କମଲାଞ୍ଜଲି
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
କମଲାଞ୍ଜଲି
କମଲାସନ କମଲାପତି ପମଥାଧିପ ୱଜିରା,
ୟୁଧଦାନୱ ମନୁଜୋରଗ ଭୁଜଗାସନ ପତିନଂ ।
ମକୁଟାହିତ ମନିଦୀଧିତି ଭମରାୱଲି ଭଜିତଂ,
ପଣମା’ମହଂ ଅନଘଂ ମୁନି ଚରଣାମଲ କମଲଂ ॥
କମଲାଲୟ ସଦି’ସଙ୍କିତ କଲମଙ୍ଗଲ ରୁଚିରଂ,
ଜୁତିରଞ୍ଜିତଂ ଅଭିନିଜ୍ଜିତ ସୁଭକଞ୍ଚନ ନଲିନଂ ।
ଜନିତା ଚିର ସମୟେ ନିଜ ପିତୁ ଭୂପତି ନମିତଂ,
ପଣମା’ମହଂ ଅନଘଂ ମୁନି ଚରଣାମଲ କମଲଂ ॥
ସରଣାଗତ ରଜନୀପତି ଦିନସେଖର ନମିତଂ,
ଭଜିତାଖିଲ ଜନପାୱନଂ ଅଭିକଙ୍ଖିତ ସୁଖଦଂ ।
ୱସୁଧାତଲ ସୟମୁଗ୍ଗତ ସରସୀରୁହ ମହିତଂ,
ପଣମା’ମହଂ ଅନଘଂ ମୁନି ଚରଣାମଲ କମଲଂ ॥
ଦିରଦାସନ ତରୁପନ୍ତିକ ଘଟିତାସନଂ ଅଭୟଂ,
ୱିଜୟାସନ ସମଧିଟ୍ଠିତ ଚତୁରଙ୍ଗିକ ୱିରିୟଂ ।
ଧରମାନକ ସୁରିୟେହନି ୱିଜିତନ୍ତକ ଧଜିନିଂ,
ପଣମା’ମହଂ ଅଭିପାତିତ ନମୁଚିଦ୍ଧଜ ୱିଭୱଂ ॥
ସଦୟୋଦିତ ପିୟଭାରତି ୱିଜିତନ୍ତକ ସମରଂ,
ଦସପାରମି ବଲକମ୍ପିତ ସଧରାଧର ଧରନିଂ ।
ଗିରିମେଖଲ ୱରୱାରନ ସିରସାନତ ଚରଣଂ,
ପଣମା’ମହଂ ଅଭିନନ୍ଦିତ ସନରାମର ଭୁୱନଂ ॥
ନିଖିଲାସୱ ୱିଗମେ’ନତିୱିମଲୀକତ ହଦୟଂ,
ତଦନନ୍ତର ୱିଦିତାଖିଲ ମତିଗୋଚର ୱିସୟଂ ।
ୱିସୟୀକତ ଭୁୱନତ୍ତୟଂ ଅତିଲୋକିୟ ଚରିତଂ,
ପଣମା’ମହଂ ଅପରାଜିତଂ ଅରହଂ ମୁନିଂ ଅସମଂ ॥
ମୁଦୁଭାରତି ମଧୁପାସିତ ନଲିନୋପମ ୱଦନଂ,
ରୁଚିରାୟତ ନଲିନୀଦଲ ନିଭ ଲୋଚନ ୟୁଗଲଂ ।
ଉଦୟୋଦିତ ରୱିମଣ୍ଡଲ ଜଲିତାମଲ ନିଟିଲଂ,
ପଣମା’ମହ ଅକୁତୋଭୟଂ ଅନଘଂ ମୁନି ପମୁଖଂ ॥
ଅସିତମ୍ବୁଦ ରୁଚିକୁଞ୍ଚିତ ମୁଦୁ କୁନ୍ତଲ ଲଲିତଂ,
ଭୁୱନୋଦର ୱିତତାମିତ ଜୁତିସଞ୍ଚୟ ଜଲିତଂ ।
ମଦମୋଦିତ ଦିରଦୋପମ ଗତିୱିବ୍ଭମ ରୁଚିରଂ,
ପଣମା’ମହଂ ଅମତନ୍ଦଦ ମୁନିପୁଙ୍ଗୱଂ ଅସମଂ ॥
କରୁଣାରସ ପରିଭାୱିତ ସୱଣାମତ ୱଚନଂ,
ୱିରୁଦାୱଲି ସତଘୋସିତ ୟସପୂରିତ ଭୁୱନଂ ।
ସୁମନୋହର ୱରଲକ୍ଖଣ ସିରିସଞ୍ଚୟ ସଦନଂ,
ପଣମା’ମହଂ ଉଦିତାମଲ ସସିମଣ୍ଡଲ ୱଦନଂ ॥
ୱିନୟାରହ ଜନମାନସ କୁମୁଦାକର ସସିନଂ,
ତସିନାପଗ ପରିସୋସନ ସତଦୀଧିତି ତୁଲିତଂ ।
ତମନାସୱ ମୁନିସେୱିତଂ ଅପଲୋକିତ ସୁଖଦଂ,
ପଣମା’ମହଂ ଅନିକେତନଂ ଅଖିଲାଗତି ୱିଗତଂ ॥
ସହିତାଖିଲ ଭୟଭେରୱଂ ଅଭୟାଗତ ସରନଂ,
ଅଜରାମର ସୁଖଦାୟକଂ ଅନିରାକତ କରୁଣଂ ।
ତମୁପାସକ ଜନସେୱିତ ସୁପତିଟ୍ଠିତ ଚରଣଂ,
ପଣମା’ମହଂ ଅହିତାପହଂ ଅନଘୁତ୍ତମ ଚରଣଂ ॥
କରୁଣାମତ ରସପୁରିତ ୱୀମଲାଖିଲ ହଦୟଂ,
ୱିହିତାମିତ ଜନତାହିତଂ ଅନୁକମ୍ପିତ ଭୁୱନଂ ।
ଭୁୱନେ ସୁତଂ ଅୱନୀପତି ସତ ସେୱିତ ଚରଣଂ,
ପଣମା’ମହଂ ଅନଘଂ ମୁନିଂ ଅଘନାସନ ଚତୁରଂ ॥
ଅରତୀରତି ପରିପୀଲିତ ୟତିମାନସ ଦମନଂ,
ନିଜସାସନ ୱିନିୱାରିତ ପୁଥୁତିତ୍ଥିୟ ସମଣଂ ।
ପରୱାଦିକ ଜନତାକତ ପରିଭାସିତ ଖମନଂ,
ପଣମା’ମହଂ ଅତିଦେୱତ ୱର ଗୋତମ ସମଣଂ ॥
ସରଣାଗତ ଭୟନାସନ ୱଜିରାଲୟ ପଣିଭଂ,
ଭୱସାଗର ପତିତାମିତ ଜନତାରନ ନିରତଂ ।
ସିରସାୱହଂ ଅମଲଞ୍ଜଲି ପୁଟପଙ୍କଜ ମକୁଲଂ,
ପଣମା’ମହଂ ଅଖିଲଲାୟ ୱିଗତଂ ମୁନିଂ ଅତୁଲଂ ॥
ୱିମଲୀକତ ଜନମାନସ ୱିଗତାସୱ ଭଗୱଂ,
ଭୱପାରଗ ୱିଭୱାମତ ସୁଖଦାୟକ ସତତଂ ।
ପରମାଦର ଗରୁଗାରୱ ୱିନତଂ ଜିନ ପୟତଂ,
ପଦପଙ୍କଜ ରଜସା ମମ ସମଲଙ୍କୁରୁ ସିରସଂ ॥
ପୱନାହତ ଦୁମପଲ୍ଲୱଂ ଇୱ ନାରତ ଚପଲଂ,
ଭୱଲାଲସ ମଲିନୀକତଂ ଅଜିତିନ୍ଦ୍ରିୟ ନିୱହଂ ।
ଚିର ସଞ୍ଚିତ ଦୁରିତାହତଂ ଅନିୱାରିତ ତିମିସଂ,
ୱିମଲୀକୁରୁ କରୁଣାଭର ସୁତରଂ ମମ ହଦୟଂ ॥
ଅଦୟେ ଦୟଂ ଅନୟେ ନୟଂ ଅପି ୟୋ ଗୁଣଂ ଅଗୁଣେ,
ଅହିତେ ହିତଂ ଅକରୋ କ୍ୱଚିଦ ଅପି କେନଚି ନକତଂ ।
ସଦୟେ ଜିନ ସୁନୟେ ଗୁଣସଦନେ ତୟି ନିତରଂ,
ସୁହିତେ ହିତଚରିତେ’ନଘ ରମତେ ମମ ହଦୟଂ ॥
ଭୱସଙ୍କଟ ପତିତେନପି ଭୱତା ଚିର ଚରିତଂ,
ୱିସମେ ସମ ଚରଣଂ ଖଲୁ ଦସପାରମି ଭରଣଂ ।
ସରତୋ’ହନି ସରତୋ ନିସି ସୁପିନେନପି ସତତଂ,
ରମତେ ଜିନ ସୁମତେ ତ୍ୱୟି ସଦୟଂ ମମ ହଦୟଂ ॥
ଅତିଦୁଦ୍ଦଦଂ ଅଦଦୀ ଭୱଂ ଅତିଦୁକ୍କରଂ ଅକରୀ ।
ଅତିଦୁକ୍ଖମଂ ଅଖମୀ ୱତ କରୁଣାନିଧି’ରସମୋ,
ଇତି ତେ ଗୁଣଂ ଅନଘଂ ମୁନି ସରତୋ ମମ ହଦୟଂ,
ରମତେ’ହନି ରମତେ ନିସି ରମତେ ତ୍ୱୟି ସତତଂ ॥
ଅତିଦୁଚ୍ଚରଂ ଅଚରୀ ଭୱଂ ଅତିଦୁଦ୍ଦମଂ ଅଦମୀ,
ଅତିଦୁଦ୍ଦୟଂ ଅଦୟୀ ୱତ ସଦୟାପର ହଦୟୋ ।
ଇତି ତେ ଗୁଣଂ ଅନଘଂ ମୁନି ସରତୋ ମମ ହଦୟଂ,
ରମତେ’ହନି ରମତେ ନିସି ରମତେ ତ୍ୱୟି ସତତଂ ॥
ଅତିଦୁଗ୍ଗମଂ ଅଗମୀ ଭୱଂ ଅତିଦୁଜ୍ଜୟଂ ଅଜୟୀ,
ଅତିଦୁସ୍ସହଂ ଅସହୀ ୱତ ସମୁପେକ୍ଖିତ ମନସୋ ।
ଇତି ତେ ଗୁଣଂ ଅନଘଂ ମୁନି ସରତୋ ମମ ହଦୟଂ,
ରମତେ’ହନି ରମତେ ନିସି ରମତେ ତ୍ୱୟି ସତତଂ ॥
ଅତିଦାରୁନ ପଲୟାନଲ ସଦିସାନଲ ଜଲିତେ,
ନିରୟେ ୱିନିପତିତୋ ଚିରଂ ଅଘତାପିତ ମନସୋ ।
ନ ସରିଂ ସକିଦ ଅପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ନରସାରଥି ତମିଦଂ ମମ ଖଲିତଂ ॥
ତିରିୟଗ୍ଗତ-ଗତିୟଂ ଚିରଂ ଅନୱଟ୍ଠିତ ଚରିତୋ,
ଅତିନିଟ୍ଠୁର ୱଧତଜ୍ଜିତ ଭୟକମ୍ପିତ ହଦୟୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ପୁରିସୁତ୍ତମ ତମିଦଂ ମମ ଖଲିତଂ ॥
ପରିଦେୱନ ନିରତୋ ଚିରଂ ଅଥ ପେତ୍ତିୟ ୱିସୟେ,
ସୁଜିଘଚ୍ଛିତ ସୁପିପାସିତ ପରିସୋସିତ ଜଠରେ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ଦିପଦୁତ୍ତମ ତମିଦଂ ମମ ଖଲିତଂ ॥
ୱିୱସୋ ଭୁସଂ ଅଘଦୂସିତ ମନସାସୁର ୱିସୟେ,
ଜନିତୋ ଘନତିମିରେ ଚିରଂ ଅତିଦୁକ୍ଖିତ ହଦୟୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ୱସିସତ୍ତମ ତମିଦଂ ମମ ଖଲିତଂ ॥
ମନସା ଚିର ୱିହିତଂ ସରଂ ଅତିକିବ୍ବିସ ଚରିତଂ,
ସମଥେନଥ ସୁୱିରାଜିୟ ତଂ ଅସଞ୍ଞିତଂ ଉପଗୋ ।
ନ ସରିଂ ସକିଦ ଅପି ତେ ପିତ ଭଜିତୁଂ ପଦ ନଲିନଂ,
ଖମ ଗୋତମ ୱସିପୁଙ୍ଗୱ ତମିଦଂ ମମ ଖଲିତଂ ॥
ୱିଜିଗୁଚ୍ଛିୟ ଦୁରିତଂ ନିଜ ୱପୁସା କତଂ ଅମିତଂ,
ତନୁ ୱଜ୍ଜିତଂ ଉପଗୋ ଭୱଂ ଇହ ଭାୱିତ ସମଥୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ୟତିକୁଞ୍ଜର ତମିଦଂ ମମ ଖଲିତଂ ॥
ରତନତ୍ତୟ ରହିତେ ଭୁସ ବହୁଲୀକତ ଦୁରିତେ,
ଜନିତୋ ପରୱିସୟେ ବୁଧଜନ ନିନ୍ଦିୟ ଚରିତେ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ କରୁଣାନିଧି ତମିଦଂ ମମ ଖଲିତଂ ॥
ଜନିତୋ ୟଦି ମନୁଜେସୁପି ୱିକଲିନ୍ଦ୍ରିୟ ନିୱହୋ,
ତନୁନା କରଚରଣାଦିହି ୱିକତେ’ନିହ ଦୁଖିତୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ମତିସାଗର ତମିଦଂ ମମ ଖଲିତଂ ॥
ୱିଧିନାହିତ ମତିଭାୱନ ରହିତୋ ତମପିହିତୋ,
ୱିସଦେସୁପି କୁସଲାଦିସୁ ତଥଦସ୍ସନ ୱିମୁଖୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ନରକେସରି ତମିଦଂ ମମ ଖଲିତଂ ॥
ସୁଚିରେନପି ଭୁୱି ଦୁଲ୍ଲଭଂ ଅସମଂ ଖଣଂ ଅଲଭଂ,
ସନରାମର ଜନତାହିତ ସୁଖଦଂ ମୁନି ଜନନଂ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ୱଦତଂୱର ତମିଦଂ ମମ ଖଲିତଂ ॥
ନିସିତାୟୁଧ ୱଧସଜ୍ଜିତ ଖଳନିଦ୍ଦୟ ହଦୟୋ,
ପରହିଂସନ ରୁଚି ଭିଂସନ ୟମସୋଦର ସଦିସୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ମୁନିସତ୍ତମ ତମିଦଂ ମମ ଖଲିତଂ ॥
ପରସନ୍ତକ ହରଣେ କତମତି ବଞ୍ଚନ ବହୁଲୋ,
ଘରସନ୍ଧିକ ପରିପନ୍ଥିକ ସହସାକତି ନିରତୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ମୁନିପୁଙ୍ଗୱ ତମିଦଂ ମମ ଖଲିତଂ ॥
ନୱୟୋବ୍ବନ ମଦଗବ୍ବିତ ପରିମୁଚ୍ଛିତ ହଦୟୋ,
ସୁଚିସଜ୍ଜନ ୱିଜିଗୁଚ୍ଛିୟ ପରଦାରିକ ନିରତୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ କରୁଣାଭର ତମିଦଂ ମମ ଖଲିତଂ ॥
ମଦିରାସୱରତ ନାଗରଜନ ସନ୍ତତ ଭଜିତୋ,
ଗରୁଗାରୱ ହିରିଦୂରିତ ତିରିୟଗ୍ଗତ ଚରିତୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ୱିହତାସୱ ତମିଦଂ ମମ ଖଲିତଂ ॥
ସପିତାମହ ପପିତାମହ ନିଚିତଂ ଧନଂ ଅମିତଂ,
ପିତୁସଞ୍ଚିତମପି ନାସିୟ କିତୱୋ ହତୱିଭୱୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ୱିଜିତନ୍ତକ ତମିଦଂ ମମ ଖଲିତଂ ॥
ୱିତଥାଲିକ ୱଚନୋ ପରପିୟସୁଞ୍ଞତ କରଣୋ,
ଫରୁସଂ ଭଣଂ ଅତିନିପ୍ଫଲ ବହୁଭାସନ ନିପୁଣୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ଭୁୱନେସୁତ ତମିଦଂ ମମ ଖଲିତଂ ॥
ପରସମ୍ପଦଂ ଅଭିଝାୟନ ନିରନ୍ତର ଦୁଖିତୋ,
ନଭିରଜ୍ଝନ ପରମୋ କ୍ୱଚି ଫଲଦସ୍ସନ ରହିତୋ ।
ନ ସରିଂ ସକିଦପି ତେ ପିତ ଭଜିତୁଂ ପଦନଲିନଂ,
ଖମ ଗୋତମ ଗୁଣସାଗର ତମିଦଂ ମମ ଖଲିତଂ ॥
ଭୱତୋ ଭୱଂ ଅପରାପରଂ ଅୟତାଚିରଂ ଇତି ମେ,
ୱପୁସା ଅଥ ୱଚସାପି ଚ ମନସା କତଂ ଅମିତଂ ।
ଖମ ଗୋତମ ଦୁରିତାପହ ଦୁରିତଂ ବହୁୱିହିତଂ,
ଦଦ ମେ ସିୱପଦଂ ଅଚ୍ଚୁତଂ ଅମତଂ ଭୱୱିଗତଂ ॥
ତିମିରାୱୁତ କୁଣପାକୁଲ ୱିଜିଗୁଚ୍ଛିୟ ପୱନେ,
ଜନିକାସୁଚି ଜଠରେ ବହୁ କିମିସନ୍ତତି ସଦନେ ।
ଅସୟିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରନଂ ଭୱ ଭଗୱଂ ମମ ଭୱନୀରଧି ତରଣେ ॥
ବହି ନିକ୍ଖମଂ ଅସକିଂ ଭଗତିରିୟଂ ପଥ ପତିତୋ,
ଅଗଦଙ୍କର କତ ସଲ୍ଲକ ସତଖଣ୍ଡିତ କରଣୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରନେ ॥
ପତିତୋ ବହି ରତିପିଲ୍ଲକ ତନୁରାମୟ ମଥିତୋ,
ୱଦିତୁଂ କିମୁ ୱିଦିତୁମ୍ପି ଚ ନ ସହଂ ମତିରହିତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଜନିତୋ ୟଦି ସୁଖିତୋ ଜନଦୟିତୋ ପିୟଜନକୋ,
ପୁଥୁକୋ ବହୁୱିଧ-କୀଲନନିରତୋ ଗଦଗହିତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ତରୁନୋପି ହି ଘରବନ୍ଧନ ଗଥିତୋମିତ ୱିଭୱୋ,
ସହସା ଗଦଗହିତୋ ପିୟଭରିୟାସୁତ ୱିୟୁତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଅଜରଂ ତନୁଂ ଅଭିମଞ୍ଞିୟ ନୱୟୋବ୍ବନ ୱସିକୋ,
ଜରସା ପରିମଥିତୋ ପରଂ ଅନନୁଟ୍ଠିତ କୁସଲୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ନିରୁଜୋ ଧୁୱଂ ଅରୁଜଂ ତନୁଂ ଅଭିମଞ୍ଞିୟ ସମଦୋ,
କୁସଲାସୟ ୱିମୁଖୋ ଭୁସଂ ଅୱସୋ ଗଦନିହତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ପୱିଚିନ୍ତିୟ ସକଜୀୱିତଂ ଅମରଂ ଧୁୱଂ ଅନିଘଂ,
ଇତି ଜୀୱିତମଦଗବ୍ବିତ ମତିରୁଜ୍ଝିତ କୁସଲୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ପରହିଂସନ ଧନମୋସନ ପରଦାରିକ ନିରତୋ,
ଧରନୀପତି ଗହିତୋ ବହୁ ୱଧବନ୍ଧନ ନିହତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ନରକୋଦକ ପତିତୋ ଗିରିତରୁମତ୍ଥକ ଗଲିତୋ,
ମିଗୱାଳକ ଗହିତୋ ୱିସଧର ଜାତିହି ଡସିତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଅଭିଚାରକ ୱିଧିକୋପିତ ନିସିଚାରକ ଗହିତୋ,
ସୱିସୋଦନ ସହସାଦନ ପଭୁତୀହି ଚ ଖଲିତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ସୟମେୱଚ ସଜନୋପରି କୁପିତୋ ମତିୱିୟୁତୋ,
ସୱିସାଦନ ଗଲକନ୍ତନ ପଭୁତାମିତ ଖଲିତୋ ।
ଅମରିଂ ଭୱଗହଣେ ଚରଂ ଅହଂ ଅପ୍ପଟିସରଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ପିତୁପୂଜନ ନିରତାସୟ ସୁଖିତୋ ପିତୁଦୟିତୋ,
ମରଣେନଚ ପିତୁନୋ ଭୁସଂ ଅନୁସୋଚନ ନିରତୋ ।
ପରୁଦିଂ ଚିରଂ ଅତିଦୁସ୍ସହ କସିରେ ଭୱଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ସମୁପଟ୍ଠିୟ ଜନିକଂ ନିଜଂ ଅଭିୱାଦନ ପରମୋ,
ମରଣେନଚ ଜନିକାୟନୁସରିତା ଗୁଣମହିମଂ ।
ପରୁଦିଂ ଚିରଂ ଅତିଦୁସ୍ସହ କସିରେ ଭୱଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଗୁରୁଦେୱତ ପତିମାନନ ପରମୋ ପିୟସୁୱଚୋ,
ସମୁପାସିତଚରଣୋ ଗୁରୁମରଣେନତିଦୁଖିତୋ ।
ପରୁଦିଂ ଚିରଂ ଅତିଦୁସ୍ସହ କସିରେ ଭୱଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଘରମେଧିତଂ ଉପଗୋମିତୱିଭୱୋ ରତିବହୁଲୋ,
ମରଣେ ପିୟଭରିୟାସୁତଦୁହିତୂ’ନତିକରୁଣଂ ।
ପରୁଦିଂ ଚିରଂ ଅତିଦୁସ୍ସହ କସିରେ ଭୱଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ପିୟପୁବ୍ବଜ ସହଜାନୁଜ ଭଗିଣିଦ୍ୱୟ ମରଣେ,
ନିଜ ବନ୍ଧୱ-ସଖ-ସିସ୍ସକ ମରଣେ ପ୍ୟତିକରୁଣଂ ।
ପରୁଦିଂ ଚିରଂ ଅତିଦୁସ୍ସହ କସିରେ ଭୱଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଜଗତୀପତି ଗହଣା ରିପୁଜନତକ୍କର ହରଣା,
ସରିତୋଦକ ୱହଣା ପୁଥୁଜଲିତାନଲ ଦହଣା ।
ପରୁଦିଂ ହତୱିଭୱୋ ଚିରମିହ ଦୁଗ୍ଗତିଗହଣେ,
ସରଣଂ ଭୱ ଭଗୱଂ ମମ ଭୱନୀରଧି ତରଣେ ॥
ଅତିଦୁଗ୍ଗମ ୱିସମାକୁଲ ଭୱସଙ୍କଟ ପତିତେ,
ବ୍ୟସନଂ ଚିରମିତି ଦୁସ୍ସହଂ ଅନୁଭୂୟପି ୱିମିତଂ ।
ନ ଜହେ ସୁଖଲୱୱଞ୍ଚିତହଦୟୋ ଭୱତସିନଂ,
ତମପାକୁରୁ କରୁଣାନିଧି ତସିନଂ ମମ କସିଣଂ ॥
ଜନନାୱଧି ମରଣଂ ୱିୟ ମରଣାୱଧି ଜନନଂ,
ଉଭୟେନପି ଭୟମେୱହି ଭୱତୋ ମମ ନିୟତଂ ।
ସିୱମେୱଚ ଜନନାୱଧି ମରଣାୱଧି ରହିତଂ,
ଦଦ ମେ ସିୱଂ ଅମତନ୍ଦଦ ତଂ ଅନାସୱ ଭଗୱଂ ॥
ଚିରଦିକ୍ଖିତମପି ମେ ମନଂ ଅନିୱାରିତ ତସିନଂ,
ଭୱତୋ ଭୱ ରତିପୀଲିତଂ ଅହହୋ କଲିଘଟିତଂ !
ତମତୋ ପିତ ଭୟତୋ ମମମୱ ମେ ଭୱ ସରଣଂ,
ଭଗୱଂ ପଟିସରଣଂ ମମ ଭୱନୀରଧି ତରଣଂ ॥