ଦାଠାୱଂସୋ
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ୱିସାରଦଂ ୱାଦପଥାତି ୱତ୍ତିନଂ,
ତିଲୋକପଜ୍ଜୋତମସୟ୍ହସାହିନଂ ।
ଅସେସ ଞେୟ୍ୟାୱରଣପ୍ପହାୟିନଂ,
ନମାମି ସତ୍ଥାରମନନ୍ତଗୋଚରଂ ॥
ତିଲୋକ ନାଥପ୍ପଭୱଂ ଭୟାପହଂ,
ୱିସୁଦ୍ଧୱିଜ୍ଜାଚରଣେହି ସେୱିତଂ ।
ପପଞ୍ଚ ସଂୟୋଜନବନ୍ଧନଚ୍ଛିଦଂ,
ନମାମି ଧମ୍ମଂ ନିପୁଣଂ ସୁଦୁଦ୍ଦସଂ ॥
ପସାଦମତ୍ତେନ’ପି ୟତ୍ଥ ପାଣିନୋ,
ଫୂସନ୍ତି ଦୁକ୍ଖକ୍ଖୟମଚ୍ଚୁତଂ ପଦଂ ।
ତମାହୁଣେୟ୍ୟଂ ସୁସମାହିତିନ୍ଦ୍ରିୟଂ,
ନମାମି ସଙ୍ଘଂ ମୁନିରାଜସାୱକଂ ॥
ୱିଭୁସୟଂ କାଳକନାଗରନ୍ୱ ୟଂ,
ପରକ୍କମୋ କାରୁଣିକୋ ଚମୂପତି ।
ଗୱେସମାନୋ ଜିନସାସନସ୍ସ ୟୋ,
ୱିରୂଳ୍ହିମତ୍ଥଞ୍ଚ ଜନସ୍ସ ପତ୍ଥୟଂ ॥
ସୁଧାମୟୂଖାମଲ ପଣ୍ଡୁୱଂସଜଂ,
ୱିରୂଳ୍ହସଦ୍ଧଂ ମୁନିରାଜସାସନେ ।
ପିୟଂ ୱଦଂ ନୀତିପଥାନୁୱତ୍ତିନିଂ,
ସଦା ପଜାନଂ ଜନିକଂ’ୱ ମାତରଂ ॥
ପିୟଂ ପରକ୍କନ୍ତିଭୁଜସ୍ସ ରାଜିନୋ,
ମହେସି ମଚ୍ଚୁନ୍ନତଖୁଦ୍ଧିସମ୍ପଦଂ ।
ୱିଧାୟ ଲୀଲାୱତିମିଚ୍ଛିତତ୍ଥଦଂ,
ଅସେସ ଲଙ୍କାତଲରଜ୍ଜଲକ୍ଖିୟଂ ॥
କୁମାରମାରାଧିତସାଧୁମନ୍ତିନଂ,
ମହାଦୟଂ ପଣ୍ଡୁନରିନ୍ଦ ୱଂସଜଂ ।
ୱିଧାୟ ସଦ୍ଧଂ ମଧୁରିନ୍ଦନାମକଂ,
ସୁସିକ୍ଖୀତଂ ପାୱଚନେ କଲାସୁ ଚ ॥
ନରିନ୍ଦସୁଞ୍ଞଂ ସୁଚିରଂ ତିସୀହଳଂ,
ଇତିପ୍ପତୀତଂ ଅୟସଂ ଅପାନୁଦି ।
ଚିରଂ ପଣୀତେନ ଚ ଚିୱରାଦିନା,
ସୁସଞ୍ଞତେ ସଂୟମିନୋ ଅତପ୍ପୟି ॥
ଚିରଟ୍ଠିତିଂ ପାୱଚନସ୍ସ ଇଚ୍ଛତା,
କତଞ୍ଞୁନା ୱିକ୍କମ ବୁଦ୍ଦିସାଲିନା ।
ସତୀମତା ଚନ୍ଦିମ ବନ୍ଧୁକିତ୍ତିନା,
ସଗାରୱଂ ତେନ’ଭୀୟାଚିତୋ ଅହଂ ॥
ସଦେସ ଭାସାୟ କୱୀହି ସୀହଳେ,
କତମ୍ପି ୱଂସଂ ଜିନଦନ୍ତଧାତୁୟା ।
ନିରୁତ୍ତିୟା ମାଗଧିକାୟ ୱୁଦ୍ଧିୟା,
କରୋମି ଦୀପନ୍ତରୱାସିନଂ ଅପି ॥
ଜୀନୋ’ୟମିଦ୍ଧେ ଅମରୱ୍ହୟେ ପୁରେ,
କଦାଚି ହୁତ୍ୱାନ ସୁମେଧନାମକୋ ।
ସୱେଦୱେଦଙ୍ଗୱିଭାଗକୋୱିଦୋ,
ମହଦ୍ଧନେ ୱିପ୍ପକୁଲମ୍ହି ମାଣୱୋ ॥
ଅହଞ୍ହି ଜାତିବ୍ୟସନେନ ପୀଳିତୋ,
ଜରାଭିଭୁତୋ ମରଣେନ ଓତ୍ଥଟୋ ।
ସିୱଂ ପଦଂ ଜାତିଜରାଦିନିସ୍ସଟଂ,
ଗୱେସୟିସ୍ସଂ’ତି ରହୋ ୱିଚିନ୍ତିୟ ॥
ଅନେକସଙ୍ଖଂ ଧନଧଞ୍ଞସମ୍ପଦଂ,
ପତିଟ୍ଠପେତ୍ୱା କପଣେସି ଦୁଚ୍ଚଜଂ ।
ଅନପ୍ପକେ ପେମଭରାନୁବନ୍ଧିନୋ,
ୱିହାୟ ମିତ୍ତେ ଚ ସୁତେଚ ବନ୍ଧୱେ ॥
ପହାୟ କାମେ ନିଖିଲେ ମନୋରମେ,
ଘରାଭିନିକ୍ଖମ୍ମ ହିମାଚଲନ୍ତିକେ ।
ମହୀଧରଂ ଧମ୍ମିକନାମ ୱିସ୍ସୁତଂ,
ଉପେଚ୍ଚ ନାନାତରୁରାଜିଭୁସିତଂ ॥
ମନୋନୁକୂଲେ ସୁରରାଜନିମ୍ମୀତେ,
ଅସମ୍ମିଗାନଂ ଅଗତିମ୍ହି ଅସ୍ସମେ ।
ନିୱତ୍ତଚୀରୋ ଅଜିନକ୍ଖିପଂ ୱହଂ,
ଜଟାଧରୋ ତାପସ ୱେସମଗ୍ଗହୀ ॥
ସୁସଞ୍ଞତତ୍ତୋପରିୱାରି ତିନ୍ଦ୍ରିୟୋ,
ଫଲାଫଲାଦୀହି ପୱତ୍ତୟଂ ତନୁଂ ।
ଗତୋ ଅଭିଞ୍ଗ୍ଞାସୁ ଚ ପାରମିଂ ୱସୀ,
ତହିଂ ସମାପତ୍ତି ସୁଖଂ ଅୱିନ୍ଦି ସୋ ॥
ସୁସଜ୍ଜିତେ ରମ୍ମପୁରାଧିୱାସିନା,
ମହାଜନେନ’ତ୍ତମନେନ ଅଞ୍ଜସେ ।
ପଥପ୍ପଦେସେ ଅଭିୟନ୍ତମତ୍ତନୋ,
ଅନିଟ୍ଠିତେୟେୱ ସୁମେଧ ତାପସୋ ॥
ଅଗାଧଞେୟ୍ୟୋଦଧୀପାରଦସ୍ସିନଂ,
ଭୱନ୍ତଗୁଂ ନିବ୍ବନଥଂ ୱିନାୟକଂ ।
ଅନେକଖୀଣାସୱଲକ୍ଖସେୱିତଂ,
କଦା ଚି ଦୀପଙ୍କରବୁଦ୍ଧମଦ୍ଦସ ॥
ତତୋ ସସଙ୍ଘସ୍ସ ତିଲୋକଭତ୍ତୁନୋ,
ପରିଚ୍ଚଜିତ୍ୱାନ ତନୁମ୍ପି ଜୀୱିତଂ ।
ପସାରୟିତ୍ୱାନ ଜଟାଜିନାଦିକଂ,
ୱିଧାୟ ସେତୁଂ ତନୁମେୱ ପଲ୍ଲଲେ ॥
ଅନକ୍କମିତ୍ୱା କଲଲଂ ମହାଦୟେ,
ସଭିକ୍ଖୁକୋ ଗଚ୍ଚତୁ ପିଟ୍ଠିୟା ଇତି ।
ଅଧିଟ୍ଠହିତ୍ୱାନ ନିପନ୍ନକୋ ତହିଂ,
ଅନାଥ ମେତଂ ତିଭୱଂ ସମେକ୍ଖିୟ ॥
ଦୟାୟ ସଞ୍ଚୋଦିତମାନସୋ ଜନେ,
ଭୱଣ୍ଣୱା ଉଦ୍ଧରିତୁଂ ଦୁଖଦ୍ଦିତେ ।
ଅକାସି ସମ୍ବୋଧିପଦସ୍ସ ପତ୍ତିୟା,
ମହାଭିନୀହାରମୁଦଗ୍ଗୱିକ୍କମୋ ॥
ଅଥୋ ୱିଦିତ୍ୱା ୱସିନୋ ତମାସୟଂ,
ଅଦାସି ସୋ ୱ୍ୟାକରଣଂ ମହାମୁନି ।
ତତୋ ପୁରଂ ତମ୍ହି ତଥାଗତେ ଗତେ,
ସୟଂୱସୀ ସମ୍ମସି ପାରମିଗୁଣେ ॥
ତତୋ ଚ କପ୍ପାନମଲୀନୱିକ୍କମୋ,
ଅସଂଖିୟେ ସୋ ଚତୁରୋ ସଲକ୍ଖକେ ।
ତହିଂ ତହିଂ ଜାତିସୁ ବୋଧିପାଚନେ,
ୱିସୁଦ୍ଧସମ୍ଭାରଗୁଣେ ଅପୂରୟି ।
ଅଥାଭିଜାତୋ ତୁସିତେ ମହାୟସୋ,
ୱିସୁଦ୍ଧସମ୍ବୋଧିପଦୋପଲଦ୍ଧିୟା ।
ଉଦିକ୍ଖମାନୋ ସମୟଂ ଦୟାଧନୋ,
ଚିରଂ ୱିଭୁତିଂ ଅନୁଭୋସି ସବ୍ବସୋ ॥
ସହସ୍ସସଙ୍ଖା ଦସଚକ୍କୱାଲତୋ,
ସମାଗତାନେକସୁରାଧିପାଦିହି ।
ଉଦଗ୍ଗୁଦଗ୍ଗେହି ଜିନତ୍ତପତ୍ତିୟା,
ସଗାରୱଂ ସୋ ଅଭିଗମ୍ମ ୟାଚିତୋ ॥
ତତୋ ଚୱିତ୍ୱା କପିଳୱ୍ହୟେ ପୁରେ,
ସଦା ସତୋ ସକ୍ୟକୁଲେକକେତୁନୋ ।
ଅହୋସି ସୁଦ୍ଧୋଦନଭୁମିଭତ୍ତୁନୋ,
ମହାଦିମାୟାୟ ମହେସିୟା ସୁତୋ ॥
ୱିଜାତମତ୍ତୋ’ୱ ୱସୁନ୍ଧରାୟ ସୋ,
ପତିଟ୍ଠହିତ୍ୱାନ ଦିସା ୱିଲୋକୟୀ ।
ତଦା ଅହେସୁଂ ୱିୱଟଙ୍ଗନା ଦିସା,
ଅପୂଜୟୁଂ ତତ୍ଥ ଚ ଦେୱମାନୁସା ॥
ଆଧାରୟୁଂ ଆତପୱାରଣାଦିକଂ,
ଅଦିସ୍ସମାନାୱ ନଭମ୍ଭି ଦେୱତା ।
ପଦାନି ସୋ ସତ୍ତ ଚ ଉତ୍ତରାମୁଖୋ,
ଉପେଚ୍ଚ ନିଚ୍ଛାରୟି ୱାଚମାସଭିଂ ॥
ୟଥତ୍ଥସିଦ୍ଧତ୍ତକୁମାରନାମକୋ,
ମହବ୍ବଲୋ ୟୋବ୍ବନହାରିୱିଗ୍ଗହୋ ।
ଉତୁତ୍ତୟାନୁଚ୍ଛୱିକେସୁ ତୀସୁ ସୋ,
ନୁଭୋସି ପାସାଦୱରେସୁ ସମ୍ପଦଂ ॥
କଦାଚି ଉୟ୍ୟାନପଥେ ଜରାହତଂ,
ତଥାତୁରଂ କାଲକତଞ୍ଚ ସଂୟମିଂ ।
କମେନ ଦିସ୍ୱାନ ୱିରତ୍ତମାନସୋ,
ଭୱେସୁ ସୋ ପବ୍ବଜିତୁଂ ଅକାମୟି ॥
ସପୁପ୍ଫଦୀପାଦୀକରେହି ରତ୍ତିୟଂ,
ପୁରକ୍ଖତୋ ସୋ ତିଦିୱାଧିୱାସିହି ।
ସଛନ୍ନକୋ କନ୍ତକୱାଜିୟାନତୋ,
ତତୋ ମହାକାରୁଣିକୋ’ଭିନିକ୍ଖମି ॥
କମେନ ପତ୍ୱାନ ଅନୋମମାପଗଂ,
ସୁଧୋତମୁତ୍ତାଫଲହାରିସେକତେ ।
ପତିଟ୍ଠହିତ୍ୱା ୱରମୋଳିବନ୍ଧନଂ,
ସିତାସିଲୂନଂ ଗଗନେ ସମୁକ୍ଖିପୀ ॥
ପଟିଗ୍ଗହେତ୍ୱା ତିଦସାନମିସ୍ସରୋ,
ସୁୱଣ୍ନଚଙ୍ଗୋଟୱରେନ ତଂ ତଦା ।
ତିୟୋଜନଂ ନୀଲମଣୀହି ଚେତିୟଂ,
ଅକାସି ଚୂଳାମଣିମତ୍ତନୋ ପୁରେ ॥
ତତୋ ଘଟୀକାରସରୋଜୟୋନିନା,
ସମାହଟଂ ଧାରୟୀ ଚୀୱରାଦିକଂ ।
ଅଥୋ ସକଂ ୱତ୍ଥୟୁଗଂ ନଭତ୍ଥଲେ,
ପସତ୍ଥୱେସଗ୍ଗହଣୋ ସମୁକ୍ଖିପୀ ॥
ପଟିଗ୍ଗହେତ୍ୱାନ ତମମ୍ବୁଜାସନୋ,
ମହିଦ୍ଧିକୋ ଭତ୍ତିଭରେନ ଚୋଦିତୋ ।
ସକେ ଭୱେ ଦ୍ୱାଦସୟୋଜନଂ ଅକା,
ମଣୀହି ନୀଲାଦିହି ଦୁସ୍ସଚେତିୟଂ ॥
ସୁସଞ୍ଞତତ୍ତୋ ସତିମା ଜିତିନ୍ଦ୍ରିୟୋ,
ୱିନୀତୱେସୋ ରସଗେଧୱଜ୍ଜିତୋ ।
ଛହାୟନାନେୱ ଅନୋମୱିକ୍କମୋ,
ମହାପଧାନଂ ପଦହିତ୍ଥ ଦୁକ୍କରଂ ॥
ୱିସାଖମାସସ୍ସଥ ପୁଣ୍ଣମାସିୟଂ,
ଉପେଚ୍ଚ ମୂଲଂ ସହଜାୟ ବୋଧିୟା ।
ତିଣାସନେ ଚୁଦ୍ଦସହତ୍ଥସମ୍ମିତେ,
ଅଧିଟ୍ଠହିତ୍ୱା ୱୀରିୟଂ ନିସଜ୍ଜି ସୋ ॥
ଅୱତ୍ଥରନ୍ତିଂ ୱସୁଧଂଚ ଅମ୍ବରଂ,
ୱିରୂପୱେସଗ୍ଗହଣେନ ଭିଂସନଂ ।
ପକମ୍ପୟନ୍ତୋ ସଧରାଧରଂ ମହିଂ,
ଜିନୋ ପଦୋସେ’ଜିନି ମାରୱାହିଣିଂ ॥
ସୁରାସୁରବ୍ରହ୍ମଗଣେହି ସଜ୍ଜିତେ,
ଜଗତ୍ତୟେ ପୁପ୍ଫମୟଗଘିକାଦିନା ।
ପୱତ୍ତମାନେ ସୁରଦୁନ୍ଦୁଭିସ୍ସରେ,
ଅବୁଜ୍ଝିବୋଧିଂ ରଜନୀପରିକ୍ଖୟେ ॥
ତଦା ପକମ୍ପିଂସୁ ସସେଲକାନନା,
ସହସ୍ସସଂଖା ଦସଲୋକଧାତୁୟୋ ।
ଅଗଞ୍ଜି ସୋ ଲୋଣପୟୋଧି ସାଧୁତଂ,
ମହାୱଭାସୋ ଭୁୱନେସୁ ପତ୍ଥରୀ ॥
ଲଭିଂସୁ ଅନ୍ଧା ୱିମଲେ ୱିଲୋଚନେ,
ସୁଣିଂସୁ ସଦ୍ଦେ ବଧିରାପି ଜାତିୟା ।
ଲପିଂସୁ ମୂଗା ୱଚନେନ ୱଗ୍ଗୁନା,
ଚରିଂସୁ ଖେଲଂ ପଦସା’ୱ ପଙ୍ଗୁଲା ॥
ଭୱିଂସୁ ଖୁଜ୍ଜା ଉଜୁସୋମ୍ମୱିଗ୍ଗହା,
ସିଖୀ’ପି ନିବ୍ବାୟି ଅୱୀଚିଆଦିସୁ ।
ଅପାଗମୁଂ ବନ୍ଧନତୋ’ପି ଜନ୍ତୱୋ,
ଖୁଦାଦିକଂ ପେତଭୱା ଅପକ୍କମୀ ॥
ସମିଂସୁ ରୋଗୱ୍ୟସନାନି ପାଣିନଂ,
ଭୟଂ ତିରଚ୍ଚାନଗତେ ନ ପୀଳୟୀ ।
ଜନା ଅହେସୁଂ ସଖିଲା ପିୟଂୱଦା,
ପୱତ୍ତୟୁଂ କୋଞ୍ଚନଦଂ ମତଙ୍ଗଜା ॥
ହୟା ଚ ହେସିଂସୁ ପହଟ୍ଠମାନସା,
ନଦିଂସୁ ସବ୍ବା ସୟମେୱ ଦୁନ୍ଦୁଭୀ ।
ରୱିଂସୁ ଦେହାଭରଣାନି ପାଣିନଂ,
ଦିସା ପସୀଦିଂସୁ ସମା ସମନ୍ତତୋ ॥
ପୱାୟି ମନ୍ଦୋ ସୁଖସୀତମାରୁତୋ,
ପୱସ୍ସି ମେଘୋ’ପି ଅକାଲସମ୍ବୱୋ ।
ଜହିଂସୁ ଆକାସଗତିଂ ୱିହଙ୍ଗମା,
ମହିଂ ସମୁଭିଜ୍ଜଜଲଂ ସମୁଟ୍ଠହୀ ॥
ଅସନ୍ଦମାନା’ୱ ଠିତା ସୱନ୍ତିୟୋ,
ନଭେ ୱିରୋଚିଂସୁ ଅସେସଜୋତିୟୋ ।
ଭୱା ଅହେସୁଂ ୱିୱଟା ସମନ୍ତତୋ,
ଜନସ୍ସ ନାସୁଂ ୱଚନୂପପତ୍ତିୟୋ ॥
ସମେକ୍ଖତଂ ନାୱରଣା ନଗାଦୟୋ,
ପୱାୟି ଗନ୍ଧୋ ଅପି ଦିବ୍ବସମ୍ମତୋ ।
ଦୁମା ଅହେସୁଂ ଫଲପୁପ୍ଫ ଧାରିନୋ,
ଅହୋସି ଛନ୍ନୋ କମଲେହି ଅଣ୍ଣୱୋ ॥
ଥଲେସୁ ତୋୟେସୁ ଚ ପୁପ୍ଫମାନକା,
ୱିଚିତ୍ତପୁପ୍ଫା ୱିକସିଂସୁ ସବ୍ବଥା ।
ନିରନ୍ତରଂ ପୁପ୍ଫସୁଗନ୍ଧୱୁଟ୍ଠିୟା,
ଅହୋସି ସବ୍ବଂ ୱସୁଧମ୍ବରନ୍ନରଂ ॥
ନିସଜ୍ଜ ପଲ୍ଲଙ୍କୱରେ ତହିଂ ଜିନୋ,
ସୁଖଂ ସମାପତ୍ତିୱିହାରସମ୍ଭୱଂ ।
ତତୋ’ନୁଭୋନ୍ତୋ ସୁଚିରାଭିପତ୍ଥିତଂ,
ଦିନାନି ସତ୍ତେୱ ଅତିକ୍କମାପୟୀ ॥
ସମୁପ୍ପତିତ୍ୱା ଗଗଣଙ୍ଗନଂ ତତୋ,
ପଦସ୍ସୟିତ୍ୱା ୟମକଂ ମହାମୁନି ।
ସପାଟିହୀରଂ ତିଦିୱାଧିୱାସିନଂ,
ଜିନତ୍ତନେ ସଂସୟିତଂ ନିରାକରି ॥
ଅଥୋତରିତ୍ୱାନ ଜୟାସନସ୍ସ ସୋ,
ଠିତୋ’ୱ ପୁବ୍ବୁତ୍ତରକଣ୍ଣନିସ୍ସିତୋ ।
ଦିନାନି ସତ୍ତାନିମିସେନ ଚକ୍ଖୁନା,
ତମାସନଂ ବୋଧିତରୁଂଚ’ପୂଜୟି ॥
ଅଥ’ନ୍ତରାଳେ ମଣିଚଙ୍କମେ ଜିନୋ,
ଠିତପ୍ପଦେସସ୍ସ ଚ ଆସନସ୍ସ ଚ ।
ମହାରହେ ଦେୱୱରାଭିନିମ୍ମିତେ,
ଦିନାନି ସତ୍ତେୱ ଅକାସି ୱଙ୍କମଂ ॥
ତତୋ ଦିସାୟଂ ଅପରାୟ ବୋଧିୟା,
ଉପାୱିସିତ୍ୱା ରତନାଲୟେ ଜିନୋ ।
ସମନ୍ତପଟ୍ଠାନନୟଂ ୱିଚିନ୍ତୟଂ,
ଦିନାନି ସତ୍ତେୱ ସୱୀତିନାମୟି ॥
ୱିନିଗ୍ଗତୋ ସତ୍ଥୁସରୀରତୋ ତଦା,
ଜୁତିପ୍ପବନ୍ଧୋ ପଟିବନ୍ଧୱଜ୍ଜିତୋ ।
ପମାଣସୁଞ୍ଞାସୁ ଚ ଲୋକଧାତୁସୁ,
ସମନ୍ତତୋ ଉଦ୍ଧମଧୋ ଚ ପତ୍ଥରୀ ॥
ୱଟସ୍ସ ମୂଲେ ଅଜପାଲସଞ୍ଞିନୋ,
ସୁଖଂ ଫୁସନ୍ତୋ ପୱିୱେକସମ୍ଭୱଂ ।
ୱିନାୟକୋ ସତ୍ତ ୱିହାସି ୱାସରେ,
ଅନନ୍ତଦସ୍ସୀ ସୁରରାଜପୂଜିତୋ ॥
ୱିହାସି ମୂଲେ ମୁଚଲିନ୍ଦସାଖିନୋ,
ନିସଜ୍ଜ ଭୋଗାୱଲିମନ୍ଦିରୋଦରେ ।
ୱିକିଣ୍ଣପୁପ୍ଫେ ମୁଚଲିନ୍ଦଭୋଗିନୋ,
ସମାଧିନା ୱାସରସତ୍ତକଂ ଜିନୋ ॥
ଦୁମେ’ପି ରାଜାୟତନେ ସମାଧିନା,
ୱିହାସି ରତ୍ତିନ୍ଦିୱ ସତ୍ତକଂ ମୁନି ।
ସହସ୍ସନେତ୍ତୋ ଅଥ ଦନ୍ତପୋଣକଂ,
ମୁଖୋଦକଞ୍ଚାପି ଅଦାସି ସତ୍ଥୁନୋ ॥
ତତୋ ମହାରାଜୱରେହି ଆଭତଂ,
ସିଲାମୟଂ ପତ୍ତ ଚତୁକ୍କମେକକଂ ।
ୱିଧାୟ ମତ୍ଥଂ ମଧୁପିଣ୍ଡିକଂ ତହିଂ,
ପଟିଗ୍ଗହେତ୍ୱାନ ସୱାଣିଜାହଟା ॥
କତନ୍ନକିଚ୍ଚୋ ସରଣେସୁ ତେ ଉଭୋ,
ପତିଟ୍ଠପେତ୍ୱାନ ତପସ୍ସୁଭଲ୍ଲିକେ ।
ଅଦାସି ତେସଂ ଅଭିପୂଜିତୁଂ ସକଂ,
ପରାମସିତ୍ୱାନ ସିରଂ ସିରୋରୁହେ ॥
ୱଟସ୍ସମୁଲେ ଅଜପାଲସଞ୍ଞିନୋ,
ସହମ୍ପତୀବ୍ରହ୍ମୱରେନ ୟାଚିତୋ ।
ଜନସ୍ସ କାତୁଂ ୱରଧମ୍ମସଙ୍ଗହଂ,
ଅଗଞ୍ଛି ବାରାଣସିମେକକୋ ମୁନି ॥
ଗନ୍ତ୍ୱା ସୋ ଧମ୍ମରାଜା ୱନମିସିପତନଂ ସଞ୍ଞତାନଂ ନିକେତଂ,
ପଲ୍ଲଙ୍କସ୍ମିଂ ନିସିନ୍ନୋ ତହିମୱିଚଲିତଟ୍ଠାନସମ୍ପାଦିତମ୍ହି ।
ଆସାଳ୍ହେ ପୁଣ୍ଣମାୟଂ ସିତରୁଚିରୁଚିୟା ଜୋତିତେ ଚକ୍କୱାଳେ,
ଦେୱବ୍ରହ୍ମାଦିକାନଂ ଦୁରିତମଲହରଂ ୱତ୍ତୟି ଧମ୍ମଚକ୍କଂ ॥
ସୁତ୍ୱା ସଦ୍ଧମ୍ମମଗ୍ଗଂ ତିଭୂୱନକୁହରାଭୋଗୱିତ୍ଥାରିକଂ ତଂ,
ଅଞ୍ଞାକୋଣ୍ଡଞ୍ଞନାମଦ୍ୱିଜମୁନିପମୁଖାଟ୍ଠାରସବ୍ରହ୍ମକୋଟୀ ।
ଅଞ୍ଞାସୁଂ ମଗ୍ଗଧମ୍ମଂ ପରିମିତରହିତେ ଚକ୍କୱାଳେ ଉଳାରୋ,
ଓଭାସୋ ପାତୁଭୁତୋ ସପଦି ବହୁୱିଧଂ ଆସି ଅଚ୍ଛେରକଞ୍ଚ ॥
ପଠମୋ ପରିଚ୍ଛେଦୋ ।
ତତୋ ପଟ୍ଠାୟ ସୋ ସତ୍ଥା ୱିନେନ୍ତୋ ଦେୱମାନୁସେ,
ବୋଧିତୋ ଫୁସ୍ସମାସମ୍ହି ନୱମେ ପୁଣ୍ଣମାସିୟଂ ॥
ଲଙ୍କମାଗମ୍ମ ଗଙ୍ଗାୟ ତୀରେ ୟୋଜନୱିତ୍ଥତେ,
ମହାନାଗୱନୁୟ୍ୟାନେ ଆୟାମେନ ତିୟୋଜନେ ॥
ୟକ୍ଖାନଂ ସମିତିଂ ଗନ୍ତ୍ୱା ଠତ୍ୱାନ ଗଗନେ ତହିଂ ।
ୱାତନ୍ଧକାରୱୁଟ୍ଠିହି କତ୍ୱା ୟକ୍ଖେ ଭୟଦ୍ଦିତେ ॥
ଲଦ୍ଧାଭୟେହି ୟକ୍ଖେହି ତେହି ଦିନ୍ନାୟ ଭୁମିୟା ।
ଚମ୍ମଖଣ୍ଡଂ ପସାରେତ୍ୱା ନିସୀଦିତ୍ୱାନ ତଙ୍ଖଣେ ॥
ଚମ୍ମଖଣ୍ଡଂ ପଦିତ୍ତଗ୍ଗି ଜାଲାମାଲାସମାକୁଲଂ ।
ଇଦ୍ଧିୟା ୱଡ୍ଢୟିତ୍ୱାନ ୟାୱ ସିନ୍ଧୁଂ ସମନ୍ତତୋ ॥
ଜୱେନ ସିନ୍ଧୁୱେଲାୟ ରାସିଭୁତେ ନିସାଚରେ ।
ଗିରିଦୀପମିଧାନେତ୍ୱା ପତିଟ୍ଠାପେସି ତେ ତହିଂ ॥
ଦେସୟିତ୍ୱା ଜିନୋ ଧମ୍ମଂ ତଦା ଦେୱସମାଗମେ ।
ବହୁନ୍ନଂ ପାଣକୋଟୀନଂ ଧମ୍ମାଭିସମୟଂ ଅକା ॥
ମହାସୁମନଦେୱସ୍ସ ସେଲେ ସୁମନକୂଟକେ ।
ଦତ୍ୱା ନମସ୍ସିତୁଂ କେସେ ଅଗା ଜେତୱନଂ ଜିନୋ ॥
ପତିଟ୍ଠପେତ୍ୱା ତେ ସତ୍ଥୁ ନିସିନ୍ନାସନଭୁମିୟଂ ।
ଇନ୍ଦନୀଲମୟଂ ଥୂପଂ କରିତ୍ୱା ସୋ ଅପୂଜୟି ॥
ନିସ୍ସାୟ ମଣିପଲ୍ଲଙ୍କଂ ପବ୍ବତଣ୍ଣୱୱାସିନୋ ।
ଦିସ୍ୱା ୟୁଦ୍ଧତ୍ଥିକେ ନାଗେ ଚୂଳୋଦର ମହୋଦରେ ॥
ବୋଧିତୋ ପଞ୍ଚମେ ୱସ୍ସେ ଚିତ୍ତମାସେ ମହାମୁନି ।
ଉପୋସଥେ କାଲପକ୍ଖେ ନାଗଦୀପମୁପାଗମୀ ॥
ତଦା ସମିଦ୍ଧିସୁମନୋ ଦେୱୋ ଜେତୱନେ ଠିତଂ ।
ଅତ୍ତନୋ ଭୱନଂୟେୱ ରାଜାୟତନପାଦପଂ ॥
ଇନ୍ଦନୀଲଦ୍ଦିକୂଟଂ’ୱ ଗହେତ୍ୱାତୁଟ୍ଠମାନସୋ ।
ଧାରୟିତ୍ୱା ସହାଗଞ୍ଛି ଛତ୍ତଂ କତ୍ୱାନ ସତ୍ଥୁନୋ ॥
ଉଭିନ୍ନଂ ନାଗରାଜୂନଂ ୱତ୍ତମାନେ ମହାହୱେ ।
ନିସିନ୍ନୋ ଗଗନେ ନାଥୋ ମାପୟିତ୍ଥ ମହାତମଂ ॥
ଆଲୋକଂ ଦସ୍ସୟିତ୍ୱାଥ ଅସ୍ସାସେତ୍ୱାନ ଭୋଗିନୋ ।
ସାମଗ୍ଗିକରଣଂ ଧମ୍ମଂ ଅଭାସି ପୁରିସାସଭୋ ॥
ଅସୀତିକୋଟିୟୋ ନାଗା ଅଚଲମ୍ବୁଧିୱାସିନୋ ।
ପତିଟ୍ଠହିଂସୁ ମୁଦିତା ସୀଲେସୁ ସରଣେସୁ ଚ ॥
ଦତ୍ୱାନ ମଣିପଲ୍ଲଙ୍କଂ ସତ୍ଥୁନୋ ଭୁଜଗାଧିପା ।
ତତ୍ଥାସୀନଂ ମହାୱୀରଂ ଅନ୍ନପାନେହି ତପ୍ପୟୁଂ ॥
ପତିଟ୍ଠପେତ୍ୱା ସୋ ତତ୍ଥ ରାଜାୟତନପାଦପଂ ।
ପଲ୍ଲଙ୍କଂ ତଞ୍ଚ ନାଗାନଂ ଅଦାସି ଅଭିପୂଜିତୁଂ ॥
ବୋଧିତୋ ଅଟ୍ଠମେ ୱସ୍ସେ ୱେସାଖେ ପୁଣ୍ଣମାସିୟଂ ।
ମଣିଅକ୍ଖିକନାମେନ ନାଗିନ୍ଦେନ ନିମନ୍ତିତୋ ॥
ନାଗରାଜସ୍ସ ତସ୍ସେୱ ଭୱନଂ ସାଧୁ ସଜ୍ଜୀତଂ ।
କଲ୍ୟାଣିୟଂ ପଞ୍ଚଭିକ୍ଖୂ ସତେହି ସହ ଆଗମି ॥
କଲ୍ୟାଣିଚେତିୟଟ୍ଠାନେ କତେ ରତନ ମଣ୍ଡପେ ।
ମହାରହମ୍ହି ପଲ୍ଲଙ୍କେ ଉପାୱିସି ନରାସଭୋ ॥
ଦିବ୍ବେହି ଖଜ୍ଜଭୋଜ୍ଜେହି ସସଙ୍ଘଂ ଲୋକନାୟକଂ ।
ସନ୍ତପ୍ପେସି ଫଣିନ୍ଦୋ ସୋ ଭୁଜଙ୍ଗେହି ପୁରକ୍ଖତୋ ॥
ଦେସୟିତ୍ୱାନ ସଦ୍ଧମ୍ମଂ ସଗ୍ଗମୋକ୍ଖସୁଖାୱହଂ ।
ସୋ ସତ୍ଥା ସୁମନେ କୂଟେ ଦସ୍ସେସି ପଦଲଞ୍ଛନଂ ॥
ତତୋ ପବ୍ବତପାଦମ୍ହି ସସଙ୍ଘୋ ସୋ ୱିନାୟକୋ ।
ଦିୱାୱିହାରଂ କତ୍ୱାନ ଦୀଘୱାପିଂ ଉପାଗମି ॥
ଥୂପଟ୍ଠାନେ ତହିଂ ବୁଦ୍ଧୋ ସସଙ୍ଘୋ’ଭିନିସୀଦିୟ ।
ସମାପତ୍ତି ସମୁବଭୁତଂ ଅୱିନ୍ଦି ଅସମଂ ସୁଖଂ ॥
ମହାବୋଧିତରୁଟ୍ଠାନେ ସମାଧିଂ ଅପ୍ପୟି ଜିନୋ ।
ମହାଥୂପପ୍ପଦେସେ ଚ ୱିହରିତ୍ଥ ସମାଧିନା ॥
ଥୂପାରାମମ୍ହି ଥୂପସ୍ସ ଠାନେ ଝାନସୁଖେନ ସୋ ।
ସଭିକ୍ଖୁସଙ୍ଘୋ ସମ୍ବୁଦ୍ଧୋ ମୁହୁତ୍ତଂ ୱୀତିନାମୟୀ ॥
ସିଲାଥୁପପ୍ପଦେସମ୍ହି ଠତ୍ୱାକାଲାୱିଦୂ ମୁନି ।
ଦେୱେ ସମନୁସାସିତ୍ୱା ତତୋ ଜେତୱନଂ ଅଗା ॥
ଅଗିଦ୍ଧୋ ଲାଭସକ୍କାରେ ଅସୟ୍ହମୱମାନନଂ ।
ସହନ୍ତୋ କେୱଲଂ ସବ୍ବ ଲୋକନିତ୍ଥରଣତ୍ଥିକୋ ॥
ସଂୱଚ୍ଛରାନି ଠତ୍ୱାନ ଚତ୍ତାଳୀସଞ୍ଚ ପଞ୍ଚ ଚ ।
ଦେସୟିତ୍ୱାନ ସୁତ୍ତାଦି ନୱଙ୍ଗଂ ସତ୍ଥୁସାସନଂ ॥
ତାରେତ୍ୱା ଭୱକନ୍ତାରା ଜନେ ସଙ୍ଖ୍ୟାତିୱତ୍ତିନୋ ।
ବୁଦ୍ଧକିଚ୍ଚାନି ସବ୍ବାନି ନିଟ୍ଠାପେତ୍ୱାନ ଚକ୍ଖୁମା ॥
କୁସିନାରାପୁରେ ରଞ୍ଞଂ ମଲ୍ଲାନମୁପୱତ୍ତନେ ।
ସାଲୱନମ୍ହି ୟମକସାଲରୁକ୍ଖାନମନ୍ତରେ ॥
ମହାରହେ ସୁପଞ୍ଞତ୍ତେ ମଞ୍ଚେ ଉତ୍ତରସୀସକଂ ।
ନିପନ୍ନୋ ସୀହସେୟ୍ୟାୟ ୱେସାଖେ ପୁଣ୍ଣମାସିୟଂ ॥
ଦେସେତ୍ୱା ପଠମେ ୟାମେ ମଲ୍ଲାନଂ ଧମ୍ମମୁତ୍ତମଂ ।
ସୁଭଦ୍ଦଂ ମଜ୍ଝିମେ ୟାମେ ପାପେତ୍ୱା ଅମତଂ ପଦଂ ॥
ଭିକ୍ଖୁ ପଚ୍ଛିମୟାମମ୍ହି ଧମ୍ମକ୍ଖନ୍ଧେ ଅସେସକେ ।
ସଙ୍ଗୟ୍ହ ଓୱଦିତ୍ୱାନ ଅପ୍ପମାଦ ପଦେନ ଚ ॥
ପଚ୍ଚୁସସମୟେ ଝାନସମାପତ୍ତିୱିହାରତୋ ।
ଉଟ୍ଠାୟ ପରିନିବ୍ବାୟି ସେସୋପାଦିୱିୱଜ୍ଜିତୋ ॥
ମହୀକମ୍ପାଦୟୋ ଆସୁଂ ତଦା ଅଚ୍ଛରିୟାୱହା ।
ପୂଜାୱିସେସା ୱତ୍ତିଂସୁ ଦେୱମାନୁସକା ବହୂ ॥
ପରିନିବ୍ବାଣସୁତ୍ତନ୍ତେ ୱୁତ୍ତାନୁକ୍କମତୋ ପନ ।
ପୂଜାୱିସେସୋ ୱିଞ୍ଞେୟ୍ୟୋ ଇଚ୍ଛନ୍ତେହି ଅସେସତୋ ॥
ଅହତେହି ଚ ୱତ୍ଥେହି ୱେଠେତ୍ୱା ପଠମଂ ଜିନଂ ।
ୱେଠୟିତ୍ୱାନ କପ୍ପାସପିଚୁନା ୱିହତେନ ଚ ॥
ଏୱଂ ପଞ୍ଚସତକ୍ଖତ୍ତୁଂ ୱେଠୟିତ୍ୱାନ ସାଧୁକଂ ।
ପକ୍ଖିପିତ୍ୱା ସୁୱଣ୍ଣାୟ ତେଲପୁଣ୍ଣାୟ ଦୋଣିୟା ॥
ୱୀସଂହତ୍ଥସତୁବ୍ବେଧଂ ଗନ୍ଧଦାରୂହି ସଙ୍ଖତଂ ।
ଆରୋପୟିଂସୁ ଚିତକଂ ମଲ୍ଲାନଂ ପମୁଖା ତଦା ॥
ମହାକସ୍ସପଥେରେନ ଧମ୍ମରାଜେ ଅୱନ୍ଦିତେ ।
ଚିତକଂ ମା ଜଲିତ୍ଥାତି ଦେୱଧିଟ୍ଠାନତୋ ପନ ॥
ପାମୋକ୍ଖା ମଲ୍ଲରାଜୂନଂ ୱାୟମନ୍ତୋପ’ନେକଧା ।
ଚିତକଂ ତଂ ନ ସକ୍ଖିଂସୁ ଗାହାପେତୁଂ ହୁତାସନଂ ॥
ମହାକସ୍ସପଥେରେନ ଅଧିଟ୍ଠାନେନ ଅତ୍ତନୋ ।
ୱତ୍ଥାଦୀନି ମହାଦୋଣିଂ ଚିତକଞ୍ଚ ମହାରହଂ ॥
ଦ୍ୱିଧା କତ୍ୱାନ ନିକ୍ଖମ୍ମ ସକସୀସେ ପତିଟ୍ଠିତା ।
ୱନ୍ଦିତା ସତ୍ଥୁନୋ ପାଦା ୟଥାଟ୍ଠାନେ ପତିଟ୍ଠିତା ॥
ତତୋ ଦେୱାନୁଭାୱେନ ପଜ୍ଜଲିତ୍ଥ ଚିତାନଲୋ ।
ନ ମସି ସତ୍ଥୁଦେହସ୍ସ ଦଡ୍ଢସ୍ସାସି ନ ଛାରିକା ॥
ଧାତୁୟୋ ଅୱସିସ୍ସିଂସୁ ମୁତ୍ତାଭା କଞ୍ଚନପ୍ପଭା ।
ଅଦିଟ୍ଠାନେନ ବୁଦ୍ଧସ୍ସ ୱିପ୍ପକିଣ୍ଣା ଅନେକଧା ॥
ଉଣ୍ହୀସଂ ଅକ୍ଖକା ଦ୍ୱେ ଚ ଚତସ୍ସୋ ଦନ୍ତଧାତୁୟୋ ।
ଇଚ୍ଚେତା ଧାତୁୟୋ ସତ୍ତ ୱିପ୍ପକିଣ୍ଣା ନ ସତ୍ଥୁନୋ ॥
ଆକାସତୋ ପତିତ୍ୱାପି ଉଗ୍ଗନ୍ତ୍ୱାପି ମହୀତଲା ।
ସମନ୍ତା ଜଲଧାରାୟୋ ନିବ୍ବାପେସୁଂ ଚିତାନଲଂ ॥
ଥେରସ୍ସ ସାରିପୁତ୍ତସ୍ସ ଅନ୍ତେୱାସି ମହିଦ୍ଧିକୋ ।
ସରଭୁନାମକୋ ଥେରୋ ପଭିନ୍ନ ପଟିସମ୍ଭିଦୋ ॥
ଗୀୱାଧାତୁଂ ଗହେତ୍ୱାନ ଚିତତୋ ମହିୟଙ୍ଗଣେ ।
ପତିଟ୍ଠପେତ୍ୱା ଥୂପମ୍ହି ଅକା କଞ୍ଚୁକଚେତିୟଂ ॥
ଖେମୱ୍ହୟୋ କାରୁଣିକୋ ଖୀଣସଂୟୋଜନୋ ମୁନି ।
ଚିତକା ତୋ ତତୋ ୱାମଦାଠାଧାତୁଂ ସମଗ୍ଗହି ॥
ଅଟ୍ଠନ୍ନମଥ ରାଜୁନଂ ଧାତୁଅତ୍ଥାୟ ସତ୍ଥୁନୋ ।
ଉପ୍ପନ୍ନଂ ୱିଗ୍ଗହଂ ଦୋଣୋ ସମେତ୍ୱାନ ଦ୍ୱିଜୁତ୍ତମୋ ॥
କତ୍ୱାନ ଅଟ୍ଠ କୋଟ୍ଠାସେ ଭାଜେତ୍ୱା ସେସଧାତୁୟୋ ।
ଅଦାସି ଅଟ୍ଠରାଜୂନଂ ତଂ ତଂ ନଗରୱାସିନଂ ॥
ହଟ୍ଠତୁଟ୍ଠା ଗହେତ୍ୱାନ ଧାତୁୟୋ ତା ନରାଧିପା ।
ଗନ୍ତ୍ୱା ସକେ ସକେ ରଟ୍ଠେ ଚେତିୟାନି ଅକାରୟୁଂ ॥
ଏକା ଦାଠା ସୁରିନ୍ଦେନ ଏକା ଗନ୍ଧାରୱାସିହି ।
ଏକା ଭୁଜଙ୍ଗରାଜୂହି ଆସି ସକ୍କତପୂଜିତା ॥
ଦନ୍ତଧାତୁଂ ତତୋ ଖେମୋ ଅତ୍ତନା ଗହିତଂ ଅଦା ।
ଦନ୍ତପୁରେ କଲିଙ୍ଗସ୍ସ ବ୍ରହ୍ମଦତ୍ତସ୍ସ ରାଜିନୋ ॥
ଦେସୟିତ୍ୱାନ ସୋ ଧମ୍ମଂ ଭେତ୍ୱା ସବ୍ବା କୁଦିଟ୍ଠିୟୋ ।
ରାଜାନଂ ତଂ ପସାଦେସି ଅଗ୍ଗମ୍ଭୀ ରତନତ୍ତୟେ ॥
ଅଜ୍ଝୋଗାଳ୍ହୋ ମୁନିନ୍ଦସ୍ସ ଧମ୍ମାମତମହଣ୍ଣୱଂ ।
ସୋ ନରିନ୍ଦୋପୱାହେସି ମଲଂ ମଚ୍ଛରିୟାଦିକଂ ॥
ପାୱୁସ୍ସକୋ ୟଥା ମେଘୋ ନାନା ରତନୱସ୍ସତୋ ।
ଦାଳିଦ୍ଦିୟନିଦାଘଂ ସୋ ନିବ୍ବାପେସି ନରୁତ୍ତମୋ ॥
ସୁୱଣ୍ଣଖଚିତାଲମ୍ବ ମୁତ୍ତାଜାଲେହି ସୋଭିତଂ ।
କୂଟାଗାରସତାକୀଣ୍ଣଂ ତରୁଣାଦିଚ୍ଚସନ୍ନିଭଂ ॥
ନାନାରତନସୋଭାୟ ଦୁଦିକ୍ଖଂ ଚକ୍ଖୁମୂସନଂ ।
ୟାନଂ ସଗ୍ଗାପୱଗ୍ଗସ୍ସ ପସାଦାତିସୟାୱହଂ ॥
କାରୟିତ୍ୱାନ ସୋ ରାଜା ଦାଠାଧାତୁନିୱେସନଂ ।
ଧାତୁପୀଠଞ୍ଚ ତତ୍ଥେୱ କାରେତ୍ୱା ରତନୁଜ୍ଜଲଂ ॥
ତହିଂ ସମପ୍ପୟିତ୍ୱାନ ଦାଠାଧାତୁଂ ମହେସିନୋ ।
ପୂଜାୱତ୍ଥୂହି ପୂଜେସି ରତ୍ତିନ୍ଦିୱମତନ୍ଦିତୋ ॥
ଇତି ସୋ ସଞ୍ଚିନିତ୍ୱାନ ପୁଞ୍ଞସମ୍ଭାର ସମ୍ପଦଂ ।
ଜହିତ୍ୱା ମାନୁସଂ ଦେହଂ ସଗ୍ଗକାୟମଲଙ୍କରି ॥
ଅନୁଜାତୋ ତତୋ ତସ୍ସ କାସିରାଜୱ୍ହୟୋ ସୁତୋ ।
ରଜ୍ଜଂ ଲଦ୍ଧା ଅମଚ୍ଚାନଂ ସୋକସଲ୍ଲମପାନୁଦୀ ॥
ପୁପ୍ଫଗନ୍ଧାଦିନା ଦନ୍ତଧାତୁଂ ତମଭିପୂଜିୟ ।
ନିଚ୍ଚଂ ମଣିପ୍ପଦୀପେହି ଜୋତୟି ଧାତୁମନ୍ଦିରଂ ॥
ଇଚ୍ଚେୱମାଦିଂ ସୋ ରାଜା କତ୍ୱା କୁସଲସଞ୍ଚୟଂ ।
ଜହିତ୍ୱାନ ନିଜଂ ଦେହଂ ଦେୱିନ୍ଦପୁରମଜ୍ଝଗା ॥
ସୁନନ୍ଦୋ ନାମ ରାଜିନ୍ଦୋ ଆନନ୍ଦଜନନୋ ସତଂ ।
ତସ୍ସ’ତ୍ରଜୋ ତତୋ ଆସି ବୁଦ୍ଧସାସନମାମକୋ ॥
ସମ୍ମାନେତ୍ୱାନ ସୋ ଦନ୍ତଧାତୁଂ ଞେୟ୍ୟନ୍ତଦସ୍ସିନୋ ।
ମହତା ଭତ୍ତିୟୋଗେନ ଅଗା ଦେୱସହୱ୍ୟତଂ ॥
ତତୋ ପରଞ୍ଚ ଅଞ୍ଞେ’ପି ବହୱୋ ୱସୁଧାଧିପା ।
ଦନ୍ତଧାତୁଂ ମୁନିନ୍ଦସ୍ସ କମେନ ଅଭିପୂଜୟୁଂ ॥
ଗୁହସୀୱୱ୍ହୟୋ ରାଜା ଦୁରତିକ୍କମ ସାସନୋ ।
ତତୋ ରଜ୍ଜସିରିଂ ପତ୍ୱା ଅନୁଗଣ୍ହି ମହାଜନଂ ॥
ସପରତ୍ଥାନଭିଞ୍ଞେ ସୋ ଲାଭସକ୍କାରଲୋଲୁପେ ।
ମାୟାୱିନୋ ଅୱିଜ୍ଜନ୍ଧେ ନିଗନ୍ଠେ ସମୁପଟ୍ଠହି ॥
ୱସ୍ସାରତ୍ତେ ୟଥା ଚନ୍ଦୋ ମୋହକ୍ଖନ୍ଧେନ ଆୱଟୋ ।
ନାସକ୍ଖୀ ଗୁଣରଂସୀହି ଜଲିତୁଂ ସୋ ନରାସଭୋ ॥
ଧମ୍ମମଗ୍ଗା ଅପେତେ’ପି ପୱିଟ୍ଠେ ଦିଟ୍ଠିକାନନଂ ।
ତସ୍ମିଂ ସାଧୁପଥଂ ଅଞ୍ଞେ ନାତିୱତ୍ତିଂସୁ ପାଣିନୋ
ହେମତୋରଣମାଲାହି ଧଜେହି କଦଲିହି ଚ ।
ପୁପ୍ଫଗଘିୟେହି’ନେକେହି ସଜ୍ଜେତ୍ୱା ନାଗରା ପୁରଂ
ମଙ୍ଗଲତ୍ଥୁତି ଘୋସେହି ନଚ୍ଚଗୀତାଦିକେହି ଚ ।
ହେମରୂପିୟପୁପ୍ଫେହି ଗନ୍ଧଚୁଣ୍ଣାଦିକେହି ଚ ॥
ପୂଜେନ୍ତା ମୁନିରାଜସ୍ସ ଦାଠାଧାତୁଂ କୁଦାଚନଂ ।
ଅକଂସୁ ଏକନିଗ୍ଘୋସଂ ସଂୱଟ୍ଟମ୍ବୁଧିସନ୍ନିଭଂ ॥
ଉଗ୍ଘାଟେତ୍ୱା ନରିନ୍ଦୋ ସୋ ପାସାଦେ ସିହପଞ୍ଜରଂ ।
ପସ୍ସନ୍ତୋ ଜନମଦ୍ଦକ୍ଖୀ ପୂଜାୱିଧିପରାୟଣଂ ॥
ଅଥାମଚ୍ଚସଭାମଜେତ୍ଧ ରାଜା ୱିମ୍ଭୀତ ମାନସୋ ।
କୋତୁହଲାକୁଲୋ ହୁତ୍ୱା ଇଦଂ ୱଚନମବ୍ରୱୀ ॥
ଅଚ୍ଛେରକଂ କିମେତନ୍ନୁ କୀଦିସଂ ପାଟିହାରିୟଂ ।
ମମେତଂ ନଗରଂ କସ୍ମା ଛଣନିସ୍ସିତକଂ ଇତି ॥
ତତୋ ଅମଚ୍ଚୋ ଆଚିକ୍ଖି ମେଧାୱୀ ବୁଦ୍ଧମାମକୋ ।
ରାଜିନୋ ତସ୍ସ ସମ୍ବୁଦ୍ଧାନୁଭାୱମୱିଜାନତୋ ॥
ସବ୍ବାଭିଭୁସ୍ସବୁଦ୍ଦସ୍ସ ତନ୍ହାସଙ୍କୟଦସ୍ସିନୋ ।
ଏସା ଧାତୁ ମହାରାଜ ଖେମତ୍ଥେରେନ ଆହଟା ॥
ତଂ ଧାତୁଂ ପୂଜୟିତ୍ୱାନ ରାଜାନୋ ପୁବ୍ବକା ଇଧ ।
କଲ୍ୟାଣମିତ୍ତେ ନିସ୍ସାୟ ଦେୱକାୟମୁପାଗମୁଂ ॥
ନାଗରାପି ଇମେ ସବ୍ବେ ସମ୍ପରାୟ ସୁକତ୍ଥିକା ।
ପୂଜୟନ୍ତି ସମାଗମ୍ମ ଧାତୁଂ ତଂ ସତ୍ଥୁନୋ ଇତି ॥
ତସ୍ସାମଚ୍ଚସ୍ସ ସୋ ରାଜା ସୁତ୍ୱା ଧମ୍ମଂ ସୁଭାସିତଂ ।
ଦୁଲ୍ଲଦ୍ଧୀମଲମୁଜ୍ଝିତ୍ୱା ପସୀଦି ରତନତ୍ତୟେ ॥
ଧାତୁପୂଜଂ କରୋନ୍ତୋ ସୋ ରାଜା ଅଚ୍ଛରିୟା ୱହଂ ।
ତିତ୍ଥିୟେ ଦୁମ୍ମନେ’କାସି ସୁମନେ ଚେତରେ ଜନେ ॥
ଇମେ ଅହିରିକା ସବ୍ବେ ସଦ୍ଧାଦିଗୁଣୱଜ୍ଜିତା ।
ଥଦ୍ଧା ସଠା ଚ ଦୁପ୍ପଞ୍ଞା ସଗ୍ଗମୋକ୍ଖୱିବନ୍ଧକା ॥
ଇତି ସୋ ଚିନ୍ତୟିତ୍ୱାନ ଗୁହସୀୱୋ ନରାଧିପୋ ।
ପବ୍ବାଜେସି ସକା ରଟ୍ଠା ନିଗଣ୍ଠେ ତେ ଅସେସକେ ॥
ତତୋ ନିଗ୍ଣ୍ଠା ସବ୍ବେ’ପି ଘତସିତ୍ତାନଲା ୟଥା ।
କୋଧଗ୍ଗିଜଲିତା’ଗଞ୍ଛୁଂ ପୁରଂ ପାଟଲିପୁତ୍ତକଂ ॥
ତତ୍ଥ ରାଜା ମହାତେଜୋ ଜମ୍ବୁଦୀପସ୍ସ ଇସ୍ସରୋ ।
ପଣ୍ଡୁନାମୋ ତଦା ଆସି ଅନନ୍ତବଲୱାହଣୋ ॥
କୋଧନ୍ଧାଥ ନିଗଣ୍ଠା ତେ ସବ୍ବେ ପେସୁଞ୍ଞକାରକା ।
ଉପସଙ୍କମ୍ମ ରାଜାନଂ ଇଦଂ ୱଚନମବ୍ରୱୂଂ ॥
ସବ୍ବଦେୱମନୁସ୍ସେହି ୱନ୍ଦନୀୟେ ମହିଦ୍ଧିକେ ।
ସିୱବ୍ରହ୍ମାଦୟୋ ଦେୱେ ନିଚ୍ଚଂ ତୁମ୍ହେ ନମସ୍ସଥ ॥
ତୁୟ୍ହଂ ସାମନ୍ତଭୁପାଲୋ ଗୁହସୀୱୋ ପନାଧୁନା ।
ନିନ୍ଦନ୍ନୋ ତାଦିସେ ଦେୱେ ଛୱଟ୍ଠିଂ ୱନ୍ଦତେ ଇତି ॥
ସୁତ୍ୱାନ ୱଚନଂ ତେସଂ ରାଜା କୋଧୱସାନୁଗୋ ।
ସୂରଂ ସାମନ୍ତଭୂପାଲଂ ଚିତ୍ତୟାନମଥ’ବ୍ରୱୀ ॥
କଲିଙ୍ଗରଟ୍ଠଂ ଗନ୍ତ୍ୱାନ ଗୁହସୀୱମିଧାନୟ ।
ପୂଜିତଂ ତଂ ଛୱଟ୍ଠିଞ୍ଚ ତେନ ରତ୍ତିନ୍ଦିୱଂ ଇତି ॥
ଚିତ୍ତୟାନୋ ତତୋ ରାଜା ମହତିଂ ଚତୁରଙ୍ଗିନିଂ ।
ସନ୍ନୟହିତ୍ୱା ସକଂ ସେନଂ ପୁରା ତମ୍ହାଭିନିକ୍ଖମି ॥
ଗନ୍ତ୍ୱାନ ସୋ ମହୀପାଲୋ ସେନଙ୍ଗେହି ପୁରକ୍ଖତୋ ।
ଦନ୍ତପୁରସ୍ସାୱିଦୂରେ ଖନ୍ଧାୱାରଂ ନିୱେସୟି ॥
ସୁତ୍ୱା ଆଗମନଂ ତସ୍ସ କଲିଙ୍ଗୋ ସୋ ମହିପତି ।
ଗଜିନ୍ଦପାଭତାଦିହି ତଂ ତୋସେସି ନରାଧିପଂ ॥
ହିତଜ୍ଝାସୟତଂ ଞତ୍ୱା ଗୁହସୀୱସ୍ସ ରାଜିନୋ ।
ଦନ୍ତପୁରଂ ଚିତ୍ତୟାନୋ ସଦ୍ଧିଂ ସେନାୟ ପାୱିସି ॥
ପାକାରଗୋପୁରଟ୍ଟାଲପାସାଦଗଘିକଚିତ୍ତିତଂ ।
ଦାନସାଲାହି ସୋ ରାଜା ସମିଦ୍ଧଂ ପୁରମଦ୍ଦସ ॥
ତତୋ ସୋ ସୁମନୋ ଗନ୍ତ୍ୱା ପୱିଟ୍ଠୋ ରାଜମନ୍ଦିରଂ ।
ଗୁହସୀୱସ୍ସ ଆଚିକ୍ଖି ପଣ୍ଡୁରାଜସ୍ସ ସାସନଂ ॥
ସୁତ୍ୱାନ ସାସନଂ ତସ୍ସ ଦାରୁଣଂ ଦୁରତିକ୍କମଂ ।
ପସନ୍ନମୁଖୱଣ୍ଣୋ’ୱ ଚିତ୍ତୟାନଂ ସମବ୍ରୱୀ ॥
ସବ୍ବଲୋକହିତତ୍ଥାୟ ମଂସନେତ୍ତାଦିଦାନତୋ ।
ଅନପ୍ପକପ୍ପେ ସମ୍ଭାରେ ସମ୍ଭରିତ୍ୱା ଅତନ୍ଦିତୋ ॥
ଜେତ୍ୱା ନମୁଚିନୋ ସେନଂ ପତ୍ୱା ସବ୍ବାସୱକ୍ଖୟଂ ।
ଅନାୱରଣଞାଣେନ ସବ୍ବଧମ୍ମେସୁ ପାରଗୁ ॥
ଦିଟ୍ଠଧମ୍ମସୁକସ୍ସାଦଂ ଅଗଣେତ୍ୱାନ ଅତ୍ତନୋ ।
ଧମ୍ମନାୱାୟ ତାରେସି ଜନତଂ ୟୋ ଭୱଣ୍ଣୱା ॥
ଦେୱାତିଦେୱଂ ତଂ ବୁଦ୍ଧଂ ସରଣଂ ସବ୍ବପାଣିନଂ ।
ଜନୋ ହି ଅୱଜାନନ୍ତୋ ଅଦ୍ଧା ସୋ ୱଞ୍ଚିତୋ ଇତି ॥
ଇଚ୍ଚେୱମାଦିଂ ସୁତ୍ୱାନ ସୋ ରାଜା ସତ୍ଥୁୱଣ୍ଣନଂ ।
ଆନନ୍ଦସ୍ସୁପ୍ପବନ୍ଧେହି ପୱେଦେସି ପସନ୍ନତଂ ॥
ଗୁହସୀୱୋ ପସନ୍ନଂ ତଂ ଚିତ୍ତୟାନଂ ଉଦିକ୍ଖିୟ ।
ତେନ ସଦ୍ଧିଂ ମହଗ୍ଘଂ ତଂ ଅଗମା ଧାତୁମନ୍ଦିରଂ ॥
ହରିଚନ୍ଦନସମ୍ଭୁତଂ ଦ୍ୱାରବାହାଦିକେହି ଚ ।
ପୱାଳୱାଳମାଲାହି ଲମ୍ବମୁତ୍ତାଲତାହି ଚ ॥
ଇନ୍ଦନୀଲକୱାଟେହି ମଣିକିଙ୍କିଣିକାହି ଚ ।
ସୋୱଣ୍ଣକଣ୍ଣମାଲାହି ସୋଭିତଂ ମଣିଥୂପିକଂ ॥
ଉଚ୍ଚଂ ୱେଲୁରିୟୁବ୍ଭାସି ଛଦନଂ ମକରାକୁଲଂ ।
ଧାତୁମନ୍ଦିରମଦ୍ଦକ୍ଖି ରତନୁଜ୍ଜଲ ପୀଠକଂ ॥
ତତୋ ସେତାତପତ୍ତସ୍ସ ହେଟ୍ଠା ରତନଚିତ୍ତିତଂ ।
ଦିସ୍ୱା ଧାତୁକରନ୍ଡଞ୍ଚ ତୁଟ୍ଠୋ ୱିମ୍ଭୟମଜ୍ଝଗା ॥
ତତୋ କଲିଙ୍ଗନାଥୋ ସୋ ୱିୱରିତ୍ୱା କରଣ୍ଡକଂ ।
ମହୀତଲେ ନିହନ୍ତ୍ୱାନ ଦକ୍ଖିଣଂ ଜାନୁମଣ୍ଡଲଂ ॥
ଅଞ୍ଜଲିଂ ପଗ୍ଗହେତ୍ୱାନ ଗୁଣେ ଦସବଲାଦିକେ ।
ସରିତ୍ୱା ବୁଦ୍ଧସେଟ୍ଠସ୍ସ ଅକାସି ଅଭିୟାଚନଂ ॥
ଗଣ୍ଡମ୍ବରୁକ୍ଖମୂଲମ୍ହି ତୟା ତିତ୍ଥୀୟମଦ୍ଦନେ ।
ୟମକଂ ଦସ୍ସୟନ୍ତେନ ପାଟିହାରିୟମବ୍ଭୁତଂ ॥
ପୁବ୍ବକାୟାଦିନିକ୍ଖନ୍ତଜଲାନଲସମାକୁଲଂ ।
ଚକ୍କୱାଳଙ୍ଗଣଂ କତ୍ୱା ଜନା ସବ୍ବେ ପସାଦିତା ॥
ଦେସେତ୍ୱାନ ତୟୋ ମାସେ ଅଭିଧମ୍ମଂ ସୁଧାସିନଂ ।
ନଗରଂ ଓତରନ୍ତେନ ସଙ୍କସ୍ସଂ ତାୱତିଂସତୋ ॥
ଛତ୍ତୱାମରସଙ୍ଖାଦିଗାହକେହି ଅନେକଧା ।
ବ୍ରହ୍ମଦେୱାସୁରାଦୀହି ପୂଜିତେନ ତୟା ପନ ॥
ଠତ୍ୱାନ ମଣିସୋପାଣେ ୱିସ୍ସକମ୍ମାଭିନିମ୍ମିତେ ।
ଲୋକୱିୱରଣଂ ନାମ ଦସ୍ସିତଂ ପାଟିହାରିୟଂ ॥
ତଥାନେକେସୁ ଠାନେସୁ ମୁନିରାଜ ତୟାପୁନ ।
ବହୂନି ପାଟିହିରାନି ଦସ୍ସିତାନି ସୟମ୍ଭୁନା ॥
ପାଟିହାରିୟମଜ୍ଜାପି ସଗ୍ଗମୋକ୍ଖସୁଖାୱହଂ ।
ପସ୍ସନ୍ତାନଂ ମନୁସ୍ସାନଂ ଦସ୍ସନୀୟଂ ତୟା ଇତି ॥
ଅବ୍ଭୁଗ୍ଗନ୍ତ୍ୱା ଗଗଣ କୁହରଂ ଚନ୍ଦଲେଖାଭିରାମା,
ୱିସ୍ସଜ୍ଜେନ୍ତି ରଜତ ଧୱଲା ରଂସିୟୋ ଦନ୍ତଧାତୁ ।
ଧୂପାୟନ୍ତି ସପଦି ବହୁଧା ପଜ୍ଜଲନ୍ତୀ ମୁହୁତ୍ତଂ,
ନିବ୍ବାୟନ୍ତୀ ନୟନସୁଭଗଂ ପାଟିହୀରଂ ଅକାସି ॥
ଅଚ୍ଛେରଂ ତଂ ପରମ ରୁଚିରଂ ଚିତ୍ତୟାନୋ ନରିନ୍ଦୋ,
ଦିସ୍ୱା ହଟ୍ଠୋ ଚିରପରିଚିତଂ ଦିଟ୍ଠିଜାଲଂ ଜହିତ୍ୱା ।
ଗନ୍ତ୍ୱା ବୁଦ୍ଧଂ ସରଣମସମଂ ସବ୍ବସେଣୀହି ସଦ୍ଧିଂ,
ଅଗ୍ଗଂ ପୁଞ୍ଞଂ ପସୱି ବହୁଧା ଧାତୁସମ୍ମାନନାୟ ॥
ଦୁତିୟୋ ପରିଚ୍ଛେଦୋ
ତତୋ କଲିଙ୍ଗାଧିପତିସ୍ସ ତସ୍ସସୋଚିତ୍ତୟାନୋପରମପ୍ପତୀତୋ ।
ତଂ ସାସନଂ ପଣ୍ଡୁନରାଧିପସ୍ସ ଞାପେସି ଧୀରୋ ଦୁରତିକ୍କମଂ’ତି ॥
ରାଜାତତୋ ଦନ୍ତପୁରଂ ଧଜେହି ପୁପ୍ଫେହି ଧୂପେହି ଚ ତୋରଣେହି ।
ଅଲଙ୍କରିତ୍ୱାନ ମହାୱିତାନ ନିୱାରିତାଦିଚ୍ଚମରୀଚିଜାଲଂ ॥
ଅସ୍ସୁପ୍ପବନ୍ଧାୱୁତଲୋଚନେହି ପୁରକ୍ଖତୋ ନେଗମ ନାଗରେହି ।
ସମୁବ୍ବହନ୍ତୋ ସିରସା ନିଜେନ ମହାରହଂ ଧାତୁକରଣ୍ଡକଂ ତଂ ॥
ସମୁସ୍ସିତୋଦାର ସିତାତପତ୍ତଂ ସଙ୍ଖୋଦରୋଦାତ ତୁରଙ୍ଗୟୁତ୍ତଂ ।
ରଥଂ ନୱାଦିଚ୍ଚସମାନୱଣ୍ଣ ମାରୁୟ୍ହ ଚିତ୍ତତ୍ଥରଣାଭିରାମଂ ॥
ଅନେକସଙ୍ଖେହି ବଲେହି ସଦ୍ଧିଂ ୱେଲାତିୱତ୍ତମ୍ବୁଧିସନ୍ନିଭେହୀ ।
ନିୱତ୍ତମାନସ୍ସ ବହୁଜ୍ଜନସ୍ସ ୱିନାପି ଦେହଂ ମନସାନୁୟାତୋ
ସୁସନ୍ଥତଂ ସବ୍ବଧିୱାଲୁକାହି ସୁସଜ୍ଜିତଂ ପୁଣ୍ଣ ଘଟାଦିକେହି ।
ପୁପ୍ଫାଭିକିଣ୍ଣଂ ପଟିପଜ୍ଜି ଦୀଘଂ ସୁୱିତ୍ଥତଂ ପାଟଲିପୁତ୍ତମଗ୍ଗଂ ॥
କଲିଙ୍ଘନାଥୋ କୁସୁମାଦିକେହି ନଚ୍ଚେହି ଗୀତେହି ଚ ୱାଦିତେହି ।
ଦିନେ ଦିନେ ଅଦ୍ଧନି ଦନ୍ତଧାତୁଂ ପୂଜେସି ସଦ୍ଧିଂ ୱନଦେୱତାହି ॥
ସୁଦୁଗ୍ଗମଂ ସିନ୍ଧୁମହୀଧରେହି କମେନ ମଦ୍ଧାନମତିକ୍କମିତ୍ୱା ।
ଆଦାୟ ଧାତୁଂ ମନୁଜାଧିନାଥୋ ଅଗା ପୁରଂ ପାଟଲି ପୁତ୍ତନାମଂ ॥
ରାଜାଧିରାଜୋ’ଥ ସଭାୟ ମଜ୍ଝେ ଦିସ୍ୱାନ ତଂ ୱୀତଭୟଂ ୱିସଙ୍କଂ ।
କଲିଙ୍ଗରାଜଂ ପଟିଘାଭିଭୁତୋ ଅଭାସି ପେସୁଞ୍ଞକରେ ନିଗଣ୍ଠେ
ଦେୱେ ଜହିତ୍ୱାନ ନମସ୍ସନୀୟେ ଛୱଟ୍ଠିମେତେନ ନମସ୍ସିତଂ’ତଂ ।
ଅଙ୍ଗାରରାସିମ୍ହି ସଜୋତିଭୂତେ ନିକ୍ଖିପ୍ପ ଖିପ୍ପଂ ଦହଥାଧୁନେତି ॥
ପହଟ୍ଠଚିତ୍ତା’ୱତତୋ ନିଗଣ୍ଠାରାଜଙ୍ଗଣେ ତେ ମହତିଂ ଗଭୀରଂ ।
ୱୀତଚ୍ଚିକଙ୍ଗାରକ ରାସି ପୁଣ୍ଣଂ ଅଙ୍ଗାରକାସୁଂ ଅଭିସଙ୍ଖରିଂସୁ ॥
ସମନ୍ତତୋ ପଜ୍ଜଲିତାୟ ତାୟ ସଜୋତିୟା ରୋରୁୱଭେରୱାୟ ।
ମୋହନ୍ଧଭୁତା ଅଥ ତିତ୍ଥିୟା ତେ ତଂ ଦନ୍ତଧାତୁଂ ଅଭିନିକ୍ଖିପିଂସୁ ॥
ତସ୍ସାନୁଭାୱେନ ତମଗ୍ଗୀରାସିଂ ହେତ୍ୱା ସରୋଜଂ ରଥଚକ୍କମତ୍ତଂ ।
ସମନ୍ତତୋ ଉଗ୍ଗତରେଣୁଜାଲ ମୁଟ୍ଠାସି କିଞ୍ଜକ୍ଖ ଭରାଭିରାମଂ ॥
ତସ୍ମିଂ ଖଣେ ପଙ୍କଜ କଣ୍ଣିକାୟ ପତିଟ୍ଠହିତ୍ୱା ଜିନଦନ୍ତଧାତୁ ।
କୁନ୍ଦାୱଦାତାହି ପଭାହି ସବ୍ବା ଦିସା ପଭାସେସି ପଭସ୍ସରାହି ॥
ଦିସ୍ୱାନ ତଂ ଅଚ୍ଛରିୟଂ ମନୁସ୍ସା ପସନ୍ନଚିତ୍ତା ରତନାଦିକେହି ।
ସମ୍ପୂଜୟିତ୍ୱା ଜିନଦନ୍ତଧାତୁଂ ସକଂ ସକଂ ଦିଟ୍ଠିମୱୋସ୍ସଜିଂସୁ ॥
ସୋ ପଣ୍ଡୁରାଜା ପନ ଦିଟ୍ଠିଜାଲଂ ଚିରାନୁବଦ୍ଧଂ ଅପରିଚ୍ଚଜନ୍ତୋ ।
ପତିଟ୍ଠପେତ୍ୱା’ଧିକରଞ୍ଞମେତଂ କୁଟେନ ଘାତାପୟି ଦନ୍ତଧାତୁଂ ॥
ତସ୍ସଂ ନିମୁଗ୍ଗା’ଧିକରଞ୍ଞମେସା ଉପଡ୍ଢଭାଗେ ନଚ ଦିସ୍ସମାନା ।
ପୁବ୍ବାଚଲଟ୍ଠୋ’ୱ ସୁଧାମରୀଚି ଜୋତେସି ରଂସୀହି ଦିସା ସମନ୍ତା ॥
ଦିସ୍ୱାନୁଭାୱଂ ଜିନଦନ୍ତଧାତୁ ୟାପଜ୍ଜି ସୋ ୱିମ୍ଭୟ ମଗ୍ଗରାଜା ।
ଏକୋ’ଥ ଇସ୍ସାପସୁତୋ ନିଗଣ୍ଠୋ ତଂ ରାଜରାଜାନମିଦଂ ଅୱୋଚ ॥
ରାମାଦୟୋ ଦେୱ ଜନଦ୍ଦନସ୍ସ ନାନାୱତାରା ଭୁୱନେ ଅହେସୁଂ ।
ତସ୍ସେକଦେସୋ’ଚ ଇଦଂ ଛୱଟ୍ଠିନୋଚେ’ନୁଭାୱୋକଥମୀଦିସୋତି ॥
ଅଦ୍ଧା ମନୁସ୍ସତ୍ତମୁପାଗତସ୍ସ ଦେୱସ୍ସ ପଚ୍ଛା ତିଦିୱଂ ଗତସ୍ସ ।
ଦେହେକଦେସୋ ଠପିତୋ ହିତତ୍ଥମେତନ୍ତି ସଚ୍ଚଂୱଚନଂଭୱେୟ୍ୟ ॥
ସଂୱଣ୍ଣୟିତ୍ୱାନ ଗୁଣେ ପହୂତେ ନାରାୟଣସ୍ସ’ସ୍ସମହିଦ୍ଧିକସ୍ସ ।
ନିମୁଗ୍ଗମେତ୍ତା’ଧିକରଞ୍ଞମେତଂସମ୍ପସ୍ସତୋ ମେବହିନୀହରିତ୍ୱା ॥
ସମ୍ପାଦୟିତ୍ୱାନ ମହାଜନାନଂ ମୁଖାନି ପଙ୍କେରୁହସୁନ୍ଦରାନି ।
ୟଟିଚ୍ଛିତଂ ଗଣ୍ହଥ ୱତ୍ଥୁଜାତଂ ଇଚ୍ଚାହ ରାଜା ମୁଖରେ ନିଗଣ୍ଠେ ॥
ତେ ତିତ୍ଥିୟା ୱିଣହୁସୁରଂ ଗୁଣେହି ୱିଚିତ୍ତ ରୂପେହି ଅଭିତ୍ଥୱିତ୍ୱା ।
ତୋୟେନ ସିଞ୍ଚିଂସୁ ସଠା ତଥାପି ଠିତପ୍ପଦେସା ନ ଚଲିତ୍ଥ ଧାତୁ ॥
ଜିଗୁଚ୍ଛମାନୋ ଅଥ ତେ ନିଗଣ୍ଠେ ସୋ ଧାତୁୟାନୀହରଣେ ଉପାୟଂ ।
ଅନ୍ୱେସମାନୋ ୱସୁଧାଧିନାଥୋ ଭେରିଂ ଚରାପେସି ସକେ ପୁରମ୍ହି ॥
ନିମୁଗ୍ଗମେତ୍ଥା’ଧିକରଞ୍ଞମଜ୍ଜି ୟୋ ଧାତୁମେତଂ ବହି ନୀହରେୟ୍ୟ ।
ଲଦ୍ଧାନ ସୋ ଇସ୍ସରିୟଂ ମହନ୍ତଂ ରଞ୍ଞୋସକାସାସୁଖମେସ୍ସତୀତି
ସୁତ୍ୱା ନ ତଂ ଭେରିରୱଂଉଳାରଂପୁଞଞ୍ଞତ୍ଥିକୋବୁଦ୍ଧବଲେପସନ୍ନୋ ।
ତସ୍ମିଂ ପୁରେ ସେଟ୍ଠିସୁତୋ ସୁଭଦ୍ଦୋ ପାୱେକ୍ଖିରଞ୍ଞୋ ସମିତିଂ ପଗବ୍ଭୋ ॥
ତମଗ୍ଗରାଜଂ ଅଥ ସୋ ନମିତ୍ୱା ସାମାଜିକାନଂ ହଦୟଙ୍ଗମାୟ ।
ଭାସାୟ ସବ୍ବଞ୍ଞୁଗୁଣପ୍ପଭାୱଂ ୱଣ୍ଣେସି ସାରଜ୍ଜୱିମୁତ୍ତ ଚିତ୍ତୋ ॥
ଭୁମିଂ କିଣିତ୍ୱା ମହତା ଧନେନ ମନୋରମଂ ଜେତୱନଂ ୱିହାରଂ ।
ୟୋ କାରୟିତ୍ୱାନ ଜିନସ୍ସ ଦତ୍ୱା ଉପଟ୍ଠହି ତଂ ଚତୁପଚ୍ଚୟେହି ॥
ଅନାଥପିଣ୍ଡିପ୍ପଦସେଟ୍ଠିସେଟ୍ଠୋସୋଦିଟ୍ଠଧମ୍ମୋପପିତାମହୋମେ ।
ତିଲୋକନାଥେ ମମ ଧମ୍ମରାଜେ ତୁମ୍ହେ’ଧୁନାପସ୍ସଥଭତ୍ତିଭାରଂ ॥
ଇତ୍ଥଂ ନଦିତ୍ୱାନ ପହୂତପଞେଞ୍ଞା କତ୍ୱାନ ଏକଂସମଥୁତ୍ତରୀୟଂ ।
ମହୀତଲଂ ଦକ୍ଖିଣଜାନୁକେନ ଆହଚ୍ଚ ବଦ୍ଧଞ୍ଜଲିକୋ ଅୱୋଚ ॥
ଛଦ୍ଦନ୍ତନାଗୋ ସୱିସେନ ୱିଦ୍ଧୋ ସଲ୍ଲେନ ୟୋ ଲୋହିତମକ୍ଖି ତଙ୍ଗୋ ।
ଛବ୍ବଣ୍ଣରଂସୀହି ସମୁଜ୍ଜଲନ୍ତେ ଛେତ୍ୱାନ ଲୁଦ୍ଦାୟ ଅଦାସି ଦନ୍ତେ ॥
ସସୋ’ପି ହୁତ୍ୱାନ ୱିସୁଦ୍ଧସୀଲୋ ଅଜ୍ଝତ୍ତଦାନାଭିରତୋ ଦ୍ୱିଜାୟ ।
ୟୋ’ଦଜ୍ଜିଦେହମ୍ପି ସକଂ ନିପଚ୍ଚ ଅଙ୍ଗାରରାସିମ୍ହି ବୁଭୁକ୍ଖିତାୟ ॥
ୟୋ ବୋଧିୟା ବାହିରୱତ୍ଥୁଦାନା ଅତିତ୍ତରୂପୋ ସିୱିରାଜ ସେଟ୍ଠୋ ।
ଅଦାସି ଚକ୍ଖୂନି ପଭସ୍ସରାନି ଦ୍ୱିଜାୟ ଜିଣ୍ଣାୟ ଅଚକ୍ଖୁକାୟ ॥
ୟୋଖନ୍ତିୱାଦୀ’ପି କଲାବୁରାଜେ ଛେଦାପୟନ୍ତେ’ପି ସହତ୍ଥପାଦଂ ।
ପରିପ୍ଲୁତଙ୍ଗୋରୁଧିରେ ତିତିକ୍ଖିମେତ୍ତାୟମାନୋ ୟସଦାୟକେ’ୱ ॥
ୟୋ ଧମ୍ମପାଲୋ ଅପି ସତ୍ତମାସ ଜାତୋପଦୁଟ୍ଠେ ଜନକେସକମ୍ହି ।
କାରାପୟନ୍ତେ ଅସିମାଲକମ୍ମଂ ଚିତ୍ତଂ ନ ଦୂସେସି ପତାପରାଜେ ॥
ସାଖାମିଗୋ ୟୋ ଅସତା ପୁମେନ ୱନେ ପପାତା ସୟମୁଦ୍ଧଟେନ ।
ସିଲାୟ ଭିନ୍ନେ’ପି ସକେ ଲଲାଟେ ତଂ ଖେମଭୁମିଂ ଅନୟିତ୍ଥମୂଳ୍ହଂ ॥
ରୁଟ୍ଠେନ ମାରେନ’ଭିନିମ୍ମିତମ୍ପି ଅଙ୍ଗାରକାସୁଂ ଜଲିତଂ ୱିହିଜ୍ଜ ।
ସମୁଟ୍ଠିତେ ସଜ୍ଜୁମହାରୱିନ୍ଦେ ଠତ୍ୱାନ ୟୋ ସେଟ୍ଠି ଅଦାସି ଦାନଂ ॥
ମିଗେନ ୟେନାପେୱିଜଞ୍ଞମେକଂ ଭୀତଂୱଧାମୋଚୟିତୁଂକୁରଙ୍ଗିଂ ।
ଆଘାତନେ ଅତ୍ତସିରଂଠପେତ୍ୱାପମୋଚିତା’ଞ୍ଞ୍ଞପିପାଣିସଙ୍ଘା ॥
ୟୋ ସତ୍ତୱସ୍ସୋ ୱିସିଖାୟ ପଂସୁ କୀଳାପରୋ ସମ୍ଭୱନାମକୋ’ପି ।
ସବ୍ବଞ୍ଞୁଲୀଳ୍ହାୟ ନିଗୁଳ୍ହପଞ୍ହଂ ପୁଟ୍ଠୋ ୱିୟାକାସି ସୁଚୀରତେନ ॥
ହିତ୍ୱା ନିକନ୍ତିଂ ସକଜୀୱିତେ’ପି ବଦ୍ଧାସକୁଚ୍ଛିମ୍ହି ଚ ୱେତ୍ତୱଲ୍ଲିଂ ।
ସାଖାମିଗେ ନେକସହସ୍ସସଙ୍ଖେ ୱଧାପମୋଚେସି କପିସ୍ସରୋୟୋ ॥
ସନ୍ତପ୍ପୟଂ ଧମ୍ମସୁଧାରସେନ ୟୋ ମାନୁସେ ତୁଣ୍ଡିଲସୂକରୋ’ପି ।
ଇସୀ’ୱ କତ୍ୱା ଅଥ ଞାୟଗନ୍ଥଂ ନିଜଂ ପୱତ୍ତେସି ଚିରାୟ ଧମ୍ମଂ ॥
ପଚ୍ଚତ୍ଥିକଂ ପୁଣ୍ଣକୟକ୍ଖମୁଗ୍ଗଂ ମହିଦ୍ଧିକଂ କାମଗୁଣେସୁ ଗିଦ୍ଧଂ ।
ୟୋ ତିକ୍ଖପଞ୍ଞୋୱିଧୁରାଭିଧାନୋଦମେସି କାଳାଗିରିମତ୍ତକମ୍ହି ॥
କୁଲାୱସାୟି ଅୱିରୂଳ୍ହପକ୍ଖୋ ୟୋ ବୁଦ୍ଧିମା ୱଟ୍ଟକପୋତକୋ’ପି ।
ସଚ୍ଚେନ ଦାୱଗ୍ଗିମଭିଜ୍ଜଲନ୍ତଂ ୱସ୍ସେନ ନିବ୍ବାପୟି ୱାରିଦୋ’ୱ ॥
ୟୋ ମଚ୍ଛରାଜାପି ଅୱୁଟ୍ଠିକାଲେଦିସ୍ୱାନମଚ୍ଛେ ତସିତେକିଲନ୍ତେ ।
ସଚ୍ଚେନୱାକ୍ୟେନମହୋଘପୁଣ୍ଣଂମୁହୁତ୍ତମତ୍ତେନଅକାସିରଟ୍ଠଂ ॥
ୱିଚିତ୍ତହତ୍ଥସ୍ସ ରଥାଦିକାନି ୱସୁନ୍ଧରା କମ୍ପନ କାରଣାନି ।
ପୁତ୍ତେ’ନୁଜାତେ ସଦିସେଚଦାରେୟୋ’ଦଜ୍ଜିୱେସ୍ସନ୍ତରଜାତିୟମ୍ପି ॥
ବୁଦ୍ଧୋ ଭୱିତ୍ୱା ଅପି ଦିଟ୍ଠଧମ୍ମ ସୁଖାନପେକ୍ଖୋ କରୁଣାନୁୱତ୍ତୀ ।
ସବ୍ବଂ ସହନ୍ତୋ ଅୱମାନନାଦିଂ ୟୋଦୁକ୍କରଂ ଲୋକହିତଂଅକାସି ॥
ବଲେନ ସଦ୍ଧିଂ ଚତୁରଙ୍ଗିକେନ ଅଭିଦ୍ଦୱନ୍ତଂ ଅତିଭିଂସନେନ ।
ଅଜେୟ୍ୟସତ୍ଥଂ ପରମିଦ୍ଧିପତ୍ତଂ ଦମେସି ୟୋ ଆଲୱକମ୍ପୀ ୟକ୍ଖଂ ॥
ଦେହାଭିନିକ୍ଖନ୍ତ ହୁତାସନଚ୍ଚି ମାଲାକୁଲଂ ବ୍ରହ୍ମଭୱଂ କରିତ୍ୱା ।
ଭେତ୍ୱାନ ଦିଟ୍ଠିଂ ସୁଚିରାନୁବଦ୍ଧଂ ଦମେସି ୟୋ ବ୍ରହ୍ମୱରଂ ମୁନିନ୍ଦୋ ॥
ଅଚ୍ଚଙ୍କୁସଂ ଦାନସୁଧୋତ ଗଣ୍ଡଂ ନିପାତିତଟ୍ଠାଲକ ଗୋପୁରାଦିଂ ।
ଧାୱନ୍ତମଗ୍ଗେ ଧନପାଲହତ୍ଥିଂ ଦମେସି ୟୋ ଦାରୁଣମନ୍ତକଂ’ୱ ॥
ମନୁସ୍ସରତ୍ତାରୁଣପାଣିପାଦମୁକ୍ଖିପ୍ପ ଖଗ୍ଗଂ ଅନୁବନ୍ଧମାନଂ ।
ମହାଦୟୋ ଦୁପ୍ପସହଂ ପରେହି ଦମେସି ୟୋ ଅଙ୍ଗୁଲିମାଲଚୋରଂ ॥
ୟୋ ଧମ୍ମରାଜା ୱିଜିତାରିସଙ୍ଘୋ ପୱତ୍ତୟନ୍ତୋ ୱରଧମ୍ମଚକ୍କଂ ।
ସଦ୍ଧମ୍ମ ସଞ୍ଞଂ ରତନାକରଞ୍ଚ ଓଗାହୟୀ ସଂ ପରିସଂ ସମଗ୍ଗଂ ॥
ତସ୍ସେୱ ସଦ୍ଧମ୍ମ ୱରାଧିପସ୍ସତଥାଗତସ୍ସ’ପ୍ପଟିପୁଗ୍ଗଲସ୍ସ ।
ଅନନ୍ତଞାଣସ୍ସ ୱିସାରଦସ୍ସ ଏସା ମହାକାରୁଣିକସ୍ସ ଧାତୁ ॥
ଅନେନ ସଚ୍ଚେନ ଜିନସ୍ସ ଧାତୁ ଖିପ୍ପଂ ସମାରୁୟ୍ହ ନଭନ୍ତରାଳଂ ।
ସୁଧଂସୁଲେଖେୱ ସମୁଜ୍ଜଲନ୍ତି କଙ୍ଖଂ ୱିନୋଦେତୁ ମହାଜନସ୍ସ ॥
ତସ୍ମିଂ ଖଣେ ସା ଜିନଦନ୍ତଧାତୁ ନଭଂ ସମୁଗ୍ଗମ୍ମ ପଭାସୟନ୍ତୀ ।
ସବ୍ବା ଦିସା ଓସଧିତାରକା’ୱ ଜନଂ ପସାଦେସି ୱ୍ତିଣ୍ଣକଙ୍ଖଂ ॥
ଅଥୋତରିତ୍ୱା ଗଗନଙ୍ଗଣମ୍ହା ସା ମତ୍ଥକେ ସେଟ୍ଠିସୁତସ୍ସ ତସ୍ସ ।
ପତିଟ୍ଠହିତ୍ୱାନ ସୁଧାଭିସିତ୍ତଗତ୍ତଂ’ୱ ତଂ ପୀଣୟି ଭତ୍ତିତିନ୍ନଂ ॥
ଦସ୍ୱାନ ତଂ ଅଚ୍ଛରିୟଂ ନିଗଣ୍ଠା ଇଚ୍ଚବ୍ରୱୁଂ ପଣ୍ଡୁନରାଧିପଂ ତଂ ।
ୱିଜ୍ଜାବଲଂ ସେଟ୍ଠିସୁତସ୍ସ ଏତଂ ନ ଧାତୁୟା ଦେୱ ଅୟମ୍ପଭାୱୋ ॥
ନିସମ୍ମ ତେସଂ ୱଚନଂ ନରିନ୍ଦୋ ଇଚ୍ଚବ୍ରୱୀ ସେଟ୍ଠିସୁତଂ ସୁଭଦ୍ଦଂ ।
ୟଥା ଚ ଏତେ ଅଭିସଦ୍ଦହେୟ୍ୟୁଂ ତଥାୱିଧଂ ଦସ୍ସୟ ଇଦ୍ଧିମଞ୍ଞଂ ॥
ତତୋ ସୁଭଦ୍ଦୋ ତପନୀୟପତ୍ତେ ସୁଗନ୍ଧିସୀତୋଦକପୂରିତମ୍ହି ।
ୱଡ୍ଢେସି ଧାତୁଂ ମୁନିପୁଙ୍ଗୱସ୍ସ ଅନୁସ୍ସରନ୍ତୋ ଚରିତବ୍ଭୁତାନି ॥
ସା ରାଜହଂ ସୀ’ୱ ୱିଧାୱମାନା ସୁଗନ୍ଧିତୋୟମ୍ହି ପଦକ୍ଖିଣେନ ।
ଉମ୍ମୁଜ୍ଜମାନା ଚ ନିମୁଜ୍ଜମାନା ଜନେ ପମୋଦସ୍ସୁଧରେ ଅକାସି ॥
ତତୋ ଚ କାସୁଂ ୱିସିଖାୟମଜ୍ଝେ କତ୍ୱା ତହିଂ ଧାତୁମଭିକ୍ଖିପିତ୍ୱା ।
ପଂସୂହି ସମ୍ମା ଅଭିପୂରୟିତ୍ୱା ବହୂହି ମଦ୍ଦାପୟି କୁଞ୍ଜରେହି ॥
ଭେତ୍ୱା ମହିଂଉଟ୍ଠହି ଚକ୍କମତ୍ତଂ ୱିରାଜମାନଂ ମଣିକଣ୍ଣିକାୟ ।
ପଭସ୍ସରଂ ରୂପିୟକେସରେହି ସରୋରୁହଂ କଞ୍ଚନପତ୍ତପାଳିଂ ॥
ପତିଟ୍ଠଭିତ୍ୱାନ ତହିଂ ସରୋଜେ ମନ୍ଦାନିଲାୱତ୍ତିତରେଣୁ ଜାଲେ ।
ଓଭାସୟନ୍ତି’ୱ ଦିସା ପଭାହି ଦିଟ୍ଠା ମୁହୁତ୍ତେନ ଜିନସ୍ସଧାତୁ ॥
ଖିପିଂସୁ ୱତ୍ଥାଭରଣାନି ମଚ୍ଚା ପୱସ୍ସୟୁଂ ପୁପ୍ଫମୟଞ୍ଚ ୱସ୍ସଂ ।
ଉକ୍କୁଟ୍ଠିସଦ୍ଦେହି ଚ ସଧୁକାରନାଦେହି ପୁଣ୍ଣଂ ନଗରଂ ଅକଂସୁ ॥
ତେ ତିତ୍ଥିୟା ତଂ ଅଭିୱଞ୍ଚନଂ’ତି ରାଜାଧିରାଜଂ ଅଥ ସଞ୍ଞପେତ୍ୱା ।
ଜିଗୁଚ୍ଛନୀୟେ କୁଣପାଦିକେହି ଖିପିଂସୁ ଧାତୁଂ ପରିଖାୟ ପିଟ୍ଠେ ॥
ତସ୍ମିଂ ଖଣେ ପଞ୍ଚୱିଧମ୍ବୁଜେହିସଞ୍ଛାଦିତାହଂସଗଣୋପଭୁତ୍ତା ।
ମଧୁବ୍ବତାଲୀ ୱିରୁତାଭିରାମା ଅହୋସି ସା ପୋକ୍ଖରଣୀ’ୱ ନନ୍ଦା ॥
ଗଜାଧିପା କୋଞ୍ଞ୍ଚରୱଂ ରୱିଂସୁ କରିଂସୁ ହେସାନିନଦଂ ତୁରଙ୍ଗା ।
ଉକ୍କୁଟ୍ଠିନାଦଂ ଅକରିଂସୁ ମଚ୍ଚା ସୁୱାଦିତା ଦୁନ୍ଦୁଭିଆଦୟୋ’ପି ॥
ଥୋମିଂସୁ ମଚ୍ଚା ଥୁତିଗୀତକେହି ନଚ୍ଚିଂସୁ ଓତ୍ତପ୍ପୱିଭୁସନା’ପି ।
ୱତ୍ଥାନି ସୀସେ ଭମୟିଂସୁ ମତ୍ତା ଭୁଜାନି ପୋଠେସୁମୁଦଗ୍ଗଚିତ୍ତା ॥
ଧୂପେହି କାଲାଗରୁସମ୍ଭୱେହି ଘନାୱନଦ୍ଧଂ’ୱ ନଭଂ ଅହୋସି ।
ସମୁସ୍ସିତାନେକଧଜାୱଲୀହି ପୁରଂ ତଦା ୱତ୍ଥମୟଂ’ୱ ଆସି ॥
ଦିସ୍ୱା ତମଚ୍ଛେରମଚିନ୍ତନୀୟଂ ଆମୋଦିତାମଚ୍ଚଗଣା ସମଗ୍ଗା ।
ଅତ୍ଥେ ନିୟୋଜେତୁ ମୁପେଚ୍ଚ ତସ୍ସ ୱଦିଂସୁ ପଣ୍ଡୁସ୍ସ ନରାଧିପସ୍ସ ॥
ଦିସ୍ୱାନ ୟୋ ଈଦିସକମ୍ପି ରାଜ ଇଦ୍ଧାନୁଭାୱଂ ମୁନିପୁଙ୍ଗୱସ୍ସ ।
ପସାଦମତ୍ତମ୍ପି କରେୟ୍ୟ ନୋଚେ କିମତ୍ଥିୟା ତସ୍ସ ଭୱେୟ୍ୟ ପଞ୍ଞା ॥
ପସାଦନୀୟେସୁ ଗୁଣେସୁ ରାଜ ପସାଦନଂ ସାଧୁଜନସ୍ସ ଧମ୍ମୋ ।
ପୁପ୍ଫନ୍ତି ସବ୍ବେ ସୟମେୱ ୱନ୍ଦେ ସମୁଗ୍ଗତେ କୋମୁଦକାନନାନି ॥
ୱାଚାୟ ତେସଂ ପନ ଦୁମ୍ମତୀନଂ ମା ସଗ୍ଗମଗ୍ଗଂ ପଜହିତ୍ଥ ରାଜ ।
ଅନ୍ଧେ ଗହେତ୍ୱା ୱିଚରେୟ୍ୟ କୋ ହି ଅନ୍ୱେସମାନୋ ସୁପଥଂ ଅମୂଳ୍ହୋ ॥
ନରାଧିପା କପ୍ପିଣ ବିମ୍ବିସାର ସୁଦ୍ଧୋଦନାଦି ଅପି ତେଜୱନ୍ତା ।
ତଂ ଧମ୍ମରାଜଂ ସରଣଂ ଉପେଚ୍ଚ ପିୱିଂସୁ ଧମ୍ମାମତମାଦରେନ ॥
ସହସ୍ସନେତ୍ତୋ ତିଦସାଧିପୋ’ପି ଖୀଣାୟୁକୋ ଖିଣଭୱଂ ମୁନିନ୍ଦଂ ।
ଉପେଚ୍ଚ ଧମ୍ମଂ ୱିମଲଂ ନିସମ୍ମ ଅଲତ୍ଥ ଆୟୁଂ ଅପି ଦିଟ୍ଠଧମ୍ମୋ ॥
ତୁୱମ୍ପି ତସ୍ମିଂ ଜିତପଞ୍ଚମାରେ ଦେୱାତିଦେୱେ ୱରଧମ୍ମରାଜେ ।
ସଗ୍ଗାପୱଗ୍ଗାଧିଗମାୟ ଖିପ୍ପଂ ଚିତ୍ତଂ ପସାଦେହି ନରାଧିରାଜ ॥
ସୁତ୍ୱାନତେସଂ ୱଚନଂ ନରିନ୍ଦୋ ୱିକିଣ୍ଣକଙ୍ଖୋ ରତନତ୍ତୟମ୍ହି ।
ସେନାପତିଂ ଅତ୍ଥୱରଂ ଅୱୋଚ ପହଟ୍ଠଭାୱୋ ପରିସାୟ ମଜ୍ଝେ ॥
ଅସଦ୍ଦହାନୋ ରତନତ୍ତୟସ୍ସ ଗୁଣେ ଭୱଚ୍ଛେଦନକାରଣସ୍ସ ।
ଚିରାୟ ଦୁଲ୍ଲଦ୍ଧିପଥେ ଚରନ୍ତୋ ଠିତୋ ସରଜ୍ଜେ ଅପି ୱଞ୍ଚିତୋହଂ ॥
ମୋହେନ ଖଜ୍ଜୋପନକଂ ଧମେସିଂ ସୀତଦ୍ଦିତୋ ଧୁମସିଖେ ଜଲନ୍ତେ ।
ପିପାସିତୋ ସିନ୍ଧୁଜଲଂ ପହାୟ ପିୱିଂ ପମାଦେନ ମରୀଚିତୋୟଂ ॥
ପରିଚ୍ଚଜିତ୍ୱା ଅମତଂ ଚିରାୟ ଜିୱତ୍ଥିକୋ ତିକ୍ଖୱିସଂ ଅଖାଦିଂ ।
ୱିହାୟ’ହଂ ଚମ୍ପକପୁପ୍ଫଦାମଂ ଅଧାରୟିଂ ଜତ୍ତୁସୁ ନାଗଭାରଂ ॥
ଗନ୍ତ୍ୱାନ ଖିପ୍ପଂ ପରିଖା ସମୀପଂ ଆରାଧୟିତ୍ୱା ଜିନଦନ୍ତଧାତୁଂ ।
ଆନେହି ପୂଜାୱିଧିନା କରିସ୍ସଂ ପୁଞ୍ଞାନି ସବ୍ବତ୍ଥ ସୁଖାୱହାନି ॥
ଗନ୍ତ୍ୱାତତେସୋପରିଖାସମୀପଂ ସେନାଧିନାଥୋ ପରମପ୍ପତୀତୋ ।
ଧାତୁଂ ମୁନିନ୍ଦସ୍ସ ନମସ୍ସମାନୋ ଅଜ୍ଝେସି ରଞ୍ଞୋ ହିତମା ଚରନ୍ତୋ
ଚିରାଗତଂ ଦିଟ୍ଠିମଲଂ ପହାୟ ଅଲତ୍ଥ ସଦ୍ଧଂ ସୁଗତେ ନରିନ୍ଦୋ ।
ପାସାଦମାଗମ୍ମ ପସାଦମସ୍ସ ୱଡ୍ଢେହି ରଞ୍ଞୋ ରତନତ୍ତୟମ୍ହି ॥
ତସ୍ମିଂ ଖଣେ ପୋକ୍ଖରଣୀ ୱିଚିତ୍ତା ଫୁଲ୍ଲେହି ସୋୱଣ୍ଣସରୋରୁହେହି ।
ଅଲଙ୍କରୋନ୍ତୀ ଗଗନଂ ଅହୋସି ମନ୍ଦାକିନୀୱାଭିନୱାୱତାରା ॥
ହଂସଙ୍ଗଣେୱାଥ ମୁନିନ୍ଦଧାତୁ ସା ପଙ୍କଜା ପଙ୍କଜମୋକ୍କମନ୍ତି ।
କୁନ୍ଦାୱଦାତାହି ପଭାହି ସବ୍ବଂ ଖିରୋଦକୁଚ୍ଛିଂ’ୱ ପୁରଂ ଅକାସି ॥
ତତୋ ସୁରତ୍ତଞ୍ଜଲିପଙ୍କଜମ୍ହି ପତିଟ୍ଠହିତ୍ୱାନ ଚମୁପତିସ୍ସ ।
ସନ୍ଦିସ୍ସମାନା ମହତା ଜନେନ ମହପ୍ଫଲଂ ମାନୁସକଂ ଅକତ୍ଥ ॥
ସୁତ୍ୱାନ ୱୁତ୍ତନ୍ତମିମଂ ନରିନ୍ଦୋ ପହଟ୍ଠଭାୱୋପଦସା’ୱ ଗନ୍ତ୍ୱା ।
ସଂସୂଚୟନ୍ତୋ ଦିଗୁଣଂ ପସାଦଂ ସୁୱିମ୍ହିତୋପଞ୍ଜଲିକୋଅୱୋଚ ॥
ୱୋହାରଦକ୍ଖା ମନୁଜା ମୁନିନ୍ଦ ସଙ୍ଘଟ୍ଟୟିତ୍ୱା ନିକସୋପଲମ୍ହି ।
କରୋନ୍ତିଅଗ୍ଘଂ ୱରକଞ୍ଚନସ୍ସ ଏସୋହି ଧମ୍ମୋ ଚରିତୋପୁରାଣୋ ॥
ମଣିଂ ପସତ୍ଥାକରସମ୍ଭୱମ୍ପି ହୁତାସକମ୍ମେହଭୀସଙ୍ଖରିତ୍ୱା ।
ପାପେନ୍ତିରାଜଞ୍ଞକିରୀଟକୋଟିଂ ୱିଭୁସନତ୍ତଂ ୱିଦୁନୋମନୁସ୍ସା ॥
ୱୀମଂସନତ୍ଥାୟ ତୱାଧୁନାପି ମୟା କତଂ ସବ୍ବମିଦଂ ମୁନିନ୍ଦ ।
ଆଗୁଂ ମହନ୍ତଂ ଖମ ଭୁରିପଞ୍ଞ ଖିପ୍ପଂ ମମାଲଙ୍କୁରୁ ଉତ୍ତମଙ୍ଗଂ ॥
ପତିଟ୍ଠିତା ତସ୍ସ ତତୋ କିରୀଟେ ମଣିପ୍ପଭା ଭାସିନି ଦନ୍ତଧାତୁ ।
ଅମୁଞ୍ଚି ରଂସୀ ଧୱଲା ପଜାସୁ ସିନେହଜାତା ଇୱ ଖୀରଧାରା ॥
ସୋ ଦନ୍ତଧାତୁଂ ସିରସାୱହନ୍ତୋ ପଦକ୍ଖିଣଂତଂନଗରଂ କରିତ୍ୱା ।
ସମ୍ପୂଜୟନ୍ତୋ କୁସୁମାଦିକେହି ସୁସଜ୍ଜିତନ୍ତେ ପୁରମାହରିତ୍ଥ ॥
ସମୁସ୍ସିତୋଦାରସିତାତପତ୍ତେ ପଲ୍ଲଙ୍କସେଟ୍ଠେ ରତନୁଜ୍ଜଲମ୍ହି ।
ପତିଟ୍ଠପେତ୍ୱାନ ଜିନସ୍ସ ଧାତୁଂ ପୂଜେସି ରାଜା ରତନାଦିକେହି ॥
ବୁଦ୍ଧାଦିୱତ୍ଥୁତ୍ତୟମେୱ ରାଜା ଆପାଣକୋଟିଂ ସରଣଂ ଉପେଚ୍ଚ ।
ହିତ୍ୱା ୱିହିଂସଂ କରୁଣାଧିୱାସୋ ଆରାଧୟୀ ସବ୍ବଜନଂ ଗୁଣେହି ॥
କାରେସି ନାନାରତନପ୍ପଭାହି ସହସ୍ସରଂସୀଂ’ୱ ୱିରୋଚମାନଂ ।
ନରାଧିପୋ ଭତ୍ତିଭରାନୁରୂପଂ ସୁଚିତ୍ତିତଂ ଧାତୁନିୱେସନମ୍ପି ॥
ୱଡ୍ଢେସି ସୋ ଧାତୁଘରମ୍ହି ଧାତୁଂ ଅଲଙ୍କରିତ୍ୱା ସକଲଂ ପୁରମ୍ପି ।
ସେସେନ ପୂଜାୱିଧିନା ଅତିତ୍ତୋ ପୂଜେସି ରଟ୍ଠଂ ସଧନଂ ସଭୋଗ୍ଗଂ ॥
ଆମନ୍ତୟିତ୍ୱା ଗୁହସୀୱରାଜଂ ସମ୍ମାନିତଂ ଅତ୍ତସମଂ କରିତ୍ୱା ।
ଦାନାଦିକଂ ପୁଞ୍ଞମନେକରୂପଂ ସଦ୍ଧାଧନୋ ସଞ୍ଚିଣିରାଜସେଟ୍ଠୋ ॥
ତତୋ ସୋ ଭୁପାଲୋ କୁମତିଜନସଂସଗ୍ଗମନୟଂ,
ନିରାକତ୍ୱା ମଗ୍ଗେ ସୁଗତୱଚନୁଜ୍ଜୋତସୁଗମେ ।
ପଧାୱନ୍ତୋ ସମ୍ମା ସପରହିତସମ୍ପତ୍ତିଚତୁରୋ,
ପସତ୍ଥଂ ଲୋକତ୍ଥଂ ଅଚରି ଚରିତାୱଜ୍ଜିତଜନୋ ॥
ତତିୟୋ ପରିଚ୍ଛେଦୋ ।
ଚରତି ଧରଣି ପାଲେ ରାଜଧମ୍ମେସୁ ତସ୍ମିଂ,
ସମରଚତୁରସେନୋ ଖୀରଧାରୋ ନରିନ୍ଦୋ ।
ନିଜଭୁଜବଲଲୀଲା’ରାତିଦପ୍ପପ୍ପମାଥୀ,
ୱିଭୱଜନିତମାନୋ ୟୁଦ୍ଧସଜ୍ଜୋ’ଭିଗଞ୍ଛି ॥
କରିୱରମଥ ଦିସ୍ୱା ସୋ ଗୁହାଦ୍ୱାରୟାତଂ,
ପଟିଭୟରହିତତ୍ତୋ ସୀହରାଜା’ୱ ରାଜା ।
ନିଜନଗରସମୀପାୟାତମେତଂ ନରିନ୍ଦଂ,
ଅମିତବଲମମହୋଘେନୋତ୍ଥରନ୍ତା’ଭିୟାୟି ॥
ଉଦିତବହଳଧୂଲୀପାଳିରୁଦ୍ଧନ୍ତଳିକ୍ଖୋ,
ସମଦୱିୱିଧୟୋଧାରାୱସଂରମ୍ଭଭୀମେ ।
ନିସିତସରସତାଲୀୱସ୍ସଧାରାକରାଳେ,
ଅଜିନି ମହତି ୟୁଦ୍ଧେ ପଣ୍ଡୁକୋ ଖୀରଧାରଂ ॥
ଅଥ ନରପତିସେଟ୍ଠୋ ସଙ୍ଗହେତ୍ୱାନ ରଟ୍ଠଂ,
ନିଜ ତନୁଜ ୱରସ୍ମିଂ ରଜ୍ଜଭାରଂ ନିଧାୟ ।
ସୁଗତ ଦସନ ଧାତୁଂ ସମ୍ପଟିଚ୍ଛାପୟିତ୍ୱା,
ପହିଣି ଚ ଗୁହସୀୱଂ ସକ୍କରିତ୍ୱା ସରଟ୍ଠଂ ॥
ସୁୱିରମୱନୀପାଲୋ ସଞ୍ଞମଂ ଅଜ୍ଝୁପେତୋ,
ୱିୱିଧ ୱିଭୱ ଦାନାୟାଚକେ ତପ୍ପୟିତ୍ୱା ।
ତିଦସପୁର ସମାଜଂ ଦେହଭେଦା ପୟାତୋ,
କୁସଲ ଫଲମନପ୍ପଂ ପତ୍ଥିତଂ ପଚ୍ଚଲତ୍ଥ ॥
ନରପତି ଗୁହସୀୱୋ ତଂ ମୁନିନ୍ଦସ୍ସ ଧାତୁଂ,
ସକପୁରମୁପନେତ୍ୱା ସାଧୁ ସମ୍ମାନୟନ୍ତୋ ।
ସୁଗତି ଗମନ ମଗ୍ଗେ ପାଣିନୋ ୟୋଜୟନ୍ତୋ,
ସୁଚରିତ ମଭିରୂପଂ ସଞ୍ଚିଣନ୍ତୋ ୱିହାସି ॥
ଅଗଣିତମହିମସ୍ସୁଜ୍ଜେ ନିରଞ୍ଞୋ ତନୂଜୋ,
ପୁରିମ ୱୟସି ୟେୱାରଦ୍ଧସଦ୍ଧାଭିୟୋଗୋ ।
ଦସବଲ ତନୁଧାତୁଂ ପୂଜିତୁଂ ତସ୍ସ ରଞ୍ଞୋ,
ପୁରୱର ମୁପାୟାତୋ ଦନ୍ତନାମୋ କୁମାରୋ ॥
ଗୁଣଜନିତ ପସାଦଂ ତଂ କଲିଙ୍ଗାଧିନାଥଂ,
ନିଖିଲ ଗୁଣ ନିୱାସୋ ସୋ କୁମାରୋ କରିତ୍ୱା ।
ୱିୱିଧ ମହୱିଧାନଂ ସାଧୁସମ୍ପାଦୟନ୍ତୋ,
ଅୱସି ସୁଗତଧାତୁଂ ଅନ୍ୱହଂ ୱନ୍ଦମାନୋ ॥
ଅଭୱି ଚ ଗୁହସୀୱସ୍ସାୱନୀସସ୍ସ ଧିତା,
ୱିକଚ କୁୱଲୟକ୍ଖୀ ହଂସକନ୍ତାଭିୟାତା ।
ୱଦନ ଜିତ ସରୋଜା ହାରିଧମ୍ମିଲ୍ଲଭାରା,
କୁଚଭରନମିତଙ୍ଗି ହେମ ମାଲାଭିଧାନା ॥
ଅଖିଲଗୁଣନିଧାନଂ ବନ୍ଧୁଭାୱାନୁରୂପଂ,
ସୁୱିମଲକୁଲଜାତଂ ତଂ କୁମାରଂ ୱିଦିତ୍ୱା ।
ନରପତି ଗୁହସୀୱୋ ଅତ୍ତନୋ ଧୀତରଂ ତଂ,
ଅଦଦି ସବହୁମାନଂ ରାଜପୁତ୍ତସ୍ସ ତସ୍ସ ॥
ମନୁଜପତି କୁମାରଂ ଧାତୁରକ୍ଖାଧିକାରେ,
ପଚୁରପରିଜନଂ ତଂ ସବ୍ବଥା ୟୋଜୟିତ୍ୱା ।
ଗୱ ମହିସ ସହସ୍ସାଦୀହି ସମ୍ପୀଣୟିତ୍ୱା,
ସକ ୱିଭୱ ସରିକ୍ଖେ ଇସ୍ସରତ୍ତେ ଠପେସି ॥
ସମରଭୁୱି ୱିନଟ୍ଠେ ଖୀରଧାରେ ନରିନ୍ଦେ,
ମଲୟୱନମୁପେତା ଭାଗିନେୟ୍ୟା କୁମାରା ।
ପବଲ ମତି ମହନ୍ତଂ ସଂହରିତ୍ୱା ବଲଗ୍ଗଂ,
ଉପପୁରମୁପଗଞ୍ଛୁଂ ଧାତୁୟା ଗଣ୍ହନତ୍ଥଂ ॥
ଅଥ ନଗରସମୀପେ ତେ ନିୱେସଂ କରିତ୍ୱା,
ସୱଣକଟୁକମେତଂ ସାସନଂ ପେସୟିଂସୁ ।
ସୁଗତଦସନଧାତୁଂ ଦେହି ୱା ଖିପ୍ପମମ୍ହଂ,
ୟସସିରିଜନନିଂ ୱା କୀଳ ସଙ୍ଗାମକେଳିଂ ॥
ସପଦି ଧରଣିପାଲୋ ସାସନଂ ତଂ ସୁଣିତ୍ୱା,
ଅୱଦି ରହସି ୱାଚଂ ରାଜପୁତ୍ତସ୍ସ ତସ୍ସ ।
ନହି ସତି ମମ ଦେହେ ଧାତୁମଞ୍ଞସ୍ସ ଦସ୍ସଂ,
ଅହମପି ୟଦି ଜେତୁଂ ନେୱ ତେ ସକ୍କୁଣେୟ୍ୟଂ ॥
ସୁରନର ନମିତଂ ତଂ ଦନ୍ତଧାତୁଂ ଗହେତ୍ୱା,
ଗହିତ ଦିଜୱିଲାସୋ ସୀହଳଂ ୟାହି ଦୀପଂ ।
ଇତି ୱଚନମୁଦାରଂ ମାତୁଲସ୍ସାଥ ସୁତ୍ୱା,
ତମୱଚ ଗୁହସୀୱଂ ଦନ୍ତନାମୋ କୁମାରୋ ॥
ତୱଚ ମମଚ କୋ ୱା ସୀହଳେ ବନ୍ଧୁଭୂତୋ,
ଜିନୱରଣସରୋଜେ ଭତ୍ତିୟୁତ୍ତୋ ଚ କୋୱା ।
ଜଲନୀଧିପରତୀରେ ସୀହଳଂ ଖୁଦ୍ଦଦେସଂ,
କଥମହମତିନେସ୍ସଂ ଦନ୍ତଧାତୁଂ ଜିନସ୍ସ ॥
ତମୱଦି ଗୁହସୀୱୋ ଭାଗିନେୟ୍ୟଂ କୁମାରଂ,
ଦସବଲତନୁଧାତୁ ସଣ୍ଠିତା ସୀହଳସ୍ମିଂ ।
ଭୱଭୟହତିଦକ୍ଖୋ ୱତ୍ତତେ ସତ୍ଥୁଧମ୍ମୋ,
ଗଣନପଥମତୀତା ଭିକ୍ଖୱୋ ଚାୱସିଂସୁ ॥
ମମ ଚ ପିୟସହାୟୋ ସୋ ମହାସେନ ରାଜା,
ଜିନଚରଣସରୋଜଦ୍ୱନ୍ଦସେୱାଭିୟୁତ୍ତୋ ।
ସଲିଲମପି ଚ ଫୁଟ୍ଠଂ ଧାତୁୟା ପତ୍ଥୟନ୍ତୋ,
ୱିୱିଧରତନଜାତଂ ପାଭତଂ ପେସୟିତ୍ଥ ॥
ପଭୱତି ମନୁଜିନ୍ଦୋ ସବ୍ବଦା ବୁଦ୍ଧିମା ସୋ,
ସୁଗତଦସନଧାତୁଂ ପୂଜିତୁଂ ପୂଜନେୟ୍ୟଂ ।
ପରିଚିତୱିସୟମ୍ହା ୱିପ୍ପୱୁତ୍ଥଂ ଭୱନ୍ତଂ,
ୱିୱିଧୱିଭୱଦାନା ସାଧୁ ସଙ୍ଗଣ୍ହିତୁଞ୍ଚ ॥
ନିଜ ଦୁହିତୁପତିଂ ତଂ ଇତ୍ଥମାରାଧୟିତ୍ୱା,
ନରପତି ଗୁହସୀୱୋ ସଙ୍ଗହେତ୍ୱାନ ସେନଂ ।
ରଣଧରଣିମୁପେତୋ ସୋ କୁମାରେହି ସଦ୍ଧିଂ,
ମରଣପରୱସତ୍ତଂ ଅଜ୍ଝଗା ୟୁଜ୍ଝମାନୋ ॥
ଅଥ ନରପତି ପୁତ୍ତୋ ଦନ୍ତନାମୋ ସୁଣିତ୍ୱା,
ସୱଣ କଟୁକମେତଂ ମାତୁଲସ୍ସପ୍ପୱତ୍ତିଂ ।
ଗହିତ ଦିଜୱିଲାସୋ ଦନ୍ତଧାତୁଂ ଗହେତ୍ୱା,
ତୁରିତ ତୁରିତ ଭୂତୋ ସୋ ପୁରମ୍ହା ପଳାୟି ॥
ସରଭସ ମୁପଗନ୍ତ୍ୱା ଦକ୍ଖିଣଂ ଚାଥ ଦେସଂ,
ଅୱିଚଲିତସଭାୱୋ ଇଦ୍ଧିୟା ଦେୱତାନଂ ।
ନଦିମତିମହତିଂ ସୋ ଉତ୍ତରିତ୍ୱାନ ପୁଣ୍ଣଂ,
ନିଦହି ଦସନଧାତୁଂ ୱାଲୁକାରାସିମଜ୍ଝେ ॥
ପୁନ ପୁରମୁପଗନ୍ତ୍ୱା ତଂ ଗହୀତଞ୍ଞୱେସଂ,
ଭରିୟମପି ଗହେତ୍ୱା ଆଗତୋ ତତ୍ଥ ଖିପ୍ପଂ ।
ସୁଗତଦସନଧାତୁଂ ୱାଲୁକାଥୁପକୁଚ୍ଛିଂ,
ଠପିତମୁପଚରନ୍ତୋ ଅଚ୍ଛି ଗୁମ୍ବନ୍ତରସ୍ମିଂ ॥
ସପଦି ନଭସି ଥେରୋ ଗଚ୍ଛମାନୋ ପନେକୋ,
ୱିୱିଧକିରଣଜାଲଂ ୱାଲୁକାରାସିଥୂପା ।
ଅୱିରଳିତମୁଦେନ୍ତଂ ଧାତୁୟା ତାୟ ଦିସ୍ୱା,
ପଣମି ସୁଗତଧାତୁଂ ଓତରିତ୍ୱାନ ତତ୍ଥ ॥
ମୁନିସୁତମଥ ଦିସ୍ୱା ଜମ୍ପତୀ ତେ ପତୀତା,
ନିଜଗମନୱିଧାନଂ ସବ୍ବମାରୋଚୟିଂସୁ ।
ଦସବଲତନୁଜୋ ସୋ ଧାତୁରକ୍ଖା ନିୟୁତ୍ତୋ,
ପରହିତନିରତତ୍ତୋ ତେ ଉଭୋ ଅଜ୍ଝଭାସି ॥
ଦସବଲତନୁଧାତୁଂ ସୀହଳଂ ନେଥ ତୁମ୍ହେ,
ଅଗଣିତ ତନୁଖେଦା ୱୀତସାରଜ୍ଜମେତଂ ।
ଅପି ଚ ଗମନମଗ୍ଗେ ଜାତମତ୍ତେ ୱିଘାତେ,
ସରଥ ମମମନେକୋପଦ୍ଦୱଚ୍ଛେଦଦକ୍ଖଂ ॥
ଇତି ସୁଗତନନୂଜୋ ଜମ୍ପତୀନଂ କଥେତ୍ୱା,
ପୁନ’ପି ତଦନୁରୂପଂ ଦେସୟିତ୍ୱାନ ଧମ୍ମଂ ।
ପୁଥୁତରମପନେତ୍ୱା ସୋକସଲ୍ଲଞ୍ଚ ଗାଳ୍ହଂ,
ସକୱସତିମୁପେତୋ ଅନ୍ତଲିକ୍ଖେନ ଧୀରୋ ॥
ଭୁଜଗଭୱନୱାସୀ ନିନ୍ନଗାୟାଥ ତସ୍ସା,
ଭୁଜଗପତି ମହିଦ୍ଧି ପଣ୍ଡୁହାରାଭିଧାନୋ ।
ସକପୁରପୱରମ୍ହା ନିକ୍ଖମିତ୍ୱା ଚରନ୍ତୋ,
ସମୁପଗମି ତଦା ତଂ ଠାନମିଚ୍ଛାୱସେନ ॥
ୱିମଲପୁଲିନଥୂପା ସୋ ସମୁଗ୍ଗଚ୍ଛମାନଂ,
ସସିରୁଚିରମରୀଚିଜ୍ଜାଲମାଲୋକୟିତ୍ୱା ।
ଠିତମଥ ମୁନିଧାତୁଂ ୱାଲୁକାରସିଗବ୍ଭେ,
କିମିଦମିତି ସକଙ୍ଖଂ ପେକ୍ଖମାନୋ ଅୱେଦି ॥
ସପଦି ସବହୁମାନୋ ସୋ ଅସନ୍ଦିସ୍ସମାନୋ,
ରତନମୟକରଣ୍ଡଂ ଧାତୁୟୁତ୍ତଂ ଗିଲିତ୍ୱା ।
ୱିତତପୁଥୁଲଦେହୋ ଭୋଗମାଲାହି ତୁଙ୍ଗଂ,
କଣକସିଖରିରାଜଂ ୱେଠୟିତ୍ୱା ସୟିତ୍ଥ ॥
ସଲିଲନିଧିସମୀପଂ ଜମ୍ପତୀ ଗନ୍ତୁକାମା,
ପୁଲିନତଲଗତଂ ତଂ ଦନ୍ତଧାତୁଂ ଅଦିସ୍ୱା ।
ନୟନସଲିଲଧାରଂ ସୋକଜାତଂ କିରନ୍ତା,
ସୁଗତସୁତୱରଂ ତଂ ତଙ୍ଖଣେ’ନୁସ୍ସରିଂସୁ ॥
ଅଥ ସୁଗତସୁତୋ ସୋ ଚିନ୍ତିତଂ ସଂୱିଦିତ୍ୱା,
ଅଗମି ସୱିଧମେସଂ ସୋକଦିନାନନାନଂ ।
ଅସୁଣି ଚ ଜିନଧାତୁଂ ୱାଲୁକାରାସିମଜ୍ଝେ,
ନୀହିତମପି ଅଦିଟ୍ଠଂ ପୂଜିତଂ ଜମ୍ପତୀହି ॥
ସୟିତମଥ ୟତୀସୋ ଦିବ୍ବଚକ୍ଖୁପ୍ପଭାୱା,
ରତନଗିରିନିକୁଞ୍ଜେ ନାଗରାଜଂ ଅପସ୍ସି ।
ୱିହଗପତିସରୀରଂ ମାପୟି ତମ୍ମୁହୁତ୍ତେ,
ୱିତତପୁଥୁଲପକ୍ଖେନ’ନ୍ତଳିକ୍ଖଂ ଥକେନ୍ତଂ ॥
ଜଲଧିମତିଗଭୀରଂ ତଂ ଦ୍ୱିଧା ସୋ କରିତ୍ୱା,
ପବଲପୱନୱେଗେନ’ତ୍ତନୋ ପକ୍ଖଜେନ ।
ସରଭସ ମହିଧାୱଂ ଭୀମସଂରମ୍ଭୟୋଗା,
ଅଭିଗମି ଭୁଜଗିନ୍ଦଂ ମେରୁପାଦେ ନିପନ୍ନଂ ॥
ଜହିତଭୁଜଗୱେସୋ ତଙ୍ଖଣେ ସୋ ଫଣିନ୍ଦୋ,
ପଟିଭୟଚକିତତ୍ତୋ ସଂଖିପିତ୍ୱାନ ଭୋଗେ ।
ସରଭସ ମୁପଗନ୍ତ୍ୱା ତସ୍ସ ପାଦେ ନମିତ୍ୱା,
ୱିନୟମଧୁରମିତ୍ଥଂ ତଂ ମୁନୀସଂ ଅୱୋଚ ॥
ସକଲଜନହିତତ୍ଥଂ ଏୱ ଜାୟନ୍ତି ବୁଦ୍ଧା,
ଭୱତି ଜନହିତତ୍ଥଂ ଧାତୁମତ୍ତସ୍ସ ପୂଜା ।
ଅହମପି ଜିନଧାତୁଂ ପୂଜୟିତ୍ୱା ମହଗ୍ଘଂ,
କୁସଲଫଲମନପ୍ପଂ ସଞ୍ଚିଣିସ୍ସଂ’ତି ଗଣ୍ହିଂ ॥
ଅଥ ମନୁଜଗଣାନଂ ସଚ୍ଚବୋଧାରହାନଂ,
ୱସତିଭୱନମେସା ନୀୟ୍ୟତେ ସୀହଳଂ ତଂ ।
ମୁନିୱରତନୁଧାତୁଂ ତେନ ଦେହୀତି ୱୁତ୍ତୋ,
ଭୁଜଗପତି କରଣ୍ଡଂ ଧାତୁଗବ୍ଭଂ ଅଦଜ୍ଜି ॥
ୱିହଗପତିତନୁଂ ତଂ ସଂହରିତ୍ୱାନ ଥେରୋ,
ଜଲଚରସତଭୀମା ଅଣ୍ଣୱା ଉପ୍ପତିତ୍ୱା ।
ସକଲପଥୱିଚକ୍କେ ରଜ୍ଜଲକ୍ଖିଂ’ୱ ଧାତୁଂ,
ନରପତିତନୁଜାନଂ ଜମ୍ପତୀନଂ ଅଦାସି ॥
ଇତି କତବହୁକାରେ ସଂୟମିନ୍ଦେ ପୟାତେ,
ସୁଗତଦସନଧାତୁଂ ମୁଦ୍ଧନା ଉବ୍ବହନ୍ତା ।
ମହତି ୱିପିନଦେୱାଦୀହି ମଗ୍ଗେ ପୟୁତ୍ତେ,
ୱିୱିଧମହୱିଧାନେ ତେ ତତୋ ନିକ୍ଖମିଂସୁ ॥
ମୁଦୁସୁରଭୀସମୀରୋ କଣ୍ଟକାଦିୱ୍ୟପେତୋ,
ୱିମଲପୁଲିନହାରୀ ଆସୀ ସବ୍ବତ୍ଥ ମଗ୍ଗୋ ।
ଅୟନମୁପଗତେ ତେ ଦନ୍ତଧାତୁପ୍ପଭାୱା,
ନିଗମନଗରୱାସୀ ସାଧୁ ସମ୍ମାନୟିଂସୁ ॥
କୁସୁମସୁରଭିଚୁଣ୍ଣାକିଣ୍ଣହତ୍ଥାହି ନିଚ୍ଚା,
ସକୁତୁକମନୁୟାତା କାନନେ ଦେୱତାହୀ ।
ଅଚଲଗହଣଦୁଗ୍ଗଂ ଖେପୟିତ୍ୱାନ ମଗ୍ଗଂ,
ଅଗମୁମତୁରିତା ତେ ପଟ୍ଟନଂ ତାମଲିତ୍ତିଂ ॥
ଅଚଲପଦରବଦ୍ଧଂ ସୁଟ୍ଠିତୋଦାରକୂପଂ,
ଉଦିତପୁଥୁଲକାରଂ ଦକ୍ଖନୀୟାମକଞ୍ଚ ।
ସୟମଭିମତଲଙ୍କାଗାମିନିଂ ନାୱମେତେ,
ସପଦି ସମୁପରୂଳ୍ହଂ ଅଦ୍ଦସୁଂ ୱାଣିଜେହି ॥
ଅଥ ଦିଜପୱରା ତେ ସୀହଳଂ ଗନ୍ତୁମିଚ୍ଛଂ,
ସରଭସ ମୁପଗନ୍ତ୍ୱା ନାୱିକସ୍ସାୱଦିଂସୁ ।
ସୁତିସୁଖୱଚସା ସୋ ସାଧୁୱୁତ୍ତେନ ଚେସଂ,
ପମୁଦିତହଦୟୋ ତେ ନାୱମାରୋପୟିତ୍ଥ ॥
ଜଲନିଧିମଭିରୂଳ୍ହେସ୍ୱେସୁ ଆଦାୟ ଧାତୁଂ,
ସମଭୱୁମୁପସନ୍ନା ଲୋଲକଲ୍ଲୋଲମାଲା ।
ସମସୁରଭିମନୁଞ୍ଞୋ ଉତ୍ତରୋ ୱାୟି ୱାତୋ,
ୱିମଲରୁଚିରସୋଭା ସବ୍ବଥା’ସୁଂ ଦିସା’ପି ॥
ନଭସି ଅସିତସୋଭେ ୱେନତେୟ୍ୟୋ’ୱ ନାୱା,
ପବଲପୱନୱେଗା ସତ୍ତତଂ ଧାୱମାନା ।
ନୟନୱିସୟଭାୱାତୀତତୀରାଚଲାଦିଂ,
ପୱିସି ଜଲଧିମଜ୍ଝଂ ଫେଣପୁପ୍ଫାଭିକିଣ୍ଣଂ ॥
ଅଥ ଅଭୱି ସମୁଦ୍ଦୋ ଭୀମସଂୱଟ୍ଟୱାତା,
ଭୀହତସିଖରିକୂଟାକାରୱୀଚିପ୍ପବନ୍ଧୋ ।
ସୱନଭିଦୁରଘୋରାରାୱରୁନ୍ଧନ୍ତଲିକ୍ଖୋ,
ଭୟଚକିତମନୁସ୍ସକ୍କନ୍ଦିତୋ ସବ୍ବରତ୍ତିଂ ॥
ଉଦୟସିଖରିସୀସଂ ନୂତନାଦିଚ୍ଚବିମ୍ବେ,
ଉପଗତୱତି ତସ୍ସା ରତ୍ତିୟା ଅଚ୍ଚୟମ୍ହି ।
ସଲିଲନିଧିଜଲଂ ତଂ ସନ୍ତକଲ୍ଲୋଲମାଲଂ,
ଅସିତମଣିୱିଚିତ୍ତଂ କୋଟ୍ଟିମଂ’ୱାୱଭାସି ॥
ଅଥ ୱିତତଫଣାଲୀ ଭିଂସନା କେଚି ନାଗା,
ସୁରଭିକୁସୁମହତ୍ଥା କେଚି ଦିବ୍ବତ୍ତଭାୱା ।
ରୁଚିରମଣିପଦୀପେ କେଚି ସନ୍ଧାରୟନ୍ତା,
ନିଜସିରସି କରୋନ୍ତା କେଚି କଣ୍ଡୁପ୍ପଲାନୀ ॥
ଫୁଟକୁମୁଦକଲାପେ ଜତ୍ତୁନେକେ ୱହନ୍ତା,
କଣକକଲସମାଲା ଉକ୍ଖିପତ୍ତା ଚ କେଚି ।
ପୱନଚଲିତକେତୁଗ୍ଗାହକା କେଚି ଏକେ,
ରୁଚିର କଣକ ଚୁଣ୍ଣାପୁଣ୍ଣଚଙ୍ଗୋଟହତ୍ଥା ॥
ସଲଳିତରମଣିୟଂ କେଚି ନଚ୍ଚଂ କରୋନ୍ତା,
ସଲୟମଧୁରଗୀତଂ ଗାୟମାନା’ୱ କେଚି ।
ପଚୁରତୁରିୟଭଣ୍ଡେ ଆହନନ୍ତା’ୱ ଏକେ,
ମୁନିୱରତନୁଧାତୁଂ ପୂଜିତୁଂ ଉଟ୍ଠହିଂସୁ ॥
ରୁଚିରକଚକଲାପା ରାଜକଞ୍ଞାୟ ତସ୍ସା,
ମୁନିୱରଦସନଂ ତଂ ନିଗ୍ଗତେୱିନ୍ଦୁଲେଖା ।
ଉଜୁରଜତସଲାକା ସନ୍ନିଭେ ମୁଞ୍ଚି ରଂସୀ ॥
ଅତୁଲିତମନୁଭାୱଂ ଧାତୁୟା ପେକ୍ଖତଂ ତଂ,
ପମୁଦିତହଦୟାନଂ ତଙ୍ଖଣେ ପନ୍ନଗାନଂ ।
ପଟିରୱହରିତାନଂ ସାଧୁୱାଦାଦିକାନଂ,
ଗଗନମପରିୟନ୍ତଂ’ୱାସି ୱିତ୍ଥାରିତାନଂ ॥
ପୱିସି ସୁଗତ ଦାଠାଧାତୁ ସା ମୋଳିଗବ୍ଭଂ,
ପୁନ ଗଗନତଲମ୍ହା ଓତରିତ୍ୱାନ ତସ୍ସା ।
ଫଣଧରନିୱହା ତେ ତଂ ତରିଂ ୱାରୟିତ୍ୱା,
ମହମକରୁମୁଦାରଂ ସତ୍ତରତ୍ତିନ୍ଦିୱଂହି ॥
ଅଚଲମିୱ ୱିମାନଂ ଅନ୍ତଲିକ୍ଖମ୍ହି ନାୱଂ,
ଗତିୱିରହିତମମ୍ହୋରାସିମଜ୍ଝମ୍ହି ଦିସ୍ୱା ।
ଭୟୱିଲୁଲିତଚିତ୍ତା ଜମ୍ପତୀ ତେ ସମଗ୍ଗା,
ଦସବଲତନୁଜଂ ତଂ ଇଦ୍ଧିମନ୍ତଂ ସରିଂସୁ ॥
ସପଦି ମୁନିସୁତୋ ସୋ ଚିତ୍ତମେସଂ ୱିଦିତ୍ୱା,
ନଭସି ଜଲଧରାଲୀ ମଦ୍ଦମାନୋ’ଭିଗନ୍ତ୍ୱା ।
ୱିହଗପତିସରୀରଂ ମାପୟିତ୍ୱା ମହନ୍ତଂ,
ଭୟଚକିତଭୁଜଙ୍ଗେ ତେ ପଳାପେସି ଖିପ୍ପଂ ॥
ଇତ୍ଥଂ ବୁଦ୍ଧିସୁତେ ଭୁଜଙ୍ଗଜନିତଂ ଭୀତିଂ ସମେତ୍ୱା ଗତେ,
ସା ନାୱା ପୱନା ପକମ୍ପିତଧଜା ତୁଙ୍ଗଂ ତରଙ୍ଗାୱଲିଂ ।
ଭୀନ୍ଦନ୍ତୀ ଗତିୱେଗସା ପୁଥୁତରଂ ମେଘାୱଲୀସନ୍ନିଭଂ,
ଲଙ୍କାପଟ୍ଟନମୋତରିତ୍ଥ ସହସା ଥେରସ୍ସ ତସ୍ସିଦ୍ଧିୟା ॥
ଚତୁତ୍ଥୋ ପରିଚ୍ଛେଦୋ ।
ସଂୱଚ୍ଛରମ୍ହି ନୱମମ୍ହି ମହାଦିସେନ,
ପୁତ୍ତସ୍ସ କିତ୍ତିସିରିମେଘନରାଧିପସ୍ସ ।
ତେ ଜମ୍ପତୀ ତମଥ ପଟ୍ଟନମୋତରିତ୍ୱା,
ଦେୱାଲୟେ ପଟିୱସିଂସୁ ମନୋଭିରାମେ ॥
ଦିସ୍ୱାନ ତେ ଦ୍ୱିଜୱରୋ ପଥିକେ ନିସାୟଂ,
ସନ୍ତପ୍ପୟିତ୍ଥ ମଧୁରାସନପାନକେହି ।
ରତ୍ତିକ୍ଖୟେ ଚ ଅନୁରାଧପୁରସ୍ସ ମଗ୍ଗଂ,
ଛାୟାପତୀନମଥ ସୋ ଅଭିୱେଦୟିତ୍ଥ ॥
ଆଦାୟ ତେ ଦସନଧାତୁୱରଂ ଜିନସ୍ସ,
ସମ୍ମାନିତା ଦ୍ୱିଜୱରେନ’ଥ ପଟ୍ଟନମ୍ହା ।
ନିକ୍ଖମ୍ମ ଦୂରତରମଗ୍ଗମତିକ୍କମିତ୍ୱା,
ପଦ୍ୱାରଗାମମନୁରାଧପୁରସ୍ସ’ଗଞ୍ଛୁଂ ॥
ୟଂ ଧମ୍ମିକଂ ନରୱରଂ ଅଭିତକ୍କୟିତ୍ୱା,
ଜାୟାପତୀ ୱିସୟମେତମୁପାଗମିଂସୁ ।
ତଂ ୱ୍ୟାଧିନା ସମୁଦିତେନ ମହାଦିସେନ,
ଲଙ୍କିସ୍ସରଂସୁଚିରକାଲକତଂ ସୁଣିଂସୁ ॥
ସୋକେନ ତେ ସିଖରିନେୱ ସମୁଗ୍ଗତେନ,
ଅଜ୍ଝୋତ୍ଥଟା ବହୁତରଂ ୱିଲପୀଂସୁ ମୁଳ୍ହା ।
କାୟିଂସୁ ତେସମଥ ମୁଚ୍ଛିତମାନସାନଂ,
ସବ୍ବା ଦିସା ଚ ୱିଦିସା ଚ ଘନନ୍ଧକାରା
ସୁତ୍ୱାନ କିତ୍ତିସିରିମେଘନରାଧିପସ୍ସ,
ରଜ୍ଜେଠିତସ୍ସ ରତନତ୍ତୟମାମକତ୍ତଂ ।
ୱସ୍ସେନ ନିବ୍ବୁତମହାଦହନା’ୱ କଚ୍ଛା,
ତେ ଜମ୍ପତୀ ସମଭୱୁଂ ହତସୋକତାପା ॥
ସୁତ୍ୱାନ ମେଘଗିରିନାମମହାୱିହାରେ,
ଭିକ୍ଖୁସ୍ସ କସ୍ସଚି ନରାଧିପୱଲ୍ଲଭତ୍ତଂ ।
ତସ୍ସ’ନ୍ତିକଂ ସମୁପଗମ୍ମ କତାତିଥେୟ୍ୟା,
ଧାତୁପ୍ପୱତ୍ତିମୱଦିଂସୁ ଉଭୋ ସମେଚ୍ଚ ॥
ସୁତ୍ୱାନ ସୋ ମୁନିୱରୋ ଦସନପ୍ପୱତ୍ତିଂ,
ହଟ୍ଠୋ ୟଥାମତରସେନ’ହିସିତ୍ତଗତ୍ତୋ ।
ଗେହେ ସକେ ସପଦି ପଟ୍ଟୱିତାନକେହି,
ୱଡ୍ଢେସି ଧାତୁମମଲଂ ସମଲଙ୍କତମ୍ହି ॥
ତେସଞ୍ଚ ଜାନିପତିକାନମୁଭିନ୍ନମେସୋ,
କତ୍ୱାନ ସଙ୍ଗହମୁଳାରତରଂ ୟଥିଚ୍ଛଂ ।
ୱୁତ୍ତନ୍ତମେତମଭିୱେଦୟିତୁଂ ପସତ୍ଥଂ,
ଲଙ୍କାଧିପସ୍ସ ସୱିଧଂ ପହିଣିତ୍ଥ ଭିକ୍ଖୁଂ ॥
ରାଜା ୱସନ୍ତସମୟେ ସହ କାମିନୀହି,
ଉୟ୍ୟାନକେଳିସୁଖ ମେକଦିନେ’ନୁଭୋନ୍ତୋ ।
ଆଗଚ୍ଛମାନମଥ ତତ୍ଥ ସୁଦୁରତୋ’ଚ,
ତଂ ୱିପ୍ପସନ୍ନମୁଖୱଣ୍ଣମପସ୍ସି ଭିକ୍ଖୁଂ ॥
ସୋ ସଂୟମି ସମୁପଗମ୍ମ ନରାଧିପଂ ତଂ,
ୱୁତ୍ତନ୍ତମେତମଭିୱେଦୟି ତୁଟ୍ଠଚିତ୍ତୋ ।
ସୁତ୍ୱାନ ତଂ ପରମପୀତିଭରଂ ୱହନ୍ତୋ,
ସମ୍ପତ୍ତଚକ୍କରତନୋ’ୱ ଅହୋସି ରାଜା ॥
ଲଙ୍କିସ୍ସରୋ ଦ୍ୱିଜୱରା ଜିନଦନ୍ତଧାତୁ,
ମାଦାୟ ଜାନିପତୟୋ ଉଭୟେ ସମେଚ୍ଚ ।
ଏସ୍ସନ୍ତି ଲଙ୍କମଚିରେନ ଇତୀରିତଂ ତଂ,
ନେମିତ୍ତିକସ୍ସ ୱଚନଞ୍ଚ ତଥଂ ଅମଞ୍ଞି ॥
ରାଜା ତତୋ ମହତିୟା ପରିସାୟ ସଦ୍ଧିଂ,
ତସ୍ସାନୁରାଧନଗରସ୍ସ ପୁରୁତ୍ତରାୟ ।
ଆସାୟ ତଂ ସପଦି ମେଘଗିରିଂ ୱିହାରଂ,
ସଦ୍ଧୋ ଅଗଞ୍ଛି ପଦସା’ୱ ପସନ୍ନଚିତ୍ତୋ ॥
ଦିସ୍ୱା ତତୋ ସୁଗତଧାତୁମଲବ୍ଭନେୟ୍ୟଂ,
ଆନନ୍ଦଜସ୍ସୁନିୱହେହି ଚ ତାରହାରଂ ।
ସିଞ୍ଚଂ ୱିଧାୟ ପଣିଧିଂ ବହୁମାନପୁବ୍ବଂ,
ରୋମଞ୍ଚକଞ୍ଚୁକଧରୋ ଇତି ଚିନ୍ତୟିତ୍ଥ ॥
ସୋ’ହଂ ଅନେକରତନୁଜ୍ଜଲମୋଳିଧାରିଂ,
ପୂଜେୟ୍ୟମଜ୍ଜ ୟଦି ଦୁଚ୍ଚଜମୁତ୍ତମଙ୍ଗଂ ।
ଲୋକତ୍ତୟେକସରଣସ୍ସ ତଥାଗତସ୍ସ,
ନୋ ଧାତୁୟା ମହମନୁଚ୍ଛୱିକଂ କରେୟ୍ୟଂ ॥
ଏତଂ ପହୂତରତନଂ ସଧନଂ ସଭୋଗ୍ଗଂ,
ସମ୍ପୂଜୟଂ ଅପି ଧରାୱଲୟଂ ଅସେସଂ ।
ପୂଜଂ କରୋମି ତଦନୁଚ୍ଛୱିକଂ ଅହଂ’ତି,
ଚିନ୍ତେୟ୍ୟ କୋହି ଭୁୱନେସୁ ଅମୂଳ୍ହତିତ୍ତୋ ॥
ଲଙ୍କାଧିପଚ୍ଚମିଦମପ୍ପତରଂ ମମାସି,
ବୁଦ୍ଧୋ ଗୁଣେହି ୱିୱିଧେହି ପମାଣ ସୁଞ୍ଞୋ ।
ସୋ’ହଂ ପରିତ୍ତୱିଭୱୋ ତିଭୱେକନାଥଂ,
ତଂ ତାଦିସଂ ଦସବଲଂ କଥମଚ୍ଚୟିସ୍ସଂ ॥
ଇତ୍ଥଂ ପୁନପ୍ପୁନ ତଦେୱ ୱିଚିନ୍ତୟନ୍ତୋ,
ଆପଜ୍ଜି ସୋ ଧିତିୟୁତୋ’ପି ୱିସଞ୍ଞିଭାୱଂ ।
ସଂୱୀଜିତୋ ସପଦି ଚାମରମାରୁତେନ,
ଖିନ୍ନେନ ସେୱକଜନେନ ଅଲତ୍ଥ ସଞ୍ଞଂ ॥
ଥୋକମ୍ପି ବୀଜମଥ ୱା ଅଭିରୋପୟନ୍ତା,
ମେଧାୱିନୋ ମହତିୟା’ପି ମସୁନ୍ଧରାୟ ।
କାଲେନ ପତ୍ତ ତୱ ପୁପ୍ଫଫଲଦିକାନି,
ୱିନ୍ଦନ୍ତି ପତ୍ଥିତଫଲାନି ଅନପ୍ପକାନି ॥
ଏୱଂ ଗୁଣେହି ୱିୱିଧେହି’ପି ଅପ୍ପମେୟ୍ୟ,
ଧମ୍ମିସ୍ସରମ୍ହି ମହମପ୍ପତରମ୍ପି କତ୍ୱା ।
କାଲଚ୍ଚୟେନ ପରିଣାମ ୱିସେସରମ୍ମଂ,
ସଗ୍ଗାପୱଗ୍ଗସୁଖମପ୍ପଟିମଂ ଲଭିସ୍ସଂ ॥
ଇତ୍ଥଂ ୱିଚିନ୍ତିୟ ପମୋଦଭରାତିରେକ,
ସମ୍ପୁଣ୍ଣଚନ୍ଦିମସରିକ୍ଖମୁଖୋ ନରିନ୍ଦୋ ।
ସବ୍ବଞ୍ଞୁନୋ ଦସନଧାତୁୱରସ୍ସ ତସ୍ସ,
ପୂଜେସି ସବ୍ବମପି ସୀହଳଦୀପମେତଂ ॥
ଭିକ୍ଖୂ’ପି ତେପିଟକ ଜାତକଭାଣକାଦି,
ତକ୍କଗମାଦି କୁସଲା ଅପି ବୁଦ୍ଧିମନ୍ତୋ ।
ୱତ୍ଥୁତ୍ତୟେକସରଣା ଅପି ପୋରୱଗ୍ଗା,
କୋତୁହଲା ସପଦି ସନ୍ନିପତିଂସୁ ତତ୍ଥ ॥
ରାଜା ତତୋ ମହତିୟ ପରିସାୟ ମଜ୍ଝେ,
ଇଚ୍ଚବ୍ରୁୱୀ ମୁନିୱରୋ ହି ସୁସୁକ୍କଦାଠୋ ।
ଦାଠା ଜିନସ୍ସ ୟଦି ଓସଧିତାରକା’ୱ,
ସେତା ଭୱେୟ୍ୟ କିମୟଂ ମଲିନାୱଭାସା ॥
ତସ୍ମିଂ ଖଣେ ଦସନଧାତୁ ମୁନିସ୍ସରସ୍ସ,
ପକ୍ଖେ ପସାରିୟ ଦୁୱେ ୱିୟ ରାଜହଂସୀ ।
ୱିତ୍ଥାରିତଂ’ସୁନି ୱହା ଗଗନଙ୍ଗନମ୍ହି,
ଆୱଟ୍ଟତୋ ଛୱି ଜୱେନ ମୁହୁତ୍ତମତ୍ତଂ ॥
ପଚ୍ଚଗ୍ଘମତ୍ଥରଣକଂ ସିତମତ୍ଥରିତ୍ୱା,
ଭଦ୍ଦାସନମ୍ହି ୱିନିଧାୟ ମୁନିନ୍ଦଧାତୁଂ ।
ତଂ ଜାତିପୁପ୍ଫନିକରେନ ଥକେସି ରାଜା,
ୱସ୍ସଚ୍ଚୟମ୍ବୁଧରକୂଟସମପ୍ପଭେନ ॥
ଉଗ୍ଗମ୍ମ ଖିପ୍ପମଥ ଧାତୁ ମୁନିସ୍ସରସ୍ସ,
ସା ପୁପ୍ଫରାସିସିଖରମ୍ହି ପତିଟ୍ଠହିତ୍ୱା ।
ରଂସୀହି ଦୁଦ୍ଧଧୱଲେହି ୱିରୋଚମାନା,
ସମ୍ପସ୍ସତଂ ଅନିମିସେ ନୟନେ ଅକାସି ॥
ତଂ ଧାତୁମାସନଗତମ୍ହି ପତିଟ୍ଠପେତ୍ୱା,
ଖୀରୋଦଏଣେପଟଲପ୍ପଟିମେ ଦୁକୁଳେ ।
ଛାଦେସି ସାଟକସତେହି ମହାରହେହି,
ଭିୟ୍ୟୋ’ପି ସୋ ଉପପରିକ୍ଖିତୁକାମତାୟ ॥
ଅବ୍ଭୁଗ୍ଗତା ସପଦି ୱତ୍ଥସତାନି ଭେତ୍ୱା,
ସେତମ୍ବୁଦୋଦରୱିନିଗ୍ଗତଚନ୍ଦିମା’ୱ ।
ଠତ୍ୱାନ ସା ଉପରି ତେସମଭାସୟିତ୍ଥ,
ରଂସୀହି କୁନ୍ଦୱିସଦେହି ଦିସା ସମନ୍ତା
ତସ୍ମିଂ ଖଣେ ୱସୁମତୀ ସହ ଭୂଧରେହି,
ଗଜ୍ଜିତ୍ଥ ସାଧୁୱଚନଂ’ୱ ସମୁଗ୍ଗିରନ୍ତୀ ।
ତଂ ଅବ୍ଭୂତଂ ୱିୟ ସମେକ୍ଖିତୁମମ୍ବୁରାସି,
ସୋ ନିଚ୍ଚଲୋ ଅଭୱି ସନ୍ତତରଙ୍ଗବାହୁ ॥
ମତ୍ତେଭକମ୍ପିତସୁପୁପଫିତସାଲତୋ’ୱ,
ଭସ୍ସିଂସୁ ଦିବ୍ବକୁସୁମାନି’ପି ଅନ୍ତଳିକ୍ଖା ।
ନଚ୍ଚେସୁ ଚାତୁରିୟୟମଚ୍ଛରିୟଂ ଜନସ୍ସ,
ସନ୍ଦସ୍ସୟିଂସୁ ଗଗନେ ସୁରସୁନ୍ଦରୀ’ପି ॥
ଆନନ୍ଦସଞ୍ଜନିତତାରରୱାଭିରାମଂ,
ଗାୟିଂସୁ ଗୀତମମତାସନଗାୟକା’ପି ।
ମୁଞ୍ଚିଂସୁ ଦିବ୍ବତୁରିୟାନି’ପି ୱାଦିତାନି,
ଗମ୍ଭୀରମୁଚ୍ଚମଧୁରଂ ଦ୍ୱିଗୁଣଂ ନିନାଦଂ ॥
ସଂସିବ୍ବିତଂ ରଜତରଜ୍ଜୁସତାନୁକାରୀ,
ଧାରାସତେହି ୱସୁଧମ୍ବରମମ୍ବୁଦେନ ।
ସବ୍ବା ଦିସା ଜଲଦକୁଟମହଗଘିୟେସୁ,
ଦିତ୍ତାଚିରଜ୍ଜୁତିପଦୀପସତାୱଭାସା ॥
ଆଧୁୟମାନ ମଲୟାୱଲ କାନନନ୍ତୋ,
ସମଥୁଲ୍ଲ ପୁପ୍ଫଜ ପରାଗହରାଭିହାରି ।
ସେଦୋଦ ବିନ୍ଦୁଗଣ ସଂହରଣପ୍ପୱୀଣୋ,
ମନ୍ଦଂ ଅୱାସି ସିସିରୋ ଅପି ଗନ୍ଧୱାହୋ ॥
ରାଜା ତମବ୍ଭୁତମୱେକ୍ଖିୟ ପାଟିହୀରଂ,
ଲୋକୁସ୍ସୱଂ ବହୁତରଞ୍ଚ ଅଦିଟ୍ଠପୁବ୍ବଂ ।
ଚିପ୍ଫାରିତକ୍ଖିୟୁଗଲୋ ପରମପ୍ପମୋଦା,
ପୂଜଂ କରିତ୍ଥ ମହତିଂ ରତନାଦିକେହି ॥
ସୋ ଧାତୁମତ୍ତସିରସା’ଥ ସମୁବ୍ବହନ୍ତୋ,
ଠତ୍ୱା ସମୁସ୍ସିତ ସିତାତପୱାରଣମ୍ହି ।
ଚିତ୍ତତ୍ଥରେ ରଥୱରେ ସିତୱାଜିୟୁତ୍ତେ,
ଲକ୍ଖିନିଧାନନୁରାଧପୁରଂ ପୱେକ୍ଖି ॥
ଦେୱିନ୍ଦ ମନ୍ଦିର ସମେ ସମଲଙ୍କତମ୍ହି,
ରାଜା ସକମ୍ହି ଭୱନେ ଅତୁଲାନୁଭାୱୋ ।
ସୀହାସନେ ପଟିକ କୋଜୱ ସନ୍ଥତମ୍ହି,
ଧାତୁଂ ଠପେସି ମୁନିନୋ ସସିତାତପତ୍ତେ ॥
ଅନ୍ତୋ’ୱ ଭୁମିପତି ଧାତୁଘରଂ ମହଗ୍ଘଂ,
କତ୍ୱାନ ତତ୍ଥ ୱିନିଧାୟ ମୁନିନ୍ଦଧାତୁଂ ।
ସମ୍ପୂଜୟିତ୍ଥ ୱିୱିଧେହି ଉପାୟନେହି,
ରତ୍ତୀନ୍ଦିୱଂ ତିଦିୱମୋକ୍ଖ ସୁଖାଭିକଙ୍ଖୀ ॥
ତେସଞ୍ଚ ଜାନିପତିକାନମୁଭିନ୍ନମେୱ,
ତୁଟ୍ଠୋ ବହୂନି ରତନାଭରଣାଦିକାନି ।
ଗାମେଚ ଇସ୍ସରକୁଲେକ ନୀୱାସଭୁତେ,
ଦତ୍ୱାନ ସଙ୍ଗହମକାସି ତିସୀହଳିନ୍ଦୋ ॥
ସଙ୍ଗମ୍ମ ଜାନପଦ ନେଗମ ନାଗରାଦୀ,
ଉକ୍କଣ୍ଠିତା ସୁଗତଧାତୁମପସ୍ସମାନା ।
ଲୋକୁତ୍ତମସ୍ସ ଚରିତାନି ଅଭିତ୍ଥୱନ୍ତା,
ଉଗ୍ଘୋସୟିଂସୁ ଧରଣୀପତିସନ୍ନିଧାନି ।
ଧମ୍ମିସ୍ସରୋ ସକଲଲୋକହିତାୟ ଲୋକେ,
ଜାୟିତ୍ଥ ସବ୍ବଜନତାହିତମାଚରିତ୍ଥ ।
ୱିତ୍ଥାରିତା ବହୁଜନସ୍ସ ହିତାୟ ଧାତୁ,
ଇଚ୍ଛାମ ଧାତୁମଭିପୂଜୟିତୁଂ ମୟମ୍ପି ॥
ସୋ ସନ୍ନିପାତିୟ ମହୀପତି ଭିକ୍ଖୁସଙ୍ଘ,
ମାରାମୱାସିମନୁରାଧପୁରୋପକଣ୍ଠେ ।
ଅଜ୍ଝାସୟଂ ତମଭିୱେଦୟି ସତ୍ଥୁଧାତୁ,
ପୂଜାୟ ସନ୍ନିପତିତସ୍ସ ମହାଜନସ୍ସ ॥
ଥେରୋ ତହିଂ ମହତି ଭିକ୍ଖୁଗଣେ ପନେକୋ,
ମେଧାବଲେନ ଅସମୋ କରୁଣାଧିୱାସୋ ।
ଏୱଂ ତିସୀହଳପତିସ୍ସ ମହାମତିସ୍ସ,
ଲୋକତ୍ଥଚାରଚତୁରସ୍ସ ନିୱେଦୟିତ୍ଥ ॥
ୟୋ ଆଚରେୟ୍ୟ ଅନୁଜୀୱିଜନସ୍ସ ଅତ୍ଥଂ,
ଏସୋ ଭୱେ’ନୁଚରିତୋ ମହତଂ ସଭାୱୋ ।
ଧାତୁଂ ୱସନ୍ତସମୟେ ବହି ନୀହରିତ୍ୱା,
ଦସ୍ସେହି ପୁଞ୍ଞମଭିପତ୍ଥୟତଂ ଜନାନଂ ॥
ସୁତ୍ୱାନ ସଂୟମିୱରସ୍ସ ସୁଭାସିତାନି,
ପୁଚ୍ଛିତ୍ଥ ସୋ ନରୱରୋ ପୁନ ଭିକ୍ଖୁସଙ୍ଘଂ ।
ଧାତୁଂ ନମସ୍ସିତୁମନେନ ମହାଜନେନ,
ଠାନଂ କିମେତ୍ଥ ରମଣୀୟତରଂ ସିୟା’ତି ॥
ସବ୍ବେ’ପି ତେ ଅଥ ନିକାୟ ନିୱାସି ଭିକ୍ଖୂ,
ଠାନଂ ସକଂ ସକମ ୱଣ୍ଣୟୁମାଦରେନ ।
ଅଞ୍ଞୋଞ୍ଞଭିନ୍ନୱଚନେସୁ ଚ ତେସୁ ରାଜା,
ନେୱାଭିନନ୍ଦି ନ ପଟିକ୍ଖିପି କିଞ୍ଚିୱାକ୍ୟଂ ॥
ମଜ୍ଝତ୍ତତାନୁଗତମାନସତାୟ କିନ୍ତୁ,
ରାଜା ଅୱୋ ଚ ପୁନ ଭିକ୍ଖୁଗଣସ୍ସ ମଜ୍ଝେ ।
ଅତ୍ତାନୁରୂପମୟମେୱ ମୁନିନ୍ଦଧାତୁ,
ଠାନଂ ଖଣେନ ସୟମେୱ ଗମିସ୍ସତୀତି ॥
ରାଜା ତତୋ ଭୱନମେୱ ସକଂ ଉପେଚ୍ଚ,
ଧାତୁପ୍ପଣାମମଭିପତ୍ଥୟତଂ ଜନାନଂ ।
ଖିପ୍ପଂମୁଖମ୍ବୁଜୱନାନୀ ୱିକାସୟନ୍ତୋ,
ସଜ୍ଜେତୁମାହ ନଗରଞ୍ଚ ୱିହାରମଗ୍ଗଂ ॥
ସମ୍ମଜ୍ଜିତା ସଲିଲ ସେୱନ ସନ୍ତଧୂଲୀ,
ରଚ୍ଛା ତଦା’ସି ପୁଲିନତ୍ଥରଣାଭିରାମା ।
ଉସ୍ସାପିତାନି କଣକାଦିୱିଚିତ୍ତିତାନି,
ୱ୍ୟଗ୍ଘାଦି ରୂପଖଚିତାନି ଚ ତୋରଣାନି ॥
ଛାୟା ନିୱାରିତ ୱିରୋଚନ ରଂସିତାପା,
ନଚ୍ଚଂ’ୱ ଦସ୍ସୟତି ୱାତଧୂତା ଧଜାଲି ।
ୱୀଥି ୱସନ୍ତୱନରାଜି ସମାନୱଣ୍ଣା,
ଜାତା ସୁଜାତକଦଲୀତରୁମାଲିକାହି ॥
ସଂସୂଚୟନ୍ତି ଚ ସତଂ ନୱପୁଣ୍ଣକୁମ୍ଭା,
ସଗ୍ଗାପୱଗ୍ଗସୁଖମିଚ୍ଛିତମିଜ୍ଝତୀତି ।
କପ୍ପୁରସାରତଗରାଗରୁସମ୍ଭୱେହି,
ଧୂପେହି ଦୁଦ୍ଦିନମଥୋ ସୁଦିନଂ ଅହୋସି ॥
ଓଲମ୍ବମାନସିତମୁତ୍ତକଜାଲକାନି,
ସଜ୍ଜାପିତାନି ୱିୱିଧାନି ଚ ମଣ୍ଡପାନି ।
ସମ୍ପାଦିତାନି ଚ ତହିଂ କୁସୁମଗଘିକାନି,
ଆମୋଦ ଲୁଦ୍ଧ ମଧୁପାୱଲି କୁଜିତାନି ॥
ଗଚ୍ଛିଂସୁ କେଚି ଗହିତୁସ୍ସୱ ୱେସସୋଭା,
ଏକେ ସମୁଗ୍ଗପରିପୁରିତପୁପ୍ଫହତ୍ଥା ।
ଅଞ୍ଞେ ଜନା ସୁରଭିଚୁଣ୍ଣଭରଂ ୱହନ୍ତା,
ତତ୍ଥେତରେ ଧତୱିଚିତ୍ତମହାତପତ୍ତା ॥
ଲଙ୍କିସ୍ସରୋ’ଥ ସସିପଣ୍ଡରୱାଜିୟୁତ୍ତେ,
ଉଜ୍ଜୋତିତେ ରଥୱରେ ରତନପ୍ପଭାହି ।
ଧାତୁଂ ତିଲୋକତିଲକସ୍ସ ପତିଟ୍ଠପେତ୍ୱା,
ଏତଂ ଅୱୋଚ ୱଚନଂ ପଣିପାତପୁବ୍ବଂ ॥
ସମ୍ବୋଧିୟା ଇୱ ମୁନିସ୍ସର ବୋଧିମଣ୍ଡଂ,
ଗଣ୍ଡମ୍ବରୁକ୍ଖମିୱ ତିତ୍ଥିୟମଦ୍ଦନାୟ ।
ଧମ୍ମଞ୍ଚ ସଂୱିଭଜିତୁଂ ମିଗଦାୟମଜ୍ଜ,
ପୂଜାନୁରୂପମୁପଗଚ୍ଛ ସୟଂ ପଦେସଂ ॥
ରାଜା ତତୋ ସମୁଚିତାଚରଣେସୁ ଦକ୍ଖୋ,
ୱିସ୍ସଜ୍ଜି ଫୁସ୍ସରଥମଟ୍ଠିତସାରଥିଂ ତଂ ।
ପଚ୍ଛା ସୟଂ ମହତିୟା ପରିସାୟ ସଦ୍ଧିଂ,
ପୂଜାୱିସେସମସମଂ ଅଗମା କରୋନ୍ତୋ ॥
ଉକ୍କୁଟ୍ଠିନାଦୱିସରେନ ମହାଜନସ୍ସ,
ହେସାରୱେନ ୱିସଟେନ ତୁରଙ୍ଗମାନଂ ।
ଭେରୀରୱେନ ମହତା କରି ଗଜ୍ଜିତେନ,
ଉଦ୍ଦାମସାଗର ସମଂ ନଗରଂ ଅହୋସି ॥
ଆମୋଦିତା ଉଭୟୱୀଥିଗତା କୁଲିତ୍ଥି,
ୱାତାୟନେହି କନକାଭରଣେ ଖିପିଂସୁ ।
ସବ୍ବତ୍ଥକଂ କୁସୁମୱସ୍ସମୱସ୍ସୟିଂସୁ,
ଚେଲାନିଚେୱ ଭମୟିଂସୁନିଜୁତ୍ତମଙ୍ଗେ ॥
ପାଚୀନଗୋପୁରସମୀପମୁପାଗତମ୍ହି,
ତସ୍ମିଂ ରଥେ ଜଲଧିପିଟ୍ଠିଗତେ’ୱ ପୋତେ ।
ତୁଟ୍ଠା ତହିଂ ୟତିଗଣା ମନୁଜା ଚ ସବ୍ବେ,
ସମ୍ପୁଜୟିଂସୁ ୱିୱିଧେହି ଉପାୟନେହି ॥
କତ୍ୱା ପଦକ୍ଖିଣମଥୋ ପୁରମୁତ୍ତରେନ,
ଦ୍ୱାରେନ ସୋ ରଥୱରୋ ବହି ନିକ୍ଖମିତ୍ୱା ।
ଠାନେ ମହିନ୍ଦମିନୁଧମ୍ମକଥାପୱିତ୍ତେ,
ଅଟ୍ଠାସି ତିତ୍ଥଗମିତା ଇୱ ଭଣ୍ଡନାୱା ॥
ଠାନେ ତହିଂ ଦସନଧାତୁୱରଂ ଜିନସ୍ସ,
ଲଙ୍କିସ୍ସରୋ ରତନୱିତ୍ତକରଣ୍ଡଗବ୍ଭା ।
ସଞ୍ଝାଘନା ଇୱ ୱିଧୁଂ ବହିନୀହରିତ୍ୱା,
ଦସ୍ସେସି ଜାନପଦ ନେଗମ ନାଗରାନଂ ॥
ତସ୍ମିଂ ଜନେ ସପଦି ଆଭରଣାଦିୱସ୍ସ,
ମଚ୍ଚନ୍ତପୀତିଭରିତେ ଅଭିୱସ୍ସୟନ୍ତେ ।
ସାନନ୍ଦିୱନ୍ଦିଜନମଙ୍ଗଲଗୀତକେହି,
ସମ୍ପାଦିତେସୁ ମୁଖରେସୁ ଦିସାମୁଖେସୁ ॥
ହତ୍ଥାରୱିନ୍ଦନିୱହେସୁ ମହାଜନସ୍ସ,
ଚନ୍ଦୋଦୟେ’ଚ ମୁକୁଲତ୍ତନମାଗତେସୁ ।
ବ୍ରହ୍ମାମରାଦିଜନିତାମିତ ସାଧୁୱାଦେ,
ତାରାପଥମ୍ହି ଭୁୱନୋଦର ମୋତ୍ଥରନ୍ତେ ॥
ସାଦନ୍ତଧାତୁ ସସିଖଣ୍ଡ ସମାନୱଣ୍ଣା,
ରଂସୀହି କୁନ୍ଦ ନୱଚନ୍ଦନ ପଣ୍ଡରେହି ।
ପାସାଦ ଗୋପୁର ସିଲୁଚ୍ଚୟ ପାଦପାଦିଂ,
ନିଦ୍ଧୋତ ରୂପିୟମୟଂ’ୱ ଅକା ଖଣେନ ॥
ତଂ ପାଟିହାରିୟ ମଚିନ୍ତିୟ ମଚ୍ଚୁଳାରଂ,
ଦିସ୍ୱାନ କେ ତହୀମହେସୁ ମହଟ୍ଠଲୋମା ।
କେୱା’ନୟୁଂ ସକସକାଭରଣାନି ଗେହଂ,
କେୱା ନ ଅତ୍ତପଟିଲାଭମୱଣ୍ଣୟିଂସୁ ॥
କେ ନୋଜହିଂସୁ ସକଦିଟ୍ଠିମଲାନୁବଦ୍ଧଂ,
କେ ୱା ନ ବୁଦ୍ଧମହିମଂ ଅଭିପତ୍ଥୟିଂସୁ ।
କେ ନାମ ମଚ୍ଛରିୟପାସୱସା ଅହେସୁଂ,
ୱତ୍ଥୁତ୍ତୟଞ୍ଚ ସରଣଂ ନଗମିଂସୁ କେୱା ॥
ଲଙ୍କିସ୍ସରୋ’ପି ନୱଲକ୍ଖ ପରିବ୍ବୟେନ,
ସବ୍ବଞ୍ଞୁଧାତୁମତୁଲଂ ଅଭିପୂଜୟିତ୍ୱା ।
ତଂ ଦନ୍ତଧାତୁଭୱନଂ ପୁନ ୱଡ୍ଢୟିତ୍ୱା,
ଅନ୍ତେପୁରମ୍ହି ପଟିୱାସରମଚ୍ଚୟିତ୍ଥ ॥
ଧାତୁଂ ୱିହାରମହୟୁତ୍ତରମେୱ ନେତ୍ୱା,
ପୂଜଂ ୱିଧାତୁମନୁୱଚ୍ଛରମେୱରୂପଂ ।
ରାଜା’ଥ କିତ୍ତିସିରିମେଘସମୱ୍ହୟୋ ସୋ,
ୱାରିତ୍ତଲେଖ ମଭିଲେଖୟି ସଚ୍ଚସନ୍ଧୋ ॥
ୱାରିତ୍ତମେତମିତରେ’ପି ପୱତ୍ତୟନ୍ତା,
ତେ ବୁଦ୍ଧଦାସପମୁଖା ୱସୁଧାଧିନାଥା ।
ସଦ୍ଧାଦୟାଧିକଗୁଣାଭରଣାଭିରାମା,
ତଂ ସକ୍କରିଂସୁ ବହୁଧା ଜିନଦନ୍ତଧାତୁଂ ॥
ସତ୍ଥାରା ସମ୍ଭତତ୍ଥଂ ପୁରିମତରଭୱେ ସମ୍ପଜାନଂ ପଜାନଂ,
ସମ୍ବୋଧିଂ ତସ୍ସ ସବ୍ବାସୱୱିଗମକରିଂ ସଦ୍ଦହନ୍ତୋ’ଦହନ୍ତୋ ।
ସୋତଂ ତସ୍ସ’ଗ୍ଗଧମ୍ମେ ନିପୁଣମତି ସତଂ ସଙ୍ଗମେସଙ୍ଗମେସଂ,
ନିବ୍ବାଣଂ ସନ୍ତମିଚ୍ଛେ ତିଭୱଭୟପରିଚ୍ଚାଗହେତୁଂ ଗହେତୁଂ ॥
ପଞ୍ଚମୋ ପରିଚ୍ଛେଦୋ ।
ୟୋ ଚନ୍ଦଗୋମି ରଚିତେୱରସଦ୍ଦସତ୍ଥେ,
ଟୀକଂ ପସତ୍ଥମକରିତ୍ଥ ଚ ପଞ୍ଚିକାୟ ।
ବୁଦ୍ଧପ୍ପଭାୱଜନ ନିଂଚ ଅକା ସମନ୍ତ,
ପାସାଦିକାୟ ୱିନୟଟ୍ଠକଥାୟ ଟୀକଂ ॥
ଅଙ୍ଗୁତ୍ତରାଗମୱରଟ୍ଠକଥାୟ ଟୀକଂ,
ସମ୍ମୋଭୱିବ୍ଭମ ୱିଘାତକରିଂ ଅକାସି ।
ଅତ୍ଥାୟ ସଂୟମିଗଣସ୍ସ ପଧାନିକସ୍ସ,
ଗନ୍ଥଂ ଅକା ୱିନୟସଙ୍ଗହନାମଧେୟ୍ୟଂ ॥
ସନ୍ତିନ୍ଦ୍ରିୟସ୍ସପଟିପତ୍ତି ପରାୟଣସ୍ସ,
ସଲ୍ଲେଖ ୱୁତ୍ତି ନିରତସ୍ସ ସମାହିତସ୍ସ ।
ଅପ୍ପିଚ୍ଛତାଦି ଗୁଣୟୋଗ ୱିଭୁସନସ୍ସ,
ସମ୍ବୁଦ୍ଧସାସନମହୋଦୟକାରଣସ୍ସ ॥
ସବ୍ବେସୁଆଚରିୟତଂ ପରମଂ ଗତସ୍ସ,
ସତ୍ଥେସୁ ସବ୍ବସମୟନ୍ତର କୋୱିଦସ୍ସ ।
ସିସ୍ସେନସାରିତନୁଜସ୍ସ ମହାଦିସାମି ॥
ସୁଦ୍ଧନ୍ୱୟେନ କରୁଣାଦିଗୁଣୋଦୟେନ,
ତକ୍କାଗମାଦି କୁସଲେନ ୱିସାରଦେନ ।
ସବ୍ବତ୍ଥ ପତ୍ଥଟ ସୁଧାକରରଂସିଜାଲ,
ସଙ୍କାସକିତ୍ତିୱିସରେନ ପରିକ୍ଖକେନ ॥
ସଦ୍ଧାଧନେନ ସଖିଲେନ ଚ ଧମ୍ମକିତ୍ତି,
ନାମେନ ରାଜଗରୁନା ଚରିୟେନ ଏସୋ ।
ସୋତୁପ୍ପସାଦଜନନୋ ଜିନଦନ୍ତଧାତୁ,
ୱଂସୋ କତୋ ନିଖିଲଦସ୍ସିପଭାୱଦୀପୋ ॥
ଧମ୍ମୋ ପୱତ୍ତତୁ ଚିରାୟ ମୁନିସ୍ସରସ୍ସ,
ଧମ୍ମେ ଠିତା ୱସୁମତୀପତୟୋ ଭୱନ୍ତୁ ।
କାଲେ ପୱସ୍ସତୁ ଘନୋ ନିଖିଲା ପଜା’ପି,
ଅଞ୍ଞୋଞ୍ଞମେତ୍ତିପଟିଲାଭସୁଖଂ ଲଭନ୍ତୁ ॥