ଜିନଚରିତୟ
॥ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ଉତ୍ତମଂ ଉତ୍ତମଙ୍ଗେନ ନମସ୍ସିତ୍ୱା ମହେସିନୋ ।
ନିବ୍ବାଣମଧୁଦଂ ପାଦପଙ୍କଜଂ ସଜ୍ଜନାଲିନଂ ॥
ମହାମୋହତମଂ ଲୋକେ ଧଂସେନ୍ତଂ ଧମ୍ମଭାକରଂ ।
ପାତୁଭୂତଂ ମହାତେଜଂ ଧମ୍ମରାଜୋଦୟାଚଲେ ॥
ଜନ୍ତୁଚିତ୍ତସରେ ଜାତଂ ପସାଦକୁମୁଦଂ ସଦା ।
ବୋଧେନ୍ତଂ ସଙ୍ଘୱନ୍ଦଞ୍ଚ ସିଲୋରୁକିରଣୁଜ୍ଜଲଂ ॥
ତହିଂ, ତହିଂ ସୁୱିତ୍ଥିଣ୍ଣଂ ଜିନସ୍ସ ଚରିତଂ ହିତଂ ।
ପୱକ୍ଖାମି ସମାସେନ ସଦା’ନୁସ୍ସରଣତ୍ଥିକୋ ॥
ପଣିତଂ ତଂ ସରନ୍ତାନଂ ଦୁଲ୍ଲଭମ୍ପି ସିୱଂପଦଂ ।
ଅଦୁଲ୍ଲଭଂ ଭୱେ ଭୋଗପଟିଲାଭମ୍ହି କା କଥା ?
ତସ୍ମା ତଂ ଭଞ୍ଞମାନଂ ମେ ଚିତ୍ତୱୁତ୍ତପଦକ୍କମଂ ।
ସୁନ୍ଦରଂ ମଧୁରଂ ସୁଦ୍ଧଂ ସୋତୁସୋତରସାୟନଂ ॥
ସୋତହତ୍ଥପୁଟା ସମ୍ମା ଗହେତ୍ୱାନ ନିରନ୍ତରଂ ।
ଅଜରାମରମି’ଚ୍ଛନ୍ତା ସାଧୱୋ ପରିଭୁଞ୍ଜଥ ॥
କପ୍ପସତସହସ୍ସସ୍ସ ଚତୁନ୍ନଂ ଚା’ପି ମତ୍ଥକେ ।
ଅସଙ୍ଖେୟ୍ୟାନମା’ୱାସଂ ସବ୍ବଦା ପୁଞ୍ଞକାମିନଂ ॥
ନାନାରତନସମ୍ପନ୍ନଂ ନାନାଜନସମାକୁଲଂ ।
ୱିଚିତ୍ତାପଣ ସଂକିଣ୍ଣଂ ତୋରଣ ଗ୍ଘିକ ଭୂସିତଂ ॥
ୟୁତ୍ତଂ ଦସହି ସଦ୍ଦେହି ଦେୱିନ୍ଦପୁରସନ୍ନିଭଂ ।
ପୁରଂ ଅମରସଙ୍ଖାତଂ ଅହୋସୀ ରୁଚିରଂ ୱରଂ ॥
ତହିଂ ବ୍ରାହ୍ମନ୍ୱୟେ ଜାତୋ ସବ୍ବଲୋକାଭିପୂଜିତୋ ।
ମହାଦୟୋ ମହାପଞ୍ଞୋ ଅଭିରୂପୋ ମନୋରମୋ ॥
ସୁମେଧୋ ନାମ ନାମେନ ୱେଦସାଗରପାରଗୂ ।
କୁମାରୋ’ସି ଗରୂନଂ ସୋ ଅୱସାନେ ଜିନଂକୁରୋ ॥
ରାସିୱଡ୍ଢକମଚ୍ଚେନ ଦସ୍ସିତଂ ଅମିତଂ ଧନଂ ।
ଅନେକସତଗବ୍ଭେସୁ ନିଚିତଂ ତଂ ଉଦିକ୍ଖିୟ ॥
ଧନସନ୍ନିଚୟଂ କତ୍ୱା ଅହୋ ମୟ୍ହଂ ପିତାଦୟୋ ।
ଗତା ମାସକମେ’କମ୍ପି ନେୱା’ଦାୟ ଦିୱଂ ଇତି ॥
ସଂୱେଗମୁ’ପୟାତୋ’ୱଚୀମନ୍ତେସୀ’ତି ଗୁଣାକରୋ ।
ଧନସାରଂ ଇହଂ ଗୟ୍ହ ଗନ୍ତୁଂ ୟୁତ୍ତନ୍ତି ମେ ପନ ॥
ରହୋଗତୋ ନିସୀଦିତ୍ୱା ସୁନ୍ଦରେ ନିଜମନ୍ଦିରେ ।
ଦେହେ ଦୋସୋ ଉଦିକ୍ଖନ୍ତୋ ଓୱଦନ୍ତୋ’ପି ଅତ୍ତନୋ ॥
ଭେଦନଂ ତନୁନୋଦୁକ୍ଖଂ ଦୁକ୍ଖୋ ତସ୍ସୋ’ଦୟୋ’ପି ଚ ।
ଜାତିଧମ୍ମୋ ଜରାଧମ୍ମୋ ୱ୍ୟାଧିଧମ୍ମୋ ଅହଂ ଇତି ॥
ଏୱମା’ଦୀହି ଦେହସ୍ମିଂ ଦିସ୍ୱା ଦୋସେ ଅନେକଧା ।
ପୁରେ ଭେରିଂ ଚରାପେତ୍ୱା ଆରୋଚେତ୍ୱାନ ରାଜିନୋ ॥
ଭେରିନାଦସୁଗନ୍ଧେନ ୟାଚକାଲିସମାଗତେ ।
ଦାନକିଞ୍ଜକ୍ଖଓଘେନ ସତ୍ତାହଂ ପୀନୟୀ ତତୋ ॥
ଦାନଗ୍ଗହିମବିନ୍ଦୂନଂ ନିପାତେନା’ପି ଧଂସନଂ ।
ଅୟାତଂ ତଂ ୱିଲୋକେତ୍ୱା ରତନମ୍ବୁଜକାନନଂ ॥
ରୁଦତୋ ଞାତିସଙ୍ଘସ୍ସ ଜଲିତାନଲକାନନା ।
ଗଜିନ୍ଦୋ ୱିୟ ଗେହମ୍ହା ନିକ୍ଖମିତ୍ୱା ମନୋରମା ॥
ମହନ୍ତଂ ସୋ ମହାୱୀରୋ ଉପଗଞ୍ଛି ହିମାଲୟଂ ।
ହରିଚନ୍ଦନକପ୍ପୂରାଗରୁଗନ୍ଧେହି ୱାସିତଂ ॥
ସୁଫଲ୍ଲଚମ୍ପକାସୋକପାଟଲୀତିଲକେହି ଚ ।
ପୂଗପୁନ୍ନାଗନାଗାଦିପାଦପେହି ଚ ମଣ୍ଡିତଂ ॥
ସୀହୱ୍ୟଗ୍ଘତରଚ୍ଛେହି ଇଭଦୀପିକପୀହି ଚ ।
ତୁରଙ୍ଗମାଦିନେକେହି ମିଗେହି ଚ ସମାକୁଲଂ ॥
ସାଳିକାରୱିହଂସେହି ହଂସକୋଞ୍ଚସୁୱେହି ଚ ।
କପୋତକରୱୀକାଦିସକୁନ୍ତେହି ଚ କୂଜିତଂ ॥
ୟକ୍ଖରକ୍ଖସଗନ୍ଧବ୍ବଦେୱଦାନୱକେହି ଚ ।
ସିଦ୍ଧୱିଜ୍ଜାଧରାଦୀହି ଭୂତେହି ଚ ନିସେୱିତଂ ॥
ମନୋସୀଲିନ୍ଦନୀଲୋରୁଚାରୁପବ୍ବତପନ୍ତିହି ।
ସଜ୍ଝୁହେମାଦିନେକେହି ଭୂଧରେହି ଚ ଭାସୁରଂ ॥
ସୁୱଣ୍ଣମଣିସୋପାନନେକତିତ୍ଥସରେହି ଚ ।
ସୋଭିତଂ ତତ୍ଥ କୀଳନ୍ତନେକଦେୱଙ୍ଗନାହି ଚ ॥
ସୀତସୀକରସଞ୍ଛନ୍ନନିଜ୍ଝରାନଂ ସତେହି ଚ ।
କିଣ୍ଣରୋରଗରଙ୍ଗେହି ରମ୍ମେହି ୱିରାଜିତଂ ॥
ସିଖଣ୍ଡିସଣ୍ଡନଚ୍ଚେହି ଲତାନଂ ମଣ୍ଡପେହି ଚ ।
ସେତୱାଲୁକସଞ୍ଛନ୍ନମାଲକେହି ଚ ମଣ୍ଡିତଂ ॥
ସୁୱଣ୍ଣମଣିମୁତ୍ତାଦି ଅନେକରତନାକରଂ ।
ଇଚ୍ଛନ୍ତାନଂ ଜନାଲୀନଂ ପୁଞ୍ଞକିଞ୍ଜକ୍ଖମା’ଲୟଂ ॥
ତମ’ଜ୍ଝୋଗୟ୍ହ ସୋ ଧୀରୋ ସହସ୍ସକ୍ଖେନ ମାପିତେ ।
ଦିସ୍ୱା ଇସିପରିକ୍ଖାରେ ପଣ୍ଣସାଲୱରେ ତହିଂ ॥
ଇସିୱେସଂ ଗହେତ୍ୱାନ ୱିହରନ୍ତୋ ସମାହିତୋ ।
ସତ୍ତାହ’ବ୍ଭନ୍ତରେ ପଞ୍ଚ ଅଭିଞ୍ଞ’ଟ୍ଠୱିଧା’ପି ଚ ॥
ଉପ୍ପାଦେତ୍ୱା ସମାପତ୍ତିସୁଖେନେ’ଚ ତପୋଧନୋ ।
ନଭସା ଦିୱସେ’କସ୍ମିଂ ଗଚ୍ଛନ୍ତୋ ଜନତଂ ଇସି ॥
ସୋଧେନ୍ତମ’ଞ୍ଜସଂ ଦିସ୍ୱା ଓତରିତ୍ୱା ନଭା ତହିଂ ।
ଇତି ତଂ ଜନତଂ ପୁଚ୍ଛି କସ୍ମା ସୋଧେଥ ଅଞ୍ଜସଂ ॥
ସୁମେଧ ତ୍ୱଂ ନଜାନାସି ଦୀପଙ୍କରତଥାଗତୋ ।
ସମ୍ବୋଧିମୁ’ତ୍ତମଂ ପତ୍ୱା ଧମ୍ମଚକ୍କମ’ନୁତ୍ତରଂ ॥
ପୱତ୍ତେତ୍ୱାନ ଲୋକସ୍ସ କରୋନ୍ତୋ ଧମ୍ମସଙ୍ଗହଂ ।
ରମ୍ମଂ ରମ୍ମପୁରଂ ପତ୍ୱା ୱସତୀ’ହ ସୁଦସ୍ସନେ ॥
ଭିକ୍ଖୁସତସହସ୍ସେହି ଚତୂହି ୱିମଲେହି ତଂ ।
ନିମନ୍ତୟିମ୍ହ ଦାନେନ ମୟଂ ଲୋକେକନାୟକ ॥
ତସ୍ସ ଆଗମନତ୍ଥାୟ ମଗ୍ଗଂ ସୋଧେମ ଚକ୍ଖୁମ ।
ଇତି ସୋତସ୍ସ ସୋ ତସ୍ସ ସୁଖଂ ଦେନ୍ତୋ ଜନୋ’ବ୍ରୱିଂ ॥
ବୁଦ୍ଧୋ’ତି ୱଚନଂ ସୁତ୍ୱା ପୀତିୟୋ’ଦଗ୍ଗମାନସୋ ।
ସକଭାୱେନ ସଣ୍ଠାତୁଂ ନେୱସକ୍ଖି ଗୁଣାକରୋ ॥
ତେନା’ରଦ୍ଧଞ୍ଜସା ଧୀରୋ ୟାଚିତ୍ୱାନ ପଦେସକଂ ।
ଲଭିତ୍ୱା ୱିସମଂ ଠାନଂ ସମଂ କାତୁଂ ସମାରଭି ॥
ନା’ଲଙ୍କତେୟେୱ ତହିଂ ପଦେସେ,
ଲୋକେକନାଥୋ ସନରାମରେହି ।
ସମ୍ପୂଜିତୋ ଲୋକହିତୋ ମହେସି,
ୱସୀହି ସଦ୍ଧିଂ ପଟିପଜ୍ଜି ମଗ୍ଗଂ ॥
ଛବ୍ବଣ୍ଣରଂସିଜାଲେହି ପଜ୍ଜଲନ୍ତଂ ତଥାଗତଂ ।
ଆଗଚ୍ଛନ୍ତଂ ତହି ଦିସ୍ୱା ମୋଦମାନୋ ୱିଚିନ୍ତୟି ॥
ୟନ୍ନୂନି’ମସ୍ସ ଧୀରସ୍ସ ସେତୁଂ କତ୍ୱାନ କଦ୍ଦମେ ।
ସକତ୍ତାନଂ ନିପଜ୍ଜୟେ ସସଙ୍ଘସ୍ସ ମହେସିନୋ ॥
ଦୀଘରତ୍ତାମ’ଲଂ ତଂ ମେ ହିତାୟ ଚ ସୁଖାୟ ଚ ।
ଇଚ୍ଚେ’ୱଂ ଚିନ୍ତୟିତ୍ୱାନ ନିପନ୍ନୋ’ସୋ ଜିନଙ୍କୁରୋ ॥
ପବୋଧେତ୍ୱାନ ଦିସ୍ୱାନ ଚାରୁଲୋଚନପଙ୍କଜେ ।
ପୁନ’ପେ’ୱଂ ୱିଚିନ୍ତେସି ନିପନ୍ନୋ ଧିତିମା ତହିଂ ॥
ଇଚ୍ଛେୟ୍ୟଂ ଚେ’ହମ’ଜ୍ଜେ’ୱ ହନ୍ତ୍ୱା’ନନ୍ତରଣେ ଭୱେ ।
ସଙ୍ଘସ୍ସ ନୱକୋ ହୁତ୍ୱା ପୱିସେୟ୍ୟଂ ପୁରଂ ୱରଂ ॥
କିମ’ଞ୍ଞାତକୱେସେନ କ୍ଲେସନିବ୍ବାପଣେନ ମେ ।
ଅୟଂ ବୁଦ୍ଧୋ’ୱ’ହଂ ବୁଦ୍ଧୋ ହୁତ୍ୱା ଲୋକେ ଅନୁତ୍ତରୋ ॥
ଜନତଂ ଧମ୍ମନାୱାୟ ତାରେତ୍ୱାନ ଭୱଣ୍ଣୱାୱ ।
ନିବ୍ବାଣପୁରମା’ନେତ୍ୱା ସେୟ୍ୟଂ ମେ ପରିନିବ୍ବୁତଂ ॥
ଇଚ୍ଚେ’ୱଂ ଚିନ୍ତୟିତ୍ୱାନ ନିପନ୍ନୋ କଦ୍ଦମେ ତହିଂ ।
ସୁୱଣ୍ଣକଦଲିକ୍ଖନ୍ଧସନ୍ନିଭୋ ସୋ’ତି ସୋଭତି ॥
ଛବ୍ବଣ୍ଣରଂସୀହି ୱିରାଜମାନଂ,
ଦିସ୍ୱା ମନୁଞ୍ଞଂ ସୁଗତତ୍ତଭାୱଂ ।
ସଞ୍ଜାତପୀତୀହି ଉଦଗ୍ଗଚିତ୍ତୋ,
ସମ୍ବୋଧିୟା ଛନ୍ଦମ’କାସି ଧୀରୋ ॥
ଆଗନ୍ତ୍ୱାନ ତହିଂ ଠାନଂ ଇସିଂ ପଙ୍କେ ନିପନ୍ନକଂ ।
ଲୋକସ୍ସ ସେତୁଭୂତୋ’ପି ସେତୁଭୂତଂ ତମ’ତ୍ତନୋ ॥
ଦିସ୍ୱା ଉସ୍ସୀସକେ ତସ୍ସ ଠତ୍ୱା ଲୋକେକସେତୁନୋ ।
ଲୋକେକଲୋଚନୋ ଧୀରୋ ଦୀପଙ୍କରତଥାଗତୋ ॥
ଗୋତମୋ ନାମ ନାମେନ ସମ୍ବୁଦ୍ଧୋ’ୟଂ ଅନାଗତେ ।
ଭୱିସ୍ସତୀତି ୱ୍ୟାକାସି ସାୱକେ ଚ ପୁରାଦିକେ ॥
ଇଦଂ ୱତ୍ୱାନ କତ୍ୱାନ ସସଙ୍ଘୋ ତଂ ପଦକ୍ଖିଣଂ ।
ପୂଜେସି ଅଟ୍ଠମୁଟ୍ଠିହି କୁସୁମେହି ଗୁଣପ୍ପିୟୋ ॥
ଇତି କାତୂନ ପାୟାସି ସସଙ୍ଘୋ ଲୋକନାୟକୋୱ ।
ରମ୍ମକଂ ନାମ ନଗରଂ ରମ୍ମାରାମାଲୟାଲୟଂ
ଜିନସ୍ସ ୱଚନଂ ସୁତ୍ୱା ଉଟ୍ଠହିତ୍ୱାନ ପଙ୍କତୋ ।
ମୁଦିତୋ ଦେୱସଙ୍ଘେହି କୁସୁମାଦୀହି ପୂଜିତୋ ॥
ପଲ୍ଲଙ୍କମା’ଭୁଜିତ୍ୱାନ ନିସୀଦି କୁସୁମାସନେ ।
ମହାତପୋ ମହାପଞ୍ଞୋ ସୁମେଧୋ ଦମିତିନ୍ଦ୍ରିୟୋ ॥
ଦେୱା ଦସସହସ୍ସେସୁ ଚକ୍କୱାଳେସୁ ମୋଦିତା ।
ଅଭିତ୍ୱୱିଂସୁ ତଂ ଧୀରଂ ନିସିନ୍ନଂ କୁସୁମାସନେ ॥
ନିସିନ୍ନୋ ଉପଧାରେସି ଧମ୍ମେ ବୁଦ୍ଧକରେ ତଦା ।
କିମୁଦ୍ଧଂ ୱା ଅଧୋ ୱା’ପି ଦିସାସୁ ୱିଦିସାସୁ ଚ ॥
ଇଚ୍ଚେ’ୱଂ ୱିଚିନନ୍ତୋ ସୋ ସକଲଂ ଧମ୍ମଧାତୁକଂ ।
ଅଦ୍ଦକ୍ଖି ସକସନ୍ତାନେ ପଠମଂ ଦାନପାରମିଂ ॥
ଏୱମେ’ୱଂ ଗୱେସନ୍ତୋ ଉତ୍ତରିଂ ପାରମୀ ୱିଦୂ ।
ସବ୍ବା ପାରମିୟୋ ଦିସ୍ୱା ଅତ୍ତନୋ ଞାଣଚକ୍ଖୁନା ॥
ସଂସାରେ ସଂସରନ୍ତୋ ସୋ ବହୁଂ ଦୁକ୍ଖଂ ତିତିକ୍ଖିୟ ।
ଗୱେସନ୍ତୋ’ମତଂ ସନ୍ତୋ ପୂରେତ୍ୱା ଦାନପାରମିଂ ॥
ସତ୍ତନଂ କପ୍ପରୁକ୍ଖୋ’ୱ ଚିନ୍ତାମଣି’ୱ କାମଦୋ ।
ଇଚ୍ଛିତିଚ୍ଛିତମନ୍ନାଦିଂ ଦଦନ୍ତୋ ଦଦତଂ ୱରୋ ॥
ତାରକାହି ବହୁଂ କତ୍ୱା ନଭେ ଚାରୁୱିଲୋଚନେ ।
ଉପ୍ପାଟେତ୍ୱା ଦଦଂ ଧୀରୋ ୟାଚକାନଂ ପମୋଦିତୋ ॥
ମହିୟା ପଂସୁତୋ ଚା’ପି ସମୁଦ୍ଦୋଦକତୋ’ଧିକଂ ।
ଦଦଂ ସରୀରମଂସଞ୍ଚ ଲୋହିତମ୍ପି ଚ ଅତ୍ତନୋ ॥
ମୋଲିନା’ଲଙ୍କତେ ସୀସେ’ଧିକଂ କତ୍ୱା ସିନେରୁତୋ ।
କମ୍ପୟିତ୍ୱା ମହିଂ ଦେନ୍ତୋ ସୁତେ ଚା’ପି ସକଙ୍ଗତାୱ ॥
ସୀଲନେକ୍କମ୍ମପଞ୍ଞାଦୀ ପୂରେତ୍ୱା ସବ୍ବପାରମୀ ।
ୱେସ୍ସନ୍ତରତ୍ତଭାୱେ’ ୱମ୍ପତ୍ୱା ତମ୍ଭା ଚୁତୋ ପନ ॥
ଉପ୍ପଜ୍ଜିତ୍ୱା ସୁରାୱାସେ ସୁନ୍ଦରେ ତୁସିତେ ପୁରେ ।
ୱସନ୍ତୋ ସୁଚିରଂ କାଲଂ ଭୁତ୍ୱାନା’ତନ୍ତସମ୍ପଦଂ ॥
କତଞ୍ଜଲୀହି ଦେୱେହି ୟାଚିତୋ ଦିପଦୁତ୍ତମୋ ।
ସମ୍ବୋଧାୟ ମହାୱୀର କାଲୋ ତୁୟ୍ହନ୍ତିଆଦିନା ॥
ୱିଲୋକେତ୍ୱାନ କାଲାଦିଂ ଞତ୍ୱା କାଲନ୍ତି ବୋଧିୟା ।
ପଟିଞ୍ଞଂ ଦେୱସଙ୍ଘସ୍ସ ଦତ୍ୱା ନନ୍ଦନକାନନଂ ॥
ଗନ୍ତ୍ୱାନ ଦେୱସଙ୍ଘେହି ସୁଗତିଂ ଗଚ୍ଛି’ତୋ ଚୁତୋ ।
ଅଭିତ୍ଥୁତୋ ମହାପଞ୍ଞୋ ଚୱିତ୍ୱାନ ତତୋ ଇଧ ॥
ସୁସଜ୍ଜିତଙ୍ଗୋରୁତୁରଙ୍ଗମାକୁଲେ,
ୱିଚିତ୍ତନାନାପଣପଣ୍ୟସମ୍ପଦେ ।
ମନୋରମୁତ୍ତୁଙ୍ଗଜିନ୍ଦରାଜିତେ,
ୱିଭୂସିତେ ତୋରଣକେତୁରାସିହି ॥
ଅଲଙ୍କତଟ୍ଟାଲୱିସାଲମାଲୟେ,
ସୁଗୋପୁରେ ସୁନ୍ଦରସୁନ୍ଦରାଲୟେ ।
ସୁଦସ୍ସନୀୟେ କପିଳୱ୍ହୟେ ପୁରେ,
ପୁରିନ୍ଦଦସ୍ସା’ପି ପୁରସ୍ସ ହାସକେ ॥
ଭୂପାଲମୋଳିରତନାଲିନିସେୱିତଙ୍ଘି,
ପଙ୍କେରୁହଂ ୱିମଲନେକଗୁଣାଧିୱାସଂ ।
ଓକ୍କାକରାଜକୁଲକେତୁମନାଥନାଥଂ,
ସୁଦ୍ଧୋଦନଂ ନରପତିଂ ପୱରଂ ପଟିଚ୍ଚ ॥
ସୋ ସଜ୍ଝୁଦାମଧୱଲାମଲଦସ୍ସନୀୟ,
ସୋଣ୍ଡାୟ ସଂଗହିତସେତୱରାରଚିନ୍ଦଂ ।
ଚନ୍ଦାୱଦାତୱରୱାରଣରାଜୱଣ୍ଣଂ,
ସନ୍ଦସ୍ସୟିତ୍ୱ ସୁପିନେନ ୱିସାଲପଞ୍ଞୋ ॥
ବିମ୍ବାଧରାୟ ୱିକଚୁପ୍ପଲଲୋଚନାୟ,
ଦେୱିନ୍ଦଚାପରତିଚଡ୍ଢନଭୂଲତାୟ ।
ସମ୍ପୁଣ୍ଣସୋମ୍ମୱିମଲିନ୍ଦୁୱରାନନାୟ,
ସୋୱଣ୍ଣହଂସୟୁଗଚାରୁପୟୋଧରାୟ ॥
ପାଦାରୱିନ୍ଦକରପଲ୍ଲୱସୁନ୍ଦରାୟ,
ସୋୱଣ୍ଣୱଣ୍ଣତନୁୱଣ୍ଣୱିରାଜିତାୟ ।
ସୀଲାଦିନେକ ଗୁଣଭୂସନଭୂସିତାୟ,
ମାୟାୟ ରାଜୱନିତାୟୁ’ପଗଞ୍ଛି କୁଚ୍ଛିଂ ॥
ପଟିସନ୍ଧିକ୍ଖଣେ ତସ୍ସ ଜାତା’ନେକୱିଧବ୍ଭୁତା ।
ଅଥା’ୟଂ ଗହିତାରକ୍ଖୋ ନରେହି ଅମରେହି ଚ ॥
ମନୁଞ୍ଞରତ୍ତମ୍ବୁଜକଣ୍ଣିକାୟ,
ମା’ସୀନସିଙ୍ଗୀପଟିମା’ୱ ରମ୍ମା ।
ସୁୱଣ୍ଣୱଣ୍ଣୋ ଦିପଦାନମିନ୍ଦୋ,
ପଲ୍ଲଙ୍କମା’ଭୁଞ୍ଛିୟ ମାତୁଗବ୍ଭେ ॥
ମଣିମ୍ହି ୱିପ୍ପସନ୍ନମ୍ହି ରତ୍ତସୁତ୍ତମି’ୱା’ୱୁତଂ ।
ମାତୁଚିତ୍ତମ୍ବୁଜଂ ଧୀରୋ ବୋଧୟନ୍ତୋ ପଦିସ୍ସତି ॥
ଦସମାସାୱସାନମ୍ହି ଦେୱୀ ରଞ୍ଞୋ କଥେସି’ଦଂ ।
ମୟ୍ହଂ ଞାତିଘରଂ ଦେୱ ଗନ୍ତୁମି’ଚ୍ଛାମ’ହଂ ଇତି ॥
ରଞ୍ଞୋ’ଥ ସମନୁଞ୍ଞତା ଗଚ୍ଛନ୍ତି କୁଲମ’ତ୍ତନୋ ।
ମହତା ପରିହାରେନ ଦିବ୍ବଞ୍ଜସ ସମଞ୍ଜସେ ॥
ସୁରଭିକୁସୁମସଣ୍ଡାଲଙ୍କତସ୍ସାଲସଣ୍ଡଂ,
ସମଦହମରମାଲାଗୀୟମାନଗ୍ଗନାଦଂ ।
ନୟନୱିହଗସଙ୍ଘେ ଅୱ୍ହୟନ୍ତଂ’ୱ ଦିସ୍ୱା,
ୱିପୁଲରତିନିୱାସଂ ଲୁମ୍ବିନୀକାନନଂ ତଂ ॥
ୱିପୁଲତରରତିଂ ସା ତମ୍ହି କାତୂନ ରମ୍ମେ,
ଅମରୟୁୱତିଲୀଲାଚାରୁଲୀଲାଭିରାମା ।
ୱିକସିତୱରସାଲସ୍ସୋ’ପଗନ୍ତ୍ୱାନ ମୂଲଂ,
ସୟମ’ତିନମିତେ କଂ ସାଲସାଖଂ ଅଗଣ୍ହି ॥
ତସ୍ମିଂ ଖଣେ କମ୍ମଜମାଲୁତ’ସ୍ସା,
ଚଲିଂସୁ ସାନୀହି ପରିକ୍ଖିପିତ୍ୱା ।
ଦେୱିଂ ଜନୋ ତଂ ଅଭିପାଲୟନ୍ତୋ,
ତମ୍ହା ପଟିକ୍କମ୍ମ ସୁସଣ୍ଠିତା’ଥ ॥
ସଗଚାରୁହେମୱଲୟାଦିୱିଭୂସିତେନ,
ଅଚ୍ଚନ୍ତତମ୍ବନଖରଂସିସମୁଜ୍ଜଲେନ ।
ତୁଲାତିକୋମଲସୁରତ୍ତକରେନ ସାଖଂ,
ଓଲମ୍ବ ତତ୍ଥ ମଜନେସି ଟ୍ଠିତା’ୱ ଧୀରଂ ॥
ସୋୱଣ୍ଣୱଣ୍ଣତନୁୱଣ୍ଣୱିରାଜମାନଂ,
ନେତ୍ତାଭିରାମମତୁଲଂ ଅତୁଲାୟ ଗବ୍ଭା ।
ସମ୍ମା ପସାରିତକରଙ୍ଘୀୟୁଗାଭିରାମଂ,
ପଙ୍କେରୁହା କଣକହଂସମି’ୱୋ’ତରନ୍ତଂ ॥
ବ୍ରହ୍ମା ମନଗ୍ଘରତିୱଡ୍ଢନହେମଜାଲ,
ମା’ଦାୟ ତେନ ଉପଗମ୍ମ ପଟିଗ୍ଗହେତ୍ୱା ।
‘‘ସମ୍ମୋଦ ଦେୱି ଅୟ ମ’ଗ୍ଗତରୋ ସୁତୋ ତେ,
ଜାତୋ’’ତି ତାୟ ପୁରତୋ କଥୟିଂସୁ ଠତ୍ୱା ॥
ଜାୟନ୍ତି ସେସମନୁଜା ମଲମକ୍ଖିତଙ୍ଗା,
ଜାତୋ ପନେ’ସ ପୱରୋ ଦିପଦାନମିନ୍ଦୋ ।
ଅଚ୍ଚନ୍ତ ସଣ୍ହମଲକାସିକୱତ୍ଥକମ୍ହି,
ନିକ୍ଖିତ୍ତନଗ୍ଘତରଚାରୁମଣୀ’ୱ ସୁଦ୍ଧୋ ॥
ଏୱ’ମ୍ପି ସନ୍ତେ ସଭତୋ’ପଗନ୍ତ୍ୱା,
ଦ୍ୱେ ୱାରିଧାରା ସୁଭଗସ୍ସ ଦେହେ ।
ଜନେତ୍ତିଦେହେ’ପି ଉତୁଂ ମନୁଞ୍ଞଂ,
ଗାହାପୟୁଂ ମଙ୍ଗଲକିଚ୍ଚତାୟ ॥
ତେସଂ କରଂ ରତିକରା ଅଜିନପ୍ପୱେଣୀ,
ମା’ଦାୟ ତେନ ଉପଗମ୍ମ ପଟିଗ୍ଗହେସୁଂ ।
ଦେୱା ଦୁକୂଲମୟଚୁମ୍ବଟକେନ ୱୀରଂ,
ତେସଂ କରଂ ନରୱରା ନରସୀହରାଜଂ ॥
ତେସଂ କରା ରତିକରୋ ୱିମଲୋ’ୱ ଚନ୍ଦୋ,
ଚକ୍କଙ୍କିତୋରୁଚରଣେହି ମହୀତଲସ୍ମିଂ ।
ସମ୍ମା ପତିଟ୍ଠିୟ ପୁରତ୍ଥିମକଂ ଦିସଂ ସୋ,
ଓଲୋକୟିତ୍ଥ କମଲାୟତଲୋଚନେହି ॥
ଏକଙ୍ଗନା ନେକସତାନି ଚକ୍କ,
ୱାଳାନ’ହେସୁଂ ସନରାମରା’ଥ ।
ଧୀରଂ ସୁଗନ୍ଧପ୍ପଭୂତୀହି ତେସୁ,
ସମ୍ପୂଜୟନ୍ତା ଇଦମ’ବ୍ରୱିଂସୁ ॥
ନତ୍ଥେ’ତ୍ଥ ତୁମ୍ହେହି ସମୋ ସୁଧୀସ,
ଏକୋ ପୁମା’ପ’ଗ୍ଗତରୋ କୁତୋ’ତି ।
ଏୱଂ ଦିସା ଲୋକିୟ ଲୋକନାଥୋ,
ତପେକ୍ଖମାନୋ ସଦିସ’ମ୍ପି ଏକଂ ॥
ଉତ୍ତରା’ଭିମୁଖୋ ସତ୍ତପଦଂ ଗନ୍ତ୍ୱା କଥେସି’ଦଂ,
‘‘ଅଗ୍ଗୋ’ହମସ୍ମି ଲୋକସ୍ସ ଜେଟ୍ଠୋ ସେଟ୍ଠୋ’’ତିଆଦିକଂ ॥
ଅନଞ୍ଞସାଧାରଣନାଦମୁ’ତ୍ତମଂ,
ସୁରାସୁରବ୍ରହ୍ମନରିନ୍ଦପୂଜିତଂ ।
ନରିନ୍ଦ’ମାଦାୟ ଗତୋ ମହାଜନୋ,
ସୁସଜ୍ଜିତଂ ତଂ କପିଳୱ୍ହୟଂ ପୁରଂ ॥
ଭାରାତିଭାରନଗପାଦପମେରୁରାଜଂ,
ସବ୍ବ’ମ୍ପି ସାଗରଜଲଂ ୱହିତୁଂ ସମତ୍ଥା ।
ଜାତକ୍ଖଣେ,ପି ଗୁଣଭାରମ’ସୟ୍ହମାନା,
ସଙ୍କମ୍ପୟୀ’ୱ ପଥୱୀ ପୱରସ୍ସ ତସ୍ସ ॥
ରମିଂସୁ ସୋଣା ହରିଣେହି ସଦ୍ଧିଂ,
କାକା ଉଲୂକେହି ମୁଦଗ୍ଗୁଦଗ୍ଗା ।
ସୁପଣ୍ଣରାଜୂହି ମହୋରଗା ଚ,
ମଜ୍ଜାରସଙ୍ଘା’ପି ଚ ଉନ୍ଦୁରେହି ॥
ମିଗା ମିଗିନ୍ଦେହି ସମାଗମିଂସୁ,
ପୁତ୍ତେହି ମାତାପିତରୋ ୟଥେ’ୱ ।
ନାୱା ୱିଦେସ’ମ୍ପି ଗତା ସଦେସଂ,
ଗତା’ଚ କଣ୍ଡଂ ସରଭଙ୍ଗସତ୍ଥୁ ॥
ନାନାୱିରାଗୁଜ୍ଜଲପଙ୍କଜେହି,
ୱିଭୂସିତୋ ସନ୍ତତରଙ୍ଗମାଲୋ ।
ମହଣ୍ଣୱୋ ଆସି ତହିଂ ଜଲ’ମ୍ପି,
ଅଚ୍ଚନ୍ତସାତତ୍ତମୁ’ପାଗମାସି ॥
ସୁଫୁଲ୍ଲଓଲମ୍ବକପଙ୍କଜେହି,
ସମାକୁଲତ୍ତଂ ଗଗନଂ ଅଗଞ୍ଛି ।
ଜହିଂସୁ ପକ୍ଖୀ ଗମନଂ ନଭମ୍ହି,
ଠିତା’ଚ ସିନ୍ଧୂ’ପି ଅସନ୍ଦମାନା ॥
ଅକାଲମେଘପ୍ପିୟସଙ୍ଗମେନ,
ମହୀୱଧୂ ସୋମ୍ମତମା ଅହୋସି ।
ମରୂହି ୱସ୍ସାପିତନେକପୁପ୍ଫ,
ୱିଭୂସିତେନା’ତିୱିଭୂସିତାୱ ॥
ସୁଫୁଲ୍ଲମାଲାଭରଣାଭିରାମା,
ଲତଙ୍ଗନା’ଲିଂଗିତପାଦପିନ୍ଦା ।
ସୁଗନ୍ଧକିଞ୍ଜକ୍ଖୱରମ୍ବରେହି,
ଦିସଙ୍ଗନାୟୋ ଅତିସୋଭୟିଂସୁ ॥
ସୁଗନ୍ଧଧୂପେହି ନଭଂ ଅସେସଂ,
ପୱାସିତଂ ରମ୍ମତରଂ ଅହୋସି ।
ସୁରାସୁରିନ୍ଦା ଛନୱେସଧାରୀ,
ସଂଗୀତିୟୁତ୍ତା ୱିଚରିଂସୁ ସବ୍ବେ ॥
ପିୟଂୱଦା ସବ୍ବଜନା ଅହେସୁଂ,
ଦିସା ଅସେସା’ପି ଚ ୱିପ୍ପସନ୍ନା ।
ଗଜା’ତିଗଜ୍ଜିଂସୁ ନଦିଂସୁ ସୀହା,
ହେସାରୱୋ ଚା’ସି ତୁରଙ୍ଗମାନଂ ॥
ସୱେଣୁୱୀଣା ସୁରଦୁନ୍ଦୁଭୀ ନଭେ,
ସକଂ ସକଂ ଚାରୁସରମ୍ପମୋଚୟୁଂ ।
ସପବ୍ବତିନ୍ଦପ୍ପୁଥୁଲୋକଧାତୁୟା,
ଉଳାରଓଭାସୱୟୋ ମନୋରମୋ ॥
ମନୁଞ୍ଞଗନ୍ଧୋ ମୁଦୁସୀତଲାନିଲୋ,
ସୁଖପ୍ପଦଂ ୱାୟି ଅସେସଜନ୍ତୁନୋ ।
ଅନେକରୋଗାଦୁପପୀଳିତଂଗିନୋ,
ତତୋ ପମୁତ୍ତା ସୁଖିନୋ ସିୟୁଂ ଜନା ॥
ୱିଜମ୍ଭମାନାମିତୱାଳୱୀଜନିପ୍ପ,
-ଭାଭିରାମଂ ଭୁୱନଂ ଅହୋସି ।
ମହିଂହି ଭେତ୍ୱା ଚୁ’ଦକାନି ସନ୍ଦୟୁଂ,
ଗମିଂସୁ ବୁଜ୍ଜା ଉଜୁଗତ୍ତତଂ ଜନା ॥
ଅନ୍ଧା ପଙ୍ଗୁଲନଚ୍ଚାନି ଲୀଲୋପେତାନି ପେକ୍ଖୟୁଂ ।
ସୁଣିଂସୁ ବଧିରା ମୂଗ ଗୀତିୟୋ’ପି ମନୋରମା ॥
ସିତଲତ୍ତମୁ’ପାଗଞ୍ଛି ଅୱୀଚଗ୍ଗି’ପି ତାୱଦେ ।
ମୋଦିଂସୁ ଜଲଜା ତସ୍ମିଂ ଜନ୍ତୱୋ ପହସିଂସୁ ଚ ॥
ଖୁପ୍ପିପାସାଭି ଭୂତାନଂ ପେତାନଂ ଆସି ଭୋଜନଂ ।
ଲୋକନ୍ତରେ’ପି ଆଲୋକୋ ଅନ୍ଧକାରନିରନ୍ତରେ ॥
ଅତିରେକତରା ତାରାୱଳିଚନ୍ଦଦିୱାକରା ।
ୱିରୋଚିଂସୁ ନଭେ ଭୂମିଗତାନି ରତନାନି ଚ ॥
ମହୀତଲାଦୟୋ ଭେତ୍ୱା ନିକ୍ଖମ୍ମ ଉପରୂପରି ।
ୱିଚିତ୍ତପଞ୍ଚୱଣ୍ଣା’ସୁଂ ସୁଫୁଲ୍ଲୱିପୁଲମ୍ବୁଜା ॥
ଦୁନ୍ଦୁଭାଦୀ ଚ’ଲଙ୍କାରା ଅୱାଦିତ ଅଘଟ୍ଟିତା ।
ଅଚ୍ଚନ୍ତମଧୁରଂ ନାଦଂ ପମୁଞ୍ଚଂସୁ ମହୀତଲେ ॥
ବଦ୍ଧା ସଙ୍ଖଲିକାଦୀହି ମୁଞ୍ଚିଂସୁ ମନୁଜା ତତୋ ।
ଭୁୱନେ ଭୱନଦ୍ୱାରକୱାଟା ୱିୱଟା ସୟଂ ॥
‘‘ପୁରେ କପିଳୱତ୍ଥୁମ୍ହି ଜାତୋ ସୁଦ୍ଧୋଦନତ୍ରଜୋ ।
ନିସଜ୍ଜ ବୋଧିମଣ୍ଡେ’ତି ଅୟଂ ବୁଦ୍ଧୋ ଭୱିସ୍ସତି ॥’’
ଚେଲୁକ୍ଖେପାଦୟୋ ଚା’ପୀ ପୱତ୍ତେନ୍ତା ପମୋଦିତା ।
କୀଳିଂସୁ ଦେୱସଙ୍ଘା ତେ ତାୱତିଂସାଲୟେ ତଦା ॥
ଇଦ୍ଧିମନ୍ତୋ ମହାପଞ୍ଞୋ କାଲଦେୱଲତାପସୋ ।
ସୁଦ୍ଧୋଦନନରିନ୍ଦସ୍ସ ଧୀମତୋ ସୋ କୁଲୂପଗୋ ॥
ଭୋଜନସ୍ସାୱସାନମ୍ହି ତାୱତିଂସାଲୟଂ ଗତୋ ।
ଗନ୍ତ୍ୱା ଦିୱାୱିହାରାୟ ନିସିନ୍ନୋ ଭୱନେ ତହିଂ ॥
ଛନୱେସଂ ଗହେତ୍ୱାନ କୀଳନ୍ତେ ତେ ଉଦିକ୍ଖିୟ ।
ସନ୍ତୋସକାରଣଂ ପୁଚ୍ଛି ତେସଂ ତେ’ପି ନ’ମବ୍ରୱୁଂ ॥
ସୁତ୍ୱା ତଂ ତତ୍ତତୋ ତମ୍ହା ପୀତିୟୋ’ଦଗ୍ଗମାନସୋ ।
ତାୱଦେୱୋ’ପଗନ୍ତ୍ୱାନ ସୁଦ୍ଧୋଦନନିୱେସନଂ ॥
ପୱିସିତ୍ୱା ସୁପଞ୍ଞତ୍ତେ ନିସିସ୍ସୋ ଆସନେ ଇସି ।
‘‘ଜାତୋ କିର ମହାରାଜ ପୁତ୍ତୋ ତେ ନୁତ୍ତରୋ ସୁଧି ॥
ଦଟ୍ଟ୍ଠୁ’ମିଚ୍ଛାମ’ହଂ ତଂ’’ତି ଆହ ରାଜା ଅଲଙ୍କତଂ ।
ଆନାପେତ୍ୱା କୁମାରଂ ତଂ ୱନ୍ଦାପେତୁ’ମୁପାଗମୀ ॥
କୁମାରଭୂତସ୍ସ’ପି ତାୱଦେୱ ଗୁଣାନୁଭାୱେନ ମନୋରମାନି ।
ପାଦାରୱିନ୍ଦା ପରିୱତ୍ତିୟ’ଗ୍ଗା ପତିଟ୍ଠିତା ମୁଦ୍ଧନି ତାପସସ୍ସ ॥
ତେନତ୍ତଭାୱେନ ନରୁତ୍ତମସ୍ସ,
ନ ୱନ୍ଦିତବ୍ବୋ ତିଭୱେପି କୋଚି ।
ତିଲୋକନାଥସ୍ସ ସଚେ ହି ସୀସଂ,
ତପସ୍ସିନୋ ପାଦତଲେ ଠପେୟ୍ୟଂ ॥
ଫାଲେୟ୍ୟମୁଦ୍ଧା ଖଲୁ ତାପସସ୍ସ ପଗ୍ଗୟ୍ହ ସୋ ଅଞ୍ଜଲିମୁତ୍ତମସ୍ସ ।
ଅଟ୍ଠାସି ଧୀରସ୍ସ ଗୁଣଣ୍ଣୱସ୍ସ ନାସେତୁ’ମତ୍ତାନ’ମୟୁତ୍ତକନ୍ତି ॥
ଦିସ୍ୱାନ ତଂ ଅଚ୍ଛରିୟଂ ନରିନ୍ଦୋ ଦେୱାତିଦେୱସ୍ସ ସକତ୍ରଜସ୍ସ ।
ପାଦାରୱିନ୍ଦାନ’ଭିୱନ୍ଦି ତୁଟ୍ଠୋ ୱିଚିତ୍ତଚକ୍କଙ୍କିତକୋମଲାନି ॥
ୟଦା’ସି ରଞ୍ଞୋ ପୁଥୁୱପ୍ପମଙ୍ଗଲଂ ତଦା ପୁରଂ ଦେୱପୁରଂ’ୱ ସଜ୍ଜିତଂ ।
ୱିଭୂସିତା ତା ଜନତା ମନୋରମା ସମାଗତା ତସ୍ସ ନିକେତମୁତ୍ତମଂ ॥
ୱିଭୂସିତଙ୍ଗୋ ଜନତାହି ତାହି ସୋ ପୁରକ୍ଖତୋ ଭୂସନଭୂସିତତ୍ରଜଂ ।
ତମା’ଦୟିତ୍ୱା’ତୁଲୱପ୍ପମଙ୍ଗଲଂ ସୁରିନ୍ଦଲୀଲାୟ ଗତୋ ନରିସ୍ସରୋ ॥
ନାନାୱିରାଗୁଜ୍ଜଲଚାରୁସାନି ପରିକ୍ଖିତେ କମ୍ହି ଚ ଜମ୍ବୁମୂଲେ ।
ସୟାପୟିତ୍ୱା ବହିମଙ୍ଗଲଂ ତଂ ଉଦିକ୍ଖିତୁଂ ଧାତିଗଣା ଗମିଂସୁ ॥
ସୁୱଣ୍ଣତାରାଦିୱିରାଜମାନ’ୱିତାନଜୋତୁଜ୍ଜଲଜମ୍ବୁମୂଲେ ।
ନିସଜ୍ଜ ଧୀରୋ ସୟନେ ମନୁଞ୍ଞେ’ଝାନଂ ସମାପଜ୍ଜି କତାୱକାସୋ ॥
ସୁୱଣ୍ଣବିମ୍ବଂ ୱିୟ ତଂ ନିସିନ୍ନଂ ଛାୟଞ୍ଚ ତସ୍ସା ଠିତମେ’ୱ ଦିସ୍ୱା ।
ତମବ୍ରୱୀ ଧାତିଜନୋ’ପଗନ୍ତ୍ୱା ‘‘ପୁତ୍ତସ୍ସ ତେ ଅବ୍ଭୁତମୀ’ଦିସନ୍ତି ॥’’
ୱିସୁଦ୍ଧଚନ୍ଦାନନଭାସୁରସ୍ସ ସୁତ୍ୱାନ ତଂ ପଙ୍କଜଲୋଚନସ୍ସ ।
ସୱନ୍ଦନଂ ମେ ଦୁତିୟ’ନ୍ତି ୱତ୍ୱା ପୁତ୍ତସ୍ସ ପାଦେ ସିରସା’ଭିୱନ୍ଦି ॥
ତଦଞ୍ଞାନିପି ଲୋକସ୍ମିଂ ଜାତା’ନେକୱିଧବ୍ଭୁତା ।
ଦସ୍ସିତା ମେ ସମାସେନ ଗନ୍ଥୱିତ୍ଥାରଭୀରୁନା ॥
ୟସ୍ମିଂ ୱିଚିତ୍ତମଣିମଣ୍ଡିତମନ୍ଦିରାନଂ,
ନାନାୱିତାନସୟନାସନମଣ୍ଡିତାନଂ ।
ନିସ୍ସେଣି ସେଣି ପୁଥୁଭୂମିକଭୂସିତାନଂ,
ତିଣ୍ଣଂ ଉତୂନମ’ନୁରୂପମ’ଲଙ୍କତାନଂ ॥
ସିଙ୍ଗେସୁ ରଂସିନିକରା ସୁରମନ୍ଦିରାନଂ,
ସିଙ୍ଗେସୁ ରଂସିମପହାସକରା’ୱ ନିଚ୍ଚଂ ।
ଆଦିଚ୍ଚରଂସି ୱିୟ ପଙ୍କଜକାନନାନି,
ଲୋକାନନମ୍ବୁଜୱନାନି ୱିକାସୟନ୍ତି ॥
ନାନା ମଣିୱିଚିତ୍ତାହି ଭିତ୍ତୀତି ୱନିତା ସଦା ।
ୱିନା’ପି ଦପ୍ପଣଚ୍ଛାୟଂ ପସାଧେନ୍ତି ସକଂ ତନୁଂ ॥
ତେଲାସନଗସଙ୍କାସଂ ୱିଲୋଚନରସାୟନଂ ।
ସୁଧାଲଙ୍କତପାକାରୱଲୟଂ ୟତ୍ଥ ଦିସ୍ସତେ ॥
ଇନ୍ଦନୀଲୋରୁୱଲୟଂ ନାନା ରତନଭୂସିତଂ ।
ଦିସ୍ସତେ’ୱ ସଦା ୟସ୍ମିଂ ପରିଖାନେକପଙ୍କଜା ॥
ପତ୍ୱାନ ୱୁଦ୍ଧିଂ ୱିପୁଲେ ମନୁଞ୍ଞେ,
ଭୁତ୍ୱାନ କାମେ ଚ ତହିଂ ୱସନ୍ତୋ ।
ଗଚ୍ଛଂ ତିଲୋକେକୱିଲୋଚନୋ ସୋ,
ଉୟ୍ୟାନକୀଳାୟ ମହାପଥମ୍ହି ॥
କମେନ ଜିଣ୍ଣଂ ବ୍ୟଧିତଂ ମତଞ୍ଚ,
ଦିସ୍ୱାନ ରୂପଂ ତିଭୱେ ୱିରତ୍ତୋ ।
ମନୋରମଂ ପବ୍ବଜିତଞ୍ଚ ରୂପଂ,
କତ୍ୱା ରତିଂ ତମ୍ହି ଚତୁତ୍ଥୱାରେ ॥
ସୁଫୁଲ୍ଲନାନାତରୁସଣ୍ଡମଣ୍ଡିତଂ ସିଖଣ୍ଡିସଣ୍ଡାଦିଦିଜୂପକୂଜିତଂ ।
ସୁଦସ୍ସନୀୟଂ ୱିୟ ନନ୍ଦନଂ ୱନଂ ମନୋରମୁୟ୍ୟାନମ’ଗା ମହାୟସୋ ॥
ସୁରଙ୍ଗନା ସୁନ୍ଦରସୁନ୍ଦରୀନଂ ମନୋରମେ ୱାଦିତନଚ୍ଚଗୀତେ ସୁରିନ୍ଦଲୀଲାୟ ।
ତହିଂ ନରିନ୍ଦୋ ରମିତ୍ୱ କାମଂ ଦିପଦାନ’ମିନ୍ଦୋ ॥
ଆଭୁଜିତ୍ୱାନ ପଲ୍ଲଙ୍କଂ ନିସିନ୍ନୋ ରୁଚିରାସନେ ।
କାରାପେତୁମ’ଚିନ୍ତେସି ଦେହଭୂସନ’ମତ୍ତନୋ ॥
ତସ୍ସ ଚିତ୍ତଂ ୱିଦିତ୍ୱାନ ୱିସ୍ସକମ୍ମସ୍ସି’ଦଂବ୍ରୱୀ ।
ଅଲଙ୍କରୋହି ସିଦ୍ଧତ୍ଥ’ମିତି ଦେୱାନମିସ୍ସରୋ ॥
ତେନା’ଣତ୍ତୋ’ପଗନ୍ତ୍ୱାନ ୱିସ୍ସକମ୍ମୋ ୟସସ୍ସିନୋ ।
ଦସଦୁସ୍ସସହସ୍ସେହି ସୀସଂ ୱେଠେସି ସୋଭନଂ ॥
ତନୁଂ ମନୁଞ୍ଞମ୍ପି ଅକାସି ସୋଭନଂ,
ଅନଞ୍ଞସାଧାରଣଲକ୍ଖଣୁଜ୍ଜଲଂ ।
ୱିଚିତ୍ତନାନୁତ୍ତମଭୂସନେହି ସୋ,
ସୁଗନ୍ଧିଗନ୍ଧୁପ୍ପଲଚନ୍ଦନାଦିନା ॥
ୱିଭୂସିତୋ ତେନ ୱିଭୂସିତଙ୍ଗିନା,
ତହିଂ ନିସିନ୍ନୋ ୱିମଲେ ସିଲାତଲେ ।
ସୁରଙ୍ଗନାସନ୍ନିଭସୁନ୍ଦରୀହି ସୋ,
ପୁରକ୍ଖତୋ ଦେୱପତୀୱ ସୋଭତି ॥
ସୁଦ୍ଧୋଦନନରିନ୍ଦେନ ପେସିତଂ ସାସନୁତ୍ତମଂ ।
‘‘ପୁତ୍ତୋ ତେ ପୁତ୍ତ ଜାତୋ’’ତି ସୁତ୍ୱାନ ଦୀପଦୁତ୍ତମୋ ॥
‘‘ମମ’ଜ୍ଜ ବନ୍ଧନଂ ଜାତଂ’’ଇତି ୱତ୍ୱାନ ତାୱଦେ ।
ସମିଦ୍ଧଂ ସବ୍ବକାମେହି ଅଗମା ସୁନ୍ଦରଂ ପୁରଂ ॥
ଠିତା ଉପରିପାସାଦେ କିସାଗୋତମି ତଂ ତଦା ।
ରାଜେନ୍ତଂ ସତରଂସି’ଂୱ ରାଜଂ ଦିସ୍ୱା କଥେ ସି’ଦଂ ॥
‘‘ୟେସଂ ସୂନୁ ଅୟଂ ଧୀରୋ ୟା ଚ ଜାୟା ଇମସ୍ସ ତୁ ।
ତେ ସବ୍ବେ ନିବ୍ବୁତା ନୂନ ସଦା’ନୂନଗୁଣସ୍ସ ୱେ’’ ॥
ଇତୀ’ଦିସଂ ଗିରଂ ସୁତ୍ୱା ମନୁଞ୍ଞଂ ତାୟ ଭାସିତଂ ।
ସଞ୍ଜାତପୀତିୟା ପୀନୋ ଗଚ୍ଛମାନୋ ସକାଲୟଂ ॥
ସୀତଲଂ ୱିମଲଂ ହାରିଂ ହାରଂ ତଂ ରତିୱଡ୍ଢନଂ ।
ପେସେତ୍ୱା ସନ୍ତିକଂ ତସ୍ସା ଓମୁଞ୍ଚିତ୍ୱାନ କଣ୍ଠତୋ ॥
ପାସାଦମ’ଭିରୂହିତ୍ୱା ୱେଜୟନ୍ତଂ’ୱ ସୁନ୍ଦରଂୱ ।
ନିପଜ୍ଜି ଦେୱରାଜା’ୱ ସୟନେ ସୋ ମହାରହେ ॥
ସୁନ୍ଦରୀ ତଂ ପୁରକ୍ଖତ୍ୱା ସୁରସୁନ୍ଦରିସନ୍ନିଭା ।
ପୟୋଜୟିଂସୁ ନଚ୍ଚାନି ଗୀତାନି ୱିୱିଧାନି’ପି ॥
ପବ୍ବଜ୍ଜାଭିରତୋ ଧୀରୋ ପଞ୍ଚକାମେ ନିରାଲୟୋ ।
ତାଦିସେ ନଚ୍ଚଗୀତେ’ପି ନ ରମିତ୍ୱା ମନୋରମେ ॥
ନିପନ୍ନୋ ୱିସ୍ସମିତ୍ୱାନ ଈସକଂ ସୟନେ ତହିଂ ।
ପଲ୍ଲଙ୍କମା’ଭୁଜିତ୍ୱାନ ମହାୱୀରୋ ମହୀପତି ॥
ନିସିନ୍ନୋ’ୱ’ନେକପ୍ପକାରଂ ୱିକାରଂ,
ପଦିସ୍ୱାନ ନିଦ୍ଦୁପଗାନଂ ୱଧୂନଂ ।
ଗମିସ୍ସାମି’ଦାନୀ’ତି ଉବ୍ବିଗ୍ଗଚିତ୍ତୋ,
ଭୱେ ଦ୍ୱାରମୂଲଂ’ପଗନ୍ତ୍ୱାନ ରମ୍ମଂ ॥
ଠପେତ୍ୱାନ ସୀସଂ ସୁଭୁମ୍ମାରକସ୍ମିଂ,
ସୁଣିସ୍ସାମି ଧୀରସ୍ସ ସଦ୍ଦନ୍ତି ତସ୍ମିଂ ।
ନିପନ୍ନଂ ସୁଦନ୍ତଂ ପସାଦାୱହନ୍ତଂ,
ସହାୟଂ ଅମଚ୍ଚଂ ମହାପୁଞ୍ଞୱନ୍ତଂ ॥
ଅଚ୍ଛନ୍ନସୱନଂ ଛନ୍ନଂ ଆମନ୍ତେତ୍ୱା କଥେସି’ଦଂ ।
‘‘ଆନେହି ଇତି କପ୍ପେତ୍ୱା କନ୍ଥକଂ ନାମ ସିନ୍ଧୱଂ ॥’’
ସୋ ଛନ୍ନୋ ପତିଗଣ୍ହିତ୍ୱା ତଂ ଗିରଂ ତେନ ଭାସିତଂ ।
ତତୋ ଗନ୍ତ୍ୱାନ କପ୍ପେତ୍ୱା ସୀଘମା’ନେସି ସିନ୍ଧୱଂ ॥
ଅଭିନିକ୍ଖମନଂ ତସ୍ସ ଞତ୍ୱା ୱରତୁରଙ୍ଗମୋ ।
ତେନ ସଜ୍ଜିୟମାନୋ ସୋ ହେସାରୱମୁ’ଦୀରୟି ॥
ପତ୍ଥରିତ୍ୱାନ ଗଚ୍ଛନ୍ତଂ ସଦ୍ଦଂ ତଂ ସକଲଂ ପୁରଂ ।
ସବ୍ବେ ସୁରଗଣା ତସ୍ମିଂ ସୋତୁଂ ନା’ଦଂସୁ କସ୍ସଚି ॥
ଅଥ ସୋ ସଜ୍ଜନାନନ୍ଦୋ ଉତ୍ତମଂ ପୁତ୍ତମ’ତ୍ତନୋ ।
ପସ୍ସିତ୍ୱା ପଠମଂ ଗନ୍ତ୍ୱା ପଚ୍ଛା ବୁଦ୍ଧୋ ଭୱାମ’ହଂ ॥
ଚିନ୍ତୟିତ୍ୱାନ ଏୱ’ମ୍ପି ଗନ୍ତ୍ୱା ଜାୟାନିୱେସନଂ ।
ଠପେତ୍ୱା ପାଦଦୁ’ମ୍ମାରେ ଗୀୱଂ ଅନ୍ତୋ ପୱେସିୟ ॥
କୁସୁମେହି ସମାକିଣ୍ଣେ ଦେୱିନ୍ଦସୟନୂପମେ ।
ନିପନ୍ନଂ ମାତୁୟା ସଦ୍ଧିଂ ସୟନେ ସକମ’ତ୍ରଜଂ ॥
ୱିଲୋକେତ୍ୱାନ ଚିନ୍ତେସି ଇତି ଲୋକେକନାୟକୋ ।
ସଚା’ହଂ ଦେୱିୟା ବାହୁମ’ପନେତ୍ୱା ମମ’ତ୍ରଜଂ ॥
ଗଣ୍ହିସ୍ସାମ’ନ୍ତରାୟ’ମ୍ପି କରେୟ୍ୟ ଗମନସ୍ସ ମେ ।
ପବୁଜ୍ଝିତ୍ୱା ମହନ୍ତେନ ପେମେନେ’ସା ୟସୋଧରା ॥
ବୁଦ୍ଧୋ ହୁତ୍ୱା ପୁନା’ଗମ୍ମ ପସ୍ସିସ୍ସାମୀ’ତି ଅତ୍ରଜଂ ।
ନରାଧିପୋ ତଦା ତମ୍ହା ପାସାଦତଲତୋ’ତରି ॥
ପେସଲାନନକରଙ୍ଘିପଙ୍କଜା ହାସଫେନଭମୁୱୀଚିଭାସୁରା ।
ନେତ୍ତନୀଲକମଲା ୟସୋଧରାକୋମୁଦୀ’ୱ ନୟନାଲିପତ୍ଥିତା ॥
ସମତ୍ଥୋ ଅସ୍ସ କୋ ତସ୍ସା ଜହିତୁଂ ଦେହସମ୍ପଦଂ ।
ୱିନ୍ଦମାନୋ ୱିନା ଧୀରଂ ଠିତଂ ପରମିମୁଦ୍ଧନି ॥
‘‘ଅସ୍ସୋ ସାମି ମୟାନୀତୋ କାଲଂ ଜାନ ରଥେସଭ’’ ।
ଇତି ଅବ୍ରୱି ଛନ୍ନୋ ସୋ ଭୂପାଲସ୍ସ ୟସସ୍ସିନୋ ॥
ମହୀପତି ତଦା ସୁତ୍ୱା ଛନ୍ନେନୋ’ଦୀରିତଂ ଗିରଂ ।
ପାସାଦା ଓତରିତ୍ୱାନ ଗନ୍ତ୍ୱା କନ୍ଥକସନ୍ତିକଂ ॥
ତସ୍ସି’ଦଂ ୱଚନଂ ଭାସି ସବ୍ବସତ୍ତହିତେ ରତୋ ।
‘‘କନ୍ଥକ’ଜ୍ଜେ’କରତ୍ତିଂ ମା ତାରେହି’’ ସନରାମରଂ ॥
ଲୋକମୁ’ତ୍ତାରୟିସ୍ସାମି ବୁଦ୍ଧୋ ହୁତ୍ୱା ଅନୁତ୍ତରୋ ।
ଭୱସାଗରତୋ ଘୋରଜରାଦିମକରାକରା ॥’’
ଇଦଂ ୱତ୍ୱା ତମା’ରୁୟ୍ହ ସିନ୍ଧୱଂ ସଙ୍ଖସନ୍ନିଭଂ ।
ଗାହାପେତ୍ୱାନ ଛନ୍ନେନ ସୁଦଳ୍ହଂ ତସ୍ସ ୱାଲଧିଂ ॥
ପତ୍ୱାନ ସୋ ମହାଦ୍ୱାରସମୀପଂ ସମଚିନ୍ତୟି ।
ଭୱେୟ୍ୟ ୱିୱଟଂ ଦ୍ୱାରଂ ୟେନ କେନଚି ନୋ ସଚେ ॥
ୱାଲଧିଂ ଗହିତେନେୱ ସଦ୍ଧିଂ ଛନ୍ନେନ କନ୍ଥକଂ,
ନିପ୍ପୀଳୟିତ୍ୱା ସତ୍ଥୀହି ଇମମଚ୍ଚୁଗ୍ଗତଂ ସୁଭଂ ।
ଉଲ୍ଲଙ୍ଘିତ୍ୱାନ ପାକାରଂ ଗଚ୍ଛାମୀ’ତି ମହବ୍ବଲୋ ॥
ତଥା ଥାମବଲୂପେତୋ ଛନ୍ନୋ’ପି ତୁରଗୁତ୍ତମୋ ।
ୱିସୁଂ ୱିସୁଂ ୱିଚିନ୍ତେସୁଂ ପାକାରଂ ସମତିକ୍କମଂ ॥
ତସ୍ସ ଚିତ୍ତଂ ୱିଦିତ୍ୱାନ ମୋଦିତା ଗମନେ ସୁଭେ ।
ୱିୱରିଂସୁ ତଦା ଦ୍ୱାରଂ ଦ୍ୱାରେ’ଧିଗ୍ଗହିତା ସୁରା ॥
ତଂ ସିଦ୍ଧତ୍ଥମ’ସିଦ୍ଧତ୍ଥଂ କରିସ୍ସାମୀ’ତି ଚିନ୍ତିୟ ।
ଆଗନ୍ତ୍ୱା ତସ୍ସି’ଦଂ ଭାସି ଅନ୍ତଲିକ୍ଖେ ଟ୍ଠିତନ୍ତିକୋ ॥
‘‘ମା ନିକ୍ଖମି ମହାୱୀର ଇତୋ ତେ ସତ୍ତମେ ଦିନେ ।
ଦିବ୍ବଂ ତୁ ଚକ୍କରତନଂ ଅଦ୍ଧା ପାତୁଭୱିସ୍ସତି ॥’’
ଇଚ୍ଚେୱଂ ୱୁଚ୍ଚମାନୋ ସୋ ଅନ୍ତକେନ ମହାୟସୋ ।
‘‘କୋ’ସି ତ୍ୱମି’ତି’’ତଂ ଭାସି ମାରୋ ଚ’ତ୍ତାନମା’ଦିସି ॥
‘‘ମାରଜାନାମ’ହଂ ମୟ୍ହଂ ଦିବ୍ବଚକ୍କସ୍ସ ସମ୍ଭୱଂ ।
ଗଚ୍ଛ ତ୍ୱମି’ଧ ମା ତିଟ୍ଠ ନ’ମ୍ହି ରଜ୍ଜେନମତ୍ଥିକୋ ॥
ସବ୍ବଂ ଦସସହସ୍ସିମ୍ପି ଲୋକଧାତୁମ’ହଂ ପନ ।
ଉନ୍ନାଦେତ୍ୱା ଭୱିସ୍ସାମି ବୁଦ୍ଧୋ ଲୋକେକନାୟକୋ ॥’’
ଏୱଂ ୱୁତ୍ତେ ମହାସତ୍ତେ ଅତ୍ତନୋ ଗିରମୁ’ତ୍ତରିଂ ।
ଗାହାପେତୁମ’ସକ୍କୋନ୍ତୋ ତତ୍ଥେ’ୱ’ନ୍ତରଧାୟି’ସୋ ॥
ପାପିମସ୍ସ ଇଦଂ ୱତ୍ୱା ଚକ୍କୱତ୍ତିସିରିମ୍ପି ଚ ।
ପହାୟ ଖେପିଣ୍ଡଂ’ୱ ପଚ୍ଚୁସସମୟେ ୱସିଂ ॥
ଗଚ୍ଛନ୍ତମ’ଭିପୂଜେତୁଂ ସମାଗନ୍ତ୍ୱାନ ତାୱଦେ ।
ରତନୁକ୍କାସହସ୍ସାନି ଧାରୟନ୍ତା ମରୂ ତହିଂ ॥
ପଚ୍ଛତୋ ପୁରତୋ ତସ୍ସ ଉଭୋପସ୍ସେସୁ ଗଚ୍ଛରେ ।
ତଥେ’ୱ ଅଭିପୂଜେନ୍ତା ସୁପଣ୍ଣା ଚ ମହୋରଗା ॥
ସୁୱିପୁଲସୁରସେନା ଚାରୁଲୀଲାଭିରାମା,
କୁସୁମସଲିଲଧାରା ୱସ୍ସୟନ୍ତା ନଭମ୍ହା ।
ଇହହି ଦସସହସ୍ସୀ ଚକ୍କୱାଳା ଗତା ତା,
ସୁଖୁମତନୁତମେତୋଦଗ୍ଗୁଦଗ୍ଗା ଚରନ୍ତି ॥
ୟସ୍ମିଂ ସୁଗନ୍ଧୱରପୁପ୍ଫସୁଧୂପ ଚୁଣ୍ଣ,
ହେମଦ୍ଧଜପ୍ପଭୁତିଭାସୁରଚାରୁମଗ୍ଗେ ।
ଗଚ୍ଛଂ ମହାଜୱୱରଙ୍ଗ ତୁରଂଗ ରାଜା,
ଗନ୍ତୁଂ ନ ସକ୍ଖି ଜୱତୋ କୁସୁମାଦିଲଗ୍ଗୋ ॥
ଇତ୍ଥଂ ତମ୍ହି ପଥେ ରମ୍ମେ ୱତ୍ତମାନେ ମହାମହେ ।
ଗଚ୍ଛନ୍ତୋ ରତ୍ତିସେସେନ ତିଂସୟୋଜନମଞ୍ଜସେ ॥
ପତ୍ୱା’ନୋମାନଦୀତୀରଂ ପିଟ୍ଠିତୋ ତୁରଗସ୍ସ ସୋ ।
ଓତରିତ୍ୱାନ ୱିମଲେ ସୀତଲେ ସିକତାତଲେ ॥
ୱିସ୍ସମିତ୍ୱା ଇଦଂ ୱତ୍ୱା ‘‘ଗଚ୍ଛାହୀ’ତି ସକଂ ପୁରଂ ।
ଆଭରଣାନି ଆଦିୟ ଛନ୍ନେ’ମଂ ଗୁରଗମ୍ପି ଚ ॥’’
ଠିତୋ ତସ୍ମିଂ ମହାୱୀରୋ ଅଚ୍ଚନ୍ତ ନିସିତା’ସିନା ।
ସୁଗନ୍ଧୱାସିତଂ ମୋଳିଂ ଛେତ୍ୱା’ନୁକ୍ଖିପି ଅମ୍ବରେ ॥
ଚାରୁହେମସୁମୁଗ୍ଗେନ କେସଧାତୁଂ ନଭୁଗ୍ଗତଂ ।
ପୂଜନତ୍ଥଂ ସହସ୍ସକ୍ଖୋ ସିରସା ସମ୍ପଟିଚ୍ଛିୟ ॥
ୱିଲୋଚନାନନ୍ଦକରିନ୍ଦନୀଲମୟେହି ଚୂଳାମଣି ଚେତିୟଂ ସୋ ।
ପତିଟ୍ଠପେସା’ମଲତାୱତିଂସେ ଉବ୍ବେଧତୋ ୟୋଜନମତ୍ତମଗ୍ଗା ॥
ଉତ୍ତମଟ୍ଠପରିକ୍ଖାରଂ ଧାରେତ୍ୱା ବ୍ରହ୍ମୁନାଭତଂ ।
ଅମ୍ବରେ’ଚ ପୱିଜ୍ଝିତ୍ଥ ୱରଂ ଦୁସ୍ସୟୁଗମ୍ପି ଚ ॥
ତମା’ଦାୟ ମହାବ୍ରହ୍ମା ବ୍ରହ୍ମଲୋକେ ମନୋରମଂ ।
ଦ୍ୱାଦସୟୋଜନୁବ୍ବେଧଂ ଦୁସ୍ସଥୂପଂ ଅକାରୟି ॥
ନାମେନା’ନୁପିୟଂ ନାମ ଗନ୍ତ୍ୱା ଅମ୍ବୱନଂ ତହିଂ ।
ସତ୍ତାହଂ ୱୀତିନାମେତ୍ୱା ପବ୍ବଜ୍ଜାସୁଖତୋ ତତୋ ॥
ଗନ୍ତ୍ୱାନେ’କଦିନେନେ’ୱ ତିଂସୟୋଜନମଞ୍ଜସଂ ।
ପତ୍ୱା ରାଜଗହଂ ଧୀରୋ ପିଣ୍ଡାୟ ଚରି ସୁବ୍ବତୋ ॥
ଇନ୍ଦନୀଲସିଲାୟା’ପି କତା ପାକାରଗୋପୁରା ।
ହେମଚଲା’ୱ ଦିସ୍ସନ୍ତି ତସ୍ସା’ଭାଗି ତହିଂ ତଦା ॥
କୋ’ୟଂ ସକ୍କୋ ନୁଖୋ ବ୍ରହ୍ମା ମାରୋ ନାଗୋ’ତିଆଦିନା ।
ଭିୟ୍ୟୋ କୋତୁହଳପ୍ପତ୍ତୋ ପଦିସ୍ୱା ତଂ ମହାଜନୋ ॥
ପୱିସିତ୍ୱା ଗରହେତୂନ ଭତ୍ତଂ ୟାପନମତ୍ତକଂ ।
ୟୁଗମତ୍ତଂ’ୱ ପେକ୍ଖନ୍ତୋ ଗଚ୍ଛନ୍ତୋ ରାଜୱୀଥିୟଂ ॥
ମଥିତଂ ମେରୁମନ୍ଥେନ ସମୁଦ୍ଦ’ୱ ମହାଜନଂ ।
ତମ୍ହା ସୋ ଆକୁଲୀ କତ୍ୱା ଗନ୍ତ୍ୱା ପଣ୍ଡୱପବ୍ବତଂ ॥
ତତୋ ତସ୍ସେ’ୱ ଛାୟାୟ ଭୂମିଭାଗେ ମନୋରମେ ।
ନିସିନ୍ନୋ ମିସ୍ସକଂ ଭତ୍ତଂ ପରିଭୁଞ୍ଜିତୁମା’ରଭି ॥
ପଚ୍ଚୱେକ୍ଖଣମତ୍ତେନ ଅନ୍ତସପ୍ପଂ ନିୱାରିସ ।
ଦେହୱମ୍ମିକତୋ ଧୀରୋ ନିକ୍ଖମନ୍ତଂ ମହବ୍ବଲୋ ॥
ଭୁତ୍ୱାନ ବିମ୍ବିସାରେନ ନରିନ୍ଦେନ ନରାସଭୋ ।
ନିମନ୍ତିନୋ’ପି ରଜ୍ଜେନ ଉପଗନ୍ତ୍ୱାନ’ନେକଧା ॥
ପଟିକ୍ଖିପିୟ ତଂ ରଜ୍ଜଂ ଅଥ ତେନା’ଭିୟାଚିତୋ ।
ଧମ୍ମଂ ଦେସେହି ମୟ୍ହନ୍ତି ବୁଦ୍ଧୋ ହୁତ୍ୱା ଅନୁତ୍ତରୋ ॥
ଦତ୍ୱା ପଟିଞ୍ଞଂ ମନୁଜାଧିପସ୍ସ ଧୀରୋ’ପଗନ୍ତ୍ୱାନ ପଧାନଭୂମିଂ ।
ଅନଞ୍ଞସାଧାରଣଦୁକ୍କରାନି କତ୍ୱା ତତୋ କିଞ୍ଚି ଅପସ୍ସମାନୋ ॥
ଓଳାରିକନ୍ନପାନାନି ଭୁଞ୍ଜିତ୍ୱା ଦେହସମ୍ପଦଂ ।
ପତ୍ୱା’ଜପାଲନିଗ୍ରୋଧମୂଲଂ ପତ୍ତୋ ସୁରୋ ୱିୟ ॥
ପୁରତ୍ଥା’ଭିମୁଖୋ ହୁତ୍ୱା ନିସିନ୍ନୋ’ସି ଜୁତିନ୍ଧରୋ ।
ଦେହୱଣ୍ଣେହି ନିଗ୍ରୋଧୋ ହେମୱଣ୍ଣୋ’ସି ତସ୍ସ ସୋ ॥
ସମିଦ୍ଧପତ୍ଥନା ଏକା ସୁଜାତା ନାମ ସୁନ୍ଦରୀ ।
ହେମପାତିଂ ସପାୟାସଂ ସୀସେନା’ଦାୟ ଓନତା ॥
ତସ୍ମିଂ ଅଧିଗ୍ଗହୀତସ୍ସ ରୁକ୍ଖଦେୱସ୍ସ ତାୱଦେ ।
ବଲିଂ ଦମ୍ମୀ’ତି ଗନ୍ତ୍ୱାନ ଦିସ୍ୱା ତା ଦୀପଦୁତ୍ତମଂ ॥
ଦୋୱୋ’ତି ସଞ୍ଞାୟ ଉଦଗ୍ଗଚିତ୍ତା ପାୟାସପାତିଂ ପୱରସ୍ସ ଦତ୍ୱା ।
‘‘ଆସିଂସନା ଇଜ୍ଝିୟଥା ହି ମୟ୍ହଂ ତୁୟ୍ହମ୍ପି ସା ସାମି ସମିଜ୍ଝିତୂ’ତି ॥’’
ଇଚ୍ଚେ’ୱଂ ୱଚନଂ ୱତ୍ୱା ଗତା ତମ୍ହା ୱରଙ୍ଗନା ।
ଅଥ ପାୟାସପାତିଂ ତଂ ଗହେତ୍ୱା ମୁନିପୁଙ୍ଗୱୋ ॥
ଗନ୍ତ୍ୱା ନେରଞ୍ଜରାତୀରଂ ଭୂତ୍ୱା ତଂ ୱରଭୋଜନଂ ।
ପଟିସୋତଂ ପୱିସ୍ସଜ୍ଜି ତସ୍ସା ପାତିଂ ମନୋରମଂ ॥
ଜନ୍ତାଲିପାଲିମନନେତ୍ତୱିଲୁମ୍ପମାନଂ,
ସମ୍ଫୁଲ୍ଲସାଲୱନରାଜିୱିରାଜମାନଂ ।
ଦେୱିନ୍ଦନନ୍ଦନୱନଂ’ୱ’ଭିନନ୍ଦନୀୟ,
ମୁ’ୟ୍ୟାନମୁ’ତ୍ତମତରଂ ପୱରୋ’ପଗନ୍ତ୍ୱା ॥
କତ୍ୱା ଦିୱାୱିହାରଂ ସୋ ସାୟଣ୍ହସମୟେ ତହିଂ ।
ଗଚ୍ଛଂ କେସରଲୀଲାୟ ବୋଧିପାଦପସନ୍ତିକଂ ॥
ବ୍ରହ୍ମସୁରାସୁରମହୋରଗପକ୍ଖିରାଜ,
ସଂସଜ୍ଜିତୋରୁୱଟୁମେ ଦିପଦାନମିନ୍ଦୋ ।
ପାୟାସି ସୋତ୍ଥିୟଦ୍ୱିଜୋ ତିଣହାରକୋ ତଂ,
ଦିସ୍ୱାନ ତସ୍ସ ଅଦଦା ତିଣମୁଟ୍ଠିୟୋ ସୋ ॥
ଇନ୍ଦିୱରାରୱିନ୍ଦାଦିକୁସୁମାନ’ମ୍ବରା ତହିଂ ।
ପତନ୍ତୀ ୱୁଟ୍ଠିଧାରା’ୱ ଗଚ୍ଛନ୍ତେ ଦୀପଦୁତ୍ତମେ ॥
ଚାରୁଚନ୍ଦନଚୁଣ୍ଣାଦି’ଧୁପଗନ୍ଧେହି ନେକଧା ।
ଅନୋକାସୋ’ସି ଆକାସୋ ଗଚ୍ଛନ୍ତେ ଦୀପଦୁତ୍ତମେ ॥
ରତନୁଜ୍ଜଲଛତ୍ତେହି ଚାରୁହେମଦ୍ଧଜେହି ଚ ।
ଅନୋକାସୋ’ସି ଆକାସୋ ଗଚ୍ଛନ୍ତେ ଦିପଦୁତ୍ତମେ ॥
ୱେଲୁକ୍ଖେପସହସ୍ସେହି କୀଳନ୍ତେହି ମରୂହି’ପି ।
ଅନୋକାସୋ’ସି ଆକାସୋ ଗଚ୍ଛନ୍ତେ ଦିପଦୁତ୍ତମେ ॥
ସୁରଦୁନ୍ଦୁଭିୱଜ୍ଜାନି କରୋନ୍ତେହି ମରୂହିପି ।
ଅନୋକାସୋ’ସି ଆକାସୋ ଗଚ୍ଛନ୍ତେ ଦିପଦୁତ୍ତମେ ॥
ସୁରଙ୍ଗନାହି ସଙ୍ଗିତିଂ ଗାୟନ୍ତିହି’ପି’ନେକଧା ।
ଅନୋକାସୋ’ସି ଆକାସୋ ଗଚ୍ଛନ୍ତେ ଦିପଦୁତ୍ତମେ ॥
ମନୋରମା କିଣ୍ଣରକିଣ୍ଣରଙ୍ଗନା,
ମନୋରମଙ୍ଗା ଉରଗୋରଗଙ୍କନା ।
ମନୋରମା ତମ୍ହି ଚ ନଚ୍ଚଗୀତିୟୋ,
ମନୋରମା’ନେକୱିଧା ପୱତ୍ତୟୁଂ ॥
ତଦା ମହୋଘେ’ୱ ମହାମଗେହି,
ପୱତ୍ତମାନେ ଇତି ସୋ ମହାୟସୋ ।
ତିଣେ ଗହେତ୍ୱା ତିଭୱେକନାୟକୋ,
ଉପାଗତୋ ବୋଧିଦୁମିନ୍ଦସନ୍ତିକଂ ॥
ୱିଦ୍ଦୁମାସିତସେଲଗ୍ଗରଜତାଚଲସନ୍ନିଭଂ ।
କତ୍ୱା ପଦକ୍ଖିଣଂ ବୋଧିପାଦପଂ ଦିପଦୁତ୍ତମୋ ॥
ପୁରତ୍ଥିମଦିସାଭାଗେ ଅଚଲେ ରଣଧଂସକେ ।
ମହୀତଲେ ଠିତୋ ଧୀରୋ ଚାଲେସି ତିଣମୁଟ୍ଠିୟୋ ॥
ୱିଦ୍ଦସହତ୍ଥମତ୍ତୋ ସୋ ପଲ୍ଲଙ୍କୋ ଆସି ତାୱଦେ ।
ଅଥ ନଂ ଅବ୍ଭୁତଂ ଦିସ୍ୱା ମହାପଞ୍ଞୋ ୱିଚିନ୍ତୟି ॥
‘‘ମଂସଲୋହିତମଟ୍ଠି ଚ ନହାରୂ ଚ ତଚୋ ଚ ମେ ।
କାମଂ ସୁସ୍ସତୁ ନେୱା’ହଂ ଜହାମି ୱୀରିୟଂ’’ଇତି ॥
ଆଭୁଜିତ୍ୱା ମହାୱୀରୋ ପଲ୍ଲଙ୍କମ’ପରାଜିତଂ ।
ପାଚିନାଭିମୁଖୋ ତସ୍ମିଂ ନିସୀଦି ଦୀପଦୁତ୍ତମୋ ॥
ଦେୱଦେୱସ୍ସ ଦେୱିନ୍ଦୋ ସଙ୍ଖମା’ଦାୟ ତାୱଦେ ।
ୱୀସୁତ୍ତରସତୁବ୍ବେଧଂ ଧମୟନ୍ତୋ ତହିଂ ଠିତୋ ॥
ଦୁତିୟଂ ପୁଣ୍ଣଚନ୍ଦଂ’ୱ ସେତଚ୍ଛତ୍ତଂ ତିୟୋଜନଂ ।
ଧାରୟନ୍ତୋ ଠିତୋ ସମ୍ମା ମହାବ୍ରହ୍ମା ସହମ୍ପତି ॥
ଚାରୁଚାମରମା’ଦାୟ ସୁୟାମୋ’ପି ସୁରାଧିପୋ ।
ୱୀଜୟନ୍ତୋ ଠିତୋ ତତ୍ଥ ମନ୍ଦଂ ମନ୍ଦଂ ତିଗାୱୁତଂ ॥
ବେଲୁୱଂ ୱୀଣମା’ଦାୟ ସୁରୋପଞ୍ଚସିଖୱ୍ହୟୋ ।
ନାନାୱିଧଲୟୋପେତଂ ୱାଦୟନ୍ତୋ ତଥା ଠିତୋ ॥
ଥୁତିଗୀତାନି ଗାୟନ୍ତୋ ନାଟକୀହି ପୁରକ୍ଖତୋ ।
ତଥେ’ୱ’ଟ୍ଠାସି ସୋ ନାଗରାଜା କାଲୱ୍ହୟୋ’ପି ଚ ॥
ଗହେତ୍ୱା ହେମମଞ୍ଜୁସା ସୁରପୁପ୍ଫେହି ପୂରିତା ।
ପୂଜୟନ୍ତା’ୱ ଅଟ୍ଠଂସୁ ବତ୍ତିଂସା’ପି କୁମାରିକା ॥
ସେନ୍ଦଦେୱସଙ୍ଘେହି ତେହି ଇତ୍ଥଂ ମହାମହେ ।
ୱତ୍ତମାନେ ତଦା ମାରୋ ପାପିମା ଇତି ଚିନ୍ତୟି ॥
‘‘ଅତିକ୍କମିତୁକାମୋ’ୟଂ କୁମାରୋ ୱିସୟଂ ମମ ।
ସିଦ୍ଧତ୍ଥୋ ଅଥ ସିଦ୍ଧତ୍ଥଂ କରିସ୍ସାମୀ’’ତି ତାୱଦେ ॥
ମାପେତ୍ୱ ଭିଂସନତରୋରୁସହସ୍ସବାହୁଂ,
ସଙ୍ଗୟ୍ହ ତେହି ଜଲିତା ୱିୱିଧାୟୁଧାନି ।
ଆରୁୟ୍ହ ଚାରୁ ଦିରଦଂ ଗିରିମେଖଲାକ୍ଖ୍ୟଂ,
ଚଣ୍ଡଂ ଦିୟଡ୍ଢସତୟୋଜନମାୟତଂ ତଂ ॥
ନାନାନନାୟ’ନଲୱଣ୍ଣସିରୋରୁହାୟ,
ରତ୍ତୋରୁୱଟ୍ଟବହିନିଗ୍ଗତଲୋଚନାୟ ।
ଦଟ୍ଠୋଟ୍ଠଭିଂସନମୁଖାୟୁ’ରଗବ୍ଭୁଜାୟ,
ସେନାୟ ସୋ ପରିୱୁତୋ ୱିୱିଧାୟୁଧାୟ ॥
ତତ୍ଥୋ’ପଗମ୍ମ ଅତିଭୀମରମଂ ରୱନ୍ତୋ,
ସିଦ୍ଧତ୍ଥମେ’ଥ ଇତି ଗଣ୍ହଥ ବନ୍ଧଥେ’ମଂ ।
ଆଣାପୟଂ ସୁରଗଣଂ ସହଦସ୍ସନେନ,
ଚଣ୍ଡାନୀଲୁଗ୍ଗତପିଚୁଂ’ୱ ପଲାପୟିତ୍ଥ ॥
ଗମ୍ଭୀରମେଘରୱସନ୍ତିଭୱଣ୍ଡନାଦଂ,
ୱାତଂଚ ମାପିୟ ତତୋ ସୁଭଗସ୍ସ ତସ୍ସ ।
କଣ୍ଣମ୍ପି ୱୀୱରୱରସ୍ସ ମନୋରମସ୍ସ,
ନୋ ଆସିୟେୱ ଚଲିତୁଂ ପଭୁ ଅନ୍ତକୋଥ ॥
ସଂୱଟ୍ଟୱୁଟ୍ଠିଜୱସନ୍ନିଭଭୀମଘୋର,
ୱସ୍ସଂ ପୱସ୍ସିୟ ତତୋ’ଦକବିନ୍ଦୁକମ୍ପି ।
ନାସକ୍ଖି ନେତୁମ’ତୁଲସ୍ସ ସମୀପକମ୍ପି,
ଦିସ୍ୱା ତମ’ବ୍ଭୁତମ’ଥୋ’ପି ସୁଦୁମ୍ମୁଖୋ ସୋ ॥
ଅଚ୍ଚନ୍ତଭୀମନଳଅଚ୍ଚିସମୁଜ୍ଜଲୋରୁ,
ପାସାନଭସ୍ମକଲଲାୟୁଧୱସ୍ସଧାରା ।
ଅଙ୍ଗାରପଜ୍ଜଲିତୱାଲୁକୱସ୍ସଧାରା,
ୱସ୍ସାପୟିତ୍ଥ ସକଲାନି ଇମାନି ତାନି ॥
ମାରାନୁଭାୱବଲତୋ ନଭତୋ’ପଗନ୍ତ୍ୱା,
ପତ୍ୱାନ ପୁଞ୍ଞସିଖରୁଗ୍ଗତସନ୍ତିକଂ ତୁ ।
ମାଲାଗୁଳପ୍ପଭୂତିଭାୱଗତାନି’ଥାପି,
ଲୋକନ୍ତରେ’ୱ ତିମିରଂ ତିମିରଂ ସୁଘୋରଂ ॥
ମାପେତ୍ୱ ମୋହତିମିରମ୍ପି ହତସ୍ସ ତସ୍ସ,
ଦେହପ୍ପଭାଗି ସତରଂସିସତୋଦିତଂ’ୱ ।
ଜାତଂ ମନୋରମତରଂ ଅତିଦସ୍ସନୀୟ,
ମା’ଲୋକପୁଞ୍ଜମ’ୱଲୋକିୟ ପାପଧମ୍ମୋ ॥
କୋପୋପରତ୍ତୱଦନୋ ଭୁକୁଟିପ୍ପୱାରା,
ଅଚ୍ଚନ୍ତଭିଂସନୱିରୂପକୱେସଧାରୀ ।
ଅଚ୍ଚନ୍ତତିଣ୍ହତରଧାରମସଙ୍ଗମେ’ୱ,
ଚକ୍କାୟୁଧଂ ଚରତରଂ ଅପି ମେରୁରାଜଂ ॥
ସଙ୍ଖଣ୍ଡୟନ୍ତମି’ୱ ଥୂଲକଲୀରକଣ୍ଡଂ,
ୱିସ୍ସଜ୍ଜି ତେନ’ପି ନ କିଞ୍ଚି ଗୁଣାକରସ୍ସ ।
କାତୁଂ ପହୁତ୍ତମୁ’ପଗଞ୍ଛି ତତୋ ତମେ’ତଂ,
ଗନ୍ତ୍ୱା ନଭା କୁସୁମଛତ୍ତତମା’ଗ ସୀସଂ ॥
ୱିସ୍ସଜ୍ଜିତା’ପି ସେନାୟ ସେଲକୂଟାନଲାକୁଲା ।
ପଗନ୍ତ୍ୱା ନଭସା ମାଲାଗୁଲତ୍ତଂ ସମୁପାଗତା ॥
ତମ୍ପି ଦିସ୍ୱା ସସୋକୋ ସୋ ଗନ୍ତ୍ୱା ଧୀରସ୍ସ ସନ୍ତିକଂ ।
ପାପୁଣାତି ମମେୱା’ୟଂ ପଲ୍ଲଙ୍କୋ ଅପରାଜିତୋ ॥
ଇତୋ ଉଟ୍ଠହ ପଲ୍ଲଙ୍କା ଇତି’ଭାସିତ୍ଥ ଧୀମତୋ ।
କତକଲ୍ୟାଣକମ୍ମସ୍ସ ପଲ୍ଲଙ୍କତ୍ଥାୟ ମାର ତେ ॥
କୋ ସକ୍ଖୀ’ତି ପୱୁତ୍ତୋ ସୋ ଇମେ ସବ୍ବେ’ତି ସକ୍ଖିନୋ ।
ସେନାୟା’ଭିମୁଖଂ ହତ୍ଥଂ ପସାରେତ୍ୱାନ ପାପିମା ॥
ଘୋରନାଦେନ’ହଂ ସକ୍ଖି ଅହଂ ସକ୍ଖୀ’ତି ତାୟ’ପି ।
ସକ୍ଖିଭାୱଂ ୱଦାପେତ୍ୱା ତସ୍ସେ’ୱଂ ସମୁଦୀରୟି ॥
କୋ ତେ ସିଦ୍ଧତ୍ଥ ସକ୍ଖୀ’ତି ଅଥ ତେନା’ତୁଲେନ’ପି ।
ମମେ’ତ୍ଥ ସକ୍ଖିନୋ ମାର ନସନ୍ତି’ତି ସଚେତନା ॥
ରତ୍ତମେଘୋପନିକ୍ଖନ୍ତହେମୱିଜ୍ଜୁୱଭାସୁରଂ ।
ନୀହରିତ୍ୱା ସୁରତ୍ତମ୍ଭା ଚୀୱରା ଦକ୍ଖିଣଂ କରଂ ॥
ଭୂମିୟା’ଭିମୁଖଂ କତ୍ୱା କସ୍ମା ପାରମିଭୂମିୟଂ ।
ଉନ୍ନାଦେତ୍ୱା ନି’ଦାନେ’ୱଂ ନିସ୍ସଦ୍ଦାସୀ’ତି ଭୂମିୟା ॥
ମୁଞ୍ଚାପିତେ ରୱେ ନେକସତେ ମେଘରୱେ ୟଥା ।
ବୁଦ୍ଧନାଗବଲା ନାଗଂ ଜାନୂହି ସୁପପତିଟ୍ଠିତଂ ॥
ଦିସ୍ୱାନି’ଦାନି ଗଣ୍ହାତି’ଦାନି ଗଣ୍ହାତି ଚିନ୍ତିୟ ।
ସମ୍ଭିନ୍ନଦାଠସପ୍ପୋ’ୱ ହତଦପ୍ପୋ ସୁଦୁମ୍ମୁଖୋ ॥
ପହାୟା’ୟୁଧୱତ୍ଥାନି’ଲଙ୍କାରାନି ଅନେକଧା ।
ଚକ୍କୱାଳାୱଲା ୟାୱ ସସେନାୟ ପଲାୟି ସୋ ॥
ତଂ ମାରସେନଂ ସଭୟଂ ସସୋକଂ ପଲାୟମାନଂ ଇତି ଦେୱସଙ୍ଘା ।
ଦିସ୍ୱାନ ମାରସ୍ସ ପରାଜୟୋ’ୟଂ ଜୟୋ’ତି ସିଦ୍ଧତ୍ଥ କୁମାରକସ୍ସ ॥
ସମ୍ମୋଦମାନଂ ଅଭିପୂଜୟନ୍ତା ଧୀରଂ ସୁଗନ୍ଧପ୍ପଭୂତିହି ତସ୍ମିଂ ।
ପୁନା’ଗତା ନେକଥୁତୀହି ସମ୍ମା ଉଗ୍ଘୋସମାନା ଛନୱେସଧାରି ॥
ଏୱଂ ମାରବଲଂ ଧୀରୋ ୱିଦ୍ଧଂସେତ୍ୱା ମହବ୍ବଲୋ ।
ଆଦିଚ୍ଚେ ଧରମାନେ’ୱ ନିସିନ୍ନୋ ଅଚଲାସନେ ॥
ୟାମସ୍ମିଂ ପଠମେ ପୁବ୍ବେନିୱାସଂ ଞାଣ’ମୁତ୍ତମୋ ।
ୱିସୋଧେତ୍ୱାନ ୟାମସ୍ମିଂ ମଜ୍ଝିମେ ଦିବ୍ବଲୋଚନଂ ॥
ସୋ ପଟିଚ୍ଚସମୁପ୍ପାଦେ ଅଥ ପଚ୍ଛିମୟାମକେ ।
ଓତାରେତ୍ୱାନ ଞାଣଂସଂ ସମ୍ମସନ୍ନୋ ଅନେକଧା ॥
ଲୋକଧାତୁସତଂ ସମ୍ମା ଉନ୍ନାଦେତ୍ୱା’ରୁଣୋଦୟେ ।
ବୁଦ୍ଧୋ ହୁତ୍ୱାନ ସମ୍ବୁଦ୍ଧୋସମ୍ବୁଦ୍ଧଜଲୋଚନୋ ॥
‘‘ଅନେକଜାତିସଂସାରଂ ସନ୍ଧାୱିସ୍ସ’’ନ୍ତିଆଦିନା ।
ଉଦାନେ’ଦଂ ଉଦାନେସି ପୀତିୱେଗେନ ସାଦିସୋ ॥
ସଲ୍ଲକ୍ଖେତ୍ୱାଗୁଣେ ତସ୍ସ ପଲ୍ଲଙ୍କସ୍ସ ଅନେକଧା ।
ନା ତାୱ’ଉଟ୍ଠହିସ୍ସାମି ଇତୋ ପଲ୍ଲଙ୍କତୋ ଇତି ॥
ସମାପତ୍ତୀ ସମାପଜ୍ଜୀ ଅନେକସତକୋଟିୟୋ ।
ସତ୍ଥା ତତ୍ଥେ’ୱ ସତ୍ତାହଂ ନିସିନ୍ନୋ ଅଚଲାସନେ ॥
ଅଜ୍ଜା’ପି ନୂନ ଧୀରସ୍ସ ସିଦ୍ଧତ୍ଥସ୍ସ ୟସସ୍ସିନୋ ।
ଅତ୍ଥି କତ୍ତବ୍ବକିଚ୍ଚଞ୍ହି ତସ୍ମା ଆସନମାଲୟଂ ॥
ନଜହାସୀ’ତି ଏକଚ୍ଚଦେୱତାନା’ସି ସଂସୟଂ ।
ଞତ୍ୱା ତାସଂ ୱିତକ୍କଂ ତଂ ସମେତୁଂ ସନ୍ତମାନସୋ ॥
ଉଟ୍ଠାୟ ହେମହଂସୋ’ୱ ହେମୱଣ୍ଣୋ ପଭଙ୍କରୋ ।
ଅବ୍ଭୁଗ୍ଗନ୍ତ୍ୱା ନଭଂ ନାଥୋ ଅକାସି ପାଟିହାରିୟଂ ॥
ୱିତକ୍କମେ’ୱଂ ଇମିନା ମରୂନଂ ସମ୍ମୁ’ପସମ୍ମା’ନିମିସେସି ବୋଧିଂ ।
ସମ୍ପୂଜୟନ୍ତୋ ନୟନମ୍ବୁଜେହି ସତ୍ତାହମ’ଟ୍ଠାସି ଜୟାସନଞ୍ଚ ॥
ସୁଭାସୁରସ୍ମିଂ ରତନେହି ତସ୍ମିଂ ସୱଙ୍କମନ୍ତୋ ୱରଚଙ୍କମସ୍ମିଂ ।
ମନୋରମସ୍ମିଂ ରତନାଲୟେହି’ପି ୱିସୁଦ୍ଧଧମ୍ମଂ ୱିଚିନଂ ୱିସୁଦ୍ଧୋ ॥
ମୂଲେଜପାଲତରୁରାଜୱରସ୍ସ ତସ୍ସ,
ମାରଙ୍ଗନାନମ’ମଲାନନପଙ୍କଜାନି ।
ସମ୍ମା ମିଲାପିୟ ତତୋ ମୁଚଲିନ୍ଦମୂଲେ,
ଭୋଗିନ୍ଦଚିତ୍ତକୁମୁଦାନି ପବୋଧୟନ୍ତୋ ॥
ମୂଲେ’ପି ରାଜୟତନସ୍ସ ତସ୍ସ ତସ୍ମିଂ ସମାପତ୍ତିସୁଖମ୍ପି ୱିନ୍ଦଂ ।
ସଂୱୀତିନାମେସି ମନୁଞ୍ଞୱଣ୍ଣୋ ଏକୂନପଞ୍ଞାସଦିନାନି ଧୀମା ॥
ଅନୋତତ୍ତୋଦକଂ ଦନ୍ତକଟ୍ଠନାଗଲତାମୟଂ ।
ହରୀଟକାଗଦଂ ଭୁତ୍ୱା ଦେୱିନ୍ଦେନାଭତୁତ୍ତମଂ ॥
ୱାନିଜେହି ସମାନୀତଂ ସମତ୍ଥମଧୁପିଣ୍ଡିକଂ ।
ମହାରାଜୂପନୀତମ୍ହି ପତ୍ତମ୍ହି ପତିଗଣ୍ହିୟ ॥
ଭୋଜନସ୍ସାୱସାନମ୍ହି ଜପାଲତରୁମୂଲକଂ ।
ଗନ୍ତ୍ୱାଧିଗତଧମ୍ମସ୍ସ ଗମ୍ଭୀରତ୍ତମନୁସ୍ସରି ॥
ମହୀସନ୍ଧାରକୋ ୱାରିକ୍ଖନ୍ଧସନ୍ନିଭକୋ ଅୟଂ ।
ଗମ୍ଭୀରୋଧିଗତୋ ଧମ୍ମୋ ମୟା ସନ୍ତୋ’ତିଆଦିନା ॥
ଧମ୍ମଗମ୍ଭୀରତଂ ଧମ୍ମରାଜସ୍ସ ସରତୋ ସତୋ ।
ଆସେୱଂ ତକ୍କଣଂ ଧମ୍ମଂ ଇମଂ ମେ ପଟିୱିଜ୍ଝିତୁଂ ॥
ୱାୟମନ୍ତୋ ସମ୍ପତ୍ତୟାଚକାନଂ ମନୋରମଂ ।
କନ୍ତେତ୍ୱା ଉତ୍ତମଙ୍ଗଞ୍ଚ ମୋଳିଭୂସନଭୂସିତଂ ॥
ସୁୱଞ୍ଜିତାନି ଅକ୍ଖିନି ଉପ୍ପାଟେତ୍ୱାନ ଲୋହିତଂ ।
ଗଳତୋ ନୀହିରିତ୍ୱାନ ଭରିୟଂ ଲାୱଣ୍ଣଭାସୁରଂ ॥
ଅତ୍ରଜଞ୍ଚ ଦଦନ୍ତେନ କୁଲୱଂସପ୍ପଦୀପକଂ ।
ଦାନଂ ନାମ ନ ଦିନ୍ନଞ୍ଚ ନତ୍ଥି ସୀଲଂ ଅରକ୍ଖିତଂ ॥
ତଥାହି ସଙ୍ଖପାଲାଦିଅତ୍ତଭାୱେସୁ ଜୀୱିତଂ ।
ମୟା ପରିଚ୍ଚଜନ୍ତେନ ସୀଲଭେଦଭୟେନ ଚ ॥
ଖନ୍ତିୱାଦାଦିକେ ନେକଅତ୍ତଭାୱେ ଅପୂରିତା ।
ଛେଜ୍ଜାଦିଂ ପାପୁନତ୍ତେନ ପାରମୀ ନତ୍ଥି କାଚି ମେ ॥
ତସ୍ସ ମେ ୱିଧମନ୍ତସ୍ସ ମାରସେନଂ ୱସୁନ୍ଧରା ।
ନ କମ୍ପିତ୍ଥ ଅୟଂ ପୁବ୍ବେନିୱାସଂ ସରତୋ’ପି ଚ ॥
ୱିସୋଧେନ୍ତସ୍ସ ମେ ୟାମେ ମଜ୍ଝିମେ ଦିବ୍ବଲୋଚନଂ ।
ନ କମ୍ପିତ୍ଥ ପକମ୍ପିତ୍ଥ ପଚ୍ଛିମେ ପନ ୟାମକେ ॥
ପଚ୍ଚୟାକାରଞାଣଂ ମେ ତାୱଦେ ପଟିୱିଜ୍ଝତୋ ।
ସାଧୁକାରଂ ଦଦନ୍ତୀ’ଚ ମୁଞ୍ଚମାନା ମହାରୱଂ ॥
ସମ୍ପୁଣ୍ଣଲାପୂ ୱିୟ କଞ୍ଜିକାହି,
ତକ୍କେହି ପୁଣ୍ଣଂ ୱିୟ ୱାଟିକା’ୱ ।
ସମ୍ମକ୍ଖିତୋ’ୱ’ଞ୍ଜନକେହି ହତ୍ଥୋ,
ୱସାହି ସମ୍ପୀତ ପିଲୋତିକା’ୱ ॥
କିଲେସପୁଞ୍ଜବ୍ଭରିତୋ କିଲିଟ୍ଠୋ,
ରାଗେନ ରତ୍ତୋ ଅପି ଦେସଦୁଟ୍ଠୋ ।
ମୋହେନ ମୂଳ୍ହୋ’ତି ମହବ୍ବଲେନ,
ଲୋକୋ ଅୱିଜ୍ଜାନିକରାକରୋ’ୟଂ ॥
କିନ୍ନାମ ଧମ୍ମଂ ପଟିୱିଜ୍ଝତେ’ତଂ,
ଅତ୍ଥୋ ହି କୋ ତସ୍ସି’ତି ଦେସନାୟ ।
ଏୱଂ ନିରୁସ୍ସାହମ’ଗଞ୍ଛି ନାଥୋ,
ପଜାୟ ଧମ୍ମାମତପାନଦାନେ ॥
ନିଚ୍ଛାରେତ୍ୱା ମହାନାଦଂ ତତୋ ବ୍ରହ୍ମା ସହମ୍ପତୀ ।
ନସ୍ସତି ୱତ ଭୋ ଲୋକୋ ଇତି ଲୋକୋ ୱିନସ୍ସତି ॥
ବ୍ରହ୍ମସଙ୍ଘଂ ସମାଦାୟ ଦେୱସଙ୍ଘଞ୍ଚ ତାୱଦେ ।
ଲୋକଧାତୁସତେ ସତ୍ଥୁ ସମୀପଂ ସମୁପାଗତୋ ॥
ଗନ୍ତ୍ୱା ମହୀତଲେ ଜାନୁଂ ନିହଚ୍ଚ ସିରସଞ୍ଜଲିଂ ।
ପଗ୍ଗୟ୍ହ ‘‘ଭଗୱା ଧମ୍ମଂ ଦେସେତୁ’’ ଇତିଆଦିନା ॥
ୟାଚିତୋ ତେନ ସମ୍ବୁଦ୍ଧରୱିନ୍ଦୱଦନୋ ଜିନୋ ।
ଲୋକଧାତୁସତଂ ବୁଦ୍ଧଚକ୍ଖୁନା’ଲୋକୟଂ ତଦା ॥
ତସ୍ମିଂ ଅପ୍ପରଜକ୍ଖାଦିମଚ୍ଚା ଦିସ୍ୱା’ତି ଏତ୍ତକା ।
ୱିଭଜିତ୍ୱା’ଥ ତେ ସତ୍ତେ ଭବ୍ବାଭବ୍ବୱସେନ ସୋ ॥
ଅଭବ୍ବେ ପରିୱଜ୍ଜେତ୍ୱା ଭବ୍ବେ’ୱା’ଦାୟ ବୁଦ୍ଧିୟା ।
ଉପନେତୁ ଜନୋ’ଦାନି ସଦ୍ଧାଭାଜନମ’ତ୍ତନୋ ॥
ପୂରେସ୍ସାମୀ’ତି ତଂ ତସ୍ସ ସଦ୍ଧମ୍ମାମତଦାନତୋ ।
ୱିସ୍ସଜ୍ଜି ବ୍ରହ୍ମସଙ୍ଘସ୍ସ ୱଚନାମତରଂସିୟୋ ॥
ତତୋଜପାଲୋଦୟପବ୍ବତୋଦିତୋ,
ମହପ୍ପଭୋ ବୁଦ୍ଧଦିୱାକରୋ ନଭେ ।
ମଣିପ୍ପଭାସନ୍ନିଭଭାସୁରପ୍ପଭୋ,
ପମୋଚୟଂ ଭାସୁରବୁଦ୍ଧରଂସିୟୋ ॥
ପମୋଦୟନ୍ତୋ ଉପକାଦୟୋ ତଦା,
କମେନ ଅଟ୍ଠାରସୟୋଜନଞ୍ଜସଂ ।
ଅତିକ୍କମିତ୍ୱାନ ସୁଫୁଲ୍ଲପାଦପେ,
ୱିଜମ୍ଭମାନାଲିଗଣାଭିକୂଜିତଂ ॥
ନିରନ୍ତରଂ ନେକଦିଜୁପକୂଜିତଂ ସୁଫ୍ରଲ୍ଲପଙ୍କେରୁହ ଗନ୍ଧୱାସିତଂ ଗତୋ ।
ୟସସ୍ସୀ ମିଗଦାୟମୁତ୍ତମଂ ତହିଂ ତପସ୍ସୀ ଅଥ ପଞ୍ଚୱଗ୍ଗିୟା ॥
ଦେୱାତିଦେୱଂ ତିଭୱେକନାଥଂ,
ଲୋକନ୍ତଦସ୍ସିଂ ସୁଗତଂ ସୁଗତ୍ତଂ ।
ଦିସ୍ୱାନ ଧୀରଂ ମୁନିସୀହରାଜଂ,
କୁମନ୍ତଣଂ ତେ ଇତି ମନ୍ତୟିଂସୁ ॥
‘‘ଭୁତ୍ୱାନ ଓଳାରିକଅନ୍ନପାନଂ,
ସୁୱଣ୍ଣୱଣ୍ଣୋ ପରିପୁଣ୍ଣକାୟୋ ।
ଏତା’ୱୁସୋ’ୟଂ ସମଣୋ ଇମସ୍ସ,
କରୋମ ନା’ମ୍ହେ ଅଭିୱାଦନାଦିଂ ॥
ଅୟଂ ୱିସାଲନ୍ୱୟତୋ ସସୂତୋ,
ସମ୍ଭାୱନୀୟୋ ଭୁୱି କେତୁଭୂତୋ ।
ପଟିଗ୍ଗହେତୁଂ’ରହତା’ସନଂ ତୁ,
ତସ୍ମା’ସନଂ’ୟେୱି’ତି ପଞ୍ଞପେମ ॥’’
ଞତ୍ୱା’ଥ ଭଗୱା ତେସଂ ୱିତକ୍କଂ ତିକ୍ଖବୁଦ୍ଧିୟା ।
ମେତ୍ତାନିଲକଦମ୍ବେହି ମାନକେତୁଂ ପଧଂସୟୀ ॥
ସମତ୍ଥା ନହି ସଣ୍ଠାତୁଂ ସକାୟ କତିକାୟ ତେ ।
ଅକଂସୁ ଲୋକନାଥସ୍ସ ୱନ୍ଦନାଦୀନି ଧୀମତୋ ॥
ବୁଦ୍ଧଭାୱଂ ଅଜାନନ୍ତା ମୁନୟୋ ମୁନିରାଜିନୋ ।
ଆୱୁସୋ ୱାଦତୋ ତସ୍ସ କେୱଲଂ ସମୁଦୀରୟୁଂ ॥
ଅଥ ଲୋକୱିଦୂ ଲୋକନାଥୋ ତେସମୁ‘‘ଦୀରଥ ।
ଆୱୁସୋୱାଦତୋ ନେୱ ସତ୍ଥୁନୋ’’ ସମୁଦୀରୟି ॥
‘‘ଭିକ୍ଖୱେ ଅରହଂ ସମ୍ମା ସମ୍ବୁଦ୍ଧୋ’ତି ତଥାଗତୋ’’ ।
ବୁଦ୍ଧଭାୱଂ ପକାସେତ୍ୱା ଅତ୍ତନୋ ତେସମୁ’ତ୍ତମୋ ॥
ନିସିନ୍ନୋ ତେହି ପଞ୍ଞତ୍ତେ ଦସ୍ସନେୟ୍ୟୁତ୍ତମାସନେ ।
ବ୍ରହ୍ମନାଦେନ ତେ ଥେରେ ସୀଲଭୂସନଭୂସିତେ ॥
ଆମନ୍ତେତ୍ୱାନ ବ୍ରହ୍ମାନଂ ନେକକୋଟିପୁରକ୍ଖତୋ ।
ଧମ୍ମଚକ୍କଂ ପୱତ୍ତେନ୍ତୋ ଦେସନାରଂସିନା ତଦା ॥
ମୋହନ୍ଧକାରରାସିମ୍ପି ହନ୍ତ୍ୱା ଲୋକେ ମନୋରମଂ ।
ଧମ୍ମାଲୋକଂ ପଦସ୍ସେତ୍ୱା ୱେନେୟ୍ୟମ୍ବୁଜବୁଦ୍ଧିୟା ॥
ମିଗକାନନସଙ୍ଖାତୋ ରଣଭୂମିତଲେ ଇତି ।
ରାଜା ମହାନୁଭାୱୋ’ୱଧମ୍ମରାଜା ୱିସାରଦୋ ॥
ଦେସନାସିଂ ସମାଦାୟ ଧୀଭୁଜେନ ମନୋରମଂ ।
ୱେନେୟ୍ୟଜନବନ୍ଧୁନଂ ମହାନତ୍ଥକରଂ ସଦା ॥
କିଲେସାରୀ ପଦାଳେତ୍ୱା ସଦ୍ଧମ୍ମଜୟଦୁନ୍ଦୁଭିଂ ।
ପହରିତ୍ୱାନ ସଦ୍ଧମ୍ମଜୟକେତୁଂ ସୁଦୁଜ୍ଜୟଂ ॥
ଉସ୍ସାପେତ୍ୱାନ ସଦ୍ଧମ୍ମଜୟତ୍ଥୁଣୁତ୍ତମଂ ସୁଭଂ ।
ପତିଟ୍ଠାପିୟ ଲୋକେକରାଜା ହୁତ୍ୱା ସିୱଙ୍କରୋ ॥
ପମୋଚେତ୍ୱାନ ଜନତଂ ବ୍ରହାସଂସାରବନ୍ଧନା ।
ନିବ୍ବାଣନଗରଂ ନେତୁକାମୋ ଲୋକହିତେ ରତୋ ॥
ସୁୱଣ୍ଣାଚଲକୂଟଂ’ୱ ଜଙ୍ଗମଂ ଚାରୁଦସ୍ସନଂ ।
ପତ୍ୱୋ’ରୁୱେଲଗାମିଂ ତଂ ଅଞ୍ଜସଂ’ୱ ସୁରଞ୍ଜସଂ ॥
ଭଦ୍ଦୱଗ୍ଗିୟଭୂପାଲକୁମାରେ ତିଂସମତ୍ତକେ ।
ମଗ୍ଗତ୍ତୟାମତରସଂ ପାୟେନ୍ୱା ରସମୁ’ତ୍ତମଂ ॥
ପବ୍ବଜ୍ଜମୁ’ତ୍ତମଂ ଦତ୍ୱା ଲୋକସ୍ସ’ତ୍ଥାୟ ଭିକ୍ଖୱୋ ।
ଉୟ୍ୟୋଜେତ୍ୱାନ ସମ୍ବୁଦ୍ଧୋ ଚାରିକଂ ଚରଥା’ତି ତେ ॥
ଗନ୍ତ୍ୱୋ’ରୁୱେଲଂ ଜଟିଲାନମ’ନ୍ତୋ-
ଜଟା ଚ ଛେତ୍ୱାନ ଜଟା ବହିଦ୍ଧା ।
ପାପେତ୍ୱ ଅଗ୍ଗଞ୍ଜସମୁ’ତ୍ତମୋ ତେ,
ପୁରକ୍ଖତୋ ଇନ୍ଦୁ’ୱ ତାରକାଭି ॥
ପୁରକ୍ଖତୋ ତେହି ଅନାସୱେହି,
ଛବ୍ବଣ୍ଣରଂସାଭରନୁତ୍ତମେହି ।
ଦିସଙ୍ଗନାୟୋ ଅତିସୋଭୟନ୍ତୋ,
ପକ୍ଖୀନମକ୍ଖୀନି’ପି ପୀଣୟନ୍ତୋ ॥
ଦିନ୍ନଂ ପଟିଞ୍ଞଂ ସମନୁସ୍ସରନ୍ତୋ,
ତଂ ବିମ୍ବିସାରସ୍ସ ମହାୟସସ୍ସ ।
ମୋଚେତୁକାମୋ ୱରରାଜୱଂସଂ,
ଧଜୂପମାନସ୍ସ ଗୁଣାଲୟସ୍ସ ॥
ସିଖଣ୍ଡିମଣ୍ଡଲାରଦ୍ଧନଚ୍ଚଂ ଲଟ୍ଠିୱନୱ୍ହୟଂ ।
ଉୟ୍ୟାନମ’ଗମା ନେକତରୁସଣ୍ଡାଭିମଣ୍ଡିତଂ ॥
ବିମ୍ବିସାରନରିନ୍ଦୋ ସୋ’ଗତଭାୱଂ ମହେସିନୋ ।
ସୁଣିତ୍ୱା ପୀତିପାମୋଜ୍ଜଭୂସନେନ ୱିଭୂସିତୋ ॥
ତମୁ’ୟ୍ୟାନୁ’ପଗନ୍ତ୍ୱାନ ମହାମଚ୍ଚପୁରକ୍ଖତୋ ।
ସତ୍ଥୁପାଦାରୱିନ୍ଦେହି ସୋଭୟନ୍ତୋ ସିରୋରୁହେ ॥
ନିସିନ୍ନୋ ବିମ୍ବିସାରଂ ତଂ ସଦ୍ଧମ୍ମଅମତମ୍ବୁନା ।
ଦେୱିନ୍ଦଗୀୟମାନଗ୍ଗୱଣ୍ଣୋ ୱଣ୍ଣାଭିରାଜିତୋ ॥
ଦେୱଦାନୱଭୋଗିନ୍ଦପୂଜିତୋ ସୋ ମହାୟସୋ ।
ରମ୍ମଂ ରାଜଗହଂ ଗନ୍ତ୍ୱା ଦେୱିନ୍ଦପୁରସନ୍ନିଭଂ ॥
ନରିନ୍ଦଗେହଂ ଆନୀତୋ ନରିନ୍ଦେନ ସରାସଭୋ ।
ଭୋଜନସ୍ସା’ୱସାନମ୍ହି ଚାଲୟନ୍ତୋ ମହାମହିଂ ॥
ପତିଗଣ୍ହିୟ ସମ୍ଫୁଲ୍ଲତରୁରାଜୱିରାଜିତଂ ।
ରମ୍ମଂ ୱେଲୁୱନାରାମଂ ୱିଲୋଚନ ରସାୟନଂ ॥
ସିତପୁଲିନସମୂହଚ୍ଛନ୍ନଭାଲଙ୍କତସ୍ମିଂ,
ସୁରଭିକୁସୁମଗନ୍ଧାକିଣ୍ଣମନ୍ଦାନିଲସ୍ମିଂ ।
ୱିୱିଧକମଲମାଲାଲଙ୍କତମ୍ବାସୟସ୍ମିଂ,
ୱିପୁଲୱିମଲତସ୍ମିଂ ୱଲ୍ଲିୟାମଣ୍ଡପସ୍ମିଂ ॥
ସୁରନରମହନୀୟୋ ଚାରୁପାଦାରୱିନ୍ଦୋ,
ୱିମଲକମଲନେତ୍ତୋ କୁନ୍ଦଦନ୍ତାଭିରାମୋ ।
ଗୁଣରତନସମୁଦ୍ଦୋ ନାଥନାଥୋ ମୁନିନ୍ଦୋ,
କଣକକିରଣସୋଭୋ ସୋମସୋମ୍ମାନନୋ ସୋ ॥
ୱିମଲପୱରସୀଲକ୍ଖନ୍ଧୱାରଞ୍ଚ କତ୍ୱା,
ରୁଚିରୱରସମାଧୀକୁନ୍ତମୁ‘‘ସ୍ସାପୟିତ୍ୱା ।
ତିଖିଣତରସୁଭଗ୍ଗଂ ବୁଦ୍ଧଞାଣୋରୁକଣ୍ଡଂ,
ୱିହରତି ଭମୟନ୍ତୋ କାମମ’ଗ୍ଗା ୱିହାରା ॥
ତଦା ସୁଦ୍ଧୋଦନୋ ରାଜା‘‘ପୁତ୍ତୋ ସମ୍ବୋଧିମୁତ୍ତମଂ ।
ପତ୍ୱା ପୱତ୍ତସଦ୍ଧମ୍ମଚକ୍କୋ ଲୋକହିତାୟ ମେ ॥
ରାଜଗହଂ’ଚ ନିସ୍ସାୟ ରମ୍ମେ ୱେଲୁୱନେ’ଧୁନା ।
ୱସତୀ‘‘ତି ସୁଣିତ୍ୱାନ ବୁଦ୍ଧଭୂତଂ ସକତ୍ରଜଂ ॥
ଦଟ୍ଠୁକାମୋ ନୱକ୍ଖତ୍ତୁଂ ନୱାମଚ୍ଚେ ମହେସିନୋ ।
ନୱୟୋଧସହସ୍ସେହି ସଦ୍ଧିଂ ପେସେସି ସନ୍ତିକଂ ॥
ଗନ୍ତ୍ୱା ତେ ଧମ୍ମରାଜସ୍ସ ସୁତ୍ୱା’ନୋପମଦେସନଂ ।
ଉତ୍ତମତ୍ଥଂ ଲଭିତ୍ୱାନ ସାସନମ୍ପି ନପେସୟୁଂ ॥
ତେସ୍ୱେ’କମ୍ପି ଅପସ୍ସନ୍ତୋ କାଲୁଦାୟିଂ ସୁଭାରତିଂ ।
ଆମନ୍ତେତ୍ୱା ମହାମଚ୍ଚଂ ପବ୍ବଜ୍ଜାଭିରତଂ ସଦା ॥
‘‘ସୁଗତ୍ତରତନଂ ନେତ୍ୱା ମମ ନେତ୍ତରସାୟନଂ ।
ୟେନ କେନଚୁ’ପାୟେନ କରୋହୀ’’ତି ତମ’ବ୍ରୱୀ ॥
ଅଥ ୟୋଧସହସ୍ସେନ ତମ୍ପି ପେସେସି ସୋ’ପି ଚ ।
ଗନ୍ତ୍ୱା ସପରିସୋ ସତ୍ଥୁ ସୁତ୍ୱା ସୁନ୍ଦରଦେସନଂ ॥
ଅରହତ୍ତଞ୍ଜସଂ ପତ୍ୱା ପବ୍ବଜିତ୍ୱା ନରାସଭଂ ।
ନମସ୍ସନ୍ତୋ ସ ସମ୍ବୁଦ୍ଧଂ ପଗ୍ଗୟ୍ହ ସିରସଞ୍ଜଲିଂ ॥
‘‘ୱସନ୍ତକାଲଜ୍ଜନୀତାତିରତ୍ତୱଣ୍ଣାଭିରାମଙ୍କୁରପଲ୍ଲୱାନି ।
ସୁନୀଲୱଣ୍ଣୁଜ୍ଜଲପତ୍ତୟୁତ୍ତା ସାଖାସହସ୍ସାନି ମନୋରମାନି ॥
ୱିସିଟ୍ଠଗନ୍ଧାକୁଲଫାଲିଫୁଲ୍ଲନାନାୱିଚିତ୍ତାନି ମହୀରୁହାନି ।
ସୁଚିତ୍ତନାନାମିଗପକ୍ଖିସଙ୍ଘସଙ୍ଗୀୟମାନୁତ୍ତମକାନନାନି ॥
ସୁନୀଲସାତୋଦକପୂରିତାନି ସୁନାଦିକାଦମ୍ବକଦମ୍ବକାନି ।
ସୁଗନ୍ଧେନ୍ଦୀୱରକଲ୍ଲହାରା ରୱିନ୍ଦରତ୍ତମ୍ବୁଜଭୂସିତାନି ॥
ତୀରନ୍ତରେ ଜାତଦୁମେସୁ ପୁପ୍ଫକିଞ୍ଜକ୍ଖରାଜୀହି ୱିରାଜିତାନି ।
ମୁତ୍ତାତିସେତାମଲସେକତାନି ରମ୍ମାନି ନେକାନି ଜଲାସୟାନି ॥
ମନୁଞ୍ଞୱେଳୁରିୟକଞ୍ଚୁକାନିୱଗୁଣ୍ଠିତାନି’ଚ ସୁସଦ୍ଦଲେହି ।
ସୁନୀଲଭୂତାନି ମହୀତଲାନି ନଭାନି ମନ୍ଦାନିଲ ସଙ୍କୁଲାନି ॥
ଅନନ୍ତଭୋଗେହି ଜନେହି ଫୀତଂ,
ସୁରାଜଧାନିଂ କପିଳାଭିଧାନିଂ ।
ଗନ୍ତୁଂ ଭଦନ୍ତେ ସମୟୋ’’ତିଆଦିଂ,
ସଂୱଣ୍ଣି ୱଣ୍ଣଂ ଗମନଞ୍ଜସସ୍ସ ॥
ସୁୱଣ୍ଣନଂ ତଂ ସୁଗତୋ ସୁଣିତ୍ୱା,
‘‘ୱଣ୍ଣେସି ୱଣ୍ଣଂ ଗମନସ୍ସୁ’ଦାୟି ।
କିନ୍ନୂ‘‘ତି ଭାସିତ୍ଥ ତତୋ ଉଦାୟି,
କଥେସି’ଦଂ ତସ୍ସ ସିୱଙ୍କରସ୍ସ ॥
‘‘ଭନ୍ତେ ପିତା ଦସ୍ସନମି’ଚ୍ଛତେ ତେ,
ସୁଦ୍ଧୋଦନୋ ରାଜୱରୋ ୟସସ୍ସୀ ।
ତଥାଗତୋ ଲୋକହିତେକନାଥୋ,
କରୋତୁ ସଞ୍ଞାତକସଙ୍ଗହନ୍ତି ॥’’
ସୁଣିତ୍ୱା ମଧୁରଂ ତସ୍ସ ଗିରଂ ଲୋକହିତେ ରତୋ ।
‘‘ସାଧୁ’ଦାୟି କରିସ୍ସାମି ଞାତକାନନ୍ତି ସଙ୍ଗହଂ ॥’’
ଜଙ୍ଗମୋ ହେମମେରୂ’ୱ ରତ୍ତକମ୍ବଲଲଙ୍କତୋ ।
ୱିମଲୋ ପୁଣ୍ଣଚନ୍ଦୋ’ୱ ତାରକାପରିୱାରିତୋ ॥
ସଦ୍ଧିଂ ୱୀସସହସ୍ସେହି ସନ୍ତଚିତ୍ତେହି ତାଦିହି ।
ଗଚ୍ଛନ୍ତୋ ସିରିସମ୍ପନ୍ନୋ ଅଞ୍ଜସେ ସଟ୍ଠିୟୋଜନେ ॥
ଦିନେ ଦିନେ ୱସିତ୍ୱାନ ୟୋଜନେ ୟୋଜନେ ଜିନୋ ।
ଦ୍ୱୀହି ମାସେହି ସମ୍ପତ୍ତୋ ବୁଦ୍ଧୋ ଜାତପୁରଂ ୱରଂ ॥
ବୁଦ୍ଧଂ ୱିସୁଦ୍ଧକମଲାନନସୋଭମାନଂ,
ବାଲଂସୁମାଲିସତଭାନୁସମାନଭାନୁଂ ।
ଚକ୍କଙ୍କିତୋରୁଚରଣଂ ଚରଣାଧିୱାସଂ,
ଲୋକତ୍ତୟେକସରଣଂ ଅରଣଗ୍ଗକାୟଂ ॥
ସମ୍ପୁଣ୍ଣହେମଘଟତୋରଣଧୂମଗନ୍ଧ,
ମାଲେହି ୱେଣୁପଣୱାଦିହି ଦୁନ୍ଦୁଭୀହି ।
ଚିତ୍ତେହି ଛତ୍ତଧଜଚାମରୱୀଜନୀହି,
ସୁଦ୍ଧୋଦନାଦିୱନିପା ଅଭିପୂଜୟିଂସୂ ॥
ସୁସଜ୍ଜିତଂ ପୁରଂ ପତ୍ୱା ମୁନିନ୍ଦୋ ତଂ ମନୋରମଂ ।
ସୁଗନ୍ଧିପୁପ୍ଫକିଞ୍ଜକ୍ଖାଲଙ୍କତୋରୁତଲାକୁଲଂ ॥
ସୁଫୁଲ୍ଲଜଲଜାକିଣ୍ଣ ଅଚ୍ଛୋଦକଜଲାଲୟଂ ।
ମୟୂରମଣ୍ଡଲାରଦ୍ଧ ରଙ୍ଗେହି ଚ ୱିରାଜିତଂ ॥
ଚାରୁଚଙ୍କମପାସାଦ ଲତାମଣ୍ଡପମଣ୍ଡିତଂ ।
ପାୱେକ୍ଖି ପୱରୋ ରମ୍ମଂ ନିଗ୍ରୋଧାରାମମୁତ୍ତମଂ ॥
‘‘ଅମ୍ହାକମେ’ସସିଦ୍ଧତ୍ଥୋ ପୁତ୍ତୋ ନତ୍ତୋ’ତି’’ଆଦିନା ।
ଚିନ୍ତୟିତ୍ୱାନ ସଞ୍ଜାତମାନସତ୍ଥଦ୍ଧସାକିୟା ॥
ଦହରେ ଦହରେ ରାଜ କୁମାରେ ଇଦମ’ବ୍ରୱୁଂ ।
‘‘ତୁମ୍ହେ ୱନ୍ଦଥ ସିଦ୍ଧତ୍ଥଂ ନୱନ୍ଦାମ ମୟନ୍ତି ତଂ ॥’’
ଇଦଂ ୱତ୍ୱା ନିସୀଦିଂସୁ କତ୍ୱା ତେ ପୁରତୋ ତତୋ ।
ଅଦନ୍ତଦମକୋ ଦନ୍ତୋ ତିଲୋକେକୱିଲୋଚନୋ ॥
ତେସଂ ଅଜ୍ଝାସୟଂ ଞତ୍ୱା ‘‘ନ ମଂ ୱନ୍ଦନ୍ତି ଞାତୟୋ ।
ହନ୍ଦ ୱନ୍ଦାପୟିସ୍ସାମି’ଦାନି ନେସନ୍ତି’’ ତାୱଦେ ॥
ଅଭିଞ୍ଞା ପାଦକଜ୍ଝାନଂ ସମାପଜ୍ଜିତ୍ୱା ଝାନତୋ ।
ୱୁଟ୍ଠାୟ ହେମହଂସୋ’ୱ ହେମୱଣ୍ଣୋ ପଭଙ୍କରୋ ॥
ଅବ୍ଭୁଗ୍ଗନ୍ତ୍ୱା ନଭଂ ସବ୍ବସତ୍ତନେତ୍ତରସାୟନଂ ।
ଗଣ୍ଡମ୍ବରୁକ୍ଖମୂଲସ୍ମିଂ ପାଟିହାରିୟସନ୍ନିଭଂ ॥
ଅସାଧାରଣମ’ଞ୍ଞେସଂ ପାଟିହାରିୟମୁ’ତ୍ତମଂ ।
ରମନୀୟତରେ ତସ୍ମିଂ ଅକାସି ମୁନିପୁଙ୍ଗୱୋ ॥
ଦିସ୍ୱା ତମ’ବ୍ଭୁତଂ ରାଜା ସୁଦ୍ଧୋଦନୋନରାସଭୋ ।
ସଞ୍ଜାତପୀତିପାମୋଜ୍ଜୋ ସକ୍ୟୱଂସେକନାୟକୋ ॥
ସତ୍ଥୁପାଦାରୱିନ୍ଦେହି ସକେ ଚାରୁସିରୋରୁହେ ।
ଭୂସିତେ’କାସି ତେ ସବ୍ବେ ସାକିୟ’ ଅକରୁଂ ତଥା ॥
ଧୀରୋ ପୋକ୍ଖରୱସ୍ସସ୍ସ ଅୱସାନେ ମନୋରମଂ ।
ଧମ୍ମୱସ୍ସଂ ପୱସ୍ସେତ୍ୱା ସତ୍ତଚିତ୍ତାୱନୁଗ୍ଗତଂ ॥
ମହାମୋହରଜଂ ହନ୍ତ୍ୱା ସସଙ୍ଘୋ ଦୁତିୟେ ଦିନେ ।
ପୱେକ୍ଖି ସପଦାନେନ ପିଣ୍ଡାୟ ପୁରମୁ’ତ୍ତମଂ ॥
ତସ୍ସ ପାଦାରୱିନ୍ଦାନି’ରୱିନ୍ଦାନି ଅନେକଧା ।
ଉଗ୍ଗନ୍ତ୍ୱା ପତିଗଣ୍ହିଂସୁ ଅକ୍କନ୍ତକ୍କନ୍ତଠାନତୋ ॥
ଦେହଜୋତିକଦମ୍ବେହି ଗୋପୁରଟ୍ଟାଲମନ୍ଦିରା ।
ପିଞ୍ଜରତ୍ତଂ ଗତା ତସ୍ମିଂ ପାକାରପ୍ପଭୂତି ତଦା ॥
ଚରନ୍ତଂ ପୱିସିତ୍ୱାନ ପିଣ୍ଡାୟ ପୁରୱୀଥିୟଂ ।
ଲୋକାଲୋକକରଂ ୱୀରଂ ସନ୍ତଂ ଦନ୍ତଂ ପଭଙ୍କରଂ ॥
ପସାଦଜନକେ ରମ୍ମେ ପାସାଦେ ସା ୟସୋଧରା ।
ସୀହପଞ୍ଜରତୋ ଦିସ୍ୱା ଠିତା ପେମପରାୟଣା ॥
ଭୂସନେ ମଣିରଂସୀହି ଭାସୁରଂ ରାହୁଲଂ ୱରଂ ।
ଆମନ୍ତେତ୍ୱା ପଦସ୍ସେତ୍ୱା ‘‘ତୁୟ୍ହମେ’ସୋ ପିତା’’ତି ତଂ ॥
ନିକେତମୁ’ପସଙ୍କମ୍ମ ସୁଦ୍ଧୋଦନୟସସ୍ସିନୋ ।
ୱନ୍ଦିତ୍ୱା ତମ’ନେକାହି ଇତ୍ଥୀହି ପରିୱାରିତା ॥
‘‘ଦେୱ ଦେୱିନ୍ଦଲୀଲାୟ ପୁତ୍ତୋ ତେ’ଧ ପୁରେ ପୁରେ ।
ଚରିତ୍ୱା ଚରତେ’ଦାନି ପିଣ୍ଡାୟା’ତି ଘରେ ଘରେ’’ ॥
ପୱେଦେସି ପୱେଦେତ୍ୱା’ଗମା ମନ୍ଦିରମ’ତ୍ତନୋ ।
ଆନନ୍ଦଜଲସନ୍ଦୋହ ପୂରିତୋ’ରୁଚିଲୋଚନା ॥
ତତୋ ସେସନରିନ୍ଦାନଂ ଇନ୍ଦୋ ଇନ୍ଦୋୱ ଲଙ୍କତୋ ।
କମ୍ପମାନୋ ପଗନ୍ତ୍ୱାନ ୱେଗେନ ଜିନସନ୍ତିକଂ ॥
‘‘ସକ୍ୟପୁଙ୍ଗୱ ତେ ନେ’ସ ୱଂସୋ ମା ଚର ମା ଚର ।
ୱଂସେ ପୁତ୍ତେ’କରାଜା’ପି ନ ପିଣ୍ଡାୟ ଚରୀ ପୁରେ ॥’’
ଇତି ୱୁତ୍ତେ ନରିନ୍ଦେନ ମୁନିନ୍ଦୋ ଗୁଣସେଖରୋ ।
‘‘ତୁୟ୍ହମେ’ସୋ ମହାରାଜ ୱଂସୋ ମୟ୍ହଂ ପନ’ନ୍ୱୟୋ ॥
ବୁଦ୍ଧୱଂସୋ’’ତି ସମ୍ବୁଦ୍ଧୱଂସଂ ତସ୍ସ ପକାସୟୀ ।
ଅଥୋ ତସ୍ମିଂ ଠିତୋୟେୱ ଦେସେନ୍ତୋ ଧମ୍ମମୁ’ତ୍ତରିଂ ॥
‘‘ଉତ୍ତିଟ୍ଠେ ନପ୍ପମଜ୍ଜେୟ୍ୟ ଧମ୍ମମି’’ଚ୍ଚାଦିମୁ’ତ୍ତମଂ ।
ଗାଥଂ ମନୋରମଂ ୱତ୍ୱା ସୋତୂନଂ ସିୱମା’ୱହଂ ॥
ଦସ୍ସନଗ୍ଗରସଂ ଦତ୍ୱା ସନ୍ତପ୍ପେତ୍ୱା ତମୁ’ତ୍ତମୋ ।
ତେନା’ଭିୟାଚିତୋ ତସ୍ସ ନିକେତଂ ସମୁପାଗତୋ ॥
ସଦ୍ଧିଂ ୱିସସହସ୍ସେହି ତାଦୀହି ଦିପଦୁତ୍ତମଂ ।
ମଧୁରୋଦନପାନେନ ସନ୍ତପ୍ପେତ୍ୱା ମହୀପତି ॥
ଚୁଳାମଣୀମରୀଚୀହି ପିଞ୍ଜରଞ୍ଜଲିକେହି ତଂ ।
ରାଜୁହି ସହ ୱନ୍ଦିତ୍ୱା ନିସୀଦି ଜିନସନ୍ତିକେ ॥
ତା’ପି ନେକସତା ଗନ୍ତ୍ୱା ସୁନ୍ଦରା ରାଜସୁନ୍ଦରୀ ।
ନରିନ୍ଦେନ ଅନୁଞ୍ଞାତା ନିସିଦିଂସୁ ତହିଂ ତଦା ॥
ଦେସେତ୍ୱା ମଧୁରଂ ଧମ୍ମଂ ତିଲୋକତିଲକୋ ଜିନୋ ।
ଅହମ୍ପ’ଜ୍ଜ ନ ଗଚ୍ଛେୟ୍ୟଂ ସୱେ ବିମ୍ବାୟ ମନ୍ଦିରଂ ॥
ଦୟାୟ ହଦୟଂ ତସ୍ସା ଫାଲେୟ୍ୟା’ତି ଦୟାଲୟୋ ।
ସାୱକଗ୍ଗୟୁଗଂ ଗୟ୍ହ ମନ୍ଦିରଂ ପିତରା ଗତୋ ॥
ନିସୀଦି ପୱିସିତ୍ୱାନ ବୁଦ୍ଧୋ ବୁଦ୍ଧାସନେ ତହିଂ ।
ଛବ୍ବଣ୍ଣରଂସିଜାଲେହି ଭାସୁରନ୍ତୋ’ୱ ଭାନୁମା ॥
ମନୋସିଲାଚୁଣ୍ଣସମାନଦେହମରୀୱିଜାଲେହି ୱିରାଜମାନା ।
ପକମ୍ପିତା ହେମଲତା’ୱ ବିମ୍ବା ବିମ୍ବଧରା ସତ୍ଥୁ ସମୀପ’ମାଗ ॥
ସତ୍ଥୁ ପାଦେସୁ ସମ୍ଫସ୍ସସୀତଲୁତ୍ତମୱାରିନା ।
ନିବ୍ବାପେସି ମହାସୋକପାୱକଂ ହଦୟିନ୍ଧନେ ॥
ରାଜା ସତ୍ଥୁ ପୱେଦେସି ବିମ୍ବାୟା’ତି ବହୁଂ ଗୁଣଂ ।
ମୁନିନ୍ଦୋ’ପି ପକାସେସି ଚନ୍ଦକିଣ୍ଣରଜାତକଂ ॥
ତଦା ନନ୍ଦକୁମାରସ୍ସ ସମ୍ପତ୍ତେ ମଙ୍ଗଲତ୍ତୟେ ।
ୱିୱାହୋ ଅଭିସେକୋ ଚ ଇତି ଗେହପ୍ପୱେସନଂ ॥
ମଙ୍ଗଲାନଂ ପୁରେୟେୱ ପବ୍ବାଜେସି ପଭଙ୍କରୋ ।
ଅନିଚ୍ଛନ୍ତଂ’ୱ ନେତ୍ୱା ତଂ ଆରାମଂ ରମ୍ମମୁତ୍ତମଂ ॥
ଅତ୍ତାନମ’ନୁଗଚ୍ଛନ୍ତଂ ଦାୟଜ୍ଜତ୍ଥଂ ସକତ୍ରଜଂ ।
କୁମାରଂ ରାହୁଲଂ ଚା’ପି କୁମାରାଭରଣୁଜ୍ଜଲଂ ॥
‘‘ସୁଖା’ୱ ଛାୟା ତେ ମେ’’ତି ଉଗ୍ଗିରନ୍ତଂ ଗିରଂ ପିୟଂ ।
‘‘ଦାୟଜ୍ଜଂ ମେ ଦଦାହୀ’ତି ଦାୟଜ୍ଜଂ ମେ ଦଦାହି ଚ’’ ॥
ଆରାମମେୱ ନେତ୍ୱାନ ପବ୍ବାଜେସି ନିରୁତ୍ତରଂ ।
ସଦ୍ଧମ୍ମରତନଂ ଦତ୍ୱା ଦାୟଜ୍ଜଂ ତସ୍ସ ଧୀମତୋ ॥
ନିକ୍ଖମ୍ମ ତମ୍ହା ସୁଗତଂସୁମାଲି ତହିଂ ଜନ୍ତୁସରୋରୁହାନି ।
ସଦ୍ଧମ୍ମରଂସୀହି ୱିକାସୟନ୍ତୋ ଉପାଗତୋ ରାଜଗହଂ ପୁନା’ପି ॥
କୁସୁମାକୁଲ ସୁନ୍ଦରତରୁପୱନେ ପଦୁମୁପ୍ପଲ ଭାସୁରସରନିକରେ ।
ପୁଥୁଚଙ୍କମମଣ୍ଡିତସିତସିକତେ ସୁଭସୀତୱନେ ୱିହରତି ସୁଗତୋ ॥
ତଦା ସୁଦତ୍ତୱ୍ହୟସେଟ୍ଠିସେଟ୍ଠୋ,
ବହୂହି ଭଣ୍ଡଂ ସକଟେହି ଗୟ୍ହ ।
ସାୱତ୍ଥିତୋ ରାଜଗହେ ମନୁଞ୍ଞେ,
ସହାୟସେଟ୍ଠିସ୍ସ ଘରୂ’ପଗନ୍ତ୍ୱା ॥
ତେନେ’ୱ ୱୁତ୍ତୋ ସୁଭଗେନ ବୁଦ୍ଧୋ,
ଜାତୋ’ତି ଲୋକେ ଦିପଦାନମିନ୍ଦୋ ।
ସଞ୍ଜାତପୀତୀହି ଉଦଗ୍ଗଚିତ୍ତୋ,
ରତ୍ତିଂ ପଭାତଂ ଇତି ମଞ୍ଞମାନୋ ॥
ନିକ୍ଖମ୍ମ ତମ୍ହା ୱିଗତନ୍ଧକାରେ,
ଦେୱାନୁଭାୱେନ ମହାପଥମ୍ହି ।
ଗନ୍ତ୍ୱାନ ତଂ ସୀତୱନଂ ସୁରମ୍ମଂ,
ସମ୍ପୁଣ୍ଣ ଚନ୍ଦଂ’ୱ ୱିରାଜମାନଂ ॥
ତଂ ଦୀପରୁକ୍ଖଂ ୱିୟ ପଜ୍ଜଲନ୍ତଂ,
ୱିଲୋଚନାନନ୍ଦକରଂ ମହେସିଂ ।
ଦିସ୍ୱାନ ତସ୍ସୁ’ତ୍ତମପାଦରାଗଂ,
ପଟିଗ୍ଗହେତ୍ୱା ସିରସା ସୁଧୀମା ॥
ଗମ୍ଭୀରଂ ନିପୁଣଂ ଧମ୍ମଂ ସୁଣିତ୍ୱା ୱିମଲଂ ୱରଂ ।
ସୋତାପତ୍ତିଫଲ’ମ୍ପତ୍ୱା ସହସ୍ସନୟ ମଣ୍ଡିତଂ ॥
ନିମନ୍ତେତ୍ୱାନ ସମ୍ବୁଦ୍ଧଂ ସସଙ୍ଘଂ ଲୋକନାୟକଂ ।
ୱଣ୍ଣଗନ୍ଧରସୂପେତଂ ଦତ୍ୱା ଦାନଂ ସୁଖାୱହଂ ॥
ସତ୍ଥୁ ଆଗମନତ୍ଥାୟ ସାୱତ୍ଥିନଗରଂ ୱରଂ ।
ପଟିଞ୍ଞଂ ସୋ ଗହେତ୍ୱାନ ଗଚ୍ଛନ୍ତୋ ଅନ୍ତରାପଥେ ॥
ୟୋଜନେ ୟୋଜନେ ୱାରୁ ଚିତ୍ତକମ୍ମସମୁଜ୍ଜଲେ ।
ୱିହାରେ ପୱରେ ଦତ୍ୱା କାରାପେତ୍ୱା ବହୁଂ ଧନଂ ॥
ସାୱତ୍ଥିଂ ପୁନ’ରାଗନ୍ତ୍ୱା ପାସାଦସତମଣ୍ଡିତଂ ।
ତୋରଣଙ୍ଘିକପାକାରଗୋପୁରାଦିୱିରାଜିତଂ ॥
ପୁରଂ ଅପହସନ୍ତଂ’ୱ ଦେୱିନ୍ଦସ୍ସା’ପି ସବ୍ବଦା ।
ସବ୍ବସମ୍ପତ୍ତିସମ୍ପନ୍ନଂ ନଚ୍ଚଗୀତାଦିସୋଭିତଂ ॥
କସ୍ମିଂ ସୋ ୱିହରେୟ୍ୟା’ତି ଭଗୱା ଲୋକନାୟକୋ ।
ସମନ୍ତାନୁୱିଲୋକେନ୍ତୋ ୱିହାରାରହଭୂମିକଂ ॥
ଜେତରାଜକୁମାରସ୍ସ ଉୟ୍ୟାନଂ ନନ୍ଦନୋପମଂ ।
ଛାୟୂଦକାଦିସମ୍ପନ୍ନଂ ଭୂମିଭାଗଂ ଉଦିକ୍ଖିୟ ॥
ହିରଞ୍ଞକୋଟିସନ୍ଥାରୱସେନେ’ୱ ମହାୟସୋ ।
କିଣିତ୍ୱା ପୱରେ ତମ୍ହି ନରାମରମନୋହରେ ॥
ନିଚ୍ଚଂ କିଙ୍କିଣିଜାଲନାଦରୁଚିରଂ ସିଙ୍ଗୀୱ ସିଙ୍ଗାକୁଲଂ,
ରମ୍ମଂନେକମଣୀହି ଛନ୍ନଛଦନଂ ଆମୁତ୍ତମୁତ୍ତାୱଲିଂ ।
ନାନାରାଗୱିତାନ ଭାସୁରତରଂ ପୁପ୍ଫାଦିନା’ଲଙ୍କତ,
ଚିତ୍ରଂ ଗନ୍ଧକୁଟିଂ ୱରଂ ସୁୱିପୁଲଂ କାରେସି ଭୂସେଖରଂ ॥
ଜିନତ୍ରଜାନମ୍ପି ୱିସାଲମାଲୟଂ,
ୱିତାନନାନାସୟନାସନୁଜ୍ଜଲଂ ।
ସୁମଣ୍ଡିତଂ ମଣ୍ଡପୱଙ୍କମାଦିନା,
ୱିଲୁମ୍ପମାନଂ ମନଲୋଚନଂ ସଦା ॥
ଅଥାପି ସଣ୍ହାମଲସେତୱାଲୁକଂ,
ସୱେଦିକାଚାରୁୱିସାଲମାଲକଂ ।
ଜଲାସୟଂ ସାତ’ତିସୀତଲୋଦକଂ,
ସୁଗନ୍ଧିସୋଗନ୍ଧିକପଙ୍କଜାକୁଲଂ ॥
ସୁଫୁଲ୍ଲସାଲାସନସୋଗନାଗ,
ପୁନ୍ନାଗପୂଗାଦିୱିରାଜମାନଂ ।
ମନୋରମଂ ଜେତୱନାଭିଧାନଂ,
କାରାପୟୀ ସେଟ୍ଠି ୱିହାରସେଟ୍ଠଂ ॥
ୱିସାଲକେଲାସଧରାଧରୁତ୍ତମା-
ଭିରାମପାକାରଫନିନ୍ଦଗୋପିତୋ ।
ଜନସ୍ସ ସବ୍ବାଭିମନତ୍ଥସାଧକୋ,
ୱିହାରଚିନ୍ତାମଣି ସୋ ୱିରାଜିତେ ॥
ତତୋ ଆଗମନତ୍ଥାୟ ମୁନିନ୍ଦଂ ନାଥପିଣ୍ଡିକୋ ।
ଦୂତଂ ପାହେସି ସୋ ସତ୍ଥା ସୁତ୍ୱା ଦୂତସ୍ସ ସାସନଂ ॥
ମହତା ଭିକ୍ଖୁସଙ୍ଘେନ ତଦା ତମ୍ହା ପୁରକ୍ଖତୋ ।
ନିକ୍ଖମିତ୍ୱା’ନୁପୁବ୍ବେନ ପତ୍ତୋ ସାୱତ୍ଥିମୁତ୍ତମଂ ॥
ସମୁଜ୍ଜଲାନି ନେକାନି ଧଜାନାଦାୟ ସୁନ୍ଦରା ।
କୁମାରା ପୁରତୋ ସତ୍ଥୁ ନିକ୍ଖମିଂସୁ ସୁରା ୟଥା ॥
ନିକ୍ଖମିଂସୁ ତତୋ ତେସଂ ପଚ୍ଛତୋ ତରୁଣଙ୍ଗନା ।
ଚାରୁପୁଣ୍ଣଘଟାଦାୟ ଦେୱକଞ୍ଞା ୟଥା ତଥା ॥
ପୁଣ୍ଣପାତିଂ ଗହେତ୍ୱାନ ସେଟ୍ଠିନୋ ଭରିୟା ତଥା ।
ସଦ୍ଧିଂ ନେକସତିତ୍ଥିହି ନେକାଲଙ୍କାରଲଙ୍କତା ॥
ମହାସେଟ୍ଠି ମହାସେଟ୍ଠିସତେହି ସହ ନାୟକଂ ।
ଅବ୍ଭୁଗ୍ଗଞ୍ଛି ମହାୱୀରଂ ପୂଜିତୋ ତେହି ନେକଧା ॥
ଛବ୍ବଣ୍ଣରଂସୀହି ମନୋରମେହି,
ପୁରଂ ୱରଂ ପିଞ୍ଜରୱଣ୍ଣଭାୱଂ ।
ନେନ୍ତୋ ମୁନିନ୍ଦୋ ସୁଗତୋ ସୁଗତ୍ତୋ,
ଉପାୱିସୀ ଜେତୱନଂ ୱିହାରଂ ॥
ଚାତୁଦ୍ଦିସସ୍ସ ସଙ୍ଘସ୍ସ ସମ୍ବୁଦ୍ଧପମୁଖସ୍ସ’ହଂ ।
ଇମଂ ଦମ୍ମି ୱିହାରନ୍ତି ସତ୍ଥୁ ଚାରୁକରମ୍ବୁଜେ ॥
ସୁଗନ୍ଧୱାସିତଂ ୱାରିଂ ହେମଭିଙ୍କାରତୋ ୱରଂ ।
ଆକିରିତ୍ୱା ଅଦା ରମ୍ମଂ ୱିହାରଂ ଚାରୁଦସ୍ସନଂ ॥
ସୁରମ୍ମଂ ୱିହାରଂ ପଟିଗ୍ଗୟହ ସେଟ୍ଠଂ,
ଅନଗ୍ଘେ ୱିଚିତ୍ତାସନସ୍ମିଂ ନିସିନ୍ନୋ ।
ଜନିନ୍ଦାନମିନ୍ଦୋ ତିଲୋକେକନେତ୍ତୋ,
ତିଲୋକପ୍ପସାଦାୱହଂ ତଂ ମନୁଞ୍ଞଂ ॥
ଉଦାରାନିସଂସଂ ୱିହାରପ୍ପଦାନେ,
ଅନାଥପ୍ପଦାନେନ ନାଥସ୍ସ ତସ୍ସ ।
ସୁଦତ୍ତାଭିଧାନସ୍ସ ସେଟ୍ଠିସ୍ସ ସତ୍ଥା,
ୟସସ୍ସୀ ହିତେସୀ ମହେସୀ ଅଦେସୀ ॥
ଉଦାରାନିସଂସଂ ୱିହାରପ୍ପଦାନେ,
କଥେତୁଂ ସମତ୍ଥୋ ୱିନା ଭୂରିପଞ୍ଞଂ ।
ତିଲୋକେକନାଥଂ ନରୋ କୋସି ୟୁତ୍ତୋ,
ମୁଖାନଂ ସହସ୍ସେହି ନେକେହି ଚା’ପି ॥
ଇତି ୱିପୁଲୟସୋ ସୋ ତସ୍ସ ଧମ୍ମଂ କଥେତ୍ୱା,
ଅପି ସକଲଜନାନଂ ମାନସେ ତୋସୟନ୍ତୋ ।
ପରମମଧୁରନାଦଂ ଧମ୍ମଭେରିଂ ମହନ୍ତଂ,
ୱିହରତି ପହରନ୍ତୋ ତତ୍ଥ ତତ୍ଥୂପଗନ୍ତ୍ୱା ॥
ଏୱଂ ତିଲୋକହିତଦେନ ମହାଦୟେନ,
ଲୋକୁତ୍ତମେନ ପରିଭୁତ୍ତପଦେସପନ୍ତିଂ ।
ନିଚ୍ଚଂସୁରାସୁରମହୋରଗରକ୍ଖସାଦି,
ସମ୍ପୂଜିତଂ ଅହମି’ଦାନି ନିଦସ୍ସସିସ୍ସଂ ॥
ସଦ୍ଧମ୍ମରଂସିନିକରେହି ଜିନଂସୁମାଲି,
ୱେନେୟ୍ୟପଙ୍କଜୱନାନି ୱିକାସୟନ୍ତୋ ।
ୱାସଂ ଅକାସି ପୱରୋ ପଠମମ୍ହି ୱସ୍ସେ,
ବାରାଣସିମ୍ହି ନଗରେ ମିଗକାନନମ୍ହି ॥
ନାନାପ୍ପକାରରତନାପଣପନ୍ତିୱୀଥି,
ରମ୍ମେ ପୁରେ ପୱରରାଜଗହାଭିଧାନେ ।
ୱାସଂ ଅକାସି ଦୁତିୟେ ତତିୟେ ଚତୁତ୍ଥେ,
ୱସ୍ସେପି କନ୍ତତରୱେଲୁୱନେୱ ନାଥୋ ॥
ଭୂପାଲମୋଳିମଣିରଂସିୱିରାଜମାନଂ,
ୱେସାଲିନାମୱିଦିତଂ ନଗରଂ ସୁରମ୍ମଂ ।
ନିସ୍ସାୟ ସକ୍ୟମୁନିକେସରି ପଞ୍ଚମମ୍ହୀ,
ୱସ୍ସମ୍ହି ୱାସମକରିତ୍ଥ ମହାୱନସ୍ମିଂ ॥
ଫୁଲ୍ଲାତିନୀଲୱିମଲୁପ୍ପଲଚାରୁନେତ୍ତୋ,
ସିଂଗୀସମାନତନୁଜୋତିହି ଜୋତମାନୋ ।
ବୁଦ୍ଧୋ ଅନନ୍ତଗୁଣସନ୍ନିଧି ଛଟ୍ଠୱସ୍ସେ,
ୱାସଂ ଅକା ୱିପୁଲମଙ୍କୁଲ ପବ୍ବତସ୍ମିଂ ॥
ଗମ୍ଭୀରଦୁଦ୍ଦସତରଂ ମଧୁରଂ ମରୂନଂ,
ଦେସେତ୍ୱ ଧମ୍ମମତୁଲୋ ସିରିସନ୍ନିୱାସୋ ।
ଦେୱିନ୍ଦସୀତଲୱିସାଲସିଲାସନସ୍ମିଂ,
ୱସ୍ସମ୍ହି ୱାସମ’କରୀ ମୁନି ସତ୍ତମମ୍ହି ॥
ଫୁଲ୍ଲାରୱିନ୍ଦଚରଣୋ ଚରଣାଧିୱାସୋ,
ସୋ ସୁଂସୁମାରଗିରିନାମଧରାଧରମ୍ହି ।
ୱାସଂ ଅକା ପରମମାରଜି ଅଟ୍ଠମସ୍ମିଂ,
ୱସ୍ସମ୍ହି କନ୍ତରଭେସକଲାୱନମ୍ହି ॥
ନାନାମତାତିବହୁତିତ୍ଥିୟସପ୍ପଦପ୍ପଂ,
ହନ୍ତ୍ୱା ତିଲୋକତିଲକୋ ନୱମମ୍ହି ୱସ୍ସେ ।
ୱାସଂ ଅକାସି ରୁଚିରେ ଅତିଦସ୍ସନୀୟେ,
କୋସମ୍ବିସିମ୍ବଲିୱନେ ଜିନପକ୍ଖିରାଜା ॥
ତେସଂ ମହନ୍ତକଲହଂ ସମିତୁଂ ୟତୀନଂ,
ନିସ୍ସାୟ ୱାରଣୱରଂ ଦସମମ୍ହି ୱସ୍ସେ ।
ପୁପ୍ଫାଭିକିଣ୍ଣୱିପୁଲାମଲକାନନସ୍ମିଂ,
ୱାସଂ ଅକା ମୁନିୱରୋ ୱରପାରଲେୟ୍ୟୋ ॥
ଧମ୍ମାମତେନ ଜନତଂ ଅଜରାମରତ୍ତଂ,
ନେନ୍ତୋ ୱିଲୋଚନମନୋହରସୁଦ୍ଧଦନ୍ତୋ ।
ନାଲାଭିଧାନଦିଜଗାମୱରେ ମୁନିନ୍ଦୋ,
ୱାସଂ ଅକା ଅମିତବୁଦ୍ଧି ଦସେକୱସ୍ସେ ॥
ୱେରଞ୍ଜ ଚାରୁଦିଜଗାମସମୀପଭୂତେ,
ଆରାମକେ ସୁରଭିପୁପ୍ଫଫଲାଭିରାମେ ।
ସବ୍ବଞ୍ଞୁ ସକ୍ୟମୁନି ବାରସମମ୍ହି ୱସ୍ସେ,
ୱାସଂ ଅକାସି ପୁଚିମନ୍ଦଦୁମିନ୍ଦମୂଲେ ॥
ଫୁଲ୍ଲାରୱିନ୍ଦୱଦନୋ ରଚିଚାରୁସୋଭୋ,
ଲୋକସ୍ସ ଅତ୍ଥଚରିୟାୟ ଦୟାଧିୱାସୋ ।
ୱାସଂ ଅକା ରୁଚିରଚାଲିୟପବ୍ବତସ୍ମିଂ,
ୱୀରୋ ତିଲୋକଗରୁ ତେରସମମ୍ହି ୱସ୍ସେ ॥
ବନ୍ଧୂକପୁପ୍ଫସମପାଦକରାଭିରାମୋ,
ଧମ୍ମିସ୍ସରୋ ପୱରଜେତୱନେ ସୁରମ୍ମେ ।
ଧୀରୋ ମହିଦ୍ଧି ମୁନି ଚୁଦ୍ଦସମମ୍ହି ୱସ୍ସେ,
ୱାସଂ ଅକା ସକଲସତ୍ତହିତେସୁ ୟୁତ୍ତୋ ॥
ୱେନେୟ୍ୟବନ୍ଧୁୱନରାଗଗଜେ ୱିହନ୍ତ୍ୱା,
ୱସ୍ସମ୍ହି ପଞ୍ଚଦସମେ ମୁନିସୀହରାଜା ।
ୱାସଂ ଅକା କପିଲୱତ୍ଥୁଧରାଧରୋରୁ,
ନିଗ୍ରୋଧରାମରମଣୀୟମଣିଗ୍ଗୁହାୟଂ ॥
ୟକ୍ଖମ୍ପି କକ୍ଖଲତରଂ ସୁୱିନୀତଭାୱଂ,
ନେତ୍ୱା ପୁରେ ୱରତମାଲୱକାଭିଧାନେ ।
ୱସ୍ମମ୍ହି ୱାସମକରୀ ଦସଛଟ୍ଠମମ୍ହି,
ନେନ୍ତୋ ଜନଂ ବହୁତରମ୍ପି ଚ ସନ୍ତିମଗ୍ଗଂ ॥
ପାକାରଗୋପୁରନିକେତନତୋରଣାଦି,
ନେତ୍ତାଭିରାମୱରରାଜଗହେ ମହେସି ।
ୱାସଂ ଅକାନଧିୱରୋ ଦସସତ୍ତମମ୍ହି,
ୱସ୍ସମ୍ହି ପତ୍ଥୟସୋ ଭୁୱନତ୍ତୟସ୍ମିଂ ॥
ଧମ୍ମୋସଧେନ ମଧୁରେନ ସୁଖାୱହେନ,
ଲୋକସ୍ସ ଘୋରତରରାଗରଜଂ ୱିହନ୍ତ୍ୱା ।
ୱସ୍ସମ୍ହି ୱାସମକରୀ ଦସଅଟ୍ଠମସ୍ମିଂ,
ଅଙ୍ଗୀରସୋ ପୱରଚାଲିୟପବ୍ବତସ୍ମିଂ ॥
ୱେନୟ୍ୟବନ୍ଧୁଜନମୋହରିପୁଂ ଉଳାରଂ,
ହନ୍ତ୍ୱାନ ଧମ୍ମଅସିନା ୱରଧମ୍ମରାଜା ।
ଏକୂନୱୀସତିମକେ ପୁନ ତତ୍ଥ ୱସ୍ସେ,
ୱାସଂ ଅକା ମଧୁରଭାରତି ଲୋକନାଥୋ ॥
ସୁଦ୍ଧାସୟୋ ପୱରରାଜଗହେ ୱିଚିତ୍ତେ,
ୱାସଂ ଅକାସି ସମୱୀସତିମମ୍ହି ୱସ୍ସେ ।
ଲୋକସ୍ସ ଅତ୍ଥଚରଣେ ସୁଭକପ୍ପରୁକ୍ଖୋ,
ଚିନ୍ତାମଣିପ୍ପୱରଭଦ୍ଦଘଟୋ ମୁନିନ୍ଦୋ ॥
ଏୱଂ ତିଲୋକମହିତୋ ଅନିବଦ୍ଧୱାସଂ,
କତ୍ୱା ଚରମ୍ପଠମବୋଧିୟୁଦାରପଞ୍ଞୋ ।
ଛବ୍ବଣ୍ଣରଂସିସମୁପେତୱିଚିତ୍ତଦେହୋ,
ଲୋକେକବନ୍ଧୁ ଭଗୱା ଅୱସେସକାଲେ ॥
ସାୱତ୍ଥିୟଂ ପୱରଜେତୱନେ ଚ ରମ୍ମେ,
ଦିବ୍ବାଲୟେ ଚ ସମଲଙ୍କତପୁବ୍ବରାମେ ।
ୱାସଂ ଅକାସି ମୁନି ୱୀସତିପଞ୍ଚୱସ୍ସେ,
ଲୋକାଭିୱୁଦ୍ଧିନିରତୋ ସୁଖସନ୍ନିୱାସୋ ॥
ଇତି ଅମିତଦୟୋ ୟୋ ପଞ୍ଚତାଳୀସୱସ୍ସେ,
ମନୁଜମନୱନସ୍ମିଂ ଜାତରାଗଗ୍ଗିରାସିଂ ।
ପରମମଧୁରଧମ୍ମମ୍ବୁହି ନିବ୍ବାପୟନ୍ତୋ,
ଅୱସି ସମୁନିମେଘୋ ଲୋକସନ୍ତିଂ କରୋତୁ !
ପଞ୍ଞାୱରଙ୍ଗନା ମୟ୍ହଂ ସଞ୍ଜାତା ମନମନ୍ଦିରେ ।
ତୋସୟନ୍ତୀ ସବ୍ବଜନଂ ୱୁଦ୍ଧିଂ ଗଚ୍ଛତୁ ସବ୍ବଦା ॥
ଚିତଂ ୟଂ ରଚୟନ୍ତେନ ଜିନସ୍ସ ଚରିତଂ ମୟା ।
ପୁଞ୍ଞଂ ତସ୍ସାନୁଭାୱେନ ସମ୍ପତ୍ତୋ ତୁସିତାଲୟଂ ॥
ମେତ୍ତେୟ୍ୟଲୋକନାଥସ୍ସ ସୁଣନ୍ତୋ ଧମ୍ମଦେସନଂ ।
ତେନ ସଦ୍ଧିଂ ଚିରଂ କାଲଂ ୱିନ୍ଦନ୍ତୋ ମହତିଂ ସିରିଂ ॥
ବୁଦ୍ଧେ ଜାତେ ମହାସତ୍ତୋରମ୍ମେ କେତୁମନୀପୁରେ ।
ରାଜୱଂସେ ଜନୀତ୍ୱାନ ତିହେତୁପଟିସନ୍ଧିକୋ ॥
ଚିୱରଂ ପିଣ୍ଡପାତଞ୍ଚ ଅନଗ୍ଘଂ ୱିପୁଲଂ ୱରଂ ।
ସେନାସନଞ୍ଚ ଭେସଜ୍ଜଂ ଦତ୍ୱା ତସ୍ସ ମହେସିନୋ ॥
ସାସନେ ପବ୍ବଜିତ୍ୱାନ ଜୋତେନ୍ତୋ ତମନୁତ୍ତରଂ ।
ଇଦ୍ଧିମା ସତିମା ସମ୍ମା ଧାରେନ୍ତୋ ପିଟକତ୍ତୟଂ ॥
ୱ୍ୟାକତୋ ତେନ ବୁଦ୍ଧୋ ୟଂ ହେସ୍ସତୀତି ଅନାଗତେ ।
ଉପ୍ପନ୍ନୁପ୍ପନ୍ନବୁଦ୍ଧାନଂ ଦାନଂ ଦତ୍ୱା ସୁଖାୱହଂ ॥
ସଂସାରେ ସଂସରନ୍ତୋ ହି କପ୍ପରୁକ୍ଖୋ ଚ ପାଣିନଂ ।
ଇଚ୍ଛିତିଚ୍ଛିତମନ୍ନାଦିଂ ଦଦନ୍ତୋ ମଧୁରଂ ଚରଂ ॥
ମଂସଲୋହିତନେତ୍ତାଦିଂ ଦଦଂ ଚିତ୍ତସମାହିତୋ ।
ସୀଲନେକ୍ଖମ୍ମପଞ୍ଞାଦିଂ ପୂରେନ୍ତୋ ସବ୍ବପାରମିଂ ॥
ପାରମିସିଖରଂ ପତ୍ୱା ବୁଦ୍ଧୋ ହୁତ୍ୱା ଅନୁତ୍ତରୋ ।
ଦେସେତ୍ୱା ମଧୁରଂ ଧମ୍ମଂ ଜନ୍ତୂନଂ ସିୱମାୱହଂ ॥
ସବ୍ବଂ ସଦେୱକଂ ଲୋକଂ ବ୍ରହାସଂସାରବନ୍ଧନା ।
ମୋଚୟିତ୍ୱା ୱରଂ ଖେମଂ ପାପୁଣ୍ୟେଂ ସିୱଂ ପୁରଂ ॥
ଲଙ୍କାଲଙ୍କାର ଭୂତେନ ଭୂପାଲନ୍ୱୟକେତୁନା ।
ୱିଜୟବାହୁନା ରଞ୍ଞା ସକନାମେନ କାରିତେ ॥
ସତୋୟାସୟପାକାର ଗୋପୁରାଦିୱିରାଜିତେ ।
ପରିୱେଣୱରେ ରମ୍ମେ ୱସତା ସନ୍ତୱୁତ୍ତିନା ॥
ମେଧଙ୍କରାଭିଧାନେନ ଦୟାୱାସେନ ଧୀମତା ।
ଥେରେନ ରଚିତଂ ଏତଂ ସବ୍ଭ ସଂସେୱିତଂ ସଦା ॥
ଭୱେ ଭୱେ’ଧ ଗାଥାନଂ ତେସତ୍ତତି ଚତୁସ୍ସତଂ ।
ଗନ୍ଥତୋ ପଞ୍ଚପଞ୍ଞାସା-ଧିକଂ ପଞ୍ଚସତଂ ଇତି ॥