କୱିଦପ୍ପଣନୀତି
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
କୱିଦପ୍ପଣନୀତି
ମାତିକା
ୟଥାଧମ୍ମିକରାଜୂନଂ, ଅମଚ୍ଚା ଚ ପୁରୋହିତା ।
ନୀତିସତ୍ଥଂ ସୁନିସ୍ସାୟ, ନିଚ୍ଛୟନ୍ତି ୱିନିଚ୍ଛୟଂ ॥
ଅଙ୍ଗାନି ୱେଦା ଚତ୍ତାରୋ, ମୀମଂସାନ୍ୟାୟ ୱିତ୍ଥାରୋ ।
ଧମ୍ମସତ୍ଥଂ ପୁରାଣଞ୍ଚ, ୱିଜ୍ଜା ହେତା ଚତୁଦ୍ଦସ ॥
ଆୟୁବ୍ବେଦୋ ମନୁବ୍ବେଦୋ, ଗନ୍ଧବ୍ବୋ ଚେତି ତେ ତୟୋ ।
ଅତ୍ଥସତ୍ଥଂ ଚତୁତ୍ଥଞ୍ଚ, ୱିଜ୍ଜାହ୍ୟାଟ୍ଠରସ ମତା ॥
ସୁତିସମୁତିସଙ୍ଖ୍ୟା ଚ, ରୋଗାନୀତି ୱିସେସକା ।
ଗନ୍ଧବ୍ବା ଗଣିକା ଚେୱ, ଧନୁବ୍ବେଦା ଚ ପୂରଣା ॥
ତିକିଚ୍ଛା ଇତିହାସୋ ଚ, ଜୋତିମାୟା ଚ ଛନ୍ଦତି ।
କେତୁମନ୍ତା ଚ ସଦ୍ଦା ଚ, ସିପ୍ପାଟ୍ଠାରସକା ଇମେ ॥
ଦମୋ ଦଣ୍ଡୋ ଇତିଖ୍ୟାତୋ, ତଟ୍ଠାଦଣ୍ଡୋ ମହୀପତି ।
ତସ୍ସ ନୀତି ଦଣ୍ଡନୀତି, ନୟନାନୀତି ୱୁଚ୍ଚତି ॥
ଦଣ୍ଡେନ ନୀୟତେ ଚେଦଂ, ଦଣ୍ଡଂ ନୟତି ୱା ପୁନ ।
ଦଣ୍ଡନୀତି ଇତିଖ୍ୟାତୋ, ତିଲୋକା ନତି ୱତ୍ତତେ ॥
ନାନାସତ୍ଥୋଦ୍ଧତଂ ୱକ୍ଖେ, ରାଜନୀତି ସମୁଚ୍ଚୟଂ ।
ସବ୍ବବୀଜମିଦୁଂ ସତ୍ଥଂ, ଚାଣକ୍ୟ ସାରସଙ୍ଗହଂ ॥
ମୂଲସୁତ୍ତଂ ପୱକ୍ଖାମି, ଚାଣକ୍ୟେନ ୟଥୋଦିତଂ ।
ୟସ୍ସଂ ୱିଞ୍ଞାତମତ୍ତେନ, ମୂଳ୍ହୋ ଭୱତି ପଣ୍ଡିତୋ ॥
ମିତ୍ତଲାଭୋ ସୁହଦଭେଦୋ, ୱିଗ୍ଗହୋ ସନ୍ଧିରେୱ ଚ ।
ପଞ୍ଚତନ୍ଦ୍ରା ତଥାଞ୍ଞସ୍ମା, ଗନ୍ଥା କସ୍ସିୟଲିଖ୍ୟତେ ॥
ଲୋକନୀତିମ୍ହା –
(୧) ପଣ୍ଡିତକଣ୍ଡ । (୨) ସୁଜନକଣ୍ଡ । (୩) ବାଲଦୁଜ୍ଜନ କଣ୍ଡ । (୪) ମିତ୍ତକଣ୍ଡ । (୫) ଇତ୍ଥିକଣ୍ଡ । (୬) ରାଜକଣ୍ଡ । (୭) ପକିଣ୍ଣକ କଣ୍ଡ-
ଲୋକନୀତି –
ପଣ୍ଡିତୋ ସୁଜନୋ କଣ୍ଡୋ, ଦୁଜ୍ଜନୋ ମିତ୍ତଇତ୍ଥୀ ଚ ।
ରାଜପକିଣ୍ଣକୋ ଚାତି, ସତ୍ତକଣ୍ଡେ ୱିଭୂସିନୋ ॥
ଚକ୍କିନ୍ଦାଭିସିରିନାୟଂ, ସୋଧିତୋ କାସିକେ ସାକେ ।
ଛନୋତ୍ୟଂ ଦୁତିୟାସଳ୍ହେ, କାଳସତ୍ତମ ଆଦିହେ ॥
ଲୋକନୀତିଂ ପୱକ୍ଖାମି, ନାନାସତ୍ଥସମୁଦ୍ଧଟଂ ।
ମାଗଧେନେୱ ସଙ୍ଖେପଂ, ୱନ୍ଦିତ୍ୱା ରତନତ୍ତୟଂ ॥
ନୀତି ଲୋକେ ପୁରିସସ୍ସ ସାରୋ,
ମାତା ପିତା ଆଚରିୟୋ ମିତ୍ତୋ ।
ତସ୍ମା ହି ନୀତିଂ ପୁରିସୋ ୱିଜଞ୍ଞା,
ଞାଣୀମହା ହୋତି ବହୁସ୍ସୁତୋ ॥
ମହାରହନୀତି –
(୧) ପଣ୍ଡିତକଥା । (୨) ସମ୍ଭେଦକଥା । (୩) ମିତ୍ତକଥା । (୪) ନାୟକ କଥା । (୫) ଇତ୍ଥିକଥା
ମହାରହ ରହଂସକ୍ୟ-ମୁନିଂ ନୀୱରଣା ତଣ୍ହା ।
ମୁତ୍ତଂ ମୁତ୍ତଂ ସୁଦସ୍ସନଂ, ୱନ୍ଦେ ବୋଧିୱରଂ ୱରଂ ॥
ନୀତିଧ ଜନ୍ତୂନଂ ସାରୋ, ମିତ୍ତାଚରିୟା ଚ ପିତରୋ ।
ନୀତିମା ସୁବୁଦ୍ଧିବ୍ୟତ୍ତୋ, ସୁତୱା ଅତ୍ଥଦସ୍ସିମା ॥
ଧମ୍ମନୀତି –
(୧) ଆଚରିୟକଥା (୨) ସିପ୍ପକଥା (୩) ପଞ୍ଞାକଥା (୪) ସୁତକଥା (୫) କଥାନକଥା (୬) ଧନକଥା (୭) ଦେସକଥା (୮) ନିସ୍ସୟକଥା (୯) ମିତ୍ତକଥା (୧୦) ଦୁଜ୍ଜନକଥା (୧୧) ସୁଜନକଥା (୧୨) ବଲକଥା (୧୩) ଇତ୍ଥିକଥା (୧୪) ୟୁତ୍ତକଥା (୧୫) ଦାସକଥା (୧୬) ଘରାୱାସକଥା (୧୭) କାତବ୍ବକଥା (୧୮) ଅକାତବ୍ବକଥା (୧୯) ଞାତବ୍ବକଥା (୨୦) ଅଲଙ୍କାରକଥା (୨୧) ରାଜଧମ୍ମକଥା (୨୨) ଉପସେୱକକଥା (୨୩) ଦୁକ୍ଖାଦିମିସ୍ସକକଥା (୨୪) ପକିଣ୍ଣକକଥା
ଚକ୍କାତିଚକ୍କଚକ୍କିନ୍ଦୋ, ଦେୱାତିଦେୱାଦେୱିନ୍ଦୋ,
ବ୍ରହ୍ମାତି ବ୍ରହ୍ମବ୍ରହ୍ମିନ୍ଦୋ, ଜିନୋ ପୂରେତୁ ମେ ଭାୱଂ ॥
ଚିରଂ ତିଟ୍ଠତୁ ଲୋକମ୍ହି, ଧଂସକଂ ସବ୍ବପାଣିନଂ ।
ମହାମୋହତମଂ ଜୟଂ, ଜୋତନ୍ତଂ ଜିନସାସନଂ ॥
ୱନ୍ଦିତ୍ୱା ରତନଂ ସେଟ୍ଠଂ, ନିସ୍ସାୟ ପୁବ୍ବକେ ଗରୁ ।
ନୀତିଧମ୍ମଂ ପୱକ୍ଖାମି, ସବ୍ବଲୋକ ସୁଖାୱହଂ ॥
ଆଚରିୟୋ ଚ ସିପ୍ପଞ୍ଚ, ପଞ୍ଞାସୁତକଥାଧନଂ ।
ଦେସଞ୍ଚ ନିସ୍ସୟୋ ମିତ୍ତଂ, ଦୁଜ୍ଜନୋ ସୁଜନୋ ବଲଂ ॥
ଇତ୍ଥୀ ପୁତ୍ତୋ ଚ ଦାସୋ ଚ, ଘରାୱାସୋ କତାକତୋ ।
ଞାତବ୍ବୋ ଚ ଅଲଙ୍କାରୋ, ରାଜଧମ୍ମା ପସେୱକୋ ।
ଦୁକ୍ଖାଦିମିସ୍ସକୋ ଚେୱ, ପକିଣ୍ଣକାତି ମାତିକା ॥
ରାଜନୀତି –
ସୀହା ଏକଂ ବକା ଏକଂ, ସିକ୍ଖେ ଚତ୍ତାରି କୁକ୍କୁଟା ।
ପଞ୍ଚ କାକା ରାଜା ନାମ, ଛ ସୁନକ୍ଖା ତୀଣି ଗଦ୍ରଭା ॥
ମହାକମ୍ମଂ ଖୁଦ୍ଦକଂ ୱା, ୟଂ କମ୍ମଂ କାତୁମିଚ୍ଛତି ।
ସବ୍ବାରମ୍ଭେନ କାତବ୍ବଂ, ସୀହା ଏକଂ ତଦା ଭୱେ ॥
ଇନ୍ଦ୍ରିୟାନି ସୁସଂୟମ, ବକୋୱ ପଣ୍ଡିତୋ ଭୱେ ।
ଦେସକ ଲୋମପନ୍ନାନି, ସବ୍ବକମ୍ମାନି ସାଧୟେ ॥
ପୁବ୍ବଟ୍ଠାନଞ୍ଚ ୟୁଦ୍ଧଞ୍ଚ, ସଂୱିଭାଗଞ୍ଚ ବନ୍ଧୁ ହି ।
ଥିୟା ଅକ୍କମ୍ମ ଭୁତ୍ତଞ୍ଚ, ସିକ୍ଖେ ଚତ୍ତାରି କୁକ୍କୁଟୋ ॥
ଗୁୟ୍ହେ ମେଥୁନଂ ପେକ୍ଖିତ୍ୱା, ଭୋଜନଂ ଞାତିସଙ୍ଗହୋ ।
ୱିଲୋକା ପେକ୍ଖନାଲସ୍ୟଂ, ପଞ୍ଚ ସିକ୍ଖେୟ୍ୟ ୱାୟସା ॥
ଅନାଲସ୍ସଂତିସୱନ୍ତାସୋ, ସୁନିଦ୍ଧା ସୁପ୍ପବୋଧନା ।
ଦଳ୍ହଭତ୍ତି ଚ ସୂରଞ୍ଚ, ଛ ଏତେସ୍ୱାନତୋ ଗୁଣୋ ॥
ଖିନ୍ନୋୱ ୱହତେ ଭାରଂ, ସୀତୁଣ୍ହଞ୍ଚ ନ ଚିନ୍ତୟୀ ।
ସନ୍ତୁଟ୍ଠୋ ଚ ଭୱେ ନିଚ୍ଚଂ, ତୀଣି ସିକ୍ଖେୟ୍ୟ ଗଦ୍ରଭା ॥
ୱୀସତି ତାନି ଗୁଣାନି, ଚରେୟ୍ୟ ଇହ ପଣ୍ଡିତୋ ।
ୱିଜେୟ୍ୟ ରିପୂ ସବ୍ବେପି, ତେଜସ୍ସୀ ସୋ ଭୱିସ୍ସତି ॥
(୧) ପଣ୍ଡିତକଣ୍ଡ (୨) ସୁଜନକଣ୍ଡ (୩) ବାଲଦୁଜ୍ଜନକଣ୍ଡ (୪) ମିତ୍ତକଣ୍ଡ (୫) ରାଜକଣ୍ଡ (୬) ନାୟକକଣ୍ଡ (୭) ପୁତ୍ତକଣ୍ଡ (୮) ୱେଜ୍ଜାଚରିୟକଣ୍ଡ (୯) ଦାସକକଣ୍ଡ (୧୦) ଇତ୍ଥିକଣ୍ଡ (୧୧) ପକିଣ୍ଣକକଣ୍ଡ
କୱିଦପ୍ପଣନୀତିଂୟୋ, ୱାଚୁଗ୍ଗତଂ କରୋତି ଚେ ।
ଭୁୱନମଜ୍ଝେ ଏସୋ ହି, ୱିଞ୍ଞୂ ପଣ୍ଡିତଜାତିକୋ ॥
କୱିଦପ୍ପଣନୀତି
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ରତନତ୍ତୟପଣାମ
ମହାକୱିୱରଂ ବୁଦ୍ଧଂ, ଧମ୍ମଞ୍ଚ ତେନ ସେୱିତଂ ।
ସଙ୍ଘଂ ନିରଙ୍ଗଣଞ୍ଚାପି, ୱନ୍ଦାମି ସିରସା ଦରଂ ॥
କରିସ୍ସାମି ସମାସେନ, ନାନାସତ୍ଥ ସମୁଦ୍ଧଟଂ ।
ହିତାୟ କୱିନଂ ନୀତିଂ, କୱିଦପ୍ପଣନାମକଂ ॥
ପଣ୍ଡିତକଣ୍ଡ
ନୀତି ସାରୋ ମନୁସ୍ସାନଂ, ମିତ୍ତୋ ଆଚରିୟୋପି ଚ ।
ମାତା ପିତା ଚ ନୀତିମା, ସୁତୱା ଗନ୍ଥକାରକୋ ॥
ଅଲସସ୍ସ କୁତୋ ସିପ୍ପଂ, ଅସିପ୍ପସ୍ସ କୁତୋ ଧନଂ ।
ଅଧନସ୍ସ କୁତୋ ମିତ୍ତଂ, ଅମିତ୍ତସ୍ସ କୁତୋ ସୁଖଂ ।
ଅସୁଖସ୍ସ କୁତୋ ପୁଞ୍ଞଂ, ଅପୁଞ୍ଞସ୍ସ କୁତୋ ୱରଂ ॥
ସୁଚିନ୍ତିତଚିନ୍ତୀ ଚେୱ, ସୁଭାସିତଭାସୀପି ଚ ।
ସୁକତକମ୍ମକାରୀ ଚ, ପଣ୍ଡିତୋ ସାଧୁମାନୁସୋ ॥
କୱିହେରଞ୍ଞକା କତ୍ୱା, ଉତ୍ତତ୍ତଂ ସତ୍ଥକଞ୍ଚନଂ ।
ଭୂସନଂ ଗଜ୍ଜପଜ୍ଜାଦିଂ, କରୋନ୍ତି ଚ ମନୋହରଂ ॥
ବହୁଂ ଲହୁଞ୍ଚ ଗହଣଂ, ସମ୍ମୂପଧାରଣମ୍ପି ଚ ।
ଗହିତ ଅସମ୍ମୁସ୍ସନଂ, ଏତଂ ସୁୱିଞ୍ଞୁଲକ୍ଖଣଂ ॥
ଅଜରାମରଂୱ ପଞ୍ଞୋ, ୱିଜ୍ଜମତ୍ଥଞ୍ଚ ଚିନ୍ତୟେ ।
ଗହିତୋ ଇୱ କେସେସୁ, ମଚ୍ଚୁନା ଧମ୍ମମାଚରେ ॥
ସିପ୍ପସମଂ ଧନଂ ନତ୍ଥି, ସିପ୍ପଂ ଚୋରା ନ ଗଣ୍ହରେ ।
ଇଧ ଲୋକେ ସିପ୍ପଂ ମିତ୍ତଂ, ପରଲୋକେ ସୁଖାୱହଂ ॥
ଭୁଞ୍ଜନତ୍ଥଂ କଥନତ୍ଥଂ, ମୁଖଂ ହୋତୀତି ନୋ ୱଦେ ।
ୟଂ ୱାତଂ ୱା ମୁଖାରୁଳ୍ହଂ, ୱଚନଂ ପଣ୍ଡିତୋ ନରୋ ॥
ଦୁମ୍ମେଧେହି ପସଂସା ଚ, ୱିଞ୍ଞୂହି ଗରହା ଚ ୟା ।
ଗରହାୱ ସେୟ୍ୟୋ ୱିଞ୍ଞୂହି, ୟଞ୍ଚେ ବାଲପ୍ପସଂସନା ॥
ଅଚିନ୍ତିୟେ ସାଟ୍ଠକଥେ, ପଣ୍ଡିତୋ ଜିନଭାସିତେ ।
ଉପଦେସଂ ସଦା ଗଣ୍ହେ, ଗରୁଂ ସମ୍ମା ଉପଟ୍ଠହଂ ॥
ତସ୍ମା ସାଟ୍ଠକଥେ ଧୀରୋ, ଗମ୍ଭୀରେ ଜିନଭାସିତେ ।
ଉପଦେସଂ ସଦା ଗଣ୍ହେ, ଗରୁଂ ସମ୍ମା ଉପଟ୍ଠହଂ ॥
ଗରୂପଦେସହୀନୋ ହି, ଅତ୍ଥସାରଂ ନ ୱିନ୍ଦତି ।
ଅତ୍ଥସାରୱିହୀନୋ ସୋ, ସଦ୍ଧମ୍ମା ପରିହାୟତି ॥
ଗରୂପଦେସଲାଭୀ ଚ, ଅତ୍ଥସାରସମାୟୁତୋ ।
ସଦ୍ଧମ୍ମଂ ପରିପାଲେନ୍ତୋ, ସଦ୍ଧମ୍ମସ୍ମା ନ ହାୟତି ॥
ସବ୍ବଦବ୍ବେସୁ ୱିଜ୍ଜେୱ, ଦବ୍ବମାହୁ ଅନୁତ୍ତରଂ ।
ଅହାରତ୍ତା ଅନଗ୍ଘତ୍ତା, ଅକ୍ଖୟତ୍ତା ଚ ସବ୍ବଦା ॥
ଅପ୍ପକେନପି ମେଧାୱୀ, ପାଭତେନ ୱିଚକ୍ଖଣୋ ।
ସମୁଟ୍ଠାପେତି ଅତ୍ତାନଂ, ଅଣୁଂ ଅଗ୍ଗିଂୱ ସନ୍ଧମଂ ॥
ପଣ୍ଡିତେ ଚ ଗୁଣା ସବ୍ବେ, ମୂଳ୍ହେ ଦୋସା ହି କେୱଲଂ ।
ତସ୍ମା ମୂଳ୍ହସହସ୍ସେସୁ, ପଞ୍ଞୋ ଏକୋ ୱିସେସିୟତେ ॥
ବାଲା ଇସ୍ସନ୍ତି ଦୁମ୍ମେଧା, ଗୁଣୀ ନିଦ୍ଦୋସକାରିନୋ ।
ଗରୁକୋ ପଣ୍ଡିତୋ ଏତସ-ମିସ୍ସଂ ତେହ୍ୟୱିଦ୍ୱା ସମୋ ॥
ମନୁଞ୍ଞମେୱ ଭାସେୟ୍ୟ, ନାମନୁଞ୍ଞଂ କୁଦାଚନଂ ।
ମନୁଞ୍ଞଂ ଭାସମାନସ୍ସ, ଗରୁଂ ଭାରଂ ଉଦଦ୍ଧରି ।
ଧନଞ୍ଚ ନଂ ଅଲାଭେସି, ତେନ ଚତ୍ତମନୋ ଅହୁ ॥
ୱିଜ୍ଜା ଦଦାତି ୱିନୟଂ, ୱିନୟା ୟାତି ପତ୍ତତଂ ।
ପତ୍ତତ୍ତା ଧନଂ ପପ୍ପୋତି, ଧନା ଧମ୍ମଂ ତତୋ ସୁଖଂ ॥
ୟେ ୱୁଡ୍ଢମପଚୟନ୍ତି, ନରା ଧମ୍ମସ୍ସ କୋୱିଦା ।
ଦିଟ୍ଠେୱ ଧମ୍ମେ ପାସଂସା, ସମ୍ପରାୟେ ଚ ସୁଗ୍ଗତିଂ ॥
ମାତରିୱ ପରଦାରେସୁ, ପରଦବ୍ବେସୁ ଲେଦ୍ଦୁଂୱ ।
ଅତ୍ତନୀୱ ସବ୍ବଭୂତେସୁ, ୟୋ ପସ୍ସତି ସୋ ପଣ୍ଡିତୋ ॥
ଆସୀସେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ଅନୱଜ୍ଜେସୁ କମ୍ମେସୁ, ପସଂସିତେସୁ ସାଧୁଭି ॥
ଆସୀସେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ୟଥା ଇଚ୍ଛିଂ ତଥା ଅହୁ ॥
ୱାୟମେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପୁଞ୍ଞକ୍ରିୟୱତ୍ଥୂସୁ, ପସଂସିତେସୁ ୱିଞ୍ଞୁଭି ॥
ଲୋକେ ଉସ୍ସାହୱନ୍ତାନଂ, ଜନାନଂ କିମସାଧିୟଂ ।
ସାଗରେପି ମହାସେତୁଂ, କପିୟୂଥେହି ବନ୍ଧତି ॥
କିଂ କୁଲେନ ୱିସାଲେନ, ଗୁଣହୀନୋ ତୁ ୟୋ ନରୋ ।
ଅକୁଲିନୋପି ସତ୍ଥଞ୍ଞୋ, ଦେୱତାହିପି ପୁଜ୍ଜତେ ॥
ଉକ୍କଟ୍ଠେ ସୂରମିଚ୍ଛନ୍ତି, ମନ୍ତୀସୁ ଅକୁତୂହଲଂ ।
ପିୟଞ୍ଚ ଅନ୍ନପାନମ୍ହି, ଅତ୍ଥେ ଜାତେ ଚ ପଣ୍ଡିତଂ ॥
ରୂପୟୋବ୍ବନ୍ନସମ୍ପନ୍ନା, ୱିସାଲକୁଲସମ୍ଭୱା ।
ୱିଜ୍ଜାହୀନା ନ ସୋଭନ୍ତେ, ନିଗ୍ଗନ୍ଧା ଇୱ କିଂ ସୁକା ॥
ୱୁତ୍ୟଂ ୱିସଦଞାଣସ୍ସ, ଞାତୋ ଅତ୍ଥୋ ତରସ୍ସନ ।
ସୂରପ୍ପଭାୟ ଆଦାସୋ, ଛାୟଂ ଦିସ୍ସେ ନ ମାକରେ ॥
ଅୱେୟ୍ୟାକରଣୋ ତ୍ୱନ୍ଧୋ, ବଧିରୋ କୋସୱଜ୍ଜିତୋ ।
ସାହିଚ୍ଚରହିତୋ ପଙ୍ଗୁ, ମୂଗୋ ତକ୍କୱିୱଜ୍ଜିତୋ ॥
ଧୀରୋ ଚ ୱିୱିଧାନଞ୍ଞୂ, ପରେସଂ ୱିୱରାନୁଗୂ ।
ସବ୍ବାମିତ୍ତେ ୱସୀକତ୍ୱା, କୋସିୟୋୱ ସୁଖୀ ସିୟା ॥
ମହାତେଜୋପି ତେଜୋୟଂ, ମତ୍ତିକଂ ନ ମୁଦୁଂ କରେ ।
ଆପୋ ଆପେସି ମୁଦୁକଂ, ସାଧୁୱାଚାୱ କକ୍ଖଳଂ ॥
କୋତ୍ଥୋ ପୁତ୍ତେନ ଜାତେନ, ୟୋ ନ ୱିଦୂ ନ ଧମ୍ମିକୋ ।
କାଣେନ ଚକ୍ଖୁନା କିଂ ୱା, ଚକ୍ଖୁ ପୀଳେୱ କେୱଲଂ ॥
ମୁଦୁନାୱ ରିପୁଂ ଜେତି, ମୁଦୁନା ଜେତି ଦାରୁଣଂ ।
ନୋ ନ ସିଦ୍ଧଂ ମୁଦୁ କିଞ୍ଚି, ତତୋ ଚ ମୁଦୁନା ଜୟେ ॥
ସଜାତୋ ୟେନ ଜାତେନ, ୟାତି ୱଂସୋ ସମୁନ୍ନତିଂ ।
ପରିୱତ୍ତିନିସଂସାରେ, ମତୋ କୋ ୱା ନ ଜାୟତେ ॥
ଦାନେ ତପସି ସୂରେ ଚ, ୟସ୍ସ ନ ପତ୍ଥିତୋ ୟସୋ ।
ୱିଜ୍ଜାୟ ମତ୍ଥଲାଭେ ଚ, କେୱଲଂ ଅଧିକୋୱସୋ ॥
ୱରୋ ଏକୋ ଗୁଣୀ ପୁତ୍ତୋ, ନ ଚ ମୂଳ୍ହସତାନ୍ୟପି ।
ଏକୋ ଚନ୍ଦୋ ତମୋ ହନତି, ନ ଚ ତାରାଗଣୋ ତଥା ॥
ପୁଞ୍ଞତିତ୍ଥକତୋ ୟେନ, ତପୋ କ୍ୱାପି ସୁଦୁକ୍କରୋ ।
ତସ୍ସ ପୁତ୍ତୋ ଭୱେ ୱସ୍ସୋ, ସମିଦ୍ଧୋ ଧମ୍ମିକୋ ସୁଦ୍ଧେ ॥
ଲାଲୟେ ପଞ୍ଚୱସ୍ସାନି, ଦସୱସ୍ସାନି ତାଲୟେ ।
ପତ୍ତେତୁ ସୋଳସେ ୱସ୍ସେ, ପୁତ୍ତଂ ମିତ୍ତଂୱ ଆଚରେ ॥
ଲାଲନେ ବହୱୋ ଦୋସା, ତାଲନେ ବହୱୋ ଗୁଣା ।
ତସ୍ମା ପୁତ୍ତଞ୍ଚ ସିସ୍ସଞ୍ଚ, ତାଲୟେ ନ ତୁ ଲାଲୟେ ॥
ମାଗଧା ପାକତା ଚେୱ, ସକ୍କତୱୋହାରୋପି ଚ ।
ଏତେସୁ କୋୱିଦୋ ପଞ୍ଞୋ, ଧୀରୋ ପାଳିଂ ୱିସୋଧୟେ ॥
ସକ୍କତଂ ପାକତଞ୍ଚେୱ-ପଭଂସୋ ଚ ପିସାଚିକୀ ।
ମାଗଧୀ ସୋରସେନୀୱ, ଛ ଭାସା ପରିକିତ୍ତିତା ॥
ଚନ୍ଦନଂ ସୀତଲଂ ଲୋକେ, ଚନ୍ଦିକା ସୀତଲା ତତୋ ।
ଚନ୍ଦନ ଚନ୍ଦିକାତୋପି, ୱାକ୍ୟଂ ସାଧୁ ସୁଭାସିତଂ ॥
ପତ୍ତକାଲୋଦିତଂ ଅପ୍ପଂ, ୱାକ୍ୟଂ ସୁଭାସିତଂ ଭୱେ ।
ଖୁଦିତସ୍ସ କଦନ୍ନମ୍ପି, ଭୁତ୍ତଂ ସାଦୁରସଂ ସିୟା ॥
ସତ୍ଥକାପି ବହୂୱାଚା, ନାଦରା ବହୁଭାଣିନୋ ।
ସୋପକାରମୁଦାସିନା, ନନୁ ଦିଟ୍ଠଂ ନଦୀଜଲଂ ॥
ପାସାଣଛତ୍ତଂ ଗରୁକଂ, ତତୋ ଦେୱାନାଚିକ୍ଖନା ।
ତତୋ ୱୁଡ୍ଢାନମୋୱାଦୋ, ତତୋ ବୁଦ୍ଧସ୍ସ ସାସନଂ ॥
ତୂଲଂ ସଲ୍ଲହୁକଂ ଲୋକେ, ତତୋ ଚପଲଜାତିକୋ ।
ତତୋନୋସାୱକୋ ତତୋ, ୟତି ଧମ୍ମପମାଦକୋ ॥
ପଣ୍ଡିତସ୍ସ ପସଂସାୟ, ଦଣ୍ଡୋ ବାଲେନ ଦୀୟତେ ।
ପଣ୍ଡିତୋ ପଣ୍ଡିତେନେୱ, ୱଣ୍ଣିତୋୱ ସୁୱଣ୍ଣିତୋ ॥
ସତେସୁ ଜାୟତେ ସୂରୋ, ସହସ୍ସେସୁ ଚ ପଣ୍ଡିତୋ ।
ୱୁତ୍ତା ସତସହସ୍ସେସୁ, ଦାତା ଭୱତି ୱା ନ ୱା ॥
ୱିଦ୍ୱତ୍ତଞ୍ଚ ରାଜତ୍ତଞ୍ଚ, ନେୱ ତୁଲ୍ୟଂ କଦାଚିପି ।
ସଦେସେ ପୂଜିତୋ ରାଜା, ୱିଦ୍ୱା ସବ୍ବତ୍ଥ ପୂଜିତୋ ॥
ସତଂ ଦୀଘାୟୁକଂ ସବ୍ବ-ସତ୍ତାନଂ ସୁଖକାରଣଂ ।
ଅସତଂ ପନ ସବ୍ବେସଂ, ଦୁକ୍ଖହେତୁ ନ ସଂସୟୋ ॥
ପଣ୍ଡିତେ ସୁଜନେ ସନ୍ତେ, ସବ୍ବେପି ସୁଜନା ଜନା ।
ଜାତେକସ୍ମିଂ ସାରଗନ୍ଧେ, ସବ୍ବେ ଗନ୍ଧମୟା ଦୁମା ॥
ଅତ୍ତାୱ ୟଦି ୱିନୀତୋ, ନିଜସ୍ସିତା ମହାଜନା ।
ୱିନୀତଂ ୟନ୍ତି ସବ୍ବେପି, କୋ ତଂ ନାସେୟ୍ୟ ପଣ୍ଡିତୋ ॥
ସରୀରସ୍ସ ଗୁଣାନଞ୍ଚ, ଦୂରମଚ୍ଚନ୍ତମନ୍ତରଂ ।
ସରୀରଂ ଖଣୱିଦ୍ଧଂସୀ, କପ୍ପନ୍ତଟ୍ଠାୟିନୋ ଗୁଣା ॥
ଅମ୍ବୁଂ ପିୱନ୍ତି ନୋ ନଜ୍ଜୋ, ରୁକ୍ଖୋ ଖାଦତି ନୋ ଫଲଂ ।
ମେଘୋ କ୍ୱଚିପି ନୋ ସସ୍ସଂ, ପରତ୍ଥାୟ ସତଂ ଧନଂ ॥
ସଚ୍ଚଂ ପୁନପି ସଚ୍ଚନ୍ତି, ଭୁଜମୁକ୍ଖିପ୍ପ ମୁଚ୍ଚତେ ।
ସକତ୍ଥୋ ନତ୍ଥି ନତ୍ଥେୱ, ପରସ୍ସତ୍ଥ ମକୁବ୍ବତୋ ॥
ସତଂ ଫରୁସୱାଚାହି, ନ ୟାତି ୱିକତିଂ ମନୋ ।
ତିଣୁକ୍କାହି ନ ସକ୍କାୱ, ତାପେତୁଂ ସାଗରେ ଜଲଂ ॥
ସେଲୋ ୟଥା ଏକଘନୋ, ୱାତେନ ନ ସମୀରତି ।
ଏୱଂ ନିନ୍ଦାପସଂସାସୁ, ନ ସମିଞ୍ଜନ୍ତି ପଣ୍ଡିତା ॥
ଧମ୍ମତ୍ଥକାମମୋକ୍ଖାନଂ, ୟସ୍ସେକୋପି ନ ୱିଜ୍ଜତି ।
ଅଜଗଲଥନସ୍ସେୱ, ତସ୍ସ ଜାତି ନିରତ୍ଥକା ॥
ନ କମ୍ମମପି ଚିନ୍ତେତ୍ୱା, ଚଜେ ଉୟ୍ୟୋଗମତ୍ତନୋ ।
ଅନୁୟ୍ୟୋଗେନ ତେଲାନି, ତିଲେହି ନ ସକ୍କା ଲଦ୍ଧୁଂ ॥
ୟଥା ହ୍ୟେକେନ ଚକ୍କେନ, ନ ରଥସ୍ସ ପତି ଭୱେ ।
ଏୱଂ ପୁରିସକାରେନ, ୱିନା କମ୍ମଂ ନ ସିଜ୍ଝତି ॥
ଉୟ୍ୟାମେନ ହି ସିଜ୍ଝନ୍ତି, କାରିୟାନି ନ ମନୋରଥଂ ।
ନ ହି ସୁତ୍ତସ୍ସ ସୀହସ୍ସ, ପୱିସନ୍ତି ମିଗାମୁଖେ ॥
ମାତାପିତୁ କତାଭ୍ୟାସୋ, ଗୁଣିତମେତି ବାଲକୋ ।
ନ ଗବ୍ଭଜାତିମତ୍ତେନ, ପୁତ୍ତୋ ଭୱତି ପଣ୍ଡିତୋ ॥
ମାତା ସତ୍ତୁ ପିତା ୱେରୀ, ୟେନ ବାଲୋ ନ ପାଠିତୋ ।
ନ ସୋଭତେ ସଭାମଜ୍ଝେ, ହଂସମଜ୍ଝେ ବକୋ ୟଥା ॥
କାଚୋ କଞ୍ଚନସଂସଗ୍ଗୋ, ଧତ୍ତେ ମରକତିଂ ଜୁତିଂ ।
ତଥା ସବ୍ଭିସନ୍ନିଧାନା, ମୂଳ୍ହୋ ୟାତି ପୱୀଣତଂ ॥
ତସ୍ମା ଅକ୍ଖରକୋସଲ୍ଲଂ, ସମ୍ମାଦେୟ୍ୟ ହିତତ୍ଥିକୋ ।
ଉପଟ୍ଠହଂ ଗରୁଂ ସମ୍ମା, ଉଟ୍ଠାନାଦୀହି ପଞ୍ଚହି ॥
ଉଟ୍ଠାନା ଉପଟ୍ଠାନା, ଚ, ସୁସ୍ସୂସା ପାରିଚରୀୟା ।
ସକ୍କଚ୍ଚଂ ସିପ୍ପୁଗ୍ଗହଣା, ଗରୁଂ ଆରାଧୟେ ବୁଧୋ ॥
କାବ୍ୟସତ୍ଥ ୱିନୋଦେନ, କାଲୋ ଗଚ୍ଛତି ଧୀମତଂ ।
ବ୍ୟସନେନ ଚ ମୂଳ୍ହାନଂ, ନିଦାୟ କଲହେନ ୱା ॥
ଛ ଦୋସା ପୁରିସେନେହ, ହାତବ୍ବା ଭୂତିମିଚ୍ଛତା ।
ନିଦ୍ଦାତନ୍ଦୀ ଭୟଂ କୋଧୋ, ଆଲସ୍ୟଂ ଦୀଘସୁତ୍ତତା ॥
ନିଦ୍ଦାସୀଲୀ ସଭାସୀଲୀ, ଅନୁଟ୍ଠାତା ଚ ୟୋ ନରୋ ।
ଅଲସୋ କୋଧପଞ୍ଞାଣୋ, ତଂ ପରାଭୱତୋ ମୁଖଂ ॥
ନିଗ୍ଗୁଣେସୁପି ସତ୍ତେସୁ, ଦୟା କୁବ୍ବନ୍ତି ସାଧୱୋ ।
ନ ହି ସଂହରତେ ଜୁତିଂ, ଚନ୍ଦୋ ଚଣ୍ଡାଲୱେସ୍ମେ ॥
ୟତ୍ର ୱିଦ୍ୱଜ୍ଜନୋ ନତ୍ଥି, ସୀଲାଘ୍ୟୋ ତତ୍ର ଅପ୍ପଧିପି ।
ନିରତ୍ଥପାଦମେ ଦେସେ, ଏରଣ୍ଡୋପି ଦୁମାୟତେ ॥
ଠାନଭଟ୍ଠା ନ ସୋଭନ୍ତେ, ଦନ୍ତା କେସା ନଖା ନରା ।
ଇତିୱିଞ୍ଞାୟ ମତିମା, ସଟ୍ଠାନଂ ନ ପରିଚ୍ଚଜେ ॥
ପରୋପଦେସେ ପଣ୍ଡିଚ୍ଚଂ, ସବ୍ବେସଂ ସୁକରଞ୍ହି ଖୋ ।
ଧମ୍ମେ ସୟମନୁଟ୍ଠାନଂ, କସ୍ସଚିସୁମହତ୍ତନୋ ॥
ଅପ୍ପମାଦଂ ପସଂସନ୍ତି, ପୁଞ୍ଞକିରିୟାସୁ ପଣ୍ଡିତା ।
ଅପ୍ପମତ୍ତୋ ଉଭୋ ଅତ୍ଥେ, ଅଧିଗ୍ଗଣ୍ହାତି ପଣ୍ଡିତୋ ॥
ନିଧୀନଂୱ ପୱତ୍ତାରଂ, ୟଂ ପସ୍ସେ ୱଜ୍ଜଦସ୍ସିନଂ ।
ନିଗ୍ଗୟ୍ହୱାଦିଂ ମେଧାୱିଂ, ତାଦିସଂ ପଣ୍ଡିତଂ ଭଜେ ।
ତାଦିସଂ ଭଜମାନସ୍ସ, ସେୟ୍ୟୋ ହୋତି ନ ପାପିୟୋ ॥
ମୁହୁତ୍ତମପି ଚେ ୱିଞ୍ଞୂ, ପଣ୍ଡିତଂ ପୟିରୁପାସତି ।
ଖିପ୍ପଂ ଧମ୍ମଂ ୱିଜାନାତି, ଜିୱ୍ହା ସୂପରସଂ ୟଥା ॥
ଦୁଲ୍ଲଭୋ ପୁରିସାଜଞ୍ଞୋ, ନ ସୋ ସବ୍ବତ୍ଥ ଜାୟତି ।
ୟତ୍ଥ ସୋ ଜାୟତୀ ଧୀରୋ, ତଂ କୁଲଂ ସୁଖ ମେଧତି ॥
ତଗରଞ୍ଚ ପଲାସେନ, ୟୋ ନରୋ ଉପନୟ୍ହତି ।
ପତ୍ତାପି ସୁରତି ୱାୟନ୍ତି, ଏୱଂ ଧୀରୂପସେୱନା ॥
ନିପୁଣେ ସୁତମେସେୟ୍ୟ, ୱିଚିନିତ୍ୱା ସୁତତ୍ଥିକୋ ।
ଭତ୍ତଂ ଉକ୍ଖଲିୟଂ ପକ୍କଂ, ଭାଜନେପି ତଥା ଭୱେ ॥
ଅପ୍ପକଂ ନାତିମଞ୍ଞେୟ୍ୟ, ଚିତ୍ତେ ସୁତଂ ନିଧାପୟେ ।
ୱମ୍ମିକୋଦକବିନ୍ଦୂୱ, ଚିରେନ ପରିପୂରତି ॥
ଗଚ୍ଛଂ କିପିଲ୍ଲିକୋ ୟାତି, ୟୋଜନାନଂ ସତାନିପି ।
ଅଗଚ୍ଛଂ ୱେନୟ୍ୟୋଅପି, ପଦମେକଂ ନ ଗଚ୍ଛତି ॥
ସେଲେ ସେଲେ ନ ମଣିକଂ, ଗଜେ ଗଜେ ନ ମୁତ୍ତିକଂ ।
ୱନେ ୱନେ ନ ଚନ୍ଦନଂ, ଠାନେ ଠାନେ ନ ପଣ୍ଡିତୋ ॥
ପଣ୍ଡିତୋ ସୁତସମ୍ପନ୍ନୋ, ୟତ୍ଥ ଅତ୍ଥୀତି ଚେ ସୁତୋ ।
ମହୁସ୍ସାହେନ ତଂ ଠାନଂ, ଗନ୍ତବ୍ବଂୱ ସୁତେସିନା ॥
ପୋତ୍ଥକେସୁ ଚ ୟଂ ସିପ୍ପଂ, ପରହତ୍ଥେସୁ ୟଂ ଧନଂ ।
ୟଥାକିଚ୍ଚେ ସମୁପ୍ପନ୍ନେ, ନ ତଂ ସିପ୍ପଂ ନ ତଂ ଧନଂ ॥
ଉପ୍ପଲେନ ଜଲଂ ଜଞ୍ଞା, କିରିୟାୟ କୁଲଂ ନରୋ ।
ବ୍ୟତ୍ତିପ୍ପମାଣ ୱାଚାୟ, ଜଞ୍ଞା ତିଣେନ ମେଦନିଂ ॥
ଜଲପ୍ପମାଣଂ କୁମୁଦମାଲଂ,
କୁଲପ୍ପମାଣଂ ୱିନୟୋପମାଣଂ ।
ବ୍ୟତ୍ତିପ୍ପମାଣଂ କଥିତୱାକ୍ୟଂ,
ପଥୱିୟା ପମାଣଂ ତିଣମିଲାତଂ –
ଅପ୍ପସ୍ସୁତୋ ସୁତଂ ଅପ୍ପଂ, ବହୁଂ ମଞ୍ଞତି ମାନୱା ।
ସିନ୍ଧୁଦକମପସ୍ସନ୍ତୋ, କୂପେ ତୋୟଂୱ ମଣ୍ଡୁକୋ ॥
ପଠମେ ସିପ୍ପଂ ଗଣ୍ହେୟ୍ୟ, ଏସେୟ୍ୟ ଦୁତିୟେ ଧନଂ ।
ଚରେୟ୍ୟ ତତିୟେ ଧମ୍ମଂ, ଏସା ଜନାନ ଧମ୍ମତା ॥
ସୁସ୍ସୂସା ସୁତ୍ତୱଦ୍ଧନୀ, ସୁତଂ ପଞ୍ଞାୟ ୱଦ୍ଧନଂ ।
ପଞ୍ଞାୟ ଅତ୍ଥଂ ଜାନାତି, ଅତ୍ଥୋ ଞାତୋ ସୁଖାୱହୋ ॥
ନତ୍ଥି ୱିଜ୍ଜାସମଂ ମିତ୍ତଂ, ନ ଚ ବ୍ୟାଧିସମୋ ରିପୁ ।
ନ ଚ ଅତ୍ଥସମଂ ପେମଂ, ନ ଚ କମ୍ମସମଂ ବଲଂ ॥
ୱିନା ସତ୍ଥଂ ନ ଗଚ୍ଛେୟ୍ୟ, ସୂରୋ ସଙ୍ଗାମଭୂମିୟଂ ।
ପଣ୍ଡିତ୍ୱଦ୍ଧଗୂ ୱାଣିଜୋ, ୱିଦେସଗମନୋ ତଥା ॥
ଧନନାସଂ ମନୋତାପଂ, ଘରେ ଦୁଚ୍ଚରିତାନି ଚ ।
ୱଞ୍ଚନଞ୍ଚ ଅୱମାନଂ, ପଣ୍ଡିତୋ ନ ପକାସୟେ ॥
ଅନୱ୍ହାୟଂ ଗମୟନ୍ତୋ, ଅପୁଚ୍ଛା ବହୁଭାସକୋ ।
ଅତ୍ତଗୁଣଂ ପକାସନ୍ତୋ, ତିୱିଧୋ ହୀନପୁଗ୍ଗଲୋ ॥
ହଂସୋ ମଜ୍ଝେ ନ କାକାନଂ, ସୀହୋ ଗୁନ୍ନଂ ନ ସୋଭତେ ।
ଗଦ୍ରଭମଜ୍ଝେ ତୁରଙ୍ଗୋ, ବାଲମଜ୍ଝେୱ ପଣ୍ଡିତୋ ॥
ପତ୍ତାନୁରୂପକଂ ୱାକ୍ୟଂ, ସଭାୱାନୁରୂପଂ ପିୟଂ ।
ଅତ୍ତାନୁରୂପକଂ କୋଧଂ, ୟୋ ଜାନାତି ସ ପଣ୍ଡିତୋ ॥
ଅପ୍ପରୂପୋ ବହୁଂଭାସୋ, ଅପ୍ପପଞ୍ଞୋ ପକାସକୋ ।
ଅପ୍ପପୂରୋ ଘଟୋ ଖୋଭେ, ଅପ୍ପଖୀରା ଗାୱୀ ଚଲେ ॥
ନ ତିତ୍ତି ରାଜା ଧନମ୍ହି, ପଣ୍ଡିତୋପି ସୁଭାସିତେ ।
ଚକ୍ଖୁପି ପିୟଦସ୍ସନେ, ନ ତିତ୍ତି ସାଗରୋ ଜଲେ ॥
ହୀନପୁତ୍ତୋ ରାଜମଚ୍ଚୋ, ବାଲପୁତ୍ତୋ ଚ ପଣ୍ଡିତୋ ।
ଅଧନସ୍ସ ଧନଂବହୁ, ପୁରିସାନଂ ନ ମଞ୍ଞଥ ॥
ୟୋ ସିସ୍ସୋ ସିପ୍ପଲୋଭେନ, ବହୁଂ ଗଣ୍ହାତି ତଂ ସିପ୍ପଂ ।
ମୂଗୋୱ ସୁପିନଂ ପସ୍ସଂ, କଥେତୁମ୍ପି ନ ଉସ୍ସହେ ॥
ନ ଭିଜ୍ଜେତୁଂ କୁମ୍ଭକାରୋ, ସୋଭେତୁଂ କୁମ୍ଭ ଘଟତି ।
ନ ଖିପିତୁଂ ଅପାୟେସୁ, ସିସ୍ସାନଂ ୱୁଡ୍ଢିକାରଣା ॥
ଅଧନସ୍ସ ରସଂଖାଦୋ, ଅବଲସ୍ସ ହତୋ ନରୋ ।
ଅପ୍ପଞ୍ଞସ୍ସ ୱାକ୍ୟକରୋ, ଉମ୍ମତ୍ତକ ସମାହିଖୋ ॥
ଏକେନାପି ସୁରୁକ୍ଖେନ, ପୁପ୍ଫିତେନ ସୁଗନ୍ଧିନା ।
ୱାସିତଂ କାନନଂ ସବ୍ବଂ, ସୁପୁତ୍ତେନ କୁଲଂ ୟଥା ॥
ଇଣକତ୍ତା ପିତା ସତ୍ତୁ, ମାତା ଚ ବ୍ୟଭିଚାରିନୀ ।
ଭରିୟା ରୂପୱତୀ ସତ୍ତୁ, ପୁତ୍ତୋ ସତ୍ତୁ ଅପଣ୍ଡିତୋ ॥
ଗୁଣଦୋସମସତ୍ଥଞ୍ଞୂ, ଜନୋ ୱିଭଜତେ କଥଂ ।
ଅଧିକାରୋ କିମନ୍ଧସ୍ସ, ରୂପଭେଦୋପଲଦ୍ଧିୟଂ ॥
ସବ୍ବତ୍ଥ ସତ୍ଥତୋୟେୱ, ଗୁଣଦୋସୱିଚେଚନଂ ।
ୟଂ କରୋତି ୱିନାସତ୍ଥଂ, ସାହସଂ କିମତୋଧିକଂ ॥
ନ ଚ ହାୟେଥ କଦାଚି ତୁଲ୍ୟସେୱୀ ।
ସେଟ୍ଠମୁପନମଂ ଉଦେତି ଖିପ୍ପଂ,
ତସ୍ମା ଅତ୍ତନୋ ଉତ୍ତରିଂ ଭଜେ ॥
ପଚ୍ଚୁପ୍ପନ୍ନଞ୍ଚ ୟୋ ଧମ୍ମଂ, ତତ୍ଥ ତତ୍ଥ ୱିପସ୍ସତି ।
ଅସଂହୀରଂ ଅସଂକୁପ୍ପଂ, ତଂ ୱିଦ୍ୱା ମନୁବ୍ରୂହୟେ ॥
ଛନ୍ଦା ଦୋସା ଭୟା ମୋହା, ୟୋ ଧମ୍ମଂ ନାତିୱତ୍ତତି ।
ଆପୂରତି ତସ୍ସ ୟସୋ, ସୁକ୍କପକ୍ଖେୱ ଚନ୍ଦିମା ॥
ପଣ୍ଡିତୋ ସୀଲସମ୍ପନ୍ନୋ, ସଣ୍ହୋ ଚ ପଟିଭାନୱା ।
ନିୱାତୱୁତ୍ତି ଅଥଦ୍ଧୋ, ତାଦିସୋ ଲଭତେ ୟସଂ ॥
ଦୁଲ୍ଲଭଂ ପାକତିକଂ ୱାକ୍ୟଂ, ଦୁଲ୍ଲଭୋ ଖେମକରୋ ସୁତୋ ।
ଦୁଲ୍ଲଭା ସଦିସୀ ଜାୟା, ଦୁଲ୍ଲଭୋ ସଜନୋ ପିୟୋ ॥
ଅତ୍ଥଂ ମହନ୍ତମାପଜ୍ଜ, ୱିଜ୍ଜଂ ସମ୍ପତ୍ତିମେୱ ଚ ।
ଚରେୟ୍ୟାମାନଥଦ୍ଧୋ ୟୋ, ପଣ୍ଡିତୋ ସୋ ପୱୁଚ୍ଚତି ॥
ସୁତସନ୍ନିଚ୍ଚୟା ଧୀରା, ତୁଣ୍ହୀଭୂତା ଅପୁଚ୍ଛିତା ।
ପୁଣ୍ଣାସୁଭାସିତେନାପି, ଘଣ୍ଟାଦୀ ଘଟ୍ଟିତା ୟଥା ॥
ଅପୁଟ୍ଠୋ ପଣ୍ଡିତୋ ଭେରୀ, ପଜ୍ଜୁନ୍ନୋ ହୋତି ପୁଚ୍ଛିତୋ ।
ବାଲୋ ପୁଟ୍ଠୋ ଅପୁଟ୍ଠୋ ଚ, ବହୁଂ ୱିକତ୍ଥତେ ସଦା ॥
ପରୂପୱାଦେ ବଧିରୋ, ପରୱଜ୍ଜେ ଅଲୋଚନୋ ।
ପଙ୍ଗୁଲୋ ଅଞ୍ଞନାରୀସୁ, ଦୁସ୍ସତକ୍କେ ଅଚେତନୋ ॥
ଚକ୍ଖୁମାସ୍ସ ୟଥା ଅନ୍ଧୋ, ସୋତୱା ବଧିରୋ ୟଥା ।
ପଞ୍ଞୱାସ୍ସ ୟଥାମୂଗୋ, ବଲୱା ଦୁବ୍ବଲୋରିୱ ।
ଅଥ ଅତ୍ଥେ ସମୁପ୍ପନ୍ନେ, ସୟେଥ ମତସାୟିତଂ ॥
ପାପମିତ୍ତେ ୱିୱଜ୍ଜେତ୍ୱା, ଭଜେୟ୍ୟୁତ୍ତମପୁଗ୍ଗଲଂ ।
ଓୱାଦେ ଚସ୍ସ ତିଟ୍ଠେୟ୍ୟ, ପତ୍ଥେନ୍ତୋ ଅଚଲଂ ସୁଖଂ ॥
ଅତିସୀତଂ ଅତିଉଣ୍ହଂ, ଅତିସାୟମିଦଂ ଅହୁ ।
ଇତି ୱିସ୍ସଟ୍ଠକମ୍ମନ୍ତେ, ଅତ୍ଥା ଅଚ୍ଚେନ୍ତି ମାଣୱେ ॥
ୟୋ ଚ ସୀତଞ୍ଚ ଉଣ୍ହଞ୍ଚ, ତିଣାଭିୟ୍ୟୋ ନ ମଞ୍ଞତି ।
କରଂ ପୁରିସକିଚ୍ଚାନି, ସୋ ସୁଖଂ ନ ୱିହାୟତି ॥
ୟସ୍ମିଂଦେସେ ନ ସମ୍ମାନୋ, ନ ପିୟୋ ନ ଚ ବନ୍ଧୱୋ ।
ନ ଚ ୱିଜ୍ଜାଗମୋ କୋଚି, ନ ତତ୍ଥ ଦିୱସଂ ୱସେ ॥
ଧନୱା ସୁତୱା ରାଜା, ନଦୀ ୱଜ୍ଜୋ ଇମେ ପଞ୍ଚ ।
ୟତ୍ଥ ଦେସେ ନ ୱିଜ୍ଜନ୍ତି, ନ ତତ୍ଥ ଦିୱସଂ ୱସେ ॥
ନଭସ୍ସ ଭୂସନଂ ଚନ୍ଦୋ, ନାରୀନଂ ଭୂସନଂ ପତି ।
ଛମାୟ ଭୂସନଂ ରାଜା, ୱିଜ୍ଜା ସବ୍ବସ୍ସ ଭୂସନଂ ॥
ସୁଖତ୍ଥିକୋ ସଚେ ୱିଜ୍ଜଂ, ୱିଜ୍ଜତ୍ଥିକୋ ଚଜେ ସୁଖଂ ।
ସୁଖତ୍ଥିନୋ କୁତୋ ୱିଜ୍ଜା, କୁତୋ ୱିଜ୍ଜତ୍ଥିନୋ ସୁଖଂ ॥
ଖଣେନ କଣେନ ଚେୱ, ୱିଜ୍ଜାମତ୍ଥଞ୍ଚ ସାଧୟେ ।
ଖଣଚାଗେ କୁତୋ ୱିଜ୍ଜା, କଣଚାଗେ କତୋ ଧନଂ ॥
ଆଚରିୟା ପାଦମାଦତ୍ତେ, ପାଦଂ ସିସ୍ସୋ ସଜାନନା ।
ପାଦଂ ସବ୍ରହ୍ମଚାରୀହି, ପାଦଂ କାଲକ୍କମେନ ଚ ॥
ଧମ୍ମୋ ଜୟେ ନୋ ଅଧମ୍ମୋ, ସଚ୍ଚଂ ଜୟତି ନାସଚ୍ଚଂ ।
ଖମା ଜୟତି ନୋ କୋଧୋ, ଦେୱୋ ଜୟତି ନାସୂରୋ ॥
ହତ୍ଥସ୍ସ ଭୂସନଂ ଦାନଂ, ସଚ୍ଚଂ କଣ୍ଠସ୍ସ ଭୂସନଂ ।
ସୋତସ୍ସ ଭୂସନଂ ସତ୍ଥଂ, ଭୂସନେ କିଂ ପୟୋଜନଂ ॥
ୱିଦେସେତୁ ଧନଂ ୱିଜ୍ଜା, ବ୍ୟସନେସୁ ଧନଂ ମତି ।
ପରଲୋକେ ଧନଂ ଧମ୍ମୋ, ସୀଲଂ ସବ୍ବତ୍ଥ ୱେ ଧନଂ ॥
ପଦୋସେ ଦୀପକୋ ଚନ୍ଦୋ, ପଭାତେ ଦୀପକୋ ରୱି ।
ତିଲୋକେ ଦୀପକୋ ଧମ୍ମୋ, ସୁପୁତ୍ତୋ କୁଲଦୀପକୋ ॥
ୱିଦ୍ୱା ଏୱ ୱିଜାନାତି, ୱିଦ୍ୱଜ୍ଜନପରିସ୍ସମଂ ।
ନ ହି ୱଞ୍ଝା ୱିଜାନାତି, ଗୁରୁଂ ପସୱୱେଦନଂ ॥
ୟସ୍ସ ନତ୍ଥି ସୟଂ ପଞ୍ଞା, ସତ୍ଥଂ ତସ୍ସ କରୋତି କିଂ ।
ଲୋଚନେହି ୱିହୀନସ୍ସ, ଦପ୍ପଣୋ କିଂ କରିସ୍ସତି ॥
କିଂ କରିସ୍ସନ୍ତି ୱତ୍ତାରୋ, ସୋତଂ ୟତ୍ଥ ନ ୱିଜ୍ଜତେ ।
ନଗ୍ଗକପଣକେ ଦେସେ, ରଜକୋ କିଂ କରିସ୍ସତି ॥
ମୂଳ୍ହସିଧସ୍ସାପଦେସେନ, କୁନାରୀଭରଣେନ ଚ ।
ଖଲସତ୍ତୂହି ସଂୟୋଗା, ପଣ୍ଡିତୋପ୍ୟାୱସୀଦତି ॥
ନତ୍ଥି ଅତ୍ତସମଂ ପେମଂ, ନତ୍ଥି ଧଞ୍ଞସମଂ ଧନଂ ।
ନତ୍ଥି ପଞ୍ଞାସମା ଆଭା, ୱୁଟ୍ଠି ୱେ ପରମା ସରା ॥
ଭୁଜଙ୍ଗମଂ ପାୱକଞ୍ଚ ଖତ୍ତିୟଞ୍ଚ ୟସସ୍ସିନଂ ।
ଭିକ୍ଖୁଞ୍ଚ ସୀଲସମ୍ପନ୍ନଂ, ସମ୍ମଦେୱ ସମାଚରେ ॥
ତସ୍ମା ହି ପଣ୍ଡିତୋ ପୋସୋ, ସମ୍ପସ୍ସଂ ଅତ୍ଥମତ୍ତନୋ ।
ବୁଦ୍ଧେ ଧମ୍ମେ ଚ ସଙ୍ଘେ ଚ, ଧୀରୋ ସଦ୍ଧଂ ନିୱେସୟେ ॥
ଗୁଣୋ ସେଟ୍ଠଙ୍ଗତଂ ୟାତି, ନ ଉଚ୍ଚେ ସୟନେ ୱସେ ।
ପାସାଦସିଖରେ ୱାସୋ, କାକୋ କିଂ ଗରୁଳୋ ସିୟା ॥
ଅନାଗତଂ ଭୟଂ ଦିସ୍ୱା, ଦୂରତୋ ପରିୱଜ୍ଜୟେ ।
ଆଗତଞ୍ଚ ଭୟଂ ଦିସ୍ୱା, ଅଭୀତୋ ହୋତି ପଣ୍ଡିତୋ ॥
ଅସଜ୍ଜାୟ ମଲାମନ୍ତା, ଅନୁଟ୍ଠାନମଲା ଘରା ।
ମଲଂ ୱଣ୍ଣସ୍ସ କୋସଜ୍ଜଂ, ପମାଦୋ ରକ୍ଖତୋ ମଲଂ ॥
ଅନୁପୁବ୍ବେନ ମେଧାୱୀ, ଥୋକଂ ଥୋକଂ ଖଣେ ଖଣେ ।
କମ୍ମାରୋ ରଜତସ୍ସେୱ, ନିଦ୍ଧମେ ମଲମତ୍ତନୋ ॥
ୟଞ୍ହି କୟିରା ତଞ୍ହି ୱଦେ, ୟଂ ନ କୟିରା ନ ତଂ ୱଦେ ।
ଅକରୋନ୍ତଂ ଭାସମାନଂ, ପରିଜାନନ୍ତି ପଣ୍ଡିତା ॥
ୱିସମଂ ସଭୟଂ ଅତିୱାତୋ, ପଟିଚ୍ଛନ୍ନଂ ଦେୱନିସ୍ସିତଂ ।
ପନ୍ଥୋ ଚ ସଙ୍ଗାମୋ ତିତ୍ଥଂ, ଅଟ୍ଠେତେ ପରିୱଜ୍ଜିୟା ॥
ରତ୍ତୋଦୁଟ୍ଠୋ ଚ ମୁଳ୍ହୋ ଚ, ମାନୀ ଲୁଦ୍ଧୋ ତଥାଲସୋ ।
ଏକଚିନ୍ତୀ ଚ ବାଲୋ ଚ, ଏତେ ଅତ୍ଥୱିନାସକା ॥
ରତ୍ତୋ ଦୁଟ୍ଠୋ ଚ ମୂଳ୍ହୋ ଚ, ଭୀରୁ ଆମିସଗରୁକୋ ।
ଇତ୍ଥୀ ସୋଣ୍ଡୋ ପଣ୍ଡକୋ ଚ, ନୱମୋ ଦାରକୋପି ଚ ॥
ନୱତେ ପୁଗ୍ଗଲା ଲୋକେ, ଇତ୍ତରା ଚଲିତା ଚଲା ।
ଏତେହି ମନ୍ତିତଂ ଗୁୟ୍ହଂ, ଖିପ୍ପଂ ଭୱତି ପାକଟଂ ॥
ୟୋ ନିରୁତ୍ତିଂ ନ ସିକ୍ଖେୟ୍ୟ, ସିକ୍ଖନ୍ତୋ ପିଟକତ୍ତୟଂ ।
ପଦେ ପଦେ ୱିକଙ୍ଖେୟ୍ୟ, ୱନେ ଅନ୍ଧଗଜୋ ୟଥା ॥
ସୁତ୍ତଂ ଧାତୁ ଗଣୋଣ୍ୱାଦି, ନାମଲିଙ୍ଗାନୁସାସନଂ ।
ୟସ୍ସ ତିଟ୍ଠତି ଜିୱ୍ହଗ୍ଗେ, ସବ୍ୟାକରଣକେସରୀ ॥
ସଦ୍ଦତ୍ଥଲକ୍ଖଣେ ଭେଦୀ, ୟୋ ୟୋ ନିଚ୍ଛିତଲକ୍ଖଣେ ।
ସୋ ସୋ ଞାତୁମକିଚ୍ଛେନ, ପହୋତି ପିଟକତ୍ତୟେ ॥
ୟୋ ସଦ୍ଦସତ୍ଥକୁସଲୋ କୁସଲୋ ନିଘଣ୍ଡୁ,
ଛନ୍ଦୋ ଅଲଙ୍କତିସୁ ନିଚ୍ଚକତାଭିୟୋଗୋ ।
ସୋ ୟଂ କୱିତ୍ତୱିକଲୋପି କୱୀସୁ ସଙ୍ଖ୍ୟଂ,
ମୋଗ୍ଗୟ୍ହ ୱିନ୍ଦତି ହି କିତ୍ତି’ ମମନ୍ଦରୂପଂ ॥
ସୁକ୍ଖୋପି ଚନ୍ଦନତରୁ ନ ଜହାତି ଗନ୍ଧଂ,
ନାଗୋ ଗତୋ ନରମୁଖେ ନ ଜହାତି ଲୀଳଂ ।
ୟନ୍ତଗତୋ ମଧୁରସଂ ନ ଜହାତି ଉଚ୍ଛୁ,
ଦୁକ୍ଖୋପି ପଣ୍ଡିତଜନୋ ନ ଜହାତି ଧମ୍ମଂ ॥
ଧନଧଞ୍ଞପ୍ପୟୋଗେସୁ, ତଥା ୱିଜ୍ଜାଗମେସୁ ଚ ।
ଆହାରେ ବ୍ୟୱହାରେ ଚ, ଚତ୍ତଲଜ୍ଜୋ ସଦା ଭୱେ ॥
ସାଭାୱିକୀ ଚ ପଟିଭା, ସୁତଞ୍ଚ ବହୁନିମ୍ମଲଂ ।
ଅମନ୍ଦୋ ଚାଭିୟୋଗୋୟଂ, ହେତୁ ହୋତିହ ବନ୍ଧନେ ॥
ଜହେୟ୍ୟ ପାପକେ ମିତ୍ତେ, ଭଜେୟ୍ୟ ପଣ୍ଡିତେ ଜନେ ।
ସାଧୱୋ ଅଭିସେୱେୟ୍ୟ, ସୁଣେୟ୍ୟ ଧମ୍ମମୁତ୍ତମଂ ॥
କଲ୍ୟାଣକାରୀ କଲ୍ୟାଣଂ, ପାପକାରୀ ଚ ପାପକଂ ।
ୟାଦିସଂ ୱପ୍ପତେ ବୀଜଂ, ତାଦିସଂ ହରତେ ଫଲଂ ॥
ଛନ୍ଦୋ ନିଦାନଂ ଗାଥାନଂ, ଅକ୍ଖରା ତାସଂ ୱିୟଞ୍ଜନଂ ।
ନାମସନ୍ନିସ୍ସିତା ଗାଥା, କୱି ଗାଥାନମାସୟୋ ॥
ତସ୍ମା ହି ପଣ୍ଡିତୋ ପୋସୋ, ସମ୍ପସ୍ସଂ ହିତମତ୍ତନୋ ।
ପଞ୍ଞୱନ୍ତଂଭିପୂଜେୟ୍ୟ, ଚେତିୟଂ ୱିୟ ସାଦରୋ ॥
ଧୀରଂ ପସ୍ସେ ସୁଣେ ଧୀରଂ, ଧୀରେନ ସହସଂୱସେ ।
ଧୀରେନଲ୍ଲାପସଲ୍ଲାପଂ, ତଂ କରେ ତଞ୍ଚ ରୋଚୟେ ॥
ନୟଂ ନୟତି ମେଧାୱୀ, ଅଧୁରାୟଂ ନ ୟୁଞ୍ଜତି ।
ସୁନୟୋ ସେୟ୍ୟସୋ ହୋତି, ସମ୍ମା ୱୁତ୍ତୋ ନ କୁପ୍ପତି ।
ୱିନୟଂ ସୋ ପଜାନାତି, ସାଧୁ ତେନ ସମାଗମୋ ॥
ସଚେ ଲଭେଥ ନିପକଂ ସହାୟଂ,
ସଦ୍ଧିଂ ଚରଂ ସାଧୁୱିହାରି ଧୀରଂ ।
ଅଭିଭୁୟ୍ୟ ସବ୍ବାନି ପରିସ୍ସୟାନି,
ଚରେୟ୍ୟ ତେନତ୍ତମନୋ ସତିମା ॥
ସଦ୍ଧିଂ ଚରଂ ସାଧୁୱିହାରି ଧୀରଂ ।
ରାଜାୱ ରଟ୍ଠଂ ୱିଜିତଂ ପହାୟ,
ଏକୋ ଚରେ ମାତଙ୍ଗରଞ୍ଞେୱ ନାଗୋ ॥
ସୋକଟ୍ଠାନସହସ୍ସାନି, ଭୟଟ୍ଠାନସତାନି ଚ ।
ଦିୱସେ ଦିୱସେ ମୂଳ୍ହ-ମାୱିସନ୍ତି ନ ପଣ୍ଡିତଂ ॥
ଜଲବିନ୍ଦୁନିପାତେନ, ଚିରେନ ପୂରତେ ଘଟୋ ।
ତଥା ସକଲୱିଜ୍ଜାନଂ, ଧମ୍ମସ୍ସ ଚ ଧନସ୍ସ ଚ ॥
ପଣ୍ଡିତା ଦୁକ୍ଖଂ ପତ୍ୱାନ, ନ ଭୱନ୍ତି ୱିସାଦିନୋ ।
ପୱିସ୍ସ ରାହୁନୋ ମୁଖଂ, କିଂ ନୋ ଦେତି ପୁନ ସସୀ ॥
ଜୱେନ ଅସ୍ସଂ ଜାନନ୍ତି, ୱାହେନ ଚ ବଲିବଦ୍ଧଂ ।
ଦୁହେନ ଧେନୁଂ ଜାନନ୍ତି, ଭାସମାନେନ ପଣ୍ଡିତଂ ॥
ମନସା ଚିନ୍ତିତଂ କମ୍ମଂ, ୱଚସା ନ ପକାସୟେ ।
ଅଞ୍ଞଲକ୍ଖିତକାରିୟସ୍ସ, ୟତୋ ସିଦ୍ଧି ନ ଜାୟତେ ॥
ଅନଭ୍ୟାସେ ୱିସଂ ୱିଜ୍ଜା, ଅଜିଣ୍ଣେ ଭୋଜନଂ ୱିସଂ ।
ୱିସଂ ସଭା ଦଲିଦ୍ଦସ୍ସ, ୱୁଦ୍ଧସ୍ସ ତରୁଣୀ ୱିସଂ ॥
ଚତ୍ତାରୋ ପଞ୍ଚ ଆଲୋପେ, ଆଭୁତ୍ୱା ଉଦକଂ ପିୱେ ।
ଅଲଂ ଫାସୁୱିହାରାୟ, ପହିତତ୍ତସ୍ସ ଭିକ୍ଖୁନୋ ॥
ୟସ୍ସ ଏସୋ ପସୁତୋପି, ଗୁଣୱା ପୁଜ୍ଜତେ ନରୋ ।
ଧନୁ ୱଂସୱିସୁଦ୍ଧୋପି, ନିଗ୍ଗୁଣୋ କିଂ କରିସ୍ସତି ॥
ଇସ୍ସୀ ଦୟୀ ଅସଂତୁଟ୍ଠୋ, କୋଧନୋ ନିଚ୍ଚସଙ୍କୀତୋ ।
ପରଭାଗ୍ୟୋପଜୀୱୀ ଚ, ଛଳେତେ ଦୁକ୍ଖଭାଗିନୋ ॥
ସୁମହନ୍ତାନି ସତ୍ତାନୀ, ଧାରୟନ୍ତା ବହୁସ୍ସୁତା ।
ଛେତ୍ତାରୋ ସଂସୟାନଞ୍ଚ, କଲିଂ ୟନ୍ତି ଲୋଭମୋହିତା ॥
ନଦୀତୀରେ ଖତେ କୂପେ, ଅରଣୀତାଲୱଣ୍ଟକେ ।
ନ ୱଦେ ଦକାଦୀ ନତ୍ଥୀତି, ମୁଖେ ଚ ୱଚନଂ ତଥା ॥
ସବ୍ବଂ ସୁଣାତି ସୋତେନ, ସବ୍ବଂ ପସ୍ସତି ଚକ୍ଖୁନା ।
ନ ଚ ଦିଟ୍ଠଂ ସୁତଂ ଧୀରୋ, ସବ୍ବଂ ଉଚ୍ଚିତୁ ମରହତି ॥
ବାଲାଦପି ଗହେତବ୍ବଂ, ୟୁତ୍ତମୁତ୍ତମନୀସିଭି ।
ରୱିସ୍ସାୱିସୟେ କିଂ ନ, ପଦୀପସ୍ସ ପକାସନଂ ॥
ତସ୍ମା ହି ପଣ୍ଡିତୋ ପୋସୋ, ସମ୍ପସ୍ସଂ ଅତ୍ତମତ୍ତନୋ ।
ୟୋନିସୋ ୱିଚିନେ ଧମ୍ମଂ, ଏୱଂ ତତ୍ଥ ୱିସୁଜ୍ଝତି ॥
କିଂ ତେନ ଜାତୁଜାତେନ, ମାତୁୟୋବ୍ବନ୍ନହାରିନା ।
ଆରୋହତି ନ ୟୋ ସକ-ୱଂସଅଗ୍ଗେ ଧଜୋ ୟଥା ॥
ସମ୍ମା ଉପପରିକ୍ଖିତ୍ୱା, ଅକ୍ଖରେସୁ ପଦେସୁ ଚ ।
ଚୋରଘାତୋ ସିୟା ସିସ୍ସୋ, ଗୁରୁ ଚୋରଟ୍ଟକାରକୋ ॥
ଅଦନ୍ତଦମନଂ ସତ୍ଥଂ, ଖଲାନଂ କୁରୁତେ ମଦଂ ।
ଚକ୍ଖୁସଙ୍ଖାରକଂ ତେଜଂ, ଉଲୂକାନଂମିୱନ୍ଧକଂ ॥
ନରତ୍ତଂ ଦୁଲ୍ଲଭଂ ଲୋକେ, ୱିଜ୍ଜା ତତ୍ର ସୁଦୁଲ୍ଲଭା ।
କୱିତ୍ତଂ ଦୁଲ୍ଲଭଂ ତତ୍ର, ସତ୍ତି ତତ୍ର ସୁଦୁଲ୍ଲଭା ॥
ୟେଭୁୟ୍ୟେନ ହି ସତ୍ତାନଂ, ୱିନାସେ ପଚ୍ଚୁପଟ୍ଠିତେ ।
ଅନୟୋ ନୟରୂପେନ, ବୁଦ୍ଧିମାଗମ୍ମ ତିଟ୍ଠତି ॥
ସୁଜନକଣ୍ଡ
ସଦ୍ଧାସୀଲାଦିଧମ୍ମେହି, ସପ୍ପନ୍ନୋ ସେଟ୍ଠମାନୁସୋ ।
ୱୁତ୍ତୋ ବୁଦ୍ଧାଦିସନ୍ତେହି, ସାଧୁସପ୍ପୁରିସୋ ଇତି ॥
ସଦ୍ଦାଧନଂ ସୀଲଧନଂ, ହିରୀଓତ୍ତପ୍ପିୟଂ ଧନଂ ।
ସୁତଧନଞ୍ଚ ଚାଗୋ ଚ, ପଞ୍ଞା ୱେ ସତ୍ତମଂ ଧନଂ ॥
ୟସ୍ସ ଏତେ ଧନା ଅତ୍ଥି, ଇତ୍ଥିୟା ପୁରିସସ୍ସ ୱା ।
ଅଦଲିଦ୍ଦୋତି ତଂ ଆହୁ, ଅମୋଘଂ ତସ୍ସ ଜୀୱିତଂ ॥
ତସ୍ମା ସଦ୍ଧଞ୍ଚ ସୀଲଞ୍ଚ, ପସାଦଂ ଧମ୍ମଦସ୍ସନଂ ।
ଅନୁୟୁଞ୍ଜେଥ ମେଧାୱୀ, ସରଂ ବୁଦ୍ଧାନସାସନଂ ॥
ସବ୍ଭିରେୱ ସମାସେଥ, ସବ୍ଭି କୁବ୍ବେଥ ସନ୍ଥୱଂ ।
ସତଂ ସଦ୍ଧମ୍ମମଞ୍ଞାୟ, ସେୟ୍ୟୋ ହୋତି ନ ପାପିୟୋ ॥
ଚଜ ଦୁଜ୍ଜନସଂସଗ୍ଗଂ, ଭଜ ସାଧୁସମାଗମଂ ।
କର ପୁଞ୍ଞମହୋରତ୍ତଂ, ସର ନିଚ୍ଚମନିଚ୍ଚତଂ ॥
କଲ୍ୟାଣମିତ୍ତୋ ଦଳ୍ହଭତ୍ତି ଚ ହୋତି ।
ଦୁକ୍ଖିତସ୍ସ ସକ୍କଚ୍ଚ କରୋତି କିଚ୍ଚଂ,
ତଥାୱିଧଂ ସପ୍ପୁରିସଂ ୱଦନ୍ତି ॥
ମାତାପେତ୍ତିଭରଂ ଜନ୍ତୁଂ, କୁଲେ ଜେଟ୍ଠାପଚାୟିନଂ ।
ସଣ୍ହଂ ସଖିଲସମ୍ଭାସଂ, ପେସୁଣେୟ୍ୟପ୍ପହାୟିନଂ ॥
ମଚ୍ଛେରୱିନୟେ ୟୁତ୍ତଂ, ସଚ୍ଚଂ କୋଧାଭିଭୁଂ ନରଂ ।
ତଂ ୱେ ଦେୱା ତାୱତିଂସା, ଆହୁ ‘‘ସପ୍ପୁରିସୋ’’ଇତି ॥
କୁଲଜାତୋ କୁଲପୁତ୍ତୋ, କୁଲୱଂସସୁରକ୍ଖତୋ ।
ଅତ୍ତନା ଦୁକ୍ଖପ୍ପତ୍ତୋପି, ହୀନକମ୍ମଂ ନ କାରୟେ ॥
ଉଦେୟ୍ୟ ଭାଣୁ ପଚ୍ଛିମେ, ନମେୟ୍ୟ ମେରୁଅଦ୍ଦିପି ।
ସୀତଲଂ ୟଦି ନରଗ୍ଗି, ପବ୍ବତଗ୍ଗେ ଚ ଉପ୍ପଲଂ ।
ୱିକସେ ନ ୱିପରିତା, ସାଧୁୱାଚା କୁଦାଚନଂ ॥
ସୁଖା ରୁକ୍ଖସ୍ସ ଛାୟାୱ, ତତୋ ଞାତିମାତାପିତୁ ।
ତତୋ ଆଚେରସ୍ସ ରଞ୍ଞୋ, ତତୋ ବୁଦ୍ଧସ୍ସନେକଧା ॥
ଭମରା ପୁପ୍ଫମିଚ୍ଛନ୍ତି, ଗୁଣମିଚ୍ଛନ୍ତି ସଜ୍ଜନା ।
ମକ୍ଖିକା ପୂତିମିଚ୍ଛନ୍ତି, ଦୋସମିଚ୍ଛନ୍ତି ଦୁଜ୍ଜନା ॥
ମାତୁହୀନୋ ଦୁବ୍ଭାସୋ ହି, ପିତୁହୀନୋ ଦୁକ୍କିରିୟୋ ।
ଉଭୋ ମାତୁପିତୁହୀନା, ଦୁବ୍ଭାସା ଚ ଦୁକ୍କିରିୟା ॥
ମାତୁସେଟ୍ଠୋ ସୁଭାସୋ ହି, ପିତୁସେଟ୍ଠୋ ସୁକିରିୟୋ ।
ଉଭୋମାତୁ ପିତୁସେଟ୍ଠା, ସୁଭାସା ଚ ସୁକିରିୟା ॥
ସୁନଖୋ ସୁନଖଂ ଦିସ୍ୱା, ଦନ୍ତଂ ଦସ୍ସେତି ହିଂସିତୁଂ ।
ଦୁଜ୍ଜନୋ ସୁଜନଂ ଦିସ୍ୱା, ରୋସୟଂ ହିଂସମିଚ୍ଛତି ॥
ନ ଚ ୱେଗେନ କିଚ୍ଚାନି, କତ୍ତବ୍ବାନି କୁଦାଚନଂ ।
ସହସା କାରିତଂ କମ୍ମଂ, ବାଲୋ ପଚ୍ଛାନୁତପ୍ପତି ॥
ମକ୍ଖପ୍ପହାନଂ ଇସୟୋ ୱଣ୍ଣୟନ୍ତି ।
ସବ୍ବେସଂ ୱୁତ୍ତଂ ଫରୁସଂ ଖମେଥ,
ଏତଂ ଖନ୍ତିଂ ଉତ୍ତମମାହୁ ସନ୍ତୋ ॥
ଦୁକ୍ଖୋ ନିୱାସୋ ସମ୍ବାଧେ, ଠାନେ ଅସୁଚୀସଙ୍କତେ ।
ତତୋ ଅରିମ୍ହି ଅପ୍ପିୟେ, ତତୋପି ଅକତଞ୍ଞୁନା ॥
ଓୱଦେୟ୍ୟା’ନୁସାସେୟ୍ୟ, ଅସବ୍ଭା ଚ ନିୱାରୟେ ।
ସତଞ୍ହି ସୋ ପିୟୋ ହୋତି, ଅସତଂ ହୋତିଅପ୍ପିୟୋ ॥
ଉତ୍ତମତ୍ତନିୱାତେନ, କକ୍ଖଳଂ ମୁଦୁନା ଜୟେ ।
ନୀଚଂ ଅପ୍ପକଦାନେନ, ୱାୟାମେନ ସମଂ ଜୟେ ॥
ନ ୱିସଂ ୱିସମିଚ୍ଚାହ, ଧନଂ ସଙ୍ଘସ୍ସ ଉଚ୍ଚତେ ।
ୱିସଂ ଏକଂୱ ହନତି, ହନତି ସଙ୍ଘସ୍ସ ସବ୍ବଂ ॥
ଧନମପ୍ପମ୍ପି ସାଧୂନଂ, କୂପେ ୱାରିୱ ନିସ୍ସୟୋ ।
ବହୁଂଅପି ଅସାଧୂନଂ, ନ ଚ ୱାରିୱ ଅଣ୍ଣୱେ ॥
ଅପତ୍ଥେୟ୍ୟଂ ନ ପତ୍ଥେୟ୍ୟ, ଅଚିନ୍ତେୟ୍ୟଂ ନ ଚିନ୍ତୟେ ।
ଧମ୍ମମେୱ ସୁଚିନ୍ତେୟ୍ୟ, କାଲଂ ମୋଘଂ ନ ଇଚ୍ଛୟେ ॥
ଅଚିନ୍ତିତମ୍ପି ଭୱତି, ଚିନ୍ତିତମ୍ପି ୱିନସ୍ସତି ।
ନ ହି ଚିନ୍ତାମୟା ଭୋଗା, ଇତ୍ଥିୟା ପୁରିସସ୍ସ ୱା ॥
ଅସନ୍ତସ୍ସ ପିୟୋ ହୋତି, ସନ୍ତେ ନ କୁରୁତେ ପିୟଂ ।
ଅସତଂ ଧମ୍ମଂ ରୋଚେତି, ତଂ ପରାଭୱତୋ ମୁଖଂ ॥
ଗୁଣା କୁବ୍ବନ୍ତି ଦୂତତ୍ତଂ, ଦୂରେପି ୱସତଂ ସତଂ ।
କେତକେ ଗନ୍ଧଂ ଘାୟିତ୍ୱା, ଗଚ୍ଛନ୍ତି ଭମରା ସୟଂ ॥
ପୁବ୍ବଜାତିକତଂ କମ୍ମଂ, ତଂ କମ୍ମମୀତି କଥ୍ୟତେ ।
ତସ୍ମା ପୁରିସାକାରେନଂ, ୟତଂ କରେ ଅତନ୍ଦିତୋ ॥
ମତ୍ତିକପିଣ୍ଡତୋ କତ୍ତା, କୁରୁତେ ୟଂ ୟଦିଚ୍ଛତି ।
ଏୱମତ୍ତକତଂ କମ୍ମଂ, ମାଣୱୋ ପଟିପଜ୍ଜତେ ॥
ଉଟ୍ଠାୟୋଟ୍ଠାୟ ବୋଧେୟ୍ୟଂ, ମହବ୍ଭୟ ମୁପଟ୍ଠିତଂ ।
ମରଣବ୍ୟାଧିସୋକାନଂ, କିମଜ୍ଜ ନିପତିସ୍ସତି ॥
ପାଣା ୟଥାତ୍ତନୋଭିଟ୍ଠା, ଭୂତାନମପି ତେ ତଥା ।
ଅତ୍ତୋପମେନ ଭୂତେସୁ, ଦୟଂ କୁବ୍ବନ୍ତି ସାଧୱୋ ॥
ସବ୍ବେ ତସନ୍ତି ଦଣ୍ଡସ୍ସ, ସବ୍ବେ ଭାୟନ୍ତି ମଚ୍ଚୁନୋ ।
ଅତ୍ତାନଂ ଉପମଂ କତ୍ୱା, ନ ହନେୟ୍ୟ ନ ଘାତୟେ ॥
ବାଲୋ ୱା ୟଦି ୱା ୱୁଦ୍ଧୋ, ୟୁୱା ୱା ଗେହମାଗତୋ ।
ତସ୍ସ ପୂଜା ୱିଧାତବ୍ବା, ସବ୍ବସ୍ସାଭ୍ୟାଗତୋ ଗରୁ ॥
ଆକିଣ୍ଣୋପି ଅସନ୍ତେହି, ଅସଂସଟ୍ଠୋୱ ଭଦ୍ଦକୋ ।
ବହୁନା ସନ୍ନଜାତେନ, ଗଚ୍ଛେନ ଉବ୍ବତ୍ତେନିଧ ॥
ବାଲଦୁଜ୍ଜନକଣ୍ଡ
କାୟଦୁଚ୍ଚରିତାଦୀହି, ସମ୍ପନ୍ନୋ ପାପମାନୁଜୋ ।
ବାଲୋତି ଲୋକନାଥେନ, କିତ୍ତିତୋ ଧମ୍ମସାମିନା ॥
ଦୁଚିନ୍ତିତଚିନ୍ତୀ ଚେୱ, ଦୁବ୍ଭାସିତଭାସୀପି ଚ ।
ଦୁକ୍କଟକମ୍ମକାରୀ ଚ, ପାପକୋ ବାଲମାନୁଜୋ ॥
ଅତିପିୟୋ ନ କାତବ୍ବୋ, ଖଲୋ କୋତୁହଲଂ କରୋ ।
ସିରସା ୱହମାନୋପି, ଅଡ୍ଢପୂରୋ ଘଟୋ ୟଥା ॥
ସପ୍ପୋ ଦୁଟ୍ଠୋ ଖଲୋ ଦୁଟ୍ଠୋ, ସପ୍ପା ଦୁଟ୍ଠତରୋ ଖଲୋ ।
ମନ୍ତୋସଧେହି ତଂ ସପ୍ପଂ, ଖଲଂ କେନୁପସମ୍ମତି ॥
ୟୋ ବାଲୋ ମଞ୍ଞତି ବାଲ୍ୟଂ, ପଣ୍ଡିତୋ ୱାପି ତେନସୋ ।
ବାଲୋ ଚ ପଣ୍ଡିତମାନୀ, ସ ୱେ ବାଲୋତି ୱୁଚ୍ଚତି ॥
ମଧୂୱ ମଞ୍ଞତି ବାଲୋ, ୟାୱ ପାପଂ ନ ପଚ୍ଚତି ।
ୟଦା ଚ ପଚ୍ଚତି ପାପଂ, ଅଥ ଦୁକ୍ଖଂ ନିଗଚ୍ଛତି ॥
ନ ସାଧୁ ବଲୱା ବାଲୋ, ସାହସା ୱିନ୍ଦତେ ଧନଂ ।
କାୟସ୍ସ ଭେଦା ଦୁପ୍ପଞ୍ଞୋ, ନିରୟଂ ସୋପପଜ୍ଜତି ॥
ଘରେ ଦୁଟ୍ଠୋ ମୂସିକୋ ଚ, ୱନେ ଦୁଟ୍ଠୋ ଚ ୱାନରୋ ।
ସକୁଣେ ଚ ଦୁଟ୍ଠୋ କାକୋ, ନରେଦୁଟ୍ଠୋ ଚ ବ୍ରାହ୍ମଣୋ ॥
ଦୀଘା ଜାଗରତୋ ରତ୍ତି, ଦୀଘଂ ସନ୍ତସ୍ସ ୟୋଜନଂ ।
ଦୀଘୋ ବାଲାନସଂସାରୋ, ସଦ୍ଧମ୍ମଂ ଅୱିଜାନତଂ ॥
ତିଲମତ୍ତଂ ପରେସଞ୍ଚ, ଅପ୍ପଦୋସଞ୍ଚ ପସ୍ସତି ।
ନାଳିକେରମ୍ପି ସଦୋସଂ, ଖଲଜାତୋ ନ ପସ୍ସତି ॥
ନତ୍ତଦୋସଂ ପରେ ଜଞ୍ଞା, ଜଞ୍ଞା ଦୋସଂ ପରସ୍ସତୁ ।
ଗୁୟ୍ହୋ କୁମ୍ମାୱ ଅଙ୍ଗାନି, ପରଦୋସଞ୍ଚ ଲକ୍ଖୟେ ॥
ଲୁଦ୍ଧଂ ଅତ୍ଥେନ ଗଣ୍ହେୟ୍ୟ, ଥଦ୍ଧଂ ଅଞ୍ଜଲିକମ୍ମୁନା ।
ଛନ୍ଦାନୁୱତ୍ତିୟା ମୂଳ୍ହଂ, ୟଥାଭୂତେନ ପଣ୍ଡିତଂ ॥
ୟଥା ଉଦୁମ୍ବରପକ୍କା, ବହି ରତ୍ତକା ଏୱ ଚ ।
ଅନ୍ତୋକିମିଲ ସମ୍ପୁଣ୍ଣା, ଏୱଂ ଦୁଜ୍ଜନହଦୟା ॥
ୟାୱଜୀୱମ୍ପି ଚେ ବାଲୋ, ପଣ୍ଡିତଂ ପୟିରୁପାସତି ।
ନ ସୋ ଧମ୍ମଂ ୱିଜାନାତି, ଦବ୍ବୀ ସୂପରସଂ ୟଥା ॥
ଚରଞ୍ଚେ ନାଧିଗଚ୍ଛେୟ୍ୟ, ସେୟ୍ୟଂ ସଦିସମତ୍ତନୋ ।
ଏକଚରିୟଂ ଦଳ୍ହଂ କୟିରା, ନତ୍ଥି ବାଲେ ସହାୟତା ॥
ଅଜାତମତମୂଳ୍ହାନଂ, ୱରମାଦୟୋ ନ ଚନ୍ତିମୋ ।
ସକିଂ ଦୁକ୍ଖକରାୱାଦ-ୟୋନ୍ତିମୋ ତୁ ପଦେ ପଦେ ॥
ଦୁଜ୍ଜନେନ ସମଂ ୱେରଂ, ସଖ୍ୟଞ୍ଚାପି ନ କାରୟେ ।
ଉଣ୍ହୋ ଦହତି ଚଙ୍ଗାରୋ, ସୀତୋ କଣ୍ହାୟତେ କରଂ ॥
ଦୁଜ୍ଜନୋ ପିୟୱାଦୀ ଚ, ନେତଂ ୱିସ୍ସାସକାରଣଂ ।
ମଧୁ ତିଟ୍ଠତି ଜିୱ୍ହଗ୍ଗେ, ହଦୟେ ହଲାହଲଂ ୱିସଂ ॥
ଦୁଜ୍ଜନୋ ପରିହାତବ୍ବୋ, ୱିଜ୍ଜାୟାଲଙ୍କତୋପି ଚ ।
ମଣିନା ଭୂସିତୋ ସପ୍ପୋ, କିମେସୋ ନ ଭୟଙ୍କରୋ ॥
ନାଳିକେରସମାକାରା, ଦିସ୍ସନ୍ତେପି ହି ସଜ୍ଜନା ।
ଅଞ୍ଞେ ବଦରିକାକାରା, ବହିରେୱ ମନୋହରା ॥
ୟଥାପି ପନ ସପକ୍କା, ବହି କଣ୍ଟକମେୱ ଚ ।
ଅନ୍ତୋ ଅମତସମ୍ପୁଣ୍ଣା, ଏୱଂ ସୁଜନହଦୟା ॥
ୟଥା ଉଦୁମ୍ବରପକ୍କା, ବହି ରତ୍ତକମେୱ ଚ ।
ଏୱଂ କିମିଲସମ୍ପୁଣା, ଏୱଂ ଦୁଜ୍ଜନହଦୟା ॥
ଦୋସଭୀତୋ ଅନାରମ୍ଭୋ, ତଂ କା ପୁରିସଲକ୍ଖଣଂ ।
କୋହ୍ୟଜିଣ୍ଣଭୟା ନନୁ, ଭୋଜନଂ ପରିହୀୟତେ ॥
ପୟୋପାନଂ ଭୁଜଙ୍ଗାନଂ, କେୱଲଂ ୱିସୱଡ୍ଢନଂ ।
ଉପଦେସୋ ହି ମୂଳ୍ହାନଂ, ପକୋପାୟ ନ ସନ୍ତିୟା ॥
ନ ଠାତବ୍ବଂ ନ ଗନ୍ତବ୍ବଂ, ଦୁଜ୍ଜନେନ ସମଂ କ୍ୱଚି ।
ଦୁଜ୍ଜନୋ ହି ଦୁକ୍ଖଂ ଦେତି, ନ ସୋ ସୁଖଂ କଦାଚିପି ॥
ଅବଦ୍ଧା ତତ୍ଥ ବଜ୍ଝନ୍ତି, ୟତ୍ଥ ବାଲା ପଭାସରେ ।
ବଦ୍ଧାପି ତତ୍ଥ ମୁଚ୍ଚନ୍ତି, ୟତ୍ଥ ଧୀରା ପଭାସରେ ॥
ପରିତ୍ତଂ ଦାରୁମାରୁୟ୍ହ, ୟଥା ସୀଦେ ମହଣ୍ଣୱେ ।
ଏୱଂ କୁସିତମାଗମ୍ମ, ସାଧୁ ଜୀୱିପି ସୀଦତି ।
ତସ୍ମା ତଂ ପରିୱଜ୍ଜେୟ୍ୟ, କୁସୀତଂ ହୀନୱୀରିୟଂ ॥
ସଦ୍ଧାସୀଲାଦିସମ୍ପନ୍ନୋ, ସୁମିତ୍ତୋ ସାଧୁମାନୁସୋ ।
ତାଦିସଂ ମିତ୍ତଂ ସେୱେୟ୍ୟ, ୱୁଦ୍ଧିକାମୋ ୱିଚକ୍ଖଣୋ ॥
ଦାନାଦିଗୁଣସେଟ୍ଠେହି, ମିଦିତବ୍ବୋ ମିତ୍ତୋ ହି ଖୋ ।
ତାଦିସଂ ଅୱଙ୍କେନେୱ, ମନସା ଭଜେୟ୍ୟ ସୁଧୀ ॥
ହିତକ୍କରୋ ପରୋ ବନ୍ଧୁ, ବନ୍ଧୁପି ଅହିତୋ ପରୋ ।
ଅହିତୋ ଦେହଜୋ ବ୍ୟାଧି, ହିତଂ ଅରଞ୍ଞମୋସଧଂ ॥
ପରୋକ୍ଖେ କିଚ୍ଚହନ୍ତାରଂ, ପଚ୍ଚକ୍ଖେ ପିୟୱାଦିନଂ ।
ୱଜ୍ଜୟେ ତାଦିସଂ ମିତ୍ତଂ, ୱିସକୁମ୍ଭଂ ପୟୋମୁଖଂ ॥
ଧନହୀନେ ଚଜେ ମିତ୍ତୋ, ପୁତ୍ତଦାରା ସହୋଦରା ।
ଧନୱନ୍ତେୱ ସେୱନ୍ତି, ଧନଂ ଲୋକେ ମହାସଖା ॥
ଜାନିୟା ପେସନେ ଭଚ୍ଚେ, ବନ୍ଧୱେ ବ୍ୟସନାଗମେ ।
ମିତ୍ତଞ୍ଚ ଆପଦିକାଲେ, ଭରିୟଞ୍ଚ ୱିଭୱକ୍ଖୟେ ॥
ଉସ୍ସୱେ ବ୍ୟସନେ ଚେୱ, ଦୁବ୍ଭିକ୍ଖେ ସତ୍ତୁୱିଗ୍ଗହେ ।
ରାଜଦ୍ୱାରେ ସୁସାନେ ଚ, ୟୋ ତିଟ୍ଠତି ସୋ ବନ୍ଧୱା ॥
ନ ୨ ୱିସ୍ସସେ ଅମିତ୍ତସ୍ସ, ମିତ୍ତଞ୍ଚାପି ନ ୱିସ୍ସସେ ।
କଦାଚି କୁପିତେ ମିତ୍ତେ, ସବ୍ବଦୋସଂ ପକାସତି ॥
ମାତା ମିତ୍ତଂ ପିତା ଚେତି, ସଭାୱା ତଂ ତୟଂ ହିତଂ ।
କମ୍ମକରଣତୋ ଚଞ୍ଞେ, ଭୱନ୍ତି ହିତବୁଦ୍ଧିୟୋ ॥
ଆପଦାସୁ ମିତ୍ତଂ ଜଞ୍ଞା, ୟୁଦ୍ଧେ ସୂରଂ ଇଣେ ସୁଚିଂ ।
ଭରିୟଂ ଖୀଣେସୁ ୱିତ୍ତେସୁ, ବ୍ୟସନେସୁ ଚ ବନ୍ଧୱଂ ॥
ସକିଂ ଦୁଟ୍ଠଞ୍ଚ ୟୋ ମିତ୍ତଂ, ପୁନ ସନ୍ଧାତୁମିଚ୍ଛତି ।
ସ ମଚ୍ଚୁମୁପଗଣ୍ହାତି, ଗବ୍ଭଂ ଅସ୍ସତରୀ ୟଥା ॥
ଇଣସେସୋ ଅଗ୍ଗିସେସୋ, ରୋଗସେସୋ ତଥେୱ ଚ ।
ପୁନପ୍ପୁନଂ ୱିୱଡ୍ଢନ୍ତି, ତସ୍ମା ସେସଂ ନ କାରୟେ ॥
ପଦୁମଂୱ ମୁଖଂ ୟସ୍ସ, ୱାଚା ଚନ୍ଦନସୀତଲା ।
ତାଦିସଂ ନୋ ପସେୱେୟ୍ୟ, ହଦୟେ ତୁ ହଲାହଲଂ ॥
ନ ସେୱେ ଫରୁସଂ ସାମିଂ, ନ ଚ ସେୱେୟ୍ୟ ମଚ୍ଛରିଂ ।
ତତୋ ଅପଗ୍ଗଣ୍ହ ସାମିଂ, ନେୱ ନିଗ୍ଗହିତଂ ତତୋ ॥
କୁଦେସଞ୍ଚ କୁମିତ୍ତଞ୍ଚ, କୁକୁଲଞ୍ଚ କୁବନ୍ଧୱଂ ।
କୁଦାରଞ୍ଚ କୁଦାସଞ୍ଚ, ଦୂରତୋ ପରିୱଜ୍ଜୟେ ॥
ସୀତୱାଚୋ ବହୁମିତ୍ତୋ, ଫରୁସୋ ଅପ୍ପମିତ୍ତକୋ ।
ଉପମା ଏତ୍ଥ ଞାତବ୍ବା, ସୂରିୟଚନ୍ଦରାଜୂନଂ ॥
ଅହିତା ପଟିସେଧୋ ଚ, ହିତେସୁ ଚ ପୟୋଜନଂ ।
ବ୍ୟସନେ ଅପରିଚ୍ଚାଗୋ, ଇତିଦଂ ମିତ୍ତଲକ୍ଖଣଂ ॥
ପିୟୋ ଗରୁ ଭାୱନୀୟୋ, ୱତ୍ତା ଚ ୱଚନକ୍ଖମୋ ।
ଗମ୍ଭୀରଞ୍ଚ କଥଂ କତ୍ତା, ନୋ ଚଟ୍ଠାନେ ନିୟୋଜକୋ ।
ତାଦିସଂ ମିତ୍ତଂ ସେୱେୟ୍ୟ, ଭୂତିକାମୋ ୱିଚକ୍ଖଣୋ ॥
ପିୟୋ ଗରୁ ଭାୱ ନୀୟୋ, ୱତ୍ତା ଚ ୱଚନକ୍ଖମୋ ।
ଗମ୍ଭିରଞ୍ଚ କଥଂ କତ୍ତା, ନୋ ଚଟ୍ଠାନେ ନିୟୋଜକୋ ॥
ୟମ୍ହି ଏତାନି ଠାନାନି, ସଂୱିଜ୍ଜନ୍ତିଧ ପୁଗ୍ଗଲେ ।
ସୋ ମିତ୍ତୋ ମିତ୍ତକାମେନ, ଅତ୍ଥକାମାନୁକମ୍ପତୋ ।
ଅପି ନାସିୟମାନେନ, ଭଜିତବ୍ବୋ ତଥାୱିଧୋ ॥
ଓରସଂ କତସମ୍ବନ୍ଧଂ, ତଥା ୱଂସକ୍କମାଗତଂ ।
ରକ୍ଖକୋ ବ୍ୟସନେହି, ମିତ୍ତଂ ଞେୟ୍ୟଂ ଚତୁବ୍ବିଧଂ ॥
ପିୟୋ ଗରୁ ଭାୱନିୟୋ, ୱତ୍ତା ଚ ୱଚନକ୍ଖମୋ ।
ଗମ୍ଭିରଞ୍ଚ କଥଂ କତ୍ତା, ନ ଚଟ୍ଠାନେ ନିୟୋଜକୋ ।
ତଂ ମିତ୍ତଂ ମିତ୍ତକାମେନ, ୟାୱଜୀୱମ୍ପି ସେୱିୟଂ ॥
ପିୟୋ ଗରୁ ଭାୱନୀୟୋ, ୱତ୍ତା ଚ ୱଚନକ୍ଖମୋ ।
ଗମ୍ଭିରଞ୍ଚ କଥଂ କତ୍ତା, ନୋ ଚଟ୍ଠାନେ ନିୟୋଜକୋ ।
ତାଦିସଂ ମିତ୍ତଂ ସେୱେୟ୍ୟ, ଭୂତିକାମୋ ୱିଚକ୍ଖଣୋ ॥
ରାଜକଣ୍ଡ
ମହାଜନଂ ୟୋ ରଞ୍ଜେତି, ଚତୂହିପି ୱତ୍ଥୂହି ୱା ।
ରାଜାତି ୱୁଚ୍ଚତେ ଲୋକେ, ଇତି ସଲ୍ଲକ୍ଖୟେ ୱିଦ୍ୱା ॥
ଦାନଞ୍ଚ ଅତ୍ଥଚରିୟା, ପିୟୱାଚା ଅତ୍ତସମଂ ।
ସଙ୍ଗହା ଚତୁରୋ ଇମେ, ମୁନିନ୍ଦେନ ପକାସିତା ॥
ଦାନମ୍ପି ଅତ୍ଥଚରିୟତଞ୍ଚ, ପିୟୱାଦିତଞ୍ଚ ସମାନତ୍ତତଞ୍ଚ ।
କରିୟଚରିୟସୁସଙ୍ଗହଂ ବହୂନଂ, ଅନୱମତେନ ଗୁଣେନ ୟାତି ସଗ୍ଗଂ ।
ଦାନଞ୍ଚ ପେୟ୍ୟୱଜ୍ଜଞ୍ଚ, ଅତ୍ଥଚରିୟା ଚ ୟା ଇଧ ।
ସମାନତ୍ତତା ଚ ଧମ୍ମେସୁ, ତତ୍ଥ ତତ୍ଥ ୟଥାରହଂ ।
ଏତେ ଖୋ ସଙ୍ଗହା ଲୋକେ, ରଥସ୍ସାଣୀୱ ୟାୟତୋ ॥
ଦାନଂ ସୀଲଂ ପରିଚ୍ଚାଗଂ, ଅଜ୍ଜୱଂ ମଦ୍ଦୱଂ ତପଂ ।
ଅକ୍କୋଧଂ ଅୱିହିଂସଞ୍ଚ, ଖନ୍ତୀ ଚ ଅୱିରୋଧନଂ ।
ଦସେତେ ଧମ୍ମେ ରାଜାନୋ, ଅପ୍ପମତ୍ତେନ ଧାରୟ୍ୟୁଂ ॥
ଏକୟାମଂ ସୟେ ରାଜା, ଦ୍ୱିୟା ମଞ୍ଞେୱ ପଣ୍ଡିତୋ ।
ଘରାୱାସୋ ତିୟାମୋୱ, ଚତୁୟାମୋ ତୁ ୟାଚକୋ ॥
ଅପୁତ୍ତକଂ ଘରଂ ସୁଞ୍ଞଂ, ରଟ୍ଠଂ ସୁଞ୍ଞଂ ଅରାଜକଂ ।
ଅସିପ୍ପସ୍ସ ମୁଖଂ ସୁଞ୍ଞଂ, ସବ୍ବସୁଞ୍ଞଂ ଦଲିଦ୍ଦତ୍ତଂ ॥
ଧନମିଚ୍ଛେ ୱାଣିଜେୟ୍ୟ, ୱିଜ୍ଜମିଚ୍ଛେ ଭଜେ ସୁତଂ ।
ପୁତ୍ତମିଚ୍ଛେ ତରୁଣିତ୍ଥିଂ, ରାଜାମଚ୍ଚଂ ଇଚ୍ଛାଗତେ ॥
ପକ୍ଖୀନଂ ବଲମାକାସୋ, ମଚ୍ଛାନମୁଦକଂ ବଲଂ ।
ଦୁବ୍ବଲସ୍ସ ବଲଂ ରାଜା, କୁମାରାନଂ ରୁଦଂ ବଲଂ ॥
ଖମା ଜାଗରିୟୁଟ୍ଠାନଂ, ସଂୱିଭାଗୋ ଦୟିକ୍ଖଣା ।
ନାୟକସ୍ସ ଗୁଣା ଏତେ, ଇଚ୍ଛିତବ୍ବା ସତଂ ସଦା ॥
ସକିଂ ୱଦନ୍ତି ରାଜାନୋ, ସକିଂ ସମଣବ୍ରାହ୍ମଣା ।
ସକିଂ ସପ୍ପୁରିସା ଲୋକେ, ଏସ ଧମ୍ମୋ ସନନ୍ତନୋ ॥
ଅଲସୋ ଗୀହି କାମଭୋଗୀ ନ ସାଧୁ,
ଅସଞ୍ଞତୋ ପବ୍ବଜିତୋ ନ ସାଧୁ ।
ରାଜା ନ ସାଧୁ ଅନିସମ୍ମକାରୀ,
ୟୋ ପଣ୍ଡିତୋ କୋଧନୋ ତଂ ନ ସାଧୁ ॥
ଆୟଂ ଖୟଂ ସୟଂ ଜଞ୍ଞା, କତାକତଂ ସୟଂ ଜଞ୍ଞା ।
ନିଗ୍ଗହେ ନିଗ୍ଗହାରହଂ, ପଗ୍ଗହେ ପଗ୍ଗହାରହଂ ॥
ମାତା ପୁତ୍ତକତଂ ପାପଂ, ସିସ୍ସକତଂ ଗୁରୁ ତଥା ।
ରାଜା ରଟ୍ଠକତଂ ପାପଂ, ରାଜକତଂ ପୁରୋହିତୋ ॥
ଅକ୍କୋଧେନ ଜିନେ କୋଧଂ, ଅସାଧୁଂ ସାଧୁନା ଜିନେ ।
ଜିନେ କଦରିୟଂ ଦାନେନ, ସଚ୍ଚେନାଲିକୱାଦିନଂ ॥
ଅଦନ୍ତଦମନଂ ଦାନଂ, ଦାନଂ ସବ୍ବତ୍ଥସାଧକଂ ।
ଦାନେନ ପିୟୱାଚାୟ, ଉନ୍ନମନ୍ତି ନମନ୍ତି ଚ ॥
ଅଦନ୍ତଦମନଂ ଦାନଂ, ଅଦାନଂ ଦନ୍ତଦୂସକଂ ।
ଦାନେନ ପିୟୱାଚାୟ, ଉନ୍ନମନ୍ତି ନମନ୍ତି ଚ ॥
ଦାନଂ ସିନେହଭେସଜ୍ଜଂ, ମଚ୍ଛେରଂ ଦୋସନୋସଧଂ ।
ଦାନଂ ୟସସ୍ସୀଭେସଜ୍ଜଂ, ମଚ୍ଛେରଂ କପଣୋସଧଂ ॥
ନ ରଞ୍ଞା ସମକଂ ଭୁଞ୍ଜେ, କାମଭୋଗଂ କୁଦାଚନଂ ।
ଆକପ୍ପଂ ରସଭୁତ୍ତଂ ୱା, ମାଲାଗନ୍ଧୱିଲେପନଂ ।
ୱତ୍ଥସବ୍ବମଲଙ୍କାରଂ, ନ ରଞ୍ଞା ସଦିସଂ କରେ ॥
ନ ମେ ରାଜା ସଖା ହୋତି, ନ ରାଜା ହୋତି ସମକୋ ।
ଏସୋ ସାମିକୋ ମୟ୍ହନ୍ତି, ଚିତ୍ତେ ନିଟ୍ଠଂ ସଣ୍ଠାପୟେ ॥
ନାତିଦୂରେ ଭଜେ ରଞ୍ଞୋ, ନଚ୍ଚାସନ୍ନେ ପୱାତକେ ।
ଉଜୁକେ ନାତିନିନ୍ନେ ଚ, ନ ଭଜେ ଉଚ୍ଚମାସନେ ।
ଛ ଦୋସେ ୱଜ୍ଜେ ସେୱକୋ, ଅଗ୍ଗୀୱ ସଂୟତୋ ତିଟ୍ଠେ ॥
ନ ପଚ୍ଛତୋ ନ ପୁରତୋ, ନାପି ଆସନ୍ନଦୂରତୋ ।
ନ କଚ୍ଛେ ନୋପି ପଟିୱାତେ, ନ ଚାପି ଓଣତୁଣ୍ଣତେ ।
ଇମେ ଦୋସେ ୱିୱଜ୍ଜେତ୍ୱା, ଏକମନ୍ତଂ ଠିତା ଅହୁ –
ଜପ୍ପେନ ମନ୍ତେନ ସୁଭାସିତେନ,
ଅନୁପ୍ପଦାନେନ ପୱେଣିୟା ୱା ।
ୟଥା ୟଥା ୟତ୍ଥ ଲଭେଥ ଅତ୍ଥଂ,
ତଥା ତଥା ତତ୍ଥ ପରକ୍କମେୟ୍ୟ ॥
କସ୍ସକୋ ୱାଣିଜୋ ମଚ୍ଚୋ, ସମଣୋ ସୁତସୀଲ ୱା ।
ତେସୁ ୱିପୁଲଜାତେସୁ, ରଟ୍ଠମ୍ପି ୱିପୁଲଂ ସିୟା ॥
ତେସୁ ଦୁବ୍ବଲଜାତେସୁ, ରଟ୍ଠମ୍ପି ଦୁବ୍ବଲଂ ସିୟା ।
ତସ୍ମା ସରଟ୍ଠଂ ୱିପୁଲଂ, ଧାରୟେ ରଟ୍ଠଭାରୱା ॥
ମହାରୁକ୍ଖସ୍ସ ଫଲିନୋ, ଆମଂ ଛିନ୍ଦତି ୟୋ ଫଲଂ ।
ରସଞ୍ଚସ୍ସ ନ ଜାନାତି, ବୀଜଞ୍ଚସ୍ସ ୱିନସ୍ସତି ॥
ମହାରୁକ୍ଖୂପମଂ ରଟ୍ଠଂ, ଅଧମ୍ମେନ ପସାସତି ।
ରସଞ୍ଚସ୍ସ ନ ଜାନାତି, ରଟ୍ଠଞ୍ଚସ୍ସ ୱିନସ୍ସତି ॥
ମହାରୁକ୍ଖସ୍ସ ଫଲିନୋ, ପକ୍କଂ ଛିନ୍ଦତି ୟୋ ଫଲଂ ।
ରସଞ୍ଚସ୍ସ ୱିଜାନାତି, ବୀଜଞ୍ଜସ୍ସ ନ ନସ୍ସତି ॥
ମହାରୁକ୍ଖୂପମଂ ରଟ୍ଠଂ, ଧମ୍ମେନ ୟୋ ପସାସତି ।
ରସଞ୍ଚସ୍ସ ୱିଜାନାତି, ରଟ୍ଠଞ୍ଚସ୍ସ ନ ନସ୍ସତି ॥
ନାୟକ କଣ୍ଡ
ଅନାୟକା ୱିନସ୍ସନ୍ତି, ନସ୍ସନ୍ତି ବହୁନାୟକା ।
ଥୀନାୟକା ୱିନସ୍ସନ୍ତି, ନସ୍ସନ୍ତି ସୁସୁନାୟକା ॥
ଗୱଂ ଚେ ତରମାନାନଂ, ଉଜୁଂ ଗଚ୍ଛତି ପୁଙ୍ଗୱୋ ।
ସବ୍ବା ଗାୱୀ ଉଜୁଂ ୟନ୍ତି, ନେତ୍ତେ ଉଜୁଂ ଗତେ ସତି ॥
ଏୱମେୱ ମନୁସ୍ସେସୁ, ୟୋ ହୋତି ସେଟ୍ଠସମ୍ମତୋ ।
ସୋ ସଚେ ଧମ୍ମଂ ଚରତି, ପଗେୱ ଇତରା ପଜା ॥
ଗୱଂ ଚେ ତରମାନାନଂ, ଉଜୁଂ ଗଚ୍ଛତି ପୁଙ୍ଗୱୋ ।
ସବ୍ବା ଗାୱୀ ଉଜୁଂୟନ୍ତି, ନେତ୍ତେ ଉଜୁଂ ଗତେ ସତି ॥
ଏୱମେୱ ମନୁସ୍ସେସୁ, ୟୋ ହୋତି ସେଟ୍ଠସମ୍ମତୋ ।
ସୋ ସଚେ ଧମ୍ମଂ ଚରତି, ପଗେୱ ଇତରା ପଜା ।
ସବ୍ବଂ ରଟ୍ଠଂ ସୁଖଂ ସେତି, ରାଜା ଚେ ହୋତି ଧମ୍ମିକୋ ॥
ନୋଦୟାହ ୱିନାସାୟ, ବହୁନାୟକତା ଭୁସଂ ।
ମିଲାୟନ୍ତି ୱିନସ୍ସନ୍ତି, ପଦ୍ମାନ୍ୟକ୍କେହି ସତ୍ତହି ॥
ସୁତାରକ୍ଖୋ ଅଭିୟୋଗୋ, କୁଲାରକ୍ଖୋ ୱତ୍ତଂ ଭୱେ ।
ୱିଜ୍ଜା ହି କୁଲପୁତ୍ତସ୍ସ, ନାୟକସ୍ସାପମାଦକୋ ॥
ପୁତ୍ତକଣ୍ଡ
ଅଭିଜାତଂ ଅନୁଜାତଂ, ପୁତ୍ତମିଚ୍ଛନ୍ତି ପଣ୍ଡିତା ।
ଅୱଜାତଂ ନ ଇଚ୍ଛନ୍ତି, ୟୋ ହୋତି କୁଲଗନ୍ଧନୋ ॥
ପଞ୍ଚଟ୍ଠାନାନି ସମ୍ପସ୍ସଂ, ପୁତ୍ତମିଚ୍ଛନ୍ତି ପଣ୍ଡିତା ।
ଭତୋ ୱା ନୋ ଭରିସ୍ସତି, କିଚ୍ଚଂ ୱା ନୋ କରିସ୍ସତି ॥
କୁଲୱଂସୋ ଚିରଂ ତିଟ୍ଠେ, ଦାୟଜ୍ଜଂ ପଟିପଜ୍ଜତି ।
ଅଥ ୱା ପନ ପେତାନଂ, ଦକ୍ଖିନଂ ଅନୁପଦସ୍ସତି ॥
ବହୁପୁତ୍ତେ ପିତା ଏକୋ, ଅୱସ୍ସଂ ପୋସେତି ସଦା ।
ବହୁପୁତ୍ତା ନ ସକ୍କୋନ୍ତି, ପୋସେତୁଂ ପିତରେକକଂ ॥
ପୁତ୍ତଂ ୱା ଭାତରଂ ଦୁଟ୍ଠୁ, ଅନୁସାସେୟ୍ୟ ନୋ ଜହେ ।
କିନ୍ନୁ ଛେଜ୍ଜଂ କରଂ ପାଦଂ, ଲିତ୍ତଂ ଅସୁଚିନା ସିୟା ॥
ୱେଜ୍ଜାଚରିୟ କଣ୍ଡ
ଆୟୁବେଦକତାଭ୍ୟାସୋ, ସବ୍ବେସଂ ପିୟଦସ୍ସନୋ ।
ଅରିୟସୀଲଗୁଣୋପେତୋ, ଏସ ୱେଜ୍ଜୋ ୱିଧୀୟତେ ॥
ନାନାଗନ୍ଥଜାନନଞ୍ଚ, ସୁଦିଟ୍ଠକମ୍ମସମ୍ପଦା ।
ଦକ୍ଖତା ହତ୍ଥସୀଘତା, ପସାଦସୂରସତ୍ତିତା ॥
ସାଭାୱିକତଙ୍ଖଣିକ-ଞାଣସୁଭାସିତାପି ଚ ।
ଉସ୍ସାହୋ ଦବ୍ବୋ ସବ୍ବତା, ୱେଜ୍ଜାଚେରସ୍ସ ଲକ୍ଖଣଂ ।
କିଲିଟ୍ଠୱତ୍ଥଂ କୋଧୋ ଚ, ଅତିମାନଞ୍ଚ ଗମ୍ମତା ।
ଅନିମନ୍ତିତଗମନଂ, ଏତେ ପଞ୍ଚ ୱିୱଜ୍ଜିୟା ॥
ଦିଟ୍ଠକମ୍ମତା ସୋଚଞ୍ଚ, ଦକ୍ଖତା ୱିଦିତାଗମୋ ।
ଚତ୍ତାରୋ ସୁଭିସକ୍କସ୍ସ, ସୁଗୁଣା ୱିଞ୍ଞୁନା ମତା ॥
ରୁଜାୟ ଜୟଲକ୍ଖଣଂ, ରସୋ ଚ ଭେସଜ୍ଜମ୍ପି ଚ ।
ତିଲକ୍ଖଣଭେଦୋ ଚେୱ, ୱିଞ୍ଞେୟ୍ୟୋ ଭିସକ୍କେନ ୱେ ॥
ଦାସକ କଣ୍ଡ
ଅନ୍ତୋଜାତୋ ଧନକ୍କୀତୋ, ଦାସବ୍ୟୋପଗତୋ ସୟଂ ।
ଦାସାକରମରାନୀତୋ-ଚ୍ଚେୱଂ ତେ ଚତୁଧା ସିୟୁଂ ॥
ପୁବ୍ବୁଟ୍ଠା ପଚ୍ଛାନିପାତୀ, ଦିନ୍ନସ୍ସ ଆଦାୟୀପି ଚ ।
ସୁକତକମ୍ମକରୋ ଚ, କିତ୍ତିୱଣ୍ଣହରୋପି ଚ ॥
ଦାସା ୦.୦୧୭୭ ପଞ୍ଚେୱ ଚୋରୟ୍ୟ-ସଖାଞାତ୍ୟତ୍ତସାଦିସା ।
ତଥା ୱିଞ୍ଞୂହି ୱିଞ୍ଞେୟ୍ୟା, ମିତ୍ତଦାରା ଚ ବନ୍ଧୱା ॥
ଇତ୍ଥିକଣ୍ଡ
ଆସା ଲୋକିତ୍ଥିୟୋ ନାମ, ୱେଲା ତାସଂ ନ ୱିଜ୍ଜତି ।
ସାରତ୍ତା ଚ ପଗବ୍ଭା ଚ, ସିଖୀ ସବ୍ବଘସୋ ୟଥା ।
ତସ୍ମା ତାୟୋ ହିତ୍ୱାନ, ବ୍ରୂହେୟ୍ୟ ୱିୱେକଂ ସୁଧୀ ॥
ଆସା ଲୋକିତ୍ଥିୟୋ ନାମ, ୱେଲା ତାସଂ ନ ୱିଜ୍ଜତି ।
ସାରତ୍ଥା ଚ ପଗବ୍ଭା ଚ, ସିଖୀ ସବ୍ବଘସୋ ୟଥା ।
ତା ହିତ୍ୱା ପବ୍ବଜିସ୍ସାମି, ୱିୱେକମନୁବ୍ରୂହୟଂ ॥
ଲୋକେ ହି ଅଙ୍ଗନା ନାମ, କୋଧନା ମିତ୍ତଭେଦିକା ।
ପିସୁକା ଅକତଞ୍ଞୂ ଚ ଦୂରତୋ ପରିୱଜ୍ଜୟେ ॥
ୟଥା ନଦୀ ଚ ପନ୍ଥୋ ଚ, ପାନାଗାରଂ ସଭା ପପା ।
ଏୱଂ ଲୋକିତ୍ଥିୟୋ ନାମ, ନାସଂ କୁଜ୍ଝନ୍ତି ପଣ୍ଡିତା ॥
ସବ୍ବା ନଦୀ ୱଙ୍କଗତୀ, ସବ୍ବେ କଟ୍ଠମୟା ୱନା ।
ସବ୍ବିତ୍ଥିୟୋ କରେ ପାପଂ, ଲଭମାନେ ନିୱାତକେ ॥
ଘଟକୁମ୍ଭସମା ନାରୀ, ତତ୍ଥଙ୍ଗାରସମୋ ପୁମା ।
ତସ୍ମା ଘତଞ୍ଚ ଅଗ୍ଗିଞ୍ଚ, ନେକତ୍ର ଠପୟେ ବୁଧୋ ॥
ଇତ୍ଥୀନଞ୍ଚ ଧନଂ ରୂପଂ, ପୁରିସାନଂ ୱିଜ୍ଜା ଧନଂ ।
ଭିକ୍ଖୂନଞ୍ଚ ଧନଂ ସୀଲଂ, ରାଜାନଞ୍ଚ ଧନଂ ବଲଂ ॥
ପଞ୍ଚାରତ୍ୟା ସୁଗନ୍ଧବ୍ବା, ସତ୍ତାରତ୍ୟା ଧନୁଗ୍ଗହା ।
ଏକମାସା ସୁଭରିୟା, ଅଡ୍ଢମାସା ସିସ୍ସା ମଲା ॥
ଜିଣ୍ଣେ ଅନ୍ନଂ ପସଂସେୟ୍ୟ, ଦାରଞ୍ଚ ଗତୟୋବ୍ବନେ ।
ରଣପୁନାଗତେ ସୂରଂ, ସସ୍ସଞ୍ଚ ଗେହମାଗତେ ॥
ଦ୍ୱିତିପତି ନାରୀ ଚେୱ, ୱିହାରଦ୍ୱିତି ଭିକ୍ଖୁ ଚ ।
ସକୁଣୋ ଦ୍ୱିତିପାତୋ ଚ, କତମାୟାବହୁତରା ॥
ରତ୍ତି ୱିନା ନ ଚନ୍ଦିମା, ୱୀଚିୱିନା ଚ ସାଗରୋ ।
ହଂସୱିନା ପୋକ୍ଖରଣୀ, ପତିୱିନା କଞ୍ଞା ସୋଭେ ॥
ଅସନ୍ତୁଟ୍ଠା ୟତୀ ନଟ୍ଠା, ସନ୍ତୁଟ୍ଠାପି ଚ ପତ୍ଥି ୱା ।
ସଲଜ୍ଜା ଗଣିକା ନଟ୍ଠା, ନିଲ୍ଲଜ୍ଜା ଚ କୁଲିତ୍ଥିୟୋ ॥
ଚୋରୀନଂ ବହୁବୁଦ୍ଧୀନଂ, ୟାସୁ ସଚ୍ଚଂ ସୁଦୁଲ୍ଲଭଂ ।
ଥୀନଂ ଭାୱୋ ଦୁରାଜାନୋ, ମଚ୍ଛସ୍ସେୱୋ’ଦକେ ଗତଂ ॥
ଅନଲା ମୁଦୁସମ୍ଭାସା, ଦୁପ୍ପୂରା ତା ନଦୀସମା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ଆୱଟ୍ଟନୀ ମହାମାୟା, ବ୍ରହ୍ମଚରିୟୱିକୋପନା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ଇତ୍ଥୀପି ହି ଏକଚ୍ଚିୟା, ସେୟ୍ୟା ପୋସ ଜନାଧିପ ।
ମେଧାୱିନୀ ସୀଲୱତୀ, ସସ୍ସୁଦେୱା ପତିବ୍ବତା ।
ତସ୍ସା ୟୋ ଜାୟତି ପୋସୋ,
ସୂରୋ ହୋସ ଦିସମ୍ପତି ।
ତାଦିସା ସୁଭଗିୟା ପୁତ୍ତୋ,
ରଜ୍ଜମ୍ପି ଅନୁସାସତି ॥
ସଲ୍ଲପେ ଅସିହତ୍ଥେନ, ପିସାଚେନାପି ସଲ୍ଲପେ ।
ଆସୀୱିସମ୍ପି ଆସୀଦେ, ୟେନ ଦଟ୍ଠୋ ନ ଜୀୱତି ।
ନ ତ୍ୱେୱ ଏକୋ ଏକାୟ, ମାତୁଗାମେନ ସଲ୍ଲପେ ॥
ନ ହି ସବ୍ବେସୁ ଠାନେସୁ, ପୁରିସୋ ହୋତି ପଣ୍ଡିତୋ ।
ଇତ୍ଥୀପି ପଣ୍ଡିତା ହୋତି, ତତ୍ଥ ତତ୍ଥ ୱିଚକ୍ଖଣା ॥
ନ ହି ସବ୍ବେସୁ ଠାନେସୁ, ପୁରିସୋ ହୋତି ପଣ୍ଡିତୋ ।
ଇତ୍ଥୀପି ପଣ୍ଡିତା ହୋତି, ଲହୁଂ ଅତ୍ଥୱିଚିନ୍ତିକା ॥
କୂପୋଦକଂ ୱଟଚ୍ଛାୟା, ସାମାଥୀ ଇଟ୍ଠକାଲୟଂ ।
ସୀତକାଲେ ଭୱେ ଉଣ୍ହଂ, ଉଣ୍ହକାଲେ ଚ ସୀତଲଂ ॥
ଇତ୍ଥିୟୋ ଏକଚ୍ଚିୟାପି, ସେୟ୍ୟା ୱୁତ୍ତାୱ ମୁନିନା ।
ଭଣ୍ଡାନଂ ଉତ୍ତମା ଇତ୍ଥୀ, ଅଗ୍ଗୂପଟ୍ଠାୟିକା ଇତି ॥
ପକିଣ୍ଣକକଣ୍ଡ
କୁଲସୀଲଗୁଣୋପେତୋ, ସବ୍ବଧମ୍ମପରାୟଣୋ ।
ପୱୀଣୋ ପେସନାଜ୍ଝକ୍ଖୋ, ଧମ୍ମଜ୍ଝକ୍ଖୋ ୱିଧୀୟତେ ॥
ୱେଦୱେଦଙ୍ଗତତ୍ୱଞ୍ଞୋ, ଜପ୍ପହୋମପରାୟଣୋ ।
ଆସୀୱାଦୱଚୋୟୁତ୍ତୋ, ଏସ ରାଜପୁରୋହିତୋ ॥
କପ୍ପୋ ବ୍ୟାକରଣଂ ଜୋତି – ସତ୍ଥଂ ସିକ୍ଖା ନିରୁତ୍ତି ଚ ।
ଛନ୍ଦୋୱିଚିତି ଚେତାନି, ୱେଦଙ୍ଗାନି ୱଦନ୍ତି ଛ ॥
ସକିଂ ୱୁତ୍ତଗହିତତ୍ତୋ, ଲହୁହତ୍ଥୋ ଜିତକ୍ଖରୋ ।
ସବ୍ବସତ୍ଥସମାଲୋକୀ, ପକଟ୍ଠୋ ନାମ ଲେଖକୋ ॥
ସମତ୍ତନୀତିସତ୍ଥଞ୍ଞୋ, ୱାହନେ ପୂରିତସ୍ସମୋ ।
ସୂରୱୀରଗୁଣୋପେତୋ, ସେନାଝକ୍ଖୋ ୱିଧୀୟତେ ॥
ସୁଧୀ ୱାକ୍ୟପଟୁ, ପଞ୍ଞୋ, ପରଚିତ୍ତୋପଲକ୍ଖଣୋ ।
ଧୀରୋ ୟଥାତ୍ଥୱାଦୀ ଚ, ଏସ ଦୂତୋ ୱିଧୀୟତେ ॥
ପୁତ୍ତନତ୍ତଗୁଣୋପେତୋ, ସତ୍ଥଞ୍ଞୋ ରସପାଚକୋ ।
ସୂରୋ ଚ କଥିନୋ ଚେୱ, ସୂପକାରୋ ସ ୱୁଚ୍ଚତେ ॥
ଇଙ୍ଗିତାକାରତତ୍ତଞ୍ଞୋ, ବଲୱାପିୟଦସ୍ସନୋ ।
ଅପ୍ପମାଦୀ ସଦା ଦକ୍ଖୋ, ପତୀହାରୋ ସ ଉଚ୍ଚତେ ॥
ଇତ୍ଥିମିସ୍ସେ କୁତୋ ସୀଲଂ, ମଂସଭକ୍ଖେ କୁତୋ ଦୟା ।
ସୁରାପାନେ କୁତୋ ସଚ୍ଚଂ, ମହାଲୋଭେ କୁତୋ ଲଜ୍ଜା ।
ମହାତନ୍ଦେ କୁତୋ ସିପ୍ପଂ, ମହାକୋଧେ କୁତୋ ଧନଂ ॥
ସୁରାୟୋଗୋ ୱେଲାଲୋ ଚ, ସମଜ୍ଜଚରଣଙ୍ଗତୋ ।
ଖିଡ୍ଡା ଧୁତ୍ତୋ ପାପମିତ୍ତୋ, ଅଲସୋ ଭୋଗନାସକା ॥
ଜୀୱନ୍ତାପି ମତା ପଞ୍ଚ, ବ୍ୟାସେନ ପରିକିତ୍ତିତା ।
ଦୁକ୍ଖିତୋ ବ୍ୟାଧିତି ମୂଳ୍ହୋ, ଇଣୱା ନିଚ୍ଚସେୱକୋ ॥
ନିଦ୍ଦାଲୁକୋ ପମାଦୋ ଚ, ସୁଖିତୋ ରୋଗୱାଲସୋ ।
କାମୁକୋ କମ୍ମାରାମୋ ଚ, ସତ୍ତେତେ ସତ୍ଥୱଜ୍ଜିତା ॥
ଗୋଣାହି ସବ୍ବଗିହୀନଂ, ପୋସକା ଭୋଗଦାୟକୋ ।
ତସ୍ମା ହି ମାତାପିତୂୱ, ମାନୟେ ସକ୍କରେୟ୍ୟ ଚ ॥
ୟଥା ମାତା ପିତା ଭାତା, ଅଞ୍ଞେୱାପି ଚ ଞାତକା ।
ଗାୱୋ ନୋ ପରମା ମିତ୍ତା, ୟାସୁ ଜାୟନ୍ତି ଓସଧା ॥
ଅନ୍ନଦା ବଲଦା ଚେତା, ୱଣ୍ଣଦା ସୁଖଦା ତଥା ।
ଏତମତ୍ଥୱସଂ ଞତ୍ୱା, ନାସୁ ଗାୱୋ ହନିଂସୁ ତେ ॥
ୟେ ଚ ଖାଦନ୍ତି ଗୋମଂସଂ, ମାତୁମଂସଂୱ ଖାଦରେ ।
ମତେସୁ ତେସୁ ଗିଜ୍ଝାନଂ, ଦଦେ ସୋତେ ଚ ୱାହୟେ ॥
ଦ୍ୱିଗୁଣୋ ଥୀନମାହାରୋ, ବୁଦ୍ଧିଚାପି ଚତୁଗ୍ଗୁଣୋ ।
ଛଗ୍ଗୁଣୋ ହୋତି ୱାୟାମୋ, କାମୋତ୍ୱଟ୍ଠଗୁଣୋ ଭୱେ ॥
ନ ଲୋକେ ସୋଭତେ ମୂଳ୍ହୋ, କେୱଲତ୍ତପସଂସକୋ ।
ଅପି ସମ୍ପିହିତେ କୂପେ, କତୱିଜ୍ଜୋ ପକାସତେ ॥
କୋସଜ୍ଜଂ ଭୟତୋ ଦିସ୍ୱା, ୱୀରିୟାରମ୍ଭଞ୍ଚ ଖେମତୋ ।
ଆରଦ୍ଧୱୀରିୟା ହୋଥ, ଏସା ବୁଦ୍ଧାନୁସାସନୀ ॥
ୱିୱାଦଂ ଭୟତୋ ଦିସ୍ୱା, ଅୱିୱାଦଞ୍ଚ ଖେମତୋ ।
ସମଗ୍ଗା ସଖିଲା ହୋଥ, ଏସା ବୁଦ୍ଧାନୁସାସନୀ ॥
ପମାଦଂ ଭୟତୋ ଦିସ୍ୱା, ଅପ୍ପମାଦଞ୍ଚ ଖେମତୋ ।
ଭାୱେଥଟ୍ଠଙ୍ଗିକଂ ମଗ୍ଗଂ, ଏସା ବୁଦ୍ଧାନୁସାସନୀ ॥
ଗରହା ଚ ପସଂସା ଚ, ଅନିଚ୍ଚା ତାୱକାଲିକା ।
ଅପ୍ପକାଚେକଦେସାୱ, ନ ତା ଇକ୍ଖେୟ୍ୟ ପଣ୍ଡିତୋ ।
ଧମ୍ମାଧମ୍ମଂୱ ଇକ୍ଖେୟ୍ୟ, ଅତ୍ଥାନତ୍ଥଂ ହିତାହିତଂ ॥
କୱିଦପ୍ପଣନୀତି
ପଖୁକ୍କୂପୁରସେଟ୍ଠସ୍ସ, ପଚ୍ଛିମେ ଆସି ୱିସ୍ସୁତୋ ।
ଚତୁଗାୱୁତଦେସମ୍ହୀ, କନରୟଗାମୋ ସୁସୋଭନୋ ॥
ଦ୍ୱିନୋ ଦ୍ୱିୱେକ ସାକମ୍ହି, ତମ୍ହି ଜାତେନ ଜାତିୟା ।
ଲଙ୍କାଭାରତଆଦୀସୁ, ୱୁଟ୍ଠପୁବ୍ବ ସୁତେସିନା ॥
ୱିସୁତାରାମ ସୀହାନଂ, ସିକ୍ଖିତେନ ତିପେଟକଂ ।
ସନ୍ତିକେ ନୱୱସ୍ସାନି, ସଂଗୀତିକିଚ୍ଚକାରିନା ॥
ଦକ୍ଖିଣାରାମ ୱାସୀନଂ, ସନ୍ତିକେପି ସୁୱିଞ୍ଞୁନଂ ।
ସିକ୍ଖିତେନ ସତ୍ତୱୀସ-ୱସ୍ସିତ୍ୱାନ ୟସସ୍ସିନା ॥
ସୁନ୍ଦରେ ପୁରସେଟ୍ଠମ୍ହି, ସୁନ୍ଦରେ ୱିସୁତେ ସୁଭେ ।
ସୁନ୍ଦରେ ଜୋତିପାଲମ୍ହି, ୱସତା ଗଣୱାଚିନା ॥
ନିସ୍ସାୟ ପେଟକେ ଚେୱ, ଅନେକନୀତି ପୋତ୍ଥକେ ।
ବହୁଲେ ଗନ୍ଥସେଟ୍ଠେପି, କତୋୟଂ ୱିଧୁମାନିତୋ ॥
ତିଟ୍ଠତଂ ଅୟଂ ମେ ଗନ୍ଥୋ, ସୁସାରୋ ୟାୱ ସାସନଂ ।
ତିଟ୍ଠତେୱ ସୁତେସୀନଂ, ସୁସାରଂ ସୁପକାସୟଂ ॥
ଅନେନ ସୁୱିସିଟ୍ଠେନ, ପୁଞ୍ଞେନଞ୍ଞେନ କମ୍ମୁନା ।
ମନିସିଭିଗୁରୂହେୱ, ଗଚ୍ଛେୟ୍ୟଂ ଅମତଂ ସିୱଂ ॥
‘‘ଅଙ୍ଗାରିନୋ ଦାନି ଦୁମା ଭଦନ୍ତେ’’
‘‘ୟଥାପି ରମ୍ମକୋ ମାସୋ, ଗିମ୍ହାନଂ ହୋତି ବ୍ରାହ୍ମଣ ।
ଅତେ‘ୱ’ଞ୍ଞେହି ମାସେହି, ଦୁମପୁମ୍ଫେହି ସୋଭତି’’ ॥
ଗିମ୍ହାନ ମାସେ ପଠମସ୍ମିଂ ଗିମ୍ହେ’’ –
॥ ନମୋ ତସ୍ସ ଭଗୱତୋ ଅରହତୋ ସମ୍ବାସମ୍ବୁଦ୍ଧସ୍ସ ॥
ପଣାମ ପଟିଞ୍ଞା
ୱତ୍ଥୁତ୍ତୟଂ ନମସିତ୍ୱା, ଆଚେରେ କୱିପୁଙ୍ଗୱେ ।
କସ୍ସଂ ଦ୍ୱାଦସମାସାନଂ, ବନ୍ଧଂ ତମ୍ମାସୱସିକଂ ॥
ଚିତ୍ତସମ୍ମତମାସୋ ହି, ଅତେୱଞ୍ଞେହି ସୋଭତି ।
ରମ୍ମକମାସୋ ରମ୍ମମାସୋ, ତେନେୱ ୱୋହାରୋ ଭୱି ॥
ତସ୍ମିଂ ସୁଚିତ୍ତମାସମ୍ହି, ନାଗଦୁମା ସୁପୁପ୍ଫରେ ।
ପୁପ୍ଫନ୍ତି ଅସନଦୁମା, ୱାୟନ୍ତି କାନନେ ହି ୱେ ॥
ସଙ୍କନ୍ତ ମହୁସ୍ସୱୋପି, ତମ୍ହି ମାସମ୍ହି ୱତ୍ତତେ ।
ଗନ୍ଧୋଦକେହି ଅଞ୍ଞୋଞ୍ଞଂ, ସିଞ୍ଚମାନା ସୁମୋଦରେ ॥
ୟଥାପି ରମ୍ମକୋ ମାସୋ, ଗିମ୍ହାନଂ ହୋତି ବ୍ରାହ୍ମଣ ।
ଅତେ‘ୱ’ଞ୍ଞେହି ମାସେହି, ଦୁମପୁପ୍ଫେହି ସୋଭତି ॥
ସମ୍ବୁଦ୍ଧୋ ଚିତ୍ତମାସସ୍ସ, କାଳପକ୍ଖେ ଉପୋସଥେ ।
ପାତୋୟେୱ ସମାଦାୟ, ପୱରଂ ପତ୍ତଚୀୱରଂ ।
ଅନୁକମ୍ପାୟ ନାଗାନଂ, ନାଗଦୀପମୁପାଗମି ॥
ୱେସାଖୱ୍ହୟମାସୋ ତୁ, ସୁୱିସିଟ୍ଠୋ ସୁପାକଟୋ ।
ଲୋକଗ୍ଗନାଥଂ ପଟିଚ୍ଚ, ସନ୍ତେହି ଅଭିଲକ୍ଖିତୋ ॥
ତମ୍ହି ୱେସାଖମାସମ୍ହି, ଚମ୍ପକାପି ସୁପୁପ୍ଫରେ ।
ବୋଧିଂ ଦକେହି ସିଞ୍ଚିତ୍ୱା, ସଜ୍ଜନା ସମ୍ପମୋଦରେ ॥
ୱନେସୁୱ ପୋତକାପି, ପକ୍ଖନ୍ଦନ୍ତି ଦିସୋଦିସଂ ।
ୱିକୂଜନ୍ତା ସଭାସାୟ, ଜନସୋତରସାୟନଂ ॥
ଦୁତିୟେ ଦିୱସେ ଭତ୍ତ-କାଲେ ଆରୋଚିତେ ଜିନୋ ।
ରମ୍ମେ ୱେସାଖମାସମ୍ହି, ପୁଣ୍ଣାମାୟଂ ମୁନିସ୍ସରୋ ॥
ଜେଟ୍ଠସମ୍ମତମାସୋପି, ସୋଗତଜନବ୍ଭନ୍ତରେ ।
ୱିଖ୍ୟାତୋ ଲକ୍ଖଞ୍ଞୋ ଚେୱ, ଜେଟ୍ଠେନ ସଂୟୁତୋ ହି ୱେ ॥
ତସ୍ମିଂହି ଜେଟ୍ଠମାସମ୍ହି, ସୁମନା ୱନମଲ୍ଲିକା ।
ପୁପ୍ଫନ୍ତି ଚ ପୱାୟନ୍ତି, ସବ୍ବଜନମନୋହରା ॥
ପରିକ୍ଖଣାସୁସଭାପି, ଅଭୱି ମ୍ରନମାମଣ୍ଡଲେ ।
ଖେତଲେ ଜେଟ୍ଠଜୋତିପି, ପଜ୍ଜଲି ତସ୍ମିଞ୍ହି ୱେ ॥
ଆସାଳ୍ହୋ ନାମ ମାସୋପି, ଅତୀୱ ୱିସିଟ୍ଠୋ ଭୱି ।
ପଟିସନ୍ଧିଂ ଗଣ୍ହି ବୁଦ୍ଧୋ, ତସ୍ମିଞ୍ହି ମୁନି ସୁଧୀ ॥
ନିକ୍ଖମିପି ଚ ସମ୍ବୁଦ୍ଧୋ, ଧମ୍ମଚକ୍କଂ ପୱତ୍ତୟି ।
ଉପସମ୍ପଦକମ୍ମମ୍ପି, କରୋନ୍ତି ତସ୍ମିଂପି ହି ॥
ପୁନ୍ନାଗଦୁମା ପୁପ୍ଫନ୍ତି, ପୱାୟନ୍ତି ଦିସୋଦିସଂ ।
ଆଦିଚ୍ଚୋ ତିଟ୍ଠତି ତମ୍ହି, ଉତ୍ତରାୟାନକୋଟିୟଂ ॥
ସୀହେ ସାୱଣମାସମ୍ହି, ସଲାକଦାନମୁତ୍ତମଂ ।
ଦେନ୍ତି ସାଧୱୋ ମାନୁସା, ସଦ୍ଦହନ୍ତା ୱତ୍ଥୁତ୍ତୟଂ ॥
ପୁପ୍ଫନ୍ତି କଟେରୁହାପି, ତମ୍ହି ସାୱଣମାସକେ ।
ଖେ ସୱଣନକ୍ଖତ୍ତମ୍ପି, ଅତୀୱ ଜୋତୟୀ ହି ୱେ ॥
ୱସ୍ସବ୍ଭନ୍ତରଭୂତେ ଚ, ସମଣା ସୁଗତୋରସା ।
ମାସେ ୱାଚନଉଗ୍ଗଣ୍ହ-କମ୍ମଂକଂସୁ ସୁଖାସୟା ॥
କଞ୍ଞାରାସିସମ୍ମତେହି, ପୋଟ୍ଠପାଦସୁମାସକେ ।
ନଦୀସୁ ଦକପୂରିତା, କଟପତ୍ଥତସାଦିସା ॥
ନାୱାମହାଉସ୍ସୱମ୍ପି, କରୋନ୍ତି ମାନୁଜା ତଦା ।
କୀଳନ୍ତି ସମ୍ପମୋଦନ୍ତି, ୱିଜିତେ ନର ନାରିୟୋ ॥
କଞ୍ଚନୟମଦୁମାପି, ୱିକସନ୍ତି ତଦା ହି ୱେ ।
ମେଘୋ ଥୋକଂ ଥୋକଂ ହିମଂ, ୱସ୍ସତି ପତତିପି ଚ ॥
ୱସ୍ସିକେ ଅସ୍ସୟୁଜିମ୍ହି, ୱିକସନ୍ତି ଅନେକଧା ।
ପଦୁମାଦିଦକଜାନି, ପୁପ୍ଫାନି ମନୁଞ୍ଞାନି ୱେ ॥
ମହାପଦୀପପନ୍ତୀହି, ସକଲମ୍ରନମାଭୂତଲେ ।
ପୂଜେନ୍ତି ଲୋକଗ୍ଗନାଥଂ, ସାଧୱୋ ସୋଗତାଜନା ॥
ତପୋଧନା ୱିଚରନ୍ତି, ୱସ୍ସଂୱୁଟ୍ଠା ଦିସୋଦିସଂ ।
ସାଧୱୋ ଦାନସୋଣ୍ଡାୱ, ସୀତାୟନ୍ତି ସୁଖନ୍ତି ଚ ॥
କତ୍ତିକମାସସେଟ୍ଠେପି, ସମ୍ପମୋଦନ୍ତି ମାନୁଜା ।
କୋସୀତକୀପୁପ୍ଫାନି ଚ, ୱିକସନ୍ତି ୱାୟନ୍ତି ଚ ॥
କଥିନମହାଦାନମ୍ପି, ଦଦନ୍ତି ସାଧୱୋ ଜନା ।
ତଦା ଚନ୍ଦକିରଣୋପି, ଅତୀୱ ପଜ୍ଜୋତୋ ଅହୁ ॥
ଅହୋସି ହିମପାତୋ ଚ, ଉତ୍ତରୱାତୋ ପୱାୟତି ।
କତ୍ତିକଜୋତିଛଣୋପି, ଅହୋସି ତସ୍ମିଞ୍ହି ୱେ ॥
ଧନୁରାସୀମାଗସିର, ମାସେ ହେମନ୍ତସମ୍ମତେ ।
ସତ୍ତିଧରସୁପୂଜାୱ୍ହ, ସଭାପି ସମ୍ପୱତ୍ତିତା ॥
ଦେୱସମ୍ମତପୁପ୍ଫାନି, ମନୁଞ୍ଞରୁଚିରାନିପି ।
ପୁପ୍ଫନ୍ତି ତମ୍ହି ମାସମ୍ହି, ହିମପାତୋ ଅହୋସି ଚ ॥
ୱୀହୟୋ ହୋନ୍ତି ପକ୍କା ଚ, ଖେତ୍ତେସୁ ମ୍ରନମାଭୂତଲେ ।
ମିଗସିରନକ୍ଖତ୍ତମ୍ପି, ଜୋତେତି ଆକାସଙ୍ଗଣେ ॥
ମକାରେ ଫୁସ୍ସମାସେପି, ପୁପ୍ଫନ୍ତି ପୱାୟନ୍ତି ଚ ।
ସୁନୀଲୱଲ୍ଲିପୁପ୍ଫାନି, ଜନମନୋହରାନିପି ॥
ସେନାବ୍ୟୂହମ୍ପି କରୋନ୍ତି, ଭୂପାଲା ମ୍ରନମାରଟ୍ଠିକା ।
ସପରିସା ଉଦିକ୍ଖନ୍ତି, ହତ୍ଥିଅସ୍ସାଦିଆଦୟୋ ॥
ତମ୍ହିସୀ ଅତିସୀତଲମ୍ପି, ଦକ୍ଖିଣାୟନକୋଟିୟଂ ।
ଅଟ୍ଠାପୁଣ୍ଣମଦିନମ୍ହି, ସୂରିୟୋ ଲୋକମାନିତୋ ॥
ବୋଧିତୋ ନୱମେ ମାସେ, ଫୁସ୍ସପୁଣ୍ଣମିୟଂ ଜିନୋ ।
ଲଂକାଦୀପଂ ୱିସୋଧେତୁଂ, ଲଙ୍କାଦୀପମୁପାଗମି ॥
କୁମ୍ଭେସୁ ମାଘମାସେହି, ତୂଲଦୁମା ସୁପୁପ୍ଫରେ ।
ପୁମ୍ତାଲା ମଧୁରରସଂ, ମାନୁଜାନଂ ଦଦନ୍ତି ଚ ॥
ୟାଗୁମହାଉସ୍ସୱୋପି, ପାକଟୋ ମ୍ରନମାଭୂତଲେ ।
ଅୱସେସସୁ ମେଘୋପି, ଥନୟଂ ଅଭିୱସ୍ସତି ॥
ନରନାରୀ ମନୁଞ୍ଞାନି, ପଦରାନି ପଣ୍ଡାନି ଚ ।
ପୁଚିମନ୍ଦଦୁମା ନୱ-ପତ୍ତାନି ଧାରେନ୍ତିପି ଚ ॥
ମିନେ ଫଗ୍ଗୁଣମାସମ୍ହି, ସୁରଭିଗନ୍ଧିକା ସୁଭା ।
ପୁପ୍ଫନ୍ତି ୱନମ୍ହି ଦୁମା, ନୱପତ୍ତେହି ସୋଭରେ ॥
ଦକ୍ଖିଣଦେସତୋ ତମ୍ହି, ୱାତୋ ପୱାୟତି ହି ୱେ ।
ୱାଳୁକପିଟ୍ଠେ ୱାଲୁକ-ଥୂପେ କତ୍ୱାନ ପୂଜୟ୍ୟୁଂ ॥
ପଥମଗିମ୍ହ ମାସମ୍ହି, ନାନାଦୁମାତି ପୁପ୍ଫରେ ।
ତେନ ସବ୍ବମ୍ପି ୱିପିନଂ, ୱିଚିତ୍ତଂ ଦସ୍ସନିୟଞ୍ହି ୱେ ॥
ୱିସୁତେ ଜୋତିପାଲମ୍ହି, ୱିସୁତମ୍ହି ନିକେତନେ ।
ୱସତା ନେକଗନ୍ଥାନଂ, ଲେଖକେନ କତୋ ଅୟଂ ॥