ମହାୱଂସପାଳି
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ମହାୱଂସପାଳି
ପଥମପରିଚ୍ଛେଦ
ମହିୟଙ୍ଗଣାଗମନଂ
ନମସ୍ସିତ୍ୱାନ ସମ୍ବୁଦ୍ଧଂ, ସୁସୁଦ୍ଧଂ ସୁଦ୍ଧୱଂସଜଂ ।
ମହାୱଂସଂ ପୱକ୍ଖାମି, ନାନାନୂନାଧିକାରିକଂ ॥
ପୋରାଣେହି କତୋ’ପେସୋ, ଅତିୱିତ୍ଥାରିତୋ କ୍ୱଚି ।
ଅତୀୱ କ୍ୱଚି ସଂଖିତ୍ତୋ, ଅନେକପୁନରୁତ୍ତକୋ ॥
ୱଜ୍ଜିତଂ ତେହି ଦୋସେହି, ସୁଖଗ୍ଗହଣଧାରଣଂ ।
ପସାଦସଂୱେଗକରଂ, ସୁତିତୋ ଚ ଉପାଗତଂ ॥
ପସାଦଜନକେ ଠାନେ, ତଥା ସଂୱେଗକାରକେ ।
ଜନୟନ୍ତୋ ପସାଦଞ୍ଚ, ସଂୱେଗଞ୍ଚ ସୁଣାଥ ତଂ ॥
ଦୀପଙ୍କରଞ୍ହି ସମ୍ବୁଦ୍ଧଂ, ପସ୍ସିତ୍ୱା ନୋ ଜିନୋ ପୁରା ।
ଲୋକଂ ଦୁକ୍ଖା ପମୋଚେତୁଂ, ବୋଧାୟ ପଣିଧିଂ ଅକା ॥
ତତୋ ତଞ୍ଚେୱ ସମ୍ବୁଦ୍ଧଂ, କୋଣ୍ଡଞ୍ଞଂ ମଙ୍ଗଲଂ ମୁନିଂ ।
ସୁମନଂ ରେୱତଂ ବୁଦ୍ଧଂ, ସୋଭିତଞ୍ଚ ମହାମୁନିଂ ॥
ଅନୋମଦସ୍ସିଂ ସମ୍ବୁଦ୍ଧଂ, ପଦୁମଂ ନାରଦଂ ଜିନଂ ।
ପଦୁମୁତ୍ତରସମ୍ବୁଦ୍ଧଂ, ସୁମେଧଞ୍ଚ ତଥାଗତଂ ॥
ସୁଜାତଂ ପିୟଦସ୍ସିଞ୍ଚ, ଅତ୍ଥଦସ୍ସିଞ୍ଚ ନାୟକଂ ।
ଧମ୍ମଦସ୍ସିଞ୍ଚ ସିଦ୍ଧତ୍ଥଂ, ତିସ୍ସଂ ଫୁସ୍ସଜିନଂ ତଥା ॥
ୱିପସ୍ସିଂ ସିଖୀସମ୍ବୁଦ୍ଧଂ, ସମ୍ବୁଦ୍ଧଂ ୱେସ୍ସଭୁଂ ୱିଭୁଂ ।
କକୁସନ୍ଧଞ୍ଚ ସମ୍ବୁଦ୍ଧଂ, କୋଣାଗମନମେୱ ଚ ॥
କସ୍ସପଂ ସୁଗତଞ୍ଚ’ମେ, ସମ୍ବୁଦ୍ଧେ ଚତୁୱୀସତି ।
ଆରାଧେତ୍ୱା ମହାୱୀରୋ, ତେହି ବୋଧାୟ ବ୍ୟାକତୋ ॥
ପୁରେତ୍ୱା ପାରମୀ ସବ୍ବା, ପତ୍ୱା ସମ୍ବୋଧିମୁତ୍ତମଂ ।
ଉତ୍ତମୋ ଗୋତମୋ ବୁଦ୍ଧୋ, ସତ୍ତେ ଦୁକ୍ଖା ପମୋଚୟି ॥
ମଗଧେସୁ ରୁୱେଲାୟଂ, ବୋଧିମୂଲେ ମହାମୁନି ।
ୱିସାଖପୁଣ୍ଣମାୟଂ ସୋ, ପତ୍ତୋ ସମ୍ବୋଧିମୁତ୍ତମଂ ॥
ସତ୍ତାହାନି ତହିଂ ସତ୍ତ, ସୋ ୱିମୁତ୍ତିସୁଖଂ ପରଂ ।
ୱିନ୍ଦନ୍ତଂ ମଧୁରତ୍ତଞ୍ଚ, ଦସ୍ସୟନ୍ତୋ ୱସୀ ୱସି ॥
ତତୋ ବାରାଣସିଂ ଗନ୍ତ୍ୱା, ଧମ୍ମଚକ୍କଂ ପଗତ୍ତୟି ।
ତତ୍ଥ ୱସ୍ସ ୱସନ୍ତୋ’ୱ, ସଟ୍ଠିଂ ଅରହତଂ ଅକା ॥
ତେ ଧମ୍ମଦେସନତ୍ଥାୟ, ୱିସ୍ସଜ୍ଜେତ୍ୱାନ ଭିକ୍ଖୱୋ ।
ୱିନେତ୍ୱା ଚ ତତୋ ତିଂସ-ସହା ୟେ ଭଦ୍ଦୱଗ୍ଗିୟେ ॥
ସହସ୍ସଜଟିଲେ ନାଥୋ, ୱିନେତୁଂ କସ୍ସପାଦିକେ ।
ହେମନ୍ତେ ଉରୁୱେଲାୟଂ, ୱସିତେ ପରିପାଚୟଂ ॥
ଉରୁୱେଲକସ୍ସପସ୍ସ, ମହାୟଞ୍ଞେ ଉପଟ୍ଠିତେ ।
ତସ୍ସ’ତ୍ତନୋ ନାଗମନେ, ଇଚ୍ଛାଚାରଂ ୱିଜାନିୟ ॥
ଉତ୍ତରକୁରୁତୋ ଭିକ୍ଖଂ, ଆହରିତ୍ୱା ରିମଦ୍ଦନୋ ।
ଅନୋତତ୍ତଦହେ ଭୁତ୍ୱା, ସାୟନ୍ହସମୟେ ସୟଂ ॥
ବୋଧିତୋ ନୱମେ ମାସେ, ଫୁସ୍ସପୁଣ୍ଣମିୟଂ ଜିନୋ ।
ଲଙ୍କାଦୀପଂ ୱିସୋଧେତୁଂ, ଲଙ୍କାଦୀପମୁପାଗମି ॥
ସାସନୁଜ୍ଜୋତନଂ ଠାନଂ, ଲଂକା ଞାତା ଜିନେନ ହି ।
ୟକ୍ଖପୁଣ୍ଣାୟ ଲଙ୍କାୟ, ୟକ୍ଖା ନିବ୍ବା ସିୟାତି ଚ ॥
ଞାତୋୱ ଲଙ୍କାମଜ୍ଝମ୍ହି, ଗଙ୍ଗାଭୀରେ ମନୋରମେ ।
ତିୟୋଜନାୟ ତେ ରମ୍ମେ, ଏକୟୋଜନୱିତ୍ଥତେ ॥
ମହାନାଗୱନୁୟ୍ୟାନେ, ୟକ୍ଖସଙ୍ଗାମଭୂମିୟା ।
ଲଙ୍କାଦୀପଟ୍ଠୟକ୍ଖାନଂ, ମହାୟକ୍ଖସମାଗମୋ ॥
ଉପାଗତୋ ତଂ ସୁଗତୋ, ମହାୟକ୍ଖସମାଗମଂ ।
ସମାଗମସ୍ସ ମଜ୍ଝମ୍ହି, ତତ୍ଥ ତେସଂ ସିରୋପରି ॥
ମହିୟଙ୍ଗଣଥୂପସ୍ସ, ଠାନେ ୱେହାୟସଂ ଜିନୋ ।
ୱୁଟ୍ଠିୱାତନ୍ଧକାରେସି, ତେସଂ ସଂୱେଜନଂ ଅକା ॥
ତେ ଭୟଟ୍ଠା’ଭୟଂ ୟକ୍ଖା, ଅୟାଚୁଂ ଅଭୟଂ ଜିନଂ ।
ଜିନୋ ଅଭୟଦୋ ଆହ, ୟକ୍ଖେ ତେ’ତି ଭୟଦ୍ଦୀତେ ॥
ୟକ୍ଖା ଭୟଂ ୱୋ ଦୁକ୍ଖଞ୍ଚ, ହରିସ୍ସାମି ଇଦଂ ଅହଂ ।
ତୁମ୍ହେ ନିସଜ୍ଜଠାନଂ ମେ, ସମଗ୍ଗା ଦେଥ ନୋ ଇଧ ॥
ଆହୁ ତେ ସୁଗତଂ ୟକ୍ଖା, ଦେମ ମାରିସ ତେ ଇଧ ।
ସବ୍ବେପି ସକଲଂ ଦୀପଂ, ଦେହି ନୋ ଅଭୟଂ ତୁୱଂ ॥
ଭୟଂ ସୀତଂ ତମଂ ତେସଂ, ହନ୍ତ୍ୱା ତଂ ଦିନ୍ନଭୂମିୟଂ ।
ଚମ୍ମକ୍ଖନ୍ଧଂ ଅତ୍ଥରିତ୍ୱା, ତତ୍ଥା’ ସୀନୋ ଜିନୋ ତତୋ ॥
ଚମ୍ମକ୍ଖଣ୍ଡଂ ପସାରେସି, ଆଦିତ୍ତଂ ତଂ ସମନ୍ତତୋ ।
ଘମ୍ମାଭିଭୂତା ତେ ଭୀତା, ଠିତା ଅନ୍ତେ ସମନ୍ତତୋ ॥
ଗିରିଦୀପଂ ତତୋ ନାଥୋ, ରମ୍ମଂ ତେସଂ ଇଧା’ନୟି ।
ତେସୁ ତତ୍ଥ ପୱିଟ୍ଠେସୁ, ୟଥାଠାନେ ଠପେସି ଚ ॥
ନାଥୋ ତଂ ସଂଖିପି ଧମ୍ମଂ, ତଦା ଦେୱା ସମାଗମୁଂ ।
ତସ୍ମିଂ ସମାଗମେ ତେସଂ, ସତ୍ଥା ଧମ୍ମ ମଦେସୟି ॥
ନେକେସଂ ପାଣକୋଟୀନଂ, ଧମ୍ମାଭିସମୟୋ ଅହୁ ।
ସରଣେସୁ ଚ ସୀଲେସୁ, ଠିତା ଆସୁଂ ଅସଂଖିୟା ॥
ସୋତାପତ୍ତିଫଲଂ ପତ୍ୱା, ସେଲେ ସୁମନକୂଟକେ ।
ମହାସୁମନଦେୱିନ୍ଦୋ, ପୂଜିୟଂ ୟାଚି ପୂଜିୟଂ ॥
ସିରଂ ପରାମସିତ୍ୱାନ, ନୀଲାମଲସିରୋରୁହୋ ।
ପାଣିମତ୍ତେଅଦା କେସେ, ତସ୍ସ ପାଣ ହିତୋ ଜିନୋ ॥
ସୋ ତଂ ସୁୱଣ୍ଣଚଙ୍କୋଟ-ୱରେନାଦାୟ ସତ୍ଥୁନୋ ।
ନିସିନ୍ନଟ୍ଠାନରଚିତେ, ନାନାରତନସଞ୍ଚୟେ ॥
ସବ୍ବତୋ ସତ୍ତରତନେ, ତେ ଠପେତ୍ୱା ସିରୋରୁହେ ।
ସୋ ଇନ୍ଦନୀଲଥୂପେନ, ପିଦହେସି ନମସ୍ସି ଚ ॥
ପରିନିବ୍ବୁତମ୍ହି ସମ୍ବୁଦ୍ଧେ, ଚିତକତୋ ଚ ଇଦ୍ଧିୟା ।
ଆଦାୟ ଜିନଗୀୱଟ୍ଠିଂ, ଥେରୋ ସରଭୂନାମକୋ ॥
ଥେରସ୍ସ ସାରିପୁତ୍ତସ୍ସ, ସିସ୍ସୋ ଆନୀୟ ଚେତିୟେ ।
ତସ୍ମିଂୟେୱ ଠପେତ୍ୱାନ, ଭିକ୍ଖୂହି ପରିୱାରିତୋ ॥
ଛାଦାପେତ୍ୱା ମେଦୱଣ୍ଣ-ପାସାଣେହି ମହିଦ୍ଧିକୋ ।
ଥୂପଂ ଦ୍ୱାଦସହତ୍ଥୁଚ୍ଚଂ, କାରାପେତ୍ୱାନ ପକ୍କମି ॥
ଦେୱାନଂପିୟତିସ୍ସସ୍ସ, ରଞ୍ଞୋ ଭାତୁକୁଧାରକୋ ।
ଉଦ୍ଧଚୂଳାଭୟୋ ନାମ, ଦିସ୍ୱା ଚେତିୟ ମବ୍ଭୁତଂ ॥
ତଂ ଛାଦୟିତ୍ୱା କାରେସି, ତିଂସହତ୍ଥୁଚ୍ଚ ଚେତିୟଂ ।
ମଦ୍ଦନ୍ତୋ ଦମିଳେ ରାଜା, ତତ୍ରଟ୍ଠୋ ଦୁକ୍ଖଗାମଣି ॥
ଅସୀତିହତ୍ଥଂ କାରେସି, ତସ୍ସ କଞ୍ଜୁକଚେତିୟଂ ।
ମହିୟଙ୍ଗଣଥୂପୋୟ-ମେସୋ ଏୱଂ ପତିଟ୍ଠିତୋ ॥
ଏୱଂ ଦୀପମିମଂକତ୍ୱା, ମନୁସ୍ସାରହମିସ୍ସରୋ ।
ଉରୁୱେଲମଗା ଧୀରୋ, ଉରୁୱୀର ପରକ୍କମୋତି ॥
ମହିୟଙ୍ଗଣାଗମନଂ ନିଟ୍ଠିତଂ ।
ନାଗଦୀପାଗମନ
ମହାକାରୁଣିକୋ ସତ୍ଥା, ସବ୍ବଲୋକହିତେ ରତୋ ।
ବୋଧିତୋ ପଞ୍ଚମେ ୱସ୍ସେ, ୱସଂ ଜେତୱନେ ଜିନୋ ॥
ମହୋଦରସ୍ସ ନାଗସ୍ସ, ତଥା ଚୂଳୋଦରସ୍ସ ଚ ।
ମାତୁଲଭାଗିନେୟ୍ୟାନଂ, ମଣିପଲ୍ଲଙ୍କହେତୁକଂ ॥
ଦିସ୍ୱା ସପାରିସଜ୍ଜାନଂ, ସଙ୍ଗାମଂ ପଚ୍ଚୁପଟ୍ଠିତଂ ।
ସମ୍ବୁଦ୍ଧୋ ଚିତ୍ତମାସସ୍ସ, କାଳପକ୍ଖେ ଉପୋସଥେ ॥
ପାତୋୟେୱ ସମାଦାୟ, ପୱରଂ ପତ୍ତଚୀୱରଂ ।
ଅନୁକମ୍ପାୟ ନାଗାନଂ, ନାଗଦୀପମୁପାଗମି ॥
ମହାଦରୋ’ପିସୋ ନାଗୋ, ତଦା ରାଜା ଅହିଦ୍ଧିକୋ ।
ସମୁଦ୍ଦେ ନାଗଭୱନେ, ଦସଦ୍ଧସତୟୋଜନେ ॥
କଣିଟ୍ଠିକା ତସ୍ସ କଣ୍ହା, ୱଡ୍ଢମାନମ୍ହି ପବ୍ବତେ ।
ନାଗରାଜସ୍ସ ଦିନ୍ନା’ସି, ତସ୍ସ ଚୂଳୋଦରୋ ସୁତୋ ॥
ତସ୍ସ ମାତା ମହାମାତୁ, ମଣିପଲ୍ଲଙ୍କମୁତ୍ତମଂ ।
ଦତ୍ୱା କାଲକତା ନାଗୀ, ମାତୁଲେନ ତଥା ହି ସୋ ॥
ଅହୋସି ଭାଗିନେୟ୍ୟସ୍ସ, ସଙ୍ଗାମୋ ପଚ୍ଚୁପଟ୍ଠିତୋ ।
ପବ୍ବତେୟ୍ୟା’ପି ନାଗା ତେ, ଅହେସୁଞ୍ହି ମହିଦ୍ଧିକା ॥
ସମିଦ୍ଧିସୁମନୋ ନାମ, ଦେୱୋ ଜେତୱନେ ଠିତଂ ।
ରାଜାୟତନମାଦାୟ, ଅତ୍ତନୋ ଭୱନଂ ସୁଭଂ ॥
ବୁଦ୍ଧାନୁମତିୟାୟେୱ, ଛତ୍ତାକାରଂ ଜିନୋପରି ।
ଧାରୟନ୍ତୋ ଉପାଗଞ୍ଛି, ଠାନଂ ତଂ ପୁବ୍ବୱୁଟ୍ଠକଂ ॥
ଦେୱୋ ହି ସୋ ନାଗଦୀପେ, ମନୁସ୍ସୋ’ନନ୍ତରେ ଭୱେ ।
ଅହୋସି ରାଜାୟତନ-ଠିତଠାନେ ସ ଅଦ୍ଦସ ॥
ପଚ୍ଚେକବୁଦ୍ଧ ଭୁଞ୍ଜନ୍ତେ, ଦିସ୍ୱା ଚିତ୍ତଂ ପସାଦିୟ ।
ପତ୍ତସୋଧନସାଖାୟୋ, ତେସଂ ପାଦାସି ତେନ ସୋ ॥
ନିବ୍ବତ୍ତିତସ୍ମିଂ ରୁକ୍ଖସ୍ମିଂ, ଜେତୁୟ୍ୟାନେ ମନୋରମେ ।
ଦ୍ୱାରକୋଟ୍ଠକପସ୍ସମ୍ହି, ପଚ୍ଛା ବହି ଅହୋସି ସୋ ॥
ଦେୱାତିଦେୱୋ ଦେୱସ୍ସ, ତସ୍ସ ୱୁଦ୍ଧିଞ୍ଚ ପସ୍ସିୟ ।
ଇଦଂ ଠାନ ହିତତ୍ଥଞ୍ଚ, ତଂ ସରୁକ୍ଖଂ ଇଧାନୟି ॥
ସଙ୍ଗାମମଜ୍ଝେ ଆକାସେ, ନିସିନ୍ନୋ ତତ୍ଥ ନାୟକୋ ।
ତମଂ ତମୋନୁଦୋ ତେସଂ, ନାଗାନଂ ହିଂସନଂ ଅକା ॥
ଅସ୍ସାସେନ୍ତୋ ଭୟଟ୍ଟେ ତେ, ଆଲୋକଂ ପୱିଦ୍ଧଂସୟି ।
ତେ ଦିସ୍ୱା ସୁଗତଂ ତୁଟ୍ଠା, ପାଦେ ୱନ୍ଦିଂସୁ ସତ୍ଥୁନୋ ॥
ତେସଂ ଧମ୍ମମଦେସେସି, ସାମଗ୍ଗିକରଣଂ ଜିନୋ ।
ଉଭୋ’ପି ତେ ପତୀତା ତଂ, ପଲ୍ଲଙ୍କଂ ମୁନିନୋ ଅଦୁଂ ॥
ସତ୍ଥା ଭୂମିଗତୋ ତତ୍ଥ, ପସୀଦିସ୍ୱାନ ଆସନେ ।
ତେହି ଦିବ୍ବନ୍ନପାନେହି, ନାଗରାଜେହି ତପ୍ପିତୋ ॥
ତେ ଜଲଟ୍ଠେ ତଲଟ୍ଠେ ଚ, ଭୁଜଗେ’ସୀତିକୋଟିୟୋ ।
ସରଣେସୁ ଚ ସୀଲେସୁ, ପତିଟ୍ଠାପେସି ନାୟକୋ ॥
ମହୋଦରସ୍ସ ନାଗସ୍ସ, ମାତୁଲୋ ମଣିଅକ୍ଖିକୋ ।
କଲ୍ୟାଣିୟଂ ନାଗରାଜା, ୟୁଦ୍ଧଂ କାତୁଂ ତହିଂ ଗତୋ ॥
ବୁଦ୍ଧଗାମମ୍ହି ପଠମେ, ସୁତ୍ୱା ସଦ୍ଧମ୍ମଦେସନଂ ।
ଠିତୋ ସରଣସୀଲେସୁ, ତତ୍ଥା’ୟାଚି ତଥାଗତଂ ॥
ମହତୀ ଅନୁକମ୍ପାନୋ, କତା ନାଥ ତୟା ଅୟଂ ।
ତୱାନାଗମନେ ସବ୍ବେ, ମୟଂ ଭସ୍ମୀ ଭୱାମହେ ॥
ଅନୁକମ୍ପା ମହୀ ପିତେ, ୱିସୁଂ ହୋତୁ ମହୋଦୟ ।
ପୁନରାଗମନେନେତ୍ଥ, ୱାସଭୂମିଂ ମମା ମମ ॥
ଅଧିୱାସୟିତ୍ୱା ଭଗୱା, ତୁଣ୍ହିଭାୱେ ନିଧାଗମଂ ।
ପତିଟ୍ଠାପେସି ତତ୍ଥେୱ, ରାଜାୟତନଚେତିୟଂ ॥
ତଞ୍ଚପି ରାଜାୟତନଂ, ପଲ୍ଲଞ୍ଚଙ୍କ ମହାରହଂ ।
ଅପ୍ପେସି ନାଗରାଜୂନଂ, ଲୋକନାଥୋ ନମସ୍ସିତୁଂ ॥
ପରିଭୋଗଚେତିୟଂ ମୟ୍ହଂ, ନାଗରାଜା ନମସ୍ସଥ ।
ତଂ ଭୱିସ୍ସତି ୱୋତାତା, ହିତାୟ ଚ ସୁଖାୟ ଚ ॥
ଇଚ୍ଚେୱମାଦିଂ ସୁଗତୋ, ନାଗାନଂ ଅନୁସାସନଂ ।
କତ୍ୱା ଜେତୱନଂ ଏୱ, ଗତୋ ଲୋକାନୁକମ୍ପକୋତି ॥
ନାଗଦୀପାଗମନଂ
କଲ୍ୟାଣାଗମନଂ
ତତୋ ସୋ ତତିୟେ ୱସ୍ସେ,
ନାଗିନ୍ଦୋ ମଣିଅକ୍ଖିକୋ ।
ଉପସଙ୍କମ୍ମ ସମ୍ବୁଦ୍ଧଂ,
ସତସଙ୍ଘଂ ନିମନ୍ତୟି ॥
ବୋଧିତୋ ଅଟ୍ଠମେ ୱସ୍ସେ, ୱସଂ ଜେତୱନେ ଜିନୋ ।
ନାଥୋ ପଞ୍ଚହି ଭିକ୍ଖୂନଂ, ସତେହି ପରିୱାରିତୋ ॥
ଦୁତିୟେ ଦିୱସେ ଭତ୍ତ-କାଲେ ଆରୋଚିତେ ଜିନୋ ।
ରମ୍ମେ ୱେସାଖମାସମ୍ହି, ପୁଣ୍ଣମାୟଂ ମୁନିସ୍ସରୋ ॥
ତତ୍ଥେୱ ପାରୁପିତ୍ୱାନ, ସଙ୍ଘାଟିଂ ପତ୍ତମାଦିୟ ।
ଆଗା କଲ୍ୟାଣିଦେସଂ ତଂ, ମଣିଅକ୍ଖିନିୱେସନଂ ॥
କଲ୍ୟାଣି ଚେତିୟଠାନେ, କତେ ରତନମଣ୍ଡପେ ।
ମହାରହମ୍ହି ପଲ୍ଲଙ୍କେ, ସହସଙ୍ଘେନୁ’ପାୱିସି ॥
ଦିବ୍ବେହି ଖଜ୍ଜଭୋଜ୍ଜେହି, ସଗଣୋ ସଗଣଂ ଜିନଂ ।
ନାଗରାଜା ଧମ୍ମରାଜଂ, ସନ୍ତପ୍ପେସି ସୁମାନସୋ ॥
ତତ୍ଥ ଧମ୍ମଂ ଦେସୟିତ୍ୱା, ସତ୍ଥା ଲୋନୁକମ୍ପକୋ ।
ଉଗ୍ଗନ୍ତ୍ୱା ସୁମନେ କୂଟେ, ପଦଂ ଦସ୍ସେସି ନାୟକୋ ॥
ତସ୍ମିଂ ପବ୍ବତପାଦମ୍ହି, ସହସଙ୍ଘୋ ୟଥାସୁଖଂ ।
ଦିୱା ୱିହାରଂ କତ୍ୱାନ, ଦୀଘୱାପି ମୁପାଗମି ॥
ତତ୍ଥ ଚେତିୟଠାନମ୍ହି, ସସଙ୍ଘୋୱ ନିସୀଦିୟ ।
ସମାଧିଂ ଅପ୍ପୟୀ ନାଥୋ, ଠାନାଗାରୱପତ୍ତିୟା ॥
ତତୋ ୱୁଟ୍ଠାୟ ଠାନମ୍ହା, ଠାନାଠାନେସୁ କୋୱିଦୋ ।
ମହାମେଘୱନାରାମ-ଠାନମାଗ ମହାମୁନି ॥
ମହାବୋଧିଠିତଠାନେ, ନିସୀଦିତ୍ୱା ସସାୱକୋ ।
ସମାଧିଂ ଅପ୍ପୟୀ ନାଥୋ, ମହାଥୂପଠିତେ ତଥା ॥
ଥୂପାରାମମ୍ହି ଥୂପସ୍ସ, ଠିତଠାନେ ତଥେୱ ଚ ।
ସମାଧିତୋ’ଥ ୱୁଟ୍ଠାୟ, ସିଲାଚେତିୟଠାନଗୋ ॥
ସହାଗତେ ଦେୱଗଣୋ, ଗଣୀ ସମନୁସାସିୟ ।
ତତୋ ଜେତୱନଂ ବୁଦ୍ଧୋ, ବୁଦ୍ଧସବ୍ବତ୍ଥକୋ ଅଗା ॥
ଏୱଂ ଲଙ୍କାୟ ନାଥୋ, ହିତମମିତମତୀ ଆୟତିଂ ପେକ୍ଖମାନୋ ।
ତସ୍ମିଂ କାଲମ୍ହି ଲଂକାସୁରଭୁଜଗଗଣାଦୀନମତ୍ଥଞ୍ଚ ପସ୍ସଂ ।
ଆଗା ତିକ୍ଖତ୍ତୁମେତଂ ଅତିୱିପୁଲଦୟୋ ଲୋକଦୀପୋ ସୁଦୀପଂ ।
ଦୀପୋ ତେନାୟମାସି ସୁଜନବହୁମନୋ ଧମ୍ମଦୀପାୱ ଭାସୀତି ॥
କଲ୍ୟାଣାଗମନଂ
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ତଥାଗତାଭିଗମନଂ ନାମ
ପଠମୋ ପରିଚ୍ଛେଦୋ ।
ଦୁତିୟପରିଚ୍ଛେଦ
ମହାସମ୍ମତୱଂସ
ମହାସମ୍ମତ ରାଜସ୍ସ, ୱଂସଜୋ ହି ମହାମୁନି ।
କପ୍ପସ୍ସାଦିମ୍ହି ରାଜା’ସି, ମହାସମ୍ମତନାମକୋ ॥
ରୋଜୋ ଚ ୱରରୋଜୋ ଚ, ତଥା କଲ୍ୟାଣକା ଦୁୱେ ।
ଉପୋସଥୋ ଚ ମନ୍ଧାତା, ଚରକୋ’ପଚରା ଦୁୱେ ॥
ଚେତୀୟୋ ମୁଚଲୋ ଚେୱ, ମହାମୂଚଲନାମକୋ ।
ମୁଚଲିନ୍ଦୋ ସାଗରୋ ଚେୱ, ସାଗରୋ ଦେୱ ୱନାମକୋ ॥
ଭରତୋ ଭଗୀରଥୋ ଚେୱ, ରୁଚି ଚ ସୁରୁଚି ପିଚ ।
ପତାପୋ ମହାପତାପୋ, ପନାଦା ଚ ତଥା ଦୁୱେ ॥
ସୁଦସ୍ସନୋ ଚ ନେରୁ ଚ, ତଥା ଏୱ ଦୁୱେ ଦୁୱେ ।
ପଚ୍ଛିମା ଚା’ତି ରାଜାନୋ, ତସ୍ସ ପୁତ୍ତପପୁତ୍ତକା ॥
ଅସଂଖିୟାୟୁକା ଏତେ, ଅଟ୍ଠୱୀସତି ଭୂମିପା ।
କୁସାୱତିଂ ରାଜଗହଂ, ମିଥିଲଞ୍ଚାପି ଆୱସୁଂ ॥
ତତୋ ସତଞ୍ଚ ରାଜନୋ, ଛପ୍ପଞ୍ଞାସ ଚ ସଟ୍ଠି ଚ ।
ଚତୁରାସୀତି ସହସ୍ସାନି, ଛତ୍ତିଂସା ଚ ତତୋ ପରେ ॥
ଦ୍ୱତ୍ତିଂସ ଅଟ୍ଠୱୀସା ଚ, ଦ୍ୱାୱୀସତି ତତୋ ପରେ ।
ଅଟ୍ଠାରସ ସତ୍ତରସ, ପଞ୍ଚଦସ ଚତୁଦ୍ଦସ ॥
ନୱ ସତ୍ତ ଦ୍ୱାଦସ ଚ, ପଞ୍ଚୱୀସ ତତୋପରେ ।
ପଞ୍ଚୱୀସଂ ଦ୍ୱାଦସ ଚ, ଦ୍ୱାଦସଞ୍ଚ ନୱା ପିଚ ॥
ଚତୁରାସୀତିସହସ୍ସାନି, ମଖାଦେୱାଦିକାପି ଚ ।
ଚତୁରାସୀତିସହସ୍ସାନି, କଳାରାଜନକାଦୟୋ ॥
ସୋଳସ ୟାୱ ଓକ୍କାତଂ, ପପୁତ୍ତା ରାସିତୋ ଇମେ ।
ୱିସୁଂ ୱିସୁଂ ପୁରେ ରଜ୍ଜଂ, କମତୋ ଅନୁସାସିସୁଂ ॥
ଓକ୍କାମୁଖୋ ଜେଟ୍ଠପୁତ୍ତୋ, ଓକ୍କାକସା’ସି ଭୂପତି ।
ନିପୁରୋ ଚନ୍ଦୀମା ଚନ୍ଦଂ-ମୁଖୋ ଚ ସିୱି ସଞ୍ଜୟୋ ॥
ୱେସ୍ସନ୍ତର ମହାରାଜା, ଜାଲୀ ଚ ସୀହୱାହନୋ ।
ସୀହସ୍ସରୋ ଚ ଇଚ୍ଚେତେ, ତସ୍ସ ପୁତ୍ତ ପ ପୁତ୍ତକା ॥
ଦ୍ୱେଅସୀତି ସହସ୍ସାନି, ସୀହସ୍ସରସ୍ସ ରାଜିନୋ ।
ପୁତ୍ତ ପ ପୁତ୍ତ ରାଜାନୋ, ଜୟସେନୋ ତଦନ୍ତିମୋ ॥
ଏତେ କପିଲୱତ୍ଥୁସ୍ମିଂ, ସକ୍ୟରାଜାତି ୱିସ୍ସୁତା ।
ସୀହହନୁ ମହାରାଜା, ଜୟସେନସ୍ସ ଅତ୍ରଜୋ ॥
ଜୟସେନସ୍ସ ଧୀତା ଚ, ନାମେନା’ସି ୟସୋଧରା ।
ଦେୱଦୟେ ଦେୱଦହ-ସକ୍କୋ ନାମା’ସି ଭୂପତି ॥
ଅଞ୍ଜନୋ ଚା’ଥ କଚ୍ଚାନା, ଆସୁଂ ତସ୍ସ ସୁତା ଦୁୱେ ।
ମହେସୀଚା’ସି କଚ୍ଚାନା, ରଞ୍ଞୋ ସୀହହନୁସ୍ସ ସା ॥
ଆସୀ ଅଞ୍ଜନସକ୍କସ୍ସ, ମହେସୀ ସା ୟସୋଧରା ।
ଅଞ୍ଜନସ୍ସ ଦୁୱେ ଧୀତା, ମାୟା ଚାଥ ପଜାପତି ॥
ପୁତ୍ତା ଦୁୱେ ଦଣ୍ଡପାଣୀ, ସୁପ୍ପବୁଦ୍ଧୋ ଚ ସାକିୟୋ ।
ପଞ୍ଚ ପୁତ୍ତା ଦୁୱେ ଧୀତା, ଆସୁଂ ସୀହହନୁସ୍ସରେ ॥
ସୁଦ୍ଧୋଦନୋ ଧୋତୋଦନୋ, ସକ୍କସୁକ୍କମିତୋଦନୋ ।
ଅମିତା ପମିତାଚା’ତି, ଇମେ ପଞ୍ଚ ଇମା ଦୁୱେ ॥
ସୁପ୍ପବୁଦ୍ଧସ୍ସ ସକ୍କସ୍ସ, ମହେସୀ ଅମିତା ଅହୁ ।
ତସ୍ସା’ସୁଂ ଭଦ୍ଦକଚ୍ଚାନା, ଦେୱଦତ୍ତୋ ଦୁୱେ ସୁତା ॥
ମାୟା ମହାପଜାପତି ଚେୱ, ସୁଦ୍ଧୋଦନ ମହେସୀୟୋ ।
ସୁଦ୍ଧୋଦନ ମହାରଞ୍ଞୋ, ପୁତ୍ତୋ ମାୟାୟ ସୋ ଜିନୋ ॥
ମହା ସମ୍ମତୱଂସମ୍ହି, ଅସମ୍ଭିନ୍ନେ ମହାମୁନି ।
ଏୱଂ ପୱତ୍ତେ ସଞ୍ଜାତୋ, ସବ୍ବ ଖତ୍ଥିୟ ମୁଦ୍ଧନି ॥
ସିଦ୍ଧତ୍ଥସ୍ସ କୁମାରସ୍ସ, ବୋଧିସତ୍ତସ୍ସ ସା ଅହୁ ।
ମହେସୀ ଭଦ୍ଦକଚ୍ଚାନା, ପୁତ୍ତୋ ତସ୍ସା’ସି ରାହୁଲୋ ॥
ବିମ୍ବିସାରୋ ଚ ସିଦ୍ଧତ୍ଥ-କୁମାରୋ ଚ ସହାୟକା ।
ଉଭିନ୍ନଂ ପିତରୋ ଚାପି, ସହାୟାଏୱ ତେ ଅହୁଂ ॥
ବୋଧିସତ୍ତୋ ବିମ୍ବିସାରା, ପଞ୍ଚୱସ୍ସାଧିକୋ ଅହୁ ।
ଏକୂନତିଂସୋ ୱୟସା, ବୋଧିସତ୍ତୋ’ଭିନିକ୍ଖମି ॥
ପଦହିତ୍ୱାନ ଛବ୍ବସ୍ସଂ, ବୋଧିଂ ପତ୍ୱା କମେନ ଚ ।
ପଞ୍ଚତିଂସୋ ଥ ୱୟସା, ବିମ୍ବିସାରମୁପାଗମି ॥
ବିମ୍ବିସାରୋ ପନ୍ନରସ-ୱସ୍ସୋ’ଥ ପୀତରଂ ସୟଂ ।
ଅଭିସିତ୍ତୋ ମହାପଞ୍ଞୋ, ପତ୍ତୋ ରଜ୍ଜସ୍ସ ତସ୍ସ ତୁ ॥
ପତ୍ତେ ସୋଳସମେ ୱସ୍ସେ, ସତ୍ଥା ଧମ୍ମମଦେସୟି ।
ଦ୍ୱାପଞ୍ଞାସେୱ ୱସ୍ସାନି, ରଜ୍ଜଂ କାରେସି ସୋ ପନ ॥
ରଜ୍ଜେ ସମା ପନ୍ନରସ, ପୁବ୍ବେ ଜିନସମାଗମା ।
ସତ୍ତତିଂସ ସମା ତସ୍ସ, ଧରମାନେ ତଥାଗତେ ॥
ବିମ୍ବିସାରସୁତୋ’ଜାତ-ସତ୍ତୁତଂ ଘାତୀୟା’ମତି ।
ରଜ୍ଜଂ ଦ୍ୱତ୍ତିଂସୱସ୍ସାନି, ମହାମିତ୍ତଦ୍ଦୁକାରୟୀ ॥
ଅଜାତସତ୍ତୁନୋ ୱସ୍ସେ, ଅଟ୍ଠମେ ମୁନି ନିବ୍ବୁତୋ ।
ପଚ୍ଛା ସୋ କାରୟୀ ରଜ୍ଜଂ, ୱସ୍ସାନି ଚତୁୱୀସତି ॥
ତଥାଗତୋ ସକଲଲୋକଗ୍ଗତଂ ଗତୋ ।
ଅନିଚ୍ଚତାୱ ସମୱସୋ ଉପାଗତୋ ।
ଇତି’ଧ ୟୋ ଭୟଜନନିଂ ଅନିଚ୍ଚତଂ,
ଅୱେକ୍ଖତେ ସ ଭୱତି ଦୁକ୍ଖପାରଗୂତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ମହାସମ୍ମତୱଂସୋ ନାମ
ଦୁତିୟୋ ପରିଚ୍ଛେଦୋ ।
ତତିୟ ପରିଚ୍ଛେଦ
ପଠମଧମ୍ମସଂଗୀତି
ପଞ୍ଚନେତ୍ତୋ ଜିନୋ ପଞ୍ଚ-ଚତ୍ତାଲୀସସମା’ସମୋ ।
ଠତ୍ୱା ସବ୍ବାନି କିଚ୍ଚାନି, କତ୍ୱା ଲୋକସ୍ସ ସବ୍ବଥା ॥
କୁସିନାରାୟୟମକ-ସାଲାନମନ୍ତରେ ୱରେ ।
ୱେସାଖପୁଣ୍ଣମାୟଂ ସୋ, ଦୀପୋ ଲୋକସ୍ସ ନିବ୍ବୁତୋ ॥
ସଙ୍ଖ୍ୟାପଥମତିକ୍କନ୍ତା, ଭିକ୍ଖୂ ତତ୍ଥ ସମାଗତା ।
ଖତ୍ତିୟା ବ୍ରାହ୍ମଣା ୱସ୍ସା, ସୁଦ୍ଧା ଦେୱା ତଥେୱ ଚ ॥
ସତ୍ତସତସହସ୍ସାନି, ତେସୁ ପାମୋକ୍ଖଭିକ୍ଖୱୋ ।
ଥେରୋ ମହାକସ୍ସପୋୱ, ସଙ୍ଘତ୍ଥେରୋ ତଦା ଅହୁ ॥
ସତ୍ଥୁସରୀରସାରୀର-ଧାତୁକିଚ୍ଚାନି କାରିୟ ।
ଇଚ୍ଛନ୍ତୋ ସୋ ମହାଥେରୋ, ସତ୍ଥୁ ଧମ୍ମଚିରଟ୍ଠିତିଂ ॥
ଲୋକନାଥେ ଦସବଲେ, ସତ୍ତାହପରିନିବ୍ବୁତେ ।
ଦୁବ୍ଭାସିତଂ ସୁଭଦ୍ଦସ୍ସ, ବୁଦ୍ଧସ୍ସ ୱଚନଂ ସରଂ ॥
ସରଂ ଚୀୱରଦାନଞ୍ଚ, ସମତ୍ତେ ଠପନଂ ତଥା ।
ସଦ୍ଧମ୍ମଠପନତ୍ଥାୟ, ମୁନିନା’ନୁଗ୍ଗହଂ କତଂ ॥
କାତୁଂ ସଦ୍ଧମ୍ମସଂଗୀତିଂ, ସମ୍ବୁଦ୍ଧାନମତେ ୟତି ।
ନୱଙ୍ଗସାସନଧରେ, ସବ୍ବଙ୍ଗସମୁପାଗତେ ॥
ଭିକ୍ଖୂ ପଞ୍ଚସତେୟେୱ, ମହାଖୀଣାସୱେ ୱରେ ।
ସମ୍ମନ୍ନି ଏକେନୂନେ ତୁ, ଆନନ୍ଦତ୍ଥେରକାରଣା ॥
ପୁନ ଆନନ୍ଦତ୍ଥେରା’ପି, ଭିକ୍ଖୂହି ଅଭିୟାଚିତୋ ।
ସମ୍ମନ୍ନି କାତୁଂ ସଂଗୀତିଂ, ସା ନ ସକ୍କା ହି ତଂ ୱିନା ॥
ସାଧୁକୀଳନସତ୍ତାହଂ, ସତ୍ତାହଂ ଧାତୁଭାଜନଂ ।
ଇଚ୍ଚଦ୍ଧମାସଂ ଖେପେତ୍ୱା, ସବ୍ବଲୋକାନୁକମ୍ପକା ॥
ୱସ୍ସଂ ୱସଂ ରାଜଗହେ, କସ୍ସାମ ଧମ୍ମସଙ୍ଗହଂ ।
ନାଞ୍ଞେହି ତତ୍ତ ୱତ୍ଥବ୍ବ-ମିତି କତ୍ୱାନ ନିଚ୍ଛୟଂ ॥
ସୋକାତୁରଂ ତତ୍ଥ ତତ୍ଥ, ଅସ୍ସାସେନ୍ତୋ ମହାଜନଂ ।
ଜମ୍ବୁଦୀପମ୍ହି ତେ ଥେରା, ୱିଚରିତ୍ୱାନ ଚାରିକଂ ॥
ଆସଳ୍ହିସୁକ୍କପକ୍ଖମ୍ହି, ସୁକ୍କପକ୍ଖଠିତତ୍ଥିକା ।
ଉପାଗମୁଂ ରାଜଗହଂ, ସମ୍ପନ୍ନଚତୁପଚ୍ଚୟଂ ॥
ତତ୍ଥେୱ ୱସ୍ସୂପଗତା, ତେ ମହାକସ୍ସପାଦୟୋ ।
ଥେରା ଥିରଗୁଣୂପେତା, ସମ୍ବୁଦ୍ଧମତକୋୱିଦା ॥
ୱସ୍ସାନଂ ପଠମଂ ମାସଂ, ସବ୍ବସେନାସନେସୁ’ପି ।
କାରେସୁଂ ପଟିସଙ୍ଖାରଂ, ୱତ୍ୱାନା’ଜାତସତ୍ତୁନୋ ॥
ୱିହାରପଟିସଙ୍ଖାରେ, ନିଟ୍ଠିତେ ଅହୁ ଭୂପତି ।
ଇଦାନି ଧମ୍ମସଂଗୀତିଂ, କରିସ୍ସାମି ମୟଂ ଇତି ॥
କତ୍ତବ୍ବଂ କିନ୍ତିପୁଟ୍ଠସ୍ସ, ନିସଜ୍ଜଠାନମାଦିସୁଂ ।
ରାଜା କତ୍ଥାତି ପୁଚ୍ଛିତ୍ୱା, ୱୁତ୍ତଠାନମ୍ହି ତେହି ସୋ ॥
ସୀଘଂ ୱେଭାରସେଲସ୍ସ, ପସ୍ସେ କାରେସି ମଣ୍ଡପଂ ।
ସତ୍ତପଣ୍ଣିଗୁହାଦ୍ୱାରେ, ରମ୍ମଂ ଦେୱସଭୋପମଂ ॥
ସବ୍ବଥା ମଣ୍ଡୟିତ୍ୱା ତଂ, ଅତ୍ଥରାପେସି ତତ୍ଥ ସୋ ।
ଭିକ୍ଖୂନଂ ଗଣନାୟେୱ, ଅନଗ୍ଘତ୍ଥରଣାନି ଚ ॥
ନିସ୍ସାୟ ଦକ୍ଖିଣଂ ଭାଗଂ, ଉତ୍ତରାମୁଖମୁତ୍ତମଂ ।
ଥେରାସନଂ ସୁପଞ୍ଞତ୍ତଂ, ଆସି ତତ୍ଥ ମହାରହଂ ॥
ତସ୍ମିଂ ମଣ୍ଡପମଜ୍ଝସ୍ମିଂ, ପୁରତ୍ଥମୁଖମୁତ୍ତମଂ ।
ଧମ୍ମାସନଂ ସୁପଞ୍ଞତ୍ତଂ, ଅହୋସି ସୁଗତାରହଂ ॥
ରାଜା’ରୋଚୟି ଥେରାନଂ, କମ୍ମଂ ନୋ ନିଟ୍ଠିତଂ ଇତି ।
ତେ ଥେରା ଥେରମାନନ୍ଦ-ମାନନ୍ଦକରମବ୍ରୱୁଂ ॥
ସ୍ୱେ ସନ୍ନିପାତୋ ଆନନ୍ଦ, ସେଖେନ ଗମନଂ ତହିଂ ।
ନ ୟୁତ୍ତନ୍ତେ ସଦତ୍ଥେ ତ୍ୱଂ, ଅପ୍ପମତ୍ତୋ ତତୋ ଭୱ ॥
ଇଚ୍ଚେୱଂ ଚୋଦିତୋ ଥେରୋ, କତ୍ୱାନ ୱୀରିୟଂ ସମଂ ।
ଇରିୟାପଥତୋ ମୁତ୍ତଂ, ଅରହତ୍ତମପାପୁଣି ॥
ୱସ୍ସାନଂ ଦୁତିୟେ ମାସେ, ଦୁତିୟେ ଦିୱସେ ପନ ।
ରୁଚିରେ ମଣ୍ଡପେ ତସ୍ମିଂ, ଥେରା ସନ୍ନିପତିଂସୁ ତେ ॥
ଠପେତ୍ୱା’ନନ୍ଦତ୍ଥେରସ୍ସ, ଅନୁଚ୍ଛୱିକମାସନଂ ।
ଆସନେସୁ ନିସୀଦିଂସୁ, ଅରହନ୍ତୋ ୟଥାରହଂ ॥
ଥେରୋ’ରହତ୍ତପତ୍ତିଂ ସୋ, ଞାପେତୁଂ ତେହି ନାଗମା ।
କୁହିଂ ଆନନ୍ଦତ୍ଥେରୋ’ତି, ୱୁଚ୍ଚମାନେ ତୁ କେହିଚି ॥
ନିମ୍ମୁଜ୍ଜିତ୍ୱା ପଥୱିୟା, ଗନ୍ତ୍ୱା ଜୋତିପଥେନ ୱା ।
ନିସୀଦି ଥେରୋ ଆନନ୍ଦୋ, ଅତ୍ତନୋ ଠପିତାସନେ ॥
ଉପାଲିଥେରୋ ୱିନୟେ, ସେସଧମ୍ମେ ଅସେସକେ ।
ଆନନ୍ଦତ୍ଥେରମକରୁଂ, ସବ୍ବେ ଥେରା ଧୁରନ୍ଧରେ ॥
ମହାଥେରୋ ସକତ୍ତାନଂ, ୱିନୟଂ ପୁଚ୍ଛିତୁଂ ସୟଂ ।
ସମ୍ମନ୍ନୁ’ପାଲିଥେରୋ ଚ, ୱିସ୍ସଜ୍ଜେତୁଂ ତମେୱ ତୁ ॥
ଥେରାସନେ ନିସୀଦିତ୍ୱା, ୱିନୟଂ ତମପୁଚ୍ଛି ସୋ ।
ଧମ୍ମାସନେ ନିସୀଦିତ୍ୱା, ୱିସ୍ସଜ୍ଜେସି ତମେୱ ସୋ ॥
ୱିନୟଞ୍ଞୂନମଗ୍ଗେନ, ୱିସ୍ସଜ୍ଜିତକମେନ ତେ ।
ସବ୍ବେ ସଜ୍ଝାୟମକରୁଂ, ୱିନୟଂ ନୟକୋୱିଦା ॥
ଅଗ୍ଗଂ ବହୁସ୍ସୁତାଦୀନଂ, କୋସାରକ୍ଖଂ ମହେସିନୋ ।
ସମ୍ମନ୍ନିତ୍ୱାନ ଅତ୍ତାନଂ, ଥେରୋ ଧମ୍ମମପୁଚ୍ଛି ସୋ ॥
ତଥା ସମ୍ମନ୍ନିୟ’ତ୍ତାନଂ, ଧମ୍ମାସନାଗତୋ ସୟଂ ।
ୱିସ୍ସଜ୍ଜେସି ତମାନନ୍ଦ-ତ୍ଥେରୋ ଧମ୍ମମସେସତୋ ॥
ୱେଦେହମୁନିନା ତେନ, ୱିସ୍ସଜ୍ଜିତକମେନ ତେ ।
ସବ୍ବେ ସଜ୍ଝାୟମକରୁଂ, ଧମ୍ମଂ ଧମ୍ମତ୍ଥକୋୱିଦା ॥
ଏୱଂ ସତ୍ତହି ମାସେହି, ଧମ୍ମସଂଗୀତି ନିଟ୍ଠିତା ।
ସବ୍ବଲୋକହିତତ୍ଥାୟ, ସବ୍ବଲୋକହି ତେହି ସା ॥
ମହାକସ୍ସପଥେରେନ, ଇଦଂ ସୁଗତସାସନଂ ।
ପଞ୍ଚୱସ୍ସସହସ୍ସାନି, ସମତ୍ଥଂ ୱତ୍ତନେ କତଂ ॥
ଅତୀୱ ଜାତପାମୋଜ୍ଜା, ସନ୍ଧାରକଜଲନ୍ତିକା ।
ସଂଗୀତିପରିୟୋସାନେ, ଛଦ୍ଧାକମ୍ପି ମହାମହୀ ॥
ଅଚ୍ଛରିୟାନି ଚା’ହେସୁଂ, ଲୋକେନେକାନିନେକଧା ।
ଥେରେହେୱ କତତ୍ତା ଚ, ଥେରିୟାୟଂ ପରମ୍ପରା ॥
ପଠମଂ ସଙ୍ଗହଂ କତ୍ୱା, ସବ୍ବଲୋକହିତଂ ବହୁଂ ।
ତେ ୟାୱତାୟୁକଂ ଠତ୍ୱା, ଥେରା ସବ୍ବେପି ନିବ୍ବୁତା ॥
ଲୋକନ୍ଧକାରହନନମ୍ହି ମହାପଦୀପା ।
ନିବ୍ବାପିତା ମରଣଘୋରମହାନିଲେନ,
ତେନାପି ଜୀୱିତମଦଂ ମତିମା ଜହେୟ୍ୟାତି ॥
ସୁଜନପ୍ପସାଦଂସଂୱେଗତ୍ଥାୟ କତେ ମହାୱଂସେ
ପଠମଧମ୍ମସଂଗୀତିନାମ
ତତିୟୋ ପରିଚ୍ଛେଦୋ ।
ଚତୁତ୍ଥ ପରିଚ୍ଛେଦ
ଦୁତିୟ ସଂଗୀତି
ଅଜାତସତ୍ତୁ ପୁତ୍ତୋ ତଂ, ଘାତେତ୍ୱା’ଦାୟି ଭଦ୍ଦକୋ ।
ରଜ୍ଜଂ ସୋଳସୱସ୍ସାନି, କାରେସି ମିତ୍ତଦୂଭିକୋ ॥
ଉଦୟଭଦ୍ଦ ପୁତ୍ତୋ ତଂ, ଘାତେତ୍ୱା ଅନୁରୁଦ୍ଧକୋ ।
ଅନୁରୁଦ୍ଧସ୍ସ ପୁତ୍ତୋ ତଂ, ଘାତେତ୍ୱା ମୁଣ୍ଡନାମକୋ ॥
ମିତ୍ତଦ୍ଦୁନୋ ଦୁମ୍ମତିନୋ, ତେ’ପି ରଜ୍ଜମକାରୟୁଂ ।
ତେସଂ ଉଭିନ୍ନଂ ରଜ୍ଜେସୁ, ଅଟ୍ଠୱସ୍ସାନ’ତିକ୍କମୁଂ ॥
ମୁଣ୍ଡସ୍ସ ପୁତ୍ତୋ ପିତରଂ, ଘାତେତ୍ୱା ନାଗଦାସକୋ ।
ଚତୁୱୀସତିୱସ୍ସାନି, ରଜ୍ଜଂ କାରେସି ପାପକୋ ॥
ପିତୁଘାତକୱଂସୋ’ୟ, ମୀତିକୁଦ୍ଧା’ଥ ନାଗରା ।
ନାଗଦାସକ ରାଜାନଂ, ଅପନେତ୍ୱା ସମାଗତା ॥
ସୁସୁନାଗୋତି ପଞ୍ଞାତଂ, ଅମଚ୍ଚଂ ସାଧୁସମ୍ମତଂ ।
ରଜ୍ଜେ ସମଭିସିଞ୍ଜିଂସୁ, ସବ୍ବେସଂ ହିତମାନସା ॥
ସୋ ଅଟ୍ଠାରସୱସ୍ସାନି, ରାଜା ରଜ୍ଜମକାରୟି ।
କାଳାସୋ କୋ ତସ୍ସ ପୁତ୍ତୋ, ଅଟ୍ଠୱୀସତି କାରୟି ॥
ଅତୀତେ ଦସମେ ୱସ୍ସେ, କାଳାସୋକସ୍ସ ରାଜିନୋ ।
ସମ୍ବୁଦ୍ଧପରିନିବ୍ବାନା, ଏୱଂ ୱସ୍ସସତଂ ଅହୁ ॥
ତଦା ୱେସାଲିୟା ଭିକ୍ଖୂ, ଅନେକା ୱଜ୍ଜିପୁତ୍ତକା ।
ସିଙ୍ଗୀଲୋଣଂ ଦ୍ୱଙ୍ଗୁଲଞ୍ଚ, ତଥା ଗାମନ୍ତରମ୍ମି ଚ ॥
ଆୱାସା’ନୁମତା’ଚିଣ୍ଣଂ, ଅମଥିତଂ ଜଲୋଗି ଚ ।
ନିସୀଦନଂ ଅଦସକଂ, ଜାତରୂପାଦିକଂ ଇତି ॥
ଦସୱତ୍ଥୂନି ଦୀପେସୁଂ, କପ୍ପନ୍ତୀତି ଅଲଜ୍ଜୀନୋ ।
ତଂ ସୁତ୍ୱାନ ୟସତ୍ଥେରୋ, ଏୱଂ ୱଜ୍ଜୀସୁ ଚାରିକଂ ॥
ଛଳଭିଞ୍ଞୋ ବଲପ୍ପତ୍ତୋ, ୟସୋ କାକଣ୍ଡକତ୍ରଜୋ ।
ତଂ ସମେତୁଂ ସଉସ୍ସାହୋ, ତତ୍ଥାଗମି’ମହାୱନଂ ॥
ଠପେତ୍ୱା’ପୋସଥଗ୍ଗେ ତେ, କଂସପାତିଂ ସହୋଧକଂ ।
କହାପଣାଦିଂ ସଙ୍ଘସ୍ସ, ଦେଥ’ନା’ହୁ ଉପାସକେ ॥
ନ କପ୍ପତେ ତଂ ମା ଦେଥ, ଇତି ଥେରୋ ସୱାରୟି ।
ପଟିସାରଣୀୟଂ କମ୍ମଂ, ୟସତ୍ଥେରସ୍ସ ତେ କରୁଂ ॥
ୟାଚିତ୍ୱା ଅନୁଦୂତଂ ସୋ, ସହ ତେନ ପୁରଂ ଗତୋ ।
ଅତ୍ତନୋ ଧମ୍ମୱାଦିତ୍ତଂ, ସଞ୍ଞାପେତ୍ୱା’ଗ ସାଗରେ ॥
ଅନୁଦୂତୱଚୋ ସୁତ୍ୱା, ତମୁକ୍ଖିପିତୁମାଗତା ।
ପରିକ୍ଖିପିୟ ଅଟ୍ଠଂସୁ, ସରଂ ଥେରସ୍ସ ଭିକ୍ଖୱୋ ॥
ଥେରୋ ଉଗ୍ଗମ୍ମ ନଭସା, ଗନ୍ତ୍ୱା କୋସମ୍ବିୟଂ ତତୋ ।
ପାୱେୟ୍ୟକା ୱନ୍ତିକାନଂ, ଭିକ୍ଖୂନଂ ସନ୍ତିକଂ ଲହୁଂ ॥
ୱେସେସି ଦୂତେତୁ ସୟଂ, ଗନ୍ତ୍ୱା’ହୋ ଗଙ୍ଗପବ୍ବତଂ ।
ଆହ ସମ୍ଭୂତତ୍ଥେରସ୍ସ, ତଂ ସବ୍ବଂ ସାଣୱାସିନୋ ॥
ପାୱେୟ୍ୟକା ସଟ୍ଠିଥେରା, ଅସିତା’ୱନ୍ତିକାପି ଚ ।
ମହାଖୀଣାସୱା ସବ୍ବେ, ଅହୋଗଙ୍ଗମ୍ହି ଓତରୁଂ ॥
ଭିକ୍ଖୱୋ ସନ୍ନିପତିତା, ସବ୍ବେ ତତ୍ଥ ତତୋ ତତୋ ।
ଆସୁଂ ନୱୁତିସହସ୍ସାନି, ମନ୍ତେତ୍ୱା ଅଖିଲା’ପି ତେ ॥
ସୋରେୟ୍ୟ ରେୱତତ୍ଥେରଂ, ବହୁସ୍ସୁତ ମନାସୱଂ ।
ତଂ କାଲପମୁଖଂ ଞତ୍ୱା, ପସ୍ସିତୁଂ ନିକ୍ଖମିଂସୁ ତଂ ॥
ଥେରୋ ତମ୍ମନ୍ତନଂ ସୁତ୍ୱା, ୱେସାଲିଂ ଗନ୍ତୁମେୱ ସୋ ।
ଇଚ୍ଛନ୍ତୋ ଫାସୁଗମନଂ, ତତୋ ନିକ୍ଖମି ତଙ୍ଖଣଂ ॥
ପାତୋ ପାତୋୱ ନିକ୍ଖନ୍ତ-ଟ୍ଠାନଂ ତେନ ମହତ୍ତନା ।
ସାୟଂ ସାୟମୁପେନ୍ତାନଂ, ସହଜୋତିୟମଦ୍ଦସୁଂ ॥
ତତ୍ଥ ସମ୍ଭୂତତ୍ଥେରେନ, ୟସତ୍ଥେରୋ ନିୟୋଜିତୋ ।
ସଦ୍ଧମ୍ମସୱନନ୍ତେ ତଂ, ରେୱତଥେର ମୁତ୍ତମଂ ॥
ଉପେଚ୍ଚ ଦସୱତ୍ଥୂନି, ପୁଚ୍ଛି ଥେରୋ ପଟିକ୍ଖିପି ।
ସୁତ୍ୱା’ଧିକରଣଂ ତଞ୍ଚ, ନିସେଧେମାତି ଅବ୍ରୱି ॥
ପାପାପି ପକ୍ଖଂ ପେକ୍ଖନ୍ତା, ରେୱତତ୍ଥେର ମୁତ୍ତମଂ ।
ସାମଣକଂ ପରିକ୍ଖାରଂ, ପଟିୟାଦିୟ ତେ ବହୁଂ ॥
ସୀଘଂ ନାୱାୟ ଗନ୍ତ୍ୱାନ, ସହଜାତିସମୀପଗା ।
କରୋନ୍ତି ଭତ୍ତୱିସ୍ସଗ୍ଗଂ, ଭତ୍ତକାଲେ ଉପଟ୍ଠିତେ ॥
ସହଜାତିଂ ଆୱସନ୍ତୋ, ସାଳଥେରୋ ୱିଚିନ୍ତିୟା ।
ପାୱେୟ୍ୟକା ଧମ୍ମୱାଦୀ, ଇତି ପସ୍ସି ଅନାସୱୋ ॥
ଉପେଚ୍ଚ ତଂ ମହାବ୍ରହ୍ମା, ଧମ୍ମେ ନିଟ୍ଠାତି ଅବ୍ରୱି ।
ନିଚ୍ଚଂ ଧମ୍ମେ ଠିତତ୍ତଂ ସୋ, ଅତ୍ତନୋ ତସ୍ସ ଅବ୍ରୱି ॥
ତେ ପରିକ୍ଖାରମାଦାୟ, ରେୱତତ୍ଥେରମଦ୍ଦସୁଂ ।
ଥେରୋ ନ ଗଣ୍ହି ତପ୍ପକ୍ଖ-ଗାହୀ ସିସ୍ସଂ ପଣାମୟୀ ॥
ୱେସାଲିଂ ତେ ତତୋ ଗନ୍ତ୍ୱା, ତତୋ ପୁପ୍ଫପୁରଂ ଗତା ।
ୱଦିଂସୁ କାଳାସୋକସ୍ସ, ନରିନ୍ଦସ୍ସ ଅଲଜ୍ଜୀନୋ ॥
ସତ୍ଥୁସ୍ସ ନୋ ଗନ୍ଧକୁଟିଂ, ଗୋପୟନ୍ତୋ ମୟଂ ତହିଂ ।
ମହାୱନୱିହାରସ୍ମିଂ, ୱସାମ ୱଜ୍ଜୀଭୂମିୟଂ ॥
ଗଣ୍ହିସ୍ସାମ ୱିହାର’ନ୍ତି, ଗାମୱାସିକସିକ୍ଖୱୋ ।
ଆଗଚ୍ଛନ୍ତି ମହାରାଜ, ମଟିସେଧୟ ତେ ଇତି ॥
ରାଜାନଂ ଦୁଗ୍ଗହିତଂ ତେ, କତ୍ୱା ୱେସାଲିମାଗମୁଂ ।
ରେୱତତ୍ଥେର ମୂଲମ୍ହି, ସହଜାତିୟମେତ୍ଥ ତୁ ॥
ଭିକ୍ଖୂ ସତସହସ୍ସାନି, ଏକାଦସ ସମାଗତା ।
ନୱୁତିଞ୍ଚ ସହସ୍ସାନି, ଅହୁ ତଂ ୱତ୍ଥୁ ସନ୍ତିୟା ॥
ମୂଲଟ୍ଠେହି ୱିନା ୱତ୍ଥୁ-ସମନଂ ନେୱ ରୋଚୟି ।
ଥେରୋ ସବ୍ବେପି ଭିକ୍ଖୂ ତେ, ୱେସାଲିମାଗମୁଂ ତତୋ ॥
ଦୁଗ୍ଗହିତୋୱ ସୋ ରାଜା, ତତ୍ଥାମଚ୍ଚେ ଅପେସୟି ।
ମୂଳା ଦେୱାନୁଭାୱେନ, ଅଞ୍ଞତ୍ଥ ଅଗମିଂସୁ ତେ ॥
ପେସେତ୍ୱା ତେ ମହୀପାଲୋ, ତଂ ରତ୍ତିଂ ସୁପିନେନସୋ ।
ଅପସ୍ସି ସକମତ୍ତାନଂ, ପକ୍ଖିତ୍ତଂ ଲୋହକୁମ୍ଭିୟଂ ॥
ଅତିଭୀତୋ ଅହୁ ରାଜା, ତମସ୍ସା ସେତୁ ମାଗମା ।
ଭଗିନୀ ନନ୍ଦଥେରୀ ତୁ, ଆକାସେନ ଅନାସୱା ॥
ଭାରିୟଂ ତେ କତଂ କମ୍ମଂ, ଧମ୍ମିକେ’ୟ୍ୟେ ଖମାପୟ ।
ପକ୍ଖୋ ତେସଂ ଭୱିତ୍ୱା ତ୍ୱଂ, କୁରୁ ସାସନପଗ୍ଗହଂ ॥
ଏୱଂ କତେ ସୋତ୍ଥି ତୁୟ୍ହଂ, ହେସ୍ସତୀତି ଅପକ୍କମି ।
ପସାତେୟେୱ ୱେସାଲିଂ, ଗନ୍ତୁଂ ନିକ୍ଖମି ଭୂପତି ॥
ଗନ୍ତ୍ୱା ମହାୱନଂ ଭିକ୍ଖୂ-ସଙ୍ଘଂ ସୋ ସନ୍ନିପାତିୟ ।
ସୁତ୍ୱା ଉଭିନ୍ନଂ ୱାଦଞ୍ଚ, ଧମ୍ମପକ୍ଖଞ୍ଚ ରୋଚିୟ ॥
ଖମାପେତ୍ୱା ଧମ୍ମିକେ ତେ, ଭିକ୍ଖୂ ସବ୍ବେ ମହୀପତି ।
ଅତ୍ତନୋ ଧମ୍ମପକ୍ଖତ୍ତଂ, ୱତ୍ୱା ତୁମ୍ହେ ୟଥାରୁଚି ॥
ସମ୍ପଗ୍ଗହଂ ସାସନସ୍ସ, କରୋଥାତି ଚ ଭାସିୟ ।
ଦତ୍ୱା ଚ ତେସଂ ଆରକ୍ଖଂ, ଅଗମାସି ସକଂ ପୁରଂ ॥
ନିଚ୍ଛେତୁଂ ତାନି ୱତ୍ଥୂନି, ସଙ୍ଘୋ ସନ୍ନିପତୀ ତଦା ।
ଅନଗ୍ଗାନି ତତ୍ଥ ଭସ୍ସାନି, ସଙ୍ଘମଜ୍ଝେ ଅଜାୟିସୁଂ ॥
ତତୋ ସୋ ରେୱତତ୍ଥେରୋ, ସାୱେତ୍ୱା ସଙ୍ଘମଜ୍ଝଗୋ ।
ଉବ୍ଭାହିକାୟ ତଂ ୱତ୍ଥୁଂ, ସମେତୁଂ ନିଚ୍ଛୟଂ ଅକା ॥
ପାଚିନକେଚ ଚତୁରୋ, ଚତୁରୋ ପାୱେୟ୍ୟକେପି ଚ ।
ଉବ୍ଭାହିକାୟ ସମ୍ମନ୍ନି, ଭିକ୍ଖୂ ତଂ ୱତ୍ଥୁ ସନ୍ତିୟା ॥
ସବ୍ବକାମୀ ଚ ସାଳ୍ହୋ ଚ, ଖୁଜ୍ଜସୋଭିତନାମକୋ ।
ୱାସଭଗାମିକୋ ଚାତି, ଥେରୋ ପାଚିନକା ଇମେ ॥
ୟସୋ କାକୋଣ୍ଡକତ୍ରଜୋ ।
ସୁମନୋ ଚାତି ଚତ୍ତାରୋ,
ଥେରା ପାୱେୟ୍ୟକା ଇମେ ॥
ସମେତୁଂ ତାନି ୱତ୍ଥୂନି, ଅପ୍ପସଦ୍ଦଂ ଅନାକୁଲଂ ।
ଅଗମୁଂ ୱାଲୁକାରାମଂ, ଅଟ୍ଠତ୍ଥେରା ଅନାସୱା ॥
ଦହରେନା’ଜି ତେ ନେତ୍ଥ, ପଞ୍ଞତ୍ତେ ଆସନେ ସୁଭେ ।
ନିସୀଦିଂସୁ ମହାଥେରା, ମହାମୁନି ମତଞ୍ଞୁନୋ ॥
ତେସୁ ୱତ୍ଥୂସୁ ଏକେକଂ, କମତୋ ରେୱତୋ ମହା ।
ଥେରୋ ଥେରଂ ସବ୍ବକାମିଂ, ପୁଚ୍ଛି ପୁଚ୍ଛାସୁ କୋୱିଦୋ ॥
ସବ୍ବକାମୀ ମହାଥେରୋ, ତେନ ପୁଟ୍ଠୋ’ଥ ବ୍ୟାକରି ।
ସବ୍ବାନି ତାନି ୱତ୍ଥୂନି, ନ କପ୍ପନ୍ତୀତି ସୁତ୍ତତୋ ॥
ନିହନିତ୍ୱା’ଧିକରଣଂ, ତଂ ତେ ତତ୍ଥ ୟଥାକ୍କମଂ ।
ତଥେୱ ସଙ୍ଘମଜ୍ଝେପି, ପୁଚ୍ଛାୱିସ୍ସଜ୍ଜନଂ କରୁଂ ॥
ନିଗ୍ଗହଂ ପାପଭିକ୍ଖୂନଂ, ଦସୱତ୍ଥୁକଦୀପନଂ ।
ତେସଂ ଦସସହସ୍ସାନଂ, ମହାଥେରୋ ଅକଂସୁ ତେ ॥
ସବ୍ବକାମୀ ପୁଥୱିୟା, ସଙ୍ଘତ୍ଥେରୋ ତଦା ଅହୁ ।
ସୋ ୱୀସଂ ୱସ୍ସସତିକୋ, ତଦା’ସି ଉପସମ୍ପଦା ॥
ସବ୍ବକାମୀ ଚ ସାଳ୍ହୋ ଚ,
ରେୱତୋ ଖୁଜ୍ଜସୋଭିତୋ ।
ୟସୋ କାକୋଣ୍ଡକସୁତୋ,
ସମ୍ଭୂତୋ ସାଣୱାସିକୋ ॥
ଥେରା ଆନନ୍ଦତ୍ଥେରସ୍ସ, ଏତେ ସଦ୍ଧିୱିହାରିନୋ ।
ୱାସଭଗାମିକୋ ଚେୱ, ସୁମନୋ ଚ ଦୁୱେ ପନ ॥
ଥେରା’ନୁରୁଦ୍ଧତ୍ଥେରସ୍ସ, ଏତେ ସଦ୍ଧିୱିହାରିନୋ ।
ଅଟ୍ଠ ଥେରା’ପି ଧଞ୍ଞା ତେ, ଦିଟ୍ଠପୁବ୍ବା ତଥାଗତଂ ॥
ଭିକ୍ଖୂ ସତସହସ୍ସାନି, ଦ୍ୱାଦସାସୁଂ ସମାଗତା ।
ସବ୍ବେସଂ ରେୱତତ୍ଥେରୋ, ଭିକ୍ଖୂନଂପମୁଖୋତଦା ॥
ତତୋ ସୋ ରେୱତତ୍ଥେରୋ, ସଦ୍ଧମ୍ମଟ୍ଠିତିୟା ଚିରଂ ।
କାରେତୁଂ ଧମ୍ମସଂଗୀତିଂ, ସବ୍ବଭିକ୍ଖୁସମୂହତୋ ॥
ପଭିନ୍ନତ୍ଥାଦିଞାଣାନଂ, ପିଟକତ୍ତୟଧାରିନଂ ।
ସତାନି ସତ୍ତଭିକ୍ଖୂନଂ, ଅରହନ୍ତାନମୁଚ୍ଚିନି ॥
ତେ ସବ୍ବେ ୱାଲୁକାରାମେ, କାଳାସୋକେନ ରକ୍ଖିତା ।
ରେୱତତ୍ଥେରପାମୋକ୍ଖା, ଅକରୁଂ ଧମ୍ମସଙ୍ଗହଂ ॥
ପୁବ୍ବେ କତଂ ତଥା ଏୱ, ଧମ୍ମଂ ପଚ୍ଛା ଚ ଭାସିତଂ ।
ଆଦାୟ ନିଟ୍ଠପେସୁଂ ତଂ, ଏତଂ ମାସେହି ଅଟ୍ଠହି ॥
ଏୱଂ ଦୁତିୟସଂଗୀତିଂ, କତ୍ୱା ତେପି ମହାୟସା ।
ଥେରା ଦୋସକ୍ଖୟଂ ପତ୍ତା, ପତ୍ତାକାଲେନ ନିବ୍ବୁତିଂ ॥
ଇତି ପରମମତୀନଂ ପତ୍ତିପତ୍ତବ୍ବକାନଂ,
ତିଭୱହିତକରାନଂ ଲୋକନାଥେରସାନଂ ।
ସୁମରିୟମରଣଂ ତଂ ସଙ୍ଖତା ସାରକତ୍ତଂ,
ପରିଗଣିୟମସେସଂ ଅପ୍ପମତ୍ତୋ ଭୱେୟ୍ୟାତି ॥
ସୁଜନପ୍ପସାଦସଂୱେଗତ୍ଥାୟ କତେ
ମହାୱଂସେ ଦୁତିୟସଂଗୀତି ନାମ
ଚତୁତ୍ଥୋ ପରିଚ୍ଛେଦୋ ।
ପଞ୍ଚମ ପରିଚ୍ଛେଦ
ତତିୟଧମ୍ମସଂଗୀତି
ୟା ମହାକସ୍ସପାଦୀହି, ମହାଥେରେହି ଆଦିତୋ ।
କତା ସଦ୍ଧମ୍ମ ସଂଗୀତି, ଥେରିୟା’ତି ପୱୁଚ୍ଚତି ॥
ଏକୋ’ୱ ଥେରୱାଦୋ ସୋ, ଆଦିୱସ୍ସସତେ ଅହୁ ।
ଅଞ୍ଞାଚରିୟୱାଦାତୁ, ତତୋ ଓରଂ ଅଜାୟିସୁଂ ॥
ତେହି ସଂଗୀତିକାରେହି, ଥେରେହି ଦୁତିୟେହି ତେ ।
ନିଗ୍ଗହିତା ପାପଭିକ୍ଖୂ, ସବ୍ବେ ଦସସହସ୍ସକା ॥
ଅକଂସା’ଚରିୟୱାଦଂ ତେ, ମହାସଂଗୀତିନାମକା ।
ତତୋ ଗୋକୁଲିକା ଜାତା, ଏକବ୍ବୋହାରିକାପି ଚ ॥
ଗୋକୁଲିକେହି ପଣ୍ଣତ୍ତି-ୱାଦା ବାହୁଲିକାପି ଚ ।
ଚେତିୟୱାଦା ତେସ୍ୱେୱ, ସମତାସଙ୍ଘିକା ଛ ତେ ॥
ପୁନାପି ଥେରୱାଦେହି, ମହିଂସାସକଭିକ୍ଖୱୋ ।
ୱଜ୍ଜୀପୁତ୍ତକଭିକ୍ଖୂ ଚ, ଦୁୱେ ଜାତା ଇମେ ଖଲୁ ॥
ଜାତା’ଥ ଧମ୍ମୁତ୍ତରିୟା, ଭଦ୍ରୟାନିକଭିକ୍ଖୱୋ ।
ଛନ୍ନାଗାରା ସମ୍ମିତିୟା, ୱଜ୍ଜୀପୁତ୍ତିୟଭିକ୍ଖୂତି ॥
ମହିଂସାସକଭିକ୍ଖୂହି, ଭିକ୍ଖୂ ସବ୍ବତ୍ଥ ୱାଦିନୋ ।
ଧମ୍ମଗୁତ୍ତିୟଭିକ୍ଖୂ ଚ, ଜାତା ଖଲୁ ଇମେ ଦୁୱେ ॥
ଜାତା ସବ୍ବତ୍ଥିୱାଦୀହି, କସ୍ସପିୟା ତତୋ ପନ ।
ଜାତା ସଙ୍କନ୍ତିକା ଭିକ୍ଖୂ, ସୁତ୍ତୱାଦା ତତୋ ପନ ॥
ଥେରୱାଦେନ ସହ ତେ, ହୋନ୍ତି ଦ୍ୱାଦସି’ମେପି ଚ ।
ପୁବ୍ବେ ୱୁତ୍ତଛୱାଦା ଚ, ଇତି ଅଟ୍ଠାରସା ଖିଲା ॥
ସତ୍ତରସାପି ଦୁତିୟେ, ଜାତା ୱସସ୍ସତେ ଇତି ।
ଅଞ୍ଞାଚରିୟୱାଦା ତୁ, ତତୋ ଓରମଜାୟିସୁଂ ॥
ହେମତା ରାଜଗିରିୟା, ତଥା ସିଦ୍ଧତ୍ଥିକାପି ଚ ।
ପୁବ୍ବସେଲିୟଭିକ୍ଖୂ ଚ, ତଥା ଅପରସେଲିୟା ॥
ୱାଜିରିୟା ଛ ଏତେହି, ଜମ୍ବୁଦୀପମ୍ହି ଭିନ୍ନକା ।
ଧମ୍ମରୁଚି ଚ ସାଗଲିୟା, ଲଂକାଦୀପମ୍ହି ଭିନ୍ନକା ॥
ଆଚରିୟକୁଲୱାଦକଥା ନିଟ୍ଠିତା ।
ଧମ୍ମାସୋକାଭିସେକ
କାଳାସୋକସ୍ସ ପୁତ୍ତା ତୁ, ଅହେସୁଂ ଦସଭାତିକା ।
ବାୱୀସତିଂ ତେ ୱସ୍ସାନି, ରଜ୍ଜଂ ସମନୁସାସିସୁଂ ॥
ନୱ ନନ୍ଦା ତତୋ ଆସୁଂ, କମେନେୱ ନରାଧିପା ।
ତେ’ପି ବାୱୀସୱସ୍ସାନି, ରଜ୍ଜଂ ସମନୁସାସିସୁଂ ॥
ମୋରିୟାନଂ ଖତ୍ତିୟାନଂ, ୱଂସେ ଜାତଂ ସିରିଧରଂ ।
ଚନ୍ଦଗୁତ୍ତୋତି ପଞ୍ଞାତଂ, ଚାଣକ୍କୋ ବ୍ରାହ୍ମଣୋ ତତୋ ॥
ନୱମଂ ଧନନନ୍ଦଂ ତଂ, ଘାତେତ୍ୱା ଚଣ୍ଡକୋଧସା ।
ସକଲେ ଜମ୍ବୁଦୀପସ୍ମିଂ, ରଜ୍ଜେ ସମଭିସିଞ୍ଚୀ ସୋ ॥
ସୋ ଚତୁୱୀସୱସ୍ସାନିଂ, ରାଜା ରଜ୍ଜମକାରୟି ।
ତସ୍ସ ପୁତ୍ତୋ ବିନ୍ଦୁସାରୋ, ଅଟ୍ଠୱୀସତି କାରୟି ॥
ବିନ୍ଦୁସାରସୁତା ଆସୁଂ, ସତଂ ଏକୋ ଚ ୱିସ୍ସୁତା ।
ଅସୋକୋ ଆସି ତେସଂ ତୁ, ପୁଞ୍ଞତେଜୋବଲିଦ୍ଧିକୋ ॥
ୱେମାତିକେ ଭାତରୋ ସୋ, ହନ୍ତ୍ୱା ଏକୂନକଂ ସତଂ ।
ସକଲେ ଜମ୍ବୁଦୀପସ୍ମିଂ, ଏକରଜ୍ଜମପାପୁଣି ॥
ଜିନନିବ୍ବାନତୋ ପଚ୍ଛା, ପୁରେ ତସ୍ସାଭିସେକତୋ ।
ସାଟ୍ଠାରସଂ ୱସ୍ସସତ-ଦ୍ୱୟମେୱଂ ୱିଜାନିୟ ॥
ପତ୍ୱା ଚତୂହି ୱସ୍ସେହି, ଏକରଜ୍ଜଂ ମହାୟସୋ ।
ପୁରେ ପାଟଲିପୁତ୍ତସ୍ମିଂ, ଅତ୍ତାନମଭିସେଚୟି ॥
ତସ୍ସା’ଭିସେକେନ ସମଂ, ଆକାସେ ଭୂମିୟଂ ତଥା ।
ୟୋଜନେ ୟୋଜନେ ଆଣା, ନିଚ୍ଚଂ ପୱତ୍ତିତା ଅହୁ ॥
ଅନୋତତ୍ତୋ ଦକାକାଜେ, ଅଟ୍ଠନେସୁଂ ଦିନେ ଦିନେ ।
ଦେୱା ଦେୱୋ ଅକା ତେହି, ସଂୱିଭାଗଂ ଜନସ୍ସଚ ॥
ନାଗଲତାଦନ୍ତକଟ୍ଠଂ, ଆନେସୁଂ ହିମୱନ୍ତତୋ ।
ଅନେକେସଂ ସହସ୍ସାନଂ, ଦେୱା ଏୱ ପହୋନକଂ ॥
ଅଗଦା’ମଲକଞ୍ଚେୱ, ତଥାଗଦ ହରିତକଂ ।
ତତୋ’ୱ ଅମପକ୍କଞ୍ଚ, ୱଣ୍ଣଗନ୍ଧରସୁତ୍ତମଂ ॥
ପଞ୍ଚୱଣ୍ଣାନି ୱତ୍ଥାନି, ତତ୍ଥପୁଞ୍ଜନପଟ୍ଟକଂ ।
ପୀତଞ୍ଚ ଦିବ୍ବପାନଞ୍ଚ, ଛଦ୍ଦନ୍ତଦହତୋ ମରୁ ॥
ମରନ୍ତା ନଗରେ ତସ୍ମିଂ, ମିଗସୂକରପକ୍ଖିନୋ ।
ଆଗନ୍ତ୍ୱାନ ମହାନସଂ, ସୟମେୱ ମରନ୍ତି ଚ ॥
ଗାୱୋ ତତ୍ଥ ଚରାପେତ୍ୱା, ୱଜମାନେନ୍ତି ଦୀପିନୋ ।
ଖେତ୍ତ ୱତ୍ଥୁତଳାକାଦିଂ, ପାଲେନ୍ତି ମିଗସୂକରା ॥
ସୁମନଂ ପୁପ୍ଫପଟକଂ, ଅଭୁତ୍ତଂ ଦିବ୍ବମୁପ୍ପଲଂ ।
ୱିଲେପନଂ ଅଞ୍ଜନଞ୍ଚ, ନାଗାନାଗାୱିମାନତୋ ॥
ସାଲିୱାହସହସ୍ସାନି, ନୱୁତିଂ ତୁ ସୁୱା ପନ ।
ଛଦ୍ଦନ୍ତଦହତୋୟେୱ, ଆହରିଂସୁ ଦିନେ ଦିନେ ॥
ତେ ସାଲିନିତ୍ଥୁସକଣେ, ଅଖଣ୍ଡେତ୍ୱାନ ତଣ୍ଡୁଲେ ।
ଅକଂସୁ ମୂସିକା ତେହି, ଭତ୍ତଂ ରାଜକୁଲେ ଅହୁ ॥
ଅକଂସୁ ସସ୍ସତଂ ତସ୍ସ, ମଧୂନି ମଧୁମକ୍ଖିକା ।
ତଥା କମ୍ମାରସାଲାସୁ, ଅଚ୍ଛାକୂଟାନି ପାତୟୁଂ ॥
କରୱିକା ସକୁଣିକା, ମନୁଞ୍ଞମଧୁରସ୍ସରା ।
ଅକଂସୁ ତସ୍ସା’ଗନ୍ତ୍ୱାନ, ରଞ୍ଞୋ ମଧୁରୱସ୍ସିତଂ ॥
ରାଜା’ଭିସିତ୍ତୋ ସୋ’ସୋକୋ,
କୁମାରଂ ତିସ୍ସସୱ୍ହୟଂ ।
କଣିଟ୍ଠଂ ସଂସୋଦରିୟଂ, ଉପରଜ୍ଜେ’ଭିସେଚୟି ॥
ଧମ୍ମାସୋକାଭିସେକୋ ନିଟ୍ଠିତୋ
ନିଗ୍ରୋଧସାମଣେର ଦସ୍ସନ
ପିତା ସଟ୍ଠିସହସ୍ସାନି, ବ୍ରାହ୍ମଣେ ବ୍ରହ୍ମପକ୍ଖିକେ ।
ଭୋଜେସି ସୋପି ତେୟେୱ, ତୀଣି ୱସ୍ସାନି ଭୋଜୟି ॥
ଦିସ୍ୱା’ନୁପସମଂ ତେସଂ, ଅସୋକୋ ପରିୱେସନେ ।
ୱିଚେୟ୍ୟ ଦାନଂ ଦସ୍ସନ୍ତି, ଅମଚ୍ଚେ ସନ୍ନିୟୋଜିୟ ॥
ଆଣାପୟିତ୍ୱା ମତିମା, ନାନାପାସଣ୍ଡିକେ ୱିସୁଂ ।
ୱୀମଂସିତ୍ୱା ନିସଜ୍ଜାୟ, ଭୋଜାପେତ୍ୱା ୱିସଜ୍ଜୟି ॥
କାଲେ ୱାତାୟନଗତୋ, ସନ୍ତଂ ରଚ୍ଛାଗତଂ ୟତିଂ ।
ନିଗ୍ରୋଧସାମଣେରଂ ସୋ, ଦିସ୍ୱା ଚିତ୍ତଂ ପସାଦୟି ॥
ବିନ୍ଦୁସାରସ୍ସ ପୁତ୍ତାନଂ, ସବ୍ବେସଂ ଜେଟ୍ଠଭାତୁନୋ ।
ସୁମନସ୍ସ କୁମାରସ୍ସ, ପୁତ୍ତୋ ସୋ ହି କୁମାରକୋ ॥
ଅସୋକୋ ପିତରା ଦିନ୍ନଂ, ରଜ୍ଜମୁଜ୍ଜେନିୟଞ୍ହି ସୋ ।
ହିତ୍ୱା’ଗତୋ ପୁପ୍ଫପୁରଂ, ବିନ୍ଦୁସାରେ ଗିଲାନକେ ॥
କତ୍ୱା ପୁରଂ ସକାୟତ୍ତଂ, ମତେ ପିତରି ଭାତରଂ ।
ଘାତେତ୍ୱା ଜେଟ୍ଠକଂ ରଜ୍ଜଂ, ଅଗ୍ଗହେସି ପୁରେ ୱରେ ॥
ସୁମନସ୍ସ କୁମାରସ୍ସ, ଦେୱୀ ତନ୍ନାମିକା ତତୋ ।
ଗବ୍ଭିନୀ ନିକ୍ଖମିତ୍ୱାନ, ପାଚିନଦ୍ୱାରତୋ ବହି ॥
ଚଣ୍ଡାଲଗାମ ମଗମା, ତତ୍ଥ ନିଗ୍ରୋଧଦେୱତା ।
ତମାଲପିୟନାମେନ, ମା ପତ୍ୱା ଘରକଂ ଅଦା ॥
ତଦହେ’ୱ ୱରଂ ପୁତ୍ତଂ, ୱିଜାୟିତ୍ୱା ସୁତସ୍ସ ସା ।
ନିଗ୍ରୋଧୋତି ଅକା ନାମଂ, ଦେୱତା ନୁଗ୍ଗହାନୁଗା ॥
ଦିସ୍ୱା ତଂ ଜେଟ୍ଠଚଣ୍ଡାଲୋ, ଅତ୍ତନୋ ସାମିନିଂ ୱିୟ ।
ମଞ୍ଞନ୍ତୋ ତଂ ଉପଟ୍ଠାସି, ସତ୍ତୱସ୍ସାନି ସାଧୁକଂ ॥
ତଂ ମହାୱରୁଣୋ ଥେରୋ, ତଦା ଦିସ୍ୱା କୁମାରକଂ ।
ଉପନିସ୍ସୟ ସମ୍ପନ୍ନଂ, ଅରହା ପୁଚ୍ଛି ମାତରଂ ॥
ପବ୍ବାଜେସି ଖୁରଗ୍ଗେ ସୋ, ଅରହତ୍ତମପାପୁଣି ।
ଦସ୍ସନାୟୋ’ପ ଗଚ୍ଛନ୍ତୋ, ସୋ ତତୋ ମାତୁଦେୱିୟା ॥
ଦକ୍ଖିଣେନ ଚ ଦ୍ୱାରେନ, ପୱିସିତ୍ୱା ପୁରୁତ୍ତମଂ ।
ତଂ ଗାମଗାମିମଗ୍ଗେନ, ୟାତି ରାଜଙ୍ଗଣେ ତଦା ॥
ସନ୍ତାୟ ଇରିୟା ୟସ୍ମିଂ, ପସୀଦି ସମହୀପତି ।
ପୁବ୍ବେ’ୱ ସନ୍ନିୱାସେନ, ପେମଂ ତସ୍ମିଂ ଅଜାୟଥ ॥
ପୁବ୍ବେ କିର ତୟୋ ଆସୁଂ, ଭାତରୋ ମଧୁ ୱାଣିଜା ।
ଏକୋ ମଧୁଂ ୱିକ୍କିଣାତି, ଆହରନ୍ତି ମଧୁଂ ଦୁୱେ ॥
ଏକୋ ପଚ୍ଚେକସମ୍ବୁଦ୍ଧୋ, ୱଣରୋଗାତୁରୋ ଅହୁ ।
ଅଞ୍ଞୋ ପଚ୍ଚେକସମ୍ବୁଦ୍ଧୋ, ତଦତ୍ଥଂ ମଧୁୱତ୍ଥିକୋ ॥
ପିଣ୍ଡଚାରିକୱତ୍ତେନ, ନଗରଂ ପାୱିସୀ ତଦା ।
ତିତ୍ଥଂ ଜଲତ୍ଥଂ ଗଚ୍ଛନ୍ତି, ଏକା ଚେଟୀ ତମଦ୍ଦସ ॥
ପୁଚ୍ଛିତ୍ୱା ମଧୁକାମତ୍ତଂ, ଞତ୍ୱା ହତ୍ଥେନ ଆଦିସି ।
ଏସୋ ମଧ୍ୱାପଣୋ ଭନ୍ତେ, ତତ୍ଥ ଗଚ୍ଛା’ତି ଅବ୍ରୱି ॥
ତତ୍ଥ ପତ୍ତସ୍ସ ବୁଦ୍ଧସ୍ସ, ୱାଣିଜୋ ସୋ ପସାଦୱା ।
ୱିସ୍ସନ୍ଦୟନ୍ତୋ ମୁଖତୋ, ପତ୍ତପୁରଂ ମଧୁଂ ଅଦା ॥
ପୁଣ୍ଣଞ୍ଚ ଉପ୍ପତନ୍ତଞ୍ଚ, ପତିତଞ୍ଚ ମହୀତଲେ ।
ଦିସ୍ୱା ମଧୁଂ ପସନ୍ନୋ ସୋ, ଏୱଂ ପଣିଦହୀ ତଦା ॥
ଜମ୍ବୁଦୀପେ ଏକରଜ୍ଜଂ, ଦାନେନା’ନେନ ହୋତୁ ମେ ।
ଆକାସେ ୟୋଜନେ ଆଣା, ଭୂମିୟଂ ୟୋଜନେତି ଚ ॥
ଭାତରେ ଆଗତେ ଆହ, ଏଦିସସ୍ସ ମଧୁଂ ଅଦଂ ।
ଅନୁମୋଦଥ ତୁମ୍ହେ ତଂ, ତୁମ୍ହାକଞ୍ଚ ୟତୋ ମଧୁ ॥
ଜେଟ୍ଠୋ ଆହ ଅତୁଟ୍ଠୋ ସୋ,
ଚଣ୍ଡାଲୋ ନୂନ ସୋସିୟଂ ।
ନିୱାସେନ୍ତୀତି ଚଣ୍ଡାଲା,
କାସାୟାନି ସଦା ଇତି ॥
ମଜ୍ଝୋ ପଚ୍ଚେକବୁଦ୍ଧଂ ତଂ, ଖିପପାରଣ୍ଣୱେ ଇତି ।
ପତ୍ତିଦାନୱଚୋ ତସ୍ସ, ସୁତ୍ୱା ତେ ଚାନୁମୋଦିସୁଂ ॥
ଆପଣା ଦେସିକଂ ୟାତୁ, ଦେୱିତ୍ତଂ ତସ୍ସ ପତ୍ଥୟି ।
ଆଦିସ୍ସମାନସନ୍ଧି ଚ, ରୂପଂ ଅତିମନୋରମଂ ॥
ଅସୋକୋ ମଧୁଦୋ’ସନ୍ଧି-ମିତ୍ତାଦେୱୀ ତୁ ଚେଟିକା ।
ଚଣ୍ଡାଲୱାଦୀ ନିଗ୍ରୋଧୋ, ତିସ୍ସୋ ସୋ ପାରୱାଦିକୋ ॥
ଚଣ୍ଡାଲୱାଦୀ ଚଣ୍ଡାଲ-ଗାମେ ଆସି ୟତୋ ତୁ ସୋ ।
ପତ୍ଥେସି ମୋକ୍ଖଂ ମୋକ୍ଖଞ୍ଚ, ସତ୍ତ ୱସ୍ସୋୱ ପାପୁଣି ॥
ନିୱିଟ୍ଠପେମୋ ତସ୍ମିଂ ସୋ, ରାଜା’ତି ତୁରିତୋ ତତୋ ।
ପକ୍କୋସାପେସି ତଂ ସୋ ତୁ, ସନ୍ତୱୁତ୍ତୀ ଉପାଗମି ॥
ନିସିଦ ତାତା’ନୁରୂପେ, ଆସନେ ତା’ହ ଭୂପତି ।
ଅଦିସ୍ୱା ଭିକ୍ଖୁମଞ୍ଞଂ ସୋ, ସୀହାସନମୁପାଗମି ॥
ତସ୍ମିଂ ପଲ୍ଲଙ୍କମାୟାତେ, ରାଜାଇତି ୱିଚିନ୍ତୟି ।
ଅଜ୍ଜା’ୟଂ ସାମଣେରୋ ମେ, ଘରେ ହେସ୍ସତି ସାମିକୋ ॥
ଆଲମ୍ବିତ୍ୱା କରଂ ରଞ୍ଞୋ, ସୋ ପଲ୍ଲଙ୍କେ ସମାରୁହି ।
ନିସୀଦି ରାଜପଲ୍ଲଙ୍କେ, ସେତଚ୍ଛତ୍ତସ୍ସ ହେଟ୍ଠତୋ ॥
ଦିସ୍ୱା ତଥା ନିସିନ୍ନଂ ତଂ, ଅସୋକୋ ସୋ ମହୀପତି ।
ସମ୍ଭାୱେତ୍ୱାନ ଗୁଣତୋ, ତୁଟ୍ଠୋ’ତୀୱ ତଦା ଅହୁ ॥
ଅତ୍ତନୋ ପଟିୟତ୍ତେନ, ଖଜ୍ଜଭୋଜ୍ଜେନ ତପ୍ପିୟ ।
ସମ୍ବୁଦ୍ଧଦେସିତଂ ଧମ୍ମଂ, ସାମଣେରମପୁଚ୍ଛିତଂ ॥
ତସ୍ସ’ପ୍ପମାଦୱଗ୍ଗଂ ସୋ, ସାମଣେରୋ ଅଭାସଥ ।
ତଂ ସୁତ୍ୱା ଭୂମିପାଲୋ ସୋ, ପସନ୍ନୋ ଜିନସାସନେ ॥
ଅଟ୍ଠ ତେ ନିଚ୍ଚଭତ୍ତାନି, ଦମ୍ମି ତାତା’ତି ଆହ ତଂ ।
ଉପଜ୍ଝାୟସ୍ସ ମେ ରାଜ, ତାନି ଦମ୍ମୀତି ଆହ ସୋ ॥
ପୁନ ଅଟ୍ଠସୁ ଦିନ୍ନେସୁ, ତାନ’ଦା ଚରିୟସ୍ସ ସୋ ।
ପୁନ ଅଟ୍ଠସୁ ଦିନ୍ନେସୁ, ଭିକ୍ଖୁସଙ୍ଘସ୍ସ ତାନ’ଦା ॥
ପୁନ ଅଟ୍ଠସୁ ଦିନ୍ନେସୁ, ଅଧିୱାସେସି ବୁଦ୍ଧିମା ।
ଦ୍ୱତ୍ତିଂସଭିକ୍ଖୂ ଆଦାୟ, ଦୁତିୟଦିୱସେ ଗତୋ ॥
ସହତ୍ଥା ତପ୍ପିତୋ ରଞ୍ଞା, ଧମ୍ମଂ ଦେସିୟ ଭୂପତିଂ ।
ସରଣେସୁ ଚ ସୀଲେସୁ, ଠପେସି ସମହାଜନଂ ॥
ନିଗ୍ରୋଧସାମଣେରଦସ୍ସନଂ
ସାସନପ୍ପୱେସ
ତତୋ ରାଜା ପସନ୍ନୋ ସୋ, ଦିଗୁଣେନ ଦିନେ ଦିନେ ।
ଭିକ୍ଖୂ ସଟ୍ଠିସହସ୍ସାନି, ଅନୁପୁବ୍ବେନୁ’ପଠହି ॥
ତତ୍ଥିୟାନଂ ସହସ୍ସାନି, ନିକଡ୍ଢିତ୍ୱାନ ସଟ୍ଠିସୋ ।
ସଟ୍ଠିଭିକ୍ଖୁସହସ୍ସାନି, ଘରେ ନିଚ୍ଚମଭୋଜୟି ॥
ସଟ୍ଠିଭିକ୍ଖୁସହସ୍ସାନି, ଭୋଜେତୁଂ ତୁରିତୋ ହି ସୋ ।
ପଟିୟାଦାପୟିତ୍ୱାନ, ଖଜ୍ଜଭୋଜ୍ଜଂ ମହାରହଂ ॥
ଭୂସାପେତ୍ୱାନ ନଗରଂ, ଗନ୍ତ୍ୱା ସଙ୍ଘଂ ନିମନ୍ତିୟ ।
ଘରଂ ନେତ୍ୱାନ ଭୋଜେତ୍ୱା, ଦତ୍ୱା ସାମଣକଂ ବହୁଂ ॥
ସତ୍ଥାରା ଦେସିତୋ ଧମ୍ମୋ, କିତ୍ତକୋତି ଅପୁଚ୍ଛଥ ।
ବ୍ୟାକାସି ମୋଗ୍ଗଲିପୁତ୍ତୋ, ତିସ୍ସତ୍ଥେରୋ ତଦସ୍ସତଂ ॥
ସୁତ୍ୱାନ ଚତୁରାସୀତି, ଧମ୍ମକ୍ଖନ୍ଧା’ତି ସୋ’ବ୍ରୱି ।
ପୂଜେମି ତେ’ହଂ ପଚ୍ଚେକଂ, ୱିହାରେନା’ତି ଭୂପତି ॥
ଦତ୍ୱା ତଦା ଛନ୍ନୱୁତି-ଧନକୋଟିଂ ମହୀପତି ।
ପୁରେସୁ ଚତୁରାସୀତି-ସହସ୍ସେସୁ ମହୀତଲେ ॥
ତତ୍ଥ ତତ୍ଥେ’ୱ ରାଜୂହି, ୱିହାରେ ଆରଭାପୟି ।
ସୟଂ ଅସୋକାରାମଂ ତୁ, କାରାପେତୁଂ ସମାରଭି ॥
ରତନତ୍ତୟନିଗ୍ରୋଧ-ଗିଲାନାନନ୍ତି ସାସନେ ।
ପଚ୍ଚେକଂ ସତସହସ୍ସଂ, ସୋ ଦାପେସି ଦିନେ ଦିନେ ॥
ଧନେନ ବୁଦ୍ଧଦିନ୍ନେନ, ଥୂପପୂଜା ଅନେକଧା ।
ଅନେକେସୁ ୱିହାରେସୁ, ଅନେକେ ଅକରୁଂ ସଦା ॥
ଧନେନ ଧମ୍ମଦିନ୍ନେନ, ପଚ୍ଚୟେ ଚତୁରୋ ୱରେ ।
ଧମ୍ମଧରାନଂ ଭିକ୍ଖୂନଂ, ଉପନେତୁଂ ସଦା ନରା ॥
ଅନୋତତ୍ତୋଦକାଜେସୁ, ସଙ୍ଘସ୍ସ ଚତୁରୋ ଅଦା ।
ତେ ପିଟକାନଂ ଥେରାନଂ, ସଟ୍ଠିୟେ’କଂ ଦିନେ ଦିନେ ॥
ଏକଂ ଅସନ୍ଧିମିତ୍ତାୟ, ଦେୱିୟା ତୁ ଅଦାପୟି ।
ସୟଂ ପନ ଦୁୱେୟେୱ, ପରିଭୁଞ୍ଜି ମହୀପତି ॥
ସଟ୍ଠିଭିକ୍ଖୁସହସ୍ସାନଂ, ଦନ୍ତକଟ୍ଠଂ ଦିନେ ଦିନେ ।
ସୋଳସିତ୍ଥିସହସ୍ସାନଂ, ଅଦା ନାଗଲତାୱ୍ହୟଂ ॥
ଅଥେକଦିୱସଂ ରାଜା, ଚତୁସମ୍ବୁଦ୍ଧଦସ୍ସିନଂ ।
କପ୍ପାୟୁକଂ ମହାକାଳଂ, ନାଗରାଜଂ ମହିଦ୍ଧିକଂ ॥
ସୁଣିତ୍ୱା ତମାନେତୁଂ, ସୋଣ୍ଡସଙ୍ଖଲିବନ୍ଧନଂ ।
ପେସୟିତ୍ୱା ତମାନେତ୍ୱା, ସେତଚ୍ଛତ୍ତସ୍ସ ହେଟ୍ଠତୋ ॥
ପଲ୍ଲଙ୍କମ୍ହି ନିସୀଦେତ୍ୱା, ନାନାପୁପ୍ଫେହି ପୂଜିୟ ।
ସୋଳସିତ୍ଥିସହସ୍ସେହି, ପରିୱାରିୟ ଅବ୍ରୱି ॥
ସଦ୍ଧମ୍ମଚକ୍କୱତ୍ତିସ୍ସ, ସମ୍ବୁଦ୍ଧସ୍ସ ମହେସିନୋ ।
ରୂପଂ ଅନନ୍ତଞାଣସ୍ସ, ଦସ୍ସେହି ମମ ଭୋ ଇତି ॥
ଦ୍ୱତ୍ତିଂସଲକ୍ଖଣୂପେତଂ, ଅସୀତିବ୍ୟଞ୍ଜନୁଜ୍ଜଲଂ ।
ବ୍ୟାମପ୍ପଭାପରିକ୍ଖିତ୍ତଂ, କେତୁମାଲାହି ସୋଭିତଂ ॥
ନିମ୍ମାସି ନାଗରାଜା ସୋ, ବୁଦ୍ଧରୂପଂ ମନୋହରଂ ।
ତଂ ଦିସ୍ୱା’ତି ପସାଦସ୍ସ, ୱିମ୍ହୟସ୍ସ ଚ ପୂରିତୋ ॥
ଏତେନ ନିମ୍ମିତଂ ରୂପଂ, ଈଦିସଂ କୀଦିସଂ ନୁଖୋ ।
ତଥାଗତସ୍ସ ରୂପନ୍ତି, ଆସି ପିତୁନ୍ନତୁନ୍ନତୋ ॥
ଅକ୍ଖିପୂଜନ୍ତି ସଞ୍ଞାତଂ, ତଂ ସତ୍ତାହଂ ନିରନ୍ତରଂ ।
ମହାମହଂ ମହାରାଜ, କାରାପେସି ମହିଦ୍ଧିକୋ ॥
ଏୱଂ ମହାନୁଭାୱୋ ଚ, ସଦ୍ଧୋ ଚାପି ମହୀପତି ।
ଥେରୋ ଚ ମୋଗ୍ଗଲିପୁତ୍ତୋ, ଦିଟ୍ଠା ପୁବ୍ବେ ୱସୀହି ତେ ॥
ସାସନପ୍ପୱେସୋ ନିଟ୍ଠିତୋ ।
ମୋଗ୍ଗଲିପୁତ୍ତତିସ୍ସଥେରାଦୟୋ
ଦୁତିୟେ ସଙ୍ଗହେ ଥେରା, ପେକ୍ଖନ୍ତା’ନାଗତେହି ତେ ।
ସାସନୋପଦ୍ଦୱଂ ତସ୍ସ, ରଞ୍ଞୋ କାଲମ୍ହି ଅଦ୍ଦସୁଂ ॥
ପେକ୍ଖାନ୍ତା ସକଲେ ଲୋକେ, ତଦୁପଦ୍ଦୱଘାତକଂ ।
ତିସ୍ସବ୍ରହ୍ମାନମଦ୍ଦକ୍ଖୁଂ, ଅଚିରଟ୍ଠାୟି ଜୀୱିତଂ ॥
ତେସଂ ସମୁପସଙ୍କମ୍ମ, ଆୟାଚିଂସୁ ମହାପତିଂ ।
ମନୁସ୍ସେସୁ’ପପଜ୍ଜିତ୍ୱା, ତଦୁପଦ୍ଦୱଘାତନଂ ॥
ଅଦା ପଟିଞ୍ଞଂ ତେସଂ ସୋ, ସାସନୁଜ୍ଜୋତନତ୍ଥିକୋ ।
ସିଗ୍ଗୱଂ ଚଣ୍ଡୱଜ୍ଜିଞ୍ଚ ଅୱୋଚୁଂ ଦହରେ ୟତି ॥
ଅଟ୍ଠାରସାଦିକା ୱସ୍ସ-ସତା ଉପରି ହେସ୍ସତି ।
ଉପଦ୍ଦୱୋ ସାସନସ୍ସ, ନ ସମ୍ଭୋସ୍ସାମ ତଂ ମୟଂ ॥
ଇମଂ ତୁମ୍ହା’ଧିକରଣଂ, ନୋପଗଞ୍ଛିତ୍ଥ ଭିକ୍ଖୱୋ ।
ଦଣ୍ଡକମ୍ମାରହା ତସ୍ମା, ଦଣ୍ଡକମ୍ମପଦଞ୍ହି ୱୋ ॥
ସାସନୁଜ୍ଜୋତନତ୍ଥାୟ, ତିସ୍ସବ୍ରହ୍ମା ମହାପତି ।
ମୋଗ୍ଗଲିବ୍ରାହ୍ମଣଘରେ, ପଟିସନ୍ଧିଂ ଗହେସ୍ସତି ॥
କାଲେ ତୁମ୍ହେସୁ ଏକୋ ତଂ, ପବ୍ବାଜେତୁ କୁମାରକଂ ।
ଏକୋ ତଂ ବୁଦ୍ଧୱଚନଂ, ଉଗ୍ଗଣ୍ହାପେତୁ ସାଧୁକଂ ॥
ଅହୁ ଉପାଲିଥେରସ୍ସ,
ଥେରୋ ସଦ୍ଧିୱିହାରିକୋ ।
ଦାସକୋ ସୋଣକୋ ତସ୍ସ,
ଦ୍ୱେ ଥେରା ସୋଣକସ୍ସିମେ ॥
ଅହୁ ୱେସାଲିୟଂ ପୁବ୍ବେ-ଦାସକୋ ନାମ ସୋତ୍ଥିୟୋ ।
ତିସିସ୍ସସତଜେଟ୍ଠୋ ସୋ, ୱସଂ ଆଚରିୟନ୍ତିକେ ॥
ଦ୍ୱାଦସୱସ୍ସିକୋୟେୱ, ୱେଦପାରଗତୋ ଚରଂ ।
ସସିସ୍ସୋ ୱାଲିକାରାମେ, ୱସନ୍ତଂ କତସଙ୍ଗହଂ ॥
ଉପାଲିଥେରଂ ପସ୍ସିତ୍ୱା, ନିସୀଦିତ୍ୱା ତଦନ୍ତିକେ ।
ୱେଦେସୁ ଗଣ୍ଠିଠାନାନି, ପୁଚ୍ଛି ସୋ ତାନି ବ୍ୟାକରି ॥
ସବ୍ବଧମ୍ମାନୁପତିତୋ, ଏକଧମ୍ମୋ ହି ମାଣୱ ।
ସବ୍ବେ ଧମ୍ମା ଓସରନ୍ତି, ଏକଧମ୍ମୋ ହି କୋ ନୁ ସୋ ॥
ଇଚ୍ଚାହ ନାମଂ ସନ୍ଧାୟ, ଥେରୋ ମାଣୱକୋ ତୁ ସୋ ।
ନା’ଞ୍ଞାସି ପୁଚ୍ଛିତୋ ମନ୍ତୋ, ବୁଦ୍ଧମନ୍ତୋତି ଭାସିତୋ ॥
ଦେହୀତି ଆହ ସୋ ଆହ, ଦେମ ନୋ ୱେସଧାରିନୋ ।
ଗୁରୁଂ ଆପୁଚ୍ଛି ମନ୍ତତ୍ଥଂ, ମାତରଂ ପିତରଂ ତଥା ॥
ମାଣୱାନଂ ସତେହେ’ସ, ତୀହି ଥେରସ୍ସ ସନ୍ତିକେ ।
ପବ୍ବଜିତ୍ୱାନ କାଲେନ, ଉପସମ୍ପଜ୍ଜି ମାଣୱୋ ॥
ଖୀଣାସୱସହସ୍ସଂ ସୋ, ଦାସକତ୍ଥେରଜେଟ୍ଠକଂ ।
ଉପାଲିଥେରୋ ୱାଚେସି, ସକଲଂ ପିଟକତ୍ତୟଂ ॥
ଗଣନା ୱୀତିୱତ୍ତା ତେ, ସେସା’ରିୟ ପୁଥୁଜ୍ଜନା ।
ପିଟକାନୁଗ୍ଗହିତାନି, ୟେହି ଥେରସ୍ସ ସନ୍ତିକେ ॥
କାସୀସୁ କୋସଲୋ ନାମ, ସତ୍ଥୱାହସୁତୋ ଅହୁ ।
ଗିରିବ୍ବଜଂ ୱଣିଜ୍ଜାୟ, ଗତୋ ମାତାପିତୂହି ସୋ ॥
ଅଗା ୱେଳୁୱନଂ ପଞ୍ଚ-ଦସୱସୋ କୁମାରକୋ ।
ମାଣୱଂ ପଞ୍ଚପଞ୍ଞାସ, ପରିୱାରିୟ ତଂ ଗତା ॥
ସଗଣଂ ଦାସକଂ ଥେରଂ, ତତ୍ଥ ଦିସ୍ୱା ପସୀଦିୟ ।
ପବ୍ବଜ୍ଜଂ ୟାଚି ସୋ ଆହ, ତୱା’ପୁଚ୍ଛ ଗୁରୁଂ ଇତି ॥
ଭତ୍ତତ୍ତୟମଭୁଞ୍ଜିତ୍ୱା, ସୋଣକୋ ସୋ କୁମାରକୋ ।
ମାତାପିତୂହି କାରେତ୍ୱା, ପବ୍ବଜ୍ଜାନୁଞ୍ଞମାଗତୋ ॥
ସଦ୍ଧିଂ ତେହି କୁମାରେହି, ଦାସକତ୍ଥେରସନ୍ତିକେ ।
ପବ୍ବଜ୍ଜଂ ଉପସମ୍ପଜ୍ଜ, ଉଗ୍ଗଣ୍ହି ପିଟକତ୍ତୟଂ ॥
ଖୀଣାସୱସହସ୍ସସ୍ସ, ଥେରସିସ୍ସ ଗଣସ୍ସ ସୋ ।
ଅହୋସି ପିଟକଞ୍ଞୁସ୍ସ, ଜେଟ୍ଠକୋ ସୋଣକୋ ୟତି ॥
ଅହୋସି ସିଗ୍ଗୱୋ ନାମ, ପୁରେ ପାଟଲିନାମକୋ ।
ପଞ୍ଞୱା’ମଚ୍ଚତନୟୋ, ଅଟ୍ଠାରସସମୋ ତୁ ସୋ ॥
ପାସାଦେସୁ ୱସଂ ତୀସୁ, ଛଳଡ୍ଢଉତୁସାଧୁସୁ ।
ଅମଚ୍ଚପୁତ୍ତଂ ଆଦାୟ, ଚଣ୍ଡୱଜ୍ଜିଂ ସହାୟକଂ ॥
ପୁରିସାନଂ ଦସଦ୍ଧେହି, ସତେହି ପରିୱାରିତୋ ।
ଗନ୍ତ୍ୱାନ କୁକ୍କୁଟାରାମଂ, ସୋଣକତ୍ଥେରମଦ୍ଦସ ॥
ସମାପତ୍ତିସମାପନ୍ନଂ, ନିସିନ୍ନଂ ସଂୱୁତିନ୍ଦ୍ରିୟଂ ।
ୱନ୍ଦି ତେନାଲପନ୍ତଂ ତଂ, ଞତ୍ୱା ସଙ୍ଘମପୁଚ୍ଛିତଂ ॥
ସମାପତ୍ତିସମାପନ୍ନା, ନାଲପନ୍ତୀ’ତି ଆହୁ ତେ ।
କଥନ୍ନୁ ୱୁଟ୍ଠହନ୍ତୀତି, ୱୁତ୍ତା ଆହଂସୁ ଭିକ୍ଖୱୋ ॥
ପକ୍କୋସନାୟ ସତ୍ଥୁସ୍ସ, ସଙ୍ଘପକ୍କୋସନାୟ ଚ ।
ୟଥା କାଲପରିଚ୍ଛେଦା, ଆୟୁକ୍ଖୟୱସେନ ଚ ॥
ୱୁଟ୍ଠହନ୍ତୀତି ୱତ୍ୱାନ, ତେସଂ ଦିସ୍ୱୋ’ପନିସ୍ସୟଂ ।
ପାହେସୁଂ ସଙ୍ଘୱଚନଂ, ୱୁଟ୍ଠାୟ ସ ତହିଂ ଅଗା ॥
କୁମାରୋ ପୁଚ୍ଛି କିଂ ଭନ୍ତେ, ନାଲପିତ୍ଥାତି ଆହ ସୋ ।
ଭୁଞ୍ଜିମ୍ହ ଭୁଞ୍ଜିତବ୍ବନ୍ତି, ଆହ ଭୋଜେଥ ନୋ ଅପି ॥
ଆହ ଅମ୍ହାଦିସେ ଜାହେ, ସକ୍କା ଭୋଜୟିତୁଂ ଇତି ।
ମାତାପିତୁ ଅନୁଞ୍ଞାୟ, ସୋ କୁମାରୋଥ ସିଗ୍ଗୱୋ ॥
ଚଣ୍ଡୱଜ୍ଜୀ ଚ ତେପଞ୍ଚ-ସତାନି ପୁରିସାପି ଚ ।
ପବ୍ବଜ୍ଜିତ୍ୱୋ’ପସମ୍ପଜ୍ଜୁଂ, ସୋଣତ୍ଥେରସ୍ସ ସନ୍ତିକେ ॥
ଉପଜ୍ଝାୟନ୍ତିକେୟେୱ, ତେ ଦୁୱେ ପିଟକତ୍ତୟଂ ।
ଉଗ୍ଗହେସୁଞ୍ଚ କାଲେନ, ଛଳଭିଞ୍ଞଂ ଲଭିଂସୁ ଚ ॥
ଞତ୍ୱା ତିସ୍ସ ପଟିସନ୍ଧିଂ, ତତୋ ପଭୁତି ସିଗ୍ଗୱୋ ।
ଥେରୋ ସୋ ସତ୍ତୱସ୍ସାନି, ତଂ ଘରଂ ଉପସଙ୍କମି ॥
ଗଚ୍ଛାତି ୱାଚାମତ୍ତମ୍ପି, ସତ୍ତୱସ୍ସାନି ନାଲଭି ।
ଅଲତ୍ଥ ଅଟ୍ଠମେ ୱସ୍ସେ, ଗଚ୍ଛାତି ୱଚନଂ ତହିଂ ॥
ତଂ ନିକ୍ଖମନ୍ତଂ ପୱିସନ୍ତୋ, ଦିସ୍ୱା ମୋଗ୍ଗଲିବ୍ରାହ୍ମଣୋ ।
କିଞ୍ଚି ଲଦ୍ଧଂ ଘରେ ନୋତି, ପୁଚ୍ଛି ଆମାତି ସୋ’ବ୍ରୱି ॥
ଘରଂ ଗନ୍ତ୍ୱାନ ପୁଚ୍ଛିତ୍ୱା, ଦୁତିୟେ ଦିୱସେ ତତୋ ।
ମୁସାୱାଦେନ ନିଗ୍ଗଣ୍ହି, ଥେରଂ ଘରମୁପାଗତଂ ॥
ଥେରସ୍ସ ୱଚନଂ ସୁତ୍ୱା, ସୋ ପସନ୍ନମନୋ ଦ୍ୱିଜୋ ।
ଅତ୍ତନୋ ପକତେନ’ସ୍ସ, ନିଚ୍ଚଂ ଭିକ୍ଖଂ ପୱତ୍ତୟି ॥
କମେନ’ସ୍ସ ପସୀଦିଂସୁ, ସବ୍ବେ’ପି ଘରମାନୁସା ।
ଭୋଜାପେସି ଦିଜୋ ନିଚ୍ଚଂ, ନିସୀଦାପିୟ ତଂ ଘରେ ॥
ଏୱଂ କମେନ ଗଚ୍ଛନ୍ତୋ, କାଲେ ସୋଳସୱସ୍ସିକୋ ।
ଅହୁ ତିସ୍ସକୁମାରୋ ସୋ, ତିୱେଦୋଦଧିପାରଗୋ ॥
ଥେରୋ କଥାସମୁଟ୍ଠାନଂ, ହେସ୍ସତେ’ୱ ଘରେ ଇତି ।
ଆସନାନି ନ ଦସ୍ସେସି, ଠପେତ୍ୱା ମାଣୱାସନଂ ॥
ବ୍ରହ୍ମଲୋକଗତତ୍ତାୱ, ସୁଚିକାମୋ ଅହୋସି ସୋ ।
ତସ୍ମା ସୋ ତସ୍ସ ପଲ୍ଲଙ୍କୋ, ୱାସୟିତ୍ୱା ଲଗୀୟତି ॥
ଅଞ୍ଞାସନଂ ଅପସ୍ସନ୍ତୋ, ଠିତେ ଥେରେ ସସମ୍ଭମୋ ।
ତସ୍ସ ତଂ ଆସନଂ ତସ୍ସ, ପଞ୍ଞପେସି ଘରେ ଜନୋ ॥
ଦିସ୍ୱା ତତ୍ଥ ନିସିନ୍ନଂ ତଂ, ଆଗମ୍ମା’ଚରିୟନ୍ତିକା ।
କୁଜ୍ଝିତ୍ୱା ମାଣୱୋ ୱାଚଂ, ଅମନାପଂ ଉଦୀରୟି ॥
ଥେରୋ ମାଣୱ କିଂ ମନ୍ତଂ, ଜାନାସୀତି ତମବ୍ରୱି ।
ତମେୱ ପୁଚ୍ଛଂ ଥେରସ୍ସ, ପଚ୍ଛା ରୋଚେସି ମାଣୱୋ ॥
ଜାନାମୀତି ପଟିଞ୍ଞାୟ, ଥେରେ ଥେରଂ ଅପୁଚ୍ଛିସୋ ।
ଗଣ୍ଠିଠାନାନି ୱେଦେସୁ, ତସ୍ସ ଥେରୋ’ଥ ବ୍ୟାକରି ॥
ୱେଦପାରଗତୋ ଅହୁ ।
ନ ବ୍ୟାକରେୟ୍ୟ କିଂ ତସ୍ସ,
ପଭିନ୍ନପଟିସମ୍ଭିଦୋ ॥
ୟସ୍ସ ଚିତ୍ତଂ ଉପ୍ପଜ୍ଜତି ନ ନିରୁଜ୍ଝତି,
ତସ୍ସ ଚିତ୍ତଂ ନିରୁଜ୍ଝିସ୍ସତି । ନ ଉପ୍ପଜ୍ଜିସ୍ସତି,
ୟସ୍ସ ୱା ପନ ଚିତ୍ତଂ ନିରୁଜ୍ଝିସତି ନ ଉପ୍ପଜ୍ଜିସ୍ସତି ।
ତସ୍ସ ଚିତ୍ତଂ ଉପ୍ପଜ୍ଜତି, ନ ନିରୁଜ୍ଝତୀତି ॥
ତଂ ଚିତ୍ତୟମକେ ପଞ୍ହଂ, ପୁଚ୍ଛି ଥେରୋ ୱିସାରଦୋ ।
ଅନ୍ଧକାରୋ ୱିୟ ଅହୁ, ତସ୍ସ ସୋ ତମୱୋଚ ସୋ ॥
ଭିକ୍ଖୁକୋ ନାମ ମନ୍ତୋତି, ବୁଦ୍ଧ ମନ୍ତୋତି ସୋ ବ୍ରୱି ।
ଦେହୀତି ୱୁତ୍ତେ ନୋୱେସ-ଧାରିନୋ ଦମ୍ମି ତଂ ଇତି ॥
ମାତାପିତୂହି’ନୁଞ୍ଞାତୋ, ମନ୍ତତ୍ଥାୟ ସ ପବ୍ବଜ୍ଜି ।
କମ୍ମଟ୍ଠାନମଦା ଥେରୋ, ପବ୍ବାଜେତ୍ୱା ୟଥାରହଂ ॥
ଭାୱନଂ ଅନୁୟୁଞ୍ଜନ୍ତୋ, ଅଚିରେନ ମହାମତୀ ।
ସୋତାଫତ୍ତିଫଲଂ ପତ୍ତୋ, ଥେରୋ ଞତ୍ୱାନ ତଂ ତଥା ॥
ପେସେସି ଚଣ୍ଡୱଜ୍ଜିସ୍ସ, ଥେରସ୍ସନ୍ତିକମୁଗ୍ଗହଂ ।
କାତୁଂ ସୁତ୍ତାଭିଧମ୍ମାନଂ, ସୋତତ୍ଥା’କାତଦୁଗ୍ଗହଂ ॥
ତତୋ ସୋ ତିସ୍ସଦହରୋ, ଆରଭିତ୍ୱା ୱିପସ୍ସନଂ ।
ଛଳଭିଞ୍ଞୋ ଅହୁ କାଲେ, ଥେରଭାୱଞ୍ଚ ପାପୁଣି ॥
ଅତୀୱ ପାକଟୋ ଆସି, ଚନ୍ଦୋ’ୱ ସୂରିୟୋ’ୱସୋ ।
ଲୋକୋ ତସ୍ସ ୱଚୋ’ମଞ୍ଞୀ, ସମ୍ବୁଦ୍ଧସ୍ସ ୱଚୋପିୟ ॥
ମୋଗ୍ଗଲିପୁତ୍ତତିସ୍ସଥେରୋଦୟୋ ନିଟ୍ଠୀତୋ ।
ଏକାହଂ ଉପରାଜା ସୋ, ଅଦକ୍ଖି ମିଗୱଂ ଗତୋ ।
କୀଳମାନେ ମିଗେ’ରଞ୍ଞେ, ଦିସ୍ୱା ଏତଂ ୱିଚିନ୍ତୟି ॥
ମିଗାପି ଏୱଂ କିଳନ୍ତି, ଅରଞ୍ଞେ ତିଣଗୋଚରା ।
ନ କିଳିସ୍ସନ୍ତି କିଂ ଭିକ୍ଖୂ, ସୁଖାହାରୱିହାରିନୋ ॥
ଅତ୍ତନୋ ଚିନ୍ତିତଂ ରଞ୍ଞୋ, ଆରୋଚେସି ଘରଂ ଗତୋ ।
ସଞ୍ଞାପେତୁଂ ତୁ ସତ୍ତାହଂ, ରଜ୍ଜଂ ତସ୍ସ ଅଦାସି ସୋ ॥
ଅନୁଭୋହି ଇମେ ରଜ୍ଜଂ, ସତ୍ତାହଂ ତ୍ୱଂ କୁମାରକ ।
ତତୋ ତଂ ଘାତୟିସ୍ସାମି, ଇଚ୍ଚ’ୱୋଚ ମହୀପତି ॥
ଆହା’ତି ତମ୍ହି ସତ୍ତାହେ,
ତ୍ୱଂ କେନା’ସି କିସୋ ଇତି ।
ମରଣସ୍ସ ଭୟେନାତି,
ୱୁତ୍ତେ ରାଜା’ହ ତଂ ପୁନ ॥
ସତ୍ତାହା’ହଂ ମରିସ୍ସଂତି, ତ୍ୱଂ ନ କୀଳି ଇମେ କଥଂ ।
କୀଳିସ୍ସନ୍ତି ୟତି ତାତ, ସଦା ମରଣସଞ୍ଞିନୋ ॥
ଇଚ୍ଚେୱଂ ଭାକରା ୱୁତ୍ତୋ, ସାସନସ୍ମିଂ ପସୀଦି ସୋ ।
କାଲେନ ମିଗୱଂ ଗନ୍ତ୍ୱା, ଥେରମଦକ୍ଖି ସଞ୍ଞତଂ ॥
ନିସିନ୍ନଂ ରୁକ୍ଖମୂଲସ୍ମିଂ, ସୋ ମହାଧମ୍ମରକ୍ଖିତଂ ।
ସାଲସାଖାୟ ନାଗେନ, ବୀଜୟନ୍ତ ମନାସୱଂ ॥
ଅୟଂ ଥେରୋ ୱିୟା’ହମ୍ପି, ପବ୍ବଜ୍ଜ ଜିନ ସାସନେ ।
ୱିହରିସ୍ସଂ କଦା ରଞ୍ଞେ, ଇତି ଚିନ୍ତୟି ପଞ୍ଞୱା ॥
ଥେରୋ ତସ୍ସ ପସାଦତ୍ଥଂ,
ଉପତିତ୍ୱା ୱିହାୟସା ।
ଗନ୍ତ୍ୱା ଅସୋକାରାମସ୍ସ,
ପୋକ୍ଖରଞ୍ଞୋ ଜଲେ ଠିତୋ ॥
ଆକାସେ ଠପୟିତ୍ୱାନ, ଚୀୱରାନି ୱରାନି ସୋ ।
ଓଗାହିତ୍ୱା ପୋକ୍ଖରଣୀ, ଗତ୍ତାନି ପରିସିଞ୍ଚଥ ॥
ତଂ ଇଦ୍ଧିଂ ଉପରାଜା ସୋ, ଦିସ୍ୱା’ତୀୱ ପସୀଦିୟ ।
ଅଜ୍ଜେୱ ପବ୍ବଜିସ୍ସଂତି, ବୁଦ୍ଧିଂଚା’କାସି ବୁଦ୍ଧିମା ॥
ଉପସଙ୍କମ୍ମ ରାଜାନଂ, ପବ୍ବଜ୍ଜଂ ୟାଚି ସାଦରୋ ।
ନିୱାରେତୁମସକ୍କୋନ୍ତୋ, ତମାଦାୟ ମହୀପତି ॥
ମହତା ପରିୱାରେନ, ୱିହାରମଗମା ସୟଂ ।
ପବ୍ବଜି ସୋ ମହାଧମ୍ମ-ରକ୍ଖିତତ୍ଥେରସନ୍ତିକେ ॥
ସଦ୍ଧିଂ ତେନ ଚତୁସତ-ସହସ୍ସାନି ନରାପି ଚ ।
ଅନୁପବ୍ବଜିତାନନ୍ତୁ, ଗଣନା ଚ ନ ୱଜ୍ଜତି ॥
ଭାଗିନେୟ୍ୟୋ ନରିନ୍ଦସ୍ସ, ଅଗ୍ଗି ବ୍ରହ୍ମାତି ୱିସ୍ସୁତୋ ।
ଅହୋସି ରଞ୍ଞୋ ଧୀତାୟ, ସଙ୍ଘମିତ୍ତାୟ ସାମିକୋ ॥
ତସ୍ସା ତସ୍ସ ସୁତୋ ଚାପି,
ସୁମନୋ ନାମ ନାମସୋ ।
ୟାଚିତ୍ୱା ସୋ’ପି ରାଜାନଂ,
ଉପରାଜେନ ପବ୍ବଜି ॥
ଉପରାଜସ୍ସ ପବ୍ବଜ୍ଜା, ତସ୍ସା’ସୋକସ୍ସ ରାଜିନୋ ।
ଚତୁତ୍ଥେ ଆସିୱସ୍ସେସା, ମହାଜନହିତୋଦୟା ॥
ତତ୍ଥେୱ ଉପସମ୍ପନ୍ନୋ, ସମ୍ପନ୍ନଉପନିସ୍ସୟୋ ।
ଘଟେନ୍ତୋ ଉପରାଜା ସୋ, ଛଳ’ଭିଞ୍ଞୋ’ରହା ଅହୁ ॥
ୱିହାରେ ତେସମାରଦ୍ଧେ, ସବ୍ବେ ସବ୍ବପୁରେସୁପି ।
ସାଧୁକଂ ତୀହି ୱସ୍ସେହି, ନିଟ୍ଠାପେସୁଂ ମନୋରମେ ॥
ଥେରସ୍ସ ଇନ୍ଦଗୁତ୍ତସ୍ସ, କମ୍ମାଦିଟ୍ଠାୟକସ୍ସ ତୁ ।
ଇଦ୍ଧିୟା ଚା’ସୁ ନିଟ୍ଠାସି, ଅସୋକାରାମସୱ୍ହୟୋ ॥
ଜନେନ ପରିଭୁତ୍ତେସୁ, ଠାନେସୁ ଚ ତହିଂ ତହିଂ ।
ଚେତିୟାନି ଅକାରେସି, ରମଣୀୟାନି ଭୂପତି ॥
ପୁରେହି ଚତୁରାସୀତି-ସହସ୍ସେହି ସମନ୍ତତୋ ।
ଲେଖେ ଏକାହମାନେସୁଂ, ୱିହାରା ନିଟ୍ଠିତା ଇତି ॥
ଲେଖେ ସୁତ୍ୱା ମହାରାଜା, ମହାତେଜିଦ୍ଧି ୱିକ୍କମୋ ।
କାତୁକାମୋ ସକିଂୟେୱ, ସବ୍ବାରାମ ମହାମହଂ ॥
ପୁରେ ଭେରିଂ ଚରାପେସି, ସତ୍ତମେ ଦିୱସେ ଇତୋ ।
ସବ୍ବାରାମମହୋ ହୋତୁ, ସବ୍ବଦେସେସୁ ଏକଦା ॥
ୟୋଜନେ ୟୋଜନେ ଦେନ୍ତୁ, ମହାଦାନଂ ମହୀତଲେ ।
କରୋନ୍ତୁ ଗାମାରାମାନଂ, ମଗ୍ଗାନଞ୍ଚ ୱିଭୂସନଂ ॥
ୱିହାରେସୁ ଚ ସବ୍ବେସୁ, ଭିକ୍ଖୁସଙ୍ଘସ୍ସ ସବ୍ବଥା ।
ମହାଦାନାନି ୱତ୍ତେନ୍ତୁ, ୟଥାକାଲଂ ୟଥାବଲଂ ॥
ଦୀପମାଲା ପୁମ୍ଫମାଲା-ଲଙ୍କାରେହି ତହିଂ ତହିଂ ।
ତୂରିୟେହି ଚ ସବ୍ବେହି, ଉପହାରଂ ଅନେକଧା ॥
ଉପୋସଥଙ୍ଗାନା’ଦାୟ, ସବ୍ବେ ଧମ୍ମଂ ସୁଣନ୍ତୁ ଚ ।
ପୂଜାୱିସେସେନ’ନେକେ ଚ, କରୋନ୍ତୁ ତଦହେପି ଚ ॥
ସବ୍ବେ ସବ୍ବତ୍ଥ ସବ୍ବଥା, ୟଥାଣତ୍ତାଧିକାପି ଚ ।
ପୂଜା ସମ୍ପଟିୟାଦେସୁଂ, ଦେୱଲୋକମନୋରମା ॥
ତସ୍ମିଂ ଦିନେ ମହାରାଜା, ସବ୍ବାଲଙ୍କାର ଭୂସିତୋ ।
ସହୋରୋଧୋ ସହାମଚ୍ଚୋ, ବଲୋଘ ପରିୱାରିତୋ ॥
ଅଗମାସି ସକାରାମଂ, ଭିନ୍ଦନ୍ତୋ ୱିୟ ମେଦିନିଂ ।
ସଙ୍ଘମଜ୍ଝମ୍ହି ଅଟ୍ଠାସି, ୱନ୍ଦିତ୍ୱା ସଙ୍ଘମୁତ୍ତମଂ ॥
ତସ୍ମିଂ ସମାଗମେ ଆସୁଂ, ଅସୀତି ଭିକ୍ଖୁକୋଟି ୟୋ ।
ଅହେସୁଂ ସତସହସ୍ସଂ, ତେସୁ ଖୀଣାସୱା ୟତି ॥
ନୱୁତି ଭିକ୍ଖୁସହସ୍ସାନି, ଅହୂ ଭିକ୍ଖୁନିୟୋ ତହିଂ ।
ଖିଣାସୱା ଭିକ୍ଖୁନିୟୋ, ସହସ୍ସଂ ଆସୁ ତାସୁ ତୁ ॥
ଲୋକୱିୱରଣଂ ନାମ, ପାଟିହୀରଂ ଅକଂସୁ ତେ ।
ଖୀଣାସୱା ପସାଦତ୍ଥଂ, ଧମ୍ମାସୋକସ୍ସ ରାଜିନୋ ॥
ଚଣ୍ଡାସୋକୋତି ଞାୟିତ୍ଥ, ପୁବ୍ବେ ପାପେନ କମ୍ମୁନା ।
ଧମ୍ମାସୋକୋତି ଞାୟିତ୍ଥ, ପଚ୍ଛା ପୁଞ୍ଞେନ କମ୍ମୁନା ॥
ସମୁଦ୍ଦପରିୟନ୍ତଂ ସୋ, ଜମ୍ବୁଦୀପଂ ସମନ୍ତତୋ ।
ପସ୍ସି ସବ୍ବେ ୱିହାରେ ଚ, ନାନାପୂଜା ୱିଭୂସିତେ ॥
ଅତୀୱ ତୁଟ୍ଠୋ ତେ ଦିସ୍ୱା, ସଙ୍ଘଂ ପୁଚ୍ଛି ନିସୀଦିୟ ।
କସ୍ସ ଭନ୍ତେ ପରିଚ୍ଚାଗୋ, ମହାସୁଗତ ସାସନେ ॥
ଥେରୋ ସୋ ମୋଗ୍ଗଲିପୁତ୍ତୋ, ରଞ୍ଞୋ ପଞ୍ହଂ ୱିୟାକରି ।
ଧରମାନେ’ପି ସୁଗତେ, ନତ୍ଥି ଚାଗୀ ତୟାସମୋ ॥
ତଂ ସୁତ୍ୱା ୱଚନଂ ଭିୟ୍ୟୋ, ତୁଟ୍ଠୋ ରାଜା ଅପୁଚ୍ଛି ତଂ ।
ବୁଦ୍ଧସାସନ ଦାୟାଦୋ, ହୋତି ଖୋ ମାଦିସୋ ଇତି ॥
ଥେରୋ ତୁ ରାଜପୁତ୍ତସ୍ସ, ମହିନ୍ଦସ୍ସୂ’ପନିସ୍ସୟଂ ।
ତଥେୱ ରାଜଧୀତାୟ, ସଙ୍ଘମିତ୍ତାୟ ପେକ୍ଖିୟ ॥
ସାସନସ୍ସା’ଭି ୱୁଦ୍ଧିଞ୍ଚ, ତଂ ହେତୁକମ ୱେକ୍ଖିୟ ।
ପଚ୍ଚାଭାସଥ ରାଜାନଂ, ସୋ ସାସନଧୁରନ୍ଧରୋ ॥
ତାଦିସୋ’ପି ମହାଚାଗୀ, ଦାୟାଦୋ ସାସନସ୍ସ ନ ।
ପଚ୍ଚୟଦାୟକୋ’ଚ୍ଚେୱ, ୱୁଚ୍ଚତେ ମନୁଜାଧୀପ ॥
ୟୋ ତୁ ପୁତ୍ତଂ ଧୀତରଂ ୱା,
ପବ୍ବଜ୍ଜାପେତି ସାସନେ ।
ସୋ ସାସନସ୍ସ ଦାୟାଦୋ,
ହୋତି ନୋ ଦାୟକୋ ଅପି ॥
ଅଥ ସାସନ ଦାୟାଦ-ଭାୱମିଚ୍ଛଂ ମହୀପତି ।
ମହିନ୍ଦଂ ସଙ୍ଘମିତ୍ତଞ୍ଚ, ଠିତେ ତତ୍ର ଅପୁଚ୍ଛଥ ॥
ପବ୍ବଜିସ୍ସଥ କିଂ ତାତା, ପବ୍ବଜ୍ଜା ମହତୀ ମତା ।
ପିତୁନୋ ୱଚନଂ ସୁତ୍ୱା, ପିତରଂ ତେ ଅଭାସିସୁଂ ॥
ଅଜ୍ଜେୱ ପବ୍ବଜିସ୍ସାମ, ସଚେ ତ୍ୱଂ ଦେୱ ଇଚ୍ଛସି ।
ଅମ୍ହଞ୍ଚ ଲାଭୋ ତୁମ୍ହଞ୍ଚ, ପବ୍ବଜ୍ଜାୟ ଭୱିସ୍ସତି ॥
ଉପରାଜସ୍ସ ପବ୍ବଜ୍ଜ-କାଲଭୋ ପଭୁତୀହି ସୋ ।
ସା ଚାପି ଅଗ୍ଗିବ୍ରହ୍ମସ୍ସ, ପବ୍ବଜ୍ଜା କତନିଚ୍ଛୟା ॥
ଉପରଜ୍ଜଂ ମହୀନ୍ଦସ୍ସ, ଦାତୁକାମୋ’ପି ଭୂପତି ।
ତତୋ’ପି ଅଧିକାସା’ତି, ପବ୍ବଜ୍ଜଂୟେୱ ରୋଚୟି ॥
ପିୟଂ ପୁତ୍ତଂ ମହିନ୍ଦଞ୍ଚ, ବୁଦ୍ଧିରୂପବଲୋଦିତଂ ।
ପବ୍ବଜ୍ଜା ପେସି ସମହଂ, ସଙ୍ଘ ମିତ୍ତଞ୍ଚ ଧୀତରଂ ॥
ତଦା ୱୀସତିୱସ୍ସୋ ସୋ, ମହିନ୍ଦୋ ରାଜନନ୍ଦନୋ ।
ସଙ୍ଘମିତ୍ତା ରାଜଧୀତା, ଅଟ୍ଠାରସସମା ତଦା ॥
ତଦହେୱ ଅହୁ ତସ୍ସ, ପବ୍ବଜ୍ଜା ଉପସମ୍ପଦା ।
ପବ୍ବଜ୍ଜା ସିକ୍ଖାଦାନଞ୍ଚ, ତସ୍ସା ଚ ତଦହୁ ଅହୁ ॥
ଉପଜ୍ଝାୟୋ କୁମାରସ୍ସ, ଅହୁ ମୋଗ୍ଗଲିସୱ୍ହୟୋ ।
ପବ୍ବାଜେସି ମହାଦେୱ-ତ୍ଥେରୋ ମଜ୍ଝନ୍ତିକୋ ପନ ॥
କମ୍ମୱାଚଂ ଅକା ତସ୍ମିଂ, ସୋ’ପସମ୍ପଦମଣ୍ଡଲେ ।
ଅରହତ୍ତଂ ମହିନ୍ଦୋ ସୋ, ପତ୍ତୋ ସପଟିସମ୍ଭିଦଂ ॥
ସଙ୍ଘମିତ୍ତା’ହୁ’ପଜ୍ଝାୟା, ଧମ୍ମପାଲାତି ୱିସ୍ସୁତା ।
ଆଚରିୟା ଆୟୁପାଲି, କାଲେ ସା’ସି ଅନାସୱା ॥
ଉଭୋ ସାସନପଜ୍ଜୋତା, ଲଂକାଦୀପୋପକାରିନୋ ।
ଛଟ୍ଠେ ୱସ୍ସେ ପବ୍ବଜିଂସୁ, ଧମ୍ମାସୋକସ୍ସ ରାଜିନୋ ॥
ମହାମହିନ୍ଦୋ ୱସ୍ସେହି, ତୀହି ଦୀପପ୍ପସାଦକୋ ।
ପିଟକତ୍ତୟଂ ମୁଗ୍ଗଣ୍ହି, ଉପଜ୍ଝାୟସ୍ସ ସନ୍ତିକେ ॥
ସା ଭିକ୍ଖୁନୀ ଚନ୍ଦଲେଖା, ମହିନ୍ଦୋ ଭିକ୍ଖୂ ସୂରିୟୋ ।
ସମ୍ବୁଦ୍ଧ ସାସନାକାସଂ, ତେ ସଦା ସୋଭୟୁଂ ତଦା ॥
ୱନେ ପାଟଲିପୁତ୍ତମ୍ହା, ୱନେ ୱନଚରୋ ଚରଂ ।
କୁନ୍ତକିନ୍ନରିୟା ସଦ୍ଧିଂ, ସଂୱାସଂ କପ୍ପୟୀ କିର ॥
ତେନ ସଂୱାସମନ୍ୱାୟ,
ସା ପୁତ୍ତେ ଜନୟୀ ଦୁୱେ ।
ତିସ୍ସୋ ଜେଟ୍ଠୋ କଣିଟ୍ଠୋ ତୁ,
ସୁମିତ୍ତୋ ନାମ ନାମତୋ ॥
ମହାୱରୁଣତ୍ଥେରସ୍ସ, କାଲେ ପବ୍ବଜ୍ଜ ସନ୍ତିକେ ।
ଅରହତ୍ତଂ ପାପୁଣିଂସୁ, ଛଳଭିଞ୍ଞଂ ଗୁଣଂ ଉଭୋ ॥
ପାଦେ କୀଟୱିସେନା’ସି, ଫୁଟ୍ଠୋ ଜେଟ୍ଠୋ ସୱେଦନୋ ।
ଆହ ପୁଟ୍ଠୋ କଣିଟ୍ଠେନ, ଭେସଜ୍ଜଂ ପସତଂ ଘଟଂ ॥
ରଞ୍ଞୋ ନିୱେଦନଂ ଥେରୋ, ଗିଲାନୱତ୍ତତୋ’ପି ସୋ ।
ସପ୍ପିସତ୍ଥଞ୍ଚ ଚରଣଂ, ପଚ୍ଛାଭତ୍ତଂ ପଟିକ୍ଖିପି ॥
ପିଣ୍ଡାୟ ଚେ ଚରଂ ସପ୍ପିଂ, ଲଭସେ ତ୍ୱଂ ତମାହର ।
ଇଚ୍ଛାହ ତିସ୍ସଥେରୋ ସୋ, ସୁମିତ୍ତଂ ଥେରମୁତ୍ତମଂ ॥
ପିଣ୍ଡାୟ ଚରତା ତେନ, ନ ଲଦ୍ଧଂ ପସତଂ ଘତଂ ।
ସପ୍ପିକୁମ୍ଭସତେନାପି, ବ୍ୟାଧିଜାତୋ ଅସାଧିୟୋ ॥
ତେନେୱ ବ୍ୟାଧିନା ଥେରୋ, ପତ୍ତୋ ଆୟୁକ୍ଖୟନ୍ତିକଂ ।
ଓୱଦିତ୍ୱାପ୍ପମାଦେନ, ନିବ୍ବାତୁଂ ମାନସଂ ଅକା ॥
ଆକାସମ୍ହି ନିସୀଦିତ୍ୱା, ତେଜୋଧାତୁୱସେନ ସୋ ।
ୟଥାରୁଚି ଅଧିଟ୍ଠାୟ, ସରୀରଂ ପରିନିବ୍ବୁତୋ ॥
ଜାଲାସରୀରା ନିକ୍ଖମ୍ମ, ନିମ୍ମଂସଛାରିକଂ ଡହି ।
ଥେରସ୍ସ ସକଲଂ କାୟଂ, ଅଟ୍ଠିକାନିତୁନୋ ଡହି ॥
ସୁତ୍ୱା ନିବ୍ବୂତିମେତସ୍ସ, ତିସ୍ସଥେରସ୍ସ ଭୂପତି ।
ଅଗମାସି ସକାରାମଂ, ଜନୋଘ ପରିୱାରିତୋ ॥
ହତ୍ତିକ୍ଖନ୍ଧଗତୋ ରାଜା, ତାନଟ୍ଠିନ’ୱରୋପିୟ ।
କାରେତ୍ୱା ଧାତୁସକ୍କାରଂ, ସଙ୍ଘଂ ବ୍ୟାଧିମପୁଚ୍ଛିତଂ ॥
ତଂ ସୁତ୍ୱା ଜାତସଂୱେଗୋ, ପୁରଦ୍ୱାରେସୁ କାରିୟ ।
ସୁଧାଚିତା ପୋକ୍ଖରଣୀ, ଭେସଜ୍ଜାନଞ୍ଚ ପୂରିୟ ॥
ପାପେସି ଭିକ୍ଖୁସଙ୍ଘସ୍ସ, ଭେସଜ୍ଜାନି ଦିନେ ଦିନେ ।
ମା ହୋତୁ ଭିକ୍ଖୁସଙ୍ଘସ୍ସ, ଭେସଜ୍ଜଂ ଦୁଲ୍ଲଭଂ ଇତି ॥
ସୁମିତ୍ତଥେରୋ ନିବ୍ବାୟି, ଚଙ୍କମନ୍ତୋ’ୱ ଚଙ୍କମେ ।
ପସୀଦି ସାସନେ’ତୀୱ, ତେନାପି ଚ ମହାଜନୋ ॥
କୁନ୍ତିପୁତ୍ତା ଦୁୱେ ଥେରା,
ତେ ଲୋକହିତକାରିନୋ ।
ନିବ୍ବାୟିଂସୁ ଅସୋକସ୍ସ,
ରଞ୍ଞୋ ୱସ୍ସମ୍ହି ଅଟ୍ଠମେ ॥
ତତୋ ପଭୁତି ସଙ୍ଘସ୍ସ, ଲାଭୋ’ତୀୱ ମହା ଅହୁ ।
ପଚ୍ଛା ପସନ୍ନା ଚ ଜନା, ୟସ୍ମା ଲାଭଂ ପୱତ୍ତୟୁଂ ॥
ପହୀନଲାଭସକ୍କାରା, ତିତ୍ଥିୟା ଲାଭକାରଣା ।
ସୟଂ କାସାୟମାଦାୟ, ୱସିଂସୁ ସହ ଭିକ୍ଖୂହି ॥
ୟଥାସକଞ୍ଚ ତେ ୱାଦଂ, ବୁଦ୍ଧୱାଦୋ’ତି ଦୀପୟୁଂ ।
ୟଥାସକଞ୍ଚ କିରିୟା, ଅକରିଂସୁ ୟଥାରୁଚି ॥
ତତୋ ମୋଗ୍ଗଲିପୁତ୍ତୋ ସୋ,
ଥେରୋ ଥିର ଗୁଣୋଦୟୋ ।
ସାସନବ୍ବୁଦମୁପ୍ପନ୍ନଂ,
ଦିସ୍ୱା ତମତିକକ୍ଖଲଂ ॥
ତସ୍ସୋ’ପସମନେ କାଲଂ, ଦୀଘଦସ୍ସୀ ଅୱେକ୍ଖିୟ ।
ଦତ୍ୱା ମହିନ୍ଦଥେରସ୍ସ, ମହାଭିକ୍ଖୁଗଣଂ ସକଂ ॥
ଉଦ୍ଧଂ ଗଙ୍ଗାୟ ଏକୋ’ୱ, ଅହୋଗଙ୍ଗମ୍ହି ପବ୍ବତେ ।
ୱିହାସି ସତ୍ତୱସ୍ସାନି, ୱିୱେକ ମନୁବ୍ରୂହୟଂ ॥
ତିତ୍ଥିୟାନଂ ବହୁଚତ୍ତା ଚ, ଦୁବ୍ବଚ୍ଚତ୍ତା ଚ ଭିକ୍ଖୱୋ ।
ତେସଂ କାତୁଂ ନ ସକ୍ଖିଂସୁ, ଧମ୍ମେନ ପଟିସେଧନଂ ॥
ତେନେୱ ଜମ୍ବୁଦୀପମ୍ହି, ସବ୍ବାରାମେସୁ ଭିକ୍ଖୱୋ ।
ସତ୍ତୱସ୍ସାନି ନାକଂସୁ, ଉପୋସଥ ପୱାରଣଂ ॥
ତଂ ସୁତ୍ୱା ମହାରାଜା, ଧମ୍ମାସୋକୋ ମହାୟସୋ ।
ଏକଂ ଅମଚ୍ଚଂ ପେସେସି, ଅସୋକାରାମ ମୁତ୍ତମଂ ॥
ଗନ୍ତ୍ୱା’ଧିକରଣଂ ଏତଂ, ୱୁପସମ୍ମ ଉପୋସଥଂ ।
କାରେହି ଭିକ୍ଖୁସଙ୍ଘେନ, ପମା’ରାମେ ତୁୱଂ ଇତି ॥
ଗନ୍ତ୍ୱାନ ସନ୍ନିପାତେତ୍ୱା, ଭିକ୍ଖୁସଙ୍ଘଂ ସଦୁମ୍ମତି ।
ଉପୋସଥଂ କରୋଥାତି, ସାୱେସି ରାଜସାସନଂ ॥
ଉପୋସଥଂ ତିତ୍ତିୟେହି, ନ କରୋମ ମୟଂ ଇତି ।
ଅୱୋ ଚ ଭିକ୍ଖୁସଙ୍ଘୋ ତଂ, ଅମଚ୍ଚଂ ମୂଳ୍ହମାନସଂ ॥
ସୋ’ମଚ୍ଚୋ କତିପୟାନଂ, ଥେରାନଂ ପଟିପାଟିୟା ।
ଅଚ୍ଛିନ୍ଦି ଅସିନା ସୀସଂ, କାରେମୀତି ଉପୋସଥଂ ॥
ରାଜଭାତା ତିସ୍ସତ୍ଥେରୋ, ତଂ ଦିସ୍ୱା କିରିୟଂ ଲହୁଂ ।
ଗନ୍ତ୍ୱାନ ତସ୍ସ ଆସନ୍ନେ, ସାସନମ୍ହି ନିସିଦି ସୋ ॥
ଥେରଂ ଦିସ୍ୱା ଅମଚ୍ଚୋ ସୋ, ଗନ୍ତ୍ୱା ରଞ୍ଞୋ ନିୱେଦୟି ।
ସବ୍ବଂ ପୱତ୍ତିଂ ତଂ ସୁତ୍ୱା, ଜାତଦାହୋ ମହୀପତି ॥
ସୀଘଂ ଗନ୍ତ୍ୱା ଭିକ୍ଖୁସଙ୍ଘଂ, ପୁଚ୍ଛି ଉବ୍ବିଗ୍ଗମାନସୋ ।
ଏୱଂ କତେନ କମ୍ମେନ, କସ୍ସ ପାପଂ ସିୟା ଇତି ॥
ତେସଂ ଅପଣ୍ଡିତା କେଚି, ପାପଂ ତୁୟ୍ହନ୍ତି କେଚି ତୁ ।
ଉଭିନ୍ନଂଚା’ତି ଆହଂସୁ, ନତ୍ଥି ତୁୟ୍ହନ୍ତି ପଣ୍ଡିତା ॥
ତଂ ସୁତ୍ୱା’ହ ମହାରାଜା, ସମତ୍ଥୋ ଅତ୍ଥି ଭିକ୍ଖୁନ ।
ୱିମତିଂ ମେ ୱିନୋଦେତ୍ୱା, କାତୁଂ ସାସନପଗ୍ଗହଂ ॥
ଅତ୍ଥି ମୋଗ୍ଗଲିପୁତ୍ତୋ ସୋ,
ତିସ୍ସତ୍ଥେରୋ ରଥେସଭ ।
ଇଚ୍ଛାହ ସଙ୍ଘୋ ରାଜାନଂ,
ରାଜ ତତ୍ଥା’ସି ସାଦରୋ ॥
ୱିସୁଂ ଭିକ୍ଖୁସହସ୍ସେନ, ଚତୁରୋ ପରିୱାରିତେ ।
ଥେରୋ ନରସହସ୍ସେନ, ଅମଚ୍ଚେ ଚତୁରୋ ତଥା ॥
ତଦହେୟେୱ ପେସେସି, ଅତ୍ତନୋ ୱଚନେନ ସୋ ।
ଥେରଂ ଆନେତୁ ମେ ତେହି, ତଥା ୱୁତ୍ତେ ସନାଗମି ॥
ତଂ ସୁତ୍ୱା ପୁନ ଅଟ୍ଠ’ତ୍ଥ, ଥେରେ’ମଚ୍ଚେ ଚ ପେସୟି ।
ୱିସୁଂ ସହସ୍ସପୁରିସେ, ପୁବ୍ବେ ୱିୟ ସନାଗମି ॥
ରାଜା ପୁଚ୍ଛି କଥଂ ଥେରୋ, ଆଗଚ୍ଛେୟ୍ୟ ନୁ ଖୋ ଇତି ।
ଭିକ୍ଖୂ ଆହଂସୁ ଥେରସ୍ସ, ତସ୍ସ’ଗମନକାରଣଂ ॥
ହୋତି ଭନ୍ତେ ଉପତ୍ଥମ୍ଭୋ, କାତୁଂ ସାସନପଗ୍ଗହଂ ।
ଇତି ୱୁତ୍ତେ ମହାରାଜ, ଥେରୋ ଏସ୍ସତି ସୋ ଇତି ॥
ପୁନାପି ଥେରୋ’ମଚ୍ଚେ ଚ, ରାଜା ସୋଳସ ସୋଳସ ।
ୱିସୁଂ ସହସ୍ସ ପୁରିସେ, ତଥା ୱତ୍ୱାନ ପେସୟି ॥
ଥେରୋ ମହଲ୍ଲତ୍ତେ’ପି, ନାରୋହିସ୍ସତି ୟାନକଂ ।
ଥେରଂ ଗଙ୍ଗାୟ ନାୱାୟ, ଆନେଥା’ତି ଚ ଅବ୍ରୱି ॥
ଗନ୍ତ୍ୱା ତେ ତଂ ତଥା’ୱୋଚୁଂ,
ସୋ ତଂ ସୁତ୍ୱା’ୱ ଉଟ୍ଠହି ।
ନାୱାୟ ଥେରଂ ଆନେସୁଂ,
ରାଜା ପଚ୍ଚୁଗ୍ଗମୀ ତହିଂ ॥
ଜାଣୁମତ୍ତଂ ଜଲଂ ରାଜୋ’ଗହେତ୍ୱା ଦକ୍ଖିଣଂ କରଂ ।
ନାୱାୟ ଓତରନ୍ତସ୍ସ, ଥେରସ୍ସା’ଦାସି ଗାରୱୋ ॥
ଦକ୍ଖିଣଂ ଦକ୍ଖିଣେୟ୍ୟୋ ସୋ, କରଂ ରଞ୍ଞୋ’ନୁକମ୍ପକୋ ।
ଆଲମ୍ବିତ୍ୱା’ନୁକମ୍ପାୟ, ଥେରୋ ନାୱାୟ ଓତରି ॥
ରାଜା ଥେରଂ ନୟିତ୍ୱାନ, ଉୟ୍ୟାନଂ ରତିୱଡ୍ଢନଂ ।
ଥେରସ୍ସ ପାଦେ ଧୋୱିତ୍ୱା, ମକ୍ଖେତ୍ୱା ଚ ନିସୀଦିୟ ॥
ସମତ୍ଥଭାୱଂ ଥେରସ୍ସ, ୱୀମଂସନ୍ତୋ ମହୀପତି ।
ଦଟ୍ଠୁକାମୋ ଅହଂ ଭନ୍ତେ, ପାଟିହୀରନ୍ତି ଅବ୍ରୱି ॥
କନ୍ତି ୱୁତ୍ତେ ମହୀକମ୍ପଂ, ଆହ ତଂ ପୁନ ରାହସୋ ।
ସକଲାୟେ’କ ଦେସାୟ, କତରଂ ଦଟ୍ଠୁମିଚ୍ଛସି ॥
କୋ ଦୁକ୍କରୋତି ପୁଚ୍ଛିତ୍ୱା, ଏକ ଦେସାୟ କମ୍ପନଂ ।
ଦୁକ୍କରନ୍ତି ସୁଣିତ୍ୱାନ, ତଂ ଦୁଟ୍ଠୁକାମତଂ ବ୍ରୱୀ ॥
ରଥଂ ଅସ୍ସଂ ମନୁସ୍ସଞ୍ଚ, ପାତିଞ୍ଚୋଦକ ପୂରିତଂ ।
ଥେରୋ ୟୋଜନ ସୀମାୟ, ଅନ୍ତରମ୍ହି ଚତୁଦ୍ଦିସେ ॥
ଠପାପେତ୍ୱା ତଦଡ୍ଢେହି, ସହ ତଂ ୟୋଜନଂ ମହିଂ ।
ଚାଲେସି ଇଦ୍ଧିୟା ତତ୍ର, ନିସିନ୍ନସ୍ସ ଚ ଦସ୍ସୟି ॥
ତେନା’ମଚ୍ଚେନ ଭିକ୍ଖୂନଂ, ମରଣେନ’ତ୍ତନୋପି ଚ ।
ପାପସ୍ସ’ତ୍ଥିତ୍ତ ନତ୍ଥିତ୍ତଂ, ଥେରଂ ପୁଚ୍ଛି ମହୀପତି ॥
ପଟିଚ୍ଚ କମ୍ମଂ ନତ୍ଥୀତି, କିଲିଟ୍ଠଂ ଚେତନଂ ୱିନା ।
ଥେରୋ ବୋଧେସି ରାଜାନଂ, ୱତ୍ୱା ତିତ୍ତିରଜାତକଂ ॥
ୱସନ୍ତୋ ତତ୍ଥ ସତ୍ତାହଂ, ରାଜୁୟ୍ୟାନେ ମନୋରମେ ।
ସିକ୍ଖାପେସି ମହୀପାଲଂ, ସମ୍ବୁଦ୍ଧସମୟଂ ସୁଭଂ ॥
ତସ୍ମିଂୟେୱ ଚ ସତ୍ତା ହେ, ଦୁୱେ ୟକ୍ଖେ ମହୀପତି ।
ପେସେତ୍ୱା ମହିୟଂ ଭିକ୍ଖୂ, ଅସେସେ ସନ୍ନିପାତୟି ॥
ସତ୍ତମେ ଦିୱସେ ଗନ୍ତ୍ୱା, ସକାରାମଂ ମନୋରମଂ ।
କାରେସି ଭିକ୍ଖୁସଙ୍ଘସ୍ସ, ସନ୍ନିପାତମସେସତୋ ॥
ଥେରେନ ସହ ଏକନ୍ତେ, ନିସିନ୍ନୋ ସାଣିଅନ୍ତରେ ।
ଏକେକଲଦ୍ଧିକେ ଭିକ୍ଖୁ, ପକ୍କୋସିତ୍ୱାନ ସନ୍ତିକଂ ॥
କିଂୱାଦୀ ସୁଗତୋ ଭନ୍ତେ, ଇତି ପୁଚ୍ଛି ମହୀପତି ।
ତେ ସସ୍ସତାଦିକଂ ଦିଟ୍ଠିଂ, ବ୍ୟାକରିଂସୁ ୟଥାସକଂ ॥
ତେ ମିଚ୍ଛାଦିଟ୍ଠିକେ ସବ୍ବେ, ରାଜା ଉପ୍ପବ୍ବାଜାପୟୀ ।
ସବ୍ବେ ସଟ୍ଠିସହସ୍ସାନି, ଆସୁଂ ଉପ୍ପବ୍ବଜାପିତା ॥
ଅପୁଚ୍ଛି ଧମ୍ମିକେ ଭିକ୍ଖୂ, କିଂୱାଦୀ ସୁଗତୋ ଇତି ।
ୱିଭଜ୍ଜୱାଦୀ ତାହଂସୁ, ତଂ ଥେରଂ ପୁଚ୍ଛି ଭୂପତି ॥
ୱିଭଜ୍ଜୱାଦୀ ସମ୍ବୁଦ୍ଧୋ,
ହୋତି ଭନ୍ତେ’ତି ଆହ ସୋ ।
ଥେରୋ’ ଆମା’ତି ତଂ ସୁତ୍ୱା,
ରାଜା ତୁଟ୍ଠମନୋ ତଦା ॥
ସଙ୍ଘୋ ପିସୋଧିତୋ ୟସ୍ମା,
ତସ୍ମା ସଙ୍ଘୋ ଉପୋସଥଂ ।
କରୋତୁ ଭନ୍ତେ ଇଚ୍ଚେୱଂ,
ୱତ୍ୱା ଥେରସ୍ସ ଭୂପତି ॥
ସଙ୍ଘସ୍ସ ରକ୍ଖଂ ଦତ୍ୱାନ, ନଗରଂ ପାୱିସୀ ସୁଭଂ ।
ସଙ୍ଘୋ ସମଗ୍ଗୋ ହୁତ୍ୱାନ, ତଦା’କାସି ଉପୋସଥଂ ॥
ଥେରୋ ଅନେକ ସଙ୍ଖମ୍ହା, ଭିକ୍ଖୁସଙ୍ଘା ୱିସାରଦେ ।
ଛଳଭିଞ୍ଞେ ତେପିଟକେ, ପଭିନ୍ନପଟିସମ୍ଭିଦେ ॥
ଭିକ୍ଖୁସହସ୍ସଂ ଉଚ୍ଚିନି, କାତୁଂ ସଦ୍ଧମ୍ମଂ ସଙ୍ଗହଂ ।
ତେହି ଅସୋକାରାମମ୍ହି, ଅକା ସଦ୍ଧମ୍ମ ସଙ୍ଗହଂ ॥
ମହାକସ୍ସପତ୍ଥେରୋ ଚ, ୟସତ୍ଥେରୋ ଚ କାରୟୁଂ ।
ୟଥା ତେ ଧମ୍ମ ସଂଗୀତିଂ, ତିସ୍ସତ୍ଥେରୋପି ତଂ ତଥା ॥
ତଥାୱତ୍ଥୁପ୍ପକରଣଂ, ପରୱାଦପ୍ପମଦ୍ଦନଂ ।
ଅଭାସି ତିସ୍ସତ୍ଥେରୋ ଚ, ତସ୍ମିଂ ସଂଗୀତି ମଣ୍ଡଲେ ॥
ଏୱଂ ଭିକ୍ଖୁସହସ୍ସେନ, ରକ୍ଖାୟ’ସୋକ ରାଜିନୋ ।
ଅୟଂ ନୱହି ମାସେହି, ଧମ୍ମ ସଂଗୀତି ନିଟ୍ଠିତା ॥
ରଞ୍ଞୋ ସତ୍ତରସେ ୱସ୍ସେ, ଦ୍ୱାସତ୍ତତିସମୋ ଇସି ।
ମହାପୱାରଣାୟ’ସୋ, ସଂଗୀତି ତଂ ସମାପୟି ॥
ସାଧୁକାରଂ ଦଦନ୍ତୀୱ, ସାସନଟ୍ଠିତି କାରଣଂ ।
ସଂଗୀତି ପରିୟୋସାନେ, ଅକମ୍ମିତ୍ଥ ମହାମହୀ ॥
ହିତ୍ୱା ସେଟ୍ଠଂ ବ୍ରହ୍ମୱିମାନମ୍ପି ମନୁଞ୍ଞଂ ।
ଜେଗୁଚ୍ଛଂ ସୋ ସାସନହେତୁନରଲୋକଂ ।
ଆଗମ୍ମା’କା ସାସନକିଚ୍ଚଂ କତକିଚ୍ଚୋ ।
କୋନାମ’ଞ୍ଞୋ ସାସନକିଚ୍ଚମ୍ହି ପମଜ୍ଜେତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ତତିୟଧମ୍ମସଂଗୀତି ନାମ
ପଞ୍ଚମୋ ପରିଚ୍ଛେଦୋ ।
ଛଟ୍ଠପରିଚ୍ଛେଦ
ୱିଜୟାଗମନଂ
ୱଙ୍ଗେସୁ ୱଙ୍ଗନଗରେ, ୱଙ୍ଗରାଜା ଅହୁ ପୁରେ ।
କାଲିଙ୍ଗରଞ୍ଞୋ ଧୀତା’ସି, ମହେସୀ ତସ୍ସ ରାଜିନୋ ॥
ସୋ ରାଜା ଦେୱିୟା ତସ୍ସା, ଏକଂ ଅଲଭି ଧୀତରଂ ।
ନେମିତ୍ତାବ୍ୟାକରୁଂ ତସ୍ସା, ସଂୱାସଂ ମଗରାଜିନା ॥
ଅତୀୱ ରୂପିନିଂ ଆସି, ଅତୀୱ କାମଗିଦ୍ଧିନୀ ।
ଦେୱେନ ଦେୱିୟା’ଚାପି, ଲଜ୍ଜାୟା’ସି ଜଗୁଚ୍ଛିତା ॥
ଏକାକିନୀ ସା ନିକ୍ଖମ୍ମ, ସେରୀଚାରସୁଖତ୍ଥିନୀ ।
ସତ୍ଥେନ ସହ ଅଞ୍ଞାତା, ଅଗା ମଗଧଗାମିନା ॥
ଲାଳରଟ୍ଠେ ଅଟୱିୟା, ସୀହୋ ସତ୍ଥମଭିଦ୍ଧୱି ।
ଅଞ୍ଞତ୍ଥ ସେସା ଧାୱିଂସୁ, ସୀହଗତଦିସନ୍ତୁସା ॥
ଗଣ୍ହିତ୍ୱା ଗୋଚରଂ ସୀହୋ, ଗଚ୍ଛଂ ଦିସ୍ୱା ତମା’ରତୋ ।
ରତ୍ତୋ ଉପାଗଲାଲେନ୍ତୋ, ଲଙ୍ଗୁଲଂ ପତ୍ତକଣ୍ଣକୋ ॥
ସା ତଂ ଦିସ୍ୱା ସରିତ୍ୱାନ, ନେମିତ୍ତୱଚନଂ ସୁତଂ ।
ଅଭୀତା ତସ୍ସ ଅଙ୍ଗାନି, ରଞ୍ଜୟନ୍ତି ପରାମସି ॥
ତସ୍ସା ଫସ୍ସେନା’ତି ରତ୍ତୋ, ପିଟ୍ଠିଂ ଆରୋପିୟା’ସୁତଂ ।
ସୀହୋ ସକଂ ଗୁହଂ ନେତ୍ୱା, ତାୟ ସଂୱାସମାଚରି ॥
ତେନ ସଂୱାସମନ୍ୱାୟ, କାଲେନ ୟମକେ ଦୁୱେ ।
ପୁତ୍ତଞ୍ଚ ଧୀତରଞ୍ଚାତି, ରାଜଧୀତା ଜନେସି ସା ॥
ପୁତ୍ତସ୍ସ ହତ୍ଥପାଦା’ସୁଂ, ସୀହାକାରା ତତୋ ଅକା ।
ନାମେନ ସୀହବାହୁଂ ତଂ, ଧୀତରଂ ସୀହସୀୱଲିଂ ॥
ପୁତ୍ତୋ ସୋଳସୱସ୍ସୋ ସୋ, ମାତରଂ ପୁଚ୍ଛି ସଂସୟଂ ।
ତୁୱଂ ପିତା ଚ ନୋ ଅମ୍ମ, କସ୍ମା ୱିସଦିସା ଇତି ॥
ସା ସବ୍ବମବ୍ରୱୀ ତସ୍ସ, କିଂନୟାମା’ତି ସୋ’ବ୍ରୱି ।
ଗୁହଂ ଥକେତିତାତୋ ତେ, ପାସାଣେନାତି ସା’ବ୍ରୱି ॥
ମହାଗୁହାୟ ଥକନଂ, ଖନ୍ଧେନା’ଦାୟ ସୋ ଅକା ।
ଏକାହେନେ’ୱ ପଞ୍ଞାସ-ୟୋଜନାନି ଗତାଗତଂ ॥
ଗୋଚରାୟ ଗହେ ସୀହେ, ଦକ୍ଖିଣସ୍ମିଞ୍ହି ମାତରଂ ।
ୱାମେ କଣିଟ୍ଠିଂ କତ୍ୱାନ, ତୟୋ ସୀଘଂ ଅପକ୍କମୀ ॥
ନିୱାସେତ୍ୱାନ ସାଖଂ ତେ, ପଚ୍ଚନ୍ତଂ ଗାମମାଗମୁଂ ।
ତତ୍ଥାସି ରାଜିଧୀତାୟ, ମାତୁଲସ୍ସ ସୁତୋ ତଦା ॥
ସେନାପତି ୱଙ୍ଗରଞ୍ଞୋ, ଠିତୋ ପଚ୍ଚନ୍ତ ଗାମକୋ ।
ନିସିନ୍ନୋୱଟମୂଲଲେସୋ, କମ୍ମନ୍ତଂ ସଂୱିଧାୟକଂ ॥
ଦିସ୍ୱା ତେ ପୁଚ୍ଛିତେ’ୱୋଚୁଂ, ଅଟୱୀ ୱାସିନୋ ମୟଂ ।
ଇତି ସୋ ଦାପୟୀ ତେସଂ, ୱତ୍ଥାନି ଧଜିନୀ ପତି ॥
ତାନା’ହେସୁଂ ଉଳାରାନି, ଭତ୍ତଂ ପଣ୍ଣେସୁ ଦାପୟି ।
ସୋୱଣ୍ଣଭାଜନନା’ସୁଂ, ତେସଂ ପୁଞ୍ଞେନ ତାନି ଚ ॥
ତେନ ସୋ ୱିମ୍ହିତୋ ପୁଚ୍ଛି, କେ ତୁମ୍ହେତି ଚମୂପତି ।
ତସ୍ସ ସା ଜାତିଗୋତ୍ତାନି, ରାଜଧୀତା ନିୱେଦୟି ॥
ପିତୁଚ୍ଛା ଧୀତରଂ ତଂ ସୋ, ଆଦାୟ ଧଜିନୀ ପତି ।
ଗନ୍ତ୍ୱାନ ୱଙ୍ଗନଗରଂ, ସଂୱାସଂ ତାୟ କପ୍ପୟି ॥
ସୀହୋ ସୀଘଂ ଗୁହଂ ଗନ୍ତ୍ୱା, ତେ ଅଦିସ୍ୱା ତୟୋ ଜନେ ।
ଅଟ୍ଟିତୋ ପୁତ୍ତସୋକେନ, ନ ଚ ଖାଦି ନ ଚା’ପିୱି ॥
ଦାରକେ ତେ ଗୱେସନ୍ତୋ, ଅଗା ପଚ୍ଚନ୍ତଗାମକେ ।
ଉବ୍ବାସୀୟତି ସୋ ସୋ’ୱ, ୟଂୟଂ ଗାମମୁପେତି ସୋ ॥
ପଚ୍ଚନ୍ତୱାସିନୋ ଗନ୍ତ୍ୱା, ରଞ୍ଞୋ ତଂ ପଟିୱେଦୟୁଂ ।
ସୀହୋ ପିଳେତି ତେ ରଟ୍ଠଂ, ତଂ ଦେୱ ପଟିସେଧୟ ॥
ଅଲକଂ ନିସେଧକଂ ତସ୍ସ, ହତ୍ଥିକ୍ଖନ୍ଧଗତଂ ପୁରେ ।
ଆଦେତୁ ସୀହଦାୟୀତି, ସହସ୍ସଂ ସୋ ପଚାରୟି ॥
ତଥେୱ ଦ୍ୱେସହସ୍ସାନି, ତୀଣିଚା’ପି ନରିସ୍ସରୋ ।
ଦ୍ୱୀସୁ ୱାରେସୁ ୱାରେସି, ମାତା ସୀହଭୁଜଂ ହିତଂ ॥
ଅଗ୍ଗହି ତତିୟେ ୱାରେ, ସୀହବାହୁ ଅପୁଚ୍ଛିୟ ।
ମାତରଂ ତିସହସ୍ସଂ ତଂ, ଘାତେତୁଂ ପିତରଂ ସକଂ ॥
ରଞ୍ଞୋ କୁମାରଂ ଦସ୍ସେସୁଂ, ତଂ ରାଜା ଇଧ ମବ୍ରୱି ।
ଗହିତୋ ୟଦି ସୀହୋ ତେ, ଦମ୍ମି ରଟ୍ଠଂ ତଦେୱ ତେ ॥
ସୋ ତଂ ଗନ୍ତ୍ୱା ଗୁହାଦ୍ୱାରଂ, ସୀହଂ ଦିସ୍ୱାୱ ଆରକା ।
ଏନ୍ତଂ ପୁତ୍ତସିନେହେନ, ୱିଜ୍ଝିତୁଂ ତଂ ସରଂ ଖିପି ॥
ସରୋ ନଳାତମାହଚ୍ଚ, ମେତ୍ତଚିତ୍ତେନ ଥସ୍ସ ତୁ ।
କୁମାରପାଦମୂଲେ’ୱ, ନିୱତ୍ତୋ ପତି ଭୂମିୟଂ ॥
ତଥା’ସି ୟାୱ ତତିୟଂ, ତତୋ କୁଜ୍ଝିମିଗାମିପୋ ।
ତତୋ ଖିତ୍ତୋ ସରୋତସ୍ସ, କାୟଂ ନିବ୍ବିଜ୍ଜ ନିକ୍ଖମି ॥
ସକେସରଂ ସୀହସୀସଂ, ଆଦାୟ ସପୁରଂ ଅଗା ।
ମତସ୍ସ ୱଙ୍ଗରାଜସ୍ସ, ସତ୍ତାହାନି ତଦା ଅହୁ ॥
ରଞ୍ଞୋ ଅପୁତ୍ତକତ୍ତା ଚ, ପତୀତା ଚସ୍ସ କମ୍ମୁନା ।
ସୁତ୍ୱା ଚ ରଞ୍ଞୋ ନତ୍ତୁତ୍ତଂ, ସଞ୍ଜାନିତ୍ୱା ଚ ମାତରଂ ॥
ଅମଚ୍ଚା ସନ୍ନିପତିତା, ଅଖିଲା ଏକମାନସା ।
ସୀହବାହୁ କୁମାରସ୍ସ, ରାଜା ହୋହୀତି ଅବ୍ରୱୁଂ ॥
ସୋ ରଜ୍ଜଂ ସମ୍ପଟିଚ୍ଛିତ୍ୱା, ଦତ୍ୱା ମାତୁ ପତିସ୍ସ ତଂ ।
ସୀହସୀୱଲିମାଦାୟ, ଜାତଭୂମିଂ ଗତୋ ସୟଂ ॥
ନଗରଂ ତତ୍ଥ ମାପେସି, ଅହୁ ସୀହପୁରନ୍ତି ତଂ ।
ଅରଞ୍ଞେ ୟୋଜନସତେ, ଗାମେ ଚାପି ନିୱେସୟି ॥
ଲାଳରଟ୍ଠେ ପୁରେ ତସ୍ମିଂ, ସୀହବାହୁନରାଧିପୋ ।
ରଜ୍ଜଂ କାରେସି କତ୍ୱାନ, ମହେସିଂ ସୀହସୀୱଲିଂ ॥
ମହେସୀ ସୋଳସକ୍ଖତ୍ତୁଂ, ୟମକେ ଚ ଦୁୱେ ଦୁୱେ ।
ପୁତ୍ତେ ଜନୟି କାଲେସା, ୱିଜୟୋ ନାମ ଜେଟ୍ଠକୋ ॥
ସୁମିତ୍ତୋ ନାମ ଦୁତିୟୋ, ସବ୍ବେ ଦ୍ୱତ୍ତିଂସ ପୁତ୍ତକା ।
କାଲେନ ୱିଜୟଂ ରାଜା, ଉପରଜ୍ଜେ’ଭି ସେଚୟି ॥
ୱିଜୟୋ ୱିସମାଚାରୋ, ଆସି ତମ୍ପରିସାପି ଚ ।
ସାହସାନି ଅନେକାନି, ଦୁସ୍ସହାନି କରିଂସୁତେ ॥
କୁଦ୍ଧୋ ମହାଜନୋ ରଞ୍ଞୋ, ତମତ୍ଥଂ ପଟିୱେଦୟି ।
ରାଜା ତେ ସଞ୍ଞପେତ୍ୱାନ, ପୁତ୍ତଂ ଓୱଦି ସାଧୁକଂ ॥
ସବ୍ବଂ ତଥେୱ ଦୁତିୟଂ, ଅହୋସି ତତିୟଂ ପନ ।
କୁଦ୍ଧୋ ମହାଜନୋ ଆହ, ପୁତ୍ତଂ ଘାତେହି ତେ ଇତି ॥
ରାଜା’ଥୱିଜୟଂ ତଞ୍ଚ, ପରିୱାରଞ୍ଚ ତସ୍ସ ତଂ ।
ସତ୍ତସତାନି ପୁରିସେ, କାରେତ୍ୱା ଅଦ୍ଧମୁଣ୍ଣକେ ॥
ନାୱାୟ ପକ୍ଖିପାପେତ୍ୱା, ୱିସ୍ସଜ୍ଜାପେସି ସାଗରେ ।
ତଥା ତେସଂ ଭରିୟାୟୋ, ତଥେୱ ଚ କୁମାରକେ ॥
ୱିସୁଂ ୱିସୁଂ ତେ ୱିସ୍ସଟ୍ଠା, ପୁରିସିତ୍ଥିକୁମାରକା ।
ୱିସୁଂ ୱିସୁଂ ଦୀପକସ୍ମିଂ, ଓକ୍କମିଂସୁ ୱସିଂସୁ ଚ ॥
ନଗ୍ଗଦୀପୋତି ଞାୟିତ୍ଥ, କୁମାରୋକ୍କନ୍ତଦୀପକୋ ।
ଭରିୟୋକ୍କନ୍ତଦୀପୋ ତୁ, ମହିନ୍ଦଦୀପକୋ ଇତି ॥
ସୁପ୍ପାରକେ ପଟ୍ଟନମ୍ହି, ୱିଜୟୋ ପନ ଓକ୍କମି ।
ପରିସା ସାହସେନେ’ତ୍ଥ, ଭୀତୋ ନାୱଂ ପୁନା’ରୁହି ॥
ଲଂକାୟଂ ୱିଜୟସନାମକୋ କୁମାରୋ ।
ଓତିଣ୍ଣୋ ଥିରମତି ତମ୍ବପଣ୍ଣିଦୀପେ ।
ସାଲାନଂ ୟମକଗୁଣାନମନ୍ତରସ୍ମିଂ ।
ନିବ୍ବାତୁଂ ସୟିତଦିନେ ତଥାଗତସ୍ସ ॥
ସୁଜନପସାଦସଂୱେ ଗତ୍ଥାୟକତେ ମହାୱଂସେ
ୱିଜୟାଗମନଂନାମ
ଛଟ୍ଠାପରିଚ୍ଛେଦୋ ।
ସତ୍ତମ ପରିଚ୍ଛେଦ
ୱିଜୟାଭିସେକୋ
ସବ୍ବଲୋକହୀତଂ କତ୍ୱା, ପତ୍ୱା ସନ୍ତିକରଂ ପଦଂ ।
ପରିନିବ୍ବାନମଞ୍ଚମ୍ହି, ନିପନ୍ନୋ ଲୋକନାୟକୋ ॥
ଦେୱତାସନ୍ନିପାତମ୍ହି, ମହନ୍ତମ୍ହି ମହାମୁନି ।
ସକ୍କ ତତ୍ରସମୀପଟ୍ଠଂ, ଅୱୋଚ ୱଦତଂ ୱରୋ ॥
ୱିଜୟୋ ଲାଳାୱିସୟା, ସୀହବାହୁନରିନ୍ଦଜୋ ।
ଏସଲଙ୍କାଧନୁପତ୍ତୋ, ସତ୍ତଭଚ୍ଚସତାନୁଗୋ ॥
ପତିଟ୍ଠହିସ୍ସତି ଦେୱିନ୍ଦଂ, ଲଂକାୟଂ ମମ ସାସନଂ ।
ତସ୍ମା ସପରିୱାରଂ ତଂ, ରକ୍ଖଲଂକଞ୍ଚ ସାଧୁକଂ ॥
ତଥାଗତସ୍ସ ଦେୱିନ୍ଦୋ, ୱଚୋ ସୁତ୍ୱାୱ ସାଦରୋ ।
ଦେୱସ୍ସୁପ୍ପଲୱଣ୍ଣସ୍ସ, ଲଂକାରକ୍ଖଂ ସମପ୍ପୟି ॥
ସକ୍କେନ ୱୁତ୍ତମତ୍ତୋସୋ, ଲଙ୍କାମାଗମ୍ମସଜ୍ଜୁକଂ ।
ପରିବ୍ବାଜକ ୱେସେନ, ରୁକ୍ଖମୂଲ ମୂପୱିସିଂ ॥
ୱିଜୟସମ୍ମୁଖା ସବ୍ବେ,
ତଂ ଉପଚ୍ଚ ଅପୁଚ୍ଛିସୁଂ ।
ଅୟଂ ଭୋ କୋନୁ ଦୀପୋତୀ,
ଲଂକାଦୀପୋତି ସୋ ବ୍ରୱି ॥
ନ ସନ୍ତି ମନୁଜା ହେତ୍ଥ, ନ ଚ ହେସ୍ସତି ୱୋ ଭୟଂ ।
ଇତି ୱତ୍ୱା କୁଣ୍ଡୀକାୟ, ତେ ଜଲେନ ନିସିଞ୍ଚିୟ ॥
ସୁତ୍ତଞ୍ଚ ତେସଂ ହତ୍ଥେସୁ, ଲଗେତ୍ୱାନଭସା’ଗମା ।
ଦସ୍ସେସି ସୋଣିରୂପେନ, ପରିୱାରିକୟକ୍ଖିନୀ ॥
ଏକୋ ତଂ ୱାରିୟନ୍ତୋପି, ରାଜପୁତ୍ତେନ ଅନ୍ୱଗା ।
ଗାମମ୍ହି ୱିଜ୍ଜମାନମ୍ହି, ଭୱନ୍ତି ସୁନଖା ଇତି ॥
ତସ୍ସା ଚ ସାମୀନୀ ତତ୍ଥ, କୁୱେଣୀନାମ ୟକ୍ଖିନୀ ।
ନିସୀଦି ରୁକ୍ଖମୂଲମ୍ହି, କନ୍ତନ୍ତି ତାପସୀ ୱିୟ ॥
ଦିସ୍ୱାନ ସୋ ପୋକ୍ଖରଣୀ, ନିସିନ୍ନଂ ତଞ୍ଚ ତାପସିଂ ।
ତତ୍ଥ ନ୍ହାତ୍ୱା ପିୱିତ୍ୱା ଚ, ଆଦାୟ ଚ ମୁଲାଲିୟୋ ॥
ୱାରିଞ୍ଚ ପୋକ୍ଖରେହେୱ, ୱୁଟ୍ଠାସି ସାତମବ୍ରୱି ।
ଭକ୍ଖୋ’ସି ମମ ତିଟ୍ଠାତି, ଅଟ୍ଠା ବଦ୍ଧୋ ୱସୋ ନରୋ ॥
ପରିତ୍ତସୁତ୍ତ ତେଜେନ, ଭକ୍ଖିତୁଂ ସା ନ ସକ୍କୁଣୀ ।
ୟାଚିୟନ୍ତୋପି ତଂ ସୁତ୍ତଂ, ନା’ଦାୟକ୍ଖିନିୟା ନରୋ ॥
ତଂ ଗହେତ୍ୱା ସୁରୁଙ୍ଗାୟଂ, ରୁଦନ୍ତଂ ୟକ୍ଖିନୀ ଖିପି ।
ଏୱଂ ଏକେକସୋ ତତ୍ଥ, ଖିପୀ ସତ୍ତସତାନିପି ॥
ଅନାୟନ୍ତେସୁ ସବ୍ବେସୁ, ୱିଜୟୋ ଭୟସଂକିତୋ ।
ନନ୍ତପଞ୍ଚାୟୁଧୋ ଗନ୍ତ୍ୱା, ଦିସ୍ୱା ପୋକ୍ଖରଣିଂ ସୁଭଂ ॥
ଅପସ୍ସ ମୁତ୍ତିଣ୍ଣପଦଂ, ପସ୍ସଂ ତଞ୍ଚେୱ ତାପସିଂ ।
‘‘ଇମାୟ ଖଲୁ ଭଚ୍ଚା ମେ, ଗହିତାନୁ’’ତି ଚିନ୍ତିୟ ॥
କିଂ ନ ପସ୍ସସି ଭଚ୍ଚେ ମେ,
ହୋତି ତ୍ୱଂ ଇତି ଆହତଂ ।
‘‘କିଂ ରାଜପୁତ୍ତ ଭଚ୍ଚେହି,
ପିୱ ନହାୟା’’ତି ଆହସା ॥
ୟକ୍ଖିନୀ ତାୱ ଜାନାତି, ମମ ଜାତିନ୍ତି ନିଚ୍ଛିତୋ ।
ସଙ୍ଘଂ ସନାମଂ ସାୱେତ୍ୱା, ଧନୁଂ ସନ୍ଧାୟୁ’ ପାଗତୋ ॥
ୟକ୍ଖିଂ ଆଦାୟ ଗୀୱାୟ, ନାରା ଚ ୱଲୟେନ ସୋ ।
ୱାମହତ୍ଥେନ କେସେସୁ, ଗହେତ୍ୱା ଦକ୍ଖିଣେ ନ ତୁ ॥
ଉକ୍ଖିପିତ୍ୱା ଅସିଂଆହ, ‘‘ଭଚ୍ଚେ ମେ ଦେହି ଦାସିତଂ ।
ମାରେମୀ’’ତି ଭୟଟ୍ଟାସା, ଜୀୱିତଂ ୟାଚି ୟକ୍ଖିନୀ ॥
ଜୀୱିତଂ ଦେହି ମେ ସାମି, ରଜ୍ଜଂ ଦଜ୍ଜାମି ତେ ଅହଂ ।
କରିସ୍ସମି’ତ୍ତି କିଚ୍ଚଞ୍ଚ, କିଚ୍ଚଂ ଅଞ୍ଞଂ ୟଥିଚ୍ଛିତଂ ॥
ଅଦୁବ୍ଭାତ୍ଥାୟ ସପଥଂ, ସୋ ତଂ ୟକ୍ଖିଂ ଅକାରୟି ।
‘‘ଆନେହି ଭଚ୍ଚେ ସୀଘ’’ନ୍ତି, ୱୁତ୍ତମତ୍ତାୱ ସା’ନୟି ॥
‘‘ଇମେ ଜାତା’’ତି ୱୁତ୍ତାସା,
ତଣ୍ଡୁଲାଦିଂ ୱିନିଦ୍ଦିସି ।
ଭକ୍ଖିତାନଂ ୱାଣିଜାନଂ,
ନାୱଟ୍ଠଂ ୱିୱିଖଂ ବହୁଂ ॥
ଭଚ୍ଚା ତେ ସାଧୟିତ୍ୱାନ, ଭତ୍ତାନି ବ୍ୟଞ୍ଜନାନିଚ ।
ରାଜା ପୁତ୍ତଂ ଭୋଜୟିତ୍ୱା, ସବ୍ବେଚାପି ଅଭୁଞ୍ଜିସୁଂ ॥
ଦାପିତଂ ୱିଜୟେନ’ଗ୍ଗଂ, ୟକ୍ଖୀ ଭୁଞ୍ଜିୟ ପୀଣିତା ।
ସୋଳସୱସ୍ସିକଂ ରୂପଂ, ମାପୟିତ୍ୱା ମନୋହରଂ ॥
ରାଜପୁତ୍ତ ମୁପଗଞ୍ଛି, ସବ୍ବାଭରଣଭୂସିତା ।
ମାପେସି ରୁକ୍ଖମୂଲସ୍ମିଂ, ସୟନଞ୍ଚ ମହାରହଂ ॥
ସାଣିୟା ସୁପରିକ୍ଖିତ୍ତଂ, ୱିତାନସମଲଙ୍କତଂ ।
ତଂ ଦିସ୍ୱା ରାଜତନୟୋ, ପେକ୍ଖଂ ଅତ୍ଥମନାଗତଂ ॥
କତ୍ୱାନ ତାୟନାୱାୟଂ, ନିପଜ୍ଜ ସୟନେ ସୁଖଂ ।
ସାଣୀ ପରିକ୍ଖିପିତ୍ୱାନ, ସବ୍ବେ ଭଚ୍ଚା ନିପଜ୍ଜିସୁଂ ॥
ରତ୍ତିଂ ତୂରିୟସଦ୍ଦଞ୍ଚ, ସୁତ୍ୱା ଗୀତରୱଞ୍ଚ ସୋ ।
ଅପୁଚ୍ଛି ସହସେମାନଂ, କିଂ ସଦ୍ଦୋ ଇତି ୟକ୍ଖିନିଂ ॥
ରଜ୍ଜଞ୍ଚ ସାମିନୋ ଦେୟ୍ୟଂ, ସବ୍ବେ ୟକ୍ଖେ ଚ ଘାତିୟ ।
ମନୁସ୍ସା ୱାସକରଣା, ୟକ୍ଖା ମଂ ଘାତୟନ୍ତିହି ॥
ଇତି ଚିନ୍ତିୟ ୟକ୍ଖୀ ସା, ଅବ୍ରୱି ରାଜନନ୍ଦନଂ ।
ସୀରୀସୱତ୍ଥୁନା ମେତଂ, ସାମି ୟକ୍ଖପୁରଂ ଇଧ ॥
ତତ୍ଥ ଜେଟ୍ଠସ୍ସ ୟକ୍ଖସ୍ସ, ଲଂକାନଗରୱାସିନୀ ।
କୁମାରିକା ଇଧା’ନୀତା, ତସ୍ସା ମାତା ଚ ଆଗତା ॥
ଆୱାହ ମଙ୍ଗଲେ ତତ୍ଥ, ଇଧାପି ଉସ୍ସୱେ ମହା ।
ୱତ୍ତତେ ତତ୍ଥ ସଦ୍ଦୋୟଂ, ମହାହେସ ସମାଗମୋ ॥
ଅଜ୍ଜେୱ ୟକ୍ଖେ ଘାତେହି,
ନ ହି ସକ୍ଖା ଇତୋ ପରଂ ।
ସୋ ଆହା’ଦିସ୍ସ ମାନେତେ,
ଘାତେସ୍ସାମି କଥଂ ଅହଂ ॥
ୟତ୍ଥ ସଦ୍ଦଂ କରିସ୍ସାମ, ତେନ ସଦ୍ଦେନ ଘାତୟ ।
ଆୟୁଧଂ ମେ’ନୁଭାୱେନ, ତେସଂ କାୟେ ପତିସ୍ସତି ॥
ତସ୍ସା ସୁତ୍ୱା ତଥା କତ୍ୱା, ସବ୍ବେ ୟକ୍ଖେ ଅଘାତୟି ।
ସୟମ୍ପି ଲଦ୍ଧୱିଜୟୋ, ୟକ୍ଖରାଜ ପସାଧନଂ ॥
ପସାଧନେହି ସେସେହି, ତଂତଂ ଭଚ୍ଚଂ ପସାଧୟି ।
କତିପହଂ ୱସିତ୍ୱେ’ତ୍ଥ, ତମ୍ବପଣ୍ଣିମୁପାଗମି ॥
ମାପୟିତ୍ୱା ତମ୍ପପଣ୍ଣି-ନଗରଂ ୱିଜୟୋ ତହିଂ ।
ୱସୀ ୟକ୍ଖିନିୟା ସଦ୍ଧିଂ, ଅମଚ୍ଚ ପରିୱାରିତୋ ॥
ନାୱାୟ ଭୂମିମୋତିଣ୍ଣା, ୱିଜୟପମୁଖା ତଦା ।
କିଲନ୍ତା ପାଣିନାଭୂମିଂ, ଆଲମ୍ବିୟ ନିସୀଦିସୁଂ ॥
ତମ୍ବଭୂମିରଜୋଫୁଟ୍ଠୋ, ତମ୍ବୋପାଣି ୟତୋ ଅହୁଂ ।
ସୋ ଦେସୋଚେୱ ଦୀପୋ ଚ, ତେନ ତନ୍ନାମକୋ ଅହୁ ॥
ସୀହବାହୁ ନରିନ୍ଦୋ ସୋ, ସୀହମାଦିନ୍ନୱା ଇତି ।
ସୀହଳୋ ତେନ ସମ୍ବନ୍ଧା, ଏତେ ସବ୍ବେପି ସୀହଳା ॥
ତତ୍ଥ ତତ୍ଥ ଚ ଗାମେ ତେ, ତସ୍ସା’ମଚ୍ଚା ନିୱେସୟୁଂ ।
ଅନୁରାଧଗାମଂ ତନ୍ନାମୋ, କଦମ୍ବ ନଦୀୟନ୍ତିକେ ॥
ଗମ୍ଭୀରନଦୀୟା ତୀରେ, ଉପତିସ୍ସୋ ପୁରୋହିତୋ ।
ଉପତିସ୍ସଗାମଂ ମାପେସି, ଅନୁରାଧସ୍ସ ଉତ୍ତରେ ॥
ଅଞ୍ଞେ ତୟୋ ଅମଚ୍ଚା ତେ, ମାପୟିଂସୁ ୱିସୁଂ ୱିସୁଂ ।
ଉଜ୍ଜେନିଂ ଉରୁୱେଲଞ୍ଚ, ୱିଜିତଂ ନଗରଂ ତଥା ॥
ନିୱାସେତ୍ୱା ଜନପଦଂ, ସବ୍ବେ’ମଚ୍ଚା ସମଚ୍ଚତଂ ।
ଅୱୋଚୁଂ ରାଜତନୟା, ସାମି ରଜ୍ଜେଭିସେଚୟ ॥
ଇତି ୱୁତ୍ତୋ ରାଜପୁତ୍ତୋ, ନ ଇଚ୍ଛି ଅଭିସେଚନଂ ।
ୱିନା ଖତ୍ତିୟକଞ୍ଞାୟ, ଅଭିସେକଂ ମହେସିୟା ॥
ଅଥାମଚ୍ଚା ସାମିନୋ ହେ, ଅଭିସେକ କତା ଦରା ।
ଦୁକ୍କରେସୁପି କିଚ୍ଚେସୁ, ତଦତ୍ଥଭିରୁତା ତିଗା ॥
ପଣ୍ଣାକାରେ ମହାସାରେ, ମଣିମୁତ୍ତାଦିକେ ବହୂ ।
ଗାହାପୟିତ୍ୱା ପାହେସୁଂ, ଦକ୍ଖିଣଂ ମଧୁରଂ ପୁରଂ ॥
ପଣ୍ଡୁରାଜସ୍ସ ଧୀତତ୍ଥଂ, ସାମିନୋ ସାମିଭତ୍ତିନୋ ।
ଅଞ୍ଞେସଂ ଚାପି ଧୀତତ୍ଥଂ, ଅମଚ୍ଚାନଂ ଜନସ୍ସ ଚ ॥
ସୀଘଂ ନାୱାୟ ଗନ୍ତ୍ୱାନ, ଦୂତା ତେ ମଧୁରଂ ପୁରଂ ।
ପଣ୍ଣାକାରେ ଚ ଲେଖଞ୍ଚ, ତସ୍ସ ରଞ୍ଞୋ ଅଦସ୍ସୟୁଂ ॥
ତତୋ ରାଜାଅମଚ୍ଚେହି, ମନ୍ତୟିତ୍ୱା ସଧୀତରଂ ।
ପାହେତୁକାମୋ’ମଚ୍ଚାନଂ, ଅଞ୍ଞେସଂ ଚାପି ଧୀତରୋ ॥
ଲଦ୍ଧା ଊନସତଂ କଞ୍ଞା, ଅଥଭେରିଂ ଚରାପୟି ।
ଲଂକାୟ ଧୀତୁଗମନଂ, ଇଚ୍ଛମାନା ନରା ଇଧ ॥
ନିୱାସୟିତ୍ୱା ଦିଗୁଣଂ, ଘରଦ୍ୱାରେସୁ ଧୀତରୋ ।
ଠପେନ୍ତୁ ତେନ ଲିଙ୍ଗେନ, ଆଦୀୟିସ୍ସାମିତା ଇତି ॥
ଏୱଂ ଲଦ୍ଧା ବହୂକଞ୍ଞା, ତପ୍ପୟିତ୍ୱାନ ତଂ କୁଲଂ ।
ସମ୍ପନ୍ନସବ୍ବାଲଙ୍କାରଂ, ଧୀତରଂ ସମ୍ପଟିଚ୍ଛଦଂ ॥
ସବ୍ବା ତା ଲଦ୍ଧସକ୍କାରା, କଞ୍ଞାୟୋ ଚ ୟଥାରହଂ ।
ରାଜାରହେ ଚ ହତ୍ଥସ୍ସ-ରଥପେସ୍ସିୟ କାରକେ ॥
ଅଟ୍ଠାରସନ୍ନଂ ସେଣୀନଂ, ସହସ୍ସଞ୍ଚ କୁଲାନି ସୋ ।
ଲେଖଂ ଦତ୍ୱାନ ପେସେସି, ୱିଜୟସ୍ସ ଜିତା’ରିନୋ ॥
ସବ୍ବୋସୋ’ତରୀ ନାୱାହି, ମହାତିତ୍ଥେ ମହାଜନୋ ।
ତେନେୱ ପଟ୍ଟନଂ ତଞ୍ହି, ମହାତିତ୍ଥଂତି ୱୁଚ୍ଚତି ॥
ୱିଜୟସ୍ସ ସୁତୋଧୀତା, ତସ୍ସା ୟକ୍ଖିନିୟା ଅହୁ ।
ରାଜକଞ୍ଞାଗମଂ ସୁତ୍ୱା, ୱିଜୟୋ ଆହ ୟକ୍ଖିନିଂ ॥
‘‘ଗଚ୍ଛ ଦାନି ତୁୱଂ ଭୋତି, ଠପେତ୍ୱା ପୁତ୍ତକେ ଦୁୱେ ।
ମନୁସ୍ସା ଅମନୁସ୍ସେହି, ଭାୟିନ୍ତୀହି ସଦା’’ ଇତି ॥
ସୁତ୍ୱା ତଂ ୟକ୍ଖଭୟତୋ, ଭୀତଂ ତଂ ଆହ ୟକ୍ଖିନିଂ ।
ମା ଚିନ୍ତୟି ସାହସ୍ସେନ, ଦାପୟିସ୍ସାମି ତେ ବଲିଂ ॥
ପୁନପ୍ପୁନଂ ତଂ ୟାଚିତ୍ୱା, ଉଭୋ ଆଦାୟ ପୁତ୍ତକେ ।
ଭୀତାପି ସା ଅଗତିୟା, ଲଂକାପୁରମୁପାଗମି ॥
ପୁତ୍ତେ ବିହି ନିସୀଦେତ୍ୱା, ସୟଂ ପାୱିସି ତଂ ପୁରଂ ।
ସଞ୍ଜାନିତ୍ୱାନ ତଂ ୟକ୍ଖିଂ, ଭୀତା ଚୋରୀତି ସଞ୍ଞିତୋ ॥
ସଂଖୁଭିଂସୁ ପୁରେ ୟକ୍ଖା, ଏକୋ ସାହସିକୋ ପନ ।
ଏକପାଣିପ୍ପହାରେନ, ୱିଲୟଂ ନୟି ୟକ୍ଖିନିଂ ॥
ତସ୍ସାତୁ ମାତୁଲୋ ୟକ୍ଖୋ, ନିକ୍ଖମ୍ମ ନଗରା ବହି ।
ଦିସ୍ୱା ତେ ଦାରକେ ପୁଚ୍ଛି, ତୁମ୍ହେ କସ୍ସ ସୁତା ଇତି ॥
କୁୱେଣିୟା’ତି ସୁତ୍ୱା’ହ, ମାତା ୱୋ ମାରିତା ଇଧ ।
ତୁମ୍ହେପି ଦିସ୍ୱା ମାରେୟ୍ୟୁଂ, ପଲାୟଥ ଲହୁଂ ଇତି ॥
ଆଗୁଂ ସୁମନକୂଟଂ ତେ, ପଲାୟିତ୍ୱା ତତୋ ଲହୁଂ ।
ୱାସଂ କପ୍ପେସି ଜେଟ୍ଠୋ ସୋ, ୱୁଦ୍ଧୋ ତାୟ କଣିଟ୍ଠିୟା ॥
ପୁତ୍ତଧୀତାହି ୱଡ୍ଢିତ୍ୱା, ରାଜାନୁଞ୍ଞାୟ ତେ ୱସୁଂ ।
ତତ୍ଥେୱ ମଲୟେ ଏସୋ, ପୁଲିନ୍ଦାନଞ୍ହି ସମ୍ଭୱୋ ॥
ପଣ୍ଡୁରାଜସ୍ସ ଦୂତା ତେ, ପଣ୍ଣାକାରଂ ସମପ୍ପୟୁଂ ।
ୱିଜୟସ୍ସ କୁମାରସ୍ସ, ରାଜାଧିକାରିକା ଚ ତା ॥
କତ୍ୱା ସକ୍କାରସମ୍ମାନଂ, ଦୂତାନଂ ୱିଜୟୋ ପନ ।
ଅଦା ୟାଥାରହଂ କଞ୍ଞା, ଅମଚ୍ଚାନଂ ଜନସ୍ସ ଚ ॥
ୟଥା ୱିଧି ଚ ୱିଜୟଂ, ସବ୍ବେ ମଚ୍ଚାସମାଗତା ।
ରଜ୍ଜେସମଭିସିଞ୍ଚିଂସୁ, କରିଂସୁଚ ମହାଛଣଂ ॥
ତତୋ ସୋ ୱିଜୟୋ ରାଜା, ପଣ୍ଡୁରାଜସ୍ସ ଧୀତରଂ ।
ମହତା ପରିହାରେନ, ମହେସିତ୍ତେ’ଭିସେଚୟି ॥
ଧନାନ’ଦା ଅମଚ୍ଚାନଂ, ଅଦାସି ସସୁରସ୍ସତୁ ।
ଅନୁୱସ୍ସଂ ସଙ୍ଖମୁତ୍ତଂ, ସତସହସ୍ସ ଦ୍ୱୟାରହଂ ॥
ହିତ୍ୱା ପୁବ୍ବାଚରିତଂ ୱିସମଂ ସମେନ ।
ଧମ୍ମେନ ଲଂକମଖିଲଂ ଅନୁସାସମାନୋ ।
ସୋ ତମପଣ୍ଣିନଗରେ ୱିଜୟୋ ନରିନ୍ଦୋ ।
ରଜ୍ଜଂ ଅକାରୟି ସମା ଖଲୁ ଅଟ୍ଠତିଂସା’ତି ॥
ସୁଜନପସାଦସଂୱେ ଗତ୍ଥାୟ କତେ ମହାୱଂସେ
ୱିଜୟାଭିସେକୋ ନାମ
ସତ୍ତମୋ ପରିଚ୍ଛେଦୋ ।
ଅଟ୍ଠମ ପରିଚ୍ଛେଦ
ପଣ୍ଡୁୱାସୁଦେୱାଭିସେକୋ
ୱିଜୟୋ ସୋ ମହାରାଜା, ୱସ୍ସେ ଅନ୍ତିମକେ ଠିତୋ ।
ଇତି ଚିନ୍ତୟି ‘‘ୱୁଦ୍ଧୋ’ହଂ, ନ ଚ ୱିଜ୍ଜତି ମେ ସୁତୋ ॥
କିଚ୍ଛେନ ୱାସିତଂ ରଟ୍ଠଂ, ନସ୍ସେୟ୍ୟ ମମ ଅଚ୍ଚୟେ ।
ଆଣାପେୟ୍ୟଂ ରଜ୍ଜହେତୁ-ସୁମିତ୍ତଂ ଭାତରଂ ମମ ॥
ଅଥା’ମଚ୍ଚେହି ମନ୍ତେତ୍ୱା, ଲେଖଂ ତତ୍ଥ ୱିସଜ୍ଜୟି ।
ଲେଖଂ ଦତ୍ୱାନ ୱିଜୟୋ, ନ ଚିରେନ ଦିୱଙ୍ଗତୋ ॥
ତସ୍ମିଂ ମତେ ଅମଚ୍ଚା ତେ, ପେକ୍ଖନ୍ତା ଖତ୍ତିୟାଗମଂ ।
ଉପତିସ୍ସଗାମେ ଠତ୍ୱାନ, ରଟ୍ଠଂ ସମୁନୁସାସିସୁଂ ॥
ମତେ ୱିଜୟରାଜମ୍ହି, ଖତ୍ତିୟାଗମନା ପୁରା ।
ଏକଂ ୱସ୍ସଂ ଅୟଂ ଲଂକା-ଦୀପୋ ଆସି ଅରାଜକୋ ॥
ତସ୍ମିଂ ସୀହପୁରେ ତସ୍ସ, ସୀହବାହୁସ୍ସ ରାଜିନୋ ।
ଅଚ୍ଚୟେନ ସୁମିତ୍ତୋ ସୋ, ରାଜା ତସ୍ସ ସୁତୋ ଅହୁ ॥
ତସ୍ସ ପୁତ୍ତା ତୟୋ ଆସୁଂ, ମଦ୍ଦରାଜସ୍ସ ଧୀତୁୟା ।
ଦୂତା ସୀହପୁରଂ ଗନ୍ତ୍ୱା, ରଞ୍ଞୋ ଲେଖଂ ଅଦଂସୁ ତେ ॥
ଲେଖଂ ସୁତ୍ୱାନ ସୋ ରାଜା, ପୁତ୍ତେ ଆମନ୍ତୟୀ ତୟୋ ।
ଅହଂ ମହଲ୍ଲକୋ ତାତା, ଏକୋ ତୁମ୍ହେସୁ ଗଚ୍ଛତୁ ॥
ଲଂକଂ ନେକଗୁଣଂ କନ୍ତଂ, ମମ ଭାତୁସ୍ସ ସନ୍ତକଂ ।
ତସ୍ସ’ଚ୍ଚ ୟେନ ତତ୍ଥେୱ, ରଜ୍ଜଂ କାରେତୁ ସୋଭନଂ ॥
କଣିଟ୍ଠକୋ ପଣ୍ଡୁୱାସୁ-ଦେୱୋ ରାଜକୁମାରକୋ ।
‘‘ଗମିସ୍ସାମୀତି ଚିନ୍ତେତ୍ୱା, ଞତ୍ୱା ସୋତ୍ଥି ଗତମ୍ପି ଚ ॥
ପିତରା ସମନୁଞ୍ଞାତୋ, ଦ୍ୱତ୍ତିଂସାମଚ୍ଚ ଦାରକେ ।
ଆଦାୟ ଆରୁହୀ ନାୱଂ, ପରିବ୍ବାଜକଲିଙ୍ଗୱା ॥
ମହାକନ୍ଦରନଜ୍ଜା ତେ, ମୁଖଦ୍ୱାରମ୍ହି ଓତରଂ ।
ତେ ପରିବ୍ବାଜକେ ଦିସ୍ୱା, ଜନୋ ସକ୍କରି ସାଧୁକଂ ॥
ପୁଚ୍ଛିତ୍ୱା ନଗରଂ ଏତ୍ଥ, ଉପୟନ୍ତଂ କମେନ ତେ ।
ଉପତିସ୍ସ ଗାମଂ ସମ୍ପତ୍ତା, ଦେୱତା ପରିପାଲିତା ॥
ଅମଚ୍ଚା’ନୁମତୋ’ମଚ୍ଚୋ, ପୁଚ୍ଛି ନେମିତ୍ତକା ତହିଂ ।
ଖତ୍ତିୟା’ଗମନଂ ତସ୍ସ, ସୋ ବ୍ୟାକାସି ପରଂପି ଚ ॥
ସତ୍ତମେ ଦୀୱସେୟେୱ, ଆଗମିସ୍ସତି ଖତ୍ତିୟୋ ।
ବୁଦ୍ଧସାସନ ମେତସ୍ସ, ୱଂସଜୋ’ୱ ଠପେସ୍ସତି ॥
ସତ୍ତମେ ଦିୱସେୟେୱ, ତେ ପରିବ୍ବାଜକେ ତହିଂ ।
ପତ୍ତେ ଦିସ୍ୱାନ ପୁଚ୍ଛିତ୍ୱା, ଅମଚ୍ଚା ତେ ୱିଜାନିୟ ॥
ତଂ ପଣ୍ଣୁୱାସୁଦେୱଂ ତେ, ଲଂକାରଜ୍ଜେନ ଅପ୍ପୟୁଂ ।
ମହେସିୟା ଅଭାୱାସୋ, ନ ତାୱ ଅଭିସେଚୟି ॥
ଅମିତୋଦନସକ୍କସ୍ସ, ପଣ୍ଡୁସକ୍କୋ ସୁତୋ ଅହୁ ।
ଞତ୍ୱା ୱିନାସଂ ସକ୍ୟାନଂ, ସୋ ଆଦାୟ ସକଂ ଜନଂ ॥
ଗନ୍ତ୍ୱା ଅଞ୍ଞାପଦେସେନ, ଗଙ୍ଗାପାରଂ ତହିଂ ପୁରଂ ।
ମାପେତ୍ୱା ତତ୍ଥ କାରେସି, ରଜ୍ଜଂ ତସ୍ସ ସୁତେ ଲଭି ॥
ଧୀତା କଣିଟ୍ଠିତା ଆସି, ଭଦ୍ଦକଚ୍ଚାନ ନାମିକା ।
ସବ୍ବଲକ୍ଖଣସମ୍ପନ୍ନା, ସୁରୂପା ଅଭିପତ୍ଥିତା ॥
ତଦତ୍ଥଂ ସତ୍ତରାଜାନୋ, ପଣ୍ଣାକାରେ ମହାରହେ ।
ପେସେସୁଂ ରାଜିନୋ ତସ୍ସ, ଭୀତୋ ରାଜୂହି ସୋ ପନ ॥
ଞତ୍ୱାନ ସୋତ୍ଥିଗମନଂ, ଅଭିସେକଫଲମ୍ପି ଚ ।
ସହଦ୍ୱତ୍ତିଂସ ଇତ୍ଥୀହି, ନାୱଂ ଆରୋପିୟା’ସୁତଂ ॥
ଗଙ୍ଗାୟ ଖିପି ଗଣ୍ହାତୁ, ପହୁ ମେ ଧୀତରଂ ଇତି ।
ଗହେତୁଂ ତେ ନ ସକ୍ଖିଂସୁ, ନାୱାସାପନ ସୀଘଗା ॥
ଦୁତିୟେ ଦିୱସେୟେୱ, ଗୋଣାଗାମକ ପଟ୍ଟନଂ ।
ପତ୍ତାପବ୍ବଜିତା କାରା, ସବ୍ବା ତା ତତ୍ଥ ଓତରୁଂ ॥
ପୁଚ୍ଛିତ୍ୱା ନଗରଂ ଏତ୍ଥ, ତା କମେନୋପୟନ୍ତିୟୋ ।
ଉପତିସ୍ସଗାମଂ ସମ୍ପତ୍ତା, ଦେୱତା ପରିପାଲିତା ॥
ନେମିତ୍ତକସ୍ସ ୱଚନଂ, ସୁତ୍ୱା ତତ୍ଥା’ଗତା ତୁ ତା ।
ଦିସ୍ୱା ଅମଚ୍ଚୋ ପୁଚ୍ଛିତ୍ୱା, ଞତ୍ୱା ରଞ୍ଞୋ ସମପ୍ପୟି ॥
ତଂ ପଣ୍ଡୁୱାସୁଦେୱଂ ତେ, ଅମଚ୍ଚା ସୁଦ୍ଧବୁଦ୍ଧିନୋ ।
ରଜ୍ଜେ ସମଭିସିଞ୍ଚିଂସୁ, ପୁଣ୍ଣସବ୍ବମନୋରଥଂ ॥
ମହେସୀଭାୱେ ଅଭିସିଞ୍ଚିୟ’ତ୍ତନୋ ।
ସହଗତା ତାୟ ପଦାସି ଅତ୍ତନା ।
ସହାଗତାନଂ ୱସି ଭୂମିପୋ ସୁଖନ୍ତୀ ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ପଣ୍ଡୁୱାସୁଦେୱାଭିସେକୋ ନାମ
ଅଟ୍ଠମୋ ପରିଚ୍ଛେଦୋ ।
ନୱମ ପରିଚ୍ଛେଦ
ଅଭୟାଭିସେକୋ
ମହେସୀ ଜନୟୀ ପୁତ୍ତେ, ଦସ ଏକଞ୍ଚ ଧୀତରଂ ।
ସବ୍ବଜେଟ୍ଠୋ’ଭୟୋ ନାମ, ଚିତ୍ତାନାମ କନିଟ୍ଠିକା ॥
ପସ୍ସିତ୍ୱା ତଂ ୱିୟାକଂସୁ, ବ୍ରାହ୍ମଣା ମନ୍ତପାରଗା ।
‘‘ରଜ୍ଜହେତୁ ସୁତୋ ଅସ୍ସା, ଘାତୟିସ୍ସତି ମାତୁଲେ’’ ॥
ଘାତେସ୍ସାମି କନିଟ୍ଠିନ୍ତି, ନିଚ୍ଛିତେ ଭାତରା’ଭୟୋ ।
ୱାରେସି କାଲେ ୱାସେସୁଂ, ଗେହଂ ତଂ ଏକଥୁଣିକେ ॥
ରଞ୍ଞୋ ଚ ସିରିଗବ୍ଭେନ, ତସ୍ସ ଦ୍ୱାରମକାରୟୁଂ ।
ଅନ୍ତୋ ଠପେସୁଂ ଏକଞ୍ଚ, ଦାସିଂ ନରସତଂ ବହି ॥
ରୂପେନୁ’ମ୍ମାଦୟୀ ନରେ, ଦିଟ୍ଠମତ୍ତାୱ ସାୟତୋ ।
ତତୋ ଉମ୍ମାଦଚିତ୍ତା’ତି, ନାମଂ ସୋପପଦଂ ଲଭି ॥
ସୁତ୍ୱାନ ଲଂକାଗମନଂ, ଭଦ୍ଦକଚ୍ଚାନଦେୱିୟା ।
ମାତରା ଚୋଦିତା ପୁତ୍ତା, ଠପେତ୍ୱେ’କଞ୍ଚ ଆଗମୁଂ ॥
ଦିସ୍ୱାନ ତେ ପଣ୍ଡୁୱାସୁ-ଦେୱଂ ଲଙ୍କିନ୍ଦମାଗତା ।
ଦିସ୍ୱାନ ତଂ କନିଟ୍ଠିଞ୍ଚ, ରୋଦିତ୍ୱା ସହ ତାୟ ଚ ॥
ରଞ୍ଞା ସୁକତସକ୍କାରା, ରଞ୍ଞୋ’ନୁଞ୍ଞାୟ ଚାରିକଂ ।
ଚରିଂସୁ ଲଂକାଦୀପମ୍ହି, ନିୱସୁଞ୍ଚ ୟଥାରୁଚିଂ ॥
ରାମେନ ୱୁସିତଠାନଂ, ରାମଗୋଣନ୍ତି ୱୁଚ୍ଚତି ।
ଉରୁୱେଲା’ନୁରାଧାନଂ, ନିୱାସା ଚ ତଥା ତଥା ॥
ତଥା ୱିଜିତଦୀଘାୟୁ-ରୋହଣାନଂ ନିୱାସକା ।
ୱିଜିତଗାମୋ ଦୀଘାୟୁ-ରୋହଣନ୍ତି ଚ ୱୁଚ୍ଚତି ॥
କାରେସି ଅନୁରାଧୋ ସୋ, ୱାପିଂ ଦକ୍ଖିଣତୋ ତତୋ ।
କାରାପେତ୍ୱା ରାଜଗେହଂ, ତତ୍ଥ ୱାସମକପ୍ପୟୀ ॥
ମହାରାଜା ପଣ୍ଡୁୱାସୁ-ଦେୱୋ ଜଟ୍ଠସୁତଂ ସକଂ ।
ଅଭୟଂ ଉପରଜ୍ଜମ୍ହି, କାଲେ ସମଭିସେଚୟି ॥
ଦୀଘାୟୁସ୍ସ କୁମାରସ୍ସ, ତନୟୋ ଦୀଘଗାମଣି ।
ସୁତ୍ୱା ଉମ୍ମାଦଚିତ୍ତଂ ତଂ, ତସ୍ସଂ ଜାତକୁତୂହଲୋ ॥
ଗହେତ୍ୱା’ପତିସ୍ସ ଗାମଂ, ତଂ ଅପସ୍ସି ମନୁଜାଧିପଂ ।
ଅଦା ସହୋପରାଜେନ, ରାଜୁପଟ୍ଠାନମସ୍ସସୋ ॥
ଗୱକ୍ଖାଭିମୁଖଟ୍ଠାନେ, ତଂ ଉପେଚ୍ଚ ଠିତଂ ତୁସା ।
ଦିସ୍ୱାନ ଗାମିଣିଂ ଚିତ୍ତା, ରତ୍ତଚିତ୍ତା’ହ ଦାସିକଂ ॥
‘‘କୋ ଏସୋ’’ତି ତତୋ ସୁତ୍ୱା,
ମାତୁଲସ୍ସ ସୁତୋଇତି ।
ଦାସିଂ ତତ୍ଥ ନିୟୋଜେସି,
ସଦ୍ଧିଂକତ୍ୱାନ ସୋ ତତୋ ॥
ଗୱକ୍ଖମ୍ହି ଡସାପେତ୍ୱା, ରତ୍ତିଂ କକ୍କଟୟନ୍ତକଂ ।
ଆରୁୟ୍ହ ଛିନ୍ଦୟିତ୍ୱାନ, କୱାଟଂ ତେନ ପାୱିସି ॥
ତାୟ ସଦ୍ଧିଂ ୱସିତ୍ୱାନ, ପଚ୍ଚୂସେୟେୱ ନିକ୍ଖମି ।
ଏୱଂ ନିଚ୍ଚଂ ୱସୀ ତତ୍ଥ, ଛିଦ୍ଦାଭାୱା ଅପାକଟୋ ॥
ସା ତେନ ଅଗ୍ଗହୀ ଗବ୍ଭଂ, ଗବ୍ଭେ ପରିଣତେ ତତୋ ।
ମାତୁ ଆରୋଚୟୀ ଦାସୀ, ମାତା ପୁଚ୍ଛିୟ ଧୀତରଂ ॥
ରଞ୍ଞୋ ଆରୋଚୟୀ ରାଜା, ଅମନ୍ତେତ୍ୱା ସୁତେ’ବ୍ରହ୍ମା ।
ପୋସିୟୋସୋ’ପି ଅମ୍ହେହି, ଦେୱ ତସ୍ସେୱ ତଂ ଇତି ॥
ପୁତ୍ତୋ ଚେ ମାରୟିସ୍ସାମ, ତ’ନ୍ତି ତସ୍ସ ଅଦଂସୁ ତଂ ।
ସା ସୂତିକାଲସମ୍ପତ୍ତେ, ସୂତି ଗେହଞ୍ଚ ପାୱିସିଂ ॥
ସଙ୍କିତ୍ୱା ଗୋପକଂ ଚିତ୍ତଂ, କାଲୱେଲଞ୍ଚ ଦାସକଂ ।
ତସ୍ମିଂ କମ୍ମେ ନିସ୍ସାୟା’ତି, ଗାମଣି ପରିଚାରକେ ॥
ତେ ପଟିଞ୍ଞଂ ଅଦେନ୍ତେ ତେ, ରାଜପୁତ୍ତା ଅଘାତୟୁଂ ।
ୟକ୍ଖା ହୁତ୍ୱାନ ରକ୍ଖିଂସୁ, ଉଭୋ ଗବ୍ଭେ କୁମାରକଂ ॥
ଅଞ୍ଞଂ ଉପୱିଜଞ୍ଞଂ ସା, ସଲ୍ଲକ୍ଖା ପେସି ଦାସିୟା ।
ଚିତ୍ତା ସା ଜନୟୀ ପୁତ୍ତଂ, ସା ଇତ୍ଥି ପନ ଧୀତରଂ ॥
ଚିତ୍ତଂ ସହସ୍ସଂ ଦାପେତ୍ୱା, ତସ୍ସା ପୁତ୍ତଂ ସକମ୍ପି ଚ ।
ଆଣାପେତ୍ୱା ଧୀତରଂ ତଂ, ନିପଜ୍ଜାପେସି ସନ୍ତିକେ ॥
ଧୀତା ଲଦ୍ଧା’ତି ସୁତ୍ୱାନ, ତୁଟ୍ଠା ରାଜସୁତା ଅହୁଂ ।
ମାତା ଚ ମାତୁମାତା ଚ, ଉଭୋ ପନ କୁମାରକଂ ॥
ମାତାମହସ୍ସ ନାମଞ୍ଚ, ଜେଟ୍ଠସ୍ସ ମାତୁଲସ୍ସ ଚ ।
ଏକଂ କତ୍ୱା ତମକରୁଂ, ପଣ୍ଡୁକାଭୟନାମକଂ ॥
ଲଂକା ପାଲୋ ପଣ୍ଡୁୱାସୁ-ଦେୱୋ ରଜ୍ଜମକାରୟି ।
ତିଂସ ୱସ୍ସମ୍ହି ଜାତମ୍ହି, ମତୋ ସୋ ପଣ୍ଡୁକାଭୟେ ॥
ତସ୍ମିଂ ମତସ୍ମିଂ ମନୁଜାଧିପସ୍ମିଂ,
ସବ୍ବେ ସମାଗମ୍ମ ନରିନ୍ଦପୁତ୍ତା ।
ତସ୍ସାଭୟସ୍ସାଭୟଦସ୍ସ ଭାତୁ,
ରାଜାଭିସେକଂ ଅକରୁଂ ଉଳାରାତି ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ଅଭୟାଭିସେକୋ ନାମ
ନୱମୋ ପରିଚ୍ଛେଦୋ ।
ଦସମ ପରିଚ୍ଛେଦ
ପଣ୍ଡୁକାଭୟାଭିସେକୋ
ଉମ୍ମାଦଚିତ୍ତାୟାଣତ୍ତା, ଦାସୀ ଆଦାୟ ଦାରକଂ ।
ସମୁଗ୍ଗେ ପକ୍ଖିପିତ୍ୱାନ, ଦ୍ୱାରମଣ୍ଡଲ କେ ଅଗା ॥
ରାଜପୁତ୍ତା ଚ ମିଗୱଂ, ଗତା ତୁମ୍ବରକନ୍ଦରେ ।
ଦିସ୍ୱା ଦାସିଂ କୁହିଂ ୟାସି, କିଂ ମେ କନ୍ତି ଚ ପୁଚ୍ଛିସୁଂ ॥
ଦ୍ୱାରମଣ୍ଡଲକଂ ୟାମି, ଧୀତୁମେଗୁଳପୂୱକଂ ।
ଇଚ୍ଚାହ ଓରୋପେହୀତି, ରାଜପୁତ୍ତଂ କମବ୍ରୱୁଂ ॥
ଚିତ୍ତୋ ଚ କାଲୱେଲୋ ଚ, ତସ୍ସା’ରକ୍ଖାୟ ନିଗ୍ଗତା ।
ମହନ୍ତଂ ସୂକରୱେସଂ, ତଂ ଖଣଂୟେୱ ଦସ୍ସୟୁଂ ॥
ତେ ତଂ ସମନୁବନ୍ଧିଂସୁ, ସାସମାଦାୟ ତତ୍ର’ଗା ।
ଦାରକଞ୍ଚ ସହସ୍ସଞ୍ଚ, ଆୟୁତ୍ତସ୍ସ ଅଦାରହୋ ॥
ତସ୍ମିଂୟେୱ ଦିନେ ତସ୍ସ, ଭରିୟା ଜନୟୀ ସୁତଂ ।
ୟମକେ ଜନୟୀ ପୁତ୍ତେ, ଭରିୟଂ ମେ’ତି ପୋସିତଂ ॥
ସୋ ସତ୍ତୱସ୍ସିକୋ ଚା’ସି, ତଂ ୱିଜାନିୟ ମାତୁଲା ।
ଗନ୍ତୁଂ ସରସି କୀଳନ୍ତେ, ଦାରକେ ଚ ପୟୋଜୟୁଂ ॥
ଜଲଟ୍ଠଂ ରୁକ୍ଖସୁସିରଂ, ଜଲଚ୍ଛାଦିତଛିଦ୍ଦକଂ ।
ନିମୁଜ୍ଜମାନୋ ଛିଦ୍ଦେନ, ପୱିସିତ୍ୱା ଚିରଟ୍ଠିତୋ ॥
ତତୋ ତଥେୱ ନିକ୍ଖମ୍ମ, କୁମାରେ ସେସଦାରକେ ।
ଉପଚ୍ଚ ପୁଚ୍ଛିୟନ୍ତୋପି, ୱଞ୍ଚେତ’ଞ୍ଞୱଚୋହି ସୋ ॥
ମନୁସ୍ସେହା’ଗତେହେସୋ, ନିୱାସେତ୍ୱାନ ୱତ୍ଥକଂ ।
କୁମାରୋ ୱାରିମୋ ଗୟ୍ହ, ସୁସିରମ୍ହି ଠିତୋ ଅହୁ ॥
ୱତ୍ଥକାନି ଗଣେତ୍ୱାନ, ମାରେତ୍ୱା ସେସଦାରକେ ।
ଗନ୍ତ୍ୱା ଆରୋଚୟୁଂ ସବ୍ବେ, ଦାରକା ମାରିତା ଇତି ॥
ଗତେସୁ ତେସୁ ସୋ ଗନ୍ତ୍ୱା, ଆୟୁତ୍ତକଘରଂ ସକଂ ।
ୱସଂ ଅସ୍ସାସିତୋ ତେନ, ଅହୂ ଦ୍ୱାଦସୱସ୍ସିକୋ ॥
ପୁନ ସୁତ୍ୱାନ ଜୀୱନ୍ତଂ, କୁମାରଂ ତସ୍ସ ମାତୁଲଂ ।
ତତ୍ଥ ଗୋପାଲକେ ସବ୍ବେ, ମାରେତୁଂ ସନ୍ନିୟୋଜୟୁଂ ॥
ତସ୍ମିଂ ଅହନି ଗୋପାଲା, ଲଦ୍ଧା ଏକଂ ଚତୁପ୍ପଦଂ ।
ଅଗ୍ଗିଂ ଆହରିତୁଂ ଗାମଂ, ପେସେତୁଂ ତଂ କୁମାରକଂ ॥
ସୋ ଗନ୍ତ୍ୱା ଘରମାୟୁତ୍ତ-ପୁତ୍ତକଂୟେୱ ପେସୟି ।
ପାଦା ରୁଜନ୍ତି ମେ ତେହି, ଅଗ୍ଗିଂ ଗୋପାଲସନ୍ତିକଂ ॥
ତତ୍ଥ ଅଙ୍ଗାର ମଂସଞ୍ଚ,
ଖାଦିସ୍ସସି ତୁୱଂ ଇତି ।
ନେ ସି ସୋ ତଂ ୱଚୋ ସୁତ୍ୱା,
ଅଗ୍ଗିଂ ଗୋପାଲସନ୍ତିକଂ ॥
ତସ୍ମିଂ ଖଣେ ପେସିତା ତେ, ପରିକ୍ଖିପିୟ ମାରୟୁଂ ।
ସବ୍ବେ ଗୋପେ ମାରୟିତ୍ୱା, ମାତୁଲାନଂ ନିୱେଦୟୁଂ ॥
ତଥୋ ସୋଳସୱସ୍ସଂ ତଂ, ୱିଜାନିଂସୁ ଚ ମାତୁଲା ।
ମାତା ସହସ୍ସଞ୍ଚା’ଦାସି, ତସ୍ସା ରକ୍ଖଞ୍ଚ ଆଦିସି ॥
ଆୟୁତ୍ତୋ ମାତୁସନ୍ଦେସଂ, ସବ୍ବଂ ତସ୍ସ ନିୱେଦିୟ ।
ଦତ୍ୱା ଦାସଂ ସହସ୍ସଞ୍ଚ, ପେସେସି ପଣ୍ଡୁଲନ୍ତିକଂ ॥
ପଣ୍ଡୁଲବ୍ରାହ୍ମଣୋ ନାମ, ଭୋଗୱା ୱେଦପାରଗୋ ।
ଦକ୍ଖିଣସ୍ମିଂ ଦିସାଭାଗେ, ୱସୀ ପଣ୍ଡୁଲଗାମକେ ॥
କୁମାରୋ ତତ୍ଥ ଗନ୍ତ୍ୱାନ, ପସ୍ସି ପଣ୍ଡୁଲବ୍ରାହ୍ମଣଂ ।
‘‘ତ୍ୱଂ ପଣ୍ଡୁକାଭୟୋ ତାତ’’, ଇତି ପୁଚ୍ଛିୟ ବ୍ୟାକତେ ॥
ତସ୍ସ କତ୍ୱାନ ସକ୍କାରଂ, ଆହ ରାଜା ଭୱିସ୍ସସି ।
ସମସତ୍ତତିୱସ୍ସାନି, ରଜ୍ଜଂ ତ୍ୱଂ କାରୟିସ୍ସସି ॥
ସିପ୍ପଂ ଉଗ୍ଗଣ୍ହ ତାତାତି, ସିପ୍ପୁଗ୍ଗହମକାରୟୀ ।
ଚନ୍ଦେନ ତସ୍ସ ପୁତ୍ତେନ, ଖିପ୍ପଂ ସିପ୍ପଂ ସମାପିତଂ ॥
ଅଦା ସତସହସ୍ସଂ ସୋ, ୟୋଧସଙ୍ଗହକାରଣା ।
ୟୋଧେସୁ ସଙ୍ଗହିତେସୁ, ତେନ ପଞ୍ଚସତେସୁ ସୋ ॥
ସିୟୁଂ ୟାୟ ଗୟିତାନି, ପଣ୍ଣାନି କନକାନି ତଂ ।
ମହେସିଂ କୁରୁଚନ୍ଦଞ୍ଚ, ମମ ପୁତ୍ତଂ ପୁରୋହିତଂ ॥
ଇଭି ୱତ୍ୱା ଧନଂ ଦତ୍ୱା, ସୟୋଧଂ ନିହରି ତତୋ ।
ସୋ ନାମଂ ସାୱୟିତ୍ୱାନ, ତତୋ ନିକ୍ଖମ୍ମ ପୁଞ୍ଞୱା ॥
ଲଦ୍ଧବଲୋ ନଗରକେ, କାସପବ୍ବତ ସନ୍ତିକେ ।
ସତ୍ତସତାନି ପୁରିସେ, ସବ୍ବେସଂ ଭୋଜନାନି ଚ ॥
ତତୋ ନରସହସ୍ସେନ, ଦ୍ୱିସତେନ କୁମାରକୋ ।
ଗିରିକଣ୍ଡ ପବ୍ବତଂ ନାମ, ଅଗମା ପରିୱାରିତୋ ॥
ଗିରିକଣ୍ଡସିୱୋ ନାମ, ପଣ୍ଡୁକାଭୟ ମାତୁଲୋ ।
ତଂ ପଣ୍ଡୁୱାସୁଦେୱେନ, ଦିନ୍ନଂ ଭୁଞ୍ଜତି ଦେସକଂ ॥
ସୋ କରିସସତଂ ପକ୍କଂ, ତଦା ଲାୱେତି ଖତ୍ତିୟୋ ।
ତସ୍ସ ଧୀତା ରୂପୱତୀ, ପାଲୀ ନାମା’ସି ଖତ୍ତିୟା ॥
ସା ମହାପରିୱାରେନ, ୟାନମାରୁୟ୍ହ ସୋଭନଂ ।
ପିତୁଭତ୍ତଂ ଗାହୟିତ୍ୱା, ଲାୱକାନଞ୍ଚ ଗଚ୍ଛତି ॥
କୁମାରସ୍ସ ମନୁସ୍ସାନଂ, ଦିସ୍ୱା ତତ୍ଥ କୁମାରିକଂ ।
ଆରୋଚେସୁଂ କୁମାରସ୍ସ, କୁମାରୋ ସହସା’ଗତୋ ॥
ଦ୍ୱେଧା ତଂ ପରିସଂ କତ୍ୱା, ସତଂ ୟାନମପେସୟି ।
ତଦନ୍ତିକଂ ସପରିସା, କତ୍ଥ ୟାସୀତି ପୁଚ୍ଛିତଂ ॥
ତାୟ ୱୁତ୍ତେତୁ ସବ୍ବସ୍ମିଂ, ତସ୍ସଂସାରତ୍ତ ମାନସୋ ।
ଅତ୍ତନୋ ସଂୱିଭାଗତ୍ଥଂ, ଭନ୍ତେନା’ୟାଚି ଖତ୍ତିୟୋ ॥
ସାସମୋରୁୟ୍ହ ୟାନମ୍ହା, ଅଦା ସୋୱଣ୍ଣପାତିୟା ।
ଭତ୍ତଂ ନିଗ୍ରୋଧ ମୂଲସ୍ମିଂ, ରାଜପୁତ୍ତସ୍ସ ଖତ୍ତିୟା ॥
ଗଣ୍ହି ନିଗ୍ରୋଧପଣ୍ଣାନି, ଭୋଜେତୁଂ ସେସକେ ଜନେ ।
ସୋୱଣ୍ଣଭାଜନାନା’ସୁଂ, ତାନି ପଣ୍ଣାନି ତଂ ଖଣେ ॥
ତାନି ଦିସ୍ୱା ରାଜପୁତ୍ତୋ, ସରିତ୍ୱା ଦିଜଭାସିତଂ ।
ମହେସିଭାୱ ୟୋଗ୍ଗାମେ, କଞ୍ଞାଲଦ୍ଧାତି ତୁସ୍ସିସୋ ॥
ସବ୍ବେ ଭୋଜାପୟୀ ତେସା, ତଂ ନ ଖୀୟିତ୍ଥ ଭୋଜନଂ ।
ଏକସ୍ସ ପଟିୱିସୋ’ୱ, ଗହିତୋ ତତ୍ଥ ଦିସ୍ସଥ ॥
ଏୱଂ ପୁଞ୍ଞଗୁଣୂପେତା, ସୁକୁମାରୀ କୁମାରିକା ।
ସୁୱଣ୍ଣପାଲି ନାମେନ, ତତୋପ୍ପଭୁତ ଆସି ସା ॥
ତଂ କୁମାର ଗହେତ୍ୱାନ, ୟାନମାରୁୟ୍ହ ଖତ୍ତିୟୋ ।
ମହବ୍ବଲ ପରିବ୍ୟୂଳ୍ହୋ, ଅନୁସଂଣୀ ଅପକ୍କମି ॥
ତଂ ସୁତ୍ୱାନ ପିତା ତସ୍ସା, ନରେ ସବ୍ବେ ଅପେସୟି ।
ତେ ଗନ୍ତ୍ୱା କଲହଂ କତ୍ୱା, ତଜ୍ଜିତା ତେହି ଆଗମୁଂ ॥
କଲହନଗରଂ ନାମ, ଗାମୋ ତତ୍ଥ କତେ ଅହୁ ।
ତଂ ସୁତ୍ୱା ଭାତରୋ ତସ୍ସା, ପଞ୍ଚୟୁଦ୍ଧାୟୁ’ପାଗମୁଂ ॥
ସବ୍ବେ ତେ ପଣ୍ଡୁଲସୁତୋ, ଚନ୍ଦୋୟେୱ ଅଘାତୟି ।
ଲୋହିତ ୱାହଖଣ୍ଡୋତି, ତେସଂ ୟୁଦ୍ଧମହୀ ଅହୁ ॥
ମହତା ବଲ କାଧୟନ,
ତତୋ ସୋ ପଣ୍ଡୁକାଭୟୋ ।
ଗଙ୍ଗାୟ ପାରିମେ ତିରେ,
ଦୋଳପବ୍ବତକଂ ଅଗା ॥
ତତ୍ଥ ଚତ୍ତାରି ୱସ୍ସାନି, ୱସି ତଂ ତତ୍ଥ ମାତୁଲା ।
ସୁତ୍ୱା ଠପେତ୍ୱା ରାଜାନଂ, ତଂ ୟୁଦ୍ଧତ୍ଥମୁପାଗମୁଂ ॥
ଖନ୍ଧାୱାରଂ ନିୱେସେତ୍ୱା, ଧୂମରକ୍ଖାଗ ସନ୍ତିକେ ।
ଭାଗିନେୟ୍ୟେନ ୟୁଜ୍ଝିଂସୁ, ଭାଗିନେୟ୍ୟୋ ତୁ ମାତୁଲେ ॥
ଅନୁବନ୍ଧୀ ଓରଗଙ୍ଗଂ, ମଲାପେତ୍ୱା ନିୱତ୍ତିୟ ।
ତେସଞ୍ଚ ଖନ୍ଧାୱାରମ୍ହି, ଦୁୱେ ୱସ୍ସାନି ସୋ ୱସୀ ॥
ଗନ୍ତ୍ୱୋ’ପତିସ୍ସଗାମଂ ତେ, ତମତ୍ଥଂ ରାଜିନୋ’ବ୍ରୱୁଂ ।
ରାଜାଲେଖଂ କୁମାରସ୍ସ, ସରହସ୍ସଂ ସପାହିଣି ॥
‘‘ପୁଞ୍ଜସ୍ସୁ ପାରଗଙ୍ଗଂ ତ୍ୱଂ, ମା’ଗା ଓରଂତତୋ’’ଇତି ।
ତଂ ସୁତ୍ୱା ତସ୍ସ କୁଜ୍ଜିଂସୁ, ଭାତରୋ ନୱ ରାଜିନୋ ॥
ଉପତ୍ଥମ୍ଭୋ ତ୍ୱମେୱା’ସି, ଚିରଂ ତସ୍ସ ଇଦାନି ତୁ ।
ରଟ୍ଠଂ ଦଦାସି ତସ୍ମା ତ୍ୱଂ, ମାରେସ୍ସାମା’ତି ଅବ୍ରୱୁଂ ॥
ସୋ ତେସଂ ରଜ୍ଜମପ୍ପେସି, ତେ ତିସ୍ସଂ ନାମ ଭାତରଂ ।
ସବ୍ବେୱ ସହିତା’କଂସୁ, ରଜ୍ଜସ୍ସ ପରିନାୟକଂ ॥
ଏସୋ ୱୀସତିୱସ୍ସାନି, ଅଭୟୋ’ଭୟ ଦାୟକୋ ।
ତତ୍ଥୋ’ପତିସ୍ସଗାମମ୍ହି, ରାଜା ରଜ୍ଜମକାରୟି ॥
ୱସନ୍ତି ଧୂମରକ୍ଖାଗେ, ସରେ ତୁମ୍ବରିୟଙ୍ଗଣେ ।
ଚରତେ ୱଳୱା ରୁପା, ୟକ୍ଖୀ ଚେତିୟନାମିକା ॥
ଏକୋ ଦିସ୍ୱାନ ସେନଙ୍ଗଂ, ଉତ୍ତପାଦଂ ମନୋରମଂ ।
ଆରୋଚେସି କୁମାରସ୍ସ, ୱଳୱେ’ତ୍ତୀ’ଦିସୀ ଇତି ॥
କୁମାରୋ ରସ୍ମିମାଦାୟ, ଗହେତୁଂ ତଂ ଉପାଗମି ।
ପଚ୍ଛତୋ ଅଗତଂ ଦିସ୍ୱା, ଭୀତା ତେଜେନ ତସ୍ସସା ॥
ଧାୱି’ନନ୍ତରଧାୟିତ୍ୱା, ଧାୱନ୍ତି ମନୁବନ୍ଧିସୋ ।
ଧାୱମାନା ସରଂ ହଂ ସା, ସତ୍ତକ୍ଖତ୍ତୁଂ ପରିକ୍ଖିପି ॥
ଓତରିତ୍ୱା ମହାଗଙ୍ଗଂ, ଉତ୍ତରିତ୍ୱା ତତୋ ପନ ।
ଧୁମରକ୍ଖଂ ପବ୍ବତଂ ତଂ, ସତ୍ତକ୍ଖତ୍ତୁଂ ପରିକ୍ଖିପି ॥
ତଂ ସରଂ ପୁନ ତିକ୍ଖତ୍ତୁଂ, ପରିକ୍ଖିପି ତତୋ ପୁନ ।
ଗଙ୍ଗଂ କଚ୍ଛକତିତ୍ଥେନ, ସମୋତରି ତହିଂ ତୁ ସୋ ॥
ଗହେସିତଂ ୱାଲଧିସ୍ମିଂ, ତାଲପତ୍ତଞ୍ଚ ତୋୟଗଂ ।
ତସ୍ସ ପୁଞ୍ଞାନୁଭାୱେନ, ସୋ ଅହୋସି ମହା ଅସି ॥
ଉଚ୍ଚାରେସି ଅସିଂ ଦଜ୍ଜଂ, ‘‘ମାରୋମୀ’’ତି ତମାହ ସା ।
ରଜ୍ଜଂ ଗହେତ୍ୱା ତେ ଦଜ୍ଜଂ, ସାମି ମାମଂ ଅମାରୟି ॥
ଗୀୱାୟ ତଂ ଗହେତ୍ୱା ସୋ, ୱିଜ୍ଝିତ୍ୱା ଅସିକୋଟିୟା ।
ନାସାୟ ରଜ୍ଜୁୟା ବନ୍ଧି, ସା ଅହୋସି ୱସାନୁଗା ॥
ଗନ୍ତ୍ୱା ତଂ ଧୁମରକ୍ଖଂ ସୋ, ତମାରୁୟ୍ହ ମହବ୍ବଲୋ ।
ତତ୍ଥ ଚତ୍ତାରି ୱସ୍ସାନି, ଧୂମରକ୍ଖନ ଗେ ୱସି ॥
ତତୋ ନିକ୍ଖମ୍ମ ସବଲୋ, ଆଗମ୍ମା’ରିଟ୍ଠପବ୍ବତଂ ।
ସୁଦ୍ଧିକାଲମପେକ୍ଖନ୍ତୋ, ତତ୍ଥ ସତ୍ତସମାୱସି ॥
ଦ୍ୱେ ମାତୁଲେ ଠପେତ୍ୱାନ, ତସ୍ସ ସେସଟ୍ଠମାତୁଲା ।
ୟୁଦ୍ଧସଜ୍ଜା ଅରିଟ୍ଠଂ ତଂ, ଉପସଙ୍କମ୍ମ ପବ୍ବତଂ ॥
ଖନ୍ଧାୱାରଂ ନଗରକେ, ନିୱେସେତ୍ୱା ଚମୂପତିଂ ।
ଦତ୍ୱା ପରିକ୍ଖିପାପେସୁଂ, ସମନ୍ତା’ରିଟ୍ଠପବ୍ବତଂ ॥
ୟକ୍ଖିନିୟା ମନ୍ତୟିତ୍ୱା, ତସ୍ସା ୱଚନୟୁତ୍ତିୟା ।
ଦତ୍ୱା ରାଜପରିକ୍ଖାରଂ, ପଣ୍ଣାକାରା ୟୁୱାନି ଚ ॥
‘‘ଗଣ୍ହାଥ ସବ୍ବାନେ’ତାନି, ଖମାପେସ୍ସାମି ୱୋ ଅହଂ’’ ।
ଇତି ୱତ୍ୱାନ ପେସେସି, କୁମାରୋ ପୁରତୋ ବଲଂ ॥
ଗଣ୍ହିସ୍ସାମି ପୱିଟ୍ଠନ୍ତି, ୱିସ୍ସଟ୍ଠେସୁ ତୁ ତେସୁ ସୋ ।
ଆରୁୟ୍ହ ୟକ୍ଖୱଳୱଂ, ମହାବଲପୁରକ୍ଖତୋ ॥
ୟୁଦ୍ଧାୟ ପାୱିସି ୟକ୍ଖୀ, ମହାରାୱ ମରାପିସା ।
ଅନ୍ତୋ ବହିବଲଞ୍ଚସ୍ସ, ଉକ୍କୁଟ୍ଠିଂ ମହତିଂ ଅକା ॥
କୁମାରପୁରିସା ସବ୍ବେ, ପରସେନା ନରେ ବହୂ ।
ଘାତେତ୍ୱା ମାତୁଲେ ଚ’ତ୍ଥ, ସୀସରାସିଂ ଅକଂସୁ ତେ ॥
ସେନାପତି ପାଲୟିତ୍ୱା, ଗୁମ୍ବଟ୍ଠାନଂ ସପାୱିସି ।
ସେନାପତି ଗୁମ୍ବକୋ’ତି, ତେନ ଏସ ପୱୁଚ୍ଚତି ॥
ଉପରିଟ୍ଠମାତୁଲସିରଂ, ସୀସରାସିଂ ସପସ୍ସିୟ ।
ଲାବୁରାସୀ’ୱ ଇଚ୍ଛାହ, ତେନା’ସି ଲାବୁଗାମକୋ ॥
ଏୱଂ ୱିଜିତସଙ୍ଗାମୋ, ତତୋ ସୋ ପଣ୍ଡୁକାଭୟୋ ।
ଅୟ୍ୟକସ୍ସା’ନୁରାଧସ୍ସ, ୱସନଠାନମାଗମି ॥
ଅତ୍ତନୋ ରାଜଗେହଂ ସୋ, ତସ୍ସ ଦତ୍ୱାନ ଅୟ୍ୟକୋ ।
ଅଞ୍ଞତ୍ଥୱାସଂ କପ୍ପେସି, ସୋ ତୁ ତସ୍ମିଂ ଘରେ ୱସି ॥
ପୁଚ୍ଛାପେତ୍ୱାନ ନେମିତ୍ତଂ, ୱତ୍ଥୁୱିଜ୍ଜା’ୱିଦୁଂ ତଥା ।
ନଗରଂ ପୱରଂ ତସ୍ମିଂ, ଗାମେୟେୱ ଅମାପୟି ॥
ନିୱାସତ୍ତା’ନୁରାଧାନଂ, ଅନୁରାଧପୁରଂ ଅହୁ ।
ନକ୍ଖତ୍ତେନା’ନୁରାଧେନ, ପତିଟ୍ଠାପିତ ତାୟ ଚ ॥
ଆଣାପେତ୍ୱା ମାତୁଲାନଂ, ଛତ୍ତଂ ଜାତସ୍ସରେ ଇଧ ।
ଧୋୱାପେତ୍ୱା ଧାରୟିତ୍ୱା, ତଂ ସରେୟେୱ ୱାରିନା ॥
ଅତ୍ତନୋ ଅଭିସେକଂ ସୋ, କାରେସି ପଣ୍ଡୁକାଭୟୋ ।
ସୁୱଣ୍ଣପାଲିଂ ଦେୱିଂ ତଂ, ମହେସିତ୍ତେ ଭିସେଚୟି ॥
ଅଦା ଚନ୍ଦକୁମାରସ୍ସ, ପୋରୋହିଚ୍ଚଂ ୟଥାୱିଧି ।
ଠାନନ୍ତରାନି ସେସାନଂ, ଭଚ୍ଚାନଞ୍ଚ ୟଥାରହଂ ॥
ମାତୁୟା ଉପକାରତ୍ତା, ଅତ୍ତନୋ ଚ ମହୀପତିଂ ।
ଅଘାତୟିତ୍ୱା ଜେଟ୍ଠଂ ତଂ, ମାତୁଲଂ ଅଭୟଂ ପନ ॥
ରତ୍ତିରଜ୍ଜଂ ଅଦା ତସ୍ସ, ଅହୁ ନଗରଗୁତ୍ତିକୋ ।
ତଦୁପାଦାୟ ନଗରେ, ଅହୂ ନଗରଗୁତ୍ତିକୋ ॥
ସସ୍ସୁରଂ ତଂ ଅଘାତେତ୍ୱା, ଗିରିକଣ୍ଡସିୱମ୍ପି ଚ ।
ଗିରିକଣ୍ଣଦେସଂ ତସ୍ସେ’ୱ, ମାତୁଲସ୍ସ ଅଦାସି ସୋ ॥
ସରଂ ତଞ୍ଚ ଖଣାପେତ୍ୱା, କାରାପେସି ବହୂ ଦକଂ ।
ଜୟେ ଜଲସ୍ସ ଗାହେନ, ଜୟୱାପୀତି ଅହୁତଂ ॥
କାଲୱେଲଂ ନିୱାସେସି, ୟକ୍ଖଂପୁର ପୁରତ୍ଥିମେ ।
ୟକ୍ଖଂ ତୁ ଚିତ୍ତରାଜଂ ତଂ, ହେଟ୍ଠୋ ଅଭୟୱାପିୟା ॥
ପୁବ୍ବୋପକାରିଂ ଦାସିଂ ତଂ, ନିବ୍ବତ୍ତଂ ୟକ୍ଖୟୋନିୟା ।
ପୁରସ୍ସ ଦକ୍ଖିଣଦ୍ୱାରେ, ସୋ କତଞ୍ଞୂ ନିୱାସୟି ॥
ଅନ୍ତୋ ନରିନ୍ଦୱତ୍ଥୁସ୍ସ, ୱଳୱାମୁଖୟକ୍ଖିନିଂ ।
ନିୱାସେସି ବଲିଂ ତେସଂ, ଅଞ୍ଞେସଞ୍ଚାନୁୱସ୍ସକଂ ॥
ଦାପେସି ଛଣକାଲେ ତୁ, ଚିତ୍ତରାଜେନ ସୋ ସହ ।
ସମାସନେ ନିସୀଦିତ୍ୱା, ଦିବ୍ବମାନୁସନାଟକଂ ॥
କାରେନ୍ତୋ’ଭିରମି ରାଜା, ରତିଖିଡ୍ଡା ସମପ୍ପିତୋ ।
ଦ୍ୱାରଗାମେ ଚ ଚତୁରୋ, ଭୟୱାପିଞ୍ଚ କାରୟି ॥
ମହାସୁସାନଘାତନଂ, ପଚ୍ଛିମରାଜିନିଂ ତଥା ।
ୱେସ୍ସୱଣସ୍ସ ନିଗ୍ରୋଧଂ, ବ୍ୟାଧିଦେୱସ୍ସ ତାଲକଂ ॥
ୟୋନସଭାଗ ୱତ୍ଥୁଞ୍ଚ, ମହେଜ୍ଜଘରମେୱ ଚ ।
ଏତାନି ପଚ୍ଛିମଦ୍ୱାର-ଦିସାଭାଗେ ନିୱେସୟି ॥
ପଞ୍ଚସତାନି ଚଣ୍ଡାଲ-ପୁରିସେ ପୁରସୋଧକେ ।
ଦୁୱେସତାନି ଚଣ୍ଡାଲ-ପୁରିସେ ୱଚ୍ଚସୋଧକେ ॥
ଦିୟଡ୍ଢସତଚଣ୍ଡାଲେ, ମତନୀହାରକେ’ପି ଚ ।
ସୁସାନ ଗୋପଚଣ୍ଡାଲେ, ତତ୍ତକେୟେୱ ଆଦିସି ॥
ତେସଂ ଗାମଂ ନିୱେସେସି, ସୁସାନା ପଚ୍ଛିମୁତ୍ତରେ ।
ୟଥା ୱିହିତକମ୍ମାନି, ତାନି ନିଚ୍ଚଂ ଅକଂସୁତେ ॥
ତସ୍ସ ଚଣ୍ଡାଲଗାମସ୍ସ, ପୁବ୍ବୁତ୍ତରଦିସାୟ ତୁ ।
ନୀଚସୁସାନକଂ ନାମ, ଚଣ୍ଡାଲାନମକାରୟି ॥
ତସ୍ସୁତ୍ତରେ ସୁସାନସ୍ସ, ପାସାଣପବ୍ବତନ୍ତରେ ।
ଆୱାସପାଲିଝାଧାନଂ, ତଦା ଆସି ନିୱେସିତା ॥
ତଦୁତ୍ତରେ ଦିସାଭାଗେ, ୟାୱ ଗାମଣି ୱାପିୟା ।
ତାପସାନଂ ଅନେକେସଂ, ଅସ୍ସମୋ ଆସି କାରିତୋ ॥
ତସ୍ସେୱ ଚ ସୁସାନସ୍ସ, ପୁରତ୍ଥିମଦିସାୟ ତୁ ।
ଜୋତିୟସ୍ସ ନିଗଣ୍ଠସ୍ସ, ଘରଂ କାରେସି ଭୂପତି ॥
ତସ୍ମିଂୟେୱ ଦେସସ୍ମିଂ, ନିଗଣ୍ଠୋ ଗିରିନାମକୋ ।
ନାନାପାସଣ୍ଡକା ଚେୱ, ୱସିଂସୁ ସମଣା ବହୂ ॥
ତତ୍ଥେୱ ଚ ଦେୱକୁଲଂ, ଅକାରେସି ମହୀପତି ।
କୁଭଣ୍ଡସ୍ସ ନିଗଣ୍ଠସ୍ସ, ତଂନାମକମହୋସିତଂ ॥
ତତୋ ତୁ ପଚ୍ଛିମେ ଭାଗେ, ଝାଧପାଲିପୁରତ୍ଥିମେ ।
ମିଚ୍ଛାଦିଟ୍ଠିକୁଲାନଂ ତୁ, ୱସୀ ପଞ୍ଚସତଂ ତହିଂ ॥
ପରଂ ଜୋତିୟଗେହମ୍ହା, ଓରଂ ଗାମଣି ୱାପିୟା ।
ସୋ ପରିବ୍ବାଜକାରାମଂ, କାରାପେସି ତଥେୱ ଚ ॥
ଆଜୀୱକାନଂ ଗେହଞ୍ଚ, ବ୍ରାହ୍ମଣୱଟ୍ଟମେୱ ଚ ।
ସିୱିକା ସୋତ୍ଥିସାଲା ଚ, ଅକାରେସି ତହିଂ ତହିଂ ॥
ଦସୱସ୍ସାଭିସେକୋ ସୋ, ଗାମସୀମା ନିୱେସୟି ।
ଲଂକାଦୀପମ୍ହି ସକଲେ, ଲଂକିନ୍ଦୋ ପଣ୍ଡୁକାଭୟୋ ॥
ସୋ କାଲୱେଲଚିତ୍ତେହି, ଦିସ୍ସମାନେହି ଭୂପତି ।
ସହା’ନୁ ଭୋସି ସମ୍ପତିଂ, ୟକ୍ଖଭୂତସହାୟ ୱା ॥
ପଣ୍ଡୁକାଭୟରଞ୍ଞୋ ଚ, ଅଭୟସ୍ସ ଚ ଅନ୍ତରେ ।
ରାଜସୁଞ୍ଞାନି ୱସ୍ସାନି, ଅହେସୁଂ ଦସସତ୍ତ ଚ ॥
ସୋ ପଣ୍ଡୁକାଭୟମହୀପତି ସତ୍ତତିଂସ–
ୱସ୍ସୋ’ଧିଗମ୍ମ ଧିତିମା ଧରଣୀ ପତିତ୍ତଂ ।
ରମ୍ମେ ଅନୁନମନୁରାଧପୁରେ ସମିଦ୍ଧେ ।
ୱସ୍ସାନି ଅକାରୟି ରଜ୍ଜମେତ୍ଥାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପଣ୍ଡୁକାଭୟାଭିସେକୋନାମ
ଦସମୋ ପରିଚ୍ଛେଦୋ ।
ଏକାଦସମ ପରିଚ୍ଛେଦ
ଦେୱାନଂପିୟତିସ୍ସାଭିସେକୋ
ତସ୍ସଚ୍ଚୟେ ତସ୍ସ ସୁତୋ, ମୁଟସିୱୋ’ତି ୱିସ୍ସୁତୋ ।
ସୁୱଣ୍ଣପାଲିୟା ପୁତ୍ତୋ, ପତ୍ତୋ ରଜ୍ଜମନାକୁଲଂ ॥
ମହାମେଘୱନୁୟ୍ୟାନଂ, ନାମନୁଗଗୁଣୋଦିତଂ ।
ଫଲପୁପ୍ଫତରୁପେତଂ, ସୋ ରାଜା କାରୟି ସୁଭଂ ॥
ଉୟ୍ୟାନଠାନଗ୍ଗହଣେ, ମହାମେଘୋ ଅକାଲଜୋ ।
ପାୱସ୍ସିତେନ ଉୟ୍ୟାନଂ, ମହାମେଘୱନଂ ଅହୁ ॥
ସଟ୍ଠିୱସ୍ସାନି ମୁଟସିୱୋ, ରାଜା ରାଜ୍ଜମକାରୟି ।
ଅନୁରାଧେ ପୁରୱରେ, ଲଂକା ଭୁୱଦନେ ସୁଭେ ॥
ତସ୍ସ ପୁତ୍ତା ଦସା’ହେସୁଂ, ଅଞ୍ଞମଞ୍ଞହିତେସିନୋ ।
ଦୁୱେ ଧୀତା ଚା’ନୁକୁଲା, କୁଲାନୁଚ୍ଛୱିକା ଅହୂ ॥
ଦେୱାନଂ ପିୟତିସ୍ସୋତି, ୱିସ୍ସୁତୋ ଦୁତିୟୋ ସୁତୋ ।
ତେସୁ ଭାତୂସୁ ସବ୍ବେସୁ, ପୁଞ୍ଞାପଞ୍ଞାଧିକୋ ଅହୁ ॥
ଦେୱାନଂ ପିୟତିସ୍ସୋ ସୋ, ରାଜା’ସି ପିତୁଅଚ୍ଚୟେ ।
ତସ୍ସା’ଭିସେକେନ ସମଂ, ବହୂନ’ଚ୍ଛରିୟାନ’ହୁଂ ॥
ଲଂକାଦୀପମ୍ହି ସକଲେ, ନିଧୟୋ ରତନାନି ଚ ।
ଅନ୍ତୋଠିତାନି ଉଗ୍ଗନ୍ତ୍ୱା, ପଥୱୀତଲମାରୁହୁଂ ॥
ଲଂକାଦୀପସମୀପମ୍ହି, ଭିନ୍ନନାୱାଗତାନି ଚ ।
ତତ୍ରଜାତାନି ଚ ଥଲଂ, ରତନାନି ସମାରୁହୁଂ ॥
ଛାତପବ୍ବତପାଦମ୍ହି, ତିସ୍ସୋ ଚ ୱେଳୁୟଟ୍ଠିୟୋ ।
ଜାତାରଥପତୋଦେନ, ସମାନା ପରିମାଣତୋ ॥
ତାସୁ ଏକାଲତାୟଟ୍ଠି, ରଜତା’ଭା ତହିଂ ଲତା ।
ସୁୱଣ୍ଣାୱଣ୍ଣାରୁଚିରା, ଦିସ୍ସନ୍ତେତା ମନୋରମା ॥
ଏକା କୁସୁମା ୟଟ୍ଠୀତୁ, କୁସୁମାନି ତହିଂ ପନ ।
ନାନାନି ନାନାୱଣ୍ଣାନି, ଦିସ୍ସନ୍ତେ’ତି ଫୁଟାନି ଚ ॥
ଏକାସକୁଣୟଟ୍ଠିତୁ, ତହିଂ ପକ୍ଖିମିଗା ବହୂ ।
ନାନା ଚ ନାନାୱଣ୍ଣା ଚ, ସଜୀୱା ୱିୟ ଦିସ୍ସରେ ॥
ଭୟଗଜରଥାମଲକା, ୱଲୟଙ୍ଗୁଲିୱେଠକା ।
କକୁଧଫଲାପାକତିକା, ଇଚ୍ଚେତା ଅଟ୍ଠଜାତିୟୋ ॥
ମୁତ୍ତାସମୁଦା ଉଗ୍ଗନ୍ତ୍ୱା, ତୀରେ ୱଟ୍ଟି ୱିୟ ଠିତା ।
ଦେୱାନଂ ପିୟତିସ୍ସସ୍ସ, ସବ୍ବଂ ପୁଞ୍ଞୱିଜମ୍ଭିତଂ ॥
ଇନ୍ଦନୀଲଂ ୱେଳୁରିୟଂ, ଲୋହିତଙ୍କମଣିଧି’ମେ ।
ରଜତାନି ପନେ’ତାନି, ମୁତ୍ତା ତା ତାୱୟଟ୍ଠିୟୋ ॥
ସତ୍ତହବ୍ଭନ୍ତରେୟେୱ, ରଞ୍ଞୋ ସନ୍ତିକମାହରୁଂ ।
ତାନି ଦିସ୍ୱା ପତୀତୋ ସୋ, ରାଜା ଇତି ୱିଚିନ୍ତୟି ॥
ରତନାନି ଅନଗ୍ଘାନି, ଧମ୍ମାସୋକୋ ଇମାନିମେ ।
ସହାୟୋ’ରହତେନା’ଞ୍ଞୋ, ତସ୍ସ ଦସ୍ସଂ ଇମାନ’ତୋ ॥
ଦେୱାନଂ ପିୟତିସ୍ସୋ ଚ, ଧମ୍ମାସୋକୋ ଚ ତେ ଇମେ ।
ଦ୍ୱେ ଅଦିଟ୍ଠସହାୟାହି, ଚିରପ୍ପଭୁତି ଭୂପତି ॥
ଭାଗିନେୟ୍ୟଂ ମହାରିଟ୍ଠଂ, ଅମଚ୍ଚଂ ପମୁଖଂ ତତୋ ।
ଦିଜଂ ଅମଚ୍ଚଂ ଗଣତଂ, ରାଜା ତେ ଚତୁରୋ ଜନେ ॥
ଦୂତୋ କତ୍ୱାନ ପାହେସି, ବଲୋଘପରିୱାରିତେ ।
ଗାହା ପେତ୍ୱା ଅନଗ୍ଘାନି, ରତନାନି ଇମାନି ସୋ ॥
ମଣିଜାତୀ ଚ ତିସ୍ସୋ ତା, ତିସ୍ସୋ ଚ ରଥୟଟ୍ଠିୟୋ ।
ସଙ୍ଖଞ୍ଚ ଦକ୍ଖିଣାୱତ୍ତଂ, ମୁତ୍ତା ଜାତୀ ଚ ଅଟ୍ଠ ତା ॥
ଆରୁୟ୍ହ ଜମ୍ବୁକୋଲମ୍ହି, ନାୱଂ ସତ୍ତଦିନେନ ତେ ।
ସୁଖେନ ତିତ୍ଥଂ ଲଦ୍ଧାନ, ସତ୍ତାହେନ ତତୋ ପୁନ ॥
ପାଟଲିପୁତ୍ତଂ ଗନ୍ତ୍ୱାନ, ଧମ୍ମାସୋକସ୍ସ ରାଜିନୋ ।
ଅଦଂସୁ ପଣ୍ଣାକାରେତେ, ଦିସ୍ୱା ତାନି ପସୀଦି ସୋ ॥
ରତନାନି’ଦିସାନେତ୍ଥ, ନତ୍ଥି ମେ ଇତି ଚିନ୍ତିୟ ।
ଅଦା ସେନାପତିଟ୍ଠାନଂ, ତୁଟ୍ଠୋ’ରିଟ୍ଠସ୍ସ ଭୂପତି ॥
ପୋରୋହିଚ୍ଚବ୍ରାହ୍ମଣସ୍ସ, ଦଣ୍ଡନାୟତଂ ପନ ।
ଅଦାସି ତସ୍ସା’ମଚ୍ଚସ୍ସ, ସେଟ୍ଠିତ୍ତଂ ଗଣକସ୍ସ ତୁ ॥
ତେସଂ ଅନପ୍ପକେ ଭୋଗେ, ଦତ୍ୱା ୱାସଘରାନି ଚ ।
ମହାମଚ୍ଚେହି ମନ୍ତେନ୍ତୋ, ପସ୍ସିତ୍ୱା ପଟିପାଭତଂ ॥
ୱାଲବୀଜନୀ ମୁଣ୍ହିସଂ, ଖଗ୍ଗଂ ଛତ୍ତଞ୍ଚ ପାଦୁକଂ ।
ମୋଳିଂ ୱତଂ ସପାମଙ୍ଗଂ, ଭିଙ୍କାରଂ ହରିଚନ୍ଦନଂ ॥
ଅଧୋୱିମଂ ୱତ୍ଥକୋଟିଂ, ମହଗ୍ଘଂ ହତ୍ଥପୁଞ୍ଛନିଂ ।
ନାଗା’ହଟଂ ଅଞ୍ଜନଞ୍ଚ, ଅରୁଣାଭଞ୍ଚ ମତ୍ତିକଂ ॥
ଅନୋତତ୍ତୋଦକଞ୍ଚେୱ, ଗଙ୍ଗାସଲିଲମେୱ ଚ ।
ସଙ୍ଖଞ୍ଚ ନନ୍ଦିୟାୱଟ୍ଟଂ, ୱଡ୍ଢମାନଂ କୁମାରିକଂ ॥
ହେମଭୋଜନକଣ୍ଡଞ୍ଚ, ସିୱିକଞ୍ଚ ମହାରହଂ ।
ହରୀଟକଂ ଆମଲକଂ, ମହଗ୍ଘଂ ଅମତୋସଧଂ ॥
ସୁକାହଟାନଂ ସାଲୀନଂ, ସଟ୍ଠିୱାହସତାନି ଚ ।
ଅଭିସେକୋ ପକରଣଂ, ପରିୱାରୱିସେସିତଂ ॥
ଦତ୍ୱା କାଲେ ଭହାୟସ୍ସ, ପଣ୍ଣାକାରେ ନରିସ୍ସରୋ ।
ଦୂତେ ପାହେସିସଦ୍ଧମ୍ମ-ପଣ୍ଣାକାରମିମମ୍ପିଚ ॥
ଅହଂ ବୁଦ୍ଧଞ୍ଚ ଧମ୍ମଞ୍ଚ, ସଙ୍ଘଞ୍ଚ ସରଣଂ ଗତୋ ।
ଉପାସକତ୍ତଂ ଦେସେସିଂ, ସକ୍ୟପୁତ୍ତସ୍ସ ସାସନେ ॥
ତ୍ୱମ୍ପିମାନି ରତନାନି, ଉତ୍ତମାନି ନରୁତ୍ତମ ।
ଚିତ୍ତଂ ପସାଦୟିତ୍ୱାନ, ସଦ୍ଧାୟ ସରଣଂ ୱଜ ॥
‘‘କରୋଥ ମେ ସହାୟସ୍ସ, ଅଭିସେକଂ ପୁନୋ’’ ଇତି ।
ୱତ୍ୱା ସହୟା’ମଚ୍ଚେତେ, ସକ୍କରିତ୍ୱା ଚ ପେସୟି ॥
ପଞ୍ଚମାସେ ୱସିତ୍ୱାନ, ତେ ମଚ୍ଚା’ତିୱସକ୍କତା ।
ୱେସାଖସୁକ୍ଖପକ୍ଖାଦି-ଦିନେ ଦୂତା ୱିନିଗ୍ଗତା ॥
ତାମଲିତ୍ତିୟମାରୁୟ୍ହ, ନାୱଂ ତେଜମ୍ବୁକୋଲକେ ।
ଓରୁୟ୍ହ କୂପଂ ପସ୍ସିଂସୁ, ପତ୍ୱା ଦ୍ୱାଦସିୟଂ ଇଧ ॥
ଅଦଂସୁ ପଣ୍ଣାକାରେ ତେ, ଦୂତା ଲଂକାଦୀପସ୍ସତେ ।
ତେସଂ ମହନ୍ତଂ ସକ୍କାରଂ, ଲଂକାପତି ଅକାରୟି ॥
ତେ ମଗ୍ଗସିରମାସସ୍ସ, ଆଦିଚନ୍ଦୋଦୟେଜିନେ ।
ଅଭିସିତ୍ତଞ୍ଚ ଲଂକିନ୍ଦଂ, ଅମଚ୍ଚା ସାମିଭତ୍ତିନୋ ॥
ଧମ୍ମାସୋକସ୍ସ ୱଚନଂ, ୱତ୍ୱା ସାମି ହିତେରତା ।
ପୁନୋପି ଅଭିସିଞ୍ଚିଂସୁ, ଲଂକାହିତସୁଖେରତଂ ॥
ଦେୱାନଂ ପିୟୱଚନୋ ପଗୂଳନାମୋ ।
ଲଂକାୟଂ ପୱୀତତପୀତି ଉସ୍ସୱାୟଂ ।
ଅତ୍ତାନଂ ଜନସୁଖଦୋ’ଭିସେଚୟୀ ସୋତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦେୱାନଂପିୟତିସ୍ସାଭିସେକୋନାମ
ଏକାଦସମୋ ପରିଚ୍ଛେଦୋ ।
ଦ୍ୱାଦସମ ପରିଚ୍ଛେଦ
ନାନାଦେସପସାଦୋ
ଥେରୋ ମୋଗ୍ଗଲିପୁତ୍ତୋ ସୋ, ଜିନସାସନ ଜୋତକୋ ।
ନିଟ୍ଠାପେତ୍ୱାନ ସଂଗୀତିଂ, ପେକ୍ଖମାନୋ ଅନାଗତଂ ॥
ସାସନସ୍ସ ପତିଟ୍ଠାନଂ, ପଚ୍ଚନ୍ତେସୁ ଅୱେକ୍ଖିୟ ।
ପେସେସି କତ୍ତିକେ ମାସେ, ତେତେ ଥେରେ ତହିଂ ତହିଂ ॥
ଥେରଂ କସ୍ମୀରଗନ୍ଧାରଂ, ମଜ୍ଝନ୍ତିକମପେସୟି ।
ଅପେସୟୀ ମହାଦେୱ-ତ୍ଥେରଂ ମହିସମଣ୍ଡଲଂ ॥
ୱନୱାସିଂ ଅପେସୟି, ଥେରଂ ରକ୍ଖିତନାମକଂ ।
ତଥା’ପରନ୍ତକଂ ୟୋନ-ଧମ୍ମରକ୍ଖିତନାମକଂ ॥
ମହାରଟ୍ଠଂ ମହାଧମ୍ମ-ରକ୍ଖିତତ୍ଥେର ନାମକଂ ।
ମହାରକ୍ଖିତ ଥେରଂ ତଂ, ୟୋନ ଲୋକମପେସୟି ॥
ପେସେସି ମଜ୍ଝିମଂ ଥେରଂ, ହିମୱନ୍ତପଦେସକଂ ।
ସୁୱଣ୍ଣଭୂମିଂ ଥେରେ ଦ୍ୱେ, ସୋଣମୁତ୍ତର ମେୱ ଚ ॥
ମହାମହିନ୍ଦତ୍ଥେରଂ ତଂ, ଥେର ଇଟ୍ଟିୟମୁତ୍ତିୟଂ ।
ସମ୍ବଲଂ ଭଦ୍ଦସାଲଞ୍ଚ, ସକେ ସଦ୍ଧିୱିହାରିକେ ॥
ଲଂକାଦୀପେ ମନୁଞ୍ଞମ୍ହି, ମନୁଞ୍ଞଂ ଜିନସାସନଂ ।
ପତିଟ୍ଠାପେଥ ତୁମ୍ହେ’ତି, ପଞ୍ଚ ଥେରେ ଅପେସୟି ॥
ତଦା କସ୍ମୀରଗନ୍ଧାରେ, ପକ୍କଂ ସସ୍ସଂ ମହିଦ୍ଧିକୋ ।
ଅରୱାଲୋ ନାଗରାଜା, ୱସ୍ସଂ କରକସଞ୍ଞିତଂ ॥
ୱସ୍ସା ପେତ୍ୱା ସମୁଦ୍ଦସ୍ମିଂ, ସବ୍ବଂ ଖିପତିଦାରୁଣୋ ।
ତତ୍ର ମଜ୍ଝନ୍ତିକତ୍ଥେରୋ, ଖିପ୍ପଂ ଗନ୍ତ୍ୱା ୱିହାୟସା ॥
ଅରୱାଲଦହେୱାରି-ପିଟ୍ଠେ ଚଙ୍କମନାଦିକେ ।
ଅକାସି ଦିସ୍ୱା ତଂନାଗା, ରୁଟ୍ଠାରଞ୍ଞୋ ନିୱେଦୟୁଂ ॥
ନାଗରାଜା’ଥରୁଟ୍ଠୋ ସୋ, ୱିୱିଧା ଭିସିକା’କରି ।
ୱାତା ମହନ୍ତା ୱାୟନ୍ତି, ମେଘୋ ଗଜ୍ଜତି ୱସ୍ସତି ॥
ଫଲନ୍ତ୍ୟ’ସନିୟୋ ୱିଜ୍ଜୁ, ନିଚ୍ଛରନ୍ତି ତତୋ ତତୋ ।
ମହିରୁହା ପବ୍ବତାନଂ, କୂଟାନି ପପତନ୍ତି ଚ ॥
ୱିରୂପରୂପା ନାଗା ଚ, ଭିଂସାପେନ୍ତି ସମନ୍ତତୋ ।
ସୟଂ ଧୁପାୟତି ଜଲତି, ଅକ୍କୋସନ୍ତୋ ଅନେକଧା ॥
ସବ୍ବଂ ତଂ ଇଦ୍ଧିୟା ଥେରୋ, ପଟିବାହିୟ ଭିଂସନଂ ।
ଅୱୋଚ ନାଗରାଜଂ ତଂ, ଦସ୍ସେନ୍ତୋ ବଲମୁତ୍ତମଂ ॥
ସଦେୱ କୋପି ଚେ ଲୋକୋ, ଆଗନ୍ତ୍ୱା ତାସୟେୟ୍ୟ ମଂ ।
ନ ମେ ପଟିବଲୋ ଅସ୍ସ, ଜନେତୁଂ ଭୟଭେରୱଂ ॥
ସଚେ’ପି ତ୍ୱଂ ମହିଂ ସବ୍ବଂ, ସସମୁଦ୍ଦଂ ସପବ୍ବତଂ ।
ଉକ୍ଖିପିତ୍ୱା ମହାନାଗ, ଖିପେୟ୍ୟାସି ମମୋ’ପରି ॥
ନେୱ ମେ ସକ୍କୁଣେୟ୍ୟାସି, ଜନେତୁଂ ଭୟଭେରୱଂ ।
ଅଞ୍ଞଦତ୍ଥୁ ତୱେ‘ୱ’ସ୍ସ, ୱିଘାତୋ ଉରଗାଧିପ ॥
ତଂସୁତ୍ୱା ନିମ୍ମଦସ୍ସ’ସ୍ସ, ଥେରୋ ଧମ୍ମମଦେସୟି ।
ତତୋ ସରଣସୀଲେସୁ, ନାଗରାଜା ପତିଟ୍ଠହି ॥
ତଥେୱ ଚତୁରାସୀତି-ସହସ୍ସାନି ଭୁଜଙ୍ଗମା ।
ହିମୱନ୍ତେୱ ଗନ୍ଧବ୍ବା, ୟକ୍ଖା କୁମ୍ଭଣ୍ଡକା ବହୂ ॥
ପଣ୍ଡକୋ ନାମ ୟକ୍ଖୋ ତୁ, ସଦ୍ଧିଂହାରିତ ୟକ୍ଖିୟା ।
ପଞ୍ଚସତେହି ପୁତ୍ତେହି, ଫଲଂ ପାପୁଣି ଆଦିକଂ ॥
‘‘ମା’’ଦାନି କୋଧଂ ଜନିୟିତ୍ଥ, ଇତୋ ଉଦ୍ଧଂ ୟଥାପୁରେ ।
ସସଘାତଞ୍ଚ ମା’କତ୍ଥ, ସୁଖକାମାହି ପାଣିନୋ ॥
କରୋଥ ମେତ୍ତଂ ସତ୍ତେସୁ, ୱସନ୍ତୁ ମନୁଜା ସୁଖଂ ।
ଇତି ତେନା’ନୁସିଟ୍ଠା ତେ, ତଥେୱ ପଟିପଜ୍ଜିସୁଂ ॥
ତତୋ ରତନପଲ୍ଲଙ୍କେ, ଥେରଂ ସୋ ଉରଗାଧିପୋ ।
ନିସୀଦାପିୟ ଅଟ୍ଠାସି, ବୀଜମାନୋ ତଦନ୍ତିକେ ॥
ତଦା କସ୍ମୀରଗନ୍ଧାର-ୱାସିନୋ ମନୁଜା’ଗତା ।
ନାଗରାଜସ୍ସ ପୂଜତ୍ଥଂ, ମନ୍ତ୍ୱା ଥେରଂ ମହିଦ୍ଧିକଂ ॥
ଥେରମେୱା’ଭି ୱାଦେତ୍ୱା, ଏକମନ୍ତଂ ନିସୀଦିସୁଂ ।
ତେସଂ ଧମ୍ମମଦେସେସି, ଥେରୋ ଆସିୱିସୋପମଂ ॥
ଅସୀତିୟା ସହସ୍ସାନଂ, ଧମ୍ମାଭିସମୟୋ ଅହୁ ।
ସତସହସ୍ସ ପୁରିସା, ପବ୍ବଜୁଂ ଥେରସନ୍ତିକେ ॥
ତତୋପ୍ପଭୁପତି କସ୍ମିର-ଗନ୍ଧାରଂ ତେ ଇଦାନିପି ।
ଆସୁଂ କାସାୱ ପଜ୍ଜୋତା, ୱତ୍ଥୁତ୍ତୟପରାୟନା ॥
ଗନ୍ତ୍ୱା ମହାଦେୱତ୍ଥେରୋ, ଦେସଂ ମହିସମଣ୍ଡଲଂ ।
ସୁତ୍ତନ୍ତଂ ଦେୱଦୂତଂ ସୋ, କଥେସି ଜନମଜ୍ଝଗୋ ॥
ଚତ୍ତାଲୀସ ସହସ୍ସାନି, ଧମ୍ମଚକ୍ଖୁଂ ୱିସୋଧୟୁଂ ।
ଚତ୍ତାଲୀସ ସହସ୍ସାନି, ପବ୍ବଜିଂସୁ ତଦନ୍ତିକେ ॥
ଗନ୍ତ୍ୱା’ଥ ରକ୍ଖିତତ୍ଥେରୋ, ୱନୱାସିଂ ନଭେ ଠିତୋ ।
ସଂୟୁତ୍ତମନମତଗ୍ଗଂ, କଥେସି ଜନମଜ୍ଝଗୋ ॥
ସଟ୍ଠି ନରସହସ୍ସାନଂ, ଧମ୍ମାଭିସମୟୋ ଅହୁ ।
ସତ୍ତତିଂସ ସହସ୍ସାନି, ପବ୍ବଜିଂସୁ ତଦନ୍ତିକେ ॥
ୱିହାରାନଂ ପଞ୍ଚସତଂ, ତସ୍ମିଂଦେସେ ପତିଟ୍ଠହି ।
ପତିଟ୍ଠାପେସି ତତ୍ଥେୱଂ, ଥେରୋ ସୋ ଜିନସାସନଂ ॥
ଗନ୍ତ୍ୱା’ପରନ୍ତକଂ ଥେରୋ, ୟୋନକୋ ଧମ୍ମରକ୍ଖିତୋ ।
ଅଗ୍ଗିକ୍ଖନ୍ଧୋପମଂ ସୁତ୍ତଂ, କଥେତ୍ୱା ଜନମଜ୍ଝଗୋ ॥
ସତ୍ତତିଂସ ସହସ୍ସାନି, ପାଣେ ତତ୍ଥ ସମାଗତେ ।
ଧମ୍ମାମତମପାୟେସି, ଧମ୍ମା ଧମ୍ମେସୁ କୋୱିଦୋ ॥
ପୁରିସାନଞ୍ଚ ସହସ୍ସଞ୍ଚ, ଇତ୍ଥିୟୋ ଚ ତତୋ’ଧିକା ।
ଖତ୍ତିୟାନଂ କୁଲାୟେୱ, ନିକ୍ଖମିତ୍ୱାନ ପବ୍ବଜୁଂ ॥
ମହାରଟ୍ଠମିସୀ ଗନ୍ତ୍ୱା, ସୋ ମହାଧମ୍ମରକ୍ଖିତୋ ।
ମହାନାରଦକସ୍ସପୱ୍ହଂ, ଜାତକଂ କଥୟୀ ତହିଂ ॥
ମଗ୍ଗଫଲଂ ପାପୁଣିଂସୁ, ଚତୁରାସୀତି ସହସ୍ସକା ।
ତେରସନ୍ତୁ ସହସ୍ସାନି, ପବ୍ବଜିଂସୁ ତଦନ୍ତିକେ ॥
ଗନ୍ତ୍ୱାନ ୟୋନୱିସୟଂ, ସୋ ମହାଧମ୍ମରକ୍ଖିତୋ ଇସି ।
କାଳକାରାମ ସୁତ୍ତନ୍ତଂ, କଥେସି ଜନମଜ୍ଝଗୋ ॥
ପାଣସତ ସହସ୍ସାନି, ସହସ୍ସାନି ଚ ସତ୍ତତି ।
ମଗ୍ଗଫଲଂ ପାପୁଣିଂସୁ, ଦସ ସହସ୍ସାନି ପବ୍ବଜୁଂ ॥
ଗନ୍ତ୍ୱା ଚତୂହି ଥେରେହି, ଦେସେସି ମଜ୍ଝିମୋ ଇସି ।
ହିମୱନ୍ତପଦେସସ୍ମିଂ, ଧମ୍ମଚକ୍କପୱତ୍ତନଂ ॥
ମଗ୍ଗଫଲପାପୁଣିଂସୁ, ଅସୀତିପାଣ କୋଟିୟୋ ।
ୱିସୁଂ ତେ ପଞ୍ଚରଟ୍ଠାନି, ପଞ୍ଚଥେରା ପସାଦୟୁଂ ॥
ପୁରିସସତସହସ୍ସାନି, ଏକେକସ୍ସେୱ ସନ୍ତିକେ ।
ପବ୍ବଜିଂସୁ ପସାଦେନ, ସମ୍ମାସମ୍ବୁଦ୍ଧ ସାସନେ ॥
ସଦ୍ଧିଂ ଉତ୍ତରଥେରେନ, ସୋଣତ୍ଥେରୋ ମହିଦ୍ଧିକୋ ।
ସୁୱଣ୍ଣଭୂମିଂ ଅଗମା, ତସ୍ମିଂ ତୁ ସମୟେ ପନ ॥
ଜାତେ ଜାତେ ରାଜଗେହେ, ଦାରକେ ରୁଦ୍ଦରକ୍ଖସୀ ।
ସମୁଦ୍ଦତୋ ନିକ୍ଖମିତ୍ୱା, ଭକ୍ଖିତ୍ୱା ପନ ଗଚ୍ଛତି ॥
ତସ୍ମିଂ ଖଣେ ରାଜଗେହେ,
ଜାତୋ ହୋତି କୁମାରକୋ ।
ଥେରେ ମନୁସ୍ସା ପସ୍ସିତ୍ୱା,
ରକ୍ଖସାନଂ ସହାୟକା ॥
ଇତି ଚିନ୍ତିୟ ମାରେତୁଂ, ସା ୟୁୱା ଉପସଙ୍କମୁଂ ।
‘‘କିମେତନ୍ତି’’ଚ ପୁଚ୍ଛିତ୍ୱା, ଥେରଂ ତେ ଏୱ ମାହୁତେ ॥
ସମଣା ମୟଂ ହିମୱନ୍ତା, ନ ରକ୍ଖସି ସହାୟକା ।
ରକ୍ଖସୀ ସା ସପରିସା, ନିକ୍ଖନ୍ତା ହୋତି ସାଗରା ॥
ତଂ ଦିସ୍ୱାନ ମହାରାୱଂ, ୱିରୱିଂସୁ ମହାଜନା ।
ଦିଗୁଣେ ରକ୍ଖସେ ଥେରୋ, ମାପୟିତ୍ୱା ଭୟାନକେ ॥
ତଂ ରକ୍ଖସିଂ ସପରିସଂ, ପରିକ୍ଖିପି ସମନ୍ତତୋ ।
ଇଦଂ ଇମେହି ଉଦ୍ଧନ୍ତି, ମନ୍ତ୍ୱା ଭୀତା ପଲାୟିସା ॥
ତସ୍ସ ଦେସସ୍ସ ଆରକ୍ଖଂ, ଠପେତ୍ୱାନ ସମନ୍ତତୋ ।
ତସ୍ମିଂ ସମାଗମେ ଥେରୋ, ବ୍ରହ୍ମଜାଲମଦେସୟି ॥
ସରଣେସୁ ଚ ସୀଲେସୁ, ଅଟ୍ଠଂସୁ ବହୱୋ ଜନା ।
ସଟ୍ଠିୟା ତୁ ସହସ୍ସାନଂ, ଧମ୍ମାଭିସମୟୋ ଅହୁ ॥
ଅଡ୍ଢୁଡ୍ଢାନି ସହସ୍ସାନି, ପବ୍ବଜୁଂ କୁଲଦାରକା ।
ପବ୍ବଜିଂସୁ ଦିୟଡ୍ଢନ୍ତୁ, ସହସ୍ସଂ କୁଲଧୀତରୋ ॥
ତତୋପ୍ପଭୁତି ସଞ୍ଜାତେ, ରାଜଗେହେ କୁମାରକେ ।
ନାମଂ କରିଂସୁ ରାଜାନୋ, ସୋଣୁତ୍ତର ସନାମକେ ॥
ମହାଜନସ୍ସାପି ଜିନସ୍ସ କଡ୍ଢନଂ ।
ୱିହାୟ ପତ୍ତଂ ଅମତଂ ସୁଖମ୍ପିତେ ।
କରିଂସୁ ଲୋକସ୍ସ ହିତଂ ତହିଂ ତହିଂ ।
ଭୱେୟ୍ୟ ୟୋ ଲୋକହିତେ ପମାଦୱାତି ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ନାନାଦେସପସାଦୋ ନାମ ଦ୍ୱାଦସମୋ ପରିଚ୍ଛେଦୋ ।
ତେରସମ ପରିଚ୍ଛେଦ
ମହିନ୍ଦାଗମନୋ
ମହାମହିନ୍ଦତ୍ଥେରୋ ସୋ, ତଦା ଦ୍ୱାଦସୱସ୍ସିକୋ ।
ଉପଜ୍ଝାୟେନ ଆଣତ୍ତୋ, ସଙ୍ଘେନ ଚ ମହାମତୀ ॥
ଲଂକାଦୀପଂ ପସାଦେତୁଂ,
କାଲଂ ପେକ୍ଖଂ ୱିଚିନ୍ତୟୀ ।
‘‘ୱୁଡ୍ଢୋ ମୁଟସିୱୋ ରାଜା,
ରାଜା ହୋତୁ ସୁତୋ’’ ଇତି ॥
ତଦନ୍ତରେ ଞାତିଗଣଂ, ଦଟ୍ଠୁଂ କତ୍ୱାନ ମାନସଂ ।
ଉପଜ୍ଝାୟଞ୍ଚ ସଙ୍ଘଞ୍ଚ, ୱନ୍ଦିତ୍ୱା ପୁଚ୍ଛ ଭୂପତିଂ ॥
ଆଦାୟ ଚତୁରୋ ଥେରେ, ସଙ୍ଘମିତ୍ତାୟ ଅତ୍ରଜଂ ।
ସୁମନଂ ସାମଣେରଞ୍ଚ, ଛଳାଭିଞ୍ଞଂ ମହିଦ୍ଧିକଂ ॥
ଞାତୀନଂ ସଙ୍ଗହଂ କାତୁଂ, ଅଗମା ଦକ୍ଖିଣାଗିରିଂ ।
ତତୋ ତତ୍ଥ ଚରନ୍ତସ୍ସ, ଛମ୍ମାସା ସମତିକ୍କମୁଂ ॥
କମେନ ୱେଦିସଗିରିଂ, ନଗରଂ ମାତୁଦେୱିୟା ।
ସମ୍ପତ୍ୱା ମତରଂ ପସ୍ସି, ଦେୱୀ ଦିସ୍ୱା ପିୟଂ ସୁତଂ ॥
ଭୋଜୟିତ୍ୱା ସପରିସଂ, ଅତ୍ତନାୟେୱ କାରିତଂ ।
ୱିହାରଂ ଚେତିୟଗିରିଂ, ଥେରଂ ଆରୋପୟୀ ସୁଭଂ ॥
ଅୱନ୍ତିରଟ୍ଠଂ ଭୁଞ୍ଜନ୍ତୋ, ପିତରା ଦିନ୍ନମତ୍ତନୋ ।
ସୋ ଅସୋକ କୁମାରୋ ହି, ଉଜ୍ଜେନୀଗମନା ପୁରା ॥
ୱେଦିସେ ନଗରେ ୱାସଂ, ଉପଗନ୍ତ୍ୱା ତହିଂ ସୁଭଂ ।
ଦେୱିନ୍ନାମ ଲଭିତ୍ୱାନ, କୁମାରିଂ ସେଟ୍ଠିଧୀତରଂ ॥
ସଂୱାସଂ ତାୟ କପ୍ପେସି, ଗବ୍ଭଂ ଗଣ୍ହିୟ ତେନ ସା ।
ଉଜ୍ଜେନିୟଂ କୁମାରଂ ତଂ, ମହିନ୍ଦଂ ଜନୟୀ ସୁଭଂ ॥
ୱସ୍ସଦ୍ୱୟମତିକ୍କମ୍ମ, ସଙ୍ଘମିତ୍ତଞ୍ଚ ଧୀତରଂ ।
ତସ୍ମିଂ କାଲେ ୱସତି ସା, ୱେଦିସେ ନଗରେ ତହିଂ ॥
ଥେରୋ ତତ୍ଥ ନିସୀଦିତ୍ୱା, କାଲଞ୍ଞୂ ଇତି ଚିନ୍ତୟି ।
ପିତରା ମେ ସମାଣତ୍ତଂ, ଅଭିସେକ ମହୁସ୍ସୱଂ ॥
ଦେୱାନଂପିୟତିସ୍ସୋ ସୋ, ମହାରାଜା’ନୁଭୋତୁ ଚ ।
ୱତ୍ଥୁତ୍ତୟଗୁଣେ ଚାପି, ସୁତ୍ୱା ଜାନାତୁ ଦୂହତୋ ॥
ଆରୋହତୁ ମିସ୍ସନଗଂ, ଜେଟ୍ଠମାସସ୍ସୁ’ପୋସଥେ ।
ତଦହେୱ ଗମିସ୍ସାମ, ଲଂକାଦୀପୱରଂ ମୟଂ ॥
ମହିନ୍ଦୋ ଉପସଙ୍କମ୍ମ, ମହିନ୍ଦତ୍ଥେର ମୁତ୍ତମଂ ।
ୟାହି ଲଂକଂ ପସାଦେତୁଂ, ସମ୍ବୁଦ୍ଧେନା’ସି ବ୍ୟାକତୋ ॥
ମୟମ୍ପି ତତ୍ଥୁପତ୍ଥମ୍ଭା, ଭୱିସ୍ସାମା’ତି ଅବ୍ରୱି ।
ଦେୱିୟା ଭଗିନୀ ଧୀତୁ-ପୁତ୍ତୋ ଭଣ୍ଡୁକ ନାମକୋ ॥
ଥେରେନ ଦେୱିୟା ଧମ୍ମଂ, ସୁତ୍ୱା ଦେସିତମେୱ ତୁ ।
ଅନାଗାମିଫଲଂ ପତ୍ୱା, ୱସି ଥେରସ୍ସ ସନ୍ତିକେ ॥
ତତ୍ଥ ମାସଂ ୱସିତ୍ୱାନ, ଜେଟ୍ଠମାସସ୍ସୁ’ ପୋସଥେ ।
ଥେରୋ ଚତୂହି ଥେରେହି, ସୁମନେନା’ଥ ଭଣ୍ଡୁନା ॥
ସଦ୍ଧିଂ ତେନ ଗହଟ୍ଠେନ, ନ ରତୋ ଞାତିହେତୁନା ।
ତସ୍ମା ୱିହାରା ଆକାସଂ, ଉଗ୍ଗନ୍ତ୍ୱା ସୋ ମହିଦ୍ଧିକୋ ॥
ଖଣେନେୱ ଇଧାଗମ୍ମ, ରମ୍ମେ ମିସ୍ସକ ପବ୍ବତେ ।
ଅଟ୍ଠାସି ୱିଲୁକୂଟମ୍ହି, ରୁଚିରମ୍ବତ୍ଥଲେ ୱରେ ॥
ଲଂକାପସାଦ ଗୁଣେନ ୱିୟାକତୋ ସୋ ।
ଲଂକାହିତାୟ ମୁନିନା ସୟିତେନ ଅନ୍ତେ ।
ଲଂକାୟ ସତ୍ଥୁସଦିସୋ ହିତହେତୁ ତସ୍ସା ।
ଲଂକାମରୂହି ମହିତୋ’ଭିନିସୀଦି ତତ୍ତାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ମହିନ୍ଦାଗମନୋ ନାମ
ତେରସମୋ ପରିଚ୍ଛେଦୋ ।
ଚୁଦ୍ଦସମ ପରିଚ୍ଛେଦ
ନଗରପ୍ପୱେସନୋ
ଦେୱାନଂପିୟତିସ୍ସୋ ସୋ, ରାଜା ସଲିଲକୀଳିତଂ ।
ଦତ୍ୱା ନଗରୱାସୀନଂ, ମିଗୱଂ କୀଳିତୁଂ ଅଗା ॥
ଚତ୍ତାଲୀସସହସ୍ସେହି, ନରେହି ପରିୱାରିତୋ ।
ଧାୱନ୍ତୋ ପଦସାୟେୱ, ଅଗମା ମିସ୍ସକଂ ନଗଂ ॥
ଥେରେ ଦସ୍ସେତୁମିଚ୍ଛନ୍ତୋ, ଦେୱୋ ତସ୍ମିଂ ମହୀଧରେ ।
ଗୁମ୍ଭଂଭକ୍ଖୟମାନୋ’ୱ, ଅଟ୍ଠା ଗୋକଣ୍ଣରୂପୱା ॥
ରାଜା ଦିସ୍ୱା ‘‘ପମତ୍ତଂ ତଂ, ନ ୟୁତ୍ତଂ ୱିଜ୍ଝିତୁଂ’’ ଇତି ।
ଜିୟା ସଦ୍ଦମକାଧାପି, ଗୋକଣ୍ଣୋ ପବ୍ବତନ୍ତରଂ ॥
ରାଜା’ନୁଧାୱି ସୋଧିଂ, ଥେରାନଂ ସନ୍ତିକଂ ଗତୋ ।
ଥେରେ ଦିଟ୍ଠେ ନରିନ୍ଦେନ, ସୟମନ୍ତରଧାୟିସୋ ॥
ଥେରୋ ‘‘ବହୂସୁ ଦିଟ୍ଠେସୁ, ଅତିଭାୟିସ୍ସତୀ’’ ତିସୋ ।
ଅତ୍ତାନମେୱ ଦସ୍ସେସି, ପସ୍ସିତ୍ୱା ତଂ ମହୀପତିଂ ॥
ଭୀତୋ ଅଟ୍ଠାସି ତଂ ଥେରୋ, ‘‘ଏହି ତିସ୍ସାତି ଅବ୍ରୱି ।
ତିସ୍ସା’ତି ୱଚନେନେୱ, ରାଜା ୟକ୍ଖୋ’’ତି ଚିନ୍ତୟୀ ॥
ସମଣା ମୟଂ ମହାରାଜ, ଧମ୍ମରାଜସ୍ସ ସାୱକା ।
ତମେୱ ଅନୁକମ୍ପାୟ, ଜମ୍ବୁଦୀପା ଇଧାଗତା ॥
ଇଚ୍ଚାହ ଥେରୋ ତଂ ସୁତ୍ୱା, ରାଜା ୱୀତଭୟୋ ଅହୁ ।
ସରିତ୍ୱା ସଖୀସନ୍ଦେସଂ, ‘‘ସମାଣା’’ ଇତି ନିଚ୍ଛିତୋ ॥
ଧନୁଂ ସରଞ୍ଚ ନିକ୍ଖିପ୍ପ, ଉପସଙ୍କମ୍ମ ତଂ ଇସିଂ ।
ସମ୍ମୋଦମାନୋ ଥେରେନ, ସୋ ନିସୀଦି ତଦନ୍ତିକେ ॥
ତଦା ତସ୍ସ ମନୁସ୍ସା ତେ, ଆଗମ୍ମ ପରିୱାରୟୁଂ ।
ତଦା ସେସେ ଛ ଦସ୍ସେସି, ମହାଥେରୋ ସହାଗତେ ॥
ତେ ଦିସ୍ୱା ଅବ୍ରୱୀ ରାଜା, ‘‘କଦା’’ ମେ ଆଗତା ଇତି ।
‘‘ମୟା ସଦ୍ଧିଂ’’ତି ଥେରେନ, ୱୁତ୍ତେ ପୁଚ୍ଛି ଇଦଂ ପୁନ ॥
‘‘ସନ୍ତି ଈଦିସକା ଅଞ୍ଞେ, ଜମ୍ବୁଦୀପେ ୟତୀ’’ ଇତି ।
ଆହ ‘‘କାସାୱପଜ୍ଜୋ ତୋ, ଜମ୍ବୁଦୀପୋ ତହିଂ ପନ ॥
ତେୱିଜ୍ଜା ଇଦ୍ଧିପ୍ପତ୍ତା ଚ, ଚେତୋପରିୟକୋୱିଦା ।
‘‘ଦିବ୍ବସୋତା’ରହନ୍ତୋ ଚ, ବହୂ ବୁଦ୍ଧସ୍ସ ସାୱକା’’ ॥
ପୁଚ୍ଛି ‘‘କେନାଗତତ୍ଥା’’ତି, ନ ଥଲେନ ନ ୱାରିନା ।
ଆଗତମ୍ହା’’ତି ୱୁତ୍ତେ ସୋ, ୱିଜାନି ନଭସାଗମଂ ॥
ୱୀମଂସଂସୋ ମହାପଞ୍ଞୋ, କଣ୍ହଂ ପଞ୍ହମପୁଚ୍ଛିତଂ ।
ପୁଟ୍ଠୋ ପୁଟ୍ଠୋ ୱିୟାକାସି, ତଂତଂ ପଞ୍ହଂ ମହୀପତି ॥
ରୁକ୍ଖୋୟଂ ରାଜକିନ୍ନାମୋ, ଅଞ୍ଞୋ ନାମ ଅୟଂ ତରୁ ।
ଇମଂ ମୁଞ୍ଚିୟ ଅତ୍ଥ’ମ୍ବୋ, ସନ୍ତି ଅମ୍ବତରୂ ବହୁଂ ॥
ଇମଞ୍ଚ ଅମ୍ବଂ ତେଚ’ମ୍ବେ, ମୁଞ୍ଚିୟତ୍ଥି ମହୀରୁହା ।
ସନ୍ତି ଭନ୍ତେ ବହୁ ରୁକ୍ଖା, ଅନମ୍ବାପନ ତେ ତରୁ ॥
ଅଞ୍ଞେ ଅମ୍ବେ ଅନମ୍ବେ ଚ, ମୁଞ୍ଚିୟ’ତ୍ଥି ମହୀରୁହା ।
ଅୟଂ ଭନ୍ତେ ଅମ୍ବରୁକ୍ଖୋ, ପଣ୍ଡିତୋ’ସି ନରିସ୍ସର ॥
ସନ୍ତି ତେ ଞାତକା ରାଜ, ସନ୍ତି ଭନ୍ତେ ବହୁଜ୍ଜନା ।
ସନ୍ତି ଅଞ୍ଞାତକା ରାଜ, ସନ୍ତି ତେ ଞାତିତୋ ବହୂ ॥
ଞାତକେ ତେ ଚ ଅଞ୍ଞେ ଚ, ମୁଞ୍ଚିୟ’ଞ୍ଞୋପି ଅତ୍ଥି ନୁ ।
‘‘ଭନ୍ତେ’’ ହମେୱ ସାଧୁ ତ୍ୱଂ, ପଣ୍ଡିତୋ’ସି ନରିସ୍ସର ॥
ପଣ୍ଡିତୋ’ତି ୱିଦିତ୍ୱାନ, ଚୂଳହତ୍ଥିପଦୋପମଂ ।
ସୁତ୍ତନ୍ତଂ ଦେସୟୀ ଥେରୋ, ମହୀପସ୍ସ ମହାମତୀ ॥
ଦେସନାପରିୟୋସାନେ, ସଦ୍ଧିଂ ତେହି ନରେହି ସୋ ।
ଚତ୍ତାଲୀସସହସ୍ସେହି, ସରଣେସୁ ପତିଟ୍ଠହି ॥
ଭତ୍ତା’ଭୀହାରଂ ସାୟନ୍ହେ, ରଞ୍ଞୋ ଅଭିହରୁଂ ତଦା ।
‘‘ନ ଭୁଞ୍ଜିସ୍ସ’’ନ୍ତି ଦାନି ମେ, ଇତି ଜନମ୍ମି ଭୂପତି ॥
ପୁଚ୍ଛିତୁଂୟେୱ ୟୁତ୍ତନ୍ତି, ଭତ୍ତେନା’ପୁଚ୍ଛିତେ ଇସି ।
ନ ଭୁଞ୍ଜାମ ଇଦାନୀ’ତି, ୱୁତ୍ତେ କାଲଞ୍ଚ ପୁଚ୍ଛିସୋ ॥
କାଲଂ ୱୁତ୍ତେ’ବ୍ରୱି ଏୱଂ, ‘‘ଗଚ୍ଛାମ ନଗରଂ’’ଇତି ।
ତୁୱଂ ଗଚ୍ଛ ମହାରାଜ, ୱସିସ୍ସାମ ମୟଂ ଇଧ ॥
ଏୱଂ ସତି କୁମାରୋ’ୟଂ, ଅମ୍ହେହି ସହ ଗଚ୍ଛତୁ ।
ଅୟଞ୍ହି ଆଗତଫଲୋ, ରାଜ ୱିଞ୍ଞାତସାସନୋ ॥
ଅପେକ୍ଖମାନୋ ପବ୍ବଜ୍ଜଂ, ୱସତ’ମ୍ହାକମନ୍ତିକେ ।
ଇଦାନି ପବ୍ବଜେସ୍ସାମ, ଇମଂ ତ୍ୱଂ ଗଚ୍ଛ ଭୂମିପ ॥
ପାତୋ ରଥଂ ପେସୟିସ୍ସଂ, ତୁମ୍ହେ ତତ୍ଥ ଠିତା ପୁରଂ ।
ୟାଥା’ତି ଥେରେ ୱନ୍ଦିତ୍ୱା, ଭଣ୍ଡୁଂନେତ୍ୱ’କ ମନ୍ତକଂ ॥
ପୁଚ୍ଛି ଥେରାଧିକାରଂସୋ, ରଞ୍ଞୋ ସବ୍ବମଭାସି ସୋ ।
ଥେରଂ ଞତ୍ୱା’ତି ତୁଟ୍ଠୋସୋ, ‘‘ଲାଭା ମେ’’ଇତି ଚିନ୍ତୟି ॥
ଭଣ୍ଡୁସ୍ସ ଗୀହିଭାୱେନ, ଗତାସଙ୍କୋ ନରିସ୍ସରୋ ।
ଅଞ୍ଞାସି ନରଭାୱଂ ସୋ, ‘‘ପବ୍ବାଜେମ ଇମଂ’’ ଇତି ॥
ଥେରୋ ତଂ ଗାମସୀମାୟଂ, ତସ୍ମିଂୟେୱ ଖଣେ ଅକା ।
ଭଣ୍ଡୁକସ୍ସ କୁମାରସ୍ସ, ପବ୍ବଜ୍ଜମୁପସମ୍ପଦଂ ॥
ତସ୍ମିଂୟେୱ ଖଣେ ସୋ ଚ, ଅରହତ୍ତମପାପୁଣି ।
ସୁମନଂ ସାମଣେରଂ ତଂ, ଥେରୋ ଆମନ୍ତୟୀ ତତୋ ॥
ଧମ୍ମସୱନକାଲଂ ତ୍ୱଂ, ଘୋସେହୀ’’ତି ଅପୁଚ୍ଛିସୋ ।
ସାୱେନ୍ତୋ କିତ୍ତକଂ ଠାନଂ, ଭନ୍ତେ ଘୋସେମ’ହଂ ଇତି ॥
‘‘ସକଲଂ ତମ୍ବପଣ୍ଣୀ’’ତି, ୱୁତ୍ତେ ଥେରେନ ଇଦ୍ଧିୟା ।
ସାୱେନ୍ତୋ ସକଲଂ ଲଂକଂ, ଧମ୍ମକାଲମଘୋସୟୀ ॥
ରାଜା ନାଗଚତୁତ୍ତେସୋ, ସୋଣ୍ଣିପସ୍ସେ ନିସୀଦିୟ ।
ଭୁଞ୍ଜନ୍ତୋ ତଂ ରୱଂ ସୁତ୍ୱା, ଥେରନ୍ତିକ ମପେସୟି ॥
‘‘ଉପଦ୍ଦୱୋ ନୁ ଅତ୍ଥୀ’’ତି, ଆହ ନତ୍ଥି ଉଦ୍ଦୱୋ ।
ସୋତୁଂ ସମ୍ବୁଦ୍ଧୱଚନଂ, କାଲୋ ଘୋସାପିତୋ ଇତି ॥
ସାମଣେର ରୱଂ ସୁତ୍ୱା, ଭୁମ୍ମାଦେୱା ଅଘୋସୟୁଂ ।
ଅନୁକ୍କମେନ ସୋ ସଦ୍ଦୋ, ବ୍ରହ୍ମଲୋକଂ ସମାରୁହି ॥
ତେନ ଘୋସେନ ଦେୱାନଂ, ସନ୍ନିପାତୋ ମହା ଅହୁ ।
ସମଚିତ୍ତସୁତ୍ତଂ ଦେସେସି, ଥେରୋ ତସ୍ମିଂ ସମାଗମେ ॥
ଅସଂଖିୟାନଂ ଦେୱାନଂ, ଧମ୍ମାଭିସମୟୋ ଅହୁ ।
ବହୂ ନାଗା ସୁପଣ୍ଣା ଚ, ସରଣେସୁ ପତିଟ୍ଠୟୁଂ ॥
ୟଥେଦଂ ସାରିପୁତ୍ତସ୍ସ, ସୁତ୍ତଂ ଥେରସ୍ସ ଭାସତୋ ।
ତଥା ମହିନ୍ଦତ୍ଥେରସ୍ସ, ଅହୁ ଦେୱସମାଗମୋ ॥
ରାଜା ପଭା ତେ ପାହେସି, ରଥଂ ସାରଥି ସୋ ଗତୋ ।
‘‘ଆରୋହଥ ରଥଂ ୟାମ, ନଗରଂ’’ ଇତି ତେ’ବ୍ରୱି ॥
ନା’ରୋହାମ ରଥଂ ଗଚ୍ଛ, ଗଚ୍ଛାମ ତୱ ପଚ୍ଛତୋ ।
ଇତି ୱତ୍ୱାନ ପେସେତ୍ୱା, ସାରଥିଂ ସୁମନୋରଥଂ ॥
ୱେହାସମବ୍ଭୁଗନ୍ତ୍ୱା, ତେ ନଗରସ୍ସ ପୁରତ୍ଥତୋ ।
ପଠମତ୍ଥୂପଟ୍ଠାନମ୍ହି, ଓତରିଂସୁ ମହିଦ୍ଧିକା ॥
ଥେରେହି ପଠମୋତିଣ୍ଣ-ଠାନମ୍ହି କତଚେତିୟଂ ।
ଅଜ୍ଜାପି ୱୁଚ୍ଚତେ ତେନ, ଏୱଂ ପଠମଚେତିୟଂ ॥
ରଞ୍ଞା ଥେରଗୁଣଂ ସୁତ୍ୱା, ସବ୍ବା ଅନ୍ତେପୁରିତ୍ଥିୟୋ ।
ଥେରଦସ୍ସନମିଚ୍ଛିଂସୁ, ୟସ୍ମା ତସ୍ମାମହୀପତି ॥
ଅନ୍ତୋ’ୱ ରାଜୱତ୍ଥୁସ୍ସ, ରମ୍ମଂ କାରେସି ମଣ୍ଡପଂ ।
ସେତେହି ୱତ୍ଥପୁପ୍ଫେହି, ଛାଦିତଂ ସମଲଙ୍କତଂ ॥
ଉଚ୍ଚସେୟ୍ୟାୱିରମଣଂ, ସୁତତ୍ତା ଥେରସନ୍ତିକେ ।
କଙ୍ଖୀ ‘‘ଉଚ୍ଚାସନେ ଥେରୋ, ନିସୀଦିଦେୟ୍ୟନୁନୋତି ଚ ॥
ତଦନ୍ତରେ ସାରଥି ସୋ, ଥେରେ ଦିସ୍ୱା ତହିଂ ଠିତେ ।
ଚୀୱରଂ ପାରୁପନ୍ତେ ତେ, ଅତିୱିମ୍ହିତ ମାନସୋ ॥
ଗନ୍ତ୍ୱା ରଞ୍ଞୋ ନିୱେଦେସି, ସୁତ୍ୱା ସବ୍ବଂ ମହୀମତି ।
‘‘ନିସଜ୍ଜଂ ନ କରିସ୍ସନ୍ତି, ପୀଠକେସୂ’’ତି ନିଚ୍ଛିତୋ ॥
‘‘ସୁସାଧୁ ଭୁମ୍ମତ୍ଥରଣଂ, ପଞ୍ଞାପେଥା’’ତି ଭାସିୟ ।
ଗନ୍ତ୍ୱା ପଟିପଥଂ ଥେରେ, ସକ୍କଚ୍ଚଂ ଅଭିୱାଦିୟ ॥
ମହାମହିନ୍ଦତ୍ଥେରସ୍ସ, ହତ୍ଥତୋ ପତ୍ତମାଦିୟ ।
ସକ୍କାରପୂଜାୱିଧିନା, ପୁରଂ ଥେରଂ ପୱେସୟି ॥
ଦିସ୍ୱା ଆସନପଞ୍ଞତ୍ତିଂ, ନେମିତ୍ତା ବ୍ୟାକରୁଂ ଇତି ।
‘‘ଗହିତା ପଥୱୀ’ମେହି, ଦୀପେ ହେସ୍ସନ୍ତି ଇସ୍ସରା ॥
ନରିନ୍ଦୋ ପୂଜୟନ୍ତୋ ତେ, ଥେରେ ଅନ୍ତେପୁରଂ ନୟି ।
ତତ୍ଥ ତେ ଦୁସ୍ସପୀଠେସୁଂ, ନିସୀଦିଂସୁ ୟଥାରହଂ ॥
ତେ ୟାଗୁଖଜ୍ଜଭୋଜ୍ଜେହି, ସୟଂ ରାଜା ଅତପ୍ପୟି ।
ନିଟ୍ଠିତେ ଭତ୍ତକିଚ୍ଚମ୍ହି, ସୟଂ ଉପନିସୀଦିୟ ॥
କନିଟ୍ଠସ୍ସୋପରାଜସ୍ସ, ମହାନାଗସ୍ସ ଜାୟିକଂ ।
ୱସନ୍ତିଂ ରାଜଗେହେ’ୱ, ପକ୍କୋସା ପେସିଚା’ନୁଲଂ ॥
ଆଗମ୍ମ ଅନୁଲାଦେୱୀ, ପଞ୍ଚ ଇତ୍ଥିସତେହି ସା ।
ଥେରେୱନ୍ଦିୟ ପୂଜେତ୍ୱା, ଏକମନ୍ତମୁପାୱିସି ॥
ପେତୱତ୍ଥୁଂ ୱିମାନଞ୍ଚ, ସଚ୍ଚସଂୟୁତ୍ତମେୱ ଚ ।
ଦେସେସି ଥେରୋ ତା ଇତ୍ଥୀ, ପଠମଂ ଫଲମଜ୍ଝଗୁଂ ॥
ହିୟ୍ୟୋ ଦିଟ୍ଠମନୁସ୍ସେହି, ସୁତ୍ୱା ଥେରଗୁଣେ ବହୂ ।
ଥେରଦସ୍ସନମିଚ୍ଛନ୍ତା, ସମାଗନ୍ତ୍ୱାନ ନାଗରା ॥
ରାଜଦ୍ୱାରେ ମହାସଦ୍ଦଂ, ଅକରୁଂ ତଂ ମହୀପତି ।
ସୁତ୍ୱା ପୁଚ୍ଛିୟ ଜାନିତ୍ୱା, ଆହ ତେସଂ ହିତତ୍ଥିକୋ ॥
ସବ୍ବେସଂ ଇଧ ସମ୍ବାଧୋ, ସାଲାମଙ୍ଗଲହତ୍ଥିନୋ ।
ସୋଧେଥ ତତ୍ଥ ଦକ୍ଖନ୍ତି, ଥେରେ’ମେ ନାଗରା’ଇତି ॥
ସୋଧେତ୍ୱା ହତ୍ଥିସାଲଂ ତଂ, ୱିତାନାଦୀହି ସଜ୍ଜୁକଂ ।
ଅଲଙ୍କରିତ୍ୱା ସୟନେ, ପଞ୍ଞପେସୁଂ ୟଥାରହଂ ॥
ସଥେରୋ ତତ୍ଥ ଗନ୍ତ୍ୱାନ, ମହାଥେରୋ ନିସୀଦିୟ ।
ସୋ ଦେୱଦୂତସୁତ୍ତନ୍ତଂ, କଥେସୀ କଥିକୋ ମହା ॥
ତଂ ସୁତ୍ୱାନ ପସୀଦିଂସୁ, ନଗରା ତେ ସମାଗତା ।
ତେସୁ ପାଣସହସ୍ସଂତୁ, ପଠମଂ ଫଲମଜ୍ଝଗା ॥
ଲଂକାଦୀପେ ସୋ ସତ୍ଥୁକପ୍ପୋ ଅକପ୍ପୋ ।
ଲଂକାଧିଟ୍ଠାନେ ଦ୍ୱୀସୁ ଠାନେସୁ ଥେରୋ ।
ଧମ୍ମଂ ଭାସିତ୍ୱା ଦୀପଭାସାୟ ଏୱଂ ।
ସଦ୍ଧମ୍ମୋ ତାରଂ କାରୟୀ ଦୀପଦୀପୋତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ନଗରପ୍ପୱେସନୋ ନାମ
ଚୁଦ୍ଦସମୋ ପରିଚ୍ଛେଦୋ ।
ପଞ୍ଚଦସମ ପରିଚ୍ଛେଦ
ମହାୱିହାର ପଟିଗ୍ଗହକୋ
ହତ୍ଥିସାଲାପି ସମ୍ବାଧା, ଇତି ତତ୍ଥ ସମାଗତା ।
ତେ ନନ୍ଦନୱନେ ରମ୍ମେ, ଦକ୍ଖିଣଦ୍ୱାରତୋ ବହି ॥
ରାଜୁୟ୍ୟାନେ ଘନଚ୍ଛାୟେ, ସୀତଲେ ନୀଲସଦ୍ଦଲେ ।
ପଞ୍ଞାପେସୁଂ ଆସନାନି, ଥେରାନଂ ସାଦରା ନରା ॥
ନିକ୍ଖମ୍ମ ଦକ୍ଖିଣଦ୍ୱାରା, ଥେରୋ ତତ୍ଥ ନିସୀଦି ଚ ।
ମହାକୁଲୀନା ଚା’ଗମ୍ମ, ଇତ୍ଥିୟୋ ବହୁକା ତହିଂ ॥
ଥେରଂ ଉପନିସୀଦିଂସୁ, ଉୟ୍ୟାନଂ ପୂରୟନ୍ତିୟୋ ।
ବାଲପଣ୍ଡିତସୁତ୍ତନ୍ତଂ, ତାସଂ ଥେରୋ ଅଦେସୟି ॥
ସହସ୍ସଂ ଇତ୍ଥିୟୋ ତାସୁ, ପଠମଂ ଫଲମଜ୍ଝଗୁଂ ।
ଏୱଂ ତତ୍ଥେୱ ଉୟ୍ୟାନେ, ସାୟଣ୍ହସମୟୋ ଅହୁ ॥
ତତୋ ଥେରା ନିକ୍ଖମିଂସୁ, ‘‘ୟାମ ତଂ ପବ୍ବତଂ’’ ଇତି ।
ରଞ୍ଞୋ ପଟିନିୱେଦେସୁଂ, ସୀଘଂ ରାଜା ଉପାଗମି ॥
ଉପାଗମ୍ମା’ବ୍ରୱୀ ଥେରଂ, ‘‘ସାୟଂ ଦୂରୋ ଚ ପବ୍ବତୋ ।
ଇଧେୱ ନନ୍ଦନୁୟ୍ୟାନେ, ନିୱାସୋ ଫାସୁକୋ ଇତି ॥
ପୁରସ୍ସ ଅଚ୍ଚାସନ୍ନତ୍ତା, ‘‘ଅସାରୁପ୍ପ’’ନ୍ତି ଭାସିତେ ।
‘‘ମହାମେଘୱନୁୟ୍ୟାନଂ, ନାତିଦୂରାତି ସନ୍ତିକେ ॥
ରମ୍ମଂ ଛାୟୂଦକୂପେତଂ, ନିୱାସୋ ତତ୍ଥ ରୋଚତୁ ।
ନିୱତ୍ତିତବ୍ବଂ ଭନ୍ତେ’’ନ୍ତି, ଥେରୋ ତତ୍ଥ ନିୱତ୍ତୟି ॥
ତସ୍ମିଂ ନିୱତ୍ତଠାନମ୍ହି, କଦମ୍ବନଦିୟନ୍ତିକେ ।
ନିୱତ୍ତଚେତିୟଂ ନାମ, କତଂ ୱୁଚ୍ଚତି ଚେତିୟଂ ॥
ତଂ ନନ୍ଦନା ଦକ୍ଖିଣେନ, ନୟଂ ଥେରଂ ରଥେସଭୋ ।
ମହାମେଘୱନୁୟ୍ୟାନଂ, ପାଚିନଦ୍ୱାରକଂ ନୟି ॥
ତତ୍ଥ ରାଜଘରେ ରମ୍ମେ, ମଞ୍ଚପୀଠାନି ସାଧୁକଂ ।
ସାଧୂତି ସନ୍ଥରାପେତ୍ୱା, ‘‘ୱସତେ’ତ୍ତ ସୁଖଂ’’ ଇତି ॥
ରାଜା ଥେରେ’ଭିୱାଦେତ୍ୱା, ଅମଚ୍ଚପରିୱାରିତୋ ।
ପୁରଂ ପାୱିସି ଥେରା ତୁ, ତଂ ରତ୍ତିଂ ତତ୍ଥ ତେ ୱସୁଂ ॥
ପଭାତେୟେୱ ପୁପ୍ଫାନି, ଗାହେତ୍ୱା ଧରଣୀପତି ।
ଥେରେ ଉପଚ୍ଚ ୱନ୍ଦିତ୍ୱା, ପୂଜେତ୍ୱା କୁସୁମେହି ଚ ॥
ପୁଚ୍ଛି କଚ୍ଚି ସୁଖଂ ୱୁଟ୍ଠଂ, ଉୟ୍ୟାନଂ ଫାସୁକଂ ଇତି ।
ସୁଖଂ ୱୁତ୍ଥଂ ମହାରାଜ, ଉୟ୍ୟାନଂ ୟତି ଫାସୁକଂ ॥
ଆରାମୋ କପ୍ପତେ ଭନ୍ତେ, ସଙ୍ଘସ୍ସା’’ତି ଅପୁଚ୍ଛି ସୋ ।
‘‘କପ୍ପତେ’’ଇତି ୱତ୍ୱାନ, କପ୍ପାକପ୍ପେସୁ କୋୱିଦୋ ॥
ଥେରୋ ୱେଳୁୱନାରାମ, ପଟିଗ୍ଗହଣମବ୍ରୱି ।
ତଂ ସୁତ୍ୱା ଅଭିହଟ୍ଠୋ ସୋ, ତୁଟ୍ଠହଟ୍ଠୋ ମହାଜନୋ ॥
ଥେରାନଂ ୱନ୍ଦନତ୍ଥାୟ, ଦେୱୀ ତୁ ଅନୁଲାଗତା ।
ସଦ୍ଧିଂ ପଞ୍ଚସତିତ୍ଥୀହି, ଦୁତିୟଂ ଫଲମଜ୍ଝଗା ॥
ସା ପଞ୍ଚସତା ଦେୱୀ, ଅନୁଲା’ହ ମହୀପତି ।
‘‘ପବ୍ବଜିସ୍ସାମ ଦେୱା’’ତି, ରାଜା ଥେରମୱୋଚ ସୋ ॥
ପବ୍ବାଜେଥ ଇମାୟୋ’’ତି, ଥେରୋ ଆହ ମହୀପତିଂ ।
‘‘ନ କପ୍ପତି ମହାରାଜ, ପବ୍ବାଜେତୁଂ ଥିୟୋ ହିନୋ ॥
ଅତ୍ଥି ପାଟଲିପୁତ୍ତସ୍ମିଂ, ଭିକ୍ଖୁନୀ ମେ କନିଟ୍ଠିକା ।
ସଙ୍ଘମିତ୍ତାତି ନାମେନ, ୱିସ୍ସୁତା ସା ବହୁସ୍ସୁତା ॥
ନରିନ୍ଦସମଣିନ୍ଦସ୍ସ, ମହାବୋଧିଦୁମିନ୍ଦତୋ ।
ଦକ୍ଖିଣଂ ସାଖମାଦାୟ, ତଥା ଭିକ୍ଖୁନିୟୋ ୱରା ॥
ଆଗଚ୍ଛତୂ’ତି ପେସେହି, ରଞ୍ଞୋ ନୋ ପିତୁ ସନ୍ତିକଂ ।
ପବ୍ବାଜେସ୍ସତି ସା ଥେରୀ, ଆଗତା ଇତ୍ଥିୟୋ ଇମା ॥
‘‘ସାଧୁ’’ତି ୱତ୍ୱା ଗଣ୍ହିତ୍ୱା, ରାଜା ଭିଙ୍କାରମୁତ୍ତମଂ ।
‘‘ମହାମେଘୱନୁୟ୍ୟାନଂ, ଦମ୍ମି ସଙ୍ଘସ୍ସି’ମଂ ଇତି ॥
ମହିନ୍ଦଥେରସ୍ସ କରେ, ଦକ୍ଖିଣୋଦକମା’କିରୀ ।
ମହିୟା ପତିତେ ତୋୟେ, ଅକମ୍ପିତ୍ଥ ମହା ମହୀ ॥
‘‘ତସ୍ମା କମ୍ପତି ଭୂମୀ’’ତି, ଭୂମିପାଲୋ ଅପୁଚ୍ଛି ତଂ ।
ପତିଟ୍ଠିତତ୍ତା ଦୀପମ୍ହି, ସାସନସ୍ସା’ତି ସୋ ବ୍ରୱି ॥
ଥେରସ୍ସ ଉପନାମେସି, ଜାତିପୁପ୍ଫାନି ଜାତିମା ।
ଥେରୋ ରାଜଘରଂ ଗନ୍ତ୍ୱା, ତସ୍ସ ଦକ୍ଖିଣତୋ ଠିତୋ ॥
ରୁକ୍ଖମ୍ହି ପିଚୁଲେ ଅଟ୍ଠ, ପୁପ୍ଫମୁଟ୍ଠୀ ସମୋକିରୀ ।
ତତ୍ଥାପି ପୁଥୱୀ କମ୍ପି, ପୁଟ୍ଠୋ ତସ୍ସା’ହ କାରଣଂ ॥
ଅହୋସି ତିଣ୍ଣଂ ବୁଦ୍ଧାନଂ, କାଲେ’ପି ଇଧ ମାଲକୋ ।
ନରିନ୍ଦସଙ୍ଘକମ୍ମତ୍ଥଂ, ଭୱିସ୍ସତି ଇଦାନିପି ॥
ରାଜଗେହା ଉତ୍ତରତୋ, ଚାରୁପୋକ୍ଖରଣିଂ ଅଗା ।
ତତ୍ତକା ନେୱ ପୁପ୍ଫାନି, ଥେରୋ ତତ୍ଥାପି ଓକିରି ॥
ତତ୍ଥା’ପି ପୁଥୁୱୀ କମ୍ପି, ପୁଟ୍ଠୋ ତସ୍ସା’ହ କାରଣଂ ।
‘‘ଜନ୍ତଘର ପୋକ୍ଖରଣୀ, ଅୟଂ ହେସ୍ସତି ଭୂମିପ’’ ॥
ତସ୍ସେୱ ରାଜଗେହସ୍ସ, ଗନ୍ତ୍ୱାନ ଦ୍ୱାରକୋଟ୍ଠକଂ ।
ତତ୍ତକେହେ’ୱ ପୁପ୍ଫେହି, ତଂ ଠାନଂ ପୂଜୟୀ ଇସି ॥
ତତ୍ଥାପି ପୁଥୁୱୀକମ୍ପି, ହଟ୍ଠଲୋମୋ ଅତୀୱସୋ ।
ରାଜା ତଂ କାରଣଂ ପୁଚ୍ଛି, ଥେରୋ ତସ୍ସା’ହ କାରଣଂ ॥
ଇମମ୍ହି କପ୍ପେ ବୁଦ୍ଧାନଂ, ତିଣ୍ଣନ୍ନଂ ବୋଧିରୁକ୍ଖତୋ ।
ଆନେତ୍ୱା ଦକ୍ଖିଣାସାଖା, ରୋପିତା ଇଧ ଭୂମିପ ॥
ତଥାଗତସ୍ସ ଅମ୍ହାକଂ, ବୋଧିସାଖାପି ଦକ୍ଖିଣା ।
ଇମସ୍ମିଂୟେୱ ଠାନମ୍ହି, ପତିଟ୍ଠିସ୍ସତି ଭୂମିପ ॥
ତତୋ’ଗମା ମହାଥେରୋ, ମହାମୁଚଲମାଲକଂ ।
ତତ୍ତକାନେୱ ପୁପ୍ଫାନି, ତସ୍ମିଂ ଠାନେ ସମୋକିରି ॥
ତଥାପି ପୁଥୱୀ କମ୍ପି, ପୁଟ୍ଠୋ ତସ୍ସା’ହ କାରଣଂ ।
ସଙ୍ଘସ୍ସୁ ପୋସଥା ଗାରଂ, ଇଧ ହେସ୍ସତି ଭୂମିପ ॥
ପଞ୍ହମ୍ବମାଲକଟ୍ଠାନଂ, ତତୋ’ଗମା ମହୀପତି ।
ସୁପକ୍କଂ ଅମ୍ବପକ୍କଞ୍ଚ, ୱଣ୍ଣଗନ୍ଧରସୁତ୍ତମଂ ॥
ମହନ୍ତଂ ଉପନାମେସି, ରଞ୍ଞୋ ଉୟ୍ୟାନପାଲକୋ ।
ତଂ ଥେରସ୍ସୁପନାମେସି, ରାଜା ଅତିମନୋରମଂ ॥
ଥେରୋ ନିସୀଦନାକାରଂ, ଦସ୍ସେସି ଜନତା ହିତୋ ।
ଅତ୍ଥରାପେସି ତତ୍ଥେୱ, ରାଜା ଅତ୍ଥରଣଂ ୱରଂ ॥
ଅଦା ତତ୍ଥ ନିସିନ୍ନସ୍ସ, ଥେରସ୍ସମ୍ବଂ ମହୀପତି ।
ଥେରୋ ତଂ ପରିଭୁଞ୍ଜିତ୍ୱା, ରୋପନତ୍ଥାୟ ରାଜିନୋ ॥
ଅମ୍ବଟ୍ଠିକଂ ଅଦା ରାଜା, ତଂ ସୟଂ ତତ୍ଥ ରୋପୟି ।
ହତ୍ଥେ ତସ୍ସୋପରିଥେରୋ, ଧୋୱି ତସ୍ସ ୱିରୁଳ୍ହିୟା ॥
ତଂ ଖଣଂୟେୱ ବୀଜମ୍ହା, ତମ୍ହା ନିକ୍ଖମ୍ମ ଅଙ୍କୁରୋ ।
କମେନା’ତି ମହାରୁକ୍ଖୋ, ପତ୍ତପକ୍କଧରୋ ଅହୁ ॥
ତଂ ପାଟିହାରିୟଂ ଦିସ୍ୱା, ପରିସା ସା ସରାଜିକା ।
ନମସ୍ସମାନା ଅଟ୍ଠାସି, ଥେରେ ହତ୍ଥତନୁରୁହା ॥
ଥେରୋ ତଦା ପୁପ୍ଫମୁଟ୍ଠି, ଅଟ୍ଠ ତତ୍ଥ ସମୋକିରି ।
ତଥାପି ପୁଥୱୀକମ୍ପି, ପୁଟ୍ଠୋ ତସ୍ସା’ହ କାରଣଂ ॥
ସଙ୍ଘସ୍ସପ୍ପନ୍ନଲାଭାନଂ, ଅନେକେସଂ ନରାଧିପ ।
ସଙ୍ଗମ୍ମଭାଜନଠାନଂ, ଇଦଂ ଠାନଂ ଭୱିସ୍ସତି ॥
ତତୋ ଗନ୍ତ୍ୱା ଚତୁସ୍ସାଲ-ଠାନଂ ତତ୍ଥ ସମୋକିରି ।
ତତ୍ତକାନେୱ ପୁପ୍ଫାନି, କମ୍ପି ତତ୍ଥାପି ମେଦିନୀ ॥
ତଂ କମ୍ପକାରଣଂ ପୁଚ୍ଛି, ରାଜା ଥେରୋ ୱିୟାକରି ।
ତିଣ୍ଣନ୍ନଂ ପୁବ୍ବବୁଦ୍ଧାନଂ, ରାଜୁୟ୍ୟାନ ପଟିଗ୍ଗହେ ॥
ଦାନ ୱତ୍ଥୁନା’ହଟାନି, ଦୀପୱାସୀହି ସବ୍ବତୋ ।
ଇଧ ଠପେତ୍ୱା ଭୋଜେସୁଂ, ସସଙ୍ଘେ ସୁଗତେ ତୟୋ ॥
ଇଦାନି ପନ ଏତ୍ଥେୱ, ଚତୁସ୍ସାଲା ଭୱିସ୍ସତି ।
ସଙ୍ଘସ୍ସ ଇଧ ଭତ୍ତଗ୍ଗଂ, ଭୱିସ୍ସତି ନରାଧିପ ॥
ମହଥୂପଠିତଠାନଂ, ଠାନାଠାନୱିଦୂତତୋ ।
ଅଗମାସି ମହାଥେରୋ, ମହିନ୍ଦୋ ଦୀପଦୀପନୋ ॥
ତଦା ଅନ୍ତୋପରିକ୍ଖେପେ, ରାଜୁୟ୍ୟାନସ୍ସ ଖୁଦ୍ଦିକା ।
କକୁଧୱ୍ହା ଅହୁ ୱାପୀ, ତସ୍ସୋ’ପରି ଜଲନ୍ତିକେ ॥
ଥୂପାରହଂ ଥଲଠାନଂ, ଅହୁ ଥେରେ ତହିଂ ଗତେ ।
ରଞ୍ଞୋ ଚମ୍ପକପୁପ୍ଫାନଂ, ପୁଟକାନ’ଟ୍ଠ ଆହରୁଂ ॥
ତାନି ଚମ୍ପକପୁପ୍ଫାନି, ରାଜା ଥେରସ୍ସୁ’ପାନୟି ।
ଥେରୋ ଚମ୍ପକପୁପ୍ଫେହି, ତେହି ପୂଜେସି ତଂ ଫଲଂ ॥
ତତ୍ଥାପି ପୁଥୱୀ କମ୍ପି, ରାଜା ତଂ କମ୍ପକାରଣଂ ।
ପୁଚ୍ଛି ଥେରୋ’ନୁ ପୁବ୍ବେନ, ଆହତଂ କମ୍ପକାରଣଂ ॥
ଇଦଂ ଠାନଂ ମହାରାଜ, ଚତୁବୁଦ୍ଧ ନିସେୱିତଂ ।
ଥୂପାରହଂ ହିତତ୍ଥାୟ, ସୁଖତ୍ଥାୟ ଚ ପାଣିନଂ ॥
ଇମମ୍ହି କପ୍ପେ ପଠମଂ, କକୁସନ୍ଧୋ ଜିନୋ ଅହୁ ।
ସବ୍ବ ଧମ୍ମୱିଦୂ ସତ୍ଥା, ସବ୍ବଲୋକାନୁକମ୍ପକୋ ॥
ମହାତିତ୍ଥୱ୍ହୟଂ ଆସି, ମହାମେଘୱନଂ ଇଦଂ ।
ନଗରଂ ଅଭୟଂ ନାମ, ପୁରତ୍ଥିମଦିସାୟ’ହୁ ॥
କଦମ୍ବ ନଦିୟା ପାରେ, ତତ୍ଥ ରାଜା’ଭୟୋ ଅହୁ ।
ଓଜଦୀପୋତି ନାମେନ, ଅୟଂ ଦୀପୋ ତଦାଅହୁ ॥
ରକ୍ଖସେହି ଜନସ୍ସେ’ତ୍ଥ, ରୋଗୋ ପଜ୍ଜରକୋ ଅହୁ ।
କକୁସନ୍ଧୋ ଦସବଲୋ, ଦିସ୍ୱାନ ତଦୁପଦ୍ଦୱଂ ॥
ତଂ ଗନ୍ତ୍ୱା ସତ୍ତୱିନୟଂ, ପୱତ୍ତିଂ ସାସନସ୍ସ ଚ ।
କାତୁଂ ଇମସ୍ମିଂ ଦୀପସ୍ମିଂ, କରୁଣା ବଲଚୋଦିତୋ ॥
ଚତ୍ତାଲୀସସହସ୍ସେହି, ତାଦୀହି ପରିୱାରିତୋ ।
ନଭସା’ଗମ୍ମ ଅଟ୍ଠାସି, ଦେୱକୂଟମ୍ହି ପବ୍ବତେ ॥
ସମ୍ବୁଦ୍ଧସ୍ସା’ନୁଭାୱେନ, ରୋଗୋ ପଜ୍ଜରକୋ ଇଧ ।
ଉପସନ୍ତୋ ମହାରାଜ, ଦୀପମ୍ହି ସକଲେ ତଦା ॥
କତ୍ଥ ଠିତୋ ଅଧିଟ୍ଠାସି, ନରିସ୍ସର ମୁନିସ୍ସରୋ ।
ସବ୍ବେ ମଂ ଅଜ୍ଜ ପସ୍ସନ୍ତୁ, ଓଜଦୀପମ୍ହି ମାନୁସା ॥
ଆଗନ୍ତୁକାମା ସବ୍ବେୱ, ମନୁସ୍ସା ମମ ସନ୍ତିକଂ ।
ଆଗଚ୍ଛନ୍ତୁ ଅକିଚ୍ଛେନ, ଖିପ୍ପଞ୍ଚାପି ମହାମୁନି ॥
ଓଭାସୟନ୍ତଂ ମୁନିନ୍ଦଂ ତଂ, ଓଭାସନ୍ତଞ୍ଚ ପବ୍ବତଂ ।
ରାଜା ଚ ନାଗରା ଚେୱ, ଦିସ୍ୱା ଖିପ୍ପଂ ଉପାଗମୁଂ ॥
ଦେୱତା ବଲିଦାନତ୍ଥଂ, ମନୁସ୍ସା ଚ ତହିଂ ଗତା ।
ଦେୱତା ଇତି ମଞ୍ଞିଂସୁ, ସସଙ୍ଘଂ ଲୋକନାୟକଂ ॥
ରାଜା ସୋ ମୁନିରାଜଂ ତଂ, ଅତିହଟ୍ଠୋ’ଭି ୱାଦିୟ ।
ନିମନ୍ତୟିତ୍ୱା ଭତ୍ତେନ, ଆନେତ୍ୱା ପୁରସନ୍ତି କଂ ॥
ସସଙ୍ଘସ୍ସ ମୁନିନ୍ଦସ୍ସ, ନିସଜ୍ଜାରହମୁତ୍ତମଂ ।
ରମଣୀୟମିଦଂ ଠାନ-ମସମ୍ବାଧନ୍ତି ଚିନ୍ତିୟ ॥
କାରିତେ ମଣ୍ଡପେ ରମ୍ମେ, ପଲ୍ଲଙ୍କେସୁ ୱରେ ସୁତଂ ।
ନିସୀଦାପେସି ସମ୍ବୁଦ୍ଧଂ, ସସଙ୍ଘଂ ଇଧ ଭୂପତି ॥
ନିସିନ୍ନମ୍ପି ଚ ପସ୍ସନ୍ତା, ସସଙ୍ଘଂ ଲୋକନାୟକଂ ।
ଦୀପେ ମନୁସ୍ସା ଆନେସୁଂ, ପଣ୍ଣାକାରେ ସମନ୍ତତୋ ॥
ଅତ୍ତନୋ ଖଜ୍ଜଭୋଜ୍ଜେହି, ତେହି ତେହା’ଭତେହି ଚ ।
ସନ୍ତପ୍ପେସି ସସଙ୍ଘଂ ତଂ, ରାଜା ସୋ ଲୋକନାୟକଂ ॥
ଇଧେୱ ପଚ୍ଛାଭତ୍ତଂ ତଂ, ନିସିନ୍ନସ୍ସ ଜିନସ୍ସ ସୋ ।
ମହା ତିତ୍ଥକମୁୟ୍ୟାନଂ, ରାଜା’ଦା ଦକ୍ଖିଣଂ ୱରଂ ॥
ଅକାଲପୁପ୍ଫା ଲଙ୍କାରେ, ମହାତିତ୍ଥୱନେ ତଦା ।
ପଟିଗ୍ଗହିତେ ବୁଦ୍ଧେନ, ଅକମ୍ପିତ୍ଥ ମହାମହୀ ॥
ଏତ୍ଥେୱ ସୋ ନିସୀଦିତ୍ୱା, ଧମ୍ମଂ ଦେସେସି ନାୟକୋ ।
ଚତ୍ତାଲୀସ ସହସ୍ସାନି, ପତ୍ତା ମଗ୍ଗଫଲଂ ନରା ॥
ଦିୱାୱିହାରଂ କତ୍ୱାନ, ମହାତିତ୍ଥୱନେ ଜିନୋ ।
ସାୟଣ୍ହସମୟେ ଗନ୍ତ୍ୱା, ବୋଧିଠାନାରହଂ ମହି ॥
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ।
ଇତି ଚିନ୍ତୟି ସମ୍ବୁଦ୍ଧୋ, ହିତତ୍ଥଂ ଦୀପୱାସିନଂ ॥
ଆଦାୟ ଦକ୍ଖିଣଂ ସାଖଂ, ବୋଧିତୋ ମେ ସିରୀସତୋ ।
ଆଗଚ୍ଛତୁ ରୂପନନ୍ଦା, ଭିକ୍ଖୁନୀ ସହଭିକ୍ଖୁନୀ ॥
ତସ୍ସ ତଂ ଚିତ୍ତମଞ୍ଞାୟ, ସା ଥେରୀ ତଦନନ୍ତରଂ ।
ଗହେତ୍ୱା ତତ୍ଥ ରାଜାନଂ, ଉପସଙ୍କମ୍ମ ତଂ ତରୁଂ ॥
ଲେଖଂ ଦକ୍ଖିଣସାଖାୟ, ଦାପେତ୍ୱାନ ମହିଦ୍ଧିକା ।
ମନୋସିଲାୟ ଛିନ୍ନଂ ତଂ, ଠିତଂ ହେମକଟାହକେ ॥
ଇଦ୍ଧିୟା ବୋଧିମାଦାୟ, ସପଞ୍ଚସତ ଭିକ୍ଖୁନୀ ।
ଇଧା’ନେତ୍ୱା ମହାରାଜ, ଦେୱତା ପରିୱାରିତା ॥
ସସୁୱଣ୍ଣ କଟାହଂ ତଂ, ସମ୍ବୁଦ୍ଧେନ ପସାରିତେ ।
ଠପେସି ଦକ୍ଖିଣେ ହତ୍ଥେ, ତଂ ଗହେତ୍ୱା ତଥାଗତୋ ॥
ପତିଟ୍ଠାପେତୁଂ ପାଦାସି, ବୋଧିଂ ରଞ୍ଞୋ’ଭୟସ୍ସ ତଂ ।
ମହାତିତ୍ଥମ୍ହି ଉୟ୍ୟାନେ, ପତିଟ୍ଠାପେସି ଭୂପତି ॥
ତତୋ ଗନ୍ତ୍ୱାନ ସମ୍ବୁଦ୍ଧୋ,
ଇତୋ ଉତ୍ତରତୋ ପନ ।
ସିରୀସମାଲକେ ରମ୍ମେ,
ନିସୀଦିତ୍ୱା ତଥାଗତୋ ॥
ଜନସ୍ସ ଧମ୍ମଂ ଦେସେସି, ଧମ୍ମାଭିସମୟୋ ତହିଂ ।
ୱୀସତିୟା ସହସ୍ସାନଂ, ପାଣାନଂ ଆସି ଭୂମିପ ॥
ତତୋପି ଉତ୍ତରଂ ଗନ୍ତ୍ୱା, ଥୂପରାମମହିଂ ଜିନୋ ।
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ॥
ଧମ୍ମଂ ଦେସେସି ସମ୍ବୁଦ୍ଧୋ, ପରିସାୟ ତହିଂପନ ।
ଦସପାଣ ସହସ୍ସାନି, ପତ୍ତମଗ୍ଗଫଲାନ’ହୁଂ ॥
ଅତ୍ତନୋ ଧମ୍ମକରଣଂ, ମନୁସ୍ସାନଂ ନମସ୍ସିତୁଂ ।
ଦତ୍ୱା ସପରିୱାରଂ ତଂ, ଠପେତ୍ୱା ଇଧ ଭିକ୍ଖୁନିଂ ॥
ସହ ଭିକ୍ଖୁସହସ୍ସେନ, ମହାଦେୱଞ୍ଚ ସାୱକଂ ।
ଠପେତ୍ୱା ଇଧ ସମ୍ବୁଦ୍ଧୋ, ତତୋ ପାଚିନତୋ ପନ ॥
ଠିତୋ ରତନମାଲମ୍ହି, ଜନଂ ସମନୁସାସିୟ ।
ସସଙ୍ଘୋ ନଭମୁଗ୍ଗନ୍ତ୍ୱା, ଜମ୍ବୁଦୀପଂ ଜିନୋ ଅଗା ॥
ଇମମ୍ହି କପ୍ପେ ଦୁତିୟଂ, କୋଣାଗମନ ନାୟକୋ ।
ଅହୁ ସବ୍ବୱିଦୂ ସତ୍ଥା, ସବ୍ବଲୋକାନୁକମ୍ପକୋ ॥
ମହାନାମୱ୍ହୟଂ ଆସି, ମହାମେଘୱନଂ ଇଦଂ ।
ୱଡ୍ଢମାନପୁରଂ ନାମ, ଦକ୍ଖିଣାୟ ଦିସାୟ’ହୁ ॥
ସମିଦ୍ଧୋ ନାମ ନାମେନ, ତତ୍ଥ ରାଜା ତଦା ଅହୁ ।
ନାମେନ ୱରଦୀପୋ’ତି, ଅୟଂ ଦୀପୋ ତଦା ଅହୁ ॥
ଦୁବ୍ବୁଟ୍ଠୁପଦ୍ଦୱୋ ଏତ୍ଥ, ୱରଦୀପେ ତଦା ଅହୁ ।
ଜିନୋ ସକୋଣାଗମନୋ, ଦିସ୍ୱାନ ତଦୁପଦ୍ଦୱଂ ॥
ତଂ ହୁତ୍ୱା ସତ୍ତୱିନୟଂ, ପୱତ୍ତିଂ ସାସନସ୍ସ ଚ ।
କାତୁଂ ଇମସ୍ମିଂ ଦୀପସ୍ମୀଂ, କରୁଣା ବଲଚୋଦିତୋ ॥
ତିଂସ ଭିକ୍ଖୁସହସ୍ସେହି, ତାଦୀହି ପରିୱାରିତୋ ।
ନଭସା’ଗମ୍ମ ଅଟ୍ଠାସି, ନଭେ ସୁମନକୂଟକେ ॥
ସମ୍ବୁଦ୍ଧସ୍ସା’ନୁଭାୱେନ, ଦୁବ୍ବୁଟ୍ଠି ସା ଖୟଂ ଗତା ।
ସାସନାନ୍ତରଧାନତ୍ତା, ସୁୱୁଟ୍ଠି ଚ ତଦାଅହୁ ॥
ତତ୍ତ ଠିତୋ ଅଧିଟ୍ଠାସି, ନରିସ୍ସରମୁନିସ୍ସରୋ ।
ସବ୍ବେୱ ଅଜ୍ଜ ପସ୍ସନ୍ତୁ, ୱରଦୀପମ୍ହି ମାନୁସା ॥
ଆଗନ୍ତୁକାମା ସବ୍ବେୱ, ମନୁସ୍ସା ମମ ସନ୍ତିକଂ ।
ଆଗଚ୍ଛନ୍ତୁ ଅକିଚ୍ଛେନ, ଖିପ୍ପଞ୍ଚା’ତି ମହାମୁନି ॥
ମହାସତ୍ତଂ ମୁନିନ୍ଦଂ ତଂ, ଓଭାସନ୍ତଞ୍ଚ ପବ୍ବତଂ ।
ରାଜା ଚ ନାଗରା ଚେୱ, ଦିସ୍ୱା ଖିପ୍ପମୁପାଗମୁଂ ॥
ଦେୱତାବଲିଦାନତ୍ଥଂ, ମନୁସ୍ସା ଚ ତହିଂ ଗତା ।
ଦେୱତା ଇତି ମଞ୍ଞିଂସୁ, ସସଙ୍ଘଂ ଲୋକନାୟକଂ ॥
ରାଜା ସୋ ମୁନିରାଜଂ ତଂ, ଅତିହଟ୍ଠୋ’ଭିୱାଦିୟ ।
ନିମନ୍ତୟିତ୍ୱା ଭତ୍ତେନ, ଆନେତ୍ୱା ପୁରସନ୍ତିକଂ ॥
ସସଙ୍ଘସ୍ସ ମୁନିନ୍ଦସ୍ସ, ନିସଜ୍ଜାରହ ମୁତ୍ତମଂ ।
ରମଣୀୟମିଦଂ ଠାନଂ, ଅସମ୍ବାଧନ୍ତି ଚିନ୍ତିୟ ॥
କାରିତେ ମଣ୍ଡପେ ରମ୍ମେ, ପଲ୍ଲଙ୍କେସୁ ୱରେସୁ ତଂ ।
ନିସୀଦାପୟି ସମ୍ବୁଦ୍ଧଂ, ସସଙ୍ଘଂ ଇଧ ଭୂପତି ॥
ନିସିନ୍ନମ୍ପି’ଧ ପସ୍ସନ୍ତା, ସସଙ୍ଘଂ ଲୋକନାୟକଂ ।
ଦୀପେ ମନୁସ୍ସା ଆନେସୁଂ, ପଣ୍ଣାକାରେ ସମନ୍ତତୋ ॥
ଅତ୍ତନୋ ଖଜ୍ଜଭୋଜ୍ଜେହି,
ତେହି ତେହା’ଭ ତେହି ଚ ।
ସନ୍ତପ୍ପେସି ସସଙ୍ଘଂ ତଂ,
ରାଜା ସୋ ଲୋକ ନାୟକଂ ॥
ଇଧେୱ ପଚ୍ଛାଭତ୍ତଂ ତଂ, ନିସିନ୍ନସ୍ସ ଜିନସ୍ସ ସୋ ।
ମହାନାମକମୁୟ୍ୟାନଂ, ରାଜା’ଦା ଦକ୍ଖିଣଂ ୱରଂ ॥
ଅକାଲପୁପ୍ଫାଲଙ୍କାରେ, ମହାନାମୱନେ ତଦା ।
ପଟିଗ୍ଗହିତେ ବୁଦ୍ଧେନ, ଅକମ୍ପିତ୍ଥ ମହାମହୀ ॥
ଏତ୍ଥେୱ ସୋ ନିସୀଦିତ୍ୱା, ଧମ୍ମଂ ଦେସେସି ନାୟକୋ ।
ତଦା ତିଂସ ସହସ୍ସାନି, ପତ୍ତା ମଗ୍ଗଫଲଂ ନରା ॥
ଦିୱାୱିହାରଂ କତ୍ୱାନ, ମହାନାମୱନେ ଜିନୋ ।
ସାୟଣ୍ହସମୟେ ଗନ୍ତ୍ୱା, ପୁବ୍ବଧୋଧିଠିତଂ ମହିଂ ॥
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ।
ଇତି ଚିନ୍ତେସି ସମ୍ବୁଦ୍ଧୋ, ହିତତ୍ଥଂ ଦୀପୱାସିନଂ ॥
ଆଦାୟ ଦକ୍ଖିଣଂ ସାଖଂ, ମମୋଦୁମ୍ବରବୋଧିତୋ ।
ଆୟାତୁ କନକଦତ୍ତା, ଭିକ୍ଖୁନୀ ସହଭିକ୍ଖୁନୀ ॥
ତସ୍ସ ତଂ ଚିତ୍ତମଞ୍ଞାୟ, ସା ଥେରୀ ତଦନନ୍ତରଂ ।
ଗହେତ୍ୱା ତତ୍ଥ ରାଜାନଂ, ଉପସଙ୍କମ୍ମ ତଂ ତରୁଂ ॥
ଲେଖଂ ଦକ୍ଖିଣସାଖାୟ, ଦାପେତ୍ୱାନ ମହିଦ୍ଧିକା ।
ମନୋସିଲାୟ ଛିନ୍ନଂ ତଂ, ଠିତଂ ହେମକଟାହକେ ॥
ଇଦ୍ଧିୟା ବୋଧିମାଦାୟ, ସପଞ୍ଚସହଭିକ୍ଖୁନୀ ।
ଇଧାଗନ୍ତ୍ୱା ମହାରାଜ, ଦେୱତାପରିୱାରିତା ॥
ସସୁୱଣ୍ଣକଟାହଂ ତଂ, ସମ୍ବୁଦ୍ଧେନ ପସାରିତେ ।
ଠପେସି ଦକ୍ଖିଣେ ହତ୍ଥେ, ତଂ ଗହେତ୍ୱା ତଥାଗତୋ ॥
ପତିଟ୍ଠାପେତୁଂ ରଞ୍ଞୋ’ଦା, ସମିଦ୍ଧସ୍ସ ସତଂ ତହିଂ ।
ମହାନାମମ୍ହି ଉୟ୍ୟାନେ, ପତିଟ୍ଠାପେସି ଭୂପତି ॥
ତତୋ ଗନ୍ତ୍ୱାନ ସମ୍ବୁଦ୍ଧୋ, ସିରୀସମାଲକୁତ୍ତରେ ।
ଜନସ୍ସ ଧମ୍ମଂ ଦେସେସି, ନିସିନ୍ନୋ ନାଗମାଲକେ ॥
ତଂ ଧମ୍ମଦେସନଂ ସୁତ୍ୱା, ଧମ୍ମାଭିସମୟୋ ତହିଂ ।
ୱୀସତିୟା ସହସ୍ସାନଂ, ପାଣାନଂ ଆସି ଭୂମିପ ॥
ପୁବ୍ବବୁଦ୍ଧନିସିନ୍ନଂ ତଂ, ଠାନଂ ଗନ୍ତ୍ୱା ପୁରୁତ୍ତରଂ ।
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ॥
ଧମ୍ମଂ ଦେସେସି ସମ୍ବୁଦ୍ଧୋ, ପରିସାୟ ତହିଂ ପନ ।
ଦସପାଣସହସ୍ସାନି, ପତ୍ତା ମଗ୍ଗଫଲଂ ଅହୁଂ ॥
କାୟବନ୍ଧନଧାତୁଂ ସୋ, ମନୁସ୍ସେହି ନମସ୍ସିତୁଂ ।
ଦତ୍ୱା ସପରିୱାରଂ ତଂ, ଠପେତ୍ୱା ଇଧ ଭିକ୍ଖୁନିଂ ॥
ସହ ଭିକ୍ଖୁସହସ୍ସେନ, ମହାସୁମ୍ମଞ୍ଚ ସାୱକଂ ।
ଠପେତ୍ୱା ଇଧ ସମ୍ବୁଦ୍ଧୋ, ଓରଂ ରତନମାଲତୋ ॥
ଠପେତ୍ୱା ସୁଦସ୍ସନେ ମାଲେ, ଜନଂ ସମନୁସାସିୟ ।
ସସଙ୍ଘୋ ନଭମୁଗ୍ଗମ୍ମ, ଜମ୍ବୁଦୀପଂ ଜିନୋ ଅଗା ॥
ଇମମ୍ହି କପ୍ପେ ତତିୟଂ, କସ୍ସପୋ ଗୋତ୍ତତୋ ଜିନୋ ।
ଅହୁ ସବ୍ବୱିଦୂ ସତ୍ଥା, ସବ୍ବଲୋକାନୁକମ୍ପକୋ ॥
ମହାମେଘୱନଂ ଆସି, ମହାସାଗରନାମକଂ ।
ୱିସାଲଂ ନାମ ନଗରଂ, ପଚ୍ଛିମାୟ ଦିସାୟ’ହୁ ॥
ଜୟନ୍ତୋ ନାମ ନାମେନ, ତତ୍ଥ ରାଜା ତଦା ଅହୁ ।
ନାମେନ ମଣ୍ଡଦୀପୋତି, ଅୟଂ ଦୀପୋ ତଦା ଅହୁ ॥
ତଦା ଜୟନ୍ତରଞ୍ଞୋ ଚ, ରଞ୍ଞୋ କନିଟ୍ଠଭାତୁ ଚ ।
ୟୁଦ୍ଧଂ ଉପଟ୍ଠିତଂ ଆସି, ଭିଂସନଂ ସତ୍ତହିଂସନଂ ॥
କସ୍ସପୋ ସୋ ଦସବଲୋ, ତେନ ୟୁଦ୍ଧେନ ପାଣିନଂ ।
ମହନ୍ତଂ ବ୍ୟସନଂ ଦିସ୍ୱା, ମହାକାରୁଣିକୋ ମୁନି ॥
ତଂ ହନ୍ତ୍ୱା ସତ୍ତୱିନୟଂ, ପୱତ୍ତିଂ ସାସନସ୍ସ ଚ ।
କାତୁଂ ଇମସ୍ମିଂ ଦୀପସ୍ମିଂ, କରୁଣାବଲଚୋଦିତୋ ॥
ୱୀସତିୟା ସହସ୍ସେହି, ତାଦୀହି ପରିୱାରିତୋ ।
ନଭସା’ଗମ୍ମ ଅଟ୍ଠାସି, ସୁଭକୂଟମ୍ହି ପବ୍ବତେ ॥
ତତ୍ରଠିତୋ ଅଧିଟ୍ଠାସି, ନରିସ୍ସର ମୁନିସ୍ସରୋ ।
‘‘ସବ୍ବେ ମଂ ଅଜ୍ଜ ପସ୍ସନ୍ତୁ, ମଣ୍ଡଦୀପମ୍ହି ମାନୁସା ॥
ଆଗନ୍ତୁକାମା ସବ୍ବେୱ, ମାନୁସା ମମ ସନ୍ତିକଂ ।
ଆଗଚ୍ଛନ୍ତୁ ଅକିଚ୍ଛେନ, ଖିପ୍ପଞ୍ଚା’ତି ମହାମୁନି ॥
ଓଭାସନ୍ତଂ ମୁନିନ୍ଦଂ ତଂ, ଓଭାସନ୍ତଞ୍ଚ ପବ୍ବକଂ ।
ରାଜା ଚ ନାଗରା ଚେୱ, ଦିସ୍ୱା ଖିପ୍ପଂ ଉପାଗମୁଂ ॥
ଅତ୍ତନୋ ଅତ୍ତନୋ ପତ୍ତ-ୱିଜୟାୟ ଜନା ବହୂ ।
ଦେୱତା ବଲିଦାନତ୍ଥଂ, ତଂ ପବ୍ବତମୁପାଗତା ॥
ଦେୱତା ଇତି ମଞ୍ଞିଂସୁ, ସସଙ୍ଘଂ ଲୋକନାୟକଂ ।
ରାଜା ଚ ସୋ କୁମାରୋ ଚ, ୟୁଦ୍ଧମୁଜ୍ଝିଂସୁ ୱିମ୍ହିତା ॥
ରାଜା ସୋ ମୁନିରାଜଂ ତଂ, ଅତିହଟ୍ଠୋ’ଭିୱାଦିୟ ।
ନିମନ୍ତୟିତ୍ୱା ଭତ୍ତେନ, ଆନେତ୍ୱା ପୁରସନ୍ତିକଂ ॥
ସସଙ୍ଘସ୍ସ ମୁନିନ୍ଦସ୍ସ, ନିସଜ୍ଜାରହମୁତ୍ତମଂ ।
ରମଣୀୟମିଦଂ ଠାନ-ମସମ୍ବାଧନ୍ତି ଚିନ୍ତିୟ ॥
କାରିତେ ମଣ୍ଡପେ ରମ୍ମେ, ପଲ୍ଲଙ୍କେସୁ ୱରେସୁ ତଂ ।
ନିସୀଦାପେସି ସମ୍ବୁଦ୍ଧଂ, ସସଙ୍ଘଂ ଇଧ ଭୂପତି ॥
ନିସିନ୍ନମ୍ପିଧ ପସ୍ସନ୍ତା, ସସଙ୍ଘଂ ଲୋକନାୟକଂ ।
ଦୀପେ ମନୁସ୍ସା ଆନେସୁଂ, ପଣ୍ଣାକାରେ ସମନ୍ତତୋ ॥
ଅତ୍ତନୋ ଖଜ୍ଜଭୋଜ୍ଜେହି, ତେହି ତେହା’ଭତେହି ଚ ।
ସସନ୍ତପ୍ପେସି ସସଙ୍ଘଂ ତଂ, ରାଜା ସୋ ଲୋକନାୟକଂ ॥
ଇଧେ’ୱ ପଚ୍ଛାଭତ୍ତଂ ତଂ, ନିସିନ୍ନସ୍ସ ଜିନସ୍ସ ସୋ ।
ମହାସାଗରମୁୟ୍ୟାନଂ, ରାଜା’ଦା ଦକ୍ଖିଣଂ ୱରଂ ॥
ଅକାଲପୁପ୍ଫଲଙ୍କାରେ, ମହାସାଗରକାନନେ ।
ପଟିଗ୍ଗହିତେ ବୁଦ୍ଧେନ, ଅକମ୍ପିତ୍ଥ ମହାମହୀ ॥
ଏତ୍ଥେୱ ସୋ ନିସୀଦିତ୍ୱା, ଧମ୍ମଂ ଦେସେସି ନାୟକୋ ।
ତଦା ୱୀସଂ ସହସ୍ସାନି, ସୋତାପତ୍ତିଫଲଂ ନରା ॥
ଦିୱା ୱିହାରଂ କତ୍ୱାନ, ମହାସାଗରକାନନେ ।
ସାୟନ୍ହେ ସୁଗତୋ ଗନ୍ତ୍ୱା, ପୁବ୍ବବୋଧିଟ୍ଠିତଂ ମହିଂ ॥
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ।
ଇତି ଚିନ୍ତେସି ସମ୍ବୁଦ୍ଧୋ, ହିତତ୍ଥଂ ଦୀପୱାସିନଂ ॥
ଆଦାୟ ଦକ୍ଖିଣଂ ସାଖଂ, ମମ ନିଗ୍ରୋଧବୋଧିତୋ ।
ସୁଧମ୍ମା ଭିକ୍ଖୁନୀ ଏତୁ, ଇଦାନି ସହଭିକ୍ଖୁନୀ ॥
ତସ୍ସ ତଂ ଚିତ୍ତମଞ୍ଞାୟ, ସା ଥେରୀ ତଦନନ୍ତରଂ ।
ଗହେତ୍ୱା ତତ୍ଥ ରାଜାନଂ, ଉପସଙ୍କମ୍ମ ତଂ ତରୁଂ ॥
ଲେଖଂ ଦକ୍ଖିଣସାଖାୟ, ଦାପେତ୍ୱାନ ମହିଦ୍ଧିକା ।
ମନୋସିଲାୟ ଛିନ୍ନଂ ତଂ, ଠିତଂ ହେମକଟାୟକେ ॥
ଇଦ୍ଧିୟା ବୋଧିମାଦାୟ, ସପଞ୍ଚସତଭିକ୍ଖୁନୀ ।
ଇଧାନେତ୍ୱା ମହାରାଜ, ଦେୱତାପରିୱାରିତା ॥
ସସୁୱଣ୍ଣକଟାହଂ ତଂ, ସମ୍ବୁଦ୍ଧେନ ପସାରିତେ ।
ଠପେସି ଦକ୍ଖିଣେ ହତ୍ଥେ, ତଂ ଗହେତ୍ୱା ତଥାଗତୋ ॥
ପତିଟ୍ଠାପେତୁଂ ରଞ୍ଞୋ’ଦା, ଜୟନ୍ତସ୍ସ ସତଂ ତହିଂ ।
ମହାସାଗରମୁୟ୍ୟାନେ, ପତିଟ୍ଠାପେସି ଭୂପତି ॥
ତତୋ ଗନ୍ତ୍ୱାନ ସମ୍ବୁଦ୍ଧୋ, ନାଗମାଳକଉତ୍ତରେ ।
ଧନସ୍ସ ଧମ୍ମଂ ଦେସେସି, ନିସିନ୍ନୋ’ସୋକମାଳକେ ॥
ତଂ ଧମ୍ମଦେସନଂ ସୁତ୍ୱା, ଧମ୍ମାଭିସମୟୋ ତହିଂ ।
ଅହୁ ପାଣସହସ୍ସାନଂ, ଚତୁନ୍ନଂ ମନୁଜାଧିପ ॥
ପୁବ୍ବବୁଦ୍ଧନିସିତଂ ତଂ, ଠାନଂ ଗନ୍ତ୍ୱା ପୁନୁତ୍ତରଂ ।
ନିସିନ୍ନୋ ତତ୍ଥ ଅପ୍ପେତ୍ୱା, ସମାଧିଂ ୱୁଟ୍ଠିତୋ ତତୋ ॥
ଧମ୍ମଂ ଦେସେସି ସମ୍ବୁଦ୍ଧୋ, ପରିସାୟ ତହିଂ ପନ ।
ଦସପାଣସହସ୍ସାନି, ପତ୍ତମଗ୍ଗଫଲାନ’ହୁଂ ॥
ଜଲସାଟିକଧାତୁଂ ସୋ, ମନସ୍ସେହି ନମସ୍ସିତୁଂ ।
ଦତ୍ୱା ସପରିୱାରଂ ତଂ । ଠପେତ୍ୱା ଇଧ ଭିକ୍ଖୁନୀ ॥
ସହ ଭିକ୍ଖୁସହସ୍ସେନ, ସବ୍ବନନ୍ଦିଞ୍ଚ ସାୱକଂ ।
ଠପେତ୍ୱା ନଦୀତୋ ଓରଂ, ସୋ ସୁଦସ୍ସନମାଳତୋ ॥
ସୋମନସ୍ସେ ମାଳକସ୍ମିଂ, ଜନଂ ସମନୁସାସିୟ ।
ସଙ୍ଘେନ ନଭମୁଗ୍ଗନ୍ତ୍ୱା, ଜମ୍ବୁଦୀପଂ ଜିନୋ ଅଗା ॥
ଅହୁ ଇମସ୍ମିଂ କପ୍ପସ୍ମିଂ, ଚତୁତ୍ଥଂ ଗୋତମୋ ଜିନୋ ।
ସବ୍ବଧମ୍ମୱିଦୂ ସତ୍ଥା, ସବ୍ବଲୋକାନୁକମ୍ପକୋ ॥
ପଠମଂ ସୋ ଇଧାଗନ୍ତ୍ୱା, ୟକ୍ଖନିଦ୍ଧମନଂ ଅକା ।
ଦୁତିୟଂ ପୁନରାଗମ୍ମ, ନାଗାନଂ ଦମନଂ ଅକା ॥
କଲ୍ୟାଣିୟଂ ମଣିଅକ୍ଖି ନାଗେନା’ଭିନିମନ୍ତିତୋ ।
ତତିୟଂ ପୁନରାଗମ୍ମ, ସସଙ୍ଘୋ ତତ୍ଥ ଭୁଞ୍ଜିୟ ॥
ପୁବ୍ବବୋଧିଠିତଠାନଂ, ଥୂପଠାନମିଦମ୍ପି ଚ ।
ପରିଭୋଗଧାତୁଠାନଞ୍ଚ, ନିସଜ୍ଜାୟୋ’ପଭୁଞ୍ଜିୟ ॥
ପୁବ୍ବବୁଦ୍ଧଠିତଟ୍ଠାନା, ଓରଂ ଗନ୍ତ୍ୱା ମହାମୁନି ।
ଲଂକାଦୀପେ ଲୋକଦୀପୋ, ମନୁସ୍ସାଭାୱତୋ ତଦା ॥
ଦୀପଟ୍ଠଂ ଦେୱସଙ୍ଘଞ୍ଚ, ନାଗେ ସମନୁସାସିୟ ।
ସସଙ୍ଘୋ ନଭମୁଗ୍ଗନ୍ତ୍ୱା, ଜମ୍ବୁଦୀପଂ ଜିନୋ ଅଗା ॥
ଏୱଂ ଠାନମିଦଂ ରାଜ, ଚତୁବୁଦ୍ଧନିସେୱିତଂ ।
ତସ୍ମିଂ ଠାନେ ମହାରାଜ, ଥୂପୋ ହେସ୍ସତି’ନାଗତେ ॥
ବୁଦ୍ଧସାରୀରଧାତୂନଂ, ଦୋଣଧାତୁନିଧାନୱା ।
ୱୀସଂହତ୍ଥସତଂ ଉଚ୍ଚୋ, ହେମମାଲୀ’ତି ୱିସ୍ସୁତୋ ॥
ଅହମେୱ କାରେସ୍ସାମି, ଇଚ୍ଛାହ ପୁଥୱିସ୍ସରୋ ।
ଇଧ ଅଞ୍ଞାନି କିଚ୍ଚାନି, ବହୂନି ତୱ ଭୂମିପ ॥
ତାନି କାରେହି ନତ୍ତାତେ, କାରେସ୍ସତି ଇମଂ ପନ ।
ମହାନାଗସ୍ସ ତେ ଭାତୁ, ଉପରାଜସ୍ସ ଅତ୍ରଜୋ ॥
ସୋ ୟଟ୍ଠାଲୟତିସ୍ସୋତି, ରାଜା ହେସ୍ସତ’ନାଗତେ ।
ରାଜା ଗୋଟ୍ଠାଭୟୋ ନାମ, ତସ୍ସ ପୁତ୍ତୋ ଭୱିସ୍ସତି ॥
ତସ୍ସ ପୁତ୍ତୋ କାକୱଣ୍ଣ-ତିସ୍ସୋ ନାମ ଭୱିସ୍ସତି ।
ତସ୍ସ ରଞ୍ଞୋ ସୁତୋ ରାଜ, ମହାରାଜା ଭୱିସ୍ସତି ॥
ଦୁଟ୍ଠଗାମଣିସଦ୍ଦେନ, ପାକଟୋ’ଭୟନାମକୋ ।
କାରେସ୍ସତୀ’ଧ ଥୂପଂ ସୋ, ମହା ତେଜିଦ୍ଧିୱିକ୍କମୋ ॥
ଇଚ୍ଚାହ ଥେରୋ ଥେରସ୍ସ, ୱଚନେ ନେ’ତ୍ଥ ଭୂପତି ।
ଉସ୍ସାପେସି ସିଲାଥମ୍ଭଂ, ତଂ ପୱତ୍ତିଂ ଲିଖାପିୟ ॥
ରମ୍ମଂ ମହାମେଘୱନଂ, ତିସ୍ସାରାମଂ ମହାମହୀ ।
ମହାମହିନ୍ଦଥେରୋ ସୋ, ପଟିଗ୍ଗୟ୍ହ ମହିଦ୍ଧିକୋ ॥
ଅକମ୍ପୋ କମ୍ପୟିତ୍ୱାନ, ମହିଂ ଠାନେସୁ ଅଟ୍ଠସୁ ।
ପିଣ୍ଡାୟ ପୱିସିତ୍ୱାନ, ନଗରଂ ସାଗରୂପମଂ ॥
ରଞ୍ଞୋ ଘରେ ଭତ୍ତକିଚ୍ଚଂ, କତ୍ୱା ନିକ୍ଖମ୍ମ ମନ୍ଦିରଂ ।
ନିସଜ୍ଜ ନନ୍ଦନୱନେ, ଅଗ୍ଗିକ୍ଖନ୍ଧୋପମଂ ତହିଂ ॥
ସୁତ୍ତଂ ଜନସ୍ସ ଦେସେତ୍ୱା, ସହସ୍ସଂ ମାନୁସେ ତହିଂ ।
ପାପୟିତ୍ୱା ମଗ୍ଗଫଲଂ, ମହାମେଘୱନେ ୱସି ॥
ତତିୟେ ଦିୱସେ ଥେରୋ, ରାଜଗେହମ୍ହି ଭୁଞ୍ଜିୟ ।
ନିସଜ୍ଜ ନନ୍ଦନୱନେ, ଦେସିୟା’ସିୱିସୋପମଂ ॥
ପାପୟିତ୍ୱା’ଭିସମୟଂ, ସହସ୍ସପୁରିସେ ତତୋ ।
ତିସ୍ସାରାମଂ ଅଗା ଥେରୋ, ରାଜା ଚ ସୁତଦେସନୋ ॥
ଥେରଂ ଉପନିସୀଦିତ୍ୱା, ସୋ ପୁଚ୍ଛି ଜିନସାସନଂ ।
ପତିଟ୍ଠିତନ୍ନୁ ଭନ୍ତେ’ତି, ନ ତାୱ ମନୁଜା’ଧିପ ॥
ଉପୋସଥାଦିକମ୍ମତ୍ଥଂ, ଜିନା’ଣାୟ ଜନାଧିପ ।
ସୀମାୟ ଇଧ ବଦ୍ଧାୟ, ପତିଟ୍ଠିସ୍ସତି ସାସନଂ ॥
ଇଚ୍ଚ’ବ୍ରୱି ମହାଥେରୋ, ତଂ ରାଜା ଇଦମବ୍ରୱି ।
ସମ୍ବୁଦ୍ଧା’ଣାୟ ଅନ୍ତୋହଂ, ୱସ୍ସିସ୍ସାମି ଜୁତିନ୍ଧର ॥
ତସ୍ମା କତ୍ୱା ପୁରଂ ଅନ୍ତୋ-ସୀମଂ ବନ୍ଧଥ ସଜ୍ଜୁକଂ ।
ଇଚ୍ଚା’ବ୍ରୱି ମହାରାଜା, ଥେରୋ ତଂ ଇଧମବ୍ରୱି ॥
ଏୱଂ ସତି ତୁୱଂୟେୱ, ପଜାନ ପୁଥୱିସ୍ସର ।
ସୀମାୟ ଗମନଟ୍ଠାନଂ, ବନ୍ଧିସ୍ସାମ ମୟଂ ହିତଂ ॥
‘‘ସାଧୂ’’ତି ୱତ୍ୱା ଭୂମିନ୍ଦୋ, ଦେୱିନ୍ଦୋ ୱିୟ ନନ୍ଦନା ।
ମହାମେଘୱନାରମ୍ମା, ପାୱିସି ମନ୍ଦିରଂ ସକଂ ॥
ଚତୁତ୍ଥେ ଦିୱସେ ଥେରୋ, ରଞ୍ଞୋ ଗେହମ୍ହି ଭୁଞ୍ଜିୟ ।
ନିସଜ୍ଜ ନନ୍ଦନୱନେ, ଦେସେସ’ନମନଗ୍ଗିୟଂ ॥
ପାୟେତ୍ୱା’ମତପାନଂ ସୋ, ସହସ୍ସପୁରିସେ ତହିଂ ।
ମହାମେଘୱନାରାମଂ, ମହାଥେରୋ ଉପାଗମି ॥
ପାତୋ ଭେରିଂ ଚରାପେତ୍ୱା, ମଣ୍ଡୟିତ୍ୱା ପୁରଂ ୱରଂ ।
ୱିହାରଗାମିମଗ୍ଗଞ୍ଚ, ୱିହାରଞ୍ଚ ସମନ୍ତତୋ ॥
ରଥେସଭୋ ରଥଟ୍ଠୋ ସୋ, ସବ୍ବାଲଙ୍କାରଭୂସିତୋ ।
ସହାମଚ୍ଚୋ ସହୋରୋଧୋ, ସୟୋଗ୍ଗବଲୱାହନୋ ॥
ମହତା ପରିୱାରେନ, ସକାରାମମୁପାଗମି ।
ତତ୍ଥ ଥେରେ ଉପଗନ୍ତ୍ୱା, ୱନ୍ଦିତ୍ୱା ୱନ୍ଦନାରହେ ॥
ସହ ଥେରେହି ଗନ୍ତ୍ୱାନ, ନଦିୟୋ’ପରିତିତ୍ଥକଂ ।
ତତୋ କସନ୍ତୋ ଅଗମି, ହେମନଙ୍ଗଲମାଦିୟ ॥
ମହାପଦୁମୋ କୁଞ୍ଜରୋ ଚ, ଉଭୋ ନାଗା ସୁମଙ୍ଗଲା ।
ସୁୱଣ୍ଣନଙ୍ଗଲେ ୟୁତ୍ତା, ପଠମେ କୁନ୍ତମାଳକେ ॥
ଚତୁରଙ୍ଗମହା ସେନୋ, ସହ ଥେରେହି ଖତ୍ତିୟୋ ।
ଗହେତ୍ୱା ନଙ୍ଗଲଂ ସୀତଂ, ଦସ୍ସୟିତ୍ୱା ଅରିନ୍ଦମୋ ॥
ସମଲଙ୍କତଂ ପୁଣ୍ଣଘଟଂ, ନାନାରାଗଂ ଧଜଂ ସୁଭଂ ।
ପାତିଂ ଚନ୍ଦନଚୁଣ୍ଣଞ୍ଚ, ସୋଣ୍ଣରଜତ ଦଣ୍ଡକଂ ॥
ଆଦାସଂ ପୁପ୍ଫଭରିତଂ, ସମୁଗ୍ଗଂ କୁସୁମଗ୍ଘିୟଂ ।
ତୋରଣକଦଲୀଛତ୍ତାଦିଂ, ଗହିତିତ୍ଥି ପରିୱାରିତୋ ॥
ନାନାତୁରିୟ ସଙ୍ଘୁଟ୍ଠୋ, ବଲୋଘ ପରିୱାରିତୋ ।
ଥୁତିମଙ୍ଗଲଗୀତେହି, ପୂରୟନ୍ତୋ ଚତୁଦ୍ଦିସଂ ॥
ସାଧୁକାର ନିନାଦେତି, ଚେଲୁକ୍ଖେପସତେହି ଚ ।
ମହତା ଛଣପୁଜାୟ, କସନ୍ତୋ ଭୂମିପୋ ଅଗା ॥
ୱିହାରଞ୍ଚ ପୁରଞ୍ଚେୱ, କୁରୁମାନୋ ପଦକ୍ଖିଣଂ ।
ସୀମାୟ ଗମନଠାନଂ, ନଦିଂ ପତ୍ୱା ସମାପୟି ॥
କେନକେନ ନିମିତ୍ତେନ, ସୀମା ଏତ୍ଥ ଗତାତି ଚେ ।
ଏୱଂ ସୀମାଗତଠାନଂ, ଇଚ୍ଛମାନା ନିବୋଧଥ ॥
ନଜ୍ଜାପାସାଣତିତ୍ଥମ୍ହି, ପାସାଣେ କୁଡ୍ଡୱାଟକଂ ।
ତତୋ କୁମ୍ବଲୱାଟଂ ତଂ, ମହାନିପଂ ତତୋ ଅଗା ॥
ତତୋ କୁକୁଧପାଳିଙ୍ଗୋ, ମହାଅଙ୍ଗଣଗୋ ତତୋ ।
ତତୋ ଖୁଜ୍ଜମଧୁଲଞ୍ଚ, ମରୁତ୍ତପୋକ୍ଖରଣିଂତତୋ ॥
ୱିଜୟାରାମ ଉୟ୍ୟାନେ, ଉତ୍ତରଦ୍ୱାରକୋଟ୍ଠ ଗୋ ।
ଗଜକୁମ୍ଭକ ପାସାଣଂ, ଥୁସୱଟ୍ଠିକ ମଜ୍ଝଗୋ ॥
ଅଭୟେ ବଲାକପାସାଣଂ, ମହାସୁସାନ ମଜ୍ଝଗୋ ।
ଦୀଘପାସାଣକଂ ଗନ୍ତ୍ୱା, କମ୍ମାରଦେୱ ଗାମତୋ ॥
ନିଗ୍ରୋଧ ମଙ୍ଗଣଂ ଗନ୍ତ୍ୱା, ହିୟଗଲ୍ଲସମୀପକେ ।
ଦିୟାୱସବ୍ରାହ୍ମଣସ୍ସ, ଦେୱୋକଂ ପୁବ୍ବଦକ୍ଖିଣଂ ॥
ତତୋ ତେଲୁମପାଲିଙ୍ଗୋ,
ତତୋ ତାଲଚତୁକ୍କଗୋ ।
ଅସ୍ସମଣ୍ଡଲୱାମେନ,
ଦ୍ୱେ କଦମ୍ବା ଅଜାୟିସୁଂ ॥
ତତୋ ମରୁମ୍ବତିତ୍ତଙ୍ଗୋ, ତତୋ ଉଦ୍ଧଂ ନିଦିଂ ଅଗା ।
ପଠମ ଚେତିୟ ପାଚିନେ, ଦ୍ୱେ କଦମ୍ବା ଅଜାୟିସୁଂ ॥
ସେନିନ୍ଦଗୁତ୍ତରଜ୍ଜମ୍ହି, ଦମିଳା ଦକସୁଦ୍ଧିକା ।
ନଦିଂ ଦୂରନ୍ତି ବନ୍ଧିତ୍ୱା, ନଗରାସନ୍ନମକଂସୁ ତଂ ॥
ଜୀୱ ମାନକଦମ୍ବଞ୍ଚ, ଅନ୍ତୋସୀମଗତଂ ଅହୁ ।
ମତକ ଦମ୍ବତୀରେନ, ସୀମାଉଦ୍ଦକଦମ୍ବଗା ॥
ସୀହସିନା ନତିତ୍ଥେନ, ଉଗ୍ଗନ୍ତ୍ୱା ତୀରତୋ ୱଜଂ ।
ପାସାଣତିତ୍ଥଂ ଗନ୍ତ୍ୱାନ, ନିମିତ୍ତଂ ଘଟ୍ଟୟି ଇସି ॥
ନିମିତ୍ତେତୁ ପନେ’ତସ୍ମିଂ, ଘଟ୍ଟିତେ ଦେୱମାନୁସା ।
ସାଧୁକାରଂ ପୱତ୍ତେସୁଂ, ସାସନଂ ସୁପ୍ପତିଟ୍ଠିତଂ ॥
ରଞ୍ଞୋ ଦିନ୍ନାୟ ସୀତାୟ, ନିମିତ୍ତେ ପରିକିତ୍ତୟି ।
ଦ୍ୱତ୍ତିଂସମାଳକତ୍ଥଞ୍ଚ, ଥୂପାରାମତ୍ଥମେୱ ଚ ॥
ନିମିତ୍ତେ କିତ୍ତୟିତ୍ୱାନ, ମହାଥେରୋ ମହାମତି ।
ସୀମନ୍ତରନିମିତ୍ତେ ଚ, କିତ୍ତୟିତ୍ୱା ୟଥାୱିଧିଂ ॥
ଅବନ୍ଧୀ ସବ୍ବା ସୀମାୟୋ, ତସ୍ମିଂୟେୱ ଦିନେୱସୀ ।
ମହାମହୀ ଅକମ୍ପିତ୍ଥ, ସୀମାବନ୍ଧେ ସମାପିତେ ॥
ପଞ୍ଚମେ ଦିୱସେ ଥେରୋ, ରଞ୍ଞୋ ଗେହମ୍ହି ଭୁଞ୍ଜିୟ ।
ନିସଜ୍ଜ ନନ୍ଦନୱନେ, ସୁତ୍ତନ୍ତଂ ଖଜ୍ଜନୀୟକଂ ॥
ମହାଜନସ୍ସ ଦେସେତ୍ୱା, ସହସ୍ସଂ ମାନୁସେ ତହିଂ ।
ପାୟେତ୍ୱା ଅମତଂ ପାନଂ, ମହାମେଘୱନେ ୱସୀ ॥
ଛଟ୍ଠେପି ଦିୱସେ ଥେରୋ, ରଞ୍ଞୋଗେହମ୍ହି ଭୁଞ୍ଜିୟ ।
ନିସଜ୍ଜ ନନ୍ଦନୱନେ, ସୁତ୍ତ ଗୋମୟ ପିଣ୍ଡିକଂ ॥
ଦେସୟିତ୍ୱା ଦେସନଞ୍ଞୂ, ମହସ୍ସଂୟେୱ ମାନୁସେ ।
ପାପୟିତ୍ୱା’ଭିସମୟଂ, ମହା ମେଘୱନେ ୱସୀ ॥
ସତ୍ତମେପି ଦିନେ ଥେରୋ, ରାଜଗେହମ୍ହି ଭୁଞ୍ଜିୟ ।
ନିସଜ୍ଜ ନନ୍ଦନୱନେ, ଧମ୍ମଚକ୍କପ୍ପୱତ୍ତନଂ ॥
ସୁତ୍ତନ୍ତଂ ଦେସୟିତ୍ୱାନ, ସହସ୍ସଂୟେୱ ମାନୁସେ ।
ପାପୟିତ୍ୱା’ଭିସମୟଂ, ମହା ମେଘୱନେ ୱସି ॥
ଏୱଞ୍ହି ଅଟ୍ଠ ନୱମ-ସହସ୍ସାନି ଜୁତିନ୍ଧରୋ ।
କାରୟିତ୍ୱା’ଭିସମୟଂ, ଦିୱସେହେୱ ସତ୍ତତି ॥
ତଂ ମହାନନ୍ଦନୱନଂ, ୱୁଚ୍ଚତେ ତେନ ତାଦିନା ।
ସାସନଜୋତିତଟ୍ଠାନ-ମୀତି ଜୋତିୱନଂ ଇତି ॥
ତିସ୍ସରାମମ୍ହି କାରେସି,
ରାଜା ଥେରସ୍ସ ଆଦିତୋ ।
ପାସାଦଂ ସୀଘମୁକ୍କାୟ,
ସୁକ୍ଖା ପେତ୍ୱାନ ମତ୍ତିକା ॥
ପାସାଦୋ କାଳକାଭାସୋ,
ଆସି ସୋ ତେନ ତଂ ତହିଂ ।
କାଳପାସାଦ ପରିୱେଣ-ମୀତି ସଙ୍ଖମୁପାଗତଂ ॥
ତତୋ ମହାବୋଧିଘରଂ, ଲୋହପାସାଦ ମେୱ ଚ ।
ସଲାକଗ୍ଗଞ୍ଚ କାରେସି, ଭତ୍ତସାଲଞ୍ଚ ସାଧୁକଂ ॥
ବହୂନି ପରିୱେଣାନି, ସାଧୁ ପୋକ୍ଖରଣୀପି ଚ ।
ରତ୍ତିଠାନ ଦିୱାଠାନ-ପଭୁତୀନି ଚ କାରୟି ॥
ତସ୍ସ ନହାନପାପସ୍ସ, ନ୍ହାନପୋକ୍ଖରଣୀତଟେ ।
ସୁନହାତପରିୱେଣନ୍ତି, ପରିୱେଣଂ ପୱୁଚ୍ଚତି ॥
ତସ୍ସ ଚଙ୍କମିତଠାନେ, ଦୀପ ଦୀପସ୍ସ ସାଧୁନୋ ।
ୱୁଚ୍ଚତେ ପରିୱେଣଂ ତଂ, ଦୀଘଚଙ୍କମନଂ ଇତି ॥
ଅଗ୍ଗଫଲସମାପତ୍ତିଂ, ସମାପଜ୍ଜ ୟହିଂ ତୁସୋ ।
ଫଲଗ୍ଗ ପରିୱେଣନ୍ତି, ଏତଂ ତେନ ପୱୁଚ୍ଚତି ॥
ଅପସ୍ସିୟ ଅପସ୍ସେନଂ, ଥେରୋ ତତ୍ଥ ନିସୀଦିସୋ ।
ଥେରା ପସ୍ସୟ ପରିୱେଣଂ, ଏତଂ ତେନ ପୱୁଚ୍ଚତି ॥
ବହୂ ମରୁଗଣା ୟତ୍ଥ, ଉପାସିଂସୁ ଉପଚ୍ଚତଂ ।
ତେନେୱ ତଂ ମରୁଗଣ-ପରିୱେଣନ୍ତି ୱୁଚ୍ଚତି ॥
ସେନାପତିତସ୍ସ ରଞ୍ଞୋ, ଥେରସ୍ସ ଦୀଘସନ୍ଦକୋ ।
କାରେସି ଚୂଳପାସାଦଂ, ମହାଥମ୍ଭେହି ଅଟ୍ଠହି ॥
ଦୀଘସନ୍ଦ ସେନାପତି-ପରିୱେଣନ୍ତି ତଂ ତହିଂ ।
ୱୁଚ୍ଚତେ ପରିୱେଣଂ ତଂ, ପମୁଖଂ ପମୁଖାକରଂ ॥
ଦେୱାନଂପିୟୱଚନୋ’ପଗୁଳନାମୋ,
ଲଂକାୟଂ ପଠମମିମଂ ମହାୱିହାରଂ ।
ରାଜା ସୋ ସୁମତିମହାମହିନ୍ଦଥେରଂ,
ଆଗମ୍ମା ମଲମତିମେତ୍ଥକାରୟିତ୍ଥାତି ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ମହାୱିହାରପଟିଗ୍ଗହକୋ ନାମ
ପନ୍ନରସମୋ ପରିଚ୍ଛେଦୋ ।
ସୋଳସମ ପରିଚ୍ଛେଦ
ଚେତିୟପବ୍ବତୱିହାର ପଟିଗ୍ଗହକୋ
ପୁରେ ଚରିତ୍ୱା ପିଣ୍ଡାୟ, କରିତ୍ୱା ଜନସଙ୍ଗହଂ ।
ରାଜଗେହମ୍ହି ଭୁଞ୍ଜନ୍ତୋ, କାରେନ୍ତୋ ରାଜସଙ୍ଗହଂ ॥
ଛବ୍ବସଦିୱସେ ଥେରୋ, ମହାମେଘୱନେ ୱସୀ ।
ଆସଳ୍ହସୁକ୍କପକ୍ଖସ୍ସ, ତେରସେ ଦିୱସେ ପନ ॥
ରାଜଗେହମ୍ହି ଭୁଞ୍ଜିତ୍ୱା, ମହାରଞ୍ଞୋ ମହାମତି ।
ମହା’ପ୍ପମାଦସୁତ୍ତନ୍ତଂ, ଦେସୟିତ୍ୱା ତତୋ ଚ ସୋ ॥
ୱିହାରକରଣଂ ଇଚ୍ଛଂ, ତତ୍ଥ ଚେତିୟପବ୍ବତେ ।
ନିକ୍ଖମ୍ମ ପୁରିମଦ୍ୱାରା, ଅଗା ଚେତିୟପବ୍ବତଂ ॥
ଥେରଂ ତତ୍ଥ ଗତଂ ସୁତ୍ୱା, ରଥଂ ଆରୁୟ୍ହ ଭୂପତି ।
ଦେୱିୟୋ ଦ୍ୱେ ଚ ଆଦାୟ, ଥେରସ୍ସାନୁପଦଂ ଅକା ॥
ଥେରା ନାଗଚତୁକ୍କମ୍ହି, ନହାତ୍ୱା ରହଦେ ତହିଂ ।
ପବ୍ବତାରୋହଣତ୍ଥାୟ, ଅଟ୍ଠଂସୁ ପଟିପାଟିୟା ॥
ରାଜା ରଥା ତଦୋ’ରୁୟ୍ହ, ସବ୍ବେ ଥେରେ’ଭିୱାଦୟି ।
ଉଣ୍ହେ କିଲନ୍ତେ କିଂରାଜ, ଆଗତୋସୀ’ତି ଅହୁତେ ॥
ତୁମ୍ହାକଂ ଗମନାସଙ୍କୀ, ଆଗତୋମ୍ହୀ’ତି ଭାସିତେ ।
ଇଧେୱ ୱସ୍ସଂ ୱସିତୁଂ, ଆଗତମ୍ହା’ତି ଭାସିୟ ॥
ତସ୍ସୂପନାୟିକଂ ଥେରୋ, ଖନ୍ଧକଂ ଖନ୍ଧକୋୱିଦୋ ।
କଥେସି ରଞ୍ଞୋ ତଂ ସୁତ୍ୱା, ଭାଗିନେୟ୍ୟୋ ଚ ରାଜିନୋ ॥
ମହାରିଟ୍ଠୋ ମହାମଚ୍ଚୋ, ପଞ୍ଚପଞ୍ଞାସଭାତୁହି ।
ସଦ୍ଧିଂ ଜେଟ୍ଠକନିଟ୍ଠେହି, ରାଜାନମଭିତୋ ଠିତୋ ॥
ୟାଚିତ୍ୱା ତଦହୁ ଚେୱ, ପବ୍ବଜୁଂ ଥେରସନ୍ତିକେ ।
ପତ୍ତାରହତ୍ତଂ ସବ୍ବେପି, ତେ ଖୁରଗ୍ଗେ ମହାମତୀ ॥
କନ୍ତକଚେତିୟଠାନେ, ପରିତୋ ତଦହେୱ ସୋ ।
କମ୍ମାନି ଆରଭାପେତ୍ୱା, ଲେଣାନି ଅଟ୍ଠସଟ୍ଠିୟୋ ॥
ଅଗମାସି ପୁରଂ ରାଜା, ଥେରା ତତ୍ଥେୱ ତେ ୱସୁଂ ।
କାଲେ ପିଣ୍ଡାୟ ନଗରଂ, ପୱିସନ୍ତା’ନୁକମ୍ପକା ॥
ନିଟ୍ଠିତେ ଲେଣକମ୍ମମ୍ହି, ଆସଳ୍ହିପୁଣ୍ଣମାସିୟଂ ।
ଗନ୍ତ୍ୱା ଅଦାସି ଥେରାନଂ, ରାଜା ୱିହାରଦକ୍ଖିଣଂ ॥
ଦ୍ୱତ୍ତିଂସମାଳକାନଞ୍ଚ, ୱିହାରସ୍ସ ଚ ତସ୍ସ ଖୋ ।
ସୀମଂ ସୀମାତିଗୋ ଥେରୋ, ବନ୍ଧିତ୍ୱା ତଦହେୱ ସୋ ॥
ତେସଂ ପବ୍ବଜ୍ଜାପେକ୍ଖାନଂ, ଅକାସି ଉପସମ୍ପଦଂ ।
ସବ୍ବେସଂ ସବ୍ବପଠମଂ, ବଦ୍ଧେ ତୁମ୍ବରୁମାଳକେ ॥
ଏତେ ଦ୍ୱାସଟ୍ଠି ଅରହନ୍ତୋ, ସବ୍ବେ ଚେତିୟପବ୍ବତେ ।
ତତ୍ଥ ୱସ୍ସଂ ଉପଗନ୍ତ୍ୱା, ଅକଂସୁ ରାଜସଙ୍ଗହଂ ॥
ଦେୱମନୁସ୍ସଗଣଗଣିତଂ ତଂ,
ତଞ୍ଚ ଗଣଂ ଗୁଣୱିତ୍ଥତକିତ୍ତିଂ ।
ୟାନମୁପଚ୍ଚ ଚ ମାନୟମାନା,
ପୁଞ୍ଞଚୟଂ ୱିପୁଲଂ ଅକରିଂସୂତି ॥
ସୁଜନପସାଦସଂୱେଗତ୍ଥାୟ କତେ ମହାୱଂସେ
ଚେତିୟପବ୍ବତୱିହାରପଟିଗ୍ଗହକୋ ନାମ
ସୋଳସମୋ ପରିଚ୍ଛେଦୋ ।
ସତ୍ତରସମ ପରିଚ୍ଛେଦ
ଧାତୁଆଗମନୋ
ୱୁତ୍ଥୱସ୍ସୋ ପୱାରେତ୍ୱା, କତ୍ତିକପୁଣ୍ଣମାସିୟଂ ।
ଅୱୋଚେ’ଦଂ ମହାରାଜଂ, ମହାଥେରୋ ମହାମତି ॥
ଚିରଦିଟ୍ଠୋ ହି ସମ୍ବୁଦ୍ଧୋ, ସତ୍ଥା ନୋ ମନୁଜାଧିପ ।
ଅନାଥୱାସଂ ଅୱସିମ୍ହ, ନତ୍ଥି ନୋ ପୂଜିୟଂ ଇଧ ॥
‘‘ଭାସିତ୍ଥ ନନୁ ଭନ୍ତେମେ, ସମ୍ବୁଦ୍ଧୋ ନିବ୍ବୁତୋ’’ ଇତି ।
ଆହ ଧାତୂସୁ ଦିଟ୍ଠେସୁ, ଦିଟ୍ଠୋ ହୋତି ଜିନୋ’’ ଇତି ॥
ୱିଦିତୋ ୱୋ ଅଧିପ୍ପାୟୋ, ଥୂପସ୍ସ କାରଣେ ମୟା ।
କାରେସ୍ସାମି ଅହଂ ଥୂପଂ, ତୁମ୍ହେ ଜାନାଥ ଧାତୁୟୋ ॥
ମନ୍ତେହି ସୁମନେନାତି, ଥେରୋ ରାଜାନମବ୍ରୱି ।
ରାଜା’ହ ସାମଣେରଂ ତଂ, କୁତୋ ଲଚ୍ଛାମ ଧାତୁୟୋ ॥
ୱିଭୂସୟିତ୍ୱା ନଗରଂ, ମଗ୍ଗଞ୍ଚ ମନୁଜାଧିପ ।
ଉପୋସଥୀ ସପରିସୋ, ହତ୍ଥିଂ ଆରୁୟ୍ହ ମଙ୍ଗଲଂ ॥
ସେତଚ୍ଛତ୍ତଂ ଧାରୟନ୍ତୋ, ତାଲାୱଚରସଂହିତୋ ।
ମହାନାଗୱନୁୟ୍ୟାନଂ, ସାୟନ୍ହସମୟେ ୱଜ ॥
ଧାତୁଭେଦଞ୍ଞୁନୋ ରାଜ, ଧାତୁୟୋ ତତ୍ଥ ଲଚ୍ଛସି ।
ଇଚ୍ଛାହ ସାମଣେରୋ ସୋ, ସୁମନୋ ତଂ ସୁମାନସଂ ॥
ଥେରୋ’ଥ ରାଜକୁଲତୋ, ଗନ୍ତ୍ୱା ଚେତିୟପବ୍ବତଂ ।
ଆମନ୍ତିୟ ସାମଣେରଂ, ସୁମନଂ ସୁମନୋ ଗତିଂ ॥
ଏହି ତ୍ୱଂ ଭଦ୍ର ସୁମନ, ଗନ୍ତ୍ୱା ପୁପ୍ଫପୁରଂ ୱରଂ ।
ଅୟ୍ୟକଂ ତେ ମହାରାଜଂ, ଏୱଂ ନୋ ୱଚନଂ ୱଦ ॥
ସହାୟୋ ତେ ମହାରାଜ, ମହାରାଜା ମରୁପ୍ପିୟୋ ।
ପସନ୍ନୋ ବୁଦ୍ଧସମୟେ, ଥୂପଂ କାରେତୁମିଚ୍ଛତି ॥
ମୁନିନୋ ଧାତୁୟୋ ଦେହି, ପତ୍ତଂ ଭୁତ୍ତଞ୍ଚ ସତ୍ଥୁନା ।
ସରୀରଧାତୁୟୋ ସନ୍ତି, ବହୱୋ ହି ତୱନ୍ତିକେ ॥
ପତ୍ତପୂରା ଗହେତ୍ୱା ତା, ଗନ୍ତ୍ୱା ଦେୱପୁରଂ ୱରଂ ।
ସକ୍କଂ ଦେୱାନମିନ୍ଦଂ ତଂ, ଏୱଂ ନୋ ୱଚନଂ ୱଦ ॥
ତିଲୋକଦକ୍ଖିଣେୟ୍ୟସ୍ସ, ଦାଠାଧାତୁ ଚ ଦକ୍ଖିଣା ।
ତୱନ୍ତିକମ୍ହି ଦେୱିନ୍ଦ, ଦକ୍ଖିଣକ୍ଖକଧାତୁ ଚ ॥
ଦାଠଂ ତ୍ୱମେୱ ପୂଜେହି, ଅକ୍ଖକଂ ଦେହି ସତ୍ଥୁନୋ ।
ଲଂକାଦୀପସ୍ସ କିଚ୍ଚେସୁ, ମାପମଜ୍ଜ ସୁରାଧିପ ॥
‘‘ଏୱଂ ଭନ୍ତେ’’ତି ୱତ୍ୱା ସୋ, ସାମଣେରୋ ମହିଦ୍ଧିକୋ ।
ତଙ୍ଖଣଂୟେୱ ଅଗମା, ଧମ୍ମାସୋକସ୍ସ ସନ୍ତିକଂ ॥
ସାଲମୂଲମ୍ହି ଠପିତଂ, ମହାବୋଧିଂ ତହିଂ ସୁତଂ ।
କତ୍ତିକଚ୍ଛଣପୂଜାହି, ପୂଜିୟଂ ତଞ୍ଚ ଅଦ୍ଦସ ॥
ଥେରସ୍ସ ୱଚନଂ ୱତ୍ୱା, ରାଜତୋ ଲଦ୍ଧଧାତୁୟୋ ।
ପତ୍ତପୂରଂ ଗହେତ୍ୱାନ, ହିମୱନ୍ତମୁପାଗମି ॥
ହିମୱନ୍ତେ ଠପେତ୍ୱାନ, ସଧାତୁଂ ପତ୍ତମୁତ୍ତମଂ ।
ଦେୱିନ୍ଦସନ୍ତିକଂ ଗନ୍ତ୍ୱା, ଥେରସ୍ସ ୱଚନଂ ଭଣି ॥
ଚୂଳାମଣି ଚେତିୟମ୍ହା, ଗହେତ୍ୱା ଦକ୍ଖିଣକ୍ଖକଂ ।
ସାମଣେରସ୍ସ ପାଦାସି, ସକ୍କୋ ଦେୱାନମିସ୍ସରୋ ॥
ତଂ ଧାତୁଂ ଧାତୁପତ୍ତଞ୍ଚ, ଆଦାୟ ସୁମନୋ ତତୋ ।
ଆଗମ୍ମ ଚେତିୟଗିରିଂ, ଥେରସ୍ସ’ଦାସି ତଂ ୟତି ॥
ମହାନାଗୱନୁୟ୍ୟାନଂ, ୱୁତ୍ତେନା ୱିଧିନା’ଗମା ।
ସାୟନ୍ହାସମୟେ ରାଜା, ରାଜସେନା ପୁରକ୍ଖତୋ ॥
ଠପେସି ଧାତୁୟୋ ସବ୍ବା, ଥେରୋ ତତ୍ଥେୱ ପବ୍ବତେ ।
ମିସ୍ସକଂ ପବ୍ବତଂ ତସ୍ମା, ଆହୁ ଚେତିୟ ପବ୍ବତଂ ॥
ଠପେତ୍ୱା ଧାତୁପତ୍ତଂ ତଂ, ଥେରୋ ଚେତିୟପବ୍ବତେ ।
ଗହେତ୍ୱା ଅକ୍ଖକଂ ଧାତୁଂ, ସଙ୍କେତଂ ସଗଣୋ’ଗମା ॥
ସଚାୟଂ ମୁନିନୋ ଧାତୁ, ଛତ୍ତଂ ନମତୁ ମେ ସୟଂ ।
ଜଣ୍ଣୁକେହି କରୀଧାତୁ, ଧାତୁଚଙ୍କୋଟକୋ ଅୟଂ ॥
ସିରସ୍ମିଂ ମେ ପତିଟ୍ଠାତୁ, ଆଗମ୍ମ ସହ ଧାତୁକୋ ।
ଇତି ରାଜା ୱିଚିନ୍ତେସି, ଚିନ୍ତିତଂ ତଂ ତଥା ଅହୁ ॥
ଅମତେନା’ଭିସିତ୍ତୋୱ, ଅହୁ ହଟ୍ଠୋ’ତି ଭୂପତି ।
ସୀସତୋ ତଂ ଗହେତ୍ୱାନ, ହତ୍ଥିକ୍ଖନ୍ଧେ ଠପେସିତଂ ॥
ହଟ୍ଠୋ ହତ୍ତୀ କୁଞ୍ଚନାଦଂ, ଅକା କମ୍ପିତ୍ଥ ମେଦିନୀ ।
ତତୋ ନାଗୋ ନିୱତ୍ତିତ୍ୱା, ସଥେର ବଲୱାହନୋ ॥
ପୁରତ୍ଥିମେନ ଦ୍ୱାରେନ, ପୱିସିତ୍ୱା ପୁରଂ ସୁଭଂ ।
ଦକ୍ଖିଣେନ ଚ ଦ୍ୱାରେନ, ନିକ୍ଖମିତ୍ୱା ତତୋ ପୁନ ॥
ଥୂପାରାମେ ଚେତିୟସ୍ସ, ଠାନତୋ ପଚ୍ଛତୋ କତଂ ।
ପମୋଜୱତ୍ଥୁଂ ଗନ୍ତ୍ୱାନ, ବୋଧିଠାନେ ନିୱତ୍ତିୟ ॥
ପୁରତ୍ଥାୱଦନୋ ଅଠା, ଥୂପଠାନଂ ତଦା ହିତଂ ।
କଦମ୍ବପୁପ୍ଫଆଦାରି-ୱଲ୍ଲୀହି ଚିତକଂ ଅହୁ ॥
ମନୁସ୍ସଦେୱୋ ଦେୱେହି, ତଂ ଠାନଂ ରକ୍ଖିତଂ ସୁଚିଂ ।
ସୋଧାପେତ୍ୱା ଭୂସୟିତ୍ୱା, ତଙ୍ଖଣଂୟେୱ ସାଧୁକଂ ॥
ଧାତୁଂ ଓରୋପନତ୍ଥାୟ, ଆରଭୀ ହତ୍ଥିକ୍ଖନ୍ଧତୋ ।
ନାଗୋ ନ ଇଚ୍ଛିତଂ ରାଜା, ଥେରଂ ପୁଚ୍ଛିତ୍ଥ ତଂ ମନଂ ॥
ଅତ୍ତନୋ ଖନ୍ଧସମକେ, ଠାନେ ଠପନମିଚ୍ଛତି ।
ଧାତୁଓରୋପନଂ ତେନ, ନ ଇଟ୍ଠମୀ’ତି ସୋ ବ୍ରୱି ॥
ଆଣାପେତ୍ୱା ଖଣଂୟେୱ,
ସୁକ୍ଖାତୋ’ଭୟୱାପିତୋ ।
ସୁକ୍ଖକଦ୍ଦମ ଖଣ୍ଡେହି,
ଚିତା ପେତ୍ୱାନ ତଂ ସମଂ ॥
ଅଲଙ୍କରିତ୍ୱାନ ବହୁଧା, ରାଜା ତଂ ଠାନମୁତ୍ତମଂ ।
ଓରୋପେତ୍ୱା ହତ୍ଥିକ୍ଖନ୍ଧା, ଧାତୁଂ ତତ୍ଥ ଠପେସିତଂ ॥
ଧାତାରକ୍ଖଂ ସଂୱିଧାୟ, ଠପେତ୍ୱା ତତ୍ଥ ହତ୍ଥିନଂ ।
ଧାତୁଥୂପସ୍ସ କରଣେ, ରାଜା ତୁରିତମାନସୋ ॥
ବହୂ ମନୁସ୍ସେ ୟୋଜେତ୍ୱା, ଇତ୍ଥିକାକରଣେ ଲହୁଂ ।
ଧାତୁକିଚ୍ଚଂ ୱିଚିନ୍ତେନ୍ତୋ, ସାମଚ୍ଚୋ ପାୱିସୀ ପୁରଂ ॥
ମହାମହିନ୍ଦତ୍ଥେରୋ ତୁ, ମହା ମେଘୱନଂ ସୁଭଂ ।
ସଗଣୋ ଅଭିଗନ୍ତ୍ୱାନ, ତତ୍ଥ ୱାସମକପ୍ପୟି ॥
ରତ୍ତିଂ ନାଗୋ’ନୁପରିୟାତି, ତଂ ଠାନଂ ସୋ ସଧାତୁ କଂ ।
ବୋଧିଠାନମ୍ହି ସାଲାୟ, ଦିୱାଠାତି ସଧାତୁକୋ ॥
ୱତ୍ଥୁସ୍ସ ତସ୍ସୋ’ପରିତୋ, ଥୂପଂ ଥେରମତାନୁ ଗୋ ।
ଜଙ୍ଘାମତ୍ତଂ ଚିତାପେତ୍ୱା, କତିପାହେନ ଭୂପତି ॥
ତତ୍ଥ ଧାତୁପତିଟ୍ଠାନଂ, ଘୋସାପେତ୍ୱା ଉପାଗମି ।
ତତୋ ତତୋ ସମନ୍ତୋ ଚ, ସମାଗମି ମହାଜନୋ ॥
ତସ୍ମିଂ ସମାଗମେ ଧାତୁ, ହତ୍ଥିକ୍ଖନ୍ଧା ନଗାଗ୍ଗତା ।
ସତ୍ତତାଲପ୍ପମାଣମ୍ହି, ଦିସ୍ସନ୍ତି ନଭସିଟ୍ଠିତା ॥
ୱିମ୍ହାପୟନ୍ତି ଜନତଂ, ୟମକଂ ପାଟିହାରିୟଂ ।
କଣ୍ଣମ୍ବମୂଲେ ବୁଦ୍ଧୋ’ୱ, ଅକରି ଲୋମହଂସନଂ ॥
ତତୋ ନିକ୍ଖନ୍ତଜାଲାହି, ଜଲଧାରାହି ଚା’ସକିଂ ।
ଅୟଂ ଓଭାସିତା’ସିତ୍ତା, ସବ୍ବାଲଂକାମହୀ ମହୁ ॥
ପରିନିବ୍ବାନମଞ୍ଚମ୍ହି, ନିପନ୍ନେନ ଜିନେନ ହି ।
କତଂ ମହାଅଧିଟ୍ଠାନ-ପଞ୍ଚକଂ ପଞ୍ଚଚକ୍ଖୁନା ॥
ଗୟ୍ହମାନା ମହାବୋଧି ସାଖାସୋକେନ ଦକ୍ଖିଣା ।
ଛିଜ୍ଜିତ୍ୱାନ ସୟଂୟେୱ, ପତିଟ୍ଠାତୁ କଟାହକେ ॥
ପତିଟ୍ଠହିତ୍ୱା ସା ସାଖା, ଛବ୍ବଣ୍ଣରସ୍ମିୟୋ ସୁଭା ।
ରଞ୍ଜୟନ୍ତୀ ଦିସା ସବ୍ବା, ଫଲପତ୍ତେହି ମୁଚ୍ଚତୁ ॥
ସସୁୱଣ୍ଣକଟାହା ସା, ଉଗ୍ଗନ୍ତ୍ୱାନ ମନୋରମା ।
ଅଦିସ୍ସମାନା ସତ୍ତାହଂ, ହିମଗବ୍ଭମ୍ହି ତିଟ୍ଠତୁ ॥
ଥୂପାରାମେ ପତିଟ୍ଠନ୍ତଂ, ମମ ଦକ୍ଖିଣଅକ୍ଖକଂ ।
କରୋତୁ ନଭମୁଗ୍ଗନ୍ତ୍ୱା, ୟମୟଂ ପାଟିହାରିୟଂ ॥
ଲଙ୍କା ଲଙ୍କାରଭୂତମ୍ହି, ହେମମାଲିକଚେତିୟେ ।
ପତିଟ୍ଠହନ୍ତିୟୋ ଧାତୁ, ଦୋଣମତ୍ତା ପମାଣତୋ ॥
ବୁଦ୍ଧୱେସଧରା ହୁତ୍ୱା, ଉଗ୍ଗନ୍ତ୍ୱା ନଭସିଟ୍ଠିତା ।
ପତିଟ୍ଠଂ ତୁ କରିତ୍ୱାନ, ୟମକଂ ପାଟିହାରିୟଂ ॥
ଅଧିଟ୍ଠାନାନି ପଞ୍ଚେ’ୱ, ଅଧିଟ୍ଠାସି ତଥାଗତୋ ।
ଅକାସି ତସ୍ମା ସା ଧାତୁ, ତଦା ତଂ ପାଟିହାରିୟଂ ॥
ଆକାସା ଓତରିତ୍ୱା ସା, ଅଟ୍ଠାଭୂପସ୍ସ ମୁଦ୍ଧନି ।
ଅତୀୱହଟ୍ଠୋ ତଂ ରାଜା, ପତିଟ୍ଠାପେସି ଚେତିୟେ ॥
ପତିଟ୍ଠିତାୟ ତସ୍ସା ଚ, ଧାତୁୟା ଚେତିୟେ ତଦା ।
ଅହୁ ମହାଭୂମିଚାଲୋ, ଅବ୍ଭୁତୋ ଲୋମହଂସନୋ ॥
ଏୱଂ ଅଚିନ୍ତିୟା ବୁଦ୍ଧା, ବୁଦ୍ଧଧମ୍ମା ଅଚିନ୍ତିୟା ।
ଅଚିନ୍ତିୟେ ପସନ୍ନାନଂ, ୱିପାକୋ ହୋତି ଅଚିନ୍ତିୟୋ ॥
ତଂ ପାଟିହାରିୟଂ ଦିସ୍ୱା, ପସୀଦିଂସୁ ଜନେ ଜନା ।
ମତ୍ତାଭୟୋ ରାଜପୁତ୍ତୋ, କନିଟ୍ଠୋ ରାଜିନୋ ପନ ॥
ମୁନିସ୍ସରେ ପସୀଦିତ୍ୱା, ୟାଚିତ୍ୱାନ ନରିସ୍ସରଂ ।
ପୁରିସାନଂ ସହସ୍ସେନ, ସହ ପବ୍ବଜିସାସନେ ॥
ଚେତାରିଗାମତୋ ଚାପି, ଦ୍ୱାରମଣ୍ଡଲତୋପି ଚ ।
ୱିହୀରବୀଜତୋ ଚାପି, ତଥା ଗଲ୍ଲକପିଟ୍ଠିତୋ ॥
ତଥୋ’ପତିସ୍ସଗାମା ଚ, ପଞ୍ଚ ପଞ୍ଚ ସତାନି ଚ ।
ପବ୍ବଜୁଂ ଦାରକା ହଟ୍ଠା, ଜାତସଦ୍ଧା ତଥାଗତେ ॥
ଏୱଂ ପୁରା ବାହିରା ଚ, ସବ୍ବେ ପବ୍ବଜିତା ତଦା ।
ତିଂସ ଭିକ୍ଖୁସହସ୍ସାନି, ଅହେସୁଂ ଜିନସାସନେ ॥
ଥୂପାରାମେ ଥୂପୱରଂ, ନିଟ୍ଠାପେତ୍ୱା ମହୀପତି ।
ରତନାଦୀହି’ନେକେହି, ସଦା ପୂଜମକାରୟି ॥
ରାଜୋରୋଧା ଖତ୍ତିୟା ଚ, ଅମଚ୍ଚା ନାଗରା ତଥା ।
ସବ୍ବେ ଜନପଦା ଚେୱ, ପୁଜା’କଂସୁ ୱିସୁଂ ୱିସୁଂ ॥
ଥୂପପୁବ୍ବଙ୍ଗମଂ ରାଜା, ୱିହାରଂ ତତ୍ଥ କାରୟି ।
ଥୂପାରାମୋତି ତେନେ’ସ, ୱିହାରୋ ୱିସ୍ସୁତୋ ଅହୁ ॥
ସକଧାତୁସରୀରକେନ ଚେ’ୱଂ,
ପରିନିବ୍ବାନଗତୋପି ଲୋକନାଥୋ ।
ଜନକାୟହିତଂ ସୁଖଞ୍ଚ ସମ୍ମା,
ବହୁଧା’କାସି ଠିତେ ଜିନେ କଥାୱକାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଧାତୁଅଗମନୋ ନାମ
ସତ୍ତରସମୋ ପରିଚ୍ଛେଦୋ ।
ଅଟ୍ଠାରସମ ପରିଚ୍ଛେଦ
ମହାବୋଧିଗ୍ଗହଣୋ
ମହାବୋଧିଞ୍ଚ ଥେରିଞ୍ଚ, ଆଣାପେତୁଂ ମହୀପତି ।
ଥେରେନ ୱୁତ୍ତୱଚନଂ, ସରମାନୋ ସକେ ଘରେ ॥
ଅନ୍ତୋୱସ୍ସେ’କ ଦିୱସଂ, ନିସିନ୍ନୋ ଥେରସନ୍ତିକେ ।
ସହା’ମଚ୍ଚେହି ମନ୍ତେତ୍ୱା, ଭାଗିନେୟ୍ୟଂ ସୟଂ ସକଂ ॥
ଅରିଟ୍ଠନାମକା’ମଚ୍ଚଂ, ତସ୍ମିଂ କମ୍ମେ ନିୟୋଜିତୁଂ ।
ମନ୍ତ୍ୱା ଆମନ୍ତୟିତ୍ୱାନ, ଇଦଂ ୱଚନମବ୍ରୱି ॥
ତା ସକ୍ଖିସ୍ସସି…, ଧମ୍ମାସୋକସ୍ସ ସନ୍ତିକା ।
ମହାବୋଧିଂ ସଙ୍ଘମିତ୍ତଂ, ଥେରିଂ ଆନୟିତୁଂ ଇଧ ॥
ସକ୍ଖିସ୍ସାମି ଅହଂ ଦେୱ, ଆନେତୁଂ ତଂ ଦୁୱେ ତତୋ ।
ଇଧା’ଗତୋ ପବ୍ବଜିତୁଂ, ସଚେ ଲଚ୍ଛାମି ମାନଦ ॥
ଏୱଂ ହୋତୂତି ୱତ୍ୱାନ, ରାଜା ତଂ ତତ୍ଥ ପେସୟି ।
ସୋ ଥେରସ୍ସ ଚ ରଞ୍ଞୋ ଚ, ସାସନଂ ଗୟ୍ହ ୱନ୍ଦିୟ ॥
ଅସ୍ସୟୁଜସୁକ୍କପକ୍ଖେ, ନିକ୍ଖନ୍ତୋ ଦୁତିୟେ’ହନି ।
ସାନୁୟୁତ୍ତୋ ଜମ୍ବୁକୋଲେ, ନାୱମାରୁୟ୍ହ ପଟ୍ଟନେ ॥
ମହୋଦମିଂ କରିତ୍ୱାନ, ଥେରାଧିଟ୍ଠାନୟୋଗତୋ ।
ନିକ୍ଖନ୍ତଦିୱସେୟେୱ, ରମ୍ମଂ ପୁପ୍ଫପୁରଂ ଅଗା ॥
ତଦା ତୁ ଅନୁଲାଦେୱୀ, ପଞ୍ଚକଞ୍ଞାସତେହି ଚ ।
ଅନ୍ତେପୁରିକଇତ୍ଥୀନଂ, ସଦ୍ଧିଂ ପଞ୍ଚସତେହି ଚ ॥
ଦସସୀଲଂ ସମାଦାୟ, କାସାୟ ୱସନା ସୁଚି ।
ପବ୍ବଜ୍ଜାପେକ୍ଖି ନିସେଖା, ପେକ୍ଖନ୍ତି ଥେରିୟା’ଗମଂ ॥
ନଗରସ୍ସେ’କଦେସମ୍ହି, ରମ୍ମେ ଭିକ୍ଖୁନୁପସ୍ସୟେ ।
କାରାପିତେ ନରିନ୍ଦେନ, ୱାସଂ କପ୍ପେସି ସୁବ୍ବତା ॥
ଉପାସିକାହି ତାହେ’ସ, ୱୁତ୍ତୋ ଭିକ୍ଖୁନୁପସ୍ସୟୋ ।
ଉପାସିକା ୱିହାରୋତି, ତେନ ଲଂକାୟ ୱିସ୍ସୁତୋ ॥
ଭାଗିନେୟ୍ୟୋ ମହା’ରିଟ୍ଠୋ, ଧମ୍ମାସୋକସ୍ସ ରାଜିନୋ ।
ଅପ୍ପେତ୍ୱା ରାଜସନ୍ଦେସଂ, ଥେରସନ୍ଦେସ’ମବ୍ରୱି ॥
ଭାତୁଜୟା ସହାୟସ୍ସ, ରଞ୍ଞୋ ତେ ରାଜକୁଞ୍ଜର ।
ଆକଙ୍ଖମାନା ପବ୍ବଜ୍ଜଂ, ନିଚ୍ଚଂ ୱସତି ସଞ୍ଞତା ॥
ସଙ୍ଘମିତ୍ତଂ ଭିକ୍ଖୁନିଂ ତଂ, ପବ୍ବାଜେତୁଂ ୱିସଜ୍ଜୟ ।
ତାୟ ସଦ୍ଧିଂ ମହାବୋଧି-ଦକ୍ଖିଣସାଖମେୱ ଚ ॥
ଥେରିୟା ଚ ତମେୱତ୍ଥଂ, ଅବ୍ରୱି ଥେରଭାସିତଂ ।
ଗନ୍ତ୍ୱା ପିତୁସମୀପଂ ସା, ଥେରୀ ଥେରମତଂ ବ୍ରୱୀ ॥
ଆହ ରାଜା ତୁୱଂ ଅମ୍ମ, ଅପସ୍ସନ୍ତୋ କଥଂ ଅହଂ ।
ସୋକଂ ୱିନୋଦୟିସ୍ସାମି, ପୁତ୍ତନତ୍ତୱିୟୋଗଜଂ ॥
ଆହ ସା ମେ ମହାରାଜ, ଭାତୁନୋ ୱଚନଂ ଗରୁ ।
ପବ୍ବାଜନୀୟା ଚ ବହୂ, ଗନ୍ତବ୍ବଂ ତତ୍ଥ ତେନ ମେ ॥
‘‘ସତ୍ଥଘାତମନାରହା, ମହାବୋଧିମହୀରୁହା ।
କଥନ୍ନୁ ସାଖଂ ଗଣିସ୍ସଂ’’, ଇତି ରାଜା ୱିଚିନ୍ତୟୀ ॥
ଅମଚ୍ଚସ୍ସ ମହାଦେୱ-ନାମକସ୍ସ ମତେନ ସୋ ।
ଭିକ୍ଖୁସଙ୍ଘଂ ନିମନ୍ତେତ୍ୱା, ଭୋଜେତ୍ୱା ପୁଚ୍ଛି ଭୂପତିଂ ॥
ଭନ୍ତେ ଲଂକଂ ମହାବୋଧି, ପେସେତବ୍ବା ନୁ ଖୋ ଇତି ।
ଥେରୋ ମୋଗ୍ଗଲିପୁତ୍ତୋ ସୋ, ପେସେତବ୍ବାତି ଭାସିୟ ॥
କତଂ ମହାଅଧିଟ୍ଠାନ-ପଞ୍ଚକଂ ପଞ୍ଚଚକ୍ଖୁନା ।
ଆଭାସି ରଞ୍ଞୋ ତଂ ସୁତ୍ୱା, ତୁସ୍ସିତ୍ୱା ଧରଣୀପତି ॥
ସତ୍ତୟୋଜନିକଂ ମଗ୍ଗଂ, ସୋ ମହାବୋଧିଗାମିନଂ ।
ସୋଧାପେତ୍ୱାନ ସକ୍କଚ୍ଚଂ, ଭୂସାପେତି ଅନେକଧା ॥
ସୁୱଣ୍ଣଂ ନୀହରାପେସି, କଟାହକରଣାୟ ଚ ।
ୱିସ୍ସକମ୍ମୋ ଚ ଆଗନ୍ତ୍ୱା, ସତୁଲାଧାରରୂପୱା ॥
‘‘କଟାହଂ କିଂ ପମାଣଂ ନୁ, କରୋମୀ’ତି ଅପୁଚ୍ଛିତଂ ।
‘‘ଞତ୍ୱା ପମାଣଂ ତ୍ୱଂୟେୱ, କରୋହି’’ ଇତି ଭାସିୟ ॥
ସୁୱଣ୍ଣା ଗହେତ୍ୱାନ, ହତ୍ଥେନ ପରିମଜ୍ଜିୟ ।
କଟାହଂ ତଙ୍ଖଣଂୟେୱ, ନିମ୍ମିନିତ୍ୱାନ ପକ୍କମି ॥
ନୱହତ୍ଥପରିକ୍ଖେପଂ, ପଞ୍ଚହତ୍ଥଂ ଗଭୀରତୋ ।
ତିହତ୍ଥୱିକ୍ଖମ୍ଭୟୁତଂ, ଅଟ୍ଠଙ୍ଗୁଲଘନଂ ସୁଭଂ ॥
ୟୁୱସ୍ସ ହତ୍ଥିନୋ ସୋଣ୍ଡ-ପମାଣମୁଖୱଟ୍ଟିକଂ ।
ଗାହା ପେତ୍ୱାନ ତଂ ରାଜା, ବାଲସୁରସମପ୍ପକଂ ॥
ସତ୍ତୟୋଜନଦୀଘାୟ, ୱିତ୍ଥତାୟତି ୟୋଜନଂ ।
ସେନାୟ ଚତୁରଙ୍ଗିନ୍ୟା, ମହାଭିକ୍ଖୁଗଣେନ ଚ ॥
ଉପଗମ୍ମ ମହାବୋଧିଂ, ନାନାଲଙ୍କାରଭୂସିତଂ ।
ନାନାରତନଚିତ୍ତଂ ତଂ, ୱିୱିଧଦ୍ଧଜମାଲିନିଂ ॥
ନାନାକୁସୁମସଂକିଣ୍ଣଂ, ନାନାତୁରିୟଘୋସିତଂ ।
ସେନାୟ ପରିୱାରେତ୍ୱା, ପରିକ୍ଖିପିୟ ସାଣିୟା ॥
ମହାଥେରସହସ୍ସେନ, ପମୁଖେନ ମହାଗଣେ ।
ରଞ୍ଞଂ ପତ୍ତାଭିସେକାନଂ, ସହସ୍ସେନା’ଧିକେନ ଚ ॥
ଅତ୍ତାନଂ ପରିୱାରେତ୍ୱା, ମହାବୋଧିଞ୍ଚ ସାଧୁକଂ ।
ଓଲୋକେସି ମହାବୋଧିଂ, ପଗ୍ଗହେତ୍ୱାନ ଅଞ୍ଜଲିଂ ॥
ତସ୍ସା ଦକ୍ଖିଣସାଖାୟ, ଚତୁହତ୍ଥପମାଣକଂ ।
ଠାନଂ ଖନ୍ଧଞ୍ଚ ୱଜ୍ଜେତ୍ୱା, ସାଖା ଅନ୍ତରଧାୟିସୁଂ ॥
ତଂ ପାଟିହାରିୟଂ ଦିସ୍ୱା, ପତୀତୋ ପୁଥୱୀପତି ।
‘‘ପୂଜେମ’ହଂ ମହାବୋଧିଂ, ରଜ୍ଜେନା’ହି ଉଦୀରିୟ ॥
ଅଭିସିଞ୍ଚି ମହାବୋଧୀଂ, ମହାରଜ୍ଜେ ମହୀପତି ।
ପୁପ୍ଫାଦୀହି ମହାବୋଧିଂ, ପୂଜେତ୍ୱାନ ପଦକ୍ଖିଣଂ ॥
କତ୍ୱା ଅଟ୍ଠସୁ ଠାନେସୁ, ୱନ୍ଦିତ୍ୱାନ କତଞ୍ଜଲୀ ।
ସୁୱଣ୍ଣଖଚିତେ ପୀଠେ, ନାନାରତନମଣ୍ଡିତେ ॥
ସ୍ୱାରୋହେ ୟାୱ ସାଉଚ୍ଚେ, ତଂ ସୁୱଣ୍ଣକଟାହକଂ ।
ଠପାପେତ୍ୱାନ ଆରୁୟ୍ହ, ଗହେତୁଂ ସାଖମୁତ୍ତମଂ ॥
ଆଦିୟିତ୍ୱାନ ସୋୱଣ୍ଣ ତୁଲିକାୟ ମନୋସିଲଂ ।
ଲେଖଂ ଦତ୍ୱାନ ସାଖାୟ, ସଚ୍ଚକ୍ରିୟମକା ଇତି ॥
‘‘ଲଂକାଦୀପଂ ୟଦି ଇତୋ, ଗନ୍ତବ୍ବଂ ଉରୁବୋଧିୟା ।
ନିବ୍ବେମତିକୋ ବୁଦ୍ଧସ୍ସ, ସାସନମ୍ହି ସଚେ ଅହଂ ॥
ସୟଂୟେୱ ମହାବୋଧି-ସାଖାୟଂ ଦକ୍ଖିଣା ସୁଭା ।
ଛିଜ୍ଜିତ୍ୱାନ ପତିଟ୍ଠାତୁ, ଇଧ ହେମକଟାହକେ ॥
ଲେଖଠାନେ ମହାବୋଧି, ଛିଜ୍ଜିତ୍ୱା ସୟମେୱ ସା ।
ଗନ୍ଧକଦ୍ଦମପୂରସ୍ସ, କଟାହସ୍ସୋ’ପରିଟ୍ଠିତା ॥
ମୂଲଲେଖାୟ ଉପରି, ତିୟଙ୍ଗୁଲତିୟଙ୍ଗୁଲେ ।
ଦଦଂ ମନୋସିଲା ଲେଖା, ପରିକ୍ଖିପି ନରିସ୍ସରୋ ॥
ଆଦିୟା ଥୂଲମୂଲାନି, ଖୁଦ୍ଦକାନି’ତରାହି ତୁ ।
ନିକ୍ଖମିତ୍ୱା ଦସ ଦସ, ଜାଲୀଭୂତା ନିଓତରୁଂ ॥
ତଂ ପାଟିହାରିୟଂ ଦିସ୍ୱା, ରାଜା’ତୀୱ ପମୋଦିତୋ ।
ତତ୍ଥେୱା’କାସି ଉକ୍କୁଟ୍ଠିଂ, ସମନ୍ତା ପରିସାପି ଚ ॥
ଭିକ୍ଖୁସଙ୍ଘୋ ସାଧୁକାରଂ, ତୁଟ୍ଠଚିତ୍ତୋ ପମୋଦୟି ।
ଚେଲୁକ୍ଖେପସହସ୍ସାନି, ପୱତ୍ତିଂସୁ ସମନ୍ତତୋ ॥
ଏୱଂ ସତେନ ମୂଲାନଂ, ତତ୍ଥ ସା ଗନ୍ଧକଦ୍ଦମେ ।
ପତିଟ୍ଠାସି ମହାବୋଧି, ପସାଦେନ୍ତୀ ମହାଜନଂ ॥
ତସ୍ସା ଖନ୍ଧୋ ଦସହତ୍ଥୋ, ପଞ୍ଚସାଖା ମନୋରମା ।
ଚତୁହତ୍ଥା ଚତୁହତ୍ଥା, ଦସଡ୍ଢଫଲମଣ୍ଡିତା ॥
ସହସ୍ସନ୍ତୁ ପସାଖାନଂ, ସାଖାନଂ ତାସମାସି ଚ ।
ଏୱଂ ଆସି ମହାବୋଧି, ମନୋହରସିରିଧରା ॥
କଟାହମ୍ହି ମହାବୋଧି-ପତିଟ୍ଠିତକ୍ଖଣେ ମହୀ ।
ଅକମ୍ପି ପାଟିହୀରାନି, ଅହେସୁଂ ୱିୱିଧାନି ଚ ॥
ସୟଂ ନାଦେହି ତୂରିୟାନଂ, ଦେୱେସୁ ମାନୁସେସୁ ଚ ।
ସାଧୁକାରନିନାଦେତି, ଦେୱବ୍ରହ୍ମଗଣସ୍ସ ଚ ॥
ମେଘାନଂ ମିଗପକ୍ଖିନଂ, ୟକ୍ଖାଦୀନଂ ରୱେହି ଚ ।
ରୱେହିଚମହୀକମ୍ପେ, ଏକକୋଲାହଲଂ ଅହୁ ॥
ବୋଧିୟା ଫଲପତ୍ତେହି, ଛବ୍ବଣ୍ଣରସ୍ମିୟୋ ସୁଭା ।
ନିକ୍ଖମିତ୍ୱା ଚକ୍କୱାଳଂ, ସକଲା ସୋଭୟିଂସୁ ଚ ॥
ସକଟାହା ମହାବୋଧି, ଉଗ୍ଗନ୍ତ୍ୱାନ ତତୋ ନଭଂ ।
ଅଟ୍ଠାସି ହିମଗବ୍ଭମ୍ହି, ସତ୍ତାହାନି ଅଦସ୍ସନା ॥
ରାଜା ଓରୁୟ୍ହ ପୀଠମ୍ହା, ତଂ ସତ୍ତାହଂ ତହିଂ ୱସଂ ।
ନିଚ୍ଚଂ ମହାବୋଧିପୂଜଂ, ଅକାସି ଚ ଅନେକଧା ॥
ଅତୀତେ ତମ୍ହି ସତ୍ତାହେ, ସବ୍ବେ ହିମୱଲାୱକା ।
ପୱିସିଂସୁ ମହାବୋଧିଂ, ସବ୍ବାକା ରଂସିୟୋପି ଚ ॥
ସୁଦ୍ଧେନକଦିସିସ୍ସିତ୍ଥ, ସାକଟାହେ ପତ୍ତିଟ୍ଠିତା ।
ମହାଜନସ୍ସ ସବ୍ବସ୍ସ, ମହାବୋଧି ମନୋରମା ॥
ପୱତ୍ତମ୍ହି ମହାବୋଧି, ୱିୱିଧେ ପାଟିହାରିୟେ ।
ୱିମ୍ହାପୟନ୍ତି ଜନତଂ, ପଥୱୀତଲମୋରୁହି ॥
ପାଟିହିରେହି’ନେକେହି, ତେହି ସୋ ପୀଣିତୋ ପୁନ ।
ମହାରାଜା ମହାବୋଧିଂ, ମହାରଜ୍ଜେନ ପୂଜୟି ॥
ମହାବୋଧିଂ ମହାରଜ୍ଜେ-ନାଭିସିଞ୍ଚିୟ ପୂଜୟଂ ।
ନାନାପୂଜାହି ସତ୍ତାହଂ, ପୁନ ତତ୍ଥେୱ ସୋ ୱସି ॥
ଅସ୍ସୟୁଜସୁକ୍କପକ୍ଖେ, ପନ୍ନରସଉପୋସଥେ ।
ଅଗ୍ଗହେସି ମହାବୋଧିଂ, ଦ୍ୱିସତ୍ତାହମଚ୍ଚୟେ ତତୋ ॥
ଅସ୍ସୟୁଜକାଳପକ୍ଖେ, ଚତୁଦ୍ଦସଉପୋସଥେ ।
ରଥେ ସୁଭେ ଠପେତ୍ୱାନ, ମହାବୋଧିଂ ରଥେସଭୋ ॥
ପୂଜେନ୍ତୋ ତଂ ଦିନଂୟେୱ, ଉପନେତ୍ୱା ସକଂ ପୁରଂ ।
ଅଲଙ୍କରିତ୍ୱା ବହୁଧା, କାରେତ୍ୱା ମଣ୍ଡପଂ ସୁଭଂ ॥
କତ୍ତିକସୁକ୍କପକ୍ଖସ୍ସ, ଦିନେ ପାଟିପଦେ ତହିଂ ।
ମହାବୋଧିଂ ମହାସାଲ-ମୂଲେ ପାଚିନତେ ସୁଭେ ॥
ଠପାପେତ୍ୱାନ କାରେସି, ପୂଜା’ନେକା ଦିନେ ଦିନେ ।
ଗାହତୋ ସତ୍ତରସମେ, ୱିୱସେ ତୁ ନୱଙ୍କିରା ॥
ସକିଂ ୟେୱଅଜାୟିଂସୁ, ତସ୍ସା’ନେକନରାଧିପୋ ।
ତୁଟ୍ଠଚିତ୍ତୋ ମହାବୋଧିଂ, ପୁନ ରଜ୍ଜେନ ପୂଜୟି ॥
ମହାରଜ୍ଜେ’ଭି ସିଞ୍ଚିତ୍ୱା, ମହାବୋଧିଂ ମହିସ୍ସରୋ ।
କାରେସି ଚ ମହାବୋଧି-ପୂଜା ନାନପ୍ପକାରକଂ ॥
ଇତି କୁସୁମପୁରେ ସରେସରଂସା,
ବହୁୱିଧଚାରୁଧଜାକୁଲାୱିସାଲା ।
ସୁରୁଚିରପୱରୋରୁ ବୋଧିପୂଜା,
ମରୁନରଚିତ୍ତୱିକାସିନୀ ଅହୋସୀତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ମହାବୋଧିଗ୍ଗହଣୋ ନାମ
ଅଟ୍ଠାରସମୋ ପରିଚ୍ଛେଦୋ ।
ଏକୂନୱୀସତିମ ପରିଚ୍ଛେଦ
ବୋଧି ଆଗମନୋ
ମହାବୋଧିରକ୍ଖଣତ୍ଥଂ, ଅଟ୍ଠାରସ ରଥେ ସଭୋ ।
ଦେୱକୁଲାନି ଦତ୍ୱାନ, ଅଟ୍ଠାମଚ୍ଚା କୁଲାନି ଚ ॥
ଅଟ୍ଠ ବ୍ରାହ୍ମଣକୁଲାନି, ଅଟ୍ଠ ୱସ୍ସକୁଲାନି ଚ ।
ଗୋପକାନଂ ତରଚ୍ଛାନଂ, କୁଲିଙ୍ଗାନଂ କୁଲାନି ଚ ॥
ତଥେୱ ପେସକାରାନଂ, କୁମ୍ଭକାରାନମେୱ ଚ ।
ସବ୍ବେ ସଞ୍ଚାପି ସେନୀନଂ, ନାଗୟକ୍ଖାନମେୱ ଚ ॥
ହେମସଜ୍ଜୁଘଟେଚେୱ, ଦତ୍ୱା ଅଟ୍ଠଟ୍ଠ ମାନଦୋ ।
ଆରୋପେତ୍ୱା ମହାବୋଧିଂ, ନାୱଂ ଗଙ୍ଗାୟ ଭୂସିତଂ ॥
ସଙ୍ଘମିତ୍ତ ମହାଥେରୀ, ସହେ କଦସ ଭିକ୍ଖୁନିଂ ।
ତଥେୱା’ରୋପୟିତ୍ୱାନ, ଅରିଟ୍ଠପମୁଖେପି ଚ ॥
ନଗରା ନିକ୍ଖମିତ୍ୱାନ, ୱିଞ୍ଜାଟୱିମତିଚ୍ଚସୋ ।
ତାମଲିତ୍ଥିଂ ଅନୁପ୍ପତ୍ତୋ, ସତ୍ତାହେନେ’ୱ ଭୂପତି ॥
ଅଚ୍ଚୁଳା ରାହି ପୂଜାୟି, ଦେୱାନାଗାନରାପି ଚ ।
ମହାବୋଧିଂ ପୂଜୟନ୍ତା, ସତ୍ତାହେନ’ୱୁପାଗମୁଂ ॥
ମହାସମୁଦ୍ଦତୀରମ୍ହି, ମହାବୋଧିଂ ମହୀପତି ।
ଠପାପେତ୍ୱାନ ପୂଜେସି, ମହାରଜ୍ଜେନ ସୋ ପୁନ ॥
ମହାବୋଧିଂ ମହାରଜ୍ଜେ, ଅଭିସିଞ୍ଚୀୟକାମଦୋ ।
ଅଗ୍ଗସିର ସୁକ୍କପକ୍ଖେ, ଦିନେ ପାଟିପଦେ ତତୋ ॥
ଉଚ୍ଚାରେତୁଂ ମହାବୋଧିଂ, ତେହିୟେୱ’ଟ୍ଠ ଅଟ୍ଠହି ।
ସାଲମୂଲମ୍ହି ଦିନ୍ନେହି, ଧାତୁଗ୍ଗତକୁଲେହି ସୋ ॥
ଉକ୍ଖିପିତ୍ୱା ମହାବୋଧିଂ, ଗଲମତ୍ତଂ ଜଲଂ ତହିଂ ।
ଓଗାହେତ୍ୱା ସନାୱାୟ, ପତିଟ୍ଠାପୟି ସାଧୁକଂ ॥
ନାୱଂ ଆରୋପୟିତ୍ୱା ତଂ, ମହାଥେରିଂ ସଥେରିକଂ ।
ମହାରିଟ୍ଠଂ ମହାମଚ୍ଚଂ, ଇଦଂ ୱଚନମବ୍ରୱି ॥
‘‘ଅହଂ ରଜ୍ଜେନ ତିକ୍ଖତ୍ତୁଂ, ମହାବୋଧିମପୂଜୟିଂ ।
ଏୱ ମେୱା’ଭି ପୂଜେତୁ, ରାଜା ରଜ୍ଜେନ ମେ ସଖା’’ ॥
ଇଦଂ ୱତ୍ୱା ମହାରାଜା, ତୀରେ ପଞ୍ଜଲିକୋ ଠିତୋ ।
ଗଚ୍ଛମାନଂ ମହାବୋଧିଂ, ପସ୍ସଂ ଅସ୍ସୂନିୱତ୍ତୟି ॥
ମହାବୋଧି ୱିୟୋଗେନ,
ଧମ୍ମା ସୋକୋ ସସୋକୱା ।
କନ୍ନିତ୍ୱା ପରିଦେୱିତ୍ୱା,
ଅଗମାସି ସକଂ ପୁରଂ ॥
ମହାବୋଧି ସମାରୁଳ୍ହା, ନାୱାପକ୍ଖନ୍ଧୀ ତୋୟଧିଂ ।
ସମନ୍ତା ୟୋଜନେ ୱିଚୀ, ସନ୍ନିସୀଦି ମହଣ୍ଣୱେ ॥
ପୁପ୍ଫିଂସୁ ପଞ୍ଚୱଣ୍ଣାନି, ପଦୁମାନି ସମନ୍ତତୋ ।
ଅନ୍ତଲିକ୍ଖେ ପୱଜ୍ଜିଂସୁ, ଅନେକ ତୂରିୟାନି ଚ ॥
ଦେୱତାହି ଅନେକାହି, ପୂଜା’ନେକା ପୱତ୍ତିତା ।
ଗହେତୁଞ୍ଚ ମହାବୋଧି, ନାଗା’କାସୁଂ ୱିକୁବ୍ବନଂ ॥
ସଙ୍ଘମିତ୍ତା ମହାଥେରି, ଅଭିଞ୍ଞାବଲପାରଗା ।
ସୁପଣ୍ଣରୂପା ହୁତ୍ୱାନ, ତେ ତାସେସି ମହୋରଗେ ॥
ତେ ତାସିତା ମହାଥେରିଂ, ୟାଚିତ୍ୱାନ ମହୋରଗା ।
ନୟିତ୍ୱାନ ମହାବେମଧିଂ, ଭୁଜଙ୍ଗଭୱନଂ ତତୋ ॥
ସତ୍ତାହଂ ନାଗରଜ୍ଜେନ, ପୂଜାହି ୱିୱିଧାହି ଚ ।
ପୂଜୟିତ୍ୱାନ ଆନେତ୍ୱା, ନାୱାୟଂ ଠପୟିଂସୁ ତେ ॥
ତଦହେୱ ମହାବୋଧି, ଜମ୍ବୁକୋଲମିଧଗମା ।
ଦେୱାନଂପିୟତିସ୍ସୋ ତୁ, ରାଜା ଲୋକହିତେ ରତୋ ॥
ସୁମନା ସାମଣେରମ୍ହା, ପୁବ୍ବେ ସୁତତଦାଗମୋ ।
ମଗ୍ଗସିରାଦିଦିନଘୋ, ପଭୁତି ୱଚସାଦରୋ ॥
ଉତ୍ତରଦ୍ୱାରତୋ ୟାୱ, ଜମ୍ବୁକୋଲଂ ମହାପଥଂ ।
ୱିଭୂସୟିତ୍ୱା ସକଲଂ, ମହାବୋଧିଗତାସୟୋ ॥
ସମୁଦ୍ଦାସନସାଲାୟ, ଠାନେ ଠତ୍ୱା ମହଣ୍ଣୱେ ।
ଆଗଚ୍ଛନ୍ତଂ ମହାବୋଧିଂ, ମହାଥେରିଦ୍ଧିୟା’ଦ୍ଦସ ॥
ତସ୍ମିଂଠାନେ କତା ସାଲା, ପକା ସେତୁଂ ତମବ୍ଭୁତଂ ।
ସମୁଦ୍ଦାସନସାଲାତି, ନାମେନା‘ସି’ଧ ପାକଟା ॥
ମହାଥେରାନୁଭାୱେନ, ସଦ୍ଧିଂ ଥେରେହି ତେହି ଚ ।
ତଦହେୱ’ଗମା ରାଜା, ଜମ୍ବୁକୋଲଂ ସ ସେନକୋ ॥
ମହାବୋଧା ଗମେପୀତି-ୱେଗେନୁ’ନ୍ନୋ ଉଦାନୟଂ ।
ଗଲପ୍ପମାଣଂ ସଲିଲଂ, ୱିଗାହେତ୍ୱା ସୁୱିଗ୍ଗହୋ ॥
ମହାବୋଧିଂ ସୋଳସହି, କୁଲେହି ସହ ମୁଦ୍ଧନା ।
ଆଦାୟୋ’ରୋପୟିତ୍ୱାନ, ୱେଲାୟଂ ମଣ୍ଡପେ ସୁଭେ ॥
ଠପୟିତ୍ୱାନ ଲଂକିନ୍ଦୋ, ଲଂକାରଜ୍ଜେନ ପୂଜୟି ।
ସୋଳସନ୍ନଂ ସମପ୍ପେତ୍ୱା, କୁଲାନଂ ରଜ୍ଜମତ୍ତନୋ ॥
ସୟଂ ଦୋୱାରିକଠାନେ, ଠତ୍ୱାନ ଦିୱସେ ତୟୋ ।
ତତ୍ଥେୱ ପୂଜଂ କାରେସି, ୱିୱିଧଂ ମନୁଜାଧିପୋ ॥
ମହାବୋଧିଂ ଦସମିୟଂ, ଆରୋପେତ୍ୱା ରଥେସୁଭେ ।
ଆନୟନ୍ତୋ ମନୁସ୍ସିନ୍ଦୋ, ଦୁମିନ୍ଦଂ ତଂ ଠପାପୟି ॥
ପାଚିନସ୍ସ ୱିହାରସ୍ସ, ଠାନେ ଠାନୱିଚକ୍ଖଣୋ ।
ପାତରାସଂ ପୱତ୍ତେସି, ସସଙ୍ଘସ୍ସ ଜନସ୍ସ ସୋ ॥
ମହାମହିନ୍ଦଥେରେ’ତ୍ଥ, କତଂ ଦସବଲେନ ତଂ ।
କଥେସି ନାଗଦମନଂ, ରଞ୍ଞୋ ତସ୍ସ ଅସେସତୋ ॥
ଥେରସ୍ସ ସୁତ୍ୱା କାରେତ୍ୱା, ସଞ୍ଞାଣାନି ତହିଂ ତହିଂ ।
ପରିଭୁତ୍ତେସୁ ଠାନେସୁ, ନିସଜ୍ଜାଦୀହି ସତ୍ଥୁନା ॥
ତିୱକ୍କସ୍ସ ବ୍ରାହ୍ମଣସ୍ସ, ଗାମଦ୍ୱାରେ ଚ ଭୂପତି ।
ଠପାପେତ୍ୱା ମହାବୋଧିଂ, ଠାନେସୁ ତେସୁ ତେସୁ ଚ ॥
ସୁଦ୍ଧୱାଲୁକ ସନ୍ଥାରେ, ନାନାପୁପ୍ଫସମାକୁଲେ ।
ପଗ୍ଗହିତଧଜେ ମଗ୍ଗେ, ପୁପ୍ଫଗ୍ଘିକୱିଭୂସିତେ ॥
ମହାବୋଧିଂ ପୂଜୟନ୍ତୋ, ରତ୍ତିନ୍ଦିୱ ମତନ୍ଦିତୋ ।
ଆନୟିତ୍ୱା ଚୁଦ୍ଦସିୟଂ, ଅନୁରାଧ ପୁରନ୍ତିକଂ ॥
ୱଡ୍ଢମାନକଚ୍ଛାୟାୟ, ପୁରଂ ସାଧୁ ୱିଭୂସିତଂ ।
ଉତ୍ତରେନ ଚ ଦ୍ୱାରେନ, ପୂଜୟନ୍ତୋ ପୱେସିୟ ॥
ଦକ୍ଖିଣେନ ଚ ଦ୍ୱାରେନ, ନିକ୍ଖମିତ୍ୱା ପୱେସିୟ ।
ମହା ମେଘୱନାରାମଂ, ଚତୁବୁଦ୍ଧନିସେୱିତଂ ॥
ସୁମନସ୍ସେୱ ୱଚସା, ପଦେସଂ ସାଧୁସଙ୍ଖତଂ ।
ପୁବ୍ବବୋଧିଠିତଟ୍ଠାନଂ, ଉପନେତ୍ୱା ମନୋରମଂ ॥
କୁଲେହି ସୋ ସୋଳସହି, ରାଜା ଲଙ୍କାରଧାରିହି ।
ଓରୋପେତ୍ୱା ମହାବୋଧିଂ, ପତିଟ୍ଠା ପେତୁ ମୋସ୍ସଜ୍ଜି ॥
ହତ୍ଥତୋ ମୁତ୍ତମତ୍ତସା, ଅସୀତିରତନଂ ନଭଂ ।
ଉଗ୍ଗନ୍ତ୍ୱାନ ଠିତା ମୁଞ୍ଚି, ଛବ୍ବଣ୍ଣା ରସ୍ମିୟୋ ସୁଭା ॥
ଦୀପେ ପତ୍ଥରିୟା’ହଚ୍ଚ, ବ୍ରହ୍ମଲୋକଂ ଠିତା ଅହୁ ।
ସୂରିୟତ୍ଥଙ୍ଗମନାୟାୱ, ରସ୍ମିୟୋ ତା ମନୋରମା ॥
ପୁରିସା ଦସସହସ୍ସାନି, ପସନ୍ନା ପାଟିହାରିୟେ ।
ୱିପସ୍ସିତ୍ୱାନା’ରହତ୍ଥଂ, ପତ୍ୱାନ ଇଧ ପବ୍ବଜୁଂ ॥
ଓରୋହିତ୍ୱା ମହାବୋଧି, ସୂରିୟତ୍ଥଙ୍ଗମେ ତତୋ ।
ରୋହିଣିୟା ପତିଟ୍ଠାସି, ମହିୟଂ କମ୍ପି ମେଦିନୀ ॥
ମୂଲାନି ତାନି ଉଗ୍ଗନ୍ତ୍ୱା, କଟାହମୁଖୱଟ୍ଟିତୋ ।
ୱିନନ୍ଧନ୍ତା କଟାହଂ ତଂ, ଓତରିଂସୁ ମହୀତଲଂ ॥
ପତିଟ୍ଠିତଂ ମହାବୋଧିଂ, ଜନା ସବ୍ବେ ସମଗତା ।
ଗନ୍ଧମାଲାଦି ପୂଜାହି, ପୂଜୟିଂସୁ ସମନ୍ତତୋ ॥
ମହାମେଘୋ ପୱସ୍ସିତ୍ଥ, ହିମଗବ୍ଭା ସମନ୍ତତୋ ।
ମହାବୋଧିଂ ଛାଦୟିଂସୁ, ସୀତଲାନି ଘନାନି ଚ ॥
ସତ୍ତାହାନି ମହାବୋଧିଂ, ତହିଂୟେୱ ଅଦସ୍ସନା ।
ହିମଗବ୍ଭେ ସନ୍ନିସୀଦି, ପସାଦଜନନୀ ଜନେ ॥
ସତ୍ତାହା ତିକ୍କମେ ମେଘା, ସବ୍ବେ ଅପଗମିଂସୁ ତେ ।
ମହାବୋଧି ଚ ଦିସ୍ସିତ୍ଥ, ଛବ୍ବଣ୍ଣା ରଂସିୟୋପି ଚ ॥
ମହାମହିନ୍ଦତ୍ଥେରୋଚ, ସଙ୍ଘମିତ୍ତା ଚ ଭିକ୍ଖୁନୀ ।
ତତ୍ଥା’ଗଞ୍ଛୁଂସପରିସା, ରାଜା ସପରିସୋପି ଚ ॥
ଖତ୍ତିୟା କାଜରଗ୍ଗାମେ, ଚନ୍ଦନଗ୍ଗାମ ଖତ୍ତିୟା ।
ତିୱକ୍କ ବ୍ରାହ୍ମଣୋ ଚେୱ, ଦୀପୱାସୀ ଜନାପି ଚ ॥
ଦେୱାନୁଭାୱେନା’ଗଞ୍ଛୁଂ, ମହାବୋଧି ମହୁସ୍ସୁକ୍କା ।
ମହାସମାଗମେ ତସ୍ମିଂ, ପାଟିହାରିୟୱିମ୍ହିତେ ॥
ପକ୍କଂ ପାଚିନସାଖାୟ, ପେକ୍ଖତଂ ପକ୍କ’ମକ୍ଖତଂ ।
ଥେରୋ ପତନ୍ତମାଦାୟ, ରୋପେତୁଂ ରାଜିନୋ ଅଦା ॥
ପଂସୂନଂ ଗନ୍ଧମିସ୍ସାନଂ, ପୁଣ୍ଣେ ସୋଣ୍ଣ କଟାହକେ ।
ମହାସନସ୍ସ ଠାନେ ତଂ, ଠପିତଂ ରୋପ’ୟିସ୍ସରୋ ॥
ପେକ୍ଖତଂୟେୱ ସବ୍ବେସଂ, ଉଗ୍ଗନ୍ତ୍ୱା ଅଟ୍ଠ ଅଙ୍କୁରା ।
ଜାୟିଂସୁ ବୋଧିତରୁଣା, ଅଟ୍ଠଂସୁ ଚତୁହତ୍ଥକା ॥
ରାଜା ତେ ବୋଧିତରୁଣେ, ଦିସ୍ୱା ୱିମ୍ହିତମାନସୋ ।
ସେତଚ୍ଛତ୍ତେନ ପୂଜେସି, ଅଭିସେକମଦାସି ଚ ॥
ପତିଟ୍ଠାପେସି ଅଟ୍ଠନ୍ନଂ, ଜମ୍ବୁକୋଲମ୍ହି ପଟ୍ଟନେ ।
ମହାବୋଧି ଠିତ ଠାନେ, ନାୱାୟୋ ରୋହନେ ତଦା ॥
ତିୱକ୍କବ୍ରାହ୍ମଣଗାମେ, ଥୂପାରାମେ ତଥେୱ ଚ ।
ଇସ୍ସରସମଣାରାମେ, ପଠମେ ଚେତିୟଙ୍ଗଣେ ॥
ଚେତିୟ ପବ୍ବତା ରାମେ, ତଥା କାଜରଗାମକେ ।
ଚନ୍ଦନଗାମକେ ଚାତି, ଏକେକଂ ବୋଧିଲଟ୍ଠିକଂ ॥
ସେସା ଚତୁପକ୍କଜାତା, ଦ୍ୱତ୍ତିଂସ ବୋଧିଲଟ୍ଠିୟୋ ।
ସମନ୍ତା ୟୋଜନଠାନେ, ୱିହାରେସୁ ତହିଂ ତହିଂ ॥
ଦୀପାୱାସୀ ଜନସ୍ସେୱ, ହିତତ୍ଥାୟ ପତିଟ୍ଠିତେ ।
ମହାବୋଧି ଦୁମିନ୍ଦମ୍ହି, ସମ୍ମାସମ୍ବୁଦ୍ଧ ତେଜସା ॥
ଅନୁଲାସାସ ପରିସା, ସଙ୍ଘମିତ୍ତାୟ ଥେରିୟା ।
ସନ୍ତିକେ ପବ୍ବଜିତ୍ୱାନ, ଅରହତ୍ତମପାପୁଣି ॥
ଅରିଟ୍ଠୋ ସୋ ପଞ୍ଚସତ-ପରିୱାରୋ ଚ ଖତ୍ତିୟୋ ।
ଥେରନ୍ତିକେ ପବ୍ବଜିତ୍ୱା, ଅରହତ୍ତମପାପୁଣି ॥
ୟାନି ସେଟ୍ଠିକୁଲାନ’ଟ୍ଠ-ମହାବୋଧିମିଧାହରୁଂ ।
ବୋଧାହରକୁଲାନୀତି, ତାନି ତେନ ପୱୁଚ୍ଚରେ ॥
ଉପାସିକା ୱିହାରୋତି, ଞାତେ ଭିକ୍ଖୁନୁପସ୍ସୟେ ।
ସସଙ୍ଘା ସଙ୍ଘମିତ୍ତା ସା, ମହାଥେରୀ ତହିଂ ୱସି ॥
ଅଗାରତ୍ତୟପାମୋକ୍ଖେ, ଅଗାରେ ତତ୍ଥ କାରୟି ।
ଦ୍ୱାଦସ ତେସୁ ଏକସ୍ମିଂ, ମହାଗାରେ ଠପାପୟି ॥
ମହାବୋଧିସମେତାୟ, ନାୱାୟ କୂପୟଟ୍ଠିକଂ ।
ଏକସ୍ମିଂ ପିୟ ମେକସ୍ମିଂ, ଅରିତ୍ତଂ ତେହି ତେୱିଦୁଂ ॥
ଜାତେ ଅଞ୍ଞନିକାୟେପି, ଅଗାରା ଦ୍ୱାଦସାପି ତେ ।
ହତ୍ଥାଳକ ଭିକ୍ଖୁନୀହି, ୱଳଞ୍ଜୟିଂସୁ ସବ୍ବଦା ॥
ରଞ୍ଞୋ ମଙ୍ଗଲହତ୍ଥି ସୋ, ୱିଚରନ୍ତୋ ୟଥାସୁଖଂ ।
ପୁରସ୍ସ ଏକପସ୍ସମ୍ହି, କନ୍ଦରନ୍ତମ୍ହି ସୀତଲେ ॥
କଦମ୍ବପୁପ୍ଫଗୁମ୍ବନ୍ତେ, ଅଟ୍ଠାସି ଗୋଚରଂ ଚରଂ ।
ହତ୍ଥିଂ ତତ୍ଥରତଂ ଞତ୍ୱା, ଅକଂସୁ ତତ୍ଥ ଆଳ୍ହକଂ ॥
ଅଥେକ ଦିୱସଂ ହତ୍ଥୀ, ନଗଣ୍ହି କବଳାନି ସୋ ।
ଦୀପପ୍ପସାଦକଂ ଥେରଂ, ରାଜା ସୋ ପୁଚ୍ଛିତଂ ମତଂ ॥
କଦମ୍ବପୁପ୍ଫଗୁମ୍ବସ୍ମିଂ, ଥୂପସ୍ସ କରଣଂ କରୀ ।
ଇଚ୍ଛତୀତି ମହାଥେରୋ, ମହାରାଜସ୍ସ ଅବ୍ରୱି ॥
ସଧାତୁକଂ ତତ୍ଥ ଥୂପଂ, ଥୂପସ୍ସ ଘରମେୱ ଚ ।
ଖିପ୍ପଂ ରାଜା ଅକାରେସି, ନିଚ୍ଚଂ ଜନହିତେରତୋ ॥
ସଙ୍ଘମିତ୍ତା ମହାଥେରୀ, ସୁଞ୍ଞାଗାରାଭିଲାସିନୀ ।
ଆକିଣ୍ଣତ୍ତା ୱିହାରସ୍ସ, ୱୁସ୍ସମାନସ୍ସ ତସ୍ସ ସା ॥
ୱୁଦ୍ଧତ୍ଥିନୀ ସାସନସ୍ସ, ଭିକ୍ଖୁନୀନଂ ହିତାୟ ଚ ।
ଭିକ୍ଖୁନୁପସ୍ସୟଂ ଅଞ୍ଞଂ, ଇଚ୍ଛମାନା ୱିଚକ୍ଖଣା ॥
ଗନ୍ତ୍ୱା ଚେତିୟଗେହଂ ତଂ, ପୱିୱେକସୁଖଂ ଭୁସଂ ।
ଦିୱାୱିହାରଂ କପ୍ପେସି, ୱିହାରକୁସଲା’ମଲା ॥
ଥେରିୟା ୱନ୍ଦନତ୍ଥାୟ, ରାଜା ଭିକ୍ଖୁନୁପସ୍ସୟଂ ।
ଗନ୍ତ୍ୱା ତତ୍ଥ ଗତଂ ସୁତ୍ୱା, ଗନ୍ତ୍ୱାନ ତତ୍ଥ ୱନ୍ଦିୟ ॥
ସମ୍ମୋଦିତ୍ୱା ତାୟ ସଦ୍ଧିଂ, ତତ୍ଥାଗମନକାରଣଂ ।
ତସ୍ସା ଞତ୍ୱା ଅଧିପ୍ପାୟଂ, ଅଧିପ୍ପାୟ ୱିଦୂ ୱିଦୂ ॥
ସମନ୍ତା ଥୂପଗେହସ୍ସ, ରମ୍ମଂ ଭିକ୍ଖୁନୁପସ୍ସୟଂ ।
ଦେୱାନଂପିୟତିସ୍ସୋ ସୋ, ମହାରାଜା ଅକାରୟି ॥
ହତ୍ଥାଳ୍ହକସମୀପମ୍ହି, କତୋ ଭିକ୍ଖୁନୁପସ୍ସୟୋ ।
ହତ୍ଥାଳ୍ହକୱିହାରୋତି, ୱିସ୍ସୁତୋ ଆସି ତେନ ସୋ ॥
ସୁମିତ୍ତା ସଙ୍ଘମିତ୍ତା ସା, ମହାଥେରୀ ମହାମତୀ ।
ତସ୍ମିଞ୍ହି ୱାସଂ କପ୍ପେସି, ରମ୍ମେ ଭିକ୍ଖୁନୁପସ୍ସୟେ ॥
ଏୱଂ ଲଂକା ଲୋକହିତଂ ସାସନୱୁଦ୍ଧିଂ ।
ସଂସୋଧେନ୍ତୋ ଏସ ମହାବୋଧି ଦୁମିନ୍ଦୋ ।
ଲଂକାଦୀପେ ରମ୍ମେ ମହାମେଘୱନସ୍ମିଂ,
ଅଟ୍ଠା ସୀଘଂ କାଲମନେକବ୍ଭୂତୟୁତ୍ତୋତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ବୋଧିଆଗମନୋ ନାମ
ଏକୂନୱୀସତିମୋ ପରିଚ୍ଛେଦୋ ।
ୱୀସତିମ ପରିଚ୍ଛେଦ
ଥେରପରିନିବ୍ବାନଂ
ଅଟ୍ଠାରସମ୍ହି ୱସ୍ସମ୍ହି, ଧମ୍ମାସୋକସ୍ସ ରାଜିନୋ ।
ମହାମେଘୱନାରାମେ, ମହାବୋଧି ପତିଟ୍ଠତି ॥
ତତୋ ଦ୍ୱାଦସମେ ୱସ୍ସେ, ମହେସୀ ତସ୍ସ ରାଜିନୋ ।
ପିୟା ଅସନ୍ଧୀମିତ୍ତା ସା, ମତା ସମ୍ବୁଦ୍ଧମାମକା ॥
ତତୋ ଚତୁତ୍ଥେ ୱସ୍ସମ୍ହି, ଧମ୍ମାସୋକୋ ମହୀପତି ।
ତିସ୍ସରକ୍ଖ ମହେସିତ୍ତେ, ଠପେସି ୱିସମାସୟଂ ॥
ତତୋ ତୁ ତତିୟେ ୱସ୍ସେ, ସାବାଲା ରୂପମାନିନୀ ।
‘‘ମୟାପି ଚ ଅୟଂ ରାଜା, ମହାବୋଧିଂ ମ ମାୟତି’’ ॥
ଇତି କୋଧୱସଂ ଗନ୍ତ୍ୱା, ଅତ୍ତନୋ’ନତ୍ଥ କାରିକା ।
ମଣ୍ଡୁକଣ୍ଟକୟୋଗେନ, ମହାବୋଧି ମଘା ତୟି ॥
ତତୋ ଚ ତୁତ୍ଥେୱସ୍ସମ୍ହି, ଧମ୍ମା ସୋକୋ ମହାୟସୋ ।
ଅନିଚ୍ଚ ତାୱ ସଂପତ୍ତୋ, ସତ୍ତତିଂସସମା ଇମେ ॥
ଦେୱାନଂ ପିୟତିସ୍ସୋ ତୁ, ରାଜା ଧମ୍ମଗୁଣେ ରତୋ ।
ମହାୱିହାରେ ନୱକମ୍ମଂ, ତଥା ଚେତିୟପବ୍ବତେ ॥
ଥୂପାରାମେ ନୱକମ୍ମଂ, ନିଟ୍ଠାପେତ୍ୱା ୟଥାରହଂ ।
ଦୀପପ୍ପସାଦକଂ ଥେରଂ, ପୁଚ୍ଛି ପୁଚ୍ଛିତକୋୱିଦଂ ॥
କାରାପେସ୍ସମହଂ ଭନ୍ତେ, ୱିହାରେସୁ ବହୂ ଇଧ ।
ପତିଟ୍ଠାପେତୁଂ ଥୂପେସୁ, କଥଂ ଲଚ୍ଛାମ ଧାତୁୟୋ ॥
ସମ୍ବୁଦ୍ଧପତ୍ତଂ ପୂରେତ୍ୱା, ସୁମନେନା’ହଟା ଇଧ ।
ଚେତିୟପବ୍ବତେ ରାଜ, ଠପିତା ଅତ୍ଥି ଧାତୁୟୋ ॥
ହତ୍ଥିକ୍ଖନ୍ଧେ ଠପେତ୍ୱା ତା, ଧାତୁୟୋ ଇଧ ଆହର ।
ଇତି ୱୁତ୍ତୋ ସଥେରେନ, ତଥା ଆହରି ଧାତୁୟୋ ॥
ୱିହାରେ କାରୟିତ୍ୱାନ, ଠାନେ ୟୋଜନୟୋଜନେ ।
ଧାତୁୟୋ ତତ୍ଥ ଥୂପେସୁ, ନିଧାପେସି ୟଥାରହଂ ॥
ସମ୍ବୁଦ୍ଧଭୁତ୍ତପତ୍ତଂ ତୁ, ରାଜୱତ୍ଥୁଘରେ ସୁଭେ ।
ଠପୟିତ୍ୱାନ ପୂଜେସି, ନାନାପୂଜାହି ସବ୍ବଦା ॥
ପଞ୍ଚସତେହି’ସ୍ସରେତି, ମହାଥେରସ୍ସ ସନ୍ତିକେ ।
ପବ୍ବଜ୍ଜୱସିତଠାନେ, ଇସ୍ସରସମଣକୋ ଅହୁ ॥
ପଞ୍ଚସତେହି ୱସ୍ସେହି, ମହାଥେରସ୍ସ ସନ୍ତିକେ ।
ପବ୍ବଜ୍ଜୱସିତଠାନେ, ତଥା ୱସ୍ସଗିରି ଅହୁ ॥
ୟା ୟା ମହାମହିନ୍ଦେନ, ଥେରେନ ୱସିତା ଗୁହା ।
ସପବ୍ବତୱିହାରେସୁ, ସା ମହିନ୍ଦଗୁହା ଅହୁ ॥
ମହାୱିହାରଂ ପଠମଂ, ଦୁତିୟଂ ଚେତିୟୱ୍ହୟଂ ।
ଥୂପାରାମଂ ତୁ ତତିୟଂ, ଥୂପପୁବ୍ବଙ୍ଗମଂ ସୁଭଂ ॥
ଚତୁତ୍ଥଂ ତୁ ମହାବୋଧି-ପତିଟ୍ଠାପନମେୱ ଚ ।
ଥୂପଠାନୀୟଭୂତସ୍ସ, ପଞ୍ଚମଂ ପନ ସାଧୁକଂ ॥
ମହାଚେତିୟଠାନମ୍ହି, ସିଲାଥୂପସ୍ସ ଚାରୁନୋ ।
ସମ୍ବୁଦ୍ଧଗୀୱାଧାତୁସ୍ସ, ପତିଟ୍ଠାପନମେୱ ଚ ॥
ଇସ୍ସରସମଣଂ ଛଟ୍ଠଂ, ତିସ୍ସୱାପିନ୍ତୁସତ୍ତମଂ ।
ଅଟ୍ଠମଂ ପଠମଂ ଥୂପଂ, ନୱମଂ ୱସ୍ସଗିରିୱ୍ହୟଂ ॥
ଉପାସିକାୱ୍ହୟଂ ରମ୍ମଂ, ତଥା ହତ୍ଥାଳ୍ହକୱ୍ହୟଂ ।
ଭିକ୍ଖୁନୁପସ୍ସକେ ଦ୍ୱେ’ମେ, ଭିକ୍ଖୁନୀ ଫାସୁକାରଣା ॥
ହତ୍ଥାଳ୍ହକେ ଓସରିତ୍ୱା, ଭିକ୍ଖୁନୀନଂ ଉପସ୍ସୟେ ।
ଗନ୍ତ୍ୱାନ ଭିକ୍ଖୁସଙ୍ଘେନ, ଭତ୍ତଗ୍ଗହଣକାରଣା ॥
ହତ୍ତସାଲଂ ସୂପହାରଂ, ମହାପାଳିକନାମକଂ ।
ସବ୍ବୁପକରଣୂପେତଂ, ସମ୍ପତ୍ତପରିଚାରିକଂ ॥
ତଥା ଭିକ୍ଖୁସହସ୍ସସ୍ସ, ସପରିକ୍ଖାରମୁତ୍ତମଂ ।
ପୱାରଣାୟ ଦାନଞ୍ଚ, ଅନୁୱସ୍ସକମେୱ ଚ ॥
ନାଗଦୀପେ ଜମ୍ବୁକୋଲ-ୱିହାରଂ ତ ମ୍ହିପଟ୍ଟନେ ।
ତିସ୍ସମହାୱିହାରଞ୍ଚ, ପାଚୀନାରାମ ମେୱ ଚ ॥
ଇତି ଏତାନି କମ୍ମାନି, ଲଂକାଜନହିତତ୍ଥିକୋ ।
ଦେୱାନଂପିୟତିସ୍ସୋ ସୋ, ଲଂକିନ୍ଦୋ ପୁଞ୍ଞପଞ୍ଞୱା ॥
ପଠମେୟେୱ ୱସ୍ସମ୍ହି, କାରାପେସି ଗୁଣପ୍ପିୟୋ ।
ୟାୱ ଜୀୱନ୍ତୁନେକାନି, ପୁଞ୍ଞକମ୍ମାନି ଆଚିନି ॥
ଅୟଂ ଦୀପୋ ଅହୁ ଠିତୋ, ୱିଜିତେ ତସ୍ସ ରାଜିନୋ ।
ୱସ୍ସାନି ଚତ୍ତାଲୀସଂ ସୋ, ରାଜା ରଜ୍ଜମକାରୟି ॥
ତସ୍ସ’ଚ୍ଚ ୟେ ତଂ କନିଟ୍ଠୋ, ଉତ୍ତିୟୋ ଇତି ୱିସ୍ସୁତୋ ।
ରାଜପୁତ୍ତୋ ଅପୁତ୍ତଂ ତଂ, ରଜ୍ଜଂ କାରେସି ସାଧୁକଂ ॥
ମହାମହିନ୍ଦତ୍ଥେରୋ ତୁ, ଜିନସାସନମୁତ୍ତମଂ ।
ପରିୟତ୍ତିଂ ପଟିପତ୍ତିଂ, ପଟିୱେଧଞ୍ଚ ସାଧୁକଂ ॥
ଲଂକାଦୀପମ୍ହି ଦୀପେତ୍ୱା, ଲଂକାଦୀପୋ ମହାଗଣି ।
ଲଂକାୟସୋ ସତ୍ଥୁ କପ୍ପୋ, କତ୍ୱା ଲଂକାହିତଂ ବହୁଂ ॥
ତସ୍ସ ଉତ୍ତିୟରାଜସ୍ସ, ଜୟୱସ୍ସମ୍ହି ଅଟ୍ଠମେ ।
ଅନ୍ତୋୱସ୍ସଂ ସଟ୍ଠିୱସ୍ସୋ, ଚେତିୟପବ୍ବତେ ୱସଂ ॥
ଅସ୍ସୟୁଜସ୍ସ ମାସସ୍ସ, ସୁକ୍କପକ୍ଖଠମେ ଦିନେ ।
ପରିନିବ୍ବାୟିତେ ନେତଂ, ଦିନଂ ତନ୍ନାମକଂ ଅହୁ ॥
[ନିବ୍ବୁତସ୍ସ ମହିନ୍ଦସ୍ସ, ଅଟ୍ଠମିୟଂ ଦିନେ ପନ,
ତେନ ତଂ ଦିୱସଂ ନାମ, ଅଟ୍ଠମିୟାତି ସମ୍ମତଂ ॥]
ତଂ ସୁତ୍ୱା ଉତ୍ତିୟୋ ରାଜା, ସୋକସଲ୍ଲସମପ୍ପିତୋ ।
ଗନ୍ତ୍ୱାନ ଥେରଂ ୱନ୍ଦିତ୍ୱା କନ୍ଦିତ୍ୱା ବହୁଧା ବହୁଂ ॥
ଆସିତ୍ତଗନ୍ଧତେଲାୟ, ବହୁଂ ସୋୱଣ୍ଣଦୋଣିୟା ।
ଥେରଦେଭଂ ଖିପାପେତ୍ୱା, ତଂ ଦୋଣିଂ ସାଧୁଫୁସ୍ସିତଂ ॥
ସୋୱଣ୍ଣକୂଟାଗାରମ୍ହି, ଠପାପେତ୍ୱା ଅଲଙ୍କତେ ।
କୂଟାଗାରଂ ଗାହୟିତ୍ୱା, କାରେନ୍ତୋ ସାଧୁକୀଳିତଂ ॥
ମହତା ଚ ଜନୋଘେନ, ଆଗତେନତତୋ ତତୋ ।
ମହତା ଚ ବଲୋଘେନ, କାରେନ୍ତୋ ପୂଜନାୱିଧିଂ ॥
ଅଲଙ୍କତେନ ମଗ୍ଗେନ, ବହୁଧା’ଲଙ୍କତଂ ପୁରଂ ।
ଆନୟିତ୍ୱାନ ନଗରେ, ଚାରେତ୍ୱା ରାଜୱୀଥିୟୋ ॥
ମହାୱିହାରଂ ଆନେତ୍ୱା, ଏତ୍ଥ ପଞ୍ହମ୍ବମାଳକେ ।
କୁଟାଗାରଂ ଠପାପେତ୍ୱା, ସତ୍ତାହଂ ସୋ ମହୀପତି ॥
ତୋରଣଦ୍ଧଜପୁପ୍ଫେହି, ଗନ୍ଧପୁଣ୍ଣଘଟେହି ଚ ।
ୱିହାରଞ୍ଚ ସମନ୍ତା ଚ, ମଣ୍ଡିହଂ ୟୋଜନତ୍ତୟଂ ॥
ଅହୁ ରାଜାନୁଭାୱେନ, ଦୀପନ୍ତୁ ସକଲଂ ପନ ।
ଆନୁଭାୱେନ ଦେୱାନଂ, ତଥେୱା’ଲଙ୍କତଂ ଅହୁ ॥
ନାନାପୂଜଂ କାରୟିତ୍ୱା, ସତ୍ତାହଂ ସୋ ମହୀପତି ।
ପୁରତ୍ଥିମଦିସାଭାଗେ, ଥେରାନଂ ବଦ୍ଧମାଳକେ ॥
କାରେତ୍ୱା ଗନ୍ଧଚିତକଂ, ମହାଥୂପଂ ପଦକ୍ଖିଣଂ ।
କରୋନ୍ତୋ ତତ୍ଥ ନେତ୍ୱା ତଂ, କୂଟାଗାରଂ ମନୋରମଂ ॥
ଚିତକମ୍ହି ଠପାପେତ୍ୱା, ସକ୍କାରଂ ଅନ୍ତିମଂ ଅକା ।
ଚେତିୟଞ୍ଚେତ୍ଥ କାରେସି, ଗାହା ପେତ୍ୱାନ ଧାତୁୟୋ ॥
ଉପଡ୍ଢଧାତୁଂ ଗାହେତ୍ୱା, ଚେତିୟେ ପବ୍ବତେପି ଚ ।
ସବ୍ବେସୁ ଚ ୱିହାରେସୁ, ଥୂପେ କାରେସି ଖତ୍ତିୟୋ ॥
ଇସିନୋ ଦେହନିକ୍ଖେପ-କତଠାନଞ୍ହି ତସ୍ସ ତଂ ।
ୱୁଚ୍ଚତେ ବହୁମାନେନ, ଇସିଭୂମଙ୍ଗନଂ ଇତି ॥
ତତୋ ପଭୁତ୍ୟ’ରିୟାନଂ, ସମନ୍ତା ୟୋଜନତ୍ତୟେ ।
ସରୀରଂ ଆହରିତ୍ୱାନ, ତମ୍ହି ଦେସମ୍ହି ଡୟ୍ହତି ॥
ସଙ୍ଘମିତ୍ତା ମହାଥେରୀ, ମହା’ଭିଞ୍ଞା ମହାମତୀ ।
କତ୍ୱା ସାସନକିଚ୍ଚାନି, ତଥା ଲୋକହିତଂ ବହୁଂ ॥
ଏକୂନସଟ୍ଠିୱସ୍ସା ସା, ଉତ୍ତିୟସ୍ସେ’ୱ ରାଜିନୋ ।
ୱସ୍ସମ୍ହି ନୱମେ ଖେମେ, ହତ୍ଥାଳ୍ହକଉପସ୍ସୟେ ॥
ୱସନ୍ତୀ ପରିନିବ୍ବାୟୀ, ରାଜା ତସ୍ସାପି କାରୟି ।
ଥେରସ୍ସ ୱିୟ ସତ୍ତାହଂ, ପୂଜାସକ୍କାର ମୁତ୍ତମଂ ॥
ସବ୍ବା ଅଲଙ୍କତା ଲଂକା, ଥେରସ୍ସ ୱିୟ ଆସି ଚ ।
କୂଟାଗାରଗତଂ ଥେରି-ଦେହଂ ସତ୍ତଦିନଚ୍ଚୟେ ॥
ନିକ୍ଖାମେତ୍ୱାନ ନଗରଂ, ଥୂପରାମ ପୁରତ୍ଥତୋ ।
ଚିତ୍ତସାଲା ସମୀପମ୍ହି, ମହାବୋଧିପ ଦସ୍ସୟେ ॥
ଥେରିୟା ୱୁଟ୍ଠଠାନମ୍ହି, ଅଗ୍ଗିକିଚ୍ଚ ମକାରୟି ।
ଥୂପଞ୍ଚ ତତ୍ଥ କାରେସି, ଉତ୍ତିୟୋ ସୋ ମହୀପତି ॥
ପଞ୍ଚାପି ତେ ମହାଥେରା, ଥେରାରିଟ୍ଠାଦୟୋପି ଚ ।
ତଥା’ନେକ ସହସ୍ସାନି, ଭିକ୍ଖୁ ଖୀଣାସୱାପି ଚ ॥
ସଙ୍ଘମିତ୍ତା ପଭୁତିୟୋ, ତା ଚ ଦ୍ୱାଦସଥେରିୟୋ ।
ଖୀଣାସୱା ଭିକ୍ଖୁନିୟୋ, ସହସ୍ସାନି ବହୂନି ଚ ॥
ବହୁସ୍ସୁତା ମହାପଞ୍ଞା, ୱିନୟାଦିଜାନାଗମଂ ।
ଜୋତୟିତ୍ୱାନ କାଲେନ, ପୟାତା’ନିଚ୍ଚତାୱସଂ ॥
ଦସୱସ୍ସାନି ସୋ ରାଜା, ରଜ୍ଜଂ କାରେସି ଉତ୍ତିୟୋ ।
ଏୱଂ ଅନିଚ୍ଚତା ଏସା, ସବ୍ବଲୋକୱିନାସିନୀ ॥
ତଂ ଏତଂ ଅତିସାହସଂ ଅତିବଲଂ ନ ୱାରିୟଂ ନରୋ ।
ଜାନନ୍ତୋପି ଅନିଚ୍ଚତଂ ଭୱଗତେ ନିବ୍ବିନ୍ଦତେନେୱ ଚ ।
ନିବ୍ବିନ୍ଦୋ ୱିରତିଂ ରତିଂ ନ କୁରୁତେ ପାପେହି ପୁଞ୍ଞେହି ଚ ।
ତସ୍ସେ’ସାଅତିମୋହଜାଲବଲତାଜାନମ୍ପି ସମ୍ମୁୟ୍ହତୀତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଥେରପରିନିବ୍ବାନଂ ନାମ
ୱୀସତିମୋ ପରିଚ୍ଛେଦୋ ।
ଏକୱୀସତିମ ପରିଚ୍ଛେଦ
ୱଞ୍ଚ ରାଜକୋ
ଉତ୍ତିୟସ୍ସ କନିଟ୍ଠୋ ତୁ, ମହାସିୱୋ ତଦଚ୍ଚୟେ ।
ଦସ ୱସ୍ସାନି କାରେସି, ରଜ୍ଜଂ ସୁଜନ ସେୱକୋ ॥
ଭଦ୍ଦସାଲମ୍ହି ସୋ ଥେରେ, ପସୀଦିତ୍ୱା ମନୋରମଂ ।
କାରେସି ପୁରିମାୟନ୍ତୁ, ୱିହାରଂ ନଗରଙ୍ଗଣଂ ॥
ମହାସିୱକନିଟ୍ଠୋ ତୁ, ସୁରତିସ୍ସୋ ତଦଚ୍ଚୟେ ।
ଦସୱସ୍ସାନି କାରେସି, ରଜ୍ଜଂ ପୁଞ୍ଞେସୁ ସାଦରୋ ॥
ଦକ୍ଖିଣାୟ ଦିସାୟଂ ସୋ, ୱିହାରଂ ନଗରଂ ଗଣଂ ।
ପୁରିମାୟ ହତ୍ଥିକ୍ଖନ୍ଧଞ୍ଚ, ଗୋକଣ୍ଣଗିରିମେୱ ଚ ॥
ୱଙ୍ଗୁତ୍ତରେ ପବ୍ବତମ୍ହି, ପାଚିନ ପବ୍ବତୱ୍ହୟଂ ।
ରହେଣକସମୀପମ୍ହି, ତଥା କୋଳମ୍ବକାଳକଂ ॥
ଅରିଟ୍ଠପାଦେ ମଂ ଗୁଲକଂ, ପୁରିମାୟ’ଚ୍ଛ ଗଲ୍ଲକଂ ।
ଗିରିନେଲପନାୟକଣ୍ଡଂ, ନଗରସ୍ସୁତ୍ଥରାୟ ତୁ ॥
ପଞ୍ଚସତା ନେୱ ମାଦି-ୱିହାରେ ପୁଥୱୀ ପତି ।
ଗଙ୍ଗାୟ ଓରପାରଞ୍ହି, ଲଂକାଦୀପେ ତହିଂ ତହିଂ ॥
ପୁରେ ରଜ୍ଜା ଚ ରଜ୍ଜେ ଚ, ସଟ୍ଠୀୱସ୍ସାନି ସାଧୁକଂ ।
କାରେସି ରମ୍ମେ ଧମ୍ମେନ, ରତନତ୍ତୟ ଗାରୱୋ ॥
ସୁୱଣ୍ଣପିଣ୍ଡତିସ୍ସୋତି, ନାମଂ ରଜ୍ଜା ତସ୍ସା ଅହୁ ।
ସୁରତିସ୍ସୋତି ନାମନ୍ତୁ, ତସ୍ସା’ପୁରଜ୍ଜପତ୍ତିୟା ॥
ଅସ୍ସନାୱିକପୁତ୍ତା ଦ୍ୱେ, ଦମିଳା ସେନଗୁତ୍ତିକା ।
ସୁରତିସ୍ସମହୀପାଲଂ, ତଂ ଗହେତ୍ୱା ମହବ୍ବଲା ॥
ଦୁୱେ ୱୀସତିୱସ୍ସାନି, ରଜ୍ଜଂ ଧମ୍ମେନ କାରୟୁଂ ।
ତେ ଗହେତ୍ୱା ଅସେଲୋ ତୁ, ମୁଟସିୱସ୍ସ ଅତ୍ରଜୋ ॥
ସୋଦରିୟାନଂ ଭାତୂନଂ, ନୱମୋ ଭତୁକୋ ତତୋ ।
ଅନୁରାଧପୁରେ ରଜ୍ଜଂ, ଦସୱସ୍ସାନି କାରୟି ॥
ଚୋଳରଟ୍ଠା ଇଧ ଗମ୍ମ, ରଜ୍ଜତ୍ଥଂ ଉଜୁଜାତିକୋ ।
ଏଳାରୋ ନାମ ଦମିଳୋ, ଗହେତ୍ୱା’ସେଲଭୂପତିଂ ॥
ୱସ୍ସାନି ଚତ୍ତାରୀସଞ୍ଚ, ଚତ୍ତାରି ଚ ଅକାରୟି ।
ରଜ୍ଜଂ ୱୋହାରସମୟେ, ମଜ୍ଝତ୍ତୋ ମିତ୍ତସତ୍ତୁସୁ ॥
ସୟନସ୍ସ ସିରୋପସ୍ସେ, ଘଣ୍ଟଂ ସୁଦୀଘୟୋତ୍ତକଂ ।
ଲମ୍ବାପେସି ୱୀରାୱେତୁଂ, ଇଚ୍ଛନ୍ତେହି ୱିନିଚ୍ଛୟଂ ॥
ଏକୋ ପୁତ୍ତୋ ଚ ଧୀତା ଚ, ଅହେସୁଂ ତସ୍ସ ରାଜିନୋ ।
ରଥେନ ତିସ୍ସୱାପିଂ ସୋ, ଗଚ୍ଛନ୍ତୋ ଭୂମିପାଲଜୋ ॥
ତରୁଣଂ ୱଚ୍ଛକଂ ମଗ୍ଗେ, ନିପନ୍ନଂ ସହଧେନୁକଂ ।
ଗୀୱଂ ଅକ୍କମ୍ମଚକ୍କେନ, ଅସଞ୍ଚିଚ୍ଚ ଅଘାତୟି ॥
ଗନ୍ତ୍ୱାନ ଧେନୁଘଣ୍ଟଂ ତଂ, ଘଟ୍ଟେସି ଘଟ୍ଟିତାସୟା ।
ରାଜା ତେନେୱ ଚକ୍କେନ, ସୀସଂ ପୁତ୍ତସ୍ସ ଛେଦୟି ॥
ଦିଜପୋତଂ ତାଲରୁକ୍ଖେ, ଏକୋ ସପ୍ପୋ ଅଭକ୍ଖୟି ।
ତମ୍ପୋତମାତା ସକୁଣୀ, ଗନ୍ତ୍ୱା ଘଣ୍ଟମଘଟ୍ଟୟି ॥
ଆଣାପେତ୍ୱାନ ତଂ ରାଜା, କୁଚ୍ଛିଂ ତସ୍ସ ୱିଦାଳିୟ ।
ପୋତଂ ତଂ ନୀହରାପେତ୍ୱା, ତାଲେ ସପ୍ପମସପ୍ପୟି ॥
ରତନଗ୍ଗସ୍ସ ରତନ-ତ୍ତୟସ୍ସ ଗୁଣସାରତଂ ।
ଅଜାନନ୍ତୋପି ସୋ ରାଜା, ଚାରିତ୍ତମନୁପାଲୟଂ ॥
ଚେତିୟଦବ୍ବତଂ ଗନ୍ତ୍ୱା, ଭିକ୍ଖୁସଙ୍ଘଂ ପୱାରିୟ ।
ଆଗଚ୍ଛନ୍ତୋ ରଥଗତୋ, ରଥସ୍ସ ୟୁଗକୋଟିୟା ॥
ଅକାସି ଜିନଥୂପସ୍ସ,
ଏକଦେସସ୍ସ ଭଞ୍ଜନଂ ।
ଅମଚ୍ଚା ‘‘ଦେୱ ଥୂପୋନୋ,
ତୟା ଭିନ୍ନୋ’ତି ଆହୁ ତଂ ॥
ଅସଞ୍ଚିଚ୍ଚ କତେ‘ପେ’ସ, ରାଜା ଓରୁୟ୍ହ ସନ୍ଦନା ।
‘‘ଚକ୍କେନ ମମ ସୀସମ୍ପି, ଛିନ୍ଦଥା’ତି ପଥେସୟି ॥
‘‘ପରହିଂସଂ ମହାରାଜ, ସତ୍ଥା ନୋ ନେୱ ଇଚ୍ଛତି ।
ଥୂପଂ ପାକତିକଂ କତ୍ୱା, ଖମାପେହୀ’’ତି ଆହୁ ତଂ ॥
ତେ ଠପେତୁଂ ପଞ୍ଚଦସ, ପାସାଣେ ପତିତେ ତହିଂ ।
କହାପଣ ସହସ୍ସାନି, ଅଦା ପଞ୍ଚଦସେ ୱସୋ ॥
ଅକା ମହଲ୍ଲିକା ୱୀହିଂ, ସୋ ସେତୁଂ ଆତପେ ଖିପି ।
ଦେୱୋ ଅକାଲେ ୱସ୍ସିତ୍ୱା, ତସ୍ସା ୱିହିଂ ଅତେମୟି ॥
ୱୀହିଂ ଗହେତ୍ୱା ଗନ୍ତ୍ୱା ସା, ଘଣ୍ଟଂ ତଂ ସମଘଟ୍ଟୟି ।
ଅକାଲୱସ୍ସଂ ସୁତ୍ୱା ତଂ, ୱିସ୍ସଜ୍ଜେତ୍ୱା ତମତ୍ତିକଂ ॥
ରାଜା ଧମ୍ମମ୍ହି ୱତ୍ତନ୍ତୋ, ‘‘କାଲେ ୱସ୍ସଂ ଲଭେ’’ଇତି ।
ତସ୍ସା ୱିନିଚ୍ଛୟତ୍ଥାୟ, ଉପୱାସଂ ନିପଜ୍ଜି ସୋ ॥
ବଲିଗ୍ଗାହୀ ଦେୱପୁତ୍ତୋ, ରଞ୍ଞୋ ତେଜେନ ଓତ୍ଥଟୋ ।
ଗନ୍ତ୍ୱା ଚାତୁମହାରାଜ-ସନ୍ତିକଂ ତଂ ନିୱେଦୟି ॥
ତେ ତମାଦାୟ ଗନ୍ତ୍ୱାନ, ସକ୍କସ୍ସ ପଟିୱେଦୟୁଂ ।
ସକ୍କୋ ପଜ୍ଜୁନ୍ନମାହୁୟ, କାଲେ ୱସ୍ସଂ ଉପାଦିୟି ॥
ବଲିଗ୍ଗାହୀ ଦେୱପୁତ୍ତୋ, ରାଜିନୋ ତଂ ନିୱେଦୟି ।
ତତୋପ୍ପଭୁତି ତଂ ରଜ୍ଜେ, ଦିୱା ଦେୱୋ ନ ୱସ୍ସଥ ॥
ରତ୍ତିଂ ଦେୱୋ’ନୁ ସତ୍ତାହଂ, ୱସ୍ସିୟାମମ୍ହି ମଜ୍ଝିମେ ।
ପୁଣ୍ଣାନ’ହେସୁଂ ସବ୍ବତ୍ଥ, ଖୁଦ୍ଦକା ୱାଟକାନିପି ॥
ଅନୁପହତ କୁଦିଟ୍ଠିପୀଦିସିଂ ପାପୁଣୀ’ଦ୍ଧିଂ ।
ଅଗତିଗମନଦୋସଂ ସୁଦ୍ଧଦିଟ୍ଠିସମାନୋ,
କଥମିଧହି ମନୁସ୍ସୋ ବୁଦ୍ଧିମା ନୋ ଜହେୟ୍ୟାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପଞ୍ଚରାଜକୋ ନାମ
ଏକୱୀସତିମୋ ପରିଚ୍ଛେଦୋ ।
ବାୱୀସତିମ ପରିଚ୍ଛେଦ
ଗାମଣିକୁମାର ସୁତି
ଏଳାରଂ ଘାତୟିତ୍ୱାନ, ରାଜା’ହୁ ଦୁଟ୍ଠଗାମଣି ।
ତଦତ୍ଥ ଦୀପନତ୍ଥାୟ, ଅନୁପୁବ୍ବକଥା ଅୟଂ ॥
ଦେୱାନଂ ପିୟତିସ୍ସସ୍ସ, ରଞ୍ଞୋ ଦୁତିୟଭାତିକୋ ।
ଉପରାଜା ମହାନାଗୋ, ନାମାନୁ ଭାତୁନୋ ପିୟୋ ॥
ରଞ୍ଞୋ ଦେୱୀ ସପୁତ୍ତସ୍ସ, ବାଲା ରଜ୍ଜାଭିକାମିନି ।
ଉପରାଜୱଧତ୍ଥାୟ, ଜାତଚିତ୍ତା ନିରନ୍ତରଂ ॥
ୱାପିଂ ତରଚ୍ଛନାମଂ ସା, କାରାପେନ୍ତସ୍ସ ପାହିଣି ।
ଅମ୍ବଂ ୱିସେନ ୟୋଜେତ୍ୱା, ଠପେତ୍ୱା ଅମ୍ବମତ୍ଥକେ ॥
ତସ୍ସା ପୁତ୍ତୋ ସହଗତୋ, ଉପରାଜେନ ବାଲକୋ ।
ଭାଜନେ ୱିୱଟେୟେୱ, ତଂ ଅମ୍ବଂ ଖାଦିୟା’ମରି ॥
ଉପରାଜା ତତୋୟେୱ, ସଦାର ବଲ ୱାହନୋ ।
ରକ୍ଖିହୁଂ ସକମତ୍ତାନଂ, ରୋହଣା’ଭିମୁଖୋ ଅଗା ॥
ୟଟ୍ଠାଲୟ ୱିହାରସ୍ମିଂ, ମହେସୀ ତସ୍ସ ଗବ୍ଭିନୀ ।
ପୁତ୍ତଂ ଜନେସି ସୋ ତସ୍ସ, ଭାତୁ ନାମ ମକାରୟି ॥
ଇସ୍ସରୋ ରୋହଣେ’ଖିଲୋ ।
ମହା ଭାଗୋ ମହା ଗାମେ,
ରଜ୍ଜଂ କାରେସି ଖତ୍ତିୟୋ ॥
କାରେସି ସୋ ନାଗମହା-ୱିହାରଂ ସକନାମକଂ ।
ଉଦ୍ଧକନ୍ଦରକାଦୀ ଚ, ପିହାରେ କାରୟୀ ବହୂ ॥
ୟଟ୍ଠାଲୟ କତିସ୍ସୋ ସୋ, ତସ୍ସ ପୁତ୍ତୋ ତଦଚ୍ଚୟେ ।
ହତ୍ଥେୱ ରଜ୍ଜଂ କାରେସି, ତସ୍ସ ପୁତ୍ତୋ’ଭୟୋ ତଥା ॥
ଗୋଟ୍ଠାଭୟସୁତୋ କାକ-ୱଣ୍ଣତିସ୍ସୋତି ୱିସ୍ସୁହୋ ।
ତଦଚ୍ଚୟେ ତତ୍ଥ ରଜ୍ଜଂ, ସୋ ଅକାରେସି ଖତ୍ତିୟୋ ॥
ୱିହାରଦେୱି ନାମା’ସି, ମହେସୀ ତସ୍ସ ରାଜିନୋ ।
ସଦ୍ଧସ୍ସ ସଦ୍ଧାସମ୍ପନ୍ନା, ଧୀତା କଲ୍ୟାଣି ରାଜିନୋ ॥
କଲ୍ୟାଣିୟଂ ନରିନ୍ଦୋ ହି, ତିସ୍ସୋ ନାମାସି ଖତ୍ତିୟୋ ।
ଦେୱିସଞ୍ଞୋଗଜନିତ-କୋ ପୋତସ୍ସ କନିଟ୍ଠକୋ ॥
ଭୀତୋ ତତୋ ପଲାୟିତ୍ୱା, ଅୟ୍ୟଉତ୍ତିୟ ନାମକୋ ।
ଅଞ୍ଞତ୍ଥ ୱସି ସୋ ଦେସୋ, ତେନ ତଂ ନାମକୋ ଅହୁ ॥
ଦତ୍ୱା ରହସ୍ସଲେଖଂ ସୋ, ଭିକ୍ଖୁୱେସଧରଂ ନରଂ ।
ପାହେସି ଦେୱିୟା ଗନ୍ତ୍ୱା, ରାଜଦ୍ୱାରେ ଠିତୋ ତୁସୋ ॥
ରାଜ ଗେହେ ଅରହତା, ଭୁଞ୍ଜମାନେନ ସବ୍ବଦା ।
ଅଞ୍ଞାୟମାନୋ ଥେରେନ, ରଞ୍ଞୋ ଘରମୁପାଗମି ॥
ଥେରେନ ସଦ୍ଧିଂ ଭୁଞ୍ଜିତ୍ୱା, ରଞ୍ଞୋ ସହ ୱିନିଗ୍ଗମେ ।
ପାତେସି ଭୂମିୟଂ ଲେଖଂ, ପେକ୍ଖମାନାୟ ଦେୱିୟା ॥
ସଦ୍ଦେନ ତେନ ରାଜାନଂ, ନିୱତ୍ତିତ୍ୱା ୱିଲୋକୟଂ ।
ଞତ୍ୱାନ ଲେଖସନ୍ଦେସଂ, କୁଦ୍ଧୋ ଥେରସ୍ସ ଦୁମ୍ମତି ॥
ଥେରଂ ତଂ ପୁରିସଂ ତଞ୍ଚ, ମାରାପେତ୍ୱାନ କୋଧସା ।
ସମୁଦ୍ଦସ୍ମିଂ ଖିପାପେସି, କୁଜ୍ଝିତ୍ୱା ତେନ ଦେୱତା ॥
ସମୁଦ୍ଦେନୋ’ତ୍ଥରା ପେସୁଂ, ତଂ ଦେସଂ ସୋତୁଭୂପତି ।
ଅତ୍ତନୋ ଧୀତରଂ ୟୁଦ୍ଧଂ, ଦେୱିଂ ନାମ ସୁରୁପିନିଂ ॥
ଲିଖିତ୍ୱା ରାଜଧୀତାତି, ସୋୱଣ୍ଣକ୍ଖଲିୟା ଲହୁଂ ।
ନିସୀଦାପିୟ ତତ୍ଥେୱ, ସମୁଦ୍ଦସ୍ମିଂ ୱିସ୍ସଜ୍ଜୟି ॥
ଓକ୍କନ୍ତଂ ତଂ ତତୋ ଲଂକେ-କାକୱଣ୍ଣୋ ମହୀପତି ।
ଅଭିସେଚୟି ତେନା’ସି, ୱିହାରୋପପଦୱ୍ହୟା ॥
ତିସ୍ସ ମହାୱିହାରଞ୍ଚ, ତଥା ଚିତ୍ତଲପବ୍ବତଂ ।
ଗମିତ୍ଥୱାଲିଂ କୁଟାଲିଂ, ୱିହାରେ ଏୱମାଦିକେ ॥
କାରେତ୍ୱା ସୁପସନ୍ନେନ, ମନସାରତନତ୍ତୟେ ।
ଉପଟ୍ଠହି ତଦା ସଙ୍ଘଂ, ପଚ୍ଚୟେହି ଚତୂହି ସୋ ॥
କୋଟିପବ୍ବତ ନାମମ୍ହି, ୱିହାରେ ସୀଲୱତ୍ତିମା ।
ତଦା ଅହୁ ସାମଣେରୋ, ନାନାପୁଞ୍ଞକରୋ ସଦା ॥
ସୁଖେନାରୋହଣତ୍ଥାୟ, ଅକାସ ଚେତିୟଙ୍ଗଣେ ।
ଠପେସି ତୀଣି ପାସାଣେ, ପାସାଣ ଫଲକାନି ସୋ ॥
ଅଦା ପାନୀୟ ଦାନଞ୍ଚ, ୱତ୍ତଂ ସଙ୍ଘସ୍ସ ଚା’କରି ।
ସଦା କିଲନ୍ତକାୟସ୍ସ, ତସ୍ସା’ବୋଧୋ ମହା ଅହୁ ॥
ସିୱିକାୟ କମାନେତ୍ୱା, ଭିକ୍ଖୱୋ କତୱେଦିନୋ ।
ସିଲାପସ୍ସୟ ପରିୱେଣେ, ତିସ୍ସାରାମେ ଉପଟ୍ଠହୁଂ ॥
ସଦା ୱିହାରଦେୱୀସା, ରାଜଗେହେ ସୁସଙ୍ଖତେ ।
ପୁରେଭତ୍ତଂ ମହାଦାନଂ, ଦତ୍ୱା ସଙ୍ଘସ୍ସ ସଞ୍ଞତା ॥
ପଚ୍ଛାଭତ୍ତଂ ଗନ୍ଧମାଲଂ, ଭେସଜ୍ଜୱସନାନି ଚ ।
ଗାହୟିତ୍ୱା ଗତା’ରାମଂ, ସକ୍କରୋତି ୟଥାରହଂ ॥
ତଦା ତଥେୱ କତ୍ୱା ସା, ସଙ୍ଘତ୍ଥେରସ୍ସ ସନ୍ତିକେ ।
ନିସୀଦି ଧମ୍ମଂ ଦେସେନ୍ତୋ, ଥେରୋ ତଂ ଇଧ ମବ୍ରୱି ॥
‘‘ମହାସମ୍ପତ୍ତି ତୁମ୍ହେହି, ଲଦ୍ଧା’ୟଂ ପୁଞ୍ଞକମ୍ମୁନା ।
ଅପ୍ପମାଦୋ’ୱ କାତବ୍ବୋ, ପୁଞ୍ଞକମ୍ମେ ଇଦାନିପି’’ ॥
ଏୱଂ ୱୁତ୍ତେ ତୁ ସା ଆହ, ‘‘କିଂ ସମ୍ପତ୍ତି ଅୟଂ ଇଧ ।
ୟେସଂ ନୋ ଦାରକା ନତ୍ଥି, ୱଞ୍ଝାସମ୍ପତ୍ତି ତେନ ନୋ’’ ॥
ଛଳଭିଞ୍ଞୋ ମହାଥେରୋ, ପୁତ୍ତଲାଭମୱେକ୍ଖିୟ ।
‘‘ଗିଲାନଂ ସାମଣେରଂ ତଂ, ପସ୍ସଦେୱୀ’’ତି ଅବ୍ରୱି ॥
ସା ଗନ୍ତ୍ୱା’ସନ୍ନ ମରଣଂ, ସାମଣେରମୱୋଚ ତଂ ।
‘‘ପତ୍ଥେହି ମମ ପୁତ୍ତତ୍ତଂ, ସମ୍ପତ୍ତୀ ମହତୀ ହି ନୋ’’ ॥
ନ ଇଚ୍ଛତୀତି ଞତ୍ୱାନ, ତଦତ୍ଥଂ ମହତିଂ ସୁଭଂ ।
ପୁପ୍ଫପୂଜଂ କାରୟିତ୍ୱା, ପୁନ ୟାଚି ସୁମେଧସା ॥
ଏୱମ୍ପ’ନିଚ୍ଛମାନସ୍ସ, ଅତ୍ଥାୟୁ’ପାୟକୋୱିଦା ।
ନାନା ଭେସଜ୍ଜ ୱତ୍ଥାନି, ସଙ୍ଘେ ଦତ୍ୱା’ଥ ୟାଚିତଂ ॥
ପତ୍ଥେସି ସୋ ରାଜକୁଲଂ, ସା ତଂ ଠାନଂ ଅନେକଧା ।
ଅଲଙ୍କରିତ୍ୱା ୱନ୍ଦିତ୍ୱା, ୟାନମାରୁୟ୍ହ ପକ୍କମି ॥
ତତୋ ଚୁତୋ ସାମଣେରୋ, ଗଚ୍ଛମାନାୟ ଦେୱିୟା ।
ତସ୍ସା କୁଚ୍ଛିମ୍ହି ନିବ୍ବତ୍ତି, ତଂ ଜାନିୟ ନିୱତ୍ତିସା ॥
ରଞ୍ଞୋ ତଂ ସାସନଂ ଦତ୍ୱା, ରଞ୍ଞା ସହ ପୁନା’ଗମା ।
ସରୀରକିଚ୍ଚଂ କାରେତ୍ୱା, ସାମଣେରସ୍ସୁ’ଭୋପିତେ ॥
ତସ୍ମିଂୟେୱ ପରିୱେଣେ, ୱସନ୍ତା ସନ୍ତମାନସା ।
ମହାଦାନଂ ପୱତ୍ତେସୁଂ, ଭିକ୍ଖୁସଙ୍ଘସ୍ସ ସବ୍ବଦା ॥
ତସ୍ସେ’ୱଂ ଦୋହଳୋ ଆହି, ମହା ପୁଞ୍ଞାୟ ମାତୁୟା ।
‘‘ଉସଭମତ୍ତଂ ମଧୁଗଣ୍ଡଂ, କତ୍ୱା ଉସ୍ସୀସକେ ସୟଂ ॥
ୱାମେତରେନ ପସ୍ସେନ, ନିପନ୍ନାସୟନେ ସୁଭେ ।
ଦ୍ୱାଦସନ୍ନଂ ସହସ୍ସାନଂ, ଭିକ୍ଖୂନଂ ଦିନ୍ନସେସକଂ ॥
ମଧୁଂ ଭୁଞ୍ଜିତୁକାମା’ସି, ଅଥ ଏଳାର ରାଜିନୋ ।
ୟୋଧାନ ମଗ୍ଗୟୋଧସ୍ସ, ସୀସଚ୍ଛିନ୍ନାସିଦେୱନଂ ॥
ତସ୍ସେୱ ସୀସେ ଠତ୍ୱାନ, ପାତୁଞ୍ଚେୱ ଅକାମୟି ।
ଅନୁରାଧ ପୁରସ୍ସେୱ, ଉପ୍ପଲକ୍ଖେତ୍ତତୋ ପନ ॥
ଆନୀତୁପ୍ପଲମାଲଞ୍ଚ, ଅମିଲା ତଂ ପିଲନ୍ଧିତୁଂ ।
ତଂ ଦେୱୀ ରାଜିନୋ ଆହ, ନେମିତ୍ତେ ପୁଚ୍ଛି ଭୂପତି ॥
ତଂ ସୁତ୍ୱା ଆହୁ ନେମିତ୍ତା, ‘‘ଦେୱିପୁତ୍ତୋ ନିଘାତିୟ ।
ଦମିଳେ କତ୍ୱେ’କରଜ୍ଜଂ, ସାସନଂ ଜୋତୟିସ୍ସତି’’ ॥
ଏଦିସଂ ମଧୁଗଣ୍ଡଂ ସୋ, ଦସ୍ସେତି ତସ୍ସ ଈଦିସିଂ ।
ସମ୍ପତ୍ତିଂ ଦେତି ରାଜା’’ତି, ଘୋସାପେସି ମହୀପତି ॥
ଗୋଟ୍ଠସମୁଦ୍ଦୱେଲନ୍ତେ, ମଧୁପୁଣ୍ଣଂ ନିକୁଜ୍ଜିତଂ ।
ନାୱଂ ଞତ୍ୱାନ ଆଚିକ୍ଖି, ରଞ୍ଞୋ ଜନପଦେ ନରୋ ॥
ରାଜା ଦେୱିଂ ତହିଂ ନେତ୍ୱା, ମଣ୍ଡପମ୍ହି ସୁସଙ୍ଖତେ ।
ୟଥିଚ୍ଛିଥଂ ତାୟ ମଧୁଂ, ପରିଭୋଗମକାରୟି ॥
ଇତରେ ଦୋହଳେ ତସ୍ସା, ସମ୍ପାଦେତୁଂ ମହୀପତି ।
ୱେଳୁସୁମନ ନାମଂ ତଂ, ୟୋଧଂ ତତ୍ଥ ନିୟୋଜୟି ॥
ସୋ’ନୁରାଧପୁରଂ ଗନ୍ତ୍ୱା, ରଞ୍ଞୋ ମଙ୍ଗଲୱାଜିନୋ ।
ଗୋପକେନ ଅକା ମେତ୍ତିଂ, ତସ୍ସ କିଚ୍ଚଞ୍ଚ ସବ୍ବଦା ॥
ତସ୍ସ ୱିସ୍ସତ୍ଥ ତଂ ଞତ୍ୱା, ପାତୋୱ ଉପ୍ପଲାନ’ସିଂ ।
କଦମ୍ବନଦିୟା ତୀରେ, ଠପେତ୍ୱାନ ଅସଙ୍କିତୋ ॥
ଅସ୍ସଂ ନେତ୍ୱା ତମାରୁୟ୍ହ, ଗଣ୍ହିତ୍ୱାନ ଉପ୍ପଲାନ’ସିଂ ।
ନିୱେଦୟିତ୍ୱାନ ଅତ୍ତାନଂ, ଅସ୍ସୱେଗେନ ପକ୍କମି ॥
ସୁତ୍ୱା ରାଜା ଗହେତୁଂ ତଂ, ମହା ୟୋଧାନପେସୟି ।
ଦୁତିୟଂ ସମ୍ମଥଂ ଅସ୍ସଂ, ଆରୁୟ୍ହ ସୋନୁଧାପିତଂ ॥
ସୋ ଗୁମ୍ବନିସ୍ସିତୋ ଅସ୍ସ-ପିଟ୍ଠେୟେୱ ନିସୀଦିୟ ।
ଏନ୍ତସ୍ସ ପିଟ୍ଠିତୋ ତସ୍ସ, ଉବ୍ବୟ୍ହା’ସିଂ ପସାରୟି ॥
ଅସ୍ସୱେଗେନୟନ୍ତସ୍ସ, ସୀସଂ ଛିଜ୍ଜ ଉଭୋହୟେ ।
ସୀସଞ୍ଚା’ଦାୟ ସାୟଂ ସୋ, ମହାଗାମମୁପାଗମି ॥
ଦୋହଳେ ତେ ଚ ସା ଦେୱୀ, ପରିଭୁଞ୍ଜି ୟଥାରୁଚି ।
ରାଜା ୟୋଧସ୍ସ ସକ୍କାରଂ, କାରାପେସି ୟଥାରହଂ ॥
ସା ଦେୱୀ ସମୟେ ଧଞ୍ଞଂ, ଜନୟୀ ପୁତ୍ତମୁତ୍ତମଂ ।
ମହାରାଜକୁଲେ ତସ୍ମିଂ, ଆନନ୍ଦୋ ଚ ମହା ଅହୁ ॥
ତସ୍ସ ପୁଞ୍ଞାନୁଭାୱେନ, ତଦହେୱ ଉପାଗମୁଂ ।
ନାନାରତନସମ୍ପୁଣ୍ଣା, ସତ୍ତନାୱା ତତୋ ତତୋ ॥
ତସ୍ସେୱ ପୁଞ୍ଞତେଜେନ, ଛଦ୍ଦନ୍ତକୁଲତୋ କରୀ ।
ହତ୍ଥିଚ୍ଛାପଂ ଆହରିତ୍ୱା, ଠପେତ୍ୱା ଇଧ ପକ୍କମି ॥
ତଂ ତିତ୍ଥସରତୀରମ୍ହି, ଦିସ୍ୱା ଗୁମ୍ବନ୍ତରେ ଠିତଂ ।
କଣ୍ଡୁଲୱ୍ହୋ ବାଲିସିକୋ, ରଞ୍ଞୋ ଆଚିକ୍ଖି ତାୱଦେ ॥
ପେସେତ୍ୱା’ଚରିୟେ ରାଜା, ତମାଣାପିୟ ପୋସୟି ।
କଣ୍ଡୁଲୋ ଇତି ଞାୟିତ୍ଥ, ଦିଟ୍ଠତ୍ତା କଣ୍ଡୁଲେନ ସୋ ॥
‘‘ସୁୱଣ୍ଣଭାଜନାଦୀନଂ, ପୁଣ୍ଣା ନାୱା ଇଧାଗତା’’ ।
ଇତି ରଞ୍ଞୋ ନିୱେଦସୁଂ, ରାଜା ତାନା’ହରାପୟି ॥
ପୁତ୍ତସ୍ସ ନାମକରଣେ, ମଙ୍ଗଲମ୍ହି ମହୀପତି ।
ଦ୍ୱାଦସ ସହସ୍ସସଙ୍ଖଂ, ଭିକ୍ଖୁସଙ୍ଘଂ ନିମନ୍ତିୟ ॥
ଏୱଂ ଚିନ୍ତେସି ‘‘ୟଦିମେ, ପୁତ୍ତୋ ଲଂକାତଲେ’ଖିଲେ ।
ରଜ୍ଜଂ ଗହେତ୍ୱା ସମ୍ବୁଦ୍ଧ-ସାସନଂ ଜୋତୟିସ୍ସତି ॥
ଅଟ୍ଠୁତ୍ତରସହସ୍ସଞ୍ଚ, ଭିକ୍ଖୱୋ ପୱିସନ୍ତୁ ଚ ।
ସବ୍ବେ ତେ ଉଦ୍ଧପତ୍ତଞ୍ଚ, ଚୀୱରଂ ପାରପନ୍ତୁ ଚ ॥
ପଠମଂ ଦକ୍ଖିଣଂ ପାଦଂ, ଉମ୍ମାରନ୍ତୋ ଠପେନ୍ତୁ ଚ ।
ଏକଚ୍ଛତ୍ତୟୁତଂ ଧମ୍ମ-କରଣଂ ନୀହରନ୍ତୁ ଚ ॥
ଗୋତମୋ ନାମ ଥେରୋ ଚ, ପତିଗ୍ଗଣ୍ହାତୁ ପୁତ୍ତକଂ ।
ସୋ ଚ ସରଣସିକ୍ଖା ୟୋ, ଦେତୁ’’ ସବ୍ବଂ ତଥା ଅହୁ ॥
ସବ୍ବଂ ନିମିତ୍ତଂ ଦିସ୍ୱାନ, ତୁଟ୍ଠଚିତ୍ତୋ ମହୀପତି ।
ଦତ୍ୱା ସଙ୍ଘସ୍ସ ପାୟାସଂ, ନାମଂ ପୁତ୍ତସ୍ସ କାରୟି ॥
ମହାଗାମେ ନାୟକତ୍ତଂ, ପିତୁନାମଞ୍ଚ ଏକତୋ ।
ଉଭୋ କତ୍ୱାନ ଏକଜ୍ଝଂ, ଗାମଣିଅଭୟୋ ଇତି ॥
ମହାଗାମଂ ପୱିସିତ୍ୱା, ନୱମେ ଦିୱସେ ତତୋ ।
ସଙ୍ଗମଂ ଦେୱିୟା କାସି, ତେନ ଗବ୍ଭମଗଣ୍ହି ସା ॥
କାଲେ ଜାତଂ ସୁତଂ ରାଜା, ତିସ୍ସନାମଂ ଅକାରୟି ।
ମହତା ପରିହାରେନ, ଉଭତୋ ୱଡ୍ଢିଂସୁ ଦାରକା ॥
ସିତ୍ଥପ୍ପୱେସମଙ୍ଗଲ-କାଲେ ଦ୍ୱିନ୍ନମ୍ପି ସାଦରୋ ।
ଭିକ୍ଖୁସତାନଂ ପଞ୍ଚନଂ, ଦାପୟିତ୍ୱାନ ପାୟସଂ ॥
ତେହି ଉପଡ୍ଢେ ଭୁତ୍ତମ୍ହି, ଗହେତ୍ୱା ଥୋକଥୋକକଂ ।
ସୋୱଣ୍ଣସରକେନେ’ସଂ, ଦେୱିୟା ସହ ଭୂପତି ॥
‘‘ସମ୍ବୁଦ୍ଧସାସନଂ ତୁମ୍ହେ, ୟଦି ଛଡ୍ଡେଥ ପୁତ୍ତକା ।
ମା ଜୀରତୁ କୁଚ୍ଛିଗତଂ, ଇଦଂ ୱୋ’’ତି ଅପାପୟି ॥
ୱିଞ୍ଞାୟ ଭାସିତତ୍ଥଂ ତେ, ଉଭୋ ରାଜକୁମାରକା ।
ପାୟାସଂ ତଂ ଅଭୁଞ୍ଜିଂସୁ, ତୁଟ୍ଠଚିତ୍ତା’ମତଂ ୱିୟ ॥
ଦସ ଦ୍ୱାଦସୱସ୍ସେସୁ, ତେସୁ ୱୀମଂସନତ୍ଥିକୋ ।
ତଥେୱ ଭିକ୍ଖୂ ଭୋଜେତ୍ୱା, ତେସଂ ଉଚ୍ଛିଟ୍ଠମୋଦନଂ ॥
ଗାହୟିତ୍ୱା ତଟ୍ଟକେନ, ଠପାପେତ୍ୱା ତଦନ୍ତିକେ ।
ତିଭାଗଂ କାରୟିତ୍ୱାନ, ଇଧ ମାହ ମହୀପତି ॥
‘‘କୁଲଦେୱତାନଂ ନୋ ତାତା, ଭିକ୍ଖୂନଂ ୱିମୁଖା ମୟଂ ।
ନ ହେସ୍ସାମା’’ତି ଚିନ୍ତେତ୍ୱା, ଭାଗଂ ଭୁଞ୍ଜଥି’ମନ୍ତି ଚ ॥
‘‘ଦ୍ୱେ ଭାତରୋ ମୟଂ ନିଚ୍ଚଂ, ଅଞ୍ଞମଞ୍ଞମଦୂଭକା ।
ଭୱିସ୍ସାମା’’ତି ଚିନ୍ତେତ୍ୱା, ଭାଗଂ ଭୁଞ୍ଜିଥି’ମନ୍ତି ଚ ॥
ଅମତଂ ୱିୟ ଭୁଞ୍ଜିଂସୁ, ତେ ଦ୍ୱେ ଭାଗେ ଉଭୋପି ଚ ।
‘‘ନ ୟୁଜ୍ଝିସ୍ସାମ ଦମିଳେହି’’, ଇତି ଭୁଞ୍ଜଥି’ମଂ ଇତି ॥
ଏୱଂ ୱୁତ୍ତେତୁ ତିସ୍ସୋ ସୋ, ପାଣିନା ଖିପି ଭୋଜନଂ ।
ଗାମଣିଭତ୍ତପିଣ୍ଡଂ ତୁ, ଖିପିତ୍ୱା ସୟନଂ ଗତୋ ॥
ସଂକୁଚିତ୍ୱା ହତ୍ଥପାଦଂ, ନିପଜ୍ଜି ସୟେନ ସୟଂ ।
ଦେୱୀ ଗନ୍ତ୍ୱା ତୋସୟନ୍ତୀ, ଗାମଣିଂ ଏତଦବ୍ରୱି ॥
ପସାରିତଙ୍ଗୋ ସୟନେ, କିଂ ନସେସି ସୁଖଂ ସୁତ ।
‘‘ଗଙ୍ଗାପାରମ୍ହି ଦମୀଳା, ଇତୋ ଗୋଟ୍ଠମହୋଦଧି ॥
କଥଂ ପସାରିତଙ୍ଗୋ’ହଂ, ନିପଜ୍ଜାମୀ’ତି ସୋ ବ୍ରୱି ।
ସୁତ୍ୱାନ ତସ୍ସାଧିପ୍ପାୟଂ, ତୁଣ୍ହୀ ଆସି ମହୀପତି ॥
ସୋ କମେନା’ଭିୱଡ୍ଢନ୍ତୋ, ଅହୁ ସୋଳସୱସ୍ସିକୋ ।
ପୁଞ୍ଞୱା ୟସୱା ଧୀମା, ତେଜୋ ବଲପରକ୍କମୋ ॥
ଚଲାଚଲାୟଂ ଗତିୟଞ୍ହି ପାଣିନୋ,
ଉପେନ୍ତି ପୁଞ୍ଞେନ ୟଥାରୁଚିଂ ଗତିଂ ।
ଇତୀତି ମନ୍ତେତ୍ୱା ସତତଂ ମହାଦରୋ,
ଭୱେୟ୍ୟ ପୁଞ୍ଞପଚୟମ୍ହି ବୁଦ୍ଧିମାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଗାମଣିକୁମାରସୂତି ନାମ
ବାୱୀସତିମୋ ପରିଚ୍ଛେଦୋ ।
ତେୱୀସତିମ ପରିଚ୍ଛେଦ
ୟୋଧଲାଭୋ
ତେଜୋଜୱଗୁଣେହି ଚ ।
ଅଗ୍ଗୋ ହୁତ୍ୱା ମହାକାୟୋ,
ସୋ ଚ କଣ୍ଡୂଲୱାରଣୋ ॥
ନନ୍ଦୀମିତ୍ତୋ ସୁରନିମିଲୋ, ମହାସୋଣୋ ଗୋଟ୍ଠୟିମ୍ବରୋ ।
ଥେରପୁତ୍ତାଭୟୋ ଭରଣୋ, ୱେଳୁସୁମନୋ ତଥେୱ ଚ ॥
ଖଞ୍ଜଦେୱୋ ଫୁସ୍ସଦେୱୋ, ଲଭିୟ୍ୟ ୱସଭୋପି ଚ ।
ଏତେ ଦସ ମହାୟୋଧା, ତସ୍ସା’ହେସୁଂ ମହବ୍ବଲା ॥
ଅହୁ ଏଳାରରାଜସ୍ସ, ମିତ୍ତୋ ନାମ ଚମୂପତି ।
ତସ୍ସ କମ୍ମନ୍ତଗାମମ୍ହି, ପାଚୀନଖଣ୍ଡରାଜିୟା ॥
ଚିତ୍ତପବ୍ବତସାମନ୍ତା, ଅହୁ ଭଗିନିୟା ସୁତୋ ।
କୋସୋହିତୱତ୍ଥଗୁୟ୍ହୋ, ମାତୁଲସ୍ସେୱ ନାମତୋ ॥
ଦୂରମ୍ପି ପରିସପ୍ପନ୍ତଂ, ଦହରଂ ତଂ କୁମାରକଂ ।
ଆବଜ୍ଝ ନନ୍ଦିୟା କଟ୍ୟଂ, ନିସଦମ୍ହି ଅବନ୍ଧିସୁ ॥
ନିସଦଂ କଡ୍ଢତୋ ତସ୍ସ, ଭୂମିୟଂ ପରିସପ୍ପତୋ ।
ଉମ୍ମାରାତିକ୍କମେ ନନ୍ଦି, ସା ଛଜ୍ଜତି ୟତୋ ତତୋ ॥
ନନ୍ଦିମିତ୍ତୋତି ଞାୟିତ୍ଥ, ଦସନାଗବଲୋ ଅହୁ ।
ୱୁଦ୍ଧୋ ନଗରମାଗମ୍ମ, ସୋ ଉପଟ୍ଠାସି ମାତୁଲଂ ॥
ଥୂପାଦୀସୁ ଅସକ୍କାରଂ, କରୋନ୍ତୋ ଦମିଳେ ତଦା ।
ଊରୁଂ ଅକ୍କମ୍ମପାଦେନ, ହତ୍ଥେନ ଇତରଂ ତୁସୋ ॥
ଗହେତ୍ୱା ସମ୍ପଦାଲେତ୍ୱା, ବହିକ୍ଖପତିଂ ଥାମୱା ।
ଦେୱା ଅନ୍ତରଧାପେନ୍ତି, ତେନ ଖିତ୍ତଂ କଳେୱରଂ ॥
ଦମିଳାନଂ ଖୟଂ ଦିସ୍ୱା, ରଞ୍ଞୋ ଆରୋଚୟିଂ ସୁତଂ ।
‘‘ସହୋଟ୍ଟଂ ଗଣ୍ହଥେତଂ’’ତି, ୱୁତ୍ତଂ କାତୁଂ ନ ସକ୍ଖିସୁଂ ॥
ଚିନ୍ତେସି ନନ୍ଦିମିତ୍ତୋ ସୋ, ‘‘ଏୱମ୍ପି କରତୋ ମମ ।
ଜନକ୍ଖୟୋ କେୱଲଞ୍ହି, ନତ୍ଥି ସାସନଜୋତନଂ ॥
ରୋହଣେ ଖତ୍ତିୟା ସନ୍ତି, ପସନ୍ନଂ ରତନତ୍ତୟେ ।
ତତ୍ଥ କତ୍ୱା ରାଜସେୱଂ, ଗଣ୍ହିତ୍ୱା ଦମିଳେ’ଖିଲେ ॥
ରଜ୍ଜଂ ଦତ୍ୱା ଖତ୍ତିୟାନଂ, ଜୋତେସ୍ସଂ ବୁଦ୍ଧସାସନଂ’’ ।
ଇତି ଗନ୍ତ୍ୱା ଗାମଣିସ୍ସ, ତଂ କୁମାରସ୍ସ ସାୱୟି ॥
ମାତୁୟା ମନ୍ତୟିତ୍ୱା ସୋ, ସକ୍କାରଂ ତସ୍ସ କାରୟି ।
ସକ୍କତୋ ନନ୍ଦିମିତ୍ତୋ ସୋ, ୟୋଧୋ ୱସି ତଦନ୍ତିକେ ॥
କାକୱଣ୍ଣୋ ତିସ୍ସରାଜା, ୱାରେତୁଂ ଦମିଳିସଦା ।
ମହାଗଙ୍ଗାୟ ତିତ୍ଥେସୁ, ରକ୍ଖଂ ସବ୍ବେସୁ କାରୟି ॥
ଅହୁ ଦୀଘାଭୟୋ ନାମ, ରଞ୍ଞୋ’ଞ୍ଞ ଭରିୟା ସୁତୋ ।
କଚ୍ଛକତିତ୍ଥେ ଗଙ୍ଗାୟ, ତେନ ରକ୍ଖମକାରୟି ॥
ସୋ ରକ୍ଖାକରଣତ୍ଥାୟ, ସମନ୍ତା ୟୋଜନଦ୍ୱୟେ ।
ମହାକୁଲମ୍ହା ଏକେକଂ, ପୁତ୍ତଂ ଆଣାପୟି ତହିଂ ॥
କୋଟ୍ଠିୱାଲେ ଜନପଦେ, ଗାମେ ଖଣ୍ଡକୱିଟ୍ଠିକେ ।
ସତ୍ତପୁତ୍ତୋ କୁଲପତି, ସଙ୍ଘୋ ନାମା’ସି ଇସ୍ସରୋ ॥
ତସ୍ସାପି ଧୂତଂ ପାହେସି, ରାଜପୁତ୍ତୋ ସୁତତ୍ଥିକୋ ।
ସତ୍ତମୋ ନିମିଲୋ ନାମ, ଦସହତ୍ଥିବଲୋ ସୁତୋ ॥
ତସ୍ସ ଅକମ୍ମସୀଲତ୍ତା, ଖୀୟନ୍ତା ଛପି ଭାତରୋ ।
ରୋଚୟୁଂ ତସ୍ସ ଗମନଂ, ନ ତୁ ମାତା ପିତା ପନ ॥
କୁଜ୍ଝିତ୍ୱା ସେସଭାତୂନଂ, ପାତୋୟେୱ ତିୟୋଜନଂ ।
ଗନ୍ତ୍ୱା ସୁରଗ୍ଗମେୟେୱ, ରାଜପୁତ୍ତଂ ଅପସ୍ସିସୋ ॥
ସୋ ତଂ ୱିମଂସନତ୍ଥାୟ, ଦୂରେ କିଚ୍ଚେ ନିୟୋଜୟି ।
ଚେତିୟ ପବ୍ବତା ସନ୍ନେ, ଦ୍ୱାର ମଣ୍ଡଲଗାମକେ ॥
ବ୍ରାହ୍ମଣୋ କୁଣ୍ଡଲୋ ନାମ, ୱିଜ୍ଜ ତେ ମେ ସହାୟକୋ ।
ସମୁଦ୍ଦପାରେ ଭଣ୍ଡାନି, ତସ୍ସ ୱିଜ୍ଜନ୍ତି ସନ୍ତିକେ ॥
ଗନ୍ତ୍ୱା ତଂ ତେନ ଦିନ୍ନାନି, ଭଣ୍ଡକାନି ଇଧା’ହର ।
ଇତି ୱତ୍ୱାନ ଭୋଜେତ୍ୱା, ଲେଖଂ ଦତ୍ୱା ୱିସ୍ସଜ୍ଜୟି ॥
ତତୋ ନୱ ୟୋଜନଞ୍ହି, ଅନୁରାଧପୁରଂ ଇଦଂ ।
ପୁବ୍ବଣ୍ହେୟେୱ ଗନ୍ତ୍ୱାନ, ସୋ ତଂ ବ୍ରାହ୍ମଣ ମଦ୍ଦସ ॥
‘‘ନ୍ହତ୍ୱା ୱାପିୟଂ ତାତ, ଏହୀ’’ତି ଆହ ବ୍ରାହ୍ମଣୋ ।
ଇଧା’ନାଗତ ପୁବ୍ବତ୍ତା, ନ୍ହତ୍ୱାନ ତିସ୍ସୱାପିୟଂ ॥
ମହାବୋଧିଞ୍ଚ ପୂଜେତ୍ୱା, ଥୂପାରାମେ ଚ ଚେତିୟଂ ।
ନଗରଂ ପୱିସିତ୍ୱାନ, ପସ୍ସିତ୍ୱା ସକଲଂ ପୁରଂ ॥
ଆପଣା ଗନ୍ଧମାଦାୟ, ଉତ୍ତର ଦ୍ୱାରତୋ ତତୋ ।
ନିକ୍ଖମ୍ମୁପ୍ପଲ ଖେତ୍ତମ୍ହା, ଗହେତ୍ୱା ଉପ୍ପଲାନି ଚ ॥
ଉପାଗମି ବ୍ରାହ୍ମଣଂ ତଂ, ପୁଟ୍ଠୋ ତେନା’ହ ସୋ ଗତିଂ ।
ସୁତ୍ୱା ସୋ ବ୍ରାହ୍ମଣୋ ତସ୍ସ, ପୁବ୍ବାଗମମିଧାଗମଂ ॥
ୱିମ୍ହିତୋ ଚିନ୍ତୟୀ ଏୱଂ, ‘‘ପୁରିସା ଜାନୀୟୋ ଅୟଂ ।
ସଚେ ଜାନେୟ୍ୟ ଏଳାରୋ, ଇମଂ ହତ୍ଥେ କରିସ୍ସତି ॥
ତସ୍ମା’ୟଂ ଦମିଳା’ସନ୍ନେ, ୱାସେତୁଂ ନେୱ ଅରହତି ।
ରାଜପୁତ୍ତସ୍ସ ପିତୁନୋ, ସନ୍ତିକେ ୱାସମରହତି’’ ॥
ଏୱ ମେୱଂ ଲିଖିତ୍ୱାନ, ଲେଖଂ ତସ୍ସ ସମପ୍ପୟି ।
ପୁଣ୍ଣୱଡ୍ଢନ ୱତ୍ଥାନି, ପଣ୍ଣାକାରେ ବହୂପି ଚ ॥
ଦତ୍ୱା ତଂ ଭୋଜୟିତ୍ୱା ଚ, ପେସେସୀ ସଖିସନ୍ତିକଂ ।
ସୋ ୱଡ୍ଢମାନଚ୍ଛାୟାୟଂ, ଗତ୍ୱା ରାଜସୁତନ୍ତି କଂ ॥
ଲେଖଞ୍ଚ ପଣ୍ଣାକାରେ ଚ, ରାଜପୁତ୍ତସ୍ସ ଅପ୍ପୟି ।
ତୁଟ୍ଠୋ ଆହ ‘‘ସହସ୍ସେନ, ପସାଦେଥ ଇମ’’ନ୍ତି ସୋ ॥
ଇସ୍ସଂ କରିଂସୁ ତସ୍ସ’ଞ୍ଞେ, ରାଜପୁତ୍ତସ୍ସ ସେୱକା ।
ସୋ ତଂ ଦସସହସ୍ସେନ, ପସାଦାପେସି ଦାରକଂ ॥
ତସ୍ସ କେସଂ ଲିଖାପେତ୍ୱା, ଗଙ୍ଗାୟେୱ ନହାପିୟ ।
ପୁଣ୍ଣୱଡ୍ଢନ ୱତ୍ଥୟୁଗଂ, ଗନ୍ଧମାଲଞ୍ଚ ସୁନ୍ଦରଂ ।
ଅଚ୍ଛାଦେତ୍ୱା ୱିଲିମ୍ପେତ୍ୱା, ମଣ୍ଡୟିତ୍ୱା ସୁରୂପକଂ ॥
ସୀସଂ ଦୁକୂଲପଟ୍ଟେନ, ୱେଠୟିତ୍ୱା ଉପାନୟୁଂ ।
ଅତ୍ତନୋ ପରିହାରେନ, ଭତ୍ତଂ ତସ୍ସ ଅଦାପୟି ॥
ଅତ୍ତନୋ ଦସସହସ୍ସ-ଅଗ୍ଘନସୟନଂ ସୁଭଂ ।
ସୟନତ୍ଥଂ ଅଦାପେସି, ତସ୍ସ ୟୋଧସ୍ସ ଖତ୍ତିୟୋ ॥
ସୋ ସବ୍ବଂ ଏକତୋ କତ୍ୱା, ନେତ୍ୱା ମାତାପିତନ୍ତିକଂ ।
ମାତୁୟା ଦସସହସ୍ସଂ, ସୟନଂ ପିତୁନୋ ଅଦା ॥
ତଂୟେୱ ରତ୍ତିଂ ଆଗନ୍ତ୍ୱା, ରକ୍ଖଠାନେ ଅଦ୍ଦସ୍ସୟି ।
ପଭାତେ ରାଜପୁତ୍ତୋ ତଂ, ସୁତ୍ୱା ତୁଟ୍ଠମନୋ ଅହୁ ॥
ଦତ୍ୱା ପରିଚ୍ଛଦଂ ତସ୍ସ, ପରିୱାରଜନଂ ତଥା ।
ଦତ୍ୱା ଦସସହସ୍ସାନୀ, ପେସେସି ପିତୁସନ୍ତିକଂ ॥
ୟୋଧୋ ଦସସହସ୍ସାନି, ନେତ୍ୱା ମାତାପିତନ୍ତିକଂ ।
ତେସଂ ଦତ୍ୱା କାକୱଣ୍ଣ-ତିସ୍ସୋ ରାଜା ମୁପାଗମି ॥
ସୋ ଗାମଣିକୁମାରସ୍ସ, ତମପ୍ପେସି ମହୀପତି ।
ସକ୍କତୋ ସୁରନିମିଲୋ, ୟୋଧୋ ୱସି ତଦନ୍ତିକେ ॥
କୁଟୁମ୍ବରିକଣ୍ଣିକାୟଂ,
ହୁନ୍ଦରୀୱାପି ଗାମକେ ।
ତିସସ୍ସ ଅଟ୍ଠମୋ ପୁତ୍ତୋ,
ଅହୋସି ସୋଣ ନାମକୋ ॥
ସତ୍ତୱସ୍ସିକକାଲେପି, ତାଲଗଚ୍ଛେ ଅଲୁଞ୍ଚି ସୋ ।
ଦସ ୱସ୍ସିକକାଲମ୍ହି, ତାଲେ ଲୁଞ୍ଚିମହବ୍ବଲୋ ॥
କାଲେ ନ ସୋ ମହାସୋଣୋ,
ଦସ ହତ୍ଥି ବଲୋ ଅହୁ ।
ରାଜା ତଂ ତାଦିସଂ ସୁତ୍ୱା,
ଗହେତ୍ୱା ପିତୁସନ୍ତିକା ॥
ଗାମଣିସ୍ସ କୁମାରସ୍ସ, ଅଦାସି ପୋସନତ୍ଥିକୋ ।
ତେନ ସୋ ଲଦ୍ଧସକ୍କାରୋ, ୟୋଧୋ ୱସି ତଦନ୍ତିକେ ॥
ଗିରିନାମେ ଜନପଦେ, ଗାମେ ନିଚ୍ଛେଲୱିଟ୍ଠିକେ ।
ଦସହତ୍ଥିବଲୋ ଆସି, ମହାନାଗସ୍ସ ଅତ୍ରଜୋ ॥
ଲକୁଣ୍ଟକସରୀରତ୍ତା, ଅହୁ ଗୋଟ୍ଠକ ନାମକୋ ।
କରୋନ୍ତି କେଳିପରିହାସଂ, ତସ୍ସ ଜେଟ୍ଠା ଛ ଭାତରୋ ॥
ତେ ଗନ୍ତ୍ୱା ମାସଖେତ୍ତତ୍ଥଂ, କୋଟ୍ଟୟିତ୍ୱା ମହାୱନଂ ।
ତସ୍ସ ଭାଗଂ ଠପେତ୍ୱାନ, ଗନ୍ତ୍ୱା ତସ୍ସ ନିୱେଦୟୁଂ ॥
ସୋ ଗନ୍ତ୍ୱା ତଂ ଖଣଂୟେୱ, ରୁକ୍ଖେ ଇମ୍ବରସଞ୍ଞିତେ ।
ଲୁଞ୍ଚିତ୍ୱାନ ସମଂ କତ୍ୱା, ଭୂମିଂ ଗନ୍ତ୍ୱା ନିୱେଦୟି ॥
ଗନ୍ତ୍ୱାନ ଭାତରୋ ତସ୍ସ, ଦିସ୍ୱା କମ୍ମନ୍ତ ମବ୍ଭୁତଂ ।
ତସ୍ସ କମ୍ମଂ କିତ୍ତୟନ୍ତା, ଆଗଚ୍ଛିଂସୁ ତଦନ୍ତିକଂ ॥
ତଦୁପାଦାୟ ସୋ ଆସି, ଗୋଟ୍ଠୟିମ୍ବରନାମକୋ ।
ତଥେୱ ରାଜା ପାହେସି, ତମ୍ବି ଗାମଣିସନ୍ତିକଂ ॥
କୋଟିପବ୍ବତସାମନ୍ତା, କିତ୍ତିଗାମମ୍ହି ଇସ୍ସରୋ ।
ରୋହଣୋ ନାମ ଗହପତି, ଜାତଂ ପୁତ୍ତକମତ୍ତନୋ ॥
ସମାନ ନାମଂ କାରେସି, ଗୋଟ୍ଠକାହୟରାଜିନୋ ।
ଦାରକୋ ସୋ ବଲୀ ଆସି, ଦସଦ୍ୱାଦସୱସ୍ସିକୋ ॥
ଅସକ୍କୁଣେୟ୍ୟପାସାଣେ, ଉଦ୍ଧତ୍ତୁଂ ଚତୁପଞ୍ଚହି ।
କୀଳମାନୋ ଖିପି ତଦା, ସୋ କୀଳାଗୁଳକେ ୱିୟ ॥
ତସ୍ସ ସୋଳସୱସ୍ସସ୍ସ, ପିତା ଗଦମକାରୟି ।
ଅଟ୍ଠତିଂସଙ୍ଗୁଲୱଟ୍ଟଂ, ସୋଳସହତ୍ଥଦୀଘକଂ ॥
କାଲାନଂ ନାଳିକେରାନଂ,
ଖନ୍ଧେ ଆହଚ୍ଚ ତାୟ ସୋ ।
ତେ ପାତୟିତ୍ୱା ତେନେୱ,
ୟୋ ଧୋ ସୋ ପାକଟୋ ଅହୁ ॥
ତଥେୱ ରାଜା ପାହେସି, ତମ୍ପି ଗାମଣିସନ୍ତିକେ ।
ଉପଟ୍ଠାକୋ ମହାସୁମ୍ମ-ଥେରସ୍ସା’ସି ପିତା ପନ ॥
ସୋ ମହାସୁମ୍ମଥେରସ୍ସ, ଧମ୍ମଂ ସୁତ୍ୱା କୁଟୁମ୍ବିକୋ ।
ସୋତାପତ୍ତିଫଲଂ ପତ୍ତୋ, ୱିହାରେ କୋଳପବ୍ବତେ ॥
ସୋତୁ ସଞ୍ଜାତସଂୱେଗୋ, ଆରୋଚେତ୍ୱାନ ରାଜିନୋ ।
ଦତ୍ୱା କୁଟୁମ୍ବଂ ପୁତ୍ତସ୍ସ, ପବ୍ବଜି ଥେରସନ୍ତିକେ ॥
ଭାୱନଂ ଅନୁୟୁଞ୍ଜିତ୍ୱା, ଅରହତ୍ତମପାପୁଣି ।
ପୁତ୍ତୋ ତେନ’ସ୍ସ ପଞ୍ଞାୟି, ଥେରପୁତ୍ତାଭୟୋ ଇତି ॥
କପ୍ପକନ୍ଦରଗାମମ୍ହି, କୁମାରସ୍ସ ସୁତୋ ଅହୁ ।
ଭରଣୋ ନାମ ସୋ କାଲେ, ଦସଦ୍ୱାଦସୱସ୍ସିକେ ॥
ଦାରକେହି ୱନଂ ଗନ୍ତ୍ୱା’-ନୁବନ୍ଧିତ୍ୱା ସସେ ବହୂ ।
ପାଦେନ ପହରିତ୍ୱାନ, ଦ୍ୱିଖଣ୍ଡଂ ଭୂମିୟଂ ଖିପି ॥
ଗାମିକେହି ୱନଂ ଗନ୍ତ୍ୱା, ସୋଳସୱସ୍ସିକୋ ପନ ।
ତଥେୱ ପାତେସି ଲହୁଂ, ମିଗ ଗୋକଣ୍ଣସୂକରେ ॥
ଭରଣୋ ସୋ ମହାୟୋଧୋ,
ତେନେୱ ପାକଟୋ ଅହୁ ।
ତଥେୱ ରାଜା ୱାସେସି,
ତମ୍ପି ଗାମଣିସନ୍ତିକେ ॥
ଗିରିଗାମେ ଜନପଦେ, କୁଟୁମ୍ବିୟଙ୍ଗଣଗାମକେ ।
କୁଟୁମ୍ପିୱସଭୋ ନାମ, ଅହୋସି ତତ୍ଥ ସମ୍ମତୋ ॥
ୱେଳୋ ଜନପଦୋ ତସ୍ସ, ସୁମନୋ ଗିରିଭୋଜକୋ ।
ସହାୟସ୍ସ ସୁତେ ଜାତେ, ପଣ୍ଣାକାରପୁରସ୍ସରା ॥
ଗନ୍ତ୍ୱା ଉଭୋ ସକଂ ନାମଂ, ଦାରକସ୍ସ ଅକାରୟୁଂ ।
ତଂ ୱୁଦ୍ଧଂ ଅତ୍ତନୋ ଗେହେ, ୱାସେସି ସିରିଭୋଜକୋ ॥
ତସ୍ସେ’କୋ ସିନ୍ଧୱୋ ପୋସଂ, କଞ୍ଚିନା ରୋହିତୁଂ ଅଦା ।
ଦିସ୍ୱା ତୁ ୱେଳୁସୁମନଂ, ଅୟଂ ଅରୋହକୋ ମମ ॥
ଅନୁରୂପୋ’ତି ଚିନ୍ତେତ୍ୱା,
ପହଟ୍ଠୋ ହେସିତଂ ଅକା ।
ତଂ ଞତ୍ୱା ଭୋଜକୋ ‘‘ଅସ୍ସଂ,
ଆରୋହା’’ତି ତମାହସୋ ॥
ସୋ ଅସ୍ସଂ ଆରୁହିତ୍ୱା ତଂ, ସୀଘଂ ଧାୱୟି ମଣ୍ଡଲେ ।
ମଣ୍ଡଲେ ସକଲେ ଅସ୍ସୋ, ଏକାବଦ୍ଧୋ ଅଦିସ୍ସି ସୋ ॥
ନିସୀଦି ଧାୱତୋ ଚ’ସ୍ସ, ୱସ୍ସହାରୋ’ୱ ପିଟ୍ଠିୟଂ ।
ମୋଚେତିପି ଉତ୍ତରିୟଂ, ବନ୍ଧତିପି ଅନାଦରୋ ॥
ତଂ ଦିସ୍ୱା ପରିସା ସବ୍ବା, ଉକ୍କୁଟ୍ଠିଂ ସମ୍ପୱତ୍ତୟି ।
ଦତ୍ୱା ଦସସହସ୍ସାନି, ତସ୍ସ ସୋ ଗିରିଭୋଜକୋ ॥
ରାଜାନୁଚ୍ଛୱିକୋ’ୟଂତି, ହଟ୍ଠୋ ରଞ୍ଞୋ ଅଦାସି ତଂ ।
ରାଜା ତଂ ୱେଳୁସୁମନଂ, ଅତ୍ତନୋୟେୱ ସନ୍ତିକେ ॥
କାରେତ୍ୱା ତସ୍ସ ସକ୍କାରଂ, ୱାସେସି ବହୁମାନୟଂ ।
ନକୁଲନଗରକଣ୍ଣିକାୟଂ, ଗାମେ ମହିନ୍ଦ ଦୋଣିକେ ॥
ଅଭୟସ୍ସ’ନ୍ତିମେ ପୁତ୍ତୋ, ଦେୱୋନାମା’ସି ଥାମୱା ।
ଈସକଂ ପନ ଖଞ୍ଜତ୍ତା, ଖଞ୍ଜଦେୱୋତି ତଂ ୱିଦୁଂ ॥
ମିଗମଂ ଗାମୱାସୀହି, ସହ ଗନ୍ତ୍ୱାନ ସୋ ତଦା ।
ମହିସେ ଅନୁବନ୍ଧିତ୍ୱା, ମହନ୍ତେ ଉଟ୍ଠିତୁଟ୍ଠିତେ ॥
ହତ୍ଥେନ ପାଦେ ଗଣ୍ହିତ୍ୱା, ଭମେତ୍ୱା ସୀସମତ୍ଥକେ ।
ଅସୁମ୍ହ ଭୂମିଂ ଚୁଣ୍ଣେତି, ତେସଂ ଅଟ୍ଠୀନି ମାଣୱୋ ॥
ତଂ ପୱତ୍ତିଂ ସୁଣିତ୍ୱାୱ, ଖଞ୍ଜଦେୱଂ ମହୀପତି ।
ୱାସେସି ଆହରାପେତ୍ୱା, ଗାମଣିସ୍ସେ’ୱ ସନ୍ତିକେ ॥
ଚିତ୍ତଲପବ୍ବତା’ସନ୍ନେ, ଗାମେ କପିଟ୍ଠନାମକେ ।
ଉପ୍ପଲସ୍ସ ସୁତୋ ଆସି, ଫୁସ୍ସଦେୱୋତି ନାମକୋ ॥
ଗନ୍ତ୍ୱା ସହ କୁମାରେହି, ୱିହାରଂ ସୋ କୁମାରକୋ ।
ବୋଧିୟା ପୂଜିତଂ ସଙ୍ଖଂ, ଆଦାୟ ଧମିଥାମସା ॥
ଅସନୀପାତସଦ୍ଦୋୱ, ସଦ୍ଦୋ ତସ୍ସ ମହା ଅହୁ ।
ଉମ୍ମତ୍ତା ୱିୟ ଆସୁଂ ତେ, ଭୀତା ସବ୍ବେପି ଦାରକା ॥
ତେନ ସୋ ଆସି ଉମ୍ମାଦ-ଫୁସ୍ସ ଦେୱୋତି ପାକଟୋ ।
ଧନୁସିପ୍ପଂ ଅକାରେସି, ତସ୍ସ ୱଂସାଗତଂ ପିତା ॥
ସଦ୍ଦୱେଧି ୱିଜ୍ଜୁୱେଧୀ, ୱାଲୱେଧୀ ଚ ସୋ ଅହୁ ।
ୱାଲୁକାପୁଣ୍ଣସକଟଂ, ବଦ୍ଧଧମ୍ମସତଂ ତଥା ॥
ଅସନୋ ଦୁମ୍ବରମୟଂ, ଅଟ୍ଠସୋଳସଅଙ୍ଗୁଲଂ ।
ତଥା ଅୟୋ ଲୋହମୟଂ, ପଟ୍ଟଂଦି ଚତୁରଙ୍ଗଲି ॥
ନିବ୍ବେଧୟତିକଣ୍ଣେନ, କଣ୍ଡୋ ତେନ ୱିସଜ୍ଜିତୋ ।
ଥଲେ ଅଟ୍ଠୁସଭଂ ୟାତି, ଜଲେ ତୁ ଉସଭଂ ପନ ॥
ତଂ ସୁଣିତ୍ୱା ମହାରାଜା, ପୱତ୍ତିଂ ପିତୁସନ୍ତିକା ।
ତମ୍ପି ଆଣାପୟିତ୍ୱାନ, ଗାମଣିମ୍ହି ଅୱାସୟି ॥
ତୁଲାଧାରନଗାସନ୍ନେ, ୱିହାରୱାପି ଗାମକେ ।
ମତ୍ତକୁଟୁମ୍ବିସ୍ସ ସୁତୋ, ଅହୁ ୱସଭନାମକୋ ॥
ତଂ ସୁଜାତସରୀରତ୍ତା, ଲଭିୟ ୱସଭଂ ୱିଦୁଂ ।
ସୋ ୱୀସତିୱସ୍ସୁଦ୍ଦେସମ୍ହି, ମହାକାୟବଲୋ ଅହୁ ॥
ଆଦାୟ ସୋ କତିପୟୋ, ପୁରିସେୟେୱ ଆରଭି ।
ଖେତ୍ତତ୍ଥିକୋ ମହାୱାପିଂ, କରୋନ୍ତୋ ତଂ ମହବ୍ବଲୋ ॥
ଦସହି ଦ୍ୱାଦସହି ୱା, ୱହିତବ୍ବେ ଧୁରେହିପି ।
ୱହନ୍ତୋ ପଂସୁପିଣ୍ଡେ ସୋ, ଲହୁଂ ୱାପିଂ ସମାପୟି ॥
ତେନ ସୋ ପାକଟୋ ଆସି, ତମ୍ପି ଆଦାୟ ଭୂମିପୋ ।
ଦତ୍ୱା ତଂ ତସ୍ସ ସକ୍କାରଂ, ଗାମଣିସ୍ସ ଅଦାସି ତଂ ॥
ୱସଭୋଦକୱାରୋତି, କଂ ଖେତ୍ତଂ ପାକଟଂ ଅହୁ ।
ଏୱଂ ଲଭିୟାୱସଭୋ, ୱସି ଗାମଣିସନ୍ତିକେ ॥
ମହାୟୋଧାନମେତେସଂ, ଦସନ୍ନମ୍ପି ମହିପତି ।
ପୁତ୍ତସ୍ସ ସକ୍କାରସମଂ, ସକ୍କାରଂ କାରୟି ତଦା ॥
ଆମନ୍ତେତ୍ୱା ମହାୟୋଧେ, ଦସାପି ଚ ଦିସମ୍ପତି ।
‘‘ୟୋଧେ ଦସଦସେ’କେକୋ, ଏସଥା’ତି ଉଦାହରି ॥
ତେ ତଥେୱା’ନୟୁଂ ୟୋଧେ, ତେସମ୍ପାହ ମହୀପତି ।
ତସ୍ସ ୟୋଧସହସ୍ସାପି, ତଥେୱ ପରିୟେସିତୁଂ ॥
ତଥା ତେପା’ନୟୁଂ ୟୋଧେ, ତେସମ୍ପାହଂ ମହୀପତି ।
ପୁନୟୋଧସହସ୍ସସ୍ସ, ତଥେୱ ପରିୟେସିତୁଂ ॥
ତଥା ତେପା’ନୟୁଂ ୟୋଧେ, ସବ୍ବେ ସମ୍ପିଣ୍ଡିତା ତୁ ତେ ।
ଏକାଦସସହସ୍ସାନି, ୟୋଧାସତଂ ତଥା ଦସ ॥
ସବ୍ବେ ତେ ଲଦ୍ଧସକ୍କାରା, ଭୂମିପାଲେନ ସବ୍ବଦା ।
ଗାମଣିଂ ରାଜପୁତ୍ତଂ ତଂ, ୱସିଂସୁ ପରିୱାରିୟ ॥
ଇତି ସୁଚରିତଜାତବ୍ଭୁତଂ,
ସୁଣିୟ ନରୋ ମତିମା ସୁଖତ୍ତିକୋ ।
ଅକୁସଲପଥତୋ ପରମ୍ମୁଖୋ,
କୁସଲପଥେ’ଭିରମେୟ୍ୟ ସବ୍ବଦାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ୟୋଧଲାଭୋ ନାମ
ତେୱୀସତିମୋ ପରିଚ୍ଛେଦୋ ।
ଚତୁୱୀସତିମ ପରିଚ୍ଛେଦ
ଦ୍ୱେଭାତିକୟୁଦ୍ଧଂ
ହତ୍ଥସ୍ସ ଥରୁକମ୍ମସ୍ସ, କୁସଲୋ କତୁପାସନୋ ।
ସୋ ଗାମଣିରାଜସୁତୋ, ମହାଗାମେ ୱସୀ ତଦା ॥
ରାଜା ରାଜସୁତଂ ତିସ୍ସଂ, ଦୀଘୱାପିମ୍ହି ୱାସୟି ।
ଆରକ୍ଖିତୁଂ ଜନପଦଂ, ସମ୍ପନ୍ନ ବଲୱାହନଂ ॥
କୁମାରୋ ଗାମଣିକାଲେ, ସମ୍ପସ୍ସନ୍ତୋ ବଲଂ ସକଂ ।
‘‘ୟୁଜ୍ଝିସ୍ସଂ ଦମିଳେହୀ’’ତି, ପିତୁରଞ୍ଞୋ କଥାପୟୀ ॥
ରାଜା ତଂ ଅନୁରକ୍ଖନ୍ତୋ, ‘‘ଓରଗଙ୍ଗଂ ଅଲଂ’’ ଇତି ।
ୱାରେସି ୟାୱତତିୟଂ, ସୋ ତଥେୱ କଥାପୟୀ ॥
ପିତା ମେ ପୁରିସୋ ହୋନ୍ତୋ, ନେ’ୱଂ ୱକ୍ଖତି ତେନି’ଦଂ ।
ପିଲନ୍ଧତୂତି ପେସେସି, ଇତ୍ଥାଲଙ୍କାରମସ୍ସ ସୋ ॥
ରାଜା’ହ ତସ୍ସ କୁଜ୍ଝିତ୍ୱା, ‘‘କରୋଥ ହେମସଙ୍ଖଲିଂ ।
ତାୟ ତଂ ବନ୍ଧୟିସ୍ସାମି, ନା’ଞ୍ଞଥା ରକ୍ଖିୟୋ ହି ସୋ ॥
ପଲାୟିତ୍ୱାନ ମଲୟଂ, କୁଜ୍ଝିତ୍ୱା ପିତୁନୋ ଅଗା ।
ଦୁଟ୍ଠତ୍ତାୟେୱ ପିତରି, ଆହୁ ତଂ ଦୁଟ୍ଠଗାମଣି ॥
ରାଜା’ଥ ଆରଭୀ କାତୁଂ, ମହାମଙ୍ଗଲଚେତିୟଂ ।
ନିଟ୍ଠିତେ ଚେତିୟେ ସଙ୍ଘଂ, ସନ୍ନିପାତୟି ଭୂପତି ॥
ଦ୍ୱାଦସା’ସୁଂ ସହସ୍ସାନି, ଭିକ୍ଖୂ ଚିତ୍ତଲପବ୍ବତା ।
ତତୋ ତତୋ ଦ୍ୱାଦସେୱ, ସହସ୍ସାନି ସମାଗମୁଂ ॥
କତ୍ୱାନ ଚେତିୟମହଂ, ରାଜା ସଙ୍ଘସ୍ସ ସମ୍ମୁଖା ।
ସବ୍ବେ ୟୋଧେ ସମାନେତ୍ୱା, କାରେସି ସପଥଂ ତଦା ॥
‘‘ପୁତ୍ତାନଂ କଲହଟ୍ଠାନଂ, ନ ଗଚ୍ଛିସ୍ସାମ ନୋ’’ଇତି ।
ଅକଂସୁ ସପଥଂ ସବ୍ବେ, ତଂ ୟୁଦ୍ଧଂ ତେନ ନାଗମୁଂ ॥
ଚତୁସଟ୍ଠି ୱିହାରେ ସୋ, କାରାପେତ୍ୱା ମହୀପତି ।
ତତ୍ତକାନେୱ ୱସ୍ସାନି, ଠତ୍ୱା ମରିତହିଂ ତଦା ॥
ରଞ୍ଞୋ ସରୀରଂ ଗାହେତ୍ୱା, ଛନ୍ନୟାନେନ ରାଜିନି ।
ନେତ୍ୱା ତିସ୍ସ ମହାରାମଂ, ତଂ ସଙ୍ଘସ୍ସ ନିୱେଦୟି ॥
ସୁତ୍ୱା ତିସ୍ସକୁମାରୋ ତଂ, ଆଗନ୍ତ୍ୱା ଦୀଘୱାପିତୋ ।
ସରୀରକିଚ୍ଚଂ କାରେତ୍ୱା, ସକ୍କଚ୍ଚଂ ପିତୁନୋ ସୟଂ ॥
ମାତରଂ କଣ୍ଡୁଲଂ ହତ୍ଥିଂ, ଆଦିୟିତ୍ୱା ମହବ୍ବଲୋ ।
ଭାତୁଭୟା ଦୀଘୱାପିଂ, ଅଗମାସି ଲହୁଂ ତତୋ ॥
ତଂ ପୱତ୍ତିଂ ନିୱେଦେତୁଂ, ଦୁଟ୍ଠଗାମଣି ସନ୍ତିକଂ ।
ଲେଖଂ ଦତ୍ୱା ୱିସଜ୍ଜେସୁଂ, ସଚ୍ଚେମଚ୍ଚା ସମାଗତା ॥
ସୋ ଗୁତ୍ତହାଲମାଗନ୍ତ୍ୱା, ତତ୍ଥ ଚାରେ ୱିସଜ୍ଜିୟ ।
ମହାଗାମମୁପଗନ୍ତ୍ୱା, ସୟଂ ରଜ୍ଜେ’ଭିସେଚୟି ॥
ମାତତ୍ଥଂ କଣ୍ଡୂଲତ୍ଥଞ୍ଚ, ଭାତୁଲେଖଂ ୱିସଜ୍ଜୟି ।
ଅଲଦ୍ଧା ୟାୱତତିୟଂ, ୟୁଦ୍ଧାୟ ସମୁପାଗମି ॥
ଅହୁ ଦ୍ୱିନ୍ନଂ ମହାୟୁଦ୍ଧଂ, ଚୂଳଙ୍ଗଣିୟପିଟ୍ଠିୟଂ ।
ତତ୍ଥ ନେକସହସ୍ସାନି, ପତିଂସୁ ରାଜିନୋ ନରା ॥
ରାଜା ଚ ତିସ୍ସାମଚ୍ଚୋ ଚ, ୱଳୱାଦୀଘୁତୁନିକା ।
ତୟୋୟେୱ ପଲାୟିଂସୁ, କୁମାରୋ ଅନୁବନ୍ଧିତେ ॥
ଉଭିନ୍ନମନ୍ତରେ ଭିକ୍ଖୂ, ମନ୍ତୟିଂସୁ ମହୀଧରଂ ।
ତଂ ଦିସ୍ୱା ‘‘ଭିକ୍ଖୁସଙ୍ଘସ୍ସ, କମ୍ମଂ’’ ଇତି ନିୱତ୍ତି ସୋ ॥
କପ୍ପକନ୍ଦରନଜ୍ଜାସୋ, ଜୱମାଲିତିତ୍ଥମାଗତୋ ।
ରାଜା’ହ ତିସ୍ସମଚ୍ଚଂ ତଂ, ‘‘ଛାତଜ୍ଝତ୍ତା ମୟଂ’’ଇତି ॥
ସୁୱଣ୍ଣସରକେ ଖିତ୍ତ-ଭତ୍ତଂ ନୀହରିତସ୍ସ ସୋ ।
ସଙ୍ଘେ ଦତ୍ୱା ଭୁଞ୍ଜନତୋ, କାରେତ୍ୱା ଚତୁଭାଗକଂ ॥
‘‘ଘୋସେହି କାଲ’’ମିଚ୍ଚା’ହ,
ତିସ୍ସୋ କାଲମଘୋସୟି ।
ସୁଣିତ୍ୱା ଦିବ୍ବସୋତେନ,
ରଞ୍ଞୋ ସକ୍ଖାୟ ଦାୟକୋ ॥
ଥେରୋ ପିୟଙ୍ଗୁ ଦୀପଟ୍ଠୋ, ଥେରଂ ତତ୍ଥ ନିୟୋଜୟି ।
ତିସ୍ସଂ କୁଟୁମ୍ବିକସୁତଂ, ସୋ ତତ୍ଥ ନଭସା’ଗମା ॥
ତସ୍ସ ତିସ୍ସୋ କରାପତ୍ତ-ଆଦାୟା’ଦାସି ରାଜିନୋ ।
ସଙ୍ଘସ୍ସ ଭାଗଂ ସମ୍ଭାଗଂ, ରାଜା ପତ୍ତେ ଖିପାପୟି ॥
ସମ୍ଭାଗଂ ଖିପି ତିସ୍ସୋ ଚ, ସମ୍ଭାଗଂ ୱଳୱାପି ଚ ।
ନ ଇଚ୍ଛିତସ୍ସାଭାଗଞ୍ଚ, ତିସ୍ସୋ ପତ୍ତମ୍ହି ପକ୍ଖିପି ॥
ଭତ୍ତସ୍ସ ପୁଣ୍ଣପତ୍ତଂ ତଂ, ଅଦାଥେରସ୍ସ ଭୂପତି ।
ଅଦା ଗୋତମଥେରସ୍ସ, ସୋ ଗନ୍ତ୍ୱା ନଭସା ଲହୁଂ ॥
ଭିକ୍ଖୂନଂ ଭୁଞ୍ଜମାନାନଂ, ଦତ୍ୱା ଆଲୋପଭାଗସୋ ।
ପଞ୍ଚସତାନଂ ସୋ ଥେରୋ, ଲଦ୍ଧେହି ତୁ ତଦନ୍ତିକା ॥
ଭାଗେହି ପତ୍ତଂ ପୂରେତ୍ୱା, ଆକାସେ ଖିପି ରାଜିନୋ ।
ଦିସ୍ୱା’ ଗତଂ ଗହେତ୍ୱା ତଂ, ତିସ୍ସୋ ଭୋଜିସି ଭୂପତିଂ ॥
ଭୁଞ୍ଜିତ୍ୱାନ ସୟଞ୍ଜାପି, ୱଳୱଞ୍ଚ ଅଭୋଜୟି ।
ସତ୍ତାହଂ ଚୁମ୍ବଟଂ କତ୍ୱା, ରାଜା ପତ୍ତଂ ୱିସଜ୍ଜୟି ॥
ଗନ୍ତ୍ୱାନ ସୋ ମହାଗାମଂ, ସମାଦାୟ ବଲଂ ପୁନ ।
ସଟ୍ଠିସହସ୍ସଂ ୟୁଦ୍ଧାୟ, ଗନ୍ତ୍ୱା ୟୁଜ୍ଝି ସଭାତରା ॥
ରାଜା ୱଳୱମାରୁୟ୍ହ, ତିସ୍ସୋ କଣ୍ଡୂଲ ହତ୍ଥିନଂ ।
ଦ୍ୱେ ଭାତରୋ ସମାଗଞ୍ଛୁଂ, ୟୁଜ୍ଝମାନା ରଣେ ତଦା ॥
ରାଜା କରିଂ କରିତ୍ୱ’ନ୍ତୋ, ୱଳୱାମଣ୍ଡଲଂ ଅକା ।
ତଥାପି ଛିଦ୍ଦଂ ନୋ ଦିସ୍ୱା, ଲଙ୍ଘା ପେତୁଂ ମତିଂଅକା ॥
ୱଳୱଂ ଲଙ୍ଘୟିତ୍ୱାନ, ହତ୍ଥିନଂ ଭାତିକୋ’ପରି ।
ତୋମରଂ ଖିପି ଚମ୍ମଂୱ, ୟଥା ଛିଜ୍ଜତି ପିଟ୍ଠିୟଂ ॥
ଅନେକାନି ସହସ୍ସାନି, କୁମାରସ୍ସ ନରାତହିଂ ।
ପତିଂସୁ ୟୁଦ୍ଧେ ୟୁଜ୍ଝନ୍ତା, ଭିଜ୍ଜ ଚେୱ ମହବ୍ବଲଂ ॥
‘‘ଆରୋହକସ୍ସ ୱେକଲ୍ଲା, ଇତ୍ଥୀ ମଂ ଲଙ୍ଘୟୀ’’ଇତି ।
କୁଦ୍ଧୋକରୀ ତଂ ଚାଲେନ୍ତୋ, ରୁକ୍ଖମେକ ମୁପାଗମି ॥
କୁମାରୋ ଆରୁହୀ ରୁକ୍ଖଂ, ହତ୍ଥୀ ସାମିମୁପାଗମି ।
ତମାରୁୟ୍ହ ପଲାୟନ୍ତଂ, କୁମାରୋ ମନୁବନ୍ଧି ସୋ ॥
ପୱିସିତ୍ୱା ୱିହାରଂ ସୋ, ମହାଥେର ଘରଂଗତୋ ।
ନିପଜ୍ଜହେଟ୍ଠା ମଞ୍ଚସ୍ସ, କୁମାରୋ ଭାତୁନୋଭୟା ॥
ପସାରୟି ମହାଥେରୋ, ଚୀୱରଂ ତତ୍ଥ ମଞ୍ଚକେ ।
ରାଜା ଅନୁପଦଂ ଗନ୍ତ୍ୱା, ‘‘କୁହିଂ ତିସ୍ସୋ’’ତି ପୁଚ୍ଛଥ ॥
‘‘ମଞ୍ଚେ ତତ୍ଥ ମହାରାଜ’’, ଇତି ଥେରୋ ଅୱୋଚ ତଂ ।
ହେଟ୍ଠା ମଞ୍ଚେତି ଜାନିତ୍ୱା, ତତୋ ନିକ୍ଖମ୍ମ ଭୂପତି ॥
ସମନ୍ତତୋ ୱିହାରସ୍ସ, ରକ୍ଖଂ କାରୟି ତଂ ପନ ।
ପଞ୍ଚକମ୍ହି ନିପଜ୍ଜେତ୍ୱା, ଦତ୍ୱା ଉପରି ଚୀୱରଂ ॥
ମଞ୍ଚପାଦେସୁ ଗଣ୍ହିତ୍ୱା, ଚତ୍ତାରୋ ଦହରା ୟତୀ ।
ମତଭିକ୍ଖୁନିୟାମେନ, କୁମାରଂ ବହି ନୀହରୁଂ ॥
ନୀୟମାନନ୍ତୁ ତଂ ଞତ୍ୱା, ଇଧ ମାହ ମହୀପତି ।
‘‘ତିସ୍ସ ତ୍ୱଂ କୁଲଦେୱତାନଂ, ସୀସେ ହୁତ୍ୱାନ ନିୟ୍ୟାସି ॥
ବଲକ୍କାରେନ ଗହଣଂ, କୁଲଦେୱେହି ନତ୍ଥି ମେ ।
ଗୁଣଂ ତ୍ୱଂ କୁଲଦେୱାନଂ, ସରେୟ୍ୟାସି କଦାଚିପି’’ ॥
ତତୋୟେୱ ମହାଗାମଂ, ଅଗମାସି ମହୀପତି ।
ଆଣାପେସି ଚ ତତ୍ଥେୱ, ମାତରଂ ମାତୁଗାରୱୋ ॥
[ୱସ୍ସାନି ଅଟ୍ଠସଟ୍ଠିଂସୋ, ଅଟ୍ଠା ଧମ୍ମଟ୍ଠମାନସୋ ।
ଅଟ୍ଠସଟ୍ଠିୱିହାରେ ଚ, କାରାପେସି ମହୀପତି ॥]
ନିକ୍ଖାମିତୋ ସୋ ଭିକ୍ଖୂହି, ତିସ୍ସୋରାଜ ସୁତୋ ପନ ।
ଦୀଘୱାପିଂ ତତୋୟେୱ, ଅଗମ’ଞ୍ଞତରୋ ୱିୟ ॥
କୁମାରୋ ଗୋଧଗତ୍ତସ୍ସ, ତିସ୍ସଥେରସ୍ସ ଆହ ସୋ ।
‘‘ସାପରାଧୋ ଅହଂ ଭନ୍ତେ, ଖମାପେସ୍ସାମି ଭାତରଂ ॥
ୱେୟ୍ୟାୱଚ୍ଚକରା କାରଂ, ତିସ୍ସଂ ପଞ୍ଚସତାନି ଚ ।
ଭିକ୍ଖୁନମାଦିୟିତ୍ୱା ସୋ, ଥେରୋ ରାଜ ମୁପାଗମି ॥
ରାଜପୁତ୍ତଂ ଠପେତ୍ୱାନ, ଥେରୋ ସୋପାନ ମତ୍ଥକେ ।
ସସଙ୍ଘୋ ପାୱିସି ସଦ୍ଧୋ, ନିସୀଦାୱିୟ ଭୂମିପୋ ॥
ଉପାନୟୀ ୟାଗୁଆଦିଂ, ଥେରୋ ପତ୍ତଂ ୱିଧେସିସୋ ।
‘‘କିନ୍ତି ୱୁତ୍ତୋ’ବ୍ରୱି ତିସ୍ସଂ, ଆଦାୟ ଅଗତା’’ଇତି ॥
‘‘କୁହିଂ ଚୋରୋ’’ତି ୱୁତ୍ତୋ ଚ, ଠିତଠାନଂ ନିୱେଦୟି ।
ୱିହାରଦେୱୀ ଗନ୍ତ୍ୱାନ, ଛାଦିୟଠାସି ପୁତ୍ତକ ॥
ଦାସଭାୱୋ ଇଦାନି ନୋ ।
ସାମଣେରଂ ପେସୟେଥ,
ତୁମ୍ହେ ମେ ସତ୍ତୱସ୍ସିକଂ ॥
ଜନକ୍ଖୟଂ ୱିନାୟେୱ, କଲହୋ ନ ଭୱେୟ୍ୟ ନୋ ।
ରାଜା ସଙ୍ଘସ୍ସ ଦୋସେସୋ, ଭଂଘେ ଦଣ୍ଡଂ କରିସ୍ସତି ॥
ହେସ୍ସତା’ଗତକିଚ୍ଚା ୱୋ,
ୟାଗାଦିଂ ଗଣ୍ହାଥାତି ସୋ ।
ଦତ୍ୱା ତଂ ଭିକ୍ଖୁସଙ୍ଘସ୍ସ,
ପକ୍କୋସିତ୍ୱାନ ଭାତରଂ ॥
ତତ୍ଥେୱ ସଙ୍ଘମଜ୍ଝମ୍ହି, ନିସିନ୍ନୋ ଭାତରା ସହ ।
ଭୁଞ୍ଜିତ୍ୱା ଏକତୋୟେୱ, ଭିକ୍ଖୁ ସଙ୍ଘଂ ୱିସଜ୍ଜୟି ॥
ସସ୍ସକମ୍ମାନି କାରେତୁଂ, ତିସ୍ସଂ ତତ୍ଥେୱ ପାହିଣି ।
ସୟମ୍ପି ଭେରିଂ ଚାରେତ୍ୱା, ସସ୍ସକମ୍ମାନି କାରୟି ॥
ଇତି ୱେରମନେକୱିକପ୍ପଚିତଂ,
ସମୟନ୍ତି ବହୁଂ ଅପି ସପ୍ପୁରିସଂ ।
ଇତି ଚିନ୍ତିୟ କୋହି ନରୋ ମତିମା,
ନ ଭୱେୟ୍ୟ ପରେସୁ ସୁସନ୍ତ ମନୋତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦ୍ୱେଭାତିକୟୁଦ୍ଧଂ ନାମ
ଚତୁୱୀସତିମୋ ପରିଚ୍ଛେଦୋ ।
ପଞ୍ଚୱୀସତିମ ପରିଚ୍ଛେଦ
ଦୁଟ୍ଠଗାମଣି ୱିଜୟୋ
ଦୁଟ୍ଠଗାମଣିରାଜା’ଥ, କତ୍ୱାନ ଜନସଙ୍ଗହଂ ।
କୁନ୍ତେ ଧାତୁଂ ନିଧାପେତ୍ୱା, ସୟୋଗ୍ଗବଲୱାହନୋ ॥
ଗନ୍ତ୍ୱା ତିସ୍ସମହାରାମଂ, ୱନ୍ଦିତ୍ୱା ସଙ୍ଘମବ୍ରୱି ।
‘‘ପାରଗଙ୍ଗଂ ଗମିସ୍ସାମି, ଜୋତେତୁଂ ସାସନଂ ଅହଂ ॥
ସକ୍କାତୁଂ ଭିକ୍ଖୱୋ ଦେଥ, ଅମ୍ହେହି ସହଗାମିନୋ ।
ମଙ୍ଗଲଞ୍ଚେୱ ରକ୍ଖା ଚ, ଭିକ୍ଖୂନଂ ଦସ୍ସନଂ ହିନୋ ॥
ଅଦାସି ଦଣ୍ଡକମ୍ମତ୍ଥଂ, ସଙ୍ଘୋ ପଞ୍ଚସତଂ ୟତୀ ।
ଭିକ୍ଖୁସଙ୍ଘତମାଦାୟ, ତତୋ ନିକ୍ଖମ୍ମ ଭୂପତି ॥
ସୋଧାପେତ୍ୱାନ ମଲୟେ, ଇଧାଗମନମଞ୍ଜସଂ ।
କଣ୍ଡୁଲଂ ହତ୍ଥିମାରୁୟ୍ହ, ୟୋଧେହି ପରିୱାରିତୋ ॥
ମହତା ବଲକାୟେନ, ୟୁଦ୍ଧାୟ ଅଭିନିକ୍ଖମି ।
ମହାଗାମେନ ସମ୍ବଦ୍ଧା, ସେନାଗା’ଗୁତ୍ତହାଲକଂ ॥
ମହିୟଙ୍ଗଣମାଗମ୍ମ, ଛତ୍ତଂ ଦମିଳମଗ୍ଗହୀ ।
ଘାତେତ୍ୱା ଦମିଳେ ତତ୍ଥ, ଆଗନ୍ତ୍ୱା ଅମ୍ବତିତ୍ଥକଂ ॥
ଗଙ୍ଗା ପରିଖାସମ୍ପନ୍ନଂ, ତିତ୍ଥମ୍ବଦମିଳଂ ପନ ।
ୟୁଜ୍ଝଂ ଚତୂହି ମା ସେହି, କତହତ୍ଥଂ ମହବ୍ବଲଂ ॥
ମାତରଂ ଦସ୍ସୟିତ୍ୱାନ, ତେନ ଲେସେନ ଅଗ୍ଗହି ।
ତତୋଓରୁୟ୍ହ ଦମିଳେ, ସତ୍ତରାଜେ ମହବ୍ବଲେ ॥
ଏକାହେନେୱ ଗଣ୍ହିତ୍ୱା, ଖେମଂ କତ୍ୱା ମହବ୍ବଲୋ ।
ବଲସ୍ସା’ଦା ଧନଂ ତେନ, ଖେମାରାମୋତି ୱୁଚ୍ଚତି ॥
ମହାକୋଟ୍ଠନ୍ତରେ ସୋବ୍ଭେ, ଦୋଣୋ ଗୱରମଗ୍ଗହୀ ।
ହାଲକୋଲେ ଇସ୍ସରିୟଂ, ନାଳିସୋବ୍ଭମ୍ହି ନାଳିକଂ ॥
ଦୀଘାଭୟଗଲ୍ଲକମ୍ହି, ଗଣ୍ହି ଦୀଘାଭୟମ୍ପି ଚ ।
କଚ୍ଛିପିଟ୍ଠେ କପିସୀସଂ, ଚତୁମାସେନ ଅଗ୍ଗହି ॥
କୋଟନଗରେ କୋଟଞ୍ଚ, ତତୋ ହାଲୱହାଣକଂ ।
ୱହିଟ୍ଠେ ୱହିଟ୍ଠଦମିଳଂ, ଗାମଣିମ୍ହି ଚ ଗାମଣିଂ ॥
କୁମ୍ଭଗାମମ୍ହି କୁମ୍ଭଞ୍ଚ, ନନ୍ଦିଗାମମ୍ହି ନନ୍ଦିକଂ ।
ଗଣ୍ହି ଖାଣୁଂ ଖାଣୁଗାମେ, ଦ୍ୱେ ତୁ ତମ୍ବୁଣ୍ଣମେ ପନ ॥
ମାତୁଲଂ ଭାଗିନେୟ୍ୟଞ୍ଚ, ତମ୍ବଉଣ୍ଣମନାମକେ ।
ଜମ୍ବୁଚଗ୍ଗହୀ ସୋସୋ ଚ, ଗାମୋ’ହୁ ତଂ ତଦୱ୍ହୟୋ ॥
‘‘ଅଜାନିତ୍ୱା ସକଂସେନଂ, ଘାତେନ୍ତି ସଜନା’’ ଇତି ।
ସୁତ୍ୱାନ ସଚ୍ଚକିରିୟଂ, ଅକରୀ ତତ୍ଥ ଭୂପତି ॥
ରଜ୍ଜସୁଖାୟ ୱାୟାମୋ, ନାୟଂ ମମ କଦାଚିପି ।
ସମ୍ବୁଦ୍ଧ ସାସନସ୍ସେୱ, ଠପନାୟ ଅୟଂ ମମ ॥
ତେନ ସଚ୍ଚେନ ମେସେନା-କାୟୋପଗତଭଣ୍ଡିକଂ ।
ଜାଲୱଣ୍ଣଂୱ ହୋତୂତି, ତଂ ତଥେୱତଦା ଅହୁ ॥
ଗଙ୍ଗାତୀରମ୍ହି ଦମିଳା, ସବ୍ବେ ଘାତିତସେସକା ।
ୱିଜିତଂ ନଗରଂ ନାମ, ସରଣତ୍ଥାୟ ପାୱିସୁଂ ॥
ଫାସୁକେ ଅଙ୍ଗଣଠାନେ, ଖନ୍ଧାୱାରଂ ନିୱେସୟି ।
ତଂ ଖନ୍ଧାୱାର… ଠୀତି, ନାମେନା’ହୋସି ପାକଟଂ ॥
ୱିଜିତନଗରଗାହତ୍ଥଂ, ୱୀମଂସନ୍ତୋ ନରାଧିପୋ ।
ଦିସ୍ୱା’ୟନ୍ତଂ ନନ୍ଦିମିତ୍ତଂ, ୱିସଜ୍ଜାପେସି କଣ୍ଡୁଲଂ ॥
ଗଣ୍ହିତୁଂ ଆଗତଂ ହତ୍ଥିଂ, ନନ୍ଦୀମିତ୍ତୋ କରେହିତଂ ।
ଉଭୋ ଦନ୍ତେ ପୀଳୟିତ୍ୱା, ଉକ୍କୁଟିକଂ ନିସୀଦୟି ॥
ହତ୍ଥିନା ନନ୍ଦିମିତ୍ତୋ ତୁ, ୟସ୍ମା ୟତ୍ଥ ଅୟୁଜ୍ଝି ସୋ ।
ତସ୍ମା ତତ୍ଥ ତତୋ ଗାମୋ, ହତ୍ଥିପୋରୋତି ୱୁଚ୍ଚତି ॥
ୱୀମଂସିତ୍ୱା ଉଭୋ ରାଜା, ୱିଜିତଂ ନଗରଂ ଅଗା ।
ୟୋଧାନଂ ଦକ୍ଖିଣଦ୍ୱାରେ, ସଙ୍ଗାମୋ ଆସି ଭିଂସନୋ ॥
ପୁରତ୍ଥିମମ୍ହି ଦ୍ୱାରମ୍ହି, ସୋ ୱେଳୁସୁମନୋ ପନ ।
ଅନେକ ସଙ୍ଖେ ଦମିଳେ, ଅସ୍ସାରୁଳ୍ହେ ଅଘାତୟି ॥
ଦ୍ୱାରଂ ଥକେସୁଂ ଦମିଳା, ରାଜା ୟୋଧେ ୱିସଜ୍ଜୟି ।
କଣ୍ଣୁଲୋ ନନ୍ଦିମିତ୍ତୋ ଚ, ସୁରନିମିଲୋ ଚ ଦକ୍ଖିଣେ ॥
ଥେର ପୁତ୍ତୋ ଚ ତେ ତୟୋ ।
ଦ୍ୱାରେସୁ ତୀସୁ କମ୍ମାନି,
ଇତରେସୁ ତଦା କରୁଂ ॥
ନଗରଂ ତଂ ତିପରିଖଂ, ଉଚ୍ଚପାକାର ଗୋପିତଂ ।
ଅୟୋକମ୍ମକତଦ୍ୱାରଂ, ଅରୀହି ଦୁପ୍ପଧଂସିୟଂ ॥
ଜାଣୂହି ଠତ୍ୱା ଦାଠାହି, ଭିନ୍ଦିତ୍ୱାନ ସିଲାୟୁଧା ।
ଇଟ୍ଠକା ଚେୱ ହତ୍ଥି ସୋ, ଅୟୋଦ୍ୱାରମୁପାଗମି ॥
ଗୋପୁରଟ୍ଠା ତୁ ଦମିଳା, ଖିପିଂସୁ ୱିୱିଧା’ୟୁଧେ ।
ପକ୍କଂ ଅୟୋଗୁଳଞ୍ଚେୱ, କଥିକଞ୍ଚ ସିଲେସିକଂ ॥
ପିଟ୍ଠିଂ ଖିତ୍ତେ ସିଲେସମ୍ହି, ଧୂପାୟନ୍ତେ’ଥ କଣ୍ଡୁଲୋ ।
ୱେଦନଟ୍ଟୋ’ଦକଠାନଂ, ଗନ୍ତ୍ୱାନ ତତ୍ଥ ଓଗହୀ ॥
ନ ଇଦଂ ସୁରାପାଣଂ ତେ, ଅୟୋଦ୍ୱାର ୱିଘାଟନଂ ।
ଗଚ୍ଛ ଦ୍ୱାରଂ ୱିଘାଟେହି, ଇଚ୍ଚାହଗୋଟ୍ଠୟିମ୍ବରୋ ॥
ସୋ ମାନଂ ଜନୟିତ୍ୱାନ, କୋଞ୍ଚଂ କତ୍ୱା ଗଜୁତ୍ତମୋ ।
ଉଦକା ଉଟ୍ଠହିତ୍ୱାନ, ଥଲେ ଅଟ୍ଠାସି ଦପ୍ପୱା ॥
ହତ୍ଥିୱଜ୍ଜେ ୱିୟୋଜେତ୍ୱା, ସିଲେସଂ ଓସଧଂ ଅକା ।
ରାଜା ଆରୁୟ୍ହ ହତ୍ଥିଂ ତଂ, କୁମ୍ଭେ ଫୁସିୟପାଣିନା ॥
‘‘ଲଂକାଦୀପମ୍ହି ସକଲେ, ରଜ୍ଜଂ ତେ ତାତ କଣ୍ଡୁଲ ।
ଦମ୍ମୀ’’ତି ତଂ ତୋସୟିତ୍ୱା, ଭୋଜେତ୍ୱା ୱରଭୋଜନଂ ॥
ୱେଠୟିତ୍ୱା ସାଟକେନ, କାରୟିତ୍ୱା ସୁୱମ୍ମିତଂ ।
ସତ୍ତଗୁଣଂ ମାହିସଚମ୍ମଂ, ବନ୍ଧେତ୍ୱା ଚମ୍ମପିଟ୍ଠିୟଂ ॥
ତସ୍ସୋ’ ପରିତେଲଚମ୍ମଂ, ଦାପେତ୍ୱା ତଂ ୱିସଜ୍ଜୟି ।
ଅସନୀୱିୟ ଗଜ୍ଜନ୍ତୋ, ସୋ ଗହେତ୍ୱା’ପଦ୍ଦୱେ ସହ ॥
ପଦରଂ ୱିଜ୍ଝି ଦାଠାହି, ଉମ୍ମାରଂ ପଦସା’ହନି ।
ସଦ୍ଧାରବାହଂ ତଂ ଦ୍ୱାରଂ, ଭୂମିୟଂ ସରୱଂ ପତି ॥
ଗୋପୁରେ ଦବ୍ବସମ୍ଭାରଂ, ପତନ୍ତଂ ହତ୍ତିପିଟ୍ଠିୟଂ ।
ବାହାହି ପରିହରିତ୍ୱାନ, ନନ୍ଦୀମିତ୍ତୋ ପୱଟ୍ଟୟି ॥
ଦିସ୍ୱାନ ତସ୍ସ କିରିୟଂ, କଣ୍ଡୁଲୋ ତୁଟ୍ଠମାନସୋ ।
ଦାଠାପୀଠନୱେରଂ ତଂ, ଛଡ୍ଢେସି ପଠମଂ କତଂ ॥
ଅତ୍ଥନୋ ପିଟ୍ଠିତୋୟେୱ, ପୱେସତ୍ଥାୟ କଣ୍ଡୁଲୋ ।
ନିୱତ୍ତିତ୍ୱାନ ଓଲୋକି, ୟୋଧଂ ତତ୍ଥ ଗଜୁତ୍ତମୋ ॥
‘‘ହତ୍ଥିନାକତମଗ୍ଗେନ, ନପ୍ପୱେକ୍ଖାମହଂ’’ଇତି ।
ନନ୍ଦୀମିତ୍ତୋ ୱିଚିନ୍ତେତ୍ୱା, ପାକାରଂ ହନି ବାହୁନା ॥
ସୋ ଅଟ୍ଠାରସହତ୍ଥୁଚ୍ଚୋ, ପତିଅଟ୍ଠୁସଭୋ କିର ।
ଓଲୋକି ସୁରନିମଲଂ, ଅନିଚ୍ଛଂ ସୋପି ତଂ ପଥଂ ॥
ଲଙ୍ଘୟିତ୍ୱାନ ପାକାରଂ,
ନଗରବ୍ଭନ୍ତରେ ପତି ।
ଭିନ୍ଦିତ୍ୱା ଦ୍ୱାରମେକେକଂ,
ଗୋଟ୍ଠୋ ସୋଣୋୱ ପାୱିସି ॥
ହତ୍ତୀ ଗହେତ୍ୱା ରଥଚକ୍କଂ, ମିତ୍ତୋ ସକଟପଞ୍ଜରଂ ।
ନାଳିକେରତରୁଂ ଗୋଟ୍ଠୋ, ନିମ୍ମଲୋ ଖଗ୍ଗମୁତ୍ତମଂ ॥
ତାଲରୁକ୍ଖଂ ମହାସୋଣୋ, ଥେରପୁତ୍ତୋ ମହାଗଦଂ ।
ୱିସୁଂ ୱିସୁଂ ୱୀଥିଗତା, ଦମିଳେ ତତ୍ଥ ଚୁଣ୍ଣୟୁଂ ॥
ୱିଜିତଂ ନଗରଂ ଭେତ୍ୱା, ଚତୁମାସେନ ଖତ୍ତିୟୋ ।
ତଥୋ ଗିରିଲକଂ ଗନ୍ତ୍ୱା, ଗିରିୟଂ ଦମିଳଂ ହନି ॥
ଗନ୍ତ୍ୱା ମହେଲନଗରଂ, ତିମହାପରିଖଂ ତତୋ ।
କଦମ୍ବ ପୁପ୍ଫୱଲ୍ଲୀହି, ସମନ୍ତା ପରିୱାରିତଂ ॥
ଏକଦ୍ୱାରଂ ଦୁପ୍ପୱେସଂ, ଚତୁମାସେ ୱସଂ ତହିଂ ।
ଗଣ୍ହି ମହେଲରାଜାନଂ, ମନ୍ତୟୁଦ୍ଧେନ ଭୂମିପୋ ॥
ତତୋ’ନୁରାଧନଗରଂ, ଆଗଚ୍ଛନ୍ତୋ ମହୀପତି ।
ଖନ୍ଧାୱାରଂ ନିୱେସେସି, ପରିତୋକାସପବ୍ବତଂ ॥
ମାସମ୍ହି ଜେଟ୍ଠମୂଲମ୍ହି, ତଳାକଂ ତତ୍ଥ କାରିୟ ।
ଜଲଂ କୀଳି ତହିଂ ଗାମୋ, ପୋସୋନନଗରୱ୍ହୟୋ ॥
ତଂ ୟୁଦ୍ଧାୟାଗତଂ ସୁତ୍ୱା, ରାଜାନଂ ଦୁଟ୍ଠଗାମଣିଂ ।
ଅମଚ୍ଚେ ସନ୍ନିପାତେତ୍ୱା, ଏଳାରୋ ଆହ ଭୂମିପୋ ॥
‘‘ସୋ ରାଜା ଚ ସୟଂୟୋଧୋ,
ୟୋଧା ଚସ୍ସ ମହୂକିର ।
ଅମଚ୍ଚୋ କିନ୍ନୁ କାତବ୍ବଂ,
କିନ୍ତି ମଞ୍ଞନ୍ତି ନୋ ଇମେ ॥
ଦୀଘଜତ୍ତୁପ୍ପଭୁତୟୋ, ୟୋଧା ଏଳାରରାଜିନୋ ।
‘‘ସୁୱେ ୟୁଦ୍ଧଂ କରିସ୍ସାମି’’, ଇତି ତେ ନିଚ୍ଛୟଂ କରୁଂ ॥
ଦୁଟ୍ଠଗାମଣିରାଜାପି, ମନ୍ତେତ୍ୱା ମାତୁୟା ସହ ।
ତସ୍ସା ମତେନ କାରେସି, ଦ୍ୱତ୍ତିଂସ ବଲକୋଟ୍ଠକେ ॥
ରାଜଚ୍ଛତ୍ତଧରେ ତତ୍ଥ, ଠପେସି ରାଜରୂପକେ ।
ଅବ୍ଭନ୍ତରେ କୋଟ୍ଠକେ ତୁ, ସୟଂ ଅଟ୍ଠାସି ଭୂପତି ॥
ଏଳାରରାଜା ସନ୍ନଦ୍ଧୋ, ମହାପବ୍ବତ ହତ୍ଥିନଂ ।
ଆରୁୟ୍ହ ଅଗମା ତତ୍ଥ, ସୟୋଗ୍ଗ ବଲୱାହନୋ ॥
ସଙ୍ଗାମେ ୱତ୍ତମାନମ୍ହି, ଦୀଘଜତ୍ତୁ ମହବ୍ବଲୋ ।
ଆଦାୟ ଖଗ୍ଗଫଲକଂ, ୟୁଜ୍ଝମାନୋ ଭୟାନକୋ ॥
ହତ୍ଥେ ଅଟ୍ଠରସୁ’ଗ୍ଗନ୍ତ୍ୱା, ନଭଂ ତଂ ରାଜରୂପକଂ ।
ଛିନ୍ଦିତ୍ୱା ଅସିନା ଭିନ୍ଦି, ପଠମଂ ବଲକୋଟ୍ଠକଂ ॥
ଏୱଂ ସେସେପି ଭିନ୍ଦିତ୍ୱା, ମଲକୋଟ୍ଠେ ମହବ୍ବଲୋ ।
ଠିତଂ ଗାମଣିରାଜେନ, ବଲକୋଟ୍ଠମୁପାଗମି ॥
ୟୋଧୋ ସୋ ସୁରନିମଲୋ, ଗଚ୍ଛନ୍ତଂ ରାଜିନୋ’ପରି ।
ସାୱେତ୍ୱା ଅତ୍ତନୋ ନାମଂ, ତମକ୍କୋସି ମହବ୍ବଲୋ ॥
ଇତରୋ ‘‘ତଂ ୱଧିସ୍ସ’’ନ୍ତି, କୁଦ୍ଧୋ ଆକାସମୁଗ୍ଗମି ।
ଇତରୋ ଓତରନ୍ତସ୍ସ, ଫଲକଂ ଉପନାମୟି ॥
‘‘ଛିନ୍ଦା ମେତଂ ସଫଲକଂ’’, ଇତି ଚିନ୍ତିୟ ସୋ ପନ ।
ଫଲକଂ ହନି ଖଗ୍ଗେନ, ତଂ ମୁଞ୍ଚିୟି’ ତରୋସୟି ॥
କପ୍ପେନ୍ତୋ ମୁତ୍ତଫଲକଂ, ଦୀଘଜତ୍ତୁ ତହିଂ ପତି ।
ଉଟ୍ଠାୟ ସୂରନିମିଲୋ, ପତିତଂ ସତ୍ତିୟା’ହନି ॥
ସଙ୍ଖଂ ଧମି ଫୁସ୍ସଦେୱୋ, ସେନା ଭିଜ୍ଜିତ୍ଥ ଦାମିଳି ।
ଏଳରୋପି ନିୱତ୍ତିତ୍ଥ, ଘାତେସୁଂ ଦମିଳେ ବହୂ ॥
ତତ୍ଥ ୱାପି ଜଲଂ ଆସି, ହତାନଂ ଲୋହିତା ୱିଲଂ ।
ତସ୍ମା କୁଲତ୍ଥୱା ପୀତି, ନାମତୋ ୱିସ୍ସୁତଂ ଅହୁ ॥
ଚରାପେତ୍ୱା ତହିଂ ଭେରିଂ, ଦୁଟ୍ଠଗାମଣି ଭୂପତି ।
‘‘ନ ହନିସ୍ସତୁ ଏଳାରଂ, ମଂମୁଞ୍ଚିୟ ପରୋ’’ଇତି ॥
ସନ୍ନଦ୍ଧୋ ସୟମାରୁୟ୍ହ, ସନ୍ନଦ୍ଧଂ କଣ୍ଡୁଲଂ କରିଂ ।
ଏଳାରଂ ଅନୁବନ୍ଧନ୍ତୋ, ଦକ୍ଖିଣଦ୍ୱାରମାଗମି ॥
ପୁରଦକ୍ଖିଣଦ୍ୱାରମ୍ହି, ଉଭୋ ୟୁଜ୍ଝିଂସୁ ଭୂମିପା ।
ତୋମରଂ ଖିପି ଏଳାରୋ, ଗାମଣି ତମୱଞ୍ଚୟି ॥
ୱିଜ୍ଝାପେସି ଚ ଦନ୍ତେହି, ତଂ ହତ୍ଥିଂ ସକହତ୍ଥିନା ।
ତୋମରଂ ଖିପି ଏଳାରଂ, ସହତ୍ଥି ତତ୍ଥ ସୋ ପତି ॥
ତତୋ ୱିଜିତସଙ୍ଗାମୋ, ସୟୋଗ୍ଗବଲୱାହନୋ ।
ଲଂକଂ ଏକାତପତ୍ତଂ ସୋ, କତ୍ୱାନ ପାୱିସି ପୁରଂ ॥
ପୁରମ୍ହି ଭେରିଂ ଚାରେତ୍ୱା, ସମନ୍ତା ୟୋଜନେ ଜନେ ।
ସନ୍ନିପାତିୟ କାରେସି, ପୂଜଂ ଏଳାରରାଜିନୋ ॥
ତଂ ଦେହପତିତଠାନେ, କୂଟାଗାରେନ ଝାପୟି ।
ଚେତିୟଂ ତତ୍ଥ କାରେସି, ପରିହାରମଦାସି ଚ ॥
ଅଜ୍ଜାପି ଲଂକାପତିନୋ, ତଂ ପଦେସସମୀପଗା ।
ତେନେୱ ପରିହାରେନ, ନ ୱାଦାପେନ୍ତି ତୂରିୟଂ ॥
ଏୱଂ ଦ୍ୱତ୍ତିଂସ ଦମିଳ, ରାଜାନୋ ଦୁଟ୍ଠଗାମଣି ।
ଗଣ୍ହିତ୍ୱା ଏକଚ୍ଛତ୍ତେନ, ଲଂକାରଜ୍ଜମକାସି ସୋ ॥
ୱିଜିତେ ନଗରେ ଭିନ୍ନେ, ୟୋଧୋ ସୋ ଦୀଘଜତ୍ତୁକୋ ।
ଏଳାରସ୍ସ ନିୱେଦେତ୍ୱା, ଭାଗିନେୟ୍ୟସ୍ସ ୟୋଧତଂ ॥
ତସ୍ସ ହଲ୍ଲୁକ ନାମସ୍ସ, ଭାଗିନେୟ୍ୟସ୍ସ ଅତ୍ତନୋ ।
ପେସୟୀ ଚାଗମତ୍ଥାୟ, ତସ୍ସ ସୁତ୍ୱାନ ହଲ୍ଲୁକୋ ॥
ଏଳାରଦଡ୍ଢଦିୱସା, ସତ୍ତମେ ଦିୱସେ ଇଧ ।
ପୁରିସାନଂ ସହସ୍ସେହି, ସଟ୍ଠିୟା ସହ ଓତରି ॥
ଓତିଣ୍ଣୋ ସୋ ସୁଣିତ୍ୱାପି, ପତନଂ ତସ୍ସ ରାଜିନୋ ।
‘‘ୟୁଜ୍ଝିସ୍ସାମୀ’’ତି ଲଜ୍ଜାୟ, ମହାତିତ୍ଥଂ ଇଧାଗମା ॥
ଖନ୍ଧାୱାରଂ ନିୱେସେସି, ଗାମେ କୋଳମ୍ବହାଲକେ ।
ରାଜା ତସ୍ସା’ଗମଂ ସୁତ୍ୱା, ୟୁଦ୍ଧାୟ ଅଭିନିକ୍ଖମି ॥
ୟୁଦ୍ଧସନ୍ନହ ସନ୍ନଦ୍ଧୋ, ହତ୍ଥିମାରୁୟ୍ହ କଣ୍ଡୁଲଂ ।
ହତ୍ଥସ୍ସ ରଥୟୋ ଧେହି, ପନ୍ତୀହି ଚ ଅନୁନକୋ ॥
ଉମ୍ମାଦଫୁସ୍ସୋ ଦେୱୋ ସୋ, ଦୀପେ ଅଗ୍ଗଧନୁଗ୍ଗହୋ ।
ଦସଡ୍ଢାୟୁଧସନଦ୍ଧୋ, ସେସୟୋଧା ଚ ଅନ୍ୱଗୁଂ ॥
ପୱତ୍ତେ ତୁମୂଲେ ୟୁଦ୍ଧେ, ସନ୍ନଦ୍ଧୋ ଭଲ୍ଲୁକୋ ତହିଂ ।
ରାଜାଭିମୁଖ ମାୟାସି, ନାଗରାଜା ତୁ କଣ୍ଡୁଲୋ ॥
ତଂ ୱେଗମନ୍ଦିଭାୱତ୍ଥଂ, ପଚ୍ଚୋସକ୍କି ସନିଂ ସନିଂ ।
ସେନାପି ସଦ୍ଧିଂ ତେନେୱ, ପଚ୍ଚୋସକ୍କି ସନିଂ ସନିଂ ॥
ରାଜାହ ‘‘ପୁବ୍ବେ ୟୁଦ୍ଧେସୁ, ଅଟ୍ଠୱୀସତିୟା ଅୟଂ ।
ନ ପଚ୍ଚୋସକ୍କି କିଂ ଏତଂ, ଫୁସ୍ସଦେୱା’’ତି ଆହ ସୋ ॥
ଜୟୋ ନୋ ପରମୋ ଦେୱ, ଜୟଭୂମି ମୟଂ ଗଜୋ ।
ପଚ୍ଚୋସକ୍କତି ପେକ୍ଖନ୍ତୋ, ଜୟଠାନମ୍ହି ଠସ୍ସତି ॥
ନାଗୋ’ଥ ପଚ୍ଚୋସକ୍କିତ୍ୱା, ଫୁସ୍ସଦେୱସ୍ସ ପସ୍ସତୋ ।
ମହାୱିହାରସୀମନ୍ତେ, ଅଟ୍ଠାସି ସୁପ୍ପତିଟ୍ଠିତୋ ॥
ତତ୍ରଟ୍ଠିତୋ ନାଗରାଜା, ଭଲ୍ଲୁକୋ ଦମିଳୋ ତହିଂ ।
ରାଜାଭିମୁଖମାଗନ୍ତ୍ୱା, ଉପ୍ପଣ୍ଡେସି ମହୀପତି ॥
ମୁଖଂ ପିଧାୟ ଖଗ୍ଗେନ, ରାଜା ଅକ୍କୋସି ତଂ ପନ ।
‘‘ରଞ୍ଞୋ ମୁଖମ୍ହି ପାତେମି’’, ଇତି କଣ୍ଡଞ୍ଚ ସୋ ଖିପି ॥
ଆହଚ୍ଚ ସୋ ଖଗ୍ଗତଲଂ, କଣ୍ଡୋ ପପତି ଭୂମିୟଂ ।
‘‘ମୁଖେ ୱିଦ୍ଧୋ’’ତି ସଞ୍ଞାୟ, ଉକ୍କଟ୍ଠିଂ ଭଲ୍ଲୁକୋ ଅକା ॥
ରଞ୍ଞୋ ପଚ୍ଛା ନିସିନ୍ନୋ ଭୋ, ଫୁସ୍ସଦେୱୋ ମହବ୍ବଲୋ ।
କଣ୍ଡ ଖିପିମୁଖେ ତସ୍ସ, ଘଟ୍ଟେନ୍ତୋ ରାଜକୁଣ୍ଡଲଂ ॥
ରାଜାନଂ ପାଦତୋ କତ୍ୱା, ପତମାନସ୍ସ ତସ୍ସ ତୁ ।
ଖିପିତ୍ୱା ଅପରଂ କଣ୍ଡଂ, ୱିଜ୍ଝିତ୍ୱା ତସ୍ସ ଜଣ୍ଡୁକଂ ॥
ରାଜାନଂ ସୀସତୋ କତ୍ୱା, ପାତେସୀ ଲହୁହତ୍ଥକୋ ।
ଭଲ୍ଲୁକେ ପତିତେ ତସ୍ମିଂ, ଜୟନାଦୋ ପୱତ୍ତଥ ॥
ଫୁସ୍ସଦେୱୋ ତହିଂୟେୱ, ଞାପେତୁଂ ଦୋସ ମତ୍ତନୋ ।
କଣ୍ଡୱଲ୍ଲିଂ ସକଂ ଛେତ୍ୱା, ପସତଂ ଲୋହିତଂ ସୟଂ ॥
ରଧଞ୍ଞା ଦସ୍ସେସି ତଂ ଦିସ୍ୱା, ରାଜା ତଂ ପୁଚ୍ଛି‘‘କିଂ’’ଇତି ।
ରାଜ ଦଣ୍ଡୋ କତୋ ମେତି, ସୋ ଅୱୋଚ ମହୀପତି ॥
କୋଧୋ ଦୋସୋତି ୱୁତ୍ତୋୱ,
ଆହ କୁଣ୍ଡଲ ଘଟ୍ଟନଂ ।
ଅଦୋସଂ ଦୋସମଞ୍ଞାୟ,
କିମେତଂ କରି ଭାତିକ ॥
ଇତି ୱତ୍ୱା ମହାରାଜା, କତଞ୍ଞୁ ଇଧ ମାହ ଚ ।
‘‘କଣ୍ଡାନୁଚ୍ଛୱିକୋ ତୁୟ୍ହଂ, ସକ୍କାରୋ ହେସ୍ସତେ ମହା ॥
ଘାତେତ୍ୱା ଦମିଳେ ସବ୍ବେ, ରାଜା ଲଦ୍ଧଜୟୋ କତୋ ।
ପାସାଦ ତଲମାରୁୟ୍ହ, ସୀହାସନଗତୋ ତହିଂ ॥
ନାଟକାମଚ୍ଚ ମଜ୍ଝମ୍ହି, ଫୁସ୍ସଦେୱସ୍ସ ତଂ ସରଂ ।
ଆଣାପେତ୍ୱା ଠପାପେତ୍ୱା, ପୁଂଖେନ ଉଜୁକଂ ତଲେ ॥
କହାପଣେହି କଣ୍ଡଂ ତଂ, ଆସିତ୍ତେ’ୟୁ ପରୂପରି ।
ଛାଦାପେତ୍ୱା ଦାପେସି, ଫୁସ୍ସଦେୱସ୍ସ ତଂ ଖଣେ ॥
ନରିନ୍ଦପାସାଦତଲେ, ନରିନ୍ଦୋଥ ଅଲଙ୍କତେ ।
ସୁଗନ୍ଧଦୀପୁଜ୍ଜଲିତେ, ନାନାଗନ୍ଧସମାୟୁତେ ॥
ନାଟକ ଜନୟୋଗେନ, ଅଚ୍ଛରାହି ଚ ଭୂସିତେ ।
ଅନଗ୍ଘତ୍ଥରଣତ୍ଥିଣ୍ଣେ, ମୁଦୁକେ ସୟନେ ସୁଭେ ॥
ସୟିତୋ ସିରିସମ୍ପତ୍ତିଂ, ମହତିଂ ଅପିପେକ୍ଖିୟ ।
କତଂ ଅକ୍ଖୋଭିଣିଘାତଂ, ସରନ୍ତୋ ନ ସୁଖଂ ଲଭି ॥
ୟିୟଙ୍ଗୁଦୀପେ ଅରହନ୍ତୋ, ଞତ୍ୱା ତଂ ତସ୍ସତକ୍କିତଂ ।
ଅଟ୍ଠା’ରହନ୍ତେ ପାହେସୁଂ, ତମସ୍ସାସେତୁମିସ୍ସରଂ ॥
ଆଗମ୍ମ ତେ ମଜ୍ଝାୟାମେ, ରାଜ ଦ୍ୱାରମ୍ହି ଓତରୁଂ ।
ନିୱେଦି ତବ୍ଭାଗମନା, ପାସାଦ ତଲେମାରୁହୁଂ ॥
ୱନ୍ଦିତ୍ୱା ତେ ମହାରାଜ, ନିସୀଦାପିୟ ଆସନେ ।
କତ୍ୱା ୱିୱିଧସକ୍କାରଂ, ପୁଚ୍ଛି ଆଗତକାରଣଂ ॥
ପିୟଙ୍ଗୁଦୀପେ ସଙ୍ଘେନ, ପେସିତଂ ମନୁଜାଧିପ ।
ତମସ୍ସା ସୟିତୁଂ ଅମ୍ହେ, ଇତି ରାଜା ପୁନା’ହତେ ॥
‘‘କଥଂ ନୁ ଭନ୍ତେ ଅସ୍ସାସୋ, ମମ ହେସ୍ସତି ୟେନ ମେ ।
ଅକ୍ଖୋଭିଣିମହାସେନ, ଘାତୋ କାରାପିତୋ’’ଇତି ॥
‘‘ସଗ୍ଗମଗ୍ଗନ୍ତରାୟୋ ଚ, ନତ୍ଥି ତେ ତେନ କମ୍ମୁନା ।
ଦୀୟଡ୍ଢମନୁଜା ଚେ’ତ୍ଥ, ଘାତିତା ମନୁଜାଧିପ ॥
ସରଣେସୁ ଠିତୋ ଏକୋ, ପଞ୍ଚସୀଲେପି ଚା’ପରୋ ।
ମିଚ୍ଛାଦିଟ୍ଠି ଚ ଦୁସ୍ସୀଲୋ, ସେସା ପସୁସମାମତା ॥
ଜୋତୟିସ୍ସସି ଚେୱ ତ୍ୱଂ, ବହୁଧା ବୁଦ୍ଧସାସନଂ ।
ମନୋୱିଲେଖଂ ତସ୍ମା ତ୍ୱଂ, ୱିନୋଦୟ ନରିସ୍ସର ॥
ଇତି ୱୁତ୍ତୋ ମହାରାଜା, ତେହି ଅସ୍ସାସମାଗତୋ ।
ୱନ୍ଦିତ୍ୱା ତେ ୱିସଜ୍ଜେତ୍ୱା, ସୟିତୋ ପୁନ ଚିନ୍ତୟି ॥
ୱିନା ସଙ୍ଘେନ ଆହାରଂ, ମାଭୁଞ୍ଜେଥ କଦାଚିପି’’ ।
ଇତି ମାତାପିତା’ହାରେ, ସପିଂସୁ ଦହରେ’ ୱନୋ ॥
ଅଦତ୍ୱା ଭିକ୍ଖୁସଙ୍ଘସ୍ସ, ଭୁତ୍ତଂ ଅତ୍ଥି ନୁଖୋ ଇତି ।
ଅଦ୍ଦସ ପାତରାସମ୍ହି, ଏକଂ ମରିଚୱଟ୍ଟିକଂ ॥
ସଙ୍ଘସ୍ସ ଅଟ୍ଠପେତ୍ୱାୱ ପରିଭୁତ୍ତଂ ସତିଂ ୱିନା ।
ତଦତ୍ଥଂ ଦଣ୍ଡକମ୍ମଂ ମେ, କତ୍ତବ୍ବନ୍ତି ଚ ଚିନ୍ତୟି ॥
ଏତେ ତେନେକକୋଟି ଇଧ ମନୁଜଗଣେ ଘାତିତେ ଚିନ୍ତୟିତ୍ୱା,
କାମାନଂ ହେତୁ ଏତଂ ମନସି ଚ କୟିରା ସାଧୁ ଆଦୀନୱଂ ତଂ ।
ସବ୍ବେସଂ ଘାତନିଂ ତଂ ମନସି ଚ କୟିରା’ ନିଚ୍ଚତଂ ସାଧୁ ସାଧୁ,
ଏୱଂ ଦୁକ୍ଖା ପମୋକ୍ଖଂ ସୁଭଗତି ମହୱା ପାପୁଣେୟ୍ୟା’ଚୀରେନାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦୁଟ୍ଠଗାମଣିୱିଜୟୋ ନାମ
ପଞ୍ଚୱୀସତିମୋ ପରିଚ୍ଛେଦୋ ।
ଛବ୍ବୀସତିମ ପରିଚ୍ଛେଦ
ମରିଚୱଟ୍ଟିକୱିହାରମହୋ
ଏକଚ୍ଛତ୍ତଂ କରିତ୍ୱାନ, ଲଂକାରଜ୍ଜଂ ମହାୟସୋ ।
ନାନନ୍ତରଂ ସଂୱିଦହି, ୟୋଧାନଂ ସୋ ୟଥାରହଂ ॥
ଥେରପୁତ୍ତାଭୟୋ ୟୋଧୋ, ଦିୟ୍ୟମାନଂ ନ ଇଚ୍ଛିତଂ ।
ପୁଚ୍ଛିତୋୱ କିମତ୍ଥନ୍ତି, ୟୁଦ୍ଧମତ୍ଥୀତି ଅବ୍ରୱି ॥
ଏକରଜ୍ଜେ କତେ ୟୁଦ୍ଧଂ, କିନାମତ୍ତୀତି ପୁଚ୍ଛିତୋ ।
ୟୁଦ୍ଧଂ କିଲେସ ଚୋରେହି, କରିସ୍ସାମି ସୁଦୁଜ୍ଜୟଂ ॥
ଇଚ୍ଚେୱ ମାହ ତଂ ରାଜା, ପୁନପ୍ପୁନଂ ନିସେଧୟି ।
ପୁନପ୍ପୁନଂ ସୋୟାଚିତ୍ୱା, ରଞ୍ଞୋନୁଞ୍ଞାୟ ପବ୍ବଜି ॥
ପବ୍ବଜିତ୍ୱା ଚ କାଲେନ, ଅରହତ୍ତମପାପୁଣି ।
ପଞ୍ଚଖୀଣାସୱସତ-ପରିୱାଏରା ଅହୋସି ଚ ॥
ଛତ୍ତମଙ୍ଗଲ ସତ୍ତାହେ, ଗତେ ଗତଭୟୋ’ ଭୟୋ ।
ରାଜା କତା ଭିସେକୋୱ, ମହତା ୱିଭୱେନ ସୋ ॥
ତିସ୍ସୱାପି’ମଗା କୀଳ-ୱିଧିନା ସମଲଙ୍କ ତଂ ।
କୀଳିତୁଂ ଅଭିସିତ୍ତାନଂ, ଚାରିତ୍ତଞ୍ଚା ନୁରକ୍ଖିତୁଂ ॥
ରଞ୍ଞୋ ପରିଚ୍ଛଦଂ ସବ୍ବଂ, ଉପାୟନସତାନି ଚ ।
ମରିଚୱଟ୍ଟିୱିହାରସ୍ସ, ଠାନମ୍ହି ଠପୟିଂସୁ ଚ ॥
ତତ୍ଥେୱ ଥୂପଠାନମ୍ହି, ସଧାତୁଂ କୁନ୍ତମୁତ୍ତମଂ ।
ଠପେସୁଂ କୁନ୍ତଧରକା, ଉଜୁକଂ ରାଜମାନୁସା ॥
ସହୋରୋଧୋ ମହାରାଜା, କୀଳିତ୍ୱା ସଲିଲେ ଦିୱା ।
ସାୟମାହଂ ଗମିସ୍ସାମ, କୁନ୍ତଂ ୱଡ୍ଢେଥ ଭୋ’’ଇତି ॥
ଚାଲେତୁଂ ତଂ ନ ସକ୍ଖିଂସୁ, କୁନ୍ତଂ ରାଜାଧିକାରିକା ।
ଗନ୍ଧାମାଲାହି ପୂଜେସୁଂ, ରାଜସେନାସମାଗତା ॥
ରାଜା ମହନ୍ତଂ ଅଚ୍ଛେରଂ, ଦିସ୍ୱା ତଂ ହଟ୍ଠମାନସୋ ।
ୱିଧାୟ ତତ୍ଥ ଆରକ୍ଖଂ, ପୱିସିତ୍ୱା ପୁରଂ ତତୋ ॥
କୁନ୍ତଂ ପରିକ୍ଖିପାପେତ୍ୱା, ଚେତିୟଂ ତତ୍ଥ କାରୟି ।
ଥୂପଂ ପରିକ୍ଖିପାପେତ୍ୱା, ୱିହାରଞ୍ଚ ଅକାରୟି ॥
ତୀହି ୱସ୍ସେହି ନିଠାସି, ୱିହାରୋ ସୋ ନରିସ୍ସରୋ ।
ସଙ୍ଘଂ ସସନ୍ନିପାତେସି, ୱିହରମହାକାରଣା ॥
ଭିକ୍ଖୁନଂ ସତସହସ୍ସାନି, ତଦା ଭିକ୍ଖୁନିୟୋ ପନ ।
ନୱୁତି ଚ ସହସ୍ସାନି, ଅଭୱିଂସୁ ସମାଗତା ॥
ତସ୍ମିଂ ସମାଗମେ ସଙ୍ଘଂ, ଇଦମାକ ମହୀପତି ।
‘‘ସଙ୍ଘଂ ଭନ୍ତେ ୱିସରିତ୍ୱା, ଭୁଞ୍ଜିଂ ମରିଚୱଟ୍ଟିକଂ ॥
ହସ୍ସେ’ତଂ ଦଣ୍ଡକମ୍ମଂ ମେ, ଭୱତୂତି ଅକାରୟି ।
ସଚେତିୟଂ ମରିଚୱଟ୍ଟି-ୱିହାରଂ ସୁମନୋହରଂ ॥
ପତିଗ୍ଗଣ୍ହାତୁ ତଂ ସଙ୍ଘୋ, ଇତି ସୋ ଦକ୍ଖିଣୋଦକଂ ।
ପାତିତ୍ୱା ଭିକ୍ଖୁସଙ୍ଘସ୍ସ, ୱିହାରଂ ସୁମନୋ ଅଦା ॥
ୱିହାରେ ତଂ ସମନ୍ତାପି, ମହନ୍ତଂ ମଣ୍ଡପଂ ସୁଭଂ ।
କାରେତ୍ୱା ତତ୍ଥ ସଙ୍ଘସ୍ସ, ମହାଦାନଂ ପୱତ୍ତୟି ॥
ପାଦେ ପତିଟ୍ଠାପେତ୍ୱାପି,
ଜଲେ ଅଭୟୱାପିୟା ।
କତୋ ସୋ ମଣ୍ଡପୋ ଆସି,
ସେସୋ କାସେ କଥାୱକା ॥
ସତ୍ତାହଂ ଅନ୍ନପାନାଦିଂ, ଦତ୍ୱାନ ମନୁଜାଧିପୋ ।
ଅଦା ସାମଣକଂ ସବ୍ବଂ, ପରିକ୍ଖାରଂ ମହାରହଂ ॥
ଅହୁ ସତସହସ୍ସଗ୍ଘୋ, ପରିକ୍ଖାରୋ ସ ଆଦିକୋ ।
ଅନ୍ତେ ସହସ୍ସଗ୍ଘନକୋ, ସବ୍ବ ସଙ୍ଘୋ ଚ ତଂଲଭି ॥
ୟୁଦ୍ଧେ ଦାନେ ଚ ସୂରେନ, ସୂରିନା ରତନତ୍ତୟେ ।
ପସନ୍ନାମଲଚିତ୍ତେନ, ସାସନୁଜୋତ ନତ୍ଥିନା ॥
ରଞ୍ଞା କତଞ୍ଞୁନା ତେନ, ଥୂପକାରାପନାଦିତୋ ।
ୱିହାର ମହନନ୍ତାନି, ପୂଜେତୁଂ ରତନତ୍ତୟଂ ॥
ପରିଚ୍ଚତ୍ତଧନାନେ’ତ୍ଥ, ଅନଗ୍ଘାନି ୱିମୁଞ୍ଚିୟ ।
ସେସାନି ହୋନ୍ତି ଏକାୟ, ଊନୱୀସତିକୋଟିୟୋ ॥
ତୋଗା ଦସଦ୍ଧୱିଧ ଦୋସୱିଦୂସିତାପି,
ପଞ୍ଞାୱିସେସ ସହିତେହି ଜନେହି ପତ୍ତା ।
ହୋନ୍ତେୱ ପଞ୍ଚଗୁଣୟୋଗ ଗହିତସାରଂ,
ଇଚ୍ଚସ୍ସ ସାରଗହଣେ ମତିମାୟତେୟ୍ୟାତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ମରିଚୱଟ୍ଟିକୱିହାରମହୋନାମ
ଛବ୍ବୀସତିମୋ ପରିଚ୍ଛେଦୋ ।
ସତ୍ତୱୀସତିମ ପରିଚ୍ଛେଦ
ଲୋହପାସାଦମହୋ
ତତୋ ରାଜା ୱିଚିନ୍ତେସି, ୱିସ୍ସୁତଂ ସୁସ୍ସୁତଂ ସୁତଂ ।
ମହାପଞ୍ଞୋ ସଦା ପୁଞ୍ଞୋ, ପଞ୍ଞାୟ କତନିଚ୍ଛୟୋ ॥
‘‘ଦୀପପ୍ପସାଦକୋ ଥେରୋ, ରାଜିନୋ ଅୟ୍ୟକସ୍ସ ମେ ।
ଏୱଂ କିରାହନତ୍ତା ତେ, ଦୁଟ୍ଠଗାମଣିଭୂପତି ॥
ମହାପୁଞ୍ଞୋ ମହାଥୂପଂ, ସୋଣ୍ଣମାଲିଂ ମନୋରମଂ ।
ୱୀସଂହତ୍ଥସତଂ ଉଚ୍ଚଂ, କାରେସ୍ସତି ଅନାଗତେ ॥
ପୁନୋ ଉପୋସଥାଗାରଂ, ନାନାରତନମଣ୍ଡିତଂ ।
ନୱଭୂମଂ କରିତ୍ୱାନ, ଲୋହପାସାଦ ମେୱ ଚ ॥
ଇତି ଚିନ୍ତିୟ ଭୂମିନ୍ଦୋ, ଲିଖିତ୍ୱେୱଂ ଠପାପିତଂ ।
ପେକ୍ଖାପେନ୍ତୋ ରାଜଗେହେ, ଠିତଂ ଏୱ କରଣ୍ଡକେ ॥
ସୋୱଣ୍ଣପଟ୍ଟଂ ଲଦ୍ଧାନ, ଲେଖଂ ତତ୍ଥ ଅୱାଚୟି ।
‘‘ଚତ୍ତାଲୀସସତଂ ୱସ୍ସଂ, ଅତିକ୍କମ୍ମ ଅନାଗତେ ॥
କାକୱଣ୍ଣସୁତୋ ଦୁଟ୍ଠ-ଗାମଣିମନୁଜାଧିପୋ ।
ଇଦଞ୍ଚିଦଞ୍ଚ ଏୱଞ୍ଚ, କାରେସ୍ସତୀ’’ତି ୱାଚିତଂ ॥
ସୁତ୍ୱା ହଟ୍ଠୋ ଉଦାନେତ୍ୱା, ଅପ୍ପୋଟ୍ଠେସି ମହୀପତି ।
ତତୋ ପାତୋ’ୱ ଗନ୍ତ୍ୱାନ, ମହାମେଘୱନଂ ସୁଭଂ ॥
ସନ୍ନିପାତଂ କାରୟିତ୍ୱା, ଭିକ୍ଖୁସଙ୍ଘସ୍ସ ଅବ୍ରୱି ।
‘‘ୱିମାନତୁଲ୍ୟଂ ପାସାଦଂ, କାରୟିସ୍ସାମି ୱୋ ଅହଂ ॥
ଦିବ୍ବଂ ୱିମାନଂ ପେସେତ୍ୱା, ତଦା ଲେଖଂ ଅଦାଥ ମେ’’ ।
ଭିକ୍ଖୁସଙ୍ଘୋ ୱିସଜ୍ଜେସି, ଅଟ୍ଠ ଖୀଣାସୱେ ତହିଂ ॥
କସ୍ସପମୁନିନୋ କାଲେ, ଅସୋକୋ ନାମ ବ୍ରାହ୍ମଣୋ ।
ଅଟ୍ଠ ସଲାକଭତ୍ତାନି, ସଙ୍ଘସ୍ସ ପରିଣାମିୟ ॥
ଭରଣିଂ ନାମ ଦାସିଂ ସୋ, ‘‘ନିଚ୍ଚଂ ଦେହୀ’’ତି ଅବ୍ରୱି ।
ଦତ୍ୱା ସା ତାନି ସକ୍କଚ୍ଚଂ, ୟାୱଜୀୱଂ ତତୋ ଚୁତା ॥
ଆକାସଟ୍ଠୱିମାନମ୍ହି, ନିବ୍ବତ୍ତିରୁଚିରେ ସୁଭେ ।
ଅଚ୍ଛରାନଂ ସହସ୍ସେନ, ସଦା’ସି ପରିୱାରିତା ॥
ତସ୍ସା ରତନପାସାଦୋ, ଦ୍ୱାଦସୟୋଜନୁଗ୍ଗତୋ ।
ୟୋଜନାନଂ ପରିକ୍ଖେପୋ, ଚତ୍ତାଲୀସଞ୍ଚ ଅଟ୍ଠ ଚ ॥
କୂଟାଗାରସହସ୍ସେନ, ମଣ୍ଡିତୋ ନୱଭୂମିକୋ ।
ସହସ୍ସଗବ୍ଭସମ୍ପନ୍ନୋ, ରାଜମାନୋ ଚତୁମ୍ମୁଖୋ ॥
ସହସ୍ସସଙ୍ଖସଂୱୁତ୍ତି, ସୀହପଞ୍ଜର ନେତ୍ତୱା ।
ସକିଙ୍କଣିକଜାଲାୟ, ସଜ୍ଜିତୋ ୱେଦିକାୟ ଚ ॥
ଅମ୍ବଲଟ୍ଠିକପାସାଦୋ, ତସ୍ସ ମଜ୍ଝେ ଠିତୋ ଅହୁ ।
ସନ୍ତମତୋ ଦିସ୍ସମାନୋ, ପଗ୍ଗହିତଧଜାକୁଲୋ ॥
ତାୱତିଂସଞ୍ଚ ଗଚ୍ଛନ୍ତା, ଦିସ୍ୱା ଥେରଂ ତମେୱ ତେ ।
ହିଙ୍ଗୁଲେନ ତଦା ଲେଖଂ, ଲେଖୟିତ୍ୱା ପଟେ ତତୋ ॥
ନିୱତ୍ତିତ୍ୱାନ ଆଗନ୍ତ୍ୱା, ପଟଂ ସଙ୍ଘସ୍ସ ଦସ୍ସୟୁଂ ।
ସଙ୍ଘୋ ପଟଂ ଗହେତ୍ୱା ତଂ, ପାହେସି ରାଜସନ୍ତିକଂ ॥
ତଂ ଦିସ୍ୱା ସୁମନୋ ରାଜା, ଆଗମ୍ମାରାମ ମୁତ୍ତମଂ ।
ଆଲେଖତୁଲ୍ୟଂ କାରେସି, ଲୋହପାସାଦ ମୁତ୍ତମଂ ॥
କମ୍ମାରମ୍ଭନକାଲେୱ, ଚତୁଦ୍ୱାରମ୍ହି ଭୋଗୱା ।
ଅଟ୍ଠସତସହସ୍ସାନି, ହିରଞ୍ଞାନି ଠପାପୟି ॥
ପୁଟସହସ୍ସ ୱତ୍ଥାନି, ଦ୍ୱାରେ ଦ୍ୱାରେ ଠପାପୟି ।
ଗୁଳ ତେଲସକ୍ଖରମଧୁ-ପୁରା ଚାନେକ ଚାଟିୟୋ ॥
‘‘ଅମୂଲକକମ୍ମ ମେତ୍ଥ, ନ କାତବ୍ବ’’ନ୍ତି ଭାସିୟ ।
ଅଗ୍ଘାପେତ୍ୱା କତଂ କମ୍ମଂ, ତେସଂ ମୂଲମଦାପୟି ॥
ହତ୍ଥସତଂ ହତ୍ଥସତଂ, ଆସି ଏକେକ ପସ୍ସତୋ ।
ଉଚ୍ଚତୋ ତତ୍ତକୋୟେୱ, ପାସାଦୋ ହି ଚତୁମ୍ମୁଖୋ ॥
ତସ୍ମିଂ ପାସାଦ ସେଟ୍ଠସ୍ମିଂ, ଅହେସୁଂ ନୱଭୂମିୟୋ ।
ଏକେକିସ୍ସା ଭୂମିୟା ଚ, କୂଟାଗାରସତାନି ଚ ॥
କୂଟାଗାରାନି ସବ୍ବାନି, ସଜ୍ଝୁନା ଖଚିତା ନ’ୟୁଂ ।
ପୱାଲୱେଦିକା ତେସଂ, ନାନାରତନ ଭୂସିତା ॥
ନାନାରତନ ଚିତ୍ତାନି, ତାସଂ ପଦୁମକାନି ଚ ।
ସଜ୍ଝକିଂକିଣିକାପନ୍ତି-ପରିକ୍ଖିତ୍ତାୱ ତା ଅହୁ ॥
ସହସ୍ସଂ ତତ୍ଥ ପାସାଦୋ, ଗବ୍ଭା ଆସୁଂ ସୁସଙ୍ଖତା ।
ନାନାରତନ ଖଚିତା, ସୀହପଞ୍ଜରନେତ୍ତୱା ॥
ନାରିୱାହନୟାନନ୍ତୁ, ସୁତ୍ୱା ୱେସ୍ସୱଣସ୍ସ ସୋ ।
ତଦା କାରମକାରେସି, ମଜ୍ଝେ ରତନମଣ୍ଡପଂ ॥
ସୀହବ୍ୟଗ୍ଘାଦିରୂପେହି, ଦେୱତା ରୂପକେହି ଚ ।
ଅହୁ ରତନମୟୋହେ’ସ, ଥମ୍ଭେହି ଚ ୱିଭୂସିତୋ ॥
ମୁତ୍ତାଜାଲପରିକ୍ଖେପୋ, ମଣ୍ଡପନ୍ତେ ସମନ୍ତତୋ ।
ପୱାଲୱେଦିକା ଚେତ୍ଥ, ପୁବ୍ବେ ୱୁତ୍ତୱିଧା ଅହୁ ॥
ସତ୍ତରତନ ଚିତ୍ତସ୍ସ, ୱେମଜ୍ଝେ ମଣ୍ଡପସ୍ସ ତୁ ।
ରୁଚିରୋ ଦନ୍ତପଲ୍ଲଙ୍କୋ, ରମ୍ମୋ ଫଲିକସନ୍ଥରୋ ॥
ଦନ୍ତମୟାପସ୍ସୟେ’ତ୍ଥ, ସୁୱଣ୍ଣମୟ ସୂରିୟୋ ।
ସଜ୍ଝୁମୟେ ଚନ୍ଦିମା ଚ, ତାରା ଚ ମୁତ୍ତକା ମୟା ॥
ନାନାରତନ ପଦୁମାନି, ତତ୍ଥ ତତ୍ଥ ୟଥାରହଂ ।
ଜାତକାନି ଚ ତତ୍ଥେୱ, ଆସୁଂ ସୋଣ୍ଣଲତନ୍ତରେ ॥
ମହଗ୍ଘପଚ୍ଚତ୍ଥରଣେ, ପଲ୍ଲଙ୍କେ’ତି ମନୋରମେ ।
ମନୋହରା’ସିଟ୍ଠପିତା, ରୁଚିରଂ ଦନ୍ତବୀଜନୀ ॥
ପୱାଲପାଦୁକା ତତ୍ଥ, ଫଲିକମ୍ହି ପତିଟ୍ଠିତା ।
ସେତଚ୍ଛତ୍ତଂ ସଜ୍ଝୁଦଣ୍ଡଂ, ପଲ୍ଲଙ୍କୋ’ପରିସୋଭଥ ॥
ସତ୍ତରତନ ମୟାନେତ୍ଥ, ଅଟ୍ଠମଙ୍ଗଲିକାନି ଚ ।
ଚତୁପ୍ପଦାନଂ ପନ୍ତୀ ଚ, ମଣିମୁତ୍ତନ୍ତରା ଅହୁଂ ॥
ରଜତାନଞ୍ଚ ଘଣ୍ଟାନଂ, ପନ୍ତୀ ଭତ୍ତନ୍ତଲମ୍ବିତା ।
ପାସାଦଛତ୍ତପଲ୍ଲଙ୍କ-ମଣ୍ଡପା’ସୁଂ ଅନଗ୍ଘିକା ॥
ମହଗ୍ଘ ପଞ୍ଞପାପେସି, ମଞ୍ଚପୀଠଂ ୟଥାରହଂ ।
ତଥେୱ ଭୂମତ୍ଥରଣଂ, କମ୍ବଲଞ୍ଚ ମହାରହଂ ॥
ଆଚାମ କୁମ୍ଭିସୋୱଣ୍ଣା, ଉଲୁଙ୍କୋ ଚ ଅହୁ ତହିଂ ।
ପାସାଦ ପରିଭୋଗେସୁ, ସେସେସୁ ଚ କଥା’ ୱକା ॥
ଚାରୁପାକାର ପରିୱାରୋ,
ସୋ ଚତୁଦ୍ୱାରକୋଟ୍ଠକୋ ।
ପାସାଦୋ’ଲଙ୍କତୋ ସୋଭି,
ତାୱତିଂସ ସଭା ୱିୟ ॥
ତମ୍ବ ଲୋହିଟ୍ଠକାହେ’ସୋ,
ପାସାଦୋ ଛାଦିତୋ ଅହୁ ।
ଲୋହ ପାସାଦ ୱୋହାରୋ,
ତେନ ତସ୍ସ ଅଜାୟଥ ॥
ନଟ୍ଠିତେ ଲୋହପାସାଦେ, ସୋ ସଙ୍ଘଂ ସନ୍ନିପାତୟି ।
ରାଜା ସଙ୍ଘୋ ସନ୍ନିପତି, ମରିଚୱଟ୍ଟିମହେ ୱିୟ ॥
ପୁଥୁଜ୍ଜନା’ୱ ଅଟ୍ଠଂସୁ, ଭିକ୍ଖୂ ପଠମଭୂମିୟଂ ।
ତେପିଟକା ଦୁତିୟାୟ, ସୋତାପନ୍ନାଦୟୋ ପନ ॥
ଏକେ କେୟେୱ ଅଟ୍ଠଂସୁ, ତତିୟାଦୀସୁ ଭୂମିସୁ ।
ଅରହନ୍ତୋ ଚ ଅଟ୍ଠଂସୁ, ଉଦ୍ଧଂ ଚତୂସୁ ଭୂମିସୁ ॥
ସଙ୍ଘସ୍ସ ଦତ୍ୱା ପାସାଦଂ, ଦକ୍ଖିଣମ୍ବୁପୁରସ୍ସରଂ ।
ରାଜା’ଦତ୍ଥ ମହାଦାନଂ, ସତ୍ତାହଂ ପୁବ୍ବକଂ ପିୟ ॥
ପାସାଦ ମହଚତ୍ତାନି, ମହାଚାଗେନ ରାଜିନା ।
ଅନଗ୍ଘାନି ଠପେତ୍ୱାନ, ଅହେସୁଂ ତିଂସକୋଟିୟୋ ॥
ନିସ୍ସାରେ ଧନନିଚୟେ ୱିସେସସାରଂ,
ୟେ ଦାନଂ ପରିଗଣୟନ୍ତି ସାଧୁପଞ୍ଞା ।
ତେ ଦାନଂ ୱିପୁଲମପେତ ଚିତ୍ତସଙ୍ଗା,
ସତ୍ତାନଂ ହିତପରମା ଦଦନ୍ତି ଏୱଂତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଲୋକହପାସାଦମହୋ ନାମ
ସତ୍ତୱୀସତିମୋ ପରିଚ୍ଛେଦୋ ।
ଅଟ୍ଠୱୀସତିମ ପରିଚ୍ଛେଦ
ମହା ଥୂପସାଧନ ଲାଭୋ
ତତୋ ସତସହସ୍ସଂ ସୋ, ୱିସ୍ସଜ୍ଜେତ୍ୱା ମହୀପତି ।
କାରାପେସି ମହାବୋଧି-ପୂଜଂ ସୁଳାରମୁତ୍ତମଂ ॥
ତତୋ ପୁରଂ ପୱିସିନ୍ତୋ, ଥୂପଠାନେ ନିୱେସିତଂ ।
ପସ୍ସିତ୍ୱାନ ସୀଲାୟୂପଂ, ସରିତ୍ୱା ପୁବ୍ବକଂ ସୁତିଂ ॥
‘‘କାରେସ୍ସାମି ମହାଥୂପଂ’’, ଇତି ହଟ୍ଠୋ ମହାତଲଂ ।
ଆରୁୟ୍ହ ରତ୍ତିଂ ଭୁଞ୍ଜିତ୍ୱା, ସୟିତୋ ଇତି ଚିନ୍ତୟି ॥
‘‘ଦମିଳେ ମଦ୍ଦମାନେନ, ଲୋକୋ’ୟଂ ପୀଳିତୋ ମୟା ।
ନ ସକ୍କା ବଲିମୁଦ୍ଧତ୍ତୁଂ, ତଂ ୱଜ୍ଜିୟ ବଲିଂ ଅହଂ ॥
କାରୟନ୍ତୋ ମହାଥୂପଂ, କତଂ ଧମ୍ମେନ ଇଟ୍ଠିକା ।
ଉପ୍ପାଦେସ୍ସାମି ‘‘ଇଚ୍ଚେୱଂ, ଚିନ୍ତୟନ୍ତସ୍ସ ଚିନ୍ତିତଂ ॥
ଛତ୍ତମ୍ହି ଦେୱତାଜାନୀ, ତତୋ କୋଲାହଲଂ ଅହୁ ।
ଦେୱେସୁ ଞତ୍ୱା ତଂ ସକ୍କୋ, ୱିସ୍ସକମ୍ମାନ ମବ୍ରୱି ॥
‘‘ଇଟ୍ଠକତ୍ତଂ ଚେତିୟସ୍ସ, ରାଜା ଚିନ୍ତେସି ଗାମଣି ।
ଗନ୍ତ୍ୱା ପୁରା ୟୋଜନମ୍ହି, ଗମ୍ଭୀର ନଦୀ ୟନ୍ତିକେ ॥
ମାପେହି ଇଟ୍ଠିକା ତତ୍ତଂ’, ଇତି ସକ୍କେ ନ ଭାସିତୋ ।
ୱିସ୍ସକମ୍ମୋ ଇଧାଗମ୍ମ, ମାପେସି ତତ୍ଥ ଇଟ୍ଠିକା ॥
ପଭାତେ ଲୁଦ୍ଦକୋ ତତ୍ଥ, ସୁନଖେହି ୱନଂ ଅଗା ।
ୱୋଧାରୂପେନ ଦସ୍ସେସି, ଲୁଦ୍ଦକଂ ଭୁମ୍ମଦେୱତା ॥
ଲୁଦ୍ଦକୋ ତଂ’ନୁବନ୍ଧନ୍ତୋ, ଗନ୍ତ୍ୱା ଦିସ୍ୱାନ ଇଟ୍ଠକା ।
ଅନ୍ତରହିତାୟ ଗୋଧାୟ, ଇତି ଚିଧନ୍ତସି ସୋ ତହିଂ ॥
‘‘କାରେତୁ କାମୋ କିର ନୋ, ମହାଥୂପଂ ମହୀପତି ।
ଉପାୟନମିଦଂ ତସ୍ସଂ’, ଇତି ଗନ୍ତ୍ୱା ନିୱେଦୟି ॥
ତସ୍ସ ତଂ ୱଚନଂ ସୁତ୍ୱା, ପିୟଂ ଜନହି ତପ୍ପିୟୋ ।
ରାଜା କାରେସି ସକ୍କାରଂ, ମହନ୍ତଂ ତୁଟ୍ଠମାନସୋ ॥
ପୁରାପୁବ୍ବୁତ୍ତରେ ଦେସେ, ୟୋଜନତ୍ତୟ ମତ୍ଥକେ ।
ଆଚାର ୱିଟ୍ଠିଗାମମ୍ହି, ସୋଳସକରୀସେ କଲେ ॥
ସୋୱଣ୍ଣ ବୀଜାନୁ’ଟ୍ଠିଂସୁ, ୱିୱିଧାନି ପମାଣତୋ ।
ୱିଦତ୍ଥୁକ୍କଟ୍ଠ ମାଣାନି, ଅଙ୍ଗୁଲିମାଣା ନିହେଠତୋ ॥
ସୁୱଣ୍ଣ ପୁଣ୍ଣଂ ତଂ ଭୂମିଂ, ଦିସ୍ୱା ସଙ୍ଗାମୱାସିକା ।
ସୁୱଣ୍ଣ ପାହିଂ ଆଦାୟ, ଗନ୍ତ୍ୱା ରଞ୍ଞୋ ନିୱେଦୟୁଂ ॥
ପୁରାପାଚିନ ପସ୍ସମ୍ହି, ସତ୍ତ ୟୋଜନ ମତ୍ଥକେ ।
ଗଙ୍ଗାପାରେ ତମ୍ବପିଟ୍ଠେ, ତମ୍ବଲୋହଂ ସମୁଟ୍ଠହି ॥
ତଙ୍ଗାମିକା ତମ୍ବଲୋହ-ବୀଜମାଦାୟ ପାତିୟା ।
ରାଜାନ ମୁପସଙ୍କମ୍ମ, ତମତ୍ଥଞ୍ଚ ନିୱେଦୟୁଂ ॥
ପୁବ୍ବଦକ୍ଖିଣଦେସମ୍ହି, ପୁରତୋ ଚତୁୟୋଜନେ ।
ସୁମନ ୱାପି ଗାମମ୍ହି, ଉଟ୍ଠହିଂସୁ ମଣୀବହୂ ॥
ଉପଲ କୁରୁୱିନ୍ଦେହି, ମିସ୍ସକାନେୱ ଗାମିକା ।
ଆଦାୟ ପାତିୟାଏୱ, ଗନ୍ତ୍ୱା ରଞ୍ଞୋ ନିୱେଦୟୁଂ ॥
ପୁରତୋ ଦକ୍ଖିଣେ ପସ୍ସେ, ଅଟ୍ଠୟୋଜନମତ୍ଥକେ ।
ଅମ୍ବଟ୍ଠ କୋଲଲେଣମ୍ହି, ରଜତଂ ଉପପଜ୍ଜଥ ॥
ନଗରେ ୱାଣିଜୋ ଏକୋ, ଆଦାୟ ସକଟେ ବହୂ ।
ମଲୟା ସିଙ୍ଗୀୱେରାଦିଂ, ଆନେତୁଂ ମଲୟଂ ଗତୋ ॥
ଲେଣସ୍ସ ଅୱିଦୂରମ୍ହି, ସକଟାନିଟ୍ଠ ପାପିୟ ।
ପତୋଦାଦାରୁନିଚ୍ଛନ୍ତୋ, ଆରୁଳ୍ହୋ ତଂ ମହୀଧରଂ ॥
ଚାଟିପ୍ପମାଣ ତଂ ତତ୍ଥ, ପକ୍କଭାରେନ ନାମି ତଂ ।
ଦିସ୍ୱା ପନ ସଲଟ୍ଠିଞ୍ଚ, ପାସାଣଟ୍ଠଞ୍ଚ ତଂ ଫଲଂ ॥
ୱଣ୍ଟେ ତଂ ୱାସିୟା ଛେତ୍ୱା, ଦସ୍ସାମ’ଗ୍ଗନ୍ତି ଚିନ୍ତିୟ ।
କାଲଂ ଘୋସେସି ସଦ୍ଧାୟ, ଚତ୍ତାରୋ’ନାସୱାଗମୁଂ ॥
ହଟ୍ଠୋ ସୋ ତେ’ଭିୱାଦେତ୍ୱା, ନିସୀଦାପିୟ ସାଦରୋ ।
ୱାସିୟା ୱଣ୍ଟସାମନ୍ତା, ତଚଂ ଛେତ୍ୱା ଅପସ୍ସୟଂ ॥
ମୁଞ୍ଜିତ୍ୱା’ୱାଟ ପୁଣ୍ଣଂ ତଂ, ୟୂସଂ ପତ୍ତେହୀ ଆଦିୟ ।
ଚତ୍ତାରୋ ୟୂସ ପୂରେତେ, ପତ୍ତେ ତେସମଦାସିସୋ ॥
ତେ ତଂ ଗହେତ୍ୱା ପକ୍କାମୁଂ,
କାଲଂ ଘୋସେସି ସୋ ପୁନ ।
ଅଞ୍ଞେ ଖିଣାସୱା ଥେରା,
ଚତ୍ତାରୋ ତତ୍ଥ ଆଗମୁଂ ॥
ତେସଂ ପତ୍ତେ ଗହେତ୍ୱା ସୋ, ପତ୍ତାମିଞ୍ଜହି ପୂରିୟ ।
ଅଦାସି ତେସଂ ପକ୍କାମୁଂ, ତୟୋ ଏକୋ ନପକ୍କମି ॥
ରଜତଂ ତସ୍ସ ଦସ୍ସେତୁଂ, ଓରୋହିତ୍ୱା ତତୋ ହି ସୋ ।
ନିସଜ୍ଜ ଲେଣାସନ୍ନମ୍ହି, ତାମିଞ୍ଜା ପରିଭୁଞ୍ଜଥ ॥
ସେସାମିଞ୍ଜା ୱାଣିଜୋ’ପି, ଭୁଞ୍ଜିତ୍ୱା ୟାୱଦତ୍ଥକଂ ।
ଭଣ୍ଡିକାୟ ଗହେତ୍ୱାନ, ସେସଥେରପଦାନୁଗୋ ॥
ଅଞ୍ଜସା ଇମିନା ତ୍ୱମ୍ପି, ଗଚ୍ଛ ଦାନୀ ଉପାସକ ।
ଗନ୍ତ୍ୱାନ ଥେରଂ ପସ୍ସିତ୍ୱା, ୱେୟ୍ୟାୱଚ୍ଚ ମହାସି ଚ ॥
ଥେରୋ ଚ ଲେଣଦ୍ୱାରେନ, ତସ୍ସ ମଗ୍ଗ ଅମାପୟି ।
ଥେରଂ ୱନ୍ଦିୟ ସୋ ତେନ, ଗଚ୍ଛନ୍ତୋ ଲେଣମଦ୍ଦସ ॥
ଲେଣ ଦ୍ୱାରମ୍ହି ଠତ୍ୱାନ, ପସ୍ସିତ୍ୱା ରଜତମ୍ପି ସୋ ।
ୱାସିୟା ଆହନିତ୍ୱାନ, ରଜତତି ୱିଜାନିୟ ॥
ଗହେତ୍ୱେକଂ ସଜ୍ଝୁପିଣ୍ଡଂ, ଗନ୍ତ୍ୱାନ ସକଟନ୍ତିକଂ ।
ସକଟାନି ଠପାପେତ୍ୱା, ସଜ୍ଝୁପିଣ୍ଡଂ ତମାଦିୟ ॥
ଲହୁଂ ଅନୁରାଧ ପୁରଂ, ଆଗମ୍ମ ୱରୱାଣିଜୋ ।
ଦସ୍ସେତ୍ୱା ରଜତଂ ରଞ୍ଞୋ, ତମତ୍ଥମ୍ପି ନିୱେଦୟି ॥
ପୁରତୋ ପଚ୍ଛିମେ ପସ୍ସେ, ପଞ୍ଚୟୋଜନ ମତ୍ଥକେ ।
ଉରୁୱେଲପଟ୍ଟନେ ମୁତ୍ତା, ମହାମଲକ ମତ୍ତିୟୋ ॥
ପୱାଲନ୍ତରିକା ସଦ୍ଧିଂ, ସମୁଦ୍ଦାଥଲମୋକ୍କମୁଂ ।
କେୱଟ୍ଟା ତା ସମେକ୍ଖିତ୍ୱା, ରାସିଂ କତ୍ୱାନ ଏକତୋ ॥
ପାତିୟା ଆନୟିତ୍ୱାନ, ମୁତ୍ତା ସହ ପୱାଲକା ।
ରାଜାନ ମୁପସଙ୍କମ୍ମ, ତମତ୍ଥମ୍ପି ନିୱେଦୟୁଂ ॥
ପୁରତୋ ଉତ୍ତରେ ପସ୍ସେ, ସତ୍ତ ୟୋଜନ ମତ୍ଥକେ ।
ପେଳିୱାପିକ ଗାମସ୍ସ, ୱାପିପକ୍ଖନ୍ତକନ୍ଦରେ ॥
ଜାୟିଂସୁ ୱାଲୁକାପିଟ୍ଠେ, ଚତ୍ତାରୋ ଉତ୍ତମା ମଣୀ ।
ନୀସଦ ପୋତପ୍ପମାଣା, ଉମ୍ମାପୁପ୍ଫନିଭାସୁଭା ॥
ତେ ଦିସ୍ୱା ସୁନଖୋ ଲୁଦ୍ଦୋ, ଅଗନ୍ତ୍ୱା ରାଜସନ୍ତିକଂ ।
‘‘ଏୱରୂପା ମଣୀଦିଟ୍ଠୋ, ମୟା’’ଇତି ନିୱେଦୟି ॥
ଇଟ୍ଠକାଦୀନି ଏତାନି ମହାପୁଞ୍ଞୋ ମହାମତି ।
ମହାଥୂପତ୍ଥମୁପ୍ପନ୍ନା-ନ’ସ୍ସୋସି ତଦହେୱ ସୋ ॥
ୟଥାନୁରୂପଂ ସକ୍କାରଂ, ତେସଂ କତ୍ୱା ସୁମାନତୋ ।
ଏତେ ୱା ରକ୍ଖକେ କତ୍ୱା, ସବ୍ବାନି ଆହରାପୟି ॥
ଖେଦମ୍ପି କାୟଜମସୟ୍ହମଚିନ୍ତୟିତ୍ୱା,
ପୁଞ୍ଞଂ ପସନ୍ନମନସୋ ପଚିତ ହି ଏୱଂ ।
ସାଧେତି ସାଧନ ସତାନି ସୁଖା କରାନି,
ତସ୍ମା ପସନ୍ନମନସୋ’ୱ କରେୟ୍ୟ ପୁଞ୍ଞନ୍ତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ମହାଥୂପସାଧନଲାଭୋ ନାମ
ଅଟ୍ଠୱୀସତିମୋ ପରିଚ୍ଛେଦୋ ।
ଏକୂନତିଂସତିମ ପରିଚ୍ଛେଦ
ଥୂପାରମ୍ଭୋ
ଏୱଂ ସମତ୍ତେ ସମ୍ଭାରେ, ୱେସାଖପୁଣ୍ଣମାସୀୟଂ ।
ପତ୍ତେ ୱିସାଖନକ୍ଖତ୍ତେ, ମହାଥୂପତ୍ଥମାରଭି ॥
ହାରେତ୍ୱାନ ତହିଂ ଥୂପଂ, ଥୂପଠାନମଖାଣୟି ।
ସତ୍ଥହତ୍ଥୋ ମହୀପାଲୋ, ଥିରୀ କାତୁଂ ମନେକଧା ॥
ୟୋଧେହି ଆହରାପେତ୍ୱା, ଗୁଳପାସାଣକେ ତହିଂ ।
କୂଟେହି ଆହନାପେତ୍ୱା, ପାସାଣେ ଚୁଣ୍ଣିତେ ଅଥ ॥
ଚମ୍ମୱନଦ୍ଧ ପାଦେହି, ମହାହତ୍ଥୀହି ମଦ୍ଦୟି ।
ଭୂମିୟା ଥିରୀଭାୱତ୍ଥଂ, ଅତ୍ଥାନତ୍ଥୱିଚକ୍ଖଣୋ ॥
ଆକାସ ଗଙ୍ଗାପତିତ-ଟ୍ଠାନେ ସତତତିନ୍ତକେ ।
ମତ୍ତିକା ସୁଖୁମା ତତ୍ଥ, ସମନ୍ତା ତିଂ ସୟୋଜନେ ॥
ନୱନୀତ ମତ୍ତିକା’ତେସା, ସୁଖୁମତ୍ତା ପପୁଚ୍ଚତି ।
ଖୀଣାସୱା ସାମଣେରା, ମତ୍ତିକା ଆହରୁଂ ତତୋ ॥
ମତ୍ତିକା ଅତ୍ଥରାପେସି, ତତ୍ଥ ପାସାଣକୋଟ୍ଟିମେ ।
ଇଟ୍ଠକା ଅତ୍ଥରାପେସି, ମତ୍ତିକୋ ପରିଇସ୍ସରୋ ॥
ତସ୍ସୋ ପରିଖରସୁଧଂ, କୁରୁୱିନ୍ଦଂ ତତୋପରି ।
ତସ୍ସୋ ପରିଅୟୋଜାଲଂ, ମରୁମ୍ବନ୍ତୁ ତତୋପରଂ ॥
ଆହଟଂ ସାମଣେରେହି, ହିମୱନ୍ତା ସୁଗନ୍ଧକଂ ।
ସନ୍ଥରାପେସି ଭୂମିନ୍ଦୋ, ଫଳିକନ୍ତୁ ତତୋପରି ॥
ସୀଲାୟୋ ସନ୍ଥରାପେସିଚ୍ଛ ଫଳିକସନ୍ଥରୋ ପରି ।
ସବ୍ବତ୍ଥ ମତ୍ତିକାକିଚ୍ଚେ, ନୱନୀତୱ୍ହୟା ଅହୁ ॥
ନିୟ୍ୟାସେନ କପିଟ୍ଠସ୍ସ, ସନ୍ନିତେନ ରସୋଦକେ ।
ଅଟ୍ଠଙ୍ଗୁଲଂ ବହଲଏତା, ଲୋହପଟ୍ଟଂ ସୀଲୋପରି ॥
ମନୋସିଲାୟତିଲତେ-ଲସନ୍ନିତାୟ ତତୋ ପରି ।
ସତ୍ତଙ୍ଗୁଲଂ ସଜ୍ଜୁପଟ୍ଟଂ, ସନ୍ଥରେସି ରଥେସଭୋ ॥
ମହାଥୂପ ପତିଟ୍ଠାନ-ଠାନେ ଏୱଂ ମହୀପତି ।
କାରେତ୍ୱା ପରିକମ୍ମାନି, ୱିପ୍ପସନ୍ନେନ ଚେତସା ॥
ଆସଳ୍ହୀ ସୁକ୍କପକ୍ଖସ୍ସ, ଦିୱସମ୍ହି ଚତୁଦ୍ଦସେ ।
କାରେତ୍ୱା ଭିକ୍ଖୁସଙ୍ଘସ୍ସ, ସନ୍ନିପାତମିଦଂ ୱଦି ॥
ମହାଚେତିୟ ମତ୍ଥାୟ, ଭଦନ୍ତାମଙ୍ଗଲିଟ୍ଠକଂ ।
ପତିଟ୍ଠାପେସ୍ସଂ ସ୍ୱେ ଏତ୍ଥ, ସବ୍ବୋ ସଙ୍ଘୋ ସମେତୁନୋ ॥
ବୁଦ୍ଧ ପୂଜା ପୟୋଗେନ, ମହାଜନହୀତତ୍ଥିକୋ ।
‘‘ମହାଜନୋ’ ପୋସଥିକୋ, ଗନ୍ଧମାଲାଦିଗଣ୍ହିୟ ॥
ମହାଥୂପ ପତିଟ୍ଠାନ-ଠାନଂ ୟାତୁ ସୁୱେ’’ଇତି ।
ଚେତିୟ ଠାନ ଭୂସାୟ, ଅମଚ୍ଚେ ଚ ନିୟୋଜୟି ॥
ଆଣାପିତା ନରିନ୍ଦେନ, ମୁନିନୋ ପିୟଗାରୱା ।
ଅନେକେହି ପକାରେହି, ତେ ତଂ ଠାନମଲଙ୍କରୁଂ ॥
ନଗରଂ ସକଲଞ୍ଚେୱ, ମଗ୍ଗଞ୍ଚେୱ ଇଧାଗତଂ ।
ଅନେକେହି ପକାରେହି, ଅଲଙ୍କାରୟି ଭୂପତି ॥
ପଭାତେ ଚ ଚତୁଦ୍ୱାରେ, ନଗରସ୍ସ ଠପାପୟି ।
ନହାପିତେ ନହାପକେ ଚ, ଅପ୍ପକେ ଚ ବହୂତଥା ॥
ୱତ୍ଥାନି ଗନ୍ଧମାଲା ଚ, ଅନ୍ନାନି ମଧୁରାନି ଚ ।
ମହାଜନତ୍ଥଂ ଭୂମିନ୍ଦୋ, ମହାଜନହିତେ ରତୋ ॥
ପଟିୟତ୍ତାନି ଏତାନି, ସାଦିୟିତ୍ୱା ୟଥାରୁଚି ।
ପୋରାଜାନପଦାଚେୱ ଥୂପଠାନମୁପାଗମୁଂ ॥
ସୁମଣ୍ଡିତେହି ନେକେହି, ଠାନନ୍ତର ୱିଧାନତୋ ।
ଆରକ୍ଖିତୋ ଅମଚ୍ଚେହି, ୟଥାଠାନଂ ମହୀପତି ॥
ସୁମଣ୍ଡିତାହି ନେକାହି, ଦେୱକଞ୍ଞୂପମାହି ଚ ।
ନାଟକୀହି ପରିବ୍ବୁଳ୍ହୋ, ସୁମଣ୍ଡିତ ପସ୍ସାଧିତୋ ॥
ଚତ୍ତାଲୀସ ସହସ୍ସେହି, ନରେହି ପରିୱାରିତୋ ।
ନାନା ତୂରିୟ ସଙ୍ଘୁଟ୍ଠୋ, ଦେୱରାଜ ୱିଲାସୱା ॥
ମହାଥୂପ ପତିଟ୍ଠାନଂ, ଠାନାଠାନ ୱିଚକ୍ଖଣୋ ।
ଅପରଣ୍ହେ ଉପାଗଞ୍ଛି, ନନ୍ଦୟନ୍ତୋ ମହାଜନଂ ॥
ଅଟ୍ଠୁତ୍ତରସହସ୍ସଂ ସୋ, ସାଟକାନିଟ୍ଠପାପିୟ ।
ପୁଟବଦ୍ଧାନି ମଜ୍ଝମ୍ହି, ଚତୁପସ୍ସେ ତତୋ ପନ ॥
ୱତ୍ଥାନି ରାସୀଂକାରେସି, ଅନେକାନି ମହୀପତି ।
ମଧୁସପ୍ପି ଗୁଳାଦୀହି ଚ, ମଙ୍ଗଲତ୍ଥଂ ଠପାପୟି ॥
ନାନାଦେସେହିପା’ଗଞ୍ଛୁଂ, ବହୱୋ ଭିକ୍ଖୱୋ ଇଧ ।
ଇଧ ଦୀପଟ୍ଠସଙ୍ଘସ୍ସ, କା କଥାୱ ଇଧାଗମେ ॥
ଥେରୋ’ ସୀତି ସହସ୍ସାନି, ଭିକ୍ଖୂ ଆଦାୟ ଆଗମା ।
ରାଜଗହସ୍ସ ସାମନ୍ତା, ଇନ୍ଦଗୁତ୍ତୋ ମହାଗଣୀ ॥
ସହସ୍ସାନି’ସିପତନା, ଭିକ୍ଖୂନଂ ଦ୍ୱାଦସା’ଦିୟ ।
ଧମ୍ମସେନୋ ମହାଥେରୋ, ଚେତିୟଠାନମାଗମା ॥
ସଟ୍ଠିଭିକ୍ଖୁସହସ୍ସାନି, ଆଦାୟ ଇଧମାଗମା ।
ପୀୟଦସ୍ସୀ ମହାଥେରୋ, ଜେତାରାମ ୱିହାରତୋ ॥
ୱେସାଲୀ ମହାୱନତୋ, ଥେରୋରୁ ବୁଦ୍ଧରକ୍ଖିତୋ ।
ଅଟ୍ଠାରସ ସହସ୍ସାନି, ଭିକ୍ଖୂ ଆଦାୟ ଆଗମା ॥
କୋସମ୍ବୀ ଘୋସିତାରାମା, ଥେରୋରୁ ଧମ୍ମରକ୍ଖିତୋ ।
ତିଂସଭିକ୍ଖୁସହସ୍ସାନି, ଆଦାୟ ଇଧ ଆଗମା ॥
ଆଦାୟୁଜ୍ଜେନୀୟଂ ଥେରୋ, ଦକ୍ଖିଣ ଗିରିତୋ ୟତି ।
ଚତ୍ତାରୀସ ସହସ୍ସାନି, ଅଗୋରୁ ସଙ୍ଘରକ୍ଖିତୋ ॥
ଭିକ୍ଖୂନଂ ସତସହସ୍ସଂ, ସଟ୍ଠସହସ୍ସାନି ଚା’ଦିୟ ।
ପୁପ୍ଫପୁରେ’ସୋକରାମା, ଥେରୋ ମିତ୍ତିଣ୍ଣ ନାମକୋ ॥
ଦୁୱେ ସତସହସ୍ସାନି, ସହସ୍ସାନି ଅସୀତି ଚ ।
ଭିକ୍ଖୂ ଗହେତ୍ୱାନୁ’ତ୍ତିଣ୍ଣୋ, ଥେରୋ କସ୍ମିରମଣ୍ଡଲା ॥
ଚତ୍ତାରୀସତ ସହସ୍ସାନି, ସହସ୍ସାନି ଚ ସଟ୍ଠି ଚ ।
ଭିକ୍ଖୂ ପଲ୍ଲୱଭୋଗମ୍ହା, ମହାଦେୱୋ ମହାମତୀ ॥
ୟୋନନଗରା’ଲସନ୍ଦାସୋ, ୟୋନ ମହାଧମ୍ମରକ୍ଖିତୋ ।
ଥେରୋ ତିଂସ ସହସ୍ସାନି, ଭିକ୍ଖୂ ଆଦାୟ ଆଗମା ॥
ୱଞ୍ଝାଟୱିୱତ୍ତନିୟା, ସେନାସନା ତୁ ଉତ୍ତରୋ ।
ଥେରୋ ସଟ୍ଠିସହସ୍ସାନି, ଭିକ୍ଖୂ ଆଦାୟ ଆଗମା ॥
ଚିତ୍ତଗୁତ୍ତୋ ମହାଥେରୋ, ବୋଧିମଣ୍ଡୱିହାରତୋ ।
ତିଂସ ଭିକ୍ଖୁସହସ୍ସାନି, ଆଦିୟିତ୍ୱା ଇଧାଗମା ॥
ଚନ୍ଦଗୁତ୍ତୋ ମହାଥେରୋ, ୱନୱାସପଦେସତୋ ।
ଆଗାସୀତି ସହସ୍ସାନି, ଆଦିୟିତ୍ୱା ୟତୀ ଇଧ ॥
ସୂରିୟଗୁତ୍ତୋମହାଥେରୋ, କେଲାସମ୍ହା ୱିହାରତୋ ।
ଛନ୍ନୱୁତି ସହସ୍ସାନି, ଭିକ୍ଖୂଆଦାୟ ଆଗମା ॥
ଭିକ୍ଖୂନଂ ଦୀପୱାସିନଂ, ଆଗତାନଞ୍ଚ ସବ୍ବସୋ ।
ଗଣନାୟ ପରିଚ୍ଛେଦୋ, ପୋରାଣେହି ନ ଭାସିତୋ ॥
ସମାଗତାନଂ ସବ୍ବେସଂ, ଭିକ୍ଖୁନଂ ତଂ ସମାଗମେ ।
ୱୁତ୍ତା ଖୀଣାସୱାୟେୱ, ତେ ଛନ୍ନୱୁତିକୋଟିୟୋ ॥
ତେ ମହାଚେତିୟଠାନଂ, ପରିୱାରେତ୍ୱା ୟଥାରହଂ ।
ମଜ୍ଝେ ଠପେତ୍ୱା ଓକାସଂ, ରଞ୍ଞୋ ଅଟ୍ଠଂସୁ ଭିକ୍ଖୱୋ ॥
ପୱିସିତ୍ୱା ତହିଂ ରାଜା, ଭିକ୍ଖୁସଙ୍ଘଂ ତଥା ଠିତଂ ।
ଦିସ୍ୱା ପସନ୍ନଚିତ୍ତେନ, ୱନ୍ଦିତ୍ୱା ହଟ୍ଠମାନସୋ ॥
ଗନ୍ଧମାଲାହି ପୂଜେତ୍ୱା, କତ୍ୱାନ ତିପଦକ୍ଖିଣଂ ।
ମଜ୍ଝେ ପୁଣ୍ଣଘଟଠାନଂ, ପୱିସିତ୍ୱା ସମଙ୍ଗଲଂ ॥
ସୁୱଣ୍ଣଖୀଲେ ପଟିମୁକ୍କଂ, ପରିବ୍ଭମନଦଣ୍ଡକଂ ।
ରାଜତେନ କତଂ ସୁଦ୍ଧଂ, ସୁଦ୍ଧପୀତି ବଲୋଦୟୋ ॥
ଗାହୟିତ୍ୱା ଅମଚ୍ଚେନ, ମଣ୍ଡିତେନ ସୁଜାତିନା ।
ଅଭିମଙ୍ଗଲଭୂତେନ, ଭୂତଭୂତିପରାୟଣୋ ॥
ମହନ୍ତଂ ଚେତିୟାୱଟ୍ଟଂ, କାରେତୁଂ କତନିଚ୍ଛୟୋ ।
ଭମାପୟିତୁ ମାରଦ୍ଧୋ, ପରିକମ୍ମିତ ଭୂମିୟଂ ॥
ସିଦ୍ଧତ୍ଥୋ ନାମ ନାମେନ, ମହାଥେରୋ ମହିଦ୍ଧିକୋ ।
ତଥାକରୋନ୍ତଂ ରାଜାନଂ, ଦୀଘଦସ୍ସୀ ନିୱାରୟି ॥
‘‘ଏୱଂ ମହନ୍ତଂ ଥୂପଞ୍ଚ, ଅୟଂ ରାଜା’ରଭିସ୍ସତି ।
ଥୂପେ ଅନିଟ୍ଠିତେୟେୱ, ମରଣଂ ଅସ୍ସ ହେସ୍ସତି ॥
ଭୱିସ୍ସତି ମହନ୍ତୋ ଚ, ଥୂପୋଦୁପ୍ପଟିସଙ୍ଖରୋ ।
ଇତି ସୋ ନାଗତଂ ପସ୍ସଂ, ମହନ୍ତତ୍ତଂ ନିୱାରୟି ॥
ସଙ୍ଘସ୍ସ ଚ ଅନୁଞ୍ଞାୟ, ଥେରୋ ସମ୍ଭାୱନାୟଚ ।
ମହନ୍ତଂ କତ୍ତୁକାମୋ’ପି, ଗଣ୍ହିତ୍ୱା ଥେରଭାସିତଂ ॥
ଥେରସ୍ସ ଉପଦେସେନ, ତସ୍ସ ରାଜା ଅକାରୟି ।
ମଜ୍ଝିମଂ ଚେତିୟାୱଟ୍ଟଂ, ପତିଟ୍ଠାପେତୁମିଟ୍ଠିକା ॥
ସୋୱଣ୍ଣରଜତେ ଚେୱ, ଘଟେ ମଜ୍ଝେଟ୍ଠପାପୟି ।
ଅଟ୍ଠଟ୍ଠ ଅଟ୍ଠିତୁସ୍ସାହୋ, ପରିୱାରିୟ ତେ ପନ ॥
ଅଟ୍ଠୁତ୍ତରସହସ୍ସଞ୍ଚ, ଠପାପେସି ନୱେ ଘଟେ ।
ଅଟ୍ଠୁତ୍ତରେ ଅଟ୍ଠୁତ୍ତରେ, ୱତ୍ଥାନଂ ତୁ ସତେ ପନ ॥
ଇଟ୍ଠିକାପୱରା ଅଟ୍ଠ, ଠପାପେସି ୱିସୁଂ ୱିସୁଂ ।
ସମ୍ମତେନ ଅମଚ୍ଚେନ, ଭୂସିତେନ ଅନେକଧା ॥
ତତୋ ଏକଂ ଗାହୟିତ୍ୱା, ନାନାମଙ୍ଗଲସଙ୍ଖତେ ।
ପୁରିତ୍ଥିମଦିସାଭାଗେ, ପଠମଂ ମଙ୍ଗଲିତ୍ଥିକଂ ॥
ପତିଟ୍ଠାପେସି ସକ୍କଚ୍ଚଂ, ମନୁଞ୍ଞେ ଗନ୍ଧକଦ୍ଦମେ ।
ଜାତିସୁମନ ପୁପ୍ଫେସୁ, ପୂଜିତେସୁ ତହିଂ ପନ ॥
ଅହୋସି ପୁଥୱୀକମ୍ପୋ, ସେସା ସତ୍ତାପି ସତ୍ତହି ।
ପତ୍ତିଟ୍ଠାପେସ’ ମଚ୍ଚେହି, ମଙ୍ଗଲାନି ଚ କାରୟି ॥
ଏୱଂ ଅସାଳ୍ହମାସସ୍ସ, ସୁକ୍କପକ୍ଖେ’ଭିସମ୍ମତେ ।
ଉପୋସଥେ ପନ୍ନରସେ, ପତିଟ୍ଠାପେସି ଇଟ୍ଠିକା ॥
ଚତୁଦ୍ଦିସଂ ଠିତେ ତତ୍ଥ, ମହାଥେରେ ଅନାସୱେ ।
ୱନ୍ଦିତ୍ୱା ପୂଜୟିତ୍ୱା ଚ, ସୁପ୍ପତିତୋ କମେନ ସୋ ॥
ପୁବ୍ବୁତ୍ତରଂ ଦିସଂ ଗନ୍ତ୍ୱା, ପିୟଦସ୍ସିଂ ଅନାସୱଂ ।
ୱନ୍ଦିତ୍ୱାନ ମହାଥେରଂ, ଅଟ୍ଠାସି ତସ୍ସ ସନ୍ତିକେ ॥
ମଙ୍ଗଲଂ ତତ୍ଥ ୱଡ୍ଢେନ୍ତୋ, ତସ୍ସ ଧମ୍ମମଭାସିସୋ ।
ଥେରସ୍ସ ଦେସନା ତସ୍ସ, ଜନସ୍ସା’ହୋସି ସାତ୍ଥିକା ॥
ଚତ୍ତାଲୀସସହସ୍ସାନଂ, ଧମ୍ମାଭିସମୟୋ ଅହୁ ।
ଚତ୍ତାଲୀସସହସ୍ସାନଂ, ସୋତାପତ୍ତିଫଲଂ ଅହୁ ॥
ସହସ୍ସଂ ସକଦାଗାମି, ଅନାଗାମି ଚ ତତ୍ତକା ।
ସହସ୍ସଂୟେୱ ଅରହନ୍ତୋ, ତତ୍ଥ’ହେସୁଂ ଗିହୀଜନା ॥
ଅଟ୍ଠାରସସହସ୍ସାନି, ଭିକ୍ଖୂଭିକ୍ଖୁନିୟୋ ପନ ।
ଚୁଦ୍ଦସେୱ ସହସ୍ସାନି, ଅରହତ୍ତେ ପତିଟ୍ଠୟୁଂ ॥
ଏୱମ୍ପପସନ୍ନମତିମା ରତନତ୍ତୟମ୍ହି,
ଚାଗାମିମୁତ୍ତମନସାଜନତାହି ତେନ ।
ଲୋକତ୍ଥସିଦ୍ଧି ପରମା ଭୱତୀତି ଞତ୍ୱା,
ସଦ୍ଧାଦିନେକଗୁଣୟୋଗ ରତିଂ କରେୟ୍ୟାତି ॥
ସୁଜନପ୍ପସାଦସଂ ୱେଗତ୍ଥାୟ କତେ ମହାୱଂସେ
ଥୂପାରମ୍ଭୋ ନାମ
ଏକୂନତିଂସତିମୋ ପରିଚ୍ଛେଦୋ ।
ତିଂସତିମ ପରିଚ୍ଛେଦ
ଧାତୁଗବ୍ଭରଚନୋ
ୱନ୍ଦିତ୍ୱାନ ମହାରାଜା, ସବ୍ବଂ ସଙ୍ଘଂ ନିମନ୍ତୟି ।
‘‘ୟାୱଚେତିୟନିଟ୍ଠାନା, ଭିକ୍ଖଂ ଗଣ୍ହଥ ମେ’’ଇତି ॥
ସଙ୍ଘୋ ତଂ ନାଧିୱାସେସି, ଅନୁପୁବ୍ବେନ ସୋ ପନ ।
ୟାୱନ୍ତୋ ୟାୱ ସତ୍ତାହଂ, ସତ୍ତାହମଧିୱାସନଂ ॥
ଅଲତ୍ଥୋ’ପଡ୍ଢଭିକ୍ଖୂହି, ତେ ଲଦ୍ଧା ସୁମନୋ’ୱ ସୋ ।
ଅଟ୍ଠାରସସୁ ଠାନେସୁ, ଥୂପଠାନସମନ୍ତତୋ ॥
ମଣ୍ଡପେ କାରୟିତ୍ୱାନ, ମହାଦାନଂ ପୱତ୍ତୟି ।
ସତ୍ଥାହଂ ତତ୍ଥ ସଙ୍ଘସ୍ସ, ତତୋ ସଙ୍ଘଂ ୱିସ୍ସଜ୍ଜୟି ॥
ତତୋ ଭେରିଂ ଚରାପେତ୍ୱା, ଇଟ୍ଠକା ୱଡ୍ଢକୀ ଲହୁଂ ।
ସନ୍ନିପାତେସି ତେ ଆସୁଂ, ପଞ୍ଚମତ୍ତସତାନି ହି ॥
କଥଂ କରିସ୍ସସି ନେ’କୋ, ପୁଚ୍ଛିତୋ ଆହ ଭୂପତି ।
‘‘ପେସ୍ସିୟାନଂ ସତଂ ଲଦ୍ଧା, ପଂସୂନଂ ସକଟଂ ଅହଂ ॥
ଖେପୟିସ୍ସାମି ଏକ୍କା’ହଂ, ତଂ ରାଜା ପଟିବାହୟି ।
ତତୋ ଉପଡ୍ଢୁପଡ୍ଢଞ୍ଚ, ପଂସୂ ଦ୍ୱେ ଅମ୍ମଣାନି ଚ ॥
ଆହଂସୁ ରାଜା ପଟିବାହି, ଚତୁରୋ ତେପି ୱଡ୍ଢକୀ ।
ଅଥେକୋ ପଣ୍ଡିତୋ ବ୍ୟତ୍ତୋ, ୱଡ୍ଢକୀ ଆହ ଭୂପତିଂ ॥
‘‘ଉଦୁକ୍ଖଲେ କୋଟ୍ଟୟିତ୍ୱା, ଅହଂ ସୁପ୍ପେହି ୱଟ୍ଟିତଂ ।
ପିଂସାପୟିତ୍ୱା ନିସଦେ, ଏତଂ ପଂସୂନମମ୍ମଣଂ ॥
ଇତି ୱୁତ୍ତୋ ଅନୁଞ୍ଞାସି, ତିଣାଦିନେତ୍ଥନୋ ସିୟୁଂ ।
ଚେତିୟମ୍ହୀତି ଭୂମିନ୍ଦୋ, ଇନ୍ଦତୁଲ୍ୟପରକ୍କମୋ ॥
‘‘କଂ ସଣ୍ଠାନଂ ଚେତିୟଂ ତଂ, କରିସ୍ସସି ତୁୱଂ ଇତି ।
ପୁଚ୍ଛିତଂ ତଂଖଣଂୟେୱ, ୱିସ୍ସକମ୍ମୋ ତମାୱିସି ॥
ସୋୱଣ୍ଣପାତିଂ ତୋ ୟସ୍ସ, ପୁରାପେତ୍ୱାୱ ୱଡ୍ଢକୀ ।
ପାଣିନା ୱାରିମାଦାୟ, ୱାରିପିଟ୍ଠିୟମାହନୀ ॥
ଫଲିକ ଲୋଲସଦିସଂ, ମହାଫୁବ୍ବୁଳମୁଟ୍ଠହି ।
ଆହୀ’ଦିସଂ କରିସ୍ସତି, ତୁସ୍ସିତ୍ୱାନ’ସ୍ସ ଭୂପତି ॥
ସହସ୍ସଗ୍ଘଂ ୱତ୍ଥୟୁଗଂ, ତଥା’ଲଙ୍କାର ପାଦୁକା ।
କହାପନାନି ଦ୍ୱାଦସ-ସହସ୍ସାନି ଚ ଦାପପି ॥
‘‘ଇଟ୍ଠକା ଆହାରାପେସ୍ସଂ, ଅପୀଳେନ୍ତୋ କଥଂ ନରେ’’ ।
ଇତି ରାଜା ୱିଚିନ୍ତେସି, ରତ୍ତିଂଞତ୍ୱାନ ତଂ ମରୂ ॥
ଚେତିୟସ୍ସ ଚତୁଦ୍ଧାରେ, ଆହରିତ୍ୱାନ ଇଟ୍ଠକା ।
ରତ୍ତିଂ ରତ୍ତିଂ ଠପୟିଂସୁ, ଏକେକାହପହୋନକା ॥
ତଂ ସୁତ୍ୱା ସୁମନୋରାଜା, ଚେତିୟେ କମ୍ମମାରଭି ।
ଅମୂଲମେତ୍ଥ କମ୍ମଞ୍ଚ, ନ କାତବ୍ବନ୍ତି ଞାପୟି ॥
ଏକେକସ୍ମିଂ ଦୁୱାରସ୍ମିଂ, ଠପାପେସି କହାପଣେ ।
ସୋଳସସତସହସ୍ସାନି, ୱତ୍ଥାନିସୁ ବହୂନି ଚ ॥
ୱିୱିଧଞ୍ଚ ଅଲଙ୍କାରଂ, ଖଜ୍ଜଂଭୋଜ୍ଜଂ ସପାନକଂ ।
ଗନ୍ଧମାଲାଗୁଳାଦିଚ, ମୁଖୱାସକପଞ୍ଚକଂ ॥
‘‘ୟଥାରୁଚିତଂ ଗଣ୍ହନ୍ତୁ, କମ୍ମଂ କତ୍ୱା ୟଥାରୁଚିଂ ।
ତେ ତଥେୱ ଅପେକ୍ଖିତ୍ୱା, ଅଦଂସୁ ରାଜକମ୍ମିକା ॥
ଥୂପକମ୍ମସହାୟତ୍ତଂ, ଏକୋ ଭିକ୍ଖୁନିକାମୟଂ ।
ମତ୍ତିକାପିଣ୍ଡମାଦାୟ, ଅତ୍ତନା ଅଭିସଙ୍ଖତଂ ॥
ଗନ୍ତ୍ୱାନ ଚେତିୟଟ୍ଠାନଂ, ୱଡ୍ଢେତ୍ୱା ରାଜକମ୍ମିକେ ।
ଅଦାସି ତଂ ୱଡ୍ଢକିସ୍ସ, ଗଣ୍ହନ୍ତୋୟେୱ ଜାନିସୋ ॥
ତସ୍ସା କାରଂ ୱିଦିତ୍ୱାନ, ତତ୍ଥାହୋସି କୁତୂହଲଂ ।
କମେନ ରାଜା ସୁତ୍ୱାନ, ଆଗତୋ ପୁଚ୍ଛି ୱଡ୍ଢକୀ ॥
ଦେୱ ଏକେନ ହତ୍ଥେନ, ପୁପ୍ଫାନା’ଦାୟ ଭିକ୍ଖୱୋ ।
ଏକେନ ମତ୍ତିକାପିଣ୍ଡଂ, ଦେନ୍ତି ମୟ୍ହଂ ଅହଂ ପନ ॥
ଅୟଂ ଆଗନ୍ତୁକୋ ଭିକ୍ଖୁ, ଅୟଂ ନେୱାସିକୋ ଇତି ।
ଜାନାମିନେୱା’ତି ୱଚୋ, ସୁତ୍ୱା ରାଜାସମପ୍ପୟି ॥
ଏକୋବଲତ୍ଥଂ ଦସ୍ସେତୁଂ, ମତ୍ତିକା ଦାୟକଂ ୟତିଂ ।
ସୋ ବଲତସ୍ସ ଦସ୍ସେସି, ସୋ ତଂ ରଞ୍ଞୋ ନିୱେଦୟି ॥
ଜାତିମକୁଲକୁମ୍ଭେସୋ, ମହାବୋଧଙ୍ଗଣେ ତୟୋ ।
ଠପାପେତ୍ୱା ବଲତ୍ଥେନ, ରାଜା ଦାପେସି ଭିକ୍ଖୁନୋ ॥
ଅଜାନିତ୍ୱା ପୂଜୟିତ୍ୱା, ଠିତସ୍ସେ’ତସ୍ସ ଭିକ୍ଖୁନୋ ।
ବଲତ୍ଥୋ ତଂ ନିୱେଦେସି, ତଦା ତଂ ଜାନି ସୋ ୟତି ॥
କେଲିୱାତେ ଜନପଦେ, ପିୟଙ୍ଗଲ୍ଲନିୱାସିକୋ ।
ଥେରୋ ଚେତିୟକମ୍ମସ୍ମିଂ, ସହାୟତ୍ତଂ ନିକାମୟଂ ॥
ତସ୍ସିତ୍ଥିକାୱଡ୍ଢକିସ୍ସ, ଞାତକୋ ଇଧ ଆଗତୋ ।
ତସ୍ସିଟ୍ଠିକା ସମତ୍ତେନ, ଞାତୋ କତ୍ୱାନ ଇଟ୍ଠକଂ ॥
କମ୍ମିୟେୱଡ୍ଢୟିତ୍ୱାନ, ୱଡ୍ଢକିସ୍ସ ଅଦାସିତଂ ।
ସୋ ତଂ ତତ୍ଥ ନିୟୋଜେସି, କୋଲାହଲମହୋସି ଚ ॥
ରାଜା ସୁତ୍ୱାୱ’ ତଂ ଆହ, ‘‘ଞାତୁଂ ସକ୍କା ତମିଟ୍ଠିକଂ’’ ।
ଜାନନ୍ତୋପି ନ ସକ୍କାତି, ରାଜାନଂ ଆହ ୱଡ୍ଢକୀ ॥
‘‘ଜାନାସି ତଂ ତ୍ୱଂ ଥେରଂତି’’,
ୱୁତ୍ତୋ ଆମା’’ତି ଭାସିତୋ ।
ତଂ ଞାପନତ୍ଥଂ ଅପ୍ପେସି,
ବଲତ୍ଥଂ ତସ୍ସ ତୂପତି ॥
ବଲତ୍ଥୋ ତେନ ତଂ ଞତ୍ୱା, ରାଜାନୁଞ୍ଞାୟୁପାଗତୋ ।
କଟ୍ଠହାଲପରିୱେଣେ, ଥେରଂ ପସ୍ସିୟ ମନ୍ତିୟ ॥
ଥେରସ୍ସ ମଗମନାହଞ୍ଚ, ଗତିଠାନଞ୍ଚ ଜାନିୟ ।
‘‘ତୁମ୍ହେହି ସହ ଗଚ୍ଛାମି, ସକଂ ଗାମଂ’’ନ୍ତି ଭାସିୟ ॥
ରଞ୍ଞୋ ସବ୍ବଂ ନିୱେଦେସି, ରାଜା ତସ୍ସ ଅଦାପୟି ।
ୱତ୍ଥୟୁଗଂ ସହସ୍ସଗ୍ଘଂ, ମହଗ୍ଘଂ ରତ୍ତକମ୍ବଲଂ ॥
ସାମଣକେ ପରିକ୍ଖାରେ, ବହୁକେ ସକ୍ଖରମ୍ପି ଚ ।
ସୁଗନ୍ଧ ତେଲନାଳିଞ୍ଚ, ଦାପେତ୍ୱା ଅନୁସାସିତଂ ॥
ଥେରେନ ସହ ଗନ୍ତ୍ୱା ସୋ, ଦିସ୍ସନ୍ତେ ପିୟଗଲ୍ଲକେ ।
ଥେରଂ ସୀତାୟ ଛାୟାୟ, ସୋଦକାୟ ନିସୀଦିୟ ॥
ସକ୍ଖରପାଣକଂ ଦତ୍ୱା, ପାଦେ ତେଲେନ ମକ୍ଖିୟ ।
ଉପାହନାନି ୟୋଜେତ୍ୱା, ପରିକ୍ଖାରେ ଉପାନୟି ॥
କୁଲୂପଗସ୍ସ ଥେରସ୍ସ, ଗହିତା ମେ ଇମେ ମୟା ।
ୱତ୍ଥୟୁଗଂତୁ ପୁତ୍ତସ୍ସ, ସବ୍ବେ ତାନି ଦଦାମି ୱୋ ॥
ଇତି ୱତ୍ୱାନ ଦତ୍ୱା ତେ, ଗହେତ୍ୱା ଗଚ୍ଛତୋ ପନ ।
ୱନ୍ଦିତ୍ୱା ରାଜୱଚସା, ରଞ୍ଞୋ ସନ୍ଦେସମାହ ସୋ ॥
ମହାଥୂପେ କୟିରମାନେ, ସତିୟାକମ୍ମକାରକା ।
ଅନେକସଙ୍ଖାହି ଜନା, ପସନ୍ନା ସୁଗତିଂ ଗତା ॥
ଚିତ୍ତପ୍ପସାଦମତ୍ତେନ, ସୁଗତେ ଗତିଉତ୍ତମା ।
ଲବ୍ଭତୀତି ୱିଦିତ୍ୱାନ, ଥୂପପୂଜଂ କରେ ବୁଧୋ ॥
ଏତ୍ଥେୱ ଭତିୟା କମ୍ମଂ, କରିତ୍ୱା ଇତ୍ଥିୟୋ ଦୁୱେ ।
ତାୱତିଂସମ୍ହି ନିବ୍ବତ୍ତା, ମହାଥୂପମ୍ହି ନିଟ୍ଠିତେ ॥
ଆୱଜ୍ଜିତ୍ୱା ପୁବ୍ବକମ୍ମଂ, ଦିଟ୍ଠକମ୍ମଫଲା ଉଭୋ ।
ଗନ୍ଧମାଲା’ଦିୟିତ୍ୱାନ, ଥୂପଂ ପୂଜେତୁମାଗତା ॥
ଗନ୍ଧମାଲାହି ପୂଜେତ୍ୱା, ଚେତିୟଂ ଅଭିୱନ୍ଦିସୁଂ ।
ତସ୍ମିଂ ଖଣେ ଭାତିୱଙ୍କ-ୱାସୀ ଥେରୋ ମହାସିୱୋ ॥
ରତ୍ତିଭାଗେ ମହାଥୂପଂ, ୱନ୍ଦିସ୍ସାମୀତି ଆଗତୋ ।
ତାଦିସ୍ୱାନ ମହାସତ୍ତ-ପଣ୍ଣିରୁକ୍ଖମ ପସ୍ସିତୋ ॥
ଅଦସ୍ସୟିତ୍ୱା ଅତ୍ତାନଂ, ପସ୍ସଂ ସମ୍ପତ୍ତିମବ୍ଭୁତଂ ।
ଠତ୍ୱା ତାସଂ ୱନ୍ଦନାୟ, ପରିୟୋସାନେ ଅପୁଚ୍ଛିତଂ ॥
‘‘ଭାସତେ ସକଲୋ ଦୀପୋ,
ଦେହୋଭାସେନ ୱୋ ଇଧ ।
କିନ୍ନୁକମ୍ମଂ କରିତ୍ୱାନ,
ଦେୱଲୋକଂ ଇତୋ ଗତା ॥
ମହାଥୂପେ କତଂ କମ୍ମଂ, ତସ୍ସ ଆହଂସୁ ଦେୱତା ।
ଏୱଂ ତଥାଗତେ ହେୱ, ପସାଦୋ ହି ମହପ୍ଫଲୋ ॥
ପୁପ୍ଫଧାନତ୍ତୟଂ ଥୂପେ, ଇଟ୍ଠିକାହି ଚିତଂ ଚିତଂ ।
ସମଂ ପଥୱିୟା କତ୍ୱା, ଇଦ୍ଧିମନ୍ତୋ’ୱ ସୀଦୟୁଂ ॥
ନୱ ୱାରେ ଚିତଂ ସବ୍ବଂ, ଏୱଂ ଓସୀଦୟିଂସୁ ତେ ।
ଅଥ ରାଜା ଭିକ୍ଖୁସଙ୍ଘ-ସନ୍ନିପାତ ମକାରୟି ॥
ତତ୍ଥାସୀତିସହସ୍ସାନି, ସନ୍ନିପାତମ୍ହି ଭିକ୍ଖୱୋ ।
ରାଜା ସଙ୍ଘମୁପାଗମ୍ମ, ପୂଜେତ୍ୱା ଅଭିୱନ୍ଦିୟ ॥
ଇଟ୍ଠକୋସିଦନେହେତୁଂ, ପୁଚ୍ଛି ସଙ୍ଘୋ ୱିୟାକରି ।
‘‘ନୋ ସୀଦନତ୍ଥଂ ଥୂପସ୍ସ, ଇଦ୍ଧିମନ୍ତେହି ଭିକ୍ଖୂହି ॥
କତଂ ଏତଂ ମହାରାଜ, ନ ଇଦାନି କରିସ୍ସତେ ।
ଅଞ୍ଞଥତ୍ତମକତ୍ୱା ତଂ, ମହାଥୂପଂ ସମାପୟ ॥
ତଂ ସୁତ୍ୱା ସୁମନୋ ରାଜା, ଥୂପକମ୍ମମକାରୟି ।
ପୁପ୍ଫାଧାନେସୁ ଦସସୁ, ଇଟ୍ଠିକା ଦସକୋଟିୟୋ ॥
ଭିକ୍ଖୁସଙ୍ଘୋ ସାମଣେରେ, ଉତ୍ତରଂ ସୁମନମ୍ପି ଚ ।
‘‘ଚେଭିୟ ଧାତୁଗବ୍ଭତ୍ଥଂ, ପାସାଣେ ମେଘୱଣ୍ଣକେ ॥
ଆହରଥା’’ତି ୟୋଜେସି, ତେ ଗନ୍ତ୍ୱା ଉତ୍ତରଂ କୁରୁଂ ।
ଅସୀତି ରତନାୟାମ, ୱିତ୍ଥାରେ ରୱିଭାସୁରେ ॥
ଅଟ୍ଠଙ୍ଗୁଲାନି ବହଲେ, ଗଣ୍ଠିପୁପ୍ଫନିଭେ ସୁଭେ ।
ଛମେଘୱଣ୍ଣପାସାଣେ, ଆହରିଂସୁ ଖଣେତତୋ ॥
ପୁପ୍ଫଧାନସ୍ସ ଉପରି, ମଜ୍ଝେ ଏକଂ ନିପାତିୟ ।
ଚତୁପସ୍ସମ୍ହି ଚତୁରୋ, ମଞ୍ଜୂସଂ ୱିୟ ୟୋଜିୟ ॥
ଏକଂ ପିଧାନକତ୍ଥାୟ, ଦିସାଭାଗେ ପୁରତ୍ଥିମେ ।
ଅଦସ୍ସନଂ କରିତ୍ୱା ତେ, ଠପୟିଂସୁ ମହିଦ୍ଧିକା ॥
ମଜ୍ଝମ୍ହି ଧାତୁଗବ୍ଭସ୍ସ, ତସ୍ସ ରାଜା ଅକାରୟି ।
ରତନମୟଂ ବୋଧିରୁକ୍ଖଂ, ସବ୍ବାକାରମନୋରମଂ ॥
ଅଟ୍ଠାରସ ରତନିକୋ, ଖନ୍ଧୋ ସାଖାସ୍ସ ପଞ୍ଚ ଚ ।
ପୱାଲମୟମୂଲୋ ସୋ, ଇନ୍ଦନୀଲେ ପତିଟ୍ଠିତୋ ॥
ସୁସୁଦ୍ଧରଜତକ୍ଖନ୍ଧୋ, ମଣିପତ୍ତେହି ସୋଭିତୋ ।
ହେମମୟପଣ୍ଡୁପତ୍ତ, ଫଲୋ ପୱାଳଅଙ୍କୁରୋ ॥
ଅଥ ମଙ୍ଗଲିକା ତସ୍ସ, ଖନ୍ଧେ ପୁପ୍ଫଲତାପି ଚ ।
ଚତୁପ୍ପଦାନଂ ପନ୍ତୀଧ, ହଂସପନ୍ତି ଚ ସୋଭନା ॥
ଉଦ୍ଧଂ ଚାରୁୱିତାନନ୍ତେ, ମୁତ୍ତା କିଂ କିଣିଜାଲକା ।
ସୁୱଣ୍ଣ ଘଣ୍ଟାପନ୍ତୀଧ, ଦାମାନି ଚ ତହିଂ ତହିଂ ॥
ୱିତାନ ଚତୁକୋଣମ୍ହି, ମୁତ୍ତାଦାମକଲାପକୋ ।
ନୱସତ ସହସ୍ସଗ୍ଘୋ, ଏକେ କୋ ଅସିଲମ୍ବିତୋ ॥
ରୱିଚନ୍ଦତାର ରୂପାନି, ନାନାପଦୁମକାନି ଚ ।
ରତନେହି କତାନେୱ, ଧିତାନେ ଅପ୍ପିତାନ’ୟୁଂ ॥
ଅଟ୍ଠୁତ୍ତରସହସ୍ସାନି, ୱତ୍ତାନି ୱିୱିଧାନି ଚ ।
ମହଗ୍ଘନାନାରଙ୍ଗାନି, ୱିତାନେ ଲମ୍ବିତାନ’ୟୁଂ ॥
ବୋଧିଂ ପରିକ୍ଖିପିତ୍ୱାନ, ନାନାରତନୱେଦିକା ।
ମହାମଲକ ମୁତ୍ତାହି, ସନ୍ଥାରେତୁ ତଦନ୍ତରେ ॥
ନାନାରତନ ପୁପ୍ଫାନଂ, ଚତୁଗନ୍ଧୂଦକସ୍ସ ଚ ।
ପୁଣ୍ଣା ପୁଣ୍ଣଘଟପନ୍ତି, ବୋଧିମୂଲେ କତାନ’ୟୁଂ ॥
ବୋଧି ପାଚିନ ପଞ୍ଞତ୍ତେ, ପଲ୍ଲଙ୍କେକୋଟିଅଗ୍ଘକେ ।
ସୋୱଣ୍ଣ ବୁଦ୍ଧପଟିମଂ, ନିସୀଦାପେସି ଭାସୁରଂ ॥
ସରୀରାୱୟୱାତସ୍ସା, ପଟିମାୟ ୟଥାରହଂ ।
ନାନାୱଣ୍ଣେହି ରତନେହି, କତା ସୁରୁଚିରା ଅହୁଂ ॥
ମହାବ୍ରହ୍ମା ଠିତୋ ତତ୍ଥ, ରାଜତଚ୍ଛତ୍ତ ଧାରକୋ ।
ୱିଜୟୁତ୍ତରସଙ୍ଖେନ, ସକ୍କୋ ଚ ଅଭିସେକଦୋ ॥
ୱିଣାହତ୍ଥୋ ପଞ୍ଚସିଖୋ, କାଳନାଗୋ ସନାଟିକୋ ।
ସହସ୍ସହତ୍ଥୋ ମାରୋ ଚ, ସହତ୍ତୀସହ କିଂକରୋ ॥
ପାଚିନପଲ୍ଲଙ୍କନିଭା, ତୀସୁ ସେସଦିସାସୁ ଚ ।
କୋଟିକୋଟିଧନଗ୍ଘା ଚ, ପଲ୍ଲଙ୍କା ଅତ୍ଥତା ଅହୁଂ ॥
ବୋଧିଂ ଉସ୍ସିସକେ କତ୍ୱା, ନାନାରତନମଣ୍ଡିତଂ ।
କୋଟି ଧନଗ୍ଘକଂୟେୱ, ପଞ୍ଞତ୍ତଂ ସୟନଂ ଅହୁ ॥
ସତ୍ତସତ୍ତାହ ଠାନେସୁ, ତତ୍ଥ ତତ୍ଥ ୟଥାରହଂ ।
ଅଧିକାରେ ଅକାରେସି, ବ୍ରହ୍ମୟାଚନମେୱ ଚ ॥
ଧମ୍ମଚକ୍କପ୍ପୱତ୍ତଞ୍ଚ, ୟସପବ୍ବଜନମ୍ପି ଚ ।
ଭଦ୍ଦୱଗ୍ଗିୟ ପବ୍ବଜ୍ଜଂ, ଜଟିଲାନଂ ଦମନମ୍ପି ଚ ॥
ବିମ୍ବିସାରାଗମଞ୍ଚାପି, ରାଜଗେହପ୍ପୱେସନଂ ।
ୱେଳୁୱନସ୍ସଗହନଂ, ଅସୀତିସାୱକେ ତଥା ॥
କପିଲ ୱତ୍ଥୁଗମନଂ, ତଥା ରତନ ଚଙ୍କମଂ ।
ରାହୁଲାନନ୍ଦପବ୍ବଜ୍ଜଂ, ଗହଣଂ ଜେତୱନସ୍ସ ଚ ॥
ଅମ୍ବମୂଲେ ପାଟିହୀରଂ, ତାୱତିଂସମ୍ହି ଦେସନଂ ।
ଦେୱୋରୋହଣପାଟିହୀରଂ, ଥେରପଞ୍ହସମାଗମଂ ॥
ମହାସମୟ ସୁତ୍ତନ୍ତଂ, ରାହୁଲୋୱାଦମେୱଚ ।
ମହାମଙ୍ଗଲସୁତ୍ତଞ୍ଚ, ଧନପାଲସମାଗମଂ ॥
ଆଳୱକଙ୍ଗୁଲିମାଲ, ଅପଲାଲଦମନମ୍ପି ଚ ।
ପାରାୟନକସମିତିଂ, ଆୟୁୱୋସ୍ସଜ୍ଜନଂ ତଥା ॥
ସୂକରମଦ୍ଦୱଗ୍ଗାହଂ, ସିଙ୍ଗୀୱଣ୍ଣୟୁଗସ୍ସ ଚ ।
ପସନ୍ନୋଦକପାନଞ୍ଚ, ପରିନିବ୍ବାନ ମେୱ ଚ ॥
ଦେୱମନୁସ୍ସ ପରିଦେୱଂ, ଥେରେନ ପାଦୱନ୍ଦନଂ ।
ଦହନଂ ଅଗ୍ଗିନିବ୍ବାନଂ, ତତ୍ଥ ସକ୍କାର ମେୱ ଚ ॥
ଧାତୁୱିତଙ୍ଗ ଦୋଣେନ, ପସାଦଜନକାନି ଚ ।
ୟେଭୁୟ୍ୟେନ ଅକାରେସି, ଜାତକାନି ସୁଜାତିମା ॥
ୱେସ୍ସନ୍ତର ଜାତକନ୍ତୁ, ୱିତ୍ଥାରେନ ଅକାରୟି ।
କୁସିନାପୁରତୋ ୟାୱ, ବୋଧିମନ୍ତି ତଥେୱ ଚ ॥
ଚତୁଦ୍ଦିସଂ ତେ ଚତ୍ତାରୋ, ମହାରାଜା ଠିତା ଅହୁଂ ।
ତେତ୍ତିଂସଦେୱ ପୁତ୍ତା ଚ, ବାତ୍ତିଂସ ଚ କୁମାରିୟୋ ॥
ୟକ୍ଖସେନାପତିଅଟ୍ଠ, ୱୀସତି ଚ ତତୋ ପରି ।
ଅଞ୍ଜଲୀପଗ୍ଗହାଦେୱା, ପୁପ୍ଫପୁଣ୍ଣଘଟା ତତୋ ॥
ନଚ୍ଚକା ଦେୱତାଚେୱ, ତୂରିୟୱାଦକ ଦେୱତା ।
ଆଦାସଗାହକା ଦେୱା, ପୁପ୍ଫସାଖା ଧରା ତଥା ॥
ପଦୁମାଦିଗାହକା ଦେୱା, ଅଞ୍ଞେ ଦେୱା ଚ ନେକଧା ।
ରତନଗ୍ଘିୟ ପନ୍ତି ଚ, ଧମ୍ମଚକ୍କାନ ମେୱ ଚ ॥
ଖଗ୍ଗଧରାଦେୱପନ୍ତି, ଦେୱାପାତିଧରା ତଥା ।
ତେସଂ ସୀସେ ପଞ୍ଚହତ୍ଥା, ଗନ୍ଧତେଲସ୍ସ ପୂରିତା ॥
ଦୁକୂଲୱଟ୍ଟିକା ପନ୍ତି, ସଦାପଞ୍ଜଲିତା ଅହୁ ।
ଫଲିକଗ୍ଘିୟେ ଚତୁକ୍କଣ୍ଣେ, ଏକେକୋ ଚ ମହାମଣି ॥
ସୁୱଣ୍ଣମଣି ମୁତ୍ତାନଂ, ରାସିୟୋ ୱଜିରସ୍ସ ଚ ।
ଚତୁକ୍କଣ୍ଣେସୁ ଚତ୍ତାରୋ, କଥା’ହେସୁଂ ପଭସ୍ସରା ॥
ମେଦୱଣ୍ଣକପାସାଣ, ଭିତ୍ତିୟଂୟେୱ ଉଜ୍ଜଲା ।
ୱିଜ୍ଜାତା ଅପ୍ପିତା ଆସୁଂ, ଧାତୁଗବ୍ଭେୱିଭୂସିତା ॥
ରୂପକାନେତ୍ତସବ୍ବାନି, ଧାତୁଗବ୍ଭେ ମନୋରମେ ।
ଘନକୋଟ୍ଟି ମହେମସ୍ସ, କାରାପେସି ମହୀପତି ॥
କମ୍ମାଧିଟ୍ଠାୟକୋ ଏତ୍ଥ, ସବ୍ବଂ ସଂୱିଦହି ଇମଂ ।
ଇନ୍ଦଗୁତ୍ତୋ ମହାଥେରୋ, ଛଳଭିଞ୍ଞୋ ମହାମତୀ ॥
ସବ୍ବଂ ରାଜିଦ୍ଧିୟା ଏତଂ, ଦେୱତାନଞ୍ଚ ଇଦ୍ଧିୟା ।
ଇଦ୍ଧିୟା ଅରିୟାନଞ୍ଚ, ଅସମ୍ବାଧଂ ପତିଟ୍ଠିତଂ ॥
ନିଟ୍ଠନ୍ତଂ ସୁଗତଞ୍ଚ ପୂଜିୟତମଂ ଲୋକୁତ୍ତମଂ ନିତ୍ତମଂ ।
ଧାତୁ ତସ୍ସ ୱିଚୁଣ୍ଣିତଂ ଜନହିତଂ ଆସିଂସତା ପୂଜିୟ ।
ପୁଞ୍ଞଂ ତଂ ସମମିଚ୍ଚ’ଚେଚ୍ଚ ମତିମା ସଦ୍ଧାଗୁଣଲଙ୍କତୋ ।
ତିଟ୍ଠନ୍ତଂ ସୁଗତଂ ୱିୟ’ସ୍ସ ମୁନିନୋ ଧାତୁ ଚ ସମ୍ବୂଜୟେ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଧାତୁଗବ୍ଭରଚନୋ ନାମ
ତିଂସତିମୋ ପରିଚ୍ଛେଦୋ ।
ଏକତିଂସତିମ ପରିଚ୍ଛେଦ
ଧାତୁନିଧାନଂ
ଧାତୁଗବ୍ଭମ୍ହି କମ୍ମାନି, ନିଟ୍ଠାପେତ୍ୱା ଅରିନ୍ଦମୋ ।
ସନ୍ନିପାତଂ କାରୟିତ୍ୱା, ସଙ୍ଘସ୍ସ ଇଧମବ୍ରୱି ॥
ଧାତୁଗବ୍ଭମ୍ହି କମ୍ମାନି, ମୟା ନିଟ୍ଠାପି ତାନି ହି ।
ସୁୱେ ଧାତୁଂ ନିଧେସ୍ସାମି, ଭନ୍ତେ ଜାନାଥ ଧାତୁୟୋ’’ ॥
ଇଦଂ ୱତ୍ୱା ମହାରାଜା, ନଗରଂ ପାୱିସୀ ତତୋ ।
ଧାତୁ ଆହରକଂ ଭିକ୍ଖୁଂ, ଭିକ୍ଖୁସଙ୍ଘୋ ୱିଚିନ୍ତିୟ ॥
ସୋଣୁତ୍ତରଂ ନାମୟତିଂ, ପୂଜାପରିୱେଣୱାସି କଂ ।
ଧାତାହରଣ କମ୍ମମ୍ହି, ଛଳଭିଞ୍ଞଂ ନିୟୋଜୟି ॥
ଚାରିକଂ ଚରମାନମ୍ହି, ନାଥେ ଲୋକହିତାୟହି ।
ନନ୍ଦୁତ୍ତରୋ’ତି ନାମେନ, ଗଙ୍ଗାତୀରମ୍ହି ମାଣୱୋ ॥
ନିମନ୍ତେତ୍ୱା’ଭିସମ୍ବୁଦ୍ଧଂ, ସହ ସଙ୍ଘଂ ଅଭୋଜୟି ।
ସତ୍ଥାପୟୋଗପଟ୍ଠାନେ, ସସଙ୍ଘୋନାୱମାରୁହି ॥
ତତ୍ଥ ଭଦ୍ଦଜିଥେରୋ ତୁ, ଛଳଭିଞ୍ଞୋ ମହିଦ୍ଧିକୋ ।
ଜଲପକ୍ଖଲିତଟ୍ଠାନଂ, ଦିସ୍ୱା ଭିକ୍ଖୂ ଇଦଂ ୱଦୀ ॥
‘‘ମହା ପନାଦଭୂତେନ, ମୟା ୱୁତ୍ତୋ ସୁୱଣ୍ଣୟୋ ।
ପାସାଦୋ ପତିତୋ ଏତ୍ଥ, ପଞ୍ଚୱୀସତିୟୋଜକୋ ॥
ତଂ ପାପୁଣିତ୍ୱା ଗଙ୍ଗାୟ, ଜଲଂ ପକ୍ଖିଲି ତଂ ଇଧ ।
ଭିକ୍ଖୂ ଅସଦ୍ଦହନ୍ତା ତଂ, ସତ୍ଥୁନୋ ତଂ ନିୱେଦୟୁଂ ॥
ସତ୍ଥା’ହ ‘‘କଙ୍ଖଂ ଭିକ୍ଖୁନଂ, ୱିନୋଦେହୀ’’ତିସୋତତୋ ।
ଞାପେତୁଂ ବ୍ରହ୍ମଲୋକେ’ପି, ୱସୱତ୍ତିସମତ୍ଥ ତଂ ॥
ଇଦ୍ଧିୟା ନଭମୁଗ୍ଗନ୍ତ୍ୱା, ସତ୍ତତାଲସମେ ଠିତୋ ।
ଦୂସ୍ସଥୂପଂ ବ୍ରହ୍ମଲୋକେ, ଠପେତ୍ୱା ୱଡ୍ଢିତେ କରେ ॥
ଇଧା’ନେତ୍ୱା ଦସ୍ସୟିତ୍ୱା, ଜନସ୍ସ ପୁନ ତଂ ତହିଂ ।
ଠପୟିତ୍ୱା ୟଥାଠାନେ, ଇଦ୍ଧିୟା ଗଙ୍ଗାମାଗତୋ ॥
ପାଦଙ୍ଗୁଟ୍ଠେନ ପାସାଦଂ, ଗହେତ୍ୱା ଥୁପିକାୟସୋ ।
ଉସ୍ସାପେତ୍ୱାନ ଦସ୍ସେତ୍ୱା, ଜନସ୍ସ ଖିପି ତଂ ତହିଂ ॥
ନନ୍ଦୁତ୍ତରୋ ମାଣୱକୋ, ଦିସ୍ୱା ତଂ ପାଟିହାରିୟଂ ।
ପରାୟତ୍ତମହଂ ଧାତୁଂ, ପହୁଆନୟିତୁଂ ସିୟଂ ॥
ଇତି ପତ୍ଥୟି ତେନେତଂ, ସଙ୍ଘୋ ସୋଣୁତ୍ତରଂ ୟତିଂ ।
ତସ୍ମିଂ କମ୍ମେ ନିୟୋଜେସି, ସୋଳସୱସ୍ସିକଂ ଅପି ॥
‘‘ଆହରାମି କୁତୋ ଧାତୁଂ’’, ଇତି ସଙ୍ଘମପୁଚ୍ଛିସୋ ।
କଥେସି ସଙ୍ଘୋ ଥେରସ୍ସ, ତସ୍ସ ତା ଧାତୁୟୋ ଇତି ॥
‘‘ପରିନିବ୍ବାନ ମଞ୍ଚମ୍ହି, ନିପନ୍ନୋ ଲୋକ ନାୟକୋ ।
ଧାତୂହିପିଲୋକହି ତଂ, କାତୁଂ ଦେୱିନ୍ଦ ମବ୍ରୁୱି ॥
ଦେୱିନ୍ଦ’ଟ୍ଠସୁ ଦୋଣେସୁ, ମମ ସାରିରଧାଥୁସୁ ।
ଏକଂ ଦୋଣଂ ରାମଗାମେ, କୋଳିୟେହି ଚ ସକ୍କତଂ ॥
ନାଗଲୋକଂ ତତୋ ନିତଂ, ତତୋ ନାଗେହି ସକ୍କତଂ ।
ଲଂକାଦିପେ ମହାଥୂପେ, ନିଧାନାୟ ଭୱିସ୍ସତି ॥
ମହାକସ୍ସପତ୍ଥେରୋପି, ଦୀଘଦସ୍ସୀ ମହାୟତି ।
ଧମ୍ମାସୋକ ନରିନ୍ଦେନ, ଧାତୁୱିତ୍ଥାରକାରକୋ ॥
ରାଜଗହସ୍ସ ସାମନ୍ତେ, ରଞ୍ଞା ଅଜାତସତ୍ତୁନା ।
କାରାପେନ୍ତୋ ମହାଧାତୁଂ, ନିଧାନଂ ସାଧୁ ସଙ୍ଖତଂ ॥
ସତ୍ତ ଦୋଣାନି ଧାତୂନଂ, ଆହରିତ୍ୱାନ କାରୟି ।
ରାମଗାମମ୍ହି ଦୋଣନ୍ତୁ, ସତ୍ତୁଚିତ୍ତଞ୍ଞୁନ’ଗ୍ଗହି ॥
ମହାଧାତୁନିଧାନଂ ତଂ, ଧମ୍ମାସୋକୋପି ଭୂପତି ।
ପସ୍ସିତ୍ୱା ଅଟ୍ଠମଂ ଦୋଣଂ, ଆଣାପେତୁଂମକିଂ ଅକା ॥
ମହାଥୂପେ ନିଧାନତ୍ଥଂ, ୱିହିତଂ ତଂ ଜିନେନି’ତି ।
ଧମ୍ମାସୋକଂ ନିୱାରେସୁଂ, ତତ୍ଥ ଖିଣାସୱାୟତି ॥
ରାମଗାମମ୍ହି ଥୂପୋତୁ, ଗଙ୍ଗାତୀରେ କତୋ ତତୋ ।
ଭିଜ୍ଜିଗଙ୍ଗାୟ ଓଘେନ, ସୋତୁ ଧାତୁ କରଣ୍ଡକୋ ॥
ସମୁଦ୍ଦଂ ପୱିସିତ୍ୱାନ, ଦ୍ୱିଧା ଭିନ୍ନେ ଜଲେ ତହିଂ ।
ନାନାରତନପିଟ୍ଠମ୍ହି, ଅଟ୍ଠାରସ୍ମିଂ ସମାକୁଲୋ ॥
ନାଗା ଦିସ୍ୱା କରଣ୍ଡଂ ତଂ, କାଳନାଗସ୍ସ ରାଜିନୋ ।
ମଞ୍ଜେରିକନାଗଭୱନଂ, ଉପଗମ୍ମ ନିୱେଦୟୁଂ ॥
ଦସକୋଟିସହସ୍ସେହି, ଗନ୍ତ୍ୱା ନାଗେହି ସୋ ତହିଂ ।
ଧାତୂ ତା ଅଭିପୂଜେନ୍ତୋ, ନେତ୍ୱାନ ଭୱନଂ ସକଂ ॥
ସବ୍ବରତନମୟଂ ଥୂପଂ, ତସ୍ସୋପରିଘରଂ ତଥା ।
ମାପେତ୍ୱା ସହ ନାଗେହି, ସଦା ପୂଜେସି ସାଦରୋ ॥
ଆରକ୍ଖାମହତୀ ତତ୍ଥ, ଗନ୍ତ୍ୱା ଧାତୁଇଧାନୟ ।
ସୁୱେ ଧାତୁନିଧାନଞ୍ହି, ଭୂମିପାଲୋ କରିସ୍ସତି’’ ॥
ଇଚ୍ଚେୱଂ ସଙ୍ଘୱଚନଂ, ସୁତ୍ୱା ସାଧୂତି ସୋ ପନ ।
ପତ୍ତବ୍ବକାଲଂ ପେକ୍ଖନ୍ତୋ, ପରିୱେଣ ମଗାସକଂ ॥
ଭୱିସ୍ସତି ସୁୱେ ଧାତୁ, ନିଧାନନ୍ତି ମହୀପତି ।
ଚାରେସି ନଗରେ ଭେରିଂ, ସବ୍ବ କିଚ୍ଚଂ ୱିଧାୟ ତଂ ॥
ନଗରଂ ସକଲଞ୍ଚେୱ, ଇଧାଗାମିଞ୍ଚ ଅଞ୍ଜସଂ ।
ଅଲଙ୍କାରୟି ସକ୍କଚ୍ଚଂ, ନଗରେ ଚ ୱିଭୂସୟି ॥
ସକ୍କୋ ଦେୱାନମିନ୍ଦୋ ଚ, ଲଂକାଦୀପମସେସକଂ ।
ଆମନ୍ତେତ୍ୱା ୱିସ୍ସକମ୍ମଂ, ଅଲଙ୍କାରୟିନେକଧା ॥
ନଗରସ୍ସ ଚତୁଦ୍ୱାରେ, ୱତ୍ତଭତ୍ତଂହି ନେକଧା ।
ମହାଜନୋପଭୋଗତ୍ଥଂ, ଠପାପେସି ନରାଧିପୋ ॥
ଉପୋସଥେ ପନ୍ନରସେ, ଅପରନ୍ହେ ସୁମାନସୋ ।
ପଣ୍ଡିତୋ ରାଜକିଚ୍ଚେସୁ, ସବ୍ବାଲଙ୍କାର ମଣ୍ଡିତୋ ॥
ସବ୍ବାହି ନାଟକତ୍ଥୀହି, ୟୋଧେହି ସାୟୁଧେହି ଚ ।
ମହତା ଚ ବଲୋଘେନ, ହତ୍ଥିୱା ଜିରଥେହି ଚ ॥
ନାନାୱିଧୱିଭୂସେହି, ସବ୍ବତୋ ପରିୱାରିତୋ ।
ଆରୁୟ୍ହ ସୁରଥଂ ଅଟ୍ଠା, ସୁସେତ ଚ ସୁସିନ୍ଧୱଂ ॥
ଭୂସିତଂ କଣ୍ଡୂଲଂ ହତ୍ଥିଂ, କାରେତ୍ୱା ପୁରତୋସୁଭଂ ।
ସୁୱଣ୍ଣଚଙ୍ଗୋଟଧରୋ, ସୋତଚ୍ଛତ୍ତସ୍ସ ହେଟ୍ଠାତୋ ॥
ଅଟ୍ଠୁତ୍ତର ସହସ୍ସାନି, ନାଗରନାରିୟୋ ସୁଭା ।
ସୁପୁଣ୍ଣଘଟଭୂସାୟୋ, ତଂ ରଟ୍ଠଂ ପରିୱାରୟୁଂ ॥
ନାନାପୁପ୍ଫସମୁଗ୍ଗାନି, ତଥେୱ ଦଣ୍ଡଦୀପିକା ।
ତତ୍ତକା ତତ୍ତକା ଏୱ, ଧାରୟିତ୍ୱାନ ଇତ୍ଥିୟୋ ॥
ଅଟ୍ଠୁତ୍ତର ସହସ୍ସାନି, ଦାରକା ସମଲଙ୍କତା ।
ଗହେତ୍ୱା ପରିୱାରେସୁଂ, ନାନାୱଣ୍ଣଧଜେ ସୁଭେ ॥
ନାନାତୂରିୟଘୋସେହି, ଅନେକେହି ତହିଂ ତହିଂ ।
ହତ୍ଥସରଥସଦ୍ଦେହି, ଭିଜ୍ଜନ୍ତେ ୱିୟ ଭୂତଲେ ॥
ୟନ୍ତୋ ମହାମେଘୱନଂ, ସିରିୟା ସୋ ମହାୟସୋ ।
ୟନ୍ତେ’ୱ ନନ୍ଦନୱନଂ, ଦେୱରାଜା ଅସୋଭଥ ॥
ରଞ୍ଞୋ ନିଗ୍ଗମନାରମ୍ଭେ, ମହାତୂରିୟ ରୱଂପୁରେ ।
ପରିୱେଣେ ନିସିନ୍ନୋ’ୱ, ସୁତ୍ୱା ସୋଣୁତ୍ତରୋ ୟତି ॥
ନିମୁଜ୍ଜିତ୍ୱା ପୁଥୁୱିୟା, ଗନ୍ତ୍ୱାନ ନାଗମନ୍ଦିରଂ ।
ନାଗରାଜସ୍ସ ପୁରତୋ, ତତ୍ଥ ପାତୂରହୁଲହୁଂ ॥
ୱୁଟ୍ଠାୟ ଅଭିୱାଦେତ୍ୱା, ପଲ୍ଲଙ୍କେ ତଂ ନିୱେସୀଲ ।
ସକ୍କରିତ୍ୱାନ ନାଗିନ୍ଦୋ, ପୁଚ୍ଛି ଆଗତ ଦେସକଂ ॥
ତସ୍ମିଂ ୱୁତ୍ତେ ଅଥୋପୁଚ୍ଛି, ଥେରାଗମନକାରଣଂ ।
ପତ୍ୱା’ଧିକାରଂ ସବ୍ବଂ ସୋ, ସଙ୍ଘ ସନ୍ଦେସ ମବ୍ରୁୱି ॥
ମହାଥୂପେ ନିଧାନତ୍ଥଂ, ବୁଦ୍ଧେନ ୱିହିତା ଇଧ ।
ତୱ ହତ୍ଥଗତା ଧାତୁ, ଦେହିତା କିର ମେ ତୁୱଂ ॥
ତଂ ସୁତ୍ୱା ନାଗରାଜାସୋ, ଅତୀୱ ଦୋମନସ୍ସି ତୋ ।
‘‘ପହୂ ଅୟଞ୍ହି ସମଣୋ, ବଲକ୍କାରେନ ଗଣ୍ହିତୁଂ ॥
ତସ୍ମା ଅଞ୍ଞତ୍ଥ ନେତବ୍ବା, ଧାତୁୟୋ’’ଇତି ଚିନ୍ତିୟ ।
ତତ୍ଥ ଠିତଂ ଭାଗିନେୟ୍ୟଂ, ଆକାରେନ ନିୱେଦୟି ॥
ନାମେନ ୱାସୁଲଦତ୍ତୋ, ଜାନିତ୍ୱା ତସ୍ସ ଇଙ୍ଗିତଂ ।
ଗନ୍ତ୍ୱା ତଂ ଚେତିୟଘରଂ, ଗିଲିତ୍ୱାନ କରଣ୍ଡକଂ ॥
ସିନେରୁପାଦଂ ଗନ୍ତ୍ୱାନ, କୁଣ୍ଡଲାୱଟ୍ଟକୋସୟି ।
ତିୟୋଜନସତଂ ଦୀଘୋ, ଭୋଗୋୟୋଜନୱଟ୍ଟୱା ॥
ଅନେକାନି ସହସ୍ସାନି, ମାପେତ୍ୱାନ ଫଣାନି ଚ ।
ଧୂପାୟତି ପଜ୍ଜଲତି, ସୟିତ୍ୱା ସୋ ମହିଦ୍ଧିକୋ ॥
ଅନେକାନି ସହସ୍ସାନି, ଅତ୍ତନା ସଦିସେ ଅହି ।
ମାପୟିତ୍ୱା ସୟାପେସି, ସମନ୍ତା ପରିୱାରିତେ ॥
ବହୂ ଦେୱା ଚ ନାଗା ଚ, ଓସରିଂସୁ ତହିଂ ତଦା ।
‘‘ୟୁଦ୍ଧଂ ଉଭିନ୍ନଂ ନାଗାନଂ, ପସିସ୍ସାମ ମୟଂ’’ଇତି ॥
ମାତୁଲୋ ଭାଗିନେୟ୍ୟେନ, ହଟାତା ଧାତୁୟୋ ଇତି ।
ଞତ୍ୱା’ନହ ଥେରଂ ତଂ, ଧାତୁନତ୍ଥି ମେ ସନ୍ତିକେ ଇତି ॥
ଆଦିତୋପ୍ପଭୁତିଥେରୋ, ତାସଂ ଧାତୂନମାଗମଂ ।
ୱତ୍ୱାନ ନାଗରାଜଂ ତଂ, ‘‘ଦେହି ଧାତୂ’’ତି ଅବ୍ରୁୱି ॥
ଅଞ୍ଞଥା ସଞ୍ଞାପେତୁଂ ତଂ, ଥେରଂ ସୋ ଉରଗାଧିପୋ ।
ଆଦାୟ ଚେତିୟ ଘରଂ, ଗନ୍ତ୍ୱା ତଂ ତସ୍ସ ୱଣ୍ଣୟି ॥
ଅନେକଧା ଅନେକେହି, ରତନେହି ସୁସଙ୍ଖତଂ ।
ଚେତିୟଂ ଚେତିୟଘରଂ, ପସ୍ସ ଭିକ୍ଖୁ ସୁନିମ୍ମିତଂ ॥
ଲଂକାଦୀପମ୍ହି ସକଲେ, ସବ୍ବାନି ରତନାନିପି ।
ସୋପାନନ୍ତେ ପାଟିକମ୍ପି, ନାଗ୍ଘନ୍ତ’ଞ୍ଞେସୁ କା କଥା ॥
ମହାସକ୍କାରଠାନମ୍ହା, ଅପ୍ପସକ୍କାରଠାନ କଂ ।
ଧାତୂନଂ ନୟନଂ ନାମ, ନୟୁତ୍ତଂ ଭିକ୍ଖୁୱୋ ଇଦଂ ॥
‘‘ସଚ୍ଚାଭିସମୟୋ ନାମ, ତୁମ୍ହାକଂ ହୀନ ୱିଜ୍ଜତି ।
ସଚ୍ଚାଭିସମୟଠାନଂ, ନେତୁଂ ୟୁତ୍ତଞ୍ହି ଧାତୁୟୋ’’ ॥
‘‘ସଂସାର ଦୁକ୍ଖ ମୋକ୍ଖାୟ, ଉପ୍ପଜ୍ଜନ୍ତି ତଥାଗତା ।
ବୁଦ୍ଧସ୍ସାୟମଧିପ୍ପାୟୋ, ତେନନେସ୍ସାମ ଧାତୁୟୋ ॥
ଧାତୁନିଧାନଂ ଅଜ୍ଜେ’ୱ, ସୋ ହି ରାଜା କରିସ୍ସତି ।
ତସ୍ମା ପପଞ୍ଚମକରିତ୍ୱା, ଲହୁଂ ମେ ଦେହି ଧାତୁୟୋ’’ ॥
ନାଗୋଆହସଚେ ଭନ୍ତେ, ତୁୱଂ ପସ୍ସସି ଧାତୁୟୋ ।
ଗହେତ୍ୱା ୟାହି ତଂ ଥେରୋ, ତିକ୍ଖତ୍ତୁଂ ତଂ ଭଣାପିୟ ॥
ସୁଖୁମଂ କରଂ ମାପୟିତ୍ୱା, ଥେରୋ ତତ୍ରଠିତୋ’ୱସୋ ।
ଭାଗିନେୟ୍ୟସ୍ସ ୱଦନେ, ହତ୍ଥଂ ପକ୍ଖିପ୍ପ ତାୱଦେ ॥
ଧାତୁକରଣ୍ଡଂ ଆଦାୟ, ‘‘ତିଟ୍ଠ ନାଗା’’ତି ଭାସିୟ ।
ନିମୁଜ୍ଜିତ୍ୱା ପଥୱିୟଂ, ପରିୱେଣମ୍ହି ଉଟ୍ଠହି ॥
ନାଗରାଜା ଗତୋ ଭିକ୍ଖୁ, ଅମ୍ହେହି ୱଞ୍ଚିତୋ’’ଇତି ।
ଧାତୁ ଆନୟନତ୍ଥାୟ, ଭାଗିନେୟ୍ୟସ୍ସ ପାହିଣି ॥
ଭାଗିନେୟ୍ୟୋ’ଥ କୁଚ୍ଛିମ୍ହି, ଅପସ୍ସିତ୍ୱା କରଣ୍ଡକଂ ।
ପରିଦେୱମାନୋ ଆଗନ୍ତ୍ୱା, ମାତୁଲସ୍ସ ନିୱେଦୟି ॥
ତଦା ସୋ ନାଗରାଜାପି, ‘‘ୱଞ୍ଚିତମ୍ହ ମୟଂ’’ଇତି ।
ପରିଦେୱି ନାଗା ସବ୍ବେପି, ପରିଦେୱିଂସୁ ପୀଳିତା ॥
ଭିକ୍ଖୁ ନାଗସ୍ସ ୱିଜୟେ, ତୁଟ୍ଠା ଦେୱା ସମାଗତା ।
ଧାତୁୟୋ ପୂଜୟନ୍ତାତା, ତେନେୱ ସହ ଆଗମୁଂ ॥
ପରିଦେୱମାନା ଆଗନ୍ତ୍ୱା, ନାଗା ସଙ୍ଘସ୍ସ ସନ୍ତିକେ ।
ବହୁଧା ପରିଦେୱିଂସୁ, ଧାତାହରଣ ଦୁକ୍ଖିତା ॥
ତେସଂ ସଙ୍ଘୋ’ନୁକମ୍ପାୟ, ଥୋକଂ ଧାତୁମଦାପୟି ।
ତେ ତେନ ତୁଟ୍ଠା ଗନ୍ତ୍ୱାନ, ପୂଜା ଭଣ୍ଡାନି ଆହରୁଂ ॥
ସକ୍କୋ ରତନପଲ୍ଲଙ୍କଂ, ସୋଣ୍ଣଚଙ୍କୋଟମେୱ ଚ ।
ଆଦାୟ ସହ ଦେୱେହି, ତଂ ଠାନଂ ସମୁପାଗତୋ ॥
ଥେରସ୍ସ ଉଗ୍ଗତଠାନେ, କାରିତେ ୱିସ୍ସକମ୍ମୁନା ।
ପତିଟ୍ଠପେତ୍ୱା ପଲ୍ଲଙ୍କଂ, ସୁଭେ ରତନମଣ୍ଡପେ ॥
ମାତୁକରଣ୍ଡମାଦାୟ, ତସ୍ସ ଥେରସ୍ସ ହତ୍ଥତୋ ।
ଚଙ୍କୋଟକେ ଠପେତ୍ୱାନ, ପଲ୍ଲଙ୍କେ ପୱରେଠପି ॥
ବ୍ରହ୍ମା ଛତ୍ତମଧାରେସି, ସନ୍ତୁସ୍ସିତୋ ୱାଳବୀଜନିଂ ।
ମଣିତାଲୱଣ୍ଟଂ ସୁୟାମୋ, ସକ୍କୋ ସଙ୍ଖଂ ତୁସୋଦକଂ ॥
ଚତ୍ତାରୋ ତୁ ମହାରାଜା, ଅଟ୍ଠଂସୁ ଖଗ୍ଗପାଣିନୋ ।
ସମୁଗ୍ଗହତ୍ଥା ତେତ୍ତିଂସ, ଦେୱପୁତ୍ତା ମହିଦ୍ଧିକା ॥
ପାରିଚ୍ଛତ୍ତକ ପୁପ୍ଫେହି, ପୂଜୟନ୍ତା ତହିଂଠିତା ।
କୁମାରିୟୋତୁ ଦ୍ୱତ୍ତିଂସ, ଦଣ୍ଡଦୀପଧରା ଠିତା ॥
ପଲାପେତ୍ୱା ଦୁଟ୍ଠୟକ୍ଖେ, ୟକ୍ଖସେନାପତି ପନ ।
ଅଟ୍ଠୱୀସତି ଅଟ୍ଠଂସୁ, ଆରକ୍ଖଂ କୁରୁମାନକା ॥
ୱୀଣଂ ୱାଦୟମାନୋ’ୱ, ଅଟ୍ଠା ପଞ୍ଚସିଖୋ ତହିଂ ।
ରଙ୍ଗଭୂମିଂ ମାପୟିତ୍ୱା, ତିମ୍ପରୁତୁରିୟ ଘୋସୱା ॥
ଅନେକଦେୱପୁତ୍ତା ଚ, ସାଧୁଗୀତପ୍ପୟୋଜକା ।
ମହାକାଳୋ ନାଗରାଜା, ଥୁୟମାନୋ ଅନେକଧା ॥
ଦିବ୍ବତୂରିୟାନି ୱଜ୍ଜନ୍ତି, ଦିବ୍ବସଂଗୀତି ୱତ୍ତତି ।
ଦିବ୍ବଗନ୍ଧାଦିୱସ୍ସାନି, ୱସ୍ସପେନ୍ତି ଚ ଦେୱତା ॥
ସୋ ଇନ୍ଦଗୁତ୍ତଥେରୋତୁ, ମାରସ୍ସ ପଟିବାହନଂ ।
ଚକ୍କୱାଳସମଂ କତ୍ୱା, ଲୋହଚ୍ଛତ୍ତମମାପୟି ॥
ମାତୂନଂ ପୁରତୋ ଚେୱ, ତତ୍ଥ ତତ୍ଥ ଚ ପଞ୍ଚସୁ ।
ଠାନେସୁ ଗଣସଜ୍ଝାୟଂ, କରିଂସ୍ୱ ଖିଲଭିକ୍ଖୱୋ ॥
ତତ୍ଥା’ଗମା ମହାରାଜା, ପହଟ୍ଠୋ ଦୁଟ୍ଠଗାମଣି ।
ସୀସେନା’ଦାୟ ଆନୀତେ, ଚଙ୍କୋଟମ୍ହି ସୁୱଣ୍ଣୟେ ॥
ଠପେତ୍ୱା ଧାତୁ ଚଙ୍କୋଟଂ, ପତିଟ୍ଠାପିୟ ଆସନେ ।
ଧାତୁଂ ପୂଜୀୟ ୱନ୍ଦିତ୍ୱା, ଠିତୋ ପଞ୍ଚଲୀକୋ ତହିଂ ॥
ଦିବ୍ବଚ୍ଛତ୍ତାଦିକାନେତ୍ଥ, ଦିବ୍ବଗନ୍ଧାଦିକାନି ଚ ।
ପସ୍ସିତ୍ୱା ଦିବ୍ବତୂରିୟାଦି-ସଦ୍ଦେ ସୁତ୍ୱା ଚ ଖତ୍ତିୟୋ ॥
ଅପସ୍ସିତ୍ୱା ବ୍ରହ୍ମଦେୱୋ, ତୁଟ୍ଠୋ ଅଚ୍ଛରିୟବ୍ଭୁତୋ ।
ଧାତୁଛତ୍ତେନ ପୂଜେସି, ଲଂକାରଜ୍ଜେ’ଭିସିଞ୍ଚି ଚ ॥
‘‘ଦିବ୍ବଚ୍ଛତ୍ତଂ ମାନୁସଞ୍ଚ, ୱିମୁତ୍ତିଚ୍ଛତ୍ତମେୱ ଚ ।
ଇତି ତିଚ୍ଛିତ୍ତଧାରିସ୍ସ, ଲୋକନାଥସ୍ସ ସତ୍ଥୁନୋ ॥
ତିକ୍ଖତ୍ତୁମେୱ ମେ ରଜ୍ଜଂ, ଦମ୍ମୀ’ତି ହଟ୍ଠମାନସୋ ।
ତିକ୍ଖତ୍ତୁମେୱ ଧାତୂନଂ, ଲଂକାରଜ୍ଜମଦାସିସୋ ॥
ପୂଜୟନ୍ତୋ ଧାତୁୟୋତା, ଦେୱେହି ମାନୁସେହି ଚ ।
ସହ ଚଙ୍କୋଟକେହେୱ, ସୀସେନାଦାୟ ଖତ୍ତିୟୋ ॥
ଭିକ୍ଖୁସଙ୍ଘ ପରିବ୍ୟୁଳ୍ହୋ, କତ୍ୱା ଥୂପଂ ପଦକ୍ଖିଣଂ ।
ପାଚିନତୋ ଆହରିତ୍ୱା, ଧାତୁଗବ୍ଭମ୍ହି ଓତରି ॥
ଅରହନ୍ତୋ ଛନ୍ନୱୁତି-କୋଟିୟୋ ଥୂପମୁତ୍ତମଂ ।
ସମନ୍ତା ପରିୱାରେତ୍ୱା, ଅଟ୍ଠଂସୁ କତପଞ୍ଜଲୀ ॥
ଓତରିତ୍ୱା ଧାତୁଗବ୍ଭଂ, ମହଗ୍ଘେ ସୟନେସୁଭେ ।
ଠପେସ୍ସାମିତି ଚିନ୍ତେନ୍ତେ, ପୀତିପୁଣ୍ଣନରିସ୍ସରେ ॥
ସଧାତୁ ଧାତୁଚଙ୍କୋଟୋ, ଉଗ୍ଗନ୍ତ୍ୱା ତସ୍ସ ସୀସତୋ ।
ସତ୍ତତାଲପ୍ପମାଣମ୍ହି, ଆକାସମ୍ହି ଠିତୋ ତତୋ ॥
ସୟଂ କରଣ୍ଡୋ ୱିୱରି, ଉଗ୍ଗନ୍ତ୍ୱା ଧାତୁୟୋ ତତୋ ।
ବୁଦ୍ଧୱେସଂ ଗହେତ୍ୱାନ, ଲକ୍ଖଣେବ୍ୟଞ୍ଜନୁଜ୍ଜଲଂ ॥
ଗଣ୍ଡମ୍ବମୂଲେ ବୁଦ୍ଧୋ’ୱ, ୟମକଂ ପାଟିହାରିୟଂ ।
ଅକଂସୁ ଧରମାନେନ, ସୁଗତେନ ଅଧିଟ୍ଠିତଂ ॥
ତଂ ପାଟିହାରିୟଂ ଦିସ୍ୱା, ପସନ୍ନେକଗ୍ଗମାନସା ।
ଦେୱାମନୁସ୍ସା ଅରହତ୍ତଂ, ପତ୍ତା ଦ୍ୱାଦସ କୋଟିୟୋ ॥
ସେସା ଫଲତ୍ତୟଂ ପତ୍ତା, ଅତୀତା ଗଣନାପଥଂ ।
ହିତ୍ୱା’ଥ ବୁଦ୍ଧୱେସଂ ତା, କରଣ୍ଡମ୍ହି ପତିଟ୍ଠୟୁଂ ॥
ତତୋ ଓରୁୟ୍ହ ଚଙ୍କୋଟୋ, ରଞ୍ଞୋ ସୀସେ ପତିଟ୍ଠହି ।
ସହିନ୍ଦଗୁତ୍ତଥେରେନ, ନାଟକୀହି ଚ ସୋ ପନ ॥
ଧାତୁଗବ୍ଭଂପରିହରଂ, ପତ୍ୱାନ ସୟନଂ ସୁଭଂ ।
ଚଙ୍କୋଟଂ ରତନପଲ୍ଲଙ୍କେ, ଠପୟିତ୍ୱା ଜୁତିନ୍ଧରୋ ॥
ଧୋୱିତ୍ୱାନ ପୁନୋହତ୍ଥେ, ଗନ୍ଧୱାସିତ ୱାରିନା ।
ଚତୁଜ୍ଜାତିୟଗନ୍ଧେନ, ଉବ୍ବତେତ୍ୱା ସଗାରୱୋ ॥
କରଣ୍ଡଂ ୱିୱରିତ୍ୱାନ, ତାଗହେତ୍ୱାନ ଧାତୁୟୋ ।
ଇତି ଚିନ୍ତୟି ଭୂମିନ୍ଦୋ, ମହାଜନହିତତ୍ଥିକୋ ॥
ଅନାକୁଲଂ କେହିଚିପି, ୟଦି ହେସ୍ସନ୍ତି ଧାତୁୟୋ ।
ଜନସ୍ସ ସରଣଂ ହୁତ୍ୱା, ୟଦି ଠସ୍ସନ୍ତି ଧାତୁୟୋ ॥
ସତ୍ଥୁନିପନ୍ନାକାରେନ, ପରିନିବ୍ବାନମଞ୍ଚକେ ।
ନିପଜ୍ଜନ୍ତୁ ସୁପଞ୍ଞତ୍ତେ, ସୟନମ୍ହି ମହାରହେ ॥
ଇତି ଚିନ୍ତିୟ ସୋ ଧାତୂ, ଠପେସି ସୟନୁତ୍ତମେ ।
ତଦା କାରା ଧାତୁୟୋ ଚ, ସହିଂସୁ ସୟନୁତ୍ତମେ ॥
ଆସଳ୍ହୀସୁକ୍କପକ୍ଖସ୍ସ, ପନ୍ନରସଉପୋସଥେ ।
ଉତ୍ତରାସଳ୍ହନକ୍ଖତ୍ତେ, ଏୱଂ ଧାତୁପତିଟ୍ଠିତା ॥
ସହ ଧାତୁପତିଟ୍ଠାନା, ଅକ୍ଖମ୍ପିତ୍ଥ ମହାମହୀ ।
ପାଟିହୀରାନିନେକାନି, ପୱତ୍ତିଂସୁ ଅନେକଧା ॥
ରାଜା ପସନ୍ନୋଧାତୁତା, ସେତଚ୍ଛତ୍ତେନ ପୂଜୟି ।
ଲଂକାୟ ରଜ୍ଜଂ ସକଲଂ, ସତ୍ତାହାନି ଅଦାସି ଚ ॥
କାୟେ ଚ ସବ୍ବାଲଙ୍କାରଂ, ଧାତୁଗବ୍ଭମ୍ହି ପୂଜୟି ।
ତଥାନାଟକିୟୋ’ମଚ୍ଛା, ପରିସା ଦେୱତାପି ଚ ॥
ୱତ୍ଥଗୁଳଘତାଦୀନି, ଦତ୍ୱା ସଙ୍ଘସ୍ସ ଭୂପତି ।
ଭିକ୍ଖୂହି ଗଣସଜ୍ଝାୟଂ, କାରେତ୍ୱା’ଖିଲରତ୍ତିୟଂ ॥
ପୁନାହନି ପୁରେଭେରିଂ, ଚାରେସି ‘‘ସକଲା ଜନା ।
ୱିନ୍ଦନ୍ତୁ ଧାତୁସତ୍ତାହଂ, ଇମଂ’’ତି ଜନତାହିତୋ ॥
ଇନ୍ଦଗୁତ୍ତୋ ମହାଥେରୋ, ଅଦିଟ୍ଠାସି ମହିଦ୍ଧିକୋ ।
‘‘ଧାତୁ ୱନ୍ଦିତୁକାମାୟେ, ଲଂକାଦୀପମ୍ହି ମାନୁସା ॥
ତଙ୍ଖଣଂୟେୱ ଆଗନ୍ତ୍ୱା, ୱନ୍ଦିତ୍ୱା ଧାତୁୟୋ ଇଧ ।
ୟଥା ସକଂ ଘରଂ ୟନ୍ତୁ’’, ତଂ ୟଥାଧିଟ୍ଠିତଂ ଅହୁ ॥
ସୋ ମହାଭିକ୍ଖୁସଙ୍ଘସ୍ସ, ମହାରାଜା ମହାୟସୋ ।
ମହାଦାନଂ ପୱତ୍ତେତ୍ୱା, ତଂ ସତ୍ତାହଂ ନିରନ୍ତରଂ ॥
ଆଚିକ୍ଖିଧାତୁଗବ୍ଭମ୍ହି, କିଚ୍ଚଂ ନିଠାପିତଂ ମୟା ।
ଧାତୁଗବ୍ଭପିଧାନଂତୁ, ସଙ୍ଘୋ ଜାନିତୁମରହତି ॥
ସଙ୍ଘୋ ତେ ଦ୍ୱେ ସାମଣେରେ, ତସ୍ମିଂ କମ୍ମେ ନିୟୋଜୟି ।
ପିଦହିଂସୁ ଧାତୁଗବ୍ଭଂ, ପାସାଣେନା’ହଟେନ ତେ ॥
‘‘ମାଲେତ୍ଥ ମା ମିଲାୟନ୍ତୁ, ଗନ୍ଧାସୁସ୍ସନ୍ତୁମା ଇମେ ।
ମା ନିବ୍ବାୟନ୍ତୁ ଦୀପାୱ, ମା କିଞ୍ଚାପି ୱିୱଜ୍ଜତୁ ॥
ମେଦୱଣ୍ଣ ଛ ପାସାଣା, ସନ୍ଧିୟନ୍ତୁନିରନ୍ତରା’’ ।
ଇତି ଘୀଣାସୱା ଏତ୍ଥ, ସବ୍ବମେତଂ ଅଧିଟ୍ଠୟୁଂ ॥
ଆଣାପେସି ମହାରାଜା, ‘‘ୟଥାସତ୍ତିଂ ମହାଜନୋ ।
ଧାତୁନିଧାନକାନେ’ତ୍ଥ, କରୋତୂ’’ତି ହିତତ୍ଥିକୋ ॥
ମହାଧାତୁନିଧାନସ୍ସ, ପିଟ୍ଠିମ୍ହି ଚ ମହାଜନୋ ।
ଅକା ସହସ୍ସ ଧାତୁନଂ, ନିଧାନାନି ୟଥାବଲଂ ॥
ପିଦହାପିୟତଂ ସବ୍ବଂ, ରାଜାଥୂପଂ ସମାପୟି ।
ଚତୁରସ୍ସ ଚ ୟଞ୍ଚେତ୍ଥ, ଚେତିୟମ୍ହି ସମାପୟି ॥
କୁବ୍ବନ୍ତି ସବ୍ବୱିଭୱୁତ୍ତମପତ୍ତି ହେତୁ ।
କାରେନ୍ତି ଚାପିହି’ଖିଲା ପରିସୁଦ୍ଧଚିତ୍ତା,
ନାନାୱିସେସଜାନତା ପରିୱାରହେତୂ’’ତି ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ଧାତୁନିଧାନଂ ନାମ
ଏକତିଂସତିମୋ ପରିଚ୍ଛେଦୋ ।
ଦ୍ୱତ୍ତିଂସତିମ ପରିଚ୍ଛେଦ
ତୁସିତପୁରଗମନଂ
ଅନିଟ୍ଠିତେ ଛତ୍ତକମ୍ମେ, ସୁଧାକମ୍ମେ ଚ ଚେତିୟେ ।
ମାରଣନ୍ତିକରୋଗେନ, ରାଜା ଆସି ଗିଲାନକୋ ॥
ତିସ୍ସଂ ପକ୍କୋସୟିତ୍ୱା ସୋ, କନିଟ୍ଠଂ ଦୀଘୱାପିତୋ ।
‘‘ଥୂପେ ଅନିଟ୍ଠିତଂ କମ୍ମଂ, ନିଟ୍ଠାପେହୀତି ଅବ୍ରୱି ॥
ଭାତୁନୋ ଦୁବ୍ବଲତ୍ତାସୋ, ତୁନ୍ନୱାୟେହି କାରିୟ ।
କଞ୍ଚୁକଂ ସୁଦ୍ଧୱତ୍ଥେହି, ତେନ ଛାଦିୟ ଚେତିୟଂ ॥
ଚିତ୍ତକାରେହି କାରେସି, ୱେଦିକଂ ତତ୍ଥ ସାଧୁକଂ ।
ପନ୍ତିପୁଣ୍ଣଘଟାନଞ୍ଚ, ପଞ୍ଚଙ୍ଗୁଲକପନ୍ତିକଂ ॥
ଛତ୍ତାକାରେହି କାରେସି, ଛତ୍ତଂ ୱେଳୁମୟଂ ତଥା ।
ଖରପତ୍ତମୟେ ଚନ୍ଦ-ସୂରିୟେ ମୁଦ୍ଧୱେଦିୟଂ ॥
ଲାଖାକୁଙ୍କୁମକେହେ’ତଂ, ଚିତ୍ତୟିତ୍ୱା ସୁଚିତ୍ତିତଂ ।
ରଞ୍ଞୋ ନିୱେଦୟି’’ଥୂପେ, କତ୍ତବ୍ବଂ ନିଟ୍ଠିତଂ’’ଇତି ॥
ସିୱିକାୟ ନିପଜ୍ଜିତ୍ୱା, ଇଧାଗନ୍ତ୍ୱା ମହୀପତି ।
ପଦକ୍ଖିଣଂ କରିତ୍ୱାନ, ସିୱିକାୟେ’ୱ ଚେତିୟଂ ॥
ୱନ୍ଦିତ୍ୱା ଦକ୍ଖିଣଦ୍ୱାରେ, ସୟନେ ଭୂମିସନ୍ଥତେ ।
ସୟିତ୍ୱା ଦକ୍ଖିଣପସ୍ସେନ, ସୋ ମହାଥୂପ ମୁତ୍ତମଂ ॥
ସୟିତ୍ୱା ୱାମପସ୍ସେସ, ଲୋହପାସାଦ ମୁତ୍ତମଂ ।
ପସ୍ସନ୍ତୋ ସୁମନୋ ଆସି, ଭିକ୍ଖୁସଙ୍ଘପୁରେକ୍ଖତୋ ॥
ଗିଲାନପୁଚ୍ଛନତ୍ଥାୟ, ଆଗତାହି ତତୋ ତତୋ ।
ଛନ୍ନୱୁତିକୋଟିୟୋ ଭିକ୍ଖୂ, ତସ୍ମିଂ ଆସୁଂ ସମାଗମେ ॥
ଗଣସଜ୍ଝାୟମକରୁଂ, ୱଗ୍ଗବନ୍ଧେନ ଭିକ୍ଖୱୋ ।
ଥେରପୁତ୍ତାଭୟଂ ଥେରଂ, ତତ୍ଥା’ଦିସ୍ୱା ମହୀପତି ॥
ଅଟ୍ଠୱୀସ ମହାୟୁଦ୍ଧଂ, ୟୁଜ୍ଝନ୍ତୋ ଅପରାଜୟଂ ।
ୟୋ ସୋ ନ ପଚ୍ଚୁଦାୱତ୍ତୋ, ମହାୟୋଧୋ ୱସୀ ମମ ॥
ମଚ୍ଚୁୟୁଦ୍ଧମ୍ହି ସମ୍ପତ୍ତେ, ଦିସ୍ୱା ମଞ୍ଞେ ପରାଜୟଂ ।
ଇଦାନି ସୋ ମଂ ନୋ ପେତି, ଥେରୋ ଥେରପୁତ୍ତଭୟୋ ॥
ଇତି ଚିନ୍ତୟି ସୋଥେରୋ, ଜାନିତ୍ୱା ତସ୍ସ ଚିନ୍ତିତଂ ।
କରିନ୍ଦନଦିୟା ସିସେ, ୱସଂ ପଞ୍ଜଲିପବ୍ବତେ ॥
ପଞ୍ଚଖୀଣାସୱସତ-ପରିୱାରେନ ଇଦ୍ଧିୟା ।
ନଭସାଗମ୍ମ ରାଜାନଂ, ଅଟ୍ଠାସି ପରିୱାରିୟ ॥
ରାଜା ଦିସ୍ୱା ପସନ୍ନୋ ତଂ, ପୁରତୋ ଚ ନିସୀଦିୟ ।
ତୁମ୍ହେ ଦସମହାୟୋଧେ, ଗଣ୍ହିତ୍ୱାନ ପୁରେ ଅହଂ ॥
ୟୁଜ୍ଝିଂ ଇଦାନି ଏକୋ’ୱ, ମଚ୍ଚୁନା ୟୁଦ୍ଧମାରଭିଂ ।
ମଚ୍ଚୁସତ୍ତୁଂ ପରାଜେତୁଂ, ନ ସକ୍କୋମୀ’’ତି ଆହ ଚ ॥
ଆହ ଥେରୋ ‘‘ମହାରାଜ-ମା ଭାୟି ମନୁଜାଧିପ ।
କିଲେସସତ୍ତୁଂ ଅଜିତ୍ୱା, ଅଜେୟ୍ୟୋ ମଚ୍ଚୁସତ୍ତୁକୋ ॥
ସବ୍ବମ୍ପି ସଙ୍ଖାରଗତଂ, ଅୱସ୍ସଂୟେୱ ଭିଜ୍ଜତି ।
‘‘ଅନିଚ୍ଚା ସବ୍ବସଙ୍ଖାରା’’, ଇତି ୱୁତ୍ତଂହି ସତ୍ଥୁନା ॥
ଲଜ୍ଜା ସାରଜ୍ଜରହିତା, ବୁଦ୍ଧେପେ’ତି ଅନିଚ୍ଚତା ।
ତସ୍ମା ଅନିଚ୍ଚା ସଙ୍ଖାରା, ଦୁକ୍ଖା’ନତ୍ତାତି ଚିନ୍ତୟ ॥
ଦୁତିୟେ ଅତ୍ତାଭାୱେପି, ଧମ୍ମଚ୍ଛନ୍ଦୋ ମହାହିତେ ।
ଉପଟ୍ଠିତେ ଦେୱଲୋକେ, ହିତ୍ୱା ଦିବ୍ବଂ ସୁଖଂ ତୁୱଂ ॥
ଇଧାଗମ୍ମ ବହୁଂ ପୁଞ୍ଞଂ, ଅକାସି ଚ ଅନେକଧା ।
କରଣମ୍ପେକରଜ୍ଜସ୍ସ, ସାସନୁଜ୍ଜୋତନାୟତେ ॥
ମହାପୁଞ୍ଞକତଂ ପୁଞ୍ଞଂ, ୟାୱଜ୍ଜଦିୱସା ତୟା ।
ସବ୍ବଂନୁସ୍ସରମେୱଂ ତେ, ସୁଖଂ ସଜ୍ଜୁ ଭୱିସ୍ସତି ॥
ଥେରସ୍ସୱଚନଂ ସୁତ୍ୱା, ରାଜା ଅତ୍ତମନୋ ଅହୁ ।
‘‘ଅୱସ୍ସୟୋ ମଚ୍ଚୁୟୁଦ୍ଧେପି, ତ୍ୱଂ ମେ ସୀ’’ତି ଅଭାସିତଂ ॥
ତଦା ଚ ଆହରାପେତ୍ୱା, ପହଟ୍ଠୋ ପୁଞ୍ଞ ପୋତ୍ଥକଂ ।
ୱାଚେତୁଂ ଲେଖକଂ ଆହ, ସୋ ତଂ ୱାଚେସି ପୋତ୍ଥକଂ ॥
ଏକୂନସତୱିହାରା, ମହାରାଜେନ କାରିତା ।
ଏକୂନୱୀସକୋଟୀହି, ୱିହାରୋ ମରିଚ ୱଟ୍ଟି ଚ ॥
ଉତ୍ତମୋ ଲୋହପାସାଦୋ,
ତିଂସକୋଟୀହି କାରିତୋ ।
ମହାଥୂପେ ଅନଗ୍ଘାନି,
କାରିତା ଚତୁୱୀସତି ॥
ମହାଥୂପମ୍ହି ସେସାନି, କାରିତାନି ସୁବୁଦ୍ଧିନା ।
କୋଟିସହସ୍ସଂ ଅଗ୍ଘନ୍ତି, ମହାରାଜା’’ତି ୱାଚୟି ॥
‘‘କୋଟ୍ଠନାମମ୍ହି ମଲୟେ, ଅକ୍ଖକ୍ଖାୟିକ ଛାତକେ ।
କୁଣ୍ଡଲାନି ମହଗ୍ଘାନି, ଦୁୱେ ଦତ୍ୱାନ ଗଣ୍ହିୟ ॥
ଖୀଣାସୱାନଂ ପଞ୍ଚନ୍ନଂ, ମହାଥେରାନ ମୁତ୍ତମୋ ।
ଦିନ୍ନୋ ପସନ୍ନଚିତ୍ତେନ, କଙ୍ଗୁଅମ୍ବିଲପିଣ୍ଡକୋ ॥
ଚୂଳଙ୍ଗନିୟ ୟୁଦ୍ଧମ୍ହି, ପରାଜିତ୍ୱା ପଲାୟତା ।
କାଲଂ ଘୋସାପୟିତ୍ୱାନ, ଆଗତସ୍ସ ୱିହାୟସା ॥
ଖୀଣାସୱସ୍ସ ୟତିନୋ, ଅତ୍ତାନମନପେକ୍ଖିୟ ।
ଦିନ୍ନଂ ସରକଭତ୍ତ’ନ୍ତି, ୱୁତ୍ତେ ଆହ ମହୀପତି ॥
ୱିହାରମହସତ୍ତାହେ, ପାସାଦସ୍ସ ମହେତଥା ।
ଥୂପାରମ୍ଭେ ତୁ ସତ୍ତାହେ, ତଥା ଧାତୁନିଧାନକେ ॥
ଚାତୁଦ୍ଦିସସ୍ସ ଉଭତୋ, ସଙ୍ଘସ୍ସ ଉଭତୋ ମୟା ।
ମହାରହଂ ମହାଦାନଂ, ଅୱିସେସଂ ପୱତ୍ତିତଂ ॥
ମହାୱେସାଖପୂଜା ଚ, ଚତୁୱୀସତି କାରୟି ।
ଦୀପେ ସଙ୍ଘସ୍ସ ତିକ୍ଖତ୍ତୁଂ, ତିଚୀୱରମଦାପୟି ॥
ସତ୍ତସତ୍ତ ଦିନାନେୱ, ଦୀପେ ରଜ୍ଜମହଂ ଇମଂ ।
ପଞ୍ଚକ୍ଖତ୍ତୁଂ ସାସନମ୍ହି, ଅଦାସିଂ ହଟ୍ଠମାନସୋ ॥
ସତତଂ ଦ୍ୱାଦସଠାନେ, ସପ୍ପିନା ସୁଦ୍ଧୱଟ୍ଟିୟା ।
ଦୀପସହସ୍ସଂ ଜାଲେସିଂ, ପୂଜେନ୍ତୋ ସୁଗତଂ ଅହଂ ॥
ନିଚ୍ଚଂ ଅଟ୍ଠାରସଠାନେ, ୱଜ୍ଜେହି ୱିହିତଂ ଅହଂ ।
ଗିଲାନ ଭତ୍ତଭେସଜ୍ଜଂ, ଗିଲାନାନମଦାପୟିଂ ॥
ଚତୁତ୍ତାଲୀସଠାନମ୍ହି, ସଙ୍ଖତଂ ମଧୁପାୟସଂ ।
ତତ୍ତକେସ୍ୱେୱ ଠାନେସୁ, ତେଲୁଲ୍ଲୋପକମେୱ ଚ ॥
ଘତେ ପକ୍କେ ମହାଜାଲ, ପୂୱେ ଠାନମ୍ହି ତତ୍ତକେ ।
ତଥେୱ ସହ ଭତ୍ତେହି, ନିଚ୍ଚ ଏମୱ ଅଦାପୟିଂ ॥
ଉପୋସଥେସୁ ଦିୱସେସୁ, ମାସେ ମାସେ ଚ ଅଟ୍ଠସୁ ।
ଲଂକାଦୀପେ ୱିହାରେସୁ, ଦୀପ ତେଲମଦାପୟିଂ ॥
ଧମ୍ମଦାନଂ ମହନ୍ତନ୍ତି, ସୁତ୍ୱା ଅମିସଦାନତୋ ।
ଲୋହ ପାସାଦତୋ ହେଟ୍ଠା, ସଙ୍ଘମଜ୍ଝମ୍ହି ଆସନେ ॥
‘‘ଓସାରେସ୍ସାମି ସଙ୍ଘସ୍ସ, ମଙ୍ଗଲସୁତ୍ତ’’ମିଚ୍ଚହଂ ।
ନିସିନ୍ନୋ ଓସାରୟିତୁଂ, ନାସକ୍ଖିଂ ସଙ୍ଘଗାରୱା ॥
ତତୋପ୍ପଭୁତି ଲଂକାୟ, ୱିହାରେସୁ ତହିଂ ତହିଂ ।
ଧମ୍ମକଥଂ କଥାପେସିଂ, ସକ୍କରିତ୍ୱାନ ଦେସକେ ॥
ଧମ୍ମକଥିକ ସ୍ସେକସ୍ସ, ସପ୍ପିଫାଣିତସକ୍ଖରଂ ।
ନାଳିଂ ନାଳିମଦାପେସିଂ, ଦାପେସିଂ ଚତୁରଙ୍ଗୁଲଂ ॥
ମୁଟ୍ଠିକଂ ୟଟ୍ଠିମଧୁକଂ, ଦାପେସିଂ ସାଟକଦ୍ୱୟଂ ।
ସବ୍ବଂପିସ୍ସରିୟେ ଦାନଂ, ନମେ ହାସେସି ମାନସଂ ॥
ଜୀୱିତଂ ଅନପେକ୍ଖିତ୍ୱା, ଦୁଗ୍ଗତେନ ସତା ମୟା ।
ଦିନ୍ନ ଦାନ ଦ୍ୱୟଂୟେୱ, ତଂ ମେ ହାସେସି ମାନସଂ ॥
ତଂ ସୁତ୍ୱା ଅଭୟୋ ଥେରୋ, ତଂ ଦାନଦ୍ୱୟମେୱ ସୋ ।
ରଞ୍ଞୋ ଚିତ୍ତପ୍ପସାଦତ୍ଥଂ, ସଂ ୱଣ୍ଣେସି ଅନେକଧା ॥
ତେସୁ ପଞ୍ଚସୁ ଥେରେସୁ, କଙ୍ଗୁଅମ୍ବିଲଗାହକୋ ।
ମଲିୟ ଦେୱ ମହାଥେରୋ, ସୁମନକୂଟମ୍ହି ପବ୍ବତେ ॥
ନୱନ୍ନଂ ଭିକ୍ଖୁସତାନଂ, ଦତ୍ୱା ତଂ ପରିଭୁଞ୍ଜି ସୋ ।
ପଥୱୀଚାଲକୋ ଧମ୍ମ, ସୁତ୍ତଥେରୋ ତୁ ତଂ ପନ ॥
କଲ୍ୟାଣିକୱିହାରମ୍ହି, ଭିକ୍ଖୂନଂ ସଂୱିଭାଜିୟ ।
ଦସଦ୍ଧସ ତସଙ୍ଖାନଂ, ପରିଭୋଗ ମକାସୟଂ ॥
ତଲଙ୍ଗର ୱାସିକୋ ଧମ୍ମ, ଦିନ୍ନତ୍ଥେରୋ ପିୟଙ୍ଗୁକେ ।
ଦୀପେ ଦସସହସ୍ସାନଂ, ଦତ୍ୱାନ ପରିଭୁଞ୍ଜିତଂ ॥
ମଙ୍ଗଣୱାସିକୋ ଖୁଦ୍ଦ, ତିସ୍ସତ୍ଥେରୋ ମହିଦ୍ଧିକୋ ।
କେଲାସେ ସଟ୍ଠିସହସ୍ସାନଂ, ଦତ୍ୱାନ ପରିଭୁଞ୍ଜି ତଂ ॥
ମହାବ୍ୟଗ୍ଘୋ ଚ ଥେରୋ ତଂ, ଉକ୍କନଗରୱିହାରକେ ।
ଦତ୍ୱା ସତାନଂ ସତ୍ତାନଂ, ପରିଭୋଗମକାସୟଂ ॥
ସରକଭତ୍ତଗାହୀ ତୁ, ଥେରୋ ପିୟଙ୍ଗୁଦୀପକେ ।
ଦ୍ୱାଦସ ଭିକ୍ଖୁସହସ୍ସାନଂ, ଦତ୍ୱାନ ପରିଭୁଞ୍ଜିତଂ ॥
ଇତି ୱତ୍ୱା’ଭୟତ୍ଥେରୋ, ରଞ୍ଞୋ ହାସେସି ମାନସଂ ।
ରାଜା ଚିତ୍ତଂ ପସାଦେତ୍ୱା, ତଂ ଥେରଂ ଇଧ ମବ୍ରୁୱି ॥
‘‘ଚତୁୱୀସତିୱସ୍ସାନି, ସଙ୍ଘସ୍ସ ଉପକାରକୋ ।
ଅହ ମେୱଂ ହୋତୁ କାୟୋ’ପି, ସଙ୍ଘସ୍ସ ଉପକାରକୋ ॥
ମହାଥୂପ ଦସ୍ସନଠାନେ, ସଙ୍ଘସ୍ସ କମ୍ମମାଳକେ ।
ସରୀରଂ ସଙ୍ଘଦାସସ୍ସ, ତୁମ୍ହେ ଝାପେଥ ମେ’’ଇତି ॥
କନିଟ୍ଠଂ ଆହ ‘‘ଭୋ ତିସ୍ସ, ମହାଥୂପେ ଅନିଟ୍ଠିତଂ ।
ନିଟ୍ଠାପେହି ତୁୱଂ ସବ୍ବଂ, କମ୍ମଂ ସକ୍କଚ୍ଚ ସାଧୁକଂ ॥
ସାୟଂ ପାତୋ ଚ ପୁପ୍ଫାନି, ମହାଥୂପମ୍ହି ପୂଜୟ ।
ତିକ୍ଖତ୍ତୁଂ ଉପହାରଞ୍ଚ, ମହାଥୂପସ୍ସ କାରୟ ॥
ପଟିୟାଦିତଞ୍ଚ ୟଂ ୱତ୍ତଂ, ମୟା ସୁଗତ ସାସନେ ।
ସବ୍ବଂ ଅପରିହାପେତ୍ୱା, ତାତ ୱତ୍ତୟ ତଂ ତୁୱଂ ॥
ସଙ୍ଘସ୍ସ ତାତ କିଚ୍ଚେସୁ, ମା ପମଜ୍ଜିତ୍ଥ ସବ୍ବଦା’’ ।
ଇତଂ ତଂ ଅନୁସାସିତ୍ୱା, ତୁଣ୍ହୀ ଆସି ମହୀପତି ॥
ତଙ୍ଖଣଂ ଗଣସଜ୍ଝାୟଂ, ଭିକ୍ଖୁସଙ୍ଘୋ ଅକାସି ଚ ।
ଦେୱତା ଛ ରଥେ ଚେୱ, ଛହି ଦେୱେହି ଆନୟୁଂ ॥
ୟାଚୁଂ ୱିସୁଂ ୱିସୁଂ ଦେୱା, ରାଜାନଂ ତେ ରଥେ ଠିତା ।
‘‘ଅମ୍ହାକଂ ଦେୱଲୋକଂ ତ୍ୱଂ, ଏହି ରାଜମନୋରମଂ’’ ॥
ରାଜା ତେସଂ ୱଚୋ ସୁତ୍ୱା, ‘‘ୟାୱ ଧମ୍ମଂ ସୁଣୋମହଂ ।
ଅଧିୱାସେଥ ତାୱା’’ତି, ହତ୍ଥାକାରେନ ୱାରୟି ॥
ୱାରେତି ଗଣସଜ୍ଝାୟ, ମୀଭି ମନ୍ତ୍ୱାନ ଭିକ୍ଖୱୋ ।
ସଜ୍ଝାୟଂ ଠପୟୁଂ ରାଜା, ପୁଚ୍ଛିତଂ ଠାନକାରଣଂ ॥
‘‘ଆଗମେଥା’’ତି ସଞ୍ଞାୟ, ଦିନ୍ନତ୍ତା’ତି ୱଦିଂସୁ ତେ ।
ରାଜା ‘‘ନେତଂ ତଥା ଭନ୍ତେ’’, ଇତି ୱତ୍ୱାନ ତଂ ୱଦି ॥
ତଂ ସୁତ୍ୱାନ ଜନା କେଚି, ‘‘ଭୀତୋ ମଚ୍ଚୁଭୟା ଅୟଂ ।
ଲାଲପ୍ପତୀ’’ତି ମଞ୍ଞିଂସୁ, ତେସଂ କଙ୍ଖାୱିନୋଦନଂ ॥
କାରେତୁଂ ଅଭୟତ୍ଥେରୋ, ରାଜାନଂ ଏୱମାହ ସୋ ।
‘‘ଜାନାପେତୁଂ କଥଂ ସକ୍କା, ଆନୀତା ତେ ରଥା’’ଇତି ॥
ପୁପ୍ଫଦାନଂ ଖିପାପେସି, ରାଜ ନଭସି ପଣ୍ଡିତୋ ।
ତାନି ଲଗ୍ଗାନି ଲମ୍ବିଂସୁ, ରଥୀସାସୁ ୱିସୁଂ ୱିସୁଂ ॥
ଆକାସେ ଲମ୍ବମାନାନି, ତାନି ଦିସ୍ୱା ମହାଜନୋ ।
କଙ୍ଖଂ ପଟିୱିନୋଦେସି, ରାଜା ଥେରମଭାସିତଂ ॥
‘‘କତମୋ ଦେୱଲୋକୋ ହି,
ରମ୍ମୋ ଭନ୍ତେ’’ତି ସୋ ବ୍ରୁୱି ।
‘‘ତୁସିନାନଂ ପୁରଂ ରାଜ,
ରମ୍ମଂ’’ଇତି ସତଂ ମତଂ ॥
ବୁଦ୍ଧଭାୱାୟ ସମୟଂ, ଓଲୋକେନ୍ତୋ ମହାଦୟୋ ।
ମେତ୍ତେୟ୍ୟୋ ବୋଧିସତ୍ତୋ ହି, ୱସତେ ତୁସିତେ ପୁରେ ॥
ଥେରସ୍ସ ୱଚନଂ ସୁତ୍ୱା, ମହାରାଜା ମହାମତୀ ।
ଓଲୋକେନ୍ତୋ ମହାଥୂପଂ, ନିପନ୍ନୋୱ ନିମୀଲୟି ॥
ଚୱିତ୍ୱା ତଂଖଣଂୟେୱ, ତୁସିତା ଅହଟେ ରଥେ ।
ନିବ୍ବତ୍ତିତ୍ୱା ଠିତୋୟେୱ, ଦିବ୍ବଦେହୋ ଅଦିସ୍ସଥ ॥
କତସ୍ସ ପୁଞ୍ଞକମ୍ମସ୍ସ, ଫଲଂ ଦସ୍ସେତୁମତ୍ତନୋ ।
ମହାଜନସ୍ସ ଦସ୍ସେନ୍ତୋ, ଅତ୍ତାନଂ ସମଲଙ୍କତଂ ॥
ରଥଟ୍ଠୋୟେୱ ତିକ୍ଖତ୍ତୁଂ, ମହାଥୂପଂ ପଦକ୍ଖିଣଂ ।
କତ୍ୱାନ ଥୂପଂ ସଙ୍ଘଞ୍ଚ, ୱନ୍ଦିତ୍ୱା ତୁସିତଂ ଅଗା ॥
ନାଟକିୟୋ ଇଧାଗନ୍ତ୍ୱା, ମକୁଟଂ ୟତ୍ଥ ମୋଚୟୁଂ ।
‘‘ମକୁଟମୁତ୍ତସାଲା’’ତି, ଏତ୍ଥ ସାଲା କତା ଅହୁ ॥
ଚିତକେ ଠପିତେ ରଞ୍ଞେ, ସରୀରମ୍ହି ମହାଜନୋ ।
ୟତ୍ଥାରୱି ‘‘ରାୱୱଟ୍ଟି-ସାଲା’’ନାମ ତହିଂ ଅହୁ ॥
ରଞ୍ଞୋ ସରୀରଂ ଝାପେସୁଂ, ୟସ୍ମିଂ ନିସ୍ସୀମମାଳକେ ।
ସୋ ଏୱ ମାଳକୋ ଏତ୍ଥ, ୱୁଚ୍ଚତେ ‘‘ରାଜ ମାଳକୋ’’ ॥
ଦୁଟ୍ଠଗାମଣିରାଜା ସୋ, ରାଜା ନାମାରହୋ ମହା ।
ମେତ୍ତେୟ୍ୟସ୍ସ ଭଗୱତୋ, ହେସ୍ସତି ଅଗ୍ଗସାୱକୋ ॥
ରଞ୍ଞୋ ପିତା ପିତା ତସ୍ସ,
ମାତା ମାତା ଭୱିସ୍ସତି ।
ସଦ୍ଧାତିସ୍ସୋ କନିଟ୍ଠୋ ତୁ,
ଦୁତିୟୋ ହେସ୍ସତି ସାୱକୋ ॥
ସାଲିରାଜକୁମାରୋ ୟୋ,
ତସ୍ସ ରଞ୍ଞୋ ସୁତୋ ତୁସୋ ।
ମେତ୍ତେୟ୍ୟସ୍ସ ଭଗୱତୋ,
ପୁତ୍ତୋୟେୱ ଭୱିସ୍ସତି ॥
ଏୱଂ ୟୋ କୁସଲପରୋ କରୋତି ପୁଞ୍ଞଂ,
ଛାଦେନ୍ତୋ ଅନିୟତପାପକଂ ବହୁମ୍ପି ।
ସୋ ସଗ୍ଗଂ ସକଲେ ରମି ୱୋ ପୟାତି ତସ୍ମା,
ସପ୍ପଞ୍ଞୋ ସ ତତରତୋ ଭୱେୟ୍ୟ ପୁଞ୍ଞେତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ତୁସିତପୁରଗମନଂ ନାମ
ଦ୍ୱତ୍ତିଂସତିମୋ ପରିଚ୍ଛେଦୋ
ତେତ୍ତିଂସତିମ ପରିଚ୍ଛେଦ
ଦସରାଜକୋ
ଦୁଟ୍ଠଗାମଣିରଞ୍ଞୋ ତୁ, ରଜ୍ଜେଠିତା ଜନା ଅହୂ ।
ସାଲିରାଜକୁମାରୋତି, ହସ୍ସାସି ୱିସ୍ସୁତୋ ସୁତୋ ॥
ଅତୀୱ ଧଞ୍ଞୋ ସୋ ଆସି, ପୁଞ୍ଞକମ୍ମରତୋ ସଦା ।
ଅତୀୱ ଚାରୁରୁପାୟ, ସତ୍ତୋ ଚଣ୍ଡାଲିୟା ଅହୁ ॥
ଅସୋକମାଲାଦେୱିଂତଂ, ସମ୍ବନ୍ଧଂ ପୁବ୍ବଜାତିୟା ।
ରୂପେନା’ତି ପିୟାୟନ୍ତୋ, ସୋ ରଜ୍ଜଂ ନେୱକାମୟି ॥
ଦୁଟ୍ଠଗାମଣିଭାତା’ସୋ, ସଦ୍ଧାତିସ୍ସୋ ତଦଚ୍ଛୟେ ।
ରଜ୍ଜଂ କାରେସ୍ସା’ଭିସିତ୍ତୋ, ଅଟ୍ଠାରସ୍ସ ସମା’ସମୋ ॥
ଛକ୍କକମ୍ମଂ ସୁଧାକମ୍ମଂ, ହତ୍ଥିପାକାରମେୱ ଚ ।
ମହାଥୂପସ୍ସ କାରେସି, ସୋ ସଦ୍ଧାକତନାମକୋ ॥
ଦୀପେନ ଲୋହପାସାଦୋ, ଉଡ୍ଡିୟ୍ହିତ୍ଥ ସୁସଙ୍ଖତୋ ।
କାରେସି ଲୋହପାସାଦଂ, ପୁନ ସୋ ସତ୍ତଭୂମକଂ ॥
ନୱୁତିସତସହସ୍ସଗ୍ଘୋ, ପାସାଦୋ ଆସି ସୋ ତଦା ।
ଦକ୍ଖିଣଗୀରିୱିହାରଂ, କଲ୍ଲକଲେଣ ମେୱ ଚ ॥
କୁଳୁମ୍ବାଲୱିହାରଞ୍ଚ, ତଥାପେତ୍ତଙ୍ଗ ୱାଲିକଂ ।
ୱେଲଙ୍ଗୱଟ୍ଟିକଞ୍ଚେୱ, ଦୁବ୍ବଲୱାପିତିସ୍ସତଂ ॥
ଦୁରତିସ୍ସକୱାପିଞ୍ଚ, ତଥାମାତୁୱିହାରକଂ ।
କାରେସି ଆଦୀଘୱାପିଂ, ୱିହାରଂୟୋଜନ ୟୋଜନେ ॥
ଦୀଘୱାପିୱିହାରଞ୍ଚ, କାରେସି ସହଚେତିୟଂ ।
ନାନାରତନକଚ୍ଛନ୍ନଂ, ତତ୍ଥ କାରେସି ଚେତିୟେ ॥
ସନ୍ଧିୟଂ ସନ୍ଧିୟଂ ତତ୍ଥ, ରଥଚକ୍କପ୍ପମାଣକଂ ।
ସୋୱଣ୍ଣମାଲଂ କାରେତ୍ୱା, ଲଗ୍ଗାପେସି ମନୋରମଂ ॥
ଚତୁରାସୀତିସହସ୍ସାନଂ, ଧମ୍ମକ୍ଖନ୍ଧାନମିସ୍ସରୋ ।
ଚତୁରାସୀତିସହସ୍ସାନି, ପୂଜାଚାପି ଅକାରୟି ॥
ଏୱଂ ପୁଞ୍ଞାନି କତ୍ୱା ସୋ, ଅନେକାନି ମହୀପତି ।
କାୟସ୍ସଭେଦା ଦେୱେସୁ, ତୁସିତେସୁ’ପପଜ୍ଜଥ ॥
ସଦ୍ଧାତିସ୍ସପକାରାଜେ, ୱସନ୍ତେ ଦୀଘୱାପିୟଂ ।
ଲଜ୍ଜୀତିସ୍ସୋ ଜେଟ୍ଠସୁତୋ, ଗିରିକୁମ୍ଭିମନାମକଂ ॥
ୱିହାରଂ କାରୟି ରମ୍ମଂ, ତଂକନିଟ୍ଠସୁତୋ ପନ ।
ଥୁଲ୍ଲତ୍ଥନୋ ଅକାରେସି, ୱିହାରଂ କନ୍ଦରୱ୍ହୟଂ ॥
ପିତରା ଥୁଲ୍ଲତ୍ଥନକୋ, ଭାତୁସନ୍ତିକମାୟତା ।
ସହେୱା’ହ ୱିହାରସ୍ସ, ସଙ୍ଘଭୋଗତ୍ଥମତ୍ତନୋ ॥
ସଦ୍ଧାତିସ୍ସେଉପରତେ, ସବ୍ବେ’ମଚ୍ଚା ସମାଗତା ।
ଥୂପାରାମେ ଭିକ୍ଖୁସଙ୍ଘଂ, ସକଲଂ ସନ୍ନିପାତିୟ ॥
ସଙ୍ଘାନୁଞ୍ଞାୟରଟ୍ଠସ୍ସ, ରକ୍ଖଣତ୍ଥଂ କୁମାରକଂ ।
ଅଭିସିଞ୍ଚୁଂ ଥୁଲ୍ଲତ୍ଥନଂ, ତଂ ସୁତ୍ୱା ଲଜ୍ଜୀତିସ୍ସତୋ ॥
ଇଧାଗନ୍ତ୍ୱା ଗହେତ୍ୱା ତଂ, ସୟଂ ରଜ୍ଜମକାରୟି ।
ମାସଞ୍ଚେୱ ଦସାହଞ୍ଚ, ରାଜା ଥୁଲ୍ଲତ୍ଥନୋ ପନ ॥
ତିସ୍ସୋସମଂ ଲଜ୍ଜୀତିସ୍ସୋ, ସଙ୍ଘୋ ହୁତ୍ୱା ଅନାଦରୋ ।
‘‘ନ ଜାନିଂସୁ ୟଥାୱୁଡ୍ଢଂ’’ ମୀତି ତଂ ପରିଭାସୟି ॥
ପଚ୍ଛା ସଙ୍ଘଂ ଖମାପେତ୍ୱା, ଦଣ୍ଡକମ୍ମତ୍ଥମିସ୍ସରୋ ।
ତୀଣି ସତସହସ୍ସାନି, ଦତ୍ୱାନ ଉରୁଚେତିୟେ ॥
ସିଲାମୟାନି କାରେସି, ପୁପ୍ଫୟାନାନି ତୀଣିସୋ ।
ଅଥୋ ସତସହସ୍ସେନ, ଚିତାପେସି ଚ ଅନ୍ତରା ॥
ମହାଥୂପଥୂପାରାମାନଂ, ଭୂମିଂଭୂମିସ୍ସରୋ ସମଂ ।
ଥୂପାରାମେ ଚ ଥୂପସ୍ସ, ସିଲାକଞ୍ଚୁକ ମୁତ୍ତମଂ ॥
ଥୂପାରାମସ୍ସ ପୁରତୋ, ସିଲାଥୂପକମେୱ ଚ ।
ଲଜ୍ଜୀକାସନସାଲଞ୍ଚ, ଭିକ୍ଖୁସଙ୍ଘସ୍ସ କାରୟି ॥
କଞ୍ଚୁକଂ କଣ୍ଟକେ ଥୂପେ, କାରାପେସି ସିଲାମୟଂ ।
ଦତ୍ୱାନ ସତସହସ୍ସଂ, ୱିହାରେ ଚେତିୟୱ୍ହୟେ ॥
ଗିରିକୁମ୍ଭିଲନାମସ୍ସ, ୱିହାରସ୍ସ ମହମ୍ହି ସୋ ।
ସଟ୍ଠିଭିକ୍ଖୁସହସ୍ସାନଂ, ତିଚୀୱରମଦାପୟି ॥
ଅରିଟ୍ଠୱିହାରଂ କାରେସି, ତଥାକନ୍ଦରହିନକଂ ।
ଗାମିକାନଞ୍ଚ ଭିକ୍ଖୂନଂ, ଭେସଜ୍ଜାନି ଅଦାପୟି ॥
କିମିଚ୍ଛକଂ ତଣ୍ଡୁଲଞ୍ଚ, ଭିକ୍ଖୁନୀନମଦାପୟି ।
ସମାନୱ’ଠମାସଞ୍ଚ, ରଜ୍ଜଂ ସୋ କାରୟୀ ଇଧ ॥
ମତେ ଲଜ୍ଜିକତିସ୍ସମ୍ହି, କନିଟ୍ଠୋ ତସ୍ସ କାରୟି ।
ରଜ୍ଜଂ ଛଳେୱ ୱସ୍ସାନି, ଖଲ୍ଲାଟନାଗନାମକୋ ॥
ଲୋହପାସାଦପରିୱାରେ, ପାସାଦେ’ତି ମନୋରମେ ।
ଲୋହପାସାଦସୋଭତ୍ଥଂ, ଏସୋ ଦ୍ୱତ୍ତିଂସକାରୟି ॥
ମହାଥୂପସ୍ସ ପରିତୋ, ଚାରୁନୋ ହେମମାଲିନୋ ।
ୱାଲିକଙ୍ଗଣମରିୟାଦଂ, ପାକାରଞ୍ଚ ଅକାରୟି ॥
ସୋୱକୁରୁନ୍ଦପାସକଂ, ୱିହାରଞ୍ଚ ଅକାରୟି ।
ପୁଞ୍ଞକମ୍ମାନିଚଞ୍ଞାନି, କାରାପେସି ମହୀପତି ॥
ତଂ ମହାରତ୍ତତୋନାମ, ସେନାପତି ମହୀପତିଂ ।
ଖଲ୍ଲାଟନାଗରାଜାନଂ, ନଗରେୟେୱ ଅଗ୍ଗହି ॥
ତସ୍ସ ରଞ୍ଞୋ କନିଟ୍ଠୋତୁ, ୱଟ୍ଟଗାମଣିନାମକୋ ।
ତଂ ଦୁଟ୍ଠସେନାପତିକଂ, ହନ୍ତ୍ୱା ରଜ୍ଜମକାରୟି ॥
ଖଲ୍ଲାଟନାଗରଞ୍ଞୋସୋ, ପୁତ୍ତକଂ ସକଭାତୁନୋ ।
ମହାଚୂଲିକନାମାନଂ, ପୁତ୍ତଠାନେ ଠପେସି ଚ ॥
ତମ୍ମାତରଂ ନୁଳାଦେୱିଂ, ମହେସିଞ୍ଚ ଅକାସିସୋ ।
ପୀତିଠାନେ ଠିତତା’ସ୍ସ, ପୀତିରାଜାତି ଅବ୍ରୱୁଂ ॥
ଏୱଂ ରଜ୍ଜେ’ଭିସିତ୍ତସ୍ସ, ତସ୍ସ ମାସମ୍ହି ପଞ୍ଚମେ ।
ରୋହଣେ ନକୁଲନଗରେ, ଏକୋ ବ୍ରାହ୍ମଣଚେଟତୋ ॥
ତିୟୋ ନାମ ବ୍ରାହ୍ମଣସ୍ସ, ୱଚୋ ସୁତ୍ୱା ଅପଣ୍ଡିତୋ ।
ଚୋରୋ ଅସୁ ମହାତସ୍ସ, ପରିୱାରୋ ଅହୋସି ଚ ॥
ସଗଣାସତ୍ତଦମିଳା, ମହାତିତ୍ଥମ୍ହି ଓତରୁଂ ।
ତଦା ବ୍ରାହ୍ମଣତିୟୋ ଚ, ତେ ସତ୍ତଦମିଳାପିଚ ॥
ଛକ୍କତ୍ଥାୟ ୱିସଜ୍ଜେସୁଂ, ଲେଖଂ ଭୂପତିସନ୍ତିକଂ ।
ରାଜା ବ୍ରାହ୍ମଣତିୟସ୍ସ, ଲେଖଂ ପେସେସି ନୀତିମା ॥
‘‘ରଜ୍ଜଂ ତୱ ଇଦାନେୱ, ଗଣ୍ହ ତ୍ୱଂ ଦମିଳେ’’ ଇତି ।
ସାଧୂତି ସୋ ଦମିଳେହି, ୟୁଜ୍ଝି ଗଣ୍ହିଂସୁ ତେ ତୁ ତଂ ॥
ତତୋ ତେ ଦମିଳା ୟୁଦ୍ଧଂ, ରଞ୍ଞା ସହ ପୱତ୍ତୟୁଂ ।
କୋଳମ୍ବାଲକସାମନ୍ତା, ୟୁଦ୍ଧେ ରାଜା ପରାଜିତୋ ॥
ତିତ୍ଥାରାମଦୁୱାରେନ, ରଥାରୁଳ୍ହୋ ପଲାୟତି ।
ପଣ୍ଡୁକାଭୟରାଜେନ, ତିତ୍ଥାରାମୋହି କାରିତୋ ।
ୱାସିତୋ ଚ ତଦା ଆସି, ଏକୱୀସତି ରାଜୁସୂ ॥
ତଂ ଦିସ୍ୱା ପଲାୟନ୍ତଂ, ନିଗଣ୍ଠୋଗିରିନାମକୋ ।
‘‘ପଲାୟତି ମହାକାଳ-ସୀହଳୋ’’ତି ଭୁସଂ ରୱି ॥
ତଂ ସୁତ୍ୱାନ ମହାରାଜା, ‘‘ସିଦ୍ଧେ ମମ ମନୋରଥେ ।
ୱିହାରଂ ଏତ୍ଥ କାରେସ୍ସଂ’’, ଇଚ୍ଚେୱଂ ଚିନ୍ତୟୀ ତଦା ॥
ସଗବ୍ଭଂ ଅନୁଲାଦେୱିଂ, ଅଗ୍ଗହୀ ରକ୍ଖିୟା ଇତି ।
ମହାଚୂଳ ମହାନାଗ-କୁମାରେଚାପୀ ରକ୍ଖିୟେ ॥
ରଥସ୍ସ ଲହୁଭାୱତ୍ଥଂ, ଡତ୍ୱା ଚୂଳାମଣିଂସୁଭଂ ।
ଓତାରେସି ସୋମଦେୱିଂ, ତସ୍ସ’ନୁଞ୍ଞାୟ ଭୂପତି ॥
ୟୁଦ୍ଧାୟଗମନେୟେୱ, ପୁତ୍ତକେ ଦ୍ୱେ ଚ ଦେୱିୟୋ ।
ଗାହୟିତ୍ୱାନ ନିକ୍ଖନ୍ତୋ, ସଙ୍କିତୋ ସୋ ପରାଜୟେ ॥
ଅସକ୍କୁଣିତ୍ୱା ଗାହେତୁଂ, ପତ୍ତଂ ଭୁତ୍ତଂ ଜିନେନ ତଂ ।
ପଲାୟିତ୍ୱା ୱେସ୍ସଗୀରି-ୱନେ ଅଭିନିୟିୟିସୋ ॥
କୁତ୍ଥିକ୍କୁଲମହାତିସ୍ସ-ଥେରୋ ଦିସ୍ୱା ତହଂ ତୁ ତଂ ।
ଭତ୍ତଂ ପାଦା ଅନାମଟ୍ଠଂ, ପିଣ୍ଡଦାନଂ ୱିୱଜ୍ଜିୟ ॥
ଅଥ କେତକିପତ୍ତମ୍ହି, ଲିଖିତ୍ୱା ହଟ୍ଠମାନସୋ ।
ସଙ୍ଘଭୋଗଂ ୱିହାରସ୍ସ, ତସ୍ସ ପାଦାମହୀପତି ॥
ତତୋ ଗନ୍ତ୍ୱା ସିଲାସୋବ୍ଭ-କଣ୍ଡକମ୍ହି ୱସୀ ତତୋ ।
ଗନ୍ତ୍ୱାନ ମାତୁୱେଲଙ୍ଗେ, ସାଲଗଲସମୀପଗୋ ॥
ତତ୍ଥଦ୍ଦସ ଦିଟ୍ଠପୁବ୍ବଂ, ଥେରଂ ଥେରୋ ମହୀପତିଂ ।
ଉପଟ୍ଠାକସ୍ସ ଅପ୍ପେସି, ତନସିୱସ୍ସ ସାଧୁକଂ ॥
ତସ୍ସ ସୋ ତନସିୱସ୍ସ, ରଟ୍ଠିକସ୍ସ’ନ୍ତିକେ ତହିଂ ।
ରାଜା ଚୁଦ୍ଦସୱସ୍ସାନି, ୱସୀ ତେନ ଉପଟ୍ଠିତୋ ॥
ସତ୍ତସୁ ଦମୀଳେସ୍ୱେ’କୋ, ସୋମାଦେୱିଂ ମଦାୱହଂ ।
ରାଗରତ୍ତୋ ଗହେତ୍ୱାନ, ପରତୀରମଗାଲହୁଂ ॥
ଏକୋପତ୍ତଂ ଦସବଲସ୍ସ, ଅନୁରାଧପୁରେ ଠିତଂ ।
ଆଦାୟ ତେନ ସନ୍ତୁଟ୍ଠୋ, ପରତୀରମଗାଲହୁଂ ॥
ପୁଳହତ୍ଥୋ ତୁ ଦମିଳୋ, ତୀଣିୱସ୍ସାନି କାରୟି ।
ରଜ୍ଜଂ ସେନାପତିଂ କତ୍ୱା, ଦମିଳଂ ବାହିୟୱ୍ହୟଂ ॥
ପୁଳହତ୍ଥଂ ଗହେତ୍ୱା ତଂ, ଦୂରେ ୱସ୍ସାନି ବାହୀୟୋ ।
ରଜ୍ଜଂ କାରେସି ତସ୍ସା’ସି, ପଣୟମାରୋ ଚମୂପତି ॥
ବାହୀୟଂ ତଂ ଗହେତ୍ୱାନ, ରାଜା’ସି ପଣୟମାରକୋ ।
ସତ୍ତୱସ୍ସାନି ତସ୍ସା’ସି, ପିଳୟମାରୋ ଚମୂପତି ॥
ପଣୟମାରଂ ଗହେତ୍ୱା ସୋ, ରାଜାସି ପୀଳୟମାରକୋ ।
ସତ୍ତମାସାନି ତସ୍ସାସି, ଦାଠିୟୋ ତୁ ଚମୂପତି ॥
ପୀଳୟମାରଂ ଗହେତ୍ୱା ସୋ, ଦାଠିୟୋ ଦମିଳୋ ପନ ।
ରଜ୍ଜଂ’ନୁରାଧନଗରେ, ଦୁୱେ ୱସ୍ସାନି କାରୟି ॥
ଏୱଂ ଦମିଳରାଜୂନଂ, ତେସଂ ପଞ୍ଚନ୍ନମେୱହି ।
ହୋନ୍ତି ଚୁଦ୍ଦସୱସ୍ସାନୀ, ସତ୍ତମାସା ଚ ଉତ୍ତରିଂ ॥
ଗତାୟ ତୁ ନିୱାସତ୍ଥଂ, ମଲୟେ’ନୁଲଦେୱିୟା ।
ଭରିୟାକନସିୱସ୍ସ, ପାଦାପହରି ପଚ୍ଛିୟଂ ॥
କୁଜ୍ଝିତ୍ୱା ରୋଦମାନାସା, ରାଜାନଂ ଉପସକିମି ।
ତଂ ସୁତ୍ୱା ତନସିୱୋସୋ, ମନୁମାଦାୟ ନିକ୍ଖମି ॥
ଦେୱିୟା ୱଚନଂ ସୁତ୍ୱା, ତସ୍ସ ଆଗମନା ପୁରା ।
ଦ୍ୱିପୁତ୍ତଂ ଦେୱିମାଦାୟ, ତତୋ ରାଜା’ପି ନିକ୍ଖମି ॥
ଧନୁଂ ସନ୍ଧାୟ ଆୟନ୍ତଂ, ସୀୱଂ ୱିଜ୍ଝି ମହାସୀୱୋ ।
ରାଜା ନାମଂ ଭାୱୟିତ୍ୱା, ଅକାସି ଜିନସଙ୍ଗହଂ ॥
ଅଲତ୍ଥ ଅଟ୍ଠାମଚ୍ଚେଚ, ମହନ୍ତେ ୟୋଧସମ୍ମତେ ।
ପରିୱାରୋ ମହାଆସୀ, ପରିହାରୋ ଚ ରାଜିନୋ ॥
କୁମ୍ଭୀଲକମହାତିସ୍ସ-ଥେର ଦିସ୍ୱା ମହାୟସୋ ।
ଅଚ୍ଛଗଲ୍ଲୱିହାରମ୍ହି, ବୁଦ୍ଧପୂଜମକାରୟି ॥
ୱତ୍ଥୁଂ ସୋଧେତୁମାରୁଳ୍ହୋ, ଅକାସଚେତିୟଙ୍ଗଣଂ ।
କୱିସୀସେ ଅମଚ୍ଚମ୍ହି, ଓରୋହନ୍ତୋମହୀପତି ॥
ଆରୋହନ୍ତୋ ସଦେୱିକୋ, ଦିସ୍ୱା ମଗ୍ଗେ ନିସିନ୍ନକଂ ।
‘‘ନ ନିପନ୍ନୋ’’ତି କୁଜ୍ଝିତ୍ୱା, କୱିସୀସଂ ଅଘାତୟି ॥
ସେସା ସତ୍ତଅମଚ୍ଚାୱି, ନିବ୍ବିନ୍ନା ତେନ ରାଜିନା ।
ତସ୍ସ’ନ୍ତିକା ପଲାୟିତ୍ୱା, ପକ୍କମନ୍ତା ୟଥାରୁଚି ॥
ମଗ୍ଗେ ୱିଲୁତ୍ତା ଚୋରେହି, ୱିହାରଂ ହମ୍ବୁଗଲ୍ଲକଂ ।
ପୱିସିତ୍ୱାନ ଅଦ୍ଦକ୍ଖୁଂ, ତିସ୍ସତ୍ଥେରଂ ବହୁସ୍ସୁତଂ ॥
ଚତୁନେକାୟିକୋ ଥେରୋ, ୟଥାଲଦ୍ଧାନି ଦାପୟି ।
ୱତ୍ଥଫାଣିତତେଲାନି, ତଣ୍ଡୁଲା ପାହୁଣା ତଥା ॥
ଅସ୍ସତ୍ଥକାଲେ ଥେରୋ ସୋ,
‘‘କୁହିଂୟାତା’’ତି ପୁଚ୍ଛିତେ ।
ଅତ୍ତାନଂ ଆୱୀକତ୍ୱା ତେ,
ତଂ ପୱତ୍ତିଂ ନିୱେଦୟୁଂ ॥
‘‘କାରେତୁଂ କେହି ସକ୍କା ନୁ, ଜିନସାସନପଗ୍ଗହଂ ।
ଦମିଳେହି ୱା’ଥ ରଞ୍ଞା, ଇତି ପୁଟ୍ଠା ତୁ ତେ ପନ ॥
‘‘ରଞ୍ଞୋ ସକ୍କା’’ତି ଆହଂସୁ, ସଞ୍ଞାପେତ୍ୱାନ ତେ ଇତି ।
ଉଭୋ ତିସ୍ସ ମହାତିସ୍ସ-ଥେରା ଆଦାୟ ତେ ତତୋ ॥
ରାଜିନୋ ସନ୍ତିକଂ ନେତ୍ୱା, ଅଞ୍ଞମଞ୍ଞଂ ଖମାପୟୁଂ ।
ରାଜା ଚ ତେ ଅମଚ୍ଚା ଚ, ଥେରୋ ଏୱ ମୟାଚୟୁଂ ॥
ସିଦ୍ଧେ କମ୍ମେ ପେସିତେନୋ, ଗନ୍ତବ୍ବଂ ସନ୍ତିକଂ ଇତି ।
ଥେରା ଦତ୍ୱା ପଟିଞ୍ଞଂ ତେ, ୟଥାଠାନମଗଞ୍ଛିସୁଂ ॥
ଅନୁରାଧପୁରଂ ରାଜା, ଆଗନ୍ତ୍ୱାନ ମହାୟସୋ ।
ଦାଠିକଂ ଦମିଳଂ ହନ୍ତ୍ୱା, ସୟଂ ରଜ୍ଜମକାରୟି ॥
ତତୋ ନିଗଣ୍ଠାରାମଂ ତଂ, ୱିଦ୍ଧଂସେତ୍ୱା ମହୀପତି ।
ୱିହାରଂ କାରୟି ତତ୍ଥ, ଦ୍ୱାଦସ ପରିୱେଣକଂ ॥
ମହାୱିହାରପଟ୍ଠାନା, ଦ୍ୱୀସୁ ୱସ୍ସସ ତେସୁ ଚ ।
ସତ୍ତରସସୁ ୱସ୍ସେସୁ, ଦସମାସା’ମିକେସୁ ଚ ॥
ତଥା ଦିନେସୁ ଦସସୁ, ଅତିକ୍କନ୍ତେସୁ ସାଦରୋ ।
ଅଭୟଗିରି ୱିହାରଂସୋ, ପତିଟ୍ଠାପେସି ଭୂପତି ॥
ଅକ୍କୋସିୟିତ୍ୱା ତେ ଥେରେ, ତେସୁ ପୁବ୍ବୁପକାରିନୋ ।
ତଂ ମହାତିସ୍ସ ଥେରସ୍ସ, ୱିହାରଂ ମାନଦୋ ଅଦା ॥
ଗିରିସ୍ସ ୟସ୍ମା ଗାରାମେ, ରାଜା କାରେସି ସୋଭୟୋ ।
ତସ୍ମା’ଭୟ ଗିରିତ୍ୱେୱ, ୱିହାରୋ ନାମକୋ ଅହୁ ॥
ଆଣାପେତ୍ୱା ସୋମାଦେୱିଂ,
ୟଥା ଠାନେ ଠପେସିସୋ ।
ତସ୍ସାତନ୍ନାମକଂ କତ୍ୱା,
ସୋମାରାମ ମକାରୟି ॥
ରଥା ଓରୋପିତା ସା ହି, ତସ୍ମିଂଠାନେ ୱରଙ୍ଗନା ।
କଦ୍ଦମ୍ବପୁପ୍ଫ ଗୁମ୍ବମ୍ହି, ନିଲିନା ତତ୍ଥ ଅଦ୍ଦସ ॥
ମୁତ୍ତୟନ୍ତଂ ସାମଣେରଂ, ମଗ୍ଗଂ ହତ୍ଥେନ ଛାଦିୟ ।
ରାଜା ତସ୍ସ ୱଚୋ ସୁତ୍ୱା, ୱିହାରଂ ତତ୍ଥ କାରୟି ॥
ମହାଥୂପସ୍ସୁତ୍ତରତୋ,
ଚେତିୟଂ ଉଚ୍ଚୱତ୍ଥୁକଂ ।
ସିଲା ସୋଭକଣ୍ଡକଂ ନାମ,
ରାଜା ସୋୟେୱ କାରୟି ॥
ତେସୁ ସତ୍ତସୁ ୟୋଧେସୁ, ଉତ୍ତିୟୋ ନାମ କାରୟି ।
ନଗରମ୍ହା ଦକ୍ଖିଣତୋ, ୱିହାରଂ ଦକ୍ଖିଣୱ୍ହୟଂ ॥
ତତ୍ତେୱ ମୂଲୱୋକାସ, ୱୀହାରଂ ମୂଲନାମକୋ ।
ଅମଚ୍ଚୋ କାରୟୀ ତେନ, ସୋପି ତଂନାମକୋ ଅହୁ ॥
କାରେସି ସାଲିୟାରାମଂ, ଅମଚ୍ଚୋ ସାଲିୟୱ୍ହୟୋ ।
କାରେସି ପବ୍ବତାରାମଂ, ଅମଚ୍ଚୋ ପବ୍ବତୱ୍ହୟୋ ॥
ଉତ୍ତରତିସ୍ସରାମନ୍ତୁ, ତିସ୍ସାମଚ୍ଚୋ ଅକାରୟି ।
ୱିହାରେ ନିଟ୍ଠିତେ ରମ୍ମେ, ତିସ୍ସଥେର ମୁପଚ୍ଚତେ ॥
‘‘ତୁମ୍ହାକଂ ପଟିସନ୍ଥାର, ୱସେନ’ମ୍ହେହି କାରିତେ ।
ୱିହାରେ ଦେମ ତୁମ୍ହାକଂ, ଇତି ୱତ୍ୱା ଅଦଂସୁ ଚ ॥
ଥେରୋ ସବ୍ବତ୍ଥୱାସେସି, ତେ ତେ ଭିକ୍ଖୂ ୟଥା ରହଂ ।
ଅମଚ୍ଚା’ଦଂସୁ ସଙ୍ଘସ୍ସ, ୱିୱିଧେ ସମଣାରହେ ॥
ରାଜା ସକୱିହାରମ୍ହି, ୱସନ୍ତେ ସମୁପଟ୍ଠହି ।
ପଚ୍ଚୟେହି ଅନୁନେହି, ତେନ ତେ ବହୱୋ ଅହୁଂ ॥
ଥେରଂ କୁଲେହୀ ସଂସଟ୍ଠଂ, ମହାତିସ୍ସୋତି ୱିସ୍ସୁତଂ ।
କୁଲସଂସଟ୍ଠ ଦୋସେନ, ସଙ୍ଘୋ ତଂ ନୀହରି ଇତୋ ॥
ତସ୍ସ ସିସ୍ସୋ ବହଲମସ୍ସୁ-
ତିସ୍ସତ୍ଥେରୋତି ପିସ୍ସୁତୋ ।
କୁଦ୍ଧୋ’ଭୟଗିରିଂ ଗନ୍ତ୍ୱା,
ୱସି ପକ୍ଖଂ ୱହଂ ତହିଂ ॥
ତତୋପ୍ପଭୁତି ତେ ଭିକ୍ଖୂ, ମହାୱିହାରନାଗମୁଂ ।
ଏୱଂ ତେ’ଭୟଗିରିକା, ନିଗ୍ଗତା ଥେରୱାଦତୋ ॥
ପଭିନ୍ନା’ଭୟଗିରିକେହି, ଦକ୍ଖିଣୱିହାରିକାୟତି ।
ଏୱଂ ତେ ଥେରୱାଦୀହି, ପଭିନ୍ନା ଭିକ୍ଖୱୋ ଦ୍ୱିଧା ॥
ମହା ଅଭୟଭିକ୍ଖୂ ତେ, ୱଡ୍ଢେତୁଂ ଦୀପୱାସିନୋ ।
ୱଟ୍ଟଗାମଣିଭୂମିନ୍ଦୋ, ପତ୍ତିଂ ନାମ ଅଦାସି ସୋ ॥
ୱିହାରପରିୱେଣାନି, ଘଟାବଦ୍ଧେ ଅକାରୟି ।
‘‘ପଟିସଙ୍ଖରଣଂ ଏୱଂ, ହେସ୍ସତୀତି ୱିଚିନ୍ତିୟ ॥
ପିଟକତ୍ତୟପାଳିଞ୍ଚ, ତସ୍ସ ଅଟ୍ଠକଥମ୍ପି ଚ ।
ମୁଖପାଠେନ ଆନେସୁଂ, ପୁବ୍ବେ ଭିକ୍ଖୂ ମହାମତି ॥
ହାନିଂ ଦିସ୍ୱାନ ସତ୍ତାନଂ, ତଦା ଭିକ୍ଖୂ ସମାଗତା ।
ଚିରଟ୍ଠିତତ୍ଥଂ ଧମ୍ମସ୍ସ, ପୋତ୍ଥକେସୁ ଲିଖାପୟୁଂ ॥
ୱଟ୍ଟଗାମଣି ଅଭୟୋ, ରାଜା ରଜ୍ଜମକାରୟି ।
ଇତି ଦ୍ୱାଦସୱସ୍ସାନି, ପଞ୍ଚମାସେସୁ ଆଦିତୋ ॥
ଇତୀ ପରହିତ ମତ୍ତନୋ ହିତଞ୍ଚ,
ପଟିଲଭିୟିସ୍ସରିୟଂ କରୋତି ପଞ୍ଞୋ ।
ୱିପୁଲମପି କୁବୁଦ୍ଧିଲଦ୍ଧଭୋୱଂ,
ଉଭୟହିତଂ ନ କରୋତି ଭୋଗଲୁଦ୍ଧୋ’ତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦସରାଜକୋ ନାମ
ତେତ୍ତିଂସତିମୋ ପରିଚ୍ଛେଦୋ ।
ଚତୁତ୍ତିଂସତିମ ପରିଚ୍ଛେଦ
ଏକାଦସରାଜଦୀପନୋ
ତଦଚ୍ଚୟେ ମହାଚୂଲୀ-ମହାତିସ୍ସୋ ଅକାରୟି ।
ରଜ୍ଜଂ ଚୁଦ୍ଦସୱସ୍ସାନି, ଧମ୍ମେନ ଚ ସମେନ ଚ ॥
ସହତ୍ଥେନ କତଂ ଦାନଂ, ସୋ ସୁତ୍ୱାନ ମହପ୍ଫଲଂ ।
ପଠମେୟେୱ ୱସ୍ସମ୍ହି, ଗନ୍ତ୍ୱା ଅଞ୍ଞାତୱେସୱା ॥
କତ୍ୱାନ ସାଲିଲୱନଂ, ଲଦ୍ଧାୟ ଭତିୟା ତତୋ ।
ପିଣ୍ଡପାତଂ ମହାସୁମ୍ମ-ଥେରସ୍ସା’ଦା ମହୀପତି ॥
ସୋଣ୍ଣଗିରିମ୍ହି ପୁନ ସୋ, ତୀଣିୱସ୍ସାନି ଖତ୍ତିୟୋ ।
ଗୁଳୟନ୍ତମ୍ହି କତ୍ୱାନ, ଭତିଂଲଦ୍ଧା ଗୁଳେ ତତୋ ॥
ତେ ଗୁଳେ ଆହରାପେତ୍ୱା, ପୁରଂ ଆଗମ୍ମ ଭୂପତି ।
ଭିକ୍ଖୁସଙ୍ଘସ୍ସ ପାଦାସି, ମହାଦାନଂ ମହୀପତି ॥
ତିଂସଭିକ୍ଖୁସହସ୍ସସ୍ସ, ଅଦା ଅଚ୍ଛାଦନାନି ଚ ।
ଦ୍ୱାଦସନ୍ନଂ ସହସ୍ସାନଂ, ଭିକ୍ଖୂନୀନଂ ତଥେୱ ଚ ॥
କାରୟିତ୍ୱା ମହୀପାଲୋ, ୱିହାରଂ ସୁପ୍ପତିଟ୍ଠିତଂ ।
ସଟ୍ଠିଭିକ୍ଖୁ ସହସ୍ସସ୍ସ, ତିଚୀୱରମଦାପୟି ॥
ତିଂସ ସହସ୍ସ ସଙ୍ଖାନଂ, ଭିକ୍ଖୁନୀନଞ୍ଚ ଦାପୟି ।
ମଣ୍ଡୱାପି ୱିହାରଂ ସୋ, ତଥା ଅଭୟଗଲ୍ଲକଂ ॥
ୱଙ୍ଗୁପଟ୍ଟଙ୍ଗଗଲ୍ଲଞ୍ଚ, ଦୀଘବାହୁକଗଲ୍ଲକଂ ।
ୱାଲଗାମ ୱିହାରଞ୍ଚ, ରାଜା ସୋୟେୱ କାରୟି ॥
ଏୱଂ ସଦ୍ଧାୟ ସୋ ରାଜା, କତ୍ୱା ପୁଞ୍ଞାନିନେକଧା ।
ଚତୁଦ୍ଦସନ୍ନଂ ୱସ୍ସାନଂ, ଅଚ୍ଚୟେନ ଦିୱଂ ଅଗା ॥
ୱଟ୍ଟଗାମଣିନୋ ପୁତ୍ତୋ, ଚୋରନାଗୋତି ୱିସ୍ସୁତୋ ।
ମହାଚୂଳିସ୍ସରଜ୍ଜମ୍ହି, ଚୋରୋ ହୁତ୍ୱା ଚରିତଦା ॥
ମହାଚୂଳେ ଉପରତେ, ରଜ୍ଜଂ କାରୟି ଆଗତୋ ।
ଅତ୍ତନୋ ଚୋରକାଲେ ସୋ, ନିୱାସଂ ୟେସୁନାଲଭି ॥
ଅଟ୍ଠରସୱିହାରେ ତେ, ୱିଦ୍ଧଂସାପେସି ଦୁମ୍ମତି ।
ରଜ୍ଜଂ ଦ୍ୱାଦସୱସ୍ସାନି, ଚୋରନାଗୋ ଅକାରୟି ॥
ଲୋକନ୍ତରିକ ନିରୟଂ, ପାପୋସୋଉପପଜ୍ଜଥ ।
ତଦଚ୍ଚୟେ ମହାଚୂଳ୍ହି-ରଞ୍ଞୋ ପୁତ୍ତୋ ଅକାରୟି ॥
ରଜ୍ଜଂ ତୀଣେୱ ୱସ୍ସାନି, ରାଜାତିସ୍ସୋ’ତି ୱିସ୍ସୁତୋ ।
ଚୋରନାଗସ୍ସ ଦେୱୀତୁ, ୱୀସମଂ ୱୀସମାନୁଲା ॥
ୱୀସଂ ଦତ୍ୱାନ ମାରେସି, ବଲତ୍ଥେରତ୍ତମାନସା ।
ତସ୍ମିଂୟେୱବଲତ୍ଥେସା, ଅନୁଲାରତ୍ତମାନସା ॥
ତିସ୍ସଂ ୱୀସେନଘାତେତ୍ୱା, ତସ୍ସ ରଜ୍ଜମଦାସିସା ।
ସୀୱୋ ନାମ ବଲତ୍ଥୋସୋ, ଜେଟ୍ଠଦୋୱାରିକୋ ତହିଂ ॥
କତ୍ୱା ମହେସିଂ ଅନୁଲଂ, ୱସ୍ସଂ ମାସଦ୍ୱୟା’ଚିକଂ ।
ରଜ୍ଜଂ କାରେସି ନଗରେ, ୱଟୁକେ ଦମିଳେ’ନୁଲା ॥
ରତ୍ତା ୱୀସେନ ତଂ ହନ୍ତ୍ୱା, ୱଟୁକେ ରଜ୍ଜମପ୍ପୟି ।
ୱଟୁକୋ ଦମିଳୋ ସୋ ହି, ପୁରେ ନଗରୱଡ୍ଢକୀ ॥
ମହେସିଂ ଅନୁଲଂ କତ୍ୱା, ୱସ୍ସଂ ମାସଦ୍ୱୟାଧିକଂ ।
ରଜ୍ଜଂ କାରେସି ନଗରେ, ଅନୁଲା ତତ୍ଥ ଆଗତଂ ॥
ପସ୍ସିତ୍ୱା ଦାରୁଭତିକଂ, ତସ୍ମିଂ ସାରତ୍ତମାନସା ।
ହନ୍ତ୍ୱା ୱିସେନ ୱଟୁକଂ, ତସ୍ସ ରଜ୍ଜଂ ସମପ୍ପୟି ॥
ଦାରୁଭତିକତିସ୍ସୋ ସୋ, ମହେସିଂ କରିୟାନୁଲଂ ।
ଏକମାସାଧିକଂ ୱସ୍ସଂ, ପୁରେ ରଜ୍ଜମକାରୟି ॥
କାରେସି ସୋ ପୋକ୍ଖରଣିଂ, ମହାମେଘୱନେ ଲହୁଂ ।
ନିଲୀୟେ ନାମ ଦମିଳେ, ସା ପୁରୋହିତବ୍ରାହ୍ମଣେ ॥
ରାଗେନ ରତ୍ତା ଅନୁଲା, ତେନ ସଂୱାସକାମିନୀ ।
ଦାରୁଭତିକତିସ୍ସଂତଂ, ୱୀସଂ ଦତ୍ୱାନ ଘାତିୟ ॥
ନିଲୀୟସ୍ସ ଅଦା ରଜ୍ଜଂ, ସୋପି ନିଲୀୟବ୍ରାହ୍ମଣୋ ।
ତଂ ମହେସିଂ କରିତ୍ୱାନ, ନିଚ୍ଚଂ ତାୟ ଉପଟ୍ଠିତୋ ॥
ରଜ୍ଜଂ କାରେସି ଛମ୍ମାସଂ, ଅନୁରାଧପୁରେ ଇଧ ।
ଦ୍ୱତ୍ତିଂସାୟ ବଲତ୍ଥେହି, ୱତ୍ଥୁକାମା ୟଥାରୁଚିଂ ॥
ୱୀସେନ ତଂ ଘାତୟିତ୍ୱା, ନିଲୀୟଂ ଖତ୍ତିୟାନୁଲା ।
ରଜ୍ଜଂ ସା ଅନୁଲାଦେୱୀ, ଚତୁମାସମକାରୟି ॥
ମହାଚୂଳିକରାଜସ୍ସ, ପୁତ୍ତୋ ଦୁତିୟକୋ ପନ ।
କୂଟକଣ୍ଣତିସ୍ସୋ ନାମ, ଭୀତୋ ସୋ’ନୁଲଦେୱିୟା ॥
ପଲାୟିତ୍ୱା ପବ୍ବଜିତ୍ୱା, କାଲେ ପତ୍ତବଲୋ ଇଧ ।
ଆଗନ୍ତ୍ୱା ଘାତୟିତ୍ୱା, ତଂ ଅନୁଲଂ ଦୁଟ୍ଠମାନସଂ ॥
ରଜ୍ଜଂ କାରେସି ଦ୍ୱାୱୀସଂ, ୱସ୍ସାନି ମନୁଜାଧିପୋ ।
ମହାଉପୋସଥାଗାରଂ, ଅକା ଚେତିୟପବ୍ବତେ ॥
ଘରସ୍ସ ତସ୍ସ ପୁରତୋ, ସିଲାଥୂପମକାରୟି ।
ବୋଧିଂ ରୋପେସି ତତ୍ଥେୱ, ସୋୱ ଚେତିୟେପବ୍ବତେ ॥
ପେଲଗାମୱିହାରଞ୍ଚ, ଅନ୍ତରଗଙ୍ଗାୟ କାରୟି ।
ତତ୍ଥେୱ ୱଣ୍ଣକଂ ନାମ, ମହାମାତିକମେୱ ଚ ॥
ଅମ୍ବଦୁଗ୍ଗମହାୱାପିଂ, ଭୟୋଲୁପ୍ପଲମେୱ ଚ ।
ସତ୍ତହତ୍ଥୁଚ୍ଚପାକାରଂ, ପୁରସ୍ସ ପରିଖଂ ତଥା ॥
ମହାୱତ୍ଥୁମ୍ହି ଅନୁଲଂ, ଝାପୟିତ୍ୱା ଅସଞ୍ଞତଂ ।
ଅପନୀୟ ତତୋ ଥୋକଂ, ମହାୱତ୍ଥୁମକାରୟି ॥
ପଦୁମସ୍ସରୱନୁୟ୍ୟାନଂ, ନଗରେୟେୱ କାରୟି ।
ମତା’ସ୍ସ ଦନ୍ତେ ଧୋୱିତ୍ୱା, ପବ୍ବଜି ଜିନସାସନେ ॥
କୁଲସନ୍ତକେ ଘରଟ୍ଠାନେ, ମାତୁଭିକ୍ଖୁନୁପସ୍ସୟଂ ।
କାରେସି ଦନ୍ତଗେହନ୍ତି, ୱିସ୍ସତୋ ଆସି ତେନ ସୋ ॥
ତଦଚ୍ଚୟେ ତସ୍ସ ପୁତ୍ତୋ, ନାମକୋ ଭାତିକାଭୟୋ ।
ଅଟ୍ଠୱୀସତିୱସ୍ସାନି, ରଜ୍ଜଂ କାରେସି ଖତ୍ତିୟୋ ॥
ମହାଦାଟ୍ଠିକରାଜସ୍ସ, ଭାତିକତ୍ତାମହୀପତି ।
ଦୀପେ ‘‘ଭାତିକରାଜା’’ତି, ପାକଟୋ ଆସି ଧମ୍ମିକୋ ॥
କାରେସି ଲୋହପାସାଦେ, ପଟିସଙ୍ଖାରମେତ୍ଥସୋ ।
ମହାଥୂପେ ୱେଦିକା ଦ୍ୱେ, ଥୂପୱ୍ହେ’ପୋସଥୱ୍ହୟଂ ॥
ଅତ୍ତନୋ ବଲିମୁଜ୍ଝିତ୍ୱା, ନଗରସ୍ସ ସମନ୍ତତୋ ।
ରୋପାପେତ୍ୱା ୟୋଜନମ୍ହି, ସୁମନାନ’ଜ୍ଜୁକାନି ଚ ॥
ପାଦୱେଚିକତୋ ୟାୱ, ଧୁରଚ୍ଛତ୍ତାନରାଧିପୋ ।
ଚତୁରଙ୍ଗଲବହଲେନ, ଗନ୍ଧେନ ଉରୁଚେତିୟଂ ॥
ଲିମ୍ପାପେତ୍ୱାନ ପୁପ୍ଫାନି, ୱଣ୍ଟେହି ତତ୍ଥ ସାଧୁକଂ ।
ନିୱେସିତ୍ୱାନ କୋରେସି, ଥୂପଂ ମାଲାଗୁଲୋପମଂ ॥
ପୁନଦ୍ୱଙ୍ଗୁଲବହଲାୟ, ମନୋସିଲାୟ ଚେତିୟଂ ।
ଲିମ୍ପାପେତ୍ୱାନ କାରେସି, ତଥେୱ କୁସୁମାଚିତଂ ॥
ପୁନ ସୋପାନତୋ ୟାୱ, ଧୁରଚ୍ଛତ୍ତାୱ ଚେତିୟଂ ।
ପୁପ୍ଫେହି ଓକିରାପେତ୍ୱା, ଛାଦେସି ପୁପ୍ଫରାସିନୋ ॥
ଉଟ୍ଠାପେତ୍ୱାନ ୟନ୍ତେହି, ଜଲଂ ଅଭୟୱାପିତୋ ।
ଜଲେହି ଥୂପଂ ସେୱନ୍ତୋ, ବଲପୂଜମକାରୟି ॥
ସକଟସତେନ ମୁତ୍ତାନଂ, ସଦ୍ଧିଂ ତେଲେନ ସାଧୁକଂ ।
ମଦ୍ଦାପେତ୍ୱା ସୁଧାପିଣ୍ଡଂ, ସୁଧାକମ୍ମମକାରୟି ॥
ପୱାଲଜାଲଂ କାରେତ୍ୱା, ତଂ ଖିପାପିୟ ଚେତିୟେ ।
ସୋୱଣ୍ଣାନି ପଦୁମାନି, ଚକ୍କମତ୍ତାନି ସନ୍ଧିସୁ ॥
ଲଗ୍ଗାପେତ୍ୱା ତତୋ ମୁତ୍ତା-କଲାପେ ୟାୱ ହେଟ୍ଠିମା ।
ପଦୁମା’ଲମ୍ବୟିତ୍ୱାନ, ମହାଥୂପମପୂଜୟି ॥
ଗଣସଜ୍ଝାୟସଦ୍ଦଂ ସୋ, ଧାତୁଗବ୍ଭମ୍ହିତାଦିନି ।
ସୁତ୍ୱା ‘‘ଅଦିସ୍ୱା ତଂନା’ହଂ, ୱୁଟ୍ଠହିସ୍ସନ୍ତି ନିଚ୍ଛିତୋ ॥
ପାଚିନାଦିକମୂଲମ୍ହି, ଅନାହାରୋ ନିପଜ୍ଜଥ ।
ଥେରା ଦ୍ୱାରଂ ମାପୟିତ୍ୱା, ଧାତୁଗବ୍ଭଂ ନୟିଂସୁ ତଂ ॥
ଧାତୁଗବ୍ଭୱିଭୂତିଂସୋ, ସବ୍ବଂ ଦିସ୍ୱା ମହୀପତି ।
ନିକ୍ଖନ୍ତୋ ତାଦିସେହେୱ, ପୋତ୍ଥରୂପେହି ପୂଜୟି ॥
ମଧୁଗନ୍ଧେହି ଗନ୍ଧେହି, ଘଟେହି ସରସେହି ଚ ।
ଅଞ୍ଜନହରିତାଲେହି, ତଥାମନୋସିଲାହି ଚ ॥
ମନୋସିଲାସୁ ୱସ୍ସେନ, ଭସ୍ସିତ୍ୱା ଚେତିୟଙ୍ଗଣେ ।
ଠିତାସୁ ଗୋପ୍ଫମତ୍ତାସୁ, ରଚିତେ ପୁ’ପ୍ପଲେହି ଚ ॥
ଥୂପଙ୍ଗଣମ୍ହି ସକଲେ, ପୁରିତେ ଗନ୍ଧକଦ୍ଦମେ ।
ଚିତ୍ତକିଲଞ୍ଜଛିଦ୍ଦେସୁ, ରଚିତେ ପୁ’ପ୍ପଲେହି ଚ ॥
ୱାରୟିତ୍ୱା ୱାରିମଗ୍ଗଂ, ତଥେୱ ପୁରିତେ ଘଟେ ।
ଦୀପୱଟ୍ଟିହି ନେକାନି, କତୱଟ୍ଟିସିଖାହି ଚ ॥
ମଧୁକତେଲମ୍ହି ତଥା, ତିଲତେଲେ ତଥେୱ ଚ ।
ତଥେୱ ପଟ୍ଟୱଟ୍ଟୀନଂ, ସୁ ବହୂହି ସିଖାହି ଚ ॥
ୟଥାୱୁତ୍ତେହି ଏତେହି, ମହାଥୂପସ୍ସ ଖତ୍ତିୟୋ ।
ସତ୍ତକ୍ଖତ୍ତୁଂ ସତ୍ତକ୍ଖତ୍ତୁଂ, ପୂଜା’କାସି ୱିସୁଂ ୱିସୁଂ ॥
ଅନୁୱସ୍ସଞ୍ଚ ନିୟତଂ, ସୁଧାମଙ୍ଗଲମୁତ୍ତମଂ ।
ବୋଧିସିନାନପୂଜା ଚ, ତଥେୱ ଉରୁବୋଧିୟା ॥
ମହାୱେସାଖ ପୂଜା ଚ, ଉଳାରା ଅଟ୍ଠୱୀସତି ।
ଚତୁରାସୀତି ସହସ୍ସାନି, ପୂଜା ଚ ଅନୁଳାରିକା ॥
ୱିୱିଧଂ ନଟନଚ୍ଚଞ୍ଚ, ନାନାତୂରିୟୱାଦିତଂ ।
ମହାଥୂପେ ମହାପୂଜଂ, ସଦ୍ଧାନୁନ୍ନୋ ଅକାରୟି ॥
ଦିୱସସ୍ସ ଚ ତିକ୍ଖତ୍ତୁଂ, ବୁଦ୍ଧୁପ୍ପଟ୍ଠାନମାଗମା ।
ଦ୍ୱିକ୍ଖତ୍ତୁଂ, ପୁପ୍ଫଭେରିଞ୍ଚ, ନିୟତଂ ସୋ ଅକାରୟି ॥
ନିୟତଞ୍ଚନଦାନଞ୍ଚ, ପୱାରଣାଦାନମେୱ ଚ ।
ତେଲଫାଣିତୱତ୍ଥାଦି-ପରିକ୍ଖାରଂ ସମଣାରହଂ ॥
ବହୁଂ ପାଦାସି ସଙ୍ଘସ୍ସ, ଚେତିୟଖେତ୍ତମେୱ ଚ ।
ଚେତିୟେ ପରିକମ୍ମତ୍ଥଂ, ଅଦାସି ତତ୍ଥ ଖତ୍ତିୟୋ ॥
ସଦା ଭିକ୍ଖୁସହସ୍ସସ୍ସ, ୱିହାରେ ଚେତିୟପବ୍ବତେ ।
ସଲାକୱତ୍ତଭତ୍ତଞ୍ଚ, ସୋ ଦାପେସି ଚ ଭୂପତି ॥
ଚିନ୍ତାମଣିମୁଚେଲୱ୍ହେ, ଉପଟ୍ଠାନତ୍ତୟେ ଚ ସୋ ।
ତଥା ପଦୁମଘରେ ଛତ୍ତ-ପାସାଦେ ଚ ମନୋରମେ ॥
ଭୋଜେନ୍ତୋ ପଞ୍ଚଠାନମ୍ହି, ଭିକ୍ଖୂଗନ୍ଥଧୁରେ ୟୁତେ ।
ପଚ୍ଚୟେହି ଉପଟ୍ଠାସି, ସଦା ଧମ୍ମେ ସଗାରୱୋ ॥
ପୋରାଣରାଜନିୟାତଂ, ୟଂକିଞ୍ଚି ସାସନସ୍ସିତଂ ।
ଅକାସି ପୁଞ୍ଞକମ୍ମଂସୋ, ସବ୍ବଂ ଭାତିକଭୂପତି ॥
ତସ୍ସ ଭାଭକରାଜସ୍ସ, ଅଚ୍ଚୟେ ତଂ କନିଟ୍ଠକୋ ।
ମହାଦାଠିମହାନାଗ-ନାମୋ ରଜ୍ଜମକାରୟି ॥
ଦ୍ୱାଦସଂୟେୱ ୱସ୍ସାନି, ନାନାପୁଞ୍ଞପରାୟନୋ ।
ମହାଥୂପମ୍ହି କିଞ୍ଜକ୍ଖ- ପାସାଣେ ଅତ୍ଥରାପୟି ॥
ୱାଲିକାମରିୟାଦଞ୍ଚ, କାରେସି ୱିତ୍ଥତଙ୍ଗଣଂ ।
ଦୀପେ ସବ୍ବୱିହାରେସୁ, ଧମ୍ମାସନମଦାପୟି ॥
ଅମ୍ବତ୍ଥଲ ମହାଥୂପଂ, କାରାପେସି ମହୀପତି ।
ଚ ୟେଅନିଟ୍ଠମାନମ୍ହି, ସରିତ୍ୱା ମୁନିନୋ ଗୁଣଂ ॥
ଚଜିତ୍ୱାନ ସକଂ ପାଣଂ, ନିପଜ୍ଜିତ୍ୱା ସୟଂ ତହିଂ ।
ଠପୟିତ୍ୱା ଚୟଂ ତସ୍ସ, ନିଟ୍ଠାପେତ୍ୱାନ ଚେତିୟଂ ॥
ଚତୁଦ୍ୱାରେ ଠପାପେସି, ଚତୁରୋ ରତନଗ୍ଘିକେ ।
ସୁସିପ୍ପିକେହି ସୁୱିଭତ୍ତେ, ନାନାରତନଜୋତିତେ ॥
ଚେତିୟେ ପଟିମୋଚେତ୍ୱା, ନାନାରତନକଞ୍ଚୁକଂ ।
କଞ୍ଚନ ବୁବ୍ବୁଲଞ୍ଚେତ୍ଥ, ମୁତ୍ତୋଲମ୍ବଞ୍ଚ ଦାପୟି ॥
ଚେତିୟ ପବ୍ବତାୱଟ୍ଟେ, ଅଲଙ୍କରିୟ ୟୋଜନଂ ।
ୟୋଜାପେତ୍ୱା ଚତୁଦ୍ୱାରଂ, ସମନ୍ତା ଚାରୁୱୀଥିକଂ ॥
ୱୀଥିୟା ଉଭତୋ ପସ୍ସେ, ଆପଣାନି ପସାରିୟ ।
ଧଜଗ୍ଘିକ ତୋ ରଣାନି, ମଣ୍ଡୟିତ୍ୱା ତହିଂ ତହିଂ ॥
ଦୀପମାଲା ସମୁଜ୍ଜୋତଂ, କାରୟିତ୍ୱା ସମନ୍ତତୋ ।
ନଟନଚ୍ଚାନି ଗୀତାନି, ୱାଦିତାନି ଚ କାରୟି ॥
ମଗ୍ଗେ କଦମ୍ବନଦିତୋ, ୟାୱଚେତିୟ ପବ୍ବତା ।
ଗନ୍ତୁଂ ଧୋତେହି ପାଦେହି, କାରୟି’ତ୍ଥରଣତ୍ଥତଂ ॥
ସନଚ୍ଚଗୀତୱାଦେହି, ସମଜ୍ଜମକରୁଂ ତହିଂ ।
ନଗରସ୍ସ ଚତୁଦ୍ୱାରେ, ମହା ଦାନଞ୍ଚ ଦାପୟି ॥
ଅକାସି ସକଲେ ଦୀପେ, ଦୀପମାଲାନିରନ୍ତରଂ ।
ସଲିଲେପି ସମୁଦ୍ଦସ୍ସ, ସମନ୍ତା ୟୋଜନନ୍ତରେ ॥
ଚେତିୟସ୍ସ ମହେତେନ, ପୂଜା ସା କାରିତା ସୁଭା ।
ଗିରିଭଣ୍ଡା ମହାପୂଜା, ଉଳାରା ୱୁଚ୍ଚତେ ଇଧ ॥
ସମାଗତାନଂ ଭିକ୍ଖୂନଂ, ତସ୍ମିଂ ପୂଜା ସମାଗମେ ।
ଦାନଂ ଅଟ୍ଠସୁ ଠାନେସୁ, ଠପାପେତ୍ୱା ମହୀପତି ॥
ତାଳୟିତ୍ୱାନ ତତ୍ରଟ୍ଠା, ଅଟ୍ଠସୋୱଣ୍ଣଭେରିୟୋ ।
ଚତୁୱୀସସହସ୍ସାନଂ, ମହାଦାନଂ ପୱତ୍ତୟି ॥
ଛଚୀୱରାନି ପାଦାସି, ବନ୍ଧମୋକ୍ଖଞ୍ଚ କାରୟି ।
ଚତୁଦ୍ୱାରେନ୍ୱାପିତେହି, ସଦା କମ୍ମମକାରୟି ॥
ପୁବ୍ବରାଜୂହି ଠପିତଂ, ଭାତରଂ ଠପିତଂ ତଥା ।
ପୁଞ୍ଞକମ୍ମଂ ଅହାପେତ୍ୱା, ସବ୍ବଂ କାରୟିଭୂପତି ॥
ଅତ୍ତାନଂ ଦେୱିଂପୁତ୍ତେ ଦ୍ୱେ, ହତ୍ଥିଂ ଅସ୍ସଞ୍ଚ ମଙ୍ଗଲଂ ।
ୱାରିୟନ୍ତୋ’ପି ସଙ୍ଘେନ, ସଙ୍ଘସ୍ସା’ଦାସି ଭୂପତି ॥
ଛସତ ସହସ୍ସଗ୍ଘକଂ, ଭିକ୍ଖୁସଙ୍ଘସ୍ସ ସୋ ଅଦା ।
ସତସହସ୍ସଗ୍ଘନକଂ, ଭିକ୍ଖୂନୀନଂ ଗଣସ୍ସ ତୁ ॥
ଦତ୍ୱାନ କପ୍ପିୟଂ ଭଣ୍ଡଂ, ୱିୱିଧଂ ୱିଧିକୋୱିଦୋ ।
ଅତ୍ତାନଞ୍ଚ’ୱ ସେସେ ଚ, ସଙ୍ଘତୋ ଅଭିନୀହରି ॥
କାଲାୟନ କଣ୍ଣିକମ୍ହି, ମଣିନାଗ ପବ୍ବତୱ୍ହୟଂ ।
ୱିହାରଞ୍ଚ କଳୱ୍ହୟଂ, କାରେସି ମନୁଜାଧିପୋ ॥
କୁବୁ ବନ୍ଧନଦୀତୀରେ, ସମୁଦ୍ଦୱିହାରମେୱ ଚ ।
ହୁୱାୱକଣ୍ଣିକେ ଚୂଳ, ନଗପବ୍ବତସୱ୍ହୟଂ ॥
ପାସାଣଦୀପକୱ୍ହମ୍ହି, ୱିହାରେ କାରିତେ ସୟଂ ।
ପାନିୟଂ ଉପନିତସ୍ସ, ସାମଣେରସ୍ସ ଖତ୍ତିୟୋ ॥
ଉପଚାରେ ପସୀଦିତ୍ୱା, ସମନ୍ତା ଅଟ୍ଠୟୋଜନଂ ।
ସଙ୍ଘଭୋଗମଦାତସ୍ସ, ୱିହାରସ୍ସ ମହୀପତି ॥
ମଣ୍ଡୱାପି ୱିହାରେ ଚ, ସାମଣେରସ୍ସ ଖତ୍ତିୟୋ ।
ତୁଟ୍ଠୋ ୱିହାରଂ ଦାପେସି, ସଙ୍ଘେ ଭୋଗଂ ତଥେୱ ସୋ ॥
ଇତି ୱିଭୱମନପ୍ପଂ ସାଧୁପଞ୍ଞା ଲଭିତ୍ୱା,
ୱିଗତମଦପମାଦାଚତ୍ତ କାମପସଙ୍ଗା ।
ଅକରିୟଜନଖେଦଂ ପୁଞ୍ଞକମ୍ମାଭିରାମା,
ୱିପୁଲୱିୱିଧପୁଞ୍ଞଂ ସୁପ୍ପନ୍ନାକରୋନ୍ତୀତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଏକାଦସରାଜଦୀପନୋ ନାମ
ଚତୁତ୍ତିଂସତିମୋ ପରିଚ୍ଛେଦୋ ।
ପଞ୍ଚତିଂସତିମପରିଚ୍ଛେଦ
ଦ୍ୱାଦସରାଜକୋ
ଆମଣ୍ଡଗାମଣ୍ୟଭୟୋ, ମହାଦାଠିକଅଚ୍ଚୟେ ।
ନୱୱସ୍ସନଟ୍ଠମାସେ, ରଜ୍ଜଂ କାରେସି ତଂ ସୁତୋ ॥
ଛତ୍ତାତି ଛତ୍ତଂ କାରେସି, ମହାଥୂପେ ମନୋରମେ ।
ତଥେୱ ପାଦୱେଦିଞ୍ଚ, ମୁଦ୍ଧୱେଦିଞ୍ଚ କାରୟି ॥
ତଥେୱ ଲୋହପାସାଦ, ଥୂପୱ୍ହେ ପୋସଥୱ୍ହୟେ ।
କାରେସି କୁଚ୍ଛିଆଜିରଂ, କୁଚ୍ଛିଆଳିନ୍ଦମେୱ ଚ ॥
ଉଭୟତ୍ଥାପି କାରେସି, ଚାରୁଂ ରତନପଣ୍ଡପଂ ।
ରଜତଲେଣ ୱିହାରଞ୍ଚ, କାରାପେସି ନରାଧିପେ ॥
ମହାଗାମେଣ୍ଡୱାପିଂସୋ, ପସ୍ସେ କାରିୟ ଦକ୍ଖିଣେ ।
ଦକ୍ଖିଣସ୍ସ ୱିହାରସ୍ସ, ଅଦାସି ପୁଞ୍ଞଦକ୍ଖିଣୋ ॥
ମାଘାତଂ ସକଲେ ଦୀପେ, କାରେସି ମନୁଜାଧିପୋ ।
ୱଲ୍ଲିଫଲାନି ସବ୍ବାନି, ରୋପାପେତ୍ୱା ତହିଂ ତହିଂ ॥
ମଂ ସକୁଭଣ୍ଡକଂ ନାମ, ଆମଣ୍ଡିୟ ମହୀପତି ।
ପତ୍ତଂ ପୂରାପୟିତ୍ୱାନ, କାରେତ୍ୱା ୱତ୍ଥଚୁମ୍ବଟଂ ॥
ଦାପେସି ସବ୍ବସଙ୍ଘସ୍ସ, ୱିପ୍ପସନ୍ନେନ ଚେତସା ।
ପତ୍ତେ ପୂରାପୟିତ୍ୱା ସୋ, ଆମଣ୍ଡ ଗାମଣିୱିଦୂ ॥
ତଙ୍କନିଟ୍ଠୋକଣିରାଜା-ତିସ୍ସୋ ଘାତିୟ ତାତରଂ ।
ତୀଣି ୱସ୍ସାନି ନଗରେ, ରଜ୍ଜଂ କାରେସି ଖତ୍ତିୟୋ ॥
ଉପୋସଥଘରଟ୍ଟଂ ଏସା, ନିଚ୍ଛିନି ଚେକିୟୱ୍ହୟେ ।
ରାଜାପରାଧକମ୍ମମ୍ହି, ପୁତ୍ତେ ସଟ୍ଠିତୁ ଭିକ୍ଖୱୋ ॥
ସହୋଡ୍ଡେ ଗାହୟିତ୍ୱାନ, ରାଜା ଚେତିୟ ପବ୍ବତେ ।
ଖିପାପେସି କଣିରୱ୍ହେ, ପବ୍ଭାରମ୍ହି ଅସୀଲକେ ॥
କଣିରାଜା ଅଚ୍ଚୟେନ, ଆମଣ୍ଡଗାମଣି ସୁତୋ ।
ଚୂଳାଭୟୋ ୱସ୍ସମେକଂ, ରଜ୍ଜଂ କାରେସି ଖତ୍ତିୟୋ ॥
ସୋ ଗୋଣକନଦୀତୀରେ, ପୁରପସ୍ସମ୍ହି ଦକ୍ଖିଣେ ।
କାରାପେସି ମହୀପାଲୋ, ୱିହାରେ ଚୂଳଗଲ୍ଲକଂ ॥
ଚୂଳାଭୟସ୍ସ’ଚ୍ଚ ୟେନ, ସୀୱଲି ତଂ କନିଟ୍ଠିକା ।
ଆମଣ୍ଡଧୀତା ଚତୁରୋ, ମାସେ ରଜ୍ଜମକାରୟି ॥
ଆମଣ୍ଡ ଭାଗିନେୟ୍ୟା ତୁ, ସୀୱଲିଂ ଅପନୀୟତଂ ।
ଇଳନାଗୋତି ନାମେନ, ଛତ୍ତଂ ଉସ୍ସାପୟି ପୁରେ ॥
ତିସ୍ସୱାପିଂ ଗତେ ତସ୍ମିଂ, ଆଦିୱସ୍ସେ ନରାଧିପେ ।
ତଂ ହିତ୍ୱା ପୁରମାଗଞ୍ଛୁଂ, ବହୱୋଲମ୍ବକଣ୍ଣକା ॥
ତହିଂ ଅଦିସ୍ୱା ତେ ରାଜା, କୁଦ୍ଧୋ ତେହି ଅକାରୟି ।
ମଦ୍ଦୟଂ ୱାପିୟା ପସ୍ସେ, ମହାଥୂପଞ୍ଜସଂସୟଂ ॥
ତେସଂ ୱିଚାରକେ କତ୍ୱା, ଚଣ୍ଡାଲେ ଚ ଠପାପୟି ।
ତେନ କୁଦ୍ଧାଲମ୍ବକଣ୍ଣା, ସବ୍ବେ ହୁତ୍ୱାନ ଏକତୋ ॥
ରାଜାନଂ ତଂ ଗହେତ୍ୱାନ, ରୁନ୍ଧିତ୍ୱାନ ସକେ ଘରେ ।
ସୟଂ ରଜ୍ଜଂ ୱିଚାରେସୁଂ, ରଞ୍ଞୋ ଦେୱୀ ତଦା ସକଂ ॥
ପୁତ୍ତଂ ଚନ୍ଦମୁଖସିୱଂ, ମଣ୍ଡୟିତ୍ୱା କୁମାରକଂ ।
ଦତ୍ୱାନ ହତ୍ଥେ ଧାତୀନଂ, ମଙ୍ଗଲହତ୍ଥି ସନ୍ତିକେ ॥
ପେସେସି ୱତ୍ୱା ସନ୍ଦେସଂ, ନେତ୍ୱା ତଂ ଧାତିୟୋ ତହିଂ ।
ୱଦିଂସୁ ଦେୱିସନ୍ଦେସଂ, ସବ୍ବଂ ମଙ୍ଗଲ ହତ୍ଥିନୋ ॥
‘‘ଅୟଂ ତେ ସାଧିନୋ ପୁତ୍ତୋ,
ସାମିକୋ ଚାରକେ ଠିତୋ ।
ଅରିହି ଘାତତୋ ସେସୋ,
ତୟା ଘାତୋ ଇମସ୍ସ ତୁ ॥
ତ୍ୱମେନଂ କିର ଘାତେହି, ଇଦଂ ଦେୱିୱଚୋ’’ଇତି ।
ୱତ୍ୱା ତୁ ସୟାପେସୁଂ, ପାଦମୂଲମ୍ହି ହତ୍ଥିନୋ ॥
ଦୁକ୍ଖିତୋ ସୋ ରୁଦିତ୍ୱାନ, ନାଗୋ ଭେତ୍ୱାନ ଆଳକଂ ।
ପୱିସିତ୍ୱା ମହାୱତ୍ଥୁଂ, ଦ୍ୱାରଂ ପାତିୟ ଥାମସା ॥
ରଞ୍ଞୋ ନିସିନ୍ନଙ୍ଗଣମ୍ହି, ଉଗ୍ଘାଟେତ୍ୱା କୱାଟକଂ ।
ନିସୀଦାପିୟ ତଂ ଖନ୍ଧେ, ମହାତିତ୍ଥମୁପାଗମି ॥
ନାୱଂ ଆରୋ ପୟିତ୍ୱାନ, ରାଜାନଂ ତତ୍ଥ କୁଞ୍ଜରୋ ।
ପଚ୍ଛିମୋ ଦଧିତୀରେନ, ସୟଂ ମଲୟ ମାରୁହୀ ॥
ପରତୀରେ ୱସିତ୍ୱା ସୋ, ତୀଣିୱସ୍ସାନି ଖତ୍ତିୟୋ ।
ବଲକାୟଂ ଗହେତ୍ୱାନ, ଆଗା ନାୱାତି ରୋହଣଂ ॥
ତିତ୍ଥେ ସକ୍ଖରସୋବ୍ଭମ୍ହି, ଓତରିତ୍ୱାନ ଭୂପତି ।
ଅକାସି ରୋହଣେ ତତ୍ଥ, ମହନ୍ତଂ ବଲସଙ୍ଗହଂ ॥
ରଞ୍ଞୋ ମଙ୍ଗଲହତ୍ଥିସୋ, ଦକ୍ଖିଣଂ ମଲୟଂ ତତୋ ।
ରୋହଣଂୟେ’ୱୁପାଗଞ୍ଛି, ତସ୍ସ କମ୍ମାନି କାତୱେ ॥
ମହାପଦୁମନାମସ୍ସ, ତତ୍ଥ ଜାତକଭାଣିନୋ ।
ତୁଲାଧାରୱ୍ହୱାସିସ୍ସ, ମହାଥେରସ୍ସ ସନ୍ତିକେ ॥
କପିଜାତକଂ ସୁତ୍ୱାନ, ବୋଧିସତ୍ତେ ପସାଦୱା ।
ନାଗମହାୱିହାରଂ ସୋ, ଜିୟାମୁତ୍ତଧନୁସ୍ସତଂ ॥
କତ୍ୱା କାରେସି ଥୂପଞ୍ଚ, ୱଡ୍ଢାପେସି ୟଥାଠିତଂ ।
ତିସ୍ସୱାପିଞ୍ଚ କାରେସି, ତଥା ଦୁରୱ୍ହୱାପିକଂ ॥
ସୋ ଗହେତ୍ୱା ବଲଂ ରାଜା, ୟୁଦ୍ଧାୟ ଅଭିନିକ୍ଖମି ।
ତଂ ସୁତ୍ୱା ଲମ୍ବକଣ୍ଣା ଚ, ୟୁଦ୍ଧାୟ ଅଭିସଂୟୁତା ॥
ପପଲ୍ଲକ୍ଖନ୍ଧଦ୍ୱାରମ୍ହି, ଖେତ୍ତେ ହିଙ୍କରୱାପିକେ ।
ୟୁଦ୍ଧଂ ଉଭିନ୍ନଂ ୱତ୍ତିତ୍ଥ, ଅଞ୍ଞମଞ୍ଞୱିହେସନଂ ॥
ନାୱାକିଲନ୍ତଦେହତ୍ତା, ପୋସା ସୀଦନ୍ତି ରାଜିନୋ ।
ରାଜା ନାମଂ ସାୱୟିତ୍ୱା, ସୟଂ ପାୱିସି ତେନ ସୋ ॥
ତେନ ଭୀତାଲମ୍ବକଣ୍ଣା, ସୟିଂସୁ ଉଦରେନ ସୋ ।
ତେସଂ ସୀସାନି ଛିନ୍ଦିତ୍ୱା, ରତନାଭିସମଂକରି ॥
ତିକ୍ଖତ୍ତୁମେୱନ୍ତୁକତେ, କରୁଣାୟ ମହୀପତି ।
‘‘ଅମାରେତ୍ୱା’ୱ ଗଣ୍ହାଥ, ଜୀୱଗ୍ଗାହ’ନ୍ତି ଅବ୍ରୁୱି ॥
ତତୋ ୱିଜିତସଙ୍ଗାମୋ, ପୁରଂ ଆଗମ୍ମ ଭୂପତି ।
ଛତ୍ତଂ ଉସ୍ସାପୟିତ୍ୱାନ ତିସ୍ସୱାପି ଛଣଂ ଅଗା ॥
ଜଲକୀଳାୟ ଉଗ୍ଗନ୍ତ୍ୱା, ସୁମଣ୍ଡିତପସାଧିତୋ ।
ଅତ୍ତନୋ ସିରିସମ୍ପତ୍ତିଂ, ଦିସ୍ୱା ତସ୍ସନ୍ତରାୟିକେ ॥
ଲମ୍ବକଣ୍ଣେ ସରିତ୍ୱାନ, କୁଦ୍ଧୋ ସୋ ୟୋଜୟୀରଥେ ।
ୟୁଗପରମ୍ପରା ତେସଂ, ପୁରତୋ ପାୱିସୀ ପୁରଂ ॥
ମହାୱତ୍ଥୁସ୍ସ ଉମ୍ମାରେ, ଠତ୍ୱା ରାଜାଣପେସି ସୋ ।
‘‘ଇମେସଂ ସୀସମୁମ୍ମାରେ, ଅସ୍ମିଂ ଛିନ୍ଦଥ ଭୋ’’ଇତି ॥
ଗୋଣା ଏତେରଥେ ୟୁତ୍ତା, ତୱ ହୋନ୍ତି ରଥେସଭ ।
ସିଙ୍ଗଂଖୁରଞ୍ଚ ଏତେସଂ, ଛେଦାପୟତ ଭୋ’’ଇତି ॥
ମାତୁୟା ଅଥ ସଞ୍ଞତ୍ତୋ, ସୀସଚ୍ଛେଦଂ ନିୱାରିୟ ।
ନାସଞ୍ଚ ପାଦଙ୍ଗୁଟ୍ଠଞ୍ଚ, ତେସଂ ରାଜା ଅଛେଦୟି ॥
ହତ୍ଥିୱୁତ୍ଥଂ ଜନପଦଂ, ଅଦା ହତ୍ଥିସ୍ସ ଖତ୍ତିୟୋ ।
ହତ୍ଥିଭୋଗୋ ଜନପଦୋ, ଇତି ତେନାସି ନାମତୋ ॥
ଏୱଂ ଅନୁରାଧପୁରେ, ଇଳାନାଗୋ ମହୀପତି ।
ଛବ୍ବସ୍ସାନି ଅନୁନାନି, ରଜ୍ଜଂ କାରେସି ଖତ୍ତିୟୋ ॥
ଇଳନାଗଚ୍ଚୟେ ତସ୍ସ, ପୁତ୍ତୋ ଚନ୍ଦମୁଖୋସିୱୋ ।
ଅଟ୍ଠୱସ୍ସଂ ସତ୍ତମାସଂ, ରାଜା ରଜ୍ଜମକାରୟି ॥
ମଣିକାରଗାମେ ୱାପି, କାରାପେତ୍ୱା ମହୀପତି ।
ଇସ୍ସରସମଣୱ୍ହସ୍ସ, ୱିହାରସ୍ସ ଅଦାସି ସୋ ॥
ତସ୍ସ ରଞ୍ଞୋ ମହେସୀ ଚ, ସଙ୍ଗାମେ ପତ୍ତିମତ୍ତନୋ ।
ତସ୍ସେୱା’ଦା ୱିହାରସ୍ସ, ଦମିଳଦେୱୀତି ୱିସ୍ସୁତା ॥
ତଂ ତିସ୍ସୱାପୀ କୀଳାୟ, ହନ୍ତ୍ୱା ଚନ୍ଦମୁଖଂ ସିୱଂ ।
ୟସଳାଲକତିସ୍ସୋ’ତି, ୱିସ୍ସୁତୋ ତଙ୍କନିଟ୍ଠକୋ ॥
ଅନୁରାଧପୁରେ ରମ୍ମେ, ଲଙ୍କାଭୁୱଦନେ ସୁଭେ ।
ସତ୍ତୱସ୍ସାନଟ୍ଠମାସେ, ରାଜା ରଜ୍ଜମକାରୟି ॥
ଦୋୱିରିକସ୍ସ ଦତ୍ତସ୍ସ, ପୁତ୍ଥୋ ଦୋୱାରିକୋ ସୟଂ ।
ରଞ୍ଞୋ ସଦିସରୂପେନ, ଅହୋସି ସୁଭନାମୱା ॥
ସୁଭଂ ବଲତ୍ଥଂ ତଂ ରାଜା, ରାଜଭୂସାୟ ଭୂସିୟ ।
ନିସିଦାପିୟ ପଲ୍ଲଙ୍କେ, ହାସତ୍ଥଂ ୟସଳାଲକୋ ॥
ସୀସଚୋଳଂ ବଲତ୍ଥସ୍ସ, ସସୀସେ ପଟିମୁଞ୍ଚିୟ ।
ୟଟ୍ଠିଂ ଗହେତ୍ୱା ହତ୍ଥେନ, ଦ୍ୱାରମୂଲେ ଠିତୋ ସୟଂ ॥
ୱନ୍ଦନ୍ତେସୁ ଅମଚ୍ଚେସୁ, ନିସିନ୍ନଂ ଆସନମ୍ହି ତଂ ।
ରାଜା ହସତି ଏୱଂ ସୋ, କୁରୁତେ ଅନ୍ତରନ୍ତରା ॥
‘‘ବଲତ୍ଥୋ ଏକଦିୱସଂ, ରାଜାନଂ ହସମାନକଂ ।
ଅୟଂ ବଲତ୍ଥୋ କସ୍ମା ମେ, ସମ୍ମୁଖାହସତୀ’’ତି ସୋ ॥
ମାରାପୟିତ୍ୱା ରାଜାନଂ, ବଲତ୍ଥୋ ସୋ ସୁଭୋ ଇଧ ।
ରଜ୍ଜଂ କାରେସି ଛବ୍ବସ୍ସଂ, ସୁଭରାଜାତି ୱିସ୍ସୁତୋ ॥
ଦ୍ୱିସୁ ମହାୱିହାରେସୁ, ସୁଭରାଜା ମନୋରମଂ ।
ପରିୱେଣପନ୍ତିଂ ସୁଭ-ନାମକଂୟେୱ କାରୟି ॥
ଉରୁୱେଲସମୀପମ୍ହି, ତଥା ୱେଲ୍ଲିୱିହାରକଂ ।
ପୁରତ୍ଥିମେ ଏକଦ୍ୱାରଂ, ଗଙ୍ଗନ୍ତେ ନନ୍ଦିଗାମକଂ ॥
ଲମ୍ବକଣ୍ଣସୁତୋ ଏକୋ, ଉତ୍ତରପସ୍ସୱାସିକୋ ।
ସେନାପତିମୁପଟ୍ଠାସି, ୱସଭୋ ନାମ ମାତୁଲଂ ॥
ହେସ୍ସତି ୱସଭୋ ନାମ, ରାଜା’ତି ସୁତିୟାସଦା ।
ଘାତେତି ରାଜାଦୀପମ୍ହି, ସବ୍ବେ ୱସଭନାମକେ ॥
‘‘ରଞ୍ଞୋ ଦସ୍ସାମ ୱସତଂ, ଇମ’’ନ୍ତି ଭରିୟାୟ ସୋ ।
ସେନାପତିମନ୍ତୟିତ୍ୱା, ପାତୋ ରାଜକୁଲଂ ଅଗା ॥
ଗଚ୍ଛତୋ ତେନ ସହସା, ତମ୍ବୁଲଂ ଚୁଣ୍ଣୱଜ୍ଜିତଂ ।
ହତ୍ଥମ୍ହି ୱସଭସ୍ସା’ଦା, ତଂ ସାଧୁ ପରିରକ୍ଖିତୁଂ ॥
ରାଜଗେହସ୍ସ ଦ୍ୱାରମ୍ହି, ତମ୍ବୁଲଂ ଚୁଣ୍ଣୱଜ୍ଜିତଂ ।
ସେନାପତି ଉଦିକ୍ଖିତ୍ୱା, ତଂ ଚୁଣ୍ଣତ୍ଥଂ ୱିସଜ୍ଜୟି ॥
ସେନାପତିସ୍ସ ଭରିୟା, ଚୁଣ୍ଣତ୍ଥଂ ୱସଭଂ ଗତଂ ।
ୱତ୍ୱା ରହସ୍ସଂ ଦତ୍ୱା ଚ, ସହସ୍ସଂ ତଂ ପଲାପୟି ॥
ମହାୱିହାରଠାନଂ ସୋ, ଗନ୍ତ୍ୱାନ ୱସଭୋ ପନ ।
ତତ୍ଥ ଥେରେହି ଖିରନ୍ନ-ୱତ୍ଥେହି କତସଙ୍ଗହୋ ॥
ତତୋ ପରଂ କୁଟ୍ଠିନୋ ଚ, ରାଜଭାୱାୟ ନିଚ୍ଛିତଂ ।
ସୁତ୍ୱାନ ୱଚନଂହଟ୍ଠୋ, ‘‘ଚୋରୋ ହେସ୍ସ’’ନ୍ତି ନିଚ୍ଛିତୋ ॥
ଲଦ୍ଧସମତ୍ଥପୁରିସେ, ଗାମଘାତଂ ତତୋ ପରଂ ।
କରୋନ୍ତୋ ରୋହଣଂ ଗନ୍ତ୍ୱା, କପଲ୍ଲପୁୱୋପଦେସତୋ ॥
କମେନ ରଟ୍ଠଂ କଣ୍ହନ୍ଥୋ, ସମ୍ପତ୍ତବଲୱାହନୋ ।
ସୋ ରାଜା ଦ୍ୱୀହି ୱସ୍ସେହି, ଆଗମ୍ମ ପୁରସନ୍ତିକଂ ॥
ସୁଭରାଜଂ ରଣେ ହନ୍ତ୍ୱା, ୱସଭୋ ସୋ ମହବ୍ବଲୋ ।
ଉସ୍ସାପୟି ପୁରେଭତ୍ତଂ, ମାତୁଲୋ’ପି ରଣେ ପତି ॥
ତଂ ମାତୁଲସ୍ସ ସରିରଂ, ପୁବ୍ବଭୂତୋପକାରିକଂ ।
ଅକାସି ୱସଭୋ ରାଜା, ମହେସିଂ ମେତ୍ତନାମିକଂ ॥
ସୋହୋରପାଠକଂ ପୁଚ୍ଛି, ଆୟୁପ୍ପମାଣମତ୍ତନୋ ।
‘‘ଆହ ଦ୍ୱାଦସୱସ୍ସାନି’’, ରହୋୟେୱସ୍ସ ସୋପି ଚ ॥
ରହସ୍ସଂ ରକ୍ଖଣତ୍ଥାୟ, ସହସ୍ସଂ ତସ୍ସା ଦାପିୟ ।
ସଙ୍ଘଂ ସୋ ସନ୍ନିପାତେତ୍ୱା, ୱନ୍ଦିତ୍ୱା ପୁଚ୍ଛି ଭୂପତି ॥
‘‘ସିୟାନୁ ଭନ୍ତେ ଆୟୁସ୍ସ, ୱଡ୍ଢନକାରଣଂ’’ଇତି ।
‘‘ଅତ୍ଥୀ’’ତି ସଙ୍ଘୋ ଆଚିକ୍ଖି, ଅନ୍ତରାୟୱିମୋଚନଂ ॥
ପରିସ୍ସାୱନଦାନଞ୍ଚ, ଆୱାସଦାନ ମେୱ ଚ ।
ଗିଲାନୱତ୍ତଦାନଞ୍ଚ, ଦାତବ୍ବଂ ମନୁଜାଧିପ ॥
‘‘କାତବ୍ବଂ ଜିଣ୍ଣକାୱାସ-ପଟିସଙ୍ଖରଣଂ ତଥା ।
ପଞ୍ଚସୀଲସମାଦାନଂ, କତ୍ୱା ତଂ ସାଧୁରକ୍ଖିୟଂ ॥
ଉପୋସଥୂପୱାସୋ ଚ, କତ୍ତବ୍ବୋ’ ପୋସଥେ’’ଇତି ।
ରାଜା ସାଧୂତି ଗନ୍ତ୍ୱାନ, ତଥା ସବ୍ବଂ ମକାସି ସୋ ॥
ତିଣ୍ଣଂ ତିଣ୍ଣଞ୍ଚ ୱସ୍ସାନଂ, ଅଚ୍ଚୟେନ ମହୀପତି ।
ଦୀପମ୍ହି ସବ୍ବସଙ୍ଘସ୍ସ, ତିଚୀୱରମଦାପୟି ॥
ଅନାଗତାନଂ ଥେରାନଂ, ପେସୟିତ୍ୱାନ ଦାପୟି ।
ଦ୍ୱତ୍ତିଂସାୟହି ଠାନେସୁ, ଦାପେସି ମଧୁପାୟସଂ ॥
ଚତୁସଟ୍ଠିୟା ଚ ଠାନେସୁ, ମହାଦାନଂତୁ ମିସ୍ସକଂ ।
ସହସ୍ସୱଟ୍ଟି ଚତୁସୁ, ଠାନେସୁ ଚ ଜଲାପୟି ॥
ଚେତିୟପବ୍ବତେ ଚେୱ, ଥୂପାରାମେ ଚ ଚେତିୟେ ।
ମହାଥୂପେ ମହାବୋଧି-ଘରେ ଇତି ଇମେସୁ ହି ॥
ଚିତ୍ତଲକୂଟେ କାରେସି, ଦସଥୂପେ ମନୋରମେ ।
ଦୀପେ’ଖିଲମ୍ହି ଆୱାସେ, ଜିଣ୍ଣେ ଚ ପଟିସଙ୍ଖରି ॥
ୱଲ୍ଲିୟେରୱିହାରେ ଚ, ଥେରସ୍ସ ସୋ ପସୀଦିୟ ।
ମହାୱଲ୍ଲିଗୋତ୍ତଂ ନାମ, ୱିହାରଞ୍ଚ ଅକାରୟି ॥
କାରେସି ଅନୁରାରାମଂ, ମହାଗାମସ୍ସ ସନ୍ତିକେ ।
ହେଳିଗାମଟ୍ଠକରିସ, ସହସ୍ସଂ ତସ୍ସ ଦାପୟି ॥
ମୁଚେଲୱିହାରଂ କାରେତ୍ୱା, ସୋ ତିସ୍ସୱଡ୍ଢମାନକେ ।
ଆଳିସାରୋଦକଭାଗଂ, ୱିହାରସ୍ସ ଅଦାପୟି ॥
କଲମ୍ବତିତ୍ଥେ ଥୂପମ୍ହି, କାରେସିଟ୍ଠିକକଞ୍ଚୁକଂ ।
କାରେସୁପୋସଥା ଗାରଂ, ୱଟ୍ଟିତେଲତ୍ଥ ମସ୍ସତୁ ॥
ସହସ୍ସକରୀସୱାପିଂସୋ, କାରାପେତ୍ୱା ଅଦାସି ଚ ।
କାରେସୁପୋସଥାଗାରଂ, ୱିହାରେ କୁମ୍ଭିଗଲ୍ଲକେ ॥
ସୋୟେ’ୱୁ ପୋସଥାଗାରଂ, ଇସ୍ସରସମଣକେ ଇଧ ।
ଥୂପାରାମେଥୂପଘରଂ, କାରାପେସି ମହୀପତି ॥
ମହାୱିହାରେ ପରିୱେଣ, ପନ୍ତିଂ ପଚ୍ଛିମପେକ୍ଖିନିଂ ।
କାରେସି ଚ ଚତୁସାଲଞ୍ଚ, ଜିଣ୍ଣକଂ ପଟିସଙ୍ଖରି ॥
ଚତୁବୁଦ୍ଧପଟିମାରମ୍ମଂ, ପଟିମାନଂଘରଂତଥା ।
ମହାବୋଧିଙ୍ଗଣେ ରମ୍ମେ, ରାଜା ସୋୟେୱ କାରୟି ॥
ତସ୍ସ ରଞ୍ଞୋ ମହେସୀ ସା, ୱୁତ୍ତନାମା ମନୋରମଂ ।
ଥୂପଂ ଥୂପଘରଞ୍ଚେୱ, ରମ୍ମଂ ତଥେୱ କାରୟି ॥
ଥୂପାରାମେ ଥୂପଘରଂ, ନିଟ୍ଠାପେତ୍ୱା ମହୀପତି ।
ତସ୍ସ ନିଟ୍ଠାପିତମହେ, ମହାଦାନମଦାସି ଚ ॥
ୟୁତ୍ତାନଂ ବୁଦ୍ଧୱଚନେ, ଭିକ୍ଖୂନଂ ପଚ୍ଚୟମ୍ପି ଚ ।
ଭିକ୍ଖୂନଂ ଧମ୍ମକଥିକାନଂ, ସପ୍ପିଫାଣିତମେୱ ଚ ॥
ନଗରସ୍ସ ଚତୁଦ୍ୱାରେ, କପଣୱଟ୍ଟଞ୍ଚ ଦାପୟି ।
ଗିଲାନାନଞ୍ଚ ଭିକ୍ଖୂନଂ, ଗିଲାନୱଟ୍ଟମେୱ ଚ ॥
ମୟେତ୍ତିଂ ରାଜୁପ୍ପଲୱାପିଂ, ୱହକୋଲମ୍ବଗାମକଂ ।
ମହାନିକ ୱିତ୍ତୱାପିଂ, ମହାରାମୋତ୍ତି ମେୱ ଚ ॥
କେହାଲଂ କାଳିୱାପିଞ୍ଚ, ଚମ୍ବୁଟ୍ଠିଂ ୱାତମଙ୍ଗନଂ ।
ଅଭିୱଡ୍ଢମାନକଞ୍ଚ, ଇଚ୍ଚେକାଦସ ୱାପିୟୋ ॥
ଦ୍ୱାଦସ ମାତିକା ଚେୱ, ସୁଭିକ୍ଖତ୍ଥମକାରୟି ।
ଗୁତ୍ତତ୍ଥ ପୁରପାକାରଂ, ଚେୱ ମୁଚ୍ଚମକାରୟି ॥
ଗୋପୁରଞ୍ଚ ଚତୁଦ୍ୱାରେ, ମହାୱତ୍ଥୁଞ୍ଚ କାରୟି ।
ସରଂ କାରେସି ଉୟ୍ୟାନେ, ହଂସେତତ୍ଥୱିସଜ୍ଜୟି ॥
ପୁରେ ବହୂ ପୋକ୍ଖରଣୀ, କାରାପେତ୍ୱା ତହିଂ ତହିଂ ।
ଉମ୍ମଗ୍ଗେନ ଜଲଂ ତତ୍ଥ, ପୱେସେସି ମହୀପତି ॥
ଏୱଂ ନାନାୱିଧଂ ପୁଞ୍ଞଂ, କତ୍ୱା ୱସଭଭୂପତି ।
ହତନ୍ତରାୟୋ ସୋ ହୁତ୍ୱା, ପୁଞ୍ଞକମ୍ମେ ସଦାଦରୋ ॥
ଚତୁତ୍ତାସୀସୱସ୍ସାନି, ପୁରେ ରଜ୍ଜମକାରୟି ।
ଚତୁତ୍ତାଲୀସୱେସାଖ, ପୂଜା ୟୋ ଚ ଅକାରୟି ॥
ସୁଭରାଜା ଧରନ୍ତୋ ସୋ, ଅତ୍ତନୋ ଏକଧୀତରଂ ।
ୱସଭେନ ଭୟାସଂକୀ, ଅପ୍ପେସି’ଠିକ ୱଡ୍ଢକିଂ ॥
ଅତ୍ତନୋ କମ୍ବଲଞ୍ଚେୱ, ରାଜା ଭଣ୍ଡାନି ଚ’ପ୍ପୟି ।
ୱସଭେନ ହତେ ତସ୍ମିଂ, ତମାଦାସିଟ୍ଠୱଡ୍ଢକୀ ॥
ଧୀତିଠାନେ ଠପେତ୍ୱାନ, ୱଡ୍ଢେତି ଅତ୍ତନୋ ଘରେ ।
ସକମ୍ମଂ କରତୋ ତସ୍ସ, ଭତ୍ତଂ ଆହରି ଦାରିକା ॥
ସା ନିରୋଧସମାପନ୍ନଂ, ତଦମ୍ବପୁପ୍ଫ ଗୁମ୍ବକେ ।
ସତ୍ତମେ ଦିୱସେ ଦିସ୍ୱା, ଭତ୍ତଂ ମେଧାୱୀନୀ ଅଦା ॥
ପୁନ ଭତ୍ତଂ ରନ୍ଧୟିତ୍ୱା, ପିତୁନୋ ଭତ୍ତମାହରି ।
ପପଞ୍ଚକାରଣଂ ପୁଟ୍ଠା, ତମତ୍ଥଂ ପିତୁନୋ ୱଦି ॥
ତୁଟ୍ଠୋ ପୁନପ୍ପୁନଞ୍ଚେ’ସୋ, ଭତ୍ତଂ ଥେରସ୍ସ ଦାପୟି ।
ୱିସ୍ସତ୍ଥୋ’ନାଗତଂ ଦିସ୍ୱା, ଥେରୋ ଆହ କୁମାରିକଂ ॥
‘‘ତୱଇସ୍ସରିୟେଜାତେ, ଇମଂ ଠାନଂ କୁମାରିକେ ।
ସରେୟ୍ୟାସୀ’ତି ଥେରୋ ତୁ, ତଦା ଚ ପରିନିବ୍ବୁତୋ ॥
ସକେ ସୋ ୱସଭୋ ରାଜା, ୱୟପ୍ପତ୍ତମ୍ହି ପୁତ୍ତକେ ।
ୱଙ୍କନାସିକତିସ୍ସମ୍ହି, କଞ୍ଞଂତସ୍ସାନୁରୂପିକଂ ॥
ଗୱେସାପେସି ପୁରିସା, ତଂ ଦିସ୍ୱାନ କୁମାରିକଂ ।
ଇଟ୍ଠକୱଡ୍ଢକୀଗାମେ, ଇତ୍ଥିଲକ୍ଖଣ କୋୱିଦା ॥
ରଞ୍ଞୋ ନିୱେଦୟୁଂ ରାଜା, ତମାଣାପେତୁମାରଭି ।
ତସ୍ସାହ ରାଜଧୀତତ୍ତଂ, ଇଟ୍ଠକୱଡ୍ଢକୀ ତଦା ॥
ସୁଭରଞ୍ଞୋ ତୁ ଧୀତତ୍ତଂ, କମ୍ବଲାଦୀହି ଞାପୟି ।
ରାଜା ତୁଟ୍ଠୋ ସୁତସ୍ସା’ଦା, ତଂ ସାଧୁ କତମଙ୍ଗଲଂ ॥
ୱସଭସ୍ସଚ୍ଚୟେ ପୁତ୍ତୋ, ୱଙ୍କନାସିକ ତିସ୍ସକୋ ।
ଅନୁରାଧପୁରେ ରଜ୍ଜଂ, ତୀଣି ୱସ୍ସାନି କାରୟି ॥
ସୋ ଗୋଣନଦିୟା ତୀରେ, ମହାମଙ୍ଗଲନାମକଂ ।
ୱିହାରଂ କାରୟି ରାଜା, ୱଙ୍କନାସିକତିସ୍ସକୋ ॥
ମହାମତ୍ତା ତୁ ଦେୱୀ ସା, ସରନ୍ତୀ ଥେରଭାସିତଂ ।
ୱିହାରକାରଣତ୍ଥାୟ, ଅକାସି ଧନସଞ୍ଚୟଂ ॥
ୱଙ୍କନାସିକତିସ୍ସସ୍ସ, ଅଚ୍ଚୟେ କାରୟୀ ସୁତୋ ।
ରଜ୍ଜଂ ବାୱୀସୱସ୍ସାନି, ଗଜ୍ଜବାହୁକଗାମଣି ॥
ସୁତ୍ୱା ସୋ ମାତୁୱଚନଂ, ମାତୁଦତ୍ଥାୟ କାରୟି ।
କଦମ୍ବପୁପ୍ଫଠାନମ୍ହି, ରାଜମାତୁୱିହାରକଂ ॥
ମାତା ସତସହସ୍ସଂ ସା, ଭୂମିଅତ୍ଥୋୟ ପଣ୍ଡିତା ।
ଅଦା ମହାୱିହାରସ୍ସ, ୱିହାରଞ୍ଚ ଅକାର ୟି ॥
ସୟମେୱ ଅକାରେସି, ତତ୍ଥ ଥୂପଂ ସିଲାମୟଂ ।
ସଙ୍ଘଭୋଗଞ୍ଚ ପାଦାସି, କିଣିତ୍ୱାନ ତତୋ ତତୋ ॥
ଅଭୟୁତ୍ତର ମହାଥୂପଂ, ୱଡ୍ଢାପେତ୍ୱା ଚିତାପୟି ।
ଚତୁଦ୍ୱାରେ ଚ ତତ୍ଥେୱ, ଆଦିମୁଖମକାରୟି ॥
ଗାମଣିତିସ୍ସୱାପିଂ ସୋ, କାରାପେତ୍ୱା ମହୀପତି ।
ଅଭୟଗିରି ୱିହାରସ୍ସ, ପାକୱଟ୍ଟାୟ’ଦାସି ଚ ॥
ମରିଚୱଟ୍ଟିକଥୂପମ୍ହି, କଞ୍ଚୁକଞ୍ଚ ଅକାରୟି ।
କିଣିତ୍ୱା ସତସହସ୍ସେନ, ସଙ୍ଘଭୋଗମଦାସି ଚ ॥
କାରେସି ପଚ୍ଛିମେ ୱସ୍ସେ, ୱିହାରଂ ରାମକୱ୍ହୟଂ ।
ମହେଜସନସାଲଞ୍ଚ, ନଗରମ୍ହି ଅକାରୟି ॥
ଗଜବାହୁସ୍ସଚ୍ଚୟେନ, ସସୁରୋ ତସ୍ସ ରାଜିନୋ ।
ରଜ୍ଜଂ ମହଲ୍ଲକୋ ନାଗୋ, ଛବ୍ବସ୍ସାନି ଅକାରୟି ॥
ପୁରତ୍ଥିମେ ପେଜଲକଂ, ଦକ୍ଖିଣେ କୋଟି ପବ୍ବତଂ ।
ପଚ୍ଛିମେ ଦକପାସାଣେ, ନାଗଦୀପେ ସାଲିପବ୍ବତଂ ॥
ବୀଜଗାମେ ତନୱେଳିଂ, ରୋହଣେ ଜନପଦେ ପନ ।
ତୋବ୍ବଲନାଗପବ୍ବତଞ୍ଚ, ଅନ୍ତୋଟ୍ଠେ ଗିରିହାଲିକଂ ॥
ଏତେ ସତ୍ତ ୱିହାରେ ସୋ, ମହଲ୍ଲନାଗଭୂପତି ।
ପରିତ୍ତେନପି କାଲେନ, କାରାପେସି ମହାମତୀ ॥
ଏୱଂ ଅସାରେହି ଧନେହି ସାରଂ,
ପୁଞ୍ଞାନି କତ୍ୱାନ ବହୂନି ପଞ୍ଞା ।
ଆଦେନ୍ତି ବାଲା ପନ କାମ ହେତୁ,
ବହୂନି ପାପାନି କରୋନ୍ତା ମୋହା’ତି ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦ୍ୱାଦସ ରାଜକୋ ନାମ
ପଞ୍ଚତିଂସତିମୋ ପରିଚ୍ଛେଦୋ ।
ଛତ୍ତିଂସତିମ ପରିଚ୍ଛେଦ
ତୟୋଦସ ରାଜକୋ
ମହଲ୍ଲନାଗଚ୍ଚୟେନ, ପୁତ୍ତୋ ଭାତିକତିସ୍ସକୋ ।
ଚତୁୱୀସତିୱସ୍ସାନି, ଲଂକାରଜ୍ଜମକାରୟି ॥
ମହାୱିହାରେ ପାକାରଂ, କାରାପେସି ସମନ୍ତତୋ ।
ଗୱରତିସ୍ସୱିହାରଂ, ସୋ କାରୟିତ୍ୱା ମହୀପତି ॥
ମହାଗାମଣିକଂ ୱାପିଂ, ୱିହାରସ୍ସ’ସ୍ସ’ଦାସି ଚ ।
ୱିହାରଞ୍ଚ ଅକାରେସି, ଭାତିୟତିସ୍ସ ନାମକଂ ॥
କାରେସୁପୋସଥାଗାରଂ, ଥୂପାରାମେ ମନୋରମେ ।
ରନ୍ଧକଣ୍ଡକୱାପିଞ୍ଚ, କାରାପେସି ମହୀପତି ॥
ସତ୍ତେସୁ ମୁଦୁଚିତ୍ତୋସୋ, ସଙ୍ଘମ୍ହି ତିବ୍ବଗାରୱୋ ।
ଉଭତୋସଙ୍ଘେ ମହୀପାଲୋ, ମହାଦାନଂ ପୱତ୍ତୟି ॥
ଭାତିକତିସ୍ସଚ୍ଚୟେନ, ତସ୍ସ କନିଟ୍ଠତିସ୍ସକୋ ।
ଅଟ୍ଠୱୀସସମାରଜ୍ଜଂ, ଲଂକାଦୀପେ ଅକାରୟି ॥
ଭୂତାରାମ ମହାନାଗ, ଥେରସ୍ମିଂ ସୋ ପସୀଦିୟ ।
କାରେସି ରତନପାସାଦଂ, ଅଭୟଗିରିମ୍ହି ସାଧୁକଂ ॥
ଅଭୟଗିରିମ୍ହି ପାକାରଂ, ମହାପରିୱେଣମେୱ ଚ ।
କାରେସି ମଣିସୋମୱ୍ହେ, ମହାପରିୱେଣମେୱ ଚ ॥
ତତ୍ଥେୱ ଚେତିୟଘରଂ, ଅମ୍ବତ୍ଥଲେ ତଥେୱ ଚ ।
କାରେସି ପଟିସଙ୍ଖାରଂ, ନାଗଦୀପେ ଘରେ ପନ ॥
ମହାୱିହାରସୀମଂସୋ, ମଦ୍ଦିତ୍ୱା ତତ୍ଥ କାରୟି ।
କୁକ୍କୁଟଗିରି ପରିୱେଣ, ପନ୍ତିଂ ସକ୍କଚ୍ଚ ଭୂପତି ॥
ମହାୱିହାରେ କାରେସି, ଦ୍ୱାଦସ ମନୁଜାଧିପୋ ।
ମହାଚତୁରସ୍ସପାସାଦେ, ଦସ୍ସନେୟ୍ୟେମନୋରମେ ॥
ଦକ୍ଖିଣୱିହାର ଥୂପମ୍ହି, କଞ୍ଚୁକଞ୍ଚ ଅକାରୟି ।
ଭତ୍ତସାଲଂ ମହାମେଘ, ୱନାସିମଞ୍ଚ ମଦ୍ଦିୟ ॥
ମହାୱିହାରପାକାରଂ, ପସ୍ସତୋ ଅପନୀୟସୋ ।
ମଗ୍ଗଂ ଦକ୍ଖିଣୱିହାର, ଗାମିଞ୍ଚାପି ଅକାରୟି ॥
ଭୂତାରାମ ୱିହାରଞ୍ଚ, ରାମଗୋଣକମେୱ ଚ ।
ତଥେୱ ନନ୍ଦତିସ୍ସସ୍ସ, ଆରାମଞ୍ଚ ଅକାରୟି ॥
ପାଚିନତୋ ଅନୁଳାତିସ୍ସ, ପବ୍ବତଂ ଗଙ୍ଗରାଜିୟଂ ।
ନିୟେଲତିସ୍ସାରାମଞ୍ଚ, ପିଳ ପିଟ୍ଠି ୱିହାରକଂ ॥
ରାଜମହାୱିହାରଞ୍ଚ, କାରେସି ମନୁଜାଧିପୋ ।
ସୋୟେୱ ତୀସୁ ଠାନେସୁ, କାରେସୁ’ପୋସଥାଲୟଂ ॥
କଲ୍ୟାଣୀକ ୱିହାରେ ଚ, ମଣ୍ଡଲଗିରିକେ ତଥା ।
ଦୁବ୍ବଲୱାପିତିସ୍ସୱ୍ହେ, ୱିହାରେସୁ ଇମେସୁ ହି ॥
କନିଟ୍ଠତିସ୍ସଚ୍ଚୟେନ, ତସ୍ସ ପୁତ୍ତୋ ଅକାରୟି ।
ରଜ୍ଜଂ ଦ୍ୱେୟେୱ ୱସ୍ସାନି, ଚୂଳନାଗୋତି ୱିସ୍ସୁତୋ ॥
ଚୂଳନାଗକନିଟ୍ଠୋତୁ, ରାଜାଘାତିୟ ଭାତିକଂ ।
ଏକୱସ୍ସଂ କୁଡ୍ଡନାଗୋ, ରଜ୍ଜଂ ଲଂକାୟ କାରୟି ॥
ମହାପେଳଞ୍ଚ ୱଡ୍ଢେସି, ଏକନାଳିକଛାତକେ ।
ଭିକ୍ଖୁସତାନଂ ପଞ୍ଚନ୍ନଂ, ଅବ୍ଭୋଚ୍ଛିନ୍ନଂ ମହୀପତି ॥
କୁଡ୍ଡନାଗସ୍ସ ରଞ୍ଞୋ ତୁ, ଦେୱୀୟା ଭାତୁକୋ ତଦା ।
ସେନାପତି ସିରିନାଗୋ, ଚୋରୋ ହୁତ୍ୱାନ ରାଜିନୋ ॥
ବଲୱାହନ ସମ୍ପନ୍ନୋ, ଆଗମ୍ମ ନଗରନ୍ତିକଂ ।
ରାଜବଲେନ ୟୁଜ୍ଝନ୍ତୋ, କୁଡ୍ଡନାଗଂ ମହୀପତିଂ ॥
ପଲାପେତ୍ୱା ଲଦ୍ଧଜୟୋ, ଅନୁରାଧ ପୁରେ ୱରେ ।
ଲଂକାରଜ୍ଜମକାରେସି, ୱସ୍ସାନେକୂନୱୀସତି ॥
ମହାଥୂପୱରେ ଛତ୍ତଂ, କାରାପେତ୍ୱାନ ଭୂପତି ।
ସୁୱଣ୍ଣକମ୍ମଂ କାରେସି, ଦସ୍ସନେୟ୍ୟଂ ମନୋରମଂ ॥
କାରେସି ଲୋହପାସାଦଂ, ସଂଖିତ୍ତଂ ପଞ୍ଚଭୂମକଂ ।
ମହାବୋଧି ଚତୁଦ୍ୱାରେ, ସୋପାନଂ ପୁନକାରୟି ॥
କାରେତ୍ୱା ଛତ୍ତପାସାଦଂ, ମହେ ପୂଜମକାରୟି ।
କୁଲମ୍ବଣଞ୍ଚ ଦୀପସ୍ମିଂ, ୱିସ୍ସଜ୍ଜେସି ଦୟାପରୋ ॥
ସିରିନାଗଚ୍ଚୟେ ତସ୍ସ, ପୁତ୍ତୋ ତିସ୍ସୋ ଅକାରୟି ।
ରଜ୍ଜଂ ଦ୍ୱାୱୀସୱସ୍ସାନି, ଧମ୍ମୱୋହାର କୋୱିଦୋ ॥
ଠପେସି ସୋ ହି ୱୋହାରଂ, ହିଂସା ମୁତ୍ତଂ ୟତୋଇଧ ।
ୱୋହାରକ ତିସ୍ସରାଜା, ଇତି ନାମଂ ତତୋ ଅହୁ ॥
କମ୍ବୁଗାମକୱାସିସ୍ସ, ଦେୱତ୍ଥେରସ୍ସ ସନ୍ତିକେ ।
ଧମ୍ମଂ ସୁତ୍ୱା ପଟିକମ୍ମଂ, ପଞ୍ଚାୱାସେ ଅକାରୟି ॥
ମହାତିସ୍ସସ୍ସ ଥେରସ୍ସ, ଅନୁରା ରାମୱାସିନୋ ।
ପସନ୍ନୋ ମୁଚେଲପଟ୍ଟନେ, ଦାନ ୱଟ୍ଟମକାରୟି ॥
ତିସ୍ସରାଜ ମଣ୍ଡପଞ୍ଚ, ମହାୱିହାରଦ୍ୱୟେପି ସୋ ।
ମହାବୋଧିଘରେ ପାଚି, ଲୋହରୂପଦ୍ଧୟମ୍ପି ଚ ॥
ସତ୍ତପଣ୍ଣିକପାସାଦଂ, କାରେତ୍ୱା ସୁଖୱାସକଂ ।
ମାସେ ମାସେ ସହସ୍ସଂ ସୋ, ମହାୱିହାରସ୍ସ ଦାପୟି ॥
ଅଭୟଗିରିୱିହାରେ, ଦକ୍ଖିଣମୂଲସୱ୍ହୟେ ।
ମରିଚୱଟ୍ଟି ୱିହାରମ୍ହି, କୁଲାଲିତିସ୍ସସୱ୍ହୟେ ॥
ମହିୟଙ୍ଗଣ ୱିହାରମ୍ହି, ମହାଗାମକସୱ୍ହୟେ ।
ମହାନାଗତିସ୍ସୱ୍ହମ୍ହି, ତଥା କଲ୍ୟାଣୀକୱ୍ହୟେ ॥
ଇତି ଅଟ୍ଠସୁ ଥୂପେସୁ, ଛତ୍ତକମ୍ମମକାରୟି ।
ମୂକନାଗସେନାପତି, ୱିହାରେ ଦକ୍ଖିଣେ ତଥା ॥
ମରିଚ ୱଟ୍ଟି ୱିହାରମ୍ହି, ପୁତ୍ତଭାଗୱ୍ହୟେ ତଥା ।
ଇସ୍ସରସମଣୱ୍ହମ୍ହି, ତିସ୍ସୱ୍ହେ ନାଗଦୀପକେ ॥
ଇତି ଛସୁ ୱିହାରେସୁ, ପାକାରଞ୍ଚ ଅକାରୟି ।
କାରେସୁ’ ପୋସଥାଗାରଂ, ଅନୁରାରାମସୱ୍ହୟେ ॥
ଅରିୟୱଂସକଥାଠାନେ, ଲଂକାଦୀପେଖିଲେପି ଚ ।
ଦାନ ୱଟ୍ଟଂ ଠପାପେସି, ସଦ୍ଧମ୍ମେ ଗାରୱେନ ସୋ ॥
ତିଣୀ ସତସହସ୍ସାନି, ଦତ୍ୱାନ ମନୁଜାଧିପୋ ।
ଇଣତୋ ସୟିକେ ଭିକ୍ଖୂ, ମୋଚେସି ସାସନପ୍ପିୟୋ ॥
ମହା ୱେସାଖ ପୂଜଂ ସୋ, କାରେତ୍ୱା ଦୀପୱାସିନଂ ।
ସବ୍ବେ ସଂୟେୱ ଭିକ୍ଖୂନଂ, ତିଚୀୱରମଦାପୟି ॥
ୱେତୁଲ୍ଲୱାଦଂ ମଦ୍ଦିତ୍ୱା, କାରେତ୍ୱା ପାପନିଗ୍ଗହଂ ।
କପିଲେନ ଅମଚ୍ଚେନ, ସାସନଂ ଜୋତୟୀଚ ସୋ ॥
ୱିସ୍ସୁତୋ’ଭୟନାଗୋ’ତି, କନିଟ୍ଠୋ ତସ୍ସରାଜିନୋ ।
ଦେୱିୟା ତସ୍ସ ସଂସଟ୍ଠୋ, ଞାତୋ ଭୀତୋ ସଭାତରା ॥
ପଲାୟିତ୍ୱା ହଲ୍ଲତିତ୍ଥଂ, ଗନ୍ତ୍ୱାନ ସହସେୱକୋ ।
କୁଦ୍ଧୋ ୱିୟ ମାତୁଲସ୍ସ, ହତ୍ଥପାଦଞ୍ଚ ଛେଦୟି ॥
ରାଜିନୋ ରଟ୍ଠତେଦତ୍ଥଂ, ଠପେତ୍ୱାନ ଇଧେୱ ତଂ ।
ସୁନଖୋପମଂ ଦସ୍ସୟିତ୍ୱା, ଗହେତ୍ୱା’ତି ସିନିଦ୍ଧକେ ॥
ତତ୍ଥେୱ ନାୱଂ ଆରୁୟ୍ହ, ପରତୀରମଗାସୟଂ ।
ସୁଭୱୋ ମାତୁଲୋ ତୁ, ଉପଗମ୍ମ ମହୀପତି ॥
ସୁହଦୋ ୱିୟ ହୁତ୍ୱାନ, ତସ୍ମିଂ ରଟ୍ଠମଭିନ୍ଦିସୋ ।
ଅଭୟୋ ତଂ ଜାନନତ୍ଥଂ, ଦୂତଂ ଇଧ ୱିସଜ୍ଜୟି ॥
ତଂ ଦିସ୍ୱା ପୂଗରୁକ୍ଖଂ ସୋ, ସମନ୍ତା କୁନ୍ତନାଳିୟା ।
ପରିବ୍ଭମନ୍ତୋ ମଦ୍ଦିତ୍ୱା, କତ୍ୱା ଦୁବ୍ବଲମୂଲକଂ ॥
ବାହୁନାୟେୱ ପାତେତ୍ୱା, ତଜ୍ଜେତ୍ୱା ତଂ ପଲାପୟି ।
ଦୂତୋ ଗନ୍ତ୍ୱା ଅଭୟସ୍ସ, ତଂ ପୱତ୍ତିଂ ପୱେଦୟି ॥
ଞତ୍ୱା’ଭୟୋ ତଂ ଦମିଳେ, ଆଦାୟ ବସୁକେ ତତୋ ।
ନଗରନ୍ତିକମାଗଞ୍ଛି, ଭାତରା ସହ ୟୁଜ୍ଝିତୁଂ ॥
ତଂ ଞତ୍ୱାନ ପଲାୟିତ୍ୱା, ଅସ୍ସମାରୁୟ୍ହଦେୱିୟା ।
ମଲୟଂ ଆଗମା ରାଜା, ତଂକନିଟ୍ଠୋ’ନୁ ବନ୍ଧିୟ ॥
ରାଜାନଂ ମଲୟେ ହନ୍ତ୍ୱା, ଦେୱୀମାଦାୟ ଆଗତୋ ।
କାରେସି ନଗରେ ରଜ୍ଜଂ, ଅଟ୍ଠୱସ୍ସାନି ଭୂପତି ॥
ପାସାଣୱେଦିଂ କାରେସି, ମହାବୋଧିସମନ୍ତତୋ ।
ଲୋହପାସାଦଙ୍ଗଣମ୍ହି, ରାଜା ମଣ୍ଡପମେୱ ଚ ॥
ଦ୍ୱିହି ସତସହସ୍ସେହି, ନେକୱତ୍ଥାନି ଭାଗିୟ ।
ଦୀପମ୍ହି ଭିକ୍ଖୁସଙ୍ଘସ୍ସ, ୱତ୍ଥଦାନମଦାସି ସୋ ॥
ଅଭୟସ୍ସ’ଚ୍ଚୟେ ଭାତୁ, ତସ୍ସସ୍ସ ତସ୍ସ ଅତ୍ରଜୋ ।
ଦ୍ୱେୱସ୍ସାନି ସିରିନାଗୋ, ଲଂକାରଜ୍ଜ ମକାରୟି ॥
ପଟିସଙ୍ଖରିୟ ପାକାରଂ, ମହାବୋଧିସମନ୍ତତୋ ।
ମହାବୋଧିଘରସ୍ସେୱ, ସୋୟେୱ ୱାଲିକାତଲେ ॥
ମୂଚେଲରୁକ୍ଖପରତୋ, ହଂସୱଟ୍ଟଂ ମନୋରମଂ ।
ମହନ୍ତଂ ମଣ୍ଡପଞ୍ଚେୱ, କାରାପେସି ମହୀପତି ॥
ୱିଜୟକୁମାରକୋ ନାମ, ସିରିନାଗସ୍ସ ଅତ୍ରଜୋ ।
ପିତୁନୋ ଅଚ୍ଚୟେ ରଜ୍ଜଂ, ଏକୱସ୍ସମକାରୟି ॥
ଲମ୍ବକଣ୍ଣା ତୟୋ ଆସୁଂ, ସହାତା ମହିୟଙ୍ଗଣେ ।
ସଙ୍ଘତିସ୍ସୋ ସଙ୍ଘବୋଧି, ତତିୟୋ ଗୋଟ୍ଠକାଭୟୋ ॥
ତେ ତିସ୍ସୱାପିମରିୟାଦ-ଗତୋ ଅନ୍ଧୋ ୱିଚକ୍ଖଣୋ ।
ରାଜୁପଟ୍ଠାନମାୟନ୍ତେ, ପଦସଦ୍ଦେନ ଅବ୍ରୱି ॥
‘‘ପଥୱୀସାମିନୋ ଏତେ, ତୟୋ ୱହତିଭୂ’ଇତି ।
ତଂ ସୁତ୍ୱା ଅଭୟୋ ପଚ୍ଛା, ୟନ୍ତୋ ପୁଚ୍ଛି ପୁନାହସୋ ॥
ତସ୍ସ ୱଂସୋ ଠସ୍ସତୀତି,
ପୁନ ପୁଚ୍ଛିତମେୱ ସୋ ।
‘‘ପଚ୍ଛିମସ୍ସା’’ତି ସୋ ଆହ,
ତଂ ସୁତ୍ୱା ଦ୍ୱୀହିସୋଅଗା ॥
ତେ ପୁରଂ ପୱିସିତ୍ୱାନ, ତୟୋ ରଞ୍ଞୋ’ତି ୱଲ୍ଲଭୋ ।
ରାଜକିଚ୍ଚାନି ସାଧେନ୍ତା, ୱସନ୍ତା ରାଜସନ୍ତିକେ ॥
ହନ୍ତ୍ୱା ୱିଜୟରାଜାନଂ, ରାଜଗେହମ୍ହି ଏକତୋ ।
ସେନାପତିଂସଙ୍ଘତିସ୍ସଂ, ଦୁୱେରଜ୍ଜେ’ଭିସେଚୟୁଂ ॥
ଏୱଂ ସୋ ଅଭିସିତ୍ତୋୱ, ଅନୁରାଧପୁରୁତ୍ତମେ ।
ରଜ୍ଜଂ ଚତ୍ତାରି ୱସ୍ସାନି, ସଙ୍ଘତିସ୍ସୋ ଅକାରୟି ॥
ମହାଥୂପମ୍ହି ଛତ୍ତଞ୍ଚ, ହେମକମ୍ମଞ୍ଚ କାରୟି ।
ୱିସୁଂ ସତସହସ୍ସଗ୍ଘେ, ଚତୁରୋ ଚ ମହାମଣି ॥
ମଜ୍ଝେ ଚତୁନ୍ନଂ ସୂରିୟାନଂ, ଠପାପେସି ମହୀପତି ।
ଥୂପସ୍ସ ମୁଦ୍ଧନି ତଥା-ନଗ୍ଘୱଜିରଚୁମ୍ବଟଂ ॥
ସୋ ଛତ୍ତମହପୂଜାୟ, ସଙ୍ଘସ୍ସ ମନୁଜାଧିପୋ ।
ଚତ୍ତାଲୀସସହସ୍ସସ୍ସ, ଛ ଚୀୱରମଦାପୟି ॥
ତଂ ମହାଦେୱଥେରେନ, ଦାମଗଲ୍ଲକ ୱାସିନୋ ।
ଦେସିତଂ ଖନ୍ଧକେ ସୁତ୍ତଂ, ୟାଗାନିସଂସ ଦୀପନଂ ॥
ସୁତ୍ୱା ପସନ୍ନୋ ସଙ୍ଘସ୍ସ, ୟାଗୁଦାନମଦାପୟି ।
ନଗରସ୍ସ ଚତୁଦ୍ୱାରେ, ସକ୍କଚ୍ଚଞ୍ଚେୱ ସାଧୁ ଚ ॥
ସୋ ଅନ୍ତରନ୍ତରେ ରାଜା, ଜମ୍ବୁପକ୍କାନି ଖାଦିତୁଂ ।
ସହୋରୋଧୋ ସହାମଚ୍ଚୋ, ଅଗାପାଚିନ ଦୀପକଂ ॥
ଉପଦ୍ଦୁତଂ’ସ୍ସ ଗମନେ, ମନୁସ୍ସା ପାଚି ୱାସିନୋ ।
ୱିସଂ ଫଲେସୁ ୟୋ ଜେସୁଂ, ରାଜଭୋଜ୍ଜାୟ ଜମ୍ବୁୟା ॥
ଖାଦିତ୍ୱା ଜମ୍ବୁପକ୍କାନି, ତାନି ତତ୍ଥେୱ ସୋ ମତୋ ।
ସେନାପତି ସଙ୍ଘଧବାଧୀଂ-ଭୟୋ ରଜ୍ଜେ’ଭିସେଚୟି ॥
ରାଜାସିରି ସଙ୍ଘ ବୋଧି, ୱିସ୍ସୁତୋ ପଞ୍ଚସୀଲୱା ।
ଅନୁରାଧପୁରେ ରଜ୍ଜଂ, ଦୁୱେ ୱସ୍ସାନି କାରୟି ॥
ମହାୱିହାରେ କାରେସି, ସଲାକଗ୍ଗଂ ମନୋରମଂ ।
ତଦାଦୀପେ ମନୁସ୍ସେସୋ, ଞତ୍ୱା ଦୁବ୍ବୁଟ୍ଠୁପଦ୍ଦୁତେ ॥
କରୁଣାୟ କମ୍ପିତମନୋ, ମହାଥୂପଙ୍ଗଣେ ସୟଂ ।
ନିପଜ୍ଜି ଭୂମିୟଂ ରାଜା, କତ୍ୱାନ ଇତି ନିଚ୍ଛୟଂ ॥
‘‘ପୱସ୍ସିତ୍ୱାନ ଦେୱେନ, ଜଲେନୁପଲାୱିତେ ମୟି ।
ନହେୱ ୱୁଟ୍ଠହିସ୍ସାମି, ମରମାନୋପହଂ ଇଧ’’ ॥
ଏୱଂ ନିପନ୍ନେ ଭୂମିନ୍ଦେ, ଦେୱୋ ପାୱସ୍ସି ତାୱଦେ ।
ଲଂକାଦୀପମ୍ହି ସକଲେ, ପିଣୟନ୍ତୋ ମହାମହିଂ ॥
ତଥାପି ନୁଟ୍ଠହତିସୋ, ଅପିଲାପନତୋ ଜଲେ ।
ଆୱରିଂସୁ ତତୋ’ମଚ୍ଚା, ଜଲନିଗ୍ଗମନାଳିୟୋ ॥
ତତୋ ଜଲମ୍ହି ପିଲୱଂ, ରାଜା ୱୁଟ୍ଠାସି ଧମ୍ମିକୋ ।
କରୁଣାୟନୁଦି ଏୱଂ, ଦୀପେ ଦୁବ୍ବୁଟ୍ଠିକାଭୟଂ ॥
ଚୋରାତହିଂ ତହିଂ ଜାତା, ଇତି ସୁତ୍ୱାନ ଭୂପତି ।
ଚୋରେ ଆଣାପୟିତ୍ୱାନ, ରହସ୍ସେନ ପଲାପୀୟ ॥
ଆଣାପେତ୍ୱା ରହସ୍ସେନ, ମତାନଂ ସୋ କଲେୱରଂ ।
ଅଗ୍ଗୀହି ଉତ୍ତାସେତ୍ୱାନ, ହନିତଂ ଚୋରୁପଦ୍ଦୱଂ ॥
ଏକୋ ୟକ୍ଖୋ ଇଧାଗମ୍ମ, ରତ୍ତକ୍ଖୋ ଇତି ୱିସ୍ସୁତୋ ।
କରୋତି ରତ୍ତାନ’କ୍ଖୀତି, ମନୁସ୍ସାନଂ ତହିଂ ତହିଂ ॥
ଅଞ୍ଞମଞ୍ଞମପେକ୍ଖିତ୍ୱା, ଭାୟିତ୍ୱା ରତ୍ତନେତ୍ତତଂ ।
ନରାମରନ୍ତି ତେ ୟକ୍ଖୋ, ସୋଭକ୍ଖେସି ଅସଙ୍କିତୋ ॥
ରାଜା ଉପଦ୍ଦୱଂ ତେସଂ, ସୁତ୍ୱା ସନ୍ତତ୍ତମାନସୋ ।
ଏକୋ’ପୱାସ ଗବ୍ଭମ୍ହି, ହୁତ୍ୱା ଅଟ୍ଠଙ୍ଗୁପୋସଥି ॥
‘‘ଅପସ୍ସିତ୍ୱାନ ତଂ ୟକ୍ଖଂ, ନ ଚୁଟ୍ଠାମୀ’’ତି ସୋ ସୟି ।
ତସ୍ସ ସୋ ଧମ୍ମତେଜେନ, ଅଗା ୟକ୍ଖୋ ତଦନ୍ତିକଂ ॥
ତେନ ‘‘କୋସୀ’’ତି ପୁଟ୍ଠୋ ଚ, ସୋ ‘‘ଅହ’’ନ୍ତି ପୱେଦୟି ।
‘‘କସ୍ମା ପଜଂ ମେ ଭକ୍ଖେସି, ମା ଖାଦ’’ଇତି ସୋବ୍ରୱି ॥
‘‘ଏକସ୍ମିଂ ମେ ଜନପଦେ, ନରେ ଦେହୀ’’ତି ସୋବ୍ରୱି ।
‘‘ନ ସକ୍କା ଇତି ୱୁତ୍ତେ ସୋ, କମେନେକଂତି ଅବ୍ରୱି ॥
‘‘ଅଞ୍ଞଂ ନ ସକ୍କା ଦାତୁଂ ମେ, ମଂ ଖାଦ’’ ଇତି ସୋବ୍ରୱି ।
‘‘ନ ସକ୍କା’’ଇତି ତଂ ୟାଚି, ଗାମେ ଗାମେ ବଲିଞ୍ଚ ସୋ ॥
ସାଧୂତି ୱତ୍ୱା ଭୂମିନ୍ଦୋ, ଦିପମ୍ପି ସକଲେପି ଚ ।
ଗାମୱରେ ନିୱେସେତ୍ୱା, ବଲିଂତସ୍ସ ଅଦାପୟି ॥
ମହାସତ୍ତେନ ତେନେୱ, ସବ୍ବଭୂତାନୁକମ୍ପିନା ।
ମହାରୋଗଭୟଂ ଜାତଂ, ଦୀପଦୀପେନ ନାସିତଂ ॥
ସୋ ଭଣ୍ଡାଗାରିକୋ ରଞ୍ଞୋ,
ଅମଚ୍ଚୋ ଗୋଟ୍ଠତାଭୟୋ ।
ଚେରୋ ହୁତ୍ୱା ଉତ୍ତରତୋ,
ନଗରଂ ସମୁପାଗମି ॥
ପରିସ୍ସାୱନମାଦାୟ, ରାଜା ଦକ୍ଖିଣଦ୍ୱାରତୋ ।
ପରହିଂସମରୋଚେନ୍ତୋ, ଏକକୋୱ ପଲାୟି ସୋ ॥
ପୁଟଭତ୍ତଂ ଗହେତ୍ୱାନ, ଗଚ୍ଛନ୍ତୋ ପୁରିତୋ ପଥି ।
ଭତ୍ତଭୋଗାୟରାଜାନଂ, ନିବନ୍ଧିତ୍ଥ ପୁନପ୍ପୁନଂ ॥
ଜଲଂ ପରିସ୍ସାୱୟିତ୍ୱା, ଭୁଞ୍ଜିତ୍ୱାନ ଦୟାଲୁକୋ ।
ତସ୍ସେୱଂ’ନୁଗ୍ଗହଂ କାତୁଂ, ଇଦଂ ୱଚନମବ୍ରୁୱି ॥
‘‘ସଙ୍ଘବୋଧି ଅହଂ ରାଜା, ଗହେତ୍ୱା ମମଭୋ ସୀରଂ ।
ଗୋଟ୍ଠାଭୟସ୍ସ ଦସ୍ସେହି, ବହୁଂ ଦସ୍ସତି ତେ ଧନଂ ॥
ନ ଇଚ୍ଛିତୋ ତଥାକାତୁଂ, ତସ୍ସତ୍ଥାୟ ମହୀପତି ।
ନିସିନ୍ନୋୟେୱ ଅମରି, ସୋ ସୀସଂ ତସ୍ସ ଆଦିୟ ॥
ଗୋଟ୍ଠାଭୟସ୍ସ ଦସ୍ସେସି, ସୋତୁ ୱିମ୍ହିତମାନସୋ ।
ଦତ୍ୱା ତସ୍ସ ଧନଂ ରଞ୍ଞୋ, ସକ୍କାରଂ ସାଧୁକାରୟି ॥
ଏୱଂ ଗୋଟ୍ଠାଭୟୋ ଏସୋ, ମେଘୱଣ୍ଣାଭୟୋ’ତି ଚ ।
ୱିସ୍ସୁତୋ ତେରସ ସମା, ଲଂକାରଜ୍ଜମକାରୟି ॥
ମହାୱତ୍ଥୁଂ କାରୟିତ୍ୱା, ୱତ୍ଥୁଦ୍ୱାରମ୍ହି ମଣ୍ଡପଂ ।
କାରୟିତ୍ୱା ମଣ୍ଡୟିତ୍ୱା, ସୋ ଭିକ୍ଖୁ ତତ୍ଥ ସଙ୍ଘତୋ ॥
ଅଟ୍ଠୁତ୍ତରସହସ୍ସାନି, ନିସୀଦେତ୍ୱା ଦିନେ ଦିନେ ।
ୟାଗୁଖଜ୍ଜକ ଭୋଜ୍ଜେହି, ସାଦୂହି ୱିୱିଧେହି ଚ ॥
ସଚୀୱରେହି କପ୍ପେତ୍ୱା, ମହାଦାନଂ ପୱତ୍ତୟି ।
ଏକୱୀସଦିନା ନେୱଂ, ନିବଦ୍ଧଞ୍ଚସ୍ସ କାରୟି ॥
ମହାୱିହାରେ କାରେସି, ସିଲାମଣ୍ଡପ ମୁତ୍ତମଂ ।
ଲୋହପାସାଦଥମ୍ଭେ ଚ, ପରିୱତ୍ତିୟ ଠାପୟି ॥
ମହାବୋଧି ସିଲାୱେଦିଂ, ଉତ୍ତରଦ୍ୱାରତୋରଣଂ ।
ପତିଟ୍ଠାପେସି ଥମ୍ଭେ ଚ, ଚକୁକଣ୍ଣେ ସଚକ୍କକେ ॥
ତିସ୍ସୋ ସୀଲାପଟିମାୟୋ, ତୀସୁ ଦ୍ୱାରେସୁ କାରୟି ।
ଠପାପେସି ଚ ପଲ୍ଲଙ୍କଂ, ଦକ୍ଖିଣମ୍ହି ସିଲାମୟଂ ॥
ପଧାନଭୂମିଂ କାରେସି, ମହାୱିହାରପଚ୍ଛତୋ ।
ଦୀପମ୍ହି ଜିଣ୍ଣକାୱାସଂ, ସବ୍ବଞ୍ଚ ପଟିସଙ୍ଖରି ॥
ଥୂପାରାମେ ଥୂପଘରଂ, ଥେରମ୍ବତ୍ଥଲକେ ତଥା ।
ଆରାମେ ମଣିସୋମୱ୍ହେ, ପଟିସଙ୍ଖାରୟି ଚ ସୋ ॥
ଥୂପାରାମେ ମଣିସୋମା-ରାମେ ମରିଚୱଟ୍ଟକେ ।
ଦକ୍ଖିଣୱ୍ହ ୱିହାରେ ଚ, ଉପୋସଥଘରାନି ଚ ॥
ମେଘୱଣ୍ଣାଭୟୱ୍ହଞ୍ଚ, ନୱୱିହାରମକାରୟି ।
ୱିହାରମହପୂଜାୟଂ, ପିଣ୍ଡେତ୍ୱା ଦୀପୱାସୀନଂ ॥
ତିଂସଭିକ୍ଖୁସହସ୍ସାନଂ, ଛଚୀୱରମଦାସି ଚ ।
ମହାୱେସାଖପୂଜଞ୍ଚ, ତଦା ଏୱଂ ଅକାରୟି ॥
ଅନୁୱସ୍ସଞ୍ଚ ସଙ୍ଘସ୍ସ, ଛଚୀୱରମଦାମୟି ।
ପାପକାନଂ ନିଗ୍ଗହେନ, ସୋଧେନ୍ତୋ ସାସନଂ ତୁ ସୋ ॥
ୱେତୁଲ୍ଲୱାଦିନୋ ଭିକ୍ଖୂ, ଅଭୟଗିରିନିୱାସିନୋ ।
ଗାହୟିତ୍ୱାସଟ୍ଠିମତ୍ତେ, ଜିନସାସନକଣ୍ଟକେ ॥
କତ୍ୱାନ ନିଗ୍ଗହଂ ତେସଂ, ପରତିରେ ଖିପାପୟି ।
ତତ୍ଥ ଖିତ୍ତସ୍ସ ଥେରସ୍ସ, ନିସ୍ସିତୋ ଭିକ୍ଖୁଚୋଳିକୋ ॥
ସଙ୍ଘମିତ୍ତୋ’ତିନାମେନ, ଭୂତିୱିଜ୍ଜାଦିକୋୱିଦୋ ।
ମହାୱିହାରେ ଭିକ୍ଖୁନଂ, କୁଜ୍ଝିତ୍ୱାନ ଇଧଗମା ॥
ଥୂପାରାମେ ସନ୍ନିପାତଂ, ପୱିସିତ୍ୱା ଅସଞ୍ଞତୋ ।
ସଙ୍ଘପାଲସ୍ସ ପରିୱେଣ, ୱାସିତ୍ଥେରସ୍ସ ତତ୍ଥ ସୋ ॥
ଗୋଟ୍ଠାସୟସ୍ସ ଥେରସ୍ସ, ମାତୁଲସ୍ସ’ସ୍ସ ରାଜିନୋ ।
ରଞ୍ଞୋ ନାମେନା‘‘ଲପନ୍ତୋ, ୱଚନଂ ପଟିବାହିୟ ॥
ରଞ୍ଞୋ କୁଲୂପଗୋ ଆସି, ରାଜା ତସ୍ମିଂ ପସୀଦିୟ ।
ଜେଟ୍ଠପୁତ୍ତଂ ଜେଟ୍ଠତିସ୍ସଂ, ମହାସେନଂ କନିଟ୍ଠକଂ ॥
ଅପ୍ପେସି ତସ୍ସ ଭିକ୍ଖୁସ୍ସ, ସୋ ସଙ୍ଗଣ୍ହି ଦୁତିୟକଂ ।
ଉପନନ୍ଧି ତସ୍ମିଂ ଭିକ୍ଖୁସ୍ମିଂ, ଜେଟ୍ଠତିସ୍ସୋ କୁମାରକୋ ॥
ପିତୁନୋ ଅଚ୍ଚୟେ ଜେଟ୍ଠ, ସିସ୍ସୋ ରାଜାଅହୋସିସୋ ।
ପିତୁ ସାରୀର ସକ୍କାରେ, ନିଗ୍ଗନ୍ତୁଂ ନିଚ୍ଛମାନକେ ॥
ଦୁଟ୍ଠାମଚ୍ଚେ ନିଗ୍ଗହେତୁଂ, ସୟଂ ନିକ୍ଖମ୍ମ ଭୂପତି ।
କନିଟ୍ଠଂ ପୁରତୋ କତ୍ୱା, ପିତୁକାୟଂ ଅନନ୍ତରଂ ॥
ତତୋ ଅମଚ୍ଚେ କତ୍ୱାନ, ସୟଂ ହୁତ୍ୱାନ ପଚ୍ଛତୋ ।
କନିଟ୍ଠେ ପିତୁକାୟେ ଚ, ନିକ୍ଖନ୍ତେ ତଦନନ୍ତରଂ ॥
ଦ୍ୱାରଂ ସଂୱରୟିତ୍ୱାନ, ଦୁଟ୍ଠମଚ୍ଚେ ନିଘାତିୟ ।
ସୂଲେ ଅପ୍ପେସି ପିତୁନୋ, ଚିତକାୟସମନ୍ତତୋ ॥
ତେନ’ସ୍ସ କମ୍ମୁନା ନାମଂ, କକ୍ଖଲୋପପଦଂଅହୁ ।
ସଙ୍ଘମିତ୍ତୋତୁ ସୋ ଭିକ୍ଖୁ, ଭୀତୋ ତସ୍ମିଂ ନରାଧିପା ॥
ତସ୍ସାଭିସେକସମକାଲଂ, ମହାସେନେନ ମନ୍ତିୟ ।
ତସ୍ସାଭିସେକଂ ପେକ୍ଖନ୍ତୋ, ପରତୀରଂ ଗତୋ ଇତୋ ॥
ପିତରା ସୋ ୱିପ୍ପକତଂ, ଲୋହପାସାଦ ମୁତ୍ତମଂ ।
କୋଟିଧନଂ ଅଗ୍ଘନକଂ, କାରେସି ସତ୍ତଭୂମକଂ ॥
ସଟ୍ଠିସତସହସ୍ସଗ୍ଘଂ, ପୂଜୟିତ୍ୱା ମଣିଂତହିଂ ।
କାରେସି ଜେଟ୍ଠତିସ୍ସୋତଂ, ମଣିପାସାଦନାମକଂ ॥
ମଣି ଦୁୱେ ମହଗ୍ଘେ ଚ, ମହାଥୂପେ ଅପୂଜୟି ।
ମହାବୋଧିଘରେ ତୀଣି, ତୋରଣାନି ଚ କାରୟି ॥
କାରୟିତ୍ୱା ୱିହାରଂ ସୋ, ପାଚିନତିସ୍ସ ପବ୍ବତଂ ।
ପଞ୍ଚୱାସେସୁ ସଙ୍ଘସ୍ସ, ଅଦାସି ପୁଥୁୱୀ ପତି ॥
ଦେୱାନଂପିୟତିସ୍ସେନ, ସୋ ପତିଟ୍ଠାପିତଂ ପୁରା ।
ଥୂପାରାମେ ଉରୁସିଲା, ପଟିମଂ ଚାରୁଦସ୍ସନଂ ॥
ନେତ୍ୱାନ ଥୂପାରାମୱ୍ହଂ, ଜେଟ୍ଠତିସ୍ସୋ ମହୀପହି ।
ପତିଟ୍ଠାପେସି ଆରାମେ, ପାଚିନତିସ୍ସ ପବ୍ବତେ ॥
କାଳମତ୍ତିକୱାପିଂସୋ, ଅଦାଚେତିୟ ପବ୍ବତେ ।
ୱିହାର ପାସାଦ ମହଂ, ମହାୱେସାଖମେୱ ଚ ॥
କତ୍ୱା ତିଂସ ସହସ୍ସସ୍ସ, ସଙ୍ଘସ୍ସ’ଦା ଛଚୀୱରଂ ।
ଆଳମ୍ବଗାମୱାପିଂସୋ, ଜେଟ୍ଠତିସ୍ସୋ ଅକାରୟି ॥
ଏୱଂ ସୋ ୱିୱିଧଂ ପୁଞ୍ଞଂ, ପାସାଦକରଣାଦିକଂ ।
କାରେନ୍ତୋ ଦସୱସ୍ସାନି, ରାଜା ରଜ୍ଜମକାରୟି ॥
ଇତି ବହୁୱିଧ ପୁଞ୍ଞ ହେତୁ ଭୂତା,
ନରପତିତା ବହୁପାପହେତୁ ଚାତି ।
ମଧୁରମିୱ ୱିସେନମିସ୍ସମନ୍ନଂ,
ସୁଜନମନୋ ଭଜତେ ନ ତଂ କଦାପି ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ତୟୋଦସରାଜକୋନାମ
ଛତ୍ତିଂସତିମୋ ପରିଚ୍ଛେଦୋ ।
ସତ୍ତତିଂସତିମ ପରିଚ୍ଛେଦ
ପଞ୍ଚରାଜକୋ
ଜେଟ୍ଠତିସ୍ସଚ୍ଚୟେ ତସ୍ସ, ମହାସେନୋ କନିଟ୍ଠକୋ ।
ସତ୍ତୱୀସତିୱସ୍ସାନି, ରାଜା ରଜ୍ଜମକାରୟି ॥
ତସ୍ସ ରଜ୍ଜାଭିସେକଂ ତଂ,
କାରେତୁଂ ପରତୀରତୋ ।
ସୋ ସଙ୍ଘମିତ୍ତତ୍ଥେରୋ ତୁ,
କାଲଂ ଞତ୍ୱା ଇଧାଗତୋ ॥
ତସ୍ସାଭିସେକଂ କାରେତ୍ୱା, ଅଞ୍ଞଂ କିଚ୍ଚଞ୍ଚନେକଧା ।
ମହାୱିହାର ୱିଦ୍ଧଂସଂ, କାତୁକାମୋ ଅସଞ୍ଞତୋ ॥
ଅୱିନୟୱାଦିନୋ ଏତେ, ମହାୱିହାରୱାସିନୋ ।
ୱିନୟୱାଦୀ ମୟଂ ରାଜ, ଇତି ଗାହିୟ ଭୂପଭିଂ ॥
ମହାୱିହାରୱାସିସ୍ସ, ଆହାରଂ ଦେତି ଭିକ୍ଖୁନୋ ।
ୟୋ ସୋ ସତଂ ଦଣ୍ଡିୟୋ’ତି, ରଞ୍ଞା ଦଣ୍ଡଂ ଠପାପୟି ॥
ଉପଦ୍ଦୁତା ତେହି ଭିକ୍ଖୂ, ମହାୱିହାରୱାସିନୋ ।
ମହାୱିହାରଂ ଛଡ୍ଡେତ୍ୱା, ମଲୟଂ ରୋହଣଂ ଅଗୁଂ ॥
ତେନ ମହାୱିହାରୋ’ୟଂ, ନୱୱସ୍ସାନି ଛଡ୍ଡିତୋ ।
ମହାୱିହାରୱାସୀହି, ଭିକ୍ଖୂହି ଆସି ସୁଞ୍ଞକୋ ॥
‘‘ହୋତି ଅସ୍ସାମିକଂ ୱତ୍ଥୁ, ପୁତୁୱିସାମିନୋ’’ଇତି ।
ରାଜାନଂ ସଞ୍ଞାପେତ୍ୱା ସୋ, ଥେରୋ ଦୁମ୍ମତି ଦୁମ୍ମତିଂ ॥
ମହାୱିହାରଂ ନାସେତୁଂ, ଲଦ୍ଧାନୁମତି ରାଜତୋ ।
ତଥା କାତୁଂ ମନୁସ୍ସେ ସୋ, ୟୋଜେସି ଦୁଟ୍ଠମାନସୋ ॥
ସଙ୍ଘମିତ୍ତସ୍ସ ଥେରସ୍ସ, ସେୱକୋ ରାଜୱଲ୍ଲଭୋ ।
ସୋଣାମଚ୍ଚୋ ଦାରଣୋ ଚ, ଭିକ୍ଖୱୋ ଚ ଅଲଜ୍ଜିନୋ ॥
ଭିନ୍ଦିତ୍ୱା ଲୋହପାସାଦଂ, ସତ୍ତଭୂମକ ମୁତ୍ତମଂ ।
ଘରେ ନାନପ୍ପକାରେ ଚ, ଇତୋ’ଭୟଗିରିଂ ନୟୁଂ ॥
ମହାୱିହାରା ନୀତେହି, ପାସାଦେହି ବହୂହି ଚ ।
ଅଭୟଗିରିୱିହାରୋୟଂ, ବହୁପାସାଦକୋ ଅହୁ ॥
ସଙ୍ଘମିତ୍ତଂ ପାପମିତ୍ତଂ, ଥେରଂ ସୋଣଞ୍ଚ ସେୱକଂ ।
ଆଗମ୍ମ ସୁବହୁଂ ପାପଂ, ଅକାସି ସୋ ମହୀପତି ॥
ମହାସିଲାପଟିମଂ ସୋ, ପାଚିନତିସ୍ସପବ୍ବତା ।
ଆନେତ୍ୱା’ଭୟଗିରିମ୍ହି, ପତିଟ୍ଠାପେସି ଭୂପତି ॥
ପଟିମାଘରଂ ବୋଧିଘରଂ, ଧାତୁସାଲଂ ମନୋରମଂ ।
ଚତୁସାଲଞ୍ଚ କାରେସୀ, ସଙ୍ଖରୀ କୁକ୍କୁଟୱ୍ହୟଂ ॥
ସଙ୍ଘମିତ୍ତେନ ଥେରେନ, ତେନ ଦାରୁଣକମ୍ମୁନା ।
ୱିହାରୋ ସୋ’ଭୟଗିରି, ଦସ୍ସନେୟ୍ୟୋ ଅହୁ ତଦା ॥
ମେଘୱଣ୍ଣାଭୟୋ ନାମ, ରଞ୍ଞୋ ସବ୍ବତ୍ଥ ସାଖକୋ ।
ସଖା ଅମଚ୍ଚୋ କୁଜ୍ଝିତ୍ୱା, ମହାୱିହାରନାସନେ ॥
ଚୋରୋ ହୁତ୍ୱାନ ମଲୟଂ, ଗନ୍ତ୍ୱା ଲଦ୍ଧମହବ୍ବଲୋ ।
ଖନ୍ଧାୱାରଂ ନିୱେସେସି, ଦୁରତିସ୍ସକୱାପିୟଂ ॥
ତତ୍ରା’ଗତଂ ତଂ ସୁତ୍ୱା, ସହାୟଂ ସୋ ମହୀପତି ।
ୟୁଦ୍ଧାହ ପଚ୍ଚୁଗ୍ଗନ୍ତ୍ୱାନ, ଖନ୍ଧାୱାରଂ ନିୱେସୟି ॥
ସାଧୁଂ ପାନଞ୍ଚ ମଂସଞ୍ଚ, ଲଭିତ୍ୱା ମଲୟାଗତଂ ।
‘‘ନ ସେୱିସ୍ସଂ ସହାୟେନ, ୱିନା ରଞ୍ଞା’’ତି ଚିନ୍ତିୟ ॥
ଆଦାୟ ତଂ ସୟଂୟେୱ, ରତ୍ତିଂ ନିକ୍ଖମ୍ମ ଏକକୋ ।
ରଞ୍ଞୋ ସନ୍ତିକମାଗମ୍ମ, ତମତ୍ଥଂ ପଟିୱେଦୟି ॥
ତେନା’ଭତଂ ତେନ ସହ, ୱିସ୍ସତ୍ଥୋ ପରିଭୁଞ୍ଜିୟ ।
‘‘କସ୍ମା ଚୋରୋ ଅହୁ ମେ ତ୍ୱଂ, ‘‘ଇତି ରାଜା ଅପୁଚ୍ଛିତଂ ॥
‘‘ତୟା ମହାୱିହାରସ୍ସ, ନାସିତତ୍ତା’’ତି ଅବ୍ରୁୱି ।
‘‘ୱିହାରଂ ୱାସୟିସ୍ସାମି, ଖେମମେତଂ ମମଚ୍ଚୟଂ ॥
ଇଚ୍ଛେୱ ମବ୍ରୱୀ ରାଜା, ରାଜାନଂ ସୋ ଖମାପୟି ।
ତେନ ସଞ୍ଞାପିତୋ ରାଜା, ନଗରଂୟେୱ ଆଗମି ॥
ରାଜାନଂ ସଞ୍ଞପେତ୍ୱା ସୋ, ମେଘୱଣ୍ଣାଭୟୋ ପନ ।
ରଞ୍ଞା ସହ ନ ଆଗଞ୍ଛି, ଦବ୍ବସମ୍ଭାରକାରଣା ॥
ୱଲଭା ଭରିୟା ରଞ୍ଞୋ, ଏକଂ ଲେଖକଧୀତିକା ।
ମହାୱିହାରନାସମ୍ହି, ଦୁକ୍ଖିତଂ ତଂ ୱିନାସକଂ ॥
ଥେରଂ ମାରାପୟି କୁଦ୍ଧା, ସଂଗହେତ୍ୱାନ ୱଡ୍ଢକିଂ ।
ଥୂପାରାମଂ ୱିନାସେତୁଂ, ଆଗତଂ ଦୁଟ୍ଠମାନସଂ ॥
ମାରାପେତ୍ୱା ସଙ୍ଘମିତ୍ତ-ତ୍ଥେରଂ ଦାରୁଣକାରକଂ ।
ସୋଣାମଚ୍ଚଦାରଣଞ୍ଚ, ଘାତୟିଂସୁ ଅସଞ୍ଞକା ॥
ଆନେତ୍ୱା ଦବ୍ବସମ୍ଭାରଂ, ମେଘୱଣ୍ଣାଭୟୋ ତୁ ସୋ ।
ମହାୱିହାରେନେକାନି, ପରିୱେଣାନି କାରୟି ॥
ଅଭୟେନଭୟୋ ତସ୍ମିଂ, ୱୂପସନ୍ତେ ତୁ ଭିକ୍ଖୱୋ ।
ମହାୱିହାରଂ ୱାସେସୁଂ, ଆଗନ୍ତ୍ୱାନ ତତୋ ତତୋ ॥
ରାଜା ମହାବୋଧିଘରେ, ପଚ୍ଛିମାୟ ଦିସାୟ ତୁ ।
କାରେତ୍ୱା ଲୋହରୂପାନି, ଠପାପେସି ଦୁୱେ ତୁ ସୋ ॥
ଦକ୍ଖିଣାରାମୱାସିମ୍ହି, କୁହକେ ଜିମ୍ହମାନସେ ।
ପସୀଦିତ୍ୱା ପାପମିତ୍ତେ, ତିସ୍ସତ୍ଥେରେ ଅସଞ୍ଞତେ ॥
ମହାୱିହାରସୀମନ୍ତେ, ଉୟ୍ୟାନେ ଜୋତିନାମକେ ।
ଜେତୱନୱିହାରଂ ସୋ, ୱାରୟନ୍ତୋପି କାରୟି ॥
ତତୋ ସୀମଂ ସମୁଗ୍ଘାତୁଂ, ଭିକ୍ଖୁସଙ୍ଘମୟାଚିସୋ ।
ଅଦାତୁକାମା ତଂ ଭିକ୍ଖୂ, ୱିହାରମ୍ହା ଅପକ୍କମୁଂ ॥
ଇଧ ସୀମାସମୁଗ୍ଘାତଂ, ପରେହି କରିୟମାନକଂ ।
କୋପେତୁଂ ଭିକ୍ଖୱୋ କେଚି, ନିଲୀୟିଂସୁ ତହିଂ ତହିଂ ॥
ମହାୱିହାରୋ ନୱମାସେ, ଏୱଂ ଭିକ୍ଖୂହି ୱଜ୍ଜିତୋ ।
‘‘ସମୁଗ୍ଘାତଂ କରିମ୍ହା’’ତି-ପରେ ଭିକ୍ଖୂ ଅମଞ୍ଞିସୁଂ ॥
ତତୋ ସୀମାସମୁଗ୍ଘାତେ, ବ୍ୟାପାରେ ପରିନିଟ୍ଠିତେ ।
ମହାୱିହାରଂ ୱାସେସୁଂ, ଇଧାଗନ୍ତ୍ୱାନ ଭିକ୍ଖୱୋ ॥
ତସ୍ସ ୱିହାରଗାହିସ୍ସ, ତିସ୍ସତ୍ଥେରସ୍ସ ଚୋଦନା ।
ଅନ୍ତିମୱତ୍ଥୁନା ଆସି, ଭୂତତ୍ଥଂ ସଙ୍ଘମଜ୍ଝଗା ॥
ୱିନିଚ୍ଛିୟ ମହାମଚ୍ଚୋ, ତଥା ଧମ୍ମିକସମ୍ମତୋ ।
ଉପ୍ପବ୍ବାଜେସି ଧମ୍ମେନ, ତଂ ଅନିଚ୍ଛାୟ ରାଜିନୋ ॥
ସୋୟେୱ ରାଜା କାରେସି, ୱିହାରଂ ମଣିହୀରକଂ ।
ତୟୋ ୱିହାରେ କାରେସି, ଦେୱାଲୟଂ ୱିନାସିୟ ॥
ଗୋକଣ୍ଣଂ ଏରକାପିଲ୍ଲଂ, କଲନ୍ଦବ୍ରାହ୍ମଣଗାମକେ ।
ମିଗଗାମୱିହାରଞ୍ଚ, ଗଙ୍ଗସେନକପବ୍ବତଂ ॥
ପଚ୍ଛିମାୟ ଦିସାୟାଥ, ଧାତୁସେନଞ୍ଚ ପବ୍ବତଂ ।
ରାଜା ମହାୱିହାରଞ୍ଚ, କୋକୱାତମ୍ହି କାରୟି ॥
ରୂପାରମ୍ମୱିହାରଞ୍ଚ, ଚୂଳୱିଟ୍ଟଞ୍ଚ କାରୟି ।
ଉତ୍ତରାଭୟସୱ୍ହେ ଚ, ଦୁୱେ ଭିକ୍ଖୂନୁପସ୍ସୟେ ॥
କାଲୱେଳକୟକ୍ଖସ୍ସ, ଠାନେ ଥୂପଞ୍ଚ କାରୟି ।
ଦୀପମ୍ହି ଜିଣ୍ଣକାୱାସେ, ବହୂ ଚ ପଟିସଙ୍ଖରି ॥
ସଙ୍ଘତ୍ଥେରସହସ୍ସସ୍ସ, ସହସ୍ସଗ୍ଘମଦାସି ସୋ ।
ଥେରଦାନଞ୍ଚ ସବ୍ବେସଂ, ଅନୁୱସ୍ସଞ୍ଚ ଚୀୱରଂ ॥
ଅନ୍ନପାନାଦିଦାନସ୍ସ, ପରିଚ୍ଛେଦୋ ନ ୱିଜ୍ଜତି ।
ସୁଭିକ୍ଖତ୍ଥାୟ କାରେସି, ସୋ’ୱ ସୋଳସ ୱାପିୟୋ ॥
ମଣିହୀରମହାୱାପିଂ, ଜଲ୍ଲୁରଂ ଖାଣୁନାମକଂ ।
ମହାମଣିଂ କୋକୱାତଂ, ମୋରକପରକୱାପିକଂ ॥
କୁବ୍ବାହକଂ ୱାହକଞ୍ଚ, ରତ୍ତମାଲକଣ୍ଡକମ୍ପି ଚ ।
ତିସ୍ସୱଡ୍ଢମାନକଞ୍ଚ, ୱେଳଙ୍ଗୱିଟ୍ଠିକମ୍ପି ଚ ॥
ମହାଗଲ୍ଲଚୀରୱାପିଂ, ମହାଦାରଗଲ୍ଲକମ୍ପି ଚ ।
କାଳପାସାଣୱାପିଞ୍ଚ, ଇମା ସୋଳସ ୱାପିୟୋ ॥
ଗଙ୍ଗାୟ ପବ୍ବୱୱ୍ହଂସୋ, ମହାମାତିଞ୍ଚ କାରୟି ।
ଏୱଂ ପୁଞ୍ଞମପୁଞ୍ଞଞ୍ଚ, ସୁବହୁଂ ସୋ ଉପାଚିନୀତି ॥
ଅସାଧୁସଙ୍ଗମେନେୱଂ, ୟାୱଜୀୱଂ ସୁଭାସୁଭଂ ।
କତ୍ୱା ଗତୋ ୟଥାକମ୍ମଂ, ସୋ ମହାସେନଭୂପତି ॥
ତସ୍ମା ଅସାଧୁସଂସଗ୍ଗଂ, ଆରକା ପରିୱଜ୍ଜିୟ ।
ଅହିଂ ୱା’ସି ୱିସଂ ଖିପ୍ପଂ, କରେୟ୍ୟ’ତ୍ଥହିତଂ ବୁଧୋ ॥
ଅହୁ ରାଜା ସିରିମେଘ-ୱଣ୍ଣୋ ତସ୍ସ ସୁତୋ ତତୋ ।
ୱନ୍ଧାତା ୱିୟ ଲୋକସ୍ସ, ସବ୍ବସମ୍ପତ୍ତିଦାୟକୋ ॥
ମହାସେନେନ ପାପାନଂ, ୱସଗେନ ୱିନାସିତେ ।
ମହାୱିହାରେ ସବ୍ବେପି, ସନ୍ନିପାତିୟ ଭିକ୍ଖୱୋ ॥
ଉପସଙ୍କମ୍ମ ୱନ୍ଦିତ୍ୱା, ନିସିନ୍ନୋ ପୁଚ୍ଛି ସାଦରୋ ।
‘‘ପିତରା ସଙ୍ଘମିତ୍ତସ୍ସ, ସହାୟେନ ୱିନାସିତଂ ॥
କିଂ କିମେୱା’’ତି ଆହଂସୁ, ଭିକ୍ଖୱୋ ତଂ ନରିସ୍ସରଂ ।
‘‘ସୀମାୟୁଗ୍ଘାଟନଂ କାତୁଂ, ୱାୟମିତ୍ୱାପି ତେ ପିତା ॥
ନାସକ୍ଖି ଅନ୍ତୋସୀମାୟଂ, ଭିକ୍ଖୂନଂ ୱିଜ୍ଜମାନତୋ ।
ଭୂମିଗବ୍ଭନିଲୀନାହି, ସତ୍ତାସୁଂ ଏତ୍ଥ ଭିକ୍ଖୱୋ ॥
ଅମଚ୍ଚୋ ସୋଣାମଚ୍ଚୋ ଚ, ସଙ୍ଘମିତ୍ତୋ ଚ ପାପିୟୋ ।
ରାଜାନଂ ସଞ୍ଞାପେତ୍ୱାନ, ଅପୁଞ୍ଞଂ ତେନ କାରୟୁଂ ॥
ଭିନ୍ଦିତ୍ୱା ଲୋହପାସାଦଂ, ସତ୍ତଭୂମକମୁତ୍ତମଂ ।
ଘରେ ନାନପ୍ପକାରେ ଚ, ଇତୋ’ଭୟଗିରିଂ ନୟୁଂ ॥
ମାସକେ ଚତୁବୁଦ୍ଧେହି, ନିୱୁତ୍ଥେ ଚେତିୟଙ୍ଗଣେ ।
ୱପାପେସୁଞ୍ଚ ଦୁପ୍ପଞ୍ଞା, ପସ୍ସ ବାଲସମାଗମଂ’’ ॥
ତଂ ସୁତ୍ୱା ପିତୁକମ୍ମଂ ସୋ, ନିବ୍ବିନ୍ନୋ ବାଲସଙ୍ଗମେ ।
ପିତରା ନାସିତଂ ତତ୍ଥ, ସବ୍ବଂ ପାକତିକଂ ଅକା ॥
ଲୋହପାସାଦମଗଦୋ’ୱ, କାସି ପାସାଦମୁତ୍ତମଂ ।
ରଞ୍ଞୋ ମହାପନାଦସ୍ସ, ଦସ୍ସେନ୍ତୋ ୱିୟ ଭୂତଲେ ॥
ପରିୱେଣାନି ସବ୍ବାନି, ନାସିତାନି ନିୱେସୟି ।
ଭୋଗେ ଆରାମିକାନଞ୍ଚ, ୟଥାଠାନେ ଠପେସି ସୋ ॥
ପିତରା ପଚ୍ଚୟାନଞ୍ଚ, ପଚ୍ଛିନ୍ନତ୍ତା ୱିବୁଦ୍ଧିନା ।
ଛିଦ୍ଦାୱାସଂ ଘନାୱାସଂ, ୱିହାରଂ’କାସି ବୁଦ୍ଧିମା ॥
କାରିତେ ପିତରା ଜୋତି ୱନେଚେ’ସୋ ୱିହାରକେ ।
କମ୍ମଂ ୱିପ୍ପକତଂ ସବ୍ବଂ, ନିଟ୍ଠାପେସି ନରିସ୍ସରୋ ॥
ଥେରସ୍ସା’ଥ ମହିନ୍ଦସ୍ସ, ସମଣିନ୍ଦସ୍ସ ସୁନୁନୋ ।
ସୁତ୍ୱାନ ମନୁଜିନ୍ଦୋ ସୋ, ପୱତ୍ତିଂ ସବ୍ବମାଦିତୋ ॥
ପସୀଦିତ୍ୱା ଗୁଣେ ତସ୍ସ, ରାଜା ଦିପ୍ପପସାଦକେ ।
‘‘ଇସ୍ସରୋ ୱତ ଦୀପସ୍ସ, ଥେରୋ’’ ଇତି ୱିଚିନ୍ତିୟ ॥
ପଟିବିମ୍ବଂ ସୁୱଣ୍ଣସ୍ସ, କତ୍ୱା ତମ୍ମାଣ ନିସ୍ସିତଂ ।
ପୁବ୍ବକତ୍ତିକମାସସ୍ସ, ପବ୍ବପକ୍ଖେ ତୁ ସତ୍ତମେ ॥
ଦିନେ ନେତ୍ୱା ଚେତିୟମ୍ବ-ଥଲେ ଥେରମ୍ବସଞ୍ଞିତେ ।
ତତ୍ରଟ୍ଠମେ ନିୱାସେତ୍ୱା, ତତୋ ତୁ ନୱମେ ପନ ॥
ମହାସେନଂ ଗହେତ୍ୱା ସୋ, ଦେୱସେନା ସମୂପମଂ ।
ଓରୋଧେ ନଗରେ ଚେୱ, ଗେହରକ୍ଖଣକେ ୱିନା ॥
ଲଂକାଦୀପେ ଚ ସକଲେ, ସବ୍ବେ ଆଦାୟ ଭିକ୍ଖୱୋ ।
ୱିସ୍ସଜ୍ଜେତ୍ୱା ମନୁସ୍ସେ ଚ, ନଗରେ ଚାରକଟ୍ଠିତେ ॥
ପଟ୍ଠପେତ୍ୱା ମହାଦାନଂ, ଅୟଞ୍ଚାଖିଲପାଣିନଂ ।
ପୂଜଂ ସବ୍ବୋପହାରେହି, କରୋନ୍ତୋ ଚ ଅନୂପମଂ ॥
ପଚ୍ଚୁଗ୍ଗମନମେତସ୍ସ, ଦୀପସତ୍ଥୁସ୍ସ ସତ୍ଥୁନୋ ।
ୱରପୁତ୍ତସ୍ସ ସୋ କତ୍ୱା, ଦେୱରାଜା’ୱ ସତ୍ଥୁନୋ ॥
ଚେତିୟମ୍ବଥଲା ୟାୱ, ନଗରଂ ସାଧୁସଜ୍ଜୟି ।
ମଗ୍ଗଂ ୱେସାଲିତୋ ୟାୱ, ସାୱତ୍ଥିନଗରଂ ୟଥା ॥
ୱିସ୍ସଜ୍ଜେତ୍ୱା ତହିଂ ଭୋଗଂ, ସବ୍ବଂ ଥେରସ୍ସ ସୋ ପିତା ।
ରାଜା ମୋଗ୍ଗଲିପୁତ୍ତସ୍ସ, ଥେରସ୍ସା’ଗମନେ ୱିୟ ॥
ଦତ୍ୱା ତତ୍ଥ ମହାଦାନଂ, କପଣଦ୍ଧିୱନିବ୍ବକେ ।
ଭିକ୍ଖୱୋପି ଚ ତୋସେତ୍ୱା, ପଚ୍ଚୟେହି ଚତୂହି’ପି ॥
ଥେରସ୍ସା’ଗମନେ ଏୱଂ, ପସ୍ସତୂତି ମହାଜନେ ।
ଗହେତ୍ୱା ତଂମହନ୍ତେନ, ସକ୍କାରେନ ମହାୟସୋ ॥
ତମ୍ହା ଓରୁୟ୍ହ ସୋ ମହା, ସୟଂ ହୁତ୍ୱା ପୁରେଚରୋ ।
ଭିକ୍ଖୱୋ ଚାପି କତ୍ୱାନ, ପରିୱାରେ ସମନ୍ତତୋ ॥
ଥେରସ୍ସ ବିମ୍ବଂ ସୋୱଣ୍ଣଂ, ଖିରସାଗରମଜ୍ଝଗୋ ।
ସଞ୍ଝା ଘନପରିକ୍ଖିତ୍ତୋ, ହେମମେରୁ’ୱ ସୋଭଥ ॥
ୱେସାଲିନଗରଂ ସୁତ୍ତଂ, ଦେସେତୁଂ ଲୋକନାୟକୋ ।
ଅଗମା ଏୱମେୱାତି, ଦସ୍ସେସି ଚ ମହାଜନଂ ॥
ଏୱଂ କରୋନ୍ତୋ ସକ୍କାର-ସମ୍ମାନଂ ସୋ ନରାସଭୋ ।
ନଗରସ୍ସ’ସ୍ସ ପାଚିନ-ଦ୍ୱାରପସ୍ସେ ସୟଂକତଂ ॥
ଉପସଙ୍କମ୍ମ ସାୟଣ୍ହେ, ୱିହାରଂ ସୋତ୍ଥିୟା କରଂ ।
ତୀହଂ ତତ୍ଥାପି ୱାସେସି, ବିମ୍ବଂ ତଂ ଜିନସୁନୁନୋ ॥
ନଗରଂ ସାଧୁସଜ୍ଜେତ୍ୱା, ତତୋ ଦ୍ୱାଦସମେ ଦିନେ ।
ସତ୍ଥୁସ୍ସା’ଦିପ୍ପୱେସମ୍ହି, ପୁରଂ ରାଜଗହଂ ୟଥା ॥
ପଟିମଂ ନୀହରିତ୍ୱା ତଂ, ୱିହାରଂ ସୋତ୍ଥିୟା କରଂ ।
ନଗରେ ସାଗରାକାରେ, ୱତ୍ତମାନେ ମହାମହେ ॥
ମହାୱିହାରଂ ନେତ୍ୱାନ, ତେମାସଂ ବୋଧିୟଙ୍ଗଣେ ।
ନିୱାସେତ୍ୱା ପୱେସେତ୍ୱା, ତେନେୱ ୱିଧିନା ପୁରଂ ॥
ରାଜଗେହସମୀପମ୍ହି, ପୁବ୍ବଦକ୍ଖିଣକୋଣକେ ।
ପଟିବିମ୍ବସ୍ସ କାରେସି, ତସ୍ସ ସାଧୁନିୱେସନଂ ॥
କାରେତ୍ୱା ଇଦ୍ଧିୟାଦୀନଂ, ପଟିମାୟୋ ୱିସାରଦୋ ।
ଥେରେନ ସହ ତତ୍ଥେ’ୱ, ନିୱେସେସି ମହାପତି ॥
ଆରକ୍ଖଂ ପଟ୍ଠପେତ୍ୱା, ପୂଜାୟ ଚ ପରିବ୍ବୟଂ ।
ଅନୁସଂୱଚ୍ଛରଂ କାତୁଂ, ଏୱମେୱ ନିୟୋଜୟି ॥
ତସ୍ସାଣମନୁରକ୍ଖନ୍ତା, ରାଜା ତବ୍ବଂସିକା ଇଧ ।
ୟାୱ’ଜ୍ଜପରିରକ୍ଖନ୍ତି, ତଂ ୱିଧିଂ ନ ୱିନାସିୟ ॥
ପୱାରଣାଦିନେ ନେତ୍ୱା, ୱିହାରଂ ନଗରା ତତୋ ।
କାତୁଂ ତେରସିୟଂ ପୂଜଂ, ଅନୁୱସ୍ସଂ ନିୟୋଜୟି ॥
ୱିହାରେ ଅଭୟେ ତିସ୍ସ-ୱସଭେ ବୋଧିପାଦପେ ।
ସିଲାୱେଦିଞ୍ଚ କାରେସି, ପାକାରଞ୍ଚ ମନୋହରଂ ॥
ନୱମେ ତସ୍ସ ୱସ୍ସମ୍ହି, ଦାଠାଧାତୁଂ ମହେସିନୋ ।
ବ୍ରାହ୍ମଣୀକାଚି ଆଦିୟ, କାଲିଙ୍ଗମ୍ହା ଇଧାନୟି ॥
ଦାଠାଧାତୁସ୍ସ ୱଂସମ୍ହି, ୱୁତ୍ତେନ ୱିଧସନଂ ।
ଗହେତ୍ୱା ବହୁମାନେନ, କତ୍ୱା ସମ୍ମା ନ ମୁତ୍ତମଂ ॥
ପକ୍ଖିପିତ୍ୱା କରଣ୍ଡମ୍ହି, ୱିସୁଦ୍ଧଫଲିକୁମ୍ଭୱ୍ହେ ।
ଦେୱାନଂପିୟତିସ୍ସେନ, ରାଜୱତ୍ଥୁମ୍ହି କାରିତେ ॥
ଧମ୍ମଚକ୍କୱ୍ହୟେ ଗେହେ, ୱଡ୍ଢୟିତ୍ଥ ମହୀପତି ।
ତତୋ ପଟ୍ଠାୟ ତଂ ଗେହଂ, ଦାଠାଧାତୁଘରଂ ଅହୁ ॥
ରାଜା ସତସହସ୍ସାନଂ, ନୱକଂ ପୁଣ୍ଣମାନସୋ ।
ୱିସ୍ସଜ୍ଜେତ୍ୱା ତତୋ’କାସି, ଦାଠାଧାତୁ ମହାମହଂ ॥
ଅନୁସଂୱଚ୍ଛରଂ ନେତ୍ୱା, ୱିହାରମଭୟୁତ୍ତରଂ ।
ତସ୍ସ ପୂଜାୱିଧିଂ କାତୁ, ମେୱ ରୂପଂ ନିୟୋଜୟି ॥
ଅଟ୍ଠାରସ ୱିହାରେ ଚ, କାରାପେସି ମହୀପତି ।
ଅନୁକମ୍ପାୟ ପାଣୀନଂ, ୱାପିୟୋ ଚ ଥିରୋଦିକା ॥
ବୋଧି ପୂଜାଦି ପୁଞ୍ଞାନି, ଅପ୍ପମେୟ୍ୟାନି କାରିୟ ।
ଅଟ୍ଠୱୀସତିମେ ୱସ୍ସେ, ଗଭୋ ସୋ ତସ୍ସ ୟା ଗତି ॥
କୁମାରୋ ଜେଟ୍ଠତିସୋ’ଥ, ଭାତା ତସ୍ସ କନିଟ୍ଠକୋ ।
ଛତ୍ତଂ ଲଙ୍ଘେସି ସଂକାୟଂ, ଦନ୍ତସିପ୍ପମ୍ହି କୋୱିଦୋ ॥
କତ୍ୱା କମ୍ମାନି ଚତ୍ରାନି, ଦୁକ୍କରାନି ମହୀପତି ।
ସିପ୍ପାୟତନ ମେତଂ ସୋ, ତିକ୍ଖାପେସି ବହୂଜନେ ॥
ଅଣତ୍ତୋ ପିତୁନା’କାସି, ଇଦ୍ଧିହି ୱିୟ ନିମ୍ମିତଂ ।
ବୋଧିସତ୍ତ ସରୂପଞ୍ଚ, ରୂପଂ ସାଧୁ ମନୋହରଂ ॥
ଅପସୟଞ୍ଚ ପଲ୍ଲଙ୍କଂ, ଛତ୍ତଂ ରତନମଣ୍ଡପଂ ।
ଚିତ୍ରଦନ୍ତମୟଂ କିଞ୍ଚି, ତସ୍ସ କମ୍ମଂ ତହିଂ ତହିଂ ॥
କତ୍ୱା ସୋ ନୱୱସ୍ସାନି, ଲଂକାଦୀପାନୁସାସନଂ ।
ଅନେକାନି ଚ ପୁଞ୍ଞାନି, ୟଥାକମ୍ମମୁପାଗମି ॥
ବୁଦ୍ଧଦାସୋ ତତୋ ତସ୍ସ, ପୁତ୍ତୋ ଆସି ମହୀପତି ।
ଗୁଣାନଂ ଆକରୋ ସବ୍ବ-ରତନାନଂ’ୱ ସାଗରୋ ॥
ସୁଖଂ ସବ୍ବପୟୋଗେହି, କରୋନ୍ତୋ ଦୀପୱାସିନଂ ।
ରକ୍ଖମାଲକମନ୍ଦଂ’ୱ, ପୁରଂ ୱସ୍ସୱଣୋ ଧନୀ ॥
ପଞ୍ଞା ପୁଞ୍ଞଗୁଣୂପେତୋ, ୱିସୁଦ୍ଧକରୁଣାଲୟୋ ।
ତଥା ଦସହି ରାଜୂନଂ, ଧମ୍ମେହି ସମୁଗାଗତୋ ॥
ଚତସ୍ସୋ ଅଗତି ହିତ୍ୱା, କାରୟନ୍ତୋ ୱିନିଚ୍ଛୟଂ ।
ଜନଂ ସଙ୍ଗହୱତ୍ଥୂହି, ସଙ୍ଗହେସି ଚତୂହିପି ॥
ଚରିୟଂ ବୋଧିସତ୍ତାନଂ, ଦସ୍ସେନ୍ତୋ ସକ୍ଖିପାଣିନଂ ।
ପିତା’ୱ ପୁତ୍ତେ ସୋ ସତ୍ତେ, ଅନୁକମ୍ପିତ୍ଥ ଭୂପତି ॥
ଦଳିଦ୍ଦେ ଧନଦାନେନା-କାସି ପୁଣ୍ଣମନୋରଥେ ।
ସୁଖିତେ ସବ୍ବଭୋଗାନଂ, ଜୀୱିତସ୍ସ ଚ ଗୁତ୍ତିୟା ॥
ସାଧୱୋ ସଙ୍ଗହେନା’ଥ, ନିଗ୍ଗହେନ ଅସାଧୱୋ ।
ଗିଲାନେ ୱେଜ୍ଜକମ୍ମେନ, ସଙ୍ଗହେସି ମହାପତି ॥
ଅଥେକ ଦିୱସଂ ରାଜା, ହତ୍ଥିକ୍ଖନ୍ଧୱରଂ ଗତୋ ।
ତିସ୍ସୱାପିଂ ନହାନତ୍ତଂ, ଗଚ୍ଛମାନୋ ମହାପଥେ ॥
ଅଦ୍ଦସେ’କଂ ମହାନାଗଂ, କୁଚ୍ଛିରୋଗ ସମପ୍ପିତଂ ।
ପୁତ୍ତଭାଗ ୱିହାରସ୍ସ, ପସ୍ସେ ୱମ୍ମିକମତ୍ଥକେ ॥
ଉତ୍ତାନ ମୁଦରେ ରୋଗଂ, ଦସ୍ସେତୁଂ ଗଣ୍ଡସଞ୍ଞିତଂ ।
ନିପନ୍ନଂସୋ’ଥ ଚିନ୍ତେସି, ତତୋ ରୋଗୀତି ନିଚ୍ଛୟଂ ॥
ଅଥୋ’ରୁୟ୍ହ ମହାନାଗଂ, ମହାନାଗ ସମୀପଗୋ ।
ଏୱମାହ ମହାନାଗୋ, ମହାନାଗମନାଗୱା ॥
‘‘କାରଣଂ ତେ ମହାନାଗ, ଞାତମାଗମନେ ମୟା ।
କୁମ୍ହେ ଖଲୁ ମହାତେଜା, ଖିପ୍ପଂ କୁପ୍ପିତସୀଲିନୋ ॥
ତସ୍ମା ଫୁସିତ୍ୱା ତଂ କମ୍ମଂ, କାତୁଂ ସକ୍କା ନ ତେ ମୟା ।
ଅଫୁସିତ୍ୱାପି ନୋ ସକ୍କା, କିନ୍ନୁକାତବ୍ବମେତ୍ଥୀ’ତି ॥
ଏୱଂ ପୁତ୍ତେ ଫଣିନ୍ଦୋ ସୋ, କେୱଲଂ ଫଣମତ୍ତନୋ ।
ବିଲସ୍ସ’ନ୍ତୋ ପୱେସେତ୍ୱା, ନିପ୍ପଜ୍ଜିତ୍ଥ ସମାହିତୋ ॥
ଅଥେ’ନ ମୁପସଙ୍କମ୍ମ, ଉଚ୍ଛଙ୍ଗଗତମତ୍ତନୋ
ସତ୍ଥଂ ଗହେତ୍ୱା ଫାଲେତ୍ୱା, ଉଦରଂ ତସ୍ସ ଭୋଗିନୋ ॥
ନୀହରିତ୍ୱା ତତୋ ଦୋସଂ, କତ୍ୱା ଭେସଜ୍ଜ ମୁତ୍ତମଂ ।
ସପ୍ପଂ ତଂ ତଙ୍ଖଣେନେୱ, ଅକାସି ସୁଖିତଂ ତଦା ॥
ଅତ୍ତାନ ମେୱଂ ଥୋମେସି, ‘‘ମହାକାରୁଞ୍ଞତଂ ମମ ।
ତିରଚ୍ଛାନାପି ଜାନିଂସୁ, ସାଧୁ ରଜ୍ଜନ୍ତି ମେ କତଂ ॥
ଦିସ୍ୱା ସୁଖିତମତ୍ତାନଂ, ପନ୍ନଗୋସୋ ମହୀପତିଂ ।
ପୂଜେତୁଂ ତସ୍ସ ପାଦାସି, ମହଗ୍ଘଂ ମଣିମତ୍ତନୋ ॥
ସିଲାମୟାୟ ସମ୍ବୁଦ୍ଧ-ପଟିମାୟ ଅକାରୟି ।
ମିଣିଂ ତଂ ନୟନଂ ରାଜା, ୱିହାରେ ଅଭୟୁତ୍ତରେ ॥
ଏକୋପି ଭିକ୍ଖୁ ଭିକ୍ଖନ୍ତୋ, ଗାମମ୍ହି ଥୁସୱିତ୍ଥିକେ ।
ସୁକ୍ଖଂ ଭିକ୍ଖଂ ଲଭିତ୍ୱାନ, ଖୀରଭିକ୍ଖାୟ ସଞ୍ଚରଂ ॥
ଖୀରଂ ସପ୍ପାଣକଂ ଲଦ୍ଧା, ପରିଭୁଞ୍ଜିତ୍ଥ କୁଚ୍ଛିୟଂ ।
ପାଣକା ବଲୱୋ ହୁତ୍ୱା, ଉଦରଂ ତସ୍ସ ଖାଦିସୁଂ ॥
ତତୋ ସୋ ଉପସଙ୍କମ୍ମ, ତଂ ନିୱେଦେସି ରାଜିନୋ ।
ରାହ ‘‘ଜାତୋ ସୁଲୋ’ୟଂ, କଦା ହାରେସି କୀଦିସଂ ॥
ସୋ ଆହ’’ ଥୁସୱିତ୍ଥିମ୍ହି, ଗାମେ ଖୀରେନ ଭୋଜନେ ।
ଭୁତ୍ତେ’ତି ରାଜା ଅଞ୍ଞାସି, ଖୀରଂ ସପ୍ପାଣକଂ’’ଇତି ॥
ତଦେୱ ଅସ୍ସୋ ଏକୋପି, ସିରାୱେଧ ତିକିଚ୍ଛିୟୋ ।
ରାଜା ତସ୍ସ ସିରାୱେଧଂ, କତ୍ୱା ଆଦାୟ ଲୋହିତଂ ॥
ପାୟେତ୍ୱା ସମଣଂ ଆହ, ମୁହୁତ୍ତଂ ୱୀତିନାମୟ ।
‘‘ଅସ୍ସଲୋହିତମଣ’’ନ୍ତି, ତଂ ସୁତ୍ୱା ସମଣୋୱମି ॥
ପାଣକା ଲୋହିତେନେୱ, ନିକ୍ଖମିଂଭୁ ସୁଖୀ ଅହୁ ।
ଭିକ୍ଖୁଂ ରାଜା ନିୱେଦେସି, କୁଚ୍ଛିମେୱଂ ପନତ୍ତନୋ ॥
‘‘ଏକସତ୍ଥପହାରେନ, ପାଣକା ସମଣୋ ହୟୋ ।
କତା ଅରୋଗା ସମ୍ମମେ, ୱେଜ୍ଜକମ୍ମ ମହୋ’’ଇତି ॥
ପିୱନ୍ତୋ ତୋୟମେକୋ ହି,
ଦେଡ୍ଡୁଭଣ୍ଡଂ ମଜାନିୟ ।
ଅଜ୍ଝୋହରିତଦା ଆସି,
ତତୋ ଜାତୋ’ତି ଦେଡ୍ଡୁଭୋ ॥
ଅନ୍ତୋ ତୁ ଦିତ୍ଥତୁଣ୍ଡେନ, ତେନ ଦୁକ୍ଖେନ ପୀଳିତୋ ।
ରାଜାନଂ ମଗମା ରାଜା, ନିଦାନଂ ତସ୍ସ ପୁଚ୍ଛିୟ ॥
ଅନ୍ତୋ ତୁ ଦିତ୍ଥତୁଣ୍ଡେନ, ତେନ ଦୁକ୍ଖେନ ପୀଳିତୋ ।
ରାଜାନଂ ମଗମା ରାଜା, ନିଦାନଂ ତସ୍ସ ପୁଚ୍ଛିୟ ॥
ଅଏନ୍ତା ସପ୍ପୋ’ତି ୱିଞ୍ଞାୟ, ସତ୍ତାହମୁପୱାସିୟ ।
ସୁନ୍ହାତସୁ ୱିଲିତ୍ତଞ୍ଚ, ସୟନେ ସାଧୁ ସନ୍ଥତେ ॥
ସୟାପେସି ତତୋ ସୋ’ତି, ନିଦ୍ଦାୟ ମୁଖମତ୍ତନୋ ।
ୱିୱରିତ୍ୱା ତଦା ସୁତ୍ତୋ, ତତୋ ତସ୍ସ ମୁଖନ୍ତିକେ ॥
ମଂସପେସିଂ ଠପାପେସି, ସରଜ୍ଜୁଂ ତସ୍ସ ନିଗ୍ଗତୋ ।
ଗନ୍ଧେନ ତଂ ଡଂସିତ୍ୱାନ, ଅନ୍ତୋ ୱିସିତୁମାରଭି ॥
ରଜ୍ଜୁୟା’ଥ ଗହେତ୍ୱାନ, ସମାକଡ୍ଢିକ ପାଣିୟଂ ।
ଉଦକେ ପାତୟିତ୍ୱାନ, ଇଦଂ ୱଚନମବ୍ରୱି ॥
‘‘ୱେଜ୍ଜୋ ଅହୋସି ସମ୍ମାସ-ମ୍ବୁଦ୍ଧସ୍ସ କିର ଜୀୱକୋ ।
କମ୍ମଂ ୱିଜ୍ଜତି ଲୋକସ୍ସ, କତଂ କିଂତେନ ଦୁକ୍କରଂ ॥
ଈଦିସଂ କସିରାସୋ’ପି, କମ୍ମଂ ନତ୍ଥେ’ତ୍ଥ ସଂସୟୋ ।
ସବ୍ବାଦରେନ କୁବ୍ବନ୍ତୋ, ଅହୋ ପୁଞ୍ଞୋ ଦୟୋ ମମ ॥
ତଥା ହେଲ୍ଲୋଲିଗାମମ୍ହି, ଚଣ୍ଡାଲି ମୁଳ୍ହଗବ୍ଭିନିଂ ।
ଜାତଂ ସତ୍ତସୁ ୱାରେସୁ, ସଗବ୍ଭଂ ସୁଖିତଂ ଅକା ॥
ୱାତବୋଧେନ ଏକୋ’ପି, ଭିକ୍ଖୁ ଉଟ୍ଠାପିତୋ ଅହୁ ।
ଗୋପାନସୀ ଗତେତମ୍ହି, ଦୁକ୍ଖାମୋଚେସି ବୁଦ୍ଧିମା ॥
ପିୱନ୍ତସ୍ସାପି ମଣ୍ଡୂକ, ଜୀବୟୁତ୍ତଂ ଜଲଂ ଲହୁଂ ।
ନାସିକା ବିଲତୋ ଗନ୍ତ୍ୱା, ବୀଜମାରୁୟ୍ହ ମତ୍ଥକଂ ॥
ଭିଜ୍ଜିତ୍ୱା ଆସି ମଣ୍ଡୂକୋ, ସୋ ୱୁଦ୍ଧୋ ତତ୍ଥ ଗଚ୍ଛତି ।
ମେଘସ୍ସା’ଗମନେ ତେନ, ସୋ’ନିବ୍ବଜ୍ଜତି ମାଣୱୋ ॥
ଫାଲେତ୍ୱା ମତ୍ଥକଂ ରାଜା, ମଣ୍ଡୂକମପନୀୟ ସୋ ।
କପାଲାନି ଘଟେତ୍ୱାନ-କାସି ପାକତିକଂ ଖଣେ ॥
ହିତତ୍ଥଂ ଦୀପାୱାସିନଂ, ଗାମେ ଗାମେ ମହୀପତି ।
କାରେତ୍ୱା ୱେଜ୍ଜସାଲାୟୋ, ୱଜ୍ଜେ ତତ୍ଥ ନିୟୋଜୟି ॥
ସବ୍ବେସଂ ୱଜ୍ଜସତ୍ଥାନଂ, କତ୍ୱା ସାରତ୍ଥସଙ୍ଗହଂ ।
ଠପେସି ୱେଜ୍ଜେ ଦୀପସ୍ସ, ତିକିଚ୍ଛତ୍ଥମନାଗତେ ।
ୟୋଜେସି ୱେଜ୍ଜ ମେକେକଂ, ରାଜା ଗାମ ଦ୍ୱିପଞ୍ଚକେ ॥
ଅଦା ୱିସଦ୍ଧ ଖେତ୍ତାନଂ, ୱେଜ୍ଜାନମୁପଜୀୱନଂ ।
ୱେଜ୍ଜେହତ୍ଥୀନମସ୍ସାନଂ, ବଲସ୍ସ ଚ ନିୟୋଜୟି ॥
ପିଟ୍ଠସପ୍ପିନମନ୍ୱାନଂ, ସାଲାୟୋ ଚ ତହିଂ ତହିଂ ।
କାରେସି ସହ ଭୋଗେନ, ସାଲାୟୋ ଚ ମହାପଥେ ॥
ନିଚ୍ଚମସ୍ସୋସି ସଦ୍ଧମ୍ମଂ, ସକ୍କତ୍ୱା ଧମ୍ମଭାଣକେ ।
ଧମ୍ମଭାଣକୱଟ୍ଟଞ୍ଚ, ପଟ୍ଠପେସି ତହିଂ ତହିଂ ॥
ସାଟକନ୍ତରତୋ କତ୍ୱା, ସତ୍ଥ ୱଟ୍ଟିଂ ମହାଦୟୋ ।
ଦିଟ୍ଠେ ଦିଟ୍ଠେ ପମୋଚେସି, ଦୁକ୍ଖମ୍ହା ଦୁକ୍ଖିତେ ଜନେ ॥
ଅଥେକ ଦିୱସଂ ରାଜା, ରାଜାଭରଣ ମଣ୍ଡିତୋ ।
ସଦ୍ଧିଂ ଗଚ୍ଛତି ସେନାୟ, ଦେୱେହି ୱିୟ ୱାସୱୋ ॥
ତଂ ଦିସ୍ୱା ସିରିସୋଭଗ୍ଗ-ମଗ୍ଗଂ ପତ୍ତଂ ମହୀ ପତିଂ ।
ରାଜିଦ୍ଧିହି ୱିରାଜନ୍ତଂ, ବଦ୍ଧୱେରୋ ଭୱନ୍ତରେ ॥
କୁଟ୍ଠି ଏକୋ ପକୁପ୍ପିତ୍ୱା, ହଟ୍ଠେନାହନିୟା’ୱତିଂ ।
ପୋଥେନ୍ତୋ ତଞ୍ଚ ପୋଥେନ୍ତୋ, ଭୂମିଂ କତ୍ତରୟଟ୍ଠିୟା ॥
ଅକ୍କୋସେସି ଅନେକେହି, ଅକ୍କୋସୱଚନେହି ଚ ।
ୱିପ୍ପକାରଂମିମଂ ଦିସ୍ୱା, ଦୂରତୋ’ୱ ମହୀପତି ॥
‘‘ନାହଂ ସରାମି ସତ୍ତସ୍ସ, କସ୍ସା’ପି କତମପ୍ପିୟଂ ।
ପୁବ୍ବୱେରୀ ଅୟଂ ଜାତୁ, ନିବ୍ବାପେସ୍ସାମିତଂ’’ ଇତି ॥
ଅଣାପେସି ସମୀପଟ୍ଠଂ, ପୁରିସଂ ‘‘ଗଚ୍ଛ କୁଟ୍ଠିନୋ ।
ଅମୁକସ୍ସା’ଭିଜାନାହି, ଚିତ୍ତାଚାର’’ନ୍ତି ସୋ ତତୋ ॥
ସହାୟୋ ୱିୟ କୁଟ୍ଠିସ୍ସ, ସମୀପମ୍ହି ନିସୀଦିୟ ।
‘‘ରୁଟ୍ଠୋ କିମତ୍ଥଂ ଭୋ ତ୍ୱ’’ନ୍ତି, ପୁଚ୍ଛି ସବ୍ବମୱୋଚ ସୋ ॥
‘‘ଦାସୋ ମେ ବୁଦ୍ଧଦାସୋ’ୟଂ, ରାଜାହୁ ପୁଞ୍ଞକମ୍ମୁନା ।
ଅୱମଞ୍ଞାୟ ମଂ ମୟ୍ହଂ, ପରତୋ ତୋ ୟାତି ହତ୍ଥିନା ॥
ଜାନାପେସ୍ସାମି ଅତ୍ତାନଂ, କତିପାହେନ ସୋୟଦି ।
ହତ୍ଥଂ ମେ ଏତି କାରେତ୍ୱା, ସବ୍ବଂ ଦାସାନ ନିଗ୍ଗହଂ ॥
ନୋ ଚେ ହତ୍ଥଂ ମମା’ୟାତି, ମାରେତ୍ୱା ଗଲଲୋହିତଂ ।
ପିୱିସ୍ସାମି ନ ସନ୍ଦେହୋ, ନ ଚିରେନେୱ ପସ୍ସସି’’ ॥
ସୋ ଗନ୍ତ୍ୱା ନରପାଲସ୍ସ, ପୱତ୍ତିଂ ତଂ ନିୱେଦୟି ।
‘‘ପୁବ୍ବୱେରି ମମାୟନ୍ତି, ନିଚ୍ଛିନିତ୍ୱା ମହାମତି ॥
ୱିନୋ ଦେତୁମୁପାୟେନ, ପୁତ୍ତଂୱେରନ୍ତି ୱେରିନୋ ।
‘‘ସାଧୁ ସଙ୍ଗଣୁତଂ ତ୍ୱ’’ନ୍ତି, ପୁରିସଂ ତଂ ନିୟେଜୟି ॥
ସୋ କୁଟ୍ଠିମୁପସଙ୍କମ୍ମ, ସହାୟୋ ପିୟ ଆହତଂ ।
‘‘ରାଜାନଂ ତଂ ୱିନାସେତୁଂ, ଚେତେତ୍ୱା କାଲମେତ୍ତକଂ ॥
ଅଲଭନ୍ତୋ ସହାୟଂ ମେ, ନାସକ୍ଖି ତସ୍ସ ଘାତନେ ।
ଲଦ୍ଧାତୁମ୍ହେ ନୟିସ୍ସାମି, ମତ୍ଥକଂ ମେ ମନୋରଥଂ ॥
ଏଥ ଗେହେ ୱସିତ୍ୱା ମେ, ହୋଥ ମେ ଅନୁୱତ୍ତକା ।
ଅହମେୱ’ସ୍ସ ନାସେମି, କତିପାହେନ ଜୀୱିତଂ ॥
ଇତି ୱତ୍ୱାନ ତଂ କୁଟ୍ଠଂ, ନେତ୍ୱା ସୋ ଘରମତ୍ତନୋ ।
ସୁନ୍ହାତ ସୁୱିଲିତ୍ତଞ୍ଚ, ନିୱତ୍ଥସୁଖୁମମ୍ବରଂ ॥
ସୁଭୁତ୍ତମଧୁରାହାରଂ, ୟୋବ୍ବନିତ୍ଥିକଥାଦରଂ ।
ସୟାପେସି ମନୁଞ୍ଞମ୍ହି, ସୟନେ ସାଧୁ ସନ୍ଥତେ ॥
ଏତେ ନେୱ ନିୟାମେନ, କତିପାହଂ ନୀୱାସିୟ ।
ଞତ୍ୱା ତଂ ଜାତୱିସ୍ସାସଂ, ସୁଖିତଂ ପିଣିତିନ୍ଦ୍ରିୟଂ ॥
‘‘ରଞ୍ଞୋ ଦିନ୍ନ’’ନ୍ତି ୱତ୍ୱାନ, ଖଜ୍ଜଭୋଜ୍ଜାଦିକଂ ଅଦା ।
ଦ୍ୱତ୍ତିକ୍ଖତ୍ତୁଂ ନିସେଧେତ୍ୱା, ତେନ’ଜ୍ଝିଟ୍ଠୋ ନମଗ୍ଗହି ॥
ଭୂପାଲେନ କମେନା’ସି, ୱିସ୍ସତ୍ଥୋ’ତିୱ ଭୂମିପୋ ।
ମତୋତି ସୁତ୍ୱା ତସ୍ସା-ସି ହଦୟଂ ଫଲିତଂ ଦ୍ୱିଧା ॥
ଏୱଂ ରୋଗେ ତିକିଚ୍ଛେସି, ରାଜା ସାରୀରମାନସେ ।
ଠପେସି ୱେଜ୍ଜେ ଦୀପସ୍ସ, ତିକଚ୍ଛତ୍ଥ ମନାଗତେ ॥
ପଞ୍ଚୱୀସତିହତ୍ଥେନ, ପାସାଦେ ନୋପସୋଭିତଂ ।
ମହାୱିହାରେମୋରୱ୍ହ-ପରିୱେଣମକାରୟି ॥
ସମଣଂ ଗୋଳପାନୁଞ୍ଚ, ଅଦା ଗାମଦ୍ୱୟଂ ତହିଂ ।
ଧମ୍ମଘାସକ ଭିକ୍ଖୂନଂ, ଭୋଗେ କପ୍ପିୟକାରକେ ॥
ୱିହାରେ ପରିୱେଣେ ଚ, ସମ୍ପନ୍ନ ଚତୁପଚ୍ଚୟେ ।
ୱାପିୟୋ ଦାନସାଲାୟୋ, ପଟିମାୟୋଚ କାରୟି ॥
ତସ୍ସେୱ ରଞ୍ଞୋ ରଜ୍ଜମ୍ହି, ମହାଧମ୍ମକଥୀୟତି ।
ସୁତ୍ତାନି ପରିୱତ୍ତେସି, ସୀହଳାୟନିରୁତ୍ତିୟା ॥
ଅଭୀତି ପୁତ୍ତା ତସ୍ସା’ସୁଂ, ସୂରାୱିରଙ୍ଗରୂପିନୋ ।
ଅସୀତିୟା ସାୱକାନଂ, ନାମକାୟିପଦସ୍ସନା ॥
ସାରିପୁତ୍ତାଦିନାମେହି, ପୁତ୍ତେହି ପରିୱାରିତୋ ।
ବୁଦ୍ଧଦାସୋ ସସମ୍ବୁଦ୍ଧ-ରାଜାୱିୟ ୱିରୋଚଥ ॥
ଏୱଂ କତ୍ୱା ହିତଂଦୀପ-ୱୀସୀନଂ ତିଦିୱଂ ଗତୋ ।
ୱସ୍ସେ ଏକୂନତିଂସମ୍ହି, ବୁଦ୍ଧଦାସୋ ନରାଧିପୋ ॥
ତତୋ ଜେଟ୍ଠସୁତୋ ତସ୍ସ, ଉପତିସ୍ସୋ’ସି ଭୂପତି ।
ସବ୍ବରାଜଗୁଣୋପେସୋ, ନିଚ୍ଚସୀଲୋ ମହାଦୟୋ ॥
ଦସାପୁଞ୍ଞକ୍ରିୟାହିତ୍ୱା, ଦସପୁଞ୍ଞକ୍ରିୟା’ଦୀୟି ।
ରାଜଧମ୍ମେଚ ପୂରେସି, ରାଜପାରମିତା ଦସ ॥
ଗଣ୍ହି ସଙ୍ଗହୱତ୍ଥୂହି, ଚଥୂହି ଚ ଚତୁଦ୍ଦିସଂ ।
ମହାପାଳିମ୍ହି ଦାପେସି, ରାଜାରାଜାନୁଭୋଜନଂ ॥
ଉତ୍ତରମ୍ହି ଦିସାଭାଗେ, ଚେତିୟମ୍ହା ତୁ ମଙ୍ଗଲା ।
ଥୂପଞ୍ଚ ପଟିମାଗେହଂ, ପଟିମଞ୍ଚା’ପି କାରୟି ॥
କରୋନ୍ତୋ ତଞ୍ଚ ସୋ ରାଜା, ମାଖିଜ୍ଜନ୍ତୁ ଜନା ଇତି ।
କାରାପେସି କୁମାରେହି, ଦାପେତ୍ୱା ଗୁଳକଣ୍ଡୁଲଂ ॥
ରାଜୁପ୍ପଲୱ୍ହୟଂ ଗିଜ୍ଝ-କୂଟଂ ପୋକ୍ଖରପାସୟଂ ।
ୱାଲାହସ୍ସଞ୍ଚ ଅମ୍ବୁଟ୍ଠିଂ, ଗୋଣ୍ଡିଗୋମମ୍ହି ୱାପିକଂ ॥
ୱିହାରଂ ଖଣ୍ଡରାଜିଞ୍ଚ, ୱାପିୟୋ ଚ ଥିରୋଦିକା ।
ଅପ୍ପମାଣାନି ପୁଞ୍ଞାନି, କାରାପେସି ତହିଂ ତହିଂ ॥
ୱସ୍ସାମାନେପି ସୋ ୱସ୍ସେ, ସୟନେ ସନ୍ନିସିନ୍ନକୋ ।
କେୱଲଂ ପରିଣାମେସି, ରତ୍ତିଂ ‘‘ଖେଦୋ ଜନସ୍ସୀ’’ତି ॥
ଞତ୍ୱା ଅମଚ୍ଚୋ ତଂ ନେତ୍ୱା, ଉୟ୍ୟାନଂ ଜାଦୟୀଘରଂ ।
ଏୱଂ ପଟିଚ୍ଚ ଅତ୍ତାନଂ, ଦୁକ୍ଖଂ ନାକାସି ପାଣିନଂ ॥
କାଲେ ତସ୍ସା’ସୀ ଦୁକ୍ଖିତ୍ତ-ରୋଗଦୁକ୍ଖେହି ପୀଳିତୋ ।
ଦୀପୋ ଦୀପୋ ପମୋପାପ-ତମସୋ ସୋ ସୁମାନସୋ ॥
ଭିକ୍ଖୂ ପୁଚ୍ଛିତ୍ଥ’’କିଂଭନ୍ତେ, ଦୁବ୍ଭିକ୍ଖାଦିଭୟଦ୍ଦିତେ ।
ଲୋକେ ଲୋକହିତଂ ନତ୍ଥି, କତଂ କିଞ୍ଚି ମହେସୀନା ॥
ଗହ୍ଘାରୋହଣସୁତ୍ତସ୍ସ, ଉପ୍ପତ୍ତିଂତସ୍ସ ନିଦ୍ଦିସୁଂ ।
ସୁତ୍ୱା ତଂ ସବ୍ବସୋୱଣ୍ଣଂ, ବିମ୍ବଂ ସମ୍ବୁଦ୍ଧଧାତୁନୋ ॥
କତ୍ୱା ସତ୍ଥୁସିଲାପତ୍ତଂ, ସୋଦକଂ ପାଣିସମ୍ପୁଟେ ।
ଠପେତ୍ୱା ତସ୍ସ ତେ ରୂପ-ମାରୋପେତ୍ୱା ମହାରଥଂ ॥
ସୟଂ ସୀଲଂ ସମାଦାୟ, ସମାଦେତ୍ୱା ମହାଜନଂ ।
ମହାଦାନଂ ପୱତ୍ତେତ୍ୱା, ଅଭୟଂ ତମ୍ବପାଣିନଂ ॥
ଅଲଙ୍କତ୍ୱା ଚ ନଗରଂ, ଦେୱଲୋକମନୋହରଂ ।
ଦୀପୱାସୀହି ସବ୍ବେହି, ଭିକ୍ଖୂହି ପରିୱାରିତୋ ॥
ଓତରିତ୍ଥ ମହାୱୀଥିଂ, ଭିକ୍ଖୂ ତତ୍ଥ ସମାଗତା ।
ଭଣନ୍ତା ରତନଂ ସୁତ୍ତଂ, ସିଞ୍ଚମାନା ଜଲଂ ତଥା ॥
ରାଜଗେହନ୍ତିକେ ୱୀତି-ମଗ୍ଗେ ପାକାରସନ୍ତିକେ ।
ୱିଚରିଂସୁ ତିୟାମନ୍ତେ, କୁରୁମାନା ପଦକ୍ଖିଣଂ ॥
ଭିଜ୍ଜମାନେ’ରୁଣେ ୱସ୍ସି, ମହାମେଘୋ ମହୀତଲେ ।
ରୋଗାତୁରାଚ ସବ୍ବେପି, ସୁଖିତାକଂସୁ ଉସ୍ସୱଂ ॥
‘‘ୟଦା ଦୁବ୍ଭିକ୍ଖରୋଗାଦି-ଭୟଂ ଦୀପମ୍ହି ହେସ୍ସତି ।
ଏୱମେୱ କରୋନ୍ତୂ’’ତି, ନିୟୋଜେସି ନରାଧିପୋ ॥
ଆରୁଳ୍ହୋ ଚେତିୟଂ କୁନ୍ତ-କିପିଲ୍ଲାଦିମୱେକ୍ଖିୟ ।
ପୁଚ୍ଛିତ୍ୱା ମୋରପିଞ୍ଚେନ, ‘‘ସଣିକଂ ୟନ୍ତୁୱନଂତି ଚ ॥
ସଙ୍ଖଂ ସୋଦକମାଦାୟ, ଚରତା’ସନଧୋୱନେ ।
ଦକ୍ଖିଣପରିତୋଣମ୍ହି, କାରେତ୍ୱା ରାଜଗେହତୋ ॥
ଉପୋସଥଘରଂ ବୁଦ୍ଧ-ପଟିମାଗେହ ମେୱ ଚ ।
ପାକାରେନ ପରିକ୍ଖିତ୍ତଂ, ଉୟ୍ୟାନଞ୍ଚ ମନୋରମଂ ॥
ଚାତୁଦ୍ଦସିଂପଞ୍ଚଦସିଂ, ୟା ଚ ପକ୍ଖସ୍ସ ଅଟ୍ଠମୀ ।
ପାଟିହାରିୟପକ୍ଖଞ୍ଚ, ଅଟ୍ଠଙ୍ଗସମୁପାଗତଂ ॥
ଉପୋସଥଂସମାଦାୟ, ସାପଦାନଂ ତହଂ ୱସୀ ।
ୟାୱଜୀୱଞ୍ଚ ସୋ ଭୁଞ୍ଜି, ମହାପାଳିମ୍ହି ଭୋଜନଂ ॥
ଚରନ୍ତୋଚକଲନ୍ଦାନ ମୁୟ୍ୟାନେ ଭତ୍ତମତ୍ତନୋ ।
କତ୍ୱା ନିୱାପଂ ଦାପେସି, ତଦଜ୍ଜାପି ଚ ୱତ୍ତତି ॥
ଚୋରଂ ୱଜ୍ଜମୁପନୀତଂ, ଦିସ୍ୱା ସଂୱିଗ୍ଗମାନସୋ ।
ଛୱଂ ସୁସାନଂ ଆନେତ୍ୱା, ଖିପିତ୍ୱା ଲୋହକୁମ୍ଭିୟଂ ॥
ଦତ୍ୱା ଧମଂ ପଲାପେତ୍ୱା, ଚୋରଂ ରତ୍ତିୟମୁଗ୍ଗତେ ।
ସୂରିୟେ କୁଜ୍ଝିତୋ ଚୋରଂ-ୱିୟଝାପୟି ତଂ ଛୱଂ ॥
ଅକା ଦୀପମ୍ହି ସବ୍ବେସଂ, ଚେତିୟାନଂ ମହାମହଂ ।
ଥୂପାରାମେ ଚ ଥୂପସ୍ସ, ହେମଚୁମ୍ବଟକଞ୍ଚୁକଂ ॥
ଦ୍ୱାଚତ୍ତାଲୀସୱସ୍ସାନି, କତ୍ୱା ୱଞ୍ଚୁଂଖଣମ୍ପିସୋ ।
କତ୍ୱା ପୁଞ୍ଞମୁପାଗଞ୍ଛି, ଦେୱରାଜସହବ୍ୟତଂ ॥
ରଞ୍ଞୋ ତସ୍ସ କନିଟ୍ଠେନ, ମହାନାମେନ ୱଲ୍ଲଭା ।
ଦେୱୀ ସତ୍ଥଂ ନିପାତେତ୍ୱା, ତମଠାନମ୍ହି ମାରୟି ॥
ପବ୍ବଜିତ୍କା କନିଟ୍ଠୋ ସୋ, ଜୀୱମାନମ୍ହି ଭାତରି ।
ହତେ ରାଜିନି ଭୀତାୟ, ଆୱତ୍ତିତ୍ୱା’ସି ଭୂପତି ॥
ମହେସିଂଅତ୍ତନୋ’କାସି, ମହେସିଂ ଭାତୁଘାତିନିଂ ।
ଗିଲାନସାଲା କାରେସି, ମହାପାଳିଞ୍ଚ ୱଡ୍ଢୟି ॥
ଲୋହଦ୍ୱାର ରଲଗ୍ଗାମ-କୋଟିପସ୍ସୱନୱ୍ହୟେ ।
ତୟୋ ୱିହାରେ କତ୍ୱା’ଦା, ଭିକ୍ଖୂନମଭୟୁତ୍ତରେ ॥
ୱିହାରଂ କାରୟିତ୍ୱାନ, ଧୁମରକ୍ଖମ୍ହି ପବ୍ବତେ ।
ମହେସିୟା ନୟେନା’ଦା, ଭିକ୍ଖୂନଂ ଥେରୱାଦୀନଂ ॥
ନୱକମ୍ମଞ୍ଚ ଜିଣ୍ଣେସୁ, ୱିହାରେସୁ ସକାରୟି ।
ଦାନସୀଲରତୋ ୱତ୍ଥୁ-ପୂଜକୋ ଚ ଅହୁ ସଦା ॥
ବୋଧିମଣ୍ଡସମୀପମ୍ହି, ଜାତୋ ବ୍ରୋହ୍ମଣମାଣୱୋ ।
ୱିଜ୍ଜାସିପ୍ପକଲାୱେଦୀ, ତୀସୁ ୱେଦେସୁ ପାରଗୋ ॥
ସମ୍ମାୱିଞ୍ଞାତସମୟୋ, ସବ୍ବୱାଦୱିସାରଦୋ ।
ୱାଦତ୍ଥି ଜମ୍ବୁଦୀପମ୍ହି, ଆହିଣ୍ଡନ୍ତୋ ପୱାଦିକୋ ॥
ୱିହାରମେକଂ ଆଗମ୍ମ, ରତ୍ତିଂ ପାତଞ୍ଜଲଂ ମତଂ ।
ପରିୱତ୍ତେସି ସମ୍ପୁଣ୍ଣ-ପଦଂ ସୁପରିମଣ୍ଡଲଂ ॥
ତତ୍ଥେକୋ ରେୱତୋନାମ, ମହାଥେରୋ ୱିଜାନିୟ ।
‘‘ମହାପଞ୍ଞୋ ଅୟଂ ସତ୍ଥୋ, ଦମେତୁଂ ୱଟ୍ଟତୀ’’ତି ସୋ ॥
‘‘କୋ ନୁ ଗଦ୍ରଭରାୱେନ, ୱିରୱନ୍ତୋ’’ତି ଅବ୍ରୱି ।
‘‘ଗଦ୍ରଭାନଂ ରୱେ ଅତ୍ଥଂ, କିଂ ଜାନାସୀ’’ତି ଆହତଂ ॥
‘‘ଅହଂ ଜାନେ’’ତି ୱୁତ୍ତୋସୋ, ଓତାରେସି ସକଂ ମତଂ ।
ୱୁତ୍ତଂ ୱୁତ୍ତଂ ୱିୟାକାସି, ୱିରୋଧମ୍ପି ଚ ଦସ୍ସୟି ॥
‘‘ତେନହି ତ୍ୱଂ ସକୱାଦ-ମୋତାରେହୀ’’ତି ଚୋଦିତୋ ।
ପାଳିମାହା’ଭିଧମ୍ମସ୍ସ, ଅତ୍ଥମସ୍ସ ନ ସୋ’ମିଗା ॥
ଆହ କସ୍ସେ’ସମନ୍ତୋ’ତି, ବୁଦ୍ଧମନ୍ତୋ’ତି ସୋବ୍ରୱି ।
‘‘ଦେହି ମେ ତ’’ନ୍ତି ୱୁତ୍ତେହି, ‘‘ଗଣ୍ହୁ ପବ୍ବଜ୍ଜତଂ’’ଇତି ॥
ମନ୍ତତ୍ଥୀ ପବ୍ବଜିତ୍ୱାସୋ, ଉଗ୍ଗଣ୍ହି ପିଟକତ୍ତୟଂ ।
‘‘ଏକାୟନୋ ଅୟଂ ମଗ୍ଗୋ’’, ଇତି ପଚ୍ଛା ତମଗ୍ଗହି ॥
ବୁଦ୍ଧସ୍ସ ୱିୟ ଗମ୍ଭୀର-ଘୋସତ୍ତାତଂ ୱିୟାକରୁଂ ।
‘‘ବୁଦ୍ଧଘୋସୋ’’ତି ଘୋସୋହି, ବୁଦ୍ଧୋ ୱିୟ ମହୀତଲେ ॥
ତତ୍ଥ ଞାଣୋଦୟଂ ନାମ, କତ୍ୱା ମକରଣଂ ତଦା ।
ଧମ୍ମସଙ୍ଗଣୀୟା’କାସି, କଚ୍ଛଂ ସୋ ଅଟ୍ଠସାଲିନିଂ ॥
ପତିତ୍ତଟ୍ଠକଥଞ୍ଚେୱ, କାରାମାରଭିବୁଦ୍ଧିମା ।
ତଂ ଦିସ୍ୱା ରେୱତୋ ଥେରୋ, ଇଦଂ ୱଚନମବ୍ରୁୱି ॥
ପାଳିମତ୍ତଇଧାନିତଂ, ନତ୍ଥି ଅଟ୍ଠକଥା ଇଧ ।
ତଥାଚରିୟୱାଦା ଚ, ଭିନ୍ନରୂପା ନ ୱିଜ୍ଜରେ ॥
ସୀହଳାଟ୍ଠକଥା ସୁଦ୍ଧା, ମହିନ୍ଦେନ ମତୀମତା ।
ସଂଗୀତିତ୍ତୟମାରୁଳଂ, ସମ୍ମାସମ୍ବୁଦ୍ଧଦେସିତଂ ॥
ସାରିପୁତ୍ତାଦିଗୀତଞ୍ଚ, କଥାମଗ୍ଗଂ ସମେକ୍ଖିୟ ।
ଏକା ସୀହଳଭାସାୟ, ସୀହଳେସୁ ପୱତ୍ତତି ॥
ତଂ ତତ୍ଥ ଗନ୍ତ୍ୱା ସୁତ୍ୱା ତଂ, ମାଗଧାନଂ ନିରୁତ୍ତିୟା ।
ପରିୱତ୍ତେସି ସା ହୋତି, ସବ୍ବଲୋକହିତା ୱହା ॥
ଏୱଂ ୱୁତ୍ତୋ ପସନ୍ନୋ ସୋ, ନିକ୍ଖମିତ୍ୱା ତତୋଇମଂ ।
ଦୀପମାଗା ଇମସ୍ସେୱ, ରଞ୍ଞୋକାଲେ ମହାମତି ॥
ମହାୱିହାରଂ ସମ୍ପତ୍ତୋ, ୱିହାରଂ ସବ୍ବସାଧୂନଂ ।
ମହାପଧାନଘରଂ ଗନ୍ତ୍ୱା, ସଙ୍ଘପାଲସ୍ସ ସନ୍ତିକା ॥
ସୀହଳଟ୍ଠକଥା ସୁଦ୍ଧା, ଥେରୱାଦଞ୍ଚ ସବ୍ବସୋ ।
‘‘ଧମ୍ମସାମିସ୍ସ ଏସୋୱ, ଅଧିପ୍ପାୟୋ’’ତି ନିଚ୍ଛିୟ ॥
ତତ୍ଥ ସଙ୍ଘଂ ସମାନେତ୍ୱା, ‘‘କାତୁମଟ୍ଠକଥାମମ ।
ପୋତ୍ଥକେ ଦେଥ ସବ୍ବେ’’ତି, ଆହ ୱୀମଂସିତୁଂ ସତଂ ॥
ସଙ୍ଘୋ ଗାଥାଦ୍ୱୟଂ ତସ୍ସା-ଦାସି ‘‘ସାମତ୍ତିୟଂ ତୱ ।
ଏତ୍ଥ ଦସ୍ସେହି ତଂ ଦିସ୍ୱା, ସବ୍ବେ ଦେମା’’ତି ପୋତ୍ଥକେ ॥
ପିଟକତ୍ତୟମେତ୍ଥେୱ, ସଦ୍ଧିମଟ୍ଠକଥାୟ ସୋ ।
ୱିସୁଦ୍ଧିମଗ୍ଗ ନାମାକା, ସଙ୍ଗହେତ୍ୱା ସମାସତୋ ॥
ତତୋ ସଙ୍ଘଂ ସମୁହେତ୍ୱା, ସମ୍ବୁଦ୍ଧମତକୋୱିଦଂ ।
ମହାବୋଧିସମୀପମ୍ହି, ସୋ ତଂ ୱାଚେତୁମାରଭି ॥
ଦେୱତା ତସ୍ସ ନେପୁଞ୍ଞଂ, ପକାସେତୁଂ ମହାଜନେ ।
ଛାଦେସୁଂ ପୋତ୍ଥକଂସୋ’ୟି, ଦ୍ୱତ୍ତିକ୍ଖତ୍ତୁମ୍ପି ତଂ ଅକା ॥
ୱାଚେତୁଂ ତତିୟେ ୱାରେ, ପୋତ୍ଥକେ ସମୁଦାହଟେ ।
ପୋତ୍ଥକଦ୍ୱୟମଞ୍ଞମ୍ପି, ସଣ୍ଠାପେସୁଂ ତହିଂ ମରୂ ॥
ୱାଚୟିଂସୁ ତଦାଭିକ୍ଖୂ, ପୋତ୍ଥକତ୍ତୟ ମେକତୋ ।
ଗନ୍ଥତୋ ଅତ୍ଥତୋ ଚାପି, ପୁବ୍ବାପରୱସେନ ୱା ॥
ଥେରୱାଦେହି ପାଳିହି, ପଦେହି ବ୍ୟଞ୍ଜନେହି ଚ ।
ଅଞ୍ଞତ୍ଥତ୍ତମହୂନେୱ, ପୋତ୍ଥତ୍ଥକେସୁପି ତୀସୁପି ॥
ଅଥ ଉଗ୍ଘୋସୟି ସଙ୍ଘୋ, ତୁଟ୍ଠହଟ୍ଠୋ ତିସେସତୋ ।
‘‘ନିସ୍ସଂସୟା’ୟଂ ମେତ୍ତେୟ୍ୟୋ’’, ଇତି ୱତ୍ୱା ପୁନପ୍ପୁନଂ ॥
ସଦ୍ଧିମଟ୍ଠକଥାୟା’ଦା, ପୋତ୍ଥକେ ପିଟକତ୍ତୟେ ।
ଗନ୍ଥକାରେ ୱସନ୍ତୋ ସୋ, ୱିହାରେ ଦୁରସଙ୍କରେ ॥
ପରିୱତ୍ତେସି ସବ୍ବାପି, ସୀହଳଟ୍ଠକଥା ତଦା ।
ସବ୍ବେସଂ ମୂଲଭାସାୟ, ମାଗଧାୟ ନିରୁତ୍ତିୟା ॥
‘‘ସତ୍ତାନଂ ସବ୍ବଭାସାନଂ, ସା ଅହୋସି ହିତାୱହା ।
ଥେରିୟା ଚରିୟାସବ୍ବେ, ପାଳିଂୱିୟ ତମଗ୍ଗୟ୍ହଂ ॥
ଅଥ କତ୍ତବ୍ବକିଚ୍ଚେସୁ, ଗହେତୁ ପରିନିଟ୍ଠିତିଂ ।
ୱନ୍ଦିତୁଂ ସୋ ମହାବୋଧିଂ, ଜମ୍ବୁଦୀପମୁପାଗମି ॥
ସୁତ୍ୱା ଦ୍ୱାୱୀସୱସ୍ସାନି, ମହାନାମୋ ମହାମହିଂ ।
କତ୍ୱା ପୁଞ୍ଞାନି ଚିତ୍ରାନି, ୟଥା କମ୍ମମୁଗାଗମି ॥
ସବ୍ବେ’ପେ ତେ ଧରଣୀପତୟୋ ମଚ୍ଚୁମଚ୍ଚେତୁମନ୍ତେ,
ନୋ ସକ୍ଖିଂ ସୂପଚିତସୁଖବଲାସାଧୁ ସମ୍ପନ୍ନଭୋଗୋ ।
ଏୱଂ ସବ୍ବେ ନିଧନୱସଗା ହୋନ୍ତି ସତ୍ତା’ତି ନିଚ୍ଚଂ,
ରାଗଂ ସମ୍ମା ୱିନୟତୁଧନେ ଜୀୱିତେ ଚାପି ଧୀମା ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପଞ୍ଚରାଜକୋ ନାମ
ସତ୍ତତିଂସତିମୋ ପରିଚ୍ଛେଦୋ ।
ଅଟ୍ଠତିଂସତିମ ପରିଚ୍ଛେଦ
ଦସରାଜକୋ
ମହାନାମ ସୁତୋ ଆସି, ଦମିଳୀ କୁଚ୍ଛିସମ୍ଭୱୋ ।
ସୋତ୍ଥିସେନୋ, ତଥାସଙ୍ଘୋ-ଧୀତା ଚା’ସି ମହେସିୟା ॥
ସୋତ୍ଥିସେନୋ ତଦା ରଜ୍ଜଂ, ପତ୍ୱା ସଙ୍ଘୟନାସିତୋ ।
ତସ୍ମିଂୟେୱ ଦିନେ ଭେରିଂ, ଚରାପେତ୍ୱା ତଦା ତୁ ସା ॥
ଅତ୍ତନୋ ସାମିକସ୍ସଦା, ଛତ୍ତଗ୍ଗାହକଜନ୍ତୁନୋ ।
ଛତ୍ତଗ୍ଗାହକୱାପିଂ ସୋ, କତ୍ୱା ସଂୱଚ୍ଛରେ ମତୋ ॥
ଅଥ ମଚ୍ଚୋ ମହାପଞ୍ଞୋ, ସହାୟୋ ତସ୍ସ ତଂ ମତଂ ।
ଅନ୍ତୋୱତ୍ଥୁମ୍ହି ଝାପେତ୍ୱା, ୱୀହିଚୋରଂ ମହାବଲଂ ॥
ରଜ୍ଜୟୋଗ୍ଗୋତି ଚିନ୍ତେତ୍ୱା, କତ୍ୱା ତଂ ଭୂପତିଂ ରହୋ ।
ଅନ୍ତୋୟେୱ ନିୱାସେତ୍ୱା, ରାଜା ରୋଗାତୁରୋ ଇତି ॥
ୟସଂ ରଜ୍ଜଂ ୱିଚାରେସି, ଛଣେ ପତ୍ତେ ମହାଜନା ।
ରାଜା ଚେ ଅତ୍ଥି ଅମ୍ହେହି, ସଦ୍ଧିଂ ମେତୂତି ଘୋସୟୁଂ ॥
ତଂ ସୁତ୍ୱା ନରପାଲୋ ସୋ, ସବ୍ବଲଙ୍କାରମଣ୍ଡିତୋ ।
ସମାନଂତେ ମହାନାଗେ, ନେସୟୋଗ୍ଗା ମମା’ତିସୋ ॥
ଦାଟ୍ଠାଧାତୁଘରଠାନେ, ସୁୱା ନାଗଂ ସମାଦିସି ।
ରଞ୍ଞୋ ଆଣାତି ୱୁତ୍ତେ ସୋ, ଅଗା ଆରୁୟ୍ହ ତଂ ପୁରଂ ॥
କତ୍ୱା ପଦକ୍ଖିଣଂ ଗନ୍ତ୍ୱା, ପାଚିନଦ୍ୱାରତୋ ବହି ।
ପଠମେ ଚେତିୟଠାନେ, ଧାତୁନାଗଂ ସମପ୍ପୟି ॥
ମହାଚେତିତ୍ତୟେ ହତ୍ଥି-ପାକାରେ’କାସି ତୋରଣଂ ।
ମିତ୍ତସେନୋ ବହୁଂ ପୁଞ୍ଞଂ, କତ୍ୱା ୱସ୍ସେନ ସୋ ଚୁତୋ ॥
ମିତ୍ତସେନଂ ରଣେ ହନ୍ତ୍ୱା, ଦମିଳୋ ପଣ୍ଡୁନାମକୋ ।
ଆଗତୋ ପରତୀରମ୍ହା, ଲଙ୍କାରଜ୍ଜମକାରୟି ॥
ଜନା କୁଲୀନା ସବ୍ବେପି, ରୋହଣଂ ସମୁପାଗତା ।
ଓରଗଙ୍ଗାୟ ଇସ୍ସେରଂ, ଦମିଳା ଏୱ କପ୍ପୟୁଂ ॥
ୟେ ସୁଭସ୍ସ ବଲଟ୍ଠସ୍ସ, ଭୀତାମୋରିୟୱଂସଜା ।
ବଲାୟିତ୍ୱା ନରାୱାସଂ, କପ୍ପୟିଂସୁ ତହିଂ ତହିଂ ॥
ତେସମଞ୍ଞତମୋ ନନ୍ଦି-ୱାପି ଗାମେ କୁଟିମ୍ବକୋ ।
ଧାତୁସେନୱ୍ହୟୋ ଆସି, ଦାଠାନାମୋ ଚ ତଂ ସୁତୋ ॥
ଗାମେ ଅମ୍ବିଲୟାଗୁମ୍ହି, ୱସଂ ପୁତ୍ତେ ଦୁୱେ ଲଭି ।
ଧାତୁସେନଂ ସିଲାତିସ୍ସ-ବୋଧିଂଚ ସମ୍ପଜାତିକେ ॥
ମାତୁସୋ ଦରିୟୋ ତେସଂ, ସଦ୍ଧୋ ପବ୍ବଜ୍ଜ ୱତ୍ତତି ।
ଦୀଘସନ୍ଦକତାୱାସେ, ଧାତୁସେନାପି ମାଣୱୋ ॥
ସନ୍ତିକେ ତସ୍ସ ପବ୍ବଜ୍ଜ-ରୁକ୍ଖମୂଲମ୍ହି ଏକଦା ।
ସଜ୍ଝାୟତି ପୱିସ୍ସିତ୍ଥ, ମେଘୋ ନାଗୋତୁପସ୍ସିୟ ॥
ପରିକ୍ଖିପିତ୍ୱା ଭୋଗେହି, ଛାଦୟିତ୍ୱା ଫଣେନ ଚ ।
ପୋତ୍ଥକଞ୍ଚ କୁମାରଞ୍ଚ, ରକ୍ଖିତଂ ପସ୍ସି ମାତୁଲୋ ॥
ସୀସେ ଆକିରି ସଙ୍କାରଂ, ତସ୍ସ ରୁଟ୍ଠୋ ପରୋୟତି ।
ତସ୍ମିଂ ଚିତ୍ତଂ ନ ଦୂସେସି, ତମ୍ପି ଦିସ୍ୱାନ ମାତୁଲୋ ॥
ଉତ୍ତମୋ ୱତ’ୟଂ ସତ୍ତୋ, ରାଜା ହେସ୍ସତି ନିଚ୍ଛୟଂ ।
ରକ୍ଖିତବ୍ବୋ’ତି ଆଦାୟ, ତଂ ୱିହାରମୁପାଗତୋ ॥
ଗୋଣିସାଦି ୱିହାରେ’ୟଂ, କତ୍ତବ୍ବୋ ନୀତିମା ଇତି ।
ସିକ୍ଖାପେସି କୁମାରଂ ତଂ, ପଣ୍ଡୁକୋ ତଂ ୱିଜାନିୟ ॥
ଗଣ୍ହଥେତନ୍ତିପେସେସି, ସେୱକେ ତସ୍ସାରତ୍ତିୟଂ ।
ଦିସ୍ୱାନ ସୁପିନଂ ଥେରୋ, ନୀହରିତ୍ଥ କୁମାରକଂ ॥
ତସ୍ମିଂ ନିକ୍ଖନ୍ତମତ୍ତମ୍ହି, ସେୱକଂ ପରିୱାରିୟ ।
ପରିୱେଣେ ନ ପସ୍ସିଂସୁ, ତତୋ ନିକ୍ଖମ୍ମ ତେ ଉଭୋ ॥
ଦକ୍ଖିଣସ୍ମିଂ ଦିସାଭାଗେ, ଗୋଣ ନାମଂ ମହାନଦିଂ ।
ପତ୍ୱା ସମ୍ପୁଣ୍ଣମଟ୍ଠଂସୁ, ଗନ୍ତୁକାମାପି ୱେଗସା ॥
ୟଥା ନଦିୟଂ ୱାରେତି, ଅମ୍ହେ ତଂ ତ୍ୱମ୍ପି ୱାରୟ ।
ୱାପିଂଗହେତ୍ୱା ଏତ୍ଥେ’ତି, ୱତ୍ୱା ଥେରୋ ତଦା ନଦିଂ ॥
ଓତରିତ୍ଥକୁମାରେନ, ସଦ୍ଧିଂ ଦିସ୍ୱାନ ତେ ଉଭୋ ।
ନାଗରାଜା ତଦା ଏକୋ, ପିଟ୍ଠିଂ ପାଦାସି ତେନ ସୋ ॥
ଉତ୍ତରିତ୍ୱା କୁମାରଂ ତଂ, ନେତ୍ୱା ପଚ୍ଚନ୍ତମାୱସଂ ।
ଲଦ୍ଧା ଖୀରୋଦନଂ ସୁତ୍ୱା, ସେସଂ ପତ୍ତେନ ତସ୍ସ’ଦା ॥
ଚିତ୍ତକାରେନ ଥେରମ୍ହି, ଭତ୍ତଂ ପକ୍ଖିପ୍ପ ଭୂମିୟଂ ।
ଭୁଞ୍ଜି ଥେରୋପି ତଂ ଜାନି, ଭୁଞ୍ଜ ତେ ୟଂ ମହିଂ ଇତି ॥
ପଣ୍ଡୁରାଜାପି କତ୍ୱାନ, ରଜ୍ଜଂ ୱସ୍ସମ୍ହି ପଞ୍ଚମେ ।
ଚୁତୋ ପୁତ୍ତୋ ପିପାରିନ୍ଦୋ, ତତିୟୋ ତସ୍ସ ଭାତୁକୋ ॥
କଣିଟ୍ଠୋ ଖୁଦ୍ଦପାରିନ୍ଦୋ, କୁବ୍ବଂ ରଜ୍ଜଂ ମହାମହିଂ ।
ଧାତୁସେନାନୁଗେ ସବ୍ବେ, ୱିହେଠେସି ମହାଜନେ ॥
ସଙ୍ଗହେତ୍ୱା ଜନେ ସାଧୁ-ସେନୋ ୟୁଜ୍ଜିତ୍ଥ ରାଜିନା ।
ସୋ ସୋଳସହି ୱସ୍ସେହି, ପୁଞ୍ଞପାପକରୋମତୋ ॥
ନିରିତରୋ ତତୋ ଆସି, ରାଜାମାସଦ୍ୱୟେନ ତଂ ।
ଧାତୁସେନୋ ୱିନାସେସି, ତେନ କତ୍ୱା ମହାହୱଂ ॥
ହତେ ତସ୍ମିଂ ମହୀପାଲେ, ଦାଠିୟୋ ଦମିଳୋ ତତୋ ।
ରାଜା ୱସ୍ସତ୍ଥ ୟେ ହୁତ୍ୱା, ଧାତୁସେନହତୋତତୋ ॥
ପିଟ୍ଠିୟୋ ଦମିଳୋ ସତ୍ତ-ମାସେନ ନିଧନଂ ଗତୋ ।
ଧାତୁସେନେନ ୟୁଜ୍ଝିତ୍ୱା, ୱଂସୋ ପଚ୍ଛିଜ୍ଜି ଦାମିଳୋ ॥
ଅଥା’ସି ରାଜାଲଙ୍କାୟଂ, ଧାତୁସେନୋ ଇରାଧିପୋ ।
ଭାତରା ସହ ଦୀପମ୍ହି, ଦମିଳେ ଦୀପଘାତକେ ॥
ଉପାୟେହି ଅନେକେୟି, ଏକୱୀସପ୍ପମାଣକେ ।
ଖନ୍ଧୱାରେ ନିୱେସେତ୍ୱା, କତ୍ୱା ୟୁଦ୍ଧମସେସତୋ ॥
ସୋଧେତ୍ୱା ମେଦିନିଂ ସାଧୁ, କତ୍ୱା ଚ ସୁଖିତଂଜନଂ ।
ସାସନଞ୍ଚ ୟଥାଠାନେ, ଠପେସି ପରନାସିତଂ ॥
ଦମିଳେ ୟେ’ନୁୱତ୍ତିଂସୁ, କୁଲୀନା କୁଲଗାମୱା ।
ତେ ମଂ ୱା ସାସନଂ ୱା ନୋ, ରକ୍ଖିଂସୂ’ତି ପକୁପ୍ପିୟ ॥
ତେସଂ ଗାମେ ଗହେତ୍ୱାନ, ଗାମେ ସ୍ୱାକାସିରକ୍ଖକେ ।
ରୋହଣା’ଗମ୍ମ ତେ ସବ୍ବେ, କୁଲୀନା ତମୁପଟ୍ଠହୁଂ ॥
ତେସଂ ସକ୍କାରସମ୍ମାନଂ, ୟଥାୟୋଗମକାସି ସୋ ।
ଅମଚ୍ଚେ ଅତ୍ତନୋ ଦୁକ୍ଖ-ସହାୟେଚା’ଭି ତୋସୟି ॥
ବନ୍ଧାପେତ୍ୱା ମହାଗଙ୍ଗଂ, କେଦାରେ’କା ଥିରୋଦକେ ।
ମହାପାଳମ୍ହି ଭିକ୍ଖୂନଂ, ସାଲିଭତ୍ତଞ୍ଚ ଦାପୟି ॥
ପଙ୍ଗୁରୋଗା ତୁରଟ୍ଟାନଂ, ସାଲାୟୋକାସି ବୁଦ୍ଧିମା ।
କାଳୱାପିଂଚ ଗଣ୍ହିତ୍ୱା, ବନ୍ଧି ଗୋଣଂ ମହାନଦିଂ ॥
ମହାୱିହାରଂ କତ୍ୱାନ, ପନ୍ତିୟୁତ୍ତମନାକୁଲଂ ।
ତଥା ବୋଧିଘରଞ୍ଚେୱ, ଦସ୍ସନେୟ୍ୟ ମକାରୟି ॥
ଭିକ୍ଖୱୋ ପରିତୋସେତ୍ୱା, ପଚ୍ଚୟେହି ଚତୂହିପି ।
ଧମ୍ମାସୋକୋ’ୱ ସୋକାସି, ସଙ୍ଗହଂ ପିଟକତ୍ତୟେ ॥
ଅଟ୍ଠାରସୱିହାରେ ଚ, ଥେରିୟାନ ମକାରୟି ।
ସମ୍ପନ୍ନଭୋଗେ ଦୀପମ୍ହି, ଅଟ୍ଠାରସ ଚ ୱାପିୟୋ ॥
କାଳୱାପୀ ୱିହାରୋ ଚ, କୋଟିପସ୍ସାୱନାମକୋ ।
ଦକ୍ଖିଣ ଗିରିନାମୋ ଚ, ୱିହାରୋ ୱଡ୍ଢମାନକୋ ॥
ପଣ୍ଣୱଲ୍ଲକଭୂତୋ ଚ, ଭଲ୍ଲାତକସନାମକୋ ।
ପାସାଣସିନ୍ନେ ଦେସମ୍ହି, ଧାତୁସେନୋ ଚ ପବ୍ବତୋ ॥
ମଂ ଗନୋ ଥୂପୱିଟ୍ଠି ଚ, ଧାତୁସେନୋପି ଉତ୍ତରେ ।
ପାଚିନ କମ୍ବୱିଟ୍ଠି ଚ, ତଥା ଅନ୍ତରମେ ଗିରି ॥
ଅନ୍ତାଳି ଧାତୁସେନୋ ଚ, କସ୍ସପିଟ୍ଠିକ ପୁବ୍ବକୋ ।
ରୋହଣେଦାୟଗାମୋ ଚ, ସାଲୱାଣୋ ୱିଭୀସନୋ ॥
ୱିହାରୋ ଭଲ୍ଲିୱାଣୋ ଚ, ଅଟ୍ଠାରସନରୁତ୍ତମୋ ।
ପାଦୂଲକଂ ହମ୍ବଲଟ୍ଠି, ମହାଦତ୍ଥାଦିୱାପି ୟୋ ॥
ଖୁଦ୍ଦକେ ଚ ୱିହାରେସୋ, ଅଟ୍ଠାରସନରୁତ୍ତମୋ ।
ୱାପୀୟୋ ଚ ତଥାକତ୍ୱା, ତେସମେୱ ତୁ ଦାପୟି ॥
ପଞ୍ଚୱୀସତି ହତ୍ଥଞ୍ଚ, ମୟୂରପରିୱେଣକଂ ।
ହରିତ୍ୱା’କାସିପାସାଦ-ମେକୱୀସତି ହତ୍ଥକଂ ॥
କୁମାରସେନସ୍ସ’ପେତ୍ୱା, ପୁବ୍ବଭୋଗଂ ୱିସୋଧୟି ।
କାଳୱାପିମ୍ମିଭାଗଦ୍ଧଂ, ଖେତ୍ତାନଞ୍ଚ ସତଦ୍ୱୟଂ ॥
ଲୋହ ପାସଦକେ ଜିଣ୍ଣେ, ନୱକମ୍ମମକାରୟି ।
ମହାଥୂପେସୁ ଛତ୍ତାନି, ତୀସୁ ଜିଣ୍ଣାନି କାରୟି ॥
ଦେୱାନଂପିୟତିସ୍ସେନ, କତଂ ବୋଧିମହଂ ୱିୟ ।
ସିନ୍ହାନପୂଜଂ ବୋଧିସ୍ସ, ୱରବୋଧିସ୍ସ କାରୟି ॥
ଧାୱନା ଲୋଭନାୱାୟୋ, ତତ୍ଥ ପୂଜେସି ସୋଳସ ।
ଅଲଙ୍କାରଂ ମୁନିନ୍ଦସ୍ସ, ଅଭିସେକଞ୍ଚ କାରୟି ॥
ମହାବୋଧି ପତିଟ୍ଠାନା, ଓରଂ ଲଙ୍କାୟ ଭୂମିପା ।
ୟାୱ ଦ୍ୱାଦସମଂ ୱସ୍ସଂ, ବୋଧିପୂଜମକାରୟୁଂ ॥
ମହାମହିନ୍ଦତ୍ଥେରସ୍ସ, କାରେତ୍ୱା ପଟିବିମ୍ବକଂ ।
ଥେରସ୍ସା’ଲାହନଂ ନେତ୍ୱା, କାତୁଂ ପୂଜଂ ମହାରହଂ ॥
ଦତ୍ୱା ସହସ୍ସଂ ଦୀପେତୁଂ, ଦୀପୱଂସଂ ସମାଦିସି ।
ଠିତାନଂ ତତ୍ଥ ଭିକ୍ଖୂନଂ, ଦାତୁଞ୍ଚାଣାପୟିଗୁଳଂ ॥
ଭିକ୍ଖୁସ୍ସ ଅତ୍ତନୋ ସୀସେ, ସଙ୍କାରୋକିରଣଂ ସରଂ ।
ଲାଭଂ ନାଦାସି ୱୁତ୍ଥସ୍ସ, ପରିୱେଣସ୍ସ ଅତ୍ତନୋ ॥
ଫାତିକମ୍ମଂ ବହୁଂ’କାସି, ୱିହାରେ ଅଭୟୁତ୍ତରେ ।
ସିଲାସତ୍ଥୁସ୍ସ କାରେସି, ମନ୍ଦିରଞ୍ଚ ସମଣ୍ଡପଂ ॥
ବୁଦ୍ଧ ଦାସକତେନେତ୍ତେ, ନଟ୍ଠେ’ନଗ୍ଘମଣି ଦ୍ୱୟଂ ।
ଅକାସି ନେତ୍ତଂ ସତ୍ଥୁସ୍ସ, ରଂସି ଚୂଳାମଣିଂତଥା ॥
ମଣିହି ଘନନୀଲେହି, କେସା ୱତ୍ତଂ ସୁମୁତ୍ତମଂ ।
ହେମପଟ୍ଟଂ ତଥେୱୁଣ୍ଣ-ଲୋମଂ ସୋୱଣ୍ଣ ଚୀୱରଂ ॥
ପାଦଜାଲଂ ସୁୱଣ୍ଣସ୍ସ, ପଦୁମଂ ଦୀପମୁତ୍ତମଂ ।
ନାନାରାଗମ୍ବରଂ ତତ୍ଥ, ପୂଜୟିତ୍ଥ ଅସଂଖିୟଂ ॥
ଅକାସି ପଟିମା ଗେହେ, ବହୁମଙ୍ଗଲଚେତିୟେ ।
ବୋଧିସତ୍ତେ ତଥା’କାସି, କାଳସେଲସ୍ସ ସତ୍ଥୁନୋ ॥
ଉପସୁମ୍ଭୱ୍ହୟସ୍ସାପି, ଲୋକନାଥସ୍ସ କାରୟି ।
ରଂସୀଚୂଳାମଣିଞ୍ଚେୱ, ଅଭିସେକୱ୍ହୟସ୍ସ ଚ ॥
ବୁଦ୍ଧବିମ୍ବସ୍ସ କାରେସି, ପୁବ୍ବେ ୱୁତ୍ତଂ ପିଳନ୍ଧନଂ ।
ୱାମପସ୍ସମ୍ହି ବୋଧିସ୍ସ, ବୋଧିସତ୍ତଘରଂ ତଥା ॥
ମେତ୍ତେୟ୍ୟସ୍ସ ଚ କାରେସି, ସବ୍ବଂ ରାଜପିଳନ୍ଧନଂ ।
ସମନ୍ତା ୟୋଜନେ ତସ୍ସ, ତଦା ରକ୍ଖଞ୍ଚ ୟୋଜୟି ॥
କାରାପେସି ୱିହାରେସୁ, ଧାତୁରାଜୱ୍ହପନ୍ତିୟୋ ।
ତଥା ସତସହସ୍ସେନ, ମହାବୋଧିଘରଂ ୱରଂ ॥
ଥୂପାରମମ୍ହି ଥୂପସ୍ସ, ପୂଜଂ ଜିଣ୍ଣୱିସୋଧନଂ ।
ଦାଠା ଧାତୁଘରେଚାପି, ଜିଣ୍ଣସ୍ସ ପଟିସଙ୍ଖରଂ ॥
ଦାଠାଧାତୁକରୁଣ୍ଡଞ୍ଚ, ରଂସିଞ୍ଚ ଘନକୋଟ୍ଟିମଂ ।
ମହଗ୍ଘମନିସଂକିଣ୍ଣଂ, ସୁୱଣ୍ଣ ପଦୁମାନି ଚ ॥
ଦାଠାଧାତୁମ୍ହି ପୂଜେସି, ପୂଜାଚାକା ଅସଙ୍ଖିୟା ।
ଚୀୱରାଦୀନି ଦାପେସି, ଭିକ୍ଖୂନଂ ଦୀପୱାସିନଂ ॥
କାରାପେତ୍ୱା ୱିହାରେସୁ, ନୱକମ୍ମଂ ତହିଂ ତହିଂ ।
ପାକାରେ ଚ ଘରେତ୍ୱା’କା, ସୁଧାକମ୍ମଂ ମନୋହରଂ ॥
ମହାଚେତିତ୍ତୟେ କତ୍ୱା, ସୁଧାକମ୍ମଂ ମହାରହଂ ।
ସୁୱଣ୍ଣଛତ୍ତଂ କାରେସି, ତଥା ୱଜିରଚୁମ୍ବଟଂ ॥
ମହାୱିହାରେ ପାପେନ, ମହାସେନେନ ନାସିତେ ।
ୱସିସୁଂ ଧମ୍ମରୁଚିକା, ଭିକ୍ଖୂ ଚେତିୟପବ୍ବତେ ॥
କତ୍ୱା ଅମ୍ବତ୍ଥଲଂ ଥେର-ୱାଦାନଂ ଦାତୁ କାମକୋ ।
ୟାଚିତୋ ତେହି ତେସଂ’ୱ, ଅଦାସି ଧରଣୀ ପତି ॥
ଦାତୁ ପଠାନନାୱଞ୍ଚ, କାରେତ୍ୱା କଂସଲୋହଜଂ ।
ଦାନୱଟ୍ଟଂ ପୱତ୍ତେସି, ଅମ୍ବଣେଭି ଦ୍ୱିପଞ୍ଚହି ॥
ଅନ୍ତୋ ବହି ଚ କାରେତ୍ୱା, ନଗରସ୍ସ ଜିନାଲୟେ ।
ପଟିମାୟୋ ଚ ପୂଜେସି, ଧମ୍ମାସୋକସମୋ’ସମୋ ॥
ତସ୍ସ ପୁଞ୍ଞାନି ସବ୍ବାନି, ୱତ୍ଥୁ ପଟିପଦଂ ନରୋ ।
କୋ ହି ନାମ ସମତ୍ଥୋତି, ମୁଖମତ୍ତଂ ନିଦସ୍ସିତଂ ॥
ତସ୍ସ ପୁତ୍ତଦୁୱେ ଆସୁଂ, କସ୍ସପୋ ଭିନ୍ନମାତିକୋ ।
ସମାନମାତିକୋ ଚେୱ, ମୋଗ୍ଗଲ୍ଲାନୋ ମହବ୍ବଲୋ ॥
ତଥା ପାଣସମା ଏକା, ଦୁହିତା ଚ ମନୋରମା ।
ଭାଗିନେୟ୍ୟସ୍ସ ପାଦାସି, ସେନାପଚ୍ଚଞ୍ଚ ତଞ୍ଚ ସୋ ॥
ୱିନା ଦୋସେନ ତାଳେସି, କସାୟୂରୁସୁ ସୋ’ପିତଂ ।
ରାଜା ଦିସ୍ୱାନ ଦୁହିତୁ-ୱତ୍ଥଂ ଲୋହିତମକ୍ଖିତଂ ॥
ଞତ୍ୱା ତଂ ମାତରଂ ତସ୍ସ, ନଗ୍ଗଂ ଝପେସି କୁଜ୍ଝିୟ ।
ତତୋପ୍ପଭୁତିସୋ ବଦ୍ଧ-ୱେରୋ ସଙ୍ଗମ୍ମ କସ୍ସପଂ ॥
ରଜ୍ଜେ ନେତଂ ପଲୋଭେତ୍ୱା, ଭିନ୍ଦିତ୍ୱା ପିତୁଅନ୍ତରେ ।
ସଙ୍ଗହେତ୍ୱା ଜନଂ ଜୱ-ଗାହଂ ଗାହାପୟୀ ପତିଂ ॥
ଉସ୍ସାପେସି ତତୋ ଛତ୍ତଂ, କସ୍ସପୋ ପିତୁପକ୍ଖିୟେ ।
ୱିନାସେତ୍ୱା ଜନେ ଲଦ୍ଧ-ସବ୍ବପାପସହାୟକୋ ॥
ମୋଗ୍ଗଲ୍ଲାନୋ ତତୋ ତେନ,
କାତୁକାମୋ ମହାହୱଂ ।
ଅଲଦ୍ଧ ବଲତାୟ’ଗା,
ଜମ୍ବୁଦୀପ ବଲତ୍ଥିକୋ ॥
ମହାରଜ୍ଜ ୱିନାସେନ, ୱିୟୋଗେନ ଚ ସୂନୁନୋ ।
ବଦ୍ଧନାଗାରୱାସେନ, ଦୁକ୍ଖିତମ୍ପି ଦୁରାଧିପଂ ॥
ଦୁକ୍ଖାପେତୁମପଞ୍ଞୋସୋ, ଆହ କସ୍ସପରାଜକଂ ।
ନିଧି ରାଜକୁଲେରାଜ-ଗୁତ୍ତ ତେ ପିତରା ଇତି ॥
ନେ’ତି ଗୁତ୍ତେ ନ ଜାନାସି, ଚିତ୍ତମେତସ୍ସ ଭୂମିପ ।
ମୋଗ୍ଗଲ୍ଲାନସ୍ସ କାପେତି, ନିଧିଂସୋତି ତଦବ୍ରୂୱି ॥
ସୁତ୍ୱା ତଂ କୁପିତୋ ଦୂତେ, ପାହେସୀ ପିତୁସନ୍ତିକଂ ।
ଆଚିକ୍ଖତୁ ନିଧିଠାନ-ମିତି ୱତ୍ୱା ନରାଧମୋ ॥
ମାରେତୁ ଅମ୍ହେ ପାପସ୍ସ, ତସ୍ସୁପାୟୋ’ତି ଚିନ୍ତିୟ ।
ତୁଣ୍ହୀ ଅହୋସି ତେ ଗନ୍ତ୍ୱା, ରାଜକସ୍ସ ନିୱେଦୟୁଂ ॥
ତତୋ’ତୀୱ ପକୁପ୍ପିତ୍ୱା, ପେସୟିତ୍ଥ ପୁନପ୍ପୁନଂ ।
ସାଧୁ ଦିସ୍ୱା ସହାୟମ୍ମେ, ନ୍ହତ୍ୱାନ କାଳୱାପିୟଂ ॥
ପରିସ୍ସାମୀତି ଚିନ୍ତେତ୍ୱା, ଆହ ଦୂତେ ସଚେ ମମଂ ।
କାଳୱାପିଂସମାପେତି, ସକ୍କା ଞାତୁନ୍ତି ତେ ଗତା ॥
ରଞ୍ଞୋ ଆହଂସୁ ରାଜାପି, ତୁଟ୍ଠହଟ୍ଠୋ ଧନତ୍ଥିକୋ ।
ପେସେସି ଦୂତେ ଦତ୍ୱାନ, ରଥଂ ଜିଣ୍ଣେନ ୱାଜିନା ॥
ଏୱଂ ଗଚ୍ଛତି ଭୂପାଲେ, ପାଜେନ୍ତୋ ରଥିକୋ ରଥଂ ।
ଖାଦନ୍ତୋ ଲାଜମସ୍ସାପି, କିଞ୍ଚି ମତ୍ତଂ ଅଦାସି ସୋ ॥
ତଂ ଖାଦିତ୍ୱା ପସୀଦିତ୍ୱା, ତସ୍ମିଂ ପାଣମଦା ତଦା ।
ମୋଗ୍ଗଲ୍ଲାନସ୍ସ ତଂ କାତୁଂ, ସଙ୍ଗହଂ ଦ୍ୱାରନାୟକଂ ॥
ଏୱଂ ସମ୍ପତ୍ତିୟୋ ନାମ, ଚଲା ୱିଜ୍ଜୁଲ୍ଲତୋପମା ।
ତସ୍ମା ତାସୁ ପମଜ୍ଜେୟ୍ୟ, କୋ ହି ନାମ ସଚେତନୋ ॥
ରାଜା ଏତୀତିସୁତ୍ୱାନ, ଥେରୋ ସୋ ତସ୍ସ ସୋହ ଦୋ ।
ଲଦ୍ଧା ମାସୋଦନଂ ମଂସଂ, ସାଣୁଣଞ୍ଚ ୱରଂ ସରଂ ॥
ରାଜା ରୋଚେତି ଏତନ୍ତି, ଗୋପୟିତ୍ୱା ଉପାୱିସି ।
ଗନ୍ତ୍ୱା ରାଜାପି ୱନ୍ଦିତ୍ୱା, ଏକମନ୍ତମୁପାୱିସୀ ॥
ଏୱଂ ନିସିନ୍ନା ସମ୍ପତ୍ତ-ରଜ୍ଜା ୱିୟ ଉଭୋପି ତେ ।
ଅଞ୍ଞମଞ୍ଞା’ଭିଲାପେନ, ନିବ୍ବାପେସୁଂ ମହାଦରଂ ॥
ଭୋଜୟିତ୍ୱାନ ତଂ ଥେରୋ, ଓୱଦିତ୍ୱା ଅନେକଧା ।
ଅପ୍ପମାଦେ ନିୟୋଜେସି, ଦସ୍ସେତ୍ୱା ଲୋକଧମ୍ମତଂ ॥
ତତୋ ୱାପୀ ମୁପଗମ୍ମ, ଓଗ୍ଗୟ୍ହିତ୍ୱା ୟଥା ସୁଖଂ ।
ନ୍ହୟିତ୍ୱା ପିୱିତ୍ୱା ଚ, ଆହେୱଂ ରାଜସେୱକେ ॥
ଏତ୍ତକଂ ମେ ଧନଂ ଭୋ’ତି, ସୁତ୍ୱା ତଂ ରାଜସେୱକା ।
ଆପରିତ୍ୱା ପୁରଂରଞ୍ଞୋ, ନିୱେଦେସୁଂ ନିରିସ୍ସରୋ ॥
ଧନଂ ରକ୍ଖତି ପୁତ୍ତସ୍ସ, ଦୀପେ ଭିନ୍ଦତି ମାନୁସେ ।
ଜୀୱନ୍ତୋ’ୟଂତୀ କୁଜ୍ଝିତ୍ୱା, ଆଣାପେସି ଚମୂପତିଂ ॥
ମାରେହି ପିତରଂ ମେତି, ଦିଟ୍ଠା ପିଟ୍ଠୀତି ୱେରିନୋ ।
ହଟ୍ଠତୁଟ୍ଠୋ ତିରୁଟ୍ଠୋସୋ, ସବ୍ବାଲଙ୍କରମଣ୍ଡିତୋ ॥
ରାଜାନମୁପସଙ୍କମ୍ମ, ପୁରତୋ ଚ’ସ୍ସ ଚଙ୍କମି ।
ରାଜାଦିସ୍ୱା ଚ ଚିନ୍ତେସି, ପାପିୟୋ’ୟଂ ମତଂ ମମ ॥
କାୟଂ ୱିୟ ଦୁକ୍ଖାପେତ୍ୱା, ନରକଂ ହେତୁ ମିଚ୍ଛତି ।
ରୋସୁପ୍ପାଦେନ ତସ୍ସେୱ, କିଂପୁରେମି ମନୋରଥଂ ॥
ଇତି ମେତ୍ତାୟମାନୋ ତଂ, ଆହ ସେନାପତିଂ ପତି ।
ମୋଗ୍ଗଲ୍ଲାନେ ତ୍ୱୟିଚେୱ, ଏକଚିତ୍ତୋ ଅହଂ ଇତି ॥
ହସଂଚାଲେସି ସୀସଂସୋ, ଦିସ୍ୱା ତଂ ଜାନିଭୂପତି ।
‘‘ନୂନ ମାରେତି ଅଜ୍ଜା’’ତି, ତଦା ସାହସିକୋପି ସୋ ॥
ନଗ୍ଗଂ କତ୍ୱାନ ରାଜାନଂ, ସସଙ୍ଖଲିକ ବନ୍ଧନଂ ।
ପୁରତ୍ଥାଭିମୁଖଂ କତ୍ୱା, ଅନ୍ତୋବନ୍ଧିୟ ଭିତ୍ତିୟଂ ॥
ମତ୍ତିକାୟ ୱିଲିମ୍ପେସି, ଏୱଂ ଦିସ୍ୱାପି ପଣ୍ଡିତୋ ।
କୋ ହି ରଜ୍ଜେୟ୍ୟ ଭୋଗେସୁ, ଜୀୱିତେପି ୟସେପି ୱା ॥
ଧାତୁସେନୋ ନରିନ୍ଦୋ ସୋ, ଏୱଂ ପୁତ୍ତହତୋ ଗତୋ ।
ଅଟ୍ଠାରସହି ୱସ୍ସେହି, ଦେୱରାଜସ୍ସ ସନ୍ତିକଂ ॥
କାଳୱାପୀ ମୟଂ ରାଜା, କାରାପେନ୍ତୋ ସମାହିତଂ ।
ପସ୍ସିତ୍ୱା ଭିକ୍ଖୁମେତନ୍ତୁ, ୱୁଟ୍ଠାପେତୁଂ ସମାଧିତୋ ॥
ଅସକ୍କୋନ୍ତୋ ଖିପାପେସି, ପଂସୁଂ ଭିକ୍ଖୁସ୍ସ ମତ୍ଥକେ ।
ସନ୍ଧିଟ୍ଠିକୋ ୱିପାକୋୟଂ, ତସ୍ସ କମ୍ମସ୍ସ ଦୀପିତୋ ॥
ଉପାଗମୁଂ ମଚ୍ଚୁମୁଖଂ ସଭୋୱା ।
ଅନିଚ୍ଚତଂ ଭୋଗୱତୋ ଧନେ ଚ,
ଦିସ୍ୱା ସପଞ୍ଞୋ ୱିଭୱଂ ଇଚ୍ଛେ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦସରାଜକୋ ନାମ
ଅଟ୍ଠତିଂସତିଏମା ପରିଚ୍ଛେଦୋ ।
ଏକୂନଚତ୍ତାଲୀସତିମ ପରିଚ୍ଛେଦ
ରାଜଦ୍ୱୟଦୀପନୋ
ତତୋ କସ୍ସପନାମୋ ସୋ, ପାପକୋ ନରପାଲକୋ ।
ଅସ୍ସ ଗୋ ପଞ୍ଚସୂଦଞ୍ଚ, ପେସୟିତ୍ୱାନ ଭାତିକଂ ॥
ମାରାପେତୁଂ ଅସକ୍କୋନ୍ତୋ, ଭୀତୋ ସୀହଗିରିଂ ଗତୋ ।
ଦୁରାରୋହଂ ମନୁସ୍ସେହି, ସୋଧାପେତ୍ୱା ସମନ୍ତତୋ ॥
ପାକାରେନ ପରିକ୍ଖିପ୍ପ, ସୀହାକାରେନ କାରୟି ।
ତତ୍ଥ ନିସ୍ସେଣି ଗେହାନି, ତେନ ତଂ ନାମକୋ ଅହୂ ॥
ସଂହରିତ୍ୱା ଧନଂ ତତ୍ଥ, ନିଦହିତ୍ୱା ସୁଗୋପିତଂ ।
ଅତ୍ତନୋ ନିହିତାନଂ ସୋ, ରକ୍ଖଂ ଦତ୍ୱା ତହିଂ ତହିଂ ॥
କତ୍ୱା ରାଜଘରଂ ତତ୍ଥ, ଦସ୍ସନେୟ୍ୟଂ ମନୋରମଂ ।
ଦୁତିୟାଲକମନ୍ଦଂୱ, କୁୱେରୋୱ ତହିଂ ୱସି ॥
ମିଗାରୋ ନାମ କାରେସି, ସେନାପତି ସନାମକଂ ।
ପରିୱେଣଂ ତଥାଗେହ-ମଭିସେକଜିନିସ୍ସ ଚ ॥
ତସ୍ସାଭିସେକଂ ୟାଚିତ୍ୱା, ସିଲାସମ୍ବୁଦ୍ଧତୋ’ଧିରଂ ।
ଅଲଦ୍ଧାସାମି ନୋ ରଜ୍ଜେ, ଜାନିସ୍ସାମୀତି ସଣ୍ଠହି ॥
ହୁତ୍ୱା ୱିପ୍ପଟିସାରୀ ସୋ, ଅତ୍ତନା କତକମ୍ମନା ।
ମୁଚ୍ଚିସ୍ସାମି କତଂ ନୁ’ତି, ପୁଞ୍ଞଂ କାସି ଅନପ୍ପକଂ ॥
ମହା ୱତ୍ଥୁନି କାରେସି, ଦ୍ୱାରେସୁ ନଗରସ୍ସ ସୋ ।
ଅମ୍ବୁୟ୍ୟାନେ ଚ କାରେସି, ଦୀପେ ୟୋଜନ ୟୋଜନେ ॥
ଇସ୍ସରସମଣାରାମଂ, କାରେତ୍ୱା ପୁବ୍ବୱତ୍ଥୁତୋ ।
ଅଧିକଂ ଭୋଗଗାମେ ଚ, ଅଧିକଂ ତସ୍ସ ଦାପୟି ॥
ବୋଧି ଉପ୍ପଲୱଣ୍ଣା ଚ, ତସ୍ସାସୁଂ ଧୀତରୋ ଦୁୱେ ।
ୱିହାରସ୍ସ’ସ୍ସ କାରେସି, ନାମଂ ତାସଞ୍ଚ ଅତ୍ତନୋ ॥
ଦେନ୍ତେ ତସ୍ମିଂ ନ ଇଚ୍ଛିଂସୁ, ସମଣା ଥେରୱାଦିନୋ ।
‘‘ପିତୁଘାତିସ୍ସ କମ୍ମ’’ନ୍ତି, ଲୋକଗାରୟ୍ହ ଭୀରୁନୋ ॥
ଦାତୁକାମୋସ ତେସଂ’ୱ, ସମ୍ବୁଦ୍ଧ ପଟିମାୟ’ଦା ।
ଭିକ୍ଖୱେ ଅଧିୱାସେସୁଂ, ଭୋଗୋ ନୋ ସତ୍ଥୁନୋ ଇତି ॥
କଥା ନିୟ୍ୟନ୍ତି ଉୟ୍ୟାନେ, ସମୀପେ ପବ୍ବତସ୍ସ ସୋ ।
କାରାପେସି ୱିହାରଂ ସୋ, ତେସଂ ନାମୋ ତତୋ ଅହୁ ॥
ଅଦା ଧମ୍ମରୁଚିନଂ ତଂ, ସମ୍ପତ୍ତ ଚତୁପଚ୍ଚୟଂ ।
ୱିହାରଞ୍ଚେୱ ଉୟ୍ୟାନଂ, ଦିସାଭାଗମ୍ହି ଉତ୍ତରେ ॥
ଭତ୍ତଂ ସନୀରପକ୍କଂ ସୋ, ଭୁଞ୍ଜିତ୍ୱା ଦିନ୍ନମିତ୍ଥିୟା ।
ସପ୍ପିୟୁତ୍ତଂ ମନୁଞ୍ଞେହି, ସୂପେହି ଅଭିସଙ୍ଖତଂ ॥
ମନୁଞ୍ଞମିଦମୟ୍ୟାନଂ, ଦସ୍ସମେୱନ୍ତି ତାଦିସଂ ।
ଭତ୍ତଂ ପାଦାସି ଭିକ୍ଖୂନଂ, ସବ୍ବେସଞ୍ଚ ସଚୀୱରଂ ॥
ଉପୋସଥମଧିଟ୍ଠାସି, ଅପ୍ପମଞ୍ଞଞ୍ଚ ଭାୱୟି,
ସମାଦିୟି ଧୁତଙ୍ଗେ ଚ, ଲିଖାପେସି ଚ ପୋତ୍ଥକେ ॥
ପଟିମାଦାନ ସାଲାଦିଂ, କାରାପେସି ଅନପ୍ପକଂ ।
ଭିତୋ ସୋ ପରଲୋକମ୍ହା, ମୋଗ୍ଗଲ୍ଲାନା ଚ ୱତ୍ତତି ॥
ତତୋ ଅଟ୍ଠାରସେ ୱସ୍ସେ, ମୋଗ୍ଗଲ୍ଲାନୋ ମହାଭଟୋ ।
ଆଦେସେନ ନିଗଣ୍ଠାନଂ, ଦ୍ୱାଦସଗ୍ଗସହାୟ ୱା ॥
ଜମ୍ବୁଦୀପା ଇଧାଗମ୍ମ, ଦେସେ ଅମ୍ବଟ୍ଠକୋଲକେ ।
କୁଳାରୀ ନାମେ ବନ୍ଧିତ୍ଥ, ୱିହାରେ ବଲସଞ୍ଚୟଂ ॥
ରାଜା ସୁତ୍ୱା ଗହେତ୍ୱା ତଂ, ଭଞ୍ଜିସ୍ସାମିତି ନିକ୍ଖମି ।
ନେମିତ୍ତେହି ନ ସକ୍କାତି, ୱଦନ୍ତେପି ମହାବଲୋ ॥
ମୋଗ୍ଗଲ୍ଲାନୋପି ସନ୍ନଦ୍ଧ ବଲୋ ସୂରସହାୟ ୱା ।
ଗଚ୍ଛନ୍ତୋ ସୁରସଙ୍ଗାମଂ, ଦେୱୋ ୱିୟ ସୁଜମ୍ପତି ॥
ଅଞ୍ଞମଞ୍ଞଂ ଉପାଗମ୍ମ, ଭିନ୍ନୱେଲାୱ ସାଗରା ।
ଆରଭିଂସୁ ମହାୟୁଦ୍ଧଂ, ବଲକାୟା ଉଭୋପି ତେ ॥
କସ୍ସପୋ ପୁରତୋ ଦିସ୍ୱା, ମହନ୍ତଂ କଦ୍ଦମାସୟଂ ।
ଗନ୍ତୁମଞ୍ଞେନ ମଗ୍ଗେନ, ପରିୱତ୍ତେସି ଦନ୍ତିନଂ ॥
ଦିସ୍ୱା ତଂ ସାମିକୋନୋ’ୟଂ, ପଲାୟତି ଭଣେ ଇତି ।
ବଲକାୟୋ ପଭିଜ୍ଜିତ୍ଥ, ‘‘ଦିଟ୍ଠଂ ପିଠ’’ନ୍ତି ଘୋସୟୁଂ ॥
ମୋଗ୍ଗଲାନ ବଲାରାଜା, ଛେତ୍ୱା ନିକରଣେନ ସୋ ।
ସୀସଂ ଉକ୍ଖିପିୟା’କାସଂ, ଛୁରିକଂ କୋସିୟଂ ଖିପି ॥
କତ୍ୱା’ଳାହନ କିଚ୍ଚଂ ସୋ, ତସ୍ସ କମ୍ମେ ପସୀଦିୟ ।
ସବ୍ବଂସୋ ଧନମାଦାୟ, ଆଗଞ୍ଛି ନଗରଂ ୱରଂ ॥
ଭିକ୍ଖୂ ସୁତ୍ୱା ପୱତ୍ତିଂ ତଂ, ସୁନିୱତ୍ଥା ସୁପାରୁତା ।
ସମ୍ମଜ୍ଜିତ୍ୱା ୱିହାରଞ୍ଚ, ଅଟ୍ଠଂସୁ ପଟିପାଟିୟା ॥
ମହାମେଘୱନଂ ପତ୍ୱା, ଦେୱରାଜାୱ ନନ୍ଦନଂ ।
ମହାସେନ ନିୱତ୍ତେତ୍ୱା, ହତ୍ଥିପାକାରତୋ ବହି ॥
ଉପସଙ୍କମ୍ମ ୱନ୍ଦିତ୍ୱା, ସଙ୍ଘେ ତସ୍ମିଂ ପସୀଦିୟ ।
ଛତ୍ତତ୍ତେନ ସଙ୍ଘଂ ପୂଜେସି, ସଙ୍ଘୋ ତସ୍ସେୱ ତଂ ଅଦା ॥
ତଂ ଠାନଂ ଛତ୍ତୱଡ୍ଢୀତି, ୱୋହରିଂସୁ ତହିଂ କତଂ ।
ପରିୱେଣମ୍ପି ତଂ ନାମଂ, ଅହୋସି ପୁରମାଗତୋ ॥
ୱିହାରେ ଦ୍ୱେପି ଗନ୍ତ୍ୱାନ, ସଙ୍ଘଂ ତତ୍ଥା’ଭିୱନ୍ଦିୟ ।
ପାପୁଣିତ୍ୱା ମହାରଜ୍ଜଂ, ଲୋକଂ ଧମ୍ମେନ ପାଲୟି ॥
କୁଦ୍ଧୋ ନୀହରି ଦାଠଂସୋ, ଘାତକଂ ପିତୁନୋ ମମ ।
ଅନୁୱତ୍ତିତ୍ୱା ମଚ୍ଚାତି, ତେନ ରକ୍ଖସ ନାମ ୱା ॥
ଅତିରେକସହସ୍ସଂ ସୋ, ଅମଚ୍ଚାନଂ ୱିନାସୟି ।
କଣ୍ଣନାସାଦି ଛେଦେସି, ପବ୍ବାଜେସି ତଥା ବହୂ ॥
ତତୋ ସୁତ୍ୱାନ ସଦ୍ଧମ୍ମ-ମୁପସନ୍ନୋ ସୁମାନସୋ ।
ମହାଦାନଂ ପୱତ୍ତେସି, ମେଘୋ ୱିୟ ମହୀତଲେ ॥
ଫୁସ୍ସପୁଣ୍ଣମୀୟଂ ଦାନ-ମନୁୱସ୍ସଂ ପୱତ୍ତୟି ।
ତତୋ ପଟ୍ଠାୟ ତଂ ଦାନଂ, ଦୀପେ ଅଜ୍ଜାପି ୱତ୍ତତି ॥
ସୋପି ସାରଥିକୋ ଲାଜ-ଦାୟକୋ ପିତୁରାଜିନୋ ।
ଆନେତ୍ୱା ପିତୁସନ୍ଦେ ସଂ, ମୋଗ୍ଗଲ୍ଲାନସ୍ସ ଦସ୍ସୟି ॥
ତଂ ଦିସ୍ୱା ପରିଦେୱିତ୍ୱା, ପିତୁନୋ ପେମ ମତ୍ତନୀ ।
ୱଣ୍ଣେତ୍ୱା ତସ୍ସ ପାଦାସି, ଦ୍ୱାରନାୟକତଂ ୱିଭୂ ॥
ସେନାପତି ମିଗାରୋହି, ନିୱେଦେତ୍ୱା ୟଥା ୱିଧିଂ ।
ଅଭିସେକ ଜିନସ୍ସା’କା, ଅଭିସେକଂ ୟଥାରୁଚିଂ ॥
ସୀହା’ଚଲେ ଦଳ୍ହନାମଂ, ଦାଠା କୋଣ୍ଡଞ୍ଞକମ୍ପି ଚ ।
ୱିହାରଂ ଧମ୍ମରୁଚିନଂ, ସାଗଲିନଞ୍ଚ ଦାପୟି ॥
ପବ୍ବତନ୍ତୁ ୱିହାରଂସୋ, କତ୍ୱା ଥେରସ୍ସ ଦାପୟି ।
ମହାନାମସନାମସ୍ସ, ଦୀଘସଣ୍ଡ ୱିହାରକେ ॥
ରାଜିନିନାମକଞ୍ଚେୱ, କତ୍ୱା ଭିକ୍ଖୁନୁପସ୍ସୟଂ ।
ଅଦା ସାଗଲିକାନଂ ସୋ, ଭିକ୍ଖୁନୀନଂ ମହାମତି ॥
ଲମ୍ବକଣ୍ଣକଗୋତ୍ତୋପି, ଦାଠା ପଭୁତି ନାମକୋ ।
କସ୍ସପସ୍ସ ଉପଠାନେ, କୋଚି ନିବ୍ବିନ୍ନ ମାନସୋ ॥
ଗନ୍ତା ମେ ରେଲିୟଂ ୱଗ୍ଗଂ,
ୱାସଂ ତତ୍ଥେୱ କପ୍ପୟି ।
ଅହୋସି ପୁତ୍ତୋ ତସ୍ସେକୋ,
ସିଲାକା ଲୋତି ପିସ୍ସୁତୋ ॥
ସୋପି କସ୍ସପତୋ ଭୀତୋ, ଞାତକେନ ସହ’ତ୍ତନୋ ।
ମୋଗ୍ଗଲ୍ଲାନେନ ଗନ୍ତ୍ୱାନ, ଜମ୍ବୁଦୀପତଲଂ ଇତୋ ॥
ବୋଧିପଣ୍ଡୱିହାରମ୍ପି, ପବ୍ବଜ୍ଜଂ ସମୁପାଗତୋ ।
କରୋନ୍ତୋ ସଙ୍ଘକିଚ୍ଚାନି, ସାଦରୋ ସୋ ସୁପେସଲୋ ॥
ଅମ୍ମଂ ସଙ୍ଘସ୍ସ ପାଦାସି, ସଙ୍ଘୋ ତସ୍ମିଂ ପସୀଦିୟ ।
ଆହ’ମ୍ବ ସାମଣେରୋ’ତି, ତେନ ତଂ ନାମକୋ ଅହୁ ॥
ସୋ କେସଧାତୁୱଂସମ୍ହି, ୱୁତ୍ତେନ ୱିଧିନା ତତୋ ।
କେସଧାତୁଂ ଲଭିତ୍ୱାନ, ତସ୍ସ ରଜ୍ଜେ ଇଧା’ନୟି ॥
ତସ୍ସ କତ୍ୱାନ ସକ୍କାରଂ, ଗହେତ୍ୱା କେସ ଧାତୁୟୋ ।
ମହଗ୍ଘେ ନିଦହିତ୍ୱାନ, କରଣ୍ଡେ ଫଲିକୁମ୍ଭୱ୍ହେ ॥
ଦୀପଙ୍କରସ୍ସ ନାଥସ୍ସ, ପଟିମାୟ ଘରେ ୱରେ ।
ୱଡ୍ଢେତ୍ୱା ପରିହାରେନ, ମହାପୂଜଂ ପୱତ୍ତୟି ॥
ମାତୁଲଂ ଭରିୟଞ୍ଚ’ସ୍ସ, କତ୍ୱା ସୋୱଣ୍ଣୟଂ ତହିଂ ।
ଠପେସି ପଟିମାୟୋ ଚ, ଅସ୍ସ ବିମ୍ବଞ୍ଚ ଚାରୁକଂ ॥
କେସଧାତୁକରଣ୍ଡଞ୍ଚ, ଛତ୍ତଂ ରତନମଣ୍ଡପଂ ।
ସାୱକଗ୍ଗୟୁଂଗଂ ୱାଳ-ବୀଜନିଞ୍ଚ ସକାରୟି ॥
ପରିହାରଞ୍ଚ ତସ୍ସ’ଦା, ରାଜା ଅଧିକମତ୍ତନୋ ।
ସିଲାକାଳ ମସିଗ୍ଗାହଂ, କତ୍ୱା ରକ୍ଖାୟ ୟୋଜୟି ॥
ଅସିଗ୍ଗାହସିଲାକାଳୋ, ଇତି ତେନା’ସି ୱିସ୍ସୁତୋ ।
ଭଗିନିଞ୍ଚ’ସ୍ସ ପାଦାସି, ସଦ୍ଧିଂ ଭୋଗେନ ଭୂମିପୋ ॥
ୱୁତ୍ତୋ’ୟମତି ସଙ୍ଖେପୋ, ୱିତ୍ଥାରୋ ପନ ସବ୍ବସୋ ।
କେସଧାତୁକୱଂସମ୍ହା, ଗହେତବ୍ବୋ ୱିଭାୱିନା ॥
ବନ୍ଧିତ୍ୱା ସାଗରା ରକ୍ଖଂ, ଦୀପଞ୍ଚ କାସିନିବ୍ଭୟଂ ।
ଧମ୍ମକମ୍ମନ ସୋଧେସି, ସଧମ୍ମଂ ଜିନସାସନଂ ॥
ସେନାପତିସ ନାମଂ’କା, ପଧାନଘର ମୁତ୍ତରୋ ।
କତ୍ୱା’ଟ୍ଠାରସମେ ୱସ୍ସେ, ସୋ ପୁଞ୍ଞାନି ଖୟଂ ଗତୋ ॥
କସ୍ସପତୋ ଜିତୋ ଅତିବଲି ପୁଞ୍ଞକ୍ଖୟେ ସଙ୍ଖତେ ।
ଜେତୁଂ ନୋ ୱିସହିତ୍ଥ ମଚ୍ଚୁମୁପଗଂ ସୋ ୟେୱଦାସୋୱିୟ ।
ତସ୍ମା ମଚ୍ଚୁବଲଂ ନିହଚ୍ଚ ସୁଖିନୋ ହେସ୍ସନ୍ତି ମେଧାୱିନୋ ।
ନିବ୍ବାନଂ ପରମଚ୍ଚୁତଂ ସିୱପଦଂ ପତ୍ତବ୍ବମତ୍ତଞ୍ଞୁନା ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ରାଜଦ୍ୱୟଦୀପନୋ ନାମ
ଏକୂନଚତ୍ତାଲୀସତିମୋ ପରିଚ୍ଛେଦୋ ।
ଚତ୍ତାଲୀସତିମ ପରିଚ୍ଛେଦ
ଅଟ୍ଠରାଜକୋ
ତସ୍ସଚ୍ଚୟେ କୁମାରାଦି-ଧାତୁସେନୋତି ୱିସ୍ସୁତୋ ।
ଅହୁ ତସ୍ସ ସୁତୋ ରାଜା, ଦେୱରୂପୋ ମହାବଲୋ ॥
କାରିତେ ପିତରା’କାସି, ୱିହାରେ ନୱକମ୍ମକଂ ।
କାରେତ୍ୱା ଧମ୍ମସଙ୍ଗୀତିଂ ପରିସୋଧେତି ସାସନଂ ॥
ସନ୍ତପ୍ପେସି ମହାସଙ୍ଘଂ, ପଚ୍ଚୟେହି ଚତୂହିପି ।
କତ୍ୱା ପୁଞ୍ଞାନି’ନେକାନି, ନୱମେ ହାୟନେ’ତିଗା ॥
ତିତ୍ତିସେନୋ ସୁତୋ ତସ୍ସ, ରାଜା ହୁତ୍ୱା ଅନେକଧା ।
କତ୍ୱା ପୁଞ୍ଞାନି ରଜ୍ଜଂ ତଂ, ମାସମ୍ପି ନୱମେ ଜହି ॥
ସିୱୋ ତଂ ମାତୁଲୋ ହନ୍ତ୍ୱା, ହୁତ୍ୱା ରାଜା ଅନପ୍ପକଂ ।
ପୁଞ୍ଞଂ କତ୍ୱୋ’ପତିସ୍ସେନ, ପଞ୍ଚୱୀସ ଦିନେ ହତୋ ॥
ଉପତିସ୍ସୋ ତତୋ ଆସି, ରାଜା ହନ୍ତ୍ୱାନ ସୀୱକଂ ।
ମୋଗ୍ଗଲ୍ଲାନସ୍ସ ଭଗିନୀ, ସାମିକୋ ଧଜିନୀପତି ॥
ରାଜା ଠାନନ୍ତରାଦୀହି, କତ୍ୱାନ ଜନସଙ୍ଗହଂ ।
ସୀଲାକାଳସ୍ସ ପାଦାସି, ସହ ଭୋ କନଧୀୱରଂ ॥
ଏକୋ ପୁତ୍ତୋ ଅହୁ ରଞ୍ଞୋ, ଉପତିସ୍ସସ୍ସ କସ୍ସପୋ ।
ସସୋଳସ ସହାୟେହି, ସୂରୋ ସୂପେହି ସଞ୍ଞୁତୋ ॥
ଏକ ୱୁତ୍ତିସହାୟେହି, ଦାନମାନ ମହାଧନୋ ।
ଧମ୍ମଟ୍ଠୋ ୱୀରିୟାଜୀୱି, ସାଧୁ ଜେଟ୍ଠପଚାୟକୋ ॥
ସିଲା କାଳୋତତୋ ରଜ୍ଜ-ଲୋଭୱଞ୍ଚିତ ମାନସୋ ।
ଦକ୍ଖିଣଂ ମଲୟଂ ଗନ୍ତ୍ୱା, ସଙ୍ଗଣ୍ହିତ୍ୱା ମହା ବଲଂ ॥
ୱିଲୁମ୍ପମାନୋ ପଚ୍ଚନ୍ତି, ସମ୍ପତ୍ତୋ ନଗରନ୍ତିକଂ ।
ତଂ ସୁତ୍ୱା କସ୍ସପୋ ଜେଟ୍ଠୋ, ୱରମାରୁୟ୍ହ କୁଞ୍ଜରଂ ॥
ଅସ୍ସା ସେତ୍ୱାନ ପିତରଂ, ସମାଦାୟ ସହାୟକେ ।
ନିକ୍ଖମ୍ମ ନଗରା ଗଚ୍ଛି, ସିଲାକାଲସ୍ସ ଦସ୍ସନଂ ॥
ଏୱଂ ସତ୍ତ’ଟ୍ଠ ୱାରେସୁ, ପଲାତୋ ଲୀନୱୁତ୍ତିକୋ ।
ହତ୍ଥେ କତ୍ୱା ଉପାୟେନ, ଦେସେ ପାଚିନ ପଚ୍ଛିମେ ॥
ୟୁଜ୍ଝିତୁଂ ପୁନ ପାଚିନ-ତିସ୍ସ ପବ୍ବତମାଗମି ।
କସ୍ସପୋପି ସହାୟେହି, ସଦ୍ଧିମାରୁୟ୍ହ ଦନ୍ତିନଂ ॥
ତତ୍ଥ ଗନ୍ତ୍ୱା ପଲାପେତ୍ୱା, ଚୋରଂ ପବ୍ବତମତ୍ଥକଂ ।
ଆରୋପେସି ମହାନାଗଂ, ତେନା’ସି ଗିରିକସ୍ସପୋ ॥
ମାନତ୍ଥଦ୍ଧୋ ସିଲାକାଳୋ, ଭିୟ୍ୟୋ ରଟ୍ଠଂ ପଭିନ୍ଦିୟ ।
ସବ୍ବଂ ହତ୍ଥଗତଂ କତ୍ୱା, ଅଜେୟ୍ୟ ବଲୱାହନୋ ॥
ଆଗମ୍ମ ନଗରଂ ରୁନ୍ଧି, ସତ୍ଥାହଂ ରାଜସେୱକା ।
ୟୁଜ୍ଝିତ୍ୱା ୱିରଲା ଆସୁଂ, ତତୋ ଚିନ୍ତେସି କସ୍ସପୋ ॥
ଏତେ ନଗରରୋଧେନ, ସବ୍ବେ ଭିଜ୍ଜନ୍ତି ପାଣିନୋ ।
ପରିହୀନଂ ବଲଂ ରାଜା, ଅନ୍ଧକୋ ଚ ମହଲ୍ଲକୋ ॥
ମେରୁକନ୍ଦରକେ କତ୍ୱା, ମାତରଂ ପିତରଞ୍ଚ ମେ ।
ଅଙ୍ଗହେତ୍ୱା ବଲଂ ପଚ୍ଛା, ଚୋରୋ ନିଗ୍ଗଣ୍ହି ୟୋ ଇତି ॥
ରତ୍ତିୟଂ ସୋ ସହାୟେ ଚ, ରାଜସାଧନମେୱଚ ।
ଆଦାୟ ପିତରୋ ଚେୱ, ମଲୟଂ ଗନ୍ତୁମାରଭି ॥
ତଦା ମଗ୍ଗମଜାନନ୍ତା, ସମ୍ମୂଳା ମଗ୍ଗଦେସକା ।
ନଗରସ୍ସ ସମୀପେୱ, ସମ୍ଭମିଂସୁ ଇତୋ ତତୋ ॥
ସିଲାକାଳୋ ପୱତ୍ତିଂ ତଂ, ସୁତ୍ୱା ସଙ୍ଗମ୍ମ ୱେଗସା ।
ପରିୱାରେସି ସଙ୍ଗାମୋ, ତତ୍ଥ ଭିଂସନକୋ ଅହୁ ॥
ଦେୱାସୁରରଣାକାରେ, ୱତ୍ତମାନେ ମହାହୱେ ।
ପତିତେସୁ ସହାୟେସୁ, ସୀଦମାନେ ମହାଗଜେ ॥
ହତ୍ଥାରୋହସ୍ସ ଦତ୍ୱା, ଛିନ୍ଦିତ୍ୱା ସୀସମତ୍ତନୋ ।
ପୁଞ୍ଛିତ୍ୱା ଲୋହିତଂ କତ୍ୱା, କୋସିୟଂ ଅସି ପୁତ୍ତିକଂ ॥
ହତ୍ଥିକୁମ୍ଭେ ଉଭୋ ହତ୍ଥେ, ଠପେତ୍ୱାନ ଅୱତ୍ଥରି ।
ଉପତିସ୍ସୋପି ତଂ ସୁତ୍ୱା, ସୋକସଲ୍ଲାହତୋ ମରି ॥
ଏୱଂ ଦିୟଡ୍ଢୱସ୍ସେନ, ଉପତିସ୍ସେ ଦିୱଂଗତେ ।
ରାଜା’ହୋସି ସିଲାକାଳୋ, ପୁବ୍ବନାମେନ ଏକତୋ ॥
ତଂ ଅମ୍ବସାମଣେରାଦି-ସିଲାକାଳୋତି ୱୋହରୁଂ ।
ତିତ୍ଥଂ ତେରସୱସ୍ସାନି, ଦିପଂ ଧମ୍ମେନ ପାଲୟି ॥
ମହାପାଳିମ୍ହି ଦାପେସି, ପଚ୍ଚଗ୍ଘଂ ରାଜଭୋଜନଂ ।
ୱେଜ୍ଜସାଲାସୁ ଭୋଗେ ଚ, ୱଡ୍ଢେସି ଜନତାହିତୋ ॥
ଅନ୍ୱହଂ ପୂଜୟି ବୋଧିଂ, ପଟିମାୟୋ ଚ କାରୟି ।
ସବ୍ବେସଂ ଦୀପୱାସୀନଂ, ଭିକ୍ଖୂନଂ’ଦା ତିଚୀୱରଂ ॥
ମାଘାତଂ କାରୟିଦୀପେ, ସବ୍ବେସଂୟେୱ ପାଣିନଂ ।
ଆନିତଂ ଅତ୍ତନା କେସ-ଧାତୁଂ ସମ୍ମା ଅପୂଜୟି ॥
ରହେରଦକୱାରଞ୍ଚ, ଅଦାସି ଅଭୟୁତ୍ତରେ ।
ପୁରତ୍ଥିମା ଥେରୀୟାନଂ, ୱିହାରକୁନ୍ଥନାମ ସୋ ॥
ଆନେତ୍ୱା ଆସନଂ ତତ୍ଥ, ଠପେସି ଦୁମରାଜକେ ।
ୟାୱଜୀୱଂ ପୱତ୍ତେସି, ପୁଞ୍ଞକମ୍ମମସଙ୍ଖିୟଂ ॥
ମୋଗ୍ଗଲ୍ଲାନୋ ତଥା ଦାଠା, ପଭୁତି ଚୋ’ପତିସ୍ସକୋ ।
ପୁତ୍ତୋ ତସ୍ସା’ସୁମଗ୍ଗସ୍ସ, ଦେସଂ ଦତ୍ୱା ପୁରତ୍ଥିମଂ ॥
ଦତ୍ୱା ଠାନନ୍ତରଞ୍ଚାଦି-ପାଦସଞ୍ଞଂ ୱିସଜ୍ଜୟି ।
ଗନ୍ତ୍ୱା ତତ୍ଥ ୱସାହୀତି, ସୋପି ଗନ୍ତ୍ୱା ତହିଂ ୱସି ॥
ଠାନଂ ମଲୟରାଜଗ୍ଗଂ, ଦେସଂ ଦତ୍ୱାନ ଦକ୍ଖିଣଂ ।
ରକ୍ଖଣତ୍ଥଂ ସମୁଦ୍ଦସ୍ସ, ମଜ୍ଝିମଂ ତୁ ନିୟୋଜୟି ॥
ଉପତିସ୍ସଂ ତୁ ୱାସେସି, ସନ୍ତିକେୟେୱ ଅତ୍ତନୋ ।
ୱିସେସେନ ମମାୟନ୍ତୋ, ୟୂନଂ କଲ୍ୟାନଦସ୍ସନଂ ॥
ତସ୍ସ ଦ୍ୱାଦସମେ ୱସ୍ସେ, ଇତୋ କାସି ପୁରଂ ଗତୋ ।
ଧମ୍ମାତୁ ମିଧା’ନେସି, ତତୋ ୱାଣିଜ ମାଣୱୋ ॥
ରାଜା ଦିସ୍ୱା’ସମତ୍ଥୋ ସୋ, ଧମ୍ମାଧମ୍ମୱିଚାରଣେ ।
ହେମସଞ୍ଞାୟ ଦୀପମ୍ହି, ପତନ୍ତୋ ସଲଭୋ ୱିୟ ॥
ବୁଦ୍ଧଧମ୍ମୋତି ସଞ୍ଞାୟ, ତଂ ଗହେତ୍ୱାନ ସାଧୁକଂ ।
କତ୍ୱା ସକ୍କାରସମ୍ମାନଂ, ଗେହେ ରାଜଘରନ୍ତିକେ ॥
ଠପେତ୍ୱା ଅନୁୱସ୍ସଂ ତୁ, ନେତ୍ୱା ଜେତୱନଂ ମହଂ ।
କାତୁଂ କାରେସି ଚାରିତ୍ତଂ, ହିତଂ ମନ୍ତ୍ୱାନ ପାଣିନଂ ॥
ଏୱଂ କତ୍ୱା ସିଲାକାଳୋ, ପୁଞ୍ଞକମ୍ମମନପ୍ପକଂ ।
ପତ୍ତେ ତେରସମେ ୱସ୍ସେ, ୟଥାକମ୍ମମୁପାଗମି ॥
ଦାଠପ୍ପଭୁତିକୋ ରଜ୍ଜଂ, ଗହେତ୍ୱା ଭାତରଂସକଂ ।
ଅକ୍କମୋତି ନିୱାରେନ୍ତଂ, ମାରାପେସି ୱିବୁଦ୍ଧିକୋ ॥
ମୋଗ୍ଗଲ୍ଲାନୋ’ଥ ତଂ ସୁତ୍ୱା, ଅପ୍ପତ୍ତଂ ରଜ୍ଜମଗ୍ଗହି ।
ଅକାରଣେ ମେ ମାରେସି, କଣିଟ୍ଠଂ ଧମ୍ମୱାଦୀନଂ ॥
କାରାପେସ୍ସାମହମ୍ପଜ୍ଜ, ରଜ୍ଜନ୍ତି ପରିକୁପ୍ପିୟ ।
ସମାଦାୟ ମହାସେନଂ, ଅଗାରାହେର ପବ୍ବତଂ ॥
ରାଜାପି ସୁତ୍ୱା ସନ୍ନଦ୍ଧ-ବଲକାୟୋ କରିନ୍ଦକେ ।
ପବ୍ବତେ ସିୱିରଂ ବନ୍ଧି, ମୋଗ୍ଗଲ୍ଲାନୋ ନିସମ୍ମତଂ ॥
ସାପରାଧାନ ତେ ମେ ୱା, ମନୁସ୍ସା ଦୀପୱାସିନୋ ।
ଏକସ୍ମିଞ୍ଚ ମତେ ରଜ୍ଜ-ମୁଭିନ୍ନଂୟେୱ ନୋସିୟା ॥
ତସ୍ମା ଅଞ୍ଞେନ ୟୁଜ୍ଝନ୍ତୁ, ଉଭୋୟେୱ ମୟଂ ଇଧ ।
ହତ୍ଥିୟୁଦ୍ଧଂ କରୋମାତି, ରଞ୍ଞୋ ପେସେସି ସାସନଂ ॥
ସୋପି ସାଧୂତି ୱତ୍ୱାନ, ବଦ୍ଧପଞ୍ଚାୟୁଧୋ ଗଜଂ ।
ଆରୁୟ୍ହ ମୁନିନୋ ମାରୋ ୱିୟ ଓତ୍ଥରି ତାୱଦେ ॥
ମୋଗ୍ଗଲ୍ଲାନୋପି ସନ୍ନଦ୍ଧୋ, ଆରୁୟ୍ହ କରୀନଂ ୱରଂ ।
ତତ୍ଥା’ଗୋ ଅଞ୍ଞମଞ୍ଞଂ ତେ, ପାପୁଣିଂସୁ ମହାଗଜା ॥
ସଦ୍ଦୋ ସୂୟିତ୍ଥ ସଙ୍ଘଟ୍ଟେ, ଅସନିରାୱ ସନ୍ନିଭୋ ।
ଦନ୍ତଘାତେନ ଉଟ୍ଠାସି, ଜାଲା ୱିଜ୍ଜୁଲ୍ଲତା ୱିୟ ॥
ସଞ୍ଝାଘନସଭାଗା’ସୁଂ, ଗଜା ଲୋହିତମକ୍ଖିତା ।
ମୋଗ୍ଗଲ୍ଲାନଗଜାୱିଦ୍ଧୋ, ରଞ୍ଞୋଓସକ୍କି କୁଞ୍ଜରୋ ॥
ରାଜା ଆରଭି ତଂ ଦିସ୍ୱା, ଛିନ୍ଦିତୁଂ ସୀସମତ୍ତନୋ ।
ମୋଗ୍ଗଲ୍ଲାନୋ’ଥ ୱନ୍ଦନ୍ତୋ, ୟାଚି’ମେ’ୱଂ କିରୀଇତି ॥
ୟାଚମାନେପି ସୋମାନଂ, ମାନେନ୍ତୋ ଛିନ୍ଦିକନ୍ଧରଂ ।
ଛଡ୍ଡେସି ଛହି ସୋ ରଜ୍ଜଂ, ମାସେହି ଦିୱସେହି ଚ ॥
ମୋଗ୍ଗଲ୍ଲାନୋ ତତୋ ରାଜା, ଆସି ଦୀପେ ମହାବଲୋ ।
ମାତୁଲଞ୍ଚ ପଟିଚ୍ଚେମଂ, ଚୂଲନାମେନ ୱୋହରୁଂ ॥
ଆସାଧାରଣକାୱେୟ୍ୟୋ, ୱତ୍ଥୁତ୍ତୟ ପରାୟଣୋ ।
ଦାନସଂୟମ ସୋଚେୟ୍ୟୋ, ସୋରଚ୍ଚାଦିଗୁଣାଲୟୋ ॥
ଦାନେନ ପିୟୱାଚାୟ, ଅତ୍ଥସ୍ସ ଚରିୟାୟ ଚ ।
ସମାନତ୍ତସ୍ସଭାୱେନ, ସଙ୍ଗହେସି ମହାଜନଂ ॥
ପିଣ୍ଡପାତୱିହାରେହି, ଭେସଜ୍ଜଚ୍ଛାଦନେହି ଚ ।
ଭିକ୍ଖୁସଙ୍ଘଞ୍ହି ସଙ୍ଗଣ୍ହି, ଧମ୍ମିକାୟ ଚ ଗୁତ୍ତିୟା ॥
ଅତିରେକାୟ ପୂଜାୟ, ପୂଜେତ୍ୱା ଧମ୍ମଭାଣକେ ।
ପିଟକେ ତୀଣି ୱାଚେସି, ସଦ୍ଧିମଟ୍ଠକଥାୟ ସୋ ॥
କୁମାରେ ଉପଲାଲେତ୍ୱା, ନିୱାପେନ ୟଥାରୁଚିଂ ।
ସଜ୍ଝାପେସି ସଦା ଧମ୍ମଂ, ଧମ୍ମଦୀପୋ ମହାମତି ॥
ଧମ୍ମଦୀପଞ୍ଚ ସୋ କତ୍ୱା, କୁଞ୍ଜରସେଖରେନି ସା ।
ଧମ୍ମାୱାସାନେ ୱାଚେସି, ପୁରମ୍ହି ପୁରିସୁତ୍ତମୋ ॥
ବନ୍ଧାପେସି କଦମ୍ବଞ୍ଚ, ନଦିଂପବ୍ବତମଜ୍ଝତୋ ।
ପତ୍ତପସାଣୱାପିଞ୍ଚ, ଧନୱାପିଂ ଗରିତରଂ ॥
ଗଣ୍ହାପେସି ସଦୀଘାୟୁ-ହେତୁ କମ୍ମନ୍ତି ସାଦରୋ ।
ଲିଖାପେସି ଚ ସଦ୍ଧମ୍ମଂ, ୱତ୍ଥୁପୂଜଞ୍ଚ କାରୟି ॥
ଲୋକଂ ସୋ ଅନୁକମ୍ପିତ୍ୱା, ମାତାପୁତ୍ତଂୱ ଓରସଂ ।
ଦତ୍ୱା ଭୁତ୍ୱା ୟଥାକାମଂ, ୱସ୍ସେ ୱୀସତିମେ ମରି ॥
ମହେସୀ ତସ୍ସ ଘାତେତ୍ୱା, ୱିସୟୋଗେନ ଞାତକେ ।
ପୁତ୍ତଂ ରଜ୍ଜେ’ଭିସିଞ୍ଚିତ୍ୱା, ସୟଂ ରଜ୍ଜଂ ୱିଚାରୟି ॥
ତଥାଭିସିତ୍ତୋ ସୋ କିତ୍ତି-ସିରିମେଘୋ ନରାଧିପୋ ।
ତିପୁପତ୍ତେହି ଛାଦେସି, ଦୁମିନ୍ଦଧରମାଦିତୋ ॥
କପଣଦ୍ଧିୱଣିବ୍ବାନଂ, ମହାଦାନଂ ପୱତ୍ତୟି ।
ମଗ୍ଗପାଲୋ ତଥାକାରୋ, ଅହୁ ସବ୍ବୋପଭୋଗିୟୋ ॥
ମହେସୀ ସା ସଦା ଆସି, ପଧାନା ସବ୍ବକମ୍ମସୁ ।
ରଜ୍ଜଂ ତସ୍ସା’ସି ତେନେୱ, ହେଟ୍ଠୁପରିୟୱତ୍ତିକଂ ॥
ରାଜାପାଦା ମହାମଚ୍ଚା’-ହେସୁଂ ଲଞ୍ଚପରାୟନା ।
ଦୁବ୍ବଲେ ଚ ୱିହେଠେସୁଂ, ବଲୀ ଜାନପଦା ନରା ॥
ସିଲାକାଳସ୍ସ କାଲମ୍ହି, ଗାମେ ସଙ୍ଗିଲ୍ଲନାମକେ ।
ଭୟୱସୀୱ୍ହୟୋ ପୋସୋ, ଅହୁ ମୋରିୟୱଂସଜୋ ॥
ଅହୋସି ପୁତ୍ତୋ ସୀୱସ୍ସ, ଅଗ୍ଗବୋଧି ସନାମକୋ ।
ଭାଗିନେୟ୍ୟୋପି ତସ୍ସାସି, ମହାନାଗୋତି ୱିସ୍ସୁତୋ ॥
ଭାଗିନେୟୋ ମହାନାଗୋ, ଅଗ୍ଗବୋଧି ଚ ସୁନ୍ଦରୋ ।
ଉଳାରଜ୍ଝାସୟତ୍ତା ସୋ, ମହାନାଗୋ ମହବ୍ବଲୋ ॥
ହିତ୍ୱା କସ୍ସକକମ୍ମାନି, ଚୋରକମ୍ମମକା ୱନେ ।
ଗୋଧଂ ଲଦ୍ଧାନ ପେସେସି, ମାତୁଲାନିୟ ସନ୍ତିକଂ ॥
ଗୋଧଂ ଦିସ୍ୱା’ୱସା ଞତ୍ୱା, ଧଞ୍ଞପଚ୍ଛିମପେସୟି ।
କମ୍ମାରସ୍ସା’ପି ପେସେସି, ସସଂ ସୋପି ତଥେୱକା ॥
ବୀଜଂ ଭଗିନୀ ମାୟାଚି, ବୀଜଗାହଞ୍ଚ ତସ୍ସ ସା ।
ଦାସଞ୍ଚ ଞତ୍ୱା ପେସେସି, ଅନ୍ନପାନାଦିନା ରହୋ ॥
ତଦା ଦୁବ୍ଭିକ୍ଖକାଲମ୍ହି, ଏକୋ ମନ୍ତଧରୋ ନରୋ ।
ଭିକ୍ଖାଲାଭାୟ ସଦ୍ଧେହି, ଭିକ୍ଖୁୱେସେନ ଭିକ୍ଖତି ॥
ତଂ ଗାମଂ ପୱିସିତ୍ୱା ସୋ, ଅଲଦ୍ଧା କିଞ୍ଚି ଭୋଜନଂ ।
ଅଭିଭୂତୋ ଜିଘଚ୍ଛାୟ, କମ୍ପମାନୋ ନିଗଚ୍ଛତି ॥
ତଂ ଦିସ୍ୱା କରୁଣାୟନ୍ତୋ, ମହାନାଗୋ ମହାଦୟୋ ।
ପତ୍ତମାଦାୟ ଗାମନ୍ତ-ମାହିଣ୍ଡିତ୍ୱାପି ସବ୍ବସୋ ॥
ୟାଗୁମତ୍ତମ୍ପି ନାଲତ୍ଥ, ତତୋ ଉତ୍ତରସାଟକଂ ।
ଦତ୍ୱା ଆହରି ଆହାରଂ, ସୋ ତଂ ଭୁତ୍ୱା ପସୀଦିୟ ॥
ରଜ୍ଜାରହମିମଂ ଦୀପେ, କରିସ୍ସାମୀତି ଚିନ୍ତିୟ ।
ତମାଦାୟ ଖଣେନା’ଗା, ଗୋକଣ୍ଣକମହଣ୍ଣୱଂ ॥
ଅଥ ତତ୍ଥ ନିସୀଦିତ୍ୱା, ସଞ୍ଜପନ୍ତୋ ୟଥାୱିଧିଂମ ।
ମନ୍ତୋନା’ନେସି ନାଗିନ୍ଦଂ, ଫୁସ୍ସପୁଣ୍ଣମରତ୍ତିୟଂ ॥
ମହାନାଗଂ ଫୁସାହୀତି, ମହାନାଗଂ ନିୟୋଜୟି ।
ସୋ ଭୀତୋ ପୁରିମେ ୟାମେ, ଆଗତଂ ତଂ ନ ସମ୍ଭୁସୀ ॥
ତଥା ମଜ୍ଝିମୟାମେପି, ପଚ୍ଛିମେ ପନ ନଙ୍ଗଲେ ।
ଗହେତ୍ୱା ଖିପି ତୀହେୱ, ଅଙ୍ଗୁଲୀହି ସତଂ ଛୁପି ॥
ସୋ ତଂ ବ୍ୟାକାସି ତଂ ଦିତ୍ୱା, ସବଲଂ ମେ ପରିସ୍ସମଂ ।
ତୀହି ରାଜୂହି ୟୁଜ୍ଝିତ୍ୱା, ଚତୁତ୍ଥଂ ତ୍ୱଂ ନିଘାତିୟ ॥
ୱୁଡ୍ଢୋ ତୀଣେୱ ୱସ୍ସାନି, ରାଜା ହୁତ୍ୱା ନ ଜୀୱସି ।
ତଥା ହେସ୍ସନ୍ତି ରାଜାନୋ, ତୟୋ ତେ ୱଂସଜା ନରା ॥
ଗନ୍ତ୍ୱା ସେୱସ୍ସୁ ରାଜାନଂ, ପଚ୍ଛା ପସ୍ସସି ମେଖଲଂ ।
ଇତି ୱତ୍ୱାନ ପେସେସି, ସୋପି ଗନ୍ତ୍ୱା ନରିସ୍ସରଂ ॥
ପସ୍ସିତ୍ୱା ତମୁପଟ୍ଠାସି, ରାଜା ରୋହଣକମ୍ମିକଂ ।
ତଂ ଅକାସି ତଦୁଟ୍ଠାନଂ, ଭଣ୍ଡମାହରି ସୋ ବହୁଂ ॥
ରାଜା ତସ୍ମିଂ ପସୀଦିତ୍ୱା, ଅନ୍ଧସେନାପତିୱ୍ହୟଂ ।
ଦତ୍ୱା ଠାନନ୍ତରଂ ତସ୍ସ, ଗନ୍ତୁଂ ତତ୍ଥେୱ ୟୋଜୟି ॥
ଭୟସୀୱସ୍ସ ପୁତ୍ତଞ୍ଚ, ଭାଗିନେୟ୍ୟଞ୍ଚ ଅତ୍ତନୋ ।
ଆଦାୟ ଗନ୍ତ୍ୱା ତଂ ଦେସଂ, ପରିୱତ୍ତେସି ସବ୍ବସୋ ॥
ପଚ୍ଚେକଭୋଗଂ କତ୍ୱାନ, ରୋହଣଂ ତତ୍ଥ ସୋ ୱସଂ ।
ଦାଠପ୍ପଭୂତିନା କାତୁଂ, ୟୁଦ୍ଧଂଗନ୍ତ୍ୱା ମହବ୍ବଲୋ ॥
ମୋଗ୍ଗଲ୍ଲାନଭୟା ଗନ୍ତ୍ୱା, ରୋହଣଞ୍ଚ ତହିଂ ୱସୀ ।
ସୁତ୍ୱା କିତ୍ତିସିରୀମେଘୱଣ୍ଣ-ରଞ୍ଞୋ ରଜ୍ଜେ ସମଞ୍ଜସଂ ॥
ରଜ୍ଜଂ ଗହେତୁଂ କାଲୋତି, ସୀଘଂ ଆଗମ୍ମ ରୋହଣା ।
ଏକୂନୱିସେ ଦିୱସେ, ମାରୟିତ୍ୱା ମହୀପତିଂ ॥
ସୟଂ ହୁତ୍ୱା ମହୀପାଲୋ, ଦେସଂ କତ୍ୱା ୟଥା ପୁରେ ।
ଭାଗିନେୟ୍ୟସ୍ସ ପାହେସି, ପଣ୍ଣମାଗଚ୍ଛତୂତି ସୋ ॥
ଆଗଚ୍ଛନ୍ତୋ ନିମିତ୍ତେନ, ନିୱତ୍ତିତ୍ୱା ମରିତ୍ଥ ସୋ ।
ତତୋ ମାତୁଲପୁତ୍ତଂ’କା, ଉପରଜ୍ଜଂ କତଞ୍ଞୁକୋ ॥
ଆଲୱାଲଂ ଦୁମିନ୍ଦସ୍ସ, କତ୍ୱା ହେମମୟଂ ଘରଂ ।
ଛାଦାପେସି ମୁନିନ୍ଦସ୍ସ, ପଟିମାୟୋ ଚ ସନ୍ଦହି ॥
ମହାଚେତିତ୍ତୟେ କାସି, ସୁଧାକମ୍ମଞ୍ଚ ଚୁମ୍ବଟଂ ।
ହତ୍ଥିୱେଦିଞ୍ଚ କାରେତ୍ୱା, ଚିତ୍ତକମ୍ମମକାରୟି ॥
ପେସକାରକଗାମଂ ସୋ, ଜମ୍ବେଲୱ୍ହୟମୁତ୍ତରେ ।
ମହାୱିହାରେଚାବନ୍ଧି, ଗାମଂ ତିନ୍ତିଣିକୱ୍ହୟଂ ॥
ଉଦ୍ଧଗାମମ୍ହି ୱସଭ-ଗାମଂ ଜେତୱନସ୍ସ’ଦା ।
ୱତ୍ଥଦାନଂ ନିକାୟେସୁ, ତୀସୁ ଚେୱ ପୱତ୍ତୟି ॥
ଖେତ୍ତାନଂ ହିସତଂ ଦତ୍ୱା, ୱିହାରେ ଜେତନାମକେ ।
ୟାଗୁଂ ତତ୍ଥ ପୱତ୍ତେସି, ଭିକ୍ଖୂନଂ ସବ୍ବକାଲିକଂ ॥
ସହସ୍ସ ଦୂରତିସ୍ସୱ୍ହା, ଖେତ୍ତଂ ଦତ୍ୱା ତପସ୍ସିନଂ ।
ମହାୱିହାରୱାସୀନଂ, ୟାଗୁଂ ନିଚ୍ଚଂ ପୱତ୍ତୟି ॥
ଚିରମାତିକୱାରଞ୍ଚ, ତତ୍ଥେୱ’ଦା ଗୁଣେ ରତୋ ।
ମୟୂରପରିୱେଣେ ଚ, ନୱକମ୍ମମକାରୟି ॥
କାସିଖଣ୍ଡେ ମହାଦେୱ-ରତ୍ତକୁରୱନାମକେ ।
ୱିହାରେ ଅନୁରାରାମଂ, ଜିଣ୍ଣଞ୍ଚ ପଟିସଙ୍ଖରୀ ॥
କମଂ ସୋୱଗ୍ଗିକଂ କତ୍ୱା, ଏୱମାଦିଂ ନରିସ୍ସରୋ ।
ଅଗମା ତୀହି ୱସ୍ସେହି, ଦେୱରାଜସହବ୍ୟତଂ ॥
ଅଟ୍ଠେତେ କୁଟ୍ଠଚିତ୍ତା’ପରିମିତୱିଭୱା ରାଜରାଜେନରୂପା ।
ରାଜାନୋ ରାଜମାନା ନରକରିତୁରଗାସୂରସେନାରଥେହି ।
ଅନ୍ତେ ହିତ୍ୱା’ଖିଲଂ ତଂ ୱିଗତପରିଜନା’ଳାହନଂ ସଙ୍ଖତାସୁଂ ।
ସପ୍ପଞ୍ଞୋ ତଂ ସରନ୍ତୋ ଭୱତୁ ଭୱସୁଖଂ ୱନ୍ତୁକାମୋ ହିତେସୀ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଅଟ୍ଠରାଜକୋ ନାମ
ଚତ୍ତାଲୀସତିମୋ ପରିଚ୍ଛେଦୋ ।
ଏକଚତ୍ତାଲୀସତିମ ପରିଚ୍ଛେଦ
ଦ୍ୱିରାଜକୋ
ମହାନାଗନରିନ୍ଦସ୍ସ, ଭାଗିନେୟ୍ୟୋ ସୁଭାଗିୟୋ ।
ସୋ ଅଗ୍ଗବୋଧିରାଜାସି, ଅଗ୍ଗବୋଧିଗତାସୟୋ ॥
ତେଜେନ ବାହୁଂ ସୋମ୍ମେନ, ଚନ୍ଦଂ ସମ୍ପୁଣ୍ଣମଣ୍ଡଲଂ ।
ସୁମେରୁମଚଲନ୍ତେନ, ଗମ୍ଭିରେନ ମହୋଦଧିଂ ॥
ୱସୁନ୍ଧରା ପକମ୍ପେନ, ମାରୁତଂ ସମ୍ପୱୁତ୍ତିୟା ।
ବୁଦ୍ଧିୟାମରମନ୍ତାରଂ, ସୁଦ୍ଧିୟା ସରଦମ୍ବରଂ ॥
କାମଭୋଗେନ ଦେୱିନ୍ଦ, ମତ୍ଥେନ ଚ ନରିସ୍ସରଂ ।
ଧମ୍ମେନ ସୁଦ୍ଧୱାସେଟ୍ଠଂ, ୱିକ୍କମେନ ମିଗାଧିପଂ ॥
ରାଜଧମ୍ମେହି ରଜ୍ଜେହି, ଚକ୍କୱତ୍ତିନରିସ୍ସରଂ ।
ୱେସ୍ସନ୍ତରଞ୍ଚ ଦାନେନ, ଅନୁଗନ୍ତ୍ୱା ଜନେ ସୁତୋ ॥
ମାତୁଲଂ ଉପରାଜୱ୍ହେ, ଭାତରଂ ୟୁୱରାଜକେ ।
ଭାଗିନେୟ୍ୟଞ୍ଚ ମଲୟ-ରାଜଠାନେ ଠପେସି ସୋ ॥
ଠାନନ୍ତରେ ୟଥାୟୋଗଂ-ସେଟ୍ଠାମଚ୍ଚେ ଠପେସି ଚ ।
ଜନଂ ସଙ୍ଗହୱତ୍ଥୂହୀ, ରାଜଧମ୍ମେହି ଚଗ୍ଗହି ॥
ଦେସଂ ସୟୋଗ୍ଗଂ ପାଦାସି, ୟୁୱରାଜସ୍ସ ଦକ୍ଖିଣଂ ।
ୱସଂ ତତ୍ଥ ସିରୀୱଡ୍ଢ-ମାନୱାପିଂ ସଗାହୟି ॥
କତ୍ୱା ଗିରିୱିହାରଞ୍ଚ, ସଙ୍ଘିକଂ ତସ୍ସ ଦାପୟି ।
ଖେତ୍ତାନଂ ଦ୍ୱିସତଂ ସଙ୍ଘ-ଭୋଗତ୍ଥାୟ ମହାମତି ॥
ଅଦା ମଲୟରାଜସ୍ସ, ଦାଠାନାମଂ ସଧୀତରଂ ।
ପରିୱେଣଂ ସୀରିସଙ୍ଘ-ବୋଧିନାମଞ୍ଚ କାରୟି ॥
ମହାସିୱସ୍ସ କାରେସି, ପରିୱେଣଂ ସନାମକଂ ।
ପରିୱାରୋ’ପି ତସ୍ସାସି, ଏୱଂ ପୁଞ୍ଞପରାୟନୋ ॥
କତ୍ୱା ସାଧୁପଚାରେନ, ପୋରାଣଂ ସଙ୍ଗହଂ ୱିଧିଂ ।
ଅନ୍ତରାୟଂ ୱିସୋଧେତୁଂ, ଜିଣ୍ଣଞ୍ଚ ପଟିସଙ୍ଖରି ॥
କୱୟୋ ତସ୍ସ ରଜ୍ଜମ୍ହି, ସୀହଳାୟ ନିରୁତ୍ତିୟା ।
କାୱେୟ୍ୟେ ବହୁକେ’କାସୁଂ, ୱିଚିତ୍ରନୟାସାଲିନୋ ॥
ୱିହାରେ ଦକ୍ଖିଣେ କାସି, ପାସାଦଂ ସୁମନୋହରଂ ।
ଅକା ନୱହି ୱସ୍ସେହି, ଦିପେ କଣ୍ଟକସୋଧନଂ ॥
କୁରୁନ୍ଦନାମଂ କାରେତ୍ୱା, ୱିହାରଂ ସବ୍ବସଙ୍ଘିକଂ ।
ୱାପିଂ ତନ୍ନାମକଂ ନାଳି-କେରାରାମଂ ତିୟୋଜନଂ ॥
ମହାସିୱୱ୍ହୟେ ଚେୱ, ସସ୍ସଂ କାରୟିତୁଂ ଅଦା ।
ଲାଭସକ୍କାରସମ୍ମାନ-ମାରାମିକସତଂ ତଦା ॥
ୱିହାରଂ ତଂ ସମୀପମ୍ହି, କତ୍ୱା ଅମ୍ବିଲପସ୍ସୱଂ ।
ଗାମଂ ତନ୍ନାମକଂ ଚାଦା, ଥେରିୟାନଂ ତପସ୍ସୀନଂ ॥
ଉତ୍ତରୱଲ୍ଲିୱିହାରସ୍ସ, ରତନଂ ଦୀଘୱଣ୍ଣିତଂ ।
ଦତ୍ୱା ଗାମଂ ପତିଟ୍ଠେସି, ସତ୍ଥୁବିମ୍ବଂ ସିଲାମୟଂ ॥
କେଳିୱାତେ ଚ କାରେସି, ସୁମନଂ ନାମ ପବ୍ବତଂ ।
ମହାତେଲୱଟଂବୋଧି-ଘରେ ପାସାଣୱେଦିକଂ ॥
କାରେତ୍ୱା ଲୋହପାସାଦଂ, ପାସାଦମହନେ ଅଦା ।
ଛତ୍ତିଂସାନଂ ସହସ୍ସାନଂ, ଭିକ୍ଖୂନଂ ସୋ ତିଚୀୱରଂ ॥
ଗାମଂ ଦତ୍ୱା ନିୟୋଜେସି, ଆରକ୍ଖଂ ଧୀତୁ ନାମକଂ ।
ହତ୍ଥିକୁଚ୍ଛିୱିହାରେପି, ପାସାଦଂ କାସି ବୁଦ୍ଧିମା ॥
ଦାଠା ସିୱସ୍ସ ଠତ୍ୱାନ, ଓୱାଦେ ସାଧୁ ଭିକ୍ଖୁନୋ ।
ସମାଚରନ୍ତୋ ଧମ୍ମେନ, ସକ୍କଚ୍ଚଂ ତମୁପଟ୍ଠହି ॥
ମୂଗସେନାପତିଂ ଚାକା, ୱିହାରଂ ସୋ ୱିସାଲକଂ ।
ଗାମଂ ଲଜ୍ଜିକମେତସ୍ସ, ଦାସ ଭୋଗାୟ’ଦାସି ଚ ॥
ମହାନାଗସ୍ସ ପୁଞ୍ଞତ୍ଥଂ, ରଞ୍ଞୋ ତଂନାମକଂ ଅକା ।
ମହାଥେରସ୍ସ ତଞ୍ଚା’ଦା, ରାଜା ତେପିଟକସ୍ସ ସୋ ॥
ଅତ୍ତନୋ ସଦିସାନଞ୍ଚ, ୟୋଗୀନଂ ୱିଗତାଲୟୋ ।
ଭିକ୍ଖୂନଂ ଚତୁସଟ୍ଠୀନଂ, ୱିହାରଂ ତଂ ତଦା ଅଦା ॥
କତ୍ୱା ତସ୍ସେୱ ମହା-ପରିୱେଣନିୱାସିନୋ ।
ଭିନ୍ନୋରୁଦୀପଂ ଦତ୍ୱାନ, ୱଟ୍ଟକାକାରପିଟ୍ଠିତୋ ॥
ଦକ୍ଖିଣଗୀରିଦଳ୍ହୱ୍ହେ, ମହାନାଗେ ଚ ପବ୍ବତେ ।
କାଳୱାପାଦିକେ ଚା’କା, ୱିହାରେ ପୋସଥାଲୟେ ॥
ୱିହାରେ ଅଭୟେ’କାସି, ମହାପୋକ୍ଖରଣିଂ ତଥା ।
ଚେତିୟପବ୍ବତେ ଚାକା, ନାଗସୋଣ୍ଡିଂ ଥିରୋଦିକଂ ॥
ମହିନ୍ଦତଟୱାୱିଞ୍ଚ, କାରାପେତ୍ୱାନ ସାଧୁକଂ ।
ଏତିସ୍ସା ମରିୟାଦାୟ, ଥେରଂ ନେତୁଂ ନିୟୋଜୟି ॥
ମହାମହିନ୍ଦ ଥେରମ୍ହି, ତଂଠାନସମୁପାଗତୋ ।
ତରଚ୍ଛା ଏୱ ନେତୁନ୍ତି, କତିକଞ୍ଚେୱ କାରୟି ॥
ଛତ୍ତଂ ସୋଣ୍ଣଞ୍ଚ କାରେସି, ନିକାୟେସୁପି ତୀସୁ ସୋ ।
ସତ୍ତାଟ୍ଠନୱ ୱାରେସୁ, ମହଗ୍ଘରତନେହି ଚ ॥
ମହାତୂପେ ଚତୁବ୍ବୀସ-ଭାରଂ ଛତ୍ତଂ ସୁୱଣ୍ଣୟଂ ।
ତତ୍ଥ ତତ୍ଥ ଚ ପୂଜେସି, ମହଗ୍ଘଂ ରତନୁତ୍ତମଂ ॥
ଦାଠାଧାତୁଘରଂ କତ୍ୱା, ୱିଚିତ୍ରରତନୁଜ୍ଜଲଂ ।
କାସି ହେମକରଣ୍ଡଞ୍ଚ, ଲୋହନାୱଞ୍ଚ ପାଳିୟଂ ॥
ମଣିମେଖଲନାମଞ୍ଚ, ବନ୍ଧାପେସି ସବନ୍ଧନଂ ।
ମହାମାତିଞ୍ଚ ଗଣ୍ହେସି, ମଣିହୀରକୱାପିୟଂ ॥
ତଦା ଏକୋ ମହାଥେରୋ, ଜୋତିପାଲକନାମକୋ ।
ପରାଜେସି ୱିୱାଦେନ, ଦୀପେ ୱେତୁଲ୍ଲୱାଦିନୋ ॥
ଦାଠାପଭୁତିନାମୋ’ଥ, ଆଦିପାଦୋ’ତିଲଜ୍ଜିତୋ ।
ହତ୍ଥମୁକ୍ଖିପ୍ପି ତଂ ହନ୍ତୁଂ, ଗଣ୍ଡୋ ସଞ୍ଜାୟି ତଂଖଣେ ॥
ରାଜା ତସ୍ମିଂ ପସୀଦିତ୍ୱା, ୱିହାରେୟେୱ ୱାସୟି ।
ମାନେନ ତଂ ଅନାଗମ୍ମ, ଦାଠାପଭୂମତୋ କିର ॥
ଦତ୍ୱା ମହାଦିପାଦତ୍ତଂ, ଭାଗିନେୟ୍ୟଗ୍ଗବୋଧିନୋ ।
ରକ୍ଖିତୁଂ ତଂ ନିୟୋଜେସି, ଥେରଂ ସୋପି ତମାଚରି ॥
ନୀଲଗେହପରିଚ୍ଛେଦଂ, କତ୍ୱା ତସ୍ସେୱ ସୋ ଅଦା ।
କତ୍ୱେୱଂ ବହୁଧା ପୁଞ୍ଞଂ, ଚତୁତ୍ତିଂସେ ସମେ ମତୋ ॥
ଅଗ୍ଗବୋଧି ତତୋ ଆସି, ରାଜା ପୁବ୍ବସ୍ସ ରାଜିନୋ ।
ମହଲ୍ଲକତ୍ତାନଂ ଖୁଦ୍ଦ-ନାମେନ ପରିଦୀପୟୁଂ ॥
ସୋ ଦୀପଂ ପରିପାଲେସି, ପୁବ୍ବଚାରିତ୍ତକୋୱିଦୋ ।
ଅକାସି ଚ ମହେସିଂ ସୋ, ମାତୁଲଧୀତୁମତ୍ତନୋ ॥
ସଙ୍ଘଭଦ୍ଦଂ ଅସିଗ୍ଗାହଂ, କାସି ବନ୍ଧୁଂ ମହେସିୟା ।
ୟଥାରହମଦା ଚେୱ, ଠାନନ୍ତରମନାଲୟୋ ॥
କତ୍ୱା ୱେଳୁୱନଂ ରାଜା, ସାଗଲୀନଂ ନିୟୋଜୟୀ ।
ଜମ୍ବୁରନ୍ତରଗଲ୍ଲଞ୍ଚ, କାସି ମାତିକପିଟ୍ଠିକଂ ॥
ରଞ୍ଞୋ ତସ୍ସେ’ୱ ରଜ୍ଜମ୍ହି, କାଲିଙ୍ଗେସୁ ମହୀପତି ।
ସତ୍ତାନଂ ମରଣଂ ୟୁଦ୍ଧେ, ଦିସ୍ୱା ସଂୱିଗ୍ଗମାନସୋ ॥
ଇମଂ ଦୀପମୁପାଗମ୍ମ, ପବ୍ବଜ୍ଜା କତନିଚ୍ଛୟୋ ।
ଜୋତିପାଲମ୍ହି ପବ୍ବଜି, ରାଜା ସକ୍କାସି ତଂ ଚିରଂ ॥
ପଧାନଠାନଂ ତସ୍ସ’କା, ୱିହାରେ ମତ୍ତପବ୍ବତେ ।
ତସ୍ସାମଚ୍ଚୋ ମହେସୀ ଚ, ତଥେୱା’ଗମ୍ମ ପବ୍ବଜୁଂ ॥
ରଞ୍ଞୋ ମହେସୀ ସୁତ୍ୱାନ, ତସ୍ସ ପବ୍ବଜ୍ଜମୁତ୍ତମଂ ।
ସକ୍କଚ୍ଚଂ ତମୁପଟ୍ଠାସି, ରତନୱ୍ହଞ୍ଚ କାରୟି ॥
ଅଦା ରାଜା ଅମଚ୍ଚସ୍ସ, ପାଚୀନକଣ୍ଡରାଜିୟଂ ।
ୱେତ୍ତୱାସୱିହାରଞ୍ଚ, ସୋ’ଦା ସଙ୍ଘସ୍ସ ତଂ ୟତି ॥
ରାଜତ୍ଥେରେମତେ ରାଜା, ସୋଚିତ୍ୱା ପରିଦେୱିୟ ।
ପଧାନଠାନଂ କାରେସି, ଚୂଳଗଲ୍ଲୱିହାରକେ ॥
ପଲଂନଗରଗଞ୍ଚେୱ, ତସ୍ସ ଠାନଞ୍ହି କାରୟି ।
ଏୱଂ ତଦତ୍ଥଂ ପୁଞ୍ଞାନି, ବହୂନି’ପି ମହୀପତି ॥
ଜୋତିପାଲିତ ଥେରମ୍ହି, ତୂପାରାମମ୍ହି ଚେତିୟଂ ।
ୱନ୍ଦମାନେ ପଭିଜ୍ଜିତ୍ୱା, ଭାଗୋ ତଂ ପୁରତୋ ପତି ॥
ପକ୍କୋସିତ୍ୱାନ ରାଜାନଂ, ଥେରୋ ଦସ୍ସେସି ଦୁକ୍ଖିତୋ ।
ରାଜା ଦିସ୍ୱାୱ ସଂୱିଗ୍ଗୋ, କମ୍ମଂ ପଟ୍ଠପି ତଂଖଣେ ॥
ଦକ୍ଖିଣକ୍ଖକଧାତୁଂ ସୋ, ଲୋହପାସାଦକୁଚ୍ଛିୟଂ ।
ସାରକ୍ଖଂ ଠପୟିତ୍ୱାନ, ରତ୍ତିନ୍ଦିୱମପୂଜୟି ॥
ନୱକମ୍ମେ ଚିରାୟନ୍ତେ, ଥୂପାରାମମ୍ହି ଦେୱତା ।
ସୁପିନଂ ତସ୍ସ ଦସ୍ସେସୁଂ, ରତ୍ତିମାରାମିକା ୱିୟ ॥
ସଚେ ରାଜା ପପଞ୍ଚେତି, କାତୁଂ ଧାତୁଘରଂ ମୟଂ ।
ଧାତୁଂ ଗହେତ୍ୱା ଗଚ୍ଛାମ, ୟତ୍ଥତତ୍ଥା’ତି ତଂଖଣେ ॥
ରାଜା ପବୁଦ୍ଧୋ ସଂୱିଗ୍ଗୋ, ନ ଚିରେନେୱ କାରୟି ।
କମ୍ମଂ ଧାତୁଘରେସବ୍ବଂ, ଚିତ୍ତକମ୍ମାଦିସଞ୍ଞୁତ୍ତଂ ॥
ଚତସ୍ସୋ ପଟିମାୟୋ ଚ, ପଲ୍ଲଙ୍କେ ଚ ସିଲାମୟେ ।
ହେମଚ୍ଛତ୍ତଂ ସିଲାଦନ୍ତ-କମ୍ମଂ ଗେହମ୍ହି ସବ୍ବସୋ ॥
ମହାମଚ୍ଚାଦୟୋ’କଂସୁ, କରଣ୍ଡାନଂ ସତଂ ନୱ ।
ଦେୱାନଂପିୟତିସ୍ସସ୍ସ, କମ୍ମଞ୍ଚ ନିଖିଲଂ ନୱଂ ॥
ସବ୍ବୁସ୍ସାହେନ କାରେତ୍ୱା, ମହାପୂଜଂ ୟଥାରହଂ ।
ଆନେତ୍ୱା ଲୋହପାସାଦା, ଧାତୁଂ ସବ୍ବାଦରେନ ସୋ ॥
ଜୋତିପାଲଂ ମହାଥେରଂ, ସସଙ୍ଘଂ ପରିୱାରିୟ ।
ପରିହାରେନ ୱଡ୍ଢେସି, ଧାତୁଂ ଧାତୁକରଣ୍ଡକେ ॥
ଧାତୁଗେହସ୍ସ ପାଦାସି, ଲଙ୍କାଦୀପଂ ସହତ୍ତନା ।
ଲାଭଗ୍ଗାମ-ମଦା ତସ୍ସା, ରକ୍ଖକାନଂ ମହେସିୟା ॥
ନାଗଦୀପମ୍ହି ଗେହଞ୍ଚ, ରାଜାୟତନଧାତୁୟା ।
ଉଣ୍ଣଲୋମଘରଞ୍ଚେୱ, ଛତ୍ତମାମଲଚେତିୟେ ॥
ତତ୍ଥ ଗାମଂ ୱିହାରସ୍ସ, ୟାଗୁଦାନାୟ’ଦାସି ଚ ।
ୱିହାରସ୍ସ’ଭୟସ୍ସା’ଦା, ଗାମମଙ୍ଗଣସାଲକଂ ॥
ନାମଂ କତ୍ୱାନ ସୋ’କାସି, ଅତ୍ତନୋ ଚ ମହେସିୟା ।
ଦାଠଗ୍ଗବୋଧିମାୱାସଂ, ୱିହାରେ ଅତୟୁତ୍ତରେ ॥
ଦେୱୀ କପାଲନାଗଂ ସା, ୱିହାରଂ ସାଧୁକାରିୟ ।
ତସ୍ସେ’ୱାଦା ୱିହାରସ୍ସ, ସମ୍ପନ୍ନଚତୁପଚ୍ଚୟଂ ॥
ଗେହଂ ଜେତୱନେ କାସି, ରାଜା ରାଜତଚୁମ୍ବଟଂ ।
ଉଦପାନଂ ମଣାପେସି, ସୋୱ ବୋଧିଘରନ୍ତିକେ ॥
ଗଙ୍ଗାତଟଂ ୱଲାହସ୍ସଂ, ୱାପିଂ ଗିରିତଟଞ୍ଚକା ।
ମହାପାଳିଂପି ୱଡ୍ଢେସି, ଭତନାୱଞ୍ଚ କାରୟି ॥
ଭିକ୍ଖୂନୀନଂ ମହେସୀ ଚ, ଭତ୍ତୱଂସଂ ସମାଦିସି ।
ଏୱଂ ପୁଞ୍ଞାନି କତ୍ୱା ସୋ, ଦିୱଂ’ଗା ଦସମେ ସମେ ॥
ଏୱଂ ପୁଞ୍ଞରତା ନରାଧିପତୟୋ ସମ୍ପନ୍ନଭୋଗା ଗମୁଂ ।
ମଚ୍ଚୁସ୍ସେୱ ୱସଂ ତତୋହି ମତିମା ସମ୍ମା ଭୱସ୍ସୀଦିସଂ ।
ପସ୍ସନ୍ତୋ ନିୟମଂ ୱିହାୟ ୱିଧିନା ସବ୍ବଂ ଭୱେ ସଙ୍ଗତିଂ ।
ନିବ୍ବାନାଭିମୁଖୋ ଚରେୟ୍ୟ ଧିତିମା ପବ୍ବଜ୍ଜମଜ୍ଝୂପଗୋ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦ୍ୱିରାଜକୋ ନାମ
ଏକଚତ୍ତାଲୀସତିମୋ ପରିଚ୍ଛେଦୋ ।
ଦ୍ୱିଚତ୍ତାଲୀସତିମ ପରିଚ୍ଛେଦ
ଛ ରାଜକୋ
ସଙ୍ଘତିସ୍ସୋ ତତୋ ଆସି, ଅସିଗ୍ଗାହୋ ମହୀପତି ।
ସାସନସ୍ସ ଚ ରଟ୍ଠସ୍ସ, ୱୁଦ୍ଧିକାମୋ ନୟେ ରତୋ ॥
ଠାନନ୍ତରଂ ୟଥାରହଂ, ଦତ୍ୱା ସଙ୍ଗଣ୍ହିସୋ ଜନଂ ।
ତଦା ଖୁଦ୍ଦକରାଜସ୍ସ, ମୋଗ୍ଗଲ୍ଲାନୋ ଚମୂପତି ॥
ୱସନ୍ତୋ ରୋହଣେ ସୁତ୍ୱା, ସଙ୍ଘତିସ୍ସସ୍ସ ରାଜତଂ ।
ଖନ୍ଧୱାରଂ ସୟୁଦ୍ଧତ୍ଥଂ, ମହାଗଲ୍ଲେ ନିୱେସୟି ॥
ସଙ୍ଘତିସ୍ସୋ ଚ ସୁତ୍ୱା ତଂ, ବଲକାୟମପେସୟି ।
ୟୁଜ୍ଝିତୁଂ ତେନ ତଜ୍ଜେସି, ମୋଗ୍ଗଲ୍ଲାନୋ ମହବ୍ବଲୋ ॥
ତତୋ ହତ୍ଥସ୍ସମାଦାୟ, ଗନ୍ତ୍ୱା ରତ୍ତିୱିହାରକଂ ।
ବଲଂ ସୋ ସନ୍ନିପାତେନ୍ତୋ, ୱାସଂ ତତ୍ଥେୱ କପ୍ପୟି ॥
ରାଜା ସୁତ୍ୱା ପୁନା’ଗନ୍ତ୍ୱା, କଦଲ୍ଲାଦୀନିୱାତକେ ।
ୟୁଜ୍ଝିତ୍ୱା ତଂ ପଲାପେତ୍ୱା, ପେସେତ୍ୱା ବଲମତ୍ତନୋ ॥
ସୟଂ ପୁରମୁପାଗଞ୍ଛି, ସୋପି ନଟ୍ଠଂ ସୱାହିନିଂ ।
ପୁନ ପାକତିକଂ କତ୍ୱା, କରେହେରମୁପାଗମି ॥
ରଞ୍ଞୋ ସେନାପତି ପୁତ୍ତଂ, ପେସେତ୍ୱା ଚୋରସନ୍ତିକଂ ।
ୟେନ କେନଚି ଲେସେନ, ସୟଂ ଦୁକ୍ଖିୱ ଦୁମ୍ମନୋ ॥
ଆତୁରୋ ୱିୟ ବାଳ୍ହଂ ସୋ, ହୋସି ମଞ୍ଚପରାୟନୋ ।
ରାଜା ସୁତ୍ୱା ପୱତ୍ତିତଂ, ଉପସଙ୍କମ୍ମ ତଙ୍ଖଣେ ॥
ମା ତ୍ୱଂ ସୋଚି କୁମାରସ୍ସ, ସମ୍ମାନେତ୍ୱାନୁସାସିୟ ।
ହନ୍ଦ ତ୍ୱଂ ନଗରଂ ରକ୍ଖ, ନତେ ସକ୍କା ମୟା ସହ ॥
ୟୁଦ୍ଧମଣ୍ଡଲମାଗନ୍ତୁଂ, ଗିଲାନତ୍ତାତି ୟୋଜୟି ।
ଉବ୍ବାସିତେ ଜନେ ସବ୍ବେ, ୱିଚ୍ଛିନ୍ନେ ରାଜଭୋଜନେ ॥
ମହାପାଳିମ୍ହି ସମ୍ପକ୍କଂ, ରଞ୍ଞୋ ଭୋଜନମାହରୁଂ ।
ରାଜା ଦ୍ୱିସ୍ୱା’ତି ନିବିନ୍ନୋ, ୟାୱ ମନ୍ଦୋ ନ ହେସ୍ସତି ॥
ଏକ୍କୋ ପୀତି ୱିଚିନ୍ତେତ୍ୱା, ୟୁଦ୍ଧାୟ ସମାସା’ଗମା ।
ସଦ୍ଧିଂ ପୁତ୍ତେନ ଆରୁୟ୍ହ, ହତ୍ଥିଂସନ୍ନଦ୍ଧୱାହନୋ ॥
ଥୋକେନେୱ ବଲେନାଗା, ପାଚିନତିସ୍ସପବ୍ବତଂ ।
ଏୱଂ ଉଭୟତୋ ଚୂଳ-ସଙ୍ଗାମେ ପଚ୍ଚୁପଟ୍ଠିତେ ॥
ସେନାପତିସମିତ୍ତଦ୍ଦୁ, ୟୁଦ୍ଧମାରଭି ପଚ୍ଛତୋ ।
ପୁତ୍ତୋ ଦିସ୍ୱା ନରିନ୍ଦସ୍ସ, ଘାତେସ୍ସାମି ଇମଂ ଇତି ॥
ଆହ ରାଜା ନିୱାରେସି, ମା ତେ ରୁଚ୍ଚି ବଲଂ ଇଦଂ ।
ନେୱ ସକ୍କା’ଧିୱାସେତୁଂ, ଅତିମନ୍ଦଂ ହନିସ୍ସତି ॥
ଦୁୱିନ୍ନଂ ବଲକାୟାନଂ, ରାଜାମଜ୍ଝଗତୋ ଅହୁ ।
ତତୋ ସେନା ଦ୍ୱିଧା’ହୋସି, ଚୋରସେନାପତୀପତି ॥
ରଞ୍ଞୋ ନାଗୋ ମଧୁକୱ୍ହ ରୁକ୍ଖଚ୍ଛାୟଂ ସମାୱିସି ।
ତଦା ଛତ୍ତଂ ପତିତସ୍ସ, ସାଖମାହଚ୍ଚ ଭୂମିୟଂ ॥
ଚୋରସ୍ସ ସେନା ତଂ ଦିତ୍ୱା, ହରିତ୍ୱା ସାମିନୋ ଅଦା ।
ସୋ ତଂ ଉସ୍ସାପୟିଛତ୍ତଂ, ଠତ୍ୱାପବ୍ବତମୁଦ୍ଧନି ॥
ତଦା ରାଜବଲଂ ରାଜା, ନୁନମେସୋତି ଚିନ୍ତିୟ ।
ଗନ୍ତ୍ୱା ତଂ ପରିୱାରେସି, ରାଜା ଆସି ତଦେକକୋ ॥
ହତ୍ଥିକ୍ଖନ୍ଧା ତଦୋରୁୟ୍ହ-ପୁତ୍ତଂ’ମଚ୍ଚଞ୍ଚ ସୋହଦଂ ।
ଉପାୱିସି ସମୀପମ୍ହି, ମେରୁମଜ୍ଜରକାନନଂ ॥
ମୋଗ୍ଗଲ୍ଲାନୋ ତତୋ ଲଦ୍ଧ-ଜୟୋ ୱାହନମାଦିୟ ।
ସେନାପତିଂଚ ମିତ୍ତଦ୍ଦୁଂ, ତସ୍ସ ପୁତ୍ତଞ୍ଚ ପାପିନଂ ॥
ଉପାଗମ୍ମ ପୁରଂ ରାଜା, ଆସୀ ଲଙ୍କା ତଲାଧିପୋ ।
ତତୋ ଚିନ୍ତେସି ଜୀୱନ୍ତେ, ସତ୍ତୁମ୍ହି ନ ସୁଖଂ ଇତି ॥
ସୋ ସୁତ୍ୱା ପୁବ୍ବରାଜସ୍ସ, ପୁତ୍ତୋ ଏତ୍ଥାତି କୁଜ୍ଝିୟ ।
ଆଣାପେସି ଚ ତସ୍ସା’ସୁ, ହତ୍ଥପାଦାନି ଛିନ୍ଦିତୁଂ ॥
ଉପକ୍କମି ତଦା ରଞ୍ଞା, ଆଣତ୍ତୋ ପୁରିସୋ ଖଣେ ।
ଛିନ୍ଦିତୁଂ ହତ୍ଥପାଦଂ ସୋ, କୁମାରୋ ରୋଦି ଦୁମ୍ମନୋ ॥
ପୂୱଖାଦକହତ୍ଥଂ ମେ, ଛିନ୍ଦେୟ୍ୟଂ ଚେ ତଦା ଅହଂ ।
ଖାଦିସଂ ତେନ ପୂୱେତି, ହଂ ସୁତ୍ୱା ରାଜକମ୍ମିକୋ ॥
ରୋଦିତ୍ୱା ପରିଦେୱିତ୍ୱା, ରାଜାଣାୟ ଦୁଖଦ୍ଦିତୋ ।
ୱାମଂ ହତ୍ଥଞ୍ଚ ପାଦଞ୍ଚ, ତସ୍ସ ଛିନ୍ଦି ନରାଧମୋ ॥
ଜେଟ୍ଠତିସ୍ସୋ ପଲାୟିତ୍ୱା, ରଞ୍ଞୋ ପୁତ୍ତୋ’ପରୋ ଅଗା ।
ଅଞ୍ଞତୋ ମଲୟଂ ଦେସଂ, ମେରୁକନ୍ଦରନାମକଂ ॥
ରାଜା’ଥ ସସୁତା’ମଚ୍ଚୋ, ଗନ୍ତ୍ୱା ୱେଳୁୱନଂ ରହୋ ।
ଚୋଦିତୋ ତତ୍ଥ ଭିକ୍ଖୂହି, କାସାୱାନି ସମାଦିୟି ॥
ଭିକ୍ଖୁୱେସଂ ଗହେତ୍ୱାନ, ରୋହଣଂ ଗନ୍ତୁମାନସୋ ।
ମଣିହୀରଂ ସମାଗଞ୍ଛି, ତତ୍ରଠା ରାଜସେୱକା ॥
ସଞ୍ଜାନିତ୍ୱା ତୟୋପେତେ, ତେସଂ ପାଦେୱରୁଜ୍ଝିୟ ।
ସାସନଂ ତସ୍ସ ପେସେସୁଂ, ରାଜା ସୁତ୍ୱା ୱିସେସତୋ ॥
ତୁଟ୍ଠୋ ଆଣାପୟି ଗନ୍ତ୍ୱା, ସୀଘମାଦାୟ ତେଜନେ ।
ତତୋ ସୀହଗିରିଂନେତ୍ୱା, ତିସ୍ସଙ୍କଂ ନିରୁପଦ୍ଦୱଂ ॥
ସୀସଂ ଗଣ୍ହଥ ତତ୍ଥେୱ, ରଞ୍ଞୋ ଚ ତନୟସ୍ସ ଚ ।
ଅମଚ୍ଚଂ ପନ ଜୀୱନ୍ତ-ମାନେୟ୍ୟାଥ ମମ’ନ୍ତିକଂ ॥
ମନୁସ୍ସା ଏୱମାଣତ୍ତା, ତେ ଗହେତ୍ୱା ତୟୋଜନେ ।
ନେତ୍ୱା ସୀହଗିରିଂକାତୁଂ, ୟଥାୱୁତ୍ତମୁପକ୍କମୁଂ ॥
ତତୋ ରାଜସୁତୋ ଆହ, ପୁରିସେ କମ୍ମକାରକେ ।
ସୀସଂ ମେ ପଠମଂ ଛେତ୍ୱା, ଦେଥ ମୟ୍ହଂ ସୁଖଂ ଇତି ॥
ରାଜପୋସା ତଥା’କାସୁଂ, ପଚ୍ଛାଛିନ୍ଦିଂସୁ ରାଜିନୋ ।
ସୀସଂ ପସ୍ସଥ ବାଲାନଂ, କମ୍ମଂ କମ୍ମୱିଦୂଜନା ॥
ଏୱଂ ଅନିଚ୍ଚା ଭୋଗାହି, ଅଧୁୱା ଅସୟଂୱସୀ ।
ତତ୍ଥ ଲଗ୍ଗା କଥଂ ନିଚ୍ଚଂ, ସୁଖଂ ଭୋ ନ ଗୱେସଥ ॥
ରଞ୍ଞୋ ସାସନମାହଂସୁ, ଅମଚ୍ଚସ୍ସ ହିତେସିନୋ ।
ତଂ ସୁତ୍ୱାନ ହସିତ୍ୱାନ, ଇଦଂ ୱଚନମବ୍ରୱି ॥
ଛିନ୍ନସୀସୋ ମୟା ଦିଟ୍ଠୋ, ମୟି ଜୀୱତି ସାମିକୋ ।
ଠପେତ୍ୱା ହମ୍ପି ସେୱାମି, ଅହୋ ଅଞ୍ଞଞ୍ହି ସାମିକଂ ॥
ଇଧ ତଂ ମାରୟିତ୍ୱାନ, ଛାୟଂ ତସ୍ସ ହରିସ୍ସଥ ।
ଅହୋ ଅଞ୍ଞାଣକା ତୁମ୍ହେ, ମଞ୍ଞେ ଉମ୍ମତ୍ତକା ଇତି ॥
ଇତି ୱତ୍ୱାନ ସୋ ପାଦେ, ଗହେତ୍ୱା ସାମିନୋ ସୟି ।
ତସ୍ସ ତେ ହରଣୋପାୟଂ, ଅପସ୍ସନ୍ତା ୟଥା ତଥା ॥
ତସ୍ସାପି ସୀସଂ ଛେତ୍ୱାନ, ମଚ୍ଚା ଆଦାୟ ତୀଣି’ପି ।
ରଞ୍ଞୋ ଦସ୍ସେତୁମାହଚ୍ଚ, ରାଜା ତୁସିତ୍ଥ ନିବ୍ଭୟୋ ॥
ଦୁଟ୍ଠସେନା ପତିସ୍ସା’ଦା, ତତୋ ମଲୟରାଜତଂ ।
ଅସିଗ୍ଗାହକଠାନମ୍ହି, ତସ୍ସ ପୁତ୍ତଂ ଠପେସି ଚ ॥
ଥୂପତ୍ତୟମ୍ପି ଛାଦେସି, ୱତ୍ଥେହି ଅହତେହି ସୋ ।
ତଥା ଲଙ୍କାତଲେ ସବ୍ବେ, ଥୂପେକାସି ମହୁସ୍ସୱଂ ॥
କେସଧାତୁଞ୍ଚ ନାଥସ୍ସ, ଦାଠାଧାତୁଂ ତଥେୱ ଚ ।
ମହାବୋଧିଂ ସସକ୍କଚ୍ଚଂ, ମହାପୂଜାୟ ସକ୍କରି ॥
ସବ୍ବଂ ୱେସାଖପୂଜାଦିଂ, ଚାରିତ୍ତଂନୁଗତଂ ଅକା ।
ଧମ୍ମକମ୍ମେନ ସୋଧେସି, ସବ୍ବଂ ସୁଗତସାସନଂ ॥
ପିଟକାନଞ୍ଚ ସଜ୍ଝାୟଂ, ମହାପୂଜାୟ କାରୟି ।
ଲାଭଂ ଦତ୍ୱା ତିରେକେନ, ପୂଜୟିତ୍ଥ ବହୁସ୍ସୁତେ ॥
ଭିକ୍ଖୂନଂ ଦୀପୱାସୀନଂ, ସବ୍ବେସଂ ଚୀୱରଂ ଅଗା ।
ଆୱାସେସୁ ଚ ସବ୍ବେସୁ, କଥିନଂ ଅତ୍ଥରାପୟି ॥
ପଟିମାୟୋ ଚ କାରେସି, ଜିଣ୍ଣଞ୍ଚ ପଟିସଙ୍ଖରି ।
ଲୋଣକ୍ଖେତ୍ତଞ୍ଚ ପାଦାସି, ସଙ୍ଘସ୍ସ ତିସତାଧିକଂ ॥
କାରପିଟ୍ଠିମ୍ହି କାରେସି, ମୋଗ୍ଗଲ୍ଲାନ ୱିହାରକଂ ।
ୱିହାରା ପିଟ୍ଠିଗାମଞ୍ଚ, ସଗାମଂ ୱଟଗାମକଂ ॥
ତଥା ଚେତିୟଗେହଞ୍ଚ’-କାସି ରକ୍ଖୱିହାରକେ ।
ୱିହାରଂ ନଂ ବହୁନ୍ନଂ ସୋ, ଭୋଗଗାମେ ବହୂ ଅଦା ॥
ଏୱଂ ପୁଞ୍ଞାନୀ ସୋ’କାସି, ଅପ୍ପମେୟ୍ୟାନି ଭୂମିପୋ ।
ସମ୍ପତ୍ତୀନମନିଚତ୍ତଂ, ସରନ୍ତୋ ପୁବ୍ବରାଜିନୋ ॥
ତଦା କେନଚି ଦୋସେନ, କୁଦ୍ଧୋମଲୟରାଜିନୋ ।
ସରିତ୍ୱା ପୁବ୍ବରାଜସ୍ସ, କତଂ ତେନ ୱିରୂପକଂ ॥
ଉପାୟେନ ଗହେତ୍ୱାନ, ହତ୍ଥପାଦଞ୍ଚ ଛେଦୟି ।
ତଂ ସୁତ୍ୱା ସୋ ଅସିଗ୍ଗାହୋ, ସପୁତ୍ତୋ ରୋହଣଂଗତୋ ॥
ୱସନ୍ତୋ ତତ୍ଥ ସୋ କତ୍ୱା, ହତ୍ଥେ ଜନପଦଂ ଲହୁଂ ।
ଜେଟ୍ଠସିସ୍ସମୁପଗଞ୍ଛି, ନିଲୀନଂ ମଲୟେ ଠିତଂ ॥
ସଦ୍ଧିଂ ତେନସଘାତେନ୍ତୋ, ରଟ୍ଠଂ ଜନପଦଂ ଖଣେ ।
ଦୋଳପବ୍ବତମାଗମ୍ମ, ଖନ୍ଧାୱାରଂ ନିୱେସୟି ॥
ରାଜା ସୁତ୍ୱାନ ତଂ ସବ୍ବଂ, ସନ୍ନଦ୍ଧବଲୱାହନୋ ।
ଖନ୍ଧାୱାରଂ ନିୱେସେସି, ଗନ୍ତ୍ୱା ତସ୍ସେୱ ସନ୍ତିକଂ ॥
ତଦା ପଜ୍ଜରରୋଗେନ, ମନୁସ୍ସାରାଜିନୋ ବହୂ ।
ଉପଦ୍ଦୁତା ମତା ଆସୁଂ, ତଂ ସୁତ୍ୱା ସୋ ଅସିଗ୍ଗହୋ ॥
ୟୁଦ୍ଧମାରଭିୱେଗେନ, ରଞ୍ଞୋ ସେନାତିଦୁବ୍ବଲା ।
ପଭିଜ୍ଜିତ୍ୱା ପଲାୟିତ୍ଥ, ରାଜାପଚ୍ଛା ପଲାୟି ସୋ ॥
ଦିସ୍ୱା ଏକାକିନଂ ୟନ୍ତଂ, ସୀହପବ୍ବତସନ୍ତିକେ ।
ଅସିଗ୍ଗାହୋ ମହାରାଜଂ, ମାରୟିତ୍ଥ ସପରିସଂ ॥
ଓହୀନଂ ପଚ୍ଛତୋ ଜେଟ୍ଠ-ତିସ୍ସମ୍ପି ପନ ମାରିତୁଂ ।
ସାସନଂ ତସ୍ସ ପେସେସି, ଏହି ରାଜା ଭୱାହୀତି ॥
ସୋ ତଞ୍ଞତ୍ୱା ପଲାୟିତ୍ୱା, ନିୱତ୍ତୋ ମଲୟଂ ଅଗା ।
କଥଞ୍ହି ଲଦ୍ଧଂ କିଚ୍ଛେନ, ରଜ୍ଜଂସୋ ଦେତି ମେ ଇତି ॥
ଏୱଂ ଖୋ ଦଲ୍ଲନାମଂ ସୋ, ମୋଗ୍ଗଲ୍ଲାନଂ ନରିସ୍ସରଂ ।
ମାରେତ୍ୱା ଛହି ୱସ୍ସେହି, ସମ୍ପତ୍ତବଲୱାହନୋ ॥
ଅଥା’ଗନ୍ତ୍ୱା ଅସିଗ୍ଗାହୋ, ଅନୁରାଧପୁରଂ ୱରଂ ।
ରାଜା ହୁତ୍ୱା ପୱତ୍ତେସି, ଆଣାଚକ୍କଂ ମହୀତଲେ ॥
ସ ସିଲାମେଘୱଣ୍ଣୱ୍ହୋ, ସଙ୍ଘଂ ବୋଧିଞ୍ଚ ୱନ୍ଦିୟ ।
ଥୂପତ୍ତୟଞ୍ଚ ସକ୍କାସି, ମହାପାଳିଞ୍ଚ ୱଡ୍ଢୟି ॥
ପାୟାସଂ’ଦାସି ସଙ୍ଘସ୍ସ, ସପ୍ପିଫାଣିତସଙ୍ଖତଂ ।
ଛାତକେ ଅତିକିଚ୍ଛମ୍ହି, ପରିସ୍ସାୱନମେୱ ଚ ॥
ସବ୍ବଦାନେନ ସଙ୍ଗଣ୍ହୀ, କପଣଦ୍ଧିୱଣିବ୍ବକେ ।
ପୂୱମୂଲଧନଂଚା’ଦା, କୁମାରାନଂ ମହାଦୟୋ ॥
ୱିହାରେ ଅଭୟେ ବୁଦ୍ଧଂ, ପୂଜୟିତ୍ଥ ସୀଲାମୟଂ ।
ଜିଣ୍ଣଞ୍ଚ ଗେହଂ ତସ୍ସା’କା, ନାନାରତନଚିତ୍ତିକଂ ॥
କୋଲୱାପିଞ୍ଚ ଦତ୍ୱାନ, ଆରକ୍ଖତ୍ଥଂ ଜିନସ୍ସ ସୋ ।
ପୂଜଂ ସବ୍ବୋପହାରେହି, ସବ୍ବକାଲଂ ପୱତ୍ତୟି ॥
ଏୱଂ ତସ୍ମିଂ ମହୀପାଲେ, ୱସନ୍ତେ ପୁଞ୍ଞଭାଜନେ ।
ନାୟକୋ ସିରିନାଗୱ୍ହୋ, ଜେଟ୍ଠତିସ୍ସସ୍ସ ମାତୁଲୋ ॥
ଗନ୍ତ୍ୱାନ ପରତୀରଂ ସୋ, ଆଦାୟ ଦମିଳେ ବହୂ ।
ଆଗନ୍ତ୍ୱା ଉତ୍ତରଂ ଦେସଂ, ଗଣ୍ହିତୁଂ ତମୁପକ୍କମି ॥
ରାଜାପି ସୁତ୍ୱା ତଂ ଗନ୍ତ୍ୱା, ୟୁଜ୍ଝିତ୍ୱା ରାଜମିତ୍ତକେ ।
ଗାମେ ହନ୍ତ୍ୱାନ ତଂ ତେନ, ଦମିଳେ ସଦ୍ଧିମାଗତେ ॥
ହତସେସେ ଗହେତ୍ୱାନ, କତ୍ୱା ପରିଭୱଂ ବହୁଂ ।
ଅଦାସି ଦାସେ କତ୍ୱାନ, ୱିହାରେସୁ ତହିଂ ତହିଂ ॥
ଏୱଂସମ୍ପତ୍ତୱିଜୟେ, ପୁରମାଗମ୍ମଭୂମିପେ ।
ସବ୍ବଂ ରଟ୍ଠଂ ୱିସୋଧେତ୍ୱା, ୱସନ୍ତେ ଅକୁତୋ ଭୟେ ॥
ଭିକ୍ଖୁବୋଧୀ ସନାମୋ’ଥ, ୱିହାରେ ଅଭୟୁତ୍ତରେ ।
ଦୁସ୍ସୀଲେ ବହୁଲେ ଦିସ୍ୱା, ପବ୍ବଜ୍ଜାୟ ନୱୋପି ସୋ ॥
ରାଜାନମୁପସଙ୍କମ୍ମ, ଧମ୍ମକମ୍ମମୟାଚଥ ।
ରାଜା ତେ ନେୱ କାରେସି, ଧମ୍ମକମ୍ମଂ ୱିହାରକେ ॥
ଦୁସ୍ସୀଲା ନିହଟା ତେନ, ସବ୍ବେ ମନ୍ତିୟ ଏକତୋ ।
ରହୋ ତଂ ମାରୟିତ୍ୱାନ, ତଂ କମ୍ମଂ ପଟିବାହୟ୍ୟୁଂ ॥
ରାଜା ସୁତ୍ୱା ତଦା କୁଦ୍ଧୋ, ସବ୍ବେଗଣ୍ହିୟ ଏକତୋ ।
ଅକା ପୋକ୍ଖରଣୀ ପାଲେ, ଛିନ୍ନହତ୍ଥେ ସବନ୍ଧନେ ॥
ଅଞ୍ଞେ ତତ୍ଥ ସତଂ ଭିକ୍ଖୂ, ଜମ୍ବୁଦୀପେ ଖିପାପୟି ।
ସରନ୍ତୋ ତସ୍ସ ଉସ୍ସାହଂ, ପରିସୋଧେସି ସାସନଂ ॥
ଭିକ୍ଖୂ ଥେରିୟୱାଦେ ସୋ, କାତୁଂ ତେହି ଉପୋସଥଂ ।
ଆରାଧେତ୍ୱା ପଟିକ୍ଖିତ୍ତୋ, ପକୁପ୍ପିତ୍ୱା ଅନାଦରୋ ॥
ଅକ୍କୋସିତ୍ୱା ଚ ଭାସିତ୍ୱା, ୱାଚାହି ଫରୁସାହି ସୋ ।
ଭିକ୍ଖୂ ତେ ଅକ୍ଖମାପେତ୍ୱା, ଦକ୍ଖିଣଂ ଦେସମଜ୍ଝଗା ॥
ତସ୍ସ ସୋ ମହତା ଫୁଟ୍ଠୋ, ରୋଗେନ ମରିସଜ୍ଜୁକଂ ।
ଏୱଂ ନୱହି ୱସ୍ସେହି, ପରିଚ୍ଚଜି ମହୀତଲଂ ॥
ତସ୍ସ ପୁତ୍ତୋ ତତୋ ଅଗ୍ଗ-ବୋଧି ନାମୋ କୁମାରକୋ ।
ଆସି ରାଜାସିରିସଙ୍ଘ-ବୋଧିନାମେନ ୱିସୁତୋ ॥
କଣିଟ୍ଠଂ ଭାତରଂ ମାଣଂ, ଓପରଜ୍ଜେ’ଭିସଞ୍ଚିୟ ।
ତସ୍ସା’ଦା ଦକ୍ଖିଣଂ ଦେସଂ, ସୟୋଗ୍ଗବଲୱାହନଂ ॥
ରାଜା ସୋ ପୁବ୍ବରାଜୂନଂ, ପୱତ୍ତଂ ନ ୱିନାସିୟ ।
ରଟ୍ଠଂ ଧମ୍ମେନ ପାଲେସି, ସଙ୍ଘଞ୍ଚ ବହୁମାନୟି ॥
ଜେଟ୍ଠତିସ୍ସୋ’ଥ ତଂ ସବ୍ବଂ, ସୁଣିତ୍ୱା ମଲୟେ ଠିତୋ ।
ଅରିଟ୍ଠଂ ଗିରିମାଗମ୍ମ, ସଙ୍ଗହେସି ମହାଜନଂ ॥
କତ୍ୱା ହତ୍ଥଗତେ ପୁବ୍ବ-ଦକ୍ଖିଣେ ସୁସମାନସେ ।
କମେନ ପୁରମାଗନ୍ତୁ-ମାରଭିତ୍ଥ ମହାବଲୋ ॥
ଦାଠାସିୱ ମମଚ୍ଚଞ୍ଚ, ଗହେତୁଂ ପଚ୍ଛିମଂ ଦିସଂ ।
ପେସୟିତ୍ୱା ସୟଂ ଗାମେ, ୱସିତ୍ଥ ସିରିପିଟ୍ଠିକେ ॥
ରାଜା ନିସମ୍ମ ତଂସବ୍ବଂ, ଉପରାଜଂ ୱିସଜ୍ଜୟି ।
ସବଲଂ ପଚ୍ଛିମଂ ଦେସଂ, ସୋ ଗନ୍ତ୍ୱା ତଂ ପଲାପୟି ॥
ପୋତକଂୱ କୁଲାୱମ୍ହି, ସକ୍କା ହନ୍ତୁନ୍ତି ଦାରକଂ ।
ମାୟେତ୍ତଂ ଆଗତଂ ରାଜା, କୁମାରା’ମଚ୍ଚ ମଗ୍ଗହୀ ॥
ଜେଟ୍ଠତିସ୍ସଂପି ଏତଂୱ, ଗଣ୍ହିସ୍ସାମୀତି ଚିନ୍ତିୟ ।
ଥୋକେନେୱ ବଲେନାଗା, ନିରାସଙ୍କୋତିୱିକ୍କମୋ ॥
ଜେଟ୍ଠସିସ୍ସୋପି ତଂ ସୁତ୍ୱା, ସନ୍ନଦ୍ଧବଲୱାହନୋ ।
ସାଗରୋ ଭିନ୍ନୱେଲୋୱ, ରାଜସେନଂ ସମୋତ୍ଥରି ॥
ରାଜସେନା ପଭିଜ୍ଜିତ୍ଥ, ରାଜା ଆରୁୟ୍ହ କୁଞ୍ଜରଂ ।
ଏକୋ ଅଞ୍ଞାତୱେସେନ, ପଲାୟିତ୍ୱା ଖଣେନ ସୋ ॥
ଛଟ୍ଠେ ମାସମ୍ହି ରଜ୍ଜମ୍ହା, ନାୱମାରୁୟ୍ହ ସଜ୍ଜୁକଂ ।
ଜମ୍ବୁଦୀପମଗାହିତ୍ୱା, ଧନଂ ଦେସଞ୍ଚ ଞାତକେ ॥
ଜେଟ୍ଠତିସ୍ସୋ ତତୋ ହୁତ୍ୱା, ପୁରେ ରାଜାୟଥା ପୁରେ ।
ସବ୍ବଂ କିଚ୍ଚଂ ପୱତ୍ତେସି, ପରିପାଲେସି ସାସନଂ ॥
ମହାଦାରଗିରିଂ ସୋ’ଦା, ୱିହାରେ ଅଭୟୁତ୍ତରେ ।
ମହାୱିହାରସ୍ସା’ଦାସି, ମହାମେତ୍ତୱ୍ହବୋଧିକଂ ॥
ଗୋଣ୍ଡିଗାମଞ୍ଚ ପାଦାସି, ରାଜା ଜେତୱନସ୍ସ ସୋ ।
ମାତୁଲଙ୍ଗଣକଞ୍ଚେୱ, ଗାମଞ୍ଚୋ ଦୁମ୍ବରଙ୍ଗଣଂ ॥
ମହାନାଗସ୍ସ ପାଦାସି, ପଧାନଘରକସ୍ସ ସୋ ।
କସ୍ସପସ୍ସ ଗିରିସ୍ସାପି, ଆହାରଂ ଅମ୍ବିଲାପିକଂ ॥
ଗାମଂ କକ୍ଖଲୱିତ୍ଥିଞ୍ଚ, ଅଦାୱେଳୁୱନସ୍ସ ସୋ ।
ଗଙ୍ଗାମାତି ୱିହାରସ୍ସ, କେହେତଂ ଗାମକଂ ଅଦା ॥
ଅନ୍ତରାଗଙ୍ଗସୱ୍ହସ୍ସ, ଚୁଲ୍ଲମାତିକଗାମକଂ ।
ମୟେତ୍ତିକସ୍ସପାୱାସେ, ସହନ୍ନ ନଗରଂ ଅଦା ॥
କାଳୱାପି ୱିହାରସ୍ସ, ଉଦୱ୍ହଂ ଗାମମାଦିସି ।
ଏତେ ଚଞ୍ଞେଚ ସୋ ଭୋଗ-ଗାମେହି ପରିପୂରୟି ॥
ଜିଣ୍ଣଂ ସତସହସ୍ସେହି, ତୀହି ସୋ ପଟିସଙ୍ଖରି ।
ଭିକ୍ଖୂନଂ ଦୀପୱାସୀନଂ, ତିଚୀୱରମଦାସି ଚ ॥
ଜମ୍ବୁଦୀପଗତସ୍ସା’ସୁଂ, ରଞ୍ଞୋ ସୋଦରିୟା ନରା ।
ତତ୍ଥ ତତ୍ଥ ନିଲୀନା ତେ, ଦେସଂ ହନ୍ତୁମୁପକ୍କମୁଂ ॥
ସୁତ୍ୱା ତଂ ଜେଟ୍ଠତିସ୍ସୋ’ଥ, କାଳୱାପିଂଉପଚ୍ଚ ସୋ ।
ୟୁଜ୍ଝନ୍ତୋ ତେହି ତତ୍ଥେୱ, ୱାସଂ’କାସି ସୱାହନୋ ॥
ପରତୀରଂ ଗତୋ ରାଜା, ଗହେତ୍ୱା ଦମିଳଂ ବଲଂ ।
କାଳୱାପିମୁପାଗମ୍ମ, କାତୁଂ ୟୁଦ୍ଧମୁପକ୍କମି ॥
ଜେଟ୍ଠତିସ୍ସୋପି ସନ୍ନଦ୍ଧ ବଲକାୟୋ ଧନାୟୁଧୋ ।
ଜମ୍ବୁଦୀପଂ ଗମାପେତ୍ୱା, ଅମଚ୍ଚଂ ଦାଠସିୱକଂ ॥
ୱମ୍ମିତଂ ଗଜମାରୁୟ୍ହ, ୟୁଜ୍ଝନ୍ତୋ ଅତ୍ତନୋ ବଲଂ ।
ଓହୀୟମାନଂ ଦିସ୍ୱାନ, ଆରୁଳ୍ହଂ ଅତ୍ତନା ସହ ॥
ମହାମଚ୍ଚୱଚୋ ୱେଦଂ, ସନ୍ଦେସଂ ମେ ମହେସିୟା ।
ଆରୋଚେହି ୟଥାକାମଂ, ପଚ୍ଛା ତୱ କରିସ୍ସତି ॥
ପବ୍ବଜିତ୍ୱା ମହାଦେୱୀ, ସଜ୍ଝାୟିତ୍ୱା ଚ ଆଗମଂ ।
ଅଭିଧମ୍ମଂ କଥେତ୍ୱାନ, ପତ୍ତିଂ ଦେହୀତି ରାଜିନୋ ॥
ଇଚ୍ଚେତଂ ସାସନଂ ଦତ୍ୱା, ଦମିଳେ ଆଗତାଗତେ ।
ୟାୱ ୟୁଦ୍ଧଂ ନିହନ୍ତ୍ୱାନ, ଆୟୁମ୍ହି ଖୟମାଗତେ ॥
ୱେଳୁପ୍ପଦମିଳଂ ନାମ, ଦିସ୍ୱା ୟୁଜ୍ଝିତୁମାଗତଂ ।
ତମ୍ବୁଲତ୍ଥୱିୟଂ ହତ୍ଥେ, ରକ୍ଖନ୍ତୋ ଛୁରିକଂ ତଦା ॥
ତତୋ ନିକ୍କରଣିଂ ସମ୍ମା, ଗହେତ୍ୱା ସୀସମତ୍ତନୋ ।
ଛେତ୍ୱା ହତ୍ଥିମ୍ହି ଅପ୍ପେତ୍ୱା, ଛୁରିକଂ କୋସିୟଂ ଖିପି ॥
ଉଗ୍ଘୋସୟି ମହାସେନା, ମହାମଚ୍ଚୋପି ସୋ ତଦା ।
ଗନ୍ତ୍ୱା’ଭିୟୋଗଂ ୱତ୍ୱାନ, ସୀସଚ୍ଛେଦମ୍ହି ରାଜିନୋ ॥
ସନ୍ଦେସଂ ଦେୱିୟା ୱତ୍ୱା, ତାୟ ପବ୍ବଜ୍ଜସାସନେ ।
ସମାପିତୋ ଭିଧମ୍ମମ୍ହି, ସଦ୍ଧିମଟ୍ଠକଥାୟ ହି ॥
ଧମ୍ମାସନା ସମୋରୁୟ୍ହ, ନିସୀଦିୟ ମହୀତଲେ ।
ଏହି ରଞ୍ଞୋ ମହାକାରଂ, ଦସ୍ସେହୀ’ତି ନିୟୋଜିତୋ ॥
ନିସଜ୍ଜ ପୁରତୋ ତସ୍ସା, ଛିନ୍ଦିତ୍ୱା ସୀସମତ୍ତନୋ ।
ଖିପିତ୍ୱା ଛୁରିକଂ ଆହ, ଏୱଂ ଦେୱୋ ମତୋ ଇତି ॥
ସା ତଂ ଦିସ୍ୱା-ତିସୋକେନ, ଫାଲେତ୍ୱା ହଦୟଂ ମତା ।
ଏୱଂ ପଞ୍ଚହି ମାସେହି, ରାଜା ସୋ ତିଦିୱଂ ଗତୋ ॥
ଏୱଂ ୱିଜିତସଙ୍ଗାମୋ, ସତ୍ତୱୋ ଅଭିମଦ୍ଦିୟ ।
ରଜ୍ଜଂ ପାକତିକଂ କତ୍ୱା, ୱିହରନ୍ତୋ ପୁରେ ୱରେ ॥
ଉପରାଜସ୍ସ ନାମେନ, କାରିତସ୍ସ ପନ’ତ୍ତନା ।
ମହଲ୍ଲରାଜା ସୱ୍ହସ୍ସ, ପଧାନଘରକସ୍ସ ସୋ ॥
ଅଦ୍ଧା ଗାମଦ୍ୱୟଂ ରାଜା, ହଙ୍କାରଂ ସାମୁଗାମକଂ ।
କେହେଲ୍ଲରାଜଭାଗଞ୍ଚ, ସବ୍ବେପି ପରିଚାରକେ ॥
ତଥା ଜେତୱନସ୍ସ’ଦା, ମହାମଣିକଗାମକଂ ।
ମୟେତ୍ତିକସ୍ସପାୱାସଂ, ସାଲଗାମେନ ପୂଜୟି ॥
ଅମ୍ବିଲ୍ଲପଦରଂ ଚା’ଦା, ଚେତିୟସ୍ସ ଗିରିସ୍ସ ସୋ ।
ପୁଲତ୍ଥିନଗରେ କାସି, ମହାପାନାଦି ଦୀପକଂ ॥
ଅମଚ୍ଚା ତସ୍ସ ମାରେସୁଂ, ମାଣୱ୍ହଂ ୟୁୱରାଜକଂ ।
ଅନ୍ତୋପୁରେ’ପରଜ୍ଝିତ୍ୱା, ଦତ୍ୱାପି ସମମେତ୍ତିକଂ ॥
ତତୋ କସ୍ସପନାମଂ ସୋ, କଣିଟ୍ଠଂ ସକଭାତରଂ ।
ପାଲେନ୍ତୋ ସନ୍ତତିଂ ରାଜା, ଓପରଜ୍ଜେ’ଭିସେଚୟି ॥
ମାଣସ୍ସ ମରଣଂ ସୁତ୍ୱା, ଗହେତ୍ୱା ଦମିଳେ ଲହୁଂ ।
ଦାଠାସିୱୋ ସମାଗଞ୍ଛି, ଗାମଂ ତିନ୍ତିଣୀ ନାମକଂ ॥
ତସ୍ସାଗମନମଞ୍ଞାମ, ନିକ୍ଖମିତ୍ୱା ସୱାହନୋ ।
ୟୁଜ୍ଝନ୍ତୋ ଦ୍ୱାରସେ ୱସ୍ସେ, ଜମ୍ବୁଦୀପଂ ପଲାତୱା ॥
ପହାୟ ସବ୍ବଂ ଗଚ୍ଛନ୍ତୋ, ସଞ୍ଞାଣତ୍ଥାୟ ଅତ୍ତନୋ ।
ଏକାୱଲିଂ ଗହେତ୍ୱାୱ, ଏକାକୀ ସୋ ହି ନିକ୍ଖମି ॥
ଏକାୱଲିଂ ୱିନାଚେୱ, ରାଜା ହୁତ୍ୱା ୟଥାୱିଧିଂ ।
ଅହୁ ଦାଠୋପତିସ୍ସୋତି, ୱିସୁତୋ ଧରଣୀ ତଲେ ॥
ଇତରୋ ଲଦ୍ଧଓକାସୋ, ରଜ୍ଜମଗ୍ଗହି ୟୁଜ୍ଝିୟ ।
ଅଞ୍ଞମଞ୍ଞଂ ପଲାପେସୁଂ, ଏୱଂ ତେ ଅନ୍ତରନ୍ତରା ॥
ଏୱଂ ଉଭିନ୍ନଂ ରାଜୂନଂ, ସଙ୍ଗାମେନା’ଭିପୀଳିତୋ ।
ଲୋକୋ ଉପଦ୍ଦୁତୋ-ସବ୍ବୋ ୱିହୀନଧନଧଞ୍ଞୱା ॥
ଦାଠୋପତିସ୍ସୋ ନାସେସି, ସବ୍ବଂ ପୁବ୍ବକରାଜୂନଂ ।
ଗଣ୍ହୀ ତୀସୁ ନିକାୟେସୁ, ସାରଂ ଧାତୁଘରେସୁ ଚ ॥
ସୁୱଣ୍ଣପଟିମାୟୋ ସୋ, ସୁୱଣ୍ଣଂ ଗଣ୍ହି ଭିନ୍ଦିୟ ।
ସୋଣ୍ଣମାଲାଦିକଂ ସବ୍ବଂ, ପୂଜାଭଣ୍ଡଂ ନିରାକରି ॥
ଥୂପାରାମେ ତଥାଗଣ୍ହି, ସୋୱଣ୍ଣଂ ଥୁପିକଂ ଘରେ ।
ମହଗ୍ଘରତନାକିଣ୍ଣଂ, ଛତ୍ତଂ ଭିନ୍ଦିତ୍ଥ ଚେତିୟେ ॥
ମହାପାଳିମ୍ହି ନାୱାୟୋ, ଦମିଳାନଂ ସଦାପୟି ।
ରାଜଗେହା ନିଝାପେସୁଂ, ସଦ୍ଧିଂ ଧାତୁଘରେନ ତେ ॥
ପଚ୍ଛା ୱିପ୍ପଟିସାରୀ ସୋ, ଦେସେତୁଂ, ପାପମତ୍ତନୋ ।
କାରେସି ସହ ଭୋଗେନ, ସାକୱତ୍ଥୁୱିହାରକଂ ॥
ଭାଗିନେୟ୍ୟୋପି ରତନ-ଦାଠୋ ଇତି ଜନେ ସୁତୋ ।
ମହାଦୀପାଦୋ ହୁତ୍ୱାନ, ସଭୋଗୋ ତମୁପଟ୍ଠହି ॥
ଅଗ୍ଗବୋଧିମ୍ହି ସମ୍ପତ୍ତେ, ରଜ୍ଜଂ ୟୁଦ୍ଧବଲେନ ଚ ।
କସ୍ସପୋ ୟୁୱରାଜା ସୋ, ସେନଂ ରକ୍ଖିତୁମତ୍ତନୋ ॥
ଦୁପ୍ପଞ୍ଞୋ ସହସା ଭେତ୍ୱା, ଥୂପାରାମମ୍ହି ଚେତିୟଂ ।
ଦେୱାନଂପିୟତିସ୍ସେନ, ଖୁଦ୍ଦରାଜେନ ଚେୱ ହି ॥
ପୁବ୍ବକେହିଚ ରାଜୂହି, ପୂଜିତଂଧନସାରକଂ ।
ଅଗ୍ଗହେସି ଦୁନ୍ନିତୀହି, ପାପକେହି ପୁରକ୍ଖତୋ ॥
ଦକ୍ଖିଣସ୍ସ ୱିହାରସ୍ସ, ଚେତିୟଂ ପରିଭିନ୍ଦିୟ ।
ଅଗ୍ଗହେସି ଧନଂ ସାରଂ, ଏୱମଞ୍ଞେପି ଭିନ୍ଦୟି ॥
ଏୱଂ କରୋନ୍ତଂ ତଂ ରାଜା, ଦୁନ୍ନିତିକପୁରକ୍ଖତଂ ।
ନାସକ୍ଖି କିର ୱାରେତୁଂ, ଅହୋ ପାପା ନିୱାରିୟା ॥
ତଂ ୱାରେତୁ ମସକ୍କୋନ୍ତୋ, ଥୂପାରାମମ୍ହି ଚେତିୟଂ ।
ଭିନ୍ନଂ ତେନ ସକାରେସି, ସହସ୍ସେନ ସମଙ୍ଗଲଂ ॥
ତଦା ଦାଠୋପତିସ୍ସେନ, ଅଗ୍ଗବୋଧି ନରିସ୍ସରୋ ।
ଜିତୋ ରୋହଣମେୱା’ଗା, ସଜ୍ଜେତୁଂ ବଲୱାହନଂ ॥
ତତ୍ର ଠିତୋ ସୋଳସମେ, ୱସ୍ସେ ବ୍ୟାଧିହତୋ ମତୋ ।
ତଦା ତସ୍ସ କଣିଟ୍ଠୋ ସୋ, ୟୁୱରାଜାପି କସ୍ସପୋ ॥
ଦାଠୋପତିସ୍ସ ରାଜାନଂ, ଜମ୍ବୁଦୀପଂ ପଲାପିୟ ।
ଏକରଜ୍ଜମକାଦେସଂ, ମକୁଟନ୍ତୁ ନ ଧାରୟି ॥
ସାଧୂନଂ ସଙ୍ଗମେନେ’ସ, ହୁତ୍ୱା ୱିପ୍ପଟିସାରକୋ ।
ନାସଂ ପାପସ୍ସ କମ୍ମସ୍ସ, କରିସ୍ସାମୀତି ଚିନ୍ତିୟ ॥
ପୁପ୍ଫାରାମେ ଫଲାରାମେ, ୱାପିୟୋ’ପି ଚ କାରୟି ।
ମହାଚେତିତ୍ତୟଞ୍ଚାପି, ମହାପୂଜାହି ସକ୍କରି ॥
ଥୂପାରାମଞ୍ଚ ପୂଜେତ୍ୱା, ଏକଂଗାମଞ୍ଚ ତସ୍ସଦା ।
ସବ୍ବାଗମିୟଭିକ୍ଖୂହି, ଧମ୍ମଂଦେସାପୟିତ୍ଥ ଚ ॥
କତ୍ୱା ମରିଚୱଟ୍ଟିମ୍ହି, ପାସାଦଂ ସୁତ୍ଥିରଂ ତହିଂ ।
ୱାସୟିତ୍ଥ ମହାଥେରଂ, ନାଗସାଲ ନିୱାସିତଂ ॥
ତତ୍ରଟ୍ଠଂ ତମୁପଟ୍ଠାୟ, ପଚ୍ଚୟେତି ଚତୂହି’ପି ।
ଅଭିଧମ୍ମଂ କଥାପେସି, ସଦ୍ଧିମଟ୍ଠକଥାୟ ସୋ ॥
ନାଗସାଲକମାୱାସଂ, କତ୍ୱା ତସ୍ସେୱ’ଦାସି ସୋ ।
ମହାନିଟ୍ଠିଲଗାମଞ୍ଚ, ପଚ୍ଚୟତ୍ଥାୟ ତସ୍ସ’ଦା ॥
ଅଥ ଦାଥୋପତିସ୍ସୋ ସୋ, ଜମ୍ବୁଦୀପା ଇଧାଗତୋ ।
ମହନ୍ତଂ ବଲମାଦାୟ, କରୋନ୍ତୋ ତେନ ଆହୱଂ ॥
କସ୍ସପେନ ସୁସନ୍ନଦ୍ଧ-ୱାହନେନ ତତୋ ମରି ।
ଦ୍ୱାଦସାସୁଂ କିରେତସ୍ସ, ରାଜଭୂତସ୍ସ ହାୟନା ॥
ତସ୍ସ ଦାଠୋପତିସ୍ସସ୍ସ, ଭାଗିନେୟ୍ୟୋ ସନାମକୋ ।
ଜମ୍ବୁଦୀପଂ ପଲାୟିତ୍ଥ, ଭୀତୋ ତମ୍ହା ମହାରଣେ ॥
ଏୱଂ ଅନିଚ୍ଚା ୱତ ସବ୍ବଭୋଗା,
ସୁଦୁଲ୍ଲଭା ଚେୱ ଖଣେୱ ସୋଭା ।
ତସ୍ମାହି ଏତେସୁ ରତିଂ ୱିହାୟ,
ଭୱେୟ୍ୟ ଧମ୍ମାଭିମୁଖୋ ହିତେସୀ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଛ ରାଜକୋ ନାମ
ଦ୍ୱିଚତ୍ତାଲୀସତିମୋ ପରିଚ୍ଛେଦୋ ।
ତେଚତ୍ତାଲୀସତିମ ପରିଚ୍ଛେଦ
ଚତୁରାଜକୋ
ତତୋ ୱିଜିତସଙ୍ଗାମୋ, କସ୍ସପୋ ପୁରିତାସୟୋ ।
ମହାପାଳିମ୍ହି ସଙ୍ଘସ୍ସ, ସମିଦ୍ଧଂ ଭୋଜନଂ ଅକା ॥
ନାଗସାଲା ନିୱାସିଂ ସୋ, ମହାଧମ୍ମକଥିଂ ୟତିଂ ।
ମହାପୂଜାୟ ପୂଜେତ୍ୱା, ସଦ୍ଧମ୍ମଂ ତେନ ୱାଚୟି ॥
ୱସନ୍ତଂ ଭାତୁଆୱାସେ, ସମୁଦ୍ଦିସ୍ସ ଲିଖାପୟି ।
କଟନ୍ଧକାରୱାସିଂ ସୋ, ପାଳି ସବ୍ବଂ ସସଙ୍ଗହଂ ॥
ଜିଣ୍ଣଂ ସଙ୍ଖରିକମ୍ମଞ୍ଚ, ନୱଂ କାରେସି ଚେତିୟେ ।
ସଙ୍ଘଭୋଗମନେକଞ୍ଚ, ତତ୍ଥ ତତ୍ଥ ପୱତ୍ତୟି ॥
ନାନାମଣିସମୁଜ୍ଜୋତଂ, କାସି ଚୂଳମଣିତ୍ତୟଂ ।
ସତଂ ପଣ୍ଡୁପଲାସାନଂ, ୱତ୍ଥଦାନେନ ତପ୍ପୟି ॥
ତସ୍ସାସୁଂ ବହୱୋ ପୁତ୍ତା, ଜେଟ୍ଠୋ ତେସଞ୍ଚ ମାଣକୋ ।
ସବ୍ବେ ତେ ନ ୱୟପ୍ପତ୍ତା, ବାଲାୱିଗତବୁଦ୍ଧିନୋ ॥
ତତୋ ସୋ ବ୍ୟାଧିନା ଫୁଟ୍ଠୋ, ଅତେକିଚ୍ଛେନ କେନଚି ।
ପୁତ୍ତା ମେ ବାଲକା ସବ୍ବେ, ନେ’ତେ ରଜ୍ଜକ୍ଖମା ଇତି ॥
ୱସନ୍ତଂ ରୋହଣେ ଦେସେ, ଭାଗିନେୟ୍ୟଂ ମହାମତିଂ ।
ଆହୁୟ ସବ୍ବଂ ପାଦାସି, ରଜ୍ଜଂ ପୁତ୍ତେହି ଅତ୍ତନୋ ॥
ଗନ୍ଧମାଲାଦିପୂଜାହି, ପୂଜୟିତ୍ୱାନ ଚେତିୟେ ।
ଭିକ୍ଖୁସଙ୍ଘଂ ଖମାଧପସି, ଦତ୍ୱାନ ଚତୁପଚ୍ଚୟଂ ॥
ଏୱଂ ଧମ୍ମଂ ଚରିତ୍ୱାନ, ମିତ୍ତାମଚ୍ଚଜନେସୁ ଚ ।
ଗତୋ ନୱହି ୱସ୍ସେହି, ୟଥାକମ୍ମଂ ନରାଧିପୋ ॥
କତ୍ୱା କତ୍ତବ୍ବକିଚ୍ଚଂ ସୋ, ମାତୁଲସ୍ସ ସଗାରୱୋ ।
ସଙ୍ଗହନ୍ତୋ ଜନଂ ମାଣୋ, ଦମିଳେ ନୀହରାପୟି ॥
ଏକତୋ ଦମିଳା ହୁତ୍ୱା, ନିବ୍ବାସେମ ଇମଂ ଇତି ।
ତସ୍ମିଂ ଠିତେ ବହିଦ୍ଧାୱ, ଅଗ୍ଗହେସୁଂ ପୁରଂ ସୟଂ ॥
ହତ୍ତ ଦାଠସ୍ସ ପେସେସି, ଜମ୍ବୁଦୀପଗତସ୍ସ ତେ ।
ଆଗନ୍ତୁଂତୱ କାଲୋତି, ସାସନଂ ରଜ୍ଜଗାହଣେ ॥
ମାଣୋ’ପି ସଙ୍ଘଂ ପେସେସି, ସାସନଂ ପିତୁରୋହଣଂ ।
ପିତା ସୁତ୍ୱାନ ତଂ ଆଗା, ନ ଚୀରେନେୱ ରୋହଣା ॥
ଉଭେ ତେ ମନ୍ତୟିତ୍ୱାନ, ଅକଂସୁ ସନ୍ଧିଲେସକଂ ।
ଉମିଳେହି ତତୋ ଜାତା, ସବ୍ବେ ତେ ସମୱୁତ୍ତିନୋ ॥
ତତୋ ସୋ ପିତରଂ ରଜ୍ଜେ, ଅଭିସିଞ୍ଚିତ୍ଥ ମାଣକୋ ।
ସୋ’ଭିସିତ୍ତୋ ନିକାୟାନଂ, ସହସ୍ସାନଂ ତୟଂ ଅଦା ॥
ସଙ୍ଘଂ ରଟ୍ଠଞ୍ଚ ସଙ୍ଗୟ୍ହ, ସବ୍ବଂ ରାଜକୁଲଟ୍ଠିତଂ ।
ଭଣ୍ଡଂ ପେସେସି ସତ୍ତୂହି, ରକ୍ଖଣତ୍ଥାୟ ରୋହଣଂ ॥
ହତ୍ଥଦାଠୋପି ସୁତ୍ୱାନ, ଦମିଳାନଂ ତୁ ସାସନଂ ।
ଖଣେନା’ଗା ଇମଂ ଦୀପଂ, ଗହେତ୍ୱା ଦମିଳ୍ହଂ ବଲଂ ॥
ତଦା ତେ ଦମିଳା ସବ୍ବେ, ପରିଭୂତା ଇଧ ଠିତା ।
ଆୟନ୍ତମେୱ ତଂ ଗନ୍ତ୍ୱା, ପରିୱାରେସୁ ମଞ୍ଜସେ ॥
ମାଣୋପି ସୁତ୍ୱା ତଂ ସବ୍ବଂ, ନାୟଂ କାଲୋତି ୟୁଜ୍ଝିତୁଂ ।
ପେସେତ୍ୱା ପିତୁରାଜାନଂ, ସଦ୍ଧିଂ ସାରେନ ରୋହଣଂ ॥
ପୁବ୍ବଦେସଂ ସୟଂ ଗନ୍ତ୍ୱା, ସଙ୍ଗଣ୍ହନ୍ତୋ ଜନଂ ୱସୀ ।
ଲଦ୍ଧା ଦମିଳପକ୍ଖଂ ସୋ, ଗହେତ୍ୱା ରାଜକଂ ପୁରଂ ॥
ଦାଠୋପତିସ୍ସୋ ରାଜାତି, ନାମଂ ସାୱେତି ଅତ୍ତନୋ ।
ମାତୁଲଂ ୱିୟ ତଂ ଲୋକୋ, ତେନ ନାମେନ ୱୋହରି ॥
ପିତୁଚ୍ଛପୁତ୍ତମାନେତ୍ୱା, ଅଗ୍ଗବୋଧି ସନାମକଂ ।
ଠପେତ୍ୱା ୟୁୱରାଜତ୍ତେ, ଦେସଞ୍ଚା’ଦାସି ଦକ୍ଖିଣଂ ॥
ଠାନନ୍ତରଞ୍ଚ ପାଦାସି, ନିସ୍ସିତାନଂ ୟଥାରହଂ ।
ସାସନସ୍ସ ଚ ଲୋକସ୍ସ, ସବ୍ବଂ କତ୍ତବ୍ବମାଚରି ॥
ମହାପାଳିମ୍ହି ଦାପେସି, ସୱତ୍ଥଂ ଦଧିଭତ୍ତକଂ ।
ଖୀରଂ ପାୟାସକଞ୍ଚେୱ, ଧମ୍ମଂ ସୁଣି ଉପୋସଥି ॥
କାରେତ୍ୱା ସବ୍ବପୂଜାୟୋ, ଦେସା ପେତ୍ୱାନ ଦେସନଂ ।
ଏୱମାଦୀହି ପୁଞ୍ଞେହି, ଅତ୍ତାନଂ’କାସି ଭଦ୍ଦକଂ ॥
କସ୍ସପସ୍ସ ୱିହାରସ୍ସ, ଦତ୍ୱାସେନୱ୍ହଗାମକଂ ।
ମହାଗଲ୍ଲଞ୍ଚ ପାଦାସି, ପଧାନଘରକସ୍ସ ସୋ ॥
ପରିୱେଣସ୍ସ ମୋରସ୍ସ, ଅକାସି ସକଗାମକଂ ।
ଥୂପାରାମସ୍ସ ପୁଣ୍ଣୋଳିଂ, ଦତ୍ୱା ସକ୍କାସି ଚେତିୟଂ ॥
କପ୍ପୂରପରିୱେଣଂ ସୋ, କାରେସି ଅଭୟୁତ୍ତରେ ।
ୱିହାରଂ ତିପୁଥୁଲ୍ଲୱ୍ହଂ, କତ୍ୱା ତସ୍ସେୱ ଦାପୟି ॥
ତସ୍ମିଂ କରୋନ୍ତେ ୱାରେସୁଂ, ସୀମାୟନ୍ତୋ’ତି ଭିକ୍ଖୱୋ ।
ଥେରିୟା ତେ କିବାହେତ୍ୱା, ବଲଂ ତଥେୱ କାରୟି ॥
ଅଥ ତେ ତେ ଥେରିୟା ଭିକ୍ଖୂ, ଦୁମ୍ମଞ୍ଞୂ ତତ୍ଥ ରାଜିନି ।
ଅସ୍ସଦ୍ଧଂ ତଂ ୱିଦିତ୍ୱାନ, ପତ୍ତନିକ୍କୁଜ୍ଜନଂ କରୁଂ ॥
ୱୁତ୍ତଞ୍ହି ମୁନିନା ତେନ, ଅସ୍ସଦ୍ଧୋ ୟୋ ଉପାସକୋ ।
ଅଲାଭାୟ ଚ ଭିକ୍ଖୂନଂ, ଚେତେତ’କ୍କୋସତି ଚ ତେ ॥
ପତ୍ତନିକୁଜ୍ଜନଂ ତସ୍ସ, କତ୍ତବ୍ବନ୍ତି ତତୋ ହି ତେ ।
ତସ୍ସ ତଂ କମ୍ମମକରୁଂ, ଲୋକୋ ମଞ୍ଞିତ୍ଥ ଅଞ୍ଞଥା ॥
ଆଦାୟୁ କୁଜ୍ଜିତଂ ପତ୍ତଂ, ଚରନ୍ତୋ ଭିକ୍ଖୁଭିକ୍ଖକଂ ।
ନିକୁଜ୍ଜେୟ୍ୟ ଘରଦ୍ୱାରେ, ତସ୍ସା’ତି କଥିକଂ କରୁଂ ॥
ତସ୍ମିଂ ସୋ ସମୟେ ଫୁଟ୍ଠୋ, ବ୍ୟାଧିନା ମହତାମରି ।
ୱସ୍ସମ୍ହି ନୱମେ ରାଜା, ସମ୍ପତ୍ତୋ ଜୀୱିତକ୍ଖୟଂ ॥
ଦପ୍ପୁଲୋପି ତତୋ ରାଜା, ଗତୋ ରୋହଣକଂ ସକଂ ।
ୱାସଂ କପ୍ପେସି ତତ୍ଥେୱ, କରୋନ୍ତୋ ପୁଞ୍ଞସଞ୍ଚୟଂ ॥
ଇତୋ ପଟ୍ଠାୟ ୱକ୍ଖାମ, ତସ୍ସ ୱଂସମନାକୁଲଂ ।
ୱୁଚ୍ଚମାନମ୍ହି ଏତ୍ଥେୱ, ତସ୍ମିଂ ହୋତି ଅସଙ୍କରୋ ॥
ଜାତୋ ଓକ୍କାକୱଂସମ୍ହି, ମହାତିସ୍ସୋତି ୱିସ୍ସୁତୋ ।
ଆସି ଏକୋ ମହାପୁଞ୍ଞୋ, ସମାକିଣ୍ଣଗୁଣାକରୋ ॥
ତସ୍ସେ’କା ଭରିୟା ଆସି, ସଙ୍ଘପିୱାତି ୱୀସ୍ସୁତା ।
ଧଞ୍ଞପୁଞ୍ଞଗୁଣୂପେତା, ଧୀତା ରୋହଣସାମିନୋ ॥
ତସ୍ସାପୁତ୍ତା ତୟୋ ଆସୁଂ, ପଠମୋ ଅଗ୍ଗବେଧିକୋ ।
ଦୁତିୟୋ ଦପ୍ପୁଲୋ ନାମ, ତତିୟୋ ମଣିଅକ୍ଖିକୋ ॥
ଏକାୱ ଧୀତା ତସ୍ସାସି, ରାଜନମଗମା ଚ ସା ।
ଜେଟ୍ଠୋ ରୋହଣନାମସ୍ସ, ଦେସସ୍ସା’ସି ସୟଂ ୱସୀ ॥
ମହାପାଳିଂ ସ କାରେସି, ମହାଗାମେ ମହାଧନୋ ।
ଦାଠଗ୍ଗବୋଧିନାମଞ୍ଚ, ପରିୱେଣଂ ତହି ୱଂସୋ ॥
କାଣଗାମମ୍ହି କାଣାନଂ, ଗିଲାନାନଞ୍ଚ ସାଲକେ ।
ୱିହାରେ ପଟିମାୱ୍ହେ ଚ, ମହନ୍ତଂ ପଟିମାଘରଂ ॥
ପତିଟ୍ଠପେସି କତ୍ୱାନ, ବୁଦ୍ଧତତ୍ଥ ସିଲାମୟଂ ।
ମହନ୍ତନାମଂ ସପ୍ପଞ୍ଞୋ, ଇଦ୍ଧୀହି ୱିୟ ନିମ୍ମିତଂ ॥
ସାଲୱାଣଞ୍ଚ କାରେସି, ୱିହାରଂ ଅତ୍ତନାମକଂ,
ପରିୱେଣୱିହାରଞ୍ଚ, ତଥା କାଜରଗାମକଂ ॥
ନୱକମ୍ମାନି କାରେତ୍ୱା, ଧମ୍ମସାଲୱିହାରକେ ।
ସୟଂ ୱଚ୍ଚକୁଟୀ ଏସ, ତତ୍ଥ ସୋଧେସି ବୁଦ୍ଧିମା ॥
ଉଚ୍ଚିଟ୍ଠଂ ଭିକ୍ଖୁସଙ୍ଘସ୍ସ, ଭୋଜନଂ ପରିଭୁଞ୍ଜିୟ ।
ମଣ୍ଡଗାମଞ୍ଚ ସଙ୍ଘସ୍ସ, ଗାମଂ’ଦାସି ମସାଦୱା ॥
ପୁଞ୍ଞାନେ’ତାନିଚଞ୍ଞାନି, କତ୍ୱା ତସ୍ମିଂ ଦିୱଙ୍ଗତେ ।
ଆସୀ ତସ୍ସା’ନୁଜୋ ତତ୍ଥ, ସାମି ଦପ୍ପୁଲନାମକୋ ॥
ଇସ୍ସେରଂ ତତ୍ଥ ୱତ୍ତେସି, ସମ୍ପମଦ୍ଦିୟ ସତ୍ତ ୱୋ ।
ମହାଦାନଂ ପୱତ୍ତେସି, ନିସ୍ସଙ୍କଂ ରୋହଣଂ ଅଗା ॥
ତସ୍ସ ତୁଟ୍ଠୋ ଜନୋ ଆହ, ମହାସାମୀତି ଏସନୋ ।
ତତୋ ପଟ୍ଠାୟ ତଂ ଲୋକୋ-ମହାସାମୀତି ୱୋହରି ॥
ସୁତ୍ୱାନ ତଂ ସିଲାଦାଠୋ, ନରିନ୍ଦୋ ସକଧୀତରଂ ।
ତସ୍ସ ପାଦାସି ସନ୍ତୁଟ୍ଠୋ, ଗୁଣେହି ବହୁକେହି ଚ ॥
ୟୁଜରାଜତ୍ତମସ୍ସାଦା, ରଜ୍ଜୟୋଗ୍ଗୋତି ମାନିତୁଂ ।
ମାଣୱମ୍ମାଦୟୋ ତସ୍ସ, ପୁତ୍ତା ଆସୁଂ ମହାସୟା ॥
ପାସାଣଦିପୱାସିସ୍ସ, ମହାଥେରସ୍ସ ସନ୍ତିକେ ।
ଧମ୍ମଂ ସୁତ୍ୱା ପସୀଦିତ୍ୱା, ତସ୍ମିଂ ତଂ ବହୁମାନିତୁଂ ॥
ୱିହାରଂ ରୋହଣେ କତ୍ୱା, ତସ୍ସ ପାଦାସି ସୋପି ତଂ ।
ଚାତୁଦ୍ଦିସିୟସଙ୍ଘସ୍ସ, ପରିଭୋଗାୟ ୱିସ୍ସଜ୍ଜି ॥
ଅମ୍ବମାଲା ୱିହାରାଦି, ୱିହାରେ କାରୟି ବହୂ ।
ଖଦିରାଲିୱିହାରଞ୍ଚ, କତ୍ୱା ଦେୱ ମପୂଜୟି ॥
ପାସାଦମନୁରାରାମଂ, ମୁତ୍ତୋଲମ୍ବଂ ସୁଜିଣ୍ଣକଂ ।
ସୀରିୱଡ୍ଢଞ୍ଚ ପାସାଦଂ, ତଥା ତକ୍କମ୍ବିଲଂ ପରଂ ॥
ସୋଧେତ୍ୱା ଭିକ୍ଖୱୋ ତତ୍ଥ, ଦ୍ୱତ୍ତିଂସ ପରିୱାସୟି ।
ସବ୍ବପଚ୍ଚୟଦାନେନ, ସନ୍ତପ୍ପେତ୍ୱା ମହୀମତି ॥
ଅଦା କେୱଟ୍ଟଗମ୍ଭୀରଂ, ଗାମଂ ନାଗୱିହାରକେ ।
ତଥା ରାଜୱିହାରସ୍ସ, ଗୋନ୍ନଗାମଂ ସମାଦିୟି ॥
ଅଦା ତୀସୱିହାରସ୍ସ, ତଥାକନ୍ତିକପବ୍ବକଂ ।
ଚିତ୍ତଲପବ୍ବତସ୍ସା’ଦା, ଗାମଂ ସୋ ଗୋନ୍ନୱିଟ୍ଠିକଂ ॥
ଦତ୍ୱା ରିୟାକରସ୍ସେସ, ଗାମଂ ସୋମାଲୱତ୍ଥୁକଂ ।
ଅକାସି ପଟିମାଗେହଂ, ତଥେୱ ସୁମନୋହରଂ ॥
ତତ୍ରଟ୍ଠସ୍ସ ଜିନସ୍ସା’କା, ଉଣ୍ଣଲୋମଂ ମହଗ୍ଘିୟଂ ।
ହେମପଟ୍ଟଞ୍ଚ କାରେସି, ସବ୍ବଂ ପୂଜାୱିଧିଂ ସ’କା ॥
ଚେତିୟେ ପରିଜିଣ୍ଣେ ସୋ, ସୁଧାକମ୍ମେନ ରଞ୍ଜୟି ।
ତିପଞ୍ଚହତ୍ଥଂ କାରେସି, ମେତ୍ତେୟ୍ୟଂ ସୁଗତଂ ପରଂ ॥
ଏୱମାଦିନି ପୁଞ୍ଞାନି, ଅପ୍ପମେୟ୍ୟାନି ସୋ ୱିଭୂ ।
ଅକାସି ଚ ସୟଂ ସାଧୁ, ପରିୱାରେହୀ କାରୟି ॥
ପରିୱାରା ଚ ତସ୍ସାସୁଂ, ବହୂପୁଞ୍ଞକରା ନରା ।
ୱିହାରା ନେକକା ଆସୁଂ, କତା ତେହି ସପ୍ପଚ୍ଚୟା ॥
କଦାଚି ମଗ୍ଗଂ ଗଚ୍ଛଂ ସୋ, ଅରଞ୍ଞମ୍ହି ଅଗାମକେ ।
ସେନଂ ସଂୱିଦହିତ୍ୱାନ, ୱାସଂ କପ୍ପେସି ରତ୍ତିୟଂ ॥
ସୁନହାତୱିଲ୍ଲିତ୍ତୋ ସୋ, ସୁଭୁତ୍ତୋସୟନେ ସୁଖେ ।
ନିପନ୍ନେସୁ ଘରେ ରମ୍ମେ, ନିଦ୍ଦାୟିତୁମୁପକ୍କମି ॥
ଅଲଭନ୍ତୋ ତଦା ନିଦ୍ଦଂ, କିନ୍ନୁ ଖୋ ଇତି କାରଣଂ ।
ପୱତ୍ତିଂ ଉପଧାରେନ୍ତୋ, ଦିୱସେ ସବ୍ବମତ୍ତନୋ ॥
ଅଦିସ୍ୱା କାରଣଂ ଅନ୍ତୋ, ଅୱସ୍ସଂ ବହି ହେସ୍ସତି ।
ଇତି ଚିନ୍ତିୟ ୟୋଜେସି, ମନୁସ୍ସେତଂ ଗୱେସିତୁଂ ॥
ଏୱମାହ ଚ ନିସ୍ସଙ୍କଂ, ଅୟ୍ୟକା ମମ ରତ୍ତିୟଂ ।
ତେମେନ୍ତା ରୁକ୍ଖମୂଲସ୍ମିଂ, ଠିତା ଆନେଥ ତେ ଇତି ॥
ତେପି ଗନ୍ତ୍ୱା ଗୱେସନ୍ତା, ଦୀପହତ୍ଥା ମହାଜନା ।
ମହାଗାମା’ଗତେ ଭିକ୍ଖୂ, ରୁକ୍ଖମୂଲଗତେ ତଦା ॥
ତେ ଗନ୍ତ୍ୱା ସାସନଂ ରଞ୍ଞୋ, ଆରୋଚେସୁଂ ପଧାୱିସୋ ।
ଦିସ୍ୱା ଚ ଭିକ୍ଖୁ ସନ୍ତୁଟ୍ଠୋ, ନେତ୍ୱା ୱାସଘରଂ ସକଂ ॥
ନିଚ୍ଚଦାନାୟ ଭିକ୍ଖୂନଂ, ଠପିତେ ରତ୍ତଚୀୱରେ ।
ତେସଂ ଦତ୍ୱାନ ତିନ୍ତାନି, ଚୀୱରାନି ସମାଦିୟ ॥
ସୁକ୍ଖାପିୟ ଚ କତ୍ୱାନ, ପାଦଧୋୱନକାଦିକଂ ।
ନିସୀଦାପିୟ ତେ ସବ୍ବେ, ସୟନେ ସାଧୁ ସନ୍ଥତେ ॥
ଭେସଜ୍ଜଂ ପଟିୟାଦେତ୍ୱା, ସୟମେୱୋ’ପନାମିୟ ।
ପଚ୍ଚୂସେପି ଚ କତ୍ୱାନ, କତ୍ତବ୍ବଂ ଭୋଜନାଦିକଂ ॥
ଦତ୍ୱା କପ୍ପିୟ କାରେ’ଥ, ୱିସ୍ସଜ୍ଜେସି ୟଥାରୁଚିଂ ।
ଏୱଂ ପୁଞ୍ଞରତସ୍ସେୱ, ତସ୍ସା’ସି ଦିୱସଂ ଗତଂ ॥
ଏୱଂ ପୁଞ୍ଞପରେତସ୍ମିଂ, ୱସମାନେ ନରୁତ୍ତମେ ।
ରଟ୍ଠଂ ଜନପଦଂ ସବ୍ବଂ, ୟୋଜେତ୍ୱା ପୁଞ୍ଞକମ୍ମେସୁ ॥
ମାଣୋ ପାଚିନଦେସମ୍ହି, ୱସନ୍ତୋ ବଲସଙ୍ଗହଂ ।
କତ୍ୱାନ ପିତୁନୋ ସେନଂ, ଧନଂ ଚେୱା ହରାପିୟ ॥
କାତୁଂ ସଙ୍ଗାମମାଗଞ୍ଛି, ତିପୁଚୁଲ୍ଲସଗାମକଂ ।
ଦାଠୋପତିସ୍ସୋ ତଂ ସୁତ୍ୱା, ତମ୍ବଲଂଗା ମହାବଲୋ ॥
ତତ୍ଥା’କଂସୁ ମହାୟୁଦ୍ଧଂ, ଅଞ୍ଞମଞ୍ଞଂ ସମାଗତା ।
ୟୋଧା ଦାଠୋ ପତିସ୍ସସ୍ସ, ମାଣଂ ସଙ୍ଗଂୱ ମାରୟୁଂ ॥
ତଂ ସୁତ୍ୱା ଦପ୍ପୁଲୋ ସୋପି, ସୋକସଲ୍ଲହତୋ ମରି ।
ସତ୍ତାହ ମନୁରାଧମ୍ହି, ୱସଂ ରଜ୍ଜମକାରୟି ॥
ରୋହଣେ ତୀଣି ୱସ୍ସାନି, ଏସ ରଜ୍ଜମକାରୟି ।
ତସ୍ମା ତସ୍ସ କଥା ଆସି, ରୋହଣମ୍ହି ଇଧାପି ଚ ॥
ଏୱଂ ପରେମାରିୟ ଆହୱମ୍ହି,
କିଚ୍ଛେନ ଲଦ୍ଧାୱ ନରେନ ଭୋଗା ।
ଆସୁଂ ଖଣେ ୱିଜ୍ଜୁଲତୋପ ଭୋଗା,
କୋ ବୁଦ୍ଧିମା ତେସୁ ରତିଂ କରେୟ୍ୟ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଚତୁରାଜକୋ ନାମ
ତେଚତ୍ତାଲୀସତିମୋ ପରିଚ୍ଛେଦୋ ।
ଚତୁଚତ୍ତାଲୀସତିମ ପରିଚ୍ଛେଦ
ତିରାଜକୋ
ଅଚ୍ଚୟେ ହତ୍ଥଦାଠସ୍ସ, ଅଗ୍ଗବୋଧିକୁମାରକୋ ।
କଣିଟ୍ଠୋ ରାଜିନୋ ଆସି, ସିରିସଙ୍ଘାଦି ବୋଧିକୋ ॥
ଧମ୍ମରାଜା ଅୟଂ ଆସି, ସମ୍ମା ଦସ୍ସନସଞ୍ଞୁତୋ ।
ତସ୍ମା ସୋ ପୁଞ୍ଞକମ୍ମାନି, ଅପ୍ପମେୟ୍ୟାନି ୱତ୍ତୟି ॥
ନିକାୟତ୍ତୟୱାସୀନଂ, ଭତ୍ତଗ୍ଗମୱଲୋକୟି ।
ମହାପାଳିଞ୍ଚ ୱଡ୍ଢେସି, ମାଘାତଞ୍ଚେୱ କାରୟି ॥
ଠାନନ୍ତରଞ୍ଚ ଦାପେସି, ୟଥାରହ ମନାଲୟୋ ।
ସିପଗୋତ୍ତାଦିୟୋଗ୍ଗେହି, ସଂଗତେହି ଚ ସଂଗହି ॥
ୟତ୍ଥ କତ୍ଥଚି ଦିସ୍ୱାପି, ଭିକ୍ଖୱୋ ସୋ ମହାମତି ।
ସକ୍କତ୍ୱା ସୋଭଣାପେସି, ପରିତ୍ତଂ ସାସନୋଗଧଂ ॥
ଥେରଂ ସୋ ଉପସଙ୍କମ୍ମ, ନାଗସାଲନିୱାସିନଂ ।
ଦାଠାସିୱଂ ମହାପଞ୍ଞଂ, ସୀଲୱନ୍ତଂ ବହୁସ୍ସୁତଂ ॥
ସକ୍କଚ୍ଚ ନଂ ତତୋ ସୁତ୍ୱା, ସମ୍ମାସମ୍ବୁଦ୍ଧସାସନଂ ।
ଧମ୍ମେ’ତୀୱପସୀଦିତ୍ୱା, ସବ୍ବସନ୍ତିକରୋ ଇତି ॥
ସୁତ୍ୱା ଥେରିୟୱାଦାନଂ, ପୁବ୍ବଞାତୀନମତ୍ତନୋ ।
ପାପାନଂ ଦୁଟ୍ଠଚିତ୍ତାନଂ, ଅପକାରେ କତେ ବହୂ ॥
ୱିହାରେ ପରିୱେଣେ ଚ, ଜିଣ୍ଣେପାକତିକେ ଅକା ।
ଭୋଗଗାମେ ଚ ଦାପେସି, ତତ୍ଥ ତତ୍ଥ ବହୂଦୟେ ॥
ୱିଚ୍ଛିନ୍ନପଚ୍ଚୟେ ଚାକା, ତଦାତ୍ୟଂ କୁରିତେ ୱିୟ ।
ଦାସକେପି ଚ ସଙ୍ଘସ୍ସ, ୟଥାଠାନେ ଠପାପୟି ॥
ପଧାନଘର ମେତସ୍ସ, ଥେରସ୍ସ’କାସନାମକଂ ।
ପଟିଗ୍ଗହେତ୍ୱା ତଂ ସୋ’ପି, ସଙ୍ଘସ୍ସା’ଦା ମହାମତୀ ॥
ଭୋଗଗାମେ ଚ ତସ୍ସା’ଦା, ଭରତ୍ତାଲଂ କିହିମ୍ବିଲଂ ।
କତକଞ୍ଚ ତୁଲାଧାରଂ, ଅନ୍ଧକାରକମେୱ ଚ ॥
ଅନ୍ଧକାରଂ ଅନ୍ତୁରେଳିଂ, ବାଲୱଂ ଦ୍ୱାରନାୟକଂ ।
ମହାନିକଡ୍ଢିକଞ୍ଚେୱ, ପେଳହାଳଂ ତଥାପରଂ ॥
ଏତେ ଅଞ୍ଞେ ଚ ସୋ ଦତ୍ୱା, ଭୋଗଗାମେ ନରିସ୍ସରୋ ।
ଦାସି ଆରାମିକେ ଚେୱ, ଅତ୍ତନୋ କିର ଞାତକେ ॥
ତଥା ଦ୍ୱିନ୍ନଂ ନିକାୟାନଂ, ୱିହାରେ ମନ୍ଦପଚ୍ଚୟେ ।
ଦିସ୍ୱାପି ଚ ସୁତ୍ୱା ୱା, ଭୋଗଗାମେ ବହୂ ଅଦା ॥
ବହୁନା କିନ୍ତୁୱୁତ୍ତେନ, ନିକାୟେସୁ’ପି ତୀସୁ’ପି ।
ଅଦା ଗାମସହସ୍ସଂ ସୋ, ବହୁପ୍ପାଦଂ ନିରାକୁଲଂ ॥
ଅନୁସ୍ସରନ୍ତୋ ସୋ ତିଣ୍ଣଂ, ରତନାନଂ ଗୁଣେ ୱରେ ।
ଏକାୱଲିଂ ଗହେତ୍ୱାନ, ଅକ୍ଖମାଲ ମକା କିର ॥
ଏୱଂ ସବ୍ବପ୍ପୟୋଗେହି, ସୋ’ହୁ ଧମ୍ମପରାୟନୋ ।
ସବ୍ବେ ତମନୁସିକ୍ଖନ୍ତା, ହେସୁ ଧମ୍ମକରା ନରା ॥
ଦମିଳୋ ପୋତ୍ଥକୁଟ୍ଠୱୋ, ତସ୍ସ କମ୍ମକରୋ ତଦା ।
ମାଟମ୍ବିୟୱ୍ହଂ କାରେସି, ପଧାନଘରମବ୍ଭୁତଂ ॥
ବୂକକଲ୍ଲେ ଅମ୍ବୱାପିଂ, ତନ୍ତୱାୟିକଚାଟିକଂ ।
ଗାମଂ ନିଟ୍ଠିଲୱେଟ୍ଠିଞ୍ଚ, ତସ୍ସା’ଦା ସୋ ସଦା ସକଂ ॥
କପ୍ପୂରପରିୱେଣେ ଚ, କୁରୁନ୍ଦପିଲ୍ଲକେ ତଥା ।
ମହାରାଜଘରେ ଚେୱ, ପାସାଦେ ସୋ’ୱ କାରୟି ॥
ଅଞ୍ଞତ୍ଥା’ଦା ତୟୋ ଗାମେ, ୱିହାରେସୁ ମହାଧନୋ ।
ପୋତ୍ଥସାତୱ୍ହୟୋ ପଞ୍ଞୋ, ୱିହାରେ ଜେତନାମକେ ॥
ସେନାପତିରାଜନାମଂ, ପରିୱେଣଂ ସମାପୟି ।
ମହାକନ୍ଦୋ ଚ ଦମିଳୋ, ପରିୱେଣଂ ସନାମକଂ ॥
ଚୁଲ୍ଲପନ୍ଥଂ ତଥା ଏକୋ, ସେହାଲଉପରାଜକଂ ।
ଉପରାଜା ସକାରେସି, ସଙ୍ଘତିସ୍ସୋ’ପି ରାଜିନୋ ॥
ଅଞ୍ଞେସୁ ବହୱୋ ଆସୁଂ, ୱିହାରେ ଏୱମାଦିକେ ।
ଭସ୍ସ ରଞ୍ଞୋ’ ନୁୱତ୍ତନ୍ତା, ଏୱଂ ଧମ୍ମୀହି ପାଣିନୋ ॥
ପାପଂ ୱାପି ହି ପୁଞ୍ଞଂ ୱା,
ପଧାନୋୟଂ କରୋତି ୟୋ ।
ଲୋ କୋ ତଂ ତଂ କରୋତେୱ,
ତଂ ୱିଜନେୟ୍ୟ ପଣ୍ଡିତୋ ॥
ଜେଟ୍ଠନାମା ମହାପୁଞ୍ଞା, ମହେସୀ ତସ୍ସ ରାଜିନୋ ।
ଜେଟ୍ଠାରାମଞ୍ଚ କାରେସି, ଭିକ୍ଖୂନୀନମୁପସ୍ସୟଂ ॥
ତସ୍ସା’ଦାସି ଚ ଦ୍ୱେ ଗାମେ, ପକ୍କପାସାଣଭୂମିୟଂ ।
ତମ୍ବୁଦ୍ଧଂ ଭେଲଗାମଞ୍ଚ, ଆରାମିକସତଂ ତଥା ॥
ଅକା ମଲୟରାଜାପି, ଧାତୁଗେହଂ ମହାରହଂ ।
ମଣ୍ଡଲଗିରିୱିହାରମ୍ହି, ଚେତିୟସ୍ସ ମହାଧନୋ ॥
ଲୋହପାସାଦକେ ସୋ’ୱ, ଛାଦେସି ମଜ୍ଝକୂଟକଂ ।
ବୋଧିତିସ୍ସୱିହାରଞ୍ଚ, ବୋଧିତସ୍ସୋ ମହାୟସୋ ॥
ଦୀପେ ମଣ୍ଡଲିକା ସବ୍ବେ, ତତ୍ଥ ତତ୍ଥ ୟଥାବଲଂ ।
ୱିହାରେ ପରିୱେଣେ ଚ, କାରୟିଂସୁ ଅନପ୍ପକେ ॥
ତସ୍ସ କାଲୋ ନରିନ୍ଦସ୍ସ, ପୁଞ୍ଞକମ୍ମମୟୋ ଇଧ ।
ଅତିୱିତ୍ଥାରଭୀତେନ, ସବ୍ବସୋ ନ ୱିଚାରିତଂ ॥
ପୁବ୍ବକୋପି କଥାମଗ୍ଗୋ, ଆକୁଲୋ ୱିୟ ଭାତିମେ ।
ୟଥାପଧାନଂ କଥିତଂ, ହେତୂନଂ ଉପଲକ୍ଖଣଂ ॥
ଅଥାପରେନ କାଲେନ, ପୁଲତ୍ଥିନଗରଂ ଗତୋ ।
ୱାସଂ ତତ୍ଥେୱ କପ୍ପେସି, କରୋନ୍ତୋ ପୁଞ୍ଞସଞ୍ଚୟଂ ॥
ଅତେକିଚ୍ଛିୟରୋଗେନ, ସମ୍ଫୁଟ୍ଠୋ କାଲମତ୍ତନୋ ।
ମରଣସ୍ସ ୱିଦିତ୍ୱାନ, ତମାହୁୟମହାଜନଂ ॥
ଓୱଦିତ୍ୱାନ ଧମ୍ମେନ, ମରଣଂ ସୋ ଉପାଗମି ।
ମହାଜନୋ ମତେ ତସ୍ମିଂ, ବାଳ୍ହସୋକୋ ପରୋଦିୟ ॥
କତ୍ୱା ଆଳହଣେ ତସ୍ସ, କିଚ୍ଚଂ ସବ୍ବମସେସତୋ ।
ତସ୍ସାଳାହଣଭସ୍ମମ୍ପି, କତ୍ୱା ଭେସଜ୍ଜମତ୍ତନୋ ॥
ରାଜା ଭଣ୍ଡଞ୍ଚ ତଂ ସବ୍ବଂ, ସବ୍ବଞ୍ଚ ବଲୱାହନଂ ।
ସମ୍ମା ଆଦାୟ ଗୋପେତ୍ୱା, ନଗରଂ ସମୁପାଗମି ॥
ଏୱଂ ସୋଳସମେ ୱସ୍ସେ, ରାଜା ଆସି ଦିୱଙ୍ଗତୋ ।
ପୋତ୍ଥକୁଟ୍ଠୋପି ଦମିଳୋ, ରଜ୍ଜଂ ତସ୍ସ ୱିଚାରୟି ॥
ଉପରାଜଂ ଗହେତ୍ୱାନ, ଦାଠାସିୱଂ ଖିପାପୟି ।
ଚାରକୋ ୱିହିତୁଂ ସମ୍ମା, ରକ୍ଖାୱରଣ ମାଦିସି ॥
ୱିନା ରଞ୍ଞା ନ ସକ୍କାତି, ମେଦିନିଂ ପରିଭୁଞ୍ଜିତୁଂ ।
ଆନେତ୍ୱା ଦତ୍ତନାମକଂ, ଧନପିଟ୍ଠପ୍ପଧାନକଂ ॥
ଉପ୍ପନ୍ନଂ ରାଜୱଂସମ୍ହି, ରଜ୍ଜେ ତଂ ଅଭିସିଞ୍ଚିୟ ।
ତସ୍ସ ନାମଂ ଠପେତ୍ୱାନ, ସୟଂ ସବ୍ବଂ ୱିଚାରୟି ॥
ଦନ୍ତୋ ସୋ ଧନପିଟ୍ଠିମ୍ହି, ୱିହାରଂ ସକନାମକଂ ।
କାରୟିତ୍ୱାନ ପୁଞ୍ଞାନି, ଅଞ୍ଞାନିପି ସମାଚିନି ॥
ସମକନ୍ତୁ ସୋ ଠତ୍ୱା’ୱ, ୱସ୍ସଦ୍ୱୟ ମହୁମତୋ ।
ପୋତ୍ଥକୁଟ୍ଠୋ ମତେତସ୍ମିଂ, ପୁନ ଅଞ୍ଞମ୍ପି ମାଣୱଂ ॥
ହତ୍ଥଦାଠଂ ସମାହୂୟ, ଉଣ୍ହା ନଗରସମ୍ଭୱଂ ।
ତମ୍ପି ରଜ୍ଜେ ଭିସିଞ୍ଚିତ୍ୱା, ୟଥା ପୁବ୍ବଂ ସୟଂୱସୀ ॥
କାଳଦୀଘାୱିକଂ କତ୍ୱା, ପଧାନଘରକଂ ତଥା ।
ପୁଞ୍ଞମଞ୍ଞଂ ଛମାସେହି, ସୋ’ପି ମଚ୍ଚୁୱସଂ ଗତୋ ॥
ଏୱଂ ୱିଦିତ୍ୱା ବହୁପଦ୍ଦୱାନି ।
ଧନାନି ଧଞ୍ଞାନି ଚ ୱାହନାନି ।
ୱିହାୟ ରଜ୍ଜେସୁ ରତିଂସପ୍ପଞ୍ଞା ।
ମନୁଞ୍ଞପୁଞ୍ଞାଭିରତା ଭୱେୟ୍ୟୁଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ତିରାଜକୋ ନାମ
ଚତୁଚତ୍ତାଲୀସତିମୋ ପରିଚ୍ଛେଦୋ ।
ପଞ୍ଚଚତ୍ତାଲୀସତିମ ପରିଚ୍ଛେଦ
ରଞ୍ଞୋ ତସ୍ସଚ୍ଚୟେ ରାଜା, ମାଣୱମ୍ମୋ ଅହୋସି ସୋ ।
କିଂ ଗୋତ୍ତୋ କସ୍ସ ପୁତ୍ତୋ ଚ, କଥଂ ରଜ୍ଜମପାପୁଣି ॥
ମହାସମ୍ମତୱଂସମ୍ହି, ଜାତୋ ଜାତିଗୁଣାୱହୋ ।
ପୁତ୍ତୋ କସ୍ସପନାମସ୍ସ, ଥୂପାରାମସ୍ସ ଭେଦିନୋ ॥
ଧୀତା ମଲୟରାଜସ୍ସ, ସଙ୍ଘନାମସ୍ସ ରାଜିନୋ ।
ତଂ ଲଭିତ୍ୱା ୱସଂ ଦେସେ, ଉତ୍ତରେ ଲୀନୱୁତ୍ତିକୋ ॥
ହତ୍ଥଦାଠନରିନ୍ଦେନ, ତସ୍ମିଂ ଅତ୍ଥେୱ ଧାରିତେ ।
ଜମ୍ବୁଦୀପମୁପାଗମ୍ମ, ନରସୀହଂ ମହୀପତି ॥
ଗନ୍ତ୍ୱା ୱତ୍ୱା ସକଂ ନାମଂ, ସେୱିତୁଂ ତମୁପକ୍କମି ।
ଆରାଧେସି ଚ ସବ୍ବେହି, ପୟୋଗେହି ନରାଧୀପଂ ॥
ୱିଦିତ୍ୱା ତସ୍ସ ସୋହଜ୍ଜଂ, ନେତ୍ୱା ଭରିୟମତ୍ତନୋ ।
ୱାସଂ ତତ୍ଥେୱ କପ୍ପେସି, ସେୱମାନୋ ଦିୱାନିସଂ ॥
ସୋପି ଆରାଧିତୋ ତେନ, କଣ୍ଡୁୱେଟ୍ଠି ନରୁତ୍ତମୋ ।
ସବ୍ବଂ ନେନ୍ତୋୱ ତଂ ରଜ୍ଜଂ, ମହାଭୋଗମଦାପୟି ॥
ତେନ ସଂୱାସମନ୍ୱାୟ, ଭରିୟା ସଙ୍ଘନାମିକା ।
ଚତସ୍ସୋ ଧୀତରୋ ପୁତ୍ତେ, ଚତ୍ତାରୋପି ୱିଜାୟଥ ॥
ଅଥେକଦିୱସଂ ରାଜା, ହତ୍ଥିକ୍ଖନ୍ଧୱରଂ ଗତୋ ।
ସଞ୍ଚରନ୍ତୋ ୟଥାକାମଂ, ମାଣୱମ୍ମେନ ଏକତୋ ॥
ନାଳିକେରଂ ପିୱିତ୍ୱାନ, ତତ୍ରଟ୍ଠୋୱ ପିପାସିତୋ ।
ମାଣୱମ୍ମସ୍ସ ପାଦାସି, ମଞ୍ଞନ୍ତୋ ଅଞ୍ଞମେୱ ତଂ ॥
ସୋ ତଂ ଗହେତ୍ୱା ଚିନ୍ତେସି, ସଖଂ ପେସ ନରାଧିପୋ ।
ଉଚ୍ଛିଟ୍ଠଂ ନାମ କିଂ ହୋତି, ସତ୍ତାନଂ ପରମତ୍ଥତୋ ॥
ତସ୍ମା ୟୁତ୍ତଂ ମୟାପାତୁ-ମୀତି ଚିନ୍ତିୟ ତଂ ପିୱି ।
ଏୱଂ ହୋନ୍ତି ମହୁସ୍ସାହା, ଦେତୁକାମାହି ବୁଦ୍ଧିନୋ ॥
ରାଜାପି ଦିସ୍ୱା ତଂ ଭୀତୋ, ତସ୍ସପୀ ତାୱ ସେସକଂ ।
ସୟଂ ପିୱି ତଥାହୋତି, କମ୍ମଂ ପୁଞ୍ଞୱତଂ ସଦା ॥
ଠପେସି ସକୱେସେୱ, ତତୋ ପଟ୍ଠାୟ ଅତ୍ତନୋ ।
ଭୋଜନେ ସୟନେ ଚେୱ, ପରିହାରେ ଚ ୱାହନେ ॥
ଏୱଂ ତେସୁ ୱସନ୍ତେସୁ, ୟୁଦ୍ଧତ୍ଥାୟମୁପକ୍କମି ।
ୱଲ୍ଲଭୋ ନରସୀହେନ, ନରସୀହୋ ୱିଚିନ୍ତୟି ॥
ଅୟଂ ଖୋ ମମ ସେୱାୟ, ରଜ୍ଜଂ ୱଂସ ଗତଂ ସକଂ ।
ଲଭିସ୍ସାମୀତି ସେୱେତି, ରତ୍ତିଂ ଦିୱ ମତନ୍ଦିତୋ ॥
ସଚେ ସୋପି ମୟା ଗନ୍ତ୍ୱା, ୟୁଜ୍ଝନ୍ତୋ ମରଣଂ ଗତୋ ।
ତକ୍କିତଂ ତସ୍ସ ମୟ୍ହଞ୍ଚ, ସବ୍ବଂ ତମଫଲଂ ଭୱେ ॥
ଏୱଂ ଚିନ୍ତିୟତଂ ରାଜା, ନିୱତ୍ତେତ୍ୱା ସକେ ପୁରେ ।
ସୟଂ ୱଲ୍ଲଭରାଜେନ, କାତୁଂ ସଙ୍ଗାମମାରସି ॥
ମାଣୱମ୍ମୋପି ଚିନ୍ତେସି, ସଚେ’ୟଂ ମୟି ଜୀୱିତି ।
ରାଜା ମୀୟତି ୟୁଦ୍ଧମ୍ହି, କିଂ ଫଲଂ ମମ ଜୀୱିତେ ॥
ୱିସ୍ସାସୋ ଦୁକ୍କତୋ ତେନ, ଭୱିସ୍ସତି ତଥାସତି ।
ସଙ୍ଗହେସି କିମତ୍ଥଂ ମଂ, ସମାନତ୍ତେନ ଅତ୍ତନୋ ॥
ତସ୍ମା ୟୁତ୍ତଂ ମୟା ଗନ୍ତୁଂ, ସହସଙ୍ଗାମ ମଣ୍ଡଲଂ ।
ସୁଖଞ୍ହି ସଦ୍ଧିଂ ତେନେତ୍ଥ, ଜୀୱିତଂ ମରଣଂପି ୱା ॥
ଏୱଂ ଚିନ୍ତିୟ ସନ୍ନଦ୍ଧ-ବଲୋ ହତ୍ଥିୱରଂ ଗତୋ ।
ଗନ୍ତ୍ୱା ଦସ୍ସେସି ଅତ୍ତାନଂ, ସୋ ତଂ ସଙ୍ଗାମ ମଣ୍ଡଲେ ॥
ନରସୀହୋୱ ତଂ ଦିସ୍ୱା, ହଟ୍ଠତୁଟ୍ଠୋ ସମୁଗ୍ଗିରି ।
ସହୋ ସନ୍ଥୱମେତସ୍ମିଂ, କତ୍ତବ୍ବଂ ମେ କତଂ ଇତି ॥
ତତୋ ମାନସ୍ସ ସେନା ଚ, ସେନା ଚେୱସ୍ସରାଜିନୋ ।
ସେନଂ ୱଲ୍ଲଭରାଜସ୍ସ, ୱିଦ୍ଧଂସେସି ସମାଗତା ॥
ମାଣୱମ୍ମୋପି ଦସ୍ସେସି, ତହିଂ ସୁରତ୍ତମତ୍ତନୋ ।
ପରକ୍କମନ୍ତୋ ଦେୱାନଂ, ରଣେ ନାରାୟଣୋ ୱିୟ ॥
ନରସୀତୋପି ସନ୍ତୁଟ୍ଠୋ, ମାଣୱମ୍ମସ୍ସ ୱିକ୍କମେ ।
ଆଲିଙ୍ଗତ୍ୱା ସିନେହେନ, ତ୍ୱଂ ଖୋ ମେ ଜୟଦୋ ଇତି ॥
ଅତ୍ତନୋ ପୁରମାଗମ୍ମ, କତ୍ୱା ୱିଜୟମଙ୍ଗଲଂ ।
ମାଣୱମ୍ମସ୍ସ ସେନାୟ, କତ୍ତବ୍ବଂ ସବ୍ବମାଚରି ॥
ଅଥେୱଂ ଚିନ୍ତୟି ରାଜା, କତ୍ତବ୍ବଂ ମେ ସହାୟକୋ ।
ଅତ୍ତନା’କାସି ସବ୍ବଞ୍ଚ, ଅନଣୋ ସୋ ମମଜ୍ଜତୋ ॥
ଇଣଂ ମମାପି ସୋଧେମି, କତ୍ୱା କତ୍ତବ୍ବମତ୍ତନା ।
କତ୍ତଞ୍ଞୂ କତୱେଦୀହି, ପୁରିସା’ତୀୱଦୁଲ୍ଲଭା ॥
ଅମଚ୍ଚେ ସନ୍ନିପାତେତ୍ୱା, ଇଦଂ ୱଚନମବ୍ରୱି ।
ସହାୟସ୍ସ ମମେତସ୍ସ, କମ୍ମେ ତୁମ୍ହେପି ସକ୍ଖିନୋ ॥
ମୟାପି ତସ୍ସ କତ୍ତବ୍ବଂ, କମ୍ମଂ ସାଧୁ ସୁଖାୱହଂ ।
ଉପକାରୋ ହି ସାଧୂନଂ, ଧମ୍ମୋ ପୁବ୍ବୋପକାରିନୋ ॥
ଏୱଂ ୱୁତ୍ତେ ଅମଚ୍ଚା ତେ, ପଚ୍ଚାହଂସୁ ମହୀପତି ।
ୟଂ ୟମିଚ୍ଛତି ଦେୱୋହି, ତଂ ତଂ ରୁଚ୍ଚତି ନୋ ଇତି ॥
ଅଥ ସୋ ମାଣୱମ୍ମସ୍ସ, ସେନଂ ଦତ୍ୱା ସୱାହନଂ ।
ସବ୍ବୋପକରଣଞ୍ଚେୱ, ସବ୍ବକମ୍ମକରେପି ଚ ॥
ଗଚ୍ଛାତି ୱତ୍ୱା ତଂ ୟନ୍ତଂ, ସହସେନାୟପେକ୍ଖିୟ ।
ପରିଦେୱିତ୍ଥ ଭୂମିନ୍ଦୋ, ୱିପ୍ପୱୁତ୍ଥଂ’ୱ ପୁତ୍ତକଂ ॥
ମାଣୱମ୍ମୋପି ଆରୁୟ୍ହ, ନାୱାୟୋ ଜଲଧୀତଟେ ।
ନ ଚିରେନେୱ ଆଗମ୍ମ, ସମତ୍ତିକ୍କମ୍ମ ୱେଗସା ॥
ସହ ସେନାୟ ମଦ୍ଦନ୍ଥୋ, ଲଙ୍କାଦୀପମୁପୱିସୀ ।
ତଂ ସୁତ୍ୱାନ ପଲାୟିତ୍ଥ, ରାଜା ଦାଠୋପତିସ୍ସକୋ ॥
ମାଣୱମ୍ମୋ ପୁରଂ ଗନ୍ତ୍ୱା, ଅହୁତ୍ୱାୱ ନରାଧିପୋ ।
ପଲାତମନୁବନ୍ଧିତ୍ଥ, ପଦାନୁପଦମୁଗତୋ ॥
ତଦା ସା ଦମିଳି ସେନା, ଅସ୍ସୋସି କିର ସାମିକୋ ।
ମହାରୋଗା’ଭିଭୂତୋତି, ସୁତ୍ୱା ତଂ ସା ଅପକ୍କମି ॥
ସୁତ୍ୱା ଦାଠୋପତିସ୍ସୋ ତଂ, ସମାଦାୟ ମହାବଲଂ ।
ମାଣୱମ୍ମଂ ଉପାଗମ୍ମ, କାତୁମାରଭି ସଂୟୁଧଂ ॥
ମାଣୱମ୍ମୋ ଚ ଚିନ୍ତେସି, ସବ୍ବା ସେନା ଗତା ମମ ।
ମତେ ମୟି ସମିଜ୍ଝେୟ୍ୟ, ୱେରିନୋ ମେ ମନୋରଥଂ ॥
ଜମ୍ବୁଦୀପଂୱ ତସ୍ମା’ହଂ, ଗନ୍ତ୍ୱା’ଦାସ ବଲଂ ତତୋ ।
ପୁନ ରଜ୍ଜଂ ଗହେସ୍ସଂତି, ତସ୍ମା ଏୱମକାସି ସୋ ॥
ଗନ୍ତ୍ୱା ପୁନ’ପି ଦିସ୍ୱାନ, ସହାୟଂ ନରସୀହକଂ ।
ଆରାଧହନ୍ତୋ ନିପୁଣଂ, ସକ୍କଚ୍ଚଂ ତମୁପଟ୍ଠହି ॥
ୟାୱ ରାଜଚତୁକ୍କଂସୋ, ମାଣାମ୍ମୋ ତହିଂ ୱସି ।
ନରସୀହୋ’ଥ ଚିନ୍ତେସି, ମାନତ୍ଥଦ୍ଧୋ ୟସୋଧନୋ ॥
ରଜ୍ଜତ୍ଥଂ ମେ ସହା ୟୋ ମଂ, ସେୱନ୍ତୋୟେୱ ଅଦ୍ଧଗୋ ।
ୱୁଦ୍ଧୋ ହେସ୍ସତି ତଂ ପସ୍ସଂ, କଥଂ ରଜ୍ଜଂ କରୋମହଂ ॥
ଇମସ୍ମିଂ ପନ ୱାରସ୍ମିଂ, ପେସୟିତ୍ୱା ବଲଂ ମମ ।
ରଜ୍ଜଂ ତଂ ନ ଗହେସ୍ସାମି, କୋ ଅତ୍ଥୋ ଜୀୱିତେନ ମେ ॥
ଏୱଂ ଚିନ୍ତିୟ ସୋ ସେନଂ, ସନ୍ନିପାତିୟ ଅତ୍ତନୋ ।
ସନ୍ନାହେତ୍ୱା ୟଥା ୟୋଗଂ, ଦାପେତ୍ୱାନ ୟଥାରୁଚିଂ ॥
ସୟମେୱ ତମାଦାୟ, ସମୁଦ୍ଦତଟମାଗତୋ ।
ନାୱାୟୋ ଚିତ୍ତରୂପାୟୋ, କାରୟିତ୍ୱା ଥିରା ବହୂ ॥
ଅମଚ୍ଚେ ଆହ ‘‘ଏତେନ, ସଦ୍ଧିଂ ଗଚ୍ଛଥ ଭୋ’’ଇତି ।
ନାୱଂ ଆରୋହିତୁଂ ସବ୍ବେ, ନ ଇଚ୍ଛିଂସୁ ତଦା ଜନା ॥
ତଦା ସୀହୋ ୱିଚିନ୍ତେତ୍ୱା, ସୟଂ ହୁତ୍ୱା ତିରୋହିତୋ ।
ଅତ୍ତନୋ ପରିହାରଂ ସୋ, ରାଜଲକ୍ଖଣସମ୍ମତଂ ॥
ସବ୍ବଂ ତସ୍ସେୱ ଦତ୍ୱାନ, ଅଲଙ୍କାରମ୍ପି ଅତ୍ତନୋ ।
ଆରୋପେତ୍ୱାନ ତଂ ନାୱଂ, ଗଚ୍ଛ ଠତ୍ୱାନ ସାଗରେ ॥
ଇମଂ ଭେରିଂଚ ୱାଦେହି, କୋଟ୍ଠନାମନ୍ତି ୟୋଜୟୀ ।
ସୋ’ପି ସବ୍ବଂ ତଥାକାସି, ରାଜାନୋ ଅଗମା ଇତି ॥
ଆରୁହିଂସୁ ଜନା ନାୱଂ, ଏକଂ କତ୍ୱା ନରାଧିପଂ ।
ସୋ ତଂ ସେନଙ୍ଗମାଦାୟ, ମାଣୋ ଗନ୍ତୁଂ ସମାରଭି ॥
କେୱଲୋ’ପି ସମୁଦ୍ଦୋ ସୋ, ଅହୋଭି ନଗରୂପମୋ ।
ଅଥ ସୋ ପଟ୍ଟନଂ ପତ୍ୱା, ଓତରିତ୍ୱା ସୱାହନୋ ॥
ୱିସ୍ସାମେତ୍ୱା ବଲଂ ତତ୍ଥ, ୱସଂ କତିପୟେ ଦିନେ ।
ଉତ୍ତରଂ ଦେସମାଦାୟ, କତ୍ୱା ହତ୍ଥଗତଂ ଜନଂ ॥
ଅକ୍ଖୋବ୍ଭିୟ ମହାସେନୋ, ନଗରଂ ଗନ୍ତୁମାରଭି ।
ପୋତ୍ଥକୁଟ୍ଠୋପି ତଂ ସୁତ୍ୱା, ପଚ୍ଚୁଗ୍ଗଞ୍ଛି ମହାବଲୋ ॥
ସଂଗଚ୍ଛିଂସୁ ଉଭୋ ସେନା, ଭିନ୍ନୱେଲା’ୱ ସାଗରା ।
ମାଣୱମ୍ମୋ ତତୋ ହତ୍ଥି-ମାରୁୟ୍ହ ଗହିତାୟୁଧୋ ॥
ପୋତ୍ଥକୁଟ୍ଠଞ୍ଚ ରାଜାନଂ, ଦ୍ୱେଧା କତ୍ୱା ପଲାପୟି ।
ହତ୍ଥଦାଠଂ ପଲାୟନ୍ତଂ, ଦିସ୍ୱା ଜନପଦା ନରା ॥
ସୀସମସ୍ସ ଗହେତ୍ୱାନ, ମାଣୱମ୍ମସ୍ସ ଦସ୍ସୟୁଂ ।
ପୋତ୍ଥକୁଟ୍ଠୋପଲାୟିତ୍ୱା, ମେରୁକନ୍ଦରମାଗମି ॥
ତତୋ ତଂ ସାମିକୋ ଦିସ୍ୱା, ସହାୟୋ ମେ ଅୟଂଚିରଂ ।
ତସ୍ମା ନ ସକ୍କା ଚଡ୍ଡେତୁଂ, ଆପଦେ ସରଣାଗତଂ ॥
ସାମିନୋ ଚ ସହାୟସ୍ସ, ନିଦ୍ଦୋସୋହଂ କଥଂ ଭୱେ ।
ଇତି ଚିନ୍ତିୟ ପୂୱଂ ସୋ, ସୱିସଂ ଖାଦିୟା’ମରି ॥
କୁଟ୍ଠକୋପି ଚ ତେନେୱ, ଖାଦିତ୍ୱା ପୂୱକଂ ମତୋ ।
ମାଣୱମ୍ମସ୍ସ ତସ୍ସେୱଂ, ଦୀପୋ ଆସି ଅକଣ୍ଟକୋ ॥
ମାଣୱମ୍ମୋ ତତୋ ଦୀପେ, ଛତ୍ତଂ ଉସ୍ସାପୟି ତଦା ।
ୱାରେନ୍ତୋ ୱିୟ ତେନେୱ, ଦୁକ୍ଖଂ ଦୀପେ ଜନସ୍ସ ସୋ ॥
ପୁଞ୍ଞକମ୍ମାନି ସୋ’କାସି, ଅନଗ୍ଘାନି ବହୂନି ଚ ।
ସମତ୍ଥୋ କୋହି ତଂ ସବ୍ବଂ, ୱତ୍ତୁଂ ପଟିପଦଂ ନରୋ ॥
କପ୍ପଗାମୱ୍ହୟଞ୍ଚେୱ, ତଥା ସେପଣ୍ଣିନାମକଂ ।
ପଧାନରକ୍ଖେ ଚ ସିରିଂ, ସିରୀସଙ୍ଘାଦି ବୋଧିକେ ॥
ପାସାଦଂ ସୋୱ କାରେସି, ପସାଦାୱହମୁତ୍ତମୋ ।
ଛାଦେସି ଲୋହପାସାଦଂ, ଥୂପାରାମଘରଂ ତଥା ॥
ଥୂପାରାମେ ଚ ପାସାଦଂ କତ୍ୱା’ଦା ପଂସୁକୂଲିନଂ ।
ଜିଣ୍ଣକଂ ପଟିସଙ୍ଖାସି ଛତ୍ତଂ ଚେତିୟମୁଦ୍ଧନି ।
ବହୱୋ ଜିଣ୍ଣକାୱାସେ ତତ୍ଥେୱ ପଟିସଙ୍ଖରି ॥
[ଏତ୍ଥ ମାଣୱମ୍ମସ୍ସ ରଜ୍ଜକଥାୟ ଊନତା ଦିସ୍ସତି । ଇତୋ ପଟ୍ଠାୟ ଅଗ୍ଗବୋଧିସ୍ସ ରଜ୍ଜପଟିବଦ୍ଧା କଥା ୱିର ଖାୟତି ।]
ଛଚତ୍ତାଲୀସତିମ ପରିଚ୍ଛେଦ
…ୱାସଂ-କତ୍ୱା ସୁଲଭପଚ୍ଚୟଂ ।
ଦାସି ଧମ୍ମରୁଚିନଂ ସୋ, ରାଜିନୀ ଦୀପକମ୍ପି ଚ ॥
କାରେତ୍ୱାନ ପରିଚ୍ଛେଦଂ, ମହାନେତ୍ତାଦି ପାଦିକଂ ।
ତେସମେୱ ଅଦା କୋଳୁ-ୱାତେ ସୋ ଦେୱତିସ୍ସକଂ ॥
ୱହତ୍ଥଲେ ଚ ସୋ କତ୍ୱା, କଦମ୍ବଗୋନନାମକଂ ।
ଦେୱପାଳିମ୍ହି କତ୍ୱାନ, ଗୀରିୱ୍ହନଗରଂ ତଥା ॥
କତ୍ୱା ଅନ୍ତରସୋବ୍ଭମ୍ହି, ଦେୱନାମଂ ୱିହାରକଂ ।
ରାଜମାତିକମାରାମଂ, କତ୍ୱା’ଦା ପଂସୁକୂଲିନଂ ॥
ଗୋକଣ୍ଣକୱିହାରେ’କା, ପଧାନଘରମେୱ ଚ ।
ଜିଣ୍ଣଗେହଞ୍ଚ କାରେସି, ୱଡ୍ଢମାନକବୋଧିୟା ॥
ସଙ୍ଘମିତ୍ତୱ୍ହୟେ ଚେୱ, ଅଞ୍ଞତ୍ଥ ଚ ମହାୟସୋ ।
ତତ୍ଥ ତତ୍ଥ ୱିହାରେସୁ, ନୱକମ୍ମମକାରୟି ॥
ଛବ୍ବୀସତି ସହସ୍ସାନି, ସୁୱଣ୍ଣାନଂ ସମପ୍ପିୟ ।
ଜିଣ୍ଣାନି ପଟିସଙ୍ଖାସି, ରାଜା ଚେତିୟପବ୍ବତେ ॥
ତାଲୱତ୍ଥୁୱିହାରଞ୍ଚ, କାରେତ୍ୱା ପଣ୍ଣଭତ୍ତକଂ ।
ୱିହାରସ୍ସ ମହାସେନ-ନରିନ୍ଦୱ୍ହସ୍ସ ଦାପୟି ॥
ଗୋଣ୍ଡିଗାମିକୱାପିଞ୍ଚ, ଛିନ୍ନଂ ବନ୍ଧି ୟଥା ପୁରା ।
ଦାନଭଣ୍ଡଞ୍ଚ ସୋ ସବ୍ବଂ, ସବ୍ବେସଂ ଦାସି ପାଣିନଂ ॥
ଉପୋସଥଂ ଉପୱସତି, ସଦ୍ଧିଂ ଦୀପଜନେହି ସୋ ।
ଧମ୍ମଞ୍ଚ ତେସଂ ଦେସେତି, ଦାତୁଂ ଲୋକୁତ୍ତରଂ ସୁଖଂ ॥
କମ୍ମଂ ସୋୱଗ୍ଗିୟଂ ତସ୍ସ, ରଜ୍ଜେ ସବ୍ବୋ ସମାଚରି ।
ୟଂ କରୋତି ମହୀପାଲୋ, ତଂ ତସ୍ସ କୁରୁତେ ଜନୋ ॥
ତସ୍ମା ରାଜା ମହାପଞ୍ଞୋ, ଧମ୍ମମେୱ ସମାଚରେ ।
ସୋ ନିୱୁତ୍ଥନିୱୁତ୍ଥମ୍ହି, ଠାନେ ହୋତି ମହାୟସୋ ॥
ସମ୍ପତ୍ତପରିୱାରୋ ଚ, ଅନ୍ତେ ଗଚ୍ଛତି ନିବ୍ବୁତିଂ ।
ଅତ୍ତତ୍ଥଞ୍ଚ ପରତ୍ଥଞ୍ଚ, ତସ୍ମା ପସ୍ସେୟ୍ୟ ବୁଦ୍ଧିମା ॥
ଅତ୍ତନା ୟଦି ଏକେନ, ୱିନିତେନ ମହାଜନା ।
ୱିନୟଂ ୟନ୍ତି ସବ୍ବେପି, କୋତଂ ନାସେୟ୍ୟ ପଣ୍ଡିତୋ ॥
ପୟୋଗୋ ୟୋ ହି ସତ୍ତାନଂ, ଲୋହଦ୍ୱୟ ହିତାୱହୋ ।
ସୋ ତେନ ଅକତୋ ନତ୍ଥି, ରତ୍ତନ୍ଦିୱମତନ୍ଦିନା ॥
ଅତ୍ତନୋ ସୋ ନିୱତ୍ଥାନି, ୱତ୍ଥାନି ସୁଖୁମାନି ଚ ।
ପଂସୂକୂଲିକଭିକ୍ଖୂନଂ, ଚୀୱରତ୍ଥାୟ ଦାପୟି ॥
ଅଟ୍ଠାନୱିନିୟୋଗୋପି, ସଙ୍ଗହୋ ୱା ୱିରୂପକୋ ।
ସାୱଜ୍ଜୋ ପରିଭୋଗୋ ୱା, ତସ୍ସ ନାହୋସି ସବ୍ବସୋ ॥
ୟେ ୟେ ସତ୍ତା ୟଦା ହାରା, ତେସଂ ତଂ ତଂ ସଦାପୟି ।
ୟେ ୟେନ ସୁଖୀ ହୋନ୍ତି, ତେ ତେ ତେନ ସୁଖାପୟୀ ॥
ଏୱଂ ପୁଞ୍ଞାନି କତ୍ୱାନ, ଛବ୍ବସ୍ସାନି ନରାଧିପୋ ।
ଅଗମା ଦେୱରାଜସ୍ସ, ସନ୍ତିକଂ ସନ୍ତିୟାୱହୋ ॥
ଅଥ ତସ୍ସ ନୁଜୋ ରାଜା, କସ୍ସପୋ ହୋତି ଖତ୍ତିୟୋ ।
ସମତ୍ଥୋ ରଜ୍ଜଭାରସ୍ସ, ୱହିତୁଂ ପୁବ୍ବୱୁତ୍ତିନୋ ॥
ପିତା ୱିୟ ନିୟଂ ପୁତ୍ତଂ, ସୋ ସଙ୍ଗଣ୍ହି ମହାଜନଂ ।
ଦାନେନ ପେୟ୍ୟୱଜ୍ଜେନ, ଅତ୍ଥସ୍ସ ଚରିୟାୟ ଚ ॥
ଠାନନ୍ତରଞ୍ଚ ଦାପେସି, ତସ୍ସ ତସ୍ସ ୟଥାରହଂ ।
ସୟଂ ଭୁଞ୍ଜିତ୍ଥ ଭୋଗେପି, ସବ୍ବଦୁକ୍ଖୱିୱଜ୍ଜିତୋ ॥
ଗୀହିନଞ୍ଚେୱ ଭିକ୍ଖୂନଂ, ବ୍ରହ୍ମଣାନଞ୍ଚ ଖତ୍ତିୟୋ ।
ୱତ୍ତାପୟି ସକାୱାରେ, ମାଘାତଞ୍ଚେୱ କାରୟି ॥
ମଚ୍ଛତିତ୍ଥେ ଦୁୱେ ଚେୱ, ଆୱାସଂ ହେଳିଗାମକଂ ।
ୱଣିଜ୍ଜଗାମମାରାମଂ, କସ୍ସପାଦୀଗିରିଂ ତଥା ॥
ତଥା ଅମ୍ବତନୱ୍ହଞ୍ଚ, ପଧାନଘର ମୁତ୍ତମଂ । ଭୋଗଗାମଞ୍ଚ…
[ଏତ୍ଥକସ୍ସପସ୍ସ ରଜ୍ଜପଟିବଦ୍ଧାୟ କଥାୟ ଊନତା ଦିସ୍ସତି ॥]
ତେସଂ ସବ୍ବକନିଟ୍ଠୋପି, ମହିନ୍ଦୋ ନାମ ଖତ୍ତିୟୋ ।
ସମ୍ପତ୍ତରଜ୍ଜୋ ନାହୋସି, ରାଜା ରଜ୍ଜ ଧୁରନ୍ଧରୋ ॥
ତସ୍ସପି କିର ନିଲୱ୍ହୋ, ସହାୟୋ ଚୀରସତ୍ଥୁତୋ ।
ମତୋ ପୁବ୍ବେୱ ତସ୍ମା, ସୋ ସରନ୍ତୋ ତଂ ନ ଇଚ୍ଛିତଂ ॥
ଅହୋରଜ୍ଜମ୍ପି ଦୀପମ୍ହି, ନ ମଞ୍ଞିତ୍ଥ ସୁଖାୱହଂ ।
ଅଭାୱେନ ସହାୟସ୍ସ, ସହାୟା’ତୀୱ ଦୁଲ୍ଲଭା ॥
ତେନେୱ ୱୁତ୍ତଂ ମୁନିନା, ଧମ୍ମା ୟେକେଚି ଲୋକିୟା ।
ତଥା ଲୋକୁତ୍ତରା ଚେୱ, ଧମ୍ମା ନିବ୍ବାନଗାମିନୋ ॥
କଲ୍ୟାଣମିତ୍ତଂ ଆଗମ୍ମ, ସବ୍ବେ ତେ ହୋନ୍ତି ପାଣିନଂ ।
ତସ୍ମା କଲ୍ୟାଣମିତ୍ତେସୁ, କତ୍ତବ୍ବୋ’ତି ସଦା ଦରୋ ॥
ଆଦିପାଦୋୱ ସୋ ତସ୍ମା, ହୁତ୍ୱା ରଜ୍ଜଂ ୱିଚାରୟି ।
ପାଲେତୁଂୟେୱ ଦୀପମ୍ହି, ଜିୱନ୍ତୋ ୱିୟ ପାଣିନୋ ॥
କସ୍ସପସ୍ସ ସଭାତୁସ୍ସ, ପୁତ୍ତଂ ସୋ ଅଗ୍ଗବୋଧିକଂ ।
ଠପେତ୍ୱା ଓପରଜ୍ଜମ୍ହି, ଦତ୍ୱା ଭୋଗମନପ୍ପକଂ ॥
ଦେସଂ ଦତ୍ୱାନ ପାଚିନଂ, ୱସିତୁଂ ତତ୍ଥ ପେସିୟ ।
ଦେସଂ ଦକ୍ଖିଣମାଦାସି, ରାଜ ପୁତ୍ତସ୍ସ ଅତ୍ତନୋ ॥
ମହାପାଳିମ୍ହି ଦାନଞ୍ଚ, ଦାପେସି ଦସୱାହଣଂ ।
ସବ୍ବେ ଭୋଗେ ସମେ’କାସି, ୟାଚନାନଂ ସହ’ତ୍ତନା ॥
ଅଦତ୍ୱା ୟାଚକାନଂ ସୋ, ନୁ କିଞ୍ଚି ପରିଭୁଞ୍ଜତି ।
ଭୁତ୍ତଂ ୱା ସତିୟା ଦେତି, ଦ୍ୱି ଗୁଣଂ ଅତ୍ତଭୁତ୍ତତୋ ॥
ସକନାମଂ ସକାରେସି, ଭିକ୍ଖୁନୀ ନ ମୁପସ୍ସୟଂ ।
ପାଦାନଗରଗଲ୍ଲଞ୍ଚ, ଆରାମ ମରିୟାଦକଂ ॥
ମହିନ୍ଦତଟମାରାମଂ, ସମ୍ପତ୍ତ ଚତୁପଚ୍ଚୟଂ ।
ଅଞ୍ଞମ୍ପି ବହୁଧା କାସି, ପୁଞ୍ଞଂ ପୁଞ୍ଞଗୁଣେରତୋ ॥
ତିଣୀ ୱସ୍ସାନି କାରେତ୍ୱା, ରଜ୍ଜମେୱ ମହାମତି ।
ଗୱେସନ୍ତୋ ସହାୟଂ’ୱ, ଦେୱଲୋକମୁପାଗମି ॥
ୱସନ୍ତୋ ଦକ୍ଖିଣେ ଦେସେ, ଅଗ୍ଗବୋଧି କୁମାରକୋ ।
କେନାପି କରଣୀୟେନ, ନଗରଂ ଆଗତୋ ଅହୁ ॥
ତସ୍ମିଂ ତତ୍ଥ ୱସନ୍ତମ୍ହି, ଆଦିପାଦୋ ମହିନ୍ଦକୋ ।
ମତୋ ଆସି ତତୋ ତସ୍ସ, ରଜ୍ଜଂ ହତ୍ଥଗତଂ ଅହୁ ॥
ସୋ ତଂ ହତ୍ଥଗତଂ କତ୍ୱା, ସଣ୍ଠପେତ୍ୱାନ ସାସନଂ ।
ପାଚିନ ଦେସପତିନୋ, ଅଗ୍ଗବୋଧିସ୍ସ ପେସୟି ॥
ସ ଆଗନ୍ତ୍ୱା ଅହୁ ରାଜା, ସିଲାମେଘୋତି ସଞ୍ଞିତୋ ।
ଓପରଜ୍ଜେ କୁମାରଞ୍ଚ, ଅଭିସିଞ୍ଚିତ୍ଥ ଭୂପତି ॥
ସୋ ରାଜା ନଂ ନିୟୋଜେତ୍ୱା, ଚିନ୍ତା ଭାରଂ ୱିମୁଞ୍ଚିୟ ।
ଭୋଗେ ଭୁଞ୍ଜଥ ତୁମ୍ହେତି, ସୟଂ ରଜ୍ଜଂ ୱିଚାରୟି ॥
ୟଥାୟୋଗଂ ଜନସ୍ସେସ-କାସି ନିଗ୍ଗହସଂଗହେ ।
ଦେସେ ଉବ୍ବିନୟଂ ସବ୍ବଂ, ମଗ୍ଗଂ ପାପେସି ଚକ୍ଖୁମା ॥
ଏୱଂ ତେସୁ ୱସନ୍ତେସୁ, ଓତାରଂ ପାପକମ୍ମିନୋ ।
ନ ଲଭନ୍ତା ୱିଚିନ୍ତେସୁଂ, ଭିନ୍ଦିତବ୍ବା ଇମେ ଇତି ॥
ରାଜାନମୁପସଙ୍କମ୍ମ, ଅୱୋଚୁଂ ପିସୁନଂ ରହୋ ।
ତୁୱଂ ରାଜାସି ନାମେନ, ରାଜା ଅଞ୍ଞୋ ସଭାୱହୋ ॥
ଉପରାଜା ଅୟଂ ରଜ୍ଜଂ, ଗଣ୍ହିସ୍ସତି ମହାଜନଂ ।
ସଙ୍ଗୟ୍ହ ନ ଚିରେନେୱ, ହୋତି ରାଜା ନ ସଂସୟୋ ॥
ତଂ ସୁତ୍ୱାନ ମହୀପାଲୋ, ପରିଭିଜ୍ଜି କୁମାରକେ ।
କୁମାରୋପି ୱିଧିତ୍ୱା ତଂ, ଚୋରୋ ହୁତ୍ୱାନ ରାଜିନ୍ଦୋ ॥
ପଲାୟିତ୍ୱା ସକଂ ଦେସଂ, ସଙ୍ଗଣ୍ହିତ୍ୱା ତହିଂ ଜନେ ।
ମହନ୍ତଂ ବଲମାଦାୟ, କାତୁଂ ସଙ୍ଗାମ ମାରଭି ॥
କଦଲ୍ୟାଦିନିୱାତମ୍ହି, ସଙ୍ଗାମୋ ଭିଂସନୋ ଅହୁ ।
ଗତୋ ତତ୍ଥ ପରାଜିତ୍ୱା, କୁମାରୋ ମଲୟଂ ୱସୋ ॥
ତତୋ ରାଜା କତଞ୍ଞୂ ସୋ, ଉପକାରଂ ସଭାତୁନୋ ।
ଚିନ୍ତେତ୍ୱା ରଜ୍ଜଦାନାଦିଂ, ପରିଦେୱିତ୍ଥ ପାକଟଂ ॥
କୁମାରୋପି ଚ ତଂ ସୁତ୍ୱା, ଅହୋସି ମୁଦୁଚିତ୍ତକୋ ।
ଏୱଂ ତେ ଅଞ୍ଞମଞ୍ଞସ୍ସ, ସିନିଦ୍ଧନ୍ତଂ ପକାସୟୁଂ ॥
ରାଜା ଗନ୍ତ୍ୱା ସୟଂୟେୱ, ମଲୟଂ ଏକକୋ ୱଂସୋ ।
କୁମାରଂ ତଂ ସମାଦାୟ, ଆଗମିତ୍ଥ ସକଂ ପୁରଂ ॥
ହୋତି ନିସ୍ସଂସୟଂ [ଏୱଂପି ଚିତ୍ତୋ] ଅତୀୱ ସୋ ।
ୱିୱାହଂ ତେନ କାରେସି, ଧୀତରଂ ସଙ୍ଘନାମିକଂ ॥
ତାୟ ସଦ୍ଧିଂ ୱସନ୍ତୋ ସୋ, ୱିସ୍ସତ୍ଥୋ ତେନ ରାଜିନା ।
ପହାରଂ ତାୟ ପାଦାସି, ଦୁଟ୍ଠୋ ଦୋସମ୍ହି କିସ୍ମିଂଚି ॥
ପିତରଂ ସା ଉପାଗମ୍ମ, କରୁଣଂ ରୋଦିତମ୍ପତି ।
ଅକାରଣେ ମଂ ମାରେତି, ଦିନ୍ନୋ ୱୋ ସାମିକୋ ଇତି ॥
ସୋପି ତଂ ସୁତମତ୍ତେୱ, ଦୁକ୍କତଂ ୱତ ମେ ଇତି ।
ପବ୍ବାଜେସି ଲହୁଂ ଗନ୍ତ୍ୱା, ଭିକ୍ଖୂନୀ ନ ମୁପସ୍ସୟଂ ॥
ଅଗ୍ଗବୋଧିସନାମୋଥ, ତସ୍ସା ମାତୁଲ ପୁତ୍ତକୋ ।
ସୁଚିରେନେୱ କାଲେନ, ତସ୍ସଂ ସା ରତ୍ତମାନସୋ ॥
କାଲୋ’ୟନ୍ତି ୱିଦିତ୍ୱାନ, ତମାଦାୟ ପଲାୟିତୁଂ ।
ଅଞ୍ଞତୋ ତଂ ଗହେତ୍ୱାନ, ଗତୋ ଏକୋୱ ରୋହଣଂ ॥
ଅଗ୍ଗବୋଧିଂ ନରିନ୍ଦୋ ସୋ, ଅଗ୍ଗବୋଧି ନମାଦିୟ ।
ଅଗ୍ଗବୋଧିଂ ନିହନ୍ତୁଂ ତଂ, ରୋହଣଂ ତମୁପାୱୀସି ॥
ଅଗ୍ଗବୋଧି ନିସେଧେତ୍ୱା, ଅଗ୍ଗବୋଧିଂ ସଭାତରଂ ।
ଅପରେ ପବ୍ବତେ ହନ୍ତୁ-ମଗ୍ଗବୋଧିଂ ସୟଂ ଗତୋ ॥
କସିଣଂ ରୋହଣଂ ହତ୍ଥ-ଗତଂ କତ୍ୱା ମହା ବଲୋ ।
ୟୁଜ୍ଝିତ୍ୱା ତେନ ତଂ ଗଣ୍ହି, ଭରିୟଂ ସଙ୍ଘମତ୍ତନୋ ॥
ତତୋ ପଟ୍ଠାୟ ସୁଖିତା, ସମଗ୍ଗା ତେ ତୟୋ ଜନା ।
ୱିସ୍ସଟ୍ଠା ଅଞ୍ଞମଞ୍ଞେସୁ, ୱିହରିଂସୁ ୟଥାରୁଚିଂ ॥
ୱାପାରନିଂ ଅକାରାମଂ, ତଥା ମାଣଗ୍ଗବୋଧିକଂ ।
ସଭତ୍ତୁଦ୍ଦେସଭୋଗଞ୍ଚ, ୱିହାରେ ଅତିୟୁତ୍ତରେ ॥
ହତ୍ଥି କୁଚ୍ଛିୱିହାରେ ଚ, ୱିହାରେ ପୁନ ପିଟ୍ଠିକେ ।
ମହାଦୀପରିୱେଣେ ଚ, ପାସାଦେ ୱାହଦୀପକେ ॥
ଥୂପାରାମମ୍ହି ଗେହସ୍ସ, ଦ୍ୱାରେ ଚ ପରିଜିଣ୍ଣକେ ।
କାସି ପାକତିକଂ ତତ୍ଥ, ଥମ୍ଭେ ଚ ପରିୱତ୍ତୟି ॥
ଏୱଂ କତ୍ୱାନ ପୁଞ୍ଞାନି, ପୁଞ୍ଞାନି ଚ ୟଥାବଲଂ ।
ଚତ୍ତାଲୀସତିମେ ୱସ୍ସେ, ୟଥାକମ୍ମ ମୁପାଗମି ॥
ଅଥୋପରାଜା ରାଜା’ସି, ଅଗ୍ଗବୋଧି ସିରୀଧରୋ ।
ତନୟୋ ସୋ ମହିନ୍ଦସ୍ସ, ଆଦିପାଦସ୍ସ ଧୀମତୋ ॥
ସାସନମ୍ପି ଚ ଲୋକଞ୍ଚ, ସଙ୍ଗଣିତ୍ଥ ୟଥାରହଂ ।
ଓପରଜ୍ଜେ’ଭିସିଞ୍ଚତ୍ଥ, ମହିନ୍ଦଂ ପୁତ୍ତମତ୍ତନୋ ॥
ମହାବୋଧିସ୍ସ କାରେସି, ଘରଂ ଜିଣ୍ଣଂ ନୱଂ ଥିରଂ ।
ଆରାମେ ଦ୍ୱେ ଚ କାରେସି, କଳନ୍ଦଂ ମଲ୍ଲୱାତକଂ ॥
ଧମ୍ମକମ୍ମେହି ସକ୍କଚ୍ଚଂ, ସୋଧେସି ଜିନସାସନଂ ।
ୱିନିଚ୍ଛନନ୍ତୋ ଧମ୍ମେନ, ଛିନ୍ଦି କୂଟଟ୍ଟକାରକେ ॥
ଭେସଜ୍ଜଞ୍ଚ ଗିଲାନାନଂ, ମଙ୍ଗଲଂ ଚାୱମଙ୍ଗଲଂ ।
ଲଙ୍କାଦୀପମ୍ହି ସକଲେ, ସୟମେୱ ୱିଚାରୟୀ ॥
ସଲାକଭତ୍ତଂ ଦାପେସି, ନିକାୟତ୍ତୟ ୱାସିନଂ ।
ଭୋଜନଂ ପଂସୁକୂଲୀନଂ, ଅତ୍ତୟୋଗ୍ଗଂ ମହାରହଂ ॥
ଏୱମାଦୀନି କତ୍ୱାନ, ପୁଞ୍ଞାନି ସସୟଂ ୱସୀ ।
ଚୁତୋ’ସି ଛହି ୱସ୍ସେହି, ପୁଲତ୍ଥିନଗରେ ୱସଂ ॥
ତତୋ ପୁବ୍ବେୱ ତସ୍ସାସି, ପୁତ୍ତୋ ସୋ ୟୁୱରାଜକୋ ।
ମତୋ କିର ତତୋ ରଜ୍ଜଂ, ଅପୁତ୍ତଂ ତଂ ତଦା ଅହୁ ॥
ପୁତ୍ତୋ ମହିନ୍ଦୋ ନାମା’ସି, ସିଲା ମେଘସ୍ସ ରାଜିନୋ ।
ରଜ୍ଜୟୋଗ୍ଗୋ ମହାପୁଞ୍ଞୋ, ଲୋକସଙ୍ଗଣ୍ହ ନକ୍ଖମୋ ॥
ତସ୍ସ ଜାତଦିନେୟେୱ, ରାଜା ନକ୍ଖତ୍ତପାଠକେ ।
ପୁଚ୍ଛିତ୍ୱା ରଜ୍ଜୟୋଗ୍ଗୋତି, ସୁତ୍ୱା ତେହି ୱିୟାକତଂ ॥
ଦତ୍ୱା ତେସଂ ଧନଂ ସାଧୁ, ପୱତ୍ତିଂ ତଂ ନିଗୂହୟି ।
ଅଥ ନଂ ସୋ ୱୟପ୍ପତ୍ତଂ, କତ୍ୱା ସେନାପତିଂସକଂ ॥
ରଜ୍ଜଂ ୱସ୍ସେୱ କତ୍ୱାନ, ସବ୍ବଂ ହତ୍ଥେ ସୟଂୱସୀ ।
ସୋ ଧମ୍ମେନ ୱିଚାରେସି, ରାଜ କିଚ୍ଚଂ ମହାମତି ॥
ମତେପି ତସ୍ମିଂ ତସ୍ମା ସୋ, ଅଗ୍ଗବୋଧାଭିଧାନିନୋ ।
ସେନାପଚ୍ଚଂ ନ ଗଣ୍ହିତ୍ଥ, ନୟଞ୍ଞୂ ତସ୍ସ ହତ୍ଥକୋ ॥
ତଦା କେନଚି ଗନ୍ତ୍ୱା ସୋ, କରଣୀୟେନ ରାଜିନୋ ।
ସମୁଦ୍ଦତୀରେ ୱସତି, ମହାତିତ୍ଥମ୍ହି ପଟ୍ଟନେ ॥
ସୁତ୍ୱା ସୋ ଚୂଳପିତୁନୋ, ମରଣଂ ୱେଗସା’ଗମା ।
ଚୋରା ରଜ୍ଜଂ ଗହେତ୍ୱାନ, ନାସେୟ୍ୟୁଂ ନଗରଂ ଇତି ॥
ତତୋ ଉତ୍ତରଦେସମ୍ହି, ମଣ୍ଡଲୀକା ସରଟ୍ଠିୟା ।
ଅଚ୍ଛିନ୍ଦିତ୍ୱାନ ତଂ ଦେସଂ, ଛିନ୍ନରାଜକରଂ କରୁଂ ॥
ସୋ ତଂ ସୁତ୍ୱା ମହାସେନୋ, ଗନ୍ତ୍ୱା ଉତ୍ତରଦେସକଂ ।
ସବ୍ବେ ନିମ୍ମଥୟିତ୍ୱାନ, ମଣ୍ଡଲୀ କେସରଟ୍ଠିୟେ ॥
ଗନ୍ତ୍ୱା ରଞ୍ଞୋ ମତଠାନଂ, ଦିସ୍ୱା ଦେୱିଂ ପରୋଦିୟ ।
ଅସ୍ସାସେତ୍ୱା ୟଥାକାଲଂ, ଇଦଂ ୱଚନମବ୍ରୱି ॥
ମାଚିନ୍ତେସି ମହାଦେୱୀ, ମତୋ ମେ ସାମିକୋ ଇତି ।
ରକ୍ଖିସ୍ସାମି ଅହଂ ଦୀପଂ, ତୁମ୍ହେ ରଜ୍ଜଂ କରିସ୍ସଥ ॥
ତୁଣ୍ହିଭୂତା’ଧିୱାସେତ୍ୱା, ପିୟସା ପାପବୁଦ୍ଧିକା ।
ରହୋ ୟୋଜୟୀ ତଂ ହନ୍ତୁଂ, ୱତ୍ଥୁକାମା ୟଥାରୁଚିଂ ॥
ସେନାପତି ତଂ ଞତ୍ୱାନ, ତସ୍ସା’ରକ୍ଖଂ ୱିଧାୟ ସୋ ।
ତଂ ପକ୍ଖିୟେହି ୟୁଜ୍ଝିତ୍ୱା, ପଲାପେସି ମହାଜନଂ ॥
ତତୋ ଦେୱିଂ ସବନ୍ଧେତ୍ୱା, ପକ୍ଖିପିତ୍ୱାନ ୟାନକେ ।
ଆଦାୟ ତଂ ପୁରଂ ଗନ୍ତ୍ୱା, ରଜ୍ଜଂ ଗଣ୍ହି ସସାଧନଂ ॥
ଅତ୍ଥି ଦପ୍ପୁଳ ନାମୋ’ପି,
ସିଲା ମେଘସ୍ସ ରାଜିନୋ ।
ଭାଗିନେୟ୍ୟୋ ମହାସେନୋ,
ଆଦିପାଦୋ ମହା ଧନୋ ॥
ସୋ ସେନଂ ସନ୍ନିପାତେତ୍ୱା, ୱସନ୍ତୋ କାଳୱାପିୟଂ ।
କାତୁଂ ସଙ୍ଗାମ ମାଗଞ୍ଛି, ସଙ୍ଗଗାମପ୍ପଦେସକଂ ॥
ସେନାପତି ପୱତ୍ତିଂ ତଂ, ସୁତ୍ୱା ସମ୍ପନ୍ନୱାହନୋ ।
ଦେୱିଞ୍ଚ ତଂ ସମାଦାୟ, ଅଗମା ତତ୍ଥ ସଜ୍ଜୁକଂ ॥
ତେସଂ ତତ୍ଥସି ସଙ୍ଗାମୋ, ଉଭିନ୍ନଂ ଲୋମହଂସନୋ ।
ଆଦିପାଦୋ ତଦାସେନଂ, ଓହୀୟନ୍ତଂ ସମେକ୍ଖିୟ ॥
ପଲାୟିତ୍ୱା ଆରୁହିତ୍ଥ, ଅଚ୍ଛସେଲଂ ସୱାହନୋ ।
ପଲାପେତ୍ୱାନ ତଂ ତତ୍ଥ, ସେନାପତି ସୁଖଂ ୱସି ॥
ସୁଞ୍ଞଂତି ନଗରଂ ସୁତ୍ୱା, ମଣ୍ଡଲୀକାପି ଉତ୍ତରେ ।
ଦେସେ ସବ୍ବେ ସମାଗମ୍ମ, ଅଗ୍ଗହେସୁଂ ପୁରଂ ତଦା ॥
ସୋ ହି ତେ ପଟିବାହେସି, ସୂରୋ ଧୀରପରକ୍କମୋ ।
ଅଥାଗମ୍ମ ପୁରଂ ରଜ୍ଜଂ, ୱିଚାରେସି ୟଥାନୟଂ ॥
ଭିକ୍ଖୁସଙ୍ଘସ୍ସ ଲୋକସ୍ସ, ମଚ୍ଛାନଂ ମିଗପକ୍ଖିନଂ ।
ଞାତୀନଂ ବଲକାୟସ୍ସ, କତ୍ତବ୍ବଂ ସବ୍ବମାଚରି ॥
ପଚ୍ଛା ଅନୁ ବଲପ୍ପତ୍ତୋ, ଦପ୍ପୁଲୋ ମଲୟଂ ଗତୋ ।
ଭାଗିନେୟ୍ୟୋ ଦୁୱେ ଚେୱ, ପକ୍କୋସିତ୍ୱାନ ରୋହଣା ॥
ରଟ୍ଠେ ଜନପଦେ ସବ୍ବେ, ଆଦାୟ ବହୁୱାହନୋ ।
ରତ୍ତିୟଂ ପୁରମାଗମ୍ମ, ସମୁଦ୍ଦୋ ୱିୟ ଓତ୍ଥରି ॥
ବଲକାୟୋ ପୁରଂ ରୁନ୍ଧି, ଉଗ୍ଘୋସେନ୍ତୋ ସମନ୍ତତୋ ।
ହେସିତେନ ତୁରଙ୍ଗାନଂ, କୋଞ୍ଚନାଦେ ନଦନ୍ତିନଂ ॥
ତାଳାୱଚର ସଦ୍ଦାନଂ, କାହଳାନଂ ରୱେନ ଚ ।
ଗଜ୍ଜିତେନ ଭଟାନଞ୍ଚ, ଆକାସଂ ନ ତଦା ଫଲି ॥
ତଦା ସେନାପତି ଦିସ୍ୱା, ମହାସେନଂ ପମୋଦିୟ ।
ଆରୋଚେସି ଅୱତ୍ତିଂ ତଂ, ବଲକାୟସ୍ସ ଅତ୍ତନୋ ॥
ରାଜପୁତ୍ତା ତୟୋ ଏତେ, ମହନ୍ତଂ ବଲମାଦିୟ ।
ନଗରଂ ନୋ’ପରୁନ୍ଧିଂସୁ, କିନ୍ତୁ କତ୍ତବ୍ବ ମେତ୍ଥ ୱୋ ॥
ଏୱଂ ୱୁତ୍ତା ତମାହଂସୁ, ସୂରା ତସ୍ସ ରଣତ୍ଥିନୋ ।
ଦେୱାସେୱା ଦିନେୟେୱ, ସେୱକାନଂ ନ ଜୀୱିତଂ ॥
ଏୱଂ ଭୂତେ ସଚେ କାଲେ, ଓହୀନା ଜୀୱିଭତ୍ଥିନୋ ।
ପୋସେସି ସାମି କିଂ କାଲ-ମେତ୍ତକଂ ନୋ ୟଥା ସୁଖଂ ॥
ୱୁତ୍ତେ ଏୱଂ ସଉସ୍ସାହୋ, ବଲଂ ସଜ୍ଜିୟ ରତ୍ତିୟଂ ।
ଉଗ୍ଗତେ ଅରୁଣେ ହତ୍ଥି-ମାରୁୟ୍ହ କତକମ୍ମକଂ ॥
ଦ୍ୱାରେନେ’କେନ ନିକ୍ଖମ୍ମ, ପତନ୍ତୋ ଅସନୀ ୱିୟ ।
ସଦ୍ଧିଂ ୟୋ ଧସହସ୍ସେହି, ସଙ୍ଗାମଂ କାସି ଦୁସ୍ସହଂ ॥
ବଲଂ ତଂ ଆଦିପାଦସ୍ସ, ନିପ୍ଫୋଟେତ୍ୱା ତତୋ ତତୋ ।
ସନ୍ନିପାତିୟ ଏକଜ୍ଝଂ, ନିୟତ୍ତିଂ ସମ୍ପୱେଦୟି ॥
ହତାୱସେସେ ଆଦାୟ, ଆଦିପାଦୋପି ଦପ୍ପୁଳୋ ।
ପୁବ୍ବଣ୍ହେୱ ପରାଜିତ୍ୱା, ପଲାୟିତ୍ୱା’ଗ ରୋହଣଂ ॥
ରାଜପୁତ୍ତେ ଦୁୱେ ଚେୱ, ରୋହଣମ୍ହା ତଦା ଗତେ ।
ଜୀୱଗ୍ଗାହଂ ସଗାହେତ୍ୱା, ତେ ଆଦାୟ ପୁରଂ ଗତୋ ॥
ଏୱଂ ପତ୍ତଜୟୋ ସୂରୋ, ଦୀପେ ଜାତେ ନିରାକୁଲେ ।
ପାଚିନଦେସଂ ସାଧେତୁଂ, ପେସୟିତ୍ଥ ସୱାହନେ ॥
ତେପି ଗନ୍ତ୍ୱାନ ଦେସଂ ତଂ, ଉତ୍ତରଂ ଦେସମେୱ ଚ ।
ସାଧୟିତ୍ୱା’ଚିରେନେୱ, ସଙ୍ଗହେସୁଂ ମହାବଲଂ ॥
ରାଜାପି ତଂ ମହାଦେୱିଂ, ଭରିୟଂ କାସି ଅତ୍ତନୋ ।
ପରିଚ୍ଚତ୍ତୁଞ୍ଚ ମାରେତୁଂ, ନ ସକ୍କାୟନ୍ତି ଚିନ୍ତିୟ ॥
ତେସଂ ସଂୱାସମନ୍ୱାୟ, ଗବ୍ଭୋ ଆସି ପତିଟ୍ଠିତୋ ।
ପୁତ୍ତଂ ୱିଜାୟି ସାଧଞ୍ଞ-ପୁଞ୍ଞଲକ୍ଖଣସଞ୍ଞୁତ୍ତଂ ॥
ରଞ୍ଞୋ ସା’ତିପିୟା ଆସି, ତତୋ ପଟ୍ଠାୟ ସୋପି ଖୋ ।
ପୁତ୍ତସ୍ସ ତସ୍ସ ପାଦାସି, ଓପରଜ୍ଜଂ ସଭୋଗିୟଂ ॥
ଠିତା ପାଚିନଦେସମ୍ହି, ଆଦିପାଦା ନିସମ୍ମତଂ ।
ୱିନା ସୋ’ୟନ୍ତି ଅମ୍ହାକଂ, ଉଭୋ ହୁତ୍ୱାନ ଏକତୋ ॥
ଦ୍ୱୀସୁ ପସ୍ସେସୁ ସେନଞ୍ଚ, ସମାଦାୟ ମହାଧନଂ ।
ସନ୍ଧିଂଭାତରମାହୂୟ, କତ୍ୱାରୋହଣ ଦେସତୋ ॥
ଗଙ୍ଗାତୀରମ୍ହି ୱାସଂ ତେ, କପ୍ପୟିଂସୁ ମହବ୍ବଲା ।
ରାଜା ସବ୍ବଂ ନିସମ୍ମେ’ତଂ, ମଣ୍ଡଲୀକେ ତହିଂ ତହିଂ ॥
ଆରାଧେତ୍ୱା ଗହେତ୍ୱାନ, ଦୁଟ୍ଠେ ମାରିୟ କେଚନ ।
ରକ୍ଖଂ ଦତ୍ୱାନ ନଗରେ, କତ୍ତବ୍ବଂ ସାଧୁୟୋଜିୟ ॥
ମହାସେନଙ୍ଗମାଦାୟ, ମହେସିଞ୍ଚ ତମାଦିୟ ।
ଖନ୍ଧାୱାରଂ ନିୱେସେତି, ମହୁମ୍ମାରମ୍ହି ଗାମକେ ॥
ତସ୍ସାଗମନମଞ୍ଞାୟ, ଆଦିପାଦାପି ତେ ତୟୋ ।
କୋୱିଳାରୱ୍ହୟେ ଗାମେ, ମହାୟୁଦ୍ଧଂ ପୱତ୍ତୟୁଂ ॥
ଅଥ ରାଜା ମହାସେନୋ, ସମୁଗ୍ଘାତେସି ତଂ ବଲଂ ।
ଦପ୍ପୁଳୋ ସୋ ପଲାୟିତ୍ଥ, ଆଦି ପାଦା ଦୁୱେ ହତା ॥
ତତ୍ଥାପି ଲଦ୍ଧୱିଜୟୋ, ପୁରମାଗମ୍ମଭୂମିପୋ ।
ରାଜକିଚ୍ଚଂ ୱିଚାରେସି, ମହାଦାନଂ ପୱତ୍ତୟି ॥
ମହାବୋଧି ଦୁମିନ୍ଦସ୍ସ, ମହାଚେତିତ୍ତୟସ୍ସ ଚ ।
ଧାତୂନମ୍ପି ଚ ସକ୍କଚ୍ଚଂ, ମହାପୂଜାମକାରୟୀ ॥
ରୋହଣଂ ସମୁପାଗମ୍ମ, ଦପ୍ପୁଳୋ ସୋ ତମାଗତୋ ।
ବଲଂ ସମ୍ପଟିପାଦେସି, ୟୁଜ୍ଝିତୁଂ ପୁନ ରାଜିନା ॥
ରାଜା ସୋ ପୁତ୍ତନତ୍ତାନଂ, ଦେସଂ କାତୁଂ ନିରାକୁଲଂ ।
ଥୂପାରାମମ୍ହି ସବ୍ବେପି, ସନ୍ନିପାତିୟ ଭିକ୍ଖୱୋ ॥
ଅଞ୍ଞେପି ଚ ମହାପଞ୍ଞେ, ୟୁତ୍ତା ୟୁତ୍ତିୱିସାରଦେ ।
ରାଜଧମ୍ମେସୁ ସବ୍ବେସୁ, ନିପୁଣୋ ନୟକୋୱିଦୋ ॥
ଆରୋଚେତ୍ୱା ପୱତ୍ତିଂ ତଂ, ତେହି ସମ୍ମା ପକାସିତୋ ।
ଚତୁରଙ୍ଗମହାସେନୋ, ସବ୍ବୂପକରଣାନୁଗୋ ॥
ଦୀପେ ସବ୍ବତ୍ଥ ୟୋଜେତ୍ୱା, କତ୍ତବ୍ବଂ ନଗରେପି ଚ ।
ନିକ୍ଖନ୍ତୋ ନ ଚିରେନେୱ, ଅଗମା ମାରପବ୍ବତଂ ॥
ସମ୍ମଦ୍ଦିତ୍ୱାନ ତଂ ଦେସଂ, ଖିପ୍ପଂ ପବ୍ବତମାରୁହୀ ।
ତଂ ଦିସ୍ୱା ରୋହଣେ ସବ୍ବେ, ଭୀତା ତଂ ୱସମାଗମୁଂ ॥
ତତୋ ସନ୍ଧିଂ କରିତ୍ୱାନ, ଦପ୍ପୁଳେନ ସଦପ୍ପକୋ ।
ହତ୍ଥୀ ଅସ୍ସେ ଚ ମଣୟୋ, ଗହେତ୍ୱା ତସ୍ସ ହତ୍ଥତୋ ॥
ଗାଳ୍ହଗଙ୍ଗଞ୍ଚ କତ୍ୱାନ, ସୀମଂ ରୋହଣଭୋଗିନଂ ।
ଓରଗଙ୍ଗଂ ସମାଦାୟ, ରାଜଭୋଗମକାରୟି ॥
ଦୀପମେୱଂ ମହାତେଜୋ, କତ୍ୱା ୱିଗତକଣ୍ଟକଂ ।
ଏକାତପତ୍ତୋ ଆଗମ୍ମ, ପୁରଂ ୱସି ୟଥାସୁଖଂ ॥
ପରିୱେଣଂ ସକାରେସି, ରାଜା ଦାମୱିହାରକଂ ।
ତଥା ସନ୍ନିରତିତ୍ଥଞ୍ଚ, ପୁଲତ୍ଥିନଗରେ ୱିଭୂ ॥
ମହାଲେଖଞ୍ଚ କାରେସି, ପରିୱେଣମଭୟା ଚଲେ ।
ତଥା ରତନପାସାଦଂ, ତଥେୱ ସୁମନୋହରଂ ॥
ଅନେକଭୂମଂ କାରେତ୍ୱା, ୱେଜୟନ୍ତମିୱାପରଂ ।
ତଥା ସତସହସ୍ସେହି, ତୀହି ଚେୱ ମହାଧନୋ ॥
ଜମ୍ବୋନଦତୁୱଣ୍ଣସ୍ସ, ସହସ୍ସେହି ଚ ସଟ୍ଠିହି ।
ବିମ୍ବଂ ସତ୍ଥୁସ୍ସ କାରେତ୍ୱା, ନଗ୍ଘଂ ଚୂଳାମଣିୟୁତଂ ॥
ପୂଜଂ ସବ୍ବୋପହାରେନ, କାରେତ୍ୱାନ ମହାରହଂ ।
ପାସାଦମହନେ ସବ୍ବଂ, ରଜ୍ଜଂ ଓସ୍ସଜ୍ଜି ଅତ୍ତନୋ ॥
ବୋଧିସତ୍ତଞ୍ଚ କାରେତ୍ୱା, ରାଜାନଂ ସୁମନୋହରଂ ।
ସଣ୍ଠପିତ୍ଥସିଲା ମେଘେ, ଚାରୁଂ ଭିକ୍ଖୂନୁପସ୍ସୟେ ॥
ଥୂପାରାମମ୍ହି ଥୁପସ୍ସ, କାସି ସୋୱଣ୍ଣକଞ୍ଚୁକଂ ।
ପଟ୍ଟଂ କତ୍ୱା ୱିଚିତତ୍ଥଂ, ରଜତଂ ଅନ୍ତରନ୍ତରା ॥
ତସ୍ମିଂୟେୱ ଚ ପାସାଦଂ, ପରିଜିଣ୍ଣଂ ସକାରୟି ।
ଅଭିଧମ୍ମଂ କଥାପେସି, କାରାପେତ୍ୱା ମହାମହଂ ॥
ମହାଥେରେନ ସତିମା, ହେମସାଲିନିୱାସିନା ।
ତତ୍ଥ ପୋକ୍ଖରଣିଞ୍ଚସ୍ସ, ପରିଭୋଗାୟ କାରୟି ॥
ଜିଣ୍ଣେ ଦେୱକୂଲେ କତ୍ୱା, ବହୁକେ ତତ୍ଥ ତତ୍ଥ ସୋ ।
ଦେୱାନଂ ପଟିମାୟୋ ଚ, କାରୟିତ୍ଥ ମହାରହା ॥
ବ୍ରାହ୍ମଣାନଞ୍ଚ ଦତ୍ୱାନ, ପଚ୍ଚଗ୍ଘଂ ରାଜଭୋଜନଂ ।
ପାୟେସି ଖୀରଂ ସୋୱଣ୍ଣ-ତଟ୍ଟକେହି ସସକ୍ଖରଂ ॥
ଉସଭେ ପଙ୍ଗୁଲାନଞ୍ଚ, ଜୀୱିକଞ୍ଚ ସଦାପୟୀ ।
ଦମିଳାନନ୍ତୁ ପାଦାସି, ଅସ୍ସେ ଗୋଣେ ଅଗଣ୍ହତଂ ॥
ଅନାଥା ୟେ ସଲଜ୍ଜା ଚ, ତେ ଚ ସଙ୍ଗଣ୍ହି ସୋ ରହୋ ।
ଅସଂଗହିତୋ ଦୀପମ୍ହି, ନତ୍ଥି ତେନ ୟଥାରହଂ ॥
ଦାତବ୍ବୋତି କଥଂ ଗୁନ୍ନ-ମହାରୋ ସୋ ୱିଚିନ୍ତିୟ ।
ସସ୍ସେ ଖୀରଗତେ’ଦାସି, ତେସଂ ଖେତ୍ତସହସ୍ସକେ ॥
କାଳୱାପିମ୍ହି ସୋ ୱାରି-ସମ୍ପାତଂ କାରୟି ଥିରଂ ।
ପୁଞ୍ଞମେୱଂ ୱିଧଂ ତସ୍ସ, ଅପ୍ପମେୟ୍ୟଂ ବହୁଂ କିର ॥
ତସ୍ସ ପୁତ୍ତୋ ତଦା ଆସି, ୟୁୱରାଜା ଦିୱଙ୍ଗତୋ ।
ଜାତୋ ସେନାପତି କାଲେ, ଅପରୋ ଅତ୍ଥି ଦାରକୋ ॥
ତଂ ରାଜା ରାଜପୁତ୍ତେହି, ଭୀତୋ ରାଜାରହୋ ଇତି ।
ମାରେତୁଂ ତଂ ନ ସକ୍କୋନ୍ତି, ୱଡ୍ଢପେସି ୟଥା ତଥା ॥
ଅରୀହି ନଗରେ ରୁଦ୍ଧେ, ପିତରଂ ସୋ କିରେକଦା ।
ଉପସଙ୍କମ୍ମ ୟାଚିତ୍ଥ, ସଙ୍ଗମାୱଚରଂ ଗଜଂ ॥
ସୋ ଦାପେସି ମହାନାଗଂ, ଘୋରଂ ମାରକରୂପମଂ ।
କତହତ୍ଥଂ ବଲଞ୍ଚେୱ, ସବ୍ବାୟୁଧ ୱିସାରଦଂ ॥
କାଲୋୟମୀତି ମନ୍ତ୍ୱା ସୋ, ବନ୍ଧିତ୍ୱା ଛୁରିକଂ ତଦା ।
କୁଞ୍ଜରଂ ୱରମାରୁୟ୍ହ, ନିକ୍ଖମ୍ମ ନଗରା ବହି ॥
ୱିଦ୍ଧଂସେତ୍ୱା ବଲଂ ସବ୍ବଂ, ଦୁଜ୍ଜୟଂ ଜୟମଗ୍ଗହୀ ।
ରାଜା ଦିସ୍ୱା ପସନ୍ନୋ ତଂ, ସେନାପଚ୍ଚଞ୍ଚ ତସ୍ସ’ଦା ॥
ଏସୋୱ କିର ଗନ୍ତ୍ୱାନ, ସବଲୋ ଦେସମୁତ୍ତରଂ ।
ପଲାପେସି ସସେନଂ ତଂ, ଆଦିପାଦଞ୍ଚ ଦପ୍ପୁଲଂ ॥
ବଦ୍ଧୱେରୋ ତତୋ’ହୋସି, ଦପ୍ପୁଳୋ ତମ୍ହି ସାଧୁକଂ ।
ମହାଉମ୍ମାରୟୁଦ୍ଧମ୍ହି, ଦିସ୍ୱା ତମତୀକୋଧୱା ॥
ସୀଘଂ ପେସେସି ତଂ ହନ୍ତୁଂ, ହତ୍ଥିମାରୁଳ୍ହମତ୍ତନା ।
ଓୱିଜ୍ଝିୟ ପଲାପେସି, ତମେସ ସକଦନ୍ତୀନା ॥
ଦିସ୍ୱା ତମତିସନ୍ତୁଟ୍ଠୋ, ଅଞ୍ଞେସଞ୍ଚ ଅଭାୱତୋ ।
ରଜ୍ଜୟୋଗେ ଅଦା ତସ୍ସ, ଉପରାଜତ୍ତମତ୍ତନୋ ॥
ଏୱଂ ୱୀସତି ୱସ୍ସାନି, ଦୀପମେତଂ ସୁଭୁଞ୍ଜିୟ ।
ୱିପାକଂ ପୁଞ୍ଞକମ୍ମସ୍ସ, ଭୁଞ୍ଜିତୁଞ୍ଚ ଦିୱଙ୍ଗତୋ ॥
ଏୱଂ ଅନେକେହି ନୟେହି ଥଦ୍ଧା ।
ଜନସ୍ସ ଦୁକ୍ଖେହି ୱିରୂପକେହି ।
ଭୋଗା ୱିନସ୍ସନ୍ତି ଖଣେ ନ ସବ୍ବେ ।
ଅହୋ ତହିଂୟେୱ ରମନ୍ତି ବାଲା ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଛ ରାଜକୋ ନାମ
ଛଚତ୍ତାଲୀସତିମୋ ପରିଚ୍ଛେଦୋ ।
ସତ୍ତଚତ୍ତାଲୀସତିମ ପରିଚ୍ଛେଦ
ପଞ୍ଚରାଜକୋ
ଅଚ୍ଚୟେ ପିତୁନୋ ରାଜା, ଉପରାଜା ଅହୋସି ସୋ ।
ସମତ୍ଥୋ ସକ୍କୁମିତ୍ତାନଂ, କାତୁଂ ନିଗ୍ଗହ ସଂଗହେ ॥
ସେନା ନାମସି ସପ୍ପଞ୍ଞା, ମହେସୀ ତସ୍ସ ରାଜିନୋ ।
ଖୁଦ୍ଦପୁତ୍ତା ପୀୟା’ତୀୱ, ରଞ୍ଞୋ କଲ୍ୟାଣଦସ୍ସନା ॥
ଅଦାସି ୟୁୱରାଜତ୍ତଂ, ଜେଟ୍ଠପୁତ୍ତସ୍ସ ଅତ୍ତନୋ ।
ଆଦିପାଦେ’ପରେକାସି, ରାଜିନୀପି ଚ ଧୀତରୋ ॥
ଦତ୍ୱା ଠାନନ୍ତରଂ ରାଜା, ତେସଂ ତେସଂ ୟଥାରହଂ ।
ଜନଂ ସଙ୍ଗହୱତ୍ଥୂହି, ସଙ୍ଗହେସି ଚତୂହିପି ॥
ଅଥ କେନାପି ସୋ ଗନ୍ତ୍ୱା, ହେତୁନା ମଣିହୀରକଂ ।
ୱସନ୍ତୋ କିର ଅସ୍ସୋସି, ପଚ୍ଚନ୍ତୋ କୁପିତୋ ଇତି ॥
ତତୋ ସେନାପତିଞ୍ଚେୱ, ଜେଟ୍ଠପୁତ୍ତଞ୍ଚ ଅତ୍ତନୋ ।
ଗନ୍ତ୍ୱା ସାଧେଥ ତଂ ଦେସ-ମୀତି ପେସେସି ସଜ୍ଜୁକଂ ॥
ତେସୁ ତତ୍ଥୋପୟାତେସୁ, ପିସୁନା ଭେଦଚିନ୍ତକା ।
ୱତ୍ୱା ୟଂକିଞ୍ଚି ଭିନ୍ଦିଂସୁ, ତେ ଉଭୋପି ନରାଧିପେ ॥
ତତୋ ଦ୍ୱେ ୱେରିନୋ ହୁତ୍ୱା, ଦେସଂ ଗଣ୍ହିତୁମାରଭୁଂ ।
ରାଜା ସୁତ୍ୱା ଖଣେନେୱ, ଦୁରତିସ୍ସ ମୁପାଗମି ॥
ତେ ଉଭୋ ତତ୍ଥ ଘାତେତ୍ୱା, ତେସଂ ସବ୍ବଂ ସମାଦିୟ ।
ହନ୍ତ୍ୱା ତଂ ପକ୍ଖିୟେ ସବ୍ବେ, ପୁଳତ୍ଥିନଗରଂ ଗମି ॥
ତଦା ରୋହଣଦେସମ୍ହି, ଭୋଗାଧିପତିନୋ ସୁତୋ ।
ଦାଠାସିୱାଦିପାଦସ୍ସ, ମହିନ୍ଦୋ ନାମ ଖତ୍ତିୟୋ ॥
ପିତୁନୋ ସୋ’ପରିଜ୍ଝିତ୍ୱା, ରଞ୍ଞୋ ସନ୍ତିକମାଗମା ।
ଦିସ୍ୱା ରାଜାପି ସନ୍ତୁଟ୍ଠୋ, ତଂ ସଙ୍ଗଣ୍ହି ୟଥାରହଂ ॥
ତେନ ମେତ୍ତିଂ ଥିରଂ କାତୁଂ, ଧୀତରଂ ଦେୱ ନାମିକଂ ।
ତସ୍ସ ଦତ୍ୱାନ ପାହେସି, ବଲଂ ରୋହଣମେୱସୋ ॥
ସୋ ଗନ୍ତ୍ୱା ରାଜସେନାୟ, ମଦ୍ଦାପେତ୍ୱାନ ରୋହଣଂ ।
ଜମ୍ବୁଦୀପଂ ପଲାପେତ୍ୱା, ପିତରଂ ରୋହଣଂ ଲଭି ॥
ମହାୱିହାରେ କାରେସି, ସଲାକଗ୍ଗଂ ଥିରଂ ସୁଭଂ ।
ଖୋଲକ୍ଖିୟମୁନିନ୍ଦସ୍ସ, ପରିହାରାୟ ଦାପୟି ॥
ମହାନାମୱ୍ହୟଂ ଗାମଂ, ପୂଜୟିତ୍ୱା ୟଥାବଲଂ ।
ୱଡ୍ଢମାନଦୁମିନ୍ଦସ୍ସ, ଜିଣ୍ଣଂ ଗେହଞ୍ଚ କାରିୟ ॥
ରୁକ୍ଖଣତ୍ଥାୟ ତସ୍ସା;ଦା, କୋଟ୍ଠାଗାମଂ ବହୁଦୟଂ ।
ନୀଲାରାମସ୍ସ ପାଦାସି, କାଳୁସ୍ସଂ ନାମ ଗାମକଂ ॥
ଲୋହରୂପସ୍ସ ପାଦାସି, ଆରାମସ୍ସ ଚ ଗାମକଂ ।
ଜିଣ୍ଣଞ୍ଚ ପଟିସଙ୍ଖାସି, ପଟିମାୟୋ ଚ କାରୟି ॥
ପାସାଦେ ଚେତିୟୋ ଚେୱ, ୱିହାରେ ଚ ଅନପ୍ପକେ ।
ପୁଳତ୍ଥିନଗରେ’କାସି, ୱେଜ୍ଜସାଲଂ ମହାଦୟୋ ॥
ତଥା ପଣ୍ଡା ୱିୟଞ୍ଚେୱ, ଭୋଗଗାମସମାୟୁତଂ ।
ପିଟ୍ଠସପ୍ପିନମନ୍ଧାନଂ, ସାଲାୟୋ ଚ ତହିଂ ତହିଂ ॥
ପୋତ୍ଥକେସୁ ଲିଖାପେତ୍ୱା, ଅଟ୍ଟେ ସମ୍ମା ୱିନିଚ୍ଛିତେ ।
ରାଜଗେହେ ଠପାପେସି, ଉକ୍କୋଟନଭୟେନ ସୋ ॥
ନାଗୱଡ୍ଢନନାମସ୍ସ, ଭୋଗଗାମେ ବହୂ ଅଦା ।
ଲେଖେ’ପୁବ୍ବେ ନ ୱାରେତ୍ୱା, ପାଲେତ୍ୱା ପୁବ୍ବସାସନଂ ॥
ପିତରା ଚ ମହାଦାନଂ, ପୁଞ୍ଞମଞ୍ଞମ୍ପି ୱା କତଂ ।
ସବ୍ବଂ ତମୱିନାସେତ୍ୱା, ନିଚ୍ଚଂ ସୋ ରକ୍ଖି ସାଦରୋ ॥
ମହେସୀ ଚ ମହାରଞ୍ଞୋ, ପୁଞ୍ଞାନି ବହୁକାରୟି ।
କଣ୍ଟକଂ ଚେତିୟଂ କାସି, ଦେୱୀ ଚେତିୟପବ୍ବତେ ॥
କାରେତ୍ୱା ଜୟସେନଞ୍ଚ, ପବ୍ବତଂ ଗାମିକସ୍ସଦା ।
ଭିକ୍ଖୁସଙ୍ଘସ୍ସ ସା ଗାମଂ, ମହୁମ୍ମାରଞ୍ଚ ତସ୍ସ ଦା ॥
ସିଲାମେଘୱ୍ହୟଂ କତ୍ୱା, ଭିକ୍ଖୁନୀନମୁପସ୍ସୟଂ ।
ସିଲାମେଘୱ୍ହୟେ ଦାସି, ଭିକ୍ଖୁନୀନଞ୍ଚ ପଚ୍ଚୟେ ॥
ଗାମାୟେ’ସୁଂ ପୁରାକୀତା, ୱିହାରୋ ତତ୍ଥ ସାଧନଂ ।
ଦତ୍ୱା ତେ ମେ ଚୟିତ୍ୱାନ, ୱିହାରସ୍ସେୱ ଦାପୟି ॥
ଛାଦୟିତ୍ୱା ମହାରୁକ୍ଖେ, ସବ୍ବେ ଚେତିୟପବ୍ବତେ ।
ନାନାରାଗେ ଧଜେ ଚେୱ, ପଟାକାୟୋ ଚ ପୂଜୟି ॥
ପୁବ୍ବାରାମକଭାଗମ୍ପି, ପାସାଦଂ ପଟିସଙ୍ଖରି ।
ଉସ୍ସାନୱିଟ୍ଠିଂ ଦୁବ୍ଭୋଗଂ, ସୁଭୋଗଂ ତସ୍ସ କାରୟି ॥
ୱିହାରଂ ଗିରିଭଣ୍ଡଞ୍ଚ, ନଟ୍ଠଂ ପାକତିକଂ କରି ।
ଭୋଗଗାମେ ଚ ଦାପେସି, ଭିକ୍ଖୂନଂ ତନ୍ନିୱାସିନଂ ॥
ଅମ୍ବୁୟ୍ୟାନମ୍ହି ଆୱାସଂ, କତ୍ୱା ଦପ୍ପୁଳପବ୍ବତଂ ।
ଭିକ୍ଖୂନଂ ତିସତସ୍ସା’ଦା, ସମ୍ପନ୍ନଚତୁପଚ୍ଚୟଂ ॥
କାରେତ୍ୱା ନୀଲଗଲ୍ଲଞ୍ଚ, ଆରାମଂ ସୋ ମନୋରମଂ ।
ଦକୱାରଂ ବହୁପ୍ପାଦଂ, ତସ୍ସ ଦାପେସି କାରିୟ ॥
ଅରିକାରି ୱିହାରେ ଚ, ପଟିସଙ୍ଖାସି ଜିଣ୍ଣକଂ ।
ସଲାକଗ୍ଗଞ୍ଚ ପାସାଦଂ, ଅପୁବ୍ବଂୟେୱ କାରୟି ॥
ୱାହଦୀପେ ସକାରେସି, ସେନଗ୍ଗବୋଧିପବ୍ବତଂ ।
ଧମ୍ମଂ ତୀସୁ ନିକାୟେସୁ, ୱାଚୟିତ୍ଥ ବହୁସ୍ସୁତେ ॥
ଗଣ୍ହାପେସି ଚ ଭିକ୍ଖୂନଂ, ଅୟୋପତ୍ତେସୁ ଗଣ୍ଠିକେ ।
ପୁଞ୍ଞନ୍ତି ୱୁତ୍ତଂ ସବ୍ବଂ ସୋ, ନ କିଞ୍ଚି ପରିୱଜ୍ଜୟି ॥
କୁଲୀନାନମନାଥାନଂ, ଇତ୍ଥୀନଂ’ଦା ପିଳନ୍ଧନଂ ।
ଭୋଜନଂ ଭୋଜନତ୍ଥୀନଂ, ବହୁ ସୋ ଦାସି ରତ୍ତିୟଂ ॥
ଗୁନ୍ନଂ ସସ୍ସାନି ପାଦାସି, କାକାଦୀନଞ୍ଚ ଭତ୍ତକଂ ।
ତଣ୍ଡୁଲଞ୍ଚ କୁମାରାନଂ, ମଧୁଫାଣିତସଂୟୁତ୍ତଂ ॥
ଏୱଂ ପୁଞ୍ଞାନି କତ୍ୱାନ, ନରିନ୍ଦୋ ସୋ ସପାରିସୋ ।
ଭୁତ୍ୱା ପଞ୍ଚସୁ ୱସ୍ସେସୁ, ମେଦିନିଂ ସମ୍ପରିଚ୍ଚଜି ॥
ତତୋ ତସ୍ସ ସୁତୋ ଆସି, ସୀହଳାନଂ ରଥେସତୋ ।
ସବ୍ବରୂପଗୁଣୋପେତୋ, ମହିନ୍ଦୋ ନାମ ଖତ୍ତିୟୋ ॥
ସୋ ଧମ୍ମିକସୀଲାମେଘୋ, ଇଚ୍ଚାସି ଧରଣୀତଲେ ।
ଧମ୍ମଦୀପୋ ଧମ୍ମଧଜୋ, ସୁଦ୍ଧଧମ୍ମପରାୟନୋ ॥
ପୁବ୍ବକେହି ନରିନ୍ଦେହି, କତଂ ଧମ୍ମପଥାନୁଗଂ ।
ସବ୍ବଂ କାସି ଅହାପେତ୍ୱା, ଅଧମ୍ମଂ ତୁ ୱିୱଜ୍ଜୟି ॥
ରାଜାରତନପାସାଦେ, କାତୁଂ ସୋ ନୱକମ୍ମକଂ ।
ସବ୍ବକାଲେସୁ ଦାପେସି, ଗେଟ୍ଠୁମ୍ବଦକୱାରକଂ ॥
ଜିଣ୍ଣଞ୍ଚ ପଟିସଙ୍ଖାସି, ପୁଞ୍ଞକମ୍ମମକାସି ଚ ।
ରଜ୍ଜଂ କତ୍ୱାନ ଚତୂସୁ, ୱସ୍ସେସୁ ନିଧନଂ ଗତୋ ॥
ଅଗ୍ଗବୋଧି ତତୋ ରାଜା, ଛତ୍ତଂ ଉସ୍ସାପୟି ପୁରେ ।
କାରେନ୍ତୋ ସବ୍ବସତ୍ତାନଂ, ହିତଂ ସୁଖମସେସତୋ ॥
ଧାତୁପୂଜଂ ସକାରେସି, ସତ୍ଥୁସବ୍ବଗୁଣାରହଂ ।
ପିତାମହକତସ୍ସା’ପି, ସମ୍ବୁଦ୍ଧସ୍ସ ମହାମହଂ ॥
ଉଦୟଗ୍ଗାଦିବୋଧିଞ୍ଚ, ପରିୱେଣଂ ସକାରୟି ।
ନାମଂ ଗହେତ୍ୱା ପିତୁନୋ, ଅତ୍ତନୋ ଚ ନରାଧିପୋ ॥
ସଭୋଗଂ ପରିୱେଣଞ୍ଚ, କତ୍ୱା ତଂ ଭୂତନାମକଂ ।
ସକାଚରିୟକସ୍ସା’ଦା, ଭିକ୍ଖୂନଂ ତିସତସ୍ସ ଚ ॥
ରାଜସାଲାୟ ଦାପେସି, ଚୂଳୱାପିୟଗାମକଂ ।
ଗାମଦ୍ୱୟଞ୍ଚ ଦାପେସି, କାଳୂଲମଲ୍ଲୱାତକେ ॥
ପୱେସଂ ୱିନିୱାରେସି, ଉପୋସଥଦିନେସୁ ସୋ ।
ମଚ୍ଛମଂସସୁରାଦୀନଂ, ଅନ୍ତୋନଗରମତ୍ତନୋ ॥
ଭିକ୍ଖୂ ୱା ଚେତିୟେ ୱା ସୋ, ୱନ୍ଦିତ୍ୱା ନିକ୍ଖମଂ ତତୋ ।
ୱାଲୁକା ହା ୱିନସ୍ସନ୍ତୁ, ଇତି ପାଦେସୁ ୱୋଧୟୀ ॥
ୟଂ ୟଂ ସୋୱଗ୍ଗିୟଂ କମ୍ମଂ, କମ୍ମଂ ନିସ୍ସରଣୱହଂ ।
ୱତ୍ଥୁତ୍ତୟେ ପସନ୍ନୋ ସୋ, କମ୍ମଂ ତଂ ସବ୍ବମାଚରି ॥
ମାତୁପଟ୍ଠାନନିରତୋ, ରତ୍ତିନ୍ଦିୱମହୋସିସୋ ।
ଗନ୍ତ୍ୱା ତସ୍ସା ଉପଟ୍ଠାନଂ, ପାତୋୱ କିର ଭୂପତି ॥
ସୀସଂ ତେଲେନ ମକ୍ଖେତ୍ୱା, ଉବ୍ବଟ୍ଟେତ୍ୱାନ ଜଲ୍ଲିକଂ ।
ନଖେ ୱିସୁଦ୍ଧେ କତ୍ୱାନ, ନହାପେତ୍ୱାନ ସାଦରଂ ॥
ଅଚ୍ଛାଦେତ୍ୱା ନୱଂ ୱତ୍ଥଂ, ସୁଖସମ୍ଫସ୍ସମତ୍ତନୋ ।
ୱତ୍ଥଂ ଛଡ୍ଡିତମାଦାୟ, ପେଲ୍ଲେତ୍ୱା ସୟମେୱ ତଂ ॥
ତସ୍ସ ତୋୟେନ ସିଞ୍ଚିତ୍ୱା, ସୀସଂ ସମକୁଟଂ ସକଂ ।
ଗନ୍ଧମାଲାହି ତଂ ସମ୍ମା, ଚେତିୟଂ ୱିହ ପୂଜିୟ ॥
ନମସ୍ସିତ୍ୱାନ ତିକ୍ଖତ୍ତୁଂ, କତ୍ୱା ତଂ ସୋ ପଦକ୍ଖିଣଂ ।
ଦାପେତ୍ୱା ପରିସାୟ’ସ୍ସା, ୱତ୍ଥାଦୀନି ୟଥାରୁଚିଂ ॥
ସହତ୍ଥେନେୱ ଭୋଜେତ୍ୱା, ଭୋଜନଂ ତଂ ମହାରହଂ ।
ଭୁତ୍ଥାୱସେସଂ ଭୁଞ୍ଜିତ୍ୱା, ସମାକିରିୟମତ୍ଥକେ ॥
ଭୋଜେତ୍ୱା ପରିସଂ ତସ୍ସା, ରାଜଭୋଜନମୁତ୍ତମଂ ।
ସଜ୍ଜେତ୍ୱା ୱାସଗେହଞ୍ଚ, ସୁଗନ୍ଧପରିୱାସିତଂ ॥
ସହତ୍ଥା ପଞ୍ଞପେତ୍ୱାନ, ସୟନଂ ତତ୍ଥ ସାଧୁକଂ ।
ପାଦେ ଧୋୱିୟ ମକ୍ଖେତ୍ୱା, ଗନ୍ଧତେଲେନ ସଣ୍ହକଂ ॥
ସମ୍ବାହେନ୍ତୋ ନିସୀଦିତ୍ୱା, କତ୍ୱା ନିଦ୍ଦମୁପେତକଂ ।
କତ୍ୱା ପଦକ୍ଖିଣଂ ମଞ୍ଚଂ, ତିକ୍ଖତ୍ତୁଂ ସାଧୁୱନ୍ଦିୟ ॥
ଆରକ୍ଖକେ ନିୟୋଜେତ୍ୱା, ଦାସେକମ୍ମକରେପି ଚ ।
ତସ୍ସା ପିଟ୍ଠିମକତ୍ୱାନ, ଅପକ୍କମେୱ ପିଟ୍ଠିତୋ ॥
ଠତ୍ୱା ଅଦସ୍ସନେ ଠାନେ, ତିକ୍ଖତ୍ତୁଂ ପୁନ ୱନ୍ଦିୟ ।
ସନ୍ତୁଟ୍ଠୋ ତେନ କମ୍ମେନ, ସରନ୍ତୋ ତଂ ପୁନପ୍ପୁନଂ ॥
ଗେହଂ ୟାତି ସଜୀୱନ୍ତଂ, ଏୱମେୱ ଉପଟ୍ଠହି ।
ଏକଦା ଦାସୱାଦେନ, ୱନ୍ଦିତ୍ୱା ଦାସମତ୍ତନୋ ॥
ତେନତ୍ତନୋ କଥାପେସି, ଖମାପେତୁଂ ସୟଂ ୱଚୋ ।
ଅତ୍ତାନଂ ଭିକ୍ଖୁସଙ୍ଘସ୍ସ, ଦାପୟିତ୍ୱାନ ମାତରା ॥
ଧନମତ୍ଥଗ୍ଘନଂ ଞତ୍ୱା, ଭୁଜିସ୍ସୋ ଆସି ବୁଦ୍ଧିମା ।
ଏୱଂ ପୁଞ୍ଞପରୋ ହୁତ୍ୱା, କତ୍ୱା ଦୀପସ୍ସ ସଙ୍ଗହଂ ॥
ଏକାଦସହି ୱସ୍ସେହି, ଦେୱଲୋକମୁପାଗମି ।
ତସ୍ସାନୁଜୋ ଦପ୍ପୁଳୋ’ଥ, ରାଜା ହୋସି ତଦଚ୍ଚୟେ ॥
ସବ୍ବଂ ପୁବ୍ବକରାଜୂନଂ, ଚରିୟଂ ସୋ ସମାଚରି ।
ତଦା ମହିନ୍ଦନାମସ୍ସ, ପୁତ୍ତାରୋହଣସାମିନୋ ॥
ପିତରା ନିହଟା’ଗଞ୍ଛୁଂ, ରାଜାନଂ ମାତୁଲଂ ସକଂ ।
ସୋ ତେ ଦିସ୍ୱା ପୱତ୍ତିଂ ତଂ, ସୁତ୍ୱା ଦତ୍ୱା ମହାବଲଂ ॥
ପାହେସି ପିତରା ୟୁଦ୍ଧଂ, କାତୁଂ ବନ୍ଧୁ ହିତେ ରତେ ।
ମହିନ୍ଦୋପି ତଥାଭାୱଂ, ୱିଦିତ୍ୱା ରୋହଣାଧିପୋ ॥
ୟୁଦ୍ଧଂ ପଟିପଦେୟେୱ, ତେସଂ’କାସି ମହାବଲୋ ।
ତେ ଉଭୋପି ପଲାୟିଂସୁ, ଦତ୍ୱା ସେନାୟ ନାୟକଂ ॥
ପୁନାଗନ୍ତ୍ୱା ମହୀପାଲଂ, ସେୱମାନା ଇଧା’ୱସୁଂ ।
ପିତାପି ତେନ ସନ୍ତୁଟ୍ଠୋ, ଅଞ୍ଞେନ ସକବନ୍ଧୁନା ॥
ୟୁଜ୍ଝନ୍ତୋ ମରଣଂ ଗଞ୍ଛି, ଞାତିସୋପି ମତୋ କିର ।
ତଦା’ଦା ଭାଗିନେୟ୍ୟସ୍ସ, ରାଜା କିତ୍ତଗ୍ଗବୋଧିନୋ ॥
ସବ୍ବରୂପଗୁଣୋପେତଂ, ଧିତରଂ ଦେୱ ନାମିକଂ ।
ସୋ ଦପ୍ପୁଳଂ ଠପେତ୍ୱାନ, ସେୱତ୍ଥଂ ତସ୍ସ ରାଜିନୋ ॥
ସୟଂ ସେନଙ୍ଗମାଦାୟ, ରୋହଣଂ ସମୁପାଗମି ।
ରୋହଣାଧିପତି ହୁତ୍ୱା, ସବ୍ବାକାରସମପ୍ପିତୋ ॥
ପୁତ୍ତଧୀତାହି ୱଡ୍ଢେନ୍ତୋ, ୱାସଂ ତତ୍ଥେୱ କପ୍ପୟି ।
ରାଜାକାସି ଦୁମିନ୍ଦସ୍ସ, ଘରଂ ଜିଣ୍ଣଂ ନୱଂ ଥିରଂ ॥
ସୋୱଣ୍ଣଖଚିତଂ କମ୍ମଂ, ମଙ୍ଗଲେନ ଚ ତସ୍ସ ସୋ ।
ଅତ୍ତନୋ ରାଜଭାୱସ୍ସ, ସତ୍ଥୁପାରମିତାୟ ଚ ॥
ସମ୍ମାନୁଚ୍ଛୱିକଂ କତ୍ୱା, ମହାପୂଜଂ ପୱତ୍ତୟି ।
ଜିଣ୍ଣଂ କାରେସି ପାସାଦଂ, ହତ୍ଥିକୁଚ୍ଛିୱିହାରକେ ॥
ୱାହଦୀପସ୍ସ ଆରାମଂ, ଲାୱରାୱଞ୍ଚ ପବ୍ବତଂ ।
ୱିହାରେ ଜେତନାମେ ଚ, କତ୍ୱା ସୋୱଣ୍ଣୟଂ ମୁନିଂ ॥
ୱଡ୍ଢେତ୍ୱା ବୋଧିଗେହମ୍ହି, ପୂଜଂକାସି ଅଚିନ୍ତିୟଂ ।
ଅନୁସଂୱଚ୍ଛରଂ ଦୀପେ, ୱତ୍ଥଦାନଂ ପୱତ୍ତୟି ॥
ମହାପାଳିଞ୍ଚ ୱଡ୍ଢେସି, ଭତ୍ତଗ୍ଗମୱଲୋକୟୀ ।
ତୁଲାଭାରଞ୍ଚ ଦାପେସି, ଜିଣ୍ଣଞ୍ଚ ପଟିସଙ୍ଖରି ॥
ଚାରିତ୍ତଂ ପୁବ୍ବରାଜୂନଂ, ପାଲେସି ମନୱଜ୍ଜିୟଂ ।
ତସ୍ସା’ସି ୱଜିରୋ ନାମ, ସେନାପତି ମହାପତି ॥
କଚ୍ଛୱାଲଂ ସକାରେସି, ଆରାମଂ ପଂସୁକୂଲିନଂ ।
ଥୂପାରାମମ୍ହି ଥୂପସ୍ସ, ଘରଂ ଛାଦେସି ସାଧୁକଂ ॥
ଇଟ୍ଠକାହି ସୁୱଣ୍ଣାହି, ହେମଦ୍ୱାରେ ଚ କାରୟି ।
ଏୱଂ ସୋଳସୱସ୍ସାନି, କତ୍ୱା ରଜ୍ଜଂ ନରାଧିପୋ ॥
ଅଗମା ସବ୍ବସତ୍ତାନଂ, ଗନ୍ତବ୍ବଂ ଦେସମେୱ ସୋ ।
ତସ୍ମିଂ ରାଜିନି ସମ୍ପତ୍ତେ, ଦେୱଲୋକଂ ତଦା ଅହୁ ॥
ଅଗ୍ଗବୋଧିସନାମୋ’ଥ, ଆଣାଭେରିଂ ଚରାପୟି ।
ପିତା ତସ୍ସ ସଭାତୁସ୍ସ, ପୁତ୍ତଂ ମହିନ୍ଦନାମକଂ ॥
ରଜ୍ଜତ୍ଥଂ ସକପୁତ୍ତାନଂ, ଆଦିପାଦଂ ନ କାରୟୀ ।
ଆଦରଂ ସୋ ସବନ୍ଧୂନଂ, କନିଟ୍ଠାନମ୍ପି କାତୱେ ॥
ଅସହନ୍ତୋ ପଲାୟିତ୍ଥ, ପରତୀରଂ ସମାକୁଲୋ ।
ତେ ସମାଗମନଂ ସୁତ୍ୱା, ପେସୟିତ୍ୱା ମହାବଲଂ ॥
କାରେତ୍ୱା ୟୁଦ୍ଧମେତେହି, ସୀସଂ ତେସଂ ସଗଣ୍ହୟି ।
ନିକାୟେସୁ ୱିଚାରେତ୍ୱା, କତ୍ତବ୍ବଂ ସବ୍ବମେୱ ସୋ ॥
ଦୀପେ’ପି ସକଲେ କାସି, ପାପାଚାରନିୱାରଣଂ ।
ଭିକ୍ଖୂ ଚୂଳୱିହାରେସୁ, ୟାଗୁଂ ଗଣ୍ହନ୍ତି ସବ୍ବଦା ॥
ମହାୱିହାରେ ତଂ ସୁତ୍ୱା, ରାଜା ନିବ୍ବିନ୍ନମାନସୋ ।
କଣ୍ଠପିଟ୍ଠିମହାଗାମଂ ତଥା ୟାବାଲଗାମକଂ ॥
ତେଲଗାମଂ ବହୁଦଞ୍ଚ, ଦକୱାରଂ ପଦାପିୟ ।
ୟାଗୁଂ ଗହେତୁଂ ୟୋଜେସି, ୱିହାରେସୁ’ପି ଭିକ୍ଖୱୋ ॥
ତତୋ ପଟ୍ଠାୟ ତଂ ୟାଗୁଂ, ସବ୍ବେ ଗଣ୍ହିଂସୁ ସାଦରା ।
ଦୀପେ ଭେରିଂଚ ରାପେତ୍ୱା, ସନ୍ନିପାତିୟ ୟାଚକେ ॥
ସୁୱଣ୍ଣଂ ସୋପଦାପେସି, ୟଥିଚ୍ଛଂ ଦିୱସତ୍ତୟଂ ।
ଏୱମାଦିଂ ସ କତ୍ୱାନ, ପୁଞ୍ଞୱଂ ୱସ୍ସେହି ତୀହି ଚ ॥
ୱତ୍ଥୁତ୍ତୟପସାଦସ୍ସ, ଫଲଂ ପସ୍ସିତୁମତ୍ତନୋ ।
ରାଜା ଦିବ୍ବେନ ୟାନେନ, ଗଚ୍ଛନ୍ତୋ ୱିୟ ସୋ ମରି ॥
ଏୱଂ ଅନିଚ୍ଚା ୱତ ସବ୍ବଦେହିନୋ ।
ସବ୍ବଞ୍ଞୂନୋପେୱ ମୁପେତି ମଚ୍ଚୁଂ ।
ପହାୟ ତସ୍ମା ଭୱରାଗଜାତଂ ।
ବୁଧୋ ସୁବୁଦ୍ଧିୱିଭୱେ ଭୱେୟ୍ୟ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପଞ୍ଚରାଜକୋ ନାମ
ସତ୍ତଚତ୍ତାଲୀସତିମୋ ପରିଚ୍ଛେଦୋ ।
ଅଟ୍ଠଚତ୍ତାଲୀସତିମ ପରିଚ୍ଛେଦ
ଏକରାଜକୋ
ତତୋ ତସ୍ସା’ନୁଜୋ ସେନୋ, ଛତ୍ତଂ ଉସ୍ସାପୟୀ ପୁରେ ।
ପିୟଂ’ୱ ପୁତ୍ତଂ ପସ୍ସନ୍ତୋ, ସତ୍ତେ ସବ୍ବେ ମହାଧନୋ ॥
ଚରିୟଂ ପୁବ୍ବରାଜୂନଂ, ସମାଚରି ୟଥାଭତଂ ।
ଅପୁବ୍ବମ୍ପି ଚ ୱତ୍ତେସି, ଚରିୟଂ ଧମ୍ମସଂହିତଂ ॥
ଭିକ୍ଖୂନଂ ଭିକ୍ଖୂନୀନଞ୍ଚ, ଞାତୀନଂ ଦୀପୱାସିନଂ ।
ମଚ୍ଛାନଂ ମିଗପକ୍ଖୀନଂ, କତ୍ତବ୍ବଂ ସ ସମାଚରି ॥
ମହିନ୍ଦଂ ପରତୀରଂ ସୋ, ଗତଂ ୟୋଜିୟମାରୟି ।
ଏୱଂ ସୋ ସୁୱିସୋଧେସି, ରଜ୍ଜପଚ୍ଚତ୍ଥିକେ’ଖିଲେ ॥
ମହାଦାନଂ ପୱତ୍ତେସି, ୟାଚକାନଂ ଧନେସିନଂ ।
ଭିକ୍ଖୂନଂ ବ୍ରାହ୍ମଣାନଞ୍ଚ, ମନୁଞ୍ଞଂ ରାଜଭୋଜନଂ ॥
ଅହେସୁଂ ଅନୁଜାତସ୍ସ, ମହିନ୍ଦୋ କସ୍ସପୋ ତଥା ।
ଉଦୟୋତି ତୟୋ ତେସୁ, ମହିନ୍ଦୋ ୟୁୱରାଜକୋ ॥
ହୁତ୍ୱା ତସ୍ସାନୁୱତ୍ତନ୍ତୋ, ସକ୍କଚ୍ଚଂ ତମୁପଟ୍ଠହି ।
ସଙ୍ଘାନାମାସି ରାଜସ୍ସ, ଭରିୟା ତସ୍ସ ରାଜିନୀ ॥
କୀଳନତ୍ଥଂ ସମୁଦ୍ଦସ୍ସ, ଗତେ ରାଜିନି ପଟ୍ଟନଂ ।
ଉଦୟୋ ଆଦିପାଦୋସୋ, ଓହୀନୋ ନଗରେ ତଦା ॥
ନାଲନାମଂ ଗହେତ୍ୱାନ, ଧୀତରଂ ମାଣିଲାନିୟା ।
ରକ୍ଖିତଂ ରାଜରକ୍ଖାୟ, ପୁଳତ୍ଥିନଗରଂ ଅଗା ॥
ରାଜା ତସ୍ମିଂ ଅକୁଜ୍ଝିତ୍ୱା, ସନ୍ଧିଂ କତ୍ୱା ଅକୁପ୍ପିୟଂ ।
ମହାଦୀପାଦଂ ପେସେତ୍ୱା, ତୋସତ୍ୱା ତଂ ଇଧାନୟି ॥
ଏୱଂ ସମଗ୍ଗା ତେ ଆସୁଂ, ତତୋ ପଟ୍ଠାୟ ଖତ୍ତିୟା ।
ରକ୍ଖନ୍ତା ସାସନଂ ଲୋକଂ, ୱସିଂସୁ ସୁସମାହିତା ॥
ତତୋ କେନଚି କାଲେନ, ପଣ୍ଡୁରାଜା ମହାବଲୋ ।
ଜମ୍ବୁଦୀପା ଇଧା’ଗମ୍ମ, ଦୀପ ଗଣ୍ହିତୁମାରଭି ॥
ରାଜା ସୁତ୍ୱା ମହାସେନଂ, ପେସୁୟିତ୍ଥ ତଦନ୍ତିକଂ ।
ଅମଚ୍ଚାନଂ ୱିୱାଦେନ, ଥଦ୍ଧୋତାରୋ ନାରାଧିପୋ ॥
ପଣ୍ଡୁରାଜା ୱିନାସେନ୍ତୋ, ସବ୍ବଂ ତଂ ଦେସମୁତ୍ତରଂ ।
ଖନ୍ଧାୱାରଂ ନିୱେସେସି, ମହାତାଲିତଗାମକେ ॥
ୱସନ୍ତା ଦମିଳା ଏତ୍ଥ, ବହୱୋ ୟେ ତହିଂ ତହିଂ ।
ସବ୍ବେ ତଂ ପକ୍ଖିୟାହେସୁଂ, ତତୋ ସୋ ବଲୱା ଅହୁ ॥
ତତ୍ଥ ଗନ୍ତା ମହାସେନା, ରଞ୍ଞୋ ୟୁଜ୍ଝିତୁମାରଭି ।
ହତ୍ଥିକ୍ଖନ୍ଧଗତୋ ପଣ୍ଡୁ-ରାଜାପି ସମୁପାୱିସି ॥
ଅହୁ ଦମିଳସେନାସା, ପସ୍ସନ୍ତି ସାମିନୋ ମୁଖଂ ।
ସମ୍ପତ୍ତବଲହୁସ୍ସାହା, ତଦତ୍ଥେ ଚତ୍ତଜୀୱିତା ॥
ଦୀପସେନା ତୁ ସାମିନ-ମଭାୱେନ ନିରୁସ୍ସୁକ୍କା ।
ୟୁଜ୍ଝନ୍ତି ପରିଭିନ୍ଦିତ୍ୱା, ପଲାୟିତ୍ଥ ତତୋ ତତୋ ॥
ଓତରିତ୍ଥମହାସେନା, ପଣ୍ଡୁରାଜାସ୍ସ ତଙ୍ଖଣେ ।
ମାରସେନାୱ ଗଚ୍ଛନ୍ତି, ୱିଚୁଣ୍ଣେନ୍ତି ମହାଜନଂ ॥
ରାଜା ସେନାୟ ଭିନ୍ନତ୍ତଂ, ସୁକ୍କା ସବ୍ବଂ ସମାଦିୟ ।
ହତ୍ଥସାରଂ ପୁରଂ ହିତ୍ୱା, ମଲୟାଭିମୁଖୋ ଗତୋ ॥
ତତୋ ହତ୍ଥିଂ ସମାରୁୟ୍ହ, ୟୁୱରାଜା ମହିନ୍ଦକୋ ।
ୟୁଜ୍ଝନ୍ତୋ ସକସେନାୟ, ପଲାତତ୍ତଂ ସମେକ୍ଖିୟ ॥
ଏକେନମେ ନ ସକ୍କା ୱେ, ସବ୍ବେ ଏତେହି ମାରିତୁଂ ।
ଏତେସଂ ନ ଚ ନୀଚାନଂ, ହତ୍ଥେସୁ ମରଣଂ ସୁଖଂ ॥
ତସ୍ମା ୱରଂ ମେ ମରଣଂ, ମୟା ଏୱେତି ଚିନ୍ତିୟ ।
ହତ୍ଥିକ୍ଖନ୍ଧଗତୋୟେୱ, ଛିନ୍ଦି ସୋ ସୀସମତ୍ତନୋ ॥
ତଂ ଦିସ୍ୱା ବହୱୋ ସୀସେ, ତତ୍ଥ ଛିନ୍ଦିଂସୁ ସେୱକା ।
ତଂ ଦିସ୍ୱା ଦମିଳୀ ସେନା, ହଟ୍ଠତୁଟ୍ଠା ପମୋଦିସା ॥
ଏତଂ ସବ୍ବଂ ସମେକ୍ଖିତ୍ୱା, ଆଦାପାଦୋ ସକସ୍ସପୋ ।
ତୁରଙ୍ଗୱରମାରୁୟ୍ହ, ସୁସନ୍ନଦ୍ଧୋ ମହାୟୁଧୋ ॥
ୱିହାରମୁପସଙ୍କମ୍ମ, ଅଭୟଂ ଏକକୋୱ ସୋ ।
ତାଦିସମ୍ପି ମହାସେନଂ, ଓଗାହେତ୍ୱା ୱିଦାରୟି ॥
ସୁପଣ୍ଣୋ ୱିୟ ଗଣ୍ହନ୍ତୋ, ଭୂଜଗେନ ସଲିଲାଲ ୟେ ।
ସୋ ତଂ ସବ୍ବଂ ନିୱତ୍ତେସି, ଅତ୍ତାନଞ୍ଚ ସୁଗୋପୟି ॥
ଅସ୍ସୋ ଏକୋୱ ଦିସ୍ସିତ୍ଥ, ତୁରଙ୍ଗାୱଲିସନ୍ନିଭୋ ।
ଅତ୍ତନୋ ସୋ ଜନଂ କଞ୍ଚି, ଅପସ୍ସନ୍ତୋ’ନୁଗାମିନଂ ॥
କିଂ ମେ ଏକେନ ୱେରିନଂ, ପୂରିତେନ ମନୋରଥଂ ।
କାଲନ୍ତରେହଂ ଜୀୱନ୍ତୋ, ପୂରେସ୍ସଂ ମେ ମନୋରଥଂ ॥
ତସ୍ମା ଗନ୍ତୁଂୱ ୟୁତ୍ତନ୍ତି, ନିମ୍ଫୋଟେତ୍ୱା ମହାବଲଂ ।
ନିବ୍ଭୟୋୱ ମହାୟୋଧୋ, କୋଣ୍ଡିୱାତମୁପାଗମି ॥
ପଣ୍ଡୁରାଜା ମହାସେନା, ଅଗ୍ଗହେସି ତତୋ ପୁରଂ ।
ସୀସଂ ତଂ ୟୁୱରାଜସ୍ସ, ପଣ୍ଡୁରାଜସ୍ସ ଦସ୍ସୟୁଂ ॥
ସୋ ତଂ ଦିସ୍ୱା ଚ ଝାପେତ୍ୱା, ରାଜୂନଂ ପଣ୍ଡୁଦେସିନଂ ।
ସବ୍ବମାଳାହନେ କିଚ୍ଚଂ, ତସ୍ସ କାତୁଂ ନିୟୋଜୟି ॥
ସବ୍ବଂ ସାରଂ ହରାପେସି, ଭଣ୍ଡାଗାରମ୍ହି ରାଜିନୋ ।
ଅଗ୍ଗଣ୍ହିତ୍ଥ ଗହେତବ୍ବଂ, ୱିହାରେ ନଗରେପି ଚ ॥
ପାସାଦେ ରତନେ ସବ୍ବେ, ସୋୱଣ୍ଣଂସତ୍ଥୁବିମ୍ବକଂ ।
ସିଲାମୟ ମୁନିନ୍ଦସ୍ସ, ଚକ୍ଖୁଭୂକ ମଣିଦ୍ୱୟଂ ॥
ତଥା ସୋୱଣ୍ଣପଟ୍ଟେ ଚ, ଥୂପାରାମମ୍ହି ଚେତିୟେ ।
ସୁୱଣ୍ଣ ପଟିମାୟୋ ଚ, ୱିହାରେସୁ ତହିଂ ତହିଂ ॥
ସବ୍ବଂ ଗହେତ୍ୱା ନିସ୍ସାରଂ, ଲଙ୍କାଦୀପ ମକାସି ସୋ ।
ଛଡ୍ଡୟିତ୍ଥ ପୁରଂ ରମ୍ମ, ୟକ୍ଖଭକ୍ଖିତ ରୂପକଂ ॥
ରାଜା’ପି ରକ୍ଖଂ ଦତ୍ୱାନ, ମହାମଗ୍ଗେ ତହିଂ ତହିଂ ।
ଗଙ୍ଗାଦ୍ୱୟ ମୁଖେ ୱାସଂ, କପ୍ପେସି ପରିସଙ୍କିତୋ ॥
ପଣ୍ଡୁରାଜା ତତୋ ସଦ୍ଧିଂ, କାତୁଂ ସୀହଳସାମିନା ।
ଅମଚ୍ଚେ ତତ୍ଥ ପେସେସି, ଦିସ୍ୱା ତେ ସୀହଲାଧିପୋ ॥
ସୁଣିତ୍ୱା ସାସନଂ ତେସଂ, ସବ୍ବଂ ତଂ ସମ୍ପଟିଚ୍ଛିୟ ।
ଦୂତାନଂ କାରୟିତ୍ୱାନ, ୟଥାକାମେନ ସଙ୍ଗହଂ ॥
ହତ୍ଥିଦ୍ୱୟଂ ସଦତ୍ୱାନ, ସବ୍ବମାଭରଣମ୍ପି ଚ ।
ତସ୍ସ ପେସେସି ଦୂତେସୋ, ଅତ୍ତନୋପି ହିତାୱହେ ॥
ପଣ୍ଡୁରାଜା ସିତଂ ସବ୍ବଂ, ଦିସ୍ୱା ସନ୍ତୁଟ୍ଠମାନସୋ ।
ନିୟ୍ୟାତେତ୍ୱାନ ଦୂତାନଂ, ତଦହେୱ ମହାପୁରଂ ॥
ନିକ୍ଖମିତ୍ୱା ପୁରା ଗନ୍ତ୍ୱା, ନ ଚିରେନେୱ ପଟ୍ଟନଂ ।
ତତ୍ଥ ଆରୁୟ୍ହ ନାୱଂ ସୋ, ସକ ଦେସ ମୁପାଗମି ॥
ତତୋ ଆଗମ୍ମ ନଗରଂ, ସୀଲାମେଘୋ ମହୀପତି ।
ୟଥାଠାନେ ଠପେତ୍ୱାନ, ଦୀପଂ ୱସି ସମାହିତୋ ॥
ଭାତରଂ ଦୁତିୟଂ କତ୍ୱା, ଉଦୟଂ ନାମ ଖତ୍ତିୟଂ ।
ମହାଦୀପାଦଂ ତସ୍ସା’ଦା, ସୋଗତ୍ଥଂ ଦକ୍ଖିଣଂ ଦିସଂ ॥
ସୋପି ଖୋ ନ ଚିରେନେୱ, କତ୍ୱା ପୁଞ୍ଞଂ ୟଥାରହଂ ।
ରୋଗେନେକେନ ସମ୍ଫୁଟ୍ଠୋ, ପୱିଟ୍ଠୋ ମଚ୍ଚୁନୋ ମୁଖଂ ॥
କସ୍ସପୋ ଆଦିପାଦୋପି, ପୁଲତ୍ଥିନଗରେ ୱସଂ ।
ୟୋଜେତ୍ୱା ପଣ୍ଡୁରାଜେନ, ଅହୋସି କିର ମାରିତୋ ॥
ତଦା କସ୍ସପନାମସ୍ସ, ପୁତ୍ତା ଆସୁଂ ମହାରହା ।
ଆଦିପାଦସ୍ସ ଚତ୍ତାରୋ, ଧଞ୍ଞଲକ୍ଖଣ ସଞ୍ଞୁତା ॥
ୟୋ ସେନଂ ସବ୍ବପଠମୋ, ସେନୋ ନାମ କୁମାରକୋ ।
ସୂରୋ ୱୀରୋ ମହୁସ୍ସାହୋ, ରାଜଭାରକ୍ଖମୋ ସମୋ ॥
ରାଜା ମହାଦୀପାଦତ୍ତଂ, ତସ୍ସ ଦତ୍ୱା ୟଥାୱିଧିଂ ।
ଭୋଗତ୍ଥଂ ଦକ୍ଖିଣଂ ଦେସଂ, ସୱାହନ ମୁପାଦିସି ॥
ରୋହଣାଧିପତିସ୍ସା’ସୁଂ, ପୁତ୍ତା କିତ୍ତଗ୍ଗବୋଧିତୋ ।
ଚତ୍ତାରୋ ଧୀତରୋ ତିସ୍ସୋ, ଦସ୍ସନେୟ୍ୟା ମନୋରମା ॥
ତଦା ଜେଟ୍ଠସୁତଂ ତସ୍ସ, ମହିନ୍ଦଂ ନାମ ଖତ୍ତିୟଂ ।
ପିତୁଚ୍ଛା ମାରୟିତ୍ୱାନ, ଦେସଂ ଗଣ୍ହି ସସାଧନଂ ॥
ଭାତରୋ ତେ ତୟୋ ତସ୍ମିଂ,
ସଂରୁଟ୍ଠା ଭାତୁ ଘାତନେ ।
ଆଦାୟ ଭଗୀନୀ ତିସ୍ସୋ,
ରଞ୍ଞୋ ସନ୍ତିକମାଗମୁଂ ॥
ରାଜାପି ଦିସ୍ୱା ତେତୀୱ, ମମାୟନ୍ତୋ ଦୟାଲୁକୋ ।
ସବ୍ବେ ଦେୱକୁମାରେୱ, ସୁଖଂ ୱଡ୍ଢେସି ପେମୱା ॥
ତତୋ କସ୍ସପନାମଂ ସୋ, ତେସଂ ଜେଟ୍ଠଂ ନରିସ୍ସରୋ ।
ଦେସଂ ତଂ ଗଣ୍ହ ୟାହୀତି, ଦତ୍ୱା ବଲମପେସୟି ॥
ସୋ’ପି ଗନ୍ତ୍ୱାନ ତଂ ହନ୍ତ୍ୱା, ରୋହଣଂ କସିଣମ୍ପି ତଂ ।
କତ୍ୱା ହତ୍ଥଗତଂ ତତ୍ଥ, ୱସିତ୍ଥ ନିରୁପଦ୍ଦୱୋ ॥
ଅଥ ସୋ ଭାତରୋ ଦ୍ୱେ’ପି, ସେନଞ୍ଚ ଉଦୟଂ ତଥା ।
ପକ୍କୋସିତ୍ୱାନ, ଭାଜେତ୍ୱା, ଦେସଂ ତେହି ସହାୱସି ॥
ରାଜା ତା ସାଧୁ ୱଡ୍ଢେତ୍ୱା, ୱୟପତ୍ତାସୁ ତୀସୁ ସୋ ।
ରାଜକଞ୍ଞାସୁ ଧଞ୍ଞାସୁ, ଦେୱଚ୍ଛରସୂ ରୂପିସୁ ॥
ଠପେତ୍ୱା ରାଜିନି ଠାନେ, ଉପରାଜସ୍ସ ଦାପୟି ।
ସଙ୍ଘନାମଂ ମହାଭୋଗଂ, ଦତ୍ୱା ରଜ୍ଜସରିକ୍ଖକଂ ॥
କଣିଟ୍ଠୋ ଉପରାଜସ୍ସ, ମହିନ୍ଦୋ ନାମ ଭାତୁକୋ ।
ଅତ୍ଥି ସବ୍ବଗୁଣୋପେତୋ, ସବ୍ବସତ୍ଥୱିସାରଦୋ ॥
ତସ୍ସା’ଦାସି ଦୁୱେ ରାଜା, ରାଜକଞ୍ଞା ମନୋହରା ।
ତିସ୍ସୱ୍ହକିତ୍ତ ନାମଞ୍ଚ, ଦତ୍ୱା ଭୋଗଂ ୟଥାରୁଚିଂ ॥
ଏୱଂ କରୋନ୍ତୋ ଞାତୀନଂ, ସଂଗହଂ ସୋ ୟଥାରହଂ ।
ଆରାଧେନ୍ତୋ ଚ ଦାନାଦି-ସଙ୍ଗହେହି ମହାଜନଂ ॥
ରାଜା ଦସୟି ରାଜୂନଂ, ଧମ୍ମେହି ସମୁପାଗତୋ ।
ସମାଚରନ୍ତୋ ପୁଞ୍ଞାନି, ପରିଭୁଞ୍ଜିତ୍ଥ ମେଦିନିଂ ॥
ପଂସୁକୂଲିକ ଭିକ୍ଖୂନଂ, କତ୍ୱା’ରିଟ୍ଠମ୍ହି ପବ୍ବତେ ।
ମହାଭୋଗଂ ଅଦାରାମଂ, ନିମ୍ମିତଂ ୱିୟ ଇଦ୍ଧିୟା ॥
ପରିହାରଞ୍ଚ ତସ୍ସଦା, ରାଜାରହମସେସତୋ ।
ଆରାମିକେ ଚ ବହୱୋ, ଦାସେ କମ୍ମକରେପି ଚ ॥
ପାସାଦଂ ସୋୱ କାରେସି, ୱିହାରେ ଜେତନାମକେ ।
ଅନେକଭୂମିଂ ଭୂମିନ୍ଦୋ, ବୁଦ୍ଧଭୂମିଗତାସୟୋ ॥
ୱଡ୍ଢେତ୍ୱା ତତ୍ଥ କାରେତ୍ୱା, ସବ୍ବ ସୋୱଣ୍ଣୟଂ ଜିନଂ ।
ସଣ୍ଠପେତ୍ୱା ମହାଭୋଗଂ, ୱସାପେସି ଚ ଭିକ୍ଖୱୋ ॥
ମହାଦି ପରିୱେଣମ୍ହି, କାରେସି ସୁମନୋହରଂ ।
ପାସାଦ ମଗ୍ଗିସନ୍ଦଂଡ୍ଢଂ, ତସ୍ମିଂୟେୱ ୱିହାରକେ ॥
କତ୍ୱା ୱୀରଙ୍କୁରାରାମଂ, ୱିହାରେ ଅଭୟୁତ୍ତରେ ।
ମହାସଙ୍ଘିକ ଭିକ୍ଖୂନଂ, ଥେରିୟାନଞ୍ଚ ଦାପୟି ॥
ପୁବ୍ବାରାମଞ୍ଚ କାରେସି, ସମ୍ପନ୍ନ ଚତୁପଚ୍ଚୟଂ ।
ସଦ୍ଧିଂ ସୋ ସଙ୍ଘନାମାୟ, ଦେୱିୟାପି ଚ ଅତ୍ତନୋ ॥
ମହାୱିହାରେତାୟେୱ, ସଦ୍ଧିଂ କାରେସି ଭୂମିପୋ ।
ଆୱାସଂ ସଙ୍ଘସେନୱ୍ହଂ, ମହାଭୋଗଂ ମହାମତି ॥
କାରେତ୍ୱା ସବ୍ବସୋୱଣ୍ଣଂ, କେସଧାତୁ କରଣ୍ଡକଂ ।
ମହାପୂଜଂ ପୱତ୍ତେସି, ରଜ୍ଜଂ ୱିସ୍ସଜ୍ଜି ଉତ୍ତମୋ ॥
ଚେତିୟସ୍ସ ଗୀରିସ୍ସାଦା, କାଣୱାପିଂ ବହୁଦୟଂ ।
ଭିକ୍ଖୂନଂ ଦିପୱାସୀନଂ, ଦାପେସି ଚ ତିଚୀୱରଂ ॥
ପୁଲତ୍ଥି ନଗରେ କାସି, ୱାପିୟୋ ଥୁସୱାପିୟା ।
ସେନଗ୍ଗବୋଧିମାୱାସଂ, ଗାମାରାମିକ ସଞ୍ଞୁତଂ ॥
ତସ୍ମିଂୟେୱ ଚ କାରେସି, ମହାପାଳିଂ ସୁଭୋଜନଂ ।
ମହାପାଳିଞ୍ଚ ସବ୍ବେସଂ, ମହାନେତ୍ତମ୍ପି ପବ୍ବତେ ॥
ୱେଜ୍ଜସାଲମ୍ପି କାରେସି, ନଗରସ୍ସ ଚ ପଚ୍ଛିମେ ।
ଅନାଥାନଂ ପୱତ୍ତେସି, ୟାଗୁଦାନଂ ସଖଜ୍ଜକଂ ॥
ପଂସୁକୂଲିକ ଭିକ୍ଖୂନଂ, ପଚ୍ଚେକଞ୍ଚ ମହାନସଂ ।
କତ୍ୱା ଦାପେସି ସକ୍କଚ୍ଚଂ, ନିଚ୍ଚଂ ଭୋଜନମୁତ୍ତମୋ ॥
ହୁତ୍ୱା ମହାଦିପାଦୋ’ୟଂ, କପ୍ପୂର ପରିୱେଣକେ ।
ଉତ୍ତରାଳ୍ହେ ଚ କାରେସି, ପରିଚ୍ଛେଦେ ସନାମକେ ॥
ତୁଲାଭାରଞ୍ଚ ପାଦାସୀ, ତିକ୍ଖତ୍ତୁଂ ସୋ ମହାଧନେ ।
ପୁଞ୍ଞମଞ୍ଞମ୍ପି ସୋ’କାସି, ରାଜା ନାନପ୍ପକାରକଂ ॥
ସଙ୍ଘନାମାପି ସା ଦେୱୀ, ଉତ୍ତରମ୍ହି ୱିହାରକେ ।
କତ୍ୱା ମହିନ୍ଦସେନୱ୍ହା-ୱାସଂ ୱାସେସି ଭିକ୍ଖୱୋ ॥
ଆରଦ୍ଧୋ ଦପ୍ପୁଲୱ୍ହସ୍ସ, କାଲେ ରାଜସ୍ସ ଧୀମଭୋ ।
ମହାଦେୱେନ ସୋ ଆସି, ରମ୍ମୋ ଦପ୍ପୁଲ ପବ୍ବତୋ ॥
ଦାରୁକସ୍ସପନାମେନ, ତଥା କସ୍ସପରାଜିକଂ ।
ଉଭୋପି ତେ ୱିପ୍ପକତେ, ରାଜା ସୋ ୱସମାପୟି ॥
ଭଦ୍ଦୋ ସେନାପତି ତସ୍ସ, ଭଦ୍ଦସେନାପତି’ୱ୍ହୟଂ ।
ପରିୱେଣମ୍ପି କାରେସି, ଦାସଭୋଗସମାୟୁତଂ ॥
ଉତ୍ତରୋ ଚ ଅମଚ୍ଚୋ’କା, ୱିହାରେ ଅଭୟୁତ୍ତରେ ।
ୱାସମୁତ୍ତରସେନୱ୍ହଂ, ରମ୍ମ ମୁତ୍ତରପଚ୍ଚୟଂ ॥
ୱଜିରୋ ନାମ ତତ୍ଥେୱା-ୱାସଂ ୱଜିରସେନକଂ ।
କାସି ରକ୍ଖସନାମୋଚା-ୱାସଂ ରକ୍ଖସନାମକଂ ॥
ତତୋ ୱୀସତି ୱସ୍ସେସୁ, ପୁଲତ୍ଥି ନଗରେ ୱସଂ ।
ପଣ୍ଡୁରାଜକତଂ କାରଂ, ସରନ୍ତୋ ସରଦସ୍ସନୋ ॥
ଦଦନ୍ତୋ ୱିୟ ସେନସ୍ସ, ସୂରସ୍ସାୱସରଞ୍ଚସୋ ।
ପହାୟ ଦୀପଂ ଦୀପୋ’ୱ, ମହାୱାତ ହତୋ ଗତୋ ॥
ପଗେୱ ତେ ବନ୍ଧୁଜନା ସହାୟା ।
ନରାଧୀପଂ ପସ୍ସଥ ଏକମେୱ ।
ସମାଗତଂ ମଚ୍ଚୁମୁଖଂ ସୁଘୋରଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଏକ ରାଜକୋ ନାମ
ଅଟ୍ଠଚତ୍ତାଲୀସତିମୋ ପରିଚ୍ଛେଦୋ ।
ଏକୂନପଞ୍ଞାସତିମ ପରିଚ୍ଛେଦ
ରାଜଦ୍ୱୟଦୀପନୋ
ଏୱଂ ତସ୍ମିଂ ମତେ ତସ୍ସ, କାତବ୍ବଂ ସାଧୁକାରିୟ ।
ମହାଦୀପାଦୋ ସେନୱ୍ହୋ, ଆଦାୟ ବଲୱାହନଂ ॥
ଆଗମ୍ମ ନଗରଂ ରାଜା, ଅହୋସି ଧରଣୀ ତଲେ ।
ଆଦିକପ୍ପମ୍ହି ରାଜୂନଂ, ଦସ୍ସନ୍ତୋ ଚରିୟଂ ପିୟ ॥
ସଦ୍ଧୋ ମହାଧନୋ ସୂରୋ, ମୁତ୍ତଚାଗୀ ନିରାଲୟୋ ।
ୟାଚୟୋଗୋ ମହାଭୋଗୋ, ସମ୍ପନ୍ନବଲୱାହନୋ ॥
କିତ୍ତିୟା’ମଲଭୂତାୟ, ତଥା ତେଜୋ ଗୁଣେନ ଚ ।
ସନ୍ନିପାତଂୱ ସୋ ଚନ୍ଦ-ସୂରିୟାନଂ ନିଦସ୍ସୟି ॥
ଅସଙ୍କିଣ୍ଣ ଗୁଣାକିଣ୍ଣୋ, ସୁୱିଚିଣ୍ଣ ଗୁଣାଗୁଣୋ ।
ନିତ୍ଥିଣ୍ଣପାପୋ ନିବ୍ବିଣ୍ଣ-ସଂସାରୋ ସାରଦସ୍ସନୋ ॥
ଭରିୟା ତସ୍ସ ୟା ଆସି, ସଙ୍ଘାତଂ ସୋ ଭିସେଚୟି ।
ମହେସୀଭାୱେ ଦତ୍ୱାନ, ପରିହାରଂ ୟଥାଭତଂ ॥
ମହିନ୍ଦଂ ନାମ ସପ୍ପଞ୍ଞଂ, କଣିଟ୍ଠଂ ଭାତରଂ ସକଂ ।
ଦତ୍ୱା ଦକ୍ଖିଣଭାଗଂ ସୋ, ଓପରଜ୍ଜେ’ଭିସେଚୟି ॥
ଅନ୍ତେପୁରେ’ପରଜ୍ଝିତ୍ୱା, ସୋ ରଞ୍ଞା ଅୱଧାରିତେ ।
ସପୁତ୍ତଦାରୋ ୱୁଟ୍ଠାୟ, ଅଞ୍ଞାତୋ ମଲୟଂ ଅଗା ॥
ଉପ୍ପଜ୍ଜିତ୍ଥ ତଦା ପୁତ୍ତୋ, ରଞ୍ଞୋ ସଙ୍ଘାୟ ଦେୱିୟା ।
ଦସ୍ସେନ୍ତୋ’ୱ ପନାଦସ୍ସ, କୁମାର ରୂପମତ୍ତନୋ ॥
ରାଜା ତଂ ଜାତମତ୍ତଂ’ୱ, ଦିସ୍ୱା ସନ୍ଥୁଟ୍ଠମାନୁସୋ ।
ସିଦ୍ଧତ୍ଥଂ ଲୁମ୍ବିନୀଜାତଂ, ରାଜା ସୁଦ୍ଧୋଦନୋ ୱିୟ ॥
ଧଞ୍ଞପୁଞ୍ଞଗୁଣୂପେତୋ, ଠପେତ୍ୱା ଦୀପମେକକଂ ।
ଜମ୍ବୁଦୀପେ’ପି କସିଣେ, ରଜ୍ଜୟୋଗ୍ଗୋତି ମେ ସୁତୋ ॥
ନାମଦାନ ଦିନେୟେୱ, ପରିହାରେନ ସବ୍ବସୋ ।
ଓପରଜ୍ଜେ ଭିସିଞ୍ଚିତ୍ୱା, ଦକ୍ଖିଣଂ ଦେସମସ୍ସ’ଦା ॥
ୟୁୱରାଜାପି ମଲୟେ, ୱସନ୍ତୋ’ୱ ମହୀପତିଂ ।
ଆରାଧେତ୍ୱା ଉପାୟେନ, ଅନୁଞ୍ଞତୋ ସଭାତରା ॥
ନିକାୟତ୍ତୟ ୱା ସୀହି, ସଦ୍ଧିଂ ଭିକ୍ଖୂହି ଆଗତୋ ।
ଦିସ୍ୱା ରାଜାନମେତ୍ଥେୱ, ସନ୍ଧୀଂ’କାସି ଅକୁପ୍ପିୟଂ ॥
ୟା ତସ୍ସ ୟୁୱରାଜସ୍ସ, ଭରିୟା ତିସ୍ସା ନାମିକା ।
ରାଜିନୀ ସା ୱିଜାୟିତ୍ଥ, ଧୀତରଂ ସଙ୍ଘନାମିକଂ ॥
କିତ୍ତିନାମା’ପରାୟା ଚ, ଭରିୟା ସାପି ଖୋ ପନ ।
ୱିଜାୟି ପୁତ୍ତେ ଚତ୍ତାରୋ, ତଥା ଏକଞ୍ଚ ଧୀତରଂ ॥
ତଦା ରାଜାପି ଚିନ୍ତେତ୍ୱା, ଏୱଂ ସତି କଣିଟ୍ଠକୋ ।
ନିସ୍ସଙ୍କୋ ମୟି ହୋତୀତି, ସମ୍ମା ମନ୍ତୀହି ମନ୍ତିୟ ॥
ଧୀତରଂ ୟୁୱରାଜସ୍ସ, ସୁରୂପିଂ ରୂପନାମିକଂ ।
କସ୍ସପସ୍ସ’ତ୍ତ ପୁତ୍ତସ୍ସ, ୱିୱାହଂ କାରୟି ବୁଧୋ ॥
ଦକ୍ଖିଣଂ ଦେସମସ୍ସେୱ, କଣିଟ୍ଠସ୍ସ ସଦାପୟି ।
ରାଜପୁତ୍ତସ୍ସ ପାଦାପି, ପଚ୍ଚେକଂ ଭୋଗମତ୍ତନୋ ॥
ରଜ୍ଜମ୍ହି ସବ୍ବଂ ତସ୍ସେୱ, ପରିଭୋଗାୟ ଦାପୟି ।
କେୱଲନ୍ତୁ ୱିଚାରେସି, ଦୀପଂ ଦୀପ ହିତାୱହୋ ॥
ତେସଂ ସଂୱାସମନ୍ୱାୟ, ଉଭିନ୍ନଂ ପୁଞ୍ଞକମ୍ମିନଂ ।
ଧଞ୍ଞପୁଞ୍ଞଗୁଣୂପେତା, ୱିଜାତା ପୁତ୍ତଧୀତରୋ ॥
କତ୍ୱା ସବ୍ବୋପହାରେନ, ଦାଠାଧାତୁ ମହାମହଂ ।
ଆରୁୟ୍ହ ୱରପାସାଦଂ, ରତନୱ୍ହଂ ମହୀପତି ॥
ତଦା ସୋୱଣ୍ଣୟସ୍ସାପି, ସମ୍ବୁଦ୍ଧସ୍ସ ପୁରା ଠିତଂ ।
ସୁଞ୍ଞଂ ପିଟ୍ଠଂ ସୟଂ ଦିସ୍ୱା, କସ୍ମା ଏୱନ୍ତି ସଂୱଦି ॥
ତତୋ ଅମଚ୍ଚା ଆହଂସୁ, ନାଜାନାସି ମହୀପତି ।
ମହାପିତୁନରିନ୍ଦସ୍ସ, କାଲେ ତୱ ନରିସ୍ସରଂ ॥
ପଣ୍ଡୁରାଜା ଇଧାଗମ୍ମ, ଦୀପମେତଂ ୱିନାସିୟ ।
ସବ୍ବଂ ସାରଗତଂ ଦୀପେ, ସମାଦାୟ ଗତୋ ଇତି ॥
ତଂ ସୁତ୍ୱା ଲଜ୍ଜିତୋ ରାଜା, ସୟଂ ୱିୟ ପରାଜିତୋ ।
ତଦହେୱ ନିୟୋଜେସି, ଅମଚ୍ଚେ ବଲସଙ୍ଗହେ ॥
ତଦା’ୱ କିର ଆଗଞ୍ଛି, ପଣ୍ଡୁରାଜକୁମାରକୋ ।
ପରିଭୂତୋ ସରାଜେନ, ରଜ୍ଜତ୍ଥଂ କତ ନିଚ୍ଛୟୋ ॥
ରାଜା ଦିସ୍ୱା’ତି ସନ୍ତୁଟ୍ଠୋ, କତ୍ତବ୍ବଂ ତସ୍ସ କାରିୟ ।
ମହାତିତ୍ଥ ମୁପାଗମ୍ମ, ପଟ୍ଟନଂ ସେମତ୍ରସୋ ॥
ମହନ୍ତଂ ବଲକାୟଞ୍ଚ, ତସ୍ସୋପକରଣାନି ଚ ।
ଅନୁନଂ ପଟିୟାଦେତ୍ୱା, ଦେୱସେନଂୱ ସଜ୍ଜିତଂ ॥
ପଣ୍ଡୁରାଜକୁମାରେନ, ସଦ୍ଧିଂ ସେନାପତି ସକଂ ।
ଗନ୍ତ୍ୱା ତଂ ପଣ୍ଡୁରାଜାନଂ, ହନ୍ତ୍ୱାନିକମିତୋ ପୁରା ॥
ରତନଂ ସବ୍ବମାଦାୟ, ଦତ୍ୱା ରଜ୍ଜଂ ଇମସ୍ସ ଚ ।
ନ ଚିରେନେୱ ଏହୀତୀ, ଉୟ୍ୟୋଜେସି ମହାୟସୋ ॥
ସୋପି ଏୱଂ କରୋମୀତି, ପଟିସ୍ସୁତ୍ୱା ମହୀପତିଂ ।
ୱିନ୍ଦିତ୍ୱା ବଲମାଦାୟ, ନାମମାରୁୟ୍ହ ତଂ ଖଣେ ॥
ପରତୀରଂ ତତୋ ଗନ୍ତ୍ୱା, ସଂୱୁଳହ ବଲୱାହନୋ ।
ୱିନାସୟନ୍ତୋ ପଚ୍ଚନ୍ତଂ, ୱାରେସି ମଧୁରଂ ପୁରଂ ॥
ଦ୍ୱାରାନି ପିଦହିତ୍ୱାନ, ପଚ୍ଛିନ୍ଦିତ୍ଥ ଗତାଗତଂ ।
ତତୋ ଅଗ୍ଗିଂ ଖିପାପେସି, ଗୋପୁରଟ୍ଟାଲ କୋଟ୍ଠକେ ॥
ଏୱଂ ସୀହଳସେନାୟ, ପୱିଟ୍ଠାୟ ସକଂ ପୁରଂ ।
ସବ୍ବଂ ୱିଲୁମ୍ପମାନାୟ, ସେନଙ୍ଗଂ ଘାତୟନ୍ତିୟା ॥
ପଣ୍ଡୁରାଜା ନିସମ୍ମେତଂ, ସମାଦାୟ ସକଂ ବଲଂ ।
ୱେଗସା ତଂ ସମାଗମ୍ମ, ୟୁଦ୍ଧଂ କାତୁଂ ସମାରଭି ॥
ଅସମ୍ପୁଣ୍ଣ ବଲତ୍ତା ସୋ, ୱିଦ୍ଧୋ ସଲ୍ଲେନ ଭୂପତି ।
ହତ୍ଥିକ୍ଖନ୍ଧଗତୋୟେୱ, ୱିହାୟ ପୁରମତ୍ତନୋ ॥
ପଲାୟିତ୍ୱା ଗତଠାନେ, ଜୀୱିତଂ ନିଜମେସ୍ସଜି ।
ଭରିୟାୱ’ସ୍ସ ତେନାସି, ସମ୍ପତ୍ତା ଜୀୱିତକ୍ଖୟଂ ॥
ତତୋ ସୀହଳସେନାସା, ପୱିଟ୍ଠା ନିବ୍ଭୟା ପୁରଂ ।
ତତ୍ଥ ସବ୍ବଂ ୱିଲୁମ୍ପିତ୍ଥ, ଦେୱା’ସିରପୁରଂ ୟଥା ॥
ସେନାପତି ତତୋ ରାଜ-ଗେହେ ଭତ୍ତଂ ସମେକ୍ଖିୟ ।
ଦୀପାନିତମିମମ୍ହା ଚ, ତତ୍ରଟ୍ଠଞ୍ଚ ମହାରହଂ ॥
ସାରଂ ସବ୍ବଂସମାଦାୟ, ଦେସେ ଚ ନଗରେ ଠିତଂ ।
କତ୍ୱା ଇସ୍ସରିୟଂ ତତ୍ଥ, ୱସେୱତ୍ତିୟ ଅତ୍ତନୋ ॥
ପଣ୍ଡୁରାଜ କୁମାରଂ ତୁ, ତତ୍ଥ ରଜ୍ଜେ’ଭି ସିଞ୍ଚିୟ ।
କାରେତ୍ୱା ପରିହାରଞ୍ଚ, ଦେସଂ ତସ୍ସ ସମପ୍ପିୟ ॥
ୟଥାରୁଚିଂ ଗହେତ୍ୱାନ, ହତ୍ଥିଅସ୍ସେ ନରେ’ପି ଚ ।
ତତ୍ଥ ତତ୍ଥ ୟଥା କାମଂ, ୱସନ୍ତୋ ଅକୁତୋ ଭୟୋ ॥
ସମୁଦ୍ଦ ତଟମାଗମ୍ମ, ଠତ୍ୱା ତତ୍ଥ ୟଥାସୁଖଂ ।
କୀଳନ୍ତୋ ୱିୟ ନାୱଂ ସୋ, ସମାରୁୟ୍ହ ୱିସାରଦୋ ॥
ମହାତିତ୍ଥ ମୁପାଗମ୍ମ, ୱନ୍ଦିତ୍ୱା ଧରଣୀ ପତିଂ ।
ତଂ ସାସନଂ ନିୱେଦେତ୍ୱା, ସାରଂ ଦସ୍ସେସି ଆହଟଂ ॥
ରାଜା ସାଧୂତି ୱତ୍ୱାନ, କାରେତ୍ୱା ତସ୍ସ ସଙ୍ଗହଂ ।
ସଦ୍ଧିଂ ସେନାୟ ଆଗନ୍ତ୍ୱା, ପକଟ୍ଠାୟ ସକଂ ପୁରଂ ॥
ଜୟପାନଂ ପିୱିତ୍ୱାନ, କତ୍ୱା ୱିଜୟମଙ୍ଗଲଂ ।
ମହାଧାଗଂ ପୱତ୍ତେତ୍ୱା, ୟାଚକାନଂ ୟଥା ରୁଚିଂ ॥
ସବ୍ବଂ ପାକତିକଂ କାସି, ସାରଂ ଦୀପେ ନିରାଲୟୋ ।
ସୋୱଣ୍ଣ ପଟିମାୟୋ ଚ, ୟଥାଠାନେ ଠପାପୟି ॥
ସୁଞ୍ଞଂ ରତନପାସାଦେ, ପିଟ୍ଠଂ ପୂରେସି ସତ୍ଥୁନୋ ।
କାସି ରକ୍ଖପିଧାନେନ, ନିବ୍ଭୟଂ ଧରଣୀତଲଂ ॥
ତତୋ ପଟ୍ଠାୟ ଦୀପଂସୋ, ଅରୀନଂ ଦୁପ୍ପଧଂସିୟଂ ।
କତ୍ୱା ୱଡ୍ଢେସି ଭୋଗେହି, ଉତ୍ତରାଦିକୁରୁଂ ପିୟ ॥
ଖିନ୍ନା ପୁବ୍ବସ୍ସ ରାଜସ୍ସ, କାଲେ ଦୀପମ୍ହି ପାଣିନୋ ।
ନିବ୍ବୁତା ତଂ ସମାଗମ୍ମ, ଘମ୍ମା ୱିୟ ୱଲାହକା ॥
ତସ୍ସ ୱୀସତିମେ ୱସ୍ସେ, ୱିହାରେ ଅଭୟୁତ୍ତରେ ।
ନିକ୍ଖମିତ୍ୱା ଗତା ହେସୁଂ, ପଂସୁକୂଲିକ ଭିକ୍ଖୱୋ ॥
ୟୁୱରାଜା ମହିନ୍ଦୋ ସୋ, ଧୁମରାଜସ୍ସ ସତ୍ଥୁନୋ ।
କାରାପୟି ଘରଂ ରମ୍ମଂ, ଦସ୍ସନେୟ୍ୟଂ ମନୋରମଂ ॥
ବୋଧିଗେହଂ କରୋନ୍ତୋ ତଂ, ଦିସ୍ୱା ୱଡ୍ଢକୀନୋ ତଦା ।
ୱଂସେନ ସାଖଂ ଆହଚ୍ଚ, ଭିଜ୍ଜନ୍ତଂ ୱରବୋଧିୟା ॥
କିନ୍ତୁ କାତବ୍ବମେତ୍ଥାତି, ୟୁୱରାଜଂ ନିୱେଦୟୁଂ ।
ସୋ ତଂ ତଂ ମୁପସଂକମ୍ମ, ମହାପୂଜାୟ ପୂଜିୟ ॥
ସଚେ ସତ୍ଥା, ହିତତ୍ଥାୟ, ସମ୍ଭୂତୋ ସବ୍ବପାଣିନଂ ।
ଲଦ୍ଧୁଂ ପୁଞ୍ଞସ୍ସ’ନଗ୍ଘସ୍ସ, ଘରସ୍ସ କରଣେତି’ଧ ॥
ସାଖା ଗଚ୍ଛଂ ତୁ ଉଦ୍ଧଂୱ, କାତୁଂ ସକ୍କା ୟଥାଘରଂ ।
ଏୱମାରାଧୟିତ୍ୱାନ, ୱନ୍ଦିତ୍ୱା ସଙ୍ଘରଂ ଗତୋ ॥
ତଦା ସାଖା ଦୁମିନ୍ଦସ୍ସ, ରତ୍ତିୟଂ ଉଦ୍ଧମୁଗ୍ଗମି ।
ତତୋ କମ୍ମକରା ସବ୍ବଂ, ଆରୋଚେସୁଂ ସସାମିନୋ ॥
ୟୁୱରାଜା’ତି ସନ୍ତୁଟ୍ଠୋ, ଭାତୁରଞ୍ଞୋ ନିୱେଦିୟ ।
ମହାପୂଜାୟ ପୂଜେସି, ୱିସ୍ସଜ୍ଜିୟ ବହୁଧନଂ ॥
ତଥା ମହିନ୍ଦସେନୱ୍ହଂ, ପରିୱେଣଞ୍ଚ କାରିୟ ।
ସଙ୍ଘସ୍ସା’ଦା ସଭୋଗଂ ସୋ, ପୁଞ୍ଞା ପୁଞ୍ଞାନିଚାଚୀନି ॥
ଅଦା ସପରିସଂ ଭତ୍ତଂ, ୱତ୍ଥଂ ଛତ୍ତମୁପାହନଂ ।
ତଥା ଗମିୟଭତ୍ତଞ୍ଚ, ନହାନଞ୍ଚ ସଭତ୍ତକଂ ॥
ଏୱଂ ଖୁଦ୍ଦାନୁ ଖୁଦ୍ଦାନି, କତ୍ୱା ପୁଞ୍ଞାନି ସୋ ୱିଭୂ ।
ରଞ୍ଞୋ ତେତ୍ତିଂସୱସ୍ସମ୍ହି, ୟଥାକମ୍ମମୁପାଗମି ॥
ଅଥ ରାଜା ମତେତସ୍ମିଂ, କଣିଟ୍ଠମୁଦୟଂ ସକଂ ।
ତସ୍ସ ଠାନେ ଠପେତ୍ୱାନ, ସବ୍ବଂ ତସ୍ସେୱ ତସ୍ସଦା ॥
ତୁଲାଭାରସ୍ସ ଦାନେନ, ଦୀନାନାଥେ ସତପ୍ପୟି ।
ଧମ୍ମକମ୍ମେନ ସୋଧେସି, ନିକାୟତ୍ତୟମେକତୋ ॥
ସୋଣ୍ଣଥାଲୀସହସ୍ସଂ ସୋ, ମୁତ୍ତାହି ପରିପୂରିୟ ।
ଠପେତ୍ୱା ମଣିମେକେକଂ, ତସ୍ସୋପରି ମହାରହଂ ॥
ବ୍ରାହ୍ମଣାନଂ ସହସ୍ସସ୍ସ, ସୁଦ୍ଧେ ରତନଭାଜନେ ।
ଭୋଜେତ୍ୱା ଖୀରପାୟାସଂ, ଦାପେତ୍ୱା ହେମସୁତ୍ତକଂ ॥
ତଥା ନୱେହି ୱତ୍ଥେହି, ଅଚ୍ଛାଦେତ୍ୱା ୟଥାରୁଚିଂ ।
ସନ୍ତପ୍ପେସି ମହନ୍ତେନ, ପରିହାରେନ ପୁଞ୍ଞୱା ॥
ଭିକ୍ଖୂନଂ ଦୀପୱାସୀନଂ, ଅଦାସି ଚ ତିଚୀୱରଂ ।
ଅଦା ସବ୍ବାସମିତ୍ଥୀନଂ, ୱତ୍ଥଞ୍ଚ ସୁମନୋହରଂ ॥
କାରେତ୍ୱା ଲୋହପାସାଦଂ, ୱେଜୟନ୍ତସରିକ୍ଖକଂ ।
ୱଡ୍ଢେସି ପଟିମଂ ତତ୍ଥ, ସୁୱଣ୍ଣଘଟକୋଟ୍ଟିମଂ ॥
ସୁତ୍ୱା ଉପୋସଥାଗାର-ଭାୱଂ ସବ୍ବ ମହେସୀନଂ ।
ତୁଚ୍ଛୋ ୟଂ ନେୱ ହୋତୂତି, ୱାସଂ ସଙ୍ଘସ୍ସ ତଂ ଅକା ॥
ଭୋଗଗାମେ ଚ ତସ୍ସଦା, ରକ୍ଖକେ ଚ ନିୟୋଜୟି ।
ଭିକ୍ଖୂ ଦ୍ୱତ୍ତିଂସମତ୍ତାହି, ୱସନ୍ତୂତି ନିୟାମୟି ॥
ଗଙ୍ଗାୟ ମରିୟାଦଂ ସୋ, କାରେସି ମଣିମେଖଲଂ ।
ତୋୟନିଦ୍ଧମନଞ୍ଚାକା, ମଣିହୀରକୱାପିୟା ॥
କଟ୍ଠୁନ୍ତନଗରେ ଚେୱ, କାଣୱାପିଂଚ ବନ୍ଧୟି ।
ୱେଜ୍ଜସାଲଞ୍ଚ କାରେସି, ଚେତିୟମ୍ହି ଗିରିମ୍ହି ସୋ ॥
ବୁଦ୍ଧଗାମୱିହାରଞ୍ଚ, ୱିହାରଂ ମହିୟଙ୍ଗଣଂ ।
କୂଟତିସ୍ସ ୱିହାରଞ୍ଚ, ଭୋଗଗାମେ ନ ୱଡ୍ଢୟି ॥
ମଣ୍ଡଲସ୍ସ ଗିରିସ୍ସା’ଦା, ୱିହାରସ୍ସ ସଗାମକେ ।
ଉତ୍ତରାଳ୍ହେ ଚ କାରେସି, ପାସାଦଂ ପରିୱେଣକେ ॥
ମହାସେନସ୍ସ ବୁଦ୍ଧସ୍ସ, ଗାମଂ ଦତ୍ୱାନ ରକ୍ଖକେ ।
ଦାସି ସୋବ୍ଭୱିହାରେ ଚ, କାରେସି ପଟିମାଘରଂ ॥
ବୋଧିସତ୍ତେ ଚ ୱଡ୍ଢେସି, ପାସାଦେ ମଣିମେଖଲେ ।
ସୀଲାମୟମୁନିନ୍ଦସ୍ସ, ଜିଣ୍ଣଗେହମ୍ପି କାରୟି ॥
ରାଜ ତଂ ବୋଧିସତ୍ତଞ୍ଚ, ସଘରଂ ତତ୍ଥ ସନ୍ନହି ।
ଆଲୱାଲଂ ଦୁମିନ୍ଦସ୍ସ, ଗନ୍ଧିତ୍ୱା କା ମହାମହଂ ॥
ଲିଖିତ୍ୱା ହେମପଟ୍ଟମ୍ହି, ସବ୍ବରତନସୁତ୍ତକଂ ।
ମହାପୂଜମକା ତସ୍ସ, ଅଭିଧମ୍ମଂ କଥାପୟି ॥
ଆନନ୍ଦପଟିମଂ ନେତ୍ୱା, ପୁରଂ କତ୍ୱା ପଦକ୍ଖିଣଂ ।
ପରିତ୍ତଂ ଭିକ୍ଖୁସଙ୍ଘେନ, ଭଣାପେତ୍ୱା ୟଥାୱିଧିଂ ॥
ପରିତ୍ତୋଦକସେକେନ, ଜନଂ କତ୍ୱା ନିରାତୁରଂ ।
ରାଜା ରୋଗଭୟଂ ପେୱଂ, ନୀହରିତ୍ଥ ସଦେସତୋ ॥
ଅଭିସେକଂ ଗହେତ୍ୱାନ, ହେମୱାଲୁକ ଚେତିୟେ ।
ଅନୁସଂୱଚ୍ଛରଂ କାତୁଂ, ତଂ ଚାରିତ୍ତଂ ଲିଖାପୟି ॥
ଅଦା ମାସସ୍ସ ଚତୂସୁ, ଉପୋସଥଦିନେସୁ ସୋ ।
ଚତୁନ୍ନଞ୍ଚ ସହସ୍ସାନଂ, ୱତ୍ଥଦାନଂ ସଭତ୍ତକଂ ॥
ୱେସାଖକୀଳଂ କୀଳିତ୍ଥ, ସଦ୍ଧିଂ ଦୁଗ୍ଗତକେହି ସୋ ।
ଅନ୍ନଂ ପାନଞ୍ଚ ୱତ୍ଥଞ୍ଚ, ତେସଂ ଦତ୍ୱା ୟଥାରୁଚିଂ ॥
ଭିକ୍ଖୁସଙ୍ଘସ୍ସ ଦୀପମ୍ହି, ନିଚ୍ଚଦାନଂ ପୱତ୍ତୟି ।
ସନ୍ତପ୍ପେସି ଚ ଦାନେନ, କପଣଦ୍ଧିକୱଣିବ୍ବକେ ॥
ତସ୍ସ ରଞ୍ଞୋ ମହେସୀ ଚ, ସଙ୍ଘନାମା ଅକାରୟି ।
ପବ୍ବତଂ ସଙ୍ଘସେନୱ୍ହଂ, ସଭୋଗମଭୟୁତ୍ତରେ ॥
ନୀଲଚୂଳାମଣିଞ୍ଚାକା, ସିଲାମୟ ମହେସିନୋ ।
ପୂଜଂ ସବ୍ବୋପହାରେହି, କାସି ସତ୍ଥୁସ୍ସ ସବ୍ବଦା ॥
ତସ୍ସ ସେନାପତିଚା’କା, ସେନସେନାପତିୱ୍ହୟଂ ।
ପରିୱେଣଂ ମହାଭୋଗଂ, ସୂରୋ ତୁଟ୍ଠକନାମକୋ ॥
ଏୱଂ ସପରିସୋ କତ୍ୱା, ସପୁଞ୍ଞାନି ମହାୟସୋ ।
ପଞ୍ଚତିଂସତିମେ ୱସ୍ସେ, ଦେୱଲୋକମୁପାଗମି ॥
ତତୋ ତସ୍ସା’ନୁଜୋ ଆସି, ଉଦୟୋ ନାମ ଖତ୍ତିୟୋ ।
ରାଜା ସବ୍ବପ୍ପୟୋଗେହି, ହିତେସୀ ଦୀପୱାସୀନଂ ॥
ହୁତ୍ୱା ସୋ ସୟଂ ରାଜା, କଣିଟ୍ଠଂ ସକଭାତରଂ ।
ମହାଦୀପାଦଠାନମ୍ହି, ଠପି କସ୍ସପନାମକଂ ॥
ରାଜା ଚିନ୍ତିୟ ଞାତୀନଂ, କାତବ୍ବୋ ସଙ୍ଗହୋ ଇତି ।
ଏୱଂ କସ୍ସପନାମସ୍ସ, ଭାତୁପୁତ୍ତସ୍ସ ଧୀତରଂ ॥
ୟୁୱରାଜସ୍ସ ତସ୍ସା’କା, ଭରିୟଂ ସେନନାମିକଂ ।
ଧାରେସିଚ ସୟଂ ରାଜା, ଅପରଂ ତିସ୍ସସୱ୍ହୟଂ ॥
ମହିନ୍ଦସ୍ସୁପରାଜସ୍ସ, ରାଜଧୀତାୟ କିତ୍ତିୟା ।
ପୁତ୍ତୋ କିତ୍ତଗ୍ଗବୋଧୀତି, ଆଦିପାଦୋ ୱିବୁଦ୍ଧିକୋ ॥
ଚୋରୋ ହୁତ୍ୱା ମହାରଞ୍ଞୋ, ନିକ୍ଖମିତ୍ୱାନ ରତ୍ତିୟଂ ।
ଏକୋ ଅଞ୍ଞାତୱେସେନ, ସମୁପାଗମ୍ମରୋହଣଂ ॥
ଜନଂ ହତ୍ତଗତଂ କତ୍ୱା, ଦେସଂ ସବ୍ବଂ ୱିନାସିୟ ।
ଘାତାପୟିତ୍ଥ ତତ୍ରଟ୍ଠଂ, ସୋ ତଂ ମାତୁଲମତ୍ତନୋ ॥
ତଂ ସୁତ୍ୱା ଧରଣୀପାଲୋ, ତସ୍ମିଂ’ତୀୱ ପକୁପ୍ପିୟ ।
ଆନେତୁଂ ତମୁପାୟଂ ସୋ, ଗୱେସନ୍ତୋ ତଥା ତଥା ॥
ଭାତୁପୁତ୍ତଂ ତମାହୁୟ, ୟୁୱରାଜଂ ସକସ୍ସପଂ ।
ଆମନ୍ତେସି ମହାପୁଞ୍ଞ, ସହାୟୋ ହୋତି ମେ ଇତି ॥
କିଂ ମେ କତ୍ତବ୍ବ’ମିଚ୍ଚାହ, ପଚ୍ଚାହ ଧରଣୀପତି ।
ପୁତ୍ତୋ ତୱ ମହିନ୍ଦୋ ସୋ, ୱୁଦ୍ଧିପ୍ପତ୍ତୋ ମହାବଲୋ ॥
ଲାଭୀ ରୋହଣଦେସସ୍ସ, ମାତିତୋ ପିତିତୋ’ପି ଚ ।
ସୂରୋ ସବ୍ବସହୋ ୱୀରୋ, କୁସଲୋ କତୂପାସନୋ ॥
ସଙ୍ଗାମୟୋଗ୍ଗୋ ମତିମା, ନିପୁଣୋ ନୟକୋୱିଦୋ ।
ତଂ ପେସେତ୍ୱା ନୟିସ୍ସାମ, ପାପଂ ମାତୁଲଘାତକଂ ॥
ତଂ ସୁତ୍ୱା ୱଚନଂ ରଞ୍ଞୋ, କସ୍ସପୋ ଭାସି ସାଦରୋ ।
ଦେୱ ଦେୱେନ ୱୁତ୍ତୋ’ହଂ, ଗଚ୍ଛେୟ୍ୟଂ କିନ୍ତୁ ମେ ସୁତୋ ॥
ୱଂସୋ ମେ ପାଲିତୋ ହୋତି, ପସାଦୋ ଚ ତୱାଧିପ ।
ତସ୍ମା କାଲମହାପେତ୍ୱା, ୟଂ ଇଚ୍ଛସି ତଥା କୁରୁ ॥
ସୁତ୍ୱା ଅତୀୱସନ୍ତୁଟ୍ଠୋ, ନରିନ୍ଦୋ ତସ୍ସ ତଂ ୱଚୋ ।
ମହନ୍ଥଂ ବଲକାୟଂ ସୋ, ସବ୍ବସୋ ପଟିୟାଦିୟ ॥
ମହତା ପରିହାରେନ, ମହିନ୍ଦଂ ରାଜପୋତକଂ ।
ରକ୍ଖିତୁଂ ତଂ ନିୟୋଜେତ୍ୱା, ୱଜିରଗ୍ଗଞ୍ଚ ନାୟକଂ ॥
ତୁଚ୍ଛଂ ୱିୟ ପୁରଂ କତ୍ୱା, ସବ୍ବଞ୍ଚ ବଲୱାହନଂ ।
ସବ୍ବୋପକରଣଞ୍ଚେୱ, ଅନୂନଂ ତସ୍ସ ଦାପିୟ ॥
ସୟଂ ତମନୁଗଚ୍ଛନ୍ତୋ, ପଦସା’ୱ ନରିସ୍ସରୋ ।
ଉୟ୍ୟୋଜେସି ମହାପୁଞ୍ଞ, ଗଚ୍ଛ ରୁକ୍ଖାତି ମେଦିନିଂ ॥
ମହିନ୍ଦୋ ସୋ ମହିନ୍ଦୋ’ୱ, ଦେୱସେନା ପୁରକ୍ଖତୋ ।
ଗଚ୍ଛନ୍ତୋ ସୁୱୀରୋଚିତ୍ଥ, ଦେୱାସୁରମହାହୱଂ ॥
ତତୋ ଗନ୍ତ୍ୱା ନ ଚିରେନ, ଗୁତ୍ତସାଲମୁପାଗମି ।
ତତୋ ଜାନପଦା ସବ୍ବେ, ମଣ୍ଡଲିକା ଚ ରଟ୍ଠିୟା ॥
ତେନ ମାତୁଲଘାତେନ, ପାପକେନ ଉପଦ୍ଦୁତା ।
ଗନ୍ତ୍ୱା ତଂ ପରିୱାରେସୁଂ, ଲଦ୍ଧୋ ନୋ ସାମିକୋ ଇତି ॥
ପତନ୍ତୋ ସୋପି ଖୋ ଚୋରୋ, ଠିତୋୱ ଗିରିମଣ୍ଡଲେ ।
ସବ୍ବଂ ହତ୍ଥଗତଂ କତ୍ୱା, ରାଜଭଣ୍ଡଂ ମହଗ୍ଘିୟଂ ॥
ହତ୍ଥୀ ଅସ୍ସେଚ ଆଦାୟ, ଗନ୍ତ୍ୱା ମଲୟମାରୁହି ।
ମହିନ୍ଦସେନା ଘାତେନ୍ତୀ, ତସ୍ସ ସେନଂ ତହିଂ ତହିଂ ॥
ପଦାନୁପଦମସ୍ସେ’ୱ, ଗଚ୍ଛନ୍ତି ହତ୍ଥିଅସ୍ସକେ ।
ଦିସ୍ୱା ମଲୟପାଦମ୍ହି, ଗହେତ୍ୱା ଏତ୍ଥ ସୋ ଇତି ॥
ତତ୍ଥ ପାୱିସିମଦ୍ଦନ୍ତୀ, ସବ୍ବଂ ମଲୟକାନନଂ ।
ନଦୀୟୋ ପଲ୍ଲଲେ ଚେୱ, କରୋନ୍ତି ମଗ୍ଗସାଦିସେ ॥
ବାଲକୋୱ ଜନଂ ଦିସ୍ୱା, ସବ୍ବଂ ରତନମତ୍ତନୋ ।
କୋଧାଭିଭୂତୋ ଛଡ୍ଡେସି, ନଦୀ ସୋବ୍ଭତଟାଦୀସୁ ॥
ଏକକୋୱ ନିଲୀୟିତ୍ଥ, ୱନେ ପବ୍ବତକନ୍ଦରେ ।
ଗୱେସନ୍ତୋ ଜନୋ ଦିସ୍ୱା, ତମଗ୍ଗହି ନରାଧମ୍ମଂ ॥
ତମାଦାୟ’ତି ତୁଟ୍ଠୋ ସୋ, ଜନୋ ଆଗମ୍ମ ସଜ୍ଜୁକଂ ।
ମହିନ୍ଦମୁପଦସ୍ସେସି, ନିସିନ୍ନଂ ଗୁତ୍ତସାଲକେ ॥
ସୋ ତଂ ଦିସ୍ୱା ହସିତ୍ୱାନ,
ଭୁତ୍ତୋ କିଂ ରୋହଣୋ’’ଇତି ।
ନାୟକସ୍ସ ନିୟ୍ୟାତେତ୍ୱା,
ୱଜିରଗ୍ଗସ୍ସ ରାଜିନୋ ॥
ସୟଂ ସେନଂ ସମାଦାୟ, ମହାଗାମମୁପାଗତୋ ।
ରୋହଣା ଧିପତି ହୁତ୍ୱା, କରୋନ୍ତୋ ଲୋକସଙ୍ଗହଂ ॥
ଜନଂ ପାକତିକଂ କତ୍ୱା, ବାଲକେନ ୱିବାଧିତଂ ।
ସାସନଞ୍ଚ ୟଥାଠାନେ, ଠପେତ୍ୱା ତେନ ନାସିତଂ ॥
ପୁପ୍ଫାରାମେ ଫଲାରାମେ, କାରୟିତ୍ୱା ତହିଂ ତହିଂ ।
ୱାପିୟୋ’ପି ଚ ଗଣ୍ହିତ୍ୱା, ବନ୍ଧାପେତ୍ୱା ମହାନଦିଂ ॥
ସବ୍ବତ୍ଥ ସୁଲଭଂ କତ୍ୱା, ସଙ୍ଘସ୍ସ ଚତୁପଚ୍ଚୟଂ ।
ଦୁଟ୍ଠେ ଚ ପଟିବାହେତ୍ୱା, ମଣ୍ଡଲୀକେ ଚ ରଟ୍ଠିୟେ ॥
ଚୋରେ ଚ ପରିସୋଧେତ୍ୱା, କତ୍ୱା ୱିଗତକଣ୍ଟକଂ ।
ତୋସୟନ୍ତୋ’ଖିଲଂ ଲୋକଂ, ଚାଗଭୋଗସମପ୍ପିତୋ ॥
ଉପାସନିୟୋ ୱିଞ୍ଞୂହି, ସେୱନୀୟୋ ଧନତ୍ଥୀହି ।
କପ୍ପରୁକ୍ଖୂପମୋ ସବ୍ବ-ୟାଚକାନଂ ହିତାୱହୋ ॥
ହିତ୍ୱା ଦୁବ୍ବିନୟଂ ଦେସେ, ପୁବ୍ବକେହି ପୱତ୍ତିତଂ ।
ସମାଚରନ୍ତୋ ଧମ୍ମଞ୍ଚ, ୱାସଂ ତତ୍ଥେୱ କପ୍ପୟି ॥
ଆଦିପାଦଂ ଗହେତ୍ୱାନ, ୱଜିରଗ୍ଗୋ ୱିନାୟକୋ ।
ଅନୁରାଧମୁପାଗମ୍ମ, ରାଜାନମଭିଦସ୍ସୟି ॥
ରାଜାପି ଦିସ୍ୱା ତଂ କୁଦ୍ଧୋ, ଖିପ୍ପଂ ପକ୍ଖିପ୍ପ ଚାରକେ ।
ରକ୍ଖାୱରଣମସ୍ସାଦା, ୱିହେଠେସି ଚ ସବ୍ବାସୋ ॥
ଅଦାସି ଚ ତୁଲାଭାରଂ, ତିକ୍ଖତ୍ତୁଂ ସୋ ମହାୟସୋ ।
ଥୂପାରାମମ୍ହି ଥୂପଞ୍ଚ, ହେମପଟ୍ଟେନ ଛାଦୟି ॥
କତ୍ୱା ତତ୍ଥେୱ ପାସାଦଂ, ଭିକ୍ଖୁସଙ୍ଘଂ ନିୱାସିୟ ।
ୱିହାରେ ନଗରେ ଚେୱ, ପଟିସଙ୍ଖାସି ଜିଣ୍ଣକଂ ॥
କଦମ୍ବନଦୀୟା’କାସି, ନିଜ୍ଝରଂ ଥିରବନ୍ଧନଂ ।
ମରିୟାଦଂ ପୱଡ୍ଢେସି, ୱାପିୟଂ ସୋ ମୟେତ୍ତିୟଂ ॥
ତତ୍ଥ ନିଦ୍ଧମନଂଚା’କା, ଅନୁୱସ୍ସମ୍ପି ଭୂମିପୋ ।
ଚୀୱରତ୍ଥଂ ସୁୱତ୍ଥାନି, ସୁସଣ୍ହାନି ଚ ଦାପୟି ॥
ଦୁବ୍ଭିକ୍ଖେ ଦାନସାଲାୟୋ, କାରେତ୍ୱା ସବ୍ବପାଣିନଂ ।
ମହାଦାନଂ ପୱତ୍ତେସି, ମହାପାଳିଞ୍ଚ ୱଡ୍ଢୟି ॥
ଦଧିଭତ୍ତଞ୍ଚ ଦାପେସି, ନିକାୟତ୍ତୟୱାସିନଂ ।
ନିଚ୍ଚଂ ଦୁଗ୍ଗତଭତ୍ତଞ୍ଚ, ୟାଗୁଞ୍ଚେୱ ସଖଜ୍ଜକଂ ॥
ଏୱମାଦୀନି ପୁଞ୍ଞାନି, କତ୍ୱା ସୋୱଗ୍ଗିୟାନି ସୋ ।
ଏକାଦସହି ୱସ୍ସେହି, ଗତୋ ଦେୱସହବ୍ୟତଂ ॥
ତସ୍ସେକାଦସୱସ୍ସେସୁ, ୱିସ୍ସଟ୍ଠଂ ସୋଣ୍ଣମେୱ ତୁ ।
ଅହୁ ସତସହସ୍ସାନଂ, ତୟୋ ଦସହି ସମ୍ମିତଂ ॥
ସୁଦୁଜ୍ଜୟଂ ପଣ୍ଡୁନରାଧିରାଜ,
ମେକୋପରୋ ରୋହଣମୁଗ୍ଗଦୁଗ୍ଗଂ ।
କତ୍ୱା’ପି ଏତେ ସୱସେ ନରିନ୍ଦା,
ସୟଂ ୱସଂ ମଚ୍ଚୁମୁପାଗମିଂସୁ ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ରାଜଦ୍ୱୟଦୀପନୋ ନାମ
ଏକୂନପଞ୍ଞାସତିମୋ ପରିଚ୍ଛେଦୋ ।
ପଞ୍ଞାସତିମ ପରିଚ୍ଛେଦ
ଦ୍ୱିରାଜକୋନାମ
ତତୋ ରଜ୍ଜେ ପତିଟ୍ଠାୟ, କସ୍ସପୋ ଦକ୍ଖିଣଂ ଦିସଂ ।
ଅଦା କସ୍ସପନାମସ୍ସ, ୟୁୱରାଜସ୍ସ ଧୀମତୋ ॥
ଅଗ୍ଗାଭିସେକଂ ଦାପେସି, ୟୁୱରାଜସ୍ସ ଧୀତୁୟା ।
ରାଜକଞ୍ଞାୟ ତିସ୍ସାୟ, ଭରିୟାୟେ’ୱ ଅତ୍ତନୋ ॥
ୟାଚକାନଞ୍ଚ ସିପ୍ପୀନଂ, ଆଗତାନଂ ତତୋ ତତୋ ।
ଦାନଂ ଦଣ୍ଡିସ୍ସରଂ ନାମ, ସଦା ଦାପେସି ଭୂପତି ॥
ଆଦିପାଦୋ ମହିନ୍ଦୋ ସୋ,
ୱସନ୍ତୋ ରୋହଣେ ତଦା ।
ଗହେତୁଂ ରାଜିନୋରଟ୍ଠ-
ମାଦାୟ ବଲମାଗତୋ ॥
ତଂ ସୁତ୍ୱା କୁପିତୋ ରାଜା, ବଲଂ ପେସେସି ଅତ୍ତନୋ ।
ୟୁଜ୍ଝିତ୍ୱା ତଂ ପରାଜେସି, ମହିନ୍ଦୋ ସୋ ମହାଭଟୋ ॥
ତତୋ ରାଜା ନିୱତ୍ତେତୁଂ, ପିତରଂ ତସ୍ସ ପେସୟି ।
କସ୍ସପଂ ୟୁୱରାଜଂ ତଂ, ସୋ ଗନ୍ତ୍ୱା ପୁତ୍ତସନ୍ତିକଂ ॥
ନାନାଧମ୍ମକଥୋପେତଂ, ୱତ୍ୱା ୟୁତ୍ତିମନେକଧା ।
ସଙ୍ଘାମତୋ ନିୱତ୍ତେତ୍ୱା, ପୁତ୍ତଂ ସୋ ପୁନରାଗମି ॥
ଆଦିପାଦୋ ତୁ ସୋ ପଚ୍ଛା, ଘାତେତ୍ୱା ମଣ୍ଡଲାଧିପେ ।
କୁଦ୍ଧେଜନପଦେ ଦିସ୍ୱା, ଅଗମାସି ପୁରନ୍ତିକଂ ॥
ଭିକ୍ଖୁସଙ୍ଘୋ ତମାନେତ୍ୱା, ଦସ୍ସେସି ୱସୁଧାଧିପଂ ।
ଦତ୍ୱା ସୋ ଧୀତରଂ ତସ୍ସା, ପେସେସି ପୁନ ରୋହଣଂ ॥
ନୀହରିତ୍ୱାନ ଦୁସ୍ସୀଲେ, ନିକାୟତ୍ତୟୱାସୀସୁ ।
ଗାହାପେସି ନୱେ ଭିକ୍ଖୂ, ଆୱାସେ ତତ୍ଥ ତତ୍ଥ ସୋ ॥
ଦ୍ୱୟାଭିସେକଜାତେନ, ଆଦିପାଦେନ ସୁନୁନା ।
ମହାୱିହାରେ ବୋଧିମ୍ହି, ପଂସୁଂ ୱଡ୍ଢେସି ପୂଜୟଂ ॥
ଅକାସି ଚ ନିକାୟେସୁ, ତୀସୁ ବିମ୍ବେ ସିଲାମୟେ ।
ସୋୱଣ୍ଣୟେ ରଂସିଜାଲେ, ଛତ୍ତଂ ଚୂଳାମଣିଂ ତଥା ॥
ଅଭୟଗିରିୱିହାରମ୍ହି, ପାସାଦଂ ସକନାମକଂ ।
କତ୍ୱା ତତ୍ଥ ନିୱାସେତ୍ୱା, ଭିକ୍ଖୁ ଗାମମଦାପୟି ॥
ମହିୟଙ୍ଗଣୱିହାରସ୍ମିଂ, ଗାମଂ ସୋ ଚେତିୟସ୍ସ’ଦା ।
ସୱତ୍ଥଂ ପଟିମାଭତ୍ତଂ, ସବ୍ବଭିକ୍ଖୂନ ଦାପୟି ॥
ଥଲେ ଜଲେ ଚ ସତ୍ତାନଂ, ଅଦାସି ଅଭୟଂ ତଦା ।
ଚାରିତ୍ତପୁବ୍ବରାଜୂନଂ, ପରିପାଲେସି ସବ୍ବଦା ॥
ତସ୍ସ ସେନାପତି ସେନୋ, ଇଲଙ୍ଗୋରାଜୱଂସଜୋ ।
ଥେରିୟାନଂ ଅକା’ୱାସଂ । ଥୂପାରାମସ୍ସ ପଚ୍ଛତୋ ॥
ଧମ୍ମାରୁଚିକଭିକ୍ଖୂନଂ, ଧମ୍ମାରାମମକାରୟି ।
ତଥା ସାଗଲିକାନଞ୍ଚ, କସ୍ସପସେନନାମକଂ ॥
ହଦୟୁଣ୍ହାଭିଧାନଂ ସୋ, କତ୍ୱା ଚେତିୟପବ୍ବତେ ।
ପରିୱେଣଂ ଅଦାଧମ୍ମ-ରୁଚିକାନଞ୍ଚ ଭିକ୍ଖୂନଂ ॥
ଆରାମିକାନଂ ଭିକ୍ଖୂନଂ, ଆରାମେସୁ ତହିଂ ତହିଂ ।
ଏକମେକଂ କୁଟିଂ କତ୍ୱା, ଦାପେସି ଚ ଚମୂପତି ॥
ରତ୍ତମାଲଗିରିସ୍ମିଂ ସୋ, କତ୍ୱା ରମ୍ମଂ ତରଂ ସୁଭଂ ।
କୁଚିଂ ଅଦା ସାସନସ୍ସ, ସାମିକାନଂ ତପସ୍ସିନଂ ॥
ମହାୱିହାରେ କାରେତ୍ୱା, ପୱିୱେଣଂ ୱରଂ ଅଦା ।
ପଂସୁକୂଲିକଭିକ୍ଖୂନଂ, ସମୁଦ୍ଦଗିରିନାମକଂ ॥
ୱାସଂ ଅରଞ୍ଞେ କାରେତ୍ୱା, ଅତ୍ତନୋ ୱଂସନାମକଂ ।
ମହାୱିହାରେ ଭିକ୍ଖୂନଂ, ୱନେ ନିୱାସତଂ ଅଦା ॥
ୱିହାରେସୂ ଚ ଜିଣ୍ଣେସୁ, ନୱକମ୍ମମକାରୟି ।
ଦାପେସି ଅଗ୍ଗଲଂ ସବ୍ବ-ଭିକ୍ଖୂନଂ ଜିଣ୍ଣଚୀୱରେ ॥
ତିସ୍ସାରାମଂ କରିତ୍ୱାନ, ଭିକ୍ଖୂନୀନମୁପସ୍ସୟଂ ।
ମରିଚୱଟ୍ଟିମହାବୋଧି, ପରିହାରେ ନିୱେସୟି ॥
ଅନୁରାଧପୁରେ ଚେୱ, ପୁଲତ୍ଥିନଗରେପି ଚ ।
ଉପସଗ୍ଗରୋଗନାସାୟ, ୱେଜ୍ଜସାଲାପି କାରୟି ॥
ଅତ୍ତନା କତୱାସନଂ, ଭୋଗଗାମେ ଚ ଦାପୟି ।
ତଥାରାମିକଗାମେ ଚ, ପଟିମାଭରଣଞ୍ଚ ସୋ ॥
ଭେସଜ୍ଜଗେହଂ କାରେସି, ନଗରେ ତତ୍ଥ ତତ୍ଥ ସୋ ।
ପଂସୁକୂଲିକଭିକ୍ଖୂନଂ, ଭତ୍ତଂ ୱତ୍ଥଞ୍ଚ ଦାପୟି ॥
ଖନ୍ଧୀକତେ ଅମୋଚେସି, ତିରଚ୍ଛାନଗତେ ବହୂ ।
କପଣାନଞ୍ଚ ଦାପେସି, ମହାଦାନଂ ଚମୂପତି ॥
ୱିଚିତ୍ତଂ ବ୍ୟଞ୍ଜନଂ ଭତ୍ତଂ, ୟାଗୁଂ ୱିୱିଧଖଜ୍ଜକଂ ।
କତ୍ୱା ସୂକରରୂପଞ୍ଚ, ଗୁଳଂ ଭିକ୍ଖୂନଂ ଦାପୟି ॥
ଏୱାମାଦୀନି ପୁଞ୍ଞାନି, କତ୍ୱା ସେନାୟ ନାୟକୋ ।
ସେନୋ କିତ୍ତିନ୍ଦୁପାଦେହି, ସବ୍ବା ଓଭାସୟୀ ଦିସା ॥
ତସ୍ସେୱ ଞାତକୋ କତ୍ୱା, ନାୟକୋ ରକ୍ଖସୱ୍ହୟୋ ।
ସୱାରକମ୍ହି ଗାମମ୍ହି, ୱିହାରଂ ସୁମନୋହରଂ ॥
ମହାୱିହାରୱାସୀନଂ, ସାରାନଂ ପଟିପତ୍ତିୟା ।
ଭିକ୍ଖୂନଂ ସୋ ଅଦା ସାଧୁ, ଠପେତ୍ୱା ୱତ୍ତମୁତ୍ତମଂ ॥
ସେନୋ ନାମ ମହାଲେଖୋ, ମହାଲେଖକପବ୍ବତଂ ।
ମହାୱିହାରେ କାରେସି, ଭିକ୍ଖୂନଂ ୱାସମୁତ୍ତମଂ ॥
ଚୋଳରାଜାଭିଧାନୋ, ଚ, ଅମଚ୍ଚୋ ତସ୍ସ ରାଜିନୋ ।
ପରିୱେଣଂ ଅକାରମ୍ମଂ, ନଟ୍ଠଂ ତଂ ସୁପ୍ପତିଟ୍ଠିତଂ ॥
ରାଜା ତୀସୁ ନିକାୟେସୁ, ରୂପକମ୍ମମନୋରମଂ ।
ମଣ୍ଡପାନି ୱିଚିତ୍ତାନି, ୱେଜୟନ୍ତୋ ପମାନି ଚ ॥
କାରେତ୍ୱା ଧାତୁପୂଜାୟୋ, କତ୍ୱା ଜନମନୋହରା ।
ୟଥା କମ୍ମଂ ଗତୋ ଠତ୍ୱା, ୱସ୍ସାନି ଦସସତ୍ତ ଚ ॥
ଦ୍ୱୟାଭିସେକସଞ୍ଜାତୋ, ୟୁୱରାଜାଥ କସ୍ସପୋ ।
ଆସି ଲଦ୍ଧାଭିସେକୋ ସୋ, ଲଂକାରଜ୍ଜେକମାଗତେ ॥
ସଦ୍ଧୋ ଆଗତମଗ୍ଗୋୱ, ସାଭିଞ୍ଞୋ ୱିୟ ପଞ୍ଞୱା ।
ୱତ୍ତା ସୋ ମରମନ୍ତିୱ, ଚାଗୱା ଧନଦୋ ୱିୟ ॥
ବହୁସ୍ସୁତୋ ଧମ୍ମକଥୀ, ସବ୍ବସିପ୍ପୱିସାରଦୋ ।
ୟୁତ୍ତାୟୁତ୍ତୱିଚାରାୟ, ନିପୁଣୋ ନୟକୋୱିଦୋ ॥
ଅଚଲୋ ଇନ୍ଦଲୀଲୋ’ୱ, ଠିତୋ ସୁଗତସାସନେ ।
ପରପ୍ପୱାଦିୱାତେହି, ସବ୍ବେହି’ପି ଅକମ୍ପିୟୋ ॥
ମାୟାସାଠେୟ୍ୟମାନାଦି, ପାପାନଞ୍ଚ ଅଗୋଚରୋ ।
ଗୁଣାନଂ ଆକରୋ ସବ୍ବ-ରତନାନଂ ୱସାଗରୋ ॥
ଭୂମିଚନ୍ଦୋ ନରିନ୍ଦୋ ସୋ, ୱଂସେ ଜାତସ୍ସ ଅତ୍ତନୋ ।
ଦପ୍ପୁଳସ୍ସାଦୀପାଦସ୍ସ, ୟୁୱରାଜପଦଂ ଅଦା ॥
ରଜ୍ଜଂ ଦସହି ଧମ୍ମେହି, ଚତୁସଙ୍ଗହୱତ୍ଥୂହି ।
କରୋନ୍ତୋ ପରିପାଲେସି, ଲୋକଂ ନେତ୍ତଂୱ ଅତ୍ତନୋ ॥
ସୋ ଧେତ୍ୱା ସାସନଂ ସବ୍ବଂ, ଧମ୍ମକମ୍ମେନ ସତ୍ଥୁନୋ ।
ଗହେତ୍ୱା ନୱକେ ଭିକ୍ଖୂ, ଅକାସା’ୱାସପୂରଣଂ ॥
ଦୁଟ୍ଠଗାମଣିରାଜେନ, କତଂ ମରିଚୱଟ୍ଟିକଂ ।
ନଟ୍ଠଂ ୱିହାରଂ କାରେତ୍ୱା, ନାନାଆୱାସ ଭୂସିତଂ ॥
ଥେରୱଂସଜଭିକ୍ଖୂନଂ, ଅଦା କତ୍ୱା ମହାମହଂ ।
ତେସଂ ପଞ୍ଚସତାନଞ୍ଚ, ଭୋଗଗାମେ ଚ ଦାପୟି ॥
ତତ୍ଥ ସୋ ତୁସିତେ ରମ୍ମେ, ଦେୱସଙ୍ଘପୁରକ୍ଖତଂ ।
ମେତ୍ତେୟ୍ୟଂ ଲୋକନାଥଂ ତଂ, ଦେସେନ୍ତଂ ଧମ୍ମମୁତ୍ତମଂ ॥
ଦସ୍ସେନ୍ତୋ ୱିୟ ଲୋକସ୍ସ, ୱିହାରେ ସବ୍ବସଜ୍ଜିତେ ।
ନିସିନ୍ନୋ ମଣ୍ଡପେ ରମ୍ମେ, ନାନାରତନଭୂସିତେ ॥
ନଗରେହି ଚ ସବ୍ବେହି, ଭିକ୍ଖୂହି ପରିୱାରିତୋ ।
ବୁଦ୍ଧଲିଲାୟ ଲଂକିନ୍ଦୋ, ଅଭିଧମ୍ମ ମଭାସୟି ॥
ସୋଣ୍ଣପଟ୍ଟେ ଲିଖାପେତ୍ୱା-ଭିଧମ୍ମପିଟକଂ ତଦା ।
ଧମ୍ମସଙ୍ଗଣିକଂ ପୋତ୍ଥଂ, ନାନାରତନ ଭୂସିତଂ ॥
କତ୍ୱା ନଗରମଜ୍ଝମ୍ହି, କାରେତ୍ୱା ହେମମୁତ୍ତମଂ ।
ତଂ ତତ୍ଥ ଠପୟିତ୍ୱାନ, ପରିହାରମଦାପୟି ॥
ସକ୍କସେନାପତିଟ୍ଠାନଂ, ଦତ୍ୱା ପୁତ୍ତସ୍ସ ଅତ୍ତନୋ ।
ପରିହାରେ ନିୟୋଜେସି, ତତ୍ଥ ତଂ ଧମ୍ମପୋତ୍ଥକେ ॥
ଅନୁସଂୱଚ୍ଛରଂ ରାଜା, ପୁରଂ ଦେୱପୁରୀ ୱିୟ ।
ୱିଭୂସିତାୟ ସେନାୟ, ସଜ୍ଜେତ୍ୱା ପରିୱାରିତୋ ॥
ଦେୱରାଜାୱ ସୋଭନ୍ତୋ, ସବ୍ବାଭରଣଭୂସିତୋ ।
ହତ୍ଥିଖଣ୍ଡେ ନିସୀଦିତ୍ୱା, ଚରନ୍ତୋ ପୁରୱୀଥିୟଂ ॥
ମହତା ପରିହାରେନ, ନେତ୍ୱା ତଂ ଧମ୍ମସଙ୍ଗହଂ ।
ଅତ୍ତନା କାରିତଂ ରମ୍ମଂ, ୱିହାରଂ ସବ୍ବସଜ୍ଜିତଂ ॥
ତତ୍ଥ ଧାତୁଗତେ ରମ୍ମେ, ନାନାରତନଭୂସିତେ ।
ମଣ୍ଡପେ ଧାତୁପିଠସ୍ମିଂ, ପତିଟ୍ଠାପିୟ ପୂଜୟି ॥
ଗନ୍ଥାକରପରିୱେଣଂ, ମହାମେଘୱନେ ଅକା ।
ନଗରେ ୱଜ୍ଜସାଲା ଚ, ତେସଂ ଗାମେ ଚ ଦାପୟି ॥
ଭଣ୍ଡିକପରିୱେଣଞ୍ଚ, ସିଲାମେଘଞ୍ଚ ପବ୍ବତଂ ।
କତ୍ୱା’ଭୟଗିରିସ୍ମିଂ ସୋ, ତେସଂ ଗାମମଦାପୟି ॥
ଜୋତିୱନୱିହାରସ୍ମିଂ, ରାଜା ଲଙ୍କାୟ ନାୟକୋ ।
ଭତ୍ତଗ୍ଗସ୍ସ ଅଦା ଗାମଂ, ତଥା’ଭୟଗିରିମ୍ହି ଚ ॥
ଦକ୍ଖିଣଗିରିନାମସ୍ସ, ୱିହାରସ୍ସ ଚ ଦାପୟି ।
ଗାମଂ କତଞ୍ଞୁଭାୱେନ, ରାଜା ପରମଧମ୍ମିକୋ ॥
ସକ୍କସେନାପତି ରମ୍ମଂ, ପରିୱେଣଂ ସୁମାପିୟ ।
ଅଦାସି ସହଗାମେହି, ଥେରିୟାନଂ ସନାମିକଂ ॥
ଭରିୟା ୱଜିରା ତସ୍ସ, ତେସଂୟେୱ ଅଦାପୟି ।
ପରିୱେଣଂ କରିତ୍ୱାନ, ସଗାମଂ ସକନାମକଂ ॥
ଉପସ୍ସୟଂ କରିତ୍ୱାନ, ସା ଏୱ ପଦଲଞ୍ଛନେ ।
ଭିକ୍ଖୂନୀନଂ ଅଦା ଥେର-ୱଂସେ ସବ୍ବତ୍ଥ ପୂଜିତେ ॥
ସକ୍କସେନାପତି ମାତା, ଦେୱା’ରଞ୍ଞକ ଭିକ୍ଖୂନଂ ।
ଥେରୱଂସପ୍ପଦୀପାନଂ, ଅକା’ୱାସଂ ସନାମକଂ ॥
ସା ଏୱ ପଟିବିମ୍ବସ୍ସ, ସତ୍ଥୁ ମରିଚୱଟ୍ଟିୟଂ ।
ଚୂଳାମଣିଂ ପାଦଜଲଂ, ଅକା ଛତ୍ତଞ୍ଚ ଚୀୱରଂ ॥
ରାଜା ରାଜାଲୟେୟେୱ, ରାଜୱଂସଂ ସନାମକଂ ।
ଅକାସି ପାଳିକଂ ନାମ, ପାସାଦଂ ସୁମନୋ ହରଂ ॥
ପୂଜେସି ରାଜିନୀ ନାମ, ରାଜିନୋ ଭରିୟା’ପରା ।
ପଟ୍ଟକଞ୍ଚୁକପୂଜାୟ, ହେମମାଲିକ ଚେତିୟଂ ॥
ତସ୍ସା ପୁତ୍ତୋସି ସିଦ୍ଧତ୍ଥୋ, ନାମ ଇସ୍ସରିୟେ ଠିତୋ ।
ସୁତୋ ମଲୟରାଜାତି, ରୂପେନ ମକରଦ୍ଧଜୋ ॥
ରାଜା ତସ୍ମିଂ ମତେ କତ୍ୱା, ସାଲଂ ଭିକ୍ଖୁନମୁତ୍ତମଂ ।
ଦାନୱଟ୍ଟଂ ପଟ୍ଠପେତ୍ୱା, ତସ୍ସ ପତ୍ତିମଦା ତଦା ॥
ଏୱଂ ଧମ୍ମେନ କାରେନ୍ତେ, ରଜ୍ଜଂ ଲଙ୍କାଦୀପେ ତଦା ।
ଚୋଳରାଜେନ ୟୁଜ୍ଝିତ୍ୱା, ପଣ୍ଡୁରାଜା ପରାଜିତୋ ॥
ପଣ୍ଣାକାରାନି ନେକାନି, ବଲଂ ସନ୍ଧାୟ ପେସୟି ।
ରାଜାଲଂକିସ୍ସରୋ ସଦ୍ଧିଂ, ମନ୍ତେତ୍ୱା ସଚିୱେହି ସୋ ॥
ସନ୍ନୟ୍ହ ବଲକାୟଂ ସୋ, ସକ୍କସେନାପତିଂ ସକଂ ।
ବଲସ୍ସ ନାୟକଂ କତ୍ୱା, ମହାୟିତ୍ଥମୁପାଗମି ॥
ୱିଜୟଂ ପୁବ୍ବରାଜୂନଂ, ୱତ୍ୱା ୱେଲାତଟେ ଠିତୋ ।
ଉସ୍ସାହଂ ଜନୟିତ୍ୱାନ, ନାୱଂ ଆରୋପୟୀ ବଲଂ ॥
ବଲକାୟଂ ସମାଦାୟ, ସକ୍କସେନାପତିଂ ତଦା ।
ସୁଖେନ ସାଗରଂ ତିଣ୍ଣୋ, ପଣ୍ଡୁଦେସମୁପାଗମି ॥
ଦିସ୍ୱା ବଲଞ୍ଚ ତଞ୍ଚେୱ, ପଣ୍ଡୁରାଜା ସୁମାନସୋ ।
ଏକଚ୍ଛତ୍ତଂ କରିସ୍ସାମି, ଜମ୍ବୁଦୀପନ୍ତି ଅବ୍ରୱି ॥
ବଲଦ୍ୱୟଂ ଗହେତ୍ୱାନ, ରାଜା ସୋ ଚୋଳୱଂସଜଂ ।
ଜେତୁଂ ଅସକ୍କୁଣିତ୍ୱାନ ୟୁଦ୍ଧମୁଜ୍ଝିୟ ନିକ୍ଖମି ॥
ୟୁଜ୍ଝିସ୍ସାମୀତି ଗନ୍ତାନ, ସକ୍କସେନାପତୀ ପୁନ ।
ନିସିନ୍ନୋ ଉପସଗ୍ଗେନ, ମତୋ ପାପେନ ପଣ୍ଡୁତୋ ॥
ଲଂକିସ୍ସରୋ ବଲସ୍ସାପି, ତେନ ରୋଗେନ ନାନସଂ ।
ସୁତ୍ୱା ଦୟାଲୁଭାୱେନ, ସେନଂ ଆଣାପୟୀ ତତୋ ॥
ସକ୍କ ସେନାପତିଟ୍ଠାନଂ, ତସ୍ସ ପୁତ୍ତସ୍ସ’ଦା ତଦା ।
ୱଡ୍ଢେସି ତେନ ତଂ ପୁତ୍ତଂ, କତ୍ୱା ସେନାୟ ନାୟକଂ ॥
ନିକାୟତ୍ତୟୱାସୀହି, ପରିତ୍ତଂ ନଗରେ ତଦା ।
କାରେତ୍ୱା ରୋଗଦୁବ୍ବୁଟ୍ଠି-ଭୟଂ ନାସେସି ଜନ୍ତୁନଂ ॥
ସାସନସ୍ସ ଚ ଲୋକସ୍ସ, ସନ୍ତିଂ କତ୍ୱା ଅନେକଧା ।
ରାଜା ସୋ ଦସମେ ୱସ୍ସେ, ସୁଖେନ ତିଦିୱଂ ଗତୋ ॥
ଲଂକାରଜ୍ଜେପି ଠତ୍ୱା କଥିତତିପିଟକୋ ସବ୍ବୱିଜ୍ଜାପଦୀପୋ,
ୱତ୍ତାୱାଦୀ କୱୀ ସୋ ସତିଧୀତିୱିସଦୋ ଦେସକୋ ଭାୱକୋ ଚ ।
ପଞ୍ଞାସଦ୍ଧାଦୟା ୱା ପରହିତନିରତୋ ଲୋକୱେଦୀୱଦଞ୍ଞୂ ।
ରାଜିନ୍ଦୋ କସ୍ସପୋ’ୟଂ ୱିୟ ୱିମଲଗୁଣୋ ହୋତୁଲୋକୋପି ସବ୍ବୋ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଦ୍ୱିରାଜକୋ ନାମ
ପଞ୍ଞାସତିମୋ ପରିଚ୍ଛେଦୋ ।
ଏକପଞ୍ଞାସତିମ ପରିଚ୍ଛେଦ
ପଞ୍ଚରାଜକୋ ନାମ
ୟୁୱରାଜା ତଦା ହୁତ୍ୱା, ରାଜା ଦପ୍ପୁଳନାମକୋ ।
ଠପେସି ଓପରଜ୍ଜମ୍ହି, ଆଦିପଦଂ ସନାମକଂ ॥
ମରିଚୱଟ୍ଟିୱିହାରସ୍ସ, ଗାମଂ ଦତ୍ୱା ତତୋ ପୁରେ ।
ଚାରିତ୍ତଂ ପୁବ୍ବରାଜୂନଂ, ରକ୍ଖିତ୍ୱାନ ମହିଂ ଇମଂ ॥
ଅଭୁତ୍ୱା ଦୀଘକାଲଞ୍ହି, ପୁବ୍ବକମ୍ମେନ ଅତ୍ତନୋ ।
ରାଜା ସୋ ସତ୍ତମେ ମାସେ, ପୱିଟ୍ଠୋ ପଚ୍ଚୁନୋ ମୁଖଂ ॥
ଉପରାଜା ଅହୁରାଜା, ଦପ୍ପୁଳୋ ତଦନନ୍ତରଂ ।
ଉଦୟସ୍ସାଦିପାଦସ୍ସ, ୟୁୱରାଜପଦଂ ଅଦା ॥
ତଦା ଚୋଳଭୟା ପଣ୍ଡୁ-ରାଜଂ ଜନପଦଂ ସକଂ ।
ଚଜିତ୍ୱା ନାୱମାରୁୟ୍ହ, ମହାତିତ୍ଥମୁପାଗମି ॥
ଆଣାପେତ୍ୱାନ ତଂ ରାଜା, ଦିସ୍ୱା ସନ୍ତୁଟ୍ଠମାନସୋ ।
ମହାଭୋଗଂ ଅଦା ତସ୍ସ, ନିୱାସେସି ପୁରା ବହି ॥
ଚୋଳରାଜେନ ୟୁଜ୍ଝିତ୍ୱା, ଗହେତ୍ୱା ପଟ୍ଟନଦ୍ୱୟଂ ।
ପଣ୍ଡୁରାଜସ୍ସ ଦମ୍ମୀତି, ସନ୍ନଦ୍ଧେ ଲଙ୍କରାଜିନି ॥
କେନା’ପି କରଣୀୟେନ, ଖତ୍ତିୟା ଦୀପୱାସିନୋ ।
ଅକଂସୁ ୱିଗ୍ଗହଂ ଘୋରଂ, ପାପକମ୍ମେନ ପଣ୍ଡୁନୋ ॥
ପଣ୍ଡୁରାଜେ’ତ୍ଥ ୱାସେନ, କମ୍ମଂ ନତ୍ଥୀତି ଚିନ୍ତିୟ ।
ଠପେତ୍ୱା ମକୁଟାଦୀନି, ଗତୋ କେରଳସନ୍ତିକଂ ॥
ୱିଗ୍ଗହେ ନିଟ୍ଠିତେ ରାଜା, ମହାମେଘୱନେ ତଦା ।
ମହାବୋଧିଘରସ୍ସା’ଦା, ଗାମଂ ନଗରସନ୍ତିକେ ॥
ଆୱାସଂ ରକ୍ଖକୋ ନାମ, ତସ୍ସ ସେନାପତୀ ଅକା ।
ଥୂପାରାମସମୀପମ୍ହି, ଇଳଙ୍ଗୋ ରାଜନାମକଂ ॥
କତଂ ତଂ ପୁବ୍ବରାଜେହି, ରାଜା ସୋ ପରିପାଲିୟ ।
ପତ୍ତୋ ଦ୍ୱାଦସମଂ ୱସ୍ସଂ, ୟଥାକମ୍ମମୁପାଗମି ॥
ଉଦୟୋ ୟୁୱରାଜା’ସି, ଲଂକାୱାସୀନମିସ୍ସରୋ ।
ସେନନାମାଦିପାଦଂ ସୋ, ଓପରଜ୍ଜେ’ଭିସେଚୟି ॥
ରଞ୍ଞୋ ଭୀତା ତଦାମଚ୍ଚା, ପୱିସିଂସୁ ତପୋୱନଂ ।
ରାଜୋପରାଜା ଗନ୍ତ୍ୱାନ, ତେସଂ ସୀସାନି ଛେଦୟୁଂ ॥
ତେନ କମ୍ମେନ ନିବ୍ବିନ୍ନା, ୟତୟୋ ତନ୍ନିୱାସିନୋ ।
ହିତ୍ୱା ଜନପଦଂ ରଞ୍ଞୋ, ତଦାଗଚ୍ଛିଂସୁ ରୋହଣଂ ॥
ତଦା ଜାନପଦା ଚେୱ, ନାଗରା ଚ ବଲାନି ଚ ।
କୁପିତା ଚଣ୍ଡୁୱାତେନ, ସାଗରୋ ୱିୟ କମ୍ପିତୋ ॥
ରତନପାସାଦମାରୁୟ୍ହ, ୱିହାରେ ଅଭୟୁତ୍ତରେ ।
ସନ୍ତାସେତ୍ୱାନ ରାଜାନଂ, ଦସ୍ସେତ୍ୱାନ ୱିଭୀସିକଂ ॥
ଉପତ୍ଥମ୍ଭକମଚ୍ଚାନଂ, ୱିଗ୍ଗହସ୍ସ ତପୋୱନେ ।
ତଦା ସୀସାନି ଛିନ୍ଦିତ୍ୱା, କୱାତେନ ନିପାତୟୁଂ ॥
ତଂ ସୁତ୍ୱା ୟୁୱରାଜା ଚ, ଆଦିପାଦୋ ଚ ତଂ ସଖା ।
ଉଲ୍ଲଙ୍ଘିତ୍ୱାନ ପାକାରଂ, ସୀଘଂ ଗଚ୍ଛିଂସୁ ରୋହଣଂ ॥
ବଲକାୟୋନୁବନ୍ଧିତ୍ୱା, ୟାୱ କଣ୍ହନଦୀତଟା ।
ଅଲାଭେନ ଚ ନାୱାନଂ, ତିଣ୍ଣତ୍ତା ତେସମାଗମି ॥
ରାଜପୁତ୍ତାଗତା ତତ୍ଥ, ୱନେ ଅଭୟଭେଦିନୋ ।
ୟତୀନଂ ପୁରତୋ ତେସଂ, ନିପଜ୍ଜିତ୍ୱା ଉରେନ ତେ ॥
ଅଲ୍ଲୱତ୍ଥା’ଲ୍ଲକେସା ଚ, ପରିଦେୱିତ୍ଥ’ନେକଧା ।
କନ୍ଦୀତ୍ୱା ରୋଦନଂ କତ୍ୱା, ଖମାପେସୁଂ ତପସ୍ସିନୋ ॥
ଖନ୍ତିମେତ୍ତାନୁଭାୱେନ, ତେସଂ ସାସନସାମିନଂ ।
ପୁଞ୍ଞୋଦୟୋ ଅହୁ ତେସଂ, ଉଭିନ୍ନଂ ଦୀପସାମିନଂ ॥
ୟୁୱରାଜବଲଞ୍ଚେୱ, ନିକାୟତ୍ତୟୱାସିନୋ ।
ଗମିଂସୁ ତେସମାନେତୁଂ, ସନ୍ତିଭୂତେ ମହାବଲେ ॥
ରାଜପୁତ୍ତା ଉଭୋ ବ୍ୟତ୍ତା, ପଣ୍ଡିତା ପଂସୁକୂଲିନୋ ।
ୟାଚିତ୍ୱା ତେସମାଦାୟ, ଅଗମଂସୁ ସକଂ ପୁରଂ ॥
ଭିକ୍ଖୂନଂ ପୁରତୋ ମଗ୍ଗଂ, ରାଜାଗନ୍ତା ଖମାପୟି ।
ଆଦାୟ ତେ ୱନଂ ତେସଂ, ନେତ୍ୱା ରାଜଘରଂ ଗତୋ ॥
ତତୋ ପଟ୍ଠାୟ ଚାରିତ୍ଥଂ, ପାଲେତ୍ୱା ପୁବ୍ବରାଜୁନଂ ।
ରାଜା ସୋ ତତିୟେ ୱସ୍ସେ, ୟଥାକମ୍ମମୁପାଗମି ॥
ଲଂକାଭିସେକଂ ପତ୍ୱାନ, ସେନୋ ସୋ ମତିମା ତତୋ ।
ଉଦୟଂ ଆଦିପାଦଂ ତଂ, ୟୁୱରାଜଂ ଅକା ସଖଂ ॥
କହାପଣସହସ୍ସଂ ସୋ, ଦୁଗ୍ଗତାନଂ ଉପୋସଥେ ।
ହୋତୁ’ପୋସଥିକୋ ଦତ୍ୱା, ୟାୱଜୀୱଂ ନରାଧିପୋ ॥
ପଟିମା ଭତ୍ତୱତ୍ଥାନି, ଭିକ୍ଖୂନଂ ଧରଣୀ ପତି ।
ଅଦା ଦଣ୍ଡିସ୍ସରଂ ଦାନଂ, ୟାଚକାନଞ୍ଚ ସିପ୍ପୀନଂ ॥
ଠାନେ କତ୍ଥଚି ସିପ୍ପୀନଂ, ପାସାଦେସୁ ମନୋହରେ ।
କାରେତ୍ୱା ଭୋଗଗାମେ ଚ, ଅଦାପେସି ମହାମତି ॥
କହାପଣସହସ୍ସଂ ୱା, ଦତ୍ୱା ପଞ୍ଚସତାନି ୱା ।
ଲଙ୍କାୟଂ ଜିଣ୍ଣକାୱାସେ, ନୱକମ୍ମମକାରୟୀ ॥
ଚତ୍ତାଲୀସସହସ୍ସାନି, ଅଭୟୁତ୍ତରଚେତିୟେ ।
ସିଲାପତ୍ଥରଣତ୍ଥାୟ, ଦାପେସି ଚ ମହୀପତି ॥
ମହାୱାପୀସୁ ଲଂକାୟଂ, ଜିଣ୍ଣନିଦ୍ଧମନେ ଅକା ।
ନୱକମ୍ମଞ୍ଚ ମରିୟାଦଂ, ଥିୟଂ ପାସାଣପଂସୁନା ॥
ଅକା ରାଜଘରେ ରମ୍ମଂ, ମାଲାଗେହଂ ମହାରହଂ ।
ଠପିତଂ ପୁନରାଜୂହି, ଦାନଂ ସମ୍ମାପୱତ୍ତୟି ॥
କତଂ ମଲୟରାଜେନ, ଅମଚ୍ଚେନ’ଗ୍ଗ ବୋଧିନା ।
ପରିୱେଣଂ ନାଗସାଲଂ, ଦିସ୍ୱା ଗାମ ମଦା ତଦା ॥
କତ୍ୱା ଚତୁୱିହାରେସୁ, ରୂପକମ୍ମାନି ସାଧୁକଂ ।
ମଣ୍ଡପାନି ଚ ରମ୍ମାନି, ଧାତୁପୂଜଂ ଅକା ସଦା ॥
ଏୱମାଦୀନି ପୁଞ୍ଞାନି, ଅନେକାନି ଅନେକଧା ।
କତ୍ୱା ସୋ ନୱମେ ୱସ୍ସେ, ୟଥାକମ୍ମମୁପାଗମି ॥
ଲଂକାଭିସେକଂ ପତ୍ୱାନ, ୟୁୱରାଜୋଦୟୋ ତତୋ ।
ସେନନାମାଦିପାଦଂ ସୋ, ଓପରଜ୍ଜେ’ଭି ସେଚୟି ॥
ନିଦ୍ଦାଲୁ ମଜ୍ଜପୋ ଆସି, ରାଜା ପାପେନ ଜନ୍ତୁନଂ ।
ଚୋଳୋ ପମତ୍ତତଂ ତସ୍ସ, ସୁତ୍ୱା ସନ୍ତୁଟ୍ଠମାନସୋ ॥
ପଣ୍ଡୁଦେସାତିସେକଂ ସୋ, ପତ୍ତୁକା ମେତ୍ଥ ପେସୟି ।
ମକୁଟାଦୀନମତ୍ଥାୟ, ଠପିତାନଂୱ ପଣ୍ଡୁନା ॥
ତାନି ନାଦାସି ସୋ ରାଜା, ତେନ ଚୋଳୋ ମହବ୍ବଲୋ ।
ବଲଂ ସନ୍ନୟ୍ହ ପେସେସି, ବଲକ୍କାରେନ ଗଣ୍ହିତୁଂ ॥
ତଦା ସେନାପତି ଏତ୍ଥ, ପଚ୍ଚନ୍ତେ କୁପିତେ ଗତୋ ।
ଆଣାପେତ୍ୱାନ ତଂ ରାଜା, ୟୁଜ୍ଝନତ୍ଥାୟ ପେସୟି ॥
ହତୋ ସେନାପତି ତତ୍ଥ, ୟୁଜ୍ଝି ନ ରଣେ ମତୋ ।
କକୂଟାଦୀନି ଆଦାୟ, ରାଜା ସୋ ରୋହଣଂ ଅଗା ॥
ଗନ୍ତ୍ୱା ଚୋଳବଲଂ ତତ୍ଥ, ଅଲଭିତ୍ୱା ପୱେସନଂ ।
ନିୱତ୍ତିତ୍ୱା ସକଂ ରଟ୍ଠଂ, ଅଗମାସି ଇଧତା ଭୟା ॥
ତତୋ ସେନାପତିଟ୍ଠାନେ, ୱିଦୁରଗ୍ଗଂ ତୁ ନାୟକଂ ।
ଠପେସି ରାଜା ଲଂକିନ୍ଦୋ, ତେଜୱନ୍ତଂ ମହାମତିଂ ॥
ପଚ୍ଚନ୍ତଂ ଚୋଳରାଜସ୍ସ, ଘାତେତ୍ୱା ସୋ ଚମୂପତି ।
ଆଣାପେସି ଇତୋ ନୀତଂ, ଦସ୍ସେତ୍ୱାନ ୱିଭୀସିତଂ ॥
ତତୋ ଦାପେସି ସୋ ସବ୍ବ-ପରିକ୍ଖାରଂ ମହାରହଂ ।
ପଂସୁକୂଲିକଭିକ୍ଖୂନଂ, ସବ୍ବେସଂ ଦୀପୱାସିନଂ ॥
ମହାୱିହାରେ ଲଂକିନ୍ଦୋ, ପଟିବିମ୍ବସ୍ସ ସତ୍ଥୁନୋ ।
ଜଲନ୍ତଂ ମଣିରଂସୀହି, ଅକା ଚୂଳାମଣିଂ ତଦା ॥
ଓରୋଧା ୱିଦୁରା ତସ୍ସ, ପାଦଜାଲେନ ପୂଜୟି ।
ମଣୀହି ପଜ୍ଜଲନ୍ତେହି, ପଟିମଂ ତଂ ସିଲାମୟଂ ॥
ଝାପିତଂ ଚୋଳରାଜସ୍ସ, ବଲେନ ମଣିନାମକଂ ।
ପାସାଦଂ କାତୁମାରଦ୍ଧୋ, ଚୁତୋ ୱସ୍ସମ୍ହି ଅଟ୍ଠମେ ॥
ପଞ୍ଚେତେ ୱସୁଧାଧିପା ୱସୁମହିଂ ଏକାତପତ୍ତଙ୍କିତଂ ।
ଭୁତ୍ୱା ନିଗ୍ଗହସଙ୍ଗହେହି ସକଲଂ ଲୋକଂ ୱସେ ୱତ୍ତିୟ ।
ୟା ତା ମଚ୍ଚୁୱସଂ ସପୁତ୍ତୱଣିତା ସାମଚ୍ଚମିତ୍ତାନୁଗା ।
ଇଚ୍ଚେୱଂ ସତତଂ ସରନ୍ତୁ ସୁଜନା ହାତୁଂ ପମାଦଂ ମଦଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପଞ୍ଚରାଜକୋ ନାମ
ଏକପଞ୍ଞାସତିମୋ ପରିଚ୍ଛେଦୋ ।
ଦ୍ୱିପଞ୍ଞାସତିମ ପରିଚ୍ଛେଦ
ତିରାଜକୋନାମ
ତତୋ ଲଙ୍କାଭିସେକଂ ସୋ, ପତ୍ୱା ସେନୋ କମାଗତଂ ।
ମହିନ୍ଦସ୍ସାଦିପାଦସ୍ସ, ୟୁୱରାଜପଦଂ ଅଦା ॥
ପଞ୍ଞୋ ମହାକୱୀ ବ୍ୟତ୍ତୋ, ମଜ୍ଝତ୍ତୋ ମିତ୍ତସତ୍ତୁସୁ ।
ୟୁତ୍ତୋ ଦୟାୟ ମେତ୍ତାୟ, ରାଜା ସୋ ସବ୍ବଦା ଅହୁ ॥
କାଲଂ ଦେୱୋ’ନତିକ୍କମ୍ମ, ସମ୍ମା ଧାରାଭିୱସ୍ସତି ।
ରଟ୍ଠେ ତସ୍ମିଂ ୱସନ୍ତା’ସୁଂ, ସୁଖିତା ନିବ୍ଭୟା ସଦା ॥
ସୁତ୍ତନ୍ତଂ ଲୋହପାସାଦେ, ନିସିନ୍ନୋ ୱଣ୍ଣୟୀ ତଦା ।
ନିକାୟତ୍ତୟୱାସୀହି, ରାଜା ସୋ ପରିୱାରିତୋ ॥
ଦାଠଧାତୁକରଣ୍ଡଂ ସୋ, ନାନାରତନଭୂସିତଂ ।
ଅକା ଚତୁୱିହାରେସୁ, ଧାତୁପୂଜା ଚ’ନେକଧା ॥
ପରିୱେଣଂ ସିତ୍ଥଗାମଂ, କାରେତ୍ୱା ୱୁତ୍ଥମତ୍ତନା ।
ଲୋକଂ ପୁତ୍ତଂୱ ପାଲେତ୍ୱା, ତିୱସ୍ସେନ ଦିୱଙ୍ଗତୋ ॥
ୟୁୱରାଜା ମହିନ୍ଦୋ ସୋ, ରାଜାସି ତଦନନ୍ତରଂ ।
ମହାପୁଞ୍ଞୋ ମହାତେଜୋ, ମହାସେନୋ ମହାୟସୋ ॥
ଏକଚ୍ଛତ୍ତଂ ଅକା ଲଙ୍କଂ, ଘାତେତ୍ୱା ଚୋରୁପଦ୍ଦୱଂ ।
ଅକଂସୁ ତମୁପଟ୍ଠାନଂ, ନିଚ୍ଚମଣ୍ଡଲନାୟକଂ ॥
ୱିଜ୍ଜମାନେପି ଲଙ୍କାୟଂ, ଖତ୍ତିୟାନଂ ନରାଧିପୋ ।
କାଲିଙ୍ଗଚକ୍କୱତ୍ତିସ୍ସ, ୱଂସେ ଜାତଂ କୁମାରିକଂ ॥
ଆଣାପେତ୍ୱାନ ତଂ ଅଗ୍ଗ-ମହେସିଂ ଅତ୍ତନୋ ଅକା ।
ତସ୍ସା ପୁତ୍ତା ଦୁୱେ ଜାତା, ଧୀତା ଏକା ମନୋରମା ॥
ଆଦିପାଦେ ଅକା ପୁତ୍ତେ, ଧୀତରଂ ଚୋପରାଜିନିଂ ।
ଇତି ସୀହଳୱଂସଞ୍ଚ, ପଟ୍ଠପେସି ସଭୂପତି ॥
ବଲକାୟଂ ଇମଂ ଦେସଂ, ମଦ୍ଦନତ୍ଥାୟ ୱଲ୍ଲଭୋ ।
ପେସେସି ନାଗଦୀପଂ ସୋ, ସୁତ୍ୱା ତଂ ଭୂପତି ଇଧ ॥
ବଲଂ ଦତ୍ୱାନ ସେନୱ୍ହ-ରାଜସେନାପତିଂ ତଦା ।
ୱଲ୍ଲଭସ୍ସ ବଲେନେ’ସ, ୟୁଜ୍ଝିତୁଂ ତତ୍ଥ ପେସୟି ॥
ଗନ୍ତ୍ୱା ସେନାପତୀ ତତ୍ଥ, ବଲେନେ’ତସ୍ସ ରାଜିନୋ ।
ୟୁଜ୍ଝିତ୍ୱା ତଂ ୱିନାସେତ୍ୱା, ଗଣ୍ହି ସୋ ୟୁଦ୍ଧମଣ୍ଡଲେ ॥
ଅସକ୍କେନ୍ତୋ ଇମଂ ଜେତୁଂ, ରାଜା ନଂ ୱଲ୍ଲଭାଦୟୋ ।
ରାଜାନୋ ମିତ୍ତସମ୍ବନ୍ଧଂ, ଲଂକିନ୍ଦେନ ଅକଂସୁ ତେ ॥
ଇଚ୍ଛେୱଂ ରାଜିନୋ ତେଜୋ, ଜମ୍ବୁଦୀପମୱତ୍ଥରି ।
ପତ୍ଥରିତ୍ୱାନ ଲଂକାୟଂ, ଉଲ୍ଲଙ୍ଘିତ୍ୱାନ ସାଗରଂ ॥
ସଦ୍ଧମ୍ମଂ କଥାୟନ୍ତାନଂ, କତ୍ୱା ସମ୍ମା ନ ମୁତ୍ତମଂ ।
ଧମ୍ମଂ ସୁତ୍ୱାନ ସୋ ରାଜା, ପସନ୍ନୋ ବୁଦ୍ଧସାସନେ ॥
ରାଜା ସୋ ସନ୍ନିପାତେତ୍ୱା, ପଂସୁକୂଲିକଭିକ୍ଖୱୋ ।
ୟାଚିତ୍ୱା ଅତ୍ତନୋ ଗେହଂ, ଆଣାପେତ୍ୱାନ ସାଧୁକଂ ॥
ଆସନଂ ପଞ୍ଞପେତ୍ୱାନ, ନିସୀଦାପିୟ ଭୋଜନଂ ।
ଦାପେସି ୱିପୁଲଂ ସୁଦ୍ଧଂ, ସଦା ଏକଦିନେ ୱିୟ ॥
ଅନେକବ୍ୟଞ୍ଜନଂ ରାଜା-ରଞ୍ଞକାନଂ ତପସ୍ସିନଂ ।
ପେସେସି ଭୋଜନଂ ସୁଦ୍ଧଂ, ମହଗ୍ଘଂ ୱିପୁଲଂ ସଦା ॥
ୱେଜ୍ଜେୱ ପେସୟିତ୍ୱାନ, ୱିଲାନାନଂ ତପସ୍ସିନଂ ।
ସନ୍ତିକଂ ସୋ ଦୟାୱାସୋ, ତିକିଚ୍ଛାପେସି ନିଚ୍ଚସୋ ॥
ଗୁଳାନି ଘନପାକାନି, ଲସୁଣାନଂ ରସାନି ଚ ।
ତମ୍ବୁଲମୁଖୱାସଞ୍ଚ, ପଚ୍ଛଭତ୍ତେ ଅଦା ସଦା ॥
ପତ୍ତେସୁ ପୂରୟିତ୍ୱାନ, ଲସୁଣଂ ମରିଚମ୍ପି ଚ ।
ପିପ୍ଫଲିସଙ୍ଗୀୱେରାନି, ଗୁଳାନି ତିଫଲାନି ଚ ॥
ଘତଂ ତେଲଂ ମଧୁଞ୍ଚାୟ, ପାପୁରତ୍ଥରଣାନି ଚ ।
ପଂସୁକୂଲିକଭିକ୍ଖୂନଂ, ପଚ୍ଚେକଂ ସବ୍ବଦା ଅଦା ॥
ଚୀୱରାଦୀନି ସବ୍ବାନି, ପରିକ୍ଖାରାନି ଭୂପତି ।
କାରାପେତ୍ୱାନ ଦାପେସି, ଭିକ୍ଖୂନଂ ପଂସୁକୁଲିନଂ ॥
ରାଜା ମହାୱିହାରସ୍ମିଂ, ଏକେକସ୍ସ ହି ଭିକ୍ଖୁନୋ ।
ପଚ୍ଚେକଂ ନୱୱତ୍ଥାନି, ଚୀୱରତ୍ଥାୟ ଦାପୟି ॥
ନିକାୟତ୍ତୟୱାସୀନଂ, ଭିକ୍ଖୂନଂ ଲାଭୱାସିନଂ ।
ତୁଲାଭାରମଦା ଦ୍ୱୀସୁ, ୱାରେସୁ ସମହୀପତି ॥
ରାଜାନୋ ସଙ୍ଘଭୋଗତୋ ।
ନ ଗଣ୍ହନ୍ତୂନି ପାସାଣେ,
ଲିଖାପେତ୍ୱା ନିଧାପୟି ॥
କଥାପେତ୍ୱାନ ବୁଦ୍ଧସ୍ସ, ସରଣାନି ଗୁଣେନୱ ।
ଅନାଥେହି ଚ ତେସଞ୍ଚ, ଭତ୍ତୱତ୍ଥାନି ଦାପୟି ॥
ଦାନସାଲଂ କରିତ୍ୱାନ, ହତ୍ଥିସାଲକଭୂମିୟଂ ।
ୟାଚକାନଂ ଅଦା ଦାନଂ, ତେସଞ୍ଚ ସୟନାସନଂ ॥
ୱେଜ୍ଜସାଲାସୁ ସବ୍ବାସୁ, ଭେସଜ୍ଜଂ ମଞ୍ଚକଞ୍ଚ ସୋ ।
ଚୋରାନଂ ବନ୍ଧନାଗାରେ, ନିଚ୍ଚଂ ଭତ୍ତାନି ଦାପୟି ॥
ୱାନରାନଂ ୱରହାନଂ, ମିଗାନଂ ସୁନଖାନ ଚ ।
ଭତ୍ତଂ ପୂୱଞ୍ଚ ଦାପେସି, ଦୟାୱାସୋ ୟଥିଚ୍ଛକଂ ॥
ରାଜା ଚତୁୱିହାରେସୁ, କତ୍ୱା ସୋ ୱୀହିରାସୟୋ ।
ୟଥିଚ୍ଛିତେନ ଗଣ୍ହନ୍ତୁ, ଅନାଥା ଇତି ଦାପୟି ॥
ନାନାପୂଜାହି ପୂଜେତ୍ୱା, କତ୍ୱା ମଙ୍ଗଲମୁତ୍ତମଂ ।
କଥାପେସି ଚ ଭିକ୍ଖୂହି, ବ୍ୟତ୍ତେହି ୱିନୟଂ ତଦା ॥
ଥେରେନ ଧମ୍ମମିତ୍ତେନ-ସିତ୍ଥଗାମକୱାସିନା ।
ପୂଜୟିତ୍ୱାନ କାରେସି, ଅଭିଧମ୍ମସ୍ସ ୱଣ୍ଣନଂ ॥
ଦାଠାନାଗା’ଭିଧାନେନ, ଥେରେନା’ରଞ୍ଞୱାସିନା ।
ଲଂକାଲଂକାରଭୂତେନ, ଅଭିଧମ୍ମଂ କଥାପୟି ॥
ପଟ୍ଟକଞ୍ଚୁକପୂଜାହି, ହେମମାଲିକଚେତିୟଂ ।
ନଚ୍ଚଗୀତେହି ଗନ୍ଧେହି, ପୁପ୍ଫେହି ୱିୱିଧେହି ଚ ॥
ଦୀପମାଲାହି ଧୂପେହି, ପୂଜୟିତ୍ୱାନ’ନେକଧା ।
ତସ୍ସ ୱତ୍ଥାନି ଭାଜେତ୍ୱା, ଭିକ୍ଖୂନଂ ଦାପୟୀ ସୟଂ ॥
ସଦା ସୋ ଅତ୍ତନୋ ରଜ୍ଜେ, ଉୟ୍ୟାନେସୁ ତହିଂତହିଂ ।
ଆଣାପେତ୍ୱାନ ପୁପ୍ଫାନି, ପୂଜେସି ରତନତ୍ତୟଂ ॥
ପାସାଦଂ ଚନ୍ଦନଂ ନାମ, କାତୁଂ ମରିଚୱଟ୍ଟିୟଂ ।
ଅକାରମ୍ଭଞ୍ଚ ଭିକ୍ଖୂନଂ ଭୋଗଗାମେ ଚ ଦାପୟି ॥
କେସଧାତୁଂ ନିଧାପେତ୍ୱା, କରଣ୍ଡଂ ରତନେହି ସୋ ।
କାରୟିତ୍ୱାନ ପୂଜେସି, ଠପେତ୍ୱା ତତ୍ଥ ଭୂପତି ॥
ସୋଣ୍ଣରଜତପଟ୍ଟେହି, ଥୂପାରାମମ୍ହି ଚେତିୟଂ ।
ଛାଦାପେତ୍ୱା ୟଥାରଜ୍ଜଂ, ପୂଜଂ କାରେସି ଭୂପତି ॥
ତସ୍ମିଂ ଧାତୁଘରେ ରାଜା, ସୋଣ୍ଣଦ୍ୱାରମକାରୟି ।
ପଜ୍ଜଲନ୍ତଂ ସିନେରୁଂୱ, ରଂସୀହି ସୂରିୟସ୍ସ ସୋ ॥
ଝାପିତଂ ଚୋଳରାଜସ୍ସ, ବଲେନ ପଦଲଞ୍ଛନେ ।
ଚତୁନ୍ନଂ ଚେତିୟାନଂ ସୋ, ରମନୀୟଂ ଘରଂ ଅକା ॥
ଝାତଂ ନଗରମଜ୍ଝମ୍ହି, ଦାଠାଧାତୁଘରଂ ଅକା ।
ଧମ୍ମସଙ୍ଗଣୀଗେହଞ୍ଚ, ମହାପାଳିଞ୍ଚ ଭୂପତି ॥
ତମ୍ବୂଲମଣ୍ଡପଂ କତ୍ୱା, ତତ୍ଥ ସୁଙ୍କଂ ମହୀପତି ।
ଭିକ୍ଖୂନଂ ଥେରୱଂସେ ସୋ, ଭେସଜ୍ଜତ୍ଥାୟ ଦାପୟି ॥
ଉପସ୍ସୟଂ କରିତ୍ୱାନ, ମହାମଙ୍ଗଲନାମକଂ ।
ଥେରୱଂସମ୍ହି ଜାତାନଂ, ଭିକ୍ଖୁନୀନଂ ଅଦାପୟି ॥
ମାତୁଲୋଦୟରାଜେନ, ଆରଦ୍ଧଂ ସାଧୁନା ତଦା ।
ନିଟ୍ଠାପେସି ମହୀପାଲୋ, ପାସାଦଂ ମଣିନାମକଂ ॥
ପରିୱେଣାନି ଚତ୍ତାରି, ତସ୍ମିଂ ଜେତୱନେ ତଦା ।
କାରାପୟିଂସୁ ଚତ୍ତାରୋ, ଅମଚ୍ଚା ତସ୍ସ ରାଜିନୋ ॥
ରଞ୍ଞୋ କିତ୍ତିସମାଦେୱୀ, କିତ୍ତିନାମା ମନୋରମା ।
ପରିୱେଣଂ ଅକାରାମଂ, ଥୂପାରାମସ୍ସ ପଚ୍ଛତୋ ॥
ସା ତସ୍ମିଂ ପରିୱେଣେ ଚ, ଅକା କପ୍ପାସଗାମକେ ।
ଚୀୱରଚେତିୟେ ଚେୱ, ତିସ୍ସୋ ପୋକ୍ଖରଣୀ ସୁଚି ॥
ଦ୍ୱାଦସରତନାୟାମଂ, ଧଜଂ ସୋଣ୍ଣମୟଞ୍ଚ ସା ।
ପୂଜେସି ପୁଞ୍ଞସମ୍ଭାରଂ, ହେମମାଲିକ ଚେତିୟେ ॥
ଗିହୀନଂ ୱଜ୍ଜସାଲଞ୍ଚ, ପୁତ୍ତୋ ତସ୍ସା ପୁରେଅକା ।
ଗୁଣୱାସକ୍କସେନାନୀ, ଭିକ୍ଖୂନଞ୍ଚ ପୁରାବହି ॥
ରାଜା ଚତୁୱିହାରେସୁ, ଦିବ୍ବପାସାଦସନ୍ନିଭେ ।
ମଣ୍ଡପେ କାରୟିତ୍ୱାନ, ଧାତୁପୂଜା ଅନେକଧା ॥
ୱସ୍ସମେକମତିକ୍କମ୍ମ, କାରାପେତ୍ୱା ମହୀପତି ।
ଚାରିତ୍ତଂ ପୁବ୍ବରାଜୂନଂ, ପରିପାଲେସି ସାଧୁକଂ ॥
ଏୱମାଦୀନି ପୁଞ୍ଞାନି, ଉଳାରାନି ଅନେକଧା ।
କତ୍ୱା ସୋଳସମେ ୱସ୍ସେ, ରାଜା ସୋ ତିଦିୱଂ ଗତୋ ॥
ଜାତୋ ପଟିଚ୍ଚ ତଂ ରାଜଂ, ସେନା ଦ୍ୱାଦସୱସ୍ସିକୋ ।
କାଲିଙ୍ଗଦେୱିୟା ପୁତ୍ତୋ, ପତ୍ତରଜ୍ଜୋ ତଦା ଅହୁ ॥
ଉଦୟସ୍ସ କନିଟ୍ଠସ୍ସ, ୟୁୱରାଜପଦଂ ଅଦା ।
ପିତୁ ସେନାପତି ସେନୋ, ତସ୍ସ ସେନାପତି ଅହୁ ॥
ପଚ୍ଚନ୍ତଂ ବଲମାଦାୟ, ଗତେ ସେନାପତିମ୍ହି ସୋ ।
ମାତରା ସହ ୱତ୍ତନ୍ତଂ, କଣିଟ୍ଠଂ ତସ୍ସ ଭାତରଂ ॥
ମାରାପେତ୍ୱା ମହାମଲ୍ଲଂ, ଅକା ସେନାପତିଂ ତଦା ।
ଅମଚ୍ଚଂ ଉଦୟଂ ନାମ, ସକଂ ୱଚନକାରକଂ ॥
ତଂ ସୁତ୍ୱା କୁପିତୋ ହୁତ୍ୱା, ସେନୋ ସେନାପତି ତଦା ।
ବଲମାଦାୟ ଆଗଞ୍ଛି, ଗଣ୍ହିସ୍ସାମୀତି ସତ୍ତୱୋ ॥
ସୁତ୍ୱାନ ତଂ ମହୀପାଲୋ, କତୱନ୍ତଂ ୱାଚମତ୍ତନୋ ।
ରକ୍ଖାମି ତଂ ଅମଚ୍ଚନ୍ତି, ଗତୋ ନିକ୍ଖମ୍ମ ରୋହଣଂ ॥
ତସ୍ସ ମାୟା ନିୱତ୍ତିତ୍ୱା, ୟୁୱରାଜଞ୍ଚ ରାଜିନିଂ ।
ଆଦାୟ କୁପିତା ତେନ ଆଣାପେସି ଚମୂପତିଂ ॥
ତାୟ ସୋ ସଙ୍ଗହୀତୋୱ, ଦମିଳେ ସନ୍ନିପାତିୟ ।
ଦତ୍ୱା ଜନପଦଂ ତେସଂ, ପୁଟତ୍ଥିନଗରେ ୱସୀ ॥
ୟୁଜ୍ଝିତୁଂ ତେନ ସୋ ରାଜା, ବଲଂ ପେସେସି ରୋହଣା ।
ସେନାପତି ୱିନାସେସି, ସବ୍ବଂ ତଂ ରାଜିନୋ ବଲଂ ॥
ଦମିଳା ତେ ଜନପଦଂ, ପୀଳେତ୍ୱା ରକ୍ଖସା ୱିୟ ।
ୱିଲୁମ୍ପିତ୍ୱାନ ଗଣ୍ହନ୍ତି, ନରାନଂ ସନ୍ତକଂ ତଦା ॥
ଖିତ୍ତା ମନୁସ୍ସା ଗନ୍ତ୍ୱାନ, ରୋହଣଂ ରାଜସନ୍ତିକଂ ।
ନିୱେଦେସୁଂ ପୱତ୍ତିଂ ତଂ, ମନ୍ତେତ୍ୱା ସଚୀୱେହି ସୋ ॥
ରକ୍ଖିତୁଂ ସାସନଂ ରଟ୍ଠଂ, ତମ୍ପହାୟ ଚମୂପତିଂ ।
ସନ୍ଧିଂ କତ୍ୱାନ ସେନେନ, ପୁଳତ୍ଥିନଗରଂ ଅଗା ॥
ମହେସିଂ ଅତ୍ତଜଂ କତ୍ୱା, ପାଲେତୁଂ ୱଂସମତ୍ତନୋ ।
ପୁତ୍ତଂ ଉପ୍ପାଦୟିତ୍ୱାନ, କସ୍ସପଂ ନାମ ଉତ୍ତମଂ ॥
ୱସନ୍ତେ ତତ୍ଥ ଲଂକିନ୍ଦେ, ଅହିତା ୱଲ୍ଲଭା ଜନା ।
ଅଲଭନ୍ତା ସୁରଂ ପାତୁ-ମାରିୟା ତସ୍ସ ସନ୍ତିକେ ॥
ମଜ୍ଜପାନେ ଗୁଣଂ ୱତ୍ୱା, ପାୟେସୁଂ ତଂ ମହୀପତିଂ ।
ପିୱିତ୍ୱା ମଜ୍ଜପାନଂ ସୋ, ମତ୍ତବ୍ୟାଳୋ ଅହୁ ତଦା ॥
ଆହାରାନଂ ଖୟଂ ପତ୍ୱା, ଚଜିତ୍ୱା ଦୁଲ୍ଲଭଂ ପଦଂ ।
ମତୋ ସୋ ଦସମେ ୱସ୍ସେ, ତରୁଣୋୟେୱ ଭୂପତି ॥
ଇତୋ ୱିଦିତ୍ୱା ଖଲୁପାପମିତ୍ତ-
ୱିଧେୟ୍ୟଭାୱଂ ପରିହାନି ହେତୁଂ ।
ସୁଖତ୍ତିତୋୟେୱ ଇଦ ୱା ହୁରଂ ୱା ।
ଜହନ୍ତୁ ତେ ଘୋରୱିସଂ’ୱ ବାଲଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେତି ରାଜକୋ ନାମ
ଦ୍ୱିପଞ୍ଞାସତିମୋ ପରିଚ୍ଛେଦୋ ।
ତିୱଞ୍ଞାସତିମ ପଚ୍ଛେଦ
ଲଂକାୱିଲୋପୋନାମ
ମହିନ୍ଦୋ ତଂ କଣିଟ୍ଠୋ ସୋ, ରାଜପୁତ୍ତୋ ତଦଚ୍ଚୟେ ।
ଉସ୍ସାପିୟ ସେତଚ୍ଛତ୍ତ-ମନୁରାଧପୁରେ ୱରେ ॥
ସେନ ସେନାନୀନା’ନୀତ ଦେସନ୍ତରଜନା କୁଲେ ।
ତତ୍ଥ ୱାସମକପ୍ପେସି, କିଚ୍ଛେନ ଦସୱଚ୍ଛରେ ॥
ଅପେତନୀତି ମଗ୍ଗସ୍ସ, ମୁଦୁଭୂତସ୍ସ ସବ୍ବସୋ ।
ଉପ୍ପାଦଭାଗଂ ନାଦଂସୁ, ତସ୍ସ ଜାନପଦା ତଦା ॥
ଅଚ୍ଚନ୍ତଂ ଖୀଣଚିତ୍ତୋ ସୋ, ୱସ୍ସମ୍ହି ଦସମେ ୱିଭୂ ।
ୱୁତ୍ତିଦାନେନ ନାସକ୍ଖି, ସଙ୍ଗହେତୁଂ ସକଂ ବଲଂ ॥
ଅଲଦ୍ଧ ୱୁତ୍ତିନୋ ସବ୍ବେ, କେରଳା ସହିତା ତତୋ ।
ନ ୱୁତ୍ତିଦାନଂ ନୋ ୟାୱ, ହୋତି ମାତାୱ ଭୁଞ୍ଜତୁ ॥
ଇତି ରାଜଘରଦ୍ୱାରେ, ସାହସେକରସା ଭୁସଂ ।
ଚାପହତା ନିସୀଦିଂସୁ, ସନ୍ନଦ୍ଧଛୁରିକାୟୁଧା ॥
ହତ୍ଥସାରଂ ସମାଦାୟ, ତେ ୱିୱଞ୍ଚିୟ ଭୂପତି ।
ଉମ୍ମଗ୍ଗତୋ ୱିନିଗ୍ଗମ୍ମ, ତୁରିତୋ ରୋହଣଂ ଅଗା ॥
ସୀଦୁପବ୍ବତଗାମମ୍ହି, ଖନ୍ଧୱାରଂ ନିବନ୍ଧିୟ ।
ଭାତୁ ଜାୟମ୍ମ ହେସିତ୍ତେ, ଠପେତ୍ୱା ସୋ ତହିଂ ୱସୀ ॥
ନ ଚିରସ୍ସେୱ ତସ୍ସାୟ, ମତା ୟସମହୀପତି ।
ମହେସିତ୍ତେ ନିୱେସେସି, ସକଭାତୁସ୍ସ ଧୀତରଂ ॥
ଦେୱିୟା ତାୟ ସଞ୍ଜାତେ, ସୁତେ କସ୍ସପନାମକେ ।
ଅଜ୍ଝାୱୁତ୍ତଂ ୱିହାୟା’ଥ, ଖନ୍ଧାୱାରଂ ମହୀମତି ॥
କାରୟିତ୍ୱାନ ନଗରଂ, କପ୍ପଗଲ୍ଲକଗାମକେ ।
ଅଧିପଚ୍ଚଂ ପୱତ୍ତେନ୍ତୋ, ରୋହଣେ ସୁଚିରଂ ୱସୀ ॥
ତତୋ ସେସେସୁ ଠାନେସୁ, କେରଳା ସୀହଳା ତଦା ।
କଣ୍ଣାଟା ଚ ୟଥାକାମ-ମାଧିପଚ୍ଚଂ ପୱତ୍ତୟୁଂ ॥
ଅଥସ୍ସ ୱାଣିଜୋ ଏକୋ, ପରତୀରଂ ଇଧାଗତୋ ।
ଗନ୍ତ୍ୱା ପୱତ୍ତିଂ ଲଂକାୟ, ଚୋଳରଞ୍ଞୋ ନିୱେଦୟି ॥
ସୋତଂ ସୁଣିତ୍ୱା ପେସେସି, ଲଂକାଗହଣମାନସୋ ।
ବଲଂ ମହନ୍ତଂ ବଲୱା, ତଂ ଖିପ୍ପଂ ଲଂକମୋତରି ॥
ପଟ୍ଠାୟୋ ତିଣ୍ଣଠାନମ୍ହା, ୱିହେଠେନ୍ତଂ ବହୂ ଜନେ ।
ଅନୁକ୍କମେନ ତଂ ଚୋଳ-ବଲଂ ରୋହଣମଜ୍ଝଗା ॥
ଛତ୍ତିଂସେ ରାଜିନୋ ୱସ୍ସେ, ମହେସିଂ ରତନାନି ଚ ।
ମକୁଟଞ୍ଚ କମାୟାତଂ, ସବ୍ବମାଭରଣଂ ତଥା ॥
ଅମୂଲିକଞ୍ଚୱଜିର-ୱଲୟଂ ଦେୱଦତ୍ତିୟଂ ।
ଅଚ୍ଛେଜ୍ଜଚ୍ଛୁରିକଂ ଛିନ୍ନ-ପଟ୍ଟିକା ଧାତୁକଞ୍ଚ ତେ ॥
ପୱିଟ୍ଠଂ ୱନଦୁଗ୍ଗମ୍ହି, ଭୟାତଞ୍ଚ ମହୀପତିଂ ।
ଜୀୱଗ୍ଗାହମଗଣ୍ହିଂସୁ, ସନ୍ଧିଲେସମ୍ପଦସ୍ସିୟ ॥
ମହୀପାଲଂ ଧନଂ ତଞ୍ଚ, ସବ୍ବଂ ହତ୍ଥଗତଂ ତତୋ ।
ପେସୟିଂସୁ ଲହୁଂ ଚୋଳ-ମହୀପାଲସ୍ସ ସନ୍ତିକଂ ॥
ନିକାୟତ୍ତିତୟେ ଧାତୁ-ଗବ୍ଭେ ଲଂକାତଲେ ଖିଲେ ।
ମହାରହେ ସୁୱଣ୍ଣାଦି-ପଟିବିମ୍ବେ ଚ’ନପ୍ପକେ ॥
ଭିନ୍ଦିତ୍ୱା ସହସା ସବ୍ବେ, ୱିହାରେ ଚ ତହିଂ ତହିଂ ।
ୟଥୋ ଜୋହାରିନୋ ୟକ୍ଖା, ଲଙ୍କାୟଂ ସାରମଗ୍ଗହୁଂ ॥
ତେ ଚୋଳା ରାଜରଟ୍ଠଂ ତଂ, ପୁଲତ୍ଥିପୁରନିସ୍ସିତା ।
ରକ୍ଖପାସାଣକଣ୍ଡୱ୍ହ, ଠାନାୱଧିମଭୁଞ୍ଜିସୁଂ ॥
ତଂ କୁମାରକମାଦାୟ, କସ୍ସପଂ ରଟ୍ଠୱାସିନୋ ।
ୱଡ୍ଢେନ୍ତି ଚୋଳଭୟତୋ, ଗୋପୟନ୍ତା ସୁସାଦରା ॥
ଚୋଳରାଜା କୁମାରଂ ତଂ, ସୁତ୍ୱା ଦ୍ୱାଦସୱସ୍ସିକଂ ।
ଗହଣତ୍ଥାୟ ପେସେସି, ମହାମଚ୍ଚେ ମହାବଲେ ॥
ଊନଂ ପଞ୍ଚସହସ୍ସେନ, ୟୋଧଲକ୍ଖଂ ସମାଦିୟ ।
ସବ୍ବଂ ତେ ରୋହଣଂ ଦେସଂ, ସଙ୍ଖୋଭେସୁ ମିତୋ ତତୋ ॥
କିତ୍ତିନାମୋ’ଥ ସଚିୱୋ, ମକ୍ଖକୁଦ୍ରୂସୱାସିକୋ ।
ମୁଦ୍ଧନାମୋ ତଥାମଚ୍ଚୋ, ମାରଗଲ୍ଲକୱାସିକୋ ॥
ଉଭୋପି ତେ ମହାୱୀରା, ୟୁଦ୍ଧୋପାୟୱିଚକ୍ଖଣା ।
ଚୋଳସେନଂ ୱିନାସେତୁ-ମଚ୍ଚନ୍ତକତନିଚ୍ଛୟା ॥
ପଲୁଟ୍ଠଗିରିନାମମ୍ହି, ଠାନେ ଦୁଗ୍ଗେ ନିୱେସିୟ ।
କତ୍ୱା ଛମାସଂ ସଙ୍ଗାମଂ, ହନିଂସୁ ଦମିଳେ ବହୂଂ ॥
ହତାୱସିଟ୍ଠା ଚୋଳାତା, ରଣେ ତସ୍ମିଂ ଭୟଦ୍ଦିତା ।
ପଲାୟିତ୍ୱା ୟଥାପୁବ୍ବଂ, ପୁଲତ୍ତିପୁରମାୱସୁଂ ॥
କୁମାରୋ ଜୟିତୋ ଦିସ୍ୱା, ଉଭୋ ତେ ସଚିୱେ ତଦା ।
ହଟ୍ଠତୁଟ୍ଠୋ ‘‘ୱରଂ ତାତା, ଗଣ୍ହଥା’’ତି ସ ଚବ୍ରୱୀ ॥
ବୁଦ୍ଧୋ ପୱେଣିଗାମଂ ସୋ, ୱରଂ ୟାଚିତ୍ଥ କିତ୍ତିକୋ ।
ସଙ୍ଘିକଂ ଗହିତଂ ଭାଗଂ, ୱିସ୍ସଜ୍ଜେତୁଂ ୱରଂ ୱରି ॥
ରାଜପୁତ୍ତୱରାଲଦ୍ଧ-ୱରା’ମଚ୍ଚୱରା ତଦା ।
ନିଦ୍ଦରା ସାଦରା ୱୀରା, ପାଦେ ୱନ୍ଦିଂସୁ ତସ୍ସ ତେ ॥
ରାଜା ଦ୍ୱାଦସୱସ୍ସାନି, ୱସିତ୍ୱା ଚୋଳମଣ୍ଡଲେ ।
ଅଟ୍ଠତାଲୀସୱସ୍ସମ୍ହି, ମହିନ୍ଦୋ ସୋ ଦିୱଂଗତୋ ॥
ପମାଦ ଦୋସାନଗତେନ ଏୱଂ,
ଲଦ୍ଧା’ପି ଭୋଗାନନଥିରା ଭୱନ୍ତି ।
ଇଚ୍ଚପ୍ପମଂଦଂ ହିତମାସସାନୋ,
ନିଚ୍ଚଂ ସୁୱିଞ୍ଞୂସୁସମା ଚରେୟ୍ୟ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଲଂକାୱିଲୋପୋ ନାମ
ତିପଞ୍ଞାସତିମୋ ପରିଚ୍ଛେଦୋ ।
ଚତୁପଞ୍ଞାସତିମ ପରିଚ୍ଛେଦ
ଛ ରାଜକୋନାମ
କତ୍ୱା ୱିକ୍କମ୍ମ ବାହୂ’ତି, ନାମ ଭୂପାଲସୂନୁତୋ ।
ତସ୍ସାଣାୟ ପୱତ୍ତିଂସୁ, ସାଦରଂ ସୀହଳା ଖିଲା ॥
ସୋ ରାଜା ଦମିଳେ ହନ୍ତୁଂ, ଧନଂ ସଞ୍ଚିୟ’ନେକାଧା ।
ସଙ୍ଗହଂ ସେୱକାନଞ୍ଚ, କୁରୁମାନୋ ୟଥୋଚିତଂ ॥
ଅଲଙ୍କାରକିରୀଟାନି, ଛତ୍ତସୀହାସନାନି ଚ ।
କାରୟିତ୍ୱା’ଭିସେକତ୍ଥଂ, ସଚିୱେହା’ଭିୟାଚିତୋ ॥
ନ ୟାୱ ରାଜରଟ୍ଠସ୍ସ, ଗହଣଂ ହୋତି ତାୱ ମେ ।
ଛତ୍ତୁସ୍ସାପନକମ୍ମେନ, କିଂ ତେନା’ତି ୱିୱାରିୟ ॥
ସତଂ ନରସହସ୍ସାନଂ, ସଙ୍କଲେତ୍ୱା ମହବ୍ବଲୋ ।
ସଙ୍ଗାମାରବ୍ଭ କାଲମ୍ହି, ୱାତରୋଗାଭିପୀଳିତୋ ॥
ୟୁଜ୍ଝିତୁଂ ସମୟୋ ନେତି, ଦ୍ୱାଦସେ ୱଚ୍ଛରେ ଲହୁଂ ।
ଉପେଚ୍ଚ ଦେୱନଗରଂ, ଗଞ୍ଛିଦେୱସହବ୍ୟତଂ ॥
କିତ୍ତିନାମୋ ଚ ସଚିୱୋ, ସେନାପଚ୍ଚମଧିଟ୍ଠିତୋ ।
ରଜ୍ଜତ୍ଥିକୋ ଦିନାନଟ୍ଠ, ନିଜାଣଂ ସମ୍ପୱତ୍ତୟି ॥
ଘାତେତ୍ୱା ତଂ ମହାଲାନ-କିତ୍ତିନାମୋ ମହବ୍ବଲୋ ।
ପତ୍ୱା’ଭିସେକଂ ଭୁଞ୍ଜନ୍ତୋ, ଦେସଂ ତଂ ରୋହଣୱ୍ହୟଂ ॥
ସଂୱଚ୍ଛରମ୍ହି ତତିୟେ, ଚୋଳୟୁଦ୍ଧେ ପରାଜିତୋ ।
ସହତ୍ଥେନ ସକଂ ସୀସଂ, ଛିନ୍ଦିତ୍ୱା ସହସା ମରି ॥
ତଦାପିତେ କିରୀଟାଦି-ଧନସାରଂ ସମାଦିୟ ।
ପେସେସୁଂ ଦମିଳା ଚୋଳ-ମହୀପାଲସ୍ସ ସନ୍ତିକଂ ॥
ଭୟା ସରଟ୍ଠଂ ହିତ୍ୱା’ଥ, ଦୁଟ୍ଠଦେସେ ୱସଂ ତଦା ।
ଏକୋ ୱିକ୍କମପଣ୍ଡୂତି, ୱିସ୍ସୁତୋ ପତ୍ଥିୱତ୍ତଜୋ ॥
ୱିଞ୍ଞାତଲଙ୍କାୱୁତ୍ତନ୍ତୋ, ଦେସମାଗମ୍ମ ରୋହଣଂ ।
କାଳତିତ୍ଥେ ୱସଂ ୱସ୍ସ-ମେକଂ ରଜ୍ଜମକାରୟି ॥
ରାମନ୍ୱୟସମୁବ୍ଭୂତୋ, ତଦାୟୁଜ୍ଝ ପୁରାଗତୋ ।
ଜଗତୀ ପାଲନାମେନ, ୱିସ୍ସୁତୋ ଭୂଭୁଜତ୍ତଜୋ ॥
ରଣେ ୱିକ୍କମପଣ୍ଡୁତଂ, ଘାତାପେତ୍ୱା ମହବ୍ବଲୋ ।
ତତୋ ଚତ୍ତାରି ୱସ୍ସାନି, ରଜ୍ଜଂ କାରେସି ରୋହଣେ ॥
ତମ୍ପି ଚୋଳାରଣେ ହନ୍ତ୍ୱା, ମହେସିଂ ଧୀତରା ସହ ।
ୱିତ୍ତସାରଞ୍ଚ ସାକଲଂ, ଚୋଳରଟ୍ଠମପେସୟୁଂ ॥
ରାଜା ପରକ୍କମୋ ନାମ, ପଣ୍ଡୁରାଜସୁତୋ ତତୋ ।
ଅକା ୱସ୍ସଦ୍ୱୟଂ ଚୋଳା, ଘାତେସୁଂ ତମ୍ପି ୟୁଜ୍ଝିୟ ॥
ଇମେ ଭୁସଂ ଲୋଭବଲାଭିଭୂତା,
ଗତା ଅସେସା ୱିୱସା ୱିନାସଂ ।
ଇଚ୍ଚେୱମଞ୍ଞାୟ ସଦା ସପଞ୍ଞୋ,
ତଣ୍ହକ୍ଖୟେୟେୱ ରତିଂ କରେୟ୍ୟ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଛ ରାଜକୋ ନାମ
ଚତୁପଞ୍ଞାସତିମୋ ପରିଚ୍ଛେଦୋ ।
ପଞ୍ଚପଞ୍ଞାସତିମ ପରିଚ୍ଛେଦ
ରୋହଣାରାତି ୱିଜୟୋନାମ
ଲୋକନାମୋ ଚମୂନାଥୋ, ମକ୍ଖକୁଦ୍ରୂସୱାସିକୋ ।
ସଚ୍ଚପଟିଞ୍ଞୋ ଧୀତିମା, ଚୋଳଦପ୍ପୱିଘାତନୋ ॥
ଅଭିଭୂୟ ଜନେ ପତ୍ୱା, ରଜ୍ଜଂ ରୋହଣମଣ୍ଡଲେ ।
ୱସୀ କାଜରଗାମମ୍ହି, ଚାରିତ୍ତୱିଧିକୋୱିଦୋ ॥
ଅହୁ ତଦା କିତ୍ତିନାମୋ, ରାଜପୁତ୍ତୋ ମହବ୍ବଲୋ ।
ତସ୍ସ ୱଂସାଦିସମ୍ପତ୍ତୀ, ନୁପୁବ୍ବେନ ପୱୁଚ୍ଚତେ ॥
ସୁତୋ କସ୍ସପଭୂପସ୍ସ, ମାଣନାମେନ ୱିସ୍ସୁତୋ ।
ଆଦିପାଦୋ ଅହୁ ଧୀରୋ, ସଦାଚାରୱିଭୂସିତୋ ॥
ତସ୍ସା’ଥ ଜେଟ୍ଠକୋ ଭାତା, ମାଣୱମ୍ମୋ ମହାମତି ।
ଗୋକଣ୍ଣକସମୀପଟ୍ଠ-ନଦୀତୀରେ ନିସୀଦିୟ ॥
କତମନ୍ତୁପଚାରୋ ସୋ, ୟଥାୱିଧିମସେସତୋ ।
ଅକ୍ଖମାଲଂ ଗହେତ୍ୱାନ, ମନ୍ତଂ ଜପ୍ପିତୁମାରଭି ॥
କୁମାରୋ କିର ଭତ୍ତଗ୍ଗେ, ପାତୁରାସି ସୱାହନୋ ।
ସିଖଣ୍ଡି ମୁଖତୁଣ୍ଡେନ, ବଲିପଟ୍ଟଂ ୱିଖଣ୍ଡିୟ ॥
ସଚ୍ଛିଦ୍ଦକେ ନାଳିକେର-କପାଲେ ୱିଚ୍ଚୁନୋଦକେ ।
ଲୂଖେ ଜଲମପସ୍ସନ୍ତୋ, ଜପନ୍ତସ୍ସ ମୁଖଂଗତୋ ॥
ତତୋ ଭାୱିନିଂ ସିଦ୍ଧି, ମପେକ୍ଖଂ ନୟନଂ ସକଂ ।
ତସ୍ସୋପନେସି, ନିବ୍ଭିଜ୍ଜ, ସୋପି ତଂ ସହସାପିଚି ॥
କୁମାରୋ ତସ୍ସ ସନ୍ତୁଟ୍ଠୋ, କୁମାରସ୍ସାଭିପତ୍ଥିତଂ ।
ୱରଂ ପଦାୟ ନଭସା, ରାଜମାନୋ ଗତୋ ତତୋ ॥
ଭିନ୍ନେକନୟନଂ ଦିସ୍ୱା, ସଚିୱାତଂ ପରୋ ଦିସୁଂ ।
ୱରଲାଭଂ ପକାସେତ୍ୱା, ସମସ୍ସାସେସି ସୋ ଜନେ ॥
ତତୋ ସୋ ସଚିୱାତସ୍ସ, ସନ୍ତୁଟ୍ଠାରାଧୟିଂସୁ ତଂ ।
ଅନୁରାଧପୁରଂ ପତ୍ୱା, ଭିସେକୋ କାରିୟୋ ଇତି ॥
ଅତ୍ଥୋ କୋ ମମରଜ୍ଜେନ, ୱିକଲଙ୍ଗସ୍ସ ସମ୍ପତି ।
ତପୋକମ୍ମଂ କରିସ୍ସାମି, ପବ୍ବଜ୍ଜମୁପଗମ୍ମହଂ ॥
କଣିଟ୍ଠୋ ମାଣନାମୋ ଚ, ଲଙ୍କାରଜ୍ଜଂ କମାଗତଂ ।
ପାଲେତୁ ଇତି ସୋ ରଜ୍ଜଂ, ସମ୍ପତ୍ତଂ ସମ୍ପଟିକ୍ଖିପି ॥
ୱିଞ୍ଞାତଚିତ୍ତସଞ୍ଚାରା, ସଚିୱା ତସ୍ସ ସବ୍ବଥା ।
ୱତ୍ତୁମେତଂ କଣିଟ୍ଠସ୍ସ, ପେସେସୁଂ ପୁରିସେ ତଦା ॥
ସୁତ୍ୱା ତଂ ସୀଘମାଗମ୍ମ, ପସ୍ସିତ୍ୱା ସକଭାତରଂ ।
ପତିତ୍ୱା ପାଦମୂଲମ୍ହି, ବହୁଂ କନ୍ଦିୟ ରୋଦିୟ ॥
ଜେଟ୍ଠେନ ଭାତରା ସଦ୍ଧି-ମନୁରାଧପୁରଂ ଗତୋ ।
ମକୁଟଂ ତତ୍ଥ ଧାରେସି, ଜେଟ୍ଠଚିତ୍ତାନୁୱତ୍ତକୋ ॥
ତତୋ’ଭୟଗିରିଂ ଗନ୍ତ୍ୱା, ପବ୍ବଜ୍ଜଂ ସକଭାତୁନୋ ।
ୟତ ୟୋ ତତ୍ଥ ୟାଚିତ୍ଥ, ବହୁମାନପୁରସ୍ସରଂ ॥
ତତୋ ତେ ୟତୟୋ ତସ୍ସ, ପବ୍ବଜ୍ଜମୁପସମ୍ପଦଂ ।
ଅକଂସୁ ୱିକଲଙ୍ଗସ୍ସ, ସିକ୍ଖାପଦନିରାଦରା ॥
ପରିୱେଣମୁତ୍ତରୋଳ-ମୁଳାରଂ ତସ୍ସ କାରିୟ ।
କତ୍ୱା ତଂ ପରିୱେଣସ୍ସ, ସାମିକଂ ଧରଣୀ ପତି ॥
ଭିକ୍ଖୂନଂ ଛସତଂ ତତ୍ଥ, ୱିଧାୟ ତଦଧୀନକଂ ।
ପରିହାରେ ଅଦା ତସ୍ସ, ପେସ୍ସୱଗ୍ଗେ ଚ ପଞ୍ଚ ସୋ ॥
ସମପ୍ପେସି ଚ ସୋ ନାନା-ସିପ୍ପକମ୍ମୱିଚକ୍ଖଣେ ।
ଜନେ ଚାକା ତଦାୟତ୍ତେ, ସୋ ଦାଠାଧାତୁରକ୍ଖିୟେ ॥
ତସ୍ସେୱାଦକରା’ହେସୁଂ, ଭିକ୍ଖୂ’ଭୟଗିରିମ୍ହି ତେ ।
ରାଜା ଚ ଲୋକଂ ପାଲେସି, ସମ୍ମା ତସ୍ସାନୁସିଟ୍ଠିୟା ॥
ଜନା ତବ୍ବଂସଜା କେଚି, ତଂ ରଜ୍ଜନିରପେକ୍ଖକା ।
ନିୱସିଂସୁ ୟଥାକାମଂ, ମହାସାମି ପଦଂସିତା ॥
ଏତସ୍ସ ମାଣୱମ୍ମସ୍ସ, ରଞ୍ଞୋ ଧମ୍ମନୟଞ୍ଞୁନୋ ।
ଅଗ୍ଗବୋଧିକୁମାରାଦି-ପୁତ୍ତନତ୍ତୁକ୍କମାଗତେ ॥
ୱଂସେ ୱିସୁଦ୍ଧେ ଜାତସ୍ସ, ଭୂପାଲନ୍ୱୟମୁଦ୍ଧନି ।
ସମାସୋଳସକଙ୍କାୟଂ, ସମ୍ମା ରଜ୍ଜାନୁସାସିନୋ ॥
ମହୀପସ୍ସ ମହିନ୍ଦସ୍ସ, ଦୁୱେ ମାକୁଲଧୀତରୋ ।
ଦେୱଲା ଲୋକିକା ଚାତି, ନାମତୋ ୱିସ୍ସୁତା ସୁଭା ॥
ଏତାସୁ ଦ୍ୱୀସୁ ଧୀତାସୁ, ଲୋକିକା ମାତୁଲତ୍ତଜଂ ।
ପଟିଚ୍ଚ ରାଜତନୟଂ, ସୁଭଂ କସ୍ସପନାମକଂ ॥
ସା ମୋଗ୍ଗଲ୍ଲାନ ଲୋକୱ୍ହେ, ପୁତ୍ତେ ଦ୍ୱେ ଲଭି ସୋଭନେ ।
ତେସୁ ଜେଟ୍ଠସୁତୋ ଲୋକ-ସାସନାଧାରକୋୱିଦୋ ॥
ମହାସାମୀତି ପଞ୍ଞାତୋ, ସଙ୍ଘୁପାସନପାଲୟୋ ।
ନେକସାରଗୁଣାୱାସୋ, ୱାସଂ କପ୍ପେସି ରୋହଣେ ॥
ଦାଠୋପତିସ୍ସ ରାଜସ୍ସ, ନତ୍ତା ସୁଗତସାସନେ ।
ପବ୍ବଜ୍ଜୂପଗତୋ ସଦ୍ଧୋ, ଧୁତୱା ସୀଲସଂୱୁତୋ ॥
ପହିତତ୍ତୋ ୱିଚିତ୍ତୋସୋ, ପନ୍ତସେନାସନେ ୱସୀ ।
ଗୁଣଂ ସବ୍ବତ୍ଥ ୱଣ୍ଣେସୁଂ, ତସ୍ମିଂ ଦେୱା ପସୀଦିୟ ॥
ଗୁଣଂ ସୁଣିତ୍ୱା ଲଂକିନ୍ଦୋ, ତଦା ସବ୍ବତ୍ଥ ପତ୍ଥଟଂ ।
ଉପସଙ୍କମ୍ମ ତଂ ନତ୍ୱା, କାତୁମତ୍ତାନୁସାସନଂ ॥
ଆରାଧୟମନିଚ୍ଛନ୍ତଂ, ୟାଚିତ୍ୱାନ ପୁନପ୍ପୁନଂ ।
ଆନୀୟ ୱାସୟିତ୍ୱା ତଂ, ପାସାଦେ ସାଧୁକାରିତେ ॥
ୟତିସ୍ସରସ୍ସ ୱସତୋ, କତ୍ଥ ରାଜାଗୁଣପ୍ପିୟୋ ।
ତସ୍ସାନୁସିଟ୍ଠିମଗ୍ଗଟ୍ଠୋ, ଲୋକଂ ଧମ୍ମେନ ପାଲୟି ॥
ଉଦ୍ଦିସ୍ସାରାଧନଂ ସମ୍ମା, ଲଂକିନ୍ଦେନ କତଂ ତଦା ।
ସେଲନ୍ତରାଭିନିକ୍ଖମ୍ମ, ୟତିନ୍ଦୋ ସୋ ଦୟାନୁଗୋ ॥
ୟତୋ ଭିକ୍ଖୂ ସମୂହେତ୍ୱା, ୱାସଂ କପ୍ପେସି ୟତ୍ଥ ସୋ ।
ସେଲନ୍ତରସମୂହୋ’ତି, ୱିକ୍ଖ୍ୟାତିଂ ସୋ ତତୋ ଗତୋ ॥
ତତୋ ପଟ୍ଠାୟ ୱାସେତ୍ୱା, ରତ୍ତିୟଂ ଦେୱପଲ୍ଲିୟଂ ।
ଦେୱତାନୁମତଂ ଭିକ୍ଖୁଂ, ମୂଲଠାନେ ଠପେନ୍ତି ହି ॥
ମୂଲତ୍ତମାୱସନ୍ତାନଂ, ୟତୀନମନୁସାସନା ।
ଲଂକିସ୍ସରା ପୱତ୍ତନ୍ତି, ପାଲେନ୍ତା ଲୋକସାସନଂ ॥
ତସ୍ସ ଦାଠୋପତିସ୍ସସ୍ସ, ୱଂସଜଂ ରାଜପୁତ୍ତକଂ ।
ବୋଧିଂ ପଟିଚ୍ଚ ତବ୍ବଂସା, ବୁଦ୍ଧନାମା କୁମାରିକା ॥
ଅଲତ୍ଥ ଲୋକିତଂ ନାମ, ଧୀତରଂ ୱରଲକ୍ଖଣଂ ।
କାଲେନ ସା ପଦିନ୍ନା’ସି, ମୋଗ୍ଗଲ୍ଲାନସ୍ସ ଧୀମତୋ ॥
ସା ତଂ ପଟିଚ୍ଚ କିତ୍ତିଞ୍ଚ, ମିତ୍ତଂ ନାମ କୁମାରିକଂ ।
ମହିନ୍ଦଂ ରକ୍ଖିତଂ ଚାପି, ଲତିତ୍ଥ ଚତୁରୋ ପଜା ॥
ଅହୁ ଜେଟ୍ଠସୁତୋ ଧୀରୋ, ୱୀରୋ ତେରସୱସ୍ସିକୋ ।
କତହତ୍ଥୋ ୱିସେସେନ, ଧନୁସିପ୍ପମ୍ହି ସୋ ତତୋ ॥
କଥଂ ଲଙ୍କଂ ଗହେସ୍ସାମି, ଦୂରେତ୍ୱା’ରାତି କଣ୍ଟକଂ ।
ଇତି ଚିନ୍ତାପରୋଗାମେ, ମୂଲସାଲୱ୍ହୟେ ୱସୀ ॥
ଏକୋ ମହାବଲୋ ୱୀରୋ, ବୁଦ୍ଧରାଜୋତି ୱିସ୍ସୁତୋ ।
ୱିଲୋମୱତ୍ତୀ ହୁତ୍ୱାନ, ଲୋକସେନାନିନୋ ତଦା ॥
ପଲାତୋ ଚୁଣ୍ଣସାଲୱ୍ହଂ, ଖିପ୍ପଂ ଜନପଦଂ ତହିଂ ।
କିତ୍ତାଦିକେ ଜନେ ନେକେ, ୱସେ ୱତ୍ତିୟ ସବ୍ବଥା ॥
ସଦ୍ଧିଂ ବନ୍ଧୂହି ସଙ୍ଗାମ-ସୂରେହି ବହୁକେହି ସୋ ।
ମଲୟାଚଲପାଦେସୁ, ୱସୀ ଦୁପ୍ପସହୋ ତଦା ॥
ତସ୍ସ’ନ୍ତିକମୁପାଗମ୍ମ, ସଂୱଚ୍ଛରିକନାୟକୋ ।
ସଙ୍ଘୋ ନାମ କୁମାରସ୍ସ, ସରୂପଂ ସାଧୁୱଂ ବ୍ରୱି ॥
ମହାସାମିସ୍ସ ତନୟୋ, ଜେଟ୍ଠୋ କିତ୍ତି ସନାମକୋ ।
ଧଞ୍ଞଲକ୍ଖଣସମ୍ପନ୍ନୋ, ସମ୍ପନ୍ନମତିୱିକ୍କମୋ ॥
ଜମ୍ବୁଦୀପେପି ତଂ ରଜ୍ଜଂ, କତ୍ତୁମେକାତପତ୍ତକଂ ।
ସମତ୍ଥୋତି ୱିଚିନ୍ତେପି, ଲଙ୍କାଦୀପମ୍ହି କା କଥା ॥
ତସ୍ସ ସୋ ୱଚନଂ ସୁତ୍ୱା, ସେୱିତବ୍ବୋ କୁମାରକୋ ।
ଇତି ନିଚ୍ଛିୟ ପେସେସି, କୁମାରସ୍ସ’ନ୍ତିକଂ ଜନେ ॥
ସୁଣିତ୍ୱା ସୋ ୱଚୋ ତେସଂ, ନିୱତ୍ତନଭୟା ୱିଭୂ ।
ଅଜାନହଂ ପିତୁନ୍ନଂ ସୋ, ୱୀରୋ ଧନୁସହାୟକୋ ॥
ଗେହା ନିକ୍ଖମ୍ମ ପସ୍ସନ୍ତୋ, ସୁନିମିତ୍ତାନିନେକଧା ।
ଅଗାଲହୁଂ ସରୀୱଗ୍ଗ-ପିଟ୍ଠିଗାମଂ ମହାମତି ॥
ତହିଂ ସୋ ନିୱସଂ ୱୀରୋ, ପେସୟିତ୍ୱା ସସେୱକେ ।
ୱିପକ୍ଖାଧିଟ୍ଠିତଂ ଜେସି, ବୋଧିୱାଲୱ୍ହଗାମକଂ ॥
ତତୋ’ଭିମାନୀ ସେନାନୀ, ସେନଂ ସୋ ତତ୍ଥ ପେସୟି ।
ସା ପରିକ୍ଖିପତଂ ଗାମଂ, ସଙ୍ଗାମାୟ ସମାରଭୀ ॥
କୁମାରୋ ତେହି ୟୁଜ୍ଝନ୍ତୋ, ସୁଭଟୋ ପଟୁୱିକ୍କମୋ ।
ଦିସାସୁ ୱିକିରୀସବ୍ବେ, ତୁଲଂ ଚଣ୍ଡୋୱ ମାଳୁତୋ ॥
ଚୁଣ୍ଣସାଲଂ ଜନପଦଂ, ଗନ୍ତ୍ୱା ଠାନୱିଦୂ ତଦା ।
ତହିଂ ୱସଂ ୱସେକାସି, ସବ୍ବଂ ମଲୟମଣ୍ଡଲଂ ॥
ତଦାପି ସେନଂ ସେନିନ୍ଦୋ, ପେସେତ୍ୱା ଅସକିଂ ସକଂ ।
ଅଭିଭୂତିମସକ୍କୋନ୍ତୋ, କାତୁଂ ଦୁମ୍ମନତଂ ଗତୋ ॥
ମକ୍ଖକୁଦ୍ରୁସୱାସିସ୍ସ, ସଚିପସ୍ସାଥ କିତ୍ତିନୋ ।
ସୁତୋ ମହବ୍ବଲୋ ଦେୱ-ମଲ୍ଲୋତି ୱିଦିତୋ ତଦା ॥
ସହିତୋ ବନ୍ଧୁମିତ୍ତେହି, ବହୂ ରୋହଣୱାସିନୋ ।
ସମାଦାୟା’ଭିଗନ୍ତ୍ୱାନ, କୁମାରଂ ପସ୍ସି ସାଦରୋ ॥
ବନ୍ଧିୟ ଛୁରିକଂ ଛେକୋ, ସୋ ପନ୍ନରସୱସ୍ସିକୋ ।
ଆଦିପାଦପଦଂ ତତ୍ଥ, ସମ୍ପାପୁଣି ମହାୟସୋ ॥
ତତୋ ହିରଞ୍ଞମଲୟ, ମୁପାଗମ୍ମ ମହବ୍ବଲୋ ।
ତହିଂ ରେମୁଣସେଲମ୍ହି, ଖନ୍ଧାୱାରଂ ନିବନ୍ଧୟି ॥
ତତ୍ଥାପି ସେନଂ ପେସେତ୍ୱା, ସଙ୍ଗାମେନ୍ତୋ ଚମୂପତି ।
ଅଲଦ୍ଧୱିଜୟୋ ଛନ୍ଦଂ, ପୁନୟୁଦ୍ଧେ ଜହିତତୋ ॥
ଲୋକନାମୋ ଚମୂନାଥୋ, ଲୋକଂ ହିତ୍ୱା ସକଂ ତଦା ।
ଅହୁ ୱସ୍ସମ୍ହି ଛଟ୍ଠେସୋ, ପରଲୋକପରାୟନୋ ॥
ତଦା କସ୍ସପନାମେକୋ, କେସଧାତୁକନାୟକୋ ।
ଜନେ’ଭିଭୂୟୱତ୍ତେସି, ନୀଜାଣଂ ରୋହଣେ ତଦା ॥
ସୁତ୍ୱା ତଂ ଚୋଳସାମନ୍ତୋ, ପୁଳତ୍ଥିନଗରା ତଦା ।
ନିକ୍ଖମ୍ମ ୟୁଦ୍ଧସନଦ୍ଧୋ, ଗନ୍ତ୍ୱା କାଜରଗାମକଂ ॥
କେସାଧାତୁ ତତୋ ୟୁଦ୍ଧେ, ଭିନ୍ଦିତ୍ୱା ଦମିଳଂ ବଲଂ ।
ରକ୍ଖପାସାଣସୀମାୟଂ, ଠପେତ୍ୱା ରକ୍ଖିୟେ ଜନେ ॥
ପଟିଲଦ୍ଧଜୟୁଦ୍ଦାମୋ, ମହାସେନା ପୁରକ୍ଖତୋ ।
ପୁନରାଗମ୍ମ ପାୱେକ୍ଖି, ୱୀରୋ କାଜରଗାମକଂ ॥
ତଦାଦିପାଦୋ ସୁତ୍ୱାନ, ସବ୍ବଂ ସୁତ୍ଥୀରଧାତୁକୋ ।
କେସଧାତୁଂ ନିଘାତେତୁଂ, ବଲଂ ସନ୍ନୟ୍ହି ୱେଗସା ॥
ପୱତ୍ତିଂ ତଂ ସୁଣିତ୍ୱା ସୋ, ସାଭିମାନୋ ଭୁସଂତତୋ ।
ସମତ୍ତଂ ବଲମାଦାୟ, ସିପ୍ପତ୍ଥଲକମାଗମା ॥
ପଞ୍ଚୟୋଜନରଟ୍ଠାଦି-ୱାସିକେସୁ ବହୂଜନେ ।
ସମାଦାୟ ସମାସନ୍ନେ, ରାଜପୁତ୍ତେ ସୁଦୁଜ୍ଜୟେ ॥
ୱିରତ୍ତତଞ୍ଚ ସୋ ଞତ୍ୱା, ବହୁନ୍ନଂ ରଟ୍ଠୱାସିନଂ ।
ଦୁକ୍କରଂ ଏତ୍ଥ ୟୁଦ୍ଧନ୍ତି, ଗତୋ ସୋ ଖଦିରଙ୍ଗଣିଂ ॥
ମହାସେନାୟ ଭୂପାଲ ସୁତୋ ସୋଳସୱସ୍ସୀକୋ ।
ଖିପ୍ପଂ ୱାପେକ୍ଖି ସୋ ୱୀତ-ଦରୋ କାଜରଗାମକଂ ॥
ଛମ୍ମାସମନୁଭୋତ୍ୱାନ, ରୋହଣଂ ରୁଟ୍ଠମାନସୋ ।
କେସଧାତୁକନାଥୋପି, ସଙ୍ଗାମତ୍ଥାୟ ତତ୍ଥଗା ॥
ରାଜପୁତ୍ତସ୍ସ ସେନା’ଥ, ୱତ୍ତେନ୍ତି ସମରଂ ଖରଂ ।
କେସଧାତୁକନାଥସ୍ସ, ସୀସଂ ଗଣ୍ହି ମହବ୍ବଲା ॥
ଆଗମ୍ମ ସତ୍ତରସୱୟଂ କୁମାରୋ ।
ସବ୍ବତ୍ଥ ପତ୍ଥଟମହାୟସକିତ୍ତିତେଜୋ ।
ସୁମାଦିନେକ ୱିଧିୟୋଗୱିସେସଦକ୍ଖୋ ।
ଖୀଣାରିକଣ୍ଟକମକା’ଖିଲରୋହଣଂ ତଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ରୋହଣାରାତିୱିଜୟୋ ନାମ
ପଞ୍ଚପଞ୍ଞାସତିମୋ ପରିଚ୍ଛେଦୋ ।
ଛପଞ୍ଞାସତିମ ପରିଚ୍ଛେଦ
ଅନୁରାଧପୁରାଭିଗମନୋ
ୟୁୱରାଜପଦେ ତସ୍ସ, ଠିତସ୍ସା’ଥ ନୟଞ୍ଞୁନୋ ।
ଅହୂ ୱିଜୟବାହୂତି, ନାମଂ ସବ୍ବତ୍ଥ ପାକଟଂ ॥
ମହାଞ୍ଞଣୋ ନିଜାଣାୟ, ତତ୍ଥ ଭେରିଂ ଚରାୱିୟ ।
ଠପେନ୍ତୋ ସଚିୱେ’ନେକେ, ପତିରୂପେ ପଦନ୍ତରେ ॥
ଚୋଳାନଂ ମଦ୍ଦନତ୍ଥାୟ, ରାଜରଟ୍ଠାଧିୱାସିନଂ ।
ଚତୁରୋ ଚତୁରୋପାୟେ, ୟୋ ଜୟଂ ତତ୍ଥ ସୋ ୱସୀ ॥
ଚୋଳରାଜା ସୁଣିତ୍ୱା ତଂ, ପୁଳତ୍ଥିନଗରେ ଠିତଂ ।
ସେନାପତିମ ପେସେସି, ଦତ୍ୱାନ ବଲୱାହନଂ ॥
ସେନିନ୍ଦଂ କାଜରଗ୍ଗାମ-ସମୀପଂ ସମୁପାଗତଂ ।
ଦୁପ୍ପସୟ୍ହଂ ୱିଦିତ୍ୱାନ, ଗିରିଦୁଗ୍ଗମଗା ତତୋ ॥
ସେନିନ୍ଦୋ କାଜରଗ୍ଗାମଂ, ୱିଲୁମ୍ପିତ୍ୱାନ ୱେଗସା ।
ତତ୍ଥ ୱତ୍ଥୁମସକ୍କୋନ୍ତୋ, ସଦେସଂ ପୁନ ରାଗମି ॥
ତତୋ ମହାଦିପାଦୋ’ପି, ଆଗମ୍ମ ମଲୟା ଲହୁଂ ।
ମହତା ବଲକାୟେନ, ସିପ୍ପତ୍ଥଲକମାୱସି ॥
ରାଜା ରାମଞ୍ଞୱିସୟେ, ରାଜିନୋ ସନ୍ତିକଂ ଜନେ ।
ପେସେସି ବହୁକେସାରଂ, ଧନଜାତଞ୍ଚ’ନପ୍ପକଂ ॥
ୱିଚିତ୍ତୱତ୍ଥକପ୍ପୂର-ଚନ୍ଦନାଦୀହି ୱତ୍ଥୂହି ।
ପରିପୁଣ୍ଣା ଚ ନାୱାୟୋ, ନେକାତିତ୍ଥେ ସମୋସଟା ॥
ଧନଜା ତେହି ନେକେହି, କରୋନ୍ତୋ ଭଟସଙ୍ଗହଂ ।
ତତୋ ତମ୍ବଲଗାମମ୍ହି, ନିୱସିତ୍ଥ ମହବ୍ବଲୋ ॥
ଅଞ୍ଞମଞ୍ଞୱିରୁଦ୍ଧତ୍ତା, ରାଜାରଟ୍ଠାଧିୱାସିନୋ ।
ଉପଗ୍ଗମ୍ମ ଜନା ସବ୍ବେ, କରଂ ନୋ ଦେନ୍ତି ସବ୍ବସୋ ॥
ୱିପକ୍ଖାଚୋଳରାଜସ୍ସ, ଭିନ୍ଦନ୍ତା’ଣଂ ମଦୁଦ୍ଧତା ।
ଆୟୁତ୍ତକେ ୱିହିଂସେନ୍ତୋ, ୟଥାକାମଂ ଚରନ୍ତି ଚ ॥
ତଂ ସୁତ୍ୱା ଚୋଳଭୂପାଲୋ, ସମ୍ପକୋପୱସୀକତୋ ।
ସେନଂ ମହନ୍ତିଂ ଦତ୍ୱାନ, ପେସେସି ସଚିୱଂ ନିଜଂ ॥
ମହାତିତ୍ଥେ’ୱହିଣ୍ଣୋ ସୋ, ତତ୍ଥ ତତ୍ଥ ବହୂଜନେ ।
ଘାତେନ୍ତୋ ସୱସେ କତ୍ୱା, ରାଜାରଟ୍ଠାଧିୱାସିନୋ ॥
ଅନୁକ୍କମେନ ଗନ୍ତ୍ୱାନ, ଖରାଣୋ ରୋହଣଂ ତଦା ।
ଅଜ୍ଝୋତ୍ଥରି ସସେନୋ ସ, ଭିନ୍ନୋ ୱେଲୋୱସାଗରୋ ॥
ରଞ୍ଞୋ ପଚ୍ଚତ୍ଥିକା ହୁତ୍ୱା, ରୱିଦେୱଚଲୱ୍ହୟା ।
ଉଭୋ ଦମିଳସେନିନ୍ଦ-ୱସଂ ୟାତା ମହବ୍ବଲା ॥
ମହାପକ୍ଖବଲୋପେତେ, ତେ ପସ୍ସିୟ ଚମୂପତି ।
ରୋହଣଂ ସକଲଂ ଖିପ୍ପଂ, ମଞ୍ଞିତ୍ଥ ସକହତ୍ଥଗଂ ॥
ଏକାଦସମ୍ହି ସୋ ୱସ୍ସେ, ରାଜା ଚୋଳାଭିଭୂତିୟା ।
ପଲୁଟ୍ଠପବ୍ବତେ ଦୁଗ୍ଗଂ, ପୱିଧାୟ ତହିଂ ୱସୀ ॥
ଚୋଳସେନା ତଦାସେଲଂ, ସମନ୍ତା ସମ୍ପରିକ୍ଖିପି ।
ତତ୍ଥୋ’ଭୟେସଂ ସେନାନ-ମହୂ ଭିଂସନକଂ ରଣଂ ॥
ରଞ୍ଞୋ ଭଟା ୱିନାସେତ୍ୱା, ସବ୍ବଂ ତଂ ଦମିଳଂ ବଲଂ ।
ପଲାୟନ୍ତଂ ମହାଚୋଳ-ସାମନ୍ତଞ୍ଚାନୁବନ୍ଧିୟ ॥
ଗହେତ୍ୱାନ ସିରଂ ତସ୍ସ, ଗାମସ୍ମିଂ ତମ୍ବୱିଟ୍ଠିକେ
ସଦ୍ଧିଂ ୱାହନୟାନେହି, ସାରଭୂତଧନେହି ଚ ॥
ତହିଂ ତଂ ସକଲଂ ଭଣ୍ଡଂ, ନେତ୍ୱା ରଞ୍ଞୋ ପଦସ୍ସିୟ ।
ପୁଳତ୍ଥିନଗରଂ ଗନ୍ତୁଂ, କାଲୋ ଇତି ସମବ୍ରୱୁଂ ॥
ମହୀପାଲୋପି ତଂ ସୁତ୍ୱା, ସଚିୱାନଂ ୱଚୋ ତଦା ।
ମହତା ବଲକାୟେନ, ପୁଲତ୍ଥିନଗରଂ ଗତୋ ॥
ପୱତ୍ତିମେତଂ ସକଲଂ, ସୁତ୍ୱା ଚୋଳନରିସ୍ସରୋ ।
ତିବ୍ବକୋପୱସଂୟାତୋ, ଭୂପାଲଗହଣତ୍ଥିକୋ ॥
ସାମଂ ଖିପ୍ପଂ ସମାଗମ୍ମ, ୱୀରୋ ସାଗରପଟ୍ଟନଂ ।
ଭିୟ୍ୟୋପି ମହତିଂ ସେନଂ, ଲଂକାଦୀପମପେସୟୀ ॥
ତଂ ୱିଜାନିୟ ଭୂମିନ୍ଦୋ, ସେନିନ୍ଦଂ ପେସୟୀ ସକଂ ।
ବଲଂ ମହନ୍ତଂ ଦତ୍ୱାନ, ଚୋଳସେନାୟ ୟୁଜ୍ଝିତୁଂ ॥
ଗଚ୍ଛମାନୋ ଚମୂନାଥୋ, ସୋ’ନୁରାଧପୁରନ୍ତିକେ ।
ସଦ୍ଧିଂ ଦମିଳସେନାୟ, ୱତ୍ତେସି ତୁମୁଲଂ ରଣଂ ॥
ପତିଂସୁ ତସ୍ମିଂ ସଙ୍ଗାମେ, ଭୂପାଲସ୍ସ ନରା ବହୂ ।
ଭିୟ୍ୟୋପି ଦମିଳାୟତ୍ତା, ଜାତା ତଂ ରଟ୍ଠୱାସିନୋ ॥
ୱିହାୟ ଧରଣୀପାଲୋ, ପୁଲତ୍ଥିନଗରଂ ତଦା ।
ୱିଲ୍ଲିକାବାଣକଂ ରଟ୍ଠଂ, ସମ୍ପାପୁଣିୟ ୱେଗସା ॥
ନିହଚ୍ଚାମଚ୍ଚୟୁଗଲଂ, ତଂ ରଟ୍ଠାଧିଟ୍ଠିତଂ ତଦା ।
ତହିଂ ୱାସମକପ୍ପେସି, ସଭଟେ ସନ୍ନିପାତୟଂ ॥
ଅତ୍ତାନମନୁବନ୍ଧନ୍ତଂ, ସୁତ୍ୱା ଚୋଳଚମୂପତିଂ ।
ଗନ୍ତ୍ୱା ୱାତଗିରିଂ ନାମ, ସମୟଞ୍ଞୂ ସିଲୁଚ୍ଚୟଂ ॥
ଉପଚ୍ଚକାୟ ସେଲସ୍ସ, ତତ୍ଥ ଦୁଗ୍ଗଂ ନିୱେସିୟ ।
ରଣଂ କରୋନ୍ତୋ ତେମାସଂ, ଦମିଳେ ପଟିବାହୟି ॥
କେସଧାତୁକନାଥସ୍ସ, ମାରିତସ୍ସ ପୁରାରଣେ ।
ଭାତା କଣିଟ୍ଠୋ ସମ୍ପତ୍ତ, ମହାପକ୍ଖବଲୋ ତଦା ॥
ମାରଣଂ ସକଭାତୁସ୍ସ, ସରନ୍ତୋ ରୁଟ୍ଠମାନସୋ ।
ସକଲଂ ପରିୱତ୍ତେସି, ଗୁତ୍ତହାଲକମଣ୍ଡଲଂ ॥
ଅଥୋ ଲଂକିସ୍ସରୋ ତତ୍ଥ, ଖିପ୍ପଂ ଗନ୍ତ୍ୱା ମହବ୍ବଲୋ ।
ଠାନେ ମଚ୍ଚୁତ୍ଥଲେ ନାମ, ଖନ୍ଧାୱାରଂ ନିବନ୍ଧିୟ ॥
ଖଦିରଙ୍ଗଣିଦୁଗ୍ଗମ୍ହା, ପଲାପେତ୍ୱାନ ତଂ ରଣେ ।
ଠାନା କୁବୁଲଗଲ୍ଲା ଚ, ୟୁଜ୍ଝନ୍ତୋ ତଂ ପଲାପୟି ॥
ୱିହାୟ ପୁତ୍ତଦାରାଦି-ସବ୍ବଂ ନେକଧନଂ ବଲଂ ।
ପଲାୟମାନୋ ସୋ ରଟ୍ଠଂ, ଚୋଳାୟତ୍ତ ମଗାଲହୁଂ ॥
ତଦା ନରିସ୍ସରୋ ତତ, ତସ୍ସ ସବ୍ବଂ ସମାଦିୟ ।
ଗନ୍ତ୍ୱା ତମ୍ବଲଗାମମ୍ହି, ନୱଂ ଦୁଗ୍ଗଂ ନିୱେସିୟ ॥
ଅନୁକ୍କମେନ ଗନ୍ତ୍ୱାନ, ମହାନାଗହୁଲୱ୍ହୟେ ।
ପୁରେୱସୀ ସୁସଜ୍ଜେନ୍ତୋ, ବଲଂ ଚୋଳେହି ୟୁଜ୍ଝିତୁଂ ॥
ତତୋ ରାଜା ସମୱ୍ହାୟ, ସଚୀୱେ ଦ୍ୱେ ମହବ୍ବଲେ ।
ପେସେସି ଦିକ୍ଖିଣଂ ପସ୍ସଂ, ୱସଂ ନେତୁଂ ତହିଂ ଜନେ ॥
ସମ୍ପେସେସି ମହାମଚ୍ଚ-ୟୁଗଲଂ କକ୍ଖଲଂ ୱିଭୂ ।
ଚୋଳଦପ୍ପୱିନାସାୟ, ତତୋ ୱେଲା ମହାପଥେ ॥
ପେସିତା ଦକ୍ଖିଣଂ ପସ୍ସଂ, ଅମଚ୍ଚା’ମେ ମହବ୍ବଲା ।
ମୁହୁନ୍ନରୁଗ୍ଗମଦୁଗ୍ଗଂ, ବଦଳତ୍ଥଲମେୱ ଚ ॥
ୱାପୀନଗରଦୁଗ୍ଗଞ୍ଚ, ବୁଦ୍ଧଗାମକମେୱ ଚ ।
ତିଲଗୁଲ୍ଲଂ ମହାଗଲ୍ଲଂ, ମଣ୍ଡଗଲ୍ଲକମେୱ ଚ ॥
ଅନୁରାଧପୁରଞ୍ଚାତି, ଗହେତ୍ୱାନ କମେନ ତେ ।
ୱତ୍ତେନ୍ତା ସୱସେ ରଟ୍ଠଂ, ମହାତିତ୍ଥମୁପାଗତା ॥
ପେସିତା ସଚିୱାଦ୍ୱେତୁ, ତତୋ ୱେଲା ମହାପଥେ ।
ୱିଲୁମ୍ପନ୍ତା ଛଗାମାଦି-ଖନ୍ଧାୱାରେ ତହିଂ ତହିଂ ॥
ପୁଲତ୍ଥିନଗରାସନ୍ନଂ, କମେନା’ଗମ୍ମ ପେସୟୁଂ ।
ଦୂତେ ରାଜନ୍ତିକଖିପ୍ପ-ମାଗନ୍ତୁଂ ୱଟ୍ଟତୀତିହ ॥
ଦିସାସା ଦ୍ୱୀସୁ ୟାନେହି, ସଚିୱେହି ପୱତ୍ତିତଂ ।
ୱିକ୍କମାତି ସୟଂ ସୁତ୍ୱା, କାଲଞ୍ଞୂ ସୋ ମହୀପହି ॥
ସୀଘଂ ସନ୍ନୟ୍ହ ସେନଙ୍ଗଂ, ସମଗ୍ଗଂ ୱିଦିକୋୱିଦୋ ।
ଉମ୍ମୂଲନାୟଚୋଳାନଂ, ପୁରାତମ୍ହା’ଭିନିକ୍ଖମି ॥
ଗଚ୍ଛଂ ଗଙ୍ଗାୟ ମହିୟ-ଙ୍ଗଣଥୂପନ୍ତିକେ ୱିଭୂ ।
ସେନାନିୱେସଂ କାରେତ୍ୱା କଞ୍ଚିକାଲଂ ତହିଂ ୱସୀ ॥
କମେନାଗମ୍ମ ଠାନଞ୍ଞୂ, ପୁଳତ୍ଥିନଗରନ୍ତିକେ ।
ବନ୍ଧାପେସି ମହାୱୀରୋ, ଖନ୍ଧାୱାରଂ ଥିରଂ ୱରଂ ॥
ତତ୍ଥ ତତ୍ଥ ଠିତା ସୂରା, ଚୋଳା ୟେ କକ୍ଖଲା’ଖିଲା ।
ପୁଲତ୍ଥିନଗରେ ୟୁଦ୍ଧଂ, କାତୁଂ ସନ୍ନିପତିଂସୁ ତେ ॥
ନିକ୍ଖମ୍ମ ନଗରା ଗନ୍ତ୍ୱା, ଚୋଳା ବହି ମହାରଣଂ ।
କତ୍ୱା ପରାଜିତା ଭୀତା, ପୱିସ୍ସ ନଗରଂ ସକଂ ॥
ଗୁତ୍ତା ସେସପୁରଦ୍ୱାରା, ଗୋପୁରଟ୍ଟାଲନିସ୍ସିତା ।
ମହାହୱଂ ବହୁସ୍ସାହା, ପୱତ୍ତେସୁଂ ଭୟାୱହଂ ॥
ଦିୟଡ୍ଢମାସଂ ୟୁଜ୍ଝନ୍ତି, ନଗରଂ ତମୁପରୁନ୍ଧିୟ ।
ସାଧେତୁଂ ନେୱସା’ସକ୍ଖି, ଭୂପାଲସ୍ସ ମହାଚମୂ ॥
ମହାରଞ୍ଞୋ ମହାୱୀରା, ମହାସୂରା ମହବ୍ବଲା ।
ମହାଭଟା ମହାମାନା, ରୱିଦେୱଚଲାଦୟୋ ॥
ଉଲ୍ଲଙ୍ଘିତ୍ୱାନ ପାକାରଂ, ପୱିସ୍ସ ସହସା ପୁରଂ ।
ଖଣେନ ଦମିଳେ ସବ୍ବେ, ମୂଲଘଚ୍ଚମଘାତୟୁଂ ॥
ଏୱଂ ଲଦ୍ଧଜୟୋ ରାଜା, ତଦା ୱିଜୟବାହୁସୋ ।
ଚରାପେସି ନିଜାଣାୟ, ଭେରିଂ ଭୂରିମତିପୁରେ ॥
ତଂ ସୁତ୍ୱା ସକସେନାୟ, ୱିନାସଂ ଚୋଳଭୂପତି ।
ସୀହଳା ବଲୱନ୍ତୋତି, ଭିୟ୍ୟୋ ସେନଂ ନ ପାହିଣି ॥
ୱୀରୋ ଅସେସନିହତୁଦ୍ଧଟ ଚୋଳସେଟ୍ଠୋ ।
ୱିଞ୍ଞୂ ସୁସାଧୁଟ୍ଠପିତାଖିଲରାଜରଟ୍ଠୋ ।
ଇଟ୍ଠନ୍ନୁରାଧପୁରସେଟ୍ଠମତୀୱ ହଟ୍ଠୋ ।
ୱସ୍ସମ୍ହି ପଞ୍ଚଦସମେ ଗମି ରାଜସେଟ୍ଠୋ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଅନୁରାଧପୁରାଭିଗମନୋ ନାମ
ଛପ୍ପଞ୍ଞାସତିମୋ ପରିଚ୍ଛେଦୋ
ସତ୍ତପଞ୍ଞାସତିମ ପରିଚ୍ଛେଦ
ସଂଗହକରଣୋନାମ
ଲଙ୍କାରକ୍ଖାୟ ସଚିୱେ, ବଲିନୋ ୟୋଧସମ୍ମତେ ।
ପଟିପାଟିଂ ସମୁଦ୍ଦିସ୍ସ, ସମନ୍ତା ସନ୍ନିୟୋଜୟି ॥
ଅଭିସେକମଙ୍ଗଲତ୍ଥାୟ, ପାସାଦାଦିମନେକତଂ ।
କିଚ୍ଚଂ ସମ୍ପାଦନୀୟନ୍ତି, ସଚିୱଂ ସନ୍ନିୟୋଜିୟ ॥
ୱନ୍ଦନୀୟେ’ଭିୱନ୍ଦନ୍ତୋ, ପଦେସେନେକକେତହିଂ ।
ନେତ୍ୱା ମାସତ୍ତୟଂ ଗଞ୍ଛି, ପୁଲତ୍ଥିନଗରଂ ପୁନ ॥
ୱିସ୍ସୁତୋ ଆଦିମଲୟ-ନାମେନ ବଲନାୟକୋ ।
ଉଜୁପଚ୍ଚତ୍ଥିକୋ ହୁତ୍ୱା, ମହୀପାଲସ୍ସ ସବ୍ବସୋ ॥
ଗଙ୍ଗା ମତ୍ଥୟୁ’ପାଗଞ୍ଛି, ବଲଂ ସବ୍ବଂ ସମାଦିୟ ।
ଅନ୍ଦୂତି ୱିସ୍ସୁତଂ ମନ୍ଦ-ପଞ୍ଞୋ ଗାମଂ ପୁରନ୍ତିକେ ॥
ଲଂକିସ୍ସରୋ ତହିଂ ଗନ୍ତ୍ୱା, ଉଦ୍ଧରିତ୍ୱା ତମୁଦ୍ଧତଂ ।
ପୁଲତ୍ଥିନଗରଂ ଗଞ୍ଛି, ୱସେ ୱତ୍ତିୟ ତଂ ବଲଂ ॥
ୟୁୱରାଜପଦଂୟେୱ, ସିତୋ ସନ୍ତୋ ଲିଖାପୟି ।
ସୋ ସତ୍ତରସୱସ୍ସାନି, ସପ୍ପଞ୍ଞୋ ନରସତ୍ତମୋ ॥
ତତୋ’ନୁରାଧନଗର-ମଭିଗମ୍ମ ୟଥାୱିଧିଂ ।
ଅନୁଭୋତ୍ୱା ୱିଧାନଞ୍ଞୂ, ଅଭିସେକମହୁସ୍ସୱଂ ॥
ଅଟ୍ଠିତୋ ପାପଧମ୍ମେସୁ, ସୁଟ୍ଠିତୋ ସେଟ୍ଠକମ୍ମନି ।
ସୋ ଅଟ୍ଠାରସମଂ ୱସ୍ସଂ, ଲିଖାପୟି ସୁସଣ୍ଠିତୋ ॥
ତତୋ ଆଗମ୍ମ ନିୱସି, ପୁଲତ୍ଥିନଗରେ ୱରେ ।
ସୋ ସିରୀସଙ୍ଘବୋଧୀ’ତି, ନାମଧେୟ୍ୟେନ ୱିସ୍ସୁତୋ ॥
ଅନୁଜଂ ସୋ ୱୀରବାହୁ-ମୋପରଜ୍ଜେ ନିୱେସିୟ ।
ଦତ୍ୱାନ ଦକ୍ଖିଣଂ ଦେସଂ, ତଂ ସଙ୍ଗଣ୍ହି ୟଥାୱିଧିଂ ॥
କଣିଟ୍ଠସ୍ସାଥ ଭାତୁସ୍ସ, ଜୟବାହୁସ୍ସ ଭୂଭୁଜୋ ।
ଆଦିପାଦପଦଂ ଦତ୍ୱା, ରଟ୍ଠଂ ଚା’ଦାସି ରୋହଣଂ ॥
ଠାନନ୍ତରାନି ସବ୍ବେସ-ମମଚ୍ଚାନଂ ୟଥାରହଂ ।
ଦତ୍ୱା ରଜ୍ଜେ ୟଥାଞାୟଂ, କରଂ ୟୋଜେସି ଗଣ୍ହିତୁଂ ॥
ଚିରସ୍ସଂ ପରିହୀନଂ ସୋ, ଦୟାୱାସୋ ମହୀପତି ।
ପୱତ୍ତେସି ୟଥାଧମ୍ମଂ, ଠିତଧମ୍ମୋ ୱିନିଚ୍ଛୟଂ ॥
ଏୱଂ ସମୁଦ୍ଧଟାନେକ, ରିପୁକଣ୍ଟକସଞ୍ଚୟେ ।
ନିଚ୍ଚଂ ରଜ୍ଜଂ ପସାସେନ୍ତେ, ଲଙ୍କଂସମ୍ମାନରିସ୍ସରେ ॥
ଛତ୍ତଗ୍ଗାହକନାଥୋ ଚ, ଧମ୍ମଗେହକନାୟକୋ ।
ତଥେୱ ସେଟ୍ଠିନାଥୋ ଚ, ଇଚ୍ଚେତେ ଭାତରୋ ତୟୋ ॥
ରଞ୍ଞୋ ୱିରୋଧିତଂ ୟାତା, ଫଲାତା ଜମ୍ପୁଦୀପକଂ ।
ଲଙ୍କଂ ୱୀସତିମେ ୱସ୍ସେ, ଏକେନୂନେ ସମୋତରୁଂ ॥
ତେ ସବ୍ବେ ରୋହଣଂ ରଟ୍ଠଂ, ସବ୍ବଂ ମଲୟମଣ୍ଡଲଂ ।
ସବ୍ବଂ ଦକ୍ଖିଣପସ୍ସଞ୍ଚ, ସହସା ପରିୱତ୍ତୟୁଂ ॥
ନିପୁଣୋ ରୋହଣଂ ଗନ୍ତ୍ୱା, ତଥା ମଲୟମଣ୍ଡଲଂ ।
ନିଘାତେନ୍ତୋ ବହୂ ତତ୍ଥ, ତତ୍ଥ ପଚ୍ଚତ୍ଥିକେ ଜନେ ॥
ସମ୍ମାୱୁପସମେତ୍ୱା ତଂ, ଠପେତ୍ୱା ସଚିୱେ ତହିଂ ।
ଦକ୍ଖିଣୋ ଦକ୍ଖିଣଂ ଦେସଂ, ସୟଂ ଗନ୍ତ୍ୱା ମହବ୍ବଲୋ ॥
ପେସେତ୍ୱା ସମଣୀଭାତୁ-ୱଂସଜଂ ସଚିୱଂ ତଦା ।
ଗାହେତ୍ୱା ସମରେଘୋରେ, ୱୀରୋ ତେ ସକୱେରିନୋ ॥
ସମାରୋପିୟସୂଲମ୍ହି, ଲଙ୍କଂ ୱିଗତକଣ୍ଟକଂ ।
କାରେତ୍ୱାନ ନିରାତଙ୍କଂ, ପୁଲତ୍ଥିପୁରମାଗମି ॥
ୱସନ୍ତୀ ଚୋଳୱିସୟେ, ଜଗତିପାଲରାଜିନୀ ।
ଚୋଳହତ୍ଥା ପମୁଞ୍ଚିତ୍ୱା, ସଦ୍ଧିଂ ଧୀତୁ କୁମାରିୟା ॥
ଲୀଲାୱତ୍ୟାଭିଧାନାୟ, ନାୱାମାରୁୟ୍ହ ୱେଗସା ।
ଲଂକାଦୀପମ୍ହି ଓତିଣ୍ଣା, ପସ୍ସି ଲଂକିସ୍ସରଂ ତଦା ॥
ସୁତ୍ୱା ୱଂସକ୍କମଂ ତସ୍ସା, ସୋ ଞତ୍ୱା ସୁଦ୍ଧୱଂସତଂ ।
ଲୀଲାୱତିଂ ମହିସିତ୍ତେ, ଅଭିସିଞ୍ଚି ନରିସ୍ସରୋ ॥
ସା ତଂ ପଟିଚ୍ଚ ରାଜାନଂ, ମହେସୀ ଧୀତରଂ ଲଭି ।
ନାମଂ ୟସୋଧରାତି’ସ୍ସା, ଅକାସି ଧରଣୀ ପତି ॥
ମେରୁକନ୍ଦରରଟ୍ଠେନ, ସଦ୍ଧିଂ ରାଜା ସଧୀତରଂ ।
ୱୀରୱମ୍ମସ୍ସ ପାଦାସି, ସା ଲଭି ଧୀତରୋ ଦୁୱେ ॥
ସମାନନାମିକା ଜେଟ୍ଠା, ସା ମାତା ମହିୟା ଅହୁ ।
ସୁଗଲା ନାମିକା ଆସି, ତାସୁ ଦ୍ୱୀସୁ କଣିଟ୍ଠିକା ॥
କାଲିଙ୍ଗଧରଣୀପାଲ-ୱଂସଜଂ ଚାରୁଦସ୍ସନଂ ।
ତିଲୋକସୁନ୍ଦରଂ ନାମ, ସୁକୁମାରଂ କୁମାରିକଂ ॥
କାଲିଙ୍ଗରଟ୍ଠତୋ ରାଜା, ଆଣାପେତ୍ୱା ଚିରଟ୍ଠିତିଂ ।
ନିଜୱଂସସ୍ସ ଇଚ୍ଛନ୍ତୋ, ମହେସିତ୍ତେ’ଭି ସେଚୟି ॥
ସୁଭଦ୍ଦା ଚ ସୁମିତ୍ତା ଚ, ଲୋକନାଥୱ୍ହୟାପି ଚ ।
ରତନାୱଲୀ ରୂପୱତୀ, ଇତିମା ପଞ୍ଚ ଧୀତରୋ ॥
ପୁତ୍ତଂ ୱିକ୍କମବାହୁଞ୍ଚ, ସା ଲଭୀ ଧଞ୍ଞଲକ୍ଖଣଂ ।
ସମ୍ପତ୍ତା ସା ପଜୱୁଦ୍ଧିଂ, ହରନ୍ତି ରାଜିନୋ ମତଂ ॥
ଇତ୍ଥାଗାରେସୁ ସେସେସୁ, ୱୀତା ସମକୁଲଙ୍ଗନା ।
ଗବ୍ଭୋ ଜାତୁମହୀପାଲଂ, ତଂ ପଟିଚ୍ଚ ନ ସଣ୍ଠହି ॥
ଅଥେକଦିୱସଂ ରାଜା, ଅମଚ୍ଚଗଣମଜ୍ଝଗୋ ।
ପିଲୋକିୟଠିଭା ସବ୍ବା, ଧୀତରୋ ପଟିପାଟିୟା ॥
ଧୀତୁ ନୱମୱସେସାନଂ, ଠପେତ୍ୱା ରତନାୱଲିଂ ।
ଧଞ୍ଞଲକ୍ଖଣସମ୍ପନ୍ନ-ପୁତ୍ତସ୍ସୁପ୍ପତ୍ତିସୁଚକଂ ॥
ଲକ୍ଖଣଂ ଲକ୍ଖଣଞ୍ଞୂ ସୋ, ଅପସ୍ସଂ ପେମଚେଗୱା ।
ରତନାୱଲିମାହୂୟ, ତସ୍ସା ମୁଦ୍ଧନି ଚୁମ୍ବିୟ ॥
ତେଜୋଗୁଣେହି ଚାଗେହି, ଧିୟା ସୂରତ୍ତନେନ ଚ ।
ଭୂତେ ଚ ଭାୱିନୋ ଚେୱ, ସବ୍ବେ ଭୂପେ’ତିସାୟିନୋ ॥
ନିଚ୍ଚଂ ଲଙ୍କଂ ନିରାସଙ୍କ-ମେକଚ୍ଛତ୍ତକମେୱ ଚ ।
ପୱିଧାତୁଂ ସମତ୍ଥସ୍ସ, ସମ୍ମାସାସନତାୟିନୋ ॥
ସୋଭନାନେକୱତ୍ତସ୍ସ, ଇମିସ୍ସା କୁଚ୍ଛିହେସ୍ସତି ।
ପୁତ୍ତସ୍ସୁପ୍ପତ୍ତିଠାନନ୍ତି, ମୁଦୁତୋ ସୋ ସମବ୍ରୱି ॥
ୟାୱନ୍ତସ୍ସାପିଖୋଚୋଳ-ମହୀପାଲସ୍ସ ନେକସୋ ।
କୁଲାଭିମାନୀ ରାଜା ସୋ, ଅଦତ୍ୱାନ କଣୀୟସିଂ ॥
ଆଣାପେତ୍ୱା ପଣ୍ଡୁରାଜଂ, ୱିସୁଦ୍ଧତ୍ୱୟସମ୍ଭୱଂ ।
ଅନୁଜଂ ରାଜିନିଂ ୱସ୍ସ, ମିତ୍ତୱ୍ହୟମଦାସିସୋ ॥
ସାମାଣଭରଣଂ କିତ୍ତି, ସିରୀ ମେଘାଭିଧାନକଂ ।
ସିରିୱଲ୍ଲଭନାମଞ୍ଚ, ଜନେସି ତନୟେ ତୟୋ ॥
ସୁଭଦ୍ଦ ୱୀରବାହୁସ୍ସ, ସୁମିତ୍ତଂ ଜୟବାହୁନୋ ।
ମହତା ପରିହାରେନ, ପାଦାସି ଧରଣୀ ପତି ॥
ଅଦାସି ମାଣାଭରଣେ, ଧୀତରଂ ରତନାୱଲିଂ ।
ଲୋକନାଥୱ୍ହୟଂ କିତ୍ତି ସିରିମେଘସ୍ସ’ଦାସିସୋ ॥
ରୂପତ୍ୟଭିଧାନାୟ, ଧୀତୁୟୋ ପରତାୟହି ।
ସରୀରିୱଲ୍ଲଭସାଦା, ସୁଗଲୱ୍ହ କୁମାରିକଂ ॥
ମଧୁକଣ୍ଣୱଭୀମରାଜ, ବଲକ୍କାର ସନାମକେ ।
ମହେସୀ ବନ୍ଧୱେରାଜ-ପୁତ୍ତେ ସୀହପୁରାଗତେ ॥
ପସ୍ସିତ୍ୱାନ ପହୀପାଲୋ, ତଦା ସଞ୍ଜାତପୀତିକୋ ।
ତେସଂ ପାଦାସି ପଚ୍ଚେକଂ, ୱୁତ୍ତିଂ ସୋ ଅନୁରୂପକଂ ॥
ତେ ସବ୍ବେ ଲଦ୍ଧସକ୍କାର ସମ୍ମାନାଧରଣୀପତିଂ ।
ଆରାଧୟନ୍ତା ସସତଂ, ନିୱସିଂସୁ ୟଥାରୁଚିଂ ॥
ଏତେସଂ ରାଜପୁତ୍ତାନଂ, ସୁନ୍ଦରିୱ୍ହଂ କଣିଟ୍ଠକଂ ।
ଅଦା ୱିକ୍କମବାହୁସ୍ସ, ନିଜୱଂସଠିତଟ୍ଠିକୋ ॥
ଭିୟ୍ୟୋ ୱିକ୍କମବାହୁସ୍ସ, ତତୋ ଲୀଲାୱତିଂ ସତିଂ ।
ସହ ଭୋଗେନ ପାଦାସି, ତଦା ବନ୍ଧୁ ହିତେରତୋ ॥
ୱିଧାୟ ଏୱଂ ସଜନେ ଜନିନ୍ଦୋ ।
ନିସ୍ସେସତୋ ଭୋଗସମପ୍ପିତୋ ।
ଦୟାପରୋ ଞାତିଜନାତମତ୍ଥଂ ।
ସମାଚରୀ ନୀତିପଥାନୁରୂପଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ସଂଗହକରଣୋ ନାମ
ସତ୍ତପଞ୍ଞାସତିମୋ ପରିଚ୍ଛେଦୋ
ଅଟ୍ଠପଞ୍ଞାସତିମ ପରିଚ୍ଛେଦ
ଲୋକସାସନ ସଂଗହକରଣୋ
ୱିଚିନିତ୍ୱା କୁଲୀନେ ସୋ, ଜନେ ସବ୍ବେ ସମାଦିୟ ।
ସକାରକ୍ଖାୟ ୟୋଜେସି, ୟଥାଚାରଂ ମହୀପତି ॥
ଉଚ୍ଚଂ ପୁଲତ୍ଥିନଗରେ, ପାକାରଂ କାରୟୀ ଥିରଂ ।
ନେକଗୋପୁରସଂୟୁତ୍ତଂ, ୟୁଧାକମ୍ମସୁରଞ୍ଜିତଂ ॥
ସମନ୍ତାୟତୱିତ୍ଥିଣ୍ଣ-ଗମ୍ଭୀରପରିଖାୟୁତଂ ।
ଉଚ୍ଚପତ୍ଥଣ୍ଡିଲୋପେତଂ, ଦୁପ୍ପଧଂସମରାତିହି ॥
ଉପସମ୍ପଦକମ୍ମସ୍ସ, ଗଣପୂରକଭିକ୍ଖୂନଂ ।
ଅପ୍ପହୋନେକଭାୱେନ, ସାସନଠିତିମାନସୋ ॥
ଅନୁରୁଦ୍ଧନରିନ୍ଦସ୍ସ, ସହାୟସ୍ସାଥ ସନ୍ତିକଂ ।
ରାମଞ୍ଞୱିସୟଂ ଦୂତେ, ପେସେତ୍ୱା ସହପାଭତେ ॥
ତତୋ ଆଣାପୟିତ୍ୱାନ, ପିଟକତ୍ତୟପାରଗେ ।
ସୋ ସୀଲାଦିଗୁଣାୱାସେ, ଭିକ୍ଖୱୋ ଥେରସମ୍ମତେ ॥
ତେ ଉଳାରାହି ପୂଜାହି, ପୂଜୟିତ୍ୱା ନରିସ୍ସରୋ ।
ପବ୍ବଜ୍ଜା ଉପସମ୍ପତ୍ତି, କାରୟିତ୍ୱା ଅନେକସୋ ॥
ପିଟକତ୍ତୟଞ୍ଚ ବହୁସୋ, କଥାପେତ୍ୱା ସୱଣ୍ଣନଂ ।
ଲଙ୍କାୟୋ’ସକ୍କମାନଂ ସୋ, ଜୋତୟୀ ଜିନସାସନଂ ॥
ପୁତତ୍ଥିନଗରସ୍ସନ୍ତୋ, ପଦେସସ୍ମିଂ ତହିଂ ତହିଂ ।
ୱିହାରେ କାରୟିତ୍ୱାନ, ବହୁକେ ସୁମନୋହରେ ॥
ଭିକ୍ଖୱୋ ତତ୍ଥ ୱାସେତ୍ୱା, ନିକାୟତ୍ତୟୱାସିନୋ ।
ପଚ୍ଚୟେହି ଉଳାରେହି, ସନ୍ତପ୍ପେସି ଚତୂହିପି ॥
ଫଲିକତ୍ଥମ୍ଭକଚାରୁ-ପାକାରପରିଖାୟୁତଂ ।
ପଞ୍ଚଭୂମକପାସାଦ-ପୱରେ ନୋ’ପସୋଭିତଂ ॥
ସମସନ୍ତା ୱାସପନ୍ତୀହି, ସୁଭାହି ସୁୱିରାଜିତଂ ।
ନିରକିଣ୍ଣମସମ୍ବାଧ ୱରଭାସୁର ଗୋପୁରଂ ॥
ୱିହାରଂ କାରୟିତ୍ୱାନ, ୱତ୍ଥୁତ୍ତୟପରାୟନୋ ।
ନିକାୟତ୍ତୟୱାସିସ୍ସ, ଭିକ୍ଖୁସଙ୍ଘସ୍ସ’ଦାସିସୋ ॥
ସଙ୍ଘସ୍ସ ପାକୱଟ୍ଟତ୍ଥଂ, ରଟ୍ଠଂ ଦତ୍ୱା’ଳିସାରକଂ ।
ସକଲଂ ସନ୍ନିୱାସୀହି, ନେତ୍ତିକେହି ସହେୱ ସୋ ॥
ନେକସତାନିଭିକ୍ଖୂନଂ, ୱାସୟିତ୍ୱାନ ତତ୍ଥ ସୋ ।
ସତତଂ ସମ୍ପୱତ୍ତେସି, ଉଳାରଂ ଚତୁପଚ୍ଚୟଂ ॥
ଦାଟ୍ଠାଧାତୁଘରଂଚାରୁ, କାରୟିତ୍ୱା ମହାରହଂ ।
ଦାଠାଧାତୁସ୍ସ ନିଚ୍ଚଂ ସୋ, ମହାମହମକାରୟି ॥
ଗଣସଙ୍ଗଣିକା’ପେତୋ, ପୋତ୍ଥକଂ ଧମ୍ମସଙ୍ଗଣିଂ ।
ପରିୱତ୍ତେସି ସୋପାତୋ, ସୁନ୍ଦରେ ଧମ୍ମମନ୍ଦିରେ ॥
ନଚ୍ଚାଦିଗନ୍ଧମାଲାଦି-ନେକପୂଜମ୍ପୱତ୍ତିୟ ।
ସୀରେନ ସଦ୍ଧାସମ୍ବନ୍ଧୋ, ସମ୍ବୁଦ୍ଧମଭିୱନ୍ଦତି ॥
ଜମ୍ବୁଦୀପାଗତେ ଚାଗ, ସୂରୋ ସୋ ଭୁୱିରିସୂରୟୋ ।
ତପ୍ପେସି ଧନଦାନେନ, ଦାନିୟେନେକ ସୋ ୱିଭୂ ॥
ସଦ୍ଧମ୍ମକଥିକାନଂ ସୋ, ପୂଜା କତ୍ୱାନ ନେକସୋ ।
ଦେସାପେସିଚ ସଦ୍ଧମ୍ମଂ, ସଦାଧମ୍ମଗୁଣେ ରତୋ ॥
ତିକ୍ଖତ୍ତୁଂ ସୋ ତୁଲାଭାର-ଦାନଂ ଦିନେସୁ ଦାପୟି ।
ଉପୋସଥଂ ୱୋପୱସି, ସୁୱିସୁଦ୍ଧମୁପୋସଥେ ॥
ଅଦା ଦଣ୍ଡିସ୍ସରଂ ଦାନ-ମନୁସଂୱଚ୍ଛରଂ ୱିଭୂ ।
ପିଟକତ୍ତୟଂ ଲିଖାପେତ୍ୱା, ଭିକ୍ଖୁସଙ୍ଘସ୍ସ ଦାପୟି ॥
ମହଗ୍ଘମଣିମୁତ୍ତାଦି-ରତନାନି ସପେସିୟ ।
ଜମ୍ବୁଦୀପେ ମହାବୋଧିଂ-ନେକକ୍ଖତ୍ତୁମ ପୂଜୟି ॥
କଣ୍ଣାଟଭୂମିପାଲେନ, ଚୋଳରଞ୍ଞା ଚ ପେସିତା ।
ଦୂତାମହନ୍ତମାଦାୟ, ପଣ୍ଣାକାରମିଧାଗତା ॥
ଅଦ୍ଦସଂସୁ ମହୀପାଲଂ, ତତୋ ସୋ ତୁଟ୍ଠମାନସୋ ।
ତେସଂ ଉଭିନ୍ନଂ ଦୂତାନଂ, କତ୍ତବ୍ବଂ ସାଧୁକାରିୟ ॥
ତେସୁ ଆଦୋ’ୱ କଣ୍ଣାଟ-ଦୂତେହି ସହ ପେସିୟ ।
ଦୂତେ ସକୀୟେ କଣ୍ଣାଟ-ନିକଟଂ ସାରପାଭତେ ॥
ଅତ୍ତନୋ ୱିସୟଂ ପତ୍ତେ, ଚୋଳୋ ସୀହଳ ଦୂତକେ ।
ସହସା କଣ୍ଣନାସାସୁ, ପାପୟିଂସୁ ୱିରୂପତଂ ॥
ସମ୍ପତ୍ତୱିପ୍ପକାରାକେ, ଇଧାଗନ୍ତ୍ୱାନ ରାଜିନୋ ।
କଥୟିଂସୁ ତଦା ସବ୍ବଂ, ଚୋଳେନ କତମତ୍ତନି ॥
ଉଦ୍ଦିପିତାଭିମାନୋ ସୋ, ସକଲାମଚ୍ଚମଜ୍ଝଗୋ ।
ଅୱ୍ହାୟ ଦମିଳେ ଦୂତେ, ଇତି ଚୋଳସ୍ସ ସନ୍ଦିସି ॥
ସେନଂ ୱିନା’ୱ ଏକସ୍ମିଂ, ଦୀପେ ମଜ୍ଝେ ମହଣ୍ଣୱେ ।
ବାହାବଲପରିକ୍ଖାୱା, ହୋତୁନୋ ଦ୍ୱନ୍ଦୟୁଦ୍ଧତୋ ॥
ବଲଂ ସନ୍ନୟ୍ହ ସକଲଂ, ରଜ୍ଜେ ତୁୟ୍ହଂ ମମା’ଥ ୱା ।
ତୱା’ଭିମତ ଦୋସମ୍ହି, ସଙ୍ଗାମୋ ୱା କରୀୟତଂ ॥
ମୟା ୱୁତ୍ତକ୍କମେନେୱ, ୱତ୍ତବ୍ବୋ ୱୋ ଜନାଧିପୋ ।
ଇତି ୱତ୍ୱାନ ତେ ଦୂତେ, ଇତ୍ଥଲଙ୍କାର ମଣ୍ଡିତେ ॥
ୱିସ୍ସଜ୍ଜିୟ ଲହୁଂଚୋଳ-ମହୀପାଲସ୍ସ ସନ୍ତିକଂ ।
ତତୋ ସେନଙ୍ଗମାଦାୟ, ଅନୁରାଧ ପୁରଂ ଗମି ॥
ମତ୍ତିକାୱାଟତିତ୍ଥେ ଚ, ମହାତିତ୍ଥେ ଚ ପେସୟୀ ।
ଚୋଳରଟ୍ଠଂ’ୱ ଗନ୍ତ୍ୱାନ, ୟୁଜ୍ଝିତୁଂ ଦ୍ୱେ ଚମୂପତି ॥
ସଜ୍ଜନ୍ତେସୁ ଚମୂପେସୁ, ନାୱାପାଥେୟ୍ୟକାନି ଚ ।
ୟୁଦ୍ଧତ୍ଥାୟ ବଲଂ ଚୋଳ-ରଟ୍ଠପେସନକାରଣା ॥
ତଦା ତିଂସତିମେ ୱସ୍ସେ, ୱେଳକ୍କାରସନାମକା ।
ବଲକାୟା ତହିଂଗନ୍ତୁ-ମନିଚ୍ଛନ୍ତା ୱିରୋଧିନୋ ॥
ମାରେତ୍ୱାନ ଉଭୋ ସେନା-ନାଥେ ମତ୍ତଗଜାୱିୟ ।
ସମନ୍ତତୋ ୱିଲୁମ୍ପିଂସୁ, ପୁଲତ୍ଥିପୁରମୁଦ୍ଧତା ॥
ପୁତ୍ତେହି ତୀହି ସହିତଂ, ରାଜିନୋ ଚ କଣୀୟସିଂ ।
ଗଣିତ୍ୱା ସହସା ରାଜ-ପାସାଦଂ ଚାପି ଝାପୟୁଂ ॥
ରାଜା ନିକ୍ଖମ୍ମ ଖିପ୍ପଂ ସୋ, ଗନ୍ତ୍ୱା ଦକ୍ଖିଣପସ୍ସକଂ ।
ସେଲେ ୱାତଗିରିୱ୍ହସ୍ମିଂ, ସାରଂ ଭଣ୍ଡଂ ଠପାପିୟ ॥
ୱୀରବାହୁପରାଜେନ, ସୀହୱିକ୍କମସାଲିନା ।
ମହତା ଚ ବଲୋଘେନ, ସମନ୍ତା ପରିୱାରିତୋ ॥
ପୁଲତ୍ଥିପୁରମାଗମ୍ମ, ୱତ୍ତେନ୍ତୋ ଦାରୁଣଂ ରଣଂ ।
ପଲାପେସି ଖଣେନେୱ, ବଲକାୟେ ସମାଗତେ ॥
ମାରିତାନ ଚମୂପାନ-ମଟ୍ଠିସଙ୍ଘାଟଧିଟ୍ଠିତଂ ।
ପରିକ୍ଖିପିତ୍ୱା ଚିତକଂ, ୱେରିଭୂତେ ବଲାଧିପେ ॥
ବନ୍ଧୟିତ୍ୱାନ ଖାଣୁମ୍ହି, ପଚ୍ଛା ବାହଂ ସୁବନ୍ଧନଂ ।
ପରିତୋ ୱିପ୍ଫୁରନ୍ତୀହି, ଅଗ୍ଗିଜାଲାହି ଝାପୟି ॥
ଘାତେତ୍ୱା ତତ୍ଥ ମାନୀତଂ, ଗାମାନି ଧରଣୀପତି ।
ଅକାସି ଲଙ୍କାୱସୁଧଂ, ସବ୍ବଥା ୱୀତକଣ୍ଟକଂ ॥
ୟୁଜ୍ଝିତୁଂ ସହ ଚୋଳେନ, ରାଜା ଅତ୍ତକତାୱଧିଂ ।
ଅନତିକ୍କମ୍ମ ସୋ ପଞ୍ଚ-ଚତ୍ତାଲୀସମ୍ହି ୱଚ୍ଛରେ ॥
ସନ୍ନଦ୍ଧଂ ବଲମାଦାୟ, ଗନ୍ତ୍ୱା ସାଗରପଟ୍ଟନଂ ।
ତସ୍ସାଭିଗମନଂ ପସ୍ସଂ, କଞ୍ଚିକାଲଂ ତହିଂ ୱସଂ ॥
ଅନାଗତତ୍ତା ଚୋଳସ୍ସ, ତସ୍ସ ଦୂତେ ୱିସ୍ସଜ୍ଜିୟ ।
ପୁନାଗନ୍ତ୍ୱା ୱସୀରାଜା, ପୁଲତ୍ଥିନଗରେ ଚିରଂ ॥
ମହାହେଳି ସରେହରୁ, ମହାଦତ୍ତିକନାମିକା ।
କଟୁନ୍ନରୂପଣ୍ଡୱାପୀ, କଲ୍ଲଗଲ୍ଲିକ ନାମିକା ॥
ଏରଣ୍ଡେଗଲ୍ଲୱାପୀ ଚ, ଦୀଘୱତ୍ଥୁକୱାପିକା ।
ମଣ୍ଡୱାଟକୱାପୀ, ଚ, କିତ୍ତଗ୍ଗବୋଧିପବ୍ବତା ॥
ୱଲାହସ୍ସ ମହାଦାରୁ, ଗଲ୍ଲକୁମ୍ଭୀଲସୋବ୍ଭକା ।
ପତ୍ତପାସାଣୱାପୀ ଚ, ୱାପୀ ଚ କାଣନାମିକା ॥
ଏତା ଚଞ୍ଞା ଚ ସୋ ଛିନ୍ନ-ମରିୟାଦା ୱାପିୟୋ ବହୂ ।
ବନ୍ଧାପେସି ସଦାଦୀନ-ସତ୍ତେ ବଦ୍ଧ ହିତାସୟୋ ॥
ଭୂମିନ୍ଦୋ କନ୍ଦରା-ଗଙ୍ଗା-ନଦୀସୁ ଚ ତହିଂ ତହିଂ ।
ସୁଭିକ୍ଖଂ କାରୟୀ ରଟ୍ଠଂ, ବନ୍ଧେତ୍ୱା’ୱରଣାନି ସୋ ॥
ୱିହାରା’ଭୟଚାରିତ୍ତ-ଭେଦିନିଂ ମହିସଂସକ ।
ପରିହାରେ ସବ୍ବସୋଚ୍ଛିଜ୍ଜ-ଗାହୟିତ୍ୱା ଗଲମ୍ହି ତଂ ॥
ପୁରମ୍ଭା ବହି କାରେତ୍ୱା, ମହାସଙ୍ଘଂ ଖମାପିୟ ।
ପକାସେସି ଚ ଲୋକସ୍ସ, ସଙ୍ଘଗାରୱମତ୍ତନୋ ॥
ମହାଗାମେ ନିକାୟାନଂ, ତିତୟେ ଚୋଳନାସିତେ ।
ଧାତୁଗବ୍ଭେ ଚ ବନ୍ଧେସି, ଥୂପାରାମଦ୍ୱୟେ’ପି ଚ ॥
ମାତୁୟା’ଳାହଣଠାନେ, ତଥେୱ ପିତୁନୋପି ଚ ।
ଅକା ପଞ୍ଚ ମହାୱାସେ, ତଥା ବୁଦଲୱିଟ୍ଠିୟଂ ॥
ପଣ୍ଡୱାପୀ ଚ ପାଠୀନୋ, ରକ୍ଖଚେତିୟପବ୍ବତୋ ।
ତଥେୱ ମଣ୍ଡଲଗିରି-ମଧୁତ୍ଥଲୱିହାରକୋ ॥
ଉରୁୱେଲୱ୍ହୟୋ ଦେୱ-ନଗରେ ଚ ୱିହାରକୋ ।
ମହିୟଙ୍ଗଣୱିହାରୋ ଚ, ସୀତଲଗ୍ଗାମଲେଣକଂ ॥
ଜମ୍ବୁକୋଲୱିହାରୋ ଚ, ତଥେୱ ଗିରିକଣ୍ଡକୋ ।
କୁରୁନ୍ଦିୟୱିହାରୋ ଚ, ଜମ୍ବୁକୋଲକଲେଣକଂ ॥
ଭଲ୍ଲାତକୱିହାରୋ ଚ, ତଥେୱ ପରଗାମକୋ ।
କାସଗଲ୍ଲୱ୍ହୟୋ ଚନ୍ଦ-ଗିରିୱ୍ହୟ ୱିହାରକୋ ॥
ୱେଲଗାମୱିହାରୋ ଚ, ମହାସେନୱ୍ହଗାମକୋ ।
ୱିହାରୋ ଚା’ନୁରାଧମ୍ହି, ପୁରେ ବୋଧିଘରଂ ତଥା ॥
ଇଚ୍ଚେୱମାଦୟୋନେକେ, ୱିହାରେ ଚ ବହୂ ୱିଭୂ ।
ପଟିସଙ୍ଖରିଜିଣ୍ଣେ ସୋ, ଗାମେ ଚା’ଦା ୱିସୁଂ ୱିସୁଂ ॥
ସମନ୍ତକୂଟ ସେଲତ୍ଥଂ, ମୁନିନ୍ଦପଦଲଞ୍ଜନଂ ।
ପଣମତ୍ଥାୟ ଗଚ୍ଛନ୍ତା, ମନୁସ୍ସା ଦୁଗ୍ଗମଞ୍ଜସେ ॥
ସବ୍ବେ ମା କିଲମନ୍ତୂ’ତି, ଦାନୱଟ୍ଟାୟ ଦାପୟି ।
ସାଲିକ୍ଖେତ୍ତାଦିସମ୍ପନ୍ନଂ, ଗିଲୀମଲୟନାମକଂ ॥
କଦଲୀଗାମମଗ୍ଗେ ଚ, ହୂୱରଳଞ୍ଜସେ ତଥା ।
ଗାମେ ଦତ୍ୱାନ ପଚ୍ଚେକଂ, ସାଲାୟୋ ଚାପି କାରୟି ॥
ଅନାଗତେ ତଂ ଭୂପାଲା, ମା ଗଣ୍ହନ୍ତୂ’ତି ଲେଖିୟ ।
ଅକ୍ଖରାନି ସିଲାଥମ୍ଭେ, ପତିଟ୍ଠାପେସି ଭୂମିପୋ ॥
ଗାମଂ ଅନ୍ତରୱିଟ୍ଠିଞ୍ଚ, ତଥା ସଙ୍ଘାଟଗାମକଂ ।
ସିରିମଣ୍ଡଗଲାରାମଞ୍ଚ, ଅଦାସୋ ଲାଭୱାସିନଂ ॥
ୱନଜୀୱକଭିକ୍ଖୂନ-ମଦା ସୋ ଚତୁପଚ୍ଚୟେ ।
ବନ୍ଧୂନମ୍ପି ଚ ସୋ ତେସଂ, ଭୋଗଗାମେ ପଦାପୟି ॥
ପାୱାରଗ୍ଗିକପଲ୍ଲାନି, ୱିୱିଧେ ଓସଧେପି ଚ ।
ସୀତେ ଉତୁମ୍ହି ବହୁସୋ, ଭିକ୍ଖୁସଙ୍ଘସ୍ସ ଦାପୟି ॥
ଅଦା ସବ୍ବପରିକ୍ଖାରେ, ପରିକ୍ଖାରେ ତଥାତ୍ଥ ସୋ ।
ନେକୱାରେସୁ ସକ୍କଚ୍ଚଂ, ଭିକ୍ଖୁସଙ୍ଘସ୍ସ ବୁଦ୍ଧିମା ॥
ସଙ୍ଘସ୍ସ ପାକୱଟ୍ଟତ୍ଥଂ, ଭିକ୍ଖୂନଂ ଲାଭୱାସିନଂ ।
ୱେୟ୍ୟାୱଚ୍ଚକରାନଞ୍ଚ, ପୂଜେତୁଂ ଚେତିୟାଦିକଂ ॥
ପଦିନ୍ନା ପୁବ୍ବରାଜୂହି, ୟେ ଗାମା ରୋହଣେ ବହୂ ।
ତେପି ସବ୍ବେ ଅନୂନେ ସୋ, ୟଥାପୁବ୍ବଂ ଠପେସି ଚ ॥
ଅଦାସି ପିଠସପ୍ପୀନ-ମୁସଭେ ବଲିନୋ ବହି ।
ଭତ୍ତଂ ଚା’ଦାସି ସୋ କାକ ସୋଣାଦୀନଂ ଦୟାପରୋ ॥
ଅଦାସିନେକତା ୱେୟ୍ୟ-କାରକାନଂ ମହାକୱୀ ।
ସଦ୍ଧିଂ ପୱେଣିଗାମେହି, ୱିତ୍ତଜାତମନପ୍ପକଂ ॥
ରାଜାମଚ୍ଚାଦିପୁତ୍ତାନଂ, ସିଲୋକେ ରଚିତେ ସୁଣଂ ।
ୟଥାନୁରୂପଂ ପାଦାସି, ଧନଂ ତେସଂ କୱିସ୍ସରୋ ॥
ଅନ୍ଧାନଂ ପଙ୍ଗୁଲାନଞ୍ଚ, ଗାମେ ଚା’ଦା ୱିସୁଂ ୱିସୁଂ ।
ନାନାଦେୱକୁଲାନଞ୍ଚ, ଦିନ୍ନଂ ପୁବ୍ବଂ ନ ହାପୟି ॥
ପତ୍ତି ୱୋ ସୋ କୁଲିତ୍ଥୀନ-ମନାଥାନଂ ୟଥାରହଂ ।
ୱିଧୱାନମଦାଗାମେ, ଭତ୍ତଅଚ୍ଛାଦନାନି ଚ ॥
ରାଜା ସୀହଳକା ୱେୟ୍ୟ-କରଣେ ସୋ ମହାପତି ।
ଅଗ୍ଗୋ ସୀହଳକାୱେୟ୍ୟ-କାରକାନମହୋସି ଚ ॥
ସୁଭେ ବଦ୍ଧାଦରୋ ବଦ୍ଧ ଗୁଣୱ୍ହୟ ୱିହାରକେ ।
ବନ୍ଧେସି ଉପରାଜା ସୋ, ଚେତିୟଂ ଚୋଳନାସିତଂ ॥
ମୁତ୍ତଚାଗୀ ତତୋ ତସ୍ସ, ୱିହାରପୱରସ୍ସ ସୋ ।
ଦତ୍ୱା ଗାମୱରେ ନିଚ୍ଚଂ, ପୂଜାୟୋ ସମ୍ପୱତ୍ତୟି ॥
ସୋୱ ତସ୍ସ ୱିହାରସ୍ସ, ଉପଚାରୱନନ୍ତିକେ ।
ବନ୍ଧାପେସି ମହାୱାପିଂ, ଥୀରୀଭୂତମହୋଦକଂ ॥
କପ୍ପୂରମୂଲାୟତନେ, ରଞ୍ଞୋ ଧୀତା ୟସୋଧରା ।
ଅକାରେସି ଥିରଂ ରମ୍ମଂ, ମହନ୍ତଂ ପଟିମାଘରଂ ॥
ସେଲନ୍ତରସମୂହସ୍ମିଂ, ରାଜିନୋ ରାଜିନୋ ସକା ।
କାରେସି ଚାରୁପାସାଦଂ, ପସାଦାୱହମୁଗ୍ଗତଂ ॥
ତଦା ନେକେ ଚ ସଚିୱା, ତସ୍ସୋ ରୋଧଜନାପି ଚ ।
ସମାଚିନିଂସୁ ପୁଞ୍ଞାନି, ଅନେକାନି ଅନେକସୋ ॥
ଏୱଂ ସମନୁସାସନ୍ତେ, ଲଂକଂ ଲଂକା ନରିସ୍ସରେ ।
ଉପରାଜା ୱସଂନୀତୋ, ୱିନୀତୋ ଘେରମଚ୍ଚୁନା ॥
ତସ୍ସ କତ୍ତବ୍ବକିଚ୍ଚାନି, ସକଲାନି ସମାପିୟ ।
ଜୟବାହୁସ୍ସୋପରଜ୍ଜଂ, ଭିକ୍ଖୂନଂ ମତିୟା ଅଦା ॥
ଅଥାଦିପାଦପଦୱିଂ, ଦତ୍ୱା ୱିକ୍କମବାହୁନୋ ।
ଗଜବାହୂ’ତି ୱିଦିତେ, ତସ୍ସ ଜାତେ ସୁତେ ତତୋ ॥
ମହାମଚ୍ଚେହି ମନ୍ତେତ୍ୱା, ରାଜାପୁତ୍ତହିତତ୍ଥିକୋ ।
ରୋହଣଂ କସିଣଂ ଦତ୍ୱା, ତହିଂ ୱାସାୟ ପେସୟି ॥
ତତୋ ସୋ ତତ୍ଥ ଗନ୍ତ୍ୱାନ, ମହାନାଗହୁଲଂ ପୁରଂ ।
ରାଜଧାନିଂ କରିତ୍ୱାନ, ତତ୍ଥ ୱାସମକପ୍ପୟୀ ॥
ଏୱଂ ପଞ୍ଞାସୱସ୍ସାନି’ହ ୱିଜୟଭୁଜୋ ୱତ୍ତୟିତ୍ୱାନ ସମ୍ମା,
ଆଣାଚକ୍କଂ ଜନିନ୍ଦୋ ପ୍ୟପଗତଖଲନଂ ଏସ ପଞ୍ଚାଧିକାନି ।
ୱଡ୍ଢେତ୍ୱା ସାସନଂ ତଂ ଖଲଦମିଳଭୟୋ ପଦ୍ଦୁତଞ୍ଚାପିଲୋକଂ,
ସଗ୍ଗଂ ଲୋକଂ ସପୁଞ୍ଞପ୍ପଭୱମୁରୁଫଲଂ ପସ୍ସିତୁଂ ଚା’ରୁ ରୋହ ॥
ସୁଜନପ୍ପସାଦ ସଂୱେଗତ୍ଥାୟ କତେ ମହାୱଂସେ
ଲୋକସାସନସଂଗହକରଣୋ ନାମ
ଅଟ୍ଠପଞ୍ଞାସତିମୋ ପରିଚ୍ଛେଦୋ
ଏକୂନସଟ୍ଠିମ ପରିଚ୍ଛେଦ
ଚତୁରାଜଚରିୟ ନିଦ୍ଦେସୋ
ତଦାରଞ୍ଞୋ ନୁଜାମିତ୍ତା, ତସ୍ସ ପୁତ୍ତା ତୟୋ’ପି ଚ ।
ମହାମଚ୍ଚା ଚୟତୟୋ, ତଥା ୟତନୱାସିନୋ ॥
ତବ୍ବେତେ ଆଦିପାଦସ୍ସ, ରୋହଣେ ୱସତୋ ସତୋ ।
ଅନାରୋଚାପୟିତ୍ୱାନ, ଭୂପାଲମତସାସନଂ ॥
ସମ୍ଭୂୟମନ୍ତୟିତ୍ୱାନ, ସମାନଚ୍ଛନ୍ଦତଂ ଗତା ।
ଅଦଂସୁ ୟୁୱରାଜସ୍ସ, ଲଙ୍କାରଜ୍ଜାଭିସେଚନଂ ॥
ଓପରଜ୍ଜେ ନିୱେସେସୁଂ, ମାନଭରଣନାମକଂ ।
କୁମାରଂ ପୁବ୍ବଚାରିତ୍ତ-ମଗ୍ଗଂ ଲଙ୍ଘିତ୍ଥ ତେ’ଖିଲା ॥
ତୟୋ’ଥ ଭାତରୋ ସବ୍ବେ, ତେ ମାଣଭରଣାଦୟୋ ।
ଜୟବାହୁମହୀପାଲ-ସହିତା ସହସା ତଦା ॥
ମୁତ୍ତାମଣିପ୍ପଭୂତିକଂ, ରତନଂ ସାରସମ୍ମତଂ ।
ସବ୍ବଂ ହତ୍ଥଗତଂ କତ୍ୱା, ୱାହନଞ୍ଚ ଗଜାଦିକଂ ॥
ସକଲଂ ବଲମାଦାୟ, ପୁଲତ୍ଥିନଗରା ତଦା ।
ଖିପ୍ପଂ ତଂ ୱିକ୍କମଭୁଜଂ, ଗଣ୍ହିସାମା’ତି ନିକ୍ଖମୁଂ ॥
ସୁତ୍ୱା ପୱତ୍ତିଂ ସକଲଂ, ଇମଂ ୱିକ୍କମବାହୁସୋ ।
ତା ତସ୍ସନ୍ତିମସକ୍କାରଂ, ୱିଧାତୁଂ ହନ୍ଦନୋ ଲଭିଂ ॥
ଇଦାନି ଖିପ୍ପଂ ଗନ୍ତ୍ୱାନ, ପୁଲତ୍ଥିନଗରଂ ତହିଂ,
ତା ତସ୍ସାଳାହନଟ୍ଠାନ ଦସ୍ସନେ ନେୱ ସୋ ଅହଂ ॥
ସୋକଭାରଂ ୱିନୋଦେସ୍ସଂ, ମମ ଚେତୋ ଗତଂ ଇତି ।
କତଦଳ୍ହ ୱୱତ୍ଥାନୋ, ୱିନିଗ୍ଗମ୍ମ ତତୋ ପୁରା ॥
ପୁଲତ୍ଥିପୁରମାଗଚ୍ଛଂ, ଆଦିପାଦୋ’ତି ସାସସୋ ।
ସତ୍ତଟ୍ଠସତସଙ୍ଖେନ, ବଲେନ ପରିୱାରିତୋ ॥
ଅନ୍ତରାଲପଥେୟେୱ, ଗୁତ୍ତହାଲକମଣ୍ଡଲେ ।
ଗାମେ ପନ ସମୁକ୍କୱ୍ହେ, ଦିସ୍ୱା ସେନଙ୍ଗମାଗତଂ ॥
ମହନ୍ତଂ ୟୁଦ୍ଧସନ୍ନଦ୍ଧଂ, ଏକୱୀରୋ ଭୟାତିକୋ ।
ୟୁଜ୍ଝିତ୍ୱା ତେ ପଲାପେସି, ଖଣେନେୱ ଦିସୋଦିସଂ ॥
ତୟୋ ତେ ଭାତରୋ ତତ୍ଥ, ସମ୍ପତ୍ତାୱ ଜୟା ତତୋ ।
ଅଭିମାନୁଦ୍ଧତା ଖିପ୍ପଂ, ଅନ୍ନୟ୍ହ ବଲୱାହନଂ ॥
ଆଦିପାଦକଜମ୍ବୂତି, ୱିସ୍ସୁତମ୍ହି ପଦେସକେ ।
ସଙ୍ଗାମେସୁଂ ପରାଜେସି, ଭିୟ୍ୟୋ ୟୁଜ୍ଝିତ୍ଥ ସୋ ତୟୋ ॥
ତତିୟଂ କଟଗାମସ୍ମିଂ, କାଳୱାପ୍ୟଂ ଚତୁତ୍ଥକଂ ।
ପଞ୍ଚମଂ ଉଦ୍ଧଟଦ୍ୱାରେ, ଛଟ୍ଠଂସୋ ପଙ୍କୱେଲକେ ॥
ତେହି ୟୁଦ୍ଧଂ କରିତ୍ୱାନ, ଗହୀତୱିଜୟୋ ସଦା ।
ପୁଲତ୍ଥିପୁରମାଗଞ୍ଚି, ସହାମଚ୍ଚ ପରିଜ୍ଜନୋ ॥
ସଚିନ୍ତିତକ୍କମେନେୱ, ପସ୍ସିତ୍ୱାଳାହନଂ ପିତୁ ।
ୱିଦୂରିତମହାସେକୋ, ଲଦ୍ଧସ୍ସାସୋ ପୁରେୱସଂ ॥
ଦୁକ୍ଖେ ସହାୟ ଭୂତାନ-ମତ୍ତନୋ ସୋ ୟଥାରହଂ ।
ଅମଚ୍ଚାନମଦା ସବ୍ବ-ଭୋଗେ ଠାନନ୍ତରେ ହି ସୋ ॥
ଭଟାନଞ୍ଚାପି ସବ୍ବେସଂ, ସହାୟାତାନମତ୍ତନୋ ।
ଅନୁରୂପମଦା ୱୁତ୍ତିଂ, ସରଂ ଦୁକ୍ଖସହାୟତଂ ॥
ମାଣାଭରଣଭୂପୋପି, ସଦ୍ଧିଂ ସେସେହି ଭାତୂହି ।
କରିତ୍ୱା ରୋହଣଂ ପସ୍ସଂ, ରୋହଣଞ୍ଚ ସହତ୍ଥଗଂ ॥
ତତୋ କିତ୍ତିସିରୀମେଘେ, ସଦ୍ୱାଦସସହସ୍ସକଂ ।
ରଟ୍ଠଂ ଦତ୍ୱାନ ୱସିତୁଂ, ତହିଂୟେୱ ସମାଦିସି ॥
ଆଣତ୍ତୋ ଭାତରାକିତ୍ତି-ସିରୀମେଘୋ ଜନାଧିପୋ ।
ଗନ୍ତ୍ୱା ୱସି ପୁରେତତ୍ଥ, ମହାନାଗହୁଲୱ୍ହୟେ ॥
ସିରୀୱଲ୍ଲଭନାମସ୍ସ, କୁମାରସ୍ସାପି ଚାଦିସି ।
ଦେସମଟ୍ଠସହସ୍ସୱ୍ହଂ, ଦତ୍ୱାନ ୱସିତୁଂ ତହିଂ ॥
ତଥେୱ ସୋପି ଗନ୍ତ୍ୱାନ, ଉଦ୍ଧନଦ୍ୱାରନାମକଂ ।
ଗାମଂ କତ୍ୱା ରାଜଦାନିଂ, ୱସନ୍ତୋ ଅନୁସାସିତଂ ॥
ସୟଞ୍ଚ ସହସେନାୟ, ଗନ୍ତ୍ୱା ଦକ୍ଖିଣପସ୍ସକଂ ।
ୱୀରବାହୂତି ପଞ୍ଞାତୋ, ପୁଙ୍ଖଗାମଂ ସମାୱସି ॥
ମାତା ଚ ତିଣ୍ଣଂ ଭାତୂନଂ, ଜୟବାହୁ ଚ ଭୂମିପୋ ।
ନିୱସିଂସୁ ତଦା କିତ୍ତି-ସିରିମେଘସ୍ସ ସନ୍ତିକେ ॥
ତତୋ ସଂୱଚ୍ଛରେ’ତୀତେ, ତେ ମାଣଭରଣାଦୟୋ ।
ତେନତ୍ତନି କତଂ ୟୁଦ୍ଧେ, ସବ୍ବଂ ୱିକ୍କମବାହୁନା ॥
ଦୁରାରୋହଂ ମହନ୍ତଂ ତଂ, ପରାଜୟତରାଭୱଂ ।
ଅନୁସ୍ସରନ୍ତବହୁସୋ, ଅଭିମାନସମୁନ୍ନତା ॥
ମୁଦ୍ଧାଭିସିତ୍ତରାଜୂନ-ମେକାକୀରାଜରଟ୍ଠକଂ ।
ୱିନାୟମଭିସେକେନ, କଥଂ ନାମାନୁଭୋସ୍ସତି ॥
ଇତି ଇସ୍ସା ପରତ୍ତଞ୍ଚ, ୟାତା ସଙ୍ଗୟ୍ହସାୱକେ ।
ଭିୟ୍ୟୋ ସମ୍ଭୂୟସଙ୍ଗାମ-କରଣତ୍ଥାୟ ନିକ୍ଖମୁଂ ॥
ସୁତ୍ୱା ତମତ୍ଥଂ ଦୂତେହି, ସୋ ୱିକ୍କମଭୁଜୋପି ଚ ।
ଅଗା ତେସଂୱ ୱିସୟଂ, ମହାସେନାପୁରକ୍ଖତୋ ॥
ଦେସେ ଦକ୍ଖିଣକେ ବୋଧି-ସେନପବ୍ବତଗାମକେ ।
ୟୁଜ୍ଝିତ୍ୱା ତେ ପରାଜେସି, ତୟୋ ୱିକ୍କମବାହୁସୋ ॥
ରିପୱୋ ଦାନି ମେ ସବ୍ବେ, ଉମ୍ମୂଲେସ୍ସାମହଂ ଇତି ।
ପଲାୟନ୍ତେ ନୁବନ୍ଧିତ୍ଥ, ପଦାନୁପଦିକଂ’ୱ ତେ ॥
ତେ ଚ ଦୁଗ୍ଗଂ ପଲାୟିଂସୁ, ପଞ୍ଚୟୋଜନରଟ୍ଠକେ ।
ଖିପ୍ପଂ ପାୱେକ୍ଖି କଲ୍ୟାଣିଂ, ସୋ’ପି ତେ ଗହଣତ୍ଥିକୋ ॥
ୱୀରୋ ଅରିୟଦେସିୟୋ, ୱୀରଦେୱୋତି ପାକଟୋ ।
ପଳନ୍ଦୀପିସ୍ସରୋ ଏକୋ, ଭୂସଂ ସହସିକୋ ତଦା ॥
ସଦ୍ଧିଂ ସୂରେହି ୟୋଧେହି, ମହାତିତ୍ଥମ୍ହି ଓତରି ।
କାତୁଂ ହତ୍ଥଗହଂ ସକ୍କା, ଲଂକାଦୀପନ୍ତି ଚିନ୍ତିୟ ॥
ସୋ ୱିକ୍କମଭୁଜୋ ସୁତ୍ୱା, ପୱତ୍ତିଂ ଭୂଭୁଜୋ ତଦା ।
ୟାୱତା ନାତ୍ର ଲଂକାୟଂ, ଲଦ୍ଧୋଗାହୋ ଭୱିସ୍ସତି ॥
ତାୱ ଉମ୍ମୂଲନୀୟୋତି, କଲ୍ୟାଣିମ୍ହା ୱିନିଗ୍ଗତୋ ।
ମହାତିତ୍ଥମ୍ହି ମନ୍ନାର-ନାମକଂ ଗାମକଂ ଗତୋ ॥
କତ୍ୱାନ ୱୀରଦେୱୋ’ପି, ସଙ୍ଗାମଂ ତେନ ରାଜିନା ।
ଅନୀକଙ୍ଗାଦୟୋ ରାଜ-ପୁତ୍ତେ ଦ୍ୱେ ଭାତରୋପି ଚ ॥
ସେନାଧିନାୟକଞ୍ଚେୱ, କିତ୍ତିନାମପ୍ପକାସିତଂ ।
ଘାତେତ୍ୱା ସହସା ୱୀର-ସମ୍ମତେ ଚ ବହୂଜନେ ॥
ଗାହେତ୍ୱା ଜୀୱଗ୍ଗାହଂସୋ, ରକ୍ଖକଞ୍ଚ ଚମୂପତିଂ ।
ସବଲଂ ତଂ ପରାଜେତ୍ୱା, ଅନୁବନ୍ଧି ପଦାପଦଂ ॥
ପଲାୟମାନୋ ସୋ ଭୀତୋ, ଆଗନ୍ତ୍ୱାନ ନିଜଂ ପୁରଂ ।
ହତ୍ଥସାରଂ ସମାଦାୟ, କୋଟ୍ଠସାରଂ ଗତୋ ଲହୁଂ ॥
ପଚ୍ଛତୋ ପଚ୍ଛତୋ ୱୀର-ଦେୱୋ ତମନୁବନ୍ଧିୟ ।
ଆଗନ୍ତ୍ୱାନ ପୁରେୱାସଂ, କତିପାହଂ ୱିଧାୟସୋ ॥
ଗଣ୍ହିତୁଂ ୱିକ୍କମଭୁଜଂ, ତତ୍ଥେୱ ତୁରିତଂ ଅଗା ।
ପେସୟିତ୍ୱା ସକଂ ସୋପି, ମହନ୍ତଂ ସକଲଂ ବଲଂ ॥
ୟୁଜ୍ଝାପେତ୍ୱାନ ଘାତେତ୍ୱା, ଗାମେ ଅନ୍ତରୱିଟ୍ଠିକେ ।
ମହାକଦ୍ଦମଦୁଗ୍ଗମ୍ହି, ୱୀରଦେୱଂ ମହବ୍ବଲୋ ॥
ଅଭିସେକଂ ୱିନାୟେୱ, ପୁଲତ୍ଥି ନଗରେ ୱସଂ ।
ଅକାସି ରାଜରଟ୍ଠସ୍ସ, ପସାସନୱିଧିଂ ୱିଭୂ ॥
ଅପନୀୟରଣେ ଛନ୍ଦଂ, ଭାତରୋପି ତୟୋ ତତୋ ।
ଆୱସିଂସୁ ୟଥାପୁବ୍ବଂ, ଗନ୍ତ୍ୱା ରଟ୍ଠଂ ସକଂ ସକଂ ॥
ଚତୁରୋପି ମହୀପାଲା, ୟତମାନା ଚିରଂ ତହିଂ ।
ଏକଚ୍ଛତ୍ତଙ୍କିତଂ କାତୁଂ, ନେୱ ସକ୍ଖିଂସୁ ସବ୍ବସୋ ॥
ଅନିସମ୍ମକାରିଭାୱେନ, କୁଲୀନେ ପରିହାପୟୁଂ ।
ଠପେସୁଞ୍ଚ ମହନ୍ତତ୍ତେ, ହୀନେ ସାଭିମତେ ଜନେ ॥
ୱଡ୍ଢିତଂନେକଧା ସମ୍ମା, ରଞ୍ଞା ୱିଜୟବାହୁନା ।
ସାସନଞ୍ଚ ତଥାଲୋକଂ, ହାପୟିଂସୁ ସୁବୁଦ୍ଧିନୋ ॥
କୁଲୀନାନଂ ମନୁସ୍ସାନ-ମଭାୱେପି ଚ ତାଦିସେ ।
ଦୋସେ ୱିତ୍ତଂ ତଦାୟତ୍ତଂ, ପସୟ୍ହାୱହରିଂସୁ ଚ ॥
ପୀଳେତୁଂ ସକଲଂ ଲୋକ-ମୁଦ୍ଧରନ୍ତାଧିକଂ ବଲିଂ ।
ଉଚ୍ଛୂୱ ଉଚ୍ଛୁୟନ୍ତେତେ, ଖୀଣକୋ ସାଧନେସିନୋ ॥
ଉଦ୍ଧରିତ୍ୱାନ ବୁଦ୍ଧାଦି-ସନ୍ତକେ ଭୋଗଗାମକେ ।
ସୋ ୱିକ୍କମଭୁଜୋ ରାଜା, ସେୱକେସୁ ସମପ୍ପୟୀ ॥
ପୁଲତ୍ଥିନଗରେ ନେକ-ୱିହାରେ ଧାତୁମଣ୍ଡିତେ ।
ସୋୱ ଦେସନ୍ତରୀୟାନଂ, ଭଟାନଂ ୱସିତୁଂ ଅଦା ॥
ସଦ୍ଧେହି ପତ୍ତଧାତୁସ୍ସ, ଦାଠାଧାତୁୱରସ୍ସ ଚ ।
ପୂଜନତ୍ଥାୟ ଦିନ୍ନାନି, ମଣିମୁତ୍ତାଦିକାନି ଚ ॥
ଚନ୍ଦନାଗରୁକପ୍ପୁରଂ, ସୁୱଣ୍ଣାଦିମୟା ବହୂ ।
ପଟିମାୟୋ ଚ ଅଚ୍ଛିଜ୍ଜ, ୟଥାକାମଂ ୱୟଂ ନୟୀ ॥
ସାସନସ୍ସ ଚ ଲୋକସ୍ସ, କ୍ରିୟମାନମୁପଦ୍ଦୱଂ ।
ପସ୍ସନ୍ତା ବହୁସୋ ତସ୍ମିଂ, ତଦା ନିବ୍ବନ୍ନମାନସା ॥
ଅଟ୍ଠମୂଲୱିହାରେସୁ, ୟତୟୋ ଗରୁସମ୍ମତା ।
ପଂସୁକୂଲିକଭିକ୍ଖୂ ଚ, କୋଟ୍ଠାସଦ୍ୱୟନିସ୍ସିତା ॥
ଏୱଂ ତିତ୍ଥିୟତୁଲ୍ୟାନଂ, ସାସନୋପଦ୍ଦୱଂ ବହୁଂ ।
କରୋନ୍ତାନଂ ସକା ସମ୍ଭା-ପୟାତଂ ପୱରଂ ଇତି ॥
ଦାଠାଧାତୁୱରଂ ପତ୍ତ-ଧାତୁମାଦାୟ ରୋହଣଂ ।
ଗନ୍ତ୍ୱା ୱାସମକପ୍ପେସୁଂ, ଫାସୁଠାନେ ତହିଂ ତହିଂ ॥
ତଥେୱ ଫାସୁଠାନେସୁ, ୱିପ୍ପକିଣ୍ଣା ତହିଂ ତହିଂ ।
ତେ କୁଲୀନା ନିଲୀନା’ୱ, ହୁତ୍ୱା ୱାସମକପ୍ପୟୁଂ ॥
ପକ୍ଖଦ୍ୱୟମହୀପାଲ-ଗୟ୍ହାସୀମା ସୁଠାପିତା ।
ସାମନ୍ତା ଅଞ୍ଞମଞ୍ଞେହି, କରୋନ୍ତୋ ବହୁସୋ ରଣଂ ॥
ସୁସମିଦ୍ଧେସୁ ନେକେସୁ, ଗାମେସୁ ନିଗମେସୁ ଚ ।
ଅଗ୍ଗିଂ ଦେନ୍ତା ତଳାକେ ଚ, ଛିନ୍ଦନ୍ତା ଜଲପୂରିତେ ॥
ନାସେନ୍ତା ସବ୍ବଥା ସବ୍ବ-ମାତିକାୱରଣାନି ଚ ।
ଛିନ୍ଦନ୍ତା ନାଳିକେରାଦି, ସୋ ପକାରେ ଚ ଭୂରୁହେ ॥
ୟଥା ପୋରାଣକଗ୍ଗାମ-ଠାନନ୍ତିପି ନ ଞାୟତେ ।
ୱିନାସେସୁଂ ତଥା ରଟ୍ଠଂ, ଅଞ୍ଞମଞ୍ଞୱିରୋଧିନୋ ॥
ତେ ଚ ଭୂମି ପତୀଗାମ-ୱିଲୋପଂ ପତ୍ଥମୋସନଂ ।
କାରେନ୍ତା ନିଜଚାରେହି, ଆଚରୁଂ ଲୋକୁପଦ୍ଦୱଂ ॥
କୁଲୀନାନଂ ମନୁସ୍ସାନଂ, ଦାସକମ୍ମକରାପି ଚ ।
ସସାମିନୋ’ତି ୱତ୍ତନ୍ତା, ନିସ୍ସଙ୍କା ୱୀତଭୀତିକା ॥
ହୁତ୍ୱା ୟୁଧୀୟା ରାଜୂନଂ, ଅବ୍ଭନ୍ତରପୱତ୍ତିନୋ ।
ବଲୱନ୍ତତରା ଜାତା, ଲଦ୍ଧଠାନନ୍ତରା ତଦା ॥
ଜନା ସମନ୍ତକୂଟାଦି-ନେକଦୁଗ୍ଗନିୱାସିନୋ ।
ଅଦେନ୍ତା ଭୂମିପାଲାନଂ, ପୁବ୍ବପଟ୍ଠପିତଂ କରଂ ॥
ରାଜାଣମଗଣେନ୍ତା ତେ, ଗତା ଦାମରିକତ୍ତନଂ ।
ସକଂ ସକଂ’ୱ ୱିସୟ-ମାୱସିଂସୁ ସମୁଦ୍ଧତା ॥
ଅନତ୍ଥେ ନିଚିତା ନାମ, ପରିୱତ୍ତନ୍ତି ସବ୍ବତା ।
ଇତି ୱତ୍ତବ୍ବ ତଂୟେୱ, ୟାତଂ ଲଙ୍କାତଲଂ ତଦା ॥
ଏୱଂ ଗାମକଭୋଜକା ୱିୟ ଭୁସଂତେଜୋ ୱିହୀନା ସଦା ।
ଅଚ୍ଚନ୍ତଂ ବ୍ୟସନାତି ସତ୍ତହଦୟା ରାଜାଭିମାନୁଜ୍ଝିତା ॥
ନିଚ୍ଚଂ ଅତ୍ତପରତ୍ଥସିଦ୍ଧିୱିଧୁରାସଙ୍ଗା ୱିହୀନାସୟା ।
ସବ୍ବେ ତେ ୱିହରିଂସୁ ଭୂମିପତୟୋ ଚାରିତ୍ତମଗ୍ଗାତିଗା ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ଚତୁରାଜଚରିୟନିଦ୍ଦେସୋ ନାମ
ଏକୂନସଟ୍ଠିମୋ ପରିଚ୍ଛେଦୋ ।
ସଟ୍ଠିମ ପରିଚ୍ଛେଦ
କୁମାରୋଦୟୋ
ରୋହଣେ ନିୱସିତ୍ଥା’ୱ, ଜୟବାହୁମହୀପତି ।
ମିତ୍ତାୱ୍ହା ରାଜିନୀ ଚେୱ, ତଦା କାଲମକଂସୁ ତେ ॥
ସିରୀୱଲ୍ଲଭଜାୟା’ଥ, ଜନେସି ସୁଗଲା ଦୁୱେ ।
ମାଣଭରଣକଂ ପୁତ୍ତଂ, ପୁତ୍ତିଂ ଲୀଲାୱତିମ୍ପି ଚ ॥
ମାଣାଭରଣଭୂପାଲ-ଦେୱୀ’ପି ରତନାୱଲୀ ।
ମିତ୍ତଂ ପଭାୱତିଞ୍ଚାପି, ଅଲଭୀ ଧୀତରୋ ଦୁୱେ ॥
ପସ୍ସନ୍ତସ୍ସ ଉଭୋ ତାୟୋ, ଧୀତରୋ ୱୀରବାହୁନୋ ।
ତଦା ମହାଦିପାଦସ୍ସ, ଏୱଂ ଆସି ୱିତକ୍କିତଂ ॥
ଲୋକାଭିସମ୍ମତେ ସବ୍ବ-ଭୂପାଲନ୍ୱୟମୁଦ୍ଧନି ।
ୱିସୁଦ୍ଧେ ସୋମୱଂସମ୍ହି, ଅଭିଜାତା ମୟଂ ପନ ॥
ପିହନୀୟତରାକାରା, ସବ୍ବସତ୍ତିସମୁନ୍ନତା ।
ନାନାୱିଜ୍ଜାସୁ ନିପୁଣା, ହତ୍ଥିଅସ୍ସାଦିସୁକ୍ଖମା ॥
ତଥା ପେକାକିନା ୱେ’ତେ, ତୟୋ ୱିକ୍କମବାହୁନା ।
ପରାଜୟଂ ପରିଭୱଂ, ପାପିତା ବହୁସୋ ରଣେ ॥
ସୂନୁନୋ ସୁସମତ୍ଥସ୍ସ, ୱିସୋଧେତୁ ମିମଂ ମଲଂ ।
ନ ଦିସ୍ସତେ ପାତୁଭାୱୋ, ଅହୋ ନୋ ଅପ୍ପପୁଞ୍ଞତା ॥
ଜନୱାଦକିଲିଟ୍ଠେନ, ରାଜତ୍ତେନାପି କିଂ ମମ ।
ଇଦାନି ୱିସୟାସଙ୍ଗଂ, ହିତ୍ୱା କଲ୍ୟାଣକମ୍ମସୁ ॥
ଅପ୍ପମତ୍ତସ୍ସ ସତତଂ, ନେତବ୍ବା ୱାସରା’ଇତି ।
ନିୟ୍ୟାତେତ୍ୱା ଅମଚ୍ଚାନଂ, ସବ୍ବଂ ରଜ୍ଜୱିଚାରଣଂ ॥
ତହିଂ ସତ୍ତ’ଟ୍ଠମାସଞ୍ହି, ୱସଂ ରତ୍ତିୟମେକଦା ।
ଦେୱରାଜଘରେସେୟ୍ୟଂ, କପ୍ପେସି ସୀଲସଂୟତୋ ॥
ତତୋ ପଚ୍ଚୂସକାଲମ୍ହି, ଦେୱପୁତ୍ତଂ ମହିଦ୍ଧିକଂ ।
ୱିଚିତ୍ତୱତ୍ଥାଭରଣଂ, ଗନ୍ଧମାଲାୱିଭୂସିତଂ ॥
ଉଳାରତରରୂପେନ, ଦେହୋଭାସେନ ଅତ୍ତନୋ ।
ଓଭାସେନ୍ତଂ ଅସେସା’ସା, ସୂରିୟଞ୍ଚ ନ ଭୁଗ୍ଗତଂ ॥
ୱଦନ୍ତଂ ସୁପିନେ ଏୱଂ, ଅଦକ୍ଖି ଦରଣୀପତି ।
ପସୀଦସ୍ସୁ ମହାଭାଗ, ପିତୋଭୱ ମହିପତି ॥
ଧଞ୍ଞଲକ୍ଖଣସମ୍ପନ୍ନୋ, ଇଚ୍ଛିତତ୍ଥସ୍ସସାଧକୋ ।
ୱିନୀତୋ ଲୋକକୁହର-ବ୍ୟାପିତେଜୋ ପରକ୍କମୋ ॥
ଆଣବଲୟସୋକିତ୍ତି-ଭାସୁରୋ ସଗ୍ଗୁଣାକରୋ ।
ଲୋକସାସନସଂୱୁଦ୍ଧି-କରୋ ପୁତ୍ତୱରୋ ତୱ ॥
ଲବ୍ଭୀସ୍ସତେ ମହାରାଜ, ନ ଚିରସ୍ସେୱ ସମ୍ପତି ।
ପୁତ୍ତଦାରାଧିୱୁତ୍ଥଂ ତଂ, ପୁରଂ ଖିପ୍ପଂ ପୟାହୀତି ॥
ପବୁଜ୍ଝିତ୍ୱାନ ସଞ୍ଜାତ-ପୀତିୱେଗୋଥ ରତ୍ତିୟା ।
ୱିଭାତାୟ ତତୋପୋଙ୍ଖ-ଗାମଂ ଗଞ୍ଛିନରୁତ୍ତମୋ ॥
ୟଥା ଦିଟ୍ଠପ୍ପକାରନ୍ତଂ, କଥେସି ସୁପିନଂ ସୁଭଂ ।
ମହେସୀ ପମୁଖାନଂ ସୋ, ଅମଚ୍ଚାନଂ ମହୀପତି ॥
ସଦ୍ଧିଂ ମହେସିୟା ତତ୍ଥ, ପତ୍ଥେନ୍ତୋ ପୁତ୍ତମୁତ୍ତମଂ ।
ଚିନ୍ତୋନ୍ତୋ ଦାନସୀଲାଦିଂ, ସୁଭଂ ନାନପ୍ପକାରକଂ ॥
ଅଥେକଦିୱସଂକାଲେ, ପଚ୍ଚୂସେ ସୁପିନେ ପନ ।
ସବ୍ବଲକ୍ଖଣସମ୍ପନ୍ନଂ, ସବ୍ବସେତଂ ମନୋହରଂ ॥
ଦନ୍ତୀପୋତୱରଂ ଦନ୍ତଂ, କଣ୍ଣେ ଗଣିୟପେମତୋ ।
ପୱିସନ୍ତମିୱତ୍ତାନଂ, ସେୟ୍ୟାଗବ୍ଭଂ ମହେସିୟା ॥
ସମ୍ପସ୍ସିୟ ପବୁଜ୍ଝିତ୍ୱା, ଉଟ୍ଠାୟ ସୟନାୱରା ।
ସଞ୍ଜାତପୀତିପାମୋଜ୍ଜ-ୱେଗପୀଣିତମାନସୋ ॥
ତାୟଂ ୱେଲାୟମେଦାସୁ-ସେୟ୍ୟାଗବ୍ଭଂ ମହେସିୟା ।
ପୱିସ୍ସସୁପିନଂ ତସ୍ସା, ୟଥାଦିଟ୍ଠଂ ପକାସୟୀ ॥
ଅହମ୍ପି ତାଦିସଂ ହତ୍ଥି-ପୋତକଂ ସୟନଂ ମମ ।
ପଦକ୍ଖିଣଂ କରିତ୍ୱାନ, ଠିତଂ ସୋଣ୍ଡେ ସମାଦିୟ ॥
ଆକଡ୍ଢିତ୍ୱାନ ସୟନଂ, ସମାରୋପିୟ ପେମତୋ ।
ଆଲିଙ୍ଗିଂ ସୁପିନମ୍ହୀତି, ଦେୱୀ ଚାପି ତମବ୍ରୱୀ ॥
ଉଭୋ ତେ ଅଞ୍ଞମଞ୍ଞସ୍ସ, ଦିଟ୍ଠମେୱଂ ପକାସିୟ ।
ଉଟ୍ଠାପେସୁଂ ପହଟ୍ଠାୱ, ୱୀତନିଦ୍ଦାରୁଣଂ ତଦା ॥
ତତୋ ପାତୋ ଉପଟ୍ଠାତୁ, ମୁପୟାତଂ ପୁରୋହିତଂ ।
ନେମିତ୍ତକେ ଚ ପୁଚ୍ଛିଂସୁ, ସୁନିତ୍ୱା ତେ ପମୋଦିତା ॥
ନ ଚିରସ୍ସେୱ ପୁତ୍ତସ୍ସ, ଧଞ୍ଞଲକ୍ଖଣସାଲିନୋ ।
ଉପ୍ପତ୍ତିୟା ଅୱସ୍ସଂ’ୱ, ଭୱଂତବ୍ବନ୍ତି କିତ୍ତୟୁଂ ॥
ତଂ ସୁଣିତ୍ୱା ଅମଚ୍ଚା ଚ, ତଥା ନଗରୱାସିନୋ ।
ଅୱିନ୍ଦିଂସୁ ଜନିନ୍ଦୋ ଚ, ସବ୍ବେପୀତି ମହୁସ୍ସୱଂ ॥
ତତୋ ପଟ୍ଠାୟ ସୋତ୍ଥାନଂ, ପତ୍ଥୟଂ ପତ୍ଥିୱୋଭୁସଂ ।
ଭିକ୍ଖୁସଙ୍ଘେନ ବହୁସୋ, ଭଣାପେସି ପରିତ୍ତକଂ ॥
ମଣିମୁତ୍ତାଦିକଂ ଚିତ୍ତଂ, ମହଗ୍ଘମନୁୱାସରଂ ।
ପରିଚ୍ଚଜି ଦାନମୁଖେ, ୟାଚକାନମନେକସୋ ॥
ପୁରୋହିତାଦିୱିପ୍ପେହି, ୱେଦୱେଦଙ୍ଗୱିଞ୍ଞୂହି ।
ୱତ୍ତାପେସି ଚ ହୋମାଦି-ୱିଧାନଂ ସୋତ୍ଥି ସମ୍ମତଂ ॥
ସୁୱିନଟ୍ଠେ ୱିହାରେ ଚ, ଧାତୁଗବ୍ଭେ ଚ ୱାପିୟୋ ।
ଜିଣ୍ଣା ଚ ପଟିସଙ୍ଖତ୍ତୁଂ, ୟୋଜୟୀ ରାଜକପ୍ପିକେ ॥
ଦିନଂ ନୟନ୍ତେ କଲ୍ୟାଣ-କମ୍ମେନେ’ୱଂ ନରିସ୍ସରେ ।
ନ ଚିରଂ ସଣ୍ଠହି ଗବ୍ଭ-ୱରୋ କୁଚ୍ଛିମ୍ହି ଦେୱିୟା ॥
ତତୋୱଗମ୍ମ ତଂ ହଟ୍ଠ-ପହଟ୍ଠୋ ସୋ ନରିସ୍ସରୋ ।
ମହନ୍ତଂ ଦେୱିୟା ଗବ୍ଭ-ପରିହାରମଦାପୟି ॥
ପରିପକ୍କଗବ୍ଭା ଦେୱୀ, କମେନ ଜନୟୀସୁକଂ ।
ସମୟେ ଭଦ୍ଦନକ୍ଖତ୍ତ-ମୁହୁତ୍ତେନଭିଲକ୍ଖିତେ ॥
ସୁପ୍ପସନ୍ନା ଅସେସା ଚ, ଦିସାୟୋ ତଂଖଣେ ଅହୁ ।
ସମୀରଣେ ଚ ୱାସିଂସୁ, ସୁଗନ୍ଧିମୁଦୁସୀତଲା ॥
ଦନ୍ତୀନଂ କୋଞ୍ଚନାଦେନ, ହୟାନଂ ହେସିତେନ ଚ ।
ରାଜଙ୍ଗଣଂ ତଦାଜାତଂ, ମହାକୋଲାହଲା କୂଲଂ ॥
ଅଚ୍ଛେରାତିସୟେ ଏୱଂ, ପାତୁଭୂତେ ଅନେକଧା ।
ଦିସ୍ୱା ତଂ ୱିମ୍ହୟପ୍ପତ୍ତୋ, ମାଣଭରଣଭୂପତି ॥
ସୁତ୍ୱା ନିଜସ୍ସ ପୁତ୍ତସ୍ସ, ତଦା ସଞ୍ଜାତସାସନଂ ।
ଅମତେନାଭିସିତ୍ତୋୱ, ପୀତିପୁଣ୍ଣମନୋରଥୋ ॥
ମୋଚାପେତ୍ୱା ତଦା କାରା-ଘରେ ବଦ୍ଧେ ବହୂଜନେ ।
ଦାନଂ ଉଳାରଂ ସମଣ-ବ୍ରାହ୍ମଣାନଂ ପଦାପୟି ॥
ଅମଚ୍ଚପମୁଖା ଚାପି, ଜନାପୁରନିୱାସିନୋ ।
କଦଲୀତୋରଣାଦୀହି, ରାଜଧାନୀ ମନେକଧା ॥
ଅଲଙ୍କରିତ୍ୱା ସକଲଂ, ସୁମଣ୍ଡିତପସାଧିତା ।
ଛଣଂ ମହନ୍ତଂ ୱତ୍ତେସୁଂ, କତିପାହଂ ମନୋରମଂ ॥
ୱେଦେ ୱୁତ୍ତୱିଧାନେନ, ଜାତକମ୍ମାଦିକଂ ୱିଧିଂ ।
ସବ୍ବଂ ସମାପୟିତ୍ୱାନ, କୁମାରସ୍ସା’ୱନୀପତି ॥
ପୁରୋହିତାଦୟୋ ୱିପ୍ପେ, ତତୋ ଲକ୍ଖଣପାଠକେ ।
ଆଣାପେତ୍ୱାନ ସକ୍କାର-ସମ୍ମାନୱିଧିପୁବ୍ବକଂ ॥
ନିୟୋଜେସି କୁମାରସ୍ସ, ଲକ୍ଖଣାନଂ ପଟିଗ୍ଗହେ ।
ସାଧକଂ ସକଲଂ ତସ୍ସ, ୟତ୍ଥପାଦାଦିଲକ୍ଖଣଂ ॥
ଉପଧାରିୟ ମହାମଚ୍ଚ-ଗଣମଜ୍ଝଗତସ୍ସ ତେ ।
ରାଜିନୋ ଦେୱିୟା ଚାପି, ପକାସେସୁଂ ପମୋଦିତା ॥
ଲଙ୍କାଦୀପଂ ଠପେତ୍ୱାନ, ଜମ୍ବୁଦୀପତଲମ୍ପି ଚ ।
ଏକଚ୍ଛତ୍ତଙ୍କିତଂ କତ୍ୱା-ନୁଭୋତ୍ତୁଂ ନିପୁଣୋ ଇତି ॥
ତେ ସନ୍ତପ୍ପିୟ ଭୋଗେହି, ଭିୟ୍ୟୋ ପୁଚ୍ଛିତ୍ଥ ସାଦରଂ ।
ସନ୍ଦିସ୍ସମାନଂ ୟଂକିଞ୍ଚି, ଅରିଟ୍ଠଂ ଅତ୍ଥି ନତ୍ଥୀ’ତି ॥
ଦୀଘାୟୁକୋ କୁମାରୋ’ୟଂ, କିଞ୍ଚି ପଞ୍ଞାୟତେ ୱତ ।
ଜନକାରିଟ୍ଠୟୋଗୋ’ତି, ତେ ମହୀପତିନୋ’ବ୍ରୱୁଂ ॥
ତସ୍ସାରିଜନସମ୍ମଦ୍ଦି-ପତାପଭୁଜୟୋ ଗତୋ ।
ସୋ ପରକ୍କମବାହୂ’ତି, ଅନ୍ୱତ୍ଥନାମମଗ୍ଗହୀ ॥
କଣ୍ଣୱେ ଧମହଞ୍ଚେୱ, ଅନ୍ନୁପାସନମଙ୍ଗଲଂ ।
କାରାପିୟ ୱିଧାନଞ୍ଞୂ, ୟଥାୱିଧିମସେସତୋ ॥
ରଞ୍ଞୋ ୱିକ୍କମବାହୁସ୍ସ, ସପୁତ୍ତୁପ୍ପତ୍ତିସାସନଂ ।
ୱତ୍ତୁଂ ସଦୂତେ ପେସେସି, ପୁଲତ୍ଥିନଗରଂ ତଦା ॥
ତେହିସୋ ଭାଗିନେୟ୍ୟସ୍ସ, ମହାଭାଗତ୍ତନମ୍ପି ଚ ।
ଜନକାରିଟ୍ଠୟୋଗଞ୍ଚ, ସୁତ୍ୱା ୱିକ୍କମବାହୁସୋ ॥
ଧଞ୍ଞଂ ୱିଜୟରାଜାଦି-ରାଜମାଲାୟ ନାୟକଂ ।
ମଣିଂୱ ଭାସୁରଂ ମୟ୍ହଂ, ଭାଗିନେୟ୍ୟଂ ଜନେସିସୋ ॥
ହାନି ୟାକାଚିସତତଂ, ୟଥା ତସ୍ସ ନ ହେସ୍ସତି ।
ତଥା ମମନ୍ତିକେୟେୱ, କୁମାରୋ ଏତ୍ଥ ୱଡ୍ଢତଂ ॥
ଅଲଦ୍ଧଂ ଲଭିତୁଂ ଲାଭଂ, ଲଦ୍ଧଞ୍ଚ ପରିରକ୍ଖିତୁଂ ।
ସବ୍ବଥା ନ ସମତ୍ଥୋୟଂ, ପୁତ୍ତୋ ଗଜବାହୁ ମମ ॥
ସୂରଭାୱାଦିୟୁତ୍ତୋ’ପି, ମହିନ୍ଦୱ୍ହପରୋସୁତୋ ।
ନିହୀନୋ ମାତୁଗୋତ୍ତେନ, ନ ରଜ୍ଜସ୍ସ ରହୋ ମମ ॥
ଠିତସ୍ସ ୱିକ୍କଜାତେନ, ନେକସୋ ସଞ୍ଚିତେନ ମେ ।
ରଜ୍ଜସ୍ସ ଭାଗିନେୟ୍ୟୋ’ୱ, କାମଂ ଭାଗୀ ଭୱିସ୍ସତି ॥
ଇତିପେସେସି ଦୂତେ ସୋ, ଆନେତୁଂ ତଂ କୁମାରକଂ ।
କୁମାରା ଭରଣଂ ଦତ୍ୱା, ସେସଂ ସାରଞ୍ଚୁପାୟନଂ ॥
ସବ୍ବଂ ଦୂତମୁଖା ସୁତ୍ୱା, ୱୀରବାହୁ ମହୀପତି ।
ତସ୍ସେତଂ ୱଚନଂ ୟୁତ୍ତଂ, ୱୁତ୍ତଂ ମେହିତ ବୁଦ୍ଧିୟା ॥
ତଥାପି ଚ ନିଜାରିଟ୍ଠ-ପଟିକାରତ୍ଥମୀଦିସଂ ।
ଓରସଂ ପୁତ୍ତରତନଂ, ପେସେତୁଂ ନା’ନୁରୂପକଂ ॥
କିଞ୍ଚ ତତ୍ଥ କୁମାରମ୍ହି, ନୀତେ ୱିକ୍କମ ବାହୁନୋ ।
ପକ୍ଖୋ ଲଦ୍ଧମହାୱାହ-ବଲୋ ୱିୟ ହୁତାସନୋ ॥
ଅଚ୍ଚୁନ୍ନତେନ ମହତା, ତେଜସା ସଞ୍ଜଲିସ୍ସତି ।
ହାନିରେୱ ୱତମ୍ହାକଂ, ମହତୀ ହେସ୍ସତେ ଭୁସଂ ॥
ଇତି ହତ୍ଥେ ଗତାନଂ ସୋ, ଦୂତାନଂ ଥନୟଂ ସକଂ ।
ଅପେସେତ୍ୱା ୱିସଜ୍ଜେସି, ପସାଦିୟ ମନେନ ସୋ ॥
ନରାଦିନାଥୋ ନିୱସଂ ତହିଂସୋ ।
ତିବ୍ବେନ ଫୁଟ୍ଠୋ ମହତାଗଦେନ,
ରଜ୍ଜେନ ସଦ୍ଧିଂ ୱିଜହିତ୍ଥ ଦେସଂ ॥
ସୁଜନପ୍ପସାଦସଂୱେ ଗତ୍ଥାୟ କତେ ମହାୱଂସେ
କୁମାରୋଦୟୋ ନାମ
ସଟ୍ଠିମୋ ପରିଚ୍ଛେଦୋ ।
ଏକସଟ୍ଠିମ ପରିଚ୍ଛେଦ
ସଙ୍ଖତ୍ଥଲିପୁରାଭିଗମନୋ
ସୁତ୍ୱା ଦ୍ୱେ ଭାତରୋ ଅଞ୍ଞେ, ଜେଟ୍ଠସ୍ସୋ ପରତିଂସଦା ।
ଖିପ୍ପଂ ସରଟ୍ଠା ଆଗମ୍ମ, କାରେସୁଂ ଅନ୍ତିମଂ ୱିଧିଂ ॥
ଅଥ କିତ୍ତିସିରିମେଘୋ, ରଟ୍ଠଂ ଜେଟ୍ଠସ୍ସ ଭାତୁନୋ ।
ଅତ୍ତାଧୀନଂ କରିତ୍ୱାନ, ଆମନ୍ତିୟ କଣିଟ୍ଠକଂ ॥
ଦତ୍ୱା ରଟ୍ଠଦ୍ୱୟଂ ଅଞ୍ଞଂ, ୱତ୍ଥୁଂ ତତ୍ଥେୱ ଆଦିସି ।
ସୋ’ପି ଜେଟ୍ଠସ୍ସ ଭାତୁସ୍ସ, ୱଚନଂ ସମ୍ପଟିଚ୍ଛିୟ ॥
ସମାଦାୟ କୁମାରଞ୍ଚ, ଦେୱିଞ୍ଚ ରତନାୱଲିଂ ।
ଧୀତରୋ ଦ୍ୱେ ଚ ଗନ୍ତାନ, ମହା ନାମହୁଲଂ ପୁରଂ ॥
ସମଗ୍ଗା ନିୱସଂ ତତ୍ଥ, କୁମାରସ୍ସ ସିଖାମହଂ ।
କାରେତ୍ୱା ପରିହାରେନ, ୱଡ୍ଢେସି ମହତା ସଦା ॥
ତତୋ ସୋ ଦେୱିୟା ଜେଟ୍ଠଂ-ଧୀତରଂ ମିତ୍ତନାମିକଂ ।
ଦାତୁକାମୋ ସପୁତ୍ତସ୍ସ, ସହାମଚ୍ଚେହି ମନ୍ତୟି ॥
କାଲିଙ୍ଗନ୍ୱୟସମ୍ଭୂତା, ପାୟେନଖଲୁ ଭୂମିପା ।
ସାମିଭାୱଂ ଗତା ଅସ୍ମିଂ, ଲଙ୍କାଦୀପମ୍ହୀ ଭୂୟସୋ ॥
କାଲିଙ୍ଗଗୋତ୍ତ ସମ୍ଭୂତ, ଗଜବାହୁସ୍ସ ଦାତୱେ ।
ଗୂଳରୂପେନ ଦେୱୀ’ୟଂ, ୟଦି ପେସେୟ୍ୟ ଧୀତରଂ ॥
ଭିୟ୍ୟୋ ୱିୱାହସମ୍ବଦ୍ଧୋ, ବଲୱା ସୋ ଭୱିସ୍ସତି ।
ମୟ୍ହଂ ଏସୋ ନିରାଲମ୍ବୋ, ପୁତ୍ତୋ ହେହୀତି ସବ୍ବଥା ॥
ତସ୍ମା ମେ ସୁନୂନୋ ଏସା, ଦାତୁଂ ୟୁତ୍ତା କୁମାରିକା ।
ଏୱଂ ସତି ୱତମ୍ହାକଂ, ୱଡ୍ଢିୟେ’ୱ ସିୟା ‘‘ଇତି’’ ॥
ଦେୱୀପି ସୁତ୍ୱା ତଂ ସବ୍ବ-ମାଦିଚ୍ଚନ୍ୱୟ ମଣ୍ଡନା ।
ସବ୍ବଥା ତମନିଚ୍ଛନ୍ତି, ଇଦମାହ ମହୀପତିଂ ॥
ଘାତେତ୍ୱା ସକଲେ ୟକ୍ଖେ, କୁମାରୋ ୱିଜୟୱ୍ହୟୋ ।
ଲଂକାଦୀପମିମଂ’କାସି, ମନୁସ୍ସାୱାସକଂ ସଦା ॥
ତତୋ ପଭୁତି ଅମ୍ହାକଂ, ଘଟେସୁଂ ୱିଜୟନ୍ୱୟଂ ।
କାଲିଙ୍ଗୱଂସଜେହେୱ, ସମ୍ବନ୍ଧଂ କତ୍ୱ ପୁବ୍ବକଂ ॥
ଅଞ୍ଞଭୂପାଲ ସମ୍ବନ୍ଧୋ, ସୁତପୁବ୍ବୋ ପିନତ୍ଥିନୋ ।
ସୋମୱଂସ ସମୁମ୍ଭୂତେ, ଠପେତ୍ୱା ଧରଣିସ୍ସରେ ॥
ତୁୟ୍ହଂ ଜାତୋତି ଅମ୍ହାକଂ, ସମ୍ବନ୍ଧୋ ସୋ କଥଂ ସିୟା ।
ଅରିୟନ୍ୱୟ ସମ୍ଭୂତ, କୁମାରେନ ସହାମୁନା ॥
ଏୱଂ ସୋ ଦେୱିୟା ତାୟ, ନେକସୋ ୱାରୟନ୍ତିୟା ।
ପସୟ୍ହସକ ପୁତ୍ଥସ୍ସ, ତଂ କୁମାରିମଦାପୟି ॥
ସୋ ଅନେକଗୁଣୋଦାର- ଭରିୟାନୁଗତୋ ତତୋ ।
ରଞ୍ଜୟନ୍ତୋ ଜନେ ସବ୍ବେ, ଜନକସନ୍ତିକେ ୱସି ॥
ଏକୱୀସତିଂ ୱସ୍ସାନି, ରଜ୍ଜଂ ୱିକ୍କମ ବାହୁସୋ ।
ଅନୁଭୋତ୍ୱା ୟଥାକମ୍ମଂ, କାୟଭେଦା ଗତୋ ପରଂ ॥
ତତୋ ଗଜଭୁଜୋ ଠିତଂ, ସମ୍ପନ୍ନବଲୱାହନଂ ।
ରଜ୍ଜଂ ହତ୍ଥଗତଂ କତ୍ୱା, ପୁଲତ୍ତିନଗରେ ୱସୀ ॥
ତତୋ କିତ୍ତିସିରୀମେଘ, ସିରୀୱଲ୍ଲଭ ଭୂମିପା ।
ୱୁତ୍ତନ୍ତ ମେତଂ ୱିଞ୍ଞାୟ, ଏୱଂ ସମନୁଚିନ୍ତୟୁଂ ॥
ତସ୍ସ ୱିକ୍କମ ବାହୁସ୍ସ, ୱୁଦ୍ଧଭାୱେନ ନେକଧା ।
ମୂଲରଜ୍ଜାଧିପଚ୍ଚଂ ତଂ, ଅମ୍ମଂ ନିନ୍ଦାକରଂ ନ ହି ॥
ତଦତ୍ଥଜସ୍ସ ବାଲସ୍ସ, ମୂଲରଜ୍ଜଂ ପସାସନୋ ।
ଉପେକ୍ଖଣଂ ପନମ୍ହାକଂ, ନେୱାନୁଚ୍ଛୱିକଂ ୱତ ॥
ତେ ସୋୟାୱ ସରଜ୍ଜମ୍ହି, ବଦ୍ଧମୂଲୋ ଭୱିସ୍ସତି ।
ପସୟ୍ହ ତାୱ ତଂ ରଜ୍ଜଂ, ୱଟ୍ଟତି ଗଣ୍ହିତୁଂ ଇତି ॥
ୱେଲକ୍କାର ବଲଂ ସବ୍ବଂ, ଭିନ୍ଦିଂସୁ ଧନ ଦାନତୋ ।
ଠପେତ୍ୱା ସେୱକେ କେଚି, ତସ୍ସବ୍ଭନ୍ତରିକେ ତଦା ॥
ଗଜବାହୁ ମହୀପାଲେ, ୱିରତ୍ତା ରଟ୍ଠୱାସିନୋ ।
ଉଭିନ୍ନଂ ରାଜୂନଂ ଦୂତେ, ପେସୟୁଂ ନେକସୋ ତତୋ ॥
ରଜ୍ଜଂ ସାଧେତ୍ୱା ଦସ୍ସାମ, ଏକୀଭୂତା ମୟଂ ପନ ।
ଉପତ୍ଥମ୍ଭକଭାୱୋ’ୱ, କାତବ୍ବୋ କେୱଲଂ ଇତି ॥
ତତୋ ଦ୍ୱେ ଭାତୁକା ସେନଂ, ସକଂ ସନ୍ନୟ୍ହ ୱେଗସା ।
ଉଭତୋ ମୁଖତୋ ତସ୍ସ, ରଟ୍ଠମଜ୍ଝମୁପାଗମୁଂ ॥
ପହିଣିଂସୁ ଚ ତେ ଦୂତେ, ତତୋ ଗଜବୋହୁୱ୍ହୟୋ ।
ଭୂମିପାଲୋ ନିଜାମଚ୍ଚେ, ସନ୍ନିପାତିୟ ମନ୍ତୟି ॥
ୱେଳକ୍କାରବଲଂ ସବ୍ବ-ମୁଜୁପଚ୍ଚତ୍ତିକଂ ଅହୁ ।
ରାଜାନୋ ଦ୍ୱେ ଚ ନୋ ରଟ୍ଠଂ, ସଙ୍ଗାମତ୍ଥମୁପାଗତା ॥
ପଠମଂ ତେସୁ ପକ୍ଖସ୍ସ, ଏକସ୍ସ ବଲିନୋ ଭୁସଂ ।
ମୁଖଭଙ୍ଗେ କତେ ଖିପ୍ପଂ, ତତୋ ଅଞ୍ଞେ ସୁସାଧିୟା ॥
ଇତି ନିଚ୍ଛିୟ ସେନଙ୍ଗଂ, ସବ୍ବମାଦାୟ ଅତ୍ତନୋ ।
ସିରିୱଲ୍ଲଭରାଜାଭି-ମୁଖଂ ୟୁଦ୍ଧା’ୟୁପାଗମି ॥
ସିରିୱଲ୍ଲଭରାଜାପି, ସଙ୍ଗାମ ମହିଭିଂସନଂ ।
ପାତୋ ପଟ୍ଠାୟ ସାୟନ୍ହ-କାଲଂ ୟାୱ ପୱତ୍ତୟଂ ॥
ଅସକ୍କୁଣନ୍ତୋ’ଭିଭୱଂ, ୱିଧାତୁଂ ତସ୍ସ କଞ୍ଚିପି ।
ତତୋୱ ସୋ ନିୱତ୍ତିତ୍ୱା, ସକଂ ରଟ୍ଠଂ ଗତୋ ଲହୁଂ ॥
ଗଜବାହୁସ୍ସଗୋକଣ୍ଣ-ସଚିୱେନ ପରାଜିତୋ ।
ଅଗା ରଟ୍ଠଂ ସକଂ କିତ୍ତି-ସିରିମେଘୋ’ପି ଭୂପତି ॥
ଗଜବାହୁନରିନ୍ଦୋପି, ସଙ୍ଗାମେ ତମ୍ହି କିଞ୍ଚିପି ।
ପରିହାନିମସମ୍ପତ୍ତୋ, ପୁନା’ଗମ୍ମ ପୁରନ୍ତିକଂ ॥
ବଲନାଥେ ୱିନିଗ୍ଗୟ୍ହ, ସାପରାଧେ ବହୂ ବଲୀ ।
ରଟ୍ଠଂ ୱୂପସମେତ୍ୱାନ, ପାୱେକ୍ଖି ନଗରଂ ସକଂ ॥
ରଟ୍ଠେ ସକେ ସକେୟେୱ, ତତୋ ପଭୂତି ଭୂମିପା ।
ଅଞ୍ଞୋଞ୍ଞମିତ୍ତେ ସମ୍ବନ୍ଧଂ, ୱିଧାୟ ୱିହରିଂସୁ ତେ ॥
ତତୋ ପରକ୍କମଭୁଜୋ, ଧରଣୀ ପାଲନନ୍ଦନୋ ।
ମେଧାୱୀନେକସିପ୍ପେସୁ, ସିକ୍ଖମାନୋ ସୁସାଧୁକଂ ॥
ୱିଚାରକ୍ଖମପଞ୍ଞତ୍ତା, କିଚ୍ଚା କିଚ୍ଚେସୁ ନେକସୋ ।
ଅଚ୍ଚୁଳାରାସୟତ୍ତା ଚ, ମହାଭାଗତ୍ତନେନ ଚ ॥
ଅତ୍ତନୋ ମାତୁଭଗିନୀ, ସହୱାସ ସୁଖମ୍ହି ଚ ।
ଅଲଗ୍ଗମାନସୋନେକ, ବଲାକୀଳାରସେସୁ ଚ ॥
ସୂରଭାୱାଦିସଂୟୁତ୍ତା, ରାଜପୁତ୍ତା ତୁ ମାଦିସା ।
ପଚ୍ଚନ୍ତେ ଈଦିସେ ଦେସେ, କଥଂ ନାମ ୱସିସ୍ସରେ ॥
ଜାତଦେସଞ୍ଚ ମେ ଦାନି, ୟୁୱରାଜପଭୋଗିୟଂ ।
ଗମିସ୍ସାମୀତି ନିଗ୍ଗଞ୍ଛି, ତମ୍ହା ପରିଜନତ୍ଥିତୋ ॥
କମେନ ସନ୍ତିକଂ ସଙ୍ଖ-ନାୟକତ୍ଥଲିସଞ୍ଞିନୋ ।
ଗାମସ୍ସାଗା ଅହିଂ କିତ୍ତି-ସିରିମେଘୋ ନିସମ୍ମ ତଂ ॥
ଅଭାୱା ରଜ୍ଜ ଦାୟାଦ-ସମାନସ୍ସ’ତ୍ରଜସ୍ସ ମେ ।
ଏକାକୀ’ହନ୍ତି ୟୋ ଚିତ୍ତ-ସନ୍ତାପୋ ସନ୍ତତଂ ଗତୋ ॥
ଜେଟ୍ଠଂୱ ଭାତରଂ ମୟ୍ହଂ, ତଂ ଦେହପଟିବିମ୍ବକଂ ।
ଦଟ୍ଠୁଂ ମେ ସତ୍ତତଂ ପୁଞ୍ଞଂ, ମହନ୍ତମୁଦିତଂତିଚ ॥
ପାମୁଜ୍ଜୱେଗୱସଗୋ, ନଗରଂ ତଂ ମନୋହରଂ ।
ଅଲଙ୍କାରା ପୟିତ୍ୱାନ, ତୋରଣାଦୀହି ନେକଧା ॥
ଗନ୍ତ୍ୱା ପଟିପଥଂୟେୱ, ବଲୋଘପରିୱାରିତୋ ।
ନରିନ୍ଦୋ ତିଥିନକ୍ଖତ୍ତ-ୱିସେସେ ସୁଭସମ୍ମତେ ॥
ଅନଞ୍ଞସାଧାରଣତଂ, ସମ୍ପତ୍ତେହି ଗୁଣେହି ଚ ।
ଲକ୍ଖଣେହି ଚ ସବ୍ବେହି, କଲ୍ୟାଣେୟି ସୁସଂୟୁତଂ ॥
ଦିସ୍ୱା କୁମାରଂ ସନ୍ତୁଟ୍ଠୋ, ଆଲିଙ୍ଗିତ୍ୱାନ ପେମତୋ ।
ଉରେ କତ୍ୱାନ ଚୁମ୍ବିତ୍ୱା, ମତ୍ଥକମ୍ହି ପୁନପ୍ପୁନଂ ॥
ଜନସ୍ସ ବଲତୋ ତସ୍ସ, ପସ୍ସତୋ ଲୋଚନେହି ସୋ ।
ସନ୍ତୋସ ଅସ୍ସୁଧାରାୟୋ, ୱସ୍ସାପେନ୍ତୋ ନିରନ୍ତରଂ ॥
ମନୁଞ୍ଞମେକ ମାରୁୟ୍ହ, ୱାହନଂ ସହ ସୂନୁନା ।
ଭେରିନି ଦେନ ପୂରେନ୍ତୋ, ଦିସା ଦସ ସମନ୍ତତୋ ॥
ପୱିସିତ୍ୱା ପୁରଂ ତତ୍ଥ, ଅଲଙ୍କାରେ ମନୋରମେ ।
ଦସ୍ସୟନ୍ତୋ ସପୁତ୍ତସ୍ସ, ପାୱିସି ରାଜମନ୍ଦିରଂ ॥
ୱଗାଦିନେକେ ପରିଚାରକେ ସୋ ।
ନାନାଗୁଣା ରାଧିତମାନସସ୍ସ,
ୱସୀସକାସେ ପିତୁନୋ ସୁଖେନ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ସଙ୍ଖତ୍ଥଲିପୁରାଭିଗମନୋ ନାମ
ଏକସଟ୍ଠିମୋ ପରିଚ୍ଛେଦୋ ।
ଦ୍ୱିସଟ୍ଠିମପରିଚ୍ଛେଦ
ପରମଣ୍ଡଲାଭିଗମନୋ
ଅତ୍ତନାଭିମତସ୍ସା’ସୁ, ଜାତଦେସସ୍ସ ପତ୍ତିୟା ।
ସମ୍ପୁଣ୍ଣମନସଙ୍କପ୍ପୋ, ଦୁସ୍ସଙ୍କପୱିୱଜ୍ଜିତୋ ॥
ୱଜିରୂପମୋରୁପଞ୍ଞା, ବଲେନ ଗୁରୁସନ୍ତିକେ ।
ଲହୁଂ ବହୁଞ୍ଚ ଗଣ୍ହନ୍ତୋ, ସିପ୍ପଜାତମନେକ କଂ ॥
ଜିନାଗମେସୁ ନେକେସୁ, କୋଟିଲ୍ଲା ଦୀସୁ ନୀତିସୁ ।
ସଦ୍ଦସତ୍ଥେ ଚ କାୱେୟ୍ୟେ, ସନିଘଣ୍ଡୁକ କେଟୁଭେ ॥
ନଚ୍ଚଗୀତେସୁ ସତ୍ଥେସୁ, ହତ୍ଥିସିପ୍ପାଦିକେସୁ ଚ ।
ଧନୁ ଖଗ୍ଗାଦିନେକେସୁ, ସତ୍ଥେସୁ ଚ ୱିସେସତୋ ॥
ପାରପ୍ପତ୍ତୋ ୱିନୀତତ୍ତୋ, ପିତୁ ରଞ୍ଞୋ ସମାଚରି ।
ଅଧିପ୍ପାୟାନୁକୁଲଂ’ୱ, ସଦା ଭତ୍ତିପୁରସ୍ସରୋ ॥
ତଦା ସଦା ଦରାଚାର-ଗୁଣାରାଧିତମାନସୋ ।
ପିୟେନ ୱିୟ ମିତ୍ତେନ, ତେନ ସଦ୍ଧିଂ ମହୀପତି ॥
ଉୟ୍ୟାନଜଲକୀଳାଦି-ସୁଖଂ ନାନପ୍ପକାରକଂ ।
ଅନୁଭୋତ୍ୱା ସଦେସସ୍ମିଂ, ସଞ୍ଚରନ୍ତୋ ତହିଂ ତହିଂ ॥
ଏକଦାସଙ୍ଖସେନାଧି-ପତିନା ଦଳ୍ହଭତ୍ତିନା ।
ସରଟ୍ଠସୀମା ରକ୍ଖାୟ, ୟୋ ଜିତେନ ବଲୀୟସା ॥
ଅଜ୍ଝାୱୁତ୍ଥସ୍ସ ଚ ବଲତ୍ଥ-ଲିନମସ୍ସ ଚ ସନ୍ତିକଂ ।
ଗାମସା’ଗଞ୍ଛି ସୁତ୍ୱାନ, ତମତ୍ଥଂ ଧଜିନୀପତି ॥
ଗାମଂ ତଂ ସାଧୁକଂ ସଜ୍ଜୁ, ସଜ୍ଜାପେତ୍ୱା ସପୁତ୍ତକଂ ।
ପଚ୍ଚୁଗ୍ଗନ୍ତ୍ୱା ମହୀପାଲଂ, ପଣମିତ୍ୱା ଠିତୋ ତଦା ॥
ପିତା ପୁତ୍ତୋ ଉଭୋ ତସ୍ସ, ସମ୍ଭାସିୟ ପିୟଂ ୱଚୋ ।
ନେକଧା’ରାଧିତା ତେନ, ତଂ ଗାମଂ ସମୁପାଗଗୁଂ ॥
ତହିଂ କତିଚି ଭୂପାଲୋ, ୱାସରେ ୱୀତିନାମିୟ ।
ସେନାପତିଂ ସମାହୂୟ, ଇଦଂ ୱଚନଂ ମବ୍ରୱି ॥
ପୁତ୍ତୋ ମେ ଦାନିୱୟସି, ଠିତୋ’ ପନୟନାରହେ ।
ତସ୍ସୋପନୟନଂ କାତୁଂ, ମହୋପକରଣଂ ଲହୁଂ ॥
ସଜ୍ଜେତବ୍ବନ୍ତି ତଂ ସୁତ୍ୱା, ସୋପି ସେନାଧିନାୟକୋ ।
ସବ୍ବୁପକରଣଂ ଖିପ୍ପଂ, ମଙ୍ଗଲତ୍ଥଂ ସୁସଜ୍ଜୟି ॥
ସୁଗନ୍ଧ ଦୀପପୁପ୍ଫାଦି-ୱତ୍ଥୂହି ଦିୱସତ୍ତୟଂ ।
ପୁବ୍ବକାରଂ କରିତ୍ୱାନ, ମହନ୍ତଂ ରତନତ୍ତୟେ ॥
ୱେଦିକାଚାରଦକ୍ଖେହି, ଦ୍ୱିଜେହି ପୁଥୁୱୀପତି ।
ସମ୍ପଭାୱାନୁ ରୂପଂୱ, ମଙ୍ଗଲଂ ତଂ ସମାପିୟ ॥
ପରକ୍କମକୁମାରେନ, ତେନ ସଦ୍ଧିଂ ସମାରଭି ।
ୱସନ୍ତକୀଳଂ ମହତିଂ, ସାମଚ୍ଚୋ କୀଳିତୁଂ ତଦା ॥
ରାଜା କିତ୍ତି ସିରୀମେଘୋ-ରୋହଣେ ୱସତୋ ତଦା ।
ସିରୀୱଲ୍ଲଭନାମସ୍ସ, ସଭାତୁ ମରଣମ୍ପି ଚ ॥
ମାଣଭରଣନାମସ୍ସ, ରଜ୍ଜଲାଭଞ୍ଚ ଦେୱିୟା ।
ମିତ୍ତାୟ ପଟିଲାଭଞ୍ଚ, ସିରୀୱଲ୍ଲଭସୂନୁ ନୋ ॥
ରୋହଣାଗତଦୂତେହି, ସୁଣିତ୍ୱା ସକଭାତୁନୋ ।
କାଲକ୍ରିୟାୟ ସଞ୍ଜାତ-ସୋକୱେଗଂ ସୁଦୁସ୍ସହଂ ॥
ମିତ୍ତାୟତନୟୁପ୍ପତ୍ତି ପୱତ୍ତିଂ ସୱଣେନ ତଂ ।
ୱିନେୟ୍ୟ ୱିରତୋ ତମ୍ହା, ୱସନ୍ତସମୟୁସ୍ସୱା ॥
ନିୱତ୍ତେତ୍ୱାନ ତତ୍ଥେୱ, ସେନାନିଂ ସଙ୍ଖନାମକଂ ।
ପୁତ୍ତେନ ସହ ସୋ ସଙ୍ଖ-ତ୍ଥଲି ନାମଂ ପୁରଂ ଗମି ॥
ପରକ୍କମକୁମାରେନ, ତେନ ସଦ୍ଧିଂ ତହିଂ ସୁଖଂ ।
ୱସତୋ ତସ୍ସ ଭୂପସ୍ସ, ୱସ୍ସମେକମତିକ୍କମି ॥
ମାଣାଭରଣଭୂପସ୍ସ, ଦେୱୀ ଚାପି ପଭାୱତୀ ।
ଲଭିତ୍ଥ ଦୁତିୟା କିତ୍ତି-ସିରୀ ମେଘୱ୍ହୟଂ ସୁତଂ ॥
ସୁଣିତ୍ୱା ତଞ୍ଚ ସୋ ଅମ୍ହଂ, ୱଂସୋ ଜାତୋ ମହା’’ଇତି ।
ଅହୁ କିତ୍ତିସିରୀମେଘୋ, ତଦା ଅତ୍ତମନୋ ଭୁସଂ ॥
ଲଂକାଦୀପୋପଭୋଗେକ-ହେତୁନା ମହତା ସତା ।
ଅସାଧାରଣଭୂଭେନ, ଚୋଦିତୋ ପୁଞ୍ଞକମ୍ମୁନା ॥
କୁମାରୋ ସୋ’ଥ ପିତରା, ପିୟମିତ୍ତେ ୱିୟତ୍ତନି ।
କରିୟମାନଂ ସସ୍ନେହଂ, ମହନ୍ତଂ ଚୋ’ପଲାଲନଂ ॥
ସଚିୱାନମନେକେସଂ, ଭୟଭତ୍ତୀ ପୁରସ୍ସରଂ ।
କ୍ରିୟମାନମୁପଟ୍ଠାନଂ, ନ ମଞ୍ଞନ୍ତୋ ତିଣାୟପି ॥
ଲଂକାଦୀପମିମଂ ସବ୍ବ ମେକଚ୍ଛତ୍ତୋ ପସୋଭିତଂ ।
ଖିପ୍ପଂ କାରେତୁକାମୋ ସୋ, ସୟଂ ଇତି ୱିଚିନ୍ତୟି ॥
କେସ ଅକ୍ଖକ ଗୀୱଟ୍ଠି-ଦାଠା ପତ୍ତାନ ମେୱ ଚ ।
ପଦଚେତ୍ୟ ମହାବୋଧି-ସାଖାନଞ୍ଚାପି ସତ୍ଥୁନୋ ॥
ଚତୁରାସୀତିସହସ୍ସାନଂ, ଧମ୍ମକ୍ଖନ୍ଧାନ ମେୱ ଚ ।
ସମ୍ମାସମ୍ବୁଦ୍ଧକପ୍ପାନଂ, ଆଧାରତ୍ତା ଚ ନିଚ୍ଚସୋ ॥
ଆକରତ୍ତା ଚ ନେକେସଂ, ମଣିମୁତ୍ତାଦିୱତ୍ଥୂନଂ ।
ସମ୍ମତୋପି ୱିସିଟ୍ଠୋତି, ଦୀପୋନାତି ମହା ଅୟଂ ॥
ତୟୋ ମେ ପିତରୋ ଭୂପା, ମାତୁଲୋପି ଚ ସବ୍ବଥା ।
ଏକଚ୍ଛତ୍ତେନ ୱତ୍ତେତୁ, ମସମତ୍ଥା ୱିଭଜ୍ଜି’ମଂ ॥
ଭୁଞ୍ଜନ୍ତା ଏତ୍ତକେନେୱ, କତକିଚ୍ଚା ମୟଂ ଇତି ।
ମଞ୍ଞନ୍ତା ୱିଗତଚ୍ଛନ୍ଦା’ଭିସେକମ୍ହି କୁଲୋଚିତେ ॥
ରଟ୍ଠେସକେ ସକେୟେୱ, ଇସ୍ସେରଂ ସମ୍ପୱତ୍ତୟୁଂ ।
କସିକମ୍ମାଦିକଂ ଗାମ-ଭୋଜକା ୱିୟ ନିସ୍ସିତା ॥
ତେସୁ କିତ୍ତିସିରି ମେଘଂ, ପେତ୍ତେୟ୍ୟଂ ମେ ଠପେତ୍ୱ ତେ ।
ଅଗମଂସୁ ୟଥାକମ୍ମଂ, ସେସା ଭୂପତୟୋ ତୟୋ ॥
ମଚ୍ଚାନଂ ପରମଂ ଆୟୁ, ୱତେ’ଦାନି ପରିତ୍ତକଂ ।
ବାଲାୟୁୱାନୋ ୱୁଦ୍ଧା ଚ, ଇମେ ସତ୍ତା’ନୁପୁବ୍ବସୋ ॥
ପାପୁଣିସ୍ସନ୍ତି ମରଣ-ମୀତି’ୟଂ ନିୟମୋପି ଚ ।
ନ ହେୱ ଅସ୍ମିଂ ଲୋକସ୍ମିଂ, ସଂୱିଜ୍ଜତି କଦାଚିପି ॥
ତସ୍ମା ସରୀରକେ ଅସ୍ମିଂ, ଭଙ୍ଗୁରେ ସାରୱଜ୍ଜିତେ ।
ହୀଳିତେ ସାରଦସ୍ସୀହି, ଅପେକ୍ଖଂ ହିତ୍ୱା ସବ୍ବଥା ॥
ପିହନିୟେ ୟସୋଦେହେ, ଚିରଟ୍ଠାୟିମ୍ହି ସବ୍ବଦା ।
ଅମ୍ହାଦିସେହି କତ୍ତବ୍ବୋ, ରାଜପୁତ୍ତେହି ଆଦରୋ ॥
ଉମ୍ମଗ୍ଗଜାତକାଦୀସୁ, ଚାରିତ୍ତଞ୍ଚାପି ଭୂମିସୁ ।
ୱିହିତଂ ବୋଧିସତ୍ତେନ, ୱୀରଭାୱାଦିନିସ୍ସିତଂ ॥
ରାମାୟଣଭାରତାଦି-ଲୋକିୟାସୁ କଥାସୁପି ।
ରାମସ୍ସ ୱିକ୍କମଞ୍ଚେୱ, ତସ୍ସ ରାୱଣଘାତିନୋ ॥
ଦୁୟୋଧନାଦିରାଜାନୋ, ହନ୍ତ୍ୱାୟୁଦ୍ଧେ ପୱତ୍ତିତଂ ।
ୱିକ୍କମାତି ସୟଞ୍ଚେୱ, ପଞ୍ଚନ୍ନଂ ପଣ୍ଡୁସୂନୂନଂ ॥
ଇତିହାସକଥାୟଞ୍ଚ, ଦେୱାସୁରରଣେ ପୁରା ।
ଦୁସ୍ସନ୍ତାଦିମହୀପେହି, କତଞ୍ଚ ଚରିତବ୍ଭୂତଂ ॥
ଉମ୍ମୂଲିତୱତୋ ତସ୍ସ, ନନ୍ଦୱଂସନରିସ୍ସରେ ।
ଚାରକ୍କଦ୍ୱିଜସେଟ୍ଠସ୍ସ, ସୁତ୍ୱା ବୁଦ୍ଧିବଲମ୍ପି ଚ ॥
ସବ୍ବା ନେତାନି ଲୋକମ୍ହି, ୟାୱଜ୍ଜଦିୱସା ଭୁୱି ।
ତେସଂ ଅସନ୍ନିଧାନେପି, ସୁପ୍ପସିଦ୍ଧିଂ ଗତାନି ହି ॥
ସୁଲଦ୍ଧଂ ଜୀୱିତଂ ତେସଂ, ଅସାଧାରଣମୀଦିସଂ ।
ଚରିତାତିସୟଂ କତ୍ତୁଂ, ସମତ୍ଥା ହୋନ୍ତି ୟେ ଭୁୱି ॥
ଜାୟିତ୍ୱା ଖତ୍ତୱଂସମ୍ହି, ଖତ୍ତୱୀରୱରୋଧିତଂ ।
ୟଦିହଂ ନ କରିସ୍ସାମି, ମୋଘା ମେ ଜାତି ହେସ୍ସତି ॥
ତେସମବ୍ଭଧିକା କାଲ-ସମ୍ପଦାୟେୱ କେୱଲଂ ।
ମୟା ତେ ଅଧିକା କିନ୍ତୁ, ପଞ୍ଞାଦୀହୀତି ଚିନ୍ତିୟ ॥
ପିତୁରାଜା ଚ ମେ’ଦାନି, ପଚ୍ଛିମେ ୱୟସିଟ୍ଠିତୋ ।
ୟଦିଦଂ ପେତ୍ତିକଂ ରଜ୍ଜଂ, ମମ ହତ୍ଥଗତବ୍ଭୱେ ॥
ରାଜଲକ୍ଖିୱ ସୋ ପେତ-ଚେତସୋ ମେ ପମାଦତୋ ।
ୟଥିଚ୍ଛିତଞ୍ଚେ ନ ଭୱେ, ମହତୀ ଜାନି ମେ ଭୁସଂ ॥
ଏତ୍ଥେୱ ନିୱସନ୍ତୋ’ହଂ, ଚରାପିୟ ସକେ ୱରେ ।
ପରମଣ୍ଡଲୱୁତ୍ତନ୍ତଂ, ଜାନେୟ୍ୟଂ ୟଦି ତତ୍ତନୋ ॥
ରନ୍ଧଂ ପଚ୍ଚତ୍ଥିକାନନ୍ତୁ, ପକାସେତୁଂ ରଥାତଥଂ ।
ଅଧିପ୍ପାୟାନୁରୂପଂ ମେ, ସମତ୍ଥା ୱା ନ ୱାଚରା ॥
ୟେ କେଚି’ଧ ଜନା ସନ୍ତି, ସବ୍ବେ ତେ ମମ ସମ୍ମୁଖା ।
ବଲୀୟତ୍ତଂ’ୱ ସତ୍ତୂନଂ, କଥୟନ୍ତି ଅନେକସୋ ॥
ପଚ୍ଚେକରଟ୍ଠସାମୀହି, ପିତୁଭୂପେହି ତିହିପି ।
ଏକୀଭୂୟ କରିତ୍ୱାନ, ସତ୍ତକ୍ଖତ୍ତୁଂ ମହାହୱଂ ॥
ସାଧେତୁଂ ଦୁକ୍କରଂ ରଟ୍ଠଂ, ଭୱତେ କାକିନା କଥଂ ।
ସିସୁନା ଗଣ୍ହିତୁଂ ସକ୍କା, ଖୁଦ୍ଦରଜ୍ଜୋ ପଭୋଗିନା ॥
ସୁକରଂ ମୂଲଭୂତସ୍ସ, ତସ୍ସ ରଜ୍ଜସ୍ସ ସାଧନଂ ।
ଇତି ଦୁଚ୍ଚିନ୍ତଂତଂ ତୁୟ୍ହଂ, ଦୂରେ ତବ୍ବମିଦଂ’’ଇତି ॥
କଣ୍ଣେ ତତ୍ଥସଲାକାୟୋ, ପୱେସେନ୍ତା’ୱ ନେକସୋ ।
ମହନ୍ତତ୍ତଂ କଥେନ୍ତେ’ୱଂ, ବହୁଧା ପରମଣ୍ଡଲେ ॥
ଅଜାନନଂ ୟଥାଭୂତଂ, ୱଦନ୍ତାନଂ କୁବୁଦ୍ଧିନଂ ।
ସବ୍ବମେତଂ ୱଚୋ ଜାତୁ, ସଦ୍ଧାତବ୍ବଂ ସିୟା ନ ହି ॥
ଲେସେନେକେନ ଗନ୍ତ୍ୱାନ, ଖିପ୍ପଂ’ୱ ପରମଣ୍ଡଲଂ ।
ସରୂପଂ ତତ୍ଥ ଉସ୍ସାମି, ଅହମେୱେତି ଚିନ୍ତୟି ॥
ୟଦି ମେ ପୀତୁଭୂପାଲୋ, ୱିଞ୍ଞାୟେତଂ ୱିତକ୍କିତଂ ।
ଅଭିଜାତସ୍ସ ପୁତ୍ତସ୍ସ, ୱଂସଜୋତିକରସ୍ସ ମେ ॥
ଗତସ୍ସ ସତ୍ଥୁ ୱିସୟ-ମନତ୍ଥୋପି ସିୟା ଇତି ।
ଅନୁକମ୍ପାଧିୟା ମୟ୍ହଂ, ଗମନଂ ୱାରୟିସ୍ସତି ॥
ମନୋରଥସ୍ସ ସଂସିଦ୍ଧି, ସବ୍ବଥା ମେନ ହେସ୍ସତି ।
ତସ୍ମା ନିଗୁଳରୂପେନ, ଗମନଂ ଭଦ୍ଦକଂ ଇତି ॥
ଲଦ୍ଧାନ ରତ୍ତିୟମ ଥେକଦିନଂ ଖଣଞ୍ଞୂ,
ସୋ ତାଦିସଂ ଖଣମଖୀଣତରୋରୂପାୟୋ ।
ଜାନାତି ନୋ ସକପିତାଗମନଂ ତଥାତଂ,
ଗେହା’ଭିନିକ୍ଖମିତଥା ଚତୁରୋ କୁମାରୋ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ପରମଣ୍ଡଲାଭିଗମନୋ ନାମ
ଦ୍ୱିସଟ୍ଠିମୋ ପରିଚ୍ଛେଦୋ ।
ତିସଟ୍ଠିମ ପରିଚ୍ଛେଦ
ସେନାପତିୱଧୋ
ନିଜାୟୁଧଦୁତିୟସ୍ସ, ନିକ୍ଖମନ୍ତସ୍ସ ତସ୍ସ ହି ।
ତଂ ଖଣଂ ପୁରତୋ କୋ’ପି, ସଙ୍ଖସଦ୍ଦୋ ସମୁଗ୍ଗତୋ ॥
ତତୋ ନେକନିମିତ୍ତଞ୍ଞୂ, କୁମାରୋ ତଂ ସୁଣି ତ୍ୱ ସୋ ।
ନିପ୍ଫଜ୍ଜିସ୍ସତି ସଙ୍କପ୍ପୋ, ଖିପ୍ପଂ ୟେୱେତି ମୋଦୱା ॥
ତତ୍ଥ ତତ୍ଥ ନିୟୁତ୍ତାନଂ, ରକ୍ଖକାନମଜାନତଂ ।
ନିକ୍ଖମିତ୍ୱା ପୁରାୱୀତ-ଭୟୋ ସୀହପରକ୍କମୋ ॥
ୱେଗେନ ମଗ୍ଗଂ ଗନ୍ତ୍ୱାନ, ପଞ୍ଚଗାୱୁତମତ୍ତକଂ ।
ବଦଲତ୍ଥଲଗାମସ୍ସ, ପଦେସେନାତି ଦୂରକେ ॥
ଗାମ ମେକମୁପାଗଞ୍ଚି, ପିଲିଂ ୱତ୍ଥୂତି ସଞ୍ଞିତଂ ।
ଜନାନଂ ସନ୍ନିପାତାୟ, ନିଜାନଂ ସୋ କତାୱଧି ॥
ନିଜାଗମନତୋ ପୁବ୍ବଂ, ପଟିମଗ୍ଗେ ନିସୀଦିତୁଂ ।
ପଟିଲଦ୍ଧନିୟୋଗାନଂ, ୟେଚି ଦେୱାଗତେ ତଦା ॥
ତହିଂ ଠିତେ ସୋ ପସ୍ସିତ୍ୱା, ଏତ୍ତକା କିନ୍ନୁ ଆଗତା ।
ଇତି ପୁଚ୍ଛି କୁମାରୋଥ, ତେପି ତଂ ଇଦ ମବ୍ରୱୁଂ ॥
ଲୋକପ୍ପୱତ୍ତିଂ ସକଲଂ, ଜାନନ୍ତେନାପି ସାମିନା ।
କିମେୱ ମୁଚ୍ଚତେ ମଚ୍ଚୁ-ଭୟଂ କେସଂ ନ ୱିଜ୍ଜତି ॥
ବାଲାତାନୁଗତୋ ସାମି, ଠିତୋ ୱୟସି ଈଦିସେ ।
ଅଜ୍ଜାପି ହି ମୁଖେ ତୁୟ୍ହଂ, ଖୀରଗନ୍ଧୋ ପୱାୟତି ॥
ନ ହେୱତ୍ଥି ୱିସୁଂ ୱିତ୍ତ-ଜାତଂ ସଙ୍ଗହିତଂ ତୱ ।
ତଦଞ୍ଞା ଚୋପକରଣ-ସାମଗ୍ଗୀ ନେୱ ୱିଜ୍ଜତେ ॥
ଚିରମ୍ପରିଚିତତ୍ତେହି, ଦଳ୍ହଂ ସାରୁଳଭତ୍ତିହି ।
ୱିନା’ମ୍ହେହି ୱିସୁଂ କେୱା’ନୁଗନ୍ତାରୋ ଜନାତୁୱଂ ॥
କିଞ୍ଚାଗତାନମମ୍ହାକଂ, ପିତା ତୁୟ୍ହଂ ନରିସ୍ସରୋ ।
କାରେସ୍ସତି ଇଦଂ ନାମ, ସବ୍ବଥା ନେୱ ଞାୟତେ ॥
ଅମ୍ହାକମନ୍ତରାମଗ୍ଗେ, ସଙ୍ଖୋ ନାମ ଚମୂପତି ।
ମହବ୍ବଲୋ ମହାୱୀରୋ, ରଜ୍ଜସୀମଂ ତମାୱସଂ ॥
ପଚ୍ଚତ୍ଥିତେ ଠପେତ୍ୱଞ୍ଞେ, ଏତେ କତିପୟା ମୟଂ ।
ଅଞ୍ଞମଞ୍ଞମ୍ହି ନିୟତ-ମାସଙ୍କୀ ହଦୟା ଭୁସଂ ॥
ଅରୁଣୁଗ୍ଗମୱେଲା ଚ, ସମାସନ୍ନତରାଧୁନା ।
ଇତି ଭୀତିଂ ପକାସେସୁଂ, ପଚ୍ଚେକଂ ହଦୟସ୍ସିତଂ ॥
ନିସମ୍ମ ତେସଂ ୱଚନଂ, ୱିଧାୟ ମଧୁରଂ ସିତଂ ।
ୱୀତସଙ୍କୋ କୁମାରୋ ସୋ, ମୁଖାନେ’ସଂ ୱିଲୋକିୟ ॥
ଚରିତ୍ୱାପି ମୟା ସଦ୍ଧି-ମେତେ’ହୋ କାଲମେତ୍ତକଂ ।
ନ ଜାନିଂସୁ ମମଂ ସବ୍ବେ, ୟେସଞ୍ହି ଭୟମିଦିସଂ ॥
ଇତି ୱତ୍ୱା ଭୟଂ ତେସଂ, ୱିନୋଦେତୁ ମୁପଟ୍ଠିତଂ ।
ସୀହନାଦଂ ତଦା’କାସି, ମହନ୍ତଂ ସୀହୱିକ୍କମୋ ॥
ତିଟ୍ଠନ୍ତୁ ମାନୁସା ସବ୍ବେ, ମୟି ହତ୍ଥଗତାୟୁଧେ ।
ସକ୍କୋ ଦେୱାନମିନ୍ଦୋପି, କୁପିତୋ କିଂ କରିସ୍ସତି ॥
ବାଲୋତି ମଂ ଚିନ୍ତୟ ତଂ, ଜାତା ୱୋ କୁମତୀଦିସୀ ।
ପରିକ୍ଖୀୟତି ତେ ଜାଣା, ନୱୟୋ’ତି ନ କିଂ ସୁତଂ ॥
ଅଜ୍ଜେୱ କାତୁମେକେନ, କମ୍ମୁନା ଚିନ୍ତିତେନ ମେ ।
ସଦେସପର ଦେସଟ୍ଠା, ଭୟଭତ୍ତୀ ୟଥାମୟି ॥
କରିସ୍ସନ୍ତି ୟଥା ୱେଦଂ, ଭୟଂ ତୁମ୍ହେ ଜହିସ୍ସଥ ।
ତଥା ରତ୍ତିୟମେତାୟ, ୱିଭାତାମୟ ଖଣେନ ମେ ॥
ଉନ୍ନତେ ଦସ୍ସୟିସ୍ସାମି, ବୁଦ୍ଧି ସାହସୱିକ୍କମେ ।
ଅନୁଧାୱତି ମଂ ତାତ, ସେତେହି ୟଦି ୱୋ ଭୟଂ ॥
ପୁରତୋ ହୋଥ ତୁମ୍ହେହି, ୱତ୍ୱା ତେ ଗହିତାୟୁଧୋ ।
ସାହସେକରସୋ ୱୀରୋ, ତମ୍ହା ନିକ୍ଖମ୍ମ ଗାମତୋ ॥
ଉଦୟା’ଚଲସୀସଟ୍ଠଂ, ଜେତୁମାଦିଚ୍ଚମଣ୍ଡଲଂ ।
ଅପରଂ ରୱି ବିମ୍ବଂୱ, ପଚ୍ଛିମା ସା ମୁଖୋଦିତଂ ॥
ତେଜସା ପସରନ୍ତେନ, ଜନାନଂ ପୱିକାସୟଂ ।
ନେତମ୍ବୁଜୱନଂ ପାତୋ, ବଦଲତ୍ଥଲିମାଗମି ॥
ଜଘସଙ୍ଖସ୍ସରେନା’ଥ, ସେନା ନାଥୋ ପବୁଜ୍ଝିୟ ।
ସଞ୍ଜାତସମ୍ଭମୋ ଞତ୍ୱା, ରାଜପୁତ୍ତମୁପାଗତଂ ॥
ସଦ୍ଧିଂ ବଲେନ ମହତା, ପଧୁଗ୍ଗମ୍ମକତାଦରୋ ।
ପଣାମମୁଚିତଂ କତ୍ତୁ-ମାନତୋ ୱସୁଧାତଲେ ॥
ଅମ୍ହାକମେସଜୀୱନ୍ତୋ, କିଂ ନାମତ୍ଥଂ କରିସ୍ସତି ।
ମାରେତବ୍ବୋ’ଧୁନେୱେତି, ପସ୍ସନ୍ତେ ସମୁଖଂ ଭଟେ ॥
ନେୱା’ଦିଟ୍ଠାପରାଧସ୍ସ, ମରଣଂ ପୁରିସୋ ଚିତଂ ।
ୱଧୋ ୱିରୋଧେ ସକ୍କା’ତି, ଇଙ୍ଗିତେନ ନିୱାରିୟ ॥
ସେନାପତିସ୍ସ ସୋ ହତ୍ଥଂ, ଗହେତ୍ୱା ସୀହସନ୍ନିଭୋ ।
ଭାସନ୍ତୋ ମଧୁରଂ ୱାଚଂ, ତସ୍ସେୱା’ଗଞ୍ଛି ମନ୍ଦିରଂ ॥
ଅଥସ୍ସ ଗମନଂ ରଞ୍ଞୋ, ଭୱିତବ୍ବମଜାନତା ।
ସରୂପଂ ୟାୱ ଜାନାମି, ତାୱସ୍ସେତେ ସହାଗତା ॥
ୟଥା ନ ସହିତା ହୋନ୍ତି, ଠପେତବ୍ବା ୱିସୁଂ ୱିସୁଂ ।
କୁମାରୋ’ୱ ମମାଗାରେ, ୱସତୂ’ତି ୱିଚିନ୍ତିୟ ॥
ତଥା ସେନାପତି କତ୍ୱା, ୱଞ୍ଚେତୁଂ ତଂ ମହାମତିଂ ।
ଦସ୍ସେତ୍ୱା’ତି ଥୀସକ୍କାରଂ, ରଞ୍ଞୋ ଦୂତେ ସ ପେସୟି ॥
କୁମାରୋ’ଥ ୱିଦିତ୍ୱାନ, ତେନ ତଂ ୱଞ୍ଚନଂ କତଂ ।
କତ୍ତବ୍ବମେତ୍ଥା’କତ୍ୱାହ, ମୁଦାସୀନୋ ଭୱେ ୟଦି ॥
ଇଚ୍ଛିତତ୍ଥସ୍ସ ନିପ୍ଫତ୍ତି, ନ ମେ ଜାତୁ ଭୱିସ୍ସତି ।
ଅୟଂ ତାୱା’ଧୁନାୱସ୍ସଂ, ମାରେତବ୍ବୋତି ଚିନ୍ତିୟ ॥
ସହାଗତଂ ପୟୋଜେତ୍ୱା, ଘାତାପୟି ଚମୂପତିଂ ।
ହତୋ ସେନାଧିନାଥୋ’ତି, ମହନ୍ତଂ ଖୁଭିତଂ ଅହୁ ॥
ସେନାନାଥଭଟୋ ଏକୋ, ସୁତ୍ୱା ସେନାପତିଂ ହତଂ ।
ମାରଣଂ ସାମିନୋ ମୟ୍ହଂ, କିଂ ନିମିତ୍ତମୀତି ବ୍ରୱି ॥
ନେତ୍ତିଂ ସପାଣୀ ସହସା, କୁମାରଂ ଠିତମେକକଂ ।
ଅଭିଦାୱି ସସାମିସ୍ସ, ପରିଚତ୍ତତ୍ତଜୀୱିନୋ ॥
କୁମାରସ୍ସ ମୁଖଂ ଦିସ୍ୱା, ୱେଧମାନୋ ଭୟେନ ସୋ ।
ପୁରେ ଠାତୁମସକ୍କୋନ୍ତୋ, ପାଦମୂଲେ ତତୋ ସୟି ॥
ଗଣ୍ହଥେ’ତନ୍ତିୱଚନା-କୁମାରସ୍ସ ପୁରେତରଂ ।
ତସ୍ସେୱେକୋ ସହଚରୋ, ଭଟମେତଂ ୱିଘାତୟି ॥
ନିୟୋଗଂ ମେ ୱିନା ତେନ, କତଂ କମ୍ମଂ ନ ୟୁଜ୍ଜତି ।
ଇତି ଦଣ୍ଡନମେତସ୍ସ, କାରାପେସିୟଥୋଚିତଂ ॥
ଅଥ ତଂ କାଲୟମ୍ଭୂତ-ସଙ୍ଖୋଭମତିଭିଂସନଂ ।
ଭମୁକ୍ଖିପନମତ୍ତେନ, ରାଜପୁତ୍ତୋ ସମଂ ନୟି ॥
ୱୀରୋ ୟସୋଧରଧନୋ ଧିତିମା କୁମାରୋ ।
ୱୀରୋପକାରଚତୁରୋ ୱରକିତ୍ତିସାରୋ ।
ସେନିନ୍ଦସଞ୍ଚିତମନପ୍ପଧନଂ ଭଟାନଂ ।
ସବ୍ବଂ ୱିସଜ୍ଜୟି ୟଥାରୁଚିୟା ଗହେତୁଂ ॥
ସୁଜନପ୍ପସାଦସଂୱେଗତ୍ଥାୟ କତେ ମହାୱଂସେ
ସେନାପତିୱଧୋ ନାମ
ତିସଟ୍ଠିମୋ ପରିଚ୍ଛେଦୋ ।