠିତା ।
ପାଚିତ୍ତିୟକଥା
ସମ୍ପଜାନମୁସାୱାଦେ, ପାଚିତ୍ତିୟମୁଦୀରିତଂ ।
ଦୱା ରୱା ଭଣନ୍ତସ୍ସ, ନ ଦୋସୁମ୍ମତ୍ତକାଦିନୋ ॥
ଅଞ୍ଞତ୍ଥାପତ୍ତିୟୋ ପଞ୍ଚ, ମୁସାୱାଦସ୍ସ କାରଣା ।
ସମୁଟ୍ଠାନାଦୟୋ ସବ୍ବେ, ଅଦିନ୍ନାଦାନତୁଲ୍ୟକା ॥
ସମ୍ପଜାନମୁସାୱାଦକଥା ।
ଜାତିଆଦୀସୁ ୱୁତ୍ତେସୁ, ଦସସ୍ୱକ୍କୋସୱତ୍ଥୁସୁ ।
ଭୂତେନ ୱା ଅଭୂତେନ, ୟେନ କେନଚି ୱତ୍ଥୁନା ॥
ୟାୟ କାୟଚି ଭାସାୟ, ହତ୍ଥମୁଦ୍ଦାୟ ୱା ପନ ।
ପାରାଜିକମନାପନ୍ନଂ, ଭିକ୍ଖୁମାପନ୍ନମେୱ ୱା ॥
ଅଞ୍ଞତ୍ରଞ୍ଞାପଦେସେନ, ଓମସନ୍ତସ୍ସ ଭିକ୍ଖୁନୋ ।
ତତ୍ଥ ପାଚିତ୍ତିୟାପତ୍ତି, ସମ୍ବୁଦ୍ଧେନ ପକାସିତା ॥
ତେହେୱଞ୍ଞାପଦେସେନ, ପାଳିମୁତ୍ତପଦେହିପି ।
ସବ୍ବତ୍ଥାନୁପସମ୍ପନ୍ନଂ, ଅକ୍କୋସନ୍ତସ୍ସ ଦୁକ୍କଟଂ ॥
ଅନକ୍କୋସିତୁକାମସ୍ସ, କେୱଲଂ ଦୱକମ୍ୟତା ।
ୱଦତୋ ପନ ସବ୍ବତ୍ଥ, ଦୁବ୍ଭାସିତମୁଦୀରିତଂ ॥
ପୱିଟ୍ଠାନୁପସମ୍ପନ୍ନ-ଟ୍ଠାନେ ଇଧ ଚ ଭିକ୍ଖୁନୀ ।
ଅନାପତ୍ତି ପୁରକ୍ଖତ୍ୱା, ଅତ୍ଥଧମ୍ମାନୁସାସନିଂ ॥
ୱଦତୋ ପନ ଭିକ୍ଖୁସ୍ସ, ସମୁଟ୍ଠାନାଦୟୋ ନୟା ।
ଅନନ୍ତରସମା ୱୁତ୍ତା, ଦୁକ୍ଖା ହୋତେତ୍ଥ ୱେଦନା ॥
ଓମସୱାଦକଥା ।
ଆପତ୍ତି ଭିକ୍ଖୁପେସୁଞ୍ଞେ, ଦୁୱିଧାକାରତୋ ସିୟା ।
ଅତ୍ତନୋ ପିୟକାମସ୍ସ, ପରଭେଦତ୍ଥିନୋପି ୱା ॥
ଅକ୍କୋସନ୍ତସ୍ସ ପରିୟାୟ-ପାଳିମୁତ୍ତନୟେହି ଚ ।
ୱଚନସ୍ସୁପସଂହାରେ, ହୋତି ଆପତ୍ତି ଦୁକ୍କଟଂ ॥
ତଥା ଅନୁପସମ୍ପନ୍ନ-ଅକ୍କୋସଂ ହରତୋପି ଚ ।
ଠିତା ଅନୁପସମ୍ପନ୍ନ-ଟ୍ଠାନେ ଇଧ ଚ ଭିକ୍ଖୁନୀ ॥
ନ ଚେୱ ପିୟକାମସ୍ସ, ନ ଚ ଭେଦତ୍ଥିନୋପି ୱା ।
ପାପାନଂ ଗରହତ୍ଥାୟ, ୱଦନ୍ତସ୍ସ ଚ ଭିକ୍ଖୁନୋ ॥
ତଥା ଉମ୍ମତ୍ତକାଦୀନଂ, ଅନାପତ୍ତୀତି ଦୀପିତା ।
ସମୁଟ୍ଠାନାଦୟୋ ସବ୍ବେ, ଅଦିନ୍ନାଦାନସାଦିସା ॥
ପେସୁଞ୍ଞକଥା ।
ଠପେତ୍ୱା ଭିକ୍ଖୁନିଂ ଭିକ୍ଖୁଂ, ଅଞ୍ଞେନ ପିଟକତ୍ତୟଂ ।
ଧମ୍ମଂ ସହ ଭଣନ୍ତସ୍ସ, ତସ୍ସ ପାଚିତ୍ତିୟଂ ସିୟା ॥
ରାଜୋୱାଦାଦୟୋ ୱୁତ୍ତା, ମହାପଚ୍ଚରିୟାଦିସୁ ।
ଅନାରୁଳ୍ହେସୁ ସଙ୍ଗୀତିଂ, ଆପତ୍ତିଜନକାତି ହି ॥
ଦୁକ୍କଟଂ ହୋତି ଭିକ୍ଖୁସ୍ମିଂ, ତଥା ଭିକ୍ଖୁନିୟାପି ଚ ।
ଭିକ୍ଖୁସ୍ସାନୁପସମ୍ପନ୍ନ-ସଞ୍ଞିନୋ ୱିମତିସ୍ସ ୱା ॥
ଏକତୋ ଉଦ୍ଦିସାପେତି, ସଜ୍ଝାୟଂ ୱା କରୋତି ୟୋ ।
ଭଣନ୍ତଂ ପଗୁଣଂ ଗନ୍ଥଂ, ଓପାତେତି ଚ ୟୋ ପନ ॥
ତସ୍ସ ଚାନୁପସମ୍ପନ୍ନ-ସନ୍ତିକେ ଗଣ୍ହତୋପି ଚ ।
ଉଦ୍ଦେସଂ ତୁ ଅନାପତ୍ତି, ଭଣନେ ତେନ ଏକତୋ ॥
ୱାଚତୋ ଚ ସମୁଟ୍ଠାତି, ୱାଚାଚିତ୍ତଦ୍ୱୟାପି ଚ ।
ସମୁଟ୍ଠାନମିଦଂ ୱୁତ୍ତଂ, ପଦସୋଧମ୍ମସଞ୍ଞିତଂ ॥
ପଦସୋଧମ୍ମକଥା ।
ସବ୍ବଚ୍ଛନ୍ନପରିଚ୍ଛନ୍ନେ, ନିପଜ୍ଜେୟ୍ୟ ସଚେ ପନ ।
ୟେଭୁୟ୍ୟେନ ପରିଚ୍ଛନ୍ନେ, ଛନ୍ନେ ସେନାସନେପି ୱା ॥
ତିସ୍ସନ୍ନଂ ପନ ରତ୍ତୀନଂ, ଉଦ୍ଧଂ ୟୋ ପନ ରତ୍ତିୟଂ ।
ଠପେତ୍ୱା ଭିକ୍ଖୁଂ ଅଞ୍ଞେନ, ତସ୍ସ ପାଚିତ୍ତିୟଂ ସିୟା ॥
ୱତ୍ଥୁଂ ୟଂ ପନ ନିଦ୍ଦିଟ୍ଠଂ, ମେଥୁନସ୍ସ ପହୋନକଂ ।
ଆପତ୍ୟନ୍ତମସୋ ତେନ, ତିରଚ୍ଛାନଗତେନପି ॥
ନିପନ୍ନେ ଉପସମ୍ପନ୍ନେ, ଇତରୋ ଚେ ନିପଜ୍ଜତି ।
ଇତରସ୍ମିଂ ନିପନ୍ନେ ୱା, ସଚେ ଭିକ୍ଖୁ ନିପଜ୍ଜତି ॥
ଉଭିନ୍ନଂ ଉଟ୍ଠହିତ୍ୱା ୱା, ନିପଜ୍ଜନପୟୋଗତୋ ।
ଆପତ୍ତାନୁପସମ୍ପନ୍ନ-ଗଣନାୟପି ୱା ସିୟା ॥
ସଚେ ପିଧାୟ ୱା ଗବ୍ଭଂ, ନିପଜ୍ଜତିପିଧାୟ ୱା ।
ଆପତ୍ତତ୍ଥଙ୍ଗତେ ସୂରିୟେ, ଚତୁତ୍ଥଦିୱସେ ସିୟା ॥
ଦିୟଡ୍ଢହତ୍ଥୁବ୍ବେଧେନ, ପାକାରଚୟନାଦିନା ।
ପରିକ୍ଖିତ୍ତମ୍ପି ତଂ ସବ୍ବଂ, ପରିକ୍ଖିତ୍ତନ୍ତି ୱୁଚ୍ଚତି ॥
ଭିକ୍ଖୁସ୍ସନ୍ତମସୋ ଦୁସ୍ସ-କୁଟିୟଂ ୱସତୋପି ଚ ।
ସହସେୟ୍ୟାୟ ଆପତ୍ତି, ହୋତୀତି ପରିଦୀପିତୋ ॥
ସବ୍ବଚ୍ଛନ୍ନପରିଚ୍ଛନ୍ନ-ୟେଭୁୟ୍ୟାଦିପ୍ପଭେଦତୋ ।
ସତ୍ତ ପାଚିତ୍ତିୟାନେତ୍ଥ, ଦଟ୍ଠବ୍ବାନି ସୁବୁଦ୍ଧିନା ॥
ଅଡ୍ଢଚ୍ଛନ୍ନପରିଚ୍ଛନ୍ନେ, ଦୁକ୍କଟଂ ପରିଦୀପିତଂ ।
ସବ୍ବଚୂଳପରିଚ୍ଛନ୍ନ-ଛନ୍ନାଦୀହିପି ପଞ୍ଚଧା ॥
ଅନାପତ୍ତି ଦିରତ୍ତଂ ୱା, ତିରତ୍ତଂ ୱସତୋ ସହ ।
ଅରୁଣସ୍ସ ପୁରେୟେୱ, ତତିୟାୟ ଚ ରତ୍ତିୟା ॥
ନିକ୍ଖମିତ୍ୱା ୱସନ୍ତସ୍ସ, ପୁନ ସଦ୍ଧିଞ୍ଚ ଭିକ୍ଖୁନୋ ।
ତଥା ସବ୍ବପରିଚ୍ଛନ୍ନ-ସବ୍ବଚ୍ଛନ୍ନାଦିକେପି ଚ ॥
ଏୱଂ ଅନୁପସମ୍ପନ୍ନେ, ନିପନ୍ନେପି ନିସୀଦତୋ ।
ସେସା ଏଳକଲୋମେନ, ସମୁଟ୍ଠାନାଦୟୋ ସମା ॥
ସହସେୟ୍ୟକଥା ।
ସଚେ ତଦହୁଜାତାୟ, ଅପି ୟୋ ମାନୁସିତ୍ଥିୟା ।
ସହସେୟ୍ୟଂ ପକପ୍ପେୟ୍ୟ, ତସ୍ସ ପାଚିତ୍ତିୟଂ ସିୟା ॥
ଦିସ୍ସମାନକରୂପାୟ, ୟକ୍ଖିୟା ପେତିୟା ସହ ।
ରତ୍ତିୟଂ ୟୋ ନିପଜ୍ଜେୟ୍ୟ, ଦେୱିୟା ପଣ୍ଡକେନ ୱା ॥
ମେଥୁନୱତ୍ଥୁଭୂତାୟ, ତିରଚ୍ଛାନଗତିତ୍ଥିୟା ।
ୱତ୍ଥୂନଂ ଗଣନାୟସ୍ସ, ହୋତି ଆପତ୍ତି ଦୁକ୍କଟଂ ॥
ଇଧେକଦିୱସେନେୱ, ଆପତ୍ତି ପରିଦୀପିତା ।
ସେସୋ ଅନନ୍ତରେ ୱୁତ୍ତ-ସଦିସୋୱ ୱିନିଚ୍ଛୟୋ ॥
ଦୁତିୟସହସେୟ୍ୟକଥା ।
ଉଦ୍ଧଂ ଛପ୍ପଞ୍ଚୱାଚାହି, ୱିଞ୍ଞୁଂ ପୁରିସୱିଗ୍ଗହଂ ।
ୱିନା ଧମ୍ମଂ ଭଣନ୍ତସ୍ସ, ହୋତି ପାଚିତ୍ତି ଇତ୍ଥିୟା ॥
ଗାଥାପାଦୋ ପନେକୋୱ, ଏକୱାଚାତି ସଞ୍ଞିତୋ ।
ପଦସୋଧମ୍ମଂ ନିଦ୍ଦିଟ୍ଠଂ, ଧମ୍ମମଟ୍ଠକଥମ୍ପି ୱା ॥
ଛନ୍ନଂ ଉପରି ୱାଚାନଂ, ପଦାଦୀନଂ ୱସା ପନ ।
ଦେସେନ୍ତସ୍ସ ସିୟାପତ୍ତି, ପଦାଦିଗଣନାୟ ଚ ॥
ନିମ୍ମିନିତ୍ୱା ଠିତେନାପି, ସଦ୍ଧିଂ ପୁରିସୱିଗ୍ଗହଂ ।
ୟକ୍ଖେନପି ଚ ପେତେନ, ତିରଚ୍ଛାନଗତେନପି ॥
ଠିତସ୍ସ ମାତୁଗାମସ୍ସ, ଧମ୍ମଂ ୟୋ ପନ ଭାସତି ।
ଛନ୍ନଂ ଉପରି ୱାଚାନଂ, ତସ୍ସ ପାଚିତ୍ତିୟଂ ସିୟା ॥
ପୁରିସେ ଇତ୍ଥିସଞ୍ଞିସ୍ସ, ୱିମତିସ୍ସ ଚ ପଣ୍ଡକେ ।
ଉତ୍ତରି ଛହି ୱାଚାହି, ୱଦତୋ ହୋତି ଦୁକ୍କଟଂ ॥
ଇତ୍ଥିରୂପଂ ଗହେତ୍ୱାନ, ଠିତାନଂ ଭାସତୋପି ଚ ।
ଦୁକ୍କଟଂ ୟକ୍ଖିପେତୀନଂ, ତିରଚ୍ଛାନଗତିତ୍ଥିୟା ॥
ପୁରିସେ ସତି ୱିଞ୍ଞୁସ୍ମିଂ, ସୟଂ ଉଟ୍ଠାୟ ୱା ପୁନ ।
ଦେସେନ୍ତସ୍ସ ନିସୀଦିତ୍ୱା, ମାତୁଗାମସ୍ସ ୱା ତଥା ॥
ଅଞ୍ଞିସ୍ସା ପୁନ ଅଞ୍ଞିସ୍ସା, ଇତ୍ଥିୟା ଭଣତୋପି ଚ ।
ଛହି ପଞ୍ଚହି ୱାଚାହି, ଅନାପତ୍ତି ପକାସିତା ॥
ପଦସୋଧମ୍ମତୁଲ୍ୟାୱ, ସମୁଟ୍ଠାନାଦୟୋ ମତା ।
ଅୟମେୱ ୱିସେସୋତି, କ୍ରିୟାକ୍ରିୟମିଦଂ ପନ ॥
ଧମ୍ମଦେସନାକଥା ।
ମହଗ୍ଗତଂ ପଣୀତଂ ୱା, ଆରୋଚେନ୍ତସ୍ସ ଭିକ୍ଖୁନୋ ।
ଠପେତ୍ୱା ଭିକ୍ଖୁନିଂ ଭିକ୍ଖୁଂ, ଭୂତେ ପାଚିତ୍ତିୟଂ ସିୟା ॥
ନୋ ଚେ ଜାନାତି ସୋ ୱୁତ୍ତଂ, ଆରୋଚେନ୍ତସ୍ସ ଭିକ୍ଖୁନୋ ।
ପରିୟାୟୱଚନେ ଚସ୍ସ, ହୋତି ଆପତ୍ତି ଦୁକ୍କଟଂ ॥
ଅନାପତ୍ତି ତଥାରୂପେ, କାରଣେ ସତି ଭାସତୋ ।
ସବ୍ବସ୍ସପି ଚ ସୀଲାଦିଂ, ୱଦତୋ ଆଦିକମ୍ମିନୋ ॥
ଉମ୍ମତ୍ତକପଦଂ ଏତ୍ଥ, ନ ୱୁତ୍ତଂ ତଦସମ୍ଭୱା ।
ଭୂତାରୋଚନକଂ ନାମ, ସମୁଟ୍ଠାନମିଦଂ ମତଂ ॥
କାୟତୋ ୱାଚତୋ କାୟ-ୱାଚତୋ ଚ ତିଧା ସିୟା ।
କୁସଲାବ୍ୟାକତେହେୱ, ଦ୍ୱିଚିତ୍ତଞ୍ଚ ଦ୍ୱିୱେଦନଂ ॥
ଭୂତାରୋଚନକଥା ।
ଆପତ୍ତିଂ ପନ ଦୁଟ୍ଠୁଲ୍ଲଂ, ଆରୋଚେନ୍ତସ୍ସ ଭିକ୍ଖୁନୋ ।
ଆପତ୍ତାନୁପସମ୍ପନ୍ନେ, ଠପେତ୍ୱା ଭିକ୍ଖୁସମ୍ମୁତିଂ ॥
ସଙ୍ଘାଦିସେସମାପନ୍ନୋ, ମୋଚେତ୍ୱା ଅସୁଚିଂ ଅୟଂ ।
ଘଟେତ୍ୱା ୱତ୍ଥୁନାପତ୍ତିଂ, ୱଦନ୍ତସ୍ସେୱ ୱଜ୍ଜତା ॥
ଇଧ ସଙ୍ଘାଦିସେସାୱ, ଦୁଟ୍ଠୁଲ୍ଲାପତ୍ତିୟୋ ମତା ।
ତସ୍ମା ସୁଦ୍ଧସ୍ସ ଦୁଟ୍ଠୁଲ୍ଲଂ, ୱଦଂ ପାଚିତ୍ତିୟଂ ଫୁସେ ॥
ଅଦୁଟ୍ଠୁଲ୍ଲାୟ ଦୁଟ୍ଠୁଲ୍ଲ-ସଞ୍ଞିନୋ ୱିମତିସ୍ସ ୱା ।
ଆପତ୍ତିୟୋପି ୱା ସେସା, ଆରୋଚେନ୍ତସ୍ସ ଦୁକ୍କଟଂ ॥
ତଥା ଅନୁପସମ୍ପନ୍ନେ, ଦୁଟ୍ଠୁଲ୍ଲଂ ପଞ୍ଚଧା ମତଂ ।
ଅଜ୍ଝାଚାରମଦୁଟ୍ଠୁଲ୍ଲଂ, ଆରୋଚେତୁଂ ନ ୱଟ୍ଟତି ॥
ୱତ୍ଥୁଂ ୱା ପନ ଆପତ୍ତିଂ, ଆରୋଚେନ୍ତସ୍ସ କେୱଲଂ ।
ଅନାପତ୍ତୀତି ଞାତବ୍ବଂ, ଭିକ୍ଖୁସମ୍ମୁତିୟା ତଥା ॥
ଏୱମୁମ୍ମତ୍ତକାଦୀନଂ, ସମୁଟ୍ଠାନାଦୟୋ ନୟା ।
ଅଦିନ୍ନାଦାନତୁଲ୍ୟାୱ, ୱେଦନା ଦୁକ୍ଖୱେଦନା ॥
ଦୁଟ୍ଠୁଲ୍ଲାରୋଚନକଥା ।
ଖଣେୟ୍ୟ ୱା ଖଣାପେୟ୍ୟ, ପଥୱିଂ ୟୋ ଅକପ୍ପିୟଂ ।
ଭେଦାପେୟ୍ୟ ଚ ଭିନ୍ଦେୟ୍ୟ, ତସ୍ସ ପାଚିତ୍ତିୟଂ ସିୟା ॥
ସୟମେୱ ଖଣନ୍ତସ୍ସ, ପଥୱିଂ ପନ ଭିକ୍ଖୁନୋ ।
ପହାରସ୍ମିଂ ପହାରସ୍ମିଂ, ପାଚିତ୍ତିୟମୁଦୀରିତଂ ॥
ଆଣାପେନ୍ତସ୍ସ ଏକାୱ, ଦିୱସଂ ଖଣତୋପି ଚ ।
ପୁନପ୍ପୁନାଣାପେନ୍ତସ୍ସ, ୱାଚତୋ ୱାଚତୋ ସିୟା ॥
‘‘ଖଣ ପୋକ୍ଖରଣିଂ ୱାପିଂ, ଆୱାଟଂ ଖଣ କୂପକଂ’’ ।
ଇଚ୍ଚେୱଂ ତୁ ୱଦନ୍ତସ୍ସ, କୋଚି ଦୋସୋ ନ ୱିଜ୍ଜତି ॥
‘‘ଇମଂ ଖଣ ଚ ଓକାସଂ, ଇଧ ପୋକ୍ଖରଣିଂ ଖଣ ।
ଇମସ୍ମିଂ ଖଣ ଓକାସେ’’, ୱତ୍ତୁମେୱଂ ନ ୱଟ୍ଟତି ॥
‘‘କନ୍ଦଂ ଖଣ କୁରୁନ୍ଦଂ ୱା, ଥୂଣଂ ଖଣ ଚ ଖାଣୁକଂ ।
ମୂଲଂ ଖଣ ଚ ତାଲଂ ୱା’’, ଏୱଂ ୱଦତି ୱଟ୍ଟତି ॥
‘‘ଇମଂ ମୂଲଂ ଇମଂ ୱଲ୍ଲିଂ, ଇମଂ ତାଲଂ ଇମଂ ନଳଂ ।
ଖଣା’’ତି ନିୟମେତ୍ୱାନ, ୱତ୍ତୁଂ ପନ ନ ୱଟ୍ଟତି ॥
ଉସ୍ସିଞ୍ଚିତୁଂ ସଚେ ସକ୍କା, ଘଟେହି ତନୁକଦ୍ଦମୋ ।
ଭିକ୍ଖୁନା ଅପନେତବ୍ବୋ, ବହଲଂ ନ ଚ ୱଟ୍ଟତି ॥
ଭିଜ୍ଜିତ୍ୱା ନଦିୟାଦୀନଂ, ପତିତଂ ତୋୟସନ୍ତିକେ ।
ତଟଂ ୱଟ୍ଠଂ ୱିକୋପେତୁଂ, ଚାତୁମାସମ୍ପି ୱଟ୍ଟତି ॥
ସଚେ ପତତି ତୋୟସ୍ମିଂ, ଦେୱେ ୱୁଟ୍ଠେପି ୱଟ୍ଟତି ।
ଚାତୁମାସମତିକ୍କନ୍ତେ, ତୋୟେ ଦେୱୋ ହି ୱସ୍ସତି ॥
ପାସାଣପିଟ୍ଠିୟଂ ସୋଣ୍ଡିଂ, ଖଣନ୍ତି ୟଦି ତତ୍ଥ ତୁ ।
ରଜଂ ପତତି ଚେ ପୁବ୍ବଂ, ପଚ୍ଛା ଦେୱୋଭିୱସ୍ସତି ॥
ସୋଧେତୁଂ ଭିନ୍ଦିତୁଂ ଅନ୍ତୋ-ଚାତୁମାସଂ ତୁ ୱଟ୍ଟତି ।
ଚାତୁମାସକତୋ ଉଦ୍ଧଂ, ୱିକୋପେତୁଂ ନ ୱଟ୍ଟତି ॥
ୱାରିନା ପଠମଂ ପୁଣ୍ଣେ, ପଚ୍ଛା ପତତି ଚେ ରଜଂ ।
ତଂ ୱଟ୍ଟତି ୱିକୋପେତୁଂ, ତୋୟେ ଦେୱୋ ହି ୱସ୍ସତି ॥
ଅଲ୍ଲୀୟତି ଫୁସାୟନ୍ତେ, ପିଟ୍ଠିପାସାଣକେ ରଜଂ ।
ଚାତୁମାସଚ୍ଚୟେ ତମ୍ପି, ୱିକୋପେତୁଂ ନ ୱଟ୍ଟତି ॥
ସଚେ ଅକତପବ୍ଭାରେ, ୱମ୍ମିକୋ ପନ ଉଟ୍ଠିତୋ ।
ୟଥାସୁଖଂ ୱିକୋପେୟ୍ୟ, ଚାତୁମାସଚ୍ଚୟେପି ଚ ॥
ଅବ୍ଭୋକାସେ ସଚେ ୱଟ୍ଠୋ, ଚାତୁମାସଂ ତୁ ୱଟ୍ଟତି ।
ରୁକ୍ଖେ ଉପଚିକାଦୀନଂ, ମତ୍ତିକାୟପି ସୋ ନୟୋ ॥
ମୂସିକୁକ୍କର ଗୋକଣ୍ଟ-ଗଣ୍ଡୁପ୍ପାଦମଲେସୁପି ।
ଅୟମେୱ ନୟୋ ୱୁତ୍ତୋ, ଅସମ୍ବଦ୍ଧେସୁ ଭୂମିୟା ॥
ତେହେୱ ସଦିସା ହୋନ୍ତି, କସିନଙ୍ଗଲମତ୍ତିକା ।
ଅଚ୍ଛିନ୍ନା ଭୂମିସମ୍ବନ୍ଧା, ସା ଜାତପଥୱୀ ସିୟା ॥
ସେନାସନମ୍ପି ଅଚ୍ଛନ୍ନଂ, ୱିନଟ୍ଠଛଦନମ୍ପି ୱା ।
ଚାତୁମାସକତୋ ଉଦ୍ଧଂ, ଓୱଟ୍ଠଂ ନ ୱିକୋପୟେ ॥
ତତୋ ‘‘ଗୋପାନସିଂ ଭିତ୍ତିଂ, ଥମ୍ଭଂ ୱା ପଦରତ୍ଥରଂ ।
ଗଣ୍ହିସ୍ସାମୀ’’ତି ସଞ୍ଞାୟ, ଗହେତୁଂ ପନ ୱଟ୍ଟତି ॥
ଗଣ୍ହନ୍ତସ୍ସିଟ୍ଠକାଦୀନି, ସଚେ ପତତି ମତ୍ତିକା ।
ଅନାପତ୍ତି ସିୟାପତ୍ତି, ମତ୍ତିକଂ ୟଦି ଗଣ୍ହତି ॥
ଅତିନ୍ତୋ ମତ୍ତିକାପୁଞ୍ଜୋ, ଅନ୍ତୋଗେହେ ସଚେ ସିୟା ।
ଅନୋୱଟ୍ଠୋ ଚ ଭିକ୍ଖୂନଂ, ସବ୍ବଦା ହୋତି କପ୍ପିୟୋ ॥
ୱୁଟ୍ଠେ ପୁନ ଚ ଗେହସ୍ମିଂ, ଗେହଂ ଛାଦେନ୍ତି ତଂ ସଚେ ।
ଚାତୁମାସଚ୍ଚୟେ ସବ୍ବୋ, ତିନ୍ତୋ ହୋତି ଅକପ୍ପିୟୋ ॥
ୟତ୍ତକଂ ତତ୍ଥ ତିନ୍ତଂ ତୁ, ତତ୍ତକଂ ହୋତ୍ୟକପ୍ପିୟଂ ।
ଅତିନ୍ତଂ ତତ୍ଥ ୟଂ ୟଂ ତୁ, ତଂ ତଂ ହୋତି ହି କପ୍ପିୟଂ ॥
ତେମିତୋ ୱାରିନା ସୋ ଚେ, ଏକାବଦ୍ଧୋୱ ଭୂମିୟା ।
ପଥୱୀ ଚେୱ ସା ଜାତା, ନ ୱଟ୍ଟତି ତତୋ ପରଂ ॥
ଅବ୍ଭୋକାସେ ଚ ପାକାରୋ, ଓୱଟ୍ଠୋ ମତ୍ତିକାମୟୋ ।
ଚାତୁମାସଚ୍ଚୟେ ‘‘ଜାତା, ପଥୱୀ’’ତି ପୱୁଚ୍ଚତି ॥
ତତ୍ଥ ଲଗ୍ଗଂ ରଜଂ ସଣ୍ହଂ, ଅଘଂସନ୍ତୋୱ ମତ୍ତସୋ ।
ଛୁପିତ୍ୱା ଅଲ୍ଲହତ୍ଥେନ, ସଚେ ଗଣ୍ହାତି ୱଟ୍ଟତି ॥
ସଚେ ଇଟ୍ଠକପାକାରୋ, ୟେଭୁୟ୍ୟକଥଲେ ପନ ।
ଠାନେ ତିଟ୍ଠତି ସୋ ତସ୍ମା, ୱିକୋପେୟ୍ୟ ୟଥାସୁଖଂ ॥
ଅବ୍ଭୋକାସେ ଠିତଂ ଥମ୍ଭଂ, ଚାଲେତ୍ୱା ପନିତୋ ଚିତୋ ।
ପଥୱିଂ ତୁ ୱିକୋପେତ୍ୱା, ଗହେତୁଂ ନ ଚ ୱଟ୍ଟତି ॥
ଅଞ୍ଞମ୍ପି ସୁକ୍ଖରୁକ୍ଖଂ ୱା, ଖାଣୁକଂ ୱାପି ଗଣ୍ହତୋ ।
ଅୟମେୱ ନୟୋ ଦୋସୋ, ଉଜୁମୁଦ୍ଧରତୋ ନ ଚ ॥
ପାସାଣଂ ୟଦି ୱା ରୁକ୍ଖଂ, ଉଚ୍ଚାଲେତ୍ୱା ପୱଟ୍ଟତି ।
ନ ଦୋସୋ ସୁଦ୍ଧଚିତ୍ତସ୍ସ, ସଚେ ପଥୱି ଭିଜ୍ଜତି ॥
ଫାଲେନ୍ତାନମ୍ପି ଦାରୂନି, ସାଖାଦୀନି ଚ କଡ୍ଢତୋ ।
ଅୟମେୱ ନୟୋ ୱୁତ୍ତୋ, ଭୂମିୟଂ ସୁଦ୍ଧଚେତସୋ ॥
କଣ୍ଟକଂ ସୂଚିମଟ୍ଠିଂ ୱା, ଖିଲଂ ୱା ଭୂମିୟଂ ପନ ।
ଆକୋଟେତୁଂ ପୱେସେତୁଂ, ଭିକ୍ଖୁନୋ ନ ଚ ୱଟ୍ଟତି ॥
‘‘ଅହଂ ପସ୍ସାୱଧାରାୟ, ଭିନ୍ଦିସ୍ସାମୀ’’ତି ମେଦିନିଂ ।
ଭିକ୍ଖୁସ୍ସ ପନ ପସ୍ସାୱ-ମେୱଂ କାତୁଂ ନ ୱଟ୍ଟତି ॥
ଅନାପତ୍ତି କରୋନ୍ତସ୍ସ, ସଚେ ଭିଜ୍ଜତି ମେଦିନୀ ।
ସମଜ୍ଜତୋ ସମଂ କାତୁଂ, ଘଂସିତୁଂ ନ ଚ ୱଟ୍ଟତି ॥
ପାଦଙ୍ଗୁଟ୍ଠେନ ୱା ଭୂମିଂ, ଲିଖିତୁମ୍ପି ନ ୱଟ୍ଟତି ।
ଭିନ୍ଦନ୍ତେନ ଚ ପାଦେହି, ତଥା ଚଙ୍କମିତୁମ୍ପି ୱା ॥
ପଥୱିଂ ଅଲ୍ଲହତ୍ଥେନ, ଛୁପିତ୍ୱା ସୁଖୁମଂ ରଜଂ ।
ଅଘଂସନ୍ତୋ ଗହେତ୍ୱା ଚେ, ହତ୍ଥଂ ଧୋୱତି ୱଟ୍ଟତି ॥
ସୟଂ ଦହତି ଚେ ଭୂମିଂ, ଦହାପେତି ପରେହି ୱା ।
ଆପତ୍ତନ୍ତମସୋ ପତ୍ତଂ, ଦହନ୍ତସ୍ସାପି ଭିକ୍ଖୁନୋ ॥
ଠାନେସୁ ୟତ୍ତକେସ୍ୱଗ୍ଗିଂ, ଦେତି ଦାପେତି ୱା ପନ ।
ତତ୍ତକାନେୱ ଭିକ୍ଖୁସ୍ସ, ହୋନ୍ତି ପାଚିତ୍ତିୟାନିପି ॥
ଠପେତୁଂ ଭିକ୍ଖୁନୋ ଅଗ୍ଗିଂ, ଭୂମିୟଂ ନ ଚ ୱଟ୍ଟତି ।
କପାଲେ ପତ୍ତପଚନେ, ଠପେତୁଂ ପନ ୱଟ୍ଟତି ॥
ଅଗ୍ଗିଂ ଉପରି ଦାରୂନଂ, ଠପେତୁଂ ନ ଚ ୱଟ୍ଟତି ।
ଦହନ୍ତୋ ତାନି ଗନ୍ତ୍ୱା ସୋ, ଭୂମିଂ ଦହତି ଚେ ପନ ॥
ଏସେୱ ଚ ନୟୋ ୱୁତ୍ତୋ, ଇଟ୍ଠକାୱାସକାଦିସୁ ।
ଠପେତୁଂ ଇଟ୍ଠକାଦୀନଂ, ମତ୍ଥକେସ୍ୱେୱ ୱଟ୍ଟତି ॥
କସ୍ମା ପନାତି ଚେ ? ତେସ-ମନୁପାଦାନଭାୱତୋ ।
ଖାଣୁକେ ସୁକ୍ଖରୁକ୍ଖେ ୱା, ଅଗ୍ଗିଂ ଦାତୁଂ ନ ୱଟ୍ଟତି ॥
ଅନାପତ୍ତି ତିଣୁକ୍କଂ ତୁ, ଗହେତ୍ୱା ପନ ଗଚ୍ଛତୋ ।
ଡୟ୍ହମାନେ ତୁ ହତ୍ଥସ୍ମିଂ, ସଚେ ପାତେତି ଭୂମିୟଂ ॥
ପୁନ ତଂ ପତିତଟ୍ଠାନେ, ଦତ୍ୱା ତସ୍ସ ପନିନ୍ଧନଂ ।
ଅଗ୍ଗିଂ ୱଟ୍ଟତି କାତୁନ୍ତି, ମହାପଚ୍ଚରିୟଂ ରୁତଂ ॥
ତସ୍ସାପଥୱିୟଂୟେୱ, ପଥୱୀତି ଚ ସଞ୍ଞିନୋ ।
ୱିମତିସ୍ସୁଭୟତ୍ଥାପି, ଦୁକ୍କଟଂ ପରିୟାପୁତଂ ॥
ଅନାପତ୍ତି ‘‘ଇମଂ ଜାନ, ଇମମାହର ଦେହି’’ତି ।
ୱଦନ୍ତସ୍ସ, ସଚିତ୍ତଞ୍ଚ, ତିସମୁଟ୍ଠାନମେୱ ଚ ॥
ପଥୱୀଖଣନକଥା ।
ମୁସାୱାଦୱଗ୍ଗୋ ପଠମୋ ।
ଭୱନ୍ତସ୍ସ ଚ ଭୂତସ୍ସ, ଭୂତଗାମସ୍ସ ଭିକ୍ଖୁନୋ ।
ପାତବ୍ୟତାନିମିତ୍ତଂ ତୁ, ପାଚିତ୍ତିୟମୁଦୀରିତଂ ॥
ଉଦକଟ୍ଠୋ ଥଲଟ୍ଠୋତି, ଦୁୱିଧୋ ହୋତି ସୋ ପନ ।
ତିଲବୀଜାଦିକୋ ତତ୍ଥ, ସପଣ୍ଣୋପି ଅପଣ୍ଣକୋ ॥
ଉଦକଟ୍ଠୋତି ୱିଞ୍ଞେୟ୍ୟୋ, ସବ୍ବୋ ସେୱାଲଜାତିକୋ ।
ୱିକୋପେନ୍ତସ୍ସ ତଂ ସବ୍ବଂ, ତସ୍ସ ପାଚିତ୍ତିୟଂ ସିୟା ॥
ୱିୟୂହିତ୍ୱା ତୁ ହତ୍ଥେନ, ନ୍ହାୟିତୁଂ ପନ ୱଟ୍ଟତି ।
ହୋତି ତସ୍ସ ଚ ସବ୍ବମ୍ପି, ଠାନଞ୍ହି ସକଲଂ ଜଲଂ ॥
ଉଦକେନ ୱିନା ଚେଚ୍ଚ, ତଂ ପନୁଦ୍ଧରିତୁଂ ଜଲା ।
ନ ଚ ୱଟ୍ଟତି ଭିକ୍ଖୁସ୍ସ, ଠାନସଙ୍କମନଞ୍ହି ତଂ ॥
ଉଦକେନୁକ୍ଖିପିତ୍ୱା ତଂ, ପକ୍ଖିପନ୍ତସ୍ସ ୱାରିସୁ ।
ୱଟ୍ଟତୀତି ଚ ନିଦ୍ଦିଟ୍ଠଂ, ସବ୍ବଅଟ୍ଠକଥାସୁପି ॥
ଜଲେ ୱଲ୍ଲିତିଣାଦୀନି, ଉଦ୍ଧରନ୍ତସ୍ସ ତୋୟତୋ ।
ୱିକୋପେନ୍ତସ୍ସ ୱା ତତ୍ଥ, ହୋତି ପାଚିତ୍ତି ଭିକ୍ଖୁନୋ ॥
ପରେହୁପ୍ପାଟିତାନେତ୍ଥ, ୱିକୋପେନ୍ତସ୍ସ ଦୁକ୍କଟଂ ।
ଗଚ୍ଛନ୍ତି ହି ୟତୋ ତାନି, ବୀଜଗାମେନ ସଙ୍ଗହଂ ॥
ଥଲଟ୍ଠେ ଛିନ୍ନରୁକ୍ଖାନଂ, ଠିତୋ ହରିତଖାଣୁକୋ ।
ଉଦ୍ଧଂ ୱଡ୍ଢନକୋ ତସ୍ସ, ଭୂତଗାମେନ ସଙ୍ଗହୋ ॥
ନାଳିକେରାଦିକାନମ୍ପି, ଖାଣୁ ଉଦ୍ଧଂ ନ ୱଡ୍ଢତି ।
ତସ୍ମା ତସ୍ସ କତୋ ହୋତି, ବୀଜଗାମେନ ସଙ୍ଗହୋ ॥
ତଥା କଦଲିୟା ଖାଣୁ, ଫଲିତାୟ ପକାସିତୋ ।
ଅଫଲିତାୟ ୟୋ ଖାଣୁ, ଭୂତଗାମେନ ସୋ ମତୋ ॥
ଫଲିତା କଦଲୀ ୟାୱ, ନୀଲପଣ୍ଣା ଚ ତାୱ ସା ।
ନଳୱେଳୁତିଣାଦୀନ-ମୟମେୱ ୱିନିଚ୍ଛୟୋ ॥
ଅଗ୍ଗତୋ ପନ ପଟ୍ଠାୟ, ୟଦାୟଂ ୱେଳୁ ସୁସ୍ସତି ।
ତଦା ସଙ୍ଗହିତୋ ହୋତି, ବୀଜଗାମେନ ନାମସୋ ॥
ଇନ୍ଦସାଲାଦିରୁକ୍ଖାନଂ, ବୀଜଗାମେନ ସଙ୍ଗହୋ ।
ଛିନ୍ଦିତ୍ୱା ଠପିତାନଂ ତୁ, ୱିଞ୍ଞେୟ୍ୟୋ ୱିନୟଞ୍ଞୁନା ॥
ମଣ୍ଡପାଦୀନମତ୍ଥାୟ, ନିକ୍ଖଣନ୍ତି ଚ ତେ ସଚେ ।
ନିଗ୍ଗତେ ମୂଲପଣ୍ଣସ୍ମିଂ, ଭୂତଗାମେନ ସଙ୍ଗହୋ ॥
ମୂଲମତ୍ତେପି ୱା ୟେସଂ, ପଣ୍ଣମତ୍ତେପି ୱା ପନ ।
ନିଗ୍ଗତେପି କତୋ ତେସଂ, ବୀଜଗାମେନ ସଙ୍ଗହୋ ॥
ସକନ୍ଦା ପନ ତାଲଟ୍ଠି, ବୀଜଗାମୋତି ୱୁଚ୍ଚତି ।
ପତ୍ତୱଟ୍ଟି ୟଦା ନୀଲା, ନିଗ୍ଗଚ୍ଛତି ତଦା ନ ଚ ॥
ନାଳିକେରତଚଂ ଭିତ୍ୱା, ଦନ୍ତସୂଚୀୱ ଅଙ୍କୁରୋ ।
ନିଗ୍ଗଚ୍ଛତି ତଦା ସୋପି, ବୀଜଗାମୋତି ୱୁଚ୍ଚତି ॥
ମିଗସିଙ୍ଗସମାନାୟ, ସତିୟା ପତ୍ତୱଟ୍ଟିୟା ।
ଅନିଗ୍ଗତେପି ମୂଲସ୍ମିଂ, ଭୂତଗାମୋତି ୱୁଚ୍ଚତି ॥
ନ ହୋନ୍ତି ହରିତା ୟାୱ, ୱୀହିଆଦୀନମଙ୍କୁରା ।
ନିଗ୍ଗତେସୁପି ପଣ୍ଣେସୁ, ବୀଜଗାମେନ ସଙ୍ଗହୋ ॥
ଚତ୍ତାରୋ ଭାଣୱାରା ନିଟ୍ଠିତା ।
ଅମ୍ବଜମ୍ବୁଟ୍ଠିକାଦୀନ-ମେସେୱ ଚ ୱିନିଚ୍ଛୟୋ ।
ୱନ୍ଦାକା ୱାପି ଅଞ୍ଞଂ ୱା, ରୁକ୍ଖେ ଜାୟତି ୟଂ ପନ ॥
ରୁକ୍ଖୋୱସ୍ସ ସିୟା ଠାନଂ, ୱିକୋପେତୁଂ ନ ୱଟ୍ଟତି ।
ଅମୂଲୱଲ୍ଲିଆଦୀନ-ମୟମେୱ ୱିନିଚ୍ଛୟୋ ॥
ପାକାରାଦୀସୁ ସେୱାଲୋ, ଅଗ୍ଗବୀଜନ୍ତି ୱୁଚ୍ଚତି ।
ୟାୱ ଦ୍ୱେ ତୀଣି ପତ୍ତାନି, ନ ସଞ୍ଜାୟନ୍ତି ତାୱ ସୋ ॥
ପତ୍ତେସୁ ପନ ଜାତେସୁ, ୱତ୍ଥୁ ପାଚିତ୍ତିୟସ୍ସ ସୋ ।
ଘଂସିତ୍ୱା ପନ ତଂ ତସ୍ମା, ଅପନେତୁଂ ନ ୱଟ୍ଟତି ॥
ସେୱାଲେ ବହି ପାନୀୟ-ଘଟାଦୀନଂ ତୁ ଦୁକ୍କଟଂ ।
ଅବ୍ବୋହାରୋୱ ସୋ ଅନ୍ତୋ, ପୂୱାଦୀସୁପି କଣ୍ଣକଂ ॥
ପାସାଣଦଦ୍ଦୁସେୱାଲ-ସେଲେୟ୍ୟପ୍ପଭୁତୀନି ଚ ।
ହୋନ୍ତି ଦୁକ୍କଟୱତ୍ଥୂନି, ଅପତ୍ତାନୀତି ନିଦ୍ଦିସେ ॥
ପୁପ୍ଫିତଂ ତୁ ଅହିଚ୍ଛତ୍ତଂ, ଅବ୍ବୋହାରିକତଂ ଗତଂ ।
ସଚେ ତଂ ମକୁଳଂ ହୋତି, ହୋତି ଦୁକ୍କଟୱତ୍ଥୁକଂ ॥
ରୁକ୍ଖେ ତଚଂ ୱିକୋପେତ୍ୱା, ତଥା ପପ୍ପଟିକମ୍ପି ଚ ।
ନିୟ୍ୟାସମ୍ପି ପନଲ୍ଲସ୍ମିଂ, ଗହେତୁଂ ନ ଚ ୱଟ୍ଟତି ॥
ନୁହିଆଦୀସୁ ରୁକ୍ଖେସୁ, ତାଲପଣ୍ଣାଦିକେସୁ ୱା ।
ଲିଖତୋ ତତ୍ଥଜାତେସୁ, ପାଚିତ୍ତିୟମୁଦୀରୟେ ॥
ପୁପ୍ଫଂ ପଣ୍ଡୁପଲାସଂ ୱା, ଫଲଂ ୱା ପକ୍କମେୱ ୱା ।
ପାତେନ୍ତସ୍ସ ଚ ଚାଲେତ୍ୱା, ପାଚିତ୍ତିୟମୁଦୀରିତଂ ॥
ନାମେତ୍ୱା ଫଲିନିଂ ସାଖଂ, ଦାତୁଂ ୱଟ୍ଟତି ଗଣ୍ହତୋ ।
ସୟଂ ଖାଦିତୁକାମୋ ଚେ, ଦାତୁମେୱଂ ନ ୱଟ୍ଟତି ॥
ଉକ୍ଖିପିତ୍ୱା ପରଂ କଞ୍ଚି, ଗାହାପେତୁମ୍ପି ୱଟ୍ଟତି ।
ପୁପ୍ଫାନି ଓଚିନନ୍ତେସୁ, ଅୟମେୱ ୱିନିଚ୍ଛୟୋ ॥
ୟେସଂ ରୁହତି ରୁକ୍ଖାନଂ, ସାଖା ତେସମ୍ପି ସାଖିନଂ ।
କପ୍ପିୟଂ ତମକାରେତ୍ୱା, ୱିକୋପେନ୍ତସ୍ସ ଦୁକ୍କଟଂ ॥
ଅୟମେୱ ନୟୋ ଅଲ୍ଲ-ସିଙ୍ଗିୱେରାଦିକେସୁପି ।
ଦୁକ୍କଟଂ ବୀଜଗାମେସୁ, ନିଦ୍ଦିଟ୍ଠତ୍ତା ମହେସିନା ॥
‘‘ରୁକ୍ଖଂ ଛିନ୍ଦ ଲତଂ ଛିନ୍ଦ, କନ୍ଦଂ ମୂଲମ୍ପି ଉଦ୍ଧର ।
ଉପ୍ପାଟେହୀ’’ତି ୱତ୍ତୁମ୍ପି, ୱଟ୍ଟତେୱାନିୟାମତୋ ॥
‘‘ଅମ୍ବଂ ଜମ୍ବୁମ୍ପି ନିମ୍ବଂ ୱା, ଛିନ୍ଦ ଭିନ୍ଦୁଦ୍ଧରା’’ତି ୱା ।
ଗହେତ୍ୱା ପନ ନାମମ୍ପି, ୱଟ୍ଟତେୱାନିୟାମତୋ ॥
‘‘ଇମଂ ରୁକ୍ଖଂ ଇମଂ ୱଲ୍ଲିଂ, ଇମଂ ଛଲ୍ଲିଂ ଇମଂ ଲତଂ ।
ଛିନ୍ଦ ଭିନ୍ଦା’’ତି ୱା ୱତ୍ତୁଂ, ନିୟମେତ୍ୱା ନ ୱଟ୍ଟତି ॥
ପୂରେତ୍ୱା ଉଚ୍ଛୁଖଣ୍ଡାନଂ, ପଚ୍ଛିୟୋ ଆହରନ୍ତି ଚେ ।
ସବ୍ବମେୱ କତଂ ହୋତି, ଏକସ୍ମିଂ କପ୍ପିୟେ କତେ ॥
ଏକତୋ ପନ ବଦ୍ଧାନି, ଉଚ୍ଛୁଦାରୂନି ହୋନ୍ତି ଚେ ।
କପ୍ପିୟଂ କରୋନ୍ତୋ ପନ, ଦାରୁଂ ୱିଜ୍ଝତି ୱଟ୍ଟତି ॥
ୱଲ୍ଲିୟା ରଜ୍ଜୁୟା ୱାପି, ୟାୟ ବଦ୍ଧାନି ତାନି ହି ।
ଭାଜନେନ ସମାନତ୍ତା, ତଂ ୱିଜ୍ଝତି ନ ୱଟ୍ଟତି ॥
ଭତ୍ତଂ ମରିଚପକ୍କେହି, ମିସ୍ସେତ୍ୱା ଆହରନ୍ତି ଚେ ।
ଏକସିତ୍ଥେପି ଭତ୍ତସ୍ସ, ସଚେ ୱିଜ୍ଝତି ୱଟ୍ଟତି ॥
ଅୟମେୱ ନୟୋ ୱୁତ୍ତୋ, ତିଲତଣ୍ଡୁଲକାଦିସୁ ।
ଏକାବଦ୍ଧେ କପିତ୍ଥେପି, କଟାହେ କପ୍ପିୟଂ କରେ ॥
କଟାହଂ ୟଦି ମୁଞ୍ଚିତ୍ୱା, ଅନ୍ତୋ ଚରତି ମିଞ୍ଜକଂ ।
ଭିନ୍ଦାପେତ୍ୱା କପିତ୍ଥଂ ତଂ, କାରେତବ୍ବଂ ତୁ କପ୍ପିୟଂ ॥
ଅଭୂତଗାମବୀଜେସୁ, ଭୂତଗାମାଦିସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଅତଥାସଞ୍ଞିନୋ ତତ୍ଥ, ଅସଞ୍ଚିଚ୍ଚାସତିସ୍ସ ଚ ।
ଉମ୍ମତ୍ତକାଦିକାନଞ୍ଚ, ଅନାପତ୍ତି ପକାସିତା ॥
ଇଦଞ୍ଚ ତିସମୁଟ୍ଠାନଂ, କ୍ରିୟଂ ସଞ୍ଞାୱିମୋକ୍ଖକଂ ।
କାୟକମ୍ମଂ ୱଚୀକମ୍ମଂ, ତିଚିତ୍ତଞ୍ଚ ତିୱେଦନଂ ॥
ଭୂତଗାମକଥା ।
କତେ ସଙ୍ଘେନ କମ୍ମସ୍ମିଂ, ଅଞ୍ଞୱାଦୱିହେସକେ ।
ତଥା ପୁନ କରୋନ୍ତସ୍ସ, ହୋତି ପାଚିତ୍ତିୟଦ୍ୱୟଂ ॥
ତିକପାଚିତ୍ତିୟଂ ଧମ୍ମେ, ଅଧମ୍ମେ ତିକଦୁକ୍କଟଂ ।
କମ୍ମେ ଅରୋପିତେ ଚେୱଂ, ୱଦନ୍ତସ୍ସ ଚ ଦୁକ୍କଟଂ ॥
ଆପତ୍ତିଂ ୱାପି ଆପନ୍ନଂ, ଅଜାନନ୍ତସ୍ସ, ‘‘ଭଣ୍ଡନଂ ।
ଭୱିସ୍ସତୀ’’ତି ସଞ୍ଞିସ୍ସ, ଗିଲାନସ୍ସ ନ ଦୋସତା ॥
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ।
କ୍ରିୟାକ୍ରିୟମିଦଂ ୱୁତ୍ତଂ, ୱେଦନା ଦୁକ୍ଖୱେଦନା ॥
ଅଞ୍ଞୱାଦକଥା ।
ଅୟସଂ କତ୍ତୁକାମୋୱ, ସମ୍ମତସ୍ସ ହି ଭିକ୍ଖୁନୋ ।
ୱଦନ୍ତୋ ଉପସମ୍ପନ୍ନେ, ଉଜ୍ଝାପେତି ଚ ଖୀୟତି ॥
ତସ୍ମିଂ ୱତ୍ଥୁଦ୍ୱୟେ ତସ୍ସ, ହୋତି ପାଚିତ୍ତିୟଦ୍ୱୟଂ ।
ତିକପାଚିତ୍ତିୟଂ ଧମ୍ମେ, ଅଧମ୍ମେ ତିକଦୁକ୍କଟଂ ॥
ଅୱଣ୍ଣଂନୁପସମ୍ପନ୍ନ-ସନ୍ତିକେ ପନ ଭିକ୍ଖୁନୋ ।
ଅସମ୍ମତସ୍ସ ଭିକ୍ଖୁସ୍ସ, ଭାସତୋ ୟସ୍ସ କସ୍ସଚି ॥
ସାମଣେରସ୍ସ ୱା ୱଣ୍ଣଂ, ସମ୍ମତାସମ୍ମତସ୍ସପି ।
ୱଦତୋ ଦୁକ୍କଟଂ ହୋତି, ୟସ୍ସ କସ୍ସଚି ସନ୍ତିକେ ॥
ଛନ୍ଦାଦୀନଂ ୱସେନେୱ, କରୋନ୍ତଂ ଭଣତୋ ପନ ।
ଅନାପତ୍ତି କ୍ରିୟାସେସ-ମନନ୍ତରସମଂ ମତଂ ॥
ଉଜ୍ଝାପନକଥା ।
ଅଜ୍ଝୋକାସେ ତୁ ମଞ୍ଚାଦିଂ, ଅତ୍ତନୋ ୱା ପରସ୍ସ ୱା ।
ଅତ୍ଥାୟ ସନ୍ଥରାପେତ୍ୱା, ସନ୍ଥରିତ୍ୱାପି ୱା ପନ ॥
ନେୱୁଦ୍ଧରେୟ୍ୟ ସଙ୍ଘସ୍ସ, ଉଦ୍ଧରାପେୟ୍ୟ ୱା ନ ତଂ ।
ପକ୍କମନ୍ତୋ ସଚେ ତସ୍ସ, ହୋତି ପାଚିତ୍ତି ଭିକ୍ଖୁନୋ ॥
ୱସ୍ସିକେ ଚତୁରୋ ମାସେ, ସଚେ ଦେୱୋ ନ ୱସ୍ସତି ।
ଅଜ୍ଝୋକାସେ ତଥା ଚାପି, ଠପେତୁଂ ନ ଚ ୱଟ୍ଟତି ॥
ୟତ୍ଥ ୱସ୍ସତି ହେମନ୍ତେ, ଚତ୍ତାରୋ ଅପରେପି ଚ ।
ଠପେତୁଂ ତତ୍ଥ ମଞ୍ଚାଦିଂ, ଅଟ୍ଠ ମାସେ ନ ୱଟ୍ଟତି ॥
କାକାଦୀନଂ ନିୱାସସ୍ମିଂ, ରୁକ୍ଖମୂଲେ କଦାଚିପି ।
ମଞ୍ଚାଦିଂ ପନ ସଙ୍ଘସ୍ସ, ଠପେତୁଂ ନ ଚ ୱଟ୍ଟତି ॥
ଅଞ୍ଞସ୍ସତ୍ଥାୟ ୟଂ କିଞ୍ଚି, ସନ୍ଥତଂ ୟଦି ସଙ୍ଘିକଂ ।
ୟତ୍ଥ କତ୍ଥଚି ୱା ଠାନେ, ୟେନ କେନଚି ଭିକ୍ଖୁନା ॥
ୟାୱ ସୋ ନ ନିସୀଦେୟ୍ୟ, ‘‘ଗଚ୍ଛା’’ତି ନ ୱଦେୟ୍ୟ ୱା ।
ତାୱ ସନ୍ଥାରକସ୍ସେୱ, ଭାରୋ ତନ୍ତି ପୱୁଚ୍ଚତି ॥
ସଚେ ତଂ ସାମଣେରେନ, ସନ୍ଥରାପେତି ସନ୍ଥତଂ ।
ସନ୍ଥରାପିତଭିକ୍ଖୁସ୍ସ, ପଲିବୋଧୋତି ଦୀପିତୋ ॥
ସନ୍ଥତଂ ଭିକ୍ଖୁନା ତଂ ଚେ, ଭାରୋ ତସ୍ସେୱ ତାୱ ତଂ ।
ୟାୱ ଆଣାପକୋ ତତ୍ଥ, ଆଗନ୍ତ୍ୱା ନ ନିସୀଦତି ॥
ଭିକ୍ଖୁଂ ୱା ସାମଣେରଂ ୱା, ଆରାମିକମୁପାସକଂ ।
ଅନାପୁଚ୍ଛା ନିୟ୍ୟାତେତ୍ୱା, ସଙ୍ଘିକଂ ସୟନାସନଂ ॥
ଲେଡ୍ଡୁପ୍ପାତମତିକ୍କମ୍ମ, ଗଚ୍ଛତୋ ପଠମେ ପଦେ ।
ଦୁକ୍କଟଂ, ଦୁତିୟେ ୱାରେ, ପାଚିତ୍ତିୟମୁଦୀରିତଂ ॥
ଠତ୍ୱା ଭୋଜନସାଲାୟଂ, ୱତ୍ୱା ୟୋ ସାମଣେରକଂ ।
ଅସୁକସ୍ମିଂ ଦିୱାଟ୍ଠାନେ, ପଞ୍ଞାପେହୀତି ମଞ୍ଚକଂ ॥
ନିକ୍ଖମିତ୍ୱା ସଚେ ତସ୍ମା, ଠାନା ଅଞ୍ଞତ୍ଥ ଗଚ୍ଛତି ।
ପାଦୁଦ୍ଧାରେନ ସୋ ଭିକ୍ଖୁ, କାରେତବ୍ବୋତି ଦୀପିତୋ ॥
ତିକପାଚିତ୍ତିୟଂ ୱୁତ୍ତଂ, ତିକାତୀତେନ ସତ୍ଥୁନା ।
ତଥା ପୁଗ୍ଗଲିକେ ତେନ, ଦୀପିତଂ ତିକଦୁକ୍କଟଂ ॥
ଚିମିଲିଂ ତଟ୍ଟିକଂ ଚମ୍ମଂ, ଫଲକଂ ପାଦପୁଞ୍ଛନିଂ ।
ଭୂମତ୍ଥରଣକଂ ୱାପି, ଉତ୍ତରତ୍ଥରଣମ୍ପି ୱା ॥
ଦାରୁମତ୍ତିକଭଣ୍ଡାନି, ପତ୍ତାଧାରକମେୱ ୱା ।
ଅବ୍ଭୋକାସେ ଠପେତ୍ୱା ତଂ, ଗଚ୍ଛତୋ ହୋତି ଦୁକ୍କଟଂ ॥
ସଚେ ଆରଞ୍ଞକେନାପି, ଅନୋୱସ୍ସେ ଚ ନୋ ସତି ।
ଲଗ୍ଗେତ୍ୱା ପନ ରୁକ୍ଖସ୍ମିଂ, ଗନ୍ତବ୍ବଂ ତୁ ୟଥାସୁଖଂ ॥
ୟଥା ଉପଚିକାଦୀହି, ନ ଖଜ୍ଜତି ନ ଲୁଜ୍ଜତି ।
ତଥା କତ୍ୱାପି ତଂ ସବ୍ବଂ, ଗନ୍ତୁଂ ପନ ଚ ୱଟ୍ଟତି ॥
ଅନାପତ୍ତୁଦ୍ଧରାପେତ୍ୱା, ଆପୁଚ୍ଛିତ୍ୱାପି ଗଚ୍ଛତୋ ।
ଅତ୍ତନୋ ସନ୍ତକେ ରୁଦ୍ଧେ, ଆପଦାସୁପି ଭିକ୍ଖୁନୋ ॥
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ।
କ୍ରିୟାକ୍ରିୟମିଦଂ ୱୁତ୍ତ-ମୟମେୱ ୱିସେସତା ॥
ପଠମସେନାସନକଥା ।
ଭିସିଚିମିଲିକା ଭୂମ-ତ୍ଥରଣଂ ଉତ୍ତରତ୍ଥରଂ ।
ତଟ୍ଟିକା ଚମ୍ମଖଣ୍ଡୋ ଚ, ପଚ୍ଚତ୍ଥରନିସୀଦନଂ ॥
ସନ୍ଥାରୋ ତିଣପଣ୍ଣାନଂ, ସେୟ୍ୟା ଦସୱିଧା ସିୟା ।
ସବ୍ବଚ୍ଛନ୍ନପରିଚ୍ଛନ୍ନେ, ୱିହାରେ ଭିକ୍ଖୁ ୟୋ ପନ ॥
ଏତଂ ଦସୱିଧଂ ସେୟ୍ୟଂ, ସନ୍ଥରିତ୍ୱାପି ୱା ସୟଂ ।
ଅନୁଦ୍ଧରିତ୍ୱାନାପୁଚ୍ଛା, ଅତିକ୍କମତି ତଂ ସଚେ ॥
ଆରାମସ୍ସୂପଚାରଂ ୱା, ପରିକ୍ଖେପଂ ପନସ୍ସ ୱା ।
ପଠମେ ଦୁକ୍କଟଂ ପାଦେ, ପାଚିତ୍ତି ଦୁତିୟେ ସିୟା ॥
ସେନାସନସ୍ସ ସେୟ୍ୟାୟ, ଉଭୟେସଂ ୱିନାସତୋ ।
ଗଚ୍ଛତୋ ସନ୍ଥରିତ୍ୱନ୍ତୋ-ଗବ୍ଭେ ପାଚିତ୍ତି ୱଣ୍ଣିତା ॥
ଉପଚାରେ ୱିହାରସ୍ସ, ଦୁକ୍କଟଂ ମଣ୍ଡପାଦିକେ ।
ଗଚ୍ଛତୋ ସନ୍ଥରିତ୍ୱା ୱା, ସେୟ୍ୟାମତ୍ତଂ ୱିନାସତୋ ॥
ତିକପାଚିତ୍ତିୟଂ ୱୁତ୍ତଂ, ସଙ୍ଘିକେ ଦସୱତ୍ଥୁକେ ।
ତଥା ପୁଗ୍ଗଲିକେ ତସ୍ସ, ଦୀପିତଂ ତିକଦୁକ୍କଟଂ ॥
ଅନାପତ୍ତୁଦ୍ଧରିତ୍ୱା ୱା, ଆପୁଚ୍ଛଂ ୱାପି ଗଚ୍ଛତୋ ।
ପଲିବୁଦ୍ଧେପି ୱାଞ୍ଞେନ, ଅତ୍ତନୋ ସନ୍ତକେପି ୱା ॥
ସାପେକ୍ଖୋୱ ଚ ଗନ୍ତ୍ୱା ତଂ, ତତ୍ଥ ଠତ୍ୱାପି ପୁଚ୍ଛତି ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
ଦୁତିୟସେନାସନକଥା ।
ୟୋ ପୁବ୍ବୁପଗତଂ ଭିକ୍ଖୁଂ, ଜାନଂ ଅନୁପଖଜ୍ଜ ଚ ।
କପ୍ପେୟ୍ୟ ସଙ୍ଘିକାୱାସେ, ସେୟ୍ୟଂ ପାଚିତ୍ତିୟସ୍ସ ଚେ ॥
ପାଦଧୋୱନପାସାଣା, ପୱିସନ୍ତସ୍ସ ଭିକ୍ଖୁନୋ ।
ୟାୱ ତଂ ମଞ୍ଚପୀଠଂ ୱା, ନିକ୍ଖମନ୍ତସ୍ସ ୱା ପନ ॥
ମଞ୍ଚପୀଠକତୋ ୟାୱ, ପସ୍ସାୱଟ୍ଠାନମେୱ ତୁ ।
ଏତ୍ଥନ୍ତରେ ଇଦଂ ଠାନଂ, ଉପଚାରୋତି ୱୁଚ୍ଚତି ॥
ତତ୍ଥ ବାଧେତୁକାମସ୍ସ, ଉପଚାରେ ତୁ ଭିକ୍ଖୁନୋ ।
ଦସସ୍ୱଞ୍ଞତରଂ ସେୟ୍ୟଂ, ସନ୍ଥରନ୍ତସ୍ସ ଦୁକ୍କଟଂ ॥
ନିସୀଦନ୍ତସ୍ସ ୱା ତତ୍ଥ, ନିପଜ୍ଜନ୍ତସ୍ସ ୱା ପନ ।
ତଥା ଦ୍ୱେପି କରୋନ୍ତସ୍ସ, ହୋତି ପାଚିତ୍ତିୟଦ୍ୱୟଂ ॥
ପୁନପ୍ପୁନଂ କରୋନ୍ତସ୍ସ, ପୟୋଗଗଣନାୱସା ।
ତିକପାଚିତ୍ତିୟଂ ୱୁତ୍ତଂ, ପୁଗ୍ଗଲେ ତିକଦୁକ୍କଟଂ ॥
ୱୁତ୍ତୂପଚାରଂ ମୁଞ୍ଚିତ୍ୱା, ସେୟ୍ୟଂ ସନ୍ଥରତୋପି ୱା ।
ୱିହାରସ୍ସୂପଚାରେ ୱା, ଅଜ୍ଝୋକାସେପି ୱା ପନ ॥
ସନ୍ଥରାପୟତୋ ୱାପି, ତତ୍ଥ ତସ୍ସ ନିସୀଦତୋ ।
ସବ୍ବତ୍ଥ ଦୁକ୍କଟଂ ୱୁତ୍ତଂ, ନିୱାସୋ ଚ ନିୱାରିତୋ ॥
ଅନାପତ୍ତି ଗିଲାନସ୍ସ, ସୀତାଦୁପ୍ପୀଳିତସ୍ସ ୱା ।
ଆପଦାସୁପି ଭିକ୍ଖୁସ୍ସ, ତଥା ଉମ୍ମତ୍ତକାଦିନୋ ॥
ସମୁଟ୍ଠାନାଦୟୋ ସବ୍ବେ, ପଠମନ୍ତିମୱତ୍ଥୁନା ।
ସଦିସାତି ଚ ୱିଞ୍ଞେୟ୍ୟା, ହୋତୀଦଂ ଦୁକ୍ଖୱେଦନଂ ॥
ଅନୁପଖଜ୍ଜକଥା ।
ୱିହାରା ସଙ୍ଘିକା ଭିକ୍ଖୁଂ, ନିକ୍କଡ୍ଢେୟ୍ୟ ସଚେ ପନ ।
ନିକ୍କଡ୍ଢାପେୟ୍ୟ ୱା କୁଦ୍ଧୋ, ତସ୍ସ ପାଚିତ୍ତିୟଂ ସିୟା ॥
ବହୁଭୂମାପି ପାସାଦା, ପୟୋଗେନେକକେନ ୟୋ ।
ନିକ୍କଡ୍ଢେତି ସଚେ ତସ୍ସ, ଏକା ପାଚିତ୍ତି ଦୀପିତା ॥
ଠପେତ୍ୱା ଚ ଠପେତ୍ୱା ଚ, ନିକ୍କଡ୍ଢନ୍ତସ୍ସ ଅନ୍ତରା ।
ଦ୍ୱାରାନଂ ଗଣନାୟସ୍ସ, ହୋନ୍ତି ପାଚିତ୍ତିୟୋ ପନ ॥
‘‘ନିକ୍ଖମା’’ତି ୱଦନ୍ତସ୍ସ, ୱାଚାୟପି ଅୟଂ ନୟୋ ।
ଆଣତ୍ତିୟା ଖଣେୟେୱ, ଆଣାପେନ୍ତସ୍ସ ଦୁକ୍କଟଂ ॥
ସଚେ ସୋ ସକିମାଣତ୍ତୋ, ଦ୍ୱାରେପି ବହୁକେ ପନ ।
ଅତିକ୍କାମେତି ଏକାୱ, ବହୁକାନି ବହୂନି ଚେ ॥
ତସ୍ସୂପଟ୍ଠାନସାଲାଦି-ୱିହାରସ୍ସୂପଚାରତୋ।
କାୟେନପି ଚ ୱାଚାୟ, ତଥା ନିକ୍କଡ୍ଢନେପି ଚ ॥
ୱିହାରସ୍ସୂପଚାରା ୱା, ୱିହାରା ୱାପି ଚେତରଂ ।
ନିକ୍କଡ୍ଢନ୍ତସ୍ସ ସବ୍ବେସଂ, ପରିକ୍ଖାରମ୍ପି ଦୁକ୍କଟଂ ॥
ଅସମ୍ବଦ୍ଧେସୁ ଭିକ୍ଖୁସ୍ସ, ପରିକ୍ଖାରେସୁ ପଣ୍ଡିତୋ ।
ୱତ୍ଥୂନଂ ଗଣନାୟସ୍ସ, ଦୁକ୍କଟଂ ପରିଦୀପୟେ ॥
ଅନ୍ତେୱାସିମଲଜ୍ଜିଂ ୱା, ତଥା ସଦ୍ଧିୱିହାରିକଂ ।
ନିକ୍କଡ୍ଢନ୍ତସ୍ସ ଉମ୍ମତ୍ତଂ, ସୟଂ ଉମ୍ମତ୍ତକସ୍ସ ଚ ॥
ଅତ୍ତନୋ ୱସନଟ୍ଠାନା, ତଥା ୱିସ୍ସାସିକସ୍ସ ୱା ।
ପରିକ୍ଖାରଞ୍ଚ ୱା ତେସଂ, ଅନାପତ୍ତି ପକାସିତା ॥
ସଙ୍ଘାରାମାପି ସବ୍ବସ୍ମା, ତଥା କଲହକାରକଂ ।
ଇଦଂ ତୁ ତିସମୁଟ୍ଠାନଂ, ୱେଦନା ଦୁକ୍ଖୱେଦନା ॥
ନିକ୍କଡ୍ଢନକଥା ।
ମଜ୍ଝିମାସୀସଘଟ୍ଟାୟ, ୱେହାସକୁଟିୟୂପରି ।
ଆହଚ୍ଚପାଦକେ ମଞ୍ଚେ, ପୀଠେ ୱା ପନ ଭିକ୍ଖୁନୋ ॥
ନିସୀଦନ୍ତସ୍ସ ୱା ତସ୍ମିଂ, ନିପଜ୍ଜନ୍ତସ୍ସ ୱା ପନ ।
ପୟୋଗଗଣନାୟେୱ, ତସ୍ସ ପାଚିତ୍ତିୟୋ ସିୟୁଂ ॥
ତିକପାଚିତ୍ତିୟଂ ୱୁତ୍ତଂ, ପୁଗ୍ଗଲେ ତିକଦୁକ୍କଟଂ ।
ହେଟ୍ଠା ଅପରିଭୋଗେ ୱା, ସୀସଘଟ୍ଟାୟ ୱା ପନ ॥
ଅୱେହାସୱିହାରେ ୱା, ଅତ୍ତନୋ ସନ୍ତକେପି ୱା ।
ୱିସ୍ସାସିକୱିହାରେ ୱା, ନ ଦୋସୁମ୍ମତ୍ତକାଦିନୋ ॥
ୟତ୍ଥ ପଟାଣି ୱା ଦିନ୍ନା, ତତ୍ଥ ଠତ୍ୱା ଲଗେତି ୱା ।
ଇଦମେଳକଲୋମେନ, ସମୁଟ୍ଠାନଂ ସମଂ ମତଂ ॥
ୱେହାସକୁଟିକଥା ।
ୟାୱ ଦ୍ୱାରସ୍ସ କୋସମ୍ହା, ଅଗ୍ଗଳଟ୍ଠପନାୟ ତୁ ।
ଭିକ୍ଖୁନା ଲିମ୍ପିତବ୍ବଂ ୱା, ଲେପାପେତବ୍ବମେୱ ୱା ॥
ଞେୟ୍ୟୋ ଆଲୋକସନ୍ଧୀନଂ, ପରିକମ୍ମେପ୍ୟୟଂ ନୟୋ ।
ଛଦନସ୍ସ ଦ୍ୱତ୍ତିପରିୟାୟଂ, ଠିତେନ ହରିତେ ପନ ॥
ଅଧିଟ୍ଠେୟ୍ୟଂ ତତୋ ଉଦ୍ଧଂ, ଅଧିଟ୍ଠେତି ସଚେ ପନ ।
ତସ୍ସ ପାଚିତ୍ତିୟଂ ହୋତି, ଦୁକ୍କଟଂ ତତ୍ଥ ତିଟ୍ଠତୋ ॥
ପିଟ୍ଠିୱଂସେ ଠିତୋ କୋଚି, ଛଦନସ୍ସ ମୁଖୱଟ୍ଟିୟା ।
ୟସ୍ମିଂ ଠାନେ ଠିତଂ ଭିକ୍ଖୁଂ, ଓଲୋକେନ୍ତୋ ନ ପସ୍ସତି ॥
ତସ୍ମିଂ ଠାନେ ପନ ଠାତୁଂ, ନେୱ ଭିକ୍ଖୁସ୍ସ ୱଟ୍ଟତି ।
ୱିହାରସ୍ସ ପତନ୍ତସ୍ସ, ପତନୋକାସତୋ ହି ତଂ ॥
ଊନକଦ୍ୱତ୍ତିପରିୟାୟେ, ଅତିରେକୋତି ସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ନ ଦୋସୋ ଦ୍ୱତ୍ତିପରିୟାୟେ, ଲେଣେ ତିଣକୁଟୀସୁ ୱା ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଦ୍ୱତ୍ତିପରିୟାୟକଥା ।
ଜାନଂ ସପ୍ପାଣକଂ ତୋୟଂ, ତିଣଂ ୱା ମତ୍ତିକମ୍ପି ୱା ।
ୟଦି ସିଞ୍ଚେୟ୍ୟ ପାଚିତ୍ତି, ସିଞ୍ଚାପେୟ୍ୟ ପରେହି ୱା ॥
ଅଚ୍ଛିନ୍ଦିତ୍ୱା ସଚେ ଧାରଂ, ମତ୍ତିକଂ ସିଞ୍ଚତୋ ପନ ।
ଏକସ୍ମିମ୍ପି ଘଟେ ଏକା, ପାଚିତ୍ତି ପରିଦୀପିତା ॥
ୱିଚ୍ଛିନ୍ଦତି ସଚେ ଧାରଂ, ପୟୋଗଗଣନାୱସା ।
ସମ୍ମୁଖମ୍ପି କରୋନ୍ତସ୍ସ, ମାତିକଂ ସନ୍ଦମାନକଂ ॥
ଏକାୱ ଚେ ସିୟାପତ୍ତି, ଦିୱସମ୍ପି ଚ ସନ୍ଦତୁ ।
ବନ୍ଧତୋ ତତ୍ଥ ତତ୍ଥସ୍ସ, ପୟୋଗଗଣନା ସିୟା ॥
ସଚେ ସକଟପୁଣ୍ଣମ୍ପି, ମତ୍ତିକଂ ତିଣମେୱ ୱା ।
ଉଦକେ ପକ୍ଖିପନ୍ତସ୍ସ, ଏକା ପାଚିତ୍ତି ଏକତୋ ॥
ଏକେକଂ ପକ୍ଖିପନ୍ତସ୍ସ, ପୟୋଗଗଣନାୟ ଚେ ।
ଖୟଂ ୱା ଆୱିଲତ୍ତଂ ୱା, ଜଲଂ ଗଚ୍ଛତି ତାଦିସେ ॥
‘‘ସିଞ୍ଚାହୀ’’ତି ୱଦନ୍ତସ୍ସ, ହୋତି ଆପତ୍ତି ଦୁକ୍କଟଂ ।
ଏକାୟାଣତ୍ତିୟା ଏକା, ଦିୱସମ୍ପି ଚ ସିଞ୍ଚତୋ ॥
ଅପ୍ପାଣେ ଉଦକେ ସୁଦ୍ଧେ, ସପ୍ପାଣମିତି ସଞ୍ଞିନୋ ।
ସବ୍ବତ୍ଥ ୱିମତିସ୍ସାପି, ହୋତି ଆପତ୍ତି ଦୁକ୍କଟଂ ॥
ସବ୍ବତ୍ଥାପାଣସଞ୍ଞିସ୍ସ, ଅସଞ୍ଚିଚ୍ଚାସତିସ୍ସ ୱା ।
ଅଜାନତୋ ଅନାପତ୍ତି, ତଥା ଉମ୍ମତ୍ତକାଦିନୋ ॥
ସପ୍ପାଣକତ୍ତଂ ତୋୟସ୍ସ, ସପ୍ପାଣନ୍ତି ୱିଜାନନଂ ।
ୱିନା ୱଧକଚିତ୍ତେନ, ତିଣାଦୀନଂ ନିସେଚନଂ ॥
ଚତ୍ତାରେୱସ୍ସ ଅଙ୍ଗାନି, ନିଦ୍ଦିଟ୍ଠାନି ମହେସିନା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଇଦଂ ପଣ୍ଣତ୍ତିୱଜ୍ଜଞ୍ଚ, ତିଚିତ୍ତଞ୍ଚାତି ଦୀପିତଂ ।
ଇଦମେୱେତ୍ଥ ନିଦ୍ଦିଟ୍ଠଂ, ତସ୍ସ ଚସ୍ସ ୱିସେସନଂ ॥
ସପ୍ପାଣକକଥା ।
ସେନାସନୱଗ୍ଗୋ ଦୁତିୟୋ ।
ଭିକ୍ଖୁସ୍ସାଟ୍ଠଙ୍ଗୟୁତ୍ତସ୍ସ, ଭିକ୍ଖୁନୋୱାଦସମ୍ମୁତି ।
ଇଧ ଞତ୍ତିଚତୁତ୍ଥେନ, ଅନୁଞ୍ଞାତା ମହେସିନା ॥
ୟୋ ତାୟାସମ୍ମତୋ ଭିକ୍ଖୁ, ଗରୁଧମ୍ମେହି ଅଟ୍ଠହି ।
ଏକଂ ସମ୍ବହୁଲା ୱାପି, ଭିକ୍ଖୁନିସଙ୍ଘମେୱ ୱା ॥
ଓସାରେନ୍ତୋୱ ତେ ଧମ୍ମେ, ଓୱଦେୟ୍ୟ ସଚେ ପନ ।
ଓୱାଦପରିୟୋସାନେ, ତସ୍ସ ପାଚିତ୍ତିୟଂ ସିୟା ॥
ଅଞ୍ଞେନ ପନ ଧମ୍ମେନ, ଓୱଦନ୍ତସ୍ସ ଦୁକ୍କଟଂ ।
ଏକତୋଉପସମ୍ପନ୍ନଂ, ଗରୁଧମ୍ମେହି ୱା ତଥା ॥
ଭିକ୍ଖୂନଂ ସନ୍ତିକେୟେୱ, ଉପସମ୍ପନ୍ନଭିକ୍ଖୁନିଂ ।
ତଥା, ଲିଙ୍ଗୱିପଲ୍ଲାସେ, ପାଚିତ୍ତେୱ ପକାସିତା ॥
ସମ୍ମତସ୍ସାପି ଭିକ୍ଖୁସ୍ସ, ଦୁକ୍କଟଂ ସମୁଦୀରିତଂ ।
ଓୱାଦଂ ଅନିୟାଦେତ୍ୱା, ଧମ୍ମେନଞ୍ଞେନ ଭାସତୋ ॥
‘‘ସମଗ୍ଗମ୍ହା’’ତି ୱୁତ୍ତେପି, ଅଞ୍ଞେନୋୱଦତୋ ତଥା ।
‘‘ୱଗ୍ଗମ୍ହା’’ତି ଚ ୱୁତ୍ତେପି, ଗରୁଧମ୍ମେହି ଦୁକ୍କଟଂ ॥
ଅଗଣ୍ହନ୍ତସ୍ସ ଓୱାଦଂ, ଅପଚ୍ଚାହରତୋପି ତଂ ।
ଠପେତ୍ୱା ଦୁକ୍କଟଂ ବାଲଂ, ଗିଲାନଂ ଗମିକଂ ସିୟା ॥
ଅଧମ୍ମେ ପନ କମ୍ମସ୍ମିଂ, ଅଧମ୍ମନ୍ତି ଚ ସଞ୍ଞିନୋ ।
ୱଗ୍ଗେ ଭିକ୍ଖୁନିସଙ୍ଘସ୍ମିଂ, ତିକପାଚିତ୍ତିୟଂ ସିୟା ॥
ତଥା ୱେମତିକସ୍ସାପି, ଧମ୍ମକମ୍ମନ୍ତି ସଞ୍ଞିନୋ ।
ନୱ ପାଚିତ୍ତିୟୋ ୱୁତ୍ତା, ସମଗ୍ଗେପି ଚ ତତ୍ତକା ॥
ନୱକାନଂ ୱସା ଦ୍ୱିନ୍ନଂ, ଅଟ୍ଠାରସ ଭୱନ୍ତି ତା ।
ଦୁକ୍କଟଂ ଧମ୍ମକମ୍ମେପି, ସତ୍ତରସୱିଧଂ ସିୟା ॥
‘‘ଓସାରେହୀ’’ତି ୱୁତ୍ତୋ ୱା, ପଞ୍ହଂ ପୁଟ୍ଠୋ କଥେତି ୱା ।
ସିକ୍ଖମାନାୟ ୱା ନେୱ, ଦୋସୋ ଉମ୍ମତ୍ତକାଦିନୋ ॥
ୱାଚୁଗ୍ଗତାୱ କାତବ୍ବା, ପଗୁଣା ଦ୍ୱେପି ମାତିକା ।
ସୁତ୍ତନ୍ତତୋ ଚ ଚତ୍ତାରୋ, ଭାଣୱାରା ପକାସିତା ॥
ଏକୋ ପରିକଥତ୍ଥାୟ, କଥାମଗ୍ଗୋ ପକାସିତୋ ।
ମଙ୍ଗଲାମଙ୍ଗଲତ୍ଥାୟ, ତିସ୍ସୋୟେୱାନୁମୋଦନା ॥
ଉପୋସଥାଦିଅତ୍ଥାୟ, କମ୍ମାକମ୍ମୱିନିଚ୍ଛୟୋ ।
କମ୍ମଟ୍ଠାନଂ ତଥା ଏକଂ, ଉତ୍ତମତ୍ଥସ୍ସ ପାପକଂ ॥
ଏତ୍ତକଂ ଉଗ୍ଗହେତ୍ୱାନ, ପଞ୍ଚୱସ୍ସୋ ବହୁସ୍ସୁତୋ ।
ମୁଞ୍ଚିତ୍ୱା ନିସ୍ସୟଂ କାମଂ, ୱସିତୁଂ ଲଭତିସ୍ସରୋ ॥
ୱାଚୁଗ୍ଗତା ୱିଭଙ୍ଗା ଦ୍ୱେ, ପଗୁଣା ବ୍ୟଞ୍ଜନାଦିତୋ ।
ଚତୂସ୍ୱପି ନିକାୟେସୁ, ଏକୋ ୱା ପୋତ୍ଥକୋପି ଚ ॥
କମ୍ମାକମ୍ମଞ୍ଚ ୱତ୍ତାନି, ଉଗ୍ଗହେତବ୍ବମେତ୍ତକଂ ।
ସବ୍ବନ୍ତିମପରିଚ୍ଛେଦୋ, ଦସୱସ୍ସୋ ସଚେ ପନ ॥
ବହୁସ୍ସୁତୋ ଦିସାମୋକ୍ଖୋ, ୟେନକାମଂଗମୋ ସିୟା ।
ପରିସଂ ଲଭତେ କାମଂ, ଉପଟ୍ଠାପେତୁମିସ୍ସରୋ ॥
ୟସ୍ସ ସାଟ୍ଠକଥଂ ସବ୍ବଂ, ୱାଚୁଗ୍ଗଂ ପିଟକତ୍ତୟଂ ।
ସୋୟଂ ବହୁସ୍ସୁତୋ ନାମ, ଭିକ୍ଖୁନୋୱାଦକୋ ସିୟା ॥
ଅସ୍ସାସମ୍ମତତାଦୀନି, ତୀଣି ଅଙ୍ଗାନି ଦୀପୟେ ।
ପଦସୋଧମ୍ମତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଓୱାଦକଥା ।
ପାଚିତ୍ତି ଗରୁଧମ୍ମେହି, ଧମ୍ମେନଞ୍ଞେନ ୱା ପନ ।
ହୋତ୍ୟତ୍ଥଙ୍ଗତେ ସୂରିୟେ, ଓୱଦନ୍ତସ୍ସ ଭିକ୍ଖୁନିଂ ॥
ତିକପାଚିତ୍ତିୟଂ ୱୁତ୍ତଂ, ସମ୍ମତସ୍ସାପି ଭିକ୍ଖୁନୋ ।
ଏକତୋଉପସମ୍ପନ୍ନଂ, ଓୱଦନ୍ତସ୍ସ ଦୁକ୍କଟଂ ॥
ତଥାନତ୍ଥଙ୍ଗତେ ସୂରିୟେ, ଗତେ ଅତ୍ଥନ୍ତି ସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଉଦ୍ଦେସାଦିନୟେନସ୍ସ, ଅନାପତ୍ତି ପକାସିତା ।
ଅନନ୍ତରସମା ସେସା, ସମୁଟ୍ଠାନାଦୟୋ ନୟା ॥
ଅତ୍ଥଙ୍ଗତସୂରିୟକଥା ।
ଭିକ୍ଖୁନିଂ ଓୱଦନ୍ତସ୍ସ, ଗନ୍ତ୍ୱା ଭିକ୍ଖୁନୁପସ୍ସୟଂ ।
ଗରୁଧମ୍ମେହି ଅଞ୍ଞତ୍ର, କାଲା ପାଚିତ୍ତିୟଂ ସିୟା ॥
ସଚେ ଅସମ୍ମତୋ ହୋତି, ହୋତି ପାଚିତ୍ତିୟଦ୍ୱୟଂ ।
ଅତ୍ଥଙ୍ଗତେ ଚ ସୂରିୟେ, ସଚେ ୱଦତି ତୀଣିପି ॥
ଅଞ୍ଞେନ ପନ ଧମ୍ମେନ, ୱଦତୋ ଦୁକ୍କଟଦ୍ୱୟଂ ।
ଏକଂ ପାଚିତ୍ତିୟଂ ହୋତି, ଭିକ୍ଖୁନୋ ରତ୍ତିହେତୁକଂ ॥
ସମ୍ମତସ୍ସାପି ଭିକ୍ଖୁସ୍ସ, ହୋତି ପାଚିତ୍ତିୟଦ୍ୱୟଂ ।
ଗରୁଧମ୍ମନିଦାନସ୍ସ, ସମ୍ମତତ୍ତା ଅଭାୱତୋ ॥
ତସ୍ସେୱଞ୍ଞେନ ଧମ୍ମେନ, ଓୱଦନ୍ତସ୍ସ ଦୁକ୍କଟଂ ।
ସମ୍ମତତ୍ତା ଅନାପତ୍ତି, ଏକା ପାଚିତ୍ତି ରତ୍ତିୟଂ ॥
ତିକପାଚିତ୍ତିୟଂ ୱୁତ୍ତଂ, ଦୁକ୍କଟଂ ଇତରଦ୍ୱୟେ ।
ଏକତୋଉପସମ୍ପନ୍ନଂ, ଓୱଦନ୍ତସ୍ସ ଦୁକ୍କଟଂ ॥
ତଥା ଅଞ୍ଞେନ ଧମ୍ମେନ, ଗନ୍ତ୍ୱା ଭିକ୍ଖୁନୁପସ୍ସୟଂ ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ଭିକ୍ଖୁନୁପସ୍ସୟକଥା ।
ଚୀୱରାଦୀନମତ୍ଥାୟ, ଓୱଦନ୍ତୀତି ଭିକ୍ଖୁନିଂ ।
ୱଦତୋ ସମ୍ମତେ ଭିକ୍ଖୁ, ତସ୍ସ ପାଚିତ୍ତିୟଂ ସିୟା ॥
ତିକପାଚିତ୍ତିୟଂ ୱୁତ୍ତଂ, ତଥେୱ ତିକଦୁକ୍କଟଂ ।
ସଙ୍ଘେନାସମ୍ମତଂ ଭିକ୍ଖୁଂ, ୱଦନ୍ତସ୍ସ ଚ ଦୁକ୍କଟଂ ॥
ତଥେୱାନୁପସମ୍ପନ୍ନଂ, ସମ୍ମତଂ ୱା ଅସମ୍ମତଂ ।
ନ ଦୋସୋ ଆମିସତ୍ଥାୟ, ଓୱଦନ୍ତସ୍ସ ଭାସତୋ ॥
ତଥା ଉମ୍ମତ୍ତକାଦୀନଂ, ଅନାପତ୍ତି ପକାସିତା ।
ଇଦଞ୍ହି ତିସମୁଟ୍ଠାନଂ, ୱେଦନା ଦୁକ୍ଖୱେଦନା ॥
ଆମିସକଥା ।
ସଚେ ଭିକ୍ଖୁନିୟା ଭିକ୍ଖୁ, ଦଦେୟ୍ୟ ପନ ଚୀୱରଂ ।
ଅଞ୍ଞାତିକାୟ ପାଚିତ୍ତି, ଠପେତ୍ୱା ପାରିୱତ୍ତକଂ ॥
ଚୀୱରସ୍ସ ପଟିଗ୍ଗାହ-ସିକ୍ଖାପଦସମୋ ନୟୋ ।
ଅୱସେସୋ ମତୋ ସଦ୍ଧିଂ, ସମୁଟ୍ଠାନାଦିନା ପନ ॥
ତତ୍ଥ ଭିକ୍ଖୁନିୟା ଦିନ୍ନଂ, ଚୀୱରଂ ଇଧ ଭିକ୍ଖୁନା ।
ତତ୍ଥ ନିସ୍ସଗ୍ଗିୟଂ ସୁଦ୍ଧ-ପାଚିତ୍ତି ଇଧ ସୂଚିତା ॥
ଚୀୱରଦାନକଥା ।
ଚୀୱରଂ ୟୋ ହି ସିବ୍ବେୟ୍ୟ, ସିବ୍ବାପେୟ୍ୟ ପରେନ ୱା ।
ଅଞ୍ଞାତିକାୟ ପାଚିତ୍ତି, ହୋତି ଭିକ୍ଖୁନିୟା ପନ ॥
ୟଂ ୱା ନିୱାସିତୁଂ ସକ୍କା, ୟଂ ୱା ପାରୁପନୂପଗଂ ।
ଚୀୱରନ୍ତି ଅଧିପ୍ପେତୋ, ଇଦମେତ୍ଥ ମହେସିନା ॥
ସୟଂ ସୂଚିଂ ପୱେସେତ୍ୱା, ସିବ୍ବନ୍ତସ୍ସ ଚ ଭିକ୍ଖୁନୋ ।
ସୂଚିନୀହରଣେ ତସ୍ସ, ପାଚିତ୍ତିୟମୁଦୀରିତଂ ॥
ସତକ୍ଖତ୍ତୁମ୍ପି ୱିଜ୍ଝିତ୍ୱା, ସକିଂ ନୀହରତୋ ପନ ।
ଏକଂ ପାଚିତ୍ତିୟଂ ୱୁତ୍ତଂ, ପୟୋଗସ୍ସ ୱସା ବହୂ ॥
‘‘ସିବ୍ବା’’ତି ପନ ଆଣତ୍ତୋ, ଅୱିସେସେନ ଭିକ୍ଖୁନା ।
ନିଟ୍ଠାପେତି ସଚେ ସବ୍ବଂ, ଏକଂ ପାଚିତ୍ତିୟଂ ସିୟା ॥
‘‘ୟମେତ୍ଥ ଚୀୱରେ କମ୍ମଂ, ଭାରୋ ସବ୍ବଂ ତୱା’’ତି ହି ।
ଆଣତ୍ତୋ ଭିକ୍ଖୁନା ସବ୍ବଂ, ନିଟ୍ଠାପେତି ସଚେ ପନ ॥
ଭିକ୍ଖୁସ୍ସାଣାପକସ୍ସେୱ, ଏକାୟାଣତ୍ତିୟା ପନ ।
ହୋନ୍ତି ପାଚିତ୍ତିୟାପତ୍ତି, ଅନେକାରାପଥେ ପଥେ ॥
ପୁନପ୍ପୁନାଣାପେନ୍ତସ୍ସ, ଅନେକାଣତ୍ତିୟଂ ପନ ।
କା ହି ନାମ କଥା ଅତ୍ଥି ? ତିକପାଚିତ୍ତିୟଂ ସିୟା ॥
ଞାତିକାୟ ଚ ଅଞ୍ଞାତି-ସଞ୍ଞିସ୍ସ ୱିମତିସ୍ସ ୱା ।
ଏକତୋଉପସମ୍ପନ୍ନ-ଚୀୱରେ ଦୁକ୍କଟଂ ସିୟା ॥
ଠପେତ୍ୱା ଚୀୱରଂ ଅଞ୍ଞଂ, ପରିକ୍ଖାରଞ୍ଚ ସିବ୍ବତୋ ।
ଅନାପତ୍ତି ୱିନିଦ୍ଦିଟ୍ଠା, ସିକ୍ଖମାନାଦିକାୟପି ॥
ସଞ୍ଚରିତ୍ତସମୁଟ୍ଠାନଂ, କ୍ରିୟଂ ପଣ୍ଣତ୍ତିୱଜ୍ଜକଂ ।
କାୟକମ୍ମଂ ୱଚୀକମ୍ମଂ, ତିଚିତ୍ତଞ୍ଚ ତିୱେଦନଂ ॥
ଚୀୱରସିବ୍ବନକଥା ।
ଭିକ୍ଖୁ ଭିକ୍ଖୁନିୟା ସଦ୍ଧିଂ, ସଂୱିଧାୟ ପନେକତୋ ।
ପଟିପଜ୍ଜେୟ୍ୟ ମଗ୍ଗଂ ଚେ, ଅଞ୍ଞତ୍ର ସମୟା ଇଧ ॥
ଗାମନ୍ତରୋକ୍କମେ ୱାପି, ଅଦ୍ଧୟୋଜନତିକ୍କମେ ।
ଅଗାମକେ ଅରଞ୍ଞେ ୱା, ହୋତି ଆପତ୍ତି ଭିକ୍ଖୁନୋ ॥
ଏତ୍ଥାକପ୍ପିୟଭୂମଟ୍ଠୋ, ସଂୱିଧାନଂ କରୋତି ୟୋ ।
ସଂୱିଧାନନିମିତ୍ତଂ ତୁ, ଦୁକ୍କଟଂ ତସ୍ସ ଦୀପିତଂ ॥
ସଂୱିଧାନଂ କରୋନ୍ତସ୍ସ, ଠତ୍ୱା କପ୍ପିୟଭୂମିୟଂ ।
ସଂୱିଧାନନିମିତ୍ତଂ ତୁ, ନ ୱଦନ୍ତସ୍ସ ଦୁକ୍କଟଂ ॥
ଉଭୟତ୍ଥାପି ପାଚିତ୍ତି, ଗଚ୍ଛନ୍ତସ୍ସେୱ ଭିକ୍ଖୁନୋ ।
ଅନନ୍ତରସ୍ସ ଗାମସ୍ସ, ଉପଚାରୋକ୍କମେ ସିୟା ॥
ତତ୍ରାପି ପଠମେ ପାଦେ, ଦୁକ୍କଟଂ ସମୁଦୀରିତଂ ।
ଦୁତିୟେ ପଦୱାରସ୍ମିଂ, ପାଚିତ୍ତିୟମୁଦୀରିତଂ ॥
ଅନ୍ତରା ସଂୱିଧାନେପି, ଭିକ୍ଖୁନୋ ଦୁକ୍କଟଂ ସିୟା ।
ଦ୍ୱାରମଗ୍ଗୱିସଙ୍କେତେ, ସତି ଚାପତ୍ତି ୱୁଚ୍ଚତି ॥
ଅସଂୱିଦହିତେ କାଲେ, ୱିଦହିତୋତି ସଞ୍ଞିନୋ ।
ଭିକ୍ଖୁସ୍ସେୱ ୱିଧାନସ୍ମିଂ, ହୋତି ଆପତ୍ତି ଦୁକ୍କଟଂ ॥
ସମୟେ ୱିଦହିତ୍ୱା ୱା, ୱିସଙ୍କେତେନ ଗଚ୍ଛତୋ ।
ଆପଦାସୁ ଅନାପତ୍ତି, ତଥା ଉମ୍ମତ୍ତକାଦିନୋ ॥
ଇଦଂ ଚତୁସମୁଟ୍ଠାନଂ, କାୟତୋ କାୟୱାଚତୋ ।
କାୟଚିତ୍ତା ସମୁଟ୍ଠାତି, କାୟୱାଚାଦିକତ୍ତୟା ॥
ସଂୱିଧାନକଥା ।
ଏକମୁଜ୍ଜୱନିଂ ନାୱଂ, ତଥା ଓଜୱନିମ୍ପି ୱା ।
ଅଭିରୂହେୟ୍ୟ ପାଚିତ୍ତି, ସଦ୍ଧିଂ ଭିକ୍ଖୁନିୟା ସଚେ ॥
ସଗାମତୀରପସ୍ସେନ, ଗାମନ୍ତରୱସେନ ୱା ।
ଅଗାମତୀରପସ୍ସେନ, ଗମନେ ଅଦ୍ଧୟୋଜନେ ॥
ତଥା ୟୋଜନୱିତ୍ଥିଣ୍ଣ-ନଦୀମଜ୍ଝେନ ଗଚ୍ଛତୋ ।
ଅଦ୍ଧୟୋଜନସଙ୍ଖାୟ, ହୋନ୍ତି ପାଚିତ୍ତିୟୋ ପନ ॥
ୟଥାସୁଖଂ ସମୁଦ୍ଦସ୍ମିଂ, ସବ୍ବଅଟ୍ଠକଥାସୁ ହି ।
ନଦିୟଂୟେୱ ଆପତ୍ତି, ନ ସମୁଦ୍ଦେ ୱିଚାରିତା ॥
ତିତ୍ଥସମ୍ପାଦନତ୍ଥାୟ, ଉଦ୍ଧଂ ୱା ନଦିୟା ଅଧୋ ।
ସଚେ ହରନ୍ତି ତଂୟୁତ୍ତା, ଅନାପତ୍ତି ପକାସିତା ॥
ତଥା ସଂୱିଦହିତ୍ୱା ୱା, ତିରିୟଂ ତରଣାୟ ୱା ।
ଆପଦାସୁ ୱିସେସୋ ହି, ଅନନ୍ତରସମୋ ମତୋ ॥
ନାୱାଭିରୁହନକଥା ।
ଞତ୍ୱା ଭିକ୍ଖୁନିୟା ଭତ୍ତଂ, ଭୁଞ୍ଜତୋ ପରିପାଚିତଂ ।
ହିତ୍ୱା ଗିହିସମାରମ୍ଭଂ, ହୋତି ପାଚିତ୍ତି ଭିକ୍ଖୁନୋ ॥
ଭୋଜନଂ ପଞ୍ଚଧା ୱୁତ୍ତଂ, ଗହଣେ ତସ୍ସ ଦୁକ୍କଟଂ ।
ଅଜ୍ଝୋହାରେସୁ ସବ୍ବେସୁ, ତସ୍ସ ପାଚିତ୍ତିୟୋ ସିୟୁଂ ॥
ସନ୍ତକଂ ଞାତକାଦୀନଂ, ଗିହିସମ୍ପାଦିତମ୍ପି ୱା ।
ୱିନା ଭିକ୍ଖୁନିୟା ଦୋସୋ, ଭୁଞ୍ଜତୋ ପରିପାଚିତଂ ॥
ପରିପାଚିତସଞ୍ଞିସ୍ସ, ଭିକ୍ଖୁସ୍ସାପରିପାଚିତେ ।
ଉଭୋସୁ ୱିମତିସ୍ସାପି, ହୋତି ସବ୍ବତ୍ଥ ଦୁକ୍କଟଂ ॥
ଏକତୋଉପସମ୍ପନ୍ନ-ପରିପାଚିତଭୋଜନଂ ।
ଅଜ୍ଝୋହାରୱସେନେୱ, ଦୁକ୍କଟଂ ପରିଭୁଞ୍ଜତୋ ॥
ଅଞ୍ଞଂ ୱା ପନ ୟଂ କିଞ୍ଚି, ଠପେତ୍ୱା ପଞ୍ଚଭୋଜନଂ ।
ଭୁଞ୍ଜନ୍ତସ୍ସ ଅନାପତ୍ତି, ୟାଗୁଖଜ୍ଜଫଲାଦିକଂ ॥
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ।
ଇଦଂ ପଣ୍ଣତ୍ତିୱଜ୍ଜଂ ତୁ, ତିଚିତ୍ତଞ୍ଚ ତିୱେଦନଂ ॥
ପରିପାଚିତକଥା ।
ଦୁତିୟାନିୟତେନେୱ, ଦସମଂ ସଦିସଂ ମତଂ ।
ଇଦଂ ସିକ୍ଖାପଦଂ ସବ୍ବଂ, ସମୁଟ୍ଠାନନୟାଦିନା ॥
ରହୋନିସଜ୍ଜକଥା ।
ଭିକ୍ଖୁନିୱଗ୍ଗୋ ତତିୟୋ ।
ଏକୋ ଆୱସଥୋ ପିଣ୍ଡୋ, ଅଗିଲାନେନ ଭିକ୍ଖୁନା ।
ଭୁଞ୍ଜିତବ୍ବୋ ତତୋ ଉଦ୍ଧଂ, ପାଚିତ୍ତି ପରିଭୁଞ୍ଜତୋ ॥
ଅନୋଦିସ୍ସେୱ ପଞ୍ଞତ୍ତେ, ୟାୱଦତ୍ଥେୱ ଭିକ୍ଖୁନା ।
ଭୁଞ୍ଜିତବ୍ବଂ ସକିଂ ତତ୍ଥ, ତତୋ ଉଦ୍ଧଂ ନ ୱଟ୍ଟତି ॥
ଦୁତିୟେ ଦିୱସେ ତତ୍ଥ, ଗହଣେ ଦୁକ୍କଟଂ ମତଂ ।
ଅଜ୍ଝୋହାରେସୁ ସବ୍ବେସୁ, ତସ୍ସ ପାଚିତ୍ତିୟୋ ମତା ॥
କୁଲେନେକେନ ପଞ୍ଞତ୍ତେ, ସହ ନାନାକୁଲେହି ୱା ।
ନାନେକଟ୍ଠାନଭେଦେସୁ, ଏକଭାଗୋୱ ୱଟ୍ଟତି ॥
ନାନାଟ୍ଠାନେସୁ ପଞ୍ଞତ୍ତୋ, ୟୋ ଚ, ନାନାକୁଲେହି ୱା ।
ଭୁଞ୍ଜତୋ ପନ ସବ୍ବତ୍ଥ, ନ ଦୋସୋ ପଟିପାଟିୟା ॥
ପଟିପାଟିମସେସେନ, ଖେପେତ୍ୱା ପୁନ ଭୁଞ୍ଜତୋ ।
ଆଦିତୋ ପନ ପଟ୍ଠାୟ, ନ ଚ କପ୍ପତି ଭିକ୍ଖୁନୋ ॥
ଅନାପତ୍ତି ଗିଲାନସ୍ସ, ଆଗଚ୍ଛନ୍ତସ୍ସ ଗଚ୍ଛତୋ ।
ଓଦିସ୍ସପି ଚ ପଞ୍ଞତ୍ତେ, ପରିତ୍ତେ ଭୁଞ୍ଜତୋ ସକିଂ ॥
ୟାଗୁଆଦୀନି ନିଚ୍ଚମ୍ପି, ଭୁଞ୍ଜିତୁଂ ପନ ୱଟ୍ଟତି ।
ସେସମେଳକଲୋମେନ, ସମୁଟ୍ଠାନାଦିକଂ ସମଂ ॥
ଆୱସଥକଥା ।
ଅଞ୍ଞତ୍ର ସମୟା ୱୁତ୍ତା, ପାଚିତ୍ତି ଗଣଭୋଜନେ ।
ଗଣୋତି ପନ ନିଦ୍ଦିଟ୍ଠା, ଚତ୍ତାରୋ ୱା ତତୁତ୍ତରିଂ ॥
ୟଂ ନିମନ୍ତନତୋ ୱାପି, ଲଦ୍ଧଂ ୱିଞ୍ଞତ୍ତିତୋପି ୱା ।
ଭୋଜନଂ ପନ ପଞ୍ଚନ୍ନଂ, ହୋତି ଅଞ୍ଞତରଂ ଇଧ ॥
ଭୋଜନାନମ୍ପି ପଞ୍ଚନ୍ନଂ, ଗହେତ୍ୱା ନାମମେୱ ତୁ ।
ନିମନ୍ତେତି ସଚେ ଭିକ୍ଖୂ, ଚତ୍ତାରୋ ବହୁକେପି ୱା ॥
‘‘ଓଦନଂ ଭୋଜନଂ ଭତ୍ତଂ, ସମ୍ପଟିଚ୍ଛଥ ଗଣ୍ହଥ’’ ।
ଇତି ୱେୱଚନେହେୱ, ଅଥ ଭାସନ୍ତରେନ ୱା ॥
ତତୋ ତସ୍ସ ଚ ତେ ଭିକ୍ଖୂ, ସାଦିୟିତ୍ୱା ନିମନ୍ତନଂ ।
ଏକତୋ ନାନତୋ ୱା ଚେ, ଗନ୍ତ୍ୱା ଗଣ୍ହନ୍ତି ଏକତୋ ॥
ସବ୍ବେସଂ ହୋତି ପାଚିତ୍ତି, ଗଣଭୋଜନକାରଣା ।
ଏକତୋ ଗହଣଂ ଏତ୍ଥ, ଗଣଭୋଜନକାରଣଂ ॥
ଏକତୋ ନାନତୋ ୱାପି, ଗମନଂ ଭୋଜନମ୍ପି ୱା ।
କାରଣନ୍ତି ନ ତଂ ୱିଞ୍ଞୂ, ଭଣନ୍ତି ଗଣଭୋଜନେ ॥
ସଚେପି ଓଦନାଦୀନଂ, ଗହେତ୍ୱା ନାମମେୱ ୱା ।
ଏକତୋ ନାନତୋ ୱାପି, ୱିଞ୍ଞାପେତ୍ୱା ମନୁସ୍ସକେ ॥
ନାନତୋ ୱେକତୋ ଗନ୍ତ୍ୱା, ସଚେ ଗଣ୍ହନ୍ତି ଏକତୋ ।
ଏୱମ୍ପି ପନ ହୋତୀତି, ୱଣ୍ଣିତଂ ଗଣଭୋଜନଂ ॥
ଦୁୱିଧସ୍ସାପି ଏତସ୍ସ, ପଟିଗ୍ଗହଣକାରଣା ।
ଦୁକ୍କଟଂ ହୋତି ପାଚିତ୍ତି, ଅଜ୍ଝୋହାରେସୁ ଦୀପିତା ॥
ସମୟେସୁ ଅନାପତ୍ତି, ସତ୍ତସ୍ୱପି ପକାସିତା ।
ଗହେତ୍ୱା ଏକତୋ ଦ୍ୱିନ୍ନଂ, ତିଣ୍ଣଂ ୱା ଭୁଞ୍ଜତଂ ତଥା ॥
ମୁନିନାନୁପସମ୍ପନ୍ନ-ଚାରିପତ୍ତାନିମନ୍ତିତା।
ଚତୁତ୍ଥେ ଏକତୋ କତ୍ୱାପି, ଗଣଭେଦୋ ପକାସିତୋ ॥
ନେୱ ସମୟଲଦ୍ଧାନଂ, ୱସେନପି ହି ସବ୍ବସୋ ।
ଗଣଭେଦୋ ପନାପତ୍ତି, ୱେଦିତବ୍ବା ୱିଭାୱିନା ॥
ଭୋଜନାନଞ୍ଚ ପଞ୍ଚନ୍ନଂ, ୱସେନ ଗଣଭୋଜନେ ।
ନତ୍ଥେୱ ଚ ୱିସଙ୍କେତଂ, ୟାଗୁଆଦୀସୁ ତଂ ସିୟା ॥
ଗଣଭୋଜନସଞ୍ଞିସ୍ସ, ଭିକ୍ଖୁସ୍ସାଗଣଭୋଜନେ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଭୋଜନାନି ଚ ପଞ୍ଚେୱ, ଠପେତ୍ୱା ୟାଗୁଆଦିସୁ ।
ଅନାପତ୍ତୀତି ଞାତବ୍ବା, ନିଚ୍ଚଭତ୍ତାଦିକେସୁପି ॥
ତଥା ଉମ୍ମତ୍ତକାଦୀନଂ, ସମୁଟ୍ଠାନାଦିନା ପନ ।
ଇଦଂ ଏଳକଲୋମେନ, ସଦିସନ୍ତି ପକାସିତଂ ॥
ଗଣଭୋଜନକଥା ।
ବହୂହି ୟୋ ଭିକ୍ଖୁ ମନୁସ୍ସକେହି ।
ନିମନ୍ତିତୋ ପଞ୍ଚହି ଭୋଜନେହି ।
ହିତ୍ୱା ସଚେ ପୁବ୍ବନିମନ୍ତନାୟ ।
ୱିକପ୍ପନଂ ପଞ୍ଚସୁ ୟସ୍ସ କସ୍ସ ॥
ପଚ୍ଛା ନିମନ୍ତିତଂ ଭତ୍ତଂ, ତଥା ଉପ୍ପଟିପାଟିୟା ।
ଭୁଞ୍ଜତୋ ଏକସିତ୍ଥମ୍ପି, ତସ୍ସ ପାଚିତ୍ତିୟଂ ସିୟା ॥
ଭୋଜନାନଂ ତୁ ପଞ୍ଚନ୍ନଂ, ୟେନ କେନ ନିମନ୍ତିତୋ ।
ତଂ ଠପେତ୍ୱା ସଚେ ଅଞ୍ଞଂ, ଭୋଜନଂ ପରିଭୁଞ୍ଜତି ॥
ତେସମେୱ ଚ ପଞ୍ଚନ୍ନଂ, ଭୋଜନାନଂ ମହେସିନା ।
ଏତଂ ପରମ୍ପରଂ ନାମ, ଭୋଜନଂ ପରିଦୀପିତଂ ॥
ୟତ୍ଥ ଖୀରଂ ରସଂ ୱାପି, ଆକିରନ୍ତି ସଚେ ପନ ।
ୟେନ ଅଜ୍ଝୋତ୍ଥଟଂ ଭତ୍ତଂ, ସବ୍ବମେକରସଂ ସିୟା ॥
କୋଟିତୋ ପନ ପଟ୍ଠାୟ, ସଂସଟ୍ଠଂ ପରିଭୁଞ୍ଜତୋ ।
ଅନାପତ୍ତୀତି ନିଦ୍ଦିଟ୍ଠଂ, ମହାପଚ୍ଚରିୟଂ ପନ ॥
ପରମ୍ପରନ୍ତି ସଞ୍ଞାୟ, ଅପରମ୍ପରଭୋଜନେ ।
ତତ୍ଥ ୱେମତିକସ୍ସାପି, ଦୁକ୍କଟଂ ପରିଭୁଞ୍ଜତୋ ॥
ସକଲେନପି ଗାମେନ, ପୂଗେନ ନିଗମେନ ୱା ।
ନିମନ୍ତିତସ୍ସ ୱା ନିଚ୍ଚ-ଭତ୍ତେ ଦୋସୋ ନ ୱିଜ୍ଜତି ॥
ସମୁଟ୍ଠାନାଦୟୋ ସବ୍ବେ, କଥିନେନାଦିନା ସମା ।
କ୍ରିୟାକ୍ରିୟମିଦଂ ୱୁତ୍ତଂ, ଭୋଜନଞ୍ଚାୱିକପ୍ପନଂ ॥
ପରମ୍ପରଭୋଜନକଥା ।
ପୂୱା ପହେଣକତ୍ଥାୟ, ପଟିୟତ୍ତା ସଚେ ପନ ।
ପାଥେୟ୍ୟତ୍ଥାୟ ମନ୍ଥା ୱା, ୟେ ହି ତତ୍ଥ ଚ ଭିକ୍ଖୁନା ॥
ଦ୍ୱତ୍ତିପତ୍ତା ଗହେତବ୍ବା, ପୂରା ପୂୱେହି ସତ୍ତୁହି ।
ତତୋ ଚେ ଉତ୍ତରିଂ ତସ୍ସ, ହୋତି ପାଚିତ୍ତି ଗଣ୍ହତୋ ॥
ଗହେତ୍ୱା ନିକ୍ଖମନ୍ତେନ, ‘‘ଦ୍ୱତ୍ତିପତ୍ତା ମୟା ଇଧ ।
ଗହିତା ପନ ପୂୱା’’ତି, ଭିକ୍ଖୁଂ ଦିସ୍ୱା ୱଦେ ବୁଧୋ ॥
‘‘ମା ଖୋ ତ୍ୱଂ ପଟିଗଣ୍ହା’’ତି, ଅୱଦନ୍ତସ୍ସ ଦୁକ୍କଟଂ ।
ଗଣ୍ହତୋପି ଚ ତଂ ସୁତ୍ୱା, ହୋତି ଆପତ୍ତି ଦୁକ୍କଟଂ ॥
ଊନକଦ୍ୱତ୍ତିପତ୍ତେସୁ, ଅତିରେକୋତି ସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ୟେନ ତତ୍ଥ ତୟୋ ଲଦ୍ଧା, ପତ୍ତପୂରା ତତୋ ପନ ।
ଦ୍ୱେ ସଙ୍ଘସ୍ସ ପଦାତବ୍ବା, ଦ୍ୱେ ଚେ ଏକୋ, ନ ଏକତୋ ॥
ଅପହେଣକପାଥେୟ୍ୟଂ, ଅୱସେସମ୍ପି ୱା ତତୋ ।
ସନ୍ତକଂ ଞାତକାଦୀନଂ, ଦେନ୍ତାନମ୍ପି ତଦୂନକଂ ॥
ଗଣ୍ହତୋପି ଅନାପତ୍ତି, ତଥା ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
କାଣମାତୁକଥା ।
ଅଞ୍ଞେନ ପନ ପଞ୍ଚନ୍ନଂ, ଭୋଜନାନଂ ପୱାରିତୋ ।
ପାଚିତ୍ତିନତିରିତ୍ତଂ ଚେ, ପୁନ ଭୁଞ୍ଜତି ଭୋଜନଂ ॥
ଅସନଂ ଭୋଜନଞ୍ଚେୱ, ହତ୍ଥପାସାଭିହାରତା ।
କାୟୱାଚାପଟିକ୍ଖେପୋ, ପଞ୍ଚଙ୍ଗେହି ପୱାରଣା ॥
ଓଦନୋ ସତ୍ତୁ କୁମ୍ମାସୋ, ମଚ୍ଛୋ ମଂସନ୍ତି ସବ୍ବସୋ ।
ନିପ୍ପପଞ୍ଚେନ ନିଦ୍ଦିଟ୍ଠଂ, ଭୋଜନଂ ପଞ୍ଚଧା ମତଂ ॥
ଓଦନୋ ତତ୍ଥ ସତ୍ତନ୍ନଂ, ଧଞ୍ଞାନଂ ଓଦନୋ ମତୋ ।
ଭଜ୍ଜିତାନଂ ତୁ ଧଞ୍ଞାନଂ, ଚୁଣ୍ଣଂ ‘‘ସତ୍ତୂ’’ତି ୱୁଚ୍ଚତି ॥
କୁମ୍ମାସୋ ୟୱକୁମ୍ମାସୋ, ମଚ୍ଛୋ ୱୁଚ୍ଚତି ଓଦକୋ ।
ମଂସମ୍ପି କପ୍ପିୟମଂସଂ, ଅୟମେତ୍ଥ ୱିନିଚ୍ଛୟୋ ॥
ସାଲି ୱୀହି ୟୱୋ କଙ୍ଗୁ, ୱରକୋ ଗୋଧୁମୋ ତଥା ।
କୁଦ୍ରୂସକୋତି ସତ୍ତେତେ, ଧଞ୍ଞା ଧଞ୍ଞେନ ଦେସିତା ॥
ସାମାକାଦିତିଣଂ ସବ୍ବଂ, କୁଦ୍ରୂସେନେୱ ଦୀପିତଂ ।
ନୀୱାରୋ ସାଲିୟଂ ୱୁତ୍ତୋ, ୱରକେ ୱରକଚୋରକୋ ॥
ସତ୍ତନ୍ନଂ ପନ ଧଞ୍ଞାନଂ, ଓଦନୋ ୟାଗୁ ୱା ପନ ।
ଅଙ୍ଗସମ୍ପତ୍ତିୟା ୟୁତ୍ତା, ସଞ୍ଜନେତି ପୱାରଣଂ ॥
ହତ୍ଥେନ ଗହିତୋକାସେ, ଓଧିଂ ଦସ୍ସେତି ୟା ପନ ।
ୟାଗୁସା ଇଧ ସବ୍ବାପି, ଓଦନୋତି ପୱୁଚ୍ଚତି ॥
ଅବ୍ଭୁଣ୍ହା ପନ ୟା ୟାଗୁ, ଉଦ୍ଧନୋରୋପିତା ତନୁ ।
ସଚେ ଓଧିଂ ନ ଦସ୍ସେତି, ନ ଜନେତି ପୱାରଣଂ ॥
ପୁନ ସା ସୀତଲୀଭୂତା, ଘନଭାୱଂ ଗତା ସଚେ ।
ଓଧିଂ ଦସ୍ସେତି ସୋ ପୁବ୍ବେ, ତନୁଭାୱୋ ନ ରକ୍ଖତି ॥
ତକ୍କଧଞ୍ଞରସାଦୀନି, ଆରୋପେତ୍ୱା ବହୂନିପି ।
ଫଲପଣ୍ଣକଳୀରାନି, ପକ୍ଖିପିତ୍ୱାନ ତତ୍ଥ ଚ ॥
ତଣ୍ଡୁଲେ ମୁଟ୍ଠିମତ୍ତେପି, ପକ୍ଖିପିତ୍ୱା ପଚନ୍ତି ଚେ ।
ଓଧିଂ ପନ ଚ ଦସ୍ସେତି, ସଞ୍ଜନେତି ପୱାରଣଂ ॥
ରସେ ଧଞ୍ଞରସେ ଖୀରେ, ୱାକିରିତ୍ୱାନ ଓଦନଂ ।
‘‘ୟାଗୁଂ ଗଣ୍ହଥ, ୟାଗୁ’’ନ୍ତି, ୱତ୍ୱା ଦେନ୍ତି ସଚେ ପନ ॥
କିଞ୍ଚାପି ତନୁକା ହୋତି, ସଞ୍ଜନେତି ପୱାରଣଂ ।
ତଂ ପଚିତ୍ୱା ସଚେ ଦେନ୍ତି, ୟାଗୁସଙ୍ଗହିତା ପନ ॥
ଛୁପନ୍ତି ମଚ୍ଛମଂସଂ ୱା, ତନୁକାୟପି ୟାଗୁୟା ।
ସଚେ ସାସପମତ୍ତମ୍ପି, ପଞ୍ଞାୟତି ପୱାରଣଂ ॥
ମଚ୍ଛମଂସରସୋ ସୁଦ୍ଧୋ, ସଂସତ୍ତୋ ରସୟାଗୁ ୱା ।
ନ ଚାକପ୍ପିୟମଂସଂ ୱା, ସଞ୍ଜନେତି ପୱାରଣଂ ॥
ଠପେତ୍ୱା ୱୁତ୍ତଧଞ୍ଞାନଂ, ଓଦନଂ ପନ ସବ୍ବସୋ ।
ୱେଳୁତଣ୍ଡୁଲକାଦୀନଂ, ନ ପୱାରେତି ଓଦନୋ ॥
ପୁଥୁକା ୱା ତତୋ ତାହି, କତଭତ୍ତମ୍ପି ସତ୍ତୁପି ।
ସୁଦ୍ଧା ନ ପନ ପୂୱା ୱା, ପୱାରେନ୍ତି କଦାଚିପି ॥
ଖରପାକେନ ଭଟ୍ଠାନଂ, ୱୀହୀନଂ ତଣ୍ଡୁଲେ ପନ ।
କୋଟ୍ଟେତ୍ୱା ଦେନ୍ତି ତଂ ଚୁଣ୍ଣଂ, ସତ୍ତୁସଙ୍ଗହିତଂ ମତଂ ॥
ଭଜ୍ଜିତାନଂ ତୁ ୱୀହୀନଂ, ନ ପୱାରେନ୍ତି ତଣ୍ଡୁଲା ।
ତେସଂ ପନ ଚ ୟଂ ଚୁଣ୍ଣଂ, ତଂ ଜନେତି ପୱାରଣଂ ॥
ଖରପାକେନ ଭଟ୍ଠାନଂ, ୱୀହୀନଂ କୁଣ୍ଡକମ୍ପି ଚ ।
ସତ୍ତୁନଂ ମୋଦକୋ ୱାପି, ସଞ୍ଜନେତି ପୱାରଣଂ ॥
ସମପାକେନ ଭଟ୍ଠାନଂ, ସୁକ୍ଖାନଂ ଆତପେନ ଚ ।
କୁଣ୍ଡକଂ ପନ ୱୀହୀନଂ, ନ ଜନେତି ପୱାରଣଂ ॥
ଲାଜା ୱା ପନ ତେହେୱ, କତଭତ୍ତମ୍ପି ସତ୍ତୁ ୱା ।
ଖଜ୍ଜକଂ ପନ ସୁଦ୍ଧଂ ୱା, ନ ଜନେତି ପୱାରଣଂ ॥
ପୂରିତଂ ମଚ୍ଛମଂସେହି, ତଂ ଜନେତି ପୱାରଣଂ ।
ୟଂ କିଞ୍ଚି ଭଜ୍ଜିତଂ ପିଟ୍ଠଂ, ନ ପୱାରେତି ସୁଦ୍ଧକଂ ॥
ୟୱେହି କତକୁମ୍ମାସୋ, ପୱାରେତି, ନ ଚାପରୋ ।
ମଚ୍ଛମଂସେସୁ ୱତ୍ତବ୍ବଂ, ପାକଟତ୍ତା ନ ୱିଜ୍ଜତି ॥
ଖାଦନ୍ତୋ କପ୍ପିୟଂ ମଂସଂ, ନିସେଧେତି ଅକପ୍ପିୟଂ ।
ନ ସୋ ତେନ ପୱାରେତି, ଅୱତ୍ଥୁତ୍ତାତି ଦୀପିତଂ ॥
ତଥେୱାକପ୍ପିୟଂ ମଂସଂ, ଖାଦନ୍ତୋ କପ୍ପିୟଂ ସଚେ ।
ନିସେଧେତି ପୱାରେତି, ୱତ୍ଥୁକତ୍ତାତି ୱଣ୍ଣିତଂ ॥
ମଂସଂ ପନ ଚ ଖାଦନ୍ତୋ, କପ୍ପିୟଂ ୱା ଅକପ୍ପିୟଂ ।
ପୱାରେତି ନିସେଧେତି, କିଞ୍ଚି କପ୍ପିୟଭୋଜନଂ ॥
ସଚେ ଅକପ୍ପିୟଂ ମଂସଂ, ଖାଦନ୍ତୋୱ ଅକପ୍ପିୟଂ ।
ନିସେଧଂ ନ ପୱାରେତି, ତଥା ଅଞ୍ଞଂ ଅକପ୍ପିୟଂ ॥
ସଚେ ଅଜ୍ଝୋହଟଂ ହୋତି, ସିତ୍ଥମେକମ୍ପି ଭିକ୍ଖୁନା ।
ପତ୍ତେ ହତ୍ଥେ ମୁଖେ ୱାପି, ଭୋଜନଂ ପନ ୱିଜ୍ଜତି ॥
ପୱାରଣପହୋନଂ ଚେ, ପଟିକ୍ଖିପତି ଭୋଜନଂ ।
ପୱାରେତି ସଚେ ନତ୍ଥି, ନ ପୱାରେତି କତ୍ଥଚି ॥
ଗିଲିତ୍ୱା ଚ ମୁଖେ ଭତ୍ତଂ, ସେସମାଦାୟ ଗଚ୍ଛତି ।
ଅନ୍ତରା ଚ ନିସେଧେନ୍ତୋ, ନ ପୱାରେତି ଭୋଜନଂ ॥
ଭତ୍ତଂ ତୁ ଅଞ୍ଞସ୍ସ ଚ ଦାତୁକାମୋ ।
ପତ୍ତେ ଚ ଭତ୍ତଂ ପୁନ ଦାତୁକାମୋ ।
ପଟିକ୍ଖିପନ୍ତୋ ନ ପୱାରିତୋ ସୋ ॥
ଅସନସ୍ସ ଉପଚ୍ଛେଦା, ନ ପୱାରେତି ସୋତି ହି ।
କଥୟନ୍ତି ମହାପଞ୍ଞା, କାରଣାକାରଣଞ୍ଞୁନୋ ॥
ଗଣ୍ହତୋ ପଚ୍ଛିମଂ ଅଙ୍ଗଂ, ଦଦତୋ ପୁରିମଂ ପନ ।
ଉଭିନ୍ନଂ ଅଡ୍ଢତେୟ୍ୟଂ ଚେ, ୱିନା ହତ୍ଥଂ ପସାରିତଂ ॥
ତସ୍ମିଂ ଅଭିହଟଂ ଠାନେ, ପୱାରଣପହୋନକଂ ।
ତାଦିସଂ ଭୁଞ୍ଜମାନୋୱ, ନିସେଧେତି ପୱାରିତୋ ॥
ହତ୍ଥେ ଆଧାରକେ ୱାପି, ପତ୍ତଂ ଊରୂସୁ ୱା ଠିତଂ ।
ଆହରିତ୍ୱା ସଚେ ଭିକ୍ଖୁ, ‘‘ଭତ୍ତଂ ଗଣ୍ହା’’ତି ଭାସତି ॥
ଅନନ୍ତରେ ନିସିନ୍ନୋୱ, ତଂ ପଟିକ୍ଖିପତୋ ପନ ।
ଅଭିହାରସ୍ସ ଚାଭାୱା, ନତ୍ଥି ତସ୍ସ ପୱାରଣା ॥
ଭତ୍ତପଚ୍ଛିଂ ପଣାମେତ୍ୱା, ଠପେତ୍ୱା ପୁରତୋ ‘‘ଇଦଂ ।
ଗଣ୍ହାହୀ’’ତି ଚ ୱୁତ୍ତେପି, ଅୟମେୱ ୱିନିଚ୍ଛୟୋ ॥
ଅନନ୍ତରସ୍ସ ଭିକ୍ଖୁସ୍ସ, ଦୀୟମାନେ ପନେତରୋ ।
ପିଦହନ୍ତୋ ସକଂ ପତ୍ତଂ, ହତ୍ଥେହି ନ ପୱାରିତୋ ॥
କାୟେନାଭିହଟଂ ଭତ୍ତଂ, ପଟିକ୍ଖିପତି ୟୋ ପନ ।
କାୟେନ ୱାପି ୱାଚାୟ, ହୋତି କସ୍ସ ପୱାରଣା ॥
ଏକୋ ଅଭିହଟେ ଭତ୍ତେ, ପୱାରଣଭୟା ପନ ।
‘‘ଆକିରାକିର କୋଟ୍ଟେତ୍ୱା, କୋଟ୍ଟେତ୍ୱା ପୂରୟା’’ତି ଚ ॥
ସଚେ ୱଦତି ତସ୍ସାପି, ନ ପନତ୍ଥି ପୱାରଣା ।
ଇଚ୍ଚେୱାହ ମହାଥେରୋ, ମହାପଦୁମନାମକୋ ॥
ସମଂସଞ୍ହି ରସଂ ନେତ୍ୱା, ଗଣ୍ହଥାତି ରସଂ ୱଦେ ।
ତଂ ସୁତ୍ୱା ଚ ନିସେଧେନ୍ତୋ, ନେୱ ହୋତି ପୱାରିତୋ ॥
‘‘ଗଣ୍ହ ମଚ୍ଛରସଂ ସାରଂ, ଗଣ୍ହ ମଂସରସ’’ନ୍ତି ୱା ।
‘‘ଇଦଂ ଗଣ୍ହା’’ତି ୱା ୱୁତ୍ତେ, ପଟିକ୍ଖେପେ ପୱାରଣା ॥
ସଚେ ମଂସଂ ୱିସୁଂ କତ୍ୱା, ‘‘ଗଣ୍ହ ମଂସରସ’’ନ୍ତି ୱା ।
ୱଦେୟ୍ୟତ୍ଥି ଚ ମଂସଂ ଚେ, ପଟିକ୍ଖେପେ ପୱାରଣା ॥
ଓଦନେନ ଚ ପୁଚ୍ଛନ୍ତଂ, ‘‘ମୁହୁତ୍ତଂ ଆଗମେହି’’ତି ।
ଗହଣତ୍ଥଂ ଠପେନ୍ତସ୍ସ, ନେୱ ତସ୍ସ ପୱାରଣା ॥
କଳୀରପନସାଦୀହି, ମିସ୍ସକଂ ମଚ୍ଛମଂସକଂ ।
‘‘କଳୀରସୂପକଂ ଗଣ୍ହ, ପନସବ୍ୟଞ୍ଜନ’’ନ୍ତି ୱା ॥
ୱଦନ୍ତି ଚେ ପଟିକ୍ଖେପେ, ନେୱ ହୋତି ପୱାରଣା ।
ଅପୱାରଣହେତୂନଂ, ନାମେନ ପନ ୱୁତ୍ତତୋ ॥
‘‘ମଚ୍ଛସୂପ’’ନ୍ତି ୱା ୱୁତ୍ତେ, ‘‘ମଂସସୂପ’’ନ୍ତି ୱା ପନ ।
‘‘ଇଦଂ ଗଣ୍ହା’’ତି ୱା ୱୁତ୍ତେ, ହୋତିୟେୱ ପୱାରଣା ॥
ଏସେୱ ଚ ନୟୋ ୱୁତ୍ତୋ, ଞେୟ୍ୟୋ ମଂସକରମ୍ବକେ ।
ସବ୍ବେସୁ ମଚ୍ଛମଂସେହି, ମିସ୍ସକେସୁ ଅୟଂ ନୟୋ ॥
ଭତ୍ତସମ୍ମିସ୍ସିତଂ ୟାଗୁଂ, ଆହରିତ୍ୱା ସଚେ ପନ ।
‘‘ୟାଗୁଂ ଗଣ୍ହା’’ତି ୱୁତ୍ତସ୍ମିଂ, ନ ପୱାରେତି ୱାରୟଂ ॥
‘‘ଭତ୍ତଂ ଗଣ୍ହା’’ତି ୱୁତ୍ତେ ତୁ, ପୱାରେତି ପଟିକ୍ଖିପଂ ।
ୟେନ ୱାପୁଚ୍ଛିତୋ ତସ୍ସ, ଅତ୍ଥିତାୟାତି କାରଣଂ ॥
‘‘ୟାଗୁମିସ୍ସକଂ ଗଣ୍ହା’’ତି, ୱୁତ୍ତେ ତତ୍ଥ ଚ ୟାଗୁ ଚେ ।
ସମା ବହୁତରା ୱା ସା, ନ ପୱାରେତି ସୋ କିର ॥
ମନ୍ଦା ୟାଗୁ, ବହୁଂ ଭତ୍ତଂ, ସଚେ ହୋତି ପୱାରଣା ।
ଇଦଂ ସବ୍ବତ୍ଥ ନିଦ୍ଦିଟ୍ଠଂ, କାରଣଂ ପନ ଦୁଦ୍ଦସଂ ॥
ରସଂ ବହୁରସେ ଭତ୍ତେ, ଖୀରଂ ୱା ବହୁଖୀରକେ ।
ଗଣ୍ହଥାତି ୱିସୁଂ କତ୍ୱା, ଦେତି ନତ୍ଥି ପୱାରଣା ॥
ଗଚ୍ଛନ୍ତେନେୱ ଭୋତ୍ତବ୍ବଂ, ଗଚ୍ଛନ୍ତୋ ଚେ ପୱାରିତୋ ।
ଭୁଞ୍ଜିତବ୍ବଂ ଠିତେନେୱ, ଠତ୍ୱା ୟଦି ପୱାରିତୋ ॥
ଉଦକଂ ୱାପି ପତ୍ୱା ସୋ, ସଚେ ତିଟ୍ଠତି କଦ୍ଦମଂ ।
ଅତିରିତ୍ତଂ ତୁ କାରେତ୍ୱା, ଭୁଞ୍ଜିତବ୍ବଂ ତତୋ ପୁନ ॥
ପୀଠକେ ୟୋ ନିସୀଦିତ୍ୱା, ପୱାରେତି ସଚେ ପନ ।
ଆସନଂ ଅୱିଚାଲେତ୍ୱା, ଭୁଞ୍ଜିତବ୍ବଂ ୟଥାସୁଖଂ ॥
ସଚେ ମଞ୍ଚେ ନିସୀଦିତ୍ୱା, ପୱାରେତି ତତୋ ପନ ।
ଇତୋ ସଂସରିତୁଂ ଏତ୍ତୋ, ଈସକମ୍ପି ନ ଲବ୍ଭତି ॥
ତେନ ମଞ୍ଚେନ ନଂ ସଦ୍ଧିଂ, ୱଟ୍ଟତଞ୍ଞତ୍ର ନେନ୍ତି ଚେ ।
ଏୱଂ ସବ୍ବତ୍ଥ ଞାତବ୍ବଂ, ୱିଞ୍ଞୁନା ୱିନୟଞ୍ଞୁନା ॥
ନିପଜ୍ଜିତ୍ୱାୱ ଭୋତ୍ତବ୍ବଂ, ନିପନ୍ନୋ ଚେ ପୱାରିତୋ ।
ୱାରେତୁକ୍କୁଟିକୋ ହୁତ୍ୱା, ଭୁଞ୍ଜିତବ୍ବଂ ତଥେୱ ଚ ॥
ଅଥାଲମେତଂ ସବ୍ବନ୍ତି, ୱତ୍ତବ୍ବଂ ତେନ ଭିକ୍ଖୁନା ।
ଅତିରିତ୍ତଂ କରୋନ୍ତେନ, ଓନମେତ୍ୱାନ ଭାଜନଂ ॥
କପ୍ପିୟଂ ପନ କାତବ୍ବଂ, ନ ପତ୍ତେୟେୱ କେୱଲଂ ।
ପଚ୍ଛିୟଂ ୟଦି ୱା କୁଣ୍ଡେ, କାତୁଂ ୱଟ୍ଟତି ଭାଜନେ ॥
ପୱାରିତାନଂ ଅପୱାରିତାନଂ ।
ଅଞ୍ଞେସମେତଂ ପନ ୱଟ୍ଟତେୱ ।
ୟେନାତିରିତ୍ତଂ ତୁ କତଂ ଠପେତ୍ୱା ।
ତମେୱ ଚେକଂ ପରିଭୁଞ୍ଜିତବ୍ବଂ ॥
କପ୍ପିୟଂ ପନ କାରେତ୍ୱା, ଭୁଞ୍ଜନ୍ତସ୍ସେୱ ଭିକ୍ଖୁନୋ ।
ବ୍ୟଞ୍ଜନଂ ୱାପି ୟଂ କିଞ୍ଚି, ପତ୍ତେ ତସ୍ସାକିରନ୍ତି ଚେ ॥
ଅତିରିତ୍ତଂ ତୁ କାରେତ୍ୱା, ଭୁଞ୍ଜିତବ୍ବଂ ତଥା ପୁନ ।
ୟେନ ତଂ ଅକତଂ ୟଂ ୱା, କାତବ୍ବଂ ତେନ ତଂ ୱିସୁଂ ॥
କତଂ ଅକପ୍ପିୟାଦୀହି, ଅତିରିତ୍ତଂ ତୁ ସତ୍ତହି ।
ନ ଗିଲାନାତିରିତ୍ତଞ୍ଚ, ତଂ ହୋତିନତିରିତ୍ତକଂ ॥
ୟୋପି ପାତୋୱ ଏକମ୍ପି, ସିତ୍ଥଂ ଭୁତ୍ୱା ନିସୀଦତି ।
ଉପକଟ୍ଠୂପନୀତମ୍ପି, କାତୁଂ ଲଭତି କପ୍ପିୟଂ ॥
ଆହାରତ୍ଥାୟ ୟାମାଦି-କାଲିକଂ ପଟିଗଣ୍ହତୋ ।
ଅନାମିସଂ ତମେୱସ୍ସ, ଦୁକ୍କଟଂ ପରିଭୁଞ୍ଜତୋ ॥
ତଥା ଅନତିରିତ୍ତନ୍ତି, ସଞ୍ଞିନୋ ଅତିରିତ୍ତକେ ।
ତତ୍ଥ ୱେମତିକସ୍ସାପି, ଦୁକ୍କଟଂ ପରିଦୀପିତଂ ॥
ଅନାପତ୍ତାତିରିତ୍ତଂ ତୁ, କାରାପେତ୍ୱାନ ଭୁଞ୍ଜତୋ ।
ଗିଲାନସ୍ସାତିରିତ୍ତଂ ୱା, ତଥା ଉମ୍ମତ୍ତକାଦିନୋ ॥
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ।
କପ୍ପିୟାକରଣଞ୍ଚେୱ, ଭୋଜନଞ୍ଚ କ୍ରିୟାକ୍ରିୟଂ ॥
ପଠମପୱାରଣକଥା ।
ୟୋ ପନାନତିରିତ୍ତେନ, ପୱାରେୟ୍ୟ ପୱାରିତଂ ।
ଜାନଂ ଆସାଦନାପେକ୍ଖୋ, ଭୁତ୍ତେ ପାଚିତ୍ତି ତସ୍ସ ତୁ ॥
ଦୁକ୍କଟଂ ଅଭିହାରେ ଚ, ଗହଣେ ଇତରସ୍ସ ହି ।
ଅଜ୍ଝୋହାରପୟୋଗେସୁ, ସବ୍ବେସୁପି ଚ ଦୁକ୍କଟଂ ॥
ଭୋଜନସ୍ସାୱସାନସ୍ମିଂ, ପାଚିତ୍ତି ପରିଦୀପିତା ।
ଅଭିହାରକଭିକ୍ଖୁସ୍ସ, ସବ୍ବଂ ତସ୍ସେୱ ଦସ୍ସିତଂ ॥
ପୱାରିତୋତି ସଞ୍ଞିସ୍ସ, ଭିକ୍ଖୁସ୍ମିଂ ଅପୱାରିତେ ।
ୱିମତିସ୍ସୁଭୟତ୍ଥାପି, ଦୁକ୍କଟଂ ପରିଦୀପିତଂ ॥
ଅନାପତ୍ତାତିରିତ୍ତଂ ୱା, କାରାପେତ୍ୱାୱ ଦେତି ଚେ ।
ଗିଲାନସ୍ସାୱସେସଂ ୱା, ଅଞ୍ଞସ୍ସତ୍ଥାୟ ଦେତି ୱା ॥
ସେସଂ ସବ୍ବମସେସେନ, ଅନନ୍ତରସମଂ ମତଂ ।
ଓମସୱାଦତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଦୁତିୟପୱାରଣକଥା ।
ଖାଦନୀୟଂ ୱା ଭୋଜନୀୟଂ ୱା ।
କିଞ୍ଚି ୱିକାଲେ ୟୋ ପନ ଭିକ୍ଖୁ ।
ସୋ ଜିନୱୁତ୍ତଂ ଦୋସମୁପେତି ॥
ୟମାମିସଗତଞ୍ଚେତ୍ଥ, ୱନମୂଲଫଲାଦିକଂ ।
କାଲିକେସ୍ୱସମ୍ମୋହତ୍ଥଂ, ୱେଦିତବ୍ବମିଦଂ ପନ ॥
ମୂଲଂ କନ୍ଦଂ ମୁଳାଲଞ୍ଚ, ମତ୍ଥକଂ ଖନ୍ଧକଂ ତଚଂ ।
ପତ୍ତଂ ପୁପ୍ଫଂ ଫଲଂ ଅଟ୍ଠି, ପିଟ୍ଠଂ ନିୟ୍ୟାସମେୱ ଚ ॥
ମୂଲଖାଦନୀୟାଦୀନଂ, ମୁଖମତ୍ତନିଦସ୍ସନଂ ।
ଭିକ୍ଖୂନଂ ପାଟୱତ୍ଥାୟ, ନାମତ୍ଥେସୁ ନିବୋଧଥ ॥
ମୂଲକଂ ଖାରକଞ୍ଚେୱ, ୱତ୍ଥୁଲଂ ତଣ୍ଡୁଲେୟ୍ୟକଂ ।
ତମ୍ବକଂ ଜଜ୍ଝରିକଞ୍ଚ, ଚଚ୍ଚୁ ୱଜକଲୀପି ଚ ॥
ମୂଲାନି ଏୱମାଦୀନଂ, ସାକାନଂ ଆମିସେ ପନ ।
ସଙ୍ଗହଂ ଇଧ ଗଚ୍ଛନ୍ତି, ଆହାରତ୍ଥଂ ଫରନ୍ତି ହି ॥
ଛଡ୍ଡେନ୍ତି ଜରଟ୍ଠଂ ଛେତ୍ୱା, ୟଂ ତଂ ୱଜକଲିସ୍ସ ତୁ ।
ତଂ ୟାୱଜୀୱିକଂ ୱୁତ୍ତଂ, ସେସାନଂ ୟାୱକାଲିକଂ ॥
ହଲିଦ୍ଦି ସିଙ୍ଗିୱେରଞ୍ଚ, ୱଚତ୍ତଂ ଅତିୱିସଂ ୱଚଂ ।
ଉସୀରଂ ଭଦ୍ଦମୁତ୍ତଞ୍ଚ, ତଥା କଟୁକରୋହିଣୀ ॥
ଇଚ୍ଚେୱମାଦିକଂ ଅଞ୍ଞଂ, ପଞ୍ଚମୂଲାଦିକଂ ବହୁ ।
ନାନପ୍ପକାରକଂ ମୂଲଂ, ୱିଞ୍ଞେୟ୍ୟଂ ୟାୱଜୀୱିକଂ ॥
ମସାଲୁପିଣ୍ଡଲାଦୀନଂ, ୱଲ୍ଲୀନଂ ଆଲୁୱସ୍ସ ଚ ।
କନ୍ଦୋ ଉପ୍ପଲଜାତୀନଂ, ତଥା ପଦୁମଜାତିୟା ॥
କଦଲୀସିଗ୍ଗୁତାଲାନଂ, ମାଲୁୱସ୍ସ ଚ ୱେଳୁୟା ।
ସତାୱରି କସେରୂନଂ, କନ୍ଦୋ ଅମ୍ବାଟକସ୍ସ ଚ ॥
ଇଚ୍ଚେୱମାଦୟୋ କନ୍ଦା ।
ଦସ୍ସିତା ୟାୱକାଲିକା ।
ଧୋତୋ ସୋ ଆମିସେ ୱୁତ୍ତୋ ।
କନ୍ଦୋ ୟୋ ଖୀରୱଲ୍ଲିୟା ॥
ଅଧୋତୋ ଲସୁଣଞ୍ଚେୱ, ଖୀରକାକୋଲିଆଦୟୋ ।
କନ୍ଦା ୱାକ୍ୟପଥାତୀତା, ୱିଞ୍ଞେୟ୍ୟା ୟାୱଜୀୱିକା ॥
ପୁଣ୍ଡରୀକମୁଳାଲଞ୍ଚ, ମୁଳାଲଂ ପଦୁମସ୍ସ ଚ ।
ଏୱମାଦିମନେକମ୍ପି, ମୁଳାଲଂ ୟାୱକାଲିକଂ ॥
ତାଲହିନ୍ତାଲକୁନ୍ତାଲ-ନାଳିକେରାଦିସମ୍ଭୱଂ ।
ହଲିଦ୍ଦିସିଙ୍ଗିୱେରାନଂ, ମୁଳାଲଂ ୟାୱଜୀୱିକଂ ॥
ତାଲହିନ୍ତାଲକୁନ୍ତାଲ-କଳୀରୋ କେତକସ୍ସ ଚ ।
କଦଲୀନାଳିକେରାନଂ, ମତ୍ଥକଂ ମୂଲକସ୍ସ ଚ ॥
ଖଜ୍ଜୁରେରକୱେତ୍ତାନଂ, ଉଚ୍ଛୁୱେଳୁନଳାଦିନଂ ।
ସତ୍ତନ୍ନଂ ପନ ଧଞ୍ଞାନଂ, କଳୀରୋ ସାସପସ୍ସ ଚ ॥
ଇଚ୍ଚେୱମାଦୟୋନେକେ, ମତ୍ଥକା ୟାୱକାଲିକା ।
ଅଞ୍ଞେ ହଲିଦ୍ଦିଆଦୀନଂ, ମତ୍ଥକା ୟାୱଜୀୱିକା ॥
ତାଲକୁନ୍ତାଲକାଦୀନଂ, ଛିନ୍ଦିତ୍ୱା ପାତିତୋ ପନ ।
ଗତୋ ଜରଟ୍ଠବୁନ୍ଦୋ ସୋ, ସଙ୍ଗହଂ ୟାୱଜୀୱିକେ ॥
ଖନ୍ଧଖାଦନୀୟଂ ନାମ, ଉଚ୍ଛୁଖନ୍ଧୋ ପକାସିତୋ ।
ସାଲକଲ୍ୟାଣିୟା ଖନ୍ଧୋ, ତଥା ପଥୱିୟଂ ଗତୋ ॥
ଏୱମୁପ୍ପଲଜାତୀନଂ, ଦଣ୍ଡକୋ ୟାୱକାଲିକୋ ।
ପଣ୍ଣଦଣ୍ଡୁପ୍ପଲାଦୀନଂ, ସବ୍ବୋ ପଦୁମଜାତିୟା ॥
ୟାୱଜୀୱିକସଙ୍ଖାତା, କରମଦ୍ଦାଦିଦଣ୍ଡକା ।
ତଚେସୁଚ୍ଛୁତଚୋୱେକୋ, ସରସୋ ୟାୱକାଲିକୋ ॥
ମୂଲକଂ ଖାରକୋ ଚଚ୍ଚୁ, ତମ୍ବକୋ ତଣ୍ଡୁଲେୟ୍ୟକୋ ।
ୱତ୍ଥୁଲୋ ଚୀନମୁଗ୍ଗୋ ଚ, ଉମ୍ମା ୱଜକଲୀ ତଥା ॥
ଜଜ୍ଝରୀ କାସମଦ୍ଦୋ ଚ, ସେଲ୍ଲୁ ସିଗ୍ଗୁ ଚ ନାଳିକା ।
ୱରୁଣୋ ଅଗ୍ଗିମନ୍ଥୋ ଚ, ଜୀୱନ୍ତୀ ସୁନିସନ୍ନକୋ ॥
ରାଜମାସୋ ଚ ମାସୋ ଚ, ନିପ୍ଫାୱୋ ମିଗପୁପ୍ଫିକା ।
ୱଣ୍ଟକୋ ଭୂମିଲୋଣୀତି, ଏୱମାଦିମନେକକଂ ॥
ପତ୍ତଖାଦନୀୟଂ ନାମ, କଥିତଂ ୟାୱକାଲିକଂ ।
ଇତରା ଚ ମହାଲୋଣି, ଦୀପିତା ୟାୱଜୀୱିକା ॥
ୟାୱକାଲିକମିଚ୍ଚେୱ, କଥିତଂ ଅମ୍ବପଲ୍ଲୱଂ ।
ନିମ୍ବସ୍ସ କୁଟଜସ୍ସାପି, ପଣ୍ଣଂ ସୁଲସିୟାପି ଚ ॥
କପ୍ପାସିକପଟୋଲାନଂ, ତେସଂ ପୁପ୍ଫଫଲାନି ଚ ।
ଫଣିଜ୍ଜକଜ୍ଜୁକାନଞ୍ଚ, ପଣ୍ଣଂ ତଂ ୟାୱଜୀୱିକଂ ॥
ଅଟ୍ଠନ୍ନଂ ମୂଲକାଦୀନଂ, ପୁପ୍ଫଂ ନିପ୍ଫାୱକସ୍ସ ଚ ।
ତଥା ପୁପ୍ଫଂ କରୀରସ୍ସ, ପୁପ୍ଫଂ ୱରୁଣକସ୍ସ ଚ ॥
ପୁପ୍ଫଂ କସେରୁକସ୍ସାପି, ଜୀୱନ୍ତୀ ସିଗ୍ଗୁପୁପ୍ଫକଂ ।
ପଦୁମୁପ୍ପଲଜାତୀନଂ, ପୁପ୍ଫାନଂ କଣ୍ଣିକାପି ଚ ॥
ନାଳିକେରସ୍ସ ତାଲସ୍ସ, ତରୁଣଂ କେତକସ୍ସ ଚ ।
ଇଚ୍ଚେୱମାଦିକଂ ପୁପ୍ଫ-ମନେକଂ ୟାୱକାଲିକଂ ॥
ୟାୱକାଲିକପୁପ୍ଫାନି, ଠପେତ୍ୱା ପନ ସେସକଂ ।
ୟାୱଜୀୱିକପୁପ୍ଫନ୍ତି, ଦୀପୟେ ସବ୍ବମେୱ ଚ ॥
କକୁଧକପିତ୍ଥକକୁନ୍ଦକଳୀନଂ ।
କୁରୱକକରୱୀରପାଟଲୀନଂ ।
କୁସୁମମିଦଂ ପନ ୟାୱଜୀୱିକଂ ॥
ଅମ୍ବମ୍ବାଟକଜମ୍ବୂନଂ, ଫଲଞ୍ଚ ପନସସ୍ସ ଚ ।
ମାତୁଲୁଙ୍ଗକପିତ୍ଥାନଂ, ଫଲଂ ତିନ୍ତିଣିକସ୍ସ ଚ ॥
ତାଲସ୍ସ ନାଳିକେରସ୍ସ, ଫଲଂ ଖଜ୍ଜୂରିୟାପି ଚ ।
ଲବୁଜସ୍ସ ଚ ଚୋଚସ୍ସ, ମୋଚସ୍ସ ମଧୁକସ୍ସ ଚ ॥
ବଦରସ୍ସ କରମଦ୍ଦସ୍ସ, ଫଲଂ ୱାତିଙ୍ଗଣସ୍ସ ଚ ।
କୁମ୍ଭଣ୍ଡତିପୁସାନଞ୍ଚ, ଫଲଂ ଏଳାଲୁକସ୍ସ ଚ ॥
ରାଜାୟତନଫଲଂ ପୁସ୍ସ-ଫଲଂ ତିମ୍ବରୁକସ୍ସ ଚ ।
ଏୱମାଦିମନେକମ୍ପି, ଫଲଂ ତଂ ୟାୱକାଲିକଂ ॥
ତିଫଲଂ ପିପ୍ଫଲୀ ଜାତି-ଫଲଞ୍ଚ କଟୁକପ୍ଫଲଂ ।
ଗୋଟ୍ଠଫଲଂ ବିଲଙ୍ଗଞ୍ଚ, ତକ୍କୋଲମରିଚାନି ଚ ॥
ଏୱମାଦୀନି ୱୁତ୍ତାନି, ଅୱୁତ୍ତାନି ଚ ପାଳିୟଂ ।
ଫଲାନି ପନ ଗଚ୍ଛନ୍ତି, ୟାୱଜୀୱିକସଙ୍ଗହଂ ॥
ପନସମ୍ବାଟକଟ୍ଠୀନି, ସାଲଟ୍ଠି ଲବୁଜଟ୍ଠି ଚ ।
ଚିଞ୍ଚାବିମ୍ବଫଲଟ୍ଠୀନି, ପୋକ୍ଖରଟ୍ଠି ଚ ସବ୍ବସୋ ॥
ଖଜ୍ଜୂରିକେତକାଦୀନଂ, ତଥା ତାଲଫଲଟ୍ଠି ଚ ।
ଏୱମାଦୀନି ଗଚ୍ଛନ୍ତି, ୟାୱକାଲିକସଙ୍ଗହଂ ॥
ପୁନ୍ନାଗମଧୁକଟ୍ଠୀନି, ସେଲ୍ଲଟ୍ଠି ତିଫଲଟ୍ଠି ଚ ।
ଏୱମାଦୀନି ଅଟ୍ଠୀନି, ନିଦ୍ଦିଟ୍ଠାନି ଅନାମିସେ ॥
ସତ୍ତନ୍ନଂ ପନ ଧଞ୍ଞାନଂ, ଅପରଣ୍ଣାନମେୱ ଚ ।
ପିଟ୍ଠଂ ପନସସାଲାନଂ, ଲବୁଜମ୍ବାଟକସ୍ସ ଚ ॥
ତାଲପିଟ୍ଠଂ ତଥା ଧୋତଂ, ପିଟ୍ଠଂ ୟଂ ଖୀରୱଲ୍ଲିୟା ।
ଏୱମାଦିମନେକମ୍ପି, କଥିତଂ ୟାୱକାଲିକଂ ॥
ଅଧୋତଂ ତାଲପିଟ୍ଠଞ୍ଚ, ପିଟ୍ଠଂ ୟଂ ଖୀରୱଲ୍ଲିୟା ।
ଅସ୍ସଗନ୍ଧାଦିପିଟ୍ଠଞ୍ଚ, ହୋତି ତଂ ୟାୱଜୀୱିକଂ ॥
ନିୟ୍ୟାସୋ ଉଚ୍ଛୁନିବ୍ବତ୍ତୋ, ଏକୋ ସତ୍ତାହକାଲିକୋ ।
ଅୱସେସୋ ଚ ହିଙ୍ଗାଦି, ନିୟ୍ୟାସୋ ୟାୱଜୀୱିକୋ ॥
ମୂଲାଦୀସୁ ମୟା କିଞ୍ଚି, ମୁଖମତ୍ତଂ ନିଦସ୍ସିତଂ ।
ଏତସ୍ସେୱାନୁସାରେନ, ସେସୋ ଞେୟ୍ୟୋ ୱିଭାୱିନା ॥
‘‘ଭୁଞ୍ଜିସ୍ସାମି ୱିକାଲେ’’ତି, ଆମିସଂ ପଟିଗଣ୍ହତୋ ।
କାଲେ ୱିକାଲସଞ୍ଞିସ୍ସ, କାଲେ ୱେମତିକସ୍ସ ଚ ॥
ଦୁକ୍କଟଂ, କାଲସଞ୍ଞିସ୍ସ, ଅନାପତ୍ତି ପକାସିତା ।
ଇଦଂ ଏଳକଲୋମେନ, ସମୁଟ୍ଠାନାଦିନା ସମଂ ॥
ୱିକାଲଭୋଜନକଥା ।
ଭୋଜନଂ ସନ୍ନିଧିଂ କତ୍ୱା, ଖାଦନଂ ୱାପି ୟୋ ପନ ।
ଭୁଞ୍ଜେୟ୍ୟ ୱାପି ଖାଦେୟ୍ୟ, ତସ୍ସ ପାଚିତ୍ତିୟଂ ସିୟା ॥
ଭିକ୍ଖୁ ୟଂ ସାମଣେରାନଂ, ପରିଚ୍ଚଜତ୍ୟନାଲୟୋ ।
ନିଦହିତ୍ୱା ସଚେ ତସ୍ସ, ଦେନ୍ତି ତଂ ପୁନ ୱଟ୍ଟତି ॥
ସୟଂ ପଟିଗ୍ଗହେତ୍ୱାନ, ଅପରିଚ୍ଚତ୍ତମେୱ ୟଂ ।
ଦୁତିୟେ ଦିୱସେ ତସ୍ସ, ନିହିତଂ ତଂ ନ ୱଟ୍ଟତି ॥
ତତୋ ଅଜ୍ଝୋହରନ୍ତସ୍ସ, ଏକସିତ୍ଥମ୍ପି ଭିକ୍ଖୁନୋ ।
ପାଚିତ୍ତି କଥିତା ସୁଦ୍ଧା, ସୁଦ୍ଧଚିତ୍ତେନ ତାଦିନା ॥
ଅକପ୍ପିୟେସୁ ମଂସେସୁ, ମନୁସ୍ସସ୍ସେୱ ମଂସକେ ।
ଥୁଲ୍ଲଚ୍ଚୟେନ ପାଚିତ୍ତି, ଦୁକ୍କଟେନ ସହେତରେ ॥
ୟାମକାଲିକସଙ୍ଖାତଂ, ପାଚିତ୍ତି ପରିଭୁଞ୍ଜତୋ ।
ଦୁକ୍କଟାପତ୍ତିୟା ସଦ୍ଧିଂ, ଆହାରତ୍ଥାୟ ଭୁଞ୍ଜତୋ ॥
ସଚେ ପୱାରିତୋ ହୁତ୍ୱା, ଅନ୍ନଂ ଅନତିରିତ୍ତକଂ ।
ଭୁଞ୍ଜତୋ ପକତଂ ତସ୍ସ, ହୋତି ପାଚିତ୍ତିୟଦ୍ୱୟଂ ॥
ଥୁଲ୍ଲଚ୍ଚୟେନ ସଦ୍ଧିଂ ଦ୍ୱେ, ମଂସେ ମାନୁସକେ ସିୟୁଂ ।
ସେସେ ଅକପ୍ପିୟେ ମଂସେ, ଦୁକ୍କଟେନ ସହ ଦ୍ୱୟଂ ॥
ୟାମକାଲିକସଙ୍ଖାତଂ, ଭୁଞ୍ଜତୋ ସତି ପଚ୍ଚୟେ ।
ସାମିସେନ ମୁଖେନ ଦ୍ୱେ, ଏକମେୱ ନିରାମିସଂ ॥
ତମେୱଜ୍ଝୋହରନ୍ତସ୍ସ, ଆହାରତ୍ଥାୟ କେୱଲଂ ।
ଦ୍ୱୀସୁ ତେସୁ ୱିକପ୍ପେସୁ, ଦୁକ୍କଟଂ ପନ ୱଡ୍ଢତି ॥
ୱିକାଲେ ଭୁଞ୍ଜତୋ ସୁଦ୍ଧଂ, ସନ୍ନିଧିପଚ୍ଚୟାପି ଚ ।
ୱିକାଲଭୋଜନା ଚେୱ, ହୋତି ପାଚିତ୍ତିୟଦ୍ୱୟଂ ॥
ମଂସେ ଥୁଲ୍ଲଚ୍ଚୟଞ୍ଚେୱ, ଦୁକ୍କଟମ୍ପି ଚ ୱଡ୍ଢତି ।
ମନୁସ୍ସମଂସେ ସେସେ ଚ, ୟଥାନୁକ୍କମତୋ ଦ୍ୱୟଂ ॥
ନତ୍ଥେୱାନତିରିତ୍ତମ୍ପି, ୱିକାଲେ ପରିଭୁଞ୍ଜତୋ ।
ଦୋସୋ ସବ୍ବୱିକପ୍ପେସୁ, ଭିକ୍ଖୁନୋ ତନ୍ନିମିତ୍ତକୋ ॥
ୱିକାଲପଚ୍ଚୟା ୱାପି, ନ ଦୋସୋ ୟାମକାଲିକେ ।
ସତ୍ତାହକାଲିକଂ ୟାୱ-ଜୀୱିକଂ ପଟିଗଣ୍ହତୋ ॥
ଆହାରସ୍ସେୱ ଅତ୍ଥାୟ, ଗହଣେ ଦୁୱିଧସ୍ସ ତୁ ।
ଅଜ୍ଝୋହାରପୟୋଗେସୁ, ଦୁକ୍କଟଂ ତୁ ନିରାମିସେ ॥
ଅଥ ଆମିସସଂସଟ୍ଠଂ, ଗହେତ୍ୱା ଠପିତଂ ସଚେ ।
ପୁନ ଅଜ୍ଝୋହରନ୍ତସ୍ସ, ପାଚିତ୍ତେୱ ପକାସିତା ॥
କାଲୋ ୟାମୋ ଚ ସତ୍ତାହଂ, ଇତି କାଲତ୍ତୟଂ ଇଦଂ ।
ଅତିକ୍କମୟତୋ ଦୋସୋ, କାଲଂ ତଂ ତଂ ତୁ କାଲିକଂ ॥
ଅତ୍ତନା ତୀଣି ସମ୍ଭିନ୍ନ-ରସାନି ଇତରାନି ହି ।
ସଭାୱମୁପନେତେୱ, ୟାୱକାଲିକମତ୍ତନୋ ॥
ଏୱମେୱ ଚ ସେସେସୁ, କାଲିକେସୁ ୱିନିଦ୍ଦିସେ ।
ଇମେସୁ ପନ ସବ୍ବେସୁ, କାଲିକେସୁ ଚତୂସ୍ୱପି ॥
କାଲିକଦ୍ୱୟମାଦିମ୍ହି, ଅନ୍ତୋୱୁତ୍ଥଞ୍ଚ ସନ୍ନିଧି ।
ଉଭୟମ୍ପି ନ ହୋତେୱ, ପଚ୍ଛିମଂ କାଲିକଦ୍ୱୟଂ ॥
ଅକପ୍ପିୟାୟ କୁଟିୟା, ୱୁତ୍ଥେନନ୍ତଦ୍ୱୟେନ ତଂ ।
ଗହିତଂ ତଦହେ ୱାପି, ଦ୍ୱୟଂ ପୁବ୍ବଂ ନ ୱଟ୍ଟତି ॥
ମୁଖସନ୍ନିଧି ନାମାୟଂ, ଅନ୍ତୋୱୁତ୍ଥଂ ନ କପ୍ପତି ।
ଇତି ୱୁତ୍ତଂ ଦଳ୍ହଂ କତ୍ୱା, ମହାପଚ୍ଚରିୟଂ ପନ ॥
ନ ଦୋସୋ ନିଦହିତ୍ୱାପି, ପଠମଂ କାଲିକତ୍ତୟଂ ।
ତଂ ତଂ ସକଂ ସକଂ କାଲ-ମନତିକ୍କମ୍ମ ଭୁଞ୍ଜତୋ ॥
ତଥା ଉମ୍ମତ୍ତକାଦୀନଂ, ଅନାପତ୍ତି ପକାସିତା ।
ସମମେଳକଲୋମେନ, ସମୁଟ୍ଠାନାଦିନା ଇଦଂ ॥
ସନ୍ନିଧିକାରକଥା ।
ଭୋଜନାନି ପଣୀତାନି, ଅଗିଲାନୋ ପନତ୍ତନୋ ।
ଅତ୍ଥାୟ ୱିଞ୍ଞାପେତ୍ୱାନ, ପାଚିତ୍ତି ପରିଭୁଞ୍ଜତୋ ॥
‘‘ସପ୍ପିନା ଦେହି ଭତ୍ତଂ ମେ, ସସପ୍ପିଂ ସପ୍ପିମିସ୍ସକଂ ।
ସପ୍ପିଭତ୍ତଞ୍ଚ ଦେହୀ’’ତି, ୱିଞ୍ଞାପେନ୍ତସ୍ସ ଦୁକ୍କଟଂ ॥
ୱିଞ୍ଞାପେତ୍ୱା ତଥା ତଂ ଚେ, ଦୁକ୍କଟଂ ପଟିଗଣ୍ହତୋ ।
ପୁନ ଅଜ୍ଝୋହରନ୍ତସ୍ସ, ପାଚିତ୍ତି ପରିୟାପୁତା ॥
ସୁଦ୍ଧାନି ସପ୍ପିଆଦୀନି, ୱିଞ୍ଞାପେତ୍ୱାନ ଭୁଞ୍ଜତୋ ।
ସେଖିୟେସୁପି ୱିଞ୍ଞତ୍ତି, ଦୁକ୍କଟଂ ପରିଦୀପୟେ ॥
ତସ୍ମା ପଣୀତସଂସଟ୍ଠଂ, ୱିଞ୍ଞାପେତ୍ୱାୱ ଭୁଞ୍ଜତୋ ।
ସତ୍ତଧଞ୍ଞମୟଂ ଭତ୍ତଂ, ପାଚିତ୍ତିୟମୁଦୀରୟେ ॥
ସଚେ ‘‘ଗୋସପ୍ପିନା ମୟ୍ହଂ, ଦେହି ଭତ୍ତ’’ନ୍ତି ୟାଚିତୋ ।
ଅଜିୟା ସପ୍ପିଆଦୀହି, ୱିସଙ୍କେତଂ ଦଦାତି ଚେ ॥
‘‘ସପ୍ପିନା ଦେହି’’ ୱୁତ୍ତୋ ଚେ, ନୱନୀତାଦିକେସୁପି ।
ଦେତି ଅଞ୍ଞତରେନସ୍ସ, ୱିସଙ୍କେତନ୍ତି ଦୀପିତଂ ॥
ୟେନ ୟେନ ହି ୱିଞ୍ଞତ୍ତଂ, ତସ୍ମିଂ ମୂଲେପି ତସ୍ସ ୱା ।
ଲଦ୍ଧେପି ପନ ତଂ ଲଦ୍ଧଂ, ହୋତିୟେୱ ନ ଅଞ୍ଞଥା ॥
ଠପେତ୍ୱା ସପ୍ପିଆଦୀନି, ଆଗତାନି ହି ପାଳିୟଂ ।
ଅଞ୍ଞେହି ୱିଞ୍ଞାପେନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ସବ୍ବେହି ସପ୍ପିଆଦୀହି, ୱିଞ୍ଞାପେତ୍ୱାୱ ଏକତୋ ।
ଭୁଞ୍ଜତେକରସଂ କତ୍ୱା, ନୱ ପାଚିତ୍ତିୟୋ ମତା ॥
ଅକପ୍ପିୟେନ ୱୁତ୍ତେପି, ସପ୍ପିନା ଦେତି ତେନ ଚେ ।
ଗହଣେ ପରିଭୋଗେପି, ଦୁକ୍କଟଂ ପରିଦୀପିତଂ ॥
ଗିଲାନସ୍ସ ଗିଲାନୋତି, ସଞ୍ଞିନୋ ୱିମତିସ୍ସ ୱା ।
ଦୁକ୍କଟଂ ମୁନିନା ୱୁତ୍ତଂ, ଅନାପତ୍ତି ପକାସିତା ॥
ଗିଲାନକାଲେ ୱିଞ୍ଞତ୍ତ-ମଗିଲାନସ୍ସ ଭୁଞ୍ଜତୋ ।
ଗିଲାନସ୍ସାୱସେସଂ ୱା, ଞାତକାଦୀନମେୱ ୱା ॥
ଇଦଂ ଚତୁସମୁଟ୍ଠାନଂ, କାୟତୋ କାୟୱାଚତୋ ।
କାୟଚିତ୍ତା ତଥା କାୟ-ୱାଚାଚିତ୍ତତ୍ତୟାପି ଚ ॥
ପଣୀତଭୋଜନକଥା ।
ଅଦିନ୍ନଞ୍ହି ମୁଖଦ୍ୱାରଂ, ଆହାରଂ ଆହରେୟ୍ୟ ୟୋ ।
ଦନ୍ତପୋନୋଦକଂ ହିତ୍ୱା, ତସ୍ସ ପାଚିତ୍ତିୟଂ ସିୟା ॥
ହତ୍ଥପାସୋଭିନୀହାରୋ, ମଜ୍ଝିମୁଚ୍ଚାରଣକ୍ଖମୋ ।
ମନୁସ୍ସୋ ୱାମନୁସ୍ସୋ ୱା, ଦେତି କାୟାଦିନା ତିଧା ॥
ପଟିଗ୍ଗଣ୍ହାତି ତଂ ଭିକ୍ଖୁ, ଦୀୟମାନଂ ସଚେ ଦ୍ୱିଧା ।
ଏୱଂ ପଞ୍ଚଙ୍ଗସଂୟୋଗେ, ଗହଣଂ ତସ୍ସ ରୂହତି ॥
ଦାୟକୋ ଗଗନଟ୍ଠୋ ଚେ, ଭୂମଟ୍ଠୋ ଚେତରୋ ସିୟା ।
ଭୂମଟ୍ଠସ୍ସ ଚ ସୀସେନ, ଗଗନଟ୍ଠସ୍ସ ଦେହିନୋ ॥
ୟମାସନ୍ନତରଂ ଅଙ୍ଗଂ, ଓରିମନ୍ତେନ ତସ୍ସ ତୁ ।
ଦାତୁଂ ୱାପି ଗହେତୁଂ ୱା, ୱିନା ହତ୍ଥଂ ପସାରିତଂ ॥
ହତ୍ଥପାସୋ ମିନେତବ୍ବୋ, ନଗଟ୍ଠାଦୀସ୍ୱୟଂ ନୟୋ ।
ଏୱରୂପେ ପନ ଠାନେ, ଠତ୍ୱା ଚେ ଦେତି ୱଟ୍ଟତି ॥
ପକ୍ଖୀ ୱା ମୁଖତୁଣ୍ଡେନ, ହତ୍ଥୀ ସୋଣ୍ଡାୟ ୱା ପନ ।
ସଚେ ୟଂ କିଞ୍ଚି ପୁପ୍ଫଂ ୱା, ଫଲଂ ୱା ଦେତି ୱଟ୍ଟତି ॥
ଭତ୍ତବ୍ୟଞ୍ଜନପୁଣ୍ଣାନି, ଭାଜନାନି ବହୂନିପି ।
ସୀସେନାଦାୟ ଭିକ୍ଖୁସ୍ସ, ଗନ୍ତ୍ୱା କସ୍ସଚି ସନ୍ତିକଂ ॥
ଈସକଂ ପନ ଓନତ୍ୱା, ‘‘ଗଣ୍ହା’’ତି ୟଦି ଭାସତି ।
ତେନ ହତ୍ଥଂ ପସାରେତ୍ୱା, ହେଟ୍ଠିମଂ ପନ ଭାଜନଂ ॥
ପଟିଚ୍ଛିତବ୍ବଂ ତଂ ଏକ- ଦେସେନାପି ଚ ଭିକ୍ଖୁନା ।
ହୋନ୍ତି ଏତ୍ତାୱତା ତାନି, ଗହିତାନେୱ ସବ୍ବସୋ ॥
ତତୋ ପଟ୍ଠାୟ ତଂ ସବ୍ବଂ, ଓରୋପେତ୍ୱା ୟଥାସୁଖଂ ।
ଉଗ୍ଘାଟେତ୍ୱା ତତୋ ଇଟ୍ଠଂ, ଗହେତୁଂ ପନ ୱଟ୍ଟତି ॥
ପଚ୍ଛିଆଦିମ୍ହି ୱତ୍ତବ୍ବ-ମତ୍ଥି କିଂ ଏକଭାଜନେ ।
କାଜଭତ୍ତଂ ହରନ୍ତୋ ଚେ, ଓନତ୍ୱା ଦେତି ୱଟ୍ଟତି ॥
ତିଂସହତ୍ଥୋ ସିୟା ୱେଳୁ, ଅନ୍ତେସୁ ଚ ଦୁୱେ ଘଟା ।
ସପ୍ପିନୋ, ଗହିତେକସ୍ମିଂ, ସବ୍ବଂ ଗହିତମେୱ ତଂ ॥
ବହୁପତ୍ତା ଚ ମଞ୍ଚେ ୱା, ପୀଠେ ୱା କଟସାରକେ ।
ଠପିତା ଦାୟକୋ ହତ୍ଥ-ପାସେ ଠତ୍ୱାନ ଦେତି ଚେ ॥
ପଟିଗ୍ଗହଣସଞ୍ଞାୟ, ମଞ୍ଚାଦୀନି ସଚେ ପନ ।
ନିସୀଦତି ଫୁସିତ୍ୱା ୟୋ, ୟଞ୍ଚ ପତ୍ତେସୁ ଦୀୟତି ॥
ଗହିତଂ ତେନ ତଂ ସବ୍ବଂ, ହୋତିୟେୱ ନ ସଂସୟୋ ।
ପଟିଗ୍ଗହେସ୍ସାମିଚ୍ଚେୱ, ମଞ୍ଚାଦୀନି ସଚେ ପନ ॥
ଗହିତଂ ହୋତି ତଂ ସବ୍ବଂ, ଆରୁହିତ୍ୱା ନିସୀଦତି ।
ଆହଚ୍ଚ କୁଚ୍ଛିୟା କୁଚ୍ଛିଂ, ଠିତା ପତ୍ତା ହି ଭୂମିୟଂ ॥
ୟଂ ୟଂ ଅଙ୍ଗୁଲିୟା ୱାପି, ଫୁସିତ୍ୱା ସୂଚିୟାପି ୱା ।
ନିସିନ୍ନୋ ତତ୍ଥ ତତ୍ଥେୱ, ଦୀୟମାନଂ ତୁ ୱଟ୍ଟତି ॥
କଟସାରେ ମହନ୍ତସ୍ମିଂ, ତଥା ହତ୍ଥତ୍ଥରାଦିସୁ ।
ଗଣ୍ହତୋ ହତ୍ଥପାସସ୍ମିଂ, ୱିଜ୍ଜମାନେ ତୁ ୱଟ୍ଟତି ॥
ତତ୍ଥଜାତକପଣ୍ଣେସୁ, ଗହେତୁଂ ନ ଚ ୱଟ୍ଟତି ।
ନ ପନେତାନି କାୟେନ, ପଟିବଦ୍ଧାନି ହୋନ୍ତି ହି ॥
ଅସଂହାରିମପାସାଣେ, ଫଲକେ ୱାପି ତାଦିସେ ।
ଖାଣୁବଦ୍ଧେପି ୱା ମଞ୍ଚେ, ଗହଣଂ ନେୱ ରୂହତି ॥
ତିନ୍ତିଣିକାଦିପଣ୍ଣେସୁ, ଭୂମିୟଂ ପତ୍ଥଟେସୁ ୱା ।
ଧାରେତୁମସମତ୍ଥତ୍ତା, ଗହଣଂ ନ ଚ ରୂହତି ॥
ହତ୍ଥପାସମତିକ୍କମ୍ମ, ଦୀଘଦଣ୍ଡେନ ଦେତି ଚେ ।
ୱତ୍ତବ୍ବୋ ଭିକ୍ଖୁନାଗନ୍ତ୍ୱା, ଦେହୀତି ପରିୱେସକୋ ॥
ସଚେ ପତ୍ତେ ରଜୋ ହୋତି, ଧୋୱିତବ୍ବୋ ଜଲେ ସତି ।
ତସ୍ମିଂ ଅସତି ପୁଞ୍ଛିତ୍ୱା, ଗହେତବ୍ବୋ ଅସେସତୋ ॥
ପିଣ୍ଡାୟ ୱିଚରନ୍ତସ୍ସ, ରଜଂ ପତତି ଚେ ପନ ।
ଭିକ୍ଖା ପଟିଗ୍ଗହେତ୍ୱାୱ, ଗହେତବ୍ବା ୱିଜାନତା ॥
ଅପ୍ପଟିଗ୍ଗହିତେ ଭିକ୍ଖୁଂ, ଗଣ୍ହତୋ ପନ ଦୁକ୍କଟଂ ।
ପଟିଗ୍ଗହେତ୍ୱାନାପତ୍ତି, ପଚ୍ଛା ତଂ ପରିଭୁଞ୍ଜତୋ ॥
‘‘ପଟିଗ୍ଗହେତ୍ୱା ଦେଥା’’ତି, ୱୁତ୍ତେ ତଂ ୱଚନଂ ପନ ।
ଅସୁତ୍ୱାନାଦିୟିତ୍ୱା ୱା, ଦେନ୍ତି ଚେ ନତ୍ଥି ଦୁକ୍କଟଂ ॥
ପଚ୍ଛା ପଟିଗ୍ଗହେତ୍ୱାୱ, ଗହେତବ୍ବଂ ୱିଜାନତା ।
ସଚେ ରଜଂ ନିପାତେତି, ମହାୱାତୋ ତତୋ ତତୋ ॥
ନ ସକ୍କା ଚ ସିୟା ଭିକ୍ଖଂ, ଗହେତୁଂ ୟଦି ଭିକ୍ଖୁନା ।
ଅଞ୍ଞସ୍ସ ଦାତୁକାମେନ, ଗହେତୁଂ ପନ ୱଟ୍ଟତି ॥
ସାମଣେରସ୍ସ ତଂ ଦତ୍ୱା, ଦିନ୍ନଂ ୱା ତେନ ତଂ ପୁନ ।
ତସ୍ସ ୱିସ୍ସାସତୋ ୱାପି, ଭୁଞ୍ଜିତୁଂ ପନ ୱଟ୍ଟତି ॥
ଭିକ୍ଖାଚାରେ ସଚେ ଭତ୍ତଂ, ସରଜଂ ଦେତି ଭିକ୍ଖୁନୋ ।
‘‘ପଟିଗ୍ଗହେତ୍ୱା ଭିକ୍ଖଂ ତ୍ୱଂ, ଗଣ୍ହ ୱା ଭୁଞ୍ଜ ୱା’’ତି ଚ ॥
ୱତ୍ତବ୍ବୋ ସୋ ତଥା ତେନ, କତ୍ତବ୍ବଞ୍ଚେୱ ଭିକ୍ଖୁନା ।
ରଜଂ ଉପରି ଭତ୍ତସ୍ସ, ତସ୍ସୁପ୍ଲୱତି ଚେ ପନ ॥
କଞ୍ଜିକଂ ତୁ ପୱାହେତ୍ୱା, ଭୁଞ୍ଜିତବ୍ବଂ ୟଥାସୁଖଂ ।
ଅନ୍ତୋ ପଟିଗ୍ଗହେତବ୍ବଂ, ପୱିଟ୍ଠଂ ତୁ ସଚେ ପନ ॥
ପତିତଂ ସୁକ୍ଖଭତ୍ତେ ଚେ, ଅପନୀୟାୱ ତଂ ରଜଂ ।
ସୁଖୁମଂ ଚେ ସଭତ୍ତମ୍ପି, ଭୁଞ୍ଜିତବ୍ବଂ ୟଥାସୁଖଂ ॥
ଉଳୁଙ୍କେନାହରିତ୍ୱାପି, ଦେନ୍ତସ୍ସ ପଠମଂ ପନ ।
ଥେୱୋ ଉଳୁଙ୍କତୋ ପତ୍ତେ, ସଚେ ପତତି ୱଟ୍ଟତି ॥
ଭତ୍ତେ ଆକିରମାନେ ତୁ, ଚରୁକେନ ତତୋ ପନ ।
ମସି ୱା ଛାରିକା ୱାପି, ସଚେ ପତତି ଭାଜନେ ॥
ତସ୍ସ ଚାଭିହଟତ୍ତାପି, ନ ଦୋସୋ ଉପଲବ୍ଭତି ।
ଅନନ୍ତରସ୍ସ ଭିକ୍ଖୁସ୍ସ, ଦୀୟମାନଂ ତୁ ପତ୍ତତୋ ॥
ଉପ୍ପଭିତ୍ୱା ସଚେ ପତ୍ତେ, ଇତରସ୍ସ ଚ ଭିକ୍ଖୁନୋ ।
ପତତି ୱଟ୍ଟତେୱାୟଂ, ପଟିଗ୍ଗହିତମେୱ ତଂ ॥
ପାୟାସସ୍ସ ଚ ପୂରେତ୍ୱା, ପତ୍ତଂ ଚେ ଦେନ୍ତି ଭିକ୍ଖୁନୋ ।
ଉଣ୍ହତ୍ତା ପନ ତଂ ହେଟ୍ଠା, ଗହେତୁଂ ନ ଚ ସକ୍କତି ॥
ୱଟ୍ଟତୀତି ଚ ନିଦ୍ଦିଟ୍ଠଂ, ଗହେତୁଂ ମୁଖୱଟ୍ଟିୟଂ ।
ନ ସକ୍କା ଚେ ଗହେତବ୍ବୋ, ତଥା ଆଧାରକେନପି ॥
ସଚେ ଆସନସାଲାୟଂ, ଗହେତ୍ୱା ପତ୍ତମତ୍ତନୋ ।
ନିଦ୍ଦାୟତି ନିସିନ୍ନୋୱ, ଦୀୟମାନଂ ନ ଜାନତି ॥
ନେୱାହରିୟମାନଂ ୱା, ଅପ୍ପଟିଗ୍ଗହିତମେୱ ତଂ ।
ଆଭୋଗଂ ପନ କତ୍ୱା ଚେ, ନିସିନ୍ନୋ ହୋତି ୱଟ୍ଟତି ॥
ସଚେ ହତ୍ଥେନ ମୁଞ୍ଚିତ୍ୱା, ପତ୍ତଂ ଆଧାରକମ୍ପି ୱା ।
ପେଲ୍ଲେତ୍ୱା ପନ ପାଦେନ, ନିଦ୍ଦାୟତି ହି ୱଟ୍ଟତି ॥
ପାଦେନାଧାରକଂ ଅକ୍କ-ମିତ୍ୱାପି ପଟିଗଣ୍ହତୋ ।
ଜାଗରସ୍ସାପି ହୋତେୱ, ଗହଣସ୍ମିଂ ଅନାଦରୋ ॥
ତସ୍ମା ତଂ ନ ଚ କାତବ୍ବଂ, ଭିକ୍ଖୁନା ୱିନୟଞ୍ଞୁନା ।
ୟଂ ଦୀୟମାନଂ ପତତି, ଗହେତୁଂ ତଂ ତୁ ୱଟ୍ଟତି ॥
ଭୁଞ୍ଜନ୍ତାନଞ୍ଚ ଦନ୍ତା ୱା, ଖୀୟନ୍ତିପି ନଖାପି ୱା ।
ତଥା ପତ୍ତସ୍ସ ୱଣ୍ଣୋ ୱା, ଅବ୍ବୋହାରନୟୋ ଅୟଂ ॥
ସତ୍ଥକେନୁଚ୍ଛୁଆଦୀନି, ଫାଲେନ୍ତାନଂ ସଚେ ମଲଂ ।
ପଞ୍ଞାୟତି ହି ତଂ ତେସୁ, ସିୟା ନୱସମୁଟ୍ଠିତଂ ॥
ପଟିଗ୍ଗହେତ୍ୱା ତଂ ପଚ୍ଛା, ଖାଦିତବ୍ବଂ ତୁ ଭିକ୍ଖୁନା ।
ନ ପଞ୍ଞାୟତି ଚେ ତସ୍ମିଂ, ମଲଂ ୱଟ୍ଟତି ଖାଦିତୁଂ ॥
ପିସନ୍ତାନମ୍ପି ଭେସଜ୍ଜଂ, କୋଟ୍ଟେନ୍ତାନମ୍ପି ୱା ତଥା ।
ନିସଦୋଦୁକ୍ଖଲାଦୀନଂ, ଖୀୟନେପି ଅୟଂ ନୟୋ ॥
ଭେସଜ୍ଜତ୍ଥାୟ ତାପେତ୍ୱା, ୱାସିଂ ଖୀରେ ଖିପନ୍ତି ଚେ ।
ଉଟ୍ଠେତି ନୀଲିକା ତତ୍ଥ, ସତ୍ଥକେ ୱିୟ ନିଚ୍ଛୟୋ ॥
ସଚେ ଆମକତକ୍କେ ୱା, ଖୀରେ ୱା ପକ୍ଖିପନ୍ତି ତଂ ।
ସାମପାକନିମିତ୍ତମ୍ହା, ନ ତୁ ମୁଚ୍ଚତି ଦୁକ୍କଟା ॥
ପିଣ୍ଡାୟ ୱିଚରନ୍ତସ୍ସ, ୱସ୍ସକାଲେସୁ ଭିକ୍ଖୁନୋ ।
ପତ୍ତେ ପତତି ଚେ ତୋୟଂ, କିଲିଟ୍ଠଂ କାୟୱତ୍ଥତୋ ॥
ପଚ୍ଛା ପଟିଗ୍ଗହେତ୍ୱା ତଂ, ଭୁଞ୍ଜିତବ୍ବଂ ୟଥାସୁଖଂ ।
ଏସେୱ ଚ ନୟୋ ୱୁତ୍ତୋ, ରୁକ୍ଖମୂଲେପି ଭୁଞ୍ଜତୋ ॥
ସତ୍ତାହଂ ପନ ୱସ୍ସନ୍ତେ, ଦେୱେ ସୁଦ୍ଧଂ ଜଲଂ ସଚେ ।
ଅବ୍ଭୋକାସେପି ୱା ପତ୍ତେ, ତୋୟଂ ପତତି ୱଟ୍ଟତି ॥
ଓଦନଂ ପନ ଦେନ୍ତେନ, ସାମଣେରସ୍ସ ଭିକ୍ଖୁନା ।
ଦାତବ୍ବୋ ଅଚ୍ଛୁପନ୍ତେନ, ତସ୍ସ ପତ୍ତଗତୋଦନଂ ॥
ପଟିଗ୍ଗହେତ୍ୱା ୱା ପତ୍ତଂ, ଦାତବ୍ବୋ ତସ୍ସ ଓଦନୋ ।
ଛୁପିତ୍ୱା ଦେତି ଚେ ଭତ୍ତଂ, ତଂ ପନୁଗ୍ଗହିତଂ ସିୟା ॥
ଅଞ୍ଞସ୍ସ ଦାତୁକାମେନ, ପରିଚ୍ଚତ୍ତଂ ସଚେ ପନ ।
ୟାୱ ହତ୍ଥଗତଂ ତାୱ, ପଟିଗ୍ଗହିତମେୱ ତଂ ॥
‘‘ଗଣ୍ହା’’ତି ନିରପେକ୍ଖୋୱ, ପତ୍ତମାଧାରକେ ଠିତଂ ।
ସଚେ ୱଦତି ପଚ୍ଛା ତଂ, ପଟିଗ୍ଗଣ୍ହେୟ୍ୟ ପଣ୍ଡିତୋ ॥
ସାପେକ୍ଖୋୟେୱ ୟୋ ପତ୍ତଂ, ଠପେତ୍ୱାଧାରକେ ପନ ।
‘‘ଏତ୍ତୋ ପୂୱମ୍ପି ଭତ୍ତଂ ୱା, କିଞ୍ଚି ଗଣ୍ହା’’ତି ଭାସତି ॥
ସାମଣେରୋପି ତଂ ଭତ୍ତଂ, ଧୋୱିତ୍ୱା ହତ୍ଥମତ୍ତନୋ ।
ଅତ୍ତପତ୍ତଗତଂ ଭତ୍ତଂ, ଅଫୁସିତ୍ୱା ସଚେ ପନ ॥
ପକ୍ଖିପନ୍ତୋ ସତକ୍ଖତ୍ତୁଂ, ଉଦ୍ଧରିତ୍ୱାପି ଗଣ୍ହତୁ ।
ତଂପଟିଗ୍ଗହଣେ କିଚ୍ଚଂ, ପୁନ ତସ୍ସ ନ ୱିଜ୍ଜତି ॥
ଅତ୍ତପତ୍ତଗତଂ ଭତ୍ତଂ, ଫୁସିତ୍ୱା ୟଦି ଗଣ୍ହତି ।
ପଚ୍ଛା ପଟିଗ୍ଗହେତବ୍ବଂ, ସଂସଟ୍ଠତ୍ତା ପରେନ ତଂ ॥
ଭିକ୍ଖୂନଂ ୟାଗୁଆଦୀନଂ, ପଚନେ ଭାଜନେ ପନ ।
ପକ୍ଖିପିତ୍ୱା ଠପେନ୍ତେନ, ଅଞ୍ଞସ୍ସତ୍ଥାୟ ଓଦନଂ ॥
ଭାଜନୁପରି ହତ୍ଥେସୁ, ସାମଣେରସ୍ସ ପକ୍ଖିପେ ।
ପତିତଂ ହତ୍ଥତୋ ତସ୍ମିଂ, ନ କରୋତି ଅକପ୍ପିୟଂ ॥
ପରିଚ୍ଚତ୍ତଞ୍ହି ତଂ ଏୱଂ, ଅକତ୍ୱାକିରତେୱ ଚେ ।
ଭୁଞ୍ଜିତବ୍ବଂ ତୁ ତଂ କତ୍ୱା, ପତ୍ତଂ ୱିୟ ନିରାମିସଂ ॥
ସଚେ ୟାଗୁକୁଟଂ ପୁଣ୍ଣଂ, ସାମଣେରୋ ହି ଦୁବ୍ବଲୋ ।
ଭିକ୍ଖୁଂ ପଟିଗ୍ଗହାପେତୁଂ, ନ ସକ୍କୋତି ହି ତଂ ପୁନ ॥
କୁଟସ୍ସ ଗୀୱଂ ପତ୍ତସ୍ସ, ଠପେତ୍ୱା ମୁଖୱଟ୍ଟିୟଂ ।
ଭିକ୍ଖୁନା ଉପନୀତସ୍ସ, ଆୱଜ୍ଜେତି ହି ୱଟ୍ଟତି ॥
ଅଥ ୱା ଭୂମିୟଂୟେୱ, ହତ୍ଥେ ଭିକ୍ଖୁ ଠପେତି ଚେ ।
ଆରୋପେତି ପୱଟ୍ଟେତ୍ୱା, ତତ୍ଥ ଚେ ପନ ୱଟ୍ଟତି ॥
ଭତ୍ତପଚ୍ଛୁଚ୍ଛୁଭାରେସୁ, ଅୟମେୱ ୱିନିଚ୍ଛୟୋ ।
ଦ୍ୱେ ତୟୋ ସାମଣେରା ୱା, ଦେନ୍ତି ଚେ ଗହଣୂପଗଂ ॥
ଭାରମେକସ୍ସ ଭିକ୍ଖୁସ୍ସ, ଗହେତୁଂ ପନ ୱଟ୍ଟତି ।
ଏକେନ ୱା ତଥା ଦିନ୍ନଂ, ଗଣ୍ହନ୍ତି ଦ୍ୱେ ତୟୋପି ୱା ॥
ମଞ୍ଚସ୍ସ ପାଦେ ପୀଠସ୍ସ, ପାଦେ ତେଲଘଟାଦିକଂ ।
ଲଗ୍ଗେନ୍ତି ତତ୍ଥ ଭିକ୍ଖୁସ୍ସ, ୱଟ୍ଟତେୱ ନିସୀଦିତୁଂ ॥
ଅପ୍ପଟିଗ୍ଗହିତଂ ହେଟ୍ଠା-ମଞ୍ଚେ ଚେ ତେଲଥାଲକଂ ।
ସମ୍ମୁଜ୍ଜନ୍ତୋ ଚ ଘଟ୍ଟେତି, ନ ପନୁଗ୍ଗହିତଂ ସିୟା ॥
ପଟିଗ୍ଗହିତସଞ୍ଞାୟ, ଅପ୍ପଟିଗ୍ଗହିତଂ ପନ ।
ଗଣ୍ହିତ୍ୱା ପୁନ ତଂ ଞତ୍ୱା, ଠପେତୁଂ ତତ୍ଥ ୱଟ୍ଟତି ॥
ୱିୱରିତ୍ୱା ସଚେ ପୁବ୍ବେ, ଠପିତଂ ପିହିତମ୍ପି ଚ ।
ତଥେୱ ତଂ ଠପେତବ୍ବଂ, କତ୍ତବ୍ବଂ ନ ପନଞ୍ଞଥା ॥
ବହି ଠପେତି ଚେ ତେନ, ଛୁପିତବ୍ବଂ ନ ତଂ ପୁନ ।
ୟଦି ଛୁପତି ଚେ ଞତ୍ୱା, ତଂ ପନୁଗ୍ଗହିତଂ ସିୟା ॥
ପଟିଗ୍ଗହିତତେଲସ୍ମିଂ, ଉଟ୍ଠେତି ୟଦି କଣ୍ଣକା ।
ସିଙ୍ଗୀୱେରାଦିକେ ମୂଲେ, ଘନଚୁଣ୍ଣମ୍ପି ୱା ତଥା ॥
ତଂସମୁଟ୍ଠାନତୋ ସବ୍ବଂ, ତଞ୍ଞେୱାତି ପୱୁଚ୍ଚତି ।
ପଟିଗ୍ଗହଣକିଚ୍ଚଂ ତୁ, ତସ୍ମିଂ ପୁନ ନ ୱିଜ୍ଜତି ॥
ତାଲଂ ୱା ନାଳିକେରଂ ୱା, ଆରୁଳ୍ହୋ କୋଚି ପୁଗ୍ଗଲୋ ।
ତତ୍ରଟ୍ଠୋ ତାଲପିଣ୍ଡିଂ ସୋ, ଓତାରେତ୍ୱାନ ରଜ୍ଜୁୟା ॥
ସଚେ ୱଦତି ‘‘ଗଣ୍ହା’’ତି, ନ ଗହେତବ୍ବମେୱ ଚ ।
ତମଞ୍ଞୋ ପନ ଭୂମଟ୍ଠୋ, ଗହେତ୍ୱା ଦେତି ୱଟ୍ଟତି ॥
ଛିନ୍ଦିତ୍ୱା ଚେ ୱତିଂ ଉଚ୍ଛୁଂ, ଫଲଂ ୱା ଦେତି ଗଣ୍ହିତୁଂ ।
ଦଣ୍ଡକେ ଅଫୁସିତ୍ୱାୱ, ନିଗ୍ଗତଂ ପନ ୱଟ୍ଟତି ॥
ସଚେ ନ ପୁଥୁଲୋ ହୋତି, ପାକାରୋ ଅତିଉଚ୍ଚକୋ ।
ଅନ୍ତୋଟ୍ଠିତବହିଟ୍ଠାନଂ, ହତ୍ଥପାସୋ ପହୋତି ଚେ ॥
ଉଦ୍ଧଂ ହତ୍ଥସତଂ ଗନ୍ତ୍ୱା, ସମ୍ପତ୍ତଂ ପୁନ ତଂ ପନ ।
ଗଣ୍ହତୋ ଭିକ୍ଖୁନୋ ଦୋସୋ, କୋଚି ନେୱୂପଲବ୍ଭତି ॥
ଭିକ୍ଖୁନୋ ସାମଣେରଂ ତୁ, ଖନ୍ଧେନ ୱହତୋ ସଚେ ।
ଫଲଂ ଗହେତ୍ୱା ତତ୍ଥେୱ, ନିସିନ୍ନୋ ଦେତି ୱଟ୍ଟତି ॥
ଅପରୋପି ୱହନ୍ତୋୱ, ଭିକ୍ଖୁଂ ୟୋ କୋଚି ପୁଗ୍ଗଲୋ ।
ଫଲଂ ଖନ୍ଧେ ନିସିନ୍ନସ୍ସ, ଭିକ୍ଖୁନୋ ଦେତି ୱଟ୍ଟତି ॥
ଗହେତ୍ୱା ଫଲିନିଂ ସାଖଂ, ଛାୟତ୍ଥଂ ୟଦି ଗଚ୍ଛତି ।
ପୁନ ଚିତ୍ତେ ସମୁପ୍ପନ୍ନେ, ଖାଦିତୁଂ ପନ ଭିକ୍ଖୁନୋ ॥
ସାଖଂ ପଟିଗ୍ଗହାପେତ୍ୱା, ଫଲଂ ଖାଦତି ୱଟ୍ଟତି ।
ମକ୍ଖିକାନଂ ନିୱାରତ୍ଥଂ, ଗହିତାୟପ୍ୟୟଂ ନୟୋ ॥
କପ୍ପିୟଂ ପନ କାରେତ୍ୱା, ପଟିଗ୍ଗଣ୍ହାତି ତଂ ପୁନ ।
ଭୋତ୍ତୁକାମୋ ସଚେ ମୂଲ-ଗହଣଂୟେୱ ୱଟ୍ଟତି ॥
ମାତାପିତୂନମତ୍ଥାୟ, ଗହେତ୍ୱା ସପ୍ପିଆଦିକଂ ।
ଗଚ୍ଛନ୍ତୋ ଅନ୍ତରାମଗ୍ଗେ, ୟଂ ଇଚ୍ଛତି ତତୋ ପନ ॥
ତଂ ସୋ ପଟିଗ୍ଗହାପେତ୍ୱା, ପରିଭୁଞ୍ଜତି ୱଟ୍ଟତି ।
ତଂ ପଟିଗ୍ଗହିତଂ ମୂଲ-ଗହଣଂୟେୱ ୱଟ୍ଟତି ॥
ସାମଣେରସ୍ସ ପାଥେୟ୍ୟ-ତଣ୍ଡୁଲେ ଭିକ୍ଖୁ ଗଣ୍ହତି ।
ଭିକ୍ଖୁସ୍ସ ସାମଣେରୋପି, ଗହେତ୍ୱା ପନ ଗଚ୍ଛତି ॥
ତଣ୍ଡୁଲେସୁ ହି ଖୀଣେସୁ, ଅତ୍ତନା ଗହିତେସୁ ସୋ ।
ସଚେ ୟାଗୁଂ ପଚିତ୍ୱାନ, ତଣ୍ଡୁଲେହିତରେହିପି ॥
ଉଭିନ୍ନଂ ଦ୍ୱୀସୁ ପତ୍ତେସୁ, ଆକିରିତ୍ୱା ପନତ୍ତନୋ ।
ୟାଗୁଂ ଭିକ୍ଖୁସ୍ସ ତଂ ଦତ୍ୱା, ସୟଂ ପିୱତି ତସ୍ସ ଚେ ॥
ସନ୍ନିଧିପଚ୍ଚୟା ନେୱ, ନ ଉଗ୍ଗହିତକାରଣା ।
ସାମଣେରସ୍ସ ପୀତତ୍ତା, ଦୋସୋ ଭିକ୍ଖୁସ୍ସ ୱିଜ୍ଜତି ॥
ମାତାପିତୂନମତ୍ଥାୟ, ତେଲାଦିଂ ହରତୋପି ଚ ।
ସାଖଂ ଛାୟାଦିଅତ୍ଥାୟ, ଇମସ୍ସ ନ ୱିସେସତା ॥
ତସ୍ମା ହିସ୍ସ ୱିସେସସ୍ସ, ଚିନ୍ତେତବ୍ବଂ ତୁ କାରଣଂ ।
ତସ୍ସ ସାଲୟଭାୱଂ ତୁ, ୱିସେସଂ ତକ୍କୟାମହଂ ॥
ତଣ୍ଡୁଲେ ପନ ଧୋୱିତ୍ୱା, ନିଚ୍ଚାଲେତୁଞ୍ହି ଚେଲକୋ ।
ନ ସକ୍କୋତି ସଚେ ତେ ଚ, ତଣ୍ଡୁଲେ ଭାଜନମ୍ପି ଚ ॥
ପଟିଗ୍ଗହେତ୍ୱା ଧୋୱିତ୍ୱା, ଆରୋପେତ୍ୱା ପନୁଦ୍ଧନଂ ।
ଭିକ୍ଖୁନାଗ୍ଗି ନ କାତବ୍ବୋ, ୱିୱରିତ୍ୱାପି ପକ୍କତା ॥
ଞାତବ୍ବା ପକ୍କକାଲସ୍ମିଂ, ଓରୋପେତ୍ୱା ୟଥାସୁଖଂ ।
ଭୁଞ୍ଜିତବ୍ବଂ, ନ ପଚ୍ଛସ୍ସ, ପଟିଗ୍ଗହଣକାରଣଂ ॥
ଆରୋପେତ୍ୱା ସଚେ ଭିକ୍ଖୁ, ଉଦ୍ଧନଂ ସୁଦ୍ଧଭାଜନଂ ।
ଉଦକଂ ୟାଗୁଅତ୍ଥାୟ, ତାପେତି ୟଦି ୱଟ୍ଟତି ॥
ତତ୍ତେ ପନୁଦକେ କୋଚି, ଚେ ପକ୍ଖିପତି ତଣ୍ଡୁଲେ ।
ତତୋ ପଟ୍ଠାୟ ତେନଗ୍ଗି, ନ କାତବ୍ବୋୱ ଭିକ୍ଖୁନା ॥
ପଟିଗ୍ଗହେତ୍ୱା ତଂ ୟାଗୁଂ, ପାତୁଂ ୱଟ୍ଟତି ଭିକ୍ଖୁନୋ ।
ସଚେ ପଚତି ପଚ୍ଛା ତଂ, ସାମପାକା ନ ମୁଚ୍ଚତି ॥
ତତ୍ଥଜାତଫଲଂ କିଞ୍ଚି, ସହ ଚାଲେତି ୱଲ୍ଲିୟା ।
ତସ୍ସେୱ ଚ ତତୋ ଲଦ୍ଧଂ, ଫଲଂ କିଞ୍ଚି ନ ୱଟ୍ଟତି ॥
ଫଲରୁକ୍ଖଂ ପରାମଟ୍ଠୁଂ, ତମପସ୍ସୟିତୁମ୍ପି ୱା ।
କଣ୍ଟକେ ବନ୍ଧିତୁଂ ୱାପି, ଭିକ୍ଖୁନୋ କିର ୱଟ୍ଟତି ॥
ସଣ୍ଡାସେନ ଚ ଦୀଘେନ, ଗହେତ୍ୱା ଥାଲକଂ ପନ ।
ପଚତୋ ଭିକ୍ଖୁନୋ ତେଲଂ, ଭସ୍ମଂ ପତତି ତତ୍ଥ ଚେ ॥
ଅମୁଞ୍ଚନ୍ତେନ ହତ୍ଥେନ, ପଚିତ୍ୱା ତେଲଥାଲକଂ ।
ଓତାରେତ୍ୱାୱ ତଂ ପଚ୍ଛା, ପଟିଗ୍ଗଣ୍ହେୟ୍ୟ ୱଟ୍ଟତି ॥
ପଟିଗ୍ଗହେତ୍ୱା ଅଙ୍ଗାରେ, ତାନି ଦାରୂନି ୱା ପନ ।
ଠପିତାନି ସଚେ ହୋନ୍ତି, ପୁବ୍ବଗାହୋୱ ୱଟ୍ଟତି ॥
ଉଚ୍ଛୁଂ ଖାଦତି ଚେ ଭିକ୍ଖୁ, ସାମଣେରୋପି ଇଚ୍ଛତି ।
‘‘ଛିନ୍ଦିତ୍ୱା ତ୍ୱମିତୋ ଗଣ୍ହ’’, ଇତି ୱୁତ୍ତୋ ଚ ଗଣ୍ହତି ॥
ନତ୍ଥେୱ ଅୱସେସସ୍ସ, ପଟିଗ୍ଗହଣକାରଣଂ ।
ଖାଦତୋ ଗୁଳପିଣ୍ଡମ୍ପି, ଅୟମେୱ ୱିନିଚ୍ଛୟୋ ॥
କାତୁଂ ସାଗରତୋୟେନ, ଲୋଣକିଚ୍ଚଂ ତୁ ୱଟ୍ଟତି ।
ୟାୱଜୀୱିକସଙ୍ଖାତଂ, ତୋୟତ୍ତା ନ ତୁ ଗଚ୍ଛତି ॥
ଇଦଂ କାଲୱିନିମ୍ମୁତ୍ତଂ, ଉଦକଂ ପରିଦୀପିତଂ ।
ନିବ୍ବାନଂ ୱିୟ ନିବ୍ବାନ-କୁସଲେନ ମହେସିନା ॥
ଉଦକେନ ସମା ୱୁତ୍ତା, ହିମସ୍ସ କରକାପି ଚ ।
କୂପାଦୀସୁ ଜଲଂ ପାତୁଂ, ବହଲମ୍ପି ଚ ୱଟ୍ଟତି ॥
ଖେତ୍ତେସୁ କସିତଟ୍ଠାନେ, ବହଲଂ ତଂ ନ ୱଟ୍ଟତି ।
ସନ୍ଦିତ୍ୱା ୟଦି ତଂ ଗନ୍ତ୍ୱା, ନଦିଂ ପୂରେତି ୱଟ୍ଟତି ॥
ସୋବ୍ଭେସୁ କକୁଧାଦୀନଂ, ଜଲେ ପୁପ୍ଫସମାକୁଲେ ।
ନ ଞାୟତି ରସୋ ତେସଂ, ନ ପଟିଗ୍ଗହଣକାରଣଂ ॥
ସରେଣୁକାନି ପୁପ୍ଫାନି, ପାନୀୟସ୍ସ ଘଟେ ପନ ।
ପକ୍ଖିତ୍ତାନି ସଚେ ହୋନ୍ତି, ପଟିଗ୍ଗଣ୍ହେୟ୍ୟ ତଂ ପନ ॥
ପଟିଗ୍ଗହେତ୍ୱା ଦେୟ୍ୟାନି, ୱାସପୁପ୍ଫାନି ତତ୍ଥ ୱା ।
କମଲ୍ଲିକାସୁ ଦିନ୍ନାସୁ, ଅବ୍ବୋହାରୋତି ୱଟ୍ଟତି ॥
ଅପ୍ପଟିଗ୍ଗହିତସ୍ସେୱ, ଦନ୍ତକଟ୍ଠସ୍ସ ୟୋ ରସୋ ।
ଅଜାନନ୍ତସ୍ସ ପାଚିତ୍ତି, ସୋ ଚେ ୱିସତି ଖାଦତୋ ॥
ସରୀରଟ୍ଠେସୁ ଭୂତେସୁ, କିଂ ୱଟ୍ଟତି ? ନ ୱଟ୍ଟତି ?
କପ୍ପାକପ୍ପିୟମଂସାନଂ, ଖୀରଂ ସବ୍ବମ୍ପି ୱଟ୍ଟତି ॥
କଣ୍ଣକ୍ଖିଗୂଥକୋ ଦନ୍ତ- ମଲଂ ମୁତ୍ତଂ କରୀସକଂ ।
ସେମ୍ହଂ ସିଙ୍ଘାଣିକା ଖେଳୋ, ଅସ୍ସୁ ଲୋଣନ୍ତି ୱଟ୍ଟତି ॥
ୟଂ ପନେତ୍ଥ ସକଟ୍ଠାନା, ଚୱିତ୍ୱା ପତିତଂ ସିୟା ।
ପତ୍ତେ ୱା ପନ ହତ୍ଥେ ୱା, ପଟିଗ୍ଗଣ୍ହେୟ୍ୟ ତଂ ପୁନ ॥
ଅଙ୍ଗଲଗ୍ଗମୱିଚ୍ଛନ୍ନଂ, ପଟିଗ୍ଗହିତମେୱ ତଂ ।
ଉଣ୍ହୟାଗୁଂ ପିୱନ୍ତସ୍ସ, ସେଦୋ ହତ୍ଥେସୁ ଜାୟତି ॥
ପିଣ୍ଡାୟ ୱିଚରନ୍ତସ୍ସ, ସେଦୋ ହତ୍ଥାନୁସାରତୋ ।
ଓରୋହତି ସଚେ ପତ୍ତଂ, ନ ପଟିଗ୍ଗହଣକାରଣଂ ॥
ସାମଂ ଗହେତ୍ୱା ଚତ୍ତାରି, ୱିକଟାନି ନଦାୟକେ ।
ସପ୍ପଦଟ୍ଠକ୍ଖଣେୟେୱ, ନ ଦୋସୋ ପରିଭୁଞ୍ଜତୋ ॥
ପଥୱିଂ ମତ୍ତିକତ୍ଥାୟ, ଖଣିତୁଂ ଛିନ୍ଦିତୁମ୍ପି ୱା ।
ତରୁମ୍ପି ଛାରିକତ୍ଥାୟ, ଭିକ୍ଖୁନୋ ପନ ୱଟ୍ଟତି ॥
ଅଚ୍ଛେଦଗାହନିରପେକ୍ଖନିସଜ୍ଜତୋ ଚ ।
ସିକ୍ଖପ୍ପହାନମରଣେହି ଚ ଲିଙ୍ଗଭେଦା ।
ଦାନେନ ତସ୍ସ ଚ ପରସ୍ସ ଅଭିକ୍ଖୁକସ୍ସ ।
ସବ୍ବଂ ପଟିଗ୍ଗହଣମେତି ୱିନାସମେୱଂ ॥
ଦୁରୂପଚିଣ୍ଣେ ନିଦ୍ଦିଟ୍ଠଂ, ଗହଣୁଗ୍ଗହିତସ୍ସପି ।
ଅନ୍ତୋୱୁତ୍ଥେ ସୟଂପକ୍କେ, ଅନ୍ତୋପକ୍କେ ଚ ଦୁକ୍କଟଂ ॥
ପଟିଗ୍ଗହିତକେ ତସ୍ମିଂ, ଅପ୍ପଟିଗ୍ଗହିତସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ପଟିଗ୍ଗହିତସଞ୍ଞିସ୍ସ, ଦନ୍ତପୋନୋଦକେସୁପି ।
ନ ଦୋସେଳକଲୋମେନ, ସମୁଟ୍ଠାନାଦୟୋ ସମା ॥
ନୱମଜ୍ଝିମଥେରଭିକ୍ଖୁନୀନଂ ।
ଅୱିସେସେନ ୟତିଚ୍ଛିତବ୍ବକୋ ।
ସକଲୋ ଅସମାସତୋୱ ମୟା ।
କଥିତୋ ଏତ୍ଥ ୱିନିଚ୍ଛୟୋ ତତୋ ॥
ଦନ୍ତପୋନକଥା ।
ଭୋଜନୱଗ୍ଗୋ ଚତୁତ୍ଥୋ ।
ୟଂ କିଞ୍ଚିଚେଲକାଦୀନଂ, ତିତ୍ଥିୟାନଂ ପନାମିସଂ ।
ଦେନ୍ତସ୍ସେକପୟୋଗେନ, ଏକଂ ପାଚିତ୍ତିୟଂ ସିୟା ॥
ୱିଚ୍ଛିନ୍ଦିତ୍ୱାନ ଦେନ୍ତସ୍ସ, ପୟୋଗଗଣନାୱସା ।
ହୋନ୍ତି ପାଚିତ୍ତିୟୋ ତସ୍ସ, ତିକପାଚିତ୍ତିୟଂ ସିୟା ॥
ଉଦକଂ ଦନ୍ତପୋନଂ ୱା, ଦେନ୍ତସ୍ସ ଚ ଅତିତ୍ଥିୟେ ।
ତିତ୍ଥିୟୋତି ଚ ସଞ୍ଞିସ୍ସ, ଦୁକ୍କଟଂ ୱିମତିସ୍ସ ଚ ॥
ଦାପେନ୍ତସ୍ସ ପନଞ୍ଞେନ, ସାମଣେରାଦିକେନ ୱା ।
ନିକ୍ଖିତ୍ତଭାଜନେ ତେସଂ, ଦେନ୍ତସ୍ସ ବହିଲେପନଂ ॥
ଠପେତ୍ୱା ଭୋଜନଂ ତେସଂ, ସନ୍ତିକେ ‘‘ଗଣ୍ହଥା’’ତି ଚ ।
ୱଦନ୍ତସ୍ସ ଅନାପତ୍ତି, ସମୁଟ୍ଠାନେଳକୂପମଂ ॥
ଅଚେଲକକଥା ।
ଦାପେତ୍ୱା ୱା ଅଦାପେତ୍ୱା, ଭିକ୍ଖୁ ୟଂ କିଞ୍ଚି ଆମିସଂ ।
କତ୍ତୁକାମୋ ସଚେ ସଦ୍ଧିଂ, ହସନାଦୀନି ଇତ୍ଥିୟା ॥
ଉୟ୍ୟୋଜେତି ହି ‘‘ଗଚ୍ଛା’’ତି, ୱତ୍ୱା ତପ୍ପଚ୍ଚୟା ପନ ।
ତସ୍ସୁୟ୍ୟୋଜନମତ୍ତସ୍ମିଂ, ଦୁକ୍କଟଂ ପଠମେନ ଚ ॥
ପାଦେନସ୍ସୁପଚାରସ୍ମିଂ, ଅତିକ୍କନ୍ତେ ଚ ଦୁକ୍କଟଂ ।
ଦୁତିୟେନସ୍ସ ପାଚିତ୍ତି, ସୀମାତିକ୍କମନେ ପନ ॥
ଦସ୍ସନେ ଉପଚାରସ୍ସ, ହତ୍ଥା ଦ୍ୱାଦସ ଦେସିତା ।
ପମାଣଂ ସୱନେ ଚେୱଂ, ଅଜ୍ଝୋକାସେ ନ ଚେତରେ ॥
ଭିକ୍ଖୁସ୍ମିଂ ତିକପାଚିତ୍ତି, ଇତରେ ତିକଦୁକ୍କଟଂ ।
ଉଭିନ୍ନଂ ଦୁକ୍କଟଂ ୱୁତ୍ତଂ, କଲିସାସନରୋପନେ ॥
ଉୟ୍ୟୋଜେନ୍ତସ୍ସ କିଚ୍ଚେନ, ନ ଦୋସୁମ୍ମତ୍ତକାଦିନୋ ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଉୟ୍ୟୋଜନକଥା ।
ଖୁଦ୍ଦକେ ପିଟ୍ଠିୱଂସଂ ୟୋ, ଅତିକ୍କମ୍ମ ନିସୀଦତି ।
ସଭୋଜନେ କୁଲେ ତସ୍ସ, ହୋତି ପାଚିତ୍ତି ଭିକ୍ଖୁନୋ ॥
ହତ୍ଥପାସଂ ଅତିକ୍କମ୍ମ, ପିଟ୍ଠିସଙ୍ଘାଟକସ୍ସ ଚ ।
ସୟନସ୍ସ ପନାସନ୍ନେ, ଠାନେ ଦୋସୋ ମହଲ୍ଲକେ ॥
ଅସୟନିଘରେ ତସ୍ସ, ସୟନିଘରସଞ୍ଞିନୋ ।
ତତ୍ଥ ୱେମତିକସ୍ସାପି, ଦୁକ୍କଟଂ ପରିଦୀପିତଂ ॥
ନିସୀଦନ୍ତସ୍ସନାପତ୍ତି, ଭିକ୍ଖୁସ୍ସ ଦୁତିୟେ ସତି ।
ୱୀତରାଗେସୁ ୱା ତେସୁ, ନିକ୍ଖନ୍ତେସୁ ଉଭୋସୁ ୱା ॥
ନିସିନ୍ନସ୍ସାନତିକ୍କମ୍ମ, ପଦେସଂ ୱୁତ୍ତଲକ୍ଖଣଂ ।
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ॥
ସଭୋଜନକଥା ।
ଚତୁତ୍ଥେ ପଞ୍ଚମେ ଚେୱ, ୱତ୍ତବ୍ବଂ ନତ୍ଥି କିଞ୍ଚିପି ।
ୱତ୍ତବ୍ବଂ ୟଞ୍ଚ ତଂ ସବ୍ବଂ, ୱୁତ୍ତଂ ଅନିୟତଦ୍ୱୟେ ॥
ସମୁଟ୍ଠାନଂ ପନେତେସଂ, ଅନନ୍ତରସମଂ ମତଂ ।
ଅୟମେୱ ୱିସେସୋତି, ତେସମେସଞ୍ଚ ଦୀପିତୋ ॥
ରହୋପଟିଚ୍ଛନ୍ନରହୋନିସଜ୍ଜକଥା ।
ଭୋଜନାନଂ ତୁ ପଞ୍ଚନ୍ନଂ, ୱୁତ୍ତୋ ଅଞ୍ଞତରେନ ୟୋ ।
ସନ୍ତଂ ଭିକ୍ଖୁମନାପୁଚ୍ଛା, ଆପଜ୍ଜେୟ୍ୟ କୁଲେସୁ ଚେ ॥
ଚାରିତ୍ତଂ ତସ୍ସ ପାଚିତ୍ତି, ଅଞ୍ଞତ୍ର ସମୟା ସିୟା ।
ଠପେତ୍ୱା ସମୟଂ ଭିକ୍ଖୁ, ଦୁୱିଧଂ ୱୁତ୍ତଲକ୍ଖଣଂ ॥
ଅୱୀତିୱତ୍ତେ ମଜ୍ଝଣ୍ହେ, ଘରମଞ୍ଞସ୍ସ ଗଚ୍ଛତି ।
ଘରୂପଚାରୋକ୍କମନେ, ପଠମେନ ହି ଦୁକ୍କଟଂ ॥
ଅତିକ୍କନ୍ତେ ଘରୁମ୍ମାରେ, ଅପରମ୍ପି ଚ ଦୁକ୍କଟଂ ।
ଦୁତିୟେନ ଚ ପାଦେନ, ପାଚିତ୍ତି ସମତିକ୍କମେ ॥
ଠିତଟ୍ଠାନେ ସଚେ ଭିକ୍ଖୁଂ, ଓଲୋକେତ୍ୱା ନ ପସ୍ସତି ।
‘‘ଅସନ୍ତ’’ନ୍ତି ଅନାପୁଚ୍ଛା, ପୱିଟ୍ଠୋ ନାମ ୱୁଚ୍ଚତି ॥
ସଚେ ଦୂରେ ଠିତୋ ହୋତି, ଅସନ୍ତୋ ନାମ ଭିକ୍ଖୁ ସୋ ।
ନତ୍ଥି ଆରୋଚନେ କିଚ୍ଚଂ, ଗୱେସିତ୍ୱା ଇତୋ ଚିତୋ ॥
ନ ଦୋସୋ ସମୟେ ସନ୍ତଂ, ଆପୁଚ୍ଛିତ୍ୱା ଚ ଗଚ୍ଛତୋ ।
ଭିକ୍ଖୁଂ ଘରେନ ମଗ୍ଗୋ ଚେ, ଆରାମଂ ଗଚ୍ଛତୋପି ଚ ॥
ତିତ୍ଥିୟାନମ୍ପି ସେୟ୍ୟଂ ୱା, ତଥା ଭିକ୍ଖୁନୁପସ୍ସୟଂ ।
ଆପଦାସନସାଲଂ ୱା, ଭତ୍ତିୟସ୍ସ ଘରମ୍ପି ୱା ॥
ଇଦଂ ପନ ସମୁଟ୍ଠାନଂ, କଥିନେନ ସମଂ ମତଂ ।
କ୍ରିୟାକ୍ରିୟମଚିତ୍ତଞ୍ଚ, ତିଚିତ୍ତଞ୍ଚ ତିୱେଦନଂ ॥
ଚାରିତ୍ତକଥା ।
ସବ୍ବାପି ସାଦିତବ୍ବାୱ, ଚତୁମାସପୱାରଣା ।
ଭିକ୍ଖୁନା ଅଗିଲାନେନ, ପୁନ ନିଚ୍ଚପୱାରଣା ॥
‘‘ୱିଞ୍ଞାପେସ୍ସାମି ରୋଗସ୍ମିଂ, ସତି ମେ ପଚ୍ଚୟେ’’ତି ଚ ।
ନ ପଟିକ୍ଖିପିତବ୍ବା ସା, ‘‘ରୋଗୋ ଦାନି ନ ମେ’’ତି ଚ ॥
ତିକପାଚିତ୍ତିୟଂ ୱୁତ୍ତଂ, ଦୁକ୍କଟଂ ନତତୁତ୍ତରିଂ ।
ତତୁତ୍ତରିନ୍ତି ସଞ୍ଞିସ୍ସ, ତତ୍ଥ ୱେମତିକସ୍ସ ଚ ॥
ନତତୁତ୍ତରିସଞ୍ଞିସ୍ସ, ୟେହି ୟେନ ପୱାରିତୋ ।
ତତୋ ଅଞ୍ଞେହି ୱା ଭିୟ୍ୟୋ, ଆଚିକ୍ଖିତ୍ୱା ୟଥାତଥଂ ॥
ୱିଞ୍ଞାପେନ୍ତସ୍ସ ଭିକ୍ଖୁସ୍ସ, ଅଞ୍ଞସ୍ସତ୍ଥାୟ ୱା ପନ ।
ଞାତକାନମନାପତ୍ତି, ଅତ୍ତନୋ ୱା ଧନେନପି ॥
ତଥା ଉମ୍ମତ୍ତକାଦୀନଂ, ଅନାପତ୍ତି ପକାସିତା ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଭେସଜ୍ଜକଥା ।
ଉୟ୍ୟୁତ୍ତଂ ଭିକ୍ଖୁନୋ ସେନଂ, ଦସ୍ସନତ୍ଥାୟ ଗଚ୍ଛତୋ ।
ଅଞ୍ଞତ୍ର ପଚ୍ଚୟା ତସ୍ସ, ଦୁକ୍କଟଂ ତୁ ପଦେ ପଦେ ॥
ଦସ୍ସନସ୍ସୁପଚାରସ୍ମିଂ, ଠତ୍ୱା ପାଚିତ୍ତି ପସ୍ସତୋ ।
ଉପଚାରଂ ୱିମୁଞ୍ଚିତ୍ୱା, ପସ୍ସନ୍ତସ୍ସ ପୟୋଗତୋ ॥
ଆରୋହା ପନ ଚତ୍ତାରୋ, ଦ୍ୱେ ଦ୍ୱେ ତଂପାଦରକ୍ଖକା ।
ଏୱଂ ଦ୍ୱାଦସପୋସୋ ଚ, ଏକୋ ହତ୍ଥୀତି ୱୁଚ୍ଚତି ॥
ଦ୍ୱେପାଦରକ୍ଖା ଆରୋହୋ, ଏକୋ ତିପୁରିସୋହୟୋ।
ଏକୋ ସାରଥି ୟୋଧେକୋ, ଆଣିରକ୍ଖା ଦୁୱେ ଜନା ॥
ଚତୁପୋସୋ ରଥୋ ୱୁତ୍ତୋ, ଚତୁସଚ୍ଚୱିଭାୱିନା ।
ଚତ୍ତାରୋ ପଦହତ୍ଥା ଚ, ପୁରିସା ପତ୍ତୀତି ୱୁଚ୍ଚତି ॥
ୱୁତ୍ତଲକ୍ଖଣସମ୍ପନ୍ନା, ଅୟଂ ପଚ୍ଛିମକୋଟିୟା ।
ଚତୁରଙ୍ଗସମାୟୁତ୍ତା, ସେନା ନାମ ପୱୁଚ୍ଚତି ॥
ହତ୍ଥିଆଦୀସୁ ଏକେକଂ, ଦସ୍ସନତ୍ଥାୟ ଗଚ୍ଛତୋ ।
ଅନୁୟ୍ୟୁତ୍ତେପି ଉୟ୍ୟୁତ୍ତ-ସଞ୍ଞିସ୍ସାପି ଚ ଦୁକ୍କଟଂ ॥
ଅତ୍ତନୋ ଚ ଠିତୋକାସଂ, ସମ୍ପତ୍ତଂ ପନ ପସ୍ସତି ।
ଆପଦାସୁ ଅନାପତ୍ତି, ତଥାରୂପେ ଚ ପଚ୍ଚୟେ ॥
ଉୟ୍ୟୁତ୍ତକଥା ।
ଚତୁତ୍ଥେ ଦିୱସେ ଅତ୍ଥ-ଙ୍ଗତେ ସୂରିୟେ ଅରୋଗୱା ।
ସଚେ ତିଟ୍ଠତୁ ସେନାୟ, ନିସୀଦତୁ ନିପଜ୍ଜତୁ ॥
ଆକାସେ ଇଦ୍ଧିୟା ସେୟ୍ୟଂ, ପକପ୍ପେତୁ ଚ ଇଦ୍ଧିମା ।
ହୋତେୱ ତସ୍ସ ପାଚିତ୍ତି, ତିକପାଚିତ୍ତିୟଂ ସିୟା ॥
ଊନକେ ଚ ତିରତ୍ତସ୍ମିଂ, ଅତିରେକୋତି ସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ପୁରାରୁଣାୱ ନିକ୍ଖମ୍ମ, ତତିୟାୟ ଚ ରତ୍ତିୟା ।
ନ ଦୋସୋ ପୁନ ୱସନ୍ତସ୍ସ, ଗିଲାନସ୍ସାପଦାସୁପି ॥
ସେନାୱାସକଥା ।
ଉୟ୍ୟୋଧିକଂ ବଲଗ୍ଗଂ ୱା, ସେନାବ୍ୟୂହମ୍ପି ୱା ପନ ।
ଦସ୍ସନତ୍ଥାୟନୀକଂ ୱା, ହୋତି ପାଚିତ୍ତି ଗଚ୍ଛତୋ ॥
ପୁରିମେ ପନ ୟୋ ୱୁତ୍ତୋ, ‘‘ହତ୍ଥୀ ଦ୍ୱାଦସପୋରିସୋ’’ ।
ଇତି ତେନ ତୟୋ ହତ୍ଥୀ, ‘‘ହତ୍ଥାନୀକ’’ନ୍ତି ଦୀପିତଂ ॥
ସେସେସୁପି ଚ ଏସେୱ, ନୟୋ ଞେୟ୍ୟୋ ୱିଭାୱିନା ।
ତିଣ୍ଣମେଳକଲୋମେନ, ସମୁଟ୍ଠାନାଦୟୋ ସମା ॥
ଉୟ୍ୟୋଧିକକଥା ।
ଅଚେଳକୱଗ୍ଗୋ ପଞ୍ଚମୋ ।
ପିଟ୍ଠାଦୀହି କତଂ ମଜ୍ଜଂ, ସୁରା ନାମାତି ୱୁଚ୍ଚତି ।
ପୁପ୍ଫାଦୀହି କତୋ ସବ୍ବୋ, ଆସୱୋ ହୋତି ମେରୟଂ॥
ବୀଜତୋ ପନ ପଟ୍ଠାୟ, ପିୱନ୍ତସ୍ସୁଭୟମ୍ପି ଚ ।
ପୟୋଗେ ଚ ପୟୋଗେ ଚ, ହୋତି ପାଚିତ୍ତି ଭିକ୍ଖୁନୋ ॥
ତିକପାଚିତ୍ତିୟଂ ୱୁତ୍ତଂ, ଅମଜ୍ଜେ ମଜ୍ଜସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଅମଜ୍ଜଂ ମଜ୍ଜୱଣ୍ଣଞ୍ଚ, ମଜ୍ଜଗନ୍ଧରସମ୍ପି ଚ ।
ଅରିଟ୍ଠଂ ଲୋଣସୋୱୀରଂ, ସୁତ୍ତକଂ ପିୱତୋପି ଚ ॥
ୱାସଗାହାପନତ୍ଥାୟ, ପକ୍ଖିପିତ୍ୱାନ ଈସକଂ ।
ସୂପାଦୀନଂ ତୁ ପାକେପି, ଅନାପତ୍ତି ପକାସିତା ॥
ହୋତେଳକସମୁଟ୍ଠାନଂ, ଅଚିତ୍ତଂ ୱତ୍ଥୁଜାନନା ।
ଇଦଞ୍ଚାକୁସଲେନେୱ, ପାନତୋ ଲୋକୱଜ୍ଜକଂ ॥
ସୁରାପାନକଥା ।
ୟେନ କେନଚି ଅଙ୍ଗେନ, ହସାଧିପ୍ପାୟିନୋ ପନ ।
ଫୁସତୋ ଉପସମ୍ପନ୍ନଂ, ହୋତି ପାଚିତ୍ତି ଭିକ୍ଖୁନୋ ॥
ସବ୍ବତ୍ଥ ଦୁକ୍କଟଂ କାୟ-ପଟିବଦ୍ଧାଦିକେ ନୟେ ।
ତଥେୱାନୁପସମ୍ପନ୍ନେ, ଦୀପିତଂ ତିକଦୁକ୍କଟଂ ॥
ଏତ୍ଥ ଚାନୁପସମ୍ପନ୍ନ-ଟ୍ଠାନେ ତିଟ୍ଠତି ଭିକ୍ଖୁନୀ ।
ଖିଡ୍ଡାଧିପ୍ପାୟିନୋ ତମ୍ପି, ଫୁସନ୍ତସ୍ସ ଚ ଦୁକ୍କଟଂ ॥
ଅନାପତ୍ତି ନହସାଧି-ପ୍ପାୟସ୍ସ ଫୁସତୋ ପରଂ ।
ସତି କିଚ୍ଚେ ଫୁସନ୍ତସ୍ସ, ତଥା ଉମ୍ମତ୍ତକାଦିନୋ ॥
ଅଙ୍ଗୁଲିପତୋଦକକଥା ।
ଜଲେ ନିମୁଜ୍ଜନାଦୀନ-ମତ୍ଥାୟ ପନ କେୱଲଂ ।
ପଦୱାରେସୁ ସବ୍ବେସୁ, ଓତରନ୍ତସ୍ସ ଦୁକ୍କଟଂ ॥
କୀଳାପେକ୍ଖୋ ସଚେ ହୁତ୍ୱା, ଜଲେ ଉପରିଗୋପ୍ଫକେ ।
ନିମୁଜ୍ଜେୟ୍ୟପି ୱା ଭିକ୍ଖୁ, ଉମ୍ମୁଜ୍ଜେୟ୍ୟ ତରେୟ୍ୟ ୱା ॥
ପୟୋଗେ ଚ ପୟୋଗେ ଚ, ତସ୍ସ ପାଚିତ୍ତିୟଂ ସିୟା ।
ଅନ୍ତୋୟେୱୋଦକେ ତସ୍ସ, ନିମୁଜ୍ଜିତ୍ୱାନ ଗଚ୍ଛତୋ ॥
ହତ୍ଥପାଦପୟୋଗେହି, ପାଚିତ୍ତିଂ ପରିଦୀପୟେ ।
ହତ୍ଥେହେୱ ତରନ୍ତସ୍ସ, ହତ୍ଥୱାରେହି କାରୟେ ॥
ୟେନ ୟେନ ପନଙ୍ଗେନ, ଭିକ୍ଖୁନୋ ତରତୋ ଜଲଂ ।
ତସ୍ସ ତସ୍ସ ପୟୋଗେନ, ପାଚିତ୍ତିଂ ପରିଦୀପୟେ ॥
ତରୁତୋ ତୀରତୋ ୱାପି, ପାଚିତ୍ତି ପତତୋ ଜଲେ ।
ତିକପାଚିତ୍ତିୟଂ ୱୁତ୍ତଂ, ତଥେୱ ତିକଦୁକ୍କଟଂ ॥
ପାଜେନ୍ତୋପି ସଚେ ନାୱଂ, ଅରିତ୍ତେନ ଫିୟେନ ୱା ।
ଉସ୍ସାରେନ୍ତୋପି ତୀରେ ୱା, ନାୱଂ କୀଳତି ଦୁକ୍କଟଂ ॥
ହତ୍ଥେନ ୱାପି ପାଦେନ, କଟ୍ଠେନ କଥଲାୟ ୱା ।
ଉଦକଂ ନୀହରନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ଉଦକଂ କଞ୍ଜିକଂ ୱାପି, ଚିକ୍ଖଲ୍ଲଂ ୱାପି ୱିକ୍ଖିପଂ ।
କୀଳନ୍ତସ୍ସାପି ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ୱିଗାହିତ୍ୱା ଜଲଂ କିଚ୍ଚେ, ସତି ନିମ୍ମୁଜ୍ଜନାଦିକଂ ।
କରୋନ୍ତସ୍ସ ଅନାପତ୍ତି, ତଥା ପାରଞ୍ଚ ଗଚ୍ଛତୋ ॥
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ।
ଅନନ୍ତରସ୍ସିମସ୍ସାପି, ନତ୍ଥି କାଚି ୱିସେସତା ॥
ହସଧମ୍ମକଥା ।
ୱୁଚ୍ଚମାନୋ ସଚେ ଭିକ୍ଖୁ, ପଞ୍ଞତ୍ତେନେୱ ଭିକ୍ଖୁନା ।
ଅକତ୍ତୁକାମତାୟସ୍ସ, ୱଚନଂ ଧମ୍ମମେୱ ୱା ॥
ୟୋ ଅସିକ୍ଖିତୁକାମୋୱ, ନ କରୋତି ପନାଦରଂ ।
ତସ୍ସାନାଦରିୟେ ତସ୍ମିଂ, ପାଚିତ୍ତିୟମୁଦୀରୟେ ॥
ତିକପାଚିତ୍ତିୟଂ ୱୁତ୍ତଂ, ତିକାତୀତେନ ସତ୍ଥୁନା ।
ତଥେୱାନୁପସମ୍ପନ୍ନା-ନାଦରେ ତିକଦୁକ୍କଟଂ ॥
ସୁତ୍ତେନେୱାଭିଧମ୍ମେନ, ଅପଞ୍ଞତ୍ତେନ ଭିକ୍ଖୁନା ।
ଦୁକ୍କଟଂ ସାମଣେରେନ, ୱୁତ୍ତସ୍ସ ଉଭୟେନପି ॥
‘‘ଆଚରିୟାନମୟଂ ଗାହୋ, ଅମ୍ହାକଂ ତୁ ପୱେଣିୟା ।
ଆଗତୋ’’ତି ଭଣନ୍ତସ୍ସ, ନ ଦୋସୁମ୍ମତ୍ତକାଦିନୋ ॥
ଏତ୍ଥ ନେୱ ଗହେତବ୍ବୋ, ଗାରୟ୍ହାଚରିୟୁଗ୍ଗହୋ ।
ଓମସୱାଦତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଅନାଦରିୟକଥା ।
ଭୟସଞ୍ଜନନତ୍ଥାୟ, ରୂପାଦିଂ ଉପସଂହରେ ।
ଭୟାନକଂ କଥଂ ୱାପି, କଥେୟ୍ୟ ପରସନ୍ତିକେ ॥
ଦିସ୍ୱା ୱା ପନ ତଂ ସୁତ୍ୱା, ମା ୱା ଭାୟତୁ, ଭାୟତୁ ।
ଇତରସ୍ସ ତୁ ଭିକ୍ଖୁସ୍ସ, ହୋତି ପାଚିତ୍ତି ତଙ୍ଖଣେ ॥
ତିକପାଚିତ୍ତିୟଂ ୱୁତ୍ତଂ, ତଥେୱ ତିକଦୁକ୍କଟଂ ।
ସାମଣେରଂ ଗହଟ୍ଠଂ ୱା, ଭିଂସାପେନ୍ତସ୍ସ ଭିକ୍ଖୁନୋ ॥
ନଭିଂସାପେତୁକାମସ୍ସ, ଅନାପତ୍ତାଦିକମ୍ମିନୋ ।
ସମୁଟ୍ଠାନାଦି ସବ୍ବମ୍ପି, ଅନନ୍ତରସମଂ ମତଂ ॥
ଭିଂସାପନକଥା ।
ଜୋତିଂ ତପ୍ପେତୁକାମୋ ଚେ, ଜଲାପେୟ୍ୟ ଜଲେୟ୍ୟ ୱା ।
ଠପେତ୍ୱା ହୋତି ପାଚିତ୍ତି, ତଥାରୂପଂ ତୁ ପଚ୍ଚୟଂ ॥
ସୟଂ ସମାଦହନ୍ତସ୍ସ, ୟାୱ ଜାଲା ନ ଜାୟତି ।
ତାୱ ସବ୍ବପୟୋଗେସୁ, ହୋତି ଆପତ୍ତି ଦୁକ୍କଟଂ ॥
ଜାଲୁଟ୍ଠାନେ ପନାପତ୍ତି, ପାଚିତ୍ତି ପରିଦୀପିତା ।
ଜାଲାପେନ୍ତସ୍ସ ଅଞ୍ଞେନ, ହୋତି ଆପତ୍ତି ଦୁକ୍କଟଂ ॥
ଗିଲାନସ୍ସ ଗିଲାନୋତି, ସଞ୍ଞିସ୍ସ ୱିମତିସ୍ସ ୱା ।
ଅଲାତଂ ଉକ୍ଖିପନ୍ତସ୍ସ, ଅୱିଜ୍ଝାତଂ ତୁ ଦୁକ୍କଟଂ ॥
ୱିଜ୍ଝାତଂ ତୁଜ୍ଜଲନ୍ତସ୍ସ, ୟଥାୱତ୍ଥୁକତା ମତା ।
ଅନାପତ୍ତି ଗିଲାନସ୍ସ, କତଂ ଅଞ୍ଞେନ ୱା ପନ ॥
ୱିସିବ୍ବେନ୍ତସ୍ସ ଅଙ୍ଗାରଂ, ପଦୀପୁଜ୍ଜାଲନାଦିକେ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଜୋତିସମାଦହନକଥା ।
ଅପୁଣ୍ଣେ ଅଦ୍ଧମାସସ୍ମିଂ, ଦେସେ ଚେ ମଜ୍ଝିମେ ପନ ।
‘‘ନ୍ହାୟିସ୍ସାମୀ’’ତି ଚୁଣ୍ଣଂ ୱା, ମତ୍ତିକଂ ୱାପି ଗୋମୟଂ ॥
ଅଭିସଙ୍ଖରତୋ ସବ୍ବ-ପୟୋଗେସୁପି ଦୁକ୍କଟଂ ।
ନ୍ହାନସ୍ସ ପରିୟୋସାନେ, ହୋତି ପାଚିତ୍ତି ଭିକ୍ଖୁନୋ ॥
ଅତିରେକଦ୍ଧମାସୂନ-ସଞ୍ଞିନୋ ୱିମତିସ୍ସ ୱା ।
ଦୁକ୍କଟଂ ଅତିରେକଦ୍ଧ- ମାସେ ଚ ସମୟେସୁ ଚ ॥
ନ୍ହାୟନ୍ତସ୍ସ ଅନାପତ୍ତି, ନଦୀପାରମ୍ପି ଗଚ୍ଛତୋ ।
ୱାଲିକଂ ଉକ୍କିରିତ୍ୱାନ, କତାୱାଟେସୁ ୱା ତଥା ॥
ପଚ୍ଚନ୍ତିମେପି ୱା ଦେସେ, ସବ୍ବେସଂ ଆପଦାସୁପି ।
ଇଦମେଳକଲୋମେନ, ସମୁଟ୍ଠାନାଦିନା ସମଂ ॥
ନ୍ହାନକଥା ।
ଚୀୱରଂ ୟଂ ନିୱାସେତୁଂ, ସକ୍କା ପାରୁପିତୁମ୍ପି ୱା ।
ଛନ୍ନମଞ୍ଞତରଂ ଭିକ୍ଖୁ, ରଜିତ୍ୱା ୟତ୍ଥ କତ୍ଥଚି ॥
ପଦେସେ କଂସନୀଲେନ, ପତ୍ତନୀଲେନ ୱା ପନ ।
ୟେନ କେନଚି କାଳେନ, କଦ୍ଦମେନପି ୱା ତଥା ॥
ମଙ୍ଗୁଲସ୍ସ ମୟୂରସ୍ସ, ପିଟ୍ଠିଅକ୍ଖିପ୍ପମାଣକଂ ।
ଅକତ୍ୱା କପ୍ପିୟଂ ବିନ୍ଦୁଂ, ପାଚିତ୍ତି ପରିଭୁଞ୍ଜତୋ ॥
ପାଳିକଣ୍ଣିକକପ୍ପୋ ୱା, ନ ଚ ୱଟ୍ଟତି କତ୍ଥଚି ।
ଏକଂ ୱାପି ଅନେକଂ ୱା, ବିନ୍ଦୁ ୱଟ୍ଟତି ୱଟ୍ଟକଂ ॥
ଆଦିନ୍ନେପି ଅନାଦିନ୍ନ-ସଞ୍ଞିନୋ ୱିମତିସ୍ସ ଚ ।
ଦୁକ୍କଟଂ ମୁନିନା ୱୁତ୍ତଂ, ଅନାପତ୍ତି ପକାସିତା ॥
କପ୍ପେ ନଟ୍ଠେପି ୱା ସଦ୍ଧିଂ, ତେନ ସଂସିବ୍ବିତେସୁ ୱା ।
କ୍ରିୟାକ୍ରିୟମିଦଂ ୱୁତ୍ତଂ, ସମୁଟ୍ଠାନେଳକୂପମଂ ॥
ଦୁବ୍ବଣ୍ଣକରଣକଥା ।
ୱିକପ୍ପନା ଦୁୱେ ୱୁତ୍ତା, ସମ୍ମୁଖାସମ୍ମୁଖାତିପି ।
ସମ୍ମୁଖାୟ ୱିକପ୍ପେନ୍ତୋ, ଭିକ୍ଖୁସ୍ସେକସ୍ସ ସନ୍ତିକେ ॥
ଏକତ୍ତଂ ବହୁଭାୱଂ ୱା, ଦୂରସନ୍ତିକତମ୍ପି ୱା ।
ଚୀୱରାନଂ ତୁ ଜାନିତ୍ୱା, ୟଥାୱଚନୟୋଗତୋ ॥
‘‘ଇମାହଂ ଚୀୱରଂ ତୁୟ୍ହଂ, ୱିକପ୍ପେମୀ’’ତି ନିଦ୍ଦିସେ ।
କପ୍ପତେତ୍ତାୱତା କାମଂ, ନିଧେତୁଂ, ନ ଚ କପ୍ପତି ॥
ପରିଭୋଗାଦିକଂ ତେନ, ଅପଚ୍ଚୁଦ୍ଧଟତୋ ପନ ।
ତେନ ପଚ୍ଚୁଦ୍ଧଟେୟେୱ, ପରିଭୋଗାଦି ୱଟ୍ଟତି ॥
‘‘ସନ୍ତକଂ ପନ ମୟ୍ହଂ ତ୍ୱଂ, ପରିଭୁଞ୍ଜ ପରିଚ୍ଚଜ ।
ୟଥାପଚ୍ଚୟଂ କରୋହୀ’’ତି, ୱୁତ୍ତେ ପଚ୍ଚୁଦ୍ଧଟଂ ସିୟା ॥
ଅପରା ସମ୍ମୁଖା ୱୁତ୍ତା, ଭିକ୍ଖୁସ୍ସେକସ୍ସ ସନ୍ତିକେ ।
ୟସ୍ସ କସ୍ସଚି ନାମଂ ତୁ, ଗହେତ୍ୱା ସହଧମ୍ମିନଂ ॥
‘‘ଇମାହଂ ଚୀୱରଂ ତିସ୍ସ- ଭିକ୍ଖୁନୋ, ତିସ୍ସଥେରିୟା ।
ୱିକପ୍ପେମୀ’’ତି ୱତ୍ତବ୍ବଂ, ୱତ୍ତବ୍ବଂ ପୁନ ତେନପି ॥
‘‘ତିସ୍ସସ୍ସ ଭିକ୍ଖୁନୋ ୱା ତ୍ୱଂ, ତସ୍ସା ତିସ୍ସାୟ ଥେରିୟା ।
ସନ୍ତକଂ ପରିଭୁଞ୍ଜାହି, ୱିସ୍ସଜ୍ଜେହୀ’’ତି ୱା ତଥା ॥
ତତୋ ପଭୁତି ସବ୍ବମ୍ପି, ପରିଭୋଗାଦି ୱଟ୍ଟତି ।
ଏୱଂ ପରମ୍ମୁଖାୟାପି, ୱତ୍ତବ୍ବଂ ଏକସନ୍ତିକେ ॥
‘‘ଇମାହଂ ଚୀୱରଂ ତୁୟ୍ହଂ, ୱିକପ୍ପତ୍ଥାୟ ଦମ୍ମି’’ତି ।
ପୁନ ତେନପି ୱତ୍ତବ୍ବଂ, ‘‘କୋ ତେ ମିତ୍ତୋ’’ତି ଭିକ୍ଖୁନା ॥
ଇତରେନପି ୱତ୍ତବ୍ବଂ, ‘‘ତିସ୍ସୋ ତିସ୍ସା’’ତି ୱା ପୁନ ।
ୱତ୍ତବ୍ବଂ ଭିକ୍ଖୁନା ତେନ, ‘‘ଇଦଂ ତିସ୍ସସ୍ସ ସନ୍ତକଂ ॥
ତିସ୍ସାୟ ଥେରିୟା ୱା ତ୍ୱଂ, ସନ୍ତକଂ ପରିଭୁଞ୍ଜ ୱା ।
ୱିସ୍ସଜ୍ଜେହୀ’’ତି ୱା ୱୁତ୍ତେ, ହୋତି ପଚ୍ଚୁଦ୍ଧଟଂ ପୁନ ॥
ଇଚ୍ଚେତାସୁ ପନ ଦ୍ୱୀସୁ, ୟାୟ କାୟଚି ଚୀୱରଂ ।
ୱିକପ୍ପେତ୍ୱା ସଧମ୍ମେସୁ, ୟସ୍ସ କସ୍ସଚି ପଞ୍ଚସୁ ॥
ଅପଚ୍ଚୁଦ୍ଧାରକଂ ୱାପି, ଅୱିସ୍ସାସେନ ତସ୍ସ ୱା ।
ୟେନ ତଂ ୱିନୟଂ କମ୍ମଂ, କତଂ ପନିଧ ଭିକ୍ଖୁନା ॥
ଚୀୱରଂ ପରିଭୁଞ୍ଜେୟ୍ୟ, ହୋତି ପାଚିତ୍ତି ଭିକ୍ଖୁନୋ ।
ତଞ୍ଚେୱାଧିଟ୍ଠହନ୍ତସ୍ସ, ୱିସ୍ସଜ୍ଜନ୍ତସ୍ସ ଦୁକ୍କଟଂ ॥
ପଚ୍ଚୁଦ୍ଧାରକୱତ୍ଥେସୁ, ଅପଚ୍ଚୁଦ୍ଧାରସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ପଚ୍ଚୁଦ୍ଧାରଣସଞ୍ଞିସ୍ସ, ୱିସ୍ସାସା ପରିଭୁଞ୍ଜତୋ ।
ଅନାପତ୍ତି ସମୁଟ୍ଠାନଂ, କଥିନେନାଦିନା ସମଂ ॥
ୱିକପ୍ପନକଥା ।
ଅଧିଟ୍ଠାନୁପଗଂ ପତ୍ତଂ, ଚୀୱରଂ ୱାପି ତାଦିସଂ ।
ତଥା ସୂଚିଘରଂ କାୟ-ବନ୍ଧନଂ ୱା ନିସୀଦନଂ ॥
ଅପନେତ୍ୱା ନିଧେନ୍ତସ୍ସ, ହସାପେକ୍ଖସ୍ସ କେୱଲଂ ।
ହୋତି ପାଚିତ୍ତିୟଂ ଅଞ୍ଞଂ, ଆଣାପେନ୍ତସ୍ସ ଦୁକ୍କଟଂ ॥
ତେନାପନିହିତେ ତସ୍ସ, ପାଚିତ୍ତିଂ ପରିଦୀପୟେ ।
ୱୁତ୍ତଂ ଅନୁପସମ୍ପନ୍ନ-ସନ୍ତକେ ତିକଦୁକ୍କଟଂ ॥
ୱିନା ୱୁତ୍ତପ୍ପକାରାନି, ପତ୍ତାଦୀନି ତତୋ ପନ ।
ଅଞ୍ଞଂ ଅପନିଧେନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ସବ୍ବେସ୍ୱନୁପସମ୍ପନ୍ନ-ସନ୍ତକେସୁପି ଦୁକ୍କଟଂ ।
ଦୁନ୍ନିକ୍ଖିତ୍ତମନାପତ୍ତି, ପଟିସାମୟତୋ ପନ ॥
ତଥା ‘‘ଧମ୍ମକଥଂ କତ୍ୱା, ଦସ୍ସାମୀ’’ତି ନିଧେତି ଚେ ।
ଅୱିହେସେତୁକାମସ୍ସ, ଅକୀଳସ୍ସାଦିକମ୍ମିନୋ ॥
ସମୁଟ୍ଠାନାଦୟୋ ତୁଲ୍ୟା, ଦୁତିୟନ୍ତିମୱତ୍ଥୁନା ।
ଇଦଂ ଅକୁସଲେନେୱ, ସଚିତ୍ତଞ୍ଚ ତିୱେଦନଂ ॥
ଚୀୱରାପନିଧାନକଥା ।
ସୁରାପାନୱଗ୍ଗୋ ଛଟ୍ଠୋ ।
ତିରଚ୍ଛାନଗତଂ ପାଣଂ, ମହନ୍ତଂ ଖୁଦ୍ଦକମ୍ପି ୱା ।
ହୋତି ପାଚିତ୍ତିୟାପତ୍ତି, ମାରେନ୍ତସ୍ସସ୍ସ ଭିକ୍ଖୁନୋ ॥
ଅପ୍ପାଣେ ପାଣସଞ୍ଞିସ୍ସ, ୱିମତିସ୍ସୁଭୟତ୍ଥ ଚ ।
ଦୁକ୍କଟଂ ତୁ ଅନାପତ୍ତି, ଅସଞ୍ଚିଚ୍ଚ ଅଜାନତୋ ॥
ନ ଚ ମାରେତୁକାମସ୍ସ, ତଥା ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ତୁଲ୍ୟା, ତତିୟନ୍ତିମୱତ୍ଥୁନା ॥
ସଞ୍ଚିଚ୍ଚପାଣକଥା ।
ସପ୍ପାଣକଂ ଜଲଂ ଜାନଂ, ପାଚିତ୍ତି ପରିଭୁଞ୍ଜତୋ ।
ପୟୋଗବହୁତାୟସ୍ସ, ପାଚିତ୍ତିବହୁତା ସିୟା ॥
ଏକେନେୱ ପୟୋଗେନ, ଅୱିଚ୍ଛିଜ୍ଜ ସଚେ ପନ ।
ପିୱତୋ ପତ୍ତପୂରମ୍ପି, ଏକଂ ପାଚିତ୍ତିୟଂ ସିୟା ॥
ତାଦିସେନୁଦକେନସ୍ସ, ଆୱିଞ୍ଛିତ୍ୱାନ ସାମିସଂ ।
ଧୋୱତୋ ପନ ପତ୍ତଂ ୱା, ନିବ୍ବାପେନ୍ତସ୍ସ ୟାଗୁୟୋ ॥
ହତ୍ଥେନ ତଂ ଉଳୁଙ୍କେନ, ଗହେତ୍ୱା ନ୍ହାୟତୋପି ୱା ।
ପୟୋଗେ ଚ ପୟୋଗେ ଚ, ପାଚିତ୍ତି ପରିଦୀପିତା ॥
ଅପ୍ପାଣକେପି ସପ୍ପାଣ-ସଞ୍ଞିସ୍ସ ଉଭୟତ୍ଥପି ।
ୱିମତିସ୍ସାପି ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ସପ୍ପାଣେପି ଚ ଅପ୍ପାଣେ, ଅପ୍ପାଣମିତି ସଞ୍ଞିନୋ ।
ନ ଦୋସୋ ‘‘ପରିଭୋଗେନ, ନ ମରନ୍ତୀ’’ତି ଜାନତୋ ॥
ପତନଂ ସଲଭାଦୀନଂ, ଞତ୍ୱା ସୁଦ୍ଧେନ ଚେତସା ।
ପଦୀପୁଜ୍ଜଲନଞ୍ଚେତ୍ଥ, ଞତ୍ୱା ସପ୍ପାଣଭାୱତଂ ॥
ଭୁଞ୍ଜତୋ ଜଲସଞ୍ଞାୟ, ଞେୟ୍ୟା ପଣ୍ଣତ୍ତିୱଜ୍ଜତା ।
ସିଞ୍ଚନେ ସିଞ୍ଚନଂ ୱୁତ୍ତଂ, ପରିଭୋଗେ ଇଦଂ ପନ ॥
ଅୟମେୱ ୱିସେସୋତି, ତସ୍ସ ଚେୱ ପନସ୍ସ ଚ ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ସପ୍ପାଣକକଥା ।
ନିହତଂ ତୁ ୟଥାଧମ୍ମଂ, କିଚ୍ଚାଧିକରଣଂ ପୁନ ।
ନିହାତବ୍ବନ୍ତି ପାଚିତ୍ତି, ଉକ୍କୋଟେନ୍ତସ୍ସ ଭିକ୍ଖୁନୋ ॥
‘‘ଅକତଂ ଦୁକ୍କତଂ କମ୍ମଂ, କାତବ୍ବଂ ପୁନଦେୱି’’ତି ।
ୱଦତା ପନ ତଂ କମ୍ମଂ, ଉଚ୍ଚାଲେତୁଂ ନ ୱଟ୍ଟତି ॥
ସଚେ ୱିପ୍ପକତେ କମ୍ମେ, ପଟିକ୍କୋସତି ତଂ ପୁନ ।
ସଞ୍ଞାପେତ୍ୱାୱ କାତବ୍ବଂ, ନ କାତବ୍ବଂ ପନଞ୍ଞଥା ॥
ଅଧମ୍ମେ ପନ କମ୍ମସ୍ମିଂ, ଧମ୍ମକମ୍ମନ୍ତି ସଞ୍ଞିନୋ ।
ୱିମତିସ୍ସୁଭୟତ୍ଥାପି, ହୋତି ଆପତ୍ତି ଦୁକ୍କଟଂ ॥
‘‘ଅଧମ୍ମେନ ଚ ୱଗ୍ଗେନ, ନ ଚ କମ୍ମାରହସ୍ସ ୱା ।
କତ’’ନ୍ତି ଜାନତୋ ନତ୍ଥି, ଦୋସୋ ଉକ୍କୋଟନେ ପନ ॥
ତଥା ଉମ୍ମତ୍ତକାଦୀନ-ମନାପତ୍ତି ପକାସିତା ।
ଓମସୱାଦତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଉକ୍କୋଟନକଥା ।
ସଙ୍ଘାଦିସେସଂ ଦୁଟ୍ଠୁଲ୍ଲଂ, ଆପତ୍ତିଂ ଭିକ୍ଖୁନୋ ପନ ।
ଞତ୍ୱା ଛାଦୟତୋ ତସ୍ସ, ପାଚିତ୍ତି ପରିୟାପୁତା ॥
ନିକ୍ଖିପିତ୍ୱା ଧୁରଂ ତସ୍ସ, ପଟିଚ୍ଛାଦନହେତୁକଂ ।
ଆରୋଚେତି ସଚଞ୍ଞସ୍ସ, ସୋପି ଅଞ୍ଞସ୍ସ ୱାତି ହି ॥
ଏୱଂ ସତମ୍ପି ଭିକ୍ଖୂନଂ, ସହସ୍ସମ୍ପି ଚ ତାୱ ତଂ ।
ଆପଜ୍ଜତେୱ ଆପତ୍ତିଂ, ୟାୱ କୋଟି ନ ଛିଜ୍ଜତି ॥
ମୂଲେନାରୋଚିତସ୍ସେୱ, ଦୁତିୟସ୍ସ ପକାସିତେ ।
ତତିୟେନ ନିୱତ୍ତିତ୍ୱା, କୋଟି ଛିନ୍ନାତି ୱୁଚ୍ଚତି ॥
ଦୁଟ୍ଠୁଲ୍ଲାୟ ଚ ଦୁଟ୍ଠଲ୍ଲ-ସଞ୍ଞୀ ପାଚିତ୍ତିୟଂ ଫୁସେ ।
ଇତରେସୁ ପନ ଦ୍ୱୀସୁ, ଦୁକ୍କଟଂ ପରିଦୀପିତଂ ॥
ଅଦୁଟ୍ଠୁଲ୍ଲାୟ ସବ୍ବତ୍ଥ, ନିଦ୍ଦିଟ୍ଠଂ ତିକଦୁକ୍କଟଂ ।
ସବ୍ବତ୍ଥାନୁପସମ୍ପନ୍ନ-ୱାରେସୁପି ଚ ଦୁକ୍କଟଂ ॥
‘‘ସଙ୍ଘସ୍ସ ଭେଦନାଦୀନି, ଭୱିସ୍ସନ୍ତୀ’’ତି ୱା ପନ ।
ନ ଚ ଛାଦେତୁକାମୋ ୱା, ସଭାଗଂ ୱା ନ ପସ୍ସତି ॥
‘‘ପଞ୍ଞାୟିସ୍ସତି କମ୍ମେନ, ସକେନାୟନ୍ତି କକ୍ଖଳୋ’’ ।
ଅନାରୋଚେତି ଚେ ଦୋସୋ, ନତ୍ଥି ଉମ୍ମତ୍ତକାଦିନୋ ॥
ଧୁରନିକ୍ଖେପତୁଲ୍ୟାୱ, ସମୁଟ୍ଠାନାଦୟୋ ନୟା ।
କାୟକମ୍ମଂ ୱଚୀକମ୍ମଂ, ଅକ୍ରିୟଂ ଦୁକ୍ଖୱେଦନଂ ॥
ଦୁଟ୍ଠୁଲ୍ଲକଥା ।
ଊନୱୀସତିୱସ୍ସଂ ୟୋ, କରେୟ୍ୟ ଉପସମ୍ପଦଂ ।
ତସ୍ସ ପାଚିତ୍ତିୟଂ ହୋତି, ସେସାନଂ ହୋତି ଦୁକ୍କଟଂ ॥
ଉପସମ୍ପାଦିତୋ ଚେସୋ, ଜାନତା ୱା ଅଜାନତା ।
ହୋତେୱାନୁପସମ୍ପନ୍ନୋ, କାତବ୍ବୋ ପୁନରେୱ ସୋ ॥
ଦସୱସ୍ସଚ୍ଚୟେନସ୍ସ, ଉପଜ୍ଝାୟସ୍ସ ଚେ ସତୋ ।
ଉପସମ୍ପାଦନେ ଦୋସୋ, ଅଞ୍ଞେସଂ ନତ୍ଥି କୋଚିପି ॥
ମୁଞ୍ଚିତ୍ୱା ପନ ତଂ ଭିକ୍ଖୁଂ, ଗଣୋ ଚେ ପରିପୂରତି ।
ହୋନ୍ତି ତେ ସୂପସମ୍ପନ୍ନା, ନ ଦୋସୋ କୋଚି ୱିଜ୍ଜତି ॥
ଉପଜ୍ଝାୟୋ ସଚେ ହୁତ୍ୱା, ଗଣଂ ଆଚରିୟମ୍ପି ୱା ।
ପରିୟେସତି ପତ୍ତଂ ୱା, ସମ୍ମନ୍ନତି ଚ ମାଳକଂ ॥
‘‘ଉପସମ୍ପାଦୟିସ୍ସାମି’’, ଇତି ସବ୍ବେସୁ ତସ୍ସ ହି ।
ଞତ୍ତିୟା ଚ ତଥା ଦ୍ୱୀସୁ, କମ୍ମୱାଚାସୁ ଦୁକ୍କଟଂ ॥
କମ୍ମୱାଚାୟ ଓସାନେ, ପାଚିତ୍ତି ପରିଦୀପିତା ।
ଊନୱୀସତିସଞ୍ଞିସ୍ସ, ପରିପୁଣ୍ଣେପି ପୁଗ୍ଗଲେ ॥
ୱିମତିସ୍ସୁଭୟତ୍ଥାପି, ହୋତି ଆପତ୍ତି ଦୁକ୍କଟଂ ।
ପରିପୁଣ୍ଣୋତି ସଞ୍ଞିସ୍ସ, ଉଭୟତ୍ଥ ନ ଦୋସତା ॥
ତଥା ଉମ୍ମତ୍ତକସ୍ସାପି, ଆଦିକମ୍ମିକଭିକ୍ଖୁନୋ ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଊନୱୀସତିକଥା ।
ଥେୟ୍ୟସତ୍ଥେନ ଜାନନ୍ତୋ, ସଂୱିଧାୟ ସଚେ ପନ ।
ମଗ୍ଗଂ ଗଚ୍ଛତି ସଦ୍ଧିଂ ୟୋ, ତସ୍ସ ପାଚିତ୍ତିୟଂ ସିୟା ॥
ଗମନେ ସଂୱିଧାନେ ଚ, ୱତ୍ତବ୍ବୋ ୟୋ ୱିନିଚ୍ଛୟୋ ।
ସୋ ଚ ଭିକ୍ଖୁନିୱଗ୍ଗସ୍ମିଂ, ୱୁତ୍ତତ୍ତା ନ ଚ ଉଦ୍ଧଟୋ ॥
ମଗ୍ଗାଟୱିୱିସଙ୍କେତେ, ୟଥାୱତ୍ଥୁକମେୱ ତୁ ।
ତେସ୍ୱସଂୱିଦହନ୍ତେସୁ, ସୟଂ ୱିଦହତୋପି ଚ ॥
ତଥେୱାଥେୟ୍ୟସତ୍ଥେପି, ଥେୟ୍ୟସତ୍ଥନ୍ତି ସଞ୍ଞିନୋ ।
ୱିମତିସ୍ସୁଭୟତ୍ଥାପି, ହୋତି ଆପତ୍ତି ଦୁକ୍କଟଂ ॥
ଅଥେୟ୍ୟସତ୍ଥସଞ୍ଞିସ୍ସ, ଅସଂୱିଦହତୋପି ଚ ।
ଆପଦାସୁ ଅନାପତ୍ତି, ୱିସଙ୍କେତେ ଚ କାଲିକେ ॥
ଥେୟ୍ୟସତ୍ଥସମୁଟ୍ଠାନଂ, କଥିତଂ କାୟଚିତ୍ତତୋ ।
କାୟୱାଚାଚିତ୍ତତୋ ଚ, ତିଚିତ୍ତଞ୍ଚ ତିୱେଦନଂ ॥
ଥେୟ୍ୟସତ୍ଥକଥା ।
ହୋତି ଭିକ୍ଖୁନିୟା ସଦ୍ଧିଂ, ସଂୱିଧାନେନ ସତ୍ତମଂ ।
ସମୁଟ୍ଠାନାଦିନା ତୁଲ୍ୟଂ, ୱିସେସୋ ନତ୍ଥି କୋଚିପି ॥
ସଂୱିଧାନକଥା ।
କମ୍ମଂ କିଲେସୋ ପାକୋ ଚ, ଉପୱାଦୋ ଅତିକ୍କମୋ ।
ଅନ୍ତରାୟକରା ଏତେ, ପଞ୍ଚ ଧମ୍ମା ପକାସିତା ॥
‘‘ଅନନ୍ତରାୟିକା ଏତେ, ୟଥା ହୋନ୍ତି ତଥା ଅହଂ ।
ଦେସିତଂ ମୁନିନା ଧମ୍ମ-ମାଜାନାମୀ’’ତି ୟୋ ୱଦେ ॥
ତିକ୍ଖତ୍ତୁଂ ତେହି ୱତ୍ତବ୍ବୋ, ୟେ ପସ୍ସନ୍ତି ସୁଣନ୍ତି ଚ ।
‘‘ମା ହେୱଂ ଅୱଚାୟସ୍ମା’’, ଇତି ଭିକ୍ଖୂହି ସୋ ପନ ॥
ଦୁକ୍କଟଂ ଅୱଦନ୍ତସ୍ସ, ତଂ ଅନିସ୍ସଜତୋପି ଚ ।
ଞତ୍ତିୟା ଚ ତଥା ଦ୍ୱୀହି, କମ୍ମୱାଚାହି ଦୁକ୍କଟଂ ॥
କମ୍ମୱାଚାୟ ଓସାନେ, ପାଚିତ୍ତି ପରିଦୀପିତା ।
ତିକପାଚିତ୍ତିୟଂ ୱୁତ୍ତଂ, ଅଧମ୍ମେ ତିକଦୁକ୍କଟଂ ॥
ନାପତ୍ତାକତକମ୍ମସ୍ସ, ପଟିନିସ୍ସଜତୋପି ଚ ।
ସମୁଟ୍ଠାନାଦୟୋ ସବ୍ବେ, ୱୁତ୍ତା ସମନୁଭାସନେ ॥
ଅରିଟ୍ଠକଥା ।
ଞତ୍ୱାକତାନୁଧମ୍ମେନ, ତଥାୱାଦିକଭିକ୍ଖୁନା ।
ସଂୱସେୟ୍ୟ ଚ ଭୁଞ୍ଜେୟ୍ୟ, ପାଚିତ୍ତି ସହ ସେୟ୍ୟ ୱା ॥
ଉପୋସଥାଦିକଂ କମ୍ମଂ, କରୋତୋ ସହ ତେନ ହି ।
କମ୍ମସ୍ସ ପରିୟୋସାନେ, ତସ୍ସ ପାଚିତ୍ତିୟଂ ସିୟା ॥
ଏକେନେୱ ପୟୋଗେନ, ଗଣ୍ହତୋ ଆମିସଂ ବହୁଂ ।
ଦଦତୋପି ତଥା ଏକଂ, ବହୂନି ଚ ବହୂସ୍ୱପି ॥
ଉକ୍ଖିତ୍ତକେ ନିପନ୍ନସ୍ମିଂ, ଇତରୋ ସେତି ଚେ ପନ ।
ଇତରସ୍ମିଂ ନିପନ୍ନେ ୱା, ପରୋ ସେତି ଉଭୋପି ୱା ॥
ନିପଜ୍ଜନପୟୋଗାନଂ, ୱସେନାପତ୍ତିୟୋ ସିୟୁଂ ।
ଏକନାନୂପଚାରେସୁ, ଏକଚ୍ଛନ୍ନେ ୱିନିଚ୍ଛୟୋ ॥
ଅନୁକ୍ଖିତ୍ତେପି ଉକ୍ଖିତ୍ତ-ସଞ୍ଞିନୋ ପନ ଭିକ୍ଖୁନୋ ।
ୱିମତିସ୍ସୁଭୟତ୍ଥାପି, ଦୁକ୍କଟଂ ପରିଦୀପିତଂ ॥
ଅନାପତ୍ତୁଭୟତ୍ଥାପି, ଅନୁକ୍ଖିତ୍ତକସଞ୍ଞିନୋ ।
ନିସ୍ସଟ୍ଠୋତି ଚ ତଂ ଦିଟ୍ଠିଂ, ସଞ୍ଞିସ୍ସୋସାରିତୋତି ଚ ॥
ତଥା ଉମ୍ମତ୍ତକାଦୀନଂ, ଇଦଂ ପଣ୍ଣତ୍ତିୱଜ୍ଜକଂ ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଉକ୍ଖିତ୍ତକଥା ।
ତଥା ୱିନାସିତଂ ଜାନଂ, ଉପଲାପେୟ୍ୟ ତେନ ୱା ।
ଉପଟ୍ଠାପେୟ୍ୟ ପାଚିତ୍ତି, ସଂଭୁଞ୍ଜେୟ୍ୟ ୱସେୟ୍ୟ ୱା ॥
ସଂୱାସେନ ଚ ଲିଙ୍ଗେନ, ଦଣ୍ଡକମ୍ମେନ ନାସନା ।
ତିସ୍ସୋ ଏତ୍ଥ ଅଧିପ୍ପେତା, ଦଣ୍ଡକମ୍ମେନ ନାସନା ॥
ସମ୍ଭୋଗା ସହସେୟ୍ୟା ଚ, ଅନନ୍ତରସମା ମତା ।
ତତ୍ଥ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ସମୁଟ୍ଠାନାଦୟୋ ସବ୍ବେ, ଅରିଟ୍ଠେନ ସମା ମତା ।
ନ ହେତ୍ଥ କିଞ୍ଚି ୱତ୍ତବ୍ବଂ, ସବ୍ବଂ ଉତ୍ତାନମେୱିଦଂ ॥
କଣ୍ଟକକଥା ।
ସପ୍ପାଣକୱଗ୍ଗୋ ସତ୍ତମୋ ।
ୱୁଚ୍ଚମାନୋ ହି ଭିକ୍ଖୂହି, ଭିକ୍ଖୁ ସିକ୍ଖାପଦେନ ୟୋ ।
‘‘ସିକ୍ଖାପଦେ ପନେତସ୍ମିଂ, ନ ସିକ୍ଖିସ୍ସାମି ତାୱହଂ ॥
ୟାୱ ନାଞ୍ଞଂ ୱିୟତ୍ତଞ୍ଚ, ପକତଞ୍ଞୁଂ ବହୁସ୍ସୁତଂ ।
ପୁଚ୍ଛାମୀ’’ତି ଭଣନ୍ତସ୍ସ, ତସ୍ସ ପାଚିତ୍ତିୟଂ ସିୟା ॥
ସତ୍ଥୁନାନୁପସମ୍ପନ୍ନେ, ଦୀପିତଂ ତିକଦୁକ୍କଟଂ ।
ନ ସଲ୍ଲେଖାୟିଦଂ ହୋତି, ୱୁଚ୍ଚମାନସ୍ସୁଭୋହିପି ॥
ଅପଞ୍ଞତ୍ତେନ ତସ୍ସେୱଂ, ୱଦତୋ ହୋତି ଦୁକ୍କଟଂ ।
ନ ଦୋସୁମ୍ମତ୍ତକାଦୀନଂ, ‘‘ସିକ୍ଖିସ୍ସାମୀ’’ତି ଭାସତୋ ॥
ସହଧମ୍ମିକକଥା ।
ଉଦ୍ଦିଟ୍ଠେହି କିମେତେହି, କୁକ୍କୁଚ୍ଚାଦିନିଦାନତୋ ।
ହୋତି ପାଚିତ୍ତିୟାପତ୍ତି, ସିକ୍ଖାପଦୱିୱଣ୍ଣନେ ॥
ତିକପାଚିତ୍ତିୟଂ ୱୁତ୍ତଂ, ତଥେୱ ତିକଦୁକ୍କଟଂ ।
ୱିୱଣ୍ଣେନୁପସମ୍ପନ୍ନ-ସନ୍ତିକେ ତଂ ସଚେ ପନ ॥
ଦୁକ୍କଟଂ ପନୁଭିନ୍ନମ୍ପି, ଅଞ୍ଞଧମ୍ମୱିୱଣ୍ଣନେ ।
ନୱିୱଣ୍ଣେତୁକାମସ୍ସ, ‘‘ସୁତ୍ତନ୍ତଂ ପରିୟାପୁଣ ॥
ୱିନୟଂ ପନ ପଚ୍ଛାପି, ହନ୍ଦ ପରିୟାପୁଣିସ୍ସସି’’ ।
ଇଚ୍ଚେୱଂ ତୁ ୱଦନ୍ତସ୍ସ, ତଥା ଉମ୍ମତ୍ତକାଦିନୋ ॥
ଅନାପତ୍ତୀତି ଞାତବ୍ବଂ, ସମୁଟ୍ଠାନାଦୟୋ ନୟା ।
ଅନନ୍ତରସ୍ସିମସ୍ସାପି, ଓମସୱାଦସାଦିସା ॥
ୱିଲେଖନକଥା ।
ଅଞ୍ଞାଣେନ ପନାପତ୍ତି, ମୋକ୍ଖୋ ନେୱସ୍ସ ୱିଜ୍ଜତି ।
କାରେତବ୍ବୋ ତଥା ଭିକ୍ଖୁ, ୟଥା ଧମ୍ମୋ ଠିତୋ ପନ ॥
ତସ୍ସାରୋପନିୟୋ ମୋହୋ, ଉତ୍ତରିମ୍ପି ହି ଭିକ୍ଖୁନୋ ।
ଦୁତିୟେନେୱ କମ୍ମେନ, ନିନ୍ଦିତ୍ୱା ତଞ୍ହି ପୁଗ୍ଗଲଂ ॥
ଏୱଂ ଆରୋପିତେ ମୋହେ, ୟଦି ମୋହେତି ୟୋ ପନ ।
ତସ୍ମିଂ ମୋହନକେ ୱୁତ୍ତା, ପାଚିତ୍ତି ପନ ପୁଗ୍ଗଲେ ॥
ଅଧମ୍ମେ ପନ କମ୍ମସ୍ମିଂ, ଦୀପିତଂ ତିକଦୁକ୍କଟଂ ।
ତଥାନାରୋପିତେ ମୋହେ, ଦୁକ୍କଟଂ ପରିକିତ୍ତିତଂ ॥
ନ ଚ ମୋହେତୁକାମସ୍ସ, ୱିତ୍ଥାରେନାସୁତସ୍ସପି ।
ଊନକେ ଦ୍ୱତ୍ତିକ୍ଖତ୍ତୁଂ ୱା, ୱିତ୍ଥାରେନାସୁତସ୍ସ ଚ ॥
ଅନାପତ୍ତୀତି ୱିଞ୍ଞେୟ୍ୟଂ, ତଥା ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
ମୋହନକଥା ।
କୁଦ୍ଧୋ ଦେତି ପହାରଂ ଚେ, ତସ୍ସ ପାଚିତ୍ତିୟଂ ସିୟା ।
ସମ୍ପହରିତୁକାମେନ, ପହାରେ ଭିକ୍ଖୁନୋ ପନ ॥
ଦିନ୍ନେ ଭିଜ୍ଜତୁ ସୀସଂ ୱା, ପାଦୋ ୱା ପରିଭିଜ୍ଜତୁ ।
ସୋ ଚେ ମରତୁ ୱା, ମା ୱା, ପାଚିତ୍ତି ପରିଦୀପିତା ॥
ୱିରୂପକରଣାପେକ୍ଖୋ, ‘‘ଇଚ୍ଚାୟଂ ନ ୱିରୋଚତି’’ ।
କଣ୍ଣଂ ୱା ତସ୍ସ ନାସଂ ୱା, ୟଦି ଛିନ୍ଦତି ଦୁକ୍କଟଂ ॥
ତଥେୱାନୁପସମ୍ପନ୍ନେ, ଇତ୍ଥିୟା ପୁରିସସ୍ସ ୱା ।
ତିରଚ୍ଛାନଗତସ୍ସାପି, ପହାରଂ ଦେତି ଦୁକ୍କଟଂ ॥
ସଚେ ପହରତିତ୍ଥିଞ୍ଚ, ଭିକ୍ଖୁ ରତ୍ତେନ ଚେତସା ।
ଗରୁକା ତସ୍ସ ଆପତ୍ତି, ୱିନିଦ୍ଦିଟ୍ଠା ମହେସିନା ॥
ପହାରଂ ଦେତି ମୋକ୍ଖାଧି-ପ୍ପାୟୋ ଦୋସୋ ନ ୱିଜ୍ଜତି ।
କାୟେନ କାୟବଦ୍ଧେନ, ତଥା ନିସ୍ସଗ୍ଗିୟେନ ୱା ॥
ପସ୍ସିତ୍ୱା ଅନ୍ତରାମଗ୍ଗେ, ଚୋରଂ ପଚ୍ଚତ୍ଥିକମ୍ପି ୱା ।
ହେଠେତୁକାମମାୟନ୍ତଂ, ‘‘ମା ଇଧାଗଚ୍ଛୁପାସକ’’ ॥
ଇତି ୱତ୍ୱା ପନାୟନ୍ତଂ, ‘‘ଗଚ୍ଛ ରେ’’ତି ଚ ମୁଗ୍ଗରଂ ।
ସତ୍ଥଂ ୱାପି ଗହେତ୍ୱା ୱା, ପହରିତ୍ୱା ତୁ ୟାତି ଚେ ॥
ଅନାପତ୍ତି ସଚେ ତେନ, ପହାରେନ ମତେପି ଚ ।
ଏସେୱ ଚ ନୟୋ ୱୁତ୍ତୋ, ଧୁତ୍ତୱାଳମିଗେସୁପି ॥
ତିକପାଚିତ୍ତିୟଂ ୱୁତ୍ତଂ, ସେସେ ଚ ତିକଦୁକ୍କଟଂ ।
କାୟଚିତ୍ତସମୁଟ୍ଠାନଂ, ସଚିତ୍ତଂ ଦୁକ୍ଖୱେଦନଂ ॥
ପହାରକଥା ।
କାୟଂ ୱା କାୟବଦ୍ଧଂ ୱା, ଉଚ୍ଚାରେୟ୍ୟ ସଚେ ପନ ।
ହୋତି ପାଚିତ୍ତିୟାପତ୍ତି, ତସ୍ସୁଗ୍ଗିରଣପଚ୍ଚୟା ॥
ଉଗ୍ଗିରିତ୍ୱା ୱିରଦ୍ଧୋ ସୋ, ପହାରଂ ଦେତି ଚେ ପନ ।
ଅସମ୍ପହରିତୁକାମେନ, ଦିନ୍ନତ୍ତା ଦୁକ୍କଟଂ ସିୟା ॥
ସଚେ ତେନ ପହାରେନ, ପହଟସ୍ସ ଚ ଭିକ୍ଖୁନୋ ।
ହତ୍ଥାଦୀସୁପି ୟଂ କିଞ୍ଚି, ଅଙ୍ଗଂ ଭିଜ୍ଜତି ଦୁକ୍କଟଂ ॥
ସେସୋ ଅନନ୍ତରେ ୱୁତ୍ତ-ନୟେନ ୱିନୟଞ୍ଞୁନା ।
ସମୁଟ୍ଠାନାଦିନା ସଦ୍ଧିଂ, ୱେଦିତବ୍ବୋ ୱିନିଚ୍ଛୟୋ ॥
ତଲସତ୍ତିକଥା ।
ଅମୂଲକେନ ସଙ୍ଘାଦି-ସେସେନ ପନ ଭିକ୍ଖୁ ୟୋ ।
ଚୋଦାପେୟ୍ୟପି ଚୋଦେୟ୍ୟ, ତସ୍ସ ପାଚିତ୍ତିୟଂ ସିୟା ॥
ତିକପାଚିତ୍ତିୟଂ ତତ୍ଥ, ଦିଟ୍ଠାଚାରୱିପତ୍ତିୟା ।
ଚୋଦତୋ ଦୁକ୍କଟାପତ୍ତି, ସେସେ ଚ ତିକଦୁକ୍କଟଂ ॥
ତଥାସଞ୍ଞିସ୍ସନାପତ୍ତି, ତଥା ଉମ୍ମତ୍ତକାଦିନୋ ।
ଓମସୱାଦତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଅମୂଲକକଥା ।
ସଞ୍ଚିଚ୍ଚ ପନ କୁକ୍କୁଚ୍ଚଂ, ଉପ୍ପାଦେନ୍ତସ୍ସ ଭିକ୍ଖୁନୋ ।
‘‘ଊନୱୀସତିୱସ୍ସୋ ତ୍ୱଂ, ମଞ୍ଞେ’’ ଇଚ୍ଚେୱମାଦିନା ॥
ହୋତି ୱାଚାୟ ୱାଚାୟ, ପାଚିତ୍ତି ପନ ଭିକ୍ଖୁନୋ ।
ତଥାରୂପେ ପନଞ୍ଞସ୍ମିଂ, ସଚେ ଅସତି ପଚ୍ଚୟେ ॥
ତିକପାଚିତ୍ତିୟଂ ୱୁତ୍ତଂ, ସେସେ ଚ ତିକଦୁକ୍କଟଂ ।
ନଉପ୍ପାଦେତୁକାମସ୍ସ, କୁକ୍କୁଚ୍ଚଂ ନତ୍ଥି ୱଜ୍ଜତା ॥
‘‘ହିତେସିତାୟହଂ ମଞ୍ଞେ, ନିସିନ୍ନଂ ଇତ୍ଥିୟା ସହ ।
ୱିକାଲେ ଚ ତୟା ଭୁତ୍ତଂ, ମା ଏୱ’’ନ୍ତି ଚ ଭାସତୋ ॥
ତଥା ଉମ୍ମତ୍ତକାଦୀନ-ମନାପତ୍ତି ପକାସିତା ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
ସଞ୍ଚିଚ୍ଚକଥା ।
ସଚେ ଭଣ୍ଡନଜାତାନଂ, ଭିକ୍ଖୂନଂ ପନ ଭିକ୍ଖୁ ୟୋ ।
ତିଟ୍ଠେୟ୍ୟୁପସ୍ସୁତିଂ ସୋତୁଂ, ତସ୍ସ ପାଚିତ୍ତିୟଂ ସିୟା ॥
‘‘ୟଂ ଇମେ ତୁ ଭଣିସ୍ସନ୍ତି, ତଂ ସୋସ୍ସାମୀ’’ତି ଗଚ୍ଛତୋ ।
ଚୋଦେତୁକାମତାୟସ୍ସ, ଦୁକ୍କଟଂ ତୁ ପଦେ ପଦେ ॥
ପୁରତୋ ଗଚ୍ଛତୋ ସୋତୁଂ, ଓହୀୟନ୍ତସ୍ସ ଦୁକ୍କଟଂ ।
ଗଚ୍ଛତୋ ତୁରିତଂ ୱାପି, ଅୟମେୱ ୱିନିଚ୍ଛୟୋ ॥
ଠିତୋକାସଂ ପନାଗନ୍ତ୍ୱା, ୟଦି ମନ୍ତେନ୍ତି ଅତ୍ତନୋ ।
ଉକ୍କାସିତ୍ୱାପି ୱା ଏତ୍ଥ, ଞାପେତବ୍ବମହନ୍ତି ୱା ॥
ତସ୍ସେୱମକରୋନ୍ତସ୍ସ, ପାଚିତ୍ତି ସୱନେ ସିୟା ।
ତିକପାଚିତ୍ତିୟଂ ୱୁତ୍ତଂ, ସେସେ ଚ ତିକଦୁକ୍କଟଂ ॥
‘‘ଇମେସଂ ୱଚନଂ ସୁତ୍ୱା, ଓରମିସ୍ସ’’ନ୍ତି ଗଚ୍ଛତୋ ।
ତଥା ଉମ୍ମତ୍ତକାଦୀନ-ମନାପତ୍ତି ପକାସିତା ॥
ଥେୟ୍ୟସତ୍ଥସମୁଟ୍ଠାନଂ, ଇଦଂ ହୋତି କ୍ରିୟାକ୍ରିୟଂ ।
କାୟକମ୍ମଂ ୱଚୀକମ୍ମଂ, ସଦୋସଂ ଦୁକ୍ଖୱେଦନଂ ॥
ଉପସ୍ସୁତିକଥା ।
ଧମ୍ମିକାନଂ ତୁ କମ୍ମାନଂ, ଛନ୍ଦଂ ଦତ୍ୱା ସଚେ ପନ ।
ପଚ୍ଛା ଖୀୟତି ପାଚିତ୍ତି, ୱାଚତୋ ୱାଚତୋ ସିୟା ॥
ଅଧମ୍ମେ ପନ କମ୍ମସ୍ମିଂ, ଧମ୍ମକମ୍ମନ୍ତି ସଞ୍ଞିନୋ ।
ୱିମତିସ୍ସୁଭୟତ୍ଥାପି, ହୋତି ଆପତ୍ତି ଦୁକ୍କଟଂ ॥
‘‘ଅଧମ୍ମେନ ଚ ୱଗ୍ଗେନ, ତଥାକମ୍ମାରହସ୍ସ ଚ ।
ଇମେ କମ୍ମଂ କରୋନ୍ତୀ’’ତି, ଞତ୍ୱା ଖୀୟତି ତସ୍ସ ଚ ॥
ତଥା ଉମ୍ମତ୍ତକାଦୀନ-ମନାପତ୍ତି ପକାସିତା ।
ଅମୂଲକସମାନାୱ, ସମୁଟ୍ଠାନାଦୟୋ ନୟା ॥
କମ୍ମପଟିବାହନକଥା ।
ୟାୱ ଆରୋଚିତଂ ୱତ୍ଥୁ, ଅୱିନିଚ୍ଛିତମେୱ ୱା ।
ଠପିତା ଞତ୍ତି ୱା ନିଟ୍ଠଂ, କମ୍ମୱାଚା ନ ଗଚ୍ଛତି ॥
ଏତସ୍ମିଂ ଅନ୍ତରେ କମ୍ମଂ, କୋପେତୁଂ ପରିସାୟ ହି ।
ହତ୍ଥପାସଂ ଜହନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ଅଦତ୍ୱା ଜହିତେ ଛନ୍ଦଂ, ତସ୍ସ ପାଚିତ୍ତିୟଂ ସିୟା ।
ଧମ୍ମକମ୍ମେ ଅଧମ୍ମେ ଚ, ୱିମତିସ୍ସ ଚ ଦୁକ୍କଟଂ ॥
ଅଧମ୍ମେପି ଚ କମ୍ମସ୍ମିଂ, ଧମ୍ମକମ୍ମନ୍ତି ସଞ୍ଞିନୋ ।
‘‘ସଙ୍ଘସ୍ସ ଭଣ୍ଡନାଦୀନି, ଭୱିସ୍ସନ୍ତୀ’’ତି ସଞ୍ଞିନୋ ॥
ଗିଲାନୋ ୱା ଗିଲାନସ୍ସ, କରଣୀୟେ ନ ଦୋସତା ।
ନ ଚ କୋପେତୁକାମସ୍ସ, କମ୍ମଂ ପସ୍ସାୱନାଦିନା ॥
ପୀଳିତସ୍ସାଗମିସ୍ସାମି, ଇଚ୍ଚେୱଂ ଗଚ୍ଛତୋପି ୱା ।
ସମଂ ସମନୁଭାସେନ, ସମୁଟ୍ଠାନଂ କ୍ରିୟାକ୍ରିୟଂ ॥
ଛନ୍ଦଂ ଅଦତ୍ୱା ଗମନକଥା ।
ସମଗ୍ଗେନ ଚ ସଙ୍ଘେନ, ସଦ୍ଧିଂ ଦତ୍ୱାନ ଚୀୱରଂ ।
ସମ୍ମତସ୍ସ ହି ଭିକ୍ଖୁସ୍ସ, ପଚ୍ଛା ଖୀୟତି ୟୋ ପନ ॥
ତସ୍ସ ୱାଚାୟ ୱାଚାୟ, ପାଚିତ୍ତି ପରିଦୀପିତା ।
ତିକପାଚିତ୍ତିୟଂ ଧମ୍ମ- କମ୍ମେ ୱୁତ୍ତଂ ତୁ ଚୀୱରଂ ॥
ଠପେତ୍ୱାଞ୍ଞପରିକ୍ଖାରଂ, ଦତ୍ୱା ଖୀୟତି ଦୁକ୍କଟଂ ।
ସଙ୍ଘେନାସମ୍ମତସ୍ସାପି, ଚୀୱରଂ ଅଞ୍ଞମେୱ ୱା ॥
ତଥେୱାନୁପସମ୍ପନ୍ନେ, ସବ୍ବତ୍ଥାପି ଚ ଦୁକ୍କଟଂ ।
ଛନ୍ଦାଦୀନଂ ୱସେନେୱ, କରୋନ୍ତଞ୍ଚ ସଭାୱତୋ ॥
ଖୀୟନ୍ତସ୍ସ ଅନାପତ୍ତି, ତଥା ଉମ୍ମତ୍ତକାଦିନୋ ।
ଅମୂଲକସମା ଞେୟ୍ୟା, ସମୁଟ୍ଠାନାଦୟୋ ନୟା ॥
ଦୁବ୍ବଲକଥା ।
ଇଦଂ ତିଂସକକଣ୍ଡସ୍ମିଂ, ଅନ୍ତିମେନ ଚ ସବ୍ବଥା ।
ତୁଲ୍ୟଂ ଦ୍ୱାଦସମଂ ସବ୍ବଂ, ଅୟମେୱ ୱିସେସତା ॥
ତତ୍ଥ ନିସ୍ସଗ୍ଗିୟଂ ୱୁତ୍ତଂ, ଅତ୍ତନୋ ପରିଣାମନା ।
ଇଧ ସୁଦ୍ଧିକପାଚିତ୍ତି, ପୁଗ୍ଗଲେ ପରିଣାମନା ॥
ପରିଣାମନକଥା ।
ସହଧମ୍ମିକୱଗ୍ଗୋ ଅଟ୍ଠମୋ ।
ଅନିକ୍ଖନ୍ତେ ଚେ ରାଜସ୍ମିଂ, ଅନିକ୍ଖନ୍ତାୟ ଦେୱିୟା ।
ସୟନୀୟଘରା ତସ୍ସ, ଉମ୍ମାରଂ ୟୋ ଅତିକ୍କମେ ॥
ଦୁକ୍କଟଂ ପଠମେ ପାଦେ, ପାଚିତ୍ତି ଦୁତିୟେ ସିୟା ।
ଦେୱିୟା ୱାପି ରଞ୍ଞୋ ୱା, ସଚେ ନ ୱିଦିତାଗମୋ ॥
ପଟିସଂୱିଦିତେ ନେୱ-ପଟିସଂୱିଦିତସଞ୍ଞିନୋ ।
ତତ୍ଥ ୱେମତିକସ୍ସାପି, ଦୁକ୍କଟଂ ପରିଦୀପିତଂ ॥
ପଟିସଂୱିଦିତସଞ୍ଞିସ୍ସ, ନେୱ ଚ ଖତ୍ତିୟସ୍ସ ୱା ।
ନ ଖତ୍ତିୟାଭିସେକେନ, ଅଭିସିତ୍ତସ୍ସ ୱା ପନ ॥
ଉଭୋସୁଭିନ୍ନମଞ୍ଞସ୍ମିଂ, ନିକ୍ଖନ୍ତେ ୱିସତୋପି ୱା ।
ନ ଦୋସୁମ୍ମତ୍ତକାଦୀନଂ, କଥିନେନ କ୍ରିୟାକ୍ରିୟଂ ॥
ଅନ୍ତେପୁରକଥା ।
ରଜତଂ ଜାତରୂପଂ ୱା, ଉଗ୍ଗଣ୍ହନ୍ତସ୍ସ ଅତ୍ତନୋ ।
ତସ୍ସ ନିସ୍ସଗ୍ଗିୟାପତ୍ତି, ଉଗ୍ଗଣ୍ହାପୟତୋପି ୱା ॥
ଗଣପୁଗ୍ଗଲସଙ୍ଘାନଂ, ନୱକମ୍ମସ୍ସ ଚେତିୟେ ।
ଉଗ୍ଗଣ୍ହାପୟତୋ ହୋତି, ଦୁକ୍କଟଂ ଗଣ୍ହତୋପି ୱା ॥
ଅୱସେସଞ୍ଚ ମୁତ୍ତାଦି-ରତନଂ ଅତ୍ତନୋପି ୱା ।
ସଙ୍ଘାଦୀନମ୍ପି ଅତ୍ଥାୟ, ଉଗ୍ଗଣ୍ହନ୍ତସ୍ସ ଦୁକ୍କଟଂ ॥
ସଚେ କପ୍ପିୟୱତ୍ଥୁଂ ୱା, ୱତ୍ଥୁଂ ୱାପି ଅକପ୍ପିୟଂ ।
ତାଲପଣ୍ଣମ୍ପି ୱା ହୋତୁ, ମାତୁକଣ୍ଣପିଲନ୍ଧନଂ ॥
ଭଣ୍ଡାଗାରିକସୀସେନ, ୟଂ କିଞ୍ଚି ଗିହିସନ୍ତକଂ ।
ତସ୍ସ ପାଚିତ୍ତିୟାପତ୍ତି, ପଟିସାମୟତୋ ପନ ॥
‘‘ଇଦଂ ଠପେତ୍ୱା ଦେହୀ’’ତି, ୱୁତ୍ତେନ ପନ କେନଚି ।
‘‘ନ ୱଟ୍ଟତୀ’’ତି ୱତ୍ୱା ତଂ, ନ ନିଧେତବ୍ବମେୱ ତୁ ॥
‘‘ଠପେହୀ’’ତି ଚ ପାତେତ୍ୱା, ସଚେ ଗଚ୍ଛତି ପୁଗ୍ଗଲୋ ।
ପଲିବୋଧୋ ହି ନାମେସୋ, ଠପେତୁଂ ପନ ୱଟ୍ଟତି ॥
ଅନୁଞ୍ଞାତେ ପନଟ୍ଠାନେ, ଉଗ୍ଗହେତ୍ୱା ଅନାଦରା ।
ସମ୍ମା ଅନିକ୍ଖିପନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ଅନୁଞ୍ଞାତେ ପନଟ୍ଠାନେ, ଗହେତ୍ୱା ରତନଂ ପନ ।
ନିକ୍ଖିପନ୍ତସ୍ସ ୱା ସମ୍ମା, ଭଣ୍ଡଂ ରତନସମ୍ମତଂ ॥
ଗଣ୍ହନ୍ତସ୍ସ ଚ ୱିସ୍ସାସଂ, ତାୱକାଲିକମେୱ ଚ ।
ନ ଦୋସୁମ୍ମତ୍ତକାଦୀନଂ, ସଞ୍ଚରିତ୍ତସମୋଦୟଂ ॥
ରତନକଥା ।
ମଜ୍ଝଣ୍ହସମୟା ଉଦ୍ଧଂ, ଅରୁଣୁଗ୍ଗମତୋ ପୁରେ ।
ଏତସ୍ମିଂ ଅନ୍ତରେ କାଲୋ, ୱିକାଲୋତି ପୱୁଚ୍ଚତି ॥
ସନ୍ତଂ ଭିକ୍ଖୁମନାପୁଚ୍ଛା, ୱିକାଲେ ପଚ୍ଚୟଂ ୱିନା ।
ପରିକ୍ଖିତ୍ତସ୍ସ ଗାମସ୍ସ, ପରିକ୍ଖେପୋକ୍କମେ ପନ ॥
ଅପରିକ୍ଖିତ୍ତଗାମସ୍ସ, ଉପଚାରୋକ୍କମେପି ୱା ।
ଦୁକ୍କଟଂ ପଠମେ ପାଦେ, ପାଚିତ୍ତି ଦୁତିୟେ ସିୟା ॥
ଅଥ ସମ୍ବହୁଲା ଗାମଂ, ୱିକାଲେ ପୱିସନ୍ତି ଚେ ।
ଆପୁଚ୍ଛିତ୍ୱାୱ ଗନ୍ତବ୍ବଂ, ଅଞ୍ଞମଞ୍ଞଂ ନ ଚଞ୍ଞଥା ॥
ଗଚ୍ଛନ୍ତି ଚେ ତତୋ ଅଞ୍ଞଂ, ତତୋ ଅଞ୍ଞନ୍ତି ୱଟ୍ଟତି ।
ପୁନ ଆପୁଚ୍ଛନେ କିଚ୍ଚଂ, ନତ୍ଥି ଗାମସତେପି ଚ ॥
ପସ୍ସମ୍ଭେତ୍ୱାନ ଉସ୍ସାହଂ, ୱିହାରତ୍ଥାୟ ନିଗ୍ଗତା ।
ପୱିସନ୍ତି ସଚେ ଅଞ୍ଞଂ, ପୁଚ୍ଛିତବ୍ବଂ ତୁ ଅନ୍ତରା ॥
କତ୍ୱା କୁଲଘରେ ଭତ୍ତ- କିଚ୍ଚଂ ଅଞ୍ଞତ୍ଥ ୱା ପନ ।
ସଚେ ଚରିତୁକାମୋ ୟୋ, ସପ୍ପିଭିକ୍ଖାୟ ୱା ସିୟା ॥
ଆପୁଚ୍ଛିତ୍ୱାୱ ଗନ୍ତବ୍ବଂ, ପସ୍ସେ ଚେ ଭିକ୍ଖୁ ଲବ୍ଭତି ।
ଅସନ୍ତେ ପନ ନତ୍ଥୀତି, ଗନ୍ତବ୍ବଂ ତୁ ୟଥାସୁଖଂ ॥
ଓତରିତ୍ୱା ମହାୱୀଥିଂ, ଭିକ୍ଖୁଂ ୟଦି ଚ ପସ୍ସତି ।
ନତ୍ଥି ଆପୁଚ୍ଛନେ କିଚ୍ଚଂ, ଚରିତବ୍ବଂ ୟଥାସୁଖଂ ॥
ଗାମମଜ୍ଝେନ ମଗ୍ଗେନ, ଗଚ୍ଛନ୍ତସ୍ସେୱ ଭିକ୍ଖୁନୋ ।
‘‘ଚରିସ୍ସାମୀ’’ତି ଉପ୍ପନ୍ନେ, ତେଲଭିକ୍ଖାୟ ମାନସେ ॥
ଆପୁଚ୍ଛିତ୍ୱାୱ ଗନ୍ତବ୍ବଂ, ପସ୍ସେ ଚେ ଭିକ୍ଖୁ ୱିଜ୍ଜତି ।
ଅନୋକ୍କମ୍ମ ଚରନ୍ତସ୍ସ, ମଗ୍ଗା ଆପୁଚ୍ଛନେନ କିଂ ?
ତିକପାଚିତ୍ତିୟଂ, କାଲେ, ୱିକାଲୋୟନ୍ତି ସଞ୍ଞିନୋ ।
କାଲେ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଆପୁଚ୍ଛିତ୍ୱାୱ ସନ୍ତଂ ୱା, ଅନାପୁଚ୍ଛା ଅସନ୍ତକଂ ।
କିଚ୍ଚେ ଅଚ୍ଚାୟିକେ ୱାପି, ପୱିସନ୍ତସ୍ସ ଭିକ୍ଖୁନୋ ॥
ଗଚ୍ଛତୋ ଅନ୍ତରାରାମଂ, ଭିକ୍ଖୁନୀନଂ ଉପସ୍ସୟଂ ।
ତଥା ଆସନସାଲଂ ୱା, ତିତ୍ଥିୟାନଂ ଉପସ୍ସୟଂ ॥
ସିୟା ଗାମେନ ମଗ୍ଗୋ ଚେ, ଅନାପତ୍ତାପଦାସୁପି ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ନ କେୱଲମନାପୁଚ୍ଛା, ଅବନ୍ଧିତ୍ୱା ଚ ବନ୍ଧନଂ ।
ଅପାରୁପିତ୍ୱା ସଙ୍ଘାଟିଂ, ଗଚ୍ଛତୋପିନୱଜ୍ଜତା ॥
ୱିକାଲଗାମପ୍ପୱେସନକଥା ।
ଅଟ୍ଠିଦନ୍ତମୟଂ ସୂଚି-ଘରଂ ୱାପି ୱିସାଣଜଂ ।
କାରାପନେ ଚ କରଣେ, ଭିକ୍ଖୁନୋ ହୋତି ଦୁକ୍କଟଂ ॥
ଲାଭେ ଭେଦନକଂ ତସ୍ସ, ପାଚିତ୍ତିୟମୁଦୀରିତଂ ।
ଅଞ୍ଞସ୍ସତ୍ଥାୟ କରଣେ, ତଥା କାରାପନେପି ଚ ॥
ଅଞ୍ଞେନ ଚ କତଂ ଲଦ୍ଧା, ଦୁକ୍କଟଂ ପରିଭୁଞ୍ଜତୋ ।
ଅନାପତ୍ତାରଣିକେ ୱିଧେ, ଗଣ୍ଠିକଞ୍ଜନିକାସୁପି ॥
ଦକପୁଞ୍ଛନିୟା ୱାସି-ଜଟେ ଉମ୍ମତ୍ତକାଦିନୋ ।
ସମୁଟ୍ଠାନାଦୟୋ ନୟା, ସଞ୍ଚରିତ୍ତସମା ମତା ॥
ସୂଚିଘରକଥା ।
ନୱଂ ମଞ୍ଚମ୍ପି ପୀଠଂ ୱା, କାରାପେନ୍ତେନ ଭିକ୍ଖୁନା ।
ଅଟ୍ଠଙ୍ଗୁଲପ୍ପମାଣେନ, ସୁଗତଙ୍ଗୁଲତୋ ପନ ॥
କାରାପେତବ୍ବମେୱଂ ତୁ, ଠପେତ୍ୱା ହେଟ୍ଠିମାଟନିଂ ।
ସଚ୍ଛେଦା ତସ୍ସ ପାଚିତ୍ତି, ତମତିକ୍କମତୋ ସିୟା ॥
ଅଞ୍ଞସ୍ସତ୍ଥାୟ କରଣେ, ତଥା କାରାପନେପି ଚ ।
ଅଞ୍ଞେନ ଚ କତଂ ଲଦ୍ଧା, ଦୁକ୍କଟଂ ପରିଭୁଞ୍ଜତୋ ॥
ଅନାପତ୍ତି ପମାଣେନ, କରୋନ୍ତସ୍ସପ୍ପମାଣିକଂ ।
ଲଭିତ୍ୱା ତସ୍ସ ପାଦେସୁ, ଛିନ୍ଦିତ୍ୱା ପରିଭୁଞ୍ଜତୋ ॥
ନେୱ ଛିନ୍ଦିତୁକାମୋ ଚେ, ନିଖଣିତ୍ୱା ପମାଣତୋ ।
ଉତ୍ତାନଂ ୱାପି ଅଟ୍ଟଂ ୱା, ବନ୍ଧିତ୍ୱା ପରିଭୁଞ୍ଜତୋ ॥
ମଞ୍ଚକଥା ।
ମଞ୍ଚଂ ୱା ପନ ପୀଠଂ ୱା, ତୂଲୋନଦ୍ଧଂ କରେୟ୍ୟ ୟୋ ।
ତସ୍ସୁଦ୍ଦାଲନକଂ ୱୁତ୍ତଂ, ପାଚିତ୍ତିୟମନୀତିନା ॥
ଅନାପତ୍ତି ପନାୟୋଗେ, ବନ୍ଧନେ ଅଂସବଦ୍ଧକେ ।
ବିବ୍ବୋହନେ ପରିସ୍ସାୱେ, ଥୱିକାଦୀସୁ ଭିକ୍ଖୁନୋ ॥
ଅଞ୍ଞେନ ଚ କତଂ ଲଦ୍ଧା, ଉଦ୍ଦାଲେତ୍ୱା ନିସେୱତୋ ।
ଅନନ୍ତରସ୍ସିମସ୍ସାପି, ସଞ୍ଚରିତ୍ତସମା ନୟା ॥
ତୂଲୋନଦ୍ଧକଥା ।
ନିସୀଦନଂ କରୋନ୍ତେନ, କାତବ୍ବଂ ତୁ ପମାଣତୋ ।
ପମାଣାତିକ୍କମେ ତସ୍ସ, ପୟୋଗେ ଦୁକ୍କଟଂ ସିୟା ॥
ପଟିଲାଭେନ ସଚ୍ଛେଦଂ, ପାଚିତ୍ତିୟମୁଦୀରିତଂ ।
ଦ୍ୱୀସୁ ଠାନେସୁ ଫାଲେତ୍ୱା, ତସ୍ସ ତିସ୍ସୋ ଦସା ସିୟୁଂ ॥
ଅନାପତ୍ତି ପମାଣେନ, କରୋନ୍ତସ୍ସ ତଦୂନକଂ ।
ୱିତାନାଦିଂ କରୋନ୍ତସ୍ସ, ସଞ୍ଚରିତ୍ତସମା ନୟା ॥
ନିସୀଦନକଥା ।
ରୋଗେ କଣ୍ଡୁପଟିଚ୍ଛାଦି, କାତବ୍ବା ହି ପମାଣତୋ ।
ପମାଣାତିକ୍କମେ ତସ୍ସ, ପୟୋଗେ ଦୁକ୍କଟଂ ସିୟା ॥
ପଟିଲାଭେନ ସଚ୍ଛେଦଂ, ପାଚିତ୍ତିୟମୁଦୀରିତଂ ।
ଅନାପତ୍ତିନୟୋପେତ୍ଥ, ଅନନ୍ତରସମୋ ମତୋ ॥
କଣ୍ଡୁପଟିଚ୍ଛାଦିକଥା ।
ପମାଣେନେୱ କାତବ୍ବା, ତଥା ୱସ୍ସିକସାଟିକା ।
ପମାଣାତିକ୍କମେ ତସ୍ସ, ଅନନ୍ତରସମୋ ନୟୋ ॥
ୱସ୍ସିକସାଟିକକଥା ।
ଚୀୱରେନ ସଚେ ତୁଲ୍ୟ-ପ୍ପମାଣଂ ସୁଗତସ୍ସ ତୁ ।
ଚୀୱରଂ ଭିକ୍ଖୁ କାରେୟ୍ୟ, କରଣେ ଦୁକ୍କଟଂ ସିୟା ॥
ପଟିଲାଭେନ ସଚ୍ଛେଦଂ, ପାଚିତ୍ତିୟମୁଦୀରିତଂ ।
ଅନନ୍ତରସମୋୟେୱ, ଅନାପତ୍ତିନୟୋ ମତୋ ॥
ଦୀଘସୋ ଚ ପମାଣେନ, ନୱ ତସ୍ସ ୱିଦତ୍ଥିୟୋ ।
ତିରିୟଂ ଛ ୱିନିଦ୍ଦିଟ୍ଠା, ସୁଗତସ୍ସ ୱିଦତ୍ଥିୟା ॥
ଅଞ୍ଞେନ ଚ କତଂ ଲଦ୍ଧା, ସେୱତୋ ଦୁକ୍କଟଂ ଭୱେ ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ନନ୍ଦକଥା ।
ରାଜୱଗ୍ଗୋ ନୱମୋ ।
ଇତି ୱିନୟୱିନିଚ୍ଛୟେ ପାଚିତ୍ତିୟକଥା ନିଟ୍ଠିତା ।
ପାଟିଦେସନୀୟକଥା
ୟୋ ଚନ୍ତରଘରଂ ଭିକ୍ଖୁ, ପୱିଟ୍ଠାୟ ତୁ ହତ୍ଥତୋ ।
ଅଞ୍ଞାତିକାୟ ୟଂ କିଞ୍ଚି, ତସ୍ସ ଭିକ୍ଖୁନିୟା ପନ ॥
ସହତ୍ଥା ପଟିଗ୍ଗଣ୍ହେୟ୍ୟ, ଖାଦନଂ ଭୋଜନମ୍ପି ୱା ।
ଗହଣେ ଦୁକ୍କଟଂ ଭୋଗେ, ପାଟିଦେସନିୟଂ ସିୟା ॥
ରଥିକାୟପି ୱା ବ୍ୟୂହେ, ସନ୍ଧିସିଙ୍ଘାଟକେସୁ ୱା ।
ହତ୍ଥିସାଲାଦିକେ ଠତ୍ୱା, ଗଣ୍ହତୋପି ଅୟଂ ନୟୋ ॥
ରଥିକାୟ ସଚେ ଠତ୍ୱା, ଦେତି ଭିକ୍ଖୁନି ଭୋଜନଂ ।
ଆପତ୍ତି ଅନ୍ତରାରାମେ, ଠତ୍ୱା ଗଣ୍ହାତି ଭିକ୍ଖୁ ଚେ ॥
ଏତ୍ଥନ୍ତରଘରଂ ତସ୍ସା, ପୱିଟ୍ଠାୟ ହି ୱାକ୍ୟତୋ ।
ଭିକ୍ଖୁସ୍ସ ଚ ଠିତଟ୍ଠାନଂ, ନପ୍ପମାଣନ୍ତି ୱଣ୍ଣିତଂ ॥
ତସ୍ମା ଭିକ୍ଖୁନିୟା ଠତ୍ୱା, ଆରାମାଦୀସୁ ଦେନ୍ତିୟା ।
ୱୀଥିୟାଦୀସୁ ଚେ ଠତ୍ୱା, ନ ଦୋସୋ ପଟିଗଣ୍ହତୋ ॥
ୟାମକାଲିକସତ୍ତାହ-କାଲିକଂ ୟାୱଜୀୱିକଂ ।
ଆହାରତ୍ଥାୟ ଗହଣେ, ଅଜ୍ଝୋହାରେ ଚ ଦୁକ୍କଟଂ ॥
ଆମିସେନ ଅସମ୍ଭିନ୍ନ-ରସଂ ସନ୍ଧାୟ ଭାସିତଂ ।
ପାଟିଦେସନିୟାପତ୍ତି, ସମ୍ଭିନ୍ନେକରସେ ସିୟା ॥
ଏକତୋଉପସମ୍ପନ୍ନ-ହତ୍ଥତୋ ପଟିଗଣ୍ହତୋ ।
କାଲିକାନଂ ଚତୁନ୍ନମ୍ପି, ଆହାରତ୍ଥାୟ ଦୁକ୍କଟଂ ॥
ଞାତିକାୟପି ଅଞ୍ଞାତି-ସଞ୍ଞିନୋ ୱିମତିସ୍ସ ୱା ।
ଦୁକ୍କଟଂ ଞାତିସଞ୍ଞିସ୍ସ, ତଥା ଅଞ୍ଞାତିକାୟ ୱା ॥
ଦାପେନ୍ତିୟା ଅନାପତ୍ତି, ଦଦମାନାୟ ୱା ପନ ।
ନିକ୍ଖିପିତ୍ୱାନ୍ତରାରାମା-ଦୀସୁ ଠତ୍ୱାପି ଦେନ୍ତିୟା ॥
ଗାମତୋ ନୀହରିତ୍ୱା ୱା, ଦେତି ଚେ ବହି ୱଟ୍ଟତି ।
‘‘ପଚ୍ଚୟେ ସତି ଭୁଞ୍ଜା’’ତି, ଦେତି ଚେ କାଲିକତ୍ତୟଂ ॥
ହତ୍ଥତୋ ସାମଣେରୀନଂ, ସିକ୍ଖମାନାୟ ୱା ତଥା ।
ଇଦଂ ଏଳକଲୋମେନ, ସମୁଟ୍ଠାନଂ ସମଂ ମତଂ ॥
ପଠମପାଟିଦେସନୀୟକଥା ।
ଅୱୁତ୍ତେ ‘‘ଅପସକ୍କା’’ତି, ଏକେନାପି ଚ ଭିକ୍ଖୁନା ।
ସଚେଜ୍ଝୋହରଣତ୍ଥାୟ, ଆମିସଂ ପଟିଗଣ୍ହତି ॥
ଗହଣେ ଦୁକ୍କଟଂ ଭୋଗେ, ପାଟିଦେସନିୟଂ ସିୟା ।
ଏକତୋଉପସମ୍ପନ୍ନଂ, ନ ୱାରେନ୍ତସ୍ସ ଦୁକ୍କଟଂ ॥
ତଥେୱାନୁପସମ୍ପନ୍ନା-ୟୁପସମ୍ପନ୍ନସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ଅନାପତ୍ତିତ୍ତନୋ ଭତ୍ତଂ, ପଦାପେତି ନ ଦେତି ଚେ ।
ତଥା ଅଞ୍ଞସ୍ସ ଭତ୍ତଂ ୱା, ନ ଦାପେତି ପଦେତି ଚେ ॥
ୟଂ ନ ଦିନ୍ନଂ ତଂ ଦାପେତି, ନ ଦିନ୍ନଂ ୟତ୍ଥ ୱାପି ଚ ।
ତତ୍ଥ ତମ୍ପି ଚ ସବ୍ବେସଂ, ସମଂ ଦାପେତି ଭିକ୍ଖୁନୀ ॥
ୱୋସାସନ୍ତୀ ଠିତା ସିକ୍ଖ-ମାନା ୱା ସାମଣେରିକା ।
ଭୋଜନାନି ଚ ପଞ୍ଚେୱ, ୱିନା, ଉମ୍ମତ୍ତକାଦିନୋ ॥
କଥିନେନ ସମୁଟ୍ଠାନଂ, ସମାନନ୍ତି ପକାସିତଂ ।
କ୍ରିୟାକ୍ରିୟମିଦଂ ୱୁତ୍ତଂ, ତିଚିତ୍ତଞ୍ଚ ତିୱେଦନଂ ॥
ଦୁତିୟପାଟିଦେସନୀୟକଥା ।
ସେକ୍ଖନ୍ତି ସମ୍ମତେ ଭିକ୍ଖୁ, ଲଦ୍ଧସମ୍ମୁତିକେ କୁଲେ ।
ଘରୂପଚାରୋକ୍କମନା, ପୁବ୍ବେୱ ଅନିମନ୍ତିତୋ ॥
ଅଗିଲାନୋ ଗହେତ୍ୱା ଚେ, ପରିଭୁଞ୍ଜେୟ୍ୟ ଆମିସଂ ।
ଗହଣେ ଦୁକ୍କଟଂ ଭୋଗେ, ପାଟିଦେସନିୟଂ ସିୟା ॥
ୟାମକାଲିକସତ୍ତାହ-କାଲିକେ ୟାୱଜୀୱିକେ ।
ଗହଣେ ପରିଭୋଗେ ଚ, ହୋତି ଆପତ୍ତି ଦୁକ୍କଟଂ ॥
ଅସେକ୍ଖସମ୍ମତେ ସେକ୍ଖ-ସମ୍ମତନ୍ତି ଚ ସଞ୍ଞିନୋ ।
ତତ୍ଥ ୱେମତିକସ୍ସାପି, ତଥେୱ ପରିଦୀପିତଂ ॥
ଅନାପତ୍ତି ଗିଲାନସ୍ସ, ଗିଲାନସ୍ସାୱସେସକେ ।
ନିମନ୍ତିତସ୍ସ ୱା ଭିକ୍ଖା, ଅଞ୍ଞେସଂ ତତ୍ଥ ଦୀୟତି ॥
ଘରତୋ ନୀହରିତ୍ୱା ୱା, ଦେନ୍ତି ଚେ ୟତ୍ଥ କତ୍ଥଚି ।
ନିଚ୍ଚଭତ୍ତାଦିକେ ୱାପି, ତଥା ଉମ୍ମତ୍ତକାଦିନୋ ॥
ଅନାଗତେ ହି ଭିକ୍ଖୁମ୍ହି, ଘରତୋ ପଠମଂ ପନ ।
ନୀହରିତ୍ୱା ସଚେ ଦ୍ୱାରେ, ସମ୍ପତ୍ତେ ଦେନ୍ତି ୱଟ୍ଟତି ॥
ଭିକ୍ଖୁଂ ପନ ଚ ଦିସ୍ୱାୱ, ନୀହରିତ୍ୱାନ ଗେହତୋ ।
ନ ୱଟ୍ଟତି ସଚେ ଦେନ୍ତି, ସମୁଟ୍ଠାନେଳକୂପମଂ ॥
ତତିୟପାଟିଦେସନୀୟକଥା ।
ଗହଟ୍ଠେନାଗହଟ୍ଠେନ, ଇତ୍ଥିୟା ପୁରିସେନ ୱା ।
ଆରାମଂ ଉପଚାରଂ ୱା, ପୱିସିତ୍ୱା ସଚେ ପନ ॥
‘‘ଇତ୍ଥନ୍ନାମସ୍ସ ତେ ଭତ୍ତଂ, ୟାଗୁ ୱା ଆହରୀୟତି’’ ।
ଏୱମାରୋଚିତଂ ୱୁତ୍ତଂ, ପଟିସଂୱିଦିତନ୍ତି ହି ॥
ଆହରୀୟତୁ ତଂ ପଚ୍ଛା, ୟଥାରୋଚିତମେୱ ୱା ।
ତସ୍ସ ୱା ପରିୱାରମ୍ପି, ଅଞ୍ଞଂ କତ୍ୱା ବହୁଂ ପନ ॥
ୟାଗୁୟା ୱିଦିତଂ କତ୍ୱା, ପୂୱଂ ଭତ୍ତଂ ହରନ୍ତି ଚେ ।
ଇଦମ୍ପି ୱିଦିତଂ ୱୁତ୍ତଂ, ୱଟ୍ଟତୀତି କୁରୁନ୍ଦିୟଂ॥
କୁଲାନି ପନ ଅଞ୍ଞାନି, ଦେୟ୍ୟଧମ୍ମଂ ପନତ୍ତନୋ ।
ହରନ୍ତି ତେନ ସଦ୍ଧିଂ ଚେ, ସବ୍ବଂ ୱଟ୍ଟତି ତମ୍ପି ଚ ॥
ଅନାରୋଚିତମେୱଂ ୟଂ, ୟଂ ଆରାମମନାଭତଂ ।
ତଂ ଅସଂୱିଦିତଂ ନାମ, ସହଧମ୍ମିକଞାପିତଂ ॥
ୟଂ ଅସଂୱିଦିତଂ କତ୍ୱା, ଆଭତଂ ପନ ତଂ ବହି ।
ଆରାମଂ ପନ ପେସେତ୍ୱା, କାରାପେତ୍ୱା ତମାହରେ ॥
ଗନ୍ତ୍ୱା ୱା ଅନ୍ତରାମଗ୍ଗେ, ଗହେତବ୍ବଂ ତୁ ଭିକ୍ଖୁନା ।
ସଚେ ଏୱମକତ୍ୱା ତଂ, ଆରାମେ ଉପଚାରତୋ ॥
ଗହେତ୍ୱାଜ୍ଝୋହରନ୍ତସ୍ସ, ଗହଣେ ଦୁକ୍କଟଂ ସିୟା ।
ଅଜ୍ଝୋହାରପୟୋଗେସୁ, ପାଟିଦେସନିୟଂ ମତଂ ॥
ପଟିସଂୱିଦିତେୟେୱ, ଅସଂୱିଦିତସଞ୍ଞିନୋ ।
ତତ୍ଥ ୱେମତିକସ୍ସାପି, ହୋତି ଆପତ୍ତି ଦୁକ୍କଟଂ ॥
ପଟିସଂୱିଦିତେ ତସ୍ସ, ଗିଲାନସ୍ସାୱସେସକେ ।
ବହାରାମେ ଗହେତ୍ୱା ୱା, ଅନ୍ତୋୟେୱସ୍ସ ଭୁଞ୍ଜତୋ ॥
ତତ୍ଥଜାତଫଲାଦୀନି, ଅନାପତ୍ତେୱ ଖାଦତୋ ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ଚତୁତ୍ଥପାଟିଦେସନୀୟକଥା ।
ଇତି ୱିନୟୱିନିଚ୍ଛୟେ ପାଟିଦେସନୀୟକଥା ନିଟ୍ଠିତା ।
ସେଖିୟକଥା
ୟୋ ଅନାଦରିୟେନେୱ, ପୁରତୋ ପଚ୍ଛତୋପି ୱା ।
ଓଲମ୍ବେତ୍ୱା ନିୱାସେୟ୍ୟ, ତସ୍ସ ଚାପତ୍ତି ଦୁକ୍କଟଂ ॥
ହତ୍ଥିସୋଣ୍ଡାଦିତୁଲ୍ୟଂ ତୁ, ନିୱାସେନ୍ତସ୍ସ ଦୁକ୍କଟଂ ।
ଆପତ୍ତିଭୀରୁନା ନିଚ୍ଚଂ, ୱତ୍ଥବ୍ବଂ ପରିମଣ୍ଡଲଂ ॥
ଜାଣୁମଣ୍ଡଲତୋ ହେଟ୍ଠା, ଅଟ୍ଠଙ୍ଗୁଲପ୍ପମାଣକଂ ।
ଓତାରେତ୍ୱା ନିୱତ୍ଥବ୍ବଂ, ତତୋ ଊନଂ ନ ୱଟ୍ଟତି ॥
ଅସଞ୍ଚିଚ୍ଚାସତିସ୍ସାପି, ଅଜାନନ୍ତସ୍ସ କେୱଲଂ ।
ଅନାପତ୍ତି ଗିଲାନସ୍ସା-ପଦାସୁମ୍ମତ୍ତକାଦିନୋ ॥
ପରିମଣ୍ଡଲକଥା ।
ଉଭୋ କୋଣେ ସମଂ କତ୍ୱା, ସାଦରଂ ପରିମଣ୍ଡଲଂ ।
କତ୍ୱା ପାରୁପିତବ୍ବେୱଂ, ଅକରୋନ୍ତସ୍ସ ଦୁକ୍କଟଂ ॥
ଅୱିସେସେନ ୱୁତ୍ତଂ ତୁ, ଇଦଂ ସିକ୍ଖାପଦଦ୍ୱୟଂ ।
ତସ୍ମା ଘରେ ୱିହାରେ ୱା, କତ୍ତବ୍ବଂ ପରିମଣ୍ଡଲଂ ॥
ଦୁତିୟଂ ।
ଗଣ୍ଠିକଂ ପଟିମୁଞ୍ଚିତ୍ୱା, କତ୍ୱା କୋଣେ ଉଭୋ ସମଂ ।
ଛାଦେତ୍ୱା ମଣିବନ୍ଧଞ୍ଚ, ଗନ୍ତବ୍ବଂ ଗୀୱମେୱ ଚ ॥
ତଥା ଅକତ୍ୱା ଭିକ୍ଖୁସ୍ସ, ଜତ୍ତୂନିପି ଉରମ୍ପି ଚ ।
ୱିୱରିତ୍ୱା ୟଥାକାମଂ, ଗଚ୍ଛତୋ ହୋତି ଦୁକ୍କଟଂ ॥
ତତିୟଂ ।
ଗଲୱାଟକତୋ ଉଦ୍ଧଂ, ସୀସଞ୍ଚ ମଣିବନ୍ଧତୋ ।
ହତ୍ଥେ ପିଣ୍ଡିକମଂସମ୍ହା, ହେଟ୍ଠା ପାଦେ ଉଭୋପି ଚ ॥
ୱିୱରିତ୍ୱାୱସେସଞ୍ଚ, ଛାଦେତ୍ୱା ଚେ ନିସୀଦତି ।
ହୋତି ସୋ ସୁପ୍ପଟିଚ୍ଛନ୍ନୋ, ଦୋସୋ ୱାସୂପଗସ୍ସ ନ ॥
ଚତୁତ୍ଥଂ ।
ହତ୍ଥଂ ୱା ପନ ପାଦଂ ୱା, ଅଚାଲେନ୍ତେନ ଭିକ୍ଖୁନା ।
ସୁୱିନୀତେନ ଗନ୍ତବ୍ବଂ, ଛଟ୍ଠେ ନତ୍ଥି ୱିସେସତା ॥
ପଞ୍ଚମଛଟ୍ଠାନି ।
ସତୀମତାୱିକାରେନ, ୟୁଗମତ୍ତଞ୍ଚ ପେକ୍ଖିନା ।
ସୁସଂୱୁତେନ ଗନ୍ତବ୍ବଂ, ଭିକ୍ଖୁନୋକ୍ଖିତ୍ତଚକ୍ଖୁନା ॥
ୟତ୍ଥ କତ୍ଥଚି ହି ଟ୍ଠାନେ, ଏକସ୍ମିଂ ଅନ୍ତରେ ଘରେ ।
ଠତ୍ୱା ପରିସ୍ସୟାଭାୱଂ, ଓଲୋକେତୁମ୍ପି ୱଟ୍ଟତି ॥
ୟୋ ଅନାଦରିୟଂ କତ୍ୱା, ଓଲୋକେନ୍ତୋ ତହିଂ ତହିଂ ।
ସଚେନ୍ତରଘରେ ୟାତି, ଦୁକ୍କଟଂ ଅଟ୍ଠମଂ ତଥା ॥
ସତ୍ତମଟ୍ଠମାନି ।
ଏକତୋ ଉଭତୋ ୱାପି, ହୁତ୍ୱା ଉକ୍ଖିତ୍ତଚୀୱରୋ ।
ଇନ୍ଦଖୀଲକତୋ ଅନ୍ତୋ, ଗଚ୍ଛତୋ ହୋତି ଦୁକ୍କଟଂ ॥
ନୱମଂ ।
ତଥା ନିସିନ୍ନକାଲେପି, ନୀହରନ୍ତେନ କୁଣ୍ଡିକଂ ।
ଅନୁକ୍ଖିପିତ୍ୱା ଦାତବ୍ବା, ଦୋସୋ ୱାସୂପଗସ୍ସ ନ ॥
ଦସମଂ ।
ପଠମୋ ୱଗ୍ଗୋ ।
ନ ୱଟ୍ଟତି ହସନ୍ତେନ, ଗନ୍ତୁଞ୍ଚେୱ ନିସୀଦିତୁଂ ।
ୱତ୍ଥୁସ୍ମିଂ ହସନୀୟସ୍ମିଂ, ସିତମତ୍ତଂ ତୁ ୱଟ୍ଟତି ॥
ପଠମଦୁତିୟାନି ।
ଅପ୍ପସଦ୍ଦେନ ଗନ୍ତବ୍ବଂ, ଚତୁତ୍ଥେପି ଅୟଂ ନୟୋ ।
ମହାସଦ୍ଦଂ କରୋନ୍ତସ୍ସ, ଉଭୟତ୍ଥାପି ଦୁକ୍କଟଂ ॥
ତତିୟଚତୁତ୍ଥାନି ।
କାୟପ୍ପଚାଲକଂ କତ୍ୱା, ବାହୁସୀସପ୍ପଚାଲକଂ ।
ଗଚ୍ଛତୋ ଦୁକ୍କଟଂ ହୋତି, ତଥେୱ ଚ ନିସୀଦତୋ ॥
କାୟଂ ବାହୁଞ୍ଚ ସୀସଞ୍ଚ, ପଗ୍ଗହେତ୍ୱା ଉଜୁଂ ପନ ।
ଗନ୍ତବ୍ବମାସିତବ୍ବଞ୍ଚ, ସମେନିରିୟାପଥେନ ତୁ ॥
ନିସୀଦନେନ ୟୁତ୍ତେସୁ, ତୀସୁ ୱାସୂପଗସ୍ସ ହି ।
ଅନାପତ୍ତୀତି ଞାତବ୍ବଂ, ୱିଞ୍ଞୁନା ୱିନୟଞ୍ଞୁନା ॥
ଦୁତିୟୋ ୱଗ୍ଗୋ ।
ଖମ୍ଭଂ କତ୍ୱା ସସୀସଂ ୱା, ପାରୁପିତ୍ୱାନ ଗଚ୍ଛତୋ ।
ଦୁକ୍କଟଂ ମୁନିନା ୱୁତ୍ତଂ, ତଥା ଉକ୍କୁଟିକାୟ ୱା ॥
ହତ୍ଥପଲ୍ଲତ୍ଥିକାୟାପି, ଦୁସ୍ସପଲ୍ଲତ୍ଥିକାୟ ୱା ।
ତସ୍ସନ୍ତରଘରେ ହୋତି, ନିସୀଦନ୍ତସ୍ସ ଦୁକ୍କଟଂ ॥
ଦୁତିୟେ ଚ ଚତୁତ୍ଥେ ଚ, ଛଟ୍ଠେ ୱାସୂପଗସ୍ସ ତୁ ।
ଅନାପତ୍ତୀତି ସାରୁପ୍ପା, ଛବ୍ବୀସତି ପକାସିତା ॥
ଛଟ୍ଠଂ ।
ସକ୍କଚ୍ଚଂ ସତିୟୁତ୍ତେନ, ଭିକ୍ଖୁନା ପତ୍ତସଞ୍ଞିନା ।
ପିଣ୍ଡପାତୋ ଗହେତବ୍ବୋ, ସମସୂପୋୱ ୱିଞ୍ଞୁନା ॥
ସୂପୋ ଭତ୍ତଚତୁବ୍ଭାଗୋ, ‘‘ସମସୂପୋ’’ତି ୱୁଚ୍ଚତି ।
ମୁଗ୍ଗମାସକୁଲତ୍ଥାନଂ, ସୂପୋ ‘‘ସୂପୋ’’ତି ୱୁଚ୍ଚତି ॥
ଅନାପତ୍ତି ଅସଞ୍ଚିଚ୍ଚ, ଗିଲାନସ୍ସ ରସେରସେ ।
ତଥେୱ ଞାତକାଦୀନଂ, ଅଞ୍ଞତ୍ଥାୟ ଧନେନ ୱା ॥
ସତ୍ତମଟ୍ଠମନୱମାନି ।
ଅନ୍ତୋଲେଖାପମାଣେନ, ପତ୍ତସ୍ସ ମୁଖୱଟ୍ଟିୟା ।
ପୂରିତୋୱ ଗହେତବ୍ବୋ, ଅଧିଟ୍ଠାନୂପଗସ୍ସ ତୁ ॥
ତତ୍ଥ ଥୂପୀକତଂ କତ୍ୱା, ଗଣ୍ହତୋ ୟାୱକାଲିକଂ ।
ୟଂ କିଞ୍ଚି ପନ ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ଅଧିଟ୍ଠାନୂପଗେ ପତ୍ତେ, କାଲିକତ୍ତୟମେୱ ଚ ।
ସେସେ ଥୂପୀକତଂ ସବ୍ବଂ, ୱଟ୍ଟତେୱ ନ ସଂସୟୋ ॥
ଦ୍ୱୀସୁ ପତ୍ତେସୁ ଭତ୍ତଂ ତୁ, ଗହେତ୍ୱା ପତ୍ତମେକକଂ ।
ପୂରେତ୍ୱା ୟଦି ପେସେତି, ଭିକ୍ଖୂନଂ ପନ ୱଟ୍ଟତି ॥
ପତ୍ତେ ପକ୍ଖିପ୍ପମାନଂ ୟଂ, ଉଚ୍ଛୁଖଣ୍ଡଫଲାଦିକଂ ।
ଓରୋହତି ସଚେ ହେଟ୍ଠା, ନ ତଂ ଥୂପୀକତଂ ସିୟା ॥
ପୁପ୍ଫତକ୍କୋଲକାଦୀନଂ, ଠପେତ୍ୱା ଚେ ୱଟଂସକଂ ।
ଦିନ୍ନଂ ଅୟାୱକାଲିତ୍ତା, ନ ତଂ ଥୂପୀକତଂ ସିୟା ॥
ୱଟଂସକଂ ତୁ ପୂୱସ୍ସ, ଠପେତ୍ୱା ଓଦନୋପରି ।
ପିଣ୍ଡପାତଂ ସଚେ ଦେନ୍ତି, ଇଦଂ ଥୂପୀକତଂ ସିୟା ॥
ଭତ୍ତସ୍ସୂପରି ପଣ୍ଣଂ ୱା, ଥାଲକଂ ୱାପି କିଞ୍ଚିପି ।
ଠପେତ୍ୱା ପରିପୂରେତ୍ୱା, ସଚେ ଗଣ୍ହାତି ୱଟ୍ଟତି ॥
ପଟିଗ୍ଗହେତୁମେୱସ୍ସ, ତଂ ତୁ ସବ୍ବଂ ନ ୱଟ୍ଟତି ।
ଗହିତଂ ସୁଗହିତଂ, ପଚ୍ଛା, ଭୁଞ୍ଜିତବ୍ବଂ ୟଥାସୁଖଂ ॥
ତତିୟୋ ୱଗ୍ଗୋ ।
ପଠମଂ ଦୁତିୟଂ ୱୁତ୍ତ-ନୟଂ ତୁ ତତିୟେ ପନ ।
ଉପରୋଧିମଦସ୍ସେତ୍ୱା, ଭୋତ୍ତବ୍ବଂ ପଟିପାଟିୟା ॥
ଅଞ୍ଞେସଂ ଅତ୍ତନୋ ଭତ୍ତଂ, ଆକିରଂ ପନ ଭାଜନେ ।
ନତ୍ଥୋମସତି ଚେ ଦୋସୋ, ତଥା ଉତ୍ତରିଭଙ୍ଗକଂ ॥
ତତିୟଂ ।
ଚତୁତ୍ଥେ ୟଂ ତୁ ୱତ୍ତବ୍ବଂ, ୱୁତ୍ତଂ ପୁବ୍ବେ ଅସେସତୋ ।
ପଞ୍ଚମେ ମତ୍ଥକଂ ଦୋସୋ, ମଦ୍ଦିତ୍ୱା ପରିଭୁଞ୍ଜତୋ ॥
ଅନାପତ୍ତି ଗିଲାନସ୍ସ, ପରିତ୍ତେପି ଚ ସେସକେ ।
ଏକତୋ ପନ ମଦ୍ଦିତ୍ୱା, ସଂକଡ୍ଢିତ୍ୱାନ ଭୁଞ୍ଜତୋ ॥
ଚତୁତ୍ଥପଞ୍ଚମାନି ।
ୟୋ ଭିୟ୍ୟୋକମ୍ୟତାହେତୁ, ସୂପଂ ୱା ବ୍ୟଞ୍ଜନମ୍ପି ୱା ।
ପଟିଚ୍ଛାଦେୟ୍ୟ ଭତ୍ତେନ, ତସ୍ସ ଚାପତ୍ତି ଦୁକ୍କଟଂ ॥
ଛଟ୍ଠଂ ।
ୱିଞ୍ଞତ୍ତିୟଂ ତୁ ୱତ୍ତବ୍ବଂ, ଅପୁବ୍ବଂ ନତ୍ଥି କିଞ୍ଚିପି ।
ଅଟ୍ଠମେ ପନ ଉଜ୍ଝାନେ, ଗିଲାନୋପି ନ ମୁଚ୍ଚତି ॥
‘‘ଦସ୍ସାମି ଦାପେସ୍ସାମୀ’’ତି, ଓଲୋକେନ୍ତସ୍ସ ଭିକ୍ଖୁନୋ ।
ଅନାପତ୍ତୀତି ଞାତବ୍ବଂ, ନ ଚ ଉଜ୍ଝାନସଞ୍ଞିନୋ ॥
ଅଟ୍ଠମଂ ।
ମହନ୍ତଂ ପନ ମୋରଣ୍ଡଂ, କୁକ୍କୁଟଣ୍ଡଞ୍ଚ ଖୁଦ୍ଦକଂ ।
ତେସଂ ମଜ୍ଝପ୍ପମାଣେନ, କତ୍ତବ୍ବୋ କବଳୋ ପନ ॥
ଖଜ୍ଜକେ ପନ ସବ୍ବତ୍ଥ, ମୂଲଖାଦନିୟାଦିକେ ।
ଫଲାଫଲେ ଅନାପତ୍ତି, ଗିଲାନୁମ୍ମତ୍ତକାଦିନୋ ॥
ନୱମଂ ।
ଅଦୀଘୋ ପନ କାତବ୍ବୋ, ଆଲୋପୋ ପରିମଣ୍ଡଲୋ ।
ଖଜ୍ଜତୁତ୍ତରିଭଙ୍ଗସ୍ମିଂ, ଅନାପତ୍ତି ଫଲାଫଲେ ॥
ଦସମଂ ।
ଚତୁତ୍ଥୋ ୱଗ୍ଗୋ ।
ଅନାହଟେ ମୁଖଦ୍ୱାରଂ, ଅପ୍ପତ୍ତେ କବଳେ ପନ ।
ଅତ୍ତନୋ ଚ ମୁଖଦ୍ୱାରଂ, ୱିୱରନ୍ତସ୍ସ ଦୁକ୍କଟଂ ॥
ପଠମଂ ।
ମୁଖେ ଚ ସକଲଂ ହତ୍ଥଂ, ପକ୍ଖିପନ୍ତସ୍ସ ଦୁକ୍କଟଂ ।
ମୁଖେ ଚ କବଳଂ କତ୍ୱା, କଥେତୁଂ ନ ଚ ୱଟ୍ଟତି ॥
ୱଚନଂ ୟତ୍ତକେନସ୍ସ, ପରିପୁଣ୍ଣଂ ନ ହୋତି ହି ।
ମୁଖସ୍ମିଂତତ୍ତକେ ସନ୍ତେ, ବ୍ୟାହରନ୍ତସ୍ସ ଦୁକ୍କଟଂ ॥
ମୁଖେ ହରୀତକାଦୀନି, ପକ୍ଖିପିତ୍ୱା କଥେତି ୟୋ ।
ୱଚନଂ ପରିପୁଣ୍ଣଂ ଚେ, କଥେତୁଂ ପନ ୱଟ୍ଟତି ॥
ଦୁତିୟତତିୟାନି ।
ୟୋ ପିଣ୍ଡୁକ୍ଖେପକଂ ଭିକ୍ଖୁ, କବଳଚ୍ଛେଦକମ୍ପି ୱା ।
ମକ୍କଟୋ ୱିୟ ଗଣ୍ଡେ ୱା, କତ୍ୱା ଭୁଞ୍ଜେୟ୍ୟ ଦୁକ୍କଟଂ ॥
ଚତୁତ୍ଥପଞ୍ଚମଛଟ୍ଠାନି ।
ନିଦ୍ଧୁନିତ୍ୱାନ ହତ୍ଥଂ ୱା, ଭତ୍ତଂ ସିତ୍ଥାୱକାରକଂ ।
ଜିୱ୍ହାନିଚ୍ଛାରକଂ ୱାପି, ତଥା ‘‘ଚପୁ ଚପୂ’’ତି ୱା ॥
ଅନାଦରୱସେନେୱ, ଭୁଞ୍ଜତୋ ହୋତି ଦୁକ୍କଟଂ ।
ସତ୍ତମେ ଅଟ୍ଠମେ ନତ୍ଥି, ଦୋସୋ କଚୱରୁଜ୍ଝନେ ॥
ସତ୍ତମଦସମାନି ।
ପଞ୍ଚମୋ ୱଗ୍ଗୋ ।
କତ୍ୱା ଏୱଂ ନ ଭୋତ୍ତବ୍ବଂ, ସଦ୍ଦଂ ‘‘ସୁରୁ ସୁରୂ’’ତି ଚ ।
ହତ୍ଥନିଲ୍ଲେହକଂ ୱାପି, ନ ଚ ୱଟ୍ଟତି ଭୁଞ୍ଜିତୁଂ ॥
ଫାଣିତଂ ଘନୟାଗୁଂ ୱା, ଗହେତ୍ୱା ଅଙ୍ଗୁଲୀହି ତଂ ।
ମୁଖେ ଅଙ୍ଗୁଲିୟୋ ଭୋତ୍ତୁଂ, ପୱେସେତ୍ୱାପି ୱଟ୍ଟତି ॥
ନ ପତ୍ତୋ ଲେହିତବ୍ବୋୱ, ଏକାୟଙ୍ଗୁଲିକାୟ ୱା ।
ଏକଓଟ୍ଠୋପି ଜିୱ୍ହାୟ, ନ ଚ ନିଲ୍ଲେହିତବ୍ବକୋ ॥
ଚତୁତ୍ଥଂ ।
ସାମିସେନ ତୁ ହତ୍ଥେନ, ନ ଚ ପାନୀୟଥାଲକଂ ।
ଗହେତବ୍ବଂ, ପଟିକ୍ଖିତ୍ତଂ, ପଟିକ୍କୂଲୱସେନ ହି ॥
ପୁଗ୍ଗଲସ୍ସ ଚ ସଙ୍ଘସ୍ସ, ଗହଟ୍ଠସ୍ସତ୍ତନୋପି ଚ ।
ସନ୍ତକୋ ପନ ସଙ୍ଖୋ ୱା, ସରାୱଂ ୱାପି ଥାଲକଂ ॥
ତସ୍ମା ନ ଚ ଗହେତବ୍ବଂ, ଗଣ୍ହତୋ ହୋତି ଦୁକ୍କଟଂ ।
ଅନାମିସେନ ହତ୍ଥେନ, ଗହଣଂ ପନ ୱଟ୍ଟତି ॥
ପଞ୍ଚମଂ ।
ଉଦ୍ଧରିତ୍ୱାପି ଭିନ୍ଦିତ୍ୱା, ଗହେତ୍ୱା ୱା ପଟିଗ୍ଗହେ ।
ନୀହରିତ୍ୱା ଅନାପତ୍ତି, ଛଡ୍ଡେନ୍ତସ୍ସ ଘରା ବହି ॥
ଛଟ୍ଠଂ ।
ଛତ୍ତଂ ୟଂ କିଞ୍ଚି ହତ୍ଥେନ, ସରୀରାୱୟୱେନ ୱା ।
ସଚେ ଧାରୟମାନସ୍ସ, ଧମ୍ମଂ ଦେସେତି ଦୁକ୍କଟଂ ॥
ସତ୍ତମଂ ।
ଅୟମେୱ ନୟୋ ୱୁତ୍ତୋ, ଦଣ୍ଡପାଣିମ୍ହି ପୁଗ୍ଗଲେ ।
ଚତୁହତ୍ଥପ୍ପମାଣୋୱ, ଦଣ୍ଡୋ ମଜ୍ଝିମହତ୍ଥତୋ ॥
ଅଟ୍ଠମଂ ।
ତଥେୱ ସତ୍ଥପାଣିସ୍ସ, ଧମ୍ମଂ ଦେସେତି ଦୁକ୍କଟଂ ।
ସତ୍ଥପାଣୀ ନ ହୋତାସିଂ, ସନ୍ନୟ୍ହିତ୍ୱା ଠିତୋ ପନ ॥
ନୱମଂ ।
ଧନୁଂ ସରେନ ସଦ୍ଧିଂ ୱା, ଧନୁଂ ୱା ସରମେୱ ୱା ।
ସଜିୟଂ ନିଜିୟଂ ୱାପି, ଗହେତ୍ୱା ଧନୁଦଣ୍ଡକଂ ॥
ଠିତସ୍ସପି ନିସିନ୍ନସ୍ସ, ନିପନ୍ନସ୍ସାପି ୱା ତଥା ।
ସଚେ ଦେସେତି ସଦ୍ଧମ୍ମଂ, ହୋତି ଆପତ୍ତି ଦୁକ୍କଟଂ ॥
ପଟିମୁକ୍କମ୍ପି କଣ୍ଠମ୍ହି, ଧନୁଂ ହତ୍ଥେନ ୟାୱତା ।
ନ ଗଣ୍ହାତି ନରୋ ତାୱ, ଧମ୍ମଂ ଦେସେୟ୍ୟ ୱଟ୍ଟତି ॥
ଛଟ୍ଠୋ ୱଗ୍ଗୋ ।
ପାଦୁକାରୁଳ୍ହକସ୍ସାପି, ଧମ୍ମଂ ଦେସେତି ଦୁକ୍କଟଂ ।
ଅକ୍କମିତ୍ୱା ଠିତସ୍ସାପି, ପଟିମୁକ୍କସ୍ସ ୱା ତଥା ॥
ପଠମଂ ।
ଉପାହନଗତସ୍ସାପି, ଅୟମେୱ ୱିନିଚ୍ଛୟୋ ।
ସବ୍ବତ୍ଥ ଅଗିଲାନସ୍ସ, ୟାନେ ୱା ସୟନେପି ୱା ॥
ନିପନ୍ନସ୍ସାଗିଲାନସ୍ସ, କଟସାରେ ଛମାୟ ୱା ।
ପୀଠେ ମଞ୍ଚେପି ୱା ଉଚ୍ଚେ, ନିସିନ୍ନେନ ଠିତେନ ୱା ॥
ନ ଚ ୱଟ୍ଟତି ଦେସେତୁଂ, ଠତ୍ୱା ୱା ଉଚ୍ଚଭୂମିୟଂ ।
ସୟନେସୁ ଗତେନାପି, ସୟନେସୁ ଗତସ୍ସ ଚ ॥
ସମାନେ ୱାପି ଉଚ୍ଚେ ୱା, ନିପନ୍ନେ ନେୱ ୱଟ୍ଟତି ।
ନିପନ୍ନେନ ଠିତସ୍ସାପି, ନିପନ୍ନସ୍ସପି ୱଟ୍ଟତି ॥
ନିସିନ୍ନେନ ନିସିନ୍ନସ୍ସ, ଠିତସ୍ସାପି ଚ ୱଟ୍ଟତି ।
ଠିତସ୍ସେୱ ଠିତେନାପି, ଦେସେତୁମ୍ପି ତଥେୱ ଚ ॥
ଦୁତିୟତତିୟଚତୁତ୍ଥାନି ।
ପଲ୍ଲତ୍ଥିକା ନିସିନ୍ନସ୍ସ, ଅଗିଲାନସ୍ସ ଦେହିନୋ ।
ତଥା ୱେଠିତସୀସସ୍ସ, ଧମ୍ମଂ ଦେସେତି ଦୁକ୍କଟଂ ॥
କେସନ୍ତଂ ୱିୱରାପେତ୍ୱା, ଦେସେତି ୟଦି ୱଟ୍ଟତି ।
ସସୀସଂ ପାରୁତସ୍ସାପି, ଅୟମେୱ ୱିନିଚ୍ଛୟୋ ॥
ପଞ୍ଚମଛଟ୍ଠସତ୍ତମାନି ।
ଅଟ୍ଠମେ ନୱମେ ୱାପି, ଦସମେ ନତ୍ଥି କିଞ୍ଚିପି ।
ସଚେପି ଥେରୁପଟ୍ଠାନଂ, ଗନ୍ତ୍ୱାନ ଦହରଂ ଠିତଂ ॥
ପଞ୍ହଂ ପୁଚ୍ଛତି ଚେ ଥେରୋ, କଥେତୁଂ ନ ଚ ୱଟ୍ଟତି ।
ତସ୍ସ ପସ୍ସେ ପନଞ୍ଞସ୍ସ, କଥେତବ୍ବଂ ୱିଜାନତା ॥
ଅଟ୍ଠମନୱମଦସମାନି ।
ସତ୍ତମୋ ୱଗ୍ଗୋ ।
ଗଚ୍ଛତୋ ପୁରତୋ ପଞ୍ହଂ, ନ ୱତ୍ତବ୍ବଂ ତୁ ପଚ୍ଛତୋ ।
‘‘ପଚ୍ଛିମସ୍ସ କଥେମୀ’’ତି, ୱତ୍ତବ୍ବଂ ୱିନୟଞ୍ଞୁନା ॥
ସଦ୍ଧିଂ ଉଗ୍ଗହିତଂ ଧମ୍ମଂ, ସଜ୍ଝାୟତି ହି ୱଟ୍ଟତି ।
ସମମେୱ ୟୁଗଗ୍ଗାହଂ, କଥେତୁଂ ଗଚ୍ଛତୋପି ଚ ॥
ପଠମଂ ।
ଏକେକସ୍ସାପି ଚକ୍କସ୍ସ, ପଥେନାପି ଚ ଗଚ୍ଛତୋ ।
ଉପ୍ପଥେନ ସମଂ ୱାପି, ଗଚ୍ଛନ୍ତସ୍ସେୱ ୱଟ୍ଟତି ॥
ଦୁତିୟଂ ।
ତତିୟେ ନତ୍ଥି ୱତ୍ତବ୍ବଂ, ଚତୁତ୍ଥେ ହରିତେ ପନ ।
ଉଚ୍ଚାରାଦିଚତୁକ୍କଂ ତୁ, କରୋତୋ ଦୁକ୍କଟଂ ସିୟା ॥
ଜୀୱରୁକ୍ଖସ୍ସ ୟଂ ମୂଲଂ, ଦିସ୍ସମାନଂ ତୁ ଗଚ୍ଛତି ।
ସାଖା ୱା ଭୂମିଲଗ୍ଗା ତଂ, ସବ୍ବଂ ହରିତମେୱ ହି ॥
ସଚେ ଅହରିତଂ ଠାନଂ, ପେକ୍ଖନ୍ତସ୍ସେୱ ଭିକ୍ଖୁନୋ ।
ୱଚ୍ଚଂ ନିକ୍ଖମତେୱସ୍ସ, ସହସା ପନ ୱଟ୍ଟତି ॥
ପଲାଲଣ୍ଡୁପକେ ୱାପି, ଗୋମୟେ ୱାପି କିସ୍ମିଚି ।
କତ୍ତବ୍ବଂ, ହରିତଂ ପଚ୍ଛା, ତମୋତ୍ଥରତି ୱଟ୍ଟତି ॥
କତୋ ଅହରିତେ ଠାନେ, ହରିତଂ ଏତି ୱଟ୍ଟତି ।
ସିଙ୍ଘାଣିକା ଗତା ଏତ୍ଥ, ଖେଳେନେୱ ଚ ସଙ୍ଗହଂ ॥
ଚତୁତ୍ଥଂ ।
ୱଚ୍ଚକୁଟିସମୁଦ୍ଦାଦି-ଉଦକେସୁପି ଭିକ୍ଖୁନୋ ।
ତେସଂ ଅପରିଭୋଗତ୍ତା, କରୋତୋ ନତ୍ଥି ଦୁକ୍କଟଂ ॥
ଦେୱେ ପନ ଚ ୱସ୍ସନ୍ତେ, ଉଦକୋଘେ ସମନ୍ତତୋ ।
ଅଜଲଂ ଅଲଭନ୍ତେନ, ଜଲେ କାତୁମ୍ପି ୱଟ୍ଟତି ॥
ପଞ୍ଚମଂ ।
ଅଟ୍ଠମୋ ୱଗ୍ଗୋ ।
ସମୁଟ୍ଠାନାଦୟୋ ଞେୟ୍ୟା, ସେଖିୟାନଂ ପନେତ୍ଥ ହି ।
ଉଜ୍ଜଗ୍ଘିକାଦିଚତ୍ତାରି, କବଳେନ ମୁଖେନ ଚ ॥
ଛମାନୀଚାସନଟ୍ଠାନ-ପଚ୍ଛା ଉପ୍ପଥୱା ଦସ ।
ସମୁଟ୍ଠାନାଦୟୋ ତୁଲ୍ୟା, ୱୁତ୍ତା ସମନୁଭାସନେ ॥
ଛତ୍ତଂ ଦଣ୍ଡାୱୁଧଂ ସତ୍ଥଂ, ପାଦୁକାରୁଳ୍ହୁପାହନା ।
ୟାନଂ ସୟନପଲ୍ଲତ୍ଥ-ୱେଠିତୋଗୁଣ୍ଠିତାନି ଚ ॥
ଧମ୍ମଦେସନାତୁଲ୍ୟାୱ, ସମୁଟ୍ଠାନାଦିନା ପନ ।
ସୂପୋଦନେନ ୱିଞ୍ଞତ୍ତି, ଥେୟ୍ୟସତ୍ଥସମଂ ମତଂ ॥
ଅୱସେସା ତିପଞ୍ଞାସ, ସମାନା ପଠମେନ ତୁ ।
ସେଖିୟେସୁପି ସବ୍ବେସୁ, ଅନାପତ୍ତାପଦାସୁପି ॥
ଉଜ୍ଝାନସଞ୍ଞିକେ ଥୂପୀ-କତେ ସୂପପଟିଚ୍ଛଦେ ।
ତୀସୁ ସିକ୍ଖାପଦେସ୍ୱେୱ, ଗିଲାନୋ ନ ପନାଗତୋ ॥
ସେଖିୟକଥା ।
ଇମଂ ୱିଦିତ୍ୱା ୱିନୟେ ୱିନିଚ୍ଛୟଂ ।
ୱିସାରଦୋ ହୋତି, ୱିନୀତମାନସୋ ।
ପରେହି ସୋ ହୋତି ଚ ଦୁପ୍ପଧଂସିୟୋ ।
ତତୋ ହି ସିକ୍ଖେ ସତତଂ ସମାହିତୋ ॥
ଅୱେଚ୍ଚ ସୱନାମତଂ ନାମତଂ ।
ପଟୁତ୍ତମଧିକେ ହିତେ କେ ହି ତେ ।
ନ ୟନ୍ତି କଲିସାସନେ ସାସନେ ॥
ଇତି ୱିନୟୱିନିଚ୍ଛୟେ
ଭିକ୍ଖୁୱିଭଙ୍ଗକଥା ନିଟ୍ଠିତା ।
ଭିକ୍ଖୁନୀୱିଭଙ୍ଗୋ
ଭିକ୍ଖୁନୀନଂ ହିତତ୍ଥାୟ, ୱିଭଙ୍ଗଂ ୟଂ ଜିନୋବ୍ରୱି ।
ତସ୍ମିଂ ଅପି ସମାସେନ, କିଞ୍ଚିମତ୍ତଂ ଭଣାମହଂ ॥
ପାରାଜିକକଥା
ଛନ୍ଦସୋ ମେଥୁନଂ ଧମ୍ମଂ, ପଟିସେୱେୟ୍ୟ ୟା ପନ ।
ହୋତି ପାରାଜିକା ନାମ, ସମଣୀ ସା ପୱୁଚ୍ଚତି ॥
ମନୁସ୍ସପୁରିସାଦୀନଂ, ନୱନ୍ନଂ ୟସ୍ସ କସ୍ସଚି ।
ସଜୀୱସ୍ସାପ୍ୟଜୀୱସ୍ସ, ସନ୍ଥତଂ ୱା ଅସନ୍ଥତଂ ॥
ଅତ୍ତନୋ ତିୱିଧେ ମଗ୍ଗେ, ୟେଭୁୟ୍ୟକ୍ଖାୟିତାଦିକଂ ।
ଅଙ୍ଗଜାତଂ ପୱେସେନ୍ତୀ, ଅଲ୍ଲୋକାସେ ପରାଜିତା ॥
ଇତୋ ପରମୱତ୍ୱାୱ, ସାଧାରଣୱିନିଚ୍ଛୟଂ ।
ଅସାଧାରଣମେୱାହଂ, ଭଣିସ୍ସାମି ସମାସତୋ ॥
ଅଧକ୍ଖକଂ ସରୀରକଂ, ୟଦୁବ୍ଭଜାଣୁମଣ୍ଡଲଂ ।
ସରୀରକେନ ଚେ ତେନ, ଫୁସେୟ୍ୟ ଭିକ୍ଖୁନୀ ପନ ॥
ଅୱସ୍ସୁତସ୍ସାୱସ୍ସୁତା, ମନୁସ୍ସପୁଗ୍ଗଲସ୍ସ ୟା ।
ସରୀରମସ୍ସ ତେନ ୱା, ଫୁଟ୍ଠା ପାରାଜିକା ସିୟା ॥
କପ୍ପରସ୍ସ ପନୁଦ୍ଧମ୍ପି, ଗହିତଂ ଉବ୍ଭଜାଣୁନା ।
ୟଥାୱୁତ୍ତପ୍ପକାରେନ, କାୟେନାନେନ ଅତ୍ତନୋ ॥
ପୁରିସସ୍ସ ତଥା କାୟ- ପଟିବଦ୍ଧଂ ଫୁସନ୍ତିୟା ।
ତଥା ୟଥାପରିଚ୍ଛିନ୍ନ- କାୟବଦ୍ଧେନ ଅତ୍ତନୋ ॥
ଅୱସେସେନ ୱା ତସ୍ସ, କାୟଂ କାୟେନ ଅତ୍ତନୋ ।
ହୋତି ଥୁଲ୍ଲଚ୍ଚୟଂ ତସ୍ସା, ପୟୋଗେ ପୁରିସସ୍ସ ଚ ॥
ୟକ୍ଖପେତତିରଚ୍ଛାନ- ପଣ୍ଡକାନଂ ଅଧକ୍ଖକଂ ।
ଉବ୍ଭଜାଣୁଂ ତଥେୱସ୍ସା, ଉଭତୋୱସ୍ସୱେ ସତି ॥
ଏକତୋୱସ୍ସୱେ ଚାପି, ଥୁଲ୍ଲଚ୍ଚୟମୁଦୀରିତଂ ।
ଅୱସେସେ ଚ ସବ୍ବତ୍ଥ, ହୋତି ଆପତ୍ତି ଦୁକ୍କଟଂ ॥
ଉବ୍ଭକ୍ଖକମଧୋଜାଣୁ-ମଣ୍ଡଲଂ ପନ ୟଂ ଇଧ ।
କପ୍ପରସ୍ସ ଚ ହେଟ୍ଠାପି, ଗତଂ ଏତ୍ଥେୱ ସଙ୍ଗହଂ ॥
କେଲାୟତି ସଚେ ଭିକ୍ଖୁ, ସଦ୍ଧିଂ ଭିକ୍ଖୁନିୟା ପନ ।
ଉଭିନ୍ନଂ କାୟସଂସଗ୍ଗ-ରାଗେ ସତି ହି ଭିକ୍ଖୁନୋ ॥
ହୋତି ସଙ୍ଘାଦିସେସୋୱ, ନାସୋ ଭିକ୍ଖୁନିୟା ସିୟା ।
କାୟସଂସଗ୍ଗରାଗୋ ଚ, ସଚେ ଭିକ୍ଖୁନିୟା ସିୟା ॥
ଭିକ୍ଖୁନୋ ମେଥୁନୋ ରାଗୋ, ଗେହପେମମ୍ପି ୱା ଭୱେ ।
ତସ୍ସା ଥୁଲ୍ଲଚ୍ଚୟଂ ୱୁତ୍ତଂ, ଭିକ୍ଖୁନୋ ହୋତି ଦୁକ୍କଟଂ ॥
ଉଭିନ୍ନଂ ମେଥୁନେ ରାଗେ, ଗେହପେମେପି ୱା ସତି ।
ଅୱିସେସେନ ନିଦ୍ଦିଟ୍ଠଂ, ଉଭିନ୍ନଂ ଦୁକ୍କଟଂ ପନ ॥
ୟସ୍ସ ୟତ୍ଥ ମନୋସୁଦ୍ଧଂ, ତସ୍ସ ତତ୍ଥ ନ ଦୋସତା ।
ଉଭିନ୍ନମ୍ପି ଅନାପତ୍ତି, ଉଭିନ୍ନଂ ଚିତ୍ତସୁଦ୍ଧିୟା ॥
କାୟସଂସଗ୍ଗରାଗେନ, ଭିନ୍ଦିତ୍ୱା ପଠମଂ ପନ ।
ପଚ୍ଛା ଦୂସେତି ଚେ ନେୱ, ହୋତି ଭିକ୍ଖୁନିଦୂସକୋ ॥
ଅଥ ଭିକ୍ଖୁନିୟା ଫୁଟ୍ଠୋ, ସାଦିୟନ୍ତୋୱ ଚେତସା ।
ନିଚ୍ଚଲୋ ହୋତି ଚେ ଭିକ୍ଖୁ, ନ ହୋତାପତ୍ତି ଭିକ୍ଖୁନୋ ॥
ଭିକ୍ଖୁନୀ ଭିକ୍ଖୁନା ଫୁଟ୍ଠା, ସଚେ ହୋତିପି ନିଚ୍ଚଲା ।
ଅଧିୱାସେତି ସମ୍ଫସ୍ସଂ, ତସ୍ସା ପାରାଜିକଂ ସିୟା ॥
ତଥା ଥୁଲ୍ଲଚ୍ଚୟଂ ଖେତ୍ତେ, ଦୁକ୍କଟଞ୍ଚ ୱିନିଦ୍ଦିସେ ।
ୱୁତ୍ତତ୍ତା ‘‘କାୟସଂସଗ୍ଗଂ, ସାଦିୟେୟ୍ୟା’’ତି ସତ୍ଥୁନା ॥
ତସ୍ସା କ୍ରିୟସମୁଟ୍ଠାନଂ, ଏୱଂ ସତି ନ ଦିସ୍ସତି ।
ଇଦଂ ତବ୍ବହୁଲେନେୱ, ନୟେନ ପରିଦୀପିତଂ ॥
ଅନାପତ୍ତି ଅସଞ୍ଚିଚ୍ଚ, ଅଜାନିତ୍ୱାମସନ୍ତିୟା ।
ସତି ଆମସନେ ତସ୍ସା, ଫସ୍ସଂ ୱାସାଦିୟନ୍ତିୟା ॥
ୱେଦନଟ୍ଟାୟ ୱା ଖିତ୍ତ-ଚିତ୍ତାୟୁମ୍ମତ୍ତିକାୟ ୱା ।
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ॥
ଉବ୍ଭଜାଣୁମଣ୍ଡଲକଥା ।
ପାରାଜିକତ୍ତଂ ଜାନନ୍ତି, ସଲିଙ୍ଗେ ତୁ ଠିତାୟ ହି ।
‘‘ନ କସ୍ସଚି ପରସ୍ସାହଂ, ଆରୋଚେସ୍ସାମି ଦାନି’’ତି ॥
ଧୁରେ ନିକ୍ଖିତ୍ତମତ୍ତସ୍ମିଂ, ସା ଚ ପାରାଜିକା ସିୟା ।
ଅୟଂ ୱଜ୍ଜପଟିଚ୍ଛାଦି- ନାମିକା ପନ ନାମତୋ ॥
ସେସଂ ସପ୍ପାଣୱଗ୍ଗସ୍ମିଂ, ଦୁଟ୍ଠୁଲ୍ଲେନ ସମଂ ନୟେ ।
ୱିସେସୋ ତତ୍ର ପାଚିତ୍ତି, ଇଧ ପାରାଜିକଂ ସିୟା ॥
ୱଜ୍ଜପଟିଚ୍ଛାଦିକଥା ।
ସଙ୍ଘେନୁକ୍ଖିତ୍ତକୋ ଭିକ୍ଖୁ, ଠିତୋ ଉକ୍ଖେପନେ ପନ ।
ୟଂଦିଟ୍ଠିକୋ ଚ ସୋ ତସ୍ସା, ଦିଟ୍ଠିୟା ଗହଣେନ ତଂ ॥
ଅନୁୱତ୍ତେୟ୍ୟ ୟା ଭିକ୍ଖୁଂ, ଭିକ୍ଖୁନୀ ସା ୱିସୁମ୍ପି ଚ ।
ସଙ୍ଘମଜ୍ଝେପି ଅଞ୍ଞାହି, ୱୁଚ୍ଚମାନା ତଥେୱ ଚ ॥
ଅଚଜନ୍ତୀୱ ତଂ ୱତ୍ଥୁଂ, ଗହେତ୍ୱା ୟଦି ତିଟ୍ଠତି ।
ତସ୍ସ କମ୍ମସ୍ସ ଓସାନେ, ଉକ୍ଖିତ୍ତସ୍ସାନୁୱତ୍ତିକା ॥
ହୋତି ପାରାଜିକାପନ୍ନା, ହୋତାସାକିୟଧୀତରା ।
ପୁନ ଅପ୍ପଟିସନ୍ଧେୟା, ଦ୍ୱିଧା ଭିନ୍ନା ସିଲା ୱିୟ ॥
ଅଧମ୍ମେ ପନ କମ୍ମସ୍ମିଂ, ନିଦ୍ଦିଟ୍ଠଂ ତିକଦୁକ୍କଟଂ ।
ସମୁଟ୍ଠାନାଦୟୋ ସବ୍ବେ, ୱୁତ୍ତା ସମନୁଭାସନେ ॥
ଉକ୍ଖିତ୍ତାନୁୱତ୍ତିକକଥା ।
ଅପାରାଜିକଖେତ୍ତସ୍ସ, ଗହଣଂ ୟସ୍ସ କସ୍ସଚି ।
ଅଙ୍ଗସ୍ସ ପନ ତଂ ହତ୍ଥ-ଗ୍ଗହଣନ୍ତି ପୱୁଚ୍ଚତି ॥
ପାରୁତସ୍ସ ନିୱତ୍ଥସ୍ସ, ଗହଣଂ ୟସ୍ସ କସ୍ସଚି ।
ଏତଂ ସଙ୍ଘାଟିୟା କଣ୍ଣ-ଗ୍ଗହଣନ୍ତି ପୱୁଚ୍ଚତି ॥
କାୟସଂସଗ୍ଗସଙ୍ଖାତ-ଅସଦ୍ଧମ୍ମସ୍ସ କାରଣା ।
ଭିକ୍ଖୁନୀ ହତ୍ଥପାସସ୍ମିଂ, ତିଟ୍ଠେୟ୍ୟ ପୁରିସସ୍ସ ୱା ॥
ସଲ୍ଲପେୟ୍ୟ ତଥା ତତ୍ଥ, ଠତ୍ୱା ତୁ ପୁରିସେନ ୱା ।
ସଙ୍କେତଂ ୱାପି ଗଚ୍ଛେୟ୍ୟ, ଇଚ୍ଛେୟ୍ୟା ଗମନସ୍ସ ୱା ॥
ତଦତ୍ଥାୟ ପଟିଚ୍ଛନ୍ନ-ଟ୍ଠାନଞ୍ଚ ପୱିସେୟ୍ୟ ୱା ।
ଉପସଂହରେୟ୍ୟ କାୟଂ ୱା, ହତ୍ଥପାସେ ଠିତା ପନ ॥
ଅୟମସ୍ସମଣୀ ହୋତି, ୱିନଟ୍ଠା ଅଟ୍ଠୱତ୍ଥୁକା ।
ଅଭବ୍ବା ପୁନରୁଳ୍ହାୟ, ଛିନ୍ନୋ ତାଲୋୱ ମତ୍ଥକେ ॥
ଅନୁଲୋମେନ ୱା ୱତ୍ଥୁଂ, ପଟିଲୋମେନ ୱା ଚୁତା ।
ଅଟ୍ଠମଂ ପରିପୂରେନ୍ତୀ, ତଥେକନ୍ତରିକାୟ ୱା ॥
ଅଥାଦିତୋ ପନେକଂ ୱା, ଦ୍ୱେ ୱା ତୀଣିପି ସତ୍ତ ୱା ।
ସତକ୍ଖତ୍ତୁମ୍ପି ପୂରେନ୍ତୀ, ନେୱ ପାରାଜିକା ସିୟା ॥
ଆପତ୍ତିୟୋ ପନାପନ୍ନା, ଦେସେତ୍ୱା ତାହି ମୁଚ୍ଚତି ।
ଧୁରନିକ୍ଖେପନଂ କତ୍ୱା, ଦେସିତା ଗଣନୂପିକା ॥
ନ ହୋତାପତ୍ତିୟା ଅଙ୍ଗଂ, ସଉସ୍ସାହାୟ ଦେସିତା ।
ଦେସନାଗଣନଂ ନେତି, ଦେସିତାପି ଅଦେସିତା ॥
ଅନାପତ୍ତି ଅସଞ୍ଚିଚ୍ଚ, ଅଜାନିତ୍ୱା କରୋନ୍ତିୟା ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
‘‘ଅସଦ୍ଧମ୍ମୋ’’ତି ନାମେତ୍ଥ, କାୟସଂସଗ୍ଗନାମକୋ ।
ଅୟମୁଦ୍ଦିସିତୋ ଅତ୍ଥୋ, ସବ୍ବଅଟ୍ଠକଥାସୁପି ॥
ୱିଞ୍ଞୂ ପଟିବଲୋ କାୟ-ସଂସଗ୍ଗଂ ପଟିପଜ୍ଜିତୁଂ ।
କାୟସଂସଗ୍ଗଭାୱେ ତୁ, ସାଧକଂ ୱଚନଂ ଇଦଂ ॥
ଅଟ୍ଠୱତ୍ଥୁକକଥା ।
ଅୱସ୍ସୁତା ପଟିଚ୍ଛାଦୀ, ଉକ୍ଖିତ୍ତା ଅଟ୍ଠୱତ୍ଥୁକା ।
ଅସାଧାରଣପଞ୍ଞତ୍ତା, ଚତସ୍ସୋୱ ମହେସିନା ॥
ପାରାଜିକକଥା ନିଟ୍ଠିତା ।
ସଙ୍ଘାଦିସେସକଥା
ଅଟ୍ଟକରୀ ମୁଖରୀ ୱିହରେୟ୍ୟ ।
ୟେନ କେନଚି ନରେନିଧ ସଦ୍ଧିଂ ।
ସା ଗରୁକଂ କିର ଦୋସମୁପେତି ॥
ସକ୍ଖିଂ ୱାପି ସହାୟଂ ୱା, ପରିୟେସତି ଦୁକ୍କଟଂ ।
ପଦେ ପଦେ ତଥା ଅଟ୍ଟଂ, କାତୁଂ ଗଚ୍ଛନ୍ତିୟାପି ଚ ॥
ଆରୋଚେତି ସଚେ ପୁବ୍ବଂ, ଭିକ୍ଖୁନୀ ଅତ୍ତନୋ କଥଂ ।
ଦିସ୍ୱା ୱୋହାରିକଂ ତସ୍ସା, ହୋତି ଆପତ୍ତି ଦୁକ୍କଟଂ ॥
ଆରୋଚେତି ସଚେ ପଚ୍ଛା, ଇତରୋ ଅତ୍ତନୋ କଥଂ ।
ହୋତି ଭିକ୍ଖୁନିୟା ତସ୍ସା, ଥୁଲ୍ଲଚ୍ଚୟମନନ୍ତରଂ ॥
ଆରୋଚେତିତରୋ ପୁବ୍ବଂ, ସଚେ ସୋ ଅତ୍ତନୋ କଥଂ ।
ପଚ୍ଛା ଭିକ୍ଖୁନୀ ଚେ ପୁବ୍ବ-ସଦିସୋୱ ୱିନିଚ୍ଛୟୋ ॥
‘‘ଆରୋଚେହୀ’’ତି ୱୁତ୍ତା ଚେ, ‘‘କଥଂ ତୱ ମମାପି ଚ’’ ।
ଆରୋଚେତୁ ୟଥାକାମଂ, ପଠମେ ଦୁକ୍କଟଂ ସିୟା ॥
ଦୁତିୟାରୋଚନେ ତସ୍ସା, ଥୁଲ୍ଲଚ୍ଚୟମୁଦୀରିତଂ ।
ଉପାସକେନ ୱୁତ୍ତେପି, ଅୟମେୱ ୱିନିଚ୍ଛୟୋ ॥
ଆରୋଚିତକଥଂ ସୁତ୍ୱା, ଉଭିନ୍ନମ୍ପି ୟଥା ତଥା ।
ୱିନିଚ୍ଛୟେ କତେ ତେହି, ଅଟ୍ଟେ ପନ ଚ ନିଟ୍ଠିତେ ॥
ଅଟ୍ଟସ୍ସ ପରିୟୋସାନେ, ଜୟେ ଭିକ୍ଖୁନିୟା ପନ ।
ପରାଜୟେପି ୱା ତସ୍ସା, ହୋତି ସଙ୍ଘାଦିସେସତା ॥
ଦୂତଂ ୱାପି ପହିଣିତ୍ୱା, ଆଗନ୍ତ୍ୱାନ ସୟମ୍ପି ୱା ।
ପଚ୍ଚତ୍ଥିକମନୁସ୍ସେହି, ଆକଡ୍ଢୀୟତି ୟା ପନ ॥
ଆରାମେ ପନ ଅଞ୍ଞେହି, ଅନାଚାରଂ କତଂ ସଚେ ।
ଅନୋଦିସ୍ସ ପରଂ କିଞ୍ଚି, ରକ୍ଖଂ ୟାଚତି ତତ୍ଥ ୟା ॥
ୟାୟ କିଞ୍ଚି ଅୱୁତ୍ତାୱ, ଧମ୍ମଟ୍ଠା ସୟମେୱ ତୁ ।
ସୁତ୍ୱା ତଂ ଅଞ୍ଞତୋ ଅଟ୍ଟଂ, ନିଟ୍ଠାପେନ୍ତି ସଚେ ପନ ॥
ତସ୍ସା, ଉମ୍ମତ୍ତିକାଦୀନ-ମନାପତ୍ତି ପକାସିତା ।
କଥିନେନ ସମୁଟ୍ଠାନଂ, ତୁଲ୍ୟଂ ସକିରିୟଂ ଇଦଂ ॥
ଅଟ୍ଟକାରିକଥା ।
ଜାନନ୍ତୀ ଭିକ୍ଖୁନୀ ଚୋରିଂ, ୱଜ୍ଝଂ ୱିଦିତମେୱ ୟା ।
ସଙ୍ଘଂ ଅନପଲୋକେତ୍ୱା, ରାଜାନଂ ଗଣମେୱ ୱା ॥
ୱୁଟ୍ଠାପେୟ୍ୟ ୱିନା କପ୍ପଂ, ଚୋରିୱୁଟ୍ଠାପନଂ ପନ ।
ସଙ୍ଘାଦିସେସମାପତ୍ତି-ମାପନ୍ନା ନାମ ହୋତି ସା ॥
ପଞ୍ଚମାସଗ୍ଘନଂ ୟାୟ, ହରିତଂ ପରସନ୍ତକଂ ।
ଅତିରେକଗ୍ଘନଂ ୱାପି, ଅୟଂ ‘‘ଚୋରୀ’’ତି ୱୁଚ୍ଚତି ॥
ଭିକ୍ଖୁନୀସୁ ପନଞ୍ଞାସୁ, ତିତ୍ଥିୟେସୁପି ୱା ତଥା ।
ୟା ପବ୍ବଜିତପୁବ୍ବା ସା, ଅୟଂ ‘‘କପ୍ପା’’ତି ୱୁଚ୍ଚତି ॥
ୱୁଟ୍ଠାପେତି ଚ ୟା ଚୋରିଂ, ଠପେତ୍ୱା କପ୍ପମେୱିଦଂ ।
ସଚେ ଆଚରିନିଂ ପତ୍ତଂ, ଚୀୱରଂ ପରିୟେସତି ॥
ସମ୍ମନ୍ନତି ଚ ସୀମଂ ୱା, ତସ୍ସା ଆପତ୍ତି ଦୁକ୍କଟଂ ।
ଞତ୍ତିୟା ଦୁକ୍କଟଂ ଦ୍ୱୀହି, କମ୍ମୱାଚାହି ଚ ଦ୍ୱୟଂ ॥
ଥୁଲ୍ଲଚ୍ଚୟସ୍ସ, କମ୍ମନ୍ତେ, ଗରୁକଂ ନିଦ୍ଦିସେ ବୁଧୋ ।
ଗଣୋ ଆଚରିନୀ ଚେୱ, ନ ଚ ମୁଚ୍ଚତି ଦୁକ୍କଟଂ ॥
ଅନାପତ୍ତି ଅଜାନନ୍ତୀ, ୱୁଟ୍ଠାପେତି, ତଥେୱ ଚ ।
କପ୍ପଂ ୱା ଅପଲୋକେତ୍ୱା, ତସ୍ସା ଉମ୍ମତ୍ତିକାୟ ୱା ॥
ଚୋରିୱୁଟ୍ଠାପନଂ ନାମ, ଜାୟତେ ୱାଚଚିତ୍ତତୋ ।
କାୟୱାଚାଦିତୋ ଚେୱ, ସଚିତ୍ତଞ୍ଚ କ୍ରିୟାକ୍ରିୟଂ ॥
ଚୋରିୱୁଟ୍ଠାପନକଥା ।
ଗାମନ୍ତରଂ ନଦୀପାରଂ, ଗଚ୍ଛେୟ୍ୟେକାୱ ୟା ସଚେ ।
ଓହୀୟେୟ୍ୟ ଗଣମ୍ହା ୱା, ରତ୍ତିଂ ୱିପ୍ପୱସେୟ୍ୟ ୱା ॥
ପଠମାପତ୍ତିକଂ ଧମ୍ମଂ, ସାପନ୍ନା ଗରୁକଂ ସିୟା ।
ସକଗାମା ଅନାପତ୍ତି, ଞାତବ୍ବା ନିକ୍ଖମନ୍ତିୟା ॥
ନିକ୍ଖମିତ୍ୱା ତତୋ ଅଞ୍ଞଂ, ଗାମଂ ଗଚ୍ଛନ୍ତିୟା ପନ ।
ଦୁକ୍କଟଂ ପଦୱାରେନ, ୱେଦିତବ୍ବଂ ୱିଭାୱିନା ॥
ଏକେନ ପଦୱାରେନ, ଗାମସ୍ସ ଇତରସ୍ସ ଚ ।
ପରିକ୍ଖେପେ ଅତିକ୍କନ୍ତେ, ଉପଚାରୋକ୍କମେପି ୱା ॥
ଥୁଲ୍ଲଚ୍ଚୟଂ ଅତିକ୍କନ୍ତେ, ଓକ୍କନ୍ତେ ଦୁତିୟେନ ତୁ ।
ପାଦେନ ଗରୁକାପତ୍ତି, ହୋତି ଭିକ୍ଖୁନିୟା ପନ ॥
ନିକ୍ଖମିତ୍ୱା ସଚେ ପଚ୍ଛା, ସକଂ ଗାମଂ ୱିସନ୍ତିୟା ।
ଅୟମେୱ ନୟୋ ଞେୟ୍ୟୋ, ୱତିଚ୍ଛିଦ୍ଦେନ ୱା ତଥା ॥
ପାକାରେନ ୱିହାରସ୍ସ, ଭୂମିଂ ତୁ ପୱିସନ୍ତିୟା ।
କପ୍ପିୟନ୍ତି ପୱିଟ୍ଠତ୍ତା, ନ ଦୋସୋ କୋଚି ୱିଜ୍ଜତି ॥
ଭିକ୍ଖୁନୀନଂ ୱିହାରସ୍ସ, ଭୂମି ତାସଂ ତୁ କପ୍ପିୟା ।
ହୋତି ଭିକ୍ଖୁୱିହାରସ୍ସ, ଭୂମି ତାସମକପ୍ପିୟା ॥
ହତ୍ଥିଅସ୍ସରଥାଦୀହି, ଇଦ୍ଧିୟା ୱା ୱିସନ୍ତିୟା ।
ଅନାପତ୍ତି ସିୟାପତ୍ତି, ପଦସା ଗମନେ ପନ ॥
ୟଂ କିଞ୍ଚି ସକଗାମଂ ୱା, ପରଗାମମ୍ପି ୱା ତଥା ।
ବହିଗାମେ ପନ ଠତ୍ୱା, ଆପତ୍ତି ପୱିସନ୍ତିୟା ॥
ଲକ୍ଖଣେନୁପପନ୍ନାୟ, ନଦିୟା ଦୁତିୟଂ ୱିନା ।
ପାରଂ ଗଚ୍ଛତି ୟା ତୀରଂ, ତସ୍ସା ସମଣିୟା ପନ ॥
ପଠମଂ ଉଦ୍ଧରିତ୍ୱାନ, ପାଦଂ ତୀରେ ଠପେନ୍ତିୟା ।
ହୋତି ଥୁଲ୍ଲଚ୍ଚୟାପତ୍ତି, ଦୁତିୟାତିକ୍କମେ ଗରୁ ॥
ଅନ୍ତରନଦିୟଂୟେୱ, ସଦ୍ଧିଂ ଦୁତିୟିକାୟ ହି ।
ଭଣ୍ଡିତ୍ୱା ଓରିମଂ ତୀରଂ, ତଥା ପଚ୍ଚୁତ୍ତରନ୍ତିୟା ॥
ଇଦ୍ଧିୟା ସେତୁନା ନାୱା-ୟାନରଜ୍ଜୂହି ୱା ପନ ।
ଏୱମ୍ପି ଚ ପରଂ ତୀରଂ, ଅନାପତ୍ତୁତ୍ତରନ୍ତିୟା ॥
ନ୍ହାୟିତୁଂ ପିୱିତୁଂ ୱାପି, ଓତିଣ୍ଣାଥ ନଦିଂ ପୁନ ।
ପଦସାୱୋରିମଂ ତୀରଂ, ପଚ୍ଚୁତ୍ତରତି ୱଟ୍ଟତି ॥
ପଦସା ଓତରିତ୍ୱାନ, ନଦିଂ ଉତ୍ତରଣେ ପନ ।
ଆରୋହିତ୍ୱା ତଥା ସେତୁଂ, ଅନାପତ୍ତୁତ୍ତରନ୍ତିୟା ॥
ସେତୁନା ଉପଗନ୍ତ୍ୱା ୱା, ୟାନାକାସେହି ୱା ସଚେ ।
ୟାତି ଉତ୍ତରଣେ କାଲେ, ପଦସା ଗରୁକଂ ଫୁସେ ॥
ନଦିୟା ପାରିମଂ ତୀରଂ, ଇତୋ ଓରିମତୀରତୋ ।
ଉଲ୍ଲଙ୍ଘିତ୍ୱାନ ୱେଗେନ, ଅନାପତ୍ତୁତ୍ତରନ୍ତିୟା ॥
ପିଟ୍ଠିୟଂ ୱା ନିସୀଦିତ୍ୱା, ଖନ୍ଧେ ୱା ଉତ୍ତରନ୍ତିୟା ।
ହତ୍ଥସଙ୍ଘାତନେ ୱାପି, ଦୁସ୍ସୟାନେପି ୱଟ୍ଟତି ॥
‘‘ପୁରେରୁଣୋଦୟାୟେୱ, ପାସଂ ଦୁତିୟିକାୟ ହି ।
ଗମିସ୍ସାମୀ’’ତି ଆଭୋଗଂ, ୱିନା ଭିକ୍ଖୁନିୟା ପନ ॥
ଏକଗବ୍ଭେପି ୱା ହତ୍ଥ-ପାସଂ ଦୁତିୟିକାୟ ହି ।
ଅତିକ୍କମ୍ମ ସିୟାପତ୍ତି, ଅରୁଣଂ ଉଟ୍ଠପେନ୍ତିୟା ॥
‘‘ଗମିସ୍ସାମୀ’’ତି ଆଭୋଗଂ, କତ୍ୱା ଗଚ୍ଛନ୍ତିୟା ପନ ।
ନ ଦୋସୋ ଦୁତିୟା ପାସଂ, ଉଟ୍ଠେତି ଅରୁଣଂ ସଚେ ॥
ଇନ୍ଦଖୀଲମତିକ୍କମ୍ମ, ଅରଞ୍ଞଂ ଏତ୍ଥ ଦୀପିତଂ ।
ଗାମତୋ ବହି ନିକ୍ଖମ୍ମ, ତସ୍ସା ଦୁତିୟିକାୟ ତୁ ॥
ଦସ୍ସନସ୍ସୁପଚାରଂ ତୁ, ଜାନିତ୍ୱା ୱିଜହନ୍ତିୟା ।
ହୋତି ଥୁଲ୍ଲଚ୍ଚୟାପତ୍ତି, ଜହିତେ ଗରୁକଂ ସିୟା ॥
ସାଣିପାକାରପାକାର-ତରୁଅନ୍ତରିତେ ପନ ।
ସୱନସ୍ସୁପଚାରେପି, ସତି ଆପତ୍ତି ହୋତି ହି ॥
ଅଜ୍ଝୋକାସେ ତୁ ଦୂରେପି, ଦସ୍ସନସ୍ସୁପଚାରତା ।
ହୋତି, ଏତ୍ଥ କଥଂ ଧମ୍ମ-ସୱନାରୋଚନେ ୱିୟ ॥
ମଗ୍ଗମୂଳ୍ହସ୍ସ ସଦ୍ଦେନ, ୱିୟ କୂଜନ୍ତିୟା ପନ ।
‘‘ଅୟ୍ୟେ’’ତି ତସ୍ସା ସଦ୍ଦସ୍ସ, ସୱନାତିକ୍କମେପି ଚ ॥
ହୋତି, ଭିକ୍ଖୁନିୟାପତ୍ତି, ଗରୁକା ଏୱରୂପକେ ।
ଏତ୍ଥ ଭିକ୍ଖୁନୀ ଏକାପି, ଗଣାୟେୱାତି ୱୁଚ୍ଚତି ॥
ଓହୀୟିତ୍ୱାଥ ଗଚ୍ଛନ୍ତୀ, ‘‘ପାପୁଣିସ୍ସାମି ଦାନିହଂ’’ ।
ଇଚ୍ଚେୱଂ ତୁ ସଉସ୍ସାହା, ଅନୁବନ୍ଧତି ୱଟ୍ଟତି ॥
ଦ୍ୱିନ୍ନଂ ମଗ୍ଗଂ ଗଚ୍ଛନ୍ତୀନଂ, ଏକା ଗନ୍ତୁଂ ନୋ ସକ୍କୋତି ।
ଉସ୍ସାହସ୍ସଚ୍ଛେଦଂ କତ୍ୱା, ଓହୀନା ଚେ ତସ୍ସାପତ୍ତି ॥
ଇତରାପି ସଚେ ୟାତି, ‘‘ଓହୀୟତୁ ଅୟ’’ନ୍ତି ଚ ।
ହୋତି ତସ୍ସାପି ଆପତ୍ତି, ସଉସ୍ସାହା ନ ହୋତି ଚେ ॥
ଗଚ୍ଛନ୍ତୀସୁ ତଥା ଦ୍ୱୀସୁ, ପୁରିମା ୟାତି ଏକକଂ ।
ଅଞ୍ଞଂ ପନ ସଚେ ମଗ୍ଗଂ, ପଚ୍ଛିମାପି ଚ ଗଣ୍ହତି ॥
ଏକିସ୍ସା ପନ ପକ୍କନ୍ତ-ଟ୍ଠାନେ ତିଟ୍ଠତି ଚେତରା ।
ତସ୍ମା ତତ୍ଥ ଉଭିନ୍ନମ୍ପି, ଅନାପତ୍ତି ପକାସିତା ॥
ଅରୁଣୁଗ୍ଗମନା ପୁବ୍ବେ, ନିକ୍ଖମିତ୍ୱା ସଗାମତୋ ।
ଅରୁଣୁଗ୍ଗମନେ କାଲେ, ଗାମନ୍ତରଗତାୟ ହି ॥
ଅତିକ୍କମନ୍ତିୟା ପାରଂ, ନଦିୟା ଦୁତିୟିକଂ ୱିନା ।
ଆପତ୍ତିୟୋ ଚତସ୍ସୋପି, ହୋନ୍ତି ଏକକ୍ଖଣେ ପନ ॥
ପକ୍କନ୍ତା ୱାପି ୱିବ୍ଭନ୍ତା, ୟାତା ପେତାନଂ ଲୋକଂ ୱା ।
ପକ୍ଖସଙ୍କନ୍ତା ୱା ନଟ୍ଠା, ସଦ୍ଧିଂ ୟାତା ସା ଚେ ହୋତି ॥
ଗାମନ୍ତରୋକ୍କମାଦୀନି, ଚତ୍ତାରିପି କରୋନ୍ତିୟା ।
ଅନାପତ୍ତୀତି ଞାତବ୍ବଂ, ଏୱଂ ଉମ୍ମତ୍ତିକାୟପି ॥
ରତ୍ତିୟଂ ୱିପ୍ପୱାସଂ ତୁ, ହତ୍ଥପାସୋୱ ରକ୍ଖତି ।
ଅଗାମକେ ଅରଞ୍ଞେ ତୁ, ଗଣା ଓହୀୟନଂ ମତଂ ॥
ସକଗାମେ ୟଥାକାମଂ, ଦିୱା ଚ ୱିଚରନ୍ତିୟା ।
ଚତ୍ତାରୋପି ଚ ସଙ୍ଘାଦି-ସେସା ତସ୍ସା ନ ୱିଜ୍ଜରେ ॥
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ।
ସଚିତ୍ତଂ କାୟକମ୍ମଞ୍ଚ, ତିଚିତ୍ତଞ୍ଚ ତିୱେଦନଂ ॥
ଗାମନ୍ତରଗମନକଥା ।
ସୀମାସମ୍ମୁତିୟା ଚେୱ, ଗଣସ୍ସ ପରିୟେସନେ ।
ଞତ୍ତିୟା ଦୁକ୍କଟଂ, ଦ୍ୱୀହି, ହୋନ୍ତି ଥୁଲ୍ଲଚ୍ଚୟା ଦୁୱେ ॥
କମ୍ମସ୍ସ ପରିୟୋସାନେ, ହୋତି ସଙ୍ଘାଦିସେସତା ।
ତିକସଙ୍ଘାଦିସେସଂ ତୁ, ଅଧମ୍ମେ ତିକଦୁକ୍କଟଂ ॥
ପୁଚ୍ଛିତ୍ୱା କାରକଂ ସଙ୍ଘଂ, ଛନ୍ଦଂ ଦତ୍ୱା ଗଣସ୍ସ ୱା ।
ୱତ୍ତେ ୱା ପନ ୱତ୍ତନ୍ତିଂ, ଅସନ୍ତେ କାରକେପି ୱା ॥
ଭିକ୍ଖୁନିଂ ପନ ଉକ୍ଖିତ୍ତଂ, ୟା ଓସାରେତି ଭିକ୍ଖୁନୀ ।
ତସ୍ସା ଉମ୍ମତ୍ତିକାଦୀନ-ମନାପତ୍ତି ପକାସିତା ॥
ସଙ୍ଘଭେଦସମା ୱୁତ୍ତା, ସମୁଟ୍ଠାନାଦୟୋ ନୟା ।
କ୍ରିୟାକ୍ରିୟମିଦଂ ୱୁତ୍ତଂ, ଅୟମେୱ ୱିସେସତା ॥
ଚତୁତ୍ଥଂ ।
ସୟଂ ଅୱସ୍ସୁତା ତଥା, ଅୱସ୍ସୁତସ୍ସ ହତ୍ଥତୋ ।
ମନୁସ୍ସପୁଗ୍ଗଲସ୍ସ ଚେ, ୟଦେୱ କିଞ୍ଚି ଗଣ୍ହତି ॥
ଆମିସଂ, ଗହଣେ ତସ୍ସା ।
ଥୁଲ୍ଲଚ୍ଚୟମୁଦୀରିତଂ ।
ଅଜ୍ଝୋହାରେସୁ ସଙ୍ଘାଦି- ।
ସେସା ହୋନ୍ତି ପୟୋଗତୋ ॥
ଏକତୋୱସ୍ସୁତେ କିଞ୍ଚି, ପଟିଗ୍ଗଣ୍ହତି, ଦୁକ୍କଟଂ ।
ଅଜ୍ଝୋହାରପ୍ପୟୋଗେସୁ, ଥୁଲ୍ଲଚ୍ଚୟଚୟୋ ସିୟା ॥
ୟକ୍ଖପେତତିରଚ୍ଛାନ-ପଣ୍ଡକାନଞ୍ଚ ହତ୍ଥତୋ ।
ମନୁସ୍ସୱିଗ୍ଗହାନମ୍ପି, ଉଭତୋୱସ୍ସୁତେ ତଥା ॥
ଏକତୋୱସ୍ସୁତେ ଏତ୍ଥ, ଉଦକେ ଦନ୍ତକଟ୍ଠକେ ।
ଗହଣେ ପରିଭୋଗେ ଚ, ସବ୍ବତ୍ଥାପି ଚ ଦୁକ୍କଟଂ ॥
ଉଭୟାୱସ୍ସୁତାଭାୱେ, ନ ଦୋସୋ ୟଦି ଗଣ୍ହତି ।
‘‘ଅୱସ୍ସୁତୋ ନ ଚାୟ’’ନ୍ତି, ଞତ୍ୱା ଗଣ୍ହତି ୟା ପନ ॥
ତସ୍ସା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ॥
ପଞ୍ଚମଂ ।
ଉୟ୍ୟୋଜନେ ପନେକିସ୍ସା, ଇତରିସ୍ସା ପଟିଗ୍ଗହେ ।
ଦୁକ୍କଟାନି ଚ ଭୋଗେସୁ, ଥୁଲ୍ଲଚ୍ଚୟଗଣୋ ସିୟା ॥
ଭୋଜନସ୍ସାୱସାନସ୍ମିଂ, ହୋତି ସଙ୍ଘାଦିସେସତା ।
ୟକ୍ଖାଦୀନଂ ଚତୁନ୍ନମ୍ପି, ତଥେୱ ପୁରିସସ୍ସ ଚ ॥
ଦନ୍ତକଟ୍ଠୁଦକାନଞ୍ଚ, ଗହଣୁୟ୍ୟୋଜନେ ପନ ।
ତେସଞ୍ଚ ପରିଭୋଗେପି, ଦୁକ୍କଟଂ ପରିକିତ୍ତିତଂ ॥
ୟକ୍ଖାଦୀନଂ ତୁ ସେସସ୍ସ, ଗହଣୁୟ୍ୟୋଜନେ ପନ ।
ଭୋଗେ ଚ ଦୁକ୍କଟଂ, ଭୁତ୍ତେ, ଥୁଲ୍ଲଚ୍ଚୟମୁଦୀରିତଂ ॥
‘‘ନାୱସ୍ସୁତୋ’’ତି ଞତ୍ୱା ୱା, କୁପିତା ୱା ନ ଗଣ୍ହତି ।
କୁଲାନୁଦ୍ଦୟତା ୱାପି, ଉୟ୍ୟୋଜେତି ଚ ୟା ପନ ॥
ତସ୍ସା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଛଟ୍ଠଂ ।
ସତ୍ତମଂ ଅଟ୍ଠମଂ ସଙ୍ଘ-ଭେଦେନ ସଦିସଂ ମତଂ ।
ସମୁଟ୍ଠାନାଦିନା ସଦ୍ଧିଂ, ନତ୍ଥି କାଚି ୱିସେସତା ॥
ସତ୍ତମଟ୍ଠମାନି ।
ନୱମେ ଦସମେ ୱାପି, ୱତ୍ତବ୍ବଂ ନତ୍ଥି କିଞ୍ଚିପି ।
ଅନନ୍ତରସମାୟେୱ, ସମୁଟ୍ଠାନାଦୟୋ ନୟା ॥
ନୱମଦସମାନି ।
ଦୁଟ୍ଠଦୋସଦ୍ୱୟେନାପି, ସଞ୍ଚରିତ୍ତେନ ତେନ ଛ ।
ୟାୱତତିୟକା ଅଟ୍ଠ, ଚତ୍ତାରି ଚ ଇତୋ ତତୋ ॥
ସଙ୍ଘାଦିସେସକଥା ।
ନିସ୍ସଗ୍ଗିୟକଥା
ଅଧିଟ୍ଠାନୂପଗଂ ପତ୍ତଂ, ଅନଧିଟ୍ଠାୟ ଭିକ୍ଖୁନୀ ।
ୱିକପ୍ପନମକତ୍ୱା ୱା, ଏକାହମ୍ପି ଠପେୟ୍ୟ ଚେ ॥
ଅରୁଣୁଗ୍ଗମନେନେୱ, ସଦ୍ଧିଂ ଭିକ୍ଖୁନିୟା ସିୟା ।
ତସ୍ସା ନିସ୍ସଗ୍ଗିୟାପତ୍ତି, ପତ୍ତସନ୍ନିଧିକାରଣା ॥
ସେସୋ ପନ କଥାମଗ୍ଗୋ, ପତ୍ତସିକ୍ଖାପଦେ ଇଧ ।
ସବ୍ବୋ ୱୁତ୍ତନୟେନେୱ, ୱେଦିତବ୍ବୋ ୱିନିଚ୍ଛୟୋ ॥
ଦସାହାତିକ୍କମେ ତତ୍ଥ, ଏକାହାତିକ୍କମେ ଇଧ ।
ତସ୍ସିମସ୍ସ ଉଭିନ୍ନମ୍ପି, ଅୟମେୱ ୱିସେସତା ॥
ପଠମଂ ।
ଅକାଲେ ଚୀୱରଂ ଦିନ୍ନଂ, ଦିନ୍ନଂ କାଲେପି କେନଚି ।
ଆଦିସ୍ସ ପନ ‘‘ସମ୍ପତ୍ତା, ଭାଜେନ୍ତୂ’’ତି ନିୟାମିତଂ ॥
ଅକାଲଚୀୱରଂ ‘‘କାଲ-ଚୀୱର’’ନ୍ତି ସଚେ ପନ ।
ଭାଜାପେୟ୍ୟ ଚ ୟା ତସ୍ସା, ପୟୋଗେ ଦୁକ୍କଟଂ ସିୟା ॥
ଅତ୍ତନା ପଟିଲଦ୍ଧଂ ୟଂ, ତଂ ତୁ ନିସ୍ସଗ୍ଗିୟଂ ଭୱେ ।
ଲଭିତ୍ୱା ପନ ନିସ୍ସଟ୍ଠଂ, ୟଥାଦାନେ ନିୟୋଜୟେ ॥
କତ୍ୱା ୱିନୟକମ୍ମଂ ତୁ, ପଟିଲଦ୍ଧମ୍ପି ତଂ ପୁନ ।
ତସ୍ସ ଚାୟମଧିପ୍ପାୟୋ, ସେୱିତୁଂ ନ ଚ ୱଟ୍ଟତି ॥
ଅକାଲୱତ୍ଥସଞ୍ଞାୟ, ଦୁକ୍କଟଂ କାଲଚୀୱରେ ।
ଉଭୟତ୍ଥପି ନିଦ୍ଦିଟ୍ଠଂ, ତଥା ୱେମତିକାୟପି ॥
କାଲଚୀୱରସଞ୍ଞାୟ, ଚୀୱରେ ଉଭୟତ୍ଥପି ।
ନ ଦୋସୁମ୍ମତ୍ତିକାଦୀନଂ, ତିସମୁଟ୍ଠାନତା ମତା ॥
ଦୁତିୟଂ ।
ଚୀୱରେସୁପି ବନ୍ଧିତ୍ୱା, ଠପିତେସୁ ବହୂସ୍ୱପି ।
ଏକାୟେୱ ସିୟାପତ୍ତି, ଅଚ୍ଛିନ୍ଦତି ସଚେ ସୟଂ ॥
ତଥାଚ୍ଛିନ୍ଦାପନେ ଏକା, ଏକାୟାଣତ୍ତିୟା ଭୱେ ।
ଇତରେସୁ ଚ ୱତ୍ଥୂନଂ, ପୟୋଗସ୍ସ ୱସା ସିୟା ॥
ତିକପାଚିତ୍ତି ଅଞ୍ଞସ୍ମିଂ, ପରିକ୍ଖାରେ ତୁ ଦୁକ୍କଟଂ ।
ତିକଦୁକ୍କଟମୁଦ୍ଦିଟ୍ଠଂ, ଇତରିସ୍ସା ତୁ ଚୀୱରେ ॥
ତାୟ ୱା ଦୀୟମାନଂ ତୁ, ତସ୍ସା ୱିସ୍ସାସମେୱ ୱା ।
ଗଣ୍ହନ୍ତିୟା ଅନାପତ୍ତି, ତିସମୁଟ୍ଠାନତା ମତା ॥
ତତିୟଂ ।
ୱିଞ୍ଞାପେତ୍ୱା ସଚେ ଅଞ୍ଞଂ, ତଦଞ୍ଞଂ ୱିଞ୍ଞାପେନ୍ତିୟା ।
ୱିଞ୍ଞତ୍ତିଦୁକ୍କଟଂ ତସ୍ସା, ଲାଭା ନିସ୍ସଗ୍ଗିୟଂ ସିୟା ॥
ତିକପାଚିତ୍ତିୟଂ ୱୁତ୍ତଂ, ଅନଞ୍ଞେ ଦ୍ୱିକଦୁକ୍କଟଂ ।
ଅନଞ୍ଞେନଞ୍ଞସଞ୍ଞାୟ, ଅପ୍ପହୋନ୍ତେପି ୱା ପୁନ ॥
ତସ୍ମିଂ ତଞ୍ଞେୱ ୱା ଅଞ୍ଞଂ, ଅଞ୍ଞେନତ୍ଥେପି ୱା ସତି ।
ଆନିସଂସଞ୍ଚ ଦସ୍ସେତ୍ୱା, ତଦଞ୍ଞଂ ୱିଞ୍ଞାପେନ୍ତିୟା ॥
ଅନାପତ୍ତୀତି ଞାତବ୍ବଂ, ତଥା ଉମ୍ମତ୍ତିକାୟପି ।
ସଞ୍ଚରିତ୍ତସମା ୱୁତ୍ତା, ସମୁଟ୍ଠାନାଦୟୋ ନୟା ॥
ଚତୁତ୍ଥଂ ।
ଅଞ୍ଞଂ ଚେତାପେତ୍ୱା ପୁବ୍ବଂ, ପଚ୍ଛା ଅଞ୍ଞଂ ଚେତାପେୟ୍ୟ ।
ଏୱଂ ସଞ୍ଞାୟଞ୍ଞଂ ଧଞ୍ଞଂ, ମୟ୍ହଂ ଆନେତ୍ୱା ଦେତୀତି ॥
ଚେତାପନପୟୋଗେନ, ମୂଲଟ୍ଠାୟ ହି ଦୁକ୍କଟଂ ।
ଲାଭେ ନିସ୍ସଗ୍ଗିୟଂ ହୋତି, ତେନ ଚଞ୍ଞେନ ୱାଭତଂ ॥
ସେସଂ ଅନନ୍ତରେନେୱ, ସଦିସନ୍ତି ୱିନିଦ୍ଦିସେ ।
ସମୁଟ୍ଠାନାଦିନା ସଦ୍ଧିଂ, ଅପୁବ୍ବଂ ନତ୍ଥି କିଞ୍ଚିପି ॥
ପଞ୍ଚମଂ ।
ଅଞ୍ଞଦତ୍ଥାୟ ଦିନ୍ନେନ, ପରିକ୍ଖାରେନ ୟା ପନ ।
ଚେତାପେୟ୍ୟ ସଚେ ଅଞ୍ଞଂ, ସଙ୍ଘିକେନିଧ ଭିକ୍ଖୁନୀ ॥
ପୟୋଗେ ଦୁକ୍କଟଂ, ଲାଭେ, ତସ୍ସା ନିସ୍ସଗ୍ଗିୟଂ ସିୟା ।
ଅନଞ୍ଞଦତ୍ଥିକେ ଏତ୍ଥ, ନିଦ୍ଦିଟ୍ଠଂ ଦ୍ୱିକଦୁକ୍କଟଂ ॥
ସେସକଂ ଅଞ୍ଞଦତ୍ଥାୟ, ଅନାପତ୍ତୁପନେନ୍ତିୟା ।
ପୁଚ୍ଛିତ୍ୱା ସାମିକେ ୱାପ୍ୟା-ପଦାସୁମ୍ମତ୍ତିକାୟ ୱା ॥
ସଞ୍ଚରିତ୍ତସମା ୱୁତ୍ତା, ସମୁଟ୍ଠାନାଦୟୋ ନୟା ।
ସତ୍ତମଂ ଛଟ୍ଠସଦିସଂ, ସୟଂ ୟାଚିତକଂ ୱିନା ॥
ଛଟ୍ଠସତ୍ତମାନି ।
ଅଟ୍ଠମେ ନୱମେ ୱାପି, ୱତ୍ତବ୍ବଂ ନତ୍ଥି କିଞ୍ଚିପି ।
‘‘ମହାଜନିକସଞ୍ଞାଚି-କେନା’’ତି ପଦତାଧିକା ॥
ଦସମେପି କଥା ସବ୍ବା, ଅନନ୍ତରସମା ମତା ।
ସମୁଟ୍ଠାନାଦିନା ସଦ୍ଧିଂ, ୱିସେସୋ ନତ୍ଥି କୋଚିପି ॥
ଅଟ୍ଠମନୱମଦସମାନି ।
ପଠମୋ ୱଗ୍ଗୋ ।
ଅତିରେକଚତୁକ୍କଂସଂ, ଗରୁପାୱୁରଣଂ ପନ ।
ଚେତାପେୟ୍ୟ ସଚେ ତସ୍ସା, ଚତୁସଚ୍ଚପ୍ପକାସିନା ॥
ପୟୋଗେ ଦୁକ୍କଟଂ ୱୁତ୍ତଂ, ଲାଭେ ନିସ୍ସଗ୍ଗିୟଂ ମତଂ ।
କହାପଣଚତୁକ୍କଂ ତୁ, କଂସୋ ନାମ ପୱୁଚ୍ଚତି ॥
ଊନକେ ତୁ ଚତୁକ୍କଂସେ, ଉଦ୍ଦିଟ୍ଠଂ ଦ୍ୱିକଦୁକ୍କଟଂ ।
ଅନାପତ୍ତି ଚତୁକ୍କଂସ-ପରମଂ ଗରୁକଂ ପନ ॥
ଚେତାପେତି ତଦୂନଂ ୱା, ଞାତକାନଞ୍ଚ ସନ୍ତକେ ।
ଅଞ୍ଞସ୍ସତ୍ଥାୟ ୱା ଅତ୍ତ-ଧନେନୁମ୍ମତ୍ତିକାୟ ୱା ॥
ଚେତାପେନ୍ତଂ ମହଗ୍ଘଂ ୟା, ଚେତାପେତପ୍ପମେୱ ୱା ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଏକାଦସମଂ ।
ଲହୁପାୱୁରଣଂ ଅଡ୍ଢ- ତେୟ୍ୟକଂସଗ୍ଘନଂ ପନ ।
ତତୋ ଚେ ଉତ୍ତରିଂ ୟଂ ତୁ, ଚେତାପେତି ହି ଭିକ୍ଖୁନୀ ॥
ତସ୍ସା ନିସ୍ସଗ୍ଗିୟାପତ୍ତି, ପାଚିତ୍ତି ପରିୟାପୁତା ।
ଅନନ୍ତରସମଂ ସେସଂ, ନତ୍ଥି କାଚି ୱିସେସତା ॥
ଦ୍ୱାଦସମଂ ।
ସାଧାରଣାନି ସେସାନି, ତାନି ଅଟ୍ଠାରସାପି ଚ ।
ଇମାନି ଦ୍ୱାଦସେୱାପି, ସମତିଂସେୱ ହୋନ୍ତି ହି ॥
ନିସ୍ସଗ୍ଗିୟକଥା ।
ପାଚିତ୍ତିୟକଥା
ଲସୁଣଂ ଭଣ୍ଡିକଂ ୱୁତ୍ତଂ, ନ ଏକଦ୍ୱିତିମିଞ୍ଜକଂ ।
ଆମକଂ ମାଗଧଂୟେୱ, ‘‘ଖାଦିସ୍ସାମୀ’’ତି ଗଣ୍ହତି ॥
ଗହଣେ ଦୁକ୍କଟଂ ତସ୍ସା, ପାଚିତ୍ତି ୟଦି ଖାଦତି ।
ଅଜ୍ଝୋହାରୱସେନେୱ, ପାଚିତ୍ତିଂ ପରିଦୀପୟେ ॥
ଦ୍ୱେ ତୟୋ ଭଣ୍ଡିକେ ସଦ୍ଧିଂ, ସଙ୍ଖାଦିତ୍ୱା ସଚେ ପନ ।
ଅଜ୍ଝୋହରତି ୟା ତସ୍ସା, ଏକଂ ପାଚିତ୍ତିୟଂ ସିୟା ॥
ଭିନ୍ଦିତ୍ୱା ତତ୍ଥ ଏକେକଂ, ମିଞ୍ଜଂ ଖାଦନ୍ତିୟା ପନ ।
ମିଞ୍ଜାନଂ ଗଣନାୟସ୍ସା, ପାଚିତ୍ତିଗଣନା ସିୟା ॥
ପଲଣ୍ଡୁକୋ ଭଞ୍ଜନକୋ, ହରିତୋ ଚାପଲୋପି ଚ ।
ଲସୁଣା ପନ ଚତ୍ତାରୋ, ୱଟ୍ଟନ୍ତେୱ ସଭାୱତୋ ॥
ପଲଣ୍ଡୁକୋ ପଣ୍ଡୁୱଣ୍ଣୋ, ଭଞ୍ଜନୋ ଲୋହିତୋପି ଚ ।
ହରିତୋ ହରିତୱଣ୍ଣୋ, ଚାପଲୋ ସେତକୋପି ଚ ॥
ଏକା ମିଞ୍ଜା ପଲଣ୍ଡୁସ୍ସ, ଭଞ୍ଜନସ୍ସ ଦୁୱେ ସିୟୁଂ ।
ତିସ୍ସୋ ହରିତକସ୍ସାପି, ଚାପଲୋ ହୋତ୍ୟମିଞ୍ଜକୋ ॥
ସୂପମଂସାଦିସଂପାକେ, ସାଳୱୁତ୍ତରିଭଙ୍ଗକେ ।
ନ ଦୋସୁମ୍ମତ୍ତିକାଦୀନଂ, ସମୁଟ୍ଠାନେଳକୂପମଂ ॥
ପଠମଂ ।
ସମ୍ବାଧେ ଉପକଚ୍ଛେସୁ, ମୁତ୍ତସ୍ସ କରଣେପି ୱା ।
ଏକଲୋମମ୍ପି ପାଚିତ୍ତି, ସଂହରାପେନ୍ତିୟା ସିୟା ॥
ବହୁକେପି ତଥା ଲୋମେ, ସଂହରାପେନ୍ତିୟା ପନ ।
ପୟୋଗଗଣନାୟସ୍ସା, ନ ଲୋମଗଣନାୟ ହି ॥
ନ ଦୋସୋ ସତି ଆବାଧେ, ଲୋମକେ ସଂହରନ୍ତିୟା ।
ସମୁଟ୍ଠାନାଦୟୋ ମଗ୍ଗ- ସଂୱିଧାନସମା ମତା ॥
ଦୁତିୟଂ ।
ହୋତି ଅନ୍ତମସୋ ମୁତ୍ତ-କରଣସ୍ସ ତଲଘାତନେ ।
କେସରେନାପି ରାଗେନ, ପାଚିତ୍ତି ପଦୁମସ୍ସ ୱା ॥
ଗଣ୍ଡଂ ତତ୍ଥ ୱଣଂ ୱାପି, ନ ଦୋସୋ ପହରନ୍ତିୟା ।
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ॥
ତତିୟଂ ।
ୟା ପନୁପ୍ପଲପତ୍ତମ୍ପି, ବ୍ୟଞ୍ଜନେ ଭିକ୍ଖୁନତ୍ତନୋ ।
କାମରାଗପରେତା ତୁ, ପୱେସେତି ନ ୱଟ୍ଟତି ॥
ଇଦଂ ୱତ୍ଥୁୱସେନେୱ, ୱୁତ୍ତଂ ତୁ ଜତୁମଟ୍ଠକଂ ।
ଦଣ୍ଡମେଲାଳୁକଂ ୱାପି, ମୁତ୍ତସ୍ସ କରଣେ ପନ ॥
ସମ୍ଫସ୍ସଂ ସାଦିୟନ୍ତିୟା, ପୱେସେତି ସଚେ ପନ ।
ପୱେସାପେତି ୱା ତସ୍ମିଂ, ତସ୍ସା ପାଚିତ୍ତିୟଂ ସିୟା ॥
ଆବାଧପଚ୍ଚୟା ଦୋସୋ, ନତ୍ଥି ଉମ୍ମତ୍ତିକାୟ ୱା ।
ତଲଘାତକତୁଲ୍ୟାୱ, ସମୁଟ୍ଠାନାଦୟୋ ମତା ॥
ଚତୁତ୍ଥଂ ।
ଅଙ୍ଗୁଲୀନଂ ପନ ଦ୍ୱିନ୍ନଂ, ଅଗ୍ଗପବ୍ବଦ୍ୱୟାଧିକଂ ।
ପାଚିତ୍ତିୟଂ ପୱେସେତ୍ୱା, ଦକସୁଦ୍ଧିଂ କରୋନ୍ତିୟା ॥
ଏକିସ୍ସାଙ୍ଗୁଲିୟା ତୀଣି, ପବ୍ବାନି ପନ ଦୀଘତୋ ।
ପାଚିତ୍ତିୟଂ ଭୱେ ସୁଦ୍ଧିଂ, ପୱେସେତ୍ୱାଦିୟନ୍ତିୟା ॥
ଚତୁନ୍ନଂ ୱାପି ତିସ୍ସନ୍ନଂ, ଏକପବ୍ବମ୍ପି ୟା ପନ ।
ୱିତ୍ଥାରତୋ ପୱେସେତି, ତସ୍ସା ପାଚିତ୍ତିୟଂ ସିୟା ॥
ଇତି ସବ୍ବପ୍ପକାରେନ, ମହାପଚ୍ଚରିୟା ପନ ।
ଅଭିବ୍ୟତ୍ତତରଂ କତ୍ୱା, ଅୟମତ୍ଥୋ ୱିଭାୱିତୋ ॥
ଦୋସୋ ଦ୍ୱଙ୍ଗୁଲପବ୍ବେ ୱା, ନତ୍ଥି ଆବାଧକାରଣା ।
ଅଧିକମ୍ପି ପୱେସେତ୍ୱା, ଦକସୁଦ୍ଧିଂ କରୋନ୍ତିୟା ॥
ତଥା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ସମୁଟ୍ଠାନାଦୟୋ ସବ୍ବେ, ତଲଘାତସମା ମତା ॥
ପଞ୍ଚମଂ ।
ଭୁଞ୍ଜତୋ ପନ ଭିକ୍ଖୁସ୍ସ, ପାନୀୟଂ ୱା ୱିଧୂପନଂ ।
ଗହେତ୍ୱା ଉପତିଟ୍ଠେୟ୍ୟ, ତସ୍ସା ପାଚିତ୍ତିୟଂ ସିୟା ॥
ଗହିତା ଉଦକେନେୱ, ଖୀରତକ୍କାଦୟୋ ରସା ।
‘‘ବୀଜନୀ’’ତି ଚ ୟା କାଚି, ୱତ୍ଥକୋଣାଦି ୱୁଚ୍ଚତି ॥
ହତ୍ଥପାସେ ଇଧଟ୍ଠାନ-ପଚ୍ଚୟାପତ୍ତି ଦୀପିତା ।
ପହାରପଚ୍ଚୟା ୱୁତ୍ତଂ, ଖନ୍ଧକେ ଦୁକ୍କଟଂ ୱିସୁଂ ॥
ହତ୍ଥପାସଂ ଜହିତ୍ୱା ୱା, ଉପତିଟ୍ଠନ୍ତିୟା ପନ ।
ଖାଦତୋ ଖାଦନଂ ୱାପି, ହୋତି ଆପତ୍ତି ଦୁକ୍କଟଂ ॥
ନ ଦୋସୋ ଦେତି ଦାପେତି, ତଥା ଉମ୍ମତ୍ତିକାୟ ୱା ।
ଇଦଂ ଏଳକଲୋମେନ, ସମୁଟ୍ଠାନଂ ସମଂ ମତଂ ॥
ଛଟ୍ଠଂ ।
ୱିଞ୍ଞତ୍ୱା ଆମକଂ ଧଞ୍ଞଂ, ଭଜ୍ଜିତ୍ୱା ୟଦି ଭିକ୍ଖୁନୀ ।
କୋଟ୍ଟେତ୍ୱା ଚ ପଚିତ୍ୱା ଚ, ପାଚିତ୍ତି ପରିଭୁଞ୍ଜତି ॥
ନ କେୱଲଂ ତୁ ଧଞ୍ଞାନଂ, ଗହଣେୟେୱ ଦୁକ୍କଟଂ ।
ହରଣେପି ଚ ଧଞ୍ଞାନଂ, ତଥା ସୁକ୍ଖାପନେ ପନ ॥
ଭଜ୍ଜନତ୍ଥାୟ ଧଞ୍ଞାନଂ, କପଲ୍ଲୁଦ୍ଧନସଜ୍ଜନେ ।
ଅଗ୍ଗିସ୍ସ କରଣେ ଦବ୍ବି-ସଜ୍ଜନେ ଚ, କପଲ୍ଲକେ ॥
ଧଞ୍ଞପକ୍ଖିପନେ ତତ୍ଥ, ଦବ୍ବିୟା ଘଟ୍ଟକୋଟ୍ଟନେ ।
ପପ୍ଫୋଟନାଦିକେ ସବ୍ବ-ପୟୋଗେ ଦୁକ୍କଟଂ ଭୱେ ॥
ଭୋଜନଞ୍ଚେୱ ୱିଞ୍ଞତ୍ତି, ପମାଣଂ ଇଦମେତ୍ଥ ହି ।
ୱିଞ୍ଞତ୍ୱା ୱା ସୟଂ ତସ୍ମା, ଭଜ୍ଜନାଦୀନି ଅଞ୍ଞତୋ ॥
ୱିଞ୍ଞାପେତ୍ୱା ପନଞ୍ଞାୟ, ଭଜ୍ଜନାଦୀନି ୱା ସୟଂ ।
କାରାପେତ୍ୱାପି କତ୍ୱା ୱା, ଅଜ୍ଝୋହରତି ୟା ପନ ॥
ଅଜ୍ଝୋହାରପୟୋଗେସୁ, ତସ୍ସା ପାଚିତ୍ତିୟୋ ସିୟୁଂ ।
ମାତରଂ ୱାପି ୟାଚିତ୍ୱା, ପାଚିତ୍ତି ପରିଭୁଞ୍ଜତି ॥
ଭଜ୍ଜନାଦୀନି କତ୍ୱା ୱା, କାରାପେତ୍ୱାପି ୱା ପନ ।
ଅୱିଞ୍ଞତ୍ତି ସୟଂ ଲଦ୍ଧଂ, ଦୁକ୍କଟଂ ପରିଭୁଞ୍ଜତି ॥
ୱିଞ୍ଞତ୍ତିୟା ପନଞ୍ଞାୟ, ଲଦ୍ଧଂ ତାୟ ସୟମ୍ପି ୱା ।
କାରାପେତ୍ୱାପି କତ୍ୱା ୱା, ତଥା ଅଜ୍ଝୋହରନ୍ତିୟା ॥
ସେଦକମ୍ମାଦିଅତ୍ଥାୟ, ଧଞ୍ଞୱିଞ୍ଞତ୍ତିୟା ପନ ।
ଠପେତ୍ୱା ସତ୍ତ ଧଞ୍ଞାନି, ସେସୱିଞ୍ଞତ୍ତିୟାପି ଚ ॥
ଅନାପତ୍ତୀତି ଞାତବ୍ବଂ, ତଥା ଉମ୍ମତ୍ତିକାୟ ଚ ।
ଞାତକାନମ୍ପି ଧଞ୍ଞଂ ତୁ, ଆମକଂ ନ ଚ ୱଟ୍ଟତି ॥
ୱିନା ୱିଞ୍ଞତ୍ତିୟା ଲଦ୍ଧଂ, ନୱକମ୍ମେସୁ ୱଟ୍ଟତି ।
ସମୁଟ୍ଠାନାଦୟୋ ସବ୍ବେ, ଅଦ୍ଧାନସଦିସା ମତା ॥
ସତ୍ତମଂ ।
ଉଚ୍ଚାରଂ ୱାପି ପସ୍ସାୱଂ, ସଙ୍କାରଂ ୱା ୱିଘାସକଂ ।
ଛଡ୍ଡେୟ୍ୟ ୱା ତିରୋକୁଟ୍ଟେ, ଛଡ୍ଡାପେୟ୍ୟ ପରେହି ୱା ॥
ହୋତି ପାଚିତ୍ତିୟଂ ତସ୍ସା, ପାକାରେପି ଅୟଂ ନୟୋ ।
ଛଡ୍ଡେନ୍ତିୟା ପନେକେକ-ମନେକାପତ୍ତି ଦୀପିତା ॥
ଏତାନି ପନ ୱତ୍ଥୂନି, ଚତ୍ତାରି ସକଲାନିପି ।
ଏକେନେୱ ପୟୋଗେନ, ଏକା ଛଡ୍ଡେନ୍ତିୟା ସିୟା ॥
ଆଣତ୍ତିୟମ୍ପି ଏସେୱ, ନୟୋ ଞେୟ୍ୟୋ ୱିଭାୱିନା ।
ଛଡ୍ଡନେ ଦନ୍ତକଟ୍ଠସ୍ସ, ପାଚିତ୍ତି ପରିଦୀପିତା ॥
ସବ୍ବତ୍ଥ ପନ ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ।
ଅୱଲଞ୍ଜେପି ୱା ଠାନେ, ଓଲୋକେତ୍ୱାପି ୱା ପନ ॥
ଛଡ୍ଡେନ୍ତିୟା ଅନାପତ୍ତି, ତଥା ଉମ୍ମତ୍ତିକାୟ ୱା ।
ସଞ୍ଚରିତ୍ତସମୁଟ୍ଠାନଂ, କ୍ରିୟାକ୍ରିୟମିଦଂ ସିୟା ॥
ଅଟ୍ଠମଂ ।
ଖେତ୍ତେ ୱା ନାଳିକେରାଦି-ଆରାମେ ୱାପି ୟା ପନ ।
ରୋପିମେ ହରିତଟ୍ଠାନେ, ୟତ୍ଥ କତ୍ଥଚି ଭିକ୍ଖୁନୀ ॥
ତାନି ଚତ୍ତାରି ୱତ୍ଥୂନି, ସଚେ ଛଡ୍ଡେତି ୱା ସୟଂ ।
ଛଡ୍ଡାପେତି ତଥା ୱୁତ୍ତ-ନୟୋ ଆପତ୍ତିନିଚ୍ଛୟୋ ॥
ଭୁଞ୍ଜମାନା ନିସୀଦିତ୍ୱା, ଖେତ୍ତେ ତୁ ହରିତେ ତଥା ।
ଉଚ୍ଛୁଆଦୀନି ଖାଦନ୍ତୀ, ଗଚ୍ଛନ୍ତୀ ପନ ତତ୍ଥ ୟା ॥
ଛଡ୍ଡେତି ୟଦି ଉଚ୍ଛିଟ୍ଠଂ, ଉଦକଂ ଚଲକାନି ୱା ।
ହୋତି ପାଚିତ୍ତିୟଂ ତସ୍ସା, ଭିକ୍ଖୁନୋ ହୋତି ଦୁକ୍କଟଂ ॥
ଛଡ୍ଡେନ୍ତିୟା ସିୟାପତ୍ତି, ଠାନେ ଅନ୍ତମସୋ ଜଲଂ ।
ପିୱିତ୍ୱା ମତ୍ଥକଚ୍ଛିନ୍ନଂ, ନାଳିକେରମ୍ପି ତାଦିସେ ॥
କସିତେ ତୁ ପନଟ୍ଠାନେ, ବୀଜନିକ୍ଖେପନେ କତେ ।
ନ ଉଟ୍ଠେତଙ୍କୁରଂ ୟାୱ, ସବ୍ବେସଂ ତାୱ ଦୁକ୍କଟଂ ॥
ଲାୟିତମ୍ପି ମନୁସ୍ସାନଂ, ଖେତ୍ତଂ ରକ୍ଖତି ଚେ ପୁନ ।
ରୋହନତ୍ଥାୟ ତତ୍ଥସ୍ସା, ୟଥାୱତ୍ଥୁକମେୱ ହି ॥
ନ ଦୋସୋ ଛଡ୍ଡିତେ ଖେତ୍ତେ, ସବ୍ବଂ ଛଡ୍ଡେନ୍ତିୟା ପନ ।
ସମୁଟ୍ଠାନାଦୟୋ ସବ୍ବେ, ଅଟ୍ଠମେନ ସମା ମତା ॥
ନୱମଂ ।
ନଚ୍ଚଂ ୱା ପନ ଗୀତଂ ୱା, ୱାଦିତଂ ୱାପି ଭିକ୍ଖୁନୀ ।
ଦସ୍ସନତ୍ଥାୟ ଗଚ୍ଛେୟ୍ୟ, ତସ୍ସା ପାଚିତ୍ତିୟଂ ସିୟା ॥
ଦସ୍ସନତ୍ଥାୟ ନଚ୍ଚସ୍ସ, ଗୀତସ୍ସ ସୱନାୟ ଚ ।
ଗଚ୍ଛନ୍ତିୟା ସିୟା ତସ୍ସା, ପଦୱାରେନ ଦୁକ୍କଟଂ ॥
ସଚେ ଏକପୟୋଗେନ, ଓଲୋକେନ୍ତୀ ଚ ପସ୍ସତି ।
ସୁଣାତି ତେସଂ ଗୀତମ୍ପି, ଏକା ପାଚିତ୍ତି ଦୀପିତା ॥
ଅଞ୍ଞସ୍ମିମ୍ପି ଦିସାଭାଗେ, ନଚ୍ଚଂ ପସ୍ସତି ଚେ ପନ ।
ସୁଣାତି ଅଞ୍ଞତୋ ଗୀତଂ, ୱିସୁଂ ପାଚିତ୍ତିୟୋ ସିୟୁଂ ॥
ପୟୋଗଗଣନାୟେତ୍ଥ, ଆପତ୍ତିଗଣନା ସିୟା ।
ନଚ୍ଚିତୁଂ ଗାୟିତୁଂ ନେୱ, ସୟଂ ଲଭତି ଭିକ୍ଖୁନୀ ॥
‘‘ଅଞ୍ଞଂ ନଚ୍ଚାତି ୱାଦେହି’’, ଇତି ୱତ୍ତୁଂ ନ ୱଟ୍ଟତି ।
‘‘ଉପଟ୍ଠାନଂ କରୋମା’’ତି, ୱୁତ୍ତେ ୱା ସମ୍ପଟିଚ୍ଛିତୁଂ ॥
ତସ୍ସା ପାଚିତ୍ତି ସବ୍ବତ୍ଥ, ଭିକ୍ଖୁନୋ ହୋତି ଦୁକ୍କଟଂ ।
‘‘ଉପଟ୍ଠାନଂ କରୋମା’’ତି, ୱୁତ୍ତେ ଭିକ୍ଖୁନିୟା ପନ ॥
‘‘ଉପଟ୍ଠାନଂ ପସତ୍ଥ’’ନ୍ତି, ୱତ୍ତୁମେୱଂ ତୁ ୱଟ୍ଟତି ।
ଆରାମେୟେୱ ଠତ୍ୱା ୱା, ୟା ପସ୍ସତି ସୁଣାତି ୱା ॥
ଅତ୍ତନୋ ଚ ଠିତୋକାସଂ, ଆଗନ୍ତ୍ୱା ଚ ପୟୋଜିତଂ ।
ଗନ୍ତ୍ୱା ପସ୍ସନ୍ତିୟା ୱାପି, ତଥାରୂପା ହି କାରଣା ॥
ପସ୍ସନ୍ତିୟା ତଥା ମଗ୍ଗଂ, ନଚ୍ଚଂ ପଟିପଥେପି ଚ ।
ତଥା ଉମ୍ମତ୍ତିକାଦୀନ-ମନାପତ୍ତାପଦାସୁପି ॥
ଇଦମେଳକଲୋମେନ, ସମୁଟ୍ଠାନଂ ସମଂ ମତଂ ।
ଲୋକୱଜ୍ଜମିଦଂ ପାପ-ଚିତ୍ତଞ୍ଚେୱ ତିୱେଦନଂ ॥
ଦସମଂ ।
ଲସୁଣୱଗ୍ଗୋ ପଠମୋ ।
ୟାଧ ରତ୍ତନ୍ଧକାରସ୍ମିଂ, ଅପ୍ପଦୀପେ ପନେକିକା ।
ସନ୍ତିଟ୍ଠତି ସଚେ ସଦ୍ଧିଂ, ପୁରିସେନ ଚ ଭିକ୍ଖୁନୀ ॥
ତସ୍ସା ପାଚିତ୍ତିୟଂ ୱୁତ୍ତଂ, ସଦ୍ଧିଂ ୱା ସଲ୍ଲପନ୍ତିୟା ।
ହତ୍ଥପାସଂ ସମାଗନ୍ତ୍ୱା, ରହସ୍ସାଦୱସେନ ତୁ ॥
ହତ୍ଥପାସଂ ଜହିତ୍ୱା ୱା, ପୁରିସସ୍ସ ସଚେ ପନ ।
ଅଜହିତ୍ୱାପି ୱା ୟକ୍ଖ-ପେତାଦୀନମ୍ପି ଭିକ୍ଖୁନୀ ॥
ସନ୍ତିଟ୍ଠତି ଚ ୟା ତସ୍ସା, ଦୁକ୍କଟଂ ପରିଦୀପିତଂ ।
ଅନାପତ୍ତି ସଚେ କୋଚି, ଦୁତିୟା ୱିଞ୍ଞୁ ୱିଜ୍ଜତି ॥
ତଥା ଉମ୍ମତ୍ତିକାଦୀନ-ମଥଞ୍ଞୱିହିତାୟ ୱା ।
ଥେୟ୍ୟସତ୍ଥସମୁଟ୍ଠାନଂ, କ୍ରିୟଂ ସଞ୍ଞାୱିମୋକ୍ଖକଂ ॥
ପଠମଂ ।
ଦୁତିୟେ ତୁ ‘‘ପଟିଚ୍ଛନ୍ନେ, ଓକାସେ’’ତି ଇଦଂ ପନ ।
ଅଧିକଂ ଇତରଂ ସବ୍ବଂ, ପଠମେନ ସମଂ ମତଂ ॥
ଦୁତିୟଂ ।
ତତିୟେପି ଚତୁତ୍ଥେପି, ଅପୁବ୍ବଂ ନତ୍ଥି କିଞ୍ଚିପି ।
ସମାନଂ ପଠମେନେୱ, ସମୁଟ୍ଠାନାଦିନା ସହ ॥
ତତିୟଚତୁତ୍ଥାନି ।
ଛଦନନ୍ତୋ ନିସୀଦିତ୍ୱା, ଅନୋୱସ୍ସପ୍ପଦେସକଂ ।
ଅଜ୍ଝୋକାସେ ନିସୀଦିତ୍ୱା, ଉପଚାରମ୍ପି ୱା ସଚେ ॥
ଅତିକ୍କମେତି ୟା, ହୋତି, ଦୁକ୍କଟଂ ପଠମେ ପଦେ ।
ଦୁତିୟେ ଚ ପଦେ ତସ୍ସା, ପାଚିତ୍ତି ପରିୟାପୁତା ॥
ପଲ୍ଲଙ୍କସ୍ସ ଅନୋକାସେ, ଦୁକ୍କଟଂ ସମୁଦୀରିତଂ ।
ତଥାପୁଟ୍ଠେ ଅନାପୁଟ୍ଠ-ସଞ୍ଞାୟ ୱିଚିକିଚ୍ଛତୋ ॥
ଅସଂହାରିମେନାପତ୍ତି, ଗିଲାନାୟାପଦାସୁ ୱା ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ପଞ୍ଚମଂ ।
ଏକାପତ୍ତି ନିସୀଦିତ୍ୱା, ହୋତି ଗଚ୍ଛନ୍ତିୟା ପନ ।
ଏକାୱ ଅନିସୀଦିତ୍ୱା, ନିପଜ୍ଜିତ୍ୱା ୱଜନ୍ତିୟା ॥
ନିସୀଦିତ୍ୱା ନିପଜ୍ଜିତ୍ୱା, ହୋନ୍ତି ଗଚ୍ଛନ୍ତିୟା ଦୁୱେ ।
ସେସଂ ଅନନ୍ତରେନେୱ, ସମୁଟ୍ଠାନାଦିନା ସମଂ ॥
ଛଟ୍ଠଂ ।
ଛଟ୍ଠେନ ସତ୍ତମଂ ତୁଲ୍ୟଂ, ଅଟ୍ଠମେ ନତ୍ଥି କିଞ୍ଚିପି ।
ୱତ୍ତବ୍ବଂ ତିସମୁଟ୍ଠାନଂ, ସଚିତ୍ତଂ ଦୁକ୍ଖୱେଦନଂ ॥
ସତ୍ତମଟ୍ଠମାନି ।
ନିରୟବ୍ରହ୍ମଚରିୟେହି, ଅତ୍ତାନଂ ୱା ପରମ୍ପି ୱା ।
ଅଭିସପେୟ୍ୟ ପାଚିତ୍ତି, ୱାଚତୋ ୱାଚତୋ ସିୟା ॥
ଠପେତ୍ୱା ନିରୟଞ୍ଚେୱ, ବ୍ରହ୍ମଚରିୟଞ୍ଚ ୟା ପନ ।
‘‘ସୁନଖୀ ସୂକରୀ କାକୀ, କାଣା କୁଣୀ’’ତିଆଦିନା ॥
ଅକ୍କୋସତି ଚ ୱାଚାୟ, ୱାଚାୟାପତ୍ତି ଦୁକ୍କଟଂ ।
ତିକପାଚିତ୍ତିୟଂ ୱୁତ୍ତଂ, ସେସାୟ ତିକଦୁକ୍କଟଂ ॥
ପୁରକ୍ଖତ୍ୱା ୱଦନ୍ତୀନ-ମତ୍ଥଧମ୍ମାନୁସାସନିଂ ।
ଅନାପତ୍ତଟ୍ଠମେନେୱ, ସମୁଟ୍ଠାନାଦୟୋ ସମା ॥
ନୱମଂ ।
ରୋଦନ୍ତିୟା ୱଧିତ୍ୱା ୱା, ପାଚିତ୍ତି ପରିଦୀପିତା ।
ଦ୍ୱୀସୁ ତେସୁ ପନେକେକଂ, ଦୁକ୍କଟଂ ତୁ କରୋନ୍ତିୟା ॥
ସେସମୁତ୍ତାନମେୱେତ୍ଥ, ସମୁଟ୍ଠାନାଦୟୋ ପନ ।
ଧୁରନିକ୍ଖେପତୁଲ୍ୟାୱ, କ୍ରିୟାମତ୍ତଂ ୱିସେସକଂ ॥
ଦସମଂ ।
ଅନ୍ଧକାରୱଗ୍ଗୋ ଦୁତିୟୋ ।
ସବ୍ବପୟୋଗେ ଦୁକ୍କଟମସ୍ସା ।
ତସ୍ସ ଚ ୱୋସାନେ ଜିନୱୁତ୍ତଂ ।
ଭିକ୍ଖୁନି ଦୋସଂ ସା ସମୁପେତି ॥
ଅଚ୍ଛିନ୍ନଚୀୱରା ନଟ୍ଠ-ଚୀୱରା ଆପଦାସୁ ୱା ।
ନ ଦୋସେଳକଲୋମେନ, ସମୁଟ୍ଠାନାଦୟୋ ସମା ॥
ପଠମଂ ।
ଦୁତିୟେ ପନ ୱତ୍ତବ୍ବଂ, ଅପୁବ୍ବଂ ନତ୍ଥି କିଞ୍ଚିପି ।
ସମୁଟ୍ଠାନାଦୟୋ ସବ୍ବେ, ସଞ୍ଚରିତ୍ତସମା ମତା ॥
ଦୁତିୟଂ ।
ଦୁସ୍ସିବ୍ବିତଂ ୱିସିବ୍ବେତ୍ୱା, ସିବ୍ବନତ୍ଥାୟ ଚୀୱରଂ ।
ଅନନ୍ତରାୟ ତଂ ପଚ୍ଛା, ୟା ନ ସିବ୍ବେୟ୍ୟ ଭିକ୍ଖୁନୀ ॥
ଠପେତ୍ୱା ଚତୁପଞ୍ଚାହଂ, ‘‘ନ ସିବ୍ବିସ୍ସାମ୍ୟହ’’ନ୍ତି ହି ।
ଧୁରେ ନିକ୍ଖିତ୍ତମତ୍ତେୱ, ତସ୍ସା ପାଚିତ୍ତିୟଂ ସିୟା ॥
ପଚ୍ଛା ସିବ୍ବତି ପାଚିତ୍ତି, ନିକ୍ଖିପିତ୍ୱା ଧୁରଂ ସଚେ ।
ତିକପାଚିତ୍ତିୟଂ ୱୁତ୍ତଂ, ସେସାୟ ତିକଦୁକ୍କଟଂ ॥
ୱୁତ୍ତଂ ଉଭିନ୍ନମଞ୍ଞସ୍ମିଂ, ପରିକ୍ଖାରେ ତୁ ଦୁକ୍କଟଂ ।
ଅନାପତ୍ତି ଗିଲାନାୟ, ଅନ୍ତରାୟେପି ୱା ସତି ॥
ଅତିକ୍କମେତି ପଞ୍ଚାହଂ, କରୋନ୍ତୀ ୱାପି ଚୀୱରଂ ।
ଧୁରନିକ୍ଖେପନଂ ନାମ, ସମୁଟ୍ଠାନମିଦଂ ମତଂ ॥
ତତିୟଂ ।
ପଞ୍ଚାହିକଂ ତୁ ସଙ୍ଘାଟି-ଚାରଂ ୟାତିକ୍କମେୟ୍ୟ ହି ।
ହୋତି ପାଚିତ୍ତିୟାପତ୍ତି, ଛଟ୍ଠେ ତସ୍ସାରୁଣୁଗ୍ଗମେ ॥
ଏକସ୍ମିଂ ଚୀୱରେ ଏକା, ପଞ୍ଚ ପଞ୍ଚସୁ ଦୀପିତା ।
ତିଚୀୱରଞ୍ଚ ସଂକଚ୍ଚି, ଦକସାଟୀତି ପଞ୍ଚ ତୁ ॥
ତିକପାଚିତ୍ତି ପଞ୍ଚାହା-ନତିକ୍କନ୍ତେ ଦ୍ୱିଦୁକ୍କଟଂ ।
ପଞ୍ଚମେ ଦିୱସେ ପଞ୍ଚ, ଚୀୱରାନି ନିସେୱତି ॥
ଓତାପେତି ଗିଲାନାୟ, ଅନାପତ୍ତିପଦାସୁପି ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ଚତୁତ୍ଥଂ ।
ଗହେତ୍ୱା ୟା ଅନାପୁଚ୍ଛା, ସଙ୍କମେତବ୍ବଚୀୱରଂ ।
ପରିଭୁଞ୍ଜତି ଅଞ୍ଞିସ୍ସା, ତସ୍ସା ପାଚିତ୍ତିୟଂ ସିୟା ॥
ତିକପାଚିତ୍ତିୟଂ ୱୁତ୍ତଂ, ସେସାୟ ତିକଦୁକ୍କଟଂ ।
ଅଚ୍ଛିନ୍ନଚୀୱରା ନଟ୍ଠ-ଚୀୱରା ଆପଦାସୁ ୱା ॥
ତଥା ଉମ୍ମତ୍ତିକାଦୀନ-ମନାପତ୍ତି ପକାସିତା ।
କଥିନେନ ସମୁଟ୍ଠାନଂ, ତୁଲ୍ୟମେତଂ କ୍ରିୟାକ୍ରିୟଂ ॥
ପଞ୍ଚମଂ ।
ୟା ହି ଭିକ୍ଖୁନି ସଙ୍ଘସ୍ସ, ଲଭିତବ୍ବଂ ତୁ ଚୀୱରଂ ।
ନିୱାରେତି ସଚେ ତସ୍ସା, ପାଚିତ୍ତି ପରିଦୀପୟେ ॥
ଗଣସ୍ସାପି ଚ ଏକିସ୍ସା, ଲାଭେ ଆପତ୍ତି ଦୁକ୍କଟଂ ।
ତଥେୱଞ୍ଞଂ ପରିକ୍ଖାରଂ, ନିୱାରେତି ସଚେ ପନ ॥
ଆନିସଂସଂ ନିଦସ୍ସେତ୍ୱା, ନିୱାରେତି ନ ଦୋସତା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ମତା ॥
ଛଟ୍ଠଂ ।
ଚୀୱରାନଂ ୱିଭଙ୍ଗଂ ୟା, ପଟିସେଧେୟ୍ୟ ଧମ୍ମିକଂ ।
ହୋତି ପାଚିତ୍ତିୟଂ ତସ୍ସା, ଦୁକ୍କଟଂ ପରିଦୀପିତଂ ॥
ଅଧମ୍ମେ ଧମ୍ମସଞ୍ଞାୟ, ଉଭୋ ୱେମତିକାୟ ୱା ।
ଆନିସଂସଂ ନିଦସ୍ସେତ୍ୱା, ପଟିସେଧେନ୍ତିୟା ପନ ॥
ତଥା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
ସତ୍ତମଂ ।
ନିୱାସନୂପଗଂ ୱାପି, ତଥା ପାରୁପନୂପଗଂ ।
କପ୍ପବିନ୍ଦୁକତଂ କିଞ୍ଚି, ମୁଞ୍ଚିତ୍ୱା ସହଧମ୍ମିକେ ॥
ପିତରୋପି ପନଞ୍ଞସ୍ସ, ଦଦେୟ୍ୟ ୟଦି ଚୀୱରଂ ।
ୟସ୍ସ କସ୍ସଚି ତସ୍ସାପି, ପାଚିତ୍ତି ପରିୟାପୁତା ॥
ଗଣନାୟ ୱସେନେତ୍ଥ, ଚୀୱରାନଂ ତୁ ତା ପନ ।
ପାଚିତ୍ତିୟୋ ଗଣେତବ୍ବା, ଭିକ୍ଖୁନୋ ଦୁକ୍କଟଂ ସିୟା ॥
ତାୱକାଲିକମଞ୍ଞେସ-ମନାପତ୍ତି ଦଦାତି ଚେ ।
ସଞ୍ଚରିତ୍ତସମା ୱୁତ୍ତା, ସମୁଟ୍ଠାନାଦୟୋ ନୟା ॥
ଅଟ୍ଠମଂ ।
ଚୀୱରସ୍ସ ୱିଭଙ୍ଗଂ ୟା, ନିସେଧେତ୍ୱାନ ଚୀୱରେ ।
କାଲଂ ଅତିକ୍କମେୟ୍ୟସ୍ସା, ଦୁବ୍ବଲାସାୟ ଦୋସତା ॥
ଅଦୁବ୍ବଲେ ତୁ ଚୀୱରେ, ସୁଦୁବ୍ବଲନ୍ତି ଚେତସା ।
ଉଭୋସୁ କଙ୍ଖିତାୟ ୱା, ଅୱୋଚ ଦୁକ୍କଟଂ ଜିନୋ ॥
ଆନିସଂସଂ ନିଦସ୍ସେତ୍ୱା, ନିୱାରେତି ନ ଦୋସତା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ମତା ॥
ନୱମଂ ।
ଧମ୍ମିକଂ କଥିନୁଦ୍ଧାରଂ, ୟା ନିୱାରେୟ୍ୟ ଭିକ୍ଖୁନୀ ।
ତସ୍ସା ପାଚିତ୍ତିୟାପତ୍ତି, ମୁନିନ୍ଦେନ ପକାସିତା ॥
ଆନିସଂସୋ ମହା ହୋତି, ୟସ୍ସ ଅତ୍ଥାରମୂଲକୋ ।
ଉଦ୍ଧାରମୂଲକୋ ଅପ୍ପୋ, ନ ଦାତବ୍ବୋ ପନୀଦିସୋ ॥
ଆନିସଂସୋ ମହା ହୋତି, ୟସ୍ସ ଉବ୍ଭାରମୂଲକୋ ।
ଅତ୍ଥାରମୂଲକୋ ଅପ୍ପୋ, ଦାତବ୍ବୋ ଏୱରୂପକୋ ॥
ତଥା ସମାନିସଂସୋପି, ସଦ୍ଧାପାଲନକାରଣା ।
ଆନିସଂସଂ ନିଦସ୍ସେତ୍ୱା, ପଟିସେଧେତି ୱଟ୍ଟତି ॥
ସେସଂ ପନ ଅସେସେନ, ସତ୍ତମେନ ସମଂ ମତଂ ।
ସମୁଟ୍ଠାନାଦିନା ସଦ୍ଧିଂ, ଅପୁବ୍ବଂ ନତ୍ଥି କିଞ୍ଚିପି ॥
ଦସମଂ ।
ନଗ୍ଗୱଗ୍ଗୋ ତତିୟୋ ।
ଏକାୟ ତୁ ନିପନ୍ନାୟ, ଅପରା ୱା ନିପଜ୍ଜତୁ ।
ନିପଜ୍ଜେୟ୍ୟୁଂ ସହେୱ ଦ୍ୱେ, ଦ୍ୱିନ୍ନଂ ପାଚିତ୍ତିୟଂ ସିୟା ॥
ଆପତ୍ତିବହୁକା ଞେୟ୍ୟା, ପୁନପ୍ପୁନଂ ନିପଜ୍ଜନେ ।
ଏକାୟ ଚ ନିପନ୍ନାୟ, ସଚେ ଏକା ନିସୀଦତି ॥
ଉଭୋ ୱାପି ନିସୀଦନ୍ତି, ସମଂ, ଉମ୍ମତ୍ତିକାୟ ୱା ।
ଅନାପତ୍ତି ସମୁଟ୍ଠାନଂ, ଏଳକେନ ସମଂ ମତଂ ॥
ପଠମଂ ।
ପାୱାରକଟସାରାଦିଂ, ସନ୍ଥରିତ୍ୱା ପନେକକଂ ।
ସଂହାରିମେସୁ ତେନେୱ, ପାରୁପିତ୍ୱା ସଚେ ପନ ॥
ନିପଜ୍ଜନ୍ତି ସହେୱ ଦ୍ୱେ, ତାସଂ ପାଚିତ୍ତିୟଂ ସିୟା ।
ଏକସ୍ମିଂ ଦୁକ୍କଟଂ ଦ୍ୱିନ୍ନଂ, ୱୁତ୍ତଂ ତୁ ଦ୍ୱିକଦୁକ୍କଟଂ ॥
ୱୱତ୍ଥାନଂ ନିଦସ୍ସେତ୍ୱା, ନିପଜ୍ଜନ୍ତି ସଚେ ପନ ।
ନ ଦୋସୁମ୍ମତ୍ତିକାଦୀନଂ, ସେସଂ ତୁଲ୍ୟଂ ପନାଦିନା ॥
ଦୁତିୟଂ ।
ପୁରତୋ ଚ ଅନାପୁଚ୍ଛା, ୟଦି ଚଙ୍କମନାଦୟୋ ।
କରେୟ୍ୟ ପନ ପାଚିତ୍ତି, ଅଞ୍ଞିସ୍ସାଫାସୁକାରଣା ॥
ନିୱତ୍ତନାନଂ ଗଣନାୟ ତସ୍ସା ।
ପାଚିତ୍ତିୟାନଂ ଗଣନା ଚ ଞେୟ୍ୟା ।
ପୟୋଗତୋୟେୱ ଭୱନ୍ତି ଦୋସା ।
ନିପଜ୍ଜନଟ୍ଠାନନିସୀଦନାନଂ ॥
ଉଦ୍ଦେସାଦୀସୁ ପାଚିତ୍ତି, ପଦାନଂ ଗଣନାୱସା ।
ତିକପାଚିତ୍ତିୟଂ ୱୁତ୍ତଂ, ସେସାୟ ତିକଦୁକ୍କଟଂ ॥
ନ ଚ ଅଫାସୁକାମାୟ, ଆପୁଚ୍ଛା ପୁରତୋ ପନ ।
ତସ୍ସା ଚଙ୍କମନାଦୀନି, ଅନାପତ୍ତି କରୋନ୍ତିୟା ॥
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ।
କ୍ରିୟାକ୍ରିୟମିଦଂ ପାପ- ମାନସଂ ଦୁକ୍ଖୱେଦନଂ ॥
ତତିୟଂ ।
ସୟଂ ଅନନ୍ତରାୟା ୟା, ଦୁକ୍ଖିତଂ ସହଜୀୱିନିଂ ।
ନୁପଟ୍ଠାପେୟ୍ୟ ଚଞ୍ଞାୟ, ନୁପଟ୍ଠେୟ୍ୟ ସୟମ୍ପି ୱା ॥
ଧୁରେ ନିକ୍ଖିତ୍ତମତ୍ତେୱ, ତସ୍ସା ପାଚିତ୍ତିୟଂ ସିୟା ।
ଅନ୍ତେୱାସିନିୟା ୱାପି, ଦୁକ୍କଟଂ ଇତରାୟ ୱା ॥
ଅନାପତ୍ତି ଗିଲାନାୟ, ଗୱେସିତ୍ୱାଲଭନ୍ତିୟା ।
ଆପଦୁମ୍ମତ୍ତିକାଦୀନଂ, ଧୁରନିକ୍ଖେପନୋଦୟଂ ॥
ଚତୁତ୍ଥଂ ।
ସକଂ ପୁଗ୍ଗଲିକଂ ଦତ୍ୱା, ସକୱାଟଂ ଉପସ୍ସୟଂ ।
ସୟଂ ଉପସ୍ସୟା ତମ୍ହା, ନିକ୍କଡ୍ଢତି ସଚେ ପନ ॥
ଏକେନେୱ ପୟୋଗେନ, ଦ୍ୱାରାଦୀସୁ ବହୂନିପି ।
ତଂ ନିକ୍କଡ୍ଢନ୍ତିୟା ତସ୍ସା, ଏକଂ ପାଚିତ୍ତିୟଂ ସିୟା ॥
ପୟୋଗଗଣନାୟେତ୍ଥ, ପାଚିତ୍ତିଗଣନା ମତା ।
ଆଣତ୍ତିୟମ୍ପି ଏସେୱ, ନୟୋ ୱୁତ୍ତୋ ମହେସିନା ॥
‘‘ଏତ୍ତକାୱ ଇମଂ ଦ୍ୱାରା, ନିକ୍କଡ୍ଢାହୀ’’ତି ଭାସତି ।
ଏକାୟାଣତ୍ତିୟା ଦ୍ୱାର-ଗଣନାପତ୍ତିୟୋ ସିୟୁଂ ॥
ଦୁକ୍କଟଂ ଅକୱାଟମ୍ହା, ସେସାୟ ତିକଦୁକ୍କଟଂ ।
ଉଭିନ୍ନଂ ପନ ସବ୍ବତ୍ଥ, ପରିକ୍ଖାରେସୁ ଦୁକ୍କଟଂ ॥
ସେସମେତ୍ଥ ଅସେସେନ, ସମୁଟ୍ଠାନାଦିନା ସହ ।
ସଙ୍ଘିକା ହି ୱିହାରସ୍ମା, ନିକ୍କଡ୍ଢନସମଂ ମତଂ ॥
ପଞ୍ଚମଂ ।
ଛଟ୍ଠେ ପନିଧ ୱତ୍ତବ୍ବଂ, ଅପୁବ୍ବଂ ନତ୍ଥି କିଞ୍ଚିପି ।
ସିକ୍ଖାପଦେନରିଟ୍ଠସ୍ସ, ସଦିସୋୱ ୱିନିଚ୍ଛୟୋ ॥
ଛଟ୍ଠଂ ।
ସାସଙ୍କସମ୍ମତେ ଅନ୍ତୋ-ରଟ୍ଠେ ଭିକ୍ଖୁନିୟା ପନ ।
ଚରନ୍ତିୟା ସିୟାପତ୍ତି, ୱିନା ସତ୍ଥେନ ଚାରିକଂ ॥
ଗାମନ୍ତରପୱେସେ ଚ, ଅରଞ୍ଞେ ଅଦ୍ଧୟୋଜନେ ।
ପାଚିତ୍ତିୟନୟୋ ଞେୟ୍ୟୋ, ଭିକ୍ଖୁନା ୱିନୟଞ୍ଞୁନା ॥
ନ ଦୋସୋ ସହ ସତ୍ଥେନ, ଖେମଟ୍ଠାନାପଦାସୁ ୱା ।
ଇଦଂ ଏଳକଲୋମେନ, ସମୁଟ୍ଠାନାଦିନା ସମଂ ॥
ସତ୍ତମଂ ।
ଅଟ୍ଠମେ ନୱମେ ୱାପି, ଅନୁତ୍ତାନଂ ନ ୱିଜ୍ଜତି ।
ସତ୍ତମେନ ସମାନାନି, ସମୁଟ୍ଠାନାଦିନା ସହ ॥
ଅଟ୍ଠମନୱମାନି ।
ପାଚିତ୍ତି ଧୁରନିକ୍ଖେପେ, ‘‘ନ ଗମିସ୍ସାମ୍ୟହ’’ନ୍ତି ଚ ।
କତ୍ୱା ଚ ଧୁରନିକ୍ଖେପଂ, ପଚ୍ଛା ଗଚ୍ଛନ୍ତିୟା ତଥା ॥
ୟୋଜନାନି ପୱାରେତ୍ୱା, ପଞ୍ଚ ଗନ୍ତୁମ୍ପି ୱଟ୍ଟତି ।
ଛସୁ ୱତ୍ତବ୍ବମେୱତ୍ଥି, କିନ୍ନୁ ନାମିଧ ତଂ ସିୟା ॥
ତୀଣି ଗନ୍ତ୍ୱା ଚ ତେନେୱ, ପଚ୍ଚାଗନ୍ତୁଂ ନ ୱଟ୍ଟତି ।
ଅଞ୍ଞେନ ପନ ମଗ୍ଗେନ, ପଚ୍ଛାଗଚ୍ଛତି ୱଟ୍ଟତି ॥
ଅନାପତ୍ତନ୍ତରାୟସ୍ମିଂ, ତସ୍ସା ଦସୱିଧେ ସତି ।
ଆପଦାସୁ ଗିଲାନାୟ, ଅଲାଭେ ଦୁତିୟାୟ ୱା ॥
ରାଜଚୋରମନୁସ୍ସଗ୍ଗି-ତୋୟୱାଳସରୀସପା ।
ମନୁସ୍ସଜୀୱିତବ୍ରହ୍ମ-ଚରିୟସ୍ସନ୍ତରାୟିକା ॥
ସମୁଟ୍ଠାନାଦିନା ତୁଲ୍ୟଂ, ପଠମନ୍ତିମୱତ୍ଥୁନା ।
ଅୟମେୱ ୱିସେସୋ ହି, ଅକ୍ରିୟଂ ଦୁକ୍ଖୱେଦନଂ ॥
ଦସମଂ ।
ତୁୱଟ୍ଟୱଗ୍ଗୋ ଚତୁତ୍ଥୋ ।
ରାଜାଗାରଂ ଚିତ୍ତାଗାରଂ, ଆରାମଂ କୀଳୁୟ୍ୟାନଂ ୱା ।
କୀଳାୱାପିଂ ନାନାକାରଂ, ଦଟ୍ଠୁଂ ଗଚ୍ଛନ୍ତିନଂ ତାନି ॥
ନିଦ୍ଦିଟ୍ଠଂ ମୁନିନା ତାସଂ, ଦୁକ୍କଟଂ ତୁ ପଦେ ପଦେ ।
ପଦଂ ଅନୁଦ୍ଧରିତ୍ୱାୱ, ସଚେ ପସ୍ସନ୍ତି ପଞ୍ଚପି ॥
ଏକାୟେୱ ପନାପତ୍ତି, ପାଚିତ୍ତି ପରିଦୀପିତା ।
ଗନ୍ତ୍ୱା ପସ୍ସନ୍ତି ଚେ ତଂ ତଂ, ପାଟେକ୍କାପତ୍ତିୟୋ ସିୟୁଂ ॥
ପୟୋଗବହୁତାୟାପି, ପାଚିତ୍ତିବହୁତା ସିୟା ।
ଭିକ୍ଖୁସ୍ସ ପନ ସବ୍ବତ୍ଥ, ହୋତି ଆପତ୍ତି ଦୁକ୍କଟଂ ॥
ଅୱସେସୋ ଅନାପତ୍ତି-କଥାମଗ୍ଗୱିନିଚ୍ଛୟୋ ।
ନଚ୍ଚଦସ୍ସନତୁଲ୍ୟୋୱ, ସମୁଟ୍ଠାନାଦିନା ସହ ॥
ପଠମଂ ।
ଆସନ୍ଦିଂ ୱା ପଲ୍ଲଙ୍କଂ ୱା, ମାଣନାତୀତଂ ୱାଳୂପେତଂ ।
ସେୱନ୍ତୀନଂ ୟାସଂ ତାସଂ, ପାଚିତ୍ତାପତ୍ତିଂ ସତ୍ଥାହ ॥
ନିସୀଦନସ୍ସାପି ନିପଜ୍ଜନସ୍ସ ।
ପୟୋଗବାହୁଲ୍ଲୱସେନ ହୋତି ।
ଇଚ୍ଚେୱମଚ୍ଚନ୍ତୟସେନ ୱୁତ୍ତା ।
ପାଚିତ୍ତିୟାନଂ ଗଣନା ପନେୱଂ ॥
ପାଦେ ଆସନ୍ଦିୟା ଛେତ୍ୱା, ଭିତ୍ୱା ପଲ୍ଲଙ୍କୱାଳକେ ।
ଅନାପତ୍ତି ସମୁଟ୍ଠାନ-ମନନ୍ତରସମଂ ମତଂ ॥
ଦୁତିୟଂ ।
ଛନ୍ନଂ ଅଞ୍ଞତରଂ ସୁତ୍ତଂ, ୟଦି କନ୍ତତି ଭିକ୍ଖୁନୀ ।
ୟତ୍ତକଂ ଅଞ୍ଛିତଂ ହତ୍ଥା, ତସ୍ମିଂ ତକ୍କମ୍ହି ୱେଠିତେ ॥
ଏକା ପାଚିତ୍ତି ନିଦ୍ଦିଟ୍ଠା, ସୁତ୍ତକନ୍ତନତୋ ପନ ।
ସବ୍ବପୁବ୍ବପୟୋଗେସୁ, ଦୁକ୍କଟଂ ହତ୍ଥୱାରତୋ ॥
ନ ଦୋସୋ କନ୍ତିତଂ ସୁତ୍ତଂ, ପୁନ କନ୍ତନ୍ତିୟା ପନ ।
ଇଦଂ ଏଳକଲୋମେନ, ସମୁଟ୍ଠାନାଦିନା ସମଂ ॥
ତତିୟଂ ।
କୋଟ୍ଟନଂ ତଣ୍ଡୁଲାନଂ ତୁ, ଆଦିଂ କତ୍ୱାନ ଦୁକ୍କଟଂ ।
ସବ୍ବପୁବ୍ବପୟୋଗେସୁ, ୱେୟ୍ୟାୱଚ୍ଚଂ କରୋନ୍ତିୟା ॥
ଭାଜନାନି ଗଣେତ୍ୱାୱ, ପାଚିତ୍ତି ୟାଗୁଆଦିସୁ ।
ଖଜ୍ଜକାଦୀସୁ ରୂପାନଂ, ଗଣନାୟ ହି ଦୀପୟେ ॥
ସଚେ ମାତାପିତୂନମ୍ପି, ଆଗତାନଂ ପନତ୍ତନୋ ।
କିଞ୍ଚି କମ୍ମଂ ଅକାରେତ୍ୱା, କିଞ୍ଚି କାତୁଂ ନ ୱଟ୍ଟତି ॥
ସଙ୍ଘସ୍ସ ୟାଗୁପାନେ ୱା, ସଙ୍ଘଭତ୍ତେପି ୱା ତଥା ।
ଚେତିୟସ୍ସ ଚ ପୂଜାୟ, ୱେୟ୍ୟାୱଚ୍ଚକରସ୍ସ ୱା ॥
ଅତ୍ତନୋ ଚ ଅନାପତ୍ତି, ତଥା ଉମ୍ମତ୍ତିକାୟ ୱା ।
ସମୁଟ୍ଠାନାଦୟୋ ସବ୍ବେ, ତତିୟେନ ସମା ମତା ॥
ଚତୁତ୍ଥଂ ।
ପାଚିତ୍ତି ଧୁରନିକ୍ଖେପେ, ୟଥା ଚୀୱରସିବ୍ବନେ ।
ତଥା ଇଧ ପନେକାହଂ, ପରିହାରୋ ନ ଲବ୍ଭତି ॥
ସେସଂ ୱୁତ୍ତନୟେନେୱ, ତତ୍ଥ ଚୀୱରସିବ୍ବନେ ।
ସମୁଟ୍ଠାନାଦିନା ସଦ୍ଧିଂ, ୱେଦିତବ୍ବଂ ୱିଭାୱିନା ।
ପଞ୍ଚମଂ ।
କାୟେନ କାୟବଦ୍ଧେନ, ତଥା ନିସ୍ସଗ୍ଗିୟେନ ୱା ।
ଗିହୀନଂ ପନ ୟଂ କିଞ୍ଚି, ଦନ୍ତପୋନୋଦକଂ ୱିନା ॥
ଅଜ୍ଝୋହରଣିୟଂ ଅଞ୍ଞଂ, ଅଞ୍ଞେସଂ ତୁ ଦଦାତି ୟା ।
ହୋତି ପାଚିତ୍ତିୟଂ ତସ୍ସା, ଠପେତ୍ୱା ସହଧମ୍ମିକେ ॥
ଦନ୍ତକଟ୍ଠୋଦକେ ୱୁତ୍ତଂ, ଦୁକ୍କଟଂ ମୁନିନା ଇଧ ।
ୟା ନ ଦେତି ଚ ଦାପେତି, ନିକ୍ଖମିତ୍ୱାପି ଦେନ୍ତିୟା ॥
ଦେତି ବାହିରଲେପଂ ୱା, ନ ଦୋସୁମ୍ମତ୍ତିକାୟ ୱା ।
ସମୁଟ୍ଠାନାଦୟୋ ସବ୍ବେ, ତତିୟେନ ସମା ମତା ॥
ଛଟ୍ଠଂ ।
ଅଦତ୍ୱା ପରିଭୁଞ୍ଜେୟ୍ୟ, ୟା ଚାୱସଥଚୀୱରଂ ।
ଦିୱସେ ତୁ ଚତୁତ୍ଥେ ତଂ, ଧୋୱିତ୍ୱା ପୁନ ଚୀୱରଂ ॥
ସାମଣେରାୟ ୱା ଅନ୍ତ-ମସୋ ଉତୁନିୟା ସଚେ ।
ତସ୍ସା ପାଚିତ୍ତିୟଂ ୱୁତ୍ତଂ, ତିକପାଚିତ୍ତିୟଂ ସିୟା ॥
ତସ୍ସା ନିସ୍ସଜ୍ଜିତେ ତସ୍ମିଂ, ୱୁତ୍ତଂ ତୁ ଦ୍ୱିକଦୁକ୍କଟଂ ।
ଉତୁନୀନଂ ଅଭାୱେ ତୁ, ଅଞ୍ଞାସଂ ପୁନ ପରିୟୟେ ॥
ଅଚ୍ଛିନ୍ନଚୀୱରାଦୀନ-ମନାପତ୍ତାପଦାସୁପି ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ସତ୍ତମଂ ।
ଅଦତ୍ୱା ରକ୍ଖଣତ୍ଥାୟ, ୱିହାରଂ ସକୱାଟକଂ ।
ହୋତି ପାଚିତ୍ତିୟଂ ତସ୍ସା, ଚାରିକଂ ପକ୍କମନ୍ତିୟା ॥
ଅତ୍ତନୋ ଗାମତୋ ଅଞ୍ଞଂ, ଗାମଂ ଗଚ୍ଛନ୍ତିୟା ପନ ।
ପରିକ୍ଖିତ୍ତୱିହାରସ୍ସ, ପରିକ୍ଖେପମ୍ପି ୱା ତଥା ॥
ଇତରସ୍ସୁପଚାରଂ ୱା, ପଠମେନ ପଦେନ ତଂ ।
ଦୁକ୍କଟଂ ସମତିକ୍କନ୍ତେ, ପାଚିତ୍ତି ଦୁତିୟେନ ତୁ ॥
ଅକୱାଟବନ୍ଧନସ୍ମିଂ, ଦୁକ୍କଟଂ ପରିଦୀପିତଂ ।
ଅନ୍ତରାୟେ ଅନାପତ୍ତି, ଜଗ୍ଗିକଂ ଅଲଭନ୍ତିୟା ॥
ଆପଦାସୁ ଗିଲାନାୟ, ତଥା ଉମ୍ମତ୍ତିକାୟ ୱା ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ଅଟ୍ଠମଂ ।
ହତ୍ଥିଅସ୍ସରଥାଦୀହି, ସଂୟୁତ୍ତଂ ସିପ୍ପମେୱ ୱା ।
ପରୂପଘାତକଂ ମନ୍ତା-ଗଦୟୋଗପ୍ପଭେଦକଂ ॥
ପରିୟାପୁଣେୟ୍ୟ ଚେ କିଞ୍ଚି, ୟସ୍ସ କସ୍ସଚି ସନ୍ତିକେ ।
ହୋତି ପାଚିତ୍ତିୟଂ ତସ୍ସା, ପଦାଦୀନଂ ୱସେନିଧ ॥
ଲେଖେ ପନ ଅନାପତ୍ତି, ଧାରଣାୟ ଚ ଗୁତ୍ତିୟା ।
ପରିତ୍ତେସୁ ଚ ସବ୍ବେସୁ, ତଥା ଉମ୍ମତ୍ତିକାୟ ୱା ॥
ନୱମଂ ।
ଦସମେ ନତ୍ଥି ୱତ୍ତବ୍ବଂ, ନୱମେନ ସମଂ ଇଦଂ ।
ସମୁଟ୍ଠାନାଦୟୋ ଦ୍ୱିନ୍ନଂ, ପଦସୋଧମ୍ମସାଦିସା ॥
ଦସମଂ ।
ଚିତ୍ତାଗାରୱଗ୍ଗୋ ପଞ୍ଚମୋ ।
ସଭିକ୍ଖୁକଂ ପନାରାମଂ, ଜାନିତ୍ୱା ପୱିସନ୍ତିୟା ।
ଅନାପୁଚ୍ଛାୱ ୟଂ କିଞ୍ଚି, ପାଚିତ୍ତି ପରିୟାପୁତା ॥
ସଚେ ଅନ୍ତମସୋ ରୁକ୍ଖ-ମୂଲସ୍ସପି ଚ ଭିକ୍ଖୁନୀ ।
ଅନାପୁଚ୍ଛା ପରିକ୍ଖେପଂ, ଅତିକ୍କାମେତି ୟା ପନ ॥
ଉପଚାରୋକ୍କମେ ୱାପି, ଅପରିକ୍ଖିତ୍ତକସ୍ସ ତୁ ।
ଦୁକ୍କଟଂ ପଠମେ ପାଦେ, ପାଚିତ୍ତି ଦୁତିୟେ ସିୟା ॥
ଅଭିକ୍ଖୁକେ ସଭିକ୍ଖୂତି, ସଞ୍ଞାୟ ପନୁଭୋସୁପି ।
ଜାତକଙ୍ଖାୟ ୱା ତସ୍ସା, ହୋତି ଆପତ୍ତି ଦୁକ୍କଟଂ ॥
ପଠମଂ ପୱିସନ୍ତୀନଂ, ତାସଂ ସୀସାନୁଲୋକିକା ।
ତା ସନ୍ନିପତିତା ୟତ୍ଥ, ତାସଂ ଗଚ୍ଛତି ସନ୍ତିକଂ ॥
ସନ୍ତଂ ଭିକ୍ଖୁଂ ପନାପୁଚ୍ଛା, ମଗ୍ଗୋ ୱାରାମମଜ୍ଝତୋ ।
ତେନ ଗଚ୍ଛନ୍ତିୟା ୱାପି, ଆପଦାସୁ ୱିସନ୍ତିୟା ॥
ତଥା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ଧୁରନିକ୍ଖେପତୁଲ୍ୟାୱ, ସମୁଟ୍ଠାନାଦୟୋ ନୟା ॥
ପଠମଂ ।
ଅକ୍କୋସେୟ୍ୟ ଚ ୟା ଭିକ୍ଖୁଂ, ପରିଭାସେୟ୍ୟ ୱା ପନ ।
ତିକପାଚିତ୍ତିୟଂ ତସ୍ସା, ସେସେ ଚ ତିକଦୁକ୍କଟଂ ॥
ପୁରକ୍ଖତ୍ୱା ୱଦନ୍ତୀନ- ।
ମତ୍ଥଧମ୍ମାନୁସାସନିଂ ।
ନ ଦୋସୋମସୱାଦେନ ।
ତୁଲ୍ୟୋ ସେସନୟୋ ମତୋ ॥
ଦୁତିୟଂ ।
ୟା ସଙ୍ଘଂ ପରିଭାସେୟ୍ୟ, ତସ୍ସା ପାଚିତ୍ତିୟଂ ସିୟା ।
ଏକଂ ସମ୍ବହୁଲା ୱାପି, ତଥେୱ ଇତରାୟ ୱା ॥
ପରିଭାସନ୍ତିୟା ତସ୍ସା, ଦୁକ୍କଟଂ ପରିଦୀପିତଂ ।
ସେସଂ ଅନନ୍ତରେନେୱ, ସମୁଟ୍ଠାନାଦିନା ସମଂ ॥
ତତିୟଂ ।
ନିମନ୍ତିତାପି ୱା ସଚେ, ପୱାରିତାପି ୱା ପନ ।
ନିମନ୍ତନପୱାରଣା, ଉଭୋପି ୱୁତ୍ତଲକ୍ଖଣା ॥
ପୁରେଭତ୍ତଂ ତୁ ୟାଗୁଞ୍ଚ, ଠପେତ୍ୱା କାଲିକତ୍ତୟଂ ।
ୟା ଚଜ୍ଝୋହରଣତ୍ଥାୟ, ୟଂ କିଞ୍ଚି ପନ ଆମିସଂ ॥
ପଟିଗ୍ଗଣ୍ହାତି ଚେ ତସ୍ସା, ଗହଣେ ଦୁକ୍କଟଂ ସିୟା ।
ଅଜ୍ଝୋହାରୱସେନେତ୍ଥ, ପାଚିତ୍ତି ପରିଦୀପିତା ॥
କାଲିକାନି ଚ ତୀଣେୱ, ଆହାରତ୍ଥାୟ ଗଣ୍ହତି ।
ଗହଣେ ଦୁକ୍କଟଂ ୱୁତ୍ତଂ, ତଥା ଅଜ୍ଝୋହରନ୍ତିୟା ॥
ନିମନ୍ତିତା ୟା ପନ ଅପ୍ପୱାରିତା ।
ସଚେପି ୟାଗୁଂ ପିୱତୀଧ ୱଟ୍ଟତି ।
ତଥା କଥେତ୍ୱା ପୁନ ସାମିକସ୍ସ ୱା ।
ସଚେପି ସା ଭୁଞ୍ଜତି ଅଞ୍ଞଭୋଜନଂ ॥
କାଲିକାନି ଚ ତୀଣେୱ, ପଚ୍ଚୟେ ସତି ଭୁଞ୍ଜତି ।
ତଥା ଉମ୍ମତ୍ତିକାଦୀନଂ, ଅନାପତ୍ତି ପକାସିତା ॥
ସମୁଟ୍ଠାନମିଦଂ ତୁଲ୍ୟଂ, ଅଦ୍ଧାନେନ କ୍ରିୟାକ୍ରିୟଂ ।
ନିମନ୍ତିତା ଅନାପୁଚ୍ଛା, ସାମିଂ ଭୁଞ୍ଜତି ଚେ ପନ ॥
କପ୍ପିୟଂ ପନ କାରେତ୍ୱା, ଅକାରେତ୍ୱାପି ୱା ୟଦି ।
ପରିଭୁଞ୍ଜତି ୟା ତସ୍ସା, ପାଚିତ୍ତି କ୍ରିୟତୋ ସିୟା ॥
ଚତୁତ୍ଥଂ ।
ଭିକ୍ଖୁନୀନଂ ଅୱଣ୍ଣଂ ୱା, ପାଚିତ୍ତି କୁଲସନ୍ତିକେ ।
କୁଲସ୍ସାୱଣ୍ଣନଂ ୱାପି, ଭିକ୍ଖୁନୀନଂ ୱଦନ୍ତିୟା ॥
ସନ୍ତଂ ଭାସନ୍ତିୟା ଦୋସଂ, ନ ଦୋସୁମ୍ମତ୍ତିକାୟ ୱା ।
ଓମସୱାଦତୁଲ୍ୟାୱ, ସମୁଟ୍ଠାନାଦୟୋ ନୟା ॥
ପଞ୍ଚମଂ ।
ଅଦ୍ଧୟୋଜନତୋ ଓରେ, ଭିକ୍ଖୁ ଓୱାଦଦାୟକୋ ।
ନ ୱସତି ସଚେ ମଗ୍ଗୋ, ଅଖେମୋ ୱା ସଚେ ସିୟା ॥
ଅୟଂ ଅଭିକ୍ଖୁକୋ ନାମ, ଆୱାସୋ ପନ ତତ୍ଥ ହି ।
ଉପଗଚ୍ଛନ୍ତିୟା ୱସ୍ସଂ, ଆପତ୍ତି ଅରୁଣୁଗ୍ଗମେ ॥
ପକ୍କନ୍ତା ପକ୍ଖସଙ୍କନ୍ତା, ୱିବ୍ଭନ୍ତା ୱା ମତାପି ୱା ।
ୱସ୍ସଂ ଉପଗତା ଭିକ୍ଖୂ, ଅନାପତ୍ତାପଦାସୁପି ॥
ସେସୋ ଞେୟ୍ୟୋ କଥାମଗ୍ଗୋ ।
ଭିକ୍ଖୁନୋୱାଦକୋ ପନ ।
ଇଦଂ ଏଳକଲୋମେନ ।
ସମୁଟ୍ଠାନାଦିନା ସମଂ ॥
ଛଟ୍ଠଂ ।
ୟା ଭିକ୍ଖୁନୁଭତୋସଙ୍ଘେ, ୱସ୍ସଂୱୁଟ୍ଠା ତତୋ ପୁନ ।
‘‘ନାହଂ ପୱାରେସ୍ସାମୀ’’ତି, ସା ନିକ୍ଖିପତି ଚେ ଧୁରଂ ॥
ଧୁରେ ନିକ୍ଖିତ୍ତମତ୍ତସ୍ମିଂ, ତସ୍ସା ପାଚିତ୍ତିୟଂ ସିୟା ।
ସତି ୱା ଅନ୍ତରାୟସ୍ମିଂ, ଗିଲାନାୟାପଦାସୁପି ॥
ପରିୟେସିତ୍ୱାପି ୱା ଭିକ୍ଖୁଂ, ନ ଦୋସୋ ଅଲଭନ୍ତିୟା ।
ଇଦଂ ତୁ ଧୁରନିକ୍ଖେପ-ସମୁଟ୍ଠାନମୁଦୀରିତଂ ॥
ସତ୍ତମଂ ।
‘‘ଓୱାଦାଦୀନମତ୍ଥାୟ, ନ ଗଚ୍ଛିସ୍ସାମ୍ୟହ’’ନ୍ତି ହି ।
ଧୁରେ ନିକ୍ଖିତ୍ତମତ୍ତସ୍ମିଂ, ପାଚିତ୍ତି ପରିଦୀପୟେ ॥
ସଦିସଂ ତୁ ସମୁଟ୍ଠାନଂ, ପଠମନ୍ତିମୱତ୍ଥୁନା ।
ଅକ୍ରିୟଂ ଲୋକୱଜ୍ଜଞ୍ଚ, କାୟିକଂ ଦୁକ୍ଖୱେଦନଂ ॥
ଅଟ୍ଠମଂ ।
‘‘ନ ୟାଚିସ୍ସାମି ଓୱାଦଂ, ନ ପୁଚ୍ଛିସ୍ସାମୁପୋସଥଂ’’ ।
ଇଚ୍ଚେୱଂ ପନ ନିକ୍ଖିତ୍ତେ, ଧୁରେ ପାଚିତ୍ତିୟଂ ସିୟା ॥
ସତି ୱା ଅନ୍ତରାୟସ୍ମିଂ, ଗିଲାନାୟାପଦାସୁ ୱା ।
ନ ଦୋସୋ ପରିୟେସିତ୍ୱା, ଦୁତିୟଂ ଅଲଭନ୍ତିୟା ॥
ଅଟ୍ଠମେପି ଅନାପତ୍ତି, ଏୱମେୱ ପକାସିତା ।
ଇଦଂ ତୁ ଧୁରନିକ୍ଖେପ-ସମୁଟ୍ଠାନମୁଦୀରିତଂ ॥
ନୱମଂ ।
ପସାଖେ ପନ ସଞ୍ଜାତଂ, ଗଣ୍ଡଂ ରୁଚିତମେୱ ୱା ।
ଅନାପୁଚ୍ଛାୱ ସଙ୍ଘଂ ୱା, ଗଣଂ ଏକେନ ଏକିକା ॥
‘‘ଭିନ୍ଦ ଫାଲେହି ଧୋୱା’’ତି, ସବ୍ବାନେୱାଣାପେନ୍ତିୟା ।
କତେସୁ ଦୁକ୍କଟାନିଚ୍ଛ, ତସ୍ସା ପାଚିତ୍ତିୟୋ ଛ ଚ ॥
‘‘ୟମେତ୍ଥ ଅତ୍ଥି କାତବ୍ବଂ, ତଂ ସବ୍ବଂ ତ୍ୱଂ କରୋହି’’ତି ।
ଆଣାପେତି ସଚେ ଏୱଂ, ସୋ ଚ ସବ୍ବଂ କରୋତି ଚେ ॥
ଏକାୟ ପନ ୱାଚାୟ, ଦୁକ୍କଟାନି ପନଚ୍ଛ ଚ ।
ତସ୍ସା ପାଚିତ୍ତିୟଚ୍ଛକ୍କଂ, ଦ୍ୱାଦସାପତ୍ତିୟୋ ସିୟୁଂ ॥
ଭେଦନାଦୀସୁ ଏକଂ ସା, ଆଣାପେତି ସଚେ ପନ ।
ସୋ କରୋତି ଚ ସବ୍ବାନି, ଏକଂ ପାଚିତ୍ତିୟଂ ସିୟା ॥
ଆପୁଚ୍ଛିତ୍ୱାପି ୱା ୱିଞ୍ଞୁଂ, ଗହେତ୍ୱା ଦୁତିୟମ୍ପି ୱା ।
ଭେଦନାଦୀନି ସବ୍ବାନି, କାରାପେତି ସଚେ ପନ ॥
ତସ୍ସା ଉମ୍ମତ୍ତିକାଦୀନ-ମନାପତ୍ତି ପକାସିତା ।
ସମୁଟ୍ଠାନାଦୟୋ ସବ୍ବେ, କଥିନେନ ସମା ମତା ॥
ଦସମଂ ।
ଆରାମୱଗ୍ଗୋ ଛଟ୍ଠୋ ।
ଗଣଂପରିୟେସନାଦିସ୍ମିଂ, ଗବ୍ଭିନିଂ ୱୁଟ୍ଠପେନ୍ତିୟା ।
ଞତ୍ତିୟା କମ୍ମୱାଚାହି, ଉପଜ୍ଝାୟାୟ ଦୁକ୍କଟଂ ॥
କମ୍ମୱାଚାୟ ଓସାନେ, ପାଚିତ୍ତି ପରିୟାପୁତା ।
ତଥା ଗବ୍ଭିନିସଞ୍ଞାୟ, ନ ଚ ଗବ୍ଭିନିୟା ପନ ॥
ଉଭୋ ସଞ୍ଜାତକଙ୍ଖାୟ, ହୋତି ଆପତ୍ତି ଦୁକ୍କଟଂ ।
ତଥାଚରିନିୟା ତସ୍ସା, ଗଣସ୍ସାପି ଚ ଦୀପିତଂ ॥
ଦ୍ୱୀସ୍ୱଗବ୍ଭିନିସଞ୍ଞାୟ, ନ ଦୋସୁମ୍ମତ୍ତିକାୟ ୱା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ପଠମଂ ।
ଦୁତିୟେ ନତ୍ଥି ୱତ୍ତବ୍ବଂ, ପଠମେନ ସମଂ ମତଂ ।
ସମୁଟ୍ଠାନାଦିନା ସଦ୍ଧିଂ, ନତ୍ଥି କାଚି ୱିସେସତା ॥
ଦୁତିୟଂ ।
ଛସ୍ୱସିକ୍ଖିତସିକ୍ଖଂ ତୁ, ସିକ୍ଖମାନଞ୍ହି ଭିକ୍ଖୁନୀ ।
ଦ୍ୱେ ୱସ୍ସାନି ସିୟାପତ୍ତି, ୱୁଟ୍ଠାପେୟ୍ୟ ସଚେ ପନ ॥
ତିକପାଚିତ୍ତିୟଂ ୱୁତ୍ତଂ, ଧମ୍ମକମ୍ମେ ତୁ ସତ୍ଥୁନା ।
ଅଧମ୍ମେ ପନ କମ୍ମସ୍ମିଂ, ଦୀପିତଂ ତିକଦୁକ୍କଟଂ ॥
ଛସୁ ସିକ୍ଖିତସିକ୍ଖଂ ୟା, ଦ୍ୱେ ୱସ୍ସାନି ଅଖଣ୍ଡତୋ ।
ୱୁଟ୍ଠାପେତି ଅନାପତ୍ତି, ତଥା ଉମ୍ମତ୍ତିକାୟ ୱା ॥
ଇମା ହି ଛ ଚ ସିକ୍ଖାୟୋ, ସଟ୍ଠିୱସ୍ସାପି ଚେ ପନ ।
ପବ୍ବଜ୍ଜାୟ ପଦାତବ୍ବା, ଅଦତ୍ୱା ନ ଚ କାରୟେ ॥
ତତିୟଂ ।
ଚତୁତ୍ଥେ ନତ୍ଥି ୱତ୍ତବ୍ବଂ, ଇଧ ସଙ୍ଘେନ ସମ୍ମତଂ ।
ସିକ୍ଖମାନମନାପତ୍ତି, ହୋତି ତଂ ୱୁଟ୍ଠପେନ୍ତିୟା ॥
ଅଦିନ୍ନା ପଠମଂ ହୋତି, ସଚେ ୱୁଟ୍ଠାନସମ୍ମୁତି ।
ତତ୍ଥାପି ଚ ପଦାତବ୍ବା, ଉପସମ୍ପଦମାଳକେ ॥
ତତିୟଞ୍ଚ ଚତୁତ୍ଥଞ୍ଚ, ସମୁଟ୍ଠାନାଦିନା ପନ ।
ପଠମେନ ସମଂ ଞେୟ୍ୟଂ, ଚତୁତ୍ଥଂ ତୁ କ୍ରିୟାକ୍ରିୟଂ ॥
ଚତୁତ୍ଥଂ ।
ଊନଦ୍ୱାଦସୱସ୍ସଂ ତୁ, କଞ୍ଚି ଗିହିଗତଂ ପନ ।
ପରିପୁଣ୍ଣାତି ସଞ୍ଞାୟ, ନ ଦୋସୋ ୱୁଟ୍ଠପେନ୍ତିୟା ॥
ହୋତି ୱାନୁପସମ୍ପନ୍ନା, ଉପସମ୍ପାଦିତାପି ସା ।
ଅସେସେନ ଚ ସେସଂ ତୁ, ପଠମେନ ସମଂ ମତଂ ॥
ପଞ୍ଚମଂ ।
ଛଟ୍ଠଂ ତୁ ତତିୟେ ୱୁତ୍ତ-ନୟେନେୱ ୱିଭାୱୟେ ।
ସତ୍ତମମ୍ପି ତଥା ସବ୍ବଂ, ଚତୁତ୍ଥେନ ସମଂ ମତଂ ॥
ଛଟ୍ଠସତ୍ତମାନି ।
ୟଂ ତୁୱଟ୍ଟକୱଗ୍ଗସ୍ମିଂ, ଦୁକ୍ଖିତଂ ସହଜୀୱିନିଂ ।
ୱୁତ୍ତଂ ତେନ ସମଂ ଞେୟ୍ୟଂ, ଅଟ୍ଠମଂ ନ ୱିସେସତା ॥
ଅଟ୍ଠମଂ ।
ଦ୍ୱେ ୱସ୍ସାନି ଚ ୟା କାଚି, ୱୁଟ୍ଠାପିତପୱତ୍ତିନିଂ ।
ନାନୁବନ୍ଧେୟ୍ୟ ଚେ ତସ୍ସା, ପାଚିତ୍ତି ପରିୟାପୁତା ॥
‘‘ଦ୍ୱେ ୱସ୍ସାନି ଅହଂ ନାନୁ-ବନ୍ଧିସ୍ସାମୀ’’ତି ଚେ ପନ ।
ଧୁରେ ନିକ୍ଖିତ୍ତମତ୍ତସ୍ମିଂ, ତସ୍ସା ପାଚିତ୍ତିୟଂ ସିୟା ॥
ତଞ୍ଚ ବାଲମଲଜ୍ଜିଂ ୱା, ଗିଲାନାୟାପଦାସୁ ୱା ।
ନାନୁବନ୍ଧନ୍ତିୟା ତସ୍ସା, ନ ଦୋସୁମ୍ମତ୍ତିକାୟ ୱା ॥
ସମୁଟ୍ଠାନାଦୟୋ ତୁଲ୍ୟା, ପଠମନ୍ତିମୱତ୍ଥୁନା ।
ଇଦଂ ପନାକ୍ରିୟଂ ୱୁତ୍ତଂ, ୱେଦନା ଦୁକ୍ଖୱେଦନା ॥
ନୱମଂ ।
ୱୁଟ୍ଠାପେତ୍ୱା ତୁ ୟା କାଚି, ଭିକ୍ଖୁନୀ ସହଜୀୱିନିଂ ।
ତଂ ଗହେତ୍ୱା ନ ଗଚ୍ଛେୟ୍ୟ, ନ ଚଞ୍ଞଂ ଆଣାପେୟ୍ୟ ଚେ ॥
ଧୁରେ ନିକ୍ଖିତ୍ତମତ୍ତସ୍ମିଂ, ତସ୍ସା ପାଚିତ୍ତିୟଂ ସିୟା ।
ସତି ୱା ଅନ୍ତରାୟସ୍ମିଂ, ଦୁତିୟଂ ଅଲଭନ୍ତିୟା ॥
ଆପଦାସୁ ଗିଲାନାୟ, ତଥା ଉମ୍ମତ୍ତିକାୟ ୱା ।
ନ ଦୋସୋ ଧୁରନିକ୍ଖେପ-ସମୁଟ୍ଠାନମିଦଂ ପନ ॥
ଦସମଂ ।
ଗବ୍ଭିନିୱଗ୍ଗୋ ସତ୍ତମୋ ।
କୁମାରିଭୂତୱଗ୍ଗସ୍ସ, ପଠମାଦୀନି ତୀଣିପି ।
ଗିହିଗତେହି ତୀହେୱ, ସଦିସାନୀତି ନିଦ୍ଦିସେ ॥
ୟା ମହୂପପଦା ଦ୍ୱେ ତୁ, ସିକ୍ଖମାନା ପନାଦିତୋ ।
‘‘ଗତା ୱୀସତିୱସ୍ସା’’ତି, ୱିଞ୍ଞାତବ୍ବା ୱିଭାୱିନା ॥
ସଚେ ଗିହିଗତା ହୋନ୍ତି, ନ ଚ ୱା ପୁରିସଂ ଗତା ।
‘‘ସିକ୍ଖମାନା’’ତି ୱତ୍ତବ୍ବା, ତା ହି ସମ୍ମୁତିଆଦିସୁ ॥
ନ ତା ‘‘କୁମାରିଭୂତା’’ତି, ତଥା ‘‘ଗିହିଗତା’’ତି ୱା ।
ୱତ୍ତବ୍ବା ପନୁଭୋପେତା, ଏୱଂ ୱତ୍ତୁଂ ନ ୱଟ୍ଟତି ॥
ସମ୍ମୁତିଂ ଦସୱସ୍ସାୟ, ଦତ୍ୱା ଦ୍ୱାଦସୱସ୍ସିକା ।
କତ୍ତବ୍ବା ଉପସମ୍ପନ୍ନା, ସେସାସୁପି ଅୟଂ ନୟୋ ॥
ୟା ଅଟ୍ଠାରସୱସ୍ସା ତୁ, ତତୋ ପଟ୍ଠାୟ ସା ପନ ।
ୱୁତ୍ତା ‘‘କୁମାରିଭୂତା’’ତି, ତଥା ‘‘ଗିହିଗତା’’ତିପି ॥
ୱୁତ୍ତା ‘‘କୁମାରିଭୂତା’’ତି, ସାମଣେରୀ ହି ୟା ପନ ।
‘‘କୁମାରିଭୂତା’’ ଇଚ୍ଚେୱ, ୱତ୍ତବ୍ବା ନ ପନଞ୍ଞଥା ॥
ଏତା ତୁ ପନ ତିସ୍ସୋପି, ସିକ୍ଖାସମ୍ମୁତିଦାନତୋ ।
‘‘ସିକ୍ଖମାନା’’ତି ୱତ୍ତୁମ୍ପି, ୱଟ୍ଟତେୱ ନ ସଂସୟୋ ॥
ତତିୟଂ ।
ଊନଦ୍ୱାଦସୱସ୍ସାୱ, ୱୁଟ୍ଠାପେତି ସଚେ ପରଂ ।
ହୁତ୍ୱା ସୟମୁପଜ୍ଝାୟା, ସିକ୍ଖମାନଂ ତୁ ଭିକ୍ଖୁନୀ ॥
ପୁବ୍ବେ ୱୁତ୍ତନୟେନେୱ, ଦୁକ୍କଟାନମନନ୍ତରଂ ।
କମ୍ମୱାଚାନମୋସାନେ, ତସ୍ସା ପାଚିତ୍ତି ଦୀପିତା ॥
ଚତୁତ୍ଥଂ ।
ପଞ୍ଚମେ ନତ୍ଥି ୱତ୍ତବ୍ବଂ, ଚତୁତ୍ଥଂ ପଞ୍ଚମମ୍ପି ଚ ।
ଉଭୟଂ ତିସମୁଟ୍ଠାନଂ, ପଞ୍ଚମଂ ତୁ କ୍ରିୟାକ୍ରିୟଂ ॥
ପଞ୍ଚମଂ ।
ସଙ୍ଘେନୁପପରିକ୍ଖିତ୍ୱା, ‘‘ଅଲଂ ତାୱା’’ତି ୱାରିତା ।
ଉପସମ୍ପାଦିତେନେତ୍ଥ, ପଚ୍ଛା ଖୀୟତି ଦୋସତା ॥
ଉଜ୍ଝାୟତି ସଚେ ଛନ୍ଦ-ଦୋସାଦୀହି କରୋନ୍ତିୟା ।
ନ ଦୋସୋ ତିସମୁଟ୍ଠାନଂ, ସଚିତ୍ତଂ ଦୁକ୍ଖୱେଦନଂ ॥
ଛଟ୍ଠଂ ।
ଲଦ୍ଧେ ଚ ଚୀୱରେ ପଚ୍ଛା, ଅସନ୍ତେ ଅନ୍ତରାୟିକେ ।
‘‘ୱୁଟ୍ଠାପେସ୍ସାମି ନାହ’’ନ୍ତି, ଧୁରନିକ୍ଖେପନେ ପନ ॥
ହୋତି ପାଚିତ୍ତିୟଂ ତସ୍ସା, ଗିଲାନାୟାପଦାସୁପି ।
ନ ଦୋସୋ ପରିୟେସିତ୍ୱା, ପରିସଂ ଅଲଭନ୍ତିୟା ॥
ଇଦଞ୍ହି ଧୁରନିକ୍ଖେପ-ସମୁଟ୍ଠାନଂ ସଚିତ୍ତକଂ ।
ଅକ୍ରିୟଂ ଲୋକୱଜ୍ଜଞ୍ଚ, ହୋତିଦଂ ଦୁକ୍ଖୱେଦନଂ ॥
ସତ୍ତମଂ ।
ଅଟ୍ଠମଂ ସତ୍ତମେନେୱ, ସଦିସଂ ପନ ସବ୍ବଥା ।
ନୱମେପି ଚ ୱତ୍ତବ୍ବଂ, ନତ୍ଥି ଉତ୍ତାନମେୱିଦଂ ॥
ନତ୍ଥାଜାନନ୍ତିୟା ଦୋସୋ, ତଥା ଉମ୍ମତ୍ତିକାୟ ୱା ।
ଅଦିନ୍ନାଦାନତୁଲ୍ୟାୱ, ସମୁଟ୍ଠାନାଦୟୋ ନୟା ॥
ଅଟ୍ଠମନୱମାନି ।
ମାତରା ପିତରା ୱାଥ, ନାନୁଞ୍ଞାତଂ ତୁ ସାମିନା ।
ତସ୍ସା ପାଚିତ୍ତିୟାପତ୍ତି, ତଂ ୱୁଟ୍ଠାପେନ୍ତିୟା ସିୟା ॥
ଉପସମ୍ପଦକାଲସ୍ମିଂ, ତଥା ପବ୍ବାଜନକ୍ଖଣେ ।
ଦ୍ୱିକ୍ଖତ୍ତୁଂ ପୁଚ୍ଛିତବ୍ବଂ ତୁ, ଭିକ୍ଖୁନୀହି, ନ ଭିକ୍ଖୁନା ॥
ଅନାପତ୍ତି ନ ଜାନାତି, ମାତୁଆଦୀନମତ୍ଥିତଂ ।
ଇଦଂ ଚତୁସମୁଟ୍ଠାନଂ, ୱାଚତୋ କାୟୱାଚତୋ ॥
ୱାଚାମାନସତୋ ଚେୱ, କାୟୱାଚାଦିତୋପି ଚ ।
କ୍ରିୟାକ୍ରିୟମଚିତ୍ତଞ୍ଚ, ତିଚିତ୍ତଞ୍ଚ ତିୱେଦନଂ ॥
ଦସମଂ ।
ୟା ପାରିୱାସିକେନେତ୍ଥ, ଛନ୍ଦଦାନେନ ଭିକ୍ଖୁନୀ ।
ୱୁଟ୍ଠାପେତି ସଚେ ସିକ୍ଖ-ମାନଂ ପାଚିତ୍ତିୟଂ ସିୟା ॥
ଅୱୁଟ୍ଠିତାୟନାପତ୍ତି, ପରିସାୟାୱିହାୟ ୱା ।
ଛନ୍ଦଂ ତୁ ତିସମୁଟ୍ଠାନଂ, ତିଚିତ୍ତଞ୍ଚ ତିୱେଦନଂ ॥
ଏକାଦସମଂ ।
ଦ୍ୱାଦସେ ତେରସେ ୱାପି, ୱତ୍ତବ୍ବଂ ନତ୍ଥି କିଞ୍ଚିପି ।
ସମୁଟ୍ଠାନାଦୟୋ ସବ୍ବେ, ଅନନ୍ତରସମା ମତା ॥
ଦ୍ୱାଦସମତେରସମାନି ।
କୁମାରୀଭୂତୱଗ୍ଗୋ ଅଟ୍ଠମୋ ।
ସମଣୀ ଅଗିଲାନା ୟା, ଧାରେୟ୍ୟ ଛତ୍ତୁପାହନଂ ।
ତସ୍ସା ପାଚିତ୍ତିୟାପତ୍ତି, ହୋତୀତି ପରିୟାପୁତା ॥
ସଚେ ଏକପୟୋଗେନ, ମଗ୍ଗସ୍ସ ଗମନେ ପନ ।
ଦିୱସମ୍ପି ଚ ଧାରେତି, ଏକଂ ପାଚିତ୍ତିୟଂ ସିୟା ॥
କଦ୍ଦମାଦୀନି ପସ୍ସିତ୍ୱା, ଓମୁଞ୍ଚିତ୍ୱା ଉପାହନା ।
ଛତ୍ତମେୱ ଚ ଧାରେନ୍ତୀ, ୟଦି ଗଚ୍ଛତି ଦୁକ୍କଟଂ ॥
ସଚେ ଉପାହନାରୁଳ୍ହା, ଦିସ୍ୱା ଗଚ୍ଛାଦିକଂ ପନ ।
ତଂ ଛତ୍ତମପନାମେତ୍ୱା, ଦୁକ୍କଟଂ ହୋତି ଗଚ୍ଛତି ॥
ଛତ୍ତମ୍ପି ଅପନାମେତ୍ୱା, ଓମୁଞ୍ଚିତ୍ୱା ଉପାହନା ।
ପୁନ ଧାରେନ୍ତିୟା ତସ୍ସା, ହୋତି ପାଚିତ୍ତିୟଂ ପନ ॥
ପୟୋଗଗଣନାୟେୱ, ପାଚିତ୍ତିଗଣନା ସିୟା ।
ତିକପାଚିତ୍ତିୟଂ ୱୁତ୍ତଂ, ତଥେୱ ଦ୍ୱିକଦୁକ୍କଟଂ ॥
ଆରାମେ ଉପଚାରେ ୱା, ଦୋସୋ ନତ୍ଥାପଦାସୁପି ।
ଇଦଂ ଏଳକଲୋମେନ, ସମୁଟ୍ଠାନାଦିନା ସମଂ ॥
ପଠମଂ ।
ହୋତି ଭିକ୍ଖୁନିୟା ୟାନା, ଓରୋହିତ୍ୱା ପୁନପ୍ପୁନଂ ।
ଅଭିରୂହନ୍ତିୟାପତ୍ତି, ପୟୋଗଗଣନାୱସା ॥
ଆପଦାସୁ ଅନାପତ୍ତି, ତଥା ଉମ୍ମତ୍ତିକାୟ ୱା ।
ସେସଂ ଅନନ୍ତରେନେୱ, ସମୁଟ୍ଠାନାଦିନା ସମଂ ॥
ଦୁତିୟଂ ।
ୟା ଚ ଧାରେୟ୍ୟ ସଙ୍ଘାଣିଂ, ୟଂ କିଞ୍ଚିପି କଟୂପିୟଂ ।
ତସ୍ସା ପାଚିତ୍ତିୟାପତ୍ତି, ହୋତୀତି ପରିୟାପୁତା ॥
ଧାରେନ୍ତିୟା ପନେତ୍ଥାପି, ଓମୁଞ୍ଚିତ୍ୱା ପୁନପ୍ପୁନଂ ।
ପୟୋଗଗଣନାୟେୱ, ତସ୍ସା ପାଚିତ୍ତିୟୋ ସିୟୁଂ ॥
ଆବାଧପଚ୍ଚୟା ୟା ତୁ, ଧାରେତି କଟିସୁତ୍ତକଂ ।
ତଥା ଉମ୍ମତ୍ତିକାଦୀନ-ମନାପତ୍ତି ପକାସିତା ॥
ସେସଂ ତୁ ପଠମେନେୱ, ସଦିସନ୍ତି ପକାସିତଂ ।
ଇଧ ଚାକୁସଲଂ ଚିତ୍ତଂ, ଲୋକୱଜ୍ଜଂ ୱିସେସତା ॥
ତତିୟଂ ।
ଧାରେତି ପନ ୟଂ କିଞ୍ଚି, ସଚେ ସୀସୂପଗାଦିସୁ ।
ତସ୍ସା ତସ୍ସ ଚ ୱତ୍ଥୁସ୍ସ, ଗଣନାପତ୍ତିୟୋ ସିୟୁଂ ॥
ଆବାଧପଚ୍ଚୟା ଦୋସୋ, କିଞ୍ଚି ଧାରେନ୍ତିୟା ନ ଚ ।
ସେସଂ ଅନନ୍ତରେନେୱ, ସଦିସଂ ପରିଦୀପିତଂ ॥
ଚତୁତ୍ଥଂ ।
ୟେନ କେନଚି ଗନ୍ଧେନ, ସୱଣ୍ଣାୱଣ୍ଣକେନ ଚ ।
ନ୍ହାସନ୍ତିୟା ପନାପତ୍ତି, ନ୍ହାନୋସାନେ ପକାସିତା ॥
ଗନ୍ଧୟୋଜନତୋ ସବ୍ବ-ପୟୋଗେ ଦୁକ୍କଟଂ ସିୟା ।
ଆବାଧପଚ୍ଚୟା ଦୋସୋ, ନତ୍ଥି ଉମ୍ମତ୍ତିକାୟ ୱା ॥
ସେସଂ ତୁ ତତିୟେନେୱ, ସଦିସଂ ସବ୍ବଥା ମତଂ ।
ଛଟ୍ଠମ୍ପି ତତିୟେନେୱ, ସଦିସନ୍ତି ପକାସିତଂ ॥
ପଞ୍ଚମଛଟ୍ଠାନି ।
ଉବ୍ବଟ୍ଟାପେୟ୍ୟ ଚଞ୍ଞାୟ, ସମ୍ବାହାପେୟ୍ୟ ୱା ତଥା ।
ହୋତି ଭିକ୍ଖୁନିୟାପତ୍ତି, ସଚେ ଭିକ୍ଖୁନିୟା ପନ ॥
ଏତ୍ଥ ହତ୍ଥମମୋଚେତ୍ୱା, ଏକା ଉବ୍ବଟ୍ଟନେ ସିୟା ।
ମୋଚେତ୍ୱା ପନ ମୋଚେତ୍ୱା, ପୟୋଗଗଣନା ସିୟା ॥
ସମ୍ବାହନେପି ଏସେୱ, ନୟୋ ଞେୟ୍ୟୋ ୱିଭାୱିନା ।
ଆପଦାସୁ ଗିଲାନାୟ, ଅନାପତ୍ତି ପକାସିତା ॥
ସେସଂ ତୁ ତତିୟେନେୱ, ସମୁଟ୍ଠାନାଦିନା ସମଂ ।
ସତ୍ତମେନ ସମାନାୱ, ଅଟ୍ଠମାଦୀନି ତୀଣିପି ॥
ସତ୍ତମଟ୍ଠମନୱମଦସମାନି ।
ୟା ଅନ୍ତୋଉପଚାରସ୍ମିଂ, ଭିକ୍ଖୁସ୍ସ ପୁରତୋ ପନ ।
ଅନାପୁଚ୍ଛା ନିସୀଦେୟ୍ୟ, ଛମାୟପି ନ ୱଟ୍ଟତି ॥
ତିକପାଚିତ୍ତିୟଂ ୱୁତ୍ତଂ, ପୁଚ୍ଛିତେ ଦୁକ୍କଟଦ୍ୱୟଂ ।
ଆପଦାସୁ ଗିଲାନାୟ, ନ ଦୋସୁମ୍ମତ୍ତିକାୟ ୱା ॥
ଇଦଂ ପନ ସମୁଟ୍ଠାନଂ, କଥିନେନ ସମଂ ମତଂ ।
କ୍ରିୟାକ୍ରିୟମଚିତ୍ତଞ୍ଚ, ତିଚିତ୍ତଞ୍ଚ ତିୱେଦନଂ ॥
ଏକାଦସମଂ ।
ଅନୋକାସକତଂ ଭିକ୍ଖୁଂ, ପଞ୍ହଂ ପୁଚ୍ଛେୟ୍ୟ ଦୋସତା ।
ୱିନୟେ ଚ କତୋକାସଂ, ସୁତ୍ତଂ ପୁଚ୍ଛନ୍ତିୟାପି ଚ ॥
କାରେତ୍ୱା ପନ ଓକାସଂ, ଅନୋଦିସ୍ସାପି ପୁଚ୍ଛତି ।
ନ ଦୋସୋ ପଦସୋଧମ୍ମ-ସମୁଟ୍ଠାନମିଦଂ ପନ ॥
ଦ୍ୱାଦସମଂ ।
ସଂକଚ୍ଚିକଂ ୱିନା ଗାମଂ, ପଦସା ପୱିସନ୍ତିୟା ।
ପରିକ୍ଖିତ୍ତସ୍ସ ଗାମସ୍ସ, ପରିକ୍ଖେପୋକ୍କମେ ପନ ॥
ଦୁକ୍କଟଂ ପଠମେ ପାଦେ, ପାଚିତ୍ତି ଦୁତିୟେ ସିୟା ।
ଉପଚାରୋକ୍କମେପେତ୍ଥ, ଏସେୱ ଚ ନୟୋ ମତୋ ॥
ୟସ୍ସା ସଂକଚ୍ଚିକଂ ନଟ୍ଠଂ, ଅଚ୍ଛିନ୍ନଂ ୱାପି କେନଚି ।
ଅନାପତ୍ତି ସିୟା ତସ୍ସା, ଗିଲାନାୟାପଦାସୁପି ॥
ଇଦମେଳକଲୋମେନ, ସମୁଟ୍ଠାନାଦିନା ସମଂ ।
ସେସଂ ୱୁତ୍ତନୟେନେୱ, ୱିଞ୍ଞାତବ୍ବଂ ୱିଭାୱିନା ॥
ତେରସମଂ ।
ଛତ୍ତୁପାହନୱଗ୍ଗୋ ନୱମୋ ।
ଇତି ୱିନୟୱିନିଚ୍ଛୟେ ପାଚିତ୍ତିୟକଥା ନିଟ୍ଠିତା ।
ପାଟିଦେସନୀୟକଥା
ଅଗିଲାନା ସଚେ ସପ୍ପିଂ, ଲଦ୍ଧଂ ୱିଞ୍ଞତ୍ତିୟା ସୟଂ ।
‘‘ଭୁଞ୍ଜିସ୍ସାମୀ’’ତି ଗହଣେ, ଦୁକ୍କଟଂ ପରିଦୀପିତଂ ॥
ଅଜ୍ଝୋହାରୱସେନେୱ, ପାଟିଦେସନିୟଂ ସିୟା ।
ତିପାଟିଦେସନୀୟଂ ତୁ, ଗିଲାନାୟ ଦ୍ୱିଦୁକ୍କଟଂ ॥
ଗିଲାନା ୱିଞ୍ଞାପେତ୍ୱାନ, ପଚ୍ଛା ସେୱନ୍ତିୟାପି ଚ ।
ଗିଲାନାୟାୱସେସଂ ୱା, ୱିଞ୍ଞତ୍ତଂ ଞାତକାଦିତୋ ॥
ଅଞ୍ଞସ୍ସତ୍ଥାୟ ୱା ଅତ୍ତ-ଧନେନୁମ୍ମତ୍ତିକାୟ ୱା ।
ଅନାପତ୍ତି ସମୁଟ୍ଠାନଂ, ଅଦ୍ଧାନସଦିସଂ ମତଂ ॥
ପଠମଂ ।
ଅୟମେୱ ଚ ସେସେସୁ, ଦୁତିୟାଦୀସୁ ନିଚ୍ଛୟୋ ।
ସମୁଟ୍ଠାନାଦିନା ସଦ୍ଧିଂ, ନତ୍ଥି କାଚି ୱିସେସତା ॥
ଅନାଗତେସୁ ସବ୍ବେସୁ, ସପ୍ପିଆଦୀସୁ ପାଳିୟଂ ।
ଭୁଞ୍ଜନ୍ତିୟା ତୁ ୱିଞ୍ଞତ୍ୱା, ଅଟ୍ଠସୁପି ଚ ଦୁକ୍କଟଂ ॥
ଇତି ୱିନୟୱିନିଚ୍ଛୟେ
ପାଟିଦେସନୀୟକଥା ନିଟ୍ଠିତା ।
ସେଖିୟା ପନ ୟେ ଧମ୍ମା, ଉଦ୍ଦିଟ୍ଠା ପଞ୍ଚସତ୍ତତି ।
ତେସଂ ମହାୱିଭଙ୍ଗେ ତୁ, ୱୁତ୍ତୋ ଅତ୍ଥୱିନିଚ୍ଛୟୋ ॥
ଇତି ୱିନୟୱିନିଚ୍ଛୟେ
ସିକ୍ଖାକରଣୀୟକଥା ନିଟ୍ଠିତା ।
ସୱିଭଙ୍ଗାନମେୱ ୟୋ ।
ଅତ୍ଥୋ ଅଟ୍ଠକଥାସାରୋ ।
ସୋ ଚ ୱୁତ୍ତୋ ୱିସେସତୋ ॥
ତଞ୍ଚ ସବ୍ବଂ ସମାଦାୟ, ୱିନୟସ୍ସ ୱିନିଚ୍ଛୟୋ ।
ଭିକ୍ଖୂନଂ ଭିକ୍ଖୁନୀନଞ୍ଚ, ହିତତ୍ଥାୟ କତୋ ମୟା ॥
ଇମଂ ପଟିଭାନଜନ୍ତୁ ନୋ ଜନ୍ତୁନୋ ।
ସୁଣନ୍ତି ୱିନୟେ ହି ତେ ୟେ ହିତେ ।
ଜନସ୍ସ ସୁମତାୟନେ ତାୟନେ ।
ଭୱନ୍ତି ପକତଞ୍ଞୁନୋ ତଞ୍ଞୁନୋ ॥
ବହୁସାରନୟେ ୱିନୟେ ପରମେ ।
ଅଭିପତ୍ଥୟତା ହି ୱିସାରଦତଂ ।
ପରମା ପନ ବୁଦ୍ଧିମତା ମହତୀ ।
କରଣୀୟତମା ୟତିନାଦରତା ॥
ଅୱଗଚ୍ଛତି ୟୋ ପନ ଭିକ୍ଖୁ ଇମଂ ।
ୱିନୟସ୍ସ ୱିନିଚ୍ଛୟମତ୍ଥୟୁତଂ ।
ଅମରଂ ଅଜରଂ ଅରଜଂ ଅରୁଜଂ ।
ଅଧିଗଚ୍ଛତି ସନ୍ତିପଦଂ ପନ ସୋ ॥
ଇତି ୱିନୟୱିନିଚ୍ଛୟେ
ଭିକ୍ଖୁନୀୱିଭଙ୍ଗକଥା ନିଟ୍ଠିତା ।
ଖନ୍ଧକକଥା
ମହାୱଗ୍ଗୋ
ମହାଖନ୍ଧକକଥା
ପବ୍ବଜ୍ଜାକଥା
ସୀଲକ୍ଖନ୍ଧାଦିୟୁତ୍ତେନ, ସୁଭକ୍ଖନ୍ଧେନ ଦେସିତେ ।
ଖନ୍ଧକେପି ପୱକ୍ଖାମି, ସମାସେନ ୱିନିଚ୍ଛୟଂ ॥
ମାତରା ଅନନୁଞ୍ଞାତଂ, ପିତରା ୱାପି ଭିକ୍ଖୁନୋ ।
ଭଣ୍ଡୁକମ୍ମମପୁଚ୍ଛିତ୍ୱା, ପବ୍ବାଜେନ୍ତସ୍ସ ଦୁକ୍କଟଂ ॥
ଉଦ୍ଦେସପରିପୁଚ୍ଛାୟ, ସୟଂ ଚେ ବ୍ୟାୱଟୋ ସିୟା ।
ଦହରୋ ଆଣାପେତବ୍ବୋ, ପବ୍ବାଜେତ୍ୱାନୟାତି ଚ ॥
ଉପଜ୍ଝାୟମଥୁଦ୍ଦିସ୍ସ, ଅୱୁତ୍ତୋ ଦହରୋ ପନ ।
ପବ୍ବାଜେତି ସଚେ ତଂ ସୋ, ସୟମେୱାପି ୱଟ୍ଟତି ॥
ସାମଣେରୋପି ୱତ୍ତବ୍ବୋ, ଦହରୋ ନତ୍ଥି ତତ୍ଥ ଚେ ।
‘‘ଖଣ୍ଡସୀମମିମଂ ନେତ୍ୱା, ପବ୍ବାଜେତ୍ୱାନୟା’’ତି ଚ ॥
ସରଣାନି ପନେତସ୍ସ, ଦାତବ୍ବାନେୱ ଅତ୍ତନା ।
ଏୱମ୍ପି ଭିକ୍ଖୁନାୟେୱ, ହୋତି ପବ୍ବାଜିତୋ ନରୋ ॥
ପୁରିସଂ ଭିକ୍ଖୁତୋ ଅଞ୍ଞୋ, ପବ୍ବାଜେତି ନ ୱଟ୍ଟତି ।
ଇତ୍ଥିଂ ଭିକ୍ଖୁନିତୋ ଅଞ୍ଞୋ, ପବ୍ବାଜେତି ନ ୱଟ୍ଟତି ॥
ସାମଣେରୋପି ୱା ଦାତୁଂ, ସାମଣେରୀପି ୱା ତଥା ।
ଆଣତ୍ତିୟା ଉଭିନ୍ନମ୍ପି, କାସାୟାନି ଲଭନ୍ତି ତେ ॥
ସୟମେୱ ଚ ୟଂ କିଞ୍ଚି, ପବ୍ବାଜେନ୍ତେନ ଭିକ୍ଖୁନା ।
କେସାପନୟନଂ କତ୍ୱା, ପଠମଂ ଉଦକେ ପୁନ ॥
ନ୍ହାପେତବ୍ବୋ ସିୟା ସୁଟ୍ଠୁ, ଘଂସିତ୍ୱା ଗୋମୟାଦିନା ।
ସରୀରେ ପୀଳକା ୱାପି, କଚ୍ଛୁ ୱା ତସ୍ସ ହୋନ୍ତି ଚେ ॥
ମାତା ୟଥା ନିୟଂପୁତ୍ତଂ, ନ ଜିଗୁଚ୍ଛତି ସବ୍ବସୋ ।
ନ୍ହାପେତବ୍ବୋୱ ୟତିନା, ତଥେୱ ଅଜିଗୁଚ୍ଛତା ॥
କସ୍ମା ? ପନେତ୍ତକେନାପି, ଉପକାରେନ ସାସନେ ।
ସୋ ସଦା ବଲୱସ୍ନେହୋ, ହୋତୁପଜ୍ଝାୟକାଦିସୁ ॥
ୱିନୋଦେତ୍ୱା ପନୁପ୍ପନ୍ନଂ, ଉକ୍କଣ୍ଠଂ କୁଲପୁତ୍ତକା ।
ସିକ୍ଖାୟୋ ପରିପୂରେତ୍ୱା, ନିବ୍ବାନଂ ପାପୁଣନ୍ତି ହି ॥
ଗନ୍ଧଚୁଣ୍ଣେନ ୱା ପଚ୍ଛା, ଚୁଣ୍ଣେନପି ହଲିଦ୍ଦିୟା ।
ସରୀରଂ ତସ୍ସ ସୀସଞ୍ଚ, ଉବ୍ବଟ୍ଟେତ୍ୱା ପୁନପ୍ପୁନଂ ॥
ଗିହିଗନ୍ଧଂ ୱିନୋଦେତ୍ୱା, କାସାୟାନି ପନେକତୋ ।
ଦ୍ୱତ୍ତିକ୍ଖତ୍ତୁଂ ସକିଂ ୱାପି, ଦାତବ୍ବାନିସ୍ସ ଭିକ୍ଖୁନା ॥
ଅଥ ହତ୍ଥେପି ୱା ତସ୍ସ, ଅଦତ୍ୱା ସୟମେୱ ତଂ ।
ଅଚ୍ଛାଦେତି ଉପଜ୍ଝାୟୋ, ୱଟ୍ଟତାଚରିୟୋପି ୱା ॥
ନିୱାସେତି ଅନାଣତ୍ତୋ, ସୋ ପାରୁପତି ୱା ସୟଂ ।
ଅପନେତ୍ୱା ତତୋ ସବ୍ବଂ, ପୁନ ଦାତବ୍ବମେୱ ତଂ ॥
ଭିକ୍ଖୁନା ତୁ ସହତ୍ଥେନ, ତଥା ଆଣତ୍ତିୟାପି ୱା ।
ଦିନ୍ନଂ ୱଟ୍ଟତି କାସାୱଂ, ନାଦିନ୍ନଂ ପନ ୱଟ୍ଟତି ॥
ତସ୍ସେୱ ସନ୍ତକଂ ୱାପି, କା କଥା ଅତ୍ତସନ୍ତକେ ।
ୱନ୍ଦାପେତ୍ୱା ତତ୍ଥ ଭିକ୍ଖୂ, କାରାପେତ୍ୱାନ ଉକ୍କୁଟିଂ ॥
ଅଞ୍ଜଲିଂ ପଗ୍ଗହାପେତ୍ୱା, ଦାତବ୍ବଂ ସରଣତ୍ତୟଂ ।
ପଟିପାଟିୱସେନେୱ, ନ ଚ ଉପ୍ପଟିପାଟିୟା ॥
ସଚେ ଏକପଦଂ ୱାପି, ଦେତି ଏକକ୍ଖରମ୍ପି ୱା ।
ପଟିପାଟିଂ ୱିରଜ୍ଝିତ୍ୱା, ଗହିତଂ ଚେ ନ ୱଟ୍ଟତି ॥
ତିକ୍ଖତ୍ତୁଂ ୟଦି ୱା ଦେତି, ବୁଦ୍ଧଂ ସରଣମେୱ ୱା ।
ତଥା ସେସେସୁ ଚେୱମ୍ପି, ନ ଦିନ୍ନାନେୱ ହୋନ୍ତି ହି ॥
କତ୍ୱାନୁନାସିକନ୍ତାନି, ଏକାବଦ୍ଧାନି ୱା ପନ ।
ୱିଚ୍ଛିନ୍ଦିତ୍ୱାଥ ମ-ନ୍ତାନି, ଦାତବ୍ବାନି ୱିଜାନତା ॥
ଉପସମ୍ପଦକମ୍ମଂ ତୁ, ଏକତୋସୁଦ୍ଧିୟା ସିୟା ।
ନ ହୋତି ପନ ପବ୍ବଜ୍ଜା, ଉଭତୋସୁଦ୍ଧିୟା ୱିନା ॥
ତସ୍ମା ଆଚରିୟେନାପି, ତଥାନ୍ତେୱାସିକେନପି ।
ବୁ-ଦ୍ଧ-କାରାଦୟୋ ୱଣ୍ଣା, ଠାନକରଣସମ୍ପଦଂ ॥
ଅହାପେନ୍ତେନ ୱତ୍ତବ୍ବା, ପବ୍ବଜ୍ଜାଗୁଣମିଚ୍ଛତା ।
ଏକୱଣ୍ଣୱିନାସେନ, ପବ୍ବଜ୍ଜା ହି ନ ରୂହତି ॥
ୟଦି ସିଦ୍ଧାପି ପବ୍ବଜ୍ଜା, ସରଣାଗମନତୋୱ ହି ।
ଦାତବ୍ବା ଦସ ସୀଲାନି, ପୂରଣତ୍ଥାୟ ଭିକ୍ଖୁନା ॥
ପବ୍ବଜ୍ଜାକଥା ।
ଉପଜ୍ଝାୟମଥାଚରିୟଂ, ନିସ୍ସାୟ ୱସତା ପନ ।
କତ୍ତବ୍ବାନେୱ ୱତ୍ତାନି, ପିୟସୀଲେନ ଭିକ୍ଖୁନା ॥
ଆସନଂ ପଞ୍ଞପେତବ୍ବଂ, ଦନ୍ତକଟ୍ଠଂ ମୁଖୋଦକଂ ।
ଦାତବ୍ବଂ ତସ୍ସ କାଲେନ, ସଚେ ୟାଗୁ ଭୱିସ୍ସତି ॥
ୟାଗୁ ତସ୍ସୁପନେତବ୍ବା, ସଙ୍ଘତୋ କୁଲତୋପି ୱା ।
ପତ୍ତେ ୱତ୍ତଞ୍ଚ କାତବ୍ବଂ, ୱତ୍ତଂ ଗାମପ୍ପୱେସନେ ॥
ଚୀୱରେ ୟାନି ୱତ୍ତାନି, ୱୁତ୍ତାନି ହି ମହେସିନା ।
ସେନାସନେ ତଥା ପାଦ-ପୀଠକଥଲିକାଦିସୁ ॥
ଏୱମାଦୀନି ୱତ୍ତାନି, ସବ୍ବାନି ପନ ରୋଗତୋ ।
ୱୁଟ୍ଠାନାଗମନନ୍ତାନି, ସତ୍ତତିଂସସତଂ ସିୟୁଂ ॥
ୱତ୍ତଭେଦେନ ସବ୍ବତ୍ଥ, ଦୁକ୍କଟଂ ତୁ ପକାସିତଂ ।
ଅନାଦରୱସେନେୱ, ଅକରୋନ୍ତସ୍ସ ଭିକ୍ଖୁନୋ ॥
ଉପଜ୍ଝାୟାଚରିୟୱତ୍ତକଥା ।
ଉପଜ୍ଝାୟସ୍ସ ୱତ୍ତାନି, ତଥା ସଦ୍ଧିୱିହାରିକେ ।
ସତଂ ତେରସ ହୋନ୍ତେୱ, ତଥାନ୍ତେୱାସିକେପି ଚ ॥
ସଦ୍ଧିୱିହାରିକନ୍ତେୱାସିକୱତ୍ତକଥା ।
ପକ୍କନ୍ତେ ୱାପି ୱିବ୍ଭନ୍ତେ, ପକ୍ଖସଙ୍କନ୍ତକେ ମତେ ।
ଆଣତ୍ତିୟା ଉପଜ୍ଝାୟା, ପସ୍ସମ୍ଭତି ଚ ନିସ୍ସୟୋ ॥
ହୋତି ଆଚରିୟମ୍ହାପି, ଛଧା ନିସ୍ସୟଭେଦନଂ ।
ପକ୍କନ୍ତେ ୱାପି ୱିବ୍ଭନ୍ତେ, ପକ୍ଖସଙ୍କନ୍ତକେ ମତେ ॥
ଆଣତ୍ତିୟଂ ଉଭିନ୍ନମ୍ପି, ଧୁରନିକ୍ଖେପନେପି ଚ ।
ଏକେକସ୍ସ ଉଭିନ୍ନଂ ୱା, ନାଲୟେ ସତି ଭିଜ୍ଜତି ॥
ଉପଜ୍ଝାୟସମୋଧାନ-ଗତସ୍ସାପି ଚ ଭିଜ୍ଜତି ।
ଦସ୍ସନଂ ସୱନଞ୍ଚାତି, ସମୋଧାନଂ ଦ୍ୱିଧା ମତଂ ॥
ଅଦ୍ଧିକସ୍ସ ଗିଲାନସ୍ସ, ଗିଲାନୁପଟ୍ଠକସ୍ସ ଚ ।
ୟାଚିତସ୍ସ ନ ଦୋସୋୱ, ୱସିତୁଂ ନିସ୍ସୟଂ ୱିନା ॥
ଜାନତା ଅତ୍ତନୋ ଚେୱ, ୱନେ ଫାସୁୱିହାରତଂ ।
ସଭାଗେ ଦାୟକେସନ୍ତେ, ୱସିତୁମ୍ପି ଚ ୱଟ୍ଟତି ॥
ନିସ୍ସୟପଟିପ୍ପସ୍ସମ୍ଭନକଥା ।
କୁଟ୍ଠିଂ ଗଣ୍ଡିଂ କିଲାସିଞ୍ଚ, ସୋସିଞ୍ଚ ଅପମାରିକଂ ।
ତଥା ରାଜଭଟଂ ଚୋରଂ, ଲିଖିତଂ କାରଭେଦକଂ ॥
କସାହତଂ ନରଞ୍ଚେୱ, ପୁରିସଂ ଲକ୍ଖଣାହତଂ ।
ଇଣାୟିକଞ୍ଚ ଦାସଞ୍ଚ, ପବ୍ବାଜେନ୍ତସ୍ସ ଦୁକ୍କଟଂ ॥
ହତ୍ଥଚ୍ଛିନ୍ନମଳଚ୍ଛିନ୍ନଂ, ପାଦଚ୍ଛିନ୍ନଞ୍ଚ ପୁଗ୍ଗଲଂ ।
କଣ୍ଣନାସଙ୍ଗୁଲିଚ୍ଛିନ୍ନଂ, କଣ୍ଡରଚ୍ଛିନ୍ନମେୱ ଚ ॥
କାଣଂ କୁଣିଞ୍ଚ ଖୁଜ୍ଜଞ୍ଚ, ୱାମନଂ ଫଣହତ୍ଥକଂ ।
ଖଞ୍ଜଂ ପକ୍ଖହତଞ୍ଚେୱ, ସୀପଦିଂ ପାପରୋଗିନଂ ॥
ଜରାୟ ଦୁବ୍ବଲଂ ଅନ୍ଧଂ, ବଧିରଞ୍ଚେୱ ମମ୍ମନଂ ।
ପୀଠସପ୍ପିଂ ତଥା ମୂଗଂ, ପବ୍ବାଜେନ୍ତସ୍ସ ଦୁକ୍କଟଂ ॥
ଅତିଦୀଘୋତିରସ୍ସୋ ୱା, ଅତିକାଲୋପି ୱା ତଥା ।
ଅଚ୍ଚୋଦାତୋପି ୱା ମଟ୍ଠ-ତମ୍ବଲୋହନିଦସ୍ସନୋ ॥
ଅତିଥୂଲୋ ଅତିକିସ୍ସୋ, ମହାସୀସୋପି ୱା ତଥା ।
ଅତିଖୁଦ୍ଦକସୀସେନ, ସହିତେନ ୟୁତ୍ତୋପି ୱା ॥
କୁଟକୁଟକସୀସୋ ୱା, ତଥା ସିଖରସୀସକୋ ।
ୱେଳୁନାଳିସମାନେନ, ସୀସେନ ଚ ୟୁତୋ ନରୋ ॥
କପ୍ପସୀସୋପି ପବ୍ଭାର-ସୀସୋ ୱା ୱଣସୀସକୋ ।
ତଥା କଣ୍ଣିକକେସୋ ୱା, ଥୂଲକେସୋପି ୱା ତଥା ॥
ପୂତିନିଲ୍ଲୋମସୀସୋ ୱା, ଜାତିପଣ୍ଡରକେସକୋ ।
ଜାତିୟା ତମ୍ବକେସୋ ୱା, ତଥେୱାୱଟ୍ଟସୀସକୋ ॥
ସୀସଲୋମେକବଦ୍ଧେହି, ଭମୁକେହି ୟୁତୋପି ୱା ।
ସମ୍ବଦ୍ଧଭମୁକୋ ୱାପି, ନିଲ୍ଲୋମଭମୁକୋପି ୱା ॥
ମହନ୍ତଖୁଦ୍ଦନେତ୍ତୋ ୱା, ତଥା ୱିସମଲୋଚନୋ ।
କେକରୋ ୱାପି ଗମ୍ଭୀର-ନେତ୍ତୋ ୱିସମଚକ୍କଲୋ ॥
ଜତୁମୂସିକକଣ୍ଣୋ ୱା, ହତ୍ଥିକଣ୍ଣୋପି ୱା ପନ ।
ଛିଦ୍ଦମତ୍ତକକଣ୍ଣୋ ୱା, ତଥେୱାୱିଦ୍ଧକଣ୍ଣକୋ ॥
ତଥା ଟଙ୍କିତକଣ୍ଣୋ ୱା, ପୂତିକଣ୍ଣୋପି ୱା ପନ ।
ୟୋନକାଦିପ୍ପଭେଦୋପି, ନାୟଂ ପରିସଦୂସକୋ ॥
ଅତିପିଙ୍ଗଲନେତ୍ତୋ ୱା, ତଥା ନିପ୍ପଖୁମକ୍ଖି ୱା ।
ଅସ୍ସୁପଗ୍ଘରନେତ୍ତୋ ୱା, ପକ୍କପୁପ୍ଫିତଲୋଚନୋ ॥
ତଥେୱ ଚ ମହାନାସୋ, ଅତିଖୁଦ୍ଦକନାସିକୋ ।
ତଥା ଚିପିଟନାସୋ ୱା, ନରୋ କୁଟିଲନାସିକୋ ॥
ନିଚ୍ଚୱିସ୍ସୱନାସୋ ୱା, ୟୋ ୱା ପନ ମହାମୁଖୋ ।
ୱଙ୍କଭିନ୍ନମୁଖୋ ୱାପି, ମହାଓଟ୍ଠୋପି ୱା ପନ ॥
ତଥା ତନୁକଓଟ୍ଠୋ ୱା, ୱିପୁଲୁତ୍ତରଓଟ୍ଠକୋ ।
ଓଟ୍ଠଛିନ୍ନୋପି ଉପ୍ପକ୍କ-ମୁଖୋ ଏଳମୁଖୋପି ୱା ॥
ସଙ୍ଖତୁଣ୍ଡୋପି ଦୁଗ୍ଗନ୍ଧ-ମୁଖୋ ୱା ପନ ପୁଗ୍ଗଲୋ ।
ମହାଦନ୍ତୋପି ଅଚ୍ଚନ୍ତଂ, ତଥା ଅସୁରଦନ୍ତକୋ ॥
ହେଟ୍ଠା ଉପରିତୋ ୱାପି, ବହିନିକ୍ଖନ୍ତଦନ୍ତକୋ ।
ଅଦନ୍ତୋ ପୂତିଦନ୍ତୋ ୱା, ଅତିଖୁଦ୍ଦକଦନ୍ତକୋ ॥
ୟସ୍ସ ଦନ୍ତନ୍ତରେ ଦନ୍ତୋ, କାଳକଦନ୍ତସନ୍ନିଭୋ ।
ସୁଖୁମୋୱ ଠିତୋ, ତଂ ଚେ, ପବ୍ବାଜେତୁମ୍ପି ୱଟ୍ଟତି ॥
ଦୀଘେନ ହନୁନା ୟୁତୋ ।
ଚିପିଟହନୁକୋ ୱାପି ।
ରସ୍ସେନ ହନୁନା ୟୁତୋ ॥
ନିମ୍ମସ୍ସୁଦାଠିକୋ ୱାପି, ଅତିଦୀଘଗଲୋପି ୱା ।
ଅତିରସ୍ସଗଲୋପି ୱା, ଭିନ୍ନଗଣ୍ଠିଗଲୋପି ୱା ॥
ତଥା ଭଟ୍ଠଂସକୂଟୋ ୱା, ଭିନ୍ନପିଟ୍ଠିଉରୋପି ୱା ।
ସୁଦୀଘରସ୍ସହତ୍ଥୋ ୱା, କଚ୍ଛୁକଣ୍ଡୁସମାୟୁତୋ ॥
ମହାନିସଦମଂସୋ ୱା, ଉଦ୍ଧନଗ୍ଗୁପମାୟୁତୋ ।
ୱାତଣ୍ଡିକୋ ମହାଊରୁ, ସଙ୍ଘଟ୍ଟନକଜାଣୁକୋ ॥
ଭିନ୍ନଜାଣୁ ମହାଜାଣୁ, ଦୀଘଜଙ୍ଘୋ ୱିଜଙ୍ଘକୋ ।
ୱିକଟୋ ୱାପି ପଣ୍ହୋ ୱା, ତଥା ଉବ୍ବଦ୍ଧପିଣ୍ଡିକୋ ॥
ୟଟ୍ଠିଜଙ୍ଘୋ ମହାଜଙ୍ଘୋ, ମହାପାଦୋପି ୟୋ ନରୋ ।
ତଥା ପିଟ୍ଠିକପାଦୋ ୱା, ମହାପଣ୍ହିପି ୱା ପନ ॥
ୱଙ୍କପାଦୋ ନରୋ ୟୋ ୱା, ଗଣ୍ଠିକଙ୍ଗୁଲିକୋପି ୱା ।
ୟୋ ପନନ୍ଧନଖୋ ୱାପି, କାଳପୂତିନଖୋପି ଚ ॥
ଇଚ୍ଚେୱମାଦିକଂ କଞ୍ଚି, ନରଂ ପରିସଦୂସକଂ ।
ପବ୍ବାଜେନ୍ତସ୍ସ ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ପରିସଦୂସକକଥା ।
‘‘ସାମଣେରଜ୍ଜ ମା ଖାଦ, ମା ଭୁଞ୍ଜ ଚ ପିୱା’’ତି ଚ ।
ନିୱାରେନ୍ତସ୍ସ ଆହାରଂ, ହୋତି ଆପତ୍ତି ଦୁକ୍କଟଂ ॥
‘‘ନିୱାରେସ୍ସାମି ଆହାର’’-ମିତି ୱା ପତ୍ତଚୀୱରଂ ।
ଅନ୍ତୋ ନିକ୍ଖିପତୋ ସବ୍ବ-ପୟୋଗେସୁପି ଦୁକ୍କଟଂ ॥
ଦୁବ୍ବଚସାମଣେରସ୍ସ, ଅନାଚାରସ୍ସ କେୱଲଂ ।
ଦଣ୍ଡକମ୍ମଂ ହୱେ କତ୍ୱା, ହିତକାମେନ ଭିକ୍ଖୁନା ॥
ୟାଗୁଂ ୱା ପନ ଭତ୍ତଂ ୱା, ଦସ୍ସେତ୍ୱା କିର ଭାସିତୁଂ ।
‘‘ଆହଟେ ଦଣ୍ଡକମ୍ମେ ତ୍ୱଂ, ଲଚ୍ଛସୀଦ’’ନ୍ତି ୱଟ୍ଟତି ॥
ଅପରାଧାନୁରୂପେନ, ଦଣ୍ଡକମ୍ମଂ ତୁ କାରୟେ ।
ୱାଲିକାସଲିଲାଦୀନ-ମାହରାପନମେୱ ତଂ ॥
ସୀସେ ୱା ନିକ୍ଖିପାପେତୁଂ, ପାସାଣାଦୀନି କାନିଚି ।
ନିପଜ୍ଜାପେତୁମୁଣ୍ହେ ୱା, ପାସାଣେ ଭୂମିୟାପି ୱା ॥
ଉଦକଂ ୱା ପୱେସେତୁଂ, ନ ଚ ୱଟ୍ଟତି ଭିକ୍ଖୁନୋ ।
ଇଧାୱରଣମତ୍ତଂ ତୁ, ଦଣ୍ଡକମ୍ମଂ ପକାସିତଂ ॥
ନିୱାରଣକଥା ।
ପକ୍ଖୋପକ୍କମିକାସିତ୍ତା, ଚତୁତ୍ଥୋ ପନୁସୂୟକୋ ।
ନପୁଂସକେନ ପଞ୍ଚେତେ, ପଣ୍ଡକା ପରିଦୀପିତା ॥
ତେସୁ ଆସିତ୍ତୁସୂୟାନଂ, ପବ୍ବଜ୍ଜା ନ ନିୱାରିତା ।
ଇତରେସଂ ତୁ ତିଣ୍ଣମ୍ପି, ପଣ୍ଡକାନଂ ନିୱାରିତା ॥
ୱାରିତା ୟସ୍ସ ପବ୍ବଜ୍ଜା, ନାସେତବ୍ବୋତି ସୋ ମତୋ ।
ତିୱିଧେ ପନ ତେ ଞତ୍ୱା, ପବ୍ବାଜେନ୍ତସ୍ସ ଦୁକ୍କଟଂ ॥
ପଣ୍ଡକକଥା ।
ଲିଙ୍ଗତ୍ଥେନୋ ଚ ସଂୱାସ-ତ୍ଥେନୋ ତଦୁଭୟସ୍ସ ଚ ।
ଥେୟ୍ୟସଂୱାସକୋ ନାମ, ତିୱିଧୋପି ପୱୁଚ୍ଚତି ॥
ସୟମେୱ ଚ ୟୋ ତତ୍ଥ, ପବ୍ବଜିତ୍ୱା ନ ଗଣ୍ହତି ।
ଭିକ୍ଖୁୱସ୍ସାନି ୱା ନେୱ, ୟଥାୱୁଡ୍ଢମ୍ପି ୱନ୍ଦନଂ ॥
ଲିଙ୍ଗତ୍ଥେନୋ ଅୟଂ ଲିଙ୍ଗ-ମତ୍ତସ୍ସ ଥେନତୋ ସିୟା ।
ୟୋ ଚ ପବ୍ବଜିତୋ ହୁତ୍ୱା, ଭିକ୍ଖୁୱସ୍ସାନି ଗଣ୍ହତି ॥
ସଂୱାସଂ ସାଦିୟନ୍ତୋୱ, ସଂୱାସତ୍ଥେନକୋ ମତୋ ।
ଉଭୟତ୍ଥେନକୋ ୱୁତ୍ତ-ନୟୋୟେୱ, ୟଥାହ ଚ ॥
‘‘ରାଜଦୁବ୍ଭିକ୍ଖକନ୍ତାର-ରୋଗୱେରିଭୟେହି ୱା ।
ଚୀୱରାହରଣତ୍ଥଂ ୱା, ଲିଙ୍ଗମାଦିୟତୀଧ ୟୋ ॥
ସଂୱାସଂ ନାଧିୱାସେତି, ୟାୱ ସୋ ସୁଦ୍ଧମାନସୋ ।
ଥେୟ୍ୟସଂୱାସକୋ ନାମ, ତାୱ ଏସ ନ ୱୁଚ୍ଚତି’’ ॥
ଥେୟ୍ୟସଂୱାସକକଥା ।
‘‘ତିତ୍ଥିୟୋହଂ ଭୱିସ୍ସ’’ନ୍ତି, ଉପସମ୍ପନ୍ନଭିକ୍ଖୁ ଚେ ।
ସଲିଙ୍ଗେନେୱ ୟୋ ୟାତି, ତିତ୍ଥିୟାନମୁପସ୍ସୟଂ ॥
ଗଚ୍ଛତୋ ପଦୱାରେନ, ହୋତି ଆପତ୍ତି ଦୁକ୍କଟଂ ।
ହୋତି ତିତ୍ଥିୟପକ୍କନ୍ତୋ, ଲିଙ୍ଗେ ତେସଂ ତୁ ନିସ୍ସିତେ ॥
‘‘ତିତ୍ଥିୟୋହଂ ଭୱିସ୍ସ’’ନ୍ତି, କୁସଚୀରାଦିକଂ ପନ ।
ସୟମେୱ ନିୱାସେତି, ସୋପି ପକ୍କନ୍ତକୋ ସିୟା ॥
ନଗ୍ଗୋ ଆଜୀୱକାଦୀନଂ, ଗନ୍ତ୍ୱା ତେସଂ ଉପସ୍ସୟଂ ।
ଲୁଞ୍ଚାପେତି ସଚେ କେସେ, ୱତ୍ତାନାଦିୟତୀଧ ୱା ॥
ମୋରପିଞ୍ଛାଦିକଂ ତେସଂ, ଲିଙ୍ଗଂ ଗଣ୍ହାତି ୱା ସଚେ ।
ସାରତୋ ଚେୱ ୱା ତେସଂ, ପବ୍ବଜ୍ଜଂ ଲଦ୍ଧିମେୱ ୱା ॥
ହୋତି ତିତ୍ଥିୟପକ୍କନ୍ତୋ, ନ ପନେସ ୱିମୁଚ୍ଚତି ।
ନଗ୍ଗସ୍ସ ଗଚ୍ଛତୋ ୱୁତ୍ତଂ, ପଦୱାରେନ ଦୁକ୍କଟଂ ॥
ୱୁତ୍ତୋ ଅନୁପସମ୍ପନ୍ନ-ୱସେନ ଥେୟ୍ୟୱାସକୋ ।
ତଥା ତିତ୍ଥିୟପକ୍କନ୍ତୋ, ଉପସମ୍ପନ୍ନଭିକ୍ଖୁନା ॥
ତିତ୍ଥିୟପକ୍କନ୍ତକଥା ।
ନାଗୋ ୱାପି ସୁପଣ୍ଣୋ ୱା, ୟକ୍ଖୋ ସକ୍କୋପି ୱା ଇଧ ।
ତିରଚ୍ଛାନଗତୋ ୱୁତ୍ତୋ, ପବ୍ବାଜେତୁଂ ନ ୱଟ୍ଟତି ॥
ତିରଚ୍ଛାନକଥା ।
ପଞ୍ଚାନନ୍ତରିକେ ପୋସେ, ପବ୍ବାଜେନ୍ତସ୍ସ ଦୁକ୍କଟଂ ।
ଉଭତୋବ୍ୟଞ୍ଜନଞ୍ଚେୱ, ତଥା ଭିକ୍ଖୁନିଦୂସକଂ ॥
ଏକତୋଉପସମ୍ପନ୍ନଂ, ଭିକ୍ଖୁନୀନଂ ତୁ ସନ୍ତିକେ ।
ଦୂସେତ୍ୱା ପନ ସୋ ନେୱ, ଭିକ୍ଖୁନୀଦୂସକୋ ସିୟା ॥
ସଚେ ଅନୁପସମ୍ପନ୍ନ-ଦୂସକୋ ଉପସମ୍ପଦଂ ।
ଲଭତେୱ ଚ ପବ୍ବଜ୍ଜଂ, ସା ଚ ନେୱ ପରାଜିତା ॥
ଏକାଦସଅଭବ୍ବପୁଗ୍ଗଲକଥା ।
ନୂପସମ୍ପାଦନୀୟୋୱ, ଅନୁପଜ୍ଝାୟକୋ ନରୋ ।
କରୋତୋ ଦୁକ୍କଟଂ ହୋତି, ନ କୁପ୍ପତି ସଚେ କତଂ ॥
କୁପ୍ପତୀତି ୱଦନ୍ତେକେ, ନ ଗହେତବ୍ବମେୱ ତଂ ।
ସେସେସୁପି ଅୟଂ ଞେୟ୍ୟୋ, ନୟୋ ସବ୍ବତ୍ଥ ୱିଞ୍ଞୁନା ॥
ଉପସମ୍ପଦକମ୍ମସ୍ସ, ଅଭବ୍ବା ପଞ୍ଚୱୀସତି ।
ଅଜାନିତ୍ୱା କତୋ ଚାପି, ଓସାରୋ ନାସନାରହୋ ॥
ହତ୍ଥଚ୍ଛିନ୍ନାଦିବାତ୍ତିଂସ, କୁଟ୍ଠିଆଦି ଚ ତେରସ ।
ଅପତ୍ତୋ ତେସମୋସାରୋ, କତୋ ଚେ ପନ ରୂହତି ॥
ଏକୂପଜ୍ଝାୟକୋ ହୋତି ।
ହୋନ୍ତି ଆଚରିୟା ତୟୋ ।
ଉପସମ୍ପଦାପେକ୍ଖା ଚ ।
ହୋନ୍ତି ଦ୍ୱେ ୱା ତୟୋପି ୱା ॥
ତୀହି ଆଚରିୟେହେୱ, ଏକତୋ ଅନୁସାୱନଂ ।
ଓସାରେତ୍ୱା କତଂ କମ୍ମଂ, ନ ଚ କୁପ୍ପତି କପ୍ପତି ॥
ଏକୂପଜ୍ଝାୟକୋ ହୋତି ।
ଆଚରିୟୋପି ତଥେକତୋ ।
ଉପସମ୍ପଦାପେକ୍ଖା ଚ ।
ହୋନ୍ତି ଦ୍ୱେ ୱା ତୟୋପି ୱା ॥
ଅନୁପୁବ୍ବେନ ସାୱେତ୍ୱା, ତେସଂ ନାମଂ ତୁ ତେନ ଚ ।
ଏକତୋ ଅନୁସାୱେତ୍ୱା, କତମ୍ପି ଚ ନ କୁପ୍ପତି ॥
ନାନୁପଜ୍ଝାୟକେନାପି, ନାନାଚରିୟକେନ ଚ ।
ଅଞ୍ଞମଞ୍ଞାନୁସାୱେତ୍ୱା, କତଂ କମ୍ମଞ୍ଚ ୱଟ୍ଟତି ॥
ସୁମନୋ ତିସ୍ସଥେରସ୍ସ, ଅନୁସାୱେତି ସିସ୍ସକଂ ।
ତିସ୍ସୋ ସୁମନଥେରସ୍ସ, ଅନୁସାୱେତି ସିସ୍ସକଂ ॥
ନାନୁପଜ୍ଝାୟକେନେୱ, ଏକାଚରିୟକେନିଧ ।
ଉପସମ୍ପଦା ପଟିକ୍ଖିତ୍ତା, ବୁଦ୍ଧେନାଦିଚ୍ଚବନ୍ଧୁନା ॥
ମହାଖନ୍ଧକକଥା ।
ଉପୋସଥକ୍ଖନ୍ଧକକଥା
ବଦ୍ଧାବଦ୍ଧୱସେନେୱ, ସୀମା ନାମ ଦ୍ୱିଧା ମତା ।
ନିମିତ୍ତେନ ନିମିତ୍ତଂ ତୁ, ଘଟେତ୍ୱା ପନ ସମ୍ମତା ॥
ଅୟଂ ସୀମାୱିପତ୍ତୀହି, ଏକାଦସହି ୱଜ୍ଜିତା ।
ବଦ୍ଧା ନାମ ସିୟା ସୀମା, ସା ତିସମ୍ପତ୍ତିସଂୟୁତା ॥
ଖଣ୍ଡସମାନସଂୱାସା-ୱିପ୍ପୱାସାଦିଭେଦତୋ ।
ଇତି ବଦ୍ଧା ତିଧା ୱୁତ୍ତା, ଅବଦ୍ଧାପି ତିଧା ମତା ॥
ଗାମତୋ ଉଦକୁକ୍ଖେପା, ସତ୍ତବ୍ଭନ୍ତରତୋପି ଚ ।
ତତ୍ଥ ଗାମପରିଚ୍ଛେଦୋ, ‘‘ଗାମସୀମା’’ତି ୱୁଚ୍ଚତି ॥
ଜାତସ୍ସରେ ସମୁଦ୍ଦେ ୱା, ନଦିୟା ୱା ସମନ୍ତତୋ ।
ମଜ୍ଝିମସ୍ସୁଦକୁକ୍ଖେପୋ, ଉଦକୁକ୍ଖେପସଞ୍ଞିତୋ ॥
ଅଗାମକେ ଅରଞ୍ଞେ ତୁ, ସତ୍ତେୱବ୍ଭନ୍ତରା ପନ ।
ସମନ୍ତତୋ ଅୟଂ ସୀମା, ସତ୍ତବ୍ଭନ୍ତରନାମିକା ॥
ଏକଂ ଅବ୍ଭନ୍ତରଂ ୱୁତ୍ତଂ, ଅଟ୍ଠୱୀସତିହତ୍ଥକଂ ।
ଗୁଳୁକ୍ଖେପନୟେନେୱ, ଉଦକୁକ୍ଖେପକା ମତା ॥
ଇମା ଦ୍ୱେ ପନ ସୀମାୟୋ, ୱଡ୍ଢନ୍ତି ପରିସାୱସା ।
ଅବ୍ଭନ୍ତରୂଦକୁକ୍ଖେପା, ଠିତୋକାସା ପରଂ ସିୟୁଂ ॥
ଠିତୋ ଅନ୍ତୋପରିଚ୍ଛେଦେ, ହତ୍ଥପାସଂ ୱିହାୟ ୱା ।
ତତ୍ତକଂ ଅନତିକ୍କମ୍ମ, ପରିଚ୍ଛେଦମ୍ପି ୱା ପରଂ ॥
ଠିତୋ କମ୍ମଂ ୱିକୋପେତି, ଇତି ଅଟ୍ଠକଥାନୟୋ ।
ତସ୍ମା ସୋ ହତ୍ଥପାସେ ୱା, କାତବ୍ବୋ ବହି ୱା ପନ ॥
ବଦ୍ଧସୀମାୟ ସଣ୍ଠାନଂ, ନିମିତ୍ତଂ ଦିସକିତ୍ତନଂ ।
ଞତ୍ୱା ପମାଣଂ ସୋଧେତ୍ୱା, ସୀମଂ ବନ୍ଧେୟ୍ୟ ପଣ୍ଡିତୋ ॥
ତିକୋଣଂ ଚତୁରସ୍ସଞ୍ଚ, ୱଟ୍ଟଞ୍ଚ ପଣୱୂପମଂ ।
ୱିତାନଂ ଧନୁକାକାରଂ, ମୁଦିଙ୍ଗସକଟୂପମଂ ॥
ପବ୍ବତଂ ୱନଂ ପାସାଣଂ, ରୁକ୍ଖଂ ମଗ୍ଗଞ୍ଚ ୱମ୍ମିକଂ ।
ଉଦକଞ୍ଚ ନଦିଞ୍ଚାତି, ନିମିତ୍ତାନଟ୍ଠ ଦୀପୟେ ॥
ତେସୁ ତୀଣି ନିମିତ୍ତାନି, ଆଦିଂ କତ୍ୱା ସମନ୍ତତୋ ।
ନିମିତ୍ତାନଂ ସତେନାପି, ବନ୍ଧିତୁଂ ପନ ୱଟ୍ଟତି ॥
ତିୟୋଜନପରା ସୀମା, ଉକ୍କଟ୍ଠାତି ପକାସିତା ।
ଏକୱୀସତି ଭିକ୍ଖୂନଂ, ଗଣ୍ହନ୍ତୀ ହେଟ୍ଠିମା ମତା ॥
ଉକ୍କଟ୍ଠାୟପି ଉକ୍କଟ୍ଠା, ହେଟ୍ଠିମାୟପି ହେଟ୍ଠିମା ।
ଏତା ଦ୍ୱେପି ଅସୀମାତି, ୱୁତ୍ତା ଆଦିଚ୍ଚବନ୍ଧୁନା ॥
ନିମିତ୍ତଂ ପନ କିତ୍ତେତ୍ୱା, ସବ୍ବମେୱ ସମନ୍ତତୋ ।
ପଚ୍ଛା ଞତ୍ତିଦୁତିୟେନ, ସୀମଂ ବନ୍ଧିତୁମରହତି ॥
ବନ୍ଧିତ୍ୱାନନ୍ତରଂ ପଚ୍ଛା, ଚୀୱରାୱିପ୍ପୱାସକଂ ।
ସମ୍ମନ୍ନିତ୍ୱାନ ବଦ୍ଧା ସା-ୱିପ୍ପୱାସାତି ୱୁଚ୍ଚତି ॥
ନଦୀସରସମୁଦ୍ଦେସୁ, ସୀମଂ ବନ୍ଧତି ଚେ ପନ ।
ନ ୱୋତ୍ଥରତି ତେନେୱ, ଅସୀମାତି ଜିନୋବ୍ରୱି ॥
ସୀମାକଥା ।
ଦିନକାରକକତ୍ତବ୍ବା-କାରାନଞ୍ଚ ୱସା ପନ ।
ନୱେୱୁପୋସଥା ୱୁତ୍ତା, ବୁଦ୍ଧେନାଦିଚ୍ଚବନ୍ଧୁନା ॥
ଚାତୁଦ୍ଦସୋ ପନ୍ନରସୋ, ସାମଗ୍ଗୀ ଚ ଉପୋସଥୋ ।
ଦିୱସେନେୱ ନିଦ୍ଦିଟ୍ଠା, ତୟୋପେତେ ଉପୋସଥା ॥
ସଙ୍ଘେ ଉପୋସଥୋ ଚେୱ, ଗଣେ ପୁଗ୍ଗଲୁପୋସଥୋ ।
କାରକାନଂ ୱସେନେୱ, ତୟୋ ୱୁତ୍ତା ଉପୋସଥା ॥
ସୁତ୍ତୁଦ୍ଦେସାଭିଧାନୋ ଚ, ପାରିସୁଦ୍ଧିଉପୋସଥୋ ।
ଅଧିଟ୍ଠାନନ୍ତି ନିଦ୍ଦିଟ୍ଠା, ତୟୋ କମ୍ମେନୁପୋସଥା ॥
ସଙ୍ଘସ୍ସ ପାତିମୋକ୍ଖୋ ଚ, ପାରିସୁଦ୍ଧି ଗଣସ୍ସ ଚ ।
ଅଧିଟ୍ଠାନମଥେକସ୍ସ, ନିଦ୍ଦିଟ୍ଠଂ ପନ ସତ୍ଥୁନା ॥
ପାତିମୋକ୍ଖସ୍ସ ଉଦ୍ଦେସା, ପଞ୍ଚ ୱୁତ୍ତା ମହେସିନା ।
ନିଦାନଂ ଉଦ୍ଦିସିତ୍ୱାନ, ସାୱେତବ୍ବଂ ତୁ ସେସକଂ ॥
ଅୟମେୱ ନୟୋ ଞେୟ୍ୟୋ, ସେସେସୁପି ଚ ୱିଞ୍ଞୁନା ।
ଚତ୍ତାରୋ ଭିକ୍ଖୁନୀନଞ୍ଚ, ଉଦ୍ଦେସା ନୱିମେ ପନ ॥
ପାତିମୋକ୍ଖସ୍ସ ଉଦ୍ଦେସୋ, କାତବ୍ବୋୱ ଉପୋସଥେ ।
ଅନ୍ତରାୟଂ ୱିନା ଚେୱ, ଅନୁଦ୍ଦେସୋ ନିୱାରିତୋ ॥
ଥେରୋ ଚ ଇସ୍ସରୋ ତସ୍ସ ।
‘‘ଥେରାଧେୟ୍ୟ’’ନ୍ତି ପାଠତୋ ।
ଅୱତ୍ତନ୍ତେନ ଅଜ୍ଝିଟ୍ଠୋ ।
ୟସ୍ସ ସୋ ପନ ୱତ୍ତତି ॥
ଉଦ୍ଦିସନ୍ତେ ସମପ୍ପା ୱା, ଆଗଚ୍ଛନ୍ତି ସଚେ ପନ ।
ଉଦ୍ଦିଟ୍ଠଂ ତଂ ସୁଉଦ୍ଦିଟ୍ଠଂ, ସାୱେତବ୍ବଂ ତୁ ସେସକଂ ॥
ଉଦ୍ଦିଟ୍ଠମତ୍ତେ ଭିକ୍ଖୂନଂ, ପରିସାୟୁଟ୍ଠିତାୟ ୱା ।
ପାରିସୁଦ୍ଧି ତୁ କତ୍ତବ୍ବା, ମୂଲେ ତେସଂ, ସଚେ ବହୂ ॥
ସମ୍ମଜ୍ଜିତୁଂ ପଦୀପେତୁଂ, ପଞ୍ଞାପେତୁଂ ଦକାସନେ ।
ୱିନିଦ୍ଦିଟ୍ଠସ୍ସ ଥେରେନ, ଅକରୋନ୍ତସ୍ସ ଦୁକ୍କଟଂ ॥
କତ୍ୱା ସମ୍ମଜ୍ଜନଂ ଦୀପଂ, ଠପେତ୍ୱା ଉଦକାସନଂ ।
ଗଣଞତ୍ତିଂ ଠପେତ୍ୱାୱ, କତ୍ତବ୍ବୋ ତୀହୁପୋସଥୋ ॥
ପୁବ୍ବକିଚ୍ଚଂ ସମାପେତ୍ୱା, ଅଧିଟ୍ଠେୟ୍ୟ ପନେକକୋ ।
ନୋ ଚେ ଅଧିଟ୍ଠହେୟ୍ୟସ୍ସ, ହୋତି ଆପତ୍ତି ଦୁକ୍କଟଂ ॥
ଅଧମ୍ମେନ ଚ ୱଗ୍ଗେନ, ସମଗ୍ଗେନ ଅଧମ୍ମତୋ ।
ତଥା ଧମ୍ମେନ ୱଗ୍ଗେନ, ସମଗ୍ଗେନ ଚ ଧମ୍ମତୋ ॥
ଉପୋସଥସ୍ସ ଏତାନି, କମ୍ମାନୀତି ଜିନୋବ୍ରୱି ।
ଚତୂସ୍ୱପି ପନେତେସୁ, ଚତୁତ୍ଥଂ ଧମ୍ମିକଂ ମତଂ ॥
ଅଧମ୍ମେନିଧ ୱଗ୍ଗୋ ହି, କତମୋ ଚେତ୍ଥୁପୋସଥୋ ?
ୱସନ୍ତି ଏକସୀମାୟଂ, ଚତ୍ତାରୋ ୟତ୍ଥ ଭିକ୍ଖୁନୋ ॥
ଏକସ୍ସ ପାରିସୁଦ୍ଧିଂ ତେ, ଆନୟିତ୍ୱା ତୟୋ ଜନା ।
କରୋନ୍ତି ପାରିସୁଦ୍ଧିଂ ଚେ, ଅଧମ୍ମୋ ୱଗ୍ଗୁପୋସଥୋ ॥
ଅଧମ୍ମେନ ସମଗ୍ଗୋ ହି, ଚତ୍ତାରୋ ଭିକ୍ଖୁନେକତୋ ।
କରୋନ୍ତି ପାରିସୁଦ୍ଧିଂ ଚେ, ସମଗ୍ଗୋ ହୋତ୍ୟଧମ୍ମିକୋ ॥
ଧମ୍ମେନ ପନ ୱଗ୍ଗୋ ହି, କତମୋ ସୋ ଉପୋସଥୋ ।
ୱସନ୍ତି ଏକସୀମାୟଂ, ଚତ୍ତାରୋ ୟତ୍ଥ ଭିକ୍ଖୁନୋ ॥
ଏକସ୍ସ ପାରିସୁଦ୍ଧିଂ ତେ, ଆନୟିତ୍ୱା ତୟୋ ଜନା ।
ପାତିମୋକ୍ଖୁଦ୍ଦିସନ୍ତେ ଚେ, ୱଗ୍ଗୋ ଧମ୍ମେନୁପୋସଥୋ ॥
ଧମ୍ମତୋ ହି ସମଗ୍ଗୋ ସୋ ।
ଚତ୍ତାରୋ ଭିକ୍ଖୁନେକତୋ ।
ପାତିମୋକ୍ଖୁଦ୍ଦିସନ୍ତୀଧ ।
ସମଗ୍ଗୋ ଧମ୍ମତୋ ମତୋ ॥
ୱଗ୍ଗେ ସମଗ୍ଗେ ୱଗ୍ଗୋତି, ସଞ୍ଞିନୋ ୱିମତିସ୍ସ ୱା ।
ଉପୋସଥଂ କରୋନ୍ତସ୍ସ, ହୋତି ଆପତ୍ତି ଦୁକ୍କଟଂ ॥
ଭେଦାଧିପ୍ପାୟତୋ ତସ୍ସ, ହୋତି ଥୁଲ୍ଲଚ୍ଚୟଂ ପନ ।
ୱଗ୍ଗେ ସମଗ୍ଗେନାପତ୍ତି, ସମଗ୍ଗୋତି ଚ ସଞ୍ଞିନୋ ॥
ଉକ୍ଖିତ୍ତେନ ଗହଟ୍ଠେନ, ସେସେହି ସହଧମ୍ମିହି ।
ଚୁତନିକ୍ଖିତ୍ତସିକ୍ଖେହି, ଏକାଦସହି ୱା ସହ ॥
ଉପୋସଥୋ ନ କାତବ୍ବୋ, ସଭାଗାପତ୍ତିକେନ ୱା ।
ଛନ୍ଦେନ ପାରିୱୁତ୍ଥେନ, କରୋତୋ ହୋତି ଦୁକ୍କଟଂ ॥
ଅଦେସେତ୍ୱା ପନାପତ୍ତିଂ, ନାୱିକତ୍ୱାନ ୱେମତିଂ ।
ଉପୋସଥୋ ନ କାତବ୍ବୋ, ଦିନେ ୱା ଅନୁପୋସଥେ ॥
ଉପୋସଥେ ପନାୱାସା, ସଭିକ୍ଖୁମ୍ହା ଚ ଭିକ୍ଖୁନା ।
ଆୱାସୋ ୱା ଅନାୱାସୋ, ନ ଗନ୍ତବ୍ବୋ କୁଦାଚନଂ ॥
ୟସ୍ମିଂ ଉପୋସଥେ କିଚ୍ଚଂ ।
ଆୱାସେ ପନ ୱତ୍ତତି ।
ସୋ ଚେ ସଭିକ୍ଖୁକୋ ନାମ ।
ଆୱାସୋତି ପକାସିତୋ ॥
ଉପୋସଥୋ କିମତ୍ଥାୟ, କିମତ୍ଥାୟ ପୱାରଣା ।
ଉପୋସଥୋ ସମଗ୍ଗତ୍ଥୋ, ୱିସୁଦ୍ଧତ୍ଥା ପୱାରଣା ॥
କୋପେତୁଂ ଧମ୍ମିକଂ କମ୍ମଂ, ପଟିକ୍କୋସେୟ୍ୟ ଦୁକ୍କଟଂ ।
ଛନ୍ଦଂ ୱା କାୟସାମଗ୍ଗିଂ, ଅଦେନ୍ତସ୍ସପି ଦୁକ୍କଟଂ ॥
ହୋତି ପଞ୍ଚୱିଧୋ ସଙ୍ଘୋ, ଚତୁୱଗ୍ଗାଦିଭେଦତୋ ।
ସୋ ଚ କତ୍ତବ୍ବକମ୍ମସ୍ସ, ୱସେନ ପରିଦୀପିତୋ ॥
ପୱାରଣଂ ତଥାବ୍ଭାନଂ, କମ୍ମଞ୍ଚ ଉପସମ୍ପଦଂ ।
ଠପେତ୍ୱା ଚତୁୱଗ୍ଗେନ, ଅକତ୍ତବ୍ବଂ ନ ୱିଜ୍ଜତି ॥
ପଞ୍ଚୱଗ୍ଗେନ ଅବ୍ଭାନଂ, ମଜ୍ଝଦେସୂପସମ୍ପଦଂ ।
ଦସୱଗ୍ଗେନ ଅବ୍ଭାନଂ, ୱିନା ସବ୍ବଂ ତୁ ୱଟ୍ଟତି ॥
କମ୍ମଂ ୱୀସତିୱଗ୍ଗେନ, ନ କତ୍ତବ୍ବଂ ନ କିଞ୍ଚିପି ।
ଊନେ ଦୋସୋତି ଞାପେତୁଂ, ନାଧିକେ ଅତିରେକତା ॥
ଚତ୍ତାରୋ ପକତତ୍ତାୱ, କମ୍ମପ୍ପତ୍ତାତି ଦୀପିତା ।
ଚତୁୱଗ୍ଗେନ କତ୍ତବ୍ବେ, ସେସେସୁ ଚ ଅୟଂ ନୟୋ ॥
ଚତୁୱଗ୍ଗାଦିକତ୍ତବ୍ବଂ, କତ୍ୱାସଂୱାସପୁଗ୍ଗଲଂ ।
ଗଣପୂରଂ କରୋନ୍ତସ୍ସ, କତଂ କୁପ୍ପତି ଦୁକ୍କଟଂ ॥
ପରିୱାସାଦିକମ୍ମେପି, ତତ୍ରଟ୍ଠଂ ଗଣପୂରକଂ ।
କତ୍ୱା ପନ କରୋନ୍ତାନଂ, ତଥା, ସେସଂ ତୁ ୱଟ୍ଟତି ॥
ଉପୋସଥକ୍ଖନ୍ଧକକଥା ।
ୱସ୍ସୂପନାୟିକକ୍ଖନ୍ଧକକଥା
ପୁରିମା ପଚ୍ଛିମା ଚାତି, ଦୁୱେ ୱସ୍ସୂପନାୟିକା ।
ଆଲୟୋ ୱା ୱଚୀଭେଦୋ, କତ୍ତବ୍ବୋ ଉପଗଚ୍ଛତା ॥
ୱସ୍ସୂପଗମନଂ ୱାପି, ଜାନଂ ଅନୁପଗଚ୍ଛତୋ ।
ତେମାସମୱସିତ୍ୱା ୱା, ଚରନ୍ତସ୍ସପି ଦୁକ୍କଟଂ ॥
ରୁକ୍ଖସ୍ସ ସୁସିରେ ଛତ୍ତେ, ଚାଟିଛୱକୁଟୀସୁ ୱା ।
ଅଜ୍ଝୋକାସେପି ୱା ୱସ୍ସଂ, ଉପଗନ୍ତୁଂ ନ ୱଟ୍ଟତି ॥
ୱସ୍ସଚ୍ଛେଦେ ଅନାପତ୍ତି, ଅନ୍ତରାୟୋ ସଚେ ସିୟା ।
ଛିନ୍ନୱସ୍ସସ୍ସ ଭିକ୍ଖୁସ୍ସ, ୱାରିତାୱ ପୱାରଣା ॥
ପଞ୍ଚନ୍ନମତ୍ଥେ ସହଧମ୍ମିକାନଂ ।
ଦଟ୍ଠୁଂ ଗିଲାନଂ ତଦୁପଟ୍ଠକାନଂ ।
ଭତ୍ତାଦି ନେସଂ ପରିୟେସନତ୍ଥଂ ॥
ତଥାନଭିରତଂ ଗନ୍ତ୍ୱା, ୱୂପକାସେସ୍ସମୁଟ୍ଠିତଂ ।
ଦିଟ୍ଠିଂ ୱା ତସ୍ସ କୁକ୍କୁଚ୍ଚଂ, ୱିନୋଦେସ୍ସାମହନ୍ତି ୱା ॥
ଏୱଂ ସତ୍ତାହକିଚ୍ଚେନ, ଭିକ୍ଖୁନା ୱିନୟଞ୍ଞୁନା ।
ଅପେସିତେପି ଗନ୍ତବ୍ବଂ, ପଗେୱ ପହିତେ ପନ ॥
ୱସ୍ସଂ ଉପଗତେନେତ୍ଥ, ଅନିମନ୍ତିତଭିକ୍ଖୁନା ।
ଧମ୍ମସ୍ସ ସୱନତ୍ଥାୟ, ଗନ୍ତୁଂ ପନ ନ ୱଟ୍ଟତି ॥
‘‘ଅସୁକଂ ନାମ ଦିୱସଂ, ସନ୍ନିପାତୋ ଭୱିସ୍ସତି’’ ।
ଇଚ୍ଚେୱଂ କତିକା ପୁବ୍ବଂ, କତା ଚେ ପନ ୱଟ୍ଟତି ॥
‘‘ଧୋୱିସ୍ସାମି ରଜିସ୍ସାମି, ଭଣ୍ଡକ’’ନ୍ତି ନ ୱଟ୍ଟତି ।
ସଚାଚରିୟୁପଜ୍ଝାୟା, ପହିଣନ୍ତି ଚ ୱଟ୍ଟତି ॥
ଉଦ୍ଦେସାଦୀନମତ୍ଥାୟ, ଗନ୍ତୁଂ ନେୱ ଚ ୱଟ୍ଟତି ।
ଗରୂନଂ ଦସ୍ସନତ୍ଥାୟ, ଗନ୍ତୁଂ ଲଭତି ପୁଗ୍ଗଲୋ ॥
ସଚେ ଆଚରିୟୋ ‘‘ଅଜ୍ଜ, ମା ଗଚ୍ଛାହୀ’’ତି ଭାସତି ।
ରତ୍ତିଚ୍ଛେଦେ ଅନାପତ୍ତି, ହୋତୀତି ପରିଦୀପିତା ॥
ୟସ୍ସ କସ୍ସଚି ଞାତିସ୍ସ, ଉପଟ୍ଠାକକୁଲସ୍ସ ୱା ।
ଗଚ୍ଛତୋ ଦସ୍ସନତ୍ଥାୟ, ରତ୍ତିଚ୍ଛେଦେ ଚ ଦୁକ୍କଟଂ ॥
‘‘ଆଗମିସ୍ସାମି ଅଜ୍ଜେୱ, ଗନ୍ତ୍ୱାହଂ ଗାମକ’’ନ୍ତି ଚ ।
ସଚେ ପାପୁଣିତୁଂ ଗଚ୍ଛଂ, ନ ସକ୍କୋତେୱ ୱଟ୍ଟତି ॥
ୱଜେ ସତ୍ଥେପି ନାୱାୟଂ, ତୀସୁ ଠାନେସୁ ଭିକ୍ଖୁନୋ ।
ୱସ୍ସଚ୍ଛେଦେ ଅନାପତ୍ତି, ପୱାରେତୁଞ୍ଚ ୱଟ୍ଟତି ॥
ସତି ପଚ୍ଚୟୱେକଲ୍ଲେ, ସରୀରାଫାସୁତାୟ ୱା ।
ଏସେୱ ଅନ୍ତରାୟୋତି, ୱସ୍ସଂ ଛେତ୍ୱାପି ପକ୍କମେ ॥
ୟେନ କେନନ୍ତରାୟେନ, ୱସ୍ସଂ ନୋପଗତୋ ହି ୟୋ ।
ଦୁତିୟା ଉପଗନ୍ତବ୍ବା, ଛିନ୍ନୱସ୍ସେନ ୱା ପନ ॥
ୱସ୍ସଂ ଅନୁପଗନ୍ତ୍ୱା ୱା, ତଦହେୱ ଚ ଗଚ୍ଛତି ।
ବହିଦ୍ଧା ଏୱ ସତ୍ତାହଂ, ଉପଗନ୍ତ୍ୱାପି ୱା ପନ ॥
ୱୀତିନାମେତି ଚେ ତସ୍ସ, ପୁରିମାପି ନ ୱିଜ୍ଜତି ।
ପଟିସ୍ସୱେ ଚ ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
ୱସ୍ସଂ ପନୁପଗନ୍ତ୍ୱା ଚ, ଉଟ୍ଠାପେତ୍ୱା ନ ଚାରୁଣଂ ।
ଗଚ୍ଛତୋ ପନ ସତ୍ତାହ-କରଣେନେୱ ଭିକ୍ଖୁନୋ ॥
ଅନ୍ତୋୟେୱ ଚ ସତ୍ତାହଂ, ନିୱତ୍ତନ୍ତସ୍ସ ତସ୍ସ ତୁ ।
ଅନାପତ୍ତୀତି କୋ ୱାଦୋ, ୱସିତ୍ୱା ବହି ଗଚ୍ଛତୋ ॥
‘‘ୱସିସ୍ସାମୀଧ ୱସ୍ସ’’ନ୍ତି, ଆଲୟୋ ୟଦି ୱିଜ୍ଜତି ।
ନୋପେତସତିୟା ୱସ୍ସଂ, ତେନ ସେନାସନଂ ପନ ॥
ଗହିତଂ ସୁଗ୍ଗହିତଂ ହୋତି, ଛିନ୍ନୱସ୍ସୋ ନ ହୋତି ସୋ ।
ଲଭତେୱ ପୱାରେତୁଂ, ନ ଦୋସୋ କୋଚି ୱିଜ୍ଜତି ॥
‘‘ଇମସ୍ମିଂ ୱିହାରେ ତେମାସଂ, ଇମଂ ୱସ୍ସଂ ଉପେମି’’ତି ।
ନିଚ୍ଛାରିତେ ଚ ତିକ୍ଖତ୍ତୁଂ, ୱସ୍ସଂ ଉପଗତୋ ସିୟା ॥
ଆଦିଂ ତୁ ନୱମିଂ କତ୍ୱା, ଗନ୍ତୁଂ ୱଟ୍ଟତି ଭିକ୍ଖୁନୋ ।
ଆଗଚ୍ଛତୁ ଚ ପଚ୍ଛା ସୋ, ମା ୱା ଦୋସୋ ନ ୱିଜ୍ଜତି ॥
ୱସ୍ସୂପନାୟିକକ୍ଖନ୍ଧକକଥା ।
ପୱାରଣକ୍ଖନ୍ଧକକଥା
ଚାତୁଦ୍ଦସୀ ପଞ୍ଚଦସୀ, ସାମଗ୍ଗୀ ଚ ପୱାରଣା ।
ତେୱାଚୀ ଦ୍ୱେକୱାଚୀ ଚ, ସଙ୍ଘେ ଚ ଗଣପୁଗ୍ଗଲେ ॥
ଏତା ପନ ମୁନିନ୍ଦେନ, ୱୁତ୍ତା ନୱ ପୱାରଣା ।
ତୀଣି କମ୍ମାନି ମୁଞ୍ଚିତ୍ୱା, ଅନ୍ତେନେୱ ପୱାରୟେ ॥
ପୁବ୍ବକିଚ୍ଚଂ ସମାପେତ୍ୱା, ପତ୍ତକଲ୍ଲେ ସମାନିତେ ।
ଞତ୍ତିଂ ଠପେତ୍ୱା ସଙ୍ଘେନ, କତ୍ତବ୍ବା ହି ପୱାରଣା ॥
ପୱାରେନ୍ତେସୁ ଥେରେସୁ, ନିସୀଦେୟ୍ୟ ନୱୋ ପନ ।
ସୟଂ ୟାୱ ପୱାରେୟ୍ୟ, ତାୱ ଉକ୍କୁଟିକଞ୍ହି ସୋ ॥
ଞତ୍ତିଂ ୱତ୍ୱା ପୱାରେୟ୍ୟୁଂ, ଚତ୍ତାରୋ ୱା ତୟୋପି ୱା ।
ପୁବ୍ବକିଚ୍ଚଂ ସମାପେତ୍ୱା, ଏକାୱାସେ ୱସନ୍ତି ଚେ ॥
ଅଞ୍ଞମଞ୍ଞଂ ପୱାରେୟ୍ୟୁଂ, ୱିନା ଞତ୍ତିଂ ଦୁୱେ ଜନା ।
ଅଧିଟ୍ଠେୟ୍ୟ ପନେକୋପି, ସେସା ସଙ୍ଘପୱାରଣା ॥
ପୱାରିତେ ଚ ସଙ୍ଘସ୍ମିଂ, କରେୟ୍ୟନାଗତୋ ପନ ।
ଅୱୁଟ୍ଠୋ ଛିନ୍ନୱସ୍ସୋ ୱା, ପାରିସୁଦ୍ଧିଉପୋସଥଂ ॥
ପଞ୍ଚ ୟସ୍ମିଂ ପନାୱାସେ, ଚତ୍ତାରୋ ୱା ତୟୋପି ୱା ।
ଏକେକସ୍ସ ହରିତ୍ୱାନ, ସମଣା ତେ ପୱାରଣଂ ॥
ଅଞ୍ଞମଞ୍ଞଂ ପୱାରେନ୍ତି, ସଚେ ଆପତ୍ତି ଦୁକ୍କଟଂ ।
ସେସଂ ଉପୋସଥେ ୱୁତ୍ତ-ନୟେନିଧ ନୟେ ବୁଧୋ ॥
ପାରିସୁଦ୍ଧିପ୍ପଦାନେନ, ସମ୍ପାଦେତତ୍ତନୋ ସୁଚିଂ ।
ଛନ୍ଦଦାନେନ ସଙ୍ଘସ୍ସ, ସବ୍ବଂ ସାଧେତି, ନତ୍ତନୋ ॥
ତସ୍ମା ପନ ଉଭିନ୍ନମ୍ପି, କିଚ୍ଚସିଦ୍ଧତ୍ଥମେୱିଧ ।
ପାରିସୁଦ୍ଧିପି ଦାତବ୍ବା, ଛନ୍ଦଂ ଦେନ୍ତେନ ଭିକ୍ଖୁନା ॥
ଛନ୍ଦେକେନ ବହୂନମ୍ପି, ହାତବ୍ବୋ ପାରିସୁଦ୍ଧିପି ।
ପରମ୍ପରାହଟୋ ଛନ୍ଦୋ, ନ ଗଚ୍ଛତି ୱିସୁଦ୍ଧିୟା ॥
ଛନ୍ଦଂ ୱା ପାରିସୁଦ୍ଧିଂ ୱା, ଗହେତ୍ୱା ୱା ପୱାରଣଂ ।
ସାମଣେରାଦିଭାୱଂ ୱା, ପଟିଜାନେୟ୍ୟ ହାରକୋ ॥
ସଚେ ସୋ ସଙ୍ଘମପ୍ପତ୍ୱା, ୱିବ୍ଭମେୟ୍ୟ ମରେୟ୍ୟ ୱା ।
ନାହଟଞ୍ଚେୱ ତଂ ସବ୍ବଂ, ପତ୍ୱା ଚେୱଂ ସିୟାହଟଂ ॥
ସଙ୍ଘଂ ପତ୍ୱା ପମତ୍ତୋ ୱା, ସୁତ୍ତୋ ୱା ଖିତ୍ତଚିତ୍ତକୋ ।
ନାରୋଚେତି ଅନାପତ୍ତି, ହୋତି ସଞ୍ଚିଚ୍ଚ ଦୁକ୍କଟଂ ॥
ୟେ ତେ ୱିପସ୍ସନାୟୁତ୍ତା, ରତ୍ତିନ୍ଦିୱମତନ୍ଦିତା ।
ପୁବ୍ବରତ୍ତାପରରତ୍ତଂ, ୱିପସ୍ସନପରାୟଣା ॥
ଲଦ୍ଧଫାସୁୱିହାରାନଂ, ସିୟା ନ ପରିହାନିତି ।
ପୱାରଣାୟ ସଙ୍ଗାହୋ, ୱୁତ୍ତୋ କତ୍ତିକମାସକେ ॥
ପୱାରଣକ୍ଖନ୍ଧକକଥା ।
ଚମ୍ମକ୍ଖନ୍ଧକକଥା
ଏଳକାଜମିଗାନଂ ତୁ, ଚମ୍ମଂ ୱଟ୍ଟତି ଭିକ୍ଖୁନୋ ।
ରୋହିତେଣିକୁରଙ୍ଗାନଂ, ପସଦଂମିଗମାତୁୟା ॥
ଠପେତ୍ୱା ଚମ୍ମମେତେସଂ, ଅଞ୍ଞଂ ଦୁକ୍କଟୱତ୍ଥୁକଂ ।
ଥୱିକୋପାହନେ ସବ୍ବଂ, ଚମ୍ମଂ ୱଟ୍ଟତ୍ୟମାନୁସଂ ॥
ୱଟ୍ଟନ୍ତି ମଜ୍ଝିମେ ଦେସେ, ନ ଗୁଣଙ୍ଗୁଣୁପାହନା ।
ୱଟ୍ଟନ୍ତି ଅନ୍ତୋଆରାମେ, ସବ୍ବତ୍ଥାପି ଚ ରୋଗିନୋ ॥
ପୁଟଖଲ୍ଲକବଦ୍ଧା ଚ, ତଥେୱ ପାଲିଗୁଣ୍ଠିମା ।
ତୂଲପୁଣ୍ଣା ନ ୱଟ୍ଟନ୍ତି, ସବ୍ବନୀଲାଦୟୋପି ଚ ॥
ଚିତ୍ରା ଉପାହନା ମେଣ୍ଡ-ୱିସାଣୂପମୱଦ୍ଧିକା ।
ନ ଚ ୱଟ୍ଟନ୍ତି ମୋରସ୍ସ, ପିଞ୍ଛେନ ପରିସିବ୍ବିତା ॥
ମଜ୍ଜାରକାଳକୋଲୂକ-ସୀହବ୍ୟଗ୍ଘୁଦ୍ଦଦୀପିନଂ ।
ଅଜିନସ୍ସ ଚ ଚମ୍ମେନ, ନ ୱଟ୍ଟତି ପରିକ୍ଖଟା ॥
ପୁଟାଦିଂ ଅପନେତ୍ୱା ୱା, ଛିନ୍ଦିତ୍ୱା ୱାପି ସବ୍ବସୋ ।
ୱଣ୍ଣଭେଦଂ ତଥା କତ୍ୱା, ଧାରେତବ୍ବା ଉପାହନା ॥
ସବ୍ବାପି ପନ ଧାରେତୁଂ, ନ ଚ ୱଟ୍ଟନ୍ତି ପାଦୁକା ।
ଠପେତ୍ୱା ତତ୍ଥ ପସ୍ସାୱ- ୱଚ୍ଚାଚମନପାଦୁକା ॥
ଆସନ୍ଦିଞ୍ଚେୱ ପଲ୍ଲଙ୍କଂ, ଉଚ୍ଚାସୟନସଞ୍ଞିତଂ ।
ଅତିକ୍କନ୍ତପମାଣଂ ତୁ, ସେୱମାନସ୍ସ ଦୁକ୍କଟଂ ॥
ଗୋନକଂ କୁତ୍ତକଂ ଚିତ୍ତଂ, ପଟିକଂ ପଟଲିକମ୍ପି ଚ ।
ଏକନ୍ତଲୋମିଂ ୱିକତିଂ, ତୂଲିକଂ ଉଦ୍ଦଲୋମିକଂ ॥
କଟ୍ଟିସ୍ସଂ ପନ କୋସେୟ୍ୟଂ, ହତ୍ଥିଅସ୍ସରଥତ୍ଥରଂ ।
କଦଲିମିଗପୱର-ପଚ୍ଚତ୍ଥରଣକମ୍ପି ଚ ॥
ହେଟ୍ଠା ରତ୍ତୱିତାନସ୍ସ, ଦ୍ୱିଧା ରତ୍ତୂପଧାନକଂ ।
ଅକପ୍ପିୟମିଦଂ ସବ୍ବଂ, ଦୁକ୍କଟଂ ପରିଭୁଞ୍ଜତୋ ॥
ହେଟ୍ଠା ଅକପ୍ପିୟେ ପଚ୍ଚତ୍ଥରେ ସତି ନ ୱଟ୍ଟତି ।
ଉଦ୍ଧଂ ସେତୱିତାନମ୍ପି, ତସ୍ମିଂ ଅସତି ୱଟ୍ଟତି ॥
ଆସନ୍ଦିଂ ପନ ପଲ୍ଲଙ୍କଂ, ଠପେତ୍ୱା ତୂଲିକମ୍ପି ଚ ।
ସେସଂ ପନ ଚ ସବ୍ବମ୍ପି, ଲଭତେ ଗିହିସନ୍ତକଂ ॥
ଧମ୍ମାସନେ ଅନାପତ୍ତି, ଭତ୍ତଗ୍ଗେପି ନିସୀଦିତୁଂ ।
ଭୂମତ୍ଥରଣକେ ତତ୍ଥ, ସୟିତୁମ୍ପି ଚ ୱଟ୍ଟତି ॥
ଚମ୍ମକ୍ଖନ୍ଧକକଥା ।
ଭେସଜ୍ଜକ୍ଖନ୍ଧକକଥା
ୱୁତ୍ତା ଗହପତିସ୍ସାପି, ସମ୍ମୁତୁସ୍ସାୱନନ୍ତିକା ।
ଗୋନିସାଦୀତି କପ୍ପିୟା, ଚତସ୍ସୋ ହୋନ୍ତି ଭୂମିୟୋ ॥
ସଙ୍ଘସ୍ସ ସନ୍ତକଂ ଗେହଂ, ସନ୍ତକଂ ଭିକ୍ଖୁନୋପି ୱା ।
କପ୍ପିୟଂ ପନ କତ୍ତବ୍ବଂ, ସହସେୟ୍ୟପ୍ପହୋନକଂ ॥
ଠପେତ୍ୱା ଭିକ୍ଖୁମଞ୍ଞେହି, ଦିନ୍ନଂ କପ୍ପିୟଭୂମିୟା ।
ଅତ୍ଥାୟ ସନ୍ତକଂ ତେସଂ, ଗେହଂ ଗହପତେୱିଦଂ ॥
ସା ହି ସମ୍ମୁତିକା ନାମ, ୟା ହି ସଙ୍ଘେନ ସମ୍ମତା ।
କମ୍ମୱାଚମୱତ୍ୱା ୱା, ୱଟ୍ଟତେୱାପଲୋକନଂ ॥
ପଠମିଟ୍ଠକପାସାଣ-ଥମ୍ଭାଦିଟ୍ଠପନେ ପନ ।
‘‘କପ୍ପିୟକୁଟିଂ କରୋମା’’ତି, ୱଦନ୍ତେହି ସମନ୍ତତୋ ॥
ଉକ୍ଖିପିତ୍ୱା ଠପେନ୍ତେସୁ, ଆମସିତ୍ୱା ପରେସୁ ୱା ।
ସୟମେୱୁକ୍ଖିପିତ୍ୱା ୱା, ଠପେୟ୍ୟୁସ୍ସାୱନନ୍ତିକା॥
ଇଟ୍ଠକାଦିପତିଟ୍ଠାନଂ, ଭିକ୍ଖୂନଂ ୱଦତଂ ପନ ।
ୱାଚାୟ ପରିୟୋସାନଂ, ସମକାଲଂ ତୁ ୱଟ୍ଟତି ॥
ଆରାମୋ ଅପରିକ୍ଖିତ୍ତୋ, ସକଲୋ ଭୁୟ୍ୟତୋପି ୱା ।
ଦୁୱିଧୋପି ଚ ୱିଞ୍ଞୂହି, ଗୋନିସାଦୀତି ୱୁଚ୍ଚତି ॥
ଏତା ପନ ଚତସ୍ସୋପି, ହୋନ୍ତି କପ୍ପିୟଭୂମିୟୋ ।
ଏତ୍ଥ ପକ୍କଞ୍ଚ ୱୁତ୍ଥଞ୍ଚ, ସବ୍ବଂ ୱଟ୍ଟତି ଆମିସଂ ॥
ଉସ୍ସାୱନନ୍ତିକା ୟା ସା, ଥମ୍ଭାଦୀସୁ ଅଧିଟ୍ଠିତା ।
ଥମ୍ଭାଦୀସ୍ୱପନୀତେସୁ, ତଦଞ୍ଞେସୁପି ତିଟ୍ଠତି ॥
ଅପନୀତେସୁ ସବ୍ବେସୁ, ସିୟା ଜହିତୱତ୍ଥୁକା ।
ଗୋନିସାଦୀ ପରିକ୍ଖିତ୍ତା, ସେସା ଛଦନନାସତୋ ॥
ଭିକ୍ଖୁଂ ଠପେତ୍ୱା ଅଞ୍ଞେସଂ, ହତ୍ଥତୋ ଚ ପଟିଗ୍ଗହୋ ।
ତେସଞ୍ଚ ସନ୍ନିଧି ଅନ୍ତୋ- ୱୁତ୍ତଂ ଭିକ୍ଖୁସ୍ସ ୱଟ୍ଟତି ॥
ଭିକ୍ଖୁସ୍ସ ଭିକ୍ଖୁନିୟା ୱା, ସନ୍ତକଂ ସଙ୍ଘିକମ୍ପି ୱା ।
ଅନ୍ତୋୱୁତ୍ଥଞ୍ଚ ପକ୍କଞ୍ଚ, ଉଭିନ୍ନଂ ନ ଚ ୱଟ୍ଟତି ॥
ଅକପ୍ପକୁଟିୟା ୱୁତ୍ଥଂ, ସପ୍ପିଆଦିୱିମିସ୍ସିତଂ ।
‘‘ଅନ୍ତୋୱୁତ୍ଥ’’ନ୍ତି ନିଦ୍ଦିଟ୍ଠଂ, ପଠମଂ କାଲିକଦ୍ୱୟଂ ॥
ତେହେୱ ସପ୍ପିଆଦୀହି, ଭିକ୍ଖୁନା ୟାୱଜୀୱିକଂ ।
ପକ୍କଂ ତଂ ପନ ସତ୍ତାହଂ, ୱଟ୍ଟତେୱ ନିରାମିସଂ ॥
ସଚେ ଆମିସସଂସଟ୍ଠଂ, ପକ୍କଂ ତଂ ପରିଭୁଞ୍ଜତି ।
ଅନ୍ତୋୱୁତ୍ଥଞ୍ଚ ଭିୟ୍ୟୋପି, ସାମପକ୍କଞ୍ଚ ଭୁଞ୍ଜତି ॥
ୟାୱକାଲିକମାହାରୋ, ପାନକଂ ୟାମକାଲିକଂ ।
ସତ୍ତାହକାଲିକଂ ନାମ, ସପ୍ପିଆଦିକପଞ୍ଚକଂ ॥
ସେସଂ ପନ ହଲିଦ୍ଦାଦି, ଭେସଜ୍ଜଂ ୟାୱଜୀୱିକଂ ।
ଚତୁଧା କାଲିକା ୱୁତ୍ତା, ଉଦକଂ ହୋତ୍ୟକାଲିକଂ ॥
ପଟିଗ୍ଗହୱସେନେୱ, କାଲାତୀତା ତିକାଲିକା ।
ହୋନ୍ତି ଦୋସକରା ଭୁତ୍ତା, ଅଭୁତ୍ତଂ ତତିୟମ୍ପି ଚ ॥
ଅମ୍ବଂ ଜମ୍ବୁ ଚ ଚୋଚଞ୍ଚ, ମୋଚଞ୍ଚ ମଧୁ ମୁଦ୍ଦିକା ।
ସାଲୁ ଫାରୁସକଞ୍ଚାତି, ପାନକଂ ଅଟ୍ଠଧା ମତଂ ॥
ପାନକତ୍ଥମନୁଞ୍ଞାତଂ, ଫଲଂ ପକ୍କଞ୍ଚ ଆମକଂ ।
ପାନହେତୁ ପଟିକ୍ଖିତ୍ତୋ, ସୱତ୍ଥୁକପଟିଗ୍ଗହୋ ॥
ଅମ୍ବପକ୍କଂ ସୁକୋଟ୍ଟେତ୍ୱା, ମଦ୍ଦିତ୍ୱା ଉଦକେ ପନ ।
ପଚ୍ଛା ପରିସ୍ସୱଂ କତ୍ୱା, ପାତୁଂ ୱଟ୍ଟତି ପାନକଂ ॥
ୱଟ୍ଟତାଦିଚ୍ଚପାକଂ ତୁ, ଅଗ୍ଗିପକ୍କଂ ନ ୱଟ୍ଟତି ।
ଏସେୱ ଚ ନୟୋ ସେସ-ପାନକେସୁପି ଦୀପିତୋ ॥
ପୁପ୍ଫପତ୍ତଫଲୁଚ୍ଛୂନଂ, ଚତ୍ତାରୋ ପନିମେ ରସା ।
ଅନୁଞ୍ଞାତା ଇମାନଟ୍ଠ, ପାନାନି ଅନୁଜାନତା ॥
ସବ୍ବୋ ପୁପ୍ଫରସୋ ୱୁତ୍ତୋ, ମଧୁକସ୍ସ ରସଂ ୱିନା ।
ସବ୍ବୋ ପତ୍ତରସୋ ୱୁତ୍ତୋ, ପକ୍କଡାକରସଂ ୱିନା ॥
ସତ୍ତନ୍ନଂ ସାନୁଲୋମାନଂ, ଧଞ୍ଞାନଂ ଫଲଜଂ ରସଂ ।
ଠପେତ୍ୱାନୁମତୋ ସବ୍ବୋ, ୱିକାଲେ ଫଲଜୋ ରସୋ ॥
ୟାୱକାଲିକପତ୍ତାନ-ମପି ସୀତୁଦକେ କତୋ ।
ମଦ୍ଦିତ୍ୱାଦିଚ୍ଚପାକୋପି, ୱିକାଲେ ପନ ୱଟ୍ଟତି ॥
ତାଲଞ୍ଚ ନାଳିକେରଞ୍ଚ, ପନସଂ ଲବୁଜମ୍ପି ଚ ।
ତିପୁସାଲାବୁକୁମ୍ଭଣ୍ଡଂ, ତଥା ପୁସ୍ସଫଲମ୍ପି ଚ ॥
ଏୱମେଳାଲୁକଞ୍ଚାତି, ନୱେତାନି ଫଲାନି ହି ।
ଅପରଣ୍ଣଞ୍ଚ ସବ୍ବମ୍ପି, ସତ୍ତଧଞ୍ଞାନୁଲୋମିକଂ ॥
ବଦରଂ ତିମ୍ବରୂ ସେଲୁ, କୋସମ୍ବଂ କରମଦ୍ଦକଂ ।
ମାତୁଲୁଙ୍ଗକପିତ୍ଥଞ୍ଚ, ୱେତ୍ତଂ ଚିଞ୍ଚଫଲମ୍ପି ଚ ॥
ଫଲାନଂ ଏୱମାଦୀନଂ, ଖୁଦ୍ଦକାନଂ ରସୋ ପନ ।
ଅଟ୍ଠପାନାନୁଲୋମତ୍ତା, ନିଦ୍ଦିଟ୍ଠୋ ଅନୁଲୋମିକେ ॥
ସାନୁଲୋମସ୍ସ ଧଞ୍ଞସ୍ସ, ଠପେତ୍ୱା ଫଲଜଂ ରସଂ ।
ଅଞ୍ଞୋ ଫଲରସୋ ନତ୍ଥି, ଅୟାମକାଲିକୋ ଇଧ ॥
ଭେସଜ୍ଜକ୍ଖନ୍ଧକକଥା ।
କଥିନକ୍ଖନ୍ଧକକଥା
ଭିକ୍ଖୂନଂ ୱୁଟ୍ଠୱସ୍ସାନଂ, କଥିନତ୍ଥାରମବ୍ରୱି ।
ପଞ୍ଚନ୍ନଂ ଆନିସଂସାନଂ, କାରଣା ମୁନିପୁଙ୍ଗୱୋ ॥
ନ ଉଲ୍ଲିଖିତମତ୍ତାଦି-ଚତୁୱୀସତିୱଜ୍ଜିତଂ ।
ଚୀୱରଂ ଭିକ୍ଖୁନାଦାୟ, ଉଦ୍ଧରିତ୍ୱା ପୁରାଣକଂ ॥
ନୱଂ ଅଧିଟ୍ଠହିତ୍ୱାୱ, ୱତ୍ତବ୍ବଂ ୱଚସା ପୁନ ।
‘‘ଇମିନାନ୍ତରୱାସେନ, କଥିନଂ ଅତ୍ଥରାମି’’ତି ॥
ୱୁତ୍ତେ ତିକ୍ଖତ୍ତୁମିଚ୍ଚେୱଂ, କଥିନଂ ହୋତି ଅତ୍ଥତଂ ।
ସଙ୍ଘଂ ପନୁପସଙ୍କମ୍ମ, ଆଦାୟ କଥିନଂ ଇତି ॥
‘‘ଅତ୍ଥତଂ କଥିନଂ ଭନ୍ତେ, ସଙ୍ଘସ୍ସ ଅନୁମୋଦଥ ।
ଧମ୍ମିକୋ କଥିନତ୍ଥାରୋ’’, ୱତ୍ତବ୍ବଂ ତେନ ଭିକ୍ଖୁନା ॥
‘‘ସୁଅତ୍ଥତଂ ତୟା ଭନ୍ତେ, ସଙ୍ଘସ୍ସ କଥିନଂ ପୁନ ।
ଧମ୍ମିକୋ କଥିନତ୍ଥାରୋ, ଅନୁମୋଦାମି’’ତୀରୟେ ॥
କଥିନସ୍ସ ଚ କିଂ ମୂଲଂ, କିଂ ୱତ୍ଥୁ କା ଚ ଭୂମିୟୋ ।
କତିଧମ୍ମୱିଦୋ ଭିକ୍ଖୁ, କଥିନତ୍ଥାରମରହତି ॥
ମୂଲମେକଂ, ସିୟା ୱତ୍ଥୁ, ତିୱିଧଂ, ଭୂମିୟୋ ଛ ଚ ।
ଅଟ୍ଠଧମ୍ମୱିଦୋ ଭିକ୍ଖୁ, କଥିନତ୍ଥାରମରହତି ॥
ସଙ୍ଘୋ ମୂଲନ୍ତି ନିଦ୍ଦିଟ୍ଠଂ, ୱତ୍ଥୁ ହୋତି ତିଚୀୱରଂ ।
ଖୋମାଦୀନି ଛ ୱୁତ୍ତାନି, ଚୀୱରାନି ଛ ଭୂମିୟୋ ॥
ପୁବ୍ବପଚ୍ଚୁଦ୍ଧରାଧିଟ୍ଠା-ନତ୍ଥାରୋ ମାତିକାପି ଚ ।
ପଲିବୋଧୋ ଚ ଉଦ୍ଧାରୋ, ଆନିସଂସା ପନଟ୍ଠିମେ ॥
ଧୋୱନଞ୍ଚ ୱିଚାରୋ ଚ, ଛେଦନଂ ବନ୍ଧନମ୍ପି ଚ ।
ସିବ୍ବନଂ ରଜନଂ କପ୍ପଂ, ‘‘ପୁବ୍ବକିଚ୍ଚ’’ନ୍ତି ୱୁଚ୍ଚତି ॥
ସଙ୍ଘାଟି ଉତ୍ତରାସଙ୍ଗୋ, ଅଥୋ ଅନ୍ତରୱାସକୋ ।
ପଚ୍ଚୁଦ୍ଧାରୋ ଅଧିଟ୍ଠାନଂ, ଅତ୍ଥାରୋପେସମେୱ ତୁ ॥
ପକ୍କମନଞ୍ଚ ନିଟ୍ଠାନଂ, ସନ୍ନିଟ୍ଠାନଞ୍ଚ ନାସନଂ ।
ସୱନାସା ଚ ସୀମା ଚ, ସହୁବ୍ଭାରୋତି ଅଟ୍ଠିମା ॥
କତଚୀୱରମାଦାୟ, ଆୱାସେ ନିରପେକ୍ଖକୋ ।
ଅତିକ୍କନ୍ତାୟ ସୀମାୟ, ହୋତି ପକ୍କମନନ୍ତିକା॥
ଆନିସଂସମଥାଦାୟ, ୱିହାରେ ଅନପେକ୍ଖକୋ ।
ଗନ୍ତ୍ୱା ପନ ୱିହାରଂ ସୋ, ଅଞ୍ଞଂ ସୁଖୱିହାରିକଂ ॥
ତତ୍ଥ ତଂ ୱିହରନ୍ତୋୱ, କରୋତି ୟଦି ଚୀୱରଂ ।
ନିଟ୍ଠିତେ ଚୀୱରେ ତସ୍ମିଂ, ନିଟ୍ଠାନନ୍ତାତି ୱୁଚ୍ଚତି ॥
‘‘ଚୀୱରଂ ନ କରିସ୍ସାମି, ନ ପଚ୍ଚେସ୍ସଂ ତମସ୍ସମଂ’’ ।
ଏୱଂ ତୁ ଧୁରନିକ୍ଖେପେ, ସନ୍ନିଟ୍ଠାନନ୍ତିକା ମତା ॥
କଥିନଚ୍ଛାଦନଂ ଲଦ୍ଧା, ‘‘ନ ପଚ୍ଚେସ୍ସ’’ନ୍ତି ଚେ ଗତୋ ।
କରୋନ୍ତସ୍ସେୱ ନଟ୍ଠଂ ୱା, ଦଡ୍ଢଂ ୱା ନାସନନ୍ତିକା॥
ଲଦ୍ଧାନିସଂସୋ ସାପେକ୍ଖୋ, ବହିସୀମଂ ଗତୋ ପନ ।
ସୁଣାତି ଚନ୍ତରୁବ୍ଭାରଂ, ସା ହୋତି ସୱନନ୍ତିକା॥
ଚୀୱରାସାୟ ପକ୍କନ୍ତୋ, ବହିସୀମଂ ଗତୋ ପନ ।
‘‘ଦସ୍ସାମି ଚୀୱରଂ ତୁୟ୍ହଂ’’, ୱୁତ୍ତୋ ସୱତି କେନଚି ॥
ପୁନ ୱୁତ୍ତେ ‘‘ନ ସକ୍କୋମି, ଦାତୁନ୍ତି ତୱ ଚୀୱରଂ’’ ।
ଆସାୟ ଛିନ୍ନମତ୍ତାୟ, ଆସାୱଚ୍ଛେଦିକା ମତା ॥
ୱସ୍ସଂୱୁଟ୍ଠୱିହାରମ୍ହା, ୱିହାରଞ୍ଞଂ ଗତୋ ସିୟା ।
ଆଗଚ୍ଛଂ ଅନ୍ତରାମଗ୍ଗେ, ତଦୁଦ୍ଧାରମତିକ୍କମେ ॥
ତସ୍ସ ସୋ କଥିନୁଦ୍ଧାରୋ, ସୀମାତିକ୍କନ୍ତିକୋ ମତୋ ।
କଥିନାନିସଂସମାଦାୟ, ସାପେକ୍ଖୋୱ ସଚେ ଗତୋ ॥
ସମ୍ଭୁଣାତି ପୁନାଗନ୍ତ୍ୱା, କଥିନୁଦ୍ଧାରମେୱ ଚେ ।
ତସ୍ସ ସୋ କଥିନୁଦ୍ଧାରୋ, ‘‘ସହୁବ୍ଭାରୋ’’ତି ୱୁଚ୍ଚତି ॥
ପକ୍କମନଞ୍ଚ ନିଟ୍ଠାନଂ, ସନ୍ନିଟ୍ଠାନଞ୍ଚ ସୀମତୋ ।
ଚତ୍ତାରୋ ପୁଗ୍ଗଲାଧୀନା, ସଙ୍ଘାଧୀନନ୍ତରୁବ୍ଭରୋ ॥
ନାସନଂ ସୱନଞ୍ଚେୱ, ଆସାୱଚ୍ଛେଦିକାପି ଚ ।
ତୟୋପି କଥିନୁବ୍ଭାରା, ନ ତୁ ସଙ୍ଘା, ନ ଭିକ୍ଖୁତୋ ॥
ଆୱାସପଲିବୋଧୋ ଚ, ପଲିବୋଧୋ ଚ ଚୀୱରେ ।
ପଲିବୋଧା ଦୁୱେ ୱୁତ୍ତା, ୟୁତ୍ତମୁତ୍ତତ୍ଥୱାଦିନା ॥
ଅଟ୍ଠନ୍ନଂ ମାତିକାନଂ ୱା, ଅନ୍ତରୁବ୍ଭାରତୋପି ୱା ।
ଉବ୍ଭାରାପି ଦୁୱେ ୱୁତ୍ତା, କଥିନସ୍ସ ମହେସିନା ॥
ଅନାମନ୍ତାସମାଦାନଂ, ଗଣତୋ ୟାୱଦତ୍ଥିକଂ ।
ତତ୍ଥ ୟୋ ଚୀୱରୁପ୍ପାଦୋ, ଆନିସଂସା ଚ ପଞ୍ଚିମେ ॥
କଥିନକ୍ଖନ୍ଧକକଥା ।
ଚୀୱରକ୍ଖନ୍ଧକକଥା
ଚୀୱରସ୍ସ ପନୁପ୍ପାଦା, ଅଟ୍ଠ ଚୀୱରମାତିକା ।
ସୀମାୟ ଦେତି, କତିକା, ଭିକ୍ଖାପଞ୍ଞତ୍ତିୟା, ତଥା ॥
ସଙ୍ଘସ୍ସ, ଉଭତୋସଙ୍ଘେ, ୱସ୍ସଂୱୁଟ୍ଠସ୍ସ ଦେତି ଚ, ।
ଆଦିସ୍ସ, ପୁଗ୍ଗଲସ୍ସାତି, ଅଟ୍ଠିମା ପନ ମାତିକା ॥
ତତ୍ଥ ସୀମାୟ ଦେତୀତି, ଅନ୍ତୋସୀମଂ ଗତେହି ତୁ ।
ଭିକ୍ଖୂହି ଭାଜେତବ୍ବନ୍ତି, ୱଣ୍ଣିତଂ ୱରୱଣ୍ଣିନା ॥
କତିକାୟ ଚ ଦିନ୍ନଂ ୟେ, ୱିହାରା ଏକଲାଭକା ।
ଏତ୍ଥ ଦିନ୍ନଞ୍ଚ ସବ୍ବେହି, ଭାଜେତବ୍ବନ୍ତି ୱୁଚ୍ଚତି ॥
ସଙ୍ଘସ୍ସ ଧୁୱକାରା ହି, ୟତ୍ଥ କରୀୟନ୍ତି ତତ୍ଥ ଚ ।
ଭିକ୍ଖାପଞ୍ଞତ୍ତିୟା ଦିନ୍ନଂ, ଦିନ୍ନଂ ୱୁତ୍ତଂ ମହେସିନା ॥
ସଙ୍ଘସ୍ସ ପନ ୟଂ ଦିନ୍ନଂ, ଉଜୁଭୂତେନ ଚେତସା ।
ତଞ୍ହି ସମ୍ମୁଖିଭୂତେନ, ଭାଜେତବ୍ବନ୍ତି ୱୁଚ୍ଚତି ॥
ଉଭତୋସଙ୍ଘ ମୁଦ୍ଦିସ୍ସ, ଦେତି ସଦ୍ଧାୟ ଚୀୱରଂ ।
ଥୋକା ୱା ବହୁ ୱା ଭିକ୍ଖୂ, ସମଭାଗୋୱ ୱଟ୍ଟତି ॥
ୱସ୍ସଂୱୁଟ୍ଠସ୍ସ ସଙ୍ଘସ୍ସ, ଚୀୱରଂ ଦେତି ୟଂ ପନ ।
ତଂ ତସ୍ମିଂ ୱୁଟ୍ଠୱସ୍ସେନ, ଭାଜେତବ୍ବନ୍ତି ୱଣ୍ଣିତଂ ॥
ୟାଗୁୟା ପନ ଭତ୍ତେ ୱା, ଦେତିଆଦିସ୍ସ ଚେ ପନ ।
ଚୀୱରଂ ତତ୍ଥ ତତ୍ଥେୱ, ୟୋଜେତବ୍ବଂ ୱିଜାନତା ॥
ପୁଗ୍ଗଲଂ ପନ ଉଦ୍ଦିସ୍ସ, ଚୀୱରଂ ୟଂ ତୁ ଦୀୟତି ।
ପୁଗ୍ଗଲୋଦିସ୍ସକଂ ନାମ, ଦାନଂ ତଂ ତୁ ପୱୁଚ୍ଚତି ॥
ସହଧମ୍ମିକେସୁ ୟୋ କୋଚି, ପଞ୍ଚସ୍ୱପି ‘‘ମମଚ୍ଚୟେ ।
ଅୟଂ ମୟ୍ହଂ ପରିକ୍ଖାରୋ, ମାତୁୟା ପିତୁନୋପି ୱା ॥
ଉପଜ୍ଝାୟସ୍ସ ୱା ହୋତୁ’’, ୱଦତିଚ୍ଚେୱମେୱ ଚେ ।
ନ ହୋତି ପନ ତଂ ତେସଂ, ସଙ୍ଘସ୍ସେୱ ଚ ସନ୍ତକଂ ॥
ପଞ୍ଚନ୍ନଂ ଅଚ୍ଚୟେ ଦାନଂ, ନ ଚ ରୂହତି କିଞ୍ଚିପି ।
ସଙ୍ଘସ୍ସେୱ ଚ ତଂ ହୋତି, ଗିହୀନଂ ପନ ରୂହତି ॥
ଭିକ୍ଖୁ ୱା ସାମଣେରୋ ୱା, କାଲଂ ଭିକ୍ଖୁନୁପସ୍ସୟେ ।
କରୋତ୍ୟସ୍ସ ପରିକ୍ଖାରା, ଭିକ୍ଖୂନଂୟେୱ ସନ୍ତକା ॥
ଭିକ୍ଖୁନୀ ସାମଣେରୀ ୱା, ୱିହାରସ୍ମିଂ ସଚେ ମତା ।
ହୋନ୍ତି ତସ୍ସା ପରିକ୍ଖାରା, ଭିକ୍ଖୁନୀନଂ ତୁ ସନ୍ତକା ॥
‘‘ଦେହି ନେତ୍ୱାସୁକସ୍ସା’’ତି, ଦିନ୍ନଂ ତଂ ପୁରିମସ୍ସ ତୁ ।
‘‘ଇଦଂ ଦମ୍ମୀ’’ତି ଦିନ୍ନଂ ତଂ, ପଚ୍ଛିମସ୍ସେୱ ସନ୍ତକଂ ॥
ଏୱଂ ଦିନ୍ନୱିଧିଂ ଞତ୍ୱା, ମତସ୍ସ ୱାମତସ୍ସ ୱା ।
ୱିସ୍ସାସଂ ୱାପି ଗଣ୍ହେୟ୍ୟ, ଗଣ୍ହେ ମତକଚୀୱରଂ ॥
ମୂଲପତ୍ତଫଲକ୍ଖନ୍ଧ-ତଚପୁପ୍ଫପ୍ପଭେଦତୋ ।
ଛବ୍ବିଧଂ ରଜନଂ ୱୁତ୍ତଂ, ୱନ୍ତଦୋସେନ ତାଦିନା ॥
ମୂଲେ ହଲିଦ୍ଦିଂ, ଖନ୍ଧେସୁ, ମଞ୍ଜେଟ୍ଠଂ ତୁଙ୍ଗହାରକଂ ।
ପତ୍ତେସୁ ଅଲ୍ଲିୟା ପତ୍ତଂ, ତଥା ପତ୍ତଞ୍ଚ ନୀଲିୟା ॥
କୁସୁମ୍ଭଂ କିଂସୁକଂ ପୁପ୍ଫେ, ତଚେ ଲୋଦ୍ଦଞ୍ଚ କଣ୍ଡୁଲଂ ।
ଠପେତ୍ୱା ରଜନଂ ସବ୍ବଂ, ଫଲଂ ସବ୍ବମ୍ପି ୱଟ୍ଟତି ॥
କିଲିଟ୍ଠସାଟକଂ ୱାପି, ଦୁବ୍ବଣ୍ଣଂ ୱାପି ଚୀୱରଂ ।
ଅଲ୍ଲିୟା ପନ ପତ୍ତେନ, ଧୋୱିତୁଂ ପନ ୱଟ୍ଟତି ॥
ଚୀୱରାନଂ କଥା ସେସା, ପଠମେ କଥିନେ ପନ ।
ତତ୍ଥ ୱୁତ୍ତନୟେନେୱ, ୱେଦିତବ୍ବା ୱିଭାୱିନା ॥
ଚୀୱରକ୍ଖନ୍ଧକକଥା ।
ମହାୱଗ୍ଗୋ ନିଟ୍ଠିତୋ ।
ଚୂଳୱଗ୍ଗୋ
ପାରିୱାସିକକ୍ଖନ୍ଧକକଥା
ତଜ୍ଜନୀୟଂ ନିୟସ୍ସଞ୍ଚ, ପବ୍ବାଜଂ ପଟିସାରଣଂ ।
ତିୱିଧୁକ୍ଖେପନଞ୍ଚାତି, ସତ୍ତ କମ୍ମାନି ଦୀପୟେ ॥
ତେଚତ୍ତାଲୀସ ୱତ୍ତାନି, ଖନ୍ଧକେ କମ୍ମସଞ୍ଞିତେ ।
ନୱାଧିକାନି ତିଂସେୱ, ଖନ୍ଧକେ ତଦନନ୍ତରେ ॥
ଏୱଂ ସବ୍ବାନି ୱତ୍ତାନି, ଦ୍ୱାସୀତେୱ ମହେସିନା ।
ହୋନ୍ତି ଖନ୍ଧକୱତ୍ତାନି, ଗହିତାଗହଣେନ ତୁ ॥
ପାରିୱାସଞ୍ଚ ୱତ୍ତଞ୍ଚ, ସମାଦିନ୍ନସ୍ସ ଭିକ୍ଖୁନୋ ।
ରତ୍ତିଚ୍ଛେଦୋ କଥଂ ୱୁତ୍ତୋ, ୱତ୍ତଭେଦୋ କଥଂ ଭୱେ ?
ସହୱାସୋ ୱିନାୱାସୋ, ଅନାରୋଚନମେୱ ଚ ।
ପାରିୱାସିକଭିକ୍ଖୁସ୍ସ, ରତ୍ତିଚ୍ଛେଦୋ ଚ ଦୁକ୍କଟଂ ॥
ଏକଚ୍ଛନ୍ନେ ପନାୱାସେ, ପକତତ୍ତେନ ଭିକ୍ଖୁନା ।
ନିୱାସୋ ଦକପାତେନ, ଉକ୍ଖିତ୍ତସ୍ସ ନିୱାରିତୋ ॥
ପାରିୱାସିକଭିକ୍ଖୁସ୍ସ, ଅନ୍ତୋୟେୱ ନ ଲବ୍ଭତି ।
ଇଚ୍ଚେୱଂ ପନ ନିଦ୍ଦିଟ୍ଠଂ, ମହାପଚ୍ଚରିୟଂ ପନ ॥
‘‘ଅୱିସେସେନ ନିଦ୍ଦିଟ୍ଠଂ, ମହାଅଟ୍ଠକଥାଦିସୁ ।
ଉଭିନ୍ନଂ ଦକପାତେନ, ନିୱାସୋ ୱାରିତୋ’’ତି ହି ॥
ଅଭିକ୍ଖୁକେ ପନାୱାସେ, ଅନାୱାସେପି କତ୍ଥଚି ।
ୱିପ୍ପୱାସଂ ୱସନ୍ତସ୍ସ, ରତ୍ତିଚ୍ଛେଦୋ ଚ ଦୁକ୍କଟଂ ॥
ପାରିୱାସିକଭିକ୍ଖୁସ୍ସ, ଭିକ୍ଖୁଂ ଦିସ୍ୱାନ ତଙ୍ଖଣେ ।
ନାରୋଚେନ୍ତସ୍ସ ଚେତସ୍ସ, ରତ୍ତିଚ୍ଛେଦୋ ଚ ଦୁକ୍କଟଂ ॥
ପଞ୍ଚେୱ ଚ ୟଥାୱୁଡ୍ଢଂ, ଲଭତେ ପାରିୱାସିକୋ ।
କାତୁଂ ତତ୍ଥେୱ ଚ ଠତ୍ୱା, ଉପୋସଥପୱାରଣଂ ॥
ୱସ୍ସସାଟିଂ ୟଥାୱୁଡ୍ଢଂ, ଦେନ୍ତି ଚେ ସଙ୍ଘଦାୟକା ।
ଓଣୋଜନଂ ତଥା ଭତ୍ତଂ, ଲଭତେ ପଞ୍ଚିମେ ପନ ॥
ପାରିୱାସିକକ୍ଖନ୍ଧକକଥା ।
ସମଥକ୍ଖନ୍ଧକକଥା
ୱିୱାଦାଧାରତା ଚାନୁ-ୱାଦାଧିକରଣମ୍ପି ଚ ।
ଆପତ୍ତାଧାରତା ଚେୱ, କିଚ୍ଚାଧିକରଣମ୍ପି ଚ ॥
ଏତାନି ପନ ଚତ୍ତାରି, ୱୁତ୍ତାନି ଚ ମହେସିନା ।
ଭେଦକାରକୱତ୍ଥୂନି, ୱିୱାଦୋ ତତ୍ଥ ନିସ୍ସିତୋ ॥
ୱିପତ୍ତିୟୋ ଚତସ୍ସୋୱ, ଅନୁୱାଦୋ ଉପାଗତୋ ।
ଆପତ୍ତାଧାରତା ନାମ, ସତ୍ତ ଆପତ୍ତିୟୋ ମତା ॥
ସଙ୍ଘକିଚ୍ଚାନି ନିସ୍ସାୟ, କିଚ୍ଚାଧିକରଣଂ ସିୟା ।
ଏତେସଂ ତୁ ଚତୁନ୍ନମ୍ପି, ସମତ୍ତା ସମଥା ମତା ॥
ସମ୍ମୁଖା ସତି ଚାମୂଳ୍ହୋ, ପଟିଞ୍ଞାୱିନୟୋପି ଚ ।
ତସ୍ସପାପିୟସୀ ଚେୱ, ତଥା ୟେଭୁୟ୍ୟସୀପି ଚ ॥
ତିଣୱତ୍ଥାରକୋ ଚେୱ, ସତ୍ତମୋ ୱିନୟୋ ମତୋ ।
ସତ୍ତିମେ ସମଥା ୱୁତ୍ତା, ବୁଦ୍ଧେନାଦିଚ୍ଚବନ୍ଧୁନା ॥
ୱିୱାଦୋ ସମ୍ମତି ଦ୍ୱୀହି, ଅନୁୱାଦୋ ଚତୂହି ଚ ।
ଆପତ୍ତି ପନ ତୀହେୱ, କିଚ୍ଚମେକେନ ସମ୍ମତି ॥
ଛଟ୍ଠେନ ପଠମେନାପି, ୱିୱାଦୋ ଏତ୍ଥ ସମ୍ମତି ।
ସମ୍ମୁଖାୱିନୟାଦୀହି, ଅନୁପୁବ୍ବେନ ତୀହିପି ॥
ତଥେୱ ପଞ୍ଚମେନାପି, ଅନୁୱାଦୋ ହି ସମ୍ମତି ।
ସମ୍ମୁଖେନ ପଟିଞ୍ଞାୟ, ତିଣୱତ୍ଥାରକେନ ଚ ॥
ଆପତ୍ତୂପସମଂ ୟାତି, ତୀହେୱ ସମଥେହି ସା ।
ସମ୍ମୁଖାୱିନୟେନେୱ, କିଚ୍ଚମେକେନ ସମ୍ମତି ॥
ୟେଭୁୟ୍ୟସିକକମ୍ମେ ତୁ, ସଲାକଂ ଗାହୟେ ବୁଧୋ ।
ଗୂଳ୍ହେନ ୱିୱଟେନାପି, କଣ୍ଣଜପ୍ପେନ ୱା ପନ ॥
ଅଲଜ୍ଜୁସ୍ସଦେ ଗୂଳ୍ହେନ, ୱିୱଟେନେୱ ଲଜ୍ଜିସୁ ।
ବାଲେସୁ କଣ୍ଣଜପ୍ପେନ, ସଲାକଂ ଗାହୟେ ବୁଧୋ ॥
ଲଜ୍ଜୀ ଅଲଜ୍ଜୀ ବାଲୋତି, କେନ ସକ୍କା ୱିଜାନିତୁଂ ?
ସକେନ କମ୍ମୁନାୟେୱ, ତେନ ସକ୍କା ୱିଜାନିତୁଂ ॥
ଆପଜ୍ଜତି ଚ ସଞ୍ଚିଚ୍ଚ, ଆପତ୍ତିଂ ପରିଗୂହତି ।
ଛନ୍ଦାଦିଅଗତିଂ ୟାତି, ଅଲଜ୍ଜୀ ଏଦିସୋ ସିୟା ॥
ନାପଜ୍ଜତି ଚ ସଞ୍ଚିଚ୍ଚ, ଆପତ୍ତିଂ ନ ଚ ଗୂହତି ।
ନ ଗଚ୍ଛତିଗତିଞ୍ଚାପି, ଏଦିସୋ ଲଜ୍ଜି ପୁଗ୍ଗଲୋ ॥
ଦୁଚ୍ଚିନ୍ତିତୋ ଚ ଦୁବ୍ଭାସୀ, ତଥା ଦୁକ୍କଟକାରିକୋ ।
ଏଦିସୋ ପନ ‘‘ବାଲୋ’’ତି, ଲକ୍ଖଣେନେୱ ଞାୟତି ॥
ତିଧା ସଲାକଗାହେନ, ବହୁକା ଧମ୍ମୱାଦିନୋ ।
ୟେଭୁୟ୍ୟସିକକମ୍ମେନ, କତ୍ତବ୍ବନ୍ତି ଜିନୋବ୍ରୱି ॥
ଅଲଜ୍ଜୀ ସାନୁୱାଦୋ ଚ, ଅସୁଚୀ କମ୍ମତୋ ଚ ୟୋ ।
ତସ୍ସପାପିୟସୀକମ୍ମ-ୟୋଗ୍ଗୋ ସୋ ହୋତି ପୁଗ୍ଗଲୋ ॥
ଭଣ୍ଡନେ କଲହେ ଜାତେ, ୱିୱାଦସ୍ମିଂ ଅନପ୍ପକେ ।
ବହୁଅସ୍ସାମଣେ ଚିଣ୍ଣେ, ଅନଗ୍ଗେପି ଚ ଭସ୍ସକେ ॥
ମୂଲମୂଲଂ ଗୱେସନ୍ତଂ, ହୋତି ୱାଳଞ୍ଚ କକ୍ଖଳଂ ।
ତିଣୱତ୍ଥାରକେନେୱ, କାତବ୍ବନ୍ତି ପକାସିତଂ ॥
ୟଥା ଚ ତିଣପଣ୍ଣେନ, ଛନ୍ନଂ ଗୂଥଞ୍ଚ ମୁତ୍ତକଂ ।
ନ ଚ ୱାୟତି ଦୁଗ୍ଗନ୍ଧଂ, ୱୂପସମ୍ମତି ତଙ୍ଖଣେ ॥
ଠପେତ୍ୱା ଥୁଲ୍ଲୱଜ୍ଜଞ୍ଚ, ଗିହୀହି ପଟିସଂୟୁତଂ ।
ଦିଟ୍ଠାୱିକମ୍ମିକଞ୍ଚେୱ, ୟୋ ଚ ତତ୍ଥ ନ ହୋତି ତଂ ॥
ସେସାୟାପତ୍ତିୟା ୟାୱ, ଉପସମ୍ପଦମାଳତୋ ।
ସୁଦ୍ଧୋ ହୋତି ନିରାପତ୍ତି, ତିଣୱତ୍ଥାରକେ ତଥା ॥
ସମଥକ୍ଖନ୍ଧକକଥା ।
ଖୁଦ୍ଦକୱତ୍ଥୁକ୍ଖନ୍ଧକକଥା
ରୁକ୍ଖେ ୱା ପନ କୁଟ୍ଟେୱା, ଅଟ୍ଟାନେ ଥମ୍ଭକେସୁ ୱା ।
ନ୍ହାୟମାନୋ ସକଂ କାୟଂ, ଉଗ୍ଘଂସେୟ୍ୟସ୍ସ ଦୁକ୍କଟଂ ॥
କାୟଂ ଗନ୍ଧବ୍ବହତ୍ଥେନ, କୁରୁୱିନ୍ଦକସୁତ୍ତିୟା ।
ମଲ୍ଲକେନ ନ ଘଂସେୟ୍ୟ, ନାଞ୍ଞମଞ୍ଞଞ୍ଚ କାୟତୋ ॥
ଅକତଂ ମଲ୍ଲକଂ ନାମ, ଗିଲାନସ୍ସେୱ ୱଟ୍ଟତି ।
କତଂ ତଂ ମଲ୍ଲକଂ ନାମ, ସବ୍ବେସମ୍ପି ନ ୱଟ୍ଟତି ॥
କପାଲିଟ୍ଠକଖଣ୍ଡାନି, ସବ୍ବସ୍ସ ପୁଥୁପାଣିକଂ ।
ଗିଲାନସ୍ସାଗିଲାନସ୍ସ, ୱତ୍ଥୱଟ୍ଟି ଚ ୱଟ୍ଟତି ॥
ୱୁତ୍ତା ଫେଣକପାସାଣ-କଥଲା ପାଦଘଂସନେ ।
ୱଟ୍ଟଂ ୱା ଚତୁରସ୍ସଂ ୱା, କତକଂ ନ ଚ ୱଟ୍ଟତି ॥
ୟଂ କିଞ୍ଚିପି ଅଲଙ୍କାରଂ, ଧାରେନ୍ତସ୍ସପି ଦୁକ୍କଟଂ ।
ହୋତି ଅନ୍ତମସୋ ତାଲ-ପଣ୍ଣମତ୍ତମ୍ପି ଭିକ୍ଖୁନୋ ॥
ଓସଣ୍ହେୟ୍ୟ ସକେ କେସେ, ୟୋ ହତ୍ଥଫଣକେନ ୱା ।
ଫଣକେନପି କୋଚ୍ଛେନ, ଦୁକ୍କଟଂ ତସ୍ସ ନିଦ୍ଦିସେ ॥
ସିତ୍ଥତେଲୋଦତେଲେହି, ମଣ୍ଡନତ୍ଥଂ ନ ୱଟ୍ଟତି ।
ଅନୁଲୋମନିପାତତ୍ଥଂ, ଉଦ୍ଧଂଲୋମେନ ଭିକ୍ଖୁନା ॥
ହତ୍ଥଂ ତେଲେନ ତେମେତ୍ୱା, ପୁଞ୍ଛିତବ୍ବା ସିରୋରୁହା ।
ୱଟ୍ଟତୁଣ୍ହାଭିତତ୍ତସ୍ସ, ଅଲ୍ଲହତ୍ଥେନ ପୁଞ୍ଛିତୁଂ ॥
ଆଦାସେ ଉଦପତ୍ତେ ୱା, ୟତ୍ଥ କତ୍ଥଚି ଅତ୍ତନୋ ।
ମୁଖବିମ୍ବଂ ୱିନା ହେତୁଂ, ଓଲୋକେନ୍ତସ୍ସ ଦୁକ୍କଟଂ ॥
‘‘ସଞ୍ଛୱିଂ ତୁ ମୁଖଂ, ନୋ’’ତି, ଦଟ୍ଠୁମାବାଧପଚ୍ଚୟା ।
‘‘ଜିଣ୍ଣୋ ନୋ’’ତାୟୁସଙ୍ଖାର-ଜାନନତ୍ଥଞ୍ଚ ୱଟ୍ଟତି ॥
ନଚ୍ଚଂ ୱା ପନ ଗୀତଂ ୱା, ୱାଦିତଂ ୱାପି ଭିକ୍ଖୁନୋ ।
ଦଟ୍ଠୁଂ ୱା ପନ ସୋତୁଂ ୱା, ଗଚ୍ଛତୋ ହୋତି ଦୁକ୍କଟଂ ॥
ଦଟ୍ଠୁମନ୍ତମସୋ ମୋର-ନଚ୍ଚମ୍ପି ଚ ନ ୱଟ୍ଟତି ।
ସୋତୁମନ୍ତମସୋ ଦନ୍ତ-ଗୀତମ୍ପି ଚ ନ ୱଟ୍ଟତି ॥
ନଚ୍ଚନ୍ତସ୍ସ ସୟଂ ୱାପି, ନଚ୍ଚାପେନ୍ତସ୍ସ ଦୁକ୍କଟଂ ।
ଅନାପତ୍ତନ୍ତରାରାମେ, ଠତ୍ୱା ସୁଣାତି ପସ୍ସତି ॥
‘‘ପସ୍ସିସ୍ସାମୀ’’ତି ନଚ୍ଚଂ ୱା, ଗୀତଂ ୱା ପନ ୱାଦିତଂ ।
ୱିହାରତୋ ୱିହାରଂ ୱା, ଗଚ୍ଛତୋ ହୋତି ଦୁକ୍କଟଂ ॥
ଆପତ୍ତନ୍ତୋୱିହାରେପି, ଉଟ୍ଠହିତ୍ୱାନ ଗଚ୍ଛତୋ ।
ଠତ୍ୱା ଗୀୱଂ ପସାରେତ୍ୱା, ପସ୍ସତୋପି ଚ ୱୀଥିୟଂ ॥
କେସା ଦୀଘା ନ ଧାରେୟ୍ୟା, ୟୋ ଧାରେୟ୍ୟସ୍ସ ଦୁକ୍କଟଂ ।
ଦ୍ୱଙ୍ଗୁଲଂ ୱା ଦୁମାସଂ ୱା, ତତୋ ଉଦ୍ଧଂ ନ ୱଟ୍ଟତି ॥
ନଖେ ନାସିକଲୋମାନି, ଦୀଘାନି ନ ତୁ ଧାରୟେ ।
ନ ଚ ୱୀସତିମଟ୍ଠଂ ୱା, କାତୁଂ ୱଟ୍ଟତି ଭିକ୍ଖୁନୋ ॥
କପ୍ପାପେୟ୍ୟ ୱିସୁଂ ମସ୍ସୁଂ, ଦାଠିକଂ ୱା ଠପେୟ୍ୟ ୟୋ ।
ସଂହରାପେୟ୍ୟ ୱା ଲୋମଂ, ସମ୍ବାଧେ ତସ୍ସ ଦୁକ୍କଟଂ ॥
ଛିନ୍ଦତୋ ଦୁକ୍କଟଂ ୱୁତ୍ତଂ, କେସେ କତ୍ତରିକାୟ ୱା ।
ଅଗିଲାନସ୍ସ ଅଞ୍ଞେନ, ଛିନ୍ଦାପେନ୍ତସ୍ସ ୱା ତଥା ॥
ଛିନ୍ଦତୋ ଅତ୍ତନୋ ଅଙ୍ଗ-ଜାତଂ ଥୁଲ୍ଲଚ୍ଚୟଂ ସିୟା ।
ସେସଙ୍ଗଛେଦନେ ଅତ୍ତ-ୱଧେ ଆପତ୍ତି ଦୁକ୍କଟଂ ॥
ଅହିକୀଟାଦିଦଟ୍ଠସ୍ସ, ତାଦିସାବାଧପଚ୍ଚୟା ।
ନ ଦୋସୋ ଛିନ୍ଦତୋ ଅଙ୍ଗଂ, ମୋଚେନ୍ତସ୍ସ ଚ ଲୋହିତଂ ॥
ଅପରିସ୍ସାୱନୋ ମଗ୍ଗଂ, ସଚେ ଗଚ୍ଛତି ଦୁକ୍କଟଂ ।
ୟାଚମାନସ୍ସ ୱା ମଗ୍ଗେ, ତଥେୱାଦଦତୋପି ତଂ ॥
ନ ଭୁଞ୍ଜେ ନ ପିୱେ ନଗ୍ଗୋ, ନ ଖାଦେ ନ ଚ ସାୟୟେ ।
ନ ଦଦେ ନ ଚ ଗଣ୍ହେୟ୍ୟ, ନ ଗଚ୍ଛେୟ୍ୟପି ଅଞ୍ଜସଂ ॥
ୱନ୍ଦିତବ୍ବଂ ନ ନଗ୍ଗେନ, ୱନ୍ଦାପେତବ୍ବମେୱ ୱା ।
ପରିକମ୍ମଂ ନ କାତବ୍ବଂ, ନ ନଗ୍ଗେନ ଚ କାରୟେ ॥
ପରିକମ୍ମେ ପଟିଚ୍ଛାଦୀ, ତିସ୍ସୋ ଜନ୍ତାଘରାଦିକା ।
ୱୁତ୍ତା, ୱତ୍ଥପଟିଚ୍ଛାଦୀ, ସବ୍ବତ୍ଥ ପନ ୱଟ୍ଟତି ॥
ୟତ୍ଥ କତ୍ଥଚି ପେଳାୟଂ, ଭୁଞ୍ଜିତୁଂ ନ ଚ ୱଟ୍ଟତି ।
ଏକତୋ ଭୁଞ୍ଜତୋ ହୋତି, ଦୁକ୍କଟଂ ଏକଭାଜନେ ॥
ଏକପାୱୁରଣା ଏକ-ତ୍ଥରଣା ୱା ନିପଜ୍ଜରେ ।
ଏକମଞ୍ଚେପି ୱା ତେସଂ, ହୋତି ଆପତ୍ତି ଦୁକ୍କଟଂ ॥
ନ ନିସୀଦେୟ୍ୟ ସଙ୍ଘାଟି-ପଲ୍ଲତ୍ଥିକମୁପାଗତୋ ।
କିଞ୍ଚି କୀଳଂ ନ କୀଳେୟ୍ୟ, ପଲିତଂ ନ ଚ ଗାହୟେ ॥
ଭମୁକାୟ ନଲାଟେ ୱା, ଦାଠିକାୟପି ଉଗ୍ଗତଂ ।
ତାଦିସଂ ପଲିତଂ ଚଞ୍ଞଂ, ଗାହାପେତୁମ୍ପି ୱଟ୍ଟତି ॥
ଅଗିଲାନୋ ସଚେ ଭିକ୍ଖୁ, ଛତ୍ତଂ ଧାରେୟ୍ୟ ଦୁକ୍କଟଂ ।
ଅତ୍ତନୋ ଚୀୱରାଦୀନଂ, ଗୁତ୍ତତ୍ଥଂ ପନ ୱଟ୍ଟତି ॥
ହତ୍ଥିସୋଣ୍ଡଂ ଚତୁକ୍କଣ୍ଣଂ, ୱସନଂ ମଚ୍ଛୱାଳକଂ ।
ୱେଲ୍ଲିୟଂ ତାଲୱଣ୍ଟଞ୍ଚ, ନିୱାସେନ୍ତସ୍ସ ଦୁକ୍କଟଂ ॥
ଗହିପାରୁପନଂ ୱାପି, ପାରୁପନ୍ତସ୍ସ ଦୁକ୍କଟଂ ।
ନିୱାସନେ ପାରୁପନେ, ପରିମଣ୍ଡଲତା ମତା ॥
ଲୋକାୟତଂ ନ ୱାଚେୟ୍ୟ, ନ ଚ ତଂ ପରିୟାପୁଣେ ।
ନ ତିରଚ୍ଛାନୱିଜ୍ଜା ୱା, ୱାଚେତବ୍ବାୱ ଭିକ୍ଖୁନା ॥
ନ ଚ ୱଟ୍ଟତି ଧାରେତୁଂ, ସବ୍ବା ଚାମରିବୀଜନୀ ।
ନ ଚାଲିମ୍ପେୟ୍ୟ ଦାୟଂ ୱା, ନ ଚ ଲଞ୍ଜେ ମୁଖମ୍ପି ଚ ॥
ନ ୱହେ ଉଭତୋକାଜଂ, ୱଟ୍ଟତନ୍ତରକାଜକଂ ।
ସୀସକ୍ଖନ୍ଧକଟୋଲମ୍ବ-ଭାରେ ଦୋସୋ ନ ୱିଜ୍ଜତି ॥
ଅଟ୍ଠଙ୍ଗୁଲାଦିକଂ ଭିକ୍ଖୁ, ପଚ୍ଛିମଂ ଚତୁରଙ୍ଗୁଲା ।
ଖାଦତୋ ଦନ୍ତକଟ୍ଠଞ୍ଚ, ହୋତି ଆପତ୍ତି ଦୁକ୍କଟଂ ॥
ରୁକ୍ଖଂ ନେୱାଭିରୂହେୟ୍ୟ, କିଚ୍ଚେ ସତିପି ପୋରିସଂ ।
ଆପଦାସୁ ୟଥାକାମଂ, ୱଟ୍ଟତେୱାଭିରୂହିତୁଂ ॥
ଲସୁଣଂ ନ ଚ ଖାଦେୟ୍ୟ, ସଚେ ନାକଲ୍ଲକୋ ସିୟା ।
ନାରୋପେତବ୍ବକଂ ବୁଦ୍ଧ-ୱଚନଂ ଅଞ୍ଞଥା ପନ ॥
ଖିପିତେନ ଚ ୱତ୍ତବ୍ବଂ, ‘‘ଜୀୱା’’ତି, ଗିହିନା ପୁନ ।
‘‘ଜୀୱଥା’’ତି ଚ ୱୁତ୍ତେନ, ‘‘ଚିରଂ ଜୀୱା’’ତି ୱଟ୍ଟତି ॥
ସାମଣେରଂ ଗହଟ୍ଠଂ ୱା, ଆକୋଟେନ୍ତସ୍ସ ଦୁକ୍କଟଂ ।
ସୟନେ ପୁପ୍ଫସଂକିଣ୍ଣେ, ନ ୱଟ୍ଟତି ନିପଜ୍ଜିତୁଂ ॥
ଖୁରଭଣ୍ଡଂ ନ ଗଣ୍ହେୟ୍ୟ, ସଚେ ନ୍ହାପିତପୁବ୍ବକୋ ।
ନ ଚ ଧାରଣିୟା ଉଣ୍ହୀ, ସବ୍ବା ବାହିରଲୋମିକା ॥
ଅଙ୍ଗରାଗଂ କରୋନ୍ତସ୍ସ, ଦୁକ୍କଟଂ ସମୁଦୀରିତଂ ।
ଅକାୟବନ୍ଧନସ୍ସାପି, ଗାମଂ ପୱିସତୋପି ଚ ॥
ଲୋହଜଂ ଦାରୁଜଂ ସବ୍ବଂ, କପ୍ପିୟଂ ମତ୍ତିକାମୟଂ ।
ୱିନା ସତ୍ଥଞ୍ଚ ପତ୍ତଞ୍ଚ, କତକଂ କୁମ୍ଭକାରିକଂ ॥
ଖୁଦ୍ଦକୱତ୍ଥୁକ୍ଖନ୍ଧକକଥା ।
ସେନାସନକ୍ଖନ୍ଧକକଥା
ଆସନ୍ଦିକୋ ଅତିକ୍କନ୍ତ-ପମାଣୋପି ଚ ୱଟ୍ଟତି ।
ତଥା ପଞ୍ଚଙ୍ଗପୀଠମ୍ପି, ସତ୍ତଙ୍ଗମ୍ପି ଚ ୱଟ୍ଟତି ॥
ତୂଲୋନଦ୍ଧା ଘରେୟେୱ, ମଞ୍ଚପୀଠା ନିସୀଦିତୁଂ ।
ସୀସପାଦୂପଧାନଞ୍ଚ, ଅଗିଲାନସ୍ସ ୱଟ୍ଟତି ॥
ସନ୍ଥରିତ୍ୱା ଗିଲାନସ୍ସ, ଉପଧାନାନି ତତ୍ଥ ଚ ।
ପଚ୍ଚତ୍ଥରଣକଂ ଦତ୍ୱା, ନିପଜ୍ଜନ୍ତସ୍ସ ୱଟ୍ଟତି ॥
ତିରିୟଂ ମୁଟ୍ଠିରତନଂ, ହୋତି ବିମ୍ବୋହନଂ ମିତଂ ।
ଦୀଘତୋ ଚ ଦିୟଡ୍ଢଂ ୱା, ଦ୍ୱିହତ୍ଥନ୍ତି କୁରୁନ୍ଦିୟଂ॥
ପୂରିତା ଚୋଳପଣ୍ଣୁଣ୍ଣ-ତିଣୱାକେହି ପଞ୍ଚହି ।
ଭିସିୟୋ ଭାସିତା ପଞ୍ଚ, ତୂଲାନଂ ଗଣନାୱସା ॥
ଭିସିତୂଲାନି ପଞ୍ଚେୱ, ତଥା ତୂଲାନି ତୀଣିପି ।
ଲୋମାନି ମିଗପକ୍ଖୀନଂ, ଗବ୍ଭା ବିମ୍ବୋହନସ୍ସିମେ ॥
ମନୁସ୍ସଲୋମଂ ଲୋମେସୁ, ପୁପ୍ଫେସୁ ବକୁଲାଦିକଂ ।
ସୁଦ୍ଧଂ ତମାଲପତ୍ତଞ୍ଚ, ପଣ୍ଣେସୁ ନ ଚ ୱଟ୍ଟତି ॥
ଉଣ୍ଣାଦିକଂ ପଞ୍ଚୱିଧଞ୍ଚ ତୂଲଂ ।
ମହେସିନା ୟଂ ଭିସିୟଂ ପୱୁତ୍ତଂ ।
କୁରୁନ୍ଦିୟଂ ଅଟ୍ଠକଥାୟ ୱୁତ୍ତଂ ॥
ୟଦେତଂ ତିୱିଧଂ ତୂଲଂ, ଭିସିୟଂ ତଂ ଅକପ୍ପିୟଂ ।
ମିସ୍ସଂ ତମାଲପତ୍ତଂ ତୁ, ସବ୍ବତ୍ଥ ପନ ୱଟ୍ଟତି ॥
ରୂପଂ ତୁ ପୁରିସିତ୍ଥୀନଂ, ତିରଚ୍ଛାନଗତସ୍ସ ୱା ।
କାରେନ୍ତସ୍ସ କରୋତୋ ୱା, ହୋତି ଆପତ୍ତି ଦୁକ୍କଟଂ ॥
ଜାତକଂ ପନ ୱତ୍ଥୁଂ ୱା, କାରାପେତୁଂ ପରେହି ୱା ।
ମାଲାକମ୍ମଂ ଲତାକମ୍ମଂ, ସୟଂ କାତୁମ୍ପି ୱଟ୍ଟତି ॥
ସମାନାସନିକୋ ନାମ, ଦ୍ୱୀହି ୱସ୍ସେହି ୟୋ ପନ ।
ୱୁଡ୍ଢୋ ୱା ଦହରୋ ୱାପି, ୱସ୍ସେନେକେନ ୱା ପନ ॥
ସମାନୱସ୍ସେ ୱତ୍ତବ୍ବଂ, କିଞ୍ଚ ନାମିଧ ୱିଜ୍ଜତି ।
ସତ୍ତୱସ୍ସତିୱସ୍ସେହି, ପଞ୍ଚୱସ୍ସୋ ନିସୀଦତି ॥
ହେଟ୍ଠା ଦୀଘାସନଂ ତିଣ୍ଣଂ, ୟଂ ପହୋତି ନିସୀଦିତୁଂ ।
ଏକମଞ୍ଚେପି ପୀଠେ ୱା, ଦ୍ୱେ ନିସୀଦନ୍ତି ୱଟ୍ଟତି ॥
ଉଭତୋବ୍ୟଞ୍ଜନଂ ଇତ୍ଥିଂ, ଠପେତ୍ୱା ପଣ୍ଡକଂ ପନ ।
ଦୀଘାସନେ ଅନୁଞ୍ଞାତଂ, ସବ୍ବେହିପି ନିସୀଦିତୁଂ ॥
ପୁରିମିକୋ ପଚ୍ଛିମିକୋ, ତଥେୱନ୍ତରମୁତ୍ତକୋ ।
ତୟୋ ସେନାସନଗ୍ଗାହା, ସମ୍ବୁଦ୍ଧେନ ପକାସିତା ॥
ପୁବ୍ବାରୁଣା ପାଟିପଦସ୍ସ ୟାୱ ।
ପୁନାରୁଣୋ ଭିଜ୍ଜତି ନେୱ ତାୱ ।
ଇଦଞ୍ହି ସେନାସନଗାହକସ୍ସ ।
ଖେତ୍ତନ୍ତି ୱସ୍ସୂପଗମେ ୱଦନ୍ତି ॥
ପାତୋୱ ଗାହିତେ ଅଞ୍ଞୋ, ଭିକ୍ଖୁ ସେନାସନେ ପନ ।
ସଚେ ୟାଚତି ଆଗନ୍ତ୍ୱା, ୱତ୍ତବ୍ବୋ ଗାହିତନ୍ତି ସୋ ॥
ସଙ୍ଘିକଂ ଅପଲୋକେତ୍ୱା, ଗହିତଂ ୱସ୍ସୱାସିକଂ ।
ଅନ୍ତୋୱସ୍ସେପି ୱିବ୍ଭନ୍ତୋ, ଲଭତେ ତତ୍ରଜଂ ସଚେ ॥
ୱୁଟ୍ଠୱସ୍ସୋ ସଚେ ଭିକ୍ଖୁ, କିଞ୍ଚି ଆୱାସିହତ୍ଥତୋ ।
ଗହେତ୍ୱା କପ୍ପିୟଂ ଭଣ୍ଡଂ, ଦତ୍ୱା ତସ୍ସତ୍ତନୋ ପନ ॥
‘‘ଅସୁକସ୍ମିଂ କୁଲେ ମୟ୍ହଂ, ୱସ୍ସାୱାସିକଚୀୱରଂ ।
ଗାହିତଂ ଗଣ୍ହ’’ଇଚ୍ଚେୱଂ, ୱତ୍ୱା ଗଚ୍ଛତି ସୋ ଦିସଂ ॥
ଉପ୍ପବ୍ବଜତି ଚେ ତତ୍ଥ, ଗତଟ୍ଠାନେ, ନ ଲବ୍ଭତି ।
ଗହେତୁଂ ତସ୍ସ ସମ୍ପତ୍ତଂ, ସଙ୍ଘିକଂୟେୱ ତଂ ସିୟା ॥
ମନୁସ୍ସେ ସମ୍ମୁଖା ତତ୍ଥ, ପଟିଚ୍ଛାପେତି ଚେ ପନ ।
ସବ୍ବଂ ଲଭତି ସମ୍ପତ୍ତଂ, ୱସ୍ସାୱାସିକଚୀୱରଂ ॥
ଆରାମୋ ଚ ୱିହାରୋ ଚ, ୱତ୍ଥୂନି ଦୁୱିଧସ୍ସପି ।
ଭିସି ବିମ୍ବୋହନଂ ମଞ୍ଚ-ପୀଠନ୍ତି ତତିୟଂ ପନ ॥
ଲୋହକୁମ୍ଭୀ କଟାହଞ୍ଚ, ଭାଣକୋ ଲୋହୱାରକୋ ।
ୱାସି ଫରସୁ କୁଦ୍ଦାଲୋ, କୁଠାରୀ ଚ ନିଖାଦନଂ ॥
ୱଲ୍ଲି ୱେଳୁ ତିଣଂ ପଣ୍ଣଂ, ମୁଞ୍ଜପବ୍ବଜମେୱ ଚ ।
ମତ୍ତିକା ଦାରୁଭଣ୍ଡଞ୍ଚ, ପଞ୍ଚମଂ ତୁ ୟଥାହ ଚ ॥
‘‘ଦ୍ୱୀହି ସଙ୍ଗହିତାନି ଦ୍ୱେ, ତତିୟଂ ଚତୁସଙ୍ଗହଂ ।
ଚତୁତ୍ଥଂ ନୱକୋଟ୍ଠାସଂ, ପଞ୍ଚମଂ ଅଟ୍ଠଧା ମତଂ ॥
ଇତି ପଞ୍ଚହି ରାସୀହି, ପଞ୍ଚନିମ୍ମଲଲୋଚନୋ ।
ପଞ୍ଚୱୀସୱିଧଂ ନାଥୋ, ଗରୁଭଣ୍ଡଂ ପକାସୟି’’ ॥
ଇଦଞ୍ହି ପନ ସଙ୍ଘସ୍ସ, ସନ୍ତକଂ ଗରୁଭଣ୍ଡକଂ ।
ୱିସ୍ସଜ୍ଜେନ୍ତୋ ୱିଭାଜେନ୍ତୋ, ଭିକ୍ଖୁ ଥୁଲ୍ଲଚ୍ଚୟଂ ଫୁସେ ॥
ଭିକ୍ଖୁନା ଗରୁଭଣ୍ଡଂ ତୁ, ସଙ୍ଘେନ ହି ଗଣେନ ୱା ।
ୱିସ୍ସଜ୍ଜିତମୱିସ୍ସଟ୍ଠଂ, ୱିଭତ୍ତମୱିଭାଜିତଂ ॥
ପୁରିମେସୁ ହି ତୀସ୍ୱେତ୍ଥ, ନ ଚତ୍ଥାଗରୁଭଣ୍ଡକଂ ।
ଲୋହକୁମ୍ଭୀ କଟାହୋ ଚ, ଲୋହଭାଣକମେୱ ଚ ॥
ତିୱିଧଂ ଖୁଦ୍ଦକଂ ୱାପି, ଗରୁଭଣ୍ଡକମେୱିଦଂ ।
ପାଦଗଣ୍ହନକୋ ଲୋହ-ୱାରକୋ ଭାଜିୟୋ ମତୋ ॥
ଉଦ୍ଧଂ ପନ ତତୋ ଲୋହ-ୱାରକୋ ଗରୁଭଣ୍ଡକଂ ।
ଭିଙ୍କାରାଦୀନି ସବ୍ବାନି, ଗରୁଭଣ୍ଡାନି ହୋନ୍ତି ହି ॥
ଭାଜେତବ୍ବୋ ଅୟୋପତ୍ତୋ ।
ତମ୍ବାୟୋଥାଲକାପି ଚ ।
ଭାଜେତବ୍ବନ୍ତି ଦୀପିତଂ ॥
ଅତ୍ତନା ପଟିଲଦ୍ଧଂ ତଂ, ଲୋହଭଣ୍ଡଂ ତୁ କିଞ୍ଚିପି ।
ନ ପୁଗ୍ଗଲିକଭୋଗେନ, ଭୁଞ୍ଜିତବ୍ବଞ୍ହି ଭିକ୍ଖୁନା ॥
କଂସୱଟ୍ଟକଲୋହାନଂ, ଭାଜନାନିପି ସବ୍ବସୋ ।
ନ ପୁଗ୍ଗଲିକଭୋଗେନ, ୱଟ୍ଟନ୍ତି ପରିଭୁଞ୍ଜିତୁଂ ॥
ତିପୁଭଣ୍ଡେପି ଏସେୱ, ନୟୋ ଞେୟ୍ୟୋ ୱିଭାୱିନା ।
ନ ଦୋସୋ ସଙ୍ଘିକେ ଅତ୍ଥି, ଗିହୀନଂ ସନ୍ତକେସୁ ୱା ॥
ଖୀରପାସାଣସମ୍ଭୂତଂ, ଗରୁକଂ ତଟ୍ଟକାଦିକଂ ।
ପାଦଗଣ୍ହନତୋ ଉଦ୍ଧଂ, ଘଟକୋ ଗରୁଭଣ୍ଡକୋ ॥
ସିଙ୍ଗିସଜ୍ଝୁମୟଂ ହାର-କୂଟଜଂ ଫଲିକୁବ୍ଭୱଂ ।
ଭାଜନାନି ନ ୱଟ୍ଟନ୍ତି, ଗିହୀନଂ ସନ୍ତକାନିପି ॥
ୱାସି ଭାଜନିୟା ଖୁଦ୍ଦା, ଗରୁଭଣ୍ଡଂ ମହତ୍ତରୀ ।
ତଥା ଫରସୁ ୱେଜ୍ଜାନଂ, ସିରାୱେଧନକମ୍ପି ଚ ॥
କୁଠାରି ୱାସି କୁଦ୍ଦାଲୋ, ଗରୁଭଣ୍ଡଂ ନିଖାଦନଂ ।
ସିଖରମ୍ପି ଚ ତେନେୱ, ଗହିତନ୍ତି ପକାସିତଂ ॥
ଚତୁରସ୍ସମୁଖଂ ଦୋଣି-ମୁଖଂ ୱଙ୍କମ୍ପି ତତ୍ଥ ଚ ।
ସଦଣ୍ଡଂ ଖୁଦ୍ଦକଂ ସବ୍ବଂ, ଗରୁଭଣ୍ଡଂ ନିଖାଦନଂ ॥
ମୁଟ୍ଠିକମଧିକରଣୀ, ସଣ୍ଡାସୋ ୱା ତୁଲାଦିକଂ ।
କିଞ୍ଚି ସଙ୍ଘସ୍ସ ଦିନ୍ନଂ ଚେ, ତଂ ସବ୍ବଂ ଗରୁଭଣ୍ଡକଂ ॥
ନ୍ହାପିତସ୍ସ ଚ ସଣ୍ଡାସୋ, କତ୍ତରୀ ଚ ମହତ୍ତରୀ ।
ମହାପିପ୍ଫଲକଂ ତୁନ୍ନ-କାରାନଂ ଗରୁଭଣ୍ଡକଂ ॥
ୱଲ୍ଲି ସଙ୍ଘସ୍ସ ଦିନ୍ନା ୱା, ତତ୍ଥଜାତାପି ରକ୍ଖିତା ।
ଅଡ୍ଢବାହୁପ୍ପମାଣାପି, ଗରୁ ୱେତ୍ତଲତାଦିକା ॥
ସୁତ୍ତୱାକାଦିନିବ୍ବତ୍ତା, ରଜ୍ଜୁକା ୟୋତ୍ତକାନି ୱା ।
ସଙ୍ଘସ୍ସ ଦିନ୍ନକାଲେ ତୁ, ଗଚ୍ଛନ୍ତି ଗରୁଭଣ୍ଡତଂ ॥
ନାଳିକେରସ୍ସ ହୀରେ ୱା, ୱାକେ ୱା ପନ କେନଚି ।
ୱଟ୍ଟେତ୍ୱା ହି କତା ଏକ-ୱଟ୍ଟାପି ଗରୁଭଣ୍ଡକଂ ॥
ୱେଳୁ ସଙ୍ଘସ୍ସ ଦିନ୍ନୋ ୱା, ରକ୍ଖିତୋ ତତ୍ଥଜାତକୋ ।
ଅଟ୍ଠଙ୍ଗୁଲାୟତୋ ସୂଚି-ଦଣ୍ଡମତ୍ତୋ ଗରୁଂ ସିୟା ॥
ଛତ୍ତଦଣ୍ଡସଲାକାୟୋ, ଦଣ୍ଡୋ କତ୍ତରୟଟ୍ଠିପି ।
ପାଦଗଣ୍ହନକା ତେଲ-ନାଳୀ ଭାଜନିୟା ଇମେ ॥
ମୁଞ୍ଜାଦୀସୁପି ୟଂ କିଞ୍ଚି, ମୁଟ୍ଠିମତ୍ତଂ ଗରୁଂ ସିୟା ।
ତାଲପଣ୍ଣାଦିମେକମ୍ପି, ଦିନ୍ନଂ ୱା ତତ୍ଥଜାତକଂ ॥
ଅଟ୍ଠଙ୍ଗୁଲପ୍ପମାଣୋପି, ଗରୁକଂ ରିତ୍ତପୋତ୍ଥକୋ ।
ମତ୍ତିକା ପକତୀ ୱାପି, ପଞ୍ଚୱଣ୍ଣା ସୁଧାପି ୱା ॥
ସିଲେସାଦୀସୁ ୱା କିଞ୍ଚି, ଦିନ୍ନଂ ୱା ତତ୍ଥଜାତକଂ ।
ତାଲପକ୍କପମାଣଂ ତୁ, ଗରୁଭଣ୍ଡନ୍ତି ଦୀପିତଂ ॥
ୱଲ୍ଲିୱେଳାଦିକଂ କିଞ୍ଚି, ଅରକ୍ଖିତମଗୋପିତଂ ।
ଗରୁଭଣ୍ଡଂ ନ ହୋତେୱ, ଗହେତବ୍ବଂ ୟଥାସୁଖଂ ॥
ରକ୍ଖିତଂ ଗୋପିତଂ ୱାପି, ଗହେତବ୍ବଂ ତୁ ଗଣ୍ହତା ।
ସମକଂ ଅତିରେକଂ ୱା, ଦତ୍ୱା ଫାତିକମେୱ ୱା ॥
ଅଞ୍ଜନଂ ହରିତାଲଞ୍ଚ, ତଥା ହିଙ୍ଗୁ ମନୋସିଲା ।
ଭାଜେତବ୍ବନ୍ତି ୱିଞ୍ଞେୟ୍ୟଂ, ୱିଞ୍ଞୁନା ୱିନୟଞ୍ଞୁନା ॥
ଦାରୁଭଣ୍ଡେପି ୟୋ କୋଚି, ସୂଚିଦଣ୍ଡପ୍ପମାଣକୋ ।
ଅଟ୍ଠଙ୍ଗୁଲାୟତୋ ଦାରୁ-ଭଣ୍ଡକୋ ଗରୁଭଣ୍ଡକଂ ॥
ମହାଅଟ୍ଠକଥାୟଂ ତୁ, ୱିଭଜିତ୍ୱାୱ ଦସ୍ସିତଂ ।
ଆସନ୍ଦିକୋପି ସତ୍ତଙ୍ଗୋ, ଭଦ୍ଦପୀଠଞ୍ଚ ପୀଠିକା ॥
ପୀଠମେଳକପାଦଞ୍ଚ, ତଥାମଣ୍ଡକୱଟ୍ଟକଂ ।
କୋଚ୍ଛଂ ପଲାଲପୀଠଞ୍ଚ, ଧୋୱନେ ଫଲକମ୍ପି ଚ ॥
ଭଣ୍ଡିକା ମୁଗ୍ଗରୋ ଚେୱ, ୱତ୍ଥଘଟ୍ଟନମୁଗ୍ଗରୋ ।
ଅମ୍ବଣମ୍ପି ଚ ମଞ୍ଜୂସା, ନାୱା ରଜନଦୋଣିକା ॥
ଉଳୁଙ୍କୋପି ସମୁଗ୍ଗୋପି, କରଣ୍ଡମ୍ପି କଟଚ୍ଛୁପି ।
ଏୱମାଦି ତୁ ସବ୍ବମ୍ପି, ସଙ୍ଘିକଂ ଗରୁଭଣ୍ଡକଂ ॥
ସବ୍ବଂ ଦାରୁମୟଂ ଗେହ-ସମ୍ଭାରଂ ଗରୁକଂ ମତଂ ।
ଭାଜିୟଂ କପ୍ପିୟଂ ଚମ୍ମଂ, ଅକପ୍ପିୟମଭାଜିୟଂ ॥
ଏଳଚମ୍ମଂ ଗରୁଂ ୱୁତ୍ତଂ, ତଥେୱୋଦୁକ୍ଖଲାଦିକଂ ।
ପେସକାରାଦିଭଣ୍ଡଞ୍ଚ, କସିଭଣ୍ଡଞ୍ଚ ସଙ୍ଘିକଂ ॥
ତଥେୱାଧାରକୋ ପତ୍ତ-ପିଧାନଂ ତାଲୱଣ୍ଟକଂ ।
ବୀଜନୀ ପଚ୍ଛି ଚଙ୍କୋଟଂ, ସବ୍ବା ସମ୍ମୁଞ୍ଜନୀ ଗରୁ ॥
ୟଂ କିଞ୍ଚି ଭୂମତ୍ଥରଣଂ, ୟୋ କୋଚି କଟସାରକୋ ।
ଚକ୍କୟୁତ୍ତକୟାନଞ୍ଚ, ସବ୍ବମ୍ପି ଗରୁଭଣ୍ଡକଂ ॥
ଛତ୍ତଞ୍ଚ ମୁଟ୍ଠିପଣ୍ଣଞ୍ଚ, ୱିସାଣଂତୁମ୍ବଭାଜନଂ ।
ଉପାହନାରଣୀଧମ୍ମ-କରଣାଦି ଲହୁଂ ଇଦଂ ॥
ହତ୍ଥିଦନ୍ତୋ ୱିସାଣଞ୍ଚ, ୟଥାଗତମତଚ୍ଛିତଂ ।
ମଞ୍ଚପାଦାଦି ୟଂ କିଞ୍ଚି, ଭାଜନୀୟମନିଟ୍ଠିତଂ ॥
ନିଟ୍ଠିତୋ ତଚ୍ଛିତୋ ୱାପି, ୱିଧୋ ହିଙ୍ଗୁକରଣ୍ଡକୋ ।
ଅଞ୍ଜନୀ ଚ ସଲାକାୟୋ, ଭାଜନୀ ଉଦପୁଞ୍ଛନୀ ॥
ସବ୍ବଂ କୁଲାଲଭଣ୍ଡମ୍ପି, ପରିଭୋଗାରହଂ ପନ ।
ପତ୍ତଙ୍ଗାରକଟାହଞ୍ଚ, ଧୂମଦାନଂ କପଲ୍ଲିକା ॥
ଥୂପିକା ଦୀପରୁକ୍ଖୋ ଚ, ଚୟନଚ୍ଛଦନିଟ୍ଠକା ।
ସଙ୍ଘିକଂ ପନ ସବ୍ବମ୍ପି, ଗରୁଭଣ୍ଡନ୍ତି ଦୀପିତଂ ॥
ପତ୍ତୋ କଞ୍ଚନକୋ ଚେୱ, ଥାଲକଂ କୁଣ୍ଡିକାପି ଚ ।
ଘଟକୋ ଲୋହଭଣ୍ଡେପି, କୁଣ୍ଡିକାପି ଚ ଭାଜିୟା ॥
ଗରୁନା ଗରୁଭଣ୍ଡଞ୍ଚ, ଥାୱରେନ ଚ ଥାୱରଂ ।
ସଙ୍ଘସ୍ସ ପରିୱତ୍ତେତ୍ୱା, ଗଣ୍ହିତୁଂ ପନ ୱଟ୍ଟତି ॥
ଅଧୋତେନ ଚ ପାଦେନ, ନକ୍କମେ ସୟନାସନଂ ।
ଅଲ୍ଲପାଦେନ ୱା ଭିକ୍ଖୁ, ତଥେୱ ସଉପାହନୋ ॥
ଭୂମିୟା ନିଟ୍ଠୁଭନ୍ତସ୍ସ, ପରିକମ୍ମକତାୟ ୱା ।
ପରିକମ୍ମକତଂ ଭିତ୍ତିଂ, ଅପସ୍ସେନ୍ତସ୍ସ ଦୁକ୍କଟଂ ॥
ପରିକମ୍ମକତଂ ଭୂମିଂ, ସଙ୍ଘିକଂ ମଞ୍ଚପୀଠକଂ ।
ଅତ୍ତନୋ ସନ୍ତକେନେୱ, ପତ୍ଥରିତ୍ୱାନ କେନଚି ॥
ନିପଜ୍ଜିତବ୍ବଂ, ସହସା, ତସ୍ସ ନିଦ୍ଦାୟତୋ ୟଦି ।
ସରୀରାୱୟୱୋ କୋଚି, ମଞ୍ଚଂ ଫୁସତି ଦୁକ୍କଟଂ ॥
ଲୋମେସୁ ପନ ଲୋମାନଂ, ଗଣନାୟେୱ ଦୁକ୍କଟଂ ।
ତଲେନ ହତ୍ଥପାଦାନଂ, ୱଟ୍ଟତକ୍କମିତୁଂ ପନ ॥
ସହସ୍ସଗ୍ଘନକୋ କୋଚି, ପିଣ୍ଡପାତୋ ସଚୀୱରୋ ।
ପତ୍ତୋ ଅୱସ୍ସିକଂ ଭିକ୍ଖୁଂ, ଲିଖିତ୍ୱା ଠପିତୋପି ଚ ॥
ତାଦିସୋ ପିଣ୍ଡପାତୋୱ, ସଟ୍ଠିୱସ୍ସାନମଚ୍ଚୟେ ।
ଉପ୍ପନ୍ନୋ ସଟ୍ଠିୱସ୍ସସ୍ସ, ଠିତିକାୟ ଦଦେ ବୁଧୋ ॥
ଉଦ୍ଦେସଭତ୍ତଂ ଭୁଞ୍ଜିତ୍ୱା, ଜାତୋ ଚେ ସାମଣେରକୋ ।
ଗହେତୁଂ ଲଭତି ତଂ ପଚ୍ଛା, ସାମଣେରସ୍ସ ପାଳିୟା ॥
ସମ୍ପୁଣ୍ଣୱୀସୱସ୍ସୋ ୟୋ, ସ୍ୱେ ଉଦ୍ଦେସଂ ଲଭିସ୍ସତି ।
ଅଜ୍ଜ ସୋ ଉପସମ୍ପନ୍ନୋ, ଅତୀତା ଠିତିକା ସିୟା ॥
ସଚେ ପନ ସଲାକା ତୁ, ଲଦ୍ଧା ଭତ୍ତଂ ନ ତଂଦିନେ ।
ଲଦ୍ଧଂ, ପୁନଦିନେ ତସ୍ସ, ଗାହେତବ୍ବଂ, ନ ସଂସୟୋ ॥
ଉତ୍ତରୁତ୍ତରିଭଙ୍ଗସ୍ସ, ଭତ୍ତସ୍ସେକଚରସ୍ସ ହି ।
ୱିସୁଞ୍ହି ଠିତିକା କତ୍ୱା, ଦାତବ୍ବା ତୁ ସଲାକିକା ॥
ଭତ୍ତମେୱ ସଚେ ଲଦ୍ଧଂ, ନ ପନୁତ୍ତରିଭଙ୍ଗକଂ ।
ଲଦ୍ଧମୁତ୍ତରିଭଙ୍ଗଂ ୱା, ନ ଲଦ୍ଧଂ ଭତ୍ତମେୱ ୱା ॥
ୟେନ ୟେନ ହି ୟଂ ୟଂ ତୁ, ନ ଲଦ୍ଧଂ, ତସ୍ସ ତସ୍ସ ଚ ।
ତଂ ତଂ ପୁନଦିନେ ଚାପି, ଗାହେତବ୍ବନ୍ତି ଦୀପିତଂ ॥
ସଙ୍ଘୁଦ୍ଦେସାଦିକଂ ଭତ୍ତଂ, ଇଦଂ ସତ୍ତୱିଧମ୍ପି ଚ ।
ଆଗନ୍ତୁକାଦିଭତ୍ତଞ୍ଚ, ଚତୁବ୍ବିଧମୁଦୀରିତଂ ॥
ୱିହାରୱାରଭତ୍ତଞ୍ଚ, ନିଚ୍ଚଞ୍ଚ କୁଟିଭତ୍ତକଂ ।
ପନ୍ନରସୱିଧଂ ଭତ୍ତଂ, ଉଦ୍ଦିଟ୍ଠଂ ସବ୍ବମେୱିଧ ॥
ପାଳିମଟ୍ଠକଥଞ୍ଚେୱ, ଓଲୋକେତ୍ୱା ପୁନପ୍ପୁନଂ ।
ସଙ୍ଘିକେ ପଚ୍ଚୟେ ସମ୍ମା, ୱିଭଜେୟ୍ୟ ୱିଚକ୍ଖଣୋ ॥
ସେନାସନକ୍ଖନ୍ଧକକଥା ।
ୱତ୍ତକ୍ଖନ୍ଧକକଥା
ଆଗନ୍ତୁକାୱାସିକପିଣ୍ଡଚାରୀ- ।
ୱତ୍ତାନି ଭତ୍ତେ ଗମିକସ୍ସ ଜନ୍ତା- ।
ଘରେ ତଥା ୱଚ୍ଚକୁଟିପ୍ପୱେସେ ॥
ୱିହାରିୱତ୍ତାନିପି ସବ୍ବସୋୱ ।
ୱତ୍ତାନି ୱୁତ୍ତାନି ଚତୁଦ୍ଦସେୱ ।
ୱିସୁଦ୍ଧଚିତ୍ତେନ ୱିନାୟକେନ ॥
ଆଗନ୍ତୁକେନ ଆରାମଂ, ପୱିସନ୍ତେନ ଭିକ୍ଖୁନା ।
ଛତ୍ତଂ ପନାପନେତବ୍ବଂ, ମୁଞ୍ଚିତବ୍ବା ଉପାହନା ॥
ଓଗୁଣ୍ଠନଂ ନ କାତବ୍ବଂ, ସୀସେ ଚୀୱରମେୱ ୱା ।
ନ ହି ତେନ ଚ ଧୋତବ୍ବା, ପାଦା ପାନୀୟୱାରିନା ॥
ୱନ୍ଦିତବ୍ବାୱ ପୁଚ୍ଛିତ୍ୱା, ୱିହାରେ ୱୁଡ୍ଢଭିକ୍ଖୁନୋ ।
କାଲେ ସେନାସନଂ ତେନ, ପୁଚ୍ଛିତବ୍ବଞ୍ଚ ଭିକ୍ଖୁନା ॥
ୱଚ୍ଚଟ୍ଠାନଞ୍ଚ ପସ୍ସାୱ-ଟ୍ଠାନଂ ପାନୀୟମେୱ ଚ ।
ପରିଭୋଜନୀୟଂ ସଙ୍ଘ-କତିକଂ ଗୋଚରାଦିକଂ ॥
ୱୁଡ୍ଢମାଗନ୍ତୁକଂ ଦିସ୍ୱା, ଭିକ୍ଖୁନାୱାସିକେନପି ।
ପତ୍ତଂ ପଟିଗ୍ଗହେତବ୍ବଂ, ପଚ୍ଚୁଗ୍ଗନ୍ତ୍ୱାନ ଚୀୱରଂ ॥
ଆସନଂ ପଞ୍ଞପେତବ୍ବଂ, ତସ୍ସ ପାଦୋଦକମ୍ପି ଚ ।
ଉପନିକ୍ଖିପିତବ୍ବଞ୍ଚ, ପୁଚ୍ଛିତବ୍ବଞ୍ଚ ୱାରିନା ॥
ୱନ୍ଦେୟ୍ୟୋ ପଞ୍ଞପେତବ୍ବଂ, ତସ୍ସ ସେନାସନମ୍ପି ଚ ।
ଅଜ୍ଝାୱୁତ୍ଥମୱୁତ୍ଥଂ ୱା, ଗୋଚରାଗୋଚରମ୍ପି ଚ ॥
ୱଚ୍ଚଟ୍ଠାନଞ୍ଚ ପସ୍ସାୱ-ଟ୍ଠାନଂ ସେକ୍ଖକୁଲାନି ଚ ।
ପୱେସେ ନିକ୍ଖମେ କାଲୋ, ୱତ୍ତବ୍ବୋ ପାନିୟାଦିକଂ ॥
ସଚେ ସୋ ନୱକୋ ହୋତି ।
ଆଗତାଗନ୍ତୁକୋ ୟଥା ।
ସବ୍ବମାୱାସିଭିକ୍ଖୁନା ॥
‘‘ଅତ୍ର ପତ୍ତଂ ଠପେହୀତି, ନିସୀଦାହୀଦମାସନଂ’’ ।
ଇଚ୍ଚେୱଂ ପନ ୱତ୍ତବ୍ବଂ, ଦେୟ୍ୟଂ ସେନାସନମ୍ପି ଚ ॥
ଦାରୁମତ୍ତିକଭଣ୍ଡାନି, ଗନ୍ତୁକାମେନ ଭିକ୍ଖୁନା ।
ଗନ୍ତବ୍ବଂ ପଟିସାମେତ୍ୱା, ଥକେତ୍ୱାୱସଥମ୍ପି ଚ ॥
ଆପୁଚ୍ଛିତ୍ୱାପି ଗନ୍ତବ୍ବଂ, ଭିକ୍ଖୁନା ସୟନାସନଂ ।
ପୁଚ୍ଛିତବ୍ବେ ଅସନ୍ତେପି, ଗୋପେତ୍ୱା ୱାପି ସାଧୁକଂ ॥
ସହସା ପୱିସେ ନାପି, ସହସା ନ ଚ ନିକ୍ଖମେ ।
ନାତିଦୂରେ ନଚ୍ଚାସନ୍ନେ, ଠାତବ୍ବଂ ପିଣ୍ଡଚାରିନା ॥
ୱାମହତ୍ଥେନ ସଙ୍ଘାଟିଂ, ଉଚ୍ଚାରେତ୍ୱାଥ ଭାଜନଂ ।
ଦକ୍ଖିଣେନ ପଣାମେତ୍ୱା, ଭିକ୍ଖଂ ଗଣ୍ହେୟ୍ୟ ପଣ୍ଡିତୋ ॥
ସୂପଂ ୱା ଦାତୁକାମାତି, ସଲ୍ଲକ୍ଖେୟ୍ୟ ମୁହୁତ୍ତକଂ ।
ଓଲୋକେୟ୍ୟନ୍ତରା ଭିକ୍ଖୁ, ନ ଭିକ୍ଖାଦାୟିକାମୁଖଂ ॥
ପାନୀୟାଦି ପନାନେୟ୍ୟଂ, ଭିକ୍ଖୁନାରଞ୍ଞକେନପି ।
ନକ୍ଖତ୍ତଂ ତେନ ୟୋଗୋ ଚ, ଜାନିତବ୍ବା ଦିସାପି ଚ ॥
ୱଚ୍ଚପସ୍ସାୱତିତ୍ଥାନି, ଭୱନ୍ତି ପଟିପାଟିୟା ।
କରୋନ୍ତସ୍ସ ୟଥାୱୁଡ୍ଢଂ, ହୋତି ଆପତ୍ତି ଦୁକ୍କଟଂ ॥
ସହସା ଉବ୍ଭଜିତ୍ୱା ୱା, ନ ଚ ୱଚ୍ଚକୁଟିଂ ୱିସେ ।
ଉକ୍କାସିତ୍ୱା ବହି ଠତ୍ୱା, ପୱିସେ ସଣିକଂ ପନ ॥
ୱଚ୍ଚଂ ନ ନିତ୍ଥୁନନ୍ତେନ, କାତବ୍ବଂ ପନ ଭିକ୍ଖୁନା ।
ଖାଦତୋ ଦନ୍ତକଟ୍ଠଂ ୱା, କରୋତୋ ହୋତି ଦୁକ୍କଟଂ ॥
ୱଚ୍ଚଂ ପନ ନ କାତବ୍ବଂ, ବହିଦ୍ଧା ୱଚ୍ଚଦୋଣିୟା ।
ପସ୍ସାୱୋପି ନ କାତବ୍ବୋ, ବହି ପସ୍ସାୱଦୋଣିୟା ॥
ଖରେନ ନାୱଲେଖେୟ୍ୟ, ନ କଟ୍ଠଂ ୱଚ୍ଚକୂପକେ ।
ଛଡ୍ଡେୟ୍ୟ ନ ଚ ପାତେୟ୍ୟ, ଖେଳଂ ପସ୍ସାୱଦୋଣିୟା ॥
ପାଦୁକାସୁ ଠିତୋୟେୱ, ଉବ୍ଭଜେୟ୍ୟ ୱିଚକ୍ଖଣୋ ।
ପଟିଚ୍ଛାଦେୟ୍ୟ ତତ୍ଥେୱ, ଠତ୍ୱା ନିକ୍ଖମନେ ପନ ॥
ନାଚମେୟ୍ୟ ସଚେ ୱଚ୍ଚଂ, କତ୍ୱା ୟୋ ସଲିଲେ ସତି ।
ତସ୍ସ ଦୁକ୍କଟମୁଦ୍ଦିଟ୍ଠଂ, ମୁନିନା ମୋହନାସିନା ॥
ସସଦ୍ଦଂ ନାଚମେତବ୍ବଂ, କତ୍ୱା ଚପୁ ଚପୂତି ଚ ।
ଆଚମିତ୍ୱା ସରାୱେପି, ସେସେତବ୍ବଂ ନ ତୂଦକଂ ॥
ଊହତମ୍ପି ଅଧୋୱିତ୍ୱା, ନିକ୍ଖମନ୍ତସ୍ସ ଦୁକ୍କଟଂ ।
ଉକ୍ଲାପାପି ସଚେ ହୋନ୍ତି, ସୋଧେତବ୍ବଂ ଅସେସତୋ ॥
ଅୱଲେଖନକଟ୍ଠେନ, ପୂରୋ ଚେ ପୀଠରୋ ପନ ।
ଛଡ୍ଡେୟ୍ୟ କୁମ୍ଭି ରିତ୍ତା ଚେ, କୁମ୍ଭିଂ ପୂରେୟ୍ୟ ୱାରିନା ॥
ଅନଜ୍ଝିଟ୍ଠୋ ହି ୱୁଡ୍ଢେନ, ପାତିମୋକ୍ଖଂ ନ ଉଦ୍ଦିସେ ।
ଧମ୍ମଂ ନ ଚ ଭଣେ, ପଞ୍ହଂ, ନ ପୁଚ୍ଛେୟ୍ୟ ନ ୱିସ୍ସଜେ ॥
ଆପୁଚ୍ଛିତ୍ୱା କଥେନ୍ତସ୍ସ, ୱୁଡ୍ଢଂ ୱୁଡ୍ଢତରାଗମେ ।
ପୁନ ଆପୁଚ୍ଛନେ କିଚ୍ଚଂ, ନତ୍ଥୀତି ପରିଦୀପିତଂ ॥
ୱୁଡ୍ଢେନେକୱିହାରସ୍ମିଂ, ସଦ୍ଧିଂ ୱିହରତା ପନ ।
ଅନାପୁଚ୍ଛା ହି ସଜ୍ଝାୟୋ, ନ କାତବ୍ବୋ କଦାଚିପି ॥
ଉଦ୍ଦେସୋପି ନ କାତବ୍ବୋ, ପରିପୁଚ୍ଛାୟ କା କଥା ।
ନ ଚ ଧମ୍ମୋ କଥେତବ୍ବୋ, ଭିକ୍ଖୁନା ଧମ୍ମଚକ୍ଖୁନା ॥
ନ ଦୀପୋ ୱିଜ୍ଝାପେତବ୍ବୋ, କାତବ୍ବୋ ୱା ନ ଚେୱ ସୋ ।
ୱାତପାନକୱାଟାନି, ଥକେୟ୍ୟ ୱିୱରେୟ୍ୟ ନୋ ॥
ଚଙ୍କମେ ଚଙ୍କମନ୍ତୋ ଚ, ୱୁଡ୍ଢତୋ ପରିୱତ୍ତୟେ ।
ତମ୍ପି ଚୀୱରକଣ୍ଣେନ, କାୟେନ ନ ଚ ଘଟ୍ଟୟେ ॥
ପୁରତୋ ନେୱ ଥେରାନଂ, ନ୍ହାୟେୟ୍ୟ ନ ପନୂପରି ।
ଉତ୍ତରଂ ଓତରନ୍ତାନଂ, ଦଦେ ମଗ୍ଗଂ, ନ ଘଟ୍ଟୟେ ॥
ୱତ୍ତଂ ଅପରିପୂରେନ୍ତୋ, ନ ସୀଲଂ ପରିପୂରତି ।
ଅସୁଦ୍ଧସୀଲୋ ଦୁପ୍ପଞ୍ଞୋ, ଚିତ୍ତେକଗ୍ଗଂ ନ ୱିନ୍ଦତି ॥
ୱିକ୍ଖିତ୍ତଚିତ୍ତୋନେକଗ୍ଗୋ, ସଦ୍ଧମ୍ମଂ ନ ଚ ପସ୍ସତି ।
ଅପସ୍ସମାନୋ ସଦ୍ଧମ୍ମଂ, ଦୁକ୍ଖା ନ ପରିମୁଚ୍ଚତି ॥
ତସ୍ମା ହି ୱତ୍ତଂ ପୂରେୟ୍ୟ, ଜିନପୁତ୍ତୋ ୱିଚକ୍ଖଣୋ ।
ଓୱାଦଂ ବୁଦ୍ଧସେଟ୍ଠସ୍ସ, କତ୍ୱା ନିବ୍ବାନମେହିତି ॥
ୱତ୍ତକ୍ଖନ୍ଧକକଥା ।
ଭିକ୍ଖୁନିକ୍ଖନ୍ଧକକଥା
କାୟଂ ଊରୁଂ ଥନଂ ୱାପି, ୱିୱରିତ୍ୱାନ ଭିକ୍ଖୁନୀ ।
ଅତ୍ତନୋ ଅଙ୍ଗଜାତଂ ୱା, ଭିକ୍ଖୁସ୍ସ ନ ଚ ଦସ୍ସୟେ ॥
ଭିକ୍ଖୁନା ସହ ୟଂ କିଞ୍ଚି, ସମ୍ପୟୋଜେନ୍ତିୟାପି ଚ ।
ତତୋ ଭାସନ୍ତିୟା ଭିକ୍ଖୁଂ, ହୋତି ଆପତ୍ତି ଦୁକ୍କଟଂ ॥
ନ ଚ ଭିକ୍ଖୁନିୟା ଦୀଘଂ, ଧାରେୟ୍ୟ କାୟବନ୍ଧନଂ ।
ତେନେୱ କାୟବନ୍ଧେନ, ଥନପଟ୍ଟେନ ୱା ପନ ॥
ୱିଲୀୱେନ ଚ ପଟ୍ଟେନ, ଚମ୍ମପଟ୍ଟେନ ୱା ତଥା ।
ଦୁସ୍ସପଟ୍ଟେନ ୱା ଦୁସ୍ସ-ୱେଣିୟା ଦୁସ୍ସୱଟ୍ଟିୟା ॥
ନ ଫାସୁକା ନମେତବ୍ବା, ଦୁକ୍କଟଂ ତୁ ନମେନ୍ତିୟା ।
ନ ଘଂସାପେୟ୍ୟ ସମଣୀ, ଜଘନଂ ଅଟ୍ଠିକାଦିନା ॥
ହତ୍ଥଂ ୱା ହତ୍ଥକୋଚ୍ଛଂ ୱା, ପାଦଂ ୱା ମୁଖମୂରୁକଂ ।
କୋଟ୍ଟାପେତି ସଚେ ତସ୍ସା, ହୋତି ଆପତ୍ତି ଦୁକ୍କଟଂ ॥
ନ ମୁଖଂ ଲିମ୍ପିତବ୍ବଂ ତୁ, ନ ଚୁଣ୍ଣେତବ୍ବମେୱ ଚ ।
ମନୋସିଲାୟ ୱାପତ୍ତି, ମୁଖଂ ଲଞ୍ଜନ୍ତିୟା ସିୟା ॥
ଅଙ୍ଗରାଗୋ ନ କାତବ୍ବୋ, ମୁଖରାଗୋପି ୱା ତଥା ।
ଅୱଙ୍ଗଂ ନ ଚ କାତବ୍ବଂ, ନ କାତବ୍ବଂ ୱିସେସକଂ ॥
ଓଲୋକନକତୋ ରାଗା, ଓଲୋକେତୁଂ ନ ୱଟ୍ଟତି ।
ଠାତବ୍ବଂ ନ ଚ ସାଲୋକେ, ସନଚ୍ଚଂ ନ ଚ କାରୟେ ॥
ଦୁକ୍କଟଂ ମୁନିନା ୱୁତ୍ତଂ, ଗଣିକଂ ୱୁଟ୍ଠପେନ୍ତିୟା ।
ସୁରଂ ୱା ପନ ମଂସଂ ୱା, ପଣ୍ଣଂ ୱା ୱିକ୍କିଣନ୍ତିୟା ॥
ୱଡ୍ଢିଂ ୱାପି ୱଣିଜ୍ଜଂ ୱା, ପୟୋଜେତୁଂ ନ ୱଟ୍ଟତି ।
ତିରୀଟଂ କଞ୍ଚୁକଂ ୱାପି, ୟଦି ଧାରେତି ଦୁକ୍କଟଂ ॥
ଦାସୋ ୱା ପନ ଦାସୀ ୱା, ତଥା କମ୍ମକରୋପି ୱା ।
ନ ଚେୱୁପଟ୍ଠପେତବ୍ବୋ, ତିରଚ୍ଛାନଗତୋପି ୱା ॥
ନ ଚ ଭିକ୍ଖୁନିୟା ସବ୍ବ-ନୀଲାଦିଂ ପନ ଚୀୱରଂ ।
ଧାରେତବ୍ବଂ, ନ ଧାରେୟ୍ୟ, ସବ୍ବଂ ନମତକମ୍ପି ଚ ॥
ପଟିଚ୍ଛନ୍ନାପଟିଚ୍ଛନ୍ନଂ, ଛିନ୍ନଂ ୱାଚ୍ଛିନ୍ନମେୱ ୱା ।
ପୁରିସବ୍ୟଞ୍ଜନଂ ସବ୍ବଂ, ଓଲୋକେତୁଂ ନ ୱଟ୍ଟତି ॥
ଦୂରତୋୱ ଚ ପସ୍ସିତ୍ୱା, ଭିକ୍ଖୁଂ ଭିକ୍ଖୁନିୟା ପନ ।
ମଗ୍ଗୋ ତସ୍ସ ପଦାତବ୍ବୋ, ଓକ୍କମିତ୍ୱାନ ଦୂରତୋ ॥
ଭିକ୍ଖୁଂ ପନ ଚ ପସ୍ସିତ୍ୱା, ପତ୍ତଂ ଭିକ୍ଖଂ ଚରନ୍ତିୟା ।
ନୀହରିତ୍ୱା ତମୁକ୍କୁଜ୍ଜଂ, ଦସ୍ସେତବ୍ବଂ ତୁ ଭିକ୍ଖୁନୋ ॥
ସଂୱେଲ୍ଲିକଞ୍ଚ କାତୁଂ ୱା, ଧାରେତୁଂ କଟିସୁତ୍ତକଂ ।
ଉତୁକାଲେ ଅନୁଞ୍ଞାତଂ, ଉତୁନୀନଂ ମହେସିନା ॥
ଇତ୍ଥିପୋସୟୁତଂ ୟାନଂ, ହତ୍ଥୱଟ୍ଟକମେୱ ୱା ।
ପାଟଙ୍କୀ ଚ ଗିଲାନାୟ, ୱଟ୍ଟତେୱାଭିରୂହିତୁଂ ॥
ଗରୁଧମ୍ମେ ଠିତାୟାପି, ମାନତ୍ତଂ ତୁ ଚରନ୍ତିୟା ।
ସମ୍ମନ୍ନିତ୍ୱା ପଦାତବ୍ବା, ଦୁତିୟା ପନ ଭିକ୍ଖୁନୀ ॥
ୟସ୍ସା ପବ୍ବଜ୍ଜକାଲେ ତୁ, ଗବ୍ଭୋ ୱୁଟ୍ଠାତି ଇତ୍ଥିୟା ।
ପୁତ୍ତୋ ୟଦି ଚ ତସ୍ସାପି, ଦାତବ୍ବା ଦୁତିୟା ତଥା ॥
ମାତା ଲଭତି ପାୟେତୁଂ, ଭୋଜେତୁଂ ପୁତ୍ତମତ୍ତନୋ ।
ମଣ୍ଡେତୁମ୍ପି ଉରେ କତ୍ୱା, ସେତୁଂ ଲଭତି ସା ପନ ॥
ଠପେତ୍ୱା ସହସେୟ୍ୟଂ ତୁ, ତସ୍ମିଂ ଦୁତିୟିକାୟ ହି ।
ପୁରିସେସୁ ୟଥାଞ୍ଞେସୁ, ୱତ୍ତିତବ୍ବଂ ତଥେୱ ଚ ॥
ୱିବ୍ଭମେନେୱ ସା ହୋତି, ୟସ୍ମା ଇଧ ଅଭିକ୍ଖୁନୀ ।
ତସ୍ମା ଭିକ୍ଖୁନିୟା ସିକ୍ଖା-ପଚ୍ଚକ୍ଖାନଂ ନ ୱିଜ୍ଜତି ॥
ୱିବ୍ଭନ୍ତାୟ ୟଥା ତସ୍ସା, ପୁନ ନତ୍ଥୂପସମ୍ପଦା ।
ଗତାୟ ତିତ୍ଥାୟତନଂ, ତଥା ନତ୍ଥୂପସମ୍ପଦା ॥
ଛେଦନଂ ନଖକେସାନଂ, ପୁରିସେହି ଚ ୱନ୍ଦନଂ ।
ୱଣସ୍ସ ପରିକମ୍ମମ୍ପି, ସାଦିତୁଂ ପନ ୱଟ୍ଟତି ॥
ନ ୱଚ୍ଚକୁଟିୟା ୱଚ୍ଚୋ, କାତବ୍ବୋ ୟାୟ କାୟଚି ।
ହେଟ୍ଠାପି ୱିୱଟେ ଉଦ୍ଧଂ, ପଟିଚ୍ଛନ୍ନେପି ୱଟ୍ଟତି ॥
ନ ଚ ୱଟ୍ଟତି ସବ୍ବତ୍ଥ, ପଲ୍ଲଙ୍କେନ ନିସୀଦିତୁଂ ।
ଗିଲାନାୟଡ୍ଢପଲ୍ଲଙ୍କଂ, ୱଟ୍ଟତୀତି ପକାସିତଂ ॥
ନ ଚ ଭିକ୍ଖୁନିୟାରଞ୍ଞେ, ୱତ୍ଥବ୍ବଂ ତୁ କଥଞ୍ଚନ ।
ଅତିତ୍ଥେ ନରତିତ୍ଥେ ୱା, ନ୍ହାୟିତୁଂ ନ ଚ ୱଟ୍ଟତି ॥
ସମଣୀ ଗନ୍ଧଚୁଣ୍ଣେନ, ୟା ଚ ୱାସିତମତ୍ତିୟା ।
ନ୍ହାୟେୟ୍ୟ ପଟିସୋତେ ୱା, ତସ୍ସା ଆପତ୍ତି ଦୁକ୍କଟଂ ॥
‘‘ତ୍ୱଂୟେୱ ପରିଭୁଞ୍ଜା’’ତି, ପରିଭୋଗତ୍ଥମତ୍ତନୋ ।
ଦିନ୍ନଂ ଅଭୁତ୍ୱା ଅଞ୍ଞସ୍ସ, ଦେନ୍ତିୟା ପନ ଦୁକ୍କଟଂ ॥
ସବ୍ବଂ ପଟିଗ୍ଗହାପେତ୍ୱା, ଭିକ୍ଖୂହି ପରିଭୁଞ୍ଜିତୁଂ ।
ଅସନ୍ତେନୁପସମ୍ପନ୍ନେ, ଭିକ୍ଖୁନୀନଂ ତୁ ୱଟ୍ଟତି ॥
ଭିକ୍ଖୁନିକ୍ଖନ୍ଧକକଥା ।
ଇତି ୱିନୟୱିନିଚ୍ଛୟେ ଖନ୍ଧକକଥା ନିଟ୍ଠିତା ।
ଚତୁବ୍ବିଧକମ୍ମକଥା
ଚତ୍ତାରିମାନି କମ୍ମାନି, ଅପଲୋକନସଞ୍ଞିତଂ ।
ଞତ୍ତି ଞତ୍ତିଦୁତିୟଞ୍ଚ, କମ୍ମଂ ଞତ୍ତିଚତୁତ୍ଥକଂ ॥
ଅପଲୋକନକମ୍ମଂ ତୁ, ପଞ୍ଚ ଠାନାନି ଗଚ୍ଛତି ।
ଞତ୍ତିକମ୍ମଂ ନୱଟ୍ଠାନଂ, ଦୁତିୟଂ ସତ୍ତ ଗଚ୍ଛତି ॥
ତଥା ଞତ୍ତିଚତୁତ୍ଥମ୍ପି, ସତ୍ତ ଠାନାନି ଗଚ୍ଛତି ।
ନିସ୍ସାରଣଞ୍ଚ ଓସାରୋ, ଭଣ୍ଡୁକଂ ବ୍ରହ୍ମଦଣ୍ଡକୋ ॥
ଅପଲୋକନକମ୍ମଞ୍ହି, କମ୍ମଲକ୍ଖଣପଞ୍ଚମଂ ।
ନିସ୍ସାରଣଞ୍ଚ ଓସାରଂ, ସମଣୁଦ୍ଦେସତୋ ୱଦେ ॥
ଭଣ୍ଡୁକଂ ପବ୍ବଜନ୍ତେନ, ଛନ୍ନେନ ବ୍ରହ୍ମଦଣ୍ଡକଂ।
ଅଞ୍ଞସ୍ସପି ଚ କାତବ୍ବୋ, ତଥାରୂପସ୍ସ ଭିକ୍ଖୁନୋ ॥
ସବ୍ବୋ ସନ୍ନିପତିତ୍ୱାନ, ଆପୁଚ୍ଛିତ୍ୱାନ ସବ୍ବସୋ ।
ଚୀୱରାଦିପରିକ୍ଖାରଂ, ସଙ୍ଘୋ ୟଂ ଦେତି ତସ୍ସ ହି ॥
ତିକ୍ଖତ୍ତୁଂ ଅପଲୋକେତ୍ୱା, ଭିକ୍ଖୂନଂ ରୁଚିୟା ପନ ।
ଏୱଂ ସଙ୍ଘସ୍ସ ଦାନଂ ତୁ, ହୋତି ତଂ କମ୍ମଲକ୍ଖଣଂ॥
ନିସ୍ସାରଣମଥୋସାରୋ, ଉପୋସଥପୱାରଣା ।
ସମ୍ମୁତି ଚେୱ ଦାନଞ୍ଚ, ପଟିଗ୍ଗାହୋ ଚ ସତ୍ତମୋ ॥
ପଚ୍ଚୁକ୍କଡ୍ଢନତା ଚେୱ, ଅଟ୍ଠମୀ ପରିକିତ୍ତିତା ।
କମ୍ମସ୍ସ ଲକ୍ଖଣଞ୍ଚାତି, ନୱ ଠାନାନି ଞତ୍ତିୟା ॥
ୱିନିଚ୍ଛୟେ ଅସମ୍ପତ୍ତେ, ଥେରସ୍ସାୱିନୟଞ୍ଞୁନୋ ।
ତସ୍ସ ନିସ୍ସାରଣା ୱୁତ୍ତା, ୟା ସା ନିସ୍ସାରଣାତି ହି ॥
ଉପସମ୍ପଦାପେକ୍ଖସ୍ସ, ଆଗଚ୍ଛୋସାରଣାତି ସା ।
ଉପୋସଥୱସେନାପି, ପୱାରଣୱସେନପି ॥
ଞତ୍ତିୟା ଠପିତତ୍ତା ହି, ଞତ୍ତିକମ୍ମାନିମେ ଦୁୱେ ।
‘‘ଉପସମ୍ପଦାପେକ୍ଖଞ୍ହି, ଅନୁସାସେୟ୍ୟହ’’ନ୍ତି ଚ ॥
‘‘ଇତ୍ଥନ୍ନାମମହଂ ଭିକ୍ଖୁଂ, ପୁଚ୍ଛେୟ୍ୟଂ ୱିନୟ’’ନ୍ତି ଚ ।
ଏୱମାଦିପୱତ୍ତା ହି, ଏଦିସା ଞତ୍ତି ସମ୍ମୁତି॥
ନିସ୍ସଟ୍ଠଚୀୱରାଦୀନଂ, ଦାନଂ ‘‘ଦାନ’’ନ୍ତି ୱୁଚ୍ଚତି ।
ଆପତ୍ତୀନଂ ପଟିଗ୍ଗାହୋ, ‘‘ପଟିଗ୍ଗାହୋ’’ତି ୱୁଚ୍ଚତି ॥
ପଚ୍ଚୁକ୍କଡ୍ଢନତା ନାମ, ପୱାରୁକ୍କଡ୍ଢନା ମତା ।
‘‘ଇମଂ ଉପୋସଥଂ କତ୍ୱା, କାଲେ ପୱାରୟାମି’’ତି ॥
ତିଣୱତ୍ଥାରକେ ସବ୍ବ-ପଠମା ଞତ୍ତି ଚେତରା ।
କମ୍ମଲକ୍ଖଣମେତନ୍ତି, ନୱ ଠାନାନି ଞତ୍ତିୟା ॥
ଞତ୍ତିଦୁତିୟକମ୍ମମ୍ପି, ସତ୍ତ ଠାନାନି ଗଚ୍ଛତି ।
ନିସ୍ସାରଣମଥୋସାରଂ, ସମ୍ମୁତିଂ ଦାନମେୱ ଚ ॥
ଉଦ୍ଧାରଂ ଦେସନଂ କମ୍ମ-ଲକ୍ଖଣଂ ପନ ସତ୍ତମଂ ।
ପତ୍ତନିକ୍କୁଜ୍ଜନାଦୀ ତୁ, ନିସ୍ସାରୋସାରଣା ମତା ॥
ସମ୍ମୁତି ନାମ ସୀମାଦି, ସା ପଞ୍ଚଦସଧା ମତା ।
ଦାନଂ କଥିନୱତ୍ଥସ୍ସ, ଦାନଂ ମତକୱାସସୋ ॥
କଥିନସ୍ସନ୍ତରୁବ୍ଭାରୋ, ‘‘ଉବ୍ଭାରୋ’’ତି ପୱୁଚ୍ଚତି ।
ଦେସନା କୁଟିୱତ୍ଥୁସ୍ସ, ୱିହାରସ୍ସ ଚ ୱତ୍ଥୁନୋ ॥
ତିଣୱତ୍ଥାରକମ୍ମେ ଚ, ମୋହାରୋପନତାଦିସୁ ।
କମ୍ମୱାଚାୱସେନେତ୍ଥ, କମ୍ମଲକ୍ଖଣତା ମତା ॥
ଇତି ଞତ୍ତିଦୁତିୟସ୍ସ, ଇମେ ସତ୍ତ ପକାସିତା ।
ତଥା ଞତ୍ତିଚତୁତ୍ଥମ୍ପି, ସତ୍ତ ଠାନାନି ଗଚ୍ଛତି ॥
ନିସ୍ସାରଣମଥୋସାରଂ, ସମ୍ମୁତିଂ ଦାନନିଗ୍ଗହଂ ।
ସମନୁଭାସନଞ୍ଚେୱ, ସତ୍ତମଂ କମ୍ମଲକ୍ଖଣଂ ॥
ସତ୍ତନ୍ନଂ ତଜ୍ଜନାଦୀନଂ, କମ୍ମାନଂ କରଣଂ ପନ ।
ନିସ୍ସାରଣାଥ ପସ୍ସଦ୍ଧି, ତେସଂ ଓସାରଣା ମତା ॥
ଓୱାଦୋ ଭିକ୍ଖୁନୀନଂ ତୁ, ସମ୍ମୁତୀତି ପକାସିତା ।
ମାନତ୍ତପରିୱାସାନଂ, ଦାନଂ ‘‘ଦାନ’’ନ୍ତି ୱୁଚ୍ଚତି ॥
ପୁନ ମୂଲାପଟିକ୍କସ୍ସୋ, ‘‘ନିଗ୍ଗହୋ’’ତି ପୱୁଚ୍ଚତି ।
ଉକ୍ଖିତ୍ତସ୍ସାନୁୱତ୍ତିକା, ଅଟ୍ଠ ୟାୱତତୀୟକା ॥
ଅରିଟ୍ଠୋ ଚଣ୍ଡକାଳୀ ଚ, ଏକାଦସ ଭୱନ୍ତିମେ ।
ଇମେସଂ ତୁ ୱସା ଞେୟ୍ୟା, ଦସେକା ସମନୁଭାସନା॥
ଉପସମ୍ପଦକମ୍ମଞ୍ଚ, କମ୍ମମବ୍ଭାନସଞ୍ଞିତଂ ।
ଇଦଂ ଞତ୍ତିଚତୁତ୍ଥେ ତୁ, ସତ୍ତମଂ କମ୍ମଲକ୍ଖଣଂ॥
ଅପଲୋକନକମ୍ମଞ୍ଚା-ପଲୋକେତ୍ୱାୱ କାରୟେ ।
ଞତ୍ତିୟା ଦୁତିୟେନାପି, ଚତୁତ୍ଥେନ ନ କାରୟେ ॥
ଞତ୍ତିଦୁତିୟକମ୍ମାନି, ଲହୁକାନତ୍ଥି କାନିଚି ।
କାତବ୍ବାନପଲୋକେତ୍ୱା, ସବ୍ବା ସମ୍ମୁତିୟୋ ସିୟୁଂ ॥
ସେସାନି ଅପଲୋକେତ୍ୱା, କାତୁଂ ପନ ନ ୱଟ୍ଟତି ।
ୟଥାୱୁତ୍ତନୟେନେୱ, ତେନ ତେନେୱ କାରୟେ ॥
ଚତୁବ୍ବିଧକମ୍ମକଥା ।
କମ୍ମୱିପତ୍ତିକଥା
ୱତ୍ଥୁତୋ ଞତ୍ତିତୋ ଚେୱ, ଅନୁସ୍ସାୱନସୀମତୋ ।
ପରିସତୋତି ପଞ୍ଚେୱ, କମ୍ମଦୋସା ପକାସିତା ॥
ସମ୍ମୁଖାକରଣୀୟଂ ୟଂ, ତଂ କରୋତି ଅସମ୍ମୁଖା ।
କମ୍ମଂ ୱତ୍ଥୁୱିପନ୍ନଂ ତଂ, ଅଧମ୍ମନ୍ତି ପୱୁଚ୍ଚତି ॥
ଅସମ୍ମୁଖାକରଣୀୟାନି, ଅଟ୍ଠେୱ ଚ ଭୱନ୍ତି ହି ।
ପତ୍ତନିକ୍କୁଜ୍ଜନଞ୍ଚେୱ, ପତ୍ତସ୍ସୁକ୍କୁଜ୍ଜନମ୍ପି ଚ ॥
ପକାସନୀୟକମ୍ମଞ୍ଚ, ସେକ୍ଖଉମ୍ମତ୍ତସମ୍ମୁତି ।
ଅୱନ୍ଦିୟୋ ତଥା ବ୍ରହ୍ମ-ଦଣ୍ଡୋ ଦୂତୂପସମ୍ପଦା ॥
ଇମାନଟ୍ଠ ଠପେତ୍ୱାନ, ସେସାନି ପନ ସବ୍ବସୋ ।
ସମ୍ମୁଖାକରଣୀୟାନି, କମ୍ମାନି ସୁଗତୋବ୍ରୱି ॥
ଞତ୍ତିତୋ ପନ ପଞ୍ଚେୱ, ୱିପଜ୍ଜନନୟା ମତା ।
ନ ପରାମସତି ୱତ୍ଥୁଞ୍ଚ, ସଙ୍ଘଂ ପୁଗ୍ଗଲମେୱ ୱା ॥
ନ ପରାମସତି ଞତ୍ତିଂ ୱା, ପଚ୍ଛା ଞତ୍ତିଂ ଠପେତି ୱା ।
ପଞ୍ଚହେତେହି କମ୍ମାନି, ଞତ୍ତିତୋୱ ୱିପଜ୍ଜରେ ॥
ଅନୁସ୍ସାୱନତୋ ପଞ୍ଚ, କମ୍ମଦୋସା ପକାସିତା ।
ନ ପରାମସତି ୱତ୍ଥୁଂ ୱା, ସଙ୍ଘଂ ପୁଗ୍ଗଲମେୱ ୱା ॥
ହାପେତି ସାୱନଂ ୱାପି, ସାୱେତସମୟେପି ୱା ।
ଏୱଂ ପନ ୱିପଜ୍ଜନ୍ତି, ଅନୁସ୍ସାୱନତୋପି ଚ ॥
ଏକାଦସହି ସୀମାହି, ସୀମତୋ କମ୍ମଦୋସତା ।
ୱୁତ୍ତା ଉପୋସଥେ ତାୱ, ଖନ୍ଧକେ ସବ୍ବସୋ ମୟା ॥
ଚତୁୱଗ୍ଗେନ କାତବ୍ବେ, କମ୍ମପ୍ପତ୍ତା ଅନାଗତା ।
ଛନ୍ଦୋ ଚ ନ ପନାନୀତୋ, ପଟିକ୍କୋସନ୍ତି ସମ୍ମୁଖା ॥
ଏୱଂ ତିୱଙ୍ଗିକୋ ଦୋସୋ, ପରିସାୟ ୱସା ସିୟା ।
ଆଗତା କମ୍ମପତ୍ତା ଚ, ଛନ୍ଦୋ ଚ ନ ପନାଗତୋ ॥
ସମ୍ମୁଖା ପଟିସେଧେନ୍ତି, ଦୁତିୟେ ଚତୁୱଗ୍ଗିକେ ।
ଆଗତା କମ୍ମପତ୍ତା ଚ, ଛନ୍ଦୋପି ଚ ସମାହଟୋ ॥
ପଟିକ୍କୋସୋୱ ଏତ୍ଥତ୍ଥି, ତତିୟେ ଚତୁୱଗ୍ଗିକେ ।
ଏୱଂ ପଞ୍ଚାଦିୱଗ୍ଗେସୁ, ସଙ୍ଘେସୁ ତିୱିଧେସୁପି ॥
ଚତୁତ୍ଥିକା ସିୟୁଂ ଦୋସା, ଦସ ଦ୍ୱେ ପରିସାୱସା ।
ଏୱଂ ଦ୍ୱାଦସଧା ଏତ୍ଥ, କମ୍ମାନି ହି ୱିପଜ୍ଜରେ ॥
କମ୍ମୱିପତ୍ତିକଥା ।
ସେଦମୋଚନକଥା
କ.
ସୋଳସପରିୱାରସ୍ସ, ପରିୱାରସ୍ସ ସାଦରା ।
ସୁଣାଥ ନିପୁଣେ ପଞ୍ହେ, ଗୂଳ୍ହତ୍ଥେ ଭଣତୋ ମମ ॥
ଖ.
ଦିୱାପଜ୍ଜତି ନୋ ରତ୍ତିଂ, ରତ୍ତିଂୟେୱ ଚ ନୋ ଦିୱା ।
କଥଞ୍ଚ ପଟିଗ୍ଗଣ୍ହନ୍ତୋ, ନ ଗଣ୍ହନ୍ତୋ କଥଂ ପନ ॥
ଗ.
ଛିନ୍ଦନ୍ତସ୍ସ ସିୟାପତ୍ତି, ତଥେୱାଛିନ୍ଦତୋପି ଚ ।
ଛାଦେନ୍ତସ୍ସ ତଥାପତ୍ତି-ନ ଛାଦେନ୍ତସ୍ସ ଭିକ୍ଖୁନୋ ॥
ଘ.
କା ଚାପତ୍ତି ସମାପତ୍ତି-ଲାଭିନୋୟେୱ ଭିକ୍ଖୁନୋ ।
ଅସମାପତ୍ତିଲାଭିସ୍ସ, କା ଚ ନାମସ୍ସ ସା ଭୱେ ॥
ଙ.
ଗରୁକଂ ଭଣତୋ ସଚ୍ଚଂ, ଅଲିକଂ ଭଣତୋ ସିୟୁଂ ।
ଲହୁଂ ସଚ୍ଚଂ ଭଣନ୍ତସ୍ସ, ମୁସା ଚ ଭଣତୋ ଗରୁଂ ॥
ଚ.
ପୱିସନ୍ତୋ ଚ ଆରାମଂ, ଆପଜ୍ଜତି ନ ନିକ୍ଖମଂ ।
ନିକ୍ଖମନ୍ତୋୱ ଆପତ୍ତି, ନ ଚେୱ ପୱିସଂ ପନ ।
ଛ.
ସମାଦିୟନ୍ତୋ ଅସମାଦିୟନ୍ତୋ ।
ଅନାଦିୟନ୍ତୋପି ଚ ଆଦିୟନ୍ତୋ ।
ଦେନ୍ତୋ ଅଦେନ୍ତୋପି ସିୟା ସଦୋସୋ ।
ତଥା କରୋନ୍ତୋପି ଚ ନୋ କରୋନ୍ତୋ ॥
ଜ.
ଆପଜ୍ଜତି ଚ ଧାରେନ୍ତୋ, ଅଧାରେନ୍ତୋ ତଥେୱ ଚ ।
ଦ୍ୱିନ୍ନଂ ମାତା ପିତା ସାୱ, କଥଂ ହୋତି ? ଭଣାହି ମେ ॥
ଝ.
ଉଭତୋବ୍ୟଞ୍ଜନା ଇତ୍ଥୀ, ଗବ୍ଭଂ ଗଣ୍ହାତି ଅତ୍ତନା ।
ଗଣ୍ହାପେତି ପରଂ ଗବ୍ଭଂ, ତସ୍ମା ମାତାପିତା ଚ ସା ॥
ଞ.
ଗାମେ ୱା ୟଦି ୱାରଞ୍ଞେ, ୟଂ ପରେସଂ ମମାୟିତଂ ।
ନ ହରନ୍ତୋୱ ତଂ ଥେୟ୍ୟା, କଥଂ ପାରାଜିକୋ ଭୱେ ।
ଟ.
ଥେୟ୍ୟସଂୱାସକୋ ଏସୋ, ଲିଙ୍ଗସଂୱାସଥେନକୋ ।
ପରଭଣ୍ଡଂ ଅଗଣ୍ହନ୍ତୋ, ତେନ ହୋତି ପରାଜିତୋ ॥
ଠ.
ନାରିଂ ରୂପୱତିଂ ଭିକ୍ଖୁ, ରତ୍ତଚିତ୍ତୋ ଅସଞ୍ଞତୋ ।
ମେଥୁନଂ ତାୟ କତ୍ୱାପି, ନ ସୋ ପାରାଜିକୋ କଥଂ ।
ଡ.
ଅଚ୍ଛରାସଦିସଂ ନାରିଂ, ସୁପିନନ୍ତେନ ପସ୍ସତି ।
ତାୟ ମେଥୁନସଂୟୋଗେ, କତେପି ନ ଭୱିସ୍ସତି ॥
ଢ.
ବହିଦ୍ଧା ଗେହତୋ ଭିକ୍ଖୁ, ଇତ୍ଥୀ ଗବ୍ଭନ୍ତରଂ ଗତା ।
ଛିଦ୍ଦଂ ଗେହସ୍ସ ନେୱତ୍ଥି, କଥଂ ମେଥୁନତୋ ଚୁତୋ ।
ଣ.
ଅନ୍ତୋଦୁସ୍ସକୁଟିଟ୍ଠେନ, ମାତୁଗାମେନ ମେଥୁନଂ ।
ସନ୍ଥତାଦିୱସେନେୱ, କତ୍ୱା ହୋତି ପରାଜିତୋ ॥
ତ.
ସୁତ୍ତେ ଚ ୱିନୟେୟେୱ, ଖନ୍ଧକେ ସାନୁଲୋମିକେ ।
ସବ୍ବତ୍ଥ ନିପୁଣା ଧୀରା, ଇମେ ପଞ୍ହେ ଭଣନ୍ତି ତେ ॥
ଥ.
ଖନ୍ଧକେ ପରିୱାରେ ଚ, ୱିନୟେ ସାନୁଲୋମିକେ ।
ଆଦରୋ କରଣୀୟୋୱ, ପଟୁଭାୱଂ ପନିଚ୍ଛିତା ॥
ସେଦମୋଚନକଥା ।
ପକିଣ୍ଣକୱିନିଚ୍ଛୟକଥା
ଛତ୍ତଂ ପଣ୍ଣମୟଂ କିଞ୍ଚି, ବହି ଅନ୍ତୋ ଚ ସବ୍ବସୋ ।
ପଞ୍ଚୱଣ୍ଣେନ ସୁତ୍ତେନ, ସିବ୍ବିତୁଂ ନ ଚ ୱଟ୍ଟତି ॥
ଛିନ୍ଦିତୁଂ ଅଡ୍ଢଚନ୍ଦଂ ୱା, ପଣ୍ଣେ ମକରଦନ୍ତକଂ ।
ଘଟକଂ ୱାଳରୂପଂ ୱା, ଲେଖା ଦଣ୍ଡେ ନ ୱଟ୍ଟତି ॥
ସିବ୍ବିତୁଂ ଏକୱଣ୍ଣେନ, ଛତ୍ତଂ ସୁତ୍ତେନ ୱଟ୍ଟତି ।
ଥିରତ୍ଥଂ, ପଞ୍ଚୱଣ୍ଣାନଂ, ପଞ୍ଜରଂ ୱା ୱିନନ୍ଧିତୁଂ ॥
ଘଟକଂ ୱାଳରୂପଂ ୱା, ଲେଖା ୱା ପନ କେୱଲା ।
ଭିନ୍ଦିତ୍ୱା ୱାପି ଘଂସିତ୍ୱା, ଧାରେତୁଂ ପନ ୱଟ୍ଟତି ॥
ଅହିଛତ୍ତକସଣ୍ଠାନଂ, ଦଣ୍ଡବୁନ୍ଦମ୍ହି ୱଟ୍ଟତି ।
ଉକ୍କିରିତ୍ୱା କତା ଲେଖା, ବନ୍ଧନତ୍ଥାୟ ୱଟ୍ଟତି ॥
ନାନାୱଣ୍ଣେହି ସୁତ୍ତେହି, ମଣ୍ଡନତ୍ଥାୟ ଚୀୱରଂ ।
ସମଂ ସତପଦାଦୀନଂ, ସିବ୍ବିତୁଂ ନ ଚ ୱଟ୍ଟତି ॥
ପତ୍ତସ୍ସ ପରିୟନ୍ତେ ୱା, ତଥା ପତ୍ତମୁଖେପି ୱା ।
ୱେଣିଂ ସଙ୍ଖଲିକଂ ୱାପି, କରୋତୋ ହୋତି ଦୁକ୍କଟଂ ॥
ପଟ୍ଟମ୍ପି ଗଣ୍ଠିପାସାନଂ, ଅଟ୍ଠକୋଣାଦିକଂୱିଧିଂ ।
ତତ୍ଥଗ୍ଘିୟଗଦାରୂପଂ, ମୁଗ୍ଗରାଦିଂ କରୋନ୍ତି ଚ ॥
ତତ୍ଥ କକ୍କଟକକ୍ଖୀନି, ଉଟ୍ଠାପେନ୍ତି ନ ୱଟ୍ଟତି ।
ସୁତ୍ତା ଚ ପିଳକା ତତ୍ଥ, ଦୁୱିଞ୍ଞେୟ୍ୟାୱ ଦୀପିତା ॥
ଚତୁକୋଣାୱ ୱଟ୍ଟନ୍ତି, ଗଣ୍ଠିପାସକପଟ୍ଟକା ।
କଣ୍ଣକୋଣେସୁ ସୁତ୍ତାନି, ରତ୍ତେ ଛିନ୍ଦେୟ୍ୟ ଚୀୱରେ ॥
ସୂଚିକମ୍ମୱିକାରଂ ୱା, ଅଞ୍ଞଂ ୱା ପନ କିଞ୍ଚିପି ।
ଚୀୱରେ ଭିକ୍ଖୁନା କାତୁଂ, କାରାପେତୁଂ ନ ୱଟ୍ଟତି ॥
ୟୋ ଚ ପକ୍ଖିପତି ଭିକ୍ଖୁ ଚୀୱରଂ ।
କଞ୍ଜିପିଟ୍ଠଖଲିଅଲ୍ଲିକାଦିସୁ ।
ୱଣ୍ଣମଟ୍ଠମଭିପତ୍ଥୟଂ ପରଂ ।
ତସ୍ସ ନତ୍ଥି ପନ ମୁତ୍ତି ଦୁକ୍କଟା ॥
ସୂଚିହତ୍ଥମଲାଦୀନଂ, କରଣେ ଚୀୱରସ୍ସ ଚ ।
ତଥା କିଲିଟ୍ଠକାଲେ ଚ, ଧୋୱନତ୍ଥଂ ତୁ ୱଟ୍ଟତି ॥
ରଜନେ ପନ ଗନ୍ଧଂ ୱା, ତେଲଂ ୱା ଲାଖମେୱ ୱା ।
କିଞ୍ଚି ପକ୍ଖିପିତୁଂ ତତ୍ଥ, ଭିକ୍ଖୁନୋ ନ ଚ ୱଟ୍ଟତି ॥
ସଙ୍ଖେନ ମଣିନା ୱାପି, ଅଞ୍ଞେନପି ଚ କେନଚି ।
ଚୀୱରଂ ନ ଚ ଘଟ୍ଟେୟ୍ୟ, ଘଂସିତବ୍ବଂ ନ ଦୋଣିୟା ॥
ଚୀୱରଂ ଦୋଣିୟଂ କତ୍ୱା, ନାପି ଘଟ୍ଟେୟ୍ୟ ମୁଟ୍ଠିନା ।
ରତ୍ତଂ ପହରିତୁଂ କିଞ୍ଚି, ହତ୍ଥେହେୱ ଚ ୱଟ୍ଟତି ॥
ଗଣ୍ଠିକେ ପନ ଲେଖା ୱା, ପିଳକା ୱା ନ ୱଟ୍ଟତି ।
କପ୍ପବିନ୍ଦୁୱିକାରୋ ୱା, ପାଳିକଣ୍ଣିକଭେଦତୋ ॥
ଥାଲକସ୍ସ ଚ ପତ୍ତସ୍ସ, ବହି ଅନ୍ତୋପି ୱା ପନ ।
ଆରଗ୍ଗେନ କତା ଲେଖା, ନ ଚ ୱଟ୍ଟତି କାଚିପି ॥
ଆରୋପେତ୍ୱା ଭମଂ ପତ୍ତଂ, ମଜ୍ଜିତ୍ୱା ଚେ ପଚନ୍ତି ଚ ।
‘‘ମଣିୱଣ୍ଣଂ କରିସ୍ସାମ’’, ଇତି କାତୁଂ ନ ୱଟ୍ଟତି ॥
ପତ୍ତମଣ୍ଡଲକେ କିଞ୍ଚି, ଭିତ୍ତିକମ୍ମଂ ନ ୱଟ୍ଟତି ।
ନ ଦୋସୋ କୋଚି ତତ୍ଥସ୍ସ, କାତୁଂ ମକରଦନ୍ତକଂ ॥
ନ ଧମ୍ମକରଣଚ୍ଛତ୍ତେ, ଲେଖା କାଚିପି ୱଟ୍ଟତି ।
କୁଚ୍ଛିୟଂ ୱା ଠପେତ୍ୱା ତଂ, ଲେଖଂ ତୁ ମୁଖୱଟ୍ଟିୟଂ ॥
ସୁତ୍ତଂ ୱା ଦିଗୁଣଂ କତ୍ୱା, କୋଟ୍ଟେନ୍ତି ଚ ତହିଂ ତହିଂ ।
କାୟବନ୍ଧନସୋଭତ୍ଥଂ, ତଂ ନ ୱଟ୍ଟତି ଭିକ୍ଖୁନୋ ॥
ଦସାମୁଖେ ଦଳ୍ହତ୍ଥାୟ, ଦ୍ୱୀସୁ ଅନ୍ତେସୁ ୱଟ୍ଟତି ।
ମାଲାକମ୍ମଲତାକମ୍ମ-ଚିତ୍ତିକମ୍ପି ନ ୱଟ୍ଟତି ॥
ଅକ୍ଖୀନି ତତ୍ଥ ଦସ୍ସେତ୍ୱା, କୋଟ୍ଟିତେ ପନ କା କଥା ।
କକ୍କଟକ୍ଖୀନି ୱା ତତ୍ଥ, ଉଟ୍ଠାପେତୁଂ ନ ୱଟ୍ଟତି ॥
ଘଟଂ ଦେଡ୍ଡୁଭସୀସଂ ୱା, ମକରସ୍ସ ମୁଖମ୍ପି ୱା ।
ୱିକାରରୂପଂ ୟଂ କିଞ୍ଚି, ନ ୱଟ୍ଟତି ଦସାମୁଖେ ॥
ଉଜୁକଂ ମଚ୍ଛକଣ୍ଟଂ ୱା, ମଟ୍ଠଂ ୱା ପନ ପଟ୍ଟିକଂ ।
ଖଜ୍ଜୂରିପତ୍ତକାକାରଂ, କତ୍ୱା ୱଟ୍ଟତି କୋଟ୍ଟିତଂ ॥
ପଟ୍ଟିକା ସୂକରନ୍ତନ୍ତି, ଦୁୱିଧଂ କାୟବନ୍ଧନଂ ।
ରଜ୍ଜୁକା ଦୁସ୍ସପଟ୍ଟାଦି, ସବ୍ବଂ ତସ୍ସାନୁଲୋମିକଂ ॥
ମୁରଜଂ ମଦ୍ଦୱୀଣଞ୍ଚ, ଦେଡ୍ଡୁଭଞ୍ଚ କଲାବୁକଂ ।
ରଜ୍ଜୁୟୋ ନ ଚ ୱଟ୍ଟନ୍ତି, ପୁରିମା ଦ୍ୱେଦସା ସିୟୁଂ ॥
ଦସା ପାମଙ୍ଗସଣ୍ଠାନା, ନିଦ୍ଦିଟ୍ଠା କାୟବନ୍ଧନେ ।
ଏକା ଦ୍ୱିତିଚତସ୍ସୋ ୱା, ୱଟ୍ଟନ୍ତି ନ ତତୋ ପରଂ ॥
ଏକରଜ୍ଜୁମୟଂ ୱୁତ୍ତଂ, ମୁନିନା କାୟବନ୍ଧନଂ ।
ତଞ୍ଚ ପାମଙ୍ଗସଣ୍ଠାନଂ, ଏକମ୍ପି ଚ ନ ୱଟ୍ଟତି ॥
ରଜ୍ଜୁକେ ଏକତୋ କତ୍ୱା, ବହୂ ଏକାୟ ରଜ୍ଜୁୟା ।
ନିରନ୍ତରଞ୍ହି ୱେଠେତ୍ୱା, କତଂ ୱଟ୍ଟତି ବନ୍ଧିତୁଂ ॥
ଦନ୍ତକଟ୍ଠୱିସାଣଟ୍ଠି-ଲୋହୱେଳୁନଳବ୍ଭୱା ।
ଜତୁସଙ୍ଖମୟାସୁତ୍ତ-ଫଲଜା ୱିଧକା ମତା ॥
କାୟବନ୍ଧନୱିଧେପି, ୱିକାରୋ ନ ଚ ୱଟ୍ଟତି ।
ତତ୍ଥ ତତ୍ଥ ପରିଚ୍ଛେଦ-ଲେଖାମତ୍ତଂ ତୁ ୱଟ୍ଟତି ॥
ମାଲାକମ୍ମଲତାକମ୍ମ-ନାନାରୂପୱିଚିତ୍ତିତା।
ନ ଚ ୱଟ୍ଟତି ଭିକ୍ଖୂନଂ, ଅଞ୍ଜନୀ ଜନରଞ୍ଜନୀ ॥
ତାଦିସଂ ପନ ଘଂସିତ୍ୱା, ୱେଠେତ୍ୱା ସୁତ୍ତକେନ ୱା ।
ୱଳଞ୍ଜନ୍ତସ୍ସ ଭିକ୍ଖୁସ୍ସ, ନ ଦୋସୋ କୋଚି ୱିଜ୍ଜତି ॥
ୱଟ୍ଟା ୱା ଚତୁରସ୍ସା ୱା, ଅଟ୍ଠଂସା ୱାପି ଅଞ୍ଜନୀ ।
ୱଟ୍ଟତେୱାତି ନିଦ୍ଦିଟ୍ଠା, ୱଣ୍ଣମଟ୍ଠା ନ ୱଟ୍ଟତି ॥
ତଥାଞ୍ଜନିସଲାକାପି, ଅଞ୍ଜନିଥୱିକାୟ ଚ ।
ନାନାୱଣ୍ଣେହି ସୁତ୍ତେହି, ଚିତ୍ତକମ୍ମଂ ନ ୱଟ୍ଟତି ॥
ଏକୱଣ୍ଣେନ ସୁତ୍ତେନ, ସିପାଟିଂ ୟେନ କେନଚି ।
ୟଂ କିଞ୍ଚି ପନ ସିବ୍ବେତ୍ୱା, ୱଳଞ୍ଜନ୍ତସ୍ସ ୱଟ୍ଟତି ॥
ମଣିକଂ ପିଳକଂ ୱାପି, ପିପ୍ଫଲେ ଆରକଣ୍ଟକେ ।
ଠପେତୁଂ ପନ ୟଂ କିଞ୍ଚି, ନ ଚ ୱଟ୍ଟତି ଭିକ୍ଖୁନୋ ॥
ଦଣ୍ଡକେପି ପରିଚ୍ଛେଦ-ଲେଖାମତ୍ତଂ ତୁ ୱଟ୍ଟତି ।
ୱଲିତ୍ୱା ଚ ନଖଚ୍ଛେଦଂ, କରୋନ୍ତୀତି ହି ୱଟ୍ଟତି ॥
ଉତ୍ତରାରଣିୟଂ ୱାପି, ଧନୁକେ ପେଲ୍ଲଦଣ୍ଡକେ ।
ମାଲାକମ୍ମାଦି ୟଂ କିଞ୍ଚି, ୱଣ୍ଣମଟ୍ଠଂ ନ ୱଟ୍ଟତି ॥
ସଣ୍ଡାସେ ଦନ୍ତକଟ୍ଠାନଂ, ତଥା ଛେଦନୱାସିୟା ।
ଦ୍ୱୀସୁ ପସ୍ସେସୁ ଲୋହେନ, ବନ୍ଧିତୁଂ ପନ ୱଟ୍ଟତି ॥
ତଥା କତ୍ତରଦଣ୍ଡେପି, ଚିତ୍ତକମ୍ମଂ ନ ୱଟ୍ଟତି ।
ୱଟ୍ଟଲେଖାୱ ୱଟ୍ଟନ୍ତି, ଏକା ୱା ଦ୍ୱେପି ହେଟ୍ଠତୋ ॥
ୱିସାଣେ ନାଳିୟଂ ୱାପି, ତଥେୱାମଣ୍ଡସାରକେ ।
ତେଲଭାଜନକେ ସବ୍ବଂ, ୱଣ୍ଣମଟ୍ଠଂ ତୁ ୱଟ୍ଟତି ॥
ପାନୀୟସ୍ସ ଉଳୁଙ୍କେପି, ଦୋଣିୟଂ ରଜନସ୍ସପି ।
ଘଟେ ଫଲକପୀଠେପି, ୱଲୟାଧାରକାଦିକେ ॥
ତଥା ପତ୍ତପିଧାନେ ଚ, ତାଲୱଣ୍ଟେ ଚ ବୀଜନେ ।
ପାଦପୁଞ୍ଛନିୟଂ ୱାପି, ସମ୍ମୁଞ୍ଜନିୟମେୱ ଚ ॥
ମଞ୍ଚେ ଭୂମତ୍ଥରେ ପୀଠେ, ଭିସିବିମ୍ବୋହନେସୁ ଚ ।
ମାଲାକମ୍ମାଦିକଂ ଚିତ୍ତଂ, ସବ୍ବମେୱ ଚ ୱଟ୍ଟତି ॥
ନାନାମଣିମୟତ୍ଥମ୍ଭ-କୱାଟଦ୍ୱାରଭିତ୍ତିକଂ।
ସେନାସନମନୁଞ୍ଞାତଂ, କା କଥା ୱଣ୍ଣମଟ୍ଠକେ ॥
ସୁୱଣ୍ଣନାନାମଣିଭିତ୍ତିଭୂମିଂ ।
ନ କିଞ୍ଚି ଏକମ୍ପି ନିସେଧନୀୟଂ ।
ସେନାସନଂ ୱଟ୍ଟତି ସବ୍ବମେୱ ॥
ବୁଦ୍ଧଂ ଧମ୍ମଞ୍ଚ ସଙ୍ଘଞ୍ଚ, ନ ଉଦ୍ଦିସ୍ସ ଦୱଂ କରେ ।
ମୂଗବ୍ବତାଦିକଂ ନେୱ, ଗଣ୍ହେୟ୍ୟ ତିତ୍ଥିୟବ୍ବତଂ ॥
କାୟଂ ୱା ଅଙ୍ଗଜାତଂ ୱା, ଊରୁଂ ୱା ନ ତୁ ଦସ୍ସୟେ ।
ଭିକ୍ଖୁନୀନଂ ତୁ ତା ୱାପି, ନ ସିଞ୍ଚେ ଉଦକାଦିନା ॥
ୱସ୍ସମଞ୍ଞତ୍ଥ ୱୁଟ୍ଠୋ ଚେ, ଭାଗମଞ୍ଞତ୍ଥ ଗଣ୍ହତି ।
ଦୁକ୍କଟଂ ପୁନ ଦାତବ୍ବଂ, ଗୀୱା ନଟ୍ଠେପି ଜଜ୍ଜରେ ॥
ଚୋଦିତୋ ସୋ ସଚେ ତେହି, ଭିକ୍ଖୂହି ନ ଦଦେୟ୍ୟତଂ ।
ଧୁରନିକ୍ଖେପନେ ତେସଂ, ଭଣ୍ଡଗ୍ଘେନେୱ କାରୟେ ॥
ଅକପ୍ପିୟସମାଦାନଂ, କରୋତୋ ହୋତି ଦୁକ୍କଟଂ ।
ଦୱା ସିଲଂ ପୱିଜ୍ଝନ୍ତୋ, ଦୁକ୍କଟା ନ ଚ ମୁଚ୍ଚତି ॥
ଗିହୀଗୋପକଦାନସ୍ମିଂ, ନ ଦୋସୋ କୋଚି ଗଣ୍ହତୋ ।
ପରିଚ୍ଛେଦନୟୋ ୱୁତ୍ତୋ, ସଙ୍ଘଚେତିୟସନ୍ତକେ ॥
ୟାନଂ ପୁରିସସଂୟୁତ୍ତଂ, ହତ୍ଥୱଟ୍ଟକମେୱ ୱା ।
ପାଟଙ୍କିଞ୍ଚ ଗିଲାନସ୍ସ, ୱଟ୍ଟତେୱାଭିରୂହିତୁଂ ॥
ନ ଚ ଭିକ୍ଖୁନିୟା ସଦ୍ଧିଂ, ସମ୍ପୟୋଜେୟ୍ୟ କିଞ୍ଚିପି ।
ଦୁକ୍କଟଂ ଭିକ୍ଖୁନିଂ ରାଗା, ଓଭାସେନ୍ତସ୍ସ ଭିକ୍ଖୁନୋ ॥
ଭିକ୍ଖୁନୀନଂ ହୱେ ଭିକ୍ଖୁ, ପାତିମୋକ୍ଖଂ ନ ଉଦ୍ଦିସେ ।
ଆପତ୍ତିଂ ୱା ସଚେ ତାସଂ, ପଟିଗ୍ଗଣ୍ହେୟ୍ୟ ଦୁକ୍କଟଂ ॥
ଅତ୍ତନୋ ପରିଭୋଗତ୍ଥଂ, ଦିନ୍ନମଞ୍ଞସ୍ସ କସ୍ସଚି ।
ପରିଭୋଗମକତ୍ୱାୱ, ଦଦତୋ ପନ ଦୁକ୍କଟଂ ॥
ଅସପ୍ପାୟଂ ସଚେ ସବ୍ବଂ, ଅପନେତୁମ୍ପି ୱଟ୍ଟତି ।
ଅଗ୍ଗଂ ଗହେତ୍ୱା ଦାତୁଂ ୱା, ପତ୍ତାଦୀସୁପ୍ୟୟଂ ନୟୋ ॥
ପଞ୍ଚୱଗ୍ଗୂପସମ୍ପଦା, ଗୁଣଙ୍ଗୁଣଉପାହନା ।
ଚମ୍ମତ୍ଥାରୋ ଧୁୱନ୍ହାନଂ, ମଜ୍ଝଦେସେ ନ ୱଟ୍ଟତି ॥
ସମ୍ବାଧସ୍ସ ଚ ସାମନ୍ତା, ସତ୍ଥକମ୍ମଂ ଦୁୱଙ୍ଗୁଲା ।
ୱାରିତଂ, ୱତ୍ଥିକମ୍ମମ୍ପି, ସମ୍ବାଧେୟେୱ ସତ୍ଥୁନା ॥
ପଣ୍ଣାନି ଅଜ୍ଜୁକାଦୀନଂ, ଲୋଣଂ ୱା ଉଣ୍ହୟାଗୁୟା ।
ପକ୍ଖିପିତ୍ୱାନ ପାକତ୍ଥଂ, ଚାଲେତୁଂ ନ ଚ ୱଟ୍ଟତି ॥
ସଚେ ପରିସମଞ୍ଞସ୍ସ, ଉପଳାଲେତି ଦୁକ୍କଟଂ ।
ତତ୍ଥ ଚାଦୀନୱଂ ତସ୍ସ, ୱତ୍ତୁଂ ପନ ଚ ୱଟ୍ଟତି ॥
‘‘ମକ୍ଖନଂ ଗୂଥମୁତ୍ତେହି, ଗତେନ ନ୍ହାୟିତୁଂ ୱିୟ ।
କତଂ ନିସ୍ସାୟ ଦୁସ୍ସୀଲଂ, ତୟା ୱିହରତା’’ତି ଚ ॥
ଭତ୍ତଗ୍ଗେ ୟାଗୁପାନେ ଚ, ଅନ୍ତୋଗାମେ ଚ ୱୀଥିୟଂ ।
ଅନ୍ଧକାରେ ଅନାୱଜ୍ଜୋ, ଏକାୱତ୍ତୋ ଚ ବ୍ୟାୱଟୋ ॥
ସୁତ୍ତୋ ଖାଦଞ୍ଚ ଭୁଞ୍ଜନ୍ତୋ, ୱଚ୍ଚଂ ମୁତ୍ତମ୍ପି ୱା କରଂ ।
ୱନ୍ଦନା ତେରସନ୍ନଂ ତୁ, ଅୟୁତ୍ତତ୍ଥେନ ୱାରିତା ॥
ନଗ୍ଗୋ ଅନୁପସମ୍ପନ୍ନୋ, ନାନାସଂୱାସକୋପି ଚ ।
ୟୋ ପଚ୍ଛା ଉପସମ୍ପନ୍ନୋ, ଉକ୍ଖିତ୍ତୋ ମାତୁଗାମକୋ ॥
ଏକାଦସ ଅଭବ୍ବା ଚ, ଗରୁକଟ୍ଠା ଚ ପଞ୍ଚିମେ ।
ୱନ୍ଦତୋ ଦୁକ୍କଟଂ ୱୁତ୍ତଂ, ବାୱୀସତି ଚ ପୁଗ୍ଗଲେ ॥
ୟୋ ପୁରେ ଉପସମ୍ପନ୍ନୋ, ନାନାସଂୱାସୱୁଡ୍ଢକୋ ।
ଧମ୍ମୱାଦୀ ଚ ସମ୍ବୁଦ୍ଧୋ, ୱନ୍ଦନୀୟା ତୟୋ ଇମେ ॥
ତଜ୍ଜନାଦିକତେ ଏତ୍ଥ, ଚତୁରୋ ପନ ପୁଗ୍ଗଲେ ।
ୱନ୍ଦତୋପି ଅନାପତ୍ତି, ତେହି କମ୍ମଞ୍ଚ କୁବ୍ବତୋ ॥
ଅଧିଟ୍ଠାନଂ ପନେକସ୍ସ, ଦ୍ୱିନ୍ନଂ ୱା ତିଣ୍ଣମେୱ ୱା ।
ଦିଟ୍ଠାୱିକମ୍ମମୁଦ୍ଦିଟ୍ଠଂ, ତତୋ ଉଦ୍ଧଂ ନିୱାରଣଂ ॥
ସନ୍ଦିଟ୍ଠୋ ହୋତି ସମ୍ଭତ୍ତୋ, ଜୀୱତାଲପିତୋପି ଚ ।
ଗହିତତ୍ତମନୋ ହୋତି, ୱିସ୍ସାସୋ ପଞ୍ଚଧା ସିୟା ॥
ସୀଲଦିଟ୍ଠିୱିପତ୍ତି ଚ, ଆଚାରାଜୀୱସମ୍ଭୱା ।
ୱିପତ୍ତିୟୋ ଚତସ୍ସୋୱ, ୱୁତ୍ତା ଆଦିଚ୍ଚବନ୍ଧୁନା ॥
ତତ୍ଥ ଅପ୍ପଟିକମ୍ମା ଚ, ୟା ଚ ୱୁଟ୍ଠାନଗାମିନୀ ।
ଆପତ୍ତିୟୋ ଦୁୱେ ସୀଲ-ୱିପତ୍ତୀତି ପକାସିତା ॥
ଅନ୍ତଗ୍ଗାହିକଦିଟ୍ଠି ଚ, ୟା ଦିଟ୍ଠି ଦସୱତ୍ଥୁକା ।
ଅୟଂ ଦିଟ୍ଠିୱିପତ୍ତୀତି, ଦୁୱିଧା ଦିଟ୍ଠି ଦୀପିତା ॥
ଦେସନାଗାମିନିକା ୟା ଚ, ପଞ୍ଚ ଥୁଲ୍ଲଚ୍ଚୟାଦିକା ।
ୱୁତ୍ତାଚାରୱିପତ୍ତୀତି, ଆଚାରକୁସଲେନ ସା ॥
କୁହନାଦିପ୍ପୱତ୍ତୋ ହି, ମିଚ୍ଛାଜୀୱୋତି ଦୀପିତୋ ।
ଆଜୀୱପଚ୍ଚୟାପତ୍ତି, ଛବ୍ବିଧାତି ପକାସିତା ॥
କମ୍ମୁନା ଲଦ୍ଧିସୀମାହି, ନାନାସଂୱାସକା ତୟୋ ।
ଉକ୍ଖିତ୍ତୋ ତିୱିଧୋ କମ୍ମ-ନାନାସଂୱାସକୋ ମତୋ ॥
ଅଧମ୍ମୱାଦିପକ୍ଖସ୍ମିଂ, ନିସିନ୍ନୋୱ ୱିଚିନ୍ତିୟଂ ।
‘‘ଧମ୍ମୱାଦୀ ପନେତେ’’ତି, ଉପ୍ପନ୍ନେ ପନ ମାନସେ ॥
ନାନାସଂୱାସକୋ ନାମ, ଲଦ୍ଧିୟାୟଂ ପକାସିତୋ ।
ତତ୍ରଟ୍ଠୋ ପନ ସୋ ଦ୍ୱିନ୍ନଂ, କମ୍ମଂ କୋପେତି ସଙ୍ଘିକଂ ॥
ବହିସୀମାଗତୋ ସୀମା-ନାନାସଂୱାସକୋ ମତୋ ।
ନାନାସଂୱାସକା ଏୱଂ, ତୟୋ ୱୁତ୍ତା ମହେସିନା ॥
ଚୁତୋ ଅନୁପସମ୍ପନ୍ନୋ, ନାନାସଂୱାସକା ତୟୋ ।
ଭିକ୍ଖୂନେକାଦସାଭବ୍ବା, ଅସଂୱାସା ଇମେ ସିୟୁଂ ॥
ଅସଂୱାସସ୍ସ ସବ୍ବସ୍ସ, ତଥା କମ୍ମାରହସ୍ସ ଚ ।
ସଙ୍ଘେ ଉମ୍ମତ୍ତକାଦୀନଂ, ପଟିକ୍ଖେପୋ ନ ରୂହତି ॥
ସସଂୱାସେକସୀମଟ୍ଠ-ପକତତ୍ତସ୍ସ ଭିକ୍ଖୁନୋ ।
ୱଚନେନ ପଟିକ୍ଖେପୋ, ରୂହତାନନ୍ତରସ୍ସପି ॥
ଭିକ୍ଖୁ ଆପଜ୍ଜତାପତ୍ତିଂ, ଆକାରେହି ପନଚ୍ଛହି ।
ୱୁତ୍ତା ସମଣକପ୍ପା ଚ, ପଞ୍ଚ, ପଞ୍ଚ ୱିସୁଦ୍ଧିୟୋ ॥
ନିଦାନଂ ପୁଗ୍ଗଲଂ ୱତ୍ଥୁଂ, ୱିଧିଂ ପଞ୍ଞତ୍ତିୟା ପନ ।
ୱିପତ୍ତାପତ୍ତନାପତ୍ତି, ସମୁଟ୍ଠାନନୟମ୍ପି ଚ ॥
ୱଜ୍ଜକମ୍ମକ୍ରିୟାସଞ୍ଞା, ଚିତ୍ତାଣତ୍ତିୱିଧିଂ ପନ ।
ତଥେୱଙ୍ଗୱିଧାନଞ୍ଚ, ୱେଦନା କୁସଲତ୍ତିକଂ ॥
ସତ୍ତରସୱିଧଂ ଏତଂ, ଦସ୍ସେତ୍ୱା ଲକ୍ଖଣଂ ବୁଧୋ ।
ସିକ୍ଖାପଦେସୁ ୟୋଜେୟ୍ୟ, ତତ୍ଥ ତତ୍ଥ ୟଥାରହଂ ॥
ନିଦାନଂ ତତ୍ଥ ୱେସାଲୀ, ତଥା ରାଜଗହଂ ପୁରଂ ।
ସାୱତ୍ଥାଳୱି କୋସମ୍ବୀ, ସକ୍କଭଗ୍ଗା ପକାସିତା ॥
ଦସ ୱେସାଲିୟା ୱୁତ୍ତା, ଏକୱୀସଂ ଗିରିବ୍ବଜେ ।
ସତାନି ହି ଛ ଊନାନି, ତୀଣି ସାୱତ୍ଥିୟା ସିୟୁଂ ॥
ଛ ପନାଳୱିୟଂ ୱୁତ୍ତା, ଅଟ୍ଠ କୋସମ୍ବିୟଂ କତା ।
ଅଟ୍ଠ ସକ୍କେସୁ ପଞ୍ଞତ୍ତା, ତୟୋ ଭଗ୍ଗେ ପକାସିତା ॥
ତେୱୀସତିୱିଧା ୱୁତ୍ତା, ସୁଦିନ୍ନଧନିୟାଦୟୋ ।
ଭିକ୍ଖୂନଂ ପାତିମୋକ୍ଖସ୍ମିଂ, ଆଦିକମ୍ମିକପୁଗ୍ଗଲା ॥
ଭିକ୍ଖୁନୀନଂ ତଥା ପାତି-ମୋକ୍ଖସ୍ମିଂ ଆଦିକମ୍ମିକା ।
ଥୁଲ୍ଲନନ୍ଦାଦୟୋ ସତ୍ତ, ସବ୍ବେ ତିଂସ ଭୱନ୍ତି ତେ ॥
ଦ୍ୱୟଙ୍କୁରଂ ସତ୍ତଫଲଂ ଛପୁପ୍ଫଂ ।
ଜାନାତି ୟୋ ଦ୍ୱିପ୍ପଭୱଂ ଦ୍ୱିସାଖଂ ।
ଜାନାତି ପଞ୍ଞତ୍ତିମସେସତୋ ସୋ ॥
ଇତି ପରମମିମଂ ୱିନିଚ୍ଛୟଂ ।
ମଧୁରପଦତ୍ଥମନାକୁଲଂ ତୁ ୟୋ ।
ପଠତି ସୁଣତି ପୁଚ୍ଛତେ ଚ ସୋ ।
ଭୱତୁପାଲିସମୋ ୱିନିଚ୍ଛୟେ ॥
ଇତି ୱିନୟୱିନିଚ୍ଛୟେ ପକିଣ୍ଣକୱିନିଚ୍ଛୟକଥା ସମତ୍ତା ।
କମ୍ମଟ୍ଠାନଭାୱନାୱିଧାନକଥା
ପାମୋକ୍ଖେ ପାତିମୋକ୍ଖସ୍ମିଂ, ମୁଖେ ମୋକ୍ଖପ୍ପୱେସନେ ।
ସବ୍ବଦୁକ୍ଖକ୍ଖୟେ ୱୁତ୍ତେ, ୱୁତ୍ତମେୱିତରତ୍ତୟଂ ॥
ଇଦଂ ଚତୁବ୍ବିଧଂ ସୀଲଂ, ଞତ୍ୱା ତତ୍ଥ ପତିଟ୍ଠିତୋ ।
ସମାଧିଂ ପୁନ ଭାୱେତ୍ୱା, ପଞ୍ଞାୟ ପରିମୁଚ୍ଚତି ॥
ଦସାନୁସ୍ସତିୟୋ ୱୁତ୍ତା, କସିଣା ଚ ଦସାସୁଭା ।
ଚତସ୍ସୋ ଅପ୍ପମଞ୍ଞାୟୋ, ତଥାରୁପ୍ପା ପରଦ୍ୱୟଂ ॥
ଇଚ୍ଚେୱଂ ପନ ସବ୍ବମ୍ପି, ଚତ୍ତାଲୀସୱିଧଂ ସିୟା ।
କମ୍ମଟ୍ଠାନଂ ସମୁଦ୍ଦିଟ୍ଠଂ, ମମ୍ମଟ୍ଠାନଂ ମନୋଭୁନୋ ॥
ଉପଚାରପ୍ପନାତୋ ଚ, ଝାନଭେଦା ଅତିକ୍କମା ।
ୱଡ୍ଢନାୱଡ୍ଢନା ଚାପି, ତଥାରମ୍ମଣଭୂମିତୋ ॥
ଗହଣା ପଚ୍ଚୟା ଭିୟ୍ୟୋ, ତଥା ଚରିୟାନୁକୂଲତୋ ।
ୱିସେସୋ ଅୟମେତେସୁ, ୱିଞ୍ଞାତବ୍ବୋ ୱିଭାୱିନା ॥
ଅଟ୍ଠାନୁସ୍ସତିୟୋ ସଞ୍ଞା-ୱୱତ୍ଥାନଞ୍ଚ ତତ୍ଥିମେ ।
ଉପଚାରୱହା, ସେସା, ତିଂସ ଝାନୱହା ମତା ॥
ପଠମଜ୍ଝାନିକା ତତ୍ଥ, ଅସୁଭା କାୟଗତାସତି ।
ଆନାପାନଞ୍ଚ କସିଣା, ଚତୁକ୍କଜ୍ଝାନିକା ଇମେ ॥
ତିକଜ୍ଝାନାନି ତିସ୍ସୋୱ, ଅପ୍ପମଞ୍ଞାଥ ପଚ୍ଛିମା ।
ଚତ୍ତାରୋପି ଚ ଆରୁପ୍ପା, ଚତୁତ୍ଥଜ୍ଝାନିକା ମତା ॥
ଅତିକ୍କମୋ ଦ୍ୱିଧା ୱୁତ୍ତୋ, ଅଙ୍ଗାରମ୍ମଣତୋପି ଚ ।
ଚତୁକ୍କତିକଝାନେସୁ, ଅଙ୍ଗାତିକ୍କମତା ମତା ॥
ଚତୁତ୍ଥା ଅପ୍ପମଞ୍ଞାପି, ଅଙ୍ଗାତିକ୍କମତୋ ସିୟା ।
ଆରମ୍ମଣମତିକ୍କମ୍ମ, ଆରୁପ୍ପା ପନ ଜାୟରେ ॥
କସିଣାନି ଦସେୱେତ୍ଥ, ୱଡ୍ଢେତବ୍ବାନି ୟୋଗିନା ।
ସେସଂ ପନ ଚ ସବ୍ବମ୍ପି, ନ ୱଡ୍ଢେତବ୍ବମେୱ ତଂ ॥
ନିମିତ୍ତାରମ୍ମଣା ତତ୍ଥ, କସିଣା ଚ ଦସାସୁଭା ।
କାୟେ ସତାନାପାନଞ୍ଚ, ବାୱୀସତି ଭୱନ୍ତିମେ ॥
ସେସାନୁସ୍ସତିୟୋ ଅଟ୍ଠ, ସଞ୍ଞା ଧାତୁୱୱତ୍ଥନଂ ।
ୱିଞ୍ଞାଣଂ ନେୱସଞ୍ଞା ଚ, ଦସ ଦ୍ୱେ ଭାୱଗୋଚରା ॥
ଚତସ୍ସୋ ଅପ୍ପମଞ୍ଞାୟୋ, ଦ୍ୱେ ଚ ଆରୁପ୍ପମାନସା ।
ଇମେ ଧମ୍ମା ୱିନିଦ୍ଦିଟ୍ଠା, ଛ ନୱତ୍ତବ୍ବଗୋଚରା ॥
ଦସାସୁଭା ପଟିକ୍କୂଲ-ସଞ୍ଞା କାୟଗତାସତି ।
ଦେୱେସୁ ନ ପୱତ୍ତନ୍ତି, ଦ୍ୱାଦସେୱାତି ଭୂମିତୋ ॥
ତାନି ଦ୍ୱାଦସ ଭିୟ୍ୟୋ ଚ, ଆନାପାନସତୀପି ଚ ।
ସବ୍ବସୋ ତେରସ ୱାପି, ବ୍ରହ୍ମଲୋକେ ନ ଜାୟରେ ॥
ଠପେତ୍ୱା ଚତୁରାରୁପ୍ପେ, ଅରୂପାୱଚରେ କିର ।
ଅଞ୍ଞେ ପନ ନ ଜାୟନ୍ତି, ସବ୍ବେ ଜାୟନ୍ତି ମାନୁସେ ॥
ଚତୁତ୍ଥଂ କସିଣଂ ହିତ୍ୱା, କସିଣା ଚ ଦସାସୁଭା ।
ଦିଟ୍ଠେନେୱ ଗହେତବ୍ବା, ପୁବ୍ବଭାଗେ ଭୱନ୍ତି ତେ ॥
ଆନାପାନଞ୍ଚ ଫୁଟ୍ଠେନ, ଦିଟ୍ଠେନ ତଚପଞ୍ଚକଂ ।
ମାଲୁତୋ ଦିଟ୍ଠଫୁଟ୍ଠେନ, ସୁତେନ ଚେତ୍ଥ ସେସକଂ ॥
ଆକାସକସିଣଞ୍ଚେତ୍ଥ, ଠପେତ୍ୱା କସିଣା ନୱ ।
ପଠମାରୁପ୍ପଚିତ୍ତସ୍ସ, ପଚ୍ଚୟା ପନ ଜାୟରେ ॥
ଭୱନ୍ତି ହି ଅଭିଞ୍ଞାଣଂ, କସିଣାନି ଦସାପି ଚ ।
ତିସ୍ସୋପି ଅପ୍ପମଞ୍ଞାୟୋ, ଚତୁତ୍ଥସ୍ସ ତୁ ପଚ୍ଚୟା ॥
ହେଟ୍ଠିମହେଟ୍ଠିମାରୁପ୍ପଂ, ପରସ୍ସ ଚ ପରସ୍ସ ଚ ।
ନେୱସଞ୍ଞା ନିରୋଧସ୍ସ, ପଚ୍ଚୟୋତି ପକାସିତା ॥
ସବ୍ବେ ସୁଖୱିହାରସ୍ସ, ଭୱନିସ୍ସରଣସ୍ସ ଚ ।
ତଥା ଭୱସୁଖାନଞ୍ଚ, ପଚ୍ଚୟାତି ଚ ଦୀପିତା ॥
ଅସୁଭା ଦସ ୱିଞ୍ଞେୟ୍ୟା, ତଥା କାୟଗତାସତି ।
ଅନୁକୂଲା ଇମେ ରାଗ-ଚରିତସ୍ସ ୱିସେସତୋ ॥
ଚତସ୍ସୋ ଅପ୍ପମଞ୍ଞାୟୋ, ସୱଣ୍ଣକସିଣା ତଥା ।
ଅନୁକୂଲା ଇମେ ଦୋସ-ଚରିତସ୍ସ ପକାସିତା ॥
ୱିତକ୍କଚରିତସ୍ସାପି, ମୋହପ୍ପକତିନୋପି ଚ ।
ଆନାପାନସତେକାୱ, ସପ୍ପାୟାତି ୱିଭାୱିତା ॥
ସଞ୍ଞା ଚେୱ ୱୱତ୍ଥାନଂ, ମରଣୂପସମେ ସତି ।
ପଞ୍ଞାପକତିନୋ ଏତେ, ଅନୁକୂଲାତି ଦୀପିତା ॥
ଆଦିଅନୁସ୍ସତିଚ୍ଛକ୍କଂ, ସଦ୍ଧାଚରିତୱଣ୍ଣିତଂ ।
ଆରୁପ୍ପା କସିଣା ସେସା, ଦସ ସବ୍ବାନୁରୂପକା ॥
ଏୱଂ ପଭେଦତୋ ଞତ୍ୱା, କମ୍ମଟ୍ଠାନାନି ପଣ୍ଡିତୋ ।
ଚରିୟାୟାନୁକୂଲଂ ତୁ, ତେସୁ ୟଂ ଅତ୍ତନୋ ପନ ॥
ତଂ ଗହେତ୍ୱାନ ମେଧାୱୀ, ଦଳ୍ହଂ କଲ୍ୟାଣମିତ୍ତକୋ ।
ଉଚ୍ଛେଦଂ ପଲିବୋଧାନଂ, କତ୍ୱା ପଠମମେୱ ଚ ॥
ଅନୁରୂପେ ୱସନ୍ତେନ, ୱିହାରେ ଦୋସୱଜ୍ଜିତେ ।
ଭାୱେତ୍ୱା ପଠମାଦୀନି, ଝାନାନି ପନ ସବ୍ବସୋ ॥
ତତୋ ୱୁଟ୍ଠାୟ ସପ୍ପଞ୍ଞୋ, ଝାନମ୍ହା ପଠମାଦିତୋ ।
ନାମରୂପୱୱତ୍ଥାନଂ, କତ୍ୱା କଙ୍ଖଂ ୱିତୀରିୟ ॥
ଉପକ୍ଲେସେ ଅମଗ୍ଗୋତି, ଦସୋଭାସାଦୟୋ ପନ ।
ମଗ୍ଗୋ ୱିପସ୍ସନାଞାଣଂ, ଇତି ଜାନାତି ପଣ୍ଡିତୋ ॥
ତିଣ୍ଣଂ ତେସଂ ୱୱତ୍ଥାନେ, କତେ ଏତ୍ତାୱତା ପନ ।
ତିଣ୍ଣଂ ପନ ଚ ସଚ୍ଚାନଂ, ୱୱତ୍ଥାନଂ କତଂ ସିୟା ॥
ଉଦୟବ୍ବୟଭଙ୍ଗା ଚ, ଭୟାଦୀନୱନିବ୍ବିଦା ।
ମୁଞ୍ଚିତୁକମ୍ୟତାଞାଣଂ, ପଟିସଙ୍ଖାନୁପସ୍ସନା ॥
ସଙ୍ଖାରୁପେକ୍ଖାଞାଣଞ୍ଚ, ନୱମଂ ସଚ୍ଚାନୁଲୋମିକଂ ।
ଅୟଂ ‘‘ପଟିପଦାଞାଣ-ଦସ୍ସନ’’ନ୍ତି ପକାସିତା ॥
ତତୋ ଗୋତ୍ରଭୁଚିତ୍ତସ୍ସ, ସମନନ୍ତରମେୱ ଚ ।
ସନ୍ତିମାରମ୍ମଣଂ କତ୍ୱା, ଜାୟତେ ଞାଣଦସ୍ସନଂ ॥
‘‘ଞାଣଦସ୍ସନସୁଦ୍ଧୀ’’ତି, ଇଦଂ ଞାଣଂ ପକାସିତଂ ।
ପଚ୍ଚୱେକ୍ଖଣପରିୟନ୍ତଂ, ଫଲଂ ତସ୍ସାନୁଜାୟତେ ॥
ତେନେୱ ଚ ଉପାୟେନ, ଭାୱେନ୍ତୋ ସୋ ପୁନପ୍ପୁନଂ ।
ପାପୁଣାତି ୟଥା ଭିକ୍ଖୁ, ସେସମଗ୍ଗଫଲାନି ଚ ॥
ଇଚ୍ଚେୱମଚ୍ଚନ୍ତମୱେଚ୍ଚ ଧମ୍ମଂ ।
ୱିଦ୍ଧଂସୟିତ୍ୱାକୁସଲଂ ଅସେସଂ ।
ୱିସୋସୟିତ୍ୱାନ ତୟୋ ଭୱେ ସୋ ।
ଉପେତି ସନ୍ତିଂ ନିରୁପାଦିସେସଂ ॥
ୱିଞ୍ଞାସକ୍କମତୋ ୱାପି, ପୁବ୍ବାପରୱସେନ ୱା ।
ୟଦି ଅକ୍ଖରବନ୍ଧେ ୱା, ଅୟୁତ୍ତଂ ୱିୟ ଦିସ୍ସତି ॥
ତଂ ତଥା ନ ଗହେତବ୍ବଂ, ଗହେତବ୍ବମଦୋସତୋ ।
ମୟା ଉପପରିକ୍ଖିତ୍ୱା, କତତ୍ତା ପନ ସବ୍ବସୋ ॥
ସେଟ୍ଠସ୍ସ ଚୋଳରଟ୍ଠସ୍ସ, ନାଭିଭୂତେ ନିରାକୁଲେ ।
ସବ୍ବସ୍ସ ପନ ଲୋକସ୍ସ, ଗାମେ ସମ୍ପିଣ୍ଡିତେ ୱିୟ ॥
କଦଲୀସାଲତାଲୁଚ୍ଛୁ-ନାଳିକେରୱନାକୁଲେ ।
କମଲୁପ୍ପଲସଞ୍ଛନ୍ନ-ସଲିଲାସୟସୋଭିତେ ॥
କାୱେରିଜଲସମ୍ପାତ-ପରିଭୂତମହୀତଲେ ।
ଇଦ୍ଧେ ସବ୍ବଙ୍ଗସମ୍ପନ୍ନେ, ମଙ୍ଗଲେ ଭୂତମଙ୍ଗଲେ ॥
ପୱରାକାରପାକାର-ପରିଖାପରିୱାରିତେ ।
ୱିହାରେ ୱେଣ୍ହୁଦାସସ୍ସ, ଦସ୍ସନୀୟେ ମନୋରମେ ॥
ତୀରନ୍ତରୁହୱାତିର-ତରୁରାଜୱିରାଜିତେ ।
ନାନାଦିଜଗଣାରାମେ, ନାନାରାମମନୋରମେ ॥
ଚାରୁପଙ୍କଜସଂକିଣ୍ଣ-ତଳାକସମଲଙ୍କତେ ।
ସୁରସୋଦକସମ୍ପୁଣ୍ଣ-ୱରକୂପୋପସୋଭିତେ ॥
ୱିଚିତ୍ରୱିପୁଲଚ୍ଚୁଗ୍ଗ-ୱରମଣ୍ଡପମଣ୍ଡିତେ ।
ଆୱାସେହି ଚନେକେହି, ଅଚ୍ଚନ୍ତମୁପସୋଭିତେ ॥
ଉପ୍ପତେନ ଚ ଥୂପେନ, ଭେତ୍ୱାୱ ଧରଣୀତଲଂ ।
ଜିତ୍ୱାୱାୱହସନ୍ତେନ, କେଲାସସିଖରଂ ଖରଂ ॥
ସରଦମ୍ବୁଦସଙ୍କାସେ, ଦସ୍ସନୀୟେ ସମୁସ୍ସିତେ ।
ପସାଦଜନନେ ରମ୍ମେ, ପାସାଦେ ୱସତା ମୟା ॥
ୱୁତ୍ତସ୍ସ ବୁଦ୍ଧସୀହେନ, ୱିନୟସ୍ସ ୱିନିଚ୍ଛୟୋ ।
ବୁଦ୍ଧସୀହଂ ସମୁଦ୍ଦିସ୍ସ, ମମ ସଦ୍ଧିୱିହାରିକଂ ॥
କତୋୟଂ ପନ ଭିକ୍ଖୂନଂ, ହିତତ୍ଥାୟ ସମାସତୋ ।
ୱିନୟସ୍ସାୱବୋଧତ୍ଥଂ, ସୁଖେନେୱାଚିରେନ ଚ ॥
ଅଚ୍ଚୁତଚ୍ଚୁତୱିକ୍କନ୍ତେ, କଲମ୍ବକୁଲନନ୍ଦନେ ।
ମହିଂ ସମନୁସାସନ୍ତେ, ଆରଦ୍ଧୋ ଚ ସମାପିତୋ ॥
ୟଥା ସିଦ୍ଧିମୟଂ ପତ୍ତୋ, ଅନ୍ତରାୟଂ ୱିନା ତଥା ।
ସବ୍ବେ ସିଜ୍ଝନ୍ତୁ ସଙ୍କପ୍ପା, ସତ୍ତାନଂ ଧମ୍ମସଂୟୁତା ॥
ୟାୱ ତିଟ୍ଠତି ଲୋକସ୍ମିଂ, ମନ୍ଦାରୋ ଚାରୁକନ୍ଦରୋ ।
ତାୱ ତିଟ୍ଠତୁ ବୁଦ୍ଧସ୍ସ, ସାସନଂ କଲିସାସନଂ ॥
କାଲେ ସମ୍ମା ପୱସ୍ସନ୍ତୁ, ୱସ୍ସଂ ୱସ୍ସୱଲାହକା ।
ପାଲୟନ୍ତୁ ମହୀପାଲା, ଧମ୍ମତୋ ସକଲଂ ମହିଂ ॥
ଇମଂ ସାରଭୂତଂ ହିତଂ ଅତ୍ଥୟୁତ୍ତଂ ।
କରୋନ୍ତେନ ପତ୍ତଂ ମୟା ୟଂ ତୁ ପୁଞ୍ଞଂ ।
ଅୟଂ ତେନ ଲୋକୋ ମୁନିନ୍ଦପ୍ପୟାତଂ ।
ସିୱଂ ୱୀତସୋକଂ ପୁରଂ ପାପୁଣାତୁ ॥
ଇତି ୱିନୟୱିନିଚ୍ଛୟେ କମ୍ମଟ୍ଠାନଭାୱନାୱିଧାନକଥା
ସମତ୍ତା ।
ଇତି ତମ୍ବପଣ୍ଣିୟେନ ପରମୱେୟ୍ୟାକରଣେନ ତିପିଟକନୟୱିଧିକୁସଲେନ ପରମକୱିଜନହଦୟପଦୁମୱନୱିକସନକରେନ କୱିୱରୱସଭେନ ପରମରତିକରୱରମଧୁରୱଚନୁଗ୍ଗାରେନ ଉରଗପୁରେନ ବୁଦ୍ଧଦତ୍ତେନ ରଚିତୋୟଂ ୱିନୟୱିନିଚ୍ଛୟୋ ।
ୱିନୟୱିନିଚ୍ଛୟୋ ସମତ୍ତୋ ।
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ଉତ୍ତରୱିନିଚ୍ଛୟୋ
ଗନ୍ଥାରମ୍ଭକଥା
ସବ୍ବସତ୍ତୁତ୍ତମଂ ଧୀରଂ, ୱନ୍ଦିତ୍ୱା ସିରସା ଜିନଂ ।
ଧମ୍ମଞ୍ଚାଧମ୍ମୱିଦ୍ଧଂସଂ, ଗଣମଙ୍ଗଣନାସନଂ ॥
ୟୋ ମୟା ରଚିତୋ ସାରୋ, ୱିନୟସ୍ସ ୱିନିଚ୍ଛୟୋ ।
ତସ୍ସ ଦାନି କରିସ୍ସାମି, ସବ୍ବାନୁତ୍ତରମୁତ୍ତରଂ ॥
ଭଣତୋ ପଠତୋ ପୟୁଞ୍ଜତୋ ।
ସୁଣତୋ ଚିନ୍ତୟତୋ ପନୁତ୍ତରଂ ।
ପରମଂ ଅବୁଦ୍ଧ ବୁଦ୍ଧିୱଡ୍ଢନଂ ।
ୱଦତୋ ମେ ନିରତା ନିବୋଧଥ ॥
ମହାୱିଭଙ୍ଗସଙ୍ଗହକଥା
ମେଥୁନଂ ପଟିସେୱନ୍ତୋ, କତି ଆପତ୍ତିୟୋ ଫୁସେ ।
ମେଥୁନଂ ପଟିସେୱନ୍ତୋ, ତିସ୍ସୋ ଆପତ୍ତିୟୋ ଫୁସେ ॥
ଭୱେ ପାରାଜିକଂ ଖେତ୍ତେ, ୟେଭୁୟ୍ୟକ୍ଖାୟିତେ ପନ ।
ଥୁଲ୍ଲଚ୍ଚୟଂ ମୁଖେ ୱଟ୍ଟ-କତେ ୱୁତ୍ତଂ ତୁ ଦୁକ୍କଟଂ ॥
ଅଦିନ୍ନଂ ଆଦିୟନ୍ତୋ ୟୋ ।
କତି ଆପତ୍ତିୟୋ ଫୁସେ ।
ଅଦିନ୍ନଂ ଆଦିୟନ୍ତୋ ସୋ ।
ତିସ୍ସୋ ଆପତ୍ତିୟୋ ଫୁସେ ॥
ପଞ୍ଚମାସଗ୍ଘନେ ୱାପି, ଅଧିକେ ୱା ପରାଜୟୋ ।
ମାସେ ୱା ଦୁକ୍କଟଂ ଊନେ, ମଜ୍ଝେ ଥୁଲ୍ଲଚ୍ଚୟଂ ତତୋ ॥
ମନୁସ୍ସଜାତିଂ ମାରେନ୍ତୋ ।
କତି ଆପତ୍ତିୟୋ ଫୁସେ ।
ମନୁସ୍ସଜାତିଂ ମାରେନ୍ତୋ ।
ତିସ୍ସୋ ଆପତ୍ତିୟୋ ଫୁସେ ॥
ମନୁସ୍ସମୁଦ୍ଦିସ୍ସୋପାତଂ, ଖଣନେ ଦୁକ୍କଟଂ ସିୟା ।
ଦୁକ୍ଖେ ଥୁଲ୍ଲଚ୍ଚୟଂ ଜାତେ, ମତେ ପାରାଜିକଂ ସିୟା ॥
ଅସନ୍ତଂ ଉତ୍ତରିଂ ଧମ୍ମଂ, ୱଦମତ୍ତୂପନାୟିକଂ ।
କତି ଆପଜ୍ଜତାପତ୍ତୀ ? ତିସ୍ସୋ ଆପତ୍ତିୟୋ ଫୁସେ ॥
ଅସନ୍ତଂ ଉତ୍ତରିଂ ଧମ୍ମଂ, ଭଣନ୍ତସ୍ସ ପରାଜୟୋ ।
ଥୁଲ୍ଲଚ୍ଚୟଂ ପରିୟାୟେ, ଞାତେ, ନୋ ଚେ ତୁ ଦୁକ୍କଟଂ ॥
ପାରାଜିକକଥା ।
ଭଣ ସୁକ୍କଂ ୱିମୋଚେନ୍ତୋ ।
କତି ଆପତ୍ତିୟୋ ଫୁସେ ।
ତିସ୍ସୋ ଆପତ୍ତିୟୋ ଫୁସେ ॥
ଗରୁକଂ ୟଦି ଚେତେତି, ଉପକ୍କମତି ମୁଚ୍ଚତି ।
ଦ୍ୱଙ୍ଗେ ଥୁଲ୍ଲଚ୍ଚୟଂ ୱୁତ୍ତଂ, ପୟୋଗେ ଦୁକ୍କଟଂ ସିୟା ॥
ଇତୋ ପଟ୍ଠାୟ ମୁଞ୍ଚିତ୍ୱା, ପଞ୍ହାପୁଚ୍ଛନମତ୍ତକଂ ।
ୱିସ୍ସଜ୍ଜନୱସେନେୱ, ହୋତି ଅତ୍ଥୱିନିଚ୍ଛୟୋ ॥
ଇତ୍ଥିୟା କାୟସଂସଗ୍ଗେ, ତିସ୍ସୋ ଆପତ୍ତିୟୋ ଫୁସେ ।
ଆମସନ୍ତସ୍ସ କାୟେନ, କାୟଂ ତୁ ଗରୁକଂ ସିୟା ॥
କାୟେନ କାୟବଦ୍ଧଂ ତୁ, ଫୁସଂ ଥୁଲ୍ଲଚ୍ଚୟଂ ଫୁସେ ।
ପଟିବଦ୍ଧେନ କାୟେନ, ପଟିବଦ୍ଧେ ତୁ ଦୁକ୍କଟଂ ॥
ଇତ୍ଥିଂ ଦୁଟ୍ଠୁଲ୍ଲୱାଚାହି, ତିସ୍ସୋ ଓଭାସତୋ ସିୟୁଂ ।
ୱଣ୍ଣାୱଣ୍ଣଂ ୱଦଂ ଦ୍ୱିନ୍ନଂ, ମଗ୍ଗାନଂ ଗରୁକଂ ଫୁସେ ॥
ୱଣ୍ଣାଦିଭଞ୍ଞେ ଆଦିସ୍ସ, ଉବ୍ଭଜାଣୁମଧକ୍ଖକଂ ।
ହୋତି ଥୁଲ୍ଲଚ୍ଚୟଂ, କାୟ-ପଟିବଦ୍ଧେ ତୁ ଦୁକ୍କଟଂ ॥
ଅତ୍ତକାମଚରିୟାୟ, ୱଦତୋ ୱଣ୍ଣମିତ୍ଥିୟା ।
ସନ୍ତିକେ ଗରୁକଂ ହୋତି, ସଚେ ଜାନାତି ସା ପନ ॥
ସନ୍ତିକେ ପଣ୍ଡକସ୍ସାପି, ତସ୍ସ ଥୁଲ୍ଲଚ୍ଚୟଂ ସିୟା ।
ତିରଚ୍ଛାନଗତସ୍ସାପି, ସନ୍ତିକେ ଦୁକ୍କଟଂ ମତଂ ॥
ପଟିଗ୍ଗଣ୍ହନୱୀମଂସା, ପଚ୍ଚାହରଣକତ୍ତିକେ ।
ସଞ୍ଚରିତ୍ତଂ ସମାପନ୍ନେ, ଗରୁକଂ ନିଦ୍ଦିସେ ବୁଧୋ ॥
ତସ୍ସ ଦ୍ୱଙ୍ଗସମାୟୋଗେ, ହୋତି ଥୁଲ୍ଲଚ୍ଚୟଂ ତଥା ।
ଅଙ୍ଗେ ସତି ପନେକସ୍ମିଂ, ହୋତି ଆପତ୍ତି ଦୁକ୍କଟଂ ॥
ସଂୟାଚିକାୟ ଚ କୁଟିଂ ।
ୱିହାରଞ୍ଚ ମହଲ୍ଲକଂ ।
କାରାପେତି ସଚେ ଭିକ୍ଖୁ ।
ତିସ୍ସୋ ଆପତ୍ତିୟୋ ଫୁସେ ॥
ପୟୋଗେ ଦୁକ୍କଟଂ ୱୁତ୍ତଂ, ଏକପିଣ୍ଡେ ଅନାଗତେ ।
ହୋତି ଥୁଲ୍ଲଚ୍ଚୟଂ, ତସ୍ମିଂ, ପିଣ୍ଡେ ଗରୁକମାଗତେ ॥
ପାରାଜିକେନ ଧମ୍ମେନ, ଭିକ୍ଖୁଂ ଅମୂଲକେନିଧ ।
ଅନୁଦ୍ଧଂସେତି ୟୋ ତସ୍ସ, ତିସ୍ସୋ ଆପତ୍ତିୟୋ ସିୟୁଂ ॥
ଓକାସଂ ନ ଚ କାରେତ୍ୱା, ହୁତ୍ୱା ଚାୱନଚେତନୋ ।
ସଚେ ଚୋଦେତି ସଙ୍ଘାଦି-ସେସେନ ସହ ଦୁକ୍କଟଂ ॥
ଓକାସଂ ପନ କାରେତ୍ୱା, ହୁତ୍ୱା ଅକ୍କୋସଚେତନୋ ।
ଚୋଦେତି ଓମସୱାଦେ, ପାଚିତ୍ତିଂ ପରିଦୀପୟେ ॥
ଅନନ୍ତରସମାନୋୱ, ନୱମେ ଅଞ୍ଞଭାଗିୟେ ।
ସବ୍ବୋ ଆପତ୍ତିଭେଦୋ ହି, ନତ୍ଥି କାଚି ୱିସେସତା ॥
ସଙ୍ଘସ୍ସ ଭେଦକୋ ଭିକ୍ଖୁ, ୟାୱତତିୟକଂ ପନ ।
ସମନୁଭାସନାୟେୱ, ଗାହଂ ନ ପଟିନିସ୍ସଜଂ ॥
ଞତ୍ତିୟା ଦୁକ୍କଟଂ, ଦ୍ୱୀହି, କମ୍ମୱାଚାହି ଥୁଲ୍ଲତଂ ।
କମ୍ମୱାଚାୟ ଓସାନେ, ଆପତ୍ତି ଗରୁକଂ ସିୟା ॥
ଭେଦାନୁୱତ୍ତକେ ଚେୱ, ଦୁବ୍ବଚେ କୁଲଦୂସକେ ।
ସଙ୍ଘଭେଦକତୁଲ୍ୟୋୱ, ହୋତି ଆପତ୍ତିନିଚ୍ଛୟୋ ॥
ସଙ୍ଘାଦିସେସକଥା ।
ଅତିକ୍କମନ୍ତୋ ଅତିରେକଚୀୱରଂ ।
ଦସାହମାପଜ୍ଜତି ଏକମେୱ ।
ନିସ୍ସଗ୍ଗିପାଚିତ୍ତିୟମେକରତ୍ତିଂ ।
ତିଚୀୱରେନାପି ୱିନା ୱସନ୍ତୋ ॥
ମାସଂ ଅତିକ୍କମନ୍ତୋ ହି, ଗହେତ୍ୱା କାଲଚୀୱରଂ ।
ଏକଂ ଆପଜ୍ଜତାପତ୍ତିଂ, ନିସ୍ସଗ୍ଗିୟମୁଦୀରିତଂ ॥
ଅଞ୍ଞାତିକାୟ ୟଂ କିଞ୍ଚି ।
ପୁରାଣଚୀୱରଂ ପନ ।
ଧୋୱାପେତି ସଚେ ତସ୍ସ ।
ହୋନ୍ତି ଆପତ୍ତିୟୋ ଦୁୱେ ॥
ଧୋୱାପେତି ପୟୋଗସ୍ମିଂ, ଦୁକ୍କଟଂ ସମୁଦାହଟଂ ।
ନିସ୍ସଗ୍ଗିୟାୱ ପାଚିତ୍ତି, ହୋତି ଧୋୱାପିତେ ପନ ॥
ଅଞ୍ଞାତିକାୟ ହତ୍ଥମ୍ହା, ଚୀୱରଂ ପଟିଗଣ୍ହତୋ ।
ଗହଣେ ଦୁକ୍କଟଂ ୱୁତ୍ତଂ, ପାଚିତ୍ତି ଗହିତେ ସିୟା ॥
ଅଞ୍ଞାତକଂ ଗହପତିଂ, ଗହପତାନିମେୱ ୱା ।
ଚୀୱରଂ ୱିଞ୍ଞାପେନ୍ତୋ ଦ୍ୱେ, ଭିକ୍ଖୁ ଆପତ୍ତିୟୋ ଫୁସେ ॥
ୱିଞ୍ଞାପେତି ପୟୋଗସ୍ମିଂ, ଦୁକ୍କଟଂ ପରିକିତ୍ତିତଂ ।
ୱିଞ୍ଞାପିତେ ଚ ନିସ୍ସଗ୍ଗି, ପାଚିତ୍ତି ପରିୟାପୁତା ॥
ଭିକ୍ଖୁ ଚୀୱରମଞ୍ଞାତିଂ, ୱିଞ୍ଞାପେନ୍ତୋ ତଦୁତ୍ତରିଂ ।
ପୟୋଗେ ଦୁକ୍କଟଂ, ୱିଞ୍ଞା-ପିତେ ନିସ୍ସଗ୍ଗିୟଂ ଫୁସେ ॥
ଅଞ୍ଞାତକଂ କଞ୍ଚି ଉପାସକଂ ୱା ।
ଉପାସିକଂ ୱା ଉପସଙ୍କମିତ୍ୱା ।
ପୁବ୍ବେୱ ହୁତ୍ୱା ପନ ଅପ୍ପୱାରିତୋ ।
ୱତ୍ଥେ ୱିକପ୍ପଂ ପଟିପଜ୍ଜମାନୋ ॥
ଦୁୱେ ଆପଜ୍ଜତାପତ୍ତୀ, ପୟୋଗେ ଦୁକ୍କଟଂ ସିୟା ।
ୱିକପ୍ପଂ ପନ ଆପନ୍ନେ, ନିସ୍ସଗ୍ଗିୟମୁଦୀରିତଂ ॥
ଅଞ୍ଞାତିଂ ଉପସଙ୍କମ୍ମ, ପୁବ୍ବେୟେୱପ୍ପୱାରିତୋ ।
ୱିକପ୍ପଂ ଚୀୱରେ ଭିକ୍ଖୁ, ଆପଜ୍ଜନ୍ତୋ ଦୁୱେ ଫୁସେ ॥
ତଥାତିରେକତିକ୍ଖତ୍ତୁଂ, ଚୋଦନାୟ ଚ ଭିକ୍ଖୁ ଚେ ।
ଗନ୍ତ୍ୱାତିରେକଛକ୍ଖତ୍ତୁଂ, ଠାନେନପି ଚ ଚୀୱରଂ ॥
ନିପ୍ଫାଦେତି ସଚେ ତସ୍ସ, ହୋନ୍ତି ଆପତ୍ତିୟୋ ଦୁୱେ ।
ପୟୋଗେ ଦୁକ୍କଟଂ, ତସ୍ସ, ଲାଭେ ନିସ୍ସଗ୍ଗିୟଂ ସିୟା ॥
କଥିନୱଗ୍ଗୋ ପଠମୋ ।
ଦୋସା କୋସିୟୱଗ୍ଗସ୍ସ, ଦ୍ୱେଦ୍ୱେଆଦୀସୁ ପଞ୍ଚସୁ ।
ପୟୋଗେ ଦୁକ୍କଟଂ ୱୁତ୍ତଂ, ଲାଭେ ନିସ୍ସଗ୍ଗିୟଂ ସିୟା ॥
ଗହେତ୍ୱେଳକଲୋମାନି, ତିୟୋଜନମତିକ୍କମଂ ।
ଦୁକ୍କଟଂ ପଠମେ ପାଦେ, ନିସ୍ସଗ୍ଗିଂ ଦୁତିୟେ ଫୁସେ ॥
ଭିକ୍ଖୁ ଭିକ୍ଖୁନିୟଞ୍ଞାୟ, ଧୋୱାପେତେଳଲୋମକଂ ।
ପୟୋଗେ ଦୁକ୍କଟଂ, ତସ୍ସ, ଧୋତେ ନିସ୍ସଗ୍ଗିୟଂ ସିୟା ॥
ରୂପିୟଂ ପଟିଗଣ୍ହନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ନିସ୍ସଗ୍ଗି ଗହିତେ ସିୟା ॥
ନାନାକାରଂ ସମାପଜ୍ଜଂ, ସଂୱୋହାରଞ୍ଚ ରୂପିୟେ ।
ସମାପନ୍ନେ ଚ ନିସ୍ସଗ୍ଗିଂ, ପୟୋଗେ ଦୁକ୍କଟଂ ଫୁସେ ॥
ନାନପ୍ପକାରକଂ ଭିକ୍ଖୁ, ଆପଜ୍ଜେ କୟୱିକ୍କୟଂ ।
ପୟୋଗେ ଦୁକ୍କଟଂ, ତସ୍ମିଂ, କତେ ନିସ୍ସଗ୍ଗିୟଂ ଫୁସେ ॥
କୋସିୟୱଗ୍ଗୋ ଦୁତିୟୋ ।
ପତ୍ତଂ ଅତିକ୍କମେନ୍ତସ୍ସ, ଦସାହମତିରେକକଂ ।
ତସ୍ସ ନିସ୍ସଗ୍ଗିୟାପତ୍ତି, ହୋତି ଏକାୱ ଭିକ୍ଖୁନୋ ॥
ଅପଞ୍ଚବନ୍ଧନେ ପତ୍ତେ, ୱିଜ୍ଜମାନେପି ଭିକ୍ଖୁନୋ ।
ଅଞ୍ଞଂ ପନ ନୱଂ ପତ୍ତଂ, ଚେତାପେତି ସଚେ ପନ ॥
ଦ୍ୱେ ପନାପତ୍ତିୟୋ ଭିକ୍ଖୁ, ଆପଜ୍ଜତି, ନ ସଂସୟୋ ।
ପୟୋଗେ ଦୁକ୍କଟଂ, ତସ୍ସ, ଲାଭେ ନିସ୍ସଗ୍ଗିୟଂ ଫୁସେ ॥
ପଟିଗ୍ଗହେତ୍ୱା ଭେସଜ୍ଜଂ, ସତ୍ତାହଂ ୟୋ ଅତିକ୍କମେ ।
ଏକଂ ନିସ୍ସଗ୍ଗିୟାପତ୍ତିଂ, ଆପଜ୍ଜତି ହି ସୋ ପନ ॥
ଅକାଲେ ପରିୟେସନ୍ତୋ, ୱସ୍ସସାଟିକଚୀୱରଂ ।
ପୟୋଗେ ଦୁକ୍କଟଂ, ତସ୍ସ, ଲାଭେ ନିସ୍ସଗ୍ଗିୟଂ ଫୁସେ ॥
ଭିକ୍ଖୁନୋ ଚୀୱରଂ ଦତ୍ୱା, ଅଚ୍ଛିନ୍ଦନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ହଟେ ନିସ୍ସଗ୍ଗିୟଂ ସିୟା ॥
ୱିଞ୍ଞାପେତ୍ୱା ସୟଂ ସୁତ୍ତଂ, ତନ୍ତୱାୟେହି ଚୀୱରଂ ।
ୱାୟାପେତି ସଚେ ଭିକ୍ଖୁ, ଦ୍ୱେ ପନାପତ୍ତିୟୋ ଫୁସେ ॥
ୟୋ ପନଞ୍ଞାତକସ୍ସେୱ, ତନ୍ତୱାୟେ ସମେଚ୍ଚ ଚେ ।
ୱିକପ୍ପଂ ଚୀୱରେ ଭିକ୍ଖୁ, ଆପଜ୍ଜଂ ଅପ୍ପୱାରିତୋ ॥
ଦ୍ୱେ ପନାପତ୍ତିୟୋ ସୋ ହି, ଆପଜ୍ଜତି, ନ ସଂସୟୋ ।
ପୟୋଗେ ଦୁକ୍କଟଂ, ତସ୍ସ, ଲାଭେ ନିସ୍ସଗ୍ଗିୟଂ ସିୟା ॥
ପଟିଗ୍ଗହେତ୍ୱା ଅଚ୍ଚେକ-ସଞ୍ଞିତଂ ପନ ଚୀୱରଂ ।
କାଲଂ ଅତିକ୍କମେନ୍ତୋ ତଂ, ଏକଂ ନିସ୍ସଗ୍ଗିୟଂ ଫୁସେ ॥
ତିଣ୍ଣମଞ୍ଞତରଂ ୱତ୍ଥଂ, ନିଦହିତ୍ୱା ଘରେଧିକଂ ।
ଛାରତ୍ତତୋ ୱିନା ତେନ, ୱସଂ ନିସ୍ସଗ୍ଗିୟଂ ଫୁସେ ॥
ଜାନଂ ପରିଣତଂ ଲାଭଂ, ସଙ୍ଘିକଂ ଅତ୍ତନୋ ପନ ।
ପରିଣାମେତି ଚେ ଭିକ୍ଖୁ, ଦ୍ୱେ ପନାପତ୍ତିୟୋ ଫୁସେ ॥
ପୟୋଗେ ଦୁକ୍କଟଂ ହୋତି, ନିସ୍ସଗ୍ଗି ପରିଣାମିତେ ।
ସବ୍ବତ୍ଥ ଅପ୍ପନାୱାର-ପରିହାନି କତା ମୟା ॥
ପତ୍ତୱଗ୍ଗୋ ତତିୟୋ ।
ତିଂସନିସ୍ସଗ୍ଗିୟକଥା ।
ୱଦନ୍ତସ୍ସ ମୁସାୱାଦଂ, ପଞ୍ଚ ଆପତ୍ତିୟୋ ସିୟୁଂ ।
ମନୁସ୍ସୁତ୍ତରିଧମ୍ମେ ତୁ, ଅଭୂତସ୍ମିଂ ପରାଜୟୋ ॥
ଚୋଦନାୟ ଗରୁଂ ଭିକ୍ଖୁଂ, ଅମୂଲନ୍ତିମୱତ୍ଥୁନା ।
ପରିୟାୟୱଚନେ ଞାତେ, ଥୁଲ୍ଲଚ୍ଚୟମୁଦୀରିତଂ ॥
ନୋ ଚେ ପଟିୱିଜାନାତି, ଦୁକ୍କଟଂ ସମୁଦାହଟଂ ।
ସମ୍ପଜାନମୁସାୱାଦେ, ପାଚିତ୍ତି ପରିଦୀପିତା ॥
ଆପତ୍ତିୟୋ ଦୁୱେ ୱୁତ୍ତା, ଭିକ୍ଖୁସ୍ସୋମସତୋ ପନ ।
ପାଚିତ୍ତି ଉପସମ୍ପନ୍ନଂ, ଦୁକ୍କଟଂ ଇତରଂ ସିୟା ॥
ପେସୁଞ୍ଞହରଣେ ଦ୍ୱେପି, ହୋନ୍ତି, ପାଚିତ୍ତିୟଂ ପନ ।
ଉପସମ୍ପନ୍ନପେସୁଞ୍ଞେ, ସେସେ ଆପତ୍ତି ଦୁକ୍କଟଂ ॥
ପଦସୋନୁପସମ୍ପନ୍ନଂ, ଧମ୍ମଂ ୱାଚେତି ଚେ ଦୁୱେ ।
ପୟୋଗେ ଦୁକ୍କଟଂ, ପାଦେ, ପାଦେ ପାଚିତ୍ତିୟଂ ସିୟା ॥
ତିରତ୍ତାନୁପସମ୍ପନ୍ନ-ସହସେୟ୍ୟାୟ ଉତ୍ତରିଂ ।
ପୟୋଗେ ଦୁକ୍କଟଂ ୱୁତ୍ତଂ, ପନ୍ନେ ପାଚିତ୍ତିୟଂ ସିୟା ॥
କପ୍ପେତି ମାତୁଗାମେନ, ସହସେୟ୍ୟଂ ସଚେ ପନ ।
ଦ୍ୱେ ସୋ ଆପଜ୍ଜତାପତ୍ତୀ, ରତ୍ତିୟଂ ଦୁକ୍କଟାଦୟୋ ॥
ଉଦ୍ଧଂ ଛପ୍ପଞ୍ଚୱାଚାହି, ଧମ୍ମଂ ଦେସେତି ଇତ୍ଥିୟା ।
ପୟୋଗେ ଦୁକ୍କଟଂ, ପାଦେ, ପାଦେ ପାଚିତ୍ତିୟଂ ସିୟା ॥
ଭୂତଂ ଅନୁପସମ୍ପନ୍ନେ, ମନୁସ୍ସୁତ୍ତରିଧମ୍ମକଂ ।
ଆରୋଚେତି ସଚେ ତସ୍ସ, ହୋନ୍ତି ଦ୍ୱେ ଦୁକ୍କଟାଦୟୋ ॥
ୱଦଂ ଅନୁପସମ୍ପନ୍ନେ, ଦୁଟ୍ଠୁଲ୍ଲାପତ୍ତିମଞ୍ଞତୋ ।
ପୟୋଗେ ଦୁକ୍କଟଂ ତସ୍ସ, ପାଚିତ୍ତାରୋଚିତେ ସିୟା ॥
ପଥୱିଂ ଖଣତୋ ତସ୍ସ, ପୟୋଗେ ଦୁକ୍କଟଂ ମତଂ ।
ପହାରେ ଚ ପହାରେ ଚ, ପାଚିତ୍ତି ପରିୟାପୁତା ॥
ମୁସାୱାଦୱଗ୍ଗୋ ପଠମୋ ।
ଭୂତଗାମଂ ତୁ ପାତେନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ, ତସ୍ସ, ପାତେ ପାଚିତ୍ତି ଦୀପିତା ॥
ଅଞ୍ଞେନଞ୍ଞଂ ୱଦନ୍ତସ୍ସ, ଦ୍ୱେ ସିୟୁଂ ଅଞ୍ଞୱାଦକେ ।
ଅରୋପିତେ ଦୁକ୍କଟଂ ତୁ, ହୋତି ପାଚିତ୍ତି ରୋପିତେ ॥
ଉଜ୍ଝାପେନ୍ତୋ ପରଂ ଭିକ୍ଖୁଂ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ, ଉଜ୍ଝା-ପିତେ ପାଚିତ୍ତିୟଂ ସିୟା ॥
ଅଜ୍ଝୋକାସେ ତୁ ମଞ୍ଚାଦିଂ, ସନ୍ଥରିତ୍ୱାନ ସଙ୍ଘିକଂ ।
ପକ୍କମନ୍ତୋ ଅନାପୁଚ୍ଛା, ଆପତ୍ତିଂ ଦୁୱିଧଂ ଫୁସେ ॥
ଲେଡ୍ଡୁପାତେ ଅତିକ୍କନ୍ତେ, ପାଦେନ ପଠମେନ ତୁ ।
ଦୁକ୍କଟଂ, ଦୁତିୟେନାପି, ପାଚିତ୍ତି ପରିଦୀପୟେ ॥
ୱିହାରେ ସଙ୍ଘିକେ ସେୟ୍ୟଂ, ସନ୍ଥରିତ୍ୱା ଅନୁଦ୍ଧରଂ ।
ଅନାପୁଚ୍ଛା ପକ୍କମନ୍ତୋ, ଦୁୱିଧାପତ୍ତିୟୋ ଫୁସେ ॥
ପରିକ୍ଖେପେ ଅତିକ୍କନ୍ତେ, ପାଦେନ ପଠମେନ ତୁ ।
ଦୁକ୍କଟଂ ପନ ଉଦ୍ଦିଟ୍ଠଂ, ପାଚିତ୍ତି ଦୁତିୟେନ ତୁ ॥
ୱିହାରେ ସଙ୍ଘିକେ ଜାନଂ, ପୁବ୍ବୂପଗତଭିକ୍ଖୁକଂ ।
ସେୟ୍ୟଂ କପ୍ପୟତୋ ହୋନ୍ତି, ପୟୋଗେ ଦୁକ୍କଟାଦୟୋ ॥
ସଙ୍ଘିକା କୁପିତୋ ଭିକ୍ଖୁଂ, ନିକ୍କଡ୍ଢତି ୱିହାରତୋ ।
ପୟୋଗେ ଦୁକ୍କଟଂ ୱୁତ୍ତଂ, ସେସଂ ନିକ୍କଡ୍ଢିତେ ସିୟା ॥
ୱିହାରେ ସଙ୍ଘିକେ ଭିକ୍ଖୁ, ୱେହାସକୁଟିୟୂପରି ।
ଆହଚ୍ଚପାଦକେ ସୀଦଂ, ଫୁସେ ଦ୍ୱେ ଦୁକ୍କଟାଦୟୋ ॥
ଅଧିଟ୍ଠିତ୍ୱା ଦ୍ୱତ୍ତିପରିୟାୟେ, ଉତ୍ତରିମ୍ପି ଅଧିଟ୍ଠତୋ ।
ପୟୋଗେ ଦୁକ୍କଟଂ ହୋତି, ପାଚିତ୍ତି ପନଧିଟ୍ଠିତେ ॥
ଜାନଂ ସପ୍ପାଣକଂ ତୋୟଂ, ତିଣଂ ୱା ସିଞ୍ଚତୋ ପନ ।
ପୟୋଗେ ଦୁକ୍କଟଂ ହୋତି, ସିତ୍ତେ ପାଚିତ୍ତିୟଂ ସିୟା ॥
ଭୂତଗାମୱଗ୍ଗୋ ଦୁତିୟୋ ।
ଫୁସେ ଭିକ୍ଖୁନିୟୋ ଭିକ୍ଖୁ, ଓୱଦନ୍ତୋ ଅସମ୍ମତୋ ।
ପୟୋଗେ ଦୁକ୍କଟଂ, ତସ୍ସ, ପାଚିତ୍ତୋୱଦିତେ ସିୟା ॥
ଦୁତିୟେ ତତିୟେ ଚେୱ, ଚତୁତ୍ଥେପି ଚ ସବ୍ବସୋ ।
ପଠମେନ ସମାନାୱ, ଆପତ୍ତୀନଂ ୱିଭାଗତା ॥
ଚୀୱରଂ ଭିକ୍ଖୁ ଅଞ୍ଞାତି-କାୟ ଦେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ଦିନ୍ନେ ପାଚିତ୍ତିୟଂ ସିୟା ॥
ଅଞ୍ଞାତିକଭିକ୍ଖୁନିୟା, ଭିକ୍ଖୁ ସିବ୍ବେୟ୍ୟ ଚୀୱରଂ ।
ପୟୋଗେ ଦୁକ୍କଟଂ ତସ୍ସ, ପାଚିତ୍ତି ପନ ସିବ୍ବିତେ ॥
ଅଦ୍ଧାନଞ୍ଞତ୍ର ସମୟା, ଭିକ୍ଖୁ ଭିକ୍ଖୁନିୟା ସହ ।
ସଂୱିଧାୟ ତୁ ଗଚ୍ଛନ୍ତୋ, ଫୁସେ ଦ୍ୱେ ଦୁକ୍କଟାଦୟୋ ॥
ନାୱେକଂ ଅଭିରୂହନ୍ତୋ, ଭିକ୍ଖୁ ଭିକ୍ଖୁନିୟା ସହ ।
ସଂୱିଧାୟ ଫୁସେ ଦ୍ୱେପି, ପୟୋଗେ ଦୁକ୍କଟାଦୟୋ ॥
ଜାନଂ ଭିକ୍ଖୁନିୟା ପିଣ୍ଡ-ପାତଂ ତୁ ପରିପାଚିତଂ ।
ଭୁଞ୍ଜନ୍ତୋ ଦୁୱିଧାପତ୍ତି-ମାପଜ୍ଜତି, ନ ସଂସୟୋ ॥
‘‘ଭୁଞ୍ଜିସ୍ସାମୀ’’ତି ଚେ ଭତ୍ତଂ, ପଟିଗ୍ଗଣ୍ହାତି ଦୁକ୍କଟଂ ।
ଅଜ୍ଝୋହାରପୟୋଗେସୁ, ପାଚିତ୍ତି ପରିଦୀପିତା ॥
ଭିକ୍ଖୁ ଭିକ୍ଖୁନିୟା ସଦ୍ଧିଂ, ନିସଜ୍ଜଂ ତୁ ରହୋ ପନ ।
କପ୍ପେନ୍ତୋ ହି ଫୁସେ ଦ୍ୱେପି, ପୟୋଗେ ଦୁକ୍କଟାଦୟୋ ॥
ଓୱାଦୱଗ୍ଗୋ ତତିୟୋ ।
ତଦୁତ୍ତରିଂ ଆୱସଥ-ପିଣ୍ଡଂ ତୁ ପରିଭୁଞ୍ଜତୋ ।
ଅନନ୍ତରସ୍ସ ୱଗ୍ଗସ୍ସ, ନୱମେନ ସମୋ ନୟୋ ॥
ଦୁତିୟେ ତତିୟେ ଚାପି, ୱିସେସୋ ନତ୍ଥି କୋଚିପି ।
ଅନନ୍ତରସମାନାୱ, ଆପତ୍ତୀନଂ ୱିଭାଗତା ॥
ଦ୍ୱତ୍ତିପତ୍ତେ ଗହେତ୍ୱାନ, ଗଣ୍ହତୋ ହି ତଦୁତ୍ତରିଂ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ଗହିତେ ସିୟା ॥
ପଞ୍ଚମେ ପଠମେନେୱ, ସମୋ ଆପତ୍ତିନିଚ୍ଛୟୋ ।
ଛଟ୍ଠେ ଅନତିରିତ୍ତେନ, ଭୁତ୍ତାୱିଂ ତୁ ପୱାରିତଂ ॥
ଅଭିହଟ୍ଠୁଂ ପୱାରେନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ୱଚନେନ ଚ ତସ୍ସେୱ, ‘‘ଭୁଞ୍ଜିସ୍ସାମୀ’’ତି ଗଣ୍ହତି ॥
ଗହଣେ ଦୁକ୍କଟଂ ତସ୍ସ, ପିଟକେ ସମୁଦାହଟଂ ।
ଭୋଜନସ୍ସ ପନୋସାନେ, ପାଚିତ୍ତି ପରିୟାପୁତା ॥
ସତ୍ତମେ ଅଟ୍ଠମେ ଚେୱ, ନୱମେ ଦସମେପି ଚ ।
ପଠମେନ ସମାନାୱ, ଆପତ୍ତୀନଂ ୱିଭାଗତା ॥
ଭୋଜନୱଗ୍ଗୋ ଚତୁତ୍ଥୋ ।
ଅଚେଲକାଦିନୋ ଦେନ୍ତୋ, ସହତ୍ଥା ଭୋଜନାଦିକଂ ।
ପୟୋଗେ ଦୁକ୍କଟଂ ପତ୍ତୋ, ଦିନ୍ନେ ପାଚିତ୍ତିୟଂ ଫୁସେ ॥
ଦାପେତ୍ୱା ୱା ଅଦାପେତ୍ୱା, ଉୟ୍ୟୋଜେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ, ତସ୍ମିଂ, ପାଚିତ୍ତୁୟ୍ୟୋଜିତେ ସିୟା ॥
ନିସଜ୍ଜଂ ଭିକ୍ଖୁ କପ୍ପେନ୍ତୋ, କୁଲେ ପନ ସଭୋଜନେ ।
ଆପତ୍ତିୟୋ ଫୁସେ ଦ୍ୱେପି, ପୟୋଗେ ଦୁକ୍କଟାଦୟୋ ॥
ଚତୁତ୍ଥେ ପଞ୍ଚମେ ୱାପି, ୱିସେସୋ ନତ୍ଥି କୋଚିପି ।
ତତିୟେନ ସମାନାୱ, ଆପତ୍ତିଗଣନା ସିୟା ॥
ସନ୍ତଂ ଭିକ୍ଖୁଂ ଅନାପୁଚ୍ଛା, ସଭତ୍ତୋ ଚ ନିମନ୍ତିତୋ ।
କୁଲେସୁ ପନ ଚାରିତ୍ତଂ, ଆପଜ୍ଜନ୍ତୋ ଦୁୱେ ଫୁସେ ॥
ପଠମେନ ଚ ପାଦେନ, ଉମ୍ମାରାତିକ୍କମେ ପନ ।
ଦୁକ୍କଟଂ ପିଟକେ ୱୁତ୍ତଂ, ପାଚିତ୍ତି ଦୁତିୟେନ ତୁ ॥
ତଦୁତ୍ତରିଂ ତୁ ଭେସଜ୍ଜଂ, ୱିଞ୍ଞାପେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ, ୱିଞ୍ଞା-ପିତେ ପାଚିତ୍ତିୟଂ ସିୟା ॥
ଉୟ୍ୟୁତ୍ତଂ ଦସ୍ସନତ୍ଥାୟ, ଗଚ୍ଛନ୍ତୋ ଦ୍ୱେ ଫୁସେ ବଲଂ ।
ଗଚ୍ଛତୋ ଦୁକ୍କଟଂ ୱୁତ୍ତଂ, ହୋତି ପାଚିତ୍ତି ପସ୍ସତୋ ॥
ଅତିରେକତିରତ୍ତଂ ତୁ, ସେନାୟ ୱସତୋ ଦୁୱେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ୱସିତେ ସିୟା ॥
ଉୟ୍ୟୋଧିକଂ ତୁ ଗଚ୍ଛନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ଗଚ୍ଛନ୍ତୋ ଦୁକ୍କଟଂ ୱୁତ୍ତଂ, ହୋତି ପାଚିତ୍ତି ପସ୍ସତୋ ॥
ଅଚେଲକୱଗ୍ଗୋ ପଞ୍ଚମୋ ।
ସୁରଂ ୱା ପନ ମେରେୟ୍ୟଂ, ପିୱନ୍ତୋ ଦ୍ୱେ ଫୁସେ ମୁନି ।
ଗଣ୍ହତୋ ଦୁକ୍କଟଂ ପାତୁଂ, ପୀତେ ପାଚିତ୍ତିୟଂ ସିୟା ॥
ଭିକ୍ଖଙ୍ଗୁଲିପତୋଦେନ, ହାସେନ୍ତୋ ଦ୍ୱେ ଫୁସେ ହୱେ ।
ପୟୋଗେ ଦୁକ୍କଟଂ ତସ୍ସ, ପାଚିତ୍ତି ହସିତେ ସିୟା ॥
କୀଳନ୍ତୋ ଉଦକେ ଭିକ୍ଖୁ, ଦ୍ୱେ ପନାପତ୍ତିୟୋ ଫୁସେ ।
ଦୁକ୍କଟଂ ଗୋପ୍ଫକା ହେଟ୍ଠା, ପାଚିତ୍ତୁପରିଗୋପ୍ଫକେ ॥
ୟୋ ପନାଦରିୟଂ ଭିକ୍ଖୁ, କରୋନ୍ତୋ ଦ୍ୱେ ଫୁସେ ହୱେ ।
ପୟୋଗେ ଦୁକ୍କଟଂ ୱୁତ୍ତଂ, କତେ ପାଚିତ୍ତିୟଂ ସିୟା ॥
ଭିଂସାପେନ୍ତୋ ହୱେ ଭିକ୍ଖୁ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ, ଭିଂସା-ପିତେ ପାଚିତ୍ତିୟଂ ସିୟା ॥
ଜୋତିଂ ସମାଦହିତ୍ୱାନ, ୱିସିବ୍ବେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତିୟଂ ୱିସୀୱିତେ ॥
ଓରସୋ ଅଦ୍ଧମାସସ୍ସ, ନ୍ହାୟନ୍ତୋ ଦ୍ୱେ ଫୁସେ ହୱେ ।
ପୟୋଗେ ଦୁକ୍କଟଂ, ନ୍ହାନ-ସ୍ସୋସାନେ ଇତରଂ ସିୟା ॥
ଦୁବ୍ବଣ୍ଣକରଣାନଂ ତୁ, ତିଣ୍ଣମେକମନାଦିୟ ।
ଚୀୱରଂ ପରିଭୁଞ୍ଜନ୍ତୋ, ଦ୍ୱେ ଫୁସେ ଦୁକ୍କଟାଦୟୋ ॥
ଚୀୱରଂ ଭିକ୍ଖୁଆଦୀନଂ, ୱିକପ୍ପେତ୍ୱା ଅନୁଦ୍ଧରଂ ।
ଦ୍ୱେ ଫୁସେ ପରିଭୁଞ୍ଜନ୍ତୋ, ପୟୋଗେ ଦୁକ୍କଟାଦୟୋ ॥
ଭିକ୍ଖୁସ୍ସାପନିଧେନ୍ତୋ ଦ୍ୱେ, ଫୁସେ ପତ୍ତାଦିକଂ ପନ ।
ପୟୋଗେ ଦୁକ୍କଟଂ, ତସ୍ମିଂ, ସେସାପନିହିତେ ସିୟା ॥
ସୁରାପାନୱଗ୍ଗୋ ଛଟ୍ଠୋ ।
ସଞ୍ଚିଚ୍ଚ ଜୀୱିତା ପାଣଂ, ୱୋରୋପେନ୍ତୋ ତପୋଧନୋ ।
ଆପତ୍ତିୟୋ ଚତସ୍ସୋୱ, ଆପଜ୍ଜତି, ନ ସଂସୟୋ ॥
ଅନୋଦିସ୍ସକମୋପାତଂ, ଖଣତୋ ହୋତି ଦୁକ୍କଟଂ ।
ମନୁସ୍ସୋ ମରତି ତସ୍ମିଂ, ପତିତ୍ୱା ଚେ ପରାଜୟୋ ॥
ୟକ୍ଖୋ ୱାପି ତିରଚ୍ଛାନ-ଗତୋ ମନୁସ୍ସୱିଗ୍ଗହୋ ।
ପତିତ୍ୱା ମରତୀ ପେତୋ, ତସ୍ସ ଥୁଲ୍ଲଚ୍ଚୟଂ ସିୟା ॥
ତିରଚ୍ଛାନଗତେ ତସ୍ମିଂ, ନିପତିତ୍ୱା ମତେ ପନ ।
ତସ୍ସ ପାଚିତ୍ତିୟାପତ୍ତି, ପଞ୍ଞତ୍ତା ପଟୁବୁଦ୍ଧିନା ॥
ଜାନଂ ସପ୍ପାଣକଂ ତୋୟଂ, ପରିଭୁଞ୍ଜଂ ଦୁୱେ ଫୁସେ ।
ପୟୋଗେ ଦୁକ୍କଟଂ ତସ୍ସ, ଭୁତ୍ତେ ପାଚିତ୍ତିୟଂ ସିୟା ॥
ନିହତାଧିକରଣଂ ଜାନଂ, ଉକ୍କୋଟେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତୁକ୍କୋଟିତେ ସିୟା ॥
ଜାନଂ ଭିକ୍ଖୁସ୍ସ ଦୁଟ୍ଠୁଲ୍ଲଂ, ଛାଦେନ୍ତୋ ପନ ୱଜ୍ଜକଂ ।
ଏକମାପଜ୍ଜତାପତ୍ତିଂ, ପାଚିତ୍ତିମିତି ଦୀପିତଂ ॥
ଊନୱୀସତିୱସ୍ସଂ ତୁ, କରୋନ୍ତୋ ଉପସମ୍ପଦଂ ।
ପୟୋଗେ ଦୁକ୍କଟଂ ପତ୍ତୋ, ସେସା ସମ୍ପାଦିତେ ସିୟା ॥
ଜାନଂ ତୁ ଥେୟ୍ୟସତ୍ଥେନ, ସଂୱିଧାୟ ସହେୱ ଚ ।
ତଥେୱ ମାତୁଗାମେନ, ମଗ୍ଗଂ ତୁ ପଟିପଜ୍ଜତୋ ॥
ଦ୍ୱେ ପନାପତ୍ତିୟୋ ହୋନ୍ତି, ପୟୋଗେ ଦୁକ୍କଟଂ ମତଂ ।
ପଟିପନ୍ନେ ପନୁଦ୍ଦିଟ୍ଠଂ, ପାଚିତ୍ତିୟମନନ୍ତରଂ ॥
ଅଚ୍ଚଜଂ ପାପିକଂ ଦିଟ୍ଠିଂ, ଞତ୍ତିୟା ଦୁକ୍କଟଂ ଫୁସେ ।
କମ୍ମୱାଚାୟ ଓସାନେ, ହୋତି ପାଚିତ୍ତି ଭିକ୍ଖୁନୋ ॥
ତଥାକଟାନୁଧମ୍ମେନ, ସଂଭୁଞ୍ଜନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ତସ୍ସ, ଭୁତ୍ତେ ପାଚିତ୍ତିୟଂ ସିୟା ॥
ନାସିତଂ ସମଣୁଦ୍ଦେସଂପଲାପେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ଉପଲାପିତେ ॥
ସପ୍ପାଣକୱଗ୍ଗୋ ସତ୍ତମୋ ।
ୱୁଚ୍ଚମାନସ୍ସ ଭିକ୍ଖୁସ୍ସ, ଭିକ୍ଖୂହି ସହଧମ୍ମିକଂ ।
‘‘ନ ସକ୍ଖିସ୍ସାମି’’ଇଚ୍ଚେୱଂ, ଭଣତୋ ଦୁକ୍କଟାଦୟୋ ॥
ୱିନୟଂ ତୁ ୱିୱଣ୍ଣେନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ତସ୍ସ, ପାଚିତ୍ତେୱ ୱିୱଣ୍ଣିତେ ॥
ମୋହେନ୍ତୋ ଦ୍ୱେ ଫୁସେ, ମୋହେ, ଦୁକ୍କଟଂ ତୁ ଅରୋପିତେ ।
ରୋପିତେ ପନ ମୋହସ୍ମିଂ, ପାଚିତ୍ତିୟମୁଦୀରିତଂ ॥
ପହାରଂ କୁପିତୋ ଦେନ୍ତୋ, ଭିକ୍ଖୁସ୍ସ ଦ୍ୱେ ଫୁସେ ହୱେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ପହଟେ ସିୟା ॥
ଭିକ୍ଖୁସ୍ସ କୁପିତୋ ଭିକ୍ଖୁ, ଉଗ୍ଗିରଂ ତଲସତ୍ତିକଂ ।
ଦ୍ୱେ ଫୁସେ ଦୁକ୍କଟଂ ୟୋଗେ, ପାଚିତ୍ତୁଗ୍ଗିରିତେ ସିୟା ॥
ଭିକ୍ଖୁ ସଙ୍ଘାଦିସେସେନ, ଅମୂଲେନେୱ ଚୋଦୟଂ ।
ଦ୍ୱେ ଫୁସେ ଦୁକ୍କଟଂ ୟୋଗେ, ପାଚିତ୍ତୁଦ୍ଧଂସିତେ ସିୟା ॥
ଭିକ୍ଖୁ ସଞ୍ଚିଚ୍ଚ କୁକ୍କୁଚ୍ଚଂ, ଜନୟନ୍ତୋ ହି ଭିକ୍ଖୁନୋ ।
ଦ୍ୱେ ଫୁସେ ଦୁକ୍କଟଂ ୟୋଗେ, ପାଚିତ୍ତୁପ୍ପାଦିତେ ସିୟା ॥
ତିଟ୍ଠନ୍ତୁପସ୍ସୁତିଂ ଭିକ୍ଖୁ, ଦ୍ୱେ ପନାପତ୍ତିୟୋ ଫୁସେ ।
ଗଚ୍ଛତୋ ଦୁକ୍କଟଂ ସୋତୁଂ, ପାଚିତ୍ତି ସୁଣତୋ ସିୟା ॥
ଧମ୍ମିକାନଂ ତୁ କମ୍ମାନଂ, ଛନ୍ଦଂ ଦତ୍ୱା ତତୋ ପୁନ ।
ଖୀୟନଧମ୍ମମାପଜ୍ଜଂ, ଦ୍ୱେ ଫୁସେ ଦୁକ୍କଟାଦୟୋ ॥
ସଙ୍ଘେ ୱିନିଚ୍ଛୟେ ନିଟ୍ଠଂ, ଅଗତେ ଛନ୍ଦମତ୍ତନୋ ।
ଅଦତ୍ୱା ଗଚ୍ଛତୋ ତସ୍ସ, ଦ୍ୱେ ପନାପତ୍ତିୟୋ ସିୟୁଂ ॥
ହତ୍ଥପାସଂ ତୁ ସଙ୍ଘସ୍ସ, ଜହତୋ ହୋତି ଦୁକ୍କଟଂ ।
ଜହିତେ ହତ୍ଥପାସସ୍ମିଂ, ହୋତି ପାଚିତ୍ତି ଭିକ୍ଖୁନୋ ॥
ସମଗ୍ଗେନ ଚ ସଙ୍ଘେନ, ଦତ୍ୱାନ ସହ ଚୀୱରଂ ।
ଖୀୟନ୍ତୋ ଦ୍ୱେ ଫୁସେ ପଚ୍ଛା, ପୟୋଗେ ଦୁକ୍କଟାଦୟୋ ॥
ଲାଭଂ ପରିଣତଂ ଜାନଂ, ସଙ୍ଘିକଂ ପୁଗ୍ଗଲସ୍ସ ହି ।
ଦ୍ୱେ ଫୁସେ ପରିଣାମେନ୍ତୋ, ପୟୋଗେ ଦୁକ୍କଟାଦୟୋ ॥
ସହଧମ୍ମିକୱଗ୍ଗୋ ଅଟ୍ଠମୋ ।
ପୁବ୍ବେ ଅୱିଦିତୋ ହୁତ୍ୱା, ରଞ୍ଞୋ ଅନ୍ତେପୁରଂ ପନ ।
ପୱିସନ୍ତସ୍ସ ଭିକ୍ଖୁନୋ, ଦ୍ୱେ ପନାପତ୍ତିୟୋ ସିୟୁଂ ॥
ପଠମେନ ଚ ପାଦେନ, ଉମ୍ମାରାତିକ୍କମେ ପନ ।
ଦୁକ୍କଟଂ ପନ ଉଦ୍ଦିଟ୍ଠଂ, ପାଚିତ୍ତି ଦୁତିୟେନ ତୁ ॥
ରତନଂ ପନ ଗଣ୍ହନ୍ତୋ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ତସ୍ସ, ପାଚିତ୍ତି ଗହିତେ ସିୟା ॥
ସନ୍ତଂ ଭିକ୍ଖୁଂ ଅନାପୁଚ୍ଛା, ୱିକାଲେ ଗାମକଂ ପନ ।
ସମଣୋ ପୱିସଂ ଦୋସେ, ଆପଜ୍ଜତି ଦୁୱେ ପନ ॥
ପଠମେନ ଚ ପାଦେନ, ପରିକ୍ଖେପଂ ଅତିକ୍କମେ ।
ଦୁକ୍କଟଂ ତସ୍ସ ନିଦ୍ଦିଟ୍ଠଂ, ପାଚିତ୍ତି ଦୁତିୟେନ ତୁ ॥
ଅଟ୍ଠିଦନ୍ତୱିସାଣାଭି-ନିବ୍ବତ୍ତଂ ସୂଚିୟା ଘରଂ ।
କାରାପେନ୍ତୋ ଫୁସେ ଦ୍ୱେପି, ପୟୋଗେ ଦୁକ୍କଟାଦୟୋ ॥
ପମାଣାତୀତମଞ୍ଚାଦିଂ, କାରାପେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ସେସା କାରାପିତେ ସିୟା ॥
ତୂଲୋନଦ୍ଧଂ ତୁ ମଞ୍ଚାଦିଂ, କାରାପେନ୍ତୋ ଦୁୱେ ଫୁସେ ।
ପୟୋଗେ ଦୁକ୍କଟଂ, ତସ୍ମିଂ, ସେସା କାରାପିତେ ସିୟା ॥
ସତ୍ତମେ ଅଟ୍ଠମେ ଚେୱ, ନୱମେ ଦସମେପି ଚ ।
ଅନନ୍ତରସମୋୟେୱ, ଆପତ୍ତୀନଂ ୱିନିଚ୍ଛୟୋ ॥
ରତନୱଗ୍ଗୋ ନୱମୋ ।
ପାଚିତ୍ତିୟକଥା ।
ଚତୂସୁ ଦୁୱିଧାପତ୍ତି, ପାଟିଦେସନିୟେସୁପି ।
ଅୱିସେସେନ ନିଦ୍ଦିଟ୍ଠା, ବୁଦ୍ଧେନାଦିଚ୍ଚବନ୍ଧୁନା ॥
‘‘ଭୁଞ୍ଜିସ୍ସାମୀ’’ତି ଭିକ୍ଖୁସ୍ସ, ଦୁକ୍କଟଂ ପଟିଗଣ୍ହତୋ ।
ଅଜ୍ଝୋହାରେସୁ ସବ୍ବତ୍ଥ, ପାଟିଦେସନିୟଂ ସିୟା ॥
ପାଟିଦେସନୀୟକଥା ।
ସେଖିୟେସୁ ଚ ଧମ୍ମେସୁ, ଏକାୱାପତ୍ତି ଦୀପିତା ।
ଅନାଦରୱସେନେୱ, ଦୁକ୍କଟଂ ସମୁଦାହଟଂ ॥
ସେଖିୟକଥା ।
ପଞ୍ଞତ୍ତା ମେଥୁନଂ ଧମ୍ମଂ, ପଟିସେୱନପଚ୍ଚୟା ।
କତି ଆପତ୍ତିୟୋ ହୋନ୍ତି ? ଚତସ୍ସୋୱ ଭୱନ୍ତି ହି ॥
ମେଥୁନଂ ପଟିସେୱନ୍ତୋ, ଅଲ୍ଲୋକାସପ୍ପୱେସନେ ।
ମତେ ଅକ୍ଖାୟିତେ ୱାପି, ଭିକ୍ଖୁ ପାରାଜିକଂ ଫୁସେ ॥
ଥୁଲ୍ଲଚ୍ଚୟଂ ତୁ ୟେଭୁୟ୍ୟ-କ୍ଖାୟିତେ, ଦୁକ୍କଟଂ ତଥା ।
ମୁଖେ ୱଟ୍ଟକତେ ୱୁତ୍ତଂ, ପାଚିତ୍ତି ଜତୁମଟ୍ଠକେ ॥
ପଞ୍ଞତ୍ତା କାୟସଂସଗ୍ଗଂ, ସମାପଜ୍ଜନପଚ୍ଚୟା ।
କତି ଆପତ୍ତିୟୋ ହୋନ୍ତି ? ପଞ୍ଚ ଆପତ୍ତିୟୋ ସିୟୁଂ ॥
ଅୱସ୍ସୁତସ୍ସ ପୋସସ୍ସ, ତଥା ଭିକ୍ଖୁନିୟାପି ଚ ।
ପାରାଜିକମଧକ୍ଖାଦି-ଗହଣଂ ସାଦିୟନ୍ତିୟା ॥
କାୟେନ ଫୁସତୋ କାୟଂ, ଭିକ୍ଖୁସ୍ସ ଗରୁକଂ ସିୟା ।
କାୟେନ କାୟବଦ୍ଧଂ ତୁ, ଫୁସଂ ଥୁଲ୍ଲଚ୍ଚୟଂ ସିୟା ॥
ପଟିବଦ୍ଧେନ କାୟେନ, ପଟିବଦ୍ଧଂ ତୁ ଦୁକ୍କଟଂ ।
ପାଚିତ୍ତିୟଂ ପନୁଦ୍ଦିଟ୍ଠଂ, ତସ୍ସଙ୍ଗୁଲିପତୋଦକେ ॥
ସେସେସୁ ସେଖିୟନ୍ତେସୁ, ଆପତ୍ତୀନଂ ୱିନିଚ୍ଛୟୋ ।
ହେଟ୍ଠା ୱୁତ୍ତନୟେନେୱ, ୱେଦିତବ୍ବୋ ୱିଭାୱିନା ॥
ମହାୱିଭଙ୍ଗସଙ୍ଗହୋ ନିଟ୍ଠିତୋ ।
ଭିକ୍ଖୁନୀୱିଭଙ୍ଗୋ
ଭିକ୍ଖୂନଂ ପାଟୱତ୍ଥାୟ, ୱିନୟସ୍ସ ୱିନିଚ୍ଛୟେ ।
ଭିକ୍ଖୁନୀନଂ ୱିଭଙ୍ଗୋପି, କିଞ୍ଚିମତ୍ତଂ ଭଣାମହଂ ॥
ଅୱସ୍ସୁତସ୍ସ ପୋସସ୍ସ, ଭିକ୍ଖୁନୀପି ଅୱସ୍ସୁତା ।
ନନ୍ଦନ୍ତୀ କାୟସଂସଗ୍ଗଂ, କତି ଆପତ୍ତିୟୋ ଫୁସେ ।
ତିସ୍ସୋ ଆପତ୍ତିୟୋ ଉବ୍ଭ-ଜାଣୁସ୍ସାଧକ୍ଖକସ୍ସ ଚ ।
ହୋତି ପାରାଜିକଂ ତସ୍ସା, ଗହଣଂ ସାଦିୟନ୍ତିୟା ॥
ଉବ୍ଭକ୍ଖକଂ ଅଧୋଜାଣୁ-ଗହଣଂ ସାଦିୟନ୍ତିୟା ।
ଥୁଲ୍ଲଚ୍ଚୟଂ ସିୟା, କାୟ-ପଟିବଦ୍ଧେ ତୁ ଦୁକ୍କଟଂ ॥
ଛାଦେନ୍ତୀ ଭିକ୍ଖୁନୀ ୱଜ୍ଜଂ, ତିସ୍ସୋ ଆପତ୍ତିୟୋ ଫୁସେ ।
ଜାନଂ ପାରାଜିକଂ ଧମ୍ମଂ, ଛାଦେନ୍ତୀ ସା ପରାଜିକା ॥
ଥୁଲ୍ଲଚ୍ଚୟଂ ୱେମତିକା, ପଟିଚ୍ଛାଦେତି ଚେ ପନ ।
ଅଥାଚାରୱିପତ୍ତିଂ ଚେ, ପଟିଚ୍ଛାଦେତି ଦୁକ୍କଟଂ ॥
ନିସ୍ସଜ୍ଜନ୍ତୀ ନ ତଂ ଲଦ୍ଧିଂ, ଉକ୍ଖିତ୍ତସ୍ସାନୁୱତ୍ତିକା ।
ସମନୁଭାସନାୟେୱ, ତିସ୍ସୋ ଆପତ୍ତିୟୋ ଫୁସେ ॥
ଞତ୍ତିୟା ଦୁକ୍କଟଂ, ଦ୍ୱୀହି, କମ୍ମୱାଚାହି ଥୁଲ୍ଲତା ।
କମ୍ମୱାଚାୟ ଓସାନେ, ପାରାଜିକମୁଦୀରିତଂ ॥
ପୂରେନ୍ତୀ ଅଟ୍ଠମଂ ୱତ୍ଥୁଂ, ତିସ୍ସୋ ଆପତ୍ତିୟୋ ଫୁସେ ।
ପୁରିସେନିଧାଗଚ୍ଛାତି, ୱୁତ୍ତାଗଚ୍ଛତି ଦୁକ୍କଟଂ ॥
ଥୁଲ୍ଲଚ୍ଚୟଂ ତୁ ପୋସସ୍ସ, ହତ୍ଥପାସପ୍ପୱେସନେ ।
ପୂରେନ୍ତୀ ଅଟ୍ଠମଂ ୱତ୍ଥୁଂ, ସମଣୀ ସା ପରାଜିତା ॥
ପାରାଜିକକଥା ।
ଉସ୍ସୟୱାଦିକା ଅଟ୍ଟଂ, କରୋନ୍ତୀ ତିୱିଧଂ ଫୁସେ ।
ଏକସ୍ସାରୋଚନେ ତସ୍ସା, ହୋତି ଆପତ୍ତି ଦୁକ୍କଟଂ ॥
ଦୁତିୟାରୋଚନେ ତସ୍ସା, ଥୁଲ୍ଲଚ୍ଚୟମୁଦୀରିତଂ ।
ଅଟ୍ଟସ୍ସ ପରିୟୋସାନେ, ହୋତି ସଙ୍ଘାଦିସେସତା ॥
ଚୋରିୱୁଟ୍ଠାପିକା ୱାପି, ଞତ୍ତିୟା ଦୁକ୍କଟଂ ଫୁସେ ।
ଦ୍ୱୀହି ଥୁଲ୍ଲଚ୍ଚୟଂ କମ୍ମ-ୱାଚୋସାନେ ଗରୁଂ ସିୟା ॥
ଏକା ଗାମନ୍ତରଂ ଗଚ୍ଛେ, ଗମନେ ଦୁକ୍କଟଂ ସିୟା ।
ପରିକ୍ଖେପେ ଅତିକ୍କନ୍ତେ, ପାଦେନ ପଠମେନ ତୁ ॥
ହୋତି ଥୁଲ୍ଲଚ୍ଚୟାପତ୍ତି, ତସ୍ସା ସମଣିୟା ପନ ।
ଦୁତିୟେନ ଅତିକ୍କନ୍ତେ, ଗରୁକେ ପନ ତିଟ୍ଠତି ॥
ଚତୁତ୍ଥେ ଦୁତିୟେ ୱୁତ୍ତ-ସଦିସୋୱ ୱିନିଚ୍ଛୟୋ ।
ଆପତ୍ତୀନଂ ପଭେଦେ ତୁ, କାଚି ନତ୍ଥି ୱିସେସତା ॥
ଅୱସ୍ସୁତା ସୟଂ ହୁତ୍ୱା, ତାଦିସସ୍ସେୱ ହତ୍ଥତୋ ।
ଗହେତ୍ୱା ପନ ଭୁଞ୍ଜନ୍ତୀ, ଭୋଜନାଦୀସୁ କିଞ୍ଚିପି ॥
ଫୁସେ ଆପତ୍ତିୟୋ ତିସ୍ସୋ, ଭୋଜନାଦୀସୁ କିଞ୍ଚିପି ।
ପଟିଗ୍ଗଣ୍ହନ୍ତିୟା ତସ୍ସା, ହୋତି ଥୁଲ୍ଲଚ୍ଚୟଂ ପନ ॥
ଅଜ୍ଝୋହାରେସୁ ସବ୍ବେସୁ, ହୋତି ସଙ୍ଘାଦିସେସତା ।
ଉଦକଂ ଦନ୍ତପୋନଂ ୱା, ପଟିଗ୍ଗଣ୍ହାତି ଦୁକ୍କଟଂ ॥
‘‘ସହତ୍ଥେନ ଗହେତ୍ୱା ତ୍ୱଂ, ଖାଦ ୱା ଭୁଞ୍ଜ ୱା’’ତିପି ।
ଉୟ୍ୟୋଜେନ୍ତୀ ପନେୱଂ ତୁ, ତିସ୍ସୋ ଆପତ୍ତିୟୋ ଫୁସେ ॥
ଦୁକ୍କଟଂ ୱଚନେ ତସ୍ସା, ‘‘ଭୁଞ୍ଜିସ୍ସାମୀ’’ତି ଗଣ୍ହତି ।
ଅଜ୍ଝୋହାରେସୁ ସବ୍ବେସୁ, ତସ୍ସା ଥୁଲ୍ଲଚ୍ଚୟଂ ସିୟା ॥
ଭୋଜନସ୍ସ ପନୋସାନେ, ହୋତି ସଙ୍ଘାଦିସେସତା ।
ଉୟ୍ୟୋଜେତି ଚ ୟା ତସ୍ସା, ଇମା ତିସ୍ସୋତି ଦୀପୟେ ॥
ସତ୍ତମେ ଅଟ୍ଠମେ ଚାପି, ନୱମେ ଦସମେପି ଚ ।
ଚୋରିୱୁଟ୍ଠାପନେନେୱ, ସମାନୋୱ ୱିନିଚ୍ଛୟୋ ॥
ସଙ୍ଘାଦିସେସକଥା ।
ପତ୍ତସନ୍ନିଚୟଂ ୟିହ, କରୋନ୍ତୀ ଭିକ୍ଖୁନୀ ପନ ।
ଏକଂ ନିସ୍ସଗ୍ଗିୟଂୟେୱ, ଫୁସେ ପାଚିତ୍ତିୟଂ ତୁ ସା ॥
ଅକାଲଚୀୱରଂ କାଲ-ଚୀୱରଂ ଭାଜାପେନ୍ତିୟା ।
ପୟୋଗେ ଦୁକ୍କଟଂ ୱୁତ୍ତଂ, ଲାଭେ ନିସ୍ସଗ୍ଗିୟଂ ସିୟା ॥
ଚୀୱରଂ ପରିୱତ୍ତେତ୍ୱା, ଅଚ୍ଛିନ୍ଦତି ସଚେ ପନ ।
ପୟୋଗେ ଦୁକ୍କଟଂ, ଛିନ୍ନେ, ତସ୍ସା ନିସ୍ସଗ୍ଗିୟଂ ସିୟା ॥
ୱିଞ୍ଞାପେତ୍ୱାୱ ଅଞ୍ଞଂ ଚେ, ୱିଞ୍ଞାପେତି ତତୋ ପରଂ ।
ପୟୋଗେ ଦୁକ୍କଟଂ, ୱିଞ୍ଞା-ପିତେ ନିସ୍ସଗ୍ଗିୟଂ ସିୟା ॥
ଚେତାପେତ୍ୱା ହି ଅଞ୍ଞଂ ଚେ, ଚେତାପେତି ତତୋ ପରଂ ।
ପୟୋଗେ ଦୁକ୍କଟଂ, ଚେତା-ପିତେ ନିସ୍ସଗ୍ଗିୟଂ ସିୟା ॥
ଏୱମେୱ ଚ ସେସେସୁ, ଛଟ୍ଠାଦୀସୁ ଚ ସତ୍ତସୁ ।
ଅନନ୍ତରସମାନୋୱ, ଆପତ୍ତୀନଂ ୱିନିଚ୍ଛୟୋ ॥
ନିସ୍ସଗ୍ଗିୟକଥା ।
ଲସୁଣଂ ଖାଦତି ଦ୍ୱେ ଚେ, ଦୁକ୍କଟଂ ଗହଣେ ସିୟା ।
ଅଜ୍ଝୋହାରପୟୋଗେସୁ, ପାଚିତ୍ତି ପରିୟାପୁତା ॥
ସଂହରାପେନ୍ତିୟା ଲୋମଂ, ସମ୍ବାଧେ ଦ୍ୱେୱ ହୋନ୍ତି ହି ।
ପୟୋଗେ ଦୁକ୍କଟଂ ୱୁତ୍ତଂ, ହୋତି ପାଚିତ୍ତି ସଂହଟେ ॥
କରୋନ୍ତୀ ତଲଘାତଂ ତୁ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ହୋତି, କତେ ପାଚିତ୍ତିୟଂ ସିୟା ॥
ଜତୁନା ମଟ୍ଠକଂ କିଞ୍ଚି, ସାଦିୟନ୍ତୀ ଦୁୱେ ଫୁସେ ।
ପୟୋଗେ ଦୁକ୍କଟାଦିନ୍ନେ, ତସ୍ସା ପାଚିତ୍ତିୟଂ ସିୟା ॥
ପଞ୍ଚମଂ ତୁ ଚତୁତ୍ଥେନ, ସମାନମିତି ଦୀପୟେ ।
ଆପତ୍ତୀନଂ ୱିଭାଗସ୍ମିଂ, ୱିସେସୋ ନତ୍ଥି କୋଚିପି ॥
ଭିକ୍ଖୁସ୍ସ ଭୁଞ୍ଜମାନସ୍ସ, ପାନୀୟେନୁପତିଟ୍ଠତି ।
ହତ୍ଥପାସେ ତୁ ପାଚିତ୍ତି, ହିତ୍ୱା ତିଟ୍ଠତି ଦୁକ୍କଟଂ ॥
ୱିଞ୍ଞାପେତ୍ୱାମକଂ ଧଞ୍ଞଂ, ‘‘ଭୁଞ୍ଜିସ୍ସାମୀ’’ତି ଗଣ୍ହତି ।
ଦୁକ୍କଟଂ ହୋତି ପାଚିତ୍ତି, ଅଜ୍ଝୋହାରେସୁ ଦୀପୟେ ॥
ଉଚ୍ଚାରାଦିଂ ତିରୋକୁଟ୍ଟେ, ଛଡ୍ଡେନ୍ତୀ ଦ୍ୱେ ଫୁସେ ହୱେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ଛଡ୍ଡିତେ ସିୟା ॥
ଉଚ୍ଚାରାଦିଚତୁକ୍କଂ ତୁ, ଛଡ୍ଡେତି ହରିତେ ସଚେ ।
ପୟୋଗେ ଦୁକ୍କଟଂ ତସ୍ସା, ପାଚିତ୍ତି ଛଡ୍ଡିତେ ସିୟା ॥
ନଚ୍ଚାଦିଂ ଦସ୍ସନତ୍ଥାୟ, ସଚେ ଗଚ୍ଛତି ଦୁକ୍କଟଂ ।
ପସ୍ସନ୍ତିୟାପି ପାଚିତ୍ତି, ତଥେୱ ଚ ସୁଣନ୍ତିୟା ॥
ଲସୁଣୱଗ୍ଗୋ ପଠମୋ ।
ପଠମେ ଦୁତିୟେ ଚେୱ, ତତିୟେ ଚ ଚତୁତ୍ଥକେ ।
ତୁଲ୍ୟୋ ଲସୁଣୱଗ୍ଗସ୍ସ, ଛଟ୍ଠେନିଧ ୱିନିଚ୍ଛୟୋ ॥
କୁଲାନି ଉପସଙ୍କମ୍ମ, ନିସୀଦିତ୍ୱା ପନାସନେ ।
ସାମିକେ ତୁ ଅନାପୁଚ୍ଛା, ପକ୍କମନ୍ତୀ ଦୁୱେ ଫୁସେ ॥
ପଠମେନ ଚ ପାଦେନ, ଅନୋୱସ୍ସମତିକ୍କମେ ।
ଦୁକ୍କଟଂ ହୋତି, ପାଚିତ୍ତି, ଦୁତିୟାତିକ୍କମେ ସିୟା ॥
ସାମିକେ ତୁ ଅନାପୁଚ୍ଛା, ଆସନେ ଚେ ନିସୀଦତି ।
ପୟୋଗେ ଦୁକ୍କଟଂ ହୋତି, ପାଚିତ୍ତି ଚ ନିସୀଦିତେ ॥
ଛଟ୍ଠେନ ସତ୍ତମଂ ସବ୍ବଂ, ସମାନଂ ଅଟ୍ଠମେ ପନ ।
ପୟୋଗେ ଦୁକ୍କଟଂ, ଉଜ୍ଝା-ପିତେ ପାଚିତ୍ତିୟଂ ସିୟା ॥
ଅତ୍ତାନଂ ଚାଭିସପ୍ପେନ୍ତୀ, ଦ୍ୱେ ଫୁସେ ନିରୟାଦିନା ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ଅଭିସପ୍ପିତେ ॥
ୱଧିତ୍ୱା ପନ ଅତ୍ତାନଂ, ରୋଦନ୍ତୀ ତୁ ଦୁୱେ ଫୁସେ ।
ୱଧତି ରୋଦତି ପାଚିତ୍ତି, କରୋତେକଂ ତୁ ଦୁକ୍କଟଂ ॥
ରତ୍ତନ୍ଧକାରୱଗ୍ଗୋ ଦୁତିୟୋ ।
ନଗ୍ଗା ନ୍ହାୟତି ଦ୍ୱେ ଚେୱ, ପୟୋଗେ ଦୁକ୍କଟଂ ସିୟା ।
ନ୍ହାନସ୍ସ ପରିୟୋସାନେ, ତସ୍ସା ପାଚିତ୍ତିୟଂ ସିୟା ॥
କାରାପେତି ପମାଣାତି-କ୍କନ୍ତଂ ଉଦକସାଟିକଂ ।
ପୟୋଗେ ଦୁକ୍କଟଂ, କାରା-ପିତେ ପାଚିତ୍ତିୟଂ ସିୟା ॥
ଚୀୱରଂ ତୁ ୱିସିବ୍ବେତ୍ୱା, ୱିସିବ୍ବାପେତ୍ୱ ୱା ପନ ।
ନେୱ ସିବ୍ବନ୍ତିୟା ୱୁତ୍ତ-ମେକଂ ପାଚିତ୍ତିୟଂ ପନ ॥
ପଞ୍ଚାହିକଂ ତୁ ସଙ୍ଘାଟି-ଚାରଂ ପନ ଅତିକ୍କମେ ।
ଏକାୱସ୍ସା ପନାପତ୍ତି, ପାଚିତ୍ତି ପରିଦୀପିତା ॥
ସଚେ ସଙ୍କମନୀୟଂ ତୁ, ଧାରେତି ପନ ଚୀୱରଂ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ପନ ଧାରିତେ ॥
ଗଣଚୀୱରଲାଭସ୍ସ, ଅନ୍ତରାୟଂ କରୋତି ଚେ ।
ପୟୋଗେ ଦୁକ୍କଟଂ ହୋତି, କତେ ପାଚିତ୍ତିୟଂ ସିୟା ॥
ୱିଭଙ୍ଗଂ ପଟିବାହନ୍ତୀ, ଚୀୱରାନଂ ତୁ ଧମ୍ମିକଂ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ପଟିବାହିତେ ॥
ଅଗାରିକାଦିନୋ ଦେତି, ସଚେ ସମଣଚୀୱରଂ ।
ପୟୋଗେ ଦୁକ୍କଟଂ, ଦିନ୍ନେ, ପାଚିତ୍ତି ପରିୟାପୁତା ॥
ଚୀୱରେ ଦୁବ୍ବଲାସାୟ, କାଲଂ ଚେ ସମତିକ୍କମେ ।
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତି ସମତିକ୍କମେ ॥
ଧମ୍ମିକଂ କଥିନୁଦ୍ଧାରଂ, ପଟିବାହନ୍ତିୟା ଦୁୱେ ।
ପୟୋଗେ ଦୁକ୍କଟଂ ହୋତି, ପାଚିତ୍ତି ପଟିବାହିତେ ॥
ନ୍ହାନୱଗ୍ଗୋ ତତିୟୋ ।
ଦୁୱେ ଭିକ୍ଖୁନିୟୋ ଏକ-ମଞ୍ଚସ୍ମିଂ ଚେ ତୁୱଟ୍ଟେୟ୍ୟୁଂ ।
ପୟୋଗେ ଦୁକ୍କଟଂ ତାସଂ, ନିପନ୍ନେ ଇତରଂ ସିୟା ॥
ଦୁତିୟଂ ପଠମେନେୱ, ସଦିସଂ ତତିୟେ ପନ ।
ପୟୋଗେ ଦୁକ୍କଟଂ ହୋତି, କତେ ପାଚିତ୍ତିୟଂ ସିୟା ॥
ନୁପଟ୍ଠାପେନ୍ତିୟା ୱାପି, ଦୁକ୍ଖିତଂ ସହଜୀୱିନିଂ ।
ଏକାୟେୱ ପନାପତ୍ତି, ପାଚିତ୍ତି ପରିଦୀପିତା ॥
ସଚେ ଉପସ୍ସୟଂ ଦତ୍ୱା, ନିକ୍କଡ୍ଢତି ଚ ଭିକ୍ଖୁନିଂ ।
ପୟୋଗେ ଦୁକ୍କଟଂ ତସ୍ସା, ହୋତି ପାଚିତ୍ତି କଡ୍ଢିତେ ॥
ଛଟ୍ଠେ ପନ ଚ ସଂସଟ୍ଠା, ଞତ୍ତିୟା ଦୁକ୍କଟଂ ଫୁସେ ।
କମ୍ମୱାଚାୟ ଓସାନେ, ପାଚିତ୍ତି ପରିଦୀପିତା ॥
ଅନ୍ତୋରଟ୍ଠେ ତୁ ସାସଙ୍କେ, ଚାରିକଂ ତୁ ଚରନ୍ତିୟା ।
ପୟୋଗେ ଦୁକ୍କଟଂ ୱୁତ୍ତଂ, ପଟିପନ୍ନାୟ ସେସକଂ ॥
ଅଟ୍ଠମଂ ନୱମଞ୍ଚେୱ, ସତ୍ତମେନ ସମଂ ମତଂ ।
ଦସମେ ପନ ଏକାୱ, ପାଚିତ୍ତି ପରିଦୀପିତା ॥
ତୁୱଟ୍ଟୱଗ୍ଗୋ ଚତୁତ୍ଥୋ ।
ରାଜାଗାରାଦିକଂ ସବ୍ବଂ, ଦସ୍ସନତ୍ଥାୟ ଗଚ୍ଛତି ।
ପୟୋଗେ ଦୁକ୍କଟଂ ତସ୍ସା, ପାଚିତ୍ତି ୟଦି ପସ୍ସତି ॥
ଆସନ୍ଦିଂ ୱାପି ପଲ୍ଲଙ୍କଂ, ପରିଭୁଞ୍ଜନ୍ତିୟା ଦୁୱେ ।
ପୟୋଗେ ଦୁକ୍କଟଂ ୱୁତ୍ତଂ, ଭୁତ୍ତେ ପାଚିତ୍ତିୟଂ ସିୟା ॥
ସୁତ୍ତଂ କନ୍ତନ୍ତିୟା ଦ୍ୱେୱ, ପୟୋଗେ ଦୁକ୍କଟଂ ମତଂ ।
ଉଜ୍ଜୱୁଜ୍ଜୱନେ ତସ୍ସା, ପାଚିତ୍ତି ସମୁଦାହରେ ॥
ୱେୟ୍ୟାୱଚ୍ଚଂ ଗିହୀନଂ ତୁ, ଦ୍ୱେୱ ହୋନ୍ତି କରୋନ୍ତିୟା ।
ପୟୋଗେ ଦୁକ୍କଟଂ ୱୁତ୍ତଂ, କତେ ପାଚିତ୍ତିୟଂ ସିୟା ॥
ପଞ୍ଚମେ ପନ ଏକାୱ, ପାଚିତ୍ତି ପରିଦୀପିତା ।
ପୟୋଗେ ଦୁକ୍କଟଂ ଛଟ୍ଠେ, ଦିନ୍ନେ ପାଚିତ୍ତିୟଂ ସିୟା ॥
ସତ୍ତମଂ ଦୁତିୟେନେୱ, ସମାପତ୍ତିପଭେଦତୋ ।
ଅଟ୍ଠମଂ ଦୁତିୟେ ୱଗ୍ଗେ, ପଞ୍ଚମେନ ସମଂ ମତଂ ॥
ତିରଚ୍ଛାନଗତଂ ୱିଜ୍ଜଂ, ଦ୍ୱେୱ ହୋନ୍ତି ପଠନ୍ତିୟା ।
ପୟୋଗେ ଦୁକ୍କଟଂ ହୋତି, ପାଚିତ୍ତି ହି ପଦେ ପଦେ ॥
ଦସମଂ ନୱମେନେୱ, ସମାନଂ ସବ୍ବଥା ପନ ।
‘‘ପରିୟାପୁଣାତି, ୱାଚେତି’’, ପଦମତ୍ତଂ ୱିସେସକଂ ॥
ଚିତ୍ତାଗାରୱଗ୍ଗୋ ପଞ୍ଚମୋ ।
ସଭିକ୍ଖୁକଂ ତମାରାମଂ, ଜାନନ୍ତୀ ପନ ଭିକ୍ଖୁନୀ ।
ପୱିସନ୍ତୀ ଅନାପୁଚ୍ଛା, ଦ୍ୱେ ପନାପତ୍ତିୟୋ ଫୁସେ ॥
ପଠମେନ ଚ ପାଦେନ, ପରିକ୍ଖେପସ୍ସତିକ୍କମେ ।
ଦୁକ୍କଟଂ ପିଟକେ ୱୁତ୍ତଂ, ପାଚିତ୍ତି ଦୁତିୟେନ ତୁ ॥
ଅକ୍କୋସତି ଚ ୟା ଭିକ୍ଖୁଂ, ଭିକ୍ଖୁନୀ ପରିଭାସତି ।
ପୟୋଗେ ଦୁକ୍କଟଂ ତସ୍ସା, ପାଚିତ୍ତକ୍କୋସିତେ ସିୟା ॥
ୟା ହି ଚଣ୍ଡିକଭାୱେନ, ଗଣଂ ତୁ ପରିଭାସତି ।
ପୟୋଗେ ଦୁକ୍କଟଂ ତସ୍ସା, ପରିଭଟ୍ଠେ ପନେତରଂ ॥
ନିମନ୍ତିତା ପୱାରିତା, ଖାଦନଂ ଭୋଜନମ୍ପି ୱା ।
ଭୁଞ୍ଜନ୍ତୀ ଭିକ୍ଖୁନୀ ସା ହି, ଦ୍ୱେ ପନାପତ୍ତିୟୋ ଫୁସେ ॥
‘‘ଭୁଞ୍ଜିସ୍ସାମୀ’’ତି ୟଂ କିଞ୍ଚି, ପଟିଗ୍ଗଣ୍ହାତି ଦୁକ୍କଟଂ ।
ଅଜ୍ଝୋହାରପୟୋଗେସୁ, ପାଚିତ୍ତି ପରିଦୀପୟେ ॥
କୁଲଂ ତୁ ମଚ୍ଛରାୟନ୍ତୀ, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ୱୁତ୍ତଂ, ସେସା ମଚ୍ଛରିତେ ସିୟା ॥
ଅଭିକ୍ଖୁକେ ପନାୱାସେ, ଭୱେ ୱସ୍ସଂ ୱସନ୍ତିୟା ।
ଦୁକ୍କଟଂ ପୁବ୍ବକିଚ୍ଚେସୁ, ପାଚିତ୍ତି ଅରୁଣୁଗ୍ଗମେ ॥
ଭିକ୍ଖୁନୀ ଉଭତୋସଙ୍ଘେ, ୱସ୍ସଂୱୁଟ୍ଠା ତୁ ତୀହିପି ।
ଠାନେହି ଅପ୍ପୱାରେନ୍ତୀ, ଏକଂ ପାଚିତ୍ତିୟଂ ଫୁସେ ॥
ଓୱାଦତ୍ଥାୟ ୱା ଭିକ୍ଖୁଂ, ସଂୱାସତ୍ଥାୟ ୱା ତଥା ।
ନ ଗଚ୍ଛତି ସଚେ ତସ୍ସା, ଏକଂ ପାଚିତ୍ତିୟଂ ସିୟା ॥
ଓୱାଦମ୍ପି ନ ୟାଚନ୍ତୀ, ନ ଗଚ୍ଛନ୍ତୀ ଉପୋସଥଂ ।
ଏକଂ ପାଚିତ୍ତିୟାପତ୍ତି-ମାପଜ୍ଜତି, ନ ସଂସୟୋ ॥
ଅପୁଚ୍ଛିତ୍ୱାୱ ସଙ୍ଘଂ ୱା, ଭେଦାପେତି ପସାଖଜଂ ।
ପୟୋଗେ ଦୁକ୍କଟଂ, ଭିନ୍ନେ, ପାଚିତ୍ତି ପରିୟାପୁତା ॥
ଆରାମୱଗ୍ଗୋ ଛଟ୍ଠୋ ।
ଗବ୍ଭିନିଂ ୱୁଟ୍ଠପେନ୍ତୀ ହି, ଦ୍ୱେ ପନାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ, ୱୁଟ୍ଠା-ପିତେ ପାଚିତ୍ତିୟଂ ସିୟା ॥
ଦୁତିୟଂ ତତିୟଞ୍ଚେୱ, ଚତୁତ୍ଥଂ ପଞ୍ଚମମ୍ପି ଚ ।
ଛଟ୍ଠଞ୍ଚ ସତ୍ତମଞ୍ଚେୱ, ପଠମେନ ସମଂ ମତଂ ॥
ଭିକ୍ଖୁନୀ ୱୁଟ୍ଠପେତ୍ୱାନ, ଭିକ୍ଖୁନିଂ ସହଜୀୱିନିଂ ।
ଦ୍ୱେୱସ୍ସଂ ନାନୁଗ୍ଗଣ୍ହନ୍ତୀ, ଏକଂ ପାଚିତ୍ତିୟଂ ଫୁସେ ॥
ନୱମଂ ଦସମଞ୍ଚେୱ, ଅଟ୍ଠମେନ ସମଂ ମତଂ ।
ଦ୍ୱୀସୁ ଆପତ୍ତିଭେଦସ୍ମିଂ, ନାନତ୍ତଂ ନତ୍ଥି କିଞ୍ଚିପି ॥
ଗବ୍ଭିନୀୱଗ୍ଗୋ ସତ୍ତମୋ ।
କୁମାରୀଭୂତୱଗ୍ଗସ୍ସ, ଆଦିତୋ ପନ ପଞ୍ଚପି ।
ସମାନା ଗବ୍ଭିନୀୱଗ୍ଗେ, ପଠମେନେୱ ସବ୍ବସୋ ॥
‘‘ଅଲଂ ୱୁଟ୍ଠାପିତେନା’’ତି, ୱୁଚ୍ଚମାନା ହି ଖୀୟତି ।
ପୟୋଗେ ଦୁକ୍କଟଂ, ପଚ୍ଛା, ହୋତି ପାଚିତ୍ତି ଖୀୟିତେ ॥
ସତ୍ତମେ ଅଟ୍ଠମେ ଚେୱ, ଏକଂ ପାଚିତ୍ତିୟଂ ମତଂ ।
ଆଦିନାୱ ସମାନାନି, ନୱମାଦୀନି ପଞ୍ଚପି ॥
କୁମାରୀଭୂତୱଗ୍ଗୋ ଅଟ୍ଠମୋ ।
ଆପତ୍ତିୟୋ ଫୁସେ ଦ୍ୱେପି, ଧାରେନ୍ତୀ ଛତ୍ତୁପାହନଂ ।
ପୟୋଗେ ଦୁକ୍କଟଂ ୱୁତ୍ତଂ, ହୋତି ପାଚିତ୍ତି ଧାରିତେ ॥
ୟାନେନ ପନ ୟାୟନ୍ତୀ, ଦ୍ୱେ କିରାପତ୍ତିୟୋ ଫୁସେ ।
ପୟୋଗେ ଦୁକ୍କଟଂ ହୋତି, ପାଚିତ୍ତି ୟଦି ୟାୟିତେ ॥
ଧାରେନ୍ତିୟା ତୁ ସଙ୍ଘାଣିଂ, ପୟୋଗେ ଦୁକ୍କଟଂ ସିୟା ।
ଧାରିତେ ପନ ପାଚିତ୍ତି, ଚତୁତ୍ଥେପି ଅୟଂ ନୟୋ ॥
ନ୍ହାୟନ୍ତୀ ଗନ୍ଧୱଣ୍ଣେନ, ପୟୋଗେ ଦୁକ୍କଟଂ ଫୁସେ ।
ନ୍ହାନସ୍ସ ପରିୟୋସାନେ, ତସ୍ସା ପାଚିତ୍ତିୟଂ ସିୟା ॥
ଛଟ୍ଠମ୍ପି ପଞ୍ଚମେନେୱ, ସମାନଂ ସବ୍ବଥା ପନ ।
ସତ୍ତମେ ଅଟ୍ଠମେ ଚେୱ, ନୱମେ ଦସମେପି ଚ ॥
ପୟୋଗେ ଦୁକ୍କଟଂ ୱୁତ୍ତଂ, ପାଚିତ୍ତୁମ୍ମଦ୍ଦିତେ ସିୟା ।
ଆପତ୍ତୀନଂ ୱିଭାଗସ୍ମିଂ, ନତ୍ଥି କାଚି ୱିସେସତା ॥
ଅନାପୁଚ୍ଛା ତୁ ଭିକ୍ଖୁସ୍ସ, ପୁରତୋ ୟା ନିସୀଦତି ।
ପୟୋଗେ ଦୁକ୍କଟଂ ତସ୍ସା, ପାଚିତ୍ତି ତୁ ନିସୀଦିତେ ॥
ଅନୋକାସକତଂ ଭିକ୍ଖୁଂ, ପଞ୍ହଂ ପୁଚ୍ଛନ୍ତିୟା ପନ ।
ପୟୋଗେ ଦୁକ୍କଟଂ ହୋତି, ୱୁତ୍ତା ପାଚିତ୍ତି ପୁଚ୍ଛିତେ ॥
ସଂକଚ୍ଚିକଂ ୱିନା ଗାମଂ, ପଦସା ପୱିସନ୍ତିୟା ।
ପଠମେନେୱ ଆରାମ-ୱଗ୍ଗସ୍ସ ସଦିସଂ ୱଦେ ॥
ଛତ୍ତୁପାହନୱଗ୍ଗୋ ନୱମୋ ।
ପାଚିତ୍ତିୟକଥା ।
ଅଟ୍ଠସୁ ଦୁୱିଧାପତ୍ତି, ପାଟିଦେସନିୟେସୁପି ।
ୱିଞ୍ଞାପେତ୍ୱା ସଚେ ସପ୍ପିଂ, ‘‘ଭୁଞ୍ଜିସ୍ସାମୀ’’ତି ଗଣ୍ହତି ॥
ତତୋ ଭିକ୍ଖୁନିୟା ତସ୍ସା, ହୋତି ଆପତ୍ତି ଦୁକ୍କଟଂ ।
ଅଜ୍ଝୋହାରେସୁ ସବ୍ବେସୁ, ପାଟିଦେସନିୟଂ ସିୟା ॥
ପାଟିଦେସନୀୟକଥା ।
ଇମଂ ୱିଦିତ୍ୱା ପରମଂ ପନୁତ୍ତରଂ ।
ନିରୁତ୍ତରଂ ଅତ୍ଥୱସେନ ଭିକ୍ଖୁ ।
ସୁଖେନ ପଞ୍ଞତ୍ତମହାସମୁଦ୍ଦଂ ।
ଦୁରୁତ୍ତରଂ ଉତ୍ତରତେୱ ଧୀରୋ ॥
ୟସ୍ମା ତସ୍ମା ଅସ୍ମିଂ ୟୋଗଂ ।
ଉସ୍ମାୟୁତ୍ତୋ ୟୁତ୍ତୋ କାତୁଂ ।
ସତ୍ତୋ ସତ୍ତୋ କଙ୍ଖଚ୍ଛେଦେ ।
ସତ୍ଥେ ସତ୍ଥେ ନିଚ୍ଚଂ ନିଚ୍ଚଂ ॥
ଭିକ୍ଖୁନୀୱିଭଙ୍ଗୋ ନିଟ୍ଠିତୋ ।
ଚତୁୱିପତ୍ତିକଥା
କତି ଆପତ୍ତିୟୋ ସୀଲ-ୱିପତ୍ତିପଚ୍ଚୟା ପନ ।
ଚତସ୍ସୋୱ ସିୟୁଂ ସୀଲ-ୱିପତ୍ତିପଚ୍ଚୟା ପନ ॥
ଜାନଂ ପାରାଜିକଂ ଧମ୍ମଂ, ସଚେ ଛାଦେତି ଭିକ୍ଖୁନୀ ।
ଚୁତା, ଥୁଲ୍ଲଚ୍ଚୟଂ ହୋତି, ସଚେ ୱେମତିକା ସିୟା ॥
ପାଚିତ୍ତି ଭିକ୍ଖୁ ସଙ୍ଘାଦି-ସେସଂ ଛାଦେତି ଚେ ପନ ।
ଅତ୍ତନୋ ପନ ଦୁଟ୍ଠୁଲ୍ଲଂ, ଛାଦେନ୍ତୋ ଦୁକ୍କଟଂ ଫୁସେ ॥
ଆପତ୍ତିୟୋ କତାଚାର-ୱିପତ୍ତିପଚ୍ଚୟା ପନ ।
ଏକାୟେୱ ସିୟାଚାର-ୱିପତ୍ତିପଚ୍ଚୟା ପନ ॥
ପଟିଚ୍ଛାଦେତି ଆଚାର-ୱିପତ୍ତିଂ ପନ ଭିକ୍ଖୁ ଚେ ।
ଏକମେୱସ୍ସ ଭିକ୍ଖୁସ୍ସ, ହୋତି ଆପତ୍ତି ଦୁକ୍କଟଂ ॥
କତି ଆପତ୍ତିୟୋ ଦିଟ୍ଠି-ୱିପତ୍ତିପଚ୍ଚୟା ପନ ?
ଦ୍ୱେ ପନାପତ୍ତିୟୋ ଦିଟ୍ଠି-ୱିପତ୍ତିପଚ୍ଚୟା ସିୟୁଂ ॥
ଅଚ୍ଚଜଂ ପାପିକଂ ଦିଟ୍ଠିଂ, ଞତ୍ତିୟା ଦୁକ୍କଟଂ ଫୁସେ ।
କମ୍ମୱାଚାୟ ଓସାନେ, ପାଚିତ୍ତି ପରିୟାପୁତା ॥
ଆପତ୍ତିୟୋ କତାଜୀୱ-ୱିପତ୍ତିପଚ୍ଚୟା ପନ ?
ଛଳେୱାପଜ୍ଜତାଜୀୱ-ୱିପତ୍ତିପଚ୍ଚୟା ପନ ॥
ଆଜୀୱହେତୁ ପାପିଚ୍ଛୋ, ଅସନ୍ତଂ ପନ ଅତ୍ତନି ।
ମନୁସ୍ସୁତ୍ତରିଧମ୍ମଂ ତୁ, ୱଦଂ ପାରାଜିକଂ ଫୁସେ ॥
ସଞ୍ଚରିତ୍ତଂ ସମାପନ୍ନୋ, ହୋତି ସଙ୍ଘାଦିସେସତା ।
ପରିୟାୟୱଚନେ ଞାତେ, ତସ୍ସ ଥୁଲ୍ଲଚ୍ଚୟଂ ସିୟା ॥
ପଣୀତଭୋଜନଂ ୱତ୍ୱା, ପାଚିତ୍ତି ପରିଭୁଞ୍ଜତୋ ।
ଭିକ୍ଖୁନୀ ତୁ ସଚେ ହୋତି, ପାଟିଦେସନିୟଂ ସିୟା ॥
ଆଜୀୱହେତୁ ସୂପଂ ୱା, ଓଦନଂ ୱା ପନତ୍ତନୋ ।
ଅତ୍ଥାୟ ୱିଞ୍ଞାପେତ୍ୱାନ, ଦୁକ୍କଟଂ ପରିଭୁଞ୍ଜତୋ ॥
ଚତୁୱିପତ୍ତିକଥା ।
ଅଧିକରଣପଚ୍ଚୟକଥା
ୱିୱାଦାଧିକରଣମ୍ହା, କତି ଆପତ୍ତିୟୋ ସିୟୁଂ ?
ୱିୱାଦାଧିକରଣମ୍ହା, ଦ୍ୱେ ପନାପତ୍ତିୟୋ ସିୟୁଂ ॥
ପାଚିତ୍ତି ଉପସମ୍ପନ୍ନଂ, ହୋତି ଓମସତୋ ପନ ।
ଭିକ୍ଖୁସ୍ସାନୁପସମ୍ପନ୍ନଂ, ଓମସନ୍ତସ୍ସ ଦୁକ୍କଟଂ ॥
ଅନୁୱାଦାଧିକରଣ-ପଚ୍ଚୟାପତ୍ତିୟୋ କତି ?
ଅନୁୱାଦାଧିକରଣ-ପଚ୍ଚୟା ତିୱିଧା ସିୟୁଂ ॥
ଅନୁଦ୍ଧଂସେତି ଚେ ଭିକ୍ଖୁଂ, ଅମୂଲନ୍ତିମୱତ୍ଥୁନା ।
ସଙ୍ଘାଦିସେସମାପତ୍ତି-ମାପଜ୍ଜତି, ନ ସଂସୟୋ ॥
ତଥା ସଙ୍ଘାଦିସେସେନ, ଅନୁଦ୍ଧଂସେତି ଚେ ପନ ।
ପାଚିତ୍ତି, ଦୁକ୍କଟଂ ୱୁତ୍ତଂ, ତଥାଚାରୱିପତ୍ତିୟା ॥
ଆପତ୍ତିପଚ୍ଚୟା ୱୁତ୍ତା, କତି ଆପତ୍ତିୟୋ ପନ ?
ଆପତ୍ତିପଚ୍ଚୟା ୱୁତ୍ତା, ଚତସ୍ସୋୱ ମହେସିନା ॥
ଜାନଂ ପାରାଜିକଂ ଧମ୍ମଂ, ସଚେ ଛାଦେତି ଭିକ୍ଖୁନୀ ।
ଚୁତା, ଥୁଲ୍ଲଚ୍ଚୟଂ ହୋତି, ସଚେ ୱେମତିକା ସିୟା ॥
ପାଚିତ୍ତି ଭିକ୍ଖୁ ସଙ୍ଘାଦି-ସେସଂ ଛାଦେତି ଚେ ପନ ।
ତଥାଚାରୱିପତ୍ତିଂ ତୁ, ସଚେ ଛାଦେତି ଦୁକ୍କଟଂ ॥
ଆପତ୍ତିୟୋ ହି କିଚ୍ଚାଧି-କରଣପଚ୍ଚୟା କତି ?
ପଞ୍ଚେୱ ହୋନ୍ତି କିଚ୍ଚାଧି-କରଣପଚ୍ଚୟା ପନ ॥
ସମନୁଭାସନାୟେୱ, ଞତ୍ତିୟା ଦୁକ୍କଟଂ ଫୁସେ ।
ସମଣୀ ଅଚ୍ଚଜନ୍ତୀୱ, ଉକ୍ଖିତ୍ତସ୍ସାନୁୱତ୍ତିକା ॥
ଥୁଲ୍ଲଚ୍ଚୟଂ ଦ୍ୱୟଂ ଦ୍ୱୀହି, କମ୍ମୱାଚାହି ସା ଫୁସେ ।
କମ୍ମୱାଚାୟ ଓସାନେ, ତସ୍ସା ପାରାଜିକଂ ସିୟା ॥
ସମନୁଭାସନାୟେୱ, ଭେଦକସ୍ସାନୁୱତ୍ତିକା ।
ନ ପରିଚ୍ଚଜତି ତଂ ଲଦ୍ଧିଂ, ହୋତି ସଙ୍ଘାଦିସେସତା ॥
ସମନୁଭାସନାୟେୱ, ପାପିକାୟ ଚ ଦିଟ୍ଠିୟା ।
ୟାୱତତିୟକଂ ତସ୍ସା, ପାଚିତ୍ତଚ୍ଚଜତୋପି ଚ ॥
ଅଧିକରଣପଚ୍ଚୟକଥା ।
ଖନ୍ଧକପୁଚ୍ଛାକଥା
ଖନ୍ଧକେସୁପି ଆପତ୍ତି-ପଭେଦଂ ଆଗତଂ ପନ ।
ପାଟୱତ୍ଥାୟ ଭିକ୍ଖୂନଂ, ପୱକ୍ଖାମି ନିବୋଧଥ ॥
ଖନ୍ଧକେ ପଠମେ ତାୱ, କତି ଆପତ୍ତିୟୋ ସିୟୁଂ ?
ଖନ୍ଧକେ ପଠମେ ତାୱ, ଦ୍ୱେ ପନାପତ୍ତିୟୋ ସିୟୁଂ ॥
ଊନୱୀସତିୱସ୍ସଂ ତୁ, କରୋତୋ ଉପସମ୍ପଦଂ ।
ହୋତି ପାଚିତ୍ତିୟଂ ତସ୍ସ, ସେସେସୁ ପନ ଦୁକ୍କଟଂ ॥
ଖନ୍ଧକେ ତୁ ଉପୋସଥେ ?
ତିସ୍ସୋ ଆପତ୍ତିୟୋ ହୋନ୍ତି ।
ଖନ୍ଧକେ ତୁ ଉପୋସଥେ ॥
‘‘ନସ୍ସନ୍ତେତେ ୱିନସ୍ସନ୍ତୁ’’, ଇତି ଭେଦପୁରକ୍ଖକା ।
ଉପୋସଥସ୍ସ କରଣେ, ଥୁଲ୍ଲଚ୍ଚୟମୁଦୀରିତଂ ॥
ଉକ୍ଖିତ୍ତକେନ ସଦ୍ଧିଂ ତୁ, କରୋନ୍ତସ୍ସ ଉପୋସଥଂ ।
ହୋତି ପାଚିତ୍ତିୟଂ ତସ୍ସ, ସେସେସୁ ପନ ଦୁକ୍କଟଂ ॥
କତି ଆପତ୍ତିୟୋ ୱୁତ୍ତା, ୱଦ ୱସ୍ସୂପନାୟିକେ ?
ଏକାୱ ଦୁକ୍କଟାପତ୍ତି, ୱୁତ୍ତା ୱସ୍ସୂପନାୟିକେ ॥
କତି ଆପତ୍ତିୟୋ ୱୁତ୍ତା, ଖନ୍ଧକେ ତୁ ପୱାରଣେ ?
ତିସ୍ସୋ ଆପତ୍ତିୟୋ ୱୁତ୍ତା, ଉପୋସଥସମା ମତା ॥
କତି ଆପତ୍ତିୟୋ ୱୁତ୍ତା, ଚମ୍ମେ ? ତିସ୍ସୋୱ ଦୀପିତା ।
ମାରେନ୍ତାନଂ ତୁ ପାଚିତ୍ତି, ଗହେତ୍ୱା ୱଚ୍ଛତରିଂ ପନ ॥
ଅଙ୍ଗଜାତଂ ଛୁପନ୍ତସ୍ସ, ରତ୍ତେନ ପନ ଚେତସା ।
ତସ୍ସ ଥୁଲ୍ଲଚ୍ଚୟଂ ୱୁତ୍ତଂ, ସେସେସୁ ପନ ଦୁକ୍କଟଂ ॥
କତି ଆପତ୍ତିୟୋ ୱୁତ୍ତା, ଭେସଜ୍ଜକ୍ଖନ୍ଧକେ ପନ ?
ତିସ୍ସୋ ଆପତ୍ତିୟୋ ୱୁତ୍ତା, ଭେସଜ୍ଜକ୍ଖନ୍ଧକେ ପନ ॥
ସମନ୍ତା ଦ୍ୱଙ୍ଗୁଲେ ତତ୍ଥ, ଥୁଲ୍ଲଚ୍ଚୟମୁଦୀରିତଂ ।
ଭୋଜ୍ଜୟାଗୂସୁ ପାଚିତ୍ତି, ସେସେସୁ ପନ ଦୁକ୍କଟଂ ॥
କଥିନେ ନତ୍ଥି ଆପତ୍ତି, ପଞ୍ଞତ୍ତଂ କେୱଲଂ ପନ ।
କତି ଚୀୱରସଂୟୁତ୍ତେ, ୱୁତ୍ତା ଆପତ୍ତିୟୋ ପନ ?
ତିସ୍ସୋ ଚୀୱରସଂୟୁତ୍ତେ, ୱୁତ୍ତା ଆପତ୍ତିୟୋ ପନ ।
କୁସୱାକମୟେ ଚୀରେ, ଥୁଲ୍ଲଚ୍ଚୟମୁଦୀରିତଂ ॥
ସନିସ୍ସଗ୍ଗାୱ ପାଚିତ୍ତି, ଅତିରେକେ ତୁ ଚୀୱରେ ।
ସେସେସୁ ଦୁକ୍କଟଂ ୱୁତ୍ତଂ, ବୁଦ୍ଧେନାଦିଚ୍ଚବନ୍ଧୁନା ॥
ଚମ୍ପେୟ୍ୟକେ ଚ କୋସମ୍ବେ, କମ୍ମସ୍ମିଂ ପାରିୱାସିକେ ।
ତଥା ସମୁଚ୍ଚୟେ ଏକା, ଦୁକ୍କଟାପତ୍ତି ଦୀପିତା ॥
କତି ଆପତ୍ତିୟୋ ୱୁତ୍ତା, ସମଥକ୍ଖନ୍ଧକେ ପନ ?
ଦ୍ୱେୟେୱାପତ୍ତିୟୋ ୱୁତ୍ତା, ସମଥକ୍ଖନ୍ଧକେ ପନ ॥
ଛନ୍ଦସ୍ସ ଦାୟକୋ ଭିକ୍ଖୁ, ପାଚିତ୍ତି ୟଦି ଖୀୟତି ।
ସେସେସୁ ପନ ସବ୍ବତ୍ଥ, ଦୁକ୍କଟଂ ସମୁଦାହଟଂ ॥
କତି ଖୁଦ୍ଦକୱତ୍ଥୁସ୍ମିଂ, ୱୁତ୍ତା ଆପତ୍ତିୟୋ ପନ ?
ତିସ୍ସୋ ଖୁଦ୍ଦକୱତ୍ଥୁସ୍ମିଂ, ୱୁତ୍ତା ଆପତ୍ତିୟୋ ପନ ॥
ଅତ୍ତନୋ ଅଙ୍ଗଜାତଂ ତୁ, ଛିନ୍ଦଂ ଥୁଲ୍ଲଚ୍ଚୟଂ ଫୁସେ ।
ରୋମନ୍ଥେ ହୋତି ପାଚିତ୍ତି, ସେସେ ଆପତ୍ତି ଦୁକ୍କଟଂ ॥
ତଥା ସେନାସନସ୍ମିଂ ତୁ, ତିସ୍ସୋ ଆପତ୍ତିୟୋ ସିୟୁଂ ।
ୱିସ୍ସଜ୍ଜନେ ଚ ଗରୁନୋ, ଥୁଲ୍ଲଚ୍ଚୟମୁଦୀରିତଂ ॥
ନିକ୍କଡ୍ଢନେ ଚ ପାଚିତ୍ତି, ସଙ୍ଘିକମ୍ହା ୱିହାରତୋ ।
ସେସେସୁ ପନ ସବ୍ବତ୍ଥ, ଦୁକ୍କଟଂ ସମୁଦାହଟଂ ॥
କତି ଆପତ୍ତିୟୋ ସଙ୍ଘ-ଭେଦେ ୱୁତ୍ତା ମହେସିନା ?
ଦ୍ୱେ ପନାପତ୍ତିୟୋ ସଙ୍ଘ-ଭେଦେ ୱୁତ୍ତା ମହେସିନା ॥
ଭେଦାନୁୱତ୍ତକାନଂ ତୁ, ଥୁଲ୍ଲଚ୍ଚୟମୁଦୀରିତଂ ।
ଗଣଭୋଗେ ତୁ ଭିକ୍ଖୂନଂ, ପାଚିତ୍ତି ପରିଦୀପିତା ॥
ଖନ୍ଧକେ ୱତ୍ତସଂୟୁତ୍ତେ, କତି ଆପତ୍ତିୟୋ ମତା ?
ଖନ୍ଧକେ ୱତ୍ତସଂୟୁତ୍ତେ, ଦୁକ୍କଟାପତ୍ତିୟେୱ ସା ॥
ଠପନେ ପାତିମୋକ୍ଖସ୍ସ, ତଥା ଏକାୱ ଦୀପିତା ।
ଭିକ୍ଖୁନିକ୍ଖନ୍ଧକେ ଚାପି, କତି ଆପତ୍ତିୟୋ ମତା ?
ଭିକ୍ଖୁନିକ୍ଖନ୍ଧକେ ଚାପି, ଦ୍ୱେ ପନାପତ୍ତିୟୋ ମତା ।
ଅପୱାରଣାୟ ପାଚିତ୍ତି, ସେସେସୁ ପନ ଦୁକ୍କଟଂ ॥
ଖନ୍ଧକପୁଚ୍ଛାକଥା ନିଟ୍ଠିତା ।
ସମୁଟ୍ଠାନସୀସକଥା
ୱିଭଙ୍ଗେସୁ ପନ ଦ୍ୱୀସୁ, ପଞ୍ଞତ୍ତାନି ମହେସିନା ।
ୟାନି ପାରାଜିକାଦୀନି, ଉଦ୍ଦିସନ୍ତି ଉପୋସଥେ ॥
ତେସଂ ଦାନି ପୱକ୍ଖାମି, ସମୁଟ୍ଠାନମିତୋ ପରଂ ।
ପାଟୱତ୍ଥାୟ ଭିକ୍ଖୂନଂ, ତଂ ସୁଣାଥ ସମାହିତା ॥
କାୟୋ ଚ ୱାଚାପି ଚ କାୟୱାଚା ।
ତାନେୱ ଚିତ୍ତେନ ୟୁତାନି ତୀଣି ।
ଏକଙ୍ଗିକଂ ଦ୍ୱଙ୍ଗିତିୱଙ୍ଗିକନ୍ତି ।
ଛଧା ସମୁଟ୍ଠାନୱିଧିଂ ୱଦନ୍ତି ॥
ତେସୁ ଏକେନ ୱା ଦ୍ୱୀହି, ତୀହି ୱାଥ ଚତୂହି ୱା ।
ଛହି ୱାପତ୍ତିୟୋ ନାନା-ସମୁଟ୍ଠାନେହି ଜାୟରେ ॥
ତତ୍ଥ ପଞ୍ଚସମୁଟ୍ଠାନା, କା ଚାପତ୍ତି ନ ୱିଜ୍ଜତି ।
ହୋତି ଏକସମୁଟ୍ଠାନା, ପଚ୍ଛିମେହେୱ ତୀହିପି ॥
ତଥେୱ ଦ୍ୱିସମୁଟ୍ଠାନା, କାୟତୋ କାୟଚିତ୍ତତୋ ।
ୱାଚତୋ ୱାଚଚିତ୍ତମ୍ହା, ତତିୟଚ୍ଛଟ୍ଠତୋପି ଚ ॥
ଚତୁତ୍ଥଚ୍ଛଟ୍ଠତୋ ଚେୱ, ପଞ୍ଚମଚ୍ଛଟ୍ଠତୋପି ଚ ।
ଜାୟତେ ପଞ୍ଚଧାୱେସା, ସମୁଟ୍ଠାତି ନ ଅଞ୍ଞତୋ ॥
ତିସମୁଟ୍ଠାନିକା ନାମ, ପଠମେହି ଚ ତୀହିପି ।
ପଚ୍ଛିମେହି ଚ ତୀହେୱ, ସମୁଟ୍ଠାତି ନ ଅଞ୍ଞତୋ ॥
ପଠମା ତତିୟା ଚେୱ, ଚତୁତ୍ଥଚ୍ଛଟ୍ଠତୋପି ଚ ।
ଦୁତିୟା ତତିୟା ଚେୱ, ପଞ୍ଚମଚ୍ଛଟ୍ଠତୋପି ଚ ॥
ଦ୍ୱିଧା ଚତୁସମୁଟ୍ଠାନା, ଜାୟତେ ନ ପନଞ୍ଞତୋ ।
ଏକଧା ଛସମୁଟ୍ଠାନା, ସମୁଟ୍ଠାତି ଛହେୱ ହି ॥
ଆହ ଚ –
‘‘ତିଧା ଏକସମୁଟ୍ଠାନା, ପଞ୍ଚଧା ଦ୍ୱିସମୁଟ୍ଠିତା ।
ଦ୍ୱିଧା ତିଚତୁରୋ ଠାନା, ଏକଧା ଛସମୁଟ୍ଠିତା’’ ॥
ତେରସେୱ ଚ ନାମାନି, ସମୁଟ୍ଠାନୱିସେସତୋ ।
ଲଭନ୍ତାପତ୍ତିୟୋ ସବ୍ବା, ତାନି ୱକ୍ଖାମିତୋ ପରଂ ॥
ପଠମନ୍ତିମୱତ୍ଥୁଞ୍ଚ, ଦୁତିୟଂ ସଞ୍ଚରିତ୍ତକଂ ।
ସମନୁଭାସନଞ୍ଚେୱ, କଥିନେଳକଲୋମକଂ ॥
ପଦସୋଧମ୍ମମଦ୍ଧାନଂ, ଥେୟ୍ୟସତ୍ଥଞ୍ଚ ଦେସନା ।
ଭୂତାରୋଚନକଞ୍ଚେୱ, ଚୋରିୱୁଟ୍ଠାପନମ୍ପି ଚ ॥
ଅନନୁଞ୍ଞାତକଞ୍ଚାତି, ସୀସାନେତାନି ତେରସ ।
ତେରସେତେ ସମୁଟ୍ଠାନ-ନୟା ୱିଞ୍ଞୂହି ଚିନ୍ତିତା ॥
ତତ୍ଥ ୟା ତୁ ଚତୁତ୍ଥେନ, ସମୁଟ୍ଠାନେନ ଜାୟତେ ।
ଆଦିପାରାଜିକୁଟ୍ଠାନା, ଅୟନ୍ତି ପରିଦୀପିତା ॥
ସଚିତ୍ତକେହି ତୀହେୱ, ସମୁଟ୍ଠାନେହି ୟା ପନ ।
ଜାୟତେ ସା ପନୁଦ୍ଦିଟ୍ଠା, ଅଦିନ୍ନାଦାନପୁବ୍ବକା॥
ସମୁଟ୍ଠାନେହି ୟାପତ୍ତି, ଜାତୁଚ୍ଛହିପି ଜାୟତେ ।
ସଞ୍ଚରିତ୍ତସମୁଟ୍ଠାନା, ନାମାତି ପରିଦୀପିତା ॥
ଛଟ୍ଠେନେୱ ସମୁଟ୍ଠାତି, ସମୁଟ୍ଠାନେନ ୟା ପନ ।
ସମୁଟ୍ଠାନୱସେନାୟଂ, ୱୁତ୍ତା ସମନୁଭାସନା॥
ତତିୟଚ୍ଛଟ୍ଠତୋୟେୱ, ସମୁଟ୍ଠାତି ହି ୟା ପନ ।
ସମୁଟ୍ଠାନୱସେନାୟଂ, କଥିନୁପପଦା ମତା ॥
ଜାୟତେ ୟା ପନାପତ୍ତି, କାୟତୋ କାୟଚିତ୍ତତୋ ।
ଅୟମେଳକଲୋମାଦି-ସମୁଟ୍ଠାନାତି ଦୀପିତା ॥
ଜାୟତେ ୟା ପନାପତ୍ତି, ୱାଚତୋ ୱାଚଚିତ୍ତତୋ ।
ଅୟଂ ତୁ ପଦସୋଧମ୍ମ-ସମୁଟ୍ଠାନାତି ୱୁଚ୍ଚତି ॥
କାୟତୋ କାୟୱାଚମ୍ହା, ଚତୁତ୍ଥଚ୍ଛଟ୍ଠତୋପି ଚ ।
ଜାୟତେ ସା ପନଦ୍ଧାନ-ସମୁଟ୍ଠାନାତି ସୂଚିତା ॥
ଚତୁତ୍ଥଚ୍ଛଟ୍ଠତୋୟେୱ, ସମୁଟ୍ଠାତି ହି ୟା ପନ ।
ଥେୟ୍ୟସତ୍ଥସମୁଟ୍ଠାନା, ଅୟନ୍ତି ପରିଦୀପିତା ॥
ପଞ୍ଚମେନେୱ ୟା ଚେତ୍ଥ, ସମୁଟ୍ଠାନେନ ଜାୟତେ ।
ସମୁଟ୍ଠାନୱସେନାୟଂ, ଧମ୍ମଦେସନସଞ୍ଞିତା॥
ଅଚିତ୍ତକେହି ତୀହେୱ, ସମୁଟ୍ଠାନେହି ୟା ସିୟା ।
ସମୁଟ୍ଠାନୱସେନାୟଂ, ଭୂତାରୋଚନପୁବ୍ବକା॥
ପଞ୍ଚମଚ୍ଛଟ୍ଠତୋୟେୱ, ୟା ସମୁଟ୍ଠାନତୋ ସିୟା ।
ଅୟଂ ତୁ ପଠିତା ଚୋରି-ୱୁଟ୍ଠାପନସମୁଟ୍ଠିତା ॥
ଦୁତିୟା ତତିୟମ୍ହା ଚ, ପଞ୍ଚମଚ୍ଛଟ୍ଠତୋପି ୟା ।
ଜାୟତେ ଅନନୁଞ୍ଞାତ-ସମୁଟ୍ଠାନା ଅୟଂ ସିୟା ॥
ପଠମଂ ଦୁତିୟଂ ତତ୍ଥ, ଚତୁତ୍ଥଂ ନୱମମ୍ପି ଚ ।
ଦସମଂ ଦ୍ୱାଦସମଞ୍ଚାତି, ସମୁଟ୍ଠାନଂ ସଚିତ୍ତକଂ ॥
ଏକେକସ୍ମିଂ ସମୁଟ୍ଠାନେ, ସଦିସା ଇଧ ଦିସ୍ସରେ ।
ସୁକ୍କଞ୍ଚ କାୟସଂସଗ୍ଗୋ, ପଠମାନିୟତୋପି ଚ ॥
ପୁବ୍ବୁପପରିପାକୋ ଚ, ରହୋ ଭିକ୍ଖୁନିୟା ସହ ।
ସଭୋଜନେ, ରହୋ ଦ୍ୱେ ଚ, ଅଙ୍ଗୁଲୀ, ଉଦକେ ହସଂ ॥
ପହାରେ, ଉଗ୍ଗିରେ ଚେୱ, ତେପଞ୍ଞାସା ଚ ସେଖିୟା ।
ଅଧକ୍ଖକୁବ୍ଭଜାଣୁଞ୍ଚ, ଗାମନ୍ତରମୱସ୍ସୁତା ॥
ତଲମଟ୍ଠୁଦସୁଦ୍ଧି ଚ, ୱସ୍ସଂୱୁଟ୍ଠା ତଥେୱ ଚ ।
ଓୱାଦାୟ ନ ଗଚ୍ଛନ୍ତୀ, ନାନୁବନ୍ଧେ ପୱତ୍ତିନିଂ ॥
ପଞ୍ଚସତ୍ତତି ନିଦ୍ଦିଟ୍ଠା, କାୟଚିତ୍ତସମୁଟ୍ଠିତା ।
ଇମେ ଏକସମୁଟ୍ଠାନା, ମେଥୁନେନ ସମା ମତା ॥
ପଠମପାରାଜିକସମୁଟ୍ଠାନଂ ।
ୱିଗ୍ଗହଂ, ଉତ୍ତରିଞ୍ଚେୱ, ଦୁଟ୍ଠୁଲ୍ଲଂ, ଅତ୍ତକାମତା ।
ଦୁଟ୍ଠଦୋସା ଦୁୱେ ଚେୱ, ଦୁତିୟାନିୟତୋପି ଚ ॥
ଅଚ୍ଛିନ୍ଦନଞ୍ଚ ପରିଣାମୋ, ମୁସା, ଓମସପେସୁଣା ।
ଦୁଟ୍ଠୁଲ୍ଲାରୋଚନଞ୍ଚେୱ, ପଥୱୀଖଣନମ୍ପି ଚ ॥
ଭୂତଗାମଞ୍ଞୱାଦୋ ଚ, ଉଜ୍ଝାପନକମେୱ ଚ ।
ନିକ୍କଡ୍ଢୋ, ସିଞ୍ଚନଞ୍ଚେୱ, ତଥା ଆମିସହେତୁ ଚ ॥
ଭୁତ୍ତାୱିଂ, ଏହନାଦରିଂ, ଭିଂସାପନକମେୱ ଚ ।
ଅପନିଧେୟ୍ୟ, ସଞ୍ଚିଚ୍ଚ, ପାଣଂ, ସପ୍ପାଣକମ୍ପି ଚ ॥
ଉକ୍କୋଟନଂ =୦୦ ତଥା ଊନୋ, ସଂୱାସୋ, ନାସନେନ ଚ ।
ସହଧମ୍ମିକଂ, ୱିଲେଖାୟ, ମୋହନାମୂଲକେନ ଚ ॥
କୁକ୍କୁଚ୍ଚଂ, ଖୀୟନଂ ଦତ୍ୱା, ପରିଣାମେୟ୍ୟ ପୁଗ୍ଗଲେ ।
କିଂ ତେ, ଅକାଲଂ, ଅଚ୍ଛିନ୍ଦେ, ଦୁଗ୍ଗହା, ନିରୟେନ ୱା ॥
ଗଣସ୍ସ ଚ ୱିଭଙ୍ଗଞ୍ଚ, ଦୁବ୍ବଲାସା ତଥେୱ ଚ ।
ଧମ୍ମିକଂ କଥିନୁଦ୍ଧାରଂ, ସଞ୍ଚିଚ୍ଚାଫାସୁମେୱ ଚ ॥
ସୟଂ ଉପସ୍ସୟଂ ଦତ୍ୱା, ଅକ୍କୋସେୟ୍ୟ ଚ ଚଣ୍ଡିକା ।
କୁଲମଚ୍ଛରିନୀ ଅସ୍ସ, ଗବ୍ଭିନିଂ ୱୁଟ୍ଠପେୟ୍ୟ ଚ ॥
ପାୟନ୍ତିଂ, ଦ୍ୱେ ଚ ୱସ୍ସାନି, ସଙ୍ଘେନାସମ୍ମତମ୍ପି ଚ ।
ତିସ୍ସୋ ଗିହିଗତା ୱୁତ୍ତା, ତିସ୍ସୋୟେୱ କୁମାରିକା ॥
ଊନଦ୍ୱାଦସୱସ୍ସା ଦ୍ୱେ, ତଥାଲଂ ତାୱ ତେତି ଚ ।
ସୋକାୱସ୍ସା ତଥା ପାରି-ୱାସିକଚ୍ଛନ୍ଦଦାନତୋ ॥
ଅନୁୱସ୍ସଂ ଦୁୱେ ଚାତି, ସିକ୍ଖା ଏକୂନସତ୍ତତି ।
ଅଦିନ୍ନାଦାନତୁଲ୍ୟତ୍ତା, ତିସମୁଟ୍ଠାନିକା କତା ॥
ଦୁତିୟପାରାଜିକସମୁଟ୍ଠାନଂ ।
ସଞ୍ଚରିକୁଟିମହଲ୍ଲକଂ, ଧୋୱାପନଞ୍ଚ ପଟିଗ୍ଗହୋ ।
ଚୀୱରସ୍ସ ଚ ୱିଞ୍ଞତ୍ତି, ଗହଣଞ୍ଚ ତଦୁତ୍ତରିଂ ॥
ଉପକ୍ଖଟଦ୍ୱୟଞ୍ଚେୱ, ତଥା ଦୂତେନ ଚୀୱରଂ ।
କୋସିୟଂ, ସୁଦ୍ଧକାଳାନଂ, ଦ୍ୱେଭାଗାଦାନମେୱ ଚ ॥
ଛବ୍ବସ୍ସାନି, ପୁରାଣସ୍ସ, ଲୋମଧୋୱାପନମ୍ପି ଚ ।
ରୂପିୟସ୍ସ ପଟିଗ୍ଗାହୋ, ଉଭୋ ନାନପ୍ପକାରକା ॥
ଊନବନ୍ଧନପତ୍ତୋ ଚ, ୱସ୍ସସାଟିକସୁତ୍ତକଂ ।
ୱିକପ୍ପାପଜ୍ଜନଂ, ୟାୱ, ଦ୍ୱାର, ଦାନଞ୍ଚ ସିବ୍ବନଂ ॥
ପୂୱେହି, ପଚ୍ଚୟୋ ଜୋତିଂ, ରତନଂ, ସୂଚି, ମଞ୍ଚକଂ ।
ତୂଲଂ, ନିସୀଦନଂ, କଣ୍ଡୁ, ୱସ୍ସିକା, ସୁଗତସ୍ସ ଚ ॥
ଅଞ୍ଞୱିଞ୍ଞତ୍ତିସିକ୍ଖା ଚ, ଅଞ୍ଞଚେତାପନମ୍ପି ଚ ।
ସଙ୍ଘିକେନ ଦୁୱେ ୱୁତ୍ତା, ଦ୍ୱେ ମହାଜନିକେନ ଚ ॥
ତଥା =୦୧ ପୁଗ୍ଗଲିକେନେକଂ, ଗରୁପାୱୁରଣଂ ଲହୁଂ ।
ଦ୍ୱେ ୱିଘାସୋଦସାଟୀ ଚ, ତଥା ସମଣଚୀୱରଂ ॥
ଇତି ଏକୂନପଣ୍ଣାସ, ଧମ୍ମା ଦୁକ୍ଖନ୍ତଦସ୍ସିନା ।
ଛସମୁଟ୍ଠାନିକା ଏତେ, ସଞ୍ଚରିତ୍ତସମା କତା ॥
ସଞ୍ଚରିତ୍ତସମୁଟ୍ଠାନଂ ।
ସଙ୍ଘଭେଦୋ ଚ ଭେଦାନୁ-ୱତ୍ତଦୁବ୍ବଚଦୂସକା ।
ଦୁଟ୍ଠୁଲ୍ଲଚ୍ଛାଦନଂ, ଦିଟ୍ଠି, ଛନ୍ଦ, ଉଜ୍ଜଗ୍ଘିକା ଦୁୱେ ॥
ଅପ୍ପସଦ୍ଦା ଦୁୱେ ୱୁତ୍ତା, ତଥା ନ ବ୍ୟାହରେତି ଚ ।
ଛମା, ନୀଚାସନେ, ଠାନଂ, ପଚ୍ଛତୋ, ଉପ୍ପଥେନ ଚ ॥
ୱଜ୍ଜଚ୍ଛାଦାନୁୱତ୍ତା ଚ, ଗହଣଂ, ଓସାରେୟ୍ୟ ଚ ।
ପଚ୍ଚକ୍ଖାମୀତି ସିକ୍ଖା ଚ, ତଥା କିସ୍ମିଞ୍ଚିଦେୱ ଚ ॥
ସଂସଟ୍ଠା ଦ୍ୱେ, ୱଧିତ୍ୱା ଚ, ୱିସିବ୍ବେତ୍ୱା ଚ ଦୁକ୍ଖିତଂ ।
ପୁନଦେୱ ଚ ସଂସଟ୍ଠା, ନେୱ ୱୂପସମେୟ୍ୟ ଚ ॥
ଜାନଂ ସଭିକ୍ଖୁକାରାମଂ, ତଥେୱ ନ ପୱାରୟେ ।
ତଥା ଅନ୍ୱଦ୍ଧମାସଞ୍ଚ, ସହଜୀୱିନିୟୋ ଦୁୱେ ॥
ସଚେ ମେ ଚୀୱରଂ ଅୟ୍ୟେ, ଅନୁବନ୍ଧିସ୍ସସୀତି ଚ ।
ସତ୍ତତିଂସ ଇମେ ଧମ୍ମା, ସମ୍ବୁଦ୍ଧେନ ପକାସିତା ॥
ସବ୍ବେ ଏତେ ସମୁଟ୍ଠାନା, କାୟୱାଚାଦିତୋ ସିୟୁଂ ।
ସମାସମସମେନେୱ, କତା ସମନୁଭାସନା ॥
ସମନୁଭାସନସମୁଟ୍ଠାନଂ ।
କଥିନାନି ଚ ତୀଣାଦି, ପତ୍ତୋ, ଭେସଜ୍ଜମେୱ ଚ ।
ଅଚ୍ଚେକମ୍ପି ଚ ସାସଙ୍କଂ, ପକ୍କମନ୍ତଦ୍ୱୟମ୍ପି ଚ ॥
ତଥା ଉପସ୍ସୟଂ ଗନ୍ତ୍ୱା, ଭୋଜନଞ୍ଚ ପରମ୍ପରଂ ।
ଅନତିରିତ୍ତଂ ସଭତ୍ତୋ, ୱିକପ୍ପେତ୍ୱା ତଥେୱ ଚ ॥
ରଞ୍ଞୋ, ୱିକାଲେ, ୱୋସାସା-ରଞ୍ଞକୁସ୍ସୟୱାଦିକା ।
ପତ୍ତସନ୍ନିଚୟଞ୍ଚେୱ, ପୁରେ, ପଚ୍ଛା, ୱିକାଲକେ ॥
ପଞ୍ଚାହିକଂ =୦୨, ସଙ୍କମନିଂ, ତଥା ଆୱସଥଦ୍ୱୟଂ ।
ପସାଖେ, ଆସନେ ଚାତି, ଏକୂନତିଂସିମେ ପନ ॥
ଦ୍ୱିସମୁଟ୍ଠାନିକା ଧମ୍ମା, ନିଦ୍ଦିଟ୍ଠା କାୟୱାଚତୋ ।
କାୟୱାଚାଦିତୋ ଚେୱ, ସବ୍ବେ କଥିନସମ୍ଭୱା ॥
କଥିନସମୁଟ୍ଠାନଂ ।
ଦ୍ୱେ ସେୟ୍ୟାହଚ୍ଚପାଦୋ ଚ, ପିଣ୍ଡଞ୍ଚ ଗଣଭୋଜନଂ ।
ୱିକାଲେ, ସନ୍ନିଧିଞ୍ଚେୱ, ଦନ୍ତପୋନମଚେଲକଂ ॥
ଉୟ୍ୟୁତ୍ତଞ୍ଚ ୱସୁୟ୍ୟୋଧିଂ, ସୁରା, ଓରେନ ନ୍ହାୟନଂ ।
ଦୁବ୍ବଣ୍ଣକରଣଞ୍ଚେୱ, ପାଟିଦେସନିୟଦ୍ୱୟଂ ॥
ଲସୁଣଂ, ଉପତିଟ୍ଠେୟ୍ୟ, ନଚ୍ଚଦସ୍ସନମେୱ ଚ ।
ନଗ୍ଗଂ, ଅତ୍ଥରଣଂ, ମଞ୍ଚେ, ଅନ୍ତୋରଟ୍ଠେ, ତଥା ବହି ॥
ଅନ୍ତୋୱସ୍ସମଗାରଞ୍ଚ, ଆସନ୍ଦିଂ, ସୁତ୍ତକନ୍ତନଂ ।
ୱେୟ୍ୟାୱଚ୍ଚଂ, ସହତ୍ଥା ଚ, ଆୱାସେ ଚ ଅଭିକ୍ଖୁକେ ॥
ଛତ୍ତଂ, ୟାନଞ୍ଚ ସଙ୍ଘାଣିଂ, ଅଲଙ୍କାରଂ, ଗନ୍ଧୱାସିତଂ ।
ଭିକ୍ଖୁନୀ, ସିକ୍ଖମାନା ଚ, ସାମଣେରୀ, ଗିହୀନିୟା ॥
ତଥା ସଂକଚ୍ଚିକା ଚାତି, ତେଚତ୍ତାଲୀସିମେ ପନ ।
ସବ୍ବେ ଏଳକଲୋମେନ, ଦ୍ୱିସମୁଟ୍ଠାନିକା ସମା ॥
ଏଳକଲୋମସମୁଟ୍ଠାନଂ ।
ଅଞ୍ଞତ୍ରାସମ୍ମତୋ ଚେୱ, ତଥା ଅତ୍ଥଙ୍ଗତେନ ଚ ।
ତିରଚ୍ଛାନୱିଜ୍ଜା ଦ୍ୱେ ୱୁତ୍ତା, ଅନୋକାସକତମ୍ପି ଚ ॥
ସବ୍ବେ ଛ ପନିମେ ଧମ୍ମା, ୱାଚତୋ ୱାଚଚିତ୍ତତୋ ।
ଦ୍ୱିସମୁଟ୍ଠାନିକା ହୋନ୍ତି, ପଦସୋଧମ୍ମତୁଲ୍ୟତା ॥
ପଦସୋଧମ୍ମସମୁଟ୍ଠାନଂ ।
ଏକଂ ନାୱଂ, ପଣୀତଞ୍ଚ, ସଂୱିଧାନଞ୍ଚ ସଂହରେ ।
ଧଞ୍ଞଂ, ନିମନ୍ତିତା ଚେୱ, ପାଟିଦେସନିୟଟ୍ଠକଂ ॥
ଏତା =୦୩ ଚତୁସମୁଟ୍ଠାନା, ସିକ୍ଖା ଚୁଦ୍ଦସ ହୋନ୍ତି ହି ।
ପଞ୍ଞତ୍ତା ବୁଦ୍ଧସେଟ୍ଠେନ, ଅଦ୍ଧାନେନ ସମା ମତା ॥
ଅଦ୍ଧାନସମୁଟ୍ଠାନଂ ।
ସୁତିଂ, ସୂପାଦିୱିଞ୍ଞତ୍ତିଂ, ଅନ୍ଧକାରେ ତଥେୱ ଚ ।
ପଟିଚ୍ଛନ୍ନେ ଚ ଓକାସେ, ବ୍ୟୂହେ ଚାତି ଇମେ ଛପି ॥
ସବ୍ବେ ତୁ ଦ୍ୱିସମୁଟ୍ଠାନା, ଚତୁତ୍ଥଚ୍ଛଟ୍ଠତୋ ସିୟୁଂ ।
ଥେୟ୍ୟସତ୍ଥସମୁଟ୍ଠାନା, ଦେସିତାଦିଚ୍ଚବନ୍ଧୁନା ॥
ଥେୟ୍ୟସତ୍ଥସମୁଟ୍ଠାନଂ ।
ଛତ୍ତ, ଦଣ୍ଡକରସ୍ସାପି, ସତ୍ଥାୱୁଧକରସ୍ସପି ।
ପାଦୁକୂପାହନା, ୟାନଂ, ସେୟ୍ୟା, ପଲ୍ଲତ୍ଥିକାୟ ଚ ॥
ୱେଠିତୋଗୁଣ୍ଠିତୋ ଚାତି, ଏକାଦସ ନିଦସ୍ସିତା ।
ସବ୍ବେ ଏକସମୁଟ୍ଠାନା, ଧମ୍ମଦେସନସଞ୍ଞିତା ॥
ଧମ୍ମଦେସନସମୁଟ୍ଠାନଂ ।
ଭୂତାରୋଚନକଞ୍ଚେୱ, ଚୋରିୱୁଟ୍ଠାପନମ୍ପି ଚ ।
ଅନନୁଞ୍ଞାତମତ୍ତଞ୍ହି, ଅସମ୍ଭିନ୍ନମିଦଂ ତୟଂ ॥
ସମୁଟ୍ଠାନସୀସକଥା ନିଟ୍ଠିତା ।
ଏକୁତ୍ତରନୟକଥା
କତି ଆପତ୍ତିୟୋ ହୋନ୍ତି, ସମୁଟ୍ଠାନେନ ଆଦିନା ?
ପଞ୍ଚ ଆପତ୍ତିୟୋ ହୋନ୍ତି, କୁଟିଂ ସଂୟାଚିକାୟ ତୁ ॥
କରୋତୋ ପନ ତିସ୍ସୋୱ, ପୟୋଗେ ଦୁକ୍କଟାଦୟୋ ।
ୱିକାଲେ ପନ ପାଚିତ୍ତି, ତଥା ଅଞ୍ଞାତିହତ୍ଥତୋ ॥
ଗହେତ୍ୱା ଭୁଞ୍ଜତୋ ୱୁତ୍ତଂ, ପାଟିଦେସନିୟମ୍ପି ଚ ।
ପଞ୍ଚିମାପତ୍ତିୟୋ ହୋନ୍ତି, ସମୁଟ୍ଠାନେନ ଆଦିନା ॥
କତି =୦୪ ଆପତ୍ତିୟୋ ହୋନ୍ତି, ଦୁତିୟେନ ତୁୱଂ ଭଣ ?
ଆପତ୍ତିୟୋ ଚତସ୍ସୋୱ, ହୋନ୍ତୀତି ପରିଦୀପୟେ ॥
‘‘କୁଟିଂ ମମ କରୋଥା’’ତି, ସମାଦିସତି ଭିକ୍ଖୁ ଚେ ।
କରୋନ୍ତି ଚେ କୁଟିଂ ତସ୍ସ, ୱିପନ୍ନଂ ସବ୍ବଥା ପନ ॥
ତିସ୍ସୋ ପୁରିମନିଦ୍ଦିଟ୍ଠା, ପୟୋଗେ ଦୁକ୍କଟାଦୟୋ ।
ପଦସୋଧମ୍ମମୂଲେନ, ଚତସ୍ସୋୱ ଭୱନ୍ତିମା ॥
ତତିୟେନ କତି ଜାୟନ୍ତି, ସମୁଟ୍ଠାନେନ ମେ ଭଣ ?
ତତିୟେନ ତୁୱଂ ବ୍ରୂମି, ପଞ୍ଚଧାପତ୍ତିୟୋ ସିୟୁଂ ॥
ଭିକ୍ଖୁ ସଂୱିଦହିତ୍ୱାନ ।
କରୋତି ଚ କୁଟିଂ ସଚେ ।
ତିସ୍ସୋ ଆପତ୍ତିୟୋ ହୋନ୍ତି ।
ପୟୋଗେ ଦୁକ୍କଟାଦୟୋ ॥
ପଣୀତଭୋଜନଂ ୱତ୍ୱା, ହୋତି ପାଚିତ୍ତି ଭୁଞ୍ଜତୋ ।
ଭିକ୍ଖୁନିଂ ନ ନିୱାରେତ୍ୱା, ପାଟିଦେସନିୟଂ ସିୟା ॥
ସିୟୁଂ କତି ଚତୁତ୍ଥେନ, ସମୁଟ୍ଠାନେନ ମେ ଭଣ ?
ଛଳେୱାପତ୍ତିୟୋ ହୋନ୍ତି, ମେଥୁନଂ ୟଦି ସେୱତି ॥
ହୋତି ପାରାଜିକଂ ତସ୍ସ, କୁଟିଂ ସଂୟାଚିକାୟ ତୁ ।
କରୋତୋ ପନ ତିସ୍ସୋୱ, ପୟୋଗେ ଦୁକ୍କଟାଦୟୋ ॥
ୱିକାଲେ ପନ ପାଚିତ୍ତି, ତଥା ଅଞ୍ଞାତିହତ୍ଥତୋ ।
ଗହେତ୍ୱା ଭୁଞ୍ଜତୋ ୱୁତ୍ତଂ, ପାଟିଦେସନିୟମ୍ପି ଚ ॥
କତି ଆପତ୍ତିୟୋ ହୋନ୍ତି, ପଞ୍ଚମେନ ? ଛ ହୋନ୍ତି ହି ।
ମନୁସ୍ସୁତ୍ତରିଧମ୍ମଂ ତୁ, ୱଦଂ ପାରାଜିକଂ ଫୁସେ ॥
‘‘କୁଟିଂ ମମ କରୋଥା’’ତି ।
ସମାଦିସତି ଭିକ୍ଖୁ ଚେ ।
କରୋନ୍ତି ଚେ କୁଟିଂ ତିସ୍ସୋ ।
ହୋନ୍ତି ତା ଦୁକ୍କଟାଦୟୋ ॥
ୱାଚେତି ପଦସୋ ଧମ୍ମଂ, ହୋତି ପାଚିତ୍ତି ଭିକ୍ଖୁନୋ ।
ଦୱକମ୍ୟତା ୱଦନ୍ତସ୍ସ, ତସ୍ସ ଦୁବ୍ଭାସିତଂ ସିୟା ॥
ସମୁଟ୍ଠାନେନ =୦୫ ଛଟ୍ଠେନ, କତି ଆପତ୍ତିୟୋ ସିୟୁଂ ?
ଛ ଚ ସଂୱିଦହିତ୍ୱାନ, ଭଣ୍ଡଂ ହରତି ଚେ ଚୁତୋ ॥
‘‘କୁଟିଂ ମମ କରୋଥା’’ତି ।
ସମାଦିସତି ଭିକ୍ଖୁ ଚେ ।
କରୋନ୍ତି ଚେ କୁଟିଂ ତିସ୍ସୋ ।
ହୋନ୍ତି ତା ଦୁକ୍କଟାଦୟୋ ॥
ପଣୀତଭୋଜନଂ ୱତ୍ୱା, ହୋତି ପାଚିତ୍ତି ଭୁଞ୍ଜତୋ ।
ଭିକ୍ଖୁନିଂ ନ ନିୱାରେତ୍ୱା, ପାଟିଦେସନିୟଂ ସିୟା ॥
ଇମମୁତ୍ତରମୁତ୍ତରତି ।
ୱିନୟଂ ସୁନୟଂ ସୁନୟେନ ୟୁତୋ ।
ସ ଚ ଦୁତ୍ତରମୁତ୍ତରମୁତ୍ତରତି ॥
ଆପତ୍ତିସମୁଟ୍ଠାନକଥା ।
ଇତୋ ପରଂ ପୱକ୍ଖାମି, ପରମେକୁତ୍ତରଂ ନୟଂ ।
ଅୱିକ୍ଖିତ୍ତେନ ଚିତ୍ତେନ, ତଂ ସୁଣାଥ ସମାହିତା ॥
କେ ଆପତ୍ତିକରା ଧମ୍ମା, ଅନାପତ୍ତିକରାପି କେ ?
କା ପନାପତ୍ତିୟୋ ନାମ, ଲହୁକା ଗରୁକାପି କା ?
ସାୱସେସା ଚ କାପତ୍ତି, କା ନାମାନୱସେସକା ?
ଦୁଟ୍ଠୁଲ୍ଲା ନାମ କାପତ୍ତି, ଅଦୁଟ୍ଠୁଲ୍ଲାପି ନାମ କା ?
ନିୟତା ନାମ କାପତ୍ତି, କା ପନାନିୟତାପି ଚ ?
ଦେସନାଗାମିନୀ କା ଚ, କା ଚାଦେସନଗାମିନୀ ?
ସମୁଟ୍ଠାନାନି ଆପତ୍ତି-କରା ଧମ୍ମାତି ଦୀପିତା ।
ଅନାପତ୍ତିକରା ଧମ୍ମା, ସମଥା ସତ୍ତ ଦସ୍ସିତା ॥
ପାରାଜିକାଦୟୋ ସତ୍ତ-ୱିଧା ଆପତ୍ତିୟୋ ସିୟୁଂ ।
ଲହୁକା ତତ୍ଥ ପଞ୍ଚେୱ, ହୋନ୍ତି ଥୁଲ୍ଲଚ୍ଚୟାଦୟୋ ॥
ପାରାଜିକଂ ଠପେତ୍ୱାନ, ସାୱସେସାୱସେସକା ।
ଏକା ପାରାଜିକାପତ୍ତି, ମତା ଅନୱସେସକା ॥
‘‘ଦୁଟ୍ଠୁଲ୍ଲା’’ତି =୦୬ ଚ ନିଦ୍ଦିଟ୍ଠା, ଦୁୱିଧାପତ୍ତିଆଦିତୋ ।
ସେସା ପଞ୍ଚୱିଧାପତ୍ତି, ‘‘ଅଦୁଟ୍ଠୁଲ୍ଲା’’ତି ଦୀପିତା ॥
ପଞ୍ଚାନନ୍ତରିୟସଂୟୁତ୍ତା, ନିୟତାନିୟତେତରା ।
ଦେସନାଗାମିନୀ ପଞ୍ଚ, ଦ୍ୱେ ପନାଦେସଗାମିକା ॥
ଏକକକଥା ।
ଅଭବ୍ବାପତ୍ତିକୋ କୋ ଚ, ଭବ୍ବାପତ୍ତିକପୁଗ୍ଗଲୋ ?
ଉପସମ୍ପଦକମ୍ମଂ ତୁ, ସତ୍ଥୁନା କସ୍ସ ୱାରିତଂ ?
ଆପତ୍ତିମାପଜ୍ଜିତୁଂ ଦ୍ୱେୱ ଲୋକେ ।
ବୁଦ୍ଧା ଚ ପଚ୍ଚେକବୁଦ୍ଧା ଅଭବ୍ବା ।
ଆପତ୍ତିମାପଜ୍ଜିତୁଂ ଦ୍ୱେୱ ଲୋକେ ।
ଭିକ୍ଖୂ ଚ ଭବ୍ବା ଅଥ ଭିକ୍ଖୁନୀ ଚ ॥
ଅଦ୍ଧୱିହୀନୋ ଅଙ୍ଗୱିହୀନୋ ।
ୱତ୍ଥୁୱିପନ୍ନୋ ଦୁକ୍କଟକାରୀ ।
ନୋ ପରିପୁଣ୍ଣୋ ୟାଚତି ୟୋ ନୋ ।
ତସ୍ସୁପସମ୍ପଦା ପଟିସିଦ୍ଧା ॥
ଅତ୍ଥାପତ୍ତି ହୱେ ଲଦ୍ଧ-ସମାପତ୍ତିସ୍ସ ଭିକ୍ଖୁନୋ ।
ଅତ୍ଥାପତ୍ତି ହି ନୋ ଲଦ୍ଧ-ସମାପତ୍ତିସ୍ସ ଦୀପିତା ॥
ଭୂତସ୍ସାରୋଚନଂ ଲଦ୍ଧ-ସମାପତ୍ତିସ୍ସ ନିଦ୍ଦିସେ ।
ଅଭୂତାରୋଚନାପତ୍ତି, ଅସମାପତ୍ତିଲାଭିନୋ ॥
ଅତ୍ଥି ସଦ୍ଧମ୍ମସଂୟୁତ୍ତା, ଅସଦ୍ଧମ୍ମୟୁତାପି ଚ ।
ସପରିକ୍ଖାରସଂୟୁତ୍ତା, ପରସନ୍ତକସଂୟୁତା ॥
ପଦସୋଧମ୍ମମୂଲାଦୀ, ସଦ୍ଧମ୍ମପଟିସଂୟୁତା ।
ଦୁଟ୍ଠୁଲ୍ଲୱାଚସଂୟୁତ୍ତା, ଅସଦ୍ଧମ୍ମୟୁତା ସିୟା ॥
ଅତିରେକଦସାହଂ ତୁ, ଠପନେ ଚୀୱରାଦିନୋ ।
ଅନିସ୍ସଜ୍ଜିତ୍ୱା ଭୋଗେ ଚ, ସପରିକ୍ଖାରସଂୟୁତା ॥
ସଙ୍ଘସ୍ସ ମଞ୍ଚପୀଠାଦିଂ, ଅଜ୍ଝୋକାସତ୍ଥରେପି ଚ ।
ଅନାପୁଚ୍ଛାୱ ଗମନେ, ପରସନ୍ତକସଂୟୁତା ॥
କଥଞ୍ହି =୦୭ ଭଣତୋ ସଚ୍ଚଂ, ଗରୁକଂ ହୋତି ଭିକ୍ଖୁନୋ ?
କଥଂ ମୁସା ଭଣନ୍ତସ୍ସ, ଲହୁକାପତ୍ତି ଜାୟତେ ?
‘‘ସିଖରଣୀ’’ତି ସଚ୍ଚଂ ତୁ, ଭଣତୋ ଗରୁକଂ ସିୟା ।
ସମ୍ପଜାନମୁସାୱାଦେ, ପାଚିତ୍ତି ଲହୁକା ଭୱେ ॥
କଥଂ ମୁସା ଭଣନ୍ତସ୍ସ, ଗରୁକଂ ହୋତି ଭିକ୍ଖୁନୋ ?
କଥଞ୍ଚ ଭଣତୋ ସଚ୍ଚଂ, ଆପତ୍ତି ଲହୁକା ସିୟା ?
ଅଭୂତାରୋଚନେ ତସ୍ସ, ଗରୁକାପତ୍ତି ଦୀପିତା ।
ଭୂତସ୍ସାରୋଚନେ ସଚ୍ଚଂ, ୱଦତୋ ଲହୁକା ସିୟା ॥
କଥଂ ଭୂମିଗତୋ ଦୋସଂ, ନ ୱେହାସଗତୋ ଫୁସେ ?
କଥଂ ୱେହାସଗୋ ଦୋସଂ, ନ ଚ ଭୂମିଗତୋ ଫୁସେ ?
ସଙ୍ଘକମ୍ମଂ ୱିକୋପେତୁଂ, ହତ୍ଥପାସଂ ଜହଂ ଫୁସେ ।
କେସମତ୍ତମ୍ପି ଆକାସେ, ତିଟ୍ଠତୋ ନତ୍ଥି ୱଜ୍ଜତା ॥
ଆହଚ୍ଚପାଦକଂ ମଞ୍ଚଂ, ୱେହାସକୁଟିୟୂପରି ।
ପୀଠଂ ୱାଭିନିସୀଦନ୍ତୋ, ଆପଜ୍ଜତି ନ ଭୂମିତୋ ॥
ପୱିସନ୍ତୋ କଥଂ ଭିକ୍ଖୁ, ଆପଜ୍ଜତି, ନ ନିକ୍ଖମଂ ?
ପୱିସନ୍ତୋ କଥଂ ଭିକ୍ଖୁ, ପୱିସନ୍ତୋ ନ ଚେୱ ତଂ ?
ସଛତ୍ତୁପାହନୋ ୱତ୍ତ-ମପୂରେତ୍ୱାନ କେୱଲଂ ।
ପୱିସନ୍ତୋ ପନାପତ୍ତିଂ, ଆପଜ୍ଜତି, ନ ନିକ୍ଖମଂ ॥
ଗମିକୋ ଗମିକୱତ୍ତାନି, ଅପୂରେତ୍ୱାନ ନିକ୍ଖମଂ ।
ନିକ୍ଖମନ୍ତୋୱ ଆପତ୍ତିଂ, ଫୁସେୟ୍ୟ, ପୱିସଂ ନ ଚ ॥
ଆଦିୟନ୍ତୋ ପନାପତ୍ତିଂ, ଆପଜ୍ଜତି କଥଂ ୱଦ ?
ତଥେୱାନାଦିୟନ୍ତୋପି, ଆପଜ୍ଜତି କଥଂ ୱଦ ?
ଭିକ୍ଖୁନୀ ଅତିଗମ୍ଭୀରଂ, ୟା କାଚୁଦକସୁଦ୍ଧିକଂ ।
ଆଦିୟନ୍ତୀ ପନାପତ୍ତିଂ, ଆପଜ୍ଜତି, ନ ସଂସୟୋ ॥
ଅନାଦିୟିତ୍ୱା ଦୁବ୍ବଣ୍ଣ-କରଣଂ ପନ ଚୀୱରଂ ।
ୟେୱଂ ଅନାଦିୟନ୍ତୋୱ, ଆପଜ୍ଜତି ହି ନାମ ସୋ ॥
ସମାଦିୟନ୍ତୋ ଆପତ୍ତିଂ, ଆପଜ୍ଜତି କଥଂ ପନ ?
ତଥାସମାଦିୟନ୍ତୋପି, ଆପଜ୍ଜତି କଥଂ ପନ ?
ୟୋ =୦୮ ହି ମୂଗବ୍ବତାଦୀନି, ୱତାନିଧ ସମାଦିୟଂ ।
ସମାଦିୟନ୍ତୋ ଆପତ୍ତିଂ, ଆପଜ୍ଜତି ହି ନାମ ସୋ ॥
ୟୋ ହି କମ୍ମକତୋ ଭିକ୍ଖୁ, ୱୁତ୍ତଂ ୱତ୍ତଂ ପନତ୍ତନୋ ।
ତଞ୍ଚାସମାଦିୟନ୍ତୋୱ, ଆପଜ୍ଜତି ହି ନାମ ସୋ ॥
କରୋନ୍ତୋୱ ପନାପତ୍ତିଂ, କଥମାପଜ୍ଜତେ ନରୋ ?
ନ କରୋନ୍ତୋ କଥଂ ନାମ, ସମଣୋ ଦୋସୱା ସିୟା ?
ଭଣ୍ଡାଗାରିକକମ୍ମଞ୍ଚ, ୱେଜ୍ଜକମ୍ମଞ୍ଚ ଚୀୱରଂ ।
ଅଞ୍ଞାତିକାୟ ସିବ୍ବନ୍ତୋ, କରଂ ଆପଜ୍ଜତେ ନରୋ ॥
ଉପଜ୍ଝାୟସ୍ସ ୱତ୍ତାନି, ୱତ୍ତାନି ଇତରସ୍ସ ୱା ।
ଅକରୋନ୍ତୋ ପନାପତ୍ତିଂ, ଆପଜ୍ଜତି ହି ନାମ ସୋ ॥
ଦେନ୍ତୋ ଆପଜ୍ଜତାପତ୍ତିଂ, ନ ଦେନ୍ତୋପି କଥଂ ଭଣ ?
ଅଞ୍ଞାତିକାୟ ୟଂ କିଞ୍ଚି, ଭିକ୍ଖୁ ଭିକ୍ଖୁନିୟା ପନ ॥
ଚୀୱରଂ ଦଦମାନୋ ହି, ଦେନ୍ତୋ ଆପଜ୍ଜତେ ପନ ।
ତଥନ୍ତେୱାସିକାଦୀନଂ, ଅଦେନ୍ତୋ ଚୀୱରାଦିକଂ ॥
ଅତ୍ତସନ୍ନିସ୍ସିତା ଅତ୍ଥି, ତଥେୱ ପରନିସ୍ସିତା ।
ମୁଦୁଲମ୍ବାଦିନୋ ଅତ୍ତା, ସେସା ହି ପରନିସ୍ସିତା ॥
କଥଞ୍ଚ ପଟିଗଣ୍ହନ୍ତୋ, ଆପଜ୍ଜତି ହି ୱଜ୍ଜତଂ ?
କଥମପ୍ପଟିଗଣ୍ହନ୍ତୋ, ଆପଜ୍ଜତି ହି ୱଜ୍ଜତଂ ?
ଚୀୱରଂ ପଟିଗଣ୍ହନ୍ତୋ, ଭିକ୍ଖୁ ଅଞ୍ଞାତିହତ୍ଥତୋ ।
ଓୱାଦଞ୍ଚ ନ ଗଣ୍ହନ୍ତୋ, ଆପଜ୍ଜତି ହି ୱଜ୍ଜତଂ ॥
କଥଞ୍ଚ ପରିଭୋଗେନ, ଆପଜ୍ଜତି ତପୋଧନୋ ?
କଥଂ ନ ପରିଭୋଗେନ, ଆପଜ୍ଜତି ତପୋଧନୋ ?
ୟୋ ହି ନିସ୍ସଗ୍ଗିୟଂ ୱତ୍ଥୁଂ, ଅଚ୍ଚଜିତ୍ୱା ନିସେୱତି ।
ଅୟଂ ତୁ ପରିଭୋଗେନ, ଆପଜ୍ଜତି, ନ ସଂସୟୋ ॥
ଅତିକ୍କମେନ୍ତୀ ସଙ୍ଘାଟି-ଚାରଂ ପଞ୍ଚାହିକଂ ପନ ।
ଅୟଂ ତୁ ପରିଭୋଗେନ, ଆପଜ୍ଜତି ହି ଭିକ୍ଖୁନୀ ॥
ଦିୱାପଜ୍ଜତି ନୋ ରତ୍ତିଂ, ରତ୍ତିମେୱ ଚ ନୋ ଦିୱା ।
ଦ୍ୱାରଂ ଅସଂୱରିତ୍ୱାନ, ସେନ୍ତୋ ଆପଜ୍ଜତେ ଦିୱା ॥
ସଗାରସେୟ୍ୟକଂ =୦୯ ରତ୍ତିଂ, ଆପଜ୍ଜତି ହି ନୋ ଦିୱା ।
ଅରୁଣୁଗ୍ଗେ ପନାପତ୍ତି, କଥଂ ନ ଅରୁଣୁଗ୍ଗମେ ?
ଏକଛାରତ୍ତସତ୍ତାହ-ଦସାହାଦିଅତିକ୍କମେ ।
ଫୁସନ୍ତୋ ୱୁତ୍ତମାପତ୍ତିଂ, ଆପଜ୍ଜତ୍ୟରୁଣୁଗ୍ଗମେ ॥
ପୱାରେତ୍ୱାନ ଭୁଞ୍ଜନ୍ତୋ, ଫୁସେ ନ ଅରୁଣୁଗ୍ଗମେ ।
ଛିନ୍ଦନ୍ତସ୍ସ ସିୟାପତ୍ତି, କଥମଚ୍ଛିନ୍ଦତୋ ସିୟା ?
ଛିନ୍ଦନ୍ତୋ ଭୂତଗାମଞ୍ଚ, ଅଙ୍ଗଜାତଞ୍ଚ ଅତ୍ତନୋ ।
ପାରାଜିକଞ୍ଚ ପାଚିତ୍ତିଂ, ଫୁସେ ଥୁଲ୍ଲଚ୍ଚୟମ୍ପି ଚ ॥
ନ ଛିନ୍ଦନ୍ତୋ ନଖେ କେସେ, ଆପଜ୍ଜତି ହି ନାମ ସୋ ।
ଛାଦେନ୍ତୋପଜ୍ଜତାପତ୍ତିଂ, ନଚ୍ଛାଦେନ୍ତୋ କଥଂ ପନ ?
ଛାଦେନ୍ତୋ ପନ ଆପତ୍ତିଂ, ଛାଦେନ୍ତୋପଜ୍ଜତେ ନରୋ ।
ଆପଜ୍ଜତି ପନଚ୍ଛିନ୍ନୋ, ନଚ୍ଛାଦେନ୍ତୋ ତିଣାଦିନା ॥
ଆପଜ୍ଜତି ହି ଧାରେନ୍ତୋ, ନ ଧାରେନ୍ତୋ କଥଂ ପନ ?
ଧାରେନ୍ତୋ କୁସଚୀରାଦିଂ, ଧାରେନ୍ତୋପଜ୍ଜତେ ପନ ॥
ଦିନ୍ନଂ ନିସ୍ସଟ୍ଠପତ୍ତଂ ତଂ, ଅଧାରେନ୍ତୋୱ ଦୋସୱା ।
ସଚିତ୍ତକଦୁକଂ ସଞ୍ଞା-ୱିମୋକ୍ଖକଦୁକଂ ଭୱେ ॥
ଦୁକକଥା ।
ଅତ୍ଥାପତ୍ତି ହି ତିଟ୍ଠନ୍ତେ, ନାଥେ, ନୋ ପରିନିବ୍ବୁତେ ।
ନିବ୍ବୁତେ ନ ତୁ ତିଟ୍ଠନ୍ତେ, ଅତ୍ଥାପତ୍ତୁଭୟତ୍ଥପି ॥
ରୁହିରୁପ୍ପାଦନାପତ୍ତି, ଠିତେ, ନୋ ପରିନିବ୍ବୁତେ ।
ଥେରମାୱୁସୱାଦେନ, ୱଦତୋ ପରିନିବ୍ବୁତେ ॥
ଆପତ୍ତିୟୋ ଇମା ଦ୍ୱେପି, ଠପେତ୍ୱା ସୁଗତେ ପନ ।
ଅୱସେସା ଧରନ୍ତେପି, ଭୱନ୍ତି ପରିନିବ୍ବୁତେ ॥
କାଲେୟେୱ ସିୟାପତ୍ତି, ୱିକାଲେ ନ ସିୟା କଥଂ ?
ୱିକାଲେ ତୁ ସିୟାପତ୍ତି, ନ କାଲେ, ଉଭୟତ୍ଥପି ?
ଭୁଞ୍ଜତୋନତିରିତ୍ତଂ ତୁ, କାଲସ୍ମିଂ, ନୋ ୱିକାଲକେ ।
ୱିକାଲଭୋଜନାପତ୍ତି, ୱିକାଲେ, ତୁ ନ କାଲକେ ॥
ଅୱସେସଂ =୧୦ ପନାପତ୍ତିଂ, ଆପଜ୍ଜତି ହି ସବ୍ବଦା ।
ସବ୍ବଂ କାଲେ ୱିକାଲେ ଚ, ନତ୍ଥି ତତ୍ଥ ଚ ସଂସୟୋ ॥
ରତ୍ତିମେୱ ପନାପତ୍ତିଂ, ଆପଜ୍ଜତି ଚ ନୋ ଦିୱା ।
ଦିୱାପଜ୍ଜତି ନୋ ରତ୍ତିଂ, ଆପଜ୍ଜତୁଭୟତ୍ଥପି ॥
ସହସେୟ୍ୟା ସିୟା ରତ୍ତିଂ, ଦ୍ୱାରାସଂୱରମୂଲକା ।
ଦିୱା, ସେସା ପନାପତ୍ତି, ସିୟା ରତ୍ତିଂ ଦିୱାପି ଚ ॥
ଦସୱସ୍ସୋ ତୁ ନୋ ଊନ-ଦସୱସ୍ସୋ ସିୟା କଥଂ ?
ହୋତୂନଦସୱସ୍ସୋ, ନୋ, ଦସୱସ୍ସୂଭୟତ୍ଥପି ?
ଉପଟ୍ଠାପେତି ଚେ ବାଲୋ, ପରିସଂ ଦସୱସ୍ସିକୋ ।
ଆପତ୍ତିଂ ପନ ଅବ୍ୟତ୍ତୋ, ଆପଜ୍ଜତି, ନ ସଂସୟୋ ॥
ତଥୂନଦସୱସ୍ସୋ ଚ, ‘‘ପଣ୍ଡିତୋହ’’ନ୍ତି ଗଣ୍ହତି ।
ପରିସଂ, ଦସୱସ୍ସୋ ନୋ, ସେସମାପଜ୍ଜତେ ଉଭୋ ॥
କାଳେ ଆପଜ୍ଜତାପତ୍ତିଂ, ନ ଜୁଣ୍ହେ ଜୁଣ୍ହକେ କଥଂ ।
ଆପଜ୍ଜତି, ନ କାଳସ୍ମିଂ, ଆପଜ୍ଜତୂଭୟତ୍ଥପି ?
ୱସ୍ସଂ ଅନୁପଗଚ୍ଛନ୍ତୋ, କାଳେ, ନୋ ଜୁଣ୍ହକେ ପନ ।
ଆପଜ୍ଜତାପୱାରେନ୍ତୋ, ଜୁଣ୍ହେ, ନ ପନ କାଳକେ ॥
ଅୱସେସଂ ତୁ ପଞ୍ଞତ୍ତ-ମାପତ୍ତିମୱିପତ୍ତିନା ।
କାଳେ ଚେୱ ଚ ଜୁଣ୍ହେ ଚ, ଆପଜ୍ଜତି, ନ ସଂସୟୋ ॥
ୱସ୍ସୂପଗମନଂ କାଳେ, ନୋ ଜୁଣ୍ହେ, ତୁ ପୱାରଣା ।
ଜୁଣ୍ହେ କପ୍ପତି, ନୋ କାଳେ, ସେସଂ ପନୁଭୟତ୍ଥପି ॥
ଅତ୍ଥାପତ୍ତି ତୁ ହେମନ୍ତେ, ନ ହୋତୀତରୁତୁଦ୍ୱୟେ ।
ଗିମ୍ହେୟେୱ ନ ସେସେସୁ, ୱସ୍ସେ ନୋ ଇତରଦ୍ୱୟେ ॥
ଦିନେ ପାଳିପଦକ୍ଖାତେ, କତ୍ତିକେ ପୁଣ୍ଣମାସିୟା ।
ଠପିତଂ ତୁ ୱିକପ୍ପେତ୍ୱା, ୱସ୍ସସାଟିକଚୀୱରଂ ॥
ଆପଜ୍ଜତି ଚ ହେମନ୍ତେ, ନିୱାସେତି ଚ ତଂ ସଚେ ।
ପୁଣ୍ଣମାଦିୱସସ୍ମିଞ୍ହି, କତ୍ତିକସ୍ସ ତୁ ପଚ୍ଛିମେ ॥
ତଂ ଅପଚ୍ଚୁଦ୍ଧରିତ୍ୱାୱ, ହେମନ୍ତେୟେୱ, ନେତରେ ।
ଆପଜ୍ଜତୀତି ନିଦ୍ଦିଟ୍ଠଂ, କୁରୁନ୍ଦଟ୍ଠକଥାୟ ତୁ ॥
‘‘ଅତିରେକମାସୋ =୧୧ ସେସୋ’’ତି ।
ପରିୟେସନ୍ତୋ ଚ ଗିମ୍ହିକେ ।
ଗିମ୍ହେ ଆପଜ୍ଜତାପତ୍ତିଂ ।
ନ ତ୍ୱେୱିତରୁତୁଦ୍ୱୟେ ॥
ୱିଜ୍ଜମାନେ ସଚେ ନଗ୍ଗୋ, ୱସ୍ସସାଟିକଚୀୱରେ ।
ଓୱସ୍ସାପେତି ୟୋ କାୟଂ, ୱସ୍ସେ ଆପଜ୍ଜତୀଧ ସୋ ॥
ଆପଜ୍ଜତି ହି ସଙ୍ଘୋୱ, ନ ଗଣୋ ନ ଚ ପୁଗ୍ଗଲୋ ।
ଗଣୋୱ ନ ଚ ସେସା ହି, ପୁଗ୍ଗଲୋୱ ନ ଚାପରେ ॥
ଅଧିଟ୍ଠାନଂ କରୋନ୍ତୋ ୱା, ପାରିସୁଦ୍ଧିଉପୋସଥଂ ।
ସଙ୍ଘୋ ୱାପଜ୍ଜତାପତ୍ତିଂ, ନ ଗଣୋ ନ ଚ ପୁଗ୍ଗଲୋ ॥
ସୁତ୍ତୁଦ୍ଦେସମଧିଟ୍ଠାନଂ, କରୋନ୍ତୋ ୱା ଉପୋସଥଂ ।
ଗଣୋ ୱାପଜ୍ଜତାପତ୍ତିଂ, ନ ସଙ୍ଘୋ ନ ଚ ପୁଗ୍ଗଲୋ ॥
ସୁତ୍ତୁଦ୍ଦେସଂ କରୋନ୍ତୋ ୱା, ଏକୋ ପନ ଉପୋସଥଂ ।
ପୁଗ୍ଗଲୋପଜ୍ଜତାପତ୍ତିଂ, ନ ଚ ସଙ୍ଘୋ ଗଣୋ ନ ଚ ॥
ଆପଜ୍ଜତି ଗିଲାନୋୱ, ନାଗିଲାନୋ କଥଂ ପନ ।
ଆପଜ୍ଜତାଗିଲାନୋୱ, ନୋ ଗିଲାନୋ ଉଭୋପି ଚ ?
ଭେସଜ୍ଜେନ ପନଞ୍ଞେନ, ଅତ୍ଥେ ସତି ଚ ୟୋ ପନ ।
ୱିଞ୍ଞାପେତି ତଦଞ୍ଞଂ ସୋ, ଆପଜ୍ଜତି ଅକଲ୍ଲକୋ ॥
ନ ଭେସଜ୍ଜେନ ଅତ୍ଥେପି, ଭେସଜ୍ଜଂ ୱିଞ୍ଞାପେତି ଚେ ।
ଆପଜ୍ଜତାଗିଲାନୋୱ, ସେସଂ ପନ ଉଭୋପି ଚ ॥
ଅତ୍ଥାପତ୍ତି ହି ଅନ୍ତୋୱ, ନ ବହିଦ୍ଧା, ତଥା ବହି ।
ଆପଜ୍ଜତି, ନ ଚେୱନ୍ତୋ, ଅତ୍ଥାପତ୍ତୁଭୟତ୍ଥପି ॥
ଅନୁପଖଜ୍ଜ ସେୟ୍ୟଂ ତୁ, କପ୍ପେନ୍ତୋ ପନ କେୱଲଂ ।
ଆପଜ୍ଜତି ପନାପତ୍ତିଂ, ଅନ୍ତୋୟେୱ ଚ, ନୋ ବହି ॥
ଅଜ୍ଝୋକାସେ ତୁ ମଞ୍ଚାଦିଂ, ସନ୍ଥରିତ୍ୱାନ ପକ୍କମଂ ।
ବହିୟେୱ ଚ, ନୋ ଅନ୍ତୋ, ସେସଂ ପନୁଭୟତ୍ଥପି ॥
ଅନ୍ତୋସୀମାୟେୱାପତ୍ତିଂ, ବହିସୀମାୟ ନେୱ ଚ ।
ବହିସୀମାୟ, ନୋ ଅନ୍ତୋ-ସୀମାୟ, ଉଭୟତ୍ଥପି ॥
ସଛତ୍ତୁପାହନୋ =୧୨ ଭିକ୍ଖୁ, ପୱିସନ୍ତୋ ତପୋଧନୋ ।
ଉପଚାରସୀମୋକ୍କନ୍ତେ, ଅନ୍ତୋ ଆପଜ୍ଜତେ ପନ ॥
ଗମିକୋ ଦାରୁଭଣ୍ଡାଦିଂ, ପଟିସାମନୱତ୍ତକଂ ।
ଅପୂରେତ୍ୱାନ ଗଚ୍ଛନ୍ତୋ, ଉପଚାରସ୍ସତିକ୍କମେ ॥
ଆପଜ୍ଜତି ପନାପତ୍ତିଂ, ବହିସୀମାୟୟେୱ ସୋ ।
ସେସମାପଜ୍ଜତେ ଅନ୍ତୋ-ବହିସୀମାୟ ସବ୍ବସୋ ॥
ତିକକଥା ।
ସକୱାଚାୟ ଆପନ୍ନୋ, ପରୱାଚାୟ ସୁଜ୍ଝତି ।
ପରୱାଚାୟ ଆପନ୍ନୋ, ସକୱାଚାୟ ସୁଜ୍ଝତି ॥
ସକୱାଚାୟ ଆପନ୍ନୋ, ସକୱାଚାୟ ସୁଜ୍ଝତି ।
ପରୱାଚାୟ ଆପନ୍ନୋ, ପରୱାଚାୟ ସୁଜ୍ଝତି ॥
ୱଚୀଦ୍ୱାରିକମାପତ୍ତିଂ, ଆପନ୍ନୋ ସକୱାଚତୋ ।
ତିଣୱତ୍ଥାରକଂ ଗନ୍ତ୍ୱା, ପରୱାଚାୟ ସୁଜ୍ଝତି ॥
ତଥା ଅପ୍ପଟିନିସ୍ସଗ୍ଗେ, ପାପିକାୟ ହି ଦିଟ୍ଠିୟା ।
ପରସ୍ସ କମ୍ମୱାଚାୟ, ଆପଜ୍ଜିତ୍ୱାନ ୱଜ୍ଜତଂ ॥
ଦେସେନ୍ତୋ ଭିକ୍ଖୁନୋ ମୂଲେ, ସକୱାଚାୟ ସୁଜ୍ଝତି ।
ୱଚୀଦ୍ୱାରିକମାପତ୍ତିଂ, ଆପନ୍ନୋ ଭିକ୍ଖୁସନ୍ତିକେ ॥
ଦେସେତ୍ୱା ତଂ ୱିସୁଜ୍ଝନ୍ତୋ, ସକୱାଚାୟ ସୁଜ୍ଝତି ।
ସଙ୍ଘାଦିସେସମାପତ୍ତିଂ, ୟାୱତତିୟକଂ ପନ ॥
ପରସ୍ସ କମ୍ମୱାଚାୟ, ଆପଜ୍ଜିତ୍ୱା ତଥା ପୁନ ।
ପରସ୍ସ ପରିୱାସାଦି-କମ୍ମୱାଚାୟ ସୁଜ୍ଝତି ॥
କାୟେନାପଜ୍ଜତାପତ୍ତିଂ, ୱାଚାୟ ଚ ୱିସୁଜ୍ଝତି ।
ୱାଚାୟାପଜ୍ଜତାପତ୍ତିଂ, କାୟେନ ଚ ୱିସୁଜ୍ଝତି ॥
କାୟେନାପଜ୍ଜତାପତ୍ତିଂ, କାୟେନେୱ ୱିସୁଜ୍ଝତି ।
ୱାଚାୟାପଜ୍ଜତାପତ୍ତିଂ, ୱାଚାୟେୱ ୱିସୁଜ୍ଝତି ॥
କାୟଦ୍ୱାରିକମାପତ୍ତିଂ, କାୟେନାପଜ୍ଜତେ, ପୁନ ।
ଦେସେନ୍ତୋ ତଂ ପନାପତ୍ତିଂ, ୱାଚାୟେୱ ୱିସୁଜ୍ଝତି ॥
ୱଚୀଦ୍ୱାରିକମାପତ୍ତିଂ =୧୩, ଆପଜ୍ଜିତ୍ୱାନ ୱାଚତୋ ।
ତିଣୱତ୍ଥାରକଂ ଗନ୍ତ୍ୱା, କାୟେନେୱ ୱିସୁଜ୍ଝତି ॥
କାୟଦ୍ୱାରିକମାପତ୍ତିଂ, ଆପଜ୍ଜିତ୍ୱାନ କାୟତୋ ।
ତିଣୱତ୍ଥାରକଂ ଗନ୍ତ୍ୱା, କାୟେନେୱ ୱିସୁଜ୍ଝତି ॥
ୱଚୀଦ୍ୱାରିକମାପତ୍ତିଂ, ଆପଜ୍ଜିତ୍ୱା ତପୋଧନୋ ।
ତମେୱ ପନ ଦେସେନ୍ତୋ, ୱାଚାୟେୱ ୱିସୁଜ୍ଝତି ॥
ସୁତ୍ତୋ ଆପଜ୍ଜତାପତ୍ତିଂ, ପଟିବୁଦ୍ଧୋ ୱିସୁଜ୍ଝତି ।
ଆପନ୍ନୋ ପଟିବୁଦ୍ଧୋୱ, ସୁତ୍ତୋ ସୁଜ୍ଝତି ସୋ କଥଂ ?
ସୁତ୍ତୋ ଆପଜ୍ଜତାପତ୍ତିଂ, ସୁତ୍ତୋୟେୱ ୱିସୁଜ୍ଝତି ।
ପଟିବୁଦ୍ଧୋୱ ଆପନ୍ନୋ, ପଟିବୁଦ୍ଧୋ ୱିସୁଜ୍ଝତି ?
ସଗାରସେୟ୍ୟକାଦିଂ ତୁ, ସୁତ୍ତୋ ଆପଜ୍ଜତେ ନରୋ ।
ଦେସେନ୍ତୋ ପନ ତଂ ଞତ୍ୱା, ପଟିବୁଦ୍ଧୋ ୱିସୁଜ୍ଝତି ॥
ଆପଜ୍ଜିତ୍ୱାନ ଜଗ୍ଗନ୍ତୋ, ତିଣୱତ୍ଥାରକେ ପନ ।
ସମଥେ ତୁ ସୟନ୍ତୋୱ, ସୁତ୍ତୋ ୱୁଟ୍ଠାତି ନାମ ସୋ ॥
ସଗାରସେୟ୍ୟକାଦିଂ ତୁ, ସୁତ୍ତୋ ଆପଜ୍ଜତେ ନରୋ ।
ସୟନ୍ତୋ ତିଣୱତ୍ଥାରେ, ସୁତ୍ତୋୟେୱ ୱିସୁଜ୍ଝତି ॥
ଆପଜ୍ଜିତ୍ୱା ପନାପତ୍ତିଂ, ଜଗ୍ଗନ୍ତୋ ପନ କେୱଲଂ ।
ଦେସେନ୍ତୋ ପନ ତଂ ପଚ୍ଛା, ପଟିବୁଦ୍ଧୋ ୱିସୁଜ୍ଝତି ॥
ଆପଜ୍ଜିତ୍ୱା ଅଚିତ୍ତୋୱ, ସଚିତ୍ତୋୱ ୱିସୁଜ୍ଝତି ।
ଆପଜ୍ଜିତ୍ୱା ସଚିତ୍ତୋୱ, ଅଚିତ୍ତୋୱ ୱିସୁଜ୍ଝତି ॥
ଆପଜ୍ଜିତ୍ୱା ଅଚିତ୍ତୋୱ, ଅଚିତ୍ତୋୱ ୱିସୁଜ୍ଝତି ।
ଆପଜ୍ଜିତ୍ୱା ସଚିତ୍ତୋୱ, ସଚିତ୍ତୋୱ ୱିସୁଜ୍ଝତି ॥
ଅଚିତ୍ତୋ, ଚିତ୍ତକାପତ୍ତିଂ, ଆପଜ୍ଜିତ୍ୱା ତପୋଧନୋ ।
ପଚ୍ଛା ତଂ ପନ ଦେସେନ୍ତୋ, ସଚିତ୍ତୋୱ ୱିସୁଜ୍ଝତି ॥
ତଥା ସଚିତ୍ତକାପତ୍ତିଂ, ଆପଜ୍ଜିତ୍ୱା ସଚିତ୍ତକୋ ।
ସୟନ୍ତୋ ତିଣୱତ୍ଥାରେ, ଅଚିତ୍ତୋୱ ୱିସୁଜ୍ଝତି ॥
ଏୱମେୱଂ ଅମିସ୍ସେତ୍ୱା, ପଚ୍ଛିମଂ ତୁ ପଦଦ୍ୱୟଂ ।
ଏତ୍ଥ ୱୁତ୍ତାନୁସାରେନ, ୱେଦିତବ୍ବଂ ୱିଭାୱିନା ॥
ଆପଜ୍ଜତି =୧୪ ଚ କମ୍ମେନ, ଅକମ୍ମେନ ୱିସୁଜ୍ଝତି ।
ଆପଜ୍ଜତି ଅକମ୍ମେନ, କମ୍ମେନେୱ ୱିସୁଜ୍ଝତି ॥
କମ୍ମେନାପଜ୍ଜତାପତ୍ତିଂ, କମ୍ମେନେୱ ୱିସୁଜ୍ଝତି ।
ଆପଜ୍ଜତି ଅକମ୍ମେନ, ଅକମ୍ମେନ ୱିସୁଜ୍ଝତି ॥
ଅଚ୍ଚଜଂ ପାପିକଂ ଦିଟ୍ଠିଂ, ଆପଜ୍ଜିତ୍ୱାନ କମ୍ମତୋ ।
ଦେସେନ୍ତୋ ପନ ତଂ ପଚ୍ଛା, ଅକମ୍ମେନ ୱିସୁଜ୍ଝତି ॥
ୱିସଟ୍ଠିଆଦିକାପତ୍ତିଂ, ଆପଜ୍ଜିତ୍ୱା ଅକମ୍ମତୋ ।
ପରିସୁଜ୍ଝତି କମ୍ମେନ, ପରିୱାସାଦିନା ପନ ॥
ସମନୁଭାସନଂ ଭିକ୍ଖୁ, ଆପଜ୍ଜତି ଚ କମ୍ମତୋ ।
ପରିୱାସାଦିନା ପଚ୍ଛା, କମ୍ମେନେୱ ୱିସୁଜ୍ଝତି ॥
ଅୱସେସଂ ପନାପତ୍ତିଂ, ଆପଜ୍ଜତି ଅକମ୍ମତୋ ।
ଦେସେନ୍ତୋ ପନ ତଂ ପଚ୍ଛା, ଅକମ୍ମେନେୱ ସୁଜ୍ଝତି ॥
ସମ୍ମୁଖାପତ୍ତିମାପନ୍ନୋ, ୱିସୁଜ୍ଝତି ଅସମ୍ମୁଖା ।
ଅସମ୍ମୁଖାପି ଆପନ୍ନୋ, ସମ୍ମୁଖାୱ ୱିସୁଜ୍ଝତି ॥
ସମ୍ମୁଖାପତ୍ତିମାପନ୍ନୋ, ସମ୍ମୁଖାୱ ୱିସୁଜ୍ଝତି ।
ଅସମ୍ମୁଖାୱ ଆପନ୍ନୋ, ୱିସୁଜ୍ଝତି ଅସମ୍ମୁଖା ॥
ଅଚ୍ଚଜଂ ପାପକଂ ଦିଟ୍ଠିଂ, ଆପନ୍ନୋ ସଙ୍ଘସମ୍ମୁଖେ ।
ୱୁଟ୍ଠାନକାଲେ ସଙ୍ଘେନ, କିଞ୍ଚି କମ୍ମଂ ନ ୱିଜ୍ଜତି ॥
ୱିସଟ୍ଠିଆଦିକାପତ୍ତିଂ, ଆପଜ୍ଜିତ୍ୱା ଅସମ୍ମୁଖା ।
ସଙ୍ଘସମ୍ମୁଖତୋୟେୱ, ୱିସୁଜ୍ଝତି ନ ଚଞ୍ଞଥା ॥
ସମନୁଭାସନଂ ସଙ୍ଘ-ସମ୍ମୁଖାପଜ୍ଜତେ, ପୁନ ।
ସଙ୍ଘସ୍ସ ସମ୍ମୁଖାୟେୱ, ୱିସୁଜ୍ଝତି, ନ ଚଞ୍ଞଥା ॥
ମୁସାୱାଦାଦିକଂ ସେସଂ, ଆପଜ୍ଜତି ଅସମ୍ମୁଖା ।
ତଂ ପଚ୍ଛା ପନ ଦେସେନ୍ତୋ, ୱିସୁଜ୍ଝତି ଅସମ୍ମୁଖା ॥
ଅଜାନନ୍ତୋୱ ଆପନ୍ନୋ, ଜାନନ୍ତୋୱ ୱିସୁଜ୍ଝତି ।
ଜାନନ୍ତୋ ପନ ଆପନ୍ନୋ, ଅଜାନନ୍ତୋ ୱିସୁଜ୍ଝତି ॥
ଅଜାନନ୍ତୋୱ ଆପନ୍ନୋ, ଅଜାନନ୍ତୋ ୱିସୁଜ୍ଝତି ।
ଜାନନ୍ତୋ ପନ ଆପନ୍ନୋ, ଜାନନ୍ତୋୱ ୱିସୁଜ୍ଝତି ॥
ଅଚିତ୍ତକଚତୁକ୍କେନ =୧୫, ସଦିସଂ ସବ୍ବଥା ଇଦଂ ।
ଅଜାନନ୍ତଚତୁକ୍କନ୍ତି, ୱେଦିତବ୍ବଂ ୱିଭାୱିନା ॥
ଆଗନ୍ତୁକୋୱ ଆପତ୍ତିଂ, ଆପଜ୍ଜତି, ନ ଚେତରୋ ।
ଆୱାସିକୋୱ ଆପତ୍ତିଂ, ଆପଜ୍ଜତି, ନ ଚେତରୋ ॥
ଆଗନ୍ତୁକୋ ତଥାୱାସି-କୋପି ଆପଜ୍ଜରେ ଉଭୋ ।
ଅତ୍ଥାପତ୍ତି ଚ ସେସଂ ତୁ, ଉଭୋ ନାପଜ୍ଜରେ ପନ ॥
ସଛତ୍ତୁପାହନୋ ଚେୱ, ସସୀସଂ ପାରୁତୋପି ଚ ।
ୱିହାରଂ ପୱିସନ୍ତୋ ଚ, ୱିଚରନ୍ତୋପି ତତ୍ଥ ଚ ॥
ଆଗନ୍ତୁକୋୱ ଆପତ୍ତିଂ, ଆପଜ୍ଜତି, ନ ଚେତରୋ ।
ଆୱାସୱତ୍ତମାୱାସୀ, ଅକରୋନ୍ତୋୱ ଦୋସୱା ॥
ନ ଚେୱାଗନ୍ତୁକୋ, ସେସ-ମାପଜ୍ଜନ୍ତି ଉଭୋପି ଚ ।
ଅସାଧାରଣମାପତ୍ତିଂ, ନାପଜ୍ଜନ୍ତି ଉଭୋପି ଚ ॥
ୱତ୍ଥୁନାନତ୍ତତା ଅତ୍ଥି, ନତ୍ଥି ଆପତ୍ତିନାନତା ।
ଅତ୍ଥି ଆପତ୍ତିନାନତ୍ତଂ, ନତ୍ଥି ୱତ୍ଥୁସ୍ସ ନାନତା ॥
ୱତ୍ଥୁନାନତ୍ତତା ଚେୱ, ଅତ୍ଥି ଆପତ୍ତିନାନତା ।
ନେୱତ୍ଥି ୱତ୍ଥୁନାନତ୍ତଂ, ନୋ ଚ ଆପତ୍ତିନାନତା ॥
ପାରାଜିକଚତୁକ୍କସ୍ସ, ୱତ୍ଥୁନାନତ୍ତତା ମତା ।
ଆପତ୍ତିନାନତା ନତ୍ଥି, ସେସାପତ୍ତୀସ୍ୱୟଂ ନୟୋ ॥
ସମଣୋ ସମଣୀ କାୟ-ସଂସଗ୍ଗଂ ତୁ କରୋନ୍ତି ଚେ ।
ସଙ୍ଘାଦିସେସୋ ଭିକ୍ଖୁସ୍ସ, ଭିକ୍ଖୁନିୟା ପରାଜୟୋ ॥
ଏୱଂ ଆପତ୍ତିନାନତ୍ତଂ, ନତ୍ଥି ୱତ୍ଥୁସ୍ସ ନାନତା ।
କାୟସ୍ସ ପନ ସଂସଗ୍ଗୋ, ଉଭିନ୍ନଂ ୱତ୍ଥୁ ହୋତି ହି ॥
ତଥେୱ ଲସୁଣସ୍ସାପି, ଖାଦନେ ଭିକ୍ଖୁନୀ ପନ ।
ଆପଜ୍ଜତି ହି ପାଚିତ୍ତିଂ, ଭିକ୍ଖୁନୋ ହୋତି ଦୁକ୍କଟଂ ॥
ପାରାଜିକାନଂ ପନ ଚେ ଚତୁନ୍ନଂ ।
ସଙ୍ଘାଦିସେସେହି ଚ ତେରସେହି ।
ହୋତେୱ ୱତ୍ଥୁସ୍ସ ଚ ନାନଭାୱୋ ।
ଆପତ୍ତିୟା ଚେୱ ହି ନାନଭାୱୋ ॥
ପାରାଜିକାନି =୧୬ ଚତ୍ତାରି, ଆପଜ୍ଜନ୍ତାନମେକତୋ ।
ଭିକ୍ଖୁନୀସମଣାନଂ ତୁ, ଉଭିନ୍ନଂ ପନ ସବ୍ବସୋ ॥
ୱତ୍ଥୁସ୍ସ ନତ୍ଥି ନାନତ୍ତଂ, ନତ୍ଥି ଆପତ୍ତିନାନତା ।
ୱିସୁଂ ପନାପଜ୍ଜନ୍ତେସୁ, ଅୟମେୱ ୱିନିଚ୍ଛୟୋ ॥
ଅତ୍ଥି ୱତ୍ଥୁସଭାଗତ୍ତଂ, ନତ୍ଥାପତ୍ତିସଭାଗତା ।
ଅତ୍ଥାପତ୍ତିସଭାଗତା, ନତ୍ଥି ୱତ୍ଥୁସଭାଗତା ॥
ଅତ୍ଥି ୱତ୍ଥୁସଭାଗତ୍ତଂ, ଅତ୍ଥାପତ୍ତିସଭାଗତା ।
ନତ୍ଥି ୱତ୍ଥୁସଭାଗତ୍ତଂ, ନତ୍ଥାପତ୍ତିସଭାଗତା ॥
ଭିକ୍ଖୂନଂ ଭିକ୍ଖୁନୀନଞ୍ଚ, କାୟସଂସଗ୍ଗକେ ସତି ।
ଅତ୍ଥି ୱତ୍ଥୁସଭାଗତ୍ତଂ, ନତ୍ଥାପତ୍ତିସଭାଗତା ॥
ଆଦିତୋ ପନ ଭିକ୍ଖୁସ୍ସ, ଚତୂସ୍ୱନ୍ତିମୱତ୍ଥୁସୁ ।
ସିୟାପତ୍ତିସଭାଗତ୍ତଂ, ନ ଚ ୱତ୍ଥୁସଭାଗତା ॥
ଭିକ୍ଖୂନଂ ଭିକ୍ଖୁନୀନଞ୍ଚ, ଚତୂସ୍ୱନ୍ତି ମୱତ୍ଥୁସୁ ।
ଅତ୍ଥି ୱତ୍ଥୁସଭାଗତ୍ତଂ, ଅତ୍ଥାପତ୍ତିସଭାଗତା ॥
ସାଧାରଣାସୁ ସବ୍ବାସୁ, ଆପତ୍ତୀସ୍ୱପ୍ୟୟଂ ନୟୋ ।
ଅସାଧାରଣାସୁ ନେୱତ୍ଥି, ୱତ୍ଥାପତ୍ତିସଭାଗତା ॥
ଅତ୍ଥାପତ୍ତି ଉପଜ୍ଝାୟେ, ନେୱ ସଦ୍ଧିୱିହାରିକେ ।
ଅତ୍ଥି ସଦ୍ଧିୱିହାରସ୍ମିଂ, ଉପଜ୍ଝାୟେ ନ ୱିଜ୍ଜତି ॥
ଅତ୍ଥାପତ୍ତି ଉପଜ୍ଝାୟେ, ତଥା ସଦ୍ଧିୱିହାରିକେ ।
ନେୱାପତ୍ତି ଉପଜ୍ଝାୟେ, ନେୱ ସଦ୍ଧିୱିହାରିକେ ॥
ଉପଜ୍ଝାୟେନ କତ୍ତବ୍ବ-ୱତ୍ତସ୍ସାକରଣେ ପନ ।
ଉପଜ୍ଝାୟୋ ଫୁସେ ୱଜ୍ଜଂ, ନ ଚ ସଦ୍ଧିୱିହାରିକୋ ॥
ଉପଜ୍ଝାୟସ୍ସ କତ୍ତବ୍ବ-ୱତ୍ତସ୍ସାକରଣେ ପନ ।
ନତ୍ଥାପତ୍ତି ଉପଜ୍ଝାୟେ, ଅତ୍ଥି ସଦ୍ଧିୱିହାରିକେ ॥
ସେସଂ ପନିଧ ଆପତ୍ତିଂ, ଆପଜ୍ଜନ୍ତି ଉଭୋପି ଚ ।
ଅସାଧାରଣମାପତ୍ତିଂ, ନାପଜ୍ଜନ୍ତି ଉଭୋପି ଚ ॥
ଆଦିୟନ୍ତୋ ଗରୁଂ ଦୋସଂ, ପୟୋଜେନ୍ତୋ ଲହୁଂ ଫୁସେ ।
ଆଦିୟନ୍ତୋ ଲହୁଂ ଦୋସଂ, ପୟୋଜେନ୍ତୋ ଗରୁଂ ଫୁସେ ॥
ଆଦିୟନ୍ତୋ =୧୭ ପୟୋଜେନ୍ତୋ, ଗରୁକେୟେୱ ତିଟ୍ଠତି ।
ଆଦିୟନ୍ତୋ ପୟୋଜେନ୍ତୋ, ଲହୁକେୟେୱ ତିଟ୍ଠତି ॥
ପାଦଂ ୱାପି ତତୋ ଉଦ୍ଧଂ, ଆଦିୟନ୍ତୋ ଗରୁଂ ଫୁସେ ।
‘‘ଗଣ୍ହା’’ତି ଊନକଂ ପାଦଂ, ଆଣାପେନ୍ତୋ ଲହୁଂ ଫୁସେ ॥
ଏତେନେୱ ଉପାୟେନ, ସେସକମ୍ପି ପଦତ୍ତୟଂ ।
ଅତ୍ଥସମ୍ଭୱତୋୟେୱ, ୱେଦିତବ୍ବଂ ୱିଭାୱିନା ॥
କାଲେୟେୱ ପନାପତ୍ତି, ନୋ ୱିକାଲେ କଥଂ ସିୟା ?
ୱିକାଲେୟେୱ ଆପତ୍ତି, ନ ଚ କାଲେ କଥଂ ସିୟା ?
ଅତ୍ଥାପତ୍ତି ହି କାଲେ ଚ, ୱିକାଲେ ଚ ପକାସିତା ?
ନେୱ କାଲେ ୱିକାଲେ ଚ, ଅତ୍ଥାପତ୍ତି ପକାସିତା ?
ପୱାରେତ୍ୱାନ ଭୁଞ୍ଜନ୍ତୋ, କାଲେ ଅନତିରିତ୍ତକଂ ।
କାଲେ ଆପଜ୍ଜତାପତ୍ତିଂ, ନ ୱିକାଲେତି ଦୀପୟେ ॥
ୱିକାଲଭୋଜନାପତ୍ତିଂ, ୱିକାଲେ ନ ଚ କାଲକେ ।
ସେସଂ କାଲେ ୱିକାଲେ ଚ, ଆପଜ୍ଜତି, ନ ସଂସୟୋ ॥
ଅସାଧାରଣମାପତ୍ତିଂ, ଭିକ୍ଖୁନୀନଂ ୱସା ପନ ।
ନେୱାପଜ୍ଜତି କାଲେପି, ନୋ ୱିକାଲେପି ସବ୍ବଦା ॥
କିଂ ପଟିଗ୍ଗହିତଂ କାଲେ, ନୋ ୱିକାଲେ ତୁ କପ୍ପତି ?
ୱିକାଲେ କିଞ୍ଚ ନୋ କାଲେ, ଗହିତଂ ପନ କପ୍ପତି ?
କାଲେ ଚେୱ ୱିକାଲେ ଚ, କିଂ ନାମ ୱଦ କପ୍ପତି ?
ନେୱ କାଲେ ଚ କିଂ ନାମ, ନୋ ୱିକାଲେ ଚ କପ୍ପତି ?
ଆମିସଂ ତୁ ପୁରେଭତ୍ତଂ, ପଟିଗ୍ଗହିତକଂ ପନ ।
କାଲେୟେୱ ତୁ ଭିକ୍ଖୂନଂ, ନୋ ୱିକାଲେ ତୁ କପ୍ପତି ॥
ପାନକଂ ତୁ ୱିକାଲସ୍ମିଂ, ପଟିଗ୍ଗହିତକଂ ପନ ।
ୱିକାଲେୟେୱ କାଲେ ଚ, ଅପରଜ୍ଜୁ ନ କପ୍ପତି ॥
ସତ୍ତାହକାଲିକଞ୍ଚେୱ, ଚତୁତ୍ଥଂ ୟାୱଜୀୱିକଂ ।
କାଲେ ଚେୱ ୱିକାଲେ ଚ, କପ୍ପତୀତି ୱିନିଦ୍ଦିସେ ॥
ଅତ୍ତନୋ ଅତ୍ତନୋ କାଲ-ମତୀତଂ କାଲିକତ୍ତୟଂ ।
ମଂସଂ ଅକପ୍ପିୟଞ୍ଚେୱ, ତଥା ଉଗ୍ଗହିତମ୍ପି ଚ ॥
କୁଲଦୂସନକମ୍ମାଦିଂ =୧୮, କତ୍ୱା ଉପ୍ପନ୍ନଭୋଜନଂ ।
କାଲେ ଚେୱ ୱିକାଲେ ଚ, ନ ଚ କପ୍ପତି ଭିକ୍ଖୁନୋ ॥
ପଚ୍ଚନ୍ତିମେସୁ ଦେସେସୁ, ଆପଜ୍ଜତି ନ ମଜ୍ଝିମେ ।
ମଜ୍ଝିମେ ପନ ଦେସସ୍ମିଂ, ନ ଚ ପଚ୍ଚନ୍ତିମେସୁ ହି ॥
ପଚ୍ଚନ୍ତିମେସୁ ଦେସେସୁ, ଆପଜ୍ଜତି ଚ ମଜ୍ଝିମେ ।
ପଚ୍ଚନ୍ତିମେସୁ ଦେସେସୁ, ନାପଜ୍ଜତି ନ ମଜ୍ଝିମେ ॥
ସୀମଂ ସମୁଦ୍ଦେ ବନ୍ଧନ୍ତୋ, ଭିକ୍ଖୁ ପଚ୍ଚନ୍ତିମେସୁ ହି ।
ଆପଜ୍ଜତି ପନାପତ୍ତିଂ, ନ ଚାପଜ୍ଜତି ମଜ୍ଝିମେ ॥
ଗଣେନ ପଞ୍ଚୱଗ୍ଗେନ, କରୋନ୍ତୋ ଉପସମ୍ପଦଂ ।
ଚମ୍ମତ୍ଥରଣଂ ଧୁୱନ୍ହାନଂ, ସଗୁଣଙ୍ଗୁଣୁପାହନଂ ॥
ଧାରେନ୍ତୋ ମଜ୍ଝିମେ ୱଜ୍ଜଂ, ଫୁସେ ପଚ୍ଚନ୍ତିମେସୁ ନୋ ।
ଅୱସେସଂ ପନାପତ୍ତିଂ, ଆପଜ୍ଜତୂଭୟତ୍ଥପି ॥
ଅସାଧାରଣଆପତ୍ତିଂ, ଭିକ୍ଖୁନୀନଂ ୱସା ପନ ।
ପଚ୍ଚନ୍ତିମେସୁ ୱା ଭିକ୍ଖୁ, ନାପଜ୍ଜତି ନ ମଜ୍ଝିମେ ॥
ପଚ୍ଚନ୍ତିମେସୁ ଦେସେସୁ, କପ୍ପତେ ନ ଚ ମଜ୍ଝିମେ ।
କପ୍ପତେ, ମଜ୍ଝିମେ ଦେସେ, ନୋ ଚ ପଚ୍ଚନ୍ତିମେସୁ ହି ॥
ପଚ୍ଚନ୍ତିମେସୁ ଦେସେସୁ, କପ୍ପତେ, ମଜ୍ଝିମେପି କିଂ ?
ପଚ୍ଚନ୍ତିମେସୁ ଚେୱାପି, କିଂ ନ କପ୍ପତି ମଜ୍ଝିମେ ?
ପଚ୍ଚନ୍ତିମେସୁ ଦେସେସୁ, ୱୁତ୍ତଂ ୱତ୍ଥୁ ଚତୁବ୍ବିଧଂ ।
ନିଦ୍ଦିସେ କପ୍ପତୀ ଚେୱ, ନ ଚ କପ୍ପତି ମଜ୍ଝିମେ ॥
‘‘ଇଦଂ ଚତୁବ୍ବିଧଂ ୱତ୍ଥୁ, ଦେସସ୍ମିଂ ପନ ମଜ୍ଝିମେ ।
ନ କପ୍ପତୀ’’ତି ୱୁତ୍ତଞ୍ହି, ‘‘ମଜ୍ଝିମେୟେୱ କପ୍ପତି’’ ॥
ପଚ୍ଚନ୍ତିମେସୁ ଦେସେସୁ, ଏୱଂ ୱୁତ୍ତଂ ନ କପ୍ପତି ।
ପଞ୍ଚଲୋଣାଦିକଂ ସେସଂ, ଉଭୟତ୍ଥପି କପ୍ପତି ॥
ଅକପ୍ପିୟନ୍ତି ୟଂ ନାମ, ପଟିକ୍ଖିତ୍ତଂ ମହେସିନା ।
ଉଭୟତ୍ଥପି ତଂ ସବ୍ବଂ, ନ ଚ କପ୍ପତି ଭିକ୍ଖୁନୋ ॥
ଅନ୍ତୋ ଆପଜ୍ଜତାପତ୍ତିଂ, ଆପଜ୍ଜତି ଚ, ନୋ ବହି ।
ବହି ଆପଜ୍ଜତାପତ୍ତିଂ, ନ ଚ ଅନ୍ତୋ କୁଦାଚନଂ ॥
ଆପଜ୍ଜତି =୧୯ ପନନ୍ତୋ ଚ, ବହି ଚେୱୁଭୟତ୍ଥପି ।
ନେୱ ଅନ୍ତୋ ଚ ଆପତ୍ତିଂ, ଆପଜ୍ଜତି ଚ, ନୋ ବହି ॥
ଅନୁପଖଜ୍ଜସେୟ୍ୟାଦିଂ, ଅନ୍ତୋୟେୱ ଚ, ନୋ ବହି ।
ସଙ୍ଘିକଂ ପନ ମଞ୍ଚାଦିଂ, ଅଜ୍ଝୋକାସେ ତୁ କିଞ୍ଚିପି ॥
ନିକ୍ଖିପିତ୍ୱାନ ଗଚ୍ଛନ୍ତୋ, ନୋ ଅନ୍ତୋ, ବହିୟେୱ ଚ ।
ସେସମାପଜ୍ଜତାପତ୍ତିଂ, ଅନ୍ତୋ ଚେୱ ତଥା ବହି ॥
ଅସାଧାରଣମାପତ୍ତିଂ, ଭିକ୍ଖୁନୀନଂ ୱସା ପନ ।
ନେୱାପଜ୍ଜତି ଅନ୍ତୋପି, ନ ବହିଦ୍ଧାପି ସବ୍ବଥା ॥
ଗାମେ ଆପଜ୍ଜତାପତ୍ତିଂ, ନୋ ଅରଞ୍ଞେ କଥଂ ୱଦ ?
ଆପଜ୍ଜତି ଅରଞ୍ଞସ୍ମିଂ, ନ ଚ ଗାମେ କଥଂ ୱଦ ?
ଆପଜ୍ଜତି ଚ ଗାମେପି, ଅରଞ୍ଞେପି କଥଂ ୱଦ ?
ନେୱାପଜ୍ଜତି ଗାମେପି, ନୋ ଅରଞ୍ଞେ କଥଂ ୱଦ ?
ଅନ୍ତରଘରସଂୟୁତ୍ତା, ସେକ୍ଖପଞ୍ଞତ୍ତିୟୋ ପନ ।
ଆପଜ୍ଜତି ହି ତଂ ଭିକ୍ଖୁ, ଗାମସ୍ମିଂ, ନୋ ଅରଞ୍ଞକେ ॥
ଅଗଣା ଅରୁଣଂ ନାମ, ଉଟ୍ଠାପେନ୍ତୀ ଚ ଭିକ୍ଖୁନୀ ।
ଆପଜ୍ଜତି ପନାପତ୍ତିଂ, ଅରଞ୍ଞେ, ନୋ ଚ ଗାମକେ ॥
ମୁସାୱାଦାଦିମାପତ୍ତିଂ, ଆପଜ୍ଜତୂଭୟତ୍ଥପି ।
ଅସାଧାରଣମାପତ୍ତିଂ, ଆପଜ୍ଜତି ନ କତ୍ଥଚି ॥
ଆପଜ୍ଜତି ଗିଲାନୋୱ, ନାଗିଲାନୋ କୁଦାଚନଂ ।
ଅଗିଲାନୋୱ ଆପତ୍ତିଂ, ଫୁସେ, ନୋ ଚ ଗିଲାନକୋ ॥
ଅଗିଲାନୋ ଗିଲାନୋ ଚ, ଆପଜ୍ଜନ୍ତି ଉଭୋପି ଚ ।
ନାପଜ୍ଜନ୍ତି ଗିଲାନୋ ଚ, ଅଗିଲାନୋ ଉଭୋପି ଚ ॥
ଭେସଜ୍ଜେନ ପନଞ୍ଞେନ, ଅତ୍ଥେ ସତି ଚ ୟୋ ପନ ।
ୱିଞ୍ଞାପେତି ତଦଞ୍ଞଂ ସୋ, ଆପଜ୍ଜତି ଅକଲ୍ଲକୋ ॥
ନ ଭେସଜ୍ଜେନ ଅତ୍ଥେପି, ଭେସଜ୍ଜଂ ୱିଞ୍ଞାପେତି ଚେ ।
ଆପଜ୍ଜତାଗିଲାନୋୱ, ଆପତ୍ତିଂ ଲୋଲମାନସୋ ॥
ମୁସାୱାଦାଦିକଂ ସେସଂ, ଆପଜ୍ଜନ୍ତି ଉଭୋପି ଚ ।
ଅସାଧାରଣମାପତ୍ତିଂ, ନାପଜ୍ଜନ୍ତି ଉଭୋପି ଚ ॥
ଚତୁକ୍କକଥା ।
ପଞ୍ଚ =୨୦ ଆପତ୍ତିୟୋ ହୋନ୍ତି, ମୁସାୱାଦସ୍ସ କାରଣା ।
ପାରାଜିକଂ ଗରୁଂଥୁଲ୍ଲ-ଚ୍ଚୟଂ ପାଚିତ୍ତି ଦୁକ୍କଟଂ ॥
ଆନିସଂସା ପନୁଦ୍ଦିଟ୍ଠା, ପଞ୍ଚେୱ କଥିନତ୍ଥରେ ।
ଅନାମନ୍ତାସମାଦାନ-ଚରଣଂ ଗଣଭୋଜନଂ ॥
ୟୋ ତତ୍ଥ ଚୀୱରୁପ୍ପାଦୋ, ସୋ ଚ ନେସଂ ଭୱିସ୍ସତି ।
ଚୀୱରଂ ୟାୱଦତ୍ଥଞ୍ଚ, ଗହେତୁମ୍ପି ଚ ୱଟ୍ଟତି ॥
ତେଲଂ ପଞ୍ଚୱିଧଂ ୱୁତ୍ତଂ, ନିପ୍ପପଞ୍ଚେନ ସତ୍ଥୁନା ।
ୱସା ମଧୁକଏରଣ୍ଡ-ତିଲସାସପସମ୍ଭୱଂ ॥
ଅଚ୍ଛମଚ୍ଛୱସା ଚେୱ, ସୁସୁକା ସୂକରସ୍ସ ଚ ।
ଗଦ୍ରଭସ୍ସ ୱସା ଚେତି, ୱସା ପଞ୍ଚୱିଧା ମତା ॥
ମୂଲଖନ୍ଧଗ୍ଗବୀଜାନି, ଫଳୁବୀଜଞ୍ଚ ପଣ୍ଡିତୋ ।
ପଞ୍ଚମଂ ବୀଜବୀଜନ୍ତି, ପଞ୍ଚ ବୀଜାନି ଦୀପୟେ ॥
ଫଲଂ ସମଣକପ୍ପେହି, ପରିଭୁଞ୍ଜେୟ୍ୟ ପଞ୍ଚହି ।
ଅଗ୍ଗିସତ୍ଥନଖକ୍କନ୍ତଂ, ଅବୀଜୁବ୍ବଟ୍ଟବୀଜକଂ ॥
ପଣ୍ଣୁଣ୍ଣତିଣଚୋଳାନଂ, ୱାକସ୍ସ ଚ ୱସେନିଧ ।
ଭିସିୟୋ ଭାସିତା ପଞ୍ଚ, ମୁନିନା ମୋହନାସିନା ॥
ପୱାରଣାପି ପଞ୍ଚେୱ, ଓଦନାଦୀହି ପଞ୍ଚହି ।
ପଟିଗ୍ଗାହାପି ପଞ୍ଚେୱ, କାୟାଦିଗହଣେନ ଚ ॥
ପଞ୍ଚାନିସଂସା ୱିନୟଞ୍ଞୁକସ୍ମିଂ ।
ମହେସିନା କାରୁଣିକେନ ୱୁତ୍ତା ।
ସୁରକ୍ଖିତଂ ହୋତି ସକଞ୍ଚ ସୀଲଂ ।
କୁକ୍କୁଚ୍ଚମଞ୍ଞସ୍ସ ନିରାକରୋତି ॥
ୱିସାରଦୋ ଭାସତି ସଙ୍ଘମଜ୍ଝେ ।
ସୁଖେନ ନିଗ୍ଗଣ୍ହତି ୱେରିଭିକ୍ଖୂ ।
ଧମ୍ମସ୍ସ ଚେୱ ଠିତିୟା ପୱତ୍ତୋ ।
ତସ୍ମାଦରଂ ତତ୍ଥ କରେୟ୍ୟ ଧୀରୋ ॥
ପଞ୍ଚକକଥା ।
ଛୱଚ୍ଛେଦନକା =୨୧ ୱୁତ୍ତା, ଛଳଭିଞ୍ଞେନ ତାଦିନା ।
ମଞ୍ଚପୀଠମତିକ୍କନ୍ତ-ପମାଣଞ୍ଚ ନିସୀଦନଂ ॥
ତଥା କଣ୍ଡୁପଟିଚ୍ଛାଦୀ, ୱସ୍ସସାଟିକଚୀୱରଂ ।
ଚୀୱରଂ ସୁଗତସ୍ସାପି, ଚୀୱରେନ ପମାଣକଂ ॥
ଛହାକାରେହି ଆପତ୍ତିଂ, ଆପଜ୍ଜତି ନ ଅଞ୍ଞଥା ।
ଅଲଜ୍ଜିତାୟ ଅଞ୍ଞାଣ-କୁକ୍କୁଚ୍ଚେହି ତଥେୱ ଚ ॥
ୱିପରିତାୟ ସଞ୍ଞାୟ, କପ୍ପିୟେପି ଅକପ୍ପିୟେ ।
ସତିସମ୍ମୋସତୋ ଚେୱ, ଆପଜ୍ଜତି, ନ ସଂସୟୋ ॥
ଉପସମ୍ପାଦନା ପନ ।
କାତବ୍ବା, ନିସ୍ସୟୋ ଚେୱ ।
ଦାତବ୍ବୋ, ସାମଣେରକୋ ॥
ଭିକ୍ଖୁନାପଟ୍ଠପେତବ୍ବୋ, ସତତଂ ଧମ୍ମଚକ୍ଖୁନା ।
ଆପତ୍ତିଂ ପନ ଜାନାତି, ଅନାପତ୍ତିଂ ଗରୁଂ ଲହୁଂ ॥
ପାତିମୋକ୍ଖାନି ୱିତ୍ଥାରା, ଉଭୟାନି ପନସ୍ସ ହି ।
ସ୍ୱାଗତାନି ଭୱନ୍ତେୱ, ସୁୱିଭତ୍ତାନି ଅତ୍ଥତୋ ॥
ଅନୁବ୍ୟଞ୍ଜନସୋ ଚେୱ, ସୁତ୍ତସୋ ସୁୱିନିଚ୍ଛିତା ।
ଦସୱସ୍ସୋପି ୱା ହୋତିତିରେକଦସୱସ୍ସିକୋ ॥
ଛକ୍କକଥା ।
ସତ୍ତ ସାମୀଚିୟୋ ୱୁତ୍ତା, ସତ୍ତେୱ ସମଥାପି ଚ ।
ପଞ୍ଞତ୍ତାପତ୍ତିୟୋ ସତ୍ତ, ସତ୍ତବୋଜ୍ଝଙ୍ଗଦସ୍ସିନା ॥
ସତ୍ତକକଥା ।
କୁଲାନି ଇଧ ଦୂସେତି, ଆକାରେହି ପନଟ୍ଠହି ।
ପୁପ୍ଫେନ ଚ ଫଲେନାପି, ଚୁଣ୍ଣେନପି ଚ ଦୂସକୋ ॥
ମତ୍ତିକାଦନ୍ତକଟ୍ଠେହି, ୱେଳୁୟା ୱେଜ୍ଜିକାୟପି ।
ଜଙ୍ଘପେସନିକେନାପି, ଆଜୀୱସ୍ସେୱ କାରଣା ॥
ଅଟ୍ଠେୱାନତିରିତ୍ତାପି, ଅତିରିତ୍ତାପି ଅଟ୍ଠ ଚ ।
ଅକପ୍ପିୟକତଂ ଚେୱାଗହିତୁଚ୍ଚାରିତମ୍ପି ଚ ॥
କତଂ ଅହତ୍ଥପାସେପି, ନ ଚ ଭୁତ୍ତାୱିନା କତଂ ।
ପୱାରିତେନ ୟଞ୍ଚେୱ, କତଂ ଭୁତ୍ତାୱିନାପି ଚ ॥
ଆସନା ୱୁଟ୍ଠିତେନାପି, ଅତିରିତ୍ତକତମ୍ପି ଚ ।
ଅୱୁତ୍ତମଲମେତନ୍ତି, ନ ଗିଲାନାତିରିତ୍ତକଂ ॥
ଇମେ ଅଟ୍ଠେୱ ନିଦ୍ଦିଟ୍ଠା, ଞେୟ୍ୟା ଅନତିରିତ୍ତକା ।
ଅତିରିତ୍ତା ପନେତେସଂ, ପଟିକ୍ଖେପେନ ଦୀପିତା ॥
ସହପୁବ୍ବପୟୋଗେସୁ, ଦୁକ୍କଟଂ ଞାତଞତ୍ତିସୁ ।
ଦୁରୂପଚିଣ୍ଣେ ଆମାସେ, ଦୁକ୍କଟଂ ପଟିସାୱନେ ॥
ଅଟ୍ଠମଂ ପନ ନିଦ୍ଦିଟ୍ଠଂ, ତଥା ୱିନୟଦୁକ୍କଟଂ ।
ଇତି ଅଟ୍ଠୱିଧଂ ହୋତି, ସବ୍ବମେୱ ଚ ଦୁକ୍କଟଂ ॥
ଏହିଭିକ୍ଖୂପସମ୍ପଦା, ସରଣଗମନେନ ଚ ।
ପଞ୍ହାବ୍ୟାକରଣୋୱାଦା, ଗରୁଧମ୍ମପଟିଗ୍ଗହୋ ॥
ତଥା ଞତ୍ତିଚତୁତ୍ଥେନ, କମ୍ମେନେୱଟ୍ଠୱାଚିକା ।
ଦୂତେନ ଭିକ୍ଖୁନୀନନ୍ତି, ଅଟ୍ଠେୱ ଉପସମ୍ପଦା ॥
ଅସଦ୍ଧମ୍ମା ପନଟ୍ଠେୱ, ନିଦ୍ଦିଟ୍ଠା ସୁଦ୍ଧଦିଟ୍ଠିନା ।
ଅଟ୍ଠେୱୁପୋସଥଙ୍ଗାନି, ୱେଦିତବ୍ବାନି ୱିଞ୍ଞୁନା ॥
ସକ୍କାରୋ ଚ ଅସକ୍କାରୋ ।
ଲାଭାଲାଭୋ ୟସାୟସୋ ।
ପାପିଚ୍ଛା ପାପମିତ୍ତତ୍ତଂ ।
ଅସଦ୍ଧମ୍ମା ପନଟ୍ଠିମେ ॥
ପାଣଂ ନ ହନେ, ନ ଚାଦିନ୍ନମାଦିୟେ ।
ମୁସା ନ ଭାସେ, ନ ଚ ମଜ୍ଜପୋ ସିୟା ।
ଅବ୍ରହ୍ମଚରିୟା ୱିରମେୟ୍ୟ ମେଥୁନା ।
ରତ୍ତିଂ ନ ଭୁଞ୍ଜେୟ୍ୟ ୱିକାଲଭୋଜନଂ ॥
ମଞ୍ଚେ ଛମାୟଂୱ ସୟେଥ ସନ୍ଥତେ ।
ବୁଦ୍ଧେନ ଦୁକ୍ଖନ୍ତଗୁନା ପକାସିତଂ ॥
ଅଟ୍ଠେୱ ପନ ପାନାନି, ନିଦ୍ଦିଟ୍ଠାନି ମହେସିନା ।
ଭିକ୍ଖୁ ଅଟ୍ଠଙ୍ଗସଂୟୁତ୍ତୋ, ଭିକ୍ଖୁନୋୱାଦମରହତି ॥
ଅଟ୍ଠକକଥା ।
ଭୋଜନାନି ପଣୀତାନି, ନୱ ୱୁତ୍ତାନି ସତ୍ଥୁନା ।
ଦୁକ୍କଟଂ ପନ ନିଦ୍ଦିଟ୍ଠଂ, ନୱ ମଂସାନି ଖାଦତୋ ॥
ପାତିମୋକ୍ଖସ୍ସ ଉଦ୍ଦେସା, ନୱେୱ ପରିଦୀପିତା ।
ଉପୋସଥା ନୱେୱେତ୍ଥ, ସଙ୍ଘୋ ନୱହି ଭିଜ୍ଜତି ॥
ନୱକକଥା ।
ଦସ ଅକ୍କୋସୱତ୍ଥୂନି, ଦସ ସିକ୍ଖାପଦାନି ଚ ।
ଅକପ୍ପିୟାନି ମଂସାନି, ଦସ ସୁକ୍କାନି ୱେ ଦସ ॥
ଜାତି ନାମଞ୍ଚ ଗୋତ୍ତଞ୍ଚ, କମ୍ମଂ ସିପ୍ପଞ୍ଚ ରୋଗତା ।
ଲିଙ୍ଗାପତ୍ତି କିଲେସା ଚ, ଅକ୍କୋସେନ ଦସେୱ ହି ॥
ଦସ ଆଦୀନୱା ରଞ୍ଞୋ, ଅନ୍ତେପୁରପ୍ପୱେସନେ ।
ଦସାକାରେହି ସଙ୍ଘାଦି-ସେସୋ ଛନ୍ନୋତି ଦୀପିତୋ ॥
ଦସ କମ୍ମପଥା ପୁଞ୍ଞା, ଅପୁଞ୍ଞାପି ତଥା ଦସ ।
ଦସେୱ ଦାନୱତ୍ଥୂନି, ଦସେୱ ରତନାନି ଚ ॥
ଅନ୍ନଂ ପାନଞ୍ଚ ୱତ୍ଥଞ୍ଚ, ମାଲା ଗନ୍ଧୱିଲେପନଂ ।
ୟାନଞ୍ଚ ସେୟ୍ୟାୱସଥଂ, ପଦୀପେୟ୍ୟନ୍ତିମେ ଦସ ॥
ଅୱନ୍ଦିୟା ମୁନିନ୍ଦେନ, ଦୀପିତା ଦସ ପୁଗ୍ଗଲା ।
ଦସେୱ ପଂସୁକୂଲାନି, ଦସ ଚୀୱରଧାରଣା ॥
ସୋସାନିକଂ ପାପଣିକଂ, ତଥା ଉନ୍ଦୂରଖାୟିତଂ ।
ଗୋଖାୟିତଗ୍ଗିନା ଦଡ୍ଢଂ, ଅଜିକୂପଚିକଖାୟିତଂ ॥
ଥୂପଚୀୱରିକଞ୍ଚେୱ, ତଥେୱ ଅଭିସେକିୟଂ ।
ଗତପଚ୍ଛାଗତଞ୍ଚେତି, ଦସଧା ପଂସୁକୂଲିକଂ ॥
ସବ୍ବନୀଲାଦୟୋ ୱୁତ୍ତା, ଦସ ଚୀୱରଧାରଣା ।
ଚୀୱରାନି ନୱେୱେତ୍ଥ, ସଦ୍ଧିଂ ସଂକଚ୍ଚିକାୟ ଚ ॥
ଦସକକଥା ।
ଏକାଦସ ପନାଭବ୍ବା, ପୁଗ୍ଗଲା ପଣ୍ଡକାଦୟୋ ।
ହୋନ୍ତେୱାନୁପସମ୍ପନ୍ନା, ଉପସମ୍ପାଦିତାପି ଚ ॥
ପତ୍ତା ଅକପ୍ପିୟା ୱୁତ୍ତା, ଏକାଦସ ଭୱନ୍ତି ହି ।
ଦାରୁଜେନ ଚ ପତ୍ତେନ, ଦସେୱ ରତନୁବ୍ଭୱା ॥
ଏକାଦସ ତଥା ହୋନ୍ତି, ପାଦୁକାପି ଅକପ୍ପିୟା ।
ଏକାଦସେୱ ସୀମାୟୋ, ଅସୀମାତି ପକାସିତା ॥
ଅତିଖୁଦ୍ଦାତିମହନ୍ତା, ଖଣ୍ଡଚ୍ଛାୟାନିମିତ୍ତକା ।
ଅନିମିତ୍ତା, ବହିଟ୍ଠେନ, ସମ୍ମତା, ନଦିୟଂ ତଥା ॥
ଜାତସ୍ସରେ, ସମୁଦ୍ଦେ ୱା, ସମ୍ଭିନ୍ନଜ୍ଝୋତ୍ଥଟାପି ଚ ।
ସୀମାୟପି ଅସୀମାୟୋ, ଏକାଦସ ଇମା ସିୟୁଂ ॥
ଏକାଦସେୱ ପଥୱୀ, କପ୍ପିୟା ଚ ଅକପ୍ପିୟା ।
ଗଣ୍ଠିକା କପ୍ପିୟା ୱୁତ୍ତା, ଏକାଦସ ଚ ୱୀଧକା ॥
ଏକାଦସୱିଧଂ ୱୁତ୍ତଂ, ଅଧିଟ୍ଠାତବ୍ବଚୀୱରଂ ।
ତିଚୀୱରଂ ତଥା କଣ୍ଡୁ-ପଟିଚ୍ଛାଦୀ, ନିସୀଦନଂ ॥
ପଚ୍ଚତ୍ଥରଣଂ, ୱସ୍ସିକ-ସାଟିକା, ମୁଖପୁଞ୍ଛନଂ ।
ଦକସାଟି, ପରିକ୍ଖାର-ଚୋଳଂ, ସଂକଚ୍ଚିକାପି ଚ ॥
ୟାୱତତିୟକା ସବ୍ବେ, ଏକାଦସ ପକାସିତା ।
ଅରିଟ୍ଠୋ, ଚଣ୍ଡକାଳୀ ଚ, ଉକ୍ଖିତ୍ତସ୍ସାନୁୱତ୍ତିକା ॥
ଅଟ୍ଠ ସଙ୍ଘାଦିସେସେସୁ, ଉଭିନ୍ନଂ ତୁ ୱସା ପନ ।
ଏକାଦସ ଇମେ ୟାୱ-ତତିୟାତି ପକାସିତା ॥
ନିସ୍ସୟସ୍ସ ଦସେକାୱ, ପଟିପ୍ପସ୍ସଦ୍ଧିୟୋ ପନ ।
ଛଧାଚରିୟତୋ ୱୁତ୍ତା, ଉପଜ୍ଝାୟା ତୁ ପଞ୍ଚଧା ॥
ଏକାଦସକକଥା ।
ତେରସେୱ ଧୁତଙ୍ଗାନି, ପରମାନି ଚ ଚୁଦ୍ଦସ ।
ସୋଳସେୱ ତୁ ‘‘ଜାନ’’ନ୍ତି, ପଞ୍ଞତ୍ତାନି ମହେସିନା ॥
ସଉତ୍ତରଂ ୱିନୟୱିନିଚ୍ଛୟଂ ତୁ ୟୋ ।
ଅନୁତ୍ତରଂ ସକଲମପୀଧ ଜାନତି ।
ମହତ୍ତରେ ୱିନୟନୟେ ଅନୁତ୍ତରେ ।
ନିରୁତ୍ତରୋ ଭୱତି ହି ସୋ, ନ ସଂସୟୋ ॥
ଏକୁତ୍ତରନୟୋ ସମତ୍ତୋ ।
ସେଦମୋଚନକଥା
ଇତୋ ପରଂ ପୱକ୍ଖାମି, ଭିକ୍ଖୂନଂ ସୁଣତଂ ପୁନ ।
ସେଦମୋଚନଗାଥାୟୋ, ପଟୁଭାୱକରା ୱରା ॥
ଉବ୍ଭକ୍ଖକଂ ୱିୱଜ୍ଜେତ୍ୱା, ଅଧୋନାଭିଂ ୱିୱଜ୍ଜିୟ ।
ପଟିଚ୍ଚ ମେଥୁନଂ ଧମ୍ମଂ, କଥଂ ପାରାଜିକୋ ସିୟା ?
କବନ୍ଧସତ୍ତକାୟସ୍ସ, ଉରେ ହୋତି ମୁଖଂ ସଚେ ।
ମୁଖେନ ମେଥୁନଂ ଧମ୍ମଂ, କତ୍ୱା ପାରାଜିକୋ ଭୱେ ॥
ସୁଞ୍ଞେ ନିସ୍ସତ୍ତକେ ଦୀପେ, ଏକୋ ଭିକ୍ଖୁ ସଚେ ୱସେ ।
ମେଥୁନପଚ୍ଚୟା ତସ୍ସ, କଥଂ ପାରାଜିକୋ ସିୟା ?
ଲମ୍ବୀ ୱା ମୁଦୁପିଟ୍ଠୀ ୱା, ୱଚ୍ଚମଗ୍ଗେ ମୁଖେପି ୱା ।
ଅଙ୍ଗଜାତଂ ପୱେସେନ୍ତୋ, ସକେ ପାରାଜିକୋ ଭୱେ ॥
ସୟଂ ନାଦିୟତେ କିଞ୍ଚି, ପରଞ୍ଚ ନ ସମାଦପେ ।
ସଂୱିଧାନଞ୍ଚ ନେୱତ୍ଥି, କଥଂ ପାରାଜିକୋ ସିୟା ?
ସୁଙ୍କଘାତେ ଅତିକ୍କନ୍ତେ, ନାଦିୟନ୍ତୋ ପରସ୍ସ ତୁ ।
ଆଣତ୍ତିଞ୍ଚ ୱିନାୟେୱ, ହୋତି ପାରାଜିକୋ ୟତି ॥
ହରନ୍ତୋ ଗରୁକଂ ଭଣ୍ଡଂ, ଥେୟ୍ୟଚିତ୍ତେନ ପୁଗ୍ଗଲୋ ।
ପରସ୍ସ ତୁ ପରିକ୍ଖାରଂ, ନ ଚ ପାରାଜିକୋ କଥଂ ?
ତିରଚ୍ଛାନଗତାନଂ ତୁ, ପୁଗ୍ଗଲୋ ଗରୁଭଣ୍ଡକଂ ।
ଗଣ୍ହନ୍ତୋ ଥେୟ୍ୟଚିତ୍ତେନ, ନ ଚ ପାରାଜିକୋ ସିୟା ॥
ଅତ୍ତନୋ ସନ୍ତକଂ ଦତ୍ୱା, ଭିକ୍ଖୁ ପାରାଜିକୋ କଥଂ ?
‘‘ମରତୂ’’ତି ଅସପ୍ପାୟ-ଭୋଜନଂ ଦେତି ଚେ ଚୁତୋ ॥
ପିତରି ପିତୁସଞ୍ଞୀ ଚ, ମାତୁସଞ୍ଞୀ ଚ ମାତରି ।
ହନ୍ତ୍ୱାନନ୍ତରିୟଂ କମ୍ମଂ, ନ ଫୁସେୟ୍ୟ କଥଂ ନରୋ ?
ତିରଚ୍ଛାନଗତା ମାତା, ତିରଚ୍ଛାନଗତୋ ପିତା ।
ତସ୍ମାନନ୍ତରିୟଂ ନତ୍ଥି, ମାରିତେସୁ ଉଭୋସୁପି ॥
ଅନାଦିୟନ୍ତୋ ଗରୁକଂ, ପରଞ୍ଚ ନ ସମାଦପେ ।
ଗଚ୍ଛଂ ଠିତୋ ନିସିନ୍ନୋ ୱା, କଥଂ ପାରାଜିକୋ ଭଣ ?
ମନୁସ୍ସୁତ୍ତରିକେ ଧମ୍ମେ, କତ୍ୱାନ କତିକଂ ତତୋ ।
ସମ୍ଭାୱନାଧିପ୍ପାୟୋ ସୋ, ଅତିକ୍କମତି ଚେ ଚୁତୋ ॥
ସଙ୍ଘାଦିସେସା ଚତ୍ତାରୋ, ଭୱେୟ୍ୟୁଂ ଏକୱତ୍ଥୁକା ।
କଥଂ ? କଥେହି ମେ ପୁଟ୍ଠୋ, ୱିନୟେ ଚେ ୱିସାରଦୋ ॥
ସଞ୍ଚରିତ୍ତଞ୍ଚ ଦୁଟ୍ଠୁଲ୍ଲଂ, ସଂସଗ୍ଗଂ ଅତ୍ତକାମତଂ ।
ଇତ୍ଥିୟା ପଟିପଜ୍ଜନ୍ତୋ, ଫୁସେୟ୍ୟ ଚତୁରୋ ଇମେ ॥
ସଙ୍ଘାଦିସେସମାପନ୍ନୋ, ଛାଦେତ୍ୱା ସୁଚିରଂ ପନ ।
ଅଚରିତ୍ୱା ୟଥାୱୁତ୍ତଂ, ୱତ୍ତଂ ସୋ ୱୁଟ୍ଠିତୋ କଥଂ ?
ସୁକ୍କୱିସ୍ସଟ୍ଠିମାପନ୍ନୋ, ଭିକ୍ଖୁଭାୱେ ଠିତୋ ପନ ।
ପରିୱତ୍ତେ ତୁ ଲିଙ୍ଗସ୍ମିଂ, ନତ୍ଥି ସଙ୍ଘାଦିସେସତା ॥
କୁଦ୍ଧୋ ଆରାଧକୋ ହୋତି ।
କୁଦ୍ଧୋ ହୋତି ଚ ନିନ୍ଦିତୋ ।
ଅଥ କୋ ନାମ ସୋ ଧମ୍ମୋ ।
ୟେନ କୁଦ୍ଧୋ ପସଂସିତୋ ?
ୱଣ୍ଣସ୍ମିଂ ଭଞ୍ଞମାନେ ୟୋ, ତିତ୍ଥିୟାନଂ ତୁ କୁଜ୍ଝତି ।
ଆରାଧକୋ, ସମ୍ବୁଦ୍ଧସ୍ସ, ୟଦି କୁଜ୍ଝତି ନିନ୍ଦିତୋ ॥
ଅତ୍ଥଙ୍ଗତେ ତୁ ସୂରିୟେ, ଭୋଜନଂ ଭିକ୍ଖୁ ଭୁଞ୍ଜତି ।
ନ ଖିତ୍ତଚିତ୍ତୋନୁମ୍ମତ୍ତୋ, ନିରାପତ୍ତି କଥଂ ଭୱେ ?
ୟୋ ଚ ରୋମନ୍ଥୟିତ୍ୱାନ, ରତ୍ତିଂ ଘସତି ଭୋଜନଂ ।
ନତ୍ଥି ତସ୍ସ ପନାପତ୍ତି, ୱିକାଲଭୋଜନେନ ହି ॥
ଅତ୍ଥଙ୍ଗତେ ଚ ସୂରିୟେ, ଗହେତ୍ୱା ଭିକ୍ଖୁ ଭୋଜନଂ ।
ସଚେ ଭୁଞ୍ଜେୟ୍ୟ ଆପତ୍ତି, ଅନାପତ୍ତି କଥଂ ଭୱେ ?
ୱିକାଲୁତ୍ତରକୁରୁଂ ଗନ୍ତ୍ୱା, ତତ୍ଥ ଲଦ୍ଧାନ ଭୋଜନଂ ।
ଆଗନ୍ତ୍ୱା ଇଧ କାଲେନ, ନତ୍ଥି ଆପତ୍ତି ଭୁଞ୍ଜତୋ ॥
ଗାମେ ୱା ୟଦି ୱାରଞ୍ଞେ, ୟଂ ପରେସଂ ମମାୟିତଂ ।
ନ ହରନ୍ତୋୱ ତଂ ଥେୟ୍ୟା, କଥଂ ପାରାଜିକୋ ସିୟା ?
ଥେୟ୍ୟସଂୱାସକୋ ନାମ, ଲିଙ୍ଗସଂୱାସଥେନକୋ ।
ପରଭଣ୍ଡଂ ଅଗଣ୍ହନ୍ତୋ, ହୋତି ଏସ ପରାଜିତୋ ॥
ନାରୀ ରୂପୱତୀ ବାଲା, ଭିକ୍ଖୁ ରତ୍ତେନ ଚେତସା ।
ମେଥୁନଂ ତାୟ କତ୍ୱାପି, ସୋ ନ ପାରାଜିକୋ କଥଂ ?
ଭିକ୍ଖୁ ରୂପୱତିଂ ନାରିଂ, ସୁପିନନ୍ତେନ ପସ୍ସତି ।
ତାୟ ମେଥୁନସଂୟୋଗେ, କତେପି ନ ୱିନସ୍ସତି ॥
ଏକିସ୍ସା ଦ୍ୱେ ସିୟୁଂ ପୁତ୍ତା, ଜାତା ଇଧ ପନିତ୍ଥିୟା ।
ଦ୍ୱିନ୍ନଂ ମାତା ପିତା ସାୱ, କଥଂ ହୋତି ଭଣାହି ମେ ?
ଉଭତୋବ୍ୟଞ୍ଜନା ଇତ୍ଥୀ, ଗବ୍ଭଂ ଗଣ୍ହାତି ଅତ୍ତନା ।
ଗଣ୍ହାପେତି ପରଂ ଗବ୍ଭଂ, ତସ୍ମା ମାତା ପିତା ଚ ସା ॥
ପୁରିସେନ ସହାଗାରେ, ରହୋ ୱସତି ଭିକ୍ଖୁନୀ ।
ପରାମସତି ତସ୍ସଙ୍ଗଂ, ଅନାପତ୍ତି କଥଂ ସିୟା ?
ସହାଗାରିକସେୟ୍ୟଞ୍ଚ, ସବ୍ବଞ୍ଚ ପଟିଜଗ୍ଗନଂ ।
ଦାରକସ୍ସ ଚ ମାତା ହି, କାତୁଂ ଲଭତି ଭିକ୍ଖୁନୀ ॥
କୋ ଚ ଭିକ୍ଖୂହି ସିକ୍ଖାସୁ, ଅସାଧାରଣତଂ ଗତୋ ।
ନ ପାରିୱାସିକୋ ବ୍ରୂହି, ନ ଉକ୍ଖିତ୍ତାଦିକୋପି ଚ ?
ଗହେତୁଂ ଖୁରଭଣ୍ଡଂ ତୁ, ସଚେ ନ୍ହାପିତପୁବ୍ବକୋ ।
ନ ସୋ ଲଭତି ଅଞ୍ଞେସଂ, କପ୍ପତୀତି ଚ ନିଦ୍ଦିସେ ॥
କଥେତି କୁସଲଂ ଧମ୍ମଂ, ପରମଂ ଅତ୍ଥସଂହିତଂ ।
କତମୋ ପୁଗ୍ଗଲୋ ବ୍ରୂହି, ନ ମତୋ ନ ଚ ଜୀୱତି ?
କଥେତି କୁସଲଂ ଧମ୍ମଂ, ପରମଂ ଅତ୍ଥସଂହିତଂ ।
ହୋତି ନିମ୍ମିତବୁଦ୍ଧୋ ସୋ, ନ ମତୋ ନ ଚ ଜୀୱତି ॥
ସଂୟାଚିକଂ କରୋନ୍ତସ୍ସ, କୁଟିଂ ଦେସିତୱତ୍ଥୁକଂ ।
ପମାଣିକମନାରମ୍ଭଂ, ଆପତ୍ତି ସପରିକ୍କମଂ ॥
ନରୋ କରୋତି ଚେ କୁଟିଂ, ସ ସବ୍ବମତ୍ତିକାମୟଂ ।
ନ ମୁଚ୍ଚତେୱ ୱଜ୍ଜତୋ, ଜିନେନ ୱୁତ୍ତତୋ ତତୋ ॥
ସଂୟାଚିକାୟ ଭିକ୍ଖୁସ୍ସ, ଅନାପତ୍ତି କଥଂ ସିୟା ।
ସବ୍ବଲକ୍ଖଣହୀନଂ ତୁ, କରୋନ୍ତସ୍ସ କୁଟିଂ ପନ ?
ସଂୟାଚିକଂ କରୋନ୍ତସ୍ସ, ତିଣଚ୍ଛଦନକଂ କୁଟିଂ ।
ଭିକ୍ଖୁନୋ ଜିନଚନ୍ଦେନ, ଅନାପତ୍ତି ପକାସିତା ॥
ନ କିଞ୍ଚି ୱାଚାୟ ପରଂ ଭଣେୟ୍ୟ ।
ଫୁସେ ଗରୁଂ ଅନ୍ତିମୱତ୍ଥୁହେତୁକଂ ।
ୱିସାରଦୋ ଚେ ୱିନୟେ ଭଣାହି ତ୍ୱଂ ?
ପରସ୍ସା ପନ ୟା ୱଜ୍ଜଂ, ପଟିଚ୍ଛାଦେତି ଭିକ୍ଖୁନୀ ।
ଅୟଂ ପାରାଜିକାପତ୍ତିଂ, ତନ୍ନିମିତ୍ତଂ ଗରୁଂ ଫୁସେ ॥
ନ କାୟିକଂ କିଞ୍ଚିପି ପାପମାଚରେ ।
ନ କିଞ୍ଚି ୱାଚାୟ ଚରେୟ୍ୟ ପାପକଂ ।
ସୁନାସିତୋୟେୱ ଚ ନାସିତୋ ସିୟା ।
କଥଂ ତୁୱଂ ବ୍ରୂହି ମୟାସି ପୁଚ୍ଛିତୋ ?
ଅଭବ୍ବା ପନ ୟେ ୱୁତ୍ତା, ପୁଗ୍ଗଲା ପଣ୍ଡକାଦୟୋ ।
ଏକାଦସ ମୁନିନ୍ଦେନ, ନାସିତା ତେ ସୁନାସିତା ॥
ଅନୁଗ୍ଗିରଂ ଗିରଂ କିଞ୍ଚି, ସୁଭଂ ୱା ୟଦି ୱାସୁଭଂ ।
ଫୁସେ ୱାଚସିକଂ ୱଜ୍ଜଂ, କଥଂ ମେ ପୁଚ୍ଛିତୋ ଭଣ ?
ସନ୍ତିମେୱ ପନାପତ୍ତିଂ, ଭିକ୍ଖୁ ନାୱିକରେୟ୍ୟ ୟୋ ।
ସମ୍ପଜାନମୁସାୱାଦେ, ଦୁକ୍କଟଂ ତସ୍ସ ୱଣ୍ଣିତଂ ॥
ଏକତୋଉପସମ୍ପନ୍ନା, ଉଭୋ ତାସଂ ତୁ ହତ୍ଥତୋ ।
ଚୀୱରଂ ଗଣ୍ହତୋ ହୋନ୍ତି, ନାନାଆପତ୍ତିୟୋ କଥଂ ?
ଏକତୋଉପସମ୍ପନ୍ନା, ଭିକ୍ଖୂନଂ ତୁ ୱସେନ ୟା ।
ଚୀୱରଂ ହତ୍ଥତୋ ତସ୍ସା, ପାଚିତ୍ତି ପଟିଗଣ୍ହତୋ ॥
ଏକତୋଉପସମ୍ପନ୍ନା, ଭିକ୍ଖୁନୀନଂ ୱସେନ ୟା ।
ଚୀୱରଂ ହତ୍ଥତୋ ତସ୍ସା, ଦୁକ୍କଟଂ ପଟିଗଣ୍ହତୋ ॥
ସଂୱିଧାୟ ଚ ଚତ୍ତାରୋ, ଗରୁଂ ଥେନିଂସୁ ଭଣ୍ଡକଂ ।
ଥେରୋ ଥୁଲ୍ଲଚ୍ଚୟଂ ତେସୁ, ପତ୍ତୋ, ସେସା ପରାଜୟଂ ॥
କଥଂ? ଛମାସକଂ ଭଣ୍ଡଂ, ତତ୍ଥ ସାହତ୍ଥିକା ତୟୋ ।
ହଟା ଥେରେନ ମାସା ତୁ, ତୟୋ ଆଣତ୍ତିୟାପି ଚ ॥
ତୀହି ସାହତ୍ଥିକୋକେକୋ ।
ପଞ୍ଚ ଆଣତ୍ତିୟା ହଟା ।
ତସ୍ମା ଥୁଲ୍ଲଚ୍ଚୟଂ ଥେରୋ ।
ପତ୍ତୋ, ସେସା ପରାଜୟଂ ॥
ବହିଦ୍ଧା ଗେହତୋ ଭିକ୍ଖୁ, ଇତ୍ଥୀ ଗବ୍ଭନ୍ତରଂ ଗତା ।
ଛିଦ୍ଦଂ ଗେହସ୍ସ ନୋ ଅତ୍ଥି, ମେଥୁନପଚ୍ଚୟା ଚୁତୋ ॥
ଅନ୍ତୋଦୁସ୍ସକୁଟିଟ୍ଠେନ, ମାତୁଗାମେନ ମେଥୁନଂ ।
ସନ୍ଥତାଦିୱସେନେୱ, କତ୍ୱା ହୋତି ପରାଜିତୋ ॥
ସପ୍ପିଆଦିଂ ତୁ ଭେସଜ୍ଜଂ, ଗହେତ୍ୱା ସାମମେୱ ତଂ ।
ଅୱୀତିୱତ୍ତେ ସତ୍ତାହେ, କଥଂ ଆପତ୍ତି ସେୱତୋ ?
ପରିୱତ୍ତିତଲିଙ୍ଗସ୍ସ, ଭିକ୍ଖୁନୋ ଇତରାୟ ୱା ।
ଅୱୀତିୱତ୍ତେ ସତ୍ତାହେ, ହୋତି ଆପତ୍ତି ସେୱତୋ ॥
ନିସ୍ସଗ୍ଗିୟେନ ପାଚିତ୍ତି, ସୁଦ୍ଧପାଚିତ୍ତିୟମ୍ପି ଚ ।
ଏକତୋୱ କଥଂ ଭିକ୍ଖୁ, ଆପଜ୍ଜେୟ୍ୟ ଭଣାହି ମେ ?
ସଙ୍ଘେ ପରିଣତଂ ଲାଭଂ, ଅତ୍ତନୋ ଚ ପରସ୍ସ ଚ ।
ଏକତୋ ପରିଣାମେନ୍ତୋ, ପୟୋଗେନ ଦ୍ୱୟଂ ଫୁସେ ॥
ଭିକ୍ଖୂ ସମାଗମ୍ମ ସମଗ୍ଗସଞ୍ଞା ।
ସବ୍ବେ କରେୟ୍ୟୁଂ ପନ ସଙ୍ଘକମ୍ମଂ ।
ଭିକ୍ଖୁଟ୍ଠିତୋ ଦ୍ୱାଦସୟୋଜନସ୍ମିଂ ।
କଥଂ କତଂ କୁପ୍ପତି ୱଗ୍ଗହେତୁ ?
ଅତ୍ଥି ସଚେ ପନ ଭିକ୍ଖୁ ନିସିନ୍ନୋ ।
ଦ୍ୱାଦସୟୋଜନିକେ ନଗରେ ତୁ ।
ତତ୍ଥ କତଂ ପନ କମ୍ମମକମ୍ମଂ ।
ନତ୍ଥି ୱିହାରଗତା ୟଦି ସୀମା ॥
ସଙ୍ଘାଟି ପାରୁତା କାୟେ, ନିୱତ୍ଥୋନ୍ତରୱାସକୋ ।
ନିସ୍ସଗ୍ଗିୟାନି ସବ୍ବାନି, କଥଂ ହୋନ୍ତି କଥେହି ମେ ?
କଣ୍ଣଂ ଗହେତ୍ୱା ତତ୍ଥେୱ, କଦ୍ଦମଂ ୟଦି ଧୋୱତି ।
ଭିକ୍ଖୁନୀ କାୟଙ୍ଗାନେୱ, ତାନି ନିସ୍ସଗ୍ଗିୟାନି ହି ॥
ପୁରିସଂ ଅପିତରଂ ହନ୍ତ୍ୱା, ଇତ୍ଥିଂ ହନ୍ତ୍ୱା ଅମାତରଂ ।
ଆନନ୍ତରିୟକଂ କମ୍ମଂ, ଆପଜ୍ଜତି କଥଂ ନରୋ ?
ପରିୱତ୍ତେ ତୁ ଲିଙ୍ଗସ୍ମିଂ, ପିତରଂ ଇତ୍ଥିତଂ ଗତଂ ।
ମାତରଂ ପୁରିସତ୍ତଂ ତୁ, ଗତଂ ହନ୍ତ୍ୱା ଗରୁଂ ଫୁସେ ॥
ମାତରଂ ପନ ମାରେତ୍ୱା, ମାରେତ୍ୱା ପିତରମ୍ପି ଚ ।
ଆନନ୍ତରିୟକଂ କମ୍ମଂ, ନାପଜ୍ଜେୟ୍ୟ କଥଂ ନରୋ ?
ତିରଚ୍ଛାନଗତା ମାତା, ତିରଚ୍ଛାନଗତୋ ପିତା ।
ମାତରଂ ପିତରଂ ହନ୍ତ୍ୱା, ନାନନ୍ତରିୟକଂ ଫୁସେ ॥
ଚୋଦେତ୍ୱା ସମ୍ମୁଖୀଭୂତଂ, ସଙ୍ଘୋ କମ୍ମଂ କରେୟ୍ୟ ଚେ ।
କଥଂ କମ୍ମଂ ଅକମ୍ମଂ ତଂ, ସଙ୍ଘୋ ସାପତ୍ତିକୋ ସିୟା ?
ୱୁତ୍ତଂ ତୁ ପଣ୍ଡକାଦୀନଂ, ସନ୍ଧାୟ ଉପସମ୍ପଦଂ ।
ଅନାପତ୍ତିସ୍ସ କମ୍ମଂ ତୁ, ସନ୍ଧାୟାତି କୁରୁନ୍ଦିୟଂ॥
କପ୍ପବିନ୍ଦୁକତଂ ରତ୍ତଂ, ଚୀୱରଂ ତୁ ଅଧିଟ୍ଠିତଂ ।
କଥମସ୍ସ ସିୟାପତ୍ତି, ସେୱମାନସ୍ସ ଦୁକ୍କଟଂ ?
ସକଂ ଅନିସ୍ସଜିତ୍ୱାନ, ୟୋ ନିସ୍ସଗ୍ଗିୟଚୀୱରଂ ।
ପରିଭୁଞ୍ଜତି ତସ୍ସାୟ-ମାପତ୍ତି ପରିଦୀପିତା ॥
ପଞ୍ଚ ପାଚିତ୍ତିୟାନେୱ, ନାନାୱତ୍ଥୁକତାନି ହି ।
ଅପୁବ୍ବଂ ଅଚରିମଂ ଏକ-କ୍ଖଣେ ଆପଜ୍ଜତେ କଥଂ ?
ଭେସଜ୍ଜାନି ହି ପଞ୍ଚେୱ, ଗହେତ୍ୱା ଭାଜନେ ୱିସୁଂ ।
ଠପିତେସୁ ଚ ସତ୍ତାହା-ତିକ୍କମେ ହୋନ୍ତି ପଞ୍ଚପି ॥
ନ ରତ୍ତଚିତ୍ତୋ ନ ଚ ଥେୟ୍ୟଚିତ୍ତୋ ।
ନ ଚାପି ଚିତ୍ତଂ ମରଣାୟ ତସ୍ସ ।
ଦେନ୍ତସ୍ସ ପାରାଜିକମାହ ସତ୍ଥା ।
ଥୁଲ୍ଲଚ୍ଚୟଂ ତଂ ପଟିଗଣ୍ହତୋପି ॥
ସଲାକଂ ସଙ୍ଘଭେଦାୟ, ପଦେନ୍ତସ୍ସ ପରାଜୟୋ ।
ହୋତି ଥୁଲ୍ଲଚ୍ଚୟଂ ତସ୍ସ, ସଲାକଂ ପଟିଗଣ୍ହତୋ ॥
ଏକତ୍ଥ ନିକ୍ଖିପିତ୍ୱାନ, ଚୀୱରଂ ଅଦ୍ଧୟୋଜନେ ।
ଅରୁଣଂ ଉଟ୍ଠାପେନ୍ତସ୍ସ, ଅନାପତ୍ତି କଥଂ ସିୟା ?
ସୁପ୍ପତିଟ୍ଠିତନିଗ୍ରୋଧ-ସଦିସେ ରୁକ୍ଖମୂଲକେ ।
ଅନାପତ୍ତି ହି ସୋ ରୁକ୍ଖୋ, ହୋତି ଏକକୁଲସ୍ସ ଚେ ॥
କଥଂ ଆପତ୍ତିୟୋ ନାନା- ।
ୱତ୍ଥୁକାୟୋ ହି କାୟିକା ।
ଅପୁବ୍ବଂ ଅଚରିମଂ ଏକ- ।
କ୍ଖଣେ ସମ୍ବହୁଲା ଫୁସେ ?
ନାନିତ୍ଥୀନଂ ତୁ କେସେ ୱା, ତାସଂ ଅଙ୍ଗୁଲିୟୋପି ୱା ।
ଏକତୋ ଗହଣେ ତସ୍ସ, ହୋନ୍ତି ସମ୍ବହୁଲା ପନ ॥
କଥଂ ୱାଚସିକା ନାନା-ୱତ୍ଥୁକାୟୋ ନ କାୟିକା ।
ଅପୁବ୍ବଂ ଅଚରିମଂ ଏକ-କ୍ଖଣେ ଆପତ୍ତିୟୋ ଫୁସେ ?
ଦୁଟ୍ଠୁଲ୍ଲଂ ୟୋ ୱଦତି ଚ ୱାଚଂ ।
‘‘ସବ୍ବା ତୁମ୍ହେ ସିଖରଣିୟୋ’’ତି ।
ୱୁତ୍ତା ଦୋସା ୱିନୟନସତ୍ଥେ ।
ତସ୍ସିତ୍ଥୀନଂ ଗଣନୱସେନ ॥
ଇତ୍ଥିୟା ପୁରିସେନାପି, ପଣ୍ଡକେନ ନିମିତ୍ତକେ ।
ମେଥୁନଂ ନ ଚ ସେୱନ୍ତୋ, ମେଥୁନପ୍ପଚ୍ଚୟା ଚୁତୋ ?
ମେଥୁନେ ପୁବ୍ବଭାଗଂ ତୁ, କାୟସଂସଗ୍ଗତଂ ଗତା ।
ମେଥୁନପ୍ପଚ୍ଚୟା ଛେଜ୍ଜଂ, ଆପନ୍ନା ଅଟ୍ଠୱତ୍ଥୁକଂ ॥
ମାତରଂ ଚୀୱରଂ ୟାଚେ, ସଙ୍ଘେ ପରିଣତଂ ନ ଚ ।
କେନସ୍ସ ହୋତି ଆପତ୍ତି, ଅନାପତ୍ତି ଚ ଞାତକେ ?
ୱସ୍ସସାଟିକଲାଭତ୍ଥଂ, ସମୟେ ପିଟ୍ଠିସଞ୍ଞିତେ ।
ସିୟାପତ୍ତି ସତୁପ୍ପାଦଂ, କରୋତୋ ମାତରମ୍ପି ଚ ॥
ସଙ୍ଘାଦିସେସମାପତ୍ତିଂ, ପାଚିତ୍ତିଂ ଦୁକ୍କଟଂ କଥଂ ।
ପାଟିଦେସନିୟଂ ଥୁଲ୍ଲ-ଚ୍ଚୟଂ ଏକକ୍ଖଣେ ଫୁସେ ?
ଅୱସ୍ସୁତାୱସ୍ସୁତହତ୍ଥତୋ ହି ।
ପିଣ୍ଡଂ ଗହେତ୍ୱା ଲସୁଣଂ ପଣୀତଂ ।
ମନୁସ୍ସମଂସଞ୍ଚ ଅକପ୍ପମଞ୍ଞଂ ।
ସବ୍ବେକତୋ ଖାଦତି, ହୋନ୍ତି ତସ୍ସା ॥
ଏକୋ ଉପଜ୍ଝାୟକପୁଗ୍ଗଲେକୋ ।
ଆଚରିୟକୋ ଦ୍ୱେପି ଚ ପୁଣ୍ଣୱସ୍ସା ।
ଏକାୱ ତେସଂ ପନ କମ୍ମୱାଚା ।
ଏକସ୍ସ କମ୍ମଂ ତୁ ନ ରୂହତେ କିଂ ?
କେସଗ୍ଗମତ୍ତମ୍ପି ମହିଦ୍ଧିକେସୁ ।
ଆକାସଗୋ ହୋତି ସଚେ ପନେକୋ ।
କତମ୍ପି ତଂ ରୂହତି ନେୱ କମ୍ମଂ ।
ଆକାସଗସ୍ସେୱ, ନ ଭୂମିଗସ୍ସ ॥
ସଙ୍ଘେନପି ହି ଆକାସେ, ଠିତେନ ପନ ଇଦ୍ଧିୟା ।
ଭୂମିଗସ୍ସ ନ କାତବ୍ବଂ, କରୋତି ୟଦି କୁପ୍ପତି ॥
ନ ଚ କପ୍ପକତଂ ୱତ୍ଥଂ, ନ ଚ ରତ୍ତଂ ଅକପ୍ପିୟଂ ।
ନିୱତ୍ଥସ୍ସ ପନାପତ୍ତି, ଅନାପତ୍ତି କଥଂ ସିୟା ?
ଅଚ୍ଛିନ୍ନଚୀୱରସ୍ସେତ୍ଥ, ଭିକ୍ଖୁସ୍ସ ପନ କିଞ୍ଚିପି ।
ନ ଚସ୍ସାକପ୍ପିୟଂ ନାମ, ଚୀୱରଂ ପନ ୱିଜ୍ଜତି ॥
ନ କୁତୋପି ଚ ଗଣ୍ହତି କିଞ୍ଚି ହୱେ ।
ନ ତୁ ଦେତି ଚ କିଞ୍ଚିପି ଭୋଜନତୋ ।
ଗରୁକଂ ପନ ୱଜ୍ଜମୁପେତି କଥଂ ।
ୱଦ ମେ ୱିନୟେ କୁସଲୋସି ୟଦି ?
ଆଦାୟ ୟଂ କିଞ୍ଚି ଅୱସ୍ସୁତମ୍ହା ।
ଉୟ୍ୟୋଜିତା ଭୁଞ୍ଜତି ଭୋଜନଞ୍ଚେ ।
ସଙ୍ଘାଦିସେସଂ କଥୟନ୍ତି ଧୀରା ॥
କସ୍ସଚି କିଞ୍ଚି ନ ଦେତି ସହତ୍ଥା ।
ନେୱ ଚ ଗଣ୍ହତି କିଞ୍ଚି କୁତୋଚି ।
ୱଜ୍ଜମୁପେତି ଲହୁଂ, ନ ଗରୁଂ ତୁ ।
ବ୍ରୂହି କଥଂ ୟଦି ବୁଜ୍ଝସି ସାଧୁ ?
ଦନ୍ତପୋନୋଦକାନଂ ତୁ, ଗହଣେ ପନ ଭିକ୍ଖୁନୀ ।
ଉୟ୍ୟୋଜେନ୍ତୀ ଲହୁଂ ୱଜ୍ଜଂ, ଆପଜ୍ଜତି ନିସେୱିତେ ॥
ଆପଜ୍ଜତି ପନାପତ୍ତିଂ, ଗରୁକଂ ସାୱସେସକଂ ।
ଛାଦେତି, ନ ଫୁସେ ୱଜ୍ଜଂ, କଥଂ ଜାନାସି ମେ ୱଦ ?
ସଙ୍ଘାଦିସେସମାପତ୍ତିଂ, ଆପଜ୍ଜିତ୍ୱା ଅନାଦରୋ ।
ଛାଦେନ୍ତୋପି ତମାପତ୍ତିଂ, ନାଞ୍ଞଂ ଉକ୍ଖିତ୍ତକୋ ଫୁସେ ॥
ସପ୍ପାଣପ୍ପାଣଜଂ ନେୱ, ଜଙ୍ଗମଂ ନ ୱିହଙ୍ଗମଂ ।
ଦ୍ୱିଜଂ କନ୍ତମକନ୍ତଞ୍ଚ, ସଚେ ଜାନାସି ମେ ୱଦ ?
ସପ୍ପାଣପ୍ପାଣଜୋ ୱୁତ୍ତୋ ।
ଚିତ୍ତଜୋ ଉତୁଜୋପି ଚ ।
ଦ୍ୱୀହେୱ ପନ ଜାତତ୍ତା ।
ମତୋ ସଦ୍ଦୋ ଦ୍ୱିଜୋତି ହି ॥
ସୁଜନସ୍ସ ସୁଖାନୟନେ ନୟନେ ।
ପଟୁ ହୋତି ପଧାନରତୋ ନ ରତୋ ।
ଇଧ ୟୋ ପନ ସାରମତେ ରମତେ ॥
ସେଦମୋଚନଗାଥାୟୋ ସମତ୍ତା ।
ସାଧାରଣାସାଧାରଣକଥା
ସବ୍ବସିକ୍ଖାପଦାନାହଂ, ନିଦାନଂ ଗଣନମ୍ପି ଚ ।
ଭିକ୍ଖୂହି ଭିକ୍ଖୁନୀନଞ୍ଚ, ଭିକ୍ଖୂନଂ ଭିକ୍ଖୁନୀହି ଚ ॥
ଅସାଧାରଣପଞ୍ଞତ୍ତଂ, ତଥା ସାଧାରଣମ୍ପି ଚ ।
ପୱକ୍ଖାମି ସମାସେନ, ତଂ ସୁଣାଥ ସମାହିତା ॥
ନିଦାନଂ ନାମ ୱେସାଲୀ, ତଥା ରାଜଗହଂ ପୁରଂ ।
ସାୱତ୍ଥାଳୱି କୋସମ୍ବୀ, ସକ୍କଭଗ୍ଗା ପକାସିତା ॥
କତି ୱେସାଲିୟା ୱୁତ୍ତା, କତି ରାଜଗହେ କତା ?
କତି ସାୱତ୍ଥିପଞ୍ଞତ୍ତା, କତି ଆଳୱିୟଂ କତା ?
କତି କୋସମ୍ବିପଞ୍ଞତ୍ତା, କତି ସକ୍କେସୁ ଭାସିତା ?
କତି ଭଗ୍ଗେସୁ ପଞ୍ଞତ୍ତା, ତଂ ମେ ଅକ୍ଖାହି ପୁଚ୍ଛିତୋ ?
ଦସ ୱେସାଲିୟା ୱୁତ୍ତା, ଏକୱୀସ ଗିରିବ୍ବଜେ ।
ଛଊନାନି ସତାନେୱ, ତୀଣି ସାୱତ୍ଥିୟଂ କତା ॥
ଛ ପନାଳୱିୟଂ ୱୁତ୍ତା, ଅଟ୍ଠ କୋସମ୍ବିୟଂ କତା ।
ଅଟ୍ଠ ସକ୍କେସୁ ପଞ୍ଞତ୍ତା, ତୟୋ ଭଗ୍ଗେସୁ ଦୀପିତା ॥
ମେଥୁନଂ ୱିଗ୍ଗହୋ ଚେୱ, ଚତୁତ୍ଥନ୍ତିମୱତ୍ଥୁକଂ ।
ଅତିରେକଚୀୱରଂ ସୁଦ୍ଧ-କାଳକେଳକଲୋମକଂ ॥
ଭୂତଂ ପରମ୍ପରଞ୍ଚେୱ, ମୁଖଦ୍ୱାରମଚେଲକୋ ।
ଭିକ୍ଖୁନୀସୁ ଚ ଅକ୍କୋସୋ, ଦସ ୱେସାଲିୟଂ କତା ॥
ଦୁତିୟନ୍ତିମୱତ୍ଥୁଞ୍ଚ, ଦ୍ୱେ ଅନୁଦ୍ଧଂସନାନି ଚ ।
ସଙ୍ଘଭେଦା ଦୁୱେ ଚେୱ, ଚୀୱରସ୍ସ ପଟିଗ୍ଗହୋ ॥
ରୂପିୟଂ ସୁତ୍ତୱିଞ୍ଞତ୍ତି, ତଥା ଉଜ୍ଝାପନମ୍ପି ଚ ।
ପରିପାଚିତପିଣ୍ଡୋ ଚ, ତଥେୱ ଗଣଭୋଜନଂ ॥
ୱିକାଲଭୋଜନଞ୍ଚେୱ, ଚାରିତ୍ତଂ ନ୍ହାନମେୱ ଚ ।
ଊନୱୀସତିୱସ୍ସଞ୍ଚ, ଦତ୍ୱା ସଙ୍ଘେନ ଚୀୱରଂ ॥
ୱୋସାସନ୍ତୀ ଚ ନଚ୍ଚଂ ୱା, ଗୀତଂ ୱା ଚାରିକଦ୍ୱୟଂ ।
ଛନ୍ଦଦାନେନିମେ ରାଜ-ଗହସ୍ମିଂ ଏକୱୀସତି ॥
କୁଟି କୋସିୟସେୟ୍ୟଞ୍ଚ, ପଥୱୀଭୂତଗାମକଂ ।
ସପ୍ପାଣକଞ୍ଚ ସିଞ୍ଚନ୍ତି, ଏତେ ଛାଳୱିୟଂ କତା ॥
ମହଲ୍ଲକୱିହାରୋ ଚ, ଦୋୱଚସ୍ସଂ ତଥେୱ ଚ ।
ଅଞ୍ଞେନଞ୍ଞଂ ତଥା ଦ୍ୱାର-କୋସା ମଜ୍ଝଞ୍ଚ ପଞ୍ଚମଂ ॥
ଅନାଦରିୟଂ ସହଧମ୍ମୋ, ପୟୋପାନଞ୍ଚ ସେଖିୟେ ।
କୋସମ୍ବିୟଂ ତୁ ପଞ୍ଞତ୍ତା, ଅଟ୍ଠିମେ ସୁଦ୍ଧଦିଟ୍ଠିନା ॥
ଧୋୱନେଳକଲୋମାନି, ପତ୍ତୋ ଚ ଦୁତିୟୋ ପନ ।
ଓୱାଦୋପି ଚ ଭେସଜ୍ଜଂ, ସୂଚି ଆରଞ୍ଞକେସୁ ଚ ॥
ଉଦକସୁଦ୍ଧିକଞ୍ଚେୱ, ଓୱାଦାଗମନମ୍ପି ଚ ।
ପୁରେ କପିଲୱତ୍ଥୁସ୍ମିଂ, ପଞ୍ଞତ୍ତା ପନ ଅଟ୍ଠିମେ ॥
ଜୋତିଂ ସମାଦହିତ୍ୱାନ, ସାମିସେନ ସସିତ୍ଥକଂ ।
ଇମେ ଭଗ୍ଗେସୁ ପଞ୍ଞତ୍ତା, ତୟୋ ଆଦିଚ୍ଚବନ୍ଧୁନା ॥
ପାରାଜିକାନି ଚତ୍ତାରି, ଗରୁକା ସୋଳସା, ଦୁୱେ ।
ଅନିୟତା, ଚତୁତ୍ତିଂସ, ହୋନ୍ତି ନିସ୍ସଗ୍ଗିୟାନି ହି ॥
ଛପ୍ପଣ୍ଣାସସତଞ୍ଚେୱ, ଖୁଦ୍ଦକାନି ଭୱନ୍ତି ହି ।
ଦସେୱ ପନ ଗାରୟ୍ହା, ଦ୍ୱେସତ୍ତତି ଚ ସେଖିୟା ॥
ଛଊନାନି ଚ ତୀଣେୱ, ସତାନି ସମଚେତସା ।
ଇମେ ୱୁତ୍ତାୱସେସା ହି, ସବ୍ବେ ସାୱତ୍ଥିୟଂ କତା ॥
ପାରାଜିକାନି ଚତ୍ତାରି, ସତ୍ତ ସଙ୍ଘାଦିସେସକା ।
ନିସ୍ସଗ୍ଗିୟାନି ଅଟ୍ଠେୱ, ଦ୍ୱତ୍ତିଂସେୱ ଚ ଖୁଦ୍ଦକା ॥
ଦ୍ୱେ ଗାରୟ୍ହା, ତୟୋ ସେଖା, ଛପ୍ପଞ୍ଞାସେୱ ସବ୍ବସୋ ।
ଭୱନ୍ତି ଛସୁ ପଞ୍ଞତ୍ତା, ନଗରେସୁ ଚ ପିଣ୍ଡିତା ॥
ସବ୍ବାନେୱ ପନେତାନି, ନଗରେସୁ ଚ ସତ୍ତସୁ ।
ଅଡ୍ଢୁଡ୍ଢାନି ସତାନେୱ, ପଞ୍ଞତ୍ତାନି ଭୱନ୍ତି ହି ॥
ସିକ୍ଖାପଦାନି ଭିକ୍ଖୂନଂ, ୱୀସଞ୍ଚ ଦ୍ୱେ ସତାନି ଚ ।
ଭିକ୍ଖୁନୀନଂ ତୁ ଚତ୍ତାରି, ତଥା ତୀଣି ସତାନି ଚ ॥
ପାରାଜିକାନି ଚତ୍ତାରି, ଗରୁକା ପନ ତେରସ ।
ଅନିୟତା ଦୁୱେ ୱୁତ୍ତା, ତିଂସ ନିସ୍ସଗ୍ଗିୟାନି ଚ ॥
ଖୁଦ୍ଦକା ନୱୁତି ଦ୍ୱେ ଚ, ଚତ୍ତାରୋ ପାଟିଦେସନା ।
ନିପ୍ପପଞ୍ଚେନ ନିଦ୍ଦିଟ୍ଠା, ପଞ୍ଚସତ୍ତତି ସେଖିୟା ॥
ଦ୍ୱେ ସତାନି ଚ ୱୀସଞ୍ଚ, ୱସା ଭିକ୍ଖୂନମେୱ ଚ ।
ସିକ୍ଖାପଦାନି ଉଦ୍ଦେସମାଗଚ୍ଛନ୍ତି ଉପୋସଥେ ॥
ପାରାଜିକାନି ଅଟ୍ଠେୱ, ଗରୁକା ଦସ ସତ୍ତ ଚ ।
ନିସ୍ସଗ୍ଗିୟାନି ତିଂସେୱ, ଛସଟ୍ଠି ଚ ସତମ୍ପି ଚ ॥
ଖୁଦ୍ଦକାନଟ୍ଠ ଗାରୟ୍ହା, ପଞ୍ଚସତ୍ତତି ସେଖିୟା ।
ସବ୍ବାନି ପନ ଚତ୍ତାରି, ତଥା ତୀଣି ସତାନି ଚ ॥
ଭୱନ୍ତି ପନ ଏତାନି, ଭିକ୍ଖୁନୀନଂ ୱସା ପନ ।
ସିକ୍ଖାପଦାନି ଉଦ୍ଦେସମାଗଚ୍ଛନ୍ତି ଉପୋସଥେ ॥
ଛଚତ୍ତାଲୀସ ହୋନ୍ତେୱ, ଭିକ୍ଖୂନଂ ଭିକ୍ଖୁନୀହି ତୁ ।
ଅସାଧାରଣଭାୱଂ ତୁ, ଗମିତାନି ମହେସିନା ॥
ଛ ଚ ସଙ୍ଘାଦିସେସା ଚ, ତଥା ଅନିୟତା ଦୁୱେ ।
ଦ୍ୱାଦସେୱ ଚ ନିସ୍ସଗ୍ଗା, ଦ୍ୱାୱୀସତି ଚ ଖୁଦ୍ଦକା ॥
ଚତ୍ତାରୋପି ଚ ଗାରୟ୍ହା, ଛଚତ୍ତାଲୀସ ହୋନ୍ତିମେ ।
ଭିକ୍ଖୂନଂୟେୱ ପଞ୍ଞତ୍ତା, ଗୋତମେନ ୟସସ୍ସିନା ॥
ୱିସଟ୍ଠି କାୟସଂସଗ୍ଗୋ, ଦୁଟ୍ଠୁଲ୍ଲଂ ଅତ୍ତକାମତା ।
କୁଟି ଚେୱ ୱିହାରୋ ଚ, ଛଳେତେ ଗରୁକା ସିୟୁଂ ॥
ନିସ୍ସଗ୍ଗିୟାଦିୱଗ୍ଗସ୍ମିଂ, ଧୋୱନଞ୍ଚ ପଟିଗ୍ଗହୋ ।
ଏଳକଲୋମୱଗ୍ଗେପି, ଆଦିତୋ ପନ ସତ୍ତ ଚ ॥
ତତିୟେପି ଚ ୱଗ୍ଗସ୍ମିଂ, ପତ୍ତୋ ଚ ପଠମୋ ତଥା ।
ୱସ୍ସସାଟିକମାରଞ୍ଞ-ମିତି ଦ୍ୱାଦସ ଦୀପିତା ॥
ପାଚିତ୍ତିୟାନି ୱୁତ୍ତାନି, ସବ୍ବାନି ଗଣନାୱସା ।
ଭିକ୍ଖୂନଂ ଭିକ୍ଖୁନୀନଞ୍ଚ, ଅଟ୍ଠାସୀତିସତଂ, ତତୋ ॥
ସବ୍ବୋ ଭିକ୍ଖୁନିୱଗ୍ଗୋପି, ସପରମ୍ପରଭୋଜନୋ ।
ତଥା ଅନତିରିତ୍ତୋ ଚ, ଅଭିହଟ୍ଠୁଂ ପୱାରଣା ॥
ପଣୀତଭୋଜନୱିଞ୍ଞତ୍ତି, ତଥେୱାଚେଲକୋପି ଚ ।
ନିମନ୍ତିତୋ ସଭତ୍ତୋ ଚ, ଦୁଟ୍ଠୁଲ୍ଲଚ୍ଛାଦନମ୍ପି ଚ ॥
ଊନୱୀସତିୱସ୍ସଂ ତୁ, ମାତୁଗାମେନ ସଦ୍ଧିପି ।
ଅନ୍ତେପୁରପ୍ପୱେସୋ ଚ, ୱସ୍ସସାଟି ନିସୀଦନଂ ॥
ଖୁଦ୍ଦକାନି ପନେତାନି, ଦ୍ୱାୱୀସତି ଭୱନ୍ତି ହି ।
ଚତ୍ତାରୋ ପନ ଗାରୟ୍ହା, ଭିକ୍ଖୂନଂ ପାତିମୋକ୍ଖକେ ॥
ଏକତୋ ପନ ପଞ୍ଞତ୍ତା, ଛଚତ୍ତାଲୀସ ହୋନ୍ତିମେ ।
ଭିକ୍ଖୁନୀହି ତୁ ଭିକ୍ଖୂନଂ, ଅସାଧାରଣତଂ ଗତା ॥
ଭିକ୍ଖୂହି ଭିକ୍ଖୁନୀନଞ୍ଚ, ସତଂ ତିଂସ ଭୱନ୍ତି ହି ।
ଅସାଧାରଣଭାୱଂ ତୁ, ଗମିତାନି ମହେସିନା ॥
ପାରାଜିକାନି ଚତ୍ତାରି, ଦସ ସଙ୍ଘାଦିସେସକା ।
ଦ୍ୱାଦସେୱ ଚ ନିସ୍ସଗ୍ଗା, ଖୁଦ୍ଦକା ନୱୁତିଚ୍ଛ ଚ ॥
ଅଟ୍ଠେୱ ପନ ଗାରୟ୍ହା, ସତଂ ତିଂସ ଭୱନ୍ତିମେ ।
ଭିକ୍ଖୁନୀନଞ୍ଚ ଭିକ୍ଖୂହି, ଅସାଧାରଣତଂ ଗତା ॥
ଭିକ୍ଖୁନୀନଂ ତୁ ସଙ୍ଘାଦି-ସେସେହି ଛ ପନାଦିତୋ ।
ୟାୱତତିୟକା ଚେୱ, ଚତ୍ତାରୋତି ଇମେ ଦସ ॥
ଅକାଲଚୀୱରଞ୍ଚେୱ, ତଥା ଅଚ୍ଛିନ୍ନଚୀୱରଂ ।
ସତ୍ତଞ୍ଞଦତ୍ଥିକାଦୀନି, ପତ୍ତୋ ଚେୱ ଗରୁଂ ଲହୁଂ ॥
ଦ୍ୱାଦସେୱ ପନେତାନି, ଭିକ୍ଖୁନୀନଂ ୱସେନିଧ ।
ନିସ୍ସଗ୍ଗିୟାନି ସତ୍ଥାରା, ପଞ୍ଞତ୍ତାନି ପନେକତୋ ॥
ଅସାଧାରଣପଞ୍ଞତ୍ତା, ଖୁଦ୍ଦକା ନୱୁତିଚ୍ଛ ଚ ।
ଗାରୟ୍ହା ଚ ପନଟ୍ଠାତି, ସବ୍ବେୱ ଗଣନାୱସା ॥
ଭିକ୍ଖୁନୀନଂ ତୁ ଭିକ୍ଖୂହି, ଅସାଧାରଣତଂ ଗତା ।
ଏକତୋୟେୱ ପଞ୍ଞତ୍ତା, ସତଂ ତିଂସ ଭୱନ୍ତି ହି ॥
ଅସାଧାରଣୁଭିନ୍ନମ୍ପି, ସତଂ ସତ୍ତତି ଚଚ୍ଛ ଚ ।
ପାରାଜିକାନି ଚତ୍ତାରି, ଗରୁକା ଚ ଦସଚ୍ଛ ଚ ॥
ଅନିୟତା ଦୁୱେ ଚେୱ, ନିସ୍ସଗ୍ଗା ଚତୁୱୀସତି ।
ସତଂ ଅଟ୍ଠାରସେୱେତ୍ଥ, ଖୁଦ୍ଦକା ପରିଦୀପିତା ॥
ଦ୍ୱାଦସେୱ ଚ ଗାରୟ୍ହା, ସତଂ ସତ୍ତତି ଚଚ୍ଛ ଚ ।
ଅସାଧାରଣୁଭିନ୍ନମ୍ପି, ଇମେତି ପରିଦୀପିତା ॥
ସାଧାରଣା ଉଭିନ୍ନମ୍ପି, ପଞ୍ଞତ୍ତା ପନ ସତ୍ଥୁନା ।
ସତଂ ସତ୍ତତି ଚତ୍ତାରି, ଭୱନ୍ତୀତି ପକାସିତା ॥
ପାରାଜିକାନି ଚତ୍ତାରି, ସତ୍ତ ସଙ୍ଘାଦିସେସକା ।
ଅଟ୍ଠାରସ ଚ ନିସ୍ସଗ୍ଗା, ସମସତ୍ତତି ଖୁଦ୍ଦକା ॥
ପଞ୍ଚସତ୍ତତି ପଞ୍ଞତ୍ତା, ସେଖିୟାପି ଚ ସବ୍ବସୋ ।
ସତଂ ସତ୍ତତି ଚତ୍ତାରି, ଉଭିନ୍ନଂ ସମସିକ୍ଖତା ॥
ସାଧାରଣାସାଧାରଣକଥା ।
ଲକ୍ଖଣକଥା
ଇତୋ ପରଂ ପୱକ୍ଖାମି, ଲକ୍ଖଣଂ ପନ ସବ୍ବଗଂ ।
ସୱନେ ସାଦରଂ କତ୍ୱା, ୱଦତୋ ମେ ନିବୋଧଥ ॥
ନିଦାନଂ ପୁଗ୍ଗଲୋ ୱତ୍ଥୁ, ପଞ୍ଞତ୍ତିୱିଧିମେୱ ଚ ।
ୱିପତ୍ତାପତ୍ତନାପତ୍ତି, ଆଣତ୍ତଙ୍ଗକିରିୟାପି ଚ ॥
ସଞ୍ଞାଚିତ୍ତସମୁଟ୍ଠାନଂ, ୱଜ୍ଜକମ୍ମପଭେଦକଂ ।
ତିକଦ୍ୱୟନ୍ତି ସବ୍ବତ୍ଥ, ୟୋଜେତବ୍ବମିଦଂ ପନ ॥
ପୁବ୍ବେ ୱୁତ୍ତନୟଂ ୟଞ୍ଚ, ୟଞ୍ଚ ଉତ୍ତାନମେୱିଧ ।
ତଂ ସବ୍ବଂ ପନ ୱଜ୍ଜେତ୍ୱା, କରିସ୍ସାମତ୍ଥଜୋତନଂ ॥
ପୁଗ୍ଗଲୋ ନାମ ୟଂ ୟଂ ତୁ, ଭିକ୍ଖୁମାରବ୍ଭ ଭିକ୍ଖୁନିଂ ।
ସିକ୍ଖାପଦଂ ତୁ ପଞ୍ଞତ୍ତଂ, ଅୟଂ ୱୁଚ୍ଚତି ପୁଗ୍ଗଲୋ ॥
ତେୱୀସତିୱିଧା ତେ ଚ, ସୁଦିନ୍ନଧନିୟାଦୟୋ ।
ଭିକ୍ଖୂନଂ ପାତିମୋକ୍ଖସ୍ମିଂ, ଆଦିକମ୍ମିକପୁଗ୍ଗଲା ॥
ଭିକ୍ଖୁନୀନଂ ତଥା ପାତି-ମୋକ୍ଖସ୍ମିଂ ଆଦିକମ୍ମିକା ।
ଥୁଲ୍ଲନନ୍ଦାଦୟୋ ସତ୍ତ, ସବ୍ବେ ତିଂସ ଭୱନ୍ତି ହି ॥
ୱତ୍ଥୂତି ପୁଗ୍ଗଲସ୍ସେୱ, ତସ୍ସ ତସ୍ସ ଚ ସବ୍ବସୋ ।
ୱତ୍ଥୁନୋ ତସ୍ସ ତସ୍ସେୱ, ଅଜ୍ଝାଚାରୋ ପୱୁଚ୍ଚତି ॥
କେୱଲା ପନ ପଞ୍ଞତ୍ତି, ମୂଲଭୂତା ତଥେୱ ସା ।
ଅନ୍ୱନୁପ୍ପନ୍ନସବ୍ବତ୍ଥ-ପଦେସପଦପୁବ୍ବିକା ॥
ସାଧାରଣା ଚ ପଞ୍ଞତ୍ତି, ତଥାସାଧାରଣାପି ଚ ।
ଏକତୋଉଭତୋପୁବ୍ବା, ଏୱଂ ନୱୱିଧା ସିୟା ॥
ତତ୍ଥ ‘‘ୟୋ ମେଥୁନଂ ଧମ୍ମଂ, ପଟିସେୱେୟ୍ୟ ଭିକ୍ଖୁ’’ତି ।
‘‘ଅଦିନ୍ନଂ ଆଦିୟେୟ୍ୟା’’ତି, ପଞ୍ଞତ୍ତିଚ୍ଚେୱମାଦିକା ॥
ହୋତି ‘‘ଅନ୍ତମସୋ ଭିକ୍ଖୁ, ତିରଚ୍ଛାନଗତାୟପି’’ ।
ଇଚ୍ଚେୱମାଦିକା ସବ୍ବା, ଅନୁପଞ୍ଞତ୍ତି ଦୀପିତା ॥
ତଥାନୁପ୍ପନ୍ନପଞ୍ଞତ୍ତି, ଅନୁପ୍ପନ୍ନେ ତୁ ୱଜ୍ଜକେ ।
ଅଟ୍ଠନ୍ନଂ ଗରୁଧମ୍ମାନଂ, ୱସେନେୱାଗତା ହି ସା ॥
ଚମ୍ମତ୍ଥରଣକଞ୍ଚେୱ, ସଗୁଣଙ୍ଗୁଣୁପାହନଂ ।
ତଥେୱ ଚ ଧୁୱନ୍ହାନଂ, ପଞ୍ଚୱଗ୍ଗୂପସମ୍ପଦା ॥
ଏସା ପଦେସପଞ୍ଞତ୍ତି, ନାମାତି ହି ଚତୁବ୍ବିଧା ।
ୱୁତ୍ତା ମଜ୍ଝିମଦେସସ୍ମିଂ-ୟେୱ ହୋତି, ନ ଅଞ୍ଞତୋ ॥
ଇତୋ ସେସା ହି ସବ୍ବତ୍ଥ-ପଞ୍ଞତ୍ତୀତି ପକାସିତା ।
ଅତ୍ଥତୋ ଏକମେୱେତ୍ଥ, ସାଧାରଣଦୁକାଦିକଂ ॥
ସାଣତ୍ତିକା ପନାପତ୍ତି, ହୋତି ନାଣତ୍ତିକାପି ଚ ।
ଆଣତ୍ତୀତି ଚ ନାମେସା, ଞେୟ୍ୟା ଆଣାପନା ପନ ॥
ଆପତ୍ତୀନଂ ତୁ ସବ୍ବାସଂ, ସବ୍ବସିକ୍ଖାପଦେସୁପି ।
ସବ୍ବୋ ପନଙ୍ଗଭେଦୋ ହି, ୱିଞ୍ଞାତବ୍ବୋ ୱିଭାୱିନା ॥
କାୟେନପି ଚ ୱାଚାୟ, ୟା କରୋନ୍ତସ୍ସ ଜାୟତେ ।
ଅୟଂ କ୍ରିୟସମୁଟ୍ଠାନା, ନାମ ପାରାଜିକା ୱିୟ ॥
କାୟୱାଚାହି କତ୍ତବ୍ବଂ, ଅକରୋନ୍ତସ୍ସ ହୋତି ୟା ।
ସା ଚାକ୍ରିୟସମୁଟ୍ଠାନା, ପଠମେ କଥିନେ ୱିୟ ॥
କରୋନ୍ତସ୍ସାକରୋନ୍ତସ୍ସ, ଭିକ୍ଖୁନୋ ହୋତି ୟା ପନ ।
ସା କ୍ରିୟାକ୍ରିୟତୋ ହୋତି, ଚୀୱରଗ୍ଗହଣେ ୱିୟ ॥
ସିୟା ପନ କରୋନ୍ତସ୍ସ, ଅକରୋନ୍ତସ୍ସ ୟା ସିୟା ।
ସା କ୍ରିୟାକ୍ରିୟତୋ ହୋତି, ରୂପିୟୁଗ୍ଗହଣେ ୱିୟ ॥
ୟା କରୋତୋ ଅକୁବ୍ବତୋ ।
ସିୟା କିରିୟତୋ ଚେୱ ।
ସା କ୍ରିୟାକ୍ରିୟତୋପି ଚ ॥
ସବ୍ବା ଚାପତ୍ତିୟୋ ସଞ୍ଞା- ।
ୱସେନ ଦୁୱିଧା ସିୟୁଂ ।
ସଞ୍ଞାୱିମୋକ୍ଖା ନୋସଞ୍ଞା- ।
ୱିମୋକ୍ଖାତି ପକାସିତା ॥
ୱୀତିକ୍କମନସଞ୍ଞାୟ, ଅଭାୱେନ ୟତୋ ପନ ।
ୱିମୁଚ୍ଚତି ଅୟଂ ସଞ୍ଞା-ୱିମୋକ୍ଖାତି ପକାସିତା ॥
ଇତରା ପନ ନୋସଞ୍ଞା-ୱିମୋକ୍ଖାତି ପକାସିତା ।
ପୁନ ସବ୍ବାୱ ଚିତ୍ତସ୍ସ, ୱସେନ ଦୁୱିଧା ସିୟୁଂ ॥
ସଚିତ୍ତକା ଅଚିତ୍ତାତି, ସୁଚିତ୍ତେନ ପକାସିତା ।
ସଚିତ୍ତକସମୁଟ୍ଠାନ-ୱସେନ ପନ ୟା ସିୟା ॥
ଅୟଂ ସଚିତ୍ତକା ନାମ, ଆପତ୍ତି ପରିଦୀପିତା ।
ସଚିତ୍ତକେହି ୱା ମିସ୍ସ-ୱସେନାୟମଚିତ୍ତକା॥
ସବ୍ବା ଚାପତ୍ତିୟୋ ୱଜ୍ଜ-ୱସେନ ଦୁୱିଧା ରୁତା ।
ସୁୱିଜ୍ଜେନାନୱଜ୍ଜେନ, ଲୋକପଣ୍ଣତ୍ତିୱଜ୍ଜତୋ ॥
ୟସ୍ସା ସଚିତ୍ତକେ ପକ୍ଖେ, ଚିତ୍ତଂ ଅକୁସଲଂ ସିୟା ।
ଲୋକୱଜ୍ଜାତି ନାମାୟଂ, ସେସା ପଣ୍ଣତ୍ତିୱଜ୍ଜକା॥
ସବ୍ବା ଚାପତ୍ତିୟୋ କମ୍ମ-ୱସେନ ତିୱିଧା ସିୟୁଂ ।
କାୟକମ୍ମଂ ୱଚୀକମ୍ମଂ, ତଥା ତଦୁଭୟମ୍ପି ଚ ॥
ତିକଦ୍ୱୟନ୍ତି ନାମେତଂ, କୁସଲାଦିତିକଦ୍ୱୟଂ ।
କୁସଲାକୁସଲଚିତ୍ତୋ ୱା, ତଥାବ୍ୟାକତମାନସୋ ॥
ହୁତ୍ୱା ଆପଜ୍ଜତାପତ୍ତିଂ, ଆପଜ୍ଜନ୍ତୋ ନ ଅଞ୍ଞଥା ।
ସୁଖୱେଦନାସମଙ୍ଗୀ ୱା, ତଥା ଦୁକ୍ଖାଦିସଂୟୁତୋ ॥
ଇଦଂ ତୁ ଲକ୍ଖଣଂ ୱୁତ୍ତଂ, ସବ୍ବସିକ୍ଖାପଦେସୁପି ।
ୟୋଜେତ୍ୱା ପନ ଦସ୍ସେୟ୍ୟ, ୱିନୟସ୍ମିଂ ୱିସାରଦୋ ॥
ଚତୁସ୍ସିଖଂ ସତ୍ତଫଲଂ ଛପୁପ୍ଫଂ ।
ଜାନାତି ୟୋ ଦ୍ୱିପ୍ପଭୱଂ ଦ୍ୱିସାଖଂ ।
ଜାନାତି ପଞ୍ଞତ୍ତିମସେସତୋ ସୋ ॥
ଇମମୁତ୍ତରଂ ଗତମନୁତ୍ତରତଂ ।
ପରିୟାପୁଣାତି ପରିପୁଚ୍ଛତି ୟୋ ।
ଉପୟାତନୁତ୍ତରତମୁତ୍ତରତୋ ।
ସ ଚ କାୟୱାଚୱିନୟେ ୱିନୟେ ॥
ଲକ୍ଖଣକଥା ।
ସୋଳସପରିୱାରସ୍ସ, ପରିୱାରସ୍ସ ସବ୍ବସୋ ।
ଇତୋ ପରଂ ପୱକ୍ଖାମି, ସବ୍ବସଙ୍କଲନଂ ନୟଂ ॥
କତି ଆପତ୍ତିୟୋ ୱୁତ୍ତା ।
କାୟିକା, ୱାଚସିକା କତି ?
ଛାଦେନ୍ତସ୍ସ କତାପତ୍ତୀ ।
କତି ସଂସଗ୍ଗପଚ୍ଚୟା ?
କାୟିକା ଛବ୍ବିଧାପତ୍ତି, ତଥା ୱାଚସିକାପି ଚ ।
ଛାଦେନ୍ତସ୍ସ ଚ ତିସ୍ସୋୱ, ପଞ୍ଚ ସଂସଗ୍ଗପଚ୍ଚୟା ॥
କତି ଆପତ୍ତିମୂଲାନି, ପଞ୍ଞତ୍ତାନି ମହେସିନା ?
କତି ଆପତ୍ତିୟୋ ୱୁତ୍ତା, ଦୁଟ୍ଠୁଲ୍ଲଚ୍ଛାଦନେ ପନ ?
ଦ୍ୱେ ପନାପତ୍ତିମୂଲାନି, କାୟୋ ୱାଚା ଭୱନ୍ତି ହି ।
ପାରାଜିକା ଚ ପାଚିତ୍ତି, ଦୁଟ୍ଠୁଲ୍ଲଚ୍ଛାଦନେ ସିୟୁଂ ॥
କତି ଗାମନ୍ତରେ ୱୁତ୍ତା, ନଦୀପାରେ ତଥା କତି ?
କତି ଥୁଲ୍ଲଚ୍ଚୟଂ ମଂସେ, କତି ମଂସେସୁ ଦୁକ୍କଟଂ ?
ଗାମନ୍ତରେ ଚତସ୍ସୋୱ, ନଦୀପାରେପି ତତ୍ତକା ।
ଥୁଲ୍ଲଚ୍ଚୟଂ ମନୁସ୍ସାନଂ, ମଂସେ, ନୱସୁ ଦୁକ୍କଟଂ ॥
ଭିକ୍ଖୁ ଭିକ୍ଖୁନିୟା ସଦ୍ଧିଂ, ସଂୱିଧାତି ଚ ଦୁକ୍କଟଂ ।
ପାଚିତ୍ତଞ୍ଞସ୍ସ ଗାମସ୍ସ, ଉପଚାରୋକ୍କମେ ସିୟା ॥
ଥୁଲ୍ଲଚ୍ଚୟଂ ପରିକ୍ଖିତ୍ତେ, ଗାମସ୍ମିଂ ପଠମେ ପଦେ ।
ଗରୁକଂ ଦୁତିୟେ ତସ୍ସା, ଗାମନ୍ତରଂ ୱଜନ୍ତିୟା ॥
ତଥା ଭିକ୍ଖୁନିୟା ସଦ୍ଧିଂ, ସଂୱିଧାନେ ତୁ ଦୁକ୍କଟଂ ।
ଅଭିରୂହତି ନାୱଂ ଚେ, ହୋତି ପାଚିତ୍ତି ଭିକ୍ଖୁନୋ ॥
ନଦିୟୁତ୍ତରଣେ କାଲେ, ପାଦେ ଥୁଲ୍ଲଚ୍ଚୟଂ ଫୁସେ ।
ପଠମେ, ଦୁତିୟେ ତସ୍ସା, ହୋତି ଭିକ୍ଖୁନିୟା ଗରୁଂ ॥
କତି ୱାଚସିକା ରତ୍ତିଂ, କତି ୱାଚସିକା ଦିୱା ?
ଦୁୱେ ୱାଚସିକା ରତ୍ତିଂ, ଦୁୱେ ୱାଚସିକା ଦିୱା ॥
ରତ୍ତନ୍ଧକାରେ ପୁରିସେନ ସଦ୍ଧିଂ ।
ଠିତା ଅଦୀପେ ପନ ହତ୍ଥପାସେ ।
ପାଚିତ୍ତି ତସ୍ସା ୟଦି ସଲ୍ଲପେୟ୍ୟ ।
ୱଦେୟ୍ୟ ଚେ ଦୁକ୍କଟମେୱ ଦୂରେ ॥
ଛନ୍ନେ ଦିୱା ୟା ପୁରିସେନ ସଦ୍ଧିଂ ।
ଠିତା ୱଦେୟ୍ୟସ୍ସ ଚ ହତ୍ଥପାସେ ।
ପାଚିତ୍ତି, ହିତ୍ୱା ପନ ହତ୍ଥପାସଂ ।
ୱଦେୟ୍ୟ ଚେ ଦୁକ୍କଟମେୱ ତସ୍ସା ॥
କତି ୱା ଦଦମାନସ୍ସ, କତି ୱା ପଟିଗଣ୍ହତୋ ?
ଦଦମାନସ୍ସ ତିସ୍ସୋୱ, ଚତସ୍ସୋୱ ପଟିଗ୍ଗହେ ॥
ମନୁସ୍ସସ୍ସ ୱିସଂ ଦେତି, ସଚେ ମରତି ତେନ ସୋ ।
ହୋତି ପାରାଜିକଂ, ୟକ୍ଖେ, ପେତେ ଥୁଲ୍ଲଚ୍ଚୟଂ ମତଂ ॥
ତିରଚ୍ଛାନଗତେ ତେନ, ମତେ ପାଚିତ୍ତିୟଂ ସିୟା ।
ତଥା ପାଚିତ୍ତି ଅଞ୍ଞାତି-କାୟ ଚେ ଦେତି ଚୀୱରଂ ॥
ହତ୍ଥଗାହେ ତଥା ୱେଣି-ଗାହେ ସଙ୍ଘାଦିସେସତା ।
ମୁଖେନ ଅଙ୍ଗଜାତସ୍ସ, ଗହଣେ ତୁ ପରାଜୟୋ ॥
ଅଞ୍ଞାତିକାୟ ହତ୍ଥମ୍ହା, ଚୀୱରସ୍ସ ପଟିଗ୍ଗହେ ।
ସନିସ୍ସଗ୍ଗା ଚ ପାଚିତ୍ତି, ହୋତୀତି ପରିୟାପୁତା ॥
ଅୱସ୍ସୁତସ୍ସ ହତ୍ଥମ୍ହା, ସୟଂ ୱାପି ଅୱସ୍ସୁତା ।
ହୋତି ଥୁଲ୍ଲଚ୍ଚୟଂ ତସ୍ସା, ଭୋଜନଂ ପଟିଗଣ୍ହତୋ ॥
କତି ଞତ୍ତିଚତୁତ୍ଥେନ, ୱୁତ୍ତା ସମ୍ମୁତିୟୋ ଇଧ ?
ଏକା ଏୱ ପନୁଦ୍ଦିଟ୍ଠା, ଭିକ୍ଖୁନୋୱାଦସମ୍ମୁତି ॥
କତି ଧଞ୍ଞରସା ୱୁତ୍ତା, ୱିକାଲେ କପ୍ପିୟା ପନ ?
ଲୋଣସୋୱୀରକଂ ଏକଂ, ୱିକାଲେ କପ୍ପିୟଂ ମତଂ ॥
କତି ପାରାଜିକା କାୟା, କତି ସଂୱାସଭୂମିୟୋ ?
ରତ୍ତିଚ୍ଛେଦୋ କତୀନଂ ତୁ, ପଞ୍ଞତ୍ତା ଦ୍ୱଙ୍ଗୁଲା କତି ?
ପାରାଜିକାନି କାୟମ୍ହା, ଦ୍ୱେ ଦ୍ୱେ ସଂୱାସଭୂମିୟୋ ।
ରତ୍ତିଚ୍ଛେଦୋ ଦୁୱିନ୍ନଂ ତୁ, ପଞ୍ଞତ୍ତା ଦ୍ୱଙ୍ଗୁଲା ଦୁୱେ ॥
ପଠମନ୍ତିମୱତ୍ଥୁଞ୍ଚ, କାୟସଂସଗ୍ଗଜମ୍ପି ଚ ।
ପାରାଜିକାନି କାୟମ୍ହା, ଇମେ ଦ୍ୱେ ପନ ଜାୟରେ ॥
ସମାନସଂୱାସକଭୂମି ଏକା ।
ତଥେୱ ନାନାପଦପୁବ୍ବିକା ଚ ।
ଦ୍ୱେ ଏୱ ସଂୱାସକଭୂମିୟୋ ହି ।
ମହେସିନା କାରୁଣିକେନ ୱୁତ୍ତା ॥
ପାରିୱାସିକଭିକ୍ଖୁସ୍ସ, ତଥା ମାନତ୍ତଚାରିନୋ ।
ରତ୍ତିଚ୍ଛେଦୋ ଦୁୱିନ୍ନଂ ତୁ, ଦ୍ୱୟାତୀତେନ ଦୀପିତୋ ॥
ଦ୍ୱଙ୍ଗୁଲପବ୍ବପରମଂ, ଆଦାତବ୍ବଂ, ତଥେୱ ଚ ।
ଦ୍ୱଙ୍ଗୁଲଂ ୱା ଦୁମାସଂ ୱା, ପଞ୍ଞତ୍ତା ଦ୍ୱଙ୍ଗୁଲା ଦୁୱେ ॥
କତି ପାଣାତିପାତସ୍ମିଂ, ୱାଚା ପାରାଜିକା କତି ?
କତି ଓଭାସନେ ୱୁତ୍ତା, ସଞ୍ଚରିତ୍ତେ ତଥା କତି ?
ତିସ୍ସୋ ପାଣାତିପାତସ୍ମିଂ ।
ୱାଚା ପାରାଜିକା ତୟୋ ।
ଓଭାସନେ ତୟୋ ୱୁତ୍ତା ।
ସଞ୍ଚରିତ୍ତେ ତଥା ତୟୋ ॥
ଅନୋଦିସ୍ସକମୋପାତେ, ଖତେ ମରତି ମାନୁସୋ ।
ପାରାଜିକଂ ସିୟା, ୟକ୍ଖେ, ପେତେ ଥୁଲ୍ଲଚ୍ଚୟଂ ମତେ ॥
ତିରଚ୍ଛାନଗତେ ତତ୍ଥ, ମତେ ପାଚିତ୍ତିୟଂ ୱଦେ ।
ଇମା ପାଣାତିପାତସ୍ମିଂ, ତିସ୍ସୋ ଆପତ୍ତିୟୋ ସିୟୁଂ ॥
ମନୁସ୍ସମାରଣାଦିନ୍ନା-ଦାନମାଣତ୍ତିୟାପି ଚ ।
ମନୁସ୍ସୁତ୍ତରିଧମ୍ମଞ୍ଚ, ୱଦତୋ ୱାଚିକା ତୟୋ ॥
ମଗ୍ଗଦ୍ୱୟଂ ପନୋଦିସ୍ସ, ୱଣ୍ଣାଦିଭଣନେ ଗରୁଂ ।
ଥୁଲ୍ଲଚ୍ଚୟଂ ପନୋଦିସ୍ସ, ଉବ୍ଭଜାଣୁମଧକ୍ଖକଂ ॥
ଉବ୍ଭକ୍ଖକମଧୋଜାଣୁ-ମାଦିସ୍ସ ଭଣତୋ ପନ ।
ଦୁକ୍କଟଂ ପନ ନିଦ୍ଦିଟ୍ଠଂ, ତିସ୍ସୋ ଓଭାସନା ୟିମା ॥
ପଟିଗ୍ଗଣ୍ହନତାଦୀହି, ତୀହି ସଙ୍ଘାଦିସେସତା ।
ଦ୍ୱୀହି ଥୁଲ୍ଲଚ୍ଚୟଂ ୱୁତ୍ତଂ, ଏକେନ ପନ ଦୁକ୍କଟଂ ॥
ଛିନ୍ଦତୋ କତି ଆପତ୍ତି, ଛଡ୍ଡିତପ୍ପଚ୍ଚୟା କତି ?
ଛିନ୍ଦନ୍ତସ୍ସ ତୁ ତିସ୍ସୋୱ, ପଞ୍ଚ ଛଡ୍ଡିତପଚ୍ଚୟା ॥
ହୋତି ପାରାଜିକଂ ତସ୍ସ, ଛିନ୍ଦନ୍ତସ୍ସ ୱନପ୍ପତିଂ ।
ଭୂତଗାମଂ ତୁ ପାଚିତ୍ତି, ଅଙ୍ଗଜାତଂ ତୁ ଥୁଲ୍ଲତା ॥
ୱିସଂ ଛଡ୍ଡେତ୍ୟନୋଦିସ୍ସ, ମନୁସ୍ସୋ ମରତି ତେନ ଚେ ।
ପାରାଜିକଂ, ମତେ ୟକ୍ଖେ, ପେତେ ଥୁଲ୍ଲଚ୍ଚୟଂ ସିୟା ॥
ତିରଚ୍ଛାନେ ତୁ ପାଚିତ୍ତି, ୱିସଟ୍ଠିଛଡ୍ଡନେ ଗରୁଂ ।
ହରିତୁଚ୍ଚାରପସ୍ସାୱ-ଛଡ୍ଡନେ ଦୁକ୍କଟଂ ମତଂ ॥
ଗଚ୍ଛତୋ କତିଧାପତ୍ତି, ଠିତସ୍ସ କତି ମେ ୱଦ ?
କତି ହୋନ୍ତି ନିସିନ୍ନସ୍ସ, ନିପନ୍ନସ୍ସାପି କିତ୍ତକା ?
ଗଚ୍ଛନ୍ତସ୍ସ ଚତସ୍ସୋୱ, ଠିତସ୍ସାପି ଚ ତତ୍ତକା ।
ନିସିନ୍ନସ୍ସ ଚତସ୍ସୋୱ, ନିପନ୍ନସ୍ସାପି ତତ୍ତକା ॥
ଭିକ୍ଖୁ ଭିକ୍ଖୁନିୟା ସଦ୍ଧିଂ, ସଂୱିଧାନେ ତୁ ଦୁକ୍କଟଂ ।
ପାଚିତ୍ତଞ୍ଞସ୍ସ ଗାମସ୍ସ, ଉପଚାରୋକ୍କମେ ସିୟା ॥
ଥୁଲ୍ଲଚ୍ଚୟଂ ପରିକ୍ଖିତ୍ତେ, ଗାମସ୍ମିଂ ପଠମେ ପଦେ ।
ଗରୁକଂ ଦୁତିୟେ ହୋତି, ଗାମନ୍ତରଂ ୱଜନ୍ତିୟା ॥
ପଟିଚ୍ଛନ୍ନେ ପନୋକାସେ, ଭିକ୍ଖୁନୀ ମିତ୍ତସନ୍ଥୱା ।
ପୋସସ୍ସ ହତ୍ଥପାସେ ତୁ, ପାଚିତ୍ତି ୟଦି ତିଟ୍ଠତି ॥
ହତ୍ଥପାସଂ ଜହିତ୍ୱାନ, ସଚେ ତିଟ୍ଠତି ଦୁକ୍କଟଂ ।
ଅରୁଣୁଗ୍ଗମନେ କାଲେ, ଦୁତିୟା ହତ୍ଥପାସକଂ ॥
ହିତ୍ୱା ତିଟ୍ଠନ୍ତିୟା ତସ୍ସା, ଥୁଲ୍ଲଚ୍ଚୟମୁଦୀରିତଂ ।
ହିତ୍ୱା ତିଟ୍ଠତି ଚେ ତସ୍ସା, ହୋତି ସଙ୍ଘାଦିସେସତା ॥
ନିସିନ୍ନାୟ ଚତସ୍ସୋୱ, ନିପନ୍ନାୟାପି ତତ୍ତକା ।
ହୋନ୍ତି ୱୁତ୍ତପ୍ପକାରାୱ, ୱିଞ୍ଞେୟ୍ୟା ୱିନୟଞ୍ଞୁନା ॥
ୟାୱତତିୟକେ ୱୁତ୍ତା, କତି ଆପତ୍ତିୟୋ ୱଦ ?
ୟାୱତତିୟକେ ୱୁତ୍ତା, ତିସ୍ସୋ ଆପତ୍ତିୟୋ ସୁଣ ॥
ଫୁସେ ପାରାଜିକାପତ୍ତିଂ, ଉକ୍ଖିତ୍ତସ୍ସାନୁୱତ୍ତିକା ।
ସଙ୍ଘାଦିସେସତା ସଙ୍ଘ-ଭେଦକସ୍ସାନୁୱତ୍ତିନୋ ॥
ଅନିସ୍ସଗ୍ଗେ ତୁ ପାଚିତ୍ତି, ପାପିକାୟ ଚ ଦିଟ୍ଠିୟା ।
ୟାୱତତିୟକେ ତିସ୍ସୋ, ହୋନ୍ତି ଆପତ୍ତିୟୋ ଇମା ॥
ଖାଦତୋ କତି ନିଦ୍ଦିଟ୍ଠା, ଭୋଜନପ୍ପଚ୍ଚୟା କତି ?
ଖାଦତୋ ପନ ତିସ୍ସୋୱ, ପଞ୍ଚ ଭୋଜନକାରଣା ॥
ଥୁଲ୍ଲଚ୍ଚୟଂ ମନୁସ୍ସାନଂ, ମଂସଂ ଖାଦତି, ଦୁକ୍କଟଂ ।
ସେସକାନଂ ତୁ, ପାଚିତ୍ତି, ଲସୁଣଂ ଭକ୍ଖୟନ୍ତିୟା ॥
ଅୱସ୍ସୁତସ୍ସ ପୋସସ୍ସ, ହତ୍ଥତୋ ହି ଅୱସ୍ସୁତା ।
ଗହେତ୍ୱା ଭୋଜନଂ କିଞ୍ଚି, ସବ୍ବଂ ମଂସଂ ଅକପ୍ପିୟଂ ॥
ୱିଞ୍ଞାପେତ୍ୱାନ ଅତ୍ତତ୍ଥଂ, ଗହେତ୍ୱା ଭୋଜନମ୍ପି ଚ ।
ଲସୁଣମ୍ପି ଚ ମିସ୍ସେତ୍ୱା, ଏକତଜ୍ଝୋହରନ୍ତିୟା ॥
ଥୁଲ୍ଲଚ୍ଚୟଞ୍ଚ ପାଚିତ୍ତି, ପାଟିଦେସନିୟମ୍ପି ଚ ।
ଦୁକ୍କଟଂ ଗରୁକଞ୍ଚାତି, ପଞ୍ଚ ଆପତ୍ତିୟୋ ସିୟୁଂ ॥
ଓଲୋକେନ୍ତସ୍ସ ନିଦ୍ଦିଟ୍ଠା, କତି ଆପତ୍ତିୟୋ ୱଦ ?
ଓଲୋକେନ୍ତସ୍ସ ନିଦ୍ଦିଟ୍ଠା, ଏକାପତ୍ତି ମହେସିନା ॥
ଦୁକ୍କଟଂ ରତ୍ତଚିତ୍ତେନ, ଅଙ୍ଗଜାତଂ ପନିତ୍ଥିୟା ।
ଓଲୋକେନ୍ତସ୍ସ ୱା ୱୁତ୍ତଂ, ମୁଖଂ ଭିକ୍ଖଂ ଦଦନ୍ତିୟା ॥
କତି ଉକ୍ଖିତ୍ତକା ୱୁତ୍ତା, ସମ୍ମାୱତ୍ତନକା କତି ?
ତୟୋ ଉକ୍ଖିତ୍ତକା ୱୁତ୍ତା, ତେଚତ୍ତାଲୀସ ୱତ୍ତନା ॥
ଅଦସ୍ସନପ୍ପଟୀକମ୍ମେ, ଆପନ୍ନାପତ୍ତିୟା ଦୁୱେ ।
ଏକୋ ଅପ୍ପଟିନିସ୍ସଗ୍ଗେ, ପାପିକାୟ ଚ ଦିଟ୍ଠିୟା ॥
କତି ନାସିତକା ୱୁତ୍ତା, କତୀନଂ ଏକୱାଚିକା ?
ତୟୋ ନାସିତକା ୱୁତ୍ତା, ତିଣ୍ଣନ୍ନଂ ଏକୱାଚିକା ॥
ମେତ୍ତିୟା ଦୂସକୋ ଚେୱ, କଣ୍ଟକୋତି ତୟୋ ଇମେ ।
ଲିଙ୍ଗସଂୱାସଦଣ୍ଡେହି, ନାସିତା ହି ୟଥାକ୍କମଂ ॥
ଏକୁପଜ୍ଝାୟକେନେୱ, ଏକେନାଚରିୟେନ ଚ ।
ଦ୍ୱେ ତୟୋ ଅନୁସାୱେତୁଂ, ୱଟ୍ଟତୀତି ଚ ନିଦ୍ଦିସେ ॥
ଞତ୍ତିୟା କପ୍ପନା ଚେୱ, ତଥା ୱିପ୍ପକତମ୍ପି ଚ ।
ଅତୀତକରଣଞ୍ଚେତି, ତୟୋ କମ୍ମସ୍ସ ସଙ୍ଗହା ॥
ଞତ୍ତିୟାକପ୍ପନା ନାମ, ‘‘ଦଦେୟ୍ୟ’’ଚ୍ଚେୱମାଦିକା ।
‘‘ଦେତି ସଙ୍ଘୋ, କରୋତୀ’’ତି, ଆଦି ୱିପ୍ପକତଂ ସିୟା ॥
‘‘ଦିନ୍ନଂ, କତଂ’’ ପନିଚ୍ଚାଦି, ଅତୀତକରଣଂ ସିୟା ।
ସଙ୍ଗୟ୍ହନ୍ତି ହି ସବ୍ବାନି, କମ୍ମାନେତେହି ତୀହିପି ॥
ସଙ୍ଘେ ସଲାକଗାହେନ, କମ୍ମେନପି ଚ କେୱଲଂ ।
କାରଣେହି ପନ ଦ୍ୱୀହି, ସଙ୍ଘୋ ଭିଜ୍ଜତି, ନଞ୍ଞଥା ॥
ସଙ୍ଘଭେଦକଭିକ୍ଖୁସ୍ସ, ତସ୍ସ ପାରାଜିକଂ ସିୟା ।
ଅନୁୱତ୍ତକଭିକ୍ଖୂନଂ, ଥୁଲ୍ଲଚ୍ଚୟମୁଦୀରିତଂ ॥
ପୟୁତ୍ତାୟୁତ୍ତୱାଚାୟ, କତି ଆପତ୍ତିୟୋ ଫୁସେ ?
ପୟୁତ୍ତାୟୁତ୍ତୱାଚାୟ, ଛ ପନାପତ୍ତିୟୋ ଫୁସେ ॥
ଆଜୀୱହେତୁ ପାପିଚ୍ଛୋ, ଇଚ୍ଛାପକତମାନସୋ ।
ଅସନ୍ତଂ ଉତ୍ତରିଂ ଧମ୍ମଂ, ଉଲ୍ଲପନ୍ତୋ ପରାଜିତୋ ॥
ସଞ୍ଚରିତ୍ତଂ ସମାପନ୍ନେ, ତଥା ସଙ୍ଘାଦିସେସତା ।
ୟୋ ତେ ୱସତି ଆରାମେ, ୱଦଂ ଥୁଲ୍ଲଚ୍ଚୟଂ ଫୁସେ ॥
ୱିଞ୍ଞାପେତ୍ୱା ପଣୀତଂ ତୁ, ଭୋଜନଂ ଭିକ୍ଖୁ ଭୁଞ୍ଜତି ।
ପାଚିତ୍ତି ଭିକ୍ଖୁନିୟା ଚେ, ପାଟିଦେସନିୟଂ ସିୟା ॥
ୱିଞ୍ଞାପେତ୍ୱାନ ସୂପଂ ୱା, ଓଦନଂ ୱା ଅନାମୟୋ ।
ଭିକ୍ଖୁ ଭୁଞ୍ଜତି ଚେ ତସ୍ସ, ହୋତି ଆପତ୍ତି ଦୁକ୍କଟଂ ॥
ଦସସତାନି ରତ୍ତୀନଂ, ଛାଦେତ୍ୱାପତ୍ତିୟୋ ପନ ।
ଦସ ରତ୍ତିୟୋ ୱସିତ୍ୱାନ, ମୁଚ୍ଚେୟ୍ୟ ପାରିୱାସିକୋ ॥
ପାରାଜିକାନି ଅଟ୍ଠେୱ, ତେୱୀସ ଗରୁକା ପନ ।
ଦ୍ୱେୟେୱାନିୟତା ୱୁତ୍ତା, ବୁଦ୍ଧେନାଦିଚ୍ଚବନ୍ଧୁନା ॥
ନିସ୍ସଗ୍ଗିୟାନି ୱୁତ୍ତାନି, ଦ୍ୱେଚତ୍ତାଲୀସ ହୋନ୍ତି ହି ।
ହୋନ୍ତି ପାଚିତ୍ତିୟା ସବ୍ବା, ଅଟ୍ଠାସୀତିସତଂ ପନ ॥
ପାଟିଦେସନିୟା ୱୁତ୍ତା, ଦ୍ୱାଦସେୱ ମହେସିନା ।
ୱୁତ୍ତା ପନ ସୁସିକ୍ଖେନ, ପଞ୍ଚସତ୍ତତି ସେଖିୟା ॥
ପଞ୍ଞତ୍ତାନି ସୁପଞ୍ଞେନ, ଗୋତମେନ ୟସସ୍ସିନା ।
ଭୱନ୍ତି ପନ ସବ୍ବାନି, ଅଡ୍ଢୁଡ୍ଢାନି ସତାନି ହି ॥
ୟୋ ପନେତେସୁ ୱତ୍ତବ୍ବୋ ।
ସାରଭୂତୋ ୱିନିଚ୍ଛୟୋ ।
ସୋ ମୟା ସକଲୋ ୱୁତ୍ତୋ ।
ସମାସେନେୱ ସବ୍ବଥା ॥
ମୟା ସୁଟ୍ଠୁ ୱିଚାରେତ୍ୱା, ପାଳିଅଟ୍ଠକଥାନୟଂ ।
କତତ୍ତା ଆଦରଂ କତ୍ୱା, ଉଗ୍ଗହେତବ୍ବମେୱିଦଂ ॥
ଅତ୍ଥେ ଅକ୍ଖରବନ୍ଧେ ୱା, ୱିଞ୍ଞାସସ୍ସ କମେପି ୱା ।
କଙ୍ଖା ତସ୍ମା ନ କାତବ୍ବା, କାତବ୍ବା ବହୁମାନତା ॥
ସଉତ୍ତରଂ ୟୋ ଜାନାତି ।
ୱିନୟସ୍ସ ୱିନିଚ୍ଛୟଂ ।
ନିସ୍ସୟଂ ସୋ ୱିମୁଞ୍ଚିତ୍ୱା ।
ୟଥାକାମଙ୍ଗମୋ ସିୟା ॥
ନିସ୍ସୟଂ ଦାତୁକାମେନ, ସୱିଭଙ୍ଗଂ ସମାତିକଂ ।
ସୁଟ୍ଠୁ ୱାଚୁଗ୍ଗତଂ କତ୍ୱା, ଞତ୍ୱା ଦାତବ୍ବମେୱିଦଂ ॥
ଇମଂ ପଠତି ଚିନ୍ତେତି, ସୁଣାତି ପରିପୁଚ୍ଛତି ।
ୱାଚେତି ଚ ପରଂ ନିଚ୍ଚଂ, ଅତ୍ଥଂ ଉପପରିକ୍ଖତି ॥
ୟୋ ତସ୍ସ ପନ ଭିକ୍ଖୁସ୍ସ, ଅତ୍ଥା ୱିନୟନିସ୍ସିତା ।
ଉପଟ୍ଠହନ୍ତି ସବ୍ବେୱ, ହତ୍ଥେ ଆମଲକଂ ୱିୟ ॥
ଇମଂ ପରମମୁତ୍ତରଂ ଉତ୍ତରଂ ।
ନରୋ ହମତସାଗରଂ ସାଗରଂ ।
ସିୟା ୱିନୟପାରଗୋ ପାରଗୋ ॥
ୱିଧୂୟ ସିକ୍ଖେ ଗୁଣସଂହିତଂ ହିତଂ ।
ନରୋ ହି ସକ୍କଚ୍ଚୱପୂରତୋ ରତୋ ।
ସୁଖସ୍ସ ସବ୍ବଙ୍ଗଣକମ୍ମଦଂ ପଦଂ ॥
ୱିନୟେ ପଟୁଭାୱକରେ ପରମେ ।
ପିଟକେ ପଟୁତଂ ଅଭିପତ୍ଥୟତା ।
ୱିଧିନା ପଟୁନା ପଟୁନା ୟତିନା ।
ପରିୟାପୁଣିତବ୍ବମିଦଂ ସତତଂ ॥
ନିଗମନକଥା
ରଚିତୋ ବୁଦ୍ଧଦତ୍ତେନ, ସୁଦ୍ଧଚିତ୍ତେନ ଧୀମତା ।
ସୁଚିରଟ୍ଠିତିକାମେନ, ସାସନସ୍ସ ମହେସିନୋ ॥
ଅନ୍ତରେନନ୍ତରାୟଂ ତୁ, ୟଥା ସିଦ୍ଧିମୁପାଗତୋ ।
ଅତ୍ଥତୋ ଗନ୍ଥତୋ ଚେୱ, ଉତ୍ତରୋୟମନୁତ୍ତରୋ ॥
ତଥା ସିଜ୍ଝନ୍ତୁ ସଙ୍କପ୍ପା, ସତ୍ତାନଂ ଧମ୍ମସଂୟୁତା ।
ରାଜା ପାତୁ ମହିଂ ସମ୍ମା, କାଲେ ଦେୱୋ ପୱସ୍ସତୁ ॥
ୟାୱ ତିଟ୍ଠତି ସେଲିନ୍ଦୋ, ୟାୱ ଚନ୍ଦୋ ୱିରୋଚତି ।
ତାୱ ତିଟ୍ଠତୁ ସଦ୍ଧମ୍ମୋ, ଗୋତମସ୍ସ ମହେସିନୋ ॥
ଖନ୍ତିସୋରଚ୍ଚସୋସୀଲ୍ୟ-ବୁଦ୍ଧିସଦ୍ଧାଦୟାଦୟୋ ।
ପତିଟ୍ଠିତା ଗୁଣା ୟସ୍ମିଂ, ରତନାନୀୱ ସାଗରେ ॥
ୱିନୟାଚାରୟୁତ୍ତେନ, ତେନ ସକ୍କଚ୍ଚ ସାଦରଂ ।
ୟାଚିତୋ ସଙ୍ଘପାଲେନ, ଥେରେନ ଥିରଚେତସା ॥
ସୁଚିରଟ୍ଠିତିକାମେନ, ୱିନୟସ୍ସ ମହେସିନୋ ।
ଭିକ୍ଖୂନଂ ପାଟୱତ୍ଥାୟ, ୱିନୟସ୍ସ ୱିନିଚ୍ଛୟେ ॥
ଅକାସିଂ ପରମଂ ଏତଂ, ଉତ୍ତରଂ ନାମ ନାମତୋ ।
ସୱନେ ସାଦରଂ କତ୍ୱା, ସିକ୍ଖିତବ୍ବୋ ତତୋ ଅୟଂ ॥
ପଞ୍ଞାସାଧିକସଙ୍ଖ୍ୟାନି, ନୱଗାଥାସତାନି ହି ।
ଗଣନା ଉତ୍ତରସ୍ସାୟଂ, ଛନ୍ଦସାନୁଟ୍ଠୁଭେନ ତୁ ॥
ଗାଥା ଚତୁସହସ୍ସାନି, ସତଞ୍ଚ ଊନୱୀସତି ।
ପମାଣତୋ ଇମା ୱୁତ୍ତା, ୱିନୟସ୍ସ ୱିନିଚ୍ଛୟେତି ॥
ଇତି ତମ୍ବପଣ୍ଣିୟେନ ପରମୱେୟ୍ୟାକରଣେନ ତିପିଟକନୟୱିଧିକୁସଲେନ ପରମକୱିଜନହଦୟପଦୁମୱନୱିକସନକରେନ କୱିୱରୱସଭେନ ପରମରତିକରୱରମଧୁରୱଚନୁଗ୍ଗାରେନ ଉରଗପୁରେନ ବୁଦ୍ଧଦତ୍ତେନ ରଚିତୋ ଉତ୍ତରୱିନିଚ୍ଛୟୋ ସମତ୍ତୋତି ।
ଉତ୍ତରୱିନିଚ୍ଛୟୋ ନିଟ୍ଠିତୋ ।