ଜିନାଲଙ୍କାର
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ଜିନାଲଙ୍କାର
ପଣାମଦୀପନୀଗାଥା
ୟୋ ଲୋକତ୍ଥାୟ ବୁଦ୍ଧୋ ଧନସୁତଭରିୟାଅଙ୍ଗଜୀୱେ ଚଜିତ୍ୱା ପୂରେତ୍ୱା ଆରମିୟୋ ତିଦସମନୁପମେ ବୋଧିପକ୍ଖୀୟଧମ୍ମେ,
ପତ୍ୱା ବୋଧିଂ ୱିସୁଦ୍ଧଂ ସକଲଗୁଣଦଦଂ ସେଟ୍ଠଭୂତୋ ତିଲୋକେ,
କତ୍ୱା ଦୁକ୍ଖସ୍ସ ଅନ୍ତଂ କତସୁଭଜନତଂ ଦୁକ୍ଖତୋ ମୋଚୟିତ୍ଥ ॥
ନତ୍ୱାନାହଂ ଜିନନ୍ତଂ ସମୁପଚିତସୁଭଂ ସବ୍ବଲୋକେକବନ୍ଧୁଂ,
ନାହୁ ୟେନପି ତୁଲ୍ୟୋ କୁସଲମହିମତୋ ଉତ୍ତମୋ ଭୂତଲୋକେ ତସ୍ସେୱାୟଂ ଉୱିମ୍ହଂ ସୁୱିପୁଲମମଲଂ ବୋଧିସମ୍ଭାରଭୂତଂ,
ହେତୁଂ ହେତ୍ୱାନୁରୂପଂ ସୁଗତଗତଫଲଂ ଭାସତୋ ମେ ସୁଣାଥ ॥
ୟୋଗାୱଚରସମ୍ପତ୍ତିଦୀପନୀଗାଥା
ଜାତୋ ୟୋ ନୱମେ ଖଣେ ସୁତଧରୋ ସୀଲେନ ସୁଦ୍ଧିନ୍ଦ୍ରିୟୋ ସଂସାରଂ ଅୟତୋ ଭୱକ୍କୟକରଂ ଦିସ୍ୱା ସିୱଂ ଖେମତୋ,
ତଂ ସମ୍ପାପକମଗ୍ଗଦେସକମୁନିଂ ସମ୍ପୂଜୟନ୍ତୋ ତତୋ ଉଦ୍ଧାନୁସ୍ସତିଭାୱନାଦିକମତୋ ସମ୍ପାଦୟେ ତଂ ସିୱଂ ॥
ୱତ୍ଥୁୱିସୋଧନୀଗାଥା
ବୁଦ୍ଧୋତି କୋ ବୁଦ୍ଧଗୁଣୋ ତି କୋ ସୋ,
ଅଚିନ୍ତୟାଦିତ୍ତମୁପାଗତୋ ୟୋ ।
ଅନଞ୍ଞସାଧାରଣଭୂତମତ୍ଥଂ,
ଅକାସି କିଂ ସୋ କିମୱୋଚ ବୁଦ୍ଧୋ ॥
ୱିସୁଦ୍ଧଖନ୍ଧସନ୍ତାନୋ ବୁଦ୍ଧୋତି ନିୟମୋ କତୋ,
ଖନ୍ଧସନ୍ତାନସୁଦ୍ଧୀ ତୁ ଗୁଣୋତି ନିୟମୋ କତୋ ॥
ଅକାସି କିଚ୍ଚାନି ଦିନେସୁ ପଞ୍ଚ,
ପସାଦୟଞ୍ଚିଦ୍ଧିବଲେନ ସେନ ।
ଜନାନସେସଂ ଚରିୟାନୁକୂଲଂ,
ଞତ୍ୱାନୱୋଚାନୁସୟପ୍ପହାନଂ ॥
ଅନଞ୍ଞସାଧାରଣଦୀପନୀଗାଥା
ଅବ୍ଭୁଗ୍ଗତା ୟସ୍ସ ଗୁଣା ଅନନ୍ତା,
ତିବୁଦ୍ଧଖେତ୍ତେକଦିୱାକରୋତି ।
ଜାନାତି ସୋ ଲୋକମିମଂ ପରଞ୍ଚ,
ସଚେତନଞ୍ଚେୱ ଅଚେତନଞ୍ଚ ।
ସକସ୍ସ ସନ୍ତାନଗତଂ ପରେସଂ,
ବ୍ୟତୀତମପ୍ପତ୍ତକମତ୍ରଭୂତଂ ॥
ଅନନ୍ତସତ୍ତେସୁ ଚ ଲୋକଧାତୁସୁ,
ଏକୋୱ ସବ୍ବେପି ସମା ନ ତେନ ।
ଦିସାସୁ ପୁବ୍ବାଦିସୁ ଚକ୍କୱାଳା,
ସହସ୍ସସଙ୍ଖାୟପି ଅପ୍ପମେୟ୍ୟା ।
ୟେ ତେସୁ ଦେୱା ମନୁଜା ଚ ବ୍ରହ୍ମା,
ଏକତ୍ଥ ସଙ୍ଗମ୍ମ ହି ମନ୍ତୟନ୍ତା ॥
ଅନାଦିକାଲାଗତନାମରୂପିନଂ,
ୟଥାସକଂ ହେତୁଫଲତ୍ତୱୁତ୍ତିନଂ ।
ତବ୍ଭାୱଭାୱିତ୍ତମସମ୍ଭୁଣନ୍ତା,
ନାନାୱିପଲ୍ଲାସମନୁପୱିଟ୍ଠା ॥
କମ୍ମପ୍ପୱତ୍ତିଞ୍ଚ ଫଲପ୍ପୱତ୍ତିଂ,
ଏକତ୍ତନାନତ୍ତନିରୀହଧମ୍ମତଂ ।
ୱିଞ୍ଞତ୍ତିସନ୍ତାନଘନେନ ଛନ୍ନତୋ,
ସିୱଞ୍ଜସଂ ନୋ ଭଣିତୁଂ ସମତ୍ଥା ॥
ଏକୋ ୱ ସୋ ସନ୍ତିକରୋ ପଭଙ୍କରୋ,
ସଙ୍ଖାୟ ଞେୟ୍ୟାନି ଅସେସିତାନି ।
ତେସଞ୍ହି ମଜ୍ଝେ ପରମାସମ୍ଭୀୱଦଂ,
ସିୱଞ୍ଜସଂ ଦୀପୟିତୁଂ ସମତ୍ଥୋ ॥
ସୋ ଗୋତମୋ ସକ୍ୟସୁତୋ ମୁନିନ୍ଦୋ,
ସବ୍ବସ୍ସ ଲୋକସ୍ସ ପଦୀପଭୂତୋ ।
ଅନନ୍ତସତ୍ତେ ଭୱବନ୍ଧନମ୍ହା,
ମୋଚେସି କାରୁଞ୍ଞଫଲାନୁପେକ୍ଖୀ ॥
ଅଭିନୀହାରଦୀପନୀଗାଥା
ୱଦେଥ ତସ୍ସୀଧ ଅନପ୍ପକଂ ଗୁଣଂ,
ନ ତେନ ତୁଲ୍ୟୋ ପରମୋ ଚ ୱିଜ୍ଜତି ।
କିଂ ତଂ ଗୁଣଂ ତଂ ସଦିସେନ ଦିନ୍ନଂ,
ସୟଂକତଂ କିନ୍ନୁ ଅଧିଚ୍ଚଲଦ୍ଧଂ ॥
ନାଧିଚ୍ଚଲଦ୍ଧଂ ନ ଚ ପୁବ୍ବବୁଦ୍ଧା,
ବ୍ରହ୍ମାଦିନଂ ସମ୍ମୁତିୟା ବହୂନଂ ।
ସୟଂକତେନେୱ ଅନୋପମେନ,
ଦାନାଦିନା ଲଦ୍ଧମିଦଂ ୱିପାକଂ ॥
ଇତୋ ଚତୁନ୍ନଂ ଅସଙ୍ଖିୟାନଂ,
ସତଂସହସ୍ସାନଧିକାନମତ୍ଥକେ ।
କପ୍ପେ ଅତୀତମ୍ହି ସୁମେଧତାପସୋ,
ୱେହାୟସଂ ଗଚ୍ଛତି ଇଦ୍ଧିୟା ତଦା ॥
ଦିପଙ୍କରୋ ନାମ ଜିନୋ ସସଙ୍ଘୋ,
ରମ୍ମଂ ପୁରଂ ୟାତି ୱିରୋଚମାନୋ ।
ମନୁସ୍ସଦେୱେହିଭିପୂଜିୟନ୍ତୋ,
ସହସ୍ସରଂସି ୱିୟ ଭାଣୁମା ନଭେ ॥
ତସ୍ସଞ୍ଜସଂ କାତୁବହୁସ୍ସହାନଂ,
ବୁଦ୍ଧୋତି ସୁତ୍ୱା ସୁମନୋ ପତୀତୋ ।
ମମଜ୍ଜ ଦେହଂ ପନିମସ୍ସ ଦତ୍ୱା,
ବୁଦ୍ଧୋ ଅହଂ ହେସ୍ସମନାଗତେଦିସୋ ॥
ତସ୍ମିଞ୍ଜସେ କନ୍ଦରତମ୍ହି ପଙ୍କେ,
କତ୍ୱାନ ସେତୁଂ ସୟି ସୋ ସଦେହଂ ।
ବୁଦ୍ଧୋ ଅୟଂ ଗଚ୍ଛତୁ ପିଟ୍ଠିୟା ମମଂ,
ବୋଧିସ୍ସଚେ ହେସ୍ସତି ମେ ଅନାଗତେ ॥
ଉସ୍ସୀସକଂ ୟାତି ଜିନୋ ହି ତସ୍ସ,
ଅଜ୍ଝାସୟୋ ସିଜ୍ଝତିମସ୍ସନାଗତେ ।
ଞତ୍ୱାନ ବ୍ୟାକାସି ଅସେସତୋ ହି,
ବୁଦ୍ଧୋ ଅୟଂ ହେସ୍ସତିନାଗତେସୁ ॥
ସୁତ୍ୱାନ ପତ୍ତୋ ୱ ମହାଭିସେକଂ,
ଲଦ୍ଧଂ ୱ ବୋଧିଂ ସମନୁସ୍ସରନ୍ତୋ ।
ପୂଜେତ୍ୱା ୟାତେ ମୁନିଦେୱମାନୁସେ,
ଉଟ୍ଠାୟ ସୋ ସମ୍ମସି ପାରମୀ ଦସ ॥
ଦଳ୍ହଂ ଗହେତ୍ୱା ସମତିଂସପାରମୀ,
ସିକ୍ଖତ୍ତୟଞ୍ଚସ୍ସ ଜିନସ୍ସ ସନ୍ତିକେ ।
କାତୁଂ ସମତ୍ଥୋ ପି ଭୱସ୍ସ ପାରଂ,
ସତ୍ତେସୁ କାରୁଞ୍ଞବଲା ଭୱଂ ଗତୋ ॥
ଉପ୍ପନ୍ନୁପ୍ପନ୍ନକେ ସୋ ଜିନୱରମତୁଲେ ପୂଜୟିତ୍ୱା ଅସେସଂ ବୁଦ୍ଧୋ ଏସୋ ହି ଓସୋ ଭୱତି ନିୟମତୋ ବ୍ୟାକତୋ ତେହି ତେହି ତେସଂ ତେସଂ ଜିନାନଂ ଅଚନମନୁପମଂ ପୂଜୟିତ୍ୱା ସିରେନ,
ତଂ ତଂ ଦୁକ୍ଖଂ ସହିତ୍ୱା ସକଲଗୁଣଦଦଂ ପାରମୀ ପୂରୟିତ୍ଥ ॥
ବୋଧିସମ୍ଭାରଦୀପନୀଗାଥା
ସୋ ଦୁକ୍ଖଖିନ୍ନଜନଦସ୍ସନଦୁକ୍ଖଖିନ୍ନୋ,
କାରୁଞ୍ଞମେୱ ଜନତାୟ ଅକାସି ନିଚ୍ଚଂ ।
ତେସଂ ହି ମୋଚନମୁପାୟମିଦନ୍ତି ଞତ୍ୱା,
ତାଦୀପରାଧମପି ଅତ୍ତନି ରୋପୟୀ ସୋ ॥
ଦାନାଦିନେକୱରପାରମିସାଗରେସୁ,
ଓଗାଳ୍ହତାୟପି ପଦୁଟ୍ଠଜନେନ ଦିନ୍ନଂ ।
ଦୁକ୍ଖଂ ତଥା ଅତିମହନ୍ତତରମ୍ପି କିଞ୍ଚି,
ନାଞ୍ଞାସି ସତ୍ତହିତମେୱେଅ ଗୱେସୟନ୍ତୋ ॥
ଛେତ୍ୱାନ ସୀସଂ ହି ସକଂ ଦଦନ୍ତୋ,
ମଂସଂ ପଚିତ୍ୱାନ ସକଂ ଦଦନ୍ତୋ ।
ସୋ ଚତ୍ତଗତ୍ତୋ ପଣିଧାନକାଲେ,
ଦୁଟ୍ଠସ୍ସ କିଂ ଦୁସ୍ସତି ଛେଦନେନ ॥
ଏୱଂ ଅନନ୍ତମପି ଜାତିସତେସୁ ଦୁକ୍ଖଂ,
ପତ୍ୱାନ ସତ୍ତହିତମେୱ ଗୱେସୟନ୍ତୋ ।
ଦୀପଙ୍କରେ ଗହିତସୀଲସମାଧିପଞ୍ଞଂ,
ପାଲେସି ୟାୱ ସକବୋଧିତଲେ ସୁନିଟ୍ଠୋ ॥
ୟଦାଭିନୀହାରମକା ସୁମେଧୋ,
ୟଦା ଚ ମଦ୍ଦିଂ ଅଦଦା ସିୱିନ୍ଦୋ ।
ଏତ୍ଥନ୍ତରେ ଜାତିସୁ କିଞ୍ଚିପେକଂ,
ନିରତ୍ଥକଂ ନୋ ଅଗମାସି ତସ୍ସ ॥
ମହାସମୁଦ୍ଦେ ଜଲବିନ୍ଦୁତୋପି,
ତଦନ୍ତ୍ରେ ଜାତି ଅନପ୍ପକା ୱ ।
ନିରନ୍ତରଂ ପୂରିତପାରମୀନଂ,
କଥଂ ପମାଣଂ ଉପମା କୁହିଂ ୱା ॥
ୟୋ ମଗ୍ଗପସ୍ସେ ମଧୁରମ୍ବବୀଜଂ,
ଛାୟାଫଲତ୍ଥାୟ ମହାଜନାନଂ ।
ରୋପେସି ତସ୍ମିଂ ହି ଖଣେୱ ତେନ,
ଛାୟାଫଲେ ପୁଞ୍ଞମଲଦ୍ଧମୁଦ୍ଧଂ ॥
ତଥେୱ ସଂସାରପଥେ ଜନାନଂ,
ହିତାୟ ଅତ୍ତନମଭିରୋପିତକ୍ଖଣେ ।
ସିଦ୍ଧଂ ୱ ପୁଞ୍ଞୂପରି ତସ୍ସ ତସ୍ମିଂ,
ଧନଙ୍ଗଜୀୱଂ ପି ହରନ୍ତି ୟେ ୟେ ॥
ସୋ ସାଗରେ ଜଲଧିକଂ ରୁହିରଂ ଅଦାସି,
ଭୂମାପରାଜିୟ ସମଂସମଦାସି ଦାନଂ ।
ମେରୁପ୍ପମାଣମଧିକଞ୍ଚ ସମୋଳିସୀସଂ,
ଖେ ତାରକାଧିକତରଂ ନୟନଂ ଅଦାସି ॥
ଗବ୍ଭୋକ୍କନ୍ତିଦୀପନୀଗାଥା
ଗମ୍ଭୀରପାନଦାନାଦିସାଗରେସୁ ହି ଥାମସା ।
ତରନ୍ତୋ ମଦ୍ଦିଦାନେନ ନିଟ୍ଠାପେତ୍ୱାନ ପାରମୀ ॥
ୱସନ୍ତୋ ତୁସୀତେ କାୟେ ବୋଧିପରିପାକମାଗମ୍ମ ।
ଆୟାଚନାୟ ଚ ଦେୱାନଂ ମାତୁଗବ୍ଭମୁପାଗମି ॥
ସତୋ ଚ ସମ୍ପଜାନୋ ଚ ମାତୁକୁଚ୍ଛିମ୍ହି ଓକ୍କମି ।
ତସ୍ସ ଓକ୍କନ୍ତିୟଂ ସବ୍ବା ଦସସହସ୍ସୀ ପକମ୍ପିତ୍ଥ ॥
ତତୋ ପୁବ୍ବନିମିତ୍ତାନି ଦ୍ୱତ୍ତିଂସାନି ତଦା ସିୟୁଂ ।
ତୁଟ୍ଠହଟ୍ଠା ୱ ସା ମାତା ପୁତ୍ତଂ ପସ୍ସତି କୁଚ୍ଛିୟଂ ॥
ୱିଜାୟନମଙ୍ଗଲଦୀପନୀଗାଥା
ସା ପୁଣ୍ଣଗବ୍ଭା ଦସମାସତୋ ପରଂ,
ଗନ୍ତ୍ୱାନ ଫୁଲ୍ଲଂ ୱରଲୁମ୍ବିନୀୱନଂ ।
ଠିତା ଗହେତ୍ୱା ୱରସାଲସାଖଂ,
ୱିଜାୟି ତଂ ପୁତ୍ତୱରଂ ସୁଖେନ ॥
ତଦା ସହସ୍ସୀଦସଲୋକଧାତୁସୁ,
ଦେୱା ଚ ନାଗା ଅସୁରା ଚ ୟକ୍ଖା ।
ନାନାଦିସା ମଙ୍ଗଲଚକ୍କୱାଳଂ,
ସୁମଙ୍ଗଲଂ ମଙ୍ଗଲମାଗମିଂସୁ ॥
ଅନେକସାଖଞ୍ଚ ସହସ୍ସମଣ୍ଡଲଂ,
ଛତ୍ତଂ ମରୂ ଧାରୟୁମନ୍ତଲିକ୍ଖେ ।
ସୁୱଣ୍ଣଦଣ୍ଡା ୱିପତନ୍ତି ଚାମରା,
ଖଜ୍ଜିଂସୁ ଭେରୀ ଚ ନଦିଂସୁ ସଙ୍ଖା ॥
ମଲେନକେନାପି ଅନୂପଲିତ୍ତୋ,
ଠିତୋ ୱ ପାଦାନି ପସାରୟନ୍ତୋ ।
କଥୀ ୱ ଧମ୍ମାସନତୋତରନ୍ତୋ,
ଜାତୋ ୟଥାଦିଚ୍ଚୱରୋ ନଭମ୍ହା ॥
ଖୀଣାସୱା ବ୍ରହ୍ମଗଣୋପଗନ୍ତ୍ୱା,
ସୁୱଣ୍ଣଜାଲେନ ପଟିଗ୍ଗହେସୁଂ ।
ତତୋ ଚ ଦେୱାଜିନଚମ୍ମକେନ,
ତତୋ ଦୁକୂଲେନ ଚ ତଂ ମନୁସ୍ସା ॥
ତେସଂ ପି ହତ୍ଥା ୱରଭୂମିୟଂ ଠିତୋ,
ଦିସା ୱିଲୋକେସି ସବ୍ବା ସମନ୍ତତୋ ।
ୱଦିଂସୁ ଦେୱା ପି ଚ ବ୍ରହ୍ମକାୟିକା,
ତୟା ସମୋ କତ୍ଥଚି ନତ୍ଥି ଉତ୍ତରୋ ॥
ଗନ୍ତ୍ୱାନ ଉତ୍ତରଂ ସତ୍ତ ପଦୱାରେହି ୱିକ୍କମୋ,
ସୀହନାଦଂ ନଦୀ ତେସଂ ଦେୱତାନଂ ହି ସାୱୟଂ ॥
ତତୋ ପୁତ୍ତଂ ଗହେତ୍ୱାନ ଗତା ମାତା ସକଙ୍ଘରଂ,
ମାତା ସତ୍ତମିୟଂ ଗନ୍ତ୍ୱା ଦେଅପୁତ୍ତତ୍ତମାଗମି ॥
ତେ ବ୍ରହ୍ମଣା ପଞ୍ଚମିୟଂ ସୁଭୁତ୍ତା,
ନାମଂ ଗହେତୁଂ ୱରଲକ୍ଖଣାନି ।
ଦିସ୍ୱାନ ଏକଙ୍ଗୁଲିମୁକ୍ଖିପିଂସୁ,
ବୁଦ୍ଧୋ ଅୟଂ ହେସ୍ସତି ୱୀତରାଗୋ ॥
ଜିଣ୍ଣଞ୍ଚ ଦିସ୍ୱା ବ୍ୟାଧିକଂ ମତଞ୍ଚ,
ଅୱ୍ହାୟିତଂ ପବ୍ବଜିତଞ୍ଚ ଦିସ୍ୱା ।
ଓହାୟ ପବ୍ବଜ୍ଜମୁପେତି କାମେ,
ବୁଦ୍ଧୋ ଅୟଂ ହେସ୍ସତି ୱୀତରାଗୋ ॥
ଅଗାରିୟସମ୍ପତ୍ତିଦୀପନୀଗାଥା
କାଲକ୍କମେନ ଚନ୍ଦୋ ୱ ୱଡ୍ଢନ୍ତୋ ୱଡ୍ଢିତେ କୁଲେ,
ପୁଞ୍ଞୋଦୟେନୁଦେନ୍ତୋ ସୋ ଭାଣୁମା ୱିୟ ଅମ୍ବରେ ॥
ସିଦ୍ଧଥକୋ ହି ସିଦ୍ଧତ୍ଥୋ ଲଦ୍ଧା ଦେୱିଂ ୟସୋଧରଂ,
ଚତ୍ତାଲୀସସହସ୍ସେହି ପୂରିତ୍ଥୀହି ପୁରକ୍ଖିତୋ ॥
ରମ୍ମସୁରମ୍ମସୁଭେସୁ ଘରେସୁ,
ତିଣ୍ଣମୁତୂନମନୁଚ୍ଛୱିକେସୁ ।
ଦିବ୍ବସୁଖଂ ୱିୟ ଭୁଞ୍ଜି ସୁଖଂ ସୋ,
ଅଚ୍ଛରିୟବ୍ଭୁତରାଜୱିଭୂତିଂ ॥
ନେକ୍ଖମ୍ମଜ୍ଝାସୟଦୀପନୀୟମକଗାଥା
॥ ନମୋ ତସ୍ସ ୟତୋ ମହିମତୋ ୟସ୍ସ ତମୋ ନ ॥
ଦିସ୍ୱା ନିମିତ୍ତାନି ମଦଚ୍ଛିଦାନି,
ଥୀନଂ ୱିରୂପାନି ରତଚ୍ଛିଦାନି ।
ପାପାନି କମ୍ମାନି ସୁଖଚ୍ଛିଦାନି,
ଲଦ୍ଧାନି ଞାଣାନି ଭୱଚ୍ଛିଦାନି ॥
ପଦିତ୍ତଗେହା ୱିୟ ଭେରୱଂ ରୱଂ,
ରୱଂ ସମ୍ମୁଟ୍ଠାୟ ଗତୋ ମହେସି ।
ମହେସିମୋଲୋକିୟପୁତ୍ତମତ୍ତନୋ,
ତନୋସି ନୋ ପେମମହୋଘମତ୍ତନୋ ॥
ଉମ୍ମାରଉମ୍ମାରଗତୁଦ୍ଧରିତ୍ୱା,
ପଦଂ ପଦଂ ୟାତନରାସଭସ୍ସ ।
ଅଲଂ ଅଲଂକାରତରେନ ଗନ୍ତୁଂ,
ମତୀ ମତୀୱେତିମନଙ୍ଗଭଙ୍ଗେ ॥
ଉମ୍ମାରଉମ୍ମାରଗତୋ ମହେସି,
ଅନଙ୍ଗଭଙ୍ଗଂ ସମଚିନ୍ତୟିତ୍ଥ ।
କିଂ ମେ ଜରାମଚ୍ଚୁମୁଖେ ଠିତସ୍ସ,
ନ ମେ ୱସେ କାମୱସେ ଠିତସ୍ସ ॥
କାମେନ କାମେନ ନ ସାଧ୍ୟମୋକ୍ଖଂ,
ମାନେନ ମାନେନ ମମତ୍ଥି କିଞ୍ଚି ।
ମାରୋ ସସେନୋ ହି ଅୱାରଣୀୟୋ,
ୟନ୍ତେନ ଉଚ୍ଛୁଂ ୱିୟ ମଦ୍ଦତୀ ମଂ ॥
ଆଦିତ୍ତମୁୟାତପୟାତମୂନଂ,
ଅତାଣାଲେଣାସରଣେ ଜନେ ତେ ।
ଦିସ୍ୱାନ ଦିସ୍ୱାନ ସିୱଂ ମୟା ତେ,
କାମେନ କାମେନ କଥଂ ୱିନେୟ୍ୟ ॥
ୱିଜ୍ଜାୱିଜ୍ଜାୟ ଚୁତଞ୍ଚୁପେତଂ,
ଅସାରସାରୂପଗତଞ୍ଜନଂ ଜନଂ ।
ୱିଜ୍ଜାୟୱିଜ୍ଜାୟ ୟୁତୋ ଚୁତୋହଂ,
ପହୋମି ତାରେତୁମସଙ୍ଗହୋ ଗତୋ ॥
ମଗ୍ଗନ୍ତି ନୋ ଦିଟ୍ଠିଗତାପୱଗ୍ଗଂ,
ଅଗ୍ଗା ତି ତେୱାହୁ ଜନା ସମଗ୍ଗା ।
ନଗ୍ଗଂ ଅହୋ ମୋହତମସ୍ସ ୱଗ୍ଗଂ,
ୱଗ୍ଗଂ ହନିସ୍ସାମି ତମଗ୍ଗମଗ୍ଗା ॥
ପସେୟ୍ହକାରେନ ଅସେୟ୍ହଦୁକ୍ଖଂ,
ଜନା ଜନେନ୍ତୀହ ଜନାନମେୱ ।
ପସେୟ୍ହକାରେନା ଅସେୟ୍ହଦୁକ୍ଖଂ,
ପାପଂ ନ ଜାନନ୍ତି ତତୋ ନିଦାନଂ ॥
ତେ ଓଘୟୋଗାସୱସଂକିଲେସା,
ତମେୱ ନାସେନ୍ତି ତତୋ ସମୁଟ୍ଠିତା ।
ଏକନ୍ତିକଂ ଜାତି ଜରା ଚ ମଚ୍ଚୁ,
ନିରନ୍ତରଂ ତଂ ବ୍ୟସନଞ୍ଚନେକଂ ॥
ଚୀରଂ କିଲେସାନସମୁଜ୍ଜଲନ୍ତଂ,
ଦିସ୍ୱାନ ସତ୍ତାନୁସୟଂ ସୟମ୍ଭୂ ।
ସାଧେମି ବୋଧିଂ ୱିନୟାମି ସତ୍ତେ,
ପଚ୍ଛାପି ପସ୍ସାମି ସୁତଂ ସୁତନ୍ତଂ ॥
ତଂ ଦିବ୍ବଚକ୍କଂ ଖୁରଚକ୍କମାଲଂ,
ରଜ୍ଜଂ ସସାରଜ୍ଜସମଜ୍ଜମଜ୍ଜଂ ।
ତେ ବନ୍ଧୱା ବନ୍ଧନମାଗତା ପରେ,
ସୁତୋ ପସୂତୋୟମନଙ୍ଗଦୂତୋ ॥
ସମୁଜ୍ଜଲନ୍ତଂ ୱସତୀ ସତୀସିରୀ,
ସିରୀସପାଗାରମିଦଂ ମହାୱିସଂ ।
ଦଦ୍ଦଲ୍ଲମାନା ୟୁୱତୀ ୱତୀମା,
ସକଣ୍ଟକାୟେୱ ସମଞ୍ଜସଞ୍ଜସେ ॥
ୟସ୍ସା ୱିରାଜିତସିରୀ ସିରିୟାପି ନତ୍ଥି,
ତସ୍ସାୱଲୋକିୟ ନ ତିତ୍ତିୱସାନମତ୍ଥି ।
ଗଚ୍ଛାମି ହନ୍ଦ ତୱନଙ୍ଗ ସିରପ୍ପଭେଦଂ,
ମତ୍ତେଭକୁମ୍ଭୁପରି ସୀହୱିଲାସଗାମିଂ ॥
ଭୋ ଭୋ ଅନଙ୍ଗସୁଚିର ପି ପନୁଣ୍ଣବାଣ,
ବାଣାନି ସଂହର ପନୁଣ୍ଣମିତୋ ନିରୋଧ ।
ରୋଧେନ ଚାପଦଗତୋ ମନସୋ ନ ସୋଚ,
ସୋଚଂ ତୱପ୍ପନୱଲୋକିୟ ୟାମି ସନ୍ତିଂ ॥
ରତୀ ରତୀ କାମଗୁଣେ ୱିୱେକେ,
ଅଲଂ ଅଲନ୍ତେୱ ୱିଚିନ୍ତୟନ୍ତୋ ।
ମନଂ ମନଙ୍ଗାଲୟସମ୍ପଦାଲୟଂ,
ତହିଂ ତହିଂ ଦିଟ୍ଠବାଲା ୱ ପକ୍କମି ॥
ପାଦୁଦ୍ଧାରୱିମ୍ହୟଦୀପନୀଗାଥା
ୟାୱଞ୍ଚୟଂ ରୱି ଚରତ୍ୟଚଲେନ ରୁଦ୍ଧେ,
ୟାୱଞ୍ଚ ଚକ୍କରତନଞ୍ଚ ପୟାତି ଲୋକେ ।
ତାୱିସ୍ସରୋ ନଭଚରୋ ଜିତଚାତୁରନ୍ତୋ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ଦୀପେ ମହା ଚ ଚତୁରାଧିକଦ୍ୱେସହସ୍ସେ,
ତତ୍ରାପି ସେଟ୍ଠଭଜିତଂ ୱରଜମ୍ବୁଦୀପଂ ।
ଭୂନାଭିକଂ କପିଲୱତ୍ଥୁପୁରଂ ସୁରମ୍ମଂ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ଞାତୀନସୀତି କୁଲତୋ ହି ସହସ୍ସ ସାକ୍ୟେ,
ହତ୍ଥିସ୍ସଧଞ୍ଞଧନିନୋ ୱିଜିତାରିସଙ୍ଘେ ।
ଗୋତ୍ତେନ ଗୋତମଭୱଂ ପିତରଞ୍ଜନଗ୍ଗଂ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ରମ୍ମଂ ସୁରମ୍ମୱସତିଂ ରତନୁଜ୍ଜଲନ୍ତଂ,
ଗିମ୍ହେପି ୱିମ୍ହୟକରଂ ସୁରମନ୍ଦିରାଭଂ ।
ଉସ୍ସାପିତଦ୍ଧଜପଟାକସିତାତପତ୍ତଂ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ସପୋକ୍ଖରା ପୋକ୍ଖରଣୀ ଚତସ୍ସୋ,
ସୁପୁପ୍ଫିତା ମନ୍ଦିରତୋ ସମନ୍ତା ।
କୋକା ନଦନ୍ତୂପରି କୋକନାଦେ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ସରେ ସରୋଜେ ରୁଦିତାଳିପାଳି,
ସମନ୍ତତୋ ପସ୍ସତି ପଞ୍ଜରଞ୍ଜସା ।
ଦିସ୍ୱାରୱିନ୍ଦାନି ମୁଖାରୱିନ୍ଦଂ
ନାଥସ୍ସ ଲଜ୍ଜା ୱିୟ ସଂକୁଜନ୍ତି ॥
ମଧୁରା ମଧୁରାଭିରୁତା,
ଚରିତା ପଦୁମେ ପଦୁମେଳିଗଣା ।
ୱସତିଂ ଅଧୁନା ମଧୁନା,
ଅକରୁଂ ଜହିତଂ କିମିଦଂ ପତିନା ॥
ତମ୍ହା ରସଂ ମଧୁକରା ଭୱନଂ ହରିତ୍ୱା,
ନିନ୍ନାଦିନୋ ସମଧୁରଂ ମଧୁରଂ କରୋନ୍ତି ।
ନାଦେନ ନାଦମତିରିଚ୍ଚୁପୱୀଣୟନ୍ତି,
ନଚ୍ଚନ୍ତି ତା ସୁରପୁରେ ୱଣିତା ୱ ତାୱ ॥
ସଞ୍ଚୋଦିତା ପୀଣପୟୋଧରାଧରା,
ୱିରାଜିତାନଙ୍ଗଜମେଖଲାଖଲା ।
ସୁରଙ୍ଗଣା ୱଙ୍ଗଜଫସ୍ସଦା ସଦା,
ରମା ରମାପେନ୍ତି ୱରଙ୍ଗଦାଗଦା ॥
କରାତିରତ୍ତା ରତିରତ୍ତରାମା,
ତାଳେନ୍ତି ତାଳାୱଚରେ ସମନ୍ତା ।
ନଚ୍ଚୁଗ୍ଗତାନେକସହସ୍ସହତ୍ଥା,
ସକ୍କୋପି କିଂ ସକ୍ୟସମୋତି ଚୋଦୟୁଂ ॥
ୱିସାଲନେତ୍ତା ହସୁଲା ସୁମଜ୍ଝା,
ନିମ୍ବତ୍ଥନୀ ୱିମ୍ହୟଗୀତସଦ୍ଦା ।
ଅଲଙ୍କତା ମଲ୍ଲଧରା ସୁୱତ୍ଥା,
ନଚ୍ଚନ୍ତି ତାଳାୱଚରେହି ଘୁଟ୍ଠା ॥
ୟାସଂ ହି ଲୋକେ ଉପମା ନତ୍ଥି,
ତାସଂ ହି ଫସ୍ସେସୁ କଥାୱକାସା ।
ତଂ ତାଦିସଂ କାମରତିଂନୁଭୋନ୍ତୋ,
ହିତ୍ୱା କଥଂ ନୁ ପଦମୁଦ୍ଧରି ସୋ ନିରାସୋ ॥
ପାଦେପାଦେ ୱଲୟୱିରୱାମେଖଲାୱୀଣାନାଦା,
ଗୀତଂଗୀତଂ ପତିରତିକରଂ ଗାୟତୀ ଗାୟତୀ ସା ।
ହତ୍ଥେହତ୍ଥେ ୱଲୟଚଲିତା ସମ୍ଭମଂ ସମ୍ଭମନ୍ତି,
ଦିସ୍ୱାଦିସ୍ୱା ଇତି ରତିକରଂ ୟାତି ହାହା କିମୀହା ॥
ଅପୁନରାୱତ୍ତିଗମନଦୀପନୀୟମକଗାଥା
ଅନନ୍ତକାଲୋପଚିତେନ ତେନ,
ପୁଞ୍ଞେନ ନିବ୍ବତ୍ତୱିମାନୟାନେ ।
ତସ୍ମିଂ ଦିନେ ଜାତସୁତଂ ପଜାପତିଂ,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ତଂ ଜୀୱମାନଂ ପିତରଞ୍ଚ ମାତରଂ,
ତେ ଞାତକେ ତାଦିସିୟୋ ଚ ଇତ୍ଥିୟୋ ।
ତେ ତାଦିସେ ରମ୍ମକରେ ନିକେତେ,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ଖୋମଞ୍ଚ ପତ୍ତୁଣ୍ଣଦୁକୂଲଚୀନଂ,
ସକାସିକଂ ସାଧୁସୁଗନ୍ଧୱାସିତଂ ।
ନିୱାସିତୋ ସୋଭତି ୱାସୱୋ ୱ,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ୱିଧିପ୍ପକାସା ନିଧିୟୋ ଚତସ୍ସୋ,
ସମୁଗ୍ଗତା ଭୂତଧରା ୱସୁନ୍ଧରା ।
ସତ୍ତାୱସତ୍ତାୱସୁଧା ସୁଧାସା,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ସୁୱଣ୍ଣଥାଲେ ସତରାଜିକେ ସୁଭେ,
ସାଧୁଂ ସୁଗନ୍ଧଂ ସୁଚିସାଲିଭୋଜନଂ ।
ଭୁତ୍ୱା ସୱାସୀହି ୱିଲାସିନୀହି,
ହିତ୍ୱା ଗତ ସୋ ସୁଗତୋ ଗତୋ ୱ ॥
ମନୁଞ୍ଞଗନ୍ଧେନ ଅସୁଞ୍ଞଗନ୍ଧୋ,
ସୁଗନ୍ଧଗନ୍ଧେନ ୱିଲିତ୍ତଗତ୍ତୋ ।
ସୁଗନ୍ଧୱାତେନ ସୁୱିଜ୍ଜିତଙ୍ଗୋ,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ସୁଲକ୍ଖଣେ ହେୱଭିଲକ୍ଖିତଙ୍ଗୋ,
ପସାଧିତୋ ଦେୱପସାଧନେନ ।
ୱିରୋଚମାନୋ ସମରାଜିନୀହି,
ହିତ୍ୱା ଗତୋ ସୋ ସୁଗତୋ ଗତୋ ୱ ॥
ନାନାସନାନି ସୟନାନି ନିୱେସନାନି,
ଭାଭାନିଭାନି ରତନାକରସନ୍ନିଭାନି ।
ତତ୍ରୁସ୍ସିତାନି ରତନଦ୍ଧଜଭୂସିତାନି,
ହିତ୍ୱା ୱ ତାନି ହିମବିନ୍ଦୁସମାନି ତାନି ॥
ନାନାୱିଧେହି ରତନେହି ସମୁଜ୍ଜଲେହି,
ନାରୀହି ନିଚ୍ଚମୁପଗାୟିତହମ୍ମିୟେହି ।
ରଜ୍ଜେହି ଚକ୍କରତନାଦିୱିଭୂସିତେହି,
ୟାତୋ ତତୋ ହି ମହିତୋ ପୁରିସସ୍ସରେହି ॥
ଦ୍ୱିପାଦବ୍ୟାସୟମକଗାଥା
ୟସୋଧରଂ ପୀଣପୟୋଧରାଧରଂ,
ଅନଙ୍ଗରଙ୍ଗଦ୍ଧଜଭୂତମଙ୍ଗଂ ।
ଦେୱଚ୍ଛରାୱୁଜ୍ଜଲିତଂ ପତିବ୍ବତଂ,
ହିତ୍ୱା ଗତୋ ସୋ ସୁଗତୋ ୱ ନୂନ ॥
ସଭାୱନିଚ୍ଛନ୍ଦମତିଂ ପଭାୱତିଂ,
ଭତ୍ତୋ କୁସୋ ସଂହରି ଭତ୍ତକାଜଂ ।
ତାୟାଭିରୂପଂ ପି ୟସୋଧରଂ ୱରଂ,
ହିତ୍ୱା ଗତୋ ସୋ ସୁଗତୋ ୱ ନୂନ ॥
ପୁରେ ପୁରେ ସଞ୍ଚରି ଖଗ୍ଗହତ୍ଥୋ,
ୱରଂ ପରିତ୍ଥୀନଂ ଅନିତ୍ଥିଗନ୍ଧୋ ।
ସିରିଞ୍ଚ ରିଞ୍ଚାପି ନ ରିଞ୍ଚି ନାରିଂ,
ହିତ୍ୱାନିମନ୍ଦାନି ଗତୋ ତଥାଗତୋ ॥
ହରିତ୍ତଚୋ ରାଗବଲେନ ଦେୱିୟା,
ଅୱତ୍ଥଲିଙ୍ଗେନ ନ ଲିଙ୍ଗନୁସ୍ସରି ।
ଅସେୱି କାମଂ ତମିଦାନି କାମଂ,
ହିତ୍ୱା ଗତୋ ସୋ ସୁଗତୋ ୱ ନୂନ ॥
ଅପମେୟ୍ୟକପ୍ପେସୁ ୱିୱେକସେୱୀ,
ହିତ୍ୱା ଗତୋ ରଜ୍ଜସିରିଂ ୱରିତ୍ଥିଂ ।
ଅଣୁଂ କଲିଂ ୱଣ୍ଣୟି ତଂ ପୁରାଣଂ,
ୱତ୍ଥମ୍ହି ଛିଦ୍ଦଂ ୱିୟ ତୁନ୍ନକାରୋ ॥
ତଥାତି ମନ୍ତ୍ୱାନ ଇଦାନିନଙ୍ଗୋ,
ୟସୋଧରଂ ପଗ୍ଗହିତୋ ଧଜଂ ୱ ।
ମତ୍ତୋ ଜିତୋମ୍ହୀ ତି ପମତ୍ତବନ୍ଧୁ,
ନ ପସ୍ସି ଞାଣାସନିପାତମନ୍ତରଂ ॥
ଦିସ୍ୱାନ ଦୁକ୍ଖାନଲସମ୍ଭୱଂଭୱଂ,
କତ୍ୱା ତଦୁପ୍ପାଦକନଙ୍ଗଭଙ୍ଗଂ ।
ୟସୋଧରଂ ପୀଣପୟୋଧରାଧରଂ,
ହିତ୍ୱା ଗତୋ ବୁଦ୍ଧବଲପ୍ପଦଂ ପଦଂ ॥
ଅନନ୍ତସତ୍ତାନମନନ୍ତକାଲେ,
ମନଙ୍ଗହେତ୍ୱାନ ଜିତୋ ଅନଙ୍ଗୋ ।
ପରାଜିତୋ ନୂନ ହି ଏକକସ୍ସ,
ତଥାଗତୋ ସୋ ନ ପୁନାଗତୋ ୱ ॥
ଦିସ୍ୱାନ ଞାଣାସନିପାତମନ୍ତରଂ,
ତଥାଗତୋ ସୋ ନ ପୁନାଗତୋ ୱ ।
ତଥାଗତୋ ସୋ ନ ପୁନାଗତୋ ୱ,
ଦିସ୍ୱାନଞାଣାସନିପାତମନ୍ତରଂ ॥
ତିପାଦବ୍ୟାସୟମକଗାଥା
ତଥାଗତଚ୍ଛେରମହୋସି ତସ୍ସ,
ତଥା ହିମାରୋପିତଦାହସନ୍ତିଂ ।
ତଥା ହି ମାରୋ ପି ତଦାହ ସନ୍ତିଂ,
ତଥା ହି ମାରୋପି ତଦା ହସନ୍ତିଂ ॥
ପାଦବ୍ୟାସମହାୟମକଗାଥା
ସକାମଦାତା ୱିନୟାମନତଗୂ,
ସକାମଦାତା ୱିନୟାମନନ୍ତଗୂ ।
ସକାମଦାତା ୱିନୟାମନନ୍ତଗୂ,
ସକାମଦାତା ୱିନୟାମନନ୍ତଗୂ ॥
ଅବ୍ୟାପେତାଦ୍ୟନ୍ତୟମକଗାଥା
ରୱେରୱେରୋରଭିମାରଭେରୱେ,
ରୱେରୱେରିୱ ଭେରୱେ ରୱେ ।
ରୱେ ରୱେ ସୂଦିତଗାରୱେ ରୱେ,
ରୱେରୱେଦେସି ଜିନୋରୱେ ରୱେ ॥
ପଟିଲୋମୟମକଗାଥା
ଲୋକାୟାତତୟା କାଲୋ ୱିସେସଂ ନ ନ ସଂସେୱି,
ୱିସେସଂ ନ ନ ସଂସେୱି ଲୋକା ୟାତତୟା କାଲୋ ॥
ରାଜରାଜୟସୋପେତୱିସେସଂ ରଚିତଂ ମୟା,
ୟାମତଂ ଚିରସଂସେୱିତପେସୋ ୟଜରାଜରା ॥
ଏକଠାନିକାଦିୟମକଗାଥା
ଆକଙ୍ଖକ୍ଖାକଙ୍ଖଙ୍ଗ କଙ୍ଖାଗଙ୍ଗାଖାଗହକ,
କଙ୍ଖାଗାହକକଙ୍ଖାଘ ହା ହା କଙ୍ଖା କହଂ କହଂ ॥
ଅପ୍ପଗବ୍ଭୋ ଅପଗବ୍ଭୋ ଅମୋହୋ ମା ପମୋହକୋ,
ମଗ୍ଗମୁଖଂ ମୋଖମାହ ମାହା ମୋହମୂହକ୍ଖମଂ ॥
ପାପାପାପଭୱଂ ପସ୍ସଂ ପାପାପଭୱୁଗ୍ଗତୋ,
ପାପାପାପଭୱାସଙ୍ଗା ପାପାପାପଭୱାଗତୋ ॥
କୁସଲାକୁସଲଂ ପସ୍ସଂ କୁସଲାକୁସଲଂ ଚଜି,
କୁସଲାକୁସଲାସଙ୍ଗ କୁସଲାକୁସଲା ଚୁତୋ ॥
ଅକ୍ଖରୁତ୍ତରିକୟମକଗାଥା
ନୋନାନିନୋ ନନୂନାନି ନନେନାନି ନନାନିନୋ,
ନୁନ୍ନାନେନାନି ନୂନ ନ ନାନନଂ ନାନନେନ ନୋ ॥
ସାରେ ସୁରାସୁରେ ସାରୀ ରସସାରସରିସ୍ସରୋ,
ରସସାରରସେ ସାରି ସୁରାସୁରସରସ୍ସିରେ ॥
ଦେୱାନଂ ନନ୍ଦନୋ ଦେୱୋ ଦେୱଦେୱ ନ ନନ୍ଦି ନୋ,
ୱେଦଦୀନେନ ୱେଦନ ୱେଦି ୱେଦନ ୱେଦିନୋ ॥
ଦେୱାସନେ ନିସିନ୍ନୋ ସୋ ଦେୱଦେୱୋ ସସାସନେ,
ନିସିନ୍ନାନଂ ସଦେୱାନଂ ଦେସେସି ଦସ୍ସନାସନଂ ॥
ପହେଳିଗାଥା
ଦସନାୱଗତୋ ସଞ୍ଞୋ ଅନ୍ଧସ୍ସ ତମଦୋ ରୱି,
ଅଟ୍ଠମାପୁଣ୍ଣସଙ୍କପ୍ପୋ ପାତ୍ୱନଞ୍ଞମନଞ୍ଞିୱ ॥
ବ୍ୟାପେତାଦିୟମକଗାଥା
ଏକନ୍ତମେୱ ସପରତ୍ଥପରୋ ମହେସି,
ଏକନ୍ତମେୱ ଦସପାରମିତାବଲେନ ।
ଏକନ୍ତମେୱ ହତମାରବଲେନ ତେନ,
ଏକନ୍ତମେୱ ସୁୱିସୁଦ୍ଧମଲତ୍ଥ ବୋଧିଂ ॥
ମହାପଧାନଦୀପନୀଗାଥା
ଓରୋହିତୋତୋହିତପାପଧମ୍ମୋ,
ଛନ୍ନେନ ସ ଛନ୍ନହୟେନ ଗନ୍ତ୍ୱା ।
ଅନୋମତୀରମ୍ହି ଅନୋମସତ୍ତୋ,
ଅନୋମପବ୍ବଜ୍ଜମୁପାଗତୋ ସୋ ॥
ନିରାମିସଂ ପୀତିସୁଖଂ ଅନୂପମଂ,
ଅନୂପିୟେ ଅମ୍ବୱନେ ଅଲତ୍ଥ ।
ସରୂପସୋଭାୟ ୱିରୂପସୋଭଂ,
ସରାଜିକଂ ରାଜଗହଂ କରିତ୍ଥ ॥
ତତୋ ଅଳାର ଊଦକତାପସାନଂ,
ଝାନେନସନ୍ତୁଟ୍ଠମନୋ ୱିହାୟ ।
ମହାପଧାନାୟ ଉରୁୱେଲଭୂମିଂ,
ଗତୋ ସିଖପ୍ପତ୍ତମକାସି ଦୁକ୍କରଂ ॥
ନ କାମତୋ ନେୱତିଦୁକ୍କରମ୍ହି,
ସବ୍ବଞ୍ଞୁତା ସିଜ୍ଝତି ମଜ୍ଝିମାୟ ।
ଞତ୍ୱାନ ତଂ ପୁବ୍ବଗୁଣୋପଲଦ୍ଧଂ,
ଧମ୍ମଂ ସମାନେତୁମଗା ସୁବୋଧିଂ ॥
ମାରପରାଜୟଦୀପନୀଗାଥା
ତିବୁଦ୍ଧଖେତ୍ତମ୍ହି ତିସେତଛତ୍ତଂ,
ଲଦ୍ଧାନ ଲୋକାଧିପତୀ ଭୱେୟ୍ୟ ।
ଗନ୍ତ୍ୱାନ ବୋଧିମ୍ହିପରାଜିତାସନେ,
ୟୁଦ୍ଧାୟ ମାରେନଚଲୋ ନିସୀଦି ॥
ଦତ୍ୱାନ ମଂସଂ ରଜ୍ଜଂ ପିତା ସୁଦ୍ଧୋଦନୋ ତଦା,
ନମସ୍ସମାନୋ ସିରସା ସେତଛତ୍ତେନ ପୂଜୟି ॥
ସୟଂ ନାରାୟନବଲୋ ଅଭିଞ୍ଞାବଲପାରଗୂ,
ଜେତୁଂ ସବ୍ବସ୍ସ ଲୋକସ୍ସ ବୋଧିମଣ୍ଡଂଉପାଗମି ॥
ତଦା ୱସୱତ୍ତୀରାଜା ଛକାମୱଚରିସ୍ସରୋ,
ସସେନାୱାହନୋ ବୋଧିମଣ୍ଡଂ ୟୁଦ୍ଧାୟୁପାଗମି ॥
ଏଥ ଗଣ୍ହଥ ବନ୍ଧଥ ଛଟ୍ଟେଥ ଚେଟକଂ ଇମଂ,
ମନୁସ୍ସକଲଲେ ଜାତୋ କିମିହନ୍ତି ନ ମଞ୍ଞତି ॥
ଜଲନ୍ତଂ ନୱୱିଧଂ ୱସ୍ସଂ ୱସ୍ସାପେତି ଅନପ୍ପକଂ,
ଧୂମନ୍ଧକାରଂ କତ୍ୱାନ ପାତେସି ଅସିନଂ ବହୁଂ ॥
ଚକ୍କାୱୁଧଂ ଖିପେନ୍ତୋ ପି ନାସକ୍ଖି କିଞ୍ଚି କାତୱେ,
ଗହେତବ୍ବଂ ହି ଗହଣଂ ଅପସ୍ସନ୍ତୋ ଇତିବ୍ରୱି ॥
ସିଦ୍ଧତ୍ଥ କସ୍ମା ଆସି ନୁ ଆସନେ ମମ ସନ୍ତକେ,
ଉଟ୍ଠେହି ଆସନା ନୋ ଚେ ଫାଲେମି ହଦୟଂ ତୱ ॥
ସପାଦମୂଲେ କୀଳନ୍ତଂ ପସ୍ସନ୍ତୋ ତରୁଣଂ ସୁତଂ,
ପିତା ୱୁଦିକ୍ଖି ତଂ ମାରଂ ମେତ୍ତାୟନ୍ତୋ ଦୟପରୋ ॥
ତଦା ସୋ ଅସମ୍ଭିୱାଚଂ ସୀହନାଦଂ ନଦୀ ମୁନି,
ନ ଜାନାତି ସୟଂ ମୟ୍ହଂ ଦାସଭାୱପିୟଂ ଖଳୋ ॥
ୟେନ କେନଚି କମ୍ମେନ ଜାତୋ ଦେୱପୁରେ ୱରେ,
ସକଂ ଗତିଂ ଅଜାନନ୍ତୋ ଲୋକଜେଟ୍ଠୋତି ମଞ୍ଞତି ॥
ଅନନ୍ତଲୋକଖାତୁମ୍ହି ସତ୍ତାନଂ ହି କତଂ ସୁଭଂ,
ମୟ୍ହେକପାରମିୟା ପି କଲଂ ନଗ୍ଘତି ସୋଳସିଂ ॥
ତିରଚ୍ଛାନୋ ସସୋ ହୁତ୍ୱା ଦିସ୍ୱା ୟାଚକମାଗତଂ,
ପଚିତ୍ୱାନ ସକଂ ମଂସଂ ପତିଇଓଗ୍ଗିମ୍ହି ଦାତୱେ ॥
ଏୱଂ ଅନନ୍ତକାଲେସୁ କତଂ ଦୁକ୍କରକାରିକଂ,
କୋ ହି ନାମ କରେୟ୍ୟଞ୍ଞୋ ଅନୁମ୍ମତ୍ତୋ ସଚେତନୋ ॥
ଏୱଂ ଅନନ୍ତପୁଞ୍ଞେହି ସିଦ୍ଧଂ ଦେହମିମଂ ପନ,
ୟଥାଭୁତଂ ଅଜାନନ୍ତୋ ମନୁସ୍ସୋସୀ ତି ମଞ୍ଞତି ॥
ନାହଂ ମନୁସ୍ସୋମନୁସ୍ସୋ ନ ବ୍ରହ୍ମା ନ ଚ ଦେୱତା,
ଜରାମରଣଂ ଲୋକସ୍ସ ଦସ୍ସେତୁଂ ପନିଧାଗତୋ ॥
ଅନୁପଲିତ୍ତୋ ଲୋକେନ ଜାତୋନନ୍ତଜିନୋ ଅହଂ,
ବୁଦ୍ଧୋ ବୋଧିତଲେ ହୁତ୍ୱା ତାରେମି ଜନତଂ ବହୁଂ ॥
ସମନ୍ତା ଧଜିନଂ ଦିସ୍ୱା ୟୁଦ୍ଧଂ ମାରଂ ସୱାହନଂ,
ୟୁଦ୍ଧାୟ ପଚ୍ଚୁଗଚ୍ଛାମି ମା ମଂ ଠାନା ଅଚାୱୟି ॥
ୟନ୍ତେ ତଂ ନପ୍ପସହତି ସେନଂ ଲୋକୋ ସଦେୱକୋ,
ତନ୍ତେ ପଞ୍ଞାୟ ଗଚ୍ଛାମି ଆମଂ ପତ୍ତଂ ୱ ଅସ୍ମନା ॥
ଇଚ୍ଛନ୍ତୋ ସାସପେ ଗବ୍ଭେ ଚଙ୍କମାମି ଇତୋ ଚିତୋ,
ଇଚ୍ଛନ୍ତୋ ଲୋକଧାତୁମ୍ହି ଅତ୍ତଭାୱେନ ଛାଦୟି ॥
ଏତେ ସବ୍ବେ ଗହେତ୍ୱାନ ଚୁଣ୍ଣେତୁଂ ଅଚ୍ଛରାୟପି,
ଅତ୍ଥି ଥାମଂ ବଲଂ ମୟ୍ହଂ ପାଣଘାତୋ ନ ୱଟ୍ଟତି ॥
ଇମସ୍ସ ଗଣ୍ଡୁପ୍ପାଦସ୍ସ ଆୟୁଧେନ ବଲେନ କିଂ,
ମୟ୍ହଂ ହି ତେନ ପାପେନ ସଲ୍ଲାପୋ ପି ନ ୟୁଜ୍ଜତି ॥
ପଲ୍ଲଙ୍କଂ ମମ ଭାୱାୟ କିମତ୍ଥଞ୍ଞେନ ସକ୍ଖିନା,
କମ୍ପିତା ମଦ୍ଦିୟା ଦାନା ସକ୍ଖି ହୋତି ଅୟଂ ମହୀ ॥
ଇତି ୱତ୍ୱା ଦକ୍ଖିଣଂ ବାହୁଂ ପଥୱିୟା ପଣମୟି,
ତଦା କମ୍ପିତ୍ଥ ପଥୱୀ ମହାଘୋସୋ ଅଜାୟଥ ॥
ପଥୱୀଘୋସେନ ଆକାସେ ଗଜ୍ଜନ୍ତୋ ଅସନି ଫଲି,
ତସ୍ମିଂ ମଜ୍ଝେ ଗତୋ ମାରୋ ସପରିସୋ ଭୟତଜ୍ଜିତୋ ॥
ମହାୱାତସମୁଦ୍ଧତଭସ୍ମଂ ୱ ୱିକିରିୟ୍ୟଥ,
ମହାଘୋସୋ ଅଜାୟିତ୍ଥ ସିଦ୍ଧତସ୍ସ ଜୟୋ ଇତି ॥
ଅଭିସମ୍ବୋଧିଦୀପନୀଗାଥା
ପୁରତୋ ଗଚ୍ଛତି ଚନ୍ଦୋ ରଜତଚକ୍କଂ ୱ ଅମ୍ବରେ,
ସହସ୍ସରଂସି ସୁରିୟୋ ପଚ୍ଛିମେନୁପଗଚ୍ଛତି ॥
ମଜ୍ଝେ ବୋଧିଦୁମଚ୍ଛତ୍ତେ ପଲ୍ଲଙ୍କେ ଅପ୍ପରାଜିତେ,
ପଲ୍ଲଙ୍କେନ ନିସୀଦିତ୍ୱା ଧମ୍ମଂ ସମ୍ମସତେ ମୁନି ॥
ସକ୍କୋ ତସ୍ମିଂ ଖଣେ ସଙ୍ଖଂ ଧମନ୍ତୋ ଅଭିଧାୱତି,
ବ୍ରହ୍ମା ତିୟୋଜନଂ ଛତ୍ତଂ ଧାରେତି ମୁନିମୁଦ୍ଧନି ॥
ମଣିତାଲୱଣ୍ଟଂ ତୁସୀତୋ ସୁୟାମୋ ୱାଳବୀଜନିଂ,
ନାନାମଙ୍ଗଲଭଣ୍ଡାନି ଗହିତୋ ସେସଦେୱତା ॥
ଏୱଂ ଦସସହସ୍ସମ୍ହି ସକ୍କୋ ବ୍ରହ୍ମା ଚ ଦେୱତା,
ସଙ୍ଖାଦୀନୀ ଧମନ୍ତା ଚ ଚକ୍କୱାଳମ୍ହି ପୂରୟୁଂ ॥
ମଙ୍ଗଲାନି ଗହେତ୍ୱାନ ତିଟ୍ଠନ୍ତି କାଚି ଦେୱତା,
ଧଜମାଲ ଗହେତ୍ୱାନ ତଥା ପୁଣ୍ଣଘଟାଦୟୋ ॥
ତତ୍ଥ ନଚ୍ଚନ୍ତି ଗାୟନ୍ତି ସେଳେନ୍ତି ୱାଦୟନ୍ତି ଚ,
ଦେୱା ଦସସହସ୍ସମ୍ହି ତୁଟ୍ଠହଟ୍ଠା ପମୋଦିତା ॥
ଧମ୍ମାମତରସସ୍ସାଦଂ ଲଭିସ୍ସାମସ୍ସ ସନ୍ତିକେ,
ନୟନାମତରସସ୍ସାଦଂ ପାଟିହାରିୟଞ୍ଚ ପସ୍ସିତୁଂ ॥
ଜାରମରଣକନ୍ତାରା ସୋକୋପାୟାସସଲ୍ଲତୋ,
ମୋଚେସି କାମପାସମ୍ହା ଦେସେନ୍ତୋ ଅମତଂ ପଦଂ ॥
ଇତି ତୁଟ୍ଠେହି ଦେୱେହି ପୂଜିୟନ୍ତୋ ନରାସଭୋ,
କିଞ୍ଚି ପୂଜଂ ଅଚିନ୍ତେନ୍ତୋ ଚିନ୍ତେନ୍ତୋ ଧମ୍ମମୁତ୍ତମଂ ॥
ସବ୍ବତ୍ଥସାଧିତୋ ସନ୍ତୋ ସିଦ୍ଧତ୍ଥୋ ଅପ୍ପରାଜିତୋ,
ଚକ୍କୱାଳସିଲାସାଣିପାକାରେହି ମନୋରମେ ॥
ତାରାମଣିଖଚିତାକାସୱିତାନେ ଚନ୍ଦଦୀପକେ,
ମାନାରତମପଜ୍ଜୋତେ ମାଲାଗନ୍ଧାଦିପୂଜିତେ ॥
ଦିବ୍ବେହି ଛଣଭେରୀହି ଘୁଟ୍ଠେ ମଙ୍ଗଲଗୀତିୟା,
ଚକ୍କୱାଳେ ସୁପ୍ପାସାଦେ ବୋଧିମଣ୍ଡମହାତଲେ ॥
ବୋଧିରୁକ୍ଖମଣିଚ୍ଛତ୍ତେ ପଲ୍ଲଙ୍କେ ଅପ୍ପରାଜିତେ,
ନିସ୍ସିନ୍ନୋ ପଠମେ ୟାମେ ପୁରିମଂ ଜାତିମନୁସ୍ସରି ॥
ନମରୂପାମନୁପ୍ପତ୍ତି ସୁଦିଟ୍ଠା ହୋତି ତେନିଧା,
ସକ୍କାତଦିଟ୍ଠି ତେନସ୍ସ ପହୀନା ହୋତି ସବ୍ବସୋ ॥
ତତୋ ହି ଦୁତିୟେ ୟାମେ ୟଥାୟମ୍ମୁପଗେ ସରି,
ସୁଦିଟ୍ଠଂ ହୋତି ତେନସ୍ସ କମ୍ମକ୍ଲେସେହି ସମ୍ଭୱଂ ॥
କଙ୍ଖାୱିତରଣୀ ନାମ ଞାଣନ୍ତଂ ସମୁପାଗତଂ,
ତେନସେସ ପହୀୟିତ୍ଥ କଙ୍ଖା ସୋଳସଧା ଠିତା ॥
ତତୋ ସୋ ତତିୟେ ୟାମେ ଦ୍ୱାଦସଙ୍ଗେ ଅସେସତୋ,
ସୋ ପଟିଚ୍ଚସମୁପ୍ପାଦେ ଞାଣମୋତାରୟୀ ମୁନି ॥
ଅୱିଜ୍ଜୱାଦ୍ୟାନୁଲୋମେନ ଜରାଦିପଟିଲୋମତୋ,
ସମ୍ମସନ୍ତୋ ୟଥାଭୂତଂ ଞାଣଦସ୍ସନମାଗମି ॥
କପ୍ପକୋଟିସତେନାପି ଅପ୍ପମେୟ୍ୟେସୁ ଜାତିସୁ,
ଲୋଭଂ ଅସେସଦାନେନ ୱିନାସେନ୍ତୋ ପୁନପ୍ପୁନଂ ॥
ସୀଲେନ ଖନ୍ତିମେତ୍ତାୟ କୋଖଦୋସଂ ନିୱାରେସି,
ପଞ୍ଞାୟ ମୋହଂ ଛେତ୍ୱାନ ମିଚ୍ଛାଦିଟ୍ଠି ତଥେୱ ଚ ॥
ଗରୂପସେୱନାଦୀହି ୱିଚିକିଚ୍ଛଂ ୱିନୋଦୟଂ,
ମାନୁଦ୍ଧଚ୍ଚଂ ୱିନୋଦେନ୍ତୋ କୁଲେ ଜେଟ୍ଠୋପଚାୟିନା ॥
ନେକ୍ଖମ୍ମେନ ୱିନାସେନ୍ତୋ କାମରାଗଂ ପୁନପ୍ପୁନଂ,
ସଚ୍ଚେନ ୱିସଂୱାଦଂ କୋସଜ୍ଜଂ ୱୀରିୟେନ ଚ ॥
ଏୱଂ ଦାନାଦିନା ତଂ ତଂ କିଲେସଙ୍ଗଂ ୱିନୋଦୟଂ,
ସୁୱଡ୍ଢିତା ମହାପଞ୍ଞା କଥଂ ସନ୍ତିଂ ନ ରୂହତି ॥
ସୁଦୁକ୍କରଂ କରିତ୍ୱାନ ଦାନାଦିପଚ୍ଚୟଂ ପୁରେ,
ନ କିଞ୍ଚି ଭୱସମ୍ପତ୍ତିଂ ପତ୍ଥେସି ବୋଧିମୁତ୍ତମଂ ॥
ପଣିଧାନମ୍ହା ପଟ୍ଠାୟ କତଂ ପୁଞ୍ଞଞ୍ଚ ପତ୍ଥନଂ,
ଏକ୍କତ୍ଥ ଦାନି ସମ୍ପତ୍ତିଂ ଦେତି ବୋଧିଂ ଅସଂସୟଂ ॥
ତତୋ ସୋ ସବ୍ବସଙ୍ଖାରେ ଅନିଚ୍ଚଦୁକ୍ଖନତ୍ତତୋ,
ସମ୍ମସନ୍ତୋନୁଲୋମେନ ନିବ୍ବାନଂ ସମୁପାଗମି ॥
ସୱାସନେ କିଲେସେ ସୋ ଝାପେନ୍ତୋନୁମତ୍ତଂ ପି ଚ,
ଅରହତ୍ତପ୍ପତ୍ତିୟା ସୁଦ୍ଧୋ ବୁଦ୍ଧୋ ବୋଧିତଲେ ଅହୁ ॥
ପତ୍ତୋ ୱିମେତ୍ତିଂ ୱରସେତଛତ୍ତଂ,
ସୋ ପୀତିୱେଗେନ ଉଦାନୁଦୀରୟି ।
ଛେତ୍ୱାନ ମାରେ ୱିଜିତାରିସଙ୍ଘୋ,
ତିବୁଦ୍ଧଖେତ୍ତେକଦିୱାକରୋ ଅହୁ ॥
ରାଜାଧିରାଜା ୱରମେୱମାସି,
ତିଛତ୍ତଧାରି ୱରଧମ୍ମରାଜା ।
ମହାସହସ୍ସଂ ପି ଚ ଲୋକଧାତୁଂ,
ସରେନ ୱିଞ୍ଞାପୟିତୁଂ ସମତ୍ଥୋ ॥
ବୁଦ୍ଧୋ ଲୋକାଲୋକେ ଲୋକେ,
ଜାତୋ ସତ୍ତୋ କୋନୁମ୍ମତ୍ତୋ ।
ସୁଦ୍ଧଂ ବୁଦ୍ଧଂ ଓଘା ତିଣ୍ଣଂ,
ସଦ୍ଧୋ ପଞ୍ଞୋ କୋ ନୋ ୱନ୍ଦେ ॥
ଭଜିତଂ ଚଜିତଂ ପୱନଂ ଭୱନଂ,
ଜହିତଂ ଗହିତଂ ସମଲଂ ଅମଲଂ ।
ସୁଗତଂ ଅଗତଂ ସୁଗତିଂ ଅଗତିଂ,
ନମିତଂ ଅମିତଂ ନମତିଂ ସୁମତିଂ ॥
ଧମ୍ମଚକ୍କପୱତ୍ତନଦୀପନୀଗାଥା
ସମ୍ମାସମ୍ବୋଧିଞାନଂ ହତସକଲମଲଂ ସୁଦ୍ଧତୋ ଚାତିସୁଦ୍ଧଂ,
ଅଦ୍ଧା ଲଦ୍ଧା ସୁଲଦ୍ଧଂ ୱତମିତି ସତତଂ ଚିନ୍ତୟନ୍ତୋ ସୁବୋଧିଂ ।
ସତ୍ତାହଂ ସତ୍ତମେୱଂ ୱିୱିଧଫଲସୁଖଂ ୱିତିନାମେସି କାଲଂ,
ବ୍ରହ୍ମେନାୟାଚିତୋ ସୋ ଇସିପତନୱନେ ୱତ୍ତୟୀ ଧମ୍ମଚକ୍କଂ ॥
ପାଟିହାରିୟଦୀପନୀଗାଥା
ବ୍ରହ୍ମସ୍ସ ସଦ୍ଦଂ କରୱୀକଭାଣିଂ,
ୟଥିଚ୍ଛିତଂ ସାୱୟିତୁଂ ସମତ୍ଥଂ ।
ସଚ୍ଚଂ ପିୟଂ ଭୂତହିତଂ ୱଦନ୍ତଂ,
ନ ପୂଜୟେ କୋ ହି ନରୋ ସଚେତନୋ ॥
ଇଦ୍ଧି ଚ ଆଦେସନାନୁସାସନୀ,
ପାଟିହୀରେ ଭଗୱା ୱସୀ ଅହୁ ।
କତ୍ୱାନ ଅଚ୍ଛେରସୁପାଟିହୀରଂ,
ଦେସେସି ଧମ୍ମଂ ଅନୁକମ୍ପିମଂ ପଜଂ ॥
ନୱଗୁଣଦୀପନୀଗାଥା
ଏୱଂ ହି ବୁଦ୍ଧତ୍ତମୁପାଗତୋ ସୋ,
ଦେସେସି ଧମ୍ମଂ ସନରାମରାନଂ ।
ନାନାନୟେହୀଭିସମେସି ସତ୍ତେ,
ତସ୍ମା ହି ଝାତୋ ତିଭୱେସୁ ନାଥୋ ॥
ଅଦ୍ଧା ଲଦ୍ଧା ଧମ୍ମାଲୋକଂ,
ଦିଟ୍ଠା ପତ୍ତା ଞାତା ସଚ୍ଚଂ ।
ତିଞ୍ଞାରାଗାଦୋସମୋହା,
ଥୋମେସୁଂ ତେ ଦେୱା ବ୍ରହ୍ମା ॥
ମୁନିରାଜୱରୋ ନରରାଜୱରୋ,
ଦିୱିଦେୱୱରୋ ସୁଚିବ୍ରହ୍ମୱରୋ ।
ସକପାପହରୋ ପରପାପହରୋ,
ସକୱୁଡ୍ଢିକରୋ ପରୱୁଡ୍ଢିକରୋ ॥
ସନରାମରୁବ୍ରହ୍ମଗଣେଭି ରୁତା,
ଅରହାଦିଗୁଣା ୱିପୁଲା ୱିମଲା ।
ନୱଧା ୱସୁଧାଗଗଣେ,
ସକଲେ ତିଦିୱେ ତିଭୱେ ୱିସଟା ॥
ୟେ ପିସ୍ସ ତେ ଭଗୱତୋ ଚ ଅଚିନ୍ତିୟାଦୀ,
ସୁଦ୍ଧାତିସୁଦ୍ଧତରବୁଦ୍ଧଗୁଣା ହି ସବ୍ବେ ।
ସଙ୍ଖେପତୋ ନୱୱିଧେସୁ ପଦେସୁ ଖିତ୍ତା,
ୱକ୍ଖାମି ଦାନି ଅରହାଦିଗୁଣେ ଅହଂ ପି ॥
ୟୋ ଚୀଧ ଜାତୋ ଅରହଂ ନିରାସୋ,
ସମ୍ମାଭିସମ୍ବୁଦ୍ଧସମନ୍ତଚକ୍ଖୁ ।
ସମ୍ପନ୍ନୱିଜ୍ଜାଚରଣୋଘତିଣ୍ଣୋ,
ସମ୍ମାଗତୋ ସୋ ସୁଗତୋ ଗତୋ ୱ ॥
ଅୱେଦି ସୋ ଲୋକମିମଂ ପରଞ୍ଚ,
ଅମୁତ୍ତରୋ ସାରଥିଦମ୍ମସତ୍ତେ ।
ସଦେୱକାନଂ ୱରସତ୍ଥୁକିଚ୍ଚଂ,
ଅକାସି ବୁଦ୍ଧୋ ଭଗୱା ୱିସୁଦ୍ଧୋ ॥
ଗୁଣଦୀପନୀଗାଥା
ନ ତସ୍ସ ଅଦିଟ୍ଠନମିଧତ୍ଥି କିଞ୍ଚି,
ଅତୋ ଅୱିଞ୍ଞାତମଜାନିତବ୍ବଂ ।
ସବ୍ବଂ ଅଭିଞ୍ଞାସି ୟଦତ୍ଥି ଞେୟ୍ୟଂ,
ତଥାଗତୋ ତେନ ସମନ୍ତଚକ୍ଖୁ ॥
ଇତି ମହିତମନନ୍ତାକିତ୍ତିସମ୍ଭାରସାରଂ,
ସକଲଦସସହସ୍ସୀଲୋକଧାତୁମ୍ହି ନିଚ୍ଚଂ ।
ଉପଚିତସୁଭହେତୁପୟୁତାନନ୍ତକାଲଂ,
ତଦିହ ସୁଗତବୋଧିସାଧୁକଂ ଚିନ୍ତନୀୟଂ ।
ତକ୍କବ୍ୟାକରଣଞ୍ଚ ଧମ୍ମୱିନୟଂ ସୁତ୍ୱା ପି ୟୋ ପଞ୍ଞୱା,
ତେନାୟଂ ସୁଚିସାରଭୂତୱଚନଂ ୱିଞ୍ଞାୟତେ କେୱଲଂ ।
ହେତୁଞ୍ଚାପି ଫଲେନ ତେନ ସଫଲଂ ସମ୍ପସ୍ସମାନୋ ତତୋ ବୋଧିଂ ସଦ୍ଦହତେୱ ତସ୍ସ ମହତାୱାୟମତୋ ସମ୍ଭୱଂ ॥
ୟୋ ସଦ୍ଦହନ୍ତୋ ପନ ତସ୍ସ ବୋଧିଂ,
ୱୁତ୍ତାନୁସାରେନ ଗୁଣେରହାଦୀ ।
କଥେତି ଚିନ୍ତେନ୍ତି ଚ ସୋ ମୁହୁତ୍ତଂ,
ଓହାୟ ପାପାନି ଉପେତି ସନ୍ତିଂ ॥
ସଦ୍ଧେୟ୍ୟା ତେ ଚିନ୍ତେୟ୍ୟା ତେ,
ୱନ୍ଦେୟ୍ୟା ତେ ପୂଜେୟ୍ୟାତେ ।
ବୁଦ୍ଧୋଲୋକାଲୋକେ ଲୋକେ,
ଜାତେ ନେତଂ ପତ୍ଥେନ୍ତେନ ॥
ପୂଜାନିଧାନଦୀପନୀଗାଥା
ତସମା ହି ଜାତୋୱରକମ୍ହି ତସ୍ସ,
ଆୟତ୍ତକେ ମଙ୍ଗଲଚକ୍କୱାଳେ ।
ଭୂତେହି ୱତ୍ଥୂହି ମନୋରମେହି,
ପୂଜେମି ତଂ ପୂଜିତ୍ପୂଜିତଂ ପୁରେ ॥
ସୋହଂ ଅଜ୍ଜ ପନେତସ୍ମିଂ ଚକ୍କୱାଳମ୍ହି ପୁପ୍ଫିତେ,
ଥଲଜେ ଜଲଜେ ୱାପି ସୁଗନ୍ଧେ ଚ ଅଗନ୍ଧକେ ॥
ମନୁସ୍ସେସୁ ଅନେକତ୍ଥ ତଳାକୁୟ୍ୟାନୱାପିସୁ,
ପୱନେ ହିମୱନ୍ତସ୍ମିଂ ତତ୍ଥ ସତ୍ତ ମହାସରେ ॥
ପରିତ୍ତଦୀପେ ଦ୍ୱିସହସ୍ସେ ମହାଦୀପେ ସୁପୁପ୍ଫିତେ,
ସତ୍ତପରିଭଣ୍ଡସେଲେସୁ ସିନେରୁପବ୍ବତୁତ୍ତମେ ॥
କୁମୁଦୁପ୍ପଲକାଦୀନି ନାଗାନଂ ଭୱନେସୁପି,
ପାଟଲାଦୀନି ପୁପ୍ଫାନି ଅସୁରାନଂ ହି ଆଲୟେ ॥
କୋୱିଳାରାଦିକାନି ତୁ ଦେୱତାନଂ ହି ଆଲୟେ,
ଏୱମାଦୀ ଅନେକତ୍ଥ ପୁପ୍ଫିତେ ଧରଣୀରୁହେ ॥
ଚମ୍ପକା ସଲଲା ନିମ୍ବା ନାଗପୁନ୍ନାଗକେତକା,
ୱସ୍ସିକା ମଲ୍ଲିକା ସାଲା କୋୱିଳାରା ଚ ପାଟଲି ॥
ଇନ୍ଦୀୱରା ଅସୋକା ଚ କଣିକାରା ଚ ମକୁଲା,
ପଦୁମା ପୁଣ୍ଡରିକା ଚ ସୋଗନ୍ଧିକୁମୁଦୁପ୍ପଲା ॥
ଏତେ ଚଞ୍ଞେ ଚ ରୁକ୍ଖା ଚ ୱଲ୍ଲିୟୋ ଚାପି ପୁପ୍ଫିତା,
ସୁଗନ୍ଧା ସୁଖସମ୍ଫସ୍ସା ନାନାୱଣ୍ଣନିଭା ସୁଭା ॥
ୱିଚିତ୍ରା ନୀଲାନେକାନି ପୀତା ଲୋହିତକାନି ଚ,
କାଳା ସେତା ଚ ମଞ୍ଜଟ୍ଠ ନେକୱଣ୍ଣା ସୁପୁପ୍ଫିତା ॥
ସୋଭତେ ପବ୍ବତେ ହେଟ୍ଠା ସରେହି ୱନରାଜିହି,
ସନ୍ଦମାନାହି ଗଙ୍ଗାହି ହିମୱା ରତନାକରୋ ॥
ପତ୍ତକିଞ୍ଜକ୍ଖରେଣୂହି ଓକିଣ୍ଣଂ ହୋତି ତଂ ୱନଂ,
ଭମରା ପୁପ୍ଫଗନ୍ଧେହି ସମନ୍ତା ଅଭିନାଦିତା ॥
ଅଥେତ୍ତ ସକୁଣା ସନ୍ତି ଦିଜା ମଞ୍ଜୁସ୍ସରା ସୁଭା,
କୂଜନ୍ତମୁପକୂଜନ୍ତି ଉତୁସମ୍ପୁପ୍ଫିତେ ଦୁମେ ॥
ନିଚ୍ଛରାନଂ ନିପାତେନ ପବ୍ବତା ଅଭିନାଦିତା,
ପଞ୍ଚଙ୍ଗିକାନି ତୂରିୟାନି ଦିବ୍ବାନି ୱିୟ ସୁୟ୍ୟରେ ॥
ତତ୍ଥ ନଚ୍ଚନ୍ତି ତସ୍ମିଂ ଜଲନ୍ତଗ୍ଗିସିଖୂପମା,
ତସ୍ମିଂ ହି କିନ୍ନରା କିଚ୍ଚଂ ପଦୀପେନ କରୀୟତି ॥
ମୁତ୍ତାଜାଲାୱ ଦିସ୍ସନ୍ତି ନିଚ୍ଛରାନଂ ହି ପାତକା,
ପଜ୍ଜଲନ୍ତା ୱ ତିଟ୍ଠନ୍ତି ମଣିୱେଳୁରିୟାଦୟୋ ॥
କାଳାନୁସାରି ତଗ୍ଗରଂ କପ୍ପୂରଂ ହରିଚନ୍ଦନଂ,
ସକୁଣାନଂ ହି ସଦ୍ଦେନ ମୟୂରାନଂ ହି କେକୟା ॥
ଭମରାନଂ ହି ନିନ୍ନାଦା କୋଞ୍ଚନାଦେନ ହତ୍ଥିନଂ,
ୱିଜମ୍ଭିତେନ ୱାଳାନଂ କିନ୍ନରାନଂ ହି ଗୀତିୟା ।
ପବ୍ବତାନଂ ହି ଓଭାସା ମଣୀନଂ ଜୋତିୟାପି ଚ,
ୱିଚିତ୍ରବ୍ଭୱିତାନେହି ଦୁମାନଂ ପୁପ୍ଫଧୂପିୟା ।
ଏୱଂ ସବ୍ବଙ୍ଗସମ୍ପନ୍ନଂ କିଂ ସିୟା ନନ୍ଦନଂ ୱନଂ ॥
ଏୱଂ ସୁସମ୍ଫୁଲ୍ଲୱନଂ ହି ୟଂ ୟଂ,
ତହିଂ ତହିଂ ପୁପ୍ଫିତପୁପ୍ଫିତଂ ସୁଭଂ ।
ମାଲଂ ସୁସଦ୍ଦଞ୍ଚ ମନୁଞ୍ଞଗନ୍ଧଂ,
ପୂଜେମି ତଂ ପୂଜିତପୂଜିତଂ ପୁରା ॥
ନାଗଲୋକେ ମନୁସ୍ସେ ଚ ଦେୱେ ବ୍ରହ୍ମେ ଚ ୟଂ ସିୟା,
ସାମୁଦ୍ଦିକଂ ଭୂମିଗତଂ ଆକାସଟ୍ଠଞ୍ଚ ୟଂ ଧମଂ ॥
ରଜତଂ ଜାତରୂପଞ୍ଚ ମୁତ୍ତା ୱେଳୁରିୟା ମଣି,
ମସାରଗଲ୍ଲଂ ଫଲିକଂ ଲୋହିତଙ୍ଗଂ ପୱାଳକଂ ॥
ୟୋ ସୋ ଅନନ୍ତକପ୍ପେସୁ ପୂରେତ୍ୱା ଦସପାରମୀ,
ବୁଦ୍ଧୋ ବୋଧେସି ସତ୍ତାନଂ ତସ୍ସ ପୂଜେମି ତଂ ଧନଂ ॥
ଖୋମଂ କୋସେୟ୍ୟଂ କପ୍ପାସଂ ସାଣଂ ଭଙ୍ଗଞ୍ଚ କମ୍ବଲଂ,
ଦୁକୂଲାନି ଚ ଦିବ୍ବାନି ଦୁସ୍ସାନି ୱିୱିଧାନି ତେ ॥
ଅନନ୍ତୱତ୍ଥଦାନେନ ହିରୋତ୍ତପ୍ପାଦିସଂୱରଂ,
ୟସ୍ସ ସିଦ୍ଧଂ ସିୟା ତସ୍ସ ଦୁସ୍ସାନି ପୁଜୟାମହଂ ॥
ପୱନେ ଜାତରୁକ୍ଖାନଂ ନାନାଫଲରସୁତ୍ତମଂ,
ଅମ୍ବା କପିଟ୍ଠା ପନ୍ସା ଚୋଚମୋଚାଦିନପ୍ପକା ॥
ତସ୍ମିଂ ଗନ୍ଧରସଂ ଓଜଂ ବୁଦ୍ଧସେଟ୍ଠସ୍ସ ପୂଜିତଂ,
ୱନ୍ଦାମି ସିରସା ନିଚ୍ଚଂ ୱିପ୍ପସନ୍ନେନ ଚେତସା ॥
ପୂଜେମି ପଠମଂ ତସ୍ସ ପଣିଧାନଂ ଅଚିନ୍ତିୟଂ,
ଚକ୍କୱାଳମ୍ହି ସବ୍ବେହି ୱିଜ୍ଜମାନେହି ୱତ୍ଥୁହି ॥
ଦସନ୍ନଂ ପାରମୀନନ୍ତୁ ପୂରିତଟ୍ଠାନମୁତ୍ତମଂ,
ତତୋ ସାଲୱନେ ରମ୍ମେ ଜାତଟ୍ଠାନଂ ଚରିମକଂ ॥
ଛବ୍ବସାନି ପଧାନସ୍ମିଂ କରଣଂ ଦୁକ୍କରକାରିକଂ,
ଅପ୍ପରାଜିତପଲ୍ଲଙ୍କଂ ବୁଦ୍ଧଂ ବୁଦ୍ଧଗୁଣଂ ନମେ ॥
ଚୁଦ୍ଦସ ବୁଦ୍ଧଞାଣାନି ଅଟ୍ଠର୍ସ ଆୱେଣିକଂ,
ପୂଜେମି ଦସବଲଞାଣଂ ଚତୁୱେସାରଜ୍ଜମୁତ୍ତମଂ ॥
ଆସୟାନୁସୟଞାଣଂ ଇନ୍ଦ୍ରିୟାନଂ ପରୋପରଂ,
ୟମକପାଟିହୀରଞ୍ଚ ଞାଣଂ ସବ୍ବଞ୍ଞୁତଂ ପି ଚ ॥
ମହାକରୁଣାପତ୍ତିଞାଣଂ ଅନାୱରଣ୍ମିତି ଚ,
ଛ ଅସାଧାରଣାନେତେ ଞତ୍ୱାନ ପୂଜୟାମହଂ ॥
ତତୋ ଚ ସତ୍ତସତ୍ତାହେ ଧମ୍ମସମ୍ମସିତଂ ନମେ,
ବ୍ରହ୍ମୁନା ୟାଚିତଟ୍ଠାନଂ ଧମ୍ମଂ ଦେସୟିତୁଂ ୱରଂ ॥
ଇସିପତନେ ମିଗଦାୟେ ଧମ୍ମଚକ୍କପୱତ୍ତନଂ,
ତତୋ ୱେଳୁୱନାରାମେ ୱସିତଠାନଞ୍ଚ ପୂଜୟେ ॥
ତତୋ ଜେତୱନଂ ରମ୍ମଂ ଚିରୱୁତ୍ଥଂ ମହେସିନା,
ଅସାଧାରଣମଞ୍ଞେସଂ ୟମକପାଟିହରିୟଂ ॥
ପାରିଚ୍ଛତ୍ତକମୂଲମ୍ହି ଅଭିଧମ୍ମଞ୍ଚ ଦେସନଂ,
ସଙ୍କସ୍ସନଗରଦ୍ୱାରେ ଦେୱୋରୋହଣକଂ ପି ଚ ॥
ତତୋ ଚ ହିମୱନ୍ତସ୍ମିଂ ମହାସମୟଦେସନଂ,
ୱୁତ୍ତାନେତାନି ଠାନାନି ନତ୍ୱାନ ପୁଜୟାମହଂ ॥
ଚତୁରାସୀତିସହସ୍ସେହି ଧମ୍ମକ୍ଖନ୍ଧେହି ସଙ୍ଗହଂ,
ପିଟକତ୍ତୟଂ ୟଥାୱୁତ୍ତୱିଧିନା ପୂଜୟାମହଂ ॥
ମାରସ୍ସ ଅତ୍ତନୋ ଆୟୁସଙ୍ଖାରୋସଜ୍ଜନଂ ନମେ,
କୁସିନାରାୟ ମଲ୍ଲାନଂ ୟମକସାଲମନ୍ତରେ ॥
ପଣିଧାନମ୍ହି ପଟ୍ଠାୟ କତଂ କିଚ୍ଚଂ ଅସେସତୋ,
ନିଟ୍ଠପେତ୍ୱାନ ସୋ ସବ୍ବଂ ପରିନିବ୍ବାୟିନାସୱୋ ॥
ଏୱଂ ନିବ୍ବାୟମାନସ୍ସ କତକିଚ୍ଚସ୍ସ ତାଦିନୋ,
ଚିରଗତା ମହାକରୁଣା ନ ନିବ୍ବାୟିତ୍ଥ କିଞ୍ଚିପି ॥
ସ୍ୱାୟଂ ଧମ୍ମୋ ୱିନୟୋ ଚ ଦେସିତୋ ସାଧୁକଂ ମୟା,
ମମଚ୍ଚୟେନ ସୋ ସତ୍ଥା ଧାତୁ ଚାପି ସରୀରଜା ॥
ଅପ୍ପରାଜିତପଲ୍ଲଙ୍କଂ ବୋଧିରୁକ୍ଖଞ୍ଚ ଉତ୍ତମଂ,
ମମଚ୍ଚୟେନ ସତ୍ଥା ତି ଅନୁଜାନି ମହାମୁନି ॥
ମମ ଠନେ ଠପେତ୍ୱାନ ଧାତୁବୋଧିଞ୍ଚ ପୂଜିତଂ,
ଅନୁଜାନାମି ତୁମ୍ହାକଂ ସାଧନତ୍ଥଂ ସିୱଞ୍ଜସଂ ॥
ତସ୍ମା ହି ତସ୍ସ ସଦ୍ଧମ୍ମଂ ଉଗ୍ଗଣ୍ହିତ୍ୱା ୟଥାତଥଂ,
ୟୋ ଦେସେତି ସମ୍ବୁଦ୍ଧୋ ତି ନତ୍ୱାନ ପୂଜୟାମହଂ ॥
ତସ୍ମା ସାସପମତ୍ତଂ ପି ଜିନଧାତୁଂ ଅସେସିୟ,
ୱିତ୍ଥିନ୍ନଚକ୍କୱାଳମ୍ହି ନତ୍ୱାନ ପୂଜୟାମହଂ ॥
ପରମ୍ପରାଭତାନଂ ହି ଇମମ୍ହା ବୋଦ୍ଧିରୁକ୍ଖତୋ,
ସବ୍ବେସଂ ବୋଧିରୁକ୍ଖାନଂ ନତ୍ୱାନ ପୂଜୟାମହଂ ॥
ୟଂ ୟଂ ପରିଭୁଞ୍ଜି ଭଗୱା ପତ୍ତଚୀୱରମାଦିକଂ,
ସବ୍ବଂ ପରିଭୋଗଧାତୁଂ ନତ୍ୱାନ ପୂଜୟାମହଂ ॥
ୟତ୍ଥ କତ୍ଥଚି ସୟିତୋ ଆସିନ୍ନୋ ଚଙ୍କମେପି ୱା,
ପାଦଲଞ୍ଛନ୍କଂ କତ୍ୱା ଠିତୋ ନତ୍ୱାନ ପୂଜୟେ ॥
ନ ସଞ୍ଜାନନ୍ତି ୟେ ବୁଦ୍ଧଂ ଏୱରୂପୋ ତି ଞାତ୍ୱେ,
କତଂ ତଂ ପଟିମଂ ସବ୍ବଂ ନତ୍ୱାନ ପୂଜୟାମହଂ ॥
ଏୱଂ ବୁଦ୍ଧଞ୍ଚ ଧମ୍ମଞ୍ଚ ସଙ୍ଘଞ୍ଚ ଅନୁତ୍ତରଂ,
ଚକ୍କୱାଳମ୍ହି ସବ୍ବେହି ୱତ୍ଥୂହି ପୂଜୟାମହଂ ॥
ପତ୍ଥନାଦୀପନୀଗାଥା
ଅସ୍ମିଂ ଚ ପୁବ୍ବେପି ଚ ଅତ୍ତଭାୱେ,
ସବ୍ବେହି ପୁଞ୍ଞେହି ମୟା କତେହି ।
ପୂଜାୱିଧାନେହି ଚ ସଞ୍ଞମେହି,
ଭୱେ ଭୱେ ପେମନିୟୋ ଭୱେୟ୍ୟଂ ॥
ସଦ୍ଧା ହିରୋତ୍ତପ୍ପବହୁସ୍ସୁତତ୍ତଂ,
ପରକ୍କମୋ ଚେୱ ସତିସ୍ସମାଧି ।
ନିବ୍ବେଧଭାଗୀ ୱଜିରୂପମାତି,
ପଞ୍ଞା ଚ ମେ ସିଜ୍ଝତୁ ୟାୱ ବୋଧିଂ ॥
ରାଗଞ୍ଚ ଦୋସଞ୍ଚ ପହାୟ ମୋହଂ,
ଦିଟ୍ଠିଞ୍ଚ ମାନଂ ୱିଚିକିଚ୍ଛିତଞ୍ଚ ।
ମଚ୍ଛେରେଇସ୍ସାମଲୱିପ୍ପହୀନୋ,
ଅନୁଦ୍ଧତୋ ଅଚ୍ଚପଲୋ ଭୱେୟ୍ୟଂ ॥
ଭୱେୟ୍ୟହଂ କେନଚି ନପ୍ପସେୟ୍ହୋ,
ଭୋଗୋ ଚ ଦିନ୍ନେହି ପଟେହି ।
ଭୋଗୋ ଚ କାୟୋ ଚ ମମେସ ଲଦ୍ଧୋ,
ପରୂପକାରାୟ ଭୱେୟ୍ୟଂ ନୂନ ॥
ଧମ୍ମେନା ମାଲାପିତରୋ ଭରେୟ୍ୟଂ,
ୱୁଡ୍ଢପଚାୟୀ ଚ ବହୂପକାରୀ ।
ଞାତୀସୁ ମିତ୍ତେସୁ ସପତ୍ତକେସୁ,
ୱୁଡ୍ଢିଂ କରେୟ୍ୟଂ ହିତମତ୍ତନୋ ଚ ॥
ମେତ୍ତେୟ୍ୟନାଥଂ ଉପସଙ୍କମିତ୍ୱା,
ତସ୍ସତ୍ତଭାୱଂ ଅଭିପୂଜୟିତ୍ୱା ।
ଲଦ୍ଧାନ ୱେୟ୍ୟାକରଣଂ ଅନୂନଂ,
ବୁଦ୍ଧୋ ଅୟଂ ହେସ୍ସତିନାଗତେସୁ ॥
ଲୋକେନ କେନାପି ଅନୁପଲିତ୍ତୋ,
ଦାନେ ରତୋ ସୀଲଗୁଣେ ସୁସାଣ୍ଠିତୋ ।
ନେକ୍ଖମ୍ମଭାଗି ୱରଞାଣଲାଭୀ,
ଭୱେୟ୍ୟହଂ ଥାମବଲୁପପନ୍ନୋ ॥
ସୀସଂ ସମଂସମଂ ମମ ହତ୍ଥପାଦେ,
ସଂଛିନଦମାନେପି କରେୟ୍ୟଖନ୍ତିଂ ।
ସଚ୍ଚେ ଠିତୋ କାଲୁମଧିଟ୍ଠିତେ ୱ,
ମେତ୍ତାୟୁପେକ୍ଖାୟ ୟୁତୋ ଭୱେୟ୍ୟଂ ॥
ମହାପରିଚ୍ଚାଗଂ କତ୍ୱା ପଞ୍ଚ,
ସମ୍ବୋଧିମଗ୍ଗଂ ଅୱିରାଧୟନ୍ତୋ ।
ଛେତ୍ୱା କିଲେସେ ଚିତପଞ୍ଚମାରୋ,
ବୁଦ୍ଧୋ ଭୱିସ୍ସାମି ଅନାଗତେସୁ ॥