ପଜ୍ଜମଧୁ
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ପଜ୍ଜମଧୁ
ଆନନ୍ଦ ରଞ୍ଞ ରତନାଦି ମହା ୟତିନ୍ଦ,
ନିଚ୍ଚପ୍ପବୁଦ୍ଧ ପଦୁମପ୍ପିୟ ସେୱିନଙ୍ଗୀ ।
ବୁଦ୍ଧପ୍ପିୟେନ ଘନ ବୁଦ୍ଧ ଗୁଣପ୍ପିୟେନ,
ଥେରାଲିନା ରଚିତ ପଜ୍ଜମଧୁଂ ପିବନ୍ତୁ ॥
ଉଣ୍ଣାପପୁଣ୍ଣସସିମଣ୍ଦଲତୋ ଗଲିତ୍ୱା,
ପାଦମ୍ବୁଜଙ୍ଗୁଲି ଦଲଟ୍ଠ ସୁଧା ଲୱାନଂ ।
ପନ୍ତୀୱ ସତ୍ଥୁ ନଖପନ୍ତି ପଜାୱିସେସଂ,
ପୀଣେତୁ ସୁଦ୍ଧ ସୁଖିତମ୍ମଣ ତୁଣ୍ଡପୀତା ॥
ଖିତ୍ତାୟ ମାରରିପୁନା ପରିୱତ୍ୟ ସତ୍ଥୁ,
ପାଦସ୍ସୟା ଜିତ ଦିସାୟ ସିତତ୍ତଲାୟ ।
ୟା ଜେତି କଞ୍ଚନ ସରାୱଲିୟା ସିରିଂ ସା,
ଦେତନ୍ଗିନଂ ରଣଜୟଙ୍ଗୁଲିପନ୍ତିକନ୍ତା ॥
ସୋୱଣ୍ଣ ୱଣ୍ଣ ସୁଖୁମଚ୍ଛୱି ସୋମ୍ମ କୁମ୍ମ,
ପିଟ୍ଠୀୱ ପିଟ୍ଠି କମତୁନ୍ନତି ଭାତି ୟେସଂ ।
ତେସୁପ୍ପତିଟ୍ଠିତସୁକୋମଲଦୀଘପଣ୍ହି,
ପାଦା ଜିନସ୍ସ ପଦଦନ୍ତୁ ପଦଂ ଜନସ୍ସ ॥
ଅଚ୍ଛେର ପଙ୍କଜସିରଂ ସିରିୟା ସକାୟ,
ୟେ ମଦ୍ଦିନୋ ୱିୟ ଚରନ୍ତି ସରୋଜ ସୀସେ ।
ସଞ୍ଚୁମ୍ବିତା ୱିୟ ଚ ତାନି ପରାଗ ରାଗା,
ତେ ନୀରଜା ମୁନିପଦା ପଦଦନ୍ତୁ ଲକ୍ଖିଂ ॥
ଅଗାମି କାଲ ଜନ ମଙ୍ଗଲ ଭତ୍ତୁ ଭାୱଂ,
ୱ୍ୟାକତ୍ତୁମତ୍ର କୁସଲେନିୱ ନିମ୍ମିତାନି ।
ୟାତ୍ରାସୁମଟ୍ଠସତମଙ୍ଗଲକ୍ଖଣାନି,
ସାଧେତୁ ନଂ ପଦୟୁଗଂ ଜୟମଙ୍ଗଲାନି ॥
ସସ୍ସେୱିଜନ୍ତୁୱରସନ୍ତିପୁରପ୍ପୱେସେ,
ନିଚ୍ଚଂ ସୁସଜ୍ଜ ଠପିତାନିୱ ମଙ୍ଗଲାୟ ।
ୟେ ତେ ଦଧନ୍ତି କଲମଙ୍ଗଲଲକ୍ଖଣାନି,
ୱତ୍ତନ୍ତୁ ତେ ଜିନପଦା ଜୟମଙ୍ଗଲାୟ ॥
ସବ୍ବେଭିଭୂୟ ସପଦେସୁ ନିପାତନସ୍ସ,
ସଞ୍ଞାଣକଂ ୱିୟ ୟଦସ୍ସିତସବ୍ବଲୋକୋ ।
ପାଦାତ୍ୟଧୋକତତିଲୋକସିରୋୱରା ପି,
ଲୋକଂ ପୁଣନ୍ତୁ ଜୟମଙ୍ଗଲକାରଣାନି ॥
ଲୋକତ୍ତୟେକସରଣତ୍ତୱିଭାୱନାୟ,
ସଜ୍ଜୋ ୱ ତିଟ୍ଠତି ୟହିଂ ସୁୱିଭତ୍ତଲୋକୋ ।
ତଂ ସବ୍ବଲୋକପଟିବିମ୍ବିତଦପ୍ପଣାଭଂ,
ପାଦଦ୍ୱୟଂ ଜନସୁସଜ୍ଜନହେତୁ ହୋତୁ ॥
ଲୋକୁତ୍ତରାୟ ସିରିୟାଧିଗମାୟ ସୁଟ୍ଠୁ,
ରଜନ୍ତି ୟତ୍ଥ ଦିଗୁଣାନିୱ ପାତୁ ଭୂତା ।
ଚକ୍କାସନାଭିସହନେମିସହସ୍ସରାନି,
ତ୍ୟଙ୍ଘୀ ଦିସନ୍ତୁ ସକଲିସ୍ସରିୟଂ ଜନସ୍ସ ॥
ୟତ୍ରୁଲ୍ଲସନ୍ତି ଦୁୱିଧାନିୱ ପାତୂ ଭୂତା,
ଧମ୍ମସ୍ସସବ୍ବଭୁୱନସ୍ସ ଚ ଇସ୍ସରତ୍ତେ ।
ଚକ୍କାନି ଚକ୍କସଦିସାନି ସୁଦସ୍ସନସ୍ସ,
ତାନଜ୍ଜ ଜନ୍ତୁ ସରଣା ଚରଣାନି ହୋନ୍ତୁ ॥
ସତ୍ତେସୁ ୱଚ୍ଛତୁ ସିରୀ ସିରିୱଚ୍ଛକେନ,
ସୋୱତ୍ଥି ସୋତ୍ଥିମନୁତିଟ୍ଠତୁ ପୁଗ୍ଗଲେସୁ ।
ନନ୍ଦିଂ ଜନାନମନୁୱତ୍ତତୁ ନନ୍ଦିୱତ୍ତୀ,
ସୀସାନଲଂକୁରୁତୁ ପାଦୱତଂସକୋ ପି ॥
ଭଦ୍ଦାୟ ପୀଠମୁପଗଚ୍ଛତୁ ଭଦ୍ଦପୀଠଂ,
ୱୁଦ୍ଧିଂ ଜନାନମନୁୱତ୍ତତୁ ୱଦ୍ଧମାନଂ ।
ପୁଣ୍ଣତ୍ତମଙ୍ଗିମନୁକୁବ୍ବତୁ ପୁଣ୍ଣକୁମ୍ଭୋ,
ପାତି ଚ ପାତୁ ସତତଂ ଜନତଂ ଅପାୟା ॥
ସେତାତପତ୍ତମପନେତମଘାତପେ ତଂ,
ଖଗ୍ଗୋ ୱିଛିନ୍ଦତୁ ସଦା ଦୁରିତାରିୱଗ୍ଗେ ।
ସଂକ୍ଲେସଦାହମପନେତୁ ସତାଲୱଣ୍ଟ,
ସଂୱୀଜନୀ କୁମତିମକ୍ଖିକମୋରହତ୍ଥୋ ॥
ଆକଡ୍ଢନୋ ଜନୱିଲୋଚନମତ୍ତନିନ୍ନଂ,
ୱାରେତୁ ସବ୍ବଗତିୱାରନମଙ୍କୁସୋ ସୋ ।
ପାଦମ୍ବୁଜସ୍ସିରିୱିଲାସନିକେତନଂ ୱ,
ପାସାଦଲଖଣମୁପେତୁ ମନୋପସାଦଂ ॥
ପାଣୀନମତ୍ତଭଜତଂ ୱରପୁଣ୍ଣପତ୍ତଂ,
ସମ୍ମା ଦଦାତୁ ପଦନିସ୍ସିତପୁଣ୍ଣପତ୍ତୋ ।
ପାଦେସୁ ଜନ୍ତୁ ମନବନ୍ଧନଦାମଭୂତଂ,
ଦାମଂ ଦମେତୁ ୱିମଲଂ ଜନତମ୍ମନାନି ॥
ଉଣ୍ହୀସକୁପ୍ପଲମଣୀପଦୁମେହି ପାଦା,
ସସ୍ସେୱିଜନ୍ତୁକରଣାନି ୱିଭୂସୟନ୍ତୁ ।
ସନ୍ନେତ୍ତନାୱୁପଗତାନମନଗ୍ଘକାନି,
ବୋଜ୍ଝଙ୍ଗସତ୍ତରତନାନି ଦଦେ ସମୁଦ୍ଦୋ ॥
ଉତ୍ତୁଙ୍ଗ ନିଚ୍ଚଲଗୁଙା ଜିତତାୟ ନିଚ୍ଚଂ,
ସେୱୀୱ ପାଦସିରି ନିଚ୍ଚ ସମୁବ୍ବହଂ ୱ ।
ଅତ୍ରାପି ସକ୍କଭୱନୁବ୍ବହଣେ ନିୟୁତ୍ତୋ,
ପାଦଟ୍ଠମେରୁ ଭୱତଂ ଭୱତଂ ୱିଭୂତ୍ୟା ॥
ସୋ ଚକ୍କୱାଳସିଖରୀ ପ୍ୟୱତଂ ସମନ୍ତା,
ସବ୍ବୂପସଗ୍ଗୱିସରାଜନତଂ ସମଗ୍ଗଂ ।
ଦୀପା ପୁଥୂପି ଚତୁରୋ ଦ୍ୱିସହସ୍ସ ଖୁଦ୍ଦା,
ଧାରେନ୍ତ୍ୱପାୟପତମାନମଦତ୍ୱ ଜନ୍ତୁଂ ॥
ସୂରୋ ପବୋଧୟତୁ ଜନ୍ତୁ ସରୋରୁହାନି,
ଚନ୍ଦୋ ପସାଦ କୁମୁଦାନି ମନୋଦହେସୁ ।
ନକ୍ଖତ୍ତଜାତମଖିଲଂ ସୁଭତାୟ ହୋତୁ,
ଚକ୍କଂ ଧଜଂ ରିପୁଜୟାୟ ଜୟଦ୍ଧଜାୟ ॥
ଜେତୁଂ ସସଂସଦ-ସୁଦସ୍ସନ-ଚକ୍କୱତ୍ତି,
ଚକ୍କାନୁଗନ୍ତଲଲିତଂ ୟହିମାୱହେୟ୍ୟ ।
ଚକ୍କାଣୁୱତ୍ତି ପରିସାୱତ-ଚକ୍କୱତ୍ତି,
ନଂୱତ୍ତତଂ ପଦୟୁଗଂ ଜନତା ହିତାୟ ॥
ପୁଜେତୁମାଗତ ୱତା ୱଜିରାସନଟ୍ଠ,
ମିନ୍ଦେନ ଛଡ୍ଡିତ ମହାୱିଜୟୁତ୍ତରାଖ୍ୟଂ ।
ସଂଖଂ ପୱିଟ୍ଠମିୱ ମାରଭୟା ପଦାଧୋ,
ପାଦଟ୍ଠସଂଖମିହ ୱତ୍ତତୁ ସନ୍ତିୟା ୱୋ ॥
ସୋୱଣ୍ଣମଚ୍ଛୟୁଗଲଂ ସିୱଭତ୍ତ ଭୋଗେ,
ଇଚ୍ଛା ବହୂପକରଣଂ ଭୱତଂ ଜନାନଂ ।
କୁମ୍ଭୀଲଧିଗ୍ଗହିତତୋ ୱ ପଦୁତ୍ଥଚିତ୍ତା,
ପାଦମ୍ବୁଜାକର ୱିଗାହି ତୁ ନୋପହୋନ୍ତୁ ॥
ସତ୍ତାପଗା ଜନମନୋଜ ମଲେ ଜହନ୍ତୁ,
ସଂକ୍ଲେସଦାହମପନେନ୍ତୁ ଦହା ଚ ସତ୍ତ ।
ସେଲା ଚ ସତ୍ତ ୱିଦଧନ୍ତୁ ଜନସ୍ସ ତାନଂ,
ଲୋକପ୍ପସିଦ୍ଧିଜନନେ ଭୱତଂ ପତାକା ॥
ପାଟଙ୍କି ସନ୍ତି ଗମନେ ଭୱତୂପକାରା,
ଦାହେତ୍ତନେସୁ ଜହତଂ ପଦଚାମରଂ ତଂ ।
ସଲ୍ଲୋକଲୋଚନମହୁସ୍ସୱ-ଉସ୍ସିତଂ ୱ,
ୱତ୍ତେୟ୍ୟ ତୋରଣମନୁତ୍ତରମଙ୍ଗଲାୟ ॥
ୟସ୍ମିଂ ମିଗିନ୍ଦ ଗତ ଭୀତି ବଲାୱ ଦଡ୍ଢ,
ଦାନା ନତା ସିରୱିଦାରଣ ପୀଳିତାୱ ।
ନାଲାଗିରୀ କରିୱରୋ ଗିରିମେଖଲୋ ଚ,
ତଂ ସୀହୱିକ୍କମପଦଂ ହନତା ଘଦନ୍ତିଂ ॥
ପାପାହିନୋ ହନତୁ ପାଦସୁୱଣ୍ଣରାଜା,
ୱ୍ୟଗ୍ଘାଧିପୋ କଲିଜନେ ଅଦତଂ ଅସେସଂ ।
ୱାଲାହ-ଅସ୍ସପତି ସମ୍ପତିତୁଂ ଅଦତ୍ୱା,
ପାୟେସୁ ପାପୟତୁ ସନ୍ତିପୁରମ୍ପଜାୟୋ ॥
ଛଦ୍ଦନ୍ତ ଦନ୍ତି ଲଲିତଂ ଗଲିତଂ ରୁସମ୍ହା,
ଲୁଦ୍ଦେତ୍ତ ଦୁବ୍ଭିନି ଦିସେ ଅଚଲଂ ଦଧାନୋ ।
ପାଦଟ୍ଠହତ୍ଥିପତି ସମ୍ପତି ଜନ୍ତୁତାସେ,
ତାସେତୁ ହାସମପରନ୍ଦିସତଂ ସତାନଂ ॥
ସବ୍ବଙ୍ଗିନୋ ଚରଣୁପୋସଥ ହତ୍ଥିରାଜା,
ପାପେତୁ ସବ୍ବଚତୁଦୀପିକରଜ୍ଜଲକ୍ଖିଂ ।
କିତ୍ତୀୱ ପାଦପରିଚାରିକତା ନିୟୁତ୍ତା,
କେଲସସେଲପଟିମା ହିତମାଚରେୟ୍ୟ ॥
ସାମିସ୍ସ ହଂସସମୟେ ଦହପାସବଦ୍ଧ,
ମାସୀନ ୱେସଗମକୋ ୱିୟ ପାଦହଂସୋ ।
ନିଗ୍ଘୋସ ଗନ୍ତିଜିତତୋ ୱିୟ ମୂଗପକ୍ଖୋ,
ୟାରେତୁ ସବ୍ବ ଜନତା ଭୱଗନ୍ତୁକତ୍ତଂ ॥
ଓହାୟ ଦିବ୍ବସରସିଂ ଖିଲଲୋକ ସବ୍ବ,
ରମ୍ମଙ୍ଘିୱାପିମୱଗାହିତୱାୱ ପାଦେ ।
ଏରାୱଣୋ କରିୱରୋ ମନସାଭିରୁଳ୍ହେ,
ଜନ୍ତୁଂ ପୁରିନ୍ଦଦପୁରଂ ନୟତଂ ୱ ସୀଘଂ ॥
ହିତ୍ୱା ସକମ୍ଭୱନମଙ୍ଘିନିସେୱନତ୍ଥ,
ମାଗମ୍ମ ରମ୍ମ ତରତାୟିହ ନିସ୍ସିତୋ ୱ ।
ପାଲେତ୍ୱ ମୂନି ପଦୱାପିତରଙ୍ଗଭଙ୍ଗି,
ମନ୍ଗୀ କରୋନ୍ତତନୁୱାସୁକି ନାଗରାଜା ॥
ନାଥସ୍ସ କଞ୍ଚନସିଖାୱଲଜାତିଲୀଲ,
ମାୱିକରଂ ୱ ପଦନିସ୍ସିତମୋରରାଜା ।
ତଂ ଧମ୍ମଦେସନରୱେନିୱ ଲୁଦ୍ଦକସ୍ସ,
ଲୋକସ୍ସ ପାପଫଣିନୋ ହନତଂ ଅସେସଂ ॥
ସଂସାରସାଗରଗତେ ସଧନେ ଜନେ ତେ,
ନେତମ୍ପଦେ କଲଚତୁମ୍ମୁଖହେମନାୱା ।
ନିବ୍ବାଣପଟ୍ଟନୱରଂ ଭରୁକଚ୍ଛକନ୍ତଂ,
ସୁପ୍ପାରପଣ୍ଡିତ ଗତା ୱିୟ ଆସୁନାୱା ॥
ସମ୍ବୋଧି ଞାଣ ପରିପାଚୟତୋ ମୁନିସ୍ସ,
ଭତ୍ତୋ ୟଥା ହିମୱତଦ୍ଦି ସମାଧିହେତୁ ।
ଏୱମ୍ମନେନ ଭଜତଂ ହିମୱଦ୍ଦିପାଦେ,
ସମ୍ବୋଧିଞାଣ ପରିପାଚନହେତୁ ହୋତୁ ॥
ଦଳ୍ହଂ ପରାଜିତତୟା ମୁନିନା ସରେନ,
ସୁଞ୍ଞସ୍ସରୋପଗତ ପଞ୍ଜର ବନ୍ଧନୋୱ ।
ସୋ ପାଦପଞ୍ଜରଗତୋ କରୱୀକପକ୍ଖୀ,
ସବ୍ବେସମପ୍ପୀୟାୱଚଞ୍ଜହତା ଭୱନ୍ତଂ ॥
ତେ ଚକ୍କୱାକ ମକରା ଅପି କୋଞ୍ଚ ଜୀୱଂ,
ଜୀୱାଦି ପକ୍ଖିୱିସରା ସରସୀୱ ଭୁତ୍ତଂ ।
ୱେସ୍ସନ୍ତରେନ ଚରଣମ୍ବୁଜି ନିବ୍ଭଜନ୍ତା,
ଜନ୍ତୁ ତହିଂ ୱିୟ ପଦେ ସୁରମେନ୍ତୁ ନିଚ୍ଚଂ ॥
ତଂ ଚନ୍ଦକିନ୍ନରଗତିଂୱ ଗତସ୍ସ ବୋଧି,
ସତ୍ତସ୍ସ ତସ୍ସ ସପଜାପତିକସ୍ସ ଭାୱଂ ।
ସଂସୂଚୟନ୍ତ ପଦ କିନ୍ନର କିନ୍ନରୀ ୱେ,
ସାମଗ୍ଗିମଗ୍ଗ ପଟି ପତ୍ତିସୁ ପାପୟନ୍ତୁ ॥
ସଂରାଜଧାନିମୁସଭୋ ୱହତଗ୍ଗ ଭାରଂ,
ପୀତିପ୍ପୟୋ ପଜନୟେୟ୍ୟ ସୱଚ୍ଛଧେନୁ ।
ସସ୍ସେୱିନୋ ଅଭିରମେନ୍ତୁ ଛକାମସଗ୍ଗା,
ଧାରେନ୍ତୁ ଝାୟିମିହ ସୋଳସ ଧାତୁଧାମା ॥
ସୁତ୍ୱା ଜିନସ୍ସ କରୱୀକ ସରମ୍ମନୁଞ୍ଞଂ,
ଅଞ୍ଞୋଞ୍ଞ ଭୀତିରହିତା ଅପି ପଚ୍ଚନୀକା ।
ହିତ୍ୱା ଗତିଂ ୱିୟ ଠିତା ପଦସତ୍ତରୂପା,
ସବ୍ବଂ ଭୱସ୍ସିତ ଜନାନଗତିଂ ହନନ୍ତୁ ॥
ସୋୱଣ୍ଣ କାହଳ ୟୁଗୋ ପମମିନ୍ଦିରାୟ,
ସନ୍ନୀରପୁପ୍ଫ ମୁକୁଲୋପମମୁସ୍ସୱାୟ ।
ନିଚ୍ଚଂ ସୁସଜ୍ଜ ଠପିତଂ ମୁନି ତିଟ୍ଠତନ୍ତେ,
ଜଙ୍ଘାଦ୍ୱୟଂ ଜନୱିଲୋଚନ ମଙ୍ଗଲାୟ ॥
ଲଖ୍ୟା ୱିଲାସ ମୁକୁରଦ୍ୱୟ ସନ୍ନିକାସଂ,
ତାଡଙ୍କ ମଣ୍ଡନ ୱିଡମ୍ବକମଂସୁ ସଣ୍ଡଂ ।
ଜାନୁଦ୍ୱୟଂ ଲଳିତ ସାଗର ବୁବ୍ବଲାଭଂ,
ହୋତଂ ଜଗତ୍ତୟ ନିଜତ୍ତ ୱିଭୂସିତୁନ୍ତେ ॥
ଛଦ୍ଦନ୍ତି ଦିନ୍ନ ୱରଦନ୍ତ ୟୁଗୋପମାନା,
ତଂ ହତ୍ଥି ସୋଣ୍ଡ କମ ପୁଣ୍ଣ ଗୁଣା ତୱୋରୂ ।
ଲୀଲ ପୟୋଧି ସିରି କେଳି ସୁୱଣ୍ଣରମ୍ଭା,
ଖନ୍ଧାୱ ଦେନ୍ତୁ ପରିପୁଣ୍ଣ ଗୁନେ ଜନାନାଂ ॥
ଜଙ୍ଘକ୍ଖ କଦ୍ୱ୍ୟ ସମପ୍ପିତ ଚିତ୍ତପାଦ,
ଚକ୍କଦ୍ୱୟୀ ମନମନୋଜହୟୋ ମୁନେ ତେ ।
ସୋନୀ ରଥୋ ସିରିୱହୋ ମନସା ଭିରୁଳ୍ହଂ,
ଲୋକତ୍ତୟଂ ସିୱପୁରଂ ଲହୁ ପାପୟାତୁ ॥
ରମ୍ମୋର ପାକଟ ତଟାକ ତଟା ସୱନ୍ତ,
ରୋମାୱଲୀ ଜଲ ପନାଲିକ କୋଟିକଟ୍ଠା ।
ନାଭୀ ଗଭୀର ସରସୀ ସିରି କେଳିତା ତେ,
ସସ୍ସେୱିନଂ ୱ୍ୟସନ ଘମ୍ମମଲଂ ସମେତୁ ॥
କନ୍ତିଚ୍ଛଟା ଲୁଳିତ ରୂପ ପୟୋଧି ନାଭି,
ଆୱଟ୍ଟ ୱଟ୍ଟିତ ନିମୁଜ୍ଜିତ ସବ୍ବଲୋକୋ ।
ସୋଭଗ୍ଗ ତୋୟ ନିୱହଂ ୱିସସୋ ପିୱିତ୍ୱା,
ଲୋକୁତ୍ତରାଦି ସୁଖ ମୁଚ୍ଛିତତଂ ପୟାତୁ ॥
ଗମ୍ଭୀର ଚିତ୍ତରହଦଂ ପରିପୂରୟିତ୍ୱା,
ତଂ ସନ୍ଦମାନ କରୁଣମ୍ବୁ ପୱାହ ତୁଲ୍ୟା ।
ରୋମାଲିୱଲ୍ଲିହରି ନାଭି ସୁଭାଲୱାଲା,
ଦେତଂ ଲହୁଂ ସିୱଫଲଂ ଭଜତଂ ମୁନେ ତେ ॥
ଚାରୂର ସାରିଫଲକୋ କୁଟିଲଗ୍ଗ ଲୋମ,
ପନ୍ତୀ ୱିଭତ୍ତି ସହିତୋ ସିରି କେଳି ସଜ୍ଜୋ ।
ସଗ୍ଗାପୱଗ୍ଗ ସୁଖ ଜୂତକ କେଳି ହେତୁ,
ହୋତଂ ତିଲୋକ ସୁଖ ଜୂତକ ସୋଣ୍ଡକାନଂ ॥
ଗମ୍ଭୀର ଚିତ୍ତ ରହଦୋ ଦର ଗାହମାନ,
ମେତ୍ତାଦୟା କରି ୱଧୂ କର ସନ୍ନି କାସା ।
ସବ୍ବଙ୍ଗିନଂ ସିୱଫଲଂ ତନୁ ଦେୱ ରୁକ୍ଖେ,
ସାଖା ସଖା ତୱ ଭୁଜା ଭଜତଂ ଦଦନ୍ତୁ ॥
ନିହାର ବିନ୍ଦୁ ସହିତଗ୍ଗଦଲୋପ ସୋଭି,
ବ୍ୟାଲମ୍ବ ରତ୍ତ ପଦୁମଦ୍ୱୟ ଭଙ୍ଗି ଭାଜା ।
ପାପାରିସୀସଲୁନତେନିୱ ରତ୍ତ ରତ୍ତା,
ରତ୍ତା କରା ତୱ ଭୱୁମ୍ଭୁୱି ମଙ୍ଗଲାୟ ॥
ରୁପସ୍ସିରୀ ଚରିତ ଚଙ୍କମ ୱିବ୍ଭମା ତେ,
ପିଟ୍ଠୀ ୟଥା କଲଲ ମୁଦ୍ଧନି ସେତୁ ଭୂତା ।
ଏୱଂ ଭୱଣ୍ଣୱ ସମୁତ୍ତରଣାୟ ସେତୁ,
ହୋତମ୍ମହାକନକ ସଂକମ ସନ୍ନିକାସା ॥
ସଦ୍ଧମ୍ମ ଦେସନ ମନୋହର ଭେରିନାଦ,
ସଂଚାରଣେ ସିୱପୁରଂ ୱିସିତୁଂ ଜନାନଂ ।
ଗୀୱା ସୁୱଣ୍ଣମୟ ଚାରୁ ମୁତିଙ୍ଗ ଭେରି,
ଭାୱମ୍ଭଜା ଭୱତୁ ଭୂତ ୱିଭୂତିୟା ତେ ॥
ଲଖୀ ନିୱାସ ୱଦନମ୍ବୁଜ ମତ୍ତ ନିନ୍ନ,
ମାକଡ୍ଢୟଂ ଜନ ୱିଲୋଚନ ଚଞ୍ଚରୀକେ ।
ସୋରବ୍ଭ ଧମ୍ମ ମକରନ୍ଦ ନିସନ୍ଦମାନଂ,
ପିଣେତୁ ତେନ ସରସେନ ସଭା ଜନେ ତେ ॥
ଲଖୀ ସମାରୁହିତ ୱତ୍ତରଥେ ରଥଙ୍ଗ,
ଦ୍ୱନ୍ଦାନୁ କାରି ମିଗ ରାଜ କପୋଲ ଲୀଲଂ ।
ତାଦଙ୍କ ମଣ୍ଡଲୟୁଗଂ ୱିୟ କଣ୍ଣଭାଜଂ,
ଗଣ୍ଡତ୍ଥଲଦ୍ୱ୍ୟମଲଂକୁରୁତଂ ଜନତ୍ତେ ॥
ଲାୱଣ୍ଣ ମଣ୍ଣୱ ପୱାଳ ଲତା ଦ୍ୱୟାଭଂ,
ତନ୍ଦେହ ଦେୱ ତରୁ ପଲ୍ଲୱ କନ୍ତେ ମନ୍ତଂ ।
ୱତ୍ତାରୱିନ୍ଦ ମକରନ୍ଦ ପରାଜିସୋଭଂ,
ରତ୍ତାଧରଦ୍ୱୟମଧୋ କୁରୁତଂ ଜନାଘଂ ॥
ଉଣ୍ଣା ସକୁନ୍ତିଗତ ମତ୍ଥକ ନତ୍ଥୁ କୂପ,
ସୁବ୍ଭୂ ଲକାର ସହିତୋଟ୍ଠ ପୱାଳ ନାୱା ।
ଗତ୍ତୁତ୍ତରରଣ୍ଣୱ ଗତା ତୱ ଜନ୍ତୁକାନଂ,
ହୋତଂ ଭୱଣ୍ଣୱ ସମୁତ୍ତରନୟ ନାଥ ॥
ଇସଂ ୱିକାସ ପଦୁମୋଦର କେସରାଲି,
ଲୀଲା ୱିନଦ୍ଧ ରୁଚିରା ତୱ ଦନ୍ତ ପନ୍ତି ।
ୱାନୀ ୱଧୂ ଧରିତ ମାଲତି ମାଲ୍ୟ ତୁଲ୍ୟା,
ତସ୍ସଂ ଜାନସ୍ସ ମନରଞ୍ଜନ ମାଚରେୟ୍ୟ ॥
ସଦ୍ଧମ୍ମ ନିଜ୍ଝର ସୁରତ୍ତ ସିଲାତଲାଭା,
ଜିୱ୍ହା ୱଚୀ ନଟ ୱଧୂ କଲ ରଙ୍ଗ ଭୂତା ।
ସଦ୍ଧମ୍ମ ସେଟ୍ଠ ତରଣୀ ନିହିତପ୍ପିୟା ତେ,
ସଂସାର ସାଗର ସମୁତ୍ତରଣାୟ ହୋତୁ ॥
ଦନ୍ତଂସୁ କଞ୍ଚୁକୀତ ରତ୍ତଧରୋ ପଧାନେ,
ଜିୱ୍ହା ସୁରତ୍ତ ସୟନେ ମୁଖ ମନ୍ଦିରଟ୍ଠେ ।
ଆମୋକ୍ଖ ମୁତ୍ତି ୱଧୁୟା ସୟିତାୟ ତୁୟ୍ହଂ,
କୁବ୍ବନ୍ତୁ ସଂଗମ ମଲଂ ଜନ ସୋତୁ କାମି ॥
ଉଣ୍ଣା ତଥାଭିନୱ ପତ୍ତ ୱରାଭି ରାମା,
ଲୀଲୋଲ୍ଲସନ୍ତ ଭମୁକଦ୍ୱୟ ନୀଲ ପତ୍ତା ।
ଘାନୋରୁ ଚାରୁ କଦଲୀ ୱଦନା ଲୱାଲା,
ତୁୟ୍ହଂ ପୱତ୍ତତୁ ଚିରଂ ଜନ ମଙ୍ଗଲାୟ ॥
ବାଲତ୍ଥଲୀ ହରି ସିଲାତଲ ପିଟ୍ଠିକଟ୍ଠ,
ଭୂୱଲ୍ଲରିଦ୍ୱୟ ମୟୂର ୟୁଗସ୍ସ ତୁୟ୍ହଂ ।
ପଞ୍ଚପ୍ପଭା ରୁଚିର ପିଚ୍ଛ ୟୁଗସ୍ସିରୀକଂ,
ନେତ୍ତଦ୍ୱୟଂ ମନସି ପୁଞ୍ଛତୁ ପାପଧୂଲିଂ ॥
ଇନ୍ଦୀୱରାନ୍ତଗତ ଭିଙ୍ଗିକ ପନ୍ତି ଭଙ୍ଗି,
ପଞମ୍ବୁଜସ୍ସରତତେ ୱିୟ ଗଚ୍ଛପନ୍ତୀ ।
ନେତ୍ତମ୍ବୁଜସ୍ସିରି ତିରୋକରଣୀୱ ତୁୟ୍ହଂ,
ପମ୍ହାୱଲୀ ସିରିଗତେହ ତିରୋ କରୋନ୍ତୁ ॥
ୱତ୍ତୁଲ୍ଲସମ୍ବୁଜ ୱିଲୋଚନ ହଂସ ତୁଣ୍ଡ,
କଞ୍ଜଂସୁ ପିଞ୍ଜର ମୁଲାଲ ଲତା ଦ୍ୱ୍ୟାଭଂ ।
ଦୋଲାଦ୍ୱୟଂୱ ସୱଣଦ୍ୱ୍ୟମତ୍ତ ଲକ୍ଖ୍ୟା,
ହୋତଂ ତୱଜ୍ଜ ଜନତା ମତିଚାରହେତୁ ॥
ୱମ୍ମୀକ ମତ୍ଥକ ସୟାନକ ଭୂରିଦତ୍ତ,
ଭୋଗିନ୍ଦ ଭୋଗୱଲି ୱିବ୍ଭମମା ୱହନ୍ତି ।
ଘାନୋପରିଟ୍ଠିତମୁନେ ତୱ ତୁଣ୍ଣମୁଣ୍ଣା,
ତଗ୍ଗାହିନୋ ୱିୟ ଜନସ୍ସ ଦଦାତୁ ୱିତ୍ତଂ ॥
ରୂପିନ୍ଦିରାୟ ୱିଜୟେ ଖିଲ ଲୋକ ରୂପଂ,
ଘାଣୋରୁ ଚାରୁ ପରିଘୋପରି ବଦ୍ଧ ସିଦ୍ଧା ।
ନୀଲାଭ ୱାତ ୱିଲୁଥନ୍ତ ୱୟଦ୍ଧଜାଭା,
ତିଟ୍ଠନ୍ତୁ ସଜ୍ଜ ଦୁରିତାରି ଜୟାୟ ତେ ଭୂ ॥
ଉଣ୍ଣସ୍ସିତୋପଲ ନିୱେସିତ ବୁନ୍ଦ ସନ୍ଧି,
ଘାଣୋରୁ ପିଣ୍ଡକମଘା ତପ ରୁନ୍ଧିତୁନ୍ତେ ।
ହୋତମ୍ମୁଖମ୍ବୁଜ ସିରୀ ସିରସୁସ୍ସିତାଭଂ,
ଭୂ ନୀଲ ପଟ୍ଟିକ ଲଲାତ ସୁୱଣ୍ଣ ଛତ୍ତଂ ॥
ରୁପଙ୍କ ୱେଦନ ୱିଲୋଚନ ବାନ ଦିଟ୍ଠୀ,
ଧାରା ନିସାନ ମଣିୱଟ୍ଟ ସିରୀ ସିରୋ ତେ ।
ସିଦ୍ଧା ମତୋସଧ କତଞ୍ଜନ ପୁଞ୍ଜ ଲକ୍ଖୀ,
ହୋତଂ ଜନସ୍ସ ନୟନାମୟ ନାସନାୟ ॥
ସକ୍ଖନ୍ଧ ବାହୁୟୁଗ ତୋରନ ମଜ୍ଝ ଗୀୱା,
ଧରପ୍ପିତସ୍ସିରିଘତୋ ପରି ମୁସ୍ସୱାୟ ।
ନୀଲୁପ୍ପଲାୱ ଠପିତା ସୱିଭତ୍ତି କନ୍ତେ,
କେସା ଭୱନ୍ତୁ ଭୁୱନତ୍ତୟ ମଙ୍ଗଲାୟ ॥
ହେମଗ୍ଘିୟେ ଠପିତ ନୀଲ ସିଲା କପାଲେ,
ପଜ୍ଜୋତ ଜାଲ ଲଲିତଂ ମୁନି ସାରୟନ୍ତୀ ।
ରୂପସ୍ସିରୀ ସିରସି ଭୂସିତ ହେମ ମାଲା,
କାରା କରୋତୁ ସୁଭଗଂ ତୱ କେତୁ ମାଲା ॥
ଭ୍ୟାମପ୍ପଭାଲି ତୱ କଞ୍ଚନ ମୋର କାଲେ,
ସୁରୋଦୟେ ୱିତତ ଚନ୍ଦକ ଚକ୍କଲକ୍ଖୀ ।
ମେଘାୱନଦ୍ଧ ସିଖରୁନ୍ନତ ହେମ ସେଲା,
ୟନ୍ତିନ୍ଦଚାପ ୱିକତୀୱ ଦଦାତୁ ସୋଭଂ ॥
ପଟ୍ଠାୟ ତେ ପଣିଧିତୋ ସୁଚି ଦାନ ସୀଲ,
ନେକ୍ଖମ୍ମ ପଞ୍ଞ ୱିରିୟକ୍ଖମ ସଚ୍ଚଧିଟ୍ଠା ।
ମେତ୍ତା ଉପେକ୍ଖିତି ଇମେ ଦସ ପୂରତୋୱ,
ପୂରେନ୍ତୁ ପାରମି ଗୁଣା ଜନତାନମତ୍ତେ ॥
ପତ୍ତୁତ୍ତରୁତ୍ତରଦସା ପଣିଧାନ ବୀଜା,
ଚେତୋରଧରାୟ କରୁଣା ଜଲ ସେଖ ୱୁଦ୍ଧା ।
ସବ୍ବଞ୍ଞୁ ଞାଣ ଫଲଦା ସତି ୱାଟ ଗୁତ୍ତା,
ତଂ ସମ୍ଫଲନ୍ଦିସତୁ ପାରମିତା ଲତା ତେ ॥
ଆବୋଧି ପୁଣ୍ଣମି ପଦିଟ୍ଠ ଦିନାଦିତୋ ତେ,
ସମ୍ଭାର କାଲ ସିତ ପକ୍ଖ କମାଭି ୱୁଦ୍ଧୋ ।
ସମ୍ପୁଣ୍ଣ ପାରମି ଗୁଣାମତରଂସି ତଂୱ,
ସବ୍ବଙ୍ଗି କୁନ୍ଦ କୁମୁଦାନି ପବୋଧୟେୟ୍ୟ ॥
ଆପଚ୍ଛିମବ୍ଭୱ ସିୱପ୍ଫଲ ଲାଭ ଦାନା,
ଦାନପ୍ପବନ୍ଧମପିଦାନ ଫଲପ୍ପଭନ୍ଦଂ ।
ସଂୱଡ୍ଢୟି ତ୍ୱଂ ଅଭିପତ୍ଥନତୋ ୟଥେୱଂ,
ଜନ୍ତୁତ୍ତରୁତ୍ତର ଫଲଂ ଖଲୁ ସମ୍ଭୁନନ୍ତୁ ॥
ଆରମ୍ଭତୋପ୍ପଭୁତି ୟାୱ ତୱଗ୍ଗମଗ୍ଗା,
ୱିକ୍ଖାଲିତ ଘକଲୁସଂ ସୁଚି ସୀଲ ତୋୟଂ ।
ମେତ୍ତା ଦୟା ମଧୁର ସୀତଲତାୟୁପେତଂ,
ସୋଧେତୁ ତ୍ୱଂୱ ଭୱ ନିସ୍ସିତ ଜନ୍ତୁ ମେତଂ ॥
ଆପଚ୍ଚିମତ୍ତମଭିନିକ୍ଖମନାଭିୟୋଗା,
ପଟ୍ଠାୟ ତମ୍ପଭୱତୋ ପରିପୁଣ୍ଣ ଗେହା ।
ତ୍ୱଂ ସବ୍ବ ଜାତି ଗହତୋ ଅପି ନିକ୍ଖମିତ୍ଥୋ,
ଏୱଂ ଜନା ଭୱ ଦୁଖା ଖଲୁ ନିକ୍ଖମନ୍ତୁ ॥
ଏକଗ୍ଗତୋ ପଲ ତଲେ ନିସିତା ଚିରନ୍ଧି,
ଧାରା ସୁଚିତ୍ତୁ ସୁତଲେ ସତି ଦଣ୍ଡ ବଦ୍ଧେ ।
ନିବ୍ବିଜ୍ଝି ଲକ୍ଖଣ ଧନୁଟ୍ଠିତି ସନ୍ତି ଲକ୍ଖଂ,
ଖିତ୍ତା ତୟୋନମନୁ ୱିଜ୍ଝତୁ ଜନ୍ତୁ ଖିତ୍ତା ॥
ତ୍ୱଂ ପାରମୀ ଜଲ ନିଧିଂ ଚତୁରିହ ବାହୁ,
ସତ୍ତୀହି ସୁତ୍ତରି ଚିରଂ ଜନକୋୱ ସିନ୍ଧୁଂ ।
ସମ୍ପନ୍ନ ୱିକ୍କମ ଫଲୋସି ୟଥା ଚସୋୱ,
ଏୱଂ ଜନା ୱିରିୟତପ୍ଫଲମେ ଧୟନ୍ତୁ ॥
ସତ୍ତ ପରଧ ଦହନେସୁ ଚିରଂ ସୁଧନ୍ତଂ,
ଖନ୍ତୀ ସୁୱଣ୍ଣ କତ ରୂପ ସମନ୍ତିମତ୍ତା ।
ସବ୍ବା ପରାଧମସହି ତ୍ୱଂଅସୟ୍ହମେୱଂ,
ସବ୍ବେ ଜନାପି ଖମନେନ ଭଜନ୍ତୁ ସନ୍ତିଂ ॥
ଲକ୍ଖାଧିକଂ ଚତୁର ସଂଖିୟ କପ୍ପ କାଲଂ,
ସଚ୍ଚେନ ସୁଟ୍ଠୁ ପରିଭାୱିତ ୱାଚିନୋ ତେ ।
ୱାଚାୟ ସଚ୍ଚ ଫୁସିତାୟ ସମେନ୍ତି ଜନ୍ତୁ,
ଏୱଂ ୱିସୁଦ୍ଧ ୱଚନା ଜନତା ଭୱନ୍ତୁ ॥
ଆଦିନ୍ନ ଧମ୍ମ ମହିୟତ୍ଥିର ସୁପ୍ପତିଟ୍ଠା,
ଧିଟ୍ଠାନ ପାରମି ମହା ୱଜିରଦ୍ଦି ତୁୟ୍ହଂ ।
ସତ୍ତେନ କେନ ପି ୟଥାହି ଅଭେଜ୍ଜ ନେଜ୍ଜୋ,
ଏୱଂ ଜନାପି କୁସଲେସୁ ଅଧିଟ୍ଠ ହନ୍ତୁ ॥
ତ୍ୱଂ ସବ୍ବ ସତ୍ତ ଚିରଭାୱିତ ମେତ୍ତ ଚିତ୍ତ,
ତୋୟେହି ସଂସମିତ କୋଧ ମହା ହୁତାସୋ ।
ଲୋକୁତ୍ତରଂ ତଦିତରଂ ହିତମାୱହିତ୍ଥୋ,
ଏୱଂ ଜନେସୁ ଜନତା ହିତମାୱହନ୍ତୂ ॥
ମିତ୍ତୋପକାର ପଟିପକ୍ଖ ଜନାପକାରେ,
ତ୍ୱଂ ନିବ୍ବିକାର ମନସୋ ଚିରଭାୱନାୟ ।
ପତ୍ତୋସିଲାଭ ପଭୁତଟ୍ଟୁସୁ ନିବ୍ବିକାରଂ,
ଏୱଂ ଜନାନୁନୟ କୋପ ନୁଦା ଭୱନ୍ତୁ ॥
ସମ୍ପନ୍ନ ହେତୁ ୱିଭୱୋ ତୁସିତେ ୱିମାନଂ,
ୟୁତ୍ତଂ ଗୁଣେହି ନୱଭିପ୍ପଦୱୀ ୱିମାନଂ ।
ତ୍ୱଂ ୱାଧିପରମିଧିରୋହିନିୟା ତିଲୋକୋ,
ଆରୋହତୁ ଭୟ ସୁଖଂ ପଦୱୀ ୱିମାନଂ ॥
ତ୍ୱଂୱେରହଂସି ସମବୁଜ୍ଝି ୟଥାଚ ସମ୍ମା,
ସମ୍ପନ୍ନ ୱିଜ୍ଜ ଚରଣୋ ସୁଗତୋସି ହୋନ୍ତୁ ।
ଲୋକଂ ୱିଦୋ ପୁରିସଦମ୍ମସୁସାରଥୀ ସି,
ସତ୍ଥାସି ବୁଜ୍ଝି ଭଗୱା ସି ତଥେୱ ଜନ୍ତୁ ॥
ସଚ୍ଚିତ୍ତ ଭୂ ନିଦହିତଂ ଜନତାୟ ତୁୟ୍ହଂ,
କଲ୍ୟାଣୱଣ୍ଣରତନଣ୍ଣୱଜାତିଭିନ୍ନଂ ।
ଦୁକ୍ଖଗ୍ଗି ଚୋର ଜଲୁପଦ୍ଦୁତଜାତି ଗେହେ,
ତସ୍ସା ସୁଖଂ ଭୱତୁ ଜୀୱିତୁମାପଦାୟ ॥
ୱାଚା ୱିଚିତ୍ତ ୱର ତନ୍ତୁ ଗତଙ୍ଗି କଣ୍ଠେ,
ସ୍ୱା ମୁତ୍ତ ସଗ୍ଗୁଣ ମହା ରତନା ୱଲୀ ତେ ।
ୱେୱଣ୍ଣି ୟତ୍ତନି ଭୱଂ ସକଲମ୍ପହାୟ,
ହୋତଞ୍ଜନସ୍ସ ସିରି ସଙ୍ଗମ ମଙ୍ଗଲାୟ ॥
ତଂ ସଗ୍ଗୁଣତ୍ଥୱ ଦହଟ୍ଠ ସୁତିପ୍ପନାଲି,
ନିସ୍ସନ୍ଦମାନ ଗୁଣନୀର ନିପାନ ତିନ୍ତେ ।
ଖେତ୍ତେତ୍ତ ସଞ୍ଞିନି ଜନା କତ ଲୋମ ହଂସ,
ବୀଜଙ୍କୁରୀ କୁସଲ ସସ୍ସ ଫଲଂ ଲଭନ୍ତୁ ॥
ଆପାୟିକପ୍ପଭୁତି ଦୁକ୍ଖ ନିଦାଘ କାଲ,
ସନ୍ତାପିତା ନିଖିଲ ଲୋକ ମନୋ କଦମ୍ବା ।
ତଂ ୱଙ୍ଣ ମେଘ ଫୁସନା ହସନଙ୍କୁରେହି,
ଇଦ୍ଧା ଭୱନ୍ତୁ ମତି ୱଲ୍ଲରି ୱେଲ୍ଲୀତା ତେ ॥
ହେତୁଦ୍ଦସା ଫଲଦସା ସମୱଟ୍ଠିତଂ ତଂ,
ସବ୍ବତ୍ଥ ସତ୍ତ ହିତମାୱହଣେନ ସିଦ୍ଧଂ ।
ଚିନ୍ତାପଥାତିଗନୁଭାୱ ୱିଭାୱନନ୍ତେ,
ଭୂତାନମତ୍ଥୁ ଚରିତବ୍ଭୁତମତ୍ଥ ସିଧ୍ୟା ॥
ଅଙ୍ଗାରକାସୁମଭିଲଙ୍ଘିୟ ଦାନ କାଲେ,
ଭତ୍ତତ୍ତନୋ ପଦ ପଟିଚ୍ଛକ ପଙ୍କଜା ଚ ।
ୟାତକ୍ଖଣେ ତୱ ପଦେ ଧଟମୁଟ୍ଠହିତ୍ୱା,
ପଙ୍କେରୁହାଂ ସିୱ ମଧୁଂ ସରତଂ ଦଦନ୍ତୁ ॥
ସଚ୍ଚେନ ମଚ୍ଛ ପତି ୱସ୍ସିତ ୱସ୍ସଧାରା,
ସତ୍ତେ ଦୟାୟ ତୱ ୱସ୍ସିତ ୱସ୍ସଧାରା ।
ଗିମ୍ହେ ଜନସ୍ସ ସମୟିଂସୁ ୟଥା ତଥାତା,
ଧମମ୍ବୁୱୁଟ୍ଠିୱ ସମେନ୍ତୁ କିଲେସ ଦାହେ ॥
ଛଦ୍ଦନ୍ତ ନାଗ ପତିନା ଖମତା ପରାଧଂ,
ଛେତ୍ୱା କରେ ଠପିତ ଦନ୍ତୱରାୱ ଲୁଦ୍ଦଂ ।
ଲୋକେ ହିତାୟ ଠପିତା ତୱ ଦନ୍ତ ଧାତୁ,
ସେଟ୍ଠା ଜନଂ ସିୱ ପୁରଂ ଲହୁ ପାପୟନ୍ତୁ ॥
ତଂ ତେମିୟାଖ୍ୟ ୟତିନୋସ୍ସମ ମାଲକମ୍ହି,
ଓକିଣ୍ଣ ମୁତ୍ତ କନକା ୱୁଜ ୱିପ୍ପକିଣ୍ଣା ।
କାରୁଞ୍ଞ ୱାରିଦ ଚୁତୋ ଦକ ବିନ୍ଦୁ ବନ୍ଧୂ,
ଧାତୁ ସମେନ୍ତୁ ତୱ ଜନ୍ତୁସୁ ଦୁକ୍ଖଦାହେ ॥
ରଟ୍ଠସ୍ସ ଅତ୍ଥ ଚରଣାୟ ଅସମ୍ମୁଖସ୍ସ,
ରାମେନ ଦିନ୍ନ ତିଣ ସଂଖତ ପାଦୁକାୱ ।
ଭୁତ୍ତା ତୟା ଚିରମସମ୍ମୁଖ ନାଗତସ୍ସ,
ଲୋକସ୍ସ ଅତ୍ଥମନୁ ତିଟ୍ଠତୁ ପତ୍ତ ଧାତୁ ॥
ୱୁତ୍ତୋ ଜନାନମୁପଦିସ୍ସ ୱରାହ ରଞ୍ଞା,
ସତ୍ଥିଂ ସହସ୍ସ ସରଦଂ ୱିୟ ଞାୟ ଧମ୍ମୋ ।
ଆଦେୟ୍ୟ ହେୟ୍ୟମୁପଦିସ୍ସ ତୟା ପୱୁତ୍ତୋ,
ଧମ୍ମୋ ପୱତ୍ତତୁ ଚିରଂ ଜନତା ହିତାୟ ॥
ମାରାରି ମଦ୍ଦନ ହିତାଧିଗମଂ କରୋତା,
ଭତ୍ତୋ ତୟା ୱର ମହା ଜୟ ବୋଧି ରାଜା ।
ସଗ୍ଗା ପୱୱଗ୍ଗ ହିତହେତୁ ଜନସ୍ସ ହନ୍ତ୍ୱା,
ସବ୍ବନ୍ତରାୟମିହ ତିଟ୍ଠତୁ ସୁଟ୍ଠୁ ସଜ୍ଜୋ ॥
ସାମୋଦ ୱଣ୍ଣ ଭଜନୀ ଗୁଣ ମଞ୍ଜରୀୟଂ,
ଚରିୟା ଲତା ୱିକସିତା ତୱ ସପ୍ଫଲଙ୍ଗଂ ।
ଓକିଣ୍ଣ ଚିତ୍ତ ମଧୁପେ ରସ ପୀଣୟନ୍ତି,
ସମ୍ଭାୱିତା ଭୁୱି ପୱତ୍ତତୁ ମତ୍ଥକେହି ॥
ସମ୍ବୁଦ୍ଧ ସେଲୱଲୟନ୍ତର ଜାନନୱ୍ହା,
ନୋତ୍ତତ୍ତତୋ ତିପଥଗା ୟତି ସାଗରଟ୍ଠା ।
ଧମ୍ମା ପଗା ସୁତି ୱସେ ତରିତେ ପୁଣନ୍ତି,
ସମ୍ଭାର ସସ୍ସମିହ ୱତ୍ତତୁ ପଚୟନ୍ତି ॥
ପଞ୍ଞାଣ କୂପ ସିତ ପଗ୍ଗହ ୱାୟୁ ଗାହୀ,
ସଦ୍ଧା ଲକାର ସହିତା ସତି ପୋତ ୱାହା ।
ସମ୍ପାପୟାତୁ ଭୱ ସାଗର ପାର ତୀର,
ସପ୍ପତ୍ତନଂ ୱରଧନେ ପତି ପତ୍ତି ନାୱା ॥
ବୋଜ୍ଝଙ୍ଗ ସତ୍ତ ରତନାକର ଧମ୍ମ ଖନ୍ଧ,
ଗମ୍ଭୀର ନୀର ଚୟ ସାସନ ସାଗରୋ ସଂ ।
ସୋ ସୀଲ୍ୟନନ୍ତ ତନୁ ୱେଟିଥ ଞାଣ ମନ୍ଥ,
ସେଲେନ ମନ୍ଥିତୱତଂ ଦିସତା ମତଂ ୱେ ॥
ୱୁତ୍ତେନ ତେନ ୱିଧିନା ୱିଧିନା ତତୋ ତଂ,
ଲଦ୍ଧା ନୁଭୂତମମତଂ ଖିଲ ଦୋସ ନାସଂ ।
ଅଚ୍ଚନ୍ତ ରୋଗ ଜରତା ମରଣା ଭି ଭୂତଂ,
ଭୂତଂ କରୋତୁ ଅମରଂ ଅଜରଂ ଅରୋଗଂ ॥
ସଦ୍ଧମ୍ମ ରାଜ ରୱିନିଗ୍ଗତ ଧମ୍ମରଂସି,
ଫୁଲ୍ଲୋ ଧୁତଙ୍ଗଦଲ ସଂୱର କେସରାଲି ।
ସଙ୍ଘାରୱିନ୍ଦ ନିକରୋ ସମଧୁଂ ସମାଧି,
ସକ୍କିଣ୍ଣିକୋ ଦିସତୁ ସାସନ ୱାପି ଜତୋ ॥
ଆନନ୍ଦ ରଞ୍ଞ ରତନାଦି ମହା ୟତିନ୍ଦ,
ନିଚ୍ଚପ୍ପବୁଦ୍ଧ ପଦୁମପ୍ପିୟ ସେୱିନଙ୍ଗୀ ।
ବୁଦ୍ଧପ୍ପିୟେନ ଘନ ବୁଦ୍ଧ ଗୁଣପ୍ପିୟେନ,
ଥେରାଲିନା ରଚିତ ପଜ୍ଜମଧୁଂ ପିବନ୍ତୁ ॥
ଇତ୍ଥଂ ରୂପ ଗୁଣାନୁକିତ୍ତନୱସା ତଂ ତଂ ହିତା ସିଂ ସତୋ,
ୱତ୍ଥାନୁସ୍ସତି ୱତ୍ତିତ ଇହ ୟଥା ସତ୍ତେସୁ ମେତ୍ତା ଚ ମେ ।
ଏୱଂ ତାଭି ଭୱନ୍ତ ରୁତ୍ତର ତରା ୱତ୍ତନ୍ତୁ ତା ବୋଧି ମେ,
ସଂୟୋଗୋଚ ଧନେହି ସନ୍ତିହି ଭୱେ କଲ୍ୟାନ ମିତ୍ତେହି ଚ ॥