ସମନ୍ତକୂଟୱଣ୍ଣନା
॥ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ସତତୱିତତ କିତ୍ତିଂ ଧସ୍ତକନ୍ଦପ୍ପଦପ୍ପଂ
ତିଭୱହିତୱିଧାନଂ ସବ୍ବଲୋକେକକେତୁଂ,
ଅମିତମତିମନଗ୍ଘଂ ସନ୍ତିଦଂ ମେରୁସାରଂ
ସୁଗତମହମୁଦାରଂ ରୂପସାରଂ ନମାମି ।
ହତଦୁରିତତୁସାରଂ ମୋହପଙ୍କୋପତାପଂ
ମନକମଲୱିକାସଂ ଜନ୍ତୁନଂ ସେସକାନଂ,
କୁମତିକୁମୁଦନାସଂ ବୁଦ୍ଧପୁବ୍ବାଚଲଗ୍ଗା
ଉଦିତମହମୁଦାରଂ ଧମ୍ମଭାନୁଂ ନମାମି ।
ସକଲୱିମଲସୀଲଂ ଧୁତପାପାରିଜାଲଂ
ସୁରନରମହନୀୟଂ ପାହୁନେୟ୍ୟାହୁନେୟ୍ୟଂ,
ଉଜୁପଥପଟିପନ୍ନଂ ପୁଞ୍ଞଖେତ୍ତଂ ଜନାନଂ
ଗଣମହମଭିୱନ୍ଦେ ସାରଦଂ ସାଦରେନ ।
ଇତି କଳିତ ପଣାମା ହନ୍ତ୍ୱ ସବ୍ବୋପସଗ୍ଗେ
ସୁଗତୱିମଲ ପାଦମ୍ଭୋଜସମ୍ପାତ ପୂତଂ,
ସୁମନସିଖରିରାଜଂ ୱଣ୍ଣୟିସ୍ସଂ ସୁରାନଂ
ୱସତି ମତୁଲମେତଂ ସାଧୁଜନ୍ତୁ ସୁଣନ୍ତୁ ।
ସୱଣା ଲପନା ଚେୱ ସତିୟା ଚାପି ୱନ୍ଦନା,
ୟସ୍ସ ସମ୍ମା ସୁଖୀ ହୋତୀ ନିବ୍ବାଣଞ୍ଚାଧିଗଚ୍ଛତି ।
ତସ୍ମା ସପ୍ପୁରିସେହେ’ଦଂ ପତ୍ଥେନ୍ତେହି ତିସମ୍ପଦଂ,
ସୱଣୀୟଞ୍ହି ସାଧୂହି ଅଚିକ୍ଖିତ୍ତେନ ଚେତସା ।
ୟୋ ଲୋକତିଲକୋ ନାଥୋ ପୂରେତ୍ୱା ଦସ ପାରମୀ,
ଜାତୋସି ତୁସିତେ କାୟେ ସନ୍ତୁସିତୋ’ତି ୱିସ୍ସୁତୋ ।
ଆରାଧିତୋ ସୁରାଦୀହି କାଲୋ ମାରିସ ତେ ଅୟଂ,
ତିଣ୍ଣୋ ତାରୟିମଂ ଲୋକଂ ବହୂ ଅପ୍ପରଜକ୍ଖକା ।
ଏତଦତ୍ଥାୟ ତେ ୱୀର ପୂରିତା ଦସ ପାରମୀ,
ବାହୁଂ ପିତୁସ୍ସ ପୁତ୍ତୋ’ୱ ଲୋକୋ ଆଲମ୍ବତେ ତୁୱଂ ।
ତେସଂ ତଂ ୱଚନଂ ସୁତ୍ୱା ମହାସତ୍ତୋ ମହାମତୀ,
ୱିଲୋକନେ ୱିଲୋକେତ୍ୱା ପଞ୍ଚାମଲ ୱିଲୋଚନୋ ।
ଜମ୍ବୁଦୀପଗ୍ଗକମଲେ କଣ୍ଣିକା’ୱ ମନୋରମା,
ପୁରୀ କପିଳୱତ୍ଥୂ’ସି ୱିସାଣା’ୱ ସୁଧାସିନଂ ।
ସିଙ୍ଗୀନିକ୍ଖମୟାଭାସ ତୁଙ୍ଗସିଙ୍ଗସମଙ୍ଗିତା,
ମଣିସୀହପଞ୍ଜରାକିଣ୍ଣ ପାସାଦା ୟତ୍ଥ ଭାସରେ ।
ସଘନେ ଗଗନେ ନିଚ୍ଚଂ ସତେରତସତାନି’ୱ,
ଅନିଲେରିତପଜ୍ଜୋତ ସୋଣ୍ଣକେତୁ ଅହୂ ୟହିଂ ।
ଜନାନଂ ନୀଲନେତ୍ତେହି ୱଦନେହି ତୁ ୟା ପୁରୀ,
ମଧୁପାଲିସମୋନଦ୍ଧ କଞ୍ଜିନୀ ସିରିମାୱହେ ।
ରଙ୍ଗତୁଙ୍ଗତୁରଙ୍ଗେହି ଗଜ୍ଜିତେହି ଚ ୟା ପୁରୀ,
ସଘୋସୁତ୍ତୁଙ୍ଗକଲ୍ଲୋଲ ଲୋଲସାଗରସନ୍ତିଭା ।
ଅୱ୍ହମାନା’ୱ ଦେୱାନଂ ପୁରଲଖ୍ୟା ଭୁଜା ଇୱ,
ମନ୍ଦାନିଲେରିତା ତୁଙ୍ଗ ନାନାରାଗଦ୍ଧଜା ୟହିଂ ।
ନାନାୱେସଧରା ୟସ୍ମିଂ ନାନାଭୂସଣ ଭୂସିତା,
ନାନାସମ୍ପତ୍ତିସଂୟୁତ୍ତା ନାନାୱିଜ୍ଜାସୁ ପାରଗା ।
ନୱୟୋବ୍ବନ ଉଦ୍ଦାମା ରୂପେନ ଚ ମନୋହରା,
ସଚ୍ଚେସୁ ନିରତା ନିଚ୍ଚଂ ଅନକ୍କୁଟ୍ଠକୁଲା ସିୟୁଂ ।
ନିଚ୍ଚଂ କୀଳା ୱିଦଦ୍ଧାହି ନରନାରୀହି ସେୱିତା,
ୟା ପୁରୀ ସାଧୁରୂପା’ସି ମଧୁରାଲାପିନୀହି ଚ ।
ତସ୍ମିଂ ସଦ୍ଧାଦୟୋପେତ ଓକ୍କାକକୁଲକେତୁକୋ,
ସୁଦ୍ଧୋଦନୱ୍ହୟୋ ଆସୀ ୱିସ୍ସୁତୋ ଭୁୱନତ୍ତୟେ ।
ୟସ୍ସଙ୍ଘିକମଲେ ସବ୍ବ ଭୁଭୁଜାନଂ ମହୀତଲେ,
କିରୀଟମଣିହିଙ୍ଗାଲି କୀଳନ୍ତୀ’ୱ ନିରନ୍ତରଂ ।
ୟସ୍ସ ପତ୍ଥଟତେଜେନ ପୁରନେତାପି ଦିୱାକରୋ,
ୱହନୀଚ’ମ୍ବରେ ଲୀଲଂ ଓସଧୀପତିନୋ ଦିୱା ।
ୟସ୍ସ ଦାନପ୍ପୱାହୋ ତୁ ନାନାୟାଚକ ଜନ୍ତୁନଂ,
ମନୋଦଧୀସୁ ୱେଲନ୍ତେତିକ୍କମନ୍ତୋୱ ସତ୍ତତଂ ।
ମତିୟା ସୁରମନ୍ତୀୱ ଧନେନ ଧନଦୋ ୱିୟ,
ରୂପେନ କୁସୁମେସୁ’ୱ ୟୋ ଜୁମ୍ହତି ମହୀତଲେ ।
ତସ୍ସାଭିସିତ୍ତା ରଜ୍ଜେନ ମହାମାୟାତି ୱିସ୍ସୁତା,
ଚନ୍ଦିକା ୱିୟ ଚନ୍ଦସ୍ସ ଗିରିରାଜା’ୱ କପାଲିତୋ ।
ଲକ୍ଖୀ’ୱ ୱାସୁଦେୱସ୍ସ ସୀତା’ୱ ରାମରାଜିନୋ,
ମହେସୀସି ୱରାରୋହା ସୁନ୍ଦରୀ ସୁନ୍ଦରାଧରା ।
ତସ୍ସା କୁଚ୍ଛିକରଣ୍ଡମ୍ହି ଅନଗ୍ଘରତନଂ ୱିୟ,
ଖତ୍ତିଂସାହି ନିମିତ୍ତେହି ୱିମ୍ହାପେନ୍ତୋ ସଦେୱକଂ ।
ସିତମ୍ବୁଜକରୋ ସନ୍ତୋ ସିତେଭଚ୍ଛାପକୋ ୱିୟ,
କତ୍ୱା ପଦକ୍ଖିଣଂ ମାତୁ ପଟିସନ୍ଧିମଗଣ୍ହି ସୋ ।
ଦସେକାଦସମାସେନ ତସ୍ସେୱଂ ଆସି ଚେତନା,
ପସ୍ସିତୁଂ ସକଞାତୀନଂ ଗନ୍ତ୍ୱାନ ନଗରଂ ତଦା ।
ନିୱେଦେତ୍ୱା ତମତ୍ଥଂ ସା ରଞ୍ଞୋ ତେନ ସୁସଜ୍ଜିତେ,
ସପରିଚ୍ଛଦା ତଦା ମଗ୍ଗେ ଗଚ୍ଛନ୍ତି ଅନ୍ତରାପଥେ ।
ଦେୱତାନଂ ମନୋନନ୍ଦକର ନନ୍ଦନ ସନ୍ନିଭଂ,
ଦିସ୍ୱାନ ଲୁମ୍ବିନିଂ ନାମ ଉୟ୍ୟାନଂ ମନନନ୍ଦନଂ ।
ତସ୍ମିଂ କୀଳିତୁମୁସ୍ସାହା ପୱିସିତ୍ୱାନ ତଂ ୱନଂ,
କୀଳନ୍ତି ଉପଗନ୍ତ୍ୱାନ ମଙ୍ଗଲଂ ସାଲପାଦପଂ ।
ୱିଲୋଲ ପଲ୍ଲୱାକିଣ୍ଣଂ ସୁଫୁଲ୍ଲକୁସୁମୋନତଂ,
ଗହେତ୍ୱା ସାଲସାଖଂ ସା ସୁରତ୍ତକର ପଲ୍ଲୱା ।
ଦେୱେହି ଗହିତା’ରକ୍ଖା ମହମାନେ ସଦେୱକେ,
ଜନେସି ତନୟଂ ମାୟା ତତ୍ରଟ୍ଠା ଲୋକଲୋଚନଂ ।
ବ୍ରହ୍ମାନୋ ଲୋକପାଲା ଚ ମନୁସ୍ସା କମତୋ ତଦା,
ସୋଣ୍ଣଜାଲାଜିନାଦୀହି ଗଣ୍ହିଂସୁ ଜନନନ୍ଦନଂ ।
ମହିଂ ପତିଟ୍ଠିତୋ ଧୀରୋ ପସ୍ସିତ୍ୱାନ ତତୋ ଦିସା,
ଉତ୍ତରାଭିମୁଖୋ ସତ୍ତପଦଂ ଗଣ୍ତ୍ୱା’ମ୍ବୁଜେ ଠିତୋ ।
ଦିସନ୍ତମୱଲୋକେତ୍ୱା ସୁଫୁଲ୍ଲମ୍ବୁଜଲୋଚନୋ,
ନିଚ୍ଛାରେସାସଭିଂ ୱାଚଂ ଅଗ୍ଗୋ ସେଟ୍ଠୋ’ତିଆଦିନା ।
ବ୍ରହ୍ମାମରନରାଦୀହି ପୂଜିତୋ ଚ ନମସ୍ସିତୋ,
କମେନ ଅଭିୱଡ୍ଢନ୍ତୋ ଜୁଣ୍ହପକ୍ଖେ ସସୀ ୟଥା ।
ବ୍ରହ୍ମୂନଂ ଛତ୍ତଛାୟାୟ ମନ୍ଦାରକୁସୁମନ୍ତରେ,
ସାନନ୍ଦାମନ୍ଦଦେୱେହି ଧୁତଚାମରମଜ୍ଝଗୋ ।
ଦିବ୍ବେହି ରୂପସଦ୍ଦେହି ଗନ୍ଧେହି ଚ ରସେହି ଚ,
ଫୋଟ୍ଠବ୍ବେହି ଚ ଦିବ୍ବେହି ମୋଦମାନୋ ଅନେକଧା ।
ଦିବ୍ବେହି ରମଣୀୟେହି ନଚ୍ଚେହି ୱାଦିତେହି ଚ,
ପଦାନେକସହସ୍ସେହି ଥୂୟମାନଗୁଣାକରୋ ।
ପତ୍ୱା ସୋଳସମଂ ୱସ୍ସଂ ଞାତିସଙ୍ଘସ୍ସ ମଜ୍ଝଗୋ,
ଦସ୍ସେତ୍ୱା’ସେସସିପ୍ପଂ ତଂ ଲୋକେ ୱିଜ୍ଜତି ୟଂ ତଦା ।
ଞାତିସଙ୍ଘଂ ପମୋଦେନ୍ତୋ ଦେୱେ ଚ ମନୁଜେ’ପି ଚ,
ଲଦ୍ଧା ୟସୋଧରଂ ଦେୱିଂ’ନୁକୂଲଂ ଜାତିଜାତିୟଂ ।
ସୋଣ୍ଣଦପ୍ପଣସଙ୍କାସ ସୋମ୍ମାନନ ୱିଭୁସିତଂ,
ନୀଲନୀରଜସଙ୍କାସ ୱିସାଲାୟତ ଲୋଚନଂ ।
ସିଙ୍ଗାରମନ୍ଦିରଦ୍ୱାରେ ଧଜୋପମଭମୁଦ୍ୱୟଂ,
ହେମକାହଲସଙ୍କାସ ନାସିକଂ ରୂପଲକ୍ଖିୟା
ନୀଲୱେଲ୍ଲିତଧମ୍ମିଲ୍ଲ ଜିମୁତୋଭୟ କୋଟିୟଂ,
ନିଚ୍ଚୱିଜ୍ଜୁଲ୍ଲତାଚକ୍କ ମନୁଞ୍ଞକଣ୍ଣପାସକଂ ।
ସାତକୁମ୍ଭନିଭାଭାସ ପୟୋଧରଘଟଦ୍ୱଂ,
ସୁୱଣ୍ଣଦ୍ଦିତଟାୟାତ ନିଜ୍ଝରାକାରହାରକଂ
ଦେହଦେୱଦ୍ଦୁମାଲମ୍ବ ପାରୋହାଭଭୁଜଦ୍ୱୟଂ,
ଅଙ୍ଗୁଲୀପଲ୍ଲୱନ୍ତମ୍ବୁ ବିନ୍ଦୁଚାରୁ ନଖାୱଲିଂ ।
ଦେହମାଲାଲିମାଲାଭ ରୋମରାଜିୱିରାଜିତଂ,
ରୂପଣ୍ଣୱତରଙ୍ଗାହ ୱଲିତ୍ତୟ ୱିଚିତ୍ତକଂ ।
ସୋଣ୍ଣରମ୍ଭାସମାୱଟ୍ଟ ପିଣୋରୁଦ୍ୱୟ ସୁନ୍ଦରଂ,
ସନ୍ନିରକଲିକାକାର ଚାରୁଜଙ୍ଘା ୱିଭୂସିତଂ ।
ପଚ୍ଚକ୍ଖରୂପଲକ୍ଖିଞ୍ଚ ଲୀଲାନିଚୟ ସନ୍ନିଭଂ,
ଗୁଣାନମାକରଂ ସାଧୁ ୱେଲଂୱ ରତିସାଗରେ ।
କନ୍ତୋ ୱସନ୍ତରାଜା’ୱ କନ୍ଦପ୍ପୋ’ୱ ସୁରୂପୱା,
ସସୀ’ୱ ଦସ୍ସନୀୟୋ ଚ ସୂରିୟୋ ୱିୟ ତେଜୱା ।
ଅଚଲତ୍ତେନ ମେରୂୱ ଗମ୍ଭୀରେନଣ୍ଣୱୋ ୱିୟ,
ବ୍ରହ୍ମସ୍ସରୋ ପିୟଂୱାଦୀ ପଞ୍ଗ୍ଞାୟ ଚ ଅନୂପମୋ ।
ୱସନ୍ତୋ ସୋ ମହାୱୀରୋ ପୁରସ୍ମିଂ କପିଲୱ୍ହୟେ,
ଦିସ୍ୱା ନିମିତ୍ତେ ଚତୁରୋ ଉୟ୍ୟାନ ଗମନଞ୍ଜସେ ।
ପବ୍ବଜ୍ଜାଭିରତୋ ନାଥୋ ଗନ୍ତ୍ୱା ଉୟ୍ୟାନଭୂମିୟଂ,
ସୁଫୁଲ୍ଲଚମ୍ପକାସୋକ ନାଗାଦା’ଗେହି ମଣ୍ଡିତଂ ।
ଫୁଲ୍ଲପଙ୍କଜ କଳ୍ହାର ଜଲାଜଲୟ ସତାକୁଲଂ,
ମନ୍ଦମନ୍ଦାନିଲାୟାତ ନାନାମୋଦେହି ୱାସିତଂ ।
ସରା ସରଂ ସମାୟାତ ମଧୁବ୍ବତ ନିସେୱିତଂ,
ଫଲପୁପ୍ଫରସୁଦ୍ଦାମ ଦ୍ୱିଜ ସଙ୍ଘ ନିକୂଜିତଂ ।
ନଚ୍ଚନ୍ତ ମତ୍ତମୋରାନଂ ନିଚ୍ଚଂ ମଣ୍ଡପସନ୍ତିଭଂ,
ଦିବ୍ବନ୍ତ ମିଗସଗ୍ଘାନଂ କୀଳାମଣ୍ଡପ ସନ୍ନିଭଂ ।
ସମୀର ସିସିରୋଦାର ଧାରାସୀକର ୱାରିହି,
ଧାରାମଣ୍ଡପ ପନ୍ତୀହି ଜନାନନ୍ଦକରଂ ୱରଂ ।
ଉୟ୍ୟାନୱନମାଗମ୍ମ ଦେୱରାଜାୱ ନନ୍ଦନଂ,
କୀଳନ୍ତୋ ନିଜପୁତ୍ତସ୍ସ ସୁତ୍ୱାନ ଜାତସାସନଂ ।
ନିୱତ୍ତୋ ୱିସ୍ସକମ୍ମେନ ସହସ୍ସକ୍ଖୋୱ ଭୂସିତୋ,
ପୁରଂ ପୱିସମାନୋୱ କିସା ଗୋତମି ଭାସିତଂ ।
ସୁତ୍ୱାନ ନିବ୍ବୁତପଦଂ ତଦା ଚିତ୍ତାନୁକୂଲକଂ,
ସନ୍ତୁଟ୍ଠୋ ସାନୁରାଗୋ ଚ ଲକ୍ଖଗ୍ଘଂ ତାରଭାସୁରଂ ।
ହାରଂ ତିସ୍ସାୟ ପେସେତ୍ୱା ଗନ୍ତ୍ୱାନ ସକମନ୍ଦିରଂ,
ଦେୱରାଜୱିଲାସେନ ନିସୀଦି ପୱରାସନେ ।
ଅଥାଗମ୍ମ ତଦା ନେକନାଟିକା ପରିୱାରୟୁଂ,
ୱଜ୍ଜନ୍ତି ଭେରିୟୋ ତାସୁ ପଗ୍ଗୟ୍ହ କାଚି ନାରିୟୋ ।
ନାନାଲୟସମାକିଣ୍ଣଂ ଗୀତଂ ଗାୟନ୍ତି କାଚି’ପି,
ଧମନ୍ତି ସୁସିରଂ କାଚି କାଚି ୱାଦେନ୍ତି ତନ୍ତିୟୋ ।
ଚାରୁ ବିମ୍ବାଧରାରମ୍ମ ପୟୋଧରଭରା ସୁଭା,
ୱିସାଲାୟତ ନୀଲକ୍ଖା ସୋମସୋମ୍ମାନନା ତଦା ।
ନଚ୍ଚନ୍ତି ପୁରତୋ ତସ୍ସ ଭେରିମଣ୍ଡଲ ମଜ୍ଝଗା,
ଦେୱକଞ୍ଞାୱ ରଙ୍ଗମ୍ହୀ ରସଭାୱନିରନ୍ତରଂ ।
ଦିସ୍ୱାନ ସୋ ତମଚ୍ଛରିୟଂ ୱିରତ୍ତୋ ୱିସୟେ ତଦା,
ଉରତ୍ତାଳଞ୍ଚ ଅଦ୍ଦକ୍ଖି ସବ୍ବନ୍ତଂ ଭେରିତାଳନଂ ।
ପରିଦେୱଂ’ଚୁପଟ୍ଠାସି ଗୀତଂ ସଂସାରସାଗରେ,
ୱାୟୁୱେଗ ୱିକାରଂ’ୱ ନଚ୍ଚଂ ଚିନ୍ତେସି ନାୟକୋ ।
’କଦାହଂ ଘରମୋସ୍ସଜ୍ଜ ପବ୍ବଜ୍ଜାସିରି ମୁବ୍ବହେ ?’
ଇଚ୍ଚେୱଂ ଚିନ୍ତୟନ୍ତୋ ସୋ ସୁପନ୍ତୋୱ ସୟୀ ତହିଂ ।
’ୟଂ ନିସ୍ସାୟ ମୟଂ ଏତ୍ଥ ନଚ୍ଚଗୀତେସୁ ୱ୍ୟାୱଟା,
ସୋ’ୟଂ’ଦାନି ସୁପୀ’ ଅମ୍ହେ କସ୍ସଦାନି କରୋମ ତଂ ? ।
ଇତି ଚିନ୍ତିୟ ତେ ତତ୍ଥ ତୁରିୟେସୁ ସକେ ସକେ,
ଆଲମ୍ବା ସୟିତା କଞ୍ଞା ସୁସଞ୍ଞାଞ୍ଞମନିସ୍ସିତା ।
ଖାଦନ୍ତି କାଚି ଦନ୍ତାନି କାଚି ଲାଲା ୱହନ୍ତିୟୋ,
କାଚି ରୁଦନ୍ତିୟୋ ତତ୍ଥ ୱିଲପନ୍ତି ଅଥା’ପରା ।
କାକଚ୍ଛନ୍ତି’ପି ସେମ୍ହମ୍ପି ଗିଲନ୍ତି ଚ ଚମନ୍ତି ଚ,
କରୋନ୍ତି ନାଦଂ ନାସାୟ ଘରୂ’ତି ଚ ଖିପନ୍ତି ଚ ।
ମୁତ୍ତୟନ୍ତି ତଦା କାଚି ରହସ୍ସଂ ୱିଚରନ୍ତି ଚ,
ଦୁଗ୍ଗନ୍ଧଂ ୱାତି ତଂ ଠାନଂ ସୁସାନଂ ଆମକଂ ୟଥା ।
ପବୁଦ୍ଧୋ ଅଡ୍ଢରତ୍ତମ୍ହି ଗତେ ତତ୍ଥ ନିସୀଦିୟ,
ଅଦ୍ଦକ୍ଖି ତାସଂ ନେକାନି ୱିକାରାନି ତହିଂ ତଦା ।
ତସ୍ସେୱଂ ପେକ୍ଖମାନସ୍ସ ଭୱେ ସଂୱିଗ୍ଗଚେତସୋ,
ଆଦିତ୍ତଂୱ ଉପଟ୍ଠାସି ମନେ ଖଲୁ ଭୱତ୍ତୟଂ ।
ଦାୱାନଲ ସମାଦିତ୍ତ ମହାରଞ୍ଞାୟଥା ଗଜୋ,
ତଥେୱାସି ନରିନ୍ଦସ୍ସ ଗେହତୋ ଗମନେ ମତୀ ।
ତତୋ ୱୁଟ୍ଠାୟ ସୟନା କରୋନ୍ତୋ ଅଭିନିକ୍ଖମଂ,
ୱିତକ୍କେସି ମହାରାଜା ପସ୍ସିତୁଂ ସକମତ୍ରଜଂ ।
ପୱିସିତ୍ୱା ତତୋ ଗବ୍ଭଂ ସନିକଂ ସନ୍ତମାନସୋ,
ପସ୍ସିତ୍ୱା ସହ ପୁତ୍ତେନ ନିଦ୍ଦାୟନ୍ତିଂ ୟସୋଧରଂ ।
ଚିରାଗତଂ ମହାପେମଂ ଧାରୟଂ ସକମାନସେ,
ବୁଦ୍ଧୋ ହୁତ୍ୱାପି’ମଂ ସକ୍କା ପସ୍ସିତୁଂ ଇତି ଚିନ୍ତିୟ ।
ଗତୋ ନାଥୋ ତତୋ ଠାନା ବୋଧିୟା ବଦ୍ଧମାନସୋ
ତଦହେୱାସି ବୁଦ୍ଧୋତି କାମୁକୋ କୋ ନ ଚିନ୍ତୟେ ।
ସିନେରୁ ମୁଦ୍ଧରନ୍ତୋୱ ପାଦୁଦ୍ଧରିୟ ନିକ୍ଖମଂ,
ଛନ୍ନମାହୂୟ ଆନୀତଂ କନ୍ଥକଂ ତୁରଗାଧିପଂ ।
ଅସ୍ସରାଜଂ ତମାରୁୟ୍ହ ସହ ଛନ୍ନେନ ରତ୍ତିୟଂ,
ଦେୱେହି ୱିୱଟଦ୍ୱରା ପଟିପଜ୍ଜି ମହାପଥଂ ।
ଚକ୍କୱାଳେସୁ ନେକେସୁ ଦେୱତା ସୁସମାଗତା,
ଦୀପଧୂପଦ୍ଧଜେହେ ଚ ଗନ୍ଧମାଲେହି ପୂଜୟୁଂ ।
ପୁରତୋ ସଟ୍ଠୀସହସ୍ସାନି ଦଣ୍ଡଦୀପାନି ଧାରୟୁଂ,
ତଥା ଦକ୍ଖିଣପସ୍ସମ୍ହି ୱାମପସ୍ସେ ଚ ପଚ୍ଛତୋ ।
ଗଗନା ପୁପ୍ଫୱସ୍ସାନି ୱସ୍ସାପେସୁଂ ଛ ଦେୱତା,
ମନ୍ଦାରୱଂ କୋକନଦଂ ସୁଗନ୍ଧଂ ଚିତ୍ତପାଟ ଲିଂ ।
ଚମ୍ପକା ସୋକ ପୁନ୍ନାଗ ନାଗପୂଗାଗ ସମ୍ଭୱଂ,
ମାଲତୀୱସ୍ସିକୀୟାଦୀ ନାନାୱଲ୍ଲୀହି ସମ୍ଭୱଂ ।
ପଦୁମୁପ୍ପଲ କଲହାର କୁମୁଦାଦ୍ୟାମ୍ବୁ ସମ୍ଭୱଂ,
ସୁଗନ୍ଧମଧୁ ମତ୍ତାହି ଛପ୍ପଦାଲୀହି କୂଜିତଂ ।
ପୁପ୍ଫୱସ୍ସଂ ପୱସ୍ସିତ୍ଥ ତିଂସୟୋଜନମଞ୍ଜସେ,
ପସତ୍ତୋ ତତ୍ଥ ତୁରଗୋ ଦୁକ୍ଖତୋ ଅଗମୀ ତଦା ।
ଏୱଂ ପୂଜାୱିଧାନେହି ଗନ୍ତ୍ୱା’ନୋମଂ ମହାନଦିଂ,
ସିତସେକତ ସଙ୍କିଣ୍ଣଂ ବହୁମୀନକୁଲାକୁଲଂ ।
ତୀରଟ୍ଠୋ ପସ୍ସି ସୋ ଧୀରୋ ଗଙ୍ଗାନାରିଂ ରସାୱହଂ,
କରୋନ୍ତିଂ ୱୀଚିବାଭାତି ଏଣେପୁପ୍ଫୋପହାରକଂ ।
ଅସ୍ସେନ ତଂ ମହାନୋମଂ ଲଙ୍ଘାପେତ୍ୱା ମହାମତୀ,
ପରତୀରେ ପତିଟ୍ଠାସି ୱିମଲେ ୱାଲୁକା ତଲେ ।
ପବ୍ବଜିତୁଂ ମୟେତ୍ଥେୱ ୟୁତ୍ତଂ ନୋ ମେ ପପଞ୍ଚିତୁଂ,
ଇତି ଚିନ୍ତିୟ ଓଭାୟ ଧାରିତାଭରଣାନି ସୋ ।
ଛନ୍ନସ୍ସ ପଟିୟାଦେତ୍ୱା କନ୍ଥକଞ୍ଚ ହୟାଧିପଂ,
ନିସିତଂ ଖଗ୍ଗମୁଗ୍ଗୟ୍ହ ସମୋଲିଂ ଛିନ୍ଦି କୁନ୍ତଲଂ ।
ଏୱମାୱଜ୍ଜୟଂ ନାଥୋ ସଚେ’ହଂ ସୁଗତୋ ଭୱେ,
ତିଟ୍ଠତୁ ଗଗନେ ଗନ୍ତ୍ୱା ଇତି ଉକ୍ଖିପି ଚ’ମ୍ବରଂ ।
ତତୋ ସକ୍କୋ ମହଗ୍ଘେନ ମଣିଚଙ୍ଗୋଟକେନ ତଂ,
ପଟିଗ୍ଗହେତ୍ୱା ସିରସଂ ନେତ୍ୱା ଦେୱପୁରଂ ଚରଂ ।
କାରେତ୍ୱା ମଣିଥୂପଂ ସୋ ନୀଧେତ୍ୱା ତଂ ସିରୋରୁହଂ,
ଅତ୍ଥାହଂ ପତିମାନେତି ସହଦେୱେହି ନେକଧା ।
ମହାବ୍ରହ୍ମୋପନୀତଟ୍ଠପରିକ୍ଖାରଂ ମହାମତୀ,
ପଟିଗ୍ଗହେତ୍ୱା କାସାୱଂ ନିୱତ୍ଥୋ ପାରୁତୋ ତଦା ।
ପୁବ୍ବେ ୱିୟମ୍ବରଂ ଗୟ୍ହ ଅମ୍ବରେ ଖିପି ନାୟକୋ,
ପଟିଗ୍ଗହେତ୍ୱା ତଂ ବ୍ରହ୍ମା ନେତ୍ୱା ବ୍ରହ୍ମପୁରଂ ଚରଂ ।
ଦ୍ୱାଦସୟୋଜନୁବ୍ବେଧଂ କତ୍ୱା ଥୂପୱରଂ ସୁଭଂ,
ତତ୍ଥ ତଂ ନିଦହିତ୍ୱାନ ପଣିପାତେତି ସବ୍ବଦା ।
ସମ୍ପୁଣ୍ଣ ମନସଙ୍କପ୍ପୋ ପବ୍ବଜ୍ଜାସିରି ମୁବ୍ବହଂ,
ଛାଦେନ୍ତୋ କାମଲେନେୱ ମରୁଂ ଚଙକ୍କମି ନାୟକୋ ।
ତତୋ ଅମ୍ବୱନଂ ଗନ୍ତ୍ୱା ୱିନ୍ଦନ୍ତୋ ପୀତିଜଂ ସୁଖଂ,
ୱୀତିନାମୟି ସତ୍ତାହଂ ରମ୍ମେ ପାଦପମଣ୍ଡପେ ।
ତତୋ ରାଜଗହଂ ଗନ୍ତ୍ୱା ପାରୁପିତ୍ୱା ଚୀୱରଂ,
ଗହେତ୍ୱା ମଣିୱଣ୍ଣଂ ସୋ ପତ୍ତଂ କରତଲମ୍ବୁଜା ।
ବତ୍ତିଂସ ଲକ୍ଖଣୂପେତୋ ଅନୁବ୍ୟଞ୍ଜନ ମଣ୍ଡିତୋ,
ବ୍ରହ୍ମୁଜ୍ଜୁଗତ୍ତୋ ଭଗୱା ପୁରସେଟ୍ଠମୁପାଗମି ।
ୱିସିଖନ୍ତରେନ ଗଚ୍ଛନ୍ତଂ ଲୋକେକନୟନଂ ଜନା,
ଦିସ୍ୱା ଏୱଂ ୱିଚିନ୍ତେସୁଂ ନାୟଂ ୟୋ ସୋ ଜନାଧିପୋ ।
କାମଂ ପୁରୱଧୁସୋମ୍ମ ୱତ୍ତସମ୍ବନ୍ଧକାରଣା,
ଚନ୍ଦୋ’ୟମାଗତୋ ଅଜ୍ଜ ସକୱେସେନ ନୋ ମତି ।
ସୁତ୍ୱାନ ତଂ ତଦା କେଚି ହସନ୍ତା ୱଚନନ୍ତରଂ,
ନାୟଂ ସସୀ ସସଙେକା ସୋ ଭାନୁମେସୋ’ତି ନୋ ମତି ।
ବୋଧେତୁମାଗତୋ କାମଂ ପୋରୀନଂ ୱଦନମ୍ବୁଜେ,
ସକୀୟେନେୱ ରୂପେନ ୱିମ୍ହୟଂ ପୋରିମାନୁସେ ।
କିଂ ଭୋ ଉମ୍ମତ୍ତକା ଅତ୍ଥ ଏୱଂ ମା ୱଦଥା’ଧୁନା,
ସତରଂସୀ ଉଣ୍ହରଂସୀ ନ ସୋ ଏସୋ ଅୱିଗ୍ଗହୋ ।
କାମେନାଲସଜନ୍ତୁହି କୀଳିତୁଂ ପୁରମାଗତୋ,
ସରୂପେନ ନ ନୋ ଅତ୍ଥି ସଂସୟୋ ବଲୁ ମାନସେ ।
ତେସଂ ତଂ ୱଚନଂ ସୁତ୍ୱା ହସନ୍ତା କେଚି ଜନ୍ତୁନୋ,
ତୁମ୍ହେ ଖଲୂ ନ ଜାନାଥ ସବାଣେ ସଧନୂ ହି ସୋ ।
ଇସ୍ସରୋ କନ୍ତରୂପେନ ତୁଙ୍ଗମନ୍ଦିରତା ପୁରଂ,
କେଲାସୋ ଇତି ସମ୍ପତ୍ତୋ ଜହାଥ ୱିମତିଂ ଇଧ ।
ତେସମ୍ପି ୱଚନଂ ସୁତ୍ୱା ହସନ୍ତେକେ ଜନା ତଦା,
ନାୟଂ ହରୋ ତିନେତ୍ତୋ ସୋ କେସୱେସୋ ଇଧାଗତୋ ।
ୱିଚିଣନ୍ତୋ ସିରିଂ ଅଜ୍ଜ ପୁରସେଟ୍ଠମୁପାଗତଂ,
ୱେସେନଞ୍ଞେନ ମଞ୍ଞାମ ଏତ୍ଥ ନୋ ନତ୍ଥି ସଂସୟୋ ।
ପହରିତ୍ୱା କରଂ କେଚି ସୁତ୍ୱା ତଂ ୱଚନଂ ନରା,
ହସନ୍ତେୱଂ ତଦାୱୋଚୁଂ ୱାସୁଦେୱୋ ନ ୱେ ଅୟଂ ।
କାମଂ ସରୋଜନାଭୋ ସୋ ୱାମନୋ କଣ୍ହୱିଗ୍ଗହୋ,
ଅୟମଞ୍ଞତରଚଣ୍ଣେନ ଆଗତୋ ପାକସାସନୋ ।
ପୁରଂ ଦେୱପୁରନ୍ତେତଂ ମଞ୍ଞମାନୋ ମହାଜୁତିଂ,
ପସ୍ସିତୁନ୍ତି ପଟିଞ୍ଞାତୋ ମା ଭୋନ୍ତୋ ୱିଲପନ୍ତୁ ୱେ ।
ସୁତ୍ୱା ତେସଂ ଗିରଂ କେଚି କେଳିଂ କତ୍ୱାନ ନେକଧା,
ତୁମ୍ହେ ସକ୍କଂ ନ ଜାନାଥ ସୋ ହି ଭୋ ୱଜିରାୟୁଧୋ ।
ଏସୋ ହି ଭୋ ମହାବ୍ରହ୍ମା ବ୍ରହ୍ମଲୋକା ଇଧାଗତୋ,
ପମତ୍ତା କିନ୍ନୁ ୱେଦମ୍ହୀ ବ୍ରହ୍ମବନ୍ଧୁ ପୁରେ ଇଧ ।
ଅଥେସଂ ୱଚନଂ ସୁତ୍ୱା କେଚି ପଣ୍ଡିତଜାତିକା,
ନେତେ ଚନ୍ଦାଦୟୋ କାମଂ ମା ମୋହଂ ଭୋ ପକାସଥ ।
ଚତୁରାନନୋ ମହାବ୍ରହ୍ମା ସୋମସୋମ୍ମାନନୋ ଅୟଂ,
ସମନ୍ତପୋତ୍ଥକୋ ବ୍ରହ୍ମା ପତ୍ତହତ୍ଥୋ’ୟମବ୍ଭୁତୋ ।
କାମଂ ପାରମିତାପୁଣ୍ଣ ପସତ୍ଥୋ ପୁରିସୋ ଅୟଂ,
ନିଚ୍ଚଂ ୱନ୍ଦଥ ପୂଜେଥ ଥୋମେଥେତଂ ମହାଜୁତିଂ ।
ଏୱଂ ୱଦନ୍ତା ସବ୍ବେ ତେ ନାଗରା ପୁରିସୁତ୍ତମଂ,
ଗନ୍ଧପୁପ୍ଫେହି ପୁଜେନ୍ତା ନମସ୍ସନ୍ତା ତମନ୍ୱଗୁଂ ।
ନେତ୍ତାରିତ୍ତେହି ପାଜେନ୍ତା ମୁନିନୋ ରୂପସାଗରେ,
ଜନ୍ତୱୋ ମନନାୱାୟୋ ପାରଂ ପସ୍ସିଂସୁ ନୋ ତଦା ।
ତଦା ଲୋକେକନୟନୋ ସପଦାନେନ ୱୀଥିୟଂ,
ଚରଂ ୟାପନମତ୍ତଂୱ ଲଦ୍ଧାଗମ୍ମ ପୁରା ବହି ।
ପଣ୍ଡୱଂ ଗିରିମାସଜ୍ଜ ତସ୍ସଚ୍ଛାୟାୟ ସୋ ମୁନି ।
ସଙ୍ଘାଟିଂ ପଞ୍ଞପେତ୍ୱାନ ନିସଜ୍ଜ ପୁରିସାସଭୋ ।
ଅଦିଟ୍ଠପୁବ୍ବଂ ଦିସ୍ୱାନ ପତ୍ତେ ମିସ୍ସକଭୋଜନଂ,
ସଞ୍ଜାତପଟିକୂଲୋ ତଂ ନୁଦିତ୍ୱା ପଚ୍ଚୱେକ୍ଖଣା ।
ଅମତଂ ୱିୟ ତଂ ଭୁତ୍ୱା ୱିକ୍ଖାଲେତ୍ୱା ମୁଖଂ ଦକା,
ପତ୍ତେ ୱତ୍ତଂ ଚରିତ୍ୱାନ ମୁହୁତ୍ତଂ ତତ୍ଥ ୱିସ୍ସମି ।
ପୱତ୍ତିଂ ତଂ ନିସାମେତ୍ୱା ବିମ୍ବିସାରୋ ନରିସ୍ସରୋ,
ସୀଘଂ ତମୁପଗନ୍ତ୍ୱାନ କତାନୁଞ୍ଞୋ ନିସୀଦିୟ ।
ନିମନ୍ତୟିତ୍ୱା ରଜ୍ଜେନ ଅନିଚ୍ଛନ୍ତେ ୟତିସ୍ସରେ,
ଅନୁଗ୍ଗହାୟ ମେ ୟୁତ୍ତଂ ବୁଦ୍ଧଭୂତେନିଧାଗମଂ ।
ଏୱଂ ନିମନ୍ତିତୋ ତେନାଧିୱାସେତ୍ୱା ମହାମତୀ,
ଅଗମାସୁରୁୱେଲାୟ ମତୁଲୋରୁ ପରକ୍କମୋ ।
ପଧାନଂ ପଦହିତ୍ୱାନ ଛବ୍ବସ୍ସମତିଦୁକ୍କରଂ,
ପକାସେତ୍ୱାନ ଲୋକସ୍ସ ମୋକ୍ଖଂ ନତ୍ଥିତି ତେନ ସୋ ।
ତତୋପ୍ପଭୁତି ୱତ୍ତନ୍ତୋ ମଜ୍ଝିମପ୍ପଟି ପତ୍ତିୟଂ,
କାୟସ୍ସାନୁଗ୍ଗହଂ କତ୍ୱା ତତୋ ସମ୍ପିଣିତି’ନ୍ଦ୍ରିୟୋ ।
ମୂଲେ’ଜପାଲନିଗ୍ରୋଧପାଦପସ୍ସ ମହାମୁନି,
ନିସୀଦି ନିଜସୋଭାହି ଓଭାସେନ୍ତୋ ଦିସୋଦିସଂ ।
ତଦା ସେନାନି ନିଗମେ ସୁଜାତା ଖୀର ଦାୟିକା,
ସମ୍ପୁଣ୍ଣମନସଙ୍କପ୍ପା ୟାଚିତ୍ୱା ୱଟଦେୱତଂ ।
ଧୀରଂ ଦେୱୋତି ମଞ୍ଞନ୍ତି ତୁଟ୍ଠହଟ୍ଠା ପମୋଦିତା,
ହେମପାତିଂ ସପାୟାସଂ ଦତ୍ୱାନ ଇଦମ’ବ୍ରୁୱି ।
ୟଥା ମୟ୍ହଂ ମହାଦେୱ ଇଦ୍ଧା ପତ୍ଥିତ ପତ୍ଥନା,
ତଥେୱ ତୱ ସଙ୍କପ୍ପୋ ଖିପ୍ପମେୱ ସମିଜ୍ଝତୁ ।
ଇତି ୱତ୍ୱାନ ୱନ୍ଦିତ୍ୱା କତ୍ୱା ଚ ନଂ ପଦକ୍ଖିଣଂ,
ପକ୍କନ୍ତାୟ ସୁଜାତାୟ ଧୀରୋ ପାତିଂ ସମାଦିୟ ।
ଉପଗନ୍ତ୍ୱାନାତିରମ୍ମଂ ନଦିଂ ସୋ ନୀଲୱାହିନିଂ,
ସୁପ୍ପତିଟ୍ଠିତନାମମ୍ହି ନଦୀତିତ୍ଥେ ନିସୀଦିୟ ।
ଭୁଞ୍ଜିତ୍ୱା ଊନପଣ୍ଣାସ ପିଣ୍ଡଂ କତ୍ୱାନ ଭୋଜନଂ,
ୱିସ୍ସଜ୍ଜେତ୍ୱା ତତୋ ପାତିଂ ପଟିସୋତଂ ନରାସଭୋ ।
ତତୋ ସାଲୱନୁୟ୍ୟାନେ ୱିସ୍ସମନ୍ତୋ ଦିୱାଦିନେ,
ଦିସ୍ୱାନ ସୁପିନେ ପଞ୍ଚ ଅତ୍ଥଂ ତେସଂ ୱିଚିନ୍ତିୟ ।
ଆବୋଧିମୂଲତୋ ମଗ୍ଗେ ଦେୱେହି ସମଲଙ୍କତେ,
ମଣିତୋରଣପାଲୀହି ପୁଣ୍ଣକୁମ୍ଭଦ୍ଧାଜାଦିହି ।
ସାୟଣ୍ହସମୟେ ନାଥୋ ଗଚ୍ଛନ୍ତୋ ବୋଧି ସନ୍ତିକଂ,
ଦିସ୍ୱାନ ସୋତ୍ଥିୟଂ ନାମ ଥୂୟମାନଂ ଦିଜୁତ୍ତମଂ ।
ତେନ ଦିନ୍ନଟ୍ଠ ମୁଟ୍ଠିନ୍ତୁ ଗହେତ୍ୱା ନୀଲସଦ୍ଦଲଂ,
ବୋଧିମୂଲମୁପାଗମ୍ମ କତ୍ୱାନ ତଂ ପଦକ୍ଖିଣଂ ।
ଅକାସି ତୀଣସନ୍ଥାରଂ ପାଚୀନାଭିମୁଖଂ ତଦା,
ତତୋ ମହିଂ ଦ୍ୱିଧା କତ୍ୱା ସମୁଟ୍ଠାସି ମହାସନଂ ।
ଉଚ୍ଚଂ ଚୁଦ୍ଦସହତ୍ଥେନ ନାନା ଚିତ୍ତ ୱିଚିତ୍ତିତଂ,
ଅଭଟ୍ଠନହିତ୍ଥ ତତ୍ରଟ୍ଠୋ ଇଚ୍ଚେୱଂ ଦଳ୍ହମାନସୋ ।
କାମଂ ତଚୋ ନହାରୂ ଚ ଅଟ୍ଠି ଚ ଅୱସିସ୍ସତୁ,
ଉପସୁସ୍ସତୁ ମେ ଗତ୍ତେ ସବ୍ବନ୍ତଂ ମଂସଲୋହିତଂ ।
ନ ଉଟ୍ଠହାମବୁଜ୍ଝିତ୍ୱା ନ ଜହେ ୱୀରିୟଂ ମମ,
ଅଧିଟ୍ଠହିତ୍ୱା ଏୱଂ ସୋ ନିସୀଦି ୱଜିରାସନେ ।
ଅନତିକ୍କମଂ ଠପେତ୍ୱାନ ଚରଣଂ ଚରଣୁପରି,
କମଲଂ କମଲେନେୱ ମଣିବନ୍ଧଂ ୱିଧାୟ ସୋ ।
ବାଲାସୋକଦଲାସତ୍ତ ପରଂ ୱା’ସୋକପଲ୍ଲୱଂ,
ନିଧାୟ ନୟନାନତ୍ଦ ପାଣିଂ ପାଣିତଲେ ଜିନୋ ।
ୟଥା ସଞ୍ଝାଘନାଲୀଢ ତୁଙ୍ଗକଞ୍ଚନ ପବ୍ବତୋ,
ସୁରତ୍ତଚୀୱରଚ୍ଛନ୍ନ ଚାରିଗତ୍ତ ୱିରାଜିତୋ ।
ଉଦୟାୱଲକୋଟିମ୍ହି ଦିପ୍ପନ୍ତୋୱ ଦିୱାକରୋ
କନ୍ଧରୋପରି ଦିପ୍ପନ୍ତ ମୁଖମଣ୍ଡଲମଣ୍ଡିତୋ ।
ୟଥା ଚାମିକରବ୍ୟମ୍ହେ ସୁନୀଲଂ ସୀହପଞ୍ଜରଂ,
ଅସମ୍ପକମ୍ପପମ୍ହେହି ପିହିତଦ୍ଧସୁଲୋଚନୋ ।
ନୀଲୁପ୍ପଲକଲାପଂଚ ଜନନେତ୍ତାଲିପାତନଂ,
ସଜ୍ଝୁଦଣ୍ଡସମାବଦ୍ଧ ବୋଧିକ୍ଖନ୍ଧମଫସ୍ସି ସୋ ।
ନିସିନ୍ନୋ ବୋଧିତୋ ଛେଜ୍ଜ ପୱାଳତରୁଣଙ୍କୁରା,
ପତମାନା ସମନ୍ତାସୁଂ ତେଜଂ ୱିୟ କୁବୁଦ୍ଧୀନଂ ।
ଦେୱା ତତ୍ଥ ସମାଗଞ୍ଜୁଂ ଖିପ୍ପଂ ଦସସହସ୍ସିୟଂ,
କମଲାସନୋରଗା ଚେୱ ସିଦ୍ଧୱିଜ୍ଜାଧରାଦୟୋ
ସହମ୍ପତି ମହାବ୍ରହ୍ମା ବ୍ରହ୍ମସେନାପୁରକ୍ଖତୋ,
ସିତାତପତ୍ତଂ ଧାରେନ୍ତୋ ଠୀତୋ ସମ୍ବୁଦ୍ଧ ସନ୍ତିକେ ।
ୱୀସଂ ରତନ ସତାୟାମଂ ୱିଜୟୁତ୍ତର ନାମକଂ,
ସଙ୍ଖଂ ଧମେନ୍ତୋ ଅଟ୍ଠାସି ସାଦରୋ ପାକସାସନୋ ।
ସୁୟାମୋ ସହ ସେନାୟ ଥୋମୟନ୍ତୋ ନରାଧିପଂ,
ମଣିତାଲୱଣ୍ଟଂ ପଗ୍ଗୟ୍ହ ମନ୍ଦମନ୍ଦେନ ୱୀଜତି ।
ଜିତକିତ୍ତି ଲତଗ୍ଗମ୍ହି ସସ୍ସ ପୁପ୍ଫଂଚ ପୁପ୍ଫୀତଂ,
ୱାଳୱିଜନିମୁଗ୍ଗୟ୍ହ ଅଟ୍ଠା ସନ୍ତୁସିତୋ ତହିଂ ।
ବେଲୁୱଂ ୱୀଣମାଦାୟ ଗୀତଂ ନାନାଲୟାନୁଗଂ,
ପଞ୍ଚସିଖୋ ଠିତୋ ତତ୍ଥ ଗାୟମାନୋ ଅନେକଧା ।
ମହାକାଲୋ’ପି ନାଗିନ୍ଦୋ ନାଗସଙ୍ଘପୁରକ୍ଖତୋ,
ଥୋମେନ୍ତୋ ତତ୍ଥ ଅଟ୍ଠାସି ନୱାରହଗୁଣାଦିହି ।
ରଙ୍ଗଭୁମିଂ ମାପୟିତ୍ୱା ଗହେତ୍ୱାନ ୱରଙ୍ଗନା,
ଉପହାରଂ କରୋନ୍ତଟ୍ଠା ତିମ୍ବରୂ ସୂରିୟୱଚ୍ଚସା ।
ଆଗନ୍ତ୍ୱା ସହ ସେନାୟ ସିତଙ୍ଗୋ ସିତଭୁସନୋ,
ଧତରଟ୍ଠୋ ଠିତୋ ପୁବ୍ବେ ଆରକ୍ଖଂ କୁରୁମାନକୋ ।
ପୂରେନ୍ତୋ ସକସେନାୟ ଦକ୍ଖିଣସ୍ସଂ ୱିରୂଳ୍ହକୋ,
ଆରକ୍ଖଂ କୁରୁମାନଟ୍ଠା ନୀଲଙ୍ଗୋ ନୀଲଭୁସନୋ ।
ୱିରୂପକ୍ଖୋ’ପି ଅଟ୍ଠାସି ପାଲୟଂ ପଚ୍ଛିମଂ ଦିସଂ,
ରତ୍ତଙ୍ଗାଭରଣୋ ୱମ୍ମୀ ନିଜସେନାପୁରକ୍ଖତୋ ।
ଉତ୍ତରସ୍ସଂ ସସେନାୟ ଆରକ୍ଖଂ କୁରୁମାନକୋ,
ସୋଣ୍ଣୱଣ୍ଣଙ୍ଗାଭରଣୋ ଅଟ୍ଠାସି ନରୱାହନୋ ।
କିମେତ୍ଥ ବହୁଲାପେନ ଜାତିକ୍ଖେତ୍ତମ୍ହି ଦେୱତା,
ନାଗତା ନେୱ ୱାହେସୁଂ ସବ୍ବେ ଏତ୍ଥେ’ୱ ଓସଟା ।
ଗଗନାତୋତିଣ୍ଣକେତୁ ପାଦେହି ପଥୱୀତଲେ,
ନାଗାଦୟୋ ନ ଧୁତାସୁଂ କେତୁନଂ ବହୁ କା କଥା ।
ନ ଧୂତା ଧଜପାଦେହି ୱାୟୁତୁଦ୍ଦାମୱୁତ୍ତିହି,
ତାରକା ଗଗନେ ବ୍ରୂମୋ କିନ୍ନୁ ତତ୍ଥ ଧଜାଲୁତା ।
ପୁବ୍ବଦିସା ଚକ୍କୱାଳ ସିଲାୟୁଗ୍ଗତକେତୁନଂ,
ପାଦାନି ପରଭାଗାଦି ଚକ୍କୱାଳସିଲନ୍ୱଗୁଂ ।
ଚକ୍କୱାଳ ମହାମେରୁ ୟୁଗନ୍ଧର ନଗାଦୟୋ,
ପୁପ୍ଫାୱତଂସକା’ୱାସୁଂ ନାନାୱଣ୍ଣେହି ସଙ୍ଖତା ।
ୱାମାମନ୍ଦମକରନ୍ଦ ବିନ୍ଦୁସନ୍ଦୋହ ସୁନ୍ଦରଂ,
ଉଲ୍ଲୋଲ ପଦୁମାକିଣ୍ଣ ୱିତାନଂ ୱାସି ଅମ୍ବରଂ ।
ଖିତ୍ତସୋଗନ୍ଧଚୁଣ୍ଣାନି ଦେୱବ୍ରହ୍ମାଦିନା ତହିଂ,
ୱିତାନଂ ୱିୟ ଖାୟନ୍ତି ଚକ୍କୱାଳଗ୍ଗମଣ୍ଡପେ ।
କପ୍ପୂରାଗରୁଧୂପେହୀ ତତ୍ଥ ତତ୍ଥୁଗ୍ଗତେହି ମା,
କାଲବ୍ଭକୂଟଚ୍ଛନ୍ନୋୱ ଆସି ମଞ୍ଞଂ କଥେମୁ କିଂ ।
ଜାତିକ୍ଖେତ୍ତେସୁ ଦେୱେହି କତଗ୍ଘିକୁସୁମାଦିନା,
ନୋସୀନା ଧରଣୀ ଭାରା ଦିସେଭାନଂ ବଲଂ ଅହୋ ।
ଅମ୍ବରାଲମ୍ବମାନାନୀ ପୁପ୍ଫଦାମାନି ଭୂତଲଂ,
ଆକଡ୍ଢନାୟ ଦେୱେହି ବଦ୍ଧରଜ୍ଜୁୱ ଭାସରେ
ଅଞ୍ଞୋଞ୍ଞକରମୁଗ୍ଗୟ୍ହ ଗଗନେ ସୁରସୁତ୍ଦରୀ,
ପରିବ୍ଭମନ୍ତା ଗାୟନ୍ତି ତତ୍ଥ ତତ୍ଥ ମନୋରମଂ ।
ଉଭୋ ଭୁଜେ ୱିକାସେତ୍ୱା ମଣ୍ଡିତଂ ସୁରସୁତ୍ଦରୀ,
ଭମନ୍ତି ଭନ୍ତଭେଣ୍ଡୁୱ ତତ୍ଥ ତତ୍ଥମ୍ବରେ ୟୁଗା ।
ନୀଲୁପ୍ପଲକଲାପାଦୀ ଗହେତ୍ୱାନ ସୁରଙ୍ଗନା,
ଠୀତାସୁଂ ପରିୱାରେତ୍ୱା ପୂଜମାନା ନରିସ୍ସରଂ ।
ରତ୍ନପଲ୍ଲୱକଲହାର କମଲୁପ୍ପଲ ସଙ୍ଗତେ,
ସନ୍ନୀରକୁସୁମାକିଣ୍ଣେ ପୁଣ୍ଣେସୋଗନ୍ଧୱାରିହୀ ।
କଞ୍ଚନାଦିଘଟେ ଗୟ୍ହ ଅମ୍ବରେ ସୁରସୁନ୍ଦରୀ,
କତ୍ୱାନ ସୁଗତଂ ମଜ୍ଝେ ପୂଜୟିଂସୁ ସମନ୍ତତୋ
କଞ୍ଚନାଦାସହତ୍ଥା ଚ କାଚୀ କଞ୍ଞା ତଥା ଠିତା,
ତାଲୱଣ୍ଟେ ଗହେତ୍ୱାନ ଠୀତାସୁଂ କାଚି ଦେୱତା ।
କାଚି ମଙ୍ଗଲ ସଂୟୁତ୍ତ ୱଚନା ତୱ ପତ୍ଥନା,
ସମିଜ୍ଝତୁତି ଘୋସେନ୍ତୀ ପରିୱାରେତ୍ୱା ଠିତା ଜିନଂ ।
ସିରିୱଚ୍ଛାଦି ପଗ୍ଗୟ୍ହ ଅଟ୍ଠମଙ୍ଗଲମୁତ୍ତମଂ,
ଠିତାସୁଂ ଗଗନେ ନାରୀ ପରିୱାରେତ୍ୱା ମୁନିସ୍ସରଂ ।
ନଚ୍ଚନ୍ତି କେଚି କୀଳନ୍ତି ସେଲେନ୍ତି ଚ ଲଲନ୍ତି ଚ,
ୱାଦେନ୍ତି କେଚି ଗାୟନ୍ତି ୱେଲୁକ୍ଖେପଂ କରୋନ୍ତି ଚ ।
ନେକପୁପ୍ଫଗ୍ଘିପନ୍ତୀ ଚ ତଥା ଦୀପଗ୍ଘିପନ୍ତି ଚ,
ମଣିଚାମୀକରାସଜ୍ଝୁ ଅଗ୍ଘିକା ପନ୍ତିୟୋ ତଥା ।
ଆବ୍ରହ୍ମଭୱନୁଗ୍ଗମ୍ମ ଚକ୍କୱାଳସମନ୍ତତୋ,
ତିଟ୍ଠନ୍ତି ଜଲମାନାୟୋ ବୁଦ୍ଧସ୍ସ ମଙ୍ଗଲୁସ୍ସୱେ ।
ସତ୍ତରତନସମ୍ଭୁତା ନାନା ତୋରଣପନ୍ତୀୟୋ,
ହେମରମ୍ଭାମୟା ଚାପି ତଥା ଦୁସ୍ସମୟା ସିୟୁଂ ।
ନାନାୱଣ୍ଣେହି ନେକେହି ଛତ୍ତେହି ଚ ନିରନ୍ତରଂ,
ଚକ୍କୱାଳୋଦରଂ ଆସି ସରଂଚ କମଲାକୁଲଂ ।
ତତ୍ଥ ତତ୍ଥୁଜ୍ଜଲାନେକ ୟନ୍ତଦୀପାୱଲୀ ମହୀ,
ତାରକାଜାଲକାକିଣ୍ଣ ଗଗନଙ୍ଗନସନ୍ତିଭା ।
ଧଜନ୍ତରିତ ଛତ୍ତା’ସୁଂ ଚକ୍କୱାଳଗିରୂପରି,
ନିରନ୍ତରା’ସୁଂ ତତ୍ଥେୱ ଘଟଦୀପା ଚ ତୋରଣ ।
ନାନାତୁରିୟନାଦେହି ନାନାସଙ୍ଗୀତିତାହି ଚ,
ସାଧୁୱାଦେହି ନେକେହି ଚକ୍କୱାଳୋ ଫୁଟୋ ଅହୂ ।
ଅହୋ ମହନ୍ତତା ତସ୍ସ ବୁଦ୍ଧସ୍ସ କତମଙ୍ଗଲେ,
ପୂଜାୱିସେସଂ ତଂ କୋ ହି ମୁଖେନେକେନ ଭାସତୀ ।
ଚତୁମ୍ମୁଖୋ ସହସ୍ସକ୍ଖୋ ଦ୍ୱିସହସ୍ସନୟନୋ ଫଣୀ,
ଦସକଣ୍ଠୋ’ପି ତଂ ସବ୍ବଂ ନେୱ ସକ୍କୋନ୍ତି ଭାସିତୁଂ ।
ଏୱଂ ସୁରାସୁରବ୍ରହ୍ମ ୱେନତେୟ୍ୟୋରଗାଦିହି,
ନିରନ୍ତରଂ କତାନେକ ମହାମହ ସମାକୁଲେ ।
ତସ୍ମିନ୍ତୁ ୱାସରେ ମାରୋ ପସ୍ସିତ୍ୱା ଭୁୱନଂ ଇଦଂ,
ଆମନ୍ତେତ୍ୱା ସାନୁୱରେ ଆହେୱଂ ସକୁତୂହଲୋ ।
ସବ୍ବେ ଦିବ୍ବୱିମାନା ଭୋ ସୁଞ୍ଞା ଦିସ୍ସନ୍ତି ଛଡ୍ଡିତା,
ପୁରପାଲମ୍ପହାପେତ୍ୱା କ୍ୱ ଗତା’ସୁଂ ସଦେୱକା ।
କିମ୍ଭୋ ମାର ନ ଜାନାସି ମତ୍ତୋ ସୁତ୍ତୋ’ସି ଅଜ୍ଜ କିଂ,
ସୁଦ୍ଧୋଦନିୟ ସିଦ୍ଧତ୍ଥୋ ମାୟାୟ ତନୟୋ ଅୟଂ ।
ପୁରେତ୍ୱା ପାରମୀ ସବ୍ବା କତ୍ୱାନ ଅଭିନିକ୍ଖମଂ,
ବୋଧିମୁଲେ ନିସିନ୍ନୋ ସି ଅଜ୍ଜ ବୁଦ୍ଧୋ ଭୱାମୀତି ।
ତସ୍ସ ପୂଜାୱିଧାନତ୍ଥଂ ଦସସହସ୍ସୀସୁ ଦେୱତା,
ସମାଗତା ହଟ୍ଠତୁଟ୍ଠା କରୋନ୍ତଜ୍ଜ ମହାମହଂ ।
କିନ୍ନୁ ତେ ବଧିରଂ ସୋତଂ କିନ୍ନୁ ପରିହାୟି ଲୋଚନଂ,
ଧଜଗ୍ଗା ତେ ନ ଦିସ୍ସନ୍ତି ଉଲ୍ଲୋଲଂ ତେ ନ ସୂୟତି ।
ତେସଂ ତଂ ୱଚନଂ ସୁତ୍ୱା ଅନ୍ତକୋ ଖଲୁ ପାପିମା,
ଦୁକ୍ଖିତୋ ଦୁମ୍ମନୋ ତେସଂ ସୋଚନ୍ତୋ ଇଦମ୍ବ୍ରୁୱି ।
ଅହୋ ୱତା’ତିପରିହାନି ସଂସାରସ୍ସ ମହା ଅୟଂ,
ଅସାରୋ ଖଲୁ ସଂସାରୋ ସିଦ୍ଧତ୍ଥେ ୱିଭୱଂ ଗତେ ।
ଅହୋ ୱତା’ତି ନଟ୍ଠମ୍ହା ତିୱଟ୍ଟଂ ପରିପୁରିତଂ,
ହୋତି ଭୋ ଦହନା ଦଡ୍ଢୱନଂୱାତି ଅଲକ୍ଖିକଂ ।
ନିରାଲୋକଂ ତିଲୋକଂ ଭୋ ଅସୁରଂ ୱାସରଂ ୟଥା,
ପରିମୋସରତନଂ ହୋତି ରଜ୍ଜଂ ୱେଦଂ ଜଗତ୍ତୟଂ ।
ମମେସ ୱିସୟଂ ହିତ୍ୱା ୟାତି ସିଦ୍ଧତ୍ଥଦାରକୋ,
ତେନ ୟାତେନ ମଗ୍ଗେନ ନିକ୍ଖମନ୍ତି ବହୁଜ୍ଜନା ।
ଭୱନ୍ତଂ ନ କରୋତେସୋ ୟାୱ ସୁଦ୍ଧୋଦନତ୍ରଜୋ,
ଏଥ ଗଚ୍ଛାମ ସିଦ୍ଧତ୍ଥମସିଦ୍ଧତ୍ଥଂ କରୋମ ଭୋ ।
ମାପେଥ ଭେରୱଂ ୱଣ୍ଣଂ ବୀଭଚ୍ଛଂ ଦୁଦ୍ଦସଂ ଖରଂ,
ସଦ୍ଦେନେୱ ପଲାପେଥ ତୂଲଭଟ୍ଟଂୱ ୱାୟୁନା ।
ତସ୍ସ ତଂ ୱଚନଂ ସୁତ୍ୱା ମାରସେନା ସମାଗମୁଂ,
ନାନାୱେସଧରା ହୁତ୍ୱା ନାନାୟୁଧ ସମଙ୍ଗିନୋ ।
ୟୋଜନାନଂ ତଦା ମାରୋ ଦିୟଡ୍ଢସତମୁଚ୍ଚତୋ,
ଗିରିମେଖଲମାରୁୟ୍ହ ସେନାୟ ସହସା’ଗମୀ ।
ଦିସ୍ୱାନ ଦୁରତୋ ଏତ୍ତଂ ଦେୱା ମାରଂ ସୱାହିନିଂ,
ଭୟଟ୍ଟାପଗମୁଂ ଖିପ୍ପଂ ଧାୱମାନା ଦିସୋଦିସଂ ।
ସଂଖିପ୍ପ ଖିପ୍ପଂ ସଚ୍ଛତ୍ତଂ ବ୍ରହ୍ମା ଧାୱି ପରମ୍ମୁଖୋ,
କତ୍ୱାନ ପିଟ୍ଠିୟଂ ସଙ୍ଖଂ ସକ୍କୋ ଧାୱି ୱିସଙ୍କିତୋ ।
ମହାକାଲୋ’ପି ନାଗିନ୍ଦୋ ନିମୁଜ୍ଜ ମହିୟଂ ତଦା,
ୱତ୍ତଦତ୍ତକରୋ ଭୀରୁ ସକେ ନିପତି ମଞ୍ଚକେ ।
ସଂ ସଂ ପୂଜାୱିଧାନନ୍ତୁ ଛଡ୍ଡେତ୍ୱାନ ସଦେୱକା,
ଗତାସୁଂ ସୁଞ୍ଞକଂ ଆସି ଚକ୍କୱାଳମିଦଂ ତଦା ।
ନିସ୍ସିରୀକଂ ପଦେସଂ ତଂ ଅସୋଭଂ ଅସମଞ୍ଜସଂ,
ଅହୋସି ପତିତାନେକ ପୂଜାଭଣ୍ଡସମାକୁଲଂ ।
ଏକୋୱ ତତ୍ଥ ସୁଗତୋ ନିସୀଦି ୱଜିରାସନେ,
ପଜ୍ଜଲଂ ନିଜସିରିୟା ସୂରିୟୋୱ ୟୁଗନ୍ଧରେ ।
ଅକମ୍ପୋ ଚ ଅସନ୍ତ୍ରାସୀ ଲୋମହଂସ ୱିୱଜ୍ଜିତୋ,
ଅଭୀତୋ ସୀହରାଜାୱ ମିଗଚ୍ଛାପାନମଗ୍ଗତୋ ।
ତତୋ ଧମ୍ମିସ୍ସରସ୍ସଗ୍ଗେ ଦୁନ୍ନିମିତ୍ତାନି ଜାୟରୁଂ,
ଅନ୍ଧକାରଂ ଦିସା ଆସୁଂ ଧୂମକେତୁ ଚ ଅମ୍ବରେ ।
ଦିନଂ ଦୁଦ୍ଦିନକଂ ଆସି ହତରଂସି ଦିୱାକରୋ,
ଉକ୍କାପତୋ’ପି ପଞ୍ଞାୟି ଦିସାଡାହୋପପଜ୍ଜଥ ।
ଅଘନେ ଗଗନେ ଆସୁଂ ଇନ୍ଦଚାପୱିରଜ୍ଜୁତୀ,
ଅନଲାସନିୟୋ’ଦିତ୍ତା ତତ୍ଥ ତତ୍ଥ ପତନ୍ତୀ ଚ
କାକୋଲସଙ୍ଘା ୱସ୍ସିଂସୁ ଉଣ୍ଣ ସକୁଣକୋସିୟା,
ଚରିଂସୁ ଅମ୍ବରେ’ପେତା କବନ୍ଧା ଚ ଭୟାୱହା ।
ସେନଂ ସଂୱିଦହିତ୍ୱାନ ତତୋ ମାରୋ ଅଭିଦ୍ଦୱି,
ଆଗନ୍ତ୍ୱା ଚକ୍କୱାଳମ୍ହି ଠିତୋ ଜିନମୁଦିକ୍ଖିୟ ।
ଏକକସ୍ସ ମନୁସ୍ସସ୍ସ ସନ୍ତିକୋପଗମଂ ମମ,
ନ ୟୁତ୍ତଞ୍ହି ଗଜୋ ୟାତି ଗଜଂ ନୋ ୟାତି କୋତ୍ଥୁକଂ ।
ନେତଂ ଗରୁ ପଲାପେତୁଂ କାଲୋ ଇତି ୱିଚିନ୍ତିୟ,
ମାପେସି କୁପିତୋ ଖିପ୍ପଂ କପ୍ପନିଲ ସମାନିଲଂ ।
ଖିପନ୍ତୋ ଗଗନେ ଖିପ୍ପଂ ଉଦ୍ଧରିତ୍ୱା ୱନସ୍ପତୀ,
କତ୍ୱାନ ୱନମୁମ୍ମୂଲଂ ୱିଦ୍ଧଂସେନ୍ତୋ ଅସେସକଂ ।
ଚାଲେତ୍ୱା ତାଲସାଲାଦିଂ ଲୁଞ୍ଚିତ୍ୱା ଗଗନେ ଖିପଂ,
ପାତେନ୍ତୋ ଚକ୍କୱାଳନ୍ତେ ୱାଜିସୀହ ଗଜାଦୟୋ ।
ପହରିତ୍ୱା ୱିୱତ୍ତେତ୍ୱା ଗିରିକୂଟାନି ଉକ୍ଖିପଂ,
ଭମୟନ୍ତୋ ନଭୋମଜ୍ଝେ ଧାୱତେୱ ତତୋ ତତୋ ।
ସିଲାହି ସିଲାସଙ୍ଘଟ୍ଟ ମହାନାଦଂ ପୱତ୍ତୟଂ,
ପାତେନ୍ତୋ ଦହନଞ୍ଚାପି ଧୂମମମ୍ବର ମୁକ୍ଖିପଂ ।
ଭମୟନ୍ତୋ ଗହେତ୍ୱାନ ଅମ୍ବରେ ଛଦନିଟ୍ଠିକା,
ପାସାଦେ ପରିୱତ୍ତେତ୍ୱା ପହରନ୍ତୋ ନଗାଦିସୁ ।
ଖନନ୍ତୋ ପଥୱିଂ ପଂସୁଂ ଗହେତ୍ୱାମ୍ବରମଣ୍ଡଲେ,
ବନ୍ଧନ୍ତୋୱ ପରଂ ଭୁମିଂ ଭିନ୍ଦନ୍ତୋ ତୁଙ୍ଗପବ୍ବତେ ।
ଭୟାନକେନ ସଦ୍ଦେନ ଉପଗମ୍ମ ମହାମୁନିଂ,
ଚାଲେତୁଂ ନେୱ ସୋ ସକ୍ଖି ଅଂସୁମତ୍ତମ୍ପି ଚୀୱରେ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ପଠମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଇତି ପଠମୋ ୱିଜୟୋ ।
ଦିସ୍ୱା ନମୁଚି ଧୀରସ୍ସ ମାଲୁତେନାନୁପଦ୍ଦୱଂ,
ଦୁକ୍ଖୀ ଚ ଦୁମ୍ମନୋ ଆସି କୋଧେନାତୁରମାନସୋ ।
ହୋତୁ ଦାନି ମହୋଘେନ ପୱାହେମି ଇମଂ ୟତିଂ,
ମାପେତ୍ୱାନ ମହାମେଘଂ ସୋଚନାୟ ଅଲଂ ମମ ।
ଇତି ଚିନ୍ତିୟ ସୋ ମାରୋ ମହାମେଘମମାପୟି,
ଦିସାସୁମ୍ପିହିତା ସବ୍ବା ଅନ୍ଧକାରୋ ଅୱତ୍ଥରି ।
ଉପରୂପରି ଗୁଣା ହୁତ୍ୱା ସହସ୍ସାନି ସତାନି’ପି,
ଧାରାଧରା ମହାଧାରା ୱତ୍ତୟିଂସୁ ସମନ୍ତତୋ ।
ସୋଦାମିନୀସହସ୍ସେହି ୱିନଦ୍ଧଂୱ ନଭଂ ଅହୂ,
ତତ୍ଥ ତତ୍ଥ ଦିସାଭାଗେ ଇନ୍ଦଚାପା ଅୱତ୍ତଥ ।
ମହାରଜତରଜ୍ଜୂହି ସିବ୍ବିତାୱ ନଭାୱନୀ,
ଧରାଧରୋରୁଧାରାହି ନିରନ୍ତରପୱତ୍ତିହି ।
ତତ୍ଥ ତତ୍ଥ ପତନ୍ତାନି ଘୋରାସନିସତା ଅହୁଂ,
ମହାଭୀମ ନଭୋ ଭେରିସ୍ସନା ଆସୁଂ ତହିଂ ତହିଂ ।
ଉଦ୍ଧରନ୍ତୋ ମହାସେଲେ ମହୋଘୋ ଚ ତଦୁବ୍ଭୱେ,
କେଲାସ ସିଖରାକାର ଏଣେପୁଞ୍ଜେ ସମୁବ୍ବହଂ ।
ମହାଥୂପପ୍ପମାଣାଦି ମହାବୁବ୍ବୁଲମୁବ୍ବହଂ,
ଗମ୍ଭୀରୋ ପୁଥୁଲୋ ଚଣ୍ଡୋ ଉପଗମ୍ମ ଜିନନ୍ତିକଂ ।
ସରୀରେ ଲୋମମତ୍ତମ୍ପି ତେମେତୁମସମତ୍ଥକୋ,
ଗତୋ ମହୋଘୋ ବୁଦ୍ଧସ୍ସ’ଭୋ’ନୁଭାୱମହନ୍ତତା ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଦୁତିୟେ ମାରୟୁଦ୍ଧମ୍ହି ମାରସ୍ସାସୀ ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନର ସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଦୁତିୟୋ ୱିଜୟୋ ।
ତତୋ ମାରୋ ଅସକ୍କୋନ୍ତୋ ୱସ୍ସୋଘେନ ଉପଦ୍ଦୱଂ,
କାତୁଂ ତସ୍ସ ଉସୂୟାଦି କୋପାକୁଲମନୋ ତଦା ।
ଭୱତଜ୍ଜ କିମେତେନ ମାରଣେ ତସ୍ସ କିଂ ଗରୁ,
ଇଦାନଙ୍ଗାରୱୁଟ୍ଠୀହି ଝାପେମି ସହସା ଇମଂ ।
ଇତି ଚିନ୍ତିୟ ସୋ ମାରୋ ମାପେତ୍ୱାଙ୍ଗାର ୱୁଟ୍ଠିୟୋ,
ପେସେସି ନଭସା ତସ୍ସ ସମ୍ବୁଦ୍ଧସ୍ସ ଉପନ୍ତିକଂ ।
ମହାପବ୍ବତସଙ୍କାସ ଜଲିତଙ୍ଗାର ରାସୟୋ,
ଧାୱିଂସୁ ନହସା ତତ୍ଥ ଅଚ୍ଚିମନ୍ତୋ ମହବ୍ଭୟା ।
ଚିଚ୍ଚିଟାୟନ ସଦ୍ଦେହି ପୂରୟନ୍ତୋ ଦିସନ୍ତରଂ,
ଧୂପାୟନ୍ତୋ ଫୁଲିଙ୍ଗେହି ମାରସ୍ସାପି ଭୟାୱହା ।
ଉଜ୍ଜାଲେନ୍ତା ମହାରୁକ୍ଖେ ପବ୍ବତେ’ପି ଚ ସମ୍ମୁଖେ,
ନରକୋଦରୁଗ୍ଗତା ଅଗ୍ଗୀ ରାସୀୱାତି ଭୟାୱହା ।
ଉପଗନ୍ତ୍ୱା ମୁହୁତ୍ତେନ ନିସିନ୍ନଂ ମୁନିପୁଙ୍ଗୱଂ,
ମଧୁମତ୍ତାଲିଝଙ୍କାର ନାଦାକୁଲଦିସାମୁଖା ।
ପାତେନ୍ତି ସତତାମନ୍ଦ ମକରନ୍ଦଜ ବିନ୍ଦୱୋ,
ମାଲାୱତଂସକା ହୁତ୍ୱା ପାଦମୁଲେ ପତିଂସୁ ତା ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ତତିୟେ ମାର ୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ତତିୟୋ ୱିଜୟୋ ।
ତେନାନୁପଦ୍ଦୁତଂ ବୁଦ୍ଧଂ ପସ୍ସିତ୍ୱାନ ପଜାପତି,
ଦୁକ୍ଖିତୋ ଦୁମ୍ମନୋ ହୁତ୍ୱା ଏୱଂ ଚିନ୍ତେସି ଦୁମ୍ମତି ।
ପାସାଣୱସ୍ସଂ ମାପେତ୍ୱା ଚୁଣ୍ଣେତ୍ୱା ପନିମଂ ୟତିଂ,
ୱିଦ୍ଧଂସେମୀତି ଚିନ୍ତେତ୍ୱା ମାପେସୂପଲୱସ୍ସକଂ ।
ତସ୍ମିଂ ୱସ୍ସେ’ତି ବୀଭଚ୍ଛା ଧୂମାୟନ୍ତା ସଜୋତିକା,
ଜଲିତଙ୍ଗାରସଙ୍କାସା ପାସାଣୁଚ୍ଚାୱଚା ବହୂ ।
କରାନଞ୍ଞୋଞ୍ଞସଙ୍ଘଟ୍ଟା ମହନ୍ତଂ ଭେରୱଂ ରୱଂ,
ଦୁଦ୍ଦିନଂ ଧୂମଜାଲାହି କୁରୁମାନା ସମନ୍ତତୋ ।
ସତ୍ଥୂପଗନ୍ତ୍ୱାଭିମୁଖଂ ସନ୍ତମାଲାଗୁଲା ୱିୟ,
ପତିଂସୁ ସିରିପାଦେ ତେ ଅମନ୍ଦାମୋଦୱାହିନୋ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଚତୁତ୍ଥେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଚତୁତ୍ଥୋ ୱିଜୟୋ ।
ଦିସ୍ୱାନତ୍ତମନୋ ମାରୋ ଦିତ୍ତୋ କୋଧଗ୍ଗିନା ତଦା,
ମାପେତ୍ୱା’ୟୁଧୱସ୍ସଂ ସୋ ପେସେସି ତଦୁପନ୍ତିକଂ ।
ନେତ୍ତିଂସଚ୍ଛୂରିକା ସତ୍ତି ହେଣ୍ଡିୱାଲ ଗଦାଦୟୋ,
ତିଣ୍ଗଧାରା ପଜ୍ଜଲିତା ଅଚିରଜ୍ଜୁତି ସନ୍ନିଭା ।
ୟଥା ପୁପ୍ଫୋପହାରୋପଗନ୍ତ୍ୱାନ ଗଗନଙ୍ଗନା,
ଏୱଂ ସମ୍ବୁଦ୍ଧପାଦେସୁ ପତିଂସୁ ପରିୱତ୍ତିତା ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ପଞ୍ଚମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ପଞ୍ଚମୋ ୱିଜୟୋ ।
ତଂ ଦିସ୍ୱା ପାପିମା କୁଦ୍ଧୋ ୟଂ ୟଂ ତସ୍ସ କରୋମ’ହଂ,
ତଂ ତଂ’ଦାନୀ ନ ସକ୍କୋତି କିଞ୍ଚି କାକୁମୁ’ପକ୍କମଂ ।
ମାପେସି କୁକ୍କୁଲଂ ୱସ୍ସଂ ମାରମୀତ’ଧୁନା ମୁନିଂ,
ସୋ’ଗା’କାସା ସମ୍ପଦିତ୍ତୋ ଧୂମାୟନ୍ତୋୱ ପଜ୍ଜଲଂ ।
ଜିନସ୍ସାଭିମୁଖଂ ଗନ୍ତ୍ୱା କୁକ୍କୁଲୋ ପରିୱତ୍ତିୟ,
ଚନ୍ଦନସ୍ସ ସିତବ୍ଭସ୍ସ ଧୂଲୀ ହୁତ୍ୱାନ ପଗ୍ଘରି ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଛଟ୍ଠେ ନମୁଚି ୟୁଦ୍ଧମ୍ହି ମାରସ୍ସାସୀ ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଛଟ୍ଠୋ ୱିଜୟୋ ।
ତତୋ ଦିସ୍ୱାନ ତଂ କଣ୍ହୋ କଣ୍ହସେନା ପୁରକ୍ଖତୋ,
ସଙ୍କୁଦ୍ଧୋ ପେସୟି ତତ୍ଥ ୱସ୍ସଂ ସୋ ସିକତାମୟଂ ।
ଖଦୀରଙ୍ଗାର ସଙ୍କାସା ୱାଲୁକା ଗଗନାଗତା,
ଭସ୍ସନ୍ତା ଜିନପାଦନ୍ତେ ୱାସଚୁଣ୍ଣତ୍ତମାଗତା ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ସତ୍ତମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନର ସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ସତ୍ତମୋ ୱିଜୟୋ ।
ତମ୍ପି ଦିସ୍ୱା ଅସଜ୍ଜନ୍ତୋ ଅହିରୀ କୋପକେତୁକୋ,
ମାପେତ୍ୱା ପଲିପନ୍ଦାନି ତତ୍ଥ ଓସୀଦୟାମି ତଂ ।
ଇତି ଚିନ୍ତିୟ ମାପେତ୍ୱା ପେସେସି ପଲିପଂ ଘନଂ,
ଧୂପାୟନ୍ତୋ ପଜ୍ଜଲନ୍ତୋ ଗନ୍ତ୍ୱା ସୋ ନଭସା ଲହୁଂ ।
ସମ୍ବୁଦ୍ଧସିରିପାଦମ୍ହି ସମ୍ପତ୍ତୋ ନିବ୍ବୁତୋ ତତୋ,
ନାନାସୁଗନ୍ଧସମ୍ଭୁତ ଗନ୍ଧକଦ୍ଦମତଂ ଗତୋ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଅଟ୍ଠମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଓଲୋକେନ୍ତୋ ତତୋ ମାରୋ ମାରାରିଂ ସିରିୟୁଜ୍ଜଲଂ,
ଦିସ୍ୱା ଚିତ୍ତମ୍ପସାଦେତୁମସକ୍କୋନ୍ତୋ’ତି କୋପୱା ।
ଅଜ୍ଜେତମନ୍ଧକାରସ୍ମିଂ ପକ୍ଖିପିତ୍ୱା ପମୋହିତୁଂ,
ମୟ୍ହଂ ଭାରୋତି ଚିନ୍ତେତ୍ୱା ମାପେସି ତିମିରଂ ଘନଂ ।
ଲୋକନ୍ତରେସୁ ସମ୍ଭୁତ ତିମିସୋ’ୱ ଭୟାୱହୋ,
ଗନ୍ତ୍ୱାନ ଗଗନା ସୋ ହି ପତ୍ୱାନ ମୁନିସନ୍ତିକଂ ।
ୟଥା ତିମିରମାୟାତି ୱିନାସଂ ସୁରିୟୁଗ୍ଗତେ,
ଏୱମାସି ଜିନଗ୍ଗମ୍ହି ଅନ୍ଧକାରୋ ତଥାୱିଧୋ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ନୱମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ନୱମୋ ୱିଜୟୋ ।
ଏୱଂ ନୱହି ୱୁଟ୍ଠିହି କତ୍ୱା ମାରୋ ମହା ଭୱଂ,
ନ ତସ୍ସୋପଦ୍ଦୱଂ ଦିସ୍ୱା ଦିତ୍ତକୋପାନଲାକୁଲୋ ।
ଗହେତ୍ୱାନ ତତୋ ଖିପ୍ପଂ ଠପିତଂ ଅତ୍ତଗୁତ୍ତିୟା,
ଚକ୍କାୟୁଧଂ ମହାତେଜଂ କୁପିତୋ ଖିପି ୱେଗସା ।
ଧାରାଧରଂ ତମୁଗ୍ଗୟ୍ହ କୁଦ୍ଧୋ ପହରତେ ୟଦୀ,
କଲୀରଂୱ ଅସଜ୍ଜନ୍ତୋ ୱିଖଣ୍ଡେତି ପଜାପତି ।
ତଥେୱ ସୋ ମହିଂ କୁଦ୍ଧୋ ମାରୋ ଖିପତି ୱେଗୱା,
ନ ଭୱନ୍ତୋସଧା ପାଣା ୱିସୁସ୍ସନ୍ତି ସରାଦୟୋ ।
ତଥେୱ କୁପିତୋ ତେନ ଖିପତେ ସୋ ମହମ୍ବୁଧିଂ,
ୱିଲୟଂ ଜଲଜା ୟନ୍ତି ସୁସ୍ସତେ ସୋ ମହଣ୍ଣୱୋ ।
ଏୱଂ ମହାନୁଭାୱୋ ସୋ ଗଚ୍ଛନ୍ତୋ ଜଲମ୍ବରେ,
ପତ୍ୱାନ ପତିତୋ ନାଥଂ ହୁତ୍ୱାନ ପୁପ୍ଫଚୁମ୍ବଟଂ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଦସମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଦସମୋ ୱିଜୟୋ ।
ଇତି କୋପଗ୍ଗିନା ଦିତ୍ତମନଂ ମାରଂ ତଦା ଜିନୋ,
କରୁଣାଜଲସେକେନ ନିବ୍ବାପେନ୍ତୋ ନିସୀଦି ସୋ ।
ଏୱଂ କତ୍ୱାପି ସୋ କୁଦ୍ଧୋ ଅଲଦ୍ଧୱିଜୟୋ ତଦା,
ଆମନ୍ତେସି ସକଂ ସେନଂ ପଲୟାନଲଭେରୱଂ ।
ଏଥାସୁ ୱତ’ରେ ମୟ୍ହଂ ଅସ୍ସୱା ମାରକିଙ୍କରା,
ନାନାୱେସଧରା ହୋଥ ଧାରେଥ ୱିୱିଧାୟୁଧେ ।
ସଦ୍ଦେହେତଂ ପଲାପେଥ ୟାଥ ଗଣ୍ହଥ ବନ୍ଧଥ,
ପାଦେ ଗହେତ୍ୱା ଖିପଥ ଚକ୍କୱାଳନ୍ତରଂ ଇତୋ ।
ଅଥଗା ସହ ୱାଚାହି ଭିଂସା ସା ମାରୱାହିନୀ,
ତୁରଙ୍ଗ ୱ୍ୟଗ୍ଘ ମାତଙ୍ଗ ସୀହାଦିରୂପ ଭିଂସନା ।
ସା ମାରସ୍ସୁଭତୋ ପସ୍ସେ ଚତୁୱୀସତିୟୋଜନେ,
ଠିତା ପଚ୍ଛିମଭାଗମ୍ହୀ ଚକ୍କୱାଳସିଲାୱଧିଂ ।
ବହଲତ୍ତେନ ସା ଆସି ସମ୍ପୁଣ୍ଣ ନୱୟୋଜନା,
ୟକ୍ଖ ପେତ ପିସାଚାଦି ୱେସେହି ଭୟୱାହିନୀ ।
ସଂୱଟ୍ଟ ୱାତସମ୍ପାତ ଖୁଭୀତମ୍ବୁଧିନୋ ୱିୟ,
ଉଲ୍ଲୋଲ ଭିମଘୋସୋ ତୁ ଗତୋ ବ୍ରହ୍ମପୁରାୱଧିଂ ।
ଦନ୍ତ ସଙ୍ଘଟ୍ଟ ସଞ୍ଜାତ ଜାଲାମାଲା ସମାକୁଲା,
ତେସଂଗାରା’ୱ ଦିତ୍ତାସୁଂ କୋଧୁମ୍ମୀଲିତ ଲୋଚନା
ୱହନ୍ତି ଧୂମକ୍ଖନ୍ଧାନି ମୁଖକୋଟର କୋଟିହୀ,
ନୀହଟା ନୀହଟା ଜିୱ୍ହା ସୁଭୀମୋରଗତଂ ଗତା ।
ଉଦ୍ଧରିତ୍ୱାନ ତାଲାଦି କରିତ୍ୱାନ ସରାସନେ,
ଭୁଜଙ୍ଗେ ଚ ଗୁଣେ କେଚି ଗାଳ୍ହମାକଡ୍ଢୟନ୍ତି ଚ ।
ପୁଣ୍ଡରୀକଚ୍ଛ ସୀହାଦୀ ଖିପନ୍ତାଭିମୁଖେ ତଦା,
ଧାୱନ୍ତେକେ ସମୁଗ୍ଗୟ୍ହ ପୁରତୋ ଦିତ୍ତପବ୍ବତେ ।
ଭୟାନକାତି ନେକାନି ସୀସାନେକ କଲେବରେ,
ମାପୟିତ୍ୱାନ ପୁରତୋ ଧାୱନ୍ତି କେଚି କିଙ୍କରା ।
ସୀସେନ ସୀହସଙ୍କାସା ଗତ୍ତେନ ମନୁଜୋପମା,
ବୁଦ୍ଧସ୍ସାଭିମୁଖଂ କେଚି ଧାୱନ୍ତି ମାର କିଙ୍କରା ।
କଣ୍ଠୀରୱାକାରଦେହା ମୁଖେନ ଖଲୁ ରକ୍ଖସା,
ହୁତ୍ୱାନ ଅଭିଧାୱନ୍ତି କେଚିମାରସ୍ସ କିଙ୍କରା ।
ଦଣ୍ଡମାନୱକା ସୀସଭାଗେନା’ତିଭୟାୱହା,
ଗତ୍ତେନ ରକ୍ଖସା ହୁତ୍ୱା କେଚି ଧାୱନ୍ତି କିଙକରା ।
ଦୀପଚ୍ଛେଭ ତୁରଙ୍ଗାନଂ ୱ୍ୟଗ୍ଘ ଖଗ୍ଗୱିସାଣିନଂ,
ୱରାହ ମହିସାଦୀନଂ କଣ୍ଣପାୱୁର ଭୋଗିନଂ ।
ସୀସାକାର ମହାସୀସେ ତବ୍ବିରୁଦ୍ଧେ କଲେବରେ,
ମାପେତ୍ୱା ଅଭିଧାୱନ୍ତି କେଚି ମାରସ୍ସ କିଙ୍କରା ।
ଆକଡ୍ଢେନ୍ତା କପୋଲାନଂ କରସାଖାହି ସମ୍ମୁଖେ,
ଦସ୍ସୟନ୍ତା ମହାଦାଠଂ କେଚେନ୍ତି ମାରକିଙ୍କରା ।
ତିଖିଣଗ୍ଗନଖା କେଚି ଫାଲୟନ୍ତା ସକୋଦରେ,
ଅନ୍ତେ ଗଲେ ପିଲନ୍ଧିତ୍ୱା ଧାୱନ୍ତି କିଙ୍କରାପରେ ।
ଗିଲନ୍ତା କେଚି ଫଣିନୋ ଉଗ୍ଗିରନ୍ତା ତଥେୱ ଚ,
ସୀସ କନ୍ଧର କଣ୍ଣନ୍ତ ବାହୁ ଅଙ୍ଗୁଲି ଆଦିସୁ ।
ସକଲେସୁ ସରୀରେସୁ ୱିସଧୂମଗ୍ଗି ସଙ୍କୁଲେ,
ଧାରେନ୍ତା’ସିୱିସେ କେଚି ଧାୱନ୍ତ୍ୟଗ୍ଗେ ଭୟାୱହା ।
ପଦିତ୍ତାୟୋଗୁଲେ ଗୟ୍ହ ଖିପନ୍ତେକେ ଅନେକଧା,
ଦିତ୍ତପବ୍ବତମୁଦ୍ଧଚ୍ଚ କେଚି ଅଗ୍ଗିକପାଲକେ,
ଖିପନ୍ନା ଅଭିଧାୱନ୍ତି ଦଟ୍ଠୋଟ୍ଠା ଭୀମଲୋଚନା ।
ଲାଲୟନ୍ତା ସକା ଜିୱ୍ହା ଖନ୍ଧେ କତ୍ୱାନ ମୁଗ୍ଗରେ,
ମତ୍ତଭୁଜଙ୍ଗ ୱେସେନ ଧାୱନ୍ତି ଅପରେ ଭଟା ।
ପିବନ୍ତା ଲୋହିତାନେକେ ଖାଦନ୍ତା ପିସିତେ ପରେ,
ପିସାଚାୱ’ଚରୁଂ କେଚି ମୁନିରାଜସ୍ସ ଅଗ୍ଗତୋ ।
ଉଲ୍ଲଙ୍ଘନ୍ତା ଚ ସେଲେନ୍ତା ଧାୱନ୍ତା ଜଲିତାୟୁଧା,
ଭିମୱେସଧରା ୟକ୍ଖା କେଚେନ୍ତି ଭକୁଟୀମୁଖା ।
ପଣୁଣ୍ଣ ସରୱସ୍ସେହି କୁନ୍ତତୋମର ୱୁଟ୍ଠିହି,
ଭେଣ୍ଡିୱାଲା’ସିଚକ୍କେହି ନିବ୍ଭରାସି ଦିଗନ୍ତରଂ ।
ୟଂ ଦିଟ୍ଠ ସୁତ ମତ୍ତେନ ମରଣଂ ଚିତ୍ତ ୱିବ୍ଭମଂ,
ୟାତି ଲୋକୋ କଥଂ କୋ ତଂ ନିସ୍ସେସଂ ଭାସତେ ନରୋ ।
ନେକଦନ୍ତସହସ୍ସେହି ନିକ୍ଖନ୍ତଗ୍ଗିସିଖାୟୁତଂ,
ଦାନନିଜ୍ଝରସମ୍ପାତଂ ଭୀମଗଜ୍ଜନଗଜ୍ଜିତଂ ।
ନେକସତ କରଗ୍ଗେହି ଧତାୟୋଲଗୁଳାଦିକଂ,
ସନ୍ନଦ୍ଧଂ କୱଚାଦୀହି ଗିରିଂଚ ଗିରିମେଖଲଂ ।
ଆରୂଳ୍ହୋ ପାପିମା ତତ୍ଥ ଉସ୍ସାପେତ୍ୱା ଜୟଦ୍ଧଜଂ,
ୱିସାଲାୱତ୍ତ ଦାଠଗ୍ଗୋ ଚିପିଟଗ୍ଗ ଭଗ୍ଗ ନାସିକୋ ।
ଦଟ୍ଠୋଟ୍ଠ ଭୀମୱଦନୋ ଭକୁଟୀ ୱଲି ଲଲାଟକୋ,
କୋଧାନଲେହି ସନ୍ଦିଦ୍ଧ ମହକ୍ଖୋ ତମ୍ବଦାଠୀକୋ ।
ନୀଲପବ୍ବତ ସଙ୍କାସ ୱିସମଙ୍ଗୋ ମହୋଦରୋ,
ଗୋନସୋରଗ ସପ୍ପାଦି ଅଙ୍ଗୀକତ ସୁଭିଂସନୋ ।
ସହସ୍ସବାହୁଂ ମାପେତ୍ୱା ଛୂରିକା ୟଟ୍ଠି ସତ୍ତି ଚ,
କୋଦଣ୍ଡଚଣ୍ଡବାଣେ ଚ ଚକ୍କ କୁନ୍ତଗଦାଦି ଚ ।
ସଙ୍କୁ ୱେତାଲିକା ଫରସୁ ପାସମୁଗ୍ଗର ଅଙ୍କୁସେ,
ଗହେତ୍ୱା କଣୟଞ୍ଚାଥ ତିସୂଲ ୱଜିରାୟୁଧେ ।
ପରିୱତ୍ତେସି ଆକାସେ ତେସମଞ୍ଞୋଞ୍ଞ ଘଟ୍ଟନା,
ଉଗ୍ଗତେହି ଫୁଲିଙ୍ଗେହି ଧାୱନ୍ତେହି ସମନ୍ତତୋ ।
ଅଗ୍ଗି ଚକ୍କପରୀତଂଚ କୁରୁମାନୋ ନିଜଂ ତନୁଂ,
ଆୱହନ୍ତୋ ଭୟଂ ବ୍ରହ୍ମ ସୁର ସିଦ୍ଧାଦୀନଂ ତଦା,
ସ ମାରସେନୋ ସୋ ମାରୋ ଭଗୱନ୍ତମୁପାଗମି ।
ଉଦୟାୱଲକୂଟମ୍ହି ଭାସନ୍ତୋୱ ପଭାକରୋ,
ସୁପ୍ପତିଟ୍ଠିତମେରୂ’ୱ ତିକୂଟାଚଲ ମୁଦ୍ଧନି ।
କତ୍ୱାନ ପିଟ୍ଠିତୋ ବୋଧିଂ ଭୂରୁହଂ ୱଜିରାସନେ,
ନିସିନ୍ନୋ ଭଗୱା’ତୀୱ ନିଚ୍ଚଲୋ ଅତିରୋଚତି ।
ଅକମ୍ପୋ ସୋ ମୁନୀ ଏୱମଗ୍ଗେ’କାସି ନିଜଂ ବଲଂ,
ସମ୍ମପ୍ପଧାନସଂୟୁତ୍ତୋ ଦୟାମେତ୍ତୋ ମହେସିକୋ ।
ଚତୁବୁଦ୍ଧଭୁମିସଙ୍ଖାତ ଜୟଭୁମିମୁଦିକ୍ଖିୟ,
ଚତୁସ୍ସଙ୍ଗହୱତ୍ଥୂନଂ ୟୋଜେତ୍ୱା ଦ୍ୱାରକୋଟ୍ଠକେ ।
ୟୋଜେତ୍ୱାନ ଥିରଂ ତତ୍ଥ ସଦ୍ଧାଦିବଲକୋଟ୍ଠକେ,
ସତିପଟ୍ଠାନପାକାରେ ଅଭେଜ୍ଜିନ୍ଦ୍ରିୟ ଗୋପୁରେ ।
ଥିରଞାଣୟୁଧାକିଣ୍ଣେ ମେତ୍ତା ସନ୍ନାହ ୱମ୍ମିତୋ,
ଅଭୀତ ଭାରତୀ ଭୁରି ଭେରିସଙ୍ଖ ପୁରକ୍ଖତୋ ।
ଚତୁରଙ୍ଗୱିରିୟୁତ୍ତୁଙ୍ଗ ମାତଙ୍ଗକ୍ଖନ୍ଧସଙ୍ଗତୋ,
ପୁଞ୍ଞସମ୍ଭାରଭାରେନ କମ୍ପୟଂ ୱସୁଧାତଲଂ ।
ଚରିୟତ୍ତୟ ସଙ୍ଖାତ’ମୁସ୍ସାପିତ ଜୟଦ୍ଧଜୋ,
ଏୱଂ ୱିଧାୟ ମାରାରି ମାରସଙ୍ଗାମ ମଣ୍ଡଲଂ ।
ଦାନାଦୟୋ ମହାୟୋଧେ ଆହୂୟ ସହଜାତକେ,
ସୁଣାଥ ଭୋ ଗିରଂ ମୟ୍ହଂ ଭୱତଜ୍ଜ ମହା ଭୱୋ ।
ଏଥ ୟାଥ ସମଗ୍ଗତ୍ଥ ନ ଓସ୍ସକ୍କଥ ସୁଜ୍ଝଥ,
ୱିଜେତୁଂ ମାରୟୁଦ୍ଧମ୍ହୀ ନ ସକ୍କା’ସେସଜନ୍ତୁହି ।
ଅଜ୍ଜ ଗଚ୍ଛତି ନିଟ୍ଠାନଂ ସୋ ଭୋ ପାରମିତାଭଟା,
ସହୁସ୍ସାହା ମମଗ୍ଗମ୍ହି ଦସ୍ସେଥ ୱୀରିୟଂ ସକଂ ।
ଅଥ ଦାନଭଟୋ ଆହ ଅପ୍ଫୋଟଂ ଦିଗୁଣଂ ଭୁଜଂ,
ପସ୍ସଦାନି ମହାୱୀର ବଲଂ ମେ ମାରଧଂସନେ ।
ପରମତ୍ଥପାରମି ୟୋଧଂ ତଥେ’ୱ ଉପପାରମିଂ,
ଉଭୋ ପସ୍ସେ କରିତ୍ୱାନ ସସେନୋ ଧାୱି ଦପ୍ପୱା ।
ତଥେୱ ସୀଲନାମୱ୍ହୋ ପାରମୀଭଟ’ମୁତ୍ତମୋ,
ନିକ୍ଖମ୍ମ ସହ ସେନାୟ ମାରସେନମଭିଦ୍ଦୱୀ ।
ତଥାନେକ୍ଖମ୍ମନାମୋପି ସନ୍ନଦ୍ଧୋ’ସଭଟୋ ଭଟୋ,
ମାରସେନାମିଗେ ହନ୍ତୁଂ ଧାୱି ଦୀପୀ’ୱ ସାହସୋ ।
ପଞ୍ଞାୟୋଧୋ’ପି ଗଚ୍ଛନ୍ତୋ ସାଟୋପୋ ଧାୱି ଦପ୍ପୱା,
ମାରମେରୁମହା ଅଜ୍ଜ ସସେନୁମ୍ମୂଲୟାମିତି ।
ୱୀରିୟପାରମିତା ୟୋଧୋ ଦଟ୍ଠୋଟ୍ଠୋ ଭୀମଗଜ୍ଜନୋ,
ସୋସେମି ମମ ତେଜେନ ୱଦଂ’ଗା ମାର ସାଗରଂ ।
ଖନ୍ତିସଚ୍ଚୱ୍ହୟା ଚେୱ ତତୋ’ଧିଟ୍ଠାନକୋ ଭଟୋ,
ଆସୁ ଧାୱିଂସୁ ପାତେତୁଂ ମାରସ୍ସ ମକରଦ୍ଧଜଂ ।
ମେତ୍ତାନାମୋ ମହାୟୋଧୋ ମାରୋ ମୟ୍ହମଲନ୍ତି’ଗା,
ଉପେକ୍ଖକୋ’ପୀ ସୋ ୟୋଧୋ ମାରସେନଂ ପଦାଲିତୁଂ ।
ପେସେତ୍ୱେୱଂ ଜିନୋ ସେନଂ’ସରୀରଂ ଦଳ୍ହୱିକ୍କମଂ,
ନିସିଦି ତସ୍ସ ତେଜେନ ନିରୁସ୍ସାହାସି ସା ଚମୂ ।
ଅହୋ ଭୋ ୱିମ୍ହୟଂ ଦାନି ସୁଣାଥ ମୁନିନୋ ମମ,
ଜେତି ଏକୋ ନିସିନ୍ନୋୱ ସମାରଂ ମାରୱାହିନିଂ ।
କୋପାନଲେନ ସନ୍ଦିତ୍ତଂ ଦୁଟ୍ଠ ରୁଟ୍ଠଂ ପଜାପତିଂ,
ଅଦୁଟ୍ଠୋ ଜେତି ସମ୍ବୁଦ୍ଧୋ ଆନୁଭାୱୋ ହି ତାଦିସୋ ।
ଦିତ୍ତାୟୁଧେ ଖିପନ୍ତେ’ପି ୱିଜ୍ଝନ୍ତେ ୱସୱତ୍ତିନୀ,
ନିରାୟୁଧୋ’ୱ ତଂ ଜେତି ଆନୁଭାୱୋ ହି ତାଦିସୋ ।
ସହାଟୋପଂ ସହଙକାରଂ ମାରଂ ସାଡମ୍ବରଂ ତଦା,
ନିଚ୍ଚଲୋ ଜେତି ସମ୍ବୁଦ୍ଧୋ ଆନୁଭାୱୋ ହି ତାଦିସୋ ।
ହତ୍ଥସ୍ସ ରଥପତ୍ତୀହି ଧାୱନ୍ତଂ ତମିତୋଚିତୋ,
ନିସିନ୍ନୋୱ ଜିନୋ ଜେତି ଆନୁଭାୱୋ ହି ତାଦିସୋ ।
ଭାସନ୍ତଂ ନେକଧା କଣ୍ଣ କଠୋର ଗିରମନ୍ତକଂ,
ନିସ୍ସଦ୍ଦୋ ଜେତି ସମ୍ବୁଦ୍ଧୋ ଆନୁଭାୱୋ ହି ତାଦିସୋ ।
ମାରୋପାଗମ୍ମ ଅଟ୍ଠାସି ଲଙ୍ଘିତୁଂ ଅସମତ୍ଥକୋ,
ବୁଦ୍ଧତେଜଗ୍ଗି ପାକାରଂ ଦିତ୍ତମବ୍ଭୁଗ୍ଗତଂ ଥିରଂ ।
ତଦାହ ନମୁଚି କୁଦ୍ଧୋ ଭୁଜମୁକ୍ଖିପ୍ପ’ମୀଦିସଂ,
ଖିପ୍ପଂ ସିଦ୍ଧତ୍ଥ ହେ ଗଚ୍ଛ ସନ୍ତକେଦଂ ମମାସନଂ ।
ନୋ ଚେ ଗଚ୍ଛସି ତେ ହଦୟଂ ଫାଲେମି ନଖସତ୍ତିହି,
ୱିଚୁଣ୍ଣେମି ତୁୱଂ ପାଦେ ଗହେତ୍ୱା ପଥୱୀତଲେ ।
ପସ୍ସ ମେ ମହତିଂ ସେନଂ ପସ୍ସ ଆୟୁଧସଞ୍ଚୟଂ,
ତେନ ତଂ ଅଭିମଦ୍ଦାମି ତୁୱଟଂ ଗଚ୍ଛିଦଂ ମମ ।
ଅଥସ୍ସ ୱଚନଂ ସୁତ୍ୱା ଜିନୋ’ହ ମଧୁରଙ୍ଗିରୋ,
କଦା ତେ ପୂରିତା ମାର ପଲ୍ଲଙ୍କତ୍ଥାୟ ପାରମୀ ।
କଦା ଅଦାସି ସୀସାଦୀ ଦାନଂ ସୀଲଂ କଥଂ ତୱ,
ତଦତ୍ଥାୟ କଥାପେହି କେ ତେ ପଚ୍ଚକ୍ଖକାରକା ।
ଅଥା’ହ ଫରୁସୋ ମାରୋ ନେତଂ ଗରୁ ମୁନେ ମମ,
ଅୟଂ ସା ପରିସା ସବ୍ବା ତସ୍ସ ପଚ୍ଚକ୍ଖକାରକଂ ।
ଉଗ୍ଘୋସେସି ମହାସେନା ପକ୍ଖୀ’ହନ୍ତି ୱିସୁଂ ୱିସୁଂ,
ଭୁମୁଦ୍ରିୟନ ମତ୍ତୋୱ ତତୋ କୋଲାହଲୋ ଅହୁ ।
ଅଥାହ ମାରୋ ସମଣ ଅହଂ ସକ୍ଖି କଥାପୟିଂ,
ତୱ କୋ ସକ୍ଖି ୟଜ୍ଜତ୍ଥି କଥାପେହି ଲହୁଂ ମମ ।
ଅଥାହ ଭଗୱା ତସ୍ସ ଗମ୍ଭୀରଂ ମଧୁରଂ ଗିରଂ,
ନିଚ୍ଛାରେନ୍ତା ମୟୂରସ୍ସ ସୁନାଦଂ ଫଣିନୋ ୟଥା ।
ତୱେୱ ମେ ନ ସନ୍ତୀଧ ପଚ୍ଚକ୍ଖତ୍ଥଂ ସଚେତନା,
ଅଚେତନାୱ ମେଦାନି ସନ୍ତି ପଚ୍ଚକ୍ଖୱାଦିନୋ ।
ଇତି ୱତ୍ୱାନ ମାରାରି ସଞ୍ତ୍ଧା ଜିମୂତ ଗବ୍ଭତୋ,
ନିକ୍ଖନ୍ତ ୱିଜ୍ଜୁସଙ୍କାସଂ କରଂ ଚାମୀକରଜ୍ଜୁତିଂ ।
ରତ୍ତ ଚୀୱରଗବ୍ଭମ୍ହା ନୀହରିତ୍ୱା ଜିନୋ ତଦା,
ଧରଣ୍ୟଭିମୁଖଂ’କାସି ଉଦ୍ଦିସ୍ସ ଭୁମିକାମିନିଂ ।
ଦାନମାନାଦିକମ୍ମେ ମେ କମ୍ପନ୍ତୀ ଜାତିଜାତିୟଂ,
କିମଜ୍ଜ ନିସ୍ସଣାସୀ’ତି ଜିନୋ ୱାଚମୁଦାହରୀ ।
ସକ୍ଖି’ହନ୍ତି ୱଦନ୍ତୀୱ ତତୋ ଭୁମିୱରଙ୍ଗନା,
ସଳିଲାୱନିପରିୟନ୍ତା ଗଜ୍ଜନ୍ତି ନଚ୍ଚି ତାୱଦେ ।
ମହୀ ସାଗର ଊମୀ’ୱ ଉଟ୍ଠାପେନ୍ତି ମହୂମିୟୋ,
ଛଦ୍ଧା କମ୍ପି କୁଲାଲସ୍ସ ଚକ୍କଂୱାତି ପରିବ୍ଭମି ।
ହିମୱା ଗିରିରାଜା ଚ ୟୁଗନ୍ଧର ନଗାଦୟୋ,
କୂଟବାଗା ସମୁକ୍ଖିପ୍ପ ନଚ୍ଚିଂସୁ ନଟକା ୱିୟ ।
ଦିସ୍ୱା ସୁତ୍ୱା ତମଚ୍ଛେରଂ ଗୟେନୁବ୍ବିଗ୍ଗ ମାନସା,
ମାରସେନା ପଭିନ୍ନାସି ଭିନ୍ନୱେଲୋୱ ସାଗରୋ ।
ଭୟେନଟ୍ଟସ୍ସରା ଭନ୍ତା ପତନ୍ତଞ୍ଞୋଞ୍ଞ ଘଟ୍ଟନା,
ୱିକିରିତ୍ୱା କଚେ ପିଟ୍ଠେ ଧାୱିଂସୁ ମାରକିଙ୍କରା ।
ଗହିତାୟୁଧାନି ଛଡ୍ଡେନ୍ତା ପିଦହନ୍ତାନନଂ କରା,
ନିୱତ୍ଥୱତ୍ଥମତ୍ତେ’ପି ଧାୱିଂସୁ ଅନପେକ୍ଖକା ।
ଅଙ୍ଗୁଲିୟୋ ମୁଖେ କେଚି ପକ୍ଖିପନ୍ତି ରୁଦନ୍ତି ଚ,
କେଚି ୱନ୍ଦନ୍ତି ୟାୱନ୍ତି ଅଭୟଂ ସାମି ଦେହି ନୋ ।
ସିଦ୍ଧତ୍ଥୋ’ୟଂ ଜିତୋ କିନ୍ନୁ ନିସ୍ସାସା ରୁଦ୍ଧଭାସନା,
ପିଟ୍ଠିପସ୍ସମୁଦିକ୍ଖନ୍ତି ଧାୱିଂସୁ ଚକିତା ପରେ ।
ଗିରିମେଖଲୋ’ପି ନାଗିନ୍ଦୋ ଜନ୍ନୁକେନ ପତୀ ତଦା,
ମାରୋ’ପି ପତିତୋ ଖିପ୍ପଂ ଧାୱିତ୍ୱା’ଦସ୍ସନଂ ଗତୋ ।
ତଙ୍କଣେ ଉଗ୍ଗତୋ ଆସି ସତ୍ଥୁ କିତ୍ତି ଜୟଦ୍ଧଜୋ,
ଅୱହେନ୍ତୋୱ ସୁରାଦୀନଂ ବ୍ରହ୍ମଲୋକାୱଧିଂ ଗତୋ ।
ତଦାସି ୱିଜୟୋ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଚରିମେ ମାରୟୁଦ୍ଧମ୍ହି ମାରସ୍ସାସି ପରାଜୟୋ ।
ଏୱଂ ମହାନୁଭାୱୋତି ମନ୍ତ୍ୱାନ ନରସାରଥିଂ,
ନିଚ୍ଚଂ ୱନ୍ଦଥ ପୂଜେଥ ସୋ ହି ୱୋ ସରଣଂ ସଦା ।
ଏକାଦସମୋ ୱିଜୟୋ ।
ଲଦ୍ଧାଭିୱିଜୟେ ବୁଦ୍ଧେ ନିସିନ୍ନେ ୱଜିରାସନେ,
ପରିୱାରୟୁଂ ଗତାଗମ୍ମ ପୁରେ ୱିୟ ସୁରାଦୟୋ ।
ଦେୱା ତେ ନିଖିଲା ନେତ୍ୱା ନାନାପୂଜାୱିଧିଂ ତତୋ,
ସନ୍ତୁଟ୍ଠା ମୁନିନୋ’କାସୁଂ ମହନ୍ତଂ ଜୟମଙ୍ଗଲଂ ।
ସମ୍ପତ୍ତାଥ ନିସାକନ୍ତା ମାନେତୁଂଚ ମୁନିସ୍ସରଂ,
ପୁବ୍ବାପରମ୍ବରେ ଲଗ୍ଗ ସସୀଣକ୍କଣ୍ଣ ଭୁସଣ ।
ସୁନୀଲାକାସ ଧମ୍ମିଲ୍ଲେ ଧତ୍ତ ତାରାଲିମାଲିକା,
ୱୀଜେନ୍ତୀୱ ଦିସା ବାହା ଫୁଲ୍ଲଚୂତକ ଚାମରେ ।
ମଲ୍ଲିକା ମୁକୁଲାସତ୍ତ ସମ୍ମତ୍ତାଲିଗଣା ତଦା,
ଧମେନ୍ତା ୱିୟ ସଙ୍ଖାନି କୂଜେନ୍ତି ମଧୁରଂ ଗିରଂ ।
ସାମୋଦ ମକରନ୍ଦେହି ମନ୍ଦମନ୍ଦାନିଲାଗତା,
ସଜୁଣ୍ହା ଜିନବିମ୍ବମ୍ହି ଉତୁଂ ଗାହେନ୍ତି ସୀତଲଂ ।
ଅୱିଜ୍ଜାଦି ମହାମୂଲଂ ତିୱଟ୍ଟତ୍ଥିର ଖନ୍ଧକଂ,
ସଂସାର ୱିସରୁକ୍ଖଂ ସୋ ଆରଦ୍ଧୁମ୍ମୁଲିତୁଂ ତଦା ।
ଭାୱେନ୍ତୋ ପୁରିମେ ୟାମେ ସରନ୍ତୋ ଖନ୍ଧସନ୍ତତିଂ,
ପୁବ୍ବେନିୱାସାନୁସ୍ସତି ଞାଣଂ ଲଦ୍ଧା ନରିସ୍ସରୋ ।
ତଥା ମଜ୍ଝିମ ୟାମମ୍ହି ଦିବ୍ବଚକ୍ଖୁ ୱିସୋଧନା,
ଚୁତୁପପାତ ଞାଣଞ୍ଚ ଅଧିଗଂତ୍ୱାନ ସବ୍ବସୋ ।
ରତ୍ତିୟା ପଚ୍ଛିମେ ୟାମେ ଚିନ୍ତୟନ୍ତୋ ଜରାଦୟୋ,
ୱିପସ୍ସିତ୍ୱା ନାମରୂପେ ଆରୋପେତ୍ୱା ତିଲକ୍ଖଣଂ ।
ସମ୍ମସନ୍ତୋ କିଲେସେହି ୱିୱେଚେତ୍ୱା ସକଂ ମନଂ,
ଆସୱାନଂ ଖୟେ ଞାଣା ଲଦ୍ଧା ଅଗ୍ଗଫଲଂ ତଦା ।
ପତ୍ତୋ ନିବ୍ବାଣନଗରଂ ବୋଜ୍ଝଙ୍ଗ ରତନିସ୍ସରୋ,
ସଦ୍ଧମ୍ମରାଜା ହୁତ୍ୱାନ ପୀତିୱାଚମୁଦାହରୀ ।
ଅନେକଜାତି ସଂସାରଂ ସନ୍ଧାୱିସ୍ସଂ ଅନିବ୍ବିସଂ,
ଗହକାରକଂ ଗୱେସନ୍ତୋ ଦୁକ୍ଖା ଜାତି ପୁନପ୍ପୁନଂ ।
ଗହକାରକ ଦିଟ୍ଠୋସି ପୁନ ଗେହଂ ନ କାହସି,
ସବ୍ବା ତେ ଫାସୁକା ଭଗ୍ଗା ଗହକୂଟଂ ୱିସଙ୍ଖିତଂ,
ୱିସଙ୍ଖାରଗତଂ ଚିତ୍ତଂ ତଣ୍ହାନଂ ଖୟମଜ୍ଝଗା ।
ଇଚ୍ଚେୱ ମଗ୍ଗମତଦାନୱିଧିପ୍ପୱୀଣ,
କାରୁଞ୍ଞପୁଞ୍ଞହଦୟେନ ମହୋଦୟେନ,
ପତ୍ୱା ଭୱଣ୍ଣୱମପାରମନନ୍ତଦୁକ୍ଖଂ,
ୟେନୋଚିତା ପରମପାରମିତା ଜିନେନ ।
ୟୋଚେୱ ସବ୍ବୱିଭୱଂ ପଣୁଦିତ୍ୱ ରଜ୍ଜଂ
ନିକ୍ଖମ୍ମ ପତ୍ୱ ଚଲପତ୍ତମହୀରୁହସ୍ସ,
ମୂଲେ ନିସଜ୍ଜ ସବଲଂ ପବଲଞ୍ଚ ମାରଂ,
ପାପାରୟୋ ଚ ୱିଜିତୋ ସ ଦଦାତୁ ସନ୍ତିଂ ।
ଅଭିସମ୍ବୋଧି କଥା ।
ତିଲୋକନାଥୋ ସୁଗତୋ ତତୋ ତଦା
ଉଦାନୱାଚଂ ସମୁଦାହରିତ୍ୱା,
ପଲ୍ଲଙ୍କମାଭୁଜ୍ଜ ଦୁମିନ୍ଦମୂଲେ
ଚିନ୍ତେସି ଏୱଂ ୱଜିରାସନସ୍ମିଂ ।
ଦାନାଦୟୋ ପାରମିତା ଚିନିତ୍ୱା
ଅସଙ୍ଖକପ୍ପାନି ଚ ଖେପୟିତ୍ୱା,
ଅସ୍ସେୱ ପଲ୍ଲଙ୍କୱରସ୍ସ ହେତୁ
ସନ୍ଧାୱିତଂ ତଂ ଭଜିତଂ ୱୟଜ୍ଜ ।
ୟାୱସ୍ସୁ ପୁଣ୍ଣ ମମ ଚେତନାୟୋ
ତାୱେତ୍ଥ ଅଚ୍ଛାମି ନ ୱୁଟ୍ଠହାମି,
ମଂତ୍ୱାନ ସୋ ନେକସହସ୍ସସଙ୍ଖା
ଜିନୋ ସମାପତ୍ତି ୱଲଞ୍ଜି ତତ୍ଥ ।
ଦେୱାତିଦେୱୋ ତିଭୱେକନାଥୋ
ହତାୱକାସୋ ଜିତପଞ୍ଚମାରୋ,
ପିତାମହାଦୀହି ମହୀୟମାନୋ
ଖେପେସି ସତ୍ଥା ଦିୱସାନି ସତ୍ତ ।
ଇତି ପଠମ ସତ୍ତାହଂ ।
ୟସ୍ମାସନଂ ନେୱ ଜହାତି ତସ୍ମା
ତିସନ୍ଧିୟୁତ୍ତେନ ନିସୀଦିତେୱ,
ଅଜ୍ଜାପି କତ୍ତବ୍ବମନେନ ଅତ୍ଥି
ଦେୱାନମିଚ୍ଛାସି ମନମ୍ହି କଙ୍ଖା ।
ତେସଂ ମନଂ ସୋ ମନସା ୱିଦିତ୍ୱା
ୱିନୋଦନତ୍ଥଂ ୱିମତିନ୍ତୁ ତେସଂ,
ଉଟ୍ଠାୟ ତମ୍ହା ନଭମୁପ୍ପତିତ୍ୱା
ଦସ୍ସେସି ତେସଂ ମୁନିପାଟିହେରଂ ।
ୱିନୋଦୟିତ୍ୱା ସୁଗତୋ ତଦେୱଂ
ସୁଧାସିନଂ ଚେତସି କଙ୍ଖରାସିଂ,
ପଲ୍ଲଙ୍କତୋ ଉତ୍ତରପୁବ୍ବକଣ୍ଣଂ
ଆକାସତୋରୁୟ୍ହ ଜଲଂ ରୱୀୱ ।
ଜିନୋ ଦୁମିନ୍ଦସ୍ସ ଚ ଆସନସ୍ସ
ବହୂପକାରତ୍ତମନୁସ୍ସରନ୍ତୋ,
ଠିତୋ ପଦଂ କିଞ୍ଚି ଅକୋପୟନ୍ତୋ
ଇତୋ ଚିତୋ ଲୋକ ନ ମୁଜ୍ଜହନ୍ତୋ ।
ନୀଲାୟତକ୍ଖାମଲକନ୍ତିତୋୟ
ଧାରାନିପାତେନ ଦୁମିନ୍ଦରାଜଂ,
ନିସିଞ୍ଚମାନୋ ଦିୱସାନି ସତ୍ତ
ପୂଜେସି ତଂ’ନିମିସଲୋଚନେହି ।
ଅଜ୍ଜାପି ତସ୍ମିଂ ଧରଣିପ୍ପଦେସେ
କତସ୍ସ ଥୂପସ୍ସ ତଦେୱ ନାମଂ,
ଅହୋସି ଦେୱା ଚ ନରୋ’ରଗା ଚ
ମହେନ୍ତି ତେ ତେନ ଦିୱଂ ପୟନ୍ତି ।
ଇତି ଦୁତିୟ ସତ୍ତାହଂ ।
ଦେୱା ତତୋ ଦେୱୱରସ୍ସ ତସ୍ସ
ସୁଚଙ୍କମଂ’କଂସୁ ମଣୀହି ନାନା,
ପଲ୍ଲଙ୍କତୋ ଠାନୱରସ୍ସ ମଜ୍ଝେ
ପୁବ୍ବାପରାସାୟନମନ୍ତରାଲେ ।
ନରିନ୍ଦ ନାଗିନ୍ଦ ସୁରିନ୍ଦ ପୂଜିତୋ
ଛବ୍ବଣ୍ଣରଂସୀହି ସମୁଜ୍ଜଲନ୍ତୋ,
ନୀଲମ୍ବରେ ତାରକିତୋ ସସୀ’ୱ
ସୋ ଚଙ୍କମୀ ସତ୍ତ ଅହାନି ତତ୍ଥ ।
ଅଜ୍ଜାପି ତସ୍ମିଂ ଧରଣିପ୍ପଦେସେ
କତସ୍ସ ଥୂପସ୍ସ ତଦେୱ ନାମଂ,
ଅହୋସି ଦେୱା ଚ ନରୋରଗା ଚ
ମହେନ୍ତି ତେ ତେନ ଦିୱଂ ପୟନ୍ତି ।
ଇତି ତତିୟ ସତ୍ତାହଂ ।
ତତୋ ଦୁମିନ୍ଦସ୍ସ ସୁରାସୁରିନ୍ଦା
ମହୀତଲେ ପଚ୍ଛିମୋତ୍ତରାୟଂ,
ମାପିଂସୁ ନାନାରତନାଲୟଗ୍ଗଂ
ନିସଜ୍ଜ ପଲ୍ଲଙ୍କୱରେ ତହିଂ ସୋ ।
ସୁଦୁଦ୍ଦସାଗାଧମପାରପାରଂ
ସମନ୍ତପଟ୍ଠାନତରଙ୍ଗଭଙ୍ଗିଂ,
ଧମ୍ମୋଦଧିଂ ଞାଣସୁମେରୁମତ୍ଥା
ସାଲୋଲୟଂ ଖେପୟହାନି ସତ୍ତ ।
ଅଜ୍ଜାପି ତସ୍ମିଂ ଧରଣିପ୍ପଦେସେ
କତସ୍ସ ଥୂପସ୍ସ ତଦେୱ ନାମଂ,
ଅହୋସି ଦେୱା ଚ ନରୋରଗା ଚ
ମହେନ୍ତି ତେ ତେନ ଦିୱଂ ପୟନ୍ତି ।
ଇତି ଚତୁତ୍ଥ ସତ୍ତାହଂ ।
ତତୋ ଜିନୋ ଗନ୍ତ୍ୱ’ଜପାଲମୂଲେ
ୱିମୁତ୍ତିଜଂ ସାଦୁଫଲଂ’ନୁଭୋନ୍ତୋ,
ସତ୍ତାହମତ୍ତଂ ଅତିୱତ୍ତୟୀ ସୋ
ଦେୱାତିଦେୱୋ କରୁଣାଗୁଣଗ୍ଗୋ ।
ତଦାଗତା ମାରୱଧୂ ମୁନିତ୍ଦଂ
ପଲୋଭିତୁଂ ୟା ପିତୁନୋ ସକାସା,
ତାସଂ ପୟୋଗମ୍ପିଧ ବିନ୍ଦୁମତ୍ତଂ
କଥୀୟତେ ତଂ ସମୁପାଗତତ୍ତା ।
ତଦା ସ ମାରୋ ସମରେ ଜିନେନ
ପରାଜିତୋ ସୋଚନକୋ’ପଗଂତ୍ୱା,
ପଜ୍ଝାୟମାନୋ’ଥ ଅଧୋମୁଖୋ’ଚ
ନିସୀଦି ତୁଣ୍ହୀ ୱିଲିଖଂ ଛମାୟଂ ।
ପରାଜୟଂ ମୟ୍ହ ମମେୱ ଦୋସୋ
ନ ତସ୍ସ କସ୍ମାହମୟଂ’ଚ ନାସିଂ,
ସୀସକ୍ଖିମଂସାଦି ଚ ପୁତ୍ତଦାରେ
ନାଦନ୍ତି ଏୱଂ ମନସୀ କରୋନ୍ତୋ ।
ପୱତ୍ତିମେତଂ ମକରଦ୍ଧଜସ୍ସ
ସୁତ୍ୱାନ ତଣ୍ହା ଅରତୀ ରଗା ଚ,
ୟତ୍ଥଚ୍ଛି ମାରୋ ପରିସୋଚୟନ୍ତୋ
ତତ୍ଥାଗମୁଂ ତା ଚକିତା ଖଣେନ ।
ଦିସ୍ୱାନ ତଂ ତତ୍ଥ ତଥା ନିସିନ୍ନଂ
ନିସ୍ସାସରୁଦ୍ଧଂ ଗିରମୁଗ୍ଗିରନ୍ତୀ,
ତୁସାର ବିନ୍ଦୁନିୱହେହି’ସାର
ପଙ୍କେରୁହାକାର ୱିସାଲନେତ୍ତା ।
ହା ତାତ ହା ତାତ କିମାସି ତେଦଂ
ନଟ୍ଠନ୍ନୁ ତେ କିଂ ୱଦ ପତ୍ଥସୀ କିଂ,
କୋ ତେ ଦିସୋ କେନ ପରାଜିତୋ’ସି
କିମାନୟିସ୍ସାମ ହନାମ କଂ ନୋ ।
କିମ୍ହୋତିୟୋଦାନି ନ ପସ୍ସଥେତଂ
ସୁଦ୍ଧୋଦନୀୟଂ ତତକିତ୍ତିଘୋସଂ,
ମୁଖମ୍ହି ମୟ୍ହଂ ମସିମକ୍ଖୟନ୍ତଂ
ଅତିଚ୍ଚ ୟନ୍ତଂ ୱିସୟଂ ପସୟ୍ହ ।
ନ ଭାରିୟା ତାତ ମନୁସ୍ସଭୂତଂ
କତ୍ତୁଂ ୱସଂ କୋ ୱସମେତି ନାମ୍ହଂ,
ତଂ ରାଗପାସେନ ଗଜଂ’ୱ ମତ୍ତଂ
ସୁବନ୍ଧକଂ ବନ୍ଧିୟ ଆନୟେମ ।
ନ ରାଗପାସେନ ହି ଆନନୀୟୋ
ମାରସ୍ସ ଧେୟ୍ୟଂ ସମତିକ୍କମୀୱ,
ଅପେତରାଗୋ ଅରହା ଅକମ୍ପୋ
ସୋୱାମ ତସ୍ମା ସୁଭଗା ତନୁଜା ।
ସଚେତନୋ ସୋ ହି ମନୁସ୍ସଭୁତୋ
ଅଚେତନଞ୍ଚେ ସମୁପାଗମାମ,
କରୋମ ତଂ ନୋ ୱସଗଂ କିମେତ୍ଥ
ଚିତ୍ତଂ ବଲଂ ପସ୍ସଥ ନୋ ଖଣେନ ।
ରୂପେନ ନେତ୍ତଂ ସୁମନୋହରେନ
ଗନ୍ଧେନ ଘାଣଂ ସୱଣଂ ସରେନ,
ଫସ୍ସେନ ଗତ୍ତଂ ରସସା ରସଞ୍ଞଂ
ମନଞ୍ଚ ପାସେନ ଚ କାମଜେନ
ସୁବାହୁପାସେନ ଚ ତସ୍ସ ଗୀୱଂ
ବାହୁଦ୍ୱୟଂ ଧାରିତମାଲଦାମା,
ବନ୍ଧିତ୍ୱଦାନେୱ ତମା’ନୟାମ
ବଲଞ୍ହି ନୋ ପସ୍ସଥ ତାତ’ଦାନି ।
ୱତ୍ୱାନ ଏୱଂ ୱଚନଂ ପିତୁସ୍ସ
ପଣମ୍ମ ପାଦାନି ପଗବ୍ଭିତନ୍ତା,
ୟତ୍ଥଚ୍ଛି ମାରାରି ୱିରୋଚମାନୋ
ତତ୍ଥା’ଗମୁଂ ଖିପ୍ପମୁଦଗ୍ଗଚିତ୍ତା ।
ସାମୋଦମାଲାକୁଲକେସଭାର
ପୟୋଧରା କୁଙକ୍କୁମହାରିହାରା,
ବିମ୍ବାଧରା ଚାରୁସଭା ପଭାସା
ଉମ୍ମାଦୟନ୍ତୀ ଜନମାନସାନି ।
ମୁଦ୍ଧେନ ମିସ୍ସଂ ମଧୁରେ ନିମୁଗ୍ଗଂ
ସ୍ନେହେନ ତିନ୍ତଂ ରସତୋ’ନୁୱିଦ୍ଧଂ,
ଭାସିଂସୁ ୱାଚଂ ହଦୟଙ୍ଗମନ୍ତା
ୱିଲୋକନେନେୱ ଧିତିଂ ହରନ୍ତୀ ।
ୱସନ୍ତକନ୍ତୋ ନୱୟୋବ୍ବନୋ’ସି
ସୁୱଣ୍ଣୱଣ୍ଣୋ ହଦୟଙ୍ଗମୋ’ସି
ଏକୋ ନିସିନ୍ନୋ’ସି ୱଟସ୍ସ ମୂଲେ
ସିମନ୍ତିନୀ ସାମି କୁହିନ୍ନୁ ତୁୟ୍ହଂ ।
ତରଙ୍ଗହୀନୋ’ପି ତରଙ୍ଗମାଲୀ
ସସଙ୍କହୀନା ରଜନୀ ଚ ସାମୀ,
ହଂସା’ଲିହୀନା ସରସୀ ସୁଫୁଲ୍ଲା
ନାଭାତି କନ୍ତା ୱିରତୋ ଧୱୋ’ପି ।
ୱସନ୍ତକାଲୋ ଚ ୱନଂ ସୁଫୁଲ୍ଲଂ
ନିସାକରାଭା ଭମରାଲିଗୀତଂ,
ସୁଗନ୍ଧମନ୍ଦୋପଗତା ସମୀରା
ୱିରୋଚସି ତ୍ୱମ୍ପି ଚ ୟୋବ୍ବନେନ ।
ମୟମ୍ପି ଚେତ୍ଥେୱ ସମାଗତମ୍ହ
ମନୋ’ନୁକୂଲା ଚ ମନୁଞ୍ଞରୂପା,
କରୋତି କିଂତ୍ୱ’ଜ୍ଜ ସକାମଦାହୋ
କାମାକରୋ’ଦାନି ସମାଗତୋ ନୋ ।
ମା ତେଦିସଂ ୟୋବ୍ବନରୂପସାରଂ
ସୁୱିଗ୍ଗହଂ ଛାଦୟ ଚୀୱରେନ,
ତେନେୱ ନୋ ନେତ୍ତମନମ୍ହି ସାମି
ମା ଦେହି ଦାହଂ ତୱ ଦାସିଭୁତେ ।
ନଖଂସୁ ସୁତ୍ତେ’ରୁଣପାନିପାଦେ
ନେତ୍ତିନ୍ଦନୀଲାନି’ୱ ଆୱୁଣନ୍ତୋ,
ତ୍ୱମଚ୍ଛି ନୋ ସାମି ମୁଖମ୍ବୁଜେସୁ
ନ ଏନ୍ତି କିନ୍ତେ ନୟନାଲିମାଲା ।
ସୁଧାସିଲାଗୀଞ୍ଜକ ଲୋହଦାରୁ
ଜାତେହି ତ୍ୱଂ ଧୀର ନ ନିମ୍ମିତୋ’ସି,
ରୂପୀ’ସି ସୋମ୍ମୋ’ସି ତଥାପି ସାମି
କିଂ କାମରାଗଂ ମନସା ନୁଦେସି ।
ଅୟଞ୍ଚ ବାଲା ଚତୁରା ରତୀସୁ
ବାଲେତି କଙ୍ଖଂ ଜହ ମାନସମ୍ହି,
କିଂ ମଞ୍ଜରୀ ଭିଜ୍ଜତି ସମ୍ପଫୁଲ୍ଲା
ମତ୍ତାଲିରାଜେ ପରିଚୁମ୍ବମାନେ ।
ଅୟଞ୍ଚ ରାମା ରମଣୀୟରୂପା
ପୀଣୋରୁଗଣ୍ଡା କୁୱମଣ୍ଡଲା ଚ,
ତଂ କାମିନିଂ କାମୟ ଫୁଲ୍ଲକଞ୍ଜେ
ହଂସୋ ୟଥା କେସର ସମ୍ପଗିଦ୍ଧୋ ।
ଚିନ୍ତାମଣିଂ ଭଦ୍ଦଘଟଞ୍ଚ କପ୍ପ
ତରୁଂ ସମାପଜ୍ଜ ଦଳିଦ୍ଦଭାୱା,
ନାପେନ୍ତି ସତ୍ତା ଖଲୁ ଦୁବ୍ଭଗତ୍ତା
ତଥେୱ ନୋ’ସୀ ତୱ ପାଦସେୱା ।
ଏୱଞ୍ହି ତା ରଞ୍ଜନମଞ୍ଜୁଭାସା
ସହସ୍ସମେକଞ୍ଚ ସତାନି ଅଟ୍ଠ,
ୱେସାନି ସମ୍ମା ଅଭିନିମ୍ମିଣିତ୍ୱା
ପଲୋଭୟୁନ୍ତଂ ବହୂଧା ମୁନିନ୍ଦଂ ।
ତତୋ ତଣ୍ହା ? ।
ୟକ୍ଖୋସି ମତ୍ତୋସି ସିଲାମୟୋସି
ଅଚେତନୋସା’ଥ ଅୟୋମୟୋସି,
ଅୱୀତରାଗଞ୍ହି ସଚେତନଞ୍ଚେ
ଅନେନୁପାୟେନୁ’ପସଙ୍କମାମ ।
ଫଲେୟ୍ୟ ଖୀପ୍ପଂ ହଦୟଞ୍ହି ତସ୍ସ
ଉଣ୍ହଂୱ ରତ୍ତଂ ମୁଖତୁ’ଗ୍ଗମେୟ୍ୟ,
ସିୟାୱ ଖିପ୍ପଂ ଅପି ଚିତ୍ତଖେପଂ
ଉମ୍ମାଦଭାୱଂଚ ସ ପାପୁଣେୟ୍ୟ ।
ୟଥା ପଲୁତ୍ତୋ ହରିତୋପଲମ୍ହି
ଖିତ୍ତୋ ନଳୋ ସୁସ୍ସତି ଆତପେନ,
ଏୱଂ ୱିସୁସ୍ସେତି ୱିସାଦମେତି
ସୋ ମୁଚ୍ଛତି ମୁୟ୍ହତି ଦୁକ୍ଖମେତି ।
ସୋକାୱକିଣ୍ଣେ ନୁ ୱନମ୍ହି ଝାୟସି
ୱିତ୍ତନ୍ନୁ ଜିତୋ ଉଦ ପତ୍ଥୟାନୋ,
ଆଗୁନ୍ନୂ ଗାମସ୍ମିଂ ଅକାସି କିଞ୍ଚି
ଜନେନ କସ୍ମା ନ କରୋସି ସକ୍ଖିଂ ।
ସତ୍ଥା ? ।
ଅତ୍ଥସ୍ସ ପତ୍ତିଂ ହଦୟସ୍ସ ସନ୍ତିଂ
ଛେତ୍ୱାନ ସେନଂ ପିୟସାତରୂପଂ
ଏକୋ’ହଂ ଝାୟଂ ସୁଖମନୁବୋଧିଂ
ଜନେନ ତସ୍ମା ନ କରୋମ ସକ୍ଖିଂ ।
ପଲୁଟ୍ଠଗତ୍ତଂ ଦହନେନ ମକ୍କଟିଂ
ସୁସାନପେତିଞ୍ଚ ଜିଗୁଚ୍ଛନୀୟଂ,
ଜେଗୁଚ୍ଛିୟଂ ଜଙ୍ଗମ ମୀଳ୍ହରାସିଂ
ଦିସ୍ୱାନ କୋ ତଂ ୱରୟେ ସପଞ୍ଞୋ ।
ଅଥ ଅରତି ? ।
କଥଂ ୱିହାରୀ ବହୁଲୋ ଚ ଭିକ୍ଖୁ
ପଞ୍ଚୋଘତିଣ୍ଣେ ଅତରୀଧ ଛଟ୍ଠଂ,
କଥଂ ଝାୟିଂ ବହୁଲଂ କାମସଞ୍ଞା
ପରିବାହିରା ହୋନ୍ତି ଅଲଦ୍ଧ ୟୋ ତଂ ।
ସତ୍ଥା ? ।
ପସ୍ସଦ୍ଧକାୟୋ ସୁୱିମୁତ୍ତଚିତ୍ତୋ
ଅସଙ୍ଖରାନୋ ସତିମା ଅନୋକୋ,
ଅଞ୍ଞାୟ ଧମ୍ମଂ ଅୱିତକ୍କ ଝାୟୀ
ନ କୁପ୍ପତୀ ନସ୍ସରତୀ ନ ଥୀନୋ ।
ଏୱଂ ୱିହାରୀ ବହୁଲୋ ଚ ଭିକ୍ଖୁ
ପଞ୍ଚୋଘତିଣ୍ଣେ ଅତରୀଧ ଛଟ୍ଠଂ,
ଏୱଂ ଝାୟିଂ ବହୁଲଂ କାମସଞ୍ଞା
ପରିବାହିରା ହୋନ୍ତି ଅଲଦ୍ଧ ୟୋ ତଂ ।
ଅଥ ରଗା ? ।
ଅଚ୍ଛେଚ୍ଛି ତଣ୍ହଂ ଗଣସଙ୍ଘଚାରୀ
ଅଦ୍ଧା ତରିସ୍ସନ୍ତୀ ବହୂ ଚ ସଦ୍ଧା,
ବହୁଂ ୱତାୟଂ ଜନତ’ମନୋକୋ
ଅଚ୍ଛିଜ୍ଜ ନେସ୍ସତି ମଚ୍ଚୁରାଜସ୍ସ ପାରଂ ।
ନୟନ୍ତି ୱେ ମହାୱୀରା ସଦ୍ଧମ୍ମେନ ତଥାଗତା,
ଧମ୍ମେନ ନୟମାନାନଂ କା ଉସୂୟା ୱିଜାନତଂ ।
ଇମା ପଞ୍ଚ ପାଲିୟଂ ? ।
ସୁତ୍ୱାନ ତଂ ଧମ୍ମୱରଂ ଜିନସ୍ସ
ପମତ୍ତବନ୍ଧୁସ୍ସ ରଗାଦିରାମା,
ପଲୋଭିତୁଂ ନେ’ୱ ସମତ୍ଥକା ତଂ
ଅଗଂସୁ ଖିପ୍ପଂ ପିତୁନୋ ସକାସଂ ।
ମାରୋ ତଦାରା’ୱ ସମେକ୍ଖମାନୋ
ଦିସ୍ୱାଗତା କେୱଲମେୱ ତାୟୋ,
ମା କତ୍ଥ କାମଂ ମମ ଭାସିତାନି
କାମତ୍ଥ ପାତୁଂ ମିଗତଣ୍ହିକାପଂ ।
ବାଲା କୁମୁଦନାଳେହି ପବ୍ବତଂ ଅଭିମନ୍ଥଥ,
ଗିରିଂ ନଖେନ ଖଣଥ ଅୟୋ ଦନ୍ତେହି ଖାଦଥ ।
ସେଲଂୱ ସିରସି ଊହଚ୍ଚ ପାତାଲେ ଗାଧମେସଥ,
ଖାନୁଂୱ ଉରସା’ସଜ୍ଜ ନିବ୍ବିଜ୍ଜାପେଥ ଗୋତମା ।
ଇମା ଦ୍ୱେ ପାଲିୟଂ ? ।
ୱତ୍ୱାନ ଏୱଂ ୱିମନୋ ସ ମାରୋ
ସଟୀତୁକୋ ସମ୍ଭୱନଂ ପୟାସି,
ସତ୍ଥାଥ ରାଗା ପରିମୁତ୍ତଚିତ୍ତୋ
ଜହାସି ତସ୍ମିଂ ଦିୱସାନି ସତ୍ତ ।
ଅଜ୍ଜାପି ତଂ ସାଖିୱରମ୍ପିତେନ
’ନୁଭୁତମତ୍ତେନ ମହେନ୍ତି ସବ୍ବେ,
ତେନେୱ ତେ ସଗ୍ଗଗତା ୱିମାନେ
ମୋଦନ୍ତି କାମେହି ଅନୂପମେହି ।
ଇତି ପଞ୍ଚମ ସତ୍ତାହଂ ।
ତତୋ ମୁନିନ୍ଦୋ ମୁଚଲିନ୍ଦମୂଲେ
ନିସୀଦି ଗନ୍ତ୍ୱା ପୱରାସନମ୍ହି,
ୟୁଗନ୍ଧରେ ବାଲରୱୀ’ୱ ରଂସି
ଜାଲାହି ଲୋକଂ ପରିପୂରୟନ୍ତୋ ।
ଅଥାନ ମେଘୋ ଜଲଦା ସତେହି
ପପୂରୟଂ ଖଂ ଥନୟଂ ସୱିଜ୍ଜୁ,
ସସୀତୱାତୋ କିରମମ୍ବୁଧାରଂ
ୱିରୋଚମାନୋ ୱିସକଣ୍ଠିକାହି ।
ଅମନ୍ଦନଣ୍ଦୋ ମୁଚଲିନ୍ଦଭୋଗୀ
ଦିସ୍ୱା ମୁନିନ୍ଦଂ ମୁଚଲିନ୍ଦମୂଲେ,
ପରିକ୍ଖିପିତ୍ୱାନ ୱିସାଲଭୋଗା
ଛାଦେତ୍ୱ ସମ୍ମା ସଫଣୋ ଫଣେନ ।
ଅଜ୍ଝେସି ସୋ ତସ୍ସ ଅନୁଗ୍ଗହାୟ
ନିସୀଦି ଗନ୍ତ୍ୱା ଭୁଜଗା’ସନମ୍ହି,
ସତ୍ଥା ତଦା ରୂପିୟମନ୍ଦିରେୱ
ସତ୍ତାମହତ୍ତଂ ସୁୱିମୁତ୍ତଚିତ୍ତୋ ।
ଅଜ୍ଜାପି ତଂ ସାଖିୱରମ୍ପି ତେନ
’ନୁଭୁତମତ୍ତେନ ମହେନ୍ତି ସବ୍ବେ,
ତେନେୱ ତେ ସଗ୍ଗଗତା ୱିମାନେ
ମୋଦନ୍ତି କାମେହି ଅନୂପମେହି ।
ଇତି ଛଟ୍ଠମ ସତ୍ତାହଂ ।
ତତୋ’ପଗନ୍ତ୍ୱା ୟତିରାଜ ରାଜା
ନିସୀଦି ରାଜାୟତନସ୍ସ ମୂଲେ,
ୱିମୁତ୍ତିଜଂ ପୀତିସୁଖଂ’ନୁଭୋନ୍ତୋ
ସତ୍ତାହମତ୍ତଂ କରୁଣାଗୁଣଗ୍ଗୋ ।
ଅଜ୍ଜାପି ତଂ ସାଖିୱରମ୍ପି ତେନ
’ନୁଭୁତମତ୍ତେନ ମହେନ୍ତୀ ସବ୍ବେ,
ତେନେୱ ତେ ସଗ୍ଗଗତା ୱିମାନେ
ମୋଦନ୍ତି କାମେହି ଅନୂପମେହି ।
ଇତି ସତ୍ତମ ସତ୍ତାହଂ ।
ଆହାର କିଚ୍ଚାଦି ୱିୱଜ୍ଜିତସ୍ସ
ସୁଖାନୁଭୋନ୍ତସ୍ସ ୱିମୁତ୍ତିଜାନି,
ସମ୍ପୀଣିତଙ୍ଗସ୍ସ ଜିନସ୍ସ ତସ୍ସ
ଇଚ୍ଚଚ୍ଚଗୁଂ ସତ୍ତଦିନାନି ସତ୍ତ ।
ଦେୱାନମିନ୍ଦେନ ତତୋ’ପନୀତ
ମୁଖୋଦକାଦିମ୍ପରିଭୁଞ୍ଜିୟାନ,
ନିସିନ୍ନମତ୍ତେ ୟତିରାଜ ରାଜେ
ତତ୍ଥା’ଗମୁଂ ଦ୍ୱେ ୱାଣିଜା ଖଣେନ ।
ଉସ୍ସାହିତା ଦେୱୱରେନ ସମ୍ମା
ସାଲୋହିତା ତସ୍ସ ତପୁସ୍ସ-ଭଲ୍ଲିକା,
ମନ୍ଥଞ୍ଚ ସାଦୁଂ ମଧୁପିଣ୍ଡିକଞ୍ଚ
ଆଦାୟ ନାଥଂ ଇଦମବ୍ରୁୱୁନ୍ତେ ।
ଇଦଞ୍ହି ନୋ ଧୀର ଅନୁଗ୍ଗହାୟ
ପଟିଗ୍ଗହେତ୍ୱ ପରିଭୁଞ୍ଜ ଦାନଂ,
ହିତାୟ ତଂ ହୋତି ସୁଖାୟ ଚେୱ
ଅନପ୍ପକପ୍ପେସୁ ଅନାଗତେସୁ ।
ପଟିଗ୍ଗହେତ୍ୱା ମୁନି ଦେୱଦିନ୍ନ
ପତ୍ତେନ ପଚ୍ଚଗ୍ଘସିଲାମୟେନ,
ଭୁତ୍ୱାନ ତେସଂ ଅନୁମୋଦନତ୍ଥଂ
ଦେସେସି ଧମ୍ମଂ ୱରଦଂ ପସତ୍ଥଂ ।
ଦ୍ୱେ ଭାତିକା ୱାଣୀଜକା ଜିନସ୍ସ
ଧମ୍ମଂ ସୁଣିତ୍ୱାନ ପସନ୍ନଚିତ୍ତା,
ଦ୍ୱେ ୱାଚିକୋପାସକତଂ ଗତାସୁଂ
ୟାଚିଂସୁ ତେ ତଂ ପୁନ ପୂଜନୀୟଂ ।
ପରାମସିତ୍ୱାନ ସିରଂ ତତୋ ସୋ
ଅଦା ଜିନୋ କୁନ୍ତଲ ଧାତୁମୁଟ୍ଠିଂ,
ତେ ତେନ ତୁଟ୍ଠା ସୁମନା ପତୀତା
ମହିଂସୁ ନେତ୍ୱା ୱିଭୱାନୁରୂପଂ ।
ସତ୍ଥା’ଥ ଗନ୍ତ୍ୱା ଅଜପାଲମୂଲେ
ସହସ୍ସ ରଂସୀୱ ୟୁଗନ୍ଧରମ୍ହି,
ନିସଜ୍ଜ ଲୋକଂ ଅନୁଲୋକୟନ୍ତୋ
ୱିତକ୍କି ଏୱଂ ମନସା ୱିତକ୍କଂ ।
ମୟଜ୍ଝପନ୍ନୋ ୱରଧମ୍ମସାରୋ
ସସସ୍ସ ସିନ୍ଧୂ’ୱ ଅଗାଧପାରୋ,
ଅବୁଦ୍ଧସତ୍ତେହି ତମଜ୍ଜ କସ୍ସ
ପକାସୟିସ୍ସଞ୍ହି ଜଳୋ ହି ଲୋକୋ ।
ଦେସେମି ଚେ ଧମ୍ମୱରଂ ପଣୀତଂ
କିଲନ୍ତଭାୱୋୱ ମମସ୍ସ ଅସ୍ମା,
କିମତ୍ତଦୁକ୍ଖେ ନିତି ଚିନ୍ତୟନ୍ତୋ
ନୁୟ୍ୟାମମାକା ମୁନି ଦେସନମ୍ହି ।
ସହମ୍ପତୀ ନାମ ତତୋ ୱିଧାତା
ସଚେତସା ତସ୍ସ ମନଂ ୱିଦିତ୍ୱା,
ୱିନସ୍ସତୀଦଂ ଖଲୁ ସବ୍ବଲୋକଂ
ଅଦେସିତେ ତେନି’ତି କମ୍ପମାନୋ ।
ସକାସମାଗମ୍ମ ଜିନସ୍ସ ତସ୍ସ
ସଗାରୱୋ ବ୍ରହ୍ମଗଣେନ ତତ୍ଥ,
ନିହଚ୍ଚ ଜାନୁଂ ପଥୱୀତଲମ୍ହି
ନମସ୍ସମାନୋ ଇଦମବ୍ରୂୱୀ ସୋ ।
ତ୍ୱଂ ଦେୱଦେୱୋ ସ ସୁମେଧକାଲେ
ପଲୋକିତଂ ଲୋକମୁଦିକ୍ଖମାନୋ,
ୱିହାୟ ଦୀପଙ୍କରପାଦମୂଲେ
ଲଦ୍ଧା’ମତଂ ତଂ କରୁଣାଗୁଣେନ ।
ପୱିସ୍ସ ସଂସାରୱନଂ ୱିଦୁଗ୍ଗଂ
ମଂସକ୍ଖିସୀସାଦିମ’ଦାସି ଦାନଂ,
ୱେଦେସି ଦୁକ୍ଖଂ ଅମିତଂ ଅସୟ୍ହଂ
ତଂ ତେ ପରତ୍ଥଂ’ୱ ନ ଅତ୍ତହେତୁଂ ।
ସନ୍ତୀଧ ସତ୍ତା ଖଲୁ ମନ୍ଦରାଗା
ଞାତୁଂ ସମତ୍ଥା ସୁଗତସ୍ସ ଧମ୍ମଂ,
ଆରାଧିତୋ ମେ କରୁଣାଗୁଣଗ୍ଗୋ
ଦେସେହି ଧମ୍ମଂ ଅନୁକମ୍ପମାନୋ ।
କାଲେ ୱିକାସନ୍ତି ଖରଂସୁ ମିସ୍ସା
ଥଲମ୍ବୁଜାତା କୁସୁମାନି ନାନା,
ତଥେ’ୱ ତେ ଧମ୍ମକରାଭିଫୁଟ୍ଠା
ୱିକାସମାୟନ୍ତୀ ଜନା ଅନେକା
ସମ୍ପନ୍ନ ୱିଜ୍ଜାଚରଣୋ ସତୀମା
ଜୁତିନ୍ଧରୋ ଅନ୍ତିମଦେହଧାରୀ,
ପଟିଗ୍ଗହେତ୍ୱାସ୍ସ ନିମନ୍ତଣଂ ସୋ
ଜନେସି ସତ୍ତେ କରୁଣା ମନସ୍ମିଂ ।
ଅପାରୁତା ତେସଂ ଅମତସ୍ସ ଦ୍ୱାରା
ୟେ ସୋତୱନ୍ତୋ ପମୁଞ୍ଚନ୍ତୁ ସଦ୍ଧଂ,
ୱିହିଂସସଞ୍ଞୀ ପଗୁଣଂ ନ ଭାସିଂ
ଧମ୍ମଂ ପଣୀତଂ ମନୁଜେସୁ ବ୍ରହ୍ମେ ।
ପଟିଗ୍ଗହେସୀତି ଉଦଗ୍ଗଚିତ୍ତୋ
ଅଜ୍ଝେସନଂ ମେ ଚତୁରାଣନୋ ସୋ,
ନତ୍ୱାନ ନାଥଂ ସହପାରିସଜ୍ଜୋ
ପକ୍କାମି ତମ୍ହା ଭୱନଂ ଖଣେନ ।
ତତୋ ଜିନୋ ତେନ ଗହିତନୁଞ୍ଞୋ
ଦେସେମି କସ୍ସେତି ଉଦିକ୍ଖମାନୋ,
ଆଳାର-ଉଦ୍ଦେ ସମୁଦିକ୍ଖ ଧୀରୋ,
ମନ୍ତ୍ୱାନ ତେସଂ ଅଚିରଚ୍ଚୁତିତ୍ତଂ ।
କହନ୍ନୁଖୋ’ହଂ ୱରଧମ୍ମଚକ୍କଂ
ଅଞ୍ଞେନ କେନାପି ଅୱତ୍ତନୀୟଂ,
ଲୋକସ୍ସ ଚିନ୍ତାମଣିସନ୍ତିଭଗ୍ଗଂ
ପୱତ୍ତୟିସ୍ସନ୍ତୀ ୱିଚିନ୍ତୟନ୍ତୋ ।
ଦିସ୍ୱାନ ଭିକ୍ଖୂ ମୁନି ପଞ୍ଚୱଗ୍ଗେ
ଆଦାୟ ପତ୍ତଞ୍ଚ ତିଚୀୱରଞ୍ଚ,
ବାରାଣସୀୟଂ ମିଗଦାୟମେନ୍ତୋ
ଅଦ୍ଧାନମଗ୍ଗଂ ପଟିପଜ୍ଜି ସତ୍ଥା ।
ତତ୍ଥାମରବ୍ରହ୍ମଗଣେହି ପୂତ
ପଥେ ଫଣୀ ପକ୍ଖି ଚତୁପ୍ପଦା ଚ,
ଆରଞ୍ଞଦେୱା ତରୁପବ୍ବତା ଚ
ମହିଂସୁ ନେକେହି ସୁୱିମ୍ହୟେହି ।
ତତୋପଗା ସୋ ମିଗଦାୟମଗ୍ଗେ
ଦିସ୍ୱା ୟତୀସଂ ୟତୟୋ’ପଗନ୍ତ୍ୱା,
ଅକଂସୁ ୱତ୍ତଂ ପଟିପତ୍ତିସାରା
ପୱତ୍ତୟୀ ତତ୍ଥ ସ ଧମ୍ମଚକ୍କଂ ।
ଅଞ୍ଞାଦିକୋଣ୍ଡଞ୍ଞୱସିପ୍ପଧାନା
କୋଟୀନମଟ୍ଠାରସ କଞ୍ଜୟୋନୀ,
ଅସୀତିକୋଟୀ’ପି ସୁଧାସି ସଙ୍ଘା
ଅଞ୍ଞାସୁମଗ୍ଗଂ କମତୋ ତଦା ତେ ।
ଅତିଚ୍ଚୟାତମ୍ହି ନିଦାଘକାଲେ
ୱସ୍ସାନକାଲେ ସମୁପାଗତସ୍ମିଂ,
ତତ୍ଥେୱ ୱସ୍ସଂ ଉପଗମ୍ମ ଧୀରୋ
ତେମାସମତ୍ତଂ ଅୱସୀ ୱସୀସୋ ।
ତତୋ ୟସଂ ତସ୍ସ ସହାୟକେପି
ପତିଟ୍ଠପେତ୍ୱା ଅରହତ୍ତମଗ୍ଗେ,
ଭୁତିଂ ଜନାନଂ ଅନୁବ୍ରୂହୟନ୍ତୋ
ୱସ୍ସସ୍ସ ଅନ୍ତଂ ଅକରୀ ତହିଂ ସୋ ।
ୱସ୍ସଚ୍ଚୟେ ଲୋକୱିଦୂ ମୁନିନ୍ଦୋ
ଆମନ୍ତୟୀ ତେ ୟତୟୋ ସପୁତ୍ତେ,
ତେ’ଥାଗମୁଂ ନିବ୍ବଣଥା କତଞ୍ଜଲୀ
’ଦମବ୍ରୁୱି ତେସମ’ନନ୍ତ ପଞ୍ଞୋ ।
ଉଗ୍ଘୋସୟନ୍ତା ମମ ଧମ୍ମଘୋସଂ
ସମାହନନ୍ତା ମମ ଧମ୍ମଭେରିଂ,
ସାଧୁଂ ଧମେନ୍ତା ମମ ଧମ୍ମସଙ୍ଖଂ
ଚରାଥ ତୁମ୍ହେ ସନରାମରାନଂ ।
ଜୟଦ୍ଧଜଂ ମେ ଭୁୱନୁକ୍ଖିପନ୍ତା
ଉସ୍ସାପୟନ୍ତା ମମ ଧମ୍ମକେତୁଂ,
ଅଥୁକ୍ଖିପନ୍ତା ମମ ଧମ୍ମକୁନ୍ତଂ
ଚରାଥ ଲୋକେସୁ ସଦେୱକେସୁ ।
ସୁସଜ୍ଜିତତ୍ତଂ ଅମତସ୍ସ ମଗ୍ଗଂ
ସକଣ୍ଟକତ୍ତଂ ନରକାୟନସ୍ସ,
ମାରାନନସ୍ମିଂ ମସିମକ୍ଖିତତ୍ତଂ
କଥେଥ ଲୋକସ୍ସ ସଦେୱକସ୍ସ ।
ବୁଦ୍ଧନ୍ତରଂ ସୁପ୍ପିହିତଂ ଅଚାରଂ
ପୁରସ୍ସ ମୋକ୍ଖସ୍ସ ୱିସାଲଦ୍ୱାରଂ,
ଅୱାପୁରୀ ନୋ ଭଗୱା’ଧୁନା ଭୋ
ୟଥଜ୍ଜ ସବ୍ବେତୀ ନିୱେଦୟୱ୍ହୋ ।
ଉପ୍ପନ୍ନଭାୱଂ ଭୁୱନେ ମମଜ୍ଜ
ତଥେୱ ଧମ୍ମସ୍ସ ଚ ପାତୁଭାୱଂ,
ଉପ୍ପନ୍ନଭାୱଞ୍ଚ ମମୋରସାନଂ
ପକାସୟନ୍ତା ଜଗତିଂ ଚରାଥ ।
ୱନମ୍ହି ପନ୍ତେ ଗିରିଗବ୍ଭରାୟଂ
ରୁକ୍ଖସ୍ସ ମୂଲେ’ପି ଚ ସୁଞ୍ଞା’ଗାରେ,
ୱସଂ ୟତତ୍ତା ମମ ଧମ୍ମମଗ୍ଗଂ
ଦେସେଥ ଲୋକେ ସନରାମରାନଂ ।
ୱତ୍ୱାନ ଏୱଂ ୟତୟୋ ଦିସାସୁ
ପେସେତ୍ୱ ନାଥୋ ଉରୁୱେଲଗାମୀ,
ପଟିପଜ୍ଜି ମଗ୍ଗଂ ଅଥ ଅନ୍ତରାଲେ
କପ୍ପାସିକୱ୍ହଂ ୱିପିନଂ ପୱିସ୍ସ ।
ତସ୍ମିଂ ରମନ୍ତେ ସମତିଂସମତ୍ତେ
ରାଜୋରସେ ସୋ ପୱରୋ ୱିନେତ୍ୱା,
ଦତ୍ୱା’ମତଂ ଧମ୍ମମଥୁଦ୍ଦିସିତ୍ୱା
ଅଗୋରୁୱେଲଂ ଗଜରାଜଗାମୀ ।
ତତ୍ଥୋରୁୱେଲାଧିକକସ୍ସପୋତି
ପସିଦ୍ଧନାମସ୍ସ ସସିସ୍ସକସ୍ସ,
ଅଗ୍ଗଂ ଫଲଂ ସୋ ପରିପାୱୟନ୍ତୋ
ୱସୀ ୱସନ୍ତେ ୱସୀନଂ ୱରିଟ୍ଠୋ ।
ତଦାହରୁଂ ନେଗମ ନାଗରା ଚ
ୟଞ୍ଞଂ ମହାକସ୍ସପ ତାପସସ୍ସ,
ଜିନୋ ୱିଦିତ୍ୱାସ୍ସ ମନଂ ମନେନ
ୱସୀ ୱିସୁଂ ତସ୍ସ ପସାଦ ହେତୁ ।
କଥଂ ?
ଗନ୍ତ୍ୱାନ ଉତ୍ତରକୁରୁଂ ଭଗୱା ତଦାନି
ପିଣ୍ଡଞ୍ଚରିତ୍ୱ ରମଣୀୟ ହିମାଲୟଦ୍ଦିଂ,
ଆଗମ୍ମ ସାଦୁରସ ନୀର ଭରାଭିରାମେ
’ନୋତତ୍ତକେ ମୁନିୱରୋ ପରିଭୁଞ୍ଜିୟାନ ।
ଚିନ୍ତେସି ଏୱମହମପ୍ପତରଂୱ କାଲଂ
ଠସ୍ସାମି ସାସନ ମମଞ୍ହି ଅନାଗତେସୁ,
ଲଙ୍କାତଲେ ଭୱତି ତତ୍ଥ ଇଦାନି ୟକ୍ଖ
ସମ୍ବାଧମତ୍ଥି ମମ ତତ୍ଥ ଗତେସୁ’ଦାନି ।
ସବ୍ବା’ମନୁସ୍ସଜ ଭୟଂ ପୱିନସ୍ସତୀ’ତି
ମନ୍ତ୍ୱା ତତୋ ୟତିୱରୋ କରୁଣାୟ ସତ୍ତେ,
ସଞ୍ଝାଘନେହି ପରିନଦ୍ଧ ରୱୀୱ ରତ୍ତ
ନିଗ୍ରୋଧପକ୍କ ସଦିସଂ ଚରପଂସୁକୂଲଂ ।
ଧାରେତ୍ୱ ସେଲମୟ ସୁନ୍ଦର ପତ୍ତହତ୍ଥୋ
ଛବ୍ବଣ୍ଣରଂସି ନିୱହଂ ଦିସି ପୂରୟନ୍ତୋ,
ସମ୍ବୋଧିତୋ ନୱମ ଫୁସ୍ସଜ ପୁଣ୍ଣମାୟଂ
ଲଙ୍କାତଲଂ ୱିଜୟିତୁଂ ନଭସା’ଗମାସି ।
ବ୍ରହ୍ମାସୁରାମର ଫଣି ଗରୁଳା ଚ ସିଦ୍ଧ
ୱିଜ୍ଜାଧରାଦି ଜନତା ସହପାରିସଜ୍ଜା,
କେତା’ତପତ୍ତ ଘଟ ଦୀପୁରୁ ତୋରଣେହି
ପୂଜଂ ଅକଂସୁ ମହତିଂ ଗଗନାୟନମ୍ହି ।
ଲଙ୍କଙ୍ଗନା ଉରସି ଭାସୁର ତାର ହାର
ସଙ୍କାସ ସୀତଲ ମନୋହର ନୀର ପୂରା,
ତସ୍ମିଂ ମହାଦିପଦ ୱାଲୁକ ନାମ ଗଙ୍ଗା
ଭୁମଜ୍ଝଗାସି ଜନ ନେତ୍ତ ହରାଭିରାମା ।
ତସ୍ସାୱିଦୂର ସୁଚି ରମ୍ମତରେ ପଦେସେ
ଆୟାମତୋ ମିତତିୟୋଜନ ୱିତ୍ଥତେନ,
ଚତ୍ତାରି ଗାୱୁତମିତଂ ନୟନାଭିରାମଂ
ଆସାର ସୀତଜଲ ନିଜ୍ଝର ଭୁରିଘୋସଂ ।
ମତ୍ତାଲିପାଲି ଖଗ ଗୀତିଜ ମିସ୍ସରାଗଂ
ସମ୍ମତ୍ତ ଚିତ୍ତ ମିଗସଙ୍ଘ ନିସେୱିତଂ ତଂ,
ନଚ୍ଚନ୍ତ ନେକସିଖି ସଙ୍ଗତ ପାଦପିଣ୍ଡଂ
ଉୟ୍ୟାନମାସି ଉରୁନାଗୱନାଭିଧାନଂ ।
ରମ୍ମେ ତଦା ରତନଦୀପୱରମ୍ହି ଲଙ୍କା
ଲୋକାଭିଧାନ ହରିକଣ୍ଡକ ୟକ୍ଖଦାସେ,
ଓଦୁମ୍ବରେ ସୁମନକୂଟକ ତଣ୍ଡୁଲେୟ୍ୟେ
ସେଲେସୁ ମାରଗିରି ମିସ୍ସକରିଟ୍ଠନାମେ ।
ୟେ’ଞ୍ଞେପି ସନ୍ତି ଗିରୟୋ ୱନରାମଣେୟ୍ୟା
ଗଙ୍ଗା ନଦୀ ଗିରିଗୁହା ସିକତାତଲା ଚ,
ତତ୍ଥାୱସନ୍ତି ରହସା ଫରୁସାନିରୁଦ୍ଦା
ପାଣାତିପାତ ନିରତା ସଠକୂଟ ୟକ୍ଖା ।
ସଙ୍ଗମ୍ମ ତେ ମହତି ନାଗୱନମ୍ହି ତମ୍ହି
ସମ୍ମନ୍ତୟିଂସୁ ସଭଟା ସହ ପାରିସଜ୍ଜା,
ତ୍ୱଂ କୋ’ସି ରେ ! ଇତି ପରୋ ଅପରଂ ଖରେନ
ତିକ୍ଖେନ ୱାଦକଣୟେନ ଅରୁନ୍ତୁଦନ୍ତା ।
କୁଜ୍ଝିଂସୁ ତେ ଅଥିତରୀତର କାରଣେନ
ୱାକ୍ୟେନ ୟୁଦ୍ଧ ପରିରଦ୍ଧ ପଗବ୍ଭିତତ୍ତା,
ସଙ୍ଖାଭିତାପଗ ପତୀୱ’ନୱଟ୍ଠଚିତ୍ତା
ସାରମ୍ଭଗବ୍ବିତମନା ପରିରାୱୟନ୍ତି ।
ତସ୍ମିଂ ଖଣେ’ଭିମତଦୋ ସୁଗତୋ ନଭମ୍ହି
ଆଗମ୍ମ ତେସ’ମନୁକମ୍ପିତ ମାନସେନ,
ଗୋପାନସୀ ସମ ମନୋହର ରଂସିମାଲି
ତତ୍ଥଚ୍ଛି ଖେ ଗୁଣମଣୀ ମଣିକଣ୍ଣିକାୱ ।
ତେସଂ ଜିନୋ କଲହୱୂପସମାୟ ହେତୁ
ମାପେସି ୱୁଟ୍ଠି ତିମିରା’ନିଲସୀତଭୀତିଂ,
ତତ୍ଥାସି ଗଜ୍ଜିତଘନୋ ସୁରଚାପଖିତ୍ତ
ଧାରାସରେହି ୱିତୁଦଂ ନିସିୱାର ସଙ୍ଘଂ ।
ଅନ୍ଧାୱ ତେ ଘନତରେ ତିମିରେ ନିମୁଗ୍ଗା
ମୁଳ୍ହା ଦିସଞ୍ଚ ୱିଦିସଂ ନ ୱିଦିଂସୁ ଭୀତା,
ଚଣ୍ଡାନିଲୁଦ୍ଧଟ ମହା ଗିରିକୂଟରୁକ୍ଖ
ସମ୍ପାତ ଭୀତ ରୁଦିତା ଗତିମେସୟନ୍ତି ।
ସୀତେନ ତେ ଅଥ ଦିଜେ ପରିକୋଟୟନ୍ତା
ଅଞ୍ଞୋଞ୍ଞଗତ୍ତମୱଲମ୍ବ ପରୋଦୟିଂସୁ,
ରୂପାନି ନେକଭୟଦାନି ଚ ଘୋସଣାନି
ୱତ୍ତିଂସୁ ତେନ ୱିୱିଧଂ ଭୟମାସି ତେସଂ ।
ବୁଦ୍ଧାପି ଦୁକ୍ଖିତମନା ପରଦୁକ୍ଖକେନ
କସ୍ମା କରୋନ୍ତି ଅନୟଂ’ତି ନ ଚିନ୍ତନୀୟଂ,
ଲୋକୋ ହନାତି ୱିଟପି ଫଲଦାନ ହେତୁ
ସତ୍ଥେନ ସୋମ ରିପୁଗାହକ ୱାସରମ୍ହି ।
ସତ୍ଥା ତତୋ ତମନୁଦୋ ସଭୟେ ସସୋକେ
ଦିସ୍ୱାନ ଗୁୟ୍ହକ ଜନେ କରୁଣାୟିତତ୍ତୋ,
ୱୁଟ୍ଠିଂ ତମଞ୍ଚ ପୱନଂ ପଣୁଦିତ୍ୱ ସବ୍ବଂ
ଦସ୍ସେସି ଅତ୍ତମଖିଲଂ ଦୁମଣୀୱ ଖମ୍ହି ।
ଦିସ୍ୱାନ ତେ ମୁନିୱର’ଞ୍ଜଲି ପଙ୍କଜେହି
ସଜ୍ଜେତ୍ୱ ସୀସ ସରସୀ ଇଦମ’ବ୍ରୁୱିଂସୁ,
ୟାଚାମ ନୋ’ଭୟପଦଂ ଭୱତୋ ସକାସା
ଦାସେସୁ ଧୀର କରୁଣଂ କରଣୀୟମେୱ ।
ଏୱଂ ତଦା’ୱଚ ଜିନୋ ମଧୁରସ୍ସରେନ
ଆମନ୍ତ ତେ ନିସିଚରେ’ୱନତେ ସମେକ୍ଖ,
ତୁମ୍ହେ ଦଦାଥ ୟଦି ଠାନମମେକଦେସଂ
ସବ୍ବେ ଅପେନ୍ତୀ ଘନୱାତଜ ସୀତଦୁକ୍ଖା ।
ୟଜ୍ଜେୱମୀତିମ’ପୟାତି କରୋମ ଭୋ ତଂ
ଗଣ୍ହାହି ଧୀର ୟଦି ଇଚ୍ଛସି ସବ୍ବଦୀପଂ,
ୱତ୍ୱାନ ତେହି ପରିଦିନ୍ନ ଛମାୟ ମଗ୍ଗୋ
ଓଗମ୍ମ ତତ୍ଥ ପୁଥୁ ପତ୍ଥରି ଚମ୍ମ କଣ୍ଡଂ ।
ତସ୍ମିଂ ନିସଜ୍ଜ କସିଣଂ ସମାପଜ୍ଜ ତେଜୋ
ଜାଲାକୁଲଂ ଜଲିତ ମଗ୍ଗୀମମାପୟୀ ସୋ,
ସୋ ଧୂମକେତୁ ଗଗନୁଗ୍ଗତ ତୁଙ୍ଗସିଙ୍ଗୋ
ସନ୍ଦଡ୍ଢୟଂ ଗିରିୱନାନୁ’ରୁଘୋସୟନ୍ତୋ ।
ରୁକ୍ଖେହି ରୁକ୍ଖୱନ ପବ୍ବତ ଲଙ୍ଘନେନ
ସାଖାମିଗେ ଚ ୱିହଗେ ଅନୁବନ୍ଧୟଂ’ୱ,
ୱେସ୍ସାନରୋ ୱନମରୂ ମିଗସୂକରେ’ପି
ସନ୍ଧାୱି ଗୁୟ୍ହକ ଜନେ ଇତି ଚିନ୍ତୟନ୍ତୋ ।
ଦିସ୍ୱାନ ତତ୍ଥ ପଚୁରାତନ ୱିପ୍ଫୁଲିଙ୍ଗ
ସମ୍ମିସ୍ସ ଜାଲ ଦହନଂ ଗୁହକା ସମେଚ୍ଚ,
ଧାୱୁଂ ୱିକିଣ୍ଣକଚ ବପ୍ପଜଲ’ଦ୍ଦନେତ୍ତା
ଦାରତ୍ତଜେହି ସହିତା ଗତିମେସମାନା ।
ସମ୍ବୁଦ୍ଧତେଜ ପରିଦଡ୍ଢ ସରୀରଚିତ୍ତା
ଆହଚ୍ଚ ସାଗରତଟଂ ପରିଧାୱମାନା,
ତସ୍ମିମ୍ପି ତେ ପୱିସିତୁଂ ସରଣଂ ନ ଲଦ୍ଧା
ଛମ୍ହି ତତୋ ସପଦି ସନ୍ନିପତିଂସୁ ସବ୍ବେ ।
ଦିସ୍ୱାନ ତେ ମୁନିୱରୋ ସହୟେ ସସୋକେ
ରମ୍ମଂ ତଦା ଜଲଧିମଜ୍ଝଗତଂ ମହନ୍ତଂ,
ଇଦ୍ଧୀହି ସେହି ଗିରିଦୀପମି’ଧାନୟିତ୍ୱା
ଆରୋପୟିତ୍ୱ ନିଖିଲେ ପୁନ ତତ୍ଥ’କାସି ।
କତ୍ୱେୱମେ’ସମସମୋ’ପସମନ୍ତ’ମୀତିଂ
ତତ୍ଥେୱ ଭାସୁରତରୋ ଭଗୱା ନିସୀଦି,
ବ୍ରହ୍ମାମରା’ସୁରଫଣୀ ଗରୁଳାଦି ସିଦ୍ଧା
ସଙ୍ଗମ୍ମ’କଂସୁ ମହତିଂ ମହମ’ଗ୍ଗରୂପଂ ।
ଦେସେସି ସଂସଦି ଜିନୋ ସୁତିସାଧୁ ଧମ୍ମଂ
ତସ୍ମିଂ ସଦାସୱନୁଦଂ ସିୱଦଂ ଜନାନଂ,
ସୁତ୍ୱାନ ନେକସତକୋଟି ପମାଣ ପାଣା
ଲଦ୍ଧା ତଦା ସମଭୱୁଂ ଚରଧମ୍ମଚକ୍ଖୁଂ ।
ତସ୍ମିଂ ଦିନେ ସୁମନକୂଟ ୱରାଧିୱାସୋ
ତେଜିଦ୍ଧିବୁଦ୍ଧିୱିଭୱୋ ସୁମନାଭିଧାନୋ,
ଦେୱୋ ପସନ୍ନହଦୟୋ ରତନତ୍ତୟମ୍ହି
ସମ୍ପାପୁଣିତ୍ଥ ପଠମଂ ଫଲମୁତ୍ତମଂ ସୋ ।
ଉଟ୍ଠାୟ ତୁଟ୍ଠୱଦନୋ କତପଞ୍ଜଲୀକୋ
ମୁଗ୍ଗୋ ଜିନଗ୍ଗ ନଖରଂସି ପୟୋଦଧିମ୍ହି
ୱନ୍ଦିତ୍ୱ ଏୱମୱଚା’ତୁଲ ୱୀର ଧୀର
ଲୋକଗ୍ଗ ପୁଗ୍ଗଲ ୱରଂ ଦଦ ସାମି ଧୀସ ।
ଦାସୋସ୍ମି ତେ ଚରଣ ପଙ୍କଜ ପୂଜକୋହଂ
ସଦ୍ଧାଦୟାଦି ୱିଭୱୋ ତନୟୋ’ହମସ୍ମି,
ତୁମ୍ହେ ୱିନା ଖଣଲୱଂ ୱସିତୁଂ ନ ଇଚ୍ଛେ
ତସ୍ମା ଦଦାତୁ ଭଗୱା ମମ ପୂଜନୀୟଂ ।
ସୁତ୍ୱାନ ତଂ ଧିତିମତୀ ପରିମଜ୍ଜ ସୀସଂ
ସଂସତ୍ତ ଛପ୍ପଦ ସରୋରୁହ ସନ୍ନିଭେନ,
ହତ୍ଥେନ ନୀଲ ସକ କୁନ୍ତଲ ଧାତୁମୁଟ୍ଠିଂ
ଦଜ୍ଜାଥ ସୋ ମଣିମୟେନ କରଣ୍ଡକେନ ।
ପଗ୍ଗୟ୍ହ ବାହୁୟୁଗଲେନ ଠୀତୋ ନମିତ୍ୱା
ମୁଦ୍ଧା ଦଧାସି ମକୁଟଂ ୱିୟ ପୀଣିତତ୍ତୋ,
କତ୍ୱା’ଥ ସୋ ୱର ମହଂ ତିଦିୱେହି ସଦ୍ଧି
’ମପ୍ପେତ୍ୱ ଧୀର ଫରିଭୁତ୍ତ ୱସୁନ୍ଧରାୟଂ ।
ସୋ’କାସି ନୀଲରତନେହି ମହାରହେହି
ଉବ୍ବେଧତୋ ରତନ ସତ୍ତ ପମାଣ ଥୂପଂ,
ନାଥେ ଧରନ୍ତସମୟେୱ ପତିଟ୍ଠହୀ ସୋ
ଥୂପୋ ତିଲୋକସୁଖଦୋ ମଣି କାମଦୋ’ୱ ।
ପଚ୍ଛା ତିଲୋକସରଣେ ପରିନିବ୍ବୁତମ୍ହି
ଖୀଣା ସୱୋ ସମହିମୋ ସରଭୁ ୟତିନ୍ଦୋ,
ଆଦାୟ ତଂ ଚିତକତୋ ଜିନଗୀୱଧାତୁଂ
ତସ୍ମିଂ ନିଧାୟ’କରି ବାରସ ହତ୍ଥଥୂପଂ ।
ଚୂଳାଭୟହ୍ୱୱନିପୋ ସମୟେ’ପରସ୍ମିଂ
ବତ୍ତିଂସ ହତ୍ଥମ’କରିୟତ୍ଥ ୱରୋରୁଥୂପଂ,
ଦୁଟ୍ଠାଦିଗାମଣି ନୁପୋ ଦମିଳେ ହନନ୍ତୋ
କାରେସି କଞ୍ଚୁକମଥୋ ଚତୁସଟ୍ଠିହତ୍ଥଂ ।
ଏୱଂ ସ ସୀହଲମହାସରମଜଝରୂଳ୍ହଂ
ସେତମ୍ବୁଜଂ’ୱ ମଧୁପାୱଲି ସେୱନୀୟଂ,
ଭୁମଙ୍ଗନା କରତଲେ ସିତୱିତ୍ଥଲୀଲୋ
ଥୂପୋ ଦଦାତୁ ମସମୋପସମଂ ଜନାନଂ ।
ଲଙ୍କୋପସଗ୍ଗମ’ୱଧୂୟ ୱିଧାୟ ଖେମଂ
ଲଙ୍କଂ ନିଜାୟ ୱରକୁନ୍ତଲ ଧାତୁୟା ତଂ,
କତ୍ୱାନ ଭାସୁରତରଂ ମୁନି ମଙ୍ଗଲାୟ
ପାୟାସି ତାରକ ପଥେ’ନୁରୁୱେଲମେୱ ।
ତସ୍ମିଂ ୱିଧାୟ ବହୁୱିମ୍ହିତ ପାଟିହେରଂ
ଭେତ୍ୱା ସସିସ୍ସକି’ସିନୋ ପୁନ ଦିଟ୍ଠିଜାଲଂ,
ଦତ୍ୱାନ ନିବ୍ବୁତିପଦଂ ସହସିସ୍ସକସ୍ସ
ନିବ୍ବାଣ ସୁନ୍ଦର ପୁରଂ ପରିପୂରୟିତ୍ଥ ।
ତମ୍ହା ୱିକାସିତ କୁସେସୟ କାନନାଭ
ୱୀତାସୱେହି ନିୱୁତୋ ସୁଗତେଭଗାମୀ,
ପାୟାସି ରାଜଗହ ଗାମୀ’ମୁଦାରମଗ୍ଗଂ
ୱେନେୟ୍ୟ ଜନ୍ତୁ କମଲାକର ଭାନୁରୂପୋ ।
ତସ୍ମିଂ ଗତେ ଜିନୱରେ ୱର ବିମ୍ବିସାରୋ
ପୂଜଂ ଅକାସି ମହତିଂ ସହ ଦେୱତାହି,
ତସ୍ମିଞ୍ହି ସଂସଦି ଲଭିଂସୁ ଅନପ୍ପପାଣା
ମଗ୍ଗେ ଫଲେ ଚ ସରଣେ ଚ ପତିଟ୍ଠହିଂସୁ
ରାଜା ତତୋ ୱିପୁଲ ୱେଲୁୱନାଭିରାମଂ
ସାଲଙ୍କତଂ ୱିୱିଧ ପାଦପ ମଣ୍ଡପେହି,
ପାଦାସି ଦକ୍ଖିଣକରେ ଜଲପାତନେନ
କତ୍ୱା ଧରାଧରଧରଂ ହିମୱଞ୍ଚ କମ୍ପଂ ।
ତସ୍ମିଂ ସମନ୍ତନୟନୋ ନୟନାଭିରାମୋ
ଭୁତିଂ ଜନସ୍ସ ସତତଂ ଅଭିୱଡ୍ଢୟନ୍ତୋ,
ଧମ୍ମମ୍ବୁ ୱୁଟ୍ଠି ନିକରଂ ପରିୱସ୍ସୟନ୍ତୋ
ୱସ୍ସଂ ୱସୀ ଅଦୁତିୟୋ ଦୁତିୟମ୍ହି ୱସ୍ସେ ।
ଦେୱିନ୍ଦ ମୋଲି ସମଲଙ୍କତ ପାଦପିଟ୍ଠୋ
ଲୋକସ୍ସ ଅତ୍ଥଚରଣେ ସତତାଭିୟୁତ୍ତୋ,
ତତ୍ଥେୱ ସୋ ହି ତତିୟେ’ପି ଚତୁତ୍ଥୱସ୍ସେ
ୱାସଂ ଅକାସି ସୁଗତୋ ସିରିସନ୍ତିୱାସୋ ।
ଲୋକସ୍ସ ଧମ୍ମ ମ’ମଲଂ ସତତଂ ୱହନ୍ତୋ
ସାୱତ୍ଥିୟଂ ରୁଚିର ଜେତୱନେ’ଭିରାମେ,
ୱାସଂ ଅକାସି ସୁଖଦୋ ମୁନିପଞ୍ଚମସ୍ମିଂ
ୱେନେୟ୍ୟ ସତ୍ତସମୟଂ ସମୁଦିକ୍ଖମାନୋ ।
ଇତି ଲଙ୍କାୟ ପଠମା’ଗମନଂ ।
ଅଥ ଭଗୱତି ତସ୍ମିଂ ଜେତନାମେ ୱନସ୍ମିଂ
ନିୱସତି ସତିଲଙ୍କା ମଙ୍ଗଲା’ୱାସରୂପା,
ଉପୱନମିୱ ନାକେ ନନ୍ଦନଂ ଦେୱତାନଂ
ଅମର ଉରଗୱାସା ରମ୍ମରୂପା ବଭୂୱ ।
ତହିମତି ରୁଚିରସ୍ମିଂ ୱଡ୍ଢମାନାଦି ସେଲେ
ମଧୁର ସଲିଲୱାହେ ରମ୍ମକଲ୍ୟାଣିକାଦୋ,
ଉଦଧି ଭୁଜଗୱାସେ ନାଗଦୀପନ୍ତିକେ ଚ
ମହତି ମହିମ ୟୁତ୍ତା ନାଗସଙ୍ଘା ୱସନ୍ତି ।
ପଚୁର ମହିମ ୟୁତ୍ତୋ ୱଡ୍ଢମାନାଚଲସ୍ମିଂ
ଅଧିପତି ଭୁଜଗାନଂ ଆସି ଚୂଲୋଦରୱ୍ହୋ,
ମହୁଦର ଇତି ନାମୋ ନାଗଦୀପୋଦଧିମ୍ହି
ନିୱସତି ଅଥ ତେସଂ ପବ୍ବତେୟ୍ୟୋ’ରଗିନ୍ଦୋ ।
ଇତର ଭୁଜଗ ରଞ୍ଞୋ ଧୀତରଂ ନାଗକଞ୍ଞଂ
ପିୟତରମ’ଭିରୂପଂ’କାସି ଦାରଂ ତଦା ହି,
ଅଥ ଚ ଦୁହିତୁୟା ସୋ ଦୀୟମାନଂ ଦଦନ୍ତୋ
ରୁଚିର ମଣୀମୟଗ୍ଘଂ ଆସନଞ୍ଚାପଦାସି ।
ଦୁହିତରି ମତକାଲେ ତେ’ଥ ପଲ୍ଲଙ୍କହେତୁ
ଜଲଜ ଥଲଜ ନାଗା ୟୁଦ୍ଧସଜ୍ଜା ଅହେସୁଂ,
ଅଥ ଥଲଜ ଭୁଜଙ୍ଗା ଭଙ୍ଗକଲ୍ଲୋଲମାଲା
ସଦିସ ଲୂଲିତ ଚିତ୍ତା ଗବ୍ବିତେୱଂ ରୱନ୍ତି ।
କିମୁ’ଦଧିଜ ଫଣୀନଂ କିତ୍ତି ସମ୍ପତ୍ତିୟା ନୋ
ଅପି ୟସପରିୱାରା କିଂ ବଲେନିଦ୍ଧିୟା କିଂ,
ଅହମହମୀତି ଗବ୍ବା କିଂ କିମିସ୍ସାୟ ତେସଂ
ଭୱତି ତିମିର’ରୀନଂ ଭାନୁମଗ୍ଗୁନ୍ନତୀ କା ।
ଅଥ ଜଲଜ’ଲଗଦ୍ଦା ଗଜ୍ଜନଂ ଗଜ୍ଜୟନ୍ତା
ଭୟଜନକ ପଗବ୍ଭା ଫୋଟୟନ୍ତା ଭୂଜାନଂ,
ଅହମହ ପଭୂ ରେ !ରେ ! ପବ୍ବତେୟ୍ୟାନ’ମେତଂ
ପଟୁତରଡସିତୋଟ୍ଠା କକ୍ଖ’ଳେୱଂ ରୱନ୍ତି ।
ପଟୁତର ଗରୁନାଦା ତାୱ ଗଜ୍ଜନ୍ତି ଦନ୍ତୀ
ନୟନ ପଥମୁ’ପେନ୍ତେ ୟାୱ କଣ୍ଠିରୱାନଂ,
ତଥରିୱ ଥଲଜାତା ଜୁମ୍ହୟନ୍ତା ସମଗ୍ଗା
ନୟନ ପଥଗତା ନୋ ସୁଞ୍ଞଦପ୍ପା ଭୱନ୍ତି ।
ଇତି ତଦୁଭୟସେନା ଘଟ୍ଟୟନ୍ତା’ଞ୍ଞମଞ୍ଞଂ
ୱିୱିଧ ପହରଣ୍ହୋ ଉଗ୍ଗିରନ୍ତୀ ଗିରନ୍ତି,
ସତତ ଖୁଭିତ ୱେଲା ସାଗରୂମୀୱ ଭନ୍ତା
ଲୁଲିତ ଲୁଲିତ ଚିତ୍ତା ୟୁଦ୍ଧନିନ୍ନା ଠିତାସୁଂ ।
ଅଥ ତଦହୁ ମୁନିନ୍ଦୋ ୟାମିନୀୟାମ’ମନ୍ତେ
ପତିନିୟ ମତିଜାଲଂ ଲୋକମୋଲୋକୟନ୍ତୋ,
ସମର ୱସଗତାନଂ ଭୋଗୀନଂ ଭାୱିଭୁତିଂ
ତଦୁପରି ଚ’ଭିୱୁଦ୍ଧିଂ ପସ୍ସି ଲଙ୍କାତଲସ୍ସ ।
ଅଥ ମୁନି ମଧୁମାସେ’ପୋସଥେ କାଲପକ୍ଖେ
କତ ନିଖିଲ ୱିଧାନୋ ଗୟ୍ହ ସଙ୍ଘାଟିକାଦିଂ,
ଅନୁଗତିକମୁଦିକ୍ଖଂ ପଞ୍ଚନେତ୍ତୋ ସମନ୍ତା
ସୁମନ ସୁମନ ନାମଂ ପସ୍ସି ଦେୱଂ ସମିଦ୍ଧିଂ ।
ତଦହୁ ସୁମନଦେୱୋ ଜେତନାମେ ସୁରମ୍ମେ
ଅଧିୱସତି ୱିହାରେ ଦ୍ୱାରକୋଟ୍ଠୋପକଟ୍ଠେ,
ଠିତ ୱିଟପ ସମିଦ୍ଧେ ଖୀରିକାପାଦପସ୍ମିଂ
ସୁଗତ ମଭିନମନ୍ତୋ ଅନ୍ୱହଂ ପୂଜୟନ୍ତୋ ।
ତମସମ୍ମୁନି ଦିସ୍ୱା’ମନ୍ତୟିତ୍ୱା’ଗତେ ତଂ
ଇଦମୱଚ ମୟା ଭୋ ସଦ୍ଧିମାଗଚ୍ଛ ଲଙ୍କଂ,
ସହ ତୱ ଭୱନମ୍ହା ପୁବ୍ବୱୁତ୍ଥପ୍ପଦେସେ
ତୱ ଭୱତି ପତିଟ୍ଠା ଭୋଗିନଞ୍ଜା’ଭିୱୁଦ୍ଧି ।
ଅଥ ମୁନିୱଚନଂ ସୋ ମୁଦ୍ଧନାମ’ଗ୍ଗହେତ୍ୱା
ସମୁଦିତହଦୟୋ ତଂ ରୁକ୍ଖମୁଦ୍ଧଚ୍ଚ ମୂଲା,
ସୁଗତମୁପରି କତ୍ୱା ଧାରୟନ୍ତୋ ସୁଫୁଲ୍ଲଂ
ବରିହି ବରିହି ଛତ୍ତାକାରମାଗା ନଭମ୍ହୀ ।
ଦସବଲ ତନୁଭା’ଭିସ୍ସଙ୍ଗମା ସୋ ଦୁମନ୍ଦୋ
ତରଲ ମଣୀୱ ନାନା’ଭାହି ସମ୍ଭାୱନୀୟୋ,
ୱିଲସିତ ଇୱ ସବ୍ବେ ରୁକ୍ଖସେଲାଦୟୋ’ପି
ଅପଗତ ସକୱଣ୍ଣାୱଣ୍ଣୱନ୍ତା ୱିରେଜୁଂ ।
ଖଗ ଭୁଜଗ ସୁରାଦି ମସ୍ସିତା ଛପ୍ପଭାହି
ନିଜପତି ନିଜଜାୟା ସ୍ୱଞ୍ଞମଞ୍ଞାସୁ ମୁୟ୍ହୁଂ,
ଅସିତ ଗଗନ ମଜ୍ଝେ ସୋଭମାନୋ ମୁନିନ୍ଦୋ
ୱିତତ ୱିୱିଧ ରଂସୀ ରଂସିମାଲୀୱ ଗଞ୍ଛି ।
ଜଲଦ ପଟଲ ସଣ୍ଡେ ୱଜ୍ଝମୁଦ୍ଦାଳୟିତ୍ୱା
ବହି ୱିଲସିତକାୟୋ ସୋମ୍ମଦୋସାକରୋ,ୱ
କତୁପରି ତରୁଛାୟୋ ଜୋତମାନୋ ସମାନୋ
ଉରଗ ସମରଠାନଂ ଗନ୍ଥ୍ୱା’କାସେ ନିସଜ୍ଜ ।
ଘନତର ତିମିରଂ ସୋ ଇଦ୍ଧିୟା ସଙ୍ଘରିତ୍ୱା
ତହିମତିରୱ ଭୀମଂ ଘୋରସଂରମ୍ଭୱନ୍ତଂ,
ଅସନି ସତ ନିପାତଂ ୱସ୍ସଧାରା କରାଲଂ
ଉରୁତର ତତ ମେଘଂ ମାପୟୀ ସୀତୱାତଂ ।
ଇତି ତିଭୁୱନନାଥୋ ଦପ୍ପିତେ ନାଗସଙ୍ଘେ
ୱିମଦ କରଣ ହେତୁ ଦସ୍ସୟୀ ଭେରୱାନୀ,
ଅଥ’ପଗତ ପଗବ୍ଭେ ତେ ୱିଦିତ୍ୱାନ ସତ୍ଥା
ଅପନୁଦି ଭୟଜାତଂ ତଙ୍ଖଣଂୟେୱ ତତ୍ଥ ।
ତରୁଣ ତରଣିସୋଭା କେତୁମାଲାୱିଲାସିଂ
ସୁଭରୁଚି ମୁଖୱନ୍ଦଂ ଲକ୍ଖଣାକିଣ୍ଣଗତ୍ତଂ,
ତିଭୱ ୱିଭୱଦାୟିଂ ତଂ ୱିଦିତ୍ୱାନ ନାଗା
ଚୁତପହରଣ ହତ୍ଥା ୱନ୍ଦମାନା ମହିଂସୁ ।
ସିରସୀ ନିହିତପାଣୀ ରତ୍ତପଙ୍କେରୁହେହି
ୱିକଚ ୱଦନ ନେତ୍ତା’ମନ୍ଦ କଞ୍ଜୁପ୍ପଲେହି,
ସକ ସକ ଧତ ନାନାୱଣ୍ଣ ୱମ୍ମାଦିକେହି
ୱିୱିଧ କୁସୁମୱତ୍ଥା’ମନ୍ଦ ଦୀପଦ୍ଧଜେହି ।
ଉରଗ ଭୱନୱାସା ନାଗକଞ୍ଞା ସମେଚ୍ଚ
କୁଚ କଲସ ସହସ୍ସଂ ଧାରୟନ୍ତି ସଲୀଲଂ,
ଲଲିତ କଣକ ୱଲ୍ଲି ଲୀଲମାଧତ୍ତ ଗତ୍ତା
ଥୁତି ମୁଖର ମୁଖା ତା ସାଧୁ କୀଳଂ ଅକଂସୁ ।
ଅଥ ମୁନି ଉରଗାନଂ ୱିଗ୍ଗହଂ ତଂ ସମେତୁଂ
ସୁତିମନ କମନୀୟଂ ନିଚ୍ଛରଂ ବ୍ରହ୍ମଘୋସଂ,
ଅଜରମମର ମଗ୍ଗଂ ସୁପ୍ପସତ୍ଥଂ ସୁଧିହି
ୱରମତି ୱରଧମ୍ମଂ ଦେସୟୀ ନଂ ଫଣୀନଂ ।
ନ ଭୋ ଭୋ ସଂସାରେ ଖଲୁ ଭୱତି ସାରଂ ଲୱମ୍ପି
ୱିସେସା ତଂ ସୀତଂ ଜଲିତ ଦହନେ ୱିଜ୍ଜତି କଦା,
ସଦା ରାଗଂ ରୋଗଂ ବ୍ୟଧତି ଜନତଂ ନେକଦୁରିତଂ
ତଥାପା’ୟୁଂ ପାତୋ ରୱିରଭିମୁଖୁସ୍ସାୱ ସଦିସଂ ।
ସରୀରୋ’ୟଂ ବତ୍ତିଂସ ୱିଧ କୁଣପୋ ସାର ରହିତୋ
ପରିତ୍ତଂ ୟୋବ୍ବଞ୍ଞଂ କୁସୁମ ସଦିସଂ ନିଗ୍ଗତସିରି,
ପହନ୍ତ୍ୱା ଗନ୍ତବ୍ବଂ ଭୱଜ ୱିଭୱଂ ସମ୍ଭତମିଦଂ
ଅଥେୱଂ ସନ୍ତେ ଭୋ ୱରୟତି ଭୱଂ କୋ ନୁ ହି ବୁଧୋ ।
ପଲାସୀ ମକ୍ଖୀ କୋଧୂପହ ମତୋ ମାନୱିଭୱୋ
ଜନୋ’ତୀତୋ’ତୋ ଭୋ ପୟତି ନରକଂ ଦାରୁଣତରଂ,
ଫଣୀ ମଜ୍ଜାରୋ ସା ଗୁହକ କପୟୋ ଭୂୟ ବହୁସୋ
ୱଧେନ୍ତଞ୍ଞୋଞ୍ଞଂ ତେ ନନୁଭୱମିଦଂ ଦୁକ୍ଖମ’ନିସଂ ।
ପୁରେ କାକୋ’ଲୁକା ଅଥ ୱନଭୱା ଫନ୍ଦନ ଇସା
କରିତ୍ୱା’ଟ୍ଠାନେ’ଘଂ ଚିରମନୁଭୱୁଂ ଦୁକ୍ଖମନିସଂ,
ଅହୋ କପ୍ପଟ୍ଠନ୍ତଂ ସରଥ ଦୁରିତଂ ୱେରଜମିଦଂ
ନ ହେତ୍ଥସ୍ସାଦୋ ଭୋ’ଣୁମପି କଲହେ ମେତ୍ତିମ’ମତଂ ।
ବଲଂ ବାଲାନଂ ଭୋ ସକ ସକ ୱଧାୟେୱ ଭୱତି
ଅତୀତେକା ଖୁଦ୍ଦା ଲଟୁକିକଦିଜା ନଟ୍ଠତନୟା,
ଗଜଂ ବାଲଂ ମତ୍ତଂ ପୱିଧି ନ ବଲଂ ହୋତି ସରଣଂ
ଅଥଟ୍ଠାନେ କିଂ ଭୋ କୁରୁଥ ୱୀରିୟଂ ଭୁତି ହନନଂ ।
ନ ଦୁକ୍ଖଂ ତେସଂ ୟେ ୱିଗତ କଲହା ଏକମନସା
ଅତୀତେ ଭୋ ଲାପା ଅଘଟିତ ମାନା ପେୟ୍ୟୱଚନା,
ସୁଖଂ ୱାସଂ’କାସୁଂ ୟଦହନି ଭୱୁଂ ତେ’ଥ ୱିଧୁରା
ୱସଂ ୱ୍ୟାଧସ୍ସାଗୁଂ ତଦହନି ଅହୋ !ମେଧଗ ବଲଂ ।
ଇତି ତିଖିଣ ସୁଧିମା କତ୍ତୁମେତେ ସମଗ୍ଗେ
ଅୱଦି ପୱର ଧମ୍ମଂ ସାଧୁ ୱିଞ୍ଞୁପ୍ପସତ୍ଥଂ,
ଅଥ ମୁଦିତମନା ତେ ପୀଣିତା ତସ୍ସ ନାଗା
ମଣିମୟମ’ତୁଲଂ ତଂ ଆସନଂ ପୂଜୟିଂସୁ ।
ଅଥ ମୁନି ଗଗନମ୍ବୋରୁୟ୍ହ ଭୁମିପ୍ପଦେସଂ
ତରୁଣ ରୱିୱ ତସ୍ମିଂ ଆସନେ ଆସି ଭାସଂ,
ଅଥ ଭୁଜଗଗଣା ତେ ଦିବ୍ବ ଖଜ୍ଜାଦିକେହି
ପରିୱିସିୟ ମୁନିନ୍ଦଂ ସାଧୁ ଧମ୍ମଂ ସୁଣିଂସୁ ।
ଅଥ ଜଲ ଥଲଜାନଂ ତତ୍ଥ ୟୁଦ୍ଧା’ଗତାନଂ
ଅଗଣିତ ଭୂଜଗାନଂ’ସୀତିକୋଟୀ ଭୁଜଙ୍ଗା,
ୱିମଲ ସରଣସୀଲେ ସୁପ୍ପତିଟ୍ଠା ସୁତୁଟ୍ଠା
ଅକରୁ’ମତିମୁଳାରଂ ସତ୍ଥୁ ପୂଜାୱିଧାନଂ ।
ଅଥ ମହୁଦର ରଞ୍ଗ୍ଞୋ ମାତୁଲୋ ନାଗରାଜା
ମନିନୟନକନାମୋ ରମ୍ମକଳ୍ୟାଣଦେସା,
ଉରଗ ସମର ହେତୂ ଆଗତୋ ନାଗଦୀପଂ
ସୁଗତୱର ସରୀରଂ ଦିସ୍ୱ ନତ୍ୱାଲପେୱଂ ।
ୟଦି ସୁଗତ ! ଇମଂ ତ୍ୱଂ ନାଗତୋ ଅସ୍ସ ଠାନଂ
ମୟମପଗତ ପାଣା ହୋମ ଝତ୍ୱା’ଞ୍ଞମଞ୍ଞଂ,
ରୁଧିରୱହ ୱିକିଣ୍ଣୋ ଅସ୍ସ ଭୁମିପ୍ପଦେସୋ
ପସମି ଦହନ ଦିତ୍ତଂ ଅମ୍ବୁଦେନେୱ ତଂ ତ୍ୱଂ ।
ମମ ଭଗୱ ! ପୁରାମେ ଦିଟ୍ଠପୁବ୍ବଂ ତୱେତଂ
ରୁଚିର ସିରିସରୀରଂ ରଂସିଜାଲା’ଭିକିଣ୍ଣଂ,
ଅପି ସୁମଧୁର ଧମ୍ମଂ ଦେସୟନ୍ତେ ସୁରାନଂ
ଦସବଲ ସୁତପୁବ୍ବଂ ଆନୁଭାୱଞ୍ଚ ତୁୟ୍ହଂ ।
ଅହମସମ ପୁରେ ତେ ୱିସ୍ସୁତୋୟେୱ ଦାସୋ
ୟଦି ମନସି ଦୟା ତେ ହୋତି ଦାସେ ପୁନା’ପି,
ପୱର ରତନଦୀପେ ହୋତି କଳ୍ୟାଣିଗଙ୍ଗା
ମମ ୱସତି ତହିଂ ତଂ ଦଟ୍ଠୁକାମୋ’ଭିୟାଚେ ।
ଇତି ୟତିପତି ତସ୍ସା’ରାଧନଂ ପଗ୍ଗହେତ୍ୱା
ସକ ପରିଚିତ ଭୁମ୍ୟା ଚେତିୟତ୍ଥଂ ୱିଧାୟ,
ମଣିମୟ ପରିଭୁତ୍ତଂ ଆସନଂ ଚା’ପି ତେସଂ
ସ ସୁମନ ତରୁ ରାଜଂ ପୂଜନତ୍ଥଂ ୱିଧାୟ ।
ଦସବଲ ପରିଭୁତ୍ତଂ ସବ୍ବମେତଂ ଭୁଜଙ୍ଗା
ମଣିରିୱ ରୁଚୀଦଂ ତେ ଧାତୁୟୋୟେୱ ତସ୍ମା,
ମହଥ ନମଥ ନିଚ୍ଚଂ ମଂୱ ସଗ୍ଗା’ପୱଗ୍ଗଂ
ଦଦତି ଇତି ଚ ୱତ୍ୱା ଓୱଦିତ୍ୱାନ ସତ୍ଥା ।
ନଭତଲ’ମୁ’ପଗନ୍ତ୍ୱା ଦେୱନାଗେ ମହେନ୍ତେ
ଦିସି ଦିସି ୱିସରନ୍ତୋ ନୀଲପୀତାଦି ରଂସି,
ମନ ନୟନ ହରନ୍ତୋ ଜନ୍ତୁନଂ ଲୋକସାରୋ
ଅଗମି ରୱି’ୱ ଖମ୍ହା ଜେତନାମଂ ୱିହାରଂ ।
ଅଥ ମନୁଜମରାନଂ ନତ୍ତସିଦ୍ଧାଦିକାନଂ
ସତତ’ମମତ ଧମ୍ମଂ ଦେସୟନ୍ତୋ ଫଣୀନଂ,
ୱନଭୱନ ସୁରମ୍ମେ ମଙ୍କୁଲୱ୍ହେ ନଗିନ୍ଦେ
ଅକରି ମୁନି ନିୱାସଂ ଛଟ୍ଠମେ ହାୟନମ୍ହି ।
ସୁରପୁରୁପୱନେ’ଥୋ ପାରିଜାତସ୍ସ ମୂଲେ
ଅରୁଣ ମୁଦୁସିଲାୟଂ ଭାସମାନୋ ମୁନିନ୍ଦୋ
ସୁନିପୁଣ’ମଭିଧମ୍ମଂ ଦେସୟନ୍ତୋ ସୁରାନଂ
ଅକରି ୱରନିୱାସଂ ସତ୍ତମେ ତତ୍ଥ ୱସ୍ସେ ।
ଅଥ ସୁଖଦ ମୁନିନ୍ଦୋ ଜେତନାମେ ୱିହାରେ
ଅୱସି ୱିମଲପଞ୍ଞୋ ଅଟ୍ଠମେ ସାରଦସ୍ମିଂ,
ଅଜର’ମମର ସନ୍ତିଂ ଫସମାନୋ ପରେସଂ
ୱିୱିଧ ନୟ ୱିଚିତ୍ତଂ ଦେସନଂ ଦେସୟନ୍ତୋ ।
ଇତି ଲଙ୍କାୟ ଦୁତିୟାଗମନଂ ।
ଏୱଂ ଜିନୋ ଜେତୱନେ ୱସନ୍ତୋ
ନୀସ୍ସାୟ ସାୱତ୍ଥିପୁରଂ ୱିହାସି,
ସା କିଦିସୀ ଆସି ପୁରୀ ତଦାନୀ
ତଂ କୀଦିସଂ ଜେତୱନଂ ୱିହାରଂ ।
ଭୂମଙ୍ଗନାୟାହିତ ଉତ୍ତମଙ୍ଗେ
ଭାସନ୍ତ ନାନାରତନାଭିରାମା,
ୱିସାଲମୋଲୀୱ ୱିସାଲଭୋଗା
ସା ଜମ୍ବୁଦୀପମ୍ହୀ ବଭୁୱ ରମ୍ମା ।
ସିରୀନିକେତେ ସିରିମାୱହନ୍ତୀ
ୱିରାଜତେ ୟା ୱସୁଧା ତଲସ୍ମିଂ,
ସା ଦେୱରାଜସ୍ସ’ମରାୱତୀ’ୱ
ରଞ୍ଞୋ କୁୱେରସ୍ସ’ଲକାୱ ରମ୍ମା ।
ସା ପୁଞ୍ଞପଞ୍ଞାଲୁ ଜନାଧିୱୁତ୍ଥା
ସୋଣ୍ଣାଦି ପୁଣ୍ଣାପନାକିଣ୍ଣୱୀଥୀ,
ଉତ୍ତୁଙ୍ଗ ମାତଙ୍ଗ ତୁରଙ୍ଗ ରଙ୍ଗା
ସା ରାଜତେ କଞ୍ଚନ ମନ୍ଦିରାଲୀ ।
ରରାଜ ସା ଭାସୁର ରାଜପୁତ୍ତା
ପୁଞ୍ଞଙ୍ଗନାଲାସ ୱିଲାସୟନ୍ତୀ,
ୱେଦଙ୍ଗପାରଙ୍ଗତ ୱିପ୍ପଚାରା
ଦ୍ୱିପଞ୍ଚ ସଦ୍ଦେହି ଚ ନିଚ୍ଚଘୋସା ।
ଅନେକସିପ୍ପୀ ସତ ସମ୍ପକିଣ୍ଣା
ନାନାଦିସାହା’ଗତ ସତ୍ଥୱାହା,
ପହୁତଖୀଣାସୱପାଦପୂତା
ବଭାସ ସା ମଙ୍ଗଲ ମନ୍ଦିରଂ’ୱ ।
ଭୱନ୍ତରେ ୟୋ ଚରିୟଂ ଚରନ୍ତୋ
ସୁୱୋ’ପନିସ୍ସାୟ ୱସଂ ଗୁଣେନ,
ୟଞ୍ଞଙ୍ଗସାଖିଂ ମତସୀନପତ୍ତଂ
ଅକା ସମିଦ୍ଧଂ ଫଲପଲ୍ଲୱେହି ।
ଇଦାନି ପତ୍ୱାନ ଭୱସ୍ସ ଅନ୍ତଂ
ନିସ୍ସାୟ ୟଂ ସୋ ୱସତେ ମୁନିନ୍ଦୋ,
ତସ୍ସା ଗୁଣଂ କୋ ହି ଅସେସୟିତ୍ୱା
କଥେତି ସା ୱସ୍ସୂ’ପମାୟ ତସ୍ସା ।
ତସ୍ସୋପକଟ୍ଠେ ରତନଂୱ’ନଗ୍ଘଂ
ମନୋହରୋ ଉତ୍ତମସତ୍ତସେୱି,
ଜନାନମାକଖିଙତଦୋ ୱିହାରୋ
ବଭୁୱ ଜେତାଦି ୱନୱ୍ହୟେନ ।
ସମଫୁଲ୍ଲ ପୁପ୍ଫରସ ମୋଦିତ ଛପ୍ପଦାଲୀ
ଝଙ୍କାର ନାଦ ପରିୱାଦିତ ତନ୍ତିନାଦା,
ସମ୍ମତ୍ତ’ନନ୍ତ ଦିଜ କୁଜିତ ଗୀତୱନ୍ତା
ତିଟ୍ଠନ୍ତି ୟତ୍ଥ ତରୱୋ ନଟକାୱ ଛେକା ।
ଖୀରଣ୍ଣୱାହରିୟ ଧୋୱିୟ ଖୀରନୀରା
ସୋସେତ୍ୱ ସଜ୍ଝୁମଲୟେ ସସିକନ୍ତି ମସ୍ସଂ
ୟତ୍ଥୋକିରିତ୍ୱ ତନିତା ୱିୟ ୱାଲୁକାୟୋ
ସା ମାଲକାୱଲି ବଭାସ ପୟୋଦଧି’ୱ ।
ୱିଜ୍ଜୋତମାନ ରତନପ୍ପମୁଖାନନମ୍ହି
ସୋପାନ ମାଲ ପଦଗଣ୍ଠିଦୁଜେହି ହାସଂ,
କତ୍ୱେୱ ଦେୱଭୱନାନମହଂ ୱିରାଗ
ୱନ୍ତୀ’ତି ଗନ୍ଧକୁଟି ୟତ୍ଥ ପହାସୟିତ୍ଥ ।
କମ୍ମାର ଗଗ୍ଗରି ମୁଖୋ’ପରି ସମ୍ପପୁଣ୍ଣା
ଅଙ୍ଗାର କନ୍ତର ୱିନିଗ୍ଗତ ଜାଲକାୱ,
ସମ୍ବୁଦ୍ଧଦେହ ପରିନିଗ୍ଗତ ରଂସିମାଲା
ଦାୟଗ୍ଗ ନିଗ୍ଗତ କରା ୱିସରନ୍ତି ୟସ୍ମିଂ ।
ତୁମ୍ହେ ସରାଗ ଜନସଙ୍ଗମତୋ’ତି ଗୀତା
ଧଞ୍ଞା ମୟନ୍ତୀ ୱିମଲେହୀ ସମଙ୍ଗିତତ୍ତା,
ତୁଟ୍ଠାୱ ହାସ ମକରା ସୁରପାଦପାନଂ
ରାଜେନ୍ତି ୟତ୍ଥ ୟତିନିସ୍ସିତ ପାଦପିନ୍ଦା ।
ପୁନ୍ନାଗ ନୀପ ୱକୁଲ’ଜ୍ଜୁନ ରାଜରୁକ୍ଖ
ନାଗା’ଗ ଚୂତ ୟୁଗପତ୍ତକ ଚମ୍ପକାନଂ,
ପୁପ୍ଫାଭିକିଣ୍ଣ ଧରଣୀ ରତନେହି ନାନା
ପଚ୍ଛନ୍ନ ଦିବ୍ବଭୱନଂ ୱିୟ ଭାତି ୟତ୍ଥ ।
ବ୍ରହ୍ମାସୁରାସୁର ନରୋରଗ ଲିଙ୍ଗିସିଦ୍ଧ
ୱିଜ୍ଜାଧରାଦି ଜନତା କତୱନ୍ଦନେହି,
ତେହେୱ ଘୁଟ୍ଠ ଥୁତିମଙ୍ଗଲ ଗୀତିକାହି
ୟତ୍ଥୋପଗାନ ମନନେତ୍ତଗଣା ମୁଦେନ୍ତି ।
ନିଗ୍ଘୋସିତାମଲ ସୁସୀତଲ ନିଜ୍ଝରେହି
ସମ୍ମତ୍ତ ନେକଦିଜ ଘୁଟ୍ଠ ଜଲାସୟେହି,
କିଞ୍ଜକ୍ଖ ପତ୍ତ ପରିକିଣ୍ଣ ସିଲାତଲେହି
ତୁସ୍ସନ୍ତି ୟତ୍ଥ ସତତଂ ୟତୀନଂ ମନାତି ।
ୟୋ ନେକ କପ୍ପ ସତ ସଞ୍ଚିତ ପୁଞ୍ଞରାସି
ହିତ୍ୱା’ମିତଂ କପିଲୱତ୍ଥୁ ମହାସିରିମ୍ପି,
ଆଗମ୍ମ ୟତ୍ଥ ନୀରତୋ ସୁଗତୋ ମହେସି
କୋ ତତ୍ଥ ଭୁତି ମତୁଲଂ କଥିକୋ କଥେତି ।
ତସ୍ମିଂ ଜିନୋ ୱସତି ଜେତୱନେ ୱିହାରେ
ଇନ୍ଦୋ ୟଥା ରୁଚିର ନନ୍ଦନ କାନନମ୍ହି,
ବ୍ରହ୍ମା’ୱ ବ୍ରହ୍ମଭୱନେ ସପିତାମହେହି
ତାରାୱଲୀ ପରିୱୁତୋ ଗଗନେ’ୱ ୱନ୍ଦୋ ।
ତଦାଗମ୍ମ ମହାନାଗୋ ମଣି ଅକ୍ଖିକନାମକୋ,
ଲଙ୍କାତୋ ଜିନପାଦସ୍ମିଂ ଫଣିଂ ପଚ୍ଚେଦ’ମବ୍ରୁୱି ।
ସମ୍ବୁଦ୍ଧା ଧୀର ଲୋକସ୍ମିଂ ଲୋକସ୍ସତ୍ଥାଭିୱୁଦ୍ଧିୟା,
ଜାୟନ୍ତି ସାମି ତୁମ୍ହାକଂ ଦୟାୟନ୍ତୋ’ଗଧା ମୟଂ ।
ତେନ ମେ ଦାସଭୁତସ୍ସ ସଂସାରନ୍ଦୁଘରା ଥିରା,
ମୁତ୍ତିଂ ୟଦିଚ୍ଛସେ ମୟ୍ହଂ ଗହଣୀୟଂ ନିମନ୍ତଣଂ ।
ସୁତ୍ୱାନ ତଂ ମହାନାଗୋ ମହାନାଗ ନିମନ୍ତଣଂ,
ପଟିଗ୍ଗହେସି ତଂ ତୁଣ୍ହୀଭାୱେନ କରୁଣାୟ ସୋ ।
ଞତ୍ୱା ତଂ ସୁମନୋ ନାଗୋ ଲହୁମାଗମ୍ମ ସୀହଲଂ,
କଳ୍ୟାଣାପଗପସ୍ସମ୍ହି ମନୋନନ୍ଦନ ଭୁତଲେ ।
ସଜ୍ଝୁ କମ୍ବୁମଣି ମୁତ୍ତ ପୱାଲ ୱଜିରାମୟେ,
ୱହାରହେ ମହାଥୂନେ ଘଟକାଦିଂ ନିଧାପିୟ ।
ଦତ୍ୱା ତୁଲାଦୟୋ ସେସ ମନ୍ଦିରଙ୍ଗେ ତଥେୱ ଚ,
ୱିଟଙ୍କ ୱ୍ୟାଲ ସୀହାଦି ପନ୍ତିୟୋ’ପି ତଥେୱହି ।
ସାତକୁମ୍ହମୟା’ନେକ ଚିତ୍ତେହି ସାଧୁ ଚିତ୍ତିତଂ,
ନିମ୍ମାୟ ଗୋପାନସିୟୋ ପକ୍ଖପାସେ ଚ କଣ୍ଣିକଂ ।
ସିଙ୍ଗି ନିକ୍ଖେନ ସିଙ୍ଗଞ୍ଚ ଛଦନିନ୍ଦମଣୀହି ଚ,
ସୋଣ୍ଣ କିଙ୍କିଣି ମାଲାୟୋ କଣ୍ଣମାଲା ଚ ମାପିୟ ।
ଚିତ୍ତୱିତାନଂ ବନ୍ଧିତ୍ୱା ମୁତ୍ତୋଲମ୍ବେ ତହିଂ ତହିଂ,
କତ୍ୱାନ ଗନ୍ଧଦାମେହି ପୁପ୍ଫଦାମେହି ସଙ୍କୁଲଂ ।
ଇନ୍ଦନୀଲମୟଂ ଭୁମି ମଜ୍ଝେ’ନଗ୍ଘ ମହାସନଂ,
ମାପେସି ପରିତୋ ସେସ ଭିକ୍ଖୂନଞ୍ଚ ସୁଭାସନେ ।
ରତନେହେ’ୱାପସ୍ସୟେ ୱେଦିକା ଏଳିକାମୟେ,
ମୁତ୍ତା ୱାଲୁକ ସଙ୍କିଣ୍ଣଂ ମାଲକଞ୍ଚ ମନୋରମଂ ।
ସତ୍ତ ରତନ ସମ୍ଭୁତ ତୋରଣୂ’ପରି ତୋରଣେ,
ସନ୍ତୀର କୁସୁମା’କିଣ୍ଣ ହାଟକାଦି ଘଟାକୁଲଂ ।
ନେକ ରାଗଦ୍ଧଜାକିଣ୍ଣ ୱିତାନ ସମଲଙ୍କତଂ,
ଦୀପ ଧୂପାଲି ସଙ୍କିଣ୍ଣ ଗନ୍ଧପୁପ୍ଫ ସମାକୁଲଂ ।
ଏୱମାଦିହି ନେକେହି ୱଣ୍ଣେହି ସମଲଙ୍କତଂ,
ମାପେତ୍ୱା ମଣ୍ଡପଂ ସେଟ୍ଠଂ ଦେୱମଣ୍ଡପ ସନ୍ତିଭଂ ।
ସୀତ ୱାଲୁକ ସଞ୍ଛନ୍ନଂ ମୁଦୁ ପାଦପଟତ୍ଥତଂ,
ମାପେତ୍ୱେୱଂ ମହାମଗ୍ଗଂ ସୁରଞ୍ଜସ ସମଞ୍ଜସଂ ।
ସଞ୍ଚିନିତ୍ୱାନ ତେ ନାଗା ଖଜ୍ଜ ଭୋଜ୍ଜ ଫଲାଫଲେ,
ଦିବ୍ବନ୍ନପାନେ ପଚୁରେ ପଟିମଗ୍ଗଂ ଗମୁଂ ତଦା ।
ତତୋ କାରୁଣିକୋ ନାଥୋ ବୋଧିତୋ ଅଟ୍ଠମେ ସମେ,
ୱେସାଖ ପୁଣ୍ଣମାସିମ୍ହି ସନ୍ନିପାତିୟ ସାୱକେ ।
ଏଥଜ୍ଜ ଭିକ୍ଖୱୋ ଲଙ୍କଂ ନାଗାନଂ’ନୁଗ୍ଗହାୟ ଭୋ,
ମଣିଅକ୍ଖିକୋ ନିମନ୍ତେସି ପସନ୍ନୋ ବୁଦ୍ଧସାସନେ ।
ସୁତ୍ୱାନ ୱଚନଂ ତସ୍ସ ସମ୍ବୁଦ୍ଧସ୍ସ ସିରୀମତୋ,
ଅସ୍ସୱା ପେସଲା ଭିକ୍ଖୂ ପଚ୍ଚସ୍ସୋସୁଂ ସମାହିତା ।
ସାରିପୁତ୍ତୋ ତତୋ ଥେରୋ ପଞ୍ଞାୟ’ଗ୍ଗ ଧୁରନ୍ଧରୋ,
ପତ୍ତଚୀୱରମା’ଦାୟ ଅଗମା ଜିନୁ’ପନ୍ତିକଂ ।
ମୋଗ୍ଗଲ୍ଲାନୋ ମହାଥେରୋ ଦୁତିୟୋ ଅଗ୍ଗସାୱକୋ,
ପତ୍ତଚୀୱରମାଦାୟ ସୋପାଗ ଜିନ ସନ୍ତିକଂ ।
ଧୂତପାପୋ ଧୁତଙ୍ଗଗ୍ଗୋ ମହାକସ୍ସପ ନାମକୋ,
ପତ୍ତଚୀୱରମାଦାୟ ଆଗମା ଜିନସନ୍ତିକଂ ।
ସାସନେ ୱିନୟଞ୍ଞ ନମଗ୍ଗୋ’ ପାଲିୱ୍ହୟୋ ୟତ,
ପତ୍ତଚୀୱରମାଦାୟ ଜିନନ୍ତିକମୁ’ପାଗମି ।
ଦିବ୍ବଚକ୍ଖୂନମଗ୍ଗୋ ୟୋ ରୁଦ୍ଧପାପାରି ଦପ୍ପକୋ,
ଥେରୋ’ନୁରୁଦ୍ଧୋ ୱରଦୋ ସୋପାଗ ମୁନିସନ୍ତିକଂ ।
ମଣିୱ କାମଦୋ କାମମୁ’ପୱାନୋ’ତି ୱିସ୍ସୁତୋ,
ଞାଣୀ ଗଣୀ ଦକ୍ଖିଣେୟ୍ୟୋ ଥେରୋପାଗ ଜିନନ୍ତିକଂ ।
ବକ୍କୁଲୋ ୱିମଲୋ ସୀଲ ସମାଧାଦି ଗୁଣାକରୋ,
ଆଗତୋ ସପରିକ୍ଖାରୋ ଭିକ୍ଖୂନଂ ସମିତିଂ ତଦା ।
ବୁଦ୍ଧସାସନ ଧୋରୟ୍ହୋ ଥେରୋ ଅଙ୍ଗୁଲିମାଲକୋ,
ସହା’ଗନ୍ତୁଂ ମୁନିନ୍ଦେନ ସନ୍ନଦ୍ଧୋ ସହସା ଗତୋ ।
ସାସନୋଦୟ ସେଲଗ୍ଗେ ସୂରିୟୋ ୱିୟ ଭାତି ୟୋ,
ସୋ’ୟଂ ରାହୁଲଥେରୋ’ପି ଲହୁ’ଗା ପିତୁ ସନ୍ତିକଂ ।
ଭଦ୍ଦାଚାରୋ ଭଦ୍ଦିୟୱ୍ହୋ ଥେରୋ ଭଦ୍ଦଘଟୋ ୱିୟ,
ପାକଟୋ ଭୁୱନେ ସୋ’ପି ଗତୋ ସମ୍ବୁଦ୍ଧ ସନ୍ତିକଂ ।
ଦେୱଦ୍ଦୁମୋ’ୱ ଲୋକସ୍ସ ୟୋ ଦଦାତି’ଚ୍ଛିତି’ଚ୍ଛିତଂ,
ଜିନୋରସୋପି ସେଲୱ୍ହୋ ଗତୋ ସମ୍ବୁଦ୍ଧସନ୍ତିକଂ ।
ୟାମିନୀ ସାମିକୋ’ୱାତି ଭାତି ୟୋ ସାସନମ୍ବରେ,
ମହାନାମ ମହାଥେରୋ ସୋପାଗ ମୁନିସନ୍ତିକଂ ।
ମନୋସିଲାତଲଗ୍ଗମ୍ହି ଜୁମ୍ହମାନୋ’ୱ କେସରୀ,
ସୁଭୁତିୱ୍ହ ମହାଥେରୋ ବୁଦ୍ଧୁପନ୍ତିକ ମାଗତୋ ।
ବୁଦ୍ଧସାସନ ଛଦ୍ଦନ୍ତ ସରସୀ ସାରସୋ ୱିୟ,
ୱିସ୍ସୁତୋ ତିସ୍ସଥେରୋ’ପି ଗତୋ ଭିକ୍ଖୁସମାଗମଂ ।
ଜିନସାସନ ସମ୍ଫୁଲ୍ଲସରସୀରୁହ ମଜ୍ଝଗୋ,
ମଧୁବ୍ବତ ନିଭୋ ରାଧଥେରୋ’ପି ସହସା ଗତୋ ।
ଭଗୁ ଦବ୍ବୋପ’ସେନୋ ଚ କୋଣ୍ଡଞ୍ଞ’ସ୍ସଜି ସୀୱଲି,
ଏତେ ଜିନତ୍ରଜା ଥେରା ଗତାସୁଂ ମୁନିସନ୍ତିକଂ ।
କୁମାରକସ୍ସପୋ ପୁଣ୍ଣୋସୋଣୋସୋଭିତ ରେୱତା,
ଥେରାପେତେ ଅଭିଞ୍ଞାତା ଗତାସୁଂ ସତ୍ଥୁସନ୍ତିକଂ ।
ୱଙ୍ଗୀସୋ ସାଗତୋ ନନ୍ଦୋ ଭାରଦ୍ୱାଜୋ ଗୱମ୍ପତି,
ପତ୍ତଚୀୱରମାଦାୟ ଗତାସୁଂ ଜିନସନ୍ତିକଂ ।
ଏୱମାଦି ମହାନାଗା ପଞ୍ଚସତ ଜିନୋରସା,
ସମାଗଞ୍ଛୁଂ ସହାଗନ୍ତୁଂ ମୁନିନା ଲୋକସାମିନଂ ।
ତତୋ ସୋ ଜଗଦାନନ୍ଦୋ କରୁଣାୟାଭିରାଧିତୋ,
ମେରୁଂ ପରିକ୍ଖିପନ୍ତୋୱ ଅନେକଜ୍ଜୁତି ୱିଜ୍ଜୁୟା ।
ନିୱାସେତ୍ୱା ସୁଦ୍ଧରଂସି ୱିସରନ୍ତରୱାସକଂ,
ତସ୍ସୂପରି ଜିନୋ ରତ୍ତଂ ବନ୍ଧିତ୍ୱା କାୟବନ୍ଧଂ ।
ଅଚ୍ଚୁଗ୍ଗତଂ ମହାଥୂପଂ ଚାରୁ ଚାମୀକରଜ୍ଜୁତିଂ,
ପଟିଚ୍ଛାଦୟମାନୋୱ ରତ୍ତକମ୍ବଲ କଞ୍ଚୁନା ।
ୱଣ୍ଣ ନିଗ୍ରୋଧପକ୍କଂୱ ସୁରତ୍ତଂ ପଂସୁକୁଲିକଂ,
ସଙ୍ଘାଟିୟା କରିତ୍ୱାନ ସଗୁଣଂ ଉତ୍ତରୀୟକଂ ।
ହୁତ୍ୱାନ ସୁପଟିଚ୍ଛନ୍ତୋ ପାରୁପିତ୍ୱାନ ସାଧୁକଂ,
ପତ୍ତତ୍ଥାୟ ପସାରେସି ଜାଲାକୁଲକରଞ୍ଜିନୋ ।
ଲୋକନାଥପ୍ପଭାୱେନ ତତୋ ପତ୍ତମଧୁବ୍ବତୋ,
ପାଣି ସରୋରୁହସ୍ସନ୍ତୋ ସମ୍ପତ୍ତୋସି ତମଗ୍ଗହି ।
ତତୋ ସସିସ୍ସକୋ ନାଥୋ ଉଗ୍ଗନ୍ତ୍ୱା ଗଗନଙ୍ଗନଂ,
ନାନାୱଣ୍ଣମ୍ବୁଦେ ତତ୍ଥ ମଦ୍ଦନ୍ତୋ ଗନ୍ତୁମାରହଭି ।
ତତୋ ସମ୍ବୁଦ୍ଧ ଦେହସ୍ମା ନିକ୍ଖନ୍ତାସୁଂ ଛ ରଂସିୟୋ,
ହେମକଣ୍ଣିକତୋ ୟାତ ମଣିଗୋପାନସୀ ୟଥା ।
ବାଣିନ୍ଦୀୱର ପୁପ୍ଫେହି ମେୱ’କିନ୍ଦମଣିହି ଚ,
ଛାଦେନ୍ତି ୱିୟ ନକ୍ଖତ୍ତା ନୀଲଂ’ସୁ ମୁନିଦେହତୋ ।
ଚମ୍ପକୁଦ୍ଦାଲମାଲାଭୀ ହେମଚୁଣ୍ଣମ୍ବରେହି ଚ,
ପୂରୟନ୍ତି ୱିୟାସଙ୍ଗ ପୀତଂସୂ ଜିନଦେହତୋ ।
ଭଣ୍ଡୀପୁପ୍ଫକଦମ୍ବେହି ଲୋହିତଙ୍କମଣିହି ଚ,
ଲୋହିତାଭା ପପୂରେନ୍ତି ଦିସା’ଗା ମୁନିଦେହତୋ ।
ହାର ମଲ୍ଲିକ ମାଲାହି ସୋମଂସୁ ଫଲିକାଦିହି,
ପୂରୟନ୍ତି ୱିୟାସଙ୍ଗ ଓଦାତା ମୁନିଦେହତୋ ।
ପିଞ୍ଜୁମଞ୍ଜେଟ୍ଠରାସୀହି ପଦୁମାଭମଣୀହି ଚ,
ଦିସଂ ଛାଦୟମାନାଗା ମଞ୍ଜିଟ୍ଠାଭା ଜିନଙ୍ଗତୋ ।
ନେକିନ୍ଦଚାପ କିଣ୍ଣଂୱ ଦିୱସଂ ରତନୁତ୍ଥତଂ,
ଚିତ୍ତପଟଂୱ ମୁଞ୍ଚନ୍ତଂ ମିସ୍ସାଭାଗା ଜିନଙ୍ଗତୋ ।
ଗିରିକୂଟ କୂଟାଗାର ମତ୍ତା ଛବ୍ବଣ୍ଣ ରଂସିୟୋ,
ଆୱେଲୱେଲା ଧାୱନ୍ତି ଦିପ୍ପମାନେତରେତରା ।
ଗଚ୍ଛମାନା’ହନିତ୍ୱାନ ଚକ୍କୱାଳ ସିଲୁଚ୍ଚୟେ,
ଉଗ୍ଗନ୍ତ୍ୱା ପରତୋ ୟନ୍ତୀ ନୀର ନିଜ୍ଝର ସନ୍ନୀଭା ।
ସମ୍ମୁଖେ ସମ୍ମୁଖେ ତାୟୋ ରୁକ୍ଖପବ୍ବତ ଆଦୟୋ,
କାରୟନ୍ତା ସକଂ ୱଣ୍ଣଂ ଧାୱନ୍ତା’ପି ଚ ସିନ୍ଧୱୋ ।
ଉଦ୍ଧମୁଗ୍ଗତରଂସୀହି ରଞ୍ଜିତା ଜଲଦା ତଦା,
ନାନାୱଣ୍ଣେ ପୁନେୱାସି ନୂତନୋ ରୱିମଣ୍ଡଲୋ ।
ଜିନପ୍ପହା ପୱାହେସୁ ନିମୁଗ୍ଗା ଦେୱତା ଗତା,
ପୂଜେତୁଂୱ ନିଜତ୍ତେହି ନାନାୱଣ୍ଣା ସିୟୁଂ ତଦା ।
ପୱିଟ୍ଠା ବୁଦ୍ଧରଂସୀନମନ୍ତରଂ ଦେୱଧୀତରୋ,
ଅସଞ୍ଜାନୀୟ ମୁୟ୍ହିଂସୁ ମୁହୁତ୍ତଂ ଅତ୍ତନୋ ଧୱଂ ।
ସୁରା ସୁରୋରଗ ବ୍ରହ୍ମ ସିଦ୍ଧ ୱିଜ୍ଜାଧରାଦୟୋ,
ଚାମରଚ୍ଛତ୍ତକେତୁହି ପୂଜୟନ୍ତା ଜିନନ୍ତ୍ୱଗୁଂ ।
ଅଗ୍ଘିକଂ ପନ୍ତିୟୋ କେଚି ତୋରଣୂପରି ତୋରଣେ,
ଘଟଦୀପାଲିୟୋ ତନ୍ଥ କରୋନ୍ତି ଅଭିତୋ’ଭିତୋ ।
ପାଦପଟେ ପତ୍ଥରନ୍ତି ୱିତତ୍ୱନ୍ତି ୱିତାନକେ,
ତତ୍ଥୂପରି ଅନେକାନୀ କୁସୁମାନୋ’କିରନ୍ତି ଚ ।
କତମଂ ଦେୱଲୋକନ୍ନୁୟାତି ଲୋକଗ୍ଗନାୟକୋ,
ୟାତି କିଂ ବୁହ୍ମଲୋକନ୍ନୁ ଅମ୍ହାକଂ ଭୱନନ୍ନୁ ଖୋ ।
କତ୍ଥ ନୁ ଖୋ ଦେୱଦେୱୋ କସ୍ସନୁଗ୍ଗହବୁଦ୍ଧୀୟା,
ୟାତୀ’ତି କଙ୍ଖିତା କେଚି ସଂସରନ୍ତି ଇତୋଚିତୋ ।
ମାପେତ୍ୱା ଅଭିତୋ ମଗ୍ଗେ ମଣ୍ଡପେ ରତନାମୟେ,
ସୟନାସନଂ ପଞ୍ଞପେତ୍ୱା କାଚି ତିଟ୍ଠନ୍ତି ଦେୱତା ।
ତହିଂ ତହିଂ ପଟ୍ଠପେନ୍ତା ସୁଧନ୍ତ ମଧୁରୋଦକଂ,
ୟାୱମାନା ଜିନଂ କେଚି ତିଟ୍ଠନ୍ତି ଚ ମହନ୍ତି ଚ ।
ଏୱଂ ମହାମହେ ନାଥୋ ୱତ୍ତମାନେ ଅନୂପମେ,
ଜଲଂ ସମ୍ବୁଦ୍ଧସିରିୟା ନୂତନୋ ସୂରିୟୋ ୱିୟ ।
ବ୍ରହ୍ମସେନାଭିତୋ ୟାନ ବ୍ରହ୍ମାୱାଥ ସହମ୍ପତି,
ସୁରସେନାଭିତୋ ୟାନ ସକ୍କୋୱ ସମଲଙ୍କତୋ ।
ଗଗାଲିମଭିତୋ ୟାନ ଗହଙ୍ଗା ମଣି ସନ୍ନିଭୋ,
ଧତରଟ୍ଠଖଗିନ୍ଦୋୱ ହଂସସେନାଲି ପୁବ୍ବଗୋ ।
ଅପେତ ରାଗଦୋସେହି ୱୀତମୋହେହି ସବ୍ବସୋ,
ପଟିସମ୍ଭିଦତ୍ତ ସମ୍ପତ୍ତ ସାୱକେହି ଅନୁଗ୍ଗତୋ ।
ୟେସଂ ୟେସଂ ମନସ୍ମିଂ ୟଂ ୟମତ୍ଥି କିଞ୍ଚି ସଂସୟଂ,
ତେସଂ ତଂ ତଂ ପଣୁଦେନ୍ତୋ ଦେସନାୟ ସୁଧାସିନଂ ।
ତତ୍ଥ ତତ୍ଥାନୁରୂପେନ ପାଟିହାରିୟ କମ୍ବୁନା,
ଲୋକସ୍ସ ନୟନାଲୀ ସୋ ତୋସସ୍ସୁସୁ ନିମୁଜ୍ଜୟଂ ।
ସମ୍ପତ୍ତୋ’ଲଙ୍କତଂ ଲଙ୍କମଥାଗୁ ଫଣିନୋ ତଦା,
ପଟିମଗ୍ଗଂ କରୋନ୍ତା ତେ ତତ୍ଥ ତତ୍ଥ ମହାମହଂ ।
ଉରଗାନମନ୍ତରେ ଦେୱା ବ୍ରହ୍ମାସୁଂ ତେସମନ୍ତରେ,
ଏୱଂ ସମ୍ମିସ୍ସକୋ ଲୋକେ ବ୍ରହ୍ମଲୋକା ପପୂରୟି ।
ୟେ ପସ୍ସନ୍ତି ଜିନଂ ତତ୍ଥ ସସିସ୍ସଂ ସିରିୟା ଜଲଂ,
ସୁଲଦ୍ଧା ତେହି ନେତ୍ତାନି ତେସମକ୍ଖୀନି ଲୋଚନା ।
ୟେ ସୁଣନ୍ତି ତଦା ଧମ୍ମଂ ଧମ୍ମିସ୍ସର ପଭାୱିତଂ,
ସୁଲଦ୍ଧା ତେହି ସୋତାନି ତେସଂ ସୋତାନି ସୋତକା ।
ୟେ ଲପନ୍ତି ତଦା ବୁଦ୍ଧଗୁଣଞ୍ହି ଗୁଣଭୂସଣା,
ସୁଲଦ୍ଧା ତେହି ୱେ ଜିୱ୍ହା ତେସଂ ଜିୱ୍ହା ରସଞ୍ଞକା
ୟେ ୱନ୍ଦନ୍ତି ଜିନଂ ୟନ୍ତଂ ସସଙ୍ଘଂ ଗଗନଙ୍ଗନେ,
ସୁଲଦ୍ଧା ତେହି ହତ୍ଥାନି ତେସଂୟେୱ ଭୁଜା ଭୁଜା ।
ତଦା ତଥାଗତଂ ଦିସ୍ୱା ୟେ ସନ୍ତୁଟ୍ଠା ତଥାଗତଂ,
ତଥାଗତାନଂ ସବ୍ବେସଂ ୟୋ ତୋସୋ ହୋତୁ ସବ୍ବଦା ।
ଗତୋ କଲ୍ୟାଣୀୟଂ ନାଥୋ ମହେନ୍ତେୱଂ ସଦେୱକେ,
ତେସଂ ପୂଜାୱିଧାନଂ କୋ ମୁଖେନେକେନ ଭାସତି ।
ତତୋ ଗଙ୍ଗା ମନୁଞ୍ଞଞ୍ହି ସମ୍ପତ୍ତଂ ତଂ ସପୁତ୍ତକଂ,
ତରଙ୍ଗ ମୁଦୁ ବାହାହି ଗହେତ୍ୱା ଚରଣମ୍ବୁଜେ ।
ପାଦେ ପକ୍ଖାଲୟି ସମ୍ମା ଫେଣ ପୁପ୍ଫୁପହାରିକା,
ତତୋ ତତୋତୁଂ ଗଣ୍ହିତ୍ୱା ଅକା ଦେହସ୍ସନୁଗ୍ଗହଂ ।
ତତୋ ସୋ ୟାଚିତୋ ସତ୍ଥା ନାଗସଙ୍ଘେହି ୱନ୍ଦିୟ,
ଅଗମା ମଣ୍ଡପଂ ରମ୍ମଂ ମନୋନନ୍ଦନମାୱହଂ ।
ଗନ୍ତ୍ୱା ମଣ୍ଡପ ମଜ୍ଝମ୍ହି ବୁଦ୍ଧାରହ ମହାସନେ,
ନିସୀଦୋଭାସୟଂ ଆସା ରୱୀୱ ଉଦୟାୱଲେ ।
ତତୋ ଭିକ୍ଖୁ ନିସୀଦିଂସୁ ପତ୍ତ ପତ୍ତାସନେ ତଦା,
ବଭାସ ମଣ୍ଡପଂ’ତୀୱ ସରଂୱ ପଦୁମାକୁଲଂ ।
ଜନନେତ୍ତାଲିନୋ’ଗମ୍ମ ୱସୀ ସୋମ୍ମମୁଖମ୍ବୁଜେ,
ପତନ୍ତା କୁସଲାମୋଦେ ଗଣ୍ହନ୍ତା ତିତ୍ତିନୋ ଗତା ।
ତଥା ସଭିକ୍ଖୁକା ନାଗା ମୁନିନୋ ରୂପସାଗରେ,
ନେତ୍ତିନ୍ଦ ମଣିନାୱାହି ପାରଂ ଗନ୍ତୁଂ ନ ତେ ପଭୁ ।
ତତୋ ସସଙ୍ଘଂ ସୁଗତଂ ସଜନୋ ମଣି ଅକ୍ଖିକୋ,
ସକ୍କଚ୍ଚଂ ସକହତ୍ଥେହି ଅନ୍ନପାନେନ ତପ୍ପୟୀ ।
ଅଥୋନୀତ ପତ୍ତପାଣିମ’ଚ୍ଚୟିତ୍ୱା ତଥାଗତଂ,
ଭତ୍ତିନିନ୍ନୋ ନିମନ୍ତେସି ଦେସନତ୍ଥାନୁମୋଦନଂ ।
ତତୋ ବ୍ରହ୍ମସ୍ସରୋ ସତ୍ଥା ନିଚ୍ଛରଂ ବ୍ରହ୍ମଘୋସନଂ,
ୱିଞ୍ଞାପେନ୍ତୋ ଜନେ ସବ୍ବେ ସକସଦ୍ଦେନ ଦେସନଂ ।
ଦେସେସ୍ୱେୱଂ ଜିନୋ ଧମ୍ମ’ମନିଲାସନକାଦିନଂ,
ପୀତିପାମୋଜ୍ଜ ଜନନଂ ନିବ୍ବାଣାମତ’ମାୱହଂ ।
ଭୋ ଭୋ ସୁଣାଥ ଭୁଜଗା ଭୱସାଗରମ୍ହି
ପାପାରିନକ୍କମକରାକୁଲ ଦୁଗ୍ଗମମ୍ହି,
ମଗ୍ଗା ଜନା ଖଲୁ ଲଭନ୍ତି କଦା ପତିଟ୍ଠଂ,
ଓହାୟ ବୁଦ୍ଧଥିରସାରତରିଂ ୱିସାଲଂ ।
ଲଦ୍ଧାନ ଦୁଲ୍ଲଭତରଂ ମୁନିପାତୁଭୂତ
କାଲଂ ଚିରେନ ଭୁଜଗା ନ ପମାଦୟିତ୍ଥ,
ଜାତୀ ଜରା ମରଣ ଦୁକ୍ଖ ପରିଦ୍ଦୱା ଚ
ସଂସାରିକସ୍ସ ନ ତତୋପ’ଗତସ୍ସ ହୋତି ।
ତାରୁଞ୍ଞମମ୍ବୁଜସିରିଂୱ ପରିତ୍ତକାଲଂ
ପାଣଂ ତୁସାରଲୱ’ସାରତରଂ ଜନାନଂ,
ଭୋଗଂ ଦଧାତି ଜଲଧିମ୍ହି ତରଙ୍ଗଭଙ୍ଗିଂ
ନିଚ୍ଚଂ ମନୋ ଦହତି ସୋକସିଖୀଭି ନାନା ।
କତ୍ୱାନ ରାଗମିସୟୋ’ପି ଖଗା ଦୁପଞ୍ଞା
ଥିରୂପି ନାରିକୁସୁମେସୁପି ରୂପଗିଦ୍ଧା,
ପତ୍ତା’ନୟଂ ଖଲୁ ପୁରେ ପରିହୀନ ଝାନା
ରୂପେ ନ ରଜ୍ଜଥ ତତୋ ଖଲୁ ସାଧୁପଞ୍ଞା ।
ସଦ୍ଦାନୁରାଗମନୁଗୋପି ପୁରେ ସିଖଣ୍ଡୀ
ସୁତ୍ୱାନ ମୋରି ମଧୁରଂ ଗିରମଞ୍ଜିତଙ୍ଗୋ,
ୱ୍ୟାଧସ୍ସ ହତ୍ଥମଗମାସି ଭୱେସୁ ତସ୍ମା
ନତ୍ଥେୱ ସଦ୍ଦସମଦୁକ୍ଖକରଂ ଜନାନଂ ।
ଓହାୟ ନେକକୁସୁମେସୁ ପରାଗରାଗଂ
ମତ୍ତେଭକୁମ୍ଭ ମଗମା ମଦଗନ୍ଧଲୁଦ୍ଧୋ,
ଭିଙ୍ଗୋ ପଭଗ୍ଗ ତନୁକୋ କରିକଣ୍ଣତାଲା
ନତ୍ଥେୱ ଗନ୍ଧସଦିସଂ ତିଭୱେସୁ ପାସଂ ।
ଗମ୍ଭୀର ନୀରଧିଭୱୋ ପୱୁରାସନୋ’ପି
ମିଚ୍ଛୋ ଗିଲିତ୍ୱ ବଲିସଂ ରସଗେଧହେତୁ,
ପପ୍ପୋତି ଦୁକ୍ଖମତୁଲଂ ନ ରସେସୁ ସାତ
ମତ୍ଥିତି ମନ୍ତ୍ୱ ପଜଭାଥ ରସେସୁ ଗେଧଂ ।
ଭୋ ବୁହ୍ମଲୋକା’ଗତ ସୁଦ୍ଧସତ୍ତୋ
ବୁଦ୍ଧତ୍ତମେୱ ନିୟତୋ ଅପି ବୋଧିସତ୍ତୋ,
ଥିସଙ୍ଗମାୟ ପରିହାୟି ସରଜ୍ଜତୋ’ପି
ତସ୍ମା ହି ଫସ୍ସସଦିସୋ ଅନୟୋ ନୱତ୍ଥି ।
ଭେରଣ୍ଡ ପେଲକ କପୁ’ଦ୍ଦକ ହେତୁହୀନ
ସତ୍ତାପି ଦାନରୁଚି ଦାନମଣିପ୍ପଭାୱା,
ପତ୍ତା’ପୱଗ୍ଗ ୱରସାରପୁରଂ ଭୁଜଙ୍ଗା
କୋ ନପ୍ପଦାତି ଧନିକୋ ସିୱ’ମେସମାନୋ ।
ପାଲେତ୍ୱ ସୀଲମ’ମଲଂ ୱିସକଣ୍ଠିକାପି
ଇନ୍ଦସ୍ସ ନନ୍ଦନୱନେ’ସି ପିୟା ମହେସୀ,
ତସ୍ମା ପସତ୍ଥୱିଭୱଂ ୟଦି ପତ୍ଥୟୱ୍ହୋ
ପାଲେଥ ସୀଲମ’ମଲଂ ଖଲୁ ଜିୱିତଂ’ୱ ।
ସଗ୍ଗୋ ୱିସାଲ ରତନାଲୟ ସମ୍ପକିଣ୍ଣୋ
ସାନନ୍ଦ’ମନ୍ଦ ସୁରସୁନ୍ଦରି ସୁନ୍ଦରୋ ସୋ,
ଫୁଲ୍ଲମ୍ବୁଜାକର ୱନାଦିହି ନନ୍ଦନୀୟୋ
ତତ୍ଥାମରା ୱିୟ’ମରା’ୱିରତଂ ରମନ୍ତି ।
ତମ୍ହାପି ଭୋ ରୁଚିର ବ୍ରହ୍ମନିକାୟ ଭୁତି
ରମ୍ମା ତତୋପି ମହିତଂ ଅମତଂ ୱରିଟ୍ଠଂ,
ତସ୍ମାତ୍ତକାମ ନିରତା ଜନତା ସପଞ୍ଞା
ତଣ୍ହକ୍ଖୟାୟ ସତତଂ ୱୀରିୟଂ କରୋଥ ।
ଏୱଂ ସଦ୍ଧମ୍ମମଗ୍ଗଂ ୱରମତି ସୁଗତୋ ଦେସୟି ପନ୍ନଗାନଂ
ସୁତ୍ୱା ତେ ସମ୍ପହଟ୍ଠା ମହମହମକରୁଂ ନିଜ୍ଜରାଦୀହି ସଦ୍ଧିଂ,
ତେସଂ ୱେ ଦେସନାୟଂ ସୁରୱିଟପି ସମା ସାତ୍ଥିକା ତତ୍ଥ ଜାତା
ସୋ ନାଥୋ ତଞ୍ଚ ଧମ୍ମଂ ଭଗୱତି ତନୟା ତେ ଚ ୱୋ ପାଲୟନ୍ତୁ
କଲ୍ୟାଣି ଦେସାଗମନଂ ।
ନଗାଧିରାଜେ ସୁମନାଭିଧାନେ
ୱସଂ ସୁମେଧୋ ସୁମନାଭିଧାନୋ,
ଦେୱୋ ତଦା’ଗମ୍ମ ସପାରିସଜ୍ଜୋ
କଲ୍ୟାଣିୟଂ ତତ୍ଥ ଫଣୀହି ସଦ୍ଧିଂ ।
ଦତ୍ୱା’ପୱଗ୍ଗସ୍ସ ନିଦାନଦାନଂ
ସୁତ୍ୱାନ ଧମ୍ମଂ ସୁତିସୀତିଭୁତଂ,
ପହଟ୍ଠଚିତ୍ତୋ ଉପଗମ୍ମ ବୁଦ୍ଧଂ
ନତ୍ୱାହ ଏୱଂ କତପଞ୍ଜଲୀକୋ ।
ନ ୱେ ଫଣୀନଂ ନପି ମାନୁସାନଂ
ନାନିମ୍ମିସାନଂ ନ ପିତାମହାନଂ,
ହିତତ୍ଥ ମେୱାଖିଲ ଲୋକନାଥା
ଜାୟନ୍ତୀ ଲୋକେ କରୁଣାଗୁଣଗ୍ଗା ।
ଅନ୍ତୋଗଧା ନୂନ ମୟମ୍ପି ତୁୟ୍ହଂ
ଦୟାୟ ତସ୍ମା ଫଣୀନଂ ୱିମେସଂ,
କରୋହି ମୟ୍ହଂ ଭୱନମ୍ହି ଧୀର
ପାଦଂ’ସୁନା’ତୀୱ ପୱିତ୍ତରୂପଂ ।
ୟୋ’ୟଂ ନଗୋ ଦିସ୍ସତି’ତୋ ପୁରତ୍ଥ
ଭୁମଙ୍ଗନା ମୋଲିସିରିଂ ୱହନ୍ତୋ,
ସମନ୍ତକୂଟୋତି ସମନ୍ତଚକ୍ଖୁ
ଜାନାତି ଲୋକୋ ୱସତିଂ ମମେତଂ ।
ୟୋ ନୀଲ ନାନା ୱନରାଜି ରାଜିତୋ
ଆସାର ଧାରା ଗିରି ନିଜ୍ଝରାକୁଲୋ,
ଆପୀତ ନୀଲାରୁଣ ପଲ୍ଲୱାୱଲୀ
ଜିମୂତକୂଟୋ ୱିୟ ଭାତି ଉଗ୍ଗତୋ ।
ୟୋ ସିନ୍ଧୁୱାରିଂ ଉରସା ପଭେଜ୍ଜ
ଆଗମ୍ମ ତେ ପାଦପଣାମ ହେତୁ,
ୱିଜ୍ଜୋତମାନୋ ୱିୟଚକ୍କପାଣି
ମହାତି ତୁଙ୍ଗଗ୍ଗ ଧରାଧରିନ୍ଦୋ ।
ଗଙ୍ଗାୱଧୂ କୁଟକିରୀଟଧାରୀ
ସାମନ୍ତ ସେଲିନ୍ଦ ଚମୂପତୀକୋ,
ୟୋ’ୟଂ ଧରାଧାର ମହାମହୀପୋ
ର ରାଜ ଲଙ୍କା ନଗରଙ୍ଗଣମ୍ହି ।
ପାରୋହ ଦନ୍ତୋ ଚିତକୂଟ କୁମ୍ଭୋ
ଅନେକ ସୋଣ୍ଡିକ୍ଖ ସୱନ୍ତି ହତ୍ଥୋ,
ୟୋ ନିଜ୍ଝରାସାର ମଦପ୍ପୱାହୋ
ଗଜୋରିୱା’ଭାତି ସୁରାଧିପସ୍ସ ।
ସମ୍ଫୂଲ୍ଲ ପୁପ୍ଫତ୍ଥବକା’ନପତ୍ତା
ସତ୍ଧତ୍ତ ରତ୍ତଙ୍କୁରମୋଲିମାଲା,
କନ୍ତାଲତା’ଲିଙ୍ଗିତ ଖନ୍ଧଦେହା
ତିଟ୍ଠନ୍ତି ଭୂପାୱ ୟହିଂ କୁଜିନ୍ଦା ।
ସିଦ୍ଧଙ୍ଗନା ରତ୍ତପଦମ୍ବୁଜାଲୀ
ସମ୍ହିନ୍ନ ହତ୍ଥାଭରଣାଲି ୟୁତ୍ତା,
କେକୀକଲାପୁପ୍ପଲ ମାଲମାଲୀ
ସିଲାତଲାକଞ୍ଜ ନିଭନ୍ତି ୟତ୍ଥ ।
ମଙ୍ଗୁର ପାଠୀନ ସୱଙ୍କ ସିଙ୍ଗୁ
ରୋହିଚ୍ଚ ମୁଞ୍ଜା ?ମର ପାୱୁସେହି,
କୁଲୀରନକ୍କାଦ’ନିମେସକେହି
ନିକୀଳୀତଂ ଦଦ୍ଦର ରତ୍ତପେହି ।
ନିଚ୍ଚଞ୍ହି ସଂରାୱ ୱିରାଚିତାନଂ
ବଲାକ କାଦମ୍ବ କଦମ୍ବକାନଂ,
ଆପାନସାଲା ୱିୟ ସାରସାନଂ
ହଂସାଲିନଂ ମଙ୍ଗଲ ୱାସଭୂତଂ ।
ନିରନ୍ତରାମୋଦ ମୁଦାୱଗେହି
ସୁଫୁଲ୍ଲ କୋକାସ’ରୱିନ୍ଦକେହି,
ସୋଗନ୍ଧି’କିନ୍ଦୀୱର କେରୱେହି
କିଞ୍ଜକ୍ଖ ଛନ୍ନଣ୍ଣତଲେହି ଚିତ୍ତଂ ।
ସୀତଚ୍ଛ ସାତୋଦକ ସମ୍ପପୁଣ୍ଣ
ସରୋଜିନୀ ଲଙ୍କତ ଭୁମିଭାଗୋ,
ୟୋ’ୟଂ ପୁରେ ଭାତି ମନୁଞ୍ଞରୂପୋ
ସମନ୍ତକୂଟୋ ସ ସମନ୍ତକୂଟୋ ।
ଦଲିତ ୱିପିନସଣ୍ଡା ୟତ୍ଥ ସେଲେ ସମନ୍ତା
ସମୁପଗତ ଜନାନଂ ଚିତ୍ତମାମୋଦୟନ୍ତି,
ମଧୁକ ୱଟ କରେରି ବୋଧି ଜମ୍ବୀର ଭଲ୍ଲି
ଖଦିର’ଭୟ କଦମ୍ବା ଫୁଲ୍ଲ ସେଲ୍ଲୂ ପଲାସା ।
ପଣସ’ମତ ପିଲକ୍ଖା କଣ୍ହୱଣ୍ଟ’କ୍ଖ ଚିଞ୍ଚା
ଲବୁଜ ବଦରି ନୀପା ଫନ୍ଦନି’ନ୍ଦୀୱରାୱ
ମକୁଲ’ସନ ପିୟାଲା ଗଦ୍ଦଭଣ୍ଡ’ଜ୍ଜୁନା ଚ
କମୁକ ସଲ୍ଲ ତିନ୍ଦୁ’ଦୁମ୍ବରମ୍ବସ୍ସ’କଣ୍ଣା ।
ପୁନ୍ନାଗ ଚମ୍ପକ ଦୁମୁପ୍ପଲ ଦାଡିମା ଚ
ଖଜ୍ଜୂରି ତାଲ ଗିରିମଲ୍ଲିକ’ସୋକ ତାଲା,
ହିନ୍ତାଲ ନାଗ ନିୱୁଲା ୟୁଗପତ୍ତ’ରିଟ୍ଠ
ସେତମ୍ବ ଏରୱତକାପି ଚ କେତକା ଚ
ସମଫୁଲ୍ଲଭଣ୍ଡି ସୁମନ’ଜ୍ଜକ ୟୂଥିକା ଚ
ୱାସନ୍ତି ଚିତ୍ତକ ଜପା ରୱିମାଲତୀ ଚ,
କୁନ୍ଦସ୍ସ’ମାରକ କୁରଣ୍ଡକ ବୀଜପୂର
ସେଫାଲିକା ଚ ତିଣସୂଲ ସମୀରଣା ଚ ।
ୱୋଚୁ’ଚ୍ଜୁ କୀଚକ ହଲିଦ୍ଦି ୱିଳଙ୍ଗି ବିମ୍ବି
ନୀଲୀ ୱଚା’ତିୱିସାଲାବୁ ଚ ନାଗୱଲ୍ଲୀ,
ୱଲ୍ଲୀହ ସାରଦ’ପରାଜିତୱାରୁ’ସୀରା
ଫଲାଦି ନେକ ୱନରାଜି ୱିରାଜିତୋ ସୋ ।
ତିଟ୍ଠନ୍ତି କେଚି ତରୱୋ ସୁରଭିଂ କିରନ୍ତା
ତତ୍ଥେୱ କେଚି ଫଲିତା ମଧୁରପ୍ଫଲାନି,
ଅନ୍ଦୋଲିତା ଫଲିତପଲ୍ଲୱିତା ଲତାୟୋ
ସନ୍ଧାରୟଂ ୱିଟପ ଜତ୍ତୁସୁ ଭନ୍ତି କେଚି ।
ସାମନ୍ତଗେ ଜନଗଣେ ସତତଂ ଦୁମିନ୍ଦା
ସମ୍ପୀଣୟନ୍ତି ଦଲିତା ଫଲିନୋ ଚ ୟସ୍ମିଂ,
ତେ ଅୱ୍ହୟନ୍ତି ୱିୟ ଲୋଚନ ଗୋଚରେହି
ୱାତେ’ରିତେହି ତରୁଣାରୁଣ ପଲ୍ଲୱେହି ।
ତସ୍ମିଂ ୱନେ ୱନସୁରା ନିଜୱସୁନ୍ଦରୀହି
ରମ୍ମେ ସିଲାତଲଦହେ ସିକତାତଲେ ଚ,
ନଚ୍ଚନ୍ତି ତନ୍ତି ତୁରିୟାନି ଚ ୱାଦୟନ୍ତି
ଗାୟନ୍ତି ମାଲଭରିନୋ ସତତଂ ପତୀତା ।
ସିଦ୍ଧା ଚ ସିଦ୍ଧୱନିତା ହି ତହିଂ ତହିଂ ତେ
ଦିବ୍ବନ୍ତି ପୁପ୍ଫଫଲ ପତ୍ତରସାହିନନ୍ଦି,
ଅଚ୍ଛନ୍ତି ତତ୍ଥ ଗିରିପାଦପ ରାମଣେୟ୍ୟେ
ୟୋଗେହି ସଙ୍ଗତ ମନା ବହିତାପସାପି ।
ତସ୍ମିଂ ୱନେ ହରିଣ ରୋହିତ ପୁଣ୍ଡରୀକ
ଗୋକଣ୍ଣ ସଲ୍ଲ ସସ ଜମ୍ବୁକ ସୂକରା ଚ,
ସାଖାମିଗେ’ଣିୱଗ ବବ୍ବୁ ରୁରୂ କୁରୁଙ୍ଗ
ଗୋଧା’ଖୁ ପମ୍ପକ କପୀ ଗୱୟା ଚ’ନେକା ।
ତେ ୱଗ୍ଗ ୱଗ୍ଗ ଚରିନୋ ହୟମାରକାଦୀ
ନାନା ଚତୁପ୍ପଦଗଣା ମୁଦିତା ୱସନ୍ତି,
ପକ୍ଖୀପି କୋସିୟ କପୋତକ ନୀଲଗୀୱ
ଧଙ୍କା’ଟ ଲାପ ପରପୁଟ୍ଠ ମଧୁବ୍ବତାୱ ।
ନିଜ୍ଜିୱ୍ହ ଦିନ୍ଦିହ ଚକୋରକ ସାଳିକା ଚ
ଚକ୍କୱ୍ହ କୀର କୁରରା କୁଲଲା ଚ କଙ୍କା,
ଚିତ୍ରଚ୍ଛଦା ମଧୁର କୂଜକ ନେକପକ୍ଖୀ
ସଙ୍ଗମ୍ମ ୟତ୍ଥ ନିୱସନ୍ତି ମନୁଞ୍ଞରୂପା ।
ତେସଂ ୱନନ୍ତମଥ ନାଟକମଣ୍ଡଲା’ଚ
ଗୀତାଲୟଂ ୱିୟ ଅହୋସି ଚ ଗାୟକାନଂ,
ଆପାନଭୁମି ସଦିସଂ ମିଗପକ୍ଖିକାନଂ
ନିଚ୍ଚୁସ୍ସୱଂ ରତିକରଂ ନୟନାଭିରାମଂ ।
ଏୱଂ ୱିଧୋ ୱିପିନରାଜି ୱିରାଜିତେହି
କୂଟେହି ନେକସୁର ସୁନ୍ଦରି ମଣ୍ଡିତେହି,
ଅତ୍ୟୁଚ୍ଚ ନୀଲସିଖିଗୀୱ ସମାନ ୱଣ୍ଣୋ
ଏସୋ ସମନ୍ତଗିରି ମେ ୱସତୀ ମୁନିନ୍ଦ ।
ଏୱଂ ପତୀତ ମନସୋ ସୁମନାଭିଧାନୋ
ୱତ୍ୱାନ ନତ୍ୱମସମଂ ଗମନୋପୟୁତ୍ତଂ,
କାସାଥ ସୋପି ମୁନି ତସ୍ସ ୱଚଂ ପଟିଚ୍ଚ
ସବ୍ଭିକ୍ଖୁ ନିକ୍ଖମି ଜିନୋ ଗଗନାୟନମ୍ହି ।
ନିଚ୍ଚେତନାପି ଗିରିପାଦପ ଆଦୟୋପି
ନାଗା ସୁପଣ୍ଣ ମିଗ ପକ୍ଖିକ ହେତୁକାପି,
ୱିଜ୍ଜାଧରାମର’ସୁରା ଚତୁରାଣନାପି
ସଙ୍ଗମ୍ମ’କଂସୁ ସୁମନା ମହମବ୍ଭୁତଂ ତେ ।
ମୁନିନ୍ଦେ ପୟନ୍ତେ ସମିଦ୍ଧଂ ତିଲୋକଂ
ଗିରିନ୍ଦାଭିନନ୍ଦା ଦୁମିନ୍ଦା ପବୁଦ୍ଧା,
ମିଗିନ୍ଦା ସୁତୁଟ୍ଠା ଖଗିନ୍ଦା ସୁଘୁଟ୍ଠା
ପୱୁଟ୍ଠୋ ମହିନ୍ଦୋ ପଣଟ୍ଠୋ ନିଦାଘୋ ।
ଗଚ୍ଛନ୍ତେ ଗଗନାୟନେନ ସୁଗତେ ଭାନୁ’ସି ସନ୍ତୋ ତଦା
ୱାରେସୁଂ ସୂରିୟାତପଞ୍ଚ ଜଲଦା ସିଞ୍ଜିଂସୁ ଭୁମ୍ୟା ଜଲଂ,
ମନ୍ଦାମନ୍ଦ ସୁଗନ୍ଧ ମୁଦ୍ଧ ପୱନୋ ପାପେତି ସିତଂ ସୁଖଂ,
ଦେୱାଦି ଧଜ ଛତ୍ତ ଚାମରକରା ପୂଜେନ୍ତି ମାନେନ୍ତି ଚ ।
ସନ୍ନୀର ହିନ୍ତାଲ’ଗ ସିନ୍ଦି ପୂଗ
ତାଲମ୍ବସାଲାଦି ମହୀରୁହିତ୍ଦା,
ତିଟ୍ଠନ୍ତି ତେ ଚାମରହତ୍ଥକା’ୱ
ପୁପ୍ଫେହି ଛନ୍ନୋ ଗଗନଙ୍ଗନୋପି ।
ଅନେନ ୱିଧିନା ଜଗଦେକ ନାଥୋ
ପୱତ୍ତମାନେସୁ ମହାମହେସୁ,
ଦିସଞ୍ଚ ୱିଦିସଂ ପରିପୂରୟନ୍ତୋ
ଜବ୍ବଣ୍ଣରଂସୀହି ଅଗା ନଗିନ୍ଦଂ ।
ତସ୍ମିଂ ସମନ୍ତନଗମୁଦ୍ଧନି ଲୋକନାଥୋ
ଛବ୍ବଣ୍ଣରଂସି ନିକରଂ ଦିସି ପତ୍ଥରନ୍ତୋ,
ଭିକ୍ଖୂହି ସୋ ପରିୱୁତୋ ପରସାଗରନ୍ତଂ
ଓଲୋକୟଂ ଠିତିମକାସି ଅଅନୋମୱଣ୍ଣୋ ।
ଲଙ୍କାୱଧୂ ସୁମନକୂଟ କିରୀଟ କୂଟଂ
ସଜ୍ଜେସି’ନଗ୍ଘ ଜନ ରାଜ ମଣୀ ମହନ୍ତୋ,
ଇଚ୍ଛତ୍ଥଦଂ ସିୱଦମପ୍ପଟିମଂ ତିଲୋକେ
ତଂ’ଦାନି ଭୋ ଭଜଥ ସେୱଥ ସବ୍ବକାଲଂ ।
କାସୁଂ ତଦା ସୁରୱରା ସୁରସୁନ୍ଦରୀହି
ଲଙ୍କାୟ ସେଲସିଖରେସୁ ମହାସମଜ୍ଜଂ,
ୱଜ୍ଜିଂସୁ ଭେରି ୱିକତୀ ସୟମେୱ ସବ୍ବା
ଭସ୍ସିଂସୁ ଦିବ୍ବକୁସୁମାଭରଣା ନଭମ୍ହା ।
ଲଙ୍କମ୍ବରଂ ନିଖିଲମାସି ଚ ଛତ୍ତଛତ୍ତଂ
ନାନା ୱିରାଗ ଧଜ କେତୁ ସମାକୁଲଞ୍ଚ,
ନାନାସୁଗନ୍ଧ କୁସୁମାଦି ଦିସନ୍ତରାଲଂ,
ନାନଗ୍ଘିକାୱଲି ୱିରାଜିତ ମନ୍ତଳିକ୍ଖଂ ।
ତସ୍ମିଂ ଦିନେ’ସି ରତନଂ ମଣିତୋରଣେହି
ଦୀପାଲି ପୁଣ୍ଣଘଟପନ୍ତୀହି ଦସ୍ସନୀୟଂ,
ସମ୍ବୁଦ୍ଧ ଦେହପରିତୋଗତ ଛପ୍ପଭାହି
ରତ୍ତଂ ନଭାୱନି ଚରାଚର ସବ୍ବଦବ୍ବଂ ।
ମାଲାୱତଂସ ସମକା ଗିରୟୋ ସମନ୍ତା
ହୁତ୍ୱା ନମନ୍ତି ଚ ଭମନ୍ତି ସଚେତନା’ୱ,
ସବ୍ବେପି ତତ୍ଥ ତରୱୋଚ ଲତାଦୟୋ ଚ
ନଚ୍ଚନ୍ତି ଦିବ୍ବନଟକା ୱିୟ ଓନତଗ୍ଗା ।
ଏୱଂ ତଦା ମହତ ୱିମ୍ହୟ ପାଟିହେରେ
ବୁଦ୍ଧାନୁଭାୱ ଜନିତେ ଇଧ ୱତ୍ତମାନେ,
ତତ୍ୱାନ ଧୀରଚରଣଂ ସମନୋ ସୁଧାସୀ
ଏୱଂ ୱଦୀ ପରମ ପିତିମନୋ ଉଦଗ୍ଗୋ ।
ୟେ ତେ ମୁଦୁ କୋମଲ ରତ୍ତପାଦା
ସୁରତ୍ତ ଫୁଲ୍ଲମ୍ବୁରୁହୋପମାନା,
ୱଟ୍ଟାନୁପୁବ୍ବାୟତ ଅଙ୍ଗୁଲିକା
ସୁତମ୍ବତୁଙ୍ଗଗ୍ଗ ନଖାୱଲୀକା ।
ସୁୱଣ୍ଣକୁମ୍ମୁ’ନ୍ନତ ପାଦପିଟ୍ଠି
ନିଗୁଳ୍ହ ଗୋପ୍ଫାୟତ ପଣ୍ହିଭାଗା
ସମଚ୍ଛମାୟଂ ସକଲଂ ପତିଟ୍ଠିତା
ନ ଲିମ୍ପତେ ସୁଚ୍ଛୱିତା ରଜାଦି ।
ସମ୍ମତ୍ତ ହତ୍ଥୋସଭ ହଂସ ସୀହ
ସମାନ ଲୀଲାୟ ୟହିଂ ପୟାତି,
ନିନ୍ନୁନ୍ନତା ଭେରିତଲା’ୱ ଭୁମି
ହୋତାଥ ପୁପ୍ଫାଦି ସୁମଣ୍ଡିତା ଚ ।
ଅପେନ୍ତି ମଗ୍ଗା ସୟମେୱ ଖାଣୁ
ସକଣ୍ଟମୂଲା କଠଲା ଚ ସବ୍ବେ,
ଗମ୍ଭୀର ନୀରାପଗ ପଙ୍କଦୁଗ୍ଗା
ହିତ୍ୱା ସଭାୱଂ ରମଣୀୟମେନ୍ତି ।
ୱଜନ୍ତି ଭୁମିଂ ଗିରୟୋ ପୁରତ୍ଥ
ପସାରିତେ ପାଦୱରେ ଜିନସ୍ସ,
ନିବ୍ବାତି ଅଗ୍ଗୀ ନରକୋଦରେପି
ଗଣ୍ହନ୍ତି ପାଦେ ପଦୁମାଦୟୋ ଚ ।
ଇଦଞ୍ହି ତେ ପାଦତଲେ ୟତୀସ
ସନାଭି ନେମି ଘଟିକାୱଲୀହି,
ସୁସଣ୍ଠିତଂ ଚା’ରସହସ୍ସୱନ୍ତଂ
ସନ୍ଦିସ୍ସତେ ଚକ୍କୱରଂ ମହନ୍ତଂ ।
ତମେୱ ଚକ୍କଂ ପରିୱାରୟିତ୍ୱା
ସିରିୱଚ୍ଛ ସୋୱତ୍ଥି’ୱତଂସକା ଚ,
ପାସାଦ ଭଦ୍ରାସନ ପୁଣ୍ଣପାତି
ସିତାତପତ୍ତାସି ମୟୂରହତ୍ଥା ।
ନୀଲାଦିଭେଦା କମଲୁପ୍ପଲା ଚ
ସମେରୁ ସତ୍ତଦ୍ଦି ମହାସମୁଦ୍ଦା,
ସତ୍ତାପଗା ସତ୍ତ ମହାସରା ଚ
ହିମାଲୟୋ ଚକ୍କୱାଳଦ୍ଦିକୋ ଚ ।
ଚନ୍ଦକ୍କତାରା ଚ ଛଦେୱଲୋକା
ପିତାମହାୱାସ ମନୁସ୍ସଲୋକଂ,
ସୁୱଣ୍ଣ ନାୱା ସିୱିକା ଚ ସଙ୍ଖଂ
କେଲାସସେଲଂ ଧଜତୋରଣା ଚ ।
ଚିନ୍ତାମଣୁଣ୍ହୀସ ସୱଚ୍ଛ ଧେନୂ
ମୀନଦ୍ୱୟଂ ଚକ୍କୱତ୍ତି ସସେନୋ,
ସୀହ’ସ୍ସ ମାତଙ୍ଗ ୱିୟଗ୍ଘରାଜା
ହଂସୋସଭୋ କିମ୍ପୁରିସୋ ମୟୂରୋ ।
କୋଞ୍ଚା ଚ ଏରାୱଣ ହତ୍ଥିରାଜା
ସଚକ୍କୱାକା ମକରାଦୟୋ ଚ,
ନାନା ମହାମଙ୍ଗଲ ଲକ୍ଖଣା ତେ
ୱିରୋଚମାନା ୱିଲସନ୍ତି ନିଚ୍ଚଂ ।
ଜାତକ୍ଖଣେ ୟସ୍ସ ମହିଂ ପଭେଜ୍ଜ
ୱିସାଲ ସତ୍ତୁଦ୍ଦୟ ପଙ୍କଜାନି,
ପଟିଗ୍ଗହେସୁଂ ଚରଣାନି ୟାନି
ତେ ତାନିମାନଚ୍ଛରିୟାନି ଲୋକେ ।
ୱନ୍ଦାପନତ୍ଥାୟୁ’ପନୀତକାଲେ
ପିତୂହି ତେ ଦେୱଲ ତାପସିନ୍ଦଂ,
ପାଦାନି ଗନ୍ତ୍ୱାନ ଜଟାସୁ ତସ୍ସ
ଆସୁଂ ତୱେ’ତଙ୍ଘିୟୁଗଂ ଅହୋ ଭୋ ।
ସୁଦ୍ଧୋଦନୱ୍ହସ୍ସ ନରାଧିପସ୍ସ
ସନ୍ତୋସ ତୋୟେହି ପପୂରିତସ୍ସ,
ସିରୋ ୱିସୁଦ୍ଧମ୍ବୁ ରୁହାକରସ୍ସ
ସରୋରୁ ହାସୁଂ ଚରଣାନି ତୁୟ୍ହଂ ।
ୟେ ଚଙ୍କମେ ଚଙ୍କମଣାୱସାନେ
ଓନମ୍ମ ମେରୂଦୟ ପବ୍ବନିଣ୍ଦା,
ପଟିଗ୍ଗହେସୁଂ ଚରଣାନି ୟାନି
ତେ ତାନିମା’ନଚ୍ଛରିୟାନି ଲୋକେ ।
ୟଂ ୱନ୍ଦମାନୋ ତିଦିୱାଧିପୋ ସୋ
ୟସ୍ସାନୁଭାୱେନ ଗତାୟୁକୋପି,
ସକିୟଠାନେ’ସିନପୁନାପି ତେ’ୱଂ
ପାଦମ୍ବୁଜଂ ଧୀର !ମହାନୁଭାୱଂ ।
ଦେହୀନମଗ୍ଗୋପି ନିସାକରାରି
ମାନୁନ୍ନତୋ ସୋ ସୟିତସ୍ସ ତୁୟ୍ହଂ,
ପାଦସ୍ସ ଅନ୍ତମ୍ପି ନ ସକ୍ଖି ଦଟ୍ଠୁଂ
ଅଚ୍ଛେର ରୂପଂ ଇଦମଙ୍ଘିକଞ୍ଜଂ ।
ଗଙ୍ଗାୟ ଗଙ୍ଗାପତି ସନ୍ନିଧାନେ
ତୀରେ ତଦା ନମ୍ମଦ ଜିମ୍ହଗସ୍ସ,
ପାଦସ୍ସ ଲଞ୍ଛଂ ଅକରୀ ମୁନିନ୍ଦ
ମୟ୍ହଂ’ପି ହୋତଂ କରୁଣା ତୱେସା ।
ଆରାଧିତୋ ସଚ୍ଚକ ତାପସେନ
ଅକା ତୁୱଂ ସଚ୍ଚକ ବଦ୍ଧସେଲେ,
ପାଦସ୍ସ ଲଞ୍ଛଂ ଜଗତୋ ହିତାୟ
ମୟ୍ହମ୍ପି ହୋତଂ ତମନୁଗ୍ଗହନ୍ତେ ।
ସୁତ୍ୱାନ ନାଥୋ ଗିରମେତମସ୍ସ
ପସ୍ସଂ ମହାଭୁତି’ମନାଗତେସୁ,
ଲୋକସ୍ସ ଲୋକେହି ମହୀୟ ମାନୋ
ଅକାସି ୱାମେନ ପଦେନ ଲଞ୍ଛଂ ।
ସମ୍ବୋଧିତୋ ଅଟ୍ଠମ ସାରଦସ୍ମିଂ
ୱେସାଖମାସେ ମୁଣି ପୁଣ୍ଣମାୟଂ,
ପାଦସ୍ସ’ଭିଞ୍ଞାଣମକା’ପରଣ୍ହେ
ସଦେୱକେ ସସ୍ସମଣେ ମହେନ୍ତେ ।
ପତଙକ୍ଗିକା ସିତ୍ଥକ ମତ୍ଥକମ୍ହି
ୟଥଙ୍କିତା ଖତ୍ତିୟ ମୁଦ୍ଦିକାୟ,
ଆସେୱ’ମେୱଂ ଜିନପାଦଲଞ୍ଛଂ
ସମନ୍ତକୂଟମ୍ହି ନମସ୍ସନୀୟଂ ।
ଅକାଲମେଘୋ ଚ ତତୋ ପୱସ୍ସି
ୱସ୍ସିଂସୁ ନାନାରତନାନି ଖମ୍ହା,
ତଥା ପରିତୋ କୁସୁମମ୍ବରାନି
ସୁୱଣ୍ଣଚୁଣ୍ଣାନି ଜିନେକୱଣ୍ଣା ।
ତତୋ’ପଗନ୍ତ୍ୱା ସୁଗତେଭଗାମୀ
ତସ୍ମିଂ ନିତମ୍ବେ ଗିରିଗବ୍ଭରାୟଂ,
ଦିୱାୱିହାରାୟ ନିସୀଦି ୟତ୍ଥ
ସୁପାକଟଂ ତଂ ଭଗୱାଗୁହା’ତି ।
ତତୋରହନ୍ତା ସୁଗତୋରସା ତେ
ଗନ୍ଧାଦିନା ସାଧୁ ମହେତ୍ୱ ସବ୍ବେ,
ୱନ୍ଦିତ୍ୱ କତ୍ୱାନ ପଦକ୍ଖିଣନ୍ତଂ
ତହଂ ତହଂ’କଂସୁ ଦିୱାୱିହାରଂ ।
ଲତଙ୍ଗନାୟୋ ୱିଟପୀଧୱାନ
ମାଲମ୍ବ ସାଖାପୁଥୁଲଂ’ସପସ୍ସେ,
ସୁଫୁଲ୍ଲ ନମଞ୍ଜୂକର ମଞ୍ଜରୀହି
ନମସ୍ସମାନା’ୱ ସଦୋନତଗ୍ଗା ।
ତିଟ୍ଠନ୍ତି ରୁକ୍ଖା ନଟକା’ୱ ତତ୍ଥ
ସୁଫୁଲ୍ଲ ସାଖାକର’ମୁକ୍ଖିପିତ୍ୱା,
ନମସ୍ସମାନା ୱିୟ ଓନତଗ୍ଗା
ୱତ୍ତନ୍ତି ମାନଚ୍ଛରିୟାନି ନିଚ୍ଚଂ ।
ତଥେୱ ଉଚ୍ଚାୱଚ ପବ୍ବତା ଚ
ନମସ୍ସମାନା ୱିୟ ପାଦଲଞ୍ଛଂ,
ତିଟ୍ଠନ୍ତି ନିନ୍ନଗ୍ଗ ସିଖା ସମନ୍ତା
ଇଦମ୍ପି ନିଚ୍ଚବଭୁତମେୱ ତତ୍ଥ ।
ତସ୍ମିଂ ନଗେ ପାଦୱରଙ୍କିତସ୍ମିଂ
ଖଲମଣ୍ଡଲୋକାସ ପଦେସମତ୍ତେ,
ସମୋସରନ୍ତେ ବହୁକେ ଜନେପି
ହୋତେୱ ଓକାସମ,ହୋ ପଦଙ୍କଂ ।
ସମୋସରିତ୍ୱାନ ମହେତ୍ୱ ସତ୍ତେ
ନିକ୍ଖନ୍ତମତ୍ତେ ଜଲଦା ସମେଚ୍ଚ,
ସୋଧେନ୍ତି ମାଲ’ମ୍ବୁୱହେହି ସାଧୁ
ଇଦମ୍ପି ନିଚ୍ଚବ୍ଭୁତମେୱ ତତ୍ଥ ।
ପାଦେନ ଫୁଟ୍ଠସ୍ସ ସିଲାତଲସ୍ସ
ଏତାଦିସାନଚ୍ଛରିୟାନି ହୋନ୍ତି,
ଲୋକେକନାଥସ୍ସ ଅନାସୱସ୍ସ
ମହବ୍ଭୁତଂ କୋନୁ କଥଂ ଭଣେୟ୍ୟ ।
ଦିୱାୱିହାରଂ ଭଗୱା ସସଙ୍ଘୋ
କତ୍ୱାନ ତସ୍ମିଂ ପନ କିଞ୍ଚିକାଲଂ,
ମହୀୟମାନେସୁ ସଦେୱକେସୁ
ତତୋ ଗତୋ ରୋହଣମମ୍ବରମ୍ହା ।
ତସ୍ମିଂ ସସଙ୍ଘୋ ମୁନି ଦୀଘୱାପିୟଂ
ଥୂପସ୍ସ ଠାନେ ପରମାୟ ଭୁମିୟା,
ଗରୁଂ କରୋନ୍ତୋ ପନ ତଂ ମହୀତଲଂ
ନିରୋଧଭାୱେନ ନିସୀଦି ସତ୍ରଜୋ ।
ତତୋ’ନୁରାଧଂ ଭଗୱା ନଭମ୍ହା
ଗନ୍ତ୍ୱାନ ବୋଧିଟ୍ଠିତଭୁମିୟା ଚ,
ଠାନେ ମହାମଙ୍ଗଲଚେତିୟସ୍ସ
ତଥେୱ ଅକ୍ଖନ୍ତିନହିତସ୍ସ ଠାନେ ।
ନିସୀଦି ପତ୍ୱାନ ନିରାଧପୀତିଂ
ସସାୱକୋ ପେକ୍ଖମ’ନାଗତଦ୍ଧଂ,
ପତିଟ୍ଠିତା ମେ ପନ ବୋଧିଧାତୁ
କରୋନ୍ତି ଲୋକେ’ତି ଜନସ୍ସ ୱୁଦ୍ଧିଂ ।
ୱୁଟ୍ଠାୟ ତୁଟ୍ଠୋ ଭଗୱା ନିରୋଧା
ଗତୋ ସିଲାଥୂପୱରସ୍ସ ଠାନଂ,
ଠିତୋ ତହିଂ ଧମ୍ମମଥୁଦ୍ଦିସିତ୍ୱା
ଗତୋ ନଭା ଜେତୱନଂ ସୁରମ୍ମଂ ।
ଏୱଂ ସୋ ଧମ୍ମରାଜା ଜନହିତୱିହିତୋ ୱୀତ ଦୋସାରିୱଗ୍ଗୋ
ଲଙ୍କାରାମାୟ ରମ୍ମେ ସୁମନଗିରିସିରେ’କାସି ୟଂ ପାଦଲଞ୍ଛଂ
ତଂ ୱୋ ସଗ୍ଗା’ପୱଗ୍ଗଂ ଦଦତି ମୁନିସମଂ ଚିତ୍ତ ମତ୍ତେ ପସନ୍ନେ
ତସ୍ମା ଭୋ !ଭୋ ! ପହଟ୍ଠା ନମଥ ମହଥ ତଂ ସାଧୁ ସାଧୁପ୍ପସତ୍ଥଂ ।
ଇତି ସମନ୍ତକୂଟ ୱଣ୍ଣନା ନିଟ୍ଠିତା ।
ଗ୍ରନ୍ଥ ସମାପ୍ତିୟ ।
ଅନନ୍ତରା ସମତ୍ତାୟଂ ସୁମଣଦ୍ଦିସୁ ୱଣ୍ଣନା,
ତଥେୱ ସାଧୂ ସଙ୍କପ୍ପା ଖିପ୍ପଂ ପପ୍ପୋନ୍ତୁ ପାଣିନଂ ।
ୟୋ ୟାଚିତୋ’ରଞ୍ଞୱାସୀ ଗୁଣାଧାର ସୁଧୀମତା,
ରାହୁଲତ୍ଥେରନାମେନ ୱିସ୍ସୁତେନ ମହୀତଲେ ।
ଭୁୱନୋଦରମ୍ହି ପଞ୍ଞାତୋ ରୱୀୱମ୍ବର ମଣ୍ଡଲେ,
ଅରଞ୍ଞରତନାନନ୍ଦ ମହାଥେରୋ ମହାଗଣୀ ।
ଜୀୱିତଂ ୱିୟ ୟୋ ସତ୍ଥୁସାସନସ୍ସ ମହାକୱୀ,
ସାରୋ ସୁପ୍ପଟିପତ୍ତୀସୁ ସତ୍ଥସାଗର ପାରଗୋ ।
ତସ୍ସ ସିସ୍ସୋ’ସି ୟୋ ୱିପ୍ପଗାମ ୱଂସେକ କେତୁକୋ
ଞାତାଗମୋ’ରଞ୍ଞୱାସୀ ସୀଲାଦି ଗୁଣଭୂସଣୋ ।
ୟୋ’କା ସୀହଲଭାସାୟ ସୀହଲଂ ସଦ୍ଦଲକ୍ଖଣଂ,
ତେନ ୱେଦେହଥେରେନ କତାୟମ୍ପିୟସୀଲିନା ।
ସିଦ୍ଧିରତ୍ଥୁ ।