ଦୀଘନିକାୟେ
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ସୁତ୍ତନ୍ତପିଟକେ
ଦୀଘନିକାୟେ
ସୀଲକ୍ଖନ୍ଧୱଗ୍ଗସୁତ୍ତ
ସଂଗାୟନସ୍ସ ପୁଚ୍ଛା ୱିସ୍ସଜ୍ଜନା
ପୁଚ୍ଛା – ପଠମମହାଧମ୍ମସଂଗୀତିକାଲେ ଆୱୁସୋ ଧମ୍ମସଂଗାହକା ମହାକସ୍ସପାଦୟୋ ମହାଥେରୱରା ପଠମଂ ୱିନୟଂ ସଂଗାୟିତ୍ୱା ତଦନନ୍ତରଂ କଂ ନାମ ପାୱଚନଂ ସଂଗାୟିଂସୁ ।
ୱିସ୍ସଜ୍ଜନା – ପଠମମହାଧମ୍ମସଂଗୀତିୟଂ ଭନ୍ତେ ଧମ୍ମସଂଗାହକା ମହାକସ୍ସପାଦୟୋ ମହାଥେରୱରା ପଠମଂ ୱିନୟଂ ସଂଗାୟିତ୍ୱା ତଦନନ୍ତରଂ ଧମ୍ମଂ ସଂଗାୟିଂସୁ ।
ପୁଚ୍ଛା – ଧମ୍ମୋ ନାମ ଆୱୁସୋ ସୁତ୍ତନ୍ତାଭିଧମ୍ମୱସେନ ଦୁୱିଧୋ, ତତ୍ଥ କତରଂ ଧମ୍ମଂ ପଠମଂ ସଂଗାୟିଂସୁ ।
ୱିସ୍ସଜ୍ଜନା – ଦ୍ୱୀସୁ ଭନ୍ତେ ଧମ୍ମେସୁ ସୁତ୍ତନ୍ତାଭିଧମ୍ମପିଟକେସୁ ପଠମଂ ସୁତ୍ତନ୍ତଂ ପିଟକଂ ଧମ୍ମଂ ସଂଗାୟିଂସୁ ।
ପୁଚ୍ଛା – ସୁତ୍ତନ୍ତପିଟକେ ପି ଆୱୁସୋ ଦୀଘମଜ୍ଝିମସଂୟୁତ୍ତଅଙ୍ଗୁତ୍ତରଖୁଦ୍ଦକନିକାୟୱସେନ ପଞ୍ଚ ନିକାୟା, ତେସୁ ପଠମଂ କତରଂ ନିକାୟଂ ସଂଗାୟିଂସୁ ।
ୱିସ୍ସଜ୍ଜନା – ପଞ୍ଚସୁ ଭନ୍ତେ ନିକାୟେସୁ ପଠମଂ ଦୀଘନିକାୟଂ ସଂଗାୟିଂସୁ ।
ପୁଚ୍ଛା – ଦୀଘନିକାୟେପି ଆୱୁସୋ ତୟୋ ୱଗ୍ଗା ଚତୁତ୍ତିଂସା ଚ ସୁତ୍ତାନି, ତେସୁ କତରଂ ୱଗ୍ଗଂ କତରଞ୍ଚ ସୁତ୍ତଂ ପଠମଂ ସଂଗାୟିଂସୁ ।
ୱିସ୍ସଜ୍ଜନା – ଦୀଘନିକାୟେପି ଭନ୍ତେ ତୀସୁ ୱଗ୍ଗେସୁ ପଠମଂ ସୀଲକ୍ଖନ୍ଧୱଗ୍ଗଂ, ଚତୁତ୍ତିଂସତିୟା ଚ ସୁତ୍ତେସୁ ପଠମଂ ବ୍ରହ୍ମଜାଲସୁତ୍ତଂ ସଂଗାୟିଂସୁ ।
ବ୍ରହ୍ମଜାଲସୁତ୍ତ
ପୁଚ୍ଛା – ସାଧୁ ସାଧୁ ଆୱୁସୋ ମୟମ୍ପି ଦାନି ତତୋୟେୱ ପଟ୍ଠାୟ ସଂଗାୟିତୁଂ ପୁବ୍ବକିଚ୍ଚାନି ସମାରଭାମ…, ତେନାୱୁସୋ ଭଗୱତା ଜାନତା ପସ୍ସତା ଅରହତା ସମ୍ମାସମ୍ବୁଦ୍ଧେନ ବ୍ରହ୍ମଜାଲସୁତ୍ତଂ କତ୍ଥ ଭାସିତଂ ।
ୱିସ୍ସଜ୍ଜନା – ଅନ୍ତରା ଚ ଭନ୍ତେ ରାଜଗହଂ ଅନ୍ତରା ଚ ନାଳନ୍ଦଂ ଅମ୍ବଲଟ୍ଠିକାୟଂ ରାଜାଗାରକେ ଭାସିତଂ ।
ପୁଚ୍ଛା – କଂ ଆୱୁସୋ ଆରବ୍ଭ ଭାସିତଂ ।
ୱିସ୍ସଜ୍ଜନା – ସୁପ୍ପିୟଞ୍ଚ ଭନ୍ତେ ପରିବ୍ବାଜକଂ ବ୍ରହ୍ମଦତ୍ତଞ୍ଚ ମାଣୱଂ ଆରବ୍ଭ ଭାସିତଂ ।
ପୁଚ୍ଛା – କିସ୍ମିଂ ଆୱୁସୋ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ୱଣ୍ଣାୱଣ୍ଣେ ଭନ୍ତେ, ସୁପ୍ପିୟୋ ହି ଭନ୍ତେ ଅନେକପରିୟାୟେନ ବୁଦ୍ଧସ୍ସ ଅୱଣ୍ଣଂ ଭାସତି ଧମ୍ମସ୍ସ ଅୱଣ୍ଣଂ ଭାସତି ସଙ୍ଘସ୍ସ ଅୱଣ୍ଣଂ ଭାସତି, ସୁପ୍ପିୟସ୍ସ ପନ ପରିବ୍ବାଜକସ୍ସ ଅନ୍ତେୱାସୀ ବ୍ରହ୍ମଦତ୍ତୋ ମାଣୱୋ ଅନେକପରିୟାୟେନ ବୁଦ୍ଧସ୍ସ ୱଣ୍ଣଂ ଭାସତି ଧମ୍ମସ୍ସ ୱଣ୍ଣଂ ଭାସତି ସଙ୍ଘସ୍ସ ୱଣ୍ଣଂ ଭାସତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ଅନୁସନ୍ଧେ
ପୁଚ୍ଛା – କତି ଆୱୁସୋ ତତ୍ଥ ଅନୁସନ୍ଧୟୋ ।
ୱିସ୍ସଜ୍ଜନା – ତୟୋ ଭନ୍ତେ ତତ୍ଥ ଅନୁସନ୍ଧୟୋ, ଏକୋ ଅୱଣ୍ଣାନୁସନ୍ଧି, ଦ୍ୱେ ୱଣ୍ଣାନୁସନ୍ଧିୟୋ ।
ପଠମ ଅନୁସନ୍ଧେ
ପୁଚ୍ଛା – ତତ୍ଥାୱୁସୋ ପଠମେ ଅନୁସନ୍ଧିମ୍ହି କଥଂ ଭଗୱତା ଭାସିତଂ, ତଂ ସଂଖେପତୋ କଥେହି ।
ୱିସ୍ସଜ୍ଜନା – ପଠମେ ଭନ୍ତେ ଅନୁସନ୍ଧିମ୍ହି ଅୱଣ୍ଣେ ମନୋପଦୋସଂ ନିୱାରେତ୍ୱା, ତତ୍ଥ ଚ ଆଦୀନୱଂ ଦସ୍ସେତ୍ୱା, ତତ୍ଥ ପଟିପଜ୍ଜିତବ୍ବାକାରୋ ଭଗୱତା ଭାସିତୋ ।
ମମଂ ୱା ଭିକ୍ଖୱେ ପରେ ଅୱଣ୍ଣଂ ଭାସେୟ୍ୟୁଂ, ଧମ୍ମସ୍ସ ୱା ଅୱଣ୍ଣଂ ଭାସେୟ୍ୟୁଂ ସଙ୍ଘସ୍ସ ୱା ଅୱଣ୍ଣଂ ଭାସେୟ୍ୟୁଂ, ତତ୍ର ତୁମ୍ହେହି ନ ଆଘାତୋ ଅପ୍ପଚ୍ଚୟୋ ନ ଚେତସୋ ଅନଭିରଦ୍ଧି କରଣୀୟା…
ଦୁତିୟ ଅନୁସନ୍ଧେ
ପୁଚ୍ଛା – ସାଧୁ ସାଧୁ ଆୱୁସୋ, ସାଧୁ ଖୋ ଭଗୱା ଅତ୍ତନା ପରମୁକ୍କଂ ସାଗତଖନ୍ତୀଗୁଣସମନ୍ନାଗତୋ ଅତ୍ତନୋ ସାୱକଭୂତେ ଅମ୍ହେପି ତତ୍ଥ ସମାଦାପେସି, ଅତ୍ତନା ଚ ଲୋକଧମ୍ମେସୁ ଅନିଞ୍ଜନସଭାୱୋ ଅମ୍ହାକମ୍ପି ତଥତ୍ତାୟ ଓୱାଦମଦାସି, ଦୁତିୟେପନାୱୁସୋ ଅନୁସନ୍ଧିମ୍ହି କଥଂ ଭଗୱତା ଭାସିତଂ, ତମ୍ପି ସଂଖେପତୋ ପକାସେହି ।
ୱିସ୍ସଜ୍ଜନା – ଦୁତିୟେ ପନ ଭନ୍ତେ ଅନୁସନ୍ଧିମ୍ହି ୱଣ୍ଣେ ଚେତସୋ ଉପ୍ପିଲାୱିତତ୍ତଂ ନିସେଧେତ୍ୱା, ତତ୍ଥ ଚ ଆଦୀନୱଂ ଦସ୍ସେତ୍ୱା, ତତ୍ଥ ଚ ପଟିପଜ୍ଜନାକାରଂ ଦସ୍ସେତ୍ୱା, ପୁଥୁଜ୍ଜନସ୍ସ ୱଣ୍ଣଭୂମିଭୂତାନି ତୀଣି ସୀଲାନି ୱିତ୍ଥାରତୋ ଭଗୱତା ଭାସିତାନି ।
ମମଂ ୱା ଭିକ୍ଖୱେ ପରେ ୱଣ୍ଣଂ ଭାସେୟ୍ୟୁଂ, ଧମ୍ମସ୍ସ ୱା ୱଣ୍ଣଂ ଭାସେୟ୍ୟୁଂ, ସଙ୍ଘସ୍ସ ୱା ୱଣ୍ଣଂ ଭାସେୟ୍ୟୁଂ, ତତ୍ର ତୁମ୍ହେହି ନ ଆନନ୍ଦୋ ନ ସୋମନସ୍ସଂ ନ ଚେତସୋ ଅଭିରଦ୍ଧି କରଣୀୟା –
ତତିୟ ଅନୁସନ୍ଧେ
ପୁଚ୍ଛା – ସାଧୁ ସାଧୁ ଆୱୁସୋ, ସାଧୁ ଖୋ ଭଗୱା ଅତ୍ତନା ପରମୁକ୍କଂସଗତସୁପରିସୁଦ୍ଧସୀଲସମନ୍ନାଗତୋ, ତଂ ଅତ୍ତନୋ ସୁପରିସୁଦ୍ଧସୀଲଂ ଦସ୍ସେତ୍ୱା ପରେପି ତତ୍ଥ ନିୟୋଜେସି, ତତିୟେ ପନାୱୁସୋ ଅନୁସନ୍ଧିମ୍ହି କଥଂ ଭଗୱତା ଭାସିତଂ, ତଂ ସଂଖେପତୋ ପକାସେହି ।
ୱିସ୍ସଜ୍ଜନା – ତତିୟେ ପନ ଭନ୍ତେ ଅନୁସନ୍ଧିମ୍ହି ଦ୍ୱାସଟ୍ଠି ଦିଟ୍ଠିୟୋ ସବ୍ବଞ୍ଞୁତ ଞାଣେନ ୱିତ୍ଥାରତୋ ୱିଭଜିତ୍ୱା, ତାସଞ୍ଚ ଛ ଫସ୍ସାୟତନପଦଟ୍ଠାନଭାୱଂ ୱିଭାୱେତ୍ୱା, ମିଚ୍ଛାଦିଟ୍ଠିଗତିକାଧିଟ୍ଠା ନଞ୍ଚ ୱଟ୍ଟଂ କଥେତ୍ୱା, ୟୁତ୍ତୟୋଗଭିକ୍ଖୁଅଧିଟ୍ଠାନଞ୍ଚ ୱିୱଟ୍ଟଂ କଥେତ୍ୱା, ମିଚ୍ଛାଦିଟ୍ଠିଗତିକସ୍ସ ଦେସନାଜାଲତୋ ଅୱିମୁତ୍ତଭାୱଂ ଦେସନାଜାଲତୋ ୱିମୁତ୍ତସ୍ସ ନତ୍ଥିକଭାୱଞ୍ଚ ୱିଭାୱେତ୍ୱା, ଅତ୍ତନୋ ଚ କତ୍ଥଚି ଅପରିୟାପନ୍ନଭାୱଂ ଦସ୍ସେତ୍ୱା, ଉପାଦିସେସନିବ୍ବାନଧାତୁଂ ପାପେତ୍ୱା ଦେସନା ଭଗୱତା ନିଟ୍ଠାପିତା ।
ଉଚ୍ଛିନ୍ନଭାୱନେତ୍ତିକୋ ଭିକ୍ଖୱେ ତଥାଗତସ୍ସ କାୟୋ ତିଟ୍ଠତି, ୟାୱସ୍ସ କାୟୋ ଠସ୍ସତି ତାୱ ନଂ ଦକ୍ଖନ୍ତି ଦେୱମନୁସ୍ସା, କାୟସ୍ସ ଭେଦା ଉଦ୍ଧଂ ଜୀୱିତପରିୟାଦାନା ନ ନଂ ଦକ୍ଖନ୍ତି ଦେୱମନୁସ୍ସା ।
ସୁତ୍ତନିଦେସନା
ପୁଚ୍ଛା – ସାଧୁ ସାଧୁ ଆୱୁସୋ, ସାଧୁ ଖୋ ଭଗୱା ଅତ୍ତନା ଦ୍ୱାସଟ୍ଠି ଦିଟ୍ଠିୟୋ ଚ ଛ ଫସ୍ସାୟତନାନି ଚ ଦ୍ୱାଦସ ପଟିଚ୍ଚସମୁପ୍ପାଦଙ୍ଗାନି ଚ ସବ୍ବସୋ ପରିଜାନିତ୍ୱା ତେସଂ ପରିଜାନନତ୍ଥାୟ ପରେସମ୍ପି ତଥତ୍ତାୟ ଧମ୍ମଂ ପକାସେତି, ସୁତ୍ତଞ୍ଚ ନାମ ଆୱୁସୋ ଚତୁନ୍ନଂ ସୁତ୍ତନିକ୍ଖେପାନଂ ଅଞ୍ଞତରୱସେନେୱ ନିକ୍ଖିତ୍ତଂ, ତସ୍ମା ତେସୁ ଇଦଂ ସୁତ୍ତଂ କତରେନ ସୁତ୍ତନିକ୍ଖେପେନ ଭଗୱତା ନିକ୍ଖିତ୍ତଂ ।
ୱିସ୍ସଜ୍ଜନା – ଚତୂସୁ ଭନ୍ତେ ସୁତ୍ତନିକ୍ଖେପେସୁ ଅଟ୍ଠୁପ୍ପତ୍ତିନିକ୍ଖେପନ ଇଦଂ ସୁତ୍ତଂ ନିକ୍ଖିତ୍ତଂ ।
ୱିସ୍ସଜ୍ଜନା – ଭଗୱତୋ ଭନ୍ତେ ୱଚନଂ ଅରହତୋ ସମ୍ମାସମ୍ବୁଦ୍ଧସ୍ସ ।
ୱିସ୍ସଜ୍ଜନା – ପରମ୍ପରାୟ ଭନ୍ତେ ଆଭତଂ ।
ପୁଚ୍ଛା – ଅତ୍ଥି ନୁ ଖୋ ଆୱୁସୋ ଏତ୍ଥ କୋଚି ୱିରଦ୍ଧଦୋସା, ୟେନ ପଚ୍ଛିମା ଜନା ମିଚ୍ଛାଅତ୍ଥଂ ଗଣ୍ହେୟ୍ୟୁଂ ।
ୱିସ୍ସଜ୍ଜନା – ନତ୍ଥି ଭନ୍ତେ ।
ସାମଞ୍ଞଫଲସୁତ୍ତ
ପୁଚ୍ଛା – ତେନାୱୁସୋ ଭଗୱତା…ପେ॰… ସମ୍ମାସମ୍ବୁଦ୍ଧେନ ସାମଞ୍ଞଫଲସୁତ୍ତଂ କତ୍ଥ ଭାସିତଂ ।
ୱିସ୍ସଜ୍ଜନା – ରାଜଗହେ ଭନ୍ତେ ଜୀୱକସ୍ସ କୋମାରଭଚ୍ଚସ୍ସ ଅମ୍ବୱନେ ଭାସିତଂ ।
ପୁଚ୍ଛା – କେନାୱୁସୋ ସଦ୍ଧିଂ ଭଗୱତା ଭାସିତଂ ।
ୱିସ୍ସଜ୍ଜନା – ରଞ୍ଞା ଭନ୍ତେ ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସଦ୍ଧିଂ ଭାସିତଂ ।
ପୁଚ୍ଛା – ତଂ ପନାୱୁସୋ ସୁତ୍ତଂ ଚତୁନ୍ନଂ ସୁତ୍ତନିକ୍ଖେପାନଂ କତରେନ ସୁତ୍ତନିକ୍ଖେପେନ ଭଗୱତା ନିକ୍ଖିତ୍ତଂ ।
ୱିସ୍ସଜ୍ଜନା – ଚତୁନ୍ନଂ ଭନ୍ତେ ସୁତ୍ତନିକ୍ଖେପାନଂ ପୁଚ୍ଛାୱସିକେନ ସୁତ୍ତନିକ୍ଖେପେନ ନିକ୍ଖିତଂ ଭଗୱତା ।
ଅଜାତସତ୍ତୁ
ପୁଚ୍ଛା – ସା ପନାୱୁସୋ ପୁଚ୍ଛା କେନାକାରେନ ସମୁପ୍ପନ୍ନା ।
ୱିସ୍ସଜ୍ଜନା – ରାଜା ଭନ୍ତେ ମାଗଧୋ ଅଜାସତ୍ତୁ ୱେଦେହିପୁତ୍ତୋ ତଦହୁପୋସଥେ ପନ୍ନରସେ କୋମୁଦିୟା ଚାତୁମାସିନିୟା ପୁଣ୍ଣାୟ ପୁଣ୍ଣମାୟ ରତ୍ତିୟା ୟେନ ଭଗୱା ତେନୁପସଂକମି, ଉପସଂକମିତ୍ୱା ଭଗୱନ୍ତଂ ଦିଟ୍ଠେୱ ଧମ୍ମେ ସଂଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଏୱଂ ଖୋ ସା ଭନ୍ତେ ପୁଚ୍ଛା ଉପ୍ପନ୍ନା ।
ରମ୍ମଣୀୟା ୱତ ଭୋ ଦୋସିନା ରତ୍ତି, ଅଭିରୂପା ୱତ ଭୋ ଦୋସିନା ରତ୍ତି, ଦସ୍ସନୀୟା ୱତ ଭୋ ଦୋସିନା ରତ୍ତି, ପାସାଦିକା ୱତ ଭୋ ଦୋସିନା ରତ୍ତି, ଲକ୍ଖଞ୍ଞା ୱତ ଭୋ ଦୋସିନା ରତ୍ତି….
କଂ ନୁଖ୍ୱଜ୍ଜ ସମଣଂ ୱା ବ୍ରାହ୍ମଣଂ ୱା ପୟିରୁପାସେୟ୍ୟାମ….
ୟଂ ନୋ ପୟିରୁପସତୋ ଚିତ୍ତଂ ପସୀଦେୟ୍ୟ….
ଛରାଜୀୱକ
ତ୍ୱଂ ପନ ସମ୍ମ ଜୀୱକ କିଂ ତୁଣ୍ହୀସି –
ଅୟଂ ଦେୱ ଅମ୍ହାକଂ ଭଗୱା ଅରହଂ ସମ୍ମାସମ୍ବୁଦ୍ଧୋ ଅମ୍ହାକଂ ଅମ୍ବୱନେ ୱିହରତି ।
ତଂ ଖୋ ପନ ଭଗୱନ୍ତଂ ଏୱଂ କଲ୍ୟାଣୋ କିତ୍ତିସଦ୍ଦୋ ଅବ୍ଭୁଗ୍ଗତୋ ‘‘ଇତିପି ସୋ ଭଗୱା ଅରହଂ ସମ୍ମାସମ୍ବୁଦ୍ଧୋ ୱିଜ୍ଜାଚରଣସମ୍ପନ୍ନୋ ସୁଗତୋ ଲୋକୱିଦୂ ଅନୁତ୍ତରୋପୁରିସଦମ୍ମସାରଥି ସତ୍ଥାଦେୱମନୁସ୍ସାନଂ ବୁଦ୍ଧୋ ଭଗୱା’’ତି ।
ତଂ ଦେୱୋ ଭଗୱନ୍ତଂ ପୟିରୁପାସତୁ, ଅପ୍ପେୱନାମ ଦେୱସ୍ସ ଭଗୱନ୍ତଂ ପୟିରୁପାସତୋ ଚିତ୍ତଂ ପସୀଦେୟ୍ୟ ।
ତେନ ହି ସମ୍ମ ଜୀୱକ ହତ୍ଥିୟାନାନି କପ୍ପାପେହି ।
କପ୍ପିତାନି ଖୋ ତେ ଦେୱ ହତ୍ଥିୟାନାନି, ୟସ୍ସ ଦାନି କାଲଂ ମଞ୍ଞସି ।
ଅଜାତସତ୍ତୁ
କିଚ୍ଚି ମଂ ସମ୍ମ ଜୀୱକ ନ ୱଞ୍ଚେସି, କଚ୍ଚି ମଂ ସମ୍ମ ଜୀୱକ ନ ପଲମ୍ଭେସି….
ମା ଭାୟି ମହାରାଜ, ମା ଭାୟି ମହାରାଜ….
ନ ତଂ ଦେୱ ୱଞ୍ଚେମି, ନ ତଂ ଦେୱ ପଲମ୍ଭାମି….
ଅଜାତସତ୍ତ
ଏସୋ ମହାରାଜ ଭଗୱା, ଏସୋ ମହାରାଜ ଭଗୱା ମଜ୍ଝିମଂ ଥମ୍ଭଂ ନିସ୍ସାୟ ପୁରତ୍ଥାଭିମୁଖୋ ନିସିନ୍ନୋ ପୁରକ୍ଖତୋ ଭିକ୍ଖୁସଙ୍ଘସ୍ସ….
ଇମିନା ମେ ଉପସମେନ ଉଦୟଭଦ୍ଦୋ କୁମାରୋ ସମନ୍ନାଗତୋ ହୋତୁ…
ଅଗମା ଖୋ ତ୍ୱଂ ମହାରାଜ ୟଥା ପେମଂ ।
ପୁଚ୍ଛେୟ୍ୟାମହଂ ଭନ୍ତେ ଭଗୱନ୍ତଂ କିଞ୍ଚିଦେୱ ଦେସଂ ସଚେ ମେ ଭଗୱା ଓକାସଂ କରୋତି ପଞ୍ହସ୍ସ ୱେୟ୍ୟାକରଣାୟ ।
ପୁଚ୍ଛ ମହାରାଜ ୟଦାକଙ୍ଖସି ।
ୟଥା ନୁ ଖୋ ଇମାନି ଭନ୍ତେ ପୁଥୁସିପ୍ପାୟତନାନି, ସେୟ୍ୟଥିଦଂ, ହତ୍ଥାରୋହା ଅସ୍ସାରୋହା ରଥିକା ଧନୁଗ୍ଗହା ଚେଲକା ଚଲକା ପିଣ୍ଡଦାୟକା (ପେୟ୍ୟାଲ) ଗଣକା ମୁଦ୍ଦିକା, ଅଞ୍ଞାନିପି ଏୱଂ ଗତିକାନି ପୁଥୁସିପ୍ପାୟତନାନି, ତେ ତେନ ସିପ୍ପେନ ସନ୍ଦିଟ୍ଠିକଂ ସିପ୍ପଫଲଂ ଜୀୱନ୍ତି, ତେ ତେନ ଅତ୍ତାନଂ ସୁଖେନ୍ତି ପୀଣେନ୍ତି, ମାତାପିତରୋ ସୁଖେନ୍ତି, ପୀଣେନ୍ତି, ପୁତ୍ତଦାରଂ ସୁଖେନ୍ତି ପୀଣେନ୍ତି, ମିତ୍ତାମଚ୍ଚେ ସୁଖେନ୍ତି ପୀଣେନ୍ତି ସମଣବ୍ରାହ୍ମଣେସୁ ଉଦ୍ଧଗ୍ଗିକଂ ଦକ୍ଖିଣଂ ପତିଟ୍ଠପେନ୍ତି ସୋୱଗ୍ଗିକଂ ସୁଖୱିପାକଂ ସଗ୍ଗସଂୱତ୍ତନିକଂ, ସକ୍କା ନୁ ଖୋ ଭନ୍ତେ ଏୱମେୱ ଦିଟ୍ଠେୱ ଧମ୍ମେ ସନ୍ଦିଟ୍ଠିକଂ ସାମଞ୍ଞଫଲଂ ପଞ୍ଞପେତୁଂ ।
ପୁଚ୍ଛା – ତଦା ଆୱୁସୋ କଥଂ ଭଗୱତା ରାଜା ଅଜାତସତ୍ତୁ ୱେଦେହି ପୁତ୍ତୋ ପଟିପୁଚ୍ଛିତୋ କଥଞ୍ଚ ତେନ ଭଗୱତୋ ଆରୋଚିତଂ ।
ୱିସ୍ସଜ୍ଜନା – ‘‘ଅଭିଜାନାସି ନୋ ତ୍ୱଂ ମହାରାଜ ଇମଂ ପଞ୍ହଂ ଅଞ୍ଞେ ସମଣବ୍ରାହ୍ମଣେ ପୁଚ୍ଛିତାତି, ଅଭିଜାନାମହଂ ଭନ୍ତେ ଅଞ୍ଞେ ସମଣବ୍ରାହ୍ମଣେ ପୁଚ୍ଛିତାତି, ୟଥାକଥଂ ପନ ତେ ମହାରାଜ ବ୍ୟାକରିଂସୁ, ସଚେ ତେ ଅଗରୁ, ଭାସସ୍ସୂତି ନ ଖୋ ମେ ଭନ୍ତେ ଗରୁ, ୟତ୍ଥସ୍ସ ଭଗୱା ନିସିନ୍ନୋ ଭୱନ୍ତରୂପୋ ୱାତି, ତେନେହି ମହାରାଜ ଭାସସ୍ସୂ’’ତି, ଏୱଂ ଖୋ ଭନ୍ତେ ତଦା ଭଗୱତା ରାଜା ମାଗଧୋ ଅଜାତସତ୍ତୁ ୱେଦେହି ପୁତ୍ତୋ ପଟିପୁଚ୍ଛିତୋ, ଏୱଂ ଖୋ ଭନ୍ତେ ତେନ ତଦା ଭଗୱତୋ ଆରୋଚିତଂ ।
ପୂରଣକସ୍ସପ ଅୟୂୱାଦ
ପୁଚ୍ଛା – କଥଞ୍ଚାୱୁସୋ ପୂରଣକସ୍ସପସ୍ସ ସନ୍ତିକେ ପୁଚ୍ଛାୱିସ୍ସଜ୍ଜନା ଅହୋସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ପୂରଣୋ କସ୍ସପୋ ତେନୁପସଙ୍କମି, ଉପସଙ୍କମିତ୍ୱା ପୂରଣଂ କସ୍ସପଂ ସନ୍ଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଅଥ ଖୋ ଭନ୍ତେ ପୂରଣୋ କସ୍ସପୋ କରୋତୋ ଖୋ ମହାରାଜ କାରୟତୋ, ଛିନ୍ଦତୋ ଛେଦାପୟତୋ, ପଚତୋ ପାଚାପୟତୋ, ସୋଚୟତୋ ସୋଚାପୟତୋ (ପେୟ୍ୟାଲ) କରୋତୋ ନ କରୀୟତି ପାପଂ ତ୍ୟାଦିନା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ସଂଦିଟ୍ଠି କଂ ସାମଞ୍ଞଫଲଂ ପୁଟ୍ଠୋ ସମାନୋ ଅକିରିୟଂ ବ୍ୟାକାସି, ଏୱଂ ଖୋ ଭନ୍ତେ ପୂରଣସ୍ସ କସ୍ସପସ୍ସ ସନ୍ତିକେ ପୁଚ୍ଛାୱିସ୍ସଜ୍ଜନା ଅହୋସି ।
ପୂରଣକସ୍ସପୱାଦ
ନିସ୍ସିରିକୋ ୱତ ଆୱୁସୋ ପୂରଣସ୍ସ କସ୍ସପସ୍ସ ୱାଦୋ ଅନତ୍ଥସଂହିତୋ ଜିଗୁଚ୍ଛନୀୟୋ ଅତିୱିୟ ଭୟାନକୋ, ୟେ ତସ୍ସ ୱଚନଂ ସୋତବ୍ବଂ ସଦ୍ଧାତବ୍ବଂ ମଞ୍ଞେୟ୍ୟୁଂ, ତେସଂ ତଂ ଅସ୍ସ ଦୀଘରତ୍ତଂ ଅହିତାୟ ଦୁକ୍ଖାୟ, ଏତ୍ତକେନେୱ ଅଜ୍ଜ ମୟଂ ପୁଚ୍ଛାୱିସ୍ସଜ୍ଜନଂ ଥପେସ୍ସାମ ।
ମକ୍ଖଲିଗୋସାଲ ଅୟୂୱାଦ
ପୁଚ୍ଛା – ପୁରିମଦିୱସେ ଆୱୁସୋ ମୟା ସାମଞ୍ଞଫଲସୁତ୍ତସ୍ସ ନିଦାନପରିୟାପନ୍ନାନି ପୁଚ୍ଛିତବ୍ବଟ୍ଠାନାନି କାନିଚି କାନିଚି ପୁଚ୍ଛିତାନି, ତୟା ଚ ସୁଟ୍ଠୁ ୱିସ୍ସଜ୍ଜିତାନି, ଅଜ୍ଜ ପନ ୟଥାନୁପ୍ପତ୍ତମକ୍ଖଲିଗୋସାୟ ୱାଦତୋ ପଟ୍ଠାୟ ପୁଚ୍ଛିସ୍ସାମି, ମକ୍ଖଲି ପନ ଆୱୁସୋ
ଗୋସାଲୋ ରଞ୍ଞା ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ମକ୍ଖଲିଗୋସାଲୋ ତେନୁପସଂକମି, ଉପସଂକମିତ୍ୱା ମକ୍ଖଲିଂ ଗୋସାଲଂ ସନ୍ଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଅଥ ଖୋ ଭନ୍ତେ ମକ୍ଖଲିଗୋସାଲୋ ରାଜାନଂ ମାଗଧଂ ଅଜାତସତ୍ତୁଂ ୱେଦେହିପୁତ୍ତଂ ଏତଦୱୋଚ ‘‘ନତ୍ଥି ମହାରାଜ ହେତୁ ନତ୍ଥି ପଚ୍ଚୟୋ ସତ୍ତାନଂ ସଂକିଲେସାୟ, ଅହେତୂ ଅପଚ୍ଚୟା ସତ୍ତା ସଂକିଲିସ୍ସନ୍ତି । ନତ୍ଥି ମହାରାଜ ହେତୁ ନତ୍ଥି ପଚ୍ଚୟୋ ସତ୍ତାନଂ ୱିସୁଦ୍ଧିୟା, ଅହେତୂ ଅପଚ୍ଚୟା ସତ୍ତା ୱିସୁଜ୍ଝନ୍ତି, (ପେୟ୍ୟାଲ) ଚୁଲ୍ଲାସୀତି ମହାକପ୍ପିନୋ ସତସହସ୍ସାନି, ୟାନି ବାଲେ ଚ ପଣ୍ଡିତେ ଚ ସନ୍ଧାୱିତ୍ୱା ସଂସରିତ୍ୱା ଦୁକ୍ଖସ୍ସନ୍ତଂ କରିସ୍ସନ୍ତି, ତତ୍ଥ ନତ୍ଥି ‘ଇମିନାହଂ ସୀଲେନ ୱା ୱତେନ ୱା ତପେନ ୱା ବ୍ରହ୍ମଚରିୟେନ ୱା ଅପରିପକ୍କଂ ୱା କମ୍ମଂ ପରିପାଚେସ୍ସାମି, ପରିପକ୍କଂ ୱା କମ୍ମଂ ଫୁସ୍ସ ଫୁସ୍ସ ବ୍ୟନ୍ତିଂ କରିସ୍ସାମୀ’ତି ହେୱଂ ନତ୍ଥି । ଦୋଣମିତେ ସୁଖଦୁକ୍ଖେ, ପରିୟନ୍ତକତେ ସଂସାରେ ନତ୍ଥି ହାୟନୱଡ୍ଢନେ, ନତ୍ଥି ଉକ୍କଂସାୱକଂସେ । ସେୟ୍ୟଥାପି ନାମ ସୁତ୍ତପୁଟ୍ଠେ ଖିତ୍ତେ ନିବ୍ବେଠିୟମାନମେୱ ପଲେତି, ଏୱମେୱ ବାଲେ ଚ ପଣ୍ଡିତେ ଚ ସନ୍ଧାୱିତ୍ୱା ସଂସରିତ୍ୱା ଦୁକ୍ଖସ୍ସନ୍ତଂ କରିସ୍ସନ୍ତୀ’’ତି, ଇତ୍ଥଂ ଖୋ ଭନ୍ତେ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ମକ୍ଖଲିଗୋସାଲୋ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ ସମାନୋ ସଂସାରସୁଦ୍ଧିଂ ବ୍ୟାକାସି ।
ମକ୍ଖଲିଗୋସାଲୱାଦ
ଅୟମ୍ପି ଆୱୁସୋ ୱାଦୋ ନିସ୍ସିରିକୋୟେୱ ଅନତ୍ଥସଂହିତୋ ଜିଗୁଚ୍ଛନୀୟୋ ଅତି ୱିୟ ଭୟାନକୋ, ୟେ ତସ୍ସ ୱଚନଂ ସୋତବ୍ବଂ ସଦ୍ଧାତବ୍ବଂ ମଞ୍ଞେୟ୍ୟୁଂ, ତେସଂ ତଂ ଅସ୍ସ ଦୀଘରତ୍ତଂ ଅହିତାୟ ଦୁକ୍ଖାୟ ।
ଅଜିତକେସକମ୍ବଲୱାଦ
ପୁଚ୍ଛା – ଅଥାପରମ୍ପି ପୁଚ୍ଛାମି, ଅଜିତୋ ପନ ଆୱୁସୋ କେସକମ୍ବଲୋ ରଞ୍ଞା ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ଅଜିତୋ କେସକମ୍ବଲୋ ତେନୁପସଙ୍କମି, ଉପସଙ୍କମିତ୍ୱା ଅଜିତଂ କେସକମ୍ବଲଂ ସନ୍ଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଅଥ ଖୋ ଭନ୍ତେ ଅଜିତୋ କେସକମ୍ବଲୋ ରାଜାନଂ ମାଗଧଂ ଅଜାତସତ୍ତୁଂ ୱେଦେହିପୁତ୍ତଂ ଏତଦୱୋଚ ‘‘ନତ୍ଥି ମହାରାଜ ଦିନ୍ନଂ, ନତ୍ଥି ୟିଟ୍ଠଂ, ନତ୍ଥି ହୁତଂ, ନତ୍ଥି ସୁକତଦୁକ୍କଟାନଂ କମ୍ମାନଂ ଫଲଂ ୱିପାକୋ, ନତ୍ଥି ଅୟଂ ଲୋକୋ, ନତ୍ଥି ପରୋ ଲୋକୋ, ନତ୍ଥି ମାତା, ନତ୍ଥି ପିତା, ନତ୍ଥି ସତ୍ତା ଓପପାତିକା, ନତ୍ଥି ଲୋକେ ସମଣବ୍ରାହ୍ମଣା ସମ୍ମଗ୍ଗତା ସମ୍ମାପଟିପନ୍ନା, ୟେ ଇମଞ୍ଚ ଲୋକଂ ପରଞ୍ଚ ଲୋକଂ ସୟଂ ଅଭିଞ୍ଞା ସଚ୍ଛିକତ୍ୱା ପୱେଦେନ୍ତି । (ପେୟ୍ୟାଲ) ବାଲେ ଚ ପଣ୍ଡିତେ ଚ କାୟସ୍ସ ଭେଦା ଉଚ୍ଛିଜ୍ଜନ୍ତି ୱିନସ୍ସନ୍ତୀ’’ତି । ଇତ୍ଥଂ ଖୋ ଭନ୍ତେ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅଜିତୋ କେସକମ୍ବଲୋ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ ସମାନୋ ଉଚ୍ଛେଦଂ ବ୍ୟାକାସି ।
ଅଜିତକେସକମ୍ବଲ
ଅୟମ୍ପି ଖୋ ଆୱୁସୋ ନିସ୍ସିରିକୋୟେୱ, ଅନତ୍ଥସଂହିତୋ ଜିଗୁଚ୍ଛନୀୟୋ ଅତି ୱିୟ ଭୟାନକୋ, ୟେ ତସ୍ସ ୱଚନଂ ସୋତବ୍ବଂ ସଦ୍ଧାତବ୍ବଂ ମଞ୍ଞେୟ୍ୟୁଂ, ତେସଂ ତଂ ଅସ୍ସ ଦୀଘରତ୍ତଂ ଅହିତାୟ ଦୁକ୍ଖାୟ ।
ପକୁଧକଚ୍ଚାୟନୱାଦ
ପୁଚ୍ଛା – ଅଥାପରମ୍ପି ପୁଚ୍ଛାମି, ପକୁଧୋ ପନ ଆୱୁସୋ କଚ୍ଚାୟନୋ ରଞ୍ଞା ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ପକୁଧୋ କଚ୍ଚାୟନୋ ତେନୁପସଙ୍କମି, ଉପସଙ୍କମିତ୍ୱା ପକୁଧଂ କଚ୍ଚାୟନଂ ସନ୍ଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଅଥ ଖୋ ଭନ୍ତେ ପକୁଧୋ କଚ୍ଚାୟନୋ ରାଜାନଂ ମାଗଧଂ ଅଜାସତ୍ତୁଂ ୱେଦେହିପୁତ୍ତଂ ଏତଦୱୋଚ ‘‘ସତ୍ତିମେ ମହାରାଜ କାୟା ଅକଟା ଅକଟୱିଧା ଅନିମ୍ମିତା ଅନିମ୍ମାତା ୱଞ୍ଚା କୂଟଟ୍ଠା ଏସିକଟ୍ଠାୟିତା, ତେ ନ ଇଞ୍ଜନ୍ତି, ନ ୱିପରିଣାମେନ୍ତି, ନ ଅଞ୍ଞମଞ୍ଞଂ ବ୍ୟାବାଧେନ୍ତି, ନାଲଂ ଅଞ୍ଞମଞ୍ଞସ୍ସ ସୁଖାୟ ୱା ଦୁକ୍ଖାୟ ୱା ସୁଖଦୁକ୍ଖାୟ ୱା । କତମେ ସତ୍ତ, ପଥୱୀକାୟୋ, ଆପୋକାୟୋ, ତେଜୋକାୟୋ ୱାୟୋକାୟୋ, ସୁଖେ, ଦୁକ୍ଖେ, ଜୀୱେ ସତ୍ତମେ । ଇମେ ସତ୍ତକାୟା ଅକଟା ଅକଟୱିଧା ଅନିମ୍ମିତା ଅନିମ୍ମାତା ୱଞ୍ଚ୍ୟା କୂଟଟ୍ଠା ଏସିକଟ୍ଠାୟିତା, ତେ ନ ଇଞ୍ଜନ୍ତି, ନ ୱିପରିଣାମେନ୍ତି, ନ ଅଞ୍ଞମଞ୍ଞଂ ବ୍ୟାବାଧେନ୍ତି, ନାଲଂ ଅଞ୍ଞମଞ୍ଞସ୍ସ ସୁଖାୟ ୱା ଦୁକ୍ଖାୟ ୱା ସୁଖଦୁକ୍ଖାୟ ୱା । ତତ୍ଥ ନତ୍ଥି ହନ୍ତା ୱା ଘାତେତା ୱା, ସୋତା ୱା ସାୱେତା ୱା, ୱିଞ୍ଞାତା ୱା ୱିଞ୍ଞାପେତା ୱା, ୟୋପି ତିଣ୍ହେନ ସତ୍ଥେନ ସୀସଂ ଛିନ୍ଦତି, ନ କୋଚି କିଞ୍ଚି ଜିୱିତା ୱୋରୋପେତି, ସତ୍ତନ୍ନଂତ୍ୱେୱ କାୟାନମନ୍ତରେନ ସତ୍ଥଂ ୱିୱରମନୁପତତୀ’’ତି । ଇତ୍ଥଂ ଖୋ ଭନ୍ତେ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ପକୁଧୋ କଚ୍ଚାୟନୋ ସାମଞ୍ଞଫଲଂ ପୁଟ୍ଠୋ ସମାନୋ ଅଞ୍ଞେନ ଅଞ୍ଞଂ ବ୍ୟାକାସି ।
ପକୁଧକଚ୍ଚାୟନୱାଦ
ଅୟମ୍ପି ଖୋ ଆୱୁସୋ ୱାଦୋ ପୁରିମୱାଦୋୱିୟ ନିସ୍ସିରିକୋୟେୱ ଅନତ୍ଥସଂହିତୋ ଜିଗୁଚ୍ଛନୀୟୋ ଅତିୱିୟ ଭୟାନକୋ ।
ନିଗଣ୍ଠନାଟପୁତ୍ତୱାଦ
ପୁଚ୍ଛା – ଅଥାପରମ୍ପି ପୁଚ୍ଛାମି, ନିଗଣ୍ଠୋ ପନାୱୁସୋ ନାଟପୁତ୍ତୋ ରଞ୍ଞା ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ନିଗଣ୍ଠୋ ନାଟପୁତ୍ତୋ ତେନୁପସଂକମି, ଉପସଂକମିତ୍ୱା ନିଗଣ୍ଠଂ ନାଟପୁତ୍ତଂ ସନ୍ଦିଟ୍ଠିକଂ ସାମଞ୍ଞଫଲଂ ପୁଚ୍ଛି, ଅଥ ଖୋ ନିଗଣ୍ଠୋ ନାଟପୁତ୍ତୋ ରାଜାନଂ ମାଗଧଂ ଅଜାତସତ୍ତୁଂ ୱେଦେହିପୁତ୍ତଂ ଏତଦୱୋଚ, ‘‘ଇଧ ମହାରାଜ ନିଗଣ୍ଠୋ ଚାତୁୟାମସଂୱରସଂୱୁତୋ ହୋତି, କଥଞ୍ଚ ମହାରାଜ
ନିଗଣ୍ଠୋ ଚାତୁୟାମସଂୱରସଂୱୁତୋ ହୋତି, ଇଧ ମହାରାଜ ନିଗଣ୍ଠୋ ସବ୍ବୱାରିୱାରିତୋ ଚ ହୋତି, ସବ୍ବୱାରିୟୁତ୍ତୋ ଚ, ସବ୍ବୱାରିଧୁତୋ ଚ, ସବ୍ବୱାରିଫୁଟୋ ଚ । ଏୱଂ ଖୋ ମହାରାଜ ନିଗଣ୍ଠୋ ଚାତୁୟାମସଂୱରସଂୱୁତୋ ହୋତି, ୟତୋ ଖୋ ମହାରାଜ ନିଗଣ୍ଠୋ ଏୱଂ ଚାତୁୟାମସଂୱରସଂୱୁତୋ ହୋତି । ଅୟଂ ୱୁଚ୍ଚତି ମହାରାଜ ନିଗଣ୍ଠୋ ଗତତ୍ତୋ ଚ ୟତତ୍ତୋ ଚ ଠିତତ୍ତୋ ଚା’’ତି । ଇତ୍ଥଂ ଖୋ ଭନ୍ତେ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ନିଗଣ୍ଠୋ ନାଟପୁତ୍ତୋ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ ସମାନୋ ଚାତୁୟାମସଂୱରଂ ବ୍ୟାକାସି ।
ନିଗଣ୍ଠୱାଦ
ଏତସ୍ସ ପନାୱୁସୋ ୱାଦେ କୋଚି ସାସନାନୁଲୋମୱାଦୋ ଅତ୍ଥି, ଅସୁଦ୍ଧଲଦ୍ଧିତାୟ ପନ ଏସୋପି ୱାଦୋ ଜିଗୁଚ୍ଛନୀୟୋୟେୱ, ସେୟ୍ୟଥାପି ଭୋଜନଂ ଗୂଥମିସ୍ସଂ ଗାରୟ୍ହୋୟେୱ ଆରକା ପରିୱଜ୍ଜିତବ୍ବୋୟେୱ, ସେୟ୍ୟଥାପି ୱିସସଂସଟ୍ଠୋ ଆପାନୀୟକଂସୋ ।
ସିଞ୍ଚଞ୍ଞୱାଦ
ପୁଚ୍ଛା – ଅଥାପରମ୍ପି ପୁଚ୍ଛାମି, ସଞ୍ଚୟୋ ପନାୱୁସୋ ବେଲଟ୍ଠପୁତ୍ତୋ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଏକମିଦଂ ଭନ୍ତେ ସମୟଂ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୟେନ ସଞ୍ଚୟୋ ବେଲଟ୍ଠପୁତ୍ତୋ ତେନୁପସଙ୍କମି, ଉପସଙ୍କମିତ୍ୱା ସଞ୍ଚୟଂ ବେଲଟ୍ଠପୁତ୍ତଂ ଏତଦୱୋଚ, ‘‘ୟଥା ନୁ ଖୋ ଇମାନି ଭୋ ସଞ୍ଚୟ ପୁଥୁସିପ୍ପାୟତନାନି, ସେୟ୍ୟଥିଦଂ, ହତ୍ଥାରୋହା ଅସ୍ସରୋହା…ପେ॰… ସକ୍କା ନୁ ଖୋ ଭୋ ସଞ୍ଚୟ ଏୱମେୱ ଦିଟ୍ଠେୱ ଧମ୍ମେ ସନ୍ଦିଟ୍ଠିକଂ ସାମଞ୍ଞଫଲଂ ପଞ୍ଞପେତୁ’’ନ୍ତି, ଏୱଂ ୱୁତ୍ତେ ଭନ୍ତେ ସଞ୍ଚୟୋ ବେଲଟ୍ଠପୁତ୍ତୋ ରାଜାନଂ ମାଗଧଂ ଅଜାତସତ୍ତୁଂ ୱେଦେହିପୁତ୍ତଂ ଏତଦୱୋଚ ।
‘‘ଅତ୍ଥି ପରୋଲୋକୋତି ଇତି ଚେ ମଂ ପୁଚ୍ଛସି, ଅତ୍ଥି ପରୋ ଲୋକୋତି ଇତି ଚେ ମେ ଅସ୍ସ, ଅତ୍ଥି ପରୋ
ଲୋକୋତି ଇତି ତେ ନଂ ବ୍ୟାକରେୟ୍ୟଂ, ଏୱନ୍ତିପି ମେ ନୋ, ତଥାତିପି ମେ ନୋ, ଅଞ୍ଞଥାତିପି ମେ ନୋ, ନୋତିପି ମେ ନୋ, ନୋ ନୋତିପି ମେ ନୋ…ପେ॰… ନେୱ ହୋତି ନ ନ ହୋତି ତଥାଗତୋ ପରଂ ମରଣାତି ଇତି ଚେ ମଂ ପୁଚ୍ଛସି, ନେୱ ହୋତି ନ ନ ହୋତି ତଥାଗତୋ ପରଂ ମରଣାତି ଇତି ଚେ ମେ ଅସ୍ସ, ନେୱ ହୋତି ନ ନ ହୋତି ତଥାଗତୋ ପରଂ ମରଣାତି ଇତି ତେ ନଂ ବ୍ୟାକରେୟ୍ୟଂ, ଏୱନ୍ତିପି ମେ ନୋ, ତଥାତିପି ମେ ନୋ, ଅଞ୍ଞଥାତିପି ମେ ନୋ, ନୋତିପି ମେ ନୋ, ନୋ ନୋତିପି ମେ ନୋ’’ତି । ଇତ୍ଥଂ ଖୋ ଭନ୍ତେ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ସଞ୍ଚୟୋ ବେଲଟ୍ଠପୁତ୍ତୋ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ ସମାନୋ ୱିକ୍ଖେପଂ ବ୍ୟାକାସି ।
ତିତ୍ଥିଅୟୂୱାଦ
ସବ୍ବେପି ଆୱୁସୋ ଏତେ ଛନ୍ନଂ ସତ୍ଥାରାନଂ ୱାଦା ନିସ୍ସିରିକାୟେୱ ଜିଗୁଚ୍ଛନୀୟାୟେୱ ଅନତ୍ଥସଂହିତାୟେୱ, ବାଲାନଂ ଭିୟ୍ୟୋସୋ ମତ୍ତାୟ ସମ୍ମୋହାୟ ସଂୱତ୍ତନ୍ତି ଅନତ୍ଥାୟ ।
ଅଜ୍ଜ ପନ ଆୱୁସୋ କାଲୋ ଅତିକ୍କନ୍ତୋ, ସ୍ୱେୟେୱ ଭଗୱତା ୱୁତ୍ତଂ ପଣୀତଂ ପସଟ୍ଠଂ ସନ୍ଦିଟ୍ଠିକଫଲଂ ପୁଚ୍ଛାମ ।
ପୁଚ୍ଛା – ପୁରିମଦିୱସେସୁ ଆୱୁସୋ ସାମଞ୍ଞଫଲସୁତ୍ତସ୍ସ ପୁବ୍ବଭାଗେ ୟାୱ ଛସତ୍ଥାରମିଚ୍ଛାୱାଦପରିୟୋସାନଂ ପୁଚ୍ଛନୱିସ୍ସଜ୍ଜନଂ ଅମ୍ହେହି କତଂ, ଅଜ୍ଜ ପନ ୟଥାନୁପ୍ପତ୍ତଂ ଭଗୱତା ଦେସିତସାମଞ୍ଞଫଲସୁତ୍ତାଧିକାରେ ପୁଚ୍ଛାୱିସ୍ସଜ୍ଜନଂ କରିସ୍ସାମ । ଭଗୱା ପନ ଆୱୁସୋ ରଞ୍ଞା ମାଗଧେନ ଅଜାତସତ୍ତୁନା ୱେଦେହିପୁତ୍ତେନ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ କଥଂ ବ୍ୟାକାସି ।
ୱିସ୍ସଜ୍ଜନା – ଭଗୱା ଭନ୍ତେ ତିଧା ୱିଭଜିତ୍ୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ସନ୍ଦିଟ୍ଠିକଂ ସାମଞ୍ଞଫଲଂ ପୁଟ୍ଠୋ ବ୍ୟାକାସି ।
ପୁଚ୍ଛା – କଥଞ୍ଚାୱୁସୋ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁନୋ ୱେଦେହିପୁତ୍ତସ୍ସ ପଠମଂ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି ।
ୱିସ୍ସଜ୍ଜନା – ଦାସଂ ଭନ୍ତେ ପବ୍ବଜିତଂ ଉପମାଭାୱେନ ନିଦ୍ଦିସିତ୍ୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଭଗୱା ପଠମଂ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି ।
ସୋହଂ ଭନ୍ତେ ଭଗୱନ୍ତମ୍ପି ପୁଚ୍ଛାମି, ୟଥା ନୁ ଖୋ ଇମାନି ଭନ୍ତେ ପୁଥୁସିପ୍ପାୟତନାନି ସେୟ୍ୟଥିଦଂ…ପେ॰… ସକ୍କା ନୁ ଖୋ ଭନ୍ତେ ଏୱ ମେୱ ଦିଟ୍ଠେୱ ଧମ୍ମେ ସନ୍ଦିଟ୍ଠିକଂ ସାମଞ୍ଞଫଲଂ ପଞ୍ଞପେତୁଂ –
ଅଚ୍ଛରିୟଂ ଆୱୁସୋ ଅବ୍ଭୁତଂ ଆୱୁସୋ, ୟାୱ ସ୍ୱାଖାତସ୍ସ ବୁଦ୍ଧସାସନସ୍ସ ମହିଦ୍ଧିକତା ମହାନୁଭାୱତା, ୟତ୍ରହି ନାମ ଦାସୋପି ନିହୀନଜଚ୍ଚୋ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତ୍ୱା ଅତ୍ତନୋ ଇସ୍ସରଭୂତେନ ରଞ୍ଞାପି ୱନ୍ଦନୀୟତ୍ତଂ ଗରୁକରଣୀୟତ୍ତଂ ପାପୁଣିସ୍ସତି, ସୁପଞ୍ଞତ୍ତମେତଂ ଭଗୱତା ପଠମଂ ସନ୍ଦିଟ୍ଠିକଫଲଂ ।
ପୁଚ୍ଛା – କଥଂ ପନାୱୁସୋ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁନୋ ୱେଦେହିପୁତ୍ତସ୍ସ ଦୁତିୟଂ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି ।
ୱିସ୍ସଜ୍ଜନା – କସ୍ସକଂ ଭନ୍ତେ ପବ୍ବଜିତଂ ଉପମାଭାୱେନ ଦସ୍ସେତ୍ୱା ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି ।
ଅଚ୍ଛରିୟଂ ଆୱୁସୋ ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା ମହିଦ୍ଧିକତା ମହାନୁଭାୱତା, ୟତ୍ରହି ନାମ କସ୍ସ କୋପି ଗୁଣରହିତୋ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତ୍ୱା ରଟ୍ଠଧିପତିନା ମନୁସ୍ସଲୋକେ ଦେୱଭୂତେନ ରଞ୍ଞାପି ଗରୁକରଣୀୟତଂ ୱନ୍ଦନୀୟତଂ ପାପୁଣିସ୍ସତି, ସୁପଞ୍ଞତ୍ତମେତଂ ଆୱୁସୋ ଭଗୱତା ଦୁତିୟଂ ସନ୍ଦିଟ୍ଠିକଫଲଂ ।
ପୁଚ୍ଛା – କଥଞ୍ଚା ପନାୱୁସୋ ଭଗୱା ପୁରିମେହି ସନ୍ଦିଟ୍ଠିକସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ସନ୍ଦିଟ୍ଠିକଂ ସାମଞ୍ଞଫଲଂ ରଞ୍ଞୋ ଦେସେସି ।
ୱିସ୍ସଜ୍ଜନା – ଭଗୱା ଭନ୍ତେ ବୁଦ୍ଧୁପ୍ପାଦତୋ ପଟ୍ଠାୟ କୁଲପୁତ୍ତସ୍ସ ପବ୍ବଜିତ ଭାୱଂ, ତସ୍ସ ଚ ସୀଲସମ୍ପଦଂ, ତସ୍ସ ଚ ଇନ୍ଦ୍ରିୟେସୁ ଗୁତ୍ତଦ୍ୱାରତଂ, ଅରିୟଞ୍ଚସତିସମ୍ପଜଞ୍ଞଂ, ଅରିୟଞ୍ଚ ସନ୍ତୁଟ୍ଠିଂ, ପଞ୍ଚନ୍ନଞ୍ଚ ନୀୱରଣାନଂ ପହାନଂ, ଚତ୍ତାରି ଚ ଝାନାନି, ଅଟ୍ଠ ଚ ୱିଜ୍ଜାୟୋ, ତାହି ତାହି ଉପମାହି ୱିତ୍ଥାରତୋ ୱିଭଜିତ୍ୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସକ୍କା ପନ ଭନ୍ତେ ଦିଟ୍ଠେୱ ଧମ୍ମେ ସନ୍ଦିଟ୍ଠିକଂ ସାମଞ୍ଞଫଲଂ, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ପଞ୍ଞପେତୁଂ ।
ସକ୍କା ମହାରାଜା, ତେନ ହି ମହାରାଜ ସୁଣୋହି ସାଧୁକଂ ମନସିକରୋହି ଭାସିସ୍ସାମି ।
ପୁଚ୍ଛା – କଥଞ୍ଚ ପନାୱୁସୋ ଭିକ୍ଖୁ ସୀଲସମ୍ପନ୍ନୋ ହୋତି, କଥଞ୍ଚ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁନୋ ୱେଦେହିପୁତ୍ତସ୍ସ ଚୂଳସୀଲଂ ୱିଭଜିତ୍ୱା ଦେସେସି ।
ୱିସ୍ସଜ୍ଜନା – ‘‘କଥଞ୍ଚ ମହାରାଜ ଭିକ୍ଖୁ ସୀଲସମ୍ପନ୍ନୋ ହୋତି । ଇଧ ମହାରାଜ ଭିକ୍ଖୁ ପାଣାତିପାତଂ ପହାୟ ପାଣାତିପାତା ପଟିୱିରତୋ ହୋତି ନିହିତଦଣ୍ଡୋ ନିହିତସତ୍ଥୋ ଲଜ୍ଜୀ ଦୟାପନ୍ନୋ, ସବ୍ବପାଣଭୂତହିତାନୁକମ୍ପୀ ୱିହରତି । ଇଦମ୍ପିସ୍ସ ହୋତି ସୀଲସ୍ମିଂ’’ ଏୱମାଦିନା ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଛବ୍ବୀସତିୟା ଆକାରେହି ଚୂଳସୀଲଂ ୱିଭଜିତ୍ୱା ଦେସେସି ।
ସାଧୁ ସାଧୁ ଆୱୁସୋ, ସାଧୁ ସାଧୁ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନେ ସଦ୍ଧାପବ୍ବାଜିତୋ ଇମିନା ଚ ଚୂଳସୀଲେନ ସମନ୍ନାଗତୋ ୱିହରେୟ୍ୟ ।
ସୁୱେ ୟଥାନୁପ୍ପତ୍ତଟ୍ଠାନତୋ ପଟ୍ଠାୟ ପୁଚ୍ଛାୱିସ୍ସଜ୍ଜନଂ କରିସ୍ସାମ ।
ପୁଚ୍ଛା – କଥଂ ପନାୱୁସୋ ରଞ୍ଞୋ ମାଗଧସ୍ସ ଅଜାତସତ୍ତୁନୋ ୱେଦେହିପୁତ୍ତସ୍ସ ମଜ୍ଝିମସୀଲଞ୍ଚ ମହାସୀଲଞ୍ଚ ୱିଭଜିତ୍ୱା ଦେସେସି ।
ୱିସ୍ସଜ୍ଜନା – ‘‘ୟଥା ୱା ପନେକେ ଭୋନ୍ତୋ ସମଣବ୍ରାହ୍ମଣା ସଦ୍ଧାଦେୟ୍ୟାନି ଭୋଜନାନି ଭୁଞ୍ଜିତ୍ୱା ତେ ଏୱରୂପଂ ବୀଜଗାମଭୂତଗାମସମାରମ୍ଭଂ ଅନୁୟୁତ୍ତା ୱିହରନ୍ତି । ସେୟ୍ୟଥିଦଂ । ମୂଲବୀଜଂ ଖନ୍ଧବୀଜଂ ଫଳୁବୀଜଂ ଅଗ୍ଗବୀଜଂ ବୀଜବୀଜମେୱ ପଞ୍ଚମଂ, ଇତି ଏୱରୂପା ବୀଜଗାମଭୂତଗାମସମାରମ୍ଭା ପଟିୱିରତୋ ହୋତି । ଇଦମ୍ପିସ୍ସ ହୋତି ସୀଲସ୍ମିଂ’’ ଏୱମାଦିନା ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ମଜ୍ଝିମସୀଲଞ୍ଚ ମହାସୀଲଞ୍ଚ ୱିତ୍ଥାରତୋ ୱିଭଜିତ୍ୱା ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନେ ସଦ୍ଧାପବ୍ବଜିତୋ ଏୱଂ ଅରିୟେନ ସୀଲେନ ସମନ୍ନାଗତୋ ୱିହରେୟ୍ୟ ।
ପୁଚ୍ଛା – କଥଂ ପନାୱୁସୋ ଅରିୟଂ ଇନ୍ଦ୍ରିୟସଂୱରଞ୍ଚ ଅରିୟଂ ସତିସମ୍ପଜଞ୍ଞଞ୍ଚ ଅରିୟଂ ସନ୍ତୋସଞ୍ଚ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱିଭଜିତ୍ୱା ଦେସେସି ।
ୱିସ୍ସଜ୍ଜନା – ଇଧ ମହାରାଜ ଭିକ୍ଖୁ ଚକ୍ଖୁନା ରୂପଂ ଦିସ୍ୱା ନ ନିମିତ୍ତଗ୍ଗାହୀ ହୋତି ନନୁବ୍ୟଞ୍ଜନଗ୍ଗାହୀ, ୟତ୍ୱାଧିକରଣମେନଂ ଚକ୍ଖୁନ୍ଦ୍ରିୟଂ ଅସଂୱୁତଂ ୱିହରନ୍ତଂ ଅଭିଜ୍ଝାଦୋମନସ୍ସା ପାପକା ଅକୁସଲା ଧମ୍ମା ଅନ୍ୱାସ୍ସୱେୟ୍ୟୁଂ, ତସ୍ସ ସଂୱରାୟ ପଟିପଜ୍ଜତି, ରକ୍ଖତି ଚକ୍ଖୁନ୍ଦ୍ରିୟଂ, ଚକ୍ଖୁନ୍ଦ୍ରିୟେ ସଂୱରଂ ଆପଜ୍ଜତି, ଏୱମାଦିନା ଚ ।
ଇଧ ମହାରାଜ ଭିକ୍ଖୁ ସତିସମ୍ପଜଞ୍ଞେନ ସମନ୍ନାଗତୋ ହୋତି, ଅଭିକ୍କନ୍ତେ ପଟିକ୍କନ୍ତେ ସମ୍ପଜନକାରୀ ହୋତି,
ଆଲୋକିତେ ୱିଲୋକିତେ ସମ୍ପଜାନକାରୀ ହୋତି, ସମିଞ୍ଜିତେ ପସାରିତେ ସମ୍ପଜାନକାରୀ ହୋତି, ସଙ୍ଘାଟିପତ୍ତଚୀୱରଧାରଣେ ସମ୍ପଜାନକାରୀ ହୋତି, ଅସିତେ ପୀତେ ଖାୟିତେ ସାୟିତେ ସମ୍ପଜାନକାରୀ ହୋତି, ଉଚ୍ଚାରପସ୍ସାୱକମ୍ମେ ସମ୍ପଜାନକାରୀ ହୋତି, ଗତେ ଠିତେ ନିସିନ୍ନେ ସୁତ୍ତେ ଜାଗରିତେ ଭାସିତେ ତୁଣ୍ହୀଭାୱେ ସମ୍ପଜାନକାରୀ ହୋତି, ଏୱଂ ଖୋ ମହାରାଜ ଭିକ୍ଖୁ ସତିସମ୍ପଜଞ୍ଞେନ ସମନ୍ନାଗତୋ ହୋତି ।
କଥଞ୍ଚ ମହାରାଜ ଭିକ୍ଖୁ ସନ୍ତୁଟ୍ଠୋ ହୋତି, ଇଧ ମହାରାଜ ଭିକ୍ଖୁ ସନ୍ତୁଟ୍ଠୋ ହୋତି କାୟପରିହାରିକେନ ଚୀୱରେନ କୁଚ୍ଛିପରିହାରିକେନ ପିଣ୍ଡପାତେନ ।
ଏୱମାଦିନା ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅରିୟଞ୍ଚ ଇନ୍ଦ୍ରିୟେସୁଗୁତ୍ତଦ୍ୱାରତଂ ଅରିୟଞ୍ଚ ସତିସମ୍ପଜଞ୍ଞଂ ଅରିୟଞ୍ଚ ସନ୍ତୋସଂ ୱିଭଜିତ୍ୱା ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନେ ସଦ୍ଧାପବ୍ବଜିତୋ ଇମିନା ଚ ଅରିୟେନ ଇନ୍ଦ୍ରିୟସଂୱରେନ ସମନ୍ନାଗତୋ, ଇମିନା ଚ ଅରିୟେନ ସତିସମ୍ପଜଞ୍ଞେନ
ସମନ୍ନାଗତୋ, ଇମାୟ ଚ ଅରିୟାୟ ସନ୍ତୁଟ୍ଠିୟା ସମନ୍ନାଗତୋ ୱିହରେୟ୍ୟ ।
ପୁଚ୍ଛା – କଥଂ ପନାୱୁସୋ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ନୀୱରଣପହାନଂ ୱିଭଜିତ୍ୱା ଦେସେସି ।
ୱିସ୍ସଜ୍ଜନା – ସୋ ଏୱଂ ଅରିୟେନ ସୀଲକ୍ଖନ୍ଧେନ ସମନ୍ନାଗତୋ, ଅରିୟେନ ଇନ୍ଦ୍ରିୟସଂୱରେନ ସମନ୍ନାଗତୋ, ଅରିୟେନ ସତିସମ୍ପଜଞ୍ଞେନ ସମନ୍ନାଗତୋ, ଅରିୟାୟ ସନ୍ତୁଟ୍ଠିୟା ସମନ୍ନାଗତୋ, ୱିୱିତ୍ତଂ ସେନାସନଂ ଭଜତି ଅରଞ୍ଞଂ ରୁକ୍ଖମୂଲଂ ପବ୍ବତଂ କନ୍ଦରଂ ଗିରିଗୁହଂ ସୁସାନଂ ୱନପତ୍ତଂ ଅବ୍ଭୋକାସଂ ପଲାଲପୁଞ୍ଜଂ । ସୋ ପଚ୍ଛାଭତ୍ତଂ ପିଣ୍ଡପାତପଟିକ୍କନ୍ତୋ ନିସୀଦତି ପଲ୍ଲଙ୍କଂ ଆଭୁଞ୍ଜିତ୍ୱା ଉଜୁଂ କାୟଂ ପଣିଧାୟ ପରିମୁଖଂ ସତିଂ ଉପଟ୍ଠପେତ୍ୱା । ସୋ ଅଭିଜ୍ଝଂ ଲୋକେ ପହାୟ ୱିଗତାଭିଜ୍ଝେନ ଚେତସା ୱିହରତି…ପେ॰… ତସ୍ସିମେ ପଞ୍ଚ ନୀୱରଣେ ପହୀନେ ଅତ୍ତନି ସମନୁପସ୍ସତୋ ପାମୋଜ୍ଜଂ ଜାୟତି, ପମୁଦିତସ୍ସ ପୀତି ଜାୟତି, ପୀତିମନସ୍ସ କାୟୋ ପସ୍ସମ୍ଭତି, ପସ୍ସଦ୍ଧକାୟୋ ସୁଖଂ ୱେଦେହି, ସୁଖିନୋ ଚିତ୍ତଂ ସମାଧିୟତି । ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ନୀୱରଣପ୍ପହାନଂ ୱିଭଜିତ୍ୱା ୱିତ୍ଥାରତୋ ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନେ ସଦ୍ଧାପବ୍ବଜିତୋ ଏୱଂ ପଞ୍ଚନୀୱରଣେ ପଜହିତ୍ୱା ତେହି ଚିତ୍ତଂ ୱିସୋଧେତ୍ୱା ୱିହରେୟ୍ୟ ।
ପୁଚ୍ଛା – କଥଞ୍ଚାୱୁସୋ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ପଠମଂ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ୱିୱିଚ୍ଚେୱ କାମେହି ୱିୱିଚ୍ଚ ଅକୁସଲେହି ଧମ୍ମେହି ସୱିତକ୍କଂ ସୱିଚାରଂ ୱିୱେକଜଂ ପୀତିସୁଖଂ ପଠମଂ ଝାନଂ ଉପସମ୍ପଜ୍ଜ ୱିହରତି…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ
ପଣୀତତରଞ୍ଚ। ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ପଠମଂ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନସଙ୍ଖାତେ ଧମ୍ମୱିନୟେ ପବ୍ବଜିତ୍ୱା ଏୱଂ ପଠମଂ ଝାନଂ
ଉପସମ୍ପଜ୍ଜ ୱିୱେକଜେନ ପୀତିସୁଖେନ ଅତ୍ତନୋ କାୟଂ ଅଭିସନ୍ଦେୟ୍ୟ ପରିସନ୍ଦେୟ୍ୟ ପରିପୂରେୟ୍ୟ ।
ପୁଚ୍ଛା – କଥଞ୍ଚାୱୁସୋ ଭଗୱା ଦୁତିୟଞ୍ଚ ତତିୟଞ୍ଚ ଚତୁତ୍ଥଞ୍ଚ ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ପୁନ ଚ ପରଂ ମହାରାଜ ଭିକ୍ଖୁ ୱିତକ୍କୱିଚାରାନଂ ୱୂପସମା ଅଜ୍ଝତ୍ତଂ ସମ୍ପସାଦନଂ ଚେତସୋ ଏକୋଦିଭାୱଂ ଅୱିତକ୍କଂ ଅୱିଚାରଂ ସମାଧିଜଂ ପୀତିସୁଖଂ ଦୁତିୟଂଝାନଂ ଉପସମ୍ପଜ୍ଜ ୱିହରତି ଏୱମାଦିନା ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଦୁତିୟଞ୍ଚ ତତିୟଞ୍ଚ ଚତୁତ୍ଥଞ୍ଚ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନସଙ୍ଖାତେ ଧମ୍ମୱିନୟେ ସଦ୍ଧାପବ୍ବଜିତୋ ଏୱଂ ଦୁତିୟଝାନଞ୍ଚ ତତିୟଝାନଞ୍ଚ ଚତୁତ୍ଥଝାନଞ୍ଚ ଉପସମ୍ପଜ୍ଜ ତେହି ଝାନସୁଖେହି ଅତ୍ତନୋ କାୟଂ ଅଭିସନ୍ଦେତ୍ୱା ପରିସନ୍ଦେତ୍ୱା ପରିପୂରେତ୍ୱା ୱିହରେୟ୍ୟ ।
ପୁଚ୍ଛା – କଥଞ୍ଚ ପନାୱୁସୋ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନଞ୍ଜପ୍ପତ୍ତେ ଞାଣଦସ୍ସନାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଏୱଂ ପଜାନାତି ‘‘ଅୟଂ ଖୋ ମେ କାୟୋ ରୂପୀ ଚାତୁମହାଭୂତିକୋ ମାତାପେତ୍ତିକସମ୍ଭୱୋ ଓଦନକୁମ୍ମାସୂପଚୟୋ ଅନିଚ୍ଚୁଚ୍ଛାଦନପରିମଦ୍ଦନଭେଦନୱିଦ୍ଧଂସନଧମ୍ମୋ, ଇଦଞ୍ଚ ପନ ମେ ୱିଞ୍ଞାଣଂ ଏତ୍ଥ ସିତଂ ଏତ୍ଥ ପଟିବନ୍ଧନ୍ତି…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସୁଞ୍ଞାରଂଗା ପୱିଟ୍ଠସ୍ସ, ସନ୍ତଚିତ୍ତସ୍ସ ଭିକ୍ଖୁନୋ । ଅମାନୁସୀ ରତୀ ହୋତି, ସମ୍ମାଧମ୍ମଂ ୱିପସ୍ସତୋ ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନସଙ୍ଖାତେ ଧମ୍ମୱିନୟେ ସଦ୍ଧାପବ୍ବଜିତୋ ଏୱଂ ଞାଣଦସ୍ସନଂ ଉପ୍ପାଦେତ୍ୱା ଏୱଂ ଞାଣଦସ୍ସନେନ ସମନ୍ନାଗତୋ ହୁତ୍ୱା ୱିହରେୟ୍ୟ ।
ପୁଚ୍ଛା – କଥଞ୍ଚାୱୁସୋ ଭଗୱା ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନଞ୍ଜପ୍ପତ୍ତେ ମନୋମୟଂ କାୟଂ ଅଭିନିମ୍ମାନାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଇମମ୍ହା କାୟା ଅଞ୍ଞଂ କାୟଂ ଅଭିନିମ୍ମିନାତି ରୂପିଂ ମନୋମୟଂ ସବ୍ବଙ୍ଗପଚ୍ଚଙ୍ଗିଂ ଅହୀନିନ୍ଦ୍ରିୟଂ ଏୱମାଦିନା ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଭିକ୍ଖୁ ଏୱଂ ସ୍ୱାଖାତେ ବୁଦ୍ଧସାସନସଙ୍ଖାତେ ଧମ୍ମୱିନୟେ ସଦ୍ଧାପବ୍ବଜିତୋ ଏୱଂ ୱିସେସେନ ମନୋମୟଞାଣେନ ସମନ୍ନାଗତୋ ୱିହରେୟ୍ୟ ।
ପୁଚ୍ଛା – ଭଗୱା ଆୱୁସୋ ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଝାନଚତୁକ୍କସଙ୍ଖାତଞ୍ଚ ପଠମ ଦୁତିୟ ୱିଜ୍ଜାସଙ୍ଖାତଞ୍ଚ ସନ୍ଦିଟ୍ଠିକଂ ସାମଞ୍ଞଫଲଂ ଦସ୍ସେତ୍ୱା, ଅପରଂ କୀଦିସଂ ସଂନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନଞ୍ଜପ୍ପତ୍ତେ ଇଦ୍ଧିୱିଧାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଅନେକୱିହିତଂ ଇଦ୍ଧିୱିଧଂ ପଚ୍ଚନୁଭୋତି, ଏକୋପି ହୁତ୍ୱା ବହୁଧା ହୋତି, ବହୁଧାପି ହୁତ୍ୱା ଏକୋ ହୋତି…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚାତି । ଇତ୍ଥଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ଅଚ୍ଛରିୟଂ ଆୱୁସୋ ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା, ୟତ୍ରହି ନାମ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତ୍ୱା ସାୱକୋପି ସମ୍ମାପଟିପନ୍ନୋ ଏୱଂ ମହିଦ୍ଧିକଂ ଏୱଂ ମହାନୁଭାୱଂ ଇଦ୍ଧିୱିଧଞାଣମ୍ପି ପଚ୍ଚନୁଭୋସ୍ସତି ।
ପୁଚ୍ଛା – କଥଂ ପନାୱୁସୋ ଭଗୱା ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନଞ୍ଜପ୍ପତ୍ତେ ଦିବ୍ବାୟ ସୋତଧାତୁୟା ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଦିବ୍ବାୟ ସୋତଧାତୁୟା ୱିସୁଦ୍ଧାୟ ଅତିକ୍କନ୍ତ ମାନୁସିକାୟ ଉଭୋ ସଦ୍ଦେ ସୁଣାତି ଦିବ୍ବେ ଚ ମାନୁସେ ଚ ୟେ ଦୂରେ ସନ୍ତିକେ ଚ…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ଅଚ୍ଛରିୟଂ ଆୱୁସୋ, ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା, ୟତ୍ରହି ନାମ ଏୱଂ ସ୍ୱାଖାତେ ବୁଦ୍ଧସାସନେ ସଦ୍ଧାପବ୍ବଜିତୋ ସମ୍ମାପଟିପନ୍ନୋ ସାୱକୋପି ଏୱଂ ୱିସେସଂ ଦିବ୍ବସୋତଞାଣଂ ପଟିଲଭିସ୍ସତି ।
ପୁଚ୍ଛା – କଥଂ ପନାୱୁସୋ ଭଗୱା ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ । ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ
ଆନଞ୍ଜପ୍ପତ୍ତେ ଚେତୋପରିୟଞାଣାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ପରସତ୍ତାନଂ ପରପୁଗ୍ଗଲାନଂ ଚେତସା ଚେତୋ ପରିଚ୍ଚ ପଜାନାତି, ସରାଗଂ ୱା ଚିତ୍ତଂ ସରାଗଂ ଚିତ୍ତନ୍ତି ପଜାନାତି, ୱୀତରାଗଂ ୱା ଚିତ୍ତଂ ୱୀତରାଗଂ ଚିତ୍ତନ୍ତି ପଜାନାତି…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ଅଚ୍ଛରିୟଂ ଆୱୁସୋ, ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା, ୟତ୍ରହି ନାମ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତୋ ସମ୍ମାପଟିପନ୍ନୋ ସାୱକୋପି ଏୱଂ ୱିସେସଂ ଚେତୋପରିୟଞାଣଂ ପଟିଲଭିସ୍ସତି ।
ପୁଚ୍ଛା – କଥଂ ପନାୱୁସୋ ଭଗୱା ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନଞ୍ଜପ୍ପତ୍ତେ ପୁବ୍ବେନିୱାସାନୁସ୍ସତିଞାଣାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଅନେକୱିହିତଂ ପୁବ୍ବେନିୱାସଂ ଅନୁସ୍ସରତି, ସେୟ୍ୟଥିଦଂ, ଏକମ୍ପିଜାତିଂ ଦ୍ୱେପି ଜାତିୟୋ…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଏୱଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ଅଚ୍ଛରିୟଂ ଆୱୁସୋ, ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା, ୟତ୍ରହି ନାମ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତ୍ୱା ସାୱକୋପି ସମ୍ମାପଟିପନ୍ନୋ ଏୱଂ ୱିସେସଂ ପୁବ୍ବେନିୱାସଞାଣଂ ପଟିଲଭିସ୍ସତି ।
ପୁଚ୍ଛା – କଥଞ୍ଚ ପନାୱୁସୋ ଭଗୱା ସନ୍ଦିଟ୍ଠିକଂ ସାମଞ୍ଞଫଲଂ ଦେସେସି, ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନେଞ୍ଜପ୍ପତ୍ତେ ସତ୍ତାନଂ ଚୁତୂପପାତଞାଣାୟ ଚିତ୍ତଂ ଅଭିନୀହରତି ଅଭିନିନ୍ନାମେତି, ସୋ ଦିବ୍ବେନ ଚକ୍ଖୁନା ୱିସୁଦ୍ଧେନ ଅତିକ୍କନ୍ତମାନୁସକେନ ସତ୍ତେ ପସ୍ସତି ଚୱମାନେ ଉପପଜ୍ଜମାନେ ହୀନେ ପଣୀତେ ସୁୱଣ୍ଣେ ଦୁବ୍ବଣ୍ଣେ ସୁଗତେ ଦୁଗ୍ଗତେ ୟଥାକମ୍ମୁପଗେ ସତ୍ତେ ପଜାନାତି…ପେ॰… ଇଦମ୍ପି ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଇତ୍ଥଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ଅପରମ୍ପି ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ଅଚ୍ଛରିୟଂ ଆୱୁସୋ, ଅବ୍ଭୁତଂ ଆୱୁସୋ, ୟାୱ ବୁଦ୍ଧସାସନସ୍ସ ସ୍ୱାଖାତତା, ୟତ୍ରହି ନାମ ଏୱଂ ସ୍ୱାଖାତେ ବୁଦ୍ଧସାସନେ ପବ୍ବଜିତୋ ସାୱକୋପି ସମ୍ମାପଟିପନ୍ନୋ ଏୱଂ ୱିସେସଂ ଦିବ୍ବଚକ୍ଖୁଞାଣଂ ପଟିଲଭିସ୍ସତି ।
ପୁଚ୍ଛା – କଥଂ ପନାୱୁସୋ ଭଗୱା ପରିୟୋସାନେ ଉତ୍ତରିତରଂ ସାମଞ୍ଞଫଲଂ ଦେସେସି ।
ୱିସ୍ସଜ୍ଜନା – ସୋ ଏୱଂ ସମାହିତେ ଚିତ୍ତେ ପରିସୁଦ୍ଧେ ପରିୟୋଦାତେ ଅନଙ୍ଗଣେ ୱିଗତୂପକ୍କିଲେସେ ମୁଦୁଭୂତେ କମ୍ମନିୟେ ଠିତେ ଆନେଞ୍ଜପ୍ପତ୍ତେ ଆସୱାନଂ ଖୟଞାଣାୟ ଚିତ୍ତଂ ଅଭିନୀହରତି ଅଭିନିନ୍ନାମେତି…ପେ॰… ଇଦଂ ଖୋ ମହାରାଜ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ । ଇମସ୍ମା ଚ ପନ ମହାରାଜ ସନ୍ଦିଟ୍ଠିକା ସାମଞ୍ଞଫଲା ଅଞ୍ଞଂ ସନ୍ଦିଟ୍ଠିକଂ ସାମଞ୍ଞଫଲଂ ଉତ୍ତରିତରଂ ୱା ପଣୀତତରଂ ୱା ନତ୍ଥୀତି । ଇତ୍ଥଂ ଖୋ ଭନ୍ତେ ଭଗୱା ରଞ୍ଞୋ ମାଗଧସ୍ସ ଅଜାତସତ୍ତୁସ୍ସ ୱେଦେହିପୁତ୍ତସ୍ସ ପରିୟୋସାନଂ ସନ୍ଦିଟ୍ଠିକଂ ସାମଞ୍ଞଫଲଂ ପୁରିମେହି ସନ୍ଦିଟ୍ଠିକେହି ସାମଞ୍ଞଫଲେହି ଅଭିକ୍କନ୍ତତରଞ୍ଚ ପଣୀତତରଞ୍ଚ ଦେସେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ, ୟଂ ଭିକ୍ଖୁ ବୁଦ୍ଧସାସନେ ସଦ୍ଧାପବ୍ବଜିତୋ ଏୱଂ ସ୍ୱାଖାତେ ଧମ୍ମୱିନୟେ ସମ୍ମାପଟିପନ୍ନୋ ଆସୱକ୍ଖୟଞାଣଂ ପାପୁଣିତ୍ୱା ଦୁକ୍ଖସ୍ସନ୍ତଂ କରୋତି ।
ପୁଚ୍ଛା – କଥଂ ପନାୱୁସୋ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ଇମିସ୍ସା ଦେସନାୟ ପରିୟୋସାନେ ଭଗୱତି ଚ ଦେସନାୟଞ୍ଚ ପସନ୍ନୋ ପସନ୍ନାକାରଂ ଅକାସି, କୀଦିସଞ୍ଚ ଆନିସଂସଂ ପଟିଲଭି ।
ୱିସ୍ସଜ୍ଜନା – ଏୱଂ ୱୁତ୍ତେ ଭନ୍ତେ ମାଗଧୋ ଅଜାତସତ୍ତୁ ୱେଦେହିପୁତ୍ତୋ ଭଗୱନ୍ତଂ ଏତଦୱୋଚ, ଅଭିକ୍କନ୍ତଂ ଭନ୍ତେ, ଅଭିକ୍କନ୍ତଂ ଭନ୍ତେ, ସେୟ୍ୟଥାପି ଭନ୍ତେ ନିକ୍କୁଜ୍ଜିତଂ ୱା ଉକ୍କୁଜ୍ଜେୟ୍ୟ, ପଟିଚ୍ଛନ୍ନଂ ୱା ୱିୱରେୟ୍ୟ…ପେ॰… ଅଜ୍ଜତଗ୍ଗେ ପାଣ୍ଣୁପେତଂ ସରଣଂ ଗତନ୍ତି, ଅୟଞ୍ହି ଭନ୍ତେ ରାଜା ପିତୁମାରିତକାଲତୋ ପଟ୍ଠାୟ ନେୱ ରତ୍ତିଂ ନ ଦିୱା ନିଦ୍ଦଂ ପଟିଲଭତି, ସତ୍ଥାରଂ ପନ ଉପସଙ୍କମିତ୍ୱା ଇମାୟ ମଧୁରାୟ ଓଜୱନ୍ତିୟା ଧମ୍ମଦେସନାୟ ସୁତକାଲତୋ ପଟ୍ଠାୟ ନିଦ୍ଦଂ ପଟିଲଭତି, ତିଣ୍ଣଂ ରତନାନଂ ମହାସକ୍କାରମକାସି, ପୁଥୁଜ୍ଜନିକାୟ ସଦ୍ଧାୟ ସମନ୍ନାଗତୋ ନାମ ଇମିନା ରଞ୍ଞା ସଦିସୋ ନାହୋସି, ଅନାଗତେ ପନ ୱିଜିତାୱୀ ନାମ ପଚ୍ଚେକବୁଦ୍ଧୋ ହୁତ୍ୱା ପରିନିବ୍ବାୟିସ୍ସତି । ଏୱଂ ଖୋ ଭନ୍ତେ ରାଜା ମାଗଧୋ ଅଜାତସତ୍ତୁ ୱେଦେହିପୁତ୍ତୋ ଦେସନାପରିୟୋସାନେ ପସନ୍ନୋ ପସନ୍ନାକାରମକାସି, ଇଦିସଞ୍ଚ ଭନ୍ତେ ମହାନିସଂସଂ ପଟିଲଭି ।
ଅମ୍ବଟ୍ଠସୁତ୍ତ
ପୁଚ୍ଛା – ତେନାୱୁସୋ ଭଗୱା ଜାନତା ଅରହତା ପସ୍ସତା ସମ୍ମାସମ୍ବୁଦ୍ଧେନ ଅମ୍ବଟ୍ଠଂ ଟାମ ସୁତ୍ତଂ କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – କୋସଲେସୁ ଭନ୍ତେ ଜନପଦେ ଇଚ୍ଛାନଙ୍ଗଲେ ନାମ କୋସଲାନଂ ବ୍ରାହ୍ମଣଗାମେ ଅମ୍ବଟ୍ଠଂ ନାମ ମାଣୱଂ ବ୍ରାହ୍ମଣସ୍ସ ପୋକ୍ଖରସାତିସ୍ସ ଅନ୍ତେୱାସିଂ ଆରବ୍ଭ ଭାସିତଂ ।
ସୋଣଦଣ୍ଡସୁତ୍ତ
ପୁଚ୍ଛା – ସୋଣଦଣ୍ଡଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ଅଙ୍ଗେସୁ ଭନ୍ତେ ଜନପଦେ ଚମ୍ପାୟଂ ସୋଣଦଣ୍ଡଂ ବ୍ରାହ୍ମଣଂ ଆରବ୍ଭ ଭାସିତଂ ।
କୂଟଦନ୍ତସୁତ୍ତ
ପୁଚ୍ଛା – କୂଟଦନ୍ତଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ମଗଧେସୁ ଭନ୍ତେ ଖାଣୁମତେ ନାମ ବ୍ରାହ୍ମଣଗାମେ କୂଟଦନ୍ତ ବ୍ରାହ୍ମଣଂ ଆରବ୍ଭ ଭାସିତଂ ।
ମହାଲିସୁତ୍ତ
ପୁଚ୍ଛା – ମହାଲିଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ୱେସାଲିୟଂ ଭନ୍ତେ ଓଟ୍ଠଦ୍ଧଂ ନାମ ଲିଚ୍ଛୱିଂ ଆରବ୍ଭ ଭାସିତଂ ।
ଜାଲିୟସୁତ୍ତ
ପୁଚ୍ଛା – ଜାଲିୟଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – କୋସମ୍ବିୟଂ ଭନ୍ତେ ଦ୍ୱେ ପବ୍ବଜିତେ ଆରବ୍ଭ ଭାସିତଂ ।
ମହାସୀହନାଦସୁତ୍ତ
ପୁଚ୍ଛା – ମହାସୀହନାଦଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ଉରୁଞ୍ଞାୟଂ ଭନ୍ତେ କଣ୍ଣକଥଲେ ଅଚେଲଂ କସ୍ସପଂ ଆରବ୍ଭ ଭାସିତଂ ।
ପୋଟ୍ଠପାଦସୁତ୍ତ
ପୁଚ୍ଛା – ପୋଟ୍ଠପାଦଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ସାୱତ୍ଥିୟଂ ଭନ୍ତେ ପୋଟ୍ଠପାଦଞ୍ଚ ପରିବ୍ବାଜକଂ ଚିତ୍ତଞ୍ଚ ହତ୍ଥିସାରିପୁତ୍ତଂ ଆରବ୍ଭ ଭାସିତଂ ।
ସୁଭସୁତ୍ତ
ପୁଚ୍ଛା – ସୁଭସୁତ୍ତଂ ପନାୱୁସୋ କତ୍ଥ କଂ ଆରବ୍ଭ କେନ ଭାସିତଂ ।
ୱିସ୍ସଜ୍ଜନା – ସାୱତ୍ଥିୟଂ ଭନ୍ତେ ଆୟସ୍ମତା ଆନନ୍ଦେନ ଧମ୍ମଭଣ୍ଡାଗାରିକେନ ସୁଭଂ ମାଣୱଂ ତୋଦେୟ୍ୟପୁତ୍ତଂ ଆରବ୍ଭ ଭାସିତଂ ।
କେୱଟ୍ଟସୁତ୍ତ
ପୁଚ୍ଛା – କେୱଟ୍ଟଂ ପନାୱୁସୋ ସୁତ୍ତଂ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – ନାଳନ୍ଦା ୟଂ ଭନ୍ତେ କେୱଟ୍ଟଂ ଗହପତିପୁତ୍ତଂ ଆରବ୍ଭ ଭାସିତଂ ।
ଲୋହିଚ୍ଚସୁତ୍ତ
ପୁଚ୍ଛା – ଲୋହିଚ୍ଚସୁତ୍ତ ପନାୱୁସୋ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – କୋସଲେସୁ ଭନ୍ତେ ଜନପଦେ ସାଲୱତିକାୟଂ ଲୋହିଚ୍ଚଂ ବ୍ରାହ୍ମଣଂ ଆରବ୍ଭ ଭାସିତଂ ।
ତେୱିଜ୍ଜସୁତ୍ତ
ପୁଚ୍ଛା – ତେୱିଜ୍ଜସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ ଭାସିତଂ ।
ୱିସ୍ସଜ୍ଜନା – କୋସଲେସୁ ଭନ୍ତେ ମନସାକଟେ ନାମ କୋସଲାନଂ ବ୍ରାହ୍ମଣଗାମେ ୱାସେଟ୍ଠଂ ଭାରଦ୍ୱାଜଂ ମାଣୱଂ ଆରବ୍ଭ ଭାସିତଂ ।
ମହାପଦାନସୁତ୍ତ
ପୁଚ୍ଛା – ତେନ ଆୱୁସୋ ଭଗୱତା ଜାନତା ପସ୍ସତା ଅରହତା ସମ୍ମାସମ୍ବୁଦ୍ଧେନ ମହାପଦାନସୁତ୍ତଂ ଦୀଘନିକାୟେ ମହାୱଗ୍ଗେ ପୋରାଣକେହି ସଙ୍ଗିତିକାରେହି ପଠମଂ ସଙ୍ଗିତଂ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ସାୱତ୍ଥିୟଂ ଭନ୍ତେ ସମ୍ବହୁଲେ ଭିକ୍ଖୂ ଆରବ୍ଭ ଭାସିତଂ, ସମ୍ବହୁଲାନଂ ଭନ୍ତେ ଭିକ୍ଖୂନଂ ପଚ୍ଛାଭତ୍ତଂ ପିଣ୍ଡପାତପଟିକ୍କନ୍ତାନଂ ମଣ୍ଡଲମାଳେ ସନ୍ନିସିନ୍ନାନଂ ସନ୍ନିପତିତାନଂ ପୁବ୍ବେନିୱାସପଟିସଂୟୁତ୍ତା ଧମ୍ମୀକଥା ଉଦପାଦି, ଇତିପି ପୁବ୍ବେନିୱାସୋ ଇତିପି ପୁବ୍ବେନିୱାସୋତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ମହାନିଦାନସୁତ୍ତ
ପୁଚ୍ଛା – ମହାନିଦାନସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – କୁରୂସୁ ଭନ୍ତେ କମ୍ମାସଧମ୍ମେ ନାମ କୁରୂନଂ ନିଗମେ ଆୟସ୍ମନ୍ତଂ ଆନନ୍ଦଂ ଆରବ୍ଭ ଭାସିତଂ, ଆୟସ୍ମା ଭନ୍ତେ ଆନନ୍ଦୋ ଭଗୱନ୍ତଂ ଉପସଙ୍କମିତ୍ୱା ଏତଦୱୋଚ ‘‘ଅଚ୍ଛରିୟଂ ଭନ୍ତେ, ଅବ୍ଭୁତଂ ଭନ୍ତେ, ୟାୱ ଗମ୍ଭୀରୋଚାୟଂ ଭନ୍ତେ ପଟିଚ୍ଚସମୁପ୍ପାଦୋ
ଗମ୍ଭୀରାୱଭାସୋ ଚ, ଅଥ ଚ ପନ ମେ ଉତ୍ତାନକୁତ୍ତାନକୋ ୱିୟ ଖାୟତୀ’’ତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ମହାପରିନିବ୍ବାନସୁତ୍ତ
ପୁଚ୍ଛା – ମହାପରିନିବ୍ବାନସୁତ୍ତଂ ପନାୱୁସୋ ବହୁଅନୁସନ୍ଧିକଂ, ବହୁଦେସନା ସଙ୍ଗହଂ, ବୁଦ୍ଧସ୍ସ ଭଗୱତୋ ପରିନିବ୍ବାନାସନ୍ନୱସ୍ସେ ପୱତ୍ତଅଟ୍ଠୁପ୍ପତ୍ତିଦୀପକୱଚନପବନ୍ଧଭୂତଂ, ତସ୍ମା ତଂ ଅନ୍ତରାଭେଦୱସେନ ୱିଭଜ୍ଜ ପରିଚ୍ଛିଜ୍ଜ ପରିଚ୍ଛିଜ୍ଜ ପୁଚ୍ଛିସ୍ସାମି, ତତ୍ଥାୱୁସୋ ଭଗୱତା ପଠମଂ
ରାଜୂନଂ ଅପରିହାନିୟଧମ୍ମଦେସନା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତା ।
ୱିସ୍ସଜ୍ଜନା – ରାଜଗହେ ଭନ୍ତେ ୱସ୍ସକାରଂ ବ୍ରାହ୍ମଣଂ ମଗଧମହାମତ୍ତଂ ଆରବ୍ଭ ଭାସିତା, ୱସ୍ସକାରୋ ଭନ୍ତେ ବ୍ରାହ୍ମଣୋ ମଗଧମହାମତ୍ତୋ ଭଗୱନ୍ତଂ ଉପସଙ୍କମିତ୍ୱା ଏତଦୱୋଚ ‘‘ରାଜା ଭୋ ଗୋତମ ମାଗଧୋ ଅଜାତସତ୍ତୁ ୱେଦେହିପୁତ୍ତୋ ୱଜ୍ଜୀ ଅଭିୟାତୁକାମୋ ସୋ ଏୱମାହ ଅହଂ ହିମେ ୱଜ୍ଜୀ ଏୱଂ ମହିଦ୍ଧିକେ ଏୱଂ ମହାନୁଭାୱେ ଉଚ୍ଛେଚ୍ଛାମି ୱଜ୍ଜୀ ୱିନାସେସ୍ସାମି ୱଜ୍ଜୀ ଅନୟବ୍ୟସନଂ ଆପାଦେସ୍ସାମୀ ୱଜ୍ଜୀ’’ତି ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତା ।
ପୁଚ୍ଛା – ଭିକ୍ଖୂନଂ ପନାୱୁସୋ ଅପରିହାନିୟଧମ୍ମଦେସନା ଭଗୱତା କତ୍ଥ କିସ୍ମିଂ ୱତ୍ଥୁସ୍ମିଂ ଭାସିତା ।
ୱିସ୍ସଜ୍ଜନା – ତସ୍ମିଂୟେୱ ଭନ୍ତେ ରାଜଗହେ ତସ୍ମିଂୟେୱ ୱତ୍ଥୁସ୍ମିଂ ଭାସିତା ।
ଜରାସୁତ୍ତ
ପୁଚ୍ଛା – ଧମ୍ମାଦାସୋ ଆୱୁସୋ ଧମ୍ମପରିୟାୟୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତୋ ।
ୱିସ୍ସଜ୍ଜନା – ନାତିକେ ଭନ୍ତେ ଗିଞ୍ଜକାୱସଥେ ଆୟସ୍ମନ୍ତଂ ଆନନ୍ଦ ଆରବ୍ଭ ଭାସିତୋ, ଆୟସ୍ମା ଭନ୍ତେ ଆନନ୍ଦୋ ଭଗୱନ୍ତଂ ଉପସଙ୍କମିତ୍ୱା ନାତିକିୟାନଂ ଦ୍ୱାଦସନ୍ନଂ ପୁଗ୍ଗଲାନଂ ଗତିଅଭିସମ୍ପରାୟଂ ପୁଚ୍ଛି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତୋ ।
ଅତ୍ତଦୀପ ଧମ୍ମଦେସନା
ପୁଚ୍ଛା – ଅତ୍ତଦୀପଧମ୍ମଦେସନା ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତା ।
ୱିସ୍ସଜ୍ଜନା – ୱେସାଲିୟଂ ଭନ୍ତେ ୱେଳୁୱଗାମକେ ଆୟସ୍ମନ୍ତଂ ଆନନ୍ଦଂ ଆରବ୍ଭ ଭାସିତା, ଆୟସ୍ମା ଭନ୍ତେ ଆନନ୍ଦୋ ଭଗୱତୋ ଗିଲାନୱୁଟ୍ଠିତସ୍ସ ଅଚିରୱୁଟ୍ଠିତସ୍ସ ଗେଲଞ୍ଞା ଭଗୱତୋ ଗେଲଞ୍ଞେନ ଅତ୍ତନୋ ଖେଦପତ୍ତକାରଣଂ ଆରୋଚେସି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତା ।
‘‘ତସ୍ମାତିହାନନ୍ଦ ଅତ୍ତଦୀପା ୱିହରଥ ଅତ୍ତସରଣା ଅନଞ୍ଞସରଣା’’ ।
ପୁଚ୍ଛା – ଭଗୱତା ଆୱୁସୋ ପୁରିମ ଦୁତିୟଦିୱସେ ପୁଚ୍ଛିତୱିସ୍ସଜ୍ଜିତକ୍କମେନ ଅତ୍ତଦୀପଧମ୍ମଦେସନଞ୍ଚ ଅଞ୍ଞାନି ଚ ଧମ୍ମଦେସନାନି କଥେତ୍ୱା ପରିନିଟ୍ଠିତ ସବ୍ବବୁଦ୍ଧକିଚ୍ଚେନ ଆୟୁସଙ୍ଖାରୋ କତ୍ଥ ଓସ୍ସଟ୍ଠୋ ।
ୱିସ୍ସଜ୍ଜନା – ୱେସାଲିୟଂ ଭନ୍ତେ ଚାପାଲେ ଚେତିୟେ ମାରେନ ପାପିମତା ୟାଚିତୋ ଭଗୱା ସତେନ ସମ୍ପଜାନେନ ଆୟୁସଙ୍ଖାରୋ ଓସ୍ସଟ୍ଠୋ ।
‘‘ପରିନିବ୍ବାତୁ ଦାନି ଭନ୍ତେ ଭଗୱା, ପରିନିବ୍ବାତୁ ସୁଗତୋ, ପରିନିବ୍ବାନ କାଲୋ ଦାନି ଭନ୍ତେ ଭଗୱତୋ ।
ଅପ୍ପୋସୁକ୍କୋ ତ୍ୱଂ ପାପିମ ହୋତି, ନ ଚିରଂ ତଥାଗତସ୍ସ ପରିନିବ୍ବାନଂ ଭୱିସ୍ସତି, ଇତୋ ତିଣ୍ଣଂ ମାସାନଂ ଅଚ୍ଚୟେନ ତଥାଗତୋ ପରିନିବ୍ବାୟିସ୍ସତି ।
ଚତୁମହାପଦେସ
ପୁଚ୍ଛା – ଚତୁମହାପଦେସଧମ୍ମଦେସନା ପନାୱୁସୋ ଭଗୱତା କତ୍ଥ ଭାସିତା ।
ୱିସ୍ସଜ୍ଜନା – ଭୋଗନଗରେ ଭନ୍ତେ ଆନନ୍ଦେ ଚେତିୟେ ଭାସିତା ।
ପରିପକ୍କୋ ୱୟୋ ମୟ୍ହଂ, ପରିତ୍ତଂ ମମ ଜୀୱିତଂ । ପହାୟ ୱୋ ଗମିସ୍ସାମି, କତଂ ମେ ସରଣମତ୍ତନୋ ।
ସଂୱେଗ
ପୁଚ୍ଛା – ଚତୁସଂୱେଜନୀୟକଥା ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତା ।
ୱିସ୍ସଜ୍ଜନା – କୁସିନାରାୟଂ ଭନ୍ତେ ଆୟସ୍ମନ୍ତଂ ଆନନ୍ଦଂ ଆରବ୍ଭ ଭାସିତା, ଆୟସ୍ମା ଭନ୍ତେ ଆନନ୍ଦୋ ଭଗୱନ୍ତଂ ଏତଦୱୋଚ ‘‘ପୁବ୍ବେ ଭନ୍ତେ ଦିସାସୁ ୱସ୍ସଂୱୁଟ୍ଠା ଭିକ୍ଖୂ ଆଗଚ୍ଛନ୍ତି ତଥାଗତଂ ଦସ୍ସନାୟ, ତେ ମୟଂ ଲଭାମ ମନୋଭାୱନୀୟେ ଭିକ୍ଖୂ ଦସ୍ସନାୟ, ଲଭାମ ପୟିରୁପାସନାୟ । ଭଗୱତୋ ପନ ମୟଂ ଭନ୍ତେ ଅଚ୍ଚୟେନ ନ ଲଭିସ୍ସାମ ମନୋଭାୱନୀୟେ ଭିକ୍ଖୂ ଦସ୍ସନାୟ, ନ ଲଭିସ୍ସାମ ପୟିରୁପାସନାୟା’’ତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତା ।
ୟେହି କେଚି ଆନନ୍ଦ ଚେତିୟଚାରିକଂ ଆହିଣ୍ଡନ୍ତା ପସନ୍ନଚିତ୍ତା କାଲଂ କରିସ୍ସନ୍ତି, ସବ୍ବେତେ କାୟସ୍ସ ଭେଦା ପରଂ ମରଣା ସୁଗତିଂ ସଗ୍ଗଂ ଲୋକଂ ଉପପଜ୍ଜିସ୍ସନ୍ତି ହୁ –
ପୁଚ୍ଛା – କଥଞ୍ଚାୱୁସୋ ଭଗୱା ଭିକ୍ଖୂନଂ ମାତୁଗାମେସୁ ପଟିପଜ୍ଜିତବ୍ବୱତ୍ତଂ କଥେସି ।
ୱିସ୍ସଜ୍ଜନା – ଅଦସ୍ସନଂ ଆନନ୍ଦାତି ଚ ଅନାଲାପୋ ଆନନ୍ଦାତି ଚ ସତି ଆନନ୍ଦ ଉପଟ୍ଠବ୍ବେତବ୍ବାତି ଚ ଏୱଂ ଖୋ ଭନ୍ତେ ଭଗୱା ମାତୁଗାମେସୁ ପଟିପଜ୍ଜିତବ୍ବାକାରଂ କଥେସି ।
ମହାସୁଦସ୍ସନସୁତ୍ତ
ପୁଚ୍ଛା – ମହାସୁଦସ୍ସନସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ତିସ୍ସଂୟେୱ ଭନ୍ତେ କୁସିନାରାୟଂ ଆୟସ୍ମନ୍ତଂ ଆନନ୍ଦଂ ଆରବ୍ଭ ଭାସିତଂ, ଆୟସ୍ମା ଭନ୍ତେ ଆନନ୍ଦୋ ଭଗୱନ୍ତଂ ଏତଦୱୋଚ ‘‘ମା ଭନ୍ତେ ଭଗୱା ଇମସ୍ମିଂ ଖୁଦ୍ଦକନଗରକେ
ଉଜ୍ଜଙ୍ଗଲନଗରକେ ସାଖାନଗରକେ ପରିନିବ୍ବାୟି । ସନ୍ତି ଭନ୍ତେ ଅଞ୍ଞାନି ମହାନଗରାନି । ସେୟ୍ୟଥିଦଂ, ଚମ୍ପା, ରାଜଗହଂ, ସାୱତ୍ଥୀ, ସାକେତଂ, କୋସମ୍ବୀ, ବାରାଣସୀ, ଏତ୍ଥ ଭଗୱା ପରିନିବ୍ବାୟତୁ, ଏତ୍ଥ ବହୂ ଖତ୍ତିୟମହାସାଲା ବ୍ରାହ୍ମଣ ମହାସାଲା ଗହପତି ମହାସାଲା ତଥାଗତେ ଅଭିପ୍ପସନ୍ନା । ତେ ତଥାଗତସ୍ସ ସରୀରପୂଜଂ କରିସ୍ସନ୍ତୀ’’ତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ପୁଚ୍ଛା – ଭଗୱା ଆୱୁସୋ ପୁରିମଦିୱସେ ପୁଚ୍ଛିତ ୱିସ୍ସଜ୍ଜିତକ୍କମେନ ମହାସୁଦସ୍ସନ ସୁତ୍ତନ୍ତଂ ଦେସେତ୍ୱା ସୁଭଦ୍ଦଂନାମ ପରିବ୍ବାଜକଂ ବୁଦ୍ଧୱେନେୟ୍ୟେସୁ ପଚ୍ଛିମସାୱକଭୂତଂ କଥଂ ୱିନେସି ।
ୱିସ୍ସଜ୍ଜନା – ୟସ୍ମିଂ ଖୋ ସୁଭଦ୍ଦ ଧମ୍ମୱିନୟେ ଅରିୟୋ ଅଟ୍ଠଙ୍ଗିକୋ ମଗ୍ଗୋ ନ ଉପଲବ୍ଭତି, ସମଣୋପି ତତ୍ଥ ନ ଉପଲବ୍ଭତି, ଦୁତିୟୋପି ତତ୍ଥ ସମଣୋ ନ ଉପଲବ୍ଭତି, ତତିୟୋପି ତତ୍ଥ ସମଣୋ ନ ଉପଲବ୍ଭତି, ଚତୁତ୍ଥୋପି ତତ୍ଥ ସମଣୋ ନ ଉପଲବ୍ଭତି (ପେୟ୍ୟାଲ) । ଇମେ ଚ ସୁଭଦ୍ଦ ଭିକ୍ଖୂ ସମ୍ମା ୱିହରେୟ୍ୟୁଂ, ଅସୁଞ୍ଞୋ ଲୋକୋ ଅରହନ୍ତେହି ଅସ୍ସ, ଏୱଂ ଖୋ ଭନ୍ତେ ଭଗୱା ସୁଭଦ୍ଦଂ ପରିବ୍ବାଜକଂ ବୁଦ୍ଧୱେନେୟ୍ୟେସୁ ପଚ୍ଛିମଂ ସକ୍ଖିସାୱକଂ ୱିନେସି ।
ପରିନିବ୍ବାନସୁତ୍ତ
ପୁଚ୍ଛା – ପଚ୍ଛିମେ ପନାୱୁସୋ କାଲେ ଭଗୱା ଆୟସ୍ମତୋ ଆନନ୍ଦସ୍ସ କୀଦିସଂ ୱଚନଂ କଥେତ୍ୱା, କଥଞ୍ଚ ଭିକ୍ଖୂ ପୱାରେତ୍ୱା, କୀଦିସଞ୍ଚ ଭିକ୍ଖୂନଂ ୱଚନଂ ଆମନ୍ତେତ୍ୱା, କଥଞ୍ଚ ଅନୁପାଦିସେସାୟ ନିବ୍ବାନଧାତୁୟା ପରିନିବ୍ବାୟି ।
ୱିସ୍ସଜ୍ଜନା – ଭଗୱା ଭନ୍ତେ ପଚ୍ଛିମେ କାଲେ ଆୟସ୍ମତୋ ଆନନ୍ଦସ୍ସ ସିୟା ଖୋ ପନାନନ୍ଦ ତୁମ୍ହାକଂ ଏୱମସ୍ସ ଅତୀତସତ୍ଥୁକଂ ପାୱଚନଂ ନତ୍ଥି ନୋ ସତ୍ଥାତି ଏୱମାଦିକଂ ୱଚନଂ କଥେତ୍ୱା, ସିୟା ଖୋ ପନ ଭିକ୍ଖୱେ ଏକଭିକ୍ଖୁସ୍ସାପି କଙ୍ଖା ୱା ୱିମତି ୱା ବୁଦ୍ଧେ ୱା ଧମ୍ମେ ୱା ସଙ୍ଘେ ୱା ମଗ୍ଗେ ୱା ପଟିପଦାୟ ୱାତି ଏୱମାଦିନା ଭିକ୍ଖୂ ପୱାରେତ୍ୱା, ହନ୍ଦଦାନି ଭିକ୍ଖୱେ ଆମନ୍ତୟାମି ୱୋ, ୱୟଧମ୍ମା ସଙ୍ଖାରା ଅପ୍ପମାଦେନ ସମ୍ପାଦେଥାତି ପଚ୍ଛିମଞ୍ଚ ଓୱାଦୱଚନଂ ଭିକ୍ଖୂନଂ ଆମନ୍ତେତ୍ୱା, ନୱ ଅନୁପୁବ୍ବସମାପତ୍ତିୟୋ ଅନୁଲୋମଂ ପଟିଲୋମଂ ସମାପଜ୍ଜିତ୍ୱା, ଚତୁତ୍ଥଜ୍ଝାନା ୱୁଟ୍ଠହିତ୍ୱା ସମନନ୍ତରା ଅନୁପାଦିସେସାୟ ନିବ୍ବାନଧାତୁୟା ପରିନିବ୍ବାୟି ।
ନାୱୁସୋ ଆନନ୍ଦ ଭଗୱା ପରିନିବ୍ବୁତୋ, ସଞ୍ଞାୱେଦୟିତ ନିରୋଧଂ ସମାପନ୍ନୋ ।
ଜନୱସଭସୁତ୍ତ
ପୁଚ୍ଛା – ମହାସୁଦସ୍ସନସୁତ୍ତଂ ପନାୱୁସୋ ପୁରିମଦିୱସେ ପୁଚ୍ଛିତଞ୍ଚ ୱିସ୍ସଜ୍ଜିତଞ୍ଚ, ଜନୱସଭସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ନାତିକେ ଭନ୍ତେ ଗିଞ୍ଜକାୱସଥେ ଆୟସ୍ମନ୍ତଂ ଆନନ୍ଦଂ ଆରବ୍ଭ ଭାସିତଂ, ଆୟସ୍ମା ଭନ୍ତେ ଆନନ୍ଦୋ ମାଗଧକେ ପରିଚାରକେ ଆରବ୍ଭ ଭଗୱତୋ ସମ୍ମୁଖା ପରିକଥଂ କଥେସି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ମହାଗୋୱିନ୍ଦସୁତ୍ତ
ପୁଚ୍ଛା – ମହାଗୋୱିନ୍ଦସୁତ୍ତଂ ପନାୱୁସୋ ଭଗୱତା କତ୍ଥ ଭାସିତଂ ।
ୱିସ୍ସଜ୍ଜନା – ରାଜଗହେ ଭନ୍ତେ ଭାସିତଂ ।
ମହାସମୟସୁତ୍ତ
ପୁଚ୍ଛା – ମହାସମୟସୁତ୍ତଂ ପନାୱୁସୋ ଭଗୱତା କତ୍ଥ ଭାସିତଂ ।
ୱିସ୍ସଜ୍ଜନା – ସକ୍କେସୁ ଭନ୍ତେ କପିଲୱତ୍ଥୁସ୍ମିଂ ଭାସିତଂ ।
ସକ୍କପଞ୍ହସୁତ୍ତ
ପୁଚ୍ଛା – ସକ୍କପଞ୍ହସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ମଗଧେସୁ ଭନ୍ତେ ପାଚୀନତୋ ରାଜଗହସ୍ସ ଅମ୍ବସଣ୍ଡା ନାମ ବ୍ରାହ୍ମଣଗାମୋ, ତସ୍ସୁତ୍ତରତୋ ୱେଦିୟକେ ପବ୍ବତେ ଇନ୍ଦସାଲଗୁହାୟଂ ସକ୍କଂ ଦେୱାନମିନ୍ଦଂ ଆରବ୍ଭ ଭାସିତଂ, ସକ୍କୋ ଭନ୍ତେ ଦେୱାନମିନ୍ଦୋ ଭଗୱନ୍ତଂ ଉପସଙ୍କମିତ୍ୱା ପଞ୍ହଂ ପୁଚ୍ଛି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ମହାସତିପଟ୍ଠାନସୁତ୍ତ
ପୁଚ୍ଛା – ମହାସତିପଟ୍ଠାନସୁତ୍ତଂ ପନାୱୁସୋ ଭଗୱତା କତ୍ଥ ଭାସିତଂ ।
ୱିସ୍ସଜ୍ଜନା – କୁରୂସୁ ଭନ୍ତେ କମ୍ମାସଧମ୍ମେ ନାମ କୁରୂନଂ ନିଗମେ ଭାସିତଂ ।
ପାୟାସିସୁତ୍ତ
ପୁଚ୍ଛା – ପାୟାସି ସୁତ୍ତଂ ପନାୱୁସୋ କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ କେନ ଭାସିତଂ ।
ୱିସ୍ସଜ୍ଜନା – କୋସଲେସୁ ଭନ୍ତେ ସେତବ୍ୟାନାମ କୋସଲାନଂ ନଗରଂ ଉତ୍ତରେନ ସେତବ୍ୟଂ ସିଂସପାୱନେ ଆୟସ୍ମତା କୁମାରକସ୍ସପେନ ପାୟାସିଂ ରାଜଞ୍ଞଂ ଆରବ୍ଭ ଭାସିତଂ, ପାୟାସିସ୍ସ ଭନ୍ତେ ରାଜଞ୍ଞସ୍ସ ଏୱରୂପଂ ପାପକଂ ଦିଟ୍ଠିଗତଂ ଉପ୍ପନ୍ନଂ ହୋତି, ଇତିପି ନତ୍ଥି ପରୋଲୋକୋ ନତ୍ଥି ସତ୍ତା ଓପପାତିକା ନତ୍ଥି ସୁକତଦୁକ୍କଟାନଂ କମ୍ମାନଂ ଫଲଂ ୱିପାକୋତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ପୁଚ୍ଛା – ତତ୍ଥାୱୁସୋ ପାୟାସିସ୍ସ ରାଜଞ୍ଞସ୍ସ ଦିଟ୍ଠିପକାସନାଚ ଆୟସ୍ମତୋ କୁମାରକସ୍ସପତ୍ଥେରସ୍ସ ଦିଟ୍ଠିୱିନିୱେଟ୍ଠନକଥା ଚ ଅନେକୱାରଂ ଆଗତା, ତତ୍ଥାୱୁସୋ ପଠମଂ ପାୟାସି ରାଜଞ୍ଞୋ ଅତ୍ତନୋ ଦିଟ୍ଠିଂ କଥଂ ପକାସେସି, କଥଞ୍ଚାୟସ୍ମା କୁମାରକସ୍ସପୋ ତଂ ମିଚ୍ଛାଦିଟ୍ଠିଂ ୱିନିୱେଠେସି ।
ୱିସ୍ସଜ୍ଜନା – ପାୟାସି ଭନ୍ତେ ରାଜଞ୍ଞୋ ଆୟସ୍ମନ୍ତଂ କୁମାରକସ୍ସପଂ ଉପସଙ୍କମିତ୍ୱା ଏତଦୱୋଚ ‘‘ଅହଞ୍ହି ଭୋ କସ୍ସପ ଏୱଂ ୱାଦୀ ଏୱଂ ଦିଟ୍ଠୀ ଇତିପି ନତ୍ଥି ପରୋଲୋକୋ, ନତ୍ଥି ସତ୍ତା ଓପପାତିକା, ନତ୍ଥି ସୁକତଦୁକ୍କଟାନଂ କମ୍ମାନଂ ଫଲଂ ୱିପାକୋ’’କି, ଏୱଂ ଖୋ ଭନ୍ତେ ପାୟାସିରାଜଞ୍ଞୋ ଅତ୍ତନୋ ମିଚ୍ଛାଦିଟ୍ଠିଂ ଆୟସ୍ମତୋ କୁମାରକସ୍ସପସ୍ସ ସନ୍ତିକେ ପକାସେସି । ଆୟସ୍ମା ଚ କୁମାରକସ୍ସପୋ ସକ୍ଖିକାରଣଂ ଚନ୍ଦିମସୂରିୟଉପମଂ ଦସ୍ସେତ୍ୱା ପାୟାସିସ୍ସ ରାଜଞ୍ଞସ୍ସ ତଂ ପାପକଂ ଦିଟ୍ଠିଗତଂ ୱିନିୱେଠେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ଆୟସ୍ମା କୁମାରକସ୍ସପୋ ପାୟାସିସ୍ସ ରାଜଞ୍ଞସ୍ସ ମିଚ୍ଛାଦିଟ୍ଠିକସ୍ସ ସଦ୍ଧମ୍ମୱିମୁଖିଭୂତସ୍ସ ପଚ୍ଚକ୍ଖତୋ ପରଲୋକଂ ଦସ୍ସେତ୍ୱା ତଂ ମିଚ୍ଛାଦିଟ୍ଠିଂ ୱିନିୱେଠେସି ।
ପୁଚ୍ଛା – ଅଥ ପନାୱୁସୋ ପାୟାସିରାଜଞ୍ଞୋ ଦୁତିୟମ୍ପି କୀଦିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ୱିସ୍ସଜ୍ଜନା – ଦୁତିୟେ ପନ ଭନ୍ତେ ପାୟାସିରାଜଞ୍ଞୋ ଅତ୍ତନୋ ମିତ୍ତାମଚ୍ଚେ ଞାତିସାଲୋହିତେ ଦୁଚ୍ଚରିତସମଙ୍ଗିନୋ କାଲଂକତେ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ମିଚ୍ଛାୱାଦଂ ପତିଟ୍ଠାପେସି, ଆୟସ୍ମା ଚ କୁମାରକସ୍ସପୋ ଚୋରଉପମାୟ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ଉପ୍ପନ୍ନଂ ପରପ୍ପୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ପୁଚ୍ଛା – ଅଥ ପନାୱୁସୋ ପାୟାସିରାଜଞ୍ଞୋ ତତିୟମ୍ପି କୀଦିସଂ ସାଧକ ପରିୟାୟଂ ଦସ୍ସେତ୍ୱା ଅତ୍ତନୋୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ୱିସ୍ସଜ୍ଜନା – ତତିୟମ୍ପନ ଭନ୍ତେ ପାୟାସିରାଜଞ୍ଞୋ ଅତ୍ତନୋ ମିତ୍ତାମଚ୍ଚେ ଞାତିସାଲୋହିତେ ସୁଚରିତସମଙ୍ଗିନୋ କାଲଂକତେ ଦସ୍ସେତ୍ୱା ଅତ୍ତନୋ ମିଚ୍ଛାୱାଦଂ ପତିଟ୍ଠାପେସି, ଆୟସ୍ମା ଚ କୁମାରକସ୍ସପୋ ଗୂଥକୂପେ ପତପୁରିସୋପମାୟ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହିତଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ଉପ୍ପନ୍ନଂ ପରପ୍ପୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ପୁଚ୍ଛା – ଆୟସ୍ମତା ଆୱୁସୋ କୁମାରକସ୍ସପେନ ପୁରିମଦିୱସେ ପୁଚ୍ଛିତୱିସ୍ସଜ୍ଜିତକ୍କମେନ ଗୂଥକୂପପୁରିସଉପମାୟ ମିଚ୍ଛାୱାଦଂ ପଟିକ୍ଖିପିତ୍ୱା ଧମ୍ମୱାଦେ ପତିଟ୍ଠାପିୟମାନେ ପିୟାସିରାଜଞ୍ଞୋ
ଚତୁତ୍ଥଂ ୱା ପଞ୍ଚମଂ ୱା କୀଦିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ସହଧମ୍ମେନ ତଂ ମିଚ୍ଛାୱାଦଂ ପଟିକ୍ଖିପିତ୍ୱା ଧମ୍ମୱାଦଂ ପତିଟ୍ଠାପେସି ।
ୱିସ୍ସଜ୍ଜନା – ପାୟାସି ଭନ୍ତେ ରାଜଞ୍ଞୋ ଆୟସ୍ମତା କୁମାରକସ୍ସପେନ ଗୂଥକୂପେ ନିମୁଗ୍ଗପୁରିସୋ ପମାୟ ମିଚ୍ଛାୱାଦଂ ସୁନିଗ୍ଗହିତଂ ନିଗ୍ଗହେତ୍ୱା ଧମ୍ମୱାଦେ ପତିଟ୍ଠାପିତେ ଚତୁତ୍ଥଂ ୱା ପଞ୍ଚମଂ ୱା ଅତ୍ତନୋ ମିତ୍ତାମଚ୍ଚେ ଞାତିସାଲୋହିତେ ସମାଦିନ୍ନ ପଞ୍ଚସୀଲେ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ମିଚ୍ଛାୱାଦଂ ପତିଟ୍ଠାପେସି । ଆୟସ୍ମା ଚ କୁମାରକସ୍ସପୋ ତାୱତିଂସଦେୱୋପମାୟ ଚ ଜଚ୍ଚନ୍ଧୋପମାୟ ଚାତି ଦ୍ୱୀହି ଉପମାହି ତଂ ପାପକଂ ଦିଟ୍ଠିଗତଂ ସହଧମ୍ମେନ ସୁନିଗ୍ଗହିତଂ ନିଗ୍ଗହେତ୍ୱା, ଧମ୍ମୱାଦଂ ପତିଟ୍ଠାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ କୁମାରକସ୍ସପୋ ପାୟାସିସ୍ସ ରାଜଞ୍ଞସ୍ସ ଦ୍ୱେ ଉପମାୟୋ ଦସ୍ସେତ୍ୱା ଉପ୍ପନ୍ନଂ ପାପକଂ ମିଚ୍ଛାୱାଦଂ ସହଧମ୍ମେନ ସନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ପୁଚ୍ଛା – ଅଥ ପନାୱୁସୋ ପାୟାସିରାଜଞ୍ଞୋ ଛଟ୍ଠଂପି କୀଦିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ସହଧମ୍ମେନ ତଂ ମିଚ୍ଛାୱାଦଂ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ୱିସ୍ସଜ୍ଜନା – ଛଟ୍ଠଂ ପନ ଭନ୍ତେ ପାୟାସିରାଜଞ୍ଞୋ ସୀଲୱନ୍ତେ ସମଣବ୍ରାହ୍ମଣେ କଲ୍ୟାଣଧମ୍ମେ ଜୀୱିତୁକାମେ ଅମରିତୁକାମେ
ସୁଖକାମେ ଦୁକ୍ଖପଟିକୂଲେ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, ଆୟସ୍ମାଚ କୁମାରକସ୍ସପୋ ଗବ୍ଭିନୀ ଉପମାୟ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହିତଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ଗବ୍ଭିନୀଉପମଂ ଦସ୍ସେତ୍ୱା ତଂ ମିଚ୍ଛାୱାଦଂ ପଟିକ୍ଖିପିତ୍ୱା ଧମ୍ମୱାଦଂ ପତିଟ୍ଠାପେସି ।
ପୁଚ୍ଛା – ଅଥ ପନାୱୁସୋ ପାୟାସିରାଜଞ୍ଞୋ ସତ୍ତମଂପି କୀଦିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ୱିସ୍ସଜ୍ଜନା – ସତ୍ତମଂ ପନ ଭନ୍ତେ ପାୟାସିରାଜଞ୍ଞୋ କୁବ୍ଭିୟଂ ପକ୍ଖିପିତ୍ୱା ମାରିତପୁରିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, ଆୟସ୍ମାଚ କୁମାରକସ୍ସପୋ ସୁପିନକୂପମାୟ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହିତଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ସୁପିନକୂପମଂ ଦସ୍ସେତ୍ୱା ଉପ୍ପନ୍ନଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ପୁଚ୍ଛା – ଅଥ ପନାୱୁସୋ ପାୟାସିରାଜଞ୍ଞୋ ଅଟ୍ଠମମ୍ପି ନୱମମ୍ପି କଥେତବ୍ବଂ କଥେତ୍ୱା ଦସମଂ କୀଦିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, କଥଞ୍ଚାୟସ୍ମା କୁମାରକସ୍ସପୋ ସହଧମ୍ମେନ ତଂ ମିଚ୍ଛାୱାଦଂ ପଟିନିସ୍ସଜ୍ଜାପେସି ।
ୱିସ୍ସଜ୍ଜନା – ଅଟ୍ଠମମ୍ପି ଭନ୍ତେ ନୱମମ୍ପି ପାୟାସିରାଜଞ୍ଞୋ ୟଂ ୱା ତଂ ୱା ପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, ଦସମଂ ପନ ଭନ୍ତେ ପାୟାସିରାଜଞ୍ଞୋ ଛୱିଆଦୀନି ଛିନ୍ଦିତ୍ୱା ମାରିତପୁରିସଂ ସାଧକପରିୟାୟଂ ଦସ୍ସେତ୍ୱା ଅତ୍ତନୋ ୱାଦଂ ପତିଟ୍ଠାପେସି, ଆୟସ୍ମା ଚ କୁମାରକସ୍ସପୋ ଅଗ୍ଗିକଜଟିଲୋପମାୟ ତଂ ମିଚ୍ଛାୱାଦଂ ସହଧମ୍ମେନ ସୁନିଗ୍ଗହିତଂ ନିଗ୍ଗହେତ୍ୱା ଧମ୍ମୱାଦଂ ପତିଟ୍ଠାପେସି ।
ପଟିନିସ୍ସଜ୍ଜେତଂ ରାଜଞ୍ଞ ପାପକଂ ଦିଟ୍ଠିଗତଂ । ପଟିନିସ୍ସଜ୍ଜେତଂ ରାଜଞ୍ଞ ପାପକଂ ଦିଟ୍ଠିଗତଂ ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ଓପାୟିକଂ ଉପମଂ ଦସ୍ସେତ୍ୱା ତଂ ପାପିକଂ ମିଚ୍ଛାଦିଟ୍ଠିଂ ପଟିନିସ୍ସଜ୍ଜାପେସି, ୟଂ ତସ୍ସ ଭୱେୟ୍ୟ ଦୀଘରତ୍ତଂ ହିତାୟ ସୁଖାୟ ।
ପୁଚ୍ଛା – ଆୟସ୍ମତା ଆୱୁସୋ କୁମାରକସ୍ସପେନ ପୁରିମଦିୱସେ ପୁଚ୍ଛିତୱିସ୍ସଜ୍ଜିତାକାରେନ ପାୟାସିସ୍ସ ରାଜଞ୍ଞସ୍ସ ଅଗ୍ଗିକଜଟିଲୋପମଂ ଦସ୍ସେତ୍ୱା ତସ୍ମିଂ ପାପକେ ଦିଟ୍ଠିଗତେ ପଟିନିସ୍ସଜ୍ଜାପିତେ ସୋ ତାୱ ଥେରସ୍ସ ୱଚନଂ ଅନାଦିୟିତ୍ୱା କୀଦିସଞ୍ଚ ପଚ୍ଚନୀକକଥଂ କଥେସି, କଥଞ୍ଚ ଥେରୋ କରୁଣାସୀତଲହଦୟୋ ହୁତ୍ୱା ଅପରମ୍ପି ଉପମଂ ଦସ୍ସେତ୍ୱା ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପେସି ।
ୱିସ୍ସଜ୍ଜନା – ପାୟାସି ଭନ୍ତେ ରାଜଞ୍ଞୋ ଆୟସ୍ମତା କୁମାରକସ୍ସପେନ ଅଗ୍ଗିକଜଟିଲୋପମଂ ଦସ୍ସେତ୍ୱା ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପିତେ କିଞ୍ଚାପି ଭୱଂ କସ୍ସପୋ ଏୱମାହ, ଅଥ ଖୋ ନେୱାହଂ ସକ୍କୋମି ଇଦଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜିତୁନ୍ତି ଏୱମାଦିକଂ ପଚ୍ଚନୀକକଥଂ କଥେସି, ଥେରୋ ଚ ଭନ୍ତେ କୁମାରକସ୍ସପୋ ଦ୍ୱେ ସତ୍ଥୱାହୋପମଂ ଦସ୍ସେତ୍ୱା ତଂ ପାପକଂ ମିଚ୍ଛାୱାଦଂ ପଟିନିସ୍ସଜ୍ଜାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ପାୟାସିସ୍ସ ରାଜଞ୍ଞସ୍ସ ଦ୍ୱେ ସତ୍ଥୱାହୋପମମ୍ପି ଦସ୍ସେତ୍ୱା ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପେସି, ତଞ୍ହି ତସ୍ସ ଚ ତଦନୁୟାୟୀନଞ୍ଚ ଭୱେୟ୍ୟ ଦୀଘରତ୍ତଂ ହିତାୟ ସୁଖାୟ ।
ପୁଚ୍ଛା – ଏୱଂ ପନାୱୁସୋ ଆୟସ୍ମତା କୁମାରକସ୍ସପେନ ୟଥା ୱୁତ୍ତାହି ବହୂହି ଉପମାହି ଚ ଅପରାହି ଗୂଥଭାରିକଅକ୍ଖଧୁତ୍ତକୋପମାହି ଚ ତସ୍ମିଂ ପାପକେ ଦିଟ୍ଠିଗତେ ୱିସ୍ସଜ୍ଜାପିତେ ସୋ ତାୱ ଥେରସ୍ସ ୱଚନଂ ଅନାଦିୟିତ୍ୱାୱ ପଚ୍ଛିମପଟିକ୍ଖେପୱସେନ କୀଦିସଂ ପଚ୍ଚନୀକକଥଂ କଥେସି, କଥଞ୍ଚ ଥେରୋ କରୁଣାସୀତଲହଦୟୋ ହୁତ୍ୱା ପଚ୍ଛିମମ୍ପି ଉପମଂ ଦସ୍ସେତ୍ୱା ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପେସି ।
ୱିସ୍ସଜ୍ଜନା – ପାୟାସି ଭନ୍ତେ ରାଜଞ୍ଞୋ ଏୱଂ ଥେରେନ ନାନାଉପମାହି ତସ୍ମିଂ ପାପକେ ଦିଟ୍ଠିଗତେ ପଟିନିସ୍ସଜ୍ଜାପିତେପି ପୁରିମନୟେନେୱ ଥେରସ୍ସ ପଚ୍ଚନୀକକଥଂ କଥେସି, ଥେରୋପି ଚ ଭନ୍ତେ ପଚ୍ଛିମଂ ସାଣଭାରିକୂପମଂ ଦସ୍ସେତ୍ୱା କରୁଣାସୀତଲହଦୟୋ ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପେସି ।
ସାଧୁ ସାଧୁ ଆୱୁସୋ, ସାଧୁ ଖୋ ଆୱୁସୋ ୟଂ ଆୟସ୍ମା କୁମାରକସ୍ସପୋ ପାୟାସିସ୍ସ ରାଜଞ୍ଞସ୍ସ ସାଣଭାରିକୋପମମ୍ପି ଦସ୍ସେତ୍ୱା ତଂ ପାପକଂ ଦିଟ୍ଠିଗତଂ ପଟିନିସ୍ସଜ୍ଜାପେସି, ତଞ୍ହି ତସ୍ସ ଚ ତଦନୁୟାୟୀନଞ୍ଚ ଭୱେୟ୍ୟ ଦୀଘରତ୍ତଂ ହିତାୟ ସୁଖାୟ ।
ପୁଚ୍ଛା – ଇମାୟ ପନାୱୁସୋ ପଚ୍ଛିମିକାୟ ସାଣଭାରିକୋପମାୟ ଦସ୍ସିତାୟ ପାୟାସିରାଜଞ୍ଞୋ ଥେରସ୍ସ ଧମ୍ମଦେସନାନୁଭାୱେନ ଇମସ୍ମିଂ ଧମ୍ମୱିନୟେ ପସନ୍ନୋ ହୁତ୍ୱା କୀଦିସଂ ପସନ୍ନାକାରମକାସି, କଥଞ୍ଚ ଆୟସ୍ମନ୍ତଂ କୁମାରକସ୍ସପଂ ଅନୁସାସନିଂ ୟାଚି, କଥଞ୍ଚାୟସ୍ମା କୁମାରକସ୍ସପୋ ଅନୁସାସି ।
ୱିସ୍ସଜ୍ଜନା – ଇମାୟ ଚ ପନ ଭନ୍ତେ ଉପମାୟ ଦସ୍ସିତାୟ ପାୟାସି ରାଜଞ୍ଞୋ ‘‘ପୁରିମେନେୱ ଅହଂ ଓପମ୍ମେନ ଭୋତୋ କସ୍ସପସ୍ସ ଅତ୍ତମନୋ ଅଭିରଦ୍ଧୋ ଏୱମାଦିନା ଭନ୍ତେ ପାୟାସିରାଜଞ୍ଞୋ ଇମସ୍ମିଂ ଧମ୍ମୱିନୟେ ଆୟସ୍ମତୋ କୁମାରକସ୍ସପସ୍ସ ଧମ୍ମଦେସନାୟ ପସନ୍ନୋ ପସନ୍ନାକାରମକାସି । ଇଚ୍ଛାମି ଚାହଂ ଭୋ କସ୍ସପ ମହାୟଞ୍ଞଂ ୟଜିତୁଂ, ଅନୁସାସତୁ ମଂ ଭୱଂ କସ୍ସପୋ ୟଂ ମମସ୍ସ ଦୀଘରତ୍ତଂ ହିତାୟ ସୁଖାୟାତି ପାୟାସି ରାଜଞ୍ଞୋ ଆୟସ୍ମନ୍ତଂ କୁମାରକସ୍ସପଂ ଅନୁସାସନିଂ ୟାଚି, ଆୟସ୍ମା ଚ ଭନ୍ତେ କୁମାରକସ୍ସପୋ ଦୁକ୍ଖେତ୍ତେ ଦୁବ୍ଭୂମେ ପୱୁତ୍ତବୀଜୋପମାୟ ଦୁସ୍ସୀଲେସୁ ଦିନ୍ନଦାନସ୍ସ ନ ମହପ୍ଫଲଭାୱଂ ଦସ୍ସେତ୍ୱା ସୁଖେତ୍ତେ ସୁଭୂମେ ପୱୁତ୍ତବୀଜୋପମାୟ ସୀଲୱନ୍ତେସୁ ଦିନ୍ନଦାନସ୍ସ ମହପ୍ଫଲଭାୱଂ ଦସ୍ସେତ୍ୱା ପାୟାସିଂ ରାଜଞ୍ଞମନୁସାସି ।
ପୁଚ୍ଛା – କଥଞ୍ଚାୱୁସୋ ପାୟାସିରାଜଞ୍ଞୋ ଦାନଂ ଅଦାସି, କଥଞ୍ଚସ୍ସ ସମ୍ପରାୟୋ ଅହୋସି ।
ୱିସ୍ସଜ୍ଜନା – ପାୟାସି ଭନ୍ତେ ରାଜଞ୍ଞୋ ଅସକ୍କଚ୍ଚଂ ଦାନମଦାସି, ଅସହତ୍ଥା ଦାନମଦାସି, ଅଚିତ୍ତୀକତଂ ଦାନମଦାସି, ଅପୱିଦ୍ଧଂ ଦାନମଦାସି, ସୋ ଅସକ୍କଚ୍ଚଂ ଦାନଂ ଦତ୍ୱା ଅସହତ୍ଥା ଦାନଂ ଦତ୍ୱା ଅଚିତ୍ତୀକତଂ ଦାନଂ ଦତ୍ୱା ଅପୱିଦ୍ଧଂ ଦାନଂ ଦତ୍ୱା କାୟସ୍ସଭେଦା ପରଂ ମରଣା ଚାତୁମହାରାଜିକାନଂ ଦେୱାନଂ ସହବ୍ୟତଂ ଉପପଜ୍ଜି ସୁଞ୍ଞଂ ସେରୀସକଂ ୱିମାନଂ ।
ପୁଚ୍ଛା – ତେନାୱୁସୋ ଭଗୱତା ଜାନତା ପସ୍ସତା ଅରହତା ସମ୍ମାସମ୍ବୁଦ୍ଧେନ ପାଥିୟୱଗ୍ଗେ ପଠମଂ ପାଥିୟସୁତ୍ତଂ କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ମଲ୍ଲେସୁ ଭନ୍ତେ ଅନୁପିୟେ ନାମ ମଲ୍ଲାନଂ ନିଗମେ ଭଗ୍ଗୱଗୋତ୍ତଂ ପରିବ୍ବାଜକଂ ଆରବ୍ଭ ଭାସିତଂ, ଭଗ୍ଗୱଗୋତ୍ତୋ ଭନ୍ତେ ପରିବ୍ବାଜକୋ ଭଗୱନ୍ତଂ ଏତଦୱୋଚ ‘‘ପୁରିମାନି ଭନ୍ତେ ଦିୱସାନି ପୁରିମତରାନି ସୁନକ୍ଖତ୍ତୋ ଲିଚ୍ଛୱିପୁତ୍ତୋ ୟେନାହଂ ତେନୁପସଙ୍କମି, ଉପସଙ୍କମିତ୍ୱା ମଂ ଏତଦୱୋଚ ‘‘ପଚ୍ଚକ୍ଖାତୋ ଦାନି ମୟା ଭଗ୍ଗୱ ଭଗୱା, ନ ଦାନାହଂ ଭଗୱନ୍ତଂ ଉଦ୍ଦିସ୍ସ ୱିହରାମୀ’ତି, କଚ୍ଚେ ତଂ ଭନ୍ତେ ତଥେୱ, ୟଥା ସୁନକ୍ଖତ୍ତୋ, ଲିଚ୍ଛୱିପୁତ୍ତୋ ଅୱଚା’’ତି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ଉଦୁମ୍ବରିକସୁତ୍ତ
ପୁଚ୍ଛା – ଉଦୁମ୍ବରିକସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ରାଜଗହେ ଭନ୍ତେ ନିଗ୍ରୋଧଂ ପରିବ୍ବାଜକଂ ଆରବ୍ଭ ଭାସିତଂ, ନିଗ୍ରୋଧୋ ଭନ୍ତେ ପରିବ୍ବାଜକୋ ଭଗୱତୋ ପରମ୍ମୁଖା ଭଗୱନ୍ତଂୟେୱ ଆରବ୍ଭ ଅନେକୱିହିତଂ ଅଭୂତକଥଂ କଥେସି, ତସ୍ମିଂ ୱତ୍ଥୁସ୍ମିଂ ଭାସିତଂ ।
ଚକ୍କୱତ୍ତିସୁତ୍ତ
ପୁଚ୍ଛା – ଚକ୍କୱତ୍ତିସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ମଗଧେସୁ ଭନ୍ତେ ମାତୁଲାୟଂ ସମ୍ବହୁଲେ ଭିକ୍ଖୂ ଆରବ୍ଭ ଅତ୍ତଜ୍ଝାସୟେନ ସୁତ୍ତନିକ୍ଖେପେନ ଭଗୱତା ଭାସିତଂ ।
ଅଗ୍ଗଞ୍ଞସୁତ୍ତ
ପୁଚ୍ଛା – ଅଗ୍ଗଞ୍ଞସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ସାୱତ୍ଥିୟଂ ଭନ୍ତେ ପୁବ୍ବାରାମେ ମିଗାରମାତୁପାସାଦେ ୱାସେଟ୍ଠଂ ପବ୍ବଜିତଂ ଆରବ୍ଭ ଭାସିତଂ, ବ୍ରାହ୍ମଣା ଭନ୍ତେ ୱାସେଟ୍ଠ ଭାରଦ୍ୱାଜେ ପବ୍ବଜିତେ ଅକ୍କୋସନ୍ତି ପରିଭାସନ୍ତି ଅତ୍ତରୂପାୟ
ପରିଭାସାୟ ପରିପୁଣ୍ଣାୟ ନୋ ଅପରିପୁଣ୍ଣାୟ, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ପୁଚ୍ଛା – ସମ୍ପସାଦନୀୟ ସୁତ୍ତଂ ପନାୱୁସୋ କତ୍ଥ କେନ ଭାସିତଂ ।
ୱିସ୍ସଜ୍ଜନା – ନାଳନ୍ଦାୟଂ ଭନ୍ତେ ପାୱାରିକମ୍ବୱନେ ଆୟସ୍ମତା ସାରିପୁତ୍ତେନ ଭାସିତଂ ।
ପାସାଦିକସୁତ୍ତ
ପୁଚ୍ଛା – ପାସାଦିକସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ସକ୍କେସୁ ଭନ୍ତେ ୱେଧଞ୍ଞାନାମ ସକ୍ୟାନଂ ଅମ୍ବୱନେ ପାସାଦେ ଚୁନ୍ଦଂ ସମଣୁଦ୍ଦେସଂ ଆରବ୍ଭ ଭାସିତଂ, ଚୁନ୍ଦୋ ଭନ୍ତେ ସମଣୁଦ୍ଦେସୋ ପାୱାୟଂ ନିଗଣ୍ଠସ୍ସ ନାଟପୁତ୍ତସ୍ସ କାଲଂ କିରିୟାୟ ଭିନ୍ନାନଂ ନିଗଣ୍ଠାନଂ ଦ୍ୱେଧିକଜାତାନଂ ଭଣ୍ଡନଜାତାନଂ କଲହଜାତାନଂ ୱିୱାଦାପନ୍ନାନଂ ଅଞ୍ଞମଞ୍ଞଂ ମୁଖସତ୍ତୀହି ୱିତୁଜ୍ଜନକାରଣଂ ଆୟସ୍ମତୋ ଆନନ୍ଦସ୍ସ ଆରୋଚେସି, ଆୟସ୍ମା ଚ ଭନ୍ତେ ଆନନ୍ଦୋ ଭଗୱତୋ ଏତମତ୍ଥଂ ଆରୋଚେସି, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ଲକ୍ଖଣସୁତ୍ତ
ପୁଚ୍ଛା – ଲକ୍ଖଣସୁତ୍ତଂ ପନାୱୁସୋ ଭଗୱତା କତ୍ଥ ଭାସିତଂ ।
ୱିସ୍ସଜ୍ଜନା – ସାୱତ୍ଥିୟଂ ଭନ୍ତେ ଜେତୱନମହାୱିହାରେ ଭାସିତଂ ।
ସିଙ୍ଗାଲସୁତ୍ତ
ପୁଚ୍ଛା – ସିଙ୍ଗାଲସୁତ୍ତଂ ପନାୱୁସୋ ଭଗୱତା କତ୍ଥ କଂ ଆରବ୍ଭ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ରାଜଗହେ ଭନ୍ତେ ସିଙ୍ଗାଲଂ ଗହପତିପୁତ୍ତଂ ଆରବ୍ଭ ଭାସିତଂ, ସିଙ୍ଗାଲୋ ଭନ୍ତେ ଗହପତିପୁତ୍ତୋ କାଲସ୍ସେୱ ଉଟ୍ଠାୟ ରାଜଗହା ନିକ୍ଖମିତ୍ୱା ଅଲ୍ଲୱତ୍ଥୋ ଅଲ୍ଲକେସୋ ପଞ୍ଜଲିକୋ ପୁଥୁଦିସା ନମସ୍ସତି ପୁରତ୍ଥିମଂ ଦିସଂ ଦକ୍ଖିଣଂ ଦିସଂ ପଚ୍ଛିମଂ ଦିସଂ ଉତ୍ତରଂ ଦିସଂ ହେଟ୍ଠିମଂ ଦିସଂ ଉପରିମଂ ଦିସଂ, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ଆଟାନାଟିୟସୁତ୍ତ
ପୁଚ୍ଛା – ଆଟାନାଟିୟସୁତ୍ତଂ ପନାୱୁସୋ ଭଗୱତା କତ୍ଥ କିସ୍ମିଂ ୱତ୍ଥୁସ୍ମିଂ ଭାସିତଂ ।
ୱିସ୍ସଜ୍ଜନା – ରାଜଗହେ ଭନ୍ତେ ଗିଜ୍ଝକୂଟେ ପବ୍ବତେ ଭାସିତଂ, ଭଗୱତି ଭନ୍ତେ ରାଜଗହେ ୱିହରତି ଚତ୍ତାରୋ ମହାରାଜାନୋ ଚତୁଦ୍ଦିସଂ ରକ୍ଖଂ ଠପେତ୍ୱା ଚତୁଦ୍ଦିସଂ ଗୁମ୍ବଂ ଠପେତ୍ୱା ଚତୁଦ୍ଦିସଂ ଓୱରଣଂ ଠପେତ୍ୱା କେୱଲକପ୍ପଂ ଗିଜ୍ଝକୂଟପବ୍ବତଂ ଓଭାସେତ୍ୱା ୟେନ ଭଗୱା ତେନୁପସଙ୍କମିଂସୁ, ଉପସଙ୍କମିତ୍ୱା ଭଗୱନ୍ତଂ ଅଭିୱାଦେତ୍ୱା ଏକମନ୍ତଂ ନିସୀଦିଂସୁ, ଏକମନ୍ତଂ ନିସିନ୍ନୋ ଖୋ ଭନ୍ତେ ୱେସ୍ସୱଣୋ ମହାରାଜା ଆଟାନାଟିୟଂ ରକ୍ଖଂ ଭଗୱତୋ ଆରୋଚେସି ଭିକ୍ଖୂନଂ ଭିକ୍ଖୁନୀନଂ ଉପାସକାନଂ ଉପାସିକାନଂ ଫାସୁୱିହାରାୟ, ତସ୍ମିଂ ଭନ୍ତେ ୱତ୍ଥୁସ୍ମିଂ ଭାସିତଂ ।
ସଙ୍ଗୀତିସୁତ୍ତ
ପୁଚ୍ଛା – ସଙ୍ଗୀତି ସୁତ୍ତଂ ପନାୱୁସୋ କତ୍ଥ କେନ ଭାସିତଂ ।
ୱିସ୍ସଜ୍ଜନା – ପାୱାୟଂ ଭନ୍ତେ ଆୟସ୍ମତା ସାରିପୁତ୍ତେନ ଭାସିତଂ ।
ଦସୁତ୍ତରସୁତ୍ତ
ପୁଚ୍ଛା – ଦସୁତ୍ତରସୁତ୍ତଂ ପନାୱୁସୋ କତ୍ଥ କେନ ଭାସିତଂ ।
ୱିସ୍ସଜ୍ଜନା – ଦସୁତ୍ତରସୁତ୍ତଂ ଭନ୍ତେ ଚମ୍ପାୟଂ ଗଗ୍ଗରାୟ ପୋକ୍ଖରଣିୟା ତୀରେ ଆୟସ୍ମତା ସାରିପୁତ୍ତେନ ଭାସିତଂ ।
ୱିସ୍ସଜ୍ଜନା – ସେକ୍ଖା ଚ ଭନ୍ତେ ପୁଥୁଜ୍ଜନକଲ୍ୟାଣକା ଚ ସିକ୍ଖନ୍ତି ।
ପୁଚ୍ଛା – କେ ଆୱୁସୋ ସିକ୍ଖିତସିକ୍ଖା ।
ୱିସ୍ସଜ୍ଜନା – ଅରହନ୍ତୋ ଭନ୍ତେ ସିକ୍ଖିତସିକ୍ଖା ।
ୱିସ୍ସଜ୍ଜନା – ଭଗୱତୋ ଭନ୍ତେ ୱଚନଂ ଅରହତୋ ସମ୍ମାସମ୍ବୁଦ୍ଧସ୍ସ ।
ପୁଚ୍ଛା – କେନାୱୁସୋ ଆଭତଂ ।
ୱିସ୍ସଜ୍ଜନା – ପରମ୍ପରାୟ ଭନ୍ତେ ଆଭତଂ ।