ଜାତକପାଳି
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ ॥
ଖୁଦ୍ଦକନିକାୟେ
ଜାତକପାଳି
(ପଠମୋ ଭାଗୋ)
୧. ଏକକନିପାତୋ
୧. ଅପଣ୍ଣକୱଗ୍ଗୋ
୧. ଅପଣ୍ଣକଜାତକଂ
ଅପଣ୍ଣକଂ ଠାନମେକେ, ଦୁତିୟଂ ଆହୁ ତକ୍କିକା ।
ଏତଦଞ୍ଞାୟ ମେଧାୱୀ, ତଂ ଗଣ୍ହେ ୟଦପଣ୍ଣକନ୍ତି [ତଂ ଗଣ୍ହେୟ୍ୟ ଅପଣ୍ଣକଂ (କ॰)]॥
ଅପଣ୍ଣକଜାତକଂ ପଠମଂ ।
୨. ୱଣ୍ଣୁପଥଜାତକଂ
ଅକିଲାସୁନୋ ୱଣ୍ଣୁପଥେ [ୱଣ୍ଣପଥେ (କ॰)] ଖଣନ୍ତା, ଉଦଙ୍ଗଣେ ତତ୍ଥ ପପଂ ଅୱିନ୍ଦୁଂ ।
ଏୱଂ ମୁନୀ ୱୀରିୟ [ମୁନି ୱିରିୟ (ପୀ॰), ମୁନି ୱୀରିୟ (ସ୍ୟା॰ କ॰)] ବଲୂପପନ୍ନୋ, ଅକିଲାସୁ ୱିନ୍ଦେ ହଦୟସ୍ସ ସନ୍ତିନ୍ତି ॥
ୱଣ୍ଣୁପଥଜାତକଂ ଦୁତିୟଂ ।
୩. ସେରିୱୱାଣିଜଜାତକଂ
ଇଧ ଚେ ନଂ [ଇଧ ଚେ ହି ନଂ (ସୀ॰ ପୀ॰)] ୱିରାଧେସି, ସଦ୍ଧମ୍ମସ୍ସ ନିୟାମତଂ [ନିୟାମକଂ (ସ୍ୟା॰ କ॰)]।
ଚିରଂ ତ୍ୱଂ ଅନୁତପ୍ପେସି [ଅନୁତପେସ୍ସସି (ସୀ॰ ପୀ॰), ଅନୁତପ୍ପିସ୍ସସି ( ?)], ସେରିୱାୟଂୱ ୱାଣିଜୋତି ॥
ସେରିୱୱାଣିଜଜାତକଂ ତତିୟଂ ।
୪. ଚୂଳସେଟ୍ଠିଜାତକଂ
ଅପ୍ପକେନପି ମେଧାୱୀ, ପାଭତେନ ୱିଚକ୍ଖଣୋ ।
ସମୁଟ୍ଠାପେତି ଅତ୍ତାନଂ, ଅଣୁଂ ଅଗ୍ଗିଂୱ ସନ୍ଧମନ୍ତି ॥
ଚୂଳ [ଚୁଲ୍ଲ (ସୀ॰), ଚୁଲ୍ଲକ (ସ୍ୟା॰ ପୀ॰)] ସେଟ୍ଠିଜାତକଂ ଚତୁତ୍ଥଂ ।
୫. ତଣ୍ଡୁଲନାଳିଜାତକଂ
[କିମଗ୍ଘତୀ ତଣ୍ଡୁଲନାଳିକା ଚ, ବାରାଣସୀ ଅନ୍ତରବାହିରାନି । ଅସ୍ସପଞ୍ଚସତେ ତାନି, ଏକା ତଣ୍ଡୁଲନାଳିକାତି । (ସ୍ୟା॰)] କିମଗ୍ଘତି ତଣ୍ଡୁଲନାଳିକାୟ, ଅସ୍ସାନ ମୂଲାୟ ୱଦେହି ରାଜ [ନାଳିକା ଚ (ସୀ॰), ନାଳିକାୟ (କ॰ ସୀ॰ ଅଟ୍ଠ॰)]।
ବାରାଣସିଂ ସନ୍ତରବାହିରତୋ [ବାହିରନ୍ତଂ (ସୀ॰)], ଅୟମଗ୍ଘତି ତଣ୍ଡୁଲନାଳିକାତି [କିମଗ୍ଘତୀ ୱଣ୍ଡୁଲନାଳିକା ଚ, ବାରାଣସୀ ଅନ୍ତରବାହିରାନି । ଅସ୍ସପଞ୍ଚସତେ ତାନି, ଏକା ତଣ୍ଡୁଲନାଳିକାତି । (ସ୍ୟା॰)]॥
ତଣ୍ଡୁଲନାଳିଜାତକଂ ପଞ୍ଚମଂ ।
୬. ଦେୱଧମ୍ମଜାତକଂ
ହିରିଓତ୍ତପ୍ପସମ୍ପନ୍ନା, ସୁକ୍କଧମ୍ମସମାହିତା ।
ସନ୍ତୋ ସପ୍ପୁରିସା ଲୋକେ, ଦେୱଧମ୍ମାତି ୱୁଚ୍ଚରେତି ॥
ଦେୱଧମ୍ମଜାତକଂ ଛଟ୍ଠଂ ।
୭. କଟ୍ଠହାରିଜାତକଂ
ପୁତ୍ତୋ ତ୍ୟାହଂ ମହାରାଜ, ତ୍ୱଂ ମଂ ପୋସ ଜନାଧିପ ।
ଅଞ୍ଞେପି ଦେୱୋ ପୋସେତି, କିଞ୍ଚ [କିଞ୍ଚି (କ॰)] ଦେୱୋ ସକଂ ପଜନ୍ତି ॥
କଟ୍ଠହାରି [କଟ୍ଠୱାହନ (କ॰)] ଜାତକଂ ସତ୍ତମଂ ।
୮. ଗାମଣିଜାତକଂ
ଅପି ଅତରମାନାନଂ, ଫଲାସାୱ ସମିଜ୍ଝତି ।
ୱିପକ୍କବ୍ରହ୍ମଚରିୟୋସ୍ମି, ଏୱଂ ଜାନାହି ଗାମଣୀତି ॥
ଗାମଣିଜାତକଂ ଅଟ୍ଠମଂ ।
୯. ମଘଦେୱଜାତକଂ
ଉତ୍ତମଙ୍ଗରୁହା ମୟ୍ହଂ, ଇମେ ଜାତା ୱୟୋହରା ।
ପାତୁଭୂତା ଦେୱଦୂତା, ପବ୍ବଜ୍ଜାସମୟୋ ମମାତି ॥
ମଘଦେୱ [ମଖାଦେୱ (ସୀ॰ ପୀ॰), ଦେୱଦୂତ (କ॰)] ଜାତକଂ ନୱମଂ ।
୧୦. ସୁଖୱିହାରିଜାତକଂ
ୟଞ୍ଚ ଅଞ୍ଞେ ନ ରକ୍ଖନ୍ତି, ୟୋ ଚ ଅଞ୍ଞେ ନ ରକ୍ଖତି ।
ସ ୱେ ରାଜ ସୁଖଂ ସେତି, କାମେସୁ ଅନପେକ୍ଖୱାତି ॥
ସୁଖୱିହାରିଜାତକଂ ଦସମଂ ।
ଅପଣ୍ଣକୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ୱରାପଣ୍ଣକ ୱଣ୍ଣୁପଥ ସେରିୱରୋ, ସୁୱିଚକ୍ଖଣ ତଣ୍ଡୁଲନାଳିକସ୍ସା ।
ହିରି ପୁତ୍ତୱରୁତ୍ତଗାମଣିନା, ୟୋ ଚ ନ ରକ୍ଖତି ତେନ ଦସାତି ॥
୨. ସୀଲୱଗ୍ଗୋ
୧୧. ଲକ୍ଖଣମିଗଜାତକଂ
ହୋତି ସୀଲୱତଂ ଅତ୍ଥୋ, ପଟିସନ୍ଥାର [ପଟିସନ୍ଧାର (କ॰)] ୱୁତ୍ତିନଂ ।
ଲକ୍ଖଣଂ ପସ୍ସ ଆୟନ୍ତଂ, ଞାତିସଙ୍ଘପୁରକ୍ଖତଂ [ପୁରକ୍ଖିତଂ (ସ୍ୟା॰), ପୁରେକ୍ଖିତଂ (କ॰)]।
ଅଥ ପସ୍ସସିମଂ କାଳଂ, ସୁୱିହୀନଂୱ ଞାତିଭୀତି ॥
ଲକ୍ଖଣମିଗଜାତକଂ ପଠମଂ ।
୧୨. ନିଗ୍ରୋଧମିଗଜାତକଂ
ନିଗ୍ରୋଧମେୱ ସେୱେୟ୍ୟ, ନ ସାଖମୁପସଂୱସେ ।
ନିଗ୍ରୋଧସ୍ମିଂ ମତଂ ସେୟ୍ୟୋ, ୟଞ୍ଚେ ସାଖସ୍ମି [ସାଖସ୍ମିଂ (ସୀ॰ ପୀ॰)] ଜୀୱିତନ୍ତି ॥
ନିଗ୍ରୋଧମିଗଜାତକଂ ଦୁତିୟଂ ।
୧୩. କଣ୍ଡିଜାତକଂ
ଧିରତ୍ଥୁ କଣ୍ଡିନଂ ସଲ୍ଲଂ, ପୁରିସଂ ଗାଳ୍ହୱେଧିନଂ ।
ଧିରତ୍ଥୁ ତଂ ଜନପଦଂ, ୟତ୍ଥିତ୍ଥୀ ପରିଣାୟିକା ।
ତେ ଚାପି ଧିକ୍କିତା [ଧିକ୍କତା ( ?)] ସତ୍ତା, ୟେ ଇତ୍ଥୀନଂ ୱସଂଗତାତି ॥
କଣ୍ଡିଜାତକଂ ତତିୟଂ ।
୧୪. ୱାତମିଗଜାତକଂ
ନ କିରତ୍ଥି ରସେହି ପାପିୟୋ, ଆୱାସେହି ୱ [ୱା (ସବ୍ବତ୍ଥ)] ସନ୍ଥୱେହି ୱା ।
ୱାତମିଗଂ ଗହନନିସ୍ସିତଂ [ଗେହନିସ୍ସିତଂ (ସୀ॰ ପୀ॰)], ୱସମାନେସି ରସେହି ସଞ୍ଜୟୋତି ॥
ୱାତମିଗଜାତକଂ ଚତୁତ୍ଥଂ ।
୧୫. ଖରାଦିୟଜାତକଂ
ଅଟ୍ଠକ୍ଖୁରଂ ଖରାଦିୟେ, ମିଗଂ ୱଙ୍କାତିୱଙ୍କିନଂ ।
ସତ୍ତହି କାଲାତିକ୍କନ୍ତଂ [ସତ୍ତହି କଲାହ’ତିକ୍କନ୍ତଂ (ସୀ॰), ସତ୍ତକାଲେହ’ତିକ୍କନ୍ତଂ (ସ୍ୟା॰), ସତ୍ତହି କାଲାହ’ତିକ୍କନ୍ତଂ (ପୀ॰)], ନ ନଂ ଓୱଦିତୁସ୍ସହେତି ॥
ଖରାଦିୟଜାତକଂ ପଞ୍ଚମଂ ।
୧୬. ତିପଲ୍ଲତ୍ଥମିଗଜାତକଂ
ମିଗଂ ତିପଲ୍ଲତ୍ଥ [ତିପଲ୍ଲତ୍ତ (କ॰)] ମନେକମାୟଂ, ଅଟ୍ଠକ୍ଖୁରଂ ଅଡ୍ଢରତ୍ତାପପାୟିଂ [ଅଡ୍ଢରତ୍ତାୱପାୟିଂ (ସୀ॰ ପୀ॰)]।
ଏକେନ ସୋତେନ ଛମାସ୍ସସନ୍ତୋ, ଛହି କଲାହିତିଭୋତି [କଲାହତିଭୋତି (ସୀ॰ ସ୍ୟା॰ ପୀ॰)] ଭାଗିନେୟ୍ୟୋତି ॥
ତିପଲ୍ଲତ୍ଥମିଗଜାତକଂ ଛଟ୍ଠଂ ।
୧୭. ମାଲୁତଜାତକଂ
କାଳେ ୱା ୟଦି ୱା ଜୁଣ୍ହେ, ୟଦା ୱାୟତି ମାଲୁତୋ ।
ୱାତଜାନି ହି ସୀତାନି, ଉଭୋତ୍ଥମପରାଜିତାତି ॥
ମାଲୁତଜାତକଂ ସତ୍ତମଂ ।
୧୮. ମତକଭତ୍ତଜାତକଂ
ଏୱଂ ଚେ ସତ୍ତା ଜାନେୟ୍ୟୁଂ, ଦୁକ୍ଖାୟଂ ଜାତିସମ୍ଭୱୋ ।
ନ ପାଣୋ ପାଣିନଂ ହଞ୍ଞେ, ପାଣଘାତୀ ହି ସୋଚତୀତି ॥
ମତକଭତ୍ତଜାତକଂ ଅଟ୍ଠମଂ ।
୧୯. ଆୟାଚିତଭତ୍ତଜାତକଂ
ସଚେ ମୁଚ୍ଚେ [ମୁଞ୍ଚେ (ସୀ॰ ସ୍ୟା॰ ପୀ॰)] ପେଚ୍ଚ ମୁଚ୍ଚେ [ମୁଞ୍ଚେ (ସୀ॰ ସ୍ୟା॰ ପୀ॰)], ମୁଚ୍ଚମାନୋ ହି ବଜ୍ଝତି ।
ନ ହେୱଂ ଧୀରା ମୁଚ୍ଚନ୍ତି, ମୁତ୍ତି ବାଲସ୍ସ ବନ୍ଧନନ୍ତି ॥
ଆୟାଚିତଭତ୍ତଜାତକଂ ନୱମଂ ।
୨୦. ନଳପାନଜାତକଂ
ଦିସ୍ୱା ପଦମନୁତ୍ତିଣ୍ଣଂ, ଦିସ୍ୱାନୋତରିତଂ ପଦଂ ।
ନଳେନ ୱାରିଂ ପିସ୍ସାମ [ପିୱିସ୍ସାମ (ସୀ॰ ସ୍ୟା॰ ପୀ॰)], ନେୱ [ନ ଚ (କ॰)] ମଂ ତ୍ୱଂ ୱଧିସ୍ସସୀତି ॥
ନଳପାନଜାତକଂ ଦସମଂ ।
ସୀଲୱଗ୍ଗୋ ଦୁତିୟୋ ।
ତସ୍ସୁଦ୍ଦାନଂ –
ଅଥ ଲକ୍ଖଣ ସାଖ ଧିରତ୍ଥୁ ପୁନ, ନ କିରତ୍ଥି ରସେହି ଖରାଦିୟା ।
ଅତିଭୋତି ୱର [ରସ (ସବ୍ବତ୍ଥ)] ମାଲୁତ ପାଣ, ମୁଚ୍ଚେନ ନଳଅୱ୍ହୟନେନ ଭୱନ୍ତି ଦସାତି ॥
୩. କୁରୁଙ୍ଗୱଗ୍ଗୋ
୨୧. କୁରୁଙ୍ଗମିଗଜାତକଂ
ଞାତମେତଂ କୁରୁଙ୍ଗସ୍ସ, ୟଂ ତ୍ୱଂ ସେପଣ୍ଣି ସିୟ୍ୟସି [ସେୟ୍ୟସି (ସୀ॰ ସ୍ୟା॰ ପୀ॰)]।
ଅଞ୍ଞଂ ସେପଣ୍ଣି ଗଚ୍ଛାମି, ନ ମେ ତେ ରୁଚ୍ଚତେ ଫଲନ୍ତି ॥
କୁରୁଙ୍ଗମିଗଜାତକଂ ପଠମଂ ।
୨୨. କୁକ୍କୁରଜାତକଂ
ୟେ କୁକ୍କୁରା ରାଜକୁଲମ୍ହି ୱଦ୍ଧା, କୋଲେୟ୍ୟକା ୱଣ୍ଣବଲୂପପନ୍ନା ।
ତେମେ ନ ୱଜ୍ଝା ମୟମସ୍ମ ୱଜ୍ଝା, ନାୟଂ ସଘଚ୍ଚା ଦୁବ୍ବଲଘାତିକାୟନ୍ତି ॥
କୁକ୍କୁରଜାତକଂ ଦୁତିୟଂ ।
୨୩. ଗୋଜାନୀୟଜାତକଂ
ଅପି ପସ୍ସେନ ସେମାନୋ, ସଲ୍ଲେଭି ସଲ୍ଲଲୀକତୋ ।
ସେୟ୍ୟୋୱ ୱଳୱା ଗୋଜୋ [ଭୋଜ୍ଜୋ (ସୀ॰), ଭୋଜ୍ଝୋ (ସ୍ୟା॰ ପୀ॰)], ୟୁଞ୍ଜ ମଞ୍ଞେୱ ସାରଥୀତି ॥
ଗୋଜାନୀୟ [ଭୋଜାଜାନୀୟ (ସୀ॰ ସ୍ୟା॰ ପୀ॰)] ଜାତକଂ ତତିୟଂ ।
୨୪. ଆଜଞ୍ଞଜାତକଂ
ୟଦା ୟଦା ୟତ୍ଥ ୟଦା, ୟତ୍ଥ ୟତ୍ଥ ୟଦା ୟଦା ।
ଆଜଞ୍ଞୋ କୁରୁତେ ୱେଗଂ, ହାୟନ୍ତି ତତ୍ଥ ୱାଳୱାତି ॥
ଆଜଞ୍ଞଜାତକଂ ଚତୁତ୍ଥଂ ।
୨୫. ତିତ୍ଥଜାତକଂ
ଅଞ୍ଞମଞ୍ଞେହି ତିତ୍ଥେହି, ଅସ୍ସଂ ପାୟେହି ସାରଥି ।
ଅଚ୍ଚାସନସ୍ସ ପୁରିସୋ, ପାୟାସସ୍ସପି ତପ୍ପତୀତି ॥
ତିତ୍ଥଜାତକଂ ପଞ୍ଚମଂ ।
୨୬. ମହିଳାମୁଖଜାତକଂ
ପୁରାଣଚୋରାନ ୱଚୋ ନିସମ୍ମ, ମହିଳାମୁଖୋ ପୋଥୟମନ୍ୱଚାରୀ ।
ସୁସଞ୍ଞତାନଞ୍ହି ୱଚୋ ନିସମ୍ମ, ଗଜୁତ୍ତମୋ ସବ୍ବଗୁଣେସୁ ଅଟ୍ଠାତି ॥
ମହିଳାମୁଖଜାତକଂ ଛଟ୍ଠଂ ।
୨୭. ଅଭିଣ୍ହଜାତକଂ
ନାଲଂ କବଳଂ ପଦାତୱେ, ନ ଚ ପିଣ୍ଡଂ ନ କୁସେ ନ ଘଂସିତୁଂ ।
ମଞ୍ଞାମି ଅଭିଣ୍ହଦସ୍ସନା, ନାଗୋ ସ୍ନେହମକାସି [ସିନେହମକାସି (ସୀ॰ ସ୍ୟା॰ ପୀ॰)] କୁକ୍କୁରେତି ॥
ଅଭିଣ୍ହଜାତକଂ ସତ୍ତମଂ ।
୨୮. ନନ୍ଦିୱିସାଲଜାତକଂ
ମନୁଞ୍ଞମେୱ ଭାସେୟ୍ୟ, ନାମନୁଞ୍ଞଂ କୁଦାଚନଂ ।
ମନୁଞ୍ଞଂ ଭାସମାନସ୍ସ, ଗରୁଂ ଭାରଂ ଉଦଦ୍ଧରି ।
ଧନଞ୍ଚ ନଂ ଅଲାଭେସି, ତେନ ଚତ୍ତମନୋ ଅହୂତି ॥
ନନ୍ଦିୱିସାଲଜାତକଂ ଅଟ୍ଠମଂ ।
୨୯. କଣ୍ହଜାତକଂ
ୟତୋ ୟତୋ ଗରୁ ଧୁରଂ, ୟତୋ ଗମ୍ଭୀରୱତ୍ତନୀ ।
ତଦାସ୍ସୁ କଣ୍ହଂ ୟୁଞ୍ଜନ୍ତି, ସ୍ୱାସ୍ସୁ ତଂ ୱହତେ ଧୁରନ୍ତି ॥
କଣ୍ହଜାତକଂ ନୱମଂ ।
୩୦. ମୁନିକଜାତକଂ
ମା ମୁନିକସ୍ସ ପିହୟି, ଆତୁରନ୍ନାନି ଭୁଞ୍ଜତି ।
ଅପ୍ପୋସ୍ସୁକ୍କୋ ଭୁସଂ ଖାଦ, ଏତଂ ଦୀଘାୟୁଲକ୍ଖଣନ୍ତି ॥
ମୁନିକଜାତକଂ ଦସମଂ ।
କୁରୁଙ୍ଗୱଗ୍ଗୋ ତତିୟୋ ।
ତସ୍ସୁଦ୍ଦାନଂ –
କୁରୁଙ୍ଗସ୍ସ କୁକ୍କୁରଗୋଜୱରୋ, ପୁନ ୱାଳୱସ୍ସସିରିୱ୍ହୟନୋ [ସିରିୱୟନୋ (ସବ୍ବତ୍ଥ)]।
ମହିଳାମୁଖନାମନୁଞ୍ଞୱରୋ, ୱହତେ ଧୁର ମୁନିକେନ ଦସାତି ॥
୪. କୁଲାୱକୱଗ୍ଗୋ
୩୧. କୁଲାୱକଜାତକଂ
କୁଲାୱକା ମାତଲି ସିମ୍ବଲିସ୍ମିଂ, ଈସାମୁଖେନ ପରିୱଜ୍ଜୟସ୍ସୁ ।
କାମଂ ଚଜାମ ଅସୁରେସୁ ପାଣଂ, ମା ମେ ଦିଜା ୱିକ୍କୁଲୱା [ମାୟିମେ ଦିଜା ୱିକୁଲାୱା (ସୀ॰ ସ୍ୟା॰ ପୀ॰)] ଅହେସୁନ୍ତି ॥
କୁଲାୱକଜାତକଂ ପଠମଂ ।
୩୨. ନଚ୍ଚଜାତକଂ
ରୁଦଂ ମନୁଞ୍ଞଂ ରୁଚିରା ଚ ପିଟ୍ଠି, ୱେଳୁରିୟୱଣ୍ଣୂପନିଭା [ୱଣ୍ଣୂପଟିଭା (ସ୍ୟା॰), ୱଣ୍ଣସନ୍ନିଭା (କ॰)] ଚ ଗୀୱା ।
ବ୍ୟାମମତ୍ତାନି ଚ ପେଖୁଣାନି, ନଚ୍ଚେନ ତେ ଧୀତରଂ ନୋ ଦଦାମୀତି ॥
ନଚ୍ଚଜାତକଂ ଦୁତିୟଂ ।
୩୩. ସମ୍ମୋଦମାନଜାତକଂ
ସମ୍ମୋଦମାନା ଗଚ୍ଛନ୍ତି, ଜାଲମାଦାୟ ପକ୍ଖିନୋ ।
ୟଦା ତେ ୱିୱଦିସ୍ସନ୍ତି, ତଦା ଏହିନ୍ତି ମେ ୱସନ୍ତି ॥
ସମ୍ମୋଦମାନଜାତକଂ ତତିୟଂ ।
୩୪. ମଚ୍ଛଜାତକଂ
ନ ମଂ ସୀତଂ ନ ମଂ ଉଣ୍ହଂ, ନ ମଂ ଜାଲସ୍ମି ବାଧନଂ ।
ୟଞ୍ଚ ମଂ ମଞ୍ଞତେ ମଚ୍ଛୀ, ଅଞ୍ଞଂ ସୋ ରତିୟା ଗତୋତି ॥
ମଚ୍ଛଜାତକଂ ଚତୁତ୍ଥଂ ।
୩୫. ୱଟ୍ଟକଜାତକଂ
ସନ୍ତି ପକ୍ଖା ଅପତନା, ସନ୍ତି ପାଦା ଅୱଞ୍ଚନା ।
ମାତାପିତା ଚ ନିକ୍ଖନ୍ତା, ଜାତୱେଦ ପଟିକ୍କମାତି ॥
ୱଟ୍ଟକଜାତକଂ ପଞ୍ଚମଂ ।
୩୬. ସକୁଣଜାତକଂ
ୟଂ ନିସ୍ସିତା ଜଗତିରୁହଂ ୱିହଙ୍ଗମା, ସ୍ୱାୟଂ ଅଗ୍ଗିଂ ପମୁଞ୍ଚତି ।
ଦିସା ଭଜଥ ୱକ୍କଙ୍ଗା [ୱଙ୍କଙ୍ଗା (ସ୍ୟା॰)], ଜାତଂ ସରଣତୋ ଭୟନ୍ତି ॥
ସକୁଣଜାତକଂ ଛଟ୍ଠଂ ।
୩୭. ତିତ୍ତିରଜାତକଂ
ୟେ ୱୁଡ୍ଢ [ୱଦ୍ଧ (ସୀ॰ ପୀ॰)] ମପଚାୟନ୍ତି, ନରା ଧମ୍ମସ୍ସ କୋୱିଦା ।
ଦିଟ୍ଠେୱ ଧମ୍ମେ ପାସଂସା, ସମ୍ପରାୟେ ଚ ସୁଗ୍ଗତୀତି ॥
ତିତ୍ତିରଜାତକଂ ସତ୍ତମଂ ।
୩୮. ବକଜାତକଂ
ନାଚ୍ଚନ୍ତଂ ନିକତିପ୍ପଞ୍ଞୋ, ନିକତ୍ୟା ସୁଖମେଧତି ।
ଆରାଧେତି ନିକତିପ୍ପଞ୍ଞୋ [ଆରାଧେ ନିକତିପ୍ପଞ୍ଞୋ (ପୀ॰)], ବକୋ କକ୍କଟକାମିୱାତି ॥
ବକଜାତକଂ ଅଟ୍ଠମଂ ।
୩୯. ନନ୍ଦଜାତକଂ
ମଞ୍ଞେ ସୋୱଣ୍ଣୟୋ ରାସି, ସୋଣ୍ଣମାଲା ଚ ନନ୍ଦକୋ ।
ୟତ୍ଥ ଦାସୋ ଆମଜାତୋ, ଠିତୋ ଥୁଲ୍ଲାନି [ଥୂଲାନି (କ॰)] ଗଜ୍ଜତୀତି ॥
ନନ୍ଦଜାତକଂ ନୱମଂ ।
୪୦. ଖଦିରଙ୍ଗାରଜାତକଂ
କାମଂ ପତାମି ନିରୟଂ, ଉଦ୍ଧଂପାଦୋ ଅୱଂସିରୋ ।
ନାନରିୟଂ କରିସ୍ସାମି, ହନ୍ଦ ପିଣ୍ଡଂ ପଟିଗ୍ଗହାତି ॥
ଖଦିରଙ୍ଗାରଜାତକଂ ଦସମଂ ।
କୁଲାୱକୱଗ୍ଗୋ ଚତୁତ୍ଥୋ ।
ତସ୍ସୁଦ୍ଦାନଂ –
ସିରିମାତଲି ଧୀତର ପକ୍ଖିୱରୋ, ରତିୟାଗତୋ ମାତାପିତା ଚ ପୁନ ।
ଜଗତୀରୁହ ୱୁଡ୍ଢ ସୁକକ୍କଟକୋ, ତଥା ନନ୍ଦକପିଣ୍ଡୱରେନ ଦସାତି ॥
୫. ଅତ୍ଥକାମୱଗ୍ଗୋ
୪୧. ଲୋସକଜାତକଂ
ୟୋ ଅତ୍ଥକାମସ୍ସ ହିତାନୁକମ୍ପିନୋ, ଓୱଜ୍ଜମାନୋ ନ କରୋତି ସାସନଂ ।
ଅଜିୟା ପାଦମୋଲମ୍ବ [ପାଦମୋଲୁମ୍ବ (ସୀ॰ ସ୍ୟା॰ ପୀ॰)], ମିତ୍ତକୋ ୱିୟ ସୋଚତୀତି ॥
ଲୋସକଜାତକଂ ପଠମଂ ।
୪୨. କପୋତଜାତକଂ
ୟୋ ଅତ୍ଥକାମସ୍ସ ହିତାନୁକମ୍ପିନୋ, ଓୱଜ୍ଜମାନୋ ନ କରୋତି ସାସନଂ ।
କପୋତକସ୍ସ ୱଚନଂ ଅକତ୍ୱା, ଅମିତ୍ତହତ୍ଥତ୍ଥଗତୋୱ ସେତୀତି ॥
କପୋତଜାତକଂ ଦୁତିୟଂ ।
୪୩. ୱେଳୁକଜାତକଂ
ୟୋ ଅତ୍ଥକାମସ୍ସ ହିତାନୁକମ୍ପିନୋ, ଓୱଜ୍ଜମାନୋ ନ କରୋତି ସାସନଂ ।
ଏୱଂ ସୋ ନିହତୋ ସେତି, ୱେଳୁକସ୍ସ ୟଥା ପିତାତି ॥
ୱେଳୁକଜାତକଂ ତତିୟଂ ।
୪୪. ମକସଜାତକଂ
ସେୟ୍ୟୋ ଅମିତ୍ତୋ ମତିୟା ଉପେତୋ, ନ ତ୍ୱେୱ ମିତ୍ତୋ ମତିୱିପ୍ପହୀନୋ ।
ମକସଂ ୱଧିସ୍ସନ୍ତି ହି ଏଳମୂଗୋ, ପୁତ୍ତୋ ପିତୁ ଅବ୍ଭିଦା ଉତ୍ତମଙ୍ଗନ୍ତି ॥
ମକସଜାତକଂ ଚତୁତ୍ଥଂ ।
୪୫. ରୋହିଣିଜାତକଂ
ସେୟ୍ୟୋ ଅମିତ୍ତୋ ମେଧାୱୀ, ୟଞ୍ଚେ ବାଲାନୁକମ୍ପକୋ ।
ପସ୍ସ ରୋହିଣିକଂ ଜମ୍ମିଂ, ମାତରଂ ହନ୍ତ୍ୱାନ ସୋଚତୀତି ॥
ରୋହିଣିଜାତକଂ ପଞ୍ଚମଂ ।
୪୬. ଆରାମଦୂସକଜାତକଂ
ନ ୱେ ଅନତ୍ଥକୁସଲେନ, ଅତ୍ଥଚରିୟା ସୁଖାୱହା ।
ହାପେତି ଅତ୍ଥଂ ଦୁମ୍ମେଧୋ, କପି ଆରାମିକୋ ୟଥାତି ॥
ଆରାମଦୂସକଜାତକଂ ଛଟ୍ଠଂ ।
୪୭. ୱାରୁଣିଦୂସକଜାତକଂ
ନ ୱେ ଅନତ୍ଥକୁସଲେନ, ଅତ୍ଥଚରିୟା ସୁଖାୱହା ।
ହାପେତି ଅତ୍ଥଂ ଦୁମ୍ମେଧୋ, କୋଣ୍ଡଞ୍ଞୋ ୱାରୁଣିଂ ୟଥାତି ॥
ୱାରୁଣିଦୂସକଜାତକଂ ସତ୍ତମଂ ।
୪୮. ୱେଦବ୍ବଜାତକଂ
ଅନୁପାୟେନ ୟୋ ଅତ୍ଥଂ, ଇଚ୍ଛତି ସୋ ୱିହଞ୍ଞତି ।
ଚେତା ହନିଂସୁ ୱେଦବ୍ବଂ [ୱେଦବ୍ଭଂ (ସୀ॰ ପୀ॰)], ସବ୍ବେ ତେ ବ୍ୟସନମଜ୍ଝଗୂତି ॥
ୱେଦବ୍ବ [ୱେଦବ୍ଭ (ସୀ॰ ପୀ॰)] ଜାତକଂ ଅଟ୍ଠମଂ ।
୪୯. ନକ୍ଖତ୍ତଜାତକଂ
ନକ୍ଖତ୍ତଂ ପଟିମାନେନ୍ତଂ, ଅତ୍ଥୋ ବାଲଂ ଉପଚ୍ଚଗା ।
ଅତ୍ଥୋ ଅତ୍ଥସ୍ସ ନକ୍ଖତ୍ତଂ, କିଂ କରିସ୍ସନ୍ତି ତାରକାତି ॥
ନକ୍ଖତ୍ତଜାତକଂ ନୱମଂ ।
୫୦. ଦୁମ୍ମେଧଜାତକଂ
ଦୁମ୍ମେଧାନଂ ସହସ୍ସେନ, ୟଞ୍ଞୋ ମେ ଉପୟାଚିତୋ ।
ଇଦାନି ଖୋହଂ ୟଜିସ୍ସାମି, ବହୁ [ବହୂ (ସୀ॰ ପୀ॰), ବହୁଂ (କ॰)] ଅଧମ୍ମିକୋ ଜନୋତି ॥
ଦୁମ୍ମେଧଜାତକଂ ଦସମଂ ।
ଅତ୍ଥକାମୱଗ୍ଗୋ ପଞ୍ଚମୋ ।
ତସ୍ସୁଦ୍ଦାନଂ –
ଅଥ ମିତ୍ତକ ମାତୁ କପୋତୱରୋ, ତଥା ୱେଳୂକ ଏଳମୂଗୋ ରୋହିଣୀ ।
କପି ୱାରୁଣି ଚେତଚରା ଚ ପୁନ, ତଥା ତାରକ ୟଞ୍ଞୱରେନ ଦସାତି ॥
ପଠମୋ ପଣ୍ଣାସକୋ ।
୬. ଆସୀସୱଗ୍ଗୋ
୫୧.ମହାସୀଲୱଜାତକଂ
ଆସୀସେଥେୱ [ଆସିଂସେଥେୱ (ସୀ॰ ସ୍ୟା॰ ପୀ॰)] ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ୟଥା ଇଚ୍ଛିଂ ତଥା ଅହୂତି ॥
ମହାସୀଲୱଜାତକଂ ପଠମଂ ।
୫୨. ଚୂଳଜନକଜାତକଂ
ୱାୟମେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ଉଦକା ଥଲମୁବ୍ଭତନ୍ତି ॥
ଚୂଳଜନକଜାତକଂ ଦୁତିୟଂ ।
୫୩. ପୁଣ୍ଣପାତିଜାତକଂ
ତଥେୱ ପୁଣ୍ଣା ପାତିୟୋ, ଅଞ୍ଞାୟଂ ୱତ୍ତତେ କଥା ।
ଆକାରଣେନ [ଆକାରକେନ (ସୀ॰ ସ୍ୟା॰ ପୀ॰)] ଜାନାମି, ନ ଚାୟଂ ଭଦ୍ଦିକା ସୁରାତି ॥
ପୁଣ୍ଣପାତିଜାତକଂ ତତିୟଂ ।
୫୪. କିଂଫଲଜାତକଂ
ନାୟଂ ରୁକ୍ଖୋ ଦୁରାରୁହୋ, ନପି ଗାମତୋ ଆରକା ।
ଆକାରଣେନ ଜାନାମି, ନାୟଂ ସାଦୁଫଲୋ ଦୁମୋତି ॥
କିଂଫଲଜାତକଂ ଚତୁତ୍ଥଂ ।
୫୫. ପଞ୍ଚାୱୁଧଜାତକଂ
ୟୋ ଅଲୀନେନ ଚିତ୍ତେନ, ଅଲୀନମନସୋ ନରୋ ।
ଭାୱେତି କୁସଲଂ ଧମ୍ମଂ, ୟୋଗକ୍ଖେମସ୍ସ ପତ୍ତିୟା ।
ପାପୁଣେ ଅନୁପୁବ୍ବେନ, ସବ୍ବସଂୟୋଜନକ୍ଖୟନ୍ତି ॥
ପଞ୍ଚାୱୁଧଜାତକଂ ପଞ୍ଚମଂ ।
୫୬. କଞ୍ଚନକ୍ଖନ୍ଧଜାତକଂ
ୟୋ ପହଟ୍ଠେନ ଚିତ୍ତେନ, ପହଟ୍ଠମନସୋ ନରୋ ।
ଭାୱେତି କୁସଲଂ ଧମ୍ମଂ, ୟୋଗକ୍ଖେମସ୍ସ ପତ୍ତିୟା ।
ପାପୁଣେ ଅନୁପୁବ୍ବେନ, ସବ୍ବସଂୟୋଜନକ୍ଖୟନ୍ତି ॥
କଞ୍ଚନକ୍ଖନ୍ଧଜାତକଂ ଛଟ୍ଠଂ ।
୫୭. ୱାନରିନ୍ଦଜାତକଂ
ୟସ୍ସେତେ ଚତୁରୋ ଧମ୍ମା, ୱାନରିନ୍ଦ ୟଥା ତୱ ।
ସଚ୍ଚଂ ଧମ୍ମୋ ଧିତି [ଧିତୀ (ସୀ॰ ପୀ॰)] ଚାଗୋ, ଦିଟ୍ଠଂ ସୋ ଅତିୱତ୍ତତୀତି ॥
ୱାନରିନ୍ଦଜାତକଂ ସତ୍ତମଂ ।
୫୮. ତୟୋଧମ୍ମଜାତକଂ
ୟସ୍ସେତେ ଚ [ୟସ୍ସ ଏତେ (ସୀ॰ ପୀ॰)] ତୟୋ ଧମ୍ମା, ୱାନରିନ୍ଦ ୟଥା ତୱ ।
ଦକ୍ଖିୟଂ ସୂରିୟଂ ପଞ୍ଞା, ଦିଟ୍ଠଂ ସୋ ଅତିୱତ୍ତତୀତି ॥
ତୟୋଧମ୍ମଜାତକଂ ଅଟ୍ଠମଂ ।
୫୯. ଭେରିୱାଦକଜାତକଂ
ଧମେ ଧମେ ନାତିଧମେ, ଅତିଧନ୍ତଞ୍ହି ପାପକଂ ।
ଧନ୍ତେନ ହି ସତଂ ଲଦ୍ଧଂ, ଅତିଧନ୍ତେନ ନାସିତନ୍ତି ॥
ଭେରିୱାଦକଜାତକଂ ନୱମଂ ।
୬୦. ସଙ୍ଖଧମଜାତକଂ
ଧମେ ଧମେ ନାତିଧମେ, ଅତିଧନ୍ତଞ୍ହି ପାପକଂ ।
ଧନ୍ତେନାଧିଗତା ଭୋଗା, ତେ ତାତୋ ୱିଧମୀ ଧମନ୍ତି ॥
ସଙ୍ଖଧମଜାତକଂ ଦସମଂ ।
ଆସୀସୱଗ୍ଗୋ ଛଟ୍ଠୋ ।
ତସ୍ସୁଦ୍ଦାନଂ –
ୟଥା ଇଚ୍ଛିଂ ତଥାହୁଦକା ଥଲା, ସୁର ସାଦୁଫଲୋ ଚ ଅଲୀନମନୋ ।
ସମ୍ପହଟ୍ଠମନୋ ଚତୁରୋ ଚ ତୟୋ, ସତଲଦ୍ଧକ ଭୋଗଧନେନ ଦସାତି ॥
୭. ଇତ୍ଥିୱଗ୍ଗୋ
୬୧. ଅସାତମନ୍ତଜାତକଂ
ଅସା ଲୋକିତ୍ଥିୟୋ ନାମ, ୱେଲା ତାସଂ ନ ୱିଜ୍ଜତି ।
ସାରତ୍ତା ଚ ପଗବ୍ଭା ଚ, ସିଖୀ ସବ୍ବଘସୋ ୟଥା ।
ତା ହିତ୍ୱା ପବ୍ବଜିସ୍ସାମି, ୱିୱେକମନୁବ୍ରୂହୟନ୍ତି ॥
ଅସାତମନ୍ତଜାତକଂ ପଠମଂ ।
୬୨. ଅଣ୍ଡଭୂତଜାତକଂ
ୟଂ ବ୍ରାହ୍ମଣୋ ଅୱାଦେସି, ୱୀଣଂ ସମୁଖୱେଠିତୋ ।
ଅଣ୍ଡଭୂତା ଭତା ଭରିୟା, ତାସୁ କୋ ଜାତୁ ୱିସ୍ସସେତି ॥
ଅଣ୍ଡଭୂତଜାତକଂ ଦୁତିୟଂ ।
୬୩. ତକ୍କପଣ୍ଡିତଜାତକଂ
କୋଧନା ଅକତଞ୍ଞୂ ଚ, ପିସୁଣା ମିତ୍ତଭେଦିକା [ପିସୁଣା ଚ ୱିଭେଦିକା (ସୀ॰ ସ୍ୟା॰ ପୀ॰)]।
ବ୍ରହ୍ମଚରିୟଂ ଚର ଭିକ୍ଖୁ, ସୋ ସୁଖଂ ନ ୱିହାହସୀତି [ପିହାହିସୀତି (ସୀ॰ ସ୍ୟା॰ ପୀ॰), ୱିହାୟସି (କ॰)]॥
ତକ୍କପଣ୍ଡିତଜାତକଂ [ତକ୍କଜାତକଂ (ସୀ॰ ସ୍ୟା॰ ପୀ॰ ଅଟ୍ଠ॰)] ତତିୟଂ ।
୬୪. ଦୁରାଜାନଜାତକଂ
ମା ସୁ ନନ୍ଦି ଇଚ୍ଛତି ମଂ, ମା ସୁ ସୋଚି ନ ମିଚ୍ଛତି [ନ ଇଚ୍ଛତି (ସୀ॰ ସ୍ୟା॰ ପୀ॰)]।
ଥୀନଂ ଭାୱୋ ଦୁରାଜାନୋ, ମଚ୍ଛସ୍ସେୱୋଦକେ ଗତନ୍ତି ॥
ଦୁରାଜାନଜାତକଂ ଚତୁତ୍ଥଂ ।
୬୫. ଅନଭିରତିଜାତକଂ
ୟଥା ନଦୀ ଚ ପନ୍ଥୋ ଚ, ପାନାଗାରଂ ସଭା ପପା ।
ଏୱଂ ଲୋକିତ୍ଥିୟୋ ନାମ, ନାସଂ କୁଜ୍ଝନ୍ତି ପଣ୍ଡିତାତି ॥
ଅନଭିରତିଜାତକଂ ପଞ୍ଚମଂ ।
୬୬. ମୁଦୁଲକ୍ଖଣଜାତକଂ
ଏକା ଇଚ୍ଛା ପୁରେ ଆସି, ଅଲଦ୍ଧା ମୁଦୁଲକ୍ଖଣଂ ।
ୟତୋ ଲଦ୍ଧା ଅଳାରକ୍ଖୀ, ଇଚ୍ଛା ଇଚ୍ଛଂ ୱିଜାୟଥାତି ॥
ମୁଦୁଲକ୍ଖଣଜାତକଂ ଛଟ୍ଠଂ ।
୬୭. ଉଚ୍ଛଙ୍ଗଜାତକଂ
ଉଚ୍ଛଙ୍ଗେ ଦେୱ ମେ ପୁତ୍ତୋ, ପଥେ ଧାୱନ୍ତିୟା ପତି ।
ତଞ୍ଚ ଦେସଂ ନ ପସ୍ସାମି, ୟତୋ ସୋଦରିୟମାନୟେତି [ସୋଦରିୟଂ ନୟେ (କ॰)]॥
ଉଚ୍ଛଙ୍ଗଜାତକଂ ସତ୍ତମଂ ।
୬୮. ସାକେତଜାତକଂ
ୟସ୍ମିଂ ମନୋ ନିୱିସତି, ଚିତ୍ତଞ୍ଚାପି [ଚିତ୍ତଂ ୱାପି (କତ୍ଥଚି)] ପସୀଦତି ।
ଅଦିଟ୍ଠପୁବ୍ବକେ ପୋସେ, କାମଂ ତସ୍ମିମ୍ପି ୱିସ୍ସସେତି ॥
ସାକେତଜାତକଂ ଅଟ୍ଠମଂ ।
୬୯. ୱିସୱନ୍ତଜାତକଂ
ଧିରତ୍ଥୁ ତଂ ୱିସଂ ୱନ୍ତଂ, ୟମହଂ ଜୀୱିତକାରଣା ।
ୱନ୍ତଂ ପଚ୍ଚାୱମିସ୍ସାମି [ପଚ୍ଚାହରିସ୍ସାମି (କ॰)], ମତଂ ମେ ଜୀୱିତା ୱରନ୍ତି ॥
ୱିସୱନ୍ତଜାତକଂ ନୱମଂ ।
୭୦. କୁଦ୍ଦାଲଜାତକଂ
ନ ତଂ ଜିତଂ ସାଧୁ ଜିତଂ, ୟଂ ଜିତଂ ଅୱଜୀୟତି ।
ତଂ ଖୋ ଜିତଂ ସାଧୁ ଜିତଂ, ୟଂ ଜିତଂ ନାୱଜୀୟତୀତି ॥
କୁଦ୍ଦାଲଜାତକଂ ଦସମଂ ।
ଇତ୍ଥିୱଗ୍ଗୋ ସତ୍ତମୋ ।
ତସ୍ସୁଦ୍ଦାନଂ –
ସିଖୀସବ୍ବଘସୋପି ଚ ୱୀଣୱରୋ, ପିସୁଣା ମିତ୍ତଭେଦିକା ନନ୍ଦୀ ନଦୀ ।
ମୁଦୁଲକ୍ଖଣ ସୋଦରିୟା ଚ ମନୋ, ୱିସ ସାଧୁଜିତେନ ଭୱନ୍ତି ଦସାତି ॥
୮. ୱରୁଣୱଗ୍ଗୋ
୭୧. ୱରୁଣଜାତକଂ
ୟୋ ପୁବ୍ବେ କରଣୀୟାନି, ପଚ୍ଛା ସୋ କାତୁମିଚ୍ଛତି ।
ୱରୁଣକଟ୍ଠ [ୱରଣକଟ୍ଠ (ସୀ॰ ପୀ॰)] ଭଞ୍ଜୋୱ, ସ ପଚ୍ଛା ମନୁତପ୍ପତୀତି ॥
ୱରୁଣଜାତକଂ ପଠମଂ ।
୭୨. ସୀଲୱହତ୍ଥିଜାତକଂ
ଅକତଞ୍ଞୁସ୍ସ ପୋସସ୍ସ, ନିଚ୍ଚଂ ୱିୱରଦସ୍ସିନୋ ।
ସବ୍ବଂ ଚେ ପଥୱିଂ [ପଠୱିଂ (ସୀ॰ ସ୍ୟା॰ ପୀ॰)] ଦଜ୍ଜା, ନେୱ ନଂ ଅଭିରାଧୟେତି ॥
ସୀଲୱହତ୍ଥିଜାତକଂ ଦୁତିୟଂ ।
୭୩. ସଚ୍ଚଂକିରଜାତକଂ
ସଚ୍ଚଂ କିରେୱମାହଂସୁ, ନରା ଏକଚ୍ଚିୟା ଇଧ ।
କଟ୍ଠଂ ନିପ୍ଲୱିତଂ [ୱିପ୍ଲାୱିତଂ (ସୀ॰ ପୀ॰)] ସେୟ୍ୟୋ, ନ ତ୍ୱେୱେକଚ୍ଚିୟୋ ନରୋତି ॥
ସଚ୍ଚଂକିରଜାତକଂ ତତିୟଂ ।
୭୪. ରୁକ୍ଖଧମ୍ମଜାତକଂ
ସାଧୂ ସମ୍ବହୁଲା ଞାତୀ, ଅପି ରୁକ୍ଖା ଅରଞ୍ଞଜା ।
ୱାତୋ ୱହତି ଏକଟ୍ଠଂ, ବ୍ରହନ୍ତମ୍ପି ୱନପ୍ପତିନ୍ତି ॥
ରୁକ୍ଖଧମ୍ମଜାତକଂ ଚତୁତ୍ଥଂ ।
୭୫. ମଚ୍ଛଜାତକଂ
ଅଭିତ୍ଥନୟ ପଜ୍ଜୁନ୍ନ, ନିଧିଂ କାକସ୍ସ ନାସୟ ।
କାକଂ ସୋକାୟ ରନ୍ଧେହି, ମଞ୍ଚ ସୋକା ପମୋଚୟାତି ॥
ମଚ୍ଛଜାତକଂ ପଞ୍ଚମଂ ।
୭୬. ଅସଙ୍କିୟଜାତକଂ
ଅସଙ୍କିୟୋମ୍ହି ଗାମମ୍ହି, ଅରଞ୍ଞେ ନତ୍ଥି ମେ ଭୟଂ ।
ଉଜୁଂ ମଗ୍ଗଂ ସମାରୂଳ୍ହୋ, ମେତ୍ତାୟ କରୁଣାୟ ଚାତି ॥
ଅସଙ୍କିୟଜାତକଂ ଛଟ୍ଠଂ ।
୭୭. ମହାସୁପିନଜାତକଂ
ଉସଭା ରୁକ୍ଖା ଗାୱିୟୋ ଗୱା ଚ, ଅସ୍ସୋ କଂସୋ ସିଙ୍ଗାଲୀ [ସିଗାସୀ (ସୀ॰ ସ୍ୟା॰ ପୀ॰)] ଚ କୁମ୍ଭୋ ।
ପୋକ୍ଖରଣୀ ଚ ଅପାକଚନ୍ଦନଂ, ଲାବୂନି ସୀଦନ୍ତି ସିଲା ପ୍ଲୱନ୍ତି ॥
ମଣ୍ଡୂକିୟୋ କଣ୍ହସପ୍ପେ ଗିଲନ୍ତି, କାକଂ ସୁପଣ୍ଣା ପରିୱାରୟନ୍ତି ।
ତସା ୱକା ଏଳକାନଂ ଭୟାହି, ୱିପରିୟାସୋ [ୱିପରିୟାୟୋ (ସ୍ୟା॰ କ॰)] ୱତ୍ତତି ନୟିଧ ମତ୍ଥୀତି ॥
ମହାସୁପିନଜାତକଂ ସତ୍ତମଂ ।
୭୮. ଇଲ୍ଲିସଜାତକଂ
ଉଭୋ ଖଞ୍ଜା ଉଭୋ କୁଣୀ, ଉଭୋ ୱିସମଚକ୍ଖୁକା [ଚକ୍ଖୁଲା (ସୀ॰ ପୀ॰)]।
ଉଭିନ୍ନଂ ପିଳକା [ପୀଳକା (ସ୍ୟା॰)] ଜାତା, ନାହଂ ପସ୍ସାମି ଇଲ୍ଲିସନ୍ତି ॥
ଇଲ୍ଲିସଜାତକଂ ଅଟ୍ଠମଂ ।
୭୯. ଖରସ୍ସରଜାତକଂ
ୟତୋ ୱିଲୁତ୍ତା ଚ ହତା ଚ ଗାୱୋ, ଦଡ୍ଢାନି ଗେହାନି ଜନୋ ଚ ନୀତୋ ।
ଅଥାଗମା ପୁତ୍ତହତାୟ ପୁତ୍ତୋ, ଖରସ୍ସରଂ ଡିଣ୍ଡିମଂ [ଦେଣ୍ଡିମଂ (ସୀ॰ ସ୍ୟା॰ ପୀ॰), ଡିନ୍ଦିମଂ (କ॰)] ୱାଦୟନ୍ତୋତି ॥
ଖରସ୍ସରଜାତକଂ ନୱମଂ ।
୮୦. ଭୀମସେନଜାତକଂ
ୟଂ ତେ ପୱିକତ୍ଥିତଂ ପୁରେ, ଅଥ ତେ ପୂତିସରା ସଜନ୍ତି ପଚ୍ଛା ।
ଉଭୟଂ ନ ସମେତି ଭୀମସେନ, ୟୁଦ୍ଧକଥା ଚ ଇଦଞ୍ଚ ତେ ୱିହଞ୍ଞନ୍ତି ॥
ଭୀମସେନଜାତକଂ ଦସମଂ ।
ୱରୁଣୱଗ୍ଗୋ [ୱରଣୱଗ୍ଗୋ (ସୀ॰ ପୀ॰)] ଅଟ୍ଠମୋ ।
ତସ୍ସୁଦ୍ଦାନଂ –
ୱରୁଣା ଅକତଞ୍ଞୂୱରେ ତୁ ସଚ୍ଚୱରଂ, ସୱନପ୍ପତିନା ଚ ଅଭିତ୍ଥନୟ ।
କରୁଣାୟ ସିଲାପ୍ଲୱ ଇଲ୍ଲିସତୋ, ପୁନ ଡିଣ୍ଡିମପୂତିସରେନ ଦସାତି ॥
୯. ଅପାୟିମ୍ହୱଗ୍ଗୋ
୮୧. ସୁରାପାନଜାତକଂ
ଅପାୟିମ୍ହ ଅନଚ୍ଚିମ୍ହ, ଅଗାୟିମ୍ହ ରୁଦିମ୍ହ ଚ ।
ୱିସଞ୍ଞିକରଣିଂ ପିତ୍ୱା [ପୀତ୍ୱା (ସୀ॰ ସ୍ୟା॰ ପୀ॰)], ଦିଟ୍ଠା ନାହୁମ୍ହ ୱାନରାତି ॥
ସୁରାପାନଜାତକଂ ପଠମଂ ।
୮୨. ମିତ୍ତୱିନ୍ଦକଜାତକଂ
ଅତିକ୍କମ୍ମ ରମଣକଂ, ସଦାମତ୍ତଞ୍ଚ ଦୂଭକଂ ।
ସ୍ୱାସି ପାସାଣମାସୀନୋ, ୟସ୍ମା ଜୀୱଂ ନ ମୋକ୍ଖସୀତି ॥
ମିତ୍ତୱିନ୍ଦକଜାତକଂ ଦୁତିୟଂ ।
୮୩. କାଲକଣ୍ଣିଜାତକଂ
ମିତ୍ତୋ ହୱେ ସତ୍ତପଦେନ ହୋତି, ସହାୟୋ ପନ ଦ୍ୱାଦସକେନ ହୋତି ।
ମାସଡ୍ଢମାସେନ ଚ ଞାତି ହୋତି, ତତୁତ୍ତରିଂ ଅତ୍ତସମୋପି ହୋତି ।
ସୋହଂ କଥଂ ଅତ୍ତସୁଖସ୍ସ ହେତୁ, ଚିରସନ୍ଥୁତଂ [ଚିରସନ୍ଧୱଂ (କ॰), ଚିରସତ୍ଥୁନଂ (ପୀ॰)] କାଳକଣ୍ଣିଂ ଜହେୟ୍ୟନ୍ତି ॥
କାଲକଣ୍ଣିଜାତକଂ ତତିୟଂ ।
୮୪. ଅତ୍ଥସ୍ସଦ୍ୱାରଜାତକଂ
ଆରୋଗ୍ୟମିଚ୍ଛେ ପରମଞ୍ଚ ଲାଭଂ, ସୀଲଞ୍ଚ ୱୁଦ୍ଧାନୁମତଂ ସୁତଞ୍ଚ ।
ଧମ୍ମାନୁୱତ୍ତୀ ଚ ଅଲୀନତା ଚ, ଅତ୍ଥସ୍ସ ଦ୍ୱାରା ପମୁଖା ଛଳେତେତି ॥
ଅତ୍ଥସ୍ସଦ୍ୱାରଜାତକଂ ଚତୁତ୍ଥଂ ।
୮୫. କିଂପକ୍କଜାତକଂ
ଆୟତିଂ ଦୋସଂ ନାଞ୍ଞାୟ, ୟୋ କାମେ ପଟିସେୱତି ।
ୱିପାକନ୍ତେ ହନନ୍ତି ନଂ, କିଂପକ୍କମିୱ ଭକ୍ଖିତନ୍ତି ॥
କିଂପକ୍କଜାତକଂ ପଞ୍ଚମଂ ।
୮୬. ସୀଲୱୀମଂସକଜାତକଂ
ସୀଲଂ କିରେୱ କଲ୍ୟାଣଂ, ସୀଲଂ ଲୋକେ ଅନୁତ୍ତରଂ ।
ପସ୍ସ ଘୋରୱିସୋ ନାଗୋ, ସୀଲୱାତି ନ ହଞ୍ଞତୀତି ॥
ସୀଲୱୀମଂସକଜାତକଂ ଛଟ୍ଠଂ ।
୮୭. ମଙ୍ଗଲଜାତକଂ
ୟସ୍ସ ମଙ୍ଗଲା ସମୂହତାସେ [ସମୂହତା (ସୀ॰ ସ୍ୟା॰ ପୀ॰ ସୁ॰ ନି॰ ୩୬୨], ଉପ୍ପାତା [ଉପ୍ପାଦା (ପୀ॰)] ସୁପିନା ଚ ଲକ୍ଖଣା ଚ ।
ସୋ [ସ (ସୀ॰ ପୀ॰ କ॰)] ମଙ୍ଗଲଦୋସୱୀତିୱତ୍ତୋ, ୟୁଗୟୋଗାଧିଗତୋ ନ ଜାତୁମେତୀତି ॥
ମଙ୍ଗଲଜାତକଂ ସତ୍ତମଂ ।
୮୮. ସାରମ୍ଭଜାତକଂ
କଲ୍ୟାଣିମେୱ ମୁଞ୍ଚେୟ୍ୟ, ନ ହି ମୁଞ୍ଚେୟ୍ୟ ପାପିକଂ ।
ମୋକ୍ଖୋ କଲ୍ୟାଣିୟା ସାଧୁ, ମୁତ୍ୱା ତପ୍ପତି ପାପିକନ୍ତି ॥
ସାରମ୍ଭଜାତକଂ ଅଟ୍ଠମଂ ।
୮୯. କୁହକଜାତକଂ
ୱାଚାୱ କିର ତେ ଆସି, ସଣ୍ହା ସଖିଲଭାଣିନୋ ।
ତିଣମତ୍ତେ ଅସଜ୍ଜିତ୍ଥୋ, ନୋ ଚ ନିକ୍ଖସତଂ ହରନ୍ତି ॥
କୁହକଜାତକଂ ନୱମଂ ।
୯୦. ଅକତଞ୍ଞୁଜାତକଂ
ୟୋ ପୁବ୍ବେ କତକଲ୍ୟାଣୋ, କତତ୍ଥୋ ନାୱବୁଜ୍ଝତି ।
ପଚ୍ଛା କିଚ୍ଚେ ସମୁପ୍ପନ୍ନେ, କତ୍ତାରଂ ନାଧିଗଚ୍ଛତୀତି ॥
ଅକତଞ୍ଞୁଜାତକଂ ଦସମଂ ।
ଅପାୟିମ୍ହୱଗ୍ଗୋ ନୱମୋ ।
ତସ୍ସୁଦ୍ଦାନଂ –
ଅପାୟିମ୍ହ ଚ ଦୂଭକଂ ସତ୍ତପଦଂ, ଛଳଦ୍ୱର ଚ ଆୟତିନା ଚ ପୁନ ।
ଅହିସୀଲୱ ମଙ୍ଗଲି ପାପିକସ୍ସା, ସତଂନିକ୍ଖ କତତ୍ଥୱରେନ ଦସାତି ॥
୧୦. ଲିତ୍ତୱଗ୍ଗୋ
୯୧. ଲିତ୍ତଜାତକଂ
ଲିତ୍ତଂ ପରମେନ ତେଜସା, ଗିଲମକ୍ଖଂ ପୁରିସୋ ନ ବୁଜ୍ଝତି ।
ଗିଲ ରେ ଗିଲ ପାପଧୁତ୍ତକ, ପଚ୍ଛା ତେ କଟୁକଂ ଭୱିସ୍ସତୀତି ॥
ଲିତ୍ତଜାତକଂ ପଠମଂ ।
୯୨. ମହାସାରଜାତକଂ
ଉକ୍କଟ୍ଠେ ସୂରମିଚ୍ଛନ୍ତି, ମନ୍ତୀସୁ ଅକୁତୂହଲଂ ।
ପିୟଞ୍ଚ ଅନ୍ନପାନମ୍ହି, ଅତ୍ଥେ ଜାତେ ଚ ପଣ୍ଡିତନ୍ତି ॥
ମହାସାରଜାତକଂ ଦୁତିୟଂ ।
୯୩. ୱିସାସଭୋଜନଜାତକଂ
ନ ୱିସ୍ସସେ ଅୱିସ୍ସତ୍ଥେ, ୱିସ୍ସତ୍ଥେପି ନ ୱିସ୍ସସେ ।
ୱିସ୍ସାସା ଭୟମନ୍ୱେତି, ସୀହଂୱ ମିଗମାତୁକାତି [ମିଗମାତୁୟା (କ॰)]॥
ୱିସାସଭୋଜନଜାତକଂ ତତିୟଂ ।
୯୪. ଲୋମହଂସଜାତକଂ
ସୋତତ୍ତୋ ସୋସିନ୍ଦୋ [ସୋସୀତୋ (ସୀ॰ ସ୍ୟା॰ ପୀ॰), ସୋସିନୋ (କ॰)] ଚେୱ, ଏକୋ ଭିଂସନକେ ୱନେ ।
ନଗ୍ଗୋ ନ ଚଗ୍ଗିମାସୀନୋ, ଏସନାପସୁତୋ ମୁନୀତି ॥
ଲୋମହଂସଜାତକଂ ଚତୁତ୍ଥଂ ।
୯୫. ମହାସୁଦସ୍ସନଜାତକଂ
ଅନିଚ୍ଚା ୱତ ସଙ୍ଖାରା, ଉପ୍ପାଦୱୟଧମ୍ମିନୋ ।
ଉପ୍ପଜ୍ଜିତ୍ୱା ନିରୁଜ୍ଝନ୍ତି, ତେସଂ ୱୂପସମୋ ସୁଖୋତି ॥
ମହାସୁଦସ୍ସନଜାତକଂ ପଞ୍ଚମଂ ।
୯୬. ତେଲପତ୍ତଜାତକଂ
ସମତିତ୍ତିକଂ ଅନୱସେକଂ, ତେଲପତ୍ତଂ ୟଥା ପରିହରେୟ୍ୟ ।
ଏୱଂ ସଚିତ୍ତମନୁରକ୍ଖେ, ପତ୍ଥୟାନୋ ଦିସଂ ଅଗତପୁବ୍ବନ୍ତି ॥
ତେଲପତ୍ତଜାତକଂ ଛଟ୍ଠଂ ।
୯୭. ନାମସିଦ୍ଧିଜାତକଂ
ଜୀୱକଞ୍ଚ ମତଂ ଦିସ୍ୱା, ଧନପାଲିଞ୍ଚ ଦୁଗ୍ଗତଂ ।
ପନ୍ଥକଞ୍ଚ ୱନେ ମୂଳ୍ହଂ, ପାପକୋ ପୁନରାଗତୋତି ॥
ନାମସିଦ୍ଧିଜାତକଂ ସତ୍ତମଂ ।
୯୮. କୂଟୱାଣିଜଜାତକଂ
ସାଧୁ ଖୋ ପଣ୍ଡିତୋ ନାମ, ନ ତ୍ୱେୱ ଅତିପଣ୍ଡିତୋ ।
ଅତିପଣ୍ଡିତେନ ପୁତ୍ତେନ, ମନମ୍ହି ଉପକୂଳିତୋତି [ଉପକୂଲିତୋତି (ସୀ॰), ଉପକୁଟ୍ଠିତୋତି (ସ୍ୟା॰), ଉପକୁଟିତୋ (କ॰)]॥
କୂଟୱାଣିଜଜାତକଂ ଅଟ୍ଠମଂ ।
୯୯. ପରୋସହସ୍ସଜାତକଂ
ପରୋସହସ୍ସମ୍ପି ସମାଗତାନଂ, କନ୍ଦେୟ୍ୟୁଂ ତେ ୱସ୍ସସତଂ ଅପଞ୍ଞା ।
ଏକୋୱ ସେୟ୍ୟୋ ପୁରିସୋ ସପଞ୍ଞୋ, ୟୋ ଭାସିତସ୍ସ ୱିଜାନାତି ଅତ୍ଥନ୍ତି ॥
ପରୋସହସ୍ସଜାତକଂ ନୱମଂ ।
୧୦୦. ଅସାତରୂପଜାତକଂ
ଅସାତଂ ସାତରୂପେନ, ପିୟରୂପେନ ଅପ୍ପିୟଂ ।
ଦୁକ୍ଖଂ ସୁଖସ୍ସ ରୂପେନ, ପମତ୍ତମତିୱତ୍ତତୀତି ॥
ଅସାତରୂପଜାତକଂ ଦସମଂ ।
ଲିତ୍ତୱଗ୍ଗୋ ଦସମୋ ।
ତସ୍ସୁଦ୍ଦାନଂ –
ଗିଲମକ୍ଖକୁତୂହଲ ମାତୁକସ୍ସା, ମୁନିନା ଚ ଅନିଚ୍ଚତ ପତ୍ତୱରଂ ।
ଧନପାଲିୱରୋ ଅତିପଣ୍ଡିତକୋ, ସପରୋସହସ୍ସଅସାତଦସାତି ॥
ମଜ୍ଝିମୋ ପଣ୍ଣାସକୋ ।
୧୧. ପରୋସତୱଗ୍ଗୋ
୧୦୧. ପରୋସତଜାତକଂ
ପରୋସତଂ ଚେପି ସମାଗତାନଂ, ଝାୟେୟ୍ୟୁଂ ତେ ୱସ୍ସସତଂ ଅପଞ୍ଞା ।
ଏକୋୱ ସେୟ୍ୟୋ ପୁରିସୋ ସପଞ୍ଞୋ, ୟୋ ଭାସିତସ୍ସ ୱିଜାନାତି ଅତ୍ଥନ୍ତି ॥
ପରୋସତଜାତକଂ ପଠମଂ ।
୧୦୨. ପଣ୍ଣିକଜାତକଂ
ୟୋ ଦୁକ୍ଖଫୁଟ୍ଠାୟ ଭୱେୟ୍ୟ ତାଣଂ, ସୋ ମେ ପିତା ଦୁବ୍ଭି [ଦୂଭି (ସୀ॰ ପୀ॰)] ୱନେ କରୋତି ।
ସା କସ୍ସ କନ୍ଦାମି ୱନସ୍ସ ମଜ୍ଝେ, ୟୋ ତାୟିତା ସୋ ସହସଂ [ସହସା (ସୀ॰ ସ୍ୟା॰ ପୀ॰)] କରୋତୀତି ॥
ପଣ୍ଣିକଜାତକଂ ଦୁତିୟଂ ।
୧୦୩. ୱେରିଜାତକଂ
ୟତ୍ଥ ୱେରୀ ନିୱିସତି [ନିୱସତି (ସୀ॰ କ॰)], ନ ୱସେ ତତ୍ଥ ପଣ୍ଡିତୋ ।
ଏକରତ୍ତଂ ଦିରତ୍ତଂ ୱା, ଦୁକ୍ଖଂ ୱସତି ୱେରିସୂତି ॥
ୱେରିଜାତକଂ ତତିୟଂ ।
୧୦୪. ମିତ୍ତୱିନ୍ଦକଜାତକଂ
ଚତୁବ୍ଭି ଅଟ୍ଠଜ୍ଝଗମା, ଅଟ୍ଠାହିପି ଚ ସୋଳସ ।
ସୋଳସାହି ଚ ବାତ୍ତିଂସ [ବତ୍ତିଂସ (ସୀ॰ ସ୍ୟା॰ ପୀ॰)], ଅତ୍ରିଚ୍ଛଂ ଚକ୍କମାସଦୋ ।
ଇଚ୍ଛାହତସ୍ସ ପୋସସ୍ସ, ଚକ୍କଂ ଭମତି ମତ୍ଥକେତି ॥
ମିତ୍ତୱିନ୍ଦକଜାତକଂ ଚତୁତ୍ଥଂ ।
୧୦୫. ଦୁବ୍ବଲକଟ୍ଠଜାତକଂ
ବହୁମ୍ପେତଂ ୱନେ କଟ୍ଠଂ, ୱାତୋ ଭଞ୍ଜତି ଦୁବ୍ବଲଂ ।
ତସ୍ସ ଚେ ଭାୟସୀ ନାଗ, କିସୋ ନୂନ ଭୱିସ୍ସସୀତି ॥
ଦୁବ୍ବଲକଟ୍ଠଜାତକଂ ପଞ୍ଚମଂ ।
୧୦୬. ଉଦଞ୍ଚନୀଜାତକଂ
ସୁଖଂ ୱତ ମଂ ଜୀୱନ୍ତଂ [ସୁଖକଂ ୱତ ଜୀୱଂ (କ॰)], ପଚମାନା ଉଦଞ୍ଚନୀ ।
ଚୋରୀ ଜାୟପ୍ପୱାଦେନ, ତେଲଂ ଲୋଣଞ୍ଚ ୟାଚତୀତି ॥
ଉଦଞ୍ଚନୀଜାତକଂ ଛଟ୍ଠଂ ।
୧୦୭. ସାଲିତ୍ତକଜାତକଂ
ସାଧୁ ଖୋ ସିପ୍ପକଂ ନାମ, ଅପି ୟାଦିସ କୀଦିସଂ ।
ପସ୍ସ ଖଞ୍ଜପ୍ପହାରେନ, ଲଦ୍ଧା ଗାମା ଚତୁଦ୍ଦିସାତି ॥
ସାଲିତ୍ତକଜାତକଂ ସତ୍ତମଂ ।
୧୦୮. ବାହିୟଜାତକଂ
ସିକ୍ଖେୟ୍ୟ ସିକ୍ଖିତବ୍ବାନି, ସନ୍ତି ତଚ୍ଛନ୍ଦିନୋ [ସଚ୍ଛନ୍ଦିନୋ (ସୀ॰ ପୀ॰)] ଜନା ।
ବାହିୟା ହି [ପି (ସୀ॰ ସ୍ୟା॰ ପୀ॰)] ସୁହନ୍ନେନ, ରାଜାନମଭିରାଧୟୀତି ॥
ବାହିୟଜାତକଂ ଅଟ୍ଠମଂ ।
୧୦୯. କୁଣ୍ଡପୂୱଜାତକଂ
ୟଥନ୍ନୋ ପୁରିସୋ ହୋତି, ତଥନ୍ନା ତସ୍ସ ଦେୱତା ।
ଆହରେତଂ କୁଣ୍ଡପୂୱଂ [କଣଂ ପୂୱଂ (ସୀ॰ ପୀ॰)], ମା ମେ ଭାଗଂ ୱିନାସୟାତି ॥
କୁଣ୍ଡପୂୱଜାତକଂ ନୱମଂ ।
୧୧୦. ସବ୍ବସଂହାରକପଞ୍ହଜାତକଂ
ସବ୍ବସଂହାରକୋ [ସବ୍ବସାହାରକୋ (କ॰)] ନତ୍ଥି, ସୁଦ୍ଧଂ କଙ୍ଗୁ ପୱାୟତି ।
ଅଲିକଂ ଭାୟତିୟଂ ଧୁତ୍ତୀ, ସଚ୍ଚମାହ ମହଲ୍ଲିକାତି ॥
ସବ୍ବସଂହାରକପଞ୍ହଜାତକଂ ଦସମଂ ।
ପରୋସତୱଗ୍ଗୋ ଏକାଦସମୋ ।
ତସ୍ସୁଦ୍ଦାନଂ –
ସପରୋସତ ତାୟିତ ୱେରୀ ପୁନ, ଭମଚକ୍କଥ ନାଗସିରିୱ୍ହୟନୋ ।
ସୁଖକଞ୍ଚ ୱତ ସିପ୍ପକ ବାହିୟା, କୁଣ୍ଡପୂୱ ମହଲ୍ଲିକକା ଚ ଦସାତି ॥
୧୨. ହଂଚିୱଗ୍ଗୋ
୧୧୧. ଗଦ୍ରଭପଞ୍ହଜାତକଂ
ହଂଚି [ହଂସି (ସୀ॰ ସ୍ୟା॰), ହଞ୍ଚି ( ?)] ତୁୱଂ ଏୱମଞ୍ଞସି ସେୟ୍ୟୋ, ପୁତ୍ତେନ ପିତାତି ରାଜସେଟ୍ଠ ।
ହନ୍ଦସ୍ସତରସ୍ସ ତେ ଅୟଂ, ଅସ୍ସତରସ୍ସ ହି ଗଦ୍ରଭୋ ପିତାତି ॥
ଗଦ୍ରଭପଞ୍ହଜାତକଂ ପଠମଂ ।
୧୧୨. ଅମରାଦେୱୀପଞ୍ହଜାତକଂ
ୟେନ ସତ୍ତୁବିଲଙ୍ଗା ଚ, ଦିଗୁଣପଲାସୋ ଚ ପୁପ୍ଫିତୋ ।
ୟେନ ଦଦାମି [ୟେନା’ଦାମି (ସୀ॰ ସ୍ୟା॰)] ତେନ ୱଦାମି, ୟେନ ନ ଦଦାମି [ୟେନ ନା’ଦାମି (ସୀ॰ ସ୍ୟା॰)] ନ ତେନ ୱଦାମି ।
ଏସ ମଗ୍ଗୋ ୟୱମଜ୍ଝକସ୍ସ, ଏତଂ ଛନ୍ନପଥଂ ୱିଜାନାହୀତି ॥
ଅମରାଦେୱୀପଞ୍ହଜାତକଂ ଦୁତିୟଂ ।
୧୧୩. ସିଙ୍ଗାଲଜାତକଂ
ସଦ୍ଦହାସି ସିଙ୍ଗାଲସ୍ସ [ସିଗାଲସ୍ସ (ସୀ॰ ସ୍ୟା॰ ପୀ॰)], ସୁରାପୀତସ୍ସ ବ୍ରାହ୍ମଣ ।
ସିପ୍ପିକାନଂ ସତଂ ନତ୍ଥି, କୁତୋ କଂସସତା ଦୁୱେତି ॥
ସିଙ୍ଗାଲଜାତକଂ ତତିୟଂ ।
୧୧୪. ମିତଚିନ୍ତିଜାତକଂ
ବହୁଚିନ୍ତୀ ଅପ୍ପଚିନ୍ତୀ, ଉଭୋ ଜାଲେ ଅବଜ୍ଝରେ ।
ମିତଚିନ୍ତୀ ପମୋଚେସୀ, ଉଭୋ ତତ୍ଥ ସମାଗତାତି ॥
ମିତଚିନ୍ତିଜାତକଂ ଚତୁତ୍ଥଂ ।
୧୧୫. ଅନୁସାସିକଜାତକଂ
ୟାୟଞ୍ଞ [ୟାୟଞ୍ଞେ (କ॰)] ମନୁସାସତି, ସୟଂ ଲୋଲୁପ୍ପଚାରିନୀ ।
ସାୟଂ ୱିପକ୍ଖିକା ସେତି, ହତା ଚକ୍କେନ ସାସିକାତି [ସାଲିକାତି (ସୀ॰ ସ୍ୟା॰ ପୀ॰)]॥
ଅନୁସାସିକଜାତକଂ ପଞ୍ଚମଂ ।
୧୧୬. ଦୁବ୍ବଚଜାତକଂ
ଅତିକରମକରାଚରିୟ, ମୟ୍ହମ୍ପେତଂ ନ ରୁଚ୍ଚତି ।
ଚତୁତ୍ଥେ ଲଙ୍ଘୟିତ୍ୱାନ, ପଞ୍ଚମାୟସି ଆୱୁତୋତି ॥
ଦୁବ୍ବଚଜାତକଂ ଛଟ୍ଠଂ ।
୧୧୭. ତିତ୍ତିରଜାତକଂ
ଅଚ୍ଚୁଗ୍ଗତାତିଲପତା [ଅତିବଲତା (ସୀ॰ ସ୍ୟା॰ ପୀ॰), ଅତିଲପକା (କତ୍ଥଚି)], ଅତିୱେଲଂ ପଭାସିତା ।
ୱାଚା ହନତି ଦୁମ୍ମେଧଂ, ତିତ୍ତିରଂୱାତିୱସ୍ସିତନ୍ତି ॥
ତିତ୍ତିରଜାତକଂ ସତ୍ତମଂ ।
୧୧୮. ୱଟ୍ଟକଜାତକଂ
ନାଚିନ୍ତୟନ୍ତୋ ପୁରିସୋ, ୱିସେସମଧିଗଚ୍ଛତି ।
ଚିନ୍ତିତସ୍ସ ଫଲଂ ପସ୍ସ, ମୁତ୍ତୋସ୍ମି ୱଧବନ୍ଧନାତି ॥
ୱଟ୍ଟକଜାତକଂ ଅଟ୍ଠମଂ ।
୧୧୯. ଅକାଲରାୱିଜାତକଂ
ଅମାତାପିତରସଂୱଦ୍ଧୋ [ପିତରି (ସୀ॰ ପୀ॰), ପିତୁ (ସ୍ୟା॰)], ଅନାଚେରକୁଲେ ୱସଂ ।
ନାୟଂ କାଲଂ ଅକାଲଂ ୱା, ଅଭିଜାନାତି କୁକ୍କୁଟୋତି ॥
ଅକାଲରାୱିଜାତକଂ ନୱମଂ ।
୧୨୦. ବନ୍ଧନମୋକ୍ଖଜାତକଂ
ଅବଦ୍ଧା ତତ୍ଥ ବଜ୍ଝନ୍ତି, ୟତ୍ଥ ବାଲା ପଭାସରେ ।
ବଦ୍ଧାପି ତତ୍ଥ ମୁଚ୍ଚନ୍ତି, ୟତ୍ଥ ଧୀରା ପଭାସରେତି ॥
ବନ୍ଧନମୋକ୍ଖଜାତକଂ ଦସମଂ ।
ହଂଚିୱଗ୍ଗୋ [ହଂସିୱଗ୍ଗୋ (ସୀ॰ ସ୍ୟା॰)] ଦ୍ୱାଦସମୋ ।
ତସ୍ସୁଦ୍ଦାନଂ –
ଅଥ ଗଦ୍ରଭ ସତ୍ତୁୱ କଂସସତଂ, ବହୁଚିନ୍ତି ସାସିକାୟାତିକର ।
ଅତିୱେଲ ୱିସେସମନାଚରିୟୋୱ, ଧୀରାପଭାସରତେନ ଦସାତି ॥
୧୩. କୁସନାଳିୱଗ୍ଗୋ
୧୨୧. କୁସନାଳିଜାତକଂ
କରେ ସରିକ୍ଖୋ ଅଥ ୱାପି ସେଟ୍ଠୋ, ନିହୀନକୋ ୱାପି କରେୟ୍ୟ ଏକୋ ।
କରେୟ୍ୟୁମେତେ [କରେୟ୍ୟୁଂ ତେ (ସୀ॰ ପୀ॰)] ବ୍ୟସନେ ଉତ୍ତମତ୍ଥଂ, ୟଥା ଅହଂ କୁସନାଳି ରୁଚାୟନ୍ତି ॥
କୁସନାଳିଜାତକଂ ପଠମଂ ।
୧୨୨. ଦୁମ୍ମେଧଜାତକଂ
ୟସଂ ଲଦ୍ଧାନ ଦୁମ୍ମେଧୋ, ଅନତ୍ଥଂ ଚରତି ଅତ୍ତନୋ ।
ଅତ୍ତନୋ ଚ ପରେସଞ୍ଚ, ହିଂସାୟ ପଟିପଜ୍ଜତୀତି ॥
ଦୁମ୍ମେଧଜାତକଂ ଦୁତିୟଂ ।
୧୨୩. ନଙ୍ଗଲୀସଜାତକଂ
ଅସବ୍ବତ୍ଥଗାମିଂ ୱାଚଂ, ବାଲୋ ସବ୍ବତ୍ଥ ଭାସତି ।
ନାୟଂ ଦଧିଂ ୱେଦି ନ [ନ ୱେଦି (କ॰)] ନଙ୍ଗଲୀସଂ, ଦଧିପ୍ପୟଂ [ଦଧିମ୍ପୟଂ (ସୀ॰ ପୀ॰)] ମଞ୍ଞତି ନଙ୍ଗଲୀସନ୍ତି ॥
ନଙ୍ଗଲୀସଜାତକଂ ତତିୟଂ ।
୧୨୪. ଅମ୍ବଜାତକଂ
ୱାୟମେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ୱାୟାମସ୍ସ ଫଲଂ ପସ୍ସ, ଭୁତ୍ତା ଅମ୍ବା ଅନୀତିହନ୍ତି ॥
ଅମ୍ବଜାତକଂ ଚତୁତ୍ଥଂ ।
୧୨୫. କଟାହକଜାତକଂ
ବହୁମ୍ପି ସୋ ୱିକତ୍ଥେୟ୍ୟ, ଅଞ୍ଞଂ ଜନପଦଂ ଗତୋ ।
ଅନ୍ୱାଗନ୍ତ୍ୱାନ ଦୂସେୟ୍ୟ, ଭୁଞ୍ଜ ଭୋଗେ କଟାହକାତି ॥
କଟାହକଜାତକଂ ପଞ୍ଚମଂ ।
୧୨୬. ଅସିଲକ୍ଖଣଜାତକଂ
ତଦେୱେକସ୍ସ [ତଥେୱେକସ୍ସ (ସୀ॰ ସ୍ୟା॰ ପୀ॰ ଅଟ୍ଠ॰ ମୂଲପାଠୋ)] କଲ୍ୟାଣଂ, ତଦେୱେକସ୍ସ ପାପକଂ ।
ତସ୍ମା ସବ୍ବଂ ନ କଲ୍ୟାଣଂ, ସବ୍ବଂ ୱାପି ନ ପାପକନ୍ତି ॥
ଅସିଲକ୍ଖଣଜାତକଂ ଛଟ୍ଠଂ ।
୧୨୭. କଲଣ୍ଡୁକଜାତକଂ
ତେ ଦେସା ତାନି ୱତ୍ଥୂନି, ଅହଞ୍ଚ ୱନଗୋଚରୋ ।
ଅନୁୱିଚ୍ଚ ଖୋ ତଂ ଗଣ୍ହେୟ୍ୟୁଂ, ପିୱ [ପିପ (ସୀ॰ ପୀ॰)] ଖୀରଂ କଲଣ୍ଡୁକାତି ॥
କଲଣ୍ଡୁକଜାତକଂ ସତ୍ତମଂ ।
୧୨୮. ବିଳାରୱତଜାତକଂ
ୟୋ ୱେ ଧମ୍ମଂ ଧଜଂ [ଧମ୍ମଧଜଂ (ସ୍ୟା॰ ପୀ॰ କ॰)] କତ୍ୱା, ନିଗୂଳ୍ହୋ ପାପମାଚରେ ।
ୱିସ୍ସାସୟିତ୍ୱା ଭୂତାନି, ବିଳାରଂ ନାମ ତଂ ୱତନ୍ତି ॥
ବିଳାରୱତଜାତକଂ ଅଟ୍ଠମଂ ।
୧୨୯. ଅଗ୍ଗିକଭାରଦ୍ୱାଜଜାତକଂ
ନାୟଂ ସିଖା ପୁଞ୍ଞହେତୁ, ଘାସହେତୁ ଅୟଂ ସିଖା ।
ନାଙ୍ଗୁଟ୍ଠଗଣନଂ ୟାତି, ଅଲଂ ତେ ହୋତୁ ଅଗ୍ଗିକାତି ॥
ଅଗ୍ଗିକଭାରଦ୍ୱାଜଜାତକଂ ନୱମଂ ।
୧୩୦. କୋସିୟଜାତକଂ
ୟଥା ୱାଚା ଚ ଭୁଞ୍ଜସ୍ସୁ, ୟଥା ଭୁତ୍ତଞ୍ଚ ବ୍ୟାହର ।
ଉଭୟଂ ତେ ନ ସମେତି, ୱାଚା ଭୁତ୍ତଞ୍ଚ କୋସିୟେତି ॥
କୋସିୟଜାତକଂ ଦସମଂ ।
କୁସନାଳିୱଗ୍ଗୋ [ସରିକ୍ଖୱଗ୍ଗୋ (କ॰)] ତେରସମୋ ।
ତସ୍ସୁଦ୍ଦାନଂ –
କୁସନାଳିସିରିୱ୍ହୟନୋ ଚ ୟସଂ, ଦଧି ମମ୍ବ କଟାହକପଞ୍ଚମକୋ ।
ଅଥ ପାପକ ଖୀର ବିଳାରୱତଂ, ସିଖି କୋସିୟସୱ୍ହୟନେନ ଦସାତି ॥
୧୪. ଅସମ୍ପଦାନୱଗ୍ଗୋ
୧୩୧. ଅସମ୍ପଦାନଜାତକଂ
ଅସମ୍ପଦାନେନିତରୀତରସ୍ସ, ବାଲସ୍ସ ମିତ୍ତାନି କଲୀ ଭୱନ୍ତି ।
ତସ୍ମା ହରାମି ଭୁସଂ ଅଡ୍ଢମାନଂ, ମା ମେ ମିତ୍ତି ଜୀୟିତ୍ଥ ସସ୍ସତାୟନ୍ତି ॥
ଅସମ୍ପଦାନଜାତକଂ ପଠମଂ ।
୧୩୨. ଭୀରୁକଜାତକଂ
କୁସଲୂପଦେସେ ଧିତିୟା ଦଳ୍ହାୟ ଚ, ଅନିୱତ୍ତିତତ୍ତାଭୟଭୀରୁତାୟ [ଅୱତ୍ଥିତତ୍ତାଭୟଭୀରୁତାୟ (ସୀ॰ ସ୍ୟା॰ ପୀ॰)] ଚ ।
ନ ରକ୍ଖସୀନଂ ୱସମାଗମିମ୍ହସେ, ସ ସୋତ୍ଥିଭାୱୋ ମହତା ଭୟେନ ମେତି ॥
ଭୀରୁକ [ପଞ୍ଚଗରୁକ (ସୀ॰ ପୀ॰), ପଞ୍ଚଭୀରୁକ (ସ୍ୟା॰), ଅଭୟଭୀରୁତ§( ?)] ଜାତକଂ ଦୁତିୟଂ ।
୧୩୩. ଘତାସନଜାତକଂ
ଖେମଂ ୟହିଂ ତତ୍ଥ ଅରୀ ଉଦୀରିତୋ [ଅରି ଉଦ୍ଧରିତୋ (କ॰)], ଦକସ୍ସ ମଜ୍ଝେ ଜଲତେ ଘତାସନୋ ।
ନ ଅଜ୍ଜ ୱାସୋ ମହିୟା ମହୀରୁହେ, ଦିସା ଭଜୱ୍ହୋ ସରଣାଜ୍ଜ ନୋ ଭୟନ୍ତି ॥
ଘତାସନଜାତକଂ ତତିୟଂ ।
୧୩୪. ଝାନସୋଧନଜାତକଂ
ୟେ ସଞ୍ଞିନୋ ତେପି ଦୁଗ୍ଗତା, ୟେପି ଅସଞ୍ଞିନୋ ତେପି ଦୁଗ୍ଗତା ।
ଏତଂ ଉଭୟଂ ୱିୱଜ୍ଜୟ, ତଂ ସମାପତ୍ତିସୁଖଂ ଅନଙ୍ଗଣନ୍ତି ॥
ଝାନସୋଧନଜାତକଂ ଚତୁତ୍ଥଂ ।
୧୩୫. ଚନ୍ଦାଭଜାତକଂ
ଚନ୍ଦାଭଂ ସୂରିୟାଭଞ୍ଚ, ୟୋଧ ପଞ୍ଞାୟ ଗାଧତି ॥
ଅୱିତକ୍କେନ ଝାନେନ, ହୋତି ଆଭସ୍ସରୂପଗୋତି ॥
ଚନ୍ଦାଭଜାତକଂ ପଞ୍ଚମଂ ।
୧୩୬. ସୁୱଣ୍ଣହଂସଜାତକଂ
ୟଂ ଲଦ୍ଧଂ ତେନ ତୁଟ୍ଠବ୍ବଂ, ଅତିଲୋଭୋ ହି ପାପକୋ ।
ହଂସରାଜଂ ଗହେତ୍ୱାନ, ସୁୱଣ୍ଣା ପରିହାୟଥାତି ॥
ସୁୱଣ୍ଣହଂସଜାତକଂ ଛଟ୍ଠଂ ।
୧୩୭. ବବ୍ବୁଜାତକଂ
ୟତ୍ଥେକୋ ଲଭତେ ବବ୍ବୁ, ଦୁତିୟୋ ତତ୍ଥ ଜାୟତି ।
ତତିୟୋ ଚ ଚତୁତ୍ଥୋ ଚ, ଇଦଂ ତେ ବବ୍ବୁକା ବିଲନ୍ତି ॥
ବବ୍ବୁଜାତକଂ ସତ୍ତମଂ ।
୧୩୮. ଗୋଧଜାତକଂ
କିଂ ତେ ଜଟାହି ଦୁମ୍ମେଧ, କିଂ ତେ ଅଜିନସାଟିୟା ।
ଅବ୍ଭନ୍ତରଂ ତେ ଗହନଂ, ବାହିରଂ ପରିମଜ୍ଜସୀତି ॥
ଗୋଧଜାତକଂ ଅଟ୍ଠମଂ ।
୧୩୯. ଉଭତୋଭଟ୍ଠଜାତକଂ
ଅକ୍ଖୀ ଭିନ୍ନା ପଟୋ ନଟ୍ଠୋ, ସଖିଗେହେ ଚ ଭଣ୍ଡନଂ ।
ଉଭତୋ ପଦୁଟ୍ଠା କମ୍ମନ୍ତା [ପଦୁଟ୍ଠକମ୍ମନ୍ତୋ (ସୀ॰), ପଦୁଟ୍ଠୋ କମ୍ମନ୍ତୋ (ପୀ॰)], ଉଦକମ୍ହି ଥଲମ୍ହି ଚାତି ॥
ଉଭତୋଭଟ୍ଠଜାତକଂ ନୱମଂ ।
୧୪୦. କାକଜାତକଂ
ନିଚ୍ଚଂ ଉବ୍ବିଗ୍ଗହଦୟା, ସବ୍ବଲୋକୱିହେସକା ।
ତସ୍ମା ନେସଂ ୱସା ନତ୍ଥି, କାକାନମ୍ହାକ [କାକାନସ୍ମାକ (ସୀ॰ ସ୍ୟା॰ ପୀ॰)] ଞାତିନନ୍ତି ॥
କାକଜାତକଂ ଦସମଂ ।
ଅସମ୍ପଦାନୱଗ୍ଗୋ ଚୁଦ୍ଦସମୋ ।
ତସ୍ସୁଦ୍ଦାନଂ –
ଇତରୀତର ରକ୍ଖସି ଖେମିୟୋ ଚ, ପରୋସତପଞ୍ହେନ ଆଭସ୍ସରୋ ପୁନ ।
ଅଥ ହଂସୱରୁତ୍ତମବବ୍ବୁଜଟଂ, ପଟନଟ୍ଠକ କାକୱରେନ ଦସାତି ॥
୧୫. କକଣ୍ଟକୱଗ୍ଗୋ
୧୪୧. ଗୋଧଜାତକଂ
ନ ପାପଜନସଂସେୱୀ, ଅଚ୍ଚନ୍ତସୁଖମେଧତି ।
ଗୋଧାକୁଲଂ [ଗୋଧକ୍କୁଲଂ (କ॰)] କକଣ୍ଟାୱ [କକଣ୍ଟକା (କ॰)], କଲିଂ ପାପେତି ଅତ୍ତନନ୍ତି ॥
ଗୋଧଜାତକଂ ପଠମଂ ।
୧୪୨. ସିଙ୍ଗାଲଜାତକଂ
ଏତଞ୍ହି ତେ ଦୁରାଜାନଂ, ୟଂ ସେସି ମତସାୟିକଂ ।
ୟସ୍ସ ତେ କଡ୍ଢମାନସ୍ସ, ହତ୍ଥା ଦଣ୍ଡୋ ନ ମୁଚ୍ଚତୀତି ॥
ସିଙ୍ଗାଲଜାତକଂ ଦୁତିୟଂ ।
୧୪୩. ୱିରୋଚଜାତକଂ
ଲସୀ ଚ ତେ ନିପ୍ଫଲିତା, ମତ୍ଥକୋ ଚ ପଦାଲିତୋ [ୱିଦାଲିତୋ (ସୀ॰ ପୀ॰)]।
ସବ୍ବା ତେ ଫାସୁକା ଭଗ୍ଗା, ଅଜ୍ଜ ଖୋ ତ୍ୱଂ ୱିରୋଚସୀତି ॥
ୱିରୋଚଜାତକଂ ତତିୟଂ ।
୧୪୪. ନଙ୍ଗୁଟ୍ଠଜାତକଂ
ବହୁମ୍ପେତଂ ଅସବ୍ଭି [ବହୁପେତମସବ୍ଭି (କ॰)] ଜାତୱେଦ, ୟଂ ତଂ ୱାଲଧିନାଭିପୂଜୟାମ ।
ମଂସାରହସ୍ସ ନତ୍ଥଜ୍ଜ ମଂସଂ, ନଙ୍ଗୁଟ୍ଠମ୍ପି ଭୱଂ ପଟିଗ୍ଗହାତୂତି ॥
ନଙ୍ଗୁଟ୍ଠଜାତକଂ ଚତୁତ୍ଥଂ ।
୧୪୫. ରାଧଜାତକଂ
ନ ତ୍ୱଂ ରାଧ ୱିଜାନାସି, ଅଡ୍ଢରତ୍ତେ ଅନାଗତେ ।
ଅବ୍ୟୟତଂ [ଅବ୍ୟାୟତଂ (ସୀ॰ ସ୍ୟା॰ ପୀ॰), ଅବ୍ୟତ୍ତତଂ ( ?)] ୱିଲପସି, ୱିରତ୍ତା କୋସିୟାୟନେତି ॥
ରାଧଜାତକଂ ପଞ୍ଚମଂ ।
୧୪୬. ସମୁଦ୍ଦକାକଜାତକଂ
ଅପି ନୁ ହନୁକା ସନ୍ତା, ମୁଖଞ୍ଚ ପରିସୁସ୍ସତି ।
ଓରମାମ ନ ପାରେମ, ପୂରତେୱ ମହୋଦଧୀତି ॥
ସମୁଦ୍ଦକାକଜାତକଂ ଛଟ୍ଠଂ ।
୧୪୭. ପୁପ୍ଫରତ୍ତଜାତକଂ
ନୟିଦଂ ଦୁକ୍ଖଂ ଅଦୁଂ ଦୁକ୍ଖଂ, ୟଂ ମଂ ତୁଦତି ୱାୟସୋ ।
ୟଂ ସାମା ପୁପ୍ଫରତ୍ତେନ, କତ୍ତିକଂ ନାନୁଭୋସ୍ସତୀତି ॥
ପୁପ୍ଫରତ୍ତଜାତକଂ ସତ୍ତମଂ ।
୧୪୮. ସିଙ୍ଗାଲଜାତକଂ
ନାହଂ ପୁନଂ ନ ଚ ପୁନଂ, ନ ଚାପି ଅପୁନପ୍ପୁନଂ ।
ହତ୍ଥିବୋନ୍ଦିଂ ପୱେକ୍ଖାମି, ତଥା ହି ଭୟତଜ୍ଜିତୋତି ॥
ସିଙ୍ଗାଲଜାତକଂ ଅଟ୍ଠମଂ ।
୧୪୯. ଏକପଣ୍ଣଜାତକଂ
ଏକପଣ୍ଣୋ ଅୟଂ ରୁକ୍ଖୋ, ନ ଭୂମ୍ୟା ଚତୁରଙ୍ଗୁଲୋ ।
ଫଲେନ ୱିସକପ୍ପେନ, ମହାୟଂ କିଂ ଭୱିସ୍ସତୀତି ॥
ଏକପଣ୍ଣଜାତକଂ ନୱମଂ ।
୧୫୦. ସଞ୍ଜୀୱଜାତକଂ
ଅସନ୍ତଂ ୟୋ ପଗ୍ଗଣ୍ହାତି, ଅସନ୍ତଂ ଚୂପସେୱତି ।
ତମେୱ ଘାସଂ କୁରୁତେ, ବ୍ୟଗ୍ଘୋ ସଞ୍ଜୀୱକୋ ୟଥାତି ॥
ସଞ୍ଜୀୱଜାତକଂ ଦସମଂ ।
କକଣ୍ଟକ [ପାପସେୱନ (କ॰)] ୱଗ୍ଗୋ ପନ୍ନରସମୋ ।
ତସ୍ସୁଦ୍ଦାନଂ –
ସୁଖମେଧତି ଦଣ୍ଡୱରୋ ଚ ପୁନ, ଲସି ୱାଲଧି ପଞ୍ଚମରାଧୱରୋ ।
ସମହୋଦଧି କତ୍ତିକ ବୋନ୍ଦି ପୁନ, ଚତୁରଙ୍ଗୁଲବ୍ୟଗ୍ଘୱରେନ ଦସାତି ॥
(ଉପରିମୋ ପଣ୍ଣାସକୋ ।) [( ) ସୀହଳପୋତ୍ଥକେୟେୱ ଦିସ୍ସତି]
ଅଥ ୱଗ୍ଗୁଦ୍ଦାନଂ –
ଅପଣ୍ଣକଂ ସୀଲୱଗ୍ଗକୁରୁଙ୍ଗ, କୁଲାୱକଂ ଅତ୍ଥକାମେନ ପଞ୍ଚମଂ ।
ଆସୀସୋ ଇତ୍ଥିୱରୁଣଂ ଅପାୟି, ଲିତ୍ତୱଗ୍ଗେନ ତେ ଦସ ।
ପରୋସତଂ ହଂଚି କୁସନାଳି [ହଂସି ସରିକ୍ଖଂ (ସବ୍ବତ୍ଥ)], ଅସମ୍ପଦଂ କକଣ୍ଟକୱଗ୍ଗୋ ॥
ଏକନିପାତମ୍ହିଲଙ୍କତନ୍ତି ।
ଏକକନିପାତଂ ନିଟ୍ଠିତଂ ।
୨. ଦୁକନିପାତୋ
୧. ଦଳ୍ହୱଗ୍ଗୋ
୧୫୧. ରାଜୋୱାଦଜାତକଂ (୨-୧-୧)
ଦଳ୍ହଂ ଦଳ୍ହସ୍ସ ଖିପତି, ବଲ୍ଲିକୋ [ମଲ୍ଲିକୋ (ସୀ॰ ପୀ॰)] ମୁଦୁନା ମୁଦୁଂ ।
ସାଧୁମ୍ପି ସାଧୁନା ଜେତି, ଅସାଧୁମ୍ପି ଅସାଧୁନା ।
ଏତାଦିସୋ ଅୟଂ ରାଜା, ମଗ୍ଗା ଉୟ୍ୟାହି ସାରଥି ॥
ଅକ୍କୋଧେନ ଜିନେ କୋଧଂ, ଅସାଧୁଂ ସାଧୁନା ଜିନେ ।
ଜିନେ କଦରିୟଂ ଦାନେନ, ସଚ୍ଚେନାଲିକୱାଦିନଂ ।
ଏତାଦିସୋ ଅୟଂ ରାଜା, ମଗ୍ଗା ଉୟ୍ୟାହି ସାରଥୀତି ॥
ରାଜୋୱାଦଜାତକଂ ପଠମଂ ।
୧୫୨. ଅସମେକ୍ଖିତକମ୍ମନ୍ତଂ, ତୁରିତାଭିନିପାତିନଂ ।
ସାନି କମ୍ମାନି ତପ୍ପେନ୍ତି, ଉଣ୍ହଂୱଜ୍ଝୋହିତଂ ମୁଖେ ॥
ସୀହୋ ଚ ସୀହନାଦେନ, ଦଦ୍ଦରଂ ଅଭିନାଦୟି ।
ସୁତ୍ୱା ସୀହସ୍ସ ନିଗ୍ଘୋସଂ, ସିଙ୍ଗାଲୋ [ସିଗାଲୋ (ସୀ॰ ସ୍ୟା॰ ପୀ॰)] ଦଦ୍ଦରେ ୱସଂ ।
ଭୀତୋ ସନ୍ତାସମାପାଦି, ହଦୟଞ୍ଚସ୍ସ ଅପ୍ଫଲୀତି ॥
ସିଙ୍ଗାଲଜାତକଂ [ସିଗାଲଜାତକଂ (ସୀ॰ ସ୍ୟା॰ ପୀ॰)] ଦୁତିୟଂ ।
୧୫୩. ସୂକରଜାତକଂ (୨-୧-୩)
ଚତୁପ୍ପଦୋ ଅହଂ ସମ୍ମ, ତ୍ୱମ୍ପି ସମ୍ମ ଚତୁପ୍ପଦୋ ।
ଏହି ସମ୍ମ [ସୀହ (ସୀ॰ ପୀ॰)] ନିୱତ୍ତସ୍ସୁ, କିଂ ନୁ ଭୀତୋ ପଲାୟସି ॥
ଅସୁଚି ପୂତିଲୋମୋସି, ଦୁଗ୍ଗନ୍ଧୋ ୱାସି ସୂକର ।
ସଚେ ୟୁଜ୍ଝିତୁକାମୋସି, ଜୟଂ ସମ୍ମ ଦଦାମି ତେତି ॥
ସୂକରଜାତକଂ ତତିୟଂ ।
୧୫୪. ଉରଗଜାତକ (୨-୧-୪)
ଇଧୂରଗାନଂ ପୱରୋ ପୱିଟ୍ଠୋ, ସେଲସ୍ସ ୱଣ୍ଣେନ ପମୋକ୍ଖମିଚ୍ଛଂ ।
ବ୍ରହ୍ମଞ୍ଚ ୱଣ୍ଣଂ [ୱକ୍କଂ (କ॰)] ଅପଚାୟମାନୋ, ବୁଭୁକ୍ଖିତୋ ନୋ ୱିତରାମି [ୱିସହାମି (କ॰ ସି॰ ସ୍ୟା॰ ପୀ॰)] ଭୋତ୍ତୁଂ ॥
ସୋ ବ୍ରହ୍ମଗୁତ୍ତୋ ଚିରମେୱ ଜୀୱ, ଦିବ୍ୟା ଚ ତେ ପାତୁଭୱନ୍ତୁ ଭକ୍ଖା ।
ୟୋ ବ୍ରହ୍ମୱଣ୍ଣଂ ଅପଚାୟମାନୋ, ବୁଭୁକ୍ଖିତୋ ନୋ ୱିତରାସି [ସବ୍ବତ୍ଥପି ସମାନଂ] ଭୋତ୍ତୁନ୍ତି ॥
ଉରଗଜାତକଂ ଚତୁତ୍ଥଂ ।
୧୫୫. ଭଗ୍ଗଜାତକଂ (୨-୧-୫)
ଜୀୱ ୱସ୍ସସତଂ ଭଗ୍ଗ [ଗଗ୍ଗ (ସୀ॰ ପୀ॰)], ଅପରାନି ଚ ୱୀସତିଂ [ୱୀସତି (ସ୍ୟା॰ କ॰)]।
ମା ମଂ ପିସାଚା ଖାଦନ୍ତୁ, ଜୀୱ ତ୍ୱଂ ସରଦୋ ସତଂ ॥
ତ୍ୱମ୍ପି ୱସ୍ସସତଂ ଜୀୱ, ଅପରାନି ଚ ୱୀସତିଂ ।
ୱିସଂ ପିସାଚା ଖାଦନ୍ତୁ, ଜୀୱ ତ୍ୱଂ ସରଦୋ ସତନ୍ତି ॥
ଭଗ୍ଗଜାତକଂ ପଞ୍ଚମଂ ।
୧୫୬. ଅଲୀନଚିତ୍ତଜାତକଂ (୨-୧-୬)
ଅଲୀନଚିତ୍ତଂ ନିସ୍ସାୟ, ପହଟ୍ଠା ମହତୀ ଚମୂ ।
କୋସଲଂ ସେନାସନ୍ତୁଟ୍ଠଂ, ଜୀୱଗ୍ଗାହଂ ଅଗାହୟି ॥
ଏୱଂ ନିସ୍ସୟସମ୍ପନ୍ନୋ, ଭିକ୍ଖୁ ଆରଦ୍ଧୱୀରିୟୋ ।
ଭାୱୟଂ କୁସଲଂ ଧମ୍ମଂ, ୟୋଗକ୍ଖେମସ୍ସ ପତ୍ତିୟା ।
ପାପୁଣେ ଅନୁପୁବ୍ବେନ, ସବ୍ବସଂୟୋଜନକ୍ଖୟନ୍ତି ॥
ଅଲୀନଚିତ୍ତଜାତକଂ ଛଟ୍ଠଂ ।
୧୫୭. ଗୁଣଜାତକଂ (୨-୧-୭)
ୟେନ କାମଂ ପଣାମେତି, ଧମ୍ମୋ ବଲୱତଂ ମିଗୀ ।
ଉନ୍ନଦନ୍ତୀ ୱିଜାନାହି, ଜାତଂ ସରଣତୋ ଭୟଂ ॥
ଅପି ଚେପି ଦୁବ୍ବଲୋ ମିତ୍ତୋ, ମିତ୍ତଧମ୍ମେସୁ ତିଟ୍ଠତି ।
ସୋ ଞାତକୋ ଚ ବନ୍ଧୁ ଚ, ସୋ ମିତ୍ତୋ ସୋ ଚ ମେ ସଖା ।
ଦାଠିନି ମାତିମଞ୍ଞିତ୍ଥୋ [ମଞ୍ଞିୱୋ (ସ୍ୟା॰), ମଞ୍ଞୱ୍ହୋ (କ॰)], ସିଙ୍ଗାଲୋ ମମ ପାଣଦୋତି ॥
ଗୁଣଜାତକଂ ସତ୍ତମଂ ।
୧୫୮. ସୁହନୁଜାତକଂ (୨-୧-୮)
ନୟିଦଂ ୱିସମସୀଲେନ, ସୋଣେନ ସୁହନୂ ସହ ।
ସୁହନୂପି ତାଦିସୋୟେୱ, ୟୋ ସୋଣସ୍ସ ସଗୋଚରୋ ॥
ପକ୍ଖନ୍ଦିନା ପଗବ୍ଭେନ, ନିଚ୍ଚଂ ସନ୍ଦାନଖାଦିନା ।
ସମେତି ପାପଂ ପାପେନ, ସମେତି ଅସତା ଅସନ୍ତି ॥
ସୁହନୁଜାତକଂ ଅଟ୍ଠମଂ ।
୧୫୯. ମୋରଜାତକଂ (୨-୧-୯)
ଉଦେତୟଂ ଚକ୍ଖୁମା ଏକରାଜା, ହରିସ୍ସୱଣ୍ଣୋ ପଥୱିପ୍ପଭାସୋ [ପଠୱିପ୍ପଭାସୋ (ସୀ॰ ସ୍ୟା॰ ପୀ॰)]।
ତଂ ତଂ ନମସ୍ସାମି ହରିସ୍ସୱଣ୍ଣଂ ପଥୱିପ୍ପଭାସଂ, ତୟାଜ୍ଜ ଗୁତ୍ତା ୱିହରେମୁ ଦିୱସଂ ॥
ୟେ ବ୍ରାହ୍ମଣା ୱେଦଗୂ ସବ୍ବଧମ୍ମେ, ତେ ମେ ନମୋ ତେ ଚ ମଂ ପାଲୟନ୍ତୁ ।
ନମତ୍ଥୁ ବୁଦ୍ଧାନଂ [ବୁଦ୍ଧାନ ( ?)] ନମତ୍ଥୁ ବୋଧିୟା, ନମୋ ୱିମୁତ୍ତାନଂ [ୱିମୁତ୍ତାନ ( ?)] ନମୋ ୱିମୁତ୍ତିୟା ।
ଇମଂ ସୋ ପରିତ୍ତଂ କତ୍ୱା, ମୋରୋ ଚରତି ଏସନା ॥
ଅପେତୟଂ ଚକ୍ଖୁମା ଏକରାଜା, ହରିସ୍ସୱଣ୍ଣୋ ପଥୱିପ୍ପଭାସୋ ।
ତଂ ତଂ ନମ୍ମସ୍ସାମି ହରିସ୍ସୱଣ୍ଣଂ ପଥୱିପ୍ପଭାସଂ, ତୟାଜ୍ଜ ଗୁତ୍ତା ୱିହରେମୁ ରତ୍ତିଂ ॥
ୟେ ବ୍ରାହ୍ମଣା ୱେଦଗୂ ସବ୍ବଧମ୍ମେ, ତେ ମେ ନମୋ ତେ ଚ ମଂ ପାଲୟନ୍ତୁ ।
ନମତ୍ଥୁ ବୁଦ୍ଧାନଂ ନମତ୍ଥୁ ବୋଧିୟା, ନମୋ ୱିମୁତ୍ତାନଂ ନମୋ ୱିମୁତ୍ତିୟା ।
ଇମଂ ସୋ ପରିତ୍ତଂ କତ୍ୱା, ମୋରୋ ୱାସମକପ୍ପୟୀତି ॥
ମୋରଜାତକଂ ନୱମଂ ।
୧୬୦. ୱିନୀଲଜାତକଂ (୨-୧-୧୦)
ଏୱମେୱ ନୂନ [ନୁ (କ॰)] ରାଜାନଂ, ୱେଦେହଂ ମିଥିଲଗ୍ଗହଂ ।
ଅସ୍ସା ୱହନ୍ତି ଆଜଞ୍ଞା, ୟଥା ହଂସା ୱିନୀଲକଂ ॥
ୱିନୀଲ ଦୁଗ୍ଗଂ ଭଜସି, ଅଭୂମିଂ ତାତ ସେୱସି ।
ଗାମନ୍ତକାନି [ଗାମନ୍ତିକାନି (ସୀ॰), ଗାମନ୍ତରାନି (କ॰)] ସେୱସ୍ସୁ, ଏତଂ ମାତାଲୟଂ ତୱାତି ॥
ୱିନୀଲଜାତକଂ ଦସମଂ ।
ଦଳ୍ହୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ୱରବଲ୍ଲିକ ଦଦ୍ଦର ସୂକରକୋ, ଉରଗୂତ୍ତମ ପଞ୍ଚମଭଗ୍ଗୱରୋ ।
ମହତୀଚମୁ ୟାୱ ସିଙ୍ଗାଲୱରୋ, ସୁହନୁତ୍ତମ ମୋର ୱିନୀଲଂ ଦସାତି ॥
୨. ସନ୍ଥୱୱଗ୍ଗୋ
୧୬୧. ଇନ୍ଦସମାନଗୋତ୍ତଜାତକଂ (୨-୨-୧)
ନ ସନ୍ଥୱଂ [ସନ୍ଧୱଂ (କ॰)] କାପୁରିସେନ କୟିରା, ଅରିୟୋ ଅନରିୟେନ ପଜାନମତ୍ଥଂ ।
ଚିରାନୁୱୁତ୍ଥୋପି କରୋତି ପାପଂ, ଗଜୋ ୟଥା ଇନ୍ଦସମାନଗୋତ୍ତଂ ॥
ୟଂ ତ୍ୱେୱ ଜଞ୍ଞା ସଦିସୋ ମମନ୍ତି, ସୀଲେନ ପଞ୍ଞାୟ ସୁତେନ ଚାପି ।
ତେନେୱ ମେତ୍ତିଂ କୟିରାଥ ସଦ୍ଧିଂ, ସୁଖୋ ହୱେ ସପ୍ପୁରିସେନ ସଙ୍ଗମୋତି ॥
ଇନ୍ଦସମାନଗୋତ୍ତଜାତକଂ ପଠମଂ ।
୧୬୨. ସନ୍ଥୱଜାତକଂ (୨-୨-୨)
ନ ସନ୍ଥୱସ୍ମା ପରମତ୍ଥି ପାପିୟୋ, ୟୋ ସନ୍ଥୱୋ [ସନ୍ଧୱୋ (କ॰)] କାପୁରିସେନ ହୋତି ।
ସନ୍ତପ୍ପିତୋ ସପ୍ପିନା ପାୟସେନ [ପାୟାସେନ (କ॰)], କିଚ୍ଛାକତଂ ପଣ୍ଣକୁଟିଂ ଅଦୟ୍ହି [ଅଦଡ୍ଢହି (ସୀ॰ ସ୍ୟା॰), ଅଦଟ୍ଠହି (ପୀ॰), ଅଦଦ୍ଦହି ( ?)]॥
ନ ସନ୍ଥୱସ୍ମା ପରମତ୍ଥି ସେୟ୍ୟୋ, ୟୋ ସନ୍ଥୱୋ ସପ୍ପୁରିସେନ ହୋତି ।
ସୀହସ୍ସ ବ୍ୟଗ୍ଘସ୍ସ ଚ ଦୀପିନୋ ଚ, ସାମା ମୁଖଂ ଲେହତି ସନ୍ଥୱେନାତି ॥
ସନ୍ଥୱଜାତକଂ ଦୁତିୟଂ ।
୧୬୩. ସୁସୀମଜାତକଂ (୨-୨-୩)
କାଳା ମିଗା ସେତଦନ୍ତା ତୱୀମେ [ତୱ ଇମେ (ସୀ॰ ସ୍ୟା॰ ପୀ॰)], ପରୋସତଂ ହେମଜାଲାଭିଛନ୍ନା [ହେମଜାଲାଭିସଞ୍ଛନ୍ନା (ସୀ॰)]।
ତେ ତେ ଦଦାମୀତି ସୁସୀମ ବ୍ରୂସି, ଅନୁସ୍ସରଂ ପେତ୍ତିପିତାମହାନଂ ॥
କାଳା ମିଗା ସେତଦନ୍ତା ମମୀମେ [ମମ ଇମେ (ସୀ॰ ପୀ॰)], ପରୋସତଂ ହେମଜାଲାଭିଚ୍ଛନ୍ନା ।
ତେ ତେ ଦଦାମୀତି ୱଦାମି ମାଣୱ, ଅନୁସ୍ସରଂ ପେତ୍ତିପିତାମହାନନ୍ତି ॥
ସୁସୀମଜାତକଂ ତତିୟଂ ।
୧୬୪. ଗିଜ୍ଝଜାତକଂ (୨-୨-୪)
ୟଂ ନୁ ଗିଜ୍ଝୋ ୟୋଜନସତଂ, କୁଣପାନି ଅୱେକ୍ଖତି ।
କସ୍ମା ଜାଲଞ୍ଚ ପାସଞ୍ଚ, ଆସଜ୍ଜାପି ନ ବୁଜ୍ଝସି ॥
ୟଦା ପରାଭୱୋ ହୋତି, ପୋସୋ ଜୀୱିତସଙ୍ଖୟେ ।
ଅଥ ଜାଲଞ୍ଚ ପାସଞ୍ଚ, ଆସଜ୍ଜାପି ନ ବୁଜ୍ଝତୀତି ॥
ଗିଜ୍ଝଜାତକଂ ଚତୁତ୍ଥଂ ।
୧୬୫. ନକୁଲଜାତକଂ (୨-୨-୫)
ସନ୍ଧିଂ କତ୍ୱା ଅମିତ୍ତେନ, ଅଣ୍ଡଜେନ ଜଲାବୁଜ ।
ୱିୱରିୟ ଦାଠଂ ସେସି [ସୟସି (ସୀ॰ ସ୍ୟା॰ ପୀ॰)], କୁତୋ ତେ ଭୟମାଗତଂ ॥
ସଙ୍କେଥେୱ [ସଙ୍କତେୱ (କ॰)] ଅମିତ୍ତସ୍ମିଂ, ମିତ୍ତସ୍ମିମ୍ପି ନ ୱିସ୍ସସେ ।
ଅଭୟା ଭୟମୁପ୍ପନ୍ନଂ, ଅପି ମୂଲାନି କନ୍ତତୀତି [ମୂଲଂ ନିକନ୍ତତୀତି (ସୀ॰)]॥
ନକୁଲଜାତକଂ ପଞ୍ଚମଂ ।
୧୬୬. ଉପସାଳକଜାତକଂ (୨-୨-୬)
ଉପସାଳକନାମାନି [ଉପସାଳ୍ହକନାମାନଂ (ସୀ॰ ସ୍ୟା॰ ପୀ॰)], ସହସ୍ସାନି ଚତୁଦ୍ଦସ ।
ଅସ୍ମିଂ ପଦେସେ ଦଡ୍ଢାନି, ନତ୍ଥି ଲୋକେ ଅନାମତଂ ॥
ୟମ୍ହି ସଚ୍ଚଞ୍ଚ ଧମ୍ମୋ ଚ, ଅହିଂସା ସଂୟମୋ ଦମୋ ।
ଏତଂ ଅରିୟା ସେୱନ୍ତି, ଏତଂ ଲୋକେ ଅନାମତନ୍ତି ॥
ଉପସାଳକଜାତକଂ ଛଟ୍ଠଂ ।
୧୬୭. ସମିଦ୍ଧିଜାତକଂ (୨-୨-୭)
ଅଭୁତ୍ୱା ଭିକ୍ଖସି ଭିକ୍ଖୁ, ନ ହି ଭୁତ୍ୱାନ ଭିକ୍ଖସି ।
ଭୁତ୍ୱାନ ଭିକ୍ଖୁ ଭିକ୍ଖସ୍ସୁ, ମା ତଂ କାଲୋ ଉପଚ୍ଚଗା ॥
କାଲଂ ୱୋହଂ ନ ଜାନାମି, ଛନ୍ନୋ କାଲୋ ନ ଦିସ୍ସତି ।
ତସ୍ମା ଅଭୁତ୍ୱା ଭିକ୍ଖାମି, ମା ମଂ କାଲୋ ଉପଚ୍ଚଗାତି ॥
ସମିଦ୍ଧିଜାତକଂ ସତ୍ତମଂ ।
୧୬୮. ସକୁଣଗ୍ଘିଜାତକଂ (୨-୨-୮)
ସେନୋ ବଲସା ପତମାନୋ, ଲାପଂ ଗୋଚରଠାୟିନଂ ।
ସହସା ଅଜ୍ଝପ୍ପତ୍ତୋୱ, ମରଣଂ ତେନୁପାଗମି ॥
ସୋହଂ ନୟେନ ସମ୍ପନ୍ନୋ, ପେତ୍ତିକେ ଗୋଚରେ ରତୋ ।
ଅପେତସତ୍ତୁ ମୋଦାମି, ସମ୍ପସ୍ସଂ ଅତ୍ଥମତ୍ତନୋତି ॥
ସକୁଣଗ୍ଘିଜାତକଂ ଅଟ୍ଠମଂ ।
୧୬୯. ଅରକଜାତକଂ (୨-୨-୯)
ୟୋ ୱେ ମେତ୍ତେନ ଚିତ୍ତେନ, ସବ୍ବଲୋକାନୁକମ୍ପତି ।
ଉଦ୍ଧଂ ଅଧୋ ଚ ତିରିୟଂ, ଅପ୍ପମାଣେନ ସବ୍ବସୋ ॥
ଅପ୍ପମାଣଂ ହିତଂ ଚିତ୍ତଂ, ପରିପୁଣ୍ଣଂ ସୁଭାୱିତଂ ।
ୟଂ ପମାଣକତଂ କମ୍ମଂ, ନ ତଂ ତତ୍ରାୱସିସ୍ସତୀତି ॥
ଅରକଜାତକଂ ନୱମଂ ।
୧୭୦. କକଣ୍ଟକଜାତକଂ (୨-୨-୧୦)
ନାୟଂ ପୁରେ ଉଣ୍ଣମତି [ଉନ୍ନମତି (ସ୍ୟା॰)], ତୋରଣଗ୍ଗେ କକଣ୍ଟକୋ ।
ମହୋସଧ ୱିଜାନାହି, କେନ ଥଦ୍ଧୋ କକଣ୍ଟକୋ ॥
ଅଲଦ୍ଧପୁବ୍ବଂ ଲଦ୍ଧାନ, ଅଡ୍ଢମାସଂ କକଣ୍ଟକୋ ।
ଅତିମଞ୍ଞତି ରାଜାନଂ, ୱେଦେହଂ ମିଥିଲଗ୍ଗହନ୍ତି ॥
କକଣ୍ଟକଜାତକଂ ଦସମଂ ।
ସନ୍ଥୱୱଗ୍ଗୋ ଦୁତିୟୋ ।
ତସ୍ସୁଦ୍ଦାନଂ –
ଅଥ ଇନ୍ଦସମାନ ସପଣ୍ଣକୁଟି, ସୁସିମୁତ୍ତମ ଗିଜ୍ଝ ଜଲାବୁଜକୋ ।
ଉପସାଳକ ଭିକ୍ଖୁ ସଲାପୱରୋ, ଅଥ ମେତ୍ତୱରୋ ଦସପୁଣ୍ଣମତୀତି ॥
୩. କଲ୍ୟାଣୱଗ୍ଗୋ
୧୭୧. କଲ୍ୟାଣଧମ୍ମଜାତକଂ (୨-୩-୧)
କଲ୍ୟାଣଧମ୍ମୋତି ୟଦା ଜନିନ୍ଦ, ଲୋକେ ସମଞ୍ଞଂ ଅନୁପାପୁଣାତି ।
ତସ୍ମା ନ ହିୟ୍ୟେଥ [ହୀୟେଥ (ସୀ॰)] ନରୋ ସପଞ୍ଞୋ, ହିରିୟାପି ସନ୍ତୋ ଧୁରମାଦିୟନ୍ତି ॥
ସାୟଂ ସମଞ୍ଞା ଇଧ ମଜ୍ଜ ପତ୍ତା, କଲ୍ୟାଣଧମ୍ମୋତି ଜନିନ୍ଦ ଲୋକେ ।
ତାହଂ ସମେକ୍ଖଂ ଇଧ ପବ୍ବଜିସ୍ସଂ, ନ ହି ମତ୍ଥି ଛନ୍ଦୋ ଇଧ କାମଭୋଗେତି ॥
କଲ୍ୟାଣଧମ୍ମଜାତକଂ ପଠମଂ ।
୧୭୨. ଦଦ୍ଦରଜାତକଂ (୨-୩-୨)
କୋ ନୁ ସଦ୍ଦେନ ମହତା, ଅଭିନାଦେତି ଦଦ୍ଦରଂ ।
ତଂ ସୀହା ନପ୍ପଟିନଦନ୍ତି [କିଂ ସୀହା ନପ୍ପଟିନଦନ୍ତି (ସୀ॰ ପୀ॰), ନ ସୀହା ପଟିନଦନ୍ତି (କ॰)], କୋ ନାମେସୋ ମିଗାଧିଭୂ ॥
ଅଧମୋ ମିଗଜାତାନଂ, ସିଙ୍ଗାଲୋ ତାତ ୱସ୍ସତି ।
ଜାତିମସ୍ସ ଜିଗୁଚ୍ଛନ୍ତା, ତୁଣ୍ହୀ ସୀହା ସମଚ୍ଛରେତି ॥
ଦଦ୍ଦରଜାତକଂ ଦୁତିୟଂ ।
୧୭୩. ମକ୍କଟଜାତକଂ (୨-୩-୩)
ତାତ ମାଣୱକୋ ଏସୋ, ତାଲମୂଲଂ ଅପସ୍ସିତୋ ।
ଅଗାରକଞ୍ଚିଦଂ ଅତ୍ଥି, ହନ୍ଦ ଦେମସ୍ସଗାରକଂ ॥
ମା ଖୋ ତ୍ୱଂ ତାତ ପକ୍କୋସି, ଦୂସେୟ୍ୟ ନୋ ଅଗାରକଂ ।
ନେତାଦିସଂ ମୁଖଂ ହୋତି, ବ୍ରାହ୍ମଣସ୍ସ ସୁସୀଲିନୋତି ॥
ମକ୍କଟଜାତକଂ ତତିୟଂ ।
୧୭୪. ଦୁବ୍ଭିୟମକ୍କଟଜାତକଂ (୨-୩-୪)
ଅଦମ୍ହ ତେ ୱାରି ପହୂତରୂପଂ, ଘମ୍ମାଭିତତ୍ତସ୍ସ ପିପାସିତସ୍ସ ।
ସୋ ଦାନି ପିତ୍ୱାନ [ପୀତ୍ୱାନ (ସୀ॰ ପୀ॰)] କିରିଙ୍କରୋସି [କିକିଂକରୋସି (ସୀ॰ ସ୍ୟା॰ ପୀ॰)], ଅସଙ୍ଗମୋ ପାପଜନେନ ସେୟ୍ୟୋ ॥
କୋ ତେ ସୁତୋ ୱା ଦିଟ୍ଠୋ ୱା, ସୀଲୱା ନାମ ମକ୍କଟୋ ।
ଇଦାନି ଖୋ ତଂ ଓହଚ୍ଛଂ [ଊହଚ୍ଚ (ସୀ॰ ପୀ॰), ଓହଚ୍ଚଂ (ସ୍ୟା॰), ଉହଜ୍ଜଂ (କ॰)], ଏସା ଅସ୍ମାକ ଧମ୍ମତାତି ॥
ଦୁବ୍ଭିୟମକ୍କଟଜାତକଂ ଚତୁତ୍ଥଂ ।
୧୭୫. ଆଦିଚ୍ଚୁପଟ୍ଠାନଜାତକଂ (୨-୩-୫)
ସବ୍ବେସୁ କିର ଭୂତେସୁ, ସନ୍ତି ସୀଲସମାହିତା ।
ପସ୍ସ ସାଖାମିଗଂ ଜମ୍ମଂ, ଆଦିଚ୍ଚମୁପତିଟ୍ଠତି ॥
ନାସ୍ସ ସୀଲଂ ୱିଜାନାଥ, ଅନଞ୍ଞାୟ ପସଂସଥ ।
ଅଗ୍ଗିହୁତ୍ତଞ୍ଚ ଉହନ୍ନଂ [ଊହନ୍ତଂ (ସୀ॰), ଊହନଂ (ସ୍ୟା॰), ଊହନ୍ତି (ପୀ॰), ଉହଦଂ (କ॰)], ଦ୍ୱେ ଚ ଭିନ୍ନା କମଣ୍ଡଲୂତି ॥
ଆଦିଚ୍ଚୁପଟ୍ଠାନଜାତକଂ ପଞ୍ଚମଂ ।
୧୭୬. କଳାୟମୁଟ୍ଠିଜାତକଂ (୨-୩-୬)
ବାଲୋ ୱତାୟଂ ଦୁମସାଖଗୋଚରୋ, ପଞ୍ଞା ଜନିନ୍ଦ ନୟିମସ୍ସ ୱିଜ୍ଜତି ।
କଳାୟମୁଟ୍ଠିଂ [କଲାୟମୁଟ୍ଠିଂ (ସୀ॰ ପୀ॰)] ଅୱକିରିୟ କେୱଲଂ, ଏକଂ କଳାୟଂ ପତିତଂ ଗୱେସତି ॥
ଏୱମେୱ ମୟଂ ରାଜ, ୟେ ଚଞ୍ଞେ ଅତିଲୋଭିନୋ ।
ଅପ୍ପେନ ବହୁଂ ଜିୟ୍ୟାମ, କଳାୟେନେୱ ୱାନରୋତି ॥
କଳାୟମୁଟ୍ଠିଜାତକଂ ଛଟ୍ଠଂ ।
୧୭୭. ତିନ୍ଦୁକଜାତକଂ (୨-୩-୭)
ଧନୁହତ୍ଥକଲାପେହି, ନେତ୍ତିଂ ସୱରଧାରିଭି ।
ସମନ୍ତା ପରିକିଣ୍ଣମ୍ହ, କଥଂ ମୋକ୍ଖୋ ଭୱିସ୍ସତି ॥
ଅପ୍ପେୱ ବହୁକିଚ୍ଚାନଂ, ଅତ୍ଥୋ ଜାୟେଥ କୋଚି ନଂ ।
ଅତ୍ଥି ରୁକ୍ଖସ୍ସ ଅଚ୍ଛିନ୍ନଂ, ଖଜ୍ଜଥଞ୍ଞେୱ ତିନ୍ଦୁକନ୍ତି ॥
ତିନ୍ଦୁକଜାତକଂ ସତ୍ତମଂ ।
୧୭୮. କଚ୍ଛପଜାତକଂ (୨-୩-୮)
ଜନିତ୍ତଂ ମେ ଭୱିତ୍ତଂ ମେ, ଇତି ପଙ୍କେ ଅୱସ୍ସୟିଂ ।
ତଂ ମଂ ପଙ୍କୋ ଅଜ୍ଝଭୱି, ୟଥା ଦୁବ୍ବଲକଂ ତଥା ।
ତଂ ତଂ ୱଦାମି ଭଗ୍ଗୱ, ସୁଣୋହି ୱଚନଂ ମମ ॥
ଗାମେ ୱା ୟଦି ୱା ରଞ୍ଞେ, ସୁଖଂ ୟତ୍ରାଧିଗଚ୍ଛତି ।
ତଂ ଜନିତ୍ତଂ ଭୱିତ୍ତଞ୍ଚ, ପୁରିସସ୍ସ ପଜାନତୋ ।
ୟମ୍ହି ଜୀୱେ ତମ୍ହି ଗଚ୍ଛେ, ନ ନିକେତହତୋ ସିୟାତି ॥
କଚ୍ଛପଜାତକଂ ଅଟ୍ଠମଂ ।
୧୭୯. ସତଧମ୍ମଜାତକଂ (୨-୩-୯)
ତଞ୍ଚ ଅପ୍ପଞ୍ଚ ଉଚ୍ଛିଟ୍ଠଂ, ତଞ୍ଚ କିଚ୍ଛେନ ନୋ ଅଦା ।
ସୋହଂ ବ୍ରାହ୍ମଣଜାତିକୋ, ୟଂ ଭୁତ୍ତଂ ତମ୍ପି ଉଗ୍ଗତଂ ॥
ଏୱଂ ଧମ୍ମଂ ନିରଂକତ୍ୱା [ନିରାକତ୍ୱା ( ?) ନି + ଆ + କର + ତ୍ୱା], ୟୋ ଅଧମ୍ମେନ ଜୀୱତି ।
ସତଧମ୍ମୋୱ ଲାଭେନ, ଲଦ୍ଧେନପି ନ ନନ୍ଦତୀତି ॥
ସତଧମ୍ମଜାତକଂ ନୱମଂ ।
୧୮୦. ଦୁଦ୍ଦଦଜାତକଂ (୨-୩-୧୦)
ଦୁଦ୍ଦଦଂ ଦଦମାନାନଂ, ଦୁକ୍କରଂ କମ୍ମ କୁବ୍ବତଂ ।
ଅସନ୍ତୋ ନାନୁକୁବ୍ବନ୍ତି, ସତଂ ଧମ୍ମୋ ଦୁରନ୍ନୟୋ ॥
ତସ୍ମା ସତଞ୍ଚ ଅସତଂ, ନାନା ହୋତି ଇତୋ ଗତି ।
ଅସନ୍ତୋ ନିରୟଂ ୟନ୍ତି, ସନ୍ତୋ ସଗ୍ଗପରାୟଣାତି [ପରାୟନା (ସ୍ୟା॰ କ॰)]॥
ଦୁଦ୍ଦଦଜାତକଂ ଦସମଂ ।
କଲ୍ୟାଣୱଗ୍ଗୋ ତତିୟୋ ।
ତସ୍ସୁଦ୍ଦାନଂ –
ସୁସମଞ୍ଞମିଗାଧିଭୂ ମାଣୱକୋ, ୱାରିପହୂତରୂପାଦିଚ୍ଚୁପଟ୍ଠାନା ।
ସକଳାୟସତିନ୍ଦୁକପଙ୍କ ପୁନ, ସତଧମ୍ମ ସୁଦୁଦ୍ଦଦକେନ ଦସାତି ॥
୪. ଅସଦିସୱଗ୍ଗୋ
୧୮୧. ଅସଦିସଜାତକଂ (୨-୪-୧)
ଧନୁଗ୍ଗହୋ ଅସଦିସୋ, ରାଜପୁତ୍ତୋ ମହବ୍ବଲୋ ।
ଦୂରେପାତୀ ଅକ୍ଖଣୱେଧୀ, ମହାକାୟପ୍ପଦାଲନୋ ॥
ସବ୍ବାମିତ୍ତେ ରଣଂ କତ୍ୱା, ନ ଚ କଞ୍ଚି ୱିହେଠୟି ।
ଭାତରଂ ସୋତ୍ଥିଂ କତ୍ୱାନ, ସଂୟମଂ ଅଜ୍ଝୁପାଗମୀତି ॥
ଅସଦିସଜାତକଂ ପଠମଂ ।
୧୮୨. ସଙ୍ଗାମାୱଚରଜାତକଂ (୨-୪-୨)
ସଙ୍ଗାମାୱଚରୋ ସୂରୋ, ବଲୱା ଇତି ୱିସ୍ସୁତୋ ।
କିଂ ନୁ ତୋରଣମାସଜ୍ଜ, ପଟିକ୍କମସି କୁଞ୍ଜର ॥
ଓମଦ୍ଦ ଖିପ୍ପଂ ପଲିଘଂ, ଏସିକାନି ଚ ଅବ୍ବହ [ଉବ୍ବହ (ସ୍ୟା॰), ଅବ୍ଭୁହ (କ॰)]।
ତୋରଣାନି ଚ ମଦ୍ଦିତ୍ୱା, ଖିପ୍ପଂ ପୱିସ କୁଞ୍ଜରାତି ॥
ସଙ୍ଗାମାୱଚରଜାତକଂ ଦୁତିୟଂ ।
୧୮୩. ୱାଲୋଦକଜାତକଂ (୨-୪-୩)
ୱାଲୋଦକଂ ଅପ୍ପରସଂ ନିହୀନଂ, ପିତ୍ୱା [ପୀତ୍ୱା (ସୀ॰ ପୀ॰)] ମଦୋ ଜାୟତି ଗଦ୍ରଭାନଂ ।
ଇମଞ୍ଚ ପିତ୍ୱାନ ରସଂ ପଣୀତଂ, ମଦୋ ନ ସଞ୍ଜାୟତି ସିନ୍ଧୱାନଂ ॥
ଅପ୍ପଂ ପିୱିତ୍ୱାନ ନିହୀନଜଚ୍ଚୋ, ସୋ ମଜ୍ଜତୀ ତେନ ଜନିନ୍ଦ ପୁଟ୍ଠୋ [ଫୁଟ୍ଠୋ (ସୀ॰ ସ୍ୟା॰), ମୁଟ୍ଠୋ (କ॰)]।
ଧୋରୟ୍ହସୀଲୀ ଚ କୁଲମ୍ହି ଜାତୋ, ନ ମଜ୍ଜତୀ ଅଗ୍ଗରସଂ ପିୱିତ୍ୱାତି ॥
ୱାଲୋଦକଜାତକଂ ତତିୟଂ ।
୧୮୪. ଗିରିଦତ୍ତଜାତକଂ (୨-୪-୪)
ଦୂସିତୋ ଗିରିଦତ୍ତେନ [ଗିରିଦନ୍ତେନ (ପୀ॰)], ହୟୋ ସାମସ୍ସ ପଣ୍ଡୱୋ ।
ପୋରାଣଂ ପକତିଂ ହିତ୍ୱା, ତସ୍ସେୱାନୁୱିଧିୟ୍ୟତି [ନୁୱିଧୀୟତି (ସୀ॰ ପୀ॰)]॥
ସଚେ ଚ ତନୁଜୋ ପୋସୋ, ସିଖରାକାର [ସିଙ୍ଗାରାକାର (ସ୍ୟା॰)] କପ୍ପିତୋ ।
ଆନନେ ନଂ [ତଂ (ସୀ॰ ସ୍ୟା॰ ପୀ॰)] ଗହେତ୍ୱାନ, ମଣ୍ଡଲେ ପରିୱତ୍ତୟେ ।
ଖିପ୍ପମେୱ ପହନ୍ତ୍ୱାନ, ତସ୍ସେୱାନୁୱିଧିୟ୍ୟତୀତି ॥
ଗିରିଦତ୍ତଜାତକଂ ଚତୁତ୍ଥଂ ।
୧୮୫. ଅନଭିରତିଜାତକଂ (୨-୪-୫)
ୟଥୋଦକେ ଆୱିଲେ ଅପ୍ପସନ୍ନେ, ନ ପସ୍ସତି ସିପ୍ପିକସମ୍ବୁକଞ୍ଚ ।
ସକ୍ଖରଂ ୱାଲୁକଂ ମଚ୍ଛଗୁମ୍ବଂ, ଏୱଂ ଆୱିଲମ୍ହି [ଆୱିଲେ ହି (ସୀ॰)] ଚିତ୍ତେ ।
ନ ପସ୍ସତି ଅତ୍ତଦତ୍ଥଂ ପରତ୍ଥଂ ॥
ୟଥୋଦକେ ଅଚ୍ଛେ ୱିପ୍ପସନ୍ନେ, ସୋ ପସ୍ସତି ସିପ୍ପିକସମ୍ବୁକଞ୍ଚ ।
ସକ୍ଖରଂ ୱାଲୁକଂ ମଚ୍ଛଗୁମ୍ବଂ, ଏୱଂ ଅନାୱିଲମ୍ହି ଚିତ୍ତେ ।
ସୋ ପସ୍ସତି ଅତ୍ତଦତ୍ଥଂ ପରତ୍ଥନ୍ତି ॥
ଅନଭିରତିଜାତକଂ ପଞ୍ଚମଂ ।
୧୮୬. ଦଧିୱାହନଜାତକଂ (୨-୪-୬)
ୱଣ୍ଣଗନ୍ଧରସୂପେତୋ, ଅମ୍ବୋୟଂ ଅହୁୱା ପୁରେ ।
ତମେୱ ପୂଜଂ ଲଭମାନୋ, କେନମ୍ବୋ କଟୁକପ୍ଫଲୋ ॥
ପୁଚିମନ୍ଦପରିୱାରୋ, ଅମ୍ବୋ ତେ ଦଧିୱାହନ ।
ମୂଲଂ ମୂଲେନ ସଂସଟ୍ଠଂ, ସାଖା ସାଖା [ସାଖଂ (ସ୍ୟା॰ କ॰)] ନିସେୱରେ [ନିୱୀସରେ (କ॰)]।
ଅସାତସନ୍ନିୱାସେନ, ତେନମ୍ବୋ କଟୁକପ୍ଫଲୋତି ॥
ଦଧିୱାହନଜାତକଂ ଛଟ୍ଠଂ ।
୧୮୭. ଚତୁମଟ୍ଠଜାତକଂ (୨-୪-୭)
ଉଚ୍ଚେ ୱିଟଭିମାରୁୟ୍ହ, ମନ୍ତୟୱ୍ହୋ ରହୋଗତା ।
ନୀଚେ ଓରୁୟ୍ହ ମନ୍ତୱ୍ହୋ, ମିଗରାଜାପି ସୋସ୍ସତି ॥
ୟଂ ସୁୱଣ୍ଣୋ ସୁୱଣ୍ଣେନ [ୟଂ ସୁପଣ୍ଣୋ ସୁପଣ୍ଣେନ (ସୀ॰ ସ୍ୟା॰ ପୀ॰)], ଦେୱୋ ଦେୱେନ ମନ୍ତୟେ ।
କିଂ ତେତ୍ଥ ଚତୁମଟ୍ଠସ୍ସ, ବିଲଂ ପୱିସ ଜମ୍ବୁକାତି ॥
ଚତୁମଟ୍ଠଜାତକଂ ସତ୍ତମଂ ।
୧୮୮. ସୀହକୋତ୍ଥୁଜାତକଂ (୨-୪-୮)
ସୀହଙ୍ଗୁଲୀ ସୀହନଖୋ, ସୀହପାଦପତିଟ୍ଠିତୋ ।
ସୋ ସୀହୋ ସୀହସଙ୍ଘମ୍ହି, ଏକୋ ନଦତି ଅଞ୍ଞଥା ॥
ମା ତ୍ୱଂ ନଦି ରାଜପୁତ୍ତ, ଅପ୍ପସଦ୍ଦୋ ୱନେ ୱସ ।
ସରେନ ଖୋ [ମା (କ॰)] ତଂ ଜାନେୟ୍ୟୁଂ, ନ ହି ତେ ପେତ୍ତିକୋ ସରୋତି ॥
ସୀହକୋତ୍ଥୁଜାତକଂ ଅଟ୍ଠମଂ ।
୧୮୯. ସୀହଚମ୍ମଜାତକଂ (୨-୪-୯)
ନେତଂ ସୀହସ୍ସ ନଦିତଂ, ନ ବ୍ୟଗ୍ଘସ୍ସ ନ [ବ୍ୟଗ୍ଘସ୍ସ ନ ଚ (କ॰)] ଦୀପିନୋ ।
ପାରୁତୋ ସୀହଚମ୍ମେନ, ଜମ୍ମୋ ନଦତି ଗଦ୍ରଭୋ ॥
ଚିରମ୍ପି ଖୋ ତଂ ଖାଦେୟ୍ୟ, ଗଦ୍ରଭୋ ହରିତଂ ୟୱଂ ।
ପାରୁତୋ ସୀହଚମ୍ମେନ, ରୱମାନୋୱ ଦୂସୟୀତି ॥
ସୀହଚମ୍ମଜାତକଂ ନୱମଂ ।
୧୯୦. ସୀଲାନିସଂସଜାତକଂ (୨-୪-୧୦)
ପସ୍ସ ସଦ୍ଧାୟ ସୀଲସ୍ସ, ଚାଗସ୍ସ ଚ ଅୟଂ ଫଲଂ ।
ନାଗୋ ନାୱାୟ ୱଣ୍ଣେନ, ସଦ୍ଧଂ ୱହତୁପାସକଂ ॥
ସବ୍ଭିରେୱ ସମାସେଥ, ସବ୍ଭି କୁବ୍ବେଥ ସନ୍ଥୱଂ ।
ସତଞ୍ହି ସନ୍ନିୱାସେନ, ସୋତ୍ଥିଂ ଗଚ୍ଛତି ନ୍ହାପିତୋତି ॥
ସୀଲାନିସଂସଜାତକଂ ଦସମଂ ।
ଅସଦିସୱଗ୍ଗୋ ଚତୁତ୍ଥୋ ।
ତସ୍ସୁଦ୍ଦାନଂ –
ଧନୁଗ୍ଗହ କୁଞ୍ଜର ଅପ୍ପରସୋ, ଗିରିଦତ୍ତମନାୱିଲଚିତ୍ତୱରଂ ।
ଦଧିୱାହନ ଜମ୍ବୂକ ସୀହନଖୋ, ହରିତୟୱ ନାଗୱରେନ ଦସାତି ॥
୫. ରୁହକୱଗ୍ଗୋ
୧୯୧. ରୁହକଜାତକଂ (୨-୫-୧)
ଅପି [ଅମ୍ଭୋ (ସ୍ୟା॰ କ॰ ସୀ॰)] ରୁହକ ଛିନ୍ନାପି, ଜିୟା ସନ୍ଧୀୟତେ ପୁନ ।
ସନ୍ଧୀୟସ୍ସୁ ପୁରାଣିୟା, ମା କୋଧସ୍ସ ୱସଂ ଗମି ॥
ୱିଜ୍ଜମାନେସୁ ୱାକେସୁ [ୱିଜ୍ଜମାନାସୁ ମରୁୱାସୁ (ସୀ॰), ୱିଜ୍ଜମାନାସୁ ମରୂଦ୍ୱାସୁ (ପୀ॰)], ୱିଜ୍ଜମାନେସୁ କାରିସୁ ।
ଅଞ୍ଞଂ ଜିୟଂ କରିସ୍ସାମି, ଅଲଞ୍ଞେୱ ପୁରାଣିୟାତି ॥
ରୁହକଜାତକଂ ପଠମଂ ।
୧୯୨. ସିରିକାଳକଣ୍ଣିଜାତକଂ (୨-୫-୨)
ଇତ୍ଥୀ ସିୟା ରୂପୱତୀ, ସା ଚ ସୀଲୱତୀ ସିୟା ।
ପୁରିସୋ ତଂ ନ ଇଚ୍ଛେୟ୍ୟ, ସଦ୍ଦହାସି ମହୋସଧ ॥
ସଦ୍ଦହାମି ମହାରାଜ, ପୁରିସୋ ଦୁବ୍ଭଗୋ ସିୟା ।
ସିରୀ ଚ କାଳକଣ୍ଣୀ ଚ, ନ ସମେନ୍ତି କୁଦାଚନନ୍ତି ॥
ସିରିକାଳକଣ୍ଣିଜାତକଂ ଦୁତିୟଂ ।
୧୯୩. ଚୂଳପଦୁମଜାତକଂ (୨-୫-୩)
ଅୟମେୱ ସା ଅହମପି [ଅହମ୍ପି (ସୀ॰ ସ୍ୟା॰ ପୀ॰), ଅହସ୍ମି (କ॰)] ସୋ ଅନଞ୍ଞୋ, ଅୟମେୱ ସୋ ହତ୍ଥଚ୍ଛିନ୍ନୋ ଅନଞ୍ଞୋ ।
ୟମାହ ‘‘କୋମାରପତୀ ମମ’’ନ୍ତି, ୱଜ୍ଝିତ୍ଥିୟୋ ନତ୍ଥି ଇତ୍ଥୀସୁ ସଚ୍ଚଂ ॥
ଇମଞ୍ଚ ଜମ୍ମଂ ମୁସଲେନ ହନ୍ତ୍ୱା, ଲୁଦ୍ଦଂ ଛୱଂ ପରଦାରୂପସେୱିଂ ।
ଇମିସ୍ସା ଚ ନଂ ପାପପତିବ୍ବତାୟ, ଜୀୱନ୍ତିୟା ଛିନ୍ଦଥ କଣ୍ଣନାସନ୍ତି ॥
ଚୂଳପଦୁମଜାତକଂ ତତିୟଂ ।
୧୯୪. ମଣିଚୋରଜାତକଂ (୨-୫-୪)
ନ ସନ୍ତି ଦେୱା ପୱସନ୍ତି ନୂନ, ନ ହି ନୂନ ସନ୍ତି ଇଧ ଲୋକପାଲା ।
ସହସା କରୋନ୍ତାନମସଞ୍ଞତାନଂ, ନ ହି ନୂନ ସନ୍ତୀ ପଟିସେଧିତାରୋ ॥
ଅକାଲେ ୱସ୍ସତୀ ତସ୍ସ, କାଲେ ତସ୍ସ ନ ୱସ୍ସତି ।
ସଗ୍ଗା ଚ ଚୱତି ଠାନା, ନନୁ ସୋ ତାୱତା ହତୋତି ॥
ମଣିଚୋରଜାତକଂ ଚତୁତ୍ଥଂ ।
୧୯୫. ପବ୍ବତୂପତ୍ଥରଜାତକଂ (୨-୫-୫)
ପବ୍ବତୂପତ୍ଥରେ [ପବ୍ବତପତ୍ଥରେ (ସୀ॰ ସ୍ୟା॰ ପୀ॰)] ରମ୍ମେ, ଜାତା ପୋକ୍ଖରଣୀ ସିୱା ।
ତଂ ସିଙ୍ଗାଲୋ ଅପାପାୟି [ଅପାପାସି (ସୀ॰ ସ୍ୟା॰ ପୀ॰)], ଜାନଂ ସୀହେନ ରକ୍ଖିତଂ ॥
ପିୱନ୍ତି ଚେ [ପିୱନ୍ତି ୱେ (ସୀ॰), ପିୱନ୍ତିୱ (ପୀ॰), ପିୱନ୍ତେୱ ( ?)] ମହାରାଜ, ସାପଦାନି ମହାନଦିଂ ।
ନ ତେନ ଅନଦୀ ହୋତି, ଖମସ୍ସୁ ୟଦି ତେ ପିୟାତି ॥
ପବ୍ବତୂପତ୍ଥର [ପବ୍ବତପତ୍ଥର (ସୀ॰ ସ୍ୟା॰ ପୀ॰)] ଜାତକଂ ପଞ୍ଚମଂ ।
୧୯୬. ୱଲାହକସ୍ସଜାତକଂ (୨-୫-୬)
ୟେ ନ କାହନ୍ତି ଓୱାଦଂ, ନରା ବୁଦ୍ଧେନ ଦେସିତଂ ।
ବ୍ୟସନଂ ତେ ଗମିସ୍ସନ୍ତି, ରକ୍ଖସୀହିୱ ୱାଣିଜା ॥
ୟେ ଚ କାହନ୍ତି ଓୱାଦଂ, ନରା ବୁଦ୍ଧେନ ଦେସିତଂ ।
ସୋତ୍ଥିଂ ପାରଂ ଗମିସ୍ସନ୍ତି, ୱଲାହେନେୱ [ୱାଲାହେନେୱ (ସୀ॰ ପୀ॰)] ୱାଣିଜାତି ॥
ୱଲାହକସ୍ସ [ୱାଲାହସ୍ସ (ସୀ॰ ପୀ॰)] ଜାତକଂ ଛଟ୍ଠଂ ।
୧୯୭. ମିତ୍ତାମିତ୍ତଜାତକଂ (୨-୫-୭)
ନ ନଂ ଉମ୍ହୟତେ ଦିସ୍ୱା, ନ ଚ ନଂ ପଟିନନ୍ଦତି ।
ଚକ୍ଖୂନି ଚସ୍ସ ନ ଦଦାତି, ପଟିଲୋମଞ୍ଚ ୱତ୍ତତି ॥
ଏତେ ଭୱନ୍ତି ଆକାରା, ଅମିତ୍ତସ୍ମିଂ ପତିଟ୍ଠିତା ।
ୟେହି ଅମିତ୍ତଂ ଜାନେୟ୍ୟ, ଦିସ୍ୱା ସୁତ୍ୱା ଚ ପଣ୍ଡିତୋତି ॥
ମିତ୍ତାମିତ୍ତଜାତକଂ ସତ୍ତମଂ ।
୧୯୮. ରାଧଜାତକଂ (୨-୫-୮)
ପୱାସା ଆଗତୋ ତାତ, ଇଦାନି ନଚିରାଗତୋ ।
କଚ୍ଚିନ୍ନୁ ତାତ ତେ ମାତା, ନ ଅଞ୍ଞମୁପସେୱତି ॥
ନ ଖୋ ପନେତଂ ସୁଭଣଂ, ଗିରଂ ସଚ୍ଚୁପସଂହିତଂ ।
ସୟେଥ ପୋଟ୍ଠପାଦୋୱ, ମୁମ୍ମୁରେ [ମୁମ୍ମୁରେ (ସ୍ୟା॰), ମଂ ପୁରେ (କ॰) ମୁମ୍ମୁରସଦ୍ଦୋ ଥୁସଗ୍ଗିମ୍ହି କୁକ୍କୁଳେ ଚ ୱତ୍ତତୀତି ସକ୍କତାଭିଧାନେସୁ] ଉପକୂଥିତୋତି [ଉପକୂସିତୋତି (ସୀ॰ ସ୍ୟା॰ ପୀ॰), ଉପକୂଲିତୋ (କ॰)]॥
ରାଧଜାତକଂ ଅଟ୍ଠମଂ ।
୧୯୯. ଗହପତିଜାତକଂ (୨-୫-୯)
ଉଭୟଂ ମେ ନ ଖମତି, ଉଭୟଂ ମେ ନ ରୁଚ୍ଚତି ।
ୟାଚାୟଂ କୋଟ୍ଠମୋତିଣ୍ଣା, ନାଦ୍ଦସଂ ଇତି ଭାସତି ॥
ତଂ ତଂ ଗାମପତି ବ୍ରୂମି, କଦରେ ଅପ୍ପସ୍ମି ଜୀୱିତେ ।
ଦ୍ୱେ ମାସେ ସଙ୍ଗରଂ କତ୍ୱା [କାରଂ କତ୍ୱାନ (ସୀ॰ ପୀ॰), ସଂକରଂ କତ୍ୱା (କ॰)], ମଂସଂ ଜରଗ୍ଗୱଂ କିସଂ ।
ଅପ୍ପତ୍ତକାଲେ ଚୋଦେସି, ତମ୍ପି ମୟ୍ହଂ ନ ରୁଚ୍ଚତୀତି ॥
ଗହପତିଜାତକଂ ନୱମଂ ।
୨୦୦. ସାଧୁସୀଲଜାତକଂ (୨-୫-୧୦)
ସରୀରଦବ୍ୟଂ ୱୁଡ୍ଢବ୍ୟଂ [ୱଦ୍ଧବ୍ୟଂ (ସୀ॰ ପୀ॰)], ସୋଜଚ୍ଚଂ ସାଧୁସୀଲିୟଂ ।
ବ୍ରାହ୍ମଣଂ ତେୱ ପୁଚ୍ଛାମ, କନ୍ନୁ ତେସଂ ୱନିମ୍ହସେ [ୱଣିମ୍ହସେ (ସୀ॰ ପୀ॰)]॥
ଅତ୍ଥୋ ଅତ୍ଥି ସରୀରସ୍ମିଂ, ୱୁଡ୍ଢବ୍ୟସ୍ସ ନମୋ କରେ ।
ଅତ୍ଥୋ ଅତ୍ଥି ସୁଜାତସ୍ମିଂ, ସୀଲଂ ଅସ୍ମାକ ରୁଚ୍ଚତୀତି ॥
ସାଧୁସୀଲଜାତକଂ ଦସମଂ ।
ରୁହକୱଗ୍ଗୋ ପଞ୍ଚମୋ ।
ତସ୍ସୁଦ୍ଦାନଂ –
ଅପିରୁହକ ରୂପୱତୀ ମୁସଲୋ, ପୱସନ୍ତି ସପଞ୍ଚମପୋକ୍ଖରଣୀ ।
ଅଥ ମୁତ୍ତିମୱାଣିଜ ଉମ୍ହୟତେ, ଚିରଆଗତ କୋଟ୍ଠ ସରୀର ଦସାତି ॥
୬. ନତଂଦଳ୍ହୱଗ୍ଗୋ
୨୦୧. ବନ୍ଧନାଗାରଜାତକଂ (୨-୬-୧)
ନ ତଂ ଦଳ୍ହଂ ବନ୍ଧନମାହୁ ଧୀରା, ୟଦାୟସଂ ଦାରୁଜପବ୍ବଜଞ୍ଚ [ବବ୍ବଜଞ୍ଚ (ସୀ॰)]।
ସାରତ୍ତରତ୍ତା ମଣିକୁଣ୍ଡଲେସୁ, ପୁତ୍ତେସୁ ଦାରେସୁ ଚ ୟା ଅପେକ୍ଖା ॥
ଏତଂ ଦଳ୍ହଂ ବନ୍ଧନମାହୁ ଧୀରା, ଓହାରିନଂ ସିଥିଲଂ ଦୁପ୍ପମୁଞ୍ଚଂ ।
ଏତମ୍ପି ଛେତ୍ୱାନ ୱଜନ୍ତି ଧୀରା, ଅନପେକ୍ଖିନୋ କାମସୁଖଂ ପହାୟାତି ॥
ବନ୍ଧନାଗାରଜାତକଂ ପଠମଂ ।
୨୦୨. କେଳିସୀଲଜାତକଂ (୨-୬-୨)
ହଂସା କୋଞ୍ଚା ମୟୂରା ଚ, ହତ୍ଥୟୋ [ହତ୍ଥିନୋ (ସୀ॰), ହତ୍ଥିୟୋ (ସ୍ୟା॰ ପୀ॰)] ପସଦା ମିଗା ।
ସବ୍ବେ ସୀହସ୍ସ ଭାୟନ୍ତି, ନତ୍ଥି କାୟସ୍ମି ତୁଲ୍ୟତା ॥
ଏୱମେୱ ମନୁସ୍ସେସୁ, ଦହରୋ ଚେପି ପଞ୍ଞୱା ।
ସୋ ହି ତତ୍ଥ ମହା ହୋତି, ନେୱ ବାଲୋ ସରୀରୱାତି ॥
କେଳିସୀଲଜାତକଂ ଦୁତିୟଂ ।
୨୦୩. ଖଣ୍ଡଜାତକଂ (୨-୬-୩)
ୱିରୂପକ୍ଖେହି ମେ ମେତ୍ତଂ, ମେତ୍ତଂ ଏରାପଥେହି ମେ ।
ଛବ୍ୟାପୁତ୍ତେହି ମେ ମେତ୍ତଂ, ମେତ୍ତଂ କଣ୍ହାଗୋତମକେହି ଚ ॥
ଅପାଦକେହି ମେ ମେତ୍ତଂ, ମେତ୍ତଂ ଦ୍ୱିପାଦକେହି ମେ ।
ଚତୁପ୍ପଦେହି ମେ ମେତ୍ତଂ, ମେତ୍ତଂ ବହୁପ୍ପଦେହି ମେ ॥
ମା ମଂ ଅପାଦକୋ ହିଂସି, ମା ମଂ ହିଂସି ଦ୍ୱିପାଦକୋ ।
ମା ମଂ ଚତୁପ୍ପଦୋ ହିଂସି, ମା ମଂ ହିଂସି ବହୁପ୍ପଦୋ ॥
ସବ୍ବେ ସତ୍ତା ସବ୍ବେ ପାଣା, ସବ୍ବେ ଭୂତା ଚ କେୱଲା ।
ସବ୍ବେ ଭଦ୍ରାନି ପସ୍ସନ୍ତୁ, ମା କଞ୍ଚି [କିଞ୍ଚି (ସ୍ୟା॰ କ॰)] ପାପମାଗମା ॥
ଅପ୍ପମାଣୋ ବୁଦ୍ଧୋ, ଅପ୍ପମାଣୋ ଧମ୍ମୋ ।
ଅପ୍ପମାଣୋ ସଙ୍ଘୋ, ପମାଣୱନ୍ତାନି ସରୀସପାନି [ସିରିସପାନି (ସୀ॰ ସ୍ୟା॰ ପୀ॰)]।
ଅହିୱିଚ୍ଛିକସତପଦୀ, ଉଣ୍ଣନାଭି [ଉଣ୍ଣାନାଭି (ସୀ॰ ସ୍ୟା॰ ପୀ॰)] ସରବୂମୂସିକା ॥
କତା ମେ ରକ୍ଖା କତା ମେ ପରିତ୍ତା, ପଟିକ୍କମନ୍ତୁ ଭୂତାନି ।
ସୋହଂ ନମୋ ଭଗୱତୋ, ନମୋ ସତ୍ତନ୍ନଂ ସମ୍ମାସମ୍ବୁଦ୍ଧାନନ୍ତି ॥
ଖଣ୍ଡଜାତକଂ ତତିୟଂ ।
୨୦୪. ୱୀରକଜାତକଂ (୨-୬-୪)
ଅପି ୱୀରକ ପସ୍ସେସି, ସକୁଣଂ ମଞ୍ଜୁଭାଣକଂ ।
ମୟୂରଗୀୱସଙ୍କାସଂ, ପତିଂ ମୟ୍ହଂ ସୱିଟ୍ଠକଂ ॥
ଉଦକଥଲଚରସ୍ସ ପକ୍ଖିନୋ, ନିଚ୍ଚଂ ଆମକମଚ୍ଛଭୋଜିନୋ ।
ତସ୍ସାନୁକରଂ ସୱିଟ୍ଠକୋ, ସେୱାଲେ ପଲିଗୁଣ୍ଠିତୋ ମତୋତି ॥
ୱୀରକଜାତକଂ ଚତୁତ୍ଥଂ ।
୨୦୫. ଗଙ୍ଗେୟ୍ୟଜାତକଂ (୨-୬-୫)
ସୋଭତି ମଚ୍ଛୋ ଗଙ୍ଗେୟ୍ୟୋ, ଅଥୋ ସୋଭତି ୟାମୁନୋ [ସୋଭନ୍ତି ମଚ୍ଛା ଗଙ୍ଗେୟ୍ୟା, ଅଥୋ ସୋଭନ୍ତି ୟାମୁନା (ସ୍ୟା॰ ପୀ॰)]।
ଚତୁପ୍ପଦୋୟଂ ପୁରିସୋ, ନିଗ୍ରୋଧପରିମଣ୍ଡଲୋ ।
ଈସକାୟତ [ଈସମାୟତ (କ॰)] ଗୀୱୋ ଚ, ସବ୍ବେୱ ଅତିରୋଚତି ॥
ୟଂ ପୁଚ୍ଛିତୋ ନ ତଂ ଅକ୍ଖାସି [ଅକ୍ଖା (ସୀ॰ ସ୍ୟା॰ ପୀ॰)], ଅଞ୍ଞଂ ଅକ୍ଖାସି [ଅକ୍ଖାତି (ସ୍ୟା॰ ପୀ॰)] ପୁଚ୍ଛିତୋ ।
ଅତ୍ତପ୍ପସଂସକୋ ପୋସୋ, ନାୟଂ ଅସ୍ମାକ ରୁଚ୍ଚତୀତି ॥
ଗଙ୍ଗେୟ୍ୟଜାତକଂ ପଞ୍ଚମଂ ।
୨୦୬. କୁରୁଙ୍ଗମିଗଜାତକଂ (୨-୬-୬)
ଇଙ୍ଘ ୱଦ୍ଧମୟଂ [ୱଦ୍ଧମୟଂ (ସୀ॰ ସ୍ୟା॰ ପୀ॰)] ପାସଂ, ଛିନ୍ଦ ଦନ୍ତେହି କଚ୍ଛପ ।
ଅହଂ ତଥା କରିସ୍ସାମି, ୟଥା ନେହିତି ଲୁଦ୍ଦକୋ ॥
କଚ୍ଛପୋ ପାୱିସୀ ୱାରିଂ, କୁରୁଙ୍ଗୋ ପାୱିସୀ ୱନଂ ।
ସତପତ୍ତୋ ଦୁମଗ୍ଗମ୍ହା, ଦୂରେ ପୁତ୍ତେ ଅପାନୟୀତି ॥
କୁରୁଙ୍ଗମିଗଜାତକଂ ଛଟ୍ଠଂ ।
୨୦୭. ଅସ୍ସକଜାତକଂ (୨-୬-୭)
ଅୟମସ୍ସକରାଜେନ, ଦେସୋ ୱିଚରିତୋ ମୟା ।
ଅନୁକାମୟ କାମେନ [ଅନୁକାମୟୱନୁକାମେନ (ସୀ॰ ପୀ॰)], ପିୟେନ ପତିନା ସହ ॥
ନୱେନ ସୁଖଦୁକ୍ଖେନ, ପୋରାଣଂ ଅପିଧୀୟତି [ଅପିଥୀୟତି (ସୀ॰ ପୀ॰), ଅପିଥିୟ୍ୟତି (ସ୍ୟା॰)]।
ତସ୍ମା ଅସ୍ସକରଞ୍ଞାୱ, କୀଟୋ ପିୟତରୋ ମମାତି ॥
ଅସ୍ସକଜାତକଂ ସତ୍ତମଂ ।
୨୦୮. ସୁସୁମାରଜାତକଂ (୨-୬-୮)
ଅଲଂ ମେତେହି ଅମ୍ବେହି, ଜମ୍ବୂହି ପନସେହି ଚ ।
ୟାନି ପାରଂ ସମୁଦ୍ଦସ୍ସ, ୱରଂ ମୟ୍ହଂ ଉଦୁମ୍ବରୋ ॥
ମହତୀ ୱତ ତେ ବୋନ୍ଦି, ନ ଚ ପଞ୍ଞା ତଦୂପିକା ।
ସୁସୁମାର [ସୁଂସୁମାର (ସୀ॰ ସ୍ୟା॰ ପୀ॰)] ୱଞ୍ଚିତୋ ମେସି, ଗଚ୍ଛ ଦାନି ୟଥାସୁଖନ୍ତି ॥
ସୁସୁମାରଜାତକଂ ଅଟ୍ଠମଂ ।
୨୦୯. କୁକ୍କୁଟଜାତକଂ (୨-୬-୯)
ଦିଟ୍ଠା ମୟା ୱନେ ରୁକ୍ଖା, ଅସ୍ସକଣ୍ଣା ୱିଭୀଟକା [ୱିଭେଦକା (ସ୍ୟା॰ କ॰)]।
ନ ତାନି ଏୱଂ ସକ୍କନ୍ତି, ୟଥା ତ୍ୱଂ ରୁକ୍ଖ ସକ୍କସି ॥
ପୁରାଣକୁକ୍କୁଟୋ [କକ୍କରୋ (ସୀ॰ ସ୍ୟା॰ ପୀ॰)] ଅୟଂ, ଭେତ୍ୱା ପଞ୍ଜରମାଗତୋ ।
କୁସଲୋ ୱାଳପାସାନଂ, ଅପକ୍କମତି ଭାସତୀତି ॥
କୁକ୍କୁଟ [କକ୍କର (ସୀ॰ ସ୍ୟା॰ ପୀ॰)] ଜାତକଂ ନୱମଂ ।
୨୧୦. କନ୍ଦଗଲକଜାତକଂ (୨-୬-୧୦)
ଅମ୍ଭୋ କୋ ନାମ ୟଂ ରୁକ୍ଖୋ, ସିନ୍ନପତ୍ତୋ [ସୀନପତ୍ତୋ (ସୀ॰ ପୀ॰)] ସକଣ୍ଟକୋ ।
ୟତ୍ଥ ଏକପ୍ପହାରେନ, ଉତ୍ତମଙ୍ଗଂ ୱିଭିଜ୍ଜିତଂ [ୱିସାଟିକଂ (ସୀ॰ ସ୍ୟା॰ ପୀ॰), ୱିଘାଟିତଂ (ସୀ॰ ନିୟ୍ୟ)]॥
ଅଚାରି ୱତାୟଂ ୱିତୁଦଂ ୱନାନି, କଟ୍ଠଙ୍ଗରୁକ୍ଖେସୁ ଅସାରକେସୁ ।
ଅଥାସଦା ଖଦିରଂ ଜାତସାରଂ [ଜାତିସାରଂ (କ॰)], ୟତ୍ଥବ୍ଭିଦା ଗରୁଳୋ ଉତ୍ତମଙ୍ଗନ୍ତି ॥
କନ୍ଦଗଲକ [କନ୍ଦଲକ (କ॰)] ଜାତକଂ ଦସମଂ ।
ନତଂଦଳ୍ହୱଗ୍ଗୋ ଛଟ୍ଠୋ ।
ତସ୍ସୁଦ୍ଦାନଂ –
ଦଳ୍ହବନ୍ଧନ ହଂସୱରୋ ଚ ପୁନ, ୱିରୂପକ୍ଖ ସୱିଟ୍ଠକ ମଚ୍ଛୱରୋ ।
ସକୁରୁଙ୍ଗ ସଅସ୍ସକ ଅମ୍ବୱରୋ, ପୁନ କୁକ୍କୁଟକୋ ଗରୁଳେନ ଦସାତି ॥
୭. ବୀରଣଥମ୍ଭୱଗ୍ଗୋ
୨୧୧. ସୋମଦତ୍ତଜାତକଂ (୨-୭-୧)
ଅକାସି ୟୋଗ୍ଗଂ ଧୁୱମପ୍ପମତ୍ତୋ, ସଂୱଚ୍ଛରଂ ବୀରଣଥମ୍ଭକସ୍ମିଂ ।
ବ୍ୟାକାସି ସଞ୍ଞଂ ପରିସଂ ୱିଗୟ୍ହ, ନ ନିୟ୍ୟମୋ ତାୟତି ଅପ୍ପପଞ୍ଞଂ ॥
ଦ୍ୱୟଂ ୟାଚନକୋ ତାତ, ସୋମଦତ୍ତ ନିଗଚ୍ଛତି ।
ଅଲାଭଂ ଧନଲାଭଂ ୱା, ଏୱଂ ଧମ୍ମା ହି ୟାଚନାତି ॥
ସୋମଦତ୍ତଜାତକଂ ପଠମଂ ।
୨୧୨. ଉଚ୍ଛିଟ୍ଠଭତ୍ତଜାତକଂ (୨-୭-୨)
ଅଞ୍ଞୋ ଉପରିମୋ ୱଣ୍ଣୋ, ଅଞ୍ଞୋ ୱଣ୍ଣୋ ଚ ହେଟ୍ଠିମୋ ।
ବ୍ରାହ୍ମଣୀ ତ୍ୱେୱ ପୁଚ୍ଛାମି, କିଂ ହେଟ୍ଠା କିଞ୍ଚ ଉପ୍ପରି ॥
ଅହଂ ନଟୋସ୍ମି ଭଦ୍ଦନ୍ତେ, ଭିକ୍ଖକୋସ୍ମି ଇଧାଗତୋ ।
ଅୟଞ୍ହି କୋଟ୍ଠମୋତିଣ୍ଣୋ, ଅୟଂ ସୋ ୟଂ [ତ୍ୱଂ (କ॰)] ଗୱେସସୀତି ॥
ଉଚ୍ଛିଟ୍ଠଭତ୍ତଜାତକଂ ଦୁତିୟଂ ।
୨୧୩. ଭରୁଜାତକଂ (୨-୭-୩)
ଇସୀନମନ୍ତରଂ କତ୍ୱା, ଭରୁରାଜାତି [କୁରୁରାଜାତି (କ॰)] ମେ ସୁତଂ ।
ଉଚ୍ଛିନ୍ନୋ ସହ ରଟ୍ଠେହି [ରଟ୍ଠେନ (ସୀ॰ ପୀ॰)], ସରାଜା ୱିଭୱଙ୍ଗତୋ ॥
ତସ୍ମା ହି ଛନ୍ଦାଗମନଂ, ନପ୍ପସଂସନ୍ତି ପଣ୍ଡିତା ।
ଅଦୁଟ୍ଠଚିତ୍ତୋ ଭାସେୟ୍ୟ, ଗିରଂ ସଚ୍ଚୁପସଂହିତନ୍ତି ॥
ଭରୁଜାତକଂ [କୁରୁରାତକଂ (କ॰)] ତତିୟଂ ।
୨୧୪. ପୁଣ୍ଣନଦୀଜାତକଂ (୨-୭-୪)
ପୁଣ୍ଣଂ ନଦିଂ ୟେନ ଚ ପେୟ୍ୟମାହୁ, ଜାତଂ ୟୱଂ ୟେନ ଚ ଗୁୟ୍ହମାହୁ ।
ଦୂରଂ ଗତଂ ୟେନ ଚ ଅୱ୍ହୟନ୍ତି, ସୋ ତ୍ୟାଗତୋ [ତ୍ୟାଭତୋ (ସ୍ୟା॰ କ॰) ପହେଳିଗାଥାଭାୱୋ ମନସି କାତବ୍ବୋ] ହନ୍ଦ ଚ ଭୁଞ୍ଜ ବ୍ରାହ୍ମଣ ॥
ୟତୋ ମଂ ସରତୀ ରାଜା, ୱାୟସମ୍ପି ପହେତୱେ ।
ହଂସା କୋଞ୍ଚା ମୟୂରା ଚ [ହଂସକୋଞ୍ଚମୟୂରାନଂ (କ॰ ଅଟ୍ଠ॰ ପାଠନ୍ତରଂ)], ଅସତୀୟେୱ ପାପିୟାତି ॥
ପୁଣ୍ଣନଦୀଜାତକଂ ଚତୁତ୍ଥଂ ।
୨୧୫. କଚ୍ଛପଜାତକଂ (୨-୭-୫)
ଅୱଧୀ ୱତ ଅତ୍ତାନଂ, କଚ୍ଛପୋ ବ୍ୟାହରଂ ଗିରଂ [କଚ୍ଛପୋୱ ପବ୍ୟାହରଂ (ସ୍ୟା॰), କଚ୍ଛପୋ ସୋ ପବ୍ୟାହରଂ (କ॰)]।
ସୁଗ୍ଗହୀତସ୍ମିଂ କଟ୍ଠସ୍ମିଂ, ୱାଚାୟ ସକିୟାୱଧି ॥
ଏତମ୍ପି ଦିସ୍ୱା ନରୱୀରିୟସେଟ୍ଠ, ୱାଚଂ ପମୁଞ୍ଚେ କୁସଲଂ ନାତିୱେଲଂ ।
ପସ୍ସସି ବହୁଭାଣେନ, କଚ୍ଛପଂ ବ୍ୟସନଂ ଗତନ୍ତି ॥
କଚ୍ଛପଜାତକଂ ପଞ୍ଚମଂ ।
୨୧୬. ମଚ୍ଛଜାତକଂ (୨-୭-୬)
ନ ମାୟମଗ୍ଗି ତପତି, ନ ସୂଲୋ ସାଧୁତଚ୍ଛିତୋ ।
ୟଞ୍ଚ ମଂ ମଞ୍ଞତେ ମଚ୍ଛୀ, ଅଞ୍ଞଂ ସୋ ରତିୟା ଗତୋ ॥
ସୋ ମଂ ଦହତି ରାଗଗ୍ଗି, ଚିତ୍ତଂ ଚୂପତପେତି ମଂ ।
ଜାଲିନୋ ମୁଞ୍ଚଥାୟିରା ମଂ, ନ କାମେ ହଞ୍ଞତେ କ୍ୱଚୀତି ॥
ମଚ୍ଛଜାତକଂ ଛଟ୍ଠଂ ।
୨୧୭. ସେଗ୍ଗୁଜାତକଂ (୨-୭-୭)
ସବ୍ବୋ ଲୋକୋ ଅତ୍ତମନୋ ଅହୋସି, ଅକୋୱିଦା ଗାମଧମ୍ମସ୍ସ ସେଗ୍ଗୁ ।
କୋମାରି କୋ ନାମ [କୋମାରିକା ନାମ (କ॰), କୋମାରିକୋ ନାମ (ସ୍ୟା॰ ପୀ॰)] ତୱଜ୍ଜ ଧମ୍ମୋ, ୟଂ ତ୍ୱଂ ଗହିତା ପୱନେ ପରୋଦସି ॥
ୟୋ ଦୁକ୍ଖଫୁଟ୍ଠାୟ ଭୱେୟ୍ୟ ତାଣଂ, ସୋ ମେ ପିତା ଦୁବ୍ଭି ୱନେ କରୋତି ।
ସା କସ୍ସ କନ୍ଦାମି ୱନସ୍ସ ମଜ୍ଝେ, ୟୋ ତାୟିତା ସୋ ସହସଂ କରୋତୀତି ॥
ସେଗ୍ଗୁଜାତକଂ ସତ୍ତମଂ ।
୨୧୮. କୂଟୱାଣିଜଜାତକଂ (୨-୭-୮)
ସଠସ୍ସ ସାଠେୟ୍ୟମିଦଂ ସୁଚିନ୍ତିତଂ, ପଚ୍ଚୋଡ୍ଡିତଂ ପଟିକୂଟସ୍ସ କୂଟଂ ।
ଫାଲଞ୍ଚେ ଖାଦେୟ୍ୟୁଂ [ଅଦେୟ୍ୟୁଂ (ସୀ॰ ପୀ॰)] ମୂସିକା, କସ୍ମା କୁମାରଂ କୁଲଲା ନ [ନୋ (ସୀ॰ ସ୍ୟା॰ ପୀ॰)] ହରେୟ୍ୟୁଂ ॥
କୂଟସ୍ସ ହି ସନ୍ତି [ସନ୍ତୀଧ (କ॰)] କୂଟକୂଟା, ଭୱତି [ଭୱନ୍ତି (କ॰)] ଚାପି ନିକତିନୋ ନିକତ୍ୟା ।
ଦେହି ପୁତ୍ତନଟ୍ଠ ଫାଲନଟ୍ଠସ୍ସ ଫାଲଂ, ମା ତେ ପୁତ୍ତମହାସି ଫାଲନଟ୍ଠୋତି ॥
କୂଟୱାଣିଜଜାତକଂ ଅଟ୍ଠମଂ ।
୨୧୯. ଗରହିତଜାତକଂ (୨-୭-୯)
ହିରଞ୍ଞଂ ମେ ସୁୱଣ୍ଣଂ ମେ, ଏସା ରତ୍ତିଂ ଦିୱା କଥା ।
ଦୁମ୍ମେଧାନଂ ମନୁସ୍ସାନଂ, ଅରିୟଧମ୍ମଂ ଅପସ୍ସତଂ ॥
ଦ୍ୱେ ଦ୍ୱେ ଗହପତୟୋ ଗେହେ, ଏକୋ ତତ୍ଥ ଅମସ୍ସୁକୋ ।
ଲମ୍ବତ୍ଥନୋ ୱେଣିକତୋ, ଅଥୋ ଅଙ୍କିତକଣ୍ଣକୋ ।
କୀତୋ ଧନେନ ବହୁନା, ସୋ ତଂ ୱିତୁଦତେ ଜନନ୍ତି ॥
ଗରହିତଜାତକଂ ନୱମଂ ।
୨୨୦. ଧମ୍ମଧଜଜାତକଂ (୨-୭-୧୦)
ସୁଖଂ ଜୀୱିତରୂପୋସି, ରଟ୍ଠା ୱିୱନମାଗତୋ ।
ସୋ ଏକକୋ ରୁକ୍ଖମୂଲେ [ଅରଞ୍ଞସ୍ମିଂ (ସୀ॰ ସ୍ୟା॰ ପୀ॰)], କପଣୋ ୱିୟ ଝାୟସି ॥
ସୁଖଂ ଜୀୱିତରୂପୋସ୍ମି, ରଟ୍ଠା ୱିୱନମାଗତୋ ।
ସୋ ଏକକୋ ରୁକ୍ଖମୂଲେ, କପଣୋ ୱିୟ ଝାୟାମି ।
ଧମ୍ମଧଜଜାତକଂ ଦସମଂ ।
ବୀରଣଥମ୍ଭୱଗ୍ଗୋ ସତ୍ତମୋ ।
ତସ୍ସୁଦ୍ଦାନଂ –
ଅଥ ବୀରଣଥମ୍ଭୱରୋ ଚ ନଟୋ, ଭରୁରାଜୱରୁତ୍ତମପୁଣ୍ଣନଦୀ ।
ବହୁଭାଣି ଅଗ୍ଗିପୱନେ ମୂସିକା, ସହଲମ୍ବତ୍ଥନୋ କପଣେନ ଦସାତି ॥
୮. କାସାୱୱଗ୍ଗୋ
୨୨୧. କାସାୱଜାତକଂ (୨-୮-୧)
ଅନିକ୍କସାୱୋ କାସାୱଂ, ୟୋ ୱତ୍ଥଂ ପରିଦହିସ୍ସତି [ପରିଦହେସ୍ସତି (ସୀ॰ ପୀ॰)]।
ଅପେତୋ ଦମସଚ୍ଚେନ, ନ ସୋ କାସାୱମରହତି ॥
ୟୋ ଚ ୱନ୍ତକସାୱସ୍ସ, ସୀଲେସୁ ସୁସମାହିତୋ ।
ଉପେତୋ ଦମସଚ୍ଚେନ, ସ ୱେ କାସାୱମରହତୀତି ॥
କାସାୱଜାତକଂ ପଠମଂ ।
୨୨୨. ଚୂଳନନ୍ଦିୟଜାତକଂ (୨-୮-୨)
ଇଦଂ ତଦାଚରିୟୱଚୋ, ପାରାସରିୟୋ ୟଦବ୍ରୱି [ପୋରାଣାଚରିୟୋବ୍ରୱି (କ॰)]।
ମାସୁ ତ୍ୱଂ ଅକରି [ଅକରା (ସୀ॰ ପୀ॰)] ପାପଂ, ୟଂ ତ୍ୱଂ ପଚ୍ଛା କତଂ ତପେ ॥
ୟାନି କରୋତି ପୁରିସୋ, ତାନି ଅତ୍ତନି ପସ୍ସତି ।
କଲ୍ୟାଣକାରୀ କଲ୍ୟାଣଂ, ପାପକାରୀ ଚ ପାପକଂ ।
ୟାଦିସଂ ୱପତେ ବୀଜଂ, ତାଦିସଂ ହରତେ ଫଲନ୍ତି ॥
ଚୂଳନନ୍ଦିୟଜାତକଂ ଦୁତିୟଂ ।
୨୨୩. ପୁଟଭତ୍ତଜାତକଂ (୨-୮-୩)
ନମେ ନମନ୍ତସ୍ସ ଭଜେ ଭଜନ୍ତଂ, କିଚ୍ଚାନୁକୁବ୍ବସ୍ସ କରେୟ୍ୟ କିଚ୍ଚଂ ।
ନାନତ୍ଥକାମସ୍ସ କରେୟ୍ୟ ଅତ୍ଥଂ, ଅସମ୍ଭଜନ୍ତମ୍ପି ନ ସମ୍ଭଜେୟ୍ୟ ॥
ଚଜେ ଚଜନ୍ତଂ ୱନଥଂ ନ କୟିରା, ଅପେତଚିତ୍ତେନ ନ ସମ୍ଭଜେୟ୍ୟ ।
ଦିଜୋ ଦୁମଂ ଖୀଣଫଲନ୍ତି ଞତ୍ୱା, ଅଞ୍ଞଂ ସମେକ୍ଖେୟ୍ୟ ମହା ହି ଲୋକୋତି ॥
ପୁଟଭତ୍ତଜାତକଂ ତତିୟଂ ।
୨୨୪. କୁମ୍ଭିଲଜାତକଂ (୨-୮-୪)
ୟସ୍ସେତେ ଚତୁରୋ ଧମ୍ମା, ୱାନରିନ୍ଦ ୟଥା ତୱ ।
ସଚ୍ଚଂ ଧମ୍ମୋ ଧିତି ଚାଗୋ, ଦିଟ୍ଠଂ ସୋ ଅତିୱତ୍ତତି ॥
ୟସ୍ସ ଚେତେ ନ ୱିଜ୍ଜନ୍ତି, ଗୁଣା ପରମଭଦ୍ଦକା ।
ସଚ୍ଚଂ ଧମ୍ମୋ ଧିତି ଚାଗୋ, ଦିଟ୍ଠଂ ସୋ ନାତିୱତ୍ତତୀତି ॥
କୁମ୍ଭିଲଜାତକଂ ଚତୁତ୍ଥଂ ।
୨୨୫. ଖନ୍ତିୱଣ୍ଣଜାତକଂ (୨-୮-୫)
ଅତ୍ଥି ମେ ପୁରିସୋ ଦେୱ, ସବ୍ବକିଚ୍ଚେସୁ ବ୍ୟାୱଟୋ [ୱାୱଟୋ (କ॰)]।
ତସ୍ସ ଚେକୋପରାଧତ୍ଥି, ତତ୍ଥ ତ୍ୱଂ କିନ୍ତି ମଞ୍ଞସି ॥
ଅମ୍ହାକମ୍ପତ୍ଥି ପୁରିସୋ, ଏଦିସୋ ଇଧ ୱିଜ୍ଜତି ।
ଦୁଲ୍ଲଭୋ ଅଙ୍ଗସମ୍ପନ୍ନୋ, ଖନ୍ତିରସ୍ମାକ ରୁଚ୍ଚତୀତି ॥
ଖନ୍ତିୱଣ୍ଣଜାତକଂ ପଞ୍ଚମଂ ।
୨୨୬. କୋସିୟଜାତକଂ (୨-୮-୬)
କାଲେ ନିକ୍ଖମନା ସାଧୁ, ନାକାଲେ ସାଧୁ ନିକ୍ଖମୋ ।
ଅକାଲେନ ହି ନିକ୍ଖମ୍ମ, ଏକକମ୍ପି ବହୁଜ୍ଜନୋ ।
ନ କିଞ୍ଚି ଅତ୍ଥଂ ଜୋତେତି, ଧଙ୍କସେନାୱ କୋସିୟଂ ॥
ଧୀରୋ ଚ ୱିଧିୱିଧାନଞ୍ଞୂ, ପରେସଂ ୱିୱରାନୁଗୂ ।
ସବ୍ବାମିତ୍ତେ ୱସୀକତ୍ୱା, କୋସିୟୋୱ ସୁଖୀ ସିୟାତି ॥
କୋସିୟଜାତକଂ ଛଟ୍ଠଂ ।
୨୨୭. ଗୂଥପାଣଜାତକଂ (୨-୮-୭)
ସୂରୋ ସୂରେନ ସଙ୍ଗମ୍ମ, ୱିକ୍କନ୍ତେନ ପହାରିନା ।
ଏହି ନାଗ ନିୱତ୍ତସ୍ସୁ, କିଂ ନୁ ଭୀତୋ ପଲାୟସି ।
ପସ୍ସନ୍ତୁ ଅଙ୍ଗମଗଧା, ମମ ତୁୟ୍ହଞ୍ଚ ୱିକ୍କମଂ ॥
ନ ତଂ ପାଦା ୱଧିସ୍ସାମି, ନ ଦନ୍ତେହି ନ ସୋଣ୍ଡିୟା ।
ମୀଳ୍ହେନ ତଂ ୱଧିସ୍ସାମି, ପୂତି ହଞ୍ଞତୁ ପୂତିନାତି ॥
ଗୂଥପାଣଜାତକଂ ସତ୍ତମଂ ।
୨୨୮. କାମନୀତଜାତକଂ (୨-୮-୮)
ତୟୋ ଗିରିଂ ଅନ୍ତରଂ କାମୟାମି, ପଞ୍ଚାଲା କୁରୁୟୋ କେକକେ ଚ [କୁରୟୋ କେକୟେ ଚ (ସୀ॰)]।
ତତୁତ୍ତରିଂ [ତଦୁତ୍ତରିଂ (କ॰)] ବ୍ରାହ୍ମଣ କାମୟାମି, ତିକିଚ୍ଛ ମଂ ବ୍ରାହ୍ମଣ କାମନୀତଂ ॥
କଣ୍ହାହିଦଟ୍ଠସ୍ସ କରୋନ୍ତି ହେକେ, ଅମନୁସ୍ସପୱିଟ୍ଠସ୍ସ [ଅମନୁସ୍ସୱଦ୍ଧସ୍ସ (ସୀ॰ ପୀ॰), ଅମନୁସ୍ସୱିଟ୍ଠସ୍ସ (ସ୍ୟା॰)] କରୋନ୍ତି ପଣ୍ଡିତା ।
ନ କାମନୀତସ୍ସ କରୋତି କୋଚି, ଓକ୍କନ୍ତସୁକ୍କସ୍ସ ହି କା ତିକିଚ୍ଛାତି ॥
କାମନୀତଜାତକଂ ଅଟ୍ଠମଂ ।
୨୨୯. ପଲାୟିତଜାତକଂ (୨-୮-୯)
ଗଜଗ୍ଗମେଘେହି ହୟଗ୍ଗମାଲିଭି, ରଥୂମିଜାତେହି ସରାଭିୱସ୍ସେଭି [ସରାଭିୱସ୍ସଭି (ସ୍ୟା॰ ସୀ॰ ଅଟ୍ଠ॰), ସରାଭିୱସ୍ସିଭି ( ?)]।
ଥରୁଗ୍ଗହାୱଟ୍ଟ [ଧନୁଗ୍ଗହାୱଟ୍ଟ (କ॰)] ଦଳ୍ହପ୍ପହାରିଭି, ପରିୱାରିତା ତକ୍କସିଲା ସମନ୍ତତୋ ॥
[ଅଭିଧାୱଥା ଚ ପତଥା ଚ, ୱିୱିଧୱିନଦିତା ଚ ଦନ୍ତିଭି । ୱତ୍ତତଜ୍ଜ ତୁମୁଲୋ ଘୋସୋ, ୟଥା ୱିଜ୍ଜୁତା ଜଲଧରସ୍ସ ଗଜ୍ଜତୋତି । (ସୀ॰ ପୀ॰ କ॰)] ଅଭିଧାୱଥ ଚୂପଧାୱଥ ଚ [ଅଭିଧାୱଥା ଚୁପ୍ପତଥା ଚ (ସ୍ୟା॰)], ୱିୱିଧା ୱିନାଦିତା [ୱିନାଦିତତ୍ଥ (କ॰)] ୱଦନ୍ତିଭି ।
ୱତ୍ତତଜ୍ଜ ତୁମୁଲୋ ଘୋସୋ ୟଥା, ୱିଜ୍ଜୁଲତା ଜଲଧରସ୍ସ ଗଜ୍ଜତୋତି [ଅଭିଧାୱଥା ଚ ପତଥା ଚ, ୱିୱିଧୱିନଦିତା ଚ ଦନ୍ତିଭି । ୱତ୍ତତଜ୍ଜ ତୁମୁଲୋ ଘୋସୋ, ୟଥା ୱିଜ୍ଜୁତା ଜଲଧରସ୍ସ ଗଜ୍ଜତୋତି । (ସୀ॰ ପୀ॰ କ॰)]॥
ପଲାୟିତଜାତକଂ ନୱମଂ ।
୨୩୦. ଦୁତିୟପଲାୟିତଜାତକଂ (୨-୮-୧୦)
ଧଜମପରିମିତଂ ଅନନ୍ତପାରଂ, ଦୁପ୍ପସହଂଧଙ୍କେହି ସାଗରଂୱ [ସାଗରମିୱ (ସୀ॰ ସ୍ୟା॰ ପୀ॰)]।
ଗିରିମିୱଅନିଲେନ ଦୁପ୍ପସୟ୍ହୋ [ଦୁପ୍ପସହୋ (ସୀ॰ ପୀ॰ କ॰)], ଦୁପ୍ପସହୋ ଅହମଜ୍ଜତାଦିସେନ ॥
ମା ବାଲିୟଂ ୱିଲପି [ୱିପ୍ପଲପି (ବହୂସୁ)] ନ ହିସ୍ସ ତାଦିସଂ, ୱିଡୟ୍ହସେ [ୱିଳୟ୍ହସେ (ସୀ॰ ପୀ॰)] ନ ହି ଲଭସେ ନିସେଧକଂ ।
ଆସଜ୍ଜସି ଗଜମିୱ ଏକଚାରିନଂ, ୟୋ ତଂ ପଦା ନଳମିୱ ପୋଥୟିସ୍ସତୀତି ॥
ଦୁତିୟପଲାୟିତଜାତକଂ ଦସମଂ ।
କାସାୱୱଗ୍ଗୋ ଅଟ୍ଠମୋ ।
ତସ୍ସୁଦ୍ଦାନଂ –
ୱରୱତ୍ଥୱଚୋ ଦୁମଖୀଣଫଲଂ, ଚତୁରୋଧମ୍ମୱରଂ ପୁରିସୁତ୍ତମ ।
ଧଙ୍କମଗଧା ଚ ତୟୋଗିରିନାମ, ଗଜଗ୍ଗୱରୋ ଧଜୱରେନ ଦସାତି ॥
୯. ଉପାହନୱଗ୍ଗୋ
୨୩୧. ଉପାହନଜାତକଂ (୨-୯-୧)
ୟଥାପି କୀତା ପୁରିସସ୍ସୁପାହନା, ସୁଖସ୍ସ ଅତ୍ଥାୟ ଦୁଖଂ ଉଦବ୍ବହେ ।
ଘମ୍ମାଭିତତ୍ତା ଥଲସା ପପୀଳିତା, ତସ୍ସେୱ ପାଦେ ପୁରିସସ୍ସ ଖାଦରେ ॥
ଏୱମେୱ ୟୋ ଦୁକ୍କୁଲୀନୋ ଅନରିୟୋ, ତମ୍ମାକ [ତମ୍ହାକ (ସୀ॰), ତୁମ୍ହାକ (ସ୍ୟା॰ ପୀ॰)] ୱିଜ୍ଜଞ୍ଚ ସୁତଞ୍ଚ ଆଦିୟ ।
ତମେୱ ସୋ ତତ୍ଥ ସୁତେନ ଖାଦତି, ଅନରିୟୋ ୱୁଚ୍ଚତି ଦୁପାହନୂପମୋତି [ପାନଦୂପମୋତି (ସୀ॰ ପୀ॰)]॥
ଉପାହନଜାତକଂ ପଠମଂ ।
୨୩୨. ୱୀଣାଗୁଣଜାତକଂ (୨-୯-୨)
ଏକଚିନ୍ତିତୋ ୟମତ୍ଥୋ, ବାଲୋ ଅପରିଣାୟକୋ ।
ନ ହି ଖୁଜ୍ଜେନ ୱାମେନ, ଭୋତି ସଙ୍ଗନ୍ତୁମରହସି ॥
ପୁରିସୂସଭଂ ମଞ୍ଞମାନା, ଅହଂ ଖୁଜ୍ଜମକାମୟିଂ ।
ସୋୟଂ ସଂକୁଟିତୋ ସେତି, ଛିନ୍ନତନ୍ତି ୟଥା ୱିଣାତି [ଥୁଣାତି (ସୀ॰)]॥
ୱୀଣାଗୁଣଜାତକଂ ଦୁତିୟଂ ।
୨୩୩. ୱିକଣ୍ଣଜାତକଂ (୨-୯-୩)
କାମଂ ୟହିଂ ଇଚ୍ଛସି ତେନ ଗଚ୍ଛ, ୱିଦ୍ଧୋସି ମମ୍ମମ୍ହି [ମମସ୍ମି (କ॰)] ୱିକଣ୍ଣକେନ ।
ହତୋସି ଭତ୍ତେନ ସୁୱାଦିତେନ [ସୱାଦିତେନ (ସୀ॰ ସ୍ୟା॰ ପୀ॰)], ଲୋଲୋ ଚ ମଚ୍ଛେ ଅନୁବନ୍ଧମାନୋ ॥
ଏୱମ୍ପି ଲୋକାମିସଂ ଓପତନ୍ତୋ, ୱିହଞ୍ଞତୀ ଚିତ୍ତୱସାନୁୱତ୍ତୀ ।
ସୋ ହଞ୍ଞତି ଞାତିସଖାନ ମଜ୍ଝେ, ମଚ୍ଛାନୁଗୋ ସୋରିୱ ସୁଂସୁମାରୋତି [ସୁସୁମାରୋ (କ॰)]॥
ୱିକଣ୍ଣଜାତକଂ ତତିୟଂ ।
୨୩୪. ଅସିତାଭୂଜାତକଂ (୨-୯-୪)
ତ୍ୱମେୱ ଦାନିମକର [ମକରି (ସ୍ୟା॰), ମକରା (କ॰ ସୀ॰)], ୟଂ କାମୋ ବ୍ୟଗମା ତୟି ।
ସୋୟଂ ଅପ୍ପଟିସନ୍ଧିକୋ, ଖରଛିନ୍ନଂୱ ରେନୁକଂ [ରେରୁକଂ (ସୀ॰ ପୀ॰)]॥
ଅତ୍ରିଚ୍ଛଂ [ଅତ୍ରିଚ୍ଛା (ସୀ॰ ସ୍ୟା॰ ପୀ॰)] ଅତିଲୋଭେନ, ଅତିଲୋଭମଦେନ ଚ ।
ଏୱଂ ହାୟତି ଅତ୍ଥମ୍ହା, ଅହଂୱ ଅସିତାଭୁୟାତି ॥
ଅସିତାଭୂଜାତକଂ ଚତୁତ୍ଥଂ ।
୨୩୫. ୱଚ୍ଛନଖଜାତକଂ (୨-୯-୫)
ସୁଖା ଘରା ୱଚ୍ଛନଖ, ସହିରଞ୍ଞା ସଭୋଜନା ।
ୟତ୍ଥ ଭୁତ୍ୱା ପିୱିତ୍ୱା ଚ, ସୟେୟ୍ୟାଥ ଅନୁସ୍ସୁକୋ ॥
ଘରା ନାନୀହମାନସ୍ସ, ଘରା ନାଭଣତୋ ମୁସା ।
ଘରା ନାଦିନ୍ନଦଣ୍ଡସ୍ସ, ପରେସଂ ଅନିକୁବ୍ବତୋ [ଅନିକ୍ରୁବ୍ବତୋ (କ॰)]।
ଏୱଂ ଛିଦ୍ଦଂ ଦୁରଭିସମ୍ଭୱଂ [ଦୁରଭିଭୱଂ (ସୀ॰ ପୀ॰)], କୋ ଘରଂ ପଟିପଜ୍ଜତୀତି ॥
ୱଚ୍ଛନଖଜାତକଂ ପଞ୍ଚମଂ ।
୨୩୬. ବକଜାତକଂ (୨-୯-୬)
ଭଦ୍ଦକୋ ୱତୟଂ ପକ୍ଖୀ, ଦିଜୋ କୁମୁଦସନ୍ନିଭୋ ।
ୱୂପସନ୍ତେହି ପକ୍ଖେହି, ମନ୍ଦମନ୍ଦୋୱ ଝାୟତି ॥
ନାସ୍ସ ସୀଲଂ ୱିଜାନାଥ, ଅନଞ୍ଞାୟ ପସଂସଥ ।
ଅମ୍ହେ ଦିଜୋ ନ ପାଲେତି, ତେନ ପକ୍ଖୀ ନ ଫନ୍ଦତୀତି ॥
ବକଜାତକଂ ଛଟ୍ଠଂ ।
୨୩୭. ସାକେତଜାତକଂ (୨-୯-୭)
କୋ ନୁ ଖୋ ଭଗୱା ହେତୁ, ଏକଚ୍ଚେ ଇଧ ପୁଗ୍ଗଲେ ।
ଅତୀୱ ହଦୟଂ ନିବ୍ବାତି, ଚିତ୍ତଞ୍ଚାପି ପସୀଦତି ॥
ପୁବ୍ବେୱ ସନ୍ନିୱାସେନ, ପଚ୍ଚୁପ୍ପନ୍ନହିତେନ ୱା ।
ଏୱଂ ତଂ ଜାୟତେ ପେମଂ, ଉପ୍ପଲଂୱ ୟଥୋଦକେତି ॥
ସାକେତଜାତକଂ ସତ୍ତମଂ ।
୨୩୮. ଏକପଦଜାତକଂ (୨-୯-୮)
ଇଙ୍ଘ ଏକପଦଂ ତାତ, ଅନେକତ୍ଥପଦସ୍ସିତଂ [ପଦନିସ୍ସିତଂ (ସୀ॰ ପୀ॰)]।
କିଞ୍ଚି ସଙ୍ଗାହିକଂ ବ୍ରୂସି, ୟେନତ୍ଥେ ସାଧୟେମସେ ॥
ଦକ୍ଖେୟ୍ୟେକପଦଂ ତାତ, ଅନେକତ୍ଥପଦସ୍ସିତଂ ।
ତଞ୍ଚ ସୀଲେନ ସଞ୍ଞୁତ୍ତଂ, ଖନ୍ତିୟା ଉପପାଦିତଂ ।
ଅଲଂ ମିତ୍ତେ ସୁଖାପେତୁଂ, ଅମିତ୍ତାନଂ ଦୁଖାୟ ଚାତି ॥
ଏକପଦଜାତକଂ ଅଟ୍ଠମଂ ।
୨୩୯. ହରିତମଣ୍ଡୂକଜାତକଂ (୨-୯-୯)
ଆସୀୱିସମ୍ପି ମଂ [ଆସୀୱିସଂ ମମଂ (ସୀ॰ ପୀ॰)] ସନ୍ତଂ, ପୱିଟ୍ଠଂ କୁମିନାମୁଖଂ ।
ରୁଚ୍ଚତେ ହରିତାମାତା, ୟଂ ମଂ ଖାଦନ୍ତି ମଚ୍ଛକା ॥
ୱିଲୁମ୍ପତେୱ ପୁରିସୋ, ୟାୱସ୍ସ ଉପକପ୍ପତି ।
ୟଦା ଚଞ୍ଞେ ୱିଲୁମ୍ପନ୍ତି, ସୋ ୱିଲୁତ୍ତୋ ୱିଲୁମ୍ପତୀତି [ୱିଲୁପ୍ପତୀତି ( ?)]॥
ହରିତମଣ୍ଡୂକଜାତକଂ ନୱମଂ ।
୨୪୦. ମହାପିଙ୍ଗଲଜାତକଂ (୨-୯-୧୦)
ସବ୍ବୋ ଜନୋ ହିଂସିତୋ ପିଙ୍ଗଲେନ, ତସ୍ମିଂ ମତେ ପଚ୍ଚୟା [ପଚ୍ଚୟଂ (ସୀ॰ ସ୍ୟା॰ ପୀ॰)] ୱେଦୟନ୍ତି ।
ପିୟୋ ନୁ ତେ ଆସି ଅକଣ୍ହନେତ୍ତୋ, କସ୍ମା ନୁ ତ୍ୱଂ ରୋଦସି ଦ୍ୱାରପାଲ ॥
ନ ମେ ପିୟୋ ଆସି ଅକଣ୍ହନେତ୍ତୋ, ଭାୟାମି ପଚ୍ଚାଗମନାୟ ତସ୍ସ ।
ଇତୋ ଗତୋ ହିଂସେୟ୍ୟ ମଚ୍ଚୁରାଜଂ, ସୋ ହିଂସିତୋ ଆନେୟ୍ୟ ପୁନ ଇଧ ॥
ଦଡ୍ଢୋ ୱାହସହସ୍ସେହି, ସିତ୍ତୋ ଘଟସତେହି ସୋ ।
ପରିକ୍ଖତା ଚ ସା ଭୂମି, ମା ଭାୟି ନାଗମିସ୍ସତୀତି ॥
ମହାପିଙ୍ଗଲଜାତକଂ ଦସମଂ ।
ଉପାହନୱଗ୍ଗୋ ନୱମୋ ।
ତସ୍ସୁଦ୍ଦାନଂ –
ୱରୁପାହନ ଖୁଜ୍ଜ ୱିକଣ୍ଣକକୋ, ଅସିତାଭୁୟ ପଞ୍ଚମୱଚ୍ଛନଖୋ ।
ଦିଜ ପେମୱରୁତ୍ତମଏକପଦଂ, କୁମିନାମୁଖ ପିଙ୍ଗଲକେନ ଦସାତି ॥
୧୦. ସିଙ୍ଗାଲୱଗ୍ଗୋ
୨୪୧. ସବ୍ବଦାଠିଜାତକଂ (୨-୧୦-୧)
ସିଙ୍ଗାଲୋ ମାନଥଦ୍ଧୋ ଚ, ପରିୱାରେନ ଅତ୍ଥିକୋ ।
ପାପୁଣି ମହତିଂ ଭୂମିଂ, ରାଜାସି ସବ୍ବଦାଠିନଂ ॥
ଏୱମେୱ ମନୁସ୍ସେସୁ, ୟୋ ହୋତି ପରିୱାରୱା ।
ସୋ ହି ତତ୍ଥ ମହା ହୋତି, ସିଙ୍ଗାଲୋ ୱିୟ ଦାଠିନନ୍ତି ॥
ସବ୍ବଦାଠିଜାତକଂ ପଠମଂ ।
୨୪୨. ସୁନଖଜାତକଂ (୨-୧୦-୨)
ବାଲୋ ୱତାୟଂ ସୁନଖୋ, ୟୋ ୱରତ୍ତଂ [ୟୋ ଚ ୟୋତ୍ତଂ (କ॰)] ନ ଖାଦତି ।
ବନ୍ଧନା ଚ ପମୁଞ୍ଚେୟ୍ୟ, ଅସିତୋ ଚ ଘରଂ ୱଜେ ॥
ଅଟ୍ଠିତଂ ମେ ମନସ୍ମିଂ ମେ, ଅଥୋ ମେ ହଦୟେ କତଂ ।
କାଲଞ୍ଚ ପଟିକଙ୍ଖାମି, ୟାୱ ପସ୍ସୁପତୂ ଜନୋ [ପସୁପତୁଜ୍ଜନୋ (ସ୍ୟା॰ କ॰)]॥
ସୁନଖଜାତକଂ ଦୁତିୟଂ ।
୨୪୩. ଗୁତ୍ତିଲଜାତକଂ (୨-୧୦-୩)
ସତ୍ତତନ୍ତିଂ ସୁମଧୁରଂ, ରାମଣେୟ୍ୟଂ ଅୱାଚୟିଂ ।
ସୋ ମଂ ରଙ୍ଗମ୍ହି ଅୱ୍ହେତି, ସରଣଂ ମେ ହୋହି କୋସିୟ ॥
ଅହଂ ତଂ ସରଣଂ ସମ୍ମ [ଅହଂ ତେ ସରଣଂ ହୋମି (ୱି॰ ୱ॰ ୩୨୮)], ଅହମାଚରିୟପୂଜକୋ ।
ନ ତଂ ଜୟିସ୍ସତି ସିସ୍ସୋ, ସିସ୍ସମାଚରିୟ ଜେସ୍ସସୀତି ॥
ଗୁତ୍ତିଲଜାତକଂ ତତିୟଂ ।
୨୪୪. ୱିଗତିଚ୍ଛଜାତକଂ (୨-୧୦-୪)
ୟଂ ପସ୍ସତି ନ ତଂ ଇଚ୍ଛତି, ୟଞ୍ଚ ନ ପସ୍ସତି ତଂ କିରିଚ୍ଛତି ।
ମଞ୍ଞାମି ଚିରଂ ଚରିସ୍ସତି, ନ ହି ତଂ ଲଚ୍ଛତି ୟଂ ସ ଇଚ୍ଛତି ॥
ୟଂ ଲଭତି ନ ତେନ ତୁସ୍ସତି, ୟଞ୍ଚ ପତ୍ଥେତି ଲଦ୍ଧଂ ହୀଳେତି ।
ଇଚ୍ଛା ହି ଅନନ୍ତଗୋଚରା, ୱିଗତିଚ୍ଛାନ [ୱୀତିଚ୍ଛାନଂ (ସୀ॰ ପୀ॰)] ନମୋ କରୋମସେତି ॥
ୱିଗତିଚ୍ଛ [ୱୀତିଚ୍ଛ (ସୀ॰ ପୀ॰)] ଜାତକଂ ଚତୁତ୍ଥଂ ।
୨୪୫. ମୂଲପରିୟାୟଜାତକଂ (୨-୧୦-୫)
କାଲୋ ଘସତି ଭୂତାନି, ସବ୍ବାନେୱ ସହତ୍ତନା ।
ୟୋ ଚ କାଲଘସୋ ଭୂତୋ, ସ ଭୂତପଚନିଂ ପଚି ॥
ବହୂନି ନରସୀସାନି, ଲୋମସାନି ବ୍ରହାନି ଚ ।
ଗୀୱାସୁ ପଟିମୁକ୍କାନି, କୋଚିଦେୱେତ୍ଥ କଣ୍ଣୱାତି ॥
ମୂଲପରିୟାୟଜାତକଂ ପଞ୍ଚମଂ ।
୨୪୬. ବାଲୋୱାଦଜାତକଂ (୨-୧୦-୬)
ହନ୍ତ୍ୱା ଛେତ୍ୱା [ଝତ୍ୱା (ସୀ॰ ପୀ॰), ଘତ୍ୱା (ସ୍ୟା॰)] ୱଧିତ୍ୱା ଚ, ଦେତି ଦାନଂ ଅସଞ୍ଞତୋ ।
ଏଦିସଂ ଭତ୍ତଂ ଭୁଞ୍ଜମାନୋ, ସ ପାପମୁପଲିମ୍ପତି [ସ ପାପେନ ଉପଲିପ୍ପତି (ସୀ॰ ପୀ॰)]॥
ପୁତ୍ତଦାରମ୍ପି ଚେ ହନ୍ତ୍ୱା, ଦେତି ଦାନଂ ଅସଞ୍ଞତୋ ।
ଭୁଞ୍ଜମାନୋପି ସପ୍ପଞ୍ଞୋ, ନ ପାପମୁପଲିମ୍ପତୀତି ॥
ବାଲୋୱାଦଜାତକଂ ଛଟ୍ଠଂ ।
୨୪୭. ପାଦଞ୍ଜଲୀଜାତକଂ (୨-୧୦-୭)
ଅଦ୍ଧା ପାଦଞ୍ଜଲୀ ସବ୍ବେ, ପଞ୍ଞାୟ ଅତିରୋଚତି ।
ତଥା ହି ଓଟ୍ଠଂ ଭଞ୍ଜତି, ଉତ୍ତରିଂ ନୂନ ପସ୍ସତି ॥
ନାୟଂ ଧମ୍ମଂ ଅଧମ୍ମଂ ୱା, ଅତ୍ଥାନତ୍ଥଞ୍ଚ ବୁଜ୍ଝତି ।
ଅଞ୍ଞତ୍ର ଓଟ୍ଠନିବ୍ଭୋଗା, ନାୟଂ ଜାନାତି କିଞ୍ଚନନ୍ତି ॥
ପାଦଞ୍ଜଲୀଜାତକଂ ସତ୍ତମଂ ।
୨୪୮. କିଂସୁକୋପମଜାତକଂ (୨-୧୦-୮)
ସବ୍ବେହି କିଂସୁକୋ ଦିଟ୍ଠୋ, କିଂନ୍ୱେତ୍ଥ ୱିଚିକିଚ୍ଛଥ ।
ନ ହି ସବ୍ବେସୁ ଠାନେସୁ, ସାରଥୀ ପରିପୁଚ୍ଛିତୋ ॥
ଏୱଂ ସବ୍ବେହି ଞାଣେହି, ୟେସଂ ଧମ୍ମା ଅଜାନିତା ।
ତେ ୱେ ଧମ୍ମେସୁ କଙ୍ଖନ୍ତି, କିଂସୁକସ୍ମିଂୱ ଭାତରୋତି ॥
କିଂସୁକୋପମଜାତକଂ ଅଟ୍ଠମଂ ।
୨୪୯. ସାଲକଜାତକଂ (୨-୧୦-୯)
ଏକପୁତ୍ତକୋ ଭୱିସ୍ସସି, ତ୍ୱଞ୍ଚ ନୋ ହେସ୍ସସି ଇସ୍ସରୋ କୁଲେ ।
ଓରୋହ ଦୁମସ୍ମା ସାଲକ, ଏହି ଦାନି ଘରକଂ ୱଜେମସେ ॥
ନନୁ ମଂ ସୁହଦୟୋତି [ନନୁ ମଂ ହଦୟେତି (ସୀ॰ ପୀ॰)] ମଞ୍ଞସି, ୟଞ୍ଚ ମଂ ହନସି ୱେଳୁୟଟ୍ଠିୟା ।
ପକ୍କମ୍ବୱନେ ରମାମସେ, ଗଚ୍ଛ ତ୍ୱଂ ଘରକଂ ୟଥାସୁଖନ୍ତି ॥
ସାଲକଜାତକଂ ନୱମଂ ।
୨୫୦. କପିଜାତକଂ (୨-୧୦-୧୦)
ଅୟଂ ଇସୀ ଉପସମସଂୟମେ ରତୋ, ସ ତିଟ୍ଠତି [ସନ୍ତିଟ୍ଠତି (ସୀ॰ ପୀ॰)] ସିସିରଭୟେନ ଅଟ୍ଟିତୋ ।
ହନ୍ଦ ଅୟଂ ପୱିସତୁମଂ ଅଗାରକଂ, ୱିନେତୁ ସୀତଂ ଦରଥଞ୍ଚ କେୱଲଂ ॥
ନାୟଂ ଇସୀ ଉପସମସଂୟମେ ରତୋ, କପୀ ଅୟଂ ଦୁମୱରସାଖଗୋଚରୋ ।
ସୋ ଦୂସକୋ ରୋସକୋ ଚାପି ଜମ୍ମୋ, ସଚେୱଜେମମ୍ପି [ସଚେ + ଆୱଜେ + ଇମମ୍ପି] ଦୂସେୟ୍ୟଗାରନ୍ତି [ଦୂସୟେ ଘରନ୍ତି (ସୀ॰ ସ୍ୟା॰ ପୀ॰)]॥
କପିଜାତକଂ ଦସମଂ ।
ସିଙ୍ଗାଲୱଗ୍ଗୋ ଦସମୋ ।
ତସ୍ସୁଦ୍ଦାନଂ –
ଅଥ ରାଜା ସିଙ୍ଗାଲୱରୋ ସୁନଖୋ, ତଥା କୋସିୟ ଇଚ୍ଛତି କାଲଘସୋ ।
ଅଥ ଦାନୱରୋଟ୍ଠପି ସାରଥିନା, ପୁନମ୍ବୱନଞ୍ଚ ସିସିରକପି ଦସାତି ॥
ଅଥ ୱଗ୍ଗୁଦ୍ଦାନଂ –
ଦଳ୍ହଞ୍ଚ ୱଗ୍ଗଂ ଅପରେନ ସନ୍ଥୱଂ, କଲ୍ୟାଣୱଗ୍ଗାସଦିସୋ ଚ ରୂହକଂ ।
ନତଂଦଳ୍ହ ବୀରଣଥମ୍ଭକଂ ପୁନ, କାସାୱୁପାହନ ସିଙ୍ଗାଲକେନ ଦସାତି ॥
ଦୁକନିପାତଂ ନିଟ୍ଠିତଂ ।
୩. ତିକନିପାତୋ
୧. ସଙ୍କପ୍ପୱଗ୍ଗୋ
୨୫୧. ସଙ୍କପ୍ପରାଗଜାତକଂ (୩-୧-୧)
ସଙ୍କପ୍ପରାଗଧୋତେନ, ୱିତକ୍କନିସିତେନ ଚ ।
ନାଲଙ୍କତେନ ଭଦ୍ରେନ [ନେୱାଲଙ୍କତଭଦ୍ରେନ (ସ୍ୟା॰)], ଉସୁକାରାକତେନ ଚ [ନ ଉସୁକାରକତେନ ଚ (ସୀ॰ ସ୍ୟା॰ ପୀ॰)]॥
ନ କଣ୍ଣାୟତମୁତ୍ତେନ, ନାପି ମୋରୂପସେୱିନା ।
ତେନମ୍ହି ହଦୟେ ୱିଦ୍ଧୋ, ସବ୍ବଙ୍ଗପରିଦାହିନା ॥
ଆୱେଧଞ୍ଚ ନ ପସ୍ସାମି, ୟତୋ ରୁହିରମସ୍ସୱେ ।
ୟାୱ ଅୟୋନିସୋ ଚିତ୍ତଂ, ସୟଂ ମେ ଦୁକ୍ଖମାଭତନ୍ତି ॥
ସଙ୍କପ୍ପରାଗଜାତକଂ ପଠମଂ ।
୨୫୨. ତିଲମୁଟ୍ଠିଜାତକଂ (୩-୧-୨)
ଅଜ୍ଜାପି ମେ ତଂ ମନସି [ସରସି (କ॰)], ୟଂ ମଂ ତ୍ୱଂ ତିଲମୁଟ୍ଠିୟା ।
ବାହାୟ ମଂ ଗହେତ୍ୱାନ, ଲଟ୍ଠିୟା ଅନୁତାଳୟି ॥
ନନୁ ଜୀୱିତେ ନ ରମସି, ୟେନାସି ବ୍ରାହ୍ମଣାଗତୋ ।
ୟଂ ମଂ ବାହା ଗହେତ୍ୱାନ, ତିକ୍ଖତ୍ତୁଂ ଅନୁତାଳୟି ॥
ଅରିୟୋ ଅନରିୟଂ କୁବ୍ବନ୍ତଂ [କୁବ୍ବାନଂ (ସୀ॰ ପୀ॰), କୁବ୍ବଂ (ସ୍ୟା॰)], ୟୋ ଦଣ୍ଡେନ ନିସେଧତି ।
ସାସନଂ ତଂ ନ ତଂ ୱେରଂ, ଇତି ନଂ ପଣ୍ଡିତା ୱିଦୂତି ॥
ତିଲମୁଟ୍ଠିଜାତକଂ ଦୁତିୟଂ ।
୨୫୩. ମଣିକଣ୍ଠଜାତକଂ (୩-୧-୩)
ମମନ୍ନପାନଂ ୱିପୁଲଂ ଉଳାରଂ, ଉପ୍ପଜ୍ଜତୀମସ୍ସ ମଣିସ୍ସ ହେତୁ ।
ତଂ ତେ ନ ଦସ୍ସଂ ଅତିୟାଚକୋସି, ନ ଚାପି ତେ ଅସ୍ସମମାଗମିସ୍ସଂ ॥
ସୁସୂ ୟଥା ସକ୍ଖରଧୋତପାଣୀ, ତାସେସି ମଂ ସେଲଂ ୟାଚମାନୋ ।
ତଂ ତେ ନ ଦସ୍ସଂ ଅତିୟାଚକୋସି, ନ ଚାପି ତେ ଅସ୍ସମମାଗମିସ୍ସଂ ॥
ନ ତଂ ୟାଚେ ୟସ୍ସ ପିୟଂ ଜିଗୀସେ [ଜିଗିଂସେ (ସୀ॰ ସ୍ୟା॰ ପୀ॰)], ଦେସ୍ସୋ ହୋତି ଅତିୟାଚନାୟ ।
ନାଗୋ ମଣିଂ ୟାଚିତୋ ବ୍ରାହ୍ମଣେନ, ଅଦସ୍ସନଂୟେୱ ତଦଜ୍ଝଗମାତି ॥
ମଣିକଣ୍ଠଜାତକଂ ତତିୟଂ ।
୨୫୪. କୁଣ୍ଡକକୁଚ୍ଛିସିନ୍ଧୱଜାତକଂ (୩-୧-୪)
ଭୁତ୍ୱା ତିଣପରିଘାସଂ, ଭୁତ୍ୱା ଆଚାମକୁଣ୍ଡକଂ ।
ଏତଂ ତେ ଭୋଜନଂ ଆସି, କସ୍ମା ଦାନି ନ ଭୁଞ୍ଜସି ॥
ୟତ୍ଥ ପୋସଂ ନ ଜାନନ୍ତି, ଜାତିୟା ୱିନୟେନ ୱା ।
ବହୁଂ [ପହୂ (ସୀ॰ ପୀ॰), ପହୁଂ (ସ୍ୟା॰ କ॰)] ତତ୍ଥ ମହାବ୍ରମ୍ହେ, ଅପି ଆଚାମକୁଣ୍ଡକଂ ॥
ତ୍ୱଞ୍ଚ ଖୋ ମଂ ପଜାନାସି, ୟାଦିସାୟଂ ହୟୁତ୍ତମୋ ।
ଜାନନ୍ତୋ ଜାନମାଗମ୍ମ, ନ ତେ ଭକ୍ଖାମି କୁଣ୍ଡକନ୍ତି ॥
କୁଣ୍ଡକକୁଚ୍ଛିସିନ୍ଧୱଜାତକଂ ଚତୁତ୍ଥଂ ।
୨୫୫. ସୁକଜାତକଂ (୩-୧-୫)
ୟାୱ ସୋ ମତ୍ତମଞ୍ଞାସି, ଭୋଜନସ୍ମିଂ ୱିହଙ୍ଗମୋ ।
ତାୱ ଅଦ୍ଧାନମାପାଦି, ମାତରଞ୍ଚ ଅପୋସୟି ॥
ୟତୋ ଚ ଖୋ ବହୁତରଂ, ଭୋଜନଂ ଅଜ୍ଝୱାହରି [ଅଜ୍ଝୁପାହରି (ସୀ॰ ପୀ॰)]।
ତତୋ ତତ୍ଥେୱ ସଂସୀଦି, ଅମତ୍ତଞ୍ଞୂ ହି ସୋ ଅହୁ ॥
ତସ୍ମା ମତ୍ତଞ୍ଞୁତା ସାଧୁ, ଭୋଜନସ୍ମିଂ ଅଗିଦ୍ଧତା [ଅଗିଦ୍ଧିତା (ସ୍ୟା॰ କ॰)]।
ଅମତ୍ତଞ୍ଞୂ ହି ସୀଦନ୍ତି, ମତ୍ତଞ୍ଞୂ ଚ ନ ସୀଦରେତି ॥
ସୁକଜାତକଂ ପଞ୍ଚମଂ ।
୨୫୬. ଜରୂଦପାନଜାତକଂ (୩-୧-୬)
ଜରୂଦପାନଂ ଖଣମାନା, ୱାଣିଜା ଉଦକତ୍ଥିକା ।
ଅଜ୍ଝଗମୁଂ ଅୟସଂ ଲୋହଂ [ଅଜ୍ଝଗଂସୁ ଅୟୋଲୋହଂ (ସୀ॰ ସ୍ୟା॰ ପୀ॰)], ତିପୁସୀସଞ୍ଚ ୱାଣିଜା ।
ରଜତଂ ଜାତରୂପଞ୍ଚ, ମୁତ୍ତା ୱେଳୂରିୟା ବହୂ ॥
ତେ ଚ ତେନ ଅସନ୍ତୁଟ୍ଠା, ଭିୟ୍ୟୋ ଭିୟ୍ୟୋ ଅଖାଣିସୁଂ ।
ତେ ତତ୍ଥାସୀୱିସୋ [ତତ୍ଥ ଆସୀୱିସୋ (କ॰), ତତ୍ଥପାସୀୱିସୋ (ସ୍ୟା॰)] ଘୋରୋ, ତେଜସ୍ସୀ ତେଜସା ହନି ॥
ତସ୍ମା ଖଣେ ନାତିଖଣେ, ଅତିଖାତଂ [ଅତିଖଣଂ (କ॰)] ହି ପାପକଂ ।
ଖାତେନ ଚ [ଖଣେନ ଚ (କ॰), ଖଣନେନ (ସ୍ୟା॰)] ଧନଂ ଲଦ୍ଧଂ, ଅତିଖାତେନ [ଅତିଖଣେନ (କ॰)] ନାସିତନ୍ତି ॥
ଜରୂଦପାନଜାତକଂ ଛଟ୍ଠଂ ।
୨୫୭. ଗାମଣିଚନ୍ଦଜାତକଂ (୩-୧-୭)
ନାୟଂ ଘରାନଂ କୁସଲୋ, ଲୋଲୋ ଅୟଂ ୱଲୀମୁଖୋ ।
କତଂ କତଂ ଖୋ ଦୂସେୟ୍ୟ, ଏୱଂଧମ୍ମମିଦଂ କୁଲଂ ॥
ନୟିଦଂ ଚିତ୍ତୱତୋ ଲୋମଂ, ନାୟଂ ଅସ୍ସାସିକୋ ମିଗୋ ।
ସିଟ୍ଠଂ [ସତ୍ଥଂ (ସୀ॰ ସ୍ୟା॰ ପୀ॰)] ମେ ଜନସନ୍ଧେନ, ନାୟଂ କିଞ୍ଚି ୱିଜାନତି ॥
ନ ମାତରଂ ପିତରଂ ୱା, ଭାତରଂ ଭଗିନିଂ ସକଂ ।
ଭରେୟ୍ୟ ତାଦିସୋ ପୋସୋ, ସିଟ୍ଠଂ ଦସରଥେନ ମେତି ॥
ଗାମଣିଚନ୍ଦ [ଗାମଣିଚଣ୍ଡ (ସୀ॰ ପୀ॰)] ଜାତକଂ ସତ୍ତମଂ ।
୨୫୮. ମନ୍ଧାତୁଜାତକଂ (୩-୧-୮)
ୟାୱତା ଚନ୍ଦିମସୂରିୟା, ପରିହରନ୍ତି ଦିସା ଭନ୍ତି ୱିରୋଚନା [ୱିରୋଚମାନା (କ॰)]।
ସବ୍ବେୱ ଦାସା ମନ୍ଧାତୁ, ୟେ ପାଣା ପଥୱିସ୍ସିତା [ପଠୱିନିସ୍ସିତା (ସୀ॰ ପୀ॰), ପଠୱିସ୍ସିତା (ସ୍ୟା॰)]॥
ନ କହାପଣୱସ୍ସେନ, ତିତ୍ତି କାମେସୁ ୱିଜ୍ଜତି ।
ଅପ୍ପସ୍ସାଦା ଦୁଖା କାମା, ଇତି ୱିଞ୍ଞାୟ ପଣ୍ଡିତୋ ॥
ଅପି ଦିବ୍ବେସୁ କାମେସୁ, ରତିଂ ସୋ ନାଧିଗଚ୍ଛତି ।
ତଣ୍ହକ୍ଖୟରତୋ ହୋତି, ସମ୍ମାସମ୍ବୁଦ୍ଧସାୱକୋତି ॥
ମନ୍ଧାତୁଜାତକଂ ଅଟ୍ଠମଂ ।
୨୫୯. ତିରୀଟୱଚ୍ଛଜାତକଂ (୩-୧-୯)
ନୟିମସ୍ସ ୱିଜ୍ଜାମୟମତ୍ଥି କିଞ୍ଚି, ନ ବନ୍ଧୱୋ ନୋ ପନ ତେ ସହାୟୋ ।
ଅଥ କେନ ୱଣ୍ଣେନ ତିରୀଟୱଚ୍ଛୋ [ତିରୀଟିୱଚ୍ଛୋ (ସ୍ୟା॰ କ॰)], ତେଦଣ୍ଡିକୋ ଭୁଞ୍ଜତି ଅଗ୍ଗପିଣ୍ଡଂ ॥
ଆପାସୁ [ଆୱାସୁ (କ॰)] ମେ ୟୁଦ୍ଧପରାଜିତସ୍ସ, ଏକସ୍ସ କତ୍ୱା ୱିୱନସ୍ମି ଘୋରେ ।
ପସାରୟୀ କିଚ୍ଛଗତସ୍ସ ପାଣିଂ, ତେନୂଦତାରିଂ ଦୁଖସଂପରେତୋ ॥
ଏତସ୍ସ କିଚ୍ଚେନ ଇଧାନୁପତ୍ତୋ, ୱେସାୟିନୋ ୱିସୟା ଜୀୱଲୋକେ ।
ଲାଭାରହୋ ତାତ ତିରୀଟୱଚ୍ଛୋ, ଦେଥସ୍ସ ଭୋଗଂ ୟଜଥଞ୍ଚ [ୟଜତଞ୍ଚ (ସୀ॰ ପୀ॰), ୟଜିତଞ୍ଚ (ସ୍ୟା॰)] ୟଞ୍ଞନ୍ତି ॥
ତିରୀଟୱଚ୍ଛଜାତକଂ ନୱମଂ ।
୨୬୦. ଦୂତଜାତକଂ (୩-୧-୧୦)
ୟସ୍ସତ୍ଥା ଦୂରମାୟନ୍ତି, ଅମିତ୍ତମପି ୟାଚିତୁଂ ।
ତସ୍ସୂଦରସ୍ସହଂ ଦୂତୋ, ମା ମେ କୁଜ୍ଝ [କୁଜ୍ଝି (ସୀ॰ ପୀ॰)] ରଥେସଭ ॥
ୟସ୍ସ ଦିୱା ଚ ରତ୍ତୋ ଚ, ୱସମାୟନ୍ତି ମାଣୱା ।
ତସ୍ସୂଦରସ୍ସହଂ ଦୂତୋ, ମା ମେ କୁଜ୍ଝ [କୁଜ୍ଝି (ସୀ॰ ପୀ॰)] ରଥେସଭ ॥
ଦଦାମି ତେ ବ୍ରାହ୍ମଣ ରୋହିଣୀନଂ, ଗୱଂ ସହସ୍ସଂ ସହ ପୁଙ୍ଗୱେନ ।
ଦୂତୋ ହି ଦୂତସ୍ସ କଥଂ ନ ଦଜ୍ଜଂ, ମୟମ୍ପି ତସ୍ସେୱ ଭୱାମ ଦୂତାତି ॥
ଦୂତଜାତକଂ ଦସମଂ ।
ସଙ୍କପ୍ପୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ଉସୁକାରୱରୋ ତିଲମୁଟ୍ଠି ମଣି, ହୟରାଜ ୱିହଙ୍ଗମ ଆସିୱିସୋ ।
ଜନସନ୍ଧ କହାପଣୱସ୍ସ ପୁନ, ତିରିଟଂ ପୁନ ଦୂତୱରେନ ଦସାତି ॥
୨. ପଦୁମୱଗ୍ଗୋ
୨୬୧. ପଦୁମଜାତକଂ (୩-୨-୧)
ୟଥା କେସା ଚ ମସ୍ସୂ ଚ, ଛିନ୍ନଂ ଛିନ୍ନଂ ୱିରୂହତି ।
ଏୱଂ ରୂହତୁ ତେ ନାସା, ପଦୁମଂ ଦେହି ୟାଚିତୋ ॥
ୟଥା ସାରଦିକଂ ବୀଜଂ, ଖେତ୍ତେ ୱୁତ୍ତଂ ୱିରୂହତି ।
ଏୱଂ ରୂହତୁ ତେ ନାସା, ପଦୁମଂ ଦେହି ୟାଚିତୋ ॥
ଉଭୋପି ପଲପନ୍ତେତେ [ୱିଲପନ୍ତେତେ (ସ୍ୟା॰ କ॰)], ଅପି ପଦ୍ମାନି ଦସ୍ସତି ।
ୱଜ୍ଜୁଂ ୱା ତେ ନ ୱା ୱଜ୍ଜୁଂ, ନତ୍ଥି ନାସାୟ ରୂହନା ।
ଦେହି ସମ୍ମ ପଦୁମାନି, ଅହଂ ୟାଚାମି ୟାଚିତୋତି ॥
ପଦୁମଜାତକଂ ପଠମଂ ।
୨୬୨. ମୁଦୁପାଣିଜାତକଂ (୩-୨-୨)
ପାଣି ଚେ ମୁଦୁକୋ ଚସ୍ସ, ନାଗୋ ଚସ୍ସ ସୁକାରିତୋ ।
ଅନ୍ଧକାରୋ ଚ ୱସ୍ସେୟ୍ୟ, ଅଥ ନୂନ ତଦା ସିୟା ॥
ଅନଲା ମୁଦୁସମ୍ଭାସା, ଦୁପ୍ପୂରା ତା [ଦୁପ୍ପୂରତ୍ତା (କ॰)] ନଦୀସମା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ୟଂ ଏତା ଉପସେୱନ୍ତି, ଛନ୍ଦସା ୱା ଧନେନ ୱା ।
ଜାତୱେଦୋୱ ସଂ ଠାନଂ, ଖିପ୍ପଂ ଅନୁଦହନ୍ତି ନନ୍ତି ॥
ମୁଦୁପାଣିଜାତକଂ ଦୁତିୟଂ ।
୨୬୩. ଚୂଳପଲୋଭନଜାତକଂ (୩-୨-୩)
ଅଭିଜ୍ଜମାନେ ୱାରିସ୍ମିଂ, ସୟଂ [ଅୟଂ (କ॰)] ଆଗମ୍ମ ଇଦ୍ଧିୟା ।
ମିସ୍ସୀଭାୱିତ୍ଥିୟା ଗନ୍ତ୍ୱା, ସଂସୀଦସି [ସଂସୀଦତି (କ॰)] ମହଣ୍ଣୱେ ॥
ଆୱଟ୍ଟନୀ ମହାମାୟା, ବ୍ରହ୍ମଚରିୟୱିକୋପନା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ୟଂ ଏତା ଉପସେୱନ୍ତି, ଛନ୍ଦସା ୱା ଧନେନ ୱା ।
ଜାତୱେଦୋୱ ସଂ ଠାନଂ, ଖିପ୍ପଂ ଅନୁଦହନ୍ତି ନନ୍ତି ॥
ଚୂଳପଲୋଭନ [ଚୁଲ୍ଲପଲୋଭନ (ସୀ॰ ସ୍ୟା॰ ପୀ॰)] ଜାତକଂ ତତିୟଂ ।
୨୬୪. ମହାପନାଦଜାତକଂ (୩-୨-୪)
ପନାଦୋ ନାମ ସୋ ରାଜା, ୟସ୍ସ ୟୂପୋ ସୁୱଣ୍ଣୟୋ ।
ତିରିୟଂ ସୋଳସୁବ୍ବେଧୋ [ସୋଳସପବ୍ବେଧୋ (ସୀ॰ ପୀ॰)], ଉଦ୍ଧମାହୁ [ଉଚ୍ଚମାହୁ (ସୀ॰ ସ୍ୟା॰ ପୀ॰)] ସହସ୍ସଧା ॥
ସହସ୍ସକଣ୍ଡୋ ସତଗେଣ୍ଡୁ [ସତଭେଦୋ (ସୀ॰ ପୀ॰), ସତଭେଣ୍ଡୁ (ସୀ॰ ନିସ୍ସୟ)], ଧଜାସୁ ହରିତାମୟୋ ।
ଅନଚ୍ଚୁଂ ତତ୍ଥ ଗନ୍ଧବ୍ବା, ଛ ସହସ୍ସାନି ସତ୍ତଧା ॥
ଏୱମେତଂ [ଏୱମେୱ (କ॰)] ତଦା ଆସି, ୟଥା ଭାସସି ଭଦ୍ଦଜି ।
ସକ୍କୋ ଅହଂ ତଦା ଆସିଂ, ୱେୟ୍ୟାୱଚ୍ଚକରୋ ତୱାତି ॥
ମହାପନାଦଜାତକଂ ଚତୁତ୍ଥଂ ।
୨୬୫. ଖୁରପ୍ପଜାତକଂ (୩-୨-୫)
ଦିସ୍ୱା ଖୁରପ୍ପେ ଧନୁୱେଗନୁନ୍ନେ, ଖଗ୍ଗେ ଗହୀତେ ତିଖିଣେ ତେଲଧୋତେ ।
ତସ୍ମିଂ ଭୟସ୍ମିଂ ମରଣେ ୱିୟୂଳ୍ହେ, କସ୍ମା ନୁ ତେ ନାହୁ ଛମ୍ଭିତତ୍ତଂ ॥
ଦିସ୍ୱା ଖୁରପ୍ପେ ଧନୁୱେଗନୁନ୍ନେ, ଖଗ୍ଗେ ଗହୀତେ ତିଖିଣେ ତେଲଧୋତେ ।
ତସ୍ମିଂ ଭୟସ୍ମିଂ ମରଣେ ୱିୟୂଳ୍ହେ, ୱେଦଂ ଅଲତ୍ଥଂ ୱିପୁଲଂ ଉଳାରଂ ॥
ସୋ ୱେଦଜାତୋ ଅଜ୍ଝଭୱିଂ ଅମିତ୍ତେ, ପୁବ୍ବେୱ ମେ ଜୀୱିତମାସି ଚତ୍ତଂ ।
ନ ହି ଜୀୱିତେ ଆଲୟଂ କୁବ୍ବମାନୋ, ସୂରୋ କୟିରା ସୂରକିଚ୍ଚଂ କଦାଚୀତି ॥
ଖୁରପ୍ପଜାତକଂ ପଞ୍ଚମଂ ।
୨୬୬. ୱାତଗ୍ଗସିନ୍ଧୱଜାତକଂ (୩-୨-୬)
ୟେନାସି କିସିୟା ପଣ୍ଡୁ, ୟେନ ଭତ୍ତଂ ନ ରୁଚ୍ଚତି ।
ଅୟଂ ସୋ ଆଗତୋ ଭତ୍ତା [ତାତୋ (ସୀ॰ ସ୍ୟା॰ ପୀ॰)], କସ୍ମା ଦାନି ପଲାୟସି ॥
ସଚେ [ନ ଖୋ (ସ୍ୟା॰ କ॰)] ପନାଦିକେନେୱ, ସନ୍ଥୱୋ ନାମ ଜାୟତି ।
ୟସୋ ହାୟତି ଇତ୍ଥୀନଂ, ତସ୍ମା ତାତ ପଲାୟହଂ [ପଲାୟିହଂ (ସ୍ୟା॰), ପଲାୟିତଂ (କ॰)]॥
ୟସ୍ସସ୍ସିନଂ କୁଲେ ଜାତଂ, ଆଗତଂ ୟା ନ ଇଚ୍ଛତି ।
ସୋଚତି ଚିରରତ୍ତାୟ, ୱାତଗ୍ଗମିୱ ଭଦ୍ଦଲୀତି [କୁନ୍ଦଲୀତି (ସୀ॰ ପୀ॰), ଗଦ୍ରଭୀତି (ସ୍ୟା॰)]॥
ୱାତଗ୍ଗସିନ୍ଧୱଜାତକଂ ଛଟ୍ଠଂ ।
୨୬୭. କକ୍କଟକଜାତକଂ (୩-୨-୭)
ସିଙ୍ଗୀମିଗୋ ଆୟତଚକ୍ଖୁନେତ୍ତୋ, ଅଟ୍ଠିତ୍ତଚୋ ୱାରିସୟୋ ଅଲୋମୋ ।
ତେନାଭିଭୂତୋ କପଣଂ ରୁଦାମି, ମା ହେୱ ମଂ ପାଣସମଂ ଜହେୟ୍ୟ [ଜହେୟ୍ୟା (ପୀ॰) ଜହା’ୟ୍ୟେ ( ?)]॥
ଅୟ୍ୟ ନ ତଂ ଜହିସ୍ସାମି, କୁଞ୍ଜରଂ ସଟ୍ଠିହାୟନଂ [କୁଞ୍ଜର ସଟ୍ଠିହାୟନ (ସୀ॰ ପୀ॰)]।
ପଥବ୍ୟା ଚାତୁରନ୍ତାୟ, ସୁପ୍ପିୟୋ ହୋସି ମେ ତୁୱଂ ॥
ୟେ କୁଳୀରା ସମୁଦ୍ଦସ୍ମିଂ, ଗଙ୍ଗାୟ ୟମୁନାୟ [ନମ୍ମଦାୟ (ସୀ॰ ପୀ॰)] ଚ ।
ତେସଂ ତ୍ୱଂ ୱାରିଜୋ ସେଟ୍ଠୋ, ମୁଞ୍ଚ ରୋଦନ୍ତିୟା ପତିନ୍ତି ॥
କକ୍କଟକ [କୁଳୀର (କ॰)] ଜାତକଂ ସତ୍ତମଂ ।
୨୬୮. ଆରାମଦୂସକଜାତକଂ (୩-୨-୮)
ୟୋ ୱେ ସବ୍ବସମେତାନଂ, ଅହୁୱା ସେଟ୍ଠସମ୍ମତୋ ।
ତସ୍ସାୟଂ ଏଦିସୀ ପଞ୍ଞା, କିମେୱ ଇତରା ପଜା ॥
ଏୱମେୱ ତୁୱଂ ବ୍ରହ୍ମେ, ଅନଞ୍ଞାୟ ୱିନିନ୍ଦସି ।
କଥଂ ମୂଲଂ ଅଦିସ୍ୱାନ [କଥଂହି ମୂଲଂ ଅଦିତ୍ୱା (ସ୍ୟା॰ ପୀ॰)], ରୁକ୍ଖଂ ଜଞ୍ଞା ପତିଟ୍ଠିତଂ ॥
ନାହଂ ତୁମ୍ହେ ୱିନିନ୍ଦାମି, ୟେ ଚଞ୍ଞେ ୱାନରା ୱନେ ।
ୱିସ୍ସସେନୋୱ ଗାରୟ୍ହୋ, ୟସ୍ସତ୍ଥା ରୁକ୍ଖରୋପକାତି ॥
ଆରାମଦୂସକଜାତକଂ ଅଟ୍ଠମଂ ।
୨୬୯. ସୁଜାତଜାତକଂ (୩-୨-୯)
ନ ହି ୱଣ୍ଣେନ ସମ୍ପନ୍ନା, ମଞ୍ଜୁକା ପିୟଦସ୍ସନା ।
ଖରୱାଚା ପିୟା ହୋତି, ଅସ୍ମିଂ ଲୋକେ ପରମ୍ହି ଚ ॥
ନନୁ ପସ୍ସସିମଂ କାଳିଂ, ଦୁବ୍ବଣ୍ଣଂ ତିଲକାହତଂ ।
କୋକିଲଂ ସଣ୍ହୱାଚେନ, ବହୂନଂ ପାଣିନଂ ପିୟଂ ॥
ତସ୍ମା ସଖିଲୱାଚସ୍ସ, ମନ୍ତଭାଣୀ ଅନୁଦ୍ଧତୋ ।
ଅତ୍ଥଂ ଧମ୍ମଞ୍ଚ ଦୀପେତି, ମଧୁରଂ ତସ୍ସ ଭାସିତନ୍ତି ॥
ସୁଜାତଜାତକଂ ନୱମଂ ।
୨୭୦. ଉଲୂକଜାତକଂ (୩-୨-୧୦)
ସବ୍ବେହି କିର ଞାତୀହି, କୋସିୟୋ ଇସ୍ସରୋ କତୋ ।
ସଚେ ଞାତୀହି ଅନୁଞ୍ଞାତୋ [ଞାତୀହନୁଞ୍ଞାତୋ (ସୀ॰ ପୀ॰)], ଭଣେୟ୍ୟାହଂ ଏକୱାଚିକଂ ॥
ଭଣ ସମ୍ମ ଅନୁଞ୍ଞାତୋ, ଅତ୍ଥଂ ଧମ୍ମଞ୍ଚ କେୱଲଂ ।
ସନ୍ତି ହି ଦହରା ପକ୍ଖୀ, ପଞ୍ଞୱନ୍ତୋ ଜୁତିନ୍ଧରା ॥
ନ ମେ ରୁଚ୍ଚତି ଭଦ୍ଦଂ ୱୋ [ଭଦନ୍ତେ (କ॰)], ଉଲୂକସ୍ସାଭିସେଚନଂ ।
ଅକ୍କୁଦ୍ଧସ୍ସ ମୁଖଂ ପସ୍ସ, କଥଂ କୁଦ୍ଧୋ କରିସ୍ସତୀତି ॥
ଉଲୂକଜାତକଂ ଦସମଂ ।
ପଦୁମୱଗ୍ଗୋ ଦୁତିୟୋ ।
ତସ୍ସୁଦ୍ଦାନଂ –
ପଦୁମୁତ୍ତମ ନାଗସିରିୱ୍ହୟନୋ, ସ-ମହଣ୍ଣୱ ୟୂପ ଖୁରପ୍ପୱରୋ ।
ଅଥ ଭଦ୍ଦଲୀ କୁଞ୍ଜର ରୁକ୍ଖ ପୁନ, ଖରୱାଚ ଉଲୂକୱରେନ ଦସାତି ॥
୩. ଉଦପାନୱଗ୍ଗୋ
୨୭୧. ଉଦପାନଦୂସକଜାତକଂ (୩-୩-୧)
ଆରଞ୍ଞିକସ୍ସ ଇସିନୋ, ଚିରରତ୍ତଂ ତପସ୍ସିନୋ ।
କିଚ୍ଛାକତଂ ଉଦପାନଂ, କଥଂ ସମ୍ମ ଅୱାହସି [ଅୱାହୟି (ସୀ॰ ପୀ॰), ଅପାହସି (ସ୍ୟା॰)]॥
ଏସ ଧମ୍ମୋ ସିଙ୍ଗାଲାନଂ, ୟଂ ପିତ୍ୱା ଓହଦାମସେ ।
ପିତୁପିତାମହଂ ଧମ୍ମୋ, ନ ତଂ [ନ ନଂ (ସୀ॰ ପୀ॰)] ଉଜ୍ଝାତୁମରହସି ॥
ୟେସଂ ୱୋ ଏଦିସୋ ଧମ୍ମୋ, ଅଧମ୍ମୋ ପନ କୀଦିସୋ ।
ମା ୱୋ ଧମ୍ମଂ ଅଧମ୍ମଂ ୱା, ଅଦ୍ଦସାମ କୁଦାଚନନ୍ତି ॥
ଉଦପାନଦୂସକଜାତକଂ ପଠମଂ ।
୨୭୨. ବ୍ୟଗ୍ଘଜାତକଂ (୩-୩-୨)
ୟେନ ମିତ୍ତେନ ସଂସଗ୍ଗା, ୟୋଗକ୍ଖେମୋ ୱିହିୟ୍ୟତି ।
ପୁବ୍ବେୱଜ୍ଝାଭୱଂ ତସ୍ସ, ରୁକ୍ଖେ ଅକ୍ଖୀୱ ପଣ୍ଡିତୋ ॥
ୟେନ ମିତ୍ତେନ ସଂସଗ୍ଗା, ୟୋଗକ୍ଖେମୋ ପୱଡ୍ଢତି ।
କରେୟ୍ୟତ୍ତସମଂ ୱୁତ୍ତିଂ, ସବ୍ବକିଚ୍ଚେସୁ ପଣ୍ଡିତୋ ॥
ଏଥ ବ୍ୟଗ୍ଘା ନିୱତ୍ତୱ୍ହୋ, ପଚ୍ଚୁପେଥ [ପଚ୍ଚମେଥ (ସୀ॰ ପୀ॰)] ମହାୱନଂ ।
ମା ୱନଂ ଛିନ୍ଦି ନିବ୍ୟଗ୍ଘଂ, ବ୍ୟଗ୍ଘା ମାହେସୁ ନିବ୍ବନାତି ॥
ବ୍ୟଗ୍ଘଜାତକଂ ଦୁତିୟଂ ।
୨୭୩. କଚ୍ଛପଜାତକଂ (୩-୩-୩)
କୋ ନୁ ଉଦ୍ଧିତଭତ୍ତୋୱ [ଉଦ୍ଦିତଭତ୍ତୋୱ (ସୀ॰), ୱଡ୍ଢିତଭତ୍ତୋୱ (ସ୍ୟା॰)], ପୂରହତ୍ଥୋୱ ବ୍ରାହ୍ମଣୋ ।
କହଂ ନୁ ଭିକ୍ଖଂ ଅଚରି, କଂ ସଦ୍ଧଂ ଉପସଙ୍କମି ॥
ଅହଂ କପିସ୍ମି ଦୁମ୍ମେଧୋ, ଅନାମାସାନି ଆମସିଂ ।
ତ୍ୱଂ ମଂ ମୋଚୟ ଭଦ୍ଦନ୍ତେ, ମୁତ୍ତୋ ଗଚ୍ଛେୟ୍ୟ ପବ୍ବତଂ ॥
କଚ୍ଛପା କସ୍ସପା ହୋନ୍ତି, କୋଣ୍ଡଞ୍ଞା ହୋନ୍ତି ମକ୍କଟା ।
ମୁଞ୍ଚ କସ୍ସପ କୋଣ୍ଡଞ୍ଞଂ, କତଂ ମେଥୁନକଂ ତୟାତି ॥
କଚ୍ଛପଜାତକଂ ତତିୟଂ ।
୨୭୪. ଲୋଲଜାତକଂ (୩-୩-୪)
କାୟଂ ବଲାକା ସିଖିନୀ, ଚୋରୀ ଲଙ୍ଘିପିତାମହା ।
ଓରଂ ବଲାକେ ଆଗଚ୍ଛ, ଚଣ୍ଡୋ ମେ ୱାୟସୋ ସଖା ॥
ନାହଂ ବଲାକା ସିଖିନୀ, ଅହଂ ଲୋଲୋସ୍ମି ୱାୟସୋ ।
ଅକତ୍ୱା ୱଚନଂ ତୁୟ୍ହଂ, ପସ୍ସ ଲୂନୋସ୍ମି ଆଗତୋ ॥
ପୁନପାପଜ୍ଜସୀ ସମ୍ମ, ସୀଲଞ୍ହି ତୱ ତାଦିସଂ ।
ନ ହି ମାନୁସକା ଭୋଗା, ସୁଭୁଞ୍ଜା ହୋନ୍ତି ପକ୍ଖିନାତି ॥
ଲୋଲଜାତକଂ ଚତୁତ୍ଥଂ ।
୨୭୫. ରୁଚିରଜାତକଂ (୩-୩-୫)
କାୟଂ ବଲାକା ରୁଚିରା, କାକନୀଳସ୍ମିମଚ୍ଛତି ।
ଚଣ୍ଡୋ କାକୋ ସଖା ମୟ୍ହଂ, ୟସ୍ସ [ତସ୍ସ (ସୀ॰ ପୀ॰)] ଚେତଂ କୁଲାୱକଂ ॥
ନନୁ ମଂ ସମ୍ମ ଜାନାସି, ଦିଜ ସାମାକଭୋଜନ ।
ଅକତ୍ୱା ୱଚନଂ ତୁୟ୍ହଂ, ପସ୍ସ ଲୂନୋସ୍ମି ଆଗତୋ ॥
ପୁନପାପଜ୍ଜସୀ ସମ୍ମ, ସୀଲଞ୍ହି ତୱ ତାଦିସଂ ।
ନ ହି ମାନୁସକା ଭୋଗା, ସୁଭୁଞ୍ଜା ହୋନ୍ତି ପକ୍ଖିନାତି ॥
ରୁଚିରଜାତକଂ ପଞ୍ଚମଂ ।
୨୭୬. କୁରୁଧମ୍ମଜାତକଂ (୩-୩-୬)
ତୱ ସଦ୍ଧଞ୍ଚ ସୀଲଞ୍ଚ, ୱିଦିତ୍ୱାନ ଜନାଧିପ ।
ୱଣ୍ଣଂ ଅଞ୍ଜନୱଣ୍ଣେନ, କାଲିଙ୍ଗସ୍ମିଂ ନିମିମ୍ହସେ [ୱିନିମ୍ହସେ (ସ୍ୟା॰), ୱନିମ୍ହସେ (କ॰)]॥
ଅନ୍ନଭଚ୍ଚା ଚଭଚ୍ଚା ଚ, ୟୋଧ ଉଦ୍ଦିସ୍ସ ଗଚ୍ଛତି ।
ସବ୍ବେ ତେ ଅପ୍ପଟିକ୍ଖିପ୍ପା, ପୁବ୍ବାଚରିୟୱଚୋ ଇଦଂ ॥
ଦଦାମି ୱୋ ବ୍ରାହ୍ମଣା ନାଗମେତଂ, ରାଜାରହଂ ରାଜଭୋଗ୍ଗଂ ୟସସ୍ସିନଂ ।
ଅଲଙ୍କତଂ ହେମଜାଲାଭିଛନ୍ନଂ, ସସାରଥିଂ ଗଚ୍ଛଥ ୟେନ କାମନ୍ତି ॥
କୁରୁଧମ୍ମଜାତକଂ [କୁରୁଧମ୍ମଜାତକଂ (ସୀ॰ ସ୍ୟା॰ ପୀ॰)] ଛଟ୍ଠଂ ।
୨୭୭. ରୋମକଜାତକଂ (୩-୩-୭)
ୱସ୍ସାନି ପଞ୍ଞାସ ସମାଧିକାନି, ୱସିମ୍ହ ସେଲସ୍ସ ଗୁହାୟ ରୋମକ ।
ଅସଙ୍କମାନା ଅଭିନିବ୍ବୁତତ୍ତା [ଅଭିନିବ୍ବୁତଚିତ୍ତା (ସ୍ୟା॰ କ॰)], ହତ୍ଥତ୍ତ [ହତ୍ଥତ୍ଥ (ସ୍ୟା॰)] ମାୟନ୍ତି ମମଣ୍ଡଜା ପୁରେ ॥
ତେ ଦାନି ୱକ୍କଙ୍ଗ କିମତ୍ଥମୁସ୍ସୁକା, ଭଜନ୍ତି ଅଞ୍ଞଂ ଗିରିକନ୍ଦରଂ ଦିଜା ।
ନ ନୂନ ମଞ୍ଞନ୍ତି ମମଂ ୟଥା ପୁରେ, ଚିରପ୍ପୱୁତ୍ଥା ଅଥ ୱା ନ ତେ ଇମେ ॥
ଜାନାମ ତଂ ନ ମୟଂ ସମ୍ପମୂଳ୍ହା [ନ ମୟ’ମସ୍ମ ମୂଳ୍ହା (ସୀ॰ ପୀ॰)], ସୋୟେୱ ତ୍ୱଂ ତେ ମୟମସ୍ମ ନାଞ୍ଞେ ।
ଚିତ୍ତଞ୍ଚ ତେ ଅସ୍ମିଂ ଜନେ ପଦୁଟ୍ଠଂ, ଆଜୀୱିକା [ଆଜୀୱକ (ସୀ॰ ସ୍ୟା॰), ଆଜୀୱିକ (ପୀ॰)] ତେନ ତମୁତ୍ତସାମାତି ॥
ରୋମକଜାତକଂ ସତ୍ତମଂ ।
୨୭୮. ମହିଂସରାଜଜାତକଂ (୩-୩-୮)
କିମତ୍ଥ [କମତ୍ଥ (ସୀ॰ ପୀ॰)] ମଭିସନ୍ଧାୟ, ଲହୁଚିତ୍ତସ୍ସ ଦୁବ୍ଭିନୋ [ଦୂଭିନୋ (ସୀ॰ ପୀ॰)]।
ସବ୍ବକାମଦଦସ୍ସେୱ [ଦୁହସ୍ସେୱ (ସୀ॰ ସ୍ୟା॰ ପୀ॰), ରହସ୍ସେୱ (କ॰)], ଇମଂ ଦୁକ୍ଖଂ ତିତିକ୍ଖସି ॥
ସିଙ୍ଗେନ ନିହନାହେତଂ, ପଦସା ଚ ଅଧିଟ୍ଠହ ।
ଭିୟ୍ୟୋ [ଭୀୟୋ (ସୀ॰)] ବାଲା ପକୁଜ୍ଝେୟ୍ୟୁଂ, ନୋ ଚସ୍ସ ପଟିସେଧକୋ ॥
ମମେୱାୟଂ ମଞ୍ଞମାନୋ, ଅଞ୍ଞେପେୱଂ [ଅଞ୍ଞମ୍ପେୱଂ (ସୀ॰ ସ୍ୟା॰ ପୀ॰)] କରିସ୍ସତି ।
ତେ ନଂ ତତ୍ଥ ୱଧିସ୍ସନ୍ତି, ସା ମେ ମୁତ୍ତି ଭୱିସ୍ସତୀତି ॥
ମହିଂସରାଜଜାତକଂ [ମହିସଜାତକଂ (ସୀ॰ ସ୍ୟା॰ ପୀ॰)] ଅଟ୍ଠମଂ ।
୨୭୯. ସତପତ୍ତଜାତକଂ (୩-୩-୯)
ୟଥା ମାଣୱକୋ ପନ୍ଥେ, ସିଙ୍ଗାଲିଂ ୱନଗୋଚରିଂ ।
ଅତ୍ଥକାମଂ ପୱେଦେନ୍ତିଂ [ପୱଦନ୍ତିଂ (ପୀ॰)], ଅନତ୍ଥକାମାତି ମଞ୍ଞତି ।
ଅନତ୍ଥକାମଂ ସତପତ୍ତଂ, ଅତ୍ଥକାମୋତି ମଞ୍ଞତି ॥
ଏୱମେୱ ଇଧେକଚ୍ଚୋ, ପୁଗ୍ଗଲୋ ହୋତି ତାଦିସୋ ।
ହିତେହି ୱଚନଂ ୱୁତ୍ତୋ, ପଟିଗଣ୍ହାତି ୱାମତୋ ॥
ୟେ ଚ ଖୋ ନଂ ପସଂସନ୍ତି, ଭୟା ଉକ୍କଂସୟନ୍ତି ୱା [ଚ (ସୀ॰ ପୀ॰)]।
ତଞ୍ହି ସୋ ମଞ୍ଞତେ ମିତ୍ତଂ, ସତପତ୍ତଂୱ ମାଣୱୋତି ॥
ସତପତ୍ତଜାତକଂ ନୱମଂ ।
୨୮୦. ପୁଟଦୂସକଜାତକଂ (୩-୩-୧୦)
ଅଦ୍ଧା ହି ନୂନ ମିଗରାଜା, ପୁଟକମ୍ମସ୍ସ କୋୱିଦୋ ।
ତଥା ହି ପୁଟଂ ଦୂସେତି, ଅଞ୍ଞଂ ନୂନ କରିସ୍ସତି ॥
ନ ମେ ମାତା ୱା ପିତା ୱା, ପୁଟକମ୍ମସ୍ସ କୋୱିଦୋ ।
କତଂ କତଂ ଖୋ ଦୂସେମ, ଏୱଂ ଧମ୍ମମିଦଂ କୁଲଂ ॥
ୟେସଂ ୱୋ ଏଦିସୋ ଧମ୍ମୋ, ଅଧମ୍ମୋ ପନ କୀଦିସୋ ।
ମା ୱୋ ଧମ୍ମଂ ଅଧମ୍ମଂ ୱା, ଅଦ୍ଦସାମ କୁଦାଚନନ୍ତି ॥
ପୁଟଦୂସକଜାତକଂ ଦସମଂ ।
ଉଦପାନୱଗ୍ଗୋ [ଅରଞ୍ଞୱଗ୍ଗୋ (ସୀ॰ ପୀ॰ କ॰)] ତତିୟୋ ।
ତସ୍ସୁଦ୍ଦାନଂ –
ଉଦପାନୱରଂ ୱନବ୍ୟଗ୍ଘ କପି, ସିଖିନୀ ଚ ବଲାକ ରୁଚିରୱରୋ ।
ସୁଜନାଧିପରୋମକଦୂସ ପୁନ, ସତପତ୍ତୱରୋ ପୁଟକମ୍ମ ଦସାତି ॥
୪. ଅବ୍ଭନ୍ତରୱଗ୍ଗୋ
୨୮୧. ଅବ୍ଭନ୍ତରଜାତକଂ (୩-୪-୧)
ଅବ୍ଭନ୍ତରୋ ନାମ ଦୁମୋ, ୟସ୍ସ ଦିବ୍ୟମିଦଂ ଫଲଂ ।
ଭୁତ୍ୱା ଦୋହଳିନୀ ନାରୀ, ଚକ୍କୱତ୍ତିଂ ୱିଜାୟତି ॥
ତ୍ୱମ୍ପି [ତ୍ୱଞ୍ଚ (ସୀ॰ ପୀ॰), ତ୍ୱଂ ହି (କ॰)] ଭଦ୍ଦେ ମହେସୀସି, ସା ଚାପି [ଚାସି (ସୀ॰ ପୀ॰)] ପତିନୋ ପିୟା ।
ଆହରିସ୍ସତି ତେ ରାଜା, ଇଦଂ ଅବ୍ଭନ୍ତରଂ ଫଲଂ ॥
ଭତ୍ତୁରତ୍ଥେ ପରକ୍କନ୍ତୋ, ୟଂ ଠାନମଧିଗଚ୍ଛତି ।
ସୂରୋ ଅତ୍ତପରିଚ୍ଚାଗୀ, ଲଭମାନୋ ଭୱାମହନ୍ତି ॥
ଅବ୍ଭନ୍ତରଜାତକଂ ପଠମଂ ।
୨୮୨. ସେୟ୍ୟଜାତକଂ (୩-୪-୨)
ସେୟ୍ୟଂସୋ ସେୟ୍ୟସୋ ହୋତି, ୟୋ ସେୟ୍ୟମୁପସେୱତି ।
ଏକେନ ସନ୍ଧିଂ କତ୍ୱାନ, ସତଂ ୱଜ୍ଝେ [ମଚ୍ଚେ (କ॰), ବଜ୍ଝେ (କ॰ ଅଟ୍ଠ॰)] ଅମୋଚୟିଂ ॥
[କସ୍ମା…ପେ॰… ସଗ୍ଗଂ ନ ଗଚ୍ଛେୟ୍ୟ (କତ୍ଥଚି)] ତସ୍ମା ସବ୍ବେନ ଲୋକେନ, ସନ୍ଧିଂ କତ୍ୱାନ ଏକତୋ [ଏକକୋ (ସୀ॰ ସ୍ୟା॰ ପୀ॰)]।
ପେଚ୍ଚ ସଗ୍ଗଂ ନିଗଚ୍ଛେୟ୍ୟ [କସ୍ମା…ପେ॰… ସଗ୍ଗଂ ନ ଗଚ୍ଛେୟ୍ୟ (କତ୍ଥଚି)], ଇଦଂ ସୁଣାଥ କାସିୟା [କାସୟୋ (ସୀ॰ ପୀ॰)]॥
ଇଦଂ ୱତ୍ୱା ମହାରାଜା, କଂସୋ ବାରାଣସିଗ୍ଗହୋ ।
ଧନୁଂ କଣ୍ଡଞ୍ଚ [ତୂଣିଞ୍ଚ (ସୀ॰ ପୀ॰)] ନିକ୍ଖିପ୍ପ, ସଂୟମଂ ଅଜ୍ଝୁପାଗମୀତି ॥
ସେୟ୍ୟଜାତକଂ ଦୁତିୟଂ ।
୨୮୩. ୱଡ୍ଢକୀସୂକରଜାତକଂ (୩-୪-୩)
ୱରଂ ୱରଂ ତ୍ୱଂ ନିହନଂ ପୁରେ ଚରି, ଅସ୍ମିଂ ପଦେସେ ଅଭିଭୁୟ୍ୟ ସୂକରେ ।
ସୋ ଦାନି ଏକୋ ବ୍ୟପଗମ୍ମ ଝାୟସି, ବଲଂ ନୁ ତେ ବ୍ୟଗ୍ଘ ନ ଚଜ୍ଜ ୱିଜ୍ଜତି ॥
ଇମେ ସୁଦଂ [ଇମସ୍ସୁ ତା (ସ୍ୟା॰ କ॰)] ୟନ୍ତି ଦିସୋଦିସଂ ପୁରେ, ଭୟଟ୍ଟିତା ଲେଣଗୱେସିନୋ ପୁଥୁ ।
ତେ ଦାନି ସଙ୍ଗମ୍ମ ୱସନ୍ତି ଏକତୋ, ୟତ୍ଥଟ୍ଠିତା ଦୁପ୍ପସହଜ୍ଜମେ [ଦୁପ୍ପସହଜ୍ଜିମେ (ସ୍ୟା॰)] ମୟା ॥
ନମତ୍ଥୁ ସଙ୍ଘାନ ସମାଗତାନଂ, ଦିସ୍ୱା ସୟଂ ସଖ୍ୟ ୱଦାମି ଅବ୍ଭୁତଂ ।
ବ୍ୟଗ୍ଘଂ ମିଗା ୟତ୍ଥ ଜିନିଂସୁ ଦାଠିନୋ, ସାମଗ୍ଗିୟା ଦାଠବଲେସୁ ମୁଚ୍ଚରେତି ॥
ୱଡ୍ଢକୀସୂକରଜାତକଂ ତତିୟଂ ।
୨୮୪. ସିରିଜାତକଂ (୩-୪-୪)
ୟଂ ଉସ୍ସୁକା ସଙ୍ଘରନ୍ତି, ଅଲକ୍ଖିକା ବହୁଂ ଧନଂ ।
ସିପ୍ପୱନ୍ତୋ ଅସିପ୍ପା ଚ, ଲକ୍ଖିୱା ତାନି ଭୁଞ୍ଜତି ॥
ସବ୍ବତ୍ଥ କତପୁଞ୍ଞସ୍ସ, ଅତିଚ୍ଚଞ୍ଞେୱ ପାଣିନୋ ।
ଉପ୍ପଜ୍ଜନ୍ତି ବହୂ ଭୋଗା, ଅପ୍ପନାୟତନେସୁପି ॥
କୁକ୍କୁଟୋ [କୁକ୍କୁଟ (ସୀ॰ ପୀ॰), କୁକ୍କୁଟା (ସୀ॰ ନିସ୍ସୟ, ସଦ୍ଦନୀତି)] ମଣୟୋ ଦଣ୍ଡୋ, ଥିୟୋ ଚ ପୁଞ୍ଞଲକ୍ଖଣା ।
ଉପ୍ପଜ୍ଜନ୍ତି ଅପାପସ୍ସ, କତପୁଞ୍ଞସ୍ସ ଜନ୍ତୁନୋତି ॥
ସିରିଜାତକଂ ଚତୁତ୍ଥଂ ।
୨୮୫. ମଣିସୂକରଜାତକଂ (୩-୪-୫)
ଦରିୟା ସତ୍ତ ୱସ୍ସାନି, ତିଂସମତ୍ତା ୱସାମସେ ।
ହଞ୍ଞାମ [ହଞ୍ଛେମ (ସୀ॰ ପୀ॰), ହଞ୍ଛାମ ( ?)] ମଣିନୋ ଆଭଂ, ଇତି ନୋ ମନ୍ତନଂ ଅହୁ ॥
ୟାୱତା ମଣିଂ ଘଂସାମ [ୟାୱ ୟାୱ ନିଘଂସାମ (ସୀ॰ ପୀ॰)], ଭିୟ୍ୟୋ ୱୋଦାୟତେ ମଣି ।
ଇଦଞ୍ଚ ଦାନି ପୁଚ୍ଛାମ, କିଂ କିଚ୍ଚଂ ଇଧ ମଞ୍ଞସି ॥
ଅୟଂ ମଣି ୱେଳୂରିୟୋ, ଅକାଚୋ ୱିମଲୋ [ୱିପୁଲୋ (କ॰)] ସୁଭୋ ।
ନାସ୍ସ ସକ୍କା ସିରିଂ ହନ୍ତୁଂ, ଅପକ୍କମଥ ସୂକରାତି ॥
ମଣିସୂକର [ମଣିଘଂସ (କ॰)] ଜାତକଂ ପଞ୍ଚମଂ ।
୨୮୬. ସାଲୂକଜାତକଂ (୩-୪-୬)
ମା ସାଲୂକସ୍ସ ପିହୟି, ଆତୁରନ୍ନାନି ଭୁଞ୍ଜତି ।
ଅପ୍ପୋସ୍ସୁକ୍କୋ ଭୁସଂ ଖାଦ, ଏତଂ ଦୀଘାୟୁଲକ୍ଖଣଂ ॥
ଇଦାନି ସୋ ଇଧାଗନ୍ତ୍ୱା, ଅତିଥୀ ୟୁତ୍ତସେୱକୋ ।
ଅଥ ଦକ୍ଖସି ସାଲୂକଂ, ସୟନ୍ତଂ ମୁସଲୁତ୍ତରଂ ॥
ୱିକନ୍ତଂ [ୱିକତ୍ତଂ (ସୀ॰), ୱିକନ୍ତିୟମାନଂ ଛିନ୍ଦିୟମାନଂତି ଅତ୍ଥୋ] ସୂକରଂ ଦିସ୍ୱା, ସୟନ୍ତଂ ମୁସଲୁତ୍ତରଂ ।
ଜରଗ୍ଗୱା ୱିଚିନ୍ତେସୁଂ, ୱରମ୍ହାକଂ ଭୁସାମିୱାତି ॥
ସାଲୂକଜାତକଂ ଛଟ୍ଠଂ ।
୨୮୭. ଲାଭଗରହଜାତକଂ (୩-୪-୭)
ନାନୁମ୍ମତ୍ତୋ ନାପିସୁଣୋ, ନାନଟୋ ନାକୁତୂହଲୋ ।
ମୂଳ୍ହେସୁ ଲଭତେ ଲାଭଂ, ଏସା ତେ ଅନୁସାସନୀ ॥
ଧିରତ୍ଥୁ ତଂ ୟସଲାଭଂ, ଧନଲାଭଞ୍ଚ ବ୍ରାହ୍ମଣ ।
ୟା ୱୁତ୍ତି ୱିନିପାତେନ, ଅଧମ୍ମଚରଣେନ [ଅଧମ୍ମଚରିୟାୟ (ସୀ॰ ସ୍ୟା॰)] ୱା ॥
ଅପି ଚେ ପତ୍ତମାଦାୟ, ଅନଗାରୋ ପରିବ୍ବଜେ ।
ଏସାୱ ଜୀୱିକା ସେୟ୍ୟୋ [ସେୟ୍ୟା (ସୀ॰ ସ୍ୟା॰ ପୀ॰)], ୟା ଚାଧମ୍ମେନ ଏସନାତି ॥
ଲାଭଗରହଜାତକଂ ସତ୍ତମଂ ।
୨୮୮. ମଚ୍ଛୁଦ୍ଦାନଜାତକଂ (୩-୪-୮)
ଅଗ୍ଘନ୍ତି ମଚ୍ଛା ଅଧିକଂ ସହସ୍ସଂ, ନ ସୋ ଅତ୍ଥି ୟୋ ଇମଂ ସଦ୍ଦହେୟ୍ୟ ।
ମୟ୍ହଞ୍ଚ ଅସ୍ସୁ ଇଧ ସତ୍ତ ମାସା, ଅହମ୍ପି ତଂ ମଚ୍ଛୁଦ୍ଦାନଂ କିଣେୟ୍ୟଂ ॥
ମଚ୍ଛାନଂ ଭୋଜନଂ ଦତ୍ୱା, ମମ ଦକ୍ଖିଣମାଦିସି ।
ତଂ ଦକ୍ଖିଣଂ ସରନ୍ତିୟା, କତଂ ଅପଚିତିଂ ତୟା ॥
ପଦୁଟ୍ଠଚିତ୍ତସ୍ସ ନ ଫାତି ହୋତି, ନ ଚାପି ତଂ [ନଂ (ସୀ॰ ସ୍ୟା॰)] ଦେୱତା ପୂଜୟନ୍ତି ।
ୟୋ ଭାତରଂ ପେତ୍ତିକଂ ସାପତେୟ୍ୟଂ, ଅୱଞ୍ଚୟୀ ଦୁକ୍କଟକମ୍ମକାରୀତି ॥
ମଚ୍ଛୁଦ୍ଦାନଜାତକଂ ଅଟ୍ଠମଂ ।
୨୮୯. ନାନାଛନ୍ଦଜାତକଂ (୩-୪-୯)
ନାନାଛନ୍ଦା ମହାରାଜ, ଏକାଗାରେ ୱସାମସେ ।
ଅହଂ ଗାମୱରଂ ଇଚ୍ଛେ, ବ୍ରାହ୍ମଣୀ ଚ ଗୱଂ ସତଂ ॥
ପୁତ୍ତୋ ଚ ଆଜଞ୍ଞରଥଂ, କଞ୍ଞା ଚ ମଣିକୁଣ୍ଡଲଂ ।
ୟା ଚେସା ପୁଣ୍ଣିକା ଜମ୍ମୀ, ଉଦୁକ୍ଖଲଂଭିକଙ୍ଖତି ॥
ବ୍ରାହ୍ମଣସ୍ସ ଗାମୱରଂ, ବ୍ରାହ୍ମଣିୟା ଗୱଂ ସତଂ ।
ପୁତ୍ତସ୍ସ ଆଜଞ୍ଞରଥଂ, କଞ୍ଞାୟ ମଣିକୁଣ୍ଡଲଂ ।
ୟଞ୍ଚେତଂ ପୁଣ୍ଣିକଂ ଜମ୍ମିଂ, ପଟିପାଦେଥୁଦୁକ୍ଖଲନ୍ତି ॥
ନାନାଛନ୍ଦଜାତକଂ ନୱମଂ ।
୨୯୦. ସୀଲୱୀମଂସକଜାତକଂ (୩-୪-୧୦)
ସୀଲଂ କିରେୱ କଲ୍ୟାଣଂ, ସୀଲଂ ଲୋକେ ଅନୁତ୍ତରଂ ।
ପସ୍ସ ଘୋରୱିସୋ ନାଗୋ, ସୀଲୱାତି ନ ହଞ୍ଞତି ॥
ସୋହଂ ସୀଲଂ ସମାଦିସ୍ସଂ, ଲୋକେ ଅନୁମତଂ ସିୱଂ ।
ଅରିୟୱୁତ୍ତିସମାଚାରୋ, ୟେନ ୱୁଚ୍ଚତି ସୀଲୱା ॥
ଞାତୀନଞ୍ଚ ପିୟୋ ହୋତି, ମିତ୍ତେସୁ ଚ ୱିରୋଚତି ।
କାୟସ୍ସ ଭେଦା ସୁଗତିଂ, ଉପପଜ୍ଜତି ସୀଲୱାତି ॥
ସୀଲୱୀମଂସକଜାତକଂ ଦସମଂ ।
ଅବ୍ଭନ୍ତରୱଗ୍ଗୋ ଚତୁତ୍ଥୋ ।
ତସ୍ସୁଦ୍ଦାନଂ –
ଦୁମ କଂସୱରୁତ୍ତମବ୍ୟଗ୍ଘମିଗା, ମଣୟୋ ମଣି ସାଲୁକମୱ୍ହୟନୋ ।
ଅନୁସାସନିୟୋପି ଚ ମଚ୍ଛୱରୋ, ମଣିକୁଣ୍ଡଲକେନ କିରେନ ଦସାତି ॥
୫. କୁମ୍ଭୱଗ୍ଗୋ
୨୯୧. ସୁରାଘଟଜାତକଂ (୨-୫-୧)
ସବ୍ବକାମଦଦଂ କୁମ୍ଭଂ, କୁଟଂ ଲଦ୍ଧାନ ଧୁତ୍ତକୋ ।
ୟାୱ ନଂ ଅନୁପାଲେତି, ତାୱ ସୋ ସୁଖମେଧତି ॥
ୟଦା ମତ୍ତୋ ଚ ଦିତ୍ତୋ ଚ, ପମାଦା କୁମ୍ଭମବ୍ଭିଦା ।
ତଦା ନଗ୍ଗୋ ଚ ପୋତ୍ଥୋ ଚ, ପଚ୍ଛା ବାଲୋ ୱିହଞ୍ଞତି ॥
ଏୱମେୱ ୟୋ ଧନଂ ଲଦ୍ଧା, ପମତ୍ତୋ [ଅମତ୍ତା (ସୀ॰), ଅମତ୍ତୋ (ପୀ॰)] ପରିଭୁଞ୍ଜତି ।
ପଚ୍ଛା ତପ୍ପତି ଦୁମ୍ମେଧୋ, କୁଟଂ ଭିତ୍ୱାୱ [କୁଟଂ ଭିନ୍ନୋୱ (ସୀ॰ ପୀ॰), କୁଟଭିନ୍ନୋୱ ( ?)] ଧୁତ୍ତକୋତି ॥
ସୁରାଘଟ [ଭଦ୍ରଘଟ (ସୀ॰ ପୀ॰), ଭଦ୍ରଘଟଭେଦକ (ସ୍ୟା॰)] ଜାତକଂ ପଠମଂ ।
୨୯୨. ସୁପତ୍ତଜାତକଂ (୩-୫-୨)
ବାରାଣସ୍ୟଂ [ବାରାଣସ୍ସଂ (ସୀ॰ ପୀ॰)] ମହାରାଜ, କାକରାଜା ନିୱାସକୋ [ନିୱାସିକୋ (ସୀ॰ ପୀ॰)]।
ଅସୀତିୟା ସହସ୍ସେହି, ସୁପତ୍ତୋ ପରିୱାରିତୋ ॥
ତସ୍ସ ଦୋହଳିନୀ ଭରିୟା, ସୁଫସ୍ସା ଭକ୍ଖିତୁମିଚ୍ଛତି [ମଚ୍ଛମିଚ୍ଛତି (ସୀ॰ ପୀ॰)]।
ରଞ୍ଞୋ ମହାନସେ ପକ୍କଂ, ପଚ୍ଚଗ୍ଘଂ ରାଜଭୋଜନଂ ॥
ତେସାହଂ ପହିତୋ ଦୂତୋ, ରଞ୍ଞୋ ଚମ୍ହି ଇଧାଗତୋ ।
ଭତ୍ତୁ ଅପଚିତିଂ କୁମ୍ମି, ନାସାୟମକରଂ [ମକରିଂ (ସୀ॰ ନିସ୍ସୟ)] ୱଣନ୍ତି ॥
ସୁପତ୍ତଜାତକଂ ଦୁତିୟଂ ।
୨୯୩. କାୟନିବ୍ବିନ୍ଦଜାତକଂ (୩-୫-୩)
ଫୁଟ୍ଠସ୍ସ ମେ ଅଞ୍ଞତରେନ ବ୍ୟାଧିନା, ରୋଗେନ ବାଳ୍ହଂ ଦୁଖିତସ୍ସ ରୁପ୍ପତୋ ।
ପରିସୁସ୍ସତି ଖିପ୍ପମିଦଂ କଳେୱରଂ, ପୁପ୍ଫଂ ୟଥା ପଂସୁନି ଆତପେ କତଂ ॥
ଅଜଞ୍ଞଂ ଜଞ୍ଞସଙ୍ଖାତଂ, ଅସୁଚିଂ ସୁଚିସମ୍ମତଂ ।
ନାନାକୁଣପପରିପୂରଂ, ଜଞ୍ଞରୂପଂ ଅପସ୍ସତୋ ॥
ଧିରତ୍ଥୁମଂ ଆତୁରଂ ପୂତିକାୟଂ, ଜେଗୁଚ୍ଛିୟଂ ଅସ୍ସୁଚିଂ ବ୍ୟାଧିଧମ୍ମଂ ।
ୟତ୍ଥପ୍ପମତ୍ତା ଅଧିମୁଚ୍ଛିତା ପଜା, ହାପେନ୍ତି ମଗ୍ଗଂ ସୁଗତୂପପତ୍ତିୟାତି ॥
କାୟନିବ୍ବିନ୍ଦ [କାୟୱିଚ୍ଛନ୍ଦ (ସୀ॰), କାୟୱିଚ୍ଛିନ୍ଦ (ପୀ॰)] ଜାତକଂ ତତିୟଂ ।
୨୯୪. ଜମ୍ବୁଖାଦକଜାତକଂ (୩-୫-୪)
କୋୟଂ ବିନ୍ଦୁସ୍ସରୋ ୱଗ୍ଗୁ, ସରୱନ୍ତାନ [ପୱଦନ୍ତାନ (ସୀ॰ ପୀ॰)] ମୁତ୍ତମୋ ।
ଅଚ୍ଚୁତୋ ଜମ୍ବୁସାଖାୟ, ମୋରଚ୍ଛାପୋୱ କୂଜତି ॥
କୁଲପୁତ୍ତୋୱ ଜାନାତି [କୁଲପୁତ୍ତୋ ପଜାନାତି (ସ୍ୟା॰ କ॰)], କୁଲପୁତ୍ତଂ [କୁଲପୁତ୍ତେ (ସୀ॰ ପୀ॰)] ପସଂସିତୁଂ ।
ବ୍ୟଗ୍ଘଚ୍ଛାପସରୀୱଣ୍ଣ, ଭୁଞ୍ଜ ସମ୍ମ ଦଦାମି ତେ ॥
ଚିରସ୍ସଂ ୱତ ପସ୍ସାମି, ମୁସାୱାଦୀ ସମାଗତେ ।
ୱନ୍ତାଦଂ କୁଣପାଦଞ୍ଚ, ଅଞ୍ଞମଞ୍ଞଂ ପସଂସକେତି ॥
ଜମ୍ବୁଖାଦକଜାତକଂ ଚତୁତ୍ଥଂ ।
୨୯୫. ଅନ୍ତଜାତକଂ (୩-୫-୫)
ଉସଭସ୍ସେୱ ତେ ଖନ୍ଧୋ, ସୀହସ୍ସେୱ ୱିଜମ୍ଭିତଂ ।
ମିଗରାଜ ନମୋ ତ୍ୟତ୍ଥୁ, ଅପି କିଞ୍ଚି ଲଭାମସେ ॥
କୁଲପୁତ୍ତୋୱ ଜାନାତି, କୁଲପୁତ୍ତଂ ପସଂସିତୁଂ ।
ମୟୂରଗୀୱସଙ୍କାସ, ଇତୋ ପରିୟାହି ୱାୟସ ॥
ମିଗାନଂ ସିଙ୍ଗାଲୋ [କୋତ୍ଥୁକୋ (ସୀ॰ ପୀ॰), କୋଟ୍ଠୁକୋ (ସ୍ୟା॰)] ଅନ୍ତୋ, ପକ୍ଖୀନଂ ପନ ୱାୟସୋ ।
ଏରଣ୍ଡୋ ଅନ୍ତୋ ରୁକ୍ଖାନଂ, ତୟୋ ଅନ୍ତା ସମାଗତାତି ॥
ଅନ୍ତଜାତକଂ ପଞ୍ଚମଂ ।
୨୯୬. ସମୁଦ୍ଦଜାତକଂ (୩-୫-୬)
କୋ ନାୟଂ [କୋ ନ୍ୱାୟଂ (ସ୍ୟା॰)] ଲୋଣତୋୟସ୍ମିଂ, ସମନ୍ତା ପରିଧାୱତି ।
ମଚ୍ଛେ ମକରେ ଚ ୱାରେତି, ଊମୀସୁ ଚ ୱିହଞ୍ଞତି ॥
ଅନନ୍ତପାୟୀ ସକୁଣୋ, ଅତିତ୍ତୋତି ଦିସାସୁତୋ ।
ସମୁଦ୍ଦଂ ପାତୁମିଚ୍ଛାମି, ସାଗରଂ ସରିତଂ ପତିଂ ॥
ସୋ ଅୟଂ ହାୟତି ଚେୱ, ପୂରତେ ଚ ମହୋଦଧି ।
ନାସ୍ସ ନାୟତି ପୀତନ୍ତୋ, ଅପେୟ୍ୟୋ କିର ସାଗରୋତି ॥
ସମୁଦ୍ଦଜାତକଂ ଛଟ୍ଠଂ ।
୨୯୭. କାମୱିଲାପଜାତକଂ (୩-୫-୭)
ଉଚ୍ଚେ ସକୁଣ ଡେମାନ, ପତ୍ତୟାନ ୱିହଙ୍ଗମ ।
ୱଜ୍ଜାସି ଖୋ ତ୍ୱଂ ୱାମୂରୁଂ, ଚିରଂ ଖୋ ସା କରିସ୍ସତି [ସରିସ୍ସତି (କ॰)]॥
ଇଦଂ ଖୋ ସା ନ ଜାନାତି, ଅସିଂ ସତ୍ତିଞ୍ଚ ଓଡ୍ଡିତଂ ।
ସା ଚଣ୍ଡୀ କାହତି କୋଧଂ, ତଂ ମେ ତପତି ନୋ ଇଦଂ [ନୋ ଇଧ (ସୀ॰ ସ୍ୟା॰ ପୀ॰)]॥
ଏସ ଉପ୍ପଲସନ୍ନାହୋ, ନିକ୍ଖଞ୍ଚୁସ୍ସୀସକୋହିତଂ [ନିକ୍ଖମୁସ୍ସୀସକେ କତଂ (ସୀ॰ ପୀ॰), ନିକ୍ଖଞ୍ଚୁସ୍ସୀସକେ କତଂ (ସ୍ୟା॰)]।
କାସିକଞ୍ଚ ମୁଦୁଂ ୱତ୍ଥଂ, ତପ୍ପେତୁ ଧନିକା ପିୟାତି [ଧନକାମିୟାତି (ସ୍ୟା॰ ପୀ॰), ଧନକାମିକାତି (ସୀ॰)]॥
କାମୱିଲାପଜାତକଂ ସତ୍ତମଂ ।
୨୯୮. ଉଦୁମ୍ବରଜାତକଂ (୩-୫-୮)
ଉଦୁମ୍ବରା ଚିମେ ପକ୍କା, ନିଗ୍ରୋଧା ଚ କପିତ୍ଥନା ।
ଏହି ନିକ୍ଖମ ଭୁଞ୍ଜସ୍ସୁ, କିଂ ଜିଘଚ୍ଛାୟ ମିୟ୍ୟସି ॥
ଏୱଂ ସୋ ସୁହିତୋ ହୋତି, ୟୋ ୱୁଡ୍ଢମପଚାୟତି ।
ୟଥାହମଜ୍ଜ ସୁହିତୋ, ଦୁମପକ୍କାନି ମାସିତୋ ॥
ୟଂ ୱନେଜୋ ୱନେଜସ୍ସ, ୱଞ୍ଚେୟ୍ୟ କପିନୋ କପି ।
ଦହରୋ କପି [ଦହରୋପି ତଂ ନ (ସୀ॰ ପୀ॰), ଦହରୋପି ନ (ସ୍ୟା॰)] ସଦ୍ଧେୟ୍ୟ, ନ ହି ଜିଣ୍ଣୋ ଜରାକପୀତି ॥
ଉଦୁମ୍ବରଜାତକଂ ଅଟ୍ଠମଂ ।
୨୯୯. କୋମାରପୁତ୍ତଜାତକଂ (୩-୫-୯)
ପୁରେ ତୁୱଂ ସୀଲୱତଂ ସକାସେ, ଓକ୍କନ୍ତିକଂ [ଓକ୍କନ୍ଦିକଂ (ସୀ॰ ସ୍ୟା॰ ପୀ॰)] କୀଳସି ଅସ୍ସମମ୍ହି ।
କରୋହରେ [କରୋହି ରେ (କ॰)] ମକ୍କଟିୟାନି ମକ୍କଟ, ନ ତଂ ମୟଂ ସୀଲୱତଂ ରମାମ ॥
ସୁତା ହି ମୟ୍ହଂ ପରମା ୱିସୁଦ୍ଧି, କୋମାରପୁତ୍ତସ୍ସ ବହୁସ୍ସୁତସ୍ସ ।
ମା ଦାନି ମଂ ମଞ୍ଞି ତୁୱଂ ୟଥା ପୁରେ, ଝାନାନୁୟୁତ୍ତୋ ୱିହରାମି [ଝାନାନୁୟୁତ୍ତା ୱିହରାମ (ସୀ॰ ପୀ॰)] ଆୱୁସୋ ॥
ସଚେପି ସେଲସ୍ମି ୱପେୟ୍ୟ ବୀଜଂ, ଦେୱୋ ଚ ୱସ୍ସେ ନ ହି ତଂ ୱିରୂଳ୍ହେ [ନେୱ ହି ତଂ ରୁହେୟ୍ୟ (ସୀ॰ ପୀ॰), ନ ହି ତଂ ୱିରୂହେ ( ?)]।
ସୁତା ହି ତେ ସା ପରମା ୱିସୁଦ୍ଧି, ଆରା ତୁୱଂ ମକ୍କଟ ଝାନଭୂମିୟାତି ॥
କୋମାରପୁତ୍ତଜାତକଂ ନୱମଂ ।
୩୦୦. ୱକଜାତକଂ (୩-୫-୧୦)
ପରପାଣରୋଧା [ପରପାଣଘାତେ (ସ୍ୟା॰), ପରପାଣରୋଚଂ (କ॰)] ଜୀୱନ୍ତୋ, ମଂସଲୋହିତଭୋଜନୋ ।
ୱକୋ ୱତଂ ସମାଦାୟ, ଉପପଜ୍ଜି ଉପୋସଥଂ ॥
ତସ୍ସ ସକ୍କୋ ୱତଞ୍ଞାୟ, ଅଜରୂପେନୁପାଗମି ।
ୱୀତତପୋ ଅଜ୍ଝପ୍ପତ୍ତୋ, ଭଞ୍ଜି ଲୋହିତପୋ ତପଂ ॥
ଏୱମେୱ ଇଧେକଚ୍ଚେ, ସମାଦାନମ୍ହି ଦୁବ୍ବଲା ।
ଲହୁଂ କରୋନ୍ତି ଅତ୍ତାନଂ, ୱକୋୱ ଅଜକାରଣାତି ॥
ୱକଜାତକଂ ଦସମଂ ।
କୁମ୍ଭୱଗ୍ଗୋ ପଞ୍ଚମୋ ।
ତସ୍ସୁଦ୍ଦାନଂ –
ୱରକୁମ୍ଭ ସୁପତ୍ତସିରିୱ୍ହୟନୋ, ସୁଚିସମ୍ମତ ବିନ୍ଦୁସରୋ ଚୁସଭୋ ।
ସରିତଂପତି ଚଣ୍ଡି ଜରାକପିନା, ଅଥ ମକ୍କଟିୟା ୱକକେନ ଦସାତି ॥
ଅଥ ୱଗ୍ଗୁଦ୍ଦାନଂ –
ସଙ୍କପ୍ପୋ ପଦୁମୋ ଚେୱ, ଉଦପାନେନ ତତିୟଂ ।
ଅବ୍ଭନ୍ତରଂ ଘଟଭେଦଂ, ତିକନିପାତମ୍ହିଲଙ୍କତନ୍ତି ॥
ତିକନିପାତଂ ନିଟ୍ଠିତଂ ।
୪. ଚତୁକ୍କନିପାତୋ
୧. କାଲିଙ୍ଗୱଗ୍ଗୋ
୩୦୧. ଚୂଳକାଲିଙ୍ଗଜାତକଂ (୪-୧-୧)
ୱିୱରଥିମାସଂ [ୱିୱରଥ ଇମାସଂ (ସୀ॰ ସ୍ୟା॰ ପୀ॰)] ଦ୍ୱାରଂ, ନଗରଂ ପୱିସନ୍ତୁ [ପୱିସିତୁଂ ମୟା । (କ॰)] ଅରୁଣରାଜସ୍ସ ।
ସୀହେନ ସୁସିଟ୍ଠେନ, ସୁରକ୍ଖିତଂ [ସୁସତ୍ଥେନ, ସୁରକ୍ଖିତଂ (ସୀ॰ ପୀ॰), ସୁସିଟ୍ଠେନ (କ॰)] ନନ୍ଦିସେନେନ ॥
ଜୟୋ କଲିଙ୍ଗାନମସୟ୍ହସାହିନଂ, ପରାଜୟୋ ଅନୟୋ [ଅଜୟୋ (ସ୍ୟା॰), ଅନ୍ୱିତୋ (କ॰)] ଅସ୍ସକାନଂ ।
ଇଚ୍ଚେୱ ତେ ଭାସିତଂ ବ୍ରହ୍ମଚାରି, ନ ଉଜ୍ଜୁଭୂତା ୱିତଥଂ ଭଣନ୍ତି ॥
ଦେୱା ମୁସାୱାଦମୁପାତିୱତ୍ତା, ସଚ୍ଚଂ ଧନଂ ପରମଂ ତେସୁ [ତଥଂ ପେମକରଂ ନୁ (କ॰), ତଥଂ ପରମଂ କରଂ ନୁ (ସ୍ୟା॰)] ସକ୍କ ।
ତଂ ତେ ମୁସା ଭାସିତଂ ଦେୱରାଜ, କିଂ ୱା ପଟିଚ୍ଚ ମଘୱା ମହିନ୍ଦ ॥
ନନୁ ତେ ସୁତଂ ବ୍ରାହ୍ମଣ ଭଞ୍ଞମାନେ, ଦେୱା ନ ଇସ୍ସନ୍ତି ପୁରିସପରକ୍କମସ୍ସ ।
ଦମୋ ସମାଧି ମନସୋ ଅଭେଜ୍ଜୋ [ଅଦେଜ୍ଜୋ (ସୀ॰ ପୀ॰), ଅଭିଜ୍ଜୋ (କ॰)], ଅବ୍ୟଗ୍ଗତା ନିକ୍କମନଞ୍ଚ [ନିକ୍ଖମନଞ୍ଚ (ସୀ॰)] କାଲେ ।
ଦଳ୍ହଞ୍ଚ ୱିରିୟଂ ପୁରିସପରକ୍କମୋ ଚ, ତେନେୱ ଆସି ୱିଜୟୋ ଅସ୍ସକାନନ୍ତି ॥
ଚୂଳକାଲିଙ୍ଗଜାତକଂ ପଠମଂ ।
୩୦୨. ମହାଅସ୍ସାରୋହଜାତକଂ (୪-୧-୨)
ଅଦେୟ୍ୟେସୁ ଦଦଂ ଦାନଂ, ଦେୟ୍ୟେସୁ ନପ୍ପୱେଚ୍ଛତି ।
ଆପାସୁ ବ୍ୟସନଂ ପତ୍ତୋ, ସହାୟଂ ନାଧିଗଚ୍ଛତି ॥
ନାଦେୟ୍ୟେସୁ ଦଦଂ ଦାନଂ, ଦେୟ୍ୟେସୁ ୟୋ ପୱେଚ୍ଛତି ।
ଆପାସୁ ବ୍ୟସନଂ ପତ୍ତୋ, ସହାୟମଧିଗଚ୍ଛତି ॥
ସଞ୍ଞୋଗସମ୍ଭୋଗୱିସେସଦସ୍ସନଂ, ଅନରିୟଧମ୍ମେସୁ ସଠେସୁ ନସ୍ସତି ।
କତଞ୍ଚ ଅରିୟେସୁ ଚ ଅଜ୍ଜୱେସୁ, ମହପ୍ଫଲଂ ହୋତି ଅଣୁମ୍ପି ତାଦିସୁ ॥
ୟୋ ପୁବ୍ବେ କତକଲ୍ୟାଣୋ, ଅକା ଲୋକେ ସୁଦୁକ୍କରଂ ।
ପଚ୍ଛା କୟିରା ନ ୱା କୟିରା, ଅଚ୍ଚନ୍ତଂ ପୂଜନାରହୋତି ॥
ମହାଅସ୍ସାରୋହଜାତକଂ ଦୁତିୟଂ ।
୩୦୩. ଏକରାଜଜାତକଂ (୪-୧-୩)
ଅନୁତ୍ତରେ କାମଗୁଣେ ସମିଦ୍ଧେ, ଭୁତ୍ୱାନ ପୁବ୍ବେ ୱସୀ ଏକରାଜ ।
ସୋ ଦାନି ଦୁଗ୍ଗେ ନରକମ୍ହି ଖିତ୍ତୋ, ନପ୍ପଜ୍ଜହେ ୱଣ୍ଣବଲଂ ପୁରାଣଂ ॥
ପୁବ୍ବେୱ ଖନ୍ତୀ ଚ ତପୋ ଚ ମୟ୍ହଂ, ସମ୍ପତ୍ଥିତା ଦୁବ୍ଭିସେନ [ଦବ୍ବସେନା (ସୀ॰ ପୀ॰)] ଅହୋସି ।
ତଂ ଦାନି ଲଦ୍ଧାନ କଥଂ ନୁ ରାଜ, ଜହେ ଅହଂ ୱଣ୍ଣବଲଂ ପୁରାଣଂ ॥
ସବ୍ବା କିରେୱଂ ପରିନିଟ୍ଠିତାନି, ୟସସ୍ସିନଂ ପଞ୍ଞୱନ୍ତଂ ୱିସୟ୍ହ ।
ୟସୋ ଚ ଲଦ୍ଧା ପୁରିମଂ ଉଳାରଂ, ନପ୍ପଜ୍ଜହେ ୱଣ୍ଣବଲଂ ପୁରାଣଂ ॥
ପନୁଜ୍ଜ ଦୁକ୍ଖେନ ସୁଖଂ ଜନିନ୍ଦ, ସୁଖେନ ୱା ଦୁକ୍ଖମସୟ୍ହସାହି ।
ଉଭୟତ୍ଥ ସନ୍ତୋ ଅଭିନିବ୍ବୁତତ୍ତା, ସୁଖେ ଚ ଦୁକ୍ଖେ ଚ ଭୱନ୍ତି ତୁଲ୍ୟାତି ॥
ଏକରାଜଜାତକଂ ତତିୟଂ ।
୩୦୪. ଦଦ୍ଦରଜାତକଂ (୪-୧-୪)
ଇମାନି ମଂ ଦଦ୍ଦର ତାପୟନ୍ତି, ୱାଚାଦୁରୁତ୍ତାନି ମନୁସ୍ସଲୋକେ ।
ମଣ୍ଡୂକଭକ୍ଖା ଉଦକନ୍ତସେୱୀ, ଆସୀୱିସଂ ମଂ ଅୱିସା ସପନ୍ତି ॥
ସକା ରଟ୍ଠା ପବ୍ବାଜିତୋ, ଅଞ୍ଞଂ ଜନପଦଂ ଗତୋ ।
ମହନ୍ତଂ କୋଟ୍ଠଂ କୟିରାଥ, ଦୁରୁତ୍ତାନଂ [ଦୁରୁତ୍ତାନି (କ॰)] ନିଧେତୱେ ॥
ୟତ୍ଥ ପୋସଂ ନ ଜାନନ୍ତି, ଜାତିୟା ୱିନୟେନ ୱା ।
ନ ତତ୍ଥ ମାନଂ କୟିରାଥ, ୱସମଞ୍ଞାତକେ ଜନେ ॥
ୱିଦେସୱାସଂ ୱସତୋ, ଜାତୱେଦସମେନପି [ଜାତୱେଦଭୟେନପି (କ॰)]।
ଖମିତବ୍ବଂ ସପଞ୍ଞେନ, ଅପି ଦାସସ୍ସ ତଜ୍ଜିତନ୍ତି ॥
ଦଦ୍ଦରଜାତକଂ ଚତୁତ୍ଥଂ ।
୩୦୫. ସୀଲୱୀମଂସନଜାତକଂ (୪-୧-୫)
ନତ୍ଥି ଲୋକେ ରହୋ ନାମ, ପାପକମ୍ମଂ ପକୁବ୍ବତୋ ।
ପସ୍ସନ୍ତି ୱନଭୂତାନି, ତଂ ବାଲୋ ମଞ୍ଞତୀ ରହୋ ॥
ଅହଂ ରହୋ ନ ପସ୍ସାମି, ସୁଞ୍ଞଂ ୱାପି ନ ୱିଜ୍ଜତି ।
ୟତ୍ଥ ଅଞ୍ଞଂ [ସୁଞ୍ଞଂ (ସ୍ୟା॰ କ॰)] ନ ପସ୍ସାମି, ଅସୁଞ୍ଞଂ ହୋତି ତଂ ମୟା ॥
ଦୁଜ୍ଜଚ୍ଚୋ ଚ ସୁଜଚ୍ଚୋ [ଅଜଚ୍ଚୋ (ପୀ॰)] ଚ, ନନ୍ଦୋ ଚ ସୁଖୱଡ୍ଢିତୋ [ସୁଖୱଚ୍ଛକୋ (ସୀ॰), ସୁଖୱଚ୍ଛନୋ (ସ୍ୟା॰ ପୀ॰)]।
ୱେଜ୍ଜୋ ଚ ଅଦ୍ଧୁୱସୀଲୋ [ଅଥ ସୀଲୋ (କ॰)] ଚ, ତେ ଧମ୍ମଂ ଜହୁ ମତ୍ଥିକା ॥
ବ୍ରାହ୍ମଣୋ ଚ କଥଂ ଜହେ, ସବ୍ବଧମ୍ମାନ ପାରଗୂ ।
ୟୋ ଧମ୍ମମନୁପାଲେତି, ଧିତିମା ସଚ୍ଚନିକ୍କମୋତି ॥
ସୀଲୱୀମଂସନଜାତକଂ ପଞ୍ଚମଂ ।
୩୦୬. ସୁଜାତଜାତକଂ (୪-୧-୬)
କିମଣ୍ଡକା ଇମେ ଦେୱ, ନିକ୍ଖିତ୍ତା କଂସମଲ୍ଲକେ ।
ଉପଲୋହିତକା ୱଗ୍ଗୂ, ତଂ [ତେ (ପୀ॰)] ମେ ଅକ୍ଖାହି ପୁଚ୍ଛିତୋ ॥
ୟାନି ପୁରେ ତୁୱଂ ଦେୱି, ଭଣ୍ଡୁ ନନ୍ତକୱାସିନୀ ।
ଉଚ୍ଛଙ୍ଗହତ୍ଥା ପଚିନାସି, ତସ୍ସା ତେ କୋଲିୟଂ ଫଲଂ ॥
ଉଡ୍ଡୟ୍ହତେ ନ ରମତି, ଭୋଗା ୱିପ୍ପଜହନ୍ତି ତଂ [ୱିପ୍ପଜହନ୍ତି’ମଂ ( ?)]।
ତତ୍ଥେୱିମଂ ପଟିନେଥ, ୟତ୍ଥ କୋଲଂ ପଚିସ୍ସତି ॥
ହୋନ୍ତି ହେତେ ମହାରାଜ, ଇଦ୍ଧିପ୍ପତ୍ତାୟ [ଇଦ୍ଧିମତ୍ତାୟ (କ॰)] ନାରିୟା ।
ଖମ ଦେୱ ସୁଜାତାୟ, ମାସ୍ସା [ମାସୁ (କ॰)] କୁଜ୍ଝ ରଥେସଭାତି ॥
ସୁଜାତଜାତକଂ ଛଟ୍ଠଂ ।
୩୦୭. ପଲାସଜାତକଂ (୪-୧-୭)
ଅଚେତନଂ ବ୍ରାହ୍ମଣ ଅସ୍ସୁଣନ୍ତଂ, ଜାନୋ ଅଜାନନ୍ତମିମଂ ପଲାସଂ ।
ଆରଦ୍ଧୱିରିୟୋ ଧୁୱଂ ଅପ୍ପମତ୍ତୋ, ସୁଖସେୟ୍ୟଂ ପୁଚ୍ଛସି କିସ୍ସ ହେତୁ ॥
ଦୂରେ ସୁତୋ ଚେୱ ବ୍ରହା ଚ ରୁକ୍ଖୋ, ଦେସେ ଠିତୋ ଭୂତନିୱାସରୂପୋ ।
ତସ୍ମା ନମସ୍ସାମି ଇମଂ ପଲାସଂ, ୟେ ଚେତ୍ଥ ଭୂତା ତେ [ତେ ଚ (ସୀ॰ ପୀ॰)] ଧନସ୍ସ ହେତୁ ॥
ସୋ ତେ କରିସ୍ସାମି ୟଥାନୁଭାୱଂ, କତଞ୍ଞୁତଂ ବ୍ରାହ୍ମଣ ପେକ୍ଖମାନୋ ।
କଥଞ୍ହି ଆଗମ୍ମ ସତଂ ସକାସେ, ମୋଘାନି ତେ ଅସ୍ସୁ ପରିଫନ୍ଦିତାନି ॥
ୟୋ ତିନ୍ଦୁକରୁକ୍ଖସ୍ସ ପରୋ [ପୁରୋ (କ॰)] ପିଲକ୍ଖୋ [ପିଲକ୍ଖୁ (ସୀ॰ ପୀ॰), ମିଲକ୍ଖୁ (କ॰)], ପରିୱାରିତୋ ପୁବ୍ବୟଞ୍ଞୋ ଉଳାରୋ ।
ତସ୍ସେସ ମୂଲସ୍ମିଂ ନିଧି ନିଖାତୋ, ଅଦାୟାଦୋ ଗଚ୍ଛ ତଂ ଉଦ୍ଧରାହୀତି ॥
ପଲାସଜାତକଂ ସତ୍ତମଂ ।
୩୦୮. ସକୁଣଜାତକଂ (୪-୧-୮)
ଅକରମ୍ହସ ତେ କିଚ୍ଚଂ, ୟଂ ବଲଂ ଅହୁୱମ୍ହସେ ।
ମିଗରାଜ ନମୋ ତ୍ୟତ୍ଥୁ, ଅପି କିଞ୍ଚି ଲଭାମସେ ॥
ମମ ଲୋହିତଭକ୍ଖସ୍ସ, ନିଚ୍ଚଂ ଲୁଦ୍ଦାନି କୁବ୍ବତୋ ।
ଦନ୍ତନ୍ତରଗତୋ ସନ୍ତୋ, ତଂ ବହୁଂ ୟମ୍ପି ଜୀୱସି ॥
ଅକତଞ୍ଞୁମକତ୍ତାରଂ, କତସ୍ସ ଅପ୍ପଟିକାରକଂ ।
ୟସ୍ମିଂ କତଞ୍ଞୁତା ନତ୍ଥି, ନିରତ୍ଥା ତସ୍ସ ସେୱନା ॥
ୟସ୍ସ ସମ୍ମୁଖଚିଣ୍ଣେନ, ମିତ୍ତଧମ୍ମୋ ନ ଲବ୍ଭତି ।
ଅନୁସୂୟ [ଅନୁସୁୟ୍ୟ (ସୀ॰ ପୀ॰)] ମନକ୍କୋସଂ, ସଣିକଂ ତମ୍ହା ଅପକ୍କମେତି ॥
ସକୁଣଜାତକଂ ଅଟ୍ଠମଂ ।
୩୦୯. ଛୱକଜାତକଂ (୪-୧-୯)
ସବ୍ବମିଦଂ ଚରିମଂ କତଂ [ଚରିମୱତଂ (ସୀ॰ ପୀ॰)], ଉଭୋ ଧମ୍ମଂ ନ ପସ୍ସରେ ।
ଉଭୋ ପକତିୟା ଚୁତା, ୟୋ ଚାୟଂ ମନ୍ତେଜ୍ଝାପେତି [ମନ୍ତଜ୍ଝାୟତି (ସୀ॰), ସଜ୍ଝାପୟତି (ପୀ॰)]।
ୟୋ ଚ ମନ୍ତଂ ଅଧୀୟତି ॥
ସାଲୀନଂ ଓଦନଂ ଭୁଞ୍ଜେ, ସୁଚିଂ ମଂସୂପସେଚନଂ ।
ତସ୍ମା ଏତଂ ନ ସେୱାମି, ଧମ୍ମଂ ଇସୀହି ସେୱିତଂ ॥
ପରିବ୍ବଜ ମହା ଲୋକୋ [ମହାବ୍ରହ୍ମେ (କ॰)], ପଚନ୍ତଞ୍ଞେପି ପାଣିନୋ ।
ମା ତଂ ଅଧମ୍ମୋ ଆଚରିତୋ, ଅସ୍ମା କୁମ୍ଭମିୱାଭିଦା ॥
ଧିରତ୍ଥୁ ତଂ ୟସଲାଭଂ, ଧନଲାଭଞ୍ଚ ବ୍ରାହ୍ମଣ ।
ୟା ୱୁତ୍ତି ୱିନିପାତେନ, ଅଧମ୍ମଚରଣେନ ୱାତି ॥
ଛୱକଜାତକଂ ନୱମଂ ।
୩୧୦. ସେୟ୍ୟଜାତକଂ (୪-୧-୧୦)
ସସମୁଦ୍ଦପରିୟାୟଂ, ମହିଂ ସାଗରକୁଣ୍ଡଲଂ ।
ନ ଇଚ୍ଛେ ସହ ନିନ୍ଦାୟ, ଏୱଂ ସେୟ୍ୟ [ସୟ୍ହ (ସୀ॰ ସ୍ୟା॰ ପୀ॰)] ୱିଜାନହି ॥
ଧିରତ୍ଥୁ ତଂ ୟସଲାଭଂ, ଧନଲାଭଞ୍ଚ ବ୍ରାହ୍ମଣ ।
ୟା ୱୁତ୍ତି ୱିନିପାତେନ, ଅଧମ୍ମଚରଣେନ ୱା ॥
ଅପି ଚେ ପତ୍ତମାଦାୟ, ଅନଗାରୋ ପରିବ୍ବଜେ ।
ସାୟେୱ ଜୀୱିକା ସେୟ୍ୟୋ, ୟା ଚାଧମ୍ମେନ ଏସନା ॥
ଅପି ଚେ ପତ୍ତମାଦାୟ, ଅନଗାରୋ ପରିବ୍ବଜେ ।
ଅଞ୍ଞଂ ଅହିଂସୟଂ ଲୋକେ, ଅପି ରଜ୍ଜେନ ତଂ ୱରନ୍ତି ॥
ସେୟ୍ୟଜାତକଂ [ସୟ୍ହଜାତକଂ (ସୀ॰ ସ୍ୟା॰ ପୀ॰)] ଦସମଂ ।
କାଲିଙ୍ଗୱଗ୍ଗୋ [ୱିୱରୱଗ୍ଗୋ (ସୀ॰ ପୀ॰)] ପଠମୋ ।
ତସ୍ସୁଦ୍ଦାନଂ –
ୱିୱରଞ୍ଚ ଅଦେୟ୍ୟ ସମିଦ୍ଧୱରଂ, ଅଥ ଦଦ୍ଦର ପାପମହାତିରହୋ ।
ଅଥ କୋଲି ପଲାସୱରଞ୍ଚ କର, ଚରିମଂ ସସମୁଦ୍ଦୱରେନ ଦସାତି ॥
୨. ପୁଚିମନ୍ଦୱଗ୍ଗୋ
୩୧୧. ପୁଚିମନ୍ଦଜାତକଂ (୪-୨-୧)
ଉଟ୍ଠେହି ଚୋର କିଂ ସେସି, କୋ ଅତ୍ଥୋ ସୁପନେନ [ସୁପିତେନ (ସୀ॰), ସୁପିନେନ (ପୀ॰ କ॰)] ତେ ।
ମା ତଂ ଗହେସୁଂ [ଗଣ୍ହେୟ୍ୟୁଂ (କ॰)] ରାଜାନୋ, ଗାମେ କିବ୍ବିସକାରକଂ ॥
ୟଂ ନୁ [ନୂନ (ସ୍ୟା॰)] ଚୋରଂ ଗହେସ୍ସନ୍ତି, ଗାମେ କିବ୍ବିସକାରକଂ ।
କିଂ ତତ୍ଥ ପୁଚିମନ୍ଦସ୍ସ, ୱନେ ଜାତସ୍ସ ତିଟ୍ଠତୋ ॥
ନ ତ୍ୱଂ ଅସ୍ସତ୍ଥ ଜାନାସି, ମମ ଚୋରସ୍ସ ଚନ୍ତରଂ ।
ଚୋରଂ ଗହେତ୍ୱା ରାଜାନୋ, ଗାମେ କିବ୍ବିସକାରକଂ ।
ଅପ୍ପେନ୍ତି [ଅଚ୍ଚେନ୍ତି (ସ୍ୟା॰)] ନିମ୍ବସୂଲସ୍ମିଂ, ତସ୍ମିଂ ମେ ସଙ୍କତେ ମନୋ ॥
ସଙ୍କେୟ୍ୟ ସଙ୍କିତବ୍ବାନି, ରକ୍ଖେୟ୍ୟାନାଗତଂ ଭୟଂ ।
ଅନାଗତଭୟା ଧୀରୋ, ଉଭୋ ଲୋକେ ଅୱେକ୍ଖତୀତି ॥
ପୁଚିମନ୍ଦଜାତକଂ ପଠମଂ ।
୩୧୨. କସ୍ସପମନ୍ଦିୟଜାତକଂ (୪-୨-୨)
ଅପି କସ୍ସପ ମନ୍ଦିୟା, ୟୁୱା ସପତି ହନ୍ତି [ସମ୍ପଟିହନ୍ତି (କ॰)] ୱା ।
ସବ୍ବଂ ତଂ ଖମତେ ଧୀରୋ, ପଣ୍ଡିତୋ ତଂ ତିତିକ୍ଖତି ॥
ସଚେପି ସନ୍ତୋ ୱିୱଦନ୍ତି, ଖିପ୍ପଂ ସନ୍ଧୀୟରେ ପୁନ ।
ବାଲା ପତ୍ତାୱ ଭିଜ୍ଜନ୍ତି, ନ ତେ ସମଥମଜ୍ଝଗୂ ॥
ଏତେ ଭିୟ୍ୟୋ ସମାୟନ୍ତି, ସନ୍ଧି ତେସଂ ନ ଜୀରତି ।
ୟୋ ଚାଧିପନ୍ନଂ ଜାନାତି, ୟୋ ଚ ଜାନାତି ଦେସନଂ ॥
ଏସୋ ହି ଉତ୍ତରିତରୋ, ଭାରୱହୋ ଧୁରଦ୍ଧରୋ ।
ୟୋ ପରେସାଧିପନ୍ନାନଂ, ସୟଂ ସନ୍ଧାତୁମରହତୀତି ॥
କସ୍ସପମନ୍ଦିୟଜାତକଂ ଦୁତିୟଂ ।
୩୧୩. ଖନ୍ତୀୱାଦୀଜାତକଂ (୪-୨-୩)
ୟୋ ତେ ହତ୍ଥେ ଚ ପାଦେ ଚ, କଣ୍ଣନାସଞ୍ଚ ଛେଦୟି ।
ତସ୍ସ କୁଜ୍ଝ ମହାୱୀର, ମା ରଟ୍ଠଂ ୱିନସା [ୱିନସ୍ସ (କ॰ ସୀ॰ ସ୍ୟା॰ କ॰)] ଇଦଂ ॥
ୟୋ ମେ ହତ୍ଥେ ଚ ପାଦେ ଚ, କଣ୍ଣନାସଞ୍ଚ ଛେଦୟି ।
ଚିରଂ ଜୀୱତୁ ସୋ ରାଜା, ନ ହି କୁଜ୍ଝନ୍ତି ମାଦିସା ॥
ଅହୂ ଅତୀତମଦ୍ଧାନଂ [ଅହୁ ଅତୀତମଦ୍ଧାନେ (ସ୍ୟା॰ ପୀ॰ କ॰)], ସମଣୋ ଖନ୍ତିଦୀପନୋ ।
ତଂ ଖନ୍ତିୟାୟେୱ ଠିତଂ, କାସିରାଜା ଅଛେଦୟି ॥
ତସ୍ସ କମ୍ମ [କମ୍ମସ୍ସ (ସୀ॰ ପୀ॰)] ଫରୁସସ୍ସ, ୱିପାକୋ କଟୁକୋ ଅହୁ ।
ୟଂ କାସିରାଜା ୱେଦେସି, ନିରୟମ୍ହି ସମପ୍ପିତୋତି ॥
ଖନ୍ତୀୱାଦୀଜାତକଂ ତତିୟଂ ।
୩୧୪. ଲୋହକୁମ୍ଭିଜାତକଂ (୪-୨-୪)
ଦୁଜ୍ଜୀୱିତମଜୀୱିମ୍ହ, ୟେ ସନ୍ତେ [ୟେସଂ ନୋ (ସ୍ୟା॰ କ॰)] ନ ଦଦମ୍ହସେ ।
ୱିଜ୍ଜମାନେସୁ ଭୋଗେସୁ, ଦୀପଂ ନାକମ୍ହ ଅତ୍ତନୋ ॥
ସଟ୍ଠି [ସଟ୍ଠିଂ (ସ୍ୟା॰)] ୱସ୍ସସହସ୍ସାନି, ପରିପୁଣ୍ଣାନି ସବ୍ବସୋ ।
ନିରୟେ ପଚ୍ଚମାନାନଂ, କଦା ଅନ୍ତୋ ଭୱିସ୍ସତି ॥
ନତ୍ଥି ଅନ୍ତୋ କୁତୋ ଅନ୍ତୋ, ନ ଅନ୍ତୋ ପଟିଦିସ୍ସତି ।
ତଦା ହି ପକତଂ ପାପଂ, ମମ ତୁୟ୍ହଞ୍ଚ ମାରିସା [ମାରିସ (ସୀ॰ ସ୍ୟା॰ ପୀ॰)]॥
ସୋହଂ ନୂନ ଇତୋ ଗନ୍ତ୍ୱା, ୟୋନିଂ ଲଦ୍ଧାନ ମାନୁସିଂ ।
ୱଦଞ୍ଞୂ ସୀଲସମ୍ପନ୍ନୋ, କାହାମି କୁସଲଂ ବହୁନ୍ତି ॥
ଲୋହକୁମ୍ଭିଜାତକଂ ଚତୁତ୍ଥଂ ।
୩୧୫. ସବ୍ବମଂସଲାଭଜାତକଂ (୪-୨-୫)
ଫରୁସା ୱତ ତେ ୱାଚା, ମଂସଂ [ସମ୍ମ (ପୀ॰ କ॰)] ୟାଚନକୋ ଅସି [ଚସି (ପୀ॰)]।
କିଲୋମସଦିସୀ [କିଲୋମସ୍ସ ସଦିସା (ପୀ॰)] ୱାଚା, କିଲୋମଂ ସମ୍ମ ଦମ୍ମି ତେ ॥
ଅଙ୍ଗମେତଂ ମନୁସ୍ସାନଂ, ଭାତା ଲୋକେ ପୱୁଚ୍ଚତି ।
ଅଙ୍ଗସ୍ସ ସଦିସୀ ୱାଚା [ଅଙ୍ଗସ୍ସଦିସୀ ତେ ୱାଚା (କ॰)], ଅଙ୍ଗଂ ସମ୍ମ ଦଦାମି ତେ ॥
ତାତାତି ପୁତ୍ତୋ ୱଦମାନୋ, କମ୍ପେତି [ସମ୍ମେତି (କ॰)] ହଦୟଂ ପିତୁ ।
ହଦୟସ୍ସ ସଦିସୀ [ହଦୟସ୍ସଦିସୀ (କ॰)] ୱାଚା, ହଦୟଂ ସମ୍ମ ଦମ୍ମି ତେ ॥
ୟସ୍ସ ଗାମେ ସଖା ନତ୍ଥି, ୟଥାରଞ୍ଞଂ ତଥେୱ ତଂ ।
ସବ୍ବସ୍ସ ସଦିସୀ ୱାଚା, ସବ୍ବଂ ସମ୍ମ ଦଦାମି ତେତି ॥
ସବ୍ବମଂସଲାଭଜାତକଂ [ମଂସଜାତକଂ (ସୀ॰ ସ୍ୟା॰ ପୀ॰)] ପଞ୍ଚମଂ ।
୩୧୬. ସସପଣ୍ଡିତଜାତକଂ (୪-୨-୬)
ସତ୍ତ ମେ ରୋହିତା ମଚ୍ଛା, ଉଦକା ଥଲମୁବ୍ଭତା ।
ଇଦଂ ବ୍ରାହ୍ମଣ ମେ ଅତ୍ଥି, ଏତଂ ଭୁତ୍ୱା ୱନେ ୱସ ॥
ଦୁସ୍ସ ମେ ଖେତ୍ତପାଲସ୍ସ, ରତ୍ତିଭତ୍ତଂ ଅପାଭତଂ ।
ମଂସସୂଲା ଚ ଦ୍ୱେ ଗୋଧା, ଏକଞ୍ଚ ଦଧିୱାରକଂ ।
ଇଦଂ ବ୍ରାହ୍ମଣ ମେ ଅତ୍ଥି, ଏତଂ ଭୁତ୍ୱା ୱନେ ୱସ ॥
ଅମ୍ବପକ୍କଂ ଦକଂ [ଅମ୍ବପକ୍କୋଦକଂ (ସୀ॰ ପୀ॰)] ସୀତଂ, ସୀତଚ୍ଛାୟା ମନୋରମା [ସୀତଚ୍ଛାୟଂ ମନୋରମଂ (ସୀ॰ ସ୍ୟା॰ ପୀ॰)]।
ଇଦଂ ବ୍ରାହ୍ମଣ ମେ ଅତ୍ଥି, ଏତଂ ଭୁତ୍ୱା ୱନେ ୱସ ॥
ନ ସସସ୍ସ ତିଲା ଅତ୍ଥି, ନ ମୁଗ୍ଗା ନପି ତଣ୍ଡୁଲା ।
ଇମିନା ଅଗ୍ଗିନା ପକ୍କଂ, ମମଂ [ମଂସଂ (କ॰)] ଭୁତ୍ୱା ୱନେ ୱସାତି ॥
ସସପଣ୍ଡିତଜାତକଂ ଛଟ୍ଠଂ ।
୩୧୭. ମତରୋଦନଜାତକଂ (୪-୨-୭)
ମତଂ ମତଂ ଏୱ [ମତମତମେୱ (ସୀ॰ ସ୍ୟା॰ ପୀ॰)] ରୋଦଥ, ନ ହି ତଂ ରୋଦଥ ୟୋ ମରିସ୍ସତି ।
ସବ୍ବେପି [ସବ୍ବେୱ (ସୀ॰ ସ୍ୟା॰ ପୀ॰)] ସରୀରଧାରିନୋ, ଅନୁପୁବ୍ବେନ ଜହନ୍ତି ଜୀୱିତଂ ॥
ଦେୱମନୁସ୍ସା ଚତୁପ୍ପଦା, ପକ୍ଖିଗଣା ଉରଗା ଚ ଭୋଗିନୋ ।
ସମ୍ହି [ୟମ୍ହି (ସ୍ୟା॰), ଅସ୍ମିଂ (ପୀ॰ କ॰)] ସରୀରେ ଅନିସ୍ସରା, ରମମାନାୱ ଜହନ୍ତି ଜୀୱିତଂ ॥
ଏୱଂ ଚଲିତଂ ଅସଣ୍ଠିତଂ, ସୁଖଦୁକ୍ଖଂ ମନୁଜେସ୍ୱପେକ୍ଖିୟ ।
କନ୍ଦିତରୁଦିତଂ ନିରତ୍ଥକଂ, କିଂ ୱୋ ସୋକଗଣାଭିକୀରରେ ॥
ଧୁତ୍ତା ଚ ସୋଣ୍ଡା [ଧୁତ୍ତା ସୋଣ୍ଡା (ସୀ॰), ଧୁତ୍ତା ସୋଣ୍ଡା ଚ (ସ୍ୟା॰)] ଅକତା, ବାଲା ସୂରା ଅୟୋଗିନୋ [ବାଲା ସୂରା ୱୀରା ଅୟୋଗିନୋ (ପୀ॰)]।
ଧୀରଂ ମଞ୍ଞନ୍ତି ବାଲୋତି, ୟେ ଧମ୍ମସ୍ସ ଅକୋୱିଦାତି ॥
ମତରୋଦନଜାତକଂ ସତ୍ତମଂ ।
୩୧୮. କଣୱେରଜାତକଂ (୪-୨-୮)
ୟଂ ତଂ ୱସନ୍ତସମୟେ, କଣୱେରେସୁ ଭାଣୁସୁ ।
ସାମଂ ବାହାୟ ପୀଳେସି, ସା ତଂ ଆରୋଗ୍ୟମବ୍ରୱି ॥
ଅମ୍ଭୋ ନ କିର ସଦ୍ଧେୟ୍ୟଂ, ୟଂ ୱାତୋ ପବ୍ବତଂ ୱହେ ।
ପବ୍ବତଞ୍ଚେ ୱହେ ୱାତୋ, ସବ୍ବମ୍ପି ପଥୱିଂ ୱହେ ।
ୟତ୍ଥ ସାମା କାଲକତା [କାଲଙ୍କତା (କ॰)], ସା ମଂ ଆରୋଗ୍ୟମବ୍ରୱି ॥
ନ ଚେୱ ସା କାଲକତା, ନ ଚ ସା ଅଞ୍ଞମିଚ୍ଛତି ।
ଏକଭତ୍ତିକିନୀ [ଏକଭତ୍ତା କିର (ସୀ॰ ସ୍ୟା॰), ଏକଭତ୍ତକିନୀ (ପୀ॰)] ସାମା, ତମେୱ ଅଭିକଙ୍ଖତି ॥
ଅସନ୍ଥୁତଂ ମଂ ଚିରସନ୍ଥୁତେନ [ଅସନ୍ଧତଂ ମଂ ଚିରସନ୍ଧତେନ (କ॰)], ନିମୀନି ସାମା ଅଧୁୱଂ ଧୁୱେନ ।
ମୟାପି ସାମା ନିମିନେୟ୍ୟ ଅଞ୍ଞଂ, ଇତୋ ଅହଂ ଦୂରତରଂ ଗମିସ୍ସନ୍ତି ॥
କଣୱେରଜାତକଂ ଅଟ୍ଠମଂ ।
୩୧୯. ତିତ୍ତିରଜାତକଂ (୪-୨-୯)
ସୁସୁଖଂ ୱତ ଜୀୱାମି, ଲଭାମି ଚେୱ ଭୁଞ୍ଜିତୁଂ ।
ପରିପନ୍ଥେୱ ତିଟ୍ଠାମି, କା ନୁ ଭନ୍ତେ ଗତୀ ମମ ॥
ମନୋ ଚେ ତେ ନପ୍ପଣମତି, ପକ୍ଖି ପାପସ୍ସ କମ୍ମୁନୋ ।
ଅବ୍ୟାୱଟସ୍ସ ଭଦ୍ରସ୍ସ, ନ ପାପମୁପଲିମ୍ପତି ॥
ଞାତକୋ ନୋ ନିସିନ୍ନୋତି, ବହୁ ଆଗଚ୍ଛତେ ଜନୋ ।
ପଟିଚ୍ଚ କମ୍ମଂ ଫୁସତି, ତସ୍ମିଂ ମେ ସଙ୍କତେ ମନୋ ॥
ନ ପଟିଚ୍ଚ କମ୍ମଂ ଫୁସତି, ମନୋ ଚେ ନପ୍ପଦୁସ୍ସତି ।
ଅପ୍ପୋସ୍ସୁକ୍କସ୍ସ ଭଦ୍ରସ୍ସ, ନ ପାପମୁପଲିମ୍ପତୀତି ॥
ତିତ୍ତିରଜାତକଂ ନୱମଂ ।
୩୨୦. ସୁଚ୍ଚଜଜାତକଂ (୪-୨-୧୦)
ସୁଚ୍ଚଜଂ ୱତ ନଚ୍ଚଜି, ୱାଚାୟ ଅଦଦଂ ଗିରିଂ ।
କିଂ ହିତସ୍ସ ଚଜନ୍ତସ୍ସ, ୱାଚାୟ ଅଦଦ ପବ୍ବତଂ ॥
ୟଞ୍ହି କୟିରା ତଞ୍ହି ୱଦେ, ୟଂ ନ କୟିରା ନ ତଂ ୱଦେ ।
ଅକରୋନ୍ତଂ ଭାସମାନଂ, ପରିଜାନନ୍ତି ପଣ୍ଡିତା ॥
ରାଜପୁତ୍ତ ନମୋ ତ୍ୟତ୍ଥୁ, ସଚ୍ଚେ ଧମ୍ମେ ଠିତୋ ଚସି ।
ୟସ୍ସ ତେ ବ୍ୟସନଂ ପତ୍ତୋ, ସଚ୍ଚସ୍ମିଂ ରମତେ ମନୋ ॥
ୟା ଦଲିଦ୍ଦୀ ଦଲିଦ୍ଦସ୍ସ, ଅଡ୍ଢା ଅଡ୍ଢସ୍ସ କିତ୍ତିମ [କିତ୍ତିମା (ସୀ॰ ସ୍ୟା॰ ପୀ॰)]।
ସା ହିସ୍ସ ପରମା ଭରିୟା, ସହିରଞ୍ଞସ୍ସ ଇତ୍ଥିୟୋତି ॥
ସୁଚ୍ଚଜଜାତକଂ ଦସମଂ ।
ପୁଚିମନ୍ଦୱଗ୍ଗୋ ଦୁତିୟୋ ।
ତସ୍ସୁଦ୍ଦାନଂ –
ଅଥ ଚୋର ସକସ୍ସପ ଖନ୍ତୀୱରୋ, ଦୁଜ୍ଜୀୱିତତା ଚ ୱରା ଫରୁସା ।
ଅଥ ସସ ମତଞ୍ଚ ୱସନ୍ତ ସୁଖଂ, ସୁଚ୍ଚଜଂୱତନଚ୍ଚଜିନା ଚ ଦସାତି ॥
୩. କୁଟିଦୂସକୱଗ୍ଗୋ
୩୨୧. କୁଟିଦୂସକଜାତକଂ (୪-୩-୧)
ମନୁସ୍ସସ୍ସେୱ ତେ ସୀସଂ, ହତ୍ଥପାଦା ଚ ୱାନର ।
ଅଥ କେନ ନୁ ୱଣ୍ଣେନ, ଅଗାରଂ ତେ ନ ୱିଜ୍ଜତି ॥
ମନୁସ୍ସସ୍ସେୱ ମେ ସୀସଂ, ହତ୍ଥପାଦା ଚ ସିଙ୍ଗିଲ [ସିଙ୍ଗାଲ (କ॰), ପିଙ୍ଗଲ (ଟୀକା)]।
ୟାହୁ ସେଟ୍ଠା ମନୁସ୍ସେସୁ, ସା ମେ ପଞ୍ଞା ନ ୱିଜ୍ଜତି ॥
ଅନୱଟ୍ଠିତଚିତ୍ତସ୍ସ, ଲହୁଚିତ୍ତସ୍ସ ଦୁବ୍ଭିନୋ [ଦୂଭିନୋ (ପୀ॰)]।
ନିଚ୍ଚଂ ଅଦ୍ଧୁୱସୀଲସ୍ସ, ସୁଖଭାୱୋ [ସୁଚିଭାୱୋ (ସୀ॰), ସୁଖଭାଗୋ ( ?)] ନ ୱିଜ୍ଜତି ॥
ସୋ କରସ୍ସୁ ଆନୁଭାୱଂ, ୱୀତିୱତ୍ତସ୍ସୁ ସୀଲିୟଂ ।
ସୀତୱାତପରିତ୍ତାଣଂ, କରସ୍ସୁ କୁଟୱଂ [କୁଟିକଂ (ସୀ॰ ସ୍ୟା॰)] କପୀତି ॥
କୁଟିଦୂସକ [ସିଙ୍ଗାଲସକୁଣ (କ॰)] ଜାତକଂ ପଠମଂ ।
୩୨୨. ଦୁଦ୍ଦୁଭଜାତକଂ (୪-୩-୨)
ଦୁଦ୍ଦୁଭାୟତି [ଦଦ୍ଦଭାୟତି (ସୀ॰ ପୀ॰)] ଭଦ୍ଦନ୍ତେ, ୟସ୍ମିଂ ଦେସେ ୱସାମହଂ ।
ଅହମ୍ପେତଂ ନ ଜାନାମି, କିମେତଂ ଦୁଦ୍ଦୁଭାୟତି ॥
ବେଲୁୱଂ ପତିତଂ ସୁତ୍ୱା, ଦୁଦ୍ଦୁଭନ୍ତି [ଦଦ୍ଦଭନ୍ତି (ସୀ॰)] ସସୋ ଜୱି ।
ସସସ୍ସ ୱଚନଂ ସୁତ୍ୱା, ସନ୍ତତ୍ତା ମିଗୱାହିନୀ ॥
ଅପ୍ପତ୍ୱା ପଦୱିଞ୍ଞାଣଂ, ପରଘୋସାନୁସାରିନୋ ।
ପନାଦପରମା ବାଲା, ତେ ହୋନ୍ତି ପରପତ୍ତିୟା ॥
ୟେ ଚ ସୀଲେନ ସମ୍ପନ୍ନା, ପଞ୍ଞାୟୂପସମେ ରତା ।
ଆରକା ୱିରତା ଧୀରା, ନ ହୋନ୍ତି ପରପତ୍ତିୟାତି ॥
ଦୁଦ୍ଦୁଭଜାତକଂ [ଦଦ୍ଦଭଜାତକଂ (ସୀ॰ ପୀ॰)] ଦୁତିୟଂ ।
୩୨୩. ବ୍ରହ୍ମଦତ୍ତଜାତକଂ (୪-୩-୩)
ଦ୍ୱୟଂ ୟାଚନକୋ ରାଜ, ବ୍ରହ୍ମଦତ୍ତ ନିଗଚ୍ଛତି ।
ଅଲାଭଂ ଧନଲାଭଂ ୱା, ଏୱଂ ଧମ୍ମା ହି ୟାଚନା ॥
ୟାଚନଂ ରୋଦନଂ ଆହୁ, ପଞ୍ଚାଲାନଂ ରଥେସଭ ।
ୟୋ ୟାଚନଂ ପଚ୍ଚକ୍ଖାତି, ତମାହୁ ପଟିରୋଦନଂ ॥
ମା ମଦ୍ଦସଂସୁ ରୋଦନ୍ତଂ, ପଞ୍ଚାଲା ସୁସମାଗତା ।
ତୁୱଂ ୱା ପଟିରୋଦନ୍ତଂ, ତସ୍ମା ଇଚ୍ଛାମହଂ ରହୋ ॥
ଦଦାମି ତେ ବ୍ରାହ୍ମଣ ରୋହିଣୀନଂ, ଗୱଂ ସହସ୍ସଂ ସହ ପୁଙ୍ଗୱେନ ।
ଅରିୟୋ ହି ଅରିୟସ୍ସ କଥଂ ନ ଦଜ୍ଜା [ଦଜ୍ଜେ (ସୀ॰), ଦଜ୍ଜଂ ( ?)], ସୁତ୍ୱାନ ଗାଥା ତୱ ଧମ୍ମୟୁତ୍ତାତି ॥
ବ୍ରହ୍ମଦତ୍ତଜାତକଂ ତତିୟଂ ।
୩୨୪. ଚମ୍ମସାଟକଜାତକଂ (୪-୩-୪)
କଲ୍ୟାଣରୂପୋ ୱତୟଂ ଚତୁପ୍ପଦୋ, ସୁଭଦ୍ଦକୋ ଚେୱ ସୁପେସଲୋ ଚ ।
ୟୋ ବ୍ରାହ୍ମଣଂ ଜାତିମନ୍ତୂପପନ୍ନଂ, ଅପଚାୟତି ମେଣ୍ଡୱରୋ ୟସସ୍ସୀ ॥
ମା ବ୍ରାହ୍ମଣ ଇତ୍ତରଦସ୍ସନେନ, ୱିସ୍ସାସମାପଜ୍ଜି ଚତୁପ୍ପଦସ୍ସ ।
ଦଳ୍ହପ୍ପହାରଂ ଅଭିକଙ୍ଖମାନୋ [ଅଭିକତ୍ତୁକାମୋ (ସ୍ୟା॰)], ଅୱସକ୍କତୀ ଦସ୍ସତି ସୁପ୍ପହାରଂ ॥
ଊରୁଟ୍ଠି [ଊରଟ୍ଠି (ସୀ॰)] ଭଗ୍ଗଂ ପୱଟ୍ଟିତୋ [ପତିତୋ (ସୀ॰ ସ୍ୟା॰)] ଖାରିଭାରୋ, ସବ୍ବଞ୍ଚ ଭଣ୍ଡଂ ବ୍ରାହ୍ମଣସ୍ସ [ବ୍ରାହ୍ମଣସ୍ସୀଧ (କ॰ ସୀ॰ ପୀ॰), ବ୍ରାହ୍ମଣସ୍ସେୱ (କ॰ ସୀ॰ ସ୍ୟା॰ କ॰)] ଭିନ୍ନଂ ।
ଉଭୋପି ବାହା ପଗ୍ଗୟ୍ହ [ପଗ୍ଗୟ୍ୟେୱ (ସ୍ୟା॰), ପଗ୍ଗହୀୟ ( ?)] କନ୍ଦତି [ବାହା ପଗ୍ଗୟ୍ୟ କନ୍ଦତି (ପୀ॰ କ॰)], ଅଭିଧାୱଥ ହଞ୍ଞତେ ବ୍ରହ୍ମଚାରୀ ॥
ଏୱଂ ସୋ ନିହତୋ ସେତି, ୟୋ ଅପୂଜଂ ପସଂସତି [ନମସ୍ସତି (ପୀ॰)]।
ୟଥାହମଜ୍ଜ ପହତୋ, ହତୋ ମେଣ୍ଡେନ ଦୁମ୍ମତୀତି ॥
ଚମ୍ମସାଟକଜାତକଂ ଚତୁତ୍ଥଂ ।
୩୨୫. ଗୋଧରାଜଜାତକଂ (୪-୩-୫)
ସମଣଂ ତଂ ମଞ୍ଞମାନୋ, ଉପଗଚ୍ଛିମସଞ୍ଞତଂ ।
ସୋ ମଂ ଦଣ୍ଡେନ ପାହାସି, ୟଥା ଅସ୍ସମଣୋ ତଥା ॥
କିଂ ତେ ଜଟାହି ଦୁମ୍ମେଧ, କିଂ ତେ ଅଜିନସାଟିୟା ।
ଅବ୍ଭନ୍ତରଂ ତେ ଗହନଂ, ବାହିରଂ ପରିମଜ୍ଜସି ॥
ଏହି ଗୋଧ ନିୱତ୍ତସ୍ସୁ, ଭୁଞ୍ଜ ସାଲୀନମୋଦନଂ ।
ତେଲଂ ଲୋଣଞ୍ଚ ମେ ଅତ୍ଥି, ପହୂତଂ ମୟ୍ହ ପିପ୍ଫଲି ॥
ଏସ ଭିୟ୍ୟୋ ପୱେକ୍ଖାମି, ୱମ୍ମିକଂ ସତପୋରିସଂ ।
ତେଲଂ ଲୋଣଞ୍ଚ କିତ୍ତେସି [କିନ୍ତେସି (ସ୍ୟା॰ ପୀ॰)], ଅହିତଂ ମୟ୍ହ ପିପ୍ଫଲୀତି ॥
ଗୋଧରାଜଜାତକଂ ପଞ୍ଚମଂ ।
୩୨୬. କକ୍କାରୁଜାତକଂ (୪-୩-୬)
କାୟେନ ୟୋ ନାୱହରେ, ୱାଚାୟ ନ ମୁସା ଭଣେ ।
ୟସୋ ଲଦ୍ଧା ନ ମଜ୍ଜେୟ୍ୟ, ସ ୱେ କକ୍କାରୁମରହତି ॥
ଧମ୍ମେନ ୱିତ୍ତମେସେୟ୍ୟ, ନ ନିକତ୍ୟା ଧନଂ ହରେ ।
ଭୋଗେ ଲଦ୍ଧା ନ ମଜ୍ଜେୟ୍ୟ, ସ ୱେ କକ୍କାରୁମରହତି ॥
ୟସ୍ସ ଚିତ୍ତଂ ଅହାଲିଦ୍ଦଂ, ସଦ୍ଧା ଚ ଅୱିରାଗିନୀ ।
ଏକୋ ସାଦୁଂ ନ ଭୁଞ୍ଜେୟ୍ୟ, ସ ୱେ କକ୍କାରୁମରହତି ॥
ସମ୍ମୁଖା ୱା ତିରୋକ୍ଖା ୱା [ପରୋକ୍ଖା ୱା (ପୀ॰), ପରମ୍ମୁଖା (କ॰)], ୟୋ ସନ୍ତେ ନ ପରିଭାସତି ।
ୟଥାୱାଦୀ ତଥାକାରୀ, ସ ୱେ କକ୍କାରୁମରହତୀତି ॥
କକ୍କାରୁଜାତକଂ ଛଟ୍ଠଂ ।
୩୨୭. କାକୱତୀଜାତକଂ (୪-୩-୭)
ୱାତି ଚାୟଂ [ୱାୟଂ (କ॰)] ତତୋ ଗନ୍ଧୋ, ୟତ୍ଥ ମେ ୱସତୀ ପିୟା ।
ଦୂରେ ଇତୋ ହି କାକୱତୀ [କାକାତୀ (ସୀ॰), କାକାତି (ସ୍ୟା॰ ପୀ॰)], ୟତ୍ଥ ମେ ନିରତୋ ମନୋ ॥
କଥଂ ସମୁଦ୍ଦମତରୀ, କଥଂ ଅତରି କେପୁକଂ [କେବୁକଂ (ସୀ॰ ପୀ॰)]।
କଥଂ ସତ୍ତ ସମୁଦ୍ଦାନି, କଥଂ ସିମ୍ବଲିମାରୁହି ॥
ତୟା ସମୁଦ୍ଦମତରିଂ, ତୟା ଅତରି କେପୁକଂ [କେବୁକଂ (ସୀ॰ ପୀ॰)]।
ତୟା ସତ୍ତ ସମୁଦ୍ଦାନି, ତୟା ସିମ୍ବଲିମାରୁହିଂ ॥
ଧିରତ୍ଥୁମଂ ମହାକାୟଂ, ଧିରତ୍ଥୁମଂ ଅଚେତନଂ ।
ୟତ୍ଥ ଜାୟାୟହଂ ଜାରଂ, ଆୱହାମି ୱହାମି ଚାତି ॥
କାକୱତୀଜାତକଂ ସତ୍ତମଂ ।
୩୨୮. ଅନନୁସୋଚିୟଜାତକଂ (୪-୩-୮)
ବହୂନଂ ୱିଜ୍ଜତୀ ଭୋତୀ, ତେହି ମେ କିଂ ଭୱିସ୍ସତି ।
ତସ୍ମା ଏତଂ ନ ସୋଚାମି, ପିୟଂ ସମ୍ମିଲ୍ଲହାସିନିଂ ॥
ତଂ ତଂ ଚେ ଅନୁସୋଚେୟ୍ୟ, ୟଂ ୟଂ ତସ୍ସ ନ ୱିଜ୍ଜତି ।
ଅତ୍ତାନମନୁସୋଚେୟ୍ୟ, ସଦା ମଚ୍ଚୁୱସଂ ପତଂ ॥
ନ ହେୱ ଠିତଂ ନାସୀନଂ, ନ ସୟାନଂ ନ ପଦ୍ଧଗୁଂ [ପତ୍ଥଗୁଂ (ସ୍ୟା॰)]।
ୟାୱ ବ୍ୟାତି ନିମିସତି, ତତ୍ରାପି ରସତୀ [ସରତୀ (ସୀ॰ ସ୍ୟା॰ ପୀ॰)] ୱୟୋ ॥
ତତ୍ଥତ୍ତନି ୱତପ୍ପଦ୍ଧେ [ୱତ ପନ୍ଥେ (ସ୍ୟା॰), ୱତ ବନ୍ଧେ (କ॰) ୱତ + ପ-ଅଦ୍ଧେ = ୱତପ୍ପଦ୍ଧେ], ୱିନାଭାୱେ ଅସଂସୟେ ।
ଭୂତଂ ସେସଂ ଦୟିତବ୍ବଂ, ୱୀତଂ ଅନନୁସୋଚିୟନ୍ତି [ଚୱିତଂ ନାନୁସୋଚିୟନ୍ତି (ସ୍ୟା॰), ମତନ୍ତଂ ନାନୁସୋଚିୟଂ (କ॰)]॥
ଅନନୁସୋଚିୟଜାତକଂ ଅଟ୍ଠମଂ ।
୩୨୯. କାଳବାହୁଜାତକଂ (୪-୩-୯)
ୟଂ ଅନ୍ନପାନସ୍ସ ପୁରେ ଲଭାମ, ତଂ ଦାନି ସାଖମିଗମେୱ ଗଚ୍ଛତି ।
ଗଚ୍ଛାମ ଦାନି ୱନମେୱ ରାଧ, ଅସକ୍କତା ଚସ୍ମ ଧନଞ୍ଜୟାୟ [ଧନଞ୍ଚୟାୟ (କ॰)]॥
ଲାଭୋ ଅଲାଭୋ ୟସୋ ଅୟସୋ ଚ, ନିନ୍ଦା ପସଂସା ଚ ସୁଖଞ୍ଚ ଦୁକ୍ଖଂ ।
ଏତେ ଅନିଚ୍ଚା ମନୁଜେସୁ ଧମ୍ମା, ମା ସୋଚି କିଂ ସୋଚସି ପୋଟ୍ଠପାଦ ॥
ଅଦ୍ଧା ତୁୱଂ ପଣ୍ଡିତକୋସି ରାଧ, ଜାନାସି ଅତ୍ଥାନି ଅନାଗତାନି ।
କଥଂ ନୁ ସାଖାମିଗଂ ଦକ୍ଖିସାମ [ଦକ୍ଖିୟାମ (କ॰), ଦକ୍ଖାମ (ସ୍ୟା॰)], ନିଦ୍ଧାୱିତଂ [ନିଦ୍ଧାପିତଂ (ସୀ॰ ସ୍ୟା॰), ନିବ୍ବାପିତଂ (ପୀ॰), ନିଚ୍ଛଦଂ (କ॰)] ରାଜକୁଲତୋୱ ଜମ୍ମଂ ॥
ଚାଲେତି କଣ୍ଣଂ ଭକୁଟିଂ କରୋତି, ମୁହୁଂ ମୁହୁଂ ଭାୟୟତେ [ଭାୟତେ (ସ୍ୟା॰), ଭାୟାପତେ (କ॰)] କୁମାରେ ।
ସୟମେୱ ତଂ କାହତି କାଳବାହୁ, ୟେନାରକା ଠସ୍ସତି ଅନ୍ନପାନାତି ॥
କାଳବାହୁଜାତକଂ ନୱମଂ ।
୩୩୦. ସୀଲୱୀମଂସଜାତକଂ (୪-୩-୧୦)
ସୀଲଂ କିରେୱ କଲ୍ୟାଣଂ, ସୀଲଂ ଲୋକେ ଅନୁତ୍ତରଂ ।
ପସ୍ସ ଘୋରୱିସୋ ନାଗୋ, ସୀଲୱାତି ନ ହଞ୍ଞତି ॥
ୟାୱଦେୱସ୍ସହୂ କିଞ୍ଚି, ତାୱଦେୱ ଅଖାଦିସୁଂ ।
ସଙ୍ଗମ୍ମ କୁଲଲା ଲୋକେ, ନ ହିଂସନ୍ତି ଅକିଞ୍ଚନଂ ॥
ସୁଖଂ ନିରାସା ସୁପତି, ଆସା ଫଲୱତୀ ସୁଖା ।
ଆସଂ ନିରାସଂ କତ୍ୱାନ, ସୁଖଂ ସୁପତି ପିଙ୍ଗଲା ॥
ନ ସମାଧିପରୋ ଅତ୍ଥି, ଅସ୍ମିଂ ଲୋକେ ପରମ୍ହି ଚ ।
ନ ପରଂ ନାପି ଅତ୍ତାନଂ, ୱିହିଂସତି ସମାହିତୋତି ॥
ସୀଲୱୀମଂସଜାତକଂ ଦସମଂ ।
କୁଟିଦୂସକୱଗ୍ଗୋ ତତିୟୋ ।
ତସ୍ସୁଦ୍ଦାନଂ –
ସମନୁସ୍ସ -ସଦୁଦ୍ଦୁଭ-ୟାଚନକୋ, ଅଥ ମେଣ୍ଡୱରୁତ୍ତମ-ଗୋଧୱରୋ ।
ଅଥ କାୟସକେପୁକ ଭୋତୀୱରୋ, ଅଥ ରାଧସୁସୀଲୱରେନ ଦସାତି ॥
୪. କୋକିଲୱଗ୍ଗୋ
୩୩୧. କୋକିଲଜାତକଂ (୪-୪-୧)
ୟୋ ୱେ କାଲେ ଅସମ୍ପତ୍ତେ, ଅତିୱେଲଂ ପଭାସତି ।
ଏୱଂ ସୋ ନିହତୋ ସେତି, କୋକିଲାୟିୱ ଅତ୍ରଜୋ ॥
ନ ହି ସତ୍ଥଂ ସୁନିସିତଂ, ୱିସଂ ହଲାହଲାମିୱ [ହଲାହଲଂ ଇୱ (ପୀ॰)]।
ଏୱଂ ନିକଟ୍ଠେ [ନିକ୍କଡ୍ଢେ (ସ୍ୟା॰), ନିକଡ୍ଢେ (କ॰)] ପାତେତି, ୱାଚା ଦୁବ୍ଭାସିତା ୟଥା ॥
ତସ୍ମା କାଲେ ଅକାଲେ ୱା [ଅକାଲେ ଚ (ସୀ॰ ସ୍ୟା॰)], ୱାଚଂ ରକ୍ଖେୟ୍ୟ ପଣ୍ଡିତୋ ।
ନାତିୱେଲଂ ପଭାସେୟ୍ୟ, ଅପି ଅତ୍ତସମମ୍ହି ୱା ॥
ୟୋ ଚ କାଲେ ମିତଂ ଭାସେ, ମତିପୁବ୍ବୋ ୱିଚକ୍ଖଣୋ ।
ସବ୍ବେ ଅମିତ୍ତେ ଆଦେତି, ସୁପଣ୍ଣୋ ଉରଗାମିୱାତି ॥
କୋକିଲଜାତକଂ [କୋକାଲିକଜାତକଂ (ସବ୍ବତ୍ଥ)] ପଠମଂ ।
୩୩୨. ରଥଲଟ୍ଠିଜାତକଂ (୪-୪-୨)
ଅପି ହନ୍ତ୍ୱା ହତୋ ବ୍ରୂତି, ଜେତ୍ୱା ଜିତୋତି ଭାସତି ।
ପୁବ୍ବୱକ୍ଖାୟିନୋ [ପୁବ୍ବମକ୍ଖାୟିନୋ (ସୀ॰ ସ୍ୟା॰)] ରାଜ, ଅଞ୍ଞଦତ୍ଥୁ [ଏକଦତ୍ଥୁ (ସୀ॰ ପୀ॰)] ନ ସଦ୍ଦହେ ॥
ତସ୍ମା ପଣ୍ଡିତଜାତିୟୋ, ସୁଣେୟ୍ୟ ଇତରସ୍ସପି ।
ଉଭିନ୍ନଂ ୱଚନଂ ସୁତ୍ୱା, ୟଥା ଧମ୍ମୋ ତଥା କରେ ॥
ଅଲସୋ ଗିହୀ କାମଭୋଗୀ ନ ସାଧୁ, ଅସଞ୍ଞତୋ ପବ୍ବଜିତୋ ନ ସାଧୁ ।
ରାଜା ନ ସାଧୁ ଅନିସମ୍ମକାରୀ, ୟୋ ପଣ୍ଡିତୋ କୋଧନୋ ତଂ ନ ସାଧୁ ॥
ନିସମ୍ମ ଖତ୍ତିୟୋ କୟିରା, ନାନିସମ୍ମ ଦିସମ୍ପତି ।
ନିସମ୍ମକାରିନୋ ରାଜ [ରଞ୍ଞୋ (ସୀ॰ ସ୍ୟା॰)], ୟସୋ କିତ୍ତି ଚ ୱଡ୍ଢତୀତି ॥
ରଥଲଟ୍ଠିଜାତକଂ ଦୁତିୟଂ ।
୩୩୩. ପକ୍କଗୋଧଜାତକଂ (୪-୪-୩)
ତଦେୱ ମେ ତ୍ୱଂ ୱିଦିତୋ, ୱନମଜ୍ଝେ ରଥେସଭ ।
ୟସ୍ସ ତେ ଖଗ୍ଗବଦ୍ଧସ୍ସ, ସନ୍ନଦ୍ଧସ୍ସ ତିରୀଟିନୋ ।
ଅସ୍ସତ୍ଥଦୁମସାଖାୟ, ପକ୍କା ଗୋଧା ପଲାୟଥ ॥
ନମେ ନମନ୍ତସ୍ସ ଭଜେ ଭଜନ୍ତଂ, କିଚ୍ଚାନୁକୁବ୍ବସ୍ସ କରେୟ୍ୟ କିଚ୍ଚଂ ।
ନାନତ୍ଥକାମସ୍ସ କରେୟ୍ୟ ଅତ୍ଥଂ, ଅସମ୍ଭଜନ୍ତମ୍ପି ନ ସମ୍ଭଜେୟ୍ୟ ॥
ଚଜେ ଚଜନ୍ତଂ ୱନଥଂ ନ କୟିରା, ଅପେତଚିତ୍ତେନ ନ ସମ୍ଭଜେୟ୍ୟ ।
ଦିଜୋ ଦୁମଂ ଖୀଣଫଲନ୍ତି [ଫଲଂୱ (କ॰ ସୀ॰ ସ୍ୟା॰ କ॰), ଦୁକନିପାତେ ପୁଟଭତ୍ତଜାତକେନ ସଂସନ୍ଦେତବ୍ବଂ] ଞତ୍ୱା, ଅଞ୍ଞଂ ସମେକ୍ଖେୟ୍ୟ ମହା ହି ଲୋକୋ ॥
ସୋ ତେ କରିସ୍ସାମି ୟଥାନୁଭାୱଂ, କତଞ୍ଞୁତଂ ଖତ୍ତିୟେ [ଖତ୍ତିୟୋ (ସ୍ୟା॰ କ॰)] ପେକ୍ଖମାନୋ ।
ସବ୍ବଞ୍ଚ ତେ ଇସ୍ସରିୟଂ ଦଦାମି, ୟସ୍ସିଚ୍ଛସୀ ତସ୍ସ ତୁୱଂ ଦଦାମୀତି ॥
ପକ୍କଗୋଧଜାତକଂ [ଗୋଧଜାତକଂ (ସୀ॰ ସ୍ୟା॰ ପୀ॰)] ତତିୟଂ ।
୩୩୪. ରାଜୋୱାଦଜାତକଂ (୪-୪-୪)
ଗୱଂ ଚେ ତରମାନାନଂ, ଜିମ୍ହଂ ଗଚ୍ଛତି ପୁଙ୍ଗୱୋ ।
ସବ୍ବା ତା ଜିମ୍ହଂ ଗଚ୍ଛନ୍ତି [ସବ୍ବା ଗାୱୀ ଜିମ୍ହଂ ୟନ୍ତି (ସୀ॰ ସ୍ୟା॰)], ନେତ୍ତେ ଜିମ୍ହଂ ଗତେ ସତି ॥
ଏୱମେୱ ମନୁସ୍ସେସୁ, ୟୋ ହୋତି ସେଟ୍ଠସମ୍ମତୋ ।
ସୋ ଚେ ଅଧମ୍ମଂ ଚରତି, ପଗେୱ ଇତରା ପଜା ।
ସବ୍ବଂ ରଟ୍ଠଂ ଦୁଖଂ ସେତି, ରାଜା ଚେ ହୋତି ଅଧମ୍ମିକୋ ॥
ଗୱଂ ଚେ ତରମାନାନଂ, ଉଜୁଂ ଗଚ୍ଛତି ପୁଙ୍ଗୱୋ ।
ସବ୍ବା ଗାୱୀ ଉଜୁଂ ୟନ୍ତି [ସବ୍ବା ତା ଉଜୁଂ ଗଚ୍ଛନ୍ତି (ପୀ॰ ଅ॰ ନି॰ ୪.୭୦)], ନେତ୍ତେ ଉଜୁଂ ଗତେ ସତି ॥
ଏୱମେୱ ମନୁସ୍ସେସୁ, ୟୋ ହୋତି ସେଟ୍ଠସମ୍ମତୋ ।
ସୋ ସଚେ ଧମ୍ମଂ ଚରତି, ପଗେୱ ଇତରା ପଜା ।
ସବ୍ବଂ ରଟ୍ଠଂ ସୁଖଂ ସେତି, ରାଜା ଚେ ହୋତି ଧମ୍ମିକୋତି ॥
ରାଜୋୱାଦଜାତକଂ ଚତୁତ୍ଥଂ ।
୩୩୫. ଜମ୍ବୁକଜାତକଂ (୪-୪-୫)
ବ୍ରହା ପୱଡ୍ଢକାୟୋ ସୋ, ଦୀଘଦାଠୋ ଚ ଜମ୍ବୁକ ।
ନ ତ୍ୱଂ ତତ୍ଥ କୁଲେ ଜାତୋ, ୟତ୍ଥ ଗଣ୍ହନ୍ତି କୁଞ୍ଜରଂ ॥
ଅସୀହୋ ସୀହମାନେନ, ୟୋ ଅତ୍ତାନଂ ୱିକୁବ୍ବତି ।
କୋତ୍ଥୂୱ [କୁଟ୍ଠୂୱ (ସୀ॰), କୁତ୍ଥୁୱ (ସ୍ୟା॰ ପୀ)] ଗଜମାସଜ୍ଜ, ସେତି ଭୂମ୍ୟା ଅନୁତ୍ଥୁନଂ ॥
ୟସସ୍ସିନୋ ଉତ୍ତମପୁଗ୍ଗଲସ୍ସ, ସଞ୍ଜାତଖନ୍ଧସ୍ସ ମହବ୍ବଲସ୍ସ ।
ଅସମେକ୍ଖିୟ ଥାମବଲୂପପତ୍ତିଂ, ସ ସେତି ନାଗେନ ହତୋୟଂ ଜମ୍ବୁକୋ ॥
ୟୋ ଚୀଧ କମ୍ମଂ କୁରୁତେ ପମାୟ, ଥାମବ୍ବଲଂ ଅତ୍ତନି ସଂୱିଦିତ୍ୱା ।
ଜପ୍ପେନ ମନ୍ତେନ ସୁଭାସିତେନ, ପରିକ୍ଖୱା ସୋ ୱିପୁଲଂ ଜିନାତୀତି ॥
ଜମ୍ବୁକଜାତକଂ ପଞ୍ଚମଂ ।
୩୩୬. ବ୍ରହାଛତ୍ତଜାତକଂ (୪-୪-୬)
ତିଣଂ ତିଣନ୍ତି ଲପସି, କୋ ନୁ ତେ ତିଣମାହରି ।
କିଂ ନୁ ତେ ତିଣକିଚ୍ଚତ୍ଥି, ତିଣମେୱ ପଭାସସି ॥
ଇଧାଗମା ବ୍ରହ୍ମଚାରୀ, ବ୍ରହା ଛତ୍ତୋ ବହୁସ୍ସୁତୋ ।
ସୋ ମେ [ସୋ ୱେ (କ॰)] ସବ୍ବଂ ସମାଦାୟ, ତିଣଂ ନିକ୍ଖିପ୍ପ ଗଚ୍ଛତି ॥
ଏୱେତଂ ହୋତି କତ୍ତବ୍ବଂ, ଅପ୍ପେନ ବହୁମିଚ୍ଛତା ।
ସବ୍ବଂ ସକସ୍ସ ଆଦାନଂ, ଅନାଦାନଂ ତିଣସ୍ସ ଚ ॥ ( ) [(ତିଣସ୍ସ ଚାଟୀସୁ ଗତୋ, ତତ୍ଥ କା ପରିଦେୱନା) (ସୀ॰ ସ୍ୟା॰) (ଚାଟୀସୁ ପକ୍ଖିପିତ୍ୱାନ, ତତ୍ଥ କା ପରିଦେୱନା) (କ॰)]
ସୀଲୱନ୍ତୋ ନ କୁବ୍ବନ୍ତି, ବାଲୋ ସୀଲାନି କୁବ୍ବତି ।
ଅନିଚ୍ଚସୀଲଂ ଦୁସ୍ସୀଲ୍ୟଂ [ଦୁସ୍ସୀଲଂ (ପୀ॰)], କିଂ ପଣ୍ଡିଚ୍ଚଂ କରିସ୍ସତୀତି ॥
ବ୍ରହାଛତ୍ତଜାତକଂ ଛଟ୍ଠଂ ।
୩୩୭. ପୀଠଜାତକଂ (୪-୪-୭)
ନ ତେ ପୀଠମଦାୟିମ୍ହା [ମଦାସିମ୍ହ (ପୀ॰ କ॰)], ନ ପାନଂ ନପି ଭୋଜନଂ ।
ବ୍ରହ୍ମଚାରି ଖମସ୍ସୁ ମେ, ଏତଂ ପସ୍ସାମି ଅଚ୍ଚୟଂ ॥
ନେୱାଭିସଜ୍ଜାମି ନ ଚାପି କୁପ୍ପେ, ନ ଚାପି ମେ ଅପ୍ପିୟମାସି କିଞ୍ଚି ।
ଅଥୋପି ମେ ଆସି ମନୋୱିତକ୍କୋ, ଏତାଦିସୋ ନୂନ କୁଲସ୍ସ ଧମ୍ମୋ ॥
ଏସସ୍ମାକଂ କୁଲେ ଧମ୍ମୋ, ପିତୁପିତାମହୋ ସଦା ।
ଆସନଂ ଉଦକଂ ପଜ୍ଜଂ, ସବ୍ବେତଂ ନିପଦାମସେ ॥
ଏସସ୍ମାକଂ କୁଲେ ଧମ୍ମୋ, ପିତୁପିତାମହୋ ସଦା ।
ସକ୍କଚ୍ଚଂ ଉପତିଟ୍ଠାମ, ଉତ୍ତମଂ ୱିୟ ଞାତକନ୍ତି ॥
ପୀଠଜାତକଂ ସତ୍ତମଂ ।
୩୩୮. ଥୁସଜାତକଂ (୪-୪-୮)
ୱିଦିତଂ ଥୁସଂ ଉନ୍ଦୁରାନଂ [ଉନ୍ଦୂରାନଂ (କ॰)], ୱିଦିତଂ ପନ ତଣ୍ଡୁଲଂ ।
ଥୁସଂ ଥୁସଂ [ଥୁସଂ ଥୂଲଂ (ସୀ॰)] ୱିୱଜ୍ଜେତ୍ୱା, ତଣ୍ଡୁଲଂ ପନ ଖାଦରେ ॥
ୟା ମନ୍ତନା ଅରଞ୍ଞସ୍ମିଂ, ୟା ଚ ଗାମେ ନିକଣ୍ଣିକା ।
ୟଞ୍ଚେତଂ ଇତି ଚୀତି ଚ, ଏତମ୍ପି ୱିଦିତଂ ମୟା ॥
ଧମ୍ମେନ କିର ଜାତସ୍ସ, ପିତା ପୁତ୍ତସ୍ସ ମକ୍କଟୋ ।
ଦହରସ୍ସେୱ ସନ୍ତସ୍ସ, ଦନ୍ତେହି ଫଲମଚ୍ଛିଦା ॥
ୟମେତଂ ପରିସପ୍ପସି [ପରିସବ୍ବେସି (କ॰)], ଅଜକାଣୋୱ ସାସପେ ।
ୟୋପାୟଂ ହେଟ୍ଠତୋ ସେତି [ସେସି (ସୀ॰)], ଏତମ୍ପି ୱିଦିତଂ ମୟାତି ॥
ଥୁସଜାତକଂ ଅଟ୍ଠମଂ ।
୩୩୯. ବାୱେରୁଜାତକଂ (୪-୪-୯)
ଅଦସ୍ସନେନ ମୋରସ୍ସ, ସିଖିନୋ ମଞ୍ଜୁଭାଣିନୋ ।
କାକଂ ତତ୍ଥ ଅପୂଜେସୁଂ, ମଂସେନ ଚ ଫଲେନ ଚ ॥
ୟଦା ଚ ସରସମ୍ପନ୍ନୋ, ମୋରୋ ବାୱେରୁମାଗମା ।
ଅଥ ଲାଭୋ ଚ ସକ୍କାରୋ, ୱାୟସସ୍ସ ଅହାୟଥ ॥
ୟାୱ ନୁପ୍ପଜ୍ଜତୀ ବୁଦ୍ଧୋ, ଧମ୍ମରାଜା ପଭଙ୍କରୋ ।
ତାୱ ଅଞ୍ଞେ ଅପୂଜେସୁଂ, ପୁଥୂ ସମଣବ୍ରାହ୍ମଣେ ॥
ୟଦା ଚ ସରସମ୍ପନ୍ନୋ, ବୁଦ୍ଧୋ ଧମ୍ମଂ ଅଦେସୟି ।
ଅଥ ଲାଭୋ ଚ ସକ୍କାରୋ, ତିତ୍ଥିୟାନଂ ଅହାୟଥାତି ॥
ବାୱେରୁଜାତକଂ ନୱମଂ ।
୩୪୦. ୱିସୟ୍ହଜାତକଂ (୪-୪-୧୦)
ଅଦାସି ଦାନାନି ପୁରେ ୱିସୟ୍ହ, ଦଦତୋ ଚ ତେ ଖୟଧମ୍ମୋ ଅହୋସି ।
ଇତୋ ପରଂ ଚେ ନ ଦଦେୟ୍ୟ ଦାନଂ, ତିଟ୍ଠେୟ୍ୟୁଂ ତେ ସଂୟମନ୍ତସ୍ସ ଭୋଗା ॥
ଅନରିୟମରିୟେନ ସହସ୍ସନେତ୍ତ, ସୁଦୁଗ୍ଗତେନାପି ଅକିଚ୍ଚମାହୁ ।
ମା ୱୋ ଧନଂ ତଂ ଅହୁ ଦେୱରାଜ [ଅହୁୱା ଜନିନ୍ଦ (କ॰ ସୀ॰ ସ୍ୟା॰ ପୀ॰)], ୟଂ ଭୋଗହେତୁ ୱିଜହେମୁ ସଦ୍ଧଂ ॥
ୟେନ ଏକୋ ରଥୋ ୟାତି, ୟାତି ତେନାପରୋ ରଥୋ ।
ପୋରାଣଂ ନିହିତଂ ୱତ୍ତଂ, ୱତ୍ତତଞ୍ଞେୱ [ୱଦ୍ଧଂ, ୱଦ୍ଧତଞ୍ଞେୱ (କ॰ ସୀ॰ ପୀ॰)] ୱାସୱ ॥
ୟଦି ହେସ୍ସତି ଦସ୍ସାମ, ଅସନ୍ତେ କିଂ ଦଦାମସେ ।
ଏୱଂଭୂତାପି ଦସ୍ସାମ, ମା ଦାନଂ ପମଦମ୍ହସେତି ॥
ୱିସୟ୍ହଜାତକଂ ଦସମଂ ।
କୋକିଲୱଗ୍ଗୋ [କୋକାଲିକୱଗ୍ଗୋ (କ॰)] ଚତୁତ୍ଥୋ ।
ତସ୍ସୁଦ୍ଦାନଂ –
ଅତିୱେଲପଭାସତି ଜୀତୱରୋ, ୱନମଜ୍ଝ ରଥେସଭ ଜିମ୍ହଗମୋ ।
ଅଥ ଜମ୍ବୁ ତିଣାସନପୀଠୱରଂ, ଅଥ ତଣ୍ଡୁଲ ମୋର ୱିସୟ୍ହ ଦସାତି ॥
୫. ଚୂଳକୁଣାଲୱଗ୍ଗୋ
୩୪୧. କଣ୍ଡରୀଜାତକଂ (୪-୫-୧)
ନରାନମାରାମକରାସୁ ନାରିସୁ, ଅନେକଚିତ୍ତାସୁ ଅନିଗ୍ଗହାସୁ ଚ ।
ସବ୍ବତ୍ଥ ନାପୀତିକରାପି [ସବ୍ବ’ତ୍ତନା’ପୀତିକରାପି (ସୀ॰ ସ୍ୟା॰)] ଚେ ସିୟା [ସିୟୁଂ (ସ୍ୟା॰)], ନ ୱିସ୍ସସେ ତିତ୍ଥସମା ହି ନାରିୟୋ ॥
ୟଂ ୱେ [ୟଞ୍ଚ (ସ୍ୟା॰ କ॰)] ଦିସ୍ୱା କଣ୍ଡରୀକିନ୍ନରାନଂ [କିନ୍ନରକିନ୍ନରୀନଂ (ସ୍ୟା॰), କିନ୍ନରୀକିନ୍ନରାନଂ (କ॰)], ସବ୍ବିତ୍ଥିୟୋ ନ ରମନ୍ତି ଅଗାରେ ।
ତଂ ତାଦିସଂ ମଚ୍ଚଂ ଚଜିତ୍ୱା ଭରିୟା, ଅଞ୍ଞଂ ଦିସ୍ୱା ପୁରିସଂ ପୀଠସପ୍ପିଂ ॥
ବକସ୍ସ ଚ ବାୱରିକସ୍ସ [ପାୱାରିକସ୍ସ (ସୀ॰)] ରଞ୍ଞୋ, ଅଚ୍ଚନ୍ତକାମାନୁଗତସ୍ସ ଭରିୟା ।
ଅୱାଚରୀ [ଅଚ୍ଚାଚରି (ସ୍ୟା॰), ଅନାଚରି (କ॰)] ପଟ୍ଠୱସାନୁଗସ୍ସ [ବଦ୍ଧୱସାନୁଗସ୍ସ (ସୀ॰ ସ୍ୟା॰), ପତ୍ତୱସାନୁଗତସ୍ସ (କ॰)], କଂ ୱାପି ଇତ୍ଥୀ ନାତିଚରେ ତଦଞ୍ଞଂ ॥
ପିଙ୍ଗିୟାନୀ ସବ୍ବଲୋକିସ୍ସରସ୍ସ, ରଞ୍ଞୋ ପିୟା ବ୍ରହ୍ମଦତ୍ତସ୍ସ ଭରିୟା ।
ଅୱାଚରୀ ପଟ୍ଠୱସାନୁଗସ୍ସ, ତଂ ୱାପି ସା ନାଜ୍ଝଗା କାମକାମିନୀତି ॥
କଣ୍ଡରୀଜାତକଂ [କିନ୍ନରୀଜାତକଂ (କ॰ ସୀ॰ କ॰), କୁଣ୍ଡଲିକଜାତକଂ (ସ୍ୟା॰)] ପଠମଂ ।
୩୪୨. ୱାନରଜାତକଂ (୪-୫-୨)
ଅସକ୍ଖିଂ ୱତ ଅତ୍ତାନଂ, ଉଦ୍ଧାତୁଂ ଉଦକା ଥଲଂ ।
ନ ଦାନାହଂ ପୁନ ତୁୟ୍ହଂ, ୱସଂ ଗଚ୍ଛାମି ୱାରିଜ ॥
ଅଲମେତେହି ଅମ୍ବେହି, ଜମ୍ବୂହି ପନସେହି ଚ ।
ୟାନି ପାରଂ ସମୁଦ୍ଦସ୍ସ, ୱରଂ ମୟ୍ହଂ ଉଦୁମ୍ବରୋ ॥
ୟୋ ଚ ଉପ୍ପତିତଂ ଅତ୍ଥଂ, ନ ଖିପ୍ପମନୁବୁଜ୍ଝତି ।
ଅମିତ୍ତୱସମନ୍ୱେତି, ପଚ୍ଛା ଚ ଅନୁତପ୍ପତି ॥
ୟୋ ଚ ଉପ୍ପତିତଂ ଅତ୍ଥଂ, ଖିପ୍ପମେୱ ନିବୋଧତି ।
ମୁଚ୍ଚତେ ସତ୍ତୁସମ୍ବାଧା, ନ ଚ ପଚ୍ଛାନୁତପ୍ପତୀତି ॥
ୱାନରଜାତକଂ ଦୁତିୟଂ ।
୩୪୩. କୁନ୍ତିନୀଜାତକଂ (୪-୫-୩)
ଅୱସିମ୍ହ ତୱାଗାରେ, ନିଚ୍ଚଂ ସକ୍କତପୂଜିତା ।
ତ୍ୱମେୱ ଦାନିମକରି, ହନ୍ଦ ରାଜ ୱଜାମହଂ ॥
ୟୋ ୱେ କତେ ପଟିକତେ, କିବ୍ବିସେ ପଟିକିବ୍ବିସେ ।
ଏୱଂ ତଂ ସମ୍ମତୀ ୱେରଂ, ୱସ କୁନ୍ତିନି ମାଗମା ॥
ନ କତସ୍ସ ଚ କତ୍ତା ଚ, ମେତ୍ତି [ମେତ୍ତୀ (ପୀ॰), ମିତ୍ତୀ (କ॰)] ସନ୍ଧୀୟତେ ପୁନ ।
ହଦୟଂ ନାନୁଜାନାତି, ଗଚ୍ଛଞ୍ଞେୱ ରଥେସଭ ॥
କତସ୍ସ ଚେୱ କତ୍ତା ଚ, ମେତ୍ତି ସନ୍ଧୀୟତେ ପୁନ ।
ଧୀରାନଂ ନୋ ଚ ବାଲାନଂ, ୱସ କୁନ୍ତିନି ମାଗମାତି ॥
କୁନ୍ତିନୀଜାତକଂ ତତିୟଂ ।
୩୪୪. ଅମ୍ବଜାତକଂ (୪-୫-୪)
ୟୋ ନୀଲିୟଂ ମଣ୍ଡୟତି, ସଣ୍ଡାସେନ ୱିହଞ୍ଞତି ।
ତସ୍ସ ସା ୱସମନ୍ୱେତୁ, ୟା ତେ ଅମ୍ବେ ଅୱାହରି ॥
ୱୀସଂ ୱା ପଞ୍ଚୱୀସଂ [ପଣ୍ଣୁୱୀସଂ (କ॰ ସୀ॰ ପୀ॰)] ୱା, ଊନତିଂସଂ ୱ ଜାତିୟା ।
ତାଦିସା ପତି ମା ଲଦ୍ଧା [ପତିଂ ମା ଲଦ୍ଧା (ପୀ॰), ପତି ମା’ଲତ୍ଥ ( ?)], ୟା ତେ ଅମ୍ବେ ଅୱାହରି ॥
ଦୀଘଂ ଗଚ୍ଛତୁ ଅଦ୍ଧାନଂ, ଏକିକା ଅଭିସାରିକା ।
ସଙ୍କେତେ ପତି ମା ଅଦ୍ଦ [ମା ଅଦ୍ଦସ (ସୀ॰ ପୀ॰)], ୟା ତେ ଅମ୍ବେ ଅୱାହରି ॥
ଅଲଙ୍କତା ସୁୱସନା, ମାଲିନୀ ଚନ୍ଦନୁସ୍ସଦା ।
ଏକିକା ସୟନେ ସେତୁ, ୟା ତେ ଅମ୍ବେ ଅୱାହରୀତି ॥
ଅମ୍ବଜାତକଂ [ଅମ୍ବଚୋରଜାତକଂ (କ॰ ସୀ॰ ପୀ॰)] ଚତୁତ୍ଥଂ ।
୩୪୫. ଗଜକୁମ୍ଭଜାତକଂ (୪-୫-୫)
ୱନଂ ୟଦଗ୍ଗି ଦହତି, ପାୱକୋ କଣ୍ହୱତ୍ତନୀ ।
କଥଂ କରୋସି ପଚଲକ, ଏୱଂ ଦନ୍ଧପରକ୍କମୋ ॥
ବହୂନି ରୁକ୍ଖଛିଦ୍ଦାନି, ପଥବ୍ୟା ୱିୱରାନି ଚ ।
ତାନି ଚେ ନାଭିସମ୍ଭୋମ, ହୋତି ନୋ କାଲପରିୟାୟୋ ॥
ୟୋ ଦନ୍ଧକାଲେ ତରତି, ତରଣୀୟେ ଚ ଦନ୍ଧତି ।
ସୁକ୍ଖପଣ୍ଣଂୱ ଅକ୍କମ୍ମ, ଅତ୍ଥଂ ଭଞ୍ଜତି ଅତ୍ତନୋ ॥
ୟୋ ଦନ୍ଧକାଲେ ଦନ୍ଧେତି, ତରଣୀୟେ ଚ ତାରୟି ।
ସସୀୱ ରତ୍ତିଂ ୱିଭଜଂ, ତସ୍ସତ୍ଥୋ ପରିପୂରତୀତି ॥
ଗଜକୁମ୍ଭଜାତକଂ ପଞ୍ଚମଂ ।
୩୪୬. କେସୱଜାତକଂ (୪-୫-୬)
ମନୁସ୍ସିନ୍ଦଂ ଜହିତ୍ୱାନ, ସବ୍ବକାମସମିଦ୍ଧିନଂ ।
କଥଂ ନୁ ଭଗୱା କେସୀ, କପ୍ପସ୍ସ ରମତି ଅସ୍ସମେ [ରମତସ୍ସମେ (କ॰)]॥
ସାଦୂନୀ [ସାଧୂନି (କ॰ ସୀ॰ ସ୍ୟା॰ କ॰)] ରମଣୀୟାନି, ସନ୍ତି ୱକ୍ଖା ମନୋରମା ।
ସୁଭାସିତାନି କପ୍ପସ୍ସ, ନାରଦ ରମୟନ୍ତି ମଂ ॥
ସାଲୀନଂ ଓଦନଂ ଭୁଞ୍ଜେ, ସୁଚିଂ ମଂସୂପସେଚନଂ ।
କଥଂ ସାମାକନୀୱାରଂ, ଅଲୋଣଂ ଛାଦୟନ୍ତି ତଂ ॥
ସାଦୁଂ ୱା [ଅସାଦୁଂ (ପୀ॰)] ୟଦି ୱାସାଦୁଂ, ଅପ୍ପଂ ୱା ୟଦି ୱା ବହୁଂ ।
ୱିସ୍ସତ୍ଥୋ ୟତ୍ଥ ଭୁଞ୍ଜେୟ୍ୟ, ୱିସ୍ସାସପରମା ରସାତି ॥
କେସୱଜାତକଂ [କେସୀଜାତକଂ (କ॰)] ଛଟ୍ଠଂ ।
୩୪୭. ଅୟକୂଟଜାତକଂ (୪-୫-୭)
ସବ୍ବାୟସଂ କୂଟମତିପ୍ପମାଣଂ, ପଗ୍ଗୟ୍ହ ୟୋ [ସୋ (ପୀ॰)] ତିଟ୍ଠସି ଅନ୍ତଲିକ୍ଖେ ।
ରକ୍ଖାୟ ମେ [ମଂ (ସୀ॰)] ତ୍ୱଂ ୱିହିତୋ ନୁସଜ୍ଜ, ଉଦାହୁ ମେ ଚେତୟସେ [ୱାୟମସେ (ସୀ॰ ସ୍ୟା॰)] ୱଧାୟ ॥
ଦୂତୋ ଅହଂ ରାଜିଧ ରକ୍ଖସାନଂ, ୱଧାୟ ତୁୟ୍ହଂ ପହିତୋହମସ୍ମି ।
ଇନ୍ଦୋ ଚ ତଂ ରକ୍ଖତି ଦେୱରାଜା, ତେନୁତ୍ତମଙ୍ଗଂ ନ ତେ [ନ ହି (କ॰ ସୀ॰ ପୀ॰), ତେ ନ (କ॰)] ଫାଲୟାମି ॥
ସଚେ ଚ ମଂ ରକ୍ଖତି ଦେୱରାଜା, ଦେୱାନମିନ୍ଦୋ ମଘୱା ସୁଜମ୍ପତି ।
କାମଂ ପିସାଚା ୱିନଦନ୍ତୁ ସବ୍ବେ, ନ ସନ୍ତସେ ରକ୍ଖସିୟା ପଜାୟ ॥
କାମଂ କନ୍ଦନ୍ତୁ [କନ୍ତନ୍ତୁ (କ॰), କଣ୍ଡନ୍ତୁ (ସ୍ୟା॰)] କୁମ୍ଭଣ୍ଡା, ସବ୍ବେ ପଂସୁପିସାଚକା ।
ନାଲଂ ପିସାଚା ୟୁଦ୍ଧାୟ, ମହତୀ ସା ୱିଭିଂସିକାତି [ୱିଭେସିକାତି (ସ୍ୟା॰), ୱିହେସିକାତି (ପୀ॰)]॥
ଅୟକୂଟଜାତକଂ ସତ୍ତମଂ ।
୩୪୮. ଅରଞ୍ଞଜାତକଂ (୪-୫-୮)
ଅରଞ୍ଞା ଗାମମାଗମ୍ମ, କିଂସୀଲଂ କିଂୱତଂ ଅହଂ ।
ପୁରିସଂ ତାତ ସେୱେୟ୍ୟଂ, ତଂ ମେ ଅକ୍ଖାହି ପୁଚ୍ଛିତୋ ॥
ୟୋ ତଂ ୱିସ୍ସାସୟେ ତାତ, ୱିସ୍ସାସଞ୍ଚ ଖମେୟ୍ୟ ତେ ।
ସୁସ୍ସୂସୀ ଚ ତିତିକ୍ଖୀ ଚ, ତଂ ଭଜେହି ଇତୋ [ତଂ ଭଜେୟ୍ୟାସିତୋ (କ॰)] ଗତୋ ॥
ୟସ୍ସ କାୟେନ ୱାଚାୟ, ମନସା ନତ୍ଥି ଦୁକ୍କଟଂ ।
ଉରସୀୱ ପତିଟ୍ଠାୟ, ତଂ ଭଜେହି ଇତୋ ଗତୋ ॥
ହଲିଦ୍ଦିରାଗଂ କପିଚିତ୍ତଂ, ପୁରିସଂ ରାଗୱିରାଗିନଂ ।
ତାଦିସଂ ତାତ ମା ସେୱି, ନିମ୍ମନୁସ୍ସମ୍ପି ଚେ ସିୟାତି ॥
ଅରଞ୍ଞଜାତକଂ ଅଟ୍ଠମଂ ।
୩୪୯. ସନ୍ଧିଭେଦଜାତକଂ (୪-୫-୯)
ନେୱ ଇତ୍ଥୀସୁ ସାମଞ୍ଞଂ, ନାପି ଭକ୍ଖେସୁ ସାରଥି ।
ଅଥସ୍ସ ସନ୍ଧିଭେଦସ୍ସ, ପସ୍ସ ୟାୱ ସୁଚିନ୍ତିତଂ ॥
ଅସି ତିକ୍ଖୋୱ ମଂସମ୍ହି, ପେସୁଞ୍ଞଂ ପରିୱତ୍ତତି ।
ୟତ୍ଥୂସଭଞ୍ଚ ସୀହଞ୍ଚ, ଭକ୍ଖୟନ୍ତି ମିଗାଧମା ॥
ଇମଂ ସୋ ସୟନଂ ସେତି, ୟମିମଂ [ୟୟିମଂ (ସୀ॰ ପୀ॰), ୟିମଂ (କ॰)] ପସ୍ସସି ସାରଥି ।
ୟୋ ୱାଚଂ ସନ୍ଧିଭେଦସ୍ସ, ପିସୁଣସ୍ସ ନିବୋଧତି ॥
ତେ ଜନା ସୁଖମେଧନ୍ତି, ନରା ସଗ୍ଗଗତାରିୱ ।
ୟେ ୱାଚଂ ସନ୍ଧିଭେଦସ୍ସ, ନାୱବୋଧନ୍ତି ସାରଥୀତି ॥
ସନ୍ଧିଭେଦଜାତକଂ ନୱମଂ ।
୩୫୦. ଦେୱତାପଞ୍ହଜାତକଂ (୪-୫-୧୦)
ହନ୍ତି ହତ୍ଥେହି ପାଦେହି, ମୁଖଞ୍ଚ ପରିସୁମ୍ଭତି ।
ସ ୱେ ରାଜ ପିୟୋ ହୋତି, କଂ ତେନ ତ୍ୱାଭିପସ୍ସସି [ମଭିପସ୍ସସି (ସୀ॰)]॥
ଅକ୍କୋସତି ୟଥାକାମଂ, ଆଗମଞ୍ଚସ୍ସ ଇଚ୍ଛତି ।
ସ ୱେ ରାଜ ପିୟୋ ହୋତି, କଂ ତେନ ତ୍ୱାଭିପସ୍ସସି ॥
ଅବ୍ଭକ୍ଖାତି ଅଭୂତେନ, ଅଲିକେନାଭିସାରୟେ ।
ସ ୱେ ରାଜ ପିୟୋ ହୋତି, କଂ ତେନ ତ୍ୱାଭିପସ୍ସସି ॥
ହରଂ ଅନ୍ନଞ୍ଚ ପାନଞ୍ଚ, ୱତ୍ଥସେନାସନାନି ଚ ।
ଅଞ୍ଞଦତ୍ଥୁହରା ସନ୍ତା, ତେ ୱେ ରାଜ ପିୟା ହୋନ୍ତି ।
କଂ ତେନ ତ୍ୱାଭିପସ୍ସସୀତି ॥
ଦେୱତାପଞ୍ହଜାତକଂ ଦସମଂ ।
ଚୂଳକୁଣାଲୱଗ୍ଗୋ ପଞ୍ଚମୋ ।
ତସ୍ସୁଦ୍ଦାନଂ –
ନରାନଂ ଅସକ୍ଖିୱସିମ୍ହୱରୋ, ନୀଲିୟମଗ୍ଗିୱରଞ୍ଚ ପୁନ ।
ପୁନ ରସାୟସକୂଟୱରୋ, ତଥାରଞ୍ଞ ସାରଥି ହନ୍ତି ଦସାତି ॥
ଅଥ ୱଗ୍ଗୁଦ୍ଦାନଂ –
କାଲିଙ୍ଗଂ [ୱିୱରଂ (ବହୂସୁ)] ପୁଚିମନ୍ଦଞ୍ଚ, କୁଟିଦୂସକ କୋକିଲା [କୁଟିଦୂସଂ ବହୁଭାଣକଂ (ବହୂସୁ)]।
ଚୂଳକୁଣାଲୱଗ୍ଗୋ ସୋ, ପଞ୍ଚମୋ ସୁପ୍ପକାସିତୋତି ॥
ଚତୁକ୍କନିପାତଂ ନିଟ୍ଠିତଂ ।
୫. ପଞ୍ଚକନିପାତୋ
୧. ମଣିକୁଣ୍ଡଲୱଗ୍ଗୋ
୩୫୧. ମଣିକୁଣ୍ଡଲଜାତକଂ (୫-୧-୧)
ଜୀନୋ ରଥସ୍ସଂ ମଣିକୁଣ୍ଡଲେ ଚ, ପୁତ୍ତେ ଚ ଦାରେ ଚ ତଥେୱ ଜୀନୋ ।
ସବ୍ବେସୁ ଭୋଗେସୁ ଅସେସକେସୁ [ଅସେସିତେସୁ (ସୀ॰ ପୀ॰), ଅସେସିକେସୁ (କ॰)], କସ୍ମା ନ ସନ୍ତପ୍ପସି ସୋକକାଲେ ॥
ପୁବ୍ବେୱ ମଚ୍ଚଂ ୱିଜହନ୍ତି ଭୋଗା, ମଚ୍ଚୋ ୱା ତେ [ଚ ନେ (ପୀ॰), ଧନେ (କ॰)] ପୁବ୍ବତରଂ ଜହାତି ।
ଅସସ୍ସତା ଭୋଗିନୋ କାମକାମି, ତସ୍ମା ନ ସୋଚାମହଂ ସୋକକାଲେ ॥
ଉଦେତି ଆପୂରତି ୱେତି [ପୂରେତି ଖୀୟତି (ସ୍ୟା॰)] ଚନ୍ଦୋ, ଅତ୍ଥଂ ତପେତ୍ୱାନ [ଅନ୍ଧଂ ତପେତ୍ୱାନ (କ॰), ଅତ୍ଥଙ୍ଗମେତ୍ୱାନ (ସ୍ୟା॰), ଏତ୍ଥ ‘‘ତପେତ୍ୱାନ ଅତ୍ଥଂ ପଲେତୀ’’ତି ସମ୍ବନ୍ଧୋ] ପଲେତି ସୂରିୟୋ ।
ୱିଦିତା [ୱିଜିତା (ସ୍ୟା॰)] ମୟା ସତ୍ତୁକ ଲୋକଧମ୍ମା, ତସ୍ମା ନ ସୋଚାମହଂ ସୋକକାଲେ ॥
ଅଲସୋ ଗିହୀ କାମଭୋଗୀ ନ ସାଧୁ, ଅସଞ୍ଞତୋ ପବ୍ବଜିତୋ ନ ସାଧୁ ।
ରାଜା ନ ସାଧୁ ଅନିସମ୍ମକାରୀ, ୟୋ ପଣ୍ଡିତୋ କୋଧନୋ ତଂ ନ ସାଧୁ ॥
ନିସମ୍ମ ଖତ୍ତିୟୋ କୟିରା, ନାନିସମ୍ମ ଦିସମ୍ପତି ।
ନିସମ୍ମକାରିନୋ ରାଜ [ରଞ୍ଞୋ (ସୀ॰ ସ୍ୟା॰)], ୟସୋ କିତ୍ତି ଚ ୱଡ୍ଢତୀତି ॥
ମଣିକୁଣ୍ଡଲଜାତକଂ ପଠମଂ ।
୩୫୨. ସୁଜାତଜାତକଂ (୫-୧-୨)
କିଂ ନୁ ସନ୍ତରମାନୋୱ, ଲାୟିତ୍ୱା ହରିତଂ ତିଣଂ ।
ଖାଦ ଖାଦାତି ଲପସି, ଗତସତ୍ତଂ ଜରଗ୍ଗୱଂ ॥
ନ ହି ଅନ୍ନେନ ପାନେନ, ମତୋ ଗୋଣୋ ସମୁଟ୍ଠହେ ।
ତ୍ୱଞ୍ଚ ତୁଚ୍ଛଂ ୱିଲପସି, ୟଥା ତଂ ଦୁମ୍ମତୀ ତଥା ॥
ତଥେୱ ତିଟ୍ଠତି ସୀସଂ, ହତ୍ଥପାଦା ଚ ୱାଲଧି ।
ସୋତା ତଥେୱ ତିଟ୍ଠନ୍ତି [ସୋ ତାତ ତଥେୱ ତିଟ୍ଠତି (କ॰)], ମଞ୍ଞେ ଗୋଣୋ ସମୁଟ୍ଠହେ ॥
ନେୱୟ୍ୟକସ୍ସ ସୀସଞ୍ଚ [ସୀସଂ ୱା (ସୀ॰ ସ୍ୟା॰ ପୀ॰)], ହତ୍ଥପାଦା ଚ ଦିସ୍ସରେ ।
ରୁଦଂ ମତ୍ତିକଥୂପସ୍ମିଂ, ନନୁ ତ୍ୱଞ୍ଞେୱ ଦୁମ୍ମତି ॥
ଆଦିତ୍ତଂ ୱତ ମଂ ସନ୍ତଂ, ଘତସିତ୍ତଂୱ ପାୱକଂ ।
ୱାରିନା ୱିୟ ଓସିଞ୍ଚଂ [ଓସିଞ୍ଚି (କ॰)], ସବ୍ବଂ ନିବ୍ବାପୟେ ଦରଂ ॥
ଅବ୍ବହୀ [ଅବ୍ବୂଳ୍ହଂ (ସୀ॰ ସ୍ୟା॰), ଅବ୍ଭୂଳ୍ହଂ (କ॰)] ୱତ ମେ ସଲ୍ଲଂ, ୟମାସି ହଦୟସ୍ସିତଂ [ସୋକଂ ହଦୟନିସ୍ସିତଂ (ସୀ॰ ସ୍ୟା॰)]।
ୟୋ ମେ ସୋକପରେତସ୍ସ, ପିତୁ ସୋକଂ ଅପାନୁଦି ॥
ସୋହଂ ଅବ୍ବୂଳ୍ହସଲ୍ଲୋସ୍ମି, ୱୀତସୋକୋ ଅନାୱିଲୋ ।
ନ ସୋଚାମି ନ ରୋଦାମି, ତୱ ସୁତ୍ୱାନ ମାଣୱ ॥
ଏୱଂ କରୋନ୍ତି ସପ୍ପଞ୍ଞା, ୟେ ହୋନ୍ତି ଅନୁକମ୍ପକା ।
ୱିନିୱତ୍ତେନ୍ତି ସୋକମ୍ହା, ସୁଜାତୋ ପିତରଂ ୟଥାତି ॥
ସୁଜାତଜାତକଂ ଦୁତିୟଂ ।
୩୫୩. ୱେନସାଖଜାତକଂ (୫-୧-୩)
ନୟିଦଂ ନିଚ୍ଚଂ ଭୱିତବ୍ବଂ ବ୍ରହ୍ମଦତ୍ତ, ଖେମଂ ସୁଭିକ୍ଖଂ ସୁଖତା ଚ କାୟେ ।
ଅତ୍ଥଚ୍ଚୟେ ମା ଅହୁ ସମ୍ପମୂଳ୍ହୋ, ଭିନ୍ନପ୍ଲୱୋ ସାଗରସ୍ସେୱ ମଜ୍ଝେ ॥
ୟାନି କରୋତି ପୁରିସୋ, ତାନି ଅତ୍ତନି ପସ୍ସତି ।
କଲ୍ୟାଣକାରୀ କଲ୍ୟାଣଂ, ପାପକାରୀ ଚ ପାପକଂ ।
ୟାଦିସଂ ୱପତେ ବୀଜଂ, ତାଦିସଂ ହରତେ ଫଲଂ ॥
ଇଦଂ ତଦାଚରିୟୱଚୋ, ପାରାସରିୟୋ ୟଦବ୍ରୱି ।
ମା ସୁ [ମା ସ୍ସୁ (ସୀ॰ ସ୍ୟା॰ ପୀ॰)] ତ୍ୱଂ ଅକରି ପାପଂ, ୟଂ ତ୍ୱଂ ପଚ୍ଛା କତଂ ତପେ ॥
ଅୟମେୱ ସୋ ପିଙ୍ଗିୟ [ସୋ ପିଙ୍ଗିୟୋ (ସ୍ୟା॰), ସୋପି ଭିୟ୍ୟୋ (କ॰)] ୱେନସାଖୋ, [ଧୋନସାଖୋ (କ॰ ସୀ॰ ପୀ॰)] ୟମ୍ହି ଘାତୟିଂ ଖତ୍ତିୟାନଂ ସହସ୍ସଂ ।
ଅଲଙ୍କତେ ଚନ୍ଦନସାରାନୁଲିତ୍ତେ, ତମେୱ ଦୁକ୍ଖଂ ପଚ୍ଚାଗତଂ ମମଂ ॥
ସାମା ଚ [ସାମାପି (ସୀ॰ ସ୍ୟା॰)] ଖୋ ଚନ୍ଦନଲିତ୍ତଗତ୍ତା [ଗତ୍ତୀ (କ॰ ସୀ॰ ସ୍ୟା॰ ପୀ॰)], ଲଟ୍ଠୀୱ ସୋଭଞ୍ଜନକସ୍ସ ଉଗ୍ଗତା ।
ଅଦିସ୍ୱା [ଅଦିସ୍ୱାୱ (ସୀ॰)] କାଲଂ କରିସ୍ସାମି ଉବ୍ବରିଂ, ତଂ ମେ ଇତୋ ଦୁକ୍ଖତରଂ ଭୱିସ୍ସତୀତି ॥
ୱେନସାଖଜାତକଂ [ଧୋନସାଖଜାତକଂ (କ॰ ସୀ॰ ପୀ॰)] ତତିୟଂ ।
୩୫୪. ଉରଗଜାତକଂ (୫-୧-୪)
ଉରଗୋୱ ତଚଂ ଜିଣ୍ଣଂ, ହିତ୍ୱା ଗଚ୍ଛତି ସଂ ତନୁଂ ।
ଏୱଂ ସରୀରେ ନିବ୍ଭୋଗେ, ପେତେ କାଲଙ୍କତେ ସତି ॥
ଡୟ୍ହମାନୋ ନ ଜାନାତି, ଞାତୀନଂ ପରିଦେୱିତଂ ।
ତସ୍ମା ଏତଂ ନ ସୋଚାମି, ଗତୋ ସୋ ତସ୍ସ ୟା ଗତି ॥
ଅନୱ୍ହିତୋ ତତୋ ଆଗା, ଅନନୁଞ୍ଞାତୋ [ନାନୁଞ୍ଞାତୋ (କ॰)] ଇତୋ ଗତୋ ।
ୟଥାଗତୋ ତଥା ଗତୋ, ତତ୍ଥ କା ପରିଦେୱନା ॥
ଡୟ୍ହମାନୋ ନ ଜାନାତି, ଞାତୀନଂ ପରିଦେୱିତଂ ।
ତସ୍ମା ଏତଂ ନ ସୋଚାମି, ଗତୋ ସୋ ତସ୍ସ ୟା ଗତି ॥
ସଚେ ରୋଦେ କିସା [କିସୀ (ପୀ॰)] ଅସ୍ସଂ, ତସ୍ସା ମେ କିଂ ଫଲଂ ସିୟା ।
ଞାତିମିତ୍ତସୁହଜ୍ଜାନଂ, ଭିୟ୍ୟୋ ନୋ ଅରତୀ ସିୟା ॥
ଡୟ୍ହମାନୋ ନ ଜାନାତି, ଞାତୀନଂ ପରିଦେୱିତଂ ।
ତସ୍ମା ଏତଂ ନ ସୋଚାମି, ଗତୋ ସୋ ତସ୍ସ ୟା ଗତି ॥
ୟଥାପି ଦାରକୋ ଚନ୍ଦଂ, ଗଚ୍ଛନ୍ତମନୁରୋଦତି ।
ଏୱଂ ସମ୍ପଦମେୱେତଂ, ୟୋ ପେତମନୁସୋଚତି ॥
ଡୟ୍ହମାନୋ ନ ଜାନାତି, ଞାତୀନଂ ପରିଦେୱିତଂ ।
ତସ୍ମା ଏତଂ ନ ସୋଚାମି, ଗତୋ ସୋ ତସ୍ସ ୟା ଗତି ॥
ୟଥାପି ଉଦକକୁମ୍ଭୋ, ଭିନ୍ନୋ ଅପ୍ପଟିସନ୍ଧିୟୋ ।
ଏୱଂ ସମ୍ପଦମେୱେତଂ, ୟୋ ପେତମନୁସୋଚତି ॥
ଡୟ୍ହମାନୋ ନ ଜାନାତି, ଞାତୀନଂ ପରିଦେୱିତଂ ।
ତସ୍ମା ଏତଂ ନ ସୋଚାମି, ଗତୋ ସୋ ତସ୍ସ ୟା ଗତୀତି ॥
ଉରଗଜାତକଂ ଚତୁତ୍ଥଂ ।
୩୫୫. ଘଟଜାତକଂ (୫-୧-୫)
ଅଞ୍ଞେ ସୋଚନ୍ତି ରୋଦନ୍ତି, ଅଞ୍ଞେ ଅସ୍ସୁମୁଖା ଜନା ।
ପସନ୍ନମୁଖୱଣ୍ଣୋସି, କସ୍ମା ଘଟ [ଘତ (ସୀ॰ ପୀ॰)] ନ ସୋଚସି ॥
ନାବ୍ଭତୀତହରୋ ସୋକୋ, ନାନାଗତସୁଖାୱହୋ ।
ତସ୍ମା ଧଙ୍କ [ୱଂକ (ପୀ॰)] ନ ସୋଚାମି, ନତ୍ଥି ସୋକେ ଦୁତୀୟତା [ସୋକୋ ଦୁତୀୟକା (କ॰)]॥
ସୋଚଂ ପଣ୍ଡୁ କିସୋ ହୋତି, ଭତ୍ତଞ୍ଚସ୍ସ ନ ରୁଚ୍ଚତି ।
ଅମିତ୍ତା ସୁମନା ହୋନ୍ତି, ସଲ୍ଲୱିଦ୍ଧସ୍ସ ରୁପ୍ପତୋ ॥
ଗାମେ ୱା ୟଦି ୱାରଞ୍ଞେ, ନିନ୍ନେ ୱା ୟଦି ୱା ଥଲେ ।
ଠିତଂ ମଂ ନାଗମିସ୍ସତି, ଏୱଂ ଦିଟ୍ଠପଦୋ ଅହଂ ॥
ୟସ୍ସତ୍ତା ନାଲମେକୋୱ, ସବ୍ବକାମରସାହରୋ ।
ସବ୍ବାପି ପଥୱୀ ତସ୍ସ, ନ ସୁଖଂ ଆୱହିସ୍ସତୀତି ॥
ଘଟଜାତକଂ ପଞ୍ଚମଂ ।
୩୫୬. କୋରଣ୍ଡିୟଜାତକଂ (୫-୧-୬)
ଏକୋ ଅରଞ୍ଞେ ଗିରିକନ୍ଦରାୟଂ, ପଗ୍ଗୟ୍ହ ପଗ୍ଗୟ୍ହ ସିଲଂ ପୱେଚ୍ଛସି [ପୱେଜ୍ଝସି (ସ୍ୟା॰ ସୀ॰ ଅଟ୍ଠ॰)]।
ପୁନପ୍ପୁନଂ ସନ୍ତରମାନରୂପୋ, କୋରଣ୍ଡିୟ [କାରଣ୍ଡିୟ (ସୀ॰ ସ୍ୟା॰ ପୀ॰)] କୋ ନୁ ତୱ ୟିଧତ୍ଥୋ ॥
ଅହଞ୍ହିମଂ ସାଗର ସେୱିତନ୍ତଂ, ସମଂ କରିସ୍ସାମି ୟଥାପି ପାଣି ।
ୱିକିରିୟ ସାନୂନି ଚ ପବ୍ବତାନି ଚ, ତସ୍ମା ସିଲଂ ଦରିୟା ପକ୍ଖିପାମି ॥
ନୟିମଂ ମହିଂ ଅରହତି ପାଣିକପ୍ପଂ, ସମଂ ମନୁସ୍ସୋ କରଣାୟ ମେକୋ ।
ମଞ୍ଞାମିମଞ୍ଞେୱ ଦରିଂ ଜିଗୀସଂ [ଜିଗିଂସଂ (ସୀ॰ ସ୍ୟା॰ ପୀ॰)], କୋରଣ୍ଡିୟ ହାହସି [ହାୟସି (ସ୍ୟା॰ କ॰)] ଜୀୱଲୋକଂ ॥
ସଚେ ଅହଂ [ଅୟଂ (ସୀ॰ ସ୍ୟା॰ ପୀ॰)] ଭୂତଧରଂ ନ ସକ୍କା [ସକ୍କୋ (ସ୍ୟା॰ କ॰)], ସମଂ ମନୁସ୍ସୋ କରଣାୟ ମେକୋ ।
ଏୱମେୱ ତ୍ୱଂ ବ୍ରହ୍ମେ ଇମେ ମନୁସ୍ସେ, ନାନାଦିଟ୍ଠିକେ ନାନୟିସ୍ସସି ତେ [ନେ (କ॰)]॥
ସଙ୍ଖିତ୍ତରୂପେନ ଭୱଂ ମମତ୍ଥଂ, ଅକ୍ଖାସି କୋରଣ୍ଡିୟ ଏୱମେତଂ ।
ୟଥା ନ ସକ୍କା ପଥୱୀ ସମାୟଂ, କତ୍ତୁଂ ମନୁସ୍ସେନ ତଥା ମନୁସ୍ସାତି ॥
କୋରଣ୍ଡିୟଜାତକଂ ଛଟ୍ଠଂ ।
୩୫୭. ଲଟୁକିକଜାତକଂ (୫-୧-୭)
ୱନ୍ଦାମି ତଂ କୁଞ୍ଜର ସଟ୍ଠିହାୟନଂ, ଆରଞ୍ଞକଂ ୟୂଥପତିଂ ୟସସ୍ସିଂ ।
ପକ୍ଖେହି ତଂ ପଞ୍ଜଲିକଂ କରୋମି, ମା ମେ ୱଧୀ ପୁତ୍ତକେ ଦୁବ୍ବଲାୟ ॥
ୱନ୍ଦାମି ତଂ କୁଞ୍ଜର ଏକଚାରିଂ, ଆରଞ୍ଞକଂ ପବ୍ବତସାନୁଗୋଚରଂ ।
ପକ୍ଖେହି ତଂ ପଞ୍ଜଲିକଂ କରୋମି, ମା ମେ ୱଧୀ ପୁତ୍ତକେ ଦୁବ୍ବଲାୟ ।
ୱମିସ୍ସାମି ତେ ଲଟୁକିକେ ପୁତ୍ତକାନି, କିଂ ମେ ତୁୱଂ କାହସି ଦୁବ୍ବଲାସି ।
ସତଂ ସହସ୍ସାନିପି ତାଦିସୀନଂ, ୱାମେନ ପାଦେନ ପପୋଥୟେୟ୍ୟଂ ॥
ନ ହେୱ ସବ୍ବତ୍ଥ ବଲେନ କିଚ୍ଚଂ, ବଲଞ୍ହି ବାଲସ୍ସ ୱଧାୟ ହୋତି ।
କରିସ୍ସାମି ତେ ନାଗରାଜା ଅନତ୍ଥଂ, ୟୋ ମେ ୱଧୀ ପୁତ୍ତକେ ଦୁବ୍ବଲାୟ ॥
କାକଞ୍ଚ ପସ୍ସ ଲଟୁକିକଂ, ମଣ୍ଡୂକଂ ନୀଲମକ୍ଖିକଂ ।
ଏତେ ନାଗଂ ଅଘାତେସୁଂ, ପସ୍ସ ୱେରସ୍ସ ୱେରିନଂ ।
ତସ୍ମା ହି ୱେରଂ ନ କୟିରାଥ, ଅପ୍ପିୟେନପି କେନଚୀତି ॥
ଲଟୁକିକଜାତକଂ ସତ୍ତମଂ ।
୩୫୮. ଚୂଳଧମ୍ମପାଲଜାତକଂ (୫-୧-୮)
ଅହମେୱ ଦୂସିୟା ଭୂନହତା, ରଞ୍ଞୋ ମହାପତାପସ୍ସ ।
ଏତଂ ମୁଞ୍ଚତୁ ଧମ୍ମପାଲଂ, ହତ୍ଥେ ମେ ଦେୱ ଛେଦେହି ॥
ଅହମେୱ ଦୂସିୟା ଭୂନହତା, ରଞ୍ଞୋ ମହାପତାପସ୍ସ ।
ଏତଂ ମୁଞ୍ଚତୁ ଧମ୍ମପାଲଂ, ପାଦେ ମେ ଦେୱ ଛେଦେହି ॥
ଅହମେୱ ଦୂସିୟା ଭୂନହତା, ରଞ୍ଞୋ ମହାପତାପସ୍ସ ।
ଏତଂ ମୁଞ୍ଚତୁ ଧମ୍ମପାଲଂ, ସୀସଂ ମେ ଦେୱ ଛେଦେହି ॥
ନ ହି [ନହ (ସୀ॰ ସ୍ୟା॰ ପୀ॰) ଏତ୍ଥ ହ-କାରୋ ଖେଦେ] ନୂନିମସ୍ସ ରଞ୍ଞୋ, ମିତ୍ତାମଚ୍ଚା ଚ ୱିଜ୍ଜରେ ସୁହଦା ।
ୟେ ନ ୱଦନ୍ତି ରାଜାନଂ, ମା ଘାତୟି ଓରସଂ ପୁତ୍ତଂ ॥
ନ ହି [ନହ (ସୀ॰ ସ୍ୟା॰ ପୀ॰) ଏତ୍ଥ ହ-କାରୋ ଖେଦେ] ନୂନିମସ୍ସ ରଞ୍ଞୋ, ଞାତୀ ମିତ୍ତା ଚ ୱିଜ୍ଜରେ ସୁହଦା ।
ୟେ ନ ୱଦନ୍ତି ରାଜାନଂ, ମା ଘାତୟି ଅତ୍ରଜଂ ପୁତ୍ତଂ ॥
ଚନ୍ଦନସାରାନୁଲିତ୍ତା, ବାହା ଛିଜ୍ଜନ୍ତି ଧମ୍ମପାଲସ୍ସ ।
ଦାୟାଦସ୍ସ ପଥବ୍ୟା, ପାଣା ମେ ଦେୱ ରୁଜ୍ଝନ୍ତୀତି ॥
ଚୂଳଧମ୍ମପାଲଜାତକଂ ଅଟ୍ଠମଂ ।
୩୫୯. ସୁୱଣ୍ଣମିଗଜାତକଂ (୫-୧-୯)
ୱିକ୍କମ ରେ ହରିପାଦ [ମହାମିଗ (ସୀ॰ ସ୍ୟା॰ ପୀ॰)], ୱିକ୍କମ ରେ ମହାମିଗ [ହରୀପଦ (ସୀ॰ ସ୍ୟା॰ ପୀ॰)]।
ଛିନ୍ଦ ୱାରତ୍ତିକଂ ପାସଂ, ନାହଂ ଏକା ୱନେ ରମେ ॥
ୱିକ୍କମାମି ନ ପାରେମି, ଭୂମିଂ ସୁମ୍ଭାମି ୱେଗସା ।
ଦଳ୍ହୋ ୱାରତ୍ତିକୋ ପାସୋ, ପାଦଂ ମେ ପରିକନ୍ତତି ॥
ଅତ୍ଥରସ୍ସୁ ପଲାସାନି, ଅସିଂ ନିବ୍ବାହ ଲୁଦ୍ଦକ ।
ପଠମଂ ମଂ ୱଧିତ୍ୱାନ, ହନ ପଚ୍ଛା ମହାମିଗଂ ॥
ନ ମେ ସୁତଂ ୱା ଦିଟ୍ଠଂ ୱା, ଭାସନ୍ତିଂ ମାନୁସିଂ ମିଗିଂ [ନ ମେ ସୁତା ୱା ଦିଟ୍ଠା ୱା, ଭାସନ୍ତୀ ମାନୁସିଂ ମିଗୀ (ଟୀକା)]।
ତ୍ୱଞ୍ଚ ଭଦ୍ଦେ ସୁଖୀ ହୋହି, ଏସୋ ଚାପି ମହାମିଗୋ ॥
ଏୱଂ ଲୁଦ୍ଦକ ନନ୍ଦସ୍ସୁ, ସହ ସବ୍ବେହି ଞାତିଭି ।
ୟଥାହମଜ୍ଜ ନନ୍ଦାମି, ମୁତ୍ତଂ ଦିସ୍ୱା ମହାମିଗନ୍ତି ॥
ସୁୱଣ୍ଣମିଗଜାତକଂ ନୱମଂ ।
୩୬୦. ସୁୟୋନନ୍ଦୀଜାତକଂ (୫-୧-୧୦)
ୱାତି ଗନ୍ଧୋ ତିମିରାନଂ, କୁସମୁଦ୍ଦୋ ଚ [ୱ (ସ୍ୟା॰ ପୀ॰)] ଘୋସୱା ।
ଦୂରେ ଇତୋ ସୁୟୋନନ୍ଦୀ [ଇତୋ ହି ସୁସନ୍ଦୀ (ସୀ॰ ସ୍ୟା॰), ଇତୋପି ସୁସ୍ସୋନ୍ଦୀ (ପୀ॰)], ତମ୍ବକାମା ତୁଦନ୍ତି ମଂ ॥
କଥଂ ସମୁଦ୍ଦମତରି, କଥଂ ଅଦ୍ଦକ୍ଖି ସେଦୁମଂ [ସେରୁମଂ (ସୀ॰ ସ୍ୟା॰ ପୀ॰)]।
କଥଂ ତସ୍ସା ଚ ତୁୟ୍ହଞ୍ଚ, ଅହୁ ସଗ୍ଗ [ଅଗ୍ଗ (ସୀ॰ ସ୍ୟା॰)] ସମାଗମୋ ॥
କୁରୁକଚ୍ଛା [ଭରୁକଚ୍ଛା (ସୀ॰ ସ୍ୟା॰ ପୀ॰)] ପୟାତାନଂ, ୱାଣିଜାନଂ ଧନେସିନଂ ।
ମକରେହି ଅଭିଦା [ମକରେହିବ୍ଭିଦା (ସୀ॰), ମକରେହି’ଭିଦା (ସ୍ୟା॰), ମକରେହି ଭିନ୍ନା (ପୀ॰)] ନାୱା, ଫଲକେନାହମପ୍ଲୱିଂ ॥
ସା ମଂ ସଣ୍ହେନ ମୁଦୁନା, ନିଚ୍ଚଂ ଚନ୍ଦନଗନ୍ଧିନୀ ।
ଅଙ୍ଗେନ [ଅଙ୍କେନ (ପୀ॰ କ॰)] ଉଦ୍ଧରୀ ଭଦ୍ଦା, ମାତା ପୁତ୍ତଂୱ ଓରସଂ ॥
ସା ମଂ ଅନ୍ନେନ ପାନେନ, ୱତ୍ଥେନ ସୟନେନ ଚ ।
ଅତ୍ତନାପି ଚ ମନ୍ଦକ୍ଖୀ, ଏୱଂ ତମ୍ବ ୱିଜାନାହୀତି ॥
ସୁୟୋନନ୍ଦୀଜାତକଂ ଦସମଂ ।
ମଣିକୁଣ୍ଡଲୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ଅଥ ଜିନୱରୋ ହରିତଂ ତିଣକୋ, ଅଥ ଭିନ୍ନପ୍ଲୱୋ ଉରଗୋୱ ଘଟୋ ।
ଦରିୟା ପୁନ କୁଞ୍ଜର ଭୂନହତା, ମିଗମୁତ୍ତମସଗ୍ଗୱରେନ ଦସାତି ॥
୨. ୱଣ୍ଣାରୋହୱଗ୍ଗୋ
୩୬୧. ୱଣ୍ଣାରୋହଜାତକଂ (୫-୨-୧)
ୱଣ୍ଣାରୋହେନ ଜାତିୟା, ବଲନିକ୍କମନେନ ଚ ।
ସୁବାହୁ ନ ମୟା ସେୟ୍ୟୋ, ସୁଦାଠ ଇତି ଭାସସି ॥
ୱଣ୍ଣାରୋହେନ ଜାତିୟା, ବଲନିକ୍କମନେନ ଚ ।
ସୁଦାଠୋ ନ ମୟା ସେୟ୍ୟୋ, ସୁବାହୁ ଇତି ଭାସସି ॥
ଏୱଂ ଚେ ମଂ ୱିହରନ୍ତଂ, ସୁବାହୁ ସମ୍ମ ଦୁବ୍ଭସି ।
ନ ଦାନାହଂ ତୟା ସଦ୍ଧିଂ, ସଂୱାସମଭିରୋଚୟେ ॥
ୟୋ ପରେସଂ ୱଚନାନି, ସଦ୍ଦହେୟ୍ୟ [ସଦ୍ଦହେଥ (ସୀ॰ ସ୍ୟା॰ ପୀ॰)] ୟଥାତଥଂ ।
ଖିପ୍ପଂ ଭିଜ୍ଜେଥ ମିତ୍ତସ୍ମିଂ, ୱେରଞ୍ଚ ପସୱେ ବହୁଂ ॥
ନ ସୋ ମିତ୍ତୋ ୟୋ ସଦା ଅପ୍ପମତ୍ତୋ, ଭେଦାସଙ୍କୀ ରନ୍ଧମେୱାନୁପସ୍ସୀ ।
ୟସ୍ମିଞ୍ଚ ସେତୀ ଉରସୀୱ ପୁତ୍ତୋ, ସ ୱେ ମିତ୍ତୋ ୟୋ ଅଭେଜ୍ଜୋ ପରେହୀତି ॥
ୱଣ୍ଣାରୋହଜାତକଂ ପଠମଂ ।
୩୬୨. ସୀଲୱୀମଂସଜାତକଂ (୫-୨-୨)
ସୀଲଂ ସେୟ୍ୟୋ ସୁତଂ ସେୟ୍ୟୋ, ଇତି ମେ ସଂସୟୋ ଅହୁ ।
ସୀଲମେୱ ସୁତା ସେୟ୍ୟୋ, ଇତି ମେ ନତ୍ଥି ସଂସୟୋ ॥
ମୋଘା ଜାତି ଚ ୱଣ୍ଣୋ ଚ, ସୀଲମେୱ କିରୁତ୍ତମଂ ।
ସୀଲେନ ଅନୁପେତସ୍ସ, ସୁତେନତ୍ଥୋ ନ ୱିଜ୍ଜତି ॥
ଖତ୍ତିୟୋ ଚ ଅଧମ୍ମଟ୍ଠୋ, ୱେସ୍ସୋ ଚାଧମ୍ମନିସ୍ସିତୋ ।
ତେ ପରିଚ୍ଚଜ୍ଜୁଭୋ ଲୋକେ, ଉପପଜ୍ଜନ୍ତି ଦୁଗ୍ଗତିଂ ॥
ଖତ୍ତିୟା ବ୍ରାହ୍ମଣା ୱେସ୍ସା, ସୁଦ୍ଦା ଚଣ୍ଡାଲପୁକ୍କୁସା ।
ଇଧ ଧମ୍ମଂ ଚରିତ୍ୱାନ, ଭୱନ୍ତି ତିଦିୱେ ସମା ॥
ନ ୱେଦା ସମ୍ପରାୟାୟ, ନ ଜାତି ନାପି [ନୋପି (ପୀ॰)] ବନ୍ଧୱା ।
ସକଞ୍ଚ ସୀଲଂ ସଂସୁଦ୍ଧଂ, ସମ୍ପରାୟାୟ ସୁଖାୟ ଚାତି [ସୁଖାୱହନ୍ତି (ସୀ॰ ସ୍ୟା॰)]॥
ସୀଲୱୀମଂସଜାତକଂ ଦୁତିୟଂ ।
୩୬୩. ହିରିଜାତକଂ (୫-୨-୩)
ହିରିଂ ତରନ୍ତଂ ୱିଜିଗୁଚ୍ଛମାନଂ, ତୱାହମସ୍ମୀ ଇତି ଭାସମାନଂ ।
ସେୟ୍ୟାନି କମ୍ମାନି ଅନାଦିୟନ୍ତଂ, ନେସୋ ମମନ୍ତି ଇତି ନଂ ୱିଜଞ୍ଞା ॥
ୟଞ୍ହି କୟିରା ତଞ୍ହି ୱଦେ, ୟଂ ନ କୟିରା ନ ତଂ ୱଦେ ।
ଅକରୋନ୍ତଂ ଭାସମାନଂ, ପରିଜାନନ୍ତି ପଣ୍ଡିତା ॥
ନ ସୋ ମିତ୍ତୋ ୟୋ ସଦା ଅପ୍ପମତ୍ତୋ, ଭେଦାସଙ୍କୀ ରନ୍ଧମେୱାନୁପସ୍ସୀ ।
ୟସ୍ମିଞ୍ଚ ସେତୀ ଉରସୀୱ ପୁତ୍ତୋ, ସ ୱେ ମିତ୍ତୋ ୟୋ ଅଭେଜ୍ଜୋ ପରେହି ॥
ପାମୋଜ୍ଜକରଣଂ ଠାନଂ, ପସଂସାୱହନଂ ସୁଖଂ ।
ଫଲାନିସଂସୋ ଭାୱେତି, ୱହନ୍ତୋ ପୋରିସଂ ଧୁରଂ ॥
ପୱିୱେକରସଂ ପିତ୍ୱା, ରସଂ ଉପସମସ୍ସ ଚ ।
ନିଦ୍ଦରୋ ହୋତି ନିପ୍ପାପୋ, ଧମ୍ମପ୍ପୀତିରସଂ ପିୱନ୍ତି ॥
ହିରିଜାତକଂ ତତିୟଂ ।
୩୬୪. ଖଜ୍ଜୋପନକଜାତକଂ (୫-୨-୪)
କୋ ନୁ ସନ୍ତମ୍ହି ପଜ୍ଜୋତେ, ଅଗ୍ଗିପରିୟେସନଂ ଚରଂ ।
ଅଦ୍ଦକ୍ଖି ରତ୍ତି [ରତ୍ତିଂ (ସ୍ୟା॰)] ଖଜ୍ଜୋତଂ, ଜାତୱେଦଂ ଅମଞ୍ଞଥ ॥
ସ୍ୱସ୍ସ ଗୋମୟଚୁଣ୍ଣାନି, ଅଭିମତ୍ଥଂ ତିଣାନି ଚ ।
ୱିପରୀତାୟ ସଞ୍ଞାୟ, ନାସକ୍ଖି ପଜ୍ଜଲେତୱେ ॥
ଏୱମ୍ପି ଅନୁପାୟେନ, ଅତ୍ଥଂ ନ ଲଭତେ ମିଗୋ [ମୂଗୋ (ସ୍ୟା॰)]।
ୱିସାଣତୋ ଗୱଂ ଦୋହଂ, ୟତ୍ଥ ଖୀରଂ ନ ୱିନ୍ଦତି ॥
ୱିୱିଧେହି ଉପାୟେହି, ଅତ୍ଥଂ ପପ୍ପୋନ୍ତି ମାଣୱା ।
ନିଗ୍ଗହେନ ଅମିତ୍ତାନଂ, ମିତ୍ତାନଂ ପଗ୍ଗହେନ ଚ ॥
ସେନାମୋକ୍ଖପଲାଭେନ [ସେନୀ ମୋକ୍ଖୂପଲାଭେନ (ସ୍ୟା॰)], ୱଲ୍ଲଭାନଂ ନୟେନ ଚ ।
ଜଗତିଂ ଜଗତିପାଲା, ଆୱସନ୍ତି ୱସୁନ୍ଧରନ୍ତି ॥
ଖଜ୍ଜୋପନକଜାତକଂ ଚତୁତ୍ଥଂ ।
୩୬୫. ଅହିତୁଣ୍ଡିକଜାତକଂ (୫-୨-୫)
ଧୁତ୍ତୋମ୍ହି ସମ୍ମ ସୁମୁଖ, ଜୂତେ ଅକ୍ଖପରାଜିତୋ ।
ହରେହି [ସେୱେହି (ପୀ॰)] ଅମ୍ବପକ୍କାନି, ୱୀରିୟଂ ତେ ଭକ୍ଖୟାମସେ ॥
ଅଲିକଂ ୱତ ମଂ ସମ୍ମ, ଅଭୂତେନ ପସଂସସି ।
କୋ ତେ ସୁତୋ ୱା ଦିଟ୍ଠୋ ୱା, ସୁମୁଖୋ ନାମ ମକ୍କଟୋ ॥
ଅଜ୍ଜାପି ମେ ତଂ ମନସି [ତେ ମଂ ସରସି (କ॰)], ୟଂ ମଂ ତ୍ୱଂ ଅହିତୁଣ୍ଡିକ ।
ଧଞ୍ଞାପଣଂ ପୱିସିତ୍ୱା, ମତ୍ତୋ [ମୁତ୍ତୋ (କ॰)] ଛାତଂ ହନାସି ମଂ ॥
ତାହଂ ସରଂ ଦୁକ୍ଖସେୟ୍ୟଂ, ଅପି ରଜ୍ଜମ୍ପି କାରୟେ ।
ନେୱାହଂ ୟାଚିତୋ ଦଜ୍ଜଂ, ତଥା ହି ଭୟତଜ୍ଜିତୋ ॥
ୟଞ୍ଚ ଜଞ୍ଞା କୁଲେ ଜାତଂ, ଗବ୍ଭେ ତିତ୍ତଂ ଅମଚ୍ଛରିଂ ।
ତେନ ସଖିଞ୍ଚ ମିତ୍ତଞ୍ଚ, ଧୀରୋ ସନ୍ଧାତୁମରହତୀତି ॥
ଅହିତୁଣ୍ଡିକଜାତକଂ ପଞ୍ଚମଂ ।
୩୬୬. ଗୁମ୍ବିୟଜାତକଂ (୫-୨-୬)
ମଧୁୱଣ୍ଣଂ ମଧୁରସଂ, ମଧୁଗନ୍ଧଂ ୱିସଂ ଅହୁ ।
ଗୁମ୍ବିୟୋ ଘାସମେସାନୋ, ଅରଞ୍ଞେ ଓଦହୀ ୱିସଂ ॥
ମଧୁ ଇତି ମଞ୍ଞମାନା [ମଧୂତି ମଞ୍ଞମାନାୟ (କ॰)], ୟେ ତଂ ୱିସମଖାଦିସୁଂ [ୱିସମସାୟିସୁଂ (ସୀ॰ ସ୍ୟା॰)]।
ତେସଂ ତଂ କଟୁକଂ ଆସି, ମରଣଂ ତେନୁପାଗମୁଂ ॥
ୟେ ଚ ଖୋ ପଟିସଙ୍ଖାୟ, ୱିସଂ ତଂ ପରିୱଜ୍ଜୟୁଂ ।
ତେ ଆତୁରେସୁ ସୁଖିତା, ଡୟ୍ହମାନେସୁ ନିବ୍ବୁତା ॥
ଏୱମେୱ ମନୁସ୍ସେସୁ, ୱିସଂ କାମା ସମୋହିତା ।
ଆମିସଂ ବନ୍ଧନଞ୍ଚେତଂ, ମଚ୍ଚୁୱେସୋ [ପଚ୍ଚୁୱସୋ (ସୀ॰ ସ୍ୟା॰)] ଗୁହାସୟୋ ॥
ଏୱମେୱ ଇମେ କାମେ, ଆତୁରା ପରିଚାରିକେ [ପରିଚାରକେ (କ॰)]।
ୟେ ସଦା ପରିୱଜ୍ଜେନ୍ତି, ସଙ୍ଗଂ ଲୋକେ ଉପଚ୍ଚଗୁନ୍ତି ॥
ଗୁମ୍ବିୟଜାତକଂ ଛଟ୍ଠଂ ।
୩୬୭. ସାଳିୟଜାତକଂ (୫-୨-୭)
ୟ୍ୱାୟଂ ସାଳିୟ [ସାଲିୟ (ସୀ॰ ସ୍ୟା॰ ପୀ॰), ସାଳିକ ( ?)] ଛାପୋତି, କଣ୍ହସପ୍ପଂ ଅଗାହୟି ।
ତେନ ସପ୍ପେନୟଂ ଦଟ୍ଠୋ, ହତୋ ପାପାନୁସାସକୋ ॥
ଅହନ୍ତାର [ଅହନନ୍ତ (ପୀ॰), ଅହରନ୍ତ ( ?)] ମହନ୍ତାରଂ, ୟୋ ନରୋ ହନ୍ତୁମିଚ୍ଛତି ।
ଏୱଂ ସୋ ନିହତୋ ସେତି, ୟଥାୟଂ ପୁରିସୋ ହତୋ ॥
ଅହନ୍ତାର [ଅହନନ୍ତ (ସୀ॰ ସ୍ୟା॰ ପୀ॰), ଅହରନ୍ତ ( ?)] ମଘାତେନ୍ତଂ, ୟୋ ନରୋ ହନ୍ତୁମିଚ୍ଛତି ।
ଏୱଂ ସୋ ନିହତୋ ସେତି, ୟଥାୟଂ ପୁରିସୋ ହତୋ ॥
ୟଥା ପଂସୁମୁଟ୍ଠିଂ ପୁରିସୋ, ପଟିୱାତଂ ପଟିକ୍ଖିପେ ।
ତମେୱ ସୋ ରଜୋ ହନ୍ତି, ତଥାୟଂ ପୁରିସୋ ହତୋ ॥
ୟୋ ଅପ୍ପଦୁଟ୍ଠସ୍ସ ନରସ୍ସ ଦୁସ୍ସତି, ସୁଦ୍ଧସ୍ସ ପୋସସ୍ସ ଅନଙ୍ଗଣସ୍ସ ।
ତମେୱ ବାଲଂ ପଚ୍ଚେତି ପାପଂ, ସୁଖୁମୋ ରଜୋ ପଟିୱାତଂୱ ଖିତ୍ତୋତି ॥
ସାଳିୟଜାତକଂ ସତ୍ତମଂ ।
୩୬୮. ତଚସାରଜାତକଂ (୫-୨-୮)
ଅମିତ୍ତହତ୍ଥତ୍ଥଗତା [ହତ୍ଥତ୍ତଗତା (କତ୍ଥଚି, ସୀ॰ ନିୟ୍ୟ)], ତଚସାରସମପ୍ପିତା ।
ପସନ୍ନମୁଖୱଣ୍ଣାତ୍ଥ, କସ୍ମା ତୁମ୍ହେ ନ ସୋଚଥ ॥
ନ ସୋଚନାୟ ପରିଦେୱନାୟ, ଅତ୍ଥୋୱ ଲବ୍ଭୋ [ଅତ୍ଥୋ ଚ ଲବ୍ଭା (ସୀ॰ ସ୍ୟା॰), ଅତ୍ଥୋଧ ଲବ୍ଭା (ଅ॰ ନି॰ ୫.୪୮)] ଅପି ଅପ୍ପକୋପି ।
ସୋଚନ୍ତମେନଂ ଦୁଖିତଂ ୱିଦିତ୍ୱା, ପଚ୍ଚତ୍ଥିକା ଅତ୍ତମନା ଭୱନ୍ତି ॥
ୟତୋ ଚ ଖୋ ପଣ୍ଡିତୋ ଆପଦାସୁ, ନ ୱେଧତୀ ଅତ୍ଥୱିନିଚ୍ଛୟଞ୍ଞୂ ।
ପଚ୍ଚତ୍ଥିକାସ୍ସ [ପଚ୍ଚତ୍ଥିକା ତେ (କ॰)] ଦୁଖିତା ଭୱନ୍ତି, ଦିସ୍ୱା ମୁଖଂ ଅୱିକାରଂ ପୁରାଣଂ ॥
ଜପ୍ପେନ ମନ୍ତେନ ସୁଭାସିତେନ, ଅନୁପ୍ପଦାନେନ ପୱେଣିୟା ୱା ।
ୟଥା ୟଥା ୟତ୍ଥ ଲଭେଥ ଅତ୍ଥଂ, ତଥା ତଥା ତତ୍ଥ ପରକ୍କମେୟ୍ୟ ॥
ୟତୋ ଚ ଜାନେୟ୍ୟ ଅଲବ୍ଭନେୟ୍ୟୋ, ମୟା ୱ [ମୟା ୱା (ସ୍ୟା॰ କ॰)] ଅଞ୍ଞେନ ୱା ଏସ ଅତ୍ଥୋ ।
ଅସୋଚମାନୋ ଅଧିୱାସୟେୟ୍ୟ, କମ୍ମଂ ଦଳ୍ହଂ କିନ୍ତି କରୋମି ଦାନୀତି ॥
ତଚସାରଜାତକଂ ଅଟ୍ଠମଂ ।
୩୬୯. ମିତ୍ତୱିନ୍ଦକଜାତକଂ (୫-୨-୯)
କ୍ୟାହଂ ଦେୱାନମକରଂ, କିଂ ପାପଂ ପକତଂ ମୟା ।
ୟଂ ମେ ସିରସ୍ମିଂ ଓହଚ୍ଚ [ଉହଚ୍ଚ (କ॰), ଉହଚ୍ଚ (ପୀ॰)], ଚକ୍କଂ ଭମତି ମତ୍ଥକେ ॥
ଅତିକ୍କମ୍ମ ରମଣକଂ, ସଦାମତ୍ତଞ୍ଚ ଦୂଭକଂ ।
ବ୍ରହ୍ମତ୍ତରଞ୍ଚ ପାସାଦଂ, କେନତ୍ଥେନ ଇଧାଗତୋ ॥
ଇତୋ ବହୁତରା ଭୋଗା, ଅତ୍ର ମଞ୍ଞେ ଭୱିସ୍ସରେ ।
ଇତି ଏତାୟ ସଞ୍ଞାୟ, ପସ୍ସ ମଂ ବ୍ୟସନଂ ଗତଂ ॥
ଚତୁବ୍ଭି ଅଟ୍ଠଜ୍ଝଗମା, ଅଟ୍ଠାହିପି ଚ [ଅଟ୍ଠାହି ଚାପି (ସୀ॰ ସ୍ୟା॰), ଅଟ୍ଠାଭି ଚାପି (କ॰)] ସୋଳସ ।
ସୋଳସାହି ଚ ବାତ୍ତିଂସ, ଅତ୍ରିଚ୍ଛଂ ଚକ୍କମାସଦୋ ।
ଇଚ୍ଛାହତସ୍ସ ପୋସସ୍ସ, ଚକ୍କଂ ଭମତି ମତ୍ଥକେ ॥
ଉପରିୱିସାଲା ଦୁପ୍ପୂରା, ଇଚ୍ଛା ୱିସଟଗାମିନୀ [ଉପରି ୱିସାଲଂ ଦୁପ୍ପୂରଂ, ଇଚ୍ଛାୱିସଦଗାମିନୀ (ସୀ॰)]।
ୟେ ଚ ତଂ ଅନୁଗିଜ୍ଝନ୍ତି, ତେ ହୋନ୍ତି ଚକ୍କଧାରିନୋତି ॥
ମିତ୍ତୱିନ୍ଦକଜାତକଂ ନୱମଂ ।
୩୭୦. ପଲାସଜାତକଂ (୫-୨-୧୦)
ହଂସୋ ପଲାସମୱଚ, ନିଗ୍ରୋଧୋ ସମ୍ମ ଜାୟତି ।
ଅଙ୍କସ୍ମିଂ [ଅଙ୍ଗସ୍ମିଂ (କ॰)] ତେ ନିସିନ୍ନୋୱ, ସୋ ତେ ମମ୍ମାନି ଛେଚ୍ଛତି [ଛିଜ୍ଜତି (କ॰)]॥
ୱଡ୍ଢତାମେୱ [ୱଦ୍ଧିତମେୱ (କ॰)] ନିଗ୍ରୋଧୋ, ପତିଟ୍ଠସ୍ସ ଭୱାମହଂ ।
ୟଥା ପିତା ଚ ମାତା ଚ [ପିତା ୱା ମାତା ୱା (ପୀ॰), ମାତା ୱା ପିତା ୱା (କ॰)], ଏୱଂ ମେ ସୋ ଭୱିସ୍ସତି ॥
ୟଂ ତ୍ୱଂ ଅଙ୍କସ୍ମିଂ ୱଡ୍ଢେସି, ଖୀରରୁକ୍ଖଂ ଭୟାନକଂ ।
ଆମନ୍ତ ଖୋ ତଂ ଗଚ୍ଛାମ, ୱୁଡ୍ଢି ମସ୍ସ ନ ରୁଚ୍ଚତି ॥
ଇଦାନି ଖୋ ମଂ ଭାୟେତି, ମହାନେରୁନିଦସ୍ସନଂ ।
ହଂସସ୍ସ ଅନଭିଞ୍ଞାୟ, ମହା ମେ ଭୟମାଗତଂ ॥
ନ ତସ୍ସ ୱୁଡ୍ଢି କୁସଲପ୍ପସତ୍ଥା, ୟୋ ୱଡ୍ଢମାନୋ ଘସତେ ପତିଟ୍ଠଂ ।
ତସ୍ସୂପରୋଧଂ ପରିସଙ୍କମାନୋ, ପତାରୟୀ ମୂଲୱଧାୟ ଧୀରୋତି ॥
ପଲାସଜାତକଂ ଦସମଂ ।
ୱଣ୍ଣାରୋହୱଗ୍ଗୋ ଦୁତିୟୋ [ଇମସ୍ସୁଦ୍ଦାନଂ ତତିୟୱଗ୍ଗପରିୟୋସାନେ ଭୱିସ୍ସତି]।
୩. ଅଡ୍ଢୱଗ୍ଗୋ
୩୭୧. ଦୀଘୀତିକୋସଲଜାତକଂ (୫-୩-୧)
ଏୱଂଭୂତସ୍ସ ତେ ରାଜ, ଆଗତସ୍ସ ୱସେ [ୱସୋ (ପୀ॰ କ॰)] ମମ ।
ଅତ୍ଥି ନୁ କୋଚି ପରିୟାୟୋ, ୟୋ ତଂ ଦୁକ୍ଖା ପମୋଚୟେ ॥
ଏୱଂଭୂତସ୍ସ ମେ ତାତ, ଆଗତସ୍ସ ୱସେ ତୱ ।
ନତ୍ଥି ନୋ କୋଚି ପରିୟାୟୋ, ୟୋ ମଂ ଦୁକ୍ଖା ପମୋଚୟେ ॥
ନାଞ୍ଞଂ ସୁଚରିତଂ ରାଜ, ନାଞ୍ଞଂ ରାଜ ସୁଭାସିତଂ ।
ତାୟତେ ମରଣକାଲେ, ଏୱମେୱିତରଂ ଧନଂ ॥
ଅକ୍କୋଚ୍ଛି ମଂ ଅୱଧି ମଂ, ଅଜିନି ମଂ ଅହାସି ମେ ।
ୟେ ଚ ତଂ ଉପନୟ୍ହନ୍ତି, ୱେରଂ ତେସଂ ନ ସମ୍ମତି ॥
ଅକ୍କୋଚ୍ଛି ମଂ ଅୱଧି ମଂ, ଅଜିନି ମଂ ଅହାସି ମେ ।
ୟେ ଚ ତଂ ନୁପନୟ୍ହନ୍ତି, ୱେରଂ ତେସୂପସମ୍ମତି ॥
ନ ହି ୱେରେନ ୱେରାନି, ସମ୍ମନ୍ତୀଧ କୁଦାଚନଂ ।
ଅୱେରେନ ଚ ସମ୍ମନ୍ତି, ଏସ ଧମ୍ମୋ ସନନ୍ତନୋତି ॥
ଦୀଘୀତିକୋସଲଜାତକଂ ପଠମଂ ।
୩୭୨. ମିଗପୋତକଜାତକଂ (୫-୩-୨)
ଅଗାରା ପଚ୍ଚୁପେତସ୍ସ, ଅନଗାରସ୍ସ ତେ ସତୋ ।
ସମଣସ୍ସ ନ ତଂ ସାଧୁ, ୟଂ ପେତମନୁସୋଚସି ॥
ସଂୱାସେନ ହୱେ ସକ୍କ, ମନୁସ୍ସସ୍ସ ମିଗସ୍ସ ୱା ।
ହଦୟେ ଜାୟତେ ପେମଂ, ନ ତଂ ସକ୍କା ଅସୋଚିତୁଂ ॥
ମତଂ ମରିସ୍ସଂ ରୋଦନ୍ତି, ୟେ ରୁଦନ୍ତି ଲପନ୍ତି ଚ ।
ତସ୍ମା ତ୍ୱଂ ଇସି ମା ରୋଦି, ରୋଦିତଂ ମୋଘମାହୁ ସନ୍ତୋ ॥
ରୋଦିତେନ ହୱେ ବ୍ରହ୍ମେ, ମତୋ ପେତୋ ସମୁଟ୍ଠହେ ।
ସବ୍ବେ ସଙ୍ଗମ୍ମ ରୋଦାମ, ଅଞ୍ଞମଞ୍ଞସ୍ସ ଞାତକେ ॥
ଆଦିତ୍ତଂ ୱତ ମଂ ସନ୍ତଂ, ଘତସିତ୍ତଂୱ ପାୱକଂ ।
ୱାରିନା ୱିୟ ଓସିଞ୍ଚଂ, ସବ୍ବଂ ନିବ୍ବାପୟେ ଦରଂ ॥
ଅବ୍ବହି ୱତ ମେ ସଲ୍ଲଂ, ୟମାସି ହଦୟସ୍ସିତଂ ।
ୟୋ ମେ ସୋକପରେତସ୍ସ, ପୁତ୍ତସୋକଂ ଅପାନୁଦି ॥
ସୋହଂ ଅବ୍ବୂଳ୍ହସଲ୍ଲୋସ୍ମି, ୱୀତସୋକୋ ଅନାୱିଲୋ ।
ନ ସୋଚାମି ନ ରୋଦାମି, ତୱ ସୁତ୍ୱାନ ୱାସୱାତି ॥
ମିଗପୋତକଜାତକଂ ଦୁତିୟଂ ।
୩୭୩. ମୂସିକଜାତକଂ (୫-୩-୩)
କୁହିଂ ଗତା କତ୍ଥ ଗତା, ଇତି ଲାଲପ୍ପତୀ ଜନୋ ।
ଅହମେୱେକୋ ଜାନାମି, ଉଦପାନେ ମୂସିକା ହତା ॥
ୟଞ୍ଚେତଂ [ୟଥେତଂ (ପୀ॰), ୟୱେତଂ (କ॰), ୟମେତଂ (କତ୍ଥଚି)] ଇତି ଚୀତି ଚ, ଗଦ୍ରଭୋୱ ନିୱତ୍ତସି ।
ଉଦପାନେ ମୂସିକଂ ହନ୍ତ୍ୱା, ୟୱଂ ଭକ୍ଖେତୁମିଚ୍ଛସି ॥
ଦହରୋ ଚାସି ଦୁମ୍ମେଧ, ପଠମୁପ୍ପତ୍ତିକୋ [ପଠମୁପ୍ପତ୍ତିତୋ (ସୀ॰ ପୀ॰)] ସୁସୁ ।
ଦୀଘଞ୍ଚେତଂ [ଦୀଘମେତଂ (ପୀ॰)] ସମାସଜ୍ଜ [ସମାପଜ୍ଜ (ସ୍ୟା॰ କ॰)], ନ ତେ ଦସ୍ସାମି ଜୀୱିତଂ ॥
ନାନ୍ତଲିକ୍ଖଭୱନେନ, ନାଙ୍ଗପୁତ୍ତପିନେନ [ନାଙ୍ଗପୁତ୍ତସିରେନ (ସୀ॰ ସ୍ୟା॰ ପୀ॰)] ୱା ।
ପୁତ୍ତେନ ହି ପତ୍ଥୟିତୋ, ସିଲୋକେହି ପମୋଚିତୋ ॥
ସବ୍ବଂ ସୁତମଧୀୟେଥ, ହୀନମୁକ୍କଟ୍ଠମଜ୍ଝିମଂ ।
ସବ୍ବସ୍ସ ଅତ୍ଥଂ ଜାନେୟ୍ୟ, ନ ଚ ସବ୍ବଂ ପୟୋଜୟେ ।
ହୋତି ତାଦିସକୋ କାଲୋ, ୟତ୍ଥ ଅତ୍ଥାୱହଂ ସୁତନ୍ତି ॥
ମୂସିକଜାତକଂ ତତିୟଂ ।
୩୭୪. ଚୂଳଧନୁଗ୍ଗହଜାତକଂ (୫-୩-୪)
ସବ୍ବଂ ଭଣ୍ଡଂ ସମାଦାୟ, ପାରଂ ତିଣ୍ଣୋସି ବ୍ରାହ୍ମଣ ।
ପଚ୍ଚାଗଚ୍ଛ ଲହୁଂ ଖିପ୍ପଂ, ମମ୍ପି ତାରେହି ଦାନିତୋ [ଦାନିଭୋ (ସ୍ୟା॰)]॥
ଅସନ୍ଥୁତଂ ମଂ ଚିରସନ୍ଥୁତେନ, ନିମୀନି ଭୋତୀ ଅଦ୍ଧୁୱଂ ଧୁୱେନ ।
ମୟାପି ଭୋତୀ ନିମିନେୟ୍ୟ ଅଞ୍ଞଂ, ଇତୋ ଅହଂ ଦୂରତରଂ ଗମିସ୍ସଂ ॥
କାୟଂ ଏଳଗଲାଗୁମ୍ବେ [ଏଳଗଣଗୁମ୍ବେ (କ॰)], କରୋତି ଅହୁହାସିୟଂ ।
ନୟୀଧ ନଚ୍ଚଗୀତଂ ୱା [ନୟିଧ ନଚ୍ଚଂ ୱା ଗୀତଂ ୱା (ସୀ॰ ସ୍ୟା॰ ପୀ॰)], ତାଳଂ ୱା ସୁସମାହିତଂ ।
ଅନମ୍ହିକାଲେ [ଅନମ୍ହକାଲେ (ପୀ॰)] ସୁସୋଣି [ସୁସ୍ସୋଣି (ସୀ॰ ସ୍ୟା॰ ପୀ॰)], କିଂ ନୁ ଜଗ୍ଘସି ସୋଭନେ [ସୋଭଣେ (ପୀ॰ କ॰)]॥
ସିଙ୍ଗାଲ ବାଲ ଦୁମ୍ମେଧ, ଅପ୍ପପଞ୍ଞୋସି ଜମ୍ବୁକ ।
ଜୀନୋ ମଚ୍ଛଞ୍ଚ ପେସିଞ୍ଚ, କପଣୋ ୱିୟ ଝାୟସି ॥
ସୁଦସ୍ସଂ ୱଜ୍ଜମଞ୍ଞେସଂ, ଅତ୍ତନୋ ପନ ଦୁଦ୍ଦସଂ ।
ଜୀନା ପତିଞ୍ଚ ଜାରଞ୍ଚ, ମଞ୍ଞେ ତ୍ୱଞ୍ଞେୱ [ମମ୍ପି ତ୍ୱଞ୍ଞେୱ (ସୀ॰ ସ୍ୟା॰), ତ୍ୱମ୍ପି ମଞ୍ଞେୱ (ପୀ॰)] ଝାୟସି ॥
ଏୱମେତଂ ମିଗରାଜ, ୟଥା ଭାସସି ଜମ୍ବୁକ ।
ସା ନୂନାହଂ ଇତୋ ଗନ୍ତ୍ୱା, ଭତ୍ତୁ ହେସ୍ସଂ ୱସାନୁଗା ॥
ୟୋ ହରେ ମତ୍ତିକଂ ଥାଲଂ, କଂସଥାଲମ୍ପି ସୋ ହରେ ।
କତଞ୍ଚେୱ [କତଂୟେୱ (ସୀ॰ ସ୍ୟା॰ ପୀ॰)] ତୟା ପାପଂ, ପୁନପେୱଂ କରିସ୍ସସୀତି ॥
ଚୂଳଧନୁଗ୍ଗହଜାତକଂ ଚତୁତ୍ଥଂ ।
୩୭୫. କପୋତଜାତକଂ (୫-୩-୫)
ଇଦାନି ଖୋମ୍ହି ସୁଖିତୋ ଅରୋଗୋ, ନିକ୍କଣ୍ଟକୋ ନିପ୍ପତିତୋ କପୋତୋ ।
କାହାମି ଦାନୀ ହଦୟସ୍ସ ତୁଟ୍ଠିଂ, ତଥାହିମଂ ମଂସସାକଂ ବଲେତି ॥
କାୟଂ ବଲାକା ସିଖିନୋ, ଚୋରୀ ଲଙ୍ଘିପିତାମହା ।
ଓରଂ ବଲାକେ ଆଗଚ୍ଛ, ଚଣ୍ଡୋ ମେ ୱାୟସୋ ସଖା ॥
ଅଲଞ୍ହି ତେ ଜଗ୍ଘିତାୟେ, ମମଂ ଦିସ୍ୱାନ ଏଦିସଂ ।
ୱିଲୂନଂ ସୂଦପୁତ୍ତେନ, ପିଟ୍ଠମଣ୍ଡେନ [ପିଟ୍ଠମଦ୍ଦେନ (ସୀ॰ ସ୍ୟା॰ ପୀ॰)] ମକ୍ଖିତଂ ॥
ସୁନ୍ହାତୋ ସୁୱିଲିତ୍ତୋସି, ଅନ୍ନପାନେନ ତପ୍ପିତୋ ।
କଣ୍ଠେ ଚ ତେ ୱେଳୁରିୟୋ, ଅଗମା ନୁ କଜଙ୍ଗଲଂ ॥
ମା ତେ ମିତ୍ତୋ ଅମିତ୍ତୋ ୱା, ଅଗମାସି କଜଙ୍ଗଲଂ ।
ପିଞ୍ଛାନି ତତ୍ଥ ଲାୟିତ୍ୱା, କଣ୍ଠେ ବନ୍ଧନ୍ତି ୱଟ୍ଟନଂ ॥
ପୁନପାପଜ୍ଜସୀ ସମ୍ମ, ସୀଲଞ୍ହି ତୱ ତାଦିସଂ ।
ନ ହି ମାନୁସକା ଭୋଗା, ସୁଭୁଞ୍ଜା ହୋନ୍ତି ପକ୍ଖିନାତି ॥
କପୋତଜାତକଂ ପଞ୍ଚମଂ ।
ଅଡ୍ଢୱଗ୍ଗୋ ତତିୟୋ ।
ତସ୍ସୁଦ୍ଦାନଂ –
ଅଥ ୱଣ୍ଣ ସସୀଲ ହିରି ଲଭତେ, ସୁମୁଖା ୱିସ ସାଳିୟମିତ୍ତୱରୋ ।
ଅଥ ଚକ୍କ ପଲାସ ସରାଜ ସତୋ, ୟୱ ବାଲ କପୋତକ ପନ୍ନରସାତି ॥
ଅଥ ୱଗ୍ଗୁଦ୍ଦାନଂ –
ଜୀନଞ୍ଚ ୱଣ୍ଣଂ ଅସମଂୱଗୁପ୍ପରି, ସୁଦେସିତା ଜାତକନ୍ତି ସନ୍ତି ୱୀସତି [ଜାତକ ପଞ୍ଚୱୀସତି ( ?)]।
ମହେସିନୋ ବ୍ରହ୍ମଚରିତ୍ତମୁତ୍ତ-ମୱୋଚ ଗାଥା ଅତ୍ଥୱତୀ ସୁବ୍ୟଞ୍ଜନାତି ॥
ପଞ୍ଚକନିପାତଂ ନିଟ୍ଠିତଂ ।
୬. ଛକ୍କନିପାତୋ
୧. ଅୱାରିୟୱଗ୍ଗୋ
୩୭୬. ଅୱାରିୟଜାତକଂ (୬-୧-୧)
ମାସୁ କୁଜ୍ଝ ଭୂମିପତି, ମାସୁ କୁଜ୍ଝ ରଥେସଭ ।
କୁଦ୍ଧଂ ଅପ୍ପଟିକୁଜ୍ଝନ୍ତୋ, ରାଜା ରଟ୍ଠସ୍ସ ପୂଜିତୋ ॥
ଗାମେ ୱା ୟଦି ୱାରଞ୍ଞେ, ନିନ୍ନେ ୱା ୟଦି ୱା ଥଲେ ।
ସବ୍ବତ୍ଥ ଅନୁସାସାମି, ମାସୁ କୁଜ୍ଝ [ମାସ୍ସୁ କୁଜ୍ଝି (ସୀ॰ ପୀ॰)] ରଥେସଭ ॥
ଅୱାରିୟପିତା ନାମ, ଅହୁ ଗଙ୍ଗାୟ ନାୱିକୋ ।
ପୁବ୍ବେ ଜନଂ ତାରେତ୍ୱାନ, ପଚ୍ଛା ୟାଚତି ୱେତନଂ ।
ତେନସ୍ସ ଭଣ୍ଡନଂ ହୋତି, ନ ଚ ଭୋଗେହି ୱଡ୍ଢତି ॥
ଅତିଣ୍ଣଂୟେୱ ୟାଚସ୍ସୁ, ଅପାରଂ ତାତ ନାୱିକ ।
ଅଞ୍ଞୋ ହି ତିଣ୍ଣସ୍ସ ମନୋ, ଅଞ୍ଞୋ ହୋତି ପାରେସିନୋ [ତରେସିନୋ (ସୀ॰ ପୀ॰), ତିରେସିନୋ (ସ୍ୟା॰)]॥
ଗାମେ ୱା ୟଦି ୱାରଞ୍ଞେ, ନିନ୍ନେ ୱା ୟଦି ୱା ଥଲେ ।
ସବ୍ବତ୍ଥ ଅନୁସାସାମି, ମାସୁ କୁଜ୍ଝିତ୍ଥ ନାୱିକ ॥
ୟାୟେୱାନୁସାସନିୟା, ରାଜା ଗାମୱରଂ ଅଦା ।
ତାୟେୱାନୁସାସନିୟା, ନାୱିକୋ ପହରୀ ମୁଖଂ ॥
ଭତ୍ତଂ ଭିନ୍ନଂ ହତା ଭରିୟା, ଗବ୍ଭୋ ଚ ପତିତୋ ଛମା ।
ମିଗୋୱ ଜାତରୂପେନ, ନ ତେନତ୍ଥଂ ଅବନ୍ଧି ସୂତି [ଅୱଡ୍ଢିତୁନ୍ତି (ସୀ॰ ସ୍ୟା॰), ଅୱଡ୍ଢି ସୂତି ( ?)]॥
ଅୱାରିୟଜାତକଂ ପଠମଂ ।
୩୭୭. ସେତକେତୁଜାତକଂ (୬-୧-୨)
ମା ତାତ କୁଜ୍ଝି ନ ହି ସାଧୁ କୋଧୋ, ବହୁମ୍ପି ତେ ଅଦିଟ୍ଠମସ୍ସୁତଞ୍ଚ ।
ମାତା ପିତା ଦିସତା [ଦିସା ତାତ (ସ୍ୟା॰), ଦିସା ତା (ପୀ॰)] ସେତକେତୁ, ଆଚରିୟମାହୁ ଦିସତଂ ପସତ୍ଥା ॥
ଅଗାରିନୋ ଅନ୍ନଦପାନୱତ୍ଥଦା [ଅନ୍ନପାନୱତ୍ଥଦା (ସ୍ୟା॰ କ॰)], ଅୱ୍ହାୟିକା ତମ୍ପି ଦିସଂ ୱଦନ୍ତି ।
ଏସା ଦିସା ପରମା ସେତକେତୁ, ୟଂ ପତ୍ୱା ଦୁକ୍ଖୀ ସୁଖିନୋ ଭୱନ୍ତି ॥
ଖରାଜିନା ଜଟିଲା ପଙ୍କଦନ୍ତା, ଦୁମ୍ମକ୍ଖରୂପା [ଦୁମୁକ୍ଖରୂପା (ସୀ॰ ସ୍ୟା॰), ଦୁମ୍ମୁକ୍ଖରୂପା (ପୀ॰ କ॰)] ୟେମେ ଜପ୍ପନ୍ତି ମନ୍ତେ ।
କଚ୍ଚି ନୁ ତେ ମାନୁସକେ ପୟୋଗେ, ଇଦଂ ୱିଦୂ ପରିମୁତ୍ତା ଅପାୟା ॥
ପାପାନି କମ୍ମାନି କତ୍ୱାନ ରାଜ, ବହୁସ୍ସୁତୋ ଚେ ନ [ବହୁସ୍ସୁତୋ ନେୱ (ସୀ॰ ସ୍ୟା॰)] ଚରେୟ୍ୟ ଧମ୍ମଂ ।
ସହସ୍ସୱେଦୋପି ନ ତଂ ପଟିଚ୍ଚ, ଦୁକ୍ଖା ପମୁଞ୍ଚେ ଚରଣଂ ଅପତ୍ୱା ॥
ସହସ୍ସୱେଦୋପି ନ ତଂ ପଟିଚ୍ଚ, ଦୁକ୍ଖା ପମୁଞ୍ଚେ ଚରଣଂ ଅପତ୍ୱା ।
ମଞ୍ଞାମି ୱେଦା ଅଫଲା ଭୱନ୍ତି, ସସଂୟମଂ ଚରଣମେୱ [ଚରଣଞ୍ଞେୱ (ସୀ॰ ସ୍ୟା॰ ପୀ॰)] ସଚ୍ଚଂ ॥
ନ ହେୱ ୱେଦା ଅଫଲା ଭୱନ୍ତି, ସସଂୟମଂ ଚରଣମେୱ ସଚ୍ଚଂ ।
କିତ୍ତିଞ୍ହି ପପ୍ପୋତି ଅଧିଚ୍ଚ ୱେଦେ, ସନ୍ତିଂ ପୁଣେତି [ସନ୍ତଂ ପୁନେ’ତି (ସୀ॰ ପୀ॰)] ଚରଣେନ ଦନ୍ତୋତି ॥
ସେତକେତୁଜାତକଂ ଦୁତିୟଂ ।
୩୭୮. ଦରୀମୁଖଜାତକଂ (୬-୧-୩)
ପଙ୍କୋ ଚ କାମା ପଲିପୋ ଚ କାମା, ଭୟଞ୍ଚ ମେତଂ ତିମୂଲଂ ପୱୁତ୍ତଂ ।
ରଜୋ ଚ ଧୂମୋ ଚ ମୟା ପକାସିତା, ହିତ୍ୱା ତୁୱଂ ପବ୍ବଜ ବ୍ରହ୍ମଦତ୍ତ ॥
ଗଧିତୋ [ଗଥିତୋ (ସୀ॰)] ଚ ରତ୍ତୋ ଚ ଅଧିମୁଚ୍ଛିତୋ ଚ, କାମେସ୍ୱହଂ ବ୍ରାହ୍ମଣ ଭିଂସରୂପଂ ।
ତଂ ନୁସ୍ସହେ ଜୀୱିକତ୍ଥୋ ପହାତୁଂ, କାହାମି ପୁଞ୍ଞାନି ଅନପ୍ପକାନି ॥
ୟୋ ଅତ୍ଥକାମସ୍ସ ହିତାନୁକମ୍ପିନୋ, ଓୱଜ୍ଜମାନୋ ନ କରୋତି ସାସନଂ ।
ଇଦମେୱ ସେୟ୍ୟୋ ଇତି ମଞ୍ଞମାନୋ, ପୁନପ୍ପୁନଂ ଗବ୍ଭମୁପେତି ମନ୍ଦୋ ॥
ସୋ ଘୋରରୂପଂ ନିରୟଂ ଉପେତି, ସୁଭାସୁଭଂ ମୁତ୍ତକରୀସପୂରଂ ।
ସତ୍ତା ସକାୟେ ନ ଜହନ୍ତି ଗିଦ୍ଧା, ୟେ ହୋନ୍ତି କାମେସୁ ଅୱୀତରାଗା ॥
ମୀଳ୍ହେନ ଲିତ୍ତା ରୁହିରେନ ମକ୍ଖିତା, ସେମ୍ହେନ ଲିତ୍ତା ଉପନିକ୍ଖମନ୍ତି ।
ୟଂ ୟଞ୍ହି କାୟେନ ଫୁସନ୍ତି ତାୱଦେ, ସବ୍ବଂ ଅସାତଂ ଦୁଖମେୱ କେୱଲଂ ॥
ଦିସ୍ୱା ୱଦାମି ନ ହି ଅଞ୍ଞତୋ ସୱଂ, ପୁବ୍ବେନିୱାସଂ ବହୁକଂ ସରାମି ।
ଚିତ୍ରାହି ଗାଥାହି ସୁଭାସିତାହି, ଦରୀମୁଖୋ ନିଜ୍ଝାପୟି ସୁମେଧନ୍ତି ॥
ଦରୀମୁଖଜାତକଂ ତତିୟଂ ।
୩୭୯. ନେରୁଜାତକଂ (୬-୧-୪)
କାକୋଲା କାକସଙ୍ଘା ଚ, ମୟଞ୍ଚ ପତତଂ ୱରା [ୱର (କ॰) ମୟନ୍ତିପଦସ୍ସ ହି ୱିସେସନଂ]।
ସବ୍ବେୱ ସଦିସା ହୋମ, ଇମଂ ଆଗମ୍ମ ପବ୍ବତଂ ॥
ଇଧ ସୀହା ଚ ବ୍ୟଗ୍ଘା ଚ, ସିଙ୍ଗାଲା ଚ ମିଗାଧମା ।
ସବ୍ବେୱ ସଦିସା ହୋନ୍ତି, ଅୟଂ କୋ ନାମ ପବ୍ବତୋ ॥
ଇମଂ ନେରୂତି [ନେରୁନ୍ତି (ସୀ॰ ସ୍ୟା॰)] ଜାନନ୍ତି, ମନୁସ୍ସା ପବ୍ବତୁତ୍ତମଂ ।
ଇଧ ୱଣ୍ଣେନ ସମ୍ପନ୍ନା, ୱସନ୍ତି ସବ୍ବପାଣିନୋ ॥
ଅମାନନା ୟତ୍ଥ ସିୟା, ସନ୍ତାନଂ ୱା ୱିମାନନା ।
ହୀନସମ୍ମାନନା ୱାପି, ନ ତତ୍ଥ ୱସତିଂ ୱସେ [ୱସତୀ ୱସେ (ସ୍ୟା॰), ୱସ ଦିୱସେ (ପୀ॰)]॥
ୟତ୍ଥାଲସୋ ଚ ଦକ୍ଖୋ ଚ, ସୂରୋ ଭୀରୁ ଚ ପୂଜିୟା ।
ନ ତତ୍ଥ ସନ୍ତୋ ୱସନ୍ତି, ଅୱିସେସକରେ ନରେ [ନଗେ (ସୀ॰ ସ୍ୟା॰ ପୀ॰)]॥
ନାୟଂ ନେରୁ ୱିଭଜତି, ହୀନଉକ୍କଟ୍ଠମଜ୍ଝିମେ ।
ଅୱିସେସକରୋ ନେରୁ, ହନ୍ଦ ନେରୁଂ ଜହାମସେତି ॥
ନେରୁଜାତକଂ ଚତୁତ୍ଥଂ ।
୩୮୦. ଆସଙ୍କଜାତକଂ (୬-୧-୫)
ଆସାୱତୀ ନାମ ଲତା, ଜାତା ଚିତ୍ତଲତାୱନେ ।
ତସ୍ସା ୱସ୍ସସହସ୍ସେନ, ଏକଂ ନିବ୍ବତ୍ତତେ ଫଲଂ ॥
ତଂ ଦେୱା ପୟିରୁପାସନ୍ତି, ତାୱ ଦୂରଫଲଂ ସତିଂ ।
ଆସୀସେୱ [ଆସିଂସେୱ (ସୀ॰ ସ୍ୟା॰ ପୀ॰)] ତୁୱଂ ରାଜ, ଆସା ଫଲୱତୀ ସୁଖା ॥
ଆସୀସତେୱ [ଆସିଂସେଥେୱ (ସୀ॰ ସ୍ୟା॰ ପୀ॰)] ସୋ ପକ୍ଖୀ, ଆସୀସତେୱ [ଆସିଂସେଥେୱ (ସୀ॰ ସ୍ୟା॰ ପୀ॰)] ସୋ ଦିଜୋ ।
ତସ୍ସ ଚାସା [ତସ୍ସେୱାସା (ସ୍ୟା॰)] ସମିଜ୍ଝତି, ତାୱ ଦୂରଗତା ସତୀ ।
ଆସୀସେୱ ତୁୱଂ ରାଜ, ଆସା ଫଲୱତୀ ସୁଖା ॥
ସମ୍ପେସି ଖୋ ମଂ ୱାଚାୟ, ନ ଚ ସମ୍ପେସି [ସଂସେସି (କ॰)] କମ୍ମୁନା ।
ମାଲା ସେରେୟ୍ୟକସ୍ସେୱ, ୱଣ୍ଣୱନ୍ତା ଅଗନ୍ଧିକା ॥
ଅଫଲଂ ମଧୁରଂ ୱାଚଂ, ୟୋ ମିତ୍ତେସୁ ପକୁବ୍ବତି ।
ଅଦଦଂ ଅୱିସ୍ସଜଂ ଭୋଗଂ, ସନ୍ଧି ତେନସ୍ସ ଜୀରତି ॥
ୟଞ୍ହି କୟିରା ତଞ୍ହି ୱଦେ, ୟଂ ନ କୟିରା ନ ତଂ ୱଦେ ।
ଅକରୋନ୍ତଂ ଭାସମାନଂ, ପରିଜାନନ୍ତି ପଣ୍ଡିତା ॥
ବଲଞ୍ଚ ୱତ ମେ ଖୀଣଂ, ପାଥେୟ୍ୟଞ୍ଚ ନ ୱିଜ୍ଜତି ।
ସଙ୍କେ ପାଣୂପରୋଧାୟ, ହନ୍ଦ ଦାନି ୱଜାମହଂ ॥
ଏତଦେୱ ହି ମେ ନାମଂ, ୟଂ ନାମସ୍ମି ରଥେସଭ ।
ଆଗମେହି ମହାରାଜ, ପିତରଂ ଆମନ୍ତୟାମହନ୍ତି ॥
ଆସଙ୍କଜାତକଂ ପଞ୍ଚମଂ ।
୩୮୧. ମିଗାଲୋପଜାତକଂ (୬-୧-୬)
ନ ମେ ରୁଚ୍ଚି ମିଗାଲୋପ, ୟସ୍ସ ତେ ତାଦିସୀ ଗତୀ ।
ଅତୁଚ୍ଚଂ ତାତ ପତସି, ଅଭୂମିଂ ତାତ ସେୱସି ॥
ଚତୁକ୍କଣ୍ଣଂୱ କେଦାରଂ, ୟଦା ତେ ପଥୱୀ ସିୟା ।
ତତୋ ତାତ ନିୱତ୍ତସ୍ସୁ, ମାସ୍ସୁ ଏତ୍ତୋ ପରଂ ଗମି ॥
ସନ୍ତି ଅଞ୍ଞେପି ସକୁଣା, ପତ୍ତୟାନା ୱିହଙ୍ଗମା ।
ଅକ୍ଖିତ୍ତା ୱାତୱେଗେନ, ନଟ୍ଠା ତେ ସସ୍ସତୀସମା ॥
ଅକତ୍ୱା ଅପନନ୍ଦସ୍ସ [ଅପରଣ୍ଣସ୍ସ (ସୀ॰ ସ୍ୟା॰ ପୀ॰)], ପିତୁ ୱୁଦ୍ଧସ୍ସ ସାସନଂ ।
କାଲୱାତେ ଅତିକ୍କମ୍ମ, ୱେରମ୍ଭାନଂ ୱସଂ ଅଗା [ଗତୋ (ସୀ॰)]॥
ତସ୍ସ ପୁତ୍ତା ଚ ଦାରା ଚ, ୟେ ଚଞ୍ଞେ ଅନୁଜୀୱିନୋ ।
ସବ୍ବେ ବ୍ୟସନମାପାଦୁଂ, ଅନୋୱାଦକରେ ଦିଜେ ॥
ଏୱମ୍ପି ଇଧ ୱୁଦ୍ଧାନଂ, ୟୋ ୱାକ୍ୟଂ ନାୱବୁଜ୍ଝତି ।
ଅତିସୀମଚରୋ [ଅତିସୀମଂ ଚରୋ (ସୀ॰ ସ୍ୟା॰ କ॰)] ଦିତ୍ତୋ, ଗିଜ୍ଝୋୱାତୀତସାସନୋ ।
ସବ୍ବେ ବ୍ୟସନଂ ପପ୍ପୋନ୍ତି, ଅକତ୍ୱା ବୁଦ୍ଧସାସନନ୍ତି ॥
ମିଗାଲୋପଜାତକଂ ଛଟ୍ଠଂ ।
୩୮୨. ସିରିକାଳକଣ୍ଣିଜାତକଂ (୬-୧-୭)
କା ନୁ କାଳେନ ୱଣ୍ଣେନ, ନ ଚାପି [ନ ଚାସି (ସୀ॰)] ପିୟଦସ୍ସନା ।
କା ୱା ତ୍ୱଂ କସ୍ସ ୱା ଧୀତା, କଥଂ ଜାନେମୁ ତଂ ମୟଂ ॥
ମହାରାଜସ୍ସହଂ ଧୀତା, ୱିରୂପକ୍ଖସ୍ସ ଚଣ୍ଡିୟା ।
ଅହଂ କାଳୀ ଅଲକ୍ଖିକା, କାଳକଣ୍ଣୀତି ମଂ ୱିଦୂ ।
ଓକାସଂ ୟାଚିତୋ ଦେହି, ୱସେମୁ ତୱ ସନ୍ତିକେ ॥
କିଂସୀଲେ କିଂସମାଚାରେ, ପୁରିସେ ନିୱିସସେ ତୁୱଂ ।
ପୁଟ୍ଠା ମେ କାଳି ଅକ୍ଖାହି, କଥଂ [ୟଥା (ସୀ॰ ପୀ॰)] ଜାନେମୁ ତଂ ମୟଂ ॥
ମକ୍ଖୀ ପଳାସୀ ସାରମ୍ଭୀ, ଇସ୍ସୁକୀ ମଚ୍ଛରୀ ସଠୋ ।
ସୋ ମୟ୍ହଂ ପୁରିସୋ କନ୍ତୋ, ଲଦ୍ଧଂ ୟସ୍ସ ୱିନସ୍ସତି ॥
କୋଧନୋ ଉପନାହୀ ଚ, ପିସୁଣୋ ଚ ୱିଭେଦକୋ ।
କଣ୍ଡକୱାଚୋ [ଅଣ୍ଡକୱାଚୋ (କ॰ ସୀ॰ ପୀ॰)] ଫରୁସୋ, ସୋ ମେ କନ୍ତତରୋ ତତୋ ॥
ଅଜ୍ଜ ସୁୱେତି ପୁରିସୋ, ସଦତ୍ଥଂ ନାୱବୁଜ୍ଝତି ।
ଓୱଜ୍ଜମାନୋ କୁପ୍ପତି, ସେୟ୍ୟଂ ସୋ ଅତିମଞ୍ଞତି ॥
ଦୱପ୍ପଲୁଦ୍ଧୋ [ଦେୱପ୍ପଲୁଦ୍ଧୋ (କ॰), ଦୱପ୍ପଲଦ୍ଧୋ (ପୀ॰)] ପୁରିସୋ, ସବ୍ବମିତ୍ତେହି ଧଂସତି ।
ସୋ ମୟ୍ହଂ ପୁରିସୋ କନ୍ତୋ, ତସ୍ମିଂ ହୋମି ଅନାମୟା ॥
ଅପେହି ଏତ୍ତୋ ତ୍ୱଂ କାଳି, ନେତଂ ଅମ୍ହେସୁ ୱିଜ୍ଜତି ।
ଅଞ୍ଞଂ ଜନପଦଂ ଗଚ୍ଛ, ନିଗମେ ରାଜଧାନିୟୋ ॥
ଅହମ୍ପି ଖୋ ତଂ [ଚେତଂ (ସୀ॰)] ଜାନାମି, ନେତଂ ତୁମ୍ହେସୁ ୱିଜ୍ଜତି ।
ସନ୍ତି ଲୋକେ ଅଲକ୍ଖିକା, ସଙ୍ଘରନ୍ତି ବହୁଂ ଧନଂ ।
ଅହଂ ଦେୱୋ ଚ ମେ ଭାତା, ଉଭୋ ନଂ ୱିଧମାମସେ ॥
କା ନୁ ଦିବ୍ବେନ ୱଣ୍ଣେନ, ପଥବ୍ୟା ସୁପତିଟ୍ଠିତା ।
କା ୱା ତ୍ୱଂ କସ୍ସ ୱା ଧୀତା, କଥଂ ଜାନେମୁ ତଂ ମୟଂ ॥
ମହାରାଜସ୍ସହଂ ଧୀତା, ଧତରଟ୍ଠସ୍ସ ସିରୀମତୋ [ଧତରଟ୍ଠସିରୀମତୋ (ସ୍ୟା॰ କ॰)]।
ଅହଂ ସିରୀ ଚ ଲକ୍ଖୀ ଚ, ଭୂରିପଞ୍ଞାତି ମଂ ୱିଦୂ ।
ଓକାସଂ ୟାଚିତୋ ଦେହି, ୱସେମୁ ତୱ ସନ୍ତିକେ ॥
କିଂସୀଲେ କିଂସମାଚାରେ, ପୁରିସେ ନିୱିସସେ ତୁୱଂ ।
ପୁଟ୍ଠା ମେ ଲକ୍ଖି ଅକ୍ଖାହି, କଥଂ [ୟଥା (ସୀ॰ ପୀ॰)] ଜାନେମୁ ତଂ ମୟଂ ॥
ୟୋ ଚାପି ସୀତେ ଅଥୱାପି ଉଣ୍ହେ, ୱାତାତପେ ଡଂସସରୀସପେ ଚ ।
ଖୁଧଂ [ଖୁଦ୍ଦଂ (ସ୍ୟା॰ କ॰), ଖୁଦଂ (ପୀ॰)] ପିପାସଂ ଅଭିଭୁୟ୍ୟ ସବ୍ବଂ, ରତ୍ତିନ୍ତିୱଂ ୟୋ ସତତଂ ନିୟୁତ୍ତୋ ।
କାଲାଗତଞ୍ଚ ନ ହାପେତି ଅତ୍ଥଂ, ସୋ ମେ ମନାପୋ ନିୱିସେ ଚ ତମ୍ହି ॥
ଅକ୍କୋଧନୋ ମିତ୍ତୱା ଚାଗୱା ଚ, ସୀଲୂପପନ୍ନୋ ଅସଠୋଜୁଭୂତୋ [ଅସଠୋ ଉଜ୍ଜୁଭୂତୋ (ପୀ॰)]।
ସଙ୍ଗାହକୋ ସଖିଲୋ ସଣ୍ହୱାଚୋ, ମହତ୍ତପତ୍ତୋପି ନିୱାତୱୁତ୍ତି ।
ତସ୍ମିଂହଂ [ତସ୍ମାହଂ (ସୀ॰ ପୀ॰)] ପୋସେ ୱିପୁଲା ଭୱାମି, ଊମି ସମୁଦ୍ଦସ୍ସ ୟଥାପି ୱଣ୍ଣଂ ॥
ୟୋ ଚାପି ମିତ୍ତେ ଅଥୱା ଅମିତ୍ତେ, ସେଟ୍ଠେ ସରିକ୍ଖେ ଅଥ ୱାପି ହୀନେ ।
ଅତ୍ଥଂ ଚରନ୍ତଂ ଅଥୱା ଅନତ୍ଥଂ, ଆୱୀ ରହୋ ସଙ୍ଗହମେୱ ୱତ୍ତେ [ୱତ୍ତୋ (ସ୍ୟା॰ କ॰)]॥
ୱାଚଂ ନ ୱଜ୍ଜା ଫରୁସଂ କଦାଚି, ମତସ୍ସ ଜୀୱସ୍ସ ଚ ତସ୍ସ ହୋମି ॥
ଏତେସଂ ୟୋ ଅଞ୍ଞତରଂ ଲଭିତ୍ୱା, କନ୍ତା ସିରୀ [କନ୍ତସିରିଂ (କତ୍ଥଚି), କନ୍ତଂ ସିରିଂ (ସ୍ୟା॰) ଅଟ୍ଠକଥାୟଂ ଦୁତିୟତତିୟପାଠନ୍ତରାନି] ମଜ୍ଜତି ଅପ୍ପପଞ୍ଞୋ ।
ତଂ ଦିତ୍ତରୂପଂ ୱିସମଂ ଚରନ୍ତଂ, କରୀସଠାନଂୱ [କରୀସଜାତଂ ୱ (ସୀ॰ ସ୍ୟା॰)] ୱିୱଜ୍ଜୟାମି ॥
ଅତ୍ତନା କୁରୁତେ ଲକ୍ଖିଂ, ଅଲକ୍ଖିଂ କୁରୁତତ୍ତନା ।
ନ ହି ଲକ୍ଖିଂ ଅଲକ୍ଖିଂ ୱା, ଅଞ୍ଞୋ ଅଞ୍ଞସ୍ସ କାରକୋତି ॥
ସିରିକାଳକଣ୍ଣିଜାତକଂ ସତ୍ତମଂ ।
୩୮୩. କୁକ୍କୁଟଜାତକଂ (୬-୧-୮)
ସୁଚିତ୍ତପତ୍ତଛଦନ, ତମ୍ବଚୂଳ ୱିହଙ୍ଗମ ।
ଓରୋହ ଦୁମସାଖାୟ, ମୁଧା ଭରିୟା ଭୱାମି ତେ ॥
ଚତୁପ୍ପଦୀ ତ୍ୱଂ କଲ୍ୟାଣି, ଦ୍ୱିପଦାହଂ ମନୋରମେ ।
ମିଗୀ ପକ୍ଖୀ ଅସଞ୍ଞୁତ୍ତା, ଅଞ୍ଞଂ ପରିୟେସ ସାମିକଂ ॥
କୋମାରିକା ତେ ହେସ୍ସାମି, ମଞ୍ଜୁକା ପିୟଭାଣିନୀ ।
ୱିନ୍ଦ ମଂ ଅରିୟେନ ୱେଦେନ, ସାୱୟ ମଂ ୟଦିଚ୍ଛସି ॥
କୁଣପାଦିନି ଲୋହିତପେ, ଚୋରି କୁକ୍କୁଟପୋଥିନି ।
ନ ତ୍ୱଂ ଅରିୟେନ ୱେଦେନ, ମମଂ ଭତ୍ତାରମିଚ୍ଛସି ॥
ଏୱମ୍ପି ଚତୁରା [ଚାତୁରା (ସ୍ୟା॰ କ॰)] ନାରୀ, ଦିସ୍ୱାନ ସଧନଂ [ପୱରଂ (ସୀ॰ ସ୍ୟା॰ ପୀ॰)] ନରଂ ।
ନେନ୍ତି ସଣ୍ହାହି ୱାଚାହି, ବିଳାରୀ ୱିୟ କୁକ୍କୁଟଂ ॥
ୟୋ ଚ ଉପ୍ପତିତଂ ଅତ୍ଥଂ, ନ ଖିପ୍ପମନୁବୁଜ୍ଝତି ।
ଅମିତ୍ତୱସମନ୍ୱେତି, ପଚ୍ଛା ଚ ଅନୁତପ୍ପତି ॥
ୟୋ ଚ ଉପ୍ପତିତଂ ଅତ୍ଥଂ, ଖିପ୍ପମେୱ ନିବୋଧତି ।
ମୁଚ୍ଚତେ ସତ୍ତୁସମ୍ବାଧା, କୁକ୍କୁଟୋୱ ବିଳାରିୟାତି ॥
କୁକ୍କୁଟଜାତକଂ ଅଟ୍ଠମଂ ।
୩୮୪. ଧମ୍ମଧଜଜାତକଂ (୬-୧-୯)
ଧମ୍ମଂ ଚରଥ ଞାତୟୋ, ଧମ୍ମଂ ଚରଥ ଭଦ୍ଦଂ ୱୋ [ଭଦ୍ଦ ୱୋ (କ॰)]।
ଧମ୍ମଚାରୀ ସୁଖଂ ସେତି, ଅସ୍ମିଂ ଲୋକେ ପରମ୍ହି ଚ ॥
ଭଦ୍ଦକୋ ୱତୟଂ ପକ୍ଖୀ, ଦିଜୋ ପରମଧମ୍ମିକୋ ।
ଏକପାଦେନ ତିଟ୍ଠନ୍ତୋ, ଧମ୍ମମେୱାନୁସାସତି ॥
ନାସ୍ସ ସୀଲଂ ୱିଜାନାଥ, ଅନଞ୍ଞାୟ ପସଂସଥ ।
ଭୁତ୍ୱା ଅଣ୍ଡଞ୍ଚ ପୋତଞ୍ଚ [ଛାପେ ଚ (ସୀ॰ ପୀ॰)], ଧମ୍ମୋ ଧମ୍ମୋତି ଭାସତି ॥
ଅଞ୍ଞଂ ଭଣତି ୱାଚାୟ, ଅଞ୍ଞଂ କାୟେନ କୁବ୍ବତି ।
ୱାଚାୟ ନୋ ଚ କାୟେନ, ନ ତଂ ଧମ୍ମଂ ଅଧିଟ୍ଠିତୋ ॥
ୱାଚାୟ ସଖିଲୋ ମନୋୱିଦୁଗ୍ଗୋ, ଛନ୍ନୋ କୂପସୟୋୱ କଣ୍ହସପ୍ପୋ ।
ଧମ୍ମଧଜୋ ଗାମନିଗମାସୁସାଧୁ [ଗାମନିଗମାସୁ ସାଧୁସମ୍ମତୋ (ସୀ॰), ଗାମନିଗମସାଧୁ (ପୀ॰)], ଦୁଜ୍ଜାନୋ ପୁରିସେନ ବାଲିସେନ ॥
ଇମଂ ତୁଣ୍ଡେହି ପକ୍ଖେହି, ପାଦା ଚିମଂ ୱିହେଠଥ [ୱିପୋଥଥ (ପୀ॰)]।
ଛୱଞ୍ହିମଂ ୱିନାସେଥ, ନାୟଂ ସଂୱାସନାରହୋତି ॥
ଧମ୍ମଧଜଜାତକଂ ନୱମଂ ।
୩୮୫. ନନ୍ଦିୟମିଗରାଜଜାତକଂ (୬-୧-୧୦)
ସଚେ ବ୍ରାହ୍ମଣ ଗଚ୍ଛେସି, ସାକେତେ [ସାକେତଂ (ସୀ॰ ସ୍ୟା॰)] ଅଜ୍ଜୁନଂ [ଅଞ୍ଝନଂ (ସୀ॰ ସ୍ୟା॰ ପୀ॰)] ୱନଂ ।
ୱଜ୍ଜାସି ନନ୍ଦିୟଂ ନାମ, ପୁତ୍ତଂ ଅସ୍ମାକମୋରସଂ ।
ମାତା ପିତା ଚ ତେ ୱୁଦ୍ଧା, ତେ ତଂ ଇଚ୍ଛନ୍ତି ପସ୍ସିତୁଂ ॥
ଭୁତ୍ତା ମୟା ନିୱାପାନି, ରାଜିନୋ ପାନଭୋଜନଂ ।
ତଂ ରାଜପିଣ୍ଡଂ ଅୱଭୋତ୍ତୁଂ [ଅୱଭୋତ୍ତଂ (କ॰)], ନାହଂ ବ୍ରାହ୍ମଣ ମୁସ୍ସହେ ॥
ଓଦହିସ୍ସାମହଂ ପସ୍ସଂ, ଖୁରପ୍ପାନିସ୍ସ [ଖୁରପ୍ପାଣିସ୍ସ (ସୀ॰), ଖୁରପାଣିସ୍ସ (ପୀ॰), ଖୁରପ୍ପପାଣିସ୍ସ ( ?)] ରାଜିନୋ ।
ତଦାହଂ ସୁଖିତୋ ମୁତ୍ତୋ, ଅପି ପସ୍ସେୟ୍ୟ ମାତରଂ ॥
ମିଗରାଜା ପୁରେ ଆସିଂ, କୋସଲସ୍ସ ନିକେତନେ [ନିକେତୱେ (ସୀ॰ ସ୍ୟା॰ ପୀ॰)]।
ନନ୍ଦିୟୋ ନାମ ନାମେନ, ଅଭିରୂପୋ ଚତୁପ୍ପଦୋ ॥
ତଂ ମଂ ୱଧିତୁମାଗଚ୍ଛି, ଦାୟସ୍ମିଂ ଅଜ୍ଜୁନେ ୱନେ ।
ଧନୁଂ ଆରଜ୍ଜଂ [ଆରଜ୍ଜୁଂ (ନିୟ୍ୟ), ଅଦେଜ୍ଝଂ (ସୀ॰ ପୀ॰) ଅଦ୍ୱେଧାଭାୱଂ ଏକୀଭାୱନ୍ତି ଅତ୍ଥୋ] କତ୍ୱାନ, ଉସୁଂ ସନ୍ନୟ୍ହ [ସନ୍ଧାୟ (ସୀ॰ ପୀ॰)] କୋସଲୋ ॥
ତସ୍ସାହଂ ଓଦହିଂ ପସ୍ସଂ, ଖୁରପ୍ପାନିସ୍ସ ରାଜିନୋ ।
ତଦାହଂ ସୁଖିତୋ ମୁତ୍ତୋ, ମାତରଂ ଦଟ୍ଠୁମାଗତୋତି ॥
ନନ୍ଦିୟମିଗରାଜଜାତକଂ ଦସମଂ ।
ଅୱାରିୟୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ଅଥ କୁଜ୍ଝରଥେସଭ କେତୁୱରୋ, ସଦରୀମୁଖ ନେରୁ ଲତା ଚ ପୁନ ।
ଅପନନ୍ଦ ସିରୀ ଚ ସୁଚିତ୍ତୱରୋ, ଅଥ ଧମ୍ମିକ ନନ୍ଦିମିଗେନ ଦସାତି ॥
୨. ଖରପୁତ୍ତୱଗ୍ଗୋ
୩୮୬. ଖରପୁତ୍ତଜାତକଂ (୬-୨-୧)
ସଚ୍ଚଂ କିରେୱମାହଂସୁ, ୱସ୍ତଂ [ଭସ୍ତଂ (ସୀ॰ ପୀ॰), କଲକଂ (ସ୍ୟା॰), ଗରଂ (କ॰)] ବାଲୋତି ପଣ୍ଡିତା ।
ପସ୍ସ ବାଲୋ ରହୋକମ୍ମଂ, ଆୱିକୁବ୍ବଂ ନ ବୁଜ୍ଝତି ॥
ତ୍ୱଂ ଖୋପି [ତ୍ୱଂ ନୁ ଖୋ (ସୀ॰ ସ୍ୟା॰), ତ୍ୱଞ୍ଚ ଖୋ (ପୀ॰)] ସମ୍ମ ବାଲୋସି, ଖରପୁତ୍ତ ୱିଜାନହି ।
ରଜ୍ଜୁୟା ହି [ରଜ୍ଜୁୟାସି (ପୀ॰)] ପରିକ୍ଖିତ୍ତୋ, ୱଙ୍କୋଟ୍ଠୋ ଓହିତୋମୁଖୋ ॥
ଅପରମ୍ପି ସମ୍ମ ତେ ବାଲ୍ୟଂ [ଅୟମ୍ପି ସମ୍ମ ତେ ବାଲୋ (କ॰)], ୟୋ ମୁତ୍ତୋ ନ ପଲାୟସି ।
ସୋ ଚ ବାଲତରୋ ସମ୍ମ, ୟଂ ତ୍ୱଂ ୱହସି ସେନକଂ ॥
ୟଂ ନୁ ସମ୍ମ ଅହଂ ବାଲୋ, ଅଜରାଜ ୱିଜାନହି ।
ଅଥ କେନ ସେନକୋ ବାଲୋ, ତଂ ମେ ଅକ୍ଖାହି ପୁଚ୍ଛିତୋ ॥
ଉତ୍ତମତ୍ଥଂ ଲଭିତ୍ୱାନ, ଭରିୟାୟ ୟୋ ପଦସ୍ସତି [ଭୟିୟା ୟୋ ପଦସ୍ସତି (ପୀ॰), ଭୟିୟା ନ ଭୱିସ୍ସତି (କ॰)]।
ତେନ ଜହିସ୍ସତତ୍ତାନଂ, ସା ଚେୱସ୍ସ ନ ହେସ୍ସତି ॥
ନ ୱେ ପିୟମ୍ମେତି [ନ ପିୟମେତି (କ॰), ନ ପିୟମେଦନ୍ତି (କତ୍ଥଚି)] ଜନିନ୍ଦ ତାଦିସୋ, ଅତ୍ତଂ ନିରଂକତ୍ୱା ପିୟାନି ସେୱତି [ସେୱୟେ ( ?)]।
ଅତ୍ତାୱ ସେୟ୍ୟୋ ପରମା ଚ ସେୟ୍ୟୋ, ଲବ୍ଭା ପିୟା ଓଚିତତ୍ଥେନ ପଚ୍ଛାତି ॥
ଖରପୁତ୍ତଜାତକଂ ପଠମଂ ।
୩୮୭. ସୂଚିଜାତକଂ (୬-୨-୨)
ଅକକ୍କସଂ ଅଫରୁସଂ, ଖରଧୋତଂ ସୁପାସିୟଂ ।
ସୁଖୁମଂ ତିଖିଣଗ୍ଗଞ୍ଚ, କୋ ସୂଚିଂ କେତୁମିଚ୍ଛତି ॥
ସୁମଜ୍ଜଞ୍ଚ ସୁପାସଞ୍ଚ, ଅନୁପୁବ୍ବଂ [ଅନୁପୁବ୍ବ (ସୀ॰ ସ୍ୟା॰)] ସୁୱଟ୍ଟିତଂ ।
ଘନଘାତିମଂ ପଟିଥଦ୍ଧଂ, କୋ ସୂଚିଂ କେତୁମିଚ୍ଛତି ॥
ଇତୋ ଦାନି ପତାୟନ୍ତି, ସୂଚିୟୋ ବଳିସାନି ଚ ।
କୋୟଂ କମ୍ମାରଗାମସ୍ମିଂ, ସୂଚିଂ ୱିକ୍କେତୁମିଚ୍ଛତି ॥
ଇତୋ ସତ୍ଥାନି ଗଚ୍ଛନ୍ତି, କମ୍ମନ୍ତା ୱିୱିଧା ପୁଥୂ ।
କୋୟଂ କମ୍ମାରଗାମସ୍ମିଂ, ସୂଚିଂ ୱିକ୍କେତୁମିଚ୍ଛତି [ମରହତି (ସୀ॰ ସ୍ୟା॰ ପୀ॰)]॥
ସୂଚିଂ କମ୍ମାରଗାମସ୍ମିଂ, ୱିକ୍କେତବ୍ବା ପଜାନତା ।
ଆଚରିୟାୱ ଜାନନ୍ତି [ଆଚରିୟା ସଞ୍ଜାନନ୍ତି (କ॰), ଆଚରିୟା ପଜାନନ୍ତି (ସ୍ୟା॰), ଆଚରିୟାୱ ସଞ୍ଜାନନ୍ତି (ପୀ॰)], କମ୍ମଂ ସୁକତଦୁକ୍କଟଂ [ଦୁକ୍କତଂ (ସୀ॰ ପୀ॰)]॥
ଇମଂ ଚେ [ଇମଞ୍ଚ (ସୀ॰ ସ୍ୟା॰ ପୀ॰)] ତେ ପିତା ଭଦ୍ଦେ, ସୂଚିଂ ଜଞ୍ଞା ମୟା କତଂ ।
ତୟା ଚ ମଂ ନିମନ୍ତେୟ୍ୟ, ୟଞ୍ଚତ୍ଥଞ୍ଞଂ ଘରେ ଧନନ୍ତି ॥
ସୂଚିଜାତକଂ ଦୁତିୟଂ ।
୩୮୮. ତୁଣ୍ଡିଲଜାତକଂ (୬-୨-୩)
ନୱଛନ୍ନକେ [ନୱଛନ୍ଦକେ (ସୀ॰ ପୀ॰), ନୱଚ୍ଛଦ୍ଦକେ (ସ୍ୟା॰)] ଦାନି [ଦୋଣି (କ॰), ଦାନଂ, ଦାନେ (କତ୍ଥଚି)] ଦିୟ୍ୟତି, ପୁଣ୍ଣାୟଂ ଦୋଣି ସୁୱାମିନୀ ଠିତା ।
ବହୁକେ ଜନେ ପାସପାଣିକେ, ନୋ ଚ ଖୋ ମେ ପଟିଭାତି ଭୁଞ୍ଜିତୁଂ ॥
ତସସି ଭମସି ଲେଣମିଚ୍ଛସି, ଅତ୍ତାଣୋସି କୁହିଂ ଗମିସ୍ସସି ।
ଅପ୍ପୋସ୍ସୁକ୍କୋ ଭୁଞ୍ଜ ତୁଣ୍ଡିଲ, ମଂସତ୍ଥାୟ ହି ପୋସିତାମ୍ହସେ [ପୋସିୟାମସେ (ସୀ॰ ସ୍ୟା॰ ପୀ॰)]॥
ଓଗହ ରହଦଂ ଅକଦ୍ଦମଂ, ସବ୍ବଂ ସେଦମଲଂ ପୱାହୟ ।
ଗଣ୍ହାହି ନୱଂ ୱିଲେପନଂ, ୟସ୍ସ ଗନ୍ଧୋ ନ କଦାଚି ଛିଜ୍ଜତି ॥
କତମୋ ରହଦୋ ଅକଦ୍ଦମୋ, କିଂସୁ ସେଦମଲନ୍ତି ୱୁଚ୍ଚତି ।
କତମଞ୍ଚ ନୱଂ ୱିଲେପନଂ, ୟସ୍ସ ଗନ୍ଧୋ ନ କଦାଚି ଛିଜ୍ଜତି ॥
ଧମ୍ମୋ ରହଦୋ ଅକଦ୍ଦମୋ, ପାପଂ ସେଦମଲନ୍ତି ୱୁଚ୍ଚତି ।
ସୀଲଞ୍ଚ ନୱଂ ୱିଲେପନଂ, ତସ୍ସ ଗନ୍ଧୋ ନ କଦାଚି ଛିଜ୍ଜତି ॥
ନନ୍ଦନ୍ତି ସରୀରଘାତିନୋ, ନ ଚ ନନ୍ଦନ୍ତି ସରୀରଧାରିନୋ ।
ପୁଣ୍ଣାୟ ଚ ପୁଣ୍ଣମାସିୟା, ରମମାନାୱ ଜହନ୍ତି ଜୀୱିତନ୍ତି ॥
ତୁଣ୍ଡିଲଜାତକଂ ତତିୟଂ ।
୩୮୯. ସୁୱଣ୍ଣକକ୍କଟଜାତକଂ (୬-୨-୪)
ସିଙ୍ଗୀମିଗୋ ଆୟତଚକ୍ଖୁନେତ୍ତୋ, ଅଟ୍ଠିତ୍ତଚୋ ୱାରିସୟୋ ଅଲୋମୋ ।
ତେନାଭିଭୂତୋ କପଣଂ ରୁଦାମି, ହରେ ସଖା କିସ୍ସ ନୁ ମଂ ଜହାସି ॥
ସୋ ପସ୍ସସନ୍ତୋ ମହତା ଫଣେନ, ଭୁଜଙ୍ଗମୋ କକ୍କଟମଜ୍ଝପତ୍ତୋ ।
ସଖା ସଖାରଂ ପରିତାୟମାନୋ, ଭୁଜଙ୍ଗମଂ କକ୍କଟକୋ ଗହେସି ॥
ନ ୱାୟସଂ ନୋ ପନ କଣ୍ହସପ୍ପଂ, ଘାସତ୍ଥିକୋ କକ୍କଟକୋ ଅଦେୟ୍ୟ ।
ପୁଚ୍ଛାମି ତଂ ଆୟତଚକ୍ଖୁନେତ୍ତ, ଅଥ କିସ୍ସ ହେତୁମ୍ହ ଉଭୋ ଗହୀତା ॥
ଅୟଂ ପୁରିସୋ ମମ ଅତ୍ଥକାମୋ, ୟୋ ମଂ ଗହେତ୍ୱାନ ଦକାୟ ନେତି ।
ତସ୍ମିଂ ମତେ ଦୁକ୍ଖମନପ୍ପକଂ ମେ, ଅହଞ୍ଚ ଏସୋ ଚ ଉଭୋ ନ ହୋମ ॥
ମମଞ୍ଚ ଦିସ୍ୱାନ ପୱଦ୍ଧକାୟଂ, ସବ୍ବୋ ଜନୋ ହିଂସିତୁମେୱ ମିଚ୍ଛେ ।
ସାଦୁଞ୍ଚ ଥୂଲଞ୍ଚ ମୁଦୁଞ୍ଚ ମଂସଂ, କାକାପି ମଂ ଦିସ୍ୱାନ [ଦିସ୍ୱ (ସୀ॰ ପୀ॰)] ୱିହେଠୟେୟ୍ୟୁଂ ॥
ସଚେତସ୍ସ ହେତୁମ୍ହ ଉଭୋ ଗହୀତା, ଉଟ୍ଠାତୁ ପୋସୋ ୱିସମାୱମାମି [ୱିସମାଚମାମି (ସୀ॰ ପୀ॰ କ॰)]।
ମମଞ୍ଚ କାକଞ୍ଚ ପମୁଞ୍ଚ ଖିପ୍ପଂ, ପୁରେ ୱିସଂ ଗାଳ୍ହମୁପେତି ମଚ୍ଚଂ ॥
ସପ୍ପଂ ପମୋକ୍ଖାମି ନ ତାୱ କାକଂ, ପଟିବନ୍ଧକୋ [ପଟିବଦ୍ଧକୋ (ସୀ॰ ପୀ॰)] ହୋହିତି [ହୋତି ହି (ସ୍ୟା॰)] ତାୱ କାକୋ ।
ପୁରିସଞ୍ଚ ଦିସ୍ୱାନ ସୁଖିଂ ଅରୋଗଂ, କାକଂ ପମୋକ୍ଖାମି ୟଥେୱ ସପ୍ପଂ ॥
କାକୋ ତଦା ଦେୱଦତ୍ତୋ ଅହୋସି, ମାରୋ ପନ କଣ୍ହସପ୍ପୋ ଅହୋସି ।
ଆନନ୍ଦଭଦ୍ଦୋ କକ୍କଟକୋ ଅହୋସି, ଅହଂ ତଦା ବ୍ରାହ୍ମଣୋ ହୋମି ସତ୍ଥାତି [ତତ୍ଥାତି (ସୀ॰ ପୀ॰)]॥
ସୁୱଣ୍ଣକକ୍କଟଜାତକଂ ଚତୁତ୍ଥଂ ।
୩୯୦. ମୟ୍ହକଜାତକଂ (୬-୨-୫)
ସକୁଣୋ ମୟ୍ହକୋ ନାମ, ଗିରିସାନୁଦରୀଚରୋ ।
ପକ୍କଂ ପିପ୍ଫଲିମାରୁୟ୍ହ, ମୟ୍ହଂ ମୟ୍ହନ୍ତି କନ୍ଦତି ॥
ତସ୍ସେୱଂ ୱିଲପନ୍ତସ୍ସ, ଦିଜସଙ୍ଘା ସମାଗତା ।
ଭୁତ୍ୱାନ ପିପ୍ଫଲିଂ ୟନ୍ତି, ୱିଲପତ୍ୱେୱ ସୋ ଦିଜୋ ॥
ଏୱମେୱ ଇଧେକଚ୍ଚୋ, ସଙ୍ଘରିତ୍ୱା ବହୁଂ ଧନଂ ।
ନେୱତ୍ତନୋ ନ ଞାତୀନଂ, ୟଥୋଧିଂ ପଟିପଜ୍ଜତି ॥
ନ ସୋ ଅଚ୍ଛାଦନଂ ଭତ୍ତଂ, ନ ମାଲଂ ନ ୱିଲେପନଂ ।
ଅନୁଭୋତି [ନାନୁଭୋତି (ସ୍ୟା॰ କ॰)] ସକିଂ କିଞ୍ଚି, ନ ସଙ୍ଗଣ୍ହାତି ଞାତକେ ॥
ତସ୍ସେୱଂ ୱିଲପନ୍ତସ୍ସ, ମୟ୍ହଂ ମୟ୍ହନ୍ତି ରକ୍ଖତୋ ।
ରାଜାନୋ ଅଥ ୱା ଚୋରା, ଦାୟଦା ୟେ ୱ [ୟେ ଚ (ସ୍ୟା॰ କ॰)] ଅପ୍ପିୟା ।
ଧନମାଦାୟ ଗଚ୍ଛନ୍ତି, ୱିଲପତ୍ୱେୱ ସୋ ନରୋ ॥
ଧୀରୋ [ଧୀରୋ ଚ (ସୀ॰)] ଭୋଗେ ଅଧିଗମ୍ମ, ସଙ୍ଗଣ୍ହାତି ଚ ଞାତକେ ।
ତେନ ସୋ କିତ୍ତିଂ ପପ୍ପୋତି, ପେଚ୍ଚ ସଗ୍ଗେ ପମୋଦତୀତି [ସଗ୍ଗେ ଚ ମୋଦତୀତି (ସୀ॰ ପୀ॰)]॥
ମୟ୍ହକଜାତକଂ ପଞ୍ଚମଂ ।
୩୯୧. ୱିଜ୍ଜାଧରଜାତକଂ (୬-୨-୬)
ଦୁବ୍ବଣ୍ଣରୂପଂ ତୁୱମରିୟୱଣ୍ଣୀ, ପୁରକ୍ଖତ୍ୱା [ପୁରକ୍ଖିତ୍ୱା (ସ୍ୟା॰ କ॰)] ପଞ୍ଜଲିକୋ ନମସ୍ସସି ।
ସେୟ୍ୟୋ ନୁ ତେ ସୋ ଉଦୱା [ଉଦାହୁ (ସ୍ୟା॰ କ॰)] ସରିକ୍ଖୋ, ନାମଂ ପରସ୍ସତ୍ତନୋ ଚାପି ବ୍ରୂହି ॥
ନ ନାମଗୋତ୍ତଂ ଗଣ୍ହନ୍ତି ରାଜ, ସମ୍ମଗ୍ଗତାନୁଜ୍ଜୁଗତାନ [ସମଗ୍ଗତାନୁଜ୍ଜୁଗତାନ (ସ୍ୟା॰), ସମୁଗ୍ଗତାନୁଜ୍ଜୁଗତାନ (କ॰)] ଦେୱା ।
ଅହଞ୍ଚ ତେ ନାମଧେୟ୍ୟଂ ୱଦାମି, ସକ୍କୋହମସ୍ମୀ ତିଦସାନମିନ୍ଦୋ ॥
ୟୋ ଦିସ୍ୱା ଭିକ୍ଖୁଂ ଚରଣୂପପନ୍ନଂ, ପୁରକ୍ଖତ୍ୱା ପଞ୍ଜଲିକୋ ନମସ୍ସତି ।
ପୁଚ୍ଛାମି ତଂ ଦେୱରାଜେତମତ୍ଥଂ, ଇତୋ ଚୁତୋ କିଂ ଲଭତେ ସୁଖଂ ସୋ ॥
ୟୋ ଦିସ୍ୱା ଭିକ୍ଖୁଂ ଚରଣୂପପନ୍ନଂ, ପୁରକ୍ଖତ୍ୱା ପଞ୍ଜଲିକୋ ନମସ୍ସତି ।
ଦିଟ୍ଠେୱ ଧମ୍ମେ ଲଭତେ ପସଂସଂ, ସଗ୍ଗଞ୍ଚ ସୋ ୟାତି ସରୀରଭେଦା ॥
ଲକ୍ଖୀ ୱତ ମେ ଉଦପାଦି ଅଜ୍ଜ, ୟଂ ୱାସୱଂ ଭୂତପତିଦ୍ଦସାମ ।
ଭିକ୍ଖୁଞ୍ଚ ଦିସ୍ୱାନ ତୁୱଞ୍ଚ ସକ୍କ, କାହାମି ପୁଞ୍ଞାନି ଅନପ୍ପକାନି ॥
ଅଦ୍ଧା ହୱେ ସେୱିତବ୍ବା ସପଞ୍ଞା, ବହୁସ୍ସୁତା ୟେ ବହୁଠାନଚିନ୍ତିନୋ ।
ଭିକ୍ଖୁଞ୍ଚ ଦିସ୍ୱାନ ମମଞ୍ଚ ରାଜ, କରୋହି ପୁଞ୍ଞାନି ଅନପ୍ପକାନି ॥
ଅକ୍କୋଧନୋ ନିଚ୍ଚପସନ୍ନଚିତ୍ତୋ, ସବ୍ବାତିଥୀୟାଚୟୋଗୋ ଭୱିତ୍ୱା ।
ନିହଚ୍ଚ ମାନଂ ଅଭିୱାଦୟିସ୍ସଂ, ସୁତ୍ୱାନ ଦେୱିନ୍ଦ ସୁଭାସିତାନୀତି ॥
ୱିଜ୍ଜାଧର [ଧଜୱିହେଠକ (ସୀ॰ ପୀ॰), ପବ୍ବଜିତୱିହେଠକ (ସ୍ୟା॰)] ଜାତକଂ ଛଟ୍ଠଂ ।
୩୯୨. ସିଙ୍ଘପୁପ୍ଫଜାତକଂ (୬-୨-୭)
ୟମେତଂ [ୟମେକଂ (ପୀ॰)] ୱାରିଜଂ ପୁପ୍ଫଂ, ଅଦିନ୍ନଂ ଉପସିଙ୍ଘସି ।
ଏକଙ୍ଗମେତଂ ଥେୟ୍ୟାନଂ, ଗନ୍ଧଥେନୋସି ମାରିସ ॥
ନ ହରାମି ନ ଭଞ୍ଜାମି, ଆରା ସିଙ୍ଘାମି ୱାରିଜଂ ।
ଅଥ କେନ ନୁ ୱଣ୍ଣେନ, ଗନ୍ଧଥେନୋତି ୱୁଚ୍ଚତି ॥
ୟୋୟଂ ଭିସାନି ଖଣତି, ପୁଣ୍ଡରୀକାନି ଭଞ୍ଜତି ।
ଏୱଂ ଆକିଣ୍ଣକମ୍ମନ୍ତୋ, କସ୍ମା ଏସୋ ନ ୱୁଚ୍ଚତି ॥
ଆକିଣ୍ଣଲୁଦ୍ଦୋ ପୁରିସୋ, ଧାତିଚେଲଂୱ ମକ୍ଖିତୋ ।
ତସ୍ମିଂ ମେ ୱଚନଂ ନତ୍ଥି, ତଞ୍ଚାରହାମି ୱତ୍ତୱେ ॥
ଅନଙ୍ଗଣସ୍ସ ପୋସସ୍ସ, ନିଚ୍ଚଂ ସୁଚିଗୱେସିନୋ ।
ୱାଲଗ୍ଗମତ୍ତଂ ପାପସ୍ସ, ଅବ୍ଭାମତ୍ତଂୱ ଖାୟତି ॥
ଅଦ୍ଧା ମଂ ୟକ୍ଖ ଜାନାସି, ଅଥୋ ମଂ ଅନୁକମ୍ପସି ।
ପୁନପି ୟକ୍ଖ ୱଜ୍ଜାସି, ୟଦା ପସ୍ସସି ଏଦିସଂ ॥
ନେୱ ତଂ ଉପଜୀୱାମି, ନପି ତେ ଭତକାମ୍ହସେ [ଭତକମ୍ହସେ (ସୀ॰ ପୀ॰), ଭତିକମ୍ହସେ (ସ୍ୟା॰)]।
ତ୍ୱମେୱ ଭିକ୍ଖୁ ଜାନେୟ୍ୟ, ୟେନ ଗଚ୍ଛେୟ୍ୟ ସୁଗ୍ଗତିନ୍ତି ॥
ସିଙ୍ଘପୁପ୍ଫ [ଭିସପୁପ୍ଫ (ସୀ॰ ପୀ॰), ଉପସିଙ୍ଘପୁପ୍ଫ (ସ୍ୟା॰)] ଜାତକଂ ସତ୍ତମଂ ।
୩୯୩. ୱିଘାସାଦଜାତକଂ (୬-୨-୮)
ସୁସୁଖଂ ୱତ ଜୀୱନ୍ତି, ୟେ ଜନା ୱିଘାସାଦିନୋ ।
ଦିଟ୍ଠେୱ ଧମ୍ମେ ପାସଂସା, ସମ୍ପରାୟେ ଚ ସୁଗ୍ଗତୀ ॥
ସୁକସ୍ସ [ସୁୱସ୍ସ (ସୀ॰ ସ୍ୟା॰ ପୀ॰)] ଭାସମାନସ୍ସ, ନ ନିସାମେଥ ପଣ୍ଡିତା ।
ଇଦଂ ସୁଣାଥ ସୋଦରିୟା, ଅମ୍ହେୱାୟଂ ପସଂସତି ॥
ନାହଂ ତୁମ୍ହେ ପସଂସାମି, କୁଣପାଦା ସୁଣାଥ ମେ ।
ଉଚ୍ଛିଟ୍ଠଭୋଜିନୋ [ଭୋଜନା (କ॰)] ତୁମ୍ହେ, ନ ତୁମ୍ହେ ୱିଘାସାଦିନୋ ॥
ସତ୍ତୱସ୍ସା ପବ୍ବଜିତା, ମେଜ୍ଝାରଞ୍ଞେ [ମଜ୍ଝେରଞ୍ଞେ (କ॰)] ସିଖଣ୍ଡିନୋ ।
ୱିଘାସେନେୱ ୟାପେନ୍ତା, ମୟଂ ଚେ ଭୋତୋ ଗାରୟ୍ହା ।
କେ ନୁ ଭୋତୋ ପସଂସିୟା ॥
ତୁମ୍ହେ ସୀହାନଂ ବ୍ୟଗ୍ଘାନଂ, ୱାଳାନଞ୍ଚାୱସିଟ୍ଠକଂ ।
ଉଚ୍ଛିଟ୍ଠେନେୱ ୟାପେନ୍ତା, ମଞ୍ଞିୱ୍ହୋ ୱିଘାସାଦିନୋ ॥
ୟେ ବ୍ରାହ୍ମଣସ୍ସ ସମଣସ୍ସ, ଅଞ୍ଞସ୍ସ ୱା [ଅଞ୍ଞସ୍ସ ଚ (ସୀ॰ ସ୍ୟା॰), ଅଞ୍ଞସ୍ସେୱ (ପୀ॰)] ୱନିବ୍ବିନୋ [ୱଣିବ୍ବିନୋ (ସୀ॰ ସ୍ୟା॰)]।
ଦତ୍ୱାୱ [ଦତ୍ୱାନ (ପୀ॰ କ॰)] ସେସଂ ଭୁଞ୍ଜନ୍ତି, ତେ ଜନା ୱିଘାସାଦିନୋତି ॥
ୱିଘାସାଦଜାତକଂ ଅଟ୍ଠମଂ ।
୩୯୪. ୱଟ୍ଟକଜାତକଂ (୬-୨-୯)
ପଣୀତଂ ଭୁଞ୍ଜସେ ଭତ୍ତଂ, ସପ୍ପିତେଲଞ୍ଚ ମାତୁଲ ।
ଅଥ କେନ ନୁ ୱଣ୍ଣେନ, କିସୋ ତ୍ୱମସି ୱାୟସ ॥
ଅମିତ୍ତମଜ୍ଝେ ୱସତୋ, ତେସୁ ଆମିସମେସତୋ ।
ନିଚ୍ଚଂ ଉବ୍ବିଗ୍ଗହଦୟସ୍ସ, କୁତୋ କାକସ୍ସ ଦଳ୍ହିୟଂ ॥
ନିଚ୍ଚଂ ଉବ୍ବେଗିନୋ [ଉବ୍ବିଗ୍ଗିନୋ (ସ୍ୟା॰ କ॰), ଉବ୍ବେଧିନୋ (ସୀ॰)] କାକା, ଧଙ୍କା ପାପେନ କମ୍ମୁନା ।
ଲଦ୍ଧୋ ପିଣ୍ଡୋ ନ ପୀଣେତି, କିସୋ ତେନସ୍ମି ୱଟ୍ଟକ ॥
ଲୂଖାନି ତିଣବୀଜାନି, ଅପ୍ପସ୍ନେହାନି ଭୁଞ୍ଜସି ।
ଅଥ କେନ ନୁ ୱଣ୍ଣେନ, ଥୂଲୋ ତ୍ୱମସି ୱଟ୍ଟକ ॥
ଅପ୍ପିଚ୍ଛା ଅପ୍ପଚିନ୍ତାୟ, ଅଦୂରଗମନେନ ଚ ।
ଲଦ୍ଧାଲଦ୍ଧେନ ୟାପେନ୍ତୋ, ଥୂଲୋ ତେନସ୍ମି ୱାୟସ ॥
ଅପ୍ପିଚ୍ଛସ୍ସ ହି ପୋସସ୍ସ, ଅପ୍ପଚିନ୍ତସୁଖସ୍ସ [ଅପ୍ପଚିନ୍ତିସୁଖସ୍ସ (ସୀ॰ ସ୍ୟା॰ ପୀ॰)] ଚ ।
ସୁସଙ୍ଗହିତମାନସ୍ସ [ସୁସଙ୍ଗହିତପମାଣସ୍ସ (ସୀ॰ ସ୍ୟା॰ ପୀ॰)], ୱୁତ୍ତୀ ସୁସମୁଦାନୟାତି ॥
ୱଟ୍ଟକଜାତକଂ ନୱମଂ ।
୩୯୫. ପାରାୱତଜାତକଂ (୬-୨-୧୦)
ଚିରସ୍ସଂ ୱତ ପସ୍ସାମି, ସହାୟଂ ମଣିଧାରିନଂ ।
ସୁକତା [ସୁକତାୟ (ସୀ॰ ପୀ॰)] ମସ୍ସୁକୁତ୍ତିୟା, ସୋଭତେ ୱତ ମେ ସଖା ॥
ପରୂଳ୍ହକଚ୍ଛନଖଲୋମୋ, ଅହଂ କମ୍ମେସୁ ବ୍ୟାୱଟୋ ।
ଚିରସ୍ସଂ ନ୍ହାପିତଂ ଲଦ୍ଧା, ଲୋମଂ ତଂ ଅଜ୍ଜଂ ହାରୟିଂ [ଅପହାରୟିଂ (ସୀ॰ ପୀ॰)]॥
ୟଂ ନୁ ଲୋମଂ ଅହାରେସି, ଦୁଲ୍ଲଭଂ ଲଦ୍ଧ କପ୍ପକଂ ।
ଅଥ କିଞ୍ଚରହି ତେ ସମ୍ମ, କଣ୍ଠେ କିଣିକିଣାୟତି [ଇଦଂ କଣ୍ଠେ କିଣାୟତି (କ॰), କଣ୍ଠେ କିଂନିକିଲାୟତି (ସ୍ୟା॰)]॥
ମନୁସ୍ସସୁଖୁମାଲାନଂ, ମଣି କଣ୍ଠେସୁ ଲମ୍ବତି ।
ତେସାହଂ ଅନୁସିକ୍ଖାମି, ମା ତ୍ୱଂ ମଞ୍ଞି ଦୱା କତଂ ॥
ସଚେପିମଂ ପିହୟସି, ମସ୍ସୁକୁତ୍ତିଂ ସୁକାରିତଂ ।
କାରୟିସ୍ସାମି ତେ ସମ୍ମ, ମଣିଞ୍ଚାପି ଦଦାମି ତେ ॥
ତ୍ୱଞ୍ଞେୱ ମଣିନା ଛନ୍ନୋ, ସୁକତାୟ ଚ ମସ୍ସୁୟା ।
ଆମନ୍ତ ଖୋ ତଂ ଗଚ୍ଛାମି, ପିୟଂ ମେ ତୱ ଦସ୍ସନନ୍ତି ॥
ପାରାୱତଜାତକଂ [କାକଜାତକଂ (ସୀ॰ ପୀ॰), ମଣିଜାତକଂ (ସ୍ୟା॰)] ଦସମଂ ।
ଖରପୁତ୍ତୱଗ୍ଗୋ [ସେନକୱଗ୍ଗୋ (ସୀ॰ ପୀ॰), ଖୁରପୁତ୍ତୱଗ୍ଗୋ (ସ୍ୟା॰), ସୂଚିୱଗ୍ଗୋ (କ॰)] ଦୁତିୟୋ ।
ତସ୍ସୁଦ୍ଦାନଂ –
ଅଥ ପସ୍ସ ସସୂଚି ଚ ତୁଣ୍ଡିଲକୋ, ମିଗ ମୟ୍ହକପଞ୍ଚମପକ୍ଖିୱରୋ ।
ଅଥ ପଞ୍ଜଲି ୱାରିଜ ମେଜ୍ଝ ପୁନ, ଅଥ ୱଟ୍ଟ କପୋତୱରେନ ଦସାତି ॥
ଅଥ ୱଗ୍ଗୁଦ୍ଦାନଂ –
ଅଥ ୱଗ୍ଗଂ ପକିତ୍ତିସ୍ସଂ, ଛନିପାତଂ ୱରୁତ୍ତମେ ।
ଅୱାରିୟା ଚ ଖରୋ ଚ [ସେନକ (ସୀ॰), ସୂଚି ଚ (ସ୍ୟା॰ କ॰)], ଦ୍ୱେ ଚ ୱୁତ୍ତା ସୁବ୍ୟଞ୍ଜନାତି ॥
ଛକ୍କନିପାତଂ ନିଟ୍ଠିତଂ ।
୭. ସତ୍ତକନିପାତୋ
୧. କୁକ୍କୁୱଗ୍ଗୋ
୩୯୬. କୁକ୍କୁଜାତକଂ (୭-୧-୧)
ଦିୟଡ୍ଢକୁକ୍କୂ ଉଦୟେନ କଣ୍ଣିକା, ୱିଦତ୍ଥିୟୋ ଅଟ୍ଠ ପରିକ୍ଖିପନ୍ତି ନଂ ।
ସା ସିଂସପା [ସସିଂସପା (ସୀ॰ ପୀ॰), ସା ସୀସପା (ସ୍ୟା॰), ୟା ସିଂସପା (କ॰ ସୀ॰ ନିୟ୍ୟ)] ସାରମୟା ଅଫେଗ୍ଗୁକା, କୁହିଂ ଠିତା ଉପ୍ପରିତୋ [ଉପରିତୋ (ସୀ॰ ସ୍ୟା॰ ପୀ॰)] ନ ଧଂସତି ॥
ୟା ତିଂସତି ସାରମୟା ଅନୁଜ୍ଜୁକା, ପରିକିରିୟ [ପକିରିୟା (କ॰)] ଗୋପାଣସିୟୋ ସମଂ ଠିତା [ସମଟ୍ଠିତା (ସୀ॰ ସ୍ୟା॰)]।
ତାହି ସୁସଙ୍ଗହିତା ବଲସା ପୀଳିତା [ତା ସଙ୍ଗହିତା ବଲସା ଚ ପୀଳିତା (ସୀ॰), ତାହି ସୁସଙ୍ଗହିତା ବଲସା ଚ ପୀଳିତା (ସ୍ୟା॰), ତାହି ସଙ୍ଗହୀତା ବଲସା ଚ ପୀଳିତା (ପୀ॰)], ସମଂ ଠିତା ଉପ୍ପରିତୋ ନ ଧଂସତି ॥
ଏୱମ୍ପି ମିତ୍ତେହି ଦଳ୍ହେହି ପଣ୍ଡିତୋ, ଅଭେଜ୍ଜରୂପେହି ସୁଚୀହି ମନ୍ତିଭି ।
ସୁସଙ୍ଗହୀତୋ ସିରିୟା ନ ଧଂସତି, ଗୋପାଣସୀ ଭାରୱହାୱ କଣ୍ଣିକା ॥
ଖରତ୍ତଚଂ ବେଲ୍ଲଂ ୟଥାପି ସତ୍ଥୱା, ଅନାମସନ୍ତୋପି କରୋତି ତିତ୍ତକଂ ।
ସମାହରଂ ସାଦୁଂ କରୋତି ପତ୍ଥିୱ, ଅସାଦୁଂ କୟିରା ତନୁବନ୍ଧମୁଦ୍ଧରଂ [ତନୁୱଟ୍ଟମୁଦ୍ଧରଂ (ସୀ॰ ପୀ॰)]॥
ଏୱମ୍ପି ଗାମନିଗମେସୁ ପଣ୍ଡିତୋ, ଅସାହସଂ ରାଜଧନାନି ସଙ୍ଘରଂ ।
ଧମ୍ମାନୁୱତ୍ତୀ ପଟିପଜ୍ଜମାନୋ, ସ ଫାତି କୟିରା ଅୱିହେଠୟଂ ପରଂ ॥
ଓଦାତମୂଲଂ ସୁଚିୱାରିସମ୍ଭୱଂ, ଜାତଂ ୟଥା ପୋକ୍ଖରଣୀସୁ ଅମ୍ବୁଜଂ ।
ପଦୁମଂ ୟଥା ଅଗ୍ଗିନିକାସିଫାଲିମଂ, ନ କଦ୍ଦମୋ ନ ରଜୋ ନ ୱାରି ଲିମ୍ପତି ॥
ଏୱମ୍ପି ୱୋହାରସୁଚିଂ ଅସାହସଂ, ୱିସୁଦ୍ଧକମ୍ମନ୍ତମପେତପାପକଂ ।
ନ ଲିମ୍ପତି କମ୍ମକିଲେସ ତାଦିସୋ, ଜାତଂ ୟଥା ପୋକ୍ଖରଣୀସୁ ଅମ୍ବୁଜନ୍ତି ॥
କୁକ୍କୁଜାତକଂ ପଠମଂ ।
୩୯୭. ମନୋଜଜାତକଂ (୭-୧-୨)
ୟଥା ଚାପୋ ନିନ୍ନମତି, ଜିୟା ଚାପି ନିକୂଜତି ।
ହଞ୍ଞତେ ନୂନ ମନୋଜୋ, ମିଗରାଜା ସଖା ମମ ॥
ହନ୍ଦ ଦାନି ୱନନ୍ତାନି, ପକ୍କମାମି ୟଥାସୁଖଂ ।
ନେତାଦିସା ସଖା ହୋନ୍ତି, ଲବ୍ଭା ମେ ଜୀୱତୋ ସଖା ॥
ନ ପାପଜନସଂସେୱୀ, ଅଚ୍ଚନ୍ତଂ ସୁଖମେଧତି ।
ମନୋଜଂ ପସ୍ସ ସେମାନଂ, ଗିରିୟସ୍ସାନୁସାସନୀ [ଅରିୟସ୍ସାନୁସାସନୀ (ସୀ॰ ସ୍ୟା॰ ପୀ॰)]॥
ନ ପାପସମ୍ପୱଙ୍କେନ, ମାତା ପୁତ୍ତେନ ନନ୍ଦତି ।
ମନୋଜଂ ପସ୍ସ ସେମାନଂ, ଅଚ୍ଛନ୍ନଂ [ସଚ୍ଛନ୍ନଂ (କ॰)] ସମ୍ହି ଲୋହିତେ ॥
ଏୱମାପଜ୍ଜତେ ପୋସୋ, ପାପିୟୋ ଚ ନିଗଚ୍ଛତି ।
ୟୋ ୱେ ହିତାନଂ ୱଚନଂ, ନ କରୋତି ଅତ୍ଥଦସ୍ସିନଂ ॥
ଏୱଞ୍ଚ ସୋ ହୋତି ତତୋ ଚ ପାପିୟୋ, ୟୋ ଉତ୍ତମୋ ଅଧମଜନୂପସେୱୀ ।
ପସ୍ସୁତ୍ତମଂ ଅଧମଜନୂପସେୱିତଂ [ସେୱିଂ (ସ୍ୟା॰)], ମିଗାଧିପଂ ସରୱରୱେଗନିଦ୍ଧୁତଂ ॥
ନିହୀୟତି ପୁରିସୋ ନିହୀନସେୱୀ, ନ ଚ ହାୟେଥ କଦାଚି ତୁଲ୍ୟସେୱୀ ।
ସେଟ୍ଠମୁପଗମଂ [ମୁପନମଂ (ସୀ॰ ପୀ॰ ଅ॰ ନି॰ ୩.୨୬)] ଉଦେତି ଖିପ୍ପଂ, ତସ୍ମାତ୍ତନା ଉତ୍ତରିତରଂ [ତସ୍ମା ଅତ୍ତନୋ ଉତ୍ତରିଂ (ସୀ॰ ପୀ॰), ତସ୍ମା ଅତ୍ତନୋ ଉତ୍ତରଂ (ସ୍ୟା॰)] ଭଜେଥାତି ॥
ମନୋଜଜାତକଂ ଦୁତିୟଂ ।
୩୯୮. ସୁତନୁଜାତକଂ (୭-୧-୩)
ରାଜା ତେ ଭତ୍ତଂ ପାହେସି, ସୁଚିଂ ମଂସୂପସେଚନଂ ।
ମଘଦେୱସ୍ମିଂ [ମଖାଦେୱସ୍ମିଂ (ସୀ॰ ପୀ॰), ମାଘଦେୱସ୍ମିଂ (କ॰)] ଅଧିୱତ୍ଥେ, ଏହି ନିକ୍ଖମ୍ମ ଭୁଞ୍ଜସ୍ସୁ ॥
ଏହି ମାଣୱ ଓରେନ, ଭିକ୍ଖମାଦାୟ ସୂପିତଂ ।
ତ୍ୱଞ୍ଚ ମାଣୱ ଭିକ୍ଖା ଚ [ଭକ୍ଖୋସି (ସ୍ୟା॰), ଭକ୍ଖାୱ (କ॰)], ଉଭୋ ଭକ୍ଖା ଭୱିସ୍ସଥ ॥
ଅପ୍ପକେନ ତୁୱଂ ୟକ୍ଖ, ଥୁଲ୍ଲମତ୍ଥଂ ଜହିସ୍ସସି ।
ଭିକ୍ଖଂ ତେ ନାହରିସ୍ସନ୍ତି, ଜନା ମରଣସଞ୍ଞିନୋ ॥
ଲଦ୍ଧାୟ ୟକ୍ଖା [ଲଦ୍ଧାୟଂ ୟକ୍ଖ (ସୀ॰ ସ୍ୟା॰ ପୀ॰)] ତୱ ନିଚ୍ଚଭିକ୍ଖଂ, ସୁଚିଂ ପଣୀତଂ ରସସା ଉପେତଂ ।
ଭିକ୍ଖଞ୍ଚ ତେ ଆହରିୟୋ ନରୋ ଇଧ, ସୁଦୁଲ୍ଲଭୋ ହେହିତି ଭକ୍ଖିତେ [ଖାଦିତେ (ସୀ॰ ସ୍ୟା॰ ପୀ॰)] ମୟି ॥
ମମେୱ [ମମେସ (ସୀ॰ ପୀ॰)] ସୁତନୋ ଅତ୍ଥୋ, ୟଥା ଭାସସି ମାଣୱ ।
ମୟା ତ୍ୱଂ ସମନୁଞ୍ଞାତୋ, ସୋତ୍ଥିଂ ପସ୍ସାହି ମାତରଂ ॥
ଖଗ୍ଗଂ ଛତ୍ତଞ୍ଚ ପାତିଞ୍ଚ, ଗଚ୍ଛମାଦାୟ [ଗଚ୍ଛେୱାଦାୟ (ସୀ॰ ସ୍ୟା॰ ପୀ॰)] ମାଣୱ ।
ସୋତ୍ଥିଂ ପସ୍ସତୁ ତେ ମାତା, ତ୍ୱଞ୍ଚ ପସ୍ସାହି ମାତରଂ ॥
ଏୱଂ ୟକ୍ଖ ସୁଖୀ ହୋହି, ସହ ସବ୍ବେହି ଞାତିଭି ।
ଧନଞ୍ଚ ମେ ଅଧିଗତଂ, ରଞ୍ଞୋ ଚ ୱଚନଂ କତନ୍ତି ॥
ସୁତନୁଜାତକଂ ତତିୟଂ ।
୩୯୯. ମାତୁପୋସକଗିଜ୍ଝଜାତକଂ (୭-୧-୪)
ତେ କଥଂ ନୁ କରିସ୍ସନ୍ତି, ୱୁଦ୍ଧା ଗିରିଦରୀସୟା ।
ଅହଂ ବଦ୍ଧୋସ୍ମି ପାସେନ, ନିଲୀୟସ୍ସ ୱସଂ ଗତୋ ॥
କିଂ ଗିଜ୍ଝ ପରିଦେୱସି, କା ନୁ ତେ ପରିଦେୱନା ।
ନ ମେ ସୁତୋ ୱା ଦିଟ୍ଠୋ ୱା, ଭାସନ୍ତୋ ମାନୁସିଂ ଦିଜୋ ॥
ଭରାମି ମାତାପିତରୋ, ୱୁଦ୍ଧେ ଗିରିଦରୀସୟେ ।
ତେ କଥଂ ନୁ କରିସ୍ସନ୍ତି, ଅହଂ ୱସଂ ଗତୋ ତୱ ॥
ୟଂ ନୁ ଗିଜ୍ଝୋ ୟୋଜନସତଂ, କୁଣପାନି ଅୱେକ୍ଖତି ।
କସ୍ମା ଜାଲଞ୍ଚ ପାସଞ୍ଚ, ଆସଜ୍ଜାପି ନ ବୁଜ୍ଝସି ॥
ୟଦା ପରାଭୱୋ ହୋତି, ପୋସୋ ଜୀୱିତସଙ୍ଖୟେ ।
ଅଥ ଜାଲଞ୍ଚ ପାସଞ୍ଚ, ଆସଜ୍ଜାପି ନ ବୁଜ୍ଝତି ॥
ଭରସ୍ସୁ ମାତାପିତରୋ, ୱୁଦ୍ଧେ ଗିରିଦରୀସୟେ ।
ମୟା ତ୍ୱଂ ସମନୁଞ୍ଞାତୋ, ସୋତ୍ଥିଂ ପସ୍ସାହି ଞାତକେ ॥
ଏୱଂ ଲୁଦ୍ଦକ ନନ୍ଦସ୍ସୁ, ସହ ସବ୍ବେହି ଞାତିଭି ।
ଭରିସ୍ସଂ ମାତାପିତରୋ, ୱୁଦ୍ଧେ ଗିରିଦରୀସୟେତି ॥
ମାତୁପୋସକଗିଜ୍ଝଜାତକଂ ଚତୁତ୍ଥଂ ।
୪୦୦. ଦବ୍ଭପୁପ୍ଫଜାତକଂ (୭-୧-୫)
ଅନୁତୀରଚାରୀ ଭଦ୍ଦନ୍ତେ, ସହାୟମନୁଧାୱ ମଂ ।
ମହା ମେ ଗହିତୋ [ରୋହିତୋ (କ॰)] ମଚ୍ଛୋ, ସୋ ମଂ ହରତି ୱେଗସା ॥
ଗମ୍ଭୀରଚାରୀ ଭଦ୍ଦନ୍ତେ, ଦଳ୍ହଂ ଗଣ୍ହାହି ଥାମସା ।
ଅହଂ ତଂ ଉଦ୍ଧରିସ୍ସାମି, ସୁପଣ୍ଣୋ ଉରଗାମିୱ [ଉରଗମ୍ମିୱ (ସୀ॰ ସ୍ୟା॰ ପୀ॰)]॥
ୱିୱାଦୋ ନୋ ସମୁପ୍ପନ୍ନୋ, ଦବ୍ଭପୁପ୍ଫ ସୁଣୋହି ମେ ।
ସମେହି ମେଧଗଂ [ମେଧକଂ (ପୀ॰)] ସମ୍ମ, ୱିୱାଦୋ ୱୂପସମ୍ମତଂ ॥
ଧମ୍ମଟ୍ଠୋହଂ ପୁରେ ଆସିଂ, ବହୂ ଅଡ୍ଡା ମେ ତୀରିତା [ବହୁଅଟ୍ଟଂ ମେ ତୀରିତଂ (ସୀ॰), ବହୁଅଟ୍ଟଂୱ ତୀରିତଂ (ସ୍ୟା॰), ବହୁ ଅତ୍ଥଂ ମେ ତୀରିତଂ (ପୀ॰)]।
ସମେମି ମେଧଗଂ ସମ୍ମ, ୱିୱାଦୋ ୱୂପସମ୍ମତଂ ॥
ଅନୁତୀରଚାରି ନଙ୍ଗୁଟ୍ଠଂ, ସୀସଂ ଗମ୍ଭୀରଚାରିନୋ ।
ଅଚ୍ଚାୟଂ [ଅଥାୟଂ (ସୀ॰ ପୀ॰)] ମଜ୍ଝିମୋ ଖଣ୍ଡୋ, ଧମ୍ମଟ୍ଠସ୍ସ ଭୱିସ୍ସତି ॥
ଚିରମ୍ପି ଭକ୍ଖୋ ଅଭୱିସ୍ସ, ସଚେ ନ ୱିୱଦେମସେ ।
ଅସୀସକଂ ଅନଙ୍ଗୁଟ୍ଠଂ, ସିଙ୍ଗାଲୋ ହରତି ରୋହିତଂ ॥
ୟଥାପି ରାଜା ନନ୍ଦେୟ୍ୟ, ରଜ୍ଜଂ ଲଦ୍ଧାନ ଖତ୍ତିୟୋ ।
ଏୱାହମଜ୍ଜ ନନ୍ଦାମି, ଦିସ୍ୱା ପୁଣ୍ଣମୁଖଂ ପତିଂ ॥
କଥଂ ନୁ ଥଲଜୋ ସନ୍ତୋ, ଉଦକେ ମଚ୍ଛଂ ପରାମସି ।
ପୁଟ୍ଠୋ ମେ ସମ୍ମ ଅକ୍ଖାହି, କଥଂ ଅଧିଗତଂ ତୟା ॥
ୱିୱାଦେନ କିସା ହୋନ୍ତି, ୱିୱାଦେନ ଧନକ୍ଖୟା ।
ଜୀନା ଉଦ୍ଦା ୱିୱାଦେନ, ଭୁଞ୍ଜ ମାୟାୱି ରୋହିତଂ ॥
ଏୱମେୱ ମନୁସ୍ସେସୁ, ୱିୱାଦୋ ୟତ୍ଥ ଜାୟତି ।
ଧମ୍ମଟ୍ଠଂ ପଟିଧାୱନ୍ତି, ସୋ ହି ନେସଂ ୱିନାୟକୋ ।
ଧନାପି ତତ୍ଥ ଜୀୟନ୍ତି, ରାଜକୋସୋ ପୱଡ୍ଢତୀତି [ଚ ୱଡ୍ଢତି (ପୀ॰)]॥
ଦବ୍ଭପୁପ୍ଫଜାତକଂ ପଞ୍ଚମଂ ।
୪୦୧. ପଣ୍ଣକଜାତକଂ (୭-୧-୬)
ପଣ୍ଣକଂ [ଦସଣ୍ଣକଂ (ସୀ॰ ସ୍ୟା॰ ପୀ॰)] ତିଖିଣଧାରଂ, ଅସିଂ ସମ୍ପନ୍ନପାୟିନଂ ।
ପରିସାୟଂ ପୁରିସୋ ଗିଲତି, କିଂ ଦୁକ୍କରତରଂ ତତୋ ।
ୟଦଞ୍ଞଂ ଦୁକ୍କରଂ ଠାନଂ, ତଂ ମେ ଅକ୍ଖାହି ପୁଚ୍ଛିତୋ ॥
ଗିଲେୟ୍ୟ ପୁରିସୋ ଲୋଭା, ଅସିଂ ସମ୍ପନ୍ନପାୟିନଂ ।
ୟୋ ଚ ୱଜ୍ଜା ଦଦାମୀତି, ତଂ ଦୁକ୍କରତରଂ ତତୋ ।
ସବ୍ବଞ୍ଞଂ ସୁକରଂ ଠାନଂ, ଏୱଂ ଜାନାହି ମଦ୍ଦୱ [ମାଗଧ (ସୀ॰ ସ୍ୟା॰ ପୀ॰)]॥
ବ୍ୟାକାସି ଆୟୁରୋ ପଞ୍ହଂ, ଅତ୍ଥଂ [ଅତ୍ଥ (ପୀ॰ ସୀ॰ ନିୟ୍ୟ)] ଧମ୍ମସ୍ସ କୋୱିଦୋ ।
ପୁକ୍କୁସଂ ଦାନି ପୁଚ୍ଛାମି, କିଂ ଦୁକ୍କରତରଂ ତତୋ ।
ୟଦଞ୍ଞଂ ଦୁକ୍କରଂ ଠାନଂ, ତଂ ମେ ଅକ୍ଖାହି ପୁଚ୍ଛିତୋ ॥
ନ ୱାଚମୁପଜୀୱନ୍ତି, ଅଫଲଂ ଗିରମୁଦୀରିତଂ ।
ୟୋ ଚ ଦତ୍ୱା ଅୱାକୟିରା, ତଂ ଦୁକ୍କରତରଂ ତତୋ ।
ସବ୍ବଞ୍ଞଂ ସୁକରଂ ଠାନଂ, ଏୱଂ ଜାନାହି ମଦ୍ଦୱ ॥
ବ୍ୟାକାସି ପୁକ୍କୁସୋ ପଞ୍ହଂ, ଅତ୍ଥଂ ଧମ୍ମସ୍ସ କୋୱିଦୋ ।
ସେନକଂ ଦାନି ପୁଚ୍ଛାମି, କିଂ ଦୁକ୍କରତରଂ ତତୋ ।
ୟଦଞ୍ଞଂ ଦୁକ୍କରଂ ଠାନଂ, ତଂ ମେ ଅକ୍ଖାହି ପୁଚ୍ଛିତୋ ॥
ଦଦେୟ୍ୟ ପୁରିସୋ ଦାନଂ, ଅପ୍ପଂ ୱା ୟଦି ୱା ବହୁଂ ।
ୟୋ ଚ ଦତ୍ୱା ନାନୁତପ୍ପେ [ତପେ (ସୀ॰ ପୀ॰)], ତଂ ଦୁକ୍କରତରଂ ତତୋ ।
ସବ୍ବଞ୍ଞଂ ସୁକରଂ ଠାନଂ, ଏୱଂ ଜାନାହି ମଦ୍ଦୱ ॥
ବ୍ୟାକାସି ଆୟୁରୋ ପଞ୍ହଂ, ଅଥୋ ପୁକ୍କୁସପୋରିସୋ ।
ସବ୍ବେ ପଞ୍ହେ ଅତିଭୋତି, ୟଥା ଭାସତି ସେନକୋତି ॥
ପଣ୍ଣକ [ଦସଣ୍ଣକ (ସୀ॰ ସ୍ୟା॰ ପୀ॰)] ଜାତକଂ ଛଟ୍ଠଂ ।
୪୦୨. ସତ୍ତୁଭସ୍ତଜାତକଂ (୭-୧-୭)
ୱିବ୍ଭନ୍ତଚିତ୍ତୋ କୁପିତିନ୍ଦ୍ରିୟୋସି, ନେତ୍ତେହି ତେ ୱାରିଗଣା ସୱନ୍ତି ।
କିଂ ତେ ନଟ୍ଠଂ କିଂ ପନ ପତ୍ଥୟାନୋ, ଇଧାଗମା ବ୍ରହ୍ମେ ତଦିଙ୍ଘ [ବ୍ରାହ୍ମଣ ଇଙ୍ଘ (ସୀ॰ ସ୍ୟା॰)] ବ୍ରୂହି ॥
ମିୟ୍ୟେଥ ଭରିୟା ୱଜତୋ ମମଜ୍ଜ, ଅଗଚ୍ଛତୋ ମରଣମାହ ୟକ୍ଖୋ ।
ଏତେନ ଦୁକ୍ଖେନ ପୱେଧିତୋସ୍ମି, ଅକ୍ଖାହି ମେ ସେନକ ଏତମତ୍ଥଂ ॥
ବହୂନି ଠାନାନି ୱିଚିନ୍ତୟିତ୍ୱା, ୟମେତ୍ଥ ୱକ୍ଖାମି ତଦେୱ ସଚ୍ଚଂ ।
ମଞ୍ଞାମି ତେ ବ୍ରାହ୍ମଣ ସତ୍ତୁଭସ୍ତଂ, ଅଜାନତୋ କଣ୍ହସପ୍ପୋ ପୱିଟ୍ଠୋ ॥
ଆଦାୟ ଦଣ୍ଡଂ ପରିସୁମ୍ଭ ଭସ୍ତଂ, ପସ୍ସେଳମୂଗଂ ଉରଗଂ ଦୁଜିୱ୍ହଂ [ଦିଜିୱ୍ହଂ (ସୀ॰ ପୀ॰)]।
ଛିନ୍ଦଜ୍ଜ କଙ୍ଖଂ ୱିଚିକିଚ୍ଛିତାନି, ଭୁଜଙ୍ଗମଂ ପସ୍ସ ପମୁଞ୍ଚ ଭସ୍ତଂ ॥
ସଂୱିଗ୍ଗରୂପୋ ପରିସାୟ ମଜ୍ଝେ, ସୋ ବ୍ରାହ୍ମଣୋ ସତ୍ତୁଭସ୍ତଂ ପମୁଞ୍ଚି ।
ଅଥ ନିକ୍ଖମି ଉରଗୋ ଉଗ୍ଗତେଜୋ, ଆସୀୱିସୋ ସପ୍ପୋ ଫଣଂ କରିତ୍ୱା ॥
ସୁଲଦ୍ଧଲାଭା ଜନକସ୍ସ ରଞ୍ଞୋ, ୟୋ ପସ୍ସତୀ ସେନକଂ ସାଧୁପଞ୍ଞଂ ।
ୱିୱଟ୍ଟଛଦ୍ଦୋ [ୱିୱତ୍ତଚ୍ଛଦ୍ଦୋ (ସୀ॰), ୱିୱଟ୍ଟଚ୍ଛଦୋ (ସ୍ୟା॰), ୱିୱଟ୍ଟଚ୍ଛଦ୍ଦା (ପୀ॰)] ନୁସି ସବ୍ବଦସ୍ସୀ, ଞାଣଂ ନୁ ତେ ବ୍ରାହ୍ମଣ ଭିଂସରୂପଂ ॥
ଇମାନି ମେ ସତ୍ତସତାନି ଅତ୍ଥି, ଗଣ୍ହାହି ସବ୍ବାନି ଦଦାମି ତୁୟ୍ହଂ ।
ତୟା ହି ମେ ଜୀୱିତମଜ୍ଜ ଲଦ୍ଧଂ, ଅଥୋପି ଭରିୟାୟ ମକାସି ସୋତ୍ଥିଂ ॥
ନ ପଣ୍ଡିତା ୱେତନମାଦିୟନ୍ତି, ଚିତ୍ରାହି ଗାଥାହି ସୁଭାସିତାହି ।
ଇତୋପି ତେ ବ୍ରହ୍ମେ ଦଦନ୍ତୁ ୱିତ୍ତଂ, ଆଦାୟ ତ୍ୱଂ ଗଚ୍ଛ ସକଂ ନିକେତନ୍ତି ॥
ସତ୍ତୁଭସ୍ତଜାତକଂ [ସେନକଜାତକଂ (ସ୍ୟା॰)] ସତ୍ତମଂ ।
୪୦୩. ଅଟ୍ଠିସେନକଜାତକଂ (୭-୧-୮)
ୟେମେ ଅହଂ ନ ଜାନାମି, ଅଟ୍ଠିସେନ ୱନିବ୍ବକେ ।
ତେ ମଂ ସଙ୍ଗମ୍ମ ୟାଚନ୍ତି, କସ୍ମା ମଂ ତ୍ୱଂ ନ ୟାଚସି ॥
ୟାଚକୋ ଅପ୍ପିୟୋ ହୋତି, ୟାଚଂ ଅଦଦମପ୍ପିୟୋ ।
ତସ୍ମାହଂ ତଂ ନ ୟାଚାମି, ମା ମେ ୱିଦେସ୍ସନା [ୱିଦ୍ଦେସନା (ସୀ॰ ପୀ॰)] ଅହୁ ॥
ୟୋ ୱେ ୟାଚନଜୀୱାନୋ, କାଲେ ୟାଚଂ ନ ୟାଚତି ।
ପରଞ୍ଚ ପୁଞ୍ଞା [ପୁଞ୍ଞଂ (ସ୍ୟା॰ କ॰)] ଧଂସେତି, ଅତ୍ତନାପି ନ ଜୀୱତି ॥
ୟୋ ଚ [ୟୋ ୱେ (କ॰)] ୟାଚନଜୀୱାନୋ, କାଲେ ୟାଚଞ୍ହି ୟାଚତି [ୟାଚଂପି ୟାଚତି (ସ୍ୟା॰), ୟାଚାନି ୟାଚତି (ପୀ॰), ୟାଚତି ୟାଚନଂ (ସୀ॰ ନିୟ୍ୟ), ୟାଚନଂ ୟାଚତି (କ॰)]।
ପରଞ୍ଚ ପୁଞ୍ଞଂ ଲବ୍ଭେତି, ଅତ୍ତନାପି ଚ ଜୀୱତି ॥
ନ ୱେ ଦେସ୍ସନ୍ତି [ନ ୱେ ଦୁସ୍ସନ୍ତି (ସ୍ୟା॰), ନ ୱେ ଦିସ୍ସନ୍ତି (ପୀ॰), ନ ୱିଦେସ୍ସନ୍ତି (କ॰ ଅଟ୍ଠ॰)] ସପ୍ପଞ୍ଞା, ଦିସ୍ୱା ୟାଚକମାଗତେ ।
ବ୍ରହ୍ମଚାରି ପିୟୋ ମେସି, ୱଦ ତ୍ୱଂ [ୱର ତଂ (ସୀ॰), ୱର ତ୍ୱଂ (ପୀ॰)] ଭଞ୍ଞମିଚ୍ଛସି [ୟଞ୍ଞମିଚ୍ଛସି ( ?)]॥
ନ ୱେ ୟାଚନ୍ତି ସପ୍ପଞ୍ଞା, ଧୀରୋ ଚ ୱେଦିତୁମରହତି ।
ଉଦ୍ଦିସ୍ସ ଅରିୟା ତିଟ୍ଠନ୍ତି, ଏସା ଅରିୟାନ ୟାଚନା ॥
ଦଦାମି ତେ ବ୍ରାହ୍ମଣ ରୋହିଣୀନଂ, ଗୱଂ ସହସ୍ସଂ ସହ ପୁଙ୍ଗୱେନ ।
ଅରିୟୋ ହି ଅରିୟସ୍ସ କଥଂ ନ ଦଜ୍ଜା, ସୁତ୍ୱାନ ଗାଥା ତୱ ଧମ୍ମୟୁତ୍ତାତି ॥
ଅଟ୍ଠିସେନକଜାତକଂ ଅଟ୍ଠମଂ ।
୪୦୪. କପିଜାତକଂ (୭-୧-୯)
ୟତ୍ଥ ୱେରୀ ନିୱସତି, ନ ୱସେ ତତ୍ଥ ପଣ୍ଡିତୋ ।
ଏକରତ୍ତଂ ଦିରତ୍ତଂ ୱା, ଦୁକ୍ଖଂ ୱସତି ୱେରିସୁ ॥
ଦିସୋ ୱେ ଲହୁଚିତ୍ତସ୍ସ, ପୋସସ୍ସାନୁୱିଧୀୟତୋ ।
ଏକସ୍ସ କପିନୋ ହେତୁ, ୟୂଥସ୍ସ ଅନୟୋ କତୋ ॥
ବାଲୋୱ [ଚ (ସୀ॰ ସ୍ୟା॰ ପୀ॰)] ପଣ୍ଡିତମାନୀ, ୟୂଥସ୍ସ ପରିହାରକୋ ।
ସଚିତ୍ତସ୍ସ ୱସଂ ଗନ୍ତ୍ୱା, ସୟେଥାୟଂ [ପସ୍ସେଥାୟଂ (କ॰)] ୟଥା କପି ॥
ନ ସାଧୁ ବଲୱା ବାଲୋ, ୟୂଥସ୍ସ ପରିହାରକୋ ।
ଅହିତୋ ଭୱତି ଞାତୀନଂ, ସକୁଣାନଂୱ ଚେତକୋ [ଚେଟକୋ (କ॰)]॥
ଧୀରୋୱ ବଲୱା ସାଧୁ, ୟୂଥସ୍ସ ପରିହାରକୋ ।
ହିତୋ ଭୱତି ଞାତୀନଂ, ତିଦସାନଂୱ ୱାସୱୋ ॥
ୟୋ ଚ ସୀଲଞ୍ଚ ପଞ୍ଞଞ୍ଚ, ସୁତଞ୍ଚତ୍ତନି ପସ୍ସତି ।
ଉଭିନ୍ନମତ୍ଥଂ ଚରତି, ଅତ୍ତନୋ ଚ ପରସ୍ସ ଚ ॥
ତସ୍ମା ତୁଲେୟ୍ୟ ମତ୍ତାନଂ, ସୀଲପଞ୍ଞାସୁତାମିୱ [ସୀଲଂ ପଞ୍ଞଂ ସୁତଂପିୱ (ସ୍ୟା॰)]।
ଗଣଂ ୱା ପରିହରେ ଧୀରୋ, ଏକୋ ୱାପି ପରିବ୍ବଜେତି ॥
କପିଜାତକଂ ନୱମଂ ।
୪୦୫. ବକଜାତକଂ (୭-୧-୧୦)
ଦ୍ୱାସତ୍ତତି ଗୋତମ [ଭୋ ଗୋତମ (କ॰)] ପୁଞ୍ଞକମ୍ମା, ୱସୱତ୍ତିନୋ ଜାତିଜରଂ ଅତୀତା ।
ଅୟମନ୍ତିମା ୱେଦଗୂ ବ୍ରହ୍ମପତ୍ତି [ବ୍ରହ୍ମୁପପତ୍ତି (ସ୍ୟା॰ କ॰)], ଅସ୍ମାଭିଜପ୍ପନ୍ତି ଜନା [ପଜା (କ॰)] ଅନେକା ॥
ଅପ୍ପଞ୍ହି ଏତଂ [ଅପ୍ପଞ୍ଚ ହେତଂ (ସ୍ୟା॰), ଅପ୍ପଂସି ଏତଂ (କ॰)] ନ ହି ଦୀଘମାୟୁ, ୟଂ ତ୍ୱଂ ବକ ମଞ୍ଞସି ଦୀଘମାୟୁଂ ।
ସତଂ ସହସ୍ସାନି [ସହସ୍ସାନଂ (ସୀ॰ ପୀ॰ ସଂ॰ ନି॰ ୧.୧୭୫), ସହସ୍ସାନ (ସ୍ୟା॰ କଂ॰)] ନିରବ୍ବୁଦାନଂ, ଆୟୁଂ ପଜାନାମି ତୱାହ ବ୍ରହ୍ମେ ॥
ଅନନ୍ତଦସ୍ସୀ ଭଗୱାହମସ୍ମି, ଜାତିଜ୍ଜରଂ ସୋକମୁପାତିୱତ୍ତୋ ।
କିଂ ମେ ପୁରାଣଂ ୱତସୀଲୱତ୍ତଂ [ସୀଲୱନ୍ତଂ (ପୀ॰ କ॰)], ଆଚିକ୍ଖ ମେ ତଂ ୟମହଂ ୱିଜଞ୍ଞଂ ॥
ୟଂ ତ୍ୱଂ ଅପାୟେସି ବହୂ ମନୁସ୍ସେ, ପିପାସିତେ ଘମ୍ମନି ସମ୍ପରେତେ ।
ତଂ ତେ ପୁରାଣଂ ୱତସୀଲୱତ୍ତଂ, ସୁତ୍ତପ୍ପବୁଦ୍ଧୋୱ ଅନୁସ୍ସରାମି ॥
ୟଂ ଏଣିକୂଲସ୍ମି ଜନଂ ଗହୀତଂ, ଅମୋଚୟୀ ଗୟ୍ହକ ନିୟ୍ୟମାନଂ ।
ତଂ ତେ ପୁରାଣଂ ୱତସୀଲୱତ୍ତଂ, ସୁତ୍ତପ୍ପବୁଦ୍ଧୋୱ ଅନୁସ୍ସରାମି ॥
ଗଙ୍ଗାୟ ସୋତସ୍ମିଂ ଗହୀତନାୱଂ, ଲୁଦ୍ଦେନ ନାଗେନ ମନୁସ୍ସକପ୍ପା ।
ଅମୋଚୟି ତ୍ୱଂ ବଲସା ପସୟ୍ହ, ତଂ ତେ ପୁରାଣଂ ୱତସୀଲୱତ୍ତଂ ।
ସୁତ୍ତପ୍ପବୁଦ୍ଧୋୱ ଅନୁସ୍ସରାମି ॥
କପ୍ପୋ ଚ ତେ ବଦ୍ଧଚରୋ [ପତ୍ଥଚରୋ (ସ୍ୟା॰), ପଟ୍ଠଚରୋ (କ॰)] ଅହୋସି, ସମ୍ବୁଦ୍ଧିମନ୍ତଂ [ସମ୍ବୁଦ୍ଧିୱନ୍ତଂ (ସ୍ୟା॰ ପୀ॰), ସମ୍ବୁଦ୍ଧୱନ୍ତଂ (କ॰)] ୱତିନଂ [ୱତିତଂ (ସ୍ୟା॰), ୱତିଦଂ (କ॰)] ଅମଞ୍ଞଂ ।
ତଂ ତେ ପୁରାଣଂ ୱତସୀଲୱତ୍ତଂ, ସୁତ୍ତପ୍ପବୁଦ୍ଧୋୱ ଅନୁସ୍ସରାମି ॥
ଅଦ୍ଧା ପଜାନାସି ମମେତମାୟୁଂ, ଅଞ୍ଞମ୍ପି ଜାନାସି ତଥା ହି ବୁଦ୍ଧୋ ।
ତଥା ହି ତାୟଂ [ତ୍ୟାୟଂ (ସଂ॰ ନି॰ ୧.୧୭୫)] ଜଲିତାନୁଭାୱୋ, ଓଭାସୟଂ ତିଟ୍ଠତି ବ୍ରହ୍ମଲୋକନ୍ତି ॥
ବକଜାତକଂ ଦସମଂ ।
କୁକ୍କୁୱଗ୍ଗୋ ପଠମୋ ।
ତସ୍ସୁଦ୍ଦାନଂ –
ୱରକଣ୍ଣିକ ଚାପୱରୋ ସୁତନୋ, ଅଥ ଗିଜ୍ଝ ସରୋହିତମଚ୍ଛୱରୋ ।
ପୁନ ପଣ୍ଣକ [ଦସଣ୍ଣକ (ସୀ॰ ସ୍ୟା॰ ପୀ॰)] ସେନକ ୟାଚନକୋ, ଅଥ ୱେରି ସବ୍ରହ୍ମବକେନ ଦସାତି ॥
୨. ଗନ୍ଧାରୱଗ୍ଗୋ
୪୦୬. ଗନ୍ଧାରଜାତକଂ (୭-୨-୧)
ହିତ୍ୱା ଗାମସହସ୍ସାନି, ପରିପୁଣ୍ଣାନି ସୋଳସ ।
କୋଟ୍ଠାଗାରାନି ଫୀତାନି, ସନ୍ନିଧିଂ ଦାନି କୁବ୍ବସି ॥
ହିତ୍ୱା ଗନ୍ଧାରୱିସୟଂ, ପହୂତଧନଧାରିୟଂ [ଧାନିୟଂ (ସୀ॰ ପୀ॰), ଧଞ୍ଞନ୍ତି ଅତ୍ଥୋ]।
ପସାସନତୋ [ପସାସନିତୋ (ସୀ॰ ସ୍ୟା॰), ପସାସନାତୋ (ପୀ॰)] ନିକ୍ଖନ୍ତୋ, ଇଧ ଦାନି ପସାସସି ॥
ଧମ୍ମଂ ଭଣାମି ୱେଦେହ, ଅଧମ୍ମୋ ମେ ନ ରୁଚ୍ଚତି ।
ଧମ୍ମଂ ମେ ଭଣମାନସ୍ସ, ନ ପାପମୁପଲିମ୍ପତି ॥
ୟେନ କେନଚି ୱଣ୍ଣେନ, ପରୋ ଲଭତି ରୁପ୍ପନଂ ।
ମହତ୍ଥିୟମ୍ପି ଚେ ୱାଚଂ, ନ ତଂ ଭାସେୟ୍ୟ ପଣ୍ଡିତୋ ॥
କାମଂ ରୁପ୍ପତୁ ୱା ମା ୱା, ଭୁସଂୱ ୱିକିରୀୟତୁ ।
ଧମ୍ମଂ ମେ ଭଣମାନସ୍ସ, ନ ପାପମୁପଲିମ୍ପତି ॥
ନୋ ଚେ ଅସ୍ସ ସକା ବୁଦ୍ଧି, ୱିନୟୋ ୱା ସୁସିକ୍ଖିତୋ ।
ୱନେ ଅନ୍ଧମହିଂସୋୱ [ଅନ୍ଧମହିସୋୱ (ସୀ॰ ପୀ॰)] ଚରେୟ୍ୟ ବହୁକୋ ଜନୋ ॥
ୟସ୍ମା ଚ ପନିଧେକଚ୍ଚେ, ଆଚେରମ୍ହି [ଆଚାରମ୍ହି (ସୀ॰ ପୀ॰)] ସୁସିକ୍ଖିତା ।
ତସ୍ମା ୱିନୀତୱିନୟା, ଚରନ୍ତି ସୁସମାହିତାତି ॥
ଗନ୍ଧାରଜାତକଂ ପଠମଂ ।
୪୦୭. ମହାକପିଜାତକଂ (୭-୨-୨)
ଅତ୍ତାନଂ ସଙ୍କମଂ କତ୍ୱା, ୟୋ ସୋତ୍ଥିଂ ସମତାରୟି ।
କିଂ ତ୍ୱଂ ତେସଂ କିମେ [କିମୋ (ସୀ॰ ପୀ॰), କିଂ ମେ (ସ୍ୟା॰)] ତୁୟ୍ହଂ, ହୋନ୍ତି ଏତେ [ହେତେ (ସ୍ୟା॰), ସୋ ତେ (କ॰)] ମହାକପି ॥
ରାଜାହଂ ଇସ୍ସରୋ ତେସଂ, ୟୂଥସ୍ସ ପରିହାରକୋ ।
ତେସଂ ସୋକପରେତାନଂ, ଭୀତାନଂ ତେ ଅରିନ୍ଦମ ॥
ଉଲ୍ଲଙ୍ଘୟିତ୍ୱା [ସ ଲଙ୍ଘୟିତ୍ୱା (ପୀ॰), ସୁଲଙ୍ଘୟିତ୍ୱା (କ॰)] ଅତ୍ତାନଂ, ୱିସ୍ସଟ୍ଠଧନୁନୋ ସତଂ ।
ତତୋ ଅପରପାଦେସୁ, ଦଳ୍ହଂ ବନ୍ଧଂ ଲତାଗୁଣଂ ॥
ଛିନ୍ନବ୍ଭମିୱ ୱାତେନ, ନୁଣ୍ଣୋ [ନୁନ୍ନୋ (ସୀ॰)] ରୁକ୍ଖଂ ଉପାଗମିଂ ।
ସୋହଂ ଅପ୍ପଭୱଂ ତତ୍ଥ, ସାଖଂ ହତ୍ଥେହି ଅଗ୍ଗହିଂ ॥
ତଂ ମଂ ୱିୟାୟତଂ ସନ୍ତଂ, ସାଖାୟ ଚ ଲତାୟ ଚ ।
ସମନୁକ୍କମନ୍ତା ପାଦେହି, ସୋତ୍ଥିଂ ସାଖାମିଗା ଗତା ॥
ତଂ ମଂ ନ ତପତେ ବନ୍ଧୋ, ମତୋ [ୱଧୋ (ସୀ॰ ସ୍ୟା॰ ପୀ॰)] ମେ ନ ତପେସ୍ସତି ।
ସୁଖମାହରିତଂ ତେସଂ, ୟେସଂ ରଜ୍ଜମକାରୟିଂ ॥
ଏସା ତେ ଉପମା ରାଜ, ତଂ ସୁଣୋହି ଅରିନ୍ଦମ [ଅତ୍ଥସନ୍ଦସ୍ସନୀ କତା (ପୀ॰)]।
ରଞ୍ଞା ରଟ୍ଠସ୍ସ ୟୋଗ୍ଗସ୍ସ, ବଲସ୍ସ ନିଗମସ୍ସ ଚ ।
ସବ୍ବେସଂ ସୁଖମେଟ୍ଠବ୍ବଂ, ଖତ୍ତିୟେନ ପଜାନତାତି ॥
ମହାକପିଜାତକଂ ଦୁତିୟଂ ।
୪୦୮. କୁମ୍ଭକାରଜାତକଂ (୭-୨-୩)
ଅମ୍ବାହମଦ୍ଦଂ ୱନମନ୍ତରସ୍ମିଂ, ନୀଲୋଭାସଂ ଫଲିତଂ [ଫଲିନଂ (ପୀ॰)] ସଂୱିରୂଳ୍ହଂ ।
ତମଦ୍ଦସଂ ଫଲହେତୁ ୱିଭଗ୍ଗଂ, ତଂ ଦିସ୍ୱା ଭିକ୍ଖାଚରିୟଂ ଚରାମି ॥
ସେଲଂ ସୁମଟ୍ଠଂ ନରୱୀରନିଟ୍ଠିତଂ [ନରୱିଦ୍ଦୁନିଟ୍ଠିତଂ (କ॰)], ନାରୀ ୟୁଗଂ ଧାରୟି ଅପ୍ପସଦ୍ଦଂ ।
ଦୁତିୟଞ୍ଚ ଆଗମ୍ମ ଅହୋସି ସଦ୍ଦୋ, ତଂ ଦିସ୍ୱା ଭିକ୍ଖାଚରିୟଂ ଚରାମି ॥
ଦିଜା ଦିଜଂ କୁଣପମାହରନ୍ତଂ, ଏକଂ ସମାନଂ ବହୁକା ସମେଚ୍ଚ ।
ଆହାରହେତୂ ପରିପାତୟିଂସୁ, ତଂ ଦିସ୍ୱା ଭିକ୍ଖାଚରିୟଂ ଚରାମି ॥
ଉସଭାହମଦ୍ଦଂ ୟୂଥସ୍ସ ମଜ୍ଝେ, ଚଲକ୍କକୁଂ ୱଣ୍ଣବଲୂପପନ୍ନଂ ।
ତମଦ୍ଦସଂ କାମହେତୁ ୱିତୁନ୍ନଂ, ତଂ ଦିସ୍ୱା ଭିକ୍ଖାଚରିୟଂ ଚରାମି ॥
କରଣ୍ଡକୋ [କରଣ୍ଡୁନାମ (ସୀ॰ ପୀ॰)] କଲିଙ୍ଗାନଂ, ଗନ୍ଧାରାନଞ୍ଚ ନଗ୍ଗଜି ।
ନିମିରାଜା ୱିଦେହାନଂ, ପଞ୍ଚାଲାନଞ୍ଚ ଦୁମ୍ମୁଖୋ ।
ଏତେ ରଟ୍ଠାନି ହିତ୍ୱାନ, ପବ୍ବଜିଂସୁ ଅକିଞ୍ଚନା ॥
ସବ୍ବେପିମେ ଦେୱସମା ସମାଗତା, ଅଗ୍ଗୀ ୟଥା ପଜ୍ଜଲିତୋ ତଥେୱିମେ ।
ଅହମ୍ପି ଏକୋ ଚରିସ୍ସାମି ଭଗ୍ଗୱି, ହିତ୍ୱାନ କାମାନି ୟଥୋଧିକାନି ॥
ଅୟମେୱ କାଲୋ ନ ହି ଅଞ୍ଞୋ ଅତ୍ଥି, ଅନୁସାସିତା ମେ ନ ଭୱେୟ୍ୟ ପଚ୍ଛା ।
ଅହମ୍ପି ଏକା ଚରିସ୍ସାମି ଭଗ୍ଗୱ, ସକୁଣୀୱ ମୁତ୍ତା ପୁରିସସ୍ସ ହତ୍ଥା ॥
ଆମଂ ପକ୍କଞ୍ଚ ଜାନନ୍ତି, ଅଥୋ ଲୋଣଂ ଅଲୋଣକଂ ।
ତମହଂ ଦିସ୍ୱାନ ପବ୍ବଜିଂ, ଚରେୱ ତ୍ୱଂ ଚରାମହନ୍ତି ॥
କୁମ୍ଭକାରଜାତକଂ ତତିୟଂ ।
୪୦୯. ଦଳ୍ହଧମ୍ମଜାତକଂ (୭-୨-୪)
ଅହଂ ଚେ ଦଳ୍ହଧମ୍ମସ୍ସ [ଦଳ୍ହଧମ୍ମାୟ (ପୀ॰)], ୱହନ୍ତି ନାଭିରାଧୟିଂ ।
ଧରନ୍ତୀ ଉରସି ସଲ୍ଲଂ, ୟୁଦ୍ଧେ ୱିକ୍କନ୍ତଚାରିନୀ ॥
ନୂନ ରାଜା ନ ଜାନାତି [ନ ହ ନୂନ ରାଜା ଜାନାତି (ସୀ॰ ପୀ॰)], ମମ ୱିକ୍କମପୋରିସଂ ।
ସଙ୍ଗାମେ ସୁକତନ୍ତାନି, ଦୂତୱିପ୍ପହିତାନି ଚ ॥
ସା ନୂନାହଂ ମରିସ୍ସାମି, ଅବନ୍ଧୁ ଅପରାୟିନୀ [ଅପରାୟିଣୀ (ସୀ॰), ଅପରାୟଣୀ ( ?)]।
ତଦା ହି [ତଥା ହି (ପୀ॰)] କୁମ୍ଭକାରସ୍ସ, ଦିନ୍ନା ଛକଣହାରିକା ॥
ୟାୱତାସୀସତୀ ପୋସୋ, ତାୱଦେୱ ପୱୀଣତି ।
ଅତ୍ଥାପାୟେ ଜହନ୍ତି ନଂ, ଓଟ୍ଠିବ୍ୟାଧିଂୱ ଖତ୍ତିୟୋ ॥
ୟୋ ପୁବ୍ବେ କତକଲ୍ୟାଣୋ, କତତ୍ଥୋ ନାୱବୁଜ୍ଝତି ।
ଅତ୍ଥା ତସ୍ସ ପଲୁଜ୍ଜନ୍ତି, ୟେ ହୋନ୍ତି ଅଭିପତ୍ଥିତା ॥
ୟୋ ପୁବ୍ବେ କତକଲ୍ୟାଣୋ, କତତ୍ଥୋ ମନୁବୁଜ୍ଝତି ।
ଅତ୍ଥା ତସ୍ସ ପୱଡ୍ଢନ୍ତି, ୟେ ହୋନ୍ତି ଅଭିପତ୍ଥିତା ॥
ତଂ ୱୋ ୱଦାମି ଭଦ୍ଦନ୍ତେ [ଭଦ୍ଦଂ ୱୋ (ସୀ॰ ସ୍ୟା॰ ପୀ॰)], ୟାୱନ୍ତେତ୍ଥ ସମାଗତା ।
ସବ୍ବେ କତଞ୍ଞୁନୋ ହୋଥ, ଚିରଂ ସଗ୍ଗମ୍ହି ଠସ୍ସଥାତି ॥
ଦଳ୍ହଧମ୍ମଜାତକଂ ଚତୁତ୍ଥଂ ।
୪୧୦. ସୋମଦତ୍ତଜାତକଂ (୭-୨-୫)
ୟୋ ମଂ ପୁରେ ପଚ୍ଚୁଡ୍ଡେତି [ପଚ୍ଚୁଦେତି (ସୀ॰ ସ୍ୟା॰ ପୀ॰), ପଚ୍ଚୁଟ୍ଠେତି (କ॰)], ଅରଞ୍ଞେ ଦୂରମାୟତୋ ।
ସୋ ନ ଦିସ୍ସତି ମାତଙ୍ଗୋ, ସୋମଦତ୍ତୋ କୁହିଂ ଗତୋ ॥
ଅୟଂ ୱା ସୋ ମତୋ ସେତି, ଅଲ୍ଲସିଙ୍ଗଂୱ ୱଚ୍ଛିତୋ [ଅଲ୍ଲପିଙ୍କୱ ଛିଜ୍ଜିତୋ (ସୀ॰ ପୀ॰), ଅଲ୍ଲପୀତଂୱ ୱିଚ୍ଛିତୋ (ସ୍ୟା॰)]।
ଭୁମ୍ୟା ନିପତିତୋ ସେତି, ଅମରା ୱତ କୁଞ୍ଜରୋ ॥
ଅନଗାରିୟୁପେତସ୍ସ, ୱିପ୍ପମୁତ୍ତସ୍ସ ତେ ସତୋ ।
ସମଣସ୍ସ ନ ତଂ ସାଧୁ, ୟଂ ପେତମନୁସୋଚସି ॥
ସଂୱାସେନ ହୱେ ସକ୍କ, ମନୁସ୍ସସ୍ସ ମିଗସ୍ସ ୱା ।
ହଦୟେ ଜାୟତେ ପେମଂ, ତଂ ନ ସକ୍କା ଅସୋଚିତୁଂ ॥
ମତଂ ମରିସ୍ସଂ ରୋଦନ୍ତି, ୟେ ରୁଦନ୍ତି ଲପନ୍ତି ଚ ।
ତସ୍ମା ତ୍ୱଂ ଇସି ମା ରୋଦି, ରୋଦିତଂ ମୋଘମାହୁ ସନ୍ତୋ ॥
କନ୍ଦିତେନ ହୱେ ବ୍ରହ୍ମେ, ମତୋ ପେତୋ ସମୁଟ୍ଠହେ ।
ସବ୍ବେ ସଙ୍ଗମ୍ମ ରୋଦାମ, ଅଞ୍ଞମଞ୍ଞସ୍ସ ଞାତକେ ॥
ଆଦିତ୍ତଂ ୱତ ମଂ ସନ୍ତଂ, ଘତସିତ୍ତଂୱ ପାୱକଂ ।
ୱାରିନା ୱିୟ ଓସିଞ୍ଚଂ, ସବ୍ବଂ ନିବ୍ବାପୟେ ଦରଂ ॥
ଅବ୍ବହୀ ୱତ ମେ ସଲ୍ଲଂ, ୟମାସି ହଦୟସ୍ସିତଂ ।
ୟୋ ମେ ସୋକପରେତସ୍ସ, ପୁତ୍ତସୋକଂ ଅପାନୁଦି ॥
ସୋହଂ ଅବ୍ବୂଳ୍ହସଲ୍ଲୋସ୍ମି, ୱୀତସୋକୋ ଅନାୱିଲୋ ।
ନ ସୋଚାମି ନ ରୋଦାମି, ତୱ ସୁତ୍ୱାନ ୱାସୱାତି ॥
ସୋମଦତ୍ତଜାତକଂ ପଞ୍ଚମଂ ।
୪୧୧. ସୁସୀମଜାତକଂ (୭-୨-୬)
କାଳାନି କେସାନି ପୁରେ ଅହେସୁଂ, ଜାତାନି ସୀସମ୍ହି ୟଥାପଦେସେ ।
ତାନଜ୍ଜ ସେତାନି ସୁସୀମ [ସୁସିମ (କ॰)] ଦିସ୍ୱା, ଧମ୍ମଂ ଚର ବ୍ରହ୍ମଚରିୟସ୍ସ କାଲୋ ॥
ମମେୱ ଦେୱ ପଲିତଂ ନ ତୁୟ୍ହଂ, ମମେୱ ସୀସଂ ମମ ଉତ୍ତମଙ୍ଗଂ ।
‘‘ଅତ୍ଥଂ କରିସ୍ସ’’ନ୍ତି ମୁସା ଅଭାଣିଂ [ଅଭାସିଂ (କ॰)], ଏକାପରାଧଂ ଖମ ରାଜସେଟ୍ଠ ॥
ଦହରୋ ତୁୱଂ ଦସ୍ସନିୟୋସି ରାଜ, ପଠମୁଗ୍ଗତୋ ହୋସି [ହୋହି (ସୀ॰), ହୋତି (କ॰)] ୟଥା କଳୀରୋ ।
ରଜ୍ଜଞ୍ଚ କାରେହି ମମଞ୍ଚ ପସ୍ସ, ମା କାଲିକଂ ଅନୁଧାୱୀ ଜନିନ୍ଦ ॥
ପସ୍ସାମି ୱୋହଂ ଦହରିଂ କୁମାରିଂ, ସାମଟ୍ଠପସ୍ସଂ ସୁତନୁଂ ସୁମଜ୍ଝଂ ।
କାଳପ୍ପୱାଳାୱ ପୱେଲ୍ଲମାନା, ପଲୋଭୟନ୍ତୀୱ [ସା ଲୋଭୟନ୍ତୀୱ (ପୀ॰)] ନରେସୁ ଗଚ୍ଛତି ॥
ତମେନ ପସ୍ସାମିପରେନ ନାରିଂ, ଆସୀତିକଂ ନାୱୁତିକଂ ୱ ଜଚ୍ଚା ।
ଦଣ୍ଡଂ ଗହେତ୍ୱାନ ପୱେଧମାନଂ, ଗୋପାନସୀଭୋଗ୍ଗସମଂ ଚରନ୍ତିଂ ॥
ସୋହଂ ତମେୱାନୁୱିଚିନ୍ତୟନ୍ତୋ, ଏକୋ ସୟାମି [ପସ୍ସାମି (କ॰)] ସୟନସ୍ସ ମଜ୍ଝେ ।
‘‘ଅହମ୍ପି ଏୱଂ’’ ଇତି ପେକ୍ଖମାନୋ, ନ ଗହେ ରମେ [ନ ଗେହେ ରମେ (ସୀ॰), ଗେହେ ନ ରମେ (ସ୍ୟା॰ କ॰)] ବ୍ରହ୍ମଚରିୟସ୍ସ କାଲୋ ॥
ରଜ୍ଜୁୱାଲମ୍ବନୀ ଚେସା, ୟା ଗେହେ ୱସତୋ ରତି ।
ଏୱମ୍ପି ଛେତ୍ୱାନ ୱଜନ୍ତି ଧୀରା, ଅନପେକ୍ଖିନୋ କାମସୁଖଂ ପହାୟାତି ॥
ସୁସୀମଜାତକଂ ଛଟ୍ଠଂ ।
୪୧୨. କୋଟସିମ୍ବଲିଜାତକଂ (୭-୨-୭)
ଅହଂ ଦସସତଂବ୍ୟାମଂ, ଉରଗମାଦାୟ ଆଗତୋ ।
ତଞ୍ଚ ମଞ୍ଚ ମହାକାୟଂ, ଧାରୟଂ ନପ୍ପୱେଧସି [ନ ପୱେଧୟି (କ॰)]॥
ଅଥିମଂ ଖୁଦ୍ଦକଂ ପକ୍ଖିଂ, ଅପ୍ପମଂସତରଂ ମୟା ।
ଧାରୟଂ ବ୍ୟଥସି [ବ୍ୟାଧସେ (ସୀ॰), ବ୍ୟଧସେ (ପୀ॰), ବ୍ୟାଧସି (କ॰)] ଭୀତା [ଭୀତୋ (ସୀ॰ ସ୍ୟା॰ ପୀ॰)], କମତ୍ଥଂ କୋଟସିମ୍ବଲି [କୋଟିସିମ୍ବଲି (ସୀ॰ ପୀ॰)]॥
ମଂସଭକ୍ଖୋ ତୁୱଂ ରାଜ, ଫଲଭକ୍ଖୋ ଅୟଂ ଦିଜୋ ।
ଅୟଂ ନିଗ୍ରୋଧବୀଜାନି, ପିଲକ୍ଖୁଦୁମ୍ବରାନି ଚ ।
ଅସ୍ସତ୍ଥାନି ଚ ଭକ୍ଖିତ୍ୱା, ଖନ୍ଧେ ମେ ଓହଦିସ୍ସତି ॥
ତେ ରୁକ୍ଖା ସଂୱିରୂହନ୍ତି, ମମ ପସ୍ସେ ନିୱାତଜା ।
ତେ ମଂ ପରିୟୋନନ୍ଧିସ୍ସନ୍ତି, ଅରୁକ୍ଖଂ ମଂ କରିସ୍ସରେ ॥
ସନ୍ତି ଅଞ୍ଞେପି ରୁକ୍ଖା ସେ, ମୂଲିନୋ ଖନ୍ଧିନୋ ଦୁମା ।
ଇମିନା ସକୁଣଜାତେନ, ବୀଜମାହରିତା ହତା ॥
ଅଜ୍ଝାରୂହାଭିୱଡ୍ଢନ୍ତି [ଅଜ୍ଝାରୂଳ୍ହାଭିୱଡ୍ଢନ୍ତି (ସୀ॰ ପୀ॰)], ବ୍ରହନ୍ତମ୍ପି ୱନପ୍ପତିଂ ।
ତସ୍ମା ରାଜ ପୱେଧାମି, ସମ୍ପସ୍ସଂନାଗତଂ ଭୟଂ ॥
ସଙ୍କେୟ୍ୟ ସଙ୍କିତବ୍ବାନି, ରକ୍ଖେୟ୍ୟାନାଗତଂ ଭୟଂ ।
ଅନାଗତଭୟା ଧୀରୋ, ଉଭୋ ଲୋକେ ଅୱେକ୍ଖତୀତି ॥
କୋଟସିମ୍ବଲିଜାତକଂ ସତ୍ତମଂ ।
୪୧୩. ଧୂମକାରିଜାତକଂ (୭-୨-୮)
ରାଜା ଅପୁଚ୍ଛି ୱିଧୁରଂ, ଧମ୍ମକାମୋ ୟୁଧିଟ୍ଠିଲୋ ।
ଅପି ବ୍ରାହ୍ମଣ ଜାନାସି, କୋ ଏକୋ ବହୁ ସୋଚତି ॥
ବ୍ରାହ୍ମଣୋ ଅଜୟୂଥେନ, ପହୂତେଧୋ [ବହୂତେଜୋ (ପୀ॰ କ॰), ବହୁତେନ୍ଦୋ (ସ୍ୟା॰)] ୱନେ ୱସଂ ।
ଧୂମଂ ଅକାସି ୱାସେଟ୍ଠୋ, ରତ୍ତିନ୍ଦିୱମତନ୍ଦିତୋ ॥
ତସ୍ସ ତଂ ଧୂମଗନ୍ଧେନ, ସରଭା ମକସଡ୍ଡିତା [ମକସଦ୍ଦିତା (ସୀ॰ ସ୍ୟା॰), ମକସଟ୍ଟିତା (ପୀ॰ କ॰)]।
ୱସ୍ସାୱାସଂ ଉପାଗଚ୍ଛୁଂ, ଧୂମକାରିସ୍ସ ସନ୍ତିକେ ॥
ସରଭେସୁ ମନଂ କତ୍ୱା, ଅଜା ସୋ ନାୱବୁଜ୍ଝଥ ।
ଆଗଚ୍ଛନ୍ତୀ ୱଜନ୍ତୀ ୱା [ଆଗଚ୍ଛନ୍ତି ୱଜନ୍ତି ୱା (ସ୍ୟା॰ ପୀ॰), ଆଗଚ୍ଛନ୍ତିଂ ୱଜନ୍ତିଂ ୱା (କ॰)], ତସ୍ସ ତା ୱିନସୁଂ [ୱିନସ୍ସୁଂ (ସୀ॰)] ଅଜା ॥
ସରଭା ସରଦେ କାଲେ, ପହୀନମକସେ ୱନେ ।
ପାୱିସୁଂ ଗିରିଦୁଗ୍ଗାନି, ନଦୀନଂ ପଭୱାନି ଚ ॥
ସରଭେ ଚ ଗତେ ଦିସ୍ୱା, ଅଜା ଚ ୱିଭୱଂ ଗତା [ଅଜେ ଚ ୱିଭୱଂ ଗତେ (କ॰)]।
କିସୋ ଚ ୱିୱଣ୍ଣୋ ଚାସି, ପଣ୍ଡୁରୋଗୀ ଚ ବ୍ରାହ୍ମଣୋ ॥
ଏୱଂ ୟୋ ସଂ ନିରଂକତ୍ୱା, ଆଗନ୍ତୁଂ କୁରୁତେ ପିୟଂ ।
ସୋ ଏକୋ ବହୁ ସୋଚତି, ଧୂମକାରୀୱ ବ୍ରାହ୍ମଣୋତି ॥
ଧୂମକାରିଜାତକଂ ଅଟ୍ଠମଂ ।
୪୧୪. ଜାଗରଜାତକଂ (୭-୨-୯)
କୋଧ ଜାଗରତଂ ସୁତ୍ତୋ, କୋଧ ସୁତ୍ତେସୁ ଜାଗରୋ ।
କୋ ମମେତଂ ୱିଜାନାତି, କୋ ତଂ ପଟିଭଣାତି ମେ ॥
ଅହଂ ଜାଗରତଂ ସୁତ୍ତୋ, ଅହଂ ସୁତ୍ତେସୁ ଜାଗରୋ ।
ଅହମେତଂ ୱିଜାନାମି, ଅହଂ ପଟିଭଣାମି ତେ ॥
କଥଂ ଜାଗରତଂ ସୁତ୍ତୋ, କଥଂ ସୁତ୍ତେସୁ ଜାଗରୋ ।
କଥଂ ଏତଂ ୱିଜାନାସି, କଥଂ ପଟିଭଣାସି ମେ ॥
ୟେ ଧମ୍ମଂ ନପ୍ପଜାନନ୍ତି, ସଂୟମୋତି ଦମୋତି ଚ ।
ତେସୁ ସୁପ୍ପମାନେସୁ, ଅହଂ ଜଗ୍ଗାମି ଦେୱତେ ॥
ୟେସଂ ରାଗୋ ଚ ଦୋସୋ ଚ, ଅୱିଜ୍ଜା ଚ ୱିରାଜିତା ।
ତେସୁ ଜାଗରମାନେସୁ, ଅହଂ ସୁତ୍ତୋସ୍ମି ଦେୱତେ ॥
ଏୱଂ ଜାଗରତଂ ସୁତ୍ତୋ, ଏୱଂ ସୁତ୍ତେସୁ ଜାଗରୋ ।
ଏୱମେତଂ ୱିଜାନାମି, ଏୱଂ ପଟିଭଣାମି ତେ ॥
ସାଧୁ ଜାଗରତଂ ସୁତ୍ତୋ, ସାଧୁ ସୁତ୍ତେସୁ ଜାଗରୋ ।
ସାଧୁମେତଂ ୱିଜାନାସି, ସାଧୁ ପଟିଭଣାସି ମେତି ॥
ଜାଗରଜାତକଂ ନୱମଂ ।
୪୧୫. କୁମ୍ମାସପିଣ୍ଡିଜାତକଂ (୭-୨-୧୦)
ନ କିରତ୍ଥି ଅନୋମଦସ୍ସିସୁ, ପାରିଚରିୟା ବୁଦ୍ଧେସୁ ଅପ୍ପିକା [ଅପ୍ପକା (କ॰)]।
ସୁକ୍ଖାୟ ଅଲୋଣିକାୟ ଚ, ପସ୍ସଫଲଂ କୁମ୍ମାସପିଣ୍ଡିୟା ॥
ହତ୍ଥିଗୱସ୍ସା ଚିମେ ବହୂ [ହତ୍ଥିଗୱାସ୍ସା ଚ ମେ ବହୂ (ସୀ॰), ହତ୍ଥୀ ଗୱାସ୍ସା ଚିମେ ବହୂ (ସ୍ୟା॰), ହତ୍ଥୀ ଗୱାସ୍ସା ଚ ମେ ବହୂ (ପୀ॰)], ଧନଧଞ୍ଞଂ ପଥୱୀ ଚ କେୱଲା ।
ନାରିୟୋ ଚିମା ଅଚ୍ଛରୂପମା, ପସ୍ସଫଲଂ କୁମ୍ମାସପିଣ୍ଡିୟା ॥
ଅଭିକ୍ଖଣଂ ରାଜକୁଞ୍ଜର, ଗାଥା ଭାସସି କୋସଲାଧିପ ।
ପୁଚ୍ଛାମି ତଂ ରଟ୍ଠୱଡ୍ଢନ, ବାଳ୍ହଂ ପୀତିମନୋ ପଭାସସି ॥
ଇମସ୍ମିଞ୍ଞେୱ ନଗରେ, କୁଲେ ଅଞ୍ଞତରେ ଅହୁଂ ।
ପରକମ୍ମକରୋ ଆସିଂ, ଭତକୋ ସୀଲସଂୱୁତୋ ॥
କମ୍ମାୟ ନିକ୍ଖମନ୍ତୋହଂ, ଚତୁରୋ ସମଣେଦ୍ଦସଂ ।
ଆଚାରସୀଲସମ୍ପନ୍ନେ, ସୀତିଭୂତେ ଅନାସୱେ ॥
ତେସୁ ଚିତ୍ତଂ ପସାଦେତ୍ୱା, ନିସୀଦେତ୍ୱା [ନିସାଦେତ୍ୱା ( ?)] ପଣ୍ଣସନ୍ଥତେ ।
ଅଦଂ ବୁଦ୍ଧାନ କୁମ୍ମାସଂ, ପସନ୍ନୋ ସେହି ପାଣିଭି ॥
ତସ୍ସ କମ୍ମସ୍ସ କୁସଲସ୍ସ, ଇଦଂ ମେ ଏଦିସଂ ଫଲଂ ।
ଅନୁଭୋମି ଇଦଂ ରଜ୍ଜଂ, ଫୀତଂ ଧରଣିମୁତ୍ତମଂ ॥
ଦଦଂ ଭୁଞ୍ଜ ମା ଚ ପମାଦୋ [ଦଦ ଭୁଞ୍ଜ ଚ ମା ଚ ପମାଦୋ (ସୀ॰ ପୀ॰)], ଚକ୍କଂ ୱତ୍ତୟ କୋସଲାଧିପ ।
ମା ରାଜ ଅଧମ୍ମିକୋ ଅହୁ, ଧମ୍ମଂ ପାଲୟ କୋସଲାଧିପ ॥
ସୋହଂ ତଦେୱ ପୁନପ୍ପୁନଂ, ୱଟୁମଂ ଆଚରିସ୍ସାମି ସୋଭନେ ।
ଅରିୟାଚରିତଂ ସୁକୋସଲେ, ଅରହନ୍ତୋ ମେ ମନାପାୱ ପସ୍ସିତୁଂ ॥
ଦେୱୀ ୱିୟ ଅଚ୍ଛରୂପମା, ମଜ୍ଝେ ନାରିଗଣସ୍ସ ସୋଭସି ।
କିଂ କମ୍ମମକାସି ଭଦ୍ଦକଂ, କେନାସି ୱଣ୍ଣୱତୀ ସୁକୋସଲେ ॥
ଅମ୍ବଟ୍ଠକୁଲସ୍ସ ଖତ୍ତିୟ, ଦାସ୍ୟାହଂ ପରପେସିୟା ଅହୁଂ ।
ସଞ୍ଞତା ଚ [ସଞ୍ଞତା (ସୀ॰ ପୀ॰)] ଧମ୍ମଜୀୱିନୀ, ସୀଲୱତୀ ଚ ଅପାପଦସ୍ସନା ॥
ଉଦ୍ଧଟଭତ୍ତଂ ଅହଂ ତଦା, ଚରମାନସ୍ସ ଅଦାସି ଭିକ୍ଖୁନୋ ।
ୱିତ୍ତା ସୁମନା ସୟଂ ଅହଂ, ତସ୍ସ କମ୍ମସ୍ସ ଫଲଂ ମମେଦିସନ୍ତି ॥
କୁମ୍ମାସପିଣ୍ଡିଜାତକଂ ଦସମଂ ।
୪୧୬. ପରନ୍ତପଜାତକଂ (୭-୨-୧୧)
ଆଗମିସ୍ସତି ମେ ପାପଂ, ଆଗମିସ୍ସତି ମେ ଭୟଂ ।
ତଦା ହି ଚଲିତା ସାଖା, ମନୁସ୍ସେନ ମିଗେନ ୱା ॥
ଭୀରୁୟା ନୂନ ମେ କାମୋ, ଅୱିଦୂରେ ୱସନ୍ତିୟା ।
କରିସ୍ସତି କିସଂ ପଣ୍ଡୁଂ, ସାୱ ସାଖା ପରନ୍ତପଂ ॥
ସୋଚୟିସ୍ସତି ମଂ କନ୍ତା, ଗାମେ ୱସମନିନ୍ଦିତା ।
କରିସ୍ସତି କିସଂ ପଣ୍ଡୁଂ, ସାୱ ସାଖା ପରନ୍ତପଂ ॥
ତୟା ମଂ ଅସିତାପଙ୍ଗି [ହସିତାପଙ୍ଗି (ସୀ॰ ସ୍ୟା॰ ପୀ॰)], ସିତାନି [ମିହିତାନି (ସୀ॰ ସ୍ୟା॰ ପୀ॰)] ଭଣିତାନି ଚ ।
କିସଂ ପଣ୍ଡୁଂ କରିସ୍ସନ୍ତି, ସାୱ ସାଖା ପରନ୍ତପଂ ॥
ଅଗମା ନୂନ ସୋ ସଦ୍ଦୋ, ଅସଂସି ନୂନ ସୋ ତୱ ।
ଅକ୍ଖାତଂ ନୂନ ତଂ ତେନ, ୟୋ ତଂ ସାଖମକମ୍ପୟି ॥
ଇଦଂ ଖୋ ତଂ ସମାଗମ୍ମ, ମମ ବାଲସ୍ସ ଚିନ୍ତିତଂ ।
ତଦା ହି ଚଲିତା ସାଖା, ମନୁସ୍ସେନ ମିଗେନ ୱା ॥
ତଥେୱ ତ୍ୱଂ ଅୱେଦେସି, ଅୱଞ୍ଚି [ଅୱଜ୍ଝି (କ॰)] ପିତରଂ ମମ ।
ହନ୍ତ୍ୱା ସାଖାହି ଛାଦେନ୍ତୋ, ଆଗମିସ୍ସତି ମେ [ତେ (ସ୍ୟା॰ କ॰)] ଭୟନ୍ତି ॥
ପରନ୍ତପଜାତକଂ ଏକାଦସମଂ ।
ଗନ୍ଧାରୱଗ୍ଗୋ ଦୁତିୟୋ ।
ତସ୍ସୁଦ୍ଦାନଂ –
ୱରଗାମ ମହାକପି ଭଗ୍ଗୱ ଚ, ଦଳ୍ହଧମ୍ମ ସକୁଞ୍ଜର କେସୱରୋ ।
ଉରଗୋ ୱିଧୁରୋ ପୁନ ଜାଗରତଂ, ଅଥ କୋସଲାଧିପ ପରନ୍ତପ ଚାତି ॥
ଅଥ ୱଗ୍ଗୁଦ୍ଦାନଂ –
ଅଥ ସତ୍ତନିପାତମ୍ହି, ୱଗ୍ଗଂ ମେ ଭଣତୋ ସୁଣ ।
କୁକ୍କୁ ଚ ପୁନ ଗନ୍ଧାରୋ, ଦ୍ୱେୱ ଗୁତ୍ତା ମହେସିନାତି ॥
ସତ୍ତକନିପାତଂ ନିଟ୍ଠିତଂ ।
୮. ଅଟ୍ଠକନିପାତୋ
୪୧୭. କଚ୍ଚାନିଜାତକଂ (୧)
ଓଦାତୱତ୍ଥା ସୁଚି ଅଲ୍ଲକେସା, କଚ୍ଚାନି କିଂ କୁମ୍ଭିମଧିସ୍ସୟିତ୍ୱା [କୁମ୍ଭିମପସ୍ସୟିତ୍ୱା (ପୀ॰)]।
ପିଟ୍ଠା ତିଲା ଧୋୱସି ତଣ୍ଡୁଲାନି, ତିଲୋଦନୋ ହେହିତି କିସ୍ସ ହେତୁ ॥
ନ ଖୋ ଅୟଂ ବ୍ରାହ୍ମଣ ଭୋଜନତ୍ଥା [ଭୋଜନତ୍ଥଂ (ସ୍ୟା॰)], ତିଲୋଦନୋ ହେହିତି ସାଧୁପକ୍କୋ ।
ଧମ୍ମୋ ମତୋ ତସ୍ସ ପହୁତ୍ତମଜ୍ଜ [ପହୂନମଜ୍ଜ (ସ୍ୟା॰), ପହୂତମଜ୍ଜ (ସୀ॰), ବହୂତମଜ୍ଜା (ପୀ॰)], ଅହଂ କରିସ୍ସାମି ସୁସାନମଜ୍ଝେ ॥
ଅନୁୱିଚ୍ଚ କଚ୍ଚାନି କରୋହି କିଚ୍ଚଂ, ଧମ୍ମୋ ମତୋ କୋ ନୁ ତୱେୱ [ତୱେତ (ସୀ॰ ସ୍ୟା॰ ପୀ॰)] ସଂସି ।
ସହସ୍ସନେତ୍ତୋ ଅତୁଲାନୁଭାୱୋ, ନ ମିୟ୍ୟତୀ ଧମ୍ମୱରୋ କଦାଚି ॥
ଦଳ୍ହପ୍ପମାଣଂ ମମ ଏତ୍ଥ ବ୍ରହ୍ମେ, ଧମ୍ମୋ ମତୋ ନତ୍ଥି ମମେତ୍ଥ କଙ୍ଖା ।
ୟେ ୟେୱ ଦାନି ପାପା ଭୱନ୍ତି, ତେ ତେୱ ଦାନି ସୁଖିତା ଭୱନ୍ତି ॥
ସୁଣିସା ହି ମୟ୍ହଂ ୱଞ୍ଝା ଅହୋସି, ସା ମଂ ୱଧିତ୍ୱାନ ୱିଜାୟି ପୁତ୍ତଂ ।
ସା ଦାନି ସବ୍ବସ୍ସ କୁଲସ୍ସ ଇସ୍ସରା, ଅହଂ ପନମ୍ହି [ୱସାମି (ସ୍ୟା॰)] ଅପୱିଦ୍ଧା ଏକିକା ॥
ଜୀୱାମି ୱୋହଂ ନ ମତୋହମସ୍ମି [ନାହଂ ମତୋସ୍ମି (ସୀ॰ ପୀ॰)], ତୱେୱ ଅତ୍ଥାୟ ଇଧାଗତୋସ୍ମି ।
ୟା ତଂ ୱଧିତ୍ୱାନ ୱିଜାୟି ପୁତ୍ତଂ, ସହାୱ ପୁତ୍ତେନ କରୋମି ଭସ୍ମଂ ॥
ଏୱଞ୍ଚ [ଏତଞ୍ଚ (ସୀ॰ ପୀ॰)] ତେ ରୁଚ୍ଚତି ଦେୱରାଜ, ମମେୱ ଅତ୍ଥାୟ ଇଧାଗତୋସି ।
ଅହଞ୍ଚ ପୁତ୍ତୋ ସୁଣିସା ଚ ନତ୍ତା, ସମ୍ମୋଦମାନା ଘରମାୱସେମ ॥
ଏୱଞ୍ଚ ତେ ରୁଚ୍ଚତି କାତିୟାନି, ହତାପି ସନ୍ତା ନ ଜହାସି ଧମ୍ମଂ ।
ତୁୱଞ୍ଚ [ତ୍ୱଞ୍ଚ (ପୀ॰ କ॰)] ପୁତ୍ତୋ ସୁଣିସା ଚ ନତ୍ତା, ସମ୍ମୋଦମାନା ଘରମାୱସେଥ ॥
ସା କାତିୟାନୀ ସୁଣିସାୟ ସଦ୍ଧିଂ, ସମ୍ମୋଦମାନା ଘରମାୱସିତ୍ଥ ।
ପୁତ୍ତୋ ଚ ନତ୍ତା ଚ ଉପଟ୍ଠହିଂସୁ, ଦେୱାନମିନ୍ଦେନ ଅଧିଗ୍ଗହୀତାତି ॥
କଚ୍ଚାନିଜାତକଂ ପଠମଂ ।
୪୧୮. ଅଟ୍ଠସଦ୍ଦଜାତକଂ (୨)
ଇଦଂ ପୁରେ ନିନ୍ନମାହୁ, ବହୁମଚ୍ଛଂ ମହୋଦକଂ ।
ଆୱାସୋ ବକରାଜସ୍ସ, ପେତ୍ତିକଂ ଭୱନଂ ମମ ।
ତ୍ୟଜ୍ଜ ଭେକେନ [ଭିଙ୍ଗେନ (କ॰)] ୟାପେମ, ଓକଂ ନ ୱଜହାମସେ [ଓକନ୍ତଂ ନ ଜହାମସେ (କ॰)]॥
କୋ ଦୁତିୟଂ ଅସୀଲିସ୍ସ, ବନ୍ଧରସ୍ସକ୍ଖି ଭେଚ୍ଛତି [ଭେଜ୍ଜତି (ସୀ॰ ସ୍ୟା॰ ପୀ॰), ଭିନ୍ଦତି (କ॰)]।
କୋ ମେ ପୁତ୍ତେ କୁଲାୱକଂ, ମଞ୍ଚ ସୋତ୍ଥିଂ କରିସ୍ସତି ॥
ସବ୍ବା ପରିକ୍ଖୟା ଫେଗ୍ଗୁ, ୟାୱ ତସ୍ସା ଗତୀ ଅହୁ ।
ଖୀଣଭକ୍ଖୋ ମହାରାଜ, ସାରେ ନ ରମତୀ ଘୁଣୋ ॥
ସା ନୂନାହଂ ଇତୋ ଗନ୍ତ୍ୱା, ରଞ୍ଞୋ ମୁତ୍ତା ନିୱେସନା ।
ଅତ୍ତାନଂ ରମୟିସ୍ସାମି, ଦୁମସାଖନିକେତିନୀ ॥
ସୋ ନୂନାହଂ ଇତୋ ଗନ୍ତ୍ୱା, ରଞ୍ଞୋ ମୁତ୍ତୋ ନିୱେସନା ।
ଅଗ୍ଗୋଦକାନି ପିସ୍ସାମି, ୟୂଥସ୍ସ ପୁରତୋ ୱଜଂ ॥
ତଂ ମଂ କାମେହି ସମ୍ମତ୍ତଂ, ରତ୍ତଂ କାମେସୁ ମୁଚ୍ଛିତଂ ।
ଆନୟୀ ଭରତୋ [ୱନତୋ (କ॰)] ଲୁଦ୍ଦୋ, ବାହିକୋ ଭଦ୍ଦମତ୍ଥୁ ତେ ॥
ଅନ୍ଧକାରତିମିସାୟଂ, ତୁଙ୍ଗେ ଉପରିପବ୍ବତେ ।
ସା ମଂ ସଣ୍ହେନ ମୁଦୁନା, ମା ପାଦଂ ଖଲି [ଖଣି (ସୀ॰ ସ୍ୟା॰ ପୀ॰)] ୟସ୍ମନି ॥
ଅସଂସୟଂ ଜାତିଖୟନ୍ତଦସ୍ସୀ, ନ ଗବ୍ଭସେୟ୍ୟଂ ପୁନରାୱଜିସ୍ସଂ ।
ଅୟମନ୍ତିମା ପଚ୍ଛିମା ଗବ୍ଭସେୟ୍ୟା [ଅୟଂ ହି ମେ ଅନ୍ତିମା ଗବ୍ଭସେୟ୍ୟା (ସୀ॰ ପୀ॰)], ଖୀଣୋ ମେ ସଂସାରୋ ପୁନବ୍ଭୱାୟାତି ॥
ଅଟ୍ଠସଦ୍ଦଜାତକଂ ଦୁତିୟଂ ।
୪୧୯. ସୁଲସାଜାତକଂ (୩)
ଇଦଂ ସୁୱଣ୍ଣକାୟୂରଂ, ମୁତ୍ତା ୱେଳୁରିୟା ବହୂ ।
ସବ୍ବଂ ହରସ୍ସୁ ଭଦ୍ଦନ୍ତେ, ମଞ୍ଚ ଦାସୀତି ସାୱୟ ॥
ଓରୋପୟସ୍ସୁ କଲ୍ୟାଣି, ମା ବାଳ୍ହଂ [ବହୁଂ (ସୀ॰ ସ୍ୟା॰ ପୀ॰)] ପରିଦେୱସି ।
ନ ଚାହଂ ଅଭିଜାନାମି, ଅହନ୍ତ୍ୱା ଧନମାଭତଂ ॥
ୟତୋ ସରାମି ଅତ୍ତାନଂ, ୟତୋ ପତ୍ତାସ୍ମି ୱିଞ୍ଞୁତଂ ।
ନ ଚାହଂ ଅଭିଜାନାମି, ଅଞ୍ଞଂ ପିୟତରଂ ତୟା ॥
ଏହି ତଂ ଉପଗୂହିସ୍ସଂ [ଉପଗୁୟ୍ହିସ୍ସଂ (କ॰)], କରିସ୍ସଞ୍ଚ ପଦକ୍ଖିଣଂ ।
ନ ହି ଦାନି ପୁନ ଅତ୍ଥି, ମମ ତୁୟ୍ହଞ୍ଚ ସଙ୍ଗମୋ ॥
ନ ହି ସବ୍ବେସୁ ଠାନେସୁ, ପୁରିସୋ ହୋତି ପଣ୍ଡିତୋ ।
ଇତ୍ଥୀପି ପଣ୍ଡିତା ହୋତି, ତତ୍ଥ ତତ୍ଥ ୱିଚକ୍ଖଣା ॥
ନ ହି ସବ୍ବେସୁ ଠାନେସୁ, ପୁରିସୋ ହୋତି ପଣ୍ଡିତୋ ।
ଇତ୍ଥୀପି ପଣ୍ଡିତା ହୋତି, ଲହୁଂ ଅତ୍ଥଂ ୱିଚିନ୍ତିକା [ଲହୁମତ୍ଥୱିଚିନ୍ତିକା (ସୀ॰ ପୀ॰)]॥
ଲହୁଞ୍ଚ ୱତ ଖିପ୍ପଞ୍ଚ, ନିକଟ୍ଠେ ସମଚେତୟି ।
ମିଗଂ ପୁଣ୍ଣାୟତେନେୱ [ପୁଣ୍ଣାୟତନେୱ (ସ୍ୟା॰)], ସୁଲସା ସତ୍ତୁକଂ ୱଧି ॥
ୟୋଧ ଉପ୍ପତିତଂ ଅତ୍ଥଂ, ନ ଖିପ୍ପମନୁବୁଜ୍ଝତି ।
ସୋ ହଞ୍ଞତି ମନ୍ଦମତି, ଚୋରୋୱ ଗିରିଗବ୍ଭରେ ॥
ୟୋ ଚ ଉପ୍ପତିତଂ ଅତ୍ଥଂ, ଖିପ୍ପମେୱ ନିବୋଧତି ।
ମୁଚ୍ଚତେ ସତ୍ତୁସମ୍ବାଧା, ସୁଲସା ସତ୍ତୁକାମିୱାତି ॥
ସୁଲସାଜାତକଂ ତତିୟଂ ।
୪୨୦. ସୁମଙ୍ଗଲଜାତକଂ (୪)
ଭୁସମ୍ହି [ଭୁସମ୍ପି (କ॰), ଭୁସଂ ହି (ସୀ॰ ନିୟ୍ୟ)] କୁଦ୍ଧୋତି ଅୱେକ୍ଖିୟାନ, ନ ତାୱ ଦଣ୍ଡଂ ପଣୟେୟ୍ୟ ଇସ୍ସରୋ ।
ଅଟ୍ଠାନସୋ ଅପ୍ପତିରୂପମତ୍ତନୋ, ପରସ୍ସ ଦୁକ୍ଖାନି ଭୁସଂ ଉଦୀରୟେ ॥
ୟତୋ ଚ ଜାନେୟ୍ୟ ପସାଦମତ୍ତନୋ, ଅତ୍ଥଂ ନିୟୁଞ୍ଜେୟ୍ୟ ପରସ୍ସ ଦୁକ୍କଟଂ ।
ତଦାୟମତ୍ଥୋତି ସୟଂ ଅୱେକ୍ଖିୟ, ଅଥସ୍ସ ଦଣ୍ଡଂ ସଦିସଂ ନିୱେସୟେ ॥
ନ ଚାପି ଝାପେତି ପରଂ ନ ଅତ୍ତନଂ, ଅମୁଚ୍ଛିତୋ ୟୋ ନୟତେ ନୟାନୟଂ ।
ୟୋ ଦଣ୍ଡଧାରୋ ଭୱତୀଧ ଇସ୍ସରୋ, ସ ୱଣ୍ଣଗୁତ୍ତୋ ସିରିୟା ନ ଧଂସତି ॥
ୟେ ଖତ୍ତିୟା ସେ ଅନିସମ୍ମକାରିନୋ, ପଣେନ୍ତି ଦଣ୍ଡଂ ସହସା ପମୁଚ୍ଛିତା ।
ଅୱଣ୍ଣସଂୟୁତା [ୟୁତ୍ତାୱ (କ॰)] ଜହନ୍ତି ଜୀୱିତଂ, ଇତୋ ୱିମୁତ୍ତାପି ଚ ୟନ୍ତି ଦୁଗ୍ଗତିଂ ॥
ଧମ୍ମେ ଚ ୟେ ଅରିୟପ୍ପୱେଦିତେ ରତା, ଅନୁତ୍ତରା ତେ ୱଚସା ମନସା କମ୍ମୁନା ଚ ।
ତେ ସନ୍ତିସୋରଚ୍ଚସମାଧିସଣ୍ଠିତା, ୱଜନ୍ତି ଲୋକଂ ଦୁଭୟଂ ତଥାୱିଧା ॥
ରାଜାହମସ୍ମି ନରପମଦାନମିସ୍ସରୋ, ସଚେପି କୁଜ୍ଝାମି ଠପେମି ଅତ୍ତନଂ ।
ନିସେଧୟନ୍ତୋ ଜନତଂ ତଥାୱିଧଂ, ପଣେମି ଦଣ୍ଡଂ ଅନୁକମ୍ପ ୟୋନିସୋ ॥
ସିରୀ ଚ ଲକ୍ଖୀ ଚ ତୱେୱ ଖତ୍ତିୟ, ଜନାଧିପ ମା ୱିଜହି କୁଦାଚନଂ ।
ଅକ୍କୋଧନୋ ନିଚ୍ଚପସନ୍ନଚିତ୍ତୋ, ଅନୀଘୋ ତୁୱଂ ୱସ୍ସସତାନି ପାଲୟ ॥
ଗୁଣେହି ଏତେହି ଉପେତ ଖତ୍ତିୟ, ଠିତମରିୟୱତ୍ତୀ [ୱତ୍ତି (ସୀ॰), ୱୁତ୍ତି (କ॰)] ସୁୱଚୋ ଅକୋଧନୋ ।
ସୁଖୀ ଅନୁପ୍ପୀଳ ପସାସମେଦିନିଂ [ଅନୁପ୍ପୀଳଂ ସହସମେଦନିଂ (କ॰)], ଇତୋ ୱିମୁତ୍ତୋପି ଚ ୟାହି ସୁଗ୍ଗତିଂ ॥
ଏୱଂ ସୁନୀତେନ [ସୁୱିନୀତେନ (ପୀ॰)] ସୁଭାସିତେନ, ଧମ୍ମେନ ଞାୟେନ ଉପାୟସୋ ନୟଂ ।
ନିବ୍ବାପୟେ ସଙ୍ଖୁଭିତଂ ମହାଜନଂ, ମହାୱ ମେଘୋ ସଲିଲେନ ମେଦିନିନ୍ତି [ମେଦନିନ୍ତି (ସ୍ୟା॰ କ॰)]॥
ସୁମଙ୍ଗଲଜାତକଂ ଚତୁତ୍ଥଂ ।
୪୨୧. ଗଙ୍ଗମାଲଜାତକଂ (୫)
ଅଙ୍ଗାରଜାତା ପଥୱୀ, କୁକ୍କୁଳାନୁଗତା ମହୀ ।
ଅଥ ଗାୟସି ୱତ୍ତାନି [ୱତ୍ଥାନି (କ॰)], ନ ତଂ ତପତି ଆତପୋ ॥
ଉଦ୍ଧଂ ତପତି ଆଦିଚ୍ଚୋ, ଅଧୋ ତପତି ୱାଲୁକା ।
ଅଥ ଗାୟସି ୱତ୍ତାନି [ୱତ୍ଥାନି (କ॰)], ନ ତଂ ତପତି ଆତପୋ ॥
ନ ମଂ ତପତି ଆତପୋ, ଆତପା [ଆତପ୍ପା (ସୀ॰ ସ୍ୟା॰ ପୀ॰)] ତପୟନ୍ତି ମଂ ।
ଅତ୍ଥା ହି ୱିୱିଧା ରାଜ, ତେ ତପନ୍ତି ନ ଆତପୋ ॥
ଅଦ୍ଦସଂ କାମ ତେ ମୂଲଂ, ସଙ୍କପ୍ପା କାମ ଜାୟସି ।
ନ ତଂ ସଙ୍କପ୍ପୟିସ୍ସାମି, ଏୱଂ କାମ ନ ହେହିସି ॥
ଅପ୍ପାପି କାମା ନ ଅଲଂ, ବହୂହିପି ନ ତପ୍ପତି ।
ଅହହା ବାଲଲପନା, ପରିୱଜ୍ଜେଥ [ପଟିୱିଜ୍ଝେଥ (ପୀ॰ ସୀ॰ ଅଟ୍ଠ॰)] ଜଗ୍ଗତୋ ॥
ଅପ୍ପସ୍ସ କମ୍ମସ୍ସ ଫଲଂ ମମେଦଂ, ଉଦୟୋ ଅଜ୍ଝାଗମା ମହତ୍ତପତ୍ତଂ ।
ସୁଲଦ୍ଧଲାଭୋ ୱତ ମାଣୱସ୍ସ, ୟୋ ପବ୍ବଜୀ କାମରାଗଂ ପହାୟ ॥
ତପସା ପଜହନ୍ତି ପାପକମ୍ମଂ, ତପସା ନ୍ହାପିତକୁମ୍ଭକାରଭାୱଂ ।
ତପସା ଅଭିଭୁୟ୍ୟ ଗଙ୍ଗମାଲ, ନାମେନାଲପସଜ୍ଜ ବ୍ରହ୍ମଦତ୍ତଂ ॥
ସନ୍ଦିଟ୍ଠିକମେୱ ‘‘ଅମ୍ମ’’ ପସ୍ସଥ, ଖନ୍ତୀସୋରଚ୍ଚସ୍ସ ଅୟଂ [ୟୋ (ସ୍ୟା॰ ପୀ॰ କ॰)] ୱିପାକୋ ।
ୟୋ [ସୋ (ସ୍ୟା॰ କ॰)] ସବ୍ବଜନସ୍ସ ୱନ୍ଦିତୋହୁ, ତଂ ୱନ୍ଦାମ ସରାଜିକା ସମଚ୍ଚା ॥
ମା କିଞ୍ଚି ଅୱଚୁତ୍ଥ ଗଙ୍ଗମାଲଂ, ମୁନିନଂ ମୋନପଥେସୁ ସିକ୍ଖମାନଂ ।
ଏସୋ ହି ଅତରି ଅଣ୍ଣୱଂ, ୟଂ ତରିତ୍ୱା ଚରନ୍ତି ୱୀତସୋକାତି ॥
ଗଙ୍ଗମାଲଜାତକଂ ପଞ୍ଚମଂ ।
୪୨୨. ଚେତିୟଜାତକଂ (୬)
ଧମ୍ମୋ ହୱେ ହତୋ ହନ୍ତି, ନାହତୋ ହନ୍ତି କିଞ୍ଚନଂ [କଞ୍ଚିନଂ (ପୀ॰)]।
ତସ୍ମା ହି ଧମ୍ମଂ ନ ହନେ, ମା ତ୍ୱଂ [ତଂ (ସ୍ୟା॰ ପୀ॰)] ଧମ୍ମୋ ହତୋ ହନି ॥
ଅଲିକଂ ଭାସମାନସ୍ସ, ଅପକ୍କମନ୍ତି ଦେୱତା ।
ପୂତିକଞ୍ଚ ମୁଖଂ ୱାତି, ସକଟ୍ଠାନା ଚ ଧଂସତି ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭୂମିୟଂ ତିଟ୍ଠ ଚେତିୟ ॥
ଅକାଲେ ୱସ୍ସତୀ ତସ୍ସ, କାଲେ ତସ୍ସ ନ ୱସ୍ସତି ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭୂମିଂ ପୱିସ ଚେତିୟ ॥
ଜିୱ୍ହା ତସ୍ସ ଦ୍ୱିଧା ହୋତି, ଉରଗସ୍ସେୱ ଦିସମ୍ପତି ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭିୟ୍ୟୋ ପୱିସ ଚେତିୟ ॥
ଜିୱ୍ହା ତସ୍ସ ନ ଭୱତି, ମଚ୍ଛସ୍ସେୱ ଦିସମ୍ପତି ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭିୟ୍ୟୋ ପୱିସ ଚେତିୟ ॥
ଥିୟୋୱ ତସ୍ସ ଜାୟନ୍ତି [ଥିୟୋ ତସ୍ସ ପଜାୟନ୍ତି (କ॰)], ନ ପୁମା ଜାୟରେ କୁଲେ ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭିୟ୍ୟୋ ପୱିସ ଚେତିୟ ॥
ପୁତ୍ତା ତସ୍ସ ନ ଭୱନ୍ତି, ପକ୍କମନ୍ତି ଦିସୋଦିସଂ ।
ୟୋ ଜାନଂ ପୁଚ୍ଛିତୋ ପଞ୍ହଂ, ଅଞ୍ଞଥା ନଂ ୱିୟାକରେ ॥
ସଚେ ହି ସଚ୍ଚଂ ଭଣସି, ହୋହି ରାଜ ୟଥା ପୁରେ ।
ମୁସା ଚେ ଭାସସେ ରାଜ, ଭିୟ୍ୟୋ ପୱିସ ଚେତିୟ ॥
ସ ରାଜା ଇସିନା ସତ୍ତୋ, ଅନ୍ତଲିକ୍ଖଚରୋ ପୁରେ ।
ପାୱେକ୍ଖି ପଥୱିଂ ଚେଚ୍ଚୋ, ହୀନତ୍ତୋ ପତ୍ୱ ପରିୟାୟଂ [ଅତ୍ତପରିୟାୟଂ (ସୀ॰ ସ୍ୟା॰), ପତ୍ତପରିୟାୟଂ (କ॰ ସୀ॰ ନିୟ୍ୟ)]॥
ତସ୍ମା ହି ଛନ୍ଦାଗମନଂ, ନପ୍ପସଂସନ୍ତି ପଣ୍ଡିତା ।
ଅଦୁଟ୍ଠଚିତ୍ତୋ ଭାସେୟ୍ୟ, ଗିରଂ ସଚ୍ଚୂପସଂହିତନ୍ତି ॥
ଚେତିୟଜାତକଂ ଛଟ୍ଠଂ ।
୪୨୩. ଇନ୍ଦ୍ରିୟଜାତକଂ (୭)
ୟୋ ଇନ୍ଦ୍ରିୟାନଂ କାମେନ, ୱସଂ ନାରଦ ଗଚ୍ଛତି ।
ସୋ ପରିଚ୍ଚଜ୍ଜୁଭୋ ଲୋକେ, ଜୀୱନ୍ତୋୱ ୱିସୁସ୍ସତି [ଜୀୱନ୍ତୋପିୱିସୁସ୍ସତି (ସ୍ୟା॰), ଜୀୱନ୍ତୋ ୱାପି ସୁସ୍ସତି (କ॰)]॥
ସୁଖସ୍ସାନନ୍ତରଂ ଦୁକ୍ଖଂ, ଦୁକ୍ଖସ୍ସାନନ୍ତରଂ ସୁଖଂ ।
ସୋସି [ସୋପି (ସ୍ୟା॰ ପୀ॰ କ॰)] ପତ୍ତୋ ସୁଖା [ସୁଖ (ସ୍ୟା॰), ସୁଖଂ (କ॰)] ଦୁକ୍ଖଂ, ପାଟିକଙ୍ଖ ୱରଂ ସୁଖଂ ॥
କିଚ୍ଛକାଲେ କିଚ୍ଛସହୋ, ୟୋ କିଚ୍ଛଂ ନାତିୱତ୍ତତି ।
ସ କିଚ୍ଛନ୍ତଂ ସୁଖଂ ଧୀରୋ, ୟୋଗଂ ସମଧିଗଚ୍ଛତି ॥
ନ ହେୱ କାମାନ କାମା, ନାନତ୍ଥା ନାତ୍ଥକାରଣା ।
ନ କତଞ୍ଚ ନିରଙ୍କତ୍ୱା, ଧମ୍ମା ଚୱିତୁମରହସି ॥
ଦକ୍ଖଂ ଗହପତୀ [ଗହପତଂ (ସୀ॰ ସ୍ୟା॰ ପୀ॰), ଗହୱତଂ ( ?)] ସାଧୁ, ସଂୱିଭଜ୍ଜଞ୍ଚ ଭୋଜନଂ ।
ଅହାସୋ ଅତ୍ଥଲାଭେସୁ, ଅତ୍ଥବ୍ୟାପତ୍ତି ଅବ୍ୟଥୋ ॥
ଏତ୍ତାୱତେତଂ ପଣ୍ଡିଚ୍ଚଂ, ଅପି ସୋ [ଅସିତୋ (ସୀ॰ ସ୍ୟା॰ ପୀ॰)] ଦୱିଲୋ [ଦେୱଲୋ (ସୀ॰ ପୀ॰)] ବ୍ରୱି ।
ନ ୟିତୋ କିଞ୍ଚି ପାପିୟୋ, ୟୋ ଇନ୍ଦ୍ରିୟାନଂ ୱସଂ ୱଜେ ॥
ଅମିତ୍ତାନଂୱ ହତ୍ଥତ୍ଥଂ, ସିୱି ପପ୍ପୋତି ମାମିୱ ।
କମ୍ମଂ ୱିଜ୍ଜଞ୍ଚ ଦକ୍ଖେୟ୍ୟଂ, ୱିୱାହଂ ସୀଲମଦ୍ଦୱଂ ।
ଏତେ ଚ ୟସେ ହାପେତ୍ୱା, ନିବ୍ବତ୍ତୋ ସେହି କମ୍ମେହି ॥
ସୋହଂ ସହସ୍ସଜୀନୋୱ ଅବନ୍ଧୁ ଅପରାୟଣୋ ।
ଅରିୟଧମ୍ମା ଅପକ୍କନ୍ତୋ, ୟଥା ପେତୋ ତଥେୱହଂ ॥
ସୁଖକାମେ ଦୁକ୍ଖାପେତ୍ୱା, ଆପନ୍ନୋସ୍ମି ପଦଂ ଇମଂ ।
ସୋ ସୁଖଂ ନାଧିଗଚ୍ଛାମି, ଠିତୋ [ଚିତୋ (ପୀ॰ ସୀ॰ ଅଟ୍ଠ॰)] ଭାଣୁମତାମିୱାତି ॥
ଇନ୍ଦ୍ରିୟଜାତକଂ ସତ୍ତମଂ ।
୪୨୪. ଆଦିତ୍ତଜାତକଂ (୮)
ଆଦିତ୍ତସ୍ମିଂ ଅଗାରସ୍ମିଂ, ୟଂ ନୀହରତି ଭାଜନଂ ।
ତଂ ତସ୍ସ ହୋତି ଅତ୍ଥାୟ, ନୋ ଚ ୟଂ ତତ୍ଥ ଡୟ୍ହତି ॥
ଏୱାମାଦୀପିତୋ ଲୋକୋ, ଜରାୟ ମରଣେନ ଚ ।
ନୀହରେଥେୱ ଦାନେନ, ଦିନ୍ନଂ ହୋତି ସୁନୀହତଂ [ସୁନୀଭତଂ (ସୀ॰ ସ୍ୟା॰ ପୀ॰), ସୁନିବ୍ଭତଂ (କ॰)]॥
ୟୋ ଧମ୍ମଲଦ୍ଧସ୍ସ ଦଦାତି ଦାନଂ, ଉଟ୍ଠାନୱୀରିୟାଧିଗତସ୍ସ ଜନ୍ତୁ ।
ଅତିକ୍କମ୍ମ ସୋ ୱେତରଣିଂ [ୱେତ୍ତରଣିଂ (କ॰)] ୟମସ୍ସ, ଦିବ୍ବାନି ଠାନାନି ଉପେତି ମଚ୍ଚୋ ॥
ଦାନଞ୍ଚ ୟୁଦ୍ଧଞ୍ଚ ସମାନମାହୁ, ଅପ୍ପାପି ସନ୍ତା ବହୁକେ ଜିନନ୍ତି ।
ଅପ୍ପମ୍ପି ଚେ ସଦ୍ଦହାନୋ ଦଦାତି, ତେନେୱ ସୋ ହୋତି ସୁଖୀ ପରତ୍ଥ ॥
ୱିଚେୟ୍ୟ ଦାନଂ ସୁଗତପ୍ପସତ୍ଥଂ, ୟେ ଦକ୍ଖିଣେୟ୍ୟା ଇଧ ଜୀୱଲୋକେ ।
ଏତେସୁ ଦିନ୍ନାନି ମହପ୍ଫଲାନି, ବୀଜାନି ୱୁତ୍ତାନି ୟଥା ସୁଖେତ୍ତେ ॥
ୟୋ ପାଣଭୂତାନି ଅହେଠୟଂ ଚରଂ, ପରୂପୱାଦା ନ କରୋତି ପାପଂ ।
ଭୀରୁଂ ପସଂସନ୍ତି ନ ତତ୍ଥ ସୂରଂ, ଭୟା ହି ସନ୍ତୋ ନ କରୋନ୍ତି ପାପଂ ॥
ହୀନେନ ବ୍ରହ୍ମଚରିୟେନ, ଖତ୍ତିୟେ ଉପପଜ୍ଜତି ।
ମଜ୍ଝିମେନ ଚ ଦେୱତ୍ତଂ, ଉତ୍ତମେନ ୱିସୁଜ୍ଝତି ॥
ଅଦ୍ଧା ହି ଦାନଂ ବହୁଧା ପସତ୍ଥଂ, ଦାନା ଚ ଖୋ ଧମ୍ମପଦଂୱ ସେୟ୍ୟୋ ।
ପୁବ୍ବେୱ ହି ପୁବ୍ବତରେୱ ସନ୍ତୋ [ପୁବ୍ବେ ଚ ହି ପୁବ୍ବତରେ ଚ ସନ୍ତୋ (ସଂ॰ ନି॰ ୧.୩୩)], ନିବ୍ବାନମେୱଜ୍ଝଗମୁଂ ସପଞ୍ଞାତି ॥
ଆଦିତ୍ତଜାତକଂ ଅଟ୍ଠମଂ ।
୪୨୫. ଅଟ୍ଠାନଜାତକଂ (୯)
ଗଙ୍ଗା କୁମୁଦିନୀ ସନ୍ତା, ସଙ୍ଖୱଣ୍ଣା ଚ କୋକିଲା ।
ଜମ୍ବୁ ତାଲଫଲଂ ଦଜ୍ଜା, ଅଥ ନୂନ ତଦା ସିୟା ॥
ୟଦା କଚ୍ଛପଲୋମାନଂ, ପାୱାରୋ ତିୱିଧୋ ସିୟା ।
ହେମନ୍ତିକଂ ପାୱୁରଣଂ [ପାପୁରଣଂ (ସୀ॰ ସ୍ୟା॰ ପୀ॰)], ଅଥ ନୂନ ତଦା ସିୟା ॥
ୟଦା ମକସପାଦାନଂ [ଦାଠାନଂ (ସୀ॰ ପୀ॰)], ଅଟ୍ଟାଲୋ ସୁକତୋ ସିୟା ।
ଦଳ୍ହୋ ଚ ଅୱିକମ୍ପୀ ଚ [ଅପ୍ପକମ୍ପୀ ଚ (ସୀ॰ ପୀ॰)], ଅଥ ନୂନ ତଦା ସିୟା ॥
ୟଦା ସସୱିସାଣାନଂ, ନିସ୍ସେଣୀ ସୁକତା ସିୟା ।
ସଗ୍ଗସ୍ସାରୋହଣତ୍ଥାୟ, ଅଥ ନୂନ ତଦା ସିୟା ॥
ୟଦା ନିସ୍ସେଣିମାରୁୟ୍ହ, ଚନ୍ଦଂ ଖାଦେୟ୍ୟୁ ମୂସିକା ।
ରାହୁଞ୍ଚ ପରିପାତେୟ୍ୟୁଂ [ପରିବାହେୟ୍ୟୁଂ (ସ୍ୟା॰)], ଅଥ ନୂନ ତଦା ସିୟା ॥
ୟଦା ସୁରାଘଟଂ ପିତ୍ୱା, ମକ୍ଖିକା ଗଣଚାରିଣୀ ।
ଅଙ୍ଗାରେ ୱାସଂ କପ୍ପେୟ୍ୟୁଂ, ଅଥ ନୂନ ତଦା ସିୟା ॥
ୟଦା ବିମ୍ବୋଟ୍ଠସମ୍ପନ୍ନୋ, ଗଦ୍ରଭୋ ସୁମୁଖୋ ସିୟା ।
କୁସଲୋ ନଚ୍ଚଗୀତସ୍ସ, ଅଥ ନୂନ ତଦା ସିୟା ॥
ୟଦା କାକା ଉଲୂକା ଚ, ମନ୍ତୟେୟ୍ୟୁଂ ରହୋଗତା ।
ଅଞ୍ଞମଞ୍ଞଂ ପିହୟେୟ୍ୟୁଂ, ଅଥ ନୂନ ତଦା ସିୟା ॥
ୟଦା ମୁଳାଲ [ପୁଲସ (ସୀ॰ ପୀ॰), ପୁଲାସ (ସ୍ୟା॰)] ପତ୍ତାନଂ, ଛତ୍ତଂ ଥିରତରଂ ସିୟା ।
ୱସ୍ସସ୍ସ ପଟିଘାତାୟ, ଅଥ ନୂନ ତଦା ସିୟା ॥
ୟଦା କୁଲକୋ [କୁଲୁଙ୍କୋ (ସୀ॰ ପୀ॰), କୁଲୁକୋ (ସ୍ୟା॰)] ସକୁଣୋ, ପବ୍ବତଂ ଗନ୍ଧମାଦନଂ ।
ତୁଣ୍ଡେନାଦାୟ ଗଚ୍ଛେୟ୍ୟ, ଅଥ ନୂନ ତଦା ସିୟା ॥
ୟଦା ସାମୁଦ୍ଦିକଂ ନାୱଂ, ସ-ୟନ୍ତଂ ସ-ୱଟାକରଂ [ସପଟାକାରଂ (କ॰)]।
ଚେଟୋ ଆଦାୟ ଗଚ୍ଛେୟ୍ୟ, ଅଥ ନୂନ ତଦା ସିୟାତି ॥
ଅଟ୍ଠାନଜାତକଂ ନୱମଂ ।
୪୨୬. ଦୀପିଜାତକଂ (୧୦)
ଖମନୀୟଂ ୟାପନୀୟଂ, କଚ୍ଚି ମାତୁଲ ତେ ସୁଖଂ ।
ସୁଖଂ ତେ ଅମ୍ମା ଅୱଚ, ସୁଖକାମାୱ [ସୁଖକାମା ହି (ସୀ॰ ସ୍ୟା॰ ପୀ॰)] ତେ ମୟଂ ॥
ନଙ୍ଗୁଟ୍ଠଂ ମେ ଅୱକ୍କମ୍ମ [ଅପକ୍କମ୍ମ (କ॰)], ହେଠୟିତ୍ୱାନ [ପୋଥୟିତ୍ୱାନ (କ॰)] ଏଳିକେ [ଏଳକି (ସ୍ୟା॰), ଏଳିକି (ପୀ॰)]।
ସାଜ୍ଜ ମାତୁଲୱାଦେନ, ମୁଞ୍ଚିତବ୍ବା ନୁ ମଞ୍ଞସି ॥
ପୁରତ୍ଥାମୁଖୋ ନିସିନ୍ନୋସି, ଅହଂ ତେ ମୁଖମାଗତା ।
ପଚ୍ଛତୋ ତୁୟ୍ହଂ ନଙ୍ଗୁଟ୍ଠଂ, କଥଂ ଖ୍ୱାହଂ ଅୱକ୍କମିଂ [ଅପକ୍କମିଂ (କ॰)]॥
ୟାୱତା ଚତୁରୋ ଦୀପା, ସସମୁଦ୍ଦା ସପବ୍ବତା ।
ତାୱତା ମୟ୍ହଂ ନଙ୍ଗୁଟ୍ଠଂ, କଥଂ ଖୋ ତ୍ୱଂ ୱିୱଜ୍ଜୟି ॥
ପୁବ୍ବେୱ ମେତମକ୍ଖିଂସୁ [ମେତଂ ଅକ୍ଖଂସୁ (ସୀ॰ ପୀ॰)], ମାତା ପିତା ଚ ଭାତରୋ ।
ଦୀଘଂ ଦୁଟ୍ଠସ୍ସ ନଙ୍ଗୁଟ୍ଠଂ, ସାମ୍ହି ୱେହାୟସାଗତା ॥
ତଞ୍ଚ ଦିସ୍ୱାନ ଆୟନ୍ତିଂ, ଅନ୍ତଲିକ୍ଖସ୍ମି ଏଳିକେ ।
ମିଗସଙ୍ଘୋ ପଲାୟିତ୍ଥ, ଭକ୍ଖୋ ମେ ନାସିତୋ ତୟା ॥
ଇଚ୍ଚେୱଂ ୱିଲପନ୍ତିୟା, ଏଳକିୟା ରୁହଗ୍ଘସୋ ।
ଗଲକଂ ଅନ୍ୱାୱମଦ୍ଦି, ନତ୍ଥି ଦୁଟ୍ଠେ ସୁଭାସିତଂ ॥
ନେୱ ଦୁଟ୍ଠେ ନୟୋ ଅତ୍ଥି, ନ ଧମ୍ମୋ ନ ସୁଭାସିତଂ ।
ନିକ୍କମଂ ଦୁଟ୍ଠେ ୟୁଞ୍ଜେଥ, ସୋ ଚ ସବ୍ଭିଂ ନ ରଞ୍ଜତୀତି ॥
ଦୀପିଜାତକଂ ଦସମଂ ।
ଅଟ୍ଠକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ପରିସୁଦ୍ଧା ମନାୱିଲା ୱତ୍ଥଧରା, ବକରାଜସ୍ସ କାୟୁରଂ ଦଣ୍ଡୱରୋ ।
ଅଥ ଅଙ୍ଗାର ଚେତିୟ ଦେୱିଲିନା, ଅଥ ଆଦିତ୍ତ ଗଙ୍ଗା ଦସେଳକିନାତି ॥
୯. ନୱକନିପାତୋ
୪୨୭. ଗିଜ୍ଝଜାତକଂ (୧)
ପରିସଙ୍କୁପଥୋ ନାମ, ଗିଜ୍ଝପନ୍ଥୋ ସନନ୍ତନୋ ।
ତତ୍ରାସି ମାତାପିତରୋ, ଗିଜ୍ଝୋ ପୋସେସି ଜିଣ୍ଣକେ ।
ତେସଂ ଅଜଗରମେଦଂ, ଅଚ୍ଚହାସି ବହୁତ୍ତସୋ [ପହୁତ୍ତତୋ (କ॰ ସୀ॰), ପହୂତସୋ (ସ୍ୟା॰ ପୀ॰), ବହୁଧସୋ (କ॰)]॥
ପିତା ଚ ପୁତ୍ତଂ ଅୱଚ, ଜାନଂ ଉଚ୍ଚଂ ପପାତିନଂ ।
ସୁପତ୍ତଂ ଥାମସମ୍ପନ୍ନଂ [ପକ୍ଖସମ୍ପନ୍ନଂ (ସୀ॰ ସ୍ୟା॰ ପୀ॰)], ତେଜସ୍ସିଂ ଦୂରଗାମିନଂ ॥
ପରିପ୍ଲୱନ୍ତଂ ପଥୱିଂ, ୟଦା ତାତ ୱିଜାନହି ।
ସାଗରେନ ପରିକ୍ଖିତ୍ତଂ, ଚକ୍କଂୱ ପରିମଣ୍ଡଲଂ ।
ତତୋ ତାତ ନିୱତ୍ତସ୍ସୁ, ମାସ୍ସୁ ଏତ୍ତୋ ପରଂ ଗମି ॥
ଉଦପତ୍ତୋସି [ଉଦ୍ଧଂ ପତ୍ତୋସି (କ॰ ସୀ॰)] ୱେଗେନ, ବଲୀ ପକ୍ଖୀ ଦିଜୁତ୍ତମୋ ।
ଓଲୋକୟନ୍ତୋ ୱକ୍କଙ୍ଗୋ, ପବ୍ବତାନି ୱନାନି ଚ ॥
ଅଦ୍ଦସ୍ସ ପଥୱିଂ ଗିଜ୍ଝୋ, ୟଥାସାସି [ୟଥାସ୍ସାସି (ସ୍ୟା॰ ଅଟ୍ଠ॰ ପାଠନ୍ତରଂ)] ପିତୁସ୍ସୁତଂ ।
ସାଗରେନ ପରିକ୍ଖିତ୍ତଂ, ଚକ୍କଂୱ ପରିମଣ୍ଡଲଂ ॥
ତଞ୍ଚ ସୋ ସମତିକ୍କମ୍ମ, ପରମେୱଚ୍ଚୱତ୍ତଥ [ପରମେୱ ପୱତ୍ତଥ (ସୀ॰ ସ୍ୟା॰)]।
ତଞ୍ଚ ୱାତସିଖା ତିକ୍ଖା, ଅଚ୍ଚହାସି ବଲିଂ ଦିଜଂ ॥
ନାସକ୍ଖାତିଗତୋ ପୋସୋ, ପୁନଦେୱ ନିୱତ୍ତିତୁଂ ।
ଦିଜୋ ବ୍ୟସନମାପାଦି, ୱେରମ୍ଭାନଂ [ୱେରମ୍ବାନଂ (ସୀ॰ ପୀ॰)] ୱସଂ ଗତୋ ॥
ତସ୍ସ ପୁତ୍ତା ଚ ଦାରା ଚ, ୟେ ଚଞ୍ଞେ ଅନୁଜୀୱିନୋ ।
ସବ୍ବେ ବ୍ୟସନମାପାଦୁଂ, ଅନୋୱାଦକରେ ଦିଜେ ॥
ଏୱମ୍ପି ଇଧ ୱୁଡ୍ଢାନଂ, ୟୋ ୱାକ୍ୟଂ ନାୱବୁଜ୍ଝତି ।
ଅତିସୀମଚରୋ ଦିତ୍ତୋ, ଗିଜ୍ଝୋୱାତୀତସାସନୋ ।
ସ ୱେ ବ୍ୟସନଂ ପପ୍ପୋତି, ଅକତ୍ୱା ୱୁଡ୍ଢସାସନନ୍ତି ॥
ଗିଜ୍ଝଜାତକଂ ପଠମଂ ।
୪୨୮. କୋସମ୍ବିୟଜାତକଂ (୨)
ପୁଥୁସଦ୍ଦୋ ସମଜନୋ, ନ ବାଲୋ କୋଚି ମଞ୍ଞଥ ।
ସଙ୍ଘସ୍ମିଂ ଭିଜ୍ଜମାନସ୍ମିଂ, ନାଞ୍ଞଂ ଭିୟ୍ୟୋ ଅମଞ୍ଞରୁଂ ॥
ପରିମୁଟ୍ଠା ପଣ୍ଡିତାଭାସା, ୱାଚାଗୋଚରଭାଣିନୋ ।
ୟାୱିଚ୍ଛନ୍ତି ମୁଖାୟାମଂ, ୟେନ ନୀତା ନ ତଂ ୱିଦୂ ॥
ଅକ୍କୋଚ୍ଛି ମଂ ଅୱଧି ମଂ, ଅଜିନି ମଂ ଅହାସି ମେ ।
ୟେ ଚ ତଂ ଉପନୟ୍ହନ୍ତି, ୱେରଂ ତେସଂ ନ ସମ୍ମତି ॥
ଅକ୍କୋଚ୍ଛି ମଂ ଅୱଧି ମଂ, ଅଜିନି ମଂ ଅହାସି ମେ ।
ୟେ ଚ ତଂ ନୁପନୟ୍ହନ୍ତି, ୱେରଂ ତେସୂପସମ୍ମତି ॥
ନ ହି ୱେରେନ ୱେରାନି, ସମ୍ମନ୍ତୀଧ କୁଦାଚନଂ ।
ଅୱେରେନ ଚ ସମ୍ମନ୍ତି, ଏସ ଧମ୍ମୋ ସନନ୍ତନୋ ॥
ପରେ ଚ ନ ୱିଜାନନ୍ତି, ମୟମେତ୍ଥ ୟମାମସେ ।
ୟେ ଚ ତତ୍ଥ ୱିଜାନନ୍ତି, ତତୋ ସମ୍ମନ୍ତି ମେଧଗା ॥
ଅଟ୍ଠିଚ୍ଛିନ୍ନା ପାଣହରା, ଗୱସ୍ସ [ଗୱାସ୍ସ (ସୀ॰ ସ୍ୟା॰ ପୀ॰)] ଧନହାରିନୋ ।
ରଟ୍ଠଂ ୱିଲୁମ୍ପମାନାନଂ, ତେସମ୍ପି ହୋତି ସଙ୍ଗତି ।
କସ୍ମା ତୁମ୍ହାକ ନୋ ସିୟା ॥
ସଚେ ଲଭେଥ ନିପକଂ ସହାୟଂ, ସଦ୍ଧିଂଚରଂ ସାଧୁୱିହାରିଧୀରଂ ।
ଅଭିଭୁୟ୍ୟ ସବ୍ବାନି ପରିସ୍ସୟାନି, ଚରେୟ୍ୟ ତେନତ୍ତମନୋ ସତୀମା ॥
ନୋ ଚେ ଲଭେଥ ନିପକଂ ସହାୟଂ, ସଦ୍ଧିଂଚରଂ ସାଧୁୱିହାରିଧୀରଂ ।
ରାଜାୱ ରଟ୍ଠଂ ୱିଜିତଂ ପହାୟ, ଏକୋ ଚରେ ମାତଙ୍ଗରଞ୍ଞେୱ ନାଗୋ ॥
ଏକସ୍ସ ଚରିତଂ ସେୟ୍ୟୋ, ନତ୍ଥି ବାଲେ ସହାୟତା ।
ଏକୋ ଚରେ ନ ପାପାନି କୟିରା, ଅପ୍ପୋସ୍ସୁକ୍କୋ ମାତଙ୍ଗରଞ୍ଞେୱ ନାଗୋତି ॥
କୋସମ୍ବିୟଜାତକଂ ଦୁତିୟଂ ।
୪୨୯. ମହାସୁୱଜାତକଂ (୩)
ଦୁମୋ ୟଦା ହୋତି ଫଲୂପପନ୍ନୋ, ଭୁଞ୍ଜନ୍ତି ନଂ ୱିହଙ୍ଗମା [ୱିହଗା (ସୀ॰ ପୀ॰)] ସମ୍ପତନ୍ତା ।
ଖୀଣନ୍ତି ଞତ୍ୱାନ ଦୁମଂ ଫଲଚ୍ଚୟେ [ଞତ୍ୱା ଦୁମପ୍ଫଲଚ୍ଚୟେନ (କ॰)], ଦିସୋଦିସଂ ୟନ୍ତି ତତୋ ୱିହଙ୍ଗମା ॥
ଚର ଚାରିକଂ ଲୋହିତତୁଣ୍ଡ ମାମରି, କିଂ ତ୍ୱଂ ସୁୱ ସୁକ୍ଖଦୁମମ୍ହି ଝାୟସି ।
ତଦିଙ୍ଘ ମଂ ବ୍ରୂହି ୱସନ୍ତସନ୍ନିଭ, କସ୍ମା ସୁୱ ସୁକ୍ଖଦୁମଂ ନ ରିଞ୍ଚସି ॥
ୟେ ୱେ ସଖୀନଂ ସଖାରୋ ଭୱନ୍ତି, ପାଣଚ୍ଚୟେ [ପାଣଂ ଚଜେ (କ॰), ପାଣଚ୍ଚୟେ ମରଣକାଲେ ଚ ସୁଖଦୁକ୍ଖେସୁ ଚ ନ ଜହନ୍ତୀତି ସମ୍ବନ୍ଧୋ] ଦୁକ୍ଖସୁଖେସୁ ହଂସ ।
ଖୀଣଂ ଅଖୀଣନ୍ତି ନ ତଂ ଜହନ୍ତି, ସନ୍ତୋ ସତଂ ଧମ୍ମମନୁସ୍ସରନ୍ତା ॥
ସୋହଂ ସତଂ ଅଞ୍ଞତରୋସ୍ମି ହଂସ, ଞାତୀ ଚ ମେ ହୋତି ସଖା ଚ ରୁକ୍ଖୋ ।
ତଂ ନୁସ୍ସହେ ଜୀୱିକତ୍ଥୋ ପହାତୁଂ, ଖୀଣନ୍ତି ଞତ୍ୱାନ ନ ହେସ ଧମ୍ମୋ [ନ ସୋସ (କ॰), ନ ଏସ (ସ୍ୟା॰)]॥
ସାଧୁ ସକ୍ଖି କତଂ ହୋତି, ମେତ୍ତି ସଂସତି ସନ୍ଥୱୋ [ମିତ୍ତଂ ସଙ୍ଗତି ସନ୍ଧୱୋ (କ॰)]।
ସଚେତଂ ଧମ୍ମଂ ରୋଚେସି, ପାସଂସୋସି ୱିଜାନତଂ ॥
ସୋ ତେ ସୁୱ ୱରଂ ଦମ୍ମି, ପତ୍ତୟାନ ୱିହଙ୍ଗମ ।
ୱରଂ ୱରସ୍ସୁ ୱକ୍କଙ୍ଗ, ୟଂ କିଞ୍ଚି ମନସିଚ୍ଛସି ॥
ୱରଞ୍ଚ ମେ ହଂସ ଭୱଂ ଦଦେୟ୍ୟ, ଅୟଞ୍ଚ ରୁକ୍ଖୋ ପୁନରାୟୁଂ ଲଭେଥ ।
ସୋ ସାଖୱା ଫଲିମା ସଂୱିରୂଳ୍ହୋ, ମଧୁତ୍ଥିକୋ ତିଟ୍ଠତୁ ସୋଭମାନୋ ॥
ତଂ ପସ୍ସ ସମ୍ମ ଫଲିମଂ ଉଳାରଂ, ସହାୱ ତେ ହୋତୁ ଉଦୁମ୍ବରେନ ।
ସୋ ସାଖୱା ଫଲିମା ସଂୱିରୂଳ୍ହୋ, ମଧୁତ୍ଥିକୋ ତିଟ୍ଠତୁ ସୋଭମାନୋ ॥
ଏୱଂ ସକ୍କ ସୁଖୀ ହୋହି, ସହ ସବ୍ବେହି ଞାତିଭି ।
ୟଥାହମଜ୍ଜ ସୁଖିତୋ, ଦିସ୍ୱାନ ସଫଲଂ ଦୁମଂ ॥
ସୁୱସ୍ସ ଚ ୱରଂ ଦତ୍ୱା, କତ୍ୱାନ ସଫଲଂ ଦୁମଂ ।
ପକ୍କାମି ସହ ଭରିୟାୟ, ଦେୱାନଂ ନନ୍ଦନଂ ୱନନ୍ତି ॥
ମହାସୁୱଜାତକଂ ତତିୟଂ ।
୪୩୦. ଚୂଳସୁୱଜାତକଂ (୪)
ସନ୍ତି ରୁକ୍ଖା ହରିପତ୍ତା [ହରିତପତ୍ତା (ସୀ॰ ସ୍ୟା॰ ପୀ॰)], ଦୁମା ନେକଫଲା ବହୂ ।
କସ୍ମା ନୁ ସୁକ୍ଖେ [ସୁକ୍ଖ (କ॰)] କୋଳାପେ, ସୁୱସ୍ସ ନିରତୋ ମନୋ ॥
ଫଲସ୍ସ ଉପଭୁଞ୍ଜିମ୍ହା, ନେକୱସ୍ସଗଣେ ବହୂ ।
ଅଫଲମ୍ପି ୱିଦିତ୍ୱାନ, ସାୱ ମେତ୍ତି ୟଥା ପୁରେ ॥
ସୁଖଞ୍ଚ ରୁକ୍ଖଂ କୋଳାପଂ, ଓପତ୍ତମଫଲଂ ଦୁମଂ ।
ଓହାୟ ସକୁଣା ୟନ୍ତି, କିଂ ଦୋସଂ ପସ୍ସସେ ଦିଜ ॥
ୟେ ଫଲତ୍ଥା ସମ୍ଭଜନ୍ତି, ଅଫଲୋତି ଜହନ୍ତି ନଂ ।
ଅତ୍ତତ୍ଥପଞ୍ଞା ଦୁମ୍ମେଧା, ତେ ହୋନ୍ତି ପକ୍ଖପାତିନୋ ॥
ସାଧୁ ସକ୍ଖି କତଂ ହୋତି, ମେତ୍ତି ସଂସତି ସନ୍ଥୱୋ ।
ସଚେତଂ ଧମ୍ମଂ ରୋଚେସି, ପାସଂସୋସି ୱିଜାନତଂ ॥
ସୋ ତେ ସୁୱ ୱରଂ ଦମ୍ମି, ପତ୍ତୟାନ ୱିହଙ୍ଗମ ।
ୱରଂ ୱରସ୍ସୁ ୱକ୍କଙ୍ଗ, ୟଂ କିଞ୍ଚି ମନସିଚ୍ଛସି ॥
ଅପି ନାମ ନଂ ପସ୍ସେୟ୍ୟଂ [ଅପି ନାମ ନଂ ପୁନ ପସ୍ସେ (ସୀ॰ ସ୍ୟା॰)], ସପତ୍ତଂ ସଫଲଂ ଦୁମଂ ।
ଦଲିଦ୍ଦୋୱ ନିଧି ଲଦ୍ଧା, ନନ୍ଦେୟ୍ୟାହଂ ପୁନପ୍ପୁନଂ ॥
ତତୋ ଅମତମାଦାୟ, ଅଭିସିଞ୍ଚି ମହୀରୁହଂ ।
ତସ୍ସ ସାଖା ୱିରୂହିଂସୁ [ୱିରୂଳ୍ହସ୍ସ (କ॰)], ସୀତଚ୍ଛାୟା ମନୋରମା ॥
ଏୱଂ ସକ୍କ ସୁଖୀ ହୋହି, ସହ ସବ୍ବେହି ଞାତିଭି ।
ୟଥାହମଜ୍ଜ ସୁଖିତୋ, ଦିସ୍ୱାନ ସଫଲଂ ଦୁମଂ ॥
ସୁୱସ୍ସ ଚ ୱରଂ ଦତ୍ୱା, କତ୍ୱାନ ସଫଲଂ ଦୁମଂ ।
ପକ୍କାମି ସହ ଭରିୟାୟ, ଦେୱାନଂ ନନ୍ଦନଂ ୱନନ୍ତି ॥
ଚୂଳସୁୱଜାତକଂ ଚତୁତ୍ଥଂ ।
୪୩୧. ହରିତଚଜାତକଂ (୫)
ସୁତଂ ମେତଂ ମହାବ୍ରହ୍ମେ, କାମେ ଭୁଞ୍ଜତି ହାରିତୋ ।
କଚ୍ଚେତଂ ୱଚନଂ ତୁଚ୍ଛଂ, କଚ୍ଚି ସୁଦ୍ଧୋ ଇରିୟ୍ୟସି ॥
ଏୱମେତଂ ମହାରାଜ, ୟଥା ତେ ୱଚନଂ ସୁତଂ ।
କୁମ୍ମଗ୍ଗଂ ପଟିପନ୍ନୋସ୍ମି, ମୋହନେୟ୍ୟେସୁ ମୁଚ୍ଛିତୋ ॥
ଅଦୁ [ଆଦୁ (ସୀ॰ ପୀ॰)] ପଞ୍ଞା କିମତ୍ଥିୟା, ନିପୁଣା ସାଧୁଚିନ୍ତିନୀ [ଚିନ୍ତନୀ (ସୀ॰ ପୀ॰)]।
ୟାୟ ଉପ୍ପତିତଂ ରାଗଂ, କିଂ ମନୋ ନ ୱିନୋଦୟେ ॥
ଚତ୍ତାରୋମେ ମହାରାଜ, ଲୋକେ ଅତିବଲା ଭୁସା ।
ରାଗୋ ଦୋସୋ ମଦୋ ମୋହୋ, ୟତ୍ଥ ପଞ୍ଞା ନ ଗାଧତି ॥
ଅରହା ସୀଲସମ୍ପନ୍ନୋ, ସୁଦ୍ଧୋ ଚରତି ହାରିତୋ ।
ମେଧାୱୀ ପଣ୍ଡିତୋ ଚେୱ, ଇତି ନୋ ସମ୍ମତୋ ଭୱଂ ॥
ମେଧାୱୀନମ୍ପି ହିଂସନ୍ତି, ଇସିଂ ଧମ୍ମଗୁଣେ ରତଂ ।
ୱିତକ୍କା ପାପକା ରାଜ, ସୁଭା ରାଗୂପସଂହିତା ॥
ଉପ୍ପନ୍ନାୟଂ ସରୀରଜୋ, ରାଗୋ ୱଣ୍ଣୱିଦୂସନୋ ତୱ ।
ତଂ ପଜହ ଭଦ୍ଦମତ୍ଥୁ ତେ, ବହୁନ୍ନାସି ମେଧାୱିସମ୍ମତୋ ॥
ତେ ଅନ୍ଧକାରକେ [କରଣେ (ସୀ॰ ସ୍ୟା॰ ପୀ॰)] କାମେ, ବହୁଦୁକ୍ଖେ ମହାୱିସେ ।
ତେସଂ ମୂଲଂ ଗୱେସିସ୍ସଂ, ଛେଚ୍ଛଂ ରାଗଂ ସବନ୍ଧନଂ ॥
ଇଦଂ ୱତ୍ୱାନ ହାରିତୋ, ଇସି ସଚ୍ଚପରକ୍କମୋ ।
କାମରାଗଂ ୱିରାଜେତ୍ୱା, ବ୍ରହ୍ମଲୋକୂପଗୋ ଅହୂତି ॥
ହରିତଚଜାତକଂ [ହାରିତଜାତକଂ (ସୀ॰ ପୀ॰)] ପଞ୍ଚମଂ ।
୪୩୨. ପଦକୁସଲମାଣୱଜାତକଂ (୬)
ବହୁସ୍ସୁତଂ ଚିତ୍ତକଥିଂ [ଚିତ୍ତକଥଂ (ସ୍ୟା॰ କ॰)], ଗଙ୍ଗା ୱହତି ପାଟଲିଂ [ପାଟଲଂ (ସୀ॰ ପୀ॰)]।
ୱୁୟ୍ହମାନକ ଭଦ୍ଦନ୍ତେ, ଏକଂ ମେ ଦେହି ଗାଥକଂ [ଗୀତକଂ (କ॰ ଅଟ୍ଠ॰)]॥
ୟେନ ସିଞ୍ଚନ୍ତି ଦୁକ୍ଖିତଂ, ୟେନ ସିଞ୍ଚନ୍ତି ଆତୁରଂ ।
ତସ୍ସ ମଜ୍ଝେ ମରିସ୍ସାମି, ଜାତଂ ସରଣତୋ ଭୟଂ ॥
ୟତ୍ଥ ବୀଜାନି ରୂହନ୍ତି, ସତ୍ତା ୟତ୍ଥ ପତିଟ୍ଠିତା ।
ସା ମେ ସୀସଂ ନିପୀଳେତି, ଜାତଂ ସରଣତୋ ଭୟଂ ॥
ୟେନ ଭତ୍ତାନି ପଚ୍ଚନ୍ତି, ସୀତଂ ୟେନ ୱିହଞ୍ଞତି ।
ସୋ ମଂ ଡହତି [ଦୟ୍ହତି (କ॰)] ଗତ୍ତାନି, ଜାତଂ ସରଣତୋ ଭୟଂ ॥
ୟେନ ଭୁତ୍ତେନ [ଭତ୍ତେନ (ସ୍ୟା॰ କ॰)] ୟାପେନ୍ତି, ପୁଥୂ ବ୍ରାହ୍ମଣଖତ୍ତିୟା ।
ସୋ ମଂ ଭୁତ୍ତୋ ବ୍ୟାପାଦେତି, ଜାତଂ ସରଣତୋ ଭୟଂ ॥
ଗିମ୍ହାନଂ ପଚ୍ଛିମେ ମାସେ, ୱାତମିଚ୍ଛନ୍ତି ପଣ୍ଡିତା ।
ସୋ ମଂ [ସୋ ମେ (ସୀ॰ ପୀ॰)] ଭଞ୍ଜତି ଗତ୍ତାନି, ଜାତଂ ସରଣତୋ ଭୟଂ ॥
ୟଂ ନିସ୍ସିତା ଜଗତିରୁହଂ, ସ୍ୱାୟଂ ଅଗ୍ଗିଂ ପମୁଞ୍ଚତି ।
ଦିସା ଭଜଥ ୱକ୍କଙ୍ଗା, ଜାତଂ ସରଣତୋ ଭୟଂ ॥
ୟମାନୟିଂ ସୋମନସ୍ସଂ, ମାଲିନିଂ ଚନ୍ଦନୁସ୍ସଦଂ ।
ସା ମଂ ଘରା ନିଚ୍ଛୁଭତି [ନୀହରତି (ସୀ॰ ସ୍ୟା॰)], ଜାତଂ ସରଣତୋ ଭୟଂ ॥
ୟେନ ଜାତେନ ନନ୍ଦିସ୍ସଂ, ୟସ୍ସ ଚ ଭୱମିଚ୍ଛିସଂ ।
ସୋ ମଂ ଘରା ନିଚ୍ଛୁଭତି [ନୀହରତି (ସୀ॰ ସ୍ୟା॰)], ଜାତଂ ସରଣତୋ ଭୟଂ ॥
ସୁଣନ୍ତୁ ମେ ଜାନପଦା, ନେଗମା ଚ ସମାଗତା ।
ୟତୋଦକଂ ତଦାଦିତ୍ତଂ, ୟତୋ ଖେମଂ ତତୋ ଭୟଂ ॥
ରାଜା ୱିଲୁମ୍ପତେ ରଟ୍ଠଂ, ବ୍ରାହ୍ମଣୋ ଚ ପୁରୋହିତୋ ।
ଅତ୍ତଗୁତ୍ତା ୱିହରଥ, ଜାତଂ ସରଣତୋ ଭୟନ୍ତି ॥
ପଦକୁସଲମାଣୱଜାତକଂ ଛଟ୍ଠଂ ।
୪୩୩. ଲୋମସକସ୍ସପଜାତକଂ (୭)
ଅସ୍ସ ଇନ୍ଦସମୋ ରାଜ, ଅଚ୍ଚନ୍ତଂ ଅଜରାମରୋ ।
ସଚେ ତ୍ୱଂ ୟଞ୍ଞଂ ୟାଜେୟ୍ୟ, ଇସିଂ ଲୋମସକସ୍ସପଂ ॥
ସସମୁଦ୍ଦପରିୟାୟଂ, ମହିଂ ସାଗରକୁଣ୍ଡଲଂ ।
ନ ଇଚ୍ଛେ ସହ ନିନ୍ଦାୟ, ଏୱଂ ସେୟ୍ୟ [ସୟ୍ହ (ସୀ॰ ସ୍ୟା॰ ପୀ॰)] ୱିଜାନହି ॥
ଧିରତ୍ଥୁ ତଂ ୟସଲାଭଂ, ଧନଲାଭଞ୍ଚ ବ୍ରାହ୍ମଣ ।
ୟା ୱୁତ୍ତି ୱିନିପାତେନ, ଅଧମ୍ମଚରଣେନ ୱା ॥
ଅପି ଚେ ପତ୍ତମାଦାୟ, ଅନଗାରୋ ପରିବ୍ବଜେ ।
ସାୟେୱ ଜୀୱିକା ସେୟ୍ୟୋ, ୟା ଚାଧମ୍ମେନ ଏସନା ॥
ଅପି ଚେ ପତ୍ତମାଦାୟ, ଅନଗାରୋ ପରିବ୍ବଜେ ।
ଅଞ୍ଞଂ ଅହିଂସୟଂ ଲୋକେ, ଅପି ରଜ୍ଜେନ ତଂ ୱରଂ ॥
ବଲଂ ଚନ୍ଦୋ ବଲଂ ସୁରିୟୋ, ବଲଂ ସମଣବ୍ରାହ୍ମଣା ।
ବଲଂ ୱେଲା ସମୁଦ୍ଦସ୍ସ, ବଲାତିବଲମିତ୍ଥିୟୋ ॥
ୟଥା ଉଗ୍ଗତପଂ ସନ୍ତଂ, ଇସିଂ ଲୋମସକସ୍ସପଂ ।
ପିତୁ ଅତ୍ଥା ଚନ୍ଦୱତୀ, ୱାଜପେୟ୍ୟଂ [ୱାଚପେୟ୍ୟଂ (ପୀ॰ କ॰)] ଅୟାଜୟି ॥
ତଂ ଲୋଭପକତଂ କମ୍ମଂ, କଟୁକଂ କାମହେତୁକଂ ।
ତସ୍ସ ମୂଲଂ ଗୱେସିସ୍ସଂ, ଛେଚ୍ଛଂ ରାଗଂ ସବନ୍ଧନଂ ॥
ଧିରତ୍ଥୁ କାମେ ସୁବହୂପି ଲୋକେ, ତପୋୱ ସେୟ୍ୟୋ କାମଗୁଣେହି ରାଜ ।
ତପୋ କରିସ୍ସାମି ପହାୟ କାମେ, ତୱେୱ ରଟ୍ଠଂ ଚନ୍ଦୱତୀ ଚ ହୋତୂତି ॥
ଲୋମସକସ୍ସପଜାତକଂ ସତ୍ତମଂ ।
୪୩୪. ଚକ୍କୱାକଜାତକଂ (୮)
କାସାୟୱତ୍ଥେ ସକୁଣେ ୱଦାମି, ଦୁୱେ ଦୁୱେ ନନ୍ଦମନେ [ନନ୍ଦିମନେ (ସୀ॰ ପୀ॰)] ଚରନ୍ତେ ।
କଂ ଅଣ୍ଡଜଂ ଅଣ୍ଡଜା ମାନୁସେସୁ, ଜାତିଂ ପସଂସନ୍ତି ତଦିଙ୍ଘ ବ୍ରୂଥ ॥
ଅମ୍ହେ ମନୁସ୍ସେସୁ ମନୁସ୍ସହିଂସ, ଅନୁବ୍ବତେ [ଅନୁପୁବ୍ବକେ (କ॰)] ଚକ୍କୱାକେ ୱଦନ୍ତି ।
କଲ୍ୟାଣଭାୱମ୍ହେ [ଭାୱ’ମ୍ହ (ସୀ॰ ପୀ॰)] ଦିଜେସୁ ସମ୍ମତା, ଅଭିରୂପା [ଅଭୀତରୂପା (ସୀ॰ ସ୍ୟା॰ ପୀ॰)] ୱିଚରାମ ଅଣ୍ଣୱେ ॥ ( ) [(ନ ଘାସହେତୂପି କରୋମ ପାପଂ) (କ॰)]
କିଂ ଅଣ୍ଣୱେ କାନି ଫଲାନି ଭୁଞ୍ଜେ, ମଂସଂ କୁତୋ ଖାଦଥ ଚକ୍କୱାକା ।
କିଂ ଭୋଜନଂ ଭୁଞ୍ଜଥ ୱୋ ଅନୋମା [ଅଭିଣ୍ହଂ (କ॰)], ବଲଞ୍ଚ ୱଣ୍ଣୋ ଚ ଅନପ୍ପରୂପା [ଅନପ୍ପରୂପୋ (ସୀ॰ ସ୍ୟା॰ ପୀ॰)]॥
ନ ଅଣ୍ଣୱେ ସନ୍ତି ଫଲାନି ଧଙ୍କ, ମଂସଂ କୁତୋ ଖାଦିତୁଂ ଚକ୍କୱାକେ ।
ସେୱାଲଭକ୍ଖମ୍ହ [ଭକ୍ଖିମ୍ହ (କ॰)] ଅପାଣଭୋଜନା [ଅୱାକଭୋଜନା (ସୀ॰ ପୀ॰)], ନ ଘାସହେତୂପି କରୋମ ପାପଂ ॥
ନ ମେ ଇଦଂ ରୁଚ୍ଚତି ଚକ୍କୱାକ, ଅସ୍ମିଂ ଭୱେ ଭୋଜନସନ୍ନିକାସୋ ।
ଅହୋସି ପୁବ୍ବେ ତତୋ ମେ ଅଞ୍ଞଥା, ଇଚ୍ଚେୱ ମେ ୱିମତି ଏତ୍ଥ ଜାତା ॥
ଅହମ୍ପି ମଂସାନି ଫଲାନି ଭୁଞ୍ଜେ, ଅନ୍ନାନି ଚ ଲୋଣିୟତେଲିୟାନି ।
ରସଂ ମନୁସ୍ସେସୁ ଲଭାମି ଭୋତ୍ତୁଂ, ସୂରୋୱ ସଙ୍ଗାମମୁଖଂ ୱିଜେତ୍ୱା ।
ନ ଚ ମେ ତାଦିସୋ ୱଣ୍ଣୋ, ଚକ୍କୱାକ ୟଥା ତୱ ॥
ଅସୁଦ୍ଧଭକ୍ଖୋସି ଖଣାନୁପାତୀ, କିଚ୍ଛେନ ତେ ଲବ୍ଭତି ଅନ୍ନପାନଂ ।
ନ ତୁସ୍ସସୀ ରୁକ୍ଖଫଲେହି ଧଙ୍କ, ମଂସାନି ୱା ୟାନି ସୁସାନମଜ୍ଝେ ॥
ୟୋ ସାହସେନ ଅଧିଗମ୍ମ ଭୋଗେ, ପରିଭୁଞ୍ଜତି ଧଙ୍କ ଖଣାନୁପାତୀ ।
ତତୋ ଉପକ୍କୋସତି ନଂ ସଭାୱୋ, ଉପକ୍କୁଟ୍ଠୋ ୱଣ୍ଣବଲଂ ଜହାତି ॥
ଅପ୍ପମ୍ପି ଚେ ନିବ୍ବୁତିଂ ଭୁଞ୍ଜତୀ ୟଦି, ଅସାହସେନ ଅପରୂପଘାତୀ [ଅସାହସେନାନୁପଘାତିନୋ (କ॰)]।
ବଲଞ୍ଚ ୱଣ୍ଣୋ ଚ ତଦସ୍ସ ହୋତି, ନ ହି ସବ୍ବୋ ଆହାରମୟେନ ୱଣ୍ଣୋତି ॥
ଚକ୍କୱାକଜାତକଂ ଅଟ୍ଠମଂ ।
୪୩୫. ହଲିଦ୍ଦିରାଗଜାତକଂ (୯)
ସୁତିତିକ୍ଖଂ ଅରଞ୍ଞମ୍ହି, ପନ୍ତମ୍ହି ସୟନାସନେ ।
ୟେ ଚ ଗାମେ ତିତିକ୍ଖନ୍ତି, ତେ ଉଳାରତରା ତୟା ॥
ଅରଞ୍ଞା ଗାମମାଗମ୍ମ, କିଂସୀଲଂ କିଂୱତଂ ଅହଂ ।
ପୁରିସଂ ତାତ ସେୱେୟ୍ୟଂ, ତଂ ମେ ଅକ୍ଖାହି ପୁଚ୍ଛିତୋ ॥
ୟୋ ତେ [ୟୋ ତଂ (ସ୍ୟା॰ ଜା॰ ୧.୪.୧୯୦ ଅରଞ୍ଞଜାତକେପି)] ୱିସ୍ସାସୟେ ତାତ, ୱିସ୍ସାସଞ୍ଚ ଖମେୟ୍ୟ ତେ ।
ସୁସ୍ସୂସୀ ଚ ତିତିକ୍ଖୀ ଚ, ତଂ ଭଜେହି ଇତୋ ଗତୋ ॥
ୟସ୍ସ କାୟେନ ୱାଚାୟ, ମନସା ନତ୍ଥି ଦୁକ୍କଟଂ ।
ଉରସୀୱ ପତିଟ୍ଠାୟ, ତଂ ଭଜେହି ଇତୋ ଗତୋ ॥
ୟୋ ଚ ଧମ୍ମେନ ଚରତି, ଚରନ୍ତୋପି ନ ମଞ୍ଞତି ।
ୱିସୁଦ୍ଧକାରିଂ ସପ୍ପଞ୍ଞଂ, ତଂ ଭଜେହି ଇତୋ ଗତୋ ॥
ହଲିଦ୍ଦିରାଗଂ କପିଚିତ୍ତଂ, ପୁରିସଂ ରାଗୱିରାଗିନଂ ।
ତାଦିସଂ ତାତ ମା ସେୱି, ନିମ୍ମନୁସ୍ସମ୍ପି ଚେ ସିୟା ॥
ଆସୀୱିସଂୱ କୁପିତଂ, ମୀଳ୍ହଲିତ୍ତଂ ମହାପଥଂ ।
ଆରକା ପରିୱଜ୍ଜେହି, ୟାନୀୱ ୱିସମଂ ପଥଂ ॥
ଅନତ୍ଥା ତାତ ୱଡ୍ଢନ୍ତି, ବାଲଂ ଅଚ୍ଚୁପସେୱତୋ ।
ମାସ୍ସୁ ବାଲେନ ସଂଗଚ୍ଛି, ଅମିତ୍ତେନେୱ ସବ୍ବଦା ॥
ତଂ ତାହଂ ତାତ ୟାଚାମି, କରସ୍ସୁ ୱଚନଂ ମମ ।
ମାସ୍ସୁ ବାଲେନ ସଂଗଚ୍ଛି [ସଂଗଞ୍ଛି (ସୀ॰ ପୀ॰)], ଦୁକ୍ଖୋ ବାଲେହି ସଙ୍ଗମୋତି ॥
ହଲିଦ୍ଦିରାଗଜାତକଂ ନୱମଂ ।
୪୩୬. ସମୁଗ୍ଗଜାତକଂ (୧୦)
କୁତୋ ନୁ ଆଗଚ୍ଛଥ ଭୋ ତୟୋ ଜନା, ସ୍ୱାଗତା ଏଥ [ସ୍ୱାଗତଂ ଏତ୍ଥ (ସୀ॰ ପୀ॰)] ନିସୀଦଥାସନେ ।
କଚ୍ଚିତ୍ଥ ଭୋନ୍ତୋ କୁସଲଂ ଅନାମୟଂ, ଚିରସ୍ସମବ୍ଭାଗମନଂ ହି ୱୋ ଇଧ ॥
ଅହମେୱ ଏକୋ ଇଧ ମଜ୍ଜ ପତ୍ତୋ, ନ ଚାପି ମେ ଦୁତିୟୋ କୋଚି ୱିଜ୍ଜତି ।
କିମେୱ ସନ୍ଧାୟ ତେ ଭାସିତଂ ଇସେ, ‘‘କୁତୋ ନୁ ଆଗଚ୍ଛଥ ଭୋ ତୟୋ ଜନା’’ ॥
ତୁୱଞ୍ଚ ଏକୋ ଭରିୟା ଚ ତେ ପିୟା, ସମୁଗ୍ଗପକ୍ଖିତ୍ତନିକିଣ୍ଣମନ୍ତରେ।
ସା ରକ୍ଖିତା କୁଚ୍ଛିଗତାୱ [କୁଚ୍ଛିଗତା ଚ (କ॰)] ତେ ସଦା, ୱାୟୁସ୍ସ [ହରିସ୍ସ (କ॰)] ପୁତ୍ତେନ ସହା ତହିଂ ରତା ॥
ସଂୱିଗ୍ଗରୂପୋ ଇସିନା ୱିୟାକତୋ [ପବ୍ୟାକତୋ (କ॰), ବ୍ୟାକତୋ (ସ୍ୟା॰ ପୀ॰)], ସୋ ଦାନୱୋ ତତ୍ଥ ସମୁଗ୍ଗମୁଗ୍ଗିଲି ।
ଅଦ୍ଦକ୍ଖି ଭରିୟଂ ସୁଚି ମାଲଧାରିନିଂ, ୱାୟୁସ୍ସ ପୁତ୍ତେନ ସହା ତହିଂ ରତଂ ॥
ସୁଦିଟ୍ଠରୂପମୁଗ୍ଗତପାନୁୱତ୍ତିନା [ସୁଦିଟ୍ଠରୂପୁଗ୍ଗତପାନୁୱତ୍ତିନା (ସୀ॰ ସ୍ୟା॰ ପୀ॰)], ହୀନା ନରା ୟେ ପମଦାୱସଂ ଗତା ।
ୟଥା ହୱେ ପାଣରିୱେତ୍ଥ ରକ୍ଖିତା, ଦୁଟ୍ଠା ମୟୀ ଅଞ୍ଞମଭିପ୍ପମୋଦୟି ॥
ଦିୱା ଚ ରତ୍ତୋ ଚ ମୟା ଉପଟ୍ଠିତା, ତପସ୍ସିନା ଜୋତିରିୱା ୱନେ ୱସଂ ।
ସା ଧମ୍ମମୁକ୍କମ୍ମ ଅଧମ୍ମମାଚରି, ଅକିରିୟରୂପୋ ପମଦାହି ସନ୍ଥୱୋ ॥
ସରୀରମଜ୍ଝମ୍ହି ଠିତାତିମଞ୍ଞହଂ, ମୟ୍ହଂ ଅୟନ୍ତି ଅସତିଂ ଅସଞ୍ଞତଂ ।
ସା ଧମ୍ମମୁକ୍କମ୍ମ ଅଧମ୍ମମାଚରି, ଅକିରିୟରୂପୋ ପମଦାହି ସନ୍ଥୱୋ ॥
ସୁରକ୍ଖିତଂ ମେତି କଥଂ ନୁ ୱିସ୍ସସେ, ଅନେକଚିତ୍ତାସୁ ନ ହତ୍ଥି [ଅନେକଚିତ୍ତା ପୁନ ହେତ୍ଥ (କ॰)] ରକ୍ଖଣା ।
ଏତା ହି ପାତାଲପପାତସନ୍ନିଭା, ଏତ୍ଥପ୍ପମତ୍ତୋ ବ୍ୟସନଂ ନିଗଚ୍ଛତି ॥
ତସ୍ମା ହି ତେ ସୁଖିନୋ ୱୀତସୋକା, ୟେ ମାତୁଗାମେହି ଚରନ୍ତି ନିସ୍ସଟା ।
ଏତଂ ସିୱଂ ଉତ୍ତମମାଭିପତ୍ଥୟଂ, ନ ମାତୁଗାମେହି କରେୟ୍ୟ ସନ୍ଥୱନ୍ତି ॥
ସମୁଗ୍ଗଜାତକଂ ଦସମଂ ।
୪୩୭. ପୂତିମଂସଜାତକଂ (୧୧)
ନ ଖୋ ମେ ରୁଚ୍ଚତି ଆଳି, ପୂତିମଂସସ୍ସ ପେକ୍ଖନା ।
ଏତାଦିସା ସଖାରସ୍ମା, ଆରକା ପରିୱଜ୍ଜୟେ ॥
ଉମ୍ମତ୍ତିକା ଅୟଂ ୱେଣୀ, ୱଣ୍ଣେତି ପତିନୋ ସଖିଂ ।
ପଜ୍ଝାୟି [ପଜ୍ଝାତି (ସୀ॰ ପୀ॰), ପଜ୍ଝାୟତି (ସୀ॰ ନିୟ୍ୟ)] ପଟିଗଚ୍ଛନ୍ତିଂ, ଆଗତଂ ମେଣ୍ଡ [ମେଳ (ସୀ॰ ପୀ॰)] ମାତରଂ ॥
ତ୍ୱଂ ଖୋସି ସମ୍ମ ଉମ୍ମତ୍ତୋ, ଦୁମ୍ମେଧୋ ଅୱିଚକ୍ଖଣୋ ।
ୟୋ ତ୍ୱଂ [ସୋ ତ୍ୱଂ (ସ୍ୟା॰)] ମତାଲୟଂ କତ୍ୱା, ଅକାଲେନ ୱିପେକ୍ଖସି ॥
ନ ଅକାଲେ ୱିପେକ୍ଖେୟ୍ୟ, କାଲେ ପେକ୍ଖେୟ୍ୟ ପଣ୍ଡିତୋ ।
ପୂତିମଂସୋୱ ପଜ୍ଝାୟି [ପଜ୍ଝାତି (ସୀ॰ ପୀ॰), ପଜ୍ଝାୟତି (ସୀ॰ ନିୟ୍ୟ)], ୟୋ ଅକାଲେ ୱିପେକ୍ଖତି ॥
ପିୟଂ ଖୋ ଆଳି ମେ ହୋତୁ, ପୁଣ୍ଣପତ୍ତଂ ଦଦାହି ମେ ।
ପତି ସଞ୍ଜୀୱିତୋ ମୟ୍ହଂ, ଏୟ୍ୟାସି ପିୟପୁଚ୍ଛିକା [ପୁଚ୍ଛିତା (ସ୍ୟା॰ କ॰)]॥
ପିୟଂ ଖୋ ଆଳି ତେ ହୋତୁ, ପୁଣ୍ଣପତ୍ତଂ ଦଦାମି ତେ ।
ମହତା ପରିୱାରେନ [ପରିହାରେନ (ସ୍ୟା॰)], ଏସ୍ସଂ [ଏସଂ (ସୀ॰ ପୀ॰)] କୟିରାହି [କୟିରାସି (ପୀ॰)] ଭୋଜନଂ ॥
କୀଦିସୋ ତୁୟ୍ହଂ ପରିୱାରୋ, ୟେସଂ କାହାମି ଭୋଜନଂ ।
କିଂନାମକା ଚ ତେ ସବ୍ବେ, ତଂ [ତେ (ସୀ॰ ସ୍ୟା॰ ପୀ॰)] ମେ ଅକ୍ଖାହି ପୁଚ୍ଛିତା ॥
ମାଲିୟୋ ଚତୁରକ୍ଖୋ ଚ, ପିଙ୍ଗିୟୋ ଅଥ ଜମ୍ବୁକୋ ।
ଏଦିସୋ ମୟ୍ହଂ ପରିୱାରୋ, ତେସଂ କୟିରାହି [କୟିରାସି (ପୀ॰)] ଭୋଜନଂ ॥
ନିକ୍ଖନ୍ତାୟ ଅଗାରସ୍ମା, ଭଣ୍ଡକମ୍ପି ୱିନସ୍ସତି ।
ଆରୋଗ୍ୟଂ ଆଳିନୋ ୱଜ୍ଜଂ [ୱଚ୍ଛଂ ( ?)], ଇଧେୱ ୱସ ମାଗମାତି ॥
ପୂତିମଂସଜାତକଂ ଏକାଦସମଂ ।
୪୩୮. ଦଦ୍ଦରଜାତକଂ (୧୨)
ୟୋ ତେ ପୁତ୍ତକେ ଅଖାଦି, ଦିନ୍ନଭତ୍ତୋ ଅଦୂସକେ ।
ତସ୍ମିଂ ଦାଠଂ ନିପାତେହି, ମା ତେ ମୁଚ୍ଚିତ୍ଥ ଜୀୱତୋ ॥
ଆକିଣ୍ଣଲୁଦ୍ଦୋ ପୁରିସୋ, ଧାତିଚେଲଂୱ ମକ୍ଖିତୋ ।
ପଦେସଂ ତଂ ନ ପସ୍ସାମି, ୟତ୍ଥ ଦାଠଂ ନିପାତୟେ ॥
ଅକତଞ୍ଞୁସ୍ସ ପୋସସ୍ସ, ନିଚ୍ଚଂ ୱିୱରଦସ୍ସିନୋ ।
ସବ୍ବଂ ଚେ ପଥୱିଂ ଦଜ୍ଜା, ନେୱ ନଂ ଅଭିରାଧୟେ ॥
କିନ୍ନୁ ସୁବାହୁ ତରମାନରୂପୋ, ପଚ୍ଚାଗତୋସି ସହ ମାଣୱେନ ।
କିଂ କିଚ୍ଚମତ୍ଥଂ ଇଧମତ୍ଥି ତୁୟ୍ହଂ, ଅକ୍ଖାହି ମେ ପୁଚ୍ଛିତୋ ଏତମତ୍ଥଂ ॥
ୟୋ ତେ ସଖା ଦଦ୍ଦରୋ ସାଧୁରୂପୋ, ତସ୍ସ ୱଧଂ ପରିସଙ୍କାମି ଅଜ୍ଜ ।
ପୁରିସସ୍ସ କମ୍ମାୟତନାନି ସୁତ୍ୱା, ନାହଂ ସୁଖିଂ ଦଦ୍ଦରଂ ଅଜ୍ଜ ମଞ୍ଞେ ॥
କାନିସ୍ସ କମ୍ମାୟତନାନି ଅସ୍ସୁ, ପୁରିସସ୍ସ ୱୁତ୍ତିସମୋଧାନତାୟ ।
କଂ ୱା ପଟିଞ୍ଞଂ ପୁରିସସ୍ସ ସୁତ୍ୱା, ପରିସଙ୍କସି ଦଦ୍ଦରଂ ମାଣୱେନ ॥
ଚିଣ୍ଣା କଲିଙ୍ଗା ଚରିତା ୱଣିଜ୍ଜା, ୱେତ୍ତାଚରୋ ସଙ୍କୁପଥୋପି ଚିଣ୍ଣୋ ।
ନଟେହି ଚିଣ୍ଣଂ ସହ ୱାକୁରେହି [ୱାକରେହି (ପୀ॰ ସୀ॰ ନିୟ୍ୟ), ୱାଗୁରେହି ( ?)], ଦଣ୍ଡେନ ୟୁଦ୍ଧମ୍ପି ସମଜ୍ଜମଜ୍ଝେ ॥
ବଦ୍ଧା କୁଲୀକା [କୁଲିଙ୍କା (ସୀ॰ ପୀ॰)] ମିତମାଳ୍ହକେନ, ଅକ୍ଖା ଜିତା [ଅକ୍ଖାଚିତା (ସୀ॰ ଅଟ୍ଠ॰)] ସଂୟମୋ ଅବ୍ଭତୀତୋ ।
ଅବ୍ବାହିତଂ [ଅପ୍ପହିତଂ (ସୀ॰ ସ୍ୟା॰), ଅବ୍ବୂହିତଂ (ପୀ॰ ସୀ॰ ନିୟ୍ୟ)] ପୁବ୍ବକଂ [ପୁପ୍ଫକଂ (ସୀ॰ ସ୍ୟା॰)] ଅଡ୍ଢରତ୍ତଂ, ହତ୍ଥା ଦଡ୍ଢା ପିଣ୍ଡପଟିଗ୍ଗହେନ ॥
ତାନିସ୍ସ କମ୍ମାୟତନାନି ଅସ୍ସୁ, ପୁରିସସ୍ସ ୱୁତ୍ତିସମୋଧାନତାୟ ।
ୟଥା ଅୟଂ ଦିସ୍ସତି ଲୋମପିଣ୍ଡୋ, ଗାୱୋ ହତା କିଂ ପନ ଦଦ୍ଦରସ୍ସାତି ॥
ଦଦ୍ଦରଜାତକଂ ଦ୍ୱାଦସମଂ ।
ନୱକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ୱରଗିଜ୍ଝ ସମଜ୍ଜନ ହଂସୱରୋ, ନିଧିସୱ୍ହୟ ହାରିତ ପାଟଲିକୋ ।
ଅଜରାମର ଧଙ୍କ ତିତିକ୍ଖ କୁତୋ, ଅଥ ଦ୍ୱାଦସ ପେକ୍ଖନ ଦଦ୍ଦରିଭୀତି ॥
୧୦. ଦସକନିପାତୋ
୪୩୯. ଚତୁଦ୍ୱାରଜାତକଂ (୧)
ଚତୁଦ୍ୱାରମିଦଂ ନଗରଂ, ଆୟସଂ ଦଳ୍ହପାକାରଂ ।
ଓରୁଦ୍ଧପଟିରୁଦ୍ଧୋସ୍ମି, କିଂ ପାପଂ ପକତଂ ମୟା ॥
ସବ୍ବେ ଅପିହିତା ଦ୍ୱାରା, ଓରୁଦ୍ଧୋସ୍ମି ୟଥା ଦିଜୋ ।
କିମାଧିକରଣଂ ୟକ୍ଖ, ଚକ୍କାଭିନିହତୋ ଅହଂ ॥
ଲଦ୍ଧା ସତସହସ୍ସାନି, ଅତିରେକାନି ୱୀସତି ।
ଅନୁକମ୍ପକାନଂ ଞାତୀନଂ, ୱଚନଂ ସମ୍ମ ନାକରି ॥
ଲଙ୍ଘିଂ ସମୁଦ୍ଦଂ ପକ୍ଖନ୍ଦି, ସାଗରଂ ଅପ୍ପସିଦ୍ଧିକଂ ।
ଚତୁବ୍ଭି ଅଟ୍ଠଜ୍ଝଗମା, ଅଟ୍ଠାହିପି ଚ ସୋଳସ ॥
ସୋଳସାହି ଚ ବାତ୍ତିଂସ, ଅତ୍ରିଚ୍ଛଂ ଚକ୍କମାସଦୋ ।
ଇଚ୍ଛାହତସ୍ସ ପୋସସ୍ସ, ଚକ୍କଂ ଭମତି ମତ୍ଥକେ ॥
ଉପରିୱିସାଲା ଦୁପ୍ପୂରା, ଇଚ୍ଛା ୱିସଟଗାମିନୀ [ୱିସଟଗାମିନିଂ (ପୀ॰ କ॰)]।
ୟେ ଚ ତଂ ଅନୁଗିଜ୍ଝନ୍ତି, ତେ ହୋନ୍ତି ଚକ୍କଧାରିନୋ ॥
ବହୁଭଣ୍ଡଂ [ବହୁଂ ଭଣ୍ଡଂ (ସୀ॰ ପୀ॰)] ଅୱହାୟ, ମଗ୍ଗଂ ଅପ୍ପଟିୱେକ୍ଖିୟ ।
ୟେସଞ୍ଚେତଂ ଅସଙ୍ଖାତଂ, ତେ ହୋନ୍ତି ଚକ୍କଧାରିନୋ ॥
କମ୍ମଂ ସମେକ୍ଖେ ୱିପୁଲଞ୍ଚ ଭୋଗଂ, ଇଚ୍ଛଂ ନ ସେୱେୟ୍ୟ ଅନତ୍ଥସଂହିତଂ ।
କରେୟ୍ୟ ୱାକ୍ୟଂ ଅନୁକମ୍ପକାନଂ, ତଂ ତାଦିସଂ ନାତିୱତ୍ତେୟ୍ୟ ଚକ୍କଂ ॥
କୀୱଚିରଂ ନୁ ମେ ୟକ୍ଖ, ଚକ୍କଂ ସିରସି ଠସ୍ସତି ।
କତି ୱସ୍ସସହସ୍ସାନି, ତଂ ମେ ଅକ୍ଖାହି ପୁଚ୍ଛିତୋ ॥
ଅତିସରୋ ପଚ୍ଚସରୋ [ଅଚ୍ଚସରୋ (ସୀ॰ ସ୍ୟା॰ ପୀ॰)], ମିତ୍ତୱିନ୍ଦ ସୁଣୋହି ମେ ।
ଚକ୍କଂ ତେ ସିରସି [ସିରସ୍ମି (ସ୍ୟା॰)] ମାୱିଦ୍ଧଂ, ନ ତଂ ଜୀୱଂ ପମୋକ୍ଖସୀତି ॥
ଚତୁଦ୍ୱାରଜାତକଂ ପଠମଂ ।
୪୪୦. କଣ୍ହଜାତକଂ (୨)
କଣ୍ହୋ ୱତାୟଂ ପୁରିସୋ, କଣ୍ହଂ ଭୁଞ୍ଜତି ଭୋଜନଂ ।
କଣ୍ହେ ଭୂମିପଦେସସ୍ମିଂ, ନ ମୟ୍ହଂ ମନସୋ ପିୟୋ ॥
ନ କଣ୍ହୋ ତଚସା ହୋତି, ଅନ୍ତୋସାରୋ ହି ବ୍ରାହ୍ମଣୋ ।
ୟସ୍ମିଂ ପାପାନି କମ୍ମାନି, ସ ୱେ କଣ୍ହୋ ସୁଜମ୍ପତି ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ ବ୍ରାହ୍ମଣ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଞ୍ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ସୁନିକ୍କୋଧଂ ସୁନିଦ୍ଦୋସଂ, ନିଲ୍ଲୋଭଂ ୱୁତ୍ତିମତ୍ତନୋ ।
ନିସ୍ନେହମଭିକଙ୍ଖାମି, ଏତେ ମେ ଚତୁରୋ ୱରେ ॥
କିଂ ନୁ କୋଧେ ୱା [କୋଧେୱ (ସୀ॰ ପୀ॰)] ଦୋସେ ୱା, ଲୋଭେ ସ୍ନେହେ ଚ ବ୍ରାହ୍ମଣ ।
ଆଦୀନୱଂ ତ୍ୱଂ ପସ୍ସସି [ସମ୍ପସ୍ସସି (ସୀ॰ ପୀ॰)], ତଂ ମେ ଅକ୍ଖାହି ପୁଚ୍ଛିତୋ ॥
ଅପ୍ପୋ ହୁତ୍ୱା ବହୁ ହୋତି, ୱଡ୍ଢତେ ସୋ ଅଖନ୍ତିଜୋ ।
ଆସଙ୍ଗୀ ବହୁପାୟାସୋ, ତସ୍ମା କୋଧଂ ନ ରୋଚୟେ ॥
ଦୁଟ୍ଠସ୍ସ ଫରୁସା [ପଠମା (ପୀ॰ ସୀ॰ ନିୟ୍ୟ)] ୱାଚା, ପରାମାସୋ ଅନନ୍ତରା ।
ତତୋ ପାଣି ତତୋ ଦଣ୍ଡୋ, ସତ୍ଥସ୍ସ ପରମା ଗତି [ପରାମସତି (କ॰)]।
ଦୋସୋ କୋଧସମୁଟ୍ଠାନୋ, ତସ୍ମା ଦୋସଂ ନ ରୋଚୟେ ॥
ଆଲୋପସାହସାକାରା [ସହସାକାରା (ସୀ॰ ସ୍ୟା॰ ପୀ॰)], ନିକତୀ ୱଞ୍ଚନାନି ଚ ।
ଦିସ୍ସନ୍ତି ଲୋଭଧମ୍ମେସୁ, ତସ୍ମା ଲୋଭଂ ନ ରୋଚୟେ ॥
ସ୍ନେହସଙ୍ଗଥିତା [ସଙ୍ଗଧିତା (କ॰), ସଙ୍ଗନ୍ତିତା (ସ୍ୟା॰)] ଗନ୍ଥା, ସେନ୍ତି ମନୋମୟା ପୁଥୂ ।
ତେ ଭୁସଂ ଉପତାପେନ୍ତି, ତସ୍ମା ସ୍ନେହଂ ନ ରୋଚୟେ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ ବ୍ରାହ୍ମଣ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଞ୍ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ଅରଞ୍ଞେ ମେ ୱିହରତୋ, ନିଚ୍ଚଂ ଏକୱିହାରିନୋ ।
ଆବାଧା ମା [ନ (ସ୍ୟା॰ ପୀ॰)] ଉପ୍ପଜ୍ଜେୟ୍ୟୁଂ, ଅନ୍ତରାୟକରା ଭୁସା ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ ବ୍ରାହ୍ମଣ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଞ୍ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ନ ମନୋ ୱା ସରୀରଂ ୱା, ମଂ-କତେ ସକ୍କ କସ୍ସଚି ।
କଦାଚି ଉପହଞ୍ଞେଥ, ଏତଂ ସକ୍କ ୱରଂ ୱରେତି ॥
କଣ୍ହଜାତକଂ ଦୁତିୟଂ ।
୪୪୧. ଚତୁପୋସଥିୟଜାତକଂ (୩)
ୟୋ କୋପନେୟ୍ୟେ ନ କରୋତି କୋପଂ, ନ କୁଜ୍ଝତି ସପ୍ପୁରିସୋ କଦାଚି ।
କୁଦ୍ଧୋପି ସୋ ନାୱିକରୋତି କୋପଂ, ତଂ ୱେ ନରଂ ସମଣମାହୁ [ସମଣଂ ଆହୁ (ସୀ॰)] ଲୋକେ ॥
ଊନୂଦରୋ ୟୋ ସହତେ ଜିଘଚ୍ଛଂ, ଦନ୍ତୋ ତପସ୍ସୀ ମିତପାନଭୋଜନୋ ।
ଆହାରହେତୁ ନ କରୋତି ପାପଂ, ତଂ ୱେ ନରଂ ସମଣମାହୁ ଲୋକେ ॥
ଖିଡ୍ଡଂ ରତିଂ ୱିପ୍ପଜହିତ୍ୱାନ ସବ୍ବଂ, ନ ଚାଲିକଂ ଭାସସି କିଞ୍ଚି ଲୋକେ ।
ୱିଭୂସଟ୍ଠାନା ୱିରତୋ ମେଥୁନସ୍ମା, ତଂ ୱେ ନରଂ ସମଣମାହୁ ଲୋକେ ॥
ପରିଗ୍ଗହଂ ଲୋଭଧମ୍ମଞ୍ଚ ସବ୍ବଂ, ୟୋ ୱେ ପରିଞ୍ଞାୟ ପରିଚ୍ଚଜେତି ।
ଦନ୍ତଂ ଠିତତ୍ତଂ ଅମମଂ ନିରାସଂ, ତଂ ୱେ ନରଂ ସମଣମାହୁ ଲୋକେ ॥
ପୁଚ୍ଛାମ କତ୍ତାରମନୋମପଞ୍ଞଂ [ମନୋମପଞ୍ଞ (ସ୍ୟା॰ କ॰)], କଥାସୁ ନୋ ୱିଗ୍ଗହୋ ଅତ୍ଥି ଜାତୋ ।
ଛିନ୍ଦଜ୍ଜ କଙ୍ଖଂ ୱିଚିକିଚ୍ଛିତାନି, ତଦଜ୍ଜ [ତୟାଜ୍ଜ (ସୀ॰)] କଙ୍ଖଂ ୱିତରେମୁ ସବ୍ବେ ॥
ୟେ ପଣ୍ଡିତା ଅତ୍ଥଦସା ଭୱନ୍ତି, ଭାସନ୍ତି ତେ ୟୋନିସୋ ତତ୍ଥ କାଲେ ।
କଥଂ ନୁ କଥାନଂ ଅଭାସିତାନଂ, ଅତ୍ଥଂ ନୟେୟ୍ୟୁଂ କୁସଲା ଜନିନ୍ଦା ॥
କଥଂ ହୱେ ଭାସତି ନାଗରାଜା, ଗରୁଳୋ ପନ ୱେନତେୟ୍ୟୋ କିମାହ ।
ଗନ୍ଧବ୍ବରାଜା ପନ କିଂ ୱଦେସି, କଥଂ ପନ କୁରୂନଂ ରାଜସେଟ୍ଠୋ ॥
ଖନ୍ତିଂ ହୱେ ଭାସତି ନାଗରାଜା, ଅପ୍ପାହାରଂ ଗରୁଳୋ ୱେନତେୟ୍ୟୋ ।
ଗନ୍ଧବ୍ବରାଜା ରତିୱିପ୍ପହାନଂ, ଅକିଞ୍ଚନଂ କୁରୂନଂ ରାଜସେଟ୍ଠୋ ॥
ସବ୍ବାନି ଏତାନି ସୁଭାସିତାନି, ନ ହେତ୍ଥ ଦୁବ୍ଭାସିତମତ୍ଥି କିଞ୍ଚି ।
ୟସ୍ମିଞ୍ଚ ଏତାନି ପତିଟ୍ଠିତାନି, ଅରାୱ ନାଭ୍ୟା ସୁସମୋହିତାନି ।
ଚତୁବ୍ଭି ଧମ୍ମେହି ସମଙ୍ଗିଭୂତଂ, ତଂ ୱେ ନରଂ ସମଣମାହୁ ଲୋକେ ॥
ତୁୱଞ୍ହି [ତୁୱଂ ନୁ (ସୀ॰ ପୀ॰)] ସେଟ୍ଠୋ ତ୍ୱମନୁତ୍ତରୋସି, ତ୍ୱଂ ଧମ୍ମଗୂ ଧମ୍ମୱିଦୂ ସୁମେଧୋ ।
ପଞ୍ଞାୟ ପଞ୍ହଂ ସମଧିଗ୍ଗହେତ୍ୱା, ଅଚ୍ଛେଚ୍ଛି ଧୀରୋ ୱିଚିକିଚ୍ଛିତାନି ।
ଅଚ୍ଛେଚ୍ଛି କଙ୍ଖଂ ୱିଚିକିଚ୍ଛିତାନି, ଚୁନ୍ଦୋ ୟଥା ନାଗଦନ୍ତଂ ଖରେନ ॥
ନୀଲୁପ୍ପଲାଭଂ ୱିମଲଂ ଅନଗ୍ଘଂ, ୱତ୍ଥଂ ଇଦଂ ଧୂମସମାନୱଣ୍ଣଂ ।
ପଞ୍ହସ୍ସ ୱେୟ୍ୟାକରଣେନ ତୁଟ୍ଠୋ, ଦଦାମି ତେ ଧମ୍ମପୂଜାୟ ଧୀର ॥
ସୁୱଣ୍ଣମାଲଂ ସତପତ୍ତଫୁଲ୍ଲିତଂ, ସକେସରଂ ରତ୍ନସହସ୍ସମଣ୍ଡିତଂ ।
ପଞ୍ହସ୍ସ ୱେୟ୍ୟାକରଣେନ ତୁଟ୍ଠୋ, ଦଦାମି ତେ ଧମ୍ମପୂଜାୟ ଧୀର ॥
ମଣିଂ ଅନଗ୍ଘଂ ରୁଚିରଂ ପଭସ୍ସରଂ, କଣ୍ଠାୱସତ୍ତଂ [ୱସିତଂ (କ॰)] ମଣିଭୂସିତଂ ମେ ।
ପଞ୍ହସ୍ସ ୱେୟ୍ୟାକରଣେନ ତୁଟ୍ଠୋ, ଦଦାମି ତେ ଧମ୍ମପୂଜାୟ ଧୀର ॥
ଗୱଂ ସହସ୍ସଂ ଉସଭଞ୍ଚ ନାଗଂ, ଆଜଞ୍ଞୟୁତ୍ତେ ଚ ରଥେ ଦସ ଇମେ ।
ପଞ୍ହସ୍ସ ୱେୟ୍ୟାକରଣେନ ତୁଟ୍ଠୋ, ଦଦାମି ତେ ଗାମୱରାନି ସୋଳସ ॥
ସାରିପୁତ୍ତୋ ତଦା ନାଗୋ, ସୁପଣ୍ଣୋ ପନ କୋଲିତୋ ।
ଗନ୍ଧବ୍ବରାଜା ଅନୁରୁଦ୍ଧୋ, ରାଜା ଆନନ୍ଦ ପଣ୍ଡିତୋ ।
ୱିଧୁରୋ ବୋଧିସତ୍ତୋ ଚ, ଏୱଂ ଧାରେଥ ଜାତକନ୍ତି ॥
ଚତୁପୋସଥିୟଜାତକଂ ତତିୟଂ ।
୪୪୨. ସଙ୍ଖଜାତକଂ (୪)
ବହୁସ୍ସୁତୋ ସୁତଧମ୍ମୋସି ସଙ୍ଖ, ଦିଟ୍ଠା ତୟା ସମଣବ୍ରାହ୍ମଣା ଚ ।
ଅଥକ୍ଖଣେ ଦସ୍ସୟସେ ୱିଲାପଂ, ଅଞ୍ଞୋ ନୁ କୋ ତେ ପଟିମନ୍ତକୋ ମୟା ॥
ସୁବ୍ଭୂ [ସୁବ୍ଭା (ସ୍ୟା॰), ସୁମ୍ଭା, ସୁଭ୍ମା (କ॰)] ସୁଭା ସୁପ୍ପଟିମୁକ୍କକମ୍ବୁ, ପଗ୍ଗୟ୍ହ ସୋୱଣ୍ଣମୟାୟ ପାତିୟା ।
‘‘ଭୁଞ୍ଜସ୍ସୁ ଭତ୍ତଂ’’ ଇତି ମଂ ୱଦେତି, ସଦ୍ଧାୱିତ୍ତା [ସଦ୍ଧାଚିତ୍ତା (ସୀ॰ ପୀ॰ କ॰)], ତମହଂ ନୋତି ବ୍ରୂମି ॥
ଏତାଦିସଂ ବ୍ରାହ୍ମଣ ଦିସ୍ୱାନ [ଦିସ୍ୱ (ସୀ॰ ପୀ॰)] ୟକ୍ଖଂ, ପୁଚ୍ଛେୟ୍ୟ ପୋସୋ ସୁଖମାସିସାନୋ [ସୁଖମାସସାନୋ (ସ୍ୟା॰), ସୁଖମାସିସମାନୋ (କ॰)]।
ଉଟ୍ଠେହି ନଂ ପଞ୍ଜଲିକାଭିପୁଚ୍ଛ, ଦେୱୀ ନୁସି ତ୍ୱଂ ଉଦ ମାନୁସୀ ନୁ ॥
ୟଂ ତ୍ୱଂ ସୁଖେନାଭିସମେକ୍ଖସେ ମଂ, ଭୁଞ୍ଜସ୍ସୁ ଭତ୍ତଂ ଇତି ମଂ ୱଦେସି ।
ପୁଚ୍ଛାମି ତଂ ନାରି ମହାନୁଭାୱେ, ଦେୱୀ ନୁସି ତ୍ୱଂ ଉଦ ମାନୁସୀ ନୁ ॥
ଦେୱୀ ଅହଂ ସଙ୍ଖ ମହାନୁଭାୱା, ଇଧାଗତା ସାଗରୱାରିମଜ୍ଝେ ।
ଅନୁକମ୍ପିକା ନୋ ଚ ପଦୁଟ୍ଠଚିତ୍ତା, ତୱେୱ ଅତ୍ଥାୟ ଇଧାଗତାସ୍ମି ॥
ଇଧନ୍ନପାନଂ ସୟନାସନଞ୍ଚ, ୟାନାନି ନାନାୱିୱିଧାନି ସଙ୍ଖ ।
ସବ୍ବସ୍ସ ତ୍ୟାହଂ ପଟିପାଦୟାମି, ୟଂ କିଞ୍ଚି ତୁୟ୍ହଂ ମନସାଭିପତ୍ଥିତଂ ॥
ୟଂ କିଞ୍ଚି ୟିଟ୍ଠଞ୍ଚ ହୁତଞ୍ଚ [ୟିଟ୍ଠଂୱ ହୁତଂୱ (ସୀ॰ ପୀ॰)] ମୟ୍ହଂ, ସବ୍ବସ୍ସ ନୋ ଇସ୍ସରା ତ୍ୱଂ ସୁଗତ୍ତେ ।
ସୁସୋଣି ସୁବ୍ଭମୁ [ସୁବ୍ଭୁ (ସୀ॰), ସୁବ୍ଭା (ସ୍ୟା॰)] ସୁୱିଲଗ୍ଗମଜ୍ଝେ [ସୁୱିଲାକମଜ୍ଝେ (ସ୍ୟା॰ ପୀ॰ ସୀ॰ ଅଟ୍ଠ॰), ସୁୱିଲାତମଜ୍ଝେ (କ॰)], କିସ୍ସ ମେ କମ୍ମସ୍ସ ଅୟଂ ୱିପାକୋ ॥
ଘମ୍ମେ ପଥେ ବ୍ରାହ୍ମଣ ଏକଭିକ୍ଖୁଂ, ଉଗ୍ଘଟ୍ଟପାଦଂ ତସିତଂ କିଲନ୍ତଂ ।
ପଟିପାଦୟୀ ସଙ୍ଖ ଉପାହନାନି [ଉପାହନାହି (ସୀ॰ ପୀ॰)], ସା ଦକ୍ଖିଣା କାମଦୁହା ତୱଜ୍ଜ ॥
ସା ହୋତୁ ନାୱା ଫଲକୂପପନ୍ନା, ଅନୱସ୍ସୁତା ଏରକୱାତୟୁତ୍ତା ।
ଅଞ୍ଞସ୍ସ ୟାନସ୍ସ ନ ହେତ୍ଥ [ନ ହତ୍ଥି (ପୀ॰)] ଭୂମି, ଅଜ୍ଜେୱ ମଂ ମୋଳିନିଂ ପାପୟସ୍ସୁ ॥
ସା ତତ୍ଥ ୱିତ୍ତା ସୁମନା ପତୀତା, ନାୱଂ ସୁଚିତ୍ତଂ ଅଭିନିମ୍ମିନିତ୍ୱା ।
ଆଦାୟ ସଙ୍ଖଂ ପୁରିସେନ ସଦ୍ଧିଂ, ଉପାନୟୀ ନଗରଂ ସାଧୁରମ୍ମନ୍ତି ॥
ସଙ୍ଖଜାତକଂ ଚତୁତ୍ଥଂ ।
୪୪୩. ଚୂଳବୋଧିଜାତକଂ (୫)
ୟୋ ତେ ଇମଂ ୱିସାଲକ୍ଖିଂ, ପିୟଂ ସମ୍ହିତଭାସିନିଂ [ସମ୍ମିଲ୍ଲଭାସିନିଂ (ସୀ॰ ପୀ॰), ସମ୍ମିଲ୍ଲହାସିନିଂ (ସ୍ୟା॰)]।
ଆଦାୟ ବଲା ଗଚ୍ଛେୟ୍ୟ, କିଂ ନୁ କୟିରାସି ବ୍ରାହ୍ମଣ ॥
ଉପ୍ପଜ୍ଜେ [ଉପ୍ପଜ୍ଜ (ସୀ॰ ପୀ॰)] ମେ ନ ମୁଚ୍ଚେୟ୍ୟ, ନ ମେ ମୁଚ୍ଚେୟ୍ୟ ଜୀୱତୋ ।
ରଜଂୱ ୱିପୁଲା ୱୁଟ୍ଠି, ଖିପ୍ପମେୱ ନିୱାରୟେ [ନିୱାରୟିଂ (କ॰)]॥
ୟଂ ନୁ ପୁବ୍ବେ ୱିକତ୍ଥିତ୍ଥୋ [ୱିକତ୍ଥିତୋ (କ॰ ସୀ॰ ସ୍ୟା॰ କ॰)], ବଲମ୍ହିୱ ଅପସ୍ସିତୋ ।
ସ୍ୱଜ୍ଜ ତୁଣ୍ହିକତୋ [ତୁଣ୍ହିକତୋ (ସୀ॰), ତୁଣ୍ହିକ୍ଖକୋ (ପୀ॰)] ଦାନି, ସଙ୍ଘାଟିଂ ସିବ୍ବମଚ୍ଛସି ॥
ଉପ୍ପଜ୍ଜି ମେ ନ ମୁଚ୍ଚିତ୍ଥ, ନ ମେ ମୁଚ୍ଚିତ୍ଥ ଜୀୱତୋ ।
ରଜଂୱ ୱିପୁଲା ୱୁଟ୍ଠି, ଖିପ୍ପମେୱ ନିୱାରୟିଂ ॥
କିଂ ତେ ଉପ୍ପଜ୍ଜି ନୋ ମୁଚ୍ଚି, କିଂ ତେ ନ ମୁଚ୍ଚି ଜୀୱତୋ ।
ରଜଂୱ ୱିପୁଲା ୱୁଟ୍ଠି, କତମଂ ତ୍ୱଂ ନିୱାରୟି ॥
ୟମ୍ହି ଜାତେ ନ ପସ୍ସତି, ଅଜାତେ ସାଧୁ ପସ୍ସତି ।
ସୋ ମେ ଉପ୍ପଜ୍ଜି ନୋ ମୁଚ୍ଚି, କୋଧୋ ଦୁମ୍ମେଧଗୋଚରୋ ॥
ୟେନ ଜାତେନ ନନ୍ଦନ୍ତି, ଅମିତ୍ତା ଦୁକ୍ଖମେସିନୋ ।
ସୋ ମେ ଉପ୍ପଜ୍ଜି ନୋ ମୁଚ୍ଚି, କୋଧୋ ଦୁମ୍ମେଧଗୋଚରୋ ॥
ୟସ୍ମିଞ୍ଚ ଜାୟମାନମ୍ହି, ସଦତ୍ଥଂ ନାୱବୁଜ୍ଝତି ।
ସୋ ମେ ଉପ୍ପଜ୍ଜି ନୋ ମୁଚ୍ଚି, କୋଧୋ ଦୁମ୍ମେଧଗୋଚରୋ ॥
ୟେନାଭିଭୂତୋ କୁସଲଂ ଜହାତି, ପରକ୍କରେ ୱିପୁଲଞ୍ଚାପି ଅତ୍ଥଂ ।
ସ ଭୀମସେନୋ ବଲୱା ପମଦ୍ଦୀ, କୋଧୋ ମହାରାଜ ନ ମେ ଅମୁଚ୍ଚଥ ॥
କଟ୍ଠସ୍ମିଂ ମତ୍ଥମାନସ୍ମିଂ [ମନ୍ଥମାନସ୍ମିଂ (ପୀ॰), ମଦ୍ଦମାନସ୍ମିଂ (କ॰)], ପାୱକୋ ନାମ ଜାୟତି ।
ତମେୱ କଟ୍ଠଂ ଡହତି, ୟସ୍ମା ସୋ ଜାୟତେ ଗିନି ॥
ଏୱଂ ମନ୍ଦସ୍ସ ପୋସସ୍ସ, ବାଲସ୍ସ ଅୱିଜାନତୋ ।
ସାରମ୍ଭା [ସାରବ୍ଭା (କ॰)] ଜାୟତେ କୋଧୋ, ସୋପି ତେନେୱ ଡୟ୍ହତି ॥
ଅଗ୍ଗୀୱ ତିଣକଟ୍ଠସ୍ମିଂ, କୋଧୋ ୟସ୍ସ ପୱଡ୍ଢତି ।
ନିହୀୟତି ତସ୍ସ ୟସୋ, କାଳପକ୍ଖେୱ ଚନ୍ଦିମା ॥
ଅନେଧୋ [ଅନିନ୍ଧୋ (ସୀ॰ କ॰), ଅନିନ୍ଦୋ (ସ୍ୟା॰)] ଧୂମକେତୂୱ, କୋଧୋ ୟସ୍ସୂପସମ୍ମତି ।
ଆପୂରତି ତସ୍ସ ୟସୋ, ସୁକ୍କପକ୍ଖେୱ ଚନ୍ଦିମାତି ॥
ଚୂଳବୋଧିଜାତକଂ ପଞ୍ଚମଂ ।
୪୪୪. କଣ୍ହଦୀପାୟନଜାତକଂ (୬)
ସତ୍ତାହମେୱାହଂ ପସନ୍ନଚିତ୍ତୋ, ପୁଞ୍ଞତ୍ଥିକୋ ଆଚରିଂ [ଅଚରିଂ (ସୀ॰ ସ୍ୟା॰ ପୀ॰)] ବ୍ରହ୍ମଚରିୟଂ ।
ଅଥାପରଂ ୟଂ ଚରିତଂ ମମେଦଂ [ମମ ୟିଦଂ (ସ୍ୟା॰), ମମାୟିଦଂ (ପୀ॰)], ୱସ୍ସାନି ପଞ୍ଞାସ ସମାଧିକାନି ।
ଅକାମକୋ ୱାପି [ୱାହି (ପୀ॰ କ॰)] ଅହଂ ଚରାମି, ଏତେନ ସଚ୍ଚେନ ସୁୱତ୍ଥି ହୋତୁ ।
ହତଂ ୱିସଂ ଜୀୱତୁ ୟଞ୍ଞଦତ୍ତୋ ॥
ୟସ୍ମା ଦାନଂ ନାଭିନନ୍ଦିଂ କଦାଚି, ଦିସ୍ୱାନହଂ ଅତିଥିଂ ୱାସକାଲେ ।
ନ ଚାପି ମେ ଅପ୍ପିୟତଂ ଅୱେଦୁଂ, ବହୁସ୍ସୁତା ସମଣବ୍ରାହ୍ମଣା ଚ ॥
ଅକାମକୋ ୱାପି ଅହଂ ଦଦାମି, ଏତେନ ସଚ୍ଚେନ ସୁୱତ୍ଥି ହୋତୁ ।
ହତଂ ୱିସଂ ଜୀୱତୁ ୟଞ୍ଞଦତ୍ତୋ ॥
ଆସୀୱିସୋ ତାତ ପହୂତତେଜୋ, ୟୋ ତଂ ଅଦଂସୀ [ଅଡଂସୀ (ସ୍ୟା॰)] ସଚରା [ବିଲରା (ସୀ॰), ପିଳାରା (ସ୍ୟା॰), ପତରା (ପୀ॰)] ଉଦିଚ୍ଚ ।
ତସ୍ମିଞ୍ଚ ମେ ଅପ୍ପିୟତାୟ ଅଜ୍ଜ, ପିତରି ଚ ତେ ନତ୍ଥି କୋଚି ୱିସେସୋ ।
ଏତେନ ସଚ୍ଚେନ ସୁୱତ୍ଥି ହୋତୁ, ହତଂ ୱିସଂ ଜୀୱତୁ ୟଞ୍ଞଦତ୍ତୋ ॥
ସନ୍ତା ଦନ୍ତାୟେୱ [ଦନ୍ତା ସନ୍ତା ୟେ ଚ (ସ୍ୟା॰ କ॰)] ପରିବ୍ବଜନ୍ତି, ଅଞ୍ଞତ୍ର କଣ୍ହା ନତ୍ଥାକାମରୂପା [ଅନକାମରୂପା (ସୀ॰ ସ୍ୟା॰ ପୀ॰)]।
ଦୀପାୟନ କିସ୍ସ ଜିଗୁଚ୍ଛମାନୋ, ଅକାମକୋ ଚରସି ବ୍ରହ୍ମଚରିୟଂ ॥
ସଦ୍ଧାୟ ନିକ୍ଖମ୍ମ ପୁନଂ ନିୱତ୍ତୋ, ସୋ ଏଳମୂଗୋୱ ବାଲୋ [ଏଳମୂଗୋ ଚପଲୋ (ସ୍ୟା॰ କ॰)] ୱତାୟଂ ।
ଏତସ୍ସ ୱାଦସ୍ସ ଜିଗୁଚ୍ଛମାନୋ, ଅକାମକୋ ଚରାମି ବ୍ରହ୍ମଚରିୟଂ ।
ୱିଞ୍ଞୁପ୍ପସତ୍ଥଞ୍ଚ ସତଞ୍ଚ ଠାନଂ [ୱିଞ୍ଞୂପସତ୍ଥଂ ୱସିତଂ ଚ ଠାନଂ (କ॰)], ଏୱମ୍ପହଂ ପୁଞ୍ଞକରୋ ଭୱାମି ॥
ସମଣେ ତୁୱଂ ବ୍ରାହ୍ମଣେ ଅଦ୍ଧିକେ ଚ, ସନ୍ତପ୍ପୟାସି ଅନ୍ନପାନେନ ଭିକ୍ଖଂ ।
ଓପାନଭୂତଂୱ ଘରଂ ତୱ ୟିଦଂ, ଅନ୍ନେନ ପାନେନ ଉପେତରୂପଂ ।
ଅଥ କିସ୍ସ ୱାଦସ୍ସ ଜିଗୁଚ୍ଛମାନୋ, ଅକାମକୋ ଦାନମିମଂ ଦଦାସି ॥
ପିତରୋ ଚ ମେ ଆସୁଂ ପିତାମହା ଚ, ସଦ୍ଧା ଅହୁଂ ଦାନପତୀ ୱଦଞ୍ଞୂ ।
ତଂ କୁଲ୍ଲୱତ୍ତଂ ଅନୁୱତ୍ତମାନୋ, ମାହଂ କୁଲେ ଅନ୍ତିମଗନ୍ଧନୋ [ଗନ୍ଧିନୋ (ସ୍ୟା॰ ପୀ॰ କ॰), ଗନ୍ଧିନୀ (ସୀ॰)] ଅହୁଂ ।
ଏତସ୍ସ ୱାଦସ୍ସ ଜିଗୁଚ୍ଛମାନୋ, ଅକାମକୋ ଦାନମିମଂ ଦଦାମି ॥
ଦହରିଂ କୁମାରିଂ ଅସମତ୍ଥପଞ୍ଞଂ, ୟଂ ତାନୟିଂ ଞାତିକୁଲା ସୁଗତ୍ତେ ।
ନ ଚାପି ମେ ଅପ୍ପିୟତଂ ଅୱେଦି, ଅଞ୍ଞତ୍ର କାମା ପରିଚାରୟନ୍ତା [ପରିଚାରୟନ୍ତୀ (ସୀ॰ ପୀ॰)]।
ଅଥ କେନ ୱଣ୍ଣେନ ମୟା ତେ ଭୋତି, ସଂୱାସଧମ୍ମୋ ଅହୁ ଏୱରୂପୋ ॥
ଆରା ଦୂରେ ନୟିଧ କଦାଚି ଅତ୍ଥି, ପରମ୍ପରା ନାମ କୁଲେ ଇମସ୍ମିଂ ।
ତଂ କୁଲ୍ଲୱତ୍ତଂ ଅନୁୱତ୍ତମାନା, ମାହଂ କୁଲେ ଅନ୍ତିମଗନ୍ଧିନୀ ଅହୁଂ ।
ଏତସ୍ସ ୱାଦସ୍ସ ଜିଗୁଚ୍ଛମାନା, ଅକାମିକା ପଦ୍ଧଚରାମ୍ହି [ପଟ୍ଠଚରାମ୍ହି (ସ୍ୟା॰ କ॰)] ତୁୟ୍ହଂ ॥
ମଣ୍ଡବ୍ୟ ଭାସିଂ ୟମଭାସନେୟ୍ୟଂ [ଭାସିସ୍ସଂ ଅଭାସନେୟ୍ୟଂ (ସୀ॰ ସ୍ୟା॰ ପୀ॰), ଭାସିସ୍ସ’ମଭାସନେୟ୍ୟଂ ( ?)], ତଂ ଖମ୍ୟତଂ ପୁତ୍ତକହେତୁ ମଜ୍ଜ ।
ପୁତ୍ତପେମା ନ ଇଧ ପରତ୍ଥି କିଞ୍ଚି, ସୋ ନୋ ଅୟଂ ଜୀୱତି ୟଞ୍ଞଦତ୍ତୋତି ॥
କଣ୍ହଦୀପାୟନଜାତକଂ [ମଣ୍ଡବ୍ୟଜାତକଂ (ସ୍ୟା॰ କ॰)] ଛଟ୍ଠଂ ।
୪୪୫. ନିଗ୍ରୋଧଜାତକଂ (୭)
ନ ୱାହମେତଂ [ନ ଚାହମେତଂ (ସୀ॰)] ଜାନାମି, କୋ ୱାୟଂ କସ୍ସ ୱାତି ୱା [ଚାତି ୱା (ସୀ॰)]।
ୟଥା ସାଖୋ ଚରି [ୱଦୀ (ସୀ॰ ସ୍ୟା॰ ପୀ॰)] ଏୱଂ, ନିଗ୍ରୋଧ କିନ୍ତି ମଞ୍ଞସି ॥
ତତୋ ଗଲୱିନୀତେନ, ପୁରିସା ନୀହରିଂସୁ ମଂ ।
ଦତ୍ୱା ମୁଖପହାରାନି, ସାଖସ୍ସ ୱଚନଂକରା ॥
ଏତାଦିସଂ ଦୁମ୍ମତିନା, ଅକତଞ୍ଞୁନ ଦୁବ୍ଭିନା ।
କତଂ ଅନରିୟଂ ସାଖେନ, ସଖିନା ତେ ଜନାଧିପ ॥
ନ ୱାହମେତଂ ଜାନାମି, ନପି ମେ କୋଚି ସଂସତି ।
ୟଂ ମେ ତ୍ୱଂ ସମ୍ମ ଅକ୍ଖାସି, ସାଖେନ କାରଣଂ [କଡ୍ଢନଂ (ସୀ॰ ସ୍ୟା॰)] କତଂ ॥
ସଖୀନଂ ସାଜୀୱକରୋ, ମମ ସାଖସ୍ସ ଚୂଭୟଂ ।
ତ୍ୱଂ ନୋସିସ୍ସରିୟଂ ଦାତା, ମନୁସ୍ସେସୁ ମହନ୍ତତଂ ।
ତୟାମା ଲବ୍ଭିତା ଇଦ୍ଧୀ, ଏତ୍ଥ ମେ ନତ୍ଥି ସଂସୟୋ ॥
ୟଥାପି ବୀଜମଗ୍ଗିମ୍ହି, ଡୟ୍ହତି ନ ୱିରୂହତି ।
ଏୱଂ କତଂ ଅସପ୍ପୁରିସେ, ନସ୍ସତି ନ ୱିରୂହତି ॥
କତଞ୍ଞୁମ୍ହି ଚ ପୋସମ୍ହି, ସୀଲୱନ୍ତେ ଅରିୟୱୁତ୍ତିନେ ।
ସୁଖେତ୍ତେ ୱିୟ ବୀଜାନି, କତଂ ତମ୍ହି ନ ନସ୍ସତି ॥
ଇମଂ ଜମ୍ମଂ ନେକତିକଂ, ଅସପ୍ପୁରିସଚିନ୍ତକଂ ।
ହନନ୍ତୁ ସାଖଂ ସତ୍ତୀହି, ନାସ୍ସ ଇଚ୍ଛାମି ଜୀୱିତଂ ॥
ଖମତସ୍ସ ମହାରାଜ, ପାଣା ନ ପଟିଆନୟା [ଦୁପ୍ପଟିଆନୟା (ସୀ॰ ସ୍ୟା॰ ପୀ॰)]।
ଖମ ଦେୱ ଅସପ୍ପୁରିସସ୍ସ, ନାସ୍ସ ଇଚ୍ଛାମହଂ ୱଧଂ ॥
ନିଗ୍ରୋଧମେୱ ସେୱେୟ୍ୟ, ନ ସାଖମୁପସଂୱସେ ।
ନିଗ୍ରୋଧସ୍ମିଂ ମତଂ ସେୟ୍ୟୋ, ୟଞ୍ଚେ ସାଖସ୍ମି ଜୀୱିତନ୍ତି ॥
ନିଗ୍ରୋଧଜାତକଂ ସତ୍ତମଂ ।
୪୪୬. ତକ୍କଲଜାତକଂ (୮)
ନ ତକ୍କଲା ସନ୍ତି ନ ଆଲୁୱାନି [ଆଲୁପାନି (ସୀ॰ ସ୍ୟା॰ ପୀ॰)], ନ ବିଳାଲିୟୋ ନ କଳମ୍ବାନି ତାତ ।
ଏକୋ ଅରଞ୍ଞମ୍ହି ସୁସାନମଜ୍ଝେ, କିମତ୍ଥିକୋ ତାତ ଖଣାସି କାସୁଂ ॥
ପିତାମହୋ ତାତ ସୁଦୁବ୍ବଲୋ ତେ, ଅନେକବ୍ୟାଧୀହି ଦୁଖେନ ଫୁଟ୍ଠୋ ।
ତମଜ୍ଜହଂ ନିଖଣିସ୍ସାମି ସୋବ୍ଭେ, ନ ହିସ୍ସ ତଂ ଜୀୱିତଂ ରୋଚୟାମି ॥
ସଙ୍କପ୍ପମେତଂ ପଟିଲଦ୍ଧ ପାପକଂ, ଅଚ୍ଚାହିତଂ କମ୍ମ କରୋସି ଲୁଦ୍ଦଂ ।
ମୟାପି ତାତ ପଟିଲଚ୍ଛସେ ତୁୱଂ, ଏତାଦିସଂ କମ୍ମ ଜରୂପନୀତୋ ।
ତଂ କୁଲ୍ଲୱତ୍ତଂ ଅନୁୱତ୍ତମାନୋ, ଅହମ୍ପି ତଂ ନିଖଣିସ୍ସାମି ସୋବ୍ଭେ ॥
ଫରୁସାହି ୱାଚାହି ପକୁବ୍ବମାନୋ, ଆସଜ୍ଜ ମଂ ତ୍ୱଂ ୱଦସେ କୁମାର ।
ପୁତ୍ତୋ ମମଂ ଓରସକୋ ସମାନୋ, ଅହିତାନୁକମ୍ପୀ ମମ ତ୍ୱଂସି ପୁତ୍ତ ॥
ନ ତାହଂ [ତ୍ୟାହଂ (ସ୍ୟା॰)] ତାତ ଅହିତାନୁକମ୍ପୀ, ହିତାନୁକମ୍ପୀ ତେ ଅହମ୍ପି [ଅହଞ୍ହି (ସ୍ୟା॰)] ତାତ ।
ପାପଞ୍ଚ ତଂ କମ୍ମ ପକୁବ୍ବମାନଂ, ଅରହାମି ନୋ ୱାରୟିତୁଂ ତତୋ ॥
ୟୋ ମାତରଂ ୱା ପିତରଂ ସୱିଟ୍ଠ [ମାତରଂ ପିତରଂ ୱା ୱସିଟ୍ଠ (ସୀ॰ ପୀ॰)], ଅଦୂସକେ ହିଂସତି ପାପଧମ୍ମୋ ।
କାୟସ୍ସ ଭେଦା ଅଭିସମ୍ପରାୟଂ, ଅସଂସୟଂ ସୋ ନିରୟଂ ଉପେତି [ପରେତି (ସୀ॰ ପୀ॰)]॥
ୟୋ ମାତରଂ ୱା ପିତରଂ ସୱିଟ୍ଠ, ଅନ୍ନେନ ପାନେନ ଉପଟ୍ଠହାତି ।
କାୟସ୍ସ ଭେଦା ଅଭିସମ୍ପରାୟଂ, ଅସଂସୟଂ ସୋ ସୁଗତିଂ ଉପେତି ॥
ନ ମେ ତ୍ୱଂ ପୁତ୍ତ ଅହିତାନୁକମ୍ପୀ, ହିତାନୁକମ୍ପୀ ମେ [ମମ ( ?)] ତ୍ୱଂସି ପୁତ୍ତ ।
ଅହଞ୍ଚ ତଂ ମାତରା ୱୁଚ୍ଚମାନୋ, ଏତାଦିସଂ କମ୍ମ କରୋମି ଲୁଦ୍ଦଂ ॥
ୟା ତେ ସା ଭରିୟା ଅନରିୟରୂପା, ମାତା ମମେସା ସକିୟା ଜନେତ୍ତି ।
ନିଦ୍ଧାପୟେ [ନିଦ୍ଧାମସେ (ପୀ॰)] ତଞ୍ଚ ସକା ଅଗାରା, ଅଞ୍ଞମ୍ପି ତେ ସା ଦୁଖମାୱହେୟ୍ୟ ॥
ୟା ତେ ସା ଭରିୟା ଅନରିୟରୂପା, ମାତା ମମେସା ସକିୟା ଜନେତ୍ତି ।
ଦନ୍ତା କରେଣୂୱ ୱସୂପନୀତା, ସା ପାପଧମ୍ମା ପୁନରାୱଜାତୂତି ॥
ତକ୍କଲଜାତକଂ ଅଟ୍ଠମଂ ।
୪୪୭. ମହାଧମ୍ମପାଲଜାତକଂ (୯)
କିଂ ତେ ୱତଂ କିଂ ପନ ବ୍ରହ୍ମଚରିୟଂ, କିସ୍ସ ସୁଚିଣ୍ଣସ୍ସ ଅୟଂ ୱିପାକୋ ।
ଅକ୍ଖାହି ମେ ବ୍ରାହ୍ମଣ ଏତମତ୍ଥଂ, କସ୍ମା ନୁ ତୁମ୍ହଂ ଦହରା ନ ମିୟ୍ୟରେ [ମୀୟରେ (ସୀ॰ ପୀ॰)]॥
ଧମ୍ମଂ ଚରାମ ନ ମୁସା ଭଣାମ, ପାପାନି କମ୍ମାନି ପରିୱଜ୍ଜୟାମ [ୱିୱଜ୍ଜୟାମ (ସୀ॰ ସ୍ୟା॰ ପୀ॰)]।
ଅନରିୟଂ ପରିୱଜ୍ଜେମୁ ସବ୍ବଂ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ସୁଣୋମ ଧମ୍ମଂ ଅସତଂ ସତଞ୍ଚ, ନ ଚାପି ଧମ୍ମଂ ଅସତଂ ରୋଚୟାମ ।
ହିତ୍ୱା ଅସନ୍ତେ ନ ଜହାମ ସନ୍ତେ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ପୁବ୍ବେୱ ଦାନା ସୁମନା ଭୱାମ, ଦଦମ୍ପି ୱେ ଅତ୍ତମନା ଭୱାମ ।
ଦତ୍ୱାପି ୱେ ନାନୁତପ୍ପାମ ପଚ୍ଛା, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ସମଣେ ମୟଂ ବ୍ରାହ୍ମଣେ ଅଦ୍ଧିକେ ଚ, ୱନିବ୍ବକେ ୟାଚନକେ ଦଲିଦ୍ଦେ ।
ଅନ୍ନେନ ପାନେନ ଅଭିତପ୍ପୟାମ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ମୟଞ୍ଚ ଭରିୟଂ ନାତିକ୍କମାମ, ଅମ୍ହେ ଚ ଭରିୟା ନାତିକ୍କମନ୍ତି ।
ଅଞ୍ଞତ୍ର ତାହି ବ୍ରହ୍ମଚରିୟଂ ଚରାମ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ପାଣାତିପାତା ୱିରମାମ ସବ୍ବେ, ଲୋକେ ଅଦିନ୍ନଂ ପରିୱଜ୍ଜୟାମ ।
ଅମଜ୍ଜପା ନୋପି ମୁସା ଭଣାମ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ଏତାସୁ ୱେ ଜାୟରେ ସୁତ୍ତମାସୁ, ମେଧାୱିନୋ ହୋନ୍ତି ପହୂତପଞ୍ଞା ।
ବହୁସ୍ସୁତା ୱେଦଗୁନୋ [ୱେଦଗୁଣା (ସ୍ୟା॰ କ॰)] ଚ ହୋନ୍ତି, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ମାତା ପିତା ଚ [ମାତା ଚ ପିତା (କ॰), ମାତାପିତରା (ସ୍ୟା॰)] ଭଗିନୀ ଭାତରୋ ଚ, ପୁତ୍ତା ଚ ଦାରା ଚ ମୟଞ୍ଚ ସବ୍ବେ ।
ଧମ୍ମଂ ଚରାମ ପରଲୋକହେତୁ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ଦାସା ଚ ଦାସ୍ୟୋ [ଦାସ୍ସୋ (ସୀ॰ ପୀ॰), ଦାସୀ (ସ୍ୟା॰)] ଅନୁଜୀୱିନୋ ଚ, ପରିଚାରକା କମ୍ମକରା ଚ ସବ୍ବେ ।
ଧମ୍ମଂ ଚରନ୍ତି ପରଲୋକହେତୁ, ତସ୍ମା ହି ଅମ୍ହଂ ଦହରା ନ ମିୟ୍ୟରେ ॥
ଧମ୍ମୋ ହୱେ ରକ୍ଖତି ଧମ୍ମଚାରିଂ, ଧମ୍ମୋ ସୁଚିଣ୍ଣୋ ସୁଖମାୱହାତି ।
ଏସାନିସଂସୋ ଧମ୍ମେ ସୁଚିଣ୍ଣେ, ନ ଦୁଗ୍ଗତିଂ ଗଚ୍ଛତି ଧମ୍ମଚାରୀ ॥
ଧମ୍ମୋ ହୱେ ରକ୍ଖତି ଧମ୍ମଚାରିଂ, ଛତ୍ତଂ ମହନ୍ତଂ ୱିୟ ୱସ୍ସକାଲେ ।
ଧମ୍ମେନ ଗୁତ୍ତୋ ମମ ଧମ୍ମପାଲୋ, ଅଞ୍ଞସ୍ସ ଅଟ୍ଠୀନି ସୁଖୀ କୁମାରୋତି ॥
ମହାଧମ୍ମପାଲଜାତକଂ ନୱମଂ ।
୪୪୮. କୁକ୍କୁଟଜାତକଂ (୧୦)
ନାସ୍ମସେ କତପାପମ୍ହି, ନାସ୍ମସେ ଅଲିକୱାଦିନେ ।
ନାସ୍ମସେ ଅତ୍ତତ୍ଥପଞ୍ଞମ୍ହି, ଅତିସନ୍ତେପି ନାସ୍ମସେ ॥
ଭୱନ୍ତି ହେକେ ପୁରିସା, ଗୋପିପାସିକଜାତିକା [ଗୋପିପାସକଜାତିକା (ସୀ॰ ସ୍ୟା॰ ପୀ॰)]।
ଘସନ୍ତି ମଞ୍ଞେ ମିତ୍ତାନି, ୱାଚାୟ ନ ଚ କମ୍ମୁନା ॥
ସୁକ୍ଖଞ୍ଜଲିପଗ୍ଗହିତା, ୱାଚାୟ ପଲିଗୁଣ୍ଠିତା ।
ମନୁସ୍ସଫେଗ୍ଗୂ ନାସୀଦେ, ୟସ୍ମିଂ ନତ୍ଥି କତଞ୍ଞୁତା ॥
ନ ହି ଅଞ୍ଞଞ୍ଞଚିତ୍ତାନଂ, ଇତ୍ଥୀନଂ ପୁରିସାନ ୱା ।
ନାନାୱିକତ୍ୱା [ନାନାୱ କତ୍ୱା (ସୀ॰ ପୀ॰)] ସଂସଗ୍ଗଂ, ତାଦିସମ୍ପି ଚ ନାସ୍ମସେ [ତାଦିସମ୍ପି ନ ୱିସ୍ସସେ (ସ୍ୟା॰)]॥
ଅନରିୟକମ୍ମମୋକ୍କନ୍ତଂ, ଅଥେତଂ [ଅତ୍ଥେତଂ (ସୀ॰ ସ୍ୟା॰ ପୀ॰)] ସବ୍ବଘାତିନଂ ।
ନିସିତଂୱ ପଟିଚ୍ଛନ୍ନଂ, ତାଦିସମ୍ପି ଚ ନାସ୍ମସେ ॥
ମିତ୍ତରୂପେନିଧେକଚ୍ଚେ, ସାଖଲ୍ୟେନ ଅଚେତସା ।
ୱିୱିଧେହି ଉପାୟନ୍ତି, ତାଦିସମ୍ପି ଚ ନାସ୍ମସେ ॥
ଆମିସଂ ୱା ଧନଂ ୱାପି, ୟତ୍ଥ ପସ୍ସତି ତାଦିସୋ ।
ଦୁବ୍ଭିଂ କରୋତି ଦୁମ୍ମେଧୋ, ତଞ୍ଚ ହନ୍ତ୍ୱାନ [ଝାତ୍ୱାନ (ସୀ॰ ପୀ॰), ହିତ୍ୱାନ (ସ୍ୟା॰)] ଗଚ୍ଛତି ॥
ମିତ୍ତରୂପେନ ବହୱୋ, ଛନ୍ନା ସେୱନ୍ତି ସତ୍ତୱୋ ।
ଜହେ କାପୁରିସେ ହେତେ, କୁକ୍କୁଟୋ ୱିୟ ସେନକଂ ॥
ୟୋ ଚ [ୟୋଧ (ଜା॰ ୧.୮.୨୫ ସୁଲସାଜାତକେ)] ଉପ୍ପତିତଂ ଅତ୍ଥଂ, ନ ଖିପ୍ପମନୁବୁଜ୍ଝତି ।
ଅମିତ୍ତୱସମନ୍ୱେତି, ପଚ୍ଛା ଚ ଅନୁତପ୍ପତି ॥
ୟୋ ଚ ଉପ୍ପତିତଂ ଅତ୍ଥଂ, ଖିପ୍ପମେୱ ନିବୋଧତି ।
ମୁଚ୍ଚତେ ସତ୍ତୁସମ୍ବାଧା, କୁକ୍କୁଟୋ ୱିୟ ସେନକା ।
ତଂ ତାଦିସଂ କୂଟମିୱୋଡ୍ଡିତଂ ୱନେ, ଅଧମ୍ମିକଂ ନିଚ୍ଚୱିଧଂସକାରିନଂ ।
ଆରା ୱିୱଜ୍ଜେୟ୍ୟ ନରୋ ୱିଚକ୍ଖଣୋ, ସେନଂ ୟଥା କୁକ୍କୁଟୋ ୱଂସକାନନେତି ॥
କୁକ୍କୁଟଜାତକଂ ଦସମଂ ।
୪୪୯. ମଟ୍ଠକୁଣ୍ଡଲୀଜାତକଂ (୧୧)
ଅଲଙ୍କତୋ ମଟ୍ଠକୁଣ୍ଡଲୀ [ମଟ୍ଟକୁଣ୍ଡଲୀ (ସୀ॰ ପୀ॰)], ମାଲଧାରୀ [ମାଲଭାରୀ (ସୀ॰ ପୀ॰)] ହରିଚନ୍ଦନୁସ୍ସଦୋ ।
ବାହା ପଗ୍ଗୟ୍ହ କନ୍ଦସି, ୱନମଜ୍ଝେ କିଂ ଦୁକ୍ଖିତୋ ତୁୱଂ ॥
ସୋୱଣ୍ଣମୟୋ ପଭସ୍ସରୋ, ଉପ୍ପନ୍ନୋ ରଥପଞ୍ଜରୋ ମମ ।
ତସ୍ସ ଚକ୍କୟୁଗଂ ନ ୱିନ୍ଦାମି, ତେନ ଦୁକ୍ଖେନ ଜହାମି ଜୀୱିତଂ ॥
ସୋୱଣ୍ଣମୟଂ ମଣୀମୟଂ, ଲୋହମୟଂ ଅଥ ରୂପିୟାମୟଂ ।
[ଆଚିକ୍ଖ ମେ ଭଦ୍ଦମାଣୱ (ୱି॰ ୱ॰ ୧୨୦୯)] ପାୱଦ ରଥଂ କରିସ୍ସାମି [କାରୟାମି (ସୀ॰ ପୀ॰)] ତେ [ଆଚିକ୍ଖ ମେ ଭଦ୍ଦମାଣୱ (ୱି॰ ୱ॰ ୧୨୦୯)], ଚକ୍କୟୁଗଂ ପଟିପାଦୟାମି ତଂ ॥
ସୋ [ଅଥ (ସ୍ୟା॰)] ମାଣୱୋ ତସ୍ସ ପାୱଦି, ଚନ୍ଦିମସୂରିୟା [ଚନ୍ଦିମସୂରିୟା (ସ୍ୟା॰)] ଉଭୟେତ୍ଥ ଭାତରୋ [ଦିସ୍ସରେ (ୱି॰ ୱ॰ ୧୨୧୦)]।
ସୋୱଣ୍ଣମୟୋ ରଥୋ ମମ, ତେନ ଚକ୍କୟୁଗେନ ସୋଭତି ॥
ବାଲୋ ଖୋ ତ୍ୱଂସି ମାଣୱ, ୟୋ ତ୍ୱଂ ପତ୍ଥୟସେ ଅପତ୍ଥିୟଂ ।
ମଞ୍ଞାମି ତୁୱଂ ମରିସ୍ସସି, ନ ହି ତ୍ୱଂ ଲଚ୍ଛସି ଚନ୍ଦସୂରିୟେ ॥
ଗମନାଗମନମ୍ପି ଦିସ୍ସତି, ୱଣ୍ଣଧାତୁ ଉଭୟେତ୍ଥ ୱୀଥିୟୋ ।
ପେତୋ ପନ ନେୱ ଦିସ୍ସତି, କୋ ନୁ ଖୋ [କୋ ନିଧ (ୱି॰ ୱ॰ ୧୨୧୨)] କନ୍ଦତଂ ବାଲ୍ୟତରୋ ॥
ସଚ୍ଚଂ ଖୋ ୱଦେସି ମାଣୱ, ଅହମେୱ କନ୍ଦତଂ ବାଲ୍ୟତରୋ ।
ଚନ୍ଦଂ ୱିୟ ଦାରକୋ ରୁଦଂ, ପେତଂ କାଲକତାଭିପତ୍ଥୟେ ॥
ଆଦିତ୍ତଂ ୱତ ମଂ ସନ୍ତଂ, ଘତସିତ୍ତଂୱ ପାୱକଂ ।
ୱାରିନା ୱିୟ ଓସିଞ୍ଚଂ, ସବ୍ବଂ ନିବ୍ବାପୟେ ଦରଂ ॥
ଅବ୍ବହୀ [ଅବ୍ବୁହି (ସ୍ୟା॰), ଅବ୍ଭୁଳ୍ହଂ (କ॰)] ୱତ ମେ ସଲ୍ଲଂ, ୟମାସି ହଦୟସ୍ସିତଂ [ସୋକଂ ହଦୟନିସ୍ସିତଂ (ୱି॰ ୱ॰ ୧୨୧୫)]।
ୟୋ ମେ ସୋକପରେତସ୍ସ, ପୁତ୍ତସୋକଂ ଅପାନୁଦି ॥
ସୋହଂ ଅବ୍ବୂଳ୍ହସଲ୍ଲୋସ୍ମି, ୱୀତସୋକୋ ଅନାୱିଲୋ ।
ନ ସୋଚାମି ନ ରୋଦାମି, ତୱ ସୁତ୍ୱାନ ମାଣୱାତି ॥
ମଟ୍ଠକୁଣ୍ଡଲୀଜାତକଂ ଏକାଦସମଂ ।
୪୫୦. ବିଲାରକୋସିୟଜାତକଂ (୧୨)
ଅପଚନ୍ତାପି ଦିଚ୍ଛନ୍ତି, ସନ୍ତୋ ଲଦ୍ଧାନ ଭୋଜନଂ ।
କିମେୱ ତ୍ୱଂ ପଚମାନୋ, ୟଂ ନ ଦଜ୍ଜା ନ ତଂ ସମଂ ॥
ମଚ୍ଛେରା ଚ ପମାଦା ଚ, ଏୱଂ ଦାନଂ ନ ଦିୟ୍ୟତି ।
ପୁଞ୍ଞଂ ଆକଙ୍ଖମାନେନ, ଦେୟ୍ୟଂ ହୋତି ୱିଜାନତା ॥
ୟସ୍ସେୱ ଭୀତୋ ନ ଦଦାତି ମଚ୍ଛରୀ, ତଦେୱାଦଦତୋ ଭୟଂ ।
ଜିଘଚ୍ଛା ଚ ପିପାସା ଚ, ୟସ୍ସ ଭାୟତି ମଚ୍ଛରୀ ।
ତମେୱ ବାଲଂ ଫୁସତି, ଅସ୍ମିଂ ଲୋକେ ପରମ୍ହି ଚ ॥
ତସ୍ମା ୱିନେୟ୍ୟ ମଚ୍ଛେରଂ, ଦଜ୍ଜା ଦାନଂ ମଲାଭିଭୂ ।
ପୁଞ୍ଞାନି ପରଲୋକସ୍ମିଂ, ପତିଟ୍ଠା ହୋନ୍ତି ପାଣିନଂ ॥
ଦୁଦ୍ଦଦଂ ଦଦମାନାନଂ, ଦୁକ୍କରଂ କମ୍ମ କୁବ୍ବତଂ ।
ଅସନ୍ତୋ ନାନୁକୁବ୍ବନ୍ତି, ସତଂ ଧମ୍ମୋ ଦୁରନ୍ନୟୋ ॥
ତସ୍ମା ସତଞ୍ଚ ଅସତଂ [ଅସତଞ୍ଚ (ସୀ॰ ସ୍ୟା॰ ପୀ॰)], ନାନା ହୋତି ଇତୋ ଗତି ।
ଅସନ୍ତୋ ନିରୟଂ ୟନ୍ତି, ସନ୍ତୋ ସଗ୍ଗପରାୟନା ॥
ଅପ୍ପସ୍ମେକେ [ଅପ୍ପମ୍ପେକେ (ସ୍ୟା॰)] ପୱେଚ୍ଛନ୍ତି, ବହୁନେକେ ନ ଦିଚ୍ଛରେ ।
ଅପ୍ପସ୍ମା ଦକ୍ଖିଣା ଦିନ୍ନା, ସହସ୍ସେନ ସମଂ ମିତା ॥
ଧମ୍ମଂ ଚରେ ୟୋପି ସମୁଞ୍ଛକଂ ଚରେ, ଦାରଞ୍ଚ ପୋସଂ ଦଦମପ୍ପକସ୍ମିଂ [ଦଦଂ ଅପ୍ପକସ୍ମିପି (ପୀ॰)]।
ସତଂ ସହସ୍ସାନଂ ସହସ୍ସୟାଗିନଂ, କଲମ୍ପି ନାଗ୍ଘନ୍ତି ତଥାୱିଧସ୍ସ ତେ ॥
କେନେସ ୟଞ୍ଞୋ ୱିପୁଲୋ ମହଗ୍ଘତୋ [ମହଗ୍ଗତୋ (ସଂ॰ ନି॰ ୧.୩୨)], ସମେନ ଦିନ୍ନସ୍ସ ନ ଅଗ୍ଘମେତି ।
କଥଂ ସତଂ ସହସ୍ସାନଂ [କଥଂ ସହସ୍ସାନଂ (ସୀ॰ ସ୍ୟା॰ ପୀ॰)] ସହସ୍ସୟାଗିନଂ, କଲମ୍ପି ନାଗ୍ଘନ୍ତି ତଥାୱିଧସ୍ସ ତେ ॥
ଦଦନ୍ତି ହେକେ ୱିସମେ ନିୱିଟ୍ଠା, ଛେତ୍ୱା [ଝତ୍ୱା (ସୀ॰ ପୀ॰), ଘତ୍ୱା (ସ୍ୟା॰)] ୱଧିତ୍ୱା ଅଥ ସୋଚୟିତ୍ୱା ।
ସା ଦକ୍ଖିଣା ଅସ୍ସୁମୁଖା ସଦଣ୍ଡା, ସମେନ ଦିନ୍ନସ୍ସ ନ ଅଗ୍ଘମେତି ।
ଏୱଂ ସତଂ ସହସ୍ସାନଂ [ଏୱଂ ସହସ୍ସାନଂ (ସୀ॰ ସ୍ୟା॰ ପୀ॰)] ସହସ୍ସୟାଗିନଂ, କଲମ୍ପି ନାଗ୍ଘନ୍ତି ତଥାୱିଧସ୍ସ ତେତି ॥
ବିଲାରକୋସିୟଜାତକଂ ଦ୍ୱାଦସମଂ ।
୪୫୧. ଚକ୍କୱାକଜାତକଂ (୧୩)
ୱଣ୍ଣୱା ଅଭିରୂପୋସି, ଘନୋ ସଞ୍ଜାତରୋହିତୋ ।
ଚକ୍କୱାକ ସୁରୂପୋସି, ୱିପ୍ପସନ୍ନମୁଖିନ୍ଦ୍ରିୟୋ ॥
ପାଠୀନଂ ପାୱୁସଂ ମଚ୍ଛଂ, ବଲଜଂ [ୱାଲଜଂ (ସୀ॰ ପୀ॰), ବଲଜ୍ଜଂ (ସ୍ୟା॰)] ମୁଞ୍ଜରୋହିତଂ ।
ଗଙ୍ଗାୟ ତୀରେ ନିସିନ୍ନୋ [ଗଙ୍ଗାତୀରେ ନିସିନ୍ନୋସି (ସ୍ୟା॰ କ॰)], ଏୱଂ ଭୁଞ୍ଜସି ଭୋଜନଂ ॥
ନ ୱାହମେତଂ [ସବ୍ବତ୍ଥପି ସମାନଂ] ଭୁଞ୍ଜାମି, ଜଙ୍ଗଲାନୋଦକାନି ୱା ।
ଅଞ୍ଞତ୍ର ସେୱାଲପଣକା, ଏତଂ [ଅଞ୍ଞଂ (ସ୍ୟା॰)] ମେ ସମ୍ମ ଭୋଜନଂ ॥
ନ ୱାହମେତଂ ସଦ୍ଦହାମି, ଚକ୍କୱାକସ୍ସ ଭୋଜନଂ ।
ଅହମ୍ପି ସମ୍ମ ଭୁଞ୍ଜାମି, ଗାମେ ଲୋଣିୟତେଲିୟଂ ॥
ମନୁସ୍ସେସୁ କତଂ ଭତ୍ତଂ, ସୁଚିଂ ମଂସୂପସେଚନଂ ।
ନ ଚ ମେ ତାଦିସୋ ୱଣ୍ଣୋ, ଚକ୍କୱାକ ୟଥା ତୁୱଂ ॥
ସମ୍ପସ୍ସଂ ଅତ୍ତନି ୱେରଂ, ହିଂସୟଂ [ହିଂସାୟ (ସ୍ୟା॰ ପୀ॰ କ॰)] ମାନୁସିଂ ପଜଂ ।
ଉତ୍ରସ୍ତୋ ଘସସୀ ଭୀତୋ, ତେନ ୱଣ୍ଣୋ ତୱେଦିସୋ ॥
ସବ୍ବଲୋକୱିରୁଦ୍ଧୋସି, ଧଙ୍କ ପାପେନ କମ୍ମୁନା ।
ଲଦ୍ଧୋ ପିଣ୍ଡୋ ନ ପୀଣେତି, ତେନ ୱଣ୍ଣୋ ତୱେଦିସୋ ॥
ଅହମ୍ପି [ଅହଞ୍ଚ ( ?)] ସମ୍ମ ଭୁଞ୍ଜାମି, ଅହିଂସଂ ସବ୍ବପାଣିନଂ ।
ଅପ୍ପୋସ୍ସୁକ୍କୋ ନିରାସଙ୍କୀ, ଅସୋକୋ ଅକୁତୋଭୟୋ ॥
ସୋ କରସ୍ସୁ ଆନୁଭାୱଂ, ୱୀତିୱତ୍ତସ୍ସୁ ସୀଲିୟଂ ।
ଅହିଂସାୟ ଚର ଲୋକେ, ପିୟୋ ହୋହିସି ମଂମିୱ ॥
ୟୋ ନ ହନ୍ତି ନ ଘାତେତି, ନ ଜିନାତି ନ ଜାପୟେ ।
ମେତ୍ତଂସୋ ସବ୍ବଭୂତେସୁ, ୱେରଂ ତସ୍ସ ନ କେନଚୀତି ॥
ଚକ୍କୱାକଜାତକଂ ତେରସମଂ ।
୪୫୨. ଭୂରିପଞ୍ଞଜାତକଂ (୧୪)
ସଚ୍ଚଂ କିର ତ୍ୱଂ ଅପି [ତ୍ୱମ୍ପି (ସୀ॰), ତୁୱମ୍ପି (ସ୍ୟା॰), ତ୍ୱଂ ଅସି (କ॰)] ଭୂରିପଞ୍ଞ, ୟା ତାଦିସୀ ସୀରି ଧିତୀ ମତୀ ଚ ।
ନ ତାୟତେଭାୱୱସୂପନିତଂ, ୟୋ ୟୱକଂ ଭୁଞ୍ଜସି ଅପ୍ପସୂପଂ ॥
ସୁଖଂ ଦୁକ୍ଖେନ ପରିପାଚୟନ୍ତୋ, କାଲା କାଲଂ ୱିଚିନଂ ଛନ୍ଦଛନ୍ନୋ ।
ଅତ୍ଥସ୍ସ ଦ୍ୱାରାନି ଅୱାପୁରନ୍ତୋ, ତେନାହଂ ତୁସ୍ସାମି ୟୱୋଦନେନ ॥
କାଲଞ୍ଚ ଞତ୍ୱା ଅଭିଜୀହନାୟ, ମନ୍ତେହି ଅତ୍ଥଂ ପରିପାଚୟିତ୍ୱା ।
ୱିଜମ୍ଭିସ୍ସଂ ସୀହୱିଜମ୍ଭିତାନି, ତାୟିଦ୍ଧିୟା ଦକ୍ଖସି ମଂ ପୁନାପି ॥
ସୁଖୀପି ହେକେ [ସୁଖୀ ହି ଏକେ (ସୀ॰), ସୁଖୀତି ହେକେ ( ?)] ନ କରୋନ୍ତି ପାପଂ, ଅୱଣ୍ଣସଂସଗ୍ଗଭୟା ପୁନେକେ ।
ପହୂ ସମାନୋ ୱିପୁଲତ୍ଥଚିନ୍ତୀ, କିଂକାରଣା ମେ ନ କରୋସି ଦୁକ୍ଖଂ ॥
ନ ପଣ୍ଡିତା ଅତ୍ତସୁଖସ୍ସ ହେତୁ, ପାପାନି କମ୍ମାନି ସମାଚରନ୍ତି ।
ଦୁକ୍ଖେନ ଫୁଟ୍ଠା ଖଲିତାପି ସନ୍ତା, ଛନ୍ଦା ଚ ଦୋସା ନ ଜହନ୍ତି ଧମ୍ମଂ ॥
ୟେନ କେନଚି ୱଣ୍ଣେନ, ମୁଦୁନା ଦାରୁଣେନ ୱା ।
ଉଦ୍ଧରେ ଦୀନମତ୍ତାନଂ, ପଚ୍ଛା ଧମ୍ମଂ ସମାଚରେ ॥
ୟସ୍ସ ରୁକ୍ଖସ୍ସ ଛାୟାୟ, ନିସୀଦେୟ୍ୟ ସୟେୟ୍ୟ ୱା ।
ନ ତସ୍ସ ସାଖଂ ଭଞ୍ଜେୟ୍ୟ, ମିତ୍ତଦୁବ୍ଭୋ ହି ପାପକୋ ॥
ୟସ୍ସାପି [ୟସ୍ସ ହି (ସୀ॰ କ॰)] ଧମ୍ମଂ ପୁରିସୋ [ମନୁଜୋ (ସୀ॰)] ୱିଜଞ୍ଞା, ୟେ ଚସ୍ସ କଙ୍ଖଂ ୱିନୟନ୍ତି ସନ୍ତୋ ।
ତଂ ହିସ୍ସ ଦୀପଞ୍ଚ ପରାୟନଞ୍ଚ, ନ ତେନ ମେତ୍ତିଂ ଜରୟେଥ ପଞ୍ଞୋ ॥
ଅଲସୋ ଗିହୀ କାମଭୋଗୀ ନ ସାଧୁ, ଅସଞ୍ଞତୋ ପବ୍ବଜିତୋ ନ ସାଧୁ ।
ରାଜା ନ ସାଧୁ ଅନିସମ୍ମକାରୀ, ୟୋ ପଣ୍ଡିତୋ କୋଧନୋ ତଂ ନ ସାଧୁ ॥
ନିସମ୍ମ ଖତ୍ତିୟୋ କୟିରା, ନାନିସମ୍ମ ଦିସମ୍ପତି ।
ନିସମ୍ମକାରିନୋ ରାଜ, ୟସୋ କିତ୍ତି ଚ ୱଡ୍ଢତୀତି ॥
ଭୂରିପଞ୍ଞଜାତକଂ ଚୁଦ୍ଦସମଂ ।
୪୫୩. ମହାମଙ୍ଗଲଜାତକଂ (୧୫)
କିଂସୁ ନରୋ ଜପ୍ପମଧିଚ୍ଚକାଲେ, କଂ ୱା ୱିଜ୍ଜଂ କତମଂ ୱା ସୁତାନଂ ।
ସୋ ମଚ୍ଚୋ ଅସ୍ମିଞ୍ଚ [ଅସ୍ମିଂୱ (ପୀ॰)] ପରମ୍ହି ଲୋକେ, କଥଂ କରୋ ସୋତ୍ଥାନେନ ଗୁତ୍ତୋ ॥
ୟସ୍ସ ଦେୱା ପିତରୋ ଚ ସବ୍ବେ, ସରୀସପା [ସିରିଂସପା (ସୀ॰ ସ୍ୟା॰ ପୀ॰)] ସବ୍ବଭୂତାନି ଚାପି ।
ମେତ୍ତାୟ ନିଚ୍ଚଂ ଅପଚିତାନି ହୋନ୍ତି, ଭୂତେସୁ ୱେ ସୋତ୍ଥାନଂ ତଦାହୁ ॥
ୟୋ ସବ୍ବଲୋକସ୍ସ ନିୱାତୱୁତ୍ତି, ଇତ୍ଥୀପୁମାନଂ ସହଦାରକାନଂ ।
ଖନ୍ତା ଦୁରୁତ୍ତାନମପ୍ପଟିକୂଲୱାଦୀ, ଅଧିୱାସନଂ ସୋତ୍ଥାନଂ ତଦାହୁ ॥
ୟୋ ନାୱଜାନାତି ସହାୟମିତ୍ତେ [ସହାୟମତ୍ତେ (ସୀ॰ ପୀ॰)], ସିପ୍ପେନ କୁଲ୍ୟାହି ଧନେନ ଜଚ୍ଚା ।
ରୁଚିପଞ୍ଞୋ ଅତ୍ଥକାଲେ ମତୀମା [ମୁତୀମା (ସୀ॰ ପୀ॰)], ସହାୟେସୁ ୱେ ସୋତ୍ଥାନଂ ତଦାହୁ ॥
ମିତ୍ତାନି ୱେ ୟସ୍ସ ଭୱନ୍ତି ସନ୍ତୋ, ସଂୱିସ୍ସତ୍ଥା ଅୱିସଂୱାଦକସ୍ସ ।
ନ ମିତ୍ତଦୁବ୍ଭୀ ସଂୱିଭାଗୀ ଧନେନ, ମିତ୍ତେସୁ ୱେ ସୋତ୍ଥାନଂ ତଦାହୁ ॥
ୟସ୍ସ ଭରିୟା ତୁଲ୍ୟୱୟା ସମଗ୍ଗା, ଅନୁବ୍ବତା ଧମ୍ମକାମା ପଜାତା [ସଜାତା (କ॰)]।
କୋଲିନିୟା ସୀଲୱତୀ ପତିବ୍ବତା, ଦାରେସୁ ୱେ ସୋତ୍ଥାନଂ ତଦାହୁ ॥
ୟସ୍ସ ରାଜା ଭୂତପତି [ଭୂତପତୀ (ସୀ॰ ସ୍ୟା॰ ପୀ॰)] ୟସସ୍ସୀ, ଜାନାତି ସୋଚେୟ୍ୟଂ ପରକ୍କମଞ୍ଚ ।
ଅଦ୍ୱେଜ୍ଝତା ସୁହଦୟଂ ମମନ୍ତି, ରାଜୂସୁ ୱେ ସୋତ୍ଥାନଂ ତଦାହୁ ॥
ଅନ୍ନଞ୍ଚ ପାନଞ୍ଚ ଦଦାତି ସଦ୍ଧୋ, ମାଲଞ୍ଚ ଗନ୍ଧଞ୍ଚ ୱିଲେପନଞ୍ଚ ।
ପସନ୍ନଚିତ୍ତୋ ଅନୁମୋଦମାନୋ, ସଗ୍ଗେସୁ ୱେ ସୋତ୍ଥାନଂ ତଦାହୁ ॥
ୟମରିୟଧମ୍ମେନ ପୁନନ୍ତି ୱୁଦ୍ଧା, ଆରାଧିତା ସମଚରିୟାୟ ସନ୍ତୋ ।
ବହୁସ୍ସୁତା ଇସୟୋ ସୀଲୱନ୍ତୋ, ଅରହନ୍ତମଜ୍ଝେ ସୋତ୍ଥାନଂ ତଦାହୁ ॥
ଏତାନି ଖୋ ସୋତ୍ଥାନାନି ଲୋକେ, ୱିଞ୍ଞୁପ୍ପସତ୍ଥାନି ସୁଖୁଦ୍ରୟାନି [ସୁଖିନ୍ଦ୍ରିୟାନି (ପୀ॰)]।
ତାନୀଧ ସେୱେଥ ନରୋ ସପଞ୍ଞୋ, ନ ହି ମଙ୍ଗଲେ କିଞ୍ଚନମତ୍ଥି ସଚ୍ଚନ୍ତି ॥
ମହାମଙ୍ଗଲଜାତକଂ ପନ୍ନରସମଂ ।
୪୫୪. ଘଟପଣ୍ଡିତଜାତକଂ (୧୬)
ଉଟ୍ଠେହି କଣ୍ହ କିଂ ସେସି, କୋ ଅତ୍ଥୋ ସୁପନେନ ତେ ।
ୟୋପି ତୁୟ୍ହଂ [ତାୟଂ (ପୀ॰)] ସକୋ ଭାତା, ହଦୟଂ ଚକ୍ଖୁ ଚ [ଚକ୍ଖୁଂୱ (ପୀ॰)] ଦକ୍ଖିଣଂ ।
ତସ୍ସ ୱାତା ବଲୀୟନ୍ତି, ଘଟୋ ଜପ୍ପତି [ସସଂ ଜପ୍ପତି ( ?)] କେସୱ ॥
ତସ୍ସ ତଂ ୱଚନଂ ସୁତ୍ୱା, ରୋହିଣେୟ୍ୟସ୍ସ କେସୱୋ ।
ତରମାନରୂପୋ ୱୁଟ୍ଠାସି, ଭାତୁସୋକେନ ଅଟ୍ଟିତୋ ॥
କିଂ ନୁ ଉମ୍ମତ୍ତରୂପୋୱ, କେୱଲଂ ଦ୍ୱାରକଂ ଇମଂ ।
ସସୋ ସସୋତି ଲପସି, କୋ ନୁ ତେ ସସମାହରି ॥
ସୋୱଣ୍ଣମୟଂ ମଣୀମୟଂ, ଲୋହମୟଂ ଅଥ ରୂପିୟାମୟଂ ।
ସଙ୍ଖସିଲାପୱାଳମୟଂ, କାରୟିସ୍ସାମି ତେ ସସଂ ॥
ସନ୍ତି ଅଞ୍ଞେପି ସସକା, ଅରଞ୍ଞେ ୱନଗୋଚରା ।
ତେପି ତେ ଆନୟିସ୍ସାମି, କୀଦିସଂ ସସମିଚ୍ଛସି ॥
ନ ଚାହମେତେ [ନ ଚାହମେତଂ (ସୀ॰), ନ ୱାହମେତେ (ସ୍ୟା॰), ନ ୱାହମେତଂ (ପୀ॰)] ଇଚ୍ଛାମି, ୟେ ସସା ପଥୱିସ୍ସିତା [ପଠୱିଂସିତା (ସୀ॰ ସ୍ୟା॰ ପୀ॰)]।
ଚନ୍ଦତୋ ସସମିଚ୍ଛାମି, ତଂ ମେ ଓହର କେସୱ ॥
ସୋ ନୂନ ମଧୁରଂ ଞାତି, ଜୀୱିତଂ ୱିଜହିସ୍ସସି ।
ଅପତ୍ଥିୟଂ ୟୋ ପତ୍ଥୟସି, ଚନ୍ଦତୋ ସସମିଚ୍ଛସି ॥
ଏୱଂ ଚେ କଣ୍ହ ଜାନାସି, ୟଦଞ୍ଞମନୁସାସସି ।
କସ୍ମା ପୁରେ ମତଂ ପୁତ୍ତଂ, ଅଜ୍ଜାପି ମନୁସୋଚସି ॥
ୟଂ ନ ଲବ୍ଭା ମନୁସ୍ସେନ, ଅମନୁସ୍ସେନ ୱା ପୁନ [ପନ (ପେ॰ ୱ॰ ୨୧୫)]।
ଜାତୋ ମେ ମା ମରୀ ପୁତ୍ତୋ, କୁତୋ ଲବ୍ଭା ଅଲବ୍ଭିୟଂ ॥
ନ ମନ୍ତା ମୂଲଭେସଜ୍ଜା, ଓସଧେହି ଧନେନ ୱା ।
ସକ୍କା ଆନୟିତୁଂ କଣ୍ହ, ୟଂ ପେତମନୁସୋଚସି ॥
ୟସ୍ସ ଏତାଦିସା ଅସ୍ସୁ, ଅମଚ୍ଚା ପୁରିସପଣ୍ଡିତା ।
ୟଥା ନିଜ୍ଝାପୟେ ଅଜ୍ଜ, ଘଟୋ ପୁରିସପଣ୍ଡିତୋ ॥
ଆଦିତ୍ତଂ ୱତ ମଂ ସନ୍ତଂ, ଘତସିତ୍ତଂୱ ପାୱକଂ ।
ୱାରିନା ୱିୟ ଓସିଞ୍ଚଂ, ସବ୍ବଂ ନିବ୍ବାପୟେ ଦରଂ ॥
ଅବ୍ବହୀ ୱତ ମେ ସଲ୍ଲଂ, ୟମାସି ହଦୟସ୍ସିତଂ ।
ୟୋ ମେ ସୋକପରେତସ୍ସ, ପୁତ୍ତସୋକଂ ଅପାନୁଦି ॥
ସୋହଂ ଅବ୍ବୂଳ୍ହସଲ୍ଲୋସ୍ମି, ୱୀତସୋକୋ ଅନାୱିଲୋ ।
ନ ସୋଚାମି ନ ରୋଦାମି, ତୱ ସୁତ୍ୱାନ ମାଣୱ [ଭାତିକ (ପେ॰ ୱ॰ ୨୨୪)]॥
ଏୱଂ କରୋନ୍ତି ସପ୍ପଞ୍ଞା, ୟେ ହୋନ୍ତି ଅନୁକମ୍ପକା ।
ନିୱତ୍ତୟନ୍ତି ସୋକମ୍ହା, ଘଟୋ ଜେଟ୍ଠଂୱ ଭାତରନ୍ତି ॥
ଘଟପଣ୍ଡିତଜାତକଂ ସୋଳସମଂ ।
ଦସକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ଦଳ୍ହ କଣ୍ହ ଧନଞ୍ଜୟ ସଙ୍ଖୱରୋ, ରଜ ସତ୍ତହ କସ୍ସ ଚ [ସତ୍ତାହସସାଖ (ସ୍ୟା॰)] ତକ୍କଲିନା ।
ଧମ୍ମଂ କୁକ୍କୁଟ କୁଣ୍ଡଲି ଭୋଜନଦା, ଚକ୍କୱାକ ସୁଭୂରିସ ସୋତ୍ଥି ଘଟୋତି ॥
୧୧. ଏକାଦସକନିପାତୋ
୪୫୫. ମାତୁପୋସକଜାତକଂ (୧)
ତସ୍ସ ନାଗସ୍ସ ୱିପ୍ପୱାସେନ, ୱିରୂଳ୍ହା ସଲ୍ଲକୀ ଚ କୁଟଜା ଚ ।
କୁରୁୱିନ୍ଦକରୱୀରା [କରୱରା (ସୀ॰ ସ୍ୟା॰)] ତିସସାମା ଚ, ନିୱାତେ ପୁପ୍ଫିତା ଚ କଣିକାରା ॥
କୋଚିଦେୱ ସୁୱଣ୍ଣକାୟୁରା, ନାଗରାଜଂ ଭରନ୍ତି ପିଣ୍ଡେନ ।
ୟତ୍ଥ ରାଜା ରାଜକୁମାରୋ ୱା, କୱଚମଭିହେସ୍ସତି ଅଛମ୍ଭିତୋ [ଅସମ୍ଭୀତୋ (ସୀ॰ ସ୍ୟା॰ ପୀ॰)]॥
ଗଣ୍ହାହି ନାଗ କବଳଂ, ମା ନାଗ କିସକୋ ଭୱ ।
ବହୂନି ରାଜକିଚ୍ଚାନି, ତାନି [ୟାନି (ସୀ॰ ପୀ॰)] ନାଗ କରିସ୍ସସି ॥
ସା ନୂନସା କପଣିକା, ଅନ୍ଧା ଅପରିଣାୟିକା ।
ଖାଣୁଂ ପାଦେନ ଘଟ୍ଟେତି, ଗିରିଂ ଚଣ୍ଡୋରଣଂ ପତି ॥
କା ନୁ ତେ ସା ମହାନାଗ, ଅନ୍ଧା ଅପରିଣାୟିକା ।
ଖାଣୁଂ ପାଦେନ ଘଟ୍ଟେତି, ଗିରିଂ ଚଣ୍ଡୋରଣଂ ପତି ॥
ମାତା ମେ ସା ମହାରାଜ, ଅନ୍ଧା ଅପରିଣାୟିକା ।
ଖାଣୁଂ ପାଦେନ ଘଟ୍ଟେତି, ଗିରିଂ ଚଣ୍ଡୋରଣଂ ପତି ॥
ମୁଞ୍ଚଥେତଂ ମହାନାଗଂ, ୟୋୟଂ ଭରତି ମାତରଂ ।
ସମେତୁ ମାତରା ନାଗୋ, ସହ ସବ୍ବେହି ଞାତିଭି ॥
ମୁତ୍ତୋ ଚ ବନ୍ଧନା ନାଗୋ, ମୁତ୍ତମାଦାୟ କୁଞ୍ଜରୋ [କାସିରାଜେନ ପେସିତୋ (ସୀ॰ ସ୍ୟା॰), ମୁତ୍ତୋ ଦାମାତୋ କୁଞ୍ଜରୋ (ପୀ॰ ସୀ॰ ନିୟ୍ୟ)]।
ମୁହୁତ୍ତଂ ଅସ୍ସାସୟିତ୍ୱା [ୱିସ୍ସମିତ୍ୱାନ (ସୀ॰)], ଅଗମା ୟେନ ପବ୍ବତୋ ॥
ତତୋ ସୋ ନଳିନିଂ [ନିଲିନଂ (ସ୍ୟା॰)] ଗନ୍ତ୍ୱା, ସୀତଂ କୁଞ୍ଜରସେୱିତଂ ।
ସୋଣ୍ଡାୟୂଦକମାହତ୍ୱା [ମାହିତ୍ୱା (ସ୍ୟା॰ କ॰)], ମାତରଂ ଅଭିସିଞ୍ଚଥ ॥
କୋୟ ଅନରିୟୋ ଦେୱୋ, ଅକାଲେନପି ୱସ୍ସତି [ଅକାଲେନ ପୱସ୍ସତି (ସୀ॰ ସ୍ୟା॰), ଅକାଲେନ’ତିୱସ୍ସତି (ପୀ॰)]।
ଗତୋ ମେ ଅତ୍ରଜୋ ପୁତ୍ତୋ, ୟୋ ମୟ୍ହଂ ପରିଚାରକୋ ॥
ଉଟ୍ଠେହି ଅମ୍ମ କିଂ ସେସି, ଆଗତୋ ତ୍ୟାହମତ୍ରଜୋ ।
ମୁତ୍ତୋମ୍ହି କାସିରାଜେନ, ୱେଦେହେନ ୟସସ୍ସିନା ॥
ଚିରଂ ଜୀୱତୁ ସୋ ରାଜା, କାସୀନଂ ରଟ୍ଠୱଡ୍ଢନୋ ।
ୟୋ ମେ ପୁତ୍ତଂ ପମୋଚେସି, ସଦା ୱୁଦ୍ଧାପଚାୟିକନ୍ତି ॥
ମାତୁପୋସକଜାତକଂ ପଠମଂ ।
୪୫୬. ଜୁଣ୍ହଜାତକଂ (୨)
ସୁଣୋହି ମୟ୍ହଂ ୱଚନଂ ଜନିନ୍ଦ, ଅତ୍ଥେନ ଜୁଣ୍ହମ୍ହି ଇଧାନୁପତ୍ତୋ ।
ନ ବ୍ରାହ୍ମଣେ ଅଦ୍ଧିକେ ତିଟ୍ଠମାନେ, ଗନ୍ତବ୍ବ [ଗନ୍ତବ୍ୟ (କ॰)] ମାହୁ ଦ୍ୱିପଦିନ୍ଦ [ଦିପଦାନ (ସୀ॰ ପୀ॰), ଦ୍ୱିପଦାନ (ସ୍ୟା॰)] ସେଟ୍ଠ ॥
ସୁଣୋମି ତିଟ୍ଠାମି ୱଦେହି ବ୍ରହ୍ମେ, ୟେନାସି [ୟେନାପି (ସ୍ୟା॰ କ॰)] ଅତ୍ଥେନ ଇଧାନୁପତ୍ତୋ ।
କଂ ୱା ତ୍ୱମତ୍ଥଂ ମୟି ପତ୍ଥୟାନୋ, ଇଧାଗମା ବ୍ରହ୍ମେ ତଦିଙ୍ଘ ବ୍ରୂହି ॥
ଦଦାହି ମେ ଗାମୱରାନି ପଞ୍ଚ, ଦାସୀସତଂ ସତ୍ତ ଗୱଂସତାନି ।
ପରୋସହସ୍ସଞ୍ଚ ସୁୱଣ୍ଣନିକ୍ଖେ, ଭରିୟା ଚ ମେ ସାଦିସୀ ଦ୍ୱେ ଦଦାହି ॥
ତପୋ ନୁ ତେ ବ୍ରାହ୍ମଣ ଭିଂସରୂପୋ, ମନ୍ତା ନୁ ତେ ବ୍ରାହ୍ମଣ ଚିତ୍ତରୂପା ।
ୟକ୍ଖା ନୁ [ୟକ୍ଖା ୱ (ସୀ॰ ପୀ॰)] ତେ ଅସ୍ସୱା ସନ୍ତି କେଚି, ଅତ୍ଥଂ ୱା ମେ ଅଭିଜାନାସି କତ୍ତଂ ॥
ନ ମେ ତପୋ ଅତ୍ଥି ନ ଚାପି ମନ୍ତା, ୟକ୍ଖାପି ମେ ଅସ୍ସୱା ନତ୍ଥି କେଚି ।
ଅତ୍ଥମ୍ପି ତେ ନାଭିଜାନାମି କତ୍ତଂ, ପୁବ୍ବେ ଚ ଖୋ [ପୁବ୍ବେୱ ଖୋ (ସ୍ୟା॰ କ॰)] ସଙ୍ଗତିମତ୍ତମାସି ॥
ପଠମଂ ଇଦଂ ଦସ୍ସନଂ ଜାନତୋ ମେ, ନ ତାଭିଜାନାମି ଇତୋ ପୁରତ୍ଥା ।
ଅକ୍ଖାହି ମେ ପୁଚ୍ଛିତୋ ଏତମତ୍ଥଂ, କଦା କୁହିଂ ୱା ଅହୁ ସଙ୍ଗମୋ ନୋ ॥
ଗନ୍ଧାରରାଜସ୍ସ ପୁରମ୍ହି ରମ୍ମେ, ଅୱସିମ୍ହସେ ତକ୍କସୀଲାୟଂ ଦେୱ ।
ତତ୍ଥନ୍ଧକାରମ୍ହି ତିମୀସିକାୟଂ [ତିମିସ୍ସିକାୟଂ (ସୀ॰ ଅଟ୍ଠ॰), ତିମିସ୍ସକାୟଂ (ସ୍ୟା॰)], ଅଂସେନ ଅଂସଂ ସମଘଟ୍ଟୟିମ୍ହ ॥
ତେ ତତ୍ଥ ଠତ୍ୱାନ ଉଭୋ ଜନିନ୍ଦ, ସାରାଣିୟଂ [ସାରଣୀୟଂ (କ॰)] ୱୀତିସାରୟିମ୍ହ [ୱୀତିସାରିମ୍ହ (ସୀ॰ ସ୍ୟା॰ ପୀ॰)] ତତ୍ଥ ।
ସାୟେୱ ନୋ ସଙ୍ଗତିମତ୍ତମାସି, ତତୋ ନ ପଚ୍ଛା ନ ପୁରେ ଅହୋସି ॥
ୟଦା କଦାଚି ମନୁଜେସୁ ବ୍ରହ୍ମେ, ସମାଗମୋ ସପ୍ପୁରିସେନ ହୋତି ।
ନ ପଣ୍ଡିତା ସଙ୍ଗତିସନ୍ଥୱାନି, ପୁବ୍ବେ କତଂ ୱାପି ୱିନାସୟନ୍ତି ॥
ବାଲାୱ [ବାଲା ଚ (ସୀ॰ ସ୍ୟା॰ ପୀ॰)] ଖୋ ସଙ୍ଗତିସନ୍ଥୱାନି, ପୁବ୍ବେ କତଂ ୱାପି ୱିନାସୟନ୍ତି ।
ବହୁମ୍ପି ବାଲେସୁ କତଂ ୱିନସ୍ସତି, ତଥା ହି ବାଲା ଅକତଞ୍ଞୁରୂପା ॥
ଧୀରା ଚ ଖୋ ସଙ୍ଗତିସନ୍ଥୱାନି, ପୁବ୍ବେ କତଂ ୱାପି ନ ନାସୟନ୍ତି ।
ଅପ୍ପମ୍ପି ଧୀରେସୁ କତଂ ନ ନସ୍ସତି, ତଥା ହି ଧୀରା ସୁକତଞ୍ଞୁରୂପା ॥
ଦଦାମି ତେ ଗାମୱରାନି ପଞ୍ଚ, ଦାସୀସତଂ ସତ୍ତ ଗୱଂସତାନି ।
ପରୋସହସ୍ସଞ୍ଚ ସୁୱଣ୍ଣନିକ୍ଖେ, ଭରିୟା ଚ ତେ ସାଦିସୀ ଦ୍ୱେ ଦଦାମି ॥
ଏୱଂ ସତଂ ହୋତି ସମେଚ୍ଚ ରାଜ, ନକ୍ଖତ୍ତରାଜାରିୱ ତାରକାନଂ ।
ଆପୂରତୀ କାସିପତୀ ତଥାହଂ, ତୟାପି ମେ ସଙ୍ଗମୋ ଅଜ୍ଜ ଲଦ୍ଧୋତି ॥
ଜୁଣ୍ହଜାତକଂ ଦୁତିୟଂ ।
୪୫୭. ଧମ୍ମଦେୱପୁତ୍ତଜାତକଂ (୩)
ୟସୋକରୋ ପୁଞ୍ଞକରୋହମସ୍ମି, ସଦାତ୍ଥୁତୋ ସମଣବ୍ରାହ୍ମଣାନଂ ।
ମଗ୍ଗାରହୋ ଦେୱମନୁସ୍ସପୂଜିତୋ, ଧମ୍ମୋ ଅହଂ ଦେହି ଅଧମ୍ମ ମଗ୍ଗଂ ॥
ଅଧମ୍ମୟାନଂ ଦଳ୍ହମାରୁହିତ୍ୱା, ଅସନ୍ତସନ୍ତୋ ବଲୱାହମସ୍ମି ।
ସ କିସ୍ସ ହେତୁମ୍ହି ତୱଜ୍ଜ ଦଜ୍ଜଂ, ମଗ୍ଗଂ ଅହଂ ଧମ୍ମ ଅଦିନ୍ନପୁବ୍ବଂ ॥
ଧମ୍ମୋ ହୱେ ପାତୁରହୋସି ପୁବ୍ବେ, ପଚ୍ଛା ଅଧମ୍ମୋ ଉଦପାଦି ଲୋକେ ।
ଜେଟ୍ଠୋ ଚ ସେଟ୍ଠୋ ଚ ସନନ୍ତନୋ ଚ, ଉୟ୍ୟାହି ଜେଟ୍ଠସ୍ସ କନିଟ୍ଠ ମଗ୍ଗା ॥
ନ ୟାଚନାୟ ନପି ପାତିରୂପା, ନ ଅରହତା [ନ ଅରହତି (ସୀ॰ ପୀ॰), ଅରହତି (କ॰)] ତେହଂ ଦଦେୟ୍ୟଂ ମଗ୍ଗଂ ।
ୟୁଦ୍ଧଞ୍ଚ ନୋ ହୋତୁ ଉଭିନ୍ନମଜ୍ଜ, ୟୁଦ୍ଧମ୍ହି ୟୋ ଜେସ୍ସତି ତସ୍ସ ମଗ୍ଗୋ ॥
ସବ୍ବା ଦିସା ଅନୁୱିସଟୋହମସ୍ମି, ମହବ୍ବଲୋ ଅମିତୟସୋ ଅତୁଲ୍ୟୋ ।
ଗୁଣେହି ସବ୍ବେହି ଉପେତରୂପୋ, ଧମ୍ମୋ ଅଧମ୍ମ ତ୍ୱଂ କଥଂ ୱିଜେସ୍ସସି ॥
ଲୋହେନ ୱେ ହଞ୍ଞତି ଜାତରୂପଂ, ନ ଜାତରୂପେନ ହନନ୍ତି ଲୋହଂ ।
ସଚେ ଅଧମ୍ମୋ ହଞ୍ଛତି [ହଞ୍ଞତି (ସୀ॰ ସ୍ୟା॰), ହଞ୍ଞିତି (କତ୍ଥଚି)] ଧମ୍ମମଜ୍ଜ, ଅୟୋ ସୁୱଣ୍ଣଂ ୱିୟ ଦସ୍ସନେୟ୍ୟଂ ॥
ସଚେ ତୁୱଂ ୟୁଦ୍ଧବଲୋ ଅଧମ୍ମ [ୟୁଦ୍ଧବଲୋ’ସି’ଧମ୍ମ (କ॰ ସୀ॰), ୟୁଦ୍ଧବଲୋ’ସ’ଧମ୍ମ (ପୀ॰)], ନ ତୁୟ୍ହ ୱୁଡ୍ଢା [ୱଦ୍ଧା (ସୀ॰ ପୀ॰)] ଚ ଗରୂ ଚ ଅତ୍ଥି ।
ମଗ୍ଗଞ୍ଚ ତେ ଦମ୍ମି ପିୟାପ୍ପିୟେନ, ୱାଚାଦୁରୁତ୍ତାନିପି ତେ ଖମାମି ॥
ଇଦଞ୍ଚ ସୁତ୍ୱା ୱଚନଂ ଅଧମ୍ମୋ, ଅୱଂସିରୋ ପତିତୋ ଉଦ୍ଧପାଦୋ ।
‘‘ୟୁଦ୍ଧତ୍ଥିକୋ ଚେ ନ ଲଭାମି ୟୁଦ୍ଧଂ’’, ଏତ୍ତାୱତା ହୋତି ହତୋ ଅଧମ୍ମୋ ॥
ଖନ୍ତୀବଲୋ ୟୁଦ୍ଧବଲଂ ୱିଜେତ୍ୱା, ହନ୍ତ୍ୱା ଅଧମ୍ମଂ ନିହନିତ୍ୱ [ୱିହନିତ୍ୱା (କ॰)] ଭୂମ୍ୟା ।
ପାୟାସି ୱିତ୍ତୋ [ଚିତ୍ତୋ (ସ୍ୟା॰)] ଅଭିରୁୟ୍ହ ସନ୍ଦନଂ, ମଗ୍ଗେନେୱ ଅତିବଲୋ ସଚ୍ଚନିକ୍କମୋ ॥
ମାତା ପିତା ସମଣବ୍ରାହ୍ମଣା ଚ, ଅସମ୍ମାନିତା ୟସ୍ସ ସକେ ଅଗାରେ ।
ଇଧେୱ ନିକ୍ଖିପ୍ପ ସରୀରଦେହଂ, କାୟସ୍ସ ଭେଦା ନିରୟଂ ୱଜନ୍ତି ତେ [ୱଜନ୍ତି (ସୀ॰ ପୀ॰)]।
ୟଥା ଅଧମ୍ମୋ ପତିତୋ ଅୱଂସିରୋ ॥
ମାତା ପିତା ସମଣବ୍ରାହ୍ମଣା ଚ, ସୁସମ୍ମାନିତା ୟସ୍ସ ସକେ ଅଗାରେ ।
ଇଧେୱ ନିକ୍ଖିପ୍ପ ସରୀରଦେହଂ, କାୟସ୍ସ ଭେଦା ସୁଗତିଂ ୱଜନ୍ତି ତେ ।
ୟଥାପି ଧମ୍ମୋ ଅଭିରୁୟ୍ହ ସନ୍ଦନନ୍ତି ॥
ଧମ୍ମଦେୱପୁତ୍ତଜାତକଂ [ଧମ୍ମଜାତକଂ (ସୀ॰ ପୀ॰)] ତତିୟଂ ।
୪୫୮. ଉଦୟଜାତକଂ (୪)
ଏକା ନିସିନ୍ନା ସୁଚି ସଞ୍ଞତୂରୂ, ପାସାଦମାରୁୟ୍ହ ଅନିନ୍ଦିତଙ୍ଗୀ ।
ୟାଚାମି ତଂ କିନ୍ନରନେତ୍ତଚକ୍ଖୁ, ଇମେକରତ୍ତିଂ ଉଭୟୋ ୱସେମ ॥
ଓକିଣ୍ଣନ୍ତରପରିଖଂ, ଦଳ୍ହମଟ୍ଟାଲକୋଟ୍ଠକଂ ।
ରକ୍ଖିତଂ ଖଗ୍ଗହତ୍ଥେହି, ଦୁପ୍ପୱେସମିଦଂ ପୁରଂ ॥
ଦହରସ୍ସ ୟୁୱିନୋ ଚାପି, ଆଗମୋ ଚ ନ ୱିଜ୍ଜତି ।
ଅଥ କେନ ନୁ ୱଣ୍ଣେନ, ସଙ୍ଗମଂ ଇଚ୍ଛସେ ମୟା ॥
ୟକ୍ଖୋହମସ୍ମି କଲ୍ୟାଣି, ଆଗତୋସ୍ମି ତୱନ୍ତିକେ [ତୱନ୍ତିକଂ (ସୀ॰ ପୀ॰)]।
ତ୍ୱଂ ମଂ ନନ୍ଦୟ [ନନ୍ଦସ୍ସୁ (ସ୍ୟା॰ କ॰)] ଭଦ୍ଦନ୍ତେ, ପୁଣ୍ଣକଂସଂ ଦଦାମି ତେ ॥
ଦେୱଂ ୱ ୟକ୍ଖଂ ଅଥ ୱା ମନୁସ୍ସଂ, ନ ପତ୍ଥୟେ ଉଦୟମତିଚ୍ଚ ଅଞ୍ଞଂ ।
ଗଚ୍ଛେୱ ତ୍ୱଂ ୟକ୍ଖ ମହାନୁଭାୱ, ମା ଚସ୍ସୁ ଗନ୍ତ୍ୱା ପୁନରାୱଜିତ୍ଥ ॥
ୟା ସା ରତି ଉତ୍ତମା କାମଭୋଗିନଂ, ୟଂ ହେତୁ ସତ୍ତା ୱିସମଂ ଚରନ୍ତି ।
ମା ତଂ ରତିଂ ଜୀୟି ତୁୱଂ ସୁଚିମ୍ହି ତେ, ଦଦାମି ତେ ରୂପିୟଂ କଂସପୂରଂ ॥
ନାରିଂ ନରୋ ନିଜ୍ଝପୟଂ ଧନେନ, ଉକ୍କଂସତୀ ୟତ୍ଥ କରୋତି ଛନ୍ଦଂ ।
ୱିପଚ୍ଚନୀକୋ ତୱ ଦେୱଧମ୍ମୋ, ପଚ୍ଚକ୍ଖତୋ ଥୋକତରେନ ଏସି ॥
ଆୟୁ ଚ ୱଣ୍ଣୋ ଚ [ଆୟୁଂ ଚ ୱଣ୍ଣଂ ଚ (କ॰ ସୀ॰ ପୀ॰)] ମନୁସ୍ସଲୋକେ, ନିହୀୟତି ମନୁଜାନଂ ସୁଗ୍ଗତ୍ତେ ।
ତେନେୱ ୱଣ୍ଣେନ ଧନମ୍ପି ତୁୟ୍ହଂ, ନିହୀୟତି ଜିଣ୍ଣତରାସି ଅଜ୍ଜ ॥
ଏୱଂ ମେ ପେକ୍ଖମାନସ୍ସ, ରାଜପୁତ୍ତି ୟସସ୍ସିନି ।
ହାୟତେୱ ତୱ [ହାୟତେ ୱତ ତେ (ସୀ॰ ସ୍ୟା॰ କ॰), ହାୟତେୱ ତତୋ (ପୀ॰)] ୱଣ୍ଣୋ, ଅହୋରତ୍ତାନମଚ୍ଚୟେ ॥
ଇମିନାୱ ତ୍ୱଂ ୱୟସା, ରାଜପୁତ୍ତି ସୁମେଧସେ ।
ବ୍ରହ୍ମଚରିୟଂ ଚରେୟ୍ୟାସି, ଭିୟ୍ୟୋ ୱଣ୍ଣୱତୀ ସିୟା ॥
ଦେୱା ନ ଜୀରନ୍ତି ୟଥା ମନୁସ୍ସା, ଗତ୍ତେସୁ ତେସଂ ୱଲିୟୋ ନ ହୋନ୍ତି ।
ପୁଚ୍ଛାମି ତଂ ୟକ୍ଖ ମହାନୁଭାୱ, କଥଂ ନୁ ଦେୱାନ [କଥଂ ନ ଦେୱାନଂ (ପୀ॰)] ସରୀରଦେହୋ ॥
ଦେୱା ନ ଜୀରନ୍ତି ୟଥା ମନୁସ୍ସା, ଗତ୍ତେସୁ ତେସଂ ୱଲିୟୋ ନ ହୋନ୍ତି ।
ସୁୱେ ସୁୱେ ଭିୟ୍ୟତରୋୱ [ଭିୟ୍ୟତରୋ ଚ (କ॰)] ତେସଂ, ଦିବ୍ବୋ ଚ ୱଣ୍ଣୋ ୱିପୁଲା ଚ ଭୋଗା ॥
କିଂସୂଧ ଭୀତା ଜନତା ଅନେକା, ମଗ୍ଗୋ ଚ ନେକାୟତନଂ ପୱୁତ୍ତୋ ।
ପୁଚ୍ଛାମି ତଂ ୟକ୍ଖ ମହାନୁଭାୱ, କତ୍ଥଟ୍ଠିତୋ ପରଲୋକଂ ନ ଭାୟେ ॥
ୱାଚଂ ମନଞ୍ଚ ପଣିଧାୟ ସମ୍ମା, କାୟେନ ପାପାନି ଅକୁବ୍ବମାନୋ ।
ବହୁନ୍ନପାନଂ ଘରମାୱସନ୍ତୋ, ସଦ୍ଧୋ ମୁଦୂ ସଂୱିଭାଗୀ ୱଦଞ୍ଞୂ ।
ସଙ୍ଗାହକୋ ସଖିଲୋ ସଣ୍ହୱାଚୋ, ଏତ୍ଥଟ୍ଠିତୋ ପରଲୋକଂ ନ ଭାୟେ ॥
ଅନୁସାସସି ମଂ ୟକ୍ଖ, ୟଥା ମାତା ୟଥା ପିତା ।
ଉଳାରୱଣ୍ଣଂ ପୁଚ୍ଛାମି, କୋ ନୁ ତ୍ୱମସି ସୁବ୍ରହା ॥
ଉଦୟୋହମସ୍ମି କଲ୍ୟାଣି, ସଙ୍କରତ୍ତା ଇଧାଗତୋ [ସଙ୍ଗରତ୍ଥା ଇଧାଗତୋ (ସୀ॰ ପୀ॰), ସଙ୍ଗରତ୍ଥାୟିଧାଗତୋ (ସ୍ୟା॰)]।
ଆମନ୍ତ ଖୋ ତଂ ଗଚ୍ଛାମି, ମୁତ୍ତୋସ୍ମି ତୱ ସଙ୍କରା [ସଙ୍ଗରା (ସୀ॰ ସ୍ୟା॰ ପୀ॰)]॥
ସଚେ ଖୋ ତ୍ୱଂ ଉଦୟୋସି, ସଙ୍କରତ୍ତା ଇଧାଗତୋ ।
ଅନୁସାସ ମଂ ରାଜପୁତ୍ତ, ୟଥାସ୍ସ ପୁନ ସଙ୍ଗମୋ ॥
ଅତିପତତି [ଅଧିପତତୀ (ସୀ॰ ପୀ॰)] ୱୟୋ ଖଣୋ ତଥେୱ, ଠାନଂ ନତ୍ଥି ଧୁୱଂ ଚୱନ୍ତି ସତ୍ତା ।
ପରିଜିୟ୍ୟତି ଅଦ୍ଧୁୱଂ ସରୀରଂ, ଉଦୟେ ମା ପମାଦ [ମା ପମାଦଂ (ସୀ॰)] ଚରସ୍ସୁ ଧମ୍ମଂ ॥
କସିଣା ପଥୱୀ ଧନସ୍ସ ପୂରା, ଏକସ୍ସେୱ ସିୟା ଅନଞ୍ଞଧେୟ୍ୟା ।
ତଞ୍ଚାପି ଜହତି [ଜହାତି (ସୀ॰ ସ୍ୟା॰ ପୀ॰), ଜହାତୀ ( ?)] ଅୱୀତରାଗୋ, ଉଦୟେ ମା ପମାଦ ଚରସ୍ସୁ ଧମ୍ମଂ ॥
ମାତା ଚ ପିତା ଚ ଭାତରୋ ଚ, ଭରିୟା ୟାପି ଧନେନ ହୋତି କୀତା [ଭରିୟାପି ଧନେନ ହୋନ୍ତି ଅତିତ୍ତା (କ॰)]।
ତେ ଚାପି ଜହନ୍ତି ଅଞ୍ଞମଞ୍ଞଂ, ଉଦୟେ ମା ପମାଦ ଚରସ୍ସୁ ଧମ୍ମଂ ॥
କାୟୋ ପରଭୋଜନନ୍ତି ଞତ୍ୱା [କାୟୋ ଚ ପରଭୋଜନଂ ୱିଦିତ୍ୱା (କ॰)], ସଂସାରେ ସୁଗତିଞ୍ଚ ଦୁଗ୍ଗତିଞ୍ଚ [ସୁଗତୀ ଚ ଦୁଗ୍ଗତୀ ଚ (ସୀ॰ ସ୍ୟା॰ ପୀ॰), ସୁଗ୍ଗତିଂ ଦୁଗ୍ଗତିଞ୍ଚ (କ॰)]।
ଇତ୍ତରୱାସୋତି ଜାନିୟାନ, ଉଦୟେ ମା ପମାଦ ଚରସ୍ସୁ ଧମ୍ମଂ ॥
ସାଧୁ ଭାସତିୟଂ [ଭାସତୟଂ (ସୀ॰ ପୀ॰)] ୟକ୍ଖୋ, ଅପ୍ପଂ ମଚ୍ଚାନ ଜୀୱିତଂ ।
କସିରଞ୍ଚ ପରିତ୍ତଞ୍ଚ, ତଞ୍ଚ ଦୁକ୍ଖେନ ସଂୟୁତଂ ।
ସାହଂ ଏକା ପବ୍ବଜିସ୍ସାମି, ହିତ୍ୱା କାସିଂ ସୁରୁନ୍ଧନନ୍ତି ॥
ଉଦୟଜାତକଂ ଚତୁତ୍ଥଂ ।
୪୫୯. ପାନୀୟଜାତକଂ (୫)
ମିତ୍ତୋ ମିତ୍ତସ୍ସ ପାନୀୟଂ, ଅଦିନ୍ନଂ ପରିଭୁଞ୍ଜିସଂ ।
ତେନ ପଚ୍ଛା ୱିଜିଗୁଚ୍ଛିଂ, ତଂ ପାପଂ ପକତଂ ମୟା ।
ମା ପୁନ ଅକରଂ ପାପଂ, ତସ୍ମା ପବ୍ବଜିତୋ ଅହଂ ॥
ପରଦାରଞ୍ଚ ଦିସ୍ୱାନ, ଛନ୍ଦୋ ମେ ଉଦପଜ୍ଜଥ [ଉପପଜ୍ଜଥ (ସ୍ୟା॰ କ॰)]।
ତେନ ପଚ୍ଛା ୱିଜିଗୁଚ୍ଛିଂ, ତଂ ପାପଂ ପକତଂ ମୟା ।
ମା ପୁନ ଅକରଂ ପାପଂ, ତସ୍ମା ପବ୍ବଜିତୋ ଅହଂ ॥
ପିତରଂ ମେ ମହାରାଜ, ଚୋରା ଅଗଣ୍ହୁ [ଅଗଣ୍ହୁଂ (ସୀ॰ ପୀ॰), ଅଗଣ୍ହି (କ॰)] କାନନେ ।
ତେସାହଂ ପୁଚ୍ଛିତୋ ଜାନଂ, ଅଞ୍ଞଥା ନଂ ୱିୟାକରିଂ ॥
ତେନ ପଚ୍ଛା ୱିଜିଗୁଚ୍ଛିଂ, ତଂ ପାପଂ ପକତଂ ମୟା ।
ମା ପୁନ ଅକରଂ ପାପଂ, ତସ୍ମା ପବ୍ବଜିତୋ ଅହଂ ॥
ପାଣାତିପାତମକରୁଂ, ସୋମୟାଗେ ଉପଟ୍ଠିତେ ।
ତେସାହଂ ସମନୁଞ୍ଞାସିଂ, ତେନ ପଚ୍ଛା ୱିଜିଗୁଚ୍ଛିଂ ॥
ତଂ ପାପଂ ପକତଂ ମୟା, ମା ପୁନ ଅକରଂ ପାପଂ ।
ତସ୍ମା ପବ୍ବଜିତୋ ଅହଂ ॥
ସୁରାମେରୟମାଧୁକା [ମଧୁକା (ସୀ॰ ସ୍ୟା॰ ପୀ॰)], ୟେ ଜନା ପଠମାସୁ ନୋ ।
ବହୂନଂ ତେ ଅନତ୍ଥାୟ, ମଜ୍ଜପାନମକପ୍ପୟୁଂ ॥
ତେସାହଂ ସମନୁଞ୍ଞାସିଂ, ତେନ ପଚ୍ଛା ୱିଜିଗୁଚ୍ଛିଂ ।
ତଂ ପାପଂ ପକତଂ ମୟା, ମା ପୁନ ଅକରଂ ପାପଂ ।
ତସ୍ମା ପବ୍ବଜିତୋ ଅହଂ ॥
ଧିରତ୍ଥୁ ସୁବହୂ କାମେ, ଦୁଗ୍ଗନ୍ଧେ ବହୁକଣ୍ଟକେ ।
ୟେ ଅହଂ ପଟିସେୱନ୍ତୋ, ନାଲଭିଂ ତାଦିସଂ ସୁଖଂ ॥
ମହସ୍ସାଦା ସୁଖା କାମା, ନତ୍ଥି କାମା ପରଂ [କାମପରଂ (ସୀ॰ ପୀ॰)] ସୁଖଂ ।
ୟେ କାମେ ପଟିସେୱନ୍ତି, ସଗ୍ଗଂ ତେ ଉପପଜ୍ଜରେ ॥
ଅପ୍ପସ୍ସାଦା ଦୁଖା କାମା, ନତ୍ଥି କାମା ପରଂ ଦୁଖଂ ।
ୟେ କାମେ ପଟିସେୱନ୍ତି, ନିରୟଂ ତେ ଉପପଜ୍ଜରେ ॥
ଅସୀ ୟଥା ସୁନିସିତୋ, ନେତ୍ତିଂସୋୱ ସୁପାୟିକୋ [ସୁପାସିତୋ (କ॰ ସୀ॰ ନିୟ୍ୟ), ସୁପାୟିତୋ (କ॰ ଅଟ୍ଠ॰)]।
ସତ୍ତୀୱ ଉରସି ଖିତ୍ତା, କାମା ଦୁକ୍ଖତରା ତତୋ ॥
ଅଙ୍ଗାରାନଂୱ ଜଲିତଂ, କାସୁଂ ସାଧିକପୋରିସଂ ।
ଫାଲଂୱ ଦିୱସଂତତ୍ତଂ, କାମା ଦୁକ୍ଖତରା ତତୋ ॥
ୱିସଂ ୟଥା ହଲାହଲଂ, ତେଲଂ ପକ୍କୁଥିତଂ [ଉକ୍କଟ୍ଠିତଂ (ସୀ॰ ପୀ॰), ପକ୍କୁଟ୍ଠିତଂ (ସ୍ୟା॰)] ୟଥା ।
ତମ୍ବଲୋହ [ତମ୍ପଲୋହଂ (ସ୍ୟା॰)] ୱିଲୀନଂୱ, କାମା ଦୁକ୍ଖତରା ତତୋତି ॥
ପାନୀୟଜାତକଂ ପଞ୍ଚମଂ ।
୪୬୦. ୟୁଧଞ୍ଚୟଜାତକଂ (୬)
ମିତ୍ତାମଚ୍ଚପରିବ୍ୟୂଳ୍ହଂ [ପରିବ୍ବୂଳ୍ହଂ (ସୀ॰ ପୀ॰)], ଅହଂ ୱନ୍ଦେ ରଥେସଭଂ ।
ପବ୍ବଜିସ୍ସାମହଂ ରାଜ [ପବ୍ବଜିସ୍ସଂ ମହାରାଜ (ସୀ॰ ପୀ॰)], ତଂ ଦେୱୋ ଅନୁମଞ୍ଞତୁ ॥
ସଚେ ତେ ଊନଂ କାମେହି, ଅହଂ ପରିପୂରୟାମି [ଅହଂୱ ପୂରୟାମି (କ॰)] ତେ ।
ୟୋ ତଂ ହିଂସତି ୱାରେମି, ମା ପବ୍ବଜ [ପବ୍ବଜି (ପୀ॰)] ୟୁଧଞ୍ଚୟ [ୟୁଧଞ୍ଜୟ (ସୀ॰ ସ୍ୟା॰), ୟୁୱଞ୍ଜୟ (ପୀ॰)]॥
ନ ମତ୍ଥି ଊନଂ କାମେହି, ହିଂସିତା ମେ ନ ୱିଜ୍ଜତି ।
ଦୀପଞ୍ଚ କାତୁମିଚ୍ଛାମି, ୟଂ ଜରା ନାଭିକୀରତି ॥
ପୁତ୍ତୋ ୱା ପିତରଂ ୟାଚେ, ପିତା ୱା ପୁତ୍ତମୋରସଂ ।
ନେଗମୋ ତଂ ୟାଚେ [ନେଗମୋ ୟାଚତେ (ସୀ॰ ସ୍ୟା॰ ପୀ॰)] ତାତ, ମା ପବ୍ବଜ ୟୁଧଞ୍ଚୟ ॥
ମା ମଂ ଦେୱ ନିୱାରେହି, ପବ୍ବଜନ୍ତଂ ରଥେସଭ ।
ମାହଂ କାମେହି ସମ୍ମତ୍ତୋ, ଜରାୟ ୱସମନ୍ୱଗୂ ॥
ଅହଂ ତଂ ତାତ ୟାଚାମି, ଅହଂ ପୁତ୍ତ ନିୱାରୟେ ।
ଚିରଂ ତଂ ଦଟ୍ଠୁମିଚ୍ଛାମି, ମା ପବ୍ବଜ ୟୁଧଞ୍ଚୟ ॥
ଉସ୍ସାୱୋୱ ତିଣଗ୍ଗମ୍ହି, ସୂରିୟୁଗ୍ଗମନଂ ପତି ।
ଏୱମାୟୁ ମନୁସ୍ସାନଂ, ମା ମଂ ଅମ୍ମ ନିୱାରୟ ॥
ତରମାନୋ ଇମଂ ୟାନଂ, ଆରୋପେତୁ [ତରମାନା ଇମଂ ୟାନଂ, ଆରୋପେନ୍ତୁ (ସୀ॰ ପୀ॰)] ରଥେସଭ ।
ମା ମେ ମାତା ତରନ୍ତସ୍ସ, ଅନ୍ତରାୟକରା ଅହୁ ॥
ଅଭିଧାୱଥ ଭଦ୍ଦନ୍ତେ, ସୁଞ୍ଞଂ ହେସ୍ସତି ରମ୍ମକଂ ।
ୟୁଧଞ୍ଚୟୋ ଅନୁଞ୍ଞାତୋ, ସବ୍ବଦତ୍ତେନ ରାଜିନା ॥
ୟୋହୁ ସେଟ୍ଠୋ ସହସ୍ସସ୍ସ [ମନୁସ୍ସାନଂ (ସ୍ୟା॰), ସହସ୍ସାନଂ (କ॰)], ୟୁୱା କଞ୍ଚନସନ୍ନିଭୋ ।
ସୋୟଂ କୁମାରୋ ପବ୍ବଜିତୋ, କାସାୟୱସନୋ ବଲୀ ॥
ଉଭୋ କୁମାରା ପବ୍ବଜିତା, ୟୁଧଞ୍ଚୟୋ ୟୁଧିଟ୍ଠିଲୋ ।
ପହାୟ ମାତାପିତରୋ, ସଙ୍ଗଂ ଛେତ୍ୱାନ ମଚ୍ଚୁନୋତି ॥
ୟୁଧଞ୍ଚୟଜାତକଂ ଛଟ୍ଠଂ ।
୪୬୧. ଦସରଥଜାତକଂ (୭)
ଏଥ ଲକ୍ଖଣ ସୀତା ଚ, ଉଭୋ ଓତରଥୋଦକଂ ।
ଏୱାୟଂ ଭରତୋ ଆହ, ‘‘ରାଜା ଦସରଥୋ ମତୋ’’ ॥
କେନ ରାମପ୍ପଭାୱେନ, ସୋଚିତବ୍ବଂ ନ ସୋଚସି ।
ପିତରଂ କାଲକତଂ [କାଲଙ୍କତଂ (କ॰)] ସୁତ୍ୱା, ନ ତଂ ପସହତେ ଦୁଖଂ ॥
ୟଂ ନ ସକ୍କା ନିପାଲେତୁଂ, ପୋସେନ ଲପତଂ ବହୁଂ ।
ସ କିସ୍ସ ୱିଞ୍ଞୂ ମେଧାୱୀ, ଅତ୍ତାନମୁପତାପୟେ ॥
ଦହରା ଚ ହି ୱୁଦ୍ଧା ଚ [ୟେ ୱୁଦ୍ଧା (ସୀ॰ ଅଟ୍ଠ॰), ୟେ ୱୁଡ୍ଢା (ସ୍ୟା॰)], ୟେ ବାଲା ୟେ ଚ ପଣ୍ଡିତା ।
ଅଡ୍ଢା ଚେୱ ଦଲିଦ୍ଦା ଚ, ସବ୍ବେ ମଚ୍ଚୁପରାୟଣା ॥
ଫଲାନମିୱ ପକ୍କାନଂ, ନିଚ୍ଚଂ ପତନତୋ ଭୟଂ ।
ଏୱଂ ଜାତାନ ମଚ୍ଚାନଂ, ନିଚ୍ଚ ମରଣତୋ ଭୟଂ ॥
ସାୟମେକେ ନ ଦିସ୍ସନ୍ତି, ପାତୋ ଦିଟ୍ଠା ବହୁଜ୍ଜନା ।
ପାତୋ ଏକେ ନ ଦିସ୍ସନ୍ତି, ସାୟଂ ଦିଟ୍ଠା ବହୁଜ୍ଜନା ॥
ପରିଦେୱୟମାନୋ ଚେ, କିଞ୍ଚିଦତ୍ଥଂ ଉଦବ୍ବହେ ।
ସମ୍ମୂଳ୍ହୋ ହିଂସମତ୍ତାନଂ, କୟିରା ତଂ ୱିଚକ୍ଖଣୋ ॥
କିସୋ ୱିୱଣ୍ଣୋ ଭୱତି, ହିଂସମତ୍ତାନମତ୍ତନୋ [ମତ୍ତନା (ସୀ॰ ଅଟ୍ଠ॰ ସୁ॰ ନି॰ ୫୯୦)]।
ନ ତେନ ପେତା ପାଲେନ୍ତି, ନିରତ୍ଥା ପରିଦେୱନା ॥
ୟଥା ସରଣମାଦିତ୍ତଂ, ୱାରିନା ପରିନିବ୍ବୟେ [ୱାରିନାୱନିବ୍ବାପୟେ (ସ୍ୟା॰ କ॰)]।
ଏୱମ୍ପି ଧୀରୋ ସୁତୱା, ମେଧାୱୀ ପଣ୍ଡିତୋ ନରୋ ।
ଖିପ୍ପମୁପ୍ପତିତଂ ସୋକଂ, ୱାତୋ ତୂଲଂୱ ଧଂସୟେ ॥
ମଚ୍ଚୋ ଏକୋୱ [ଏକୋୱ ମଚ୍ଚୋ (ସୀ॰ ସ୍ୟା॰ ପୀ॰)] ଅଚ୍ଚେତି, ଏକୋୱ ଜାୟତେ କୁଲେ ।
ସଂୟୋଗପରମାତ୍ୱେୱ, ସମ୍ଭୋଗା ସବ୍ବପାଣିନଂ ॥
ତସ୍ମା ହି ଧୀରସ୍ସ ବହୁସ୍ସୁତସ୍ସ, ସମ୍ପସ୍ସତୋ ଲୋକମିମଂ ପରଞ୍ଚ ।
ଅଞ୍ଞାୟ ଧମ୍ମଂ ହଦୟଂ ମନଞ୍ଚ, ସୋକା ମହନ୍ତାପି ନ ତାପୟନ୍ତି ॥
ସୋହଂ ଦସ୍ସଞ୍ଚ ଭୋକ୍ଖଞ୍ଚ, ଭରିସ୍ସାମି ଚ [ସୋହଂ ୟସଞ୍ଚ ଭୋଗଞ୍ଚ, ଭରିୟାପି ଚ (ସ୍ୟା॰ କ॰)] ଞାତକେ ।
ସେସଞ୍ଚ ପାଲୟିସ୍ସାମି, କିଚ୍ଚମେତଂ [କିଚ୍ଚମେୱଂ (ପୀ॰)] ୱିଜାନତୋ ॥
ଦସ ୱସ୍ସସହସ୍ସାନି, ସଟ୍ଠି ୱସ୍ସସତାନି ଚ ।
କମ୍ବୁଗୀୱୋ ମହାବାହୁ, ରାମୋ ରଜ୍ଜମକାରୟୀତି ॥
ଦସରଥଜାତକଂ ସତ୍ତମଂ ।
୪୬୨. ସଂୱରଜାତକଂ (୮)
ଜାନନ୍ତୋ ନୋ ମହାରାଜ, ତୱ ସୀଲଂ ଜନାଧିପୋ ।
ଇମେ କୁମାରେ ପୂଜେନ୍ତୋ, ନ ତଂ କେନଚି ମଞ୍ଞଥ ॥
ତିଟ୍ଠନ୍ତେ ନୋ ମହାରାଜେ, ଅଦୁ [ଆଦୁ (ସୀ॰ ପୀ॰), ଆଦୂ (ସ୍ୟା॰)] ଦେୱେ ଦିୱଙ୍ଗତେ ।
ଞାତୀ ତଂ ସମନୁଞ୍ଞିଂସୁ, ସମ୍ପସ୍ସଂ ଅତ୍ଥମତ୍ତନୋ ॥
କେନ ସଂୱରୱତ୍ତେନ, ସଞ୍ଜାତେ ଅଭିତିଟ୍ଠସି ।
କେନ ତଂ ନାତିୱତ୍ତନ୍ତି, ଞାତିସଙ୍ଘା ସମାଗତା ॥
ନ ରାଜପୁତ୍ତ ଉସୂୟାମି [ରାଜପୁତ୍ତ ନୁସ୍ସୁୟ୍ୟାମି (କ॰)], ସମଣାନଂ ମହେସିନଂ ।
ସକ୍କଚ୍ଚଂ ତେ ନମସ୍ସାମି, ପାଦେ ୱନ୍ଦାମି ତାଦିନଂ ॥
ତେ ମଂ ଧମ୍ମଗୁଣେ ୟୁତ୍ତଂ, ସୁସ୍ସୂସମନୁସୂୟକଂ ।
ସମଣା ମନୁସାସନ୍ତି [ସମନୁସାସନ୍ତି (ସୀ॰ ସ୍ୟା॰ ପୀ॰)], ଇସୀ ଧମ୍ମଗୁଣେ ରତା ॥
ତେସାହଂ ୱଚନଂ ସୁତ୍ୱା, ସମଣାନଂ ମହେସିନଂ ।
ନ କିଞ୍ଚି ଅତିମଞ୍ଞାମି, ଧମ୍ମେ ମେ ନିରତୋ ମନୋ ॥
ହତ୍ଥାରୋହା ଅନୀକଟ୍ଠା, ରଥିକା ପତ୍ତିକାରକା ।
ତେସଂ [ତେସୁ (ପୀ॰)] ନପ୍ପଟିବନ୍ଧାମି, ନିୱିଟ୍ଠଂ [ନିବଦ୍ଧଂ (ସୀ॰ ପୀ॰)] ଭତ୍ତୱେତନଂ ॥
ମହାମତ୍ତା ଚ ମେ ଅତ୍ଥି, ମନ୍ତିନୋ ପରିଚାରକା ।
ବାରାଣସିଂ ୱୋହରନ୍ତି, ବହୁମଂସସୁରୋଦକଂ ॥
ଅଥୋପି ୱାଣିଜା ଫୀତା, ନାନାରଟ୍ଠେହି ଆଗତା ।
ତେସୁ ମେ ୱିହିତା ରକ୍ଖା, ଏୱଂ ଜାନାହୁପୋସଥ ॥
ଧମ୍ମେନ କିର ଞାତୀନଂ, ରଜ୍ଜଂ କାରେହି ସଂୱର ।
ମେଧାୱୀ ପଣ୍ଡିତୋ ଚାସି [ଚାପି (ସୀ॰ ପୀ॰)], ଅଥୋପି ଞାତିନଂ ହିତୋ ॥
ତଂ ତଂ ଞାତିପରିବ୍ୟୂଳ୍ହଂ, ନାନାରତନମୋଚିତଂ ।
ଅମିତ୍ତା ନପ୍ପସହନ୍ତି, ଇନ୍ଦଂୱ ଅସୁରାଧିପୋତି ॥
ସଂୱରଜାତକଂ ଅଟ୍ଠମଂ ।
୪୬୩. ସୁପ୍ପାରକଜାତକଂ (୯)
ଉମ୍ମୁଜ୍ଜନ୍ତି ନିମୁଜ୍ଜନ୍ତି, ମନୁସ୍ସା ଖୁରନାସିକା ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା [ଭରୁକଚ୍ଛା (ସୀ॰ ସ୍ୟା॰ ପୀ॰ ଅଟ୍ଠ॰)] ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, ଖୁରମାଲୀତି ୱୁଚ୍ଚତି ॥
ୟଥା ଅଗ୍ଗୀୱ ସୁରିୟୋୱ [ଅଗ୍ଗି ସୁରିୟୋ ଚ (ସ୍ୟା॰), ଅଗ୍ଗୀୱ ସୂରିୟୋ (କ॰)], ସମୁଦ୍ଦୋ ପଟିଦିସ୍ସତି ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, ଅଗ୍ଗିମାଲୀତି ୱୁଚ୍ଚତି ॥
ୟଥା ଦଧୀୱ ଖୀରଂୱ [ଦଧି ଚ ଖୀରଂ ଚ (ସ୍ୟା॰), ଏୱମୁପରିପି], ସମୁଦ୍ଦୋ ପଟିଦିସ୍ସତି ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, ଦଧିମାଲୀତି [ଖୀରମାଲୀତି (କ॰)] ୱୁଚ୍ଚତି ॥
ୟଥା କୁସୋୱ ସସ୍ସୋୱ, ସମୁଦ୍ଦୋ ପଟିଦିସ୍ସତି ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, କୁସମାଲୀତି ୱୁଚ୍ଚତି ॥
ୟଥା ନଳୋୱ ୱେଳୂୱ, ସମୁଦ୍ଦୋ ପଟିଦିସ୍ସତି ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, ନଳମାଲୀତି ୱୁଚ୍ଚତି ॥
ମହବ୍ଭୟୋ ଭିଂସନକୋ, ସଦ୍ଦୋ ସୁୟ୍ୟତିମାନୁସୋ [ସମୁଦ୍ଦୋ ସୁୟ୍ୟତ’ମାନୁସୋ (ସୀ॰ ପୀ॰ ଅଟ୍ଠ॰)]।
ୟଥା ସୋବ୍ଭୋ ପପାତୋୱ, ସମୁଦ୍ଦୋ ପଟିଦିସ୍ସତି ।
ସୁପ୍ପାରକଂ ତଂ ପୁଚ୍ଛାମ, ସମୁଦ୍ଦୋ କତମୋ ଅୟଂ ॥
କୁରୁକଚ୍ଛା ପୟାତାନଂ, ୱାଣିଜାନଂ ଧନେସିନଂ ।
ନାୱାୟ ୱିପ୍ପନଟ୍ଠାୟ, ବଳୱାମୁଖୀତି [ୱଳଭାମୁଖୀତି (ସୀ॰ ସ୍ୟା॰), ବଲୱାମୁଖୀତି (ସ୍ୟା॰ କ॰)] ୱୁଚ୍ଚତି ॥
ୟତୋ ସରାମି ଅତ୍ତାନଂ, ୟତୋ ପତ୍ତୋସ୍ମି ୱିଞ୍ଞୁତଂ ।
ନାଭିଜାନାମି ସଞ୍ଚିଚ୍ଚ, ଏକପାଣମ୍ପି ହିଂସିତଂ ।
ଏତେନ ସଚ୍ଚୱଜ୍ଜେନ, ସୋତ୍ଥିଂ ନାୱା ନିୱତ୍ତତୂତି ॥
ସୁପ୍ପାରକଜାତକଂ ନୱମଂ ।
ଏକାଦସକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ସିରିମାତୁସୁପୋସକନାଗୱରୋ, ପୁନ ଜୁଣ୍ହକ ଧମ୍ମମୁଦୟୱରୋ ।
ଅଥ ପାନି ୟୁଧଞ୍ଚୟକୋ ଚ, ଦସରଥ ସଂୱର ପାରଗତେନ ନୱାତି ॥
୧୨. ଦ୍ୱାଦସକନିପାତୋ
୪୬୪. ଚୂଳକୁଣାଲଜାତକଂ (୧)
ଲୁଦ୍ଧାନଂ [ଖୁଦ୍ଦାନଂ (ସୀ॰ ସ୍ୟା॰ ପୀ॰)] ଲହୁଚିତ୍ତାନଂ, ଅକତଞ୍ଞୂନ ଦୁବ୍ଭିନଂ ।
ନାଦେୱସତ୍ତୋ ପୁରିସୋ, ଥୀନଂ ସଦ୍ଧାତୁମରହତି ॥
ନ ତା ପଜାନନ୍ତି କତଂ ନ କିଚ୍ଚଂ, ନ ମାତରଂ ପିତରଂ ଭାତରଂ ୱା ।
ଅନରିୟା ସମତିକ୍କନ୍ତଧମ୍ମା, ସସ୍ସେୱ ଚିତ୍ତସ୍ସ ୱସଂ ୱଜନ୍ତି ॥
ଚିରାନୁୱୁଟ୍ଠମ୍ପି [ଚିରାନୁୱୁତ୍ଥମ୍ପି (ସୀ॰ ପୀ॰)] ପିୟଂ ମନାପଂ, ଅନୁକମ୍ପକଂ ପାଣସମମ୍ପି ଭତ୍ତୁଂ [ସନ୍ତଂ (ସୀ॰ ସ୍ୟା॰ ପୀ॰)]।
ଆୱାସୁ କିଚ୍ଚେସୁ ଚ ନଂ ଜହନ୍ତି, ତସ୍ମାହମିତ୍ଥୀନଂ ନ ୱିସ୍ସସାମି ॥
ଥୀନଞ୍ହି ଚିତ୍ତଂ ୟଥା ୱାନରସ୍ସ, କନ୍ନପ୍ପକନ୍ନଂ ୟଥା ରୁକ୍ଖଛାୟା ।
ଚଲାଚଲଂ ହଦୟମିତ୍ଥିୟାନଂ, ଚକ୍କସ୍ସ ନେମି ୱିୟ ପରିୱତ୍ତତି ॥
ୟଦା ତା ପସ୍ସନ୍ତି ସମେକ୍ଖମାନା, ଆଦେୟ୍ୟରୂପଂ ପୁରିସସ୍ସ ୱିତ୍ତଂ ।
ସଣ୍ହାହି ୱାଚାହି ନୟନ୍ତି ମେନଂ, କମ୍ବୋଜକା ଜଲଜେନେୱ ଅସ୍ସଂ ॥
ୟଦା ନ ପସ୍ସନ୍ତି ସମେକ୍ଖମାନା, ଆଦେୟ୍ୟରୂପଂ ପୁରିସସ୍ସ ୱିତ୍ତଂ ।
ସମନ୍ତତୋ ନଂ ପରିୱଜ୍ଜୟନ୍ତି, ତିଣ୍ଣୋ ନଦୀପାରଗତୋୱ କୁଲ୍ଲଂ ॥
ସିଲେସୂପମା ସିଖିରିୱ ସବ୍ବଭକ୍ଖା, ତିକ୍ଖମାୟା ନଦୀରିୱ ସୀଘସୋତା ।
ସେୱନ୍ତି ହେତା ପିୟମପ୍ପିୟଞ୍ଚ, ନାୱା ୟଥା ଓରକୂଲଂ ପରଞ୍ଚ ॥
ନ ତା ଏକସ୍ସ ନ ଦ୍ୱିନ୍ନଂ, ଆପଣୋୱ ପସାରିତୋ ।
ୟୋ ତା ମୟ୍ହନ୍ତି ମଞ୍ଞେୟ୍ୟ, ୱାତଂ ଜାଲେନ ବାଧୟେ [ବନ୍ଧୟେ (ସ୍ୟା॰ କ॰)]॥
ୟଥା ନଦୀ ଚ ପନ୍ଥୋ ଚ, ପାନାଗାରଂ ସଭା ପପା ।
ଏୱଂ ଲୋକିତ୍ଥିୟୋ ନାମ, ୱେଲା ତାସଂ ନ ୱିଜ୍ଜତି [ଇମିସ୍ସା ଗାଥାୟ ପୁବ୍ବଦ୍ଧାପରଦ୍ଧଂ ୱିପରିୟାୟେନ ଦିସ୍ସତି (କ॰)]॥
ଘତାସନସମା ଏତା, କଣ୍ହସପ୍ପସିରୂପମା ।
ଗାୱୋ ବହିତିଣସ୍ସେୱ, ଓମସନ୍ତି ୱରଂ ୱରଂ ॥
ଘତାସନଂ କୁଞ୍ଜରଂ କଣ୍ହସପ୍ପଂ, ମୁଦ୍ଧାଭିସିତ୍ତଂ ପମଦା ଚ ସବ୍ବା ।
ଏତେ ନରୋ ନିଚ୍ଚୟତୋ [ନିଚ୍ଚୟତ୍ତୋ (ସୀ॰ ପୀ॰)] ଭଜେଥ, ତେସଂ ହୱେ ଦୁବ୍ବିଦୁ ସବ୍ବଭାୱୋ [ସଚ୍ଚଭାୱୋ (ସ୍ୟା॰)]॥
ନଚ୍ଚନ୍ତୱଣ୍ଣା ନ ବହୂନଂ କନ୍ତା, ନ ଦକ୍ଖିଣା ପମଦା ସେୱିତବ୍ବା ।
ନ ପରସ୍ସ ଭରିୟା ନ ଧନସ୍ସ ହେତୁ, ଏତିତ୍ଥିୟୋ ପଞ୍ଚ ନ ସେୱିତବ୍ବାତି ॥
ଚୂଳକୁଣାଲଜାତକଂ ପଠମଂ ।
୪୬୫. ଭଦ୍ଦସାଲଜାତକଂ (୨)
କା ତ୍ୱଂ ସୁଦ୍ଧେହି ୱତ୍ଥେହି, ଅଘେ ୱେହାୟସଂ [ୱେହାସୟଂ (ସୀ॰ ପୀ॰)] ଠିତା ।
କେନ ତ୍ୟାସ୍ସୂନି ୱତ୍ତନ୍ତି, କୁତୋ ତଂ ଭୟମାଗତଂ ॥
ତୱେୱ ଦେୱ ୱିଜିତେ, ଭଦ୍ଦସାଲୋତି ମଂ ୱିଦୂ ।
ସଟ୍ଠି [ସଟ୍ଠିଂ (ସୀ॰ ପୀ॰)] ୱସ୍ସସହସ୍ସାନି, ତିଟ୍ଠତୋ ପୂଜିତସ୍ସ ମେ ॥
କାରୟନ୍ତା ନଗରାନି, ଅଗାରେ ଚ ଦିସମ୍ପତି ।
ୱିୱିଧେ ଚାପି ପାସାଦେ, ନ ମଂ ତେ ଅଚ୍ଚମଞ୍ଞିସୁଂ ।
ୟଥେୱ ମଂ ତେ ପୂଜେସୁଂ, ତଥେୱ ତ୍ୱମ୍ପି ପୂଜୟ ॥
ତଂ ଇୱାହଂ [ତଞ୍ଚ ଅହଂ (ସୀ॰ ସ୍ୟା॰ ପୀ॰)] ନ ପସ୍ସାମି, ଥୂଲଂ କାୟେନ ତେ ଦୁମଂ ।
ଆରୋହପରିଣାହେନ, ଅଭିରୂପୋସି ଜାତିୟା ॥
ପାସାଦଂ କାରୟିସ୍ସାମି, ଏକତ୍ଥମ୍ଭଂ ମନୋରମଂ ।
ତତ୍ଥ ତଂ ଉପନେସ୍ସାମି, ଚିରଂ ତେ ୟକ୍ଖ ଜୀୱିତଂ ॥
ଏୱଂ ଚିତ୍ତଂ ଉଦପାଦି, ସରୀରେନ ୱିନାଭାୱୋ ।
ପୁଥୁସୋ ମଂ ୱିକନ୍ତିତ୍ୱା, ଖଣ୍ଡସୋ ଅୱକନ୍ତଥ ॥
ଅଗ୍ଗେ ଚ ଛେତ୍ୱା ମଜ୍ଝେ ଚ, ପଚ୍ଛା ମୂଲମ୍ହି ଛିନ୍ଦଥ [ମୂଲଞ୍ଚ ଛିନ୍ଦଥ (ସୀ॰), ମୂଲଂ ୱିଛିନ୍ଦଥ (ପୀ॰)]।
ଏୱଂ ମେ ଛିଜ୍ଜମାନସ୍ସ, ନ ଦୁକ୍ଖଂ ମରଣଂ ସିୟା ॥
ହତ୍ଥପାଦଂ [ହତ୍ଥପାଦେ (କ॰)] ୟଥା ଛିନ୍ଦେ [ଛିନ୍ନେ (କ॰)], କଣ୍ଣନାସଞ୍ଚ ଜୀୱତୋ ।
ତତୋ ପଚ୍ଛା ସିରୋ ଛିନ୍ଦେ, ତଂ ଦୁକ୍ଖଂ ମରଣଂ ସିୟା ॥
ସୁଖଂ ନୁ ଖଣ୍ଡସୋ ଛିନ୍ନଂ, ଭଦ୍ଦସାଲୱନପ୍ପତି ।
କିଂ ହେତୁ କିଂ ଉପାଦାୟ, ଖଣ୍ଡସୋ ଛିନ୍ନମିଚ୍ଛସି ॥
ୟଞ୍ଚ ହେତୁମୁପାଦାୟ, ହେତୁଂ ଧମ୍ମୂପସଂହିତଂ ।
ଖଣ୍ଡସୋ ଛିନ୍ନମିଚ୍ଛାମି, ମହାରାଜ ସୁଣୋହି ମେ ॥
ଞାତୀ ମେ ସୁଖସଂୱଦ୍ଧା, ମମ ପସ୍ସେ ନିୱାତଜା ।
ତେପିହଂ ଉପହିଂସେୟ୍ୟଂ, ପରେସଂ ଅସୁଖୋଚିତଂ ॥
ଚେତେୟ୍ୟରୂପଂ [ଚେତବ୍ବରୂପଂ (ସୀ॰ ପୀ॰)] ଚେତେସି, ଭଦ୍ଦସାଲୱନପ୍ପତି ।
ହିତକାମୋସି ଞାତୀନଂ, ଅଭୟଂ ସମ୍ମ ଦମ୍ମି ତେତି ॥
ଭଦ୍ଦସାଲଜାତକଂ ଦୁତିୟଂ ।
୪୬୬. ସମୁଦ୍ଦୱାଣିଜଜାତକଂ (୩)
କସନ୍ତି ୱପନ୍ତି ତେ ଜନା, ମନୁଜା କମ୍ମଫଲୂପଜୀୱିନୋ ।
ନୟିମସ୍ସ ଦୀପକସ୍ସ ଭାଗିନୋ, ଜମ୍ବୁଦୀପା ଇଦମେୱ ନୋ ୱରଂ ॥
ତିପଞ୍ଚରତ୍ତୂପଗତମ୍ହି ଚନ୍ଦେ, ୱେଗୋ ମହା ହେହିତି ସାଗରସ୍ସ ।
ଉପ୍ଲୱିସ୍ସଂ ଦୀପମିମଂ ଉଳାରଂ, ମା ୱୋ ୱଧୀ ଗଚ୍ଛଥ ଲେଣମଞ୍ଞଂ ॥
ନ ଜାତୁୟଂ ସାଗରୱାରିୱେଗୋ, ଉପ୍ଲୱିସ୍ସଂ ଦୀପମିମଂ ଉଳାରଂ ।
ତଂ ମେ ନିମିତ୍ତେହି ବହୂହି ଦିଟ୍ଠଂ, ମା ଭେଥ କିଂ ସୋଚଥ ମୋଦଥୱ୍ହୋ [ମୋଦଥ ୱୋ (କ॰) ୬.୩୮ ମୋଗ୍ଗଲ୍ଲାନସୁତ୍ତଂ ପସ୍ସିତବ୍ବଂ]॥
ପହୂତଭକ୍ଖଂ ବହୁଅନ୍ନପାନଂ, ପତ୍ତତ୍ଥ ଆୱାସମିମଂ ଉଳାରଂ ।
ନ ୱୋ ଭୟଂ ପଟିପସ୍ସାମି କିଞ୍ଚି, ଆପୁତ୍ତପୁତ୍ତେହି ପମୋଦଥୱ୍ହୋ ॥
ୟୋ ଦେୱୋୟଂ ଦକ୍ଖିଣାୟଂ [ଦକ୍ଖିଣସ୍ସଂ (ସୀ॰)] ଦିସାୟଂ, ଖେମନ୍ତି ପକ୍କୋସତି ତସ୍ସ ସଚ୍ଚଂ ।
ନ ଉତ୍ତରୋ ୱେଦି ଭୟାଭୟସ୍ସ, ମା ଭେଥ କିଂ ସୋଚଥ ମୋଦଥୱ୍ହୋ ॥
ୟଥା ଇମେ ୱିପ୍ପୱଦନ୍ତି ୟକ୍ଖା, ଏକୋ ଭୟଂ ସଂସତି ଖେମମେକୋ ।
ତଦିଙ୍ଘ ମୟ୍ହଂ ୱଚନଂ ସୁଣାଥ, ଖିପ୍ପଂ ଲହୁଂ ମା ୱିନସ୍ସିମ୍ହ ସବ୍ବେ ॥
ସବ୍ବେ ସମାଗମ୍ମ କରୋମ ନାୱଂ, ଦୋଣିଂ ଦଳ୍ହଂ ସବ୍ବୟନ୍ତୂପପନ୍ନଂ ।
ସଚେ ଅୟଂ ଦକ୍ଖିଣୋ ସଚ୍ଚମାହ, ମୋଘଂ ପଟିକ୍କୋସତି ଉତ୍ତରୋୟଂ ।
ସା ଚେୱ ନୋ ହେହିତି ଆପଦତ୍ଥା, ଇମଞ୍ଚ ଦୀପଂ ନ ପରିଚ୍ଚଜେମ ॥
ସଚେ ଚ ଖୋ ଉତ୍ତରୋ ସଚ୍ଚମାହ, ମୋଘଂ ପଟିକ୍କୋସତି ଦକ୍ଖିଣୋୟଂ ।
ତମେୱ ନାୱଂ ଅଭିରୁୟ୍ହ ସବ୍ବେ, ଏୱଂ ମୟଂ ସୋତ୍ଥି ତରେମୁ ପାରଂ ॥
ନ ୱେ ସୁଗଣ୍ହଂ ପଠମେନ ସେଟ୍ଠଂ, କନିଟ୍ଠମାପାଥଗତଂ ଗହେତ୍ୱା ।
ୟୋ ଚୀଧ ତଚ୍ଛଂ [ମଜ୍ଝଂ (ସୀ॰ ସ୍ୟା॰ ପୀ॰)] ପୱିଚେୟ୍ୟ ଗଣ୍ହତି [ଗଣ୍ହି (କ॰)], ସ ୱେ ନରୋ ସେଟ୍ଠମୁପେତି ଠାନଂ ॥
ୟଥାପି ତେ ସାଗରୱାରିମଜ୍ଝେ, ସକମ୍ମୁନା ସୋତ୍ଥି ୱହିଂସୁ ୱାଣିଜା ।
ଅନାଗତତ୍ଥଂ ପଟିୱିଜ୍ଝିୟାନ, ଅପ୍ପମ୍ପି ନାଚ୍ଚେତି ସ ଭୂରିପଞ୍ଞୋ ॥
ବାଲା ଚ ମୋହେନ ରସାନୁଗିଦ୍ଧା, ଅନାଗତଂ ଅପ୍ପଟିୱିଜ୍ଝିୟତ୍ଥଂ ।
ପଚ୍ଚୁପ୍ପନ୍ନେ ସୀଦନ୍ତି ଅତ୍ଥଜାତେ, ସମୁଦ୍ଦମଜ୍ଝେ ୟଥା ତେ ମନୁସ୍ସା ॥
ଅନାଗତଂ ପଟିକୟିରାଥ କିଚ୍ଚଂ, ‘‘ମା ମଂ କିଚ୍ଚଂ କିଚ୍ଚକାଲେ ବ୍ୟଧେସି’’ ।
ତଂ ତାଦିସଂ ପଟିକତ [ପଟିକତଂ (କ॰), ପଟିଗତ (ସୀ॰ ଅଟ୍ଠ॰), ପଟିକଚ୍ଚ ( ?)] କିଚ୍ଚକାରିଂ, ନ ତଂ କିଚ୍ଚଂ କିଚ୍ଚକାଲେ ବ୍ୟଧେତୀତି ॥
ସମୁଦ୍ଦୱାଣିଜଜାତକଂ ତତିୟଂ ।
୪୬୭. କାମଜାତକଂ (୪)
କାମଂ କାମୟମାନସ୍ସ, ତସ୍ସ ଚେ ତଂ ସମିଜ୍ଝତି ।
ଅଦ୍ଧା ପୀତିମନୋ ହୋତି, ଲଦ୍ଧା ମଚ୍ଚୋ ୟଦିଚ୍ଛତି ॥
କାମଂ କାମୟମାନସ୍ସ, ତସ୍ସ ଚେ ତଂ ସମିଜ୍ଝତି ।
ତତୋ ନଂ ଅପରଂ କାମେ, ଧମ୍ମେ ତଣ୍ହଂୱ ୱିନ୍ଦତି ॥
ଗୱଂୱ ସିଙ୍ଗିନୋ ସିଙ୍ଗଂ, ୱଡ୍ଢମାନସ୍ସ ୱଡ୍ଢତି ।
ଏୱଂ ମନ୍ଦସ୍ସ ପୋସସ୍ସ, ବାଲସ୍ସ ଅୱିଜାନତୋ ।
ଭିୟ୍ୟୋ ତଣ୍ହା ପିପାସା ଚ, ୱଡ୍ଢମାନସ୍ସ ୱଡ୍ଢତି ॥
ପଥବ୍ୟା ସାଲିୟୱକଂ, ଗୱସ୍ସଂ [ଗୱାସଂ (ସୀ॰ ସ୍ୟା॰ ପୀ॰)] ଦାସପୋରିସଂ ।
ଦତ୍ୱା ଚ [ଦତ୍ୱାପି (ସୀ॰ ସ୍ୟା॰), ଦତ୍ୱା ୱା (ପୀ॰)] ନାଲମେକସ୍ସ, ଇତି ୱିଦ୍ୱା [ୱିଦ୍ଧା (ସ୍ୟା॰)] ସମଂ ଚରେ ॥
ରାଜା ପସୟ୍ହ ପଥୱିଂ ୱିଜିତ୍ୱା, ସସାଗରନ୍ତଂ ମହିମାୱସନ୍ତୋ ।
ଓରଂ ସମୁଦ୍ଦସ୍ସ ଅତିତ୍ତରୂପୋ [ଅତିତ୍ତିରୂପୋ (କ॰)], ପାରଂ ସମୁଦ୍ଦସ୍ସପି ପତ୍ଥୟେଥ ॥
ୟାୱ ଅନୁସ୍ସରଂ କାମେ, ମନସା ତିତ୍ତି ନାଜ୍ଝଗା ।
ତତୋ ନିୱତ୍ତା ପଟିକମ୍ମ ଦିସ୍ୱା, ତେ ୱେ ସୁତିତ୍ତା ୟେ [ତିତ୍ତା (ସୀ॰ ସ୍ୟା॰ ପୀ॰)] ପଞ୍ଞାୟ ତିତ୍ତା ॥
ପଞ୍ଞାୟ ତିତ୍ତିନଂ [ତିତ୍ତୀନଂ (ସୀ॰ ସ୍ୟା॰)] ସେଟ୍ଠଂ, ନ ସୋ କାମେହି ତପ୍ପତି ।
ପଞ୍ଞାୟ ତିତ୍ତଂ ପୁରିସଂ, ତଣ୍ହା ନ କୁରୁତେ ୱସଂ ॥
ଅପଚିନେଥେୱ କାମାନଂ [କାମାନି (ସୀ॰ ସ୍ୟା॰ ପୀ॰)], ଅପ୍ପିଚ୍ଛସ୍ସ ଅଲୋଲୁପୋ ।
ସମୁଦ୍ଦମତ୍ତୋ ପୁରିସୋ, ନ ସୋ କାମେହି ତପ୍ପତି ॥
ରଥକାରୋୱ ଚମ୍ମସ୍ସ, ପରିକନ୍ତଂ ଉପାହନଂ ।
ୟଂ ୟଂ ଚଜତି [ଜହତି (ସ୍ୟା॰ କ॰)] କାମାନଂ, ତଂ ତଂ ସମ୍ପଜ୍ଜତେ ସୁଖଂ ।
ସବ୍ବଂ ଚେ ସୁଖମିଚ୍ଛେୟ୍ୟ, ସବ୍ବେ କାମେ ପରିଚ୍ଚଜେ ॥
ଅଟ୍ଠ ତେ ଭାସିତା ଗାଥା, ସବ୍ବା ହୋନ୍ତି ସହସ୍ସିୟୋ [ସହସ୍ସିୟା ( ?) ଉପରି ସୁତସୋମଜାତକେ ତଥା ଦିସ୍ସତି]।
ପଟିଗଣ୍ହ ମହାବ୍ରହ୍ମେ, ସାଧେତଂ ତୱ ଭାସିତଂ ॥
ନ ମେ ଅତ୍ଥୋ ସହସ୍ସେହି, ସତେହି ନହୁତେହି ୱା ।
ପଚ୍ଛିମଂ ଭାସତୋ ଗାଥଂ, କାମେ ମେ ନ ରତୋ ମନୋ ॥
ଭଦ୍ରକୋ [ସଦ୍ଦୋ (ସୀ॰)] ୱତାୟଂ ମାଣୱକୋ, ସବ୍ବଲୋକୱିଦୂ ମୁନି ।
ୟୋ ଇମଂ ତଣ୍ହଂ [ୟୋ ତଣ୍ହଂ (ସୀ॰ ସ୍ୟା॰)] ଦୁକ୍ଖଜନନିଂ, ପରିଜାନାତି ପଣ୍ଡିତୋତି ॥
କାମଜାତକଂ ଚତୁତ୍ଥଂ ।
୪୬୮. ଜନସନ୍ଧଜାତକଂ (୫)
ଦସ ଖଲୁ ଇମାନି [ଖଲୁମାନି (ସ୍ୟା॰)] ଠାନାନି, ୟାନି ପୁବ୍ବେ ଅକରିତ୍ୱା ।
ସ ପଚ୍ଛା ମନୁତପ୍ପତି, ଇଚ୍ଚେୱାହ [ଇଚ୍ଚାହ ରାଜା (ସୀ॰ ସ୍ୟା॰ ପୀ॰)] ଜନସନ୍ଧୋ ॥
ଅଲଦ୍ଧା ୱିତ୍ତଂ ତପ୍ପତି, ପୁବ୍ବେ ଅସମୁଦାନିତଂ ।
ନ ପୁବ୍ବେ ଧନମେସିସ୍ସଂ, ଇତି ପଚ୍ଛାନୁତପ୍ପତି ॥
ସକ୍ୟରୂପଂ ପୁରେ ସନ୍ତଂ, ମୟା ସିପ୍ପଂ ନ ସିକ୍ଖିତଂ ।
କିଚ୍ଛା ୱୁତ୍ତି ଅସିପ୍ପସ୍ସ, ଇତି ପଚ୍ଛାନୁତପ୍ପତି ॥
କୂଟୱେଦୀ ପୁରେ ଆସିଂ, ପିସୁଣୋ ପିଟ୍ଠିମଂସିକୋ ।
ଚଣ୍ଡୋ ଚ ଫରୁସୋ ଚାପି [ଚାସିଂ (ସୀ॰ ସ୍ୟା॰ ପୀ॰)], ଇତି ପଚ୍ଛାନୁତପ୍ପତି ॥
ପାଣାତିପାତୀ ପୁରେ ଆସିଂ, ଲୁଦ୍ଦୋ ଚାପି [ଚାସିଂ (ସୀ॰ ପୀ॰)] ଅନାରିୟୋ ।
ଭୂତାନଂ ନାପଚାୟିସ୍ସଂ, ଇତି ପଚ୍ଛାନୁତପ୍ପତି ॥
ବହୂସୁ ୱତ ସନ୍ତୀସୁ, ଅନାପାଦାସୁ ଇତ୍ଥିସୁ ।
ପରଦାରଂ ଅସେୱିସ୍ସଂ, ଇତି ପଚ୍ଛାନୁତପ୍ପତି ॥
ବହୁମ୍ହି ୱତ ସନ୍ତମ୍ହି, ଅନ୍ନପାନେ ଉପଟ୍ଠିତେ ।
ନ ପୁବ୍ବେ ଅଦଦଂ [ଅଦଦିଂ (ସୀ॰)] ଦାନଂ, ଇତି ପଚ୍ଛାନୁତପ୍ପତି ॥
ମାତରଂ ପିତରଞ୍ଚାପି, ଜିଣ୍ଣକଂ ଗତୟୋବ୍ବନଂ [ଜିଣ୍ଣକେ ଗତୟୋବ୍ବନେ (ସୀ॰ ସ୍ୟା॰ ପୀ॰)]।
ପହୁ ସନ୍ତୋ ନ ପୋସିସ୍ସଂ, ଇତି ପଚ୍ଛାନୁତପ୍ପତି ॥
ଆଚରିୟମନୁସତ୍ଥାରଂ, ସବ୍ବକାମରସାହରଂ ।
ପିତରଂ ଅତିମଞ୍ଞିସ୍ସଂ, ଇତି ପଚ୍ଛାନୁତପ୍ପତି ॥
ସମଣେ ବ୍ରାହ୍ମଣେ ଚାପି, ସୀଲୱନ୍ତେ ବହୁସ୍ସୁତେ ।
ନ ପୁବ୍ବେ ପୟିରୁପାସିସ୍ସଂ, ଇତି ପଚ୍ଛାନୁତପ୍ପତି ॥
ସାଧୁ ହୋତି ତପୋ ଚିଣ୍ଣୋ, ସନ୍ତୋ ଚ ପୟିରୁପାସିତୋ ।
ନ ଚ ପୁବ୍ବେ ତପୋ ଚିଣ୍ଣୋ, ଇତି ପଚ୍ଛାନୁତପ୍ପତି ॥
ୟୋ ଚ ଏତାନି ଠାନାନି, ୟୋନିସୋ ପଟିପଜ୍ଜତି ।
କରଂ ପୁରିସକିଚ୍ଚାନି, ସ ପଚ୍ଛା ନାନୁତପ୍ପତୀତି ॥
ଜନସନ୍ଧଜାତକଂ ପଞ୍ଚମଂ ।
୪୬୯. ମହାକଣ୍ହଜାତକଂ (୬)
କଣ୍ହୋ କଣ୍ହୋ ଚ ଘୋରୋ ଚ, ସୁକ୍କଦାଠୋ ପଭାସୱା [ପତାପୱା (ସୀ॰ ସ୍ୟା॰ ପୀ॰)]।
ବଦ୍ଧୋ ପଞ୍ଚହି ରଜ୍ଜୂହି, କିଂ ରୱି [ଧୀର (ସୀ॰ ପୀ॰), ୱୀର (ସ୍ୟା॰)] ସୁନଖୋ ତୱ ॥
ନାୟଂ ମିଗାନମତ୍ଥାୟ, ଉସୀନକ [ଉସୀନର (ସୀ॰ ପୀ॰), ଉସୀନ୍ନର (ସ୍ୟା॰)] ଭୱିସ୍ସତି ।
ମନୁସ୍ସାନଂ ଅନୟୋ ହୁତ୍ୱା, ତଦା କଣ୍ହୋ ପମୋକ୍ଖତି ॥
ପତ୍ତହତ୍ଥା ସମଣକା, ମୁଣ୍ଡା ସଙ୍ଘାଟିପାରୁତା ।
ନଙ୍ଗଲେହି କସିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ତପସ୍ସିନିୟୋ [ତପନୀୟା (କ॰) ଦୁତିୟନ୍ତପଦାନି ହେତାନି] ପବ୍ବଜିତା, ମୁଣ୍ଡା ସଙ୍ଘାଟିପାରୁତା ।
ୟଦା ଲୋକେ ଗମିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ଦୀଘୋତ୍ତରୋଟ୍ଠା ଜଟିଲା, ପଙ୍କଦନ୍ତା ରଜସ୍ସିରା ।
ଇଣଂ ଚୋଦାୟ [ୱୋଦାୟ (ସୀ॰ ପୀ॰), ଚୋଦୟ (ସ୍ୟା॰)] ଗଚ୍ଛନ୍ତି, ତଦା କଣ୍ହୋ ପମୋକ୍ଖତି ॥
ଅଧିଚ୍ଚ ୱେଦେ [ୱେଦଂ (କ॰)] ସାୱିତ୍ତିଂ, ୟଞ୍ଞତନ୍ତଞ୍ଚ [ତନ୍ତ୍ରଞ୍ଚ (ସୀ॰ ସ୍ୟା॰ ପୀ॰)] ବ୍ରାହ୍ମଣା ।
ଭତିକାୟ ୟଜିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ମାତରଂ ପିତରଞ୍ଚାପି, ଜିଣ୍ଣକଂ ଗତୟୋବ୍ବନଂ ।
ପହୂ ସନ୍ତୋ [ସନ୍ତା (ସୀ॰)] ନ ଭରନ୍ତି, ତଦା କଣ୍ହୋ ପମୋକ୍ଖତି ॥
ମାତରଂ ପିତରଞ୍ଚାପି, ଜିଣ୍ଣକଂ ଗତୟୋବ୍ବନଂ ।
ବାଲା ତୁମ୍ହେତି ୱକ୍ଖନ୍ତି, ତଦା କଣ୍ହୋ ପମୋକ୍ଖତି ॥
ଆଚରିୟଭରିୟଂ ସଖିଂ [ଆଚରିୟଭରିୟଂ ସଖାଭରିୟଂ (ସୀ॰ ପୀ॰)], ମାତୁଲାନିଂ ପିତୁଚ୍ଛକିଂ [ପିତୁଚ୍ଛୟଂ (ସୀ॰), ପିତୁଚ୍ଛସଂ (ପୀ॰)]।
ୟଦା ଲୋକେ ଗମିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ଅସିଚମ୍ମଂ ଗହେତ୍ୱାନ, ଖଗ୍ଗଂ ପଗ୍ଗୟ୍ହ ବ୍ରାହ୍ମଣା ।
ପନ୍ଥଘାତଂ କରିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ସୁକ୍କଚ୍ଛୱୀ ୱେଧୱେରା, ଥୂଲବାହୂ ଅପାତୁଭା ।
ମିତ୍ତଭେଦଂ କରିସ୍ସନ୍ତି, ତଦା କଣ୍ହୋ ପମୋକ୍ଖତି ॥
ମାୟାୱିନୋ ନେକତିକା, ଅସପ୍ପୁରିସଚିନ୍ତକା ।
ୟଦା ଲୋକେ ଭୱିସ୍ସନ୍ତି, ତଦା କଣ୍ହୋ ପମୋକ୍ଖତୀତି ॥
ମହାକଣ୍ହଜାତକଂ ଛଟ୍ଠଂ ।
୪୭୦. କୋସିୟଜାତକଂ (୭)
ନେୱ କିଣାମି ନପି ୱିକ୍କିଣାମି, ନ ଚାପି ମେ ସନ୍ନିଚୟୋ ଚ ଅତ୍ଥି [ଇଧତ୍ଥି (ସ୍ୟା॰)]।
ସୁକିଚ୍ଛରୂପଂ ୱତିଦଂ ପରିତ୍ତଂ, ପତ୍ଥୋଦନୋ ନାଲମୟଂ ଦୁୱିନ୍ନଂ ॥
ଅପ୍ପମ୍ହା ଅପ୍ପକଂ ଦଜ୍ଜା, ଅନୁମଜ୍ଝତୋ ମଜ୍ଝକଂ ।
ବହୁମ୍ହା ବହୁକଂ ଦଜ୍ଜା, ଅଦାନଂ ନୁପପଜ୍ଜତି [ନ ଉପପଜ୍ଜତି (ସୀ॰ ପୀ॰), ନୂପପଜ୍ଜତି (ସ୍ୟା॰)]॥
ତଂ ତଂ ୱଦାମି କୋସିୟ, ଦେହି ଦାନାନି ଭୁଞ୍ଜ ଚ ॥
ଅରିୟମଗ୍ଗଂ ସମାରୂହ [ଅରିୟଂ ମଗ୍ଗଂ ସମାରୁହ (ସୀ॰ ପୀ॰)], ନେକାସୀ ଲଭତେ ସୁଖଂ ॥
ମୋଘଞ୍ଚସ୍ସ ହୁତଂ ହୋତି, ମୋଘଞ୍ଚାପି ସମୀହିତଂ ।
ଅତିଥିସ୍ମିଂ ୟୋ ନିସିନ୍ନସ୍ମିଂ, ଏକୋ ଭୁଞ୍ଜତି ଭୋଜନଂ ॥
ତଂ ତଂ ୱଦାମି କୋସିୟ, ଦେହି ଦାନାନି ଭୁଞ୍ଜ ଚ ।
ଅରିୟମଗ୍ଗଂ ସମାରୂହ, ନେକାସୀ ଲଭତେ ସୁଖଂ ॥
ସଚ୍ଚଞ୍ଚସ୍ସ ହୁତଂ ହୋତି, ସଚ୍ଚଞ୍ଚାପି ସମୀହିତଂ ।
ଅତିଥିସ୍ମିଂ ୟୋ ନିସିନ୍ନସ୍ମିଂ, ନେକୋ ଭୁଞ୍ଜତି ଭୋଜନଂ ॥
ତଂ ତଂ ୱଦାମି କୋସିୟ, ଦେହି ଦାନାନି ଭୁଞ୍ଜ ଚ ।
ଅରିୟମଗ୍ଗଂ ସମାରୂହ, ନେକାସୀ ଲଭତେ ସୁଖଂ ॥
ସରଞ୍ଚ ଜୁହତି ପୋସୋ, ବହୁକାୟ ଗୟାୟ ଚ ।
ଦୋଣେ ତିମ୍ବରୁତିତ୍ଥସ୍ମିଂ, ସୀଘସୋତେ ମହାୱହେ ॥
ଅତ୍ର ଚସ୍ସ ହୁତଂ ହୋତି, ଅତ୍ର ଚସ୍ସ ସମୀହିତଂ ।
ଅତିଥିସ୍ମିଂ ୟୋ ନିସିନ୍ନସ୍ମିଂ, ନେକୋ ଭୁଞ୍ଜତି ଭୋଜନଂ ॥
ତଂ ତଂ ୱଦାମି କୋସିୟ, ଦେହି ଦାନାନି ଭୁଞ୍ଜ ଚ ।
ଅରିୟମଗ୍ଗଂ ସମାରୂହ, ନେକାସୀ ଲଭତେ ସୁଖଂ ॥
ବଳିସଞ୍ହି ସୋ ନିଗିଲତି [ନିଗ୍ଗିଲତି (ସୀ॰ ପୀ॰)], ଦୀଘସୁତ୍ତଂ ସବନ୍ଧନଂ ।
ଅତିଥିସ୍ମିଂ ୟୋ ନିସିନ୍ନସ୍ମିଂ, ଏକୋ ଭୁଞ୍ଜତି ଭୋଜନଂ ॥
ତଂ ତଂ ୱଦାମି କୋସିୟ, ଦେହି ଦାନାନି ଭୁଞ୍ଜ ଚ ।
ଅରିୟମଗ୍ଗଂ ସମାରୂହ, ନେକାସୀ ଲଭତେ ସୁଖଂ ॥
ଉଳାରୱଣ୍ଣା ୱତ ବ୍ରାହ୍ମଣା ଇମେ, ଅୟଞ୍ଚ ୱୋ ସୁନଖୋ କିସ୍ସ ହେତୁ ।
ଉଚ୍ଚାୱଚଂ ୱଣ୍ଣନିଭଂ ୱିକୁବ୍ବତି, ଅକ୍ଖାଥ ନୋ ବ୍ରାହ୍ମଣା କେ ନୁ ତୁମ୍ହେ ॥
ଚନ୍ଦୋ ଚ ସୁରିୟୋ ଚ [ସୂରିୟୋ ଚ (କ॰)] ଉଭୋ ଇଧାଗତା, ଅୟଂ ପନ ମାତଲି ଦେୱସାରଥି ।
ସକ୍କୋହମସ୍ମି ତିଦସାନମିନ୍ଦୋ, ଏସୋ ଚ ଖୋ ପଞ୍ଚସିଖୋତି ୱୁଚ୍ଚତି ॥
ପାଣିସ୍ସରା ମୁଦିଙ୍ଗା ଚ [ମୁତିଙ୍ଗା ଚ (ସୀ॰ ସ୍ୟା॰ ପୀ॰], ମୁରଜାଲମ୍ବରାନି ଚ ।
ସୁତ୍ତମେନଂ ପବୋଧେନ୍ତି, ପଟିବୁଦ୍ଧୋ ଚ ନନ୍ଦତି ॥
ୟେ କେଚିମେ ମଚ୍ଛରିନୋ କଦରିୟା, ପରିଭାସକା ସମଣବ୍ରାହ୍ମଣାନଂ ।
ଇଧେୱ ନିକ୍ଖିପ୍ପ ସରୀରଦେହଂ, କାୟସ୍ସ ଭେଦା ନିରୟଂ ୱଜନ୍ତି ॥
ୟେ କେଚିମେ ସୁଗ୍ଗତିମାସମାନା [ସୁଗ୍ଗତିମାସସାନା (ସୀ॰ ପୀ॰), ସୁଗ୍ଗତାସିସମାନା (କ॰)], ଧମ୍ମେ ଠିତା ସଂୟମେ ସଂୱିଭାଗେ ।
ଇଧେୱ ନିକ୍ଖିପ୍ପ ସରୀରଦେହଂ, କାୟସ୍ସ ଭେଦା ସୁଗତିଂ ୱଜନ୍ତି ॥
ତ୍ୱଂ ନୋସି ଞାତି ପୁରିମାସୁ ଜାତିସୁ, ସୋ ମଚ୍ଛରୀ ରୋସକୋ [କୋସିୟୋ (ସ୍ୟା॰ କ॰)] ପାପଧମ୍ମୋ ।
ତୱେୱ ଅତ୍ଥାୟ ଇଧାଗତମ୍ହା, ମା ପାପଧମ୍ମୋ ନିରୟଂ ଗମିତ୍ଥ [ଅପ୍ପତ୍ଥ (କ॰ ସୀ॰ ସ୍ୟା॰ ପୀ॰)]॥
ଅଦ୍ଧା ହି ମଂ ୱୋ ହିତକାମା, ୟଂ ମଂ ସମନୁସାସଥ ।
ସୋହଂ ତଥା କରିସ୍ସାମି, ସବ୍ବଂ ୱୁତ୍ତଂ ହିତେସିଭି ॥
ଏସାହମଜ୍ଜେୱ ଉପାରମାମି, ନ ଚାପିହଂ [ନ ଚାପହଂ (ସୀ॰ ପୀ॰)] କିଞ୍ଚି କରେୟ୍ୟ ପାପଂ ।
ନ ଚାପି ମେ କିଞ୍ଚି ଅଦେୟ୍ୟମତ୍ଥି, ନ ଚାପିଦତ୍ୱା ଉଦକଂ ପିୱାମି [ଉଦକମ୍ପହଂ ପିବେ (ସୀ॰)]॥
ଏୱଞ୍ଚ ମେ ଦଦତୋ ସବ୍ବକାଲଂ [କାଲେ (କ॰)], ଭୋଗା ଇମେ ୱାସୱ ଖୀୟିସ୍ସନ୍ତି ।
ତତୋ ଅହଂ ପବ୍ବଜିସ୍ସାମି ସକ୍କ, ହିତ୍ୱାନ କାମାନି ୟଥୋଧିକାନୀତି ॥
କୋସିୟଜାତକଂ ସତ୍ତମଂ ।
୪୭୧. ମେଣ୍ଡକପଞ୍ହଜାତକଂ (୮)
ୟେସଂ ନ କଦାଚି ଭୂତପୁବ୍ବଂ, ସଖ୍ୟଂ [ସକ୍ଖିଂ (ସୀ॰ ପୀ॰), ସଖି (ସ୍ୟା॰)] ସତ୍ତପଦମ୍ପିମସ୍ମି ଲୋକେ ।
ଜାତା ଅମିତ୍ତା ଦୁୱେ ସହାୟା, ପଟିସନ୍ଧାୟ ଚରନ୍ତି କିସ୍ସ ହେତୁ ॥
ୟଦି ମେ ଅଜ୍ଜ ପାତରାସକାଲେ, ପଞ୍ହଂ ନ ସକ୍କୁଣେୟ୍ୟାଥ ୱତ୍ତୁମେତଂ ।
ରଟ୍ଠା ପବ୍ବାଜୟିସ୍ସାମି ୱୋ ସବ୍ବେ, ନ ହି ମତ୍ଥୋ ଦୁପ୍ପଞ୍ଞଜାତିକେହି ॥
ମହାଜନସମାଗମମ୍ହି ଘୋରେ, ଜନକୋଲାହଲସଙ୍ଗମମ୍ହି ଜାତେ ।
ୱିକ୍ଖିତ୍ତମନା ଅନେକଚିତ୍ତା, ପଞ୍ହଂ ନ ସକ୍କୁଣୋମ ୱତ୍ତୁମେତଂ ॥
ଏକଗ୍ଗଚିତ୍ତାୱ ଏକମେକା, ରହସି ଗତା ଅତ୍ଥଂ ନିଚିନ୍ତୟିତ୍ୱା [ଅତ୍ଥାନି ଚିନ୍ତୟିତ୍ୱା (ସ୍ୟା॰ କ॰)]।
ପୱିୱେକେ ସମ୍ମସିତ୍ୱାନ ଧୀରା, ଅଥ ୱକ୍ଖନ୍ତି ଜନିନ୍ଦ ଏତମତ୍ଥଂ ॥
ଉଗ୍ଗପୁତ୍ତ-ରାଜପୁତ୍ତିୟାନଂ, ଉରବ୍ଭସ୍ସ ମଂସଂ ପିୟଂ ମନାପଂ ।
ନ ସୁନଖସ୍ସ ତେ ଅଦେନ୍ତି ମଂସଂ, ଅଥ ମେଣ୍ଡସ୍ସ ସୁଣେନ ସଖ୍ୟମସ୍ସ ॥
ଚମ୍ମଂ ୱିହନନ୍ତି ଏଳକସ୍ସ, ଅସ୍ସପିଟ୍ଠତ୍ଥରସ୍ସୁଖସ୍ସ [ଅସ୍ସପିଟ୍ଠତ୍ଥରଣସୁଖସ୍ସ (ସୀ॰)] ହେତୁ ।
ନ ଚ ତେ ସୁନଖସ୍ସ ଅତ୍ଥରନ୍ତି, ଅଥ ମେଣ୍ଡସ୍ସ ସୁଣେନ ସଖ୍ୟମସ୍ସ ॥
ଆୱେଲ୍ଲିତସିଙ୍ଗିକୋ ହି ମେଣ୍ଡୋ, ନ ଚ ସୁନଖସ୍ସ ୱିସାଣକାନି ଅତ୍ଥି ।
ତିଣଭକ୍ଖୋ ମଂସଭୋଜନୋ ଚ, ଅଥ ମେଣ୍ଡସ୍ସ ସୁଣେନ ସଖ୍ୟମସ୍ସ ॥
ତିଣମାସି ପଲାସମାସି ମେଣ୍ଡୋ, ନ ଚ ସୁନଖୋ ତିଣମାସି ନୋ ପଲାସଂ ।
ଗଣ୍ହେୟ୍ୟ ସୁଣୋ ସସଂ ବିଳାରଂ, ଅଥ ମେଣ୍ଡସ୍ସ ସୁଣେନ ସଖ୍ୟମସ୍ସ ॥
ଅଟ୍ଠଡ୍ଢପଦୋ ଚତୁପ୍ପଦସ୍ସ, ମେଣ୍ଡୋ ଅଟ୍ଠନଖୋ ଅଦିସ୍ସମାନୋ ।
ଛାଦିୟମାହରତୀ ଅୟଂ ଇମସ୍ସ, ମଂସଂ ଆହରତୀ ଅୟଂ ଅମୁସ୍ସ ॥
ପାସାଦୱରଗତୋ ୱିଦେହସେଟ୍ଠୋ, ୱିତିହାରଂ ଅଞ୍ଞମଞ୍ଞଭୋଜନାନଂ ।
ଅଦ୍ଦକ୍ଖି [ଅଦ୍ଦସ (ସ୍ୟା॰ କ॰)] କିର ସକ୍ଖିକଂ ଜନିନ୍ଦୋ, ବୁଭୁକ୍କସ୍ସ ପୁଣ୍ଣଂ ମୁଖସ୍ସ [ଭୋଭୁକ୍ଖସ୍ସ ଚ ପୁଣ୍ଣମୁଖସ୍ସ (ସୀ॰)] ଚେତଂ ॥
ଲାଭା ୱତ ମେ ଅନପ୍ପରୂପା, ୟସ୍ସ ମେଦିସା ପଣ୍ଡିତା କୁଲମ୍ହି ।
ପଞ୍ହସ୍ସ ଗମ୍ଭୀରଗତଂ ନିପୁଣମତ୍ଥଂ, ପଟିୱିଜ୍ଝନ୍ତି ସୁଭାସିତେନ ଧୀରା ॥
ଅସ୍ସତରିରଥଞ୍ଚ ଏକମେକଂ, ଫୀତଂ ଗାମୱରଞ୍ଚ ଏକମେକଂ ।
ସବ୍ବେସଂ ୱୋ ଦମ୍ମି ପଣ୍ଡିତାନଂ, ପରମପ୍ପତୀତମନୋ ସୁଭାସିତେନାତି ॥
ମେଣ୍ଡକପଞ୍ହଜାତକଂ ଅଟ୍ଠମଂ ।
୪୭୨. ମହାପଦୁମଜାତକଂ (୯)
ନାଦଟ୍ଠା [ନାଦିଟ୍ଠା (କ॰ ସୀ॰ ସ୍ୟା॰ କ॰)] ପରତୋ ଦୋସଂ, ଅଣୁଂ ଥୂଲାନି ସବ୍ବସୋ ।
ଇସ୍ସରୋ ପଣୟେ ଦଣ୍ଡଂ, ସାମଂ ଅପ୍ପଟିୱେକ୍ଖିୟ ॥
ୟୋ ଚ ଅପ୍ପଟିୱେକ୍ଖିତ୍ୱା, ଦଣ୍ଡଂ କୁବ୍ବତି ଖତ୍ତିୟୋ ।
ସକଣ୍ଟକଂ ସୋ ଗିଲତି, ଜଚ୍ଚନ୍ଧୋୱ ସମକ୍ଖିକଂ ॥
ଅଦଣ୍ଡିୟଂ ଦଣ୍ଡୟତି [ଦଣ୍ଡିୟତି (ସ୍ୟା॰ ପୀ॰)], ଦଣ୍ଡିୟଞ୍ଚ ଅଦଣ୍ଡିୟଂ [ଅଦଣ୍ଡିୟ (ନିୟ୍ୟ), ନ ଦଣ୍ଡୟେ ( ?)]।
ଅନ୍ଧୋୱ ୱିସମଂ ମଗ୍ଗଂ, ନ ଜାନାତି ସମାସମଂ ॥
ୟୋ ଚ ଏତାନି ଠାନାନି, ଅଣୁଂ ଥୂଲାନି ସବ୍ବସୋ ।
ସୁଦିଟ୍ଠମନୁସାସେୟ୍ୟ, ସ ୱେ ୱୋହରିତୁ [ୱୋହାତୁ (ପୀ॰)] ମରହତି ॥
ନେକନ୍ତମୁଦୁନା ସକ୍କା, ଏକନ୍ତତିଖିଣେନ ୱା ।
ଅତ୍ତଂ ମହନ୍ତେ [ମହତ୍ତେ (ସ୍ୟା॰ କ॰)] ଠପେତୁଂ [ଠାପେତୁଂ (ସୀ॰ ସ୍ୟା॰ ପୀ॰)], ତସ୍ମା ଉଭୟମାଚରେ ॥
ପରିଭୂତୋ ମୁଦୁ ହୋତି, ଅତିତିକ୍ଖୋ ଚ ୱେରୱା ।
ଏତଞ୍ଚ ଉଭୟଂ ଞତ୍ୱା, ଅନୁମଜ୍ଝଂ ସମାଚରେ ॥
ବହୁମ୍ପି ରତ୍ତୋ ଭାସେୟ୍ୟ, ଦୁଟ୍ଠୋପି ବହୁ ଭାସତି ।
ନ ଇତ୍ଥିକାରଣା ରାଜ, ପୁତ୍ତଂ ଘାତେତୁମରହସି ॥
ସବ୍ବୋୱ [ସବ୍ବୋ ଚ (କ॰ ସୀ॰ ପୀ॰)] ଲୋକୋ ଏକତୋ [ଏକନ୍ତୋ (ସୀ॰ ପୀ॰)], ଇତ୍ଥୀ ଚ ଅୟମେକିକା ।
ତେନାହଂ ପଟିପଜ୍ଜିସ୍ସଂ, ଗଚ୍ଛଥ ପକ୍ଖିପଥେୱ [ପକ୍ଖିପେଥ (ସ୍ୟା॰ ଅଟ୍ଠ॰)] ତଂ ॥
ଅନେକତାଲେ ନରକେ, ଗମ୍ଭୀରେ ଚ ସୁଦୁତ୍ତରେ [ଗମ୍ଭୀରେ ସୁଦୁରୁତ୍ତରେ (ପୀ॰ କ॰)]।
ପାତିତୋ ଗିରିଦୁଗ୍ଗସ୍ମିଂ, କେନ ତ୍ୱଂ ତତ୍ଥ ନାମରି ॥
ନାଗୋ ଜାତଫଣୋ ତତ୍ଥ, ଥାମୱା ଗିରିସାନୁଜୋ ।
ପଚ୍ଚଗ୍ଗହି ମଂ ଭୋଗେହି, ତେନାହଂ ତତ୍ଥ ନାମରିଂ ॥
ଏହି ତଂ ପଟିନେସ୍ସାମି, ରାଜପୁତ୍ତ ସକଂ ଘରଂ ।
ରଜ୍ଜଂ କାରେହି [କାରେସି (ସୀ॰)] ଭଦ୍ଦନ୍ତେ, କିଂ ଅରଞ୍ଞେ କରିସ୍ସସି ॥
ୟଥା ଗିଲିତ୍ୱା ବଳିସଂ, ଉଦ୍ଧରେୟ୍ୟ ସଲୋହିତଂ ।
ଉଦ୍ଧରିତ୍ୱା ସୁଖୀ ଅସ୍ସ, ଏୱଂ [ସୁଖଂ (ପୀ॰ କ॰)] ପସ୍ସାମି ଅତ୍ତନଂ [ଅତ୍ତନି (ପୀ॰ କ॰), ଅତ୍ତନା (ସ୍ୟା॰), ଏୱଂ ଅହମ୍ପି ପୁନ ସୋତ୍ଥିଭାୱପ୍ପତ୍ତଂ ଗିଲିତବଳିସଂ ପୁରିସମିୱ ଅତ୍ତାନଂ ପସ୍ସାମୀତି (ଅଟ୍ଠ॰ ସଂୱଣ୍ଣନା)]॥
କିଂ ନୁ ତ୍ୱଂ ବଳିସଂ ବ୍ରୂସି, କିଂ ତ୍ୱଂ ବ୍ରୂସି ସଲୋହିତଂ ।
କିଂ ନୁ ତ୍ୱଂ ଉବ୍ଭତଂ ବ୍ରୂସି, ତଂ ମେ ଅକ୍ଖାହି ପୁଚ୍ଛିତୋ ॥
କାମାହଂ ବଳିସଂ ବ୍ରୂମି, ହତ୍ଥିଅସ୍ସଂ ସଲୋହିତଂ ।
ଚତ୍ତାହଂ ଉବ୍ଭତଂ ବ୍ରୂମି, ଏୱଂ ଜାନାହି ଖତ୍ତିୟ ॥
ଚିଞ୍ଚାମାଣୱିକା ମାତା, ଦେୱଦତ୍ତୋ ଚ ମେ ପିତା ।
ଆନନ୍ଦୋ ପଣ୍ଡିତୋ ନାଗୋ, ସାରିପୁତ୍ତୋ ଚ ଦେୱତା ।
ରାଜପୁତ୍ତୋ ଅହଂ ଆସିଂ [ଅହଂ ତଦା ରାଜପୁତ୍ତୋ (ସୀ॰ ସ୍ୟା॰ ପୀ॰)], ଏୱଂ ଧାରେଥ ଜାତକନ୍ତି ॥
ମହାପଦୁମଜାତକଂ ନୱମଂ ।
୪୭୩. ମିତ୍ତାମିତ୍ତଜାତକଂ (୧୦)
କାନି କମ୍ମାନି କୁବ୍ବାନଂ, କଥଂ ୱିଞ୍ଞୂ ପରକ୍କମେ ।
ଅମିତ୍ତଂ ଜାନେୟ୍ୟ ମେଧାୱୀ, ଦିସ୍ୱା ସୁତ୍ୱା ଚ ପଣ୍ଡିତୋ ॥
ନ ନଂ ଉମ୍ହୟତେ ଦିସ୍ୱା, ନ ଚ ନଂ ପଟିନନ୍ଦତି ।
ଚକ୍ଖୂନି ଚସ୍ସ [ଚକ୍ଖୂନିସ୍ସ (ସ୍ୟା॰ କ॰)] ନ ଦଦାତି, ପଟିଲୋମଞ୍ଚ ୱତ୍ତତି ॥
ଅମିତ୍ତେ ତସ୍ସ ଭଜତି, ମିତ୍ତେ ତସ୍ସ ନ ସେୱତି ।
ୱଣ୍ଣକାମେ ନିୱାରେତି, ଅକ୍କୋସନ୍ତେ ପସଂସତି ॥
ଗୁୟ୍ହଞ୍ଚ ତସ୍ସ ନକ୍ଖାତି, ତସ୍ସ ଗୁୟ୍ହଂ ନ ଗୂହତି ।
କମ୍ମଂ ତସ୍ସ ନ ୱଣ୍ଣେତି, ପଞ୍ଞସ୍ସ ନପ୍ପସଂସତି ॥
ଅଭୱେ ନନ୍ଦତି ତସ୍ସ, ଭୱେ ତସ୍ସ ନ ନନ୍ଦତି ।
ଅଚ୍ଛେରଂ [ଅଚ୍ଛରିୟଂ (ସୀ॰ ସ୍ୟା॰ ପୀ॰)] ଭୋଜନଂ ଲଦ୍ଧା, ତସ୍ସ ନୁପ୍ପଜ୍ଜତେ ସତି ।
ତତୋ ନଂ ନାନୁକମ୍ପତି, ଅହୋ ସୋପି [ଅହାସୋପି (କ॰ ସୀ॰ ସ୍ୟା॰ କ॰)] ଲଭେୟ୍ୟିତୋ ॥
ଇଚ୍ଚେତେ ସୋଳସାକାରା, ଅମିତ୍ତସ୍ମିଂ ପତିଟ୍ଠିତା ।
ୟେହି ଅମିତ୍ତଂ ଜାନେୟ୍ୟ, ଦିସ୍ୱା ସୁତ୍ୱା ଚ ପଣ୍ଡିତୋ ॥
କାନି କମ୍ମାନି କୁବ୍ବାନଂ, କଥଂ ୱିଞ୍ଞୂ ପରକ୍କମେ ।
ମିତ୍ତଂ ଜାନେୟ୍ୟ ମେଧାୱୀ, ଦିସ୍ୱା ସୁତ୍ୱା ଚ ପଣ୍ଡିତୋ ॥
ପୱୁତ୍ଥଂ ତସ୍ସ ସରତି, ଆଗତଂ ଅଭିନନ୍ଦତି ।
ତତୋ କେଲାୟିତୋ ହୋତି, ୱାଚାୟ ପଟିନନ୍ଦତି ॥
ମିତ୍ତେ ତସ୍ସେୱ ଭଜତି, ଅମିତ୍ତେ ତସ୍ସ ନ ସେୱତି ।
ଅକ୍କୋସନ୍ତେ ନିୱାରେତି, ୱଣ୍ଣକାମେ ପସଂସତି ॥
ଗୁୟ୍ହଞ୍ଚ ତସ୍ସ ଅକ୍ଖାତି, ତସ୍ସ ଗୁୟ୍ହଞ୍ଚ ଗୂହତି ।
କମ୍ମଞ୍ଚ ତସ୍ସ ୱଣ୍ଣେତି, ପଞ୍ଞଂ ତସ୍ସ [ପଞ୍ଞମସ୍ସ (ସ୍ୟା॰ କ॰)] ପସଂସତି ॥
ଭୱେ ଚ ନନ୍ଦତି ତସ୍ସ [ଭୱେ ନନ୍ଦତି ତସ୍ସ ଚ (କ॰)], ଅଭୱେ ତସ୍ସ ନ ନନ୍ଦତି ।
ଅଚ୍ଛେରଂ [ଅଚ୍ଛରିୟଂ (ସୀ॰ ସ୍ୟା॰ ପୀ॰)] ଭୋଜନଂ ଲଦ୍ଧା, ତସ୍ସ ଉପ୍ପଜ୍ଜତେ ସତି ।
ତତୋ ନଂ ଅନୁକମ୍ପତି, ଅହୋ ସୋପି [ପହାସୋପି (କ॰ ସୀ॰ ସ୍ୟା॰ କ॰)] ଲଭେୟ୍ୟିତୋ ॥
ଇଚ୍ଚେତେ ସୋଳସାକାରା, ମିତ୍ତସ୍ମିଂ ସୁପ୍ପତିଟ୍ଠିତା ।
ୟେହି ମିତ୍ତଞ୍ଚ ଜାନେୟ୍ୟ [ମିତ୍ତଂ ସୁଜାନେୟ୍ୟ (ପୀ॰ କ॰)], ଦିସ୍ୱା ସୁତ୍ୱା ଚ ପଣ୍ଡିତୋତି ॥
ମିତ୍ତାମିତ୍ତଜାତକଂ ଦସମଂ ।
ଦ୍ୱାଦସକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ଲହୁଚିତ୍ତ ସସାଲ କସନ୍ତି ପୁନ, ଅଥ କାମ ଦସଖଲୁଟ୍ଠାନୱରୋ ।
ଅଥ କଣ୍ହ ସୁକୋସିୟ ମେଣ୍ଡୱରୋ, ପଦୁମୋ ପୁନ ମିତ୍ତୱରେନ ଦସାତି ॥
୧୩. ତେରସକନିପାତୋ
୪୭୪. ଅମ୍ବଜାତକଂ (୧)
ଅହାସି [ଆହାସି ( ?)] ମେ ଅମ୍ବଫଲାନି ପୁବ୍ବେ, ଅଣୂନି ଥୂଲାନି ଚ ବ୍ରହ୍ମଚାରି ।
ତେହେୱ ମନ୍ତେହି ନ ଦାନି ତୁୟ୍ହଂ, ଦୁମପ୍ଫଲା ପାତୁଭୱନ୍ତି ବ୍ରହ୍ମେ ॥
ନକ୍ଖତ୍ତୟୋଗଂ ପଟିମାନୟାମି, ଖଣଂ ମୁହୁତ୍ତଞ୍ଚ ମନ୍ତେ ନ ପସ୍ସଂ [ଖଣଂ ମୁହୁତ୍ତଂ ନ ମଂ ତୋସୟନ୍ତି (ସୀ॰ ପୀ॰)]।
ନକ୍ଖତ୍ତୟୋଗଞ୍ଚ ଖଣଞ୍ଚ ଲଦ୍ଧା, ଅଦ୍ଧାହରିସ୍ସମ୍ବଫଲଂ [ଅଥାହରିସ୍ସମ୍ବଫଲଂ (ସୀ॰ ପୀ॰)] ପହୂତଂ ॥
ନକ୍ଖତ୍ତୟୋଗଂ ନ ପୁରେ ଅଭାଣି, ଖଣଂ ମୁହୁତ୍ତଂ ନ ପୁରେ ଅସଂସି ।
ସୟଂ ହରୀ [ଅଥାହରୀ (ସୀ॰ ସ୍ୟା॰ ପୀ॰)] ଅମ୍ବଫଲଂ ପହୂତଂ, ୱଣ୍ଣେନ ଗନ୍ଧେନ ରସେନୁପେତଂ ॥
ମନ୍ତାଭିଜପ୍ପେନ ପୁରେ ହି [ପୁର’ସ୍ସ (ସୀ॰ ପୀ॰), ପୁରେପି (ସ୍ୟା॰)] ତୁୟ୍ହଂ, ଦୁମପ୍ଫଲା ପାତୁଭୱନ୍ତି ବ୍ରହ୍ମେ ।
ସ୍ୱାଜ୍ଜ ନ ପାରେସି ଜପ୍ପମ୍ପି ମନ୍ତଂ [ଜପମ୍ପି ମନ୍ତେ (ସୀ॰ ପୀ॰)], ଅୟଂ ସୋ କୋ ନାମ ତୱଜ୍ଜ ଧମ୍ମୋ ॥
ଚଣ୍ଡାଲପୁତ୍ତୋ ମମ ସମ୍ପଦାସି, ଧମ୍ମେନ ମନ୍ତେ ପକତିଞ୍ଚ ସଂସି ।
ମା ଚସ୍ସୁ ମେ ପୁଚ୍ଛିତୋ ନାମଗୋତ୍ତଂ, ଗୁୟ୍ହିତ୍ଥୋ ଅତ୍ଥଂ [ମା ତଂ (ସୀ॰ ସ୍ୟା॰ ପୀ॰)] ୱିଜହେୟ୍ୟ ମନ୍ତୋ [ୱିଜହେୟ୍ୟୁମନ୍ତା (ସ୍ୟା॰)]॥
ସୋହଂ ଜନିନ୍ଦେନ ଜନମ୍ହି ପୁଟ୍ଠୋ, ମକ୍ଖାଭିଭୂତୋ ଅଲିକଂ ଅଭାଣିଂ ।
‘‘ମନ୍ତା ଇମେ ବ୍ରାହ୍ମଣସ୍ସା’’ତି ମିଚ୍ଛା, ପହୀନମନ୍ତୋ କପଣୋ ରୁଦାମି ॥
ଏରଣ୍ଡା ପୁଚିମନ୍ଦା ୱା, ଅଥ ୱା ପାଲିଭଦ୍ଦକା ।
ମଧୁଂ ମଧୁତ୍ଥିକୋ ୱିନ୍ଦେ, ସୋ ହି ତସ୍ସ ଦୁମୁତ୍ତମୋ ॥
ଖତ୍ତିୟା ବ୍ରାହ୍ମଣା ୱେସ୍ସା, ସୁଦ୍ଦା ଚଣ୍ଡାଲପୁକ୍କୁସା ।
ୟମ୍ହା ଧମ୍ମଂ ୱିଜାନେୟ୍ୟ, ସୋ ହି ତସ୍ସ ନରୁତ୍ତମୋ ॥
ଇମସ୍ସ ଦଣ୍ଡଞ୍ଚ ୱଧଞ୍ଚ ଦତ୍ୱା, ଗଲେ ଗହେତ୍ୱା ଖଲୟାଥ [ବଲୟାଥ (ସ୍ୟା॰), ଗଲୟାଥ (କ॰)] ଜମ୍ମଂ ।
ୟୋ ଉତ୍ତମତ୍ଥଂ କସିରେନ ଲଦ୍ଧଂ, ମାନାତିମାନେନ ୱିନାସୟିତ୍ଥ ॥
ୟଥା ସମଂ ମଞ୍ଞମାନୋ ପତେୟ୍ୟ, ସୋବ୍ଭଂ ଗୁହଂ ନରକଂ ପୂତିପାଦଂ ।
ରଜ୍ଜୂତି ୱା ଅକ୍କମେ କଣ୍ହସପ୍ପଂ, ଅନ୍ଧୋ ୟଥା ଜୋତିମଧିଟ୍ଠହେୟ୍ୟ ।
ଏୱମ୍ପି ମଂ ତ୍ୱଂ ଖଲିତଂ ସପଞ୍ଞ [ସପଞ୍ଞା (ପୀ॰)], ପହୀନମନ୍ତସ୍ସ ପୁନପ୍ପଦାହି [ପୁନ ସମ୍ପଦାହି (ସ୍ୟା॰), ପୁନପ୍ପସୀଦ (ସୀ॰ ପୀ॰)]॥
ଧମ୍ମେନ ମନ୍ତଂ [ମନ୍ତେ (ସୀ॰ ସ୍ୟା॰ ପୀ॰)] ତୱ ସମ୍ପଦାସିଂ, ତୁୱମ୍ପି ଧମ୍ମେନ [ତ୍ୱମ୍ପି ଧମ୍ମେନେୱ (କ॰)] ପରିଗ୍ଗହେସି ।
ପକତିମ୍ପି ତେ ଅତ୍ତମନୋ ଅସଂସିଂ, ଧମ୍ମେ ଠିତଂ ତଂ [ପତିଟ୍ଠଂ (କ॰)] ନ ଜହେୟ୍ୟ ମନ୍ତୋ ॥
ୟୋ ବାଲ ମନ୍ତଂ [ବଲମନ୍ତଂ (କ॰)] କସିରେନ ଲଦ୍ଧଂ, ୟଂ ଦୁଲ୍ଲଭଂ ଅଜ୍ଜ ମନୁସ୍ସଲୋକେ ।
କିଞ୍ଚାପି ଲଦ୍ଧା ଜୀୱିତୁଂ ଅପ୍ପପଞ୍ଞୋ [କିଚ୍ଛା ଲଦ୍ଧଂ ଜୀୱିକଂ ଅପ୍ପପଞ୍ଞୋ (ସୀ॰ ସ୍ୟା॰), କଚ୍ଛାପି ଲଦ୍ଧା ଜୀୱିକଂ ଅପ୍ପଞ୍ଞ (ପୀ॰)], ୱିନାସୟୀ ଅଲିକଂ ଭାସମାନୋ ॥
ବାଲସ୍ସ ମୂଳ୍ହସ୍ସ ଅକତଞ୍ଞୁନୋ ଚ, ମୁସା ଭଣନ୍ତସ୍ସ ଅସଞ୍ଞତସ୍ସ ।
ମନ୍ତେ ମୟଂ ତାଦିସକେ ନ ଦେମ, କୁତୋ ମନ୍ତା ଗଚ୍ଛ ନ ମୟ୍ହ ରୁଚ୍ଚସୀତି ॥
ଅମ୍ବଜାତକଂ ପଠମଂ ।
୪୭୫. ଫନ୍ଦନଜାତକଂ (୨)
କୁଠାରିହତ୍ଥୋ [କୁଧାରିହତ୍ଥୋ (କ॰)] ପୁରିସୋ, ୱନମୋଗୟ୍ହ ତିଟ୍ଠସି ।
ପୁଟ୍ଠୋ ମେ ସମ୍ମ ଅକ୍ଖାହି, କିଂ ଦାରୁଂ ଛେତୁମିଚ୍ଛସି ॥
ଇସ୍ସୋ [ଇସୋ (ସୀ॰), ଈସୋ (ସ୍ୟା॰ ପୀ॰)] ୱନାନି ଚରସି, ସମାନି ୱିସମାନି ଚ ।
ପୁଟ୍ଠୋ ମେ ସମ୍ମ ଅକ୍ଖାହି, କିଂ ଦାରୁଂ ନେମିୟା ଦଳ୍ହଂ ॥
ନେୱ ସାଲୋ ନ ଖଦିରୋ, ନାସ୍ସକଣ୍ଣୋ କୁତୋ ଧୱୋ ।
ରୁକ୍ଖୋ ଚ [ରୁକ୍ଖୋୱ (ସୀ॰ ପୀ॰)] ଫନ୍ଦନୋ ନାମ, ତଂ ଦାରୁଂ ନେମିୟା ଦଳ୍ହଂ ॥
କୀଦିସାନିସ୍ସ ପତ୍ତାନି, ଖନ୍ଧୋ ୱା ପନ କୀଦିସୋ ।
ପୁଟ୍ଠୋ ମେ ସମ୍ମ ଅକ୍ଖାହି, ୟଥା ଜାନେମୁ ଫନ୍ଦନଂ ॥
ୟସ୍ସ ସାଖା ପଲମ୍ବନ୍ତି, ନମନ୍ତି ନ ଚ ଭଞ୍ଜରେ ।
ସୋ ରୁକ୍ଖୋ ଫନ୍ଦନୋ ନାମ, ୟସ୍ସ ମୂଲେ ଅହଂ ଠିତୋ ॥
ଅରାନଂ ଚକ୍କନାଭୀନଂ, ଈସାନେମିରଥସ୍ସ ଚ ।
ସବ୍ବସ୍ସ ତେ କମ୍ମନିୟୋ, ଅୟଂ ହେସ୍ସତି ଫନ୍ଦନୋ ॥
ଇତି ଫନ୍ଦନରୁକ୍ଖୋପି, ତାୱଦେ ଅଜ୍ଝଭାସଥ ।
ମୟ୍ହମ୍ପି ୱଚନଂ ଅତ୍ଥି, ଭାରଦ୍ୱାଜ ସୁଣୋହି ମେ ॥
ଇସ୍ସସ୍ସ [ଇମସ୍ସ (କ॰ ସୀ॰ କ॰)] ଉପକ୍ଖନ୍ଧମ୍ହା [ଉପଖନ୍ଧମ୍ହା (କ॰ ସୀ॰ ପୀ॰ କ॰)], ଉକ୍କଚ୍ଚ ଚତୁରଙ୍ଗୁଲଂ ।
ତେନ ନେମିଂ ପସାରେସି [ପରିହରେସି (ସୀ॰ ପୀ॰)], ଏୱଂ ଦଳ୍ହତରଂ ସିୟା ॥
ଇତି ଫନ୍ଦନରୁକ୍ଖୋପି, ୱେରଂ ଅପ୍ପେସି ତାୱଦେ ।
ଜାତାନଞ୍ଚ ଅଜାତାନଂ, ଇସ୍ସାନଂ ଦୁକ୍ଖମାୱହି ॥
ଇଚ୍ଚେୱଂ [ଇଚ୍ଚେୱ (ସୀ॰ ପୀ॰)] ଫନ୍ଦନୋ ଇସ୍ସଂ, ଇସ୍ସୋ ଚ ପନ ଫନ୍ଦନଂ ।
ଅଞ୍ଞମଞ୍ଞଂ ୱିୱାଦେନ, ଅଞ୍ଞମଞ୍ଞମଘାତୟୁଂ ॥
ଏୱମେୱ ମନୁସ୍ସାନଂ, ୱିୱାଦୋ ୟତ୍ଥ ଜାୟତି ।
ମୟୂରନଚ୍ଚଂ ନଚ୍ଚନ୍ତି, ୟଥା ତେ ଇସ୍ସଫନ୍ଦନା ॥
ତଂ ୱୋ ୱଦାମି ଭଦ୍ଦଂ ୱୋ [ଭଦ୍ଦନ୍ତେ (କ॰)], ୟାୱନ୍ତେତ୍ଥ ସମାଗତା ।
ସମ୍ମୋଦଥ ମା ୱିୱଦଥ [ମାୱିୱଦିତ୍ଥ (ସୀ॰ ସ୍ୟା॰ ପୀ॰)], ମା ହୋଥ ଇସ୍ସଫନ୍ଦନା ॥
ସାମଗ୍ଗିମେୱ [ସାମଗ୍ୟମେୱ (ସ୍ୟା॰ କ॰)] ସିକ୍ଖେଥ, ବୁଦ୍ଧେହେତଂ ପସଂସିତଂ ।
ସାମଗ୍ଗିରତୋ ଧମ୍ମଟ୍ଠୋ, ୟୋଗକ୍ଖେମା ନ ଧଂସତୀତି ॥
ଫନ୍ଦନଜାତକଂ ଦୁତିୟଂ ।
୪୭୬. ଜୱନହଂସଜାତକଂ (୩)
ଇଧେୱ ହଂସ ନିପତ, ପିୟଂ ମେ ତୱ ଦସ୍ସନଂ ।
ଇସ୍ସରୋସି ଅନୁପ୍ପତ୍ତୋ, ୟମିଧତ୍ଥି ପୱେଦୟ ॥
ସୱନେନ ଏକସ୍ସ ପିୟା ଭୱନ୍ତି, ଦିସ୍ୱା ପନେକସ୍ସ ୱିୟେତି [ୱିନେତି (ସ୍ୟା॰), ୱିହେତି (ପୀ॰), ୱିଗେତି (କ॰ ଅଟ୍ଠ॰)] ଛନ୍ଦୋ ।
ଦିସ୍ୱା ଚ ସୁତ୍ୱା ଚ ପିୟା ଭୱନ୍ତି, କଚ୍ଚିନ୍ନୁ ମେ ପୀୟସି [ପିୟ୍ୟସି (ସୀ॰ ପୀ॰)] ଦସ୍ସନେନ ॥
ସୱନେନ ପିୟୋ ମେସି, ଭିୟ୍ୟୋ ଚାଗମ୍ମ ଦସ୍ସନଂ ।
ଏୱଂ ପିୟଦସ୍ସନୋ ମେ [ଏୱଂ ପିୟଦସ୍ସନୋ ସମାନୋ (ସୀ॰ ସ୍ୟା॰ ପୀ॰)], ୱସ ହଂସ ମମନ୍ତିକେ [ମମ ସନ୍ତିକେ (ସୀ॰ ସ୍ୟା॰ ପୀ॰)]॥
ୱସେୟ୍ୟାମ ତୱାଗାରେ, ନିଚ୍ଚଂ ସକ୍କତପୂଜିତା ।
ମତ୍ତୋ ଚ ଏକଦା ୱଜ୍ଜେ [ୱଜ୍ଜା (ସୀ॰ ପୀ॰)], ‘‘ହଂସରାଜଂ ପଚନ୍ତୁ ମେ’’ ॥
ଧିରତ୍ଥୁ ତଂ ମଜ୍ଜପାନଂ, ୟଂ ମେ ପିୟତରଂ ତୟା ।
ନ ଚାପି ମଜ୍ଜଂ ପିସ୍ସାମି [ପିୱିସ୍ସାମି (ସ୍ୟା॰), ପାୟାମି (ସୀ॰ ପୀ॰)], ୟାୱ ମେ ୱଚ୍ଛସୀ ଘରେ ॥
ସୁୱିଜାନଂ ସିଙ୍ଗାଲାନଂ, ସକୁଣାନଞ୍ଚ [ସକୁନ୍ତାନଞ୍ଚ (ସୀ॰ ସ୍ୟା॰ ପୀ॰)] ୱସ୍ସିତଂ ।
ମନୁସ୍ସୱସ୍ସିତଂ ରାଜ, ଦୁବ୍ବିଜାନତରଂ ତତୋ ॥
ଅପି ଚେ ମଞ୍ଞତୀ ପୋସୋ, ଞାତି ମିତ୍ତୋ ସଖାତି ୱା ।
ୟୋ ପୁବ୍ବେ ସୁମନୋ ହୁତ୍ୱା, ପଚ୍ଛା ସମ୍ପଜ୍ଜତେ ଦିସୋ ॥
ୟସ୍ମିଂ ମନୋ ନିୱିସତି, ଅୱିଦୂରେ ସହାପି ସୋ ।
ସନ୍ତିକେପି ହି ସୋ ଦୂରେ, ୟସ୍ମିଂ ନାୱିସତେ [ୟସ୍ମା ୱିୱସତେ (ସୀ॰ ସ୍ୟା॰ ପୀ॰)] ମନୋ ॥
ଅନ୍ତୋପି ସୋ ହୋତି ପସନ୍ନଚିତ୍ତୋ, ପାରଂ ସମୁଦ୍ଦସ୍ସ ପସନ୍ନଚିତ୍ତୋ ।
ଅନ୍ତୋପି ସୋ ହୋତି ପଦୁଟ୍ଠଚିତ୍ତୋ, ପାରଂ ସମୁଦ୍ଦସ୍ସ ପଦୁଟ୍ଠଚିତ୍ତୋ ॥
ସଂୱସନ୍ତା ୱିୱସନ୍ତି, ୟେ ଦିସା ତେ ରଥେସଭ ।
ଆରା ସନ୍ତୋ ସଂୱସନ୍ତି, ମନସା ରଟ୍ଠୱଡ୍ଢନ ॥
ଅତିଚିରଂ ନିୱାସେନ, ପିୟୋ ଭୱତି ଅପ୍ପିୟୋ ।
ଆମନ୍ତ ଖୋ ତଂ ଗଚ୍ଛାମ [ଗଚ୍ଛାମି (ସ୍ୟା॰)], ପୁରା ତେ ହୋମ ଅପ୍ପିୟା [ହୋମି ଅପ୍ପିୟୋ (ସ୍ୟା॰)]॥
ଏୱଂ ଚେ ୟାଚମାନାନଂ, ଅଞ୍ଜଲିଂ ନାୱବୁଜ୍ଝସି ।
ପରିଚାରକାନଂ ସତଂ [ସନ୍ତାନଂ (ସୀ॰ ସ୍ୟା॰), ସତ୍ତାନଂ (ପୀ॰)], ୱଚନଂ ନ କରୋସି ନୋ ।
ଏୱଂ ତଂ ଅଭିୟାଚାମ, ପୁନ କୟିରାସି ପରିୟାୟଂ ॥
ଏୱଂ ଚେ ନୋ ୱିହରତଂ, ଅନ୍ତରାୟୋ ନ ହେସ୍ସତି ।
ତୁୟ୍ହଞ୍ଚାପି [ୱାପି (ସ୍ୟା॰ ପୀ॰ କ॰)] ମହାରାଜ, ମୟ୍ହଞ୍ଚ [ୱା (ବହୂସୁ)] ରଟ୍ଠୱଡ୍ଢନ ।
ଅପ୍ପେୱ ନାମ ପସ୍ସେମୁ [ପସ୍ସେମ (ସୀ॰ ସ୍ୟା॰ ପୀ॰)], ଅହୋରତାନମଚ୍ଚୟେତି ॥
ଜୱନହଂସଜାତକଂ ତତିୟଂ ।
୪୭୭. ଚୂଳନାରଦଜାତକଂ (୪)
ନ ତେ କଟ୍ଠାନି ଭିନ୍ନାନି, ନ ତେ ଉଦକମାଭତଂ ।
ଅଗ୍ଗୀପି ତେ ନ ହାପିତୋ [ହାସିତୋ (ସୀ॰ ସ୍ୟା॰)], କିଂ ନୁ ମନ୍ଦୋୱ ଝାୟସି ॥
ନ ଉସ୍ସହେ ୱନେ ୱତ୍ଥୁଂ, କସ୍ସପାମନ୍ତୟାମି ତଂ ।
ଦୁକ୍ଖୋ ୱାସୋ ଅରଞ୍ଞସ୍ମିଂ, ରଟ୍ଠଂ ଇଚ୍ଛାମି ଗନ୍ତୱେ ॥
ୟଥା ଅହଂ ଇତୋ ଗନ୍ତ୍ୱା, ୟସ୍ମିଂ ଜନପଦେ ୱସଂ ।
ଆଚାରଂ ବ୍ରହ୍ମେ [ବ୍ରହ୍ମଂ (କ॰)] ସିକ୍ଖେୟ୍ୟଂ, ତଂ ଧମ୍ମଂ ଅନୁସାସ ମଂ ॥
ସଚେ ଅରଞ୍ଞଂ ହିତ୍ୱାନ, ୱନମୂଲଫଲାନି ଚ ।
ରଟ୍ଠେ ରୋଚୟସେ ୱାସଂ, ତଂ ଧମ୍ମଂ ନିସାମେହି ମେ ॥
ୱିସଂ ମା ପଟିସେୱିତ୍ଥୋ [ପଟିସେୱିତ୍ଥ (ସ୍ୟା॰ କ॰)], ପପାତଂ ପରିୱଜ୍ଜୟ ।
ପଙ୍କେ ଚ ମା ୱିସୀଦିତ୍ଥୋ [ପଙ୍କୋ ଚ ମା ୱିସିୟିତ୍ଥୋ (କ॰)], ୟତ୍ତୋ ଚାସୀୱିସେ ଚରେ ॥
କିଂ ନୁ ୱିସଂ ପପାତୋ ୱା, ପଙ୍କୋ ୱା ବ୍ରହ୍ମଚାରିନଂ ।
କଂ ତ୍ୱଂ ଆସୀୱିସଂ ବ୍ରୂସି, ତଂ ମେ ଅକ୍ଖାହି ପୁଚ୍ଛିତୋ ।
ଆସୱୋ ତାତ ଲୋକସ୍ମିଂ, ସୁରା ନାମ ପୱୁଚ୍ଚତି ।
ମନୁଞ୍ଞୋ [ମନୁଞ୍ଞା (ସୀ॰ ସ୍ୟା॰ ପୀ॰)] ସୁରଭୀ ୱଗ୍ଗୁ, ସାଦୁ [ମଧୁ (ସୀ॰ ସ୍ୟା॰)] ଖୁଦ୍ଦରସୂପମୋ [ରସୂପମା (ସୀ॰ ସ୍ୟା॰ ପୀ॰)]।
ୱିସଂ ତଦାହୁ ଅରିୟା ସେ, ବ୍ରହ୍ମଚରିୟସ୍ସ ନାରଦ ॥
ଇତ୍ଥିୟୋ ତାତ ଲୋକସ୍ମିଂ, ପମତ୍ତଂ ପମଥେନ୍ତି ତା ।
ହରନ୍ତି ୟୁୱିନୋ ଚିତ୍ତଂ, ତୂଲଂ ଭଟ୍ଠଂୱ ମାଲୁତୋ ।
ପପାତୋ ଏସୋ ଅକ୍ଖାତୋ, ବ୍ରହ୍ମଚରିୟସ୍ସ ନାରଦ ॥
ଲାଭୋ ସିଲୋକୋ ସକ୍କାରୋ, ପୂଜା ପରକୁଲେସୁ ଚ ।
ପଙ୍କୋ ଏସୋ ଚ [ଏସୋୱ (ସୀ॰ ସ୍ୟା॰ ପୀ॰)] ଅକ୍ଖାତୋ, ବ୍ରହ୍ମଚରିୟସ୍ସ ନାରଦ ॥
ସସତ୍ଥା [ମହନ୍ତା (ସ୍ୟା॰ କ॰)] ତାତ ରାଜାନୋ, ଆୱସନ୍ତି ମହିଂ ଇମଂ ।
ତେ ତାଦିସେ ମନୁସ୍ସିନ୍ଦେ, ମହନ୍ତେ ତାତ ନାରଦ ॥
ଇସ୍ସରାନଂ ଅଧିପତୀନଂ, ନ ତେସଂ ପାଦତୋ ଚରେ ।
ଆସୀୱିସୋତି [ଆସୀୱିସୋ ସୋ (ସୀ॰ ପୀ॰)] ଅକ୍ଖାତୋ, ବ୍ରହ୍ମଚରିୟସ୍ସ ନାରଦ ॥
ଭତ୍ତତ୍ଥୋ ଭତ୍ତକାଲେ ଚ [ୟଂ (ସୀ॰ ପୀ॰)], ୟଂ ଗେହମୁପସଙ୍କମେ ।
ୟଦେତ୍ଥ କୁସଲଂ ଜଞ୍ଞା, ତତ୍ଥ ଘାସେସନଂ ଚରେ ॥
ପୱିସିତ୍ୱା ପରକୁଲଂ, ପାନତ୍ଥଂ [ପାନତ୍ଥୋ (ସ୍ୟା॰ ପୀ॰)] ଭୋଜନାୟ ୱା ।
ମିତଂ ଖାଦେ ମିତଂ ଭୁଞ୍ଜେ, ନ ଚ ରୂପେ ମନଂ କରେ ॥
ଗୋଟ୍ଠଂ ମଜ୍ଜଂ କିରାଟଞ୍ଚ [କିରାସଞ୍ଚ (ସୀ॰ ସ୍ୟା॰), କିରାସଂ ୱା (ପୀ॰)], ସଭା ନିକିରଣାନି ଚ ।
ଆରକା ପରିୱଜ୍ଜେହି, ୟାନୀୱ ୱିସମଂ ପଥନ୍ତି ॥
ଚୂଳନାରଦଜାତକଂ ଚତୁତ୍ଥଂ ।
୪୭୮. ଦୂତଜାତକଂ (୫)
ଦୂତେ ତେ ବ୍ରହ୍ମେ [ଦୂତେ ବ୍ରାହ୍ମଣ (କ॰)] ପାହେସିଂ, ଗଙ୍ଗାତୀରସ୍ମି ଝାୟତୋ ।
ତେସଂ ପୁଟ୍ଠୋ ନ ବ୍ୟାକାସି, ଦୁକ୍ଖଂ ଗୁୟ୍ହମତଂ [ଗୁୟ୍ହଂ ମତଂ (ସୀ॰), ତୁୟ୍ହଂ ମତଂ (ସ୍ୟା॰ କ॰)] ନୁ ତେ ॥
ସଚେ ତେ ଦୁକ୍ଖମୁପ୍ପଜ୍ଜେ, କାସୀନଂ ରଟ୍ଠୱଡ୍ଢନ ।
ମା ଖୋ ନଂ ତସ୍ସ ଅକ୍ଖାହି, ୟୋ ତଂ ଦୁକ୍ଖା ନ ମୋଚୟେ ॥
ୟୋ ତସ୍ସ [ୟୋ ଚ ତଥା (ପୀ॰)] ଦୁକ୍ଖଜାତସ୍ସ, ଏକଙ୍ଗମପି ଭାଗସୋ [ଏକନ୍ତମପି ଭାସତୋ (ସୀ॰ ପୀ॰)]।
ୱିପ୍ପମୋଚେୟ୍ୟ ଧମ୍ମେନ, କାମଂ ତସ୍ସ ପୱେଦୟ [ପୱେଦୟେ (ସୀ॰)]॥
ସୁୱିଜାନଂ ସିଙ୍ଗାଲାନଂ, ସକୁଣାନଞ୍ଚ ୱସ୍ସିତଂ ।
ମନୁସ୍ସୱସ୍ସିତଂ ରାଜ, ଦୁବ୍ବିଜାନତରଂ ତତୋ ॥
ଅପି ଚେ ମଞ୍ଞତୀ ପୋସୋ, ଞାତି ମିତ୍ତୋ ସଖାତି ୱା ।
ୟୋ ପୁବ୍ବେ ସୁମନୋ ହୁତ୍ୱା, ପଚ୍ଛା ସମ୍ପଜ୍ଜତେ ଦିସୋ ॥
ୟୋ ଅତ୍ତନୋ ଦୁକ୍ଖମନାନୁପୁଟ୍ଠୋ, ପୱେଦୟେ ଜନ୍ତୁ ଅକାଲରୂପେ ।
ଆନନ୍ଦିନୋ ତସ୍ସ ଭୱନ୍ତିମିତ୍ତା [ଭୱନ୍ତ’ମିତ୍ତା (ସୀ॰ ପୀ॰)], ହିତେସିନୋ ତସ୍ସ ଦୁଖୀ ଭୱନ୍ତି ॥
କାଲଞ୍ଚ ଞତ୍ୱାନ ତଥାୱିଧସ୍ସ, ମେଧାୱୀନଂ ଏକମନଂ ୱିଦିତ୍ୱା ।
ଅକ୍ଖେୟ୍ୟ ତିବ୍ବାନି [ତିପ୍ପାନି (ସୀ॰ ସ୍ୟା॰ ପୀ॰)] ପରସ୍ସ ଧୀରୋ, ସଣ୍ହଂ ଗିରଂ ଅତ୍ଥୱତିଂ ପମୁଞ୍ଚେ ॥
ସଚେ ଚ ଜଞ୍ଞା ଅୱିସୟ୍ହମତ୍ତନୋ, ନ ତେ ହି ମୟ୍ହଂ [ନାୟଂ ନୀତି ମୟ୍ହ (ସୀ॰ ପୀ॰)] ସୁଖାଗମାୟ ।
ଏକୋୱ ତିବ୍ବାନି ସହେୟ୍ୟ ଧୀରୋ, ସଚ୍ଚଂ ହିରୋତ୍ତପ୍ପମପେକ୍ଖମାନୋ ॥
ଅହଂ ରଟ୍ଠାନି ୱିଚରନ୍ତୋ, ନିଗମେ ରାଜଧାନିୟୋ ।
ଭିକ୍ଖମାନୋ ମହାରାଜ, ଆଚରିୟସ୍ସ ଧନତ୍ଥିକୋ ॥
ଗହପତୀ ରାଜପୁରିସେ, ମହାସାଲେ ଚ ବ୍ରାହ୍ମଣେ ।
ଅଲତ୍ଥଂ ସତ୍ତ ନିକ୍ଖାନି, ସୁୱଣ୍ଣସ୍ସ ଜନାଧିପ ।
ତେ ମେ ନଟ୍ଠା ମହାରାଜ, ତସ୍ମା ସୋଚାମହଂ ଭୁସଂ ॥
ପୁରିସା ତେ ମହାରାଜ, ମନସାନୁୱିଚିନ୍ତିତା ।
ନାଲଂ ଦୁକ୍ଖା ପମୋଚେତୁଂ, ତସ୍ମା ତେସଂ ନ ବ୍ୟାହରିଂ ॥
ତ୍ୱଞ୍ଚ ଖୋ ମେ ମହାରାଜ, ମନସାନୁୱିଚିନ୍ତିତୋ ।
ଅଲଂ ଦୁକ୍ଖା ପମୋଚେତୁଂ, ତସ୍ମା ତୁୟ୍ହଂ ପୱେଦୟିଂ ॥
ତସ୍ସାଦାସି ପସନ୍ନତ୍ତୋ, କାସୀନଂ ରଟ୍ଠୱଡ୍ଢନୋ ।
ଜାତରୂପମୟେ ନିକ୍ଖେ, ସୁୱଣ୍ଣସ୍ସ ଚତୁଦ୍ଦସାତି ॥
ଦୂତଜାତକଂ ପଞ୍ଚମଂ ।
୪୭୯. କାଲିଙ୍ଗବୋଧିଜାତକଂ (୬)
ରାଜା କାଲିଙ୍ଗୋ ଚକ୍କୱତ୍ତି, ଧମ୍ମେନ ପଥୱିମନୁସାସଂ [ମନୁସାସି (ସ୍ୟା॰ କ॰)]।
ଅଗମା [ଅଗମାସି (ସ୍ୟା॰ କ॰)] ବୋଧିସମୀପଂ, ନାଗେନ ମହାନୁଭାୱେନ ॥
କାଲିଙ୍ଗୋ ଭାରଦ୍ୱାଜୋ ଚ, ରାଜାନଂ କାଲିଙ୍ଗଂ ସମଣକୋଲଞ୍ଞଂ ।
ଚକ୍କଂ ୱତ୍ତୟତୋ ପରିଗ୍ଗହେତ୍ୱା [ପରିଣେତ୍ୱା (ପୀ॰)], ପଞ୍ଜଲୀ ଇଦମୱୋଚ ॥
ପଚ୍ଚୋରୋହ ମହାରାଜ, ଭୂମିଭାଗୋ ୟଥା ସମଣୁଗ୍ଗତୋ [ସମନୁଗୀତୋ (ସୀ॰ ସ୍ୟା॰ ପୀ॰)]।
ଇଧ ଅନଧିୱରା ବୁଦ୍ଧା, ଅଭିସମ୍ବୁଦ୍ଧା ୱିରୋଚନ୍ତି ॥
ପଦକ୍ଖିଣତୋ ଆୱଟ୍ଟା, ତିଣଲତା ଅସ୍ମିଂ ଭୂମିଭାଗସ୍ମିଂ ।
ପଥୱିୟା ନାଭିୟଂ [ପୁଥୁୱିୟା ଅୟଂ (ସୀ॰), ପଠୱିୟା ଅୟଂ (ସ୍ୟା॰), ପୁଥୱିୟା’ୟଂ (ପୀ॰)] ମଣ୍ଡୋ, ଇତି ନୋ ସୁତଂ ମନ୍ତେ ମହାରାଜ [ସୁତଂ ମହାରାଜ (ସୀ॰ ସ୍ୟା॰ ପୀ॰)]॥
ସାଗରପରିୟନ୍ତାୟ, ମେଦିନିୟା ସବ୍ବଭୂତଧରଣିୟା ।
ପଥୱିୟା ଅୟଂ ମଣ୍ଡୋ, ଓରୋହିତ୍ୱା ନମୋ କରୋହି ॥
ୟେ ତେ ଭୱନ୍ତି ନାଗା ଚ, ଅଭିଜାତା ଚ କୁଞ୍ଜରା ।
ଏତ୍ତାୱତା ପଦେସଂ ତେ, ନାଗା ନେୱ ମୁପୟନ୍ତି ॥
ଅଭିଜାତୋ ନାଗୋ [ଅଭିଜାତୋ ତେ ନାଗୋ (ସୀ॰ ପୀ॰ ଅଟ୍ଠ॰)] କାମଂ, ପେସେହି କୁଞ୍ଜରଂ ଦନ୍ତିଂ ।
ଏତ୍ତାୱତା ପଦେସୋ [ପଦେସୋ ଚ (ସ୍ୟା॰ କ॰)], ସକ୍କା [ନ ସକ୍କା (ସ୍ୟା॰)] ନାଗେନ ମୁପଗନ୍ତୁଂ ॥
ତଂ ସୁତ୍ୱା ରାଜା କାଲିଙ୍ଗୋ, ୱେୟ୍ୟଞ୍ଜନିକୱଚୋ ନିସାମେତ୍ୱା ।
ସମ୍ପେସେସି ନାଗଂ ଞସ୍ସାମ, ମୟଂ ୟଥିମସ୍ସିଦଂ [ୟଥା ଇଦଂ (ସୀ॰ ସ୍ୟା॰ ପୀ॰)] ୱଚନଂ ॥
ସମ୍ପେସିତୋ ଚ ରଞ୍ଞା, ନାଗୋ କୋଞ୍ଚୋୱ ଅଭିନଦିତ୍ୱାନ ।
ପଟିସକ୍କିତ୍ୱା [ପଟିଓସକ୍କିତ୍ୱା (କ॰)] ନିସୀଦି, ଗରୁଂୱ ଭାରଂ ଅସହମାନୋ ॥
କାଲିଙ୍ଗଭାରଦ୍ୱାଜୋ, ନାଗଂ ଖୀଣାୟୁକଂ ୱିଦିତ୍ୱାନ ।
ରାଜାନଂ କାଲିଙ୍ଗଂ, ତରମାନୋ ଅଜ୍ଝଭାସିତ୍ଥ ।
ଅଞ୍ଞଂ ସଙ୍କମ ନାଗଂ, ନାଗୋ ଖୀଣାୟୁକୋ ମହାରାଜ ॥
ତଂ ସୁତ୍ୱା କାଲିଙ୍ଗୋ, ତରମାନୋ ସଙ୍କମୀ ନାଗଂ ।
ସଙ୍କନ୍ତେୱ ରଞ୍ଞେ, ନାଗୋ ତତ୍ଥେୱ ପତି [ପତିତୋ (କ॰)] ଭୁମ୍ୟା ।
ୱେୟ୍ୟଞ୍ଜନିକୱଚୋ, ୟଥା ତଥା ଅହୁ ନାଗୋ ॥
କାଲିଙ୍ଗୋ ରାଜା କାଲିଙ୍ଗଂ, ବ୍ରାହ୍ମଣଂ ଏତଦୱୋଚ ।
ତ୍ୱମେୱ ଅସି ସମ୍ବୁଦ୍ଧୋ, ସବ୍ବଞ୍ଞୂ ସବ୍ବଦସ୍ସାୱୀ ॥
ତଂ ଅନଧିୱାସେନ୍ତୋ କାଲିଙ୍ଗଂ [କାଲିଙ୍ଗୋ (ସୀ॰ ସ୍ୟା॰ ପୀ॰)], ବ୍ରାହ୍ମଣୋ ଇଦମୱୋଚ ।
ୱେୟ୍ୟଞ୍ଜନିକା ହି ମୟଂ, ବୁଦ୍ଧା ସବ୍ବଞ୍ଞୁନୋ ମହାରାଜ ॥
ସବ୍ବଞ୍ଞୂ ସବ୍ବୱିଦୂ ଚ, ବୁଦ୍ଧା ନ ଲକ୍ଖଣେନ ଜାନନ୍ତି ।
ଆଗମବଲସା [ଆଗମପୁରିସା (ପୀ॰)] ହି ମୟଂ, ବୁଦ୍ଧା ସବ୍ବଂ ପଜାନନ୍ତି ॥
ମହୟିତ୍ୱା ସମ୍ବୋଧିଂ [ମହାୟିତ୍ୱାନ ସମ୍ବୋଧିଂ (ସୀ॰ ପୀ॰), ପହଂସିତ୍ୱାନ ସମ୍ବୋଧିଂ (ସ୍ୟା॰), ମମାୟିତ୍ୱାନ ତଂ ବୋଧିଂ (କ॰)], ନାନାତୁରିୟେହି ୱଜ୍ଜମାନେହି ।
ମାଲାୱିଲେପନଂ ଅଭିହରିତ୍ୱା [ମାଲାଗନ୍ଧୱିଲେପନଂ ଆହରିତ୍ୱା (ସୀ॰ ପୀ॰); ପାକାରପରିକ୍ଖେପଂ କାରେସି । ଅଥ ରାଜା ପାୟାସି (ସୀ॰ ସ୍ୟା॰ ପୀ॰)] ଅଥ ରାଜା ମନୁପାୟାସି [ପାକାରପରିକ୍ଖେପଂ କାରେସି । ଅଥ ରାଜା ପାୟାସି (ସୀ॰ ସ୍ୟା॰ ପୀ॰)]॥
ସଟ୍ଠି ୱାହସହସ୍ସାନି, ପୁପ୍ଫାନଂ ସନ୍ନିପାତୟି ।
ପୂଜେସି ରାଜା କାଲିଙ୍ଗୋ, ବୋଧିମଣ୍ଡମନୁତ୍ତରନ୍ତି [ୱରୁତ୍ତମେତି (ସୀ॰)]॥
କାଲିଙ୍ଗବୋଧିଜାତକଂ ଛଟ୍ଠଂ ।
୪୮୦. ଅକିତ୍ତିଜାତକଂ (୭)
ଅକିତ୍ତିଂ [ଅକତ୍ତିଂ (କ॰)] ଦିସ୍ୱା ସମ୍ମନ୍ତଂ, ସକ୍କୋ ଭୂତପତୀ ବ୍ରୱି ।
କିଂ ପତ୍ଥୟଂ ମହାବ୍ରହ୍ମେ, ଏକୋ ସମ୍ମସି ଘମ୍ମନି ॥
ଦୁକ୍ଖୋ ପୁନବ୍ଭୱୋ ସକ୍କ, ସରୀରସ୍ସ ଚ ଭେଦନଂ ।
ସମ୍ମୋହମରଣଂ ଦୁକ୍ଖଂ, ତସ୍ମା ସମ୍ମାମି ୱାସୱ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ୟେନ ପୁତ୍ତେ ଚ ଦାରେ ଚ, ଧନଧଞ୍ଞଂ ପିୟାନି ଚ ।
ଲଦ୍ଧା ନରା ନ [ଲଦ୍ଧା ନଞ୍ଞାନି (କ॰)] ତପ୍ପନ୍ତି, ସୋ ଲୋଭୋ ନ ମୟୀ ୱସେ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ଖେତ୍ତଂ ୱତ୍ଥୁଂ ହିରଞ୍ଞଞ୍ଚ, ଗୱସ୍ସଂ ଦାସପୋରିସଂ ।
ୟେନ ଜାତେନ ଜୀୟନ୍ତି, ସୋ ଦୋସୋ ନ ମୟୀ ୱସେ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ବାଲଂ ନ ପସ୍ସେ ନ ସୁଣେ, ନ ଚ ବାଲେନ ସଂୱସେ ।
ବାଲେନଲ୍ଲାପ [ବାଲେନା’ଲାପ ( ?)] ସଲ୍ଲାପଂ, ନ କରେ ନ ଚ ରୋଚୟେ ॥
କିଂ ନୁ ତେ ଅକରଂ ବାଲୋ, ୱଦ କସ୍ସପ କାରଣଂ ।
କେନ କସ୍ସପ ବାଲସ୍ସ, ଦସ୍ସନଂ ନାଭିକଙ୍ଖସି ॥
ଅନୟଂ ନୟତି ଦୁମ୍ମେଧୋ, ଅଧୁରାୟଂ ନିୟୁଞ୍ଜତି ।
ଦୁନ୍ନୟୋ ସେୟ୍ୟସୋ ହୋତି, ସମ୍ମା ୱୁତ୍ତୋ ପକୁପ୍ପତି ।
ୱିନୟଂ ସୋ ନ ଜାନାତି, ସାଧୁ ତସ୍ସ ଅଦସ୍ସନଂ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ଧୀରଂ ପସ୍ସେ ସୁଣେ ଧୀରଂ, ଧୀରେନ ସହ ସଂୱସେ ।
ଧୀରେନଲ୍ଲାପସଲ୍ଲାପଂ, ତଂ କରେ ତଞ୍ଚ ରୋଚୟେ ॥
କିଂ ନୁ ତେ ଅକରଂ ଧୀରୋ, ୱଦ କସ୍ସପ କାରଣଂ ।
କେନ କସ୍ସପ ଧୀରସ୍ସ, ଦସ୍ସନଂ ଅଭିକଙ୍ଖସି ॥
ନୟଂ ନୟତି ମେଧାୱୀ, ଅଧୁରାୟଂ ନ ୟୁଞ୍ଜତି ।
ସୁନୟୋ ସେୟ୍ୟସୋ ହୋତି, ସମ୍ମା ୱୁତ୍ତୋ ନ କୁପ୍ପତି ।
ୱିନୟଂ ସୋ ପଜାନାତି, ସାଧୁ ତେନ ସମାଗମୋ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ତତୋ ରତ୍ୟା ୱିୱସାନେ [ୱିୱସନେ (ସୀ॰ ସ୍ୟା॰ ପୀ॰)], ସୂରିୟୁଗ୍ଗମନଂ [ସୁରିୟସ୍ସୁଗ୍ଗମନଂ (ସୀ॰ ସ୍ୟା॰ ପୀ॰)] ପତି ।
ଦିବ୍ବା ଭକ୍ଖା ପାତୁଭୱେୟ୍ୟୁଂ, ସୀଲୱନ୍ତୋ ଚ ୟାଚକା ॥
ଦଦତୋ ମେ [ଦଦତୋ ଚ ମେ (ପୀ॰)] ନ ଖୀୟେଥ, ଦତ୍ୱା ନାନୁତପେୟ୍ୟହଂ ।
ଦଦଂ ଚିତ୍ତଂ ପସାଦେୟ୍ୟଂ, ଏତଂ ସକ୍କ ୱରଂ ୱରେ ॥
ଏତସ୍ମିଂ ତେ ସୁଲପିତେ, ପତିରୂପେ ସୁଭାସିତେ ।
ୱରଂ କସ୍ସପ ତେ ଦମ୍ମି, ୟଂ କିଞ୍ଚି ମନସିଚ୍ଛସି ॥
ୱରଂ ଚେ ମେ ଅଦୋ ସକ୍କ, ସବ୍ବଭୂତାନମିସ୍ସର ।
ନ ମଂ ପୁନ ଉପେୟ୍ୟାସି, ଏତଂ ସକ୍କ ୱରଂ ୱରେ ॥
ବହୂହି ୱତଚରିୟାହି [ୱତ୍ତଚରିୟାହି (ସୀ॰ ସ୍ୟା॰ କ॰)], ନରା ଚ ଅଥ ନାରିୟୋ ।
ଦସ୍ସନଂ ଅଭିକଙ୍ଖନ୍ତି, କିଂ ନୁ ମେ ଦସ୍ସନେ ଭୟଂ ॥
ତଂ ତାଦିସଂ ଦେୱୱଣ୍ଣଂ [ଦେୱୱଣ୍ଣିଂ (ପୀ॰)], ସବ୍ବକାମସମିଦ୍ଧିନଂ ।
ଦିସ୍ୱା ତପୋ ପମଜ୍ଜେୟ୍ୟ [ଦିସ୍ୱା ତପୋ ପମଜ୍ଜେୟ୍ୟଂ (ସୀ॰ ସ୍ୟା॰ ପୀ॰), ଦିସ୍ୱାନହଂ ପମଜ୍ଜେୟ୍ୟଂ (ଚରିୟାପିଟକଟ୍ଠକଥା)], ଏତଂ ତେ ଦସ୍ସନେ ଭୟନ୍ତି ॥
ଅକିତ୍ତିଜାତକଂ ସତ୍ତମଂ ।
୪୮୧. ତକ୍କାରିୟଜାତକଂ (୮)
ଅହମେୱ ଦୁବ୍ଭାସିତଂ ଭାସି ବାଲୋ, ଭେକୋୱରଞ୍ଞେ ଅହିମୱ୍ହାୟମାନୋ [ମୱ୍ହୟାନୋ (ସୀ॰ ପୀ॰)]।
ତକ୍କାରିୟେ ସୋବ୍ଭମିମଂ [ସୋବ୍ଭମ୍ହି ଅହଂ (କ॰)] ପତାମି, ନ କିରେୱ ସାଧୁ ଅତିୱେଲଭାଣୀ [ସାଧୂତ୍ୟତିୱେଲଭାଣୀ (କ॰)]॥
ପପ୍ପୋତି ମଚ୍ଚୋ ଅତିୱେଲଭାଣୀ, ବନ୍ଧଂ ୱଧଂ ସୋକପରିଦ୍ଦୱଞ୍ଚ ।
ଅତ୍ତାନମେୱ ଗରହାସି ଏତ୍ଥ, ଆଚେର ୟଂ ତଂ ନିଖଣନ୍ତି ସୋବ୍ଭେ ॥
କିମେୱହଂ ତୁଣ୍ଡିଲମନୁପୁଚ୍ଛିଂ, କରେୟ୍ୟ ସଂ [କରେୟ୍ୟାସଂ (ସ୍ୟା॰), କରେୟ୍ୟ ସ (କ॰), ଭରେୟ୍ୟ ସଂ ( ?)] ଭାତରଂ କାଳିକାୟଂ [କାଳିକାୟ (ସ୍ୟା॰ କ॰)]।
ନଗ୍ଗୋୱହଂ [ନଗ୍ଗୋଚ’ହଂ ( ?)] ୱତ୍ଥୟୁଗଞ୍ଚ ଜୀନୋ, ଅୟମ୍ପି ଅତ୍ଥୋ ବହୁତାଦିସୋୱ ॥
ୟୋ ୟୁଜ୍ଝମାନାନମୟୁଜ୍ଝମାନୋ [ୟୁଜ୍ଝମାନେନ ଅୟୁଜ୍ଝମାନୋ (କ॰)], ମେଣ୍ଡନ୍ତରଂ ଅଚ୍ଚୁପତୀ କୁଲିଙ୍ଗୋ ।
ସୋ ପିଂସିତୋ ମେଣ୍ଡସିରେହି ତତ୍ଥ, ଅୟମ୍ପି ଅତ୍ଥୋ ବହୁତାଦିସୋୱ ॥
ଚତୁରୋ ଜନା ପୋତ୍ଥକମଗ୍ଗହେସୁଂ, ଏକଞ୍ଚ ପୋସଂ ଅନୁରକ୍ଖମାନା ।
ସବ୍ବେୱ ତେ ଭିନ୍ନସିରା ସୟିଂସୁ, ଅୟମ୍ପି ଅତ୍ଥୋ ବହୁତାଦିସୋୱ ॥
ଅଜା ୟଥା ୱେଳୁଗୁମ୍ବସ୍ମିଂ ବଦ୍ଧା [ବନ୍ଧଂ (ସ୍ୟା॰ କ॰)], ଅୱକ୍ଖିପନ୍ତୀ ଅସିମଜ୍ଝଗଚ୍ଛି ।
ତେନେୱ ତସ୍ସା ଗଲକାୱକନ୍ତଂ [ଗଲୟା ୱିକନ୍ତୁଂ (କ॰), ଗଲକଂ ୱିକନ୍ତା (ସ୍ୟା॰)], ଅୟମ୍ପି ଅତ୍ଥୋ ବହୁତାଦିସୋୱ ॥
ଇମେ ନ ଦେୱା ନ ଗନ୍ଧବ୍ବପୁତ୍ତା, ମିଗା ଇମେ ଅତ୍ଥୱସଂ ଗତା ମେ [ଅତ୍ଥୱସାଭତା ଇମେ (ସୀ॰ ସ୍ୟା॰ ପୀ॰)]।
ଏକଞ୍ଚ ନଂ ସାୟମାସେ ପଚନ୍ତୁ, ଏକଂ ପୁନପ୍ପାତରାସେ [ଏକଞ୍ଚ ନଂ ପାତରାସେ (କ॰ ସୀ॰ ପୀ॰)] ପଚନ୍ତୁ ॥
ସତଂ ସହସ୍ସାନି ଦୁଭାସିତାନି, କଲମ୍ପି ନାଗ୍ଘନ୍ତି ସୁଭାସିତସ୍ସ ।
ଦୁବ୍ଭାସିତଂ ସଙ୍କମାନୋ କିଲେସୋ [କିଲିସ୍ସତି ( ?)], ତସ୍ମା ତୁଣ୍ହୀ କିମ୍ପୁରିସା [କିଂପୁରିସୋ (ସୀ॰ ସ୍ୟା॰)] ନ ବାଲ୍ୟା ॥
ୟା ମେସା ବ୍ୟାହାସି [ବ୍ୟାକାସି (ସୀ॰ ସ୍ୟା॰ ପୀ॰)] ପମୁଞ୍ଚଥେତଂ, ଗିରିଞ୍ଚ ନଂ [ଗିରିଂ ୱରଂ (କ॰)] ହିମୱନ୍ତଂ ନୟନ୍ତୁ ।
ଇମଞ୍ଚ ଖୋ ଦେନ୍ତୁ ମହାନସାୟ, ପାତୋୱ ନଂ ପାତରାସେ ପଚନ୍ତୁ ॥
ପଜ୍ଜୁନ୍ନନାଥା ପସୱୋ, ପସୁନାଥା ଅୟଂ ପଜା ।
ତ୍ୱଂ ନାଥୋସି [ତ୍ୱଂ-ନାଥୋ’ସ୍ମି (ସୀ॰ ସ୍ୟା॰ ପୀ॰)] ମହାରାଜ, ନାଥୋହଂ ଭରିୟାୟ ମେ [ଅମ୍ହ-ନାଥା ମମ ଭରିୟା (କ॰ ସୀ॰ ସ୍ୟା॰)]।
ଦ୍ୱିନ୍ନମଞ୍ଞତରଂ ଞତ୍ୱା, ମୁତ୍ତୋ ଗଚ୍ଛେୟ୍ୟ ପବ୍ବତଂ ॥
ନ ୱେ ନିନ୍ଦା ସୁପରିୱଜ୍ଜୟେଥ [ସୁପରିୱଜ୍ଜୟାଥ (ସ୍ୟା॰)], ନାନା ଜନା ସେୱିତବ୍ବା ଜନିନ୍ଦ ।
ୟେନେୱ ଏକୋ ଲଭତେ ପସଂସଂ, ତେନେୱ ଅଞ୍ଞୋ ଲଭତେ ନିନ୍ଦିତାରଂ ॥
ସବ୍ବୋ ଲୋକୋ ପରିଚିତ୍ତୋ ଅତିଚିତ୍ତୋ [ପରଚିତ୍ତେନ ଅତିଚିତ୍ତୋ (ସୀ॰ ସ୍ୟା॰), ପରଚିତ୍ତେନ ଅଚିତ୍ତୋ (ସୀ॰ ଅଟ୍ଠ॰)], ସବ୍ବୋ ଲୋକୋ ଚିତ୍ତୱା ସମ୍ହି ଚିତ୍ତେ ।
ପଚ୍ଚେକଚିତ୍ତା ପୁଥୁ ସବ୍ବସତ୍ତା, କସ୍ସୀଧ ଚିତ୍ତସ୍ସ ୱସେ ନ ୱତ୍ତେ ॥
ତୁଣ୍ହୀ ଅହୂ କିମ୍ପୁରିସୋ ସଭରିୟୋ [ଅଭାଣୀ (କ॰)], ୟୋ ଦାନି ବ୍ୟାହାସି ଭୟସ୍ସ ଭୀତୋ ।
ସୋ ଦାନି ମୁତ୍ତୋ ସୁଖିତୋ ଅରୋଗୋ, ୱାଚାକିରେୱତ୍ତୱତୀ ନରାନନ୍ତି ॥
ତକ୍କାରିୟଜାତକଂ ଅଟ୍ଠମଂ ।
୪୮୨. ରୁରୁମିଗରାଜଜାତକଂ (୯)
ତସ୍ସ [କସ୍ସ (ସୀ॰ ପୀ॰)] ଗାମୱରଂ ଦମ୍ମି, ନାରିୟୋ ଚ ଅଲଙ୍କତା ।
ୟୋ [କୋ (ସୀ॰ ସ୍ୟା॰ ପୀ॰)] ମେତଂ ମିଗମକ୍ଖାତି [ମକ୍ଖାସି (ସ୍ୟା॰ କ॰)], ମିଗାନଂ ମିଗମୁତ୍ତମଂ ॥
ମୟ୍ହଂ ଗାମୱରଂ ଦେହି, ନାରିୟୋ ଚ ଅଲଙ୍କତା ।
ଅହଂ ତେ ମିଗମକ୍ଖିସ୍ସଂ, ମିଗାନଂ ମିଗମୁତ୍ତମଂ ॥
ଏତସ୍ମିଂ ୱନସଣ୍ଡସ୍ମିଂ, ଅମ୍ବା ସାଲା ଚ ପୁପ୍ଫିତା ।
ଇନ୍ଦଗୋପକସଞ୍ଛନ୍ନା, ଏତ୍ଥେସୋ ତିଟ୍ଠତେ ମିଗୋ ॥
ଧନୁଂ ଅଦ୍ୱେଜ୍ଝଂ [ଅଦେଜ୍ଝଂ (ସୀ॰ ପୀ॰), ସରଜ୍ଜଂ (କ॰)] କତ୍ୱାନ, ଉସୁଂ ସନ୍ନୟ୍ହୁପାଗମି [ସନ୍ଧାୟୁପାଗମି (ସୀ॰ ପୀ॰)]।
ମିଗୋ ଚ ଦିସ୍ୱା ରାଜାନଂ, ଦୂରତୋ ଅଜ୍ଝଭାସଥ ॥
ଆଗମେହି ମହାରାଜ, ମା ମଂ ୱିଜ୍ଝି ରଥେସଭ ।
କୋ ନୁ ତେ ଇଦମକ୍ଖାସି, ଏତ୍ଥେସୋ ତିଟ୍ଠତେ ମିଗୋ ॥
ଏସ ପାପଚରୋ ପୋସୋ, ସମ୍ମ ତିଟ୍ଠତି ଆରକା ।
ସୋୟଂ [ସୋ ହି (ସୀ॰ ସ୍ୟା॰ ପୀ॰)] ମେ ଇଦମକ୍ଖାସି, ଏତ୍ଥେସୋ ତିଟ୍ଠତେ ମିଗୋ ॥
ସଚ୍ଚଂ କିରେୱ ମାହଂସୁ, ନରା ଏକଚ୍ଚିୟା ଇଧ ।
କଟ୍ଠଂ ନିପ୍ଲୱିତଂ ସେୟ୍ୟୋ, ନ ତ୍ୱେୱେକଚ୍ଚି ୟୋ ନରୋ ॥
କିଂ ନୁ ରୁରୁ ଗରହସି ମିଗାନଂ, କିଂ ପକ୍ଖୀନଂ କିଂ ପନ ମାନୁସାନଂ ।
ଭୟଞ୍ହି ମଂ ୱିନ୍ଦତିନପ୍ପରୂପଂ, ସୁତ୍ୱାନ ତଂ ମାନୁସିଂ ଭାସମାନଂ ॥
ୟମୁଦ୍ଧରିଂ ୱାହନେ ୱୁୟ୍ହମାନଂ, ମହୋଦକେ ସଲିଲେ ସୀଘସୋତେ ।
ତତୋନିଦାନଂ ଭୟମାଗତଂ ମମ, ଦୁକ୍ଖୋ ହୱେ ରାଜ ଅସବ୍ଭି ସଙ୍ଗମୋ ॥
ସୋହଂ ଚତୁପ୍ପତ୍ତମିମଂ ୱିହଙ୍ଗମଂ, ତନୁଚ୍ଛିଦଂ ହଦୟେ ଓସ୍ସଜାମି ।
ହନାମି ତଂ ମିତ୍ତଦୁବ୍ଭିଂ ଅକିଚ୍ଚକାରିଂ [ହନାମି ମିତ୍ତଦ୍ଦୁ’ମକିଚ୍ଚକାରିଂ (ସୀ॰ ପୀ॰)], ୟୋ ତାଦିସଂ କମ୍ମକତଂ ନ ଜାନେ ॥
ଧୀରସ୍ସ ବାଲସ୍ସ ହୱେ ଜନିନ୍ଦ, ସନ୍ତୋ ୱଧଂ ନପ୍ପସଂସନ୍ତି ଜାତୁ ।
କାମଂ ଘରଂ ଗଚ୍ଛତୁ ପାପଧମ୍ମୋ, ୟଞ୍ଚସ୍ସ ଭଟ୍ଠଂ ତଦେତସ୍ସ ଦେହି ।
ଅହଞ୍ଚ ତେ କାମକରୋ ଭୱାମି ॥
ଅଦ୍ଧା ରୁରୁ ଅଞ୍ଞତରୋ ସତଂ ସୋ [ସତଂ’ସେ (ସୀ॰)], ୟୋ ଦୁବ୍ଭତୋ [ଦୁବ୍ଭିନୋ (ସ୍ୟା॰), ଦୂଭତୋ (ପୀ॰)] ମାନୁସସ୍ସ ନ ଦୁବ୍ଭି ।
କାମଂ ଘରଂ ଗଚ୍ଛତୁ ପାପଧମ୍ମୋ, ୟଞ୍ଚସ୍ସ ଭଟ୍ଠଂ ତଦେତସ୍ସ ଦମ୍ମି ।
ଅହଞ୍ଚ ତେ କାମଚାରଂ ଦଦାମି ॥
ସୁୱିଜାନଂ ସିଙ୍ଗାଲାନଂ, ସକୁଣାନଞ୍ଚୱସ୍ସିତଂ ।
ମନୁସ୍ସୱସ୍ସିତଂ ରାଜ, ଦୁବ୍ବିଜାନତରଂ ତତୋ ॥
ଅପି ଚେ ମଞ୍ଞତୀ ପୋସୋ, ଞାତି ମିତ୍ତୋ ସଖାତି ୱା ।
ୟୋ ପୁବ୍ବେ ସୁମନୋ ହୁତ୍ୱା, ପଚ୍ଛା ସମ୍ପଜ୍ଜତେ ଦିସୋ ॥
ସମାଗତା ଜାନପଦା, ନେଗମା ଚ ସମାଗତା ।
ମିଗା ସସ୍ସାନି ଖାଦନ୍ତି, ତଂ ଦେୱୋ ପଟିସେଧତୁ ॥
କାମଂ ଜନପଦୋ ମାସି, ରଟ୍ଠଞ୍ଚାପି ୱିନସ୍ସତୁ ।
ନ ତ୍ୱେୱାହଂ ରୁରୁଂ ଦୁବ୍ଭେ, ଦତ୍ୱା ଅଭୟଦକ୍ଖିଣଂ ॥
ମା ମେ ଜନପଦୋ ଆସି [ମା ମଂ ଜନପଦୋ ଅହୁ (ସ୍ୟା॰)], ରଟ୍ଠଞ୍ଚାପି ୱିନସ୍ସତୁ ।
ନ ତ୍ୱେୱାହଂ [ନ ତ୍ୱେୱ (କ॰ ସୀ॰ କ॰)] ମିଗରାଜସ୍ସ, ୱରଂ ଦତ୍ୱା ମୁସା ଭଣେତି ॥
ରୁରୁମିଗରାଜଜାତକଂ ନୱମଂ ।
୪୮୩. ସରଭମିଗଜାତକଂ (୧୦)
ଆସୀସେଥେୱ [ଆସିଂସେଥେୱ (ସୀ॰ ସ୍ୟା॰ ପୀ॰)] ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ୟଥା ଇଚ୍ଛିଂ ତଥା ଅହୁ ॥
ଆସୀସେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ଉଦକା ଥଲମୁବ୍ଭତଂ ॥
ୱାୟମେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ୟଥା ଇଚ୍ଛିଂ ତଥା ଅହୁ ॥
ୱାୟମେଥେୱ ପୁରିସୋ, ନ ନିବ୍ବିନ୍ଦେୟ୍ୟ ପଣ୍ଡିତୋ ।
ପସ୍ସାମି ୱୋହଂ ଅତ୍ତାନଂ, ଉଦକା ଥଲମୁବ୍ଭତଂ ॥
ଦୁକ୍ଖୂପନୀତୋପି ନରୋ ସପଞ୍ଞୋ, ଆସଂ ନ ଛିନ୍ଦେୟ୍ୟ ସୁଖାଗମାୟ ।
ବହୂ ହି ଫସ୍ସା ଅହିତା ହିତା ଚ, ଅୱିତକ୍କିତା ମଚ୍ଚମୁପବ୍ବଜନ୍ତି [ମଚ୍ଚୁମୁପବ୍ବଜନ୍ତି (କ॰ ସୀ॰ ପୀ॰), ମଚ୍ଚୁମୁପପଜ୍ଜନ୍ତି (ସ୍ୟା॰ କ॰) ଏତ୍ଥ ‘‘ଅୱିତକ୍କିତାପି ଫସ୍ସୋ ମଚ୍ଚଂ ଜନଂ ଉପଗଚ୍ଛନ୍ତୀ’’ତି ଅତ୍ଥୋ]॥
ଅଚିନ୍ତିତମ୍ପି ଭୱତି, ଚିନ୍ତିତମ୍ପି ୱିନସ୍ସତି ।
ନ ହି ଚିନ୍ତାମୟା ଭୋଗା, ଇତ୍ଥିୟା ପୁରିସସ୍ସ ୱା ॥
ସରଭଂ ଗିରିଦୁଗ୍ଗସ୍ମିଂ, ୟଂ ତ୍ୱଂ ଅନୁସରୀ ପୁରେ ।
ଅଲୀନଚିତ୍ତସ୍ସ ତୁୱଂ, ୱିକ୍କନ୍ତମନୁଜୀୱସି [ତୱ, ୱିକ୍କନ୍ତଂ ଜୀୱିତଂ ଲଭି (କ॰)]॥
ୟୋ ତଂ ୱିଦୁଗ୍ଗା ନରକା ସମୁଦ୍ଧରି, ସିଲାୟ ୟୋଗ୍ଗଂ ସରଭୋ କରିତ୍ୱା ।
ଦୁକ୍ଖୂପନୀତଂ ମଚ୍ଚୁମୁଖା ପମୋଚୟି, ଅଲୀନଚିତ୍ତଂ ତଂ ମିଗଂ [ତମେୱ (ସ୍ୟା॰ କ॰)] ୱଦେସି ॥
କିଂ ତ୍ୱଂ ନୁ [ତୁୱନ୍ନୁ (ସୀ॰ ପୀ॰)] ତତ୍ଥେୱ ତଦା ଅହୋସି, ଉଦାହୁ ତେ କୋଚି ନଂ [ତଂ (କ॰)] ଏତଦକ୍ଖା ।
ୱିୱଟ୍ଟଚ୍ଛଦ୍ଦୋ ନୁସି ସବ୍ବଦସ୍ସୀ, ଞାଣଂ ନୁ ତେ ବ୍ରାହ୍ମଣ ଭିଂସରୂପଂ ॥
ନ ଚେୱହଂ ତତ୍ଥ ତଦା ଅହୋସିଂ, ନ ଚାପି ମେ କୋଚି ନଂ [ତଂ (କ॰)] ଏତଦକ୍ଖା ।
ଗାଥାପଦାନଞ୍ଚ ସୁଭାସିତାନଂ, ଅତ୍ଥଂ ତଦାନେନ୍ତି ଜନିନ୍ଦ ଧୀରା ॥
ଆଦାୟ ପତ୍ତିଂ [ପତ୍ତଂ (ସ୍ୟା॰), ପଟ୍ଟିଂ (କ॰)] ପରୱିରିୟଘାତିଂ, ଚାପେ ସରଂ କିଂ ୱିଚିକିଚ୍ଛସେ ତୁୱଂ ।
ନୁନ୍ନୋ [ନୁଣ୍ଣୋ (କ॰ ସୀ॰ ସ୍ୟା॰), ତୁଣ୍ଣୋ (କ॰)] ସରୋ ସରଭଂ ହନ୍ତୁ ଖିପ୍ପଂ, ଅନ୍ନଞ୍ହି ଏତଂ ୱରପଞ୍ଞ ରଞ୍ଞୋ ॥
ଅଦ୍ଧା ପଜାନାମି ଅହମ୍ପି ଏତଂ, ଅନ୍ନଂ ମିଗୋ ବ୍ରାହ୍ମଣ ଖତ୍ତିୟସ୍ସ ।
ପୁବ୍ବେ କତଞ୍ଚ [ପୁବ୍ବେ ଚ କତଂ (କ॰)] ଅପଚାୟମାନୋ, ତସ୍ମା ମିଗଂ ସରଭଂ ନୋ ହନାମି ॥
ନେସୋ ମିଗୋ ମହାରାଜ, ଅସୁରେସୋ ଦିସମ୍ପତି ।
ଏତଂ ହନ୍ତ୍ୱା ମନୁସ୍ସିନ୍ଦ, ଭୱସ୍ସୁ ଅମରାଧିପୋ ॥
ସଚେ ଚ ରାଜା [ରାଜ (ସୀ॰ ସ୍ୟା॰ ପୀ॰)] ୱିଚିକିଚ୍ଛସେ ତୁୱଂ, ହନ୍ତୁଂ ମିଗଂ ସରଭଂ ସହାୟକଂ [ସହାୟକଂ ମେ (ସୀ॰ ପୀ॰)]।
ସପୁତ୍ତଦାରୋ ନରୱୀରସେଟ୍ଠ [ନରୱିରିୟସେଟ୍ଠ (ସୀ॰ ପୀ॰)], ଗନ୍ତ୍ୱା [ଗନ୍ତା (ସୀ॰ ପୀ॰ ଅଟ୍ଠ॰)] ତୁୱଂ ୱେତରଣିଂ ୟମସ୍ସ ॥
କାମଂ ଅହଂ ଜାନପଦା ଚ ସବ୍ବେ, ପୁତ୍ତା ଚ ଦାରା ଚ ସହାୟସଙ୍ଘା ।
ଗଚ୍ଛେମୁ ତଂ ୱେତରଣିଂ ୟମସ୍ସ, ନ ତ୍ୱେୱ ହଞ୍ଞୋ ମମ ପାଣଦୋ ୟୋ [ପାଣଦ’ସ୍ସ (ସୀ॰ ସ୍ୟା॰ ପୀ॰)]॥
ଅୟଂ ମିଗୋ କିଚ୍ଛଗତସ୍ସ ମୟ୍ହଂ, ଏକସ୍ସ କତ୍ତା ୱିୱନସ୍ମି ଘୋରେ ।
ତଂ ତାଦିସଂ ପୁବ୍ବକିଚ୍ଚଂ ସରନ୍ତୋ, ଜାନଂ ମହାବ୍ରହ୍ମେ କଥଂ ହନେୟ୍ୟଂ ॥
ମିତ୍ତାଭିରାଧୀ ଚିରମେୱ ଜୀୱ, ରଜ୍ଜଂ ଇମଂ ଧମ୍ମଗୁଣେ [ରଜ୍ଜମ୍ପିମଂ ଚସ୍ସ ଗଣେ (କ॰)] ପସାସ ।
ନାରୀଗଣେହି ପରିଚାରିୟନ୍ତୋ, ମୋଦସ୍ସୁ ରଟ୍ଠେ ତିଦିୱେୱ ୱାସୱୋ ॥
ଅକ୍କୋଧନୋ ନିଚ୍ଚପସନ୍ନଚିତ୍ତୋ, ସବ୍ବାତିଥୀ ୟାଚୟୋଗୋ ଭୱିତ୍ୱା [ପାହୁନକେ କରିତ୍ୱା (ସ୍ୟା॰), ୟାଚୟୋଗୋ ୱିଦିତ୍ୱା (କ॰)]।
ଦତ୍ୱା ଚ ଭୁତ୍ୱା ଚ ୟଥାନୁଭାୱଂ, ଅନିନ୍ଦିତୋ ସଗ୍ଗମୁପେହି ଠାନନ୍ତି ॥
ସରଭମିଗଜାତକଂ ଦସମଂ ।
ତେରସକନିପାତଂ ନିଟ୍ଠିତଂ ।
ତସ୍ସୁଦ୍ଦାନଂ –
ୱରଅମ୍ବ କୁଠାରି ସହଂସୱରୋ, ଅଥରଞ୍ଞସ୍ମିଂ ଦୂତକପଞ୍ଚମକୋ ।
ଅଥ ବୋଧି ଅକିତ୍ତି ସୁତକ୍କରିନା, ଅଥ ରୁରୁମିଗେନପରୋ ସରଭୋତି ॥
୧୪. ପକିଣ୍ଣକନିପାତୋ
୪୮୪. ସାଲିକେଦାରଜାତକଂ (୧)
ସମ୍ପନ୍ନଂ ସାଲିକେଦାରଂ, ସୁୱା ଭୁଞ୍ଜନ୍ତି କୋସିୟ ।
ପଟିୱେଦେମି ତେ ବ୍ରହ୍ମେ, ନ ନେ [ତେ (ସୀ॰ ସ୍ୟା॰), ନଂ (ସୀ॰ ସ୍ୟା॰ ପୀ॰ ଅଟ୍ଠ॰), ତଂ (କ॰ ଅଟ୍ଠ॰)] ୱାରେତୁମୁସ୍ସହେ ॥
ଏକୋ ଚ ତତ୍ଥ ସକୁଣୋ, ୟୋ ନେସଂ [ତେସଂ (ସୀ॰ ଅଟ୍ଠ॰)] ସବ୍ବସୁନ୍ଦରୋ ।
ଭୁତ୍ୱା ସାଲିଂ ୟଥାକାମଂ, ତୁଣ୍ଡେନାଦାୟ ଗଚ୍ଛତି ॥
ଓଡ୍ଡେନ୍ତୁ [ଉଜ୍ଝୁନ୍ତୁ (ସ୍ୟା॰ କ॰) ଅଙ୍ଗୁତ୍ତରନିକାୟେ ପସ୍ସିତବ୍ବଂ] ୱାଳପାସାନି, ୟଥା ୱଜ୍ଝେଥ ସୋ ଦିଜୋ ।
ଜୀୱଞ୍ଚ ନଂ ଗହେତ୍ୱାନ, ଆନୟେହି [ଆନୟେଥ (ସୀ॰ ପୀ॰)] ମମନ୍ତିକେ ॥
ଏତେ ଭୁତ୍ୱା ପିୱିତ୍ୱା ଚ [ଭୁତ୍ୱା ଚ ପିତ୍ୱା ଚ (ପୀ॰)], ପକ୍କମନ୍ତି ୱିହଙ୍ଗମା ।
ଏକୋ ବଦ୍ଧୋସ୍ମି ପାସେନ, କିଂ ପାପଂ ପକତଂ ମୟା ॥
ଉଦରଂ ନୂନ ଅଞ୍ଞେସଂ, ସୁୱ ଅଚ୍ଚୋଦରଂ ତୱ ।
ଭୁତ୍ୱା ସାଲିଂ ୟଥାକାମଂ, ତୁଣ୍ଡେନାଦାୟ ଗଚ୍ଛସି ॥
କୋଟ୍ଠଂ ନୁ ତତ୍ଥ ପୂରେସି, ସୁୱ ୱେରଂ ନୁ ତେ ମୟା ।
ପୁଟ୍ଠୋ ମେ ସମ୍ମ ଅକ୍ଖାହି, କୁହିଂ ସାଲିଂ ନିଦାହସି [ନିଧୀୟସି (ପୀ॰)]॥
ନ ମେ ୱେରଂ ତୟା ସଦ୍ଧିଂ, କୋଟ୍ଠୋ ମୟ୍ହଂ ନ ୱିଜ୍ଜତି ।
ଇଣଂ ମୁଞ୍ଚାମିଣଂ ଦମ୍ମି, ସମ୍ପତ୍ତୋ କୋଟସିମ୍ବଲିଂ ।
ନିଧିମ୍ପି ତତ୍ଥ ନିଦହାମି, ଏୱଂ ଜାନାହି କୋସିୟ ॥
କୀଦିସଂ ତେ ଇଣଦାନଂ, ଇଣମୋକ୍ଖୋ ଚ କୀଦିସୋ ।
ନିଧିନିଧାନମକ୍ଖାହି, ଅଥ ପାସା ପମୋକ୍ଖସି ॥
ଅଜାତପକ୍ଖା ତରୁଣା, ପୁତ୍ତକା ମୟ୍ହ କୋସିୟ ।
ତେ ମଂ ଭତା ଭରିସ୍ସନ୍ତି, ତସ୍ମା ତେସଂ ଇଣଂ ଦଦେ ॥
ମାତା ପିତା ଚ ମେ ୱୁଦ୍ଧା, ଜିଣ୍ଣକା ଗତୟୋବ୍ବନା ।
ତେସଂ ତୁଣ୍ଡେନ ହାତୂନ, ମୁଞ୍ଚେ ପୁବ୍ବକତଂ [ପୁବ୍ବେ କତଂ (ସୀ॰)] ଇଣଂ ॥
ଅଞ୍ଞେପି ତତ୍ଥ ସକୁଣା, ଖୀଣପକ୍ଖା ସୁଦୁବ୍ବଲା ।
ତେସଂ ପୁଞ୍ଞତ୍ଥିକୋ ଦମ୍ମି, ତଂ ନିଧିଂ ଆହୁ ପଣ୍ଡିତା ॥
ଈଦିସଂ [ଏଦିସଂ (ସୀ॰ ପୀ॰)] ମେ ଇଣଦାନଂ, ଇଣମୋକ୍ଖୋ ଚ ଈଦିସୋ ।
ନିଧିନିଧାନମକ୍ଖାମି [ନିଧିଂ ନିଧାନଂ ଅକ୍ଖାତଂ (ସୀ॰ ପୀ॰)], ଏୱଂ ଜାନାହି କୋସିୟ ॥
ଭଦ୍ଦକୋ ୱତୟଂ ପକ୍ଖୀ, ଦିଜୋ ପରମଧମ୍ମିକୋ ।
ଏକଚ୍ଚେସୁ ମନୁସ୍ସେସୁ, ଅୟଂ ଧମ୍ମୋ ନ ୱିଜ୍ଜତି ॥
ଭୁଞ୍ଜ ସାଲିଂ ୟଥାକାମଂ, ସହ ସବ୍ବେହି ଞାତିଭି ।
ପୁନାପି ସୁୱ ପସ୍ସେମୁ, ପିୟଂ ମେ ତୱ ଦସ୍ସନଂ ॥
ଭୁତ୍ତଞ୍ଚ ପୀତଞ୍ଚ ତୱସ୍ସମମ୍ହି [ତୱସ୍ସବ୍ୟମ୍ହି (କ॰)], ରତ୍ତିଞ୍ଚ [ରତୀ ଚ (ସୀ॰ ପୀ॰)] ନୋ କୋସିୟ ତେ ସକାସେ ।
ନିକ୍ଖିତ୍ତଦଣ୍ଡେସୁ ଦଦାହି ଦାନଂ, ଜିଣ୍ଣେ ଚ ମାତାପିତରୋ ଭରସ୍ସୁ ॥
ଲକ୍ଖୀ ୱତ ମେ ଉଦପାଦି ଅଜ୍ଜ, ୟୋ ଅଦ୍ଦସାସିଂ ପୱରଂ [ୟୋହଂ ଅଦସ୍ସଂ ପରମଂ (ସ୍ୟା॰ କ॰)] ଦିଜାନଂ ।
ସୁୱସ୍ସ ସୁତ୍ୱାନ ସୁଭାସିତାନି, କାହାମି ପୁଞ୍ଞାନି ଅନପ୍ପକାନି ॥
ସୋ କୋସିୟୋ ଅତ୍ତମନୋ ଉଦଗ୍ଗୋ, ଅନ୍ନଞ୍ଚ ପାନଞ୍ଚଭିସଙ୍ଖରିତ୍ୱା [ଅନ୍ନଞ୍ଚ ପାନଂ ଅଭିସଂହରିତ୍ୱା (କ॰)]।
ଅନ୍ନେନ ପାନେନ ପସନ୍ନଚିତ୍ତୋ, ସନ୍ତପ୍ପୟି ସମଣବ୍ରାହ୍ମଣେ ଚାତି ॥
ସାଲିକେଦାରଜାତକଂ [କେଦାରଜାତକଂ (କ॰)] ପଠମଂ ।
୪୮୫. ଚନ୍ଦକିନ୍ନରୀଜାତକଂ (୨)
ଉପନୀୟତିଦଂ ମଞ୍ଞେ, ଚନ୍ଦେ [ଲୋହିତମଦେନ ମଜ୍ଜାମି । ୱିଜହାମି ଜୀୱିତଂ ପାଣା, (ସୀ॰ ପୀ॰ ଅଟ୍ଠ॰)] ଲୋହିତମଦ୍ଦନେ ।
ଅଜ୍ଜ ଜହାମି ଜୀୱିତଂ, ପାଣା [ଲୋହିତମଦେନ ମଜ୍ଜାମି । ୱିଜହାମି ଜୀୱିତଂ ପାଣା, (ସୀ॰ ପୀ॰ ଅଟ୍ଠ॰)] ମେ ଚନ୍ଦେ ନିରୁଜ୍ଝନ୍ତି ॥
ଓସୀଦି [ଓସଧି (ସୀ॰ ସ୍ୟା॰ ପୀ॰), ଓସଟ୍ଠି (କ॰), ଓସତି (ଅଭିନୱଟୀକା), ଓସୀଦତି ( ?)] ମେ ଦୁକ୍ଖଂ [ଦୁକ୍ଖଂ ମେ (ସୀ॰ ପୀ॰)] ହଦୟଂ, ମେ ଡୟ୍ହତେ ନିତମ୍ମାମି ।
ତୱ ଚନ୍ଦିୟା ସୋଚନ୍ତିୟା, ନ ନଂ ଅଞ୍ଞେହି ସୋକେହି ॥
ତିଣମିୱ ୱନମିୱ ମିଲାୟାମି [ମିଲୟାମି (ସୀ॰), ମିୟ୍ୟାମି (ସୀ॰ ପୀ॰ ଅଟ୍ଠ॰)], ନଦୀ ଅପରିପୁଣ୍ଣାୱ [ଅପରିପୁଣ୍ଣିୟାୱ (ସୀ॰ ପୀ॰)] ସୁସ୍ସାମି ।
ତୱ ଚନ୍ଦିୟା ସୋଚନ୍ତିୟା, ନ ନଂ ଅଞ୍ଞେହି ସୋକେହି ॥
ୱସ୍ସମିୱ ସରେ ପାଦେ [ୱସ୍ସଂୱ ସରେ ପାଦେ (ସୀ॰), ୱସ୍ସଂୱ ସରେ ପବ୍ବତପାଦେ (ପୀ॰)], ଇମାନି ଅସ୍ସୂନି ୱତ୍ତରେ ମୟ୍ହଂ ।
ତୱ ଚନ୍ଦିୟା ସୋଚନ୍ତିୟା, ନ ନଂ ଅଞ୍ଞେହି ସୋକେହି ॥
ପାପୋ ଖୋସି [ପାପୋସି ଖୋ (ସୀ॰), ପାପୋ ଖୋ (ସ୍ୟା॰ ପୀ॰)] ରାଜପୁତ୍ତ, ୟୋ ମେ ଇଚ୍ଛିତଂ [ଇଚ୍ଛିତ (ସୀ॰ ସ୍ୟା॰ ପୀ॰)] ପତିଂ ୱରାକିୟା ।
ୱିଜ୍ଝସି ୱନମୂଲସ୍ମିଂ, ସୋୟଂ ୱିଦ୍ଧୋ ଛମା ସେତି ॥
ଇମଂ ମୟ୍ହଂ ହଦୟସୋକଂ, ପଟିମୁଞ୍ଚତୁ ରାଜପୁତ୍ତ ତୱ ମାତା ।
ୟୋ ମୟ୍ହଂ ହଦୟସୋକୋ, କିମ୍ପୁରିସଂ ଅୱେକ୍ଖମାନାୟ ॥
ଇମଂ ମୟ୍ହଂ ହଦୟସୋକଂ, ପଟିମୁଞ୍ଚତୁ ରାଜପୁତ୍ତ ତୱ ଜାୟା ।
ୟୋ ମୟ୍ହଂ ହଦୟସୋକୋ, କିମ୍ପୁରିସଂ ଅୱେକ୍ଖମାନାୟ ॥
ମା ଚ ପୁତ୍ତଂ [ପୁତ୍ତେ (ସୀ॰ ପୀ॰)] ମା ଚ ପତିଂ, ଅଦ୍ଦକ୍ଖି ରାଜପୁତ୍ତ ତୱ ମାତା ।
ୟୋ କିମ୍ପୁରିସଂ ଅୱଧି, ଅଦୂସକଂ ମୟ୍ହ କାମା ହି [ମୟ୍ହଂ କାମା (କ॰)]॥
ମା ଚ ପୁତ୍ତଂ ମା ଚ ପତିଂ, ଅଦ୍ଦକ୍ଖି ରାଜପୁତ୍ତ ତୱ ଜାୟା ।
ୟୋ କିମ୍ପୁରିସଂ ଅୱଧି, ଅଦୂସକଂ ମୟ୍ହ କାମା ହି ॥
ମା ତ୍ୱଂ ଚନ୍ଦେ ରୋଦି, ମା ସୋଚି ୱନତିମିରମତ୍ତକ୍ଖି ।
ମମ ତ୍ୱଂ ହେହିସି ଭରିୟା, ରାଜକୁଲେ ପୂଜିତା ନାରୀଭି [ନାରୀ (ସୀ॰ ପୀ॰)]॥
ଅପି ନୂନହଂ ମରିସ୍ସଂ, ନାହଂ [ନ ଚ ପନାହଂ (ସୀ॰ ପୀ॰)] ରାଜପୁତ୍ତ ତୱ ହେସ୍ସଂ ।
ୟୋ କିମ୍ପୁରିସଂ ଅୱଧି, ଅଦୂସକଂ ମୟ୍ହ କାମା ହି ॥
ଅପି ଭୀରୁକେ ଅପି ଜୀୱିତୁକାମିକେ, କିମ୍ପୁରିସି ଗଚ୍ଛ ହିମୱନ୍ତଂ ।
ତାଲୀସତଗରଭୋଜନା, ଅଞ୍ଞେ [ତାଲିସ୍ସତଗରଭୋଜନେ, ଅରଞ୍ଞେ (ସୀ॰ ପୀ॰)] ତଂ ମିଗା ରମିସ୍ସନ୍ତି ॥
ତେ ପବ୍ବତା ତା ଚ କନ୍ଦରା, [ତା ଚ ଗିରିଗୁହାୟୋ (ସୀ॰ ସ୍ୟା॰ ପୀ॰)] ତା ଚ ଗିରିଗୁହାୟୋ ତଥେୱ ତିଟ୍ଠନ୍ତି [ତା ଚ ଗିରିଗୁହାୟୋ (ସୀ॰ ସ୍ୟା॰ ପୀ॰)]।
ତତ୍ଥେୱ [ତତ୍ଥ (ସୀ॰ ସ୍ୟା॰ ପୀ॰)] ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ତେ ପଣ୍ଣସନ୍ଥତା ରମଣୀୟା, ୱାଳମିଗେହି ଅନୁଚିଣ୍ଣା ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ [କାସଂ (ସୀ॰ ସ୍ୟା॰ ପୀ॰)]॥
ତେ ପୁପ୍ଫସନ୍ଥତା ରମଣୀୟା, ୱାଳମିଗେହି ଅନୁଚିଣ୍ଣା ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ଅଚ୍ଛା ସୱନ୍ତି ଗିରିୱନ [ଗିରିୱର (ସୀ॰ ପୀ॰)] ନଦିୟୋ, କୁସୁମାଭିକିଣ୍ଣସୋତାୟୋ ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ନୀଲାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି [ଦସ୍ସନେୟ୍ୟାନି (ସୀ॰ ପୀ॰)]।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ପୀତାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ତମ୍ବାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ତୁଙ୍ଗାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ସେତାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ଚିତ୍ରାନି ହିମୱତୋ ପବ୍ବତସ୍ସ, କୂଟାନି ଦସ୍ସନୀୟାନି ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ୟକ୍ଖଗଣସେୱିତେ ଗନ୍ଧମାଦନେ, ଓସଧେଭି ସଞ୍ଛନ୍ନେ ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
କିମ୍ପୁରିସସେୱିତେ ଗନ୍ଧମାଦନେ, ଓସଧେଭି ସଞ୍ଛନ୍ନେ ।
ତତ୍ଥେୱ ତଂ ଅପସ୍ସନ୍ତୀ, କିମ୍ପୁରିସ କଥଂ ଅହଂ କସ୍ସଂ ॥
ୱନ୍ଦେ ତେ ଅୟିରବ୍ରହ୍ମେ [ଅୟ୍ୟିରେ ବ୍ରହ୍ମେ (କ॰)], ୟୋ ମେ ଇଚ୍ଛିତଂ ପତିଂ ୱରାକିୟା ।
ଅମତେନ ଅଭିସିଞ୍ଚି, ସମାଗତାସ୍ମି ପିୟତମେନ ॥
ୱିଚରାମ ଦାନି ଗିରିୱନ [ଗିରିୱର (ସୀ॰ ପୀ॰)] ନଦିୟୋ, କୁସୁମାଭିକିଣ୍ଣସୋତାୟୋ ।
ନାନାଦୁମୱସନାୟୋ [ସେୱନାୟୋ (ପୀ॰)], ପିୟଂୱଦା ଅଞ୍ଞମଞ୍ଞସ୍ସାତି ॥
ଚନ୍ଦକିନ୍ନରୀଜାତକଂ [ଚନ୍ଦକିନ୍ନରଜାତକଂ (ସୀ॰ ସ୍ୟା॰ ପୀ॰)] ଦୁତିୟଂ ।
୪୮୬. ମହାଉକ୍କୁସଜାତକଂ (୩)
ଉକ୍କା ଚିଲାଚା [ମିଲାଚା (ସୀ॰ ସ୍ୟା॰ ପୀ॰)] ବନ୍ଧନ୍ତି ଦୀପେ [ବନ୍ଧନ୍ତି ଲୁଦ୍ଦା, ଦୀପେ (କ॰)], ପଜା ମମଂ ଖାଦିତୁଂ ପତ୍ଥୟନ୍ତି ।
ମିତ୍ତଂ ସହାୟଞ୍ଚ ୱଦେହି ସେନକ, ଆଚିକ୍ଖ ଞାତିବ୍ୟସନଂ ଦିଜାନଂ ॥
ଦିଜୋ ଦିଜାନଂ ପୱରୋସି ପକ୍ଖିମ [ପକ୍ଖି (ସୀ॰ ପୀ॰), ପକ୍ଖି ଚ (ସ୍ୟା॰)], ଉକ୍କୁସରାଜ ସରଣଂ ତଂ ଉପେମ [ଉପେମି (ସୀ॰ ସ୍ୟା॰ ପୀ॰)]।
ପଜା ମମଂ ଖାଦିତୁଂ ପତ୍ଥୟନ୍ତି, ଲୁଦ୍ଦା ଚିଲାଚା [ମିଲାଚା (ସୀ॰ ସ୍ୟା॰ ପୀ॰)] ଭୱ ମେ ସୁଖାୟ ॥
ମିତ୍ତଂ ସହାୟଞ୍ଚ କରୋନ୍ତି ପଣ୍ଡିତା, କାଲେ ଅକାଲେ ସୁଖମେସମାନା [ମାସୟାନା (ପୀ॰)]।
କରୋମି ତେ ସେନକ ଏତମତ୍ଥଂ, ଅରିୟୋ ହି ଅରିୟସ୍ସ କରୋତି କିଚ୍ଚଂ ॥
ୟଂ ହୋତି କିଚ୍ଚଂ ଅନୁକମ୍ପକେନ, ଅରିୟସ୍ସ ଅରିୟେନ କତଂ ତୟୀଦଂ [ତୱ ୟିଦଂ (ସୀ॰ ପୀ॰)]।
ଅତ୍ତାନୁରକ୍ଖୀ ଭୱ ମା ଅଦୟ୍ହି [ଅଡୟ୍ହ (ସୀ॰ ପୀ॰)], ଲଚ୍ଛାମ ପୁତ୍ତେ ତୟି ଜୀୱମାନେ ॥
ତୱେୱ [ତମେୱ (ସ୍ୟା॰ କ॰)] ରକ୍ଖାୱରଣଂ କରୋନ୍ତୋ, ସରୀରଭେଦାପି ନ ସନ୍ତସାମି ।
କରୋନ୍ତି ହେକେ [ହେତେ (କ॰ ସୀ॰ ସ୍ୟା॰ ପୀ॰)] ସଖୀନଂ ସଖାରୋ, ପାଣଂ ଚଜନ୍ତା [ଚଜନ୍ତି (ସୀ॰ ପୀ॰)] ସତମେସ [ସତାନେସ (ପୀ॰)] ଧମ୍ମୋ ॥
ସୁଦୁକ୍କରଂ କମ୍ମମକାସି [ମକା (ସୀ॰ ପୀ॰)], ଅଣ୍ଡଜାୟଂ ୱିହଙ୍ଗମୋ ।
ଅତ୍ଥାୟ କୁରରୋ ପୁତ୍ତେ, ଅଡ୍ଢରତ୍ତେ ଅନାଗତେ ॥
ଚୁତାପି ହେକେ [ଏକେ (ସୀ॰ ପୀ॰)] ଖଲିତା ସକମ୍ମୁନା, ମିତ୍ତାନୁକମ୍ପାୟ ପତିଟ୍ଠହନ୍ତି ।
ପୁତ୍ତା ମମଟ୍ଟା ଗତିମାଗତୋସ୍ମି, ଅତ୍ଥଂ ଚରେଥୋ [ଚରେଥ (ସୀ॰ ସ୍ୟା॰ ପୀ॰)] ମମ ୱାରିଚର [ୱାରିଛନ୍ନ (ସୀ॰ ପୀ॰)]॥
ଧନେନ ଧଞ୍ଞେନ ଚ ଅତ୍ତନା ଚ, ମିତ୍ତଂ ସହାୟଞ୍ଚ କରୋନ୍ତି ପଣ୍ଡିତା ।
କରୋମି ତେ ସେନକ ଏତମତ୍ଥଂ, ଅରିୟୋ ହି ଅରିୟସ୍ସ କରୋତି କିଚ୍ଚଂ ॥
ଅପ୍ପୋସ୍ସୁକ୍କୋ ତାତ ତୁୱଂ ନିସୀଦ, ପୁତ୍ତୋ ପିତୁ ଚରତି ଅତ୍ଥଚରିୟଂ ।
ଅହଂ ଚରିସ୍ସାମି ତୱେତମତ୍ଥଂ, ସେନସ୍ସ ପୁତ୍ତେ ପରିତାୟମାନୋ ॥
ଅଦ୍ଧା ହି ତାତ ସତମେସ ଧମ୍ମୋ, ପୁତ୍ତୋ ପିତୁ ୟଂ ଚରେ [ପିତୁନଂ ଚରେ (କ॰), ପିତୁ ୟଞ୍ଚରେଥ (ସୀ॰ ପୀ॰)] ଅତ୍ଥଚରିୟଂ ।
ଅପ୍ପେୱ ମଂ ଦିସ୍ୱାନ ପୱଡ୍ଢକାୟଂ, ସେନସ୍ସ ପୁତ୍ତା ନ ୱିହେଠୟେୟ୍ୟୁଂ ॥
ପସୂ ମନୁସ୍ସା ମିଗୱୀରସେଟ୍ଠ [ମିଗୱିରିୟସେଟ୍ଠ (ସୀ॰ ପୀ॰)], ଭୟଟ୍ଟିତା [ଭୟଦ୍ଦିତା (ସୀ॰ ପୀ॰)] ସେଟ୍ଠମୁପବ୍ବଜନ୍ତି ।
ପୁତ୍ତା ମମଟ୍ଟା ଗତିମାଗତୋସ୍ମି, ତ୍ୱଂ ନୋସି ରାଜା ଭୱ ମେ ସୁଖାୟ ॥
କରୋମି ତେ ସେନକ ଏତମତ୍ଥଂ, ଆୟାମି ତେ ତଂ ଦିସତଂ ୱଧାୟ ।
କଥଞ୍ହି ୱିଞ୍ଞୂ ପହୁ ସମ୍ପଜାନୋ, ନ ୱାୟମେ ଅତ୍ତଜନସ୍ସ ଗୁତ୍ତିୟା ॥
ମିତ୍ତଞ୍ଚ କୟିରାଥ ସୁହଦୟଞ୍ଚ [ସୁହଦ୍ଦୟଞ୍ଚ (ସୀ॰), ସଖାଘରଞ୍ଚ (ପୀ॰)], ଅୟିରଞ୍ଚ କୟିରାଥ ସୁଖାଗମାୟ ।
ନିୱତ୍ଥକୋଚୋୱ [କୋଜୋୱ (ସୀ॰ ପୀ॰)] ସରେଭିହନ୍ତ୍ୱା, ମୋଦାମ ପୁତ୍ତେହି ସମଙ୍ଗିଭୂତା ॥
ସକମିତ୍ତସ୍ସ କମ୍ମେନ, ସହାୟସ୍ସାପଲାୟିନୋ ।
କୂଜନ୍ତମୁପକୂଜନ୍ତି, ଲୋମସା ହଦୟଙ୍ଗମଂ ॥
ମିତ୍ତଂ ସହାୟଂ ଅଧିଗମ୍ମ ପଣ୍ଡିତୋ, ସୋ ଭୁଞ୍ଜତୀ ପୁତ୍ତ ପସୁଂ ଧନଂ ୱା ।
ଅହଞ୍ଚ ପୁତ୍ତା ଚ ପତୀ ଚ ମୟ୍ହଂ, ମିତ୍ତାନୁକମ୍ପାୟ ସମଙ୍ଗିଭୂତା ॥
ରାଜୱତା ସୂରୱତା ଚ ଅତ୍ଥୋ, ସମ୍ପନ୍ନସଖିସ୍ସ ଭୱନ୍ତି ହେତେ ।
ସୋ ମିତ୍ତୱା ୟସୱା ଉଗ୍ଗତତ୍ତୋ, ଅସ୍ମିଂଧଲୋକେ [ଅସ୍ମିଞ୍ଚ ଲୋକେ (ସୀ॰ ସ୍ୟା॰ ପୀ॰)] ମୋଦତି କାମକାମୀ ॥
କରଣୀୟାନି ମିତ୍ତାନି, ଦଲିଦ୍ଦେନାପି ସେନକ ।
ପସ୍ସ ମିତ୍ତାନୁକମ୍ପାୟ, ସମଗ୍ଗମ୍ହା ସଞାତକେ [ସଞାତକା ( ?)]॥
ସୂରେନ ବଲୱନ୍ତେନ, ୟୋ ମିତ୍ତେ [ମେତ୍ତେ (ସୀ॰), ମିତ୍ତଂ (ସ୍ୟା॰)] କୁରୁତେ ଦିଜୋ ।
ଏୱଂ ସୋ ସୁଖିତୋ ହୋତି, ୟଥାହଂ ତ୍ୱଞ୍ଚ ସେନକାତି ॥
ମହାଉକ୍କୁସଜାତକଂ ତତିୟଂ ।
୪୮୭. ଉଦ୍ଦାଲକଜାତକଂ (୪)
ଖରାଜିନା ଜଟିଲା ପଙ୍କଦନ୍ତା, ଦୁମ୍ମକ୍ଖରୂପା [ଦୁମ୍ମୁଧରୂପା (ସୀ॰ ପୀ॰ କ॰)] ୟେ ମନ୍ତଂ ଜପ୍ପନ୍ତି [ୟେମେ ଜପନ୍ତି (ସୀ॰ ପୀ॰), ୟେ’ମେ ଜପ୍ପନ୍ତି ମନ୍ତେ (ଜା॰ ୧.୬.୧୦)]।
କଚ୍ଚିନ୍ନୁ ତେ ମାନୁସକେ ପୟୋଗେ, ଇଦଂ ୱିଦୂ ପରିମୁତ୍ତା ଅପାୟା ॥
ପାପାନି କମ୍ମାନି କରେଥ [କରେୟ୍ୟ (ସ୍ୟା॰), କତ୍ୱାନ (ଜା॰ ୧.୬.୧୧)] ରାଜ, ବହୁସ୍ସୁତୋ ଚେ ନ ଚରେୟ୍ୟ ଧମ୍ମଂ ।
ସହସ୍ସୱେଦୋପି ନ ତଂ ପଟିଚ୍ଚ, ଦୁକ୍ଖା ପମୁଚ୍ଚେ [ପମୁଞ୍ଚେ (ସ୍ୟା॰)] ଚରଣଂ ଅପତ୍ୱା ॥
ସହସ୍ସୱେଦୋପି ନ ତଂ ପଟିଚ୍ଚ, ଦୁକ୍ଖା ପମୁଚ୍ଚେ ଚରଣଂ ଅପତ୍ୱା ।
ମଞ୍ଞାମି ୱେଦା ଅଫଲା ଭୱନ୍ତି, ସସଂୟମଂ ଚରଣଞ୍ଞେୱ ସଚ୍ଚଂ ॥
ନ ହେୱ ୱେଦା ଅଫଲା ଭୱନ୍ତି, ସସଂୟମଂ ଚରଣଞ୍ଞେୱ ସଚ୍ଚଂ ।
କିତ୍ତିଞ୍ହି [କିତ୍ତିଞ୍ଚ (ସ୍ୟା॰)] ପପ୍ପୋତି ଅଧିଚ୍ଚ ୱେଦେ, ସନ୍ତିଂ ପୁଣାତି [ପୁନୋତି (ସୀ॰ ଅଟ୍ଠ॰), ପୁଣେତି (ସ୍ୟା॰ ଜା॰ ୧.୬.୧୩), ପୁନେତି (ପୀ॰)] ଚରଣେନ ଦନ୍ତୋ ॥
ଭଚ୍ଚା ମାତା ପିତା ବନ୍ଧୂ, ୟେନ ଜାତୋ ସୟେୱ ସୋ ।
ଉଦ୍ଦାଲକୋ ଅହଂ ଭୋତୋ [ଭୋତି (କ॰)], ସୋତ୍ତିୟାକୁଲୱଂସକୋ [ୱଂସତୋ (କ॰)]॥
କଥଂ ଭୋ ବ୍ରାହ୍ମଣୋ ହୋତି, କଥଂ ଭୱତି କେୱଲୀ ।
କଥଞ୍ଚ ପରିନିବ୍ବାନଂ, ଧମ୍ମଟ୍ଠୋ କିନ୍ତି ୱୁଚ୍ଚତି ॥
ନିରଂକତ୍ୱା ଅଗ୍ଗିମାଦାୟ ବ୍ରାହ୍ମଣୋ, ଆପୋ ସିଞ୍ଚଂ ୟଜଂ ଉସ୍ସେତି ୟୂପଂ ।
ଏୱଂକରୋ ବ୍ରାହ୍ମଣୋ ହୋତି ଖେମୀ, ଧମ୍ମେ ଠିତଂ ତେନ ଅମାପୟିଂସୁ ॥
ନ ସୁଦ୍ଧି ସେଚନେନତ୍ଥି, ନାପି କେୱଲୀ ବ୍ରାହ୍ମଣୋ ।
ନ ଖନ୍ତୀ ନାପି ସୋରଚ୍ଚଂ, ନାପି ସୋ ପରିନିବ୍ବୁତୋ ॥
କଥଂ ସୋ [ଭୋ (ସ୍ୟା॰ କ॰)] ବ୍ରାହ୍ମଣୋ ହୋତି, କଥଂ ଭୱତି କେୱଲୀ ।
କଥଞ୍ଚ ପରିନିବ୍ବାନଂ, ଧମ୍ମଟ୍ଠୋ କିନ୍ତି ୱୁଚ୍ଚତି ॥
ଅଖେତ୍ତବନ୍ଧୂ ଅମମୋ ନିରାସୋ, ନିଲ୍ଲୋଭପାପୋ ଭୱଲୋଭଖୀଣୋ ।
ଏୱଂକରୋ ବ୍ରାହ୍ମଣୋ ହୋତି ଖେମୀ, ଧମ୍ମେ ଠିତଂ ତେନ ଅମାପୟିଂସୁ ॥
ଖତ୍ତିୟା ବ୍ରାହ୍ମଣା ୱେସ୍ସା, ସୁଦ୍ଦା ଚଣ୍ଡାଲପୁକ୍କୁସା ।
ସବ୍ବେୱ ସୋରତା ଦନ୍ତା, ସବ୍ବେୱ ପରିନିବ୍ବୁତା ।
ସବ୍ବେସଂ ସୀତିଭୂତାନଂ, ଅତ୍ଥି ସେୟ୍ୟୋଥ [ସେୟ୍ୟୋୱ (ସୀ॰ ପୀ॰)] ପାପିୟୋ ॥
ଖତ୍ତିୟା ବ୍ରାହ୍ମଣା ୱେସ୍ସା, ସୁଦ୍ଦା ଚଣ୍ଡାଲପୁକ୍କୁସା ।
ସବ୍ବେୱ ସୋରତା ଦନ୍ତା, ସବ୍ବେୱ ପରିନିବ୍ବୁତା ।
ସବ୍ବେସଂ ସୀତିଭୂତାନଂ, ନତ୍ଥି ସେୟ୍ୟୋଥ ପାପିୟୋ ॥
ଖତ୍ତିୟା ବ୍ରାହ୍ମଣା ୱେସ୍ସା, ସୁଦ୍ଦା ଚଣ୍ଡାଲପୁକ୍କୁସା ।
ସବ୍ବେୱ ସୋରତା ଦନ୍ତା, ସବ୍ବେୱ ପରିନିବ୍ବୁତା ॥
ସବ୍ବେସଂ ସୀତିଭୂତାନଂ, ନତ୍ଥି ସେୟ୍ୟୋଥ ପାପିୟୋ ।
ପନତ୍ଥଂ [ପସତ୍ଥଂ (ସ୍ୟା॰), ପସଟ୍ଠଂ (କ॰)] ଚରସି ବ୍ରହ୍ମଞ୍ଞଂ, ସୋତ୍ତିୟାକୁଲୱଂସତଂ ॥
ନାନାରତ୍ତେହି ୱତ୍ଥେହି, ୱିମାନଂ ଭୱତି ଛାଦିତଂ ।
ନ ତେସଂ ଛାୟା ୱତ୍ଥାନଂ, ସୋ ରାଗୋ ଅନୁପଜ୍ଜଥ ॥
ଏୱମେୱ [ଏୱମେୱଂ (ପୀ॰)] ମନୁସ୍ସେସୁ, ୟଦା ସୁଜ୍ଝନ୍ତି ମାଣୱା ।
ତେ ସଜାତିଂ ପମୁଞ୍ଚନ୍ତି [ନ ତେସଂ ଜାତିଂ ପୁଚ୍ଛନ୍ତି (ସୀ॰ ସ୍ୟା॰ ପୀ॰), ନ ତେସଂ ଜାତି ସୁଜ୍ଝତି (କ॰)], ଧମ୍ମମଞ୍ଞାୟ ସୁବ୍ବତାତି ॥
ଉଦ୍ଦାଲକଜାତକଂ ଚତୁତ୍ଥଂ ।
୪୮୮. ଭିସଜାତକଂ (୫)
ଅସ୍ସଂ ଗୱଂ ରଜତଂ ଜାତରୂପଂ, ଭରିୟଞ୍ଚ ସୋ ଇଧ ଲଭତଂ ମନାପଂ ।
ପୁତ୍ତେହି ଦାରେହି ସମଙ୍ଗି ହୋତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ମାଲଞ୍ଚ ସୋ କାସିକଚନ୍ଦନଞ୍ଚ, ଧାରେତୁ ପୁତ୍ତସ୍ସ ବହୂ ଭୱନ୍ତୁ ।
କାମେସୁ ତିବ୍ବଂ କୁରୁତଂ ଅପେକ୍ଖଂ, ଭିସାନି ତେ ବ୍ରାହ୍ମଣ ୟୋ ଅହାସି ॥
ପହୂତଧଞ୍ଞୋ କସିମା ୟସସ୍ସୀ, ପୁତ୍ତେ ଗିହୀ ଧନିମା ସବ୍ବକାମେ ।
ୱୟଂ ଅପସ୍ସଂ ଘରମାୱସାତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ସୋ ଖତ୍ତିୟୋ ହୋତୁ ପସୟ୍ହକାରୀ, ରାଜାଭିରାଜା [ରାଜାଧିରାଜା (ସ୍ୟା॰ କ॰)] ବଲୱା ୟସସ୍ସୀ ।
ସ ଚାତୁରନ୍ତଂ ମହିମାୱସାତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ସୋ ବ୍ରାହ୍ମଣୋ ହୋତୁ ଅୱୀତରାଗୋ, ମୁହୁତ୍ତନକ୍ଖତ୍ତପଥେସୁ ୟୁତ୍ତୋ ।
ପୂଜେତୁ ନଂ ରଟ୍ଠପତୀ ୟସସ୍ସୀ, ଭିସାନି ତେ ବ୍ରାହ୍ମଣ ୟୋ ଅହାସି ॥
ଅଜ୍ଝାୟକଂ ସବ୍ବସମନ୍ତୱେଦଂ [ସବ୍ବସମତ୍ତୱେଦଂ (ସୀ॰), ସବ୍ବସମତ୍ତୱେଦନଂ (ପୀ॰)], ତପସ୍ସୀନଂ ମଞ୍ଞତୁ ସବ୍ବଲୋକୋ ।
ପୂଜେନ୍ତୁ ନଂ ଜାନପଦା ସମେଚ୍ଚ, ଭିସାନି ତେ ବ୍ରାହ୍ମଣ ୟୋ ଅହାସି ॥
ଚତୁସ୍ସଦଂ ଗାମୱରଂ ସମିଦ୍ଧଂ, ଦିନ୍ନଞ୍ହି ସୋ ଭୁଞ୍ଜତୁ ୱାସୱେନ ।
ଅୱୀତରାଗୋ ମରଣଂ ଉପେତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ସୋ ଗାମଣୀ ହୋତୁ ସହାୟମଜ୍ଝେ, ନଚ୍ଚେହି ଗୀତେହି ପମୋଦମାନୋ ।
ସୋ ରାଜତୋ ବ୍ୟସନ ମାଲତ୍ଥ [ମା ରାଜତୋ ୱ୍ୟସନ’ମଲତ୍ଥ (ସୀ॰ ସ୍ୟା॰ ପୀ॰)] କିଞ୍ଚି, ଭିସାନି ତେ ବ୍ରାହ୍ମଣ ୟୋ ଅହାସି ॥
ୟଂ ଏକରାଜା ପଥୱିଂ ୱିଜେତ୍ୱା, ଇତ୍ଥୀସହସ୍ସାନ [ଇତ୍ଥୀସହସ୍ସସ୍ସ (ସୀ॰ ପୀ॰)] ଠପେତୁ ଅଗ୍ଗଂ ।
ସୀମନ୍ତିନୀନଂ ପୱରା ଭୱାତୁ, ଭିସାନି ତେ ବ୍ରାହ୍ମଣ ୟା ଅହାସି ॥
ଇସୀନଞ୍ହି ସା ସବ୍ବସମାଗତାନଂ, ଭୁଞ୍ଜେୟ୍ୟ ସାଦୁଂ ଅୱିକମ୍ପମାନା ।
ଚରାତୁ ଲାଭେନ ୱିକତ୍ଥମାନା, ଭିସାନି ତେ ବ୍ରାହ୍ମଣ ୟା ଅହାସି ॥
ଆୱାସିକୋ ହୋତୁ ମହାୱିହାରେ, ନୱକମ୍ମିକୋ ହୋତୁ ଗଜଙ୍ଗଲାୟଂ [କଜଙ୍ଗଲାୟଂ (ସୀ॰ ସ୍ୟା॰ ପୀ॰)]।
ଆଲୋକସନ୍ଧିଂ ଦିୱସଂ [ଦିୱସା (ସୀ॰ ସ୍ୟା॰ ପୀ॰)] କରୋତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ସୋ ବଜ୍ଝତୂ ପାସସତେହି ଛବ୍ଭି [ଛମ୍ହି (ସୀ॰ ପୀ॰), ଛସ୍ସୁ ( ?)], ରମ୍ମା ୱନା ନିୟ୍ୟତୁ ରାଜଧାନିଂ [ରାଜଠାନିଂ (କ॰)]।
ତୁତ୍ତେହି ସୋ ହଞ୍ଞତୁ ପାଚନେହି, ଭିସାନି ତେ ବ୍ରାହ୍ମଣ ୟୋ ଅହାସି ॥
ଅଲକ୍କମାଲୀ ତିପୁକଣ୍ଣୱିଦ୍ଧୋ, ଲଟ୍ଠୀହତୋ ସପ୍ପମୁଖଂ ଉପେତୁ ।
ସକଚ୍ଛବନ୍ଧୋ [ସକ୍କଚ୍ଚବଦ୍ଧୋ (ସୀ॰ ପୀ॰), ସଂକଚ୍ଚବନ୍ଧୋ (ନିୟ୍ୟ)] ୱିସିଖଂ ଚରାତୁ, ଭିସାନି ତେ ବ୍ରାହ୍ମଣ ୟୋ ଅହାସି ॥
ୟୋ ୱେ ଅନଟ୍ଠଂୱ [ଅନଟ୍ଠଂ (ସୀ॰ ସ୍ୟା॰ ପୀ॰)] ନଟ୍ଠନ୍ତି ଚାହ, କାମେୱ ସୋ ଲଭତଂ ଭୁଞ୍ଜତଞ୍ଚ [ଲଭତୁ ଭୁଞ୍ଜତୁ ଚ (ସ୍ୟା॰)]।
ଅଗାରମଜ୍ଝେ ମରଣଂ ଉପେତୁ, ୟୋ ୱା ଭୋନ୍ତୋ ସଙ୍କତି କଞ୍ଚିଦେୱ [କିଞ୍ଚିଦେୱ (କ॰)]॥
ୟଦେସମାନା ୱିଚରନ୍ତି ଲୋକେ, ଇଟ୍ଠଞ୍ଚ କନ୍ତଞ୍ଚ ବହୂନମେତଂ ।
ପିୟଂ ମନୁଞ୍ଞଂ ଚିଧ ଜୀୱଲୋକେ, କସ୍ମା ଇସୟୋ ନପ୍ପସଂସନ୍ତି କାମେ ॥
କାମେସୁ ୱେ ହଞ୍ଞରେ ବଜ୍ଝରେ ଚ, କାମେସୁ ଦୁକ୍ଖଞ୍ଚ ଭୟଞ୍ଚ ଜାତଂ ।
କାମେସୁ ଭୂତାଧିପତୀ ପମତ୍ତା, ପାପାନି କମ୍ମାନି କରୋନ୍ତି ମୋହା ॥
ତେ ପାପଧମ୍ମା ପସୱେତ୍ୱ ପାପଂ, କାୟସ୍ସ ଭେଦା ନିରୟଂ ୱଜନ୍ତି ।
ଆଦୀନୱଂ କାମଗୁଣେସୁ ଦିସ୍ୱା, ତସ୍ମା ଇସୟୋ ନପ୍ପସଂସନ୍ତି କାମେ ॥
ୱୀମଂସମାନୋ ଇସିନୋ ଭିସାନି, ତୀରେ ଗହେତ୍ୱାନ ଥଲେ ନିଧେସିଂ ।
ସୁଦ୍ଧା ଅପାପା ଇସୟୋ ୱସନ୍ତି, ଏତାନି ତେ ବ୍ରହ୍ମଚାରୀ ଭିସାନି ॥
ନ ତେ ନଟା ନୋ ପନ କୀଳନେୟ୍ୟା, ନ ବନ୍ଧୱା ନୋ ପନ ତେ ସହାୟା ।
କିସ୍ମିଂ ୱୁପତ୍ଥମ୍ଭ ସହସ୍ସନେତ୍ତ, ଇସୀହି ତ୍ୱଂ କୀଳସି ଦେୱରାଜ ॥
ଆଚରିୟୋ ମେସି ପିତା ଚ ମୟ୍ହଂ, ଏସା ପତିଟ୍ଠା ଖଲିତସ୍ସ ବ୍ରହ୍ମେ ।
ଏକାପରାଧଂ ଖମ ଭୂରିପଞ୍ଞ, ନ ପଣ୍ଡିତା କୋଧବଲା ଭୱନ୍ତି ॥
ସୁୱାସିତଂ ଇସିନଂ ଏକରତ୍ତଂ, ୟଂ ୱାସୱଂ ଭୂତପତିଦ୍ଦସାମ ।
ସବ୍ବେୱ ଭୋନ୍ତୋ ସୁମନା ଭୱନ୍ତୁ, ୟଂ ବ୍ରାହ୍ମଣୋ ପଚ୍ଚୁପାଦୀ ଭିସାନି ॥
ଅହଞ୍ଚ ସାରିପୁତ୍ତୋ ଚ, ମୋଗ୍ଗଲ୍ଲାନୋ ଚ କସ୍ସପୋ ।
ଅନୁରୁଦ୍ଧୋ ପୁଣ୍ଣୋ ଆନନ୍ଦୋ, ତଦାସୁଂ ସତ୍ତ ଭାତରୋ ॥
ଭଗିନୀ ଉପ୍ପଲୱଣ୍ଣା ଚ, ଦାସୀ ଖୁଜ୍ଜୁତ୍ତରା ତଦା ।
ଚିତ୍ତୋ ଗହପତି ଦାସୋ, ୟକ୍ଖୋ ସାତାଗିରୋ ତଦା ॥
ପାଲିଲେୟ୍ୟୋ [ପାରିଲେୟ୍ୟୋ (ସୀ॰ ପୀ॰)] ତଦା ନାଗୋ, ମଧୁଦୋ [ମଧୁୱା (ସୀ॰ ପୀ॰)] ସେଟ୍ଠୱାନରୋ ।
କାଳୁଦାୟୀ ତଦା ସକ୍କୋ, ଏୱଂ ଧାରେଥ ଜାତକନ୍ତି ॥
ଭିସଜାତକଂ ପଞ୍ଚମଂ ।
୪୮୯. ସୁରୁଚିଜାତକଂ (୬)
ମହେସୀ ସୁରୁଚିନୋ [ରୁଚିନୋ (ସୀ॰ ସ୍ୟା॰ ପୀ॰)] ଭରିୟା, ଆନୀତା ପଠମଂ ଅହଂ ।
ଦସ ୱସ୍ସସହସ୍ସାନି, ୟଂ ମଂ ସୁରୁଚିମାନୟି ॥
ସାହଂ ବ୍ରାହ୍ମଣ ରାଜାନଂ, ୱେଦେହଂ ମିଥିଲଗ୍ଗହଂ ।
ନାଭିଜାନାମି କାୟେନ, ୱାଚାୟ ଉଦ ଚେତସା ।
ସୁରୁଚିଂ ଅତିମଞ୍ଞିତ୍ଥ [ଅତିମଞ୍ଞିତ୍ଥୋ (ସୀ॰ ପୀ॰), ଅତିମଞ୍ଞିତା ( ?)], ଆୱି [ଆୱିଂ (ସୀ॰ ପୀ॰)] ୱା ୟଦି ୱା ରହୋ ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ଭତ୍ତୁ ମମ ସସ୍ସୁ ମାତା, ପିତା ଚାପି ଚ ସସ୍ସୁରୋ ।
ତେ ମଂ ବ୍ରହ୍ମେ ୱିନେତାରୋ, ୟାୱ ଅଟ୍ଠଂସୁ ଜୀୱିତଂ ॥
ସାହଂ ଅହିଂସାରତିନୀ, କାମସା [କାମସୋ (ସୀ॰)] ଧମ୍ମଚାରିନୀ [ଧମ୍ମଚାରିଣୀ (ସୀ॰)]।
ସକ୍କଚ୍ଚଂ ତେ ଉପଟ୍ଠାସିଂ, ରତ୍ତିନ୍ଦିୱମତନ୍ଦିତା ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ସୋଳସିତ୍ଥିସହସ୍ସାନି, ସହଭରିୟାନି ବ୍ରାହ୍ମଣ ।
ତାସୁ ଇସ୍ସା ୱା କୋଧୋ ୱା, ନାହୁ ମୟ୍ହଂ କୁଦାଚନଂ ॥
ହିତେନ ତାସଂ ନନ୍ଦାମି, ନ ଚ ମେ କାଚି ଅପ୍ପିୟା ।
ଅତ୍ତାନଂୱାନୁକମ୍ପାମି, ସଦା ସବ୍ବା ସପତ୍ତିୟୋ ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ଦାସେ କମ୍ମକରେ ପେସ୍ସେ [ପୋସେ (ସ୍ୟା॰ କ॰)], ୟେ ଚଞ୍ଞେ ଅନୁଜୀୱିନୋ ।
ପେସେମି [ପୋସେମି (ସୀ॰ ସ୍ୟା॰ ପୀ॰)] ସହଧମ୍ମେନ, ସଦା ପମୁଦିତିନ୍ଦ୍ରିୟା ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ସମଣେ ବ୍ରାହ୍ମଣେ ଚାପି, ଅଞ୍ଞେ ଚାପି ୱନିବ୍ବକେ ।
ତପ୍ପେମି ଅନ୍ନପାନେନ, ସଦା ପୟତପାଣିନୀ ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ଚାତୁଦ୍ଦସିଂ ପଞ୍ଚଦ୍ଦସିଂ [ପନ୍ନରସିଂ (ସୀ॰ ପୀ॰)], ୟା ଚ ପକ୍ଖସ୍ସ ଅଟ୍ଠମୀ [ଅଟ୍ଠମିଂ (ସୀ॰ ପୀ॰)]।
ପାଟିହାରିୟପକ୍ଖଞ୍ଚ, ଅଟ୍ଠଙ୍ଗସୁସମାଗତଂ [ଅଟ୍ଠଙ୍ଗସୁସମାହିତଂ (ସବ୍ବତ୍ଥ) ୱି॰ ୱ॰ ୧୨୯ ପାଳିୟା ଅଟ୍ଠକଥା ପସ୍ସିତବ୍ବା]।
ଉପୋସଥଂ ଉପୱସାମି [ଉପୱସିଂ (କ॰)], ସଦା ସୀଲେସୁ ସଂୱୁତା ॥
ଏତେନ ସଚ୍ଚୱଜ୍ଜେନ, ପୁତ୍ତୋ ଉପ୍ପଜ୍ଜତଂ ଇସେ ।
ମୁସା ମେ ଭଣମାନାୟ, ମୁଦ୍ଧା ଫଲତୁ ସତ୍ତଧା ॥
ସବ୍ବେୱ ତେ ଧମ୍ମଗୁଣା, ରାଜପୁତ୍ତି ୟସସ୍ସିନି ।
ସଂୱିଜ୍ଜନ୍ତି ତୟି ଭଦ୍ଦେ, ୟେ ତ୍ୱଂ କିତ୍ତେସି ଅତ୍ତନି ॥
ଖତ୍ତିୟୋ ଜାତିସମ୍ପନ୍ନୋ, ଅଭିଜାତୋ ୟସସ୍ସିମା ।
ଧମ୍ମରାଜା ୱିଦେହାନଂ, ପୁତ୍ତୋ ଉପ୍ପଜ୍ଜତେ ତୱ [ତୱଂ (ସୀ॰ ପୀ॰)]॥
ଦୁମ୍ମୀ [ରୁମ୍ମୀ (ସୀ॰ ପୀ॰)] ରଜୋଜଲ୍ଲଧରୋ, ଅଘେ ୱେହାୟସଂ ଠିତୋ ।
ମନୁଞ୍ଞଂ ଭାସସେ ୱାଚଂ, ୟଂ ମୟ୍ହଂ ହଦୟଙ୍ଗମଂ ॥
ଦେୱତାନୁସି ସଗ୍ଗମ୍ହା, ଇସି ୱାସି [ଚାପି (କ॰)] ମହିଦ୍ଧିକୋ ।
କୋ ୱାସି ତ୍ୱଂ ଅନୁପ୍ପତ୍ତୋ, ଅତ୍ତାନଂ ମେ ପୱେଦୟ ॥
ୟଂ ଦେୱସଙ୍ଘା ୱନ୍ଦନ୍ତି, ସୁଧମ୍ମାୟଂ ସମାଗତା ।
ସୋହଂ ସକ୍କୋ ସହସ୍ସକ୍ଖୋ, ଆଗତୋସ୍ମି ତୱନ୍ତିକେ ॥
ଇତ୍ଥିୟୋ [ଇତ୍ଥିୟା (ପୀ॰)] ଜୀୱଲୋକସ୍ମିଂ, ୟା ହୋତି [ହୋନ୍ତି (ସୀ॰ ସ୍ୟା॰)] ସମଚାରିନୀ [ସମଚାରିଣୀ (ସୀ॰)]।
ମେଧାୱିନୀ ସୀଲୱତୀ, ସସ୍ସୁଦେୱା ପତିବ୍ବତା ॥
ତାଦିସାୟ ସୁମେଧାୟ, ସୁଚିକମ୍ମାୟ ନାରିୟା ।
ଦେୱା ଦସ୍ସନମାୟନ୍ତି, ମାନୁସିୟା ଅମାନୁସା ॥
ତ୍ୱଞ୍ଚ ଭଦ୍ଦେ ସୁଚିଣ୍ଣେନ, ପୁବ୍ବେ ସୁଚରିତେନ ଚ ।
ଇଧ ରାଜକୁଲେ ଜାତା, ସବ୍ବକାମସମିଦ୍ଧିନୀ ॥
ଅୟଞ୍ଚ ତେ ରାଜପୁତ୍ତି, ଉଭୟତ୍ଥ କଟଗ୍ଗହୋ ।
ଦେୱଲୋକୂପପତ୍ତୀ ଚ, କିତ୍ତୀ ଚ ଇଧ ଜୀୱିତେ ॥
ଚିରଂ ସୁମେଧେ ସୁଖିନୀ, ଧମ୍ମମତ୍ତନି ପାଲୟ ।
ଏସାହଂ ତିଦିୱଂ ୟାମି, ପିୟଂ ମେ ତୱ ଦସ୍ସନନ୍ତି ॥
ସୁରୁଚିଜାତକଂ ଛଟ୍ଠଂ ।
୪୯୦. ପଞ୍ଚୁପୋସଥିକଜାତକଂ (୭)
ଅପ୍ପୋସ୍ସୁକ୍କୋ ଦାନି ତୁୱଂ କପୋତ, ୱିହଙ୍ଗମ ନ ତୱ ଭୋଜନତ୍ଥୋ ।
ଖୁଦଂ [ଖୁଦ୍ଦଂ (ସ୍ୟା॰ କ॰), ଖୁଧଂ (ସକ୍କତ-ପାକତାନୁରୂପଂ)] ପିପାସଂ ଅଧିୱାସୟନ୍ତୋ, କସ୍ମା ଭୱଂପୋସଥିକୋ କପୋତ [କପୋତୋ (ସୀ॰ ପୀ॰)]॥
ଅହଂ ପୁରେ ଗିଦ୍ଧିଗତୋ କପୋତିୟା, ଅସ୍ମିଂ ପଦେସସ୍ମିମୁଭୋ ରମାମ ।
ଅଥଗ୍ଗହୀ ସାକୁଣିକୋ କପୋତିଂ, ଅକାମକୋ ତାୟ ୱିନା ଅହୋସିଂ ॥
ନାନାଭୱା ୱିପ୍ପୟୋଗେନ ତସ୍ସା, ମନୋମୟଂ ୱେଦନ ୱେଦୟାମି [ୱେଦନଂ ୱେଦିୟାମି (ସୀ॰ ପୀ॰)]।
ତସ୍ମା ଅହଂପୋସଥଂ ପାଲୟାମି, ରାଗୋ ମମଂ ମା ପୁନରାଗମାସି ॥
ଅନୁଜ୍ଜୁଗାମୀ ଉରଗା ଦୁଜିୱ୍ହ [ଉରଗ ଦ୍ୱିଜିୱ୍ହ (ସୀ॰)], ଦାଠାୱୁଧୋ ଘୋରୱିସୋସି ସପ୍ପ ।
ଖୁଦଂ ପିପାସଂ ଅଧିୱାସୟନ୍ତୋ, କସ୍ମା ଭୱଂପୋସଥିକୋ ନୁ ଦୀଘ [ଦୀଘୋ (ସୀ॰ ପୀ॰)]॥
ଉସଭୋ ଅହୂ ବଲୱା ଗାମିକସ୍ସ, ଚଲକ୍କକୂ ୱଣ୍ଣବଲୂପପନ୍ନୋ ।
ସୋ ମଂ ଅକ୍କମି ତଂ କୁପିତୋ ଅଡଂସି, ଦୁକ୍ଖାଭିତୁଣ୍ଣୋ ମରଣଂ ଉପାଗା [ଉପାଗମି (ସୀ॰ ପୀ॰)]॥
ତତୋ ଜନା ନିକ୍ଖମିତ୍ୱାନ ଗାମା, କନ୍ଦିତ୍ୱା ରୋଦିତ୍ୱା [କନ୍ଦିତ୍ୱ ରୋଦିତ୍ୱ (ସୀ॰)] ଅପକ୍କମିଂସୁ ।
ତସ୍ମା ଅହଂପୋସଥଂ ପାଲୟାମି, କୋଧୋ ମମଂ ମା ପୁନରାଗମାସି ॥
ମତାନ ମଂସାନି ବହୂ ସୁସାନେ, ମନୁଞ୍ଞରୂପଂ ତୱ ଭୋଜନେ ତଂ ।
ଖୁଦଂ ପିପାସଂ ଅଧିୱାସୟନ୍ତୋ, କସ୍ମା ଭୱଂପୋସଥିକୋ ସିଙ୍ଗାଲ [ସିଗାଲୋ (ସୀ॰ ପୀ॰)]॥
ପୱିସି [ପୱିସ୍ସଂ (ସୀ॰ ପୀ॰), ପୱିସ୍ସ (ସ୍ୟା॰)] କୁଚ୍ଛିଂ ମହତୋ ଗଜସ୍ସ, କୁଣପେ ରତୋ ହତ୍ଥିମଂସେସୁ ଗିଦ୍ଧୋ [ହତ୍ଥିମଂସେ ପଗିଦ୍ଧୋ (ସୀ॰ ପୀ॰)]।
ଉଣ୍ହୋ ଚ ୱାତୋ ତିଖିଣା ଚ ରସ୍ମିୟୋ, ତେ ସୋସୟୁଂ ତସ୍ସ କରୀସମଗ୍ଗଂ ॥
କିସୋ ଚ ପଣ୍ଡୂ ଚ ଅହଂ ଭଦନ୍ତେ, ନ ମେ ଅହୂ ନିକ୍ଖମନାୟ ମଗ୍ଗୋ ।
ମହା ଚ ମେଘୋ ସହସା ପୱସ୍ସି, ସୋ ତେମୟୀ ତସ୍ସ କରୀସମଗ୍ଗଂ ॥
ତତୋ ଅହଂ ନିକ୍ଖମିସଂ ଭଦନ୍ତେ, ଚନ୍ଦୋ ୟଥା ରାହୁମୁଖା ପମୁତ୍ତୋ ।
ତସ୍ମା ଅହଂପୋସଥଂ ପାଲୟାମି, ଲୋଭୋ ମମଂ ମା ପୁନରାଗମାସି ॥
ୱମ୍ମୀକଥୂପସ୍ମିଂ କିପିଲ୍ଲିକାନି, ନିପ୍ପୋଥୟନ୍ତୋ ତୁୱଂ ପୁରେ ଚରାସି ।
ଖୁଦଂ ପିପାସଂ ଅଧିୱାସୟନ୍ତୋ, କସ୍ମା ଭୱଂପୋସଥିକୋ ନୁ ଅଚ୍ଛ [ଅଚ୍ଛୋ (ସୀ॰ ପୀ॰)]॥
ସକଂ ନିକେତଂ ଅତିହୀଳୟାନୋ [ଅତିହେଳୟାନୋ (ସ୍ୟା॰ କ॰)], ଅତ୍ରିଚ୍ଛତା [ଅତ୍ରିଚ୍ଛତାୟ (ସୀ॰ ସ୍ୟା॰ ପୀ॰)] ମଲ୍ଲଗାମଂ [ମଲତଂ (ସୀ॰ ପୀ॰), ମଲ୍ଲୟତଂ (କ॰)] ଅଗଚ୍ଛିଂ ।
ତତୋ ଜନା ନିକ୍ଖମିତ୍ୱାନ ଗାମା, କୋଦଣ୍ଡକେନ ପରିପୋଥୟିଂସୁ ମଂ ॥
ସୋ ଭିନ୍ନସୀସୋ ରୁହିରମକ୍ଖିତଙ୍ଗୋ, ପଚ୍ଚାଗମାସିଂ ସକଂ [ସ ସକଂ (ସ୍ୟା॰ କ॰),’ଥ ସକଂ ( ?)] ନିକେତଂ ।
ତସ୍ମା ଅହଂପୋସଥଂ ପାଲୟାମି, ଅତ୍ରିଚ୍ଛତା ମା ପୁନରାଗମାସି ॥
ୟଂ ନୋ ଅପୁଚ୍ଛିତ୍ଥ ତୁୱଂ ଭଦନ୍ତେ, ସବ୍ବେୱ ବ୍ୟାକରିମ୍ହ ୟଥା ପଜାନଂ ।
ମୟମ୍ପି ପୁଚ୍ଛାମ ତୁୱଂ ଭଦନ୍ତେ, କସ୍ମା ଭୱଂପୋସଥିକୋ ନୁ ବ୍ରହ୍ମେ ॥
ଅନୂପଲିତ୍ତୋ ମମ ଅସ୍ସମମ୍ହି, ପଚ୍ଚେକବୁଦ୍ଧୋ ମୁହୁତ୍ତଂ ନିସୀଦି ।
ସୋ ମଂ ଅୱେଦୀ ଗତିମାଗତିଞ୍ଚ, ନାମଞ୍ଚ ଗୋତ୍ତଂ ଚରଣଞ୍ଚ ସବ୍ବଂ ॥
ଏୱମ୍ପହଂ ୱନ୍ଦି ନ [ଏୱମ୍ପହଂ ନଗ୍ଗହେ (ସୀ॰ ପୀ॰)] ତସ୍ସ ପାଦେ, ନ ଚାପି ନଂ ମାନଗତେନ ପୁଚ୍ଛିଂ ।
ତସ୍ମା ଅହଂପୋସଥଂ ପାଲୟାମି, ମାନୋ ମମଂ ମା ପୁନରାଗମାସୀତି ॥
ପଞ୍ଚୁପୋସଥିକଜାତକଂ ସତ୍ତମଂ ।
୪୯୧. ମହାମୋରଜାତକଂ (୮)
ସଚେ ହି ତ୍ୟାହଂ ଧନହେତୁ ଗାହିତୋ, ମା ମଂ ୱଧୀ ଜୀୱଗାହଂ ଗହେତ୍ୱା ।
ରଞ୍ଞୋ ଚ [ରଞ୍ଞୋୱ (ସୀ॰ ପୀ॰)] ମଂ ସମ୍ମ ଉପନ୍ତିକଂ [ଉପନ୍ତି (ସୀ॰ ସ୍ୟା॰ ପୀ॰)] ନେହି, ମଞ୍ଞେ ଧନଂ ଲଚ୍ଛସିନପ୍ପରୂପଂ ॥
ନ ମେ ଅୟଂ ତୁୟ୍ହ ୱଧାୟ ଅଜ୍ଜ, ସମାହିତୋ ଚାପଧୁରେ [ଚାପୱରେ (ସୀ॰ ପୀ॰), ଚାପୱରୋ (ସ୍ୟା॰)] ଖୁରପ୍ପୋ ।
ପାସଞ୍ଚ ତ୍ୟାହଂ ଅଧିପାତୟିସ୍ସଂ, ୟଥାସୁଖଂ ଗଚ୍ଛତୁ ମୋରରାଜା ॥
ୟଂ ସତ୍ତ ୱସ୍ସାନି ମମାନୁବନ୍ଧି, ରତ୍ତିନ୍ଦିୱଂ ଖୁପ୍ପିପାସଂ ସହନ୍ତୋ ।
ଅଥ କିସ୍ସ ମଂ ପାସୱସୂପନୀତଂ, ପମୁତ୍ତୱେ ଇଚ୍ଛସି ବନ୍ଧନସ୍ମା ॥
ପାଣାତିପାତା ୱିରତୋ ନୁସଜ୍ଜ, ଅଭୟଂ ନୁ ତେ ସବ୍ବଭୂତେସୁ ଦିନ୍ନଂ ।
ୟଂ ମଂ ତୁୱଂ ପାସୱସୂପନୀତଂ, ପମୁତ୍ତୱେ ଇଚ୍ଛସି ବନ୍ଧନସ୍ମା ॥
ପାଣାତିପାତା ୱିରତସ୍ସ ବ୍ରୂହି, ଅଭୟଞ୍ଚ ୟୋ ସବ୍ବଭୂତେସୁ ଦେତି ।
ପୁଚ୍ଛାମି ତଂ ମୋରରାଜେତମତ୍ଥଂ, ଇତୋ ଚୁତୋ କିଂ ଲଭତେ ସୁଖଂ ସୋ ॥
ପାଣାତିପାତା ୱିରତସ୍ସ ବ୍ରୂମି, ଅଭୟଞ୍ଚ ୟୋ ସବ୍ବଭୂତେସୁ ଦେତି ।
ଦିଟ୍ଠେୱ ଧମ୍ମେ ଲଭତେ ପସଂସଂ, ସଗ୍ଗଞ୍ଚ ସୋ ୟାତି ସରୀରଭେଦା ॥
ନ ସନ୍ତି ଦେୱା ଇତି ଆହୁ [ଇଚ୍ଚାହୁ (ସୀ॰ ପୀ॰)] ଏକେ, ଇଧେୱ ଜୀୱୋ ୱିଭୱଂ ଉପେତି ।
ତଥା ଫଲଂ ସୁକତଦୁକ୍କଟାନଂ, ଦତ୍ତୁପଞ୍ଞତ୍ତଞ୍ଚ ୱଦନ୍ତି ଦାନଂ ।
ତେସଂ ୱଚୋ ଅରହତଂ ସଦ୍ଦହାନୋ, ତସ୍ମା ଅହଂ ସକୁଣେ ବାଧୟାମି ॥
ଚନ୍ଦୋ ଚ ସୁରିୟୋ ଚ ଉଭୋ ସୁଦସ୍ସନା, ଗଚ୍ଛନ୍ତି ଓଭାସୟମନ୍ତଲିକ୍ଖେ ।
ଇମସ୍ସ ଲୋକସ୍ସ ପରସ୍ସ ୱା ତେ, କଥଂ ନୁ ତେ ଆହୁ ମନୁସ୍ସଲୋକେ ॥
ଚନ୍ଦୋ ଚ ସୁରିୟୋ ଚ ଉଭୋ ସୁଦସ୍ସନା, ଗଚ୍ଛନ୍ତି ଓଭାସୟମନ୍ତଲିକ୍ଖେ ।
ପରସ୍ସ ଲୋକସ୍ସ ନ ତେ ଇମସ୍ସ, ଦେୱାତି ତେ ଆହୁ ମନୁସ୍ସଲୋକେ ॥
ଏତ୍ଥେୱ ତେ ନୀହତା ହୀନୱାଦା, ଅହେତୁକା ୟେ ନ ୱଦନ୍ତି କମ୍ମଂ ।
ତଥା ଫଲଂ ସୁକତଦୁକ୍କଟାନଂ, ଦତ୍ତୁପଞ୍ଞତ୍ତଂ ୟେ ଚ ୱଦନ୍ତି ଦାନଂ ॥
ଅଦ୍ଧା ହି ସଚ୍ଚଂ ୱଚନଂ ତୱେଦଂ [ତୱେତଂ (ସୀ॰ ସ୍ୟା॰ ପୀ॰)], କଥଞ୍ହି ଦାନଂ ଅଫଲଂ ଭୱେୟ୍ୟ [ୱଦେୟ୍ୟ (ସୀ॰ ପୀ॰)]।
ତଥା ଫଲଂ ସୁକତଦୁକ୍କଟାନଂ, ଦତ୍ତୁପଞ୍ଞତ୍ତଞ୍ଚ କଥଂ ଭୱେୟ୍ୟ ॥
କଥଂକରୋ କିନ୍ତିକରୋ କିମାଚରଂ, କିଂ ସେୱମାନୋ କେନ ତପୋଗୁଣେନ ।
ଅକ୍ଖାହି [ଅକ୍ଖାହି ତଂ ଦାନି (କ॰)] ମେ ମୋରରାଜେତମତ୍ଥଂ, ୟଥା ଅହଂ ନୋ ନିରୟଂ ପତେୟ୍ୟଂ ॥
ୟେ କେଚି ଅତ୍ଥି ସମଣା ପଥବ୍ୟା, କାସାୟୱତ୍ଥା ଅନଗାରିୟା ତେ ।
ପାତୋୱ ପିଣ୍ଡାୟ ଚରନ୍ତି କାଲେ, ୱିକାଲଚରିୟା ୱିରତା ହି ସନ୍ତୋ ॥
ତେ ତତ୍ଥ କାଲେନୁପସଙ୍କମିତ୍ୱା, ପୁଚ୍ଛାହି ୟଂ ତେ ମନସୋ ପିୟଂ ସିୟା ।
ତେ ତେ ପୱକ୍ଖନ୍ତି ୟଥାପଜାନଂ, ଇମସ୍ସ ଲୋକସ୍ସ ପରସ୍ସ ଚତ୍ଥଂ ॥
ତଚଂୱ ଜିଣ୍ଣଂ ଉରଗୋ ପୁରାଣଂ, ପଣ୍ଡୂପଲାସଂ ହରିତୋ ଦୁମୋୱ ।
ଏସପ୍ପହୀନୋ ମମ ଲୁଦ୍ଦଭାୱୋ, ଜହାମହଂ ଲୁଦ୍ଦକଭାୱମଜ୍ଜ ॥
ୟେ ଚାପି ମେ ସକୁଣା ଅତ୍ଥି ବଦ୍ଧା, ସତାନିନେକାନି ନିୱେସନସ୍ମିଂ ।
ତେସମ୍ପହଂ [ତେସଂ ଅହଂ (ସ୍ୟା॰ କ॰)] ଜୀୱିତମଜ୍ଜ ଦମ୍ମି, ମୋକ୍ଖଞ୍ଚ ତେ ପତ୍ତା [ପତ୍ତୋ (ସୀ॰), ଅଚ୍ଛ (ସ୍ୟା॰)] ସକଂ ନିକେତଂ ॥
ଲୁଦ୍ଦୋ ଚରୀ ପାସହତ୍ଥୋ ଅରଞ୍ଞେ, ବାଧେତୁ ମୋରାଧିପତିଂ ୟସସ୍ସିଂ ।
ବନ୍ଧିତ୍ୱା [ବନ୍ଧିତ୍ୱ (ସୀ॰ ପୀ॰)] ମୋରାଧିପତିଂ ୟସସ୍ସିଂ, ଦୁକ୍ଖା ସ ପମୁଚ୍ଚି [ଦୁକ୍ଖା ପମୁଚ୍ଚି (ସୀ॰), ଦୁକ୍ଖା ପମୁଞ୍ଚି (ସ୍ୟା॰ ପୀ॰)] ୟଥାହଂ ପମୁତ୍ତୋତି ॥
ମହାମୋରଜାତକଂ ଅଟ୍ଠମଂ ।
୪୯୨. ତଚ୍ଛସୂକରଜାତକଂ (୯)
ୟଦେସମାନା ୱିଚରିମ୍ହ, ପବ୍ବତାନି ୱନାନି ଚ ।
ଅନ୍ୱେସଂ ୱିଚରିଂ [ୱିପୁଲେ (ସ୍ୟା॰ କ॰)] ଞାତୀ, ତେମେ ଅଧିଗତା ମୟା ॥
ବହୁଞ୍ଚିଦଂ ମୂଲଫଲଂ, ଭକ୍ଖୋ ଚାୟଂ ଅନପ୍ପକୋ ।
ରମ୍ମା ଚିମା ଗିରୀନଜ୍ଜୋ [ଗିରିନଦିୟୋ (ସୀ॰ ପୀ॰)], ଫାସୁୱାସୋ ଭୱିସ୍ସତି ॥
ଇଧେୱାହଂ ୱସିସ୍ସାମି, ସହ ସବ୍ବେହି ଞାତିଭି ।
ଅପ୍ପୋସ୍ସୁକ୍କୋ ନିରାସଙ୍କୀ, ଅସୋକୋ ଅକୁତୋଭୟୋ ॥
ଅଞ୍ଞମ୍ପି [ଅଞ୍ଞଂ ହି (ସୀ॰ ପୀ॰)] ଲେଣଂ ପରିୟେସ, ସତ୍ତୁ ନୋ ଇଧ ୱିଜ୍ଜତି ।
ସୋ ତଚ୍ଛ ସୂକରେ ହନ୍ତି, ଇଧାଗନ୍ତ୍ୱା ୱରଂ ୱରଂ ॥
କୋ ନୁମ୍ହାକଂ [କୋ ନମ୍ହାକଂ (ସୀ॰ ପୀ॰)] ଇଧ ସତ୍ତୁ, କୋ ଞାତୀ ସୁସମାଗତେ ।
ଦୁପ୍ପଧଂସେ [ଅପ୍ପଧଂସେ (ସୀ॰ ପୀ॰)] ପଧଂସେତି, ତଂ ମେ ଅକ୍ଖାଥ ପୁଚ୍ଛିତା ॥
ଉଦ୍ଧଗ୍ଗରାଜୀ ମିଗରାଜା, ବଲୀ ଦାଠାୱୁଧୋ ମିଗୋ ।
ସୋ ତଚ୍ଛ ସୂକରେ ହନ୍ତି, ଇଧାଗନ୍ତ୍ୱା ୱରଂ ୱରଂ ॥
ନ ନୋ ଦାଠା ନ ୱିଜ୍ଜନ୍ତି [ନୁ ୱିଜ୍ଜନ୍ତି (କ॰)], ବଲଂ କାୟେ ସମୋହିତଂ ।
ସବ୍ବେ ସମଗ୍ଗା ହୁତ୍ୱାନ, ୱସଂ କାହାମ ଏକକଂ ॥
ହଦୟଙ୍ଗମଂ କଣ୍ଣସୁଖଂ, ୱାଚଂ ଭାସସି ତଚ୍ଛକ ।
ୟୋପି ୟୁଦ୍ଧେ ପଲାୟେୟ୍ୟ, ତମ୍ପି ପଚ୍ଛା ହନାମସେ ॥
ପାଣାତିପାତା ୱିରତୋ ନୁ ଅଜ୍ଜ, ଅଭୟଂ ନୁ ତେ ସବ୍ବଭୂତେସୁ ଦିନ୍ନଂ ।
ଦାଠା ନୁ ତେ ମିଗୱଧାୟ [ମିଗ ୱିରିୟଂ (ସୀ॰ ସ୍ୟା॰ ପୀ॰)] ନ ସନ୍ତି, ୟୋ ସଙ୍ଘପତ୍ତୋ କପଣୋୱ ଝାୟସି ॥
ନ ମେ ଦାଠା ନ ୱିଜ୍ଜନ୍ତି, ବଲଂ କାୟେ ସମୋହିତଂ ।
ଞାତୀ ଚ ଦିସ୍ୱାନ ସାମଗ୍ଗୀ ଏକତୋ, ତସ୍ମା ଚ ଝାୟାମି ୱନମ୍ହି ଏକକୋ ॥
ଇମସ୍ସୁଦଂ ୟନ୍ତି ଦିସୋଦିସଂ ପୁରେ, ଭୟଟ୍ଟିତା ଲେଣଗୱେସିନୋ ପୁଥୁ ।
ତେ ଦାନି ସଙ୍ଗମ୍ମ ୱସନ୍ତି ଏକତୋ, ୟତ୍ଥଟ୍ଠିତା ଦୁପ୍ପସହଜ୍ଜ ତେ ମୟା ॥
ପରିଣାୟକସମ୍ପନ୍ନା, ସହିତା ଏକୱାଦିନୋ ।
ତେ ମଂ ସମଗ୍ଗା ହିଂସେୟ୍ୟୁଂ, ତସ୍ମା ନେସଂ ନ ପତ୍ଥୟେ [ଅପତ୍ଥୱେ (ପୀ॰)]॥
ଏକୋୱ ଇନ୍ଦୋ ଅସୁରେ ଜିନାତି, ଏକୋୱ ସେନୋ ହନ୍ତି ଦିଜେ ପସୟ୍ହ ।
ଏକୋୱ ବ୍ୟଗ୍ଘୋ ମିଗସଙ୍ଘପତ୍ତୋ, ୱରଂ ୱରଂ ହନ୍ତି ବଲଞ୍ହି ତାଦିସଂ ॥
ନ ହେୱ ଇନ୍ଦୋ ନ ସେନୋ, ନପି ବ୍ୟଗ୍ଘୋ ମିଗାଧିପୋ ।
ସମଗ୍ଗେ ସହିତେ ଞାତୀ, ନ ବ୍ୟଗ୍ଘେ [ବ୍ୟଗ୍ଘେ ଚ (ସୀ॰ ପୀ॰), ବ୍ୟଗ୍ଘୋ ନ (ସ୍ୟା॰)] କୁରୁତେ ୱସେ ॥
କୁମ୍ଭୀଲକା ସକୁଣକା, ସଙ୍ଘିନୋ ଗଣଚାରିନୋ ।
ସମ୍ମୋଦମାନା ଏକଜ୍ଝଂ, ଉପ୍ପତନ୍ତି ଡୟନ୍ତି ଚ ॥
ତେସଞ୍ଚ ଡୟମାନାନଂ, ଏକେତ୍ଥ ଅପସକ୍କତି [ଅପୱତ୍ତତି (ସୀ॰ ପୀ॰)]।
ତଞ୍ଚ ସେନୋ ନିତାଳେତି, ୱେୟ୍ୟଗ୍ଘିୟେୱ ସା ଗତି ॥
ଉସ୍ସାହିତୋ ଜଟିଲେନ, ଲୁଦ୍ଦେନାମିସଚକ୍ଖୁନା ।
ଦାଠୀ ଦାଠୀସୁ ପକ୍ଖନ୍ଦି, ମଞ୍ଞମାନୋ ୟଥା ପୁରେ ॥
ସାଧୁ ସମ୍ବହୁଲା ଞାତୀ, ଅପି ରୁକ୍ଖା ଅରଞ୍ଞଜା ।
ସୂକରେହି ସମଗ୍ଗେହି, ବ୍ୟଗ୍ଘୋ ଏକାୟନେ ହତୋ ॥
ବ୍ରାହ୍ମଣଞ୍ଚେୱ ବ୍ୟଗ୍ଘଞ୍ଚ, ଉଭୋ ହନ୍ତ୍ୱାନ ସୂକରା ॥
ଆନନ୍ଦିନୋ ପମୁଦିତା, ମହାନାଦଂ ପନାଦିସୁଂ ॥
ତେ ସୁ ଉଦୁମ୍ବରମୂଲସ୍ମିଂ, ସୂକରା ସୁସମାଗତା ।
ତଚ୍ଛକଂ ଅଭିସିଞ୍ଚିଂସୁ, ‘‘ତ୍ୱଂ ନୋ ରାଜାସି ଇସ୍ସରୋ’’ତି ॥
ତଚ୍ଛସୂକରଜାତକଂ ନୱମଂ ।
୪୯୩. ମହାୱାଣିଜଜାତକଂ (୧୦)
ୱାଣିଜା ସମିତିଂ କତ୍ୱା, ନାନାରଟ୍ଠତୋ ଆଗତା ।
ଧନାହରା ପକ୍କମିଂସୁ, ଏକଂ କତ୍ୱାନ ଗାମଣିଂ ॥
ତେ ତଂ କନ୍ତାରମାଗମ୍ମ, ଅପ୍ପଭକ୍ଖଂ ଅନୋଦକଂ ।
ମହାନିଗ୍ରୋଧମଦ୍ଦକ୍ଖୁଂ, ସୀତଚ୍ଛାୟଂ ମନୋରମଂ ॥
ତେ ଚ ତତ୍ଥ ନିସୀଦିତ୍ୱା, ତସ୍ସ ରୁକ୍ଖସ୍ସ ଛାୟୟା [ଛାଦିୟା (ସୀ॰ ସ୍ୟା॰ ପୀ॰)]।
ୱାଣିଜା ସମଚିନ୍ତେସୁଂ, ବାଲା ମୋହେନ ପାରୁତା ॥
ଅଲ୍ଲାୟତେ [ଅଦ୍ଦାୟତେ (ସୀ॰ ପୀ॰)] ଅୟଂ ରୁକ୍ଖୋ, ଅପି ୱାରୀୱ [ୱାରି ଚ (ସୀ॰ ପୀ॰)] ସନ୍ଦତି ।
ଇଙ୍ଘସ୍ସ ପୁରିମଂ ସାଖଂ, ମୟଂ ଛିନ୍ଦାମ ୱାଣିଜା ॥
ସା ଚ ଛିନ୍ନାୱ ପଗ୍ଘରି, ଅଚ୍ଛଂ ୱାରିଂ ଅନାୱିଲଂ ।
ତେ ତତ୍ଥ ନ୍ହତ୍ୱା ପିୱିତ୍ୱା, ୟାୱତିଚ୍ଛିଂସୁ ୱାଣିଜା ॥
ଦୁତିୟଂ ସମଚିନ୍ତେସୁଂ, ବାଲା ମୋହେନ ପାରୁତା ।
ଇଙ୍ଘସ୍ସ ଦକ୍ଖିଣଂ ସାଖଂ, ମୟଂ ଛିନ୍ଦାମ ୱାଣିଜା ॥
ସା ଚ ଛିନ୍ନାୱ ପଗ୍ଘରି, ସାଲିମଂସୋଦନଂ ବହୁଂ ।
ଅପ୍ପୋଦୱଣ୍ଣେ କୁମ୍ମାସେ, ସିଙ୍ଗିଂ ୱିଦଲସୂପିୟୋ [ସିଙ୍ଗିଂ ବିଦଲସୂପିୟୋ (ସୀ॰ ପୀ॰), ସିଙ୍ଗୀୱେରଂ ଲସୂପିୟୋ (କ॰) ସିଙ୍ଗୀନ୍ତି ସିଙ୍ଗୀୱେରାଦିକଂ ଉତ୍ତରିଭଙ୍ଗଂ । ୱିଦଲସୂପିୟୋତି ମୁଗ୍ଗସୂପାଦୟୋ (ଅଟ୍ଠ॰) ୱିଦଲଂ କଲାୟାଦିମ୍ହି ୱତ୍ତତୀତି ସକ୍କତାଭିଧାନେ]॥
ତେ ତତ୍ଥ ଭୁତ୍ୱା ଖାଦିତ୍ୱା [ଭୁତ୍ୱା ଚ ପିୱିତ୍ୱା ଚ (ପୀ॰)], ୟାୱତିଚ୍ଛିଂସୁ ୱାଣିଜା ।
ତତିୟଂ ସମଚିନ୍ତେସୁଂ, ବାଲା ମୋହେନ ପାରୁତା ।
ଇଙ୍ଘସ୍ସ ପଚ୍ଛିମଂ ସାଖଂ, ମୟଂ ଛିନ୍ଦାମ ୱାଣିଜା ॥
ସା ଚ ଛିନ୍ନାୱ ପଗ୍ଘରି, ନାରିୟୋ ସମଲଙ୍କତା ।
ୱିଚିତ୍ରୱତ୍ଥାଭରଣା, ଆମୁତ୍ତମଣିକୁଣ୍ଡଲା ॥
ଅପି ସୁ ୱାଣିଜା ଏକା, ନାରିୟୋ ପଣ୍ଣୱୀସତି ।
ସମନ୍ତା ପରିୱାରିଂସୁ [ପରିକରିଂସୁ (ସୀ॰ ସ୍ୟା॰ ପୀ॰)], ତସ୍ସ ରୁକ୍ଖସ୍ସ ଛାୟୟା [ଛାଦିୟା (ସୀ॰ ସ୍ୟା॰ ପୀ॰)]॥
ତେ ତାହି ପରିଚାରେତ୍ୱା [ପରିୱାରେତ୍ୱା (ସୀ॰ ସ୍ୟା॰ ପୀ॰)], ୟାୱତିଚ୍ଛିଂସୁ ୱାଣିଜା ।
ଚତୁତ୍ଥଂ ସମଚିନ୍ତେସୁଂ, ବାଲା ମୋହେନ ପାରୁତା ।
ଇଙ୍ଘସ୍ସ ଉତ୍ତରଂ ସାଖଂ, ମୟଂ ଛିନ୍ଦାମ ୱାଣିଜା ॥
ସା ଚ ଛିନ୍ନାୱ ପଗ୍ଘରି, ମୁତ୍ତା ୱେଳୁରିୟା ବହୂ ।
ରଜତଂ ଜାତରୂପଞ୍ଚ, କୁତ୍ତିୟୋ ପଟିୟାନି ଚ ॥
କାସିକାନି ଚ ୱତ୍ଥାନି, ଉଦ୍ଦିୟାନି ଚ କମ୍ବଲା [ଉଦ୍ଦିୟାନେ ଚ କମ୍ବଲେ (ସୀ॰ ପୀ॰)]।
ତେ ତତ୍ଥ ଭାରେ ବନ୍ଧିତ୍ୱା, ୟାୱତିଚ୍ଛିଂସୁ ୱାଣିଜା ॥
ପଞ୍ଚମଂ ସମଚିନ୍ତେସୁଂ, ବାଲା ମୋହେନ ପାରୁତା ।
ଇଙ୍ଘସ୍ସ ମୂଲେ [ମୂଲଂ (ସୀ॰ ପୀ॰ କ॰)] ଛିନ୍ଦାମ, ଅପି ଭିୟ୍ୟୋ ଲଭାମସେ ॥
ଅଥୁଟ୍ଠହି ସତ୍ଥୱାହୋ, ୟାଚମାନୋ କତଞ୍ଜଲୀ ।
ନିଗ୍ରୋଧୋ କିଂ ପରଜ୍ଝତି [ଅପରଜ୍ଝଥ (ସୀ॰), ଅପରଜ୍ଝତି (ସ୍ୟା॰ ପୀ॰)], ୱାଣିଜା ଭଦ୍ଦମତ୍ଥୁ ତେ ॥
ୱାରିଦା ପୁରିମା ସାଖା, ଅନ୍ନପାନଞ୍ଚ ଦକ୍ଖିଣା ।
ନାରିଦା ପଚ୍ଛିମା ସାଖା, ସବ୍ବକାମେ ଚ ଉତ୍ତରା ।
ନିଗ୍ରୋଧୋ କିଂ ପରଜ୍ଝତି, ୱାଣିଜା ଭଦ୍ଦମତ୍ଥୁ ତେ ॥
ୟସ୍ସ ରୁକ୍ଖସ୍ସ ଛାୟାୟ, ନିସୀଦେୟ୍ୟ ସୟେୟ୍ୟ ୱା ।
ନ ତସ୍ସ ସାଖଂ ଭଞ୍ଜେୟ୍ୟ, ମିତ୍ତଦୁବ୍ଭୋ ହି ପାପକୋ ॥
ତେ ଚ ତସ୍ସାନାଦିୟିତ୍ୱା [ତସ୍ସ ଅନାଦିତ୍ୱା (ସୀ॰ ସ୍ୟା॰)], ଏକସ୍ସ ୱଚନଂ ବହୂ ।
ନିସିତାହି କୁଠାରୀହି [କୁଧାରୀହି (କ॰)], ମୂଲତୋ ନଂ ଉପକ୍କମୁଂ ॥
ତତୋ ନାଗା ନିକ୍ଖମିଂସୁ, ସନ୍ନଦ୍ଧା ପଣ୍ଣୱୀସତି ।
ଧନୁଗ୍ଗହାନଂ ତିସତା, ଛସହସ୍ସା ଚ ୱମ୍ମିନୋ ॥
ଏତେ ହନଥ ବନ୍ଧଥ, ମା ୱୋ ମୁଞ୍ଚିତ୍ଥ [ମୁଚ୍ଚିତ୍ଥ (ପୀ॰)] ଜୀୱିତଂ ।
ଠପେତ୍ୱା ସତ୍ଥୱାହଂୱ, ସବ୍ବେ ଭସ୍ମଂ [ଭସ୍ମୀ (ସୀ॰)] କରୋଥ ନେ ॥
ତସ୍ମା ହି ପଣ୍ଡିତୋ ପୋସୋ, ସମ୍ପସ୍ସଂ ଅତ୍ଥମତ୍ତନୋ ।
ଲୋଭସ୍ସ ନ ୱସଂ ଗଚ୍ଛେ, ହନେୟ୍ୟାରିସକଂ [ହନେୟ୍ୟ ଦିସତଂ (ସୀ॰), ହନେୟ୍ୟ ଦିସକଂ (ସ୍ୟା॰)] ମନଂ ॥
ଏୱ [ଏତ (ସୀ॰ ପୀ॰)] ମାଦୀନୱଂ ଞତ୍ୱା, ତଣ୍ହା ଦୁକ୍ଖସ୍ସ ସମ୍ଭୱଂ ।
ୱୀତତଣ୍ହୋ ଅନାଦାନୋ, ସତୋ ଭିକ୍ଖୁ ପରିବ୍ବଜେତି ॥
ମହାୱାଣିଜଜାତକଂ ଦସମଂ ।
୪୯୪. ସାଧିନଜାତକଂ (୧୧)
ଅବ୍ଭୁତୋ ୱତ ଲୋକସ୍ମିଂ, ଉପ୍ପଜ୍ଜି ଲୋମହଂସନୋ ।
ଦିବ୍ବୋ ରଥୋ ପାତୁରହୁ, ୱେଦେହସ୍ସ ୟସସ୍ସିନୋ ॥
ଦେୱପୁତ୍ତୋ ମହିଦ୍ଧିକୋ, ମାତଲି [ମାତଲୀ (ସୀ॰)] ଦେୱସାରଥି ।
ନିମନ୍ତୟିତ୍ଥ ରାଜାନଂ, ୱେଦେହଂ ମିଥିଲଗ୍ଗହଂ ॥
ଏହିମଂ ରଥମାରୁୟ୍ହ, ରାଜସେଟ୍ଠ ଦିସମ୍ପତି ।
ଦେୱା ଦସ୍ସନକାମା ତେ, ତାୱତିଂସା ସଇନ୍ଦକା ।
ସରମାନା ହି ତେ ଦେୱା, ସୁଧମ୍ମାୟଂ ସମଚ୍ଛରେ ॥
ତତୋ ଚ ରାଜା ସାଧିନୋ [ସାଧୀନୋ (ସୀ॰ ପୀ॰)], ୱେଦେହୋ ମିଥିଲଗ୍ଗହୋ [ପମୁଖୋ ରଥମାରୁହି (ସୀ॰ ପୀ॰)]।
ସହସ୍ସୟୁତ୍ତମାରୁୟ୍ହ [ୟୁତ୍ତଂ ଅଭିରୁୟ୍ହ (ସୀ॰)], ଅଗା ଦେୱାନ ସନ୍ତିକେ ।
ତଂ ଦେୱା ପଟିନନ୍ଦିଂସୁ, ଦିସ୍ୱା ରାଜାନମାଗତଂ ॥
ସ୍ୱାଗତଂ ତେ ମହାରାଜ, ଅଥୋ ତେ ଅଦୁରାଗତଂ ।
ନିସୀଦ ଦାନି ରାଜୀସି [ରାଜିସି (ସୀ॰ ସ୍ୟା॰ ପୀ॰)], ଦେୱରାଜସ୍ସ ସନ୍ତିକେ ॥
ସକ୍କୋପି ପଟିନନ୍ଦିତ୍ଥ, ୱେଦେହଂ ମିଥିଲଗ୍ଗହଂ ।
ନିମନ୍ତୟିତ୍ଥ [ନିମନ୍ତୟୀ ଚ (ସୀ॰ ପୀ॰)] କାମେହି, ଆସନେନ ଚ ୱାସୱୋ ॥
ସାଧୁ ଖୋସି ଅନୁପ୍ପତ୍ତୋ, ଆୱାସଂ ୱସୱତ୍ତିନଂ ।
ୱସ ଦେୱେସୁ ରାଜୀସି, ସବ୍ବକାମସମିଦ୍ଧିସୁ ।
ତାୱତିଂସେସୁ ଦେୱେସୁ, ଭୁଞ୍ଜ କାମେ ଅମାନୁସେ ॥
ଅହଂ ପୁରେ ସଗ୍ଗଗତୋ ରମାମି, ନଚ୍ଚେହି ଗୀତେହି ଚ ୱାଦିତେହି ।
ସୋ ଦାନି ଅଜ୍ଜ ନ ରମାମି ସଗ୍ଗେ, ଆୟୁଂ ନୁ ଖୀଣୋ [ଖୀଣଂ (ସ୍ୟା॰)] ମରଣଂ ନୁ ସନ୍ତିକେ ।
ଉଦାହୁ ମୂଳ୍ହୋସ୍ମି ଜନିନ୍ଦସେଟ୍ଠ ॥
ନ ତାୟୁ [ନ ଚାୟୁ (ସୀ॰ ପୀ॰ କ॰)] ଖୀଣଂ ମରଣଞ୍ଚ [ମରଣଂ ତେ (ସୀ॰ ପୀ॰)] ଦୂରେ, ନ ଚାପି ମୂଳ୍ହୋ ନରୱୀରସେଟ୍ଠ ।
ତୁୟ୍ହଞ୍ଚ [ତୱଞ୍ଚ (ସୀ॰ ପୀ॰), ତୱ ଚ (କ॰)] ପୁଞ୍ଞାନି ପରିତ୍ତକାନି, ୟେସଂ ୱିପାକଂ ଇଧ ୱେଦୟିତ୍ଥୋ [ୱେଦୟତୋ (ପୀ॰ କ॰)]॥
ୱସ ଦେୱାନୁଭାୱେନ, ରାଜସେଟ୍ଠ ଦିସମ୍ପତି ।
ତାୱତିଂସେସୁ ଦେୱେସୁ, ଭୁଞ୍ଜ କାମେ ଅମାନୁସେ ॥
ୟଥା ୟାଚିତକଂ ୟାନଂ, ୟଥା ୟାଚିତକଂ ଧନଂ ।
ଏୱଂ ସମ୍ପଦମେୱେତଂ, ୟଂ ପରତୋ ଦାନପଚ୍ଚୟା ॥
ନ ଚାହମେତମିଚ୍ଛାମି, ୟଂ ପରତୋ ଦାନପଚ୍ଚୟା ।
ସୟଂକତାନି ପୁଞ୍ଞାନି, ତଂ ମେ ଆୱେଣିକଂ [ଆୱେଣିୟଂ (ସୀ॰ ସ୍ୟା॰ ପୀ॰), ଆୱେନିକଂ (କ॰)] ଧନଂ ॥
ସୋହଂ ଗନ୍ତ୍ୱା ମନୁସ୍ସେସୁ, କାହାମି କୁସଲଂ ବହୁଂ ।
ଦାନେନ ସମଚରିୟାୟ, ସଂୟମେନ ଦମେନ ଚ ।
ୟଂ କତ୍ୱା ସୁଖିତୋ ହୋତି, ନ ଚ ପଚ୍ଛାନୁତପ୍ପତି ॥
ଇମାନି ତାନି ଖେତ୍ତାନି, ଇମଂ ନିକ୍ଖଂ ସୁକୁଣ୍ଡଲଂ ।
ଇମା ତା ହରିତାନୂପା, ଇମା ନଜ୍ଜୋ ସୱନ୍ତିୟୋ ॥
ଇମା ତା ପୋକ୍ଖରଣୀ ରମ୍ମା, ଚକ୍କୱାକପକୂଜିତା [ଚକ୍କୱାକୂପକୂଜିତା (ସୀ॰ ପୀ॰)]।
ମନ୍ଦାଲକେହି ସଞ୍ଛନ୍ନା, ପଦୁମୁପ୍ପଲକେହି ଚ ।
ୟସ୍ସିମାନି ମମାୟିଂସୁ, କିଂ ନୁ ତେ ଦିସତଂ ଗତା ॥
ତାନୀଧ ଖେତ୍ତାନି ସୋ ଭୂମିଭାଗୋ, ତେୟେୱ ଆରାମୱନୁପଚାରା [ତେ ଆରାମା ତେ ୱନ’ମେ ପଚାରା (ସୀ॰ ପୀ॰), ତେ ୟେୱ ଆରାମୱନାନି ସଞ୍ଚରା (କ॰)]।
ତମେୱ ମୟ୍ହଂ ଜନତଂ ଅପସ୍ସତୋ, ସୁଞ୍ଞଂୱ ମେ ନାରଦ ଖାୟତେ ଦିସା ॥
ଦିଟ୍ଠା ମୟା ୱିମାନାନି, ଓଭାସେନ୍ତା ଚତୁଦ୍ଦିସା ।
ସମ୍ମୁଖା ଦେୱରାଜସ୍ସ, ତିଦସାନଞ୍ଚ ସମ୍ମୁଖା ॥
ୱୁତ୍ଥଂ ମେ ଭୱନଂ ଦିବ୍ୟଂ [ଦିବ୍ବଂ (ସୀ॰ ପୀ॰)], ଭୁତ୍ତା କାମା ଅମାନୁସା ।
ତାୱତିଂସେସୁ ଦେୱେସୁ, ସବ୍ବକାମସମିଦ୍ଧିସୁ ॥
ସୋହଂ ଏତାଦିସଂ ହିତ୍ୱା, ପୁଞ୍ଞାୟମ୍ହି ଇଧାଗତୋ ।
ଧମ୍ମମେୱ ଚରିସ୍ସାମି, ନାହଂ ରଜ୍ଜେନ ଅତ୍ଥିକୋ ॥
ଅଦଣ୍ଡାୱଚରଂ ମଗ୍ଗଂ, ସମ୍ମାସମ୍ବୁଦ୍ଧଦେସିତଂ ।
ତଂ ମଗ୍ଗଂ ପଟିପଜ୍ଜିସ୍ସଂ, ୟେନ ଗଚ୍ଛନ୍ତି ସୁବ୍ବତାତି ॥
ସାଧିନଜାତକଂ [ସାଧିନରାଜଜାତକଂ (ସ୍ୟା॰)] ଏକାଦସମଂ ।
୪୯୫. ଦସବ୍ରାହ୍ମଣଜାତକଂ (୧୨)
ରାଜା ଅୱୋଚ ୱିଧୁରଂ, ଧମ୍ମକାମୋ ୟୁଧିଟ୍ଠିଲୋ ।
ବ୍ରାହ୍ମଣେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ [ଭୁଞ୍ଜେୟ୍ୟୁଂ (ସୀ॰)] ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ଦୁଲ୍ଲଭା ବ୍ରାହ୍ମଣା ଦେୱ, ସୀଲୱନ୍ତୋ ବହୁସ୍ସୁତା ।
ୱିରତା ମେଥୁନା ଧମ୍ମା, ୟେ ତେ ଭୁଞ୍ଜେୟ୍ୟୁ ଭୋଜନଂ ॥
ଦସ ଖଲୁ ମହାରାଜ, ୟା ତା ବ୍ରାହ୍ମଣଜାତିୟୋ ।
ତେସଂ ୱିଭଙ୍ଗଂ ୱିଚୟଂ [ୱିଚିୟ (କ॰)], ୱିତ୍ଥାରେନ ସୁଣୋହି ମେ ॥
ପସିବ୍ବକେ ଗହେତ୍ୱାନ, ପୁଣ୍ଣେ ମୂଲସ୍ସ ସଂୱୁତେ ।
ଓସଧିକାୟୋ [ଓସଧିକାୟେ (ସ୍ୟା॰ କ॰)] ଗନ୍ଥେନ୍ତି, ନ୍ହାପୟନ୍ତି [ନହାୟନ୍ତି (ସୀ॰ ପୀ॰)] ଜପନ୍ତି ଚ ॥
ତିକିଚ୍ଛକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ଚ [ତେ (ସୀ॰ ପୀ॰)] ବ୍ରହ୍ମଞ୍ଞା,
(ଇତି ରାଜା [ରାଜା ଚ (ସ୍ୟା॰ କ॰)] କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
କିଙ୍କିଣିକାୟୋ [କିଙ୍କଣିକାୟୋ (କ॰), କିଙ୍କିଣିୟୋ (ସ୍ୟା॰)] ଗହେତ୍ୱା [ଗହେତ୍ୱାନ (ସୀ॰ ସ୍ୟା॰ ପୀ॰)], ଘୋସେନ୍ତି ପୁରତୋପି ତେ ।
ପେସନାନିପି ଗଚ୍ଛନ୍ତି, ରଥଚରିୟାସୁ ସିକ୍ଖରେ ॥
ପରିଚାରକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ଚ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
କମଣ୍ଡଲୁଂ ଗହେତ୍ୱାନ, ୱଙ୍କଦଣ୍ଡଞ୍ଚ ବ୍ରାହ୍ମଣା ।
ପଚ୍ଚୁପେସ୍ସନ୍ତି ରାଜାନୋ, ଗାମେସୁ ନିଗମେସୁ ଚ ।
ନାଦିନ୍ନେ ୱୁଟ୍ଠହିସ୍ସାମ, ଗାମମ୍ହି ୱା ୱନମ୍ହି ୱା [ୱାମମ୍ହି ଚ ୱନମ୍ହି ଚ (ସୀ॰ ପୀ॰), ଗାମମ୍ହି ନିଗମମ୍ହି ୱା (ସ୍ୟା॰)]॥
ନିଗ୍ଗାହକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ଚ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ପରୂଳ୍ହକଚ୍ଛନଖଲୋମା, ପଙ୍କଦନ୍ତା ରଜସ୍ସିରା ।
ଓକିଣ୍ଣା ରଜରେଣୂହି, ୟାଚକା ୱିଚରନ୍ତି ତେ ॥
ଖାଣୁଘାତସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ଚ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ହରୀତକଂ [ହରୀଟକଂ (ବହୂସୁ)] ଆମଲକଂ, ଅମ୍ବଂ ଜମ୍ବୁଂ ୱିଭୀତକଂ [ଅମ୍ବଜମ୍ବୁୱିଭୀଟକଂ (ସୀ॰ ପୀ॰)]।
ଲବୁଜଂ ଦନ୍ତପୋଣାନି, ବେଲୁୱା ବଦରାନି ଚ ॥
ରାଜାୟତନଂ ଉଚ୍ଛୁ-ପୁଟଂ, ଧୂମନେତ୍ତଂ ମଧୁ-ଅଞ୍ଜନଂ ।
ଉଚ୍ଚାୱଚାନି ପଣିୟାନି, ୱିପଣେନ୍ତି ଜନାଧିପ ॥
ୱାଣିଜକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
କସି-ୱାଣିଜ୍ଜଂ [କସିଂ ୱଣିଜ୍ଜଂ (ସୀ॰ ପୀ॰)] କାରେନ୍ତି, ପୋସୟନ୍ତି ଅଜେଳକେ ।
କୁମାରିୟୋ ପୱେଚ୍ଛନ୍ତି, ୱିୱାହନ୍ତାୱହନ୍ତି ଚ ॥
ସମା ଅମ୍ବଟ୍ଠୱେସ୍ସେହି, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ଚ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ନିକ୍ଖିତ୍ତଭିକ୍ଖଂ ଭୁଞ୍ଜନ୍ତି, ଗାମେସ୍ୱେକେ ପୁରୋହିତା ।
ବହୂ ତେ [ନେ (ସ୍ୟା॰ କ॰)] ପରିପୁଚ୍ଛନ୍ତି, ଅଣ୍ଡଚ୍ଛେଦା ନିଲଞ୍ଛକା [ତିଲଞ୍ଛକା (ପୀ॰)]॥
ପସୂପି ତତ୍ଥ ହଞ୍ଞନ୍ତି, ମହିଂସା ସୂକରା ଅଜା ।
ଗୋଘାତକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ଅସିଚମ୍ମଂ ଗହେତ୍ୱାନ, ଖଗ୍ଗଂ ପଗ୍ଗୟ୍ହ ବ୍ରାହ୍ମଣା ।
ୱେସ୍ସପଥେସୁ ତିଟ୍ଠନ୍ତି, ସତ୍ଥଂ ଅବ୍ବାହୟନ୍ତିପି ॥
ସମା ଗୋପନିସାଦେହି, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଅପେତା ତେ ବ୍ରହ୍ମଞ୍ଞା,
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ଅରଞ୍ଞେ କୁଟିକଂ କତ୍ୱା, କୂଟାନି କାରୟନ୍ତି ତେ ।
ସସବିଳାରେ ବାଧେନ୍ତି, ଆଗୋଧା ମଚ୍ଛକଚ୍ଛପଂ ॥
ତେ ଲୁଦ୍ଦକସମା ରାଜ [ଲୁଦ୍ଦକା ତେ ମହାରାଜ (ସୀ॰ ପୀ॰)], ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ଅଞ୍ଞେ ଧନସ୍ସ କାମା ହି, ହେଟ୍ଠାମଞ୍ଚେ ପସକ୍କିତା [ପସକ୍ଖିତା (ସୀ॰ ସ୍ୟା॰ ପୀ॰)]।
ରାଜାନୋ ଉପରି ନ୍ହାୟନ୍ତି, ସୋମୟାଗେ ଉପଟ୍ଠିତେ ॥
ମଲମଜ୍ଜକସମା ରାଜ, ତେପି ୱୁଚ୍ଚନ୍ତି ବ୍ରାହ୍ମଣା ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
(ଇତି ରାଜା କୋରବ୍ୟୋ)
ନ ତେ ୱୁଚ୍ଚନ୍ତି ବ୍ରାହ୍ମଣା ।
ଅଞ୍ଞେ ୱିଧୁର ପରିୟେସ, ସୀଲୱନ୍ତେ ବହୁସ୍ସୁତେ ॥
ୱିରତେ ମେଥୁନା ଧମ୍ମା, ୟେ ମେ ଭୁଞ୍ଜେୟ୍ୟୁ ଭୋଜନଂ ।
ଦକ୍ଖିଣଂ ସମ୍ମ ଦସ୍ସାମ, ୟତ୍ଥ ଦିନ୍ନଂ ମହପ୍ଫଲଂ ॥
ଅତ୍ଥି ଖୋ ବ୍ରାହ୍ମଣା ଦେୱ, ସୀଲୱନ୍ତୋ ବହୁସ୍ସୁତା ।
ୱିରତା ମେଥୁନା ଧମ୍ମା, ୟେ ତେ ଭୁଞ୍ଜେୟ୍ୟୁ ଭୋଜନଂ ॥
ଏକଞ୍ଚ ଭତ୍ତଂ ଭୁଞ୍ଜନ୍ତି, ନ ଚ ମଜ୍ଜଂ ପିୱନ୍ତି ତେ ।
ଅକ୍ଖାତା ତେ ମହାରାଜ, ତାଦିସେ ନିପତାମସେ ॥
ଏତେ ଖୋ ବ୍ରାହ୍ମଣା ୱିଧୁର, ସୀଲୱନ୍ତୋ ବହୁସ୍ସୁତା ।
ଏତେ ୱିଧୁର ପରିୟେସ, ଖିପ୍ପଞ୍ଚ ନେ [ଖିପ୍ପଂୱ ନେ (କ॰)] ନିମନ୍ତୟାତି ॥
ଦସବ୍ରାହ୍ମଣଜାତକଂ ଦ୍ୱାଦସମଂ ।
୪୯୬. ଭିକ୍ଖାପରମ୍ପରଜାତକଂ (୧୩)
ସୁଖୁମାଲରୂପଂ ଦିସ୍ୱା [ଦିସ୍ୱାନ (କ॰ ସୀ॰ ଅଟ୍ଠ॰)], ରଟ୍ଠା ୱିୱନମାଗତଂ ।
କୂଟାଗାରୱରୂପେତଂ, ମହାସୟନମୁପାସିତଂ [ମୁପୋଚିତଂ (ବହୂସୁ)]॥
ତସ୍ସ ତେ ପେମକେନାହଂ, ଅଦାସିଂ ୱଡ୍ଢମୋଦନଂ [ବଦ୍ଧମୋଦନଂ (ସୀ॰ ପୀ॰)]।
ସାଲୀନଂ ୱିଚିତଂ ଭତ୍ତଂ, ସୁଚିଂ ମଂସୂପସେଚନଂ ॥
ତଂ ତ୍ୱଂ ଭତ୍ତଂ ପଟିଗ୍ଗୟ୍ହ, ବ୍ରାହ୍ମଣସ୍ସ ଅଦାସୟି [ଅଦାପୟି (ସୀ॰ ସ୍ୟା॰ ପୀ॰)]।
ଅତ୍ତାନଂ [ଅତ୍ତନା (ପୀ॰ ଅଟ୍ଠ॰ ପାଠନ୍ତରଂ)] ଅନସିତ୍ୱାନ, କୋୟଂ ଧମ୍ମୋ ନମତ୍ଥୁ ତେ ॥
ଆଚରିୟୋ ବ୍ରାହ୍ମଣୋ ମୟ୍ହଂ, କିଚ୍ଚାକିଚ୍ଚେସୁ ବ୍ୟାୱଟୋ [ୱାୱଟୋ (କ॰)]।
ଗରୁ ଚ ଆମନ୍ତନୀୟୋ [ଆମନ୍ତଣୀୟୋ (ସୀ॰ ପୀ॰)] ଚ, ଦାତୁମରହାମି ଭୋଜନଂ ॥
ବ୍ରାହ୍ମଣଂ ଦାନି ପୁଚ୍ଛାମି, ଗୋତମଂ ରାଜପୂଜିତଂ ।
ରାଜା ତେ ଭତ୍ତଂ ପାଦାସି, ସୁଚିଂ ମଂସୂପସେଚନଂ ॥
ତଂ ତ୍ୱଂ ଭତ୍ତଂ ପଟିଗ୍ଗୟ୍ହ, ଇସିସ୍ସ ଭୋଜନଂ ଅଦା ।
ଅଖେତ୍ତଞ୍ଞୂସି ଦାନସ୍ସ, କୋୟଂ ଧମ୍ମୋ ନମତ୍ଥୁ ତେ ॥
ଭରାମି ପୁତ୍ତ [ପୁତ୍ତେ (ସୀ॰ ପୀ॰)] ଦାରେ ଚ, ଘରେସୁ ଗଧିତୋ [ଗଥିତୋ (ସୀ॰ ପୀ॰)] ଅହଂ ।
ଭୁଞ୍ଜେ ମାନୁସକେ କାମେ, ଅନୁସାସାମି ରାଜିନୋ ॥
ଆରଞ୍ଞିକସ୍ସ [ଆରଞ୍ଞକସ୍ସ (ସୀ॰ ପୀ॰)] ଇସିନୋ, ଚିରରତ୍ତଂ ତପସ୍ସିନୋ ।
ୱୁଡ୍ଢସ୍ସ ଭାୱିତତ୍ତସ୍ସ, ଦାତୁମରହାମି ଭୋଜନଂ ॥
ଇସିଞ୍ଚ ଦାନି ପୁଚ୍ଛାମି, କିସଂ ଧମନିସନ୍ଥତଂ ।
ପରୂଳ୍ହକଚ୍ଛନଖଲୋମଂ, ପଙ୍କଦନ୍ତଂ ରଜସ୍ସିରଂ ॥
ଏକୋ ଅରଞ୍ଞେ ୱିହରସି [ୱିହାସି (କ॰)], ନାୱକଙ୍ଖସି ଜୀୱିତଂ ।
ଭିକ୍ଖୁ କେନ ତୟା ସେୟ୍ୟୋ, ୟସ୍ସ ତ୍ୱଂ ଭୋଜନଂ ଅଦା ॥
ଖଣନ୍ତାଲୁକଲମ୍ବାନି [ଖଣମାଲୁକଲମ୍ବାନି (ସ୍ୟା॰ କ॰)], ବିଲାଲିତକ୍କଲାନି ଚ [ବିଳାଲିତକ୍କଳାନି ଚ (ସୀ॰ ପୀ॰)]।
ଧୁନଂ ସାମାକନୀୱାରଂ, ସଙ୍ଘାରିୟଂ ପସାରିୟଂ [ସଂହାରିୟଂ ପହାରିୟଂ (ସ୍ୟା॰), ସଂସାରିୟଂ ପସାରିୟଂ (କ॰)]॥
ସାକଂ ଭିସଂ ମଧୁଂ ମଂସଂ, ବଦରାମଲକାନି ଚ ।
ତାନି ଆହରିତ୍ୱା [ଆହତ୍ୱ (ସୀ॰ ସ୍ୟା॰)] ଭୁଞ୍ଜାମି, ଅତ୍ଥି ମେ ସୋ ପରିଗ୍ଗହୋ ॥
ପଚନ୍ତୋ ଅପଚନ୍ତସ୍ସ, ଅମମସ୍ସ ସକିଞ୍ଚନୋ [ଅକିଞ୍ଚନୋ (କ॰)]।
ଅନାଦାନସ୍ସ ସାଦାନୋ, ଦାତୁମରହାମି ଭୋଜନଂ ॥
ଭିକ୍ଖୁଞ୍ଚ ଦାନି ପୁଚ୍ଛାମି, ତୁଣ୍ହୀମାସୀନ ସୁବ୍ବତଂ ।
ଇସି ତେ ଭତ୍ତଂ ପାଦାସି, ସୁଚିଂ ମଂସୂପସେଚନଂ ॥
ତଂ ତ୍ୱଂ ଭତ୍ତଂ ପଟିଗ୍ଗୟ୍ହ, ତୁଣ୍ହୀ ଭୁଞ୍ଜସି ଏକକୋ ।
ନାଞ୍ଞଂ କଞ୍ଚି [କିଞ୍ଚି (କ॰)] ନିମନ୍ତେସି, କୋୟଂ ଧମ୍ମୋ ନମତ୍ଥୁ ତେ ॥
ନ ପଚାମି ନ ପାଚେମି, ନ ଛିନ୍ଦାମି ନ ଛେଦୟେ ।
ତଂ ମଂ ଅକିଞ୍ଚନଂ ଞତ୍ୱା, ସବ୍ବପାପେହି ଆରତଂ ॥
ୱାମେନ ଭିକ୍ଖମାଦାୟ, ଦକ୍ଖିଣେନ କମଣ୍ଡଲୁଂ ।
ଇସି ମେ ଭତ୍ତଂ ପାଦାସି, ସୁଚିଂ ମଂସୂପସେଚନଂ ॥
ଏତେ ହି ଦାତୁମରହନ୍ତି, ସମମା ସପରିଗ୍ଗହା ।
ପଚ୍ଚନୀକମହଂ ମଞ୍ଞେ, ୟୋ ଦାତାରଂ ନିମନ୍ତୟେ ॥
ଅତ୍ଥାୟ ୱତ ମେ ଅଜ୍ଜ, ଇଧାଗଚ୍ଛି ରଥେସଭୋ ।
ସୋହଂ ଅଜ୍ଜ ପଜାନାମି [ଇତୋ ପୁବ୍ବେ ନ ଜାନାମି (ସୀ॰ ପୀ॰)], ୟତ୍ଥ ଦିନ୍ନଂ ମହପ୍ଫଲଂ ॥
ରଟ୍ଠେସୁ ଗିଦ୍ଧା ରାଜାନୋ, କିଚ୍ଚାକିଚ୍ଚେସୁ ବ୍ରାହ୍ମଣା ।
ଇସୀ ମୂଲଫଲେ ଗିଦ୍ଧା, ୱିପ୍ପମୁତ୍ତା ଚ ଭିକ୍ଖୱୋତି ॥
ଭିକ୍ଖାପରମ୍ପରଜାତକଂ ତେରସମଂ ।
ତସ୍ସୁଦ୍ଦାନଂ –
ସୁୱ କିନ୍ନର ମୁକ୍କ ଖରାଜିନସୋ, ଭିସଜାତ ମହେସି କପୋତୱରୋ ।
ଅଥ ମୋର ସତଚ୍ଛକ ୱାଣିଜକୋ, ଅଥ ରାଜ ସବ୍ରାହ୍ମଣ ଭିକ୍ଖପରନ୍ତି ॥
ପକିଣ୍ଣକନିପାତଂ ନିଟ୍ଠିତଂ ।
୧୫. ୱୀସତିନିପାତୋ
୪୯୭. ମାତଙ୍ଗଜାତକଂ (୧)
କୁତୋ ନୁ ଆଗଚ୍ଛସି ଦୁମ୍ମୱାସୀ [ରୁମ୍ମୱାସୀ (ସୀ॰ ପୀ॰)], ଓତଲ୍ଲକୋ ପଂସୁପିସାଚକୋୱ ।
ସଙ୍କାରଚୋଳଂ ପଟିମୁଞ୍ଚ [ପଟିମୁଚ୍ଚ (ସୀ॰ ପୀ॰)] କଣ୍ଠେ, କୋ ରେ ତୁୱଂ ହୋସି [ହୋହିସି (ସୀ॰ ପୀ॰)] ଅଦକ୍ଖିଣେୟ୍ୟୋ ॥
ଅନ୍ନଂ ତୱେଦଂ [ତୱ ଇଦଂ (କ॰ ସୀ॰ ପୀ॰), ତୱୟିଦଂ (ସ୍ୟା॰)] ପକତଂ ୟସସ୍ସି, ତଂ ଖଜ୍ଜରେ ଭୁଞ୍ଜରେ ପିୟ୍ୟରେ ଚ ।
ଜାନାସି ମଂ ତ୍ୱଂ ପରଦତ୍ତୂପଜୀୱିଂ, ଉତ୍ତିଟ୍ଠପିଣ୍ଡଂ ଲଭତଂ ସପାକୋ ॥
ଅନ୍ନଂ ମମେଦଂ [ମମ ଇଦଂ (କ॰ ସୀ॰ ପୀ॰), ମମୟିଦଂ (ସ୍ୟା॰)] ପକତଂ ବ୍ରାହ୍ମଣାନଂ, ଅତ୍ତତ୍ଥାୟ ସଦ୍ଦହତୋ ମମେଦଂ [ମମ ଇଦଂ (କ॰ ସୀ॰ ପୀ॰), ମମୟିଦଂ (ସ୍ୟା॰)]।
ଅପେହି ଏତ୍ତୋ କିମିଧଟ୍ଠିତୋସି, ନ ମାଦିସା ତୁୟ୍ହଂ ଦଦନ୍ତି ଜମ୍ମ ॥
ଥଲେ ଚ ନିନ୍ନେ ଚ ୱପନ୍ତି ବୀଜଂ, ଅନୂପଖେତ୍ତେ ଫଲମାସମାନା [ମାସସାନା (ସୀ॰ ପୀ॰), ମାସିଂ ସମାନା (ସ୍ୟା॰)]।
ଏତାୟ ସଦ୍ଧାୟ ଦଦାହି ଦାନଂ, ଅପ୍ପେୱ ଆରାଧୟେ ଦକ୍ଖିଣେୟ୍ୟେ ॥
ଖେତ୍ତାନି ମୟ୍ହଂ ୱିଦିତାନି ଲୋକେ, ୟେସାହଂ ବୀଜାନି ପତିଟ୍ଠପେମି ।
ୟେ ବ୍ରାହ୍ମଣା ଜାତିମନ୍ତୂପପନ୍ନା, ତାନୀଧ ଖେତ୍ତାନି ସୁପେସଲାନି ॥
ଜାତିମଦୋ ଚ ଅତିମାନିତା ଚ, ଲୋଭୋ ଚ ଦୋସୋ ଚ ମଦୋ ଚ ମୋହୋ ।
ଏତେ ଅଗୁଣା ୟେସୁ ଚ ସନ୍ତି [ୟେସୁ ୱସନ୍ତି (ସୀ॰ ପୀ॰)] ସବ୍ବେ, ତାନୀଧ ଖେତ୍ତାନି ଅପେସଲାନି ॥
ଜାତିମଦୋ ଚ ଅତିମାନିତା ଚ, ଲୋଭୋ ଚ ଦୋସୋ ଚ ମଦୋ ଚ ମୋହୋ ।
ଏତେ ଅଗୁଣା ୟେସୁ ନ ସନ୍ତି ସବ୍ବେ, ତାନୀଧ ଖେତ୍ତାନି ସୁପେସଲାନି ॥
କ୍ୱେତ୍ଥ ଗତା [କ୍ୱତ୍ଥ ଗତା (ସ୍ୟା॰), କତ୍ଥେୱ ଭଟ୍ଠା (ପୀ॰)] ଉପଜୋତିୟୋ ଚ, ଉପଜ୍ଝାୟୋ ଚ ଅଥୱା ଗଣ୍ଡକୁଚ୍ଛି [ଅଣ୍ଡକୁଚ୍ଛି (ସୀ॰ ସ୍ୟା॰ ପୀ॰)]।
ଇମସ୍ସ ଦଣ୍ଡଞ୍ଚ ୱଧଞ୍ଚ ଦତ୍ୱା, ଗଲେ ଗହେତ୍ୱା ଖଲୟାଥ [ଗଲୟାଥ (କ॰)] ଜମ୍ମଂ ॥
ଗିରିଂ ନଖେନ ଖଣସି, ଅୟୋ ଦନ୍ତେହି [ଦନ୍ତେନ (ସୀ॰ ପୀ॰)] ଖାଦସି ।
ଜାତୱେଦଂ ପଦହସି, ୟୋ ଇସିଂ ପରିଭାସସି ॥
ଇଦଂ ୱତ୍ୱାନ ମାତଙ୍ଗୋ, ଇସି ସଚ୍ଚପରକ୍କମୋ ।
ଅନ୍ତଲିକ୍ଖସ୍ମିଂ ପକ୍କାମି [ପକ୍କମି (କ॰)], ବ୍ରାହ୍ମଣାନଂ ଉଦିକ୍ଖତଂ ॥
ଆୱେଲ୍ଲିତଂ [ଅୱେଠିତଂ (ସୀ॰ ପୀ॰)] ପିଟ୍ଠିତୋ ଉତ୍ତମଙ୍ଗଂ, ବାହୁଂ [ବାହଂ (ସୀ॰ ପୀ॰)] ପସାରେତି ଅକମ୍ମନେୟ୍ୟଂ [ଅକମ୍ପନେୟ୍ୟଂ (କ॰)]।
ସେତାନି ଅକ୍ଖୀନି ୟଥା ମତସ୍ସ, କୋ ମେ ଇମଂ ପୁତ୍ତମକାସି ଏୱଂ ॥
ଇଧାଗମା ସମଣୋ ଦୁମ୍ମୱାସୀ, ଓତଲ୍ଲକୋ ପଂସୁପିସାଚକୋୱ ।
ସଙ୍କାରଚୋଳଂ ପଟିମୁଞ୍ଚ କଣ୍ଠେ, ସୋ ତେ ଇମଂ ପୁତ୍ତମକାସି ଏୱଂ ॥
କତମଂ ଦିସଂ ଅଗମା ଭୂରିପଞ୍ଞୋ, ଅକ୍ଖାଥ ମେ ମାଣୱା ଏତମତ୍ଥଂ ।
ଗନ୍ତ୍ୱାନ ତଂ ପଟିକରେମୁ ଅଚ୍ଚୟଂ, ଅପ୍ପେୱ ନଂ ପୁତ୍ତ ଲଭେମୁ ଜୀୱିତଂ ॥
ୱେହାୟସଂ ଅଗମା ଭୂରିପଞ୍ଞୋ, ପଥଦ୍ଧୁନୋ ପନ୍ନରସେୱ ଚନ୍ଦୋ ।
ଅପି ଚାପି ସୋ ପୁରିମଦିସଂ ଅଗଚ୍ଛି, ସଚ୍ଚପ୍ପଟିଞ୍ଞୋ ଇସି ସାଧୁରୂପୋ ॥
ଆୱେଲ୍ଲିତଂ ପିଟ୍ଠିତୋ ଉତ୍ତମଙ୍ଗଂ, ବାହୁଂ ପସାରେତି ଅକମ୍ମନେୟ୍ୟଂ ।
ସେତାନି ଅକ୍ଖୀନି ୟଥା ମତସ୍ସ, କୋ ମେ ଇମଂ ପୁତ୍ତମକାସି ଏୱଂ ॥
ୟକ୍ଖା ହୱେ ସନ୍ତି ମହାନୁଭାୱା, ଅନ୍ୱାଗତା ଇସୟୋ ସାଧୁରୂପା ।
ତେ ଦୁଟ୍ଠଚିତ୍ତଂ କୁପିତଂ ୱିଦିତ୍ୱା, ୟକ୍ଖା ହି ତେ ପୁତ୍ତମକଂସୁ ଏୱଂ ॥
ୟକ୍ଖା ଚ ମେ ପୁତ୍ତମକଂସୁ ଏୱଂ, ତ୍ୱଞ୍ଞେୱ ମେ ମା କୁଦ୍ଧୋ [କୁଦ୍ଧ (କ॰)] ବ୍ରହ୍ମଚାରି ।
ତୁମ୍ହେୱ [ତୁୟ୍ହେୱ (କ॰)] ପାଦେ ସରଣଂ ଗତାସ୍ମି, ଅନ୍ୱାଗତା ପୁତ୍ତସୋକେନ ଭିକ୍ଖୁ ॥
ତଦେୱ ହି ଏତରହି ଚ ମୟ୍ହଂ, ମନୋପଦୋସୋ ନ ମମତ୍ଥି [ମମ ନତ୍ଥି (ପୀ॰)] କୋଚି ।
ପୁତ୍ତୋ ଚ ତେ ୱେଦମଦେନ ମତ୍ତୋ, ଅତ୍ଥଂ ନ ଜାନାତି ଅଧିଚ୍ଚ ୱେଦେ ॥
ଅଦ୍ଧା ହୱେ ଭିକ୍ଖୁ ମୁହୁତ୍ତକେନ, ସମ୍ମୁୟ୍ହତେୱ ପୁରିସସ୍ସ ସଞ୍ଞା ।
ଏକାପରାଧଂ [ଏତାପରାଧଂ (କ॰)] ଖମ ଭୂରିପଞ୍ଞ, ନ ପଣ୍ଡିତା କୋଧବଲା ଭୱନ୍ତି ॥
ଇଦଞ୍ଚ ମୟ୍ହଂ ଉତ୍ତିଟ୍ଠପିଣ୍ଡଂ, ତୱ [ନତ୍ଥି ସୀ॰ ପୀ॰ ପୋତ୍ଥକେସୁ] ମଣ୍ଡବ୍ୟୋ ଭୁଞ୍ଜତୁ ଅପ୍ପପଞ୍ଞୋ ।
ୟକ୍ଖା ଚ ତେ ନଂ [ତେ ପୁତ୍ତଂ (ସ୍ୟା॰)] ନ ୱିହେଠୟେୟ୍ୟୁଂ, ପୁତ୍ତୋ ଚ ତେ ହେସ୍ସତି [ହୋହିତି (ସୀ॰ ପୀ॰)] ସୋ ଅରୋଗୋ ॥
ମଣ୍ଡବ୍ୟ ବାଲୋସି ପରିତ୍ତପଞ୍ଞୋ, ୟୋ ପୁଞ୍ଞଖେତ୍ତାନମକୋୱିଦୋସି ।
ମହକ୍କସାୱେସୁ ଦଦାସି ଦାନଂ, କିଲିଟ୍ଠକମ୍ମେସୁ ଅସଞ୍ଞତେସୁ ॥
ଜଟା ଚ କେସା ଅଜିନା ନିୱତ୍ଥା, ଜରୂଦପାନଂୱ ମୁଖଂ ପରୂଳ୍ହଂ ।
ପଜଂ ଇମଂ ପସ୍ସଥ ଦୁମ୍ମରୂପଂ [ରୁମ୍ମରୂପିଂ (ସୀ॰ ପୀ॰)], ନ ଜଟାଜିନଂ ତାୟତି ଅପ୍ପପଞ୍ଞଂ ॥
ୟେସଂ ରାଗୋ ଚ ଦୋସୋ ଚ, ଅୱିଜ୍ଜା ଚ ୱିରାଜିତା ।
ଖୀଣାସୱା ଅରହନ୍ତୋ, ତେସୁ ଦିନ୍ନଂ ମହପ୍ଫଲନ୍ତି ॥
ମାତଙ୍ଗଜାତକଂ ପଠମଂ ।
୪୯୮. ଚିତ୍ତସମ୍ଭୂତଜାତକଂ (୨)
ସବ୍ବଂ ନରାନଂ ସଫଲଂ ସୁଚିଣ୍ଣଂ, ନ କମ୍ମୁନା କିଞ୍ଚନ ମୋଘମତ୍ଥି ।
ପସ୍ସାମି ସମ୍ଭୂତଂ ମହାନୁଭାୱଂ, ସକମ୍ମୁନା ପୁଞ୍ଞଫଲୂପପନ୍ନଂ ॥
ସବ୍ବଂ ନରାନଂ ସଫଲଂ ସୁଚିଣ୍ଣଂ, ନ କମ୍ମୁନା କିଞ୍ଚନ ମୋଘମତ୍ଥି ।
କଚ୍ଚିନ୍ନୁ ଚିତ୍ତସ୍ସପି ଏୱମେୱଂ, ଇଦ୍ଧୋ ମନୋ ତସ୍ସ ୟଥାପି ମୟ୍ହଂ ॥
ସବ୍ବଂ ନରାନଂ ସଫଲଂ ସୁଚିଣ୍ଣଂ, ନ କମ୍ମୁନା କିଞ୍ଚନ ମୋଘମତ୍ଥି ।
ଚିତ୍ତମ୍ପି ଜାନାହି [ଚିତ୍ତଂ ୱିଜାନାହି (ସୀ॰ ପୀ॰)] ତଥେୱ ଦେୱ, ଇଦ୍ଧୋ ମନୋ ତସ୍ସ ୟଥାପି ତୁୟ୍ହଂ ॥
ଭୱଂ ନୁ ଚିତ୍ତୋ ସୁତମଞ୍ଞତୋ ତେ, ଉଦାହୁ ତେ କୋଚି ନଂ ଏତଦକ୍ଖା ।
ଗାଥା ସୁଗୀତା ନ ମମତ୍ଥି କଙ୍ଖା, ଦଦାମି ତେ ଗାମୱରଂ ସତଞ୍ଚ ॥
ନ ଚାହଂ ଚିତ୍ତୋ ସୁତମଞ୍ଞତୋ ମେ, ଇସୀ ଚ ମେ ଏତମତ୍ଥଂ ଅସଂସି ।
‘‘ଗନ୍ତ୍ୱାନ ରଞ୍ଞୋ ପଟିଗାହି [ପଟିଗାୟି (ସ୍ୟା॰ କ॰), ପଟିଗାୟ ( ?)] ଗାଥଂ, ଅପି ତେ ୱରଂ ଅତ୍ତମନୋ ଦଦେୟ୍ୟ’’ [ଅପି ନୁ ତେ ୱରଂ ଅତ୍ତମନୋ ଦଦେୟ୍ୟ (ସ୍ୟା॰), ଅପି ନୁ ତେ ଅତ୍ତମନୋ ୱରଂ ଦଦେ (କ॰)]॥
ୟୋଜେନ୍ତୁ ୱେ ରାଜରଥେ, ସୁକତେ ଚିତ୍ତସିବ୍ବନେ ।
କଚ୍ଛଂ ନାଗାନଂ ବନ୍ଧଥ, ଗୀୱେୟ୍ୟଂ ପଟିମୁଞ୍ଚଥ ॥
ଆହଞ୍ଞନ୍ତୁ [ଆହଞ୍ଞରେ (ସ୍ୟା॰)] ଭେରିମୁଦିଙ୍ଗସଙ୍ଖେ [ସଙ୍ଖା (ସ୍ୟା॰)], ସୀଘାନି ୟାନାନି ଚ ୟୋଜୟନ୍ତୁ ।
ଅଜ୍ଜେୱହଂ ଅସ୍ସମଂ ତଂ ଗମିସ୍ସଂ, ୟତ୍ଥେୱ ଦକ୍ଖିସ୍ସମିସିଂ ନିସିନ୍ନଂ ॥
ସୁଲଦ୍ଧଲାଭୋ ୱତ ମେ ଅହୋସି, ଗାଥା ସୁଗୀତା ପରିସାୟ ମଜ୍ଝେ ।
ସ୍ୱାହଂ ଇସିଂ ସୀଲୱତୂପପନ୍ନଂ, ଦିସ୍ୱା ପତୀତୋ ସୁମନୋହମସ୍ମି ॥
ଆସନଂ ଉଦକଂ ପଜ୍ଜଂ, ପଟିଗ୍ଗଣ୍ହାତୁ ନୋ ଭୱଂ ।
ଅଗ୍ଘେ ଭୱନ୍ତଂ ପୁଚ୍ଛାମ, ଅଗ୍ଘଂ କୁରୁତୁ ନୋ ଭୱଂ ॥
ରମ୍ମଞ୍ଚ ତେ ଆୱସଥଂ କରୋନ୍ତୁ, ନାରୀଗଣେହି ପରିଚାରୟସ୍ସୁ ।
କରୋହି ଓକାସମନୁଗ୍ଗହାୟ, ଉଭୋପି ମଂ ଇସ୍ସରିୟଂ କରୋମ ॥
ଦିସ୍ୱା ଫଲଂ ଦୁଚ୍ଚରିତସ୍ସ ରାଜ, ଅଥୋ ସୁଚିଣ୍ଣସ୍ସ ମହାୱିପାକଂ ।
ଅତ୍ତାନମେୱ ପଟିସଂୟମିସ୍ସଂ, ନ ପତ୍ଥୟେ ପୁତ୍ତ [ପୁତ୍ତଂ (ସୀ॰ ପୀ॰)] ପସୁଂ ଧନଂ ୱା ॥
ଦସେୱିମା ୱସ୍ସଦସା, ମଚ୍ଚାନଂ ଇଧ ଜୀୱିତଂ ।
ଅପତ୍ତଞ୍ଞେୱ ତଂ ଓଧିଂ, ନଳୋ ଛିନ୍ନୋୱ ସୁସ୍ସତି ॥
ତତ୍ଥ କା ନନ୍ଦି କା ଖିଡ୍ଡା, କା ରତୀ କା ଧନେସନା ।
କିଂ ମେ ପୁତ୍ତେହି ଦାରେହି, ରାଜ ମୁତ୍ତୋସ୍ମି ବନ୍ଧନା ॥
ସୋହଂ ଏୱଂ ପଜାନାମି [ସୋ ଅହଂ ସୁପ୍ପଜାନାମି (ସୀ॰ ପୀ॰)], ମଚ୍ଚୁ ମେ ନପ୍ପମଜ୍ଜତି ।
ଅନ୍ତକେନାଧିପନ୍ନସ୍ସ, କା ରତୀ କା ଧନେସନା ॥
ଜାତି ନରାନଂ ଅଧମା ଜନିନ୍ଦ, ଚଣ୍ଡାଲୟୋନି ଦ୍ୱିପଦାକନିଟ୍ଠା [ଦିପଦାକନିଟ୍ଠା (ସୀ॰ ପୀ॰)]।
ସକେହି କମ୍ମେହି ସୁପାପକେହି, ଚଣ୍ଡାଲଗବ୍ଭେ [ଚଣ୍ଡାଲିଗବ୍ଭେ (ସ୍ୟା॰)] ଅୱସିମ୍ହ ପୁବ୍ବେ ॥
ଚଣ୍ଡାଲାହୁମ୍ହ ଅୱନ୍ତୀସୁ, ମିଗା ନେରଞ୍ଜରଂ ପତି ।
ଉକ୍କୁସା ନମ୍ମଦାତୀରେ [ରମ୍ମଦାତୀରେ (ସ୍ୟା॰ କ॰)], ତ୍ୟଜ୍ଜ ବ୍ରାହ୍ମଣଖତ୍ତିୟା ॥
ଉପନୀୟତି ଜୀୱିତମପ୍ପମାୟୁ, ଜରୂପନୀତସ୍ସ ନ ସନ୍ତି ତାଣା ।
କରୋହି ପଞ୍ଚାଲ ମମେତ [ମମେୱ (ସ୍ୟା॰ କ॰)] ୱାକ୍ୟଂ, ମାକାସି କମ୍ମାନି ଦୁକ୍ଖୁଦ୍ରୟାନି ॥
ଉପନୀୟତି ଜୀୱିତମପ୍ପମାୟୁ, ଜରୂପନୀତସ୍ସ ନ ସନ୍ତି ତାଣା ।
କରୋହି ପଞ୍ଚାଲ ମମେତ ୱାକ୍ୟଂ, ମାକାସି କମ୍ମାନି ଦୁକ୍ଖପ୍ଫଲାନି ॥
ଉପନୀୟତି ଜୀୱିତମପ୍ପମାୟୁ, ଜରୂପନୀତସ୍ସ ନ ସନ୍ତି ତାଣା ।
କରୋହି ପଞ୍ଚାଲ ମମେତ ୱାକ୍ୟଂ, ମାକାସି କମ୍ମାନି ରଜସ୍ସିରାନି ॥
ଉପନୀୟତି ଜୀୱିତମପ୍ପମାୟୁ, ୱଣ୍ଣଂ ଜରା ହନ୍ତି ନରସ୍ସ ଜିୟ୍ୟତୋ ।
କରୋହି ପଞ୍ଚାଲ ମମେତ ୱାକ୍ୟଂ, ମାକାସି କମ୍ମଂ ନିରୟୂପପତ୍ତିୟା ॥
ଅଦ୍ଧା ହି ସଚ୍ଚଂ ୱଚନଂ ତୱେତଂ, ୟଥା ଇସୀ ଭାସସି ଏୱମେତଂ ।
କାମା ଚ ମେ ସନ୍ତି ଅନପ୍ପରୂପା, ତେ ଦୁଚ୍ଚଜା ମାଦିସକେନ ଭିକ୍ଖୁ ॥
ନାଗୋ ୟଥା ପଙ୍କମଜ୍ଝେ ବ୍ୟସନ୍ନୋ, ପସ୍ସଂ ଥଲଂ ନାଭିସମ୍ଭୋତି ଗନ୍ତୁଂ ।
ଏୱମ୍ପହଂ [ଏୱମହଂ (ସ୍ୟା॰)] କାମପଙ୍କେ ବ୍ୟସନ୍ନୋ, ନ ଭିକ୍ଖୁନୋ ମଗ୍ଗମନୁବ୍ବଜାମି ॥
ୟଥାପି ମାତା ଚ ପିତା ଚ ପୁତ୍ତଂ, ଅନୁସାସରେ କିନ୍ତି ସୁଖୀ ଭୱେୟ୍ୟ ।
ଏୱମ୍ପି ମଂ ତ୍ୱଂ ଅନୁସାସ ଭନ୍ତେ, ୟଥା ଚିରଂ [ୟମାଚରଂ (ସୀ॰ ପୀ॰ କ॰ ଅଟ୍ଠ॰)] ପେଚ୍ଚ ସୁଖୀ ଭୱେୟ୍ୟଂ ॥
ନୋ ଚେ ତୁୱଂ ଉସ୍ସହସେ ଜନିନ୍ଦ, କାମେ ଇମେ ମାନୁସକେ ପହାତୁଂ ।
ଧମ୍ମିଂ [ଧମ୍ମଂ (ସୀ॰ ପୀ॰)] ବଲିଂ ପଟ୍ଠପୟସ୍ସୁ ରାଜ, ଅଧମ୍ମକାରୋ ତୱ [ଅଧମ୍ମକାରୋ ଚ ତେ (ସୀ॰ ସ୍ୟା॰ ପୀ॰)] ମାହୁ ରଟ୍ଠେ ॥
ଦୂତା ୱିଧାୱନ୍ତୁ ଦିସା ଚତସ୍ସୋ, ନିମନ୍ତକା ସମଣବ୍ରାହ୍ମଣାନଂ ।
ତେ ଅନ୍ନପାନେନ ଉପଟ୍ଠହସ୍ସୁ, ୱତ୍ଥେନ ସେନାସନପଚ୍ଚୟେନ ଚ ॥
ଅନ୍ନେନ ପାନେନ ପସନ୍ନଚିତ୍ତୋ, ସନ୍ତପ୍ପୟ ସମଣବ୍ରାହ୍ମଣେ ଚ ।
ଦତ୍ୱା ଚ ଭୁତ୍ୱା ଚ ୟଥାନୁଭାୱଂ, ଅନିନ୍ଦିତୋ ସଗ୍ଗମୁପେହି [ମୁପେତି (ପୀ॰ କ॰)] ଠାନଂ ॥
ସଚେ ଚ ତଂ ରାଜ ମଦୋ ସହେୟ୍ୟ, ନାରୀଗଣେହି ପରିଚାରୟନ୍ତଂ ।
ଇମମେୱ ଗାଥଂ ମନସୀ କରୋହି, ଭାସେସି [ଭାସେହି (ସ୍ୟା॰ ପୀ॰ କ॰)] ଚେନଂ ପରିସାୟ ମଜ୍ଝେ ॥
ଅବ୍ଭୋକାସସୟୋ ଜନ୍ତୁ, ୱଜନ୍ତ୍ୟା ଖୀରପାୟିତୋ ।
ପରିକିଣ୍ଣୋ ସୁୱାନେହି [ସୁପିନେହି (ସୀ॰ ପୀ॰)], ସ୍ୱାଜ୍ଜ ରାଜାତି ୱୁଚ୍ଚତୀତି ॥
ଚିତ୍ତସମ୍ଭୂତଜାତକଂ ଦୁତିୟଂ ।
୪୯୯. ସିୱିଜାତକଂ (୩)
ଦୂରେ ଅପସ୍ସଂ ଥେରୋୱ, ଚକ୍ଖୁଂ ୟାଚିତୁମାଗତୋ ।
ଏକନେତ୍ତା ଭୱିସ୍ସାମ, ଚକ୍ଖୁଂ ମେ ଦେହି ୟାଚିତୋ ॥
କେନାନୁସିଟ୍ଠୋ ଇଧ ମାଗତୋସି, ୱନିବ୍ବକ [ୱଣିବ୍ବକ (ସୀ॰)] ଚକ୍ଖୁପଥାନି ୟାଚିତୁଂ ।
ସୁଦୁଚ୍ଚଜଂ ୟାଚସି ଉତ୍ତମଙ୍ଗଂ, ୟମାହୁ ନେତ୍ତଂ ପୁରିସେନ ଦୁଚ୍ଚଜଂ ॥
ୟମାହୁ ଦେୱେସୁ ସୁଜମ୍ପତୀତି, ମଘୱାତି ନଂ ଆହୁ ମନୁସ୍ସଲୋକେ ।
ତେନାନୁସିଟ୍ଠୋ ଇଧ ମାଗତୋସ୍ମି, ୱନିବ୍ବକୋ ଚକ୍ଖୁପଥାନି ୟାଚିତୁଂ ॥
ୱନିବ୍ବତୋ [ୱନିବ୍ବକୋ (ସ୍ୟା॰ ପୀ॰)] ମୟ୍ହ ୱନିଂ [ୱନଂ (କ॰), ୱଣିଂ (ସୀ॰ ସ୍ୟା॰ ପୀ॰)] ଅନୁତ୍ତରଂ, ଦଦାହି ତେ ଚକ୍ଖୁପଥାନି ୟାଚିତୋ ।
ଦଦାହି ମେ ଚକ୍ଖୁପଥଂ ଅନୁତ୍ତରଂ, ୟମାହୁ ନେତ୍ତଂ ପୁରିସେନ ଦୁଚ୍ଚଜଂ ॥
ୟେନ ଅତ୍ଥେନ ଆଗଚ୍ଛି [ଆଗଞ୍ଛି (ସୀ॰ ପୀ॰)], ୟମତ୍ଥମଭିପତ୍ଥୟଂ ।
ତେ ତେ ଇଜ୍ଝନ୍ତୁ ସଙ୍କପ୍ପା, ଲଭ ଚକ୍ଖୂନି ବ୍ରାହ୍ମଣ ॥
ଏକଂ ତେ ୟାଚମାନସ୍ସ, ଉଭୟାନି ଦଦାମହଂ ।
ସ ଚକ୍ଖୁମା ଗଚ୍ଛ ଜନସ୍ସ ପେକ୍ଖତୋ, ୟଦିଚ୍ଛସେ ତ୍ୱଂ ତଦତେ ସମିଜ୍ଝତୁ ॥
ମା ନୋ ଦେୱ ଅଦା ଚକ୍ଖୁଂ, ମା ନୋ ସବ୍ବେ ପରାକରି [ପରକ୍କରି (ସ୍ୟା॰ କ॰ ଅଟ୍ଠ॰), ପରିକ୍କରି (କ॰) ପରି + ଆ + କରି = ପରାକରି]।
ଧନଂ ଦେହି ମହାରାଜ, ମୁତ୍ତା ୱେଳୁରିୟା ବହୂ ॥
ୟୁତ୍ତେ ଦେୱ ରଥେ ଦେହି, ଆଜାନୀୟେ ଚଲଙ୍କତେ ।
ନାଗେ ଦେହି ମହାରାଜ, ହେମକପ୍ପନୱାସସେ ॥
ୟଥା ତଂ ସିୱୟୋ [ସୀୱିୟୋ (ସ୍ୟା॰)] ସବ୍ବେ, ସୟୋଗ୍ଗା ସରଥା ସଦା ।
ସମନ୍ତା ପରିକିରେୟ୍ୟୁଂ [ପରିକରେୟ୍ୟୁଂ (ସ୍ୟା॰ ପୀ॰)], ଏୱଂ ଦେହି ରଥେସଭ ॥
ୟୋ ୱେ ଦସ୍ସନ୍ତି ୱତ୍ୱାନ, ଅଦାନେ କୁରୁତେ ମନୋ ।
ଭୂମ୍ୟଂ [ଭୂମ୍ୟା (ସୀ॰ ପୀ॰)] ସୋ ପତିତଂ ପାସଂ, ଗୀୱାୟଂ ପଟିମୁଞ୍ଚତି ॥
ୟୋ ୱେ ଦସ୍ସନ୍ତି ୱତ୍ୱାନ, ଅଦାନେ କୁରୁତେ ମନୋ ।
ପାପା ପାପତରୋ ହୋତି, ସମ୍ପତ୍ତୋ ୟମସାଧନଂ ॥
ୟଞ୍ହି ୟାଚେ ତଞ୍ହି ଦଦେ, ୟଂ ନ ୟାଚେ ନ ତଂ ଦଦେ ।
ସ୍ୱାହଂ ତମେୱ ଦସ୍ସାମି, ୟଂ ମଂ ୟାଚତି ବ୍ରାହ୍ମଣୋ ॥
ଆୟୁଂ ନୁ ୱଣ୍ଣଂ ନୁ ସୁଖଂ ବଲଂ ନୁ, କିଂ ପତ୍ଥୟାନୋ ନୁ ଜନିନ୍ଦ ଦେସି ।
କଥଞ୍ହି ରାଜା ସିୱିନଂ ଅନୁତ୍ତରୋ, ଚକ୍ଖୂନି ଦଜ୍ଜା ପରଲୋକହେତୁ ॥
ନ ୱାହମେତଂ ୟସସା ଦଦାମି, ନ ପୁତ୍ତମିଚ୍ଛେ ନ ଧନଂ ନ ରଟ୍ଠଂ ।
ସତଞ୍ଚ ଧମ୍ମୋ ଚରିତୋ ପୁରାଣୋ, ଇଚ୍ଚେୱ ଦାନେ ରମତେ ମନୋ ମମ [ମମଂ (ସୀ॰ ପୀ॰)]॥
ସଖା ଚ ମିତ୍ତୋ ଚ ମମାସି ସୀୱିକ [ସୀୱକ (ସୀ॰ ପୀ॰)], ସୁସିକ୍ଖିତୋ ସାଧୁ କରୋହି ମେ ୱଚୋ ।
ଉଦ୍ଧରିତ୍ୱା [ଉଦ୍ଧତ୍ୱ (ସୀ॰), ଲଦ୍ଧ ତ୍ୱଂ (ପୀ॰)] ଚକ୍ଖୂନି ମମଂ ଜିଗୀସତୋ, ହତ୍ଥେସୁ ଠପେହି [ଆୱେସି (ସୀ॰)] ୱନିବ୍ବକସ୍ସ ॥
ଚୋଦିତୋ ସିୱିରାଜେନ, ସିୱିକୋ ୱଚନଙ୍କରୋ ।
ରଞ୍ଞୋ ଚକ୍ଖୂନୁଦ୍ଧରିତ୍ୱା [ଚକ୍ଖୂନି ଉଦ୍ଧତ୍ୱା (ସୀ॰ ପୀ॰)], ବ୍ରାହ୍ମଣସ୍ସୂପନାମୟି ।
ସଚକ୍ଖୁ ବ୍ରାହ୍ମଣୋ ଆସି, ଅନ୍ଧୋ ରାଜା ଉପାୱିସି ॥
ତତୋ ସୋ କତିପାହସ୍ସ, ଉପରୂଳ୍ହେସୁ ଚକ୍ଖୁସୁ ।
ସୂତଂ ଆମନ୍ତୟୀ ରାଜା, ସିୱୀନଂ ରଟ୍ଠୱଡ୍ଢନୋ ॥
ୟୋଜେହି ସାରଥି ୟାନଂ, ୟୁତ୍ତଞ୍ଚ ପଟିୱେଦୟ ।
ଉୟ୍ୟାନଭୂମିଂ ଗଚ୍ଛାମ, ପୋକ୍ଖରଞ୍ଞୋ ୱନାନି ଚ ॥
ସୋ ଚ ପୋକ୍ଖରଣୀତୀରେ [ପୋକ୍ଖରଣିୟା ତୀରେ (ସୀ॰ ପୀ॰)], ପଲ୍ଲଙ୍କେନ ଉପାୱିସି ।
ତସ୍ସ ସକ୍କୋ ପାତୁରହୁ, ଦେୱରାଜା ସୁଜମ୍ପତି ॥
ସକ୍କୋହମସ୍ମି ଦେୱିନ୍ଦୋ, ଆଗତୋସ୍ମି ତୱନ୍ତିକେ ।
ୱରଂ ୱରସ୍ସୁ ରାଜୀସି, ୟଂ କିଞ୍ଚି ମନସିଚ୍ଛସି ॥
ପହୂତଂ ମେ ଧନଂ ସକ୍କ, ବଲଂ କୋସୋ ଚନପ୍ପକୋ ।
ଅନ୍ଧସ୍ସ ମେ ସତୋ ଦାନି, ମରଣଞ୍ଞେୱ ରୁଚ୍ଚତି ॥
ୟାନି ସଚ୍ଚାନି ଦ୍ୱିପଦିନ୍ଦ, ତାନି ଭାସସ୍ସୁ ଖତ୍ତିୟ ।
ସଚ୍ଚଂ ତେ ଭଣମାନସ୍ସ, ପୁନ ଚକ୍ଖୁ ଭୱିସ୍ସତି ॥
ୟେ ମଂ ୟାଚିତୁମାୟନ୍ତି, ନାନାଗୋତ୍ତା ୱନିବ୍ବକା ।
ୟୋପି ମଂ ୟାଚତେ ତତ୍ଥ, ସୋପି ମେ ମନସୋ ପିୟୋ ।
ଏତେନ ସଚ୍ଚୱଜ୍ଜେନ, ଚକ୍ଖୁ ମେ ଉପପଜ୍ଜଥ ॥
ୟଂ ମଂ ସୋ ୟାଚିତୁଂ ଆଗା, ଦେହି ଚକ୍ଖୁନ୍ତି ବ୍ରାହ୍ମଣୋ ।
ତସ୍ସ ଚକ୍ଖୂନି ପାଦାସିଂ, ବ୍ରାହ୍ମଣସ୍ସ ୱନିବ୍ବତୋ [ୱଣିବ୍ବିନୋ (ସୀ॰), ୱନିବ୍ବିନୋ (ପୀ॰)]॥
ଭିୟ୍ୟୋ ମଂ ଆୱିସୀ ପୀତି, ସୋମନସ୍ସଞ୍ଚନପ୍ପକଂ ।
ଏତେନ ସଚ୍ଚୱଜ୍ଜେନ, ଦୁତିୟଂ ମେ ଉପପଜ୍ଜଥ ॥
ଧମ୍ମେନ ଭାସିତା ଗାଥା, ସିୱୀନଂ ରଟ୍ଠୱଡ୍ଢନ ।
ଏତାନି ତୱ ନେତ୍ତାନି, ଦିବ୍ବାନି ପଟିଦିସ୍ସରେ ॥
ତିରୋକୁଟ୍ଟଂ ତିରୋସେଲଂ, ସମତିଗ୍ଗୟ୍ହ ପବ୍ବତଂ ।
ସମନ୍ତା ୟୋଜନସତଂ, ଦସ୍ସନଂ ଅନୁଭୋନ୍ତୁ ତେ ॥
କୋ ନୀଧ ୱିତ୍ତଂ ନ ଦଦେୟ୍ୟ ୟାଚିତୋ, ଅପି ୱିସିଟ୍ଠଂ ସୁପିୟମ୍ପି ଅତ୍ତନୋ ।
ତଦିଙ୍ଘ ସବ୍ବେ ସିୱୟୋ ସମାଗତା, ଦିବ୍ବାନି ନେତ୍ତାନି ମମଜ୍ଜ ପସ୍ସଥ ॥
ତିରୋକୁଟ୍ଟଂ ତିରୋସେଲଂ, ସମତିଗ୍ଗୟ୍ହ ପବ୍ବତଂ ।
ସମନ୍ତା ୟୋଜନସତଂ, ଦସ୍ସନଂ ଅନୁଭୋନ୍ତି ମେ ॥
ନ ଚାଗମତ୍ତା ପରମତ୍ଥି କିଞ୍ଚି, ମଚ୍ଚାନଂ ଇଧ ଜୀୱିତେ ।
ଦତ୍ୱାନ ମାନୁସଂ [ଦତ୍ୱା ମାନୁସକଂ (ସୀ॰)] ଚକ୍ଖୁଂ, ଲଦ୍ଧଂ ମେ [ମେ ଇତି ପଦଂ ନତ୍ଥି ସୀ॰ ପୋତ୍ଥକେ] ଚକ୍ଖୁଂ ଅମାନୁସଂ ॥
ଏତମ୍ପି ଦିସ୍ୱା ସିୱୟୋ, ଦେଥ ଦାନାନି ଭୁଞ୍ଜଥ ।
ଦତ୍ୱା ଚ ଭୁତ୍ୱା ଚ ୟଥାନୁଭାୱଂ, ଅନିନ୍ଦିତା ସଗ୍ଗମୁପେଥ ଠାନନ୍ତି ॥
ସିୱିଜାତକଂ ତତିୟଂ ।
୫୦୦. ସିରୀମନ୍ତଜାତକଂ (୪)
ପଞ୍ଞାୟୁପେତଂ ସିରିୟା ୱିହୀନଂ, ୟସସ୍ସିନଂ ୱାପି ଅପେତପଞ୍ଞଂ ।
ପୁଚ୍ଛାମି ତଂ ସେନକ ଏତମତ୍ଥଂ, କମେତ୍ଥ ସେୟ୍ୟୋ କୁସଲା ୱଦନ୍ତି ॥
ଧୀରା ଚ ବାଲା ଚ ହୱେ ଜନିନ୍ଦ, ସିପ୍ପୂପପନ୍ନା ଚ ଅସିପ୍ପିନୋ ଚ ।
ସୁଜାତିମନ୍ତୋପି ଅଜାତିମସ୍ସ, ୟସସ୍ସିନୋ ପେସକରା [ପେସ୍ସକରା (ସୀ॰ ପୀ॰)] ଭୱନ୍ତି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ [ସିରିମାୱ (ସୀ॰ ସ୍ୟା॰ ପୀ॰)] ସେୟ୍ୟୋ ॥
ତୁୱମ୍ପି ପୁଚ୍ଛାମି ଅନୋମପଞ୍ଞ, ମହୋସଧ କେୱଲଧମ୍ମଦସ୍ସି ।
ବାଲଂ ୟସସ୍ସିଂ ପଣ୍ଡିତଂ ଅପ୍ପଭୋଗଂ, କମେତ୍ଥ ସେୟ୍ୟୋ କୁସଲା ୱଦନ୍ତି ॥
ପାପାନି କମ୍ମାନି କରୋତି ବାଲୋ [କରୋନ୍ତି ବାଲା (ସ୍ୟା॰ କ॰)], ଇଧମେୱ [ଇଦମେୱ (ସ୍ୟା॰ କ॰ ଅଟ୍ଠ॰), ଇମମେୱ (କ॰)] ସେୟ୍ୟୋ ଇତି ମଞ୍ଞମାନୋ [ମଞ୍ଞମାନା (ସ୍ୟା॰ କ॰)]।
ଇଧଲୋକଦସ୍ସୀ ପରଲୋକମଦସ୍ସୀ, ଉଭୟତ୍ଥ ବାଲୋ କଲିମଗ୍ଗହେସି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ନ ସିପ୍ପମେତଂ ୱିଦଧାତି ଭୋଗଂ, ନ ବନ୍ଧୁୱା [ନ ବନ୍ଧୱା (ସୀ॰ ସ୍ୟା॰ କ॰)] ନ ସରୀରୱଣ୍ଣୋ ୟୋ [ନ ସରୀରାୱକାସୋ (ସୀ॰ ସ୍ୟା॰ ପୀ॰)]।
ପସ୍ସେଳମୂଗଂ ସୁଖମେଧମାନଂ, ସିରୀ ହି ନଂ ଭଜତେ ଗୋରୱିନ୍ଦଂ [ଗୋରିମନ୍ଦଂ (ସୀ॰ ପୀ॰)]।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ଲଦ୍ଧା ସୁଖଂ ମଜ୍ଜତି ଅପ୍ପପଞ୍ଞୋ, ଦୁକ୍ଖେନ ଫୁଟ୍ଠୋପି ପମୋହମେତି ।
ଆଗନ୍ତୁନା ଦୁକ୍ଖସୁଖେନ ଫୁଟ୍ଠୋ, ପୱେଧତି ୱାରିଚରୋୱ ଘମ୍ମେ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ଦୁମଂ ୟଥା ସାଦୁଫଲଂ ଅରଞ୍ଞେ, ସମନ୍ତତୋ ସମଭିସରନ୍ତି [ସମଭିଚରନ୍ତି (ସୀ॰ ପୀ॰)] ପକ୍ଖୀ ।
ଏୱମ୍ପି ଅଡ୍ଢଂ ସଧନଂ ସଭୋଗଂ, ବହୁଜ୍ଜନୋ ଭଜତି ଅତ୍ଥହେତୁ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ନ ସାଧୁ ବଲୱା ବାଲୋ, ସାହସା ୱିନ୍ଦତେ ଧନଂ ।
କନ୍ଦନ୍ତମେତଂ ଦୁମ୍ମେଧଂ, କଡ୍ଢନ୍ତି ନିରୟଂ ଭୁସଂ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ୟା କାଚି ନଜ୍ଜୋ ଗଙ୍ଗମଭିସ୍ସୱନ୍ତି, ସବ୍ବାୱ ତା ନାମଗୋତ୍ତଂ ଜହନ୍ତି ।
ଗଙ୍ଗା ସମୁଦ୍ଦଂ ପଟିପଜ୍ଜମାନା, ନ ଖାୟତେ ଇଦ୍ଧିଂ ପଞ୍ଞୋପି ଲୋକେ [ଇଦ୍ଧିପରୋ ହି ଲୋକେ (କ॰ ସୀ॰ ସ୍ୟା॰), ଇଦ୍ଧିପରୋ ହି ଲୋକୋ (ସୀ॰ ପୀ॰ ଅଟ୍ଠ॰)]।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ୟମେତମକ୍ଖା ଉଦଧିଂ ମହନ୍ତଂ, ସୱନ୍ତି ନଜ୍ଜୋ ସବ୍ବକାଲମସଙ୍ଖ୍ୟଂ ।
ସୋ ସାଗରୋ ନିଚ୍ଚମୁଳାରୱେଗୋ, ୱେଲଂ ନ ଅଚ୍ଚେତି ମହାସମୁଦ୍ଦୋ ॥
ଏୱମ୍ପି ବାଲସ୍ସ ପଜପ୍ପିତାନି, ପଞ୍ଞଂ ନ ଅଚ୍ଚେତି ସିରୀ କଦାଚି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ଅସଞ୍ଞତୋ ଚେପି ପରେସମତ୍ଥଂ, ଭଣାତି ସନ୍ଧାନଗତୋ [ସଣ୍ଠାନଗତୋ (ସ୍ୟା॰ ପୀ॰), ସନ୍ଥାନଗତୋ (ସୀ॰)] ୟସସ୍ସୀ ।
ତସ୍ସେୱ ତଂ ରୂହତି ଞାତିମଜ୍ଝେ, ସିରୀ ହି ନଂ [ସିରିହୀନଂ (ସୀ॰ କ॰), ସିରୀହୀନଂ (ସ୍ୟା॰ ପୀ॰)] କାରୟତେ ନ ପଞ୍ଞା [ନ ପଞ୍ଞୋ (ସୀ॰), ନ ପଞ୍ଞଂ (ସ୍ୟା॰ କ॰)]।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ପରସ୍ସ ୱା ଅତ୍ତନୋ ୱାପି ହେତୁ, ବାଲୋ ମୁସା ଭାସତି ଅପ୍ପପଞ୍ଞୋ ।
ସୋ ନିନ୍ଦିତୋ ହୋତି ସଭାୟ ମଜ୍ଝେ, ପଚ୍ଛାପି [ପେଚ୍ଚମ୍ପି (ସୀ॰ ପୀ॰), ପେଚ୍ଚାପି ( ?)] ସୋ ଦୁଗ୍ଗତିଗାମୀ ହୋତି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ଅତ୍ଥମ୍ପି ଚେ ଭାସତି ଭୂରିପଞ୍ଞୋ, ଅନାଳ୍ହିୟୋ [ଅନାଲୟୋ (ପୀ॰)] ଅପ୍ପଧନୋ ଦଲିଦ୍ଦୋ ।
ନ ତସ୍ସ ତଂ ରୂହତି ଞାତିମଜ୍ଝେ, ସିରୀ ଚ ପଞ୍ଞାଣୱତୋ ନ ହୋତି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ପରସ୍ସ ୱା ଅତ୍ତନୋ ୱାପି ହେତୁ, ନ ଭାସତି ଅଲିକଂ ଭୂରିପଞ୍ଞୋ ।
ସୋ ପୂଜିତୋ ହୋତି ସଭାୟ ମଜ୍ଝେ, ପଚ୍ଛାପି ସୋ ସୁଗ୍ଗତିଗାମୀ ହୋତି ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ହତ୍ଥୀ ଗୱସ୍ସା ମଣିକୁଣ୍ଡଲା ଚ, ଥିୟୋ ଚ ଇଦ୍ଧେସୁ କୁଲେସୁ ଜାତା ।
ସବ୍ବାୱ ତା ଉପଭୋଗା ଭୱନ୍ତି, ଇଦ୍ଧସ୍ସ ପୋସସ୍ସ ଅନିଦ୍ଧିମନ୍ତୋ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ଅସଂୱିହିତକମ୍ମନ୍ତଂ, ବାଲଂ ଦୁମ୍ମେଧମନ୍ତିନଂ ।
ସିରୀ ଜହତି ଦୁମ୍ମେଧଂ, ଜିଣ୍ଣଂୱ ଉରଗୋ ତଚଂ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ପଞ୍ଚ ପଣ୍ଡିତା ମୟଂ ଭଦ୍ଦନ୍ତେ, ସବ୍ବେ ପଞ୍ଜଲିକା ଉପଟ୍ଠିତା ।
ତ୍ୱଂ ନୋ ଅଭିଭୁୟ୍ୟ ଇସ୍ସରୋସି, ସକ୍କୋୱ ଭୂତପତି ଦେୱରାଜା ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋ ନିହୀନୋ ସିରୀମାୱ ସେୟ୍ୟୋ ॥
ଦାସୋୱ ପଞ୍ଞସ୍ସ ୟସସ୍ସି ବାଲୋ, ଅତ୍ଥେସୁ ଜାତେସୁ ତଥାୱିଧେସୁ ।
ୟଂ ପଣ୍ଡିତୋ ନିପୁଣଂ ସଂୱିଧେତି, ସମ୍ମୋହମାପଜ୍ଜତି ତତ୍ଥ ବାଲୋ ।
ଏତମ୍ପି ଦିସ୍ୱାନ ଅହଂ ୱଦାମି, ପଞ୍ଞୋୱ ସେୟ୍ୟୋ ନ ୟସସ୍ସି ବାଲୋ ॥
ଅଦ୍ଧା ହି ପଞ୍ଞାୱ ସତଂ ପସତ୍ଥା, କନ୍ତା ସିରୀ ଭୋଗରତା ମନୁସ୍ସା ।
ଞାଣଞ୍ଚ ବୁଦ୍ଧାନମତୁଲ୍ୟରୂପଂ, ପଞ୍ଞଂ ନ ଅଚ୍ଚେତି ସିରୀ କଦାଚି ॥
ୟଂ ତଂ ଅପୁଚ୍ଛିମ୍ହ ଅକିତ୍ତୟୀ ନୋ, ମହୋସଧ କେୱଲଧମ୍ମଦସ୍ସୀ ।
ଗୱଂ ସହସ୍ସଂ ଉସଭଞ୍ଚ ନାଗଂ, ଆଜଞ୍ଞୟୁତ୍ତେ ଚ ରଥେ ଦସ ଇମେ ।
ପଞ୍ହସ୍ସ ୱେୟ୍ୟାକରଣେନ ତୁଟ୍ଠୋ, ଦଦାମି ତେ ଗାମୱରାନି ସୋଳସାତି ॥
ସିରୀମନ୍ତଜାତକଂ [ସିରିମନ୍ଦଜାତକଂ (ସୀ॰ ସ୍ୟା॰ ପୀ॰)] ଚତୁତ୍ଥଂ ।
୫୦୧. ରୋହଣମିଗଜାତକଂ (୫)
ଏତେ ୟୂଥା ପତିୟନ୍ତି, ଭୀତା ମରଣସ୍ସ [ମରଣା (ସ୍ୟା॰ ପୀ॰), ମରଣ (କ॰)] ଚିତ୍ତକ ।
ଗଚ୍ଛ ତୁୱମ୍ପି ମାକଙ୍ଖି, ଜୀୱିସ୍ସନ୍ତି ତୟା ସହ ॥
ନାହଂ ରୋହଣ [ରୋହନ୍ତ (ସୀ॰ ପୀ॰), ରୋହନ (ସ୍ୟା॰)] ଗଚ୍ଛାମି, ହଦୟଂ ମେ ଅୱକସ୍ସତି ।
ନ ତଂ ଅହଂ ଜହିସ୍ସାମି, ଇଧ ହିସ୍ସାମି ଜୀୱିତଂ ॥
ତେ ହି ନୂନ ମରିସ୍ସନ୍ତି, ଅନ୍ଧା ଅପରିଣାୟକା ।
ଗଚ୍ଛ ତୁୱମ୍ପି ମାକଙ୍ଖି, ଜୀୱିସ୍ସନ୍ତି ତୟା ସହ ॥
ନାହଂ ରୋହଣ ଗଚ୍ଛାମି, ହଦୟଂ ମେ ଅୱକସ୍ସତି ।
ନ ତଂ ବଦ୍ଧଂ [ବନ୍ଧଂ (କ॰)] ଜହିସ୍ସାମି, ଇଧ ହିସ୍ସାମି ଜୀୱିତଂ ॥
ଗଚ୍ଛ ଭୀରୁ ପଲାୟସ୍ସୁ, କୂଟେ ବଦ୍ଧୋସ୍ମି ଆୟସେ ।
ଗଚ୍ଛ ତୁୱମ୍ପି ମାକଙ୍ଖି, ଜୀୱିସ୍ସନ୍ତି ତୟା ସହ ॥
ନାହଂ ରୋହଣ ଗଚ୍ଛାମି, ହଦୟଂ ମେ ଅୱକସ୍ସତି ।
ନ ତଂ ଅହଂ ଜହିସ୍ସାମି, ଇଧ ହିସ୍ସାମି ଜୀୱିତଂ ॥
ତେ ହି ନୂନ ମରିସ୍ସନ୍ତି, ଅନ୍ଧା ଅପରିଣାୟକା ।
ଗଚ୍ଛ ତୁୱମ୍ପି ମାକଙ୍ଖି, ଜୀୱିସ୍ସନ୍ତି ତୟା ସହ ॥
ନାହଂ ରୋହଣ ଗଚ୍ଛାମି, ହଦୟଂ ମେ ଅୱକସ୍ସତି ।
ନ ତଂ ବଦ୍ଧଂ ଜହିସ୍ସାମି, ଇଧ ହିସ୍ସାମି ଜୀୱିତଂ ॥
ଅୟଂ ସୋ ଲୁଦ୍ଦକୋ ଏତି, ଲୁଦ୍ଦରୂପୋ [ରୁଦ୍ଦରୂପୋ (ସୀ॰ ପୀ॰)] ସହାୱୁଧୋ ।
ୟୋ ନୋ ୱଧିସ୍ସତି ଅଜ୍ଜ, ଉସୁନା ସତ୍ତିୟା ଅପି [ମପି (ସୀ॰ ସ୍ୟା॰ ପୀ॰)]॥
ସା ମୁହୁତ୍ତଂ ପଲାୟିତ୍ୱା, ଭୟଟ୍ଟା [ଭୟଟ୍ଠା (ପୀ॰)] ଭୟତଜ୍ଜିତା ।
ସୁଦୁକ୍କରଂ ଅକରା ଭୀରୁ, ମରଣାୟୂପନିୱତ୍ତଥ ॥
କିନ୍ନୁ ତେମେ ମିଗା ହୋନ୍ତି, ମୁତ୍ତା ବଦ୍ଧଂ ଉପାସରେ ।
ନ ତଂ ଚଜିତୁମିଚ୍ଛନ୍ତି, ଜୀୱିତସ୍ସପି କାରଣା ॥
ଭାତରୋ ହୋନ୍ତି ମେ ଲୁଦ୍ଦ, ସୋଦରିୟା ଏକମାତୁକା ।
ନ ମଂ ଚଜିତୁମିଚ୍ଛନ୍ତି, ଜୀୱିତସ୍ସପି କାରଣା ॥
ତେ ହି ନୂନ ମରିସ୍ସନ୍ତି, ଅନ୍ଧା ଅପରିଣାୟକା ।
ପଞ୍ଚନ୍ନଂ ଜୀୱିତଂ ଦେହି, ଭାତରଂ ମୁଞ୍ଚ ଲୁଦ୍ଦକ ॥
ସୋ ୱୋ ଅହଂ ପମୋକ୍ଖାମି, ମାତାପେତ୍ତିଭରଂ ମିଗଂ ।
ନନ୍ଦନ୍ତୁ ମାତାପିତରୋ, ମୁତ୍ତଂ ଦିସ୍ୱା ମହାମିଗଂ ॥
ଏୱଂ ଲୁଦ୍ଦକ ନନ୍ଦସ୍ସୁ, ସହ ସବ୍ବେହି ଞାତିଭି ।
ୟଥାହମଜ୍ଜ ନନ୍ଦାମି, ମୁତ୍ତଂ ଦିସ୍ୱା ମହାମିଗଂ ॥
କଥଂ ତ୍ୱଂ ପମୋକ୍ଖୋ [କଥଂ ପମୋକ୍ଖୋ (ସୀ॰ ପୀ॰), କଥଂ ତେ ପରୋକ୍ଖୋ ( ?)] ଆସି, ଉପନୀତସ୍ମି ଜୀୱିତେ ।
କଥଂ ପୁତ୍ତ ଅମୋଚେସି, କୂଟପାସମ୍ହ ଲୁଦ୍ଦକୋ ॥
ଭଣଂ କଣ୍ଣସୁଖଂ ୱାଚଂ, ହଦୟଙ୍ଗଂ ହଦୟସ୍ସିତଂ ।
ସୁଭାସିତାହି ୱାଚାହି, ଚିତ୍ତକୋ ମଂ ଅମୋଚୟି ॥
ଭଣଂ କଣ୍ଣସୁଖଂ ୱାଚଂ, ହଦୟଙ୍ଗଂ ହଦୟସ୍ସିତଂ ।
ସୁଭାସିତାହି ୱାଚାହି, ସୁତନା ମଂ ଅମୋଚୟି ॥
ସୁତ୍ୱା କଣ୍ଣସୁଖଂ ୱାଚଂ, ହଦୟଙ୍ଗଂ ହଦୟସ୍ସିତଂ ।
ସୁଭାସିତାନି ସୁତ୍ୱାନ, ଲୁଦ୍ଦକୋ ମଂ ଅମୋଚୟି ॥
ଏୱଂ ଆନନ୍ଦିତୋ ହୋତୁ, ସହ ଦାରେହି ଲୁଦ୍ଦକୋ ।
ୟଥା ମୟଜ୍ଜ ନନ୍ଦାମ, ଦିସ୍ୱା ରୋହଣମାଗତଂ ॥
ନନୁ ତ୍ୱଂ ଅୱଚ [ଅୱଚା (ସୀ॰ ପୀ॰)] ଲୁଦ୍ଦ, ‘‘ମିଗଚମ୍ମାନି ଆହରିଂ’’ ।
ଅଥ କେନ ନୁ ୱଣ୍ଣେନ, ମିଗଚମ୍ମାନି ନାହରି ॥
ଆଗମା ଚେୱ ହତ୍ଥତ୍ଥଂ, କୂଟପାସଞ୍ଚ ସୋ ମିଗୋ ।
ଅବଜ୍ଝି ତଂ [ଅବଜ୍ଝି ତଞ୍ଚ (ପୀ॰)] ମିଗରାଜଂ, ତଞ୍ଚ ମୁତ୍ତା ଉପାସରେ ॥
ତସ୍ସ ମେ ଅହୁ ସଂୱେଗୋ, ଅବ୍ଭୁତୋ ଲୋମହଂସନୋ ।
ଇମଞ୍ଚାହଂ ମିଗଂ ହଞ୍ଞେ, ଅଜ୍ଜ ହିସ୍ସାମି ଜୀୱିତଂ ॥
କୀଦିସା ତେ ମିଗା ଲୁଦ୍ଦ, କୀଦିସା ଧମ୍ମିକା ମିଗା ।
କଥଂୱଣ୍ଣା କଥଂସୀଲା, ବାଳ୍ହଂ ଖୋ ନେ ପସଂସସି ॥
ଓଦାତସିଙ୍ଗା ସୁଚିୱାଳା, ଜାତରୂପତଚୂପମା ।
ପାଦା ଲୋହିତକା ତେସଂ, ଅଞ୍ଜିତକ୍ଖା ମନୋରମା ॥
ଏଦିସା ତେ ମିଗା ଦେୱ, ଏଦିସା ଧମ୍ମିକା ମିଗା ।
ମାତାପେତ୍ତିଭରା ଦେୱ, ନ ତେ ସୋ ଅଭିହାରିତୁଂ [ଅଭିହାରୟୁଂ (କ॰ ସୀ॰), ଅଭିହାରୟିଂ (ସ୍ୟା॰), ଅଭିହାରୟଂ (ପୀ॰)]॥
ଦମ୍ମି ନିକ୍ଖସତଂ ଲୁଦ୍ଦ, ଥୂଲଞ୍ଚ ମଣିକୁଣ୍ଡଲଂ ।
ଚତୁସ୍ସଦଞ୍ଚ [ଚତୁରସ୍ସଞ୍ଚ (ସ୍ୟା॰ କ॰)] ପଲ୍ଲଙ୍କଂ, ଉମାପୁପ୍ଫସରିନ୍ନିଭଂ [ଉମ୍ମାପୁପ୍ଫସିରିନ୍ନିଭଂ (ସୀ॰ ସ୍ୟା॰ ପୀ॰ କ॰)]॥
ଦ୍ୱେ ଚ ସାଦିସିୟୋ ଭରିୟା, ଉସଭଞ୍ଚ ଗୱଂ ସତଂ ।
ଧମ୍ମେନ ରଜ୍ଜଂ କାରେସ୍ସଂ, ବହୁକାରୋ ମେସି ଲୁଦ୍ଦକ ॥
କସିୱାଣିଜ୍ଜା [କସୀ ୱଣିଜ୍ଜା (ସୀ॰ ସ୍ୟା॰ ପୀ॰)] ଇଣଦାନଂ, ଉଞ୍ଛାଚରିୟା ଚ ଲୁଦ୍ଦକ ।
ଏତେନ ଦାରଂ ପୋସେହି, ମା ପାପଂ ଅକରୀ ପୁନାତି [ଅକରା ପୁନନ୍ତି (କ॰ ସୀ॰ ପୀ॰)]॥
ରୋହଣମିଗଜାତକଂ [ରୋହନ୍ତମିଗଜାତକଂ (ସୀ॰ ପୀ॰)] ପଞ୍ଚମଂ ।
୫୦୨. ଚୂଳହଂସଜାତକଂ (୬)
ଏତେ ହଂସା ପକ୍କମନ୍ତି, ୱକ୍କଙ୍ଗା ଭୟମେରିତା ।
ହରିତ୍ତଚ ହେମୱଣ୍ଣ, କାମଂ ସୁମୁଖ ପକ୍କମ ॥
ଓହାୟ ମଂ ଞାତିଗଣା, ଏକଂ ପାସୱସଂ ଗତଂ ।
ଅନପେକ୍ଖମାନା [ନାପେକ୍ଖମାନା (କ॰)] ଗଚ୍ଛନ୍ତି, କିଂ ଏସୋ ଅୱହିୟ୍ୟସି ॥
ପତେୱ ପତତଂ ସେଟ୍ଠ, ନତ୍ଥି ବଦ୍ଧେ ସହାୟତା [ସହାୟକା (ସ୍ୟା॰)]।
ମା ଅନୀଘାୟ ହାପେସି, କାମଂ ସୁମୁଖ ପକ୍କମ ॥
ନାହଂ ‘‘ଦୁକ୍ଖପରେତୋ’’ତି [ଦୁକ୍ଖପରେତୋପି (କ॰)], ଧତରଟ୍ଠ ତୁୱଂ [ତୱଂ (ସୀ॰ ପୀ॰)] ଜହେ ।
ଜୀୱିତଂ ମରଣଂ ୱା ମେ, ତୟା ସଦ୍ଧିଂ ଭୱିସ୍ସତି ॥
ଏତଦରିୟସ୍ସ କଲ୍ୟାଣଂ, ୟଂ ତ୍ୱଂ ସୁମୁଖ ଭାସସି ।
ତଞ୍ଚ ୱୀମଂସମାନୋହଂ, ‘‘ପତତେତଂ’’ ଅୱସ୍ସଜିଂ ॥
ଅପଦେନ ପଦଂ ୟାତି, ଅନ୍ତଲିକ୍ଖଚରୋ [ଅନ୍ତଲିକ୍ଖେ ଚରୋ (ସୀ॰ ପୀ॰)] ଦିଜୋ ।
ଆରା ପାସଂ ନ ବୁଜ୍ଝି ତ୍ୱଂ, ହଂସାନଂ ପୱରୁତ୍ତମ [ପୱରୁତ୍ତମୋ (କ॰ ସୀ॰ ପୀ॰)]॥
ୟଦା ପରାଭୱୋ ହୋତି, ପୋସୋ ଜୀୱିତସଙ୍ଖୟେ ।
ଅଥ ଜାଲଞ୍ଚ ପାସଞ୍ଚ, ଆସଜ୍ଜାପି ନ ବୁଜ୍ଝତି ॥
ଏତେ ହଂସା ପକ୍କମନ୍ତି, ୱକ୍କଙ୍ଗା ଭୟମେରିତା ।
ହରିତ୍ତଚ ହେମୱଣ୍ଣ, ତ୍ୱଞ୍ଞେୱ [ତ୍ୱଞ୍ଚ ତଂ (ସୀ॰), ତ୍ୱଞ୍ଚ (ପୀ॰)] ଅୱହିୟ୍ୟସି ॥
ଏତେ ଭୁତ୍ୱା ଚ ପିତ୍ୱା ଚ, ପକ୍କମନ୍ତି ୱିହଙ୍ଗମା ।
ଅନପେକ୍ଖମାନା ୱକ୍କଙ୍ଗା, ତ୍ୱଞ୍ଞେୱେକୋ ଉପାସସି ॥
କିନ୍ନୁ ତ୍ୟାୟଂ [ତାୟଂ (ସୀ॰ ସ୍ୟା॰ ପୀ॰)] ଦିଜୋ ହୋତି, ମୁତ୍ତୋ ବଦ୍ଧଂ ଉପାସସି ।
ଓହାୟ ସକୁଣା ୟନ୍ତି, କିଂ ଏକୋ ଅୱହିୟ୍ୟସି ॥
ରାଜା ମେ ସୋ ଦିଜୋ ମିତ୍ତୋ, ସଖା ପାଣସମୋ ଚ ମେ ।
ନେୱ ନଂ ୱିଜହିସ୍ସାମି, ୟାୱ କାଲସ୍ସ ପରିୟାୟଂ ॥
ୟୋ ଚ ତ୍ୱଂ ସଖିନୋ ହେତୁ, ପାଣଂ ଚଜିତୁମିଚ୍ଛସି ।
ସୋ ତେ ସହାୟଂ ମୁଞ୍ଚାମି, ହୋତୁ ରାଜା ତୱାନୁଗୋ ॥
ଏୱଂ ଲୁଦ୍ଦକ ନନ୍ଦସ୍ସୁ, ସହ ସବ୍ବେହି ଞାତିଭି ।
ୟଥାହମଜ୍ଜ ନନ୍ଦାମି, ଦିସ୍ୱା ମୁତ୍ତଂ ଦିଜାଧିପଂ ॥
କଚ୍ଚିନ୍ନୁ ଭୋତୋ କୁସଲଂ, କଚ୍ଚି ଭୋତୋ ଅନାମୟଂ ।
କଚ୍ଚି ରଟ୍ଠମିଦଂ ଫୀତଂ, ଧମ୍ମେନ ମନୁସାସସି ॥
କୁସଲଞ୍ଚେୱ ମେ ହଂସ, ଅଥୋ ହଂସ ଅନାମୟଂ ।
ଅଥୋ ରଟ୍ଠମିଦଂ ଫୀତଂ, ଧମ୍ମେନ ମନୁସାସହଂ ॥
କଚ୍ଚି ଭୋତୋ ଅମଚ୍ଚେସୁ, ଦୋସୋ କୋଚି ନ ୱିଜ୍ଜତି ।
କଚ୍ଚି ଆରା ଅମିତ୍ତା ତେ, ଛାୟା ଦକ୍ଖିଣତୋରିୱ ॥
ଅଥୋପି ମେ ଅମଚ୍ଚେସୁ, ଦୋସୋ କୋଚି ନ ୱିଜ୍ଜତି ।
ଅଥୋ ଆରା ଅମିତ୍ତା ମେ, ଛାୟା ଦକ୍ଖିଣତୋରିୱ ॥
କଚ୍ଚି ତେ ସାଦିସୀ ଭରିୟା, ଅସ୍ସୱା ପିୟଭାଣିନୀ ।
ପୁତ୍ତରୂପୟସୂପେତା, ତୱ ଛନ୍ଦୱସାନୁଗା ॥
ଅଥୋ ମେ ସାଦିସୀ ଭରିୟା, ଅସ୍ସୱା ପିୟଭାଣିନୀ ।
ପୁତ୍ତରୂପୟସୂପେତା, ମମ ଛନ୍ଦୱସାନୁଗା ॥
କଚ୍ଚି ତେ ବହୱୋ ପୁତ୍ତା, ସୁଜାତା ରଟ୍ଠୱଡ୍ଢନ ।
ପଞ୍ଞାଜୱେନ ସମ୍ପନ୍ନା, ସମ୍ମୋଦନ୍ତି ତତୋ ତତୋ ॥
ସତମେକୋ ଚ ମେ ପୁତ୍ତା, ଧତରଟ୍ଠ ମୟା ସୁତା ।
ତେସଂ ତ୍ୱଂ କିଚ୍ଚମକ୍ଖାହି, ନାୱରୁଜ୍ଝନ୍ତି [ନାୱରଜ୍ଝନ୍ତି (କ॰ ସୀ॰ ପୀ॰)] ତେ ୱଚୋ ॥
ଉପପନ୍ନୋପି ଚେ ହୋତି, ଜାତିୟା ୱିନୟେନ ୱା ।
ଅଥ ପଚ୍ଛା କୁରୁତେ ୟୋଗଂ, କିଚ୍ଛେ [କିଚ୍ଚେ (ସୀ॰ ସ୍ୟା॰ ପୀ॰)] ଆପାସୁ [ଆୱାସୁ (ସ୍ୟା॰), ଆପଦାସୁ (କ॰)] ସୀଦତି ॥
ତସ୍ସ ସଂହୀରପଞ୍ଞସ୍ସ, ୱିୱରୋ ଜାୟତେ ମହା ।
ରତ୍ତିମନ୍ଧୋୱ [ନତ୍ତମନ୍ଧୋୱ (ସୀ॰ ପୀ॰)] ରୂପାନି, ଥୂଲାନି ମନୁପସ୍ସତି ॥
ଅସାରେ ସାରୟୋଗଞ୍ଞୂ, ମତିଂ ନ ତ୍ୱେୱ ୱିନ୍ଦତି ।
ସରଭୋୱ ଗିରିଦୁଗ୍ଗସ୍ମିଂ, ଅନ୍ତରାୟେୱ ସୀଦତି ॥
ହୀନଜଚ୍ଚୋପି ଚେ ହୋତି, ଉଟ୍ଠାତା ଧିତିମା ନରୋ ।
ଆଚାରସୀଲସମ୍ପନ୍ନୋ, ନିସେ ଅଗ୍ଗୀୱ ଭାସତି ॥
ଏତଂ ମେ ଉପମଂ କତ୍ୱା, ପୁତ୍ତେ ୱିଜ୍ଜାସୁ ୱାଚୟ [ଠାପସ (ସ୍ୟା॰ କ॰)]।
ସଂୱିରୂଳ୍ହେଥ ମେଧାୱୀ, ଖେତ୍ତେ ବୀଜଂୱ [ଖେତ୍ତବୀଜଂୱ (ସୀ॰ ପୀ॰)] ୱୁଟ୍ଠିୟାତି ॥
ଚୂଳହଂସଜାତକଂ ଛଟ୍ଠଂ ।
୫୦୩. ସତ୍ତିଗୁମ୍ବଜାତକଂ (୭)
ମିଗଲୁଦ୍ଦୋ ମହାରାଜା, ପଞ୍ଚାଲାନଂ ରଥେସଭୋ ।
ନିକ୍ଖନ୍ତୋ ସହ ସେନାୟ, ଓଗଣୋ ୱନମାଗମା ॥
ତତ୍ଥଦ୍ଦସା ଅରଞ୍ଞସ୍ମିଂ, ତକ୍କରାନଂ କୁଟିଂ କତଂ ।
ତସ୍ସା [ତସ୍ମା (ସ୍ୟା॰ ପୀ॰ କ॰)] କୁଟିୟା ନିକ୍ଖମ୍ମ, ସୁୱୋ ଲୁଦ୍ଦାନି ଭାସତି ॥
ସମ୍ପନ୍ନୱାହନୋ ପୋସୋ, ୟୁୱା ସମ୍ମଟ୍ଠକୁଣ୍ଡଲୋ [କୁଣ୍ଡଲୀ (ସ୍ୟା॰ କ॰)]।
ସୋଭତି ଲୋହିତୁଣ୍ହୀସୋ, ଦିୱା ସୂରିୟୋୱ ଭାସତି ॥
ମଜ୍ଝନ୍ହିକେ [ମଜ୍ଝନ୍ତିକେ (ସବ୍ବତ୍ଥ)] ସମ୍ପତିକେ, ସୁତ୍ତୋ ରାଜା ସସାରଥି ।
ହନ୍ଦସ୍ସାଭରଣଂ ସବ୍ବଂ, ଗଣ୍ହାମ ସାହସା [ସହସା (ସୀ॰ ସ୍ୟା॰ ପୀ॰)] ମୟଂ ॥
ନିସୀଥେପି ରହୋ ଦାନି, ସୁତ୍ତୋ ରାଜା ସସାରଥି ।
ଆଦାୟ ୱତ୍ଥଂ ମଣିକୁଣ୍ଡଲଞ୍ଚ, ହନ୍ତ୍ୱାନ ସାଖାହି ଅୱତ୍ଥରାମ ॥
କିନ୍ନୁ ଉମ୍ମତ୍ତରୂପୋୱ, ସତ୍ତିଗୁମ୍ବ ପଭାସସି ।
ଦୁରାସଦା ହି ରାଜାନୋ, ଅଗ୍ଗି ପଜ୍ଜଲିତୋ ୟଥା ॥
ଅଥ ତ୍ୱଂ ପତିକୋଲମ୍ବ, ମତ୍ତୋ ଥୁଲ୍ଲାନି ଗଜ୍ଜସି ।
ମାତରି ମୟ୍ହଂ ନଗ୍ଗାୟ, କିନ୍ନୁ ତ୍ୱଂ ୱିଜିଗୁଚ୍ଛସେ ॥
ଉଟ୍ଠେହି ସମ୍ମ ତରମାନୋ, ରଥଂ ୟୋଜେହି ସାରଥି ।
ସକୁଣୋ ମେ ନ ରୁଚ୍ଚତି, ଅଞ୍ଞଂ ଗଚ୍ଛାମ ଅସ୍ସମଂ ॥
ୟୁତ୍ତୋ ରଥୋ ମହାରାଜ, ୟୁତ୍ତୋ ଚ ବଲୱାହନୋ ।
ଅଧିତିଟ୍ଠ ମହାରାଜ, ଅଞ୍ଞଂ ଗଚ୍ଛାମ ଅସ୍ସମଂ ॥
କୋ ନୁମେୱ ଗତା [କ୍ୱ ନୁ’ମେ’ପଗତା ( ?)] ସବ୍ବେ, ୟେ ଅସ୍ମିଂ ପରିଚାରକା ।
ଏସ ଗଚ୍ଛତି ପଞ୍ଚାଲୋ, ମୁତ୍ତୋ ତେସଂ ଅଦସ୍ସନା ॥
କୋଦଣ୍ଡକାନି ଗଣ୍ହଥ, ସତ୍ତିୟୋ ତୋମରାନି ଚ ।
ଏସ ଗଚ୍ଛତି ପଞ୍ଚାଲୋ, ମା ୱୋ ମୁଞ୍ଚିତ୍ଥ ଜୀୱତଂ [ଜୀୱିତଂ (ବହୂସୁ)]॥
ଅଥାପରୋ ପଟିନନ୍ଦିତ୍ଥ, ସୁୱୋ ଲୋହିତତୁଣ୍ଡକୋ ।
ସ୍ୱାଗତଂ ତେ ମହାରାଜ, ଅଥୋ ତେ ଅଦୁରାଗତଂ ।
ଇସ୍ସରୋସି ଅନୁପ୍ପତ୍ତୋ, ୟଂ ଇଧତ୍ଥି ପୱେଦୟ ॥
ତିନ୍ଦୁକାନି ପିୟାଲାନି, ମଧୁକେ କାସୁମାରିୟୋ ।
ଫଲାନି ଖୁଦ୍ଦକପ୍ପାନି, ଭୁଞ୍ଜ ରାଜ ୱରଂ ୱରଂ ॥
ଇଦମ୍ପି ପାନୀୟଂ ସୀତଂ, ଆଭତଂ ଗିରିଗବ୍ଭରା ।
ତତୋ ପିୱ ମହାରାଜ, ସଚେ ତ୍ୱଂ ଅଭିକଙ୍ଖସି ॥
ଅରଞ୍ଞଂ ଉଞ୍ଛାୟ ଗତା, ୟେ ଅସ୍ମିଂ ପରିଚାରକା ।
ସୟଂ ଉଟ୍ଠାୟ ଗଣ୍ହୱ୍ହୋ, ହତ୍ଥା ମେ ନତ୍ଥି ଦାତୱେ ॥
ଭଦ୍ଦକୋ ୱତୟଂ ପକ୍ଖୀ, ଦିଜୋ ପରମଧମ୍ମିକୋ ।
ଅଥେସୋ ଇତରୋ ପକ୍ଖୀ, ସୁୱୋ ଲୁଦ୍ଦାନି ଭାସତି ॥
‘‘ଏତଂ ହନଥ ବନ୍ଧଥ, ମା ୱୋ ମୁଞ୍ଚିତ୍ଥ ଜୀୱତଂ’’ ।
ଇଚ୍ଚେୱଂ ୱିଲପନ୍ତସ୍ସ, ସୋତ୍ଥିଂ [ସୋତ୍ଥୀ (ସ୍ୟା॰)] ପତ୍ତୋସ୍ମି ଅସ୍ସମଂ ॥
ଭାତରୋସ୍ମ ମହାରାଜ, ସୋଦରିୟା ଏକମାତୁକା ।
ଏକରୁକ୍ଖସ୍ମିଂ ସଂୱଡ୍ଢା, ନାନାଖେତ୍ତଗତା ଉଭୋ ॥
ସତ୍ତିଗୁମ୍ବୋ ଚ ଚୋରାନଂ, ଅହଞ୍ଚ ଇସୀନଂ ଇଧ ।
ଅସତଂ ସୋ, ସତଂ ଅହଂ, ତେନ ଧମ୍ମେନ ନୋ ୱିନା ॥
ତତ୍ଥ ୱଧୋ ଚ ବନ୍ଧୋ ଚ, ନିକତୀ ୱଞ୍ଚନାନି ଚ ।
ଆଲୋପା ସାହସାକାରା, ତାନି ସୋ ତତ୍ଥ ସିକ୍ଖତି ॥
ଇଧ ସଚ୍ଚଞ୍ଚ ଧମ୍ମୋ ଚ, ଅହିଂସା ସଂୟମୋ ଦମୋ ।
ଆସନୂଦକଦାୟୀନଂ, ଅଙ୍କେ ୱଦ୍ଧୋସ୍ମି ଭାରଧ [ଭାରତ (ସୀ॰ ସ୍ୟା॰ ପୀ॰)]॥
ୟଂ ୟଞ୍ହି ରାଜ ଭଜତି, ସନ୍ତଂ ୱା ୟଦି ୱା ଅସଂ ।
ସୀଲୱନ୍ତଂ ୱିସୀଲଂ ୱା, ୱସଂ ତସ୍ସେୱ ଗଚ୍ଛତି ॥
ୟାଦିସଂ କୁରୁତେ ମିତ୍ତଂ, ୟାଦିସଂ ଚୂପସେୱତି ।
ସୋପି ତାଦିସକୋ ହୋତି, ସହୱାସୋ ହି [ସହୱାସୋପି (ସ୍ୟା॰ କ॰)] ତାଦିସୋ ॥
ସେୱମାନୋ ସେୱମାନଂ, ସମ୍ଫୁଟ୍ଠୋ ସମ୍ଫୁସଂ ପରଂ ।
ସରୋ ଦିଦ୍ଧୋ କଲାପଂୱ, ଅଲିତ୍ତମୁପଲିମ୍ପତି ।
ଉପଲେପଭୟା [ଉପଲିମ୍ପଭୟା (ସ୍ୟା॰ କ॰)] ଧୀରୋ, ନେୱ ପାପସଖା ସିୟା ॥
ପୂତିମଚ୍ଛଂ କୁସଗ୍ଗେନ, ୟୋ ନରୋ ଉପନୟ୍ହତି ।
କୁସାପି ପୂତି [ପୂତୀ (ସୀ॰ ପୀ॰)] ୱାୟନ୍ତି, ଏୱଂ ବାଲୂପସେୱନା ॥
ତଗରଞ୍ଚ ପଲାସେନ, ୟୋ ନରୋ ଉପନୟ୍ହତି ।
ପତ୍ତାପି ସୁରଭି [ସୁରଭୀ (ସୀ॰ ସ୍ୟା॰ ପୀ॰)] ୱାୟନ୍ତି, ଏୱଂ ଧୀରୂପସେୱନା ॥
ତସ୍ମା ପତ୍ତପୁଟସ୍ସେୱ [ଫଲପୁଟସ୍ସେୱ (ସୀ॰ ପୀ॰), ପଲପୁଟସ୍ସେୱ (କ॰ ଅଟ୍ଠ॰), ପଲାସପୁଟସ୍ସେୱ (ସ୍ୟା॰ କ॰)], ଞତ୍ୱା ସମ୍ପାକମତ୍ତନୋ ।
ଅସନ୍ତେ ନୋପସେୱେୟ୍ୟ, ସନ୍ତେ ସେୱେୟ୍ୟ ପଣ୍ଡିତୋ ।
ଅସନ୍ତୋ ନିରୟଂ ନେନ୍ତି, ସନ୍ତୋ ପାପେନ୍ତି ସୁଗ୍ଗତିନ୍ତି ॥
ସତ୍ତିଗୁମ୍ବଜାତକଂ ସତ୍ତମଂ ।
୫୦୪. ଭଲ୍ଲାତିୟଜାତକଂ (୮)
ଭଲ୍ଲାତିୟୋ [ଭଲ୍ଲାଟିୟୋ (ସୀ॰ ପୀ॰)] ନାମ ଅହୋସି ରାଜା, ରଟ୍ଠଂ ପହାୟ ମିଗୱଂ ଅଚାରି ସୋ ।
ଅଗମା ଗିରିୱରଂ ଗନ୍ଧମାଦନଂ, ସୁପୁପ୍ଫିତଂ [ସମ୍ପୁପ୍ଫିତଂ (ସୀ॰ ପୀ॰)] କିମ୍ପୁରିସାନୁଚିଣ୍ଣଂ ॥
ସାଳୂରସଙ୍ଘଞ୍ଚ ନିସେଧୟିତ୍ୱା, ଧନୁଂ [ଧନୁ (ସୀ॰ ସ୍ୟା॰ ପୀ॰)] କଲାପଞ୍ଚ ସୋ ନିକ୍ଖିପିତ୍ୱା ।
ଉପାଗମି ୱଚନଂ ୱତ୍ତୁକାମୋ, ୟତ୍ଥଟ୍ଠିତା କିମ୍ପୁରିସା ଅହେସୁଂ ॥
ହିମଚ୍ଚୟେ ହେମୱତାୟ ତୀରେ, କିମିଧଟ୍ଠିତା ମନ୍ତୟୱ୍ହୋ ଅଭିଣ୍ହଂ ।
ପୁଚ୍ଛାମି ୱୋ ମାନୁସଦେହୱଣ୍ଣେ, କଥଂ ନୁ [କଥଂ ୱୋ (ସୀ॰ ସ୍ୟା॰ ପୀ॰)] ଜାନନ୍ତି ମନୁସ୍ସଲୋକେ ॥
ମଲ୍ଲଂ ଗିରିଂ ପଣ୍ଡରକଂ ତିକୂଟଂ, ସୀତୋଦକା [ସୀତୋଦିୟା (ସୀ॰ ପୀ॰), ସୀତୋଦିକା ( ?)] ଅନୁୱିଚରାମ ନଜ୍ଜୋ ।
ମିଗା ମନୁସ୍ସାୱ ନିଭାସୱଣ୍ଣା, ଜାନନ୍ତି ନୋ କିମ୍ପୁରିସାତି ଲୁଦ୍ଦ ॥
ସୁକିଚ୍ଛରୂପଂ ପରିଦେୱୟୱ୍ହୋ [ପରିଦେୱଥୱ୍ହୋ ( ?) ମୋଗ୍ଗଲ୍ଲାନବ୍ୟାକରଣେ ୬.୩୮ ସୁତ୍ତଂ], ଆଲିଙ୍ଗିତୋ ଚାସି ପିୟୋ ପିୟାୟ ।
ପୁଚ୍ଛାମି ୱୋ ମାନୁସଦେହୱଣ୍ଣେ, କିମିଧ ୱନେ ରୋଦଥ ଅପ୍ପତୀତା ॥
ସୁକିଚ୍ଛରୂପଂ ପରିଦେୱୟୱ୍ହୋ, ଆଲିଙ୍ଗିତୋ ଚାସି ପିୟୋ ପିୟାୟ ।
ପୁଚ୍ଛାମି ୱୋ ମାନୁସଦେହୱଣ୍ଣେ, କିମିଧ ୱନେ ୱିଲପଥ ଅପ୍ପତୀତା ॥
ସୁକିଚ୍ଛରୂପଂ ପରିଦେୱୟୱ୍ହୋ, ଆଲିଙ୍ଗିତୋ ଚାସି ପିୟୋ ପିୟାୟ ।
ପୁଚ୍ଛାମି ୱୋ ମାନୁସଦେହୱଣ୍ଣେ, କିମିଧ ୱନେ ସୋଚଥ ଅପ୍ପତୀତା ॥
ମୟେକରତ୍ତଂ [ରତ୍ତିଂ (ପୀ॰)] ୱିପ୍ପୱସିମ୍ହ ଲୁଦ୍ଦ, ଅକାମକା ଅଞ୍ଞମଞ୍ଞଂ ସରନ୍ତା ।
ତମେକରତ୍ତଂ ଅନୁତପ୍ପମାନା, ସୋଚାମ ‘‘ସା ରତ୍ତି ପୁନଂ ନ ହେସ୍ସତି’’ ॥
ୟମେକରତ୍ତଂ ଅନୁତପ୍ପଥେତଂ, ଧନଂ ୱ ନଟ୍ଠଂ ପିତରଂ ୱ ପେତଂ ।
ପୁଚ୍ଛାମି ୱୋ ମାନୁସଦେହୱଣ୍ଣେ, କଥଂ ୱିନା ୱାସମକପ୍ପୟିତ୍ଥ ॥
ୟମିମଂ [ୟୟିମଂ (କ॰ ସୀ॰)] ନଦିଂ ପସ୍ସସି ସୀଘସୋତଂ, ନାନାଦୁମଚ୍ଛାଦନଂ ସେଲକୂଲଂ [ଦୁମଚ୍ଛଦନଂ ସେଲକୂଟଂ (ସୀ॰ ପୀ॰), ଦୁମସଞ୍ଛନ୍ନଂ ସେଲକୂଲଂ (କ॰)]।
ତଂ ମେ ପିୟୋ ଉତ୍ତରି ୱସ୍ସକାଲେ, ମମଞ୍ଚ ମଞ୍ଞଂ ଅନୁବନ୍ଧତୀତି ॥
ଅହଞ୍ଚ ଅଙ୍କୋଲକମୋଚିନାମି, ଅତିମୁତ୍ତକଂ ସତ୍ତଲିୟୋଥିକଞ୍ଚ ।
‘‘ପିୟୋ ଚ ମେ ହେହିତି ମାଲଭାରୀ, ଅହଞ୍ଚ ନଂ ମାଲିନୀ ଅଜ୍ଝୁପେସ୍ସଂ’’ ॥
ଅହଞ୍ଚିଦଂ କୁରୱକମୋଚିନାମି, ଉଦ୍ଦାଲକା ପାଟଲିସିନ୍ଧୁୱାରକା [ସିନ୍ଧୁୱାରିତା (ସ୍ୟା॰ ପୀ॰ କ॰)]।
‘‘ପିୟୋ ଚ ମେ ହେହିତି ମାଲଭାରୀ, ଅହଞ୍ଚ ନଂ ମାଲିନୀ ଅଜ୍ଝୁପେସ୍ସଂ’’ ॥
ଅହଞ୍ଚ ସାଲସ୍ସ ସୁପୁପ୍ଫିତସ୍ସ, ଓଚେୟ୍ୟ ପୁପ୍ଫାନି କରୋମି ମାଲଂ ।
‘‘ପିୟୋ ଚ ମେ ହେହିତି ମାଲଭାରୀ, ଅହଞ୍ଚ ନଂ ମାଲିନୀ ଅଜ୍ଝୁପେସ୍ସଂ’’ ॥
ଅହଞ୍ଚ ସାଲସ୍ସ ସୁପୁପ୍ଫିତସ୍ସ, ଓଚେୟ୍ୟ ପୁପ୍ଫାନି କରୋମି ଭାରଂ ।
ଇଦଞ୍ଚ ନୋ ହେହିତି ସନ୍ଥରତ୍ଥଂ, ୟତ୍ଥଜ୍ଜିମଂ [ୟତ୍ଥଜ୍ଜମଂ (ସୀ॰ ପୀ॰)] ୱିହରିସ୍ସାମ [ୱିହରିସ୍ସାମୁ (ପୀ॰)] ରତ୍ତିଂ ॥
ଅହଞ୍ଚ ଖୋ ଅଗଳୁଂ [ଅଗ୍ଗଲୁ (ସ୍ୟା॰ କ॰), ଅକଲୁଂ (ପୀ॰)] ଚନ୍ଦନଞ୍ଚ, ସିଲାୟ ପିଂସାମି ପମତ୍ତରୂପା ।
‘‘ପିୟୋ ଚ ମେ ହେହିତି ରୋସିତଙ୍ଗୋ, ଅହଞ୍ଚ ନଂ ରୋସିତା ଅଜ୍ଝୁପେସ୍ସଂ’’ ॥
ଅଥାଗମା ସଲିଲଂ ସୀଘସୋତଂ, ନୁଦଂ ସାଲେ ସଲଳେ କଣ୍ଣିକାରେ ।
ଆପୂରଥ [ଅପୂରଥ (ସୀ॰ ପୀ॰), ଆପୂରଥେ (ସ୍ୟା॰)] ତେନ ମୁହୁତ୍ତକେନ, ସାୟଂ ନଦୀ ଆସି ମୟା ସୁଦୁତ୍ତରା ॥
ଉଭୋସୁ ତୀରେସୁ ମୟଂ ତଦା ଠିତା, ସମ୍ପସ୍ସନ୍ତା ଉଭୟୋ ଅଞ୍ଞମଞ୍ଞଂ ।
ସକିମ୍ପି ରୋଦାମ ସକିଂ ହସାମ, କିଚ୍ଛେନ ନୋ ଆଗମା [ଅଗମା (ସୀ॰ ସ୍ୟା॰ ପୀ॰)] ସଂୱରୀ ସା ॥
ପାତୋୱ [ପାତୋ ଚ (ସୀ॰ ସ୍ୟା॰ ପୀ॰)] ଖୋ ଉଗ୍ଗତେ ସୂରିୟମ୍ହି, ଚତୁକ୍କଂ ନଦିଂ ଉତ୍ତରିୟାନ ଲୁଦ୍ଦ ।
ଆଲିଙ୍ଗିୟା ଅଞ୍ଞମଞ୍ଞଂ ମୟଂ ଉଭୋ, ସକିମ୍ପି ରୋଦାମ ସକିଂ ହସାମ ॥
ତୀହୂନକଂ ସତ୍ତସତାନି ଲୁଦ୍ଦ, ୟମିଧ ମୟଂ ୱିପ୍ପୱସିମ୍ହ ପୁବ୍ବେ ।
ୱସ୍ସେକିମଂ [ୱାସେକିମଂ (ସୀ॰ ପୀ॰)] ଜୀୱିତଂ ଭୂମିପାଲ, କୋ ନୀଧ କନ୍ତାୟ ୱିନା ୱସେୟ୍ୟ ॥
ଆୟୁଞ୍ଚ ୱୋ କୀୱତକୋ ନୁ ସମ୍ମ, ସଚେପି ଜାନାଥ ୱଦେଥ ଆୟୁଂ ।
ଅନୁସ୍ସୱା ୱୁଡ୍ଢତୋ ଆଗମା ୱା, ଅକ୍ଖାଥ ମେ ତଂ ଅୱିକମ୍ପମାନା ॥
ଆୟୁଞ୍ଚ ନୋ ୱସ୍ସସହସ୍ସଂ ଲୁଦ୍ଦ, ନ ଚନ୍ତରା ପାପକୋ ଅତ୍ଥି ରୋଗୋ ।
ଅପ୍ପଞ୍ଚ [ଅପ୍ପଂୱ (ସ୍ୟା॰ କ॰)] ଦୁକ୍ଖଂ ସୁଖମେୱ ଭିୟ୍ୟୋ, ଅୱୀତରାଗା ୱିଜହାମ ଜୀୱିତଂ ॥
ଇଦଞ୍ଚ ସୁତ୍ୱାନ ଅମାନୁସାନଂ, ଭଲ୍ଲାତିୟୋ ଇତ୍ତର ଜୀୱିତନ୍ତି ।
ନିୱତ୍ତଥ ନ ମିଗୱଂ ଅଚରି, ଅଦାସି ଦାନାନି ଅଭୁଞ୍ଜି ଭୋଗେ ॥
ଇଦଞ୍ଚ ସୁତ୍ୱାନ ଅମାନୁସାନଂ, ସମ୍ମୋଦଥ ମା କଲହଂ ଅକତ୍ଥ ।
ମା ୱୋ ତପୀ ଅତ୍ତକମ୍ମାପରାଧୋ, ୟଥାପି ତେ କିମ୍ପୁରିସେକରତ୍ତଂ ॥
ଇଦଞ୍ଚ ସୁତ୍ୱାନ ଅମାନୁସାନଂ, ସମ୍ମୋଦଥ ମା ୱିୱାଦଂ ଅକତ୍ଥ ।
ମା ୱୋ ତପୀ ଅତ୍ତକମ୍ମାପରାଧୋ, ୟଥାପି ତେ କିମ୍ପୁରିସେକରତ୍ତଂ ॥
ୱିୱିଧଂ [ୱିୱିଧ (ସୀ॰ ସ୍ୟା॰)] ଅଧିମନା ସୁଣୋମହଂ, ୱଚନପଥଂ ତୱ ଅତ୍ଥସଂହିତଂ ।
ମୁଞ୍ଚଂ [ମୁଞ୍ଚ (ସୀ॰ ପୀ॰)] ଗିରଂ ନୁଦସେୱ ମେ ଦରଂ, ସମଣ ସୁଖାୱହ ଜୀୱ ମେ ଚିରନ୍ତି ॥
ଭଲ୍ଲାତିୟଜାତକଂ ଅଟ୍ଠମଂ ।
୫୦୫. ସୋମନସ୍ସଜାତକଂ (୯)
କୋ ତଂ ହିଂସତି ହେଠେତି, କିଂ [କିନ୍ନୁ (ପୀ॰ କ॰)] ଦୁମ୍ମନୋ ସୋଚସି ଅପ୍ପତୀତୋ ।
କସ୍ସଜ୍ଜ ମାତାପିତରୋ ରୁଦନ୍ତୁ, କ୍ୱଜ୍ଜ ସେତୁ [କୋ ନ୍ୱେଜ୍ଜ ସେତି (କ॰), କୋ ଅଜ୍ଜ ସେତୁ ( ?)] ନିହତୋ ପଥବ୍ୟା ॥
ତୁଟ୍ଠୋସ୍ମି ଦେୱ ତୱ ଦସ୍ସନେନ, ଚିରସ୍ସଂ ପସ୍ସାମି ତଂ ଭୂମିପାଲ ।
ଅହିଂସକୋ ରେଣୁମନୁପ୍ପୱିସ୍ସ, ପୁତ୍ତେନ ତେ ହେଠୟିତୋସ୍ମି [ପୋଥୟିତୋସ୍ମି (କ॰)] ଦେୱ ॥
ଆୟନ୍ତୁ ଦୋୱାରିକା ଖଗ୍ଗବନ୍ଧା [ଖଗ୍ଗବଦ୍ଧା (ସୀ॰ ପୀ॰)], କାସାୱିୟା ୟନ୍ତୁ [ହନ୍ତୁ (କ॰)] ଅନ୍ତେପୁରନ୍ତଂ ।
ହନ୍ତ୍ୱାନ ତଂ ସୋମନସ୍ସଂ କୁମାରଂ, ଛେତ୍ୱାନ ସୀସଂ ୱରମାହରନ୍ତୁ ॥
ପେସିତା ରାଜିନୋ ଦୂତା, କୁମାରଂ ଏତଦବ୍ରୱୁଂ ।
ଇସ୍ସରେନ ୱିତିଣ୍ଣୋସି, ୱଧଂ ପତ୍ତୋସି ଖତ୍ତିୟ ॥
ସ ରାଜପୁତ୍ତୋ ପରିଦେୱୟନ୍ତୋ, ଦସଙ୍ଗୁଲିଂ ଅଞ୍ଜଲିଂ ପଗ୍ଗହେତ୍ୱା ।
ଅହମ୍ପି ଇଚ୍ଛାମି ଜନିନ୍ଦ ଦଟ୍ଠୁଂ, ଜୀୱଂ ମଂ ନେତ୍ୱା [ଜୀୱଂ ପନେତ୍ୱା (ସୀ॰ ପୀ॰)] ପଟିଦସ୍ସୟେଥ ॥
ତସ୍ସ ତଂ ୱଚନଂ ସୁତ୍ୱା, ରଞ୍ଞୋ ପୁତ୍ତଂ ଅଦସ୍ସୟୁଂ ।
ପୁତ୍ତୋ ଚ ପିତରଂ ଦିସ୍ୱା, ଦୂରତୋୱଜ୍ଝଭାସଥ ॥
ଆଗଚ୍ଛୁଂ [ଆଗଞ୍ଛୁଂ (ସୀ॰), ଆଗଞ୍ଛୁ (ପୀ॰)] ଦୋୱାରିକା ଖଗ୍ଗବନ୍ଧା, କାସାୱିୟା ହନ୍ତୁ ମମଂ ଜନିନ୍ଦ ।
ଅକ୍ଖାହି ମେ ପୁଚ୍ଛିତୋ ଏତମତ୍ଥଂ, ଅପରାଧୋ କୋ ନିଧ ମମଜ୍ଜ ଅତ୍ଥି ॥
ସାୟଞ୍ଚ ପାତୋ ଉଦକଂ ସଜାତି, ଅଗ୍ଗିଂ ସଦା ପାରିଚରତପ୍ପମତ୍ତୋ ।
ତଂ ତାଦିସଂ ସଂୟତଂ ବ୍ରହ୍ମଚାରିଂ, କସ୍ମା ତୁୱଂ ବ୍ରୂସି ଗହପ୍ପତୀତି ॥
ତାଲା ଚ ମୂଲା ଚ ଫଲା ଚ ଦେୱ, ପରିଗ୍ଗହା ୱିୱିଧା ସନ୍ତିମସ୍ସ ।
ତେ ରକ୍ଖତି ଗୋପୟତପ୍ପମତ୍ତୋ, [ବ୍ରାହ୍ମଣୋ ଗହପତି ତେନ ହୋତି (ସୀ॰ ସ୍ୟା॰ ପୀ॰)] ତସ୍ମା ଅହଂ ବ୍ରୂମି ଗହପ୍ପତୀତି [ବ୍ରାହ୍ମଣୋ ଗହପତି ତେନ ହୋତି (ସୀ॰ ସ୍ୟା॰ ପୀ॰)]॥
ସଚ୍ଚଂ ଖୋ ଏତଂ ୱଦସି କୁମାର, ପରିଗ୍ଗହା ୱିୱିଧା ସନ୍ତିମସ୍ସ ।
ତେ ରକ୍ଖତି ଗୋପୟତପ୍ପମତ୍ତୋ, ସ [ନତ୍ଥି ଇଦଂ ସୀ॰ ସ୍ୟା॰ ପୀ॰ ପୋତ୍ଥକେସୁ] ବ୍ରାହ୍ମଣୋ ଗହପତି ତେନ ହୋତି ॥
ସୁଣନ୍ତୁ ମୟ୍ହଂ ପରିସା ସମାଗତା, ସନେଗମା ଜାନପଦା ଚ ସବ୍ବେ ।
ବାଲାୟଂ ବାଲସ୍ସ ୱଚୋ ନିସମ୍ମ, ଅହେତୁନା ଘାତୟତେ ମଂ [ଘାତୟତେ (ସୀ॰ ପୀ॰)] ଜନିନ୍ଦୋ ॥
ଦଳ୍ହସ୍ମି ମୂଲେ ୱିସଟେ ୱିରୂଳ୍ହେ, ଦୁନ୍ନିକ୍କୟୋ ୱେଳୁ ପସାଖଜାତୋ ।
ୱନ୍ଦାମି ପାଦାନି ତୱ [ତୱଂ (ସୀ॰ ପୀ॰)] ଜନିନ୍ଦ, ଅନୁଜାନ ମଂ ପବ୍ବଜିସ୍ସାମି ଦେୱ ॥
ଭୁଞ୍ଜସ୍ସୁ ଭୋଗେ ୱିପୁଲେ କୁମାର, ସବ୍ବଞ୍ଚ ତେ ଇସ୍ସରିୟଂ ଦଦାମି ।
ଅଜ୍ଜେୱ ତ୍ୱଂ କୁରୂନଂ ହୋହି ରାଜା, ମା ପବ୍ବଜୀ ପବ୍ବଜ୍ଜା ହି ଦୁକ୍ଖା ॥
କିନ୍ନୂଧ ଦେୱ ତୱମତ୍ଥି ଭୋଗା, ପୁବ୍ବେୱହଂ [ପୁବ୍ବେ ଚହଂ (କ॰)] ଦେୱଲୋକେ ରମିସ୍ସଂ ।
ରୂପେହି ସଦ୍ଦେହି ଅଥୋ ରସେହି, ଗନ୍ଧେହି ଫସ୍ସେହି ମନୋରମେହି ॥
ଭୁତ୍ତା ଚ ମେ [ଭୁତ୍ତା (ସୀ॰ ପୀ॰)] ଭୋଗା ତିଦିୱସ୍ମିଂ ଦେୱ, ପରିୱାରିତା [ପରିଚାରିତା (କ॰)] ଅଚ୍ଛରାନଂ ଗଣେନ [ଅଚ୍ଛରାସଂଗଣେନ (ସ୍ୟା॰ ପୀ॰ କ॰)]।
ତୁୱଞ୍ଚ [ତୱଞ୍ଚ (ସୀ॰ ପୀ॰)] ବାଲଂ ପରନେୟ୍ୟଂ ୱିଦିତ୍ୱା, ନ ତାଦିସେ ରାଜକୁଲେ ୱସେୟ୍ୟଂ ॥
ସଚାହଂ ବାଲୋ ପରନେୟ୍ୟୋ ଅସ୍ମି, ଏକାପରାଧଂ [ଏତାପରାଧଂ (କ॰)] ଖମ ପୁତ୍ତ ମୟ୍ହଂ ।
ପୁନପି ଚେ ଏଦିସକଂ ଭୱେୟ୍ୟ, ୟଥାମତିଂ ସୋମନସ୍ସ କରୋହି ॥
ଅନିସମ୍ମ କତଂ କମ୍ମଂ, ଅନୱତ୍ଥାୟ ଚିନ୍ତିତଂ ।
ଭେସଜ୍ଜସ୍ସେୱ ୱେଭଙ୍ଗୋ, ୱିପାକୋ ହୋତି ପାପକୋ ॥
ନିସମ୍ମ ଚ କତଂ କମ୍ମଂ, ସମ୍ମାୱତ୍ଥାୟ ଚିନ୍ତିତଂ ।
ଭେସଜ୍ଜସ୍ସେୱ ସମ୍ପତ୍ତି, ୱିପାକୋ ହୋତି ଭଦ୍ରକୋ ॥
ଅଲସୋ ଗିହୀ କାମଭୋଗୀ ନ ସାଧୁ, ଅସଞ୍ଞତୋ ପବ୍ବଜିତୋ ନ ସାଧୁ ।
ରାଜା ନ ସାଧୁ ଅନିସମ୍ମକାରୀ, ୟୋ ପଣ୍ଡିତୋ କୋଧନୋ ତଂ ନ ସାଧୁ ॥
ନିସମ୍ମ ଖତ୍ତିୟୋ କୟିରା, ନାନିସମ୍ମ ଦିସମ୍ପତି ।
ନିସମ୍ମକାରିନୋ ରାଜ, ୟସୋ କିତ୍ତି ଚ ୱଡ୍ଢତି ॥
ନିସମ୍ମ ଦଣ୍ଡଂ ପଣୟେୟ୍ୟ ଇସ୍ସରୋ, ୱେଗା କତଂ ତପ୍ପତି ଭୂମିପାଲ ।
ସମ୍ମାପଣୀଧୀ ଚ ନରସ୍ସ ଅତ୍ଥା, ଅନାନୁତପ୍ପା ତେ ଭୱନ୍ତି ପଚ୍ଛା ॥
ଅନାନୁତପ୍ପାନି ହି ୟେ କରୋନ୍ତି, ୱିଭଜ୍ଜ କମ୍ମାୟତନାନି ଲୋକେ ।
ୱିଞ୍ଞୁପ୍ପସତ୍ଥାନି ସୁଖୁଦ୍ରୟାନି, ଭୱନ୍ତି ବୁଦ୍ଧାନୁମତାନି [ୱଦ୍ଧାନୁମତାନି (ସୀ॰ ପୀ॰)] ତାନି ॥
ଆଗଚ୍ଛୁଂ ଦୋୱାରିକା ଖଗ୍ଗବନ୍ଧା, କାସାୱିୟା ହନ୍ତୁ ମମଂ ଜନିନ୍ଦ ।
ମାତୁଞ୍ଚ [ମାତୁଚ୍ଚ (ପୀ॰)] ଅଙ୍କସ୍ମିମହଂ ନିସିନ୍ନୋ, ଆକଡ୍ଢିତୋ ସହସା ତେହି ଦେୱ ॥
କଟୁକଞ୍ହି ସମ୍ବାଧଂ ସୁକିଚ୍ଛଂ [ସୁକିଚ୍ଛ (ସୀ॰ ପୀ॰)] ପତ୍ତୋ, ମଧୁରମ୍ପି ୟଂ ଜୀୱିତଂ ଲଦ୍ଧ ରାଜ ।
କିଚ୍ଛେନହଂ ଅଜ୍ଜ ୱଧା ପମୁତ୍ତୋ, ପବ୍ବଜ୍ଜମେୱାଭିମନୋହମସ୍ମି ॥
ପୁତ୍ତୋ ତୱାୟଂ ତରୁଣୋ ସୁଧମ୍ମେ, ଅନୁକମ୍ପକୋ ସୋମନସ୍ସୋ କୁମାରୋ ।
ତଂ ୟାଚମାନୋ ନ ଲଭାମି ସ୍ୱଜ୍ଜ [ସଜ୍ଜ (ସୀ॰ ପୀ॰)], ଅରହସି ନଂ ୟାଚିତୱେ [ୟାଚିତୁୟେ (କ॰)] ତୁୱମ୍ପି ॥
ରମସ୍ସୁ ଭିକ୍ଖାଚରିୟାୟ ପୁତ୍ତ, ନିସମ୍ମ ଧମ୍ମେସୁ ପରିବ୍ବଜସ୍ସୁ ।
ସବ୍ବେସୁ ଭୂତେସୁ ନିଧାୟ ଦଣ୍ଡଂ, ଅନିନ୍ଦିତୋ ବ୍ରହ୍ମମୁପେହି ଠାନଂ ॥
ଅଚ୍ଛେର [ଅଚ୍ଛରିୟ (ସୀ॰ ସ୍ୟା॰ ପୀ॰)] ରୂପଂ ୱତ ୟାଦିସଞ୍ଚ, ଦୁକ୍ଖିତଂ ମଂ ଦୁକ୍ଖାପୟସେ ସୁଧମ୍ମେ ।
ୟାଚସ୍ସୁ ପୁତ୍ତଂ ଇତି ୱୁଚ୍ଚମାନା, ଭିୟ୍ୟୋୱ ଉସ୍ସାହୟସେ କୁମାରଂ ॥
ୟେ ୱିପ୍ପମୁତ୍ତା ଅନୱଜ୍ଜଭୋଗିନୋ [ଭୋଜିନୋ (ସୀ॰ ସ୍ୟା॰ ପୀ॰)], ପରିନିବ୍ବୁତା ଲୋକମିମଂ ଚରନ୍ତି ।
ତମରିୟମଗ୍ଗଂ ପଟିପଜ୍ଜମାନଂ, ନ ଉସ୍ସହେ ୱାରୟିତୁଂ କୁମାରଂ ॥
ଅଦ୍ଧା ହୱେ ସେୱିତବ୍ବା ସପଞ୍ଞା, ବହୁସ୍ସୁତା ୟେ ବହୁଠାନଚିନ୍ତିନୋ ।
ୟେସାୟଂ ସୁତ୍ୱାନ ସୁଭାସିତାନି, ଅପ୍ପୋସ୍ସୁକ୍କା ୱୀତସୋକା ସୁଧମ୍ମାତି ॥
ସୋମନସ୍ସଜାତକଂ ନୱମଂ ।
୫୦୬. ଚମ୍ପେୟ୍ୟଜାତକଂ (୧୦)
କା ନୁ ୱିଜ୍ଜୁରିୱାଭାସି, ଓସଧୀ ୱିୟ ତାରକା ।
ଦେୱତା ନୁସି ଗନ୍ଧବ୍ବୀ, ନ ତଂ ମଞ୍ଞାମି ମାନୁସିଂ [ମାନୁସୀ (ସ୍ୟା॰ କ॰)]॥
ନମ୍ହି ଦେୱୀ ନ ଗନ୍ଧବ୍ବୀ, ନ ମହାରାଜ ମାନୁସୀ ।
ନାଗକଞ୍ଞାସ୍ମି ଭଦ୍ଦନ୍ତେ, ଅତ୍ଥେନମ୍ହି ଇଧାଗତା ॥
ୱିବ୍ଭନ୍ତଚିତ୍ତା କୁପିତିନ୍ଦ୍ରିୟାସି, ନେତ୍ତେହି ତେ ୱାରିଗଣା ସୱନ୍ତି ।
କିଂ ତେ ନଟ୍ଠଂ କିଂ ପନ ପତ୍ଥୟାନା, ଇଧାଗତା ନାରି ତଦିଙ୍ଘ ବ୍ରୂହି ॥
ୟମୁଗ୍ଗତେଜୋ ଉରଗୋତି ଚାହୁ, ନାଗୋତି ନଂ ଆହୁ ଜନା ଜନିନ୍ଦ ।
ତମଗ୍ଗହୀ ପୁରିସୋ ଜୀୱିକତ୍ଥୋ, ତଂ ବନ୍ଧନା ମୁଞ୍ଚ ପତୀ ମମେସୋ ॥
କଥଂ ନ୍ୱୟଂ ବଲୱିରିୟୂପପନ୍ନୋ, ହତ୍ଥତ୍ତ [ହତ୍ଥତ୍ଥ (ସୀ॰ ସ୍ୟା॰ ପୀ॰)] ମାଗଚ୍ଛି ୱନିବ୍ବକସ୍ସ ।
ଅକ୍ଖାହି ମେ ନାଗକଞ୍ଞେ ତମତ୍ଥଂ, କଥଂ ୱିଜାନେମୁ ଗହୀତନାଗଂ ॥
ନଗରମ୍ପି ନାଗୋ ଭସ୍ମଂ କରେୟ୍ୟ, ତଥା ହି ସୋ ବଲୱିରିୟୂପପନ୍ନୋ ।
ଧମ୍ମଞ୍ଚ ନାଗୋ ଅପଚାୟମାନୋ, ତସ୍ମା ପରକ୍କମ୍ମ ତପୋ କରୋତି ॥
ଚାତୁଦ୍ଦସିଂ ପଞ୍ଚଦସିଂ [ପନ୍ନରସିଂ (ସୀ॰ ସ୍ୟା॰ ପୀ॰)] ଚ ରାଜ, ଚତୁପ୍ପଥେ ସମ୍ମତି ନାଗରାଜା ।
ତମଗ୍ଗହୀ ପୁରିସୋ ଜୀୱିକତ୍ଥୋ, ତଂ ବନ୍ଧନା ମୁଞ୍ଚ ପତୀ ମମେସୋ ॥
ସୋଳସିତ୍ଥିସହସ୍ସାନି, ଆମୁତ୍ତମଣିକୁଣ୍ଡଲା ।
ୱାରିଗେହସୟା ନାରୀ [ନାରିୟୋ (ପୀ॰)], ତାପି ତଂ ସରଣଂ ଗତା ॥
ଧମ୍ମେନ ମୋଚେହି ଅସାହସେନ, ଗାମେନ ନିକ୍ଖେନ ଗୱଂ ସତେନ ।
ଓସ୍ସଟ୍ଠକାୟୋ ଉରଗୋ ଚରାତୁ, ପୁଞ୍ଞତ୍ଥିକୋ ମୁଞ୍ଚତୁ ବନ୍ଧନସ୍ମା ॥
ଧମ୍ମେନ ମୋଚେମି ଅସାହସେନ, ଗାମେନ ନିକ୍ଖେନ ଗୱଂ ସତେନ ।
ଓସ୍ସଟ୍ଠକାୟୋ ଉରଗୋ ଚରାତୁ, ପୁଞ୍ଞତ୍ଥିକୋ ମୁଞ୍ଚତୁ ବନ୍ଧନସ୍ମା ॥
ଦମ୍ମି ନିକ୍ଖସତଂ ଲୁଦ୍ଦ, ଥୂଲଞ୍ଚ ମଣିକୁଣ୍ଡଲଂ ।
ଚତୁସ୍ସଦଞ୍ଚ ପଲ୍ଲଙ୍କଂ, ଉମାପୁପ୍ଫସରିନ୍ନିଭଂ ॥
ଦ୍ୱେ ଚ ସାଦିସିୟୋ ଭରିୟା, ଉସଭଞ୍ଚ ଗୱଂ ସତଂ ।
ଓସ୍ସଟ୍ଠକାୟୋ ଉରଗୋ ଚରାତୁ, ପୁଞ୍ଞତ୍ଥିକୋ ମୁଞ୍ଚତୁ ବନ୍ଧନସ୍ମା ॥
ୱିନାପି ଦାନା ତୱ ୱଚନଂ ଜନିନ୍ଦ, ମୁଞ୍ଚେମୁ ନଂ ଉରଗଂ ବନ୍ଧନସ୍ମା ।
ଓସ୍ସଟ୍ଠକାୟୋ ଉରଗୋ ଚରାତୁ, ପୁଞ୍ଞତ୍ଥିକୋ ମୁଞ୍ଚତୁ ବନ୍ଧନସ୍ମା ॥
ମୁତ୍ତୋ ଚମ୍ପେୟ୍ୟକୋ ନାଗୋ, ରାଜାନଂ ଏତଦବ୍ରୱି ।
ନମୋ ତେ କାସିରାଜତ୍ଥୁ, ନମୋ ତେ କାସିୱଡ୍ଢନ ।
ଅଞ୍ଜଲିଂ ତେ ପଗ୍ଗଣ୍ହାମି, ପସ୍ସେୟ୍ୟଂ ମେ ନିୱେସନଂ ॥
ଅଦ୍ଧା ହି ଦୁବ୍ବିସ୍ସସମେତମାହୁ, ୟଂ ମାନୁସୋ ୱିସ୍ସସେ ଅମାନୁସମ୍ହି ।
ସଚେ ଚ ମଂ ୟାଚସି ଏତମତ୍ଥଂ, ଦକ୍ଖେମୁ ତେ ନାଗ ନିୱେସନାନି ॥
ସଚେପି [ସଚେ ହି (ସୀ॰ ପୀ॰ ଅଟ୍ଠ॰)] ୱାତୋ ଗିରିମାୱହେୟ୍ୟ, ଚନ୍ଦୋ ଚ ସୁରିୟୋ ଚ ଛମା ପତେୟ୍ୟୁଂ ।
ସବ୍ବା ଚ ନଜ୍ଜୋ ପଟିସୋତଂ ୱଜେୟ୍ୟୁଂ, ନ ତ୍ୱେୱହଂ ରାଜ ମୁସା ଭଣେୟ୍ୟଂ ॥
ନଭଂ ଫଲେୟ୍ୟ ଉଦଧୀପି ସୁସ୍ସେ, ସଂୱଟ୍ଟୟେ [ସଂୱଟ୍ଟେୟଂ (ସୀ॰ ପୀ॰), ସଂୱଟ୍ଟେୟ୍ୟ (ସ୍ୟା॰ କ॰)] ଭୂତଧରା ୱସୁନ୍ଧରା ।
ସିଲୁଚ୍ଚୟୋ ମେରୁ ସମୂଲମୁପ୍ପତେ [ମୁବ୍ବହେ (ସୀ॰ ସ୍ୟା॰ ପୀ॰ କ॰ ଅଟ୍ଠ॰), ମୁଟ୍ଠହେ (କ॰)], ନ ତ୍ୱେୱହଂ ରାଜ ମୁସା ଭଣେୟ୍ୟଂ ॥
ଅଦ୍ଧା ହି ଦୁବ୍ବିସ୍ସସମେତମାହୁ, ୟଂ ମାନୁସୋ ୱିସ୍ସସେ ଅମାନୁସମ୍ହି ।
ସଚେ ଚ ମଂ ୟାଚସି ଏତମତ୍ଥଂ, ଦକ୍ଖେମୁ ତେ ନାଗ ନିୱେସନାନି ॥
ତୁମ୍ହେ ଖୋତ୍ଥ ଘୋରୱିସା ଉଳାରା, ମହାତେଜା ଖିପ୍ପକୋପୀ ଚ ହୋଥ ।
ମଂକାରଣା [ମମ କାରଣା (ସୀ॰ ସ୍ୟା॰ ପୀ॰)] ବନ୍ଧନସ୍ମା ପମୁତ୍ତୋ, ଅରହସି ନୋ ଜାନିତୁୟେ [ଜାନିତାୟେ (ସୀ॰), ଜାନିତୱେ (ସ୍ୟା॰), ଜାନିତୟେ (ପୀ॰)] କତାନି ॥
ସୋ ପଚ୍ଚତଂ ନିରୟେ ଘୋରରୂପେ, ମା କାୟିକଂ ସାତମଲତ୍ଥ କିଞ୍ଚି ।
ପେଳାୟ ବଦ୍ଧୋ ମରଣଂ ଉପେତୁ, ୟୋ ତାଦିସଂ କମ୍ମକତଂ ନ ଜାନେ ॥
ସଚ୍ଚପ୍ପଟିଞ୍ଞା ତୱମେସ ହୋତୁ, ଅକ୍କୋଧନୋ ହୋହି ଅନୁପନାହୀ ।
ସବ୍ବଞ୍ଚ ତେ ନାଗକୁଲଂ ସୁପଣ୍ଣା, ଅଗ୍ଗିଂୱ ଗିମ୍ହେସୁ [ଗିମ୍ହାସୁ (ସୀ॰ ସ୍ୟା॰ ପୀ॰)] ୱିୱଜ୍ଜୟନ୍ତୁ ॥
ଅନୁକମ୍ପସୀ ନାଗକୁଲଂ ଜନିନ୍ଦ, ମାତା ୟଥା ସୁପ୍ପିୟଂ ଏକପୁତ୍ତଂ ।
ଅହଞ୍ଚ ତେ ନାଗକୁଲେନ ସଦ୍ଧିଂ, କାହାମି ୱେୟ୍ୟାୱଟିକଂ ଉଳାରଂ ॥
ୟୋଜେନ୍ତୁ ୱେ ରାଜରଥେ ସୁଚିତ୍ତେ, କମ୍ବୋଜକେ ଅସ୍ସତରେ ସୁଦନ୍ତେ ।
ନାଗେ ଚ ୟୋଜେନ୍ତୁ ସୁୱଣ୍ଣକପ୍ପନେ, ଦକ୍ଖେମୁ ନାଗସ୍ସ ନିୱେସନାନି ॥
ଭେରୀ ମୁଦିଙ୍ଗା [ମୁତିଙ୍ଗା (ସୀ॰ ପୀ॰)] ପଣୱା ଚ ସଙ୍ଖା, ଅୱଜ୍ଜୟିଂସୁ ଉଗ୍ଗସେନସ୍ସ ରଞ୍ଞୋ ।
ପାୟାସି ରାଜା ବହୁସୋଭମାନୋ, ପୁରକ୍ଖତୋ ନାରିଗଣସ୍ସ ମଜ୍ଝେ ॥
ସୁୱଣ୍ଣଚିତକଂ ଭୂମିଂ, ଅଦ୍ଦକ୍ଖି କାସିୱଡ୍ଢନୋ ।
ସୋୱଣ୍ଣମୟପାସାଦେ, ୱେଳୁରିୟଫଲକତ୍ଥତେ ॥
ସ ରାଜା ପାୱିସି ବ୍ୟମ୍ହଂ, ଚମ୍ପେୟ୍ୟସ୍ସ ନିୱେସନଂ ।
ଆଦିଚ୍ଚୱଣ୍ଣସନ୍ନିଭଂ, କଂସୱିଜ୍ଜୁ ପଭସ୍ସରଂ ॥
ନାନାରୁକ୍ଖେହି ସଞ୍ଛନ୍ନଂ, ନାନାଗନ୍ଧସମୀରିତଂ ।
ସୋ ପାୱେକ୍ଖି କାସିରାଜା, ଚମ୍ପେୟ୍ୟସ୍ସ ନିୱେସନଂ ॥
ପୱିଟ୍ଠସ୍ମିଂ କାସିରଞ୍ଞେ, ଚମ୍ପେୟ୍ୟସ୍ସ ନିୱେସନଂ ।
ଦିବ୍ବା ତୂରିୟା ପୱଜ୍ଜିଂସୁ, ନାଗକଞ୍ଞା ଚ ନଚ୍ଚିସୁଂ [ନଚ୍ଚୟୁଂ (ସୀ॰ ପୀ॰ କ॰)]॥
ତଂ ନାଗକଞ୍ଞା ଚରିତଂ ଗଣେନ, ଅନ୍ୱାରୁହୀ କାସିରାଜା ପସନ୍ନୋ ।
ନିସୀଦି ସୋୱଣ୍ଣମୟମ୍ହି ପୀଠେ, ସାପସ୍ସୟେ [ସୋପସ୍ସୟେ (କ॰)] ଚନ୍ଦନସାରଲିତ୍ତେ ॥
ସୋ ତତ୍ଥ ଭୁତ୍ୱା ଚ ଅଥୋ ରମିତ୍ୱା, ଚମ୍ପେୟ୍ୟକଂ କାସିରାଜା ଅୱୋଚ ।
ୱିମାନସେଟ୍ଠାନି ଇମାନି ତୁୟ୍ହଂ, ଆଦିଚ୍ଚୱଣ୍ଣାନି ପଭସ୍ସରାନି ।
ନେତାଦିସଂ ଅତ୍ଥି ମନୁସ୍ସଲୋକେ, କିଂ ପତ୍ଥୟଂ [କିମତ୍ଥିୟଂ (ସୀ॰ ସ୍ୟା॰ ପୀ॰)] ନାଗ ତପୋ କରୋସି ॥
ତା କମ୍ବୁକାୟୂରଧରା ସୁୱତ୍ଥା, ୱଟ୍ଟଙ୍ଗୁଲୀ ତମ୍ବତଲୂପପନ୍ନା ।
ପଗ୍ଗୟ୍ହ ପାୟେନ୍ତି ଅନୋମୱଣ୍ଣା, ନେତାଦିସଂ ଅତ୍ଥି ମନୁସ୍ସଲୋକେ ।
କିଂ ପତ୍ଥୟଂ ନାଗ ତପୋ କରୋସି ॥
ନଜ୍ଜୋ ଚ ତେମା ପୁଥୁଲୋମମଚ୍ଛା, ଆଟା [ଆଦା (ସ୍ୟା॰), ଅଦା (ପୀ॰)] ସକୁନ୍ତାଭିରୁଦା ସୁତିତ୍ଥା ।
ନେତାଦିସଂ ଅତ୍ଥି ମନୁସ୍ସଲୋକେ, କିଂ ପତ୍ଥୟଂ ନାଗ ତପୋ କରୋସି ॥
କୋଞ୍ଚା ମୟୂରା ଦିୱିୟା ଚ ହଂସା, ୱଗ୍ଗୁସ୍ସରା କୋକିଲା ସମ୍ପତନ୍ତି ।
ନେତାଦିସଂ ଅତ୍ଥି ମନୁସ୍ସଲୋକେ, କିଂ ପତ୍ଥୟଂ ନାଗ ତପୋ କରୋସି ॥
ଅମ୍ବା ଚ ସାଲା ତିଲକା ଚ ଜମ୍ବୁୟୋ, ଉଦ୍ଦାଲକା ପାଟଲିୟୋ ଚ ଫୁଲ୍ଲା ।
ନେତାଦିସଂ ଅତ୍ଥି ମନୁସ୍ସଲୋକେ, କିଂ ପତ୍ଥୟଂ ନାଗ ତପୋ କରୋସି ॥
ଇମା ଚ ତେ ପୋକ୍ଖରଞ୍ଞୋ ସମନ୍ତତୋ, ଦିବ୍ବା [ଦିବ୍ୟା (ସ୍ୟା॰), ଦିୱିୟା (ପୀ॰)] ଚ ଗନ୍ଧା ସତତଂ ପୱାୟନ୍ତି ।
ନେତାଦିସଂ ଅତ୍ଥି ମନୁସ୍ସଲୋକେ, କିଂ ପତ୍ଥୟଂ ନାଗ ତପୋ କରୋସି ॥
ନ ପୁତ୍ତହେତୁ ନ ଧନସ୍ସ ହେତୁ, ନ ଆୟୁନୋ ଚାପି [ୱାପି (ସୀ॰ ପୀ॰)] ଜନିନ୍ଦ ହେତୁ ।
ମନୁସ୍ସୟୋନିଂ ଅଭିପତ୍ଥୟାନୋ, ତସ୍ମା ପରକ୍କମ୍ମ ତପୋ କରୋମି ॥
ତ୍ୱଂ ଲୋହିତକ୍ଖୋ ୱିହତନ୍ତରଂସୋ, ଅଲଙ୍କତୋ କପ୍ପିତକେସମସ୍ସୁ ।
ସୁରୋସିତୋ ଲୋହିତଚନ୍ଦନେନ, ଗନ୍ଧବ୍ବରାଜାୱ ଦିସା ପଭାସସି ॥
ଦେୱିଦ୍ଧିପତ୍ତୋସି ମହାନୁଭାୱୋ, ସବ୍ବେହି କାମେହି ସମଙ୍ଗିଭୂତୋ ।
ପୁଚ୍ଛାମି ତଂ ନାଗରାଜେତମତ୍ଥଂ, ସେୟ୍ୟୋ ଇତୋ କେନ ମନୁସ୍ସଲୋକୋ ॥
ଜନିନ୍ଦ ନାଞ୍ଞତ୍ର ମନୁସ୍ସଲୋକା, ସୁଦ୍ଧୀ ୱ ସଂୱିଜ୍ଜତି ସଂୟମୋ ୱା ।
ଅହଞ୍ଚ ଲଦ୍ଧାନ ମନୁସ୍ସୟୋନିଂ, କାହାମି ଜାତିମରଣସ୍ସ ଅନ୍ତଂ ॥
ଅଦ୍ଧା ହୱେ ସେୱିତବ୍ବା ସପଞ୍ଞା, ବହୁସ୍ସୁତା ୟେ ବହୁଠାନଚିନ୍ତିନୋ ।
ନାରିୟୋ ଚ ଦିସ୍ୱାନ ତୁୱଞ୍ଚ ନାଗ, କାହାମି ପୁଞ୍ଞାନି ଅନପ୍ପକାନି ॥
ଅଦ୍ଧା ହୱେ ସେୱିତବ୍ବା ସପଞ୍ଞା, ବହୁସ୍ସୁତା ୟେ ବହୁଠାନଚିନ୍ତିନୋ ।
ନାରିୟୋ ଚ ଦିସ୍ୱାନ ମମଞ୍ଚ ରାଜ, କରୋହି ପୁଞ୍ଞାନି ଅନପ୍ପକାନି ॥
ଇଦଞ୍ଚ ମେ ଜାତରୂପଂ ପହୂତଂ, ରାସୀ ସୁୱଣ୍ଣସ୍ସ ଚ ତାଲମତ୍ତା ।
[ଇତୋ ହରିତ୍ୱା ସୋୱଣ୍ଣଘରାନି କାରୟ, ରୂପିୟସ୍ସ ଚ ପାକାରଂ କରୋନ୍ତୁ (ସୀ॰ ସ୍ୟା॰) ଇତୋ ହରିତ୍ୱା ସୋୱଣ୍ଣଘରାନି, [କାରୟ] ରୂପିୟସ୍ସ ଚ ପାକାରଂ କରୋନ୍ତୁ (ପୀ॰)] ଇତୋ ହରିତ୍ୱାନ ସୁୱଣ୍ଣଘରାନି, କରସ୍ସୁ ରୂପିୟପାକାରଂ କରୋନ୍ତୁ [ଇତୋ ହରିତ୍ୱା ସୋୱଣ୍ଣଘରାନି କାରୟ, ରୂପିୟସ୍ସ ଚ ପାକାରଂ କରୋନ୍ତୁ (ସୀ॰ ସ୍ୟା॰) ଇତୋ ହରିତ୍ୱା ସୋୱଣ୍ଣଘରାନି, [କାରୟ] ରୂପିୟସ୍ସ ଚ ପାକାରଂ କରୋନ୍ତୁ (ପୀ॰)]॥
ମୁତ୍ତା ଚ [ମୁତ୍ତାନଞ୍ଚ (ସୀ॰ ସ୍ୟା॰)] ୱାହସହସ୍ସାନି ପଞ୍ଚ, ୱେଳୁରିୟମିସ୍ସାନି ଇତୋ ହରିତ୍ୱା ।
ଅନ୍ତେପୁରେ ଭୂମିୟଂ ସନ୍ଥରନ୍ତୁ, ନିକ୍କଦ୍ଦମା ହେହିତି ନୀରଜା ଚ ॥
ଏତାଦିସଂ ଆୱସ ରାଜସେଟ୍ଠ, ୱିମାନସେଟ୍ଠଂ ବହୁ ସୋଭମାନଂ ।
ବାରାଣସିଂ ନଗରଂ ଇଦ୍ଧଂ ଫୀତଂ, ରଜ୍ଜଞ୍ଚ କାରେହି ଅନୋମପଞ୍ଞାତି ॥
ଚମ୍ପେୟ୍ୟଜାତକଂ ଦସମଂ ।
୫୦୭. ମହାପଲୋଭନଜାତକଂ (୧୧)
ବ୍ରହ୍ମଲୋକା ଚୱିତ୍ୱାନ, ଦେୱପୁତ୍ତୋ ମହିଦ୍ଧିକୋ ।
ରଞ୍ଞୋ ପୁତ୍ତୋ ଉଦପାଦି, ସବ୍ବକାମସମିଦ୍ଧିସୁ ॥
କାମା ୱା କାମସଞ୍ଞା ୱା, ବ୍ରହ୍ମଲୋକେ ନ ୱିଜ୍ଜତି ।
ସ୍ୱାସ୍ସୁ [ୟ୍ୱାସ୍ସ (ସୀ॰)] ତାୟେୱ ସଞ୍ଞାୟ, କାମେହି ୱିଜିଗୁଚ୍ଛଥ ॥
ତସ୍ସ ଚନ୍ତେପୁରେ ଆସି, ଝାନାଗାରଂ ସୁମାପିତଂ ।
ସୋ ତତ୍ଥ ପଟିସଲ୍ଲୀନୋ [ପଟିସଲ୍ଲାନୋ (କ॰)], ଏକୋ ରହସି ଝାୟଥ ॥
ସ ରାଜା ପରିଦେୱେସି, ପୁତ୍ତସୋକେନ ଅଟ୍ଟିତୋ ।
ଏକପୁତ୍ତୋ ଚୟଂ ମୟ୍ହଂ, ନ ଚ କାମାନି ଭୁଞ୍ଜତି ॥
କୋ ନୁ ଖ୍ୱେତ୍ଥ [ଖେତ୍ଥ (ସୀ॰ ପୀ॰)] ଉପାୟୋ ସୋ, କୋ ୱା ଜାନାତି କିଞ୍ଚନଂ ।
ୟୋ [କୋ (ସୀ॰ ପୀ॰)] ମେ ପୁତ୍ତଂ ପଲୋଭେୟ୍ୟ, ୟଥା କାମାନି ପତ୍ଥୟେ ॥
ଅହୁ କୁମାରୀ ତତ୍ଥେୱ, ୱଣ୍ଣରୂପସମାହିତା ।
କୁସଲା ନଚ୍ଚଗୀତସ୍ସ, ୱାଦିତେ ଚ ପଦକ୍ଖିଣା ॥
ସା ତତ୍ଥ ଉପସଙ୍କମ୍ମ, ରାଜାନଂ ଏତଦବ୍ରୱି ।
ଅହଂ ଖୋ ନଂ ପଲୋଭେୟ୍ୟଂ, ସଚେ ଭତ୍ତା ଭୱିସ୍ସତି ॥
ତଂ ତଥାୱାଦିନିଂ ରାଜା, କୁମାରିଂ ଏତଦବ୍ରୱି ।
ତ୍ୱଞ୍ଞେୱ ନଂ ପଲୋଭେହି, ତୱ ଭତ୍ତା ଭୱିସ୍ସତି ॥
ସା ଚ ଅନ୍ତେପୁରଂ ଗନ୍ତ୍ୱା, ବହୁଂ କାମୁପସଂହିତଂ ।
ହଦୟଙ୍ଗମା ପେମନୀୟା, ଚିତ୍ରା ଗାଥା ଅଭାସଥ ॥
ତସ୍ସା ଚ ଗାୟମାନାୟ, ସଦ୍ଦଂ ସୁତ୍ୱାନ ନାରିୟା ।
କାମଚ୍ଛନ୍ଦସ୍ସ ଉପ୍ପଜ୍ଜି, ଜନଂ ସୋ ପରିପୁଚ୍ଛଥ ॥
କସ୍ସେସୋ ସଦ୍ଦୋ କୋ ୱା ସୋ, ଭଣତି ଉଚ୍ଚାୱଚଂ ବହୁଂ ।
ହଦୟଙ୍ଗମଂ ପେମନୀୟଂ, ଅହୋ [ଅଥୋ (ସୀ॰ ପୀ॰)] କଣ୍ଣସୁଖଂ ମମ ॥
ଏସା ଖୋ ପମଦା ଦେୱ, ଖିଡ୍ଡା ଏସା ଅନପ୍ପିକା [ଅନପ୍ପକା (କ॰)]।
ସଚେ ତ୍ୱଂ କାମେ ଭୁଞ୍ଜେୟ୍ୟ, ଭିୟ୍ୟୋ ଭିୟ୍ୟୋ ଛାଦେୟ୍ୟୁ ତଂ ॥
ଇଙ୍ଘ ଆଗଚ୍ଛତୋରେନ [ଆଗଚ୍ଛତୋରେନଂ (କ॰) ଆଗଚ୍ଛତୁ + ଓରେନ], ଅୱିଦୂରମ୍ହି ଗାୟତୁ ।
ଅସ୍ସମସ୍ସ ସମୀପମ୍ହି, ସନ୍ତିକେ ମୟ୍ହଂ ଗାୟତୁ ॥
ତିରୋକୁଟ୍ଟମ୍ହି ଗାୟିତ୍ୱା, ଝାନାଗାରମ୍ହି ପାୱିସି ।
ବନ୍ଧି ନଂ [ଭନ୍ଧିତୁଂ (ସ୍ୟା॰ କ॰)] ଅନୁପୁବ୍ବେନ, ଆରଞ୍ଞମିୱ କୁଞ୍ଜରଂ ॥
ତସ୍ସ [ତସ୍ସା (ସ୍ୟା॰)] କାମରସଂ ଞତ୍ୱା, ଇସ୍ସାଧମ୍ମୋ ଅଜାୟଥ ।
‘‘ଅହମେୱ କାମେ ଭୁଞ୍ଜେୟ୍ୟଂ, ମା ଅଞ୍ଞୋ ପୁରିସୋ ଅହୁ’’ ॥
ତତୋ ଅସିଂ ଗହେତ୍ୱାନ, ପୁରିସେ ହନ୍ତୁଂ ଉପକ୍କମି ।
ଅହମେୱେକୋ ଭୁଞ୍ଜିସ୍ସଂ, ମା ଅଞ୍ଞୋ ପୁରିସୋ ସିୟା ॥
ତତୋ ଜାନପଦା ସବ୍ବେ, ୱିକ୍କନ୍ଦିଂସୁ ସମାଗତା ।
ପୁତ୍ତୋ ତ୍ୟାୟଂ ମହାରାଜ, ଜନଂ ହେଠେତ୍ୟଦୂସକଂ ॥
ତଞ୍ଚ ରାଜା ୱିୱାହେସି [ନିୱାହେସି (ସ୍ୟା॰), ୱିହାହେସି (ପୀ॰)], ସମ୍ହା ରଟ୍ଠା ଚ [ରଟ୍ଠାତୋ (ସୀ॰ ପୀ॰), ରଟ୍ଠତୋ (କ॰)] ଖତ୍ତିୟୋ ।
ୟାୱତା ୱିଜିତଂ ମୟ୍ହଂ, ନ ତେ ୱତ୍ଥବ୍ବ [ୱତ୍ତବ୍ବ (ସୀ॰ ପୀ॰)] ତାୱଦେ ॥
ତତୋ ସୋ ଭରିୟମାଦାୟ, ସମୁଦ୍ଦଂ ଉପସଙ୍କମି ।
ପଣ୍ଣସାଲଂ କରିତ୍ୱାନ, ୱନମୁଞ୍ଛାୟ ପାୱିସି ॥
ଅଥେତ୍ଥ ଇସି ମାଗଚ୍ଛି, ସମୁଦ୍ଦଂ ଉପରୂପରି ।
ସୋ ତସ୍ସ ଗେହଂ ପାୱେକ୍ଖି, ଭତ୍ତକାଲେ ଉପଟ୍ଠିତେ ॥
ତଞ୍ଚ ଭରିୟା ପଲୋଭେସି, ପସ୍ସ ୟାୱ ସୁଦାରୁଣଂ ।
ଚୁତୋ ସୋ ବ୍ରହ୍ମଚରିୟମ୍ହା, ଇଦ୍ଧିୟା ପରିହାୟଥ ॥
ରାଜପୁତ୍ତୋ ଚ ଉଞ୍ଛାତୋ, ୱନମୂଲଫଲଂ ବହୁଂ ।
ସାୟଂ କାଜେନ [କାଚେନ (ପୀ॰)] ଆଦାୟ, ଅସ୍ସମଂ ଉପସଙ୍କମି ॥
ଇସୀ ଚ ଖତ୍ତିୟଂ ଦିସ୍ୱା, ସମୁଦ୍ଦଂ ଉପସଙ୍କମି ।
‘‘ୱେହାୟସଂ ଗମିସ୍ସ’’ନ୍ତି, ସୀଦତେ ସୋ ମହଣ୍ଣୱେ ॥
ଖତ୍ତିୟୋ ଚ ଇସିଂ ଦିସ୍ୱା, ସୀଦମାନଂ ମହଣ୍ଣୱେ ।
ତସ୍ସେୱ ଅନୁକମ୍ପାୟ, ଇମା ଗାଥା ଅଭାସଥ ॥
ଅଭିଜ୍ଜମାନେ ୱାରିସ୍ମିଂ, ସୟଂ ଆଗମ୍ମ ଇଦ୍ଧିୟା ।
ମିସ୍ସୀଭାୱିତ୍ଥିୟା ଗନ୍ତ୍ୱା, ସଂସୀଦସି ମହଣ୍ଣୱେ ॥
ଆୱଟ୍ଟନୀ ମହାମାୟା, ବ୍ରହ୍ମଚରିୟୱିକୋପନା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ଅନଲା ମୁଦୁସମ୍ଭାସା, ଦୁପ୍ପୂରା ତା ନଦୀସମା ।
ସୀଦନ୍ତି ନଂ ୱିଦିତ୍ୱାନ, ଆରକା ପରିୱଜ୍ଜୟେ ॥
ୟଂ ଏତା ଉପସେୱନ୍ତି, ଛନ୍ଦସା ୱା ଧନେନ ୱା ।
ଜାତୱେଦୋୱ ସଂ ଠାନଂ, ଖିପ୍ପଂ ଅନୁଦହନ୍ତି ନଂ ॥
ଖତ୍ତିୟସ୍ସ ୱଚୋ ସୁତ୍ୱା, ଇସିସ୍ସ ନିବ୍ବିଦା ଅହୁ ।
ଲଦ୍ଧା ପୋରାଣକଂ ମଗ୍ଗଂ, ଗଚ୍ଛତେ ସୋ ୱିହାୟସଂ ॥
ଖତ୍ତିୟୋ ଚ ଇସିଂ ଦିସ୍ୱା, ଗଚ୍ଛମାନଂ ୱିହାୟସଂ ।
ସଂୱେଗଂ ଅଲଭୀ ଧୀରୋ, ପବ୍ବଜ୍ଜଂ ସମରୋଚୟି ॥
ତତୋ ସୋ ପବ୍ବଜିତ୍ୱାନ, କାମରାଗଂ ୱିରାଜୟି ।
କାମରାଗଂ ୱିରାଜେତ୍ୱା, ବ୍ରହ୍ମଲୋକୂପଗୋ ଅହୂତି ॥
ମହାପଲୋଭନଜାତକଂ ଏକାଦସମଂ ।
୫୦୮. ପଞ୍ଚପଣ୍ଡିତଜାତକଂ (୧୨)
ପଞ୍ଚ ପଣ୍ଡିତା ସମାଗତାତ୍ଥ, ପଞ୍ହା ମେ ପଟିଭାତି ତଂ ସୁଣାଥ ।
ନିନ୍ଦିୟମତ୍ଥଂ ପସଂସିୟଂ ୱା, କସ୍ସେୱାୱିକରେୟ୍ୟ [କସ୍ସ ୱାୱୀକରେୟ୍ୟ (କ॰)] ଗୁୟ୍ହମତ୍ଥଂ ॥
ତ୍ୱଂ ଆୱିକରୋହି ଭୂମିପାଲ, ଭତ୍ତା ଭାରସହୋ ତୁୱଂ ୱଦେ ତଂ ।
ତୱ ଛନ୍ଦରୁଚୀନି [ଛନ୍ଦଞ୍ଚ ରୁଚିଞ୍ଚ (ସୀ॰ ପୀ॰)] ସମ୍ମସିତ୍ୱା, ଅଥ ୱକ୍ଖନ୍ତି ଜନିନ୍ଦ ପଞ୍ଚ ଧୀରା ॥
ୟା ସୀଲୱତୀ ଅନଞ୍ଞଥେୟ୍ୟା [ଅନଞ୍ଞଧେୟ୍ୟା (ସୀ॰ ପୀ॰)], ଭତ୍ତୁଚ୍ଛନ୍ଦୱସାନୁଗା (ପିୟା) [( ) ନତ୍ଥି ସୀ॰ ପୀ॰ ପୋତ୍ଥକେସୁ] ମନାପା ।
ନିନ୍ଦିୟମତ୍ଥଂ ପସଂସିୟଂ ୱା, ଭରିୟାୟାୱିକରେୟ୍ୟ [ଭରିୟାୟ ୱାୱୀକରେୟ୍ୟ (କ॰)] ଗୁୟ୍ହମତ୍ଥଂ ॥
ୟୋ କିଚ୍ଛଗତସ୍ସ ଆତୁରସ୍ସ, ସରଣଂ ହୋତି ଗତୀ ପରାୟନଞ୍ଚ ।
ନିନ୍ଦିୟମତ୍ଥଂ ପସଂସିୟଂ ୱା, ସଖିନୋ ୱାୱିକରେୟ୍ୟ ଗୁୟ୍ହମତ୍ଥଂ ॥
ଜେଟ୍ଠୋ [ୟୋ ଜେଟ୍ଠୋ (ସ୍ୟା॰)] ଅଥ ମଜ୍ଝିମୋ କନିଟ୍ଠୋ, ୟୋ [ସୋ (ସୀ॰ ସ୍ୟା॰ ପୀ॰)] ଚେ ସୀଲସମାହିତୋ ଠିତତ୍ତୋ ।
ନିନ୍ଦିୟମତ୍ଥଂ ପସଂସିୟଂ ୱା, ଭାତୁ ୱାୱୀକରେୟ୍ୟ ଗୁୟ୍ହମତ୍ଥଂ ॥
ୟୋ ୱେ ପିତୁହଦୟସ୍ସ ପଦ୍ଧଗୂ [ପତ୍ଥଗୂ (ସ୍ୟା॰), ପତ୍ତଗୂ (କ॰)], ଅନୁଜାତୋ ପିତରଂ ଅନୋମପଞ୍ଞୋ ।
ନିନ୍ଦିୟମତ୍ଥଂ ପସଂସିୟଂ ୱା, ପୁତ୍ତସ୍ସାୱିକରେୟ୍ୟ [ପୁତ୍ତସ୍ସ ୱାୱୀକରେୟ୍ୟ (କ॰)] ଗୁୟ୍ହମତ୍ଥଂ ॥
ମାତା ଦ୍ୱିପଦାଜନିନ୍ଦସେଟ୍ଠ, ୟା ନଂ [ୟୋ ତଂ (ସୀ॰ ପୀ॰)] ପୋସେତି ଛନ୍ଦସା ପିୟେନ ।
ନିନ୍ଦିୟମତ୍ଥଂ ପସଂସିୟଂ ୱା, ମାତୁୟାୱୀକରେୟ୍ୟ [ମାତୁୟା ୱାୱୀକରେୟ୍ୟ (କ॰)] ଗୁୟ୍ହମତ୍ଥଂ ॥
ଗୁୟ୍ହସ୍ସ ହି ଗୁୟ୍ହମେୱ ସାଧୁ, ନ ହି ଗୁୟ୍ହସ୍ସ ପସତ୍ଥମାୱିକମ୍ମଂ ।
ଅନିପ୍ଫନ୍ନତା [ଅନିପ୍ଫାଦାୟ (ସୀ॰ ପୀ॰), ଅନିପ୍ଫନ୍ନତାୟ (ସ୍ୟା॰), ଆ ନିପ୍ଫାଦା ( ?)] ସହେୟ୍ୟ ଧୀରୋ, ନିପ୍ଫନ୍ନୋୱ [ନିପ୍ଫନ୍ନତ୍ଥୋ (ସୀ॰ ପୀ॰), ନିପ୍ଫନ୍ନତ୍ଥୋୱ (ସ୍ୟା॰)] ୟଥାସୁଖଂ ଭଣେୟ୍ୟ ॥
କିଂ ତ୍ୱଂ ୱିମନୋସି ରାଜସେଟ୍ଠ, ଦ୍ୱିପଦଜନିନ୍ଦ [ଦିପଦିନ୍ଦ (ସୀ॰ ସ୍ୟା॰ ପୀ॰)] ୱଚନଂ ସୁଣୋମ ମେତଂ [ନେତଂ (ସୀ॰ ପୀ॰), ତେତଂ (ସ୍ୟା॰)]।
କିଂ ଚିନ୍ତୟମାନୋ ଦୁମ୍ମନୋସି, ନୂନ ଦେୱ ଅପରାଧୋ ଅତ୍ଥି ମୟ୍ହଂ ॥
‘‘ପଣ୍ହେ [ପଞ୍ଞୋ (ସୀ॰ ପୀ॰), ପଞ୍ହେ (ସ୍ୟା॰), ପନ୍ହେ (କ॰)] ୱଜ୍ଝୋ ମହୋସଧୋ’’ତି, ଆଣତ୍ତୋ ମେ ୱଧାୟ ଭୂରିପଞ୍ଞୋ ।
ତଂ ଚିନ୍ତୟମାନୋ ଦୁମ୍ମନୋସ୍ମି, ନ ହି ଦେୱୀ ଅପରାଧୋ ଅତ୍ଥି ତୁୟ୍ହଂ ॥
ଅଭିଦୋସଗତୋ ଦାନି ଏହିସି, କିଂ ସୁତ୍ୱା କିଂ ସଙ୍କତେ ମନୋ ତେ ।
କୋ ତେ କିମୱୋଚ ଭୂରିପଞ୍ଞ, ଇଙ୍ଘ ୱଚନଂ ସୁଣୋମ ବ୍ରୂହି ମେତଂ ॥
‘‘ପଣ୍ହେ ୱଜ୍ଝୋ ମହୋସଧୋ’’ତି, ୟଦି ତେ ମନ୍ତୟିତଂ ଜନିନ୍ଦ ଦୋସଂ ।
ଭରିୟାୟ ରହୋଗତୋ ଅସଂସି, ଗୁୟ୍ହଂ ପାତୁକତଂ ସୁତଂ ମମେତଂ ॥
ୟଂ ସାଲୱନସ୍ମିଂ ସେନକୋ, ପାପକମ୍ମଂ ଅକାସି ଅସବ୍ଭିରୂପଂ ।
ସଖିନୋୱ ରହୋଗତୋ ଅସଂସି, ଗୁୟ୍ହଂ ପାତୁକତଂ ସୁତଂ ମମେତଂ ॥
ପୁକ୍କୁସ [ପକ୍କୁସ (କ॰) ଜା॰ ୧.୭.୪୧ ପଣ୍ଣଜାତକେ ପସ୍ସିତବ୍ବଂ] ପୁରିସସ୍ସ ତେ ଜନିନ୍ଦ, ଉପ୍ପନ୍ନୋ ରୋଗୋ ଅରାଜୟୁତ୍ତୋ ।
ଭାତୁଞ୍ଚ [ଭାତୁଚ୍ଚ (ସୀ॰ ପୀ॰), ଭାତୁୱ (ସ୍ୟା॰)] ରହୋଗତୋ ଅସଂସି, ଗୁୟ୍ହଂ ପାତୁକତଂ ସୁତଂ ମମେତଂ ॥
ଆବାଧୋୟଂ ଅସବ୍ଭିରୂପୋ, କାମିନ୍ଦୋ [କାୱିନ୍ଦୋ (ସୀ॰ ପୀ॰)] ନରଦେୱେନ ଫୁଟ୍ଠୋ ।
ପୁତ୍ତସ୍ସ ରହୋଗତୋ ଅସଂସି, ଗୁୟ୍ହଂ ପାତୁକତଂ ସୁତଂ ମମେତଂ ॥
ଅଟ୍ଠୱଙ୍କଂ ମଣିରତନଂ ଉଳାରଂ, ସକ୍କୋ ତେ ଅଦଦା ପିତାମହସ୍ସ ।
ଦେୱିନ୍ଦସ୍ସ ଗତଂ ତଦଜ୍ଜ ହତ୍ଥଂ [ଦେୱିନ୍ଦସ୍ସ ତଦଜ୍ଜ ହତ୍ଥଗତଂ (କ॰)], ମାତୁଞ୍ଚ ରହୋଗତୋ ଅସଂସି ।
ଗୁୟ୍ହଂ ପାତୁକତଂ ସୁତଂ ମମେତଂ ॥
ଗୁୟ୍ହସ୍ସ ହି ଗୁୟ୍ହମେୱ ସାଧୁ, ନ ହି ଗୁୟ୍ହସ୍ସ ପସତ୍ଥମାୱିକମ୍ମଂ ।
ଅନିପ୍ଫନ୍ନତା ସହେୟ୍ୟ ଧୀରୋ, ନିପ୍ଫନ୍ନୋୱ ୟଥାସୁଖଂ ଭଣେୟ୍ୟ ॥
ନ ଗୁୟ୍ହମତ୍ଥଂ ୱିୱରେୟ୍ୟ, ରକ୍ଖେୟ୍ୟ ନଂ ୟଥା ନିଧିଂ ।
ନ ହି ପାତୁକତୋ ସାଧୁ, ଗୁୟ୍ହୋ ଅତ୍ଥୋ ପଜାନତା ॥
ଥିୟା ଗୁୟ୍ହଂ ନ ସଂସେୟ୍ୟ, ଅମିତ୍ତସ୍ସ ଚ ପଣ୍ଡିତୋ ।
ୟୋ ଚାମିସେନ ସଂହୀରୋ, ହଦୟତ୍ଥେନୋ ଚ ୟୋ ନରୋ ॥
ଗୁୟ୍ହମତ୍ଥଂ ଅସମ୍ବୁଦ୍ଧଂ, ସମ୍ବୋଧୟତି ୟୋ ନରୋ ।
ମନ୍ତଭେଦଭୟା ତସ୍ସ, ଦାସଭୂତୋ ତିତିକ୍ଖତି ॥
ୟାୱନ୍ତୋ ପୁରିସସ୍ସତ୍ଥଂ, ଗୁୟ୍ହଂ ଜାନନ୍ତି ମନ୍ତିନଂ ।
ତାୱନ୍ତୋ ତସ୍ସ ଉବ୍ବେଗା, ତସ୍ମା ଗୁୟ୍ହଂ ନ ୱିସ୍ସଜେ ॥
ୱିୱିଚ୍ଚ ଭାସେୟ୍ୟ ଦିୱା ରହସ୍ସଂ, ରତ୍ତିଂ ଗିରଂ ନାତିୱେଲଂ ପମୁଞ୍ଚେ ।
ଉପସ୍ସୁତିକା ହି ସୁଣନ୍ତି ମନ୍ତଂ, ତସ୍ମା ମନ୍ତୋ ଖିପ୍ପମୁପେତି ଭେଦନ୍ତି ॥
ପଞ୍ଚପଣ୍ଡିତଜାତକଂ ଦ୍ୱାଦସମଂ ।
୫୦୯. ହତ୍ଥିପାଲଜାତକଂ (୧୩)
ଚିରସ୍ସଂ ୱତ ପସ୍ସାମ, ବ୍ରାହ୍ମଣଂ ଦେୱୱଣ୍ଣିନଂ ।
ମହାଜଟଂ ଖାରିଧରଂ [ଭାରଧରଂ (ପୀ॰)], ପଙ୍କଦନ୍ତଂ ରଜସ୍ସିରଂ ॥
ଚିରସ୍ସଂ ୱତ ପସ୍ସାମ, ଇସିଂ ଧମ୍ମଗୁଣେ ରତଂ ।
କାସାୟୱତ୍ଥୱସନଂ, ୱାକଚୀରଂ ପଟିଚ୍ଛଦଂ ॥
ଆସନଂ ଉଦକଂ ପଜ୍ଜଂ, ପଟିଗଣ୍ହାତୁ ନୋ ଭୱଂ ।
ଅଗ୍ଘେ ଭୱନ୍ତଂ ପୁଚ୍ଛାମ, ଅଗ୍ଘଂ କୁରୁତୁ ନୋ ଭୱଂ ॥
ଅଧିଚ୍ଚ ୱେଦେ ପରିୟେସ ୱିତ୍ତଂ, ପୁତ୍ତେ ଗହେ [ଗେହେ (ସୀ॰ ସ୍ୟା॰ ପୀ॰)] ତାତ ପତିଟ୍ଠପେତ୍ୱା ।
ଗନ୍ଧେ ରସେ ପଚ୍ଚନୁଭୁୟ୍ୟ [ପଚ୍ଚନୁଭୋତ୍ୱ (ସ୍ୟା॰), ପଚ୍ଚନୁଭୁତ୍ୱ (ପୀ॰)] ସବ୍ବଂ, ଅରଞ୍ଞଂ ସାଧୁ ମୁନି ସୋ ପସତ୍ଥୋ ॥
ୱେଦା ନ ସଚ୍ଚା ନ ଚ ୱିତ୍ତଲାଭୋ, ନ ପୁତ୍ତଲାଭେନ ଜରଂ ୱିହନ୍ତି ।
ଗନ୍ଧେ ରସେ ମୁଚ୍ଚନ [ମୁଞ୍ଚନ (ସୀ॰ କ॰)] ମାହୁ ସନ୍ତୋ, ସକମ୍ମୁନା [ସକମ୍ମନା (ସୀ॰ ପୀ॰)] ହୋତି ଫଲୂପପତ୍ତି ॥
ଅଦ୍ଧା ହି ସଚ୍ଚଂ ୱଚନଂ ତୱେତଂ, ସକମ୍ମୁନା ହୋତି ଫଲୂପପତ୍ତି ।
ଜିଣ୍ଣା ଚ ମାତାପିତରୋ ତୱୀମେ [ତୱେମେ (ସୀ॰), ତୱ ୟିମେ (ସ୍ୟା॰ ପୀ॰)], ପସ୍ସେୟ୍ୟୁଂ ତଂ ୱସ୍ସସତଂ ଅରୋଗଂ [ଅରୋଗ୍ୟଂ (ସ୍ୟା॰ କ॰)]॥
ୟସ୍ସସ୍ସ ସକ୍ଖୀ ମରଣେନ ରାଜ, ଜରାୟ ମେତ୍ତୀ ନରୱୀରସେଟ୍ଠ ।
ୟୋ ଚାପି ଜଞ୍ଞା ନ ମରିସ୍ସଂ କଦାଚି, ପସ୍ସେୟ୍ୟୁଂ ତଂ ୱସ୍ସସତଂ ଅରୋଗଂ ॥
ୟଥାପି ନାୱଂ ପୁରିସୋ ଦକମ୍ହି, ଏରେତି ଚେ ନଂ ଉପନେତି ତୀରଂ ।
ଏୱମ୍ପି ବ୍ୟାଧୀ ସତତଂ ଜରା ଚ, ଉପନେତି ମଚ୍ଚଂ [ମଚ୍ଚୁ (ସ୍ୟା॰ ପୀ॰)] ୱସମନ୍ତକସ୍ସ ॥
ପଙ୍କୋ ଚ କାମା ପଲିପୋ ଚ କାମା, ମନୋହରା ଦୁତ୍ତରା ମଚ୍ଚୁଧେୟ୍ୟା ।
ଏତସ୍ମିଂ ପଙ୍କେ ପଲିପେ ବ୍ୟସନ୍ନା [ୱିସନ୍ନା (ସ୍ୟା॰ କ॰)], ହୀନତ୍ତରୂପା ନ ତରନ୍ତି ପାରଂ ॥
ଅୟଂ ପୁରେ ଲୁଦ୍ଦମକାସି କମ୍ମଂ, ସ୍ୱାୟଂ ଗହୀତୋ ନ ହି ମୋକ୍ଖିତୋ ମେ ।
ଓରୁନ୍ଧିୟା ନଂ ପରିରକ୍ଖିସ୍ସାମି, ମାୟଂ ପୁନ ଲୁଦ୍ଦମକାସି କମ୍ମଂ ॥
ଗୱଂୱ [ଗାୱଂୱ (ସୀ॰)] ନଟ୍ଠଂ ପୁରିସୋ ୟଥା ୱନେ, ଅନ୍ୱେସତୀ [ପରିୟେସତୀ (ସୀ॰ ପୀ॰)] ରାଜ ଅପସ୍ସମାନୋ ।
ଏୱଂ ନଟ୍ଠୋ ଏସୁକାରୀ ମମତ୍ଥୋ, ସୋହଂ କଥଂ ନ ଗୱେସେୟ୍ୟଂ ରାଜ ॥
ହିୟ୍ୟୋତି ହିୟ୍ୟତି [ହୀୟୋତି ହୀୟତି (ସୀ॰)] ପୋସୋ, ପରେତି ପରିହାୟତି ।
ଅନାଗତଂ ନେତମତ୍ଥୀତି ଞତ୍ୱା, ଉପ୍ପନ୍ନଛନ୍ଦଂ କୋ ପନୁଦେୟ୍ୟ ଧୀରୋ ॥
ପସ୍ସାମି ୱୋହଂ ଦହରଂ [ଦହରୀ (ସ୍ୟା॰ ପୀ॰ କ॰)] କୁମାରିଂ, ମତ୍ତୂପମଂ କେତକପୁପ୍ଫନେତ୍ତଂ ।
ଅଭୁତ୍ତଭୋଗେ [ଅଭୁତ୍ୱ ଭୋଗେ (ସ୍ୟା॰ କ॰ ଅଟ୍ଠ॰), ଅଭୁତ୍ୱ ଭୋଗେ (ପୀ॰), ଭୋଗେ ଅତୁତ୍ୱା (କ॰)] ପଠମେ ୱୟସ୍ମିଂ, ଆଦାୟ ମଚ୍ଚୁ ୱଜତେ କୁମାରିଂ ॥
ୟୁୱା ସୁଜାତୋ ସୁମୁଖୋ ସୁଦସ୍ସନୋ, ସାମୋ କୁସୁମ୍ଭପରିକିଣ୍ଣମସ୍ସୁ ।
ହିତ୍ୱାନ କାମେ ପଟିକଚ୍ଚ [ପଟିଗଚ୍ଚ (ସୀ॰), ପଟିଗଚ୍ଛ (ସ୍ୟା॰ ପୀ॰)] ଗେହଂ, ଅନୁଜାନ ମଂ ପବ୍ବଜିସ୍ସାମି ଦେୱ ॥
ସାଖାହି ରୁକ୍ଖୋ ଲଭତେ ସମଞ୍ଞଂ, ପହୀନସାଖଂ ପନ ଖାଣୁମାହୁ ।
ପହୀନପୁତ୍ତସ୍ସ ମମଜ୍ଜ ଭୋତି, ୱାସେଟ୍ଠି ଭିକ୍ଖାଚରିୟାୟ କାଲୋ ॥
ଅଘସ୍ମି କୋଞ୍ଚାୱ ୟଥା ହିମଚ୍ଚୟେ, କତାନି [ତନ୍ତାନି (ସୀ॰ ପୀ॰)] ଜାଲାନି ପଦାଲିୟ [ପଦାଲେୟ୍ୟ (ସୀ॰)] ହଂସା ।
ଗଚ୍ଛନ୍ତି ପୁତ୍ତା ଚ ପତୀ ଚ ମୟ୍ହଂ, ସାହଂ କଥଂ ନାନୁୱଜେ ପଜାନଂ ॥
ଏତେ ଭୁତ୍ୱା ୱମିତ୍ୱା ଚ, ପକ୍କମନ୍ତି ୱିହଙ୍ଗମା ।
ୟେ ଚ ଭୁତ୍ୱାନ ୱମିଂସୁ, ତେ ମେ ହତ୍ଥତ୍ତ [ହତ୍ଥତ୍ଥ (ସୀ॰ ସ୍ୟା॰ ପୀ॰)] ମାଗତା ॥
ଅୱମୀ ବ୍ରାହ୍ମଣୋ କାମେ, ସୋ [ତେ (ସୀ॰ ପୀ॰)] ତ୍ୱଂ ପଚ୍ଚାୱମିସ୍ସସି ।
ୱନ୍ତାଦୋ ପୁରିସୋ ରାଜ, ନ ସୋ ହୋତି ପସଂସିୟୋ ॥
ପଙ୍କେ ଚ [ପଙ୍କେୱ (ସୀ॰ ପୀ॰)] ପୋସଂ ପଲିପେ ବ୍ୟସନ୍ନଂ, ବଲୀ ୟଥା ଦୁବ୍ବଲମୁଦ୍ଧରେୟ୍ୟ ।
ଏୱମ୍ପି ମଂ ତ୍ୱଂ ଉଦତାରି ଭୋତି, ପଞ୍ଚାଲି ଗାଥାହି ସୁଭାସିତାହି ॥
ଇଦଂ ୱତ୍ୱା ମହାରାଜା, ଏସୁକାରୀ ଦିସମ୍ପତି ।
ରଟ୍ଠଂ ହିତ୍ୱାନ ପବ୍ବଜି, ନାଗୋ ଛେତ୍ୱାୱ ବନ୍ଧନଂ ॥
ରାଜା ଚ ପବ୍ବଜ୍ଜମରୋଚୟିତ୍ଥ, ରଟ୍ଠଂ ପହାୟ ନରୱୀରସେଟ୍ଠୋ ।
ତୁୱମ୍ପି ନୋ ହୋତି ୟଥେୱ ରାଜା, ଅମ୍ହେହି ଗୁତ୍ତା ଅନୁସାସ ରଜ୍ଜଂ ॥
ରାଜା ଚ ପବ୍ବଜ୍ଜମରୋଚୟିତ୍ଥ, ରଟ୍ଠଂ ପହାୟ ନରୱୀରସେଟ୍ଠୋ ।
ଅହମ୍ପି ଏକା [ଏକାୱ (ସୀ॰)] ଚରିସ୍ସାମି ଲୋକେ, ହିତ୍ୱାନ କାମାନି ମନୋରମାନି ॥
ରାଜା ଚ ପବ୍ବଜ୍ଜମରୋଚୟିତ୍ଥ, ରଟ୍ଠଂ ପହାୟ ନରୱୀରସେଟ୍ଠୋ ।
ଅହମ୍ପି ଏକା ଚରିସ୍ସାମି ଲୋକେ, ହିତ୍ୱାନ କାମାନି ୟଥୋଧିକାନି ॥
ଅଚ୍ଚେନ୍ତି କାଲା ତରୟନ୍ତି ରତ୍ତିୟୋ, ୱୟୋଗୁଣା ଅନୁପୁବ୍ବଂ ଜହନ୍ତି ।
ଅହମ୍ପି ଏକା ଚରିସ୍ସାମି ଲୋକେ, ହିତ୍ୱାନ କାମାନି ମନୋରମାନି ॥
ଅଚ୍ଚେନ୍ତି କାଲା ତରୟନ୍ତି ରତ୍ତିୟୋ, ୱୟୋଗୁଣା ଅନୁପୁବ୍ବଂ ଜହନ୍ତି ।
ଅହମ୍ପି ଏକା ଚରିସ୍ସାମି ଲୋକେ, ହିତ୍ୱାନ କାମାନି ୟଥୋଧିକାନି ॥
ଅଚ୍ଚେନ୍ତି କାଲା ତରୟନ୍ତି ରତ୍ତିୟୋ, ୱୟୋଗୁଣା ଅନୁପୁବ୍ବଂ ଜହନ୍ତି ।
ଅହମ୍ପି ଏକା ଚରିସ୍ସାମି ଲୋକେ, ସୀତିଭୂତା [ସୀତୀଭୂତା (ସୀ॰)] ସବ୍ବମତିଚ୍ଚ ସଙ୍ଗନ୍ତି ॥
ହତ୍ଥିପାଲଜାତକଂ ତେରସମଂ ।
୫୧୦. ଅୟୋଘରଜାତକଂ (୧୪)
ୟମେକରତ୍ତିଂ ପଠମଂ, ଗବ୍ଭେ ୱସତି ମାଣୱୋ ।
ଅବ୍ଭୁଟ୍ଠିତୋୱ ସୋ ୟାତି [ସୟତି (ସୀ॰ ପୀ॰), ସ ୟାତି (କତ୍ଥଚି)], ସଗଚ୍ଛଂ ନ ନିୱତ୍ତତି ॥
ନ ୟୁଜ୍ଝମାନା ନ ବଲେନୱସ୍ସିତା, ନରା ନ ଜୀରନ୍ତି ନ ଚାପି ମିୟ୍ୟରେ ।
ସବ୍ବଂ ହିଦଂ [ହି ତଂ (ସୀ॰ ପୀ॰)] ଜାତିଜରାୟୁପଦ୍ଦୁତଂ, ତଂ ମେ ମତୀ ହୋତି ଚରାମି ଧମ୍ମଂ ॥
ଚତୁରଙ୍ଗିନିଂ ସେନଂ ସୁଭିଂସରୂପଂ, ଜୟନ୍ତି ରଟ୍ଠାଧିପତୀ ପସୟ୍ହ ।
ନ ମଚ୍ଚୁନୋ ଜୟିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ହତ୍ଥୀହି ଅସ୍ସେହି ରଥେହି ପତ୍ତିଭି, ପରିୱାରିତା ମୁଚ୍ଚରେ ଏକଚ୍ଚେୟ୍ୟା [ଏକଚେୟ୍ୟା (ସୀ॰ ପୀ॰)]।
ନ ମଚ୍ଚୁନୋ [ନ ମଚ୍ଚୁତୋ (ସୀ॰)] ମୁଚ୍ଚିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ହତ୍ଥୀହି ଅସ୍ସେହି ରଥେହି ପତ୍ତିଭି, ସୂରା [ପୁରା (କ॰)] ପଭଞ୍ଜନ୍ତି ପଧଂସୟନ୍ତି ।
ନ ମଚ୍ଚୁନୋ ଭଞ୍ଜିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ମତ୍ତା ଗଜା ଭିନ୍ନଗଳା [ପଭିନ୍ନଗଲା (ସୀ॰)] ପଭିନ୍ନା, ନଗରାନି ମଦ୍ଦନ୍ତି ଜନଂ ହନନ୍ତି ।
ନ ମଚ୍ଚୁନୋ ମଦ୍ଦିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଇସ୍ସାସିନୋ କତହତ୍ଥାପି ୱୀରା [ୱୀରା (ସୀ॰ ପୀ॰)], ଦୂରେପାତୀ [ପତୀ (କ॰)] ଅକ୍ଖଣୱେଧିନୋପି ।
ନ ମଚ୍ଚୁନୋ ୱିଜ୍ଝିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ସରାନି ଖୀୟନ୍ତି ସସେଲକାନନା, ସବ୍ବଂ ହିଦଂ [ହି ତଂ (ସୀ॰ ପୀ॰), ପିତଂ (ସ୍ୟା॰)] ଖୀୟତି ଦୀଘମନ୍ତରଂ ।
ସବ୍ବଂ ହିଦଂ [ହି ତଂ (ସୀ॰ ପୀ॰), ପିତଂ (ସ୍ୟା॰)] ଭଞ୍ଜରେ କାଲପରିୟାୟଂ, ତଂ ମେ ମତୀ ହୋତି ଚରାମି ଧମ୍ମଂ ॥
ସବ୍ବେ ସମେୱଂ ହି ନରାନନାରିନଂ [ନରାନରୀନଂ (ପୀ॰), ନାରୀ ନରାନଂ (ସ୍ୟା॰), ନରନାରୀନଂ (କ॰)], ଚଲାଚଲଂ ପାଣଭୁନୋଧ ଜୀୱିତଂ ।
ପଟୋୱ ଧୁତ୍ତସ୍ସ ଦୁମୋୱ କୂଲଜୋ, ତଂ ମେ ମତୀ ହୋତି ଚରାମି ଧମ୍ମଂ ॥
ଦୁମପ୍ଫଲାନେୱ ପତନ୍ତି ମାଣୱା, ଦହରା ଚ ୱୁଦ୍ଧା ଚ ସରୀରଭେଦା ।
ନାରିୟୋ ନରା ମଜ୍ଝିମପୋରିସା ଚ, ତଂ ମେ ମତୀ ହୋତି ଚରାମି ଧମ୍ମଂ ॥
ନାୟଂ ୱୟୋ ତାରକରାଜସନ୍ନିଭୋ, ୟଦବ୍ଭତୀତଂ ଗତମେୱ ଦାନି ତଂ ।
ଜିଣ୍ଣସ୍ସ ହୀ ନତ୍ଥି ରତୀ କୁତୋ ସୁଖଂ, ତଂ ମେ ମତୀ ହୋତି ଚରାମି ଧମ୍ମଂ ॥
ୟକ୍ଖା ପିସାଚା ଅଥୱାପି ପେତା, କୁପିତାତେ [କୁପିତାପି ତେ (ସୀ॰ ପୀ॰)] ଅସ୍ସସନ୍ତି ମନୁସ୍ସେ ।
ନ ମଚ୍ଚୁନୋ ଅସ୍ସସିତୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ୟକ୍ଖେ ପିସାଚେ ଅଥୱାପି ପେତେ, କୁପିତେପି ତେ ନିଜ୍ଝପନଂ କରୋନ୍ତି ।
ନ ମଚ୍ଚୁନୋ ନିଜ୍ଝପନଂ କରୋନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଅପରାଧକେ ଦୂସକେ ହେଠକେ ଚ, ରାଜାନୋ ଦଣ୍ଡେନ୍ତି ୱିଦିତ୍ୱାନ ଦୋସଂ ।
ନ ମଚ୍ଚୁନୋ ଦଣ୍ଡୟିତୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଅପରାଧକା ଦୂସକା ହେଟ୍ଠକା ଚ, ଲଭନ୍ତି ତେ ରାଜିନୋ ନିଜ୍ଝପେତୁଂ ।
ନ ମଚ୍ଚୁନୋ ନିଜ୍ଝପନଂ କରୋନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ନ ଖତ୍ତିୟୋତି ନ ଚ ବ୍ରାହ୍ମଣୋତି, ନ ଅଡ୍ଢକା ବଲୱା ତେଜୱାପି ।
ନ ମଚ୍ଚୁରାଜସ୍ସ ଅପେକ୍ଖମତ୍ଥି, ତଂ ମେ ମତୀ ହୋତି ଚରାମି ଧମ୍ମଂ ॥
ସୀହା ଚ ବ୍ୟଗ୍ଘା ଚ ଅଥୋପି ଦୀପିୟୋ, ପସୟ୍ହ ଖାଦନ୍ତି ୱିପ୍ଫନ୍ଦମାନଂ ।
ନ ମଚ୍ଚୁନୋ ଖାଦିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ମାୟାକାରା ରଙ୍ଗମଜ୍ଝେ କରୋନ୍ତା, ମୋହେନ୍ତି ଚକ୍ଖୂନି ଜନସ୍ସ ତାୱଦେ ।
ନ ମଚ୍ଚୁନୋ ମୋହୟିତୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଆସୀୱିସା କୁପିତା ଉଗ୍ଗତେଜା, ଡଂସନ୍ତି ମାରେନ୍ତିପି ତେ ମନୁସ୍ସେ ।
ନ ମଚ୍ଚୁନୋ ଡଂସିତୁମୁସ୍ସହନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଆସୀୱିସା କୁପିତା ୟଂ ଡଂସନ୍ତି, ତିକିଚ୍ଛକା ତେସ ୱିସଂ ହନନ୍ତି ।
ନ ମଚ୍ଚୁନୋ ଦଟ୍ଠୱିସଂ [ଦଟ୍ଠସ୍ସ ୱିସଂ (କ॰)] ହନନ୍ତି, ତଂ ମେ ମତୀ ହୋତି ଚରାମି ଧମ୍ମଂ ॥
ଧମ୍ମନ୍ତରୀ ୱେତ୍ତରଣୀ [ୱେତରଣୀ (ସୀ॰ ପୀ॰)] ଚ ଭୋଜୋ, ୱିସାନି ହନ୍ତ୍ୱାନ ଭୁଜଙ୍ଗମାନଂ ।
ସୁୟ୍ୟନ୍ତି ତେ କାଲକତା ତଥେୱ, ତଂ ମେ ମତୀ ହୋତି ଚରାମି ଧମ୍ମଂ ॥
ୱିଜ୍ଜାଧରା ଘୋରମଧୀୟମାନା, ଅଦସ୍ସନଂ ଓସଧେହି ୱଜନ୍ତି ।
ନ ମଚ୍ଚୁରାଜସ୍ସ ୱଜନ୍ତଦସ୍ସନଂ [ୱଜନ୍ତି ଅଦସ୍ସନଂ (ସ୍ୟା॰ କ॰)], ତଂ ମେ ମତୀ ହୋତି ଚରାମି ଧମ୍ମଂ ॥
ଧମ୍ମୋ ହୱେ ରକ୍ଖତି ଧମ୍ମଚାରିଂ, ଧମ୍ମୋ ସୁଚିଣ୍ଣୋ ସୁଖମାୱହାତି ।
ଏସାନିସଂସୋ ଧମ୍ମେ ସୁଚିଣ୍ଣେ, ନ ଦୁଗ୍ଗତିଂ ଗଚ୍ଛତି ଧମ୍ମଚାରୀ ॥
ନ ହି ଧମ୍ମୋ ଅଧମ୍ମୋ ଚ, ଉଭୋ ସମୱିପାକିନୋ ।
ଅଧମ୍ମୋ ନିରୟଂ ନେତି, ଧମ୍ମୋ ପାପେତି ସୁଗ୍ଗତିନ୍ତି ॥
ଅୟୋଘରଜାତକଂ ଚୁଦ୍ଦସମଂ ।
ତସ୍ସୁଦ୍ଦାନଂ –
ମାତଙ୍ଗ ସମ୍ଭୂତ ସିୱି ସିରିମନ୍ତୋ, ରୋହଣ ହଂସ ସତ୍ତିଗୁମ୍ବୋ ଭଲ୍ଲାତିୟ ।
ସୋମନସ୍ସ ଚମ୍ପେୟ୍ୟ ବ୍ରହ୍ମ ପଞ୍ଚ-ପଣ୍ଡିତ ଚିରସ୍ସଂୱତ ଅୟୋଘରାତି ॥
ୱୀସତିନିପାତଂ ନିଟ୍ଠିତଂ ।
୧୬. ତିଂସନିପାତୋ
୫୧୧. କିଂଛନ୍ଦଜାତକଂ (୧)
କିଂଛନ୍ଦୋ କିମଧିପ୍ପାୟୋ, ଏକୋ ସମ୍ମସି ଘମ୍ମନି ।
କିଂ ପତ୍ଥୟାନୋ କିଂ ଏସଂ, କେନ ଅତ୍ଥେନ ବ୍ରାହ୍ମଣ ॥
ୟଥା ମହା ୱାରିଧରୋ, କୁମ୍ଭୋ ସୁପରିଣାହୱା [ସୁପରିଣାମୱା (କ॰)]।
ତଥୂପମଂ ଅମ୍ବପକ୍କଂ, ୱଣ୍ଣଗନ୍ଧରସୁତ୍ତମଂ ॥
ତଂ ୱୁୟ୍ହମାନଂ ସୋତେନ, ଦିସ୍ୱାନାମଲମଜ୍ଝିମେ ।
ପାଣୀହି ନଂ ଗହେତ୍ୱାନ, ଅଗ୍ୟାୟତନମାହରିଂ ॥
ତତୋ କଦଲିପତ୍ତେସୁ, ନିକ୍ଖିପିତ୍ୱା ସୟଂ ଅହଂ ।
ସତ୍ଥେନ ନଂ ୱିକପ୍ପେତ୍ୱା, ଖୁପ୍ପିପାସଂ ଅହାସି ମେ ॥
ସୋହଂ ଅପେତଦରଥୋ, ବ୍ୟନ୍ତୀଭୂତୋ [ବ୍ୟନ୍ତିଭୂତୋ (ସୀ॰ ପୀ॰ କ॰)] ଦୁଖକ୍ଖମୋ ।
ଅସ୍ସାଦଂ ନାଧିଗଚ୍ଛାମି, ଫଲେସ୍ୱଞ୍ଞେସୁ କେସୁଚି [କେସୁପି (କ॰ ସୀ॰)]॥
ସୋସେତ୍ୱା ନୂନ ମରଣଂ, ତଂ ମମଂ ଆୱହିସ୍ସତି ।
ଅମ୍ବଂ ୟସ୍ସ ଫଲଂ ସାଦୁ, ମଧୁରଗ୍ଗଂ ମନୋରମଂ ।
ୟମୁଦ୍ଧରିଂ ୱୁୟ୍ହମାନଂ, ଉଦଧିସ୍ମା ମହଣ୍ଣୱେ ॥
ଅକ୍ଖାତଂ ତେ ମୟା ସବ୍ବଂ, ୟସ୍ମା ଉପୱସାମହଂ ।
ରମ୍ମଂ ପତି ନିସିନ୍ନୋସ୍ମି, ପୁଥୁଲୋମାୟୁତା ପୁଥୁ ॥
ତ୍ୱଞ୍ଚ ଖୋ ମେୱ [ମେ (ସୀ॰), ମମ ( ?)] ଅକ୍ଖାହି, ଅତ୍ତାନମପଲାୟିନି ।
କା ୱା ତ୍ୱମସି କଲ୍ୟାଣି, କିସ୍ସ ୱା ତ୍ୱଂ ସୁମଜ୍ଝିମେ ॥
ରୁପ୍ପପଟ୍ଟପଲିମଟ୍ଠୀୱ [ରୁପ୍ପପଟ୍ଟପ୍ଲମଟ୍ଠୀୱ (ସ୍ୟା॰), ରୂପପଟ୍ଟପମଟ୍ଠୀୱ (କ॰)], ବ୍ୟଗ୍ଘୀୱ ଗିରିସାନୁଜା ।
ୟା ସନ୍ତି ନାରିୟୋ ଦେୱେସୁ, ଦେୱାନଂ ପରିଚାରିକା ॥
ୟା ଚ ମନୁସ୍ସଲୋକସ୍ମିଂ, ରୂପେନାନ୍ୱାଗତିତ୍ଥିୟୋ ।
ରୂପେନ ତେ ସଦିସୀ ନତ୍ଥି, ଦେୱେସୁ ଗନ୍ଧବ୍ବମନୁସ୍ସଲୋକେ [ଦେୱଗନ୍ଧବ୍ବମାନୁସେ (ସ୍ୟା॰)]।
ପୁଟ୍ଠାସି ମେ ଚାରୁପୁବ୍ବଙ୍ଗି, ବ୍ରୂହି ନାମଞ୍ଚ ବନ୍ଧୱେ ॥
ୟଂ ତ୍ୱଂ ପତି ନିସିନ୍ନୋସି, ରମ୍ମଂ ବ୍ରାହ୍ମଣ କୋସିକିଂ ।
ସାହଂ ଭୁସାଲୟା ୱୁତ୍ଥା, ୱରୱାରିୱହୋଘସା ॥
ନାନାଦୁମଗଣାକିଣ୍ଣା, ବହୁକା ଗିରିକନ୍ଦରା ।
ମମେୱ ପମୁଖା ହୋନ୍ତି, ଅଭିସନ୍ଦନ୍ତି ପାୱୁସେ ॥
ଅଥୋ ବହୂ ୱନତୋଦା, ନୀଲୱାରିୱହିନ୍ଧରା ।
ବହୁକା ନାଗୱିତ୍ତୋଦା, ଅଭିସନ୍ଦନ୍ତି ୱାରିନା ॥
ତା ଅମ୍ବଜମ୍ବୁଲବୁଜା, ନୀପା ତାଲା ଚୁଦୁମ୍ବରା [ତାଲମୁଦୁମ୍ବରା (ସ୍ୟା॰ କ॰)]।
ବହୂନି ଫଲଜାତାନି, ଆୱହନ୍ତି ଅଭିଣ୍ହସୋ ॥
ୟଂ କିଞ୍ଚି ଉଭତୋ ତୀରେ, ଫଲଂ ପତତି ଅମ୍ବୁନି ।
ଅସଂସୟଂ ତଂ ସୋତସ୍ସ, ଫଲଂ ହୋତି ୱସାନୁଗଂ ॥
ଏତଦଞ୍ଞାୟ ମେଧାୱି, ପୁଥୁପଞ୍ଞ ସୁଣୋହି ମେ ।
ମା ରୋଚୟ ମଭିସଙ୍ଗଂ, ପଟିସେଧ ଜନାଧିପ ॥
ନ ୱାହଂ ୱଡ୍ଢୱଂ [ୱଦ୍ଧୱଂ (ସୀ॰ ପୀ॰)] ମଞ୍ଞେ, ୟଂ ତ୍ୱଂ ରଟ୍ଠାଭିୱଡ୍ଢନ ।
ଆଚେୟ୍ୟମାନୋ ରାଜିସି, ମରଣଂ ଅଭିକଙ୍ଖସି ॥
ତସ୍ସ ଜାନନ୍ତି ପିତରୋ, ଗନ୍ଧବ୍ବା ଚ ସଦେୱକା ।
ୟେ ଚାପି ଇସୟୋ ଲୋକେ, ସଞ୍ଞତତ୍ତା ତପସ୍ସିନୋ ।
ଅସଂସୟଂ ତେପି [ତେ (ସୀ॰ ପୀ॰)] ଜାନନ୍ତି, ପଟ୍ଠଭୂତା [ୱଦ୍ଧଭୂତା (ସୀ॰ ପୀ॰)] ୟସସ୍ସିନୋ ॥
ଏୱଂ ୱିଦିତ୍ୱା ୱିଦୂ ସବ୍ବଧମ୍ମଂ, ୱିଦ୍ଧଂସନଂ ଚୱନଂ ଜୀୱିତସ୍ସ ।
ନ ଚୀୟତୀ ତସ୍ସ ନରସ୍ସ ପାପଂ, ସଚେ ନ ଚେତେତି ୱଧାୟ ତସ୍ସ ॥
ଇସିପୂଗସମଞ୍ଞାତେ, ଏୱଂ ଲୋକ୍ୟା ୱିଦିତା ସତି [ପତି (କ॰ ସ୍ୟା॰ କ॰)]।
ଅନରିୟପରିସମ୍ଭାସେ, ପାପକମ୍ମଂ ଜିଗୀସସି [ଜିଗିଂସସି (ସୀ॰ ସ୍ୟା॰ ପୀ॰)]॥
ସଚେ ଅହଂ ମରିସ୍ସାମି, ତୀରେ ତେ ପୁଥୁସୁସ୍ସୋଣି ।
ଅସଂସୟଂ ତଂ ଅସିଲୋକୋ, ମୟି ପେତେ ଆଗମିସ୍ସତି ॥
ତସ୍ମା ହି ପାପକଂ କମ୍ମଂ, ରକ୍ଖସ୍ସେୱ [ରକ୍ଖସ୍ସୁ ଚ (ସ୍ୟା॰)] ସୁମଜ୍ଝିମେ ।
ମା ତଂ ସବ୍ବୋ ଜନୋ ପଚ୍ଛା, ପକୁଟ୍ଠାୟି [ପକତ୍ଥାସି (ସୀ॰ ପୀ॰), ପତ୍ୱକ୍ଖାସି (ସ୍ୟା॰)] ମୟି ମତେ ॥
ଅଞ୍ଞାତମେତଂ ଅୱିସୟ୍ହସାହି, ଅତ୍ତାନମମ୍ବଞ୍ଚ ଦଦାମି ତେ ତଂ ।
ସୋ ଦୁଚ୍ଚଜେ କାମଗୁଣେ ପହାୟ, ସନ୍ତିଞ୍ଚ ଧମ୍ମଞ୍ଚ ଅଧିଟ୍ଠିତୋସି ॥
ୟୋ ହିତ୍ୱା ପୁବ୍ବସଞ୍ଞୋଗଂ, ପଚ୍ଛା ସଂୟୋଜନେ ଠିତୋ ।
ଅଧମ୍ମଞ୍ଚେୱ ଚରତି, ପାପଞ୍ଚସ୍ସ ପୱଡ୍ଢତି ॥
ଏହି ତଂ ପାପୟିସ୍ସାମି, କାମଂ ଅପ୍ପୋସ୍ସୁକୋ ଭୱ ।
ଉପାନୟାମି ସୀତସ୍ମିଂ, ୱିହରାହି ଅନୁସ୍ସୁକୋ ॥
ତଂ ପୁପ୍ଫରସମତ୍ତେଭି, ୱକ୍କଙ୍ଗେହି ଅରିନ୍ଦମ ।
କୋଞ୍ଚା ମୟୂରା ଦିୱିୟା, କୋଲଟ୍ଠିମଧୁସାଳିକା ।
କୂଜିତା ହଂସପୂଗେହି, କୋକିଲେତ୍ଥ ପବୋଧରେ ॥
ଅମ୍ବେତ୍ଥ ୱିପ୍ପସାଖଗ୍ଗା [ୱିପ୍ପସୂନଗ୍ଗା (ସୀ॰ ସ୍ୟା॰ ପୀ॰), ୱିପ୍ପଓନଗ୍ଗା (କ॰)], ପଲାଲଖଲସନ୍ନିଭା ।
କୋସମ୍ବସଳଲା [କୋସୁମ୍ଭସଲଲା (ସୀ॰ ସ୍ୟା॰ ପୀ॰)] ନୀପା, ପକ୍କତାଲୱିଲମ୍ବିନୋ ॥
ମାଲୀ ତିରିଟୀ କାୟୂରୀ, ଅଙ୍ଗଦୀ ଚନ୍ଦନୁସ୍ସଦୋ [ଚନ୍ଦନସ୍ସଦୋ (ସୀ॰)]।
ରତ୍ତିଂ ତ୍ୱଂ ପରିଚାରେସି, ଦିୱା ୱେଦେସି ୱେଦନଂ ॥
ସୋଳସିତ୍ଥିସହସ୍ସାନି, ୟା ତେମା ପରିଚାରିକା ।
ଏୱଂ ମହାନୁଭାୱୋସି, ଅବ୍ଭୁତୋ ଲୋମହଂସନୋ ॥
କିଂ କମ୍ମମକରୀ ପୁବ୍ବେ, ପାପଂ ଅତ୍ତଦୁଖାୱହଂ ।
ୟଂ କରିତ୍ୱା ମନୁସ୍ସେସୁ, ପିଟ୍ଠିମଂସାନି ଖାଦସି ॥
ଅଜ୍ଝେନାନି ପଟିଗ୍ଗୟ୍ହ, କାମେସୁ ଗଧିତୋ [ଗଥିତୋ (ସୀ॰ ପୀ॰), ଗିଦ୍ଧିତୋ (ସ୍ୟା॰ କ॰), ଗିଦ୍ଧିକୋ (କ॰ ଅଟ୍ଠ॰)] ଅହଂ ।
ଅଚରିଂ ଦୀଘମଦ୍ଧାନଂ, ପରେସଂ ଅହିତାୟହଂ ॥
ୟୋ ପିଟ୍ଠିମଂସିକୋ ହୋତି, ଏୱଂ ଉକ୍କଚ୍ଚ ଖାଦତି ।
ୟଥାହଂ ଅଜ୍ଜ ଖାଦାମି, ପିଟ୍ଠିମଂସାନି ଅତ୍ତନୋତି ॥
କିଂଛନ୍ଦଜାତକଂ ପଠମଂ ।
୫୧୨. କୁମ୍ଭଜାତକଂ (୨)
କୋ ପାତୁରାସୀ ତିଦିୱା ନଭମ୍ହି, ଓଭାସୟଂ ସଂୱରିଂ ଚନ୍ଦିମାୱ ।
ଗତ୍ତେହି ତେ ରସ୍ମିୟୋ ନିଚ୍ଛରନ୍ତି, ସତେରତା [ସତେରିତା (ସୀ॰ ସ୍ୟା॰ କ॰)] ୱିଜ୍ଜୁରିୱନ୍ତଲିକ୍ଖେ ॥
ସୋ ଛିନ୍ନୱାତଂ କମସୀ ଅଘମ୍ହି, ୱେହାୟସଂ ଗଚ୍ଛସି ତିଟ୍ଠସୀ ଚ ।
ଇଦ୍ଧୀ ନୁ ତେ ୱତ୍ଥୁକତା ସୁଭାୱିତା, ଅନଦ୍ଧଗୂନଂ ଅପି ଦେୱତାନଂ ॥
ୱେହାୟସଂ ଗମ୍ମମାଗମ୍ମ [କମମାଗମ୍ମ (ସୀ॰ ସ୍ୟା॰)] ତିଟ୍ଠସି, କୁମ୍ଭଂ କିଣାଥାତି ୟମେତମତ୍ଥଂ ।
କୋ ୱା ତୁୱଂ କିସ୍ସ ୱା ତାୟ କୁମ୍ଭୋ, ଅକ୍ଖାହି ମେ ବ୍ରାହ୍ମଣ ଏତମତ୍ଥଂ ॥
ନ ସପ୍ପିକୁମ୍ଭୋ ନପି ତେଲକୁମ୍ଭୋ, ନ ଫାଣିତସ୍ସ ନ ମଧୁସ୍ସ କୁମ୍ଭୋ ।
କୁମ୍ଭସ୍ସ ୱଜ୍ଜାନି ଅନପ୍ପକାନି, ଦୋସେ ବହୂ କୁମ୍ଭଗତେ ସୁଣାଥ ॥
ଗଳେୟ୍ୟ ୟଂ ପିତ୍ୱା [ପୀତ୍ୱା (ସୀ॰ ପୀ॰)] ପତେ ପପାତଂ, ସୋବ୍ଭଂ ଗୁହଂ ଚନ୍ଦନିୟୋଳିଗଲ୍ଲଂ ।
ବହୁମ୍ପି ଭୁଞ୍ଜେୟ୍ୟ ଅଭୋଜନେୟ୍ୟଂ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ପିତ୍ୱା [ୟଂ ୱେ ପୀତ୍ୱା (ସୀ॰)] ଚିତ୍ତସ୍ମିମନେସମାନୋ, ଆହିଣ୍ଡତୀ ଗୋରିୱ ଭକ୍ଖସାରୀ [ଭକ୍ଖସାଦୀ (ସୀ॰ ସ୍ୟା॰ ଅଟ୍ଠ॰)]।
ଅନାଥମାନୋ ଉପଗାୟତି ନଚ୍ଚତି ଚ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିୱିତ୍ୱା ଅଚେଲୋୱ ନଗ୍ଗୋ, ଚରେୟ୍ୟ ଗାମେ ୱିସିଖନ୍ତରାନି ।
ସମ୍ମୂଳ୍ହଚିତ୍ତୋ ଅତିୱେଲସାୟୀ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ପିତ୍ୱା ଉଟ୍ଠାୟ ପୱେଧମାନୋ, ସୀସଞ୍ଚ ବାହୁଞ୍ଚ [ବାହଞ୍ଚ (ପୀ॰)] ପଚାଲୟନ୍ତୋ ।
ସୋ ନଚ୍ଚତୀ ଦାରୁକଟଲ୍ଲକୋୱ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିୱିତ୍ୱା ଅଗ୍ଗିଦଡ୍ଢା ସୟନ୍ତି, ଅଥୋ ସିଗାଲେହିପି ଖାଦିତାସେ ।
ବନ୍ଧଂ ୱଧଂ ଭୋଗଜାନିଞ୍ଚୁପେନ୍ତି, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ପିତ୍ୱା ଭାସେୟ୍ୟ ଆଭାସନେୟ୍ୟଂ, ସଭାୟମାସୀନୋ ଅପେତୱତ୍ଥୋ ।
ସମ୍ମକ୍ଖିତୋ [ସମକ୍ଖିତୋ (ସୀ॰)] ୱନ୍ତଗତୋ ବ୍ୟସନ୍ନୋ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିୱିତ୍ୱା ଉକ୍କଟ୍ଠୋ ଆୱିଲକ୍ଖୋ, ମମେୱ ସବ୍ବା ପଥୱୀତି ମଞ୍ଞେ [ମଞ୍ଞତି (ସୀ॰)]।
ନ ମେ ସମୋ ଚାତୁରନ୍ତୋପି ରାଜା, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ମାନାତିମାନା କଲହାନି ପେସୁଣୀ, ଦୁବ୍ବଣ୍ଣିନୀ ନଗ୍ଗୟିନୀ ପଲାୟିନୀ ।
ଚୋରାନ ଧୁତ୍ତାନ ଗତୀ ନିକେତୋ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ଇଦ୍ଧାନି ଫୀତାନି କୁଲାନି ଅସ୍ସୁ, ଅନେକସାହସ୍ସଧନାନି ଲୋକେ ।
ଉଚ୍ଛିନ୍ନଦାୟଜ୍ଜକତାନିମାୟ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ଧଞ୍ଞଂ ଧନଂ ରଜତଂ ଜାତରୂପଂ, ଖେତ୍ତଂ ଗୱଂ ୟତ୍ଥ ୱିନାସୟନ୍ତି ।
ଉଚ୍ଛେଦନୀ ୱିତ୍ତୱତଂ [ଉଚ୍ଛେଦନୀ ୱିତ୍ତଗତଂ (ସ୍ୟା॰), ଉଚ୍ଛେଦନିୱିତ୍ତଗତଂ (କ॰)] କୁଲାନଂ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ଦିତ୍ତରୂପୋୱ [ଦୁଟ୍ଠରୂପୋୱ (ସୀ॰)] ପୋସୋ, ଅକ୍କୋସତି ମାତରଂ ପିତରଞ୍ଚ ।
ସସ୍ସୁମ୍ପି ଗଣ୍ହେୟ୍ୟ ଅଥୋପି ସୁଣ୍ହଂ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ଦିତ୍ତରୂପାୱ ନାରୀ, ଅକ୍କୋସତି ସସୁରଂ ସାମିକଞ୍ଚ ।
ଦାସମ୍ପି ଗଣ୍ହେ ପରିଚାରକମ୍ପି, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିୱିତ୍ୱାନ [ୟଞ୍ଚେ ପୀତ୍ୱାନ (ପୀ॰)] ହନେୟ୍ୟ ପୋସୋ, ଧମ୍ମେ ଠିତଂ ସମଣଂ ବ୍ରାହ୍ମଣଂ ୱା ।
ଗଚ୍ଛେ ଅପାୟମ୍ପି ତତୋନିଦାନଂ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିୱିତ୍ୱା ଦୁଚ୍ଚରିତଂ ଚରନ୍ତି, କାୟେନ ୱାଚାୟ ଚ ଚେତସା ଚ ।
ନିରୟଂ ୱଜନ୍ତି ଦୁଚ୍ଚରିତଂ ଚରିତ୍ୱା, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୟାଚମାନା ନ ଲଭନ୍ତି ପୁବ୍ବେ, ବହୁଂ ହିରଞ୍ଞମ୍ପି ପରିଚ୍ଚଜନ୍ତା ।
ସୋ ତଂ ପିୱିତ୍ୱା ଅଲିକଂ ଭଣାତି, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ପେସନେ ପେସିୟନ୍ତୋ, ଅଚ୍ଚାୟିକେ କରଣୀୟମ୍ହି ଜାତେ ।
ଅତ୍ଥମ୍ପି ସୋ ନପ୍ପଜାନାତି ୱୁତ୍ତୋ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ହିରୀମନାପି ଅହିରୀକଭାୱଂ, ପାତୁଂ କରୋନ୍ତି ମଦନାୟ [ମଦିରାୟ (ପୀ॰)] ମତ୍ତା ।
ଧୀରାପି ସନ୍ତା ବହୁକଂ ଭଣନ୍ତି, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ଏକଥୂପା ସୟନ୍ତି, ଅନାସକା ଥଣ୍ଡିଲଦୁକ୍ଖସେୟ୍ୟଂ ।
ଦୁବ୍ବଣ୍ଣିୟଂ ଆୟସକ୍ୟଞ୍ଚୁପେନ୍ତି, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ପତ୍ତଖନ୍ଧା ସୟନ୍ତି, ଗାୱୋ କୁଟହତାୱ ନ ହି ୱାରୁଣିୟା ।
[ୟଂ ୱେ ପିତ୍ୱା ପତ୍ତକ୍ଖନ୍ଧା, ସୟନ୍ତି ଗାୱୋ କୂଟହତାରିୱ । ନ ହି ୱାରୁଣିୟା ୱେଗୋ, ନରେନ ସୁସ୍ସହୋରିୱ । (ସୀ॰)] ୱେଗୋ ନରେନ ସୁସହୋରିୱ [ୟଂ ୱେ ପିତ୍ୱା ପତ୍ତକ୍ଖନ୍ଧା, ସୟନ୍ତି ଗାୱୋ କୂଟହତାରିୱ । ନ ହି ୱାରୁଣିୟା ୱେଗୋ, ନରେନ ସୁସ୍ସହୋରିୱ । (ସୀ॰)], ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ମନୁସ୍ସା ୱିୱଜ୍ଜେନ୍ତି, ସପ୍ପଂ ଘୋରୱିସଂ ମିୱ [ୱିସମିୱ (ସ୍ୟା॰), ୱିସଂ ଇୱ (କ॰), ୱିସାମିୱ ( ?)]।
ତଂ ଲୋକେ ୱିସସମାନଂ, କୋ ନରୋ ପାତୁମରହତି ॥
ୟଂ ୱେ ପିତ୍ୱା ଅନ୍ଧକୱେଣ୍ଡପୁତ୍ତା, ସମୁଦ୍ଦତୀରେ ପରିଚାରୟନ୍ତା [ଅନ୍ଧକୱେଣ୍ହୁପୁତ୍ତା (ସୀ॰ ପୀ॰), ଅଣ୍ଡକୱେଣ୍ଡପୁତ୍ତା (କ॰)]।
ଉପକ୍କମୁଂ ମୁସଲେହଞ୍ଞମଞ୍ଞଂ, ତସ୍ସା ପୁଣ୍ଣଂ କୁମ୍ଭମିମଂ କିଣାଥ ॥
ୟଂ ୱେ ପିତ୍ୱା ପୁବ୍ବଦେୱା ପମତ୍ତା, ତିଦିୱା ଚୁତା ସସ୍ସତିୟା ସମାୟ ।
ତଂ ତାଦିସଂ ମଜ୍ଜମିମଂ ନିରତ୍ଥକଂ, ଜାନଂ ମହାରାଜ କଥଂ ପିୱେୟ୍ୟ ॥
ନୟିମସ୍ମିଂ କୁମ୍ଭସ୍ମିଂ ଦଧି ୱା ମଧୁ ୱା, ଏୱଂ ଅଭିଞ୍ଞାୟ କିଣାହି ରାଜ ।
ଏୱଞ୍ହିମଂ କୁମ୍ଭଗତା ମୟା ତେ, ଅକ୍ଖାତରୂପଂ ତୱ ସବ୍ବମିତ୍ତ ॥
ନ ମେ ପିତା ୱା ଅଥୱାପି ମାତା, ଏତାଦିସା ୟାଦିସକୋ ତୁୱଂସି ।
ହିତାନୁକମ୍ପୀ ପରମତ୍ଥକାମୋ, ସୋହଂ କରିସ୍ସଂ ୱଚନଂ ତୱଜ୍ଜ ॥
ଦଦାମି ତେ ଗାମୱରାନି ପଞ୍ଚ, ଦାସୀସତଂ ସତ୍ତ ଗୱଂ ସତାନି ।
ଆଜଞ୍ଞୟୁତ୍ତେ ଚ ରଥେ ଦସ ଇମେ, ଆଚରିୟୋ ହୋସି ମମତ୍ଥକାମୋ ॥
ତୱେୱ ଦାସୀସତମତ୍ଥୁ ରାଜ, ଗାମା ଚ ଗାୱୋ ଚ ତୱେୱ ହୋନ୍ତୁ ।
ଆଜଞ୍ଞୟୁତ୍ତା ଚ ରଥା ତୱେୱ, ସକ୍କୋହମସ୍ମୀ ତିଦସାନମିନ୍ଦୋ ॥
ମଂସୋଦନଂ ସପ୍ପିପାୟାସଂ [ସପ୍ପିପାୟଞ୍ଚ (ସୀ॰)] ଭୁଞ୍ଜ, ଖାଦସ୍ସୁ ଚ ତ୍ୱଂ ମଧୁମାସପୂୱେ ।
ଏୱଂ ତୁୱଂ ଧମ୍ମରତୋ ଜନିନ୍ଦ, ଅନିନ୍ଦିତୋ ସଗ୍ଗମୁପେହି ଠାନନ୍ତି ॥
କୁମ୍ଭଜାତକଂ ଦୁତିୟଂ ।
୫୧୩. ଜୟଦ୍ଦିସଜାତକଂ (୩)
ଚିରସ୍ସଂ ୱତ ମେ ଉଦପାଦି ଅଜ୍ଜ, ଭକ୍ଖୋ ମହା ସତ୍ତମିଭତ୍ତକାଲେ ।
କୁତୋସି କୋ ୱାସି ତଦିଙ୍ଘ ବ୍ରୂହି, ଆଚିକ୍ଖ ଜାତିଂ ୱିଦିତୋ ୟଥାସି ॥
ପଞ୍ଚାଲରାଜା ମିଗୱଂ ପୱିଟ୍ଠୋ, ଜୟଦ୍ଦିସୋ ନାମ ୟଦିସ୍ସୁତୋ ତେ ।
ଚରାମି କଚ୍ଛାନି ୱନାନି ଚାହଂ, ପସଦଂ ଇମଂ ଖାଦ ମମଜ୍ଜ ମୁଞ୍ଚ ॥
ସେନେୱ ତ୍ୱଂ ପଣସି ସସ୍ସମାନୋ [ସୟ୍ହମାନୋ (ସ୍ୟା॰ କ॰)], ମମେସ ଭକ୍ଖୋ ପସଦୋ ୟଂ ୱଦେସି ।
ତଂ ଖାଦିୟାନ ପସଦଂ ଜିଘଞ୍ଞଂ [ଜିଘଚ୍ଛଂ ( ?)], ଖାଦିସ୍ସଂ ପଚ୍ଛା ନ ୱିଲାପକାଲୋ ॥
ନ ଚତ୍ଥି ମୋକ୍ଖୋ ମମ ନିକ୍କୟେନ [ୱିକ୍କୟେନ (ସୀ॰)], ଗନ୍ତ୍ୱାନ ପଚ୍ଚାଗମନାୟ ପଣ୍ହେ ।
ତଂ ସଙ୍କରଂ [ସଙ୍ଗରଂ (ସୀ॰ ସ୍ୟା॰ ପୀ॰)] ବ୍ରାହ୍ମଣସ୍ସପ୍ପଦାୟ, ସଚ୍ଚାନୁରକ୍ଖୀ ପୁନରାୱଜିସ୍ସଂ ॥
କିଂ କମ୍ମଜାତଂ ଅନୁତପ୍ପତେ ତ୍ୱଂ [ଅନୁତପ୍ପତୀ ତଂ (ସୀ॰ ପୀ॰)], ପତ୍ତଂ ସମୀପଂ ମରଣସ୍ସ ରାଜ ।
ଆଚିକ୍ଖ ମେ ତଂ ଅପି ସକ୍କୁଣେମୁ, ଅନୁଜାନିତୁଂ ଆଗମନାୟ ପଣ୍ହେ ॥
କତା ମୟା ବ୍ରାହ୍ମଣସ୍ସ ଧନାସା, ତଂ ସଙ୍କରଂ ପଟିମୁକ୍କଂ ନ ମୁତ୍ତଂ ।
ତଂ ସଙ୍କରଂ ବ୍ରାହ୍ମଣସ୍ସପ୍ପଦାୟ, ସଚ୍ଚାନୁରକ୍ଖୀ ପୁନରାୱଜିସ୍ସଂ ॥
ୟା ତେ କତା ବ୍ରାହ୍ମଣସ୍ସ ଧନାସା, ତଂ ସଙ୍କରଂ ପଟିମୁକ୍କଂ ନ ମୁତ୍ତଂ ।
ତଂ ସଙ୍କରଂ ବ୍ରାହ୍ମଣସ୍ସପ୍ପଦାୟ, ସଚ୍ଚାନୁରକ୍ଖୀ ପୁନରାୱଜସ୍ସୁ ॥
ମୁତ୍ତୋ ଚ ସୋ ପୋରିସାଦସ୍ସ [ପୁରିସାଦସ୍ସ (ପୀ॰)] ହତ୍ଥା, ଗନ୍ତ୍ୱା ସକଂ ମନ୍ଦିରଂ କାମକାମୀ ।
ତଂ ସଙ୍କରଂ ବ୍ରାହ୍ମଣସ୍ସପ୍ପଦାୟ, ଆମନ୍ତୟୀ ପୁତ୍ତମଲୀନସତ୍ତଂ [ସତ୍ତୁଂ (ସ୍ୟା॰ ପୀ॰ କ॰)]॥
ଅଜ୍ଜେୱ ରଜ୍ଜଂ ଅଭିସିଞ୍ଚୟସ୍ସୁ, ଧମ୍ମଂ ଚର ସେସୁ ପରେସୁ ଚାପି ।
ଅଧମ୍ମକାରୋ ଚ ତେ ମାହୁ ରଟ୍ଠେ, ଗଚ୍ଛାମହଂ ପୋରିସାଦସ୍ସ ଞତ୍ତେ [ଞନ୍ତେ (ସ୍ୟା॰)]॥
କିଂ କମ୍ମ କୁବ୍ବଂ ତୱ ଦେୱ ପାୱ [ଦେୱପାଦେ (ସୀ॰ ସ୍ୟା॰ ପୀ॰)], ନାରାଧୟୀ ତଂ ତଦିଚ୍ଛାମି ସୋତୁଂ ।
ୟମଜ୍ଜ ରଜ୍ଜମ୍ହି ଉଦସ୍ସୟେ ତୁୱଂ, ରଜ୍ଜମ୍ପି ନିଚ୍ଛେୟ୍ୟଂ ତୟା ୱିନାହଂ ॥
ନ କମ୍ମୁନା ୱା ୱଚସା ୱ ତାତ, ଅପରାଧିତୋହଂ ତୁୱିୟଂ ସରାମି ।
ସନ୍ଧିଞ୍ଚ [ସଦ୍ଧିଂ ଚ (କ॰)] କତ୍ୱା ପୁରିସାଦକେନ, ସଚ୍ଚାନୁରକ୍ଖୀ ପୁନାହଂ ଗମିସ୍ସଂ ॥
ଅହଂ ଗମିସ୍ସାମି ଇଧେୱ ହୋହି, ନତ୍ଥି ତତୋ ଜୀୱତୋ ୱିପ୍ପମୋକ୍ଖୋ ।
ସଚେ ତୁୱଂ ଗଚ୍ଛସିୟେୱ ରାଜ, ଅହମ୍ପି ଗଚ୍ଛାମି ଉଭୋ ନ ହୋମ ॥
ଅଦ୍ଧା ହି ତାତ ସତାନେସ ଧମ୍ମୋ, ମରଣା ଚ ମେ ଦୁକ୍ଖତରଂ ତଦସ୍ସ ।
କମ୍ମାସପାଦୋ ତଂ ୟଦା ପଚିତ୍ୱା, ପସୟ୍ହ ଖାଦେ ଭିଦା ରୁକ୍ଖସୂଲେ ॥
ପାଣେନ ତେ ପାଣମହଂ ନିମିସ୍ସଂ, ମା ତ୍ୱଂ ଅଗା ପୋରିସାଦସ୍ସ ଞତ୍ତେ ।
ଏତଞ୍ଚ ତେ ପାଣମହଂ ନିମିସ୍ସଂ, ତସ୍ମା ମତଂ ଜୀୱିତସ୍ସ ୱଣ୍ଣେମି [ୱରେମି (ସୀ॰)]॥
ତତୋ ହୱେ ଧିତିମା ରାଜପୁତ୍ତୋ, ୱନ୍ଦିତ୍ୱା ମାତୁ ଚ ପିତୁ ଚ [ୱନ୍ଦିତ୍ଥ ମାତୁଚ୍ଚ ପିତୁଚ୍ଚ (ସୀ॰ ପୀ॰)] ପାଦେ ।
ଦୁଖିନିସ୍ସ ମାତା ନିପତା [ନିପତୀ (ସୀ॰ ପୀ॰)] ପଥବ୍ୟା, ପିତାସ୍ସ ପଗ୍ଗୟ୍ହ ଭୁଜାନି କନ୍ଦତି ॥
ତଂ ଗଚ୍ଛନ୍ତଂ ତାୱ ପିତା ୱିଦିତ୍ୱା, ପରମ୍ମୁଖୋ ୱନ୍ଦତି ପଞ୍ଜଲୀକୋ ।
ସୋମୋ ଚ ରାଜା ୱରୁଣୋ ଚ ରାଜା, ପଜାପତୀ ଚନ୍ଦିମା ସୂରିୟୋ ଚ ।
ଏତେହି ଗୁତ୍ତୋ ପୁରିସାଦକମ୍ହା, ଅନୁଞ୍ଞାତୋ ସୋତ୍ଥି ପଚ୍ଚେହି ତାତ ॥
ୟଂ ଦଣ୍ଡକିରଞ୍ଞୋ ଗତସ୍ସ [ୟଂ ଦଣ୍ଡକାରଞ୍ଞଗତସ୍ସ (ପୀ॰)] ମାତା, ରାମସ୍ସକାସି ସୋତ୍ଥାନଂ ସୁଗୁତ୍ତା ।
ତଂ ତେ ଅହଂ ସୋତ୍ଥାନଂ କରୋମି, ଏତେନ ସଚ୍ଚେନ ସରନ୍ତୁ ଦେୱା ।
ଅନୁଞ୍ଞାତୋ ସୋତ୍ଥି ପଚ୍ଚେହି ପୁତ୍ତ ॥
ଆୱୀ ରହୋ ୱାପୀ ମନୋପଦୋସଂ, ନାହଂ ସରେ ଜାତୁ ମଲୀନସତ୍ତେ ।
ଏତେନ ସଚ୍ଚେନ ସରନ୍ତୁ ଦେୱା, ଅନୁଞ୍ଞାତୋ ସୋତ୍ଥି ପଚ୍ଚେହି ଭାତିକ [ଭାତ (ସୀ॰), ଭାତା (ସ୍ୟା॰ ପୀ॰)]॥
ୟସ୍ମା ଚ ମେ ଅନଧିମନୋସି ସାମି, ନ ଚାପି ମେ ମନସା ଅପ୍ପିୟୋସି ।
ଏତେନ ସଚ୍ଚେନ ସରନ୍ତୁ ଦେୱା, ଅନୁଞ୍ଞାତୋ ସୋତ୍ଥି ପଚ୍ଚେହି ସାମି ॥
ବ୍ରହା ଉଜୂ ଚାରୁମୁଖୋ କୁତୋସି, ନ ମଂ ପଜାନାସି ୱନେ ୱସନ୍ତଂ ।
ଲୁଦ୍ଦଂ ମଂ ଞତ୍ୱା ‘‘ପୁରିସାଦକୋ’’ତି, କୋ ସୋତ୍ଥି ମାଜାନମିଧା’ୱଜେୟ୍ୟ ॥
ଜାନାମି ଲୁଦ୍ଦ ପୁରିସାଦକୋ ତ୍ୱଂ, ନ ତଂ ନ ଜାନାମି ୱନେ ୱସନ୍ତଂ ।
ଅହଞ୍ଚ ପୁତ୍ତୋସ୍ମି ଜୟଦ୍ଦିସସ୍ସ, ମମଜ୍ଜ ଖାଦ ପିତୁନୋ ପମୋକ୍ଖା ॥
ଜାନାମି ପୁତ୍ତୋତି [ପୁତ୍ତୋସି (ସ୍ୟା॰ କ॰)] ଜୟଦ୍ଦିସସ୍ସ, ତଥା ହି ୱୋ ମୁଖୱଣ୍ଣୋ ଉଭିନ୍ନଂ ।
ସୁଦୁକ୍କରଞ୍ଞେୱ [ସୁଦୁକ୍କରଞ୍ଚେୱ (ସ୍ୟା॰ ପୀ॰ କ॰)] କତଂ ତୱେଦଂ, ୟୋ ମତ୍ତୁମିଚ୍ଛେ ପିତୁନୋ ପମୋକ୍ଖା ॥
ନ ଦୁକ୍କରଂ କିଞ୍ଚି ମହେତ୍ଥ ମଞ୍ଞେ, ୟୋ ମତ୍ତୁମିଚ୍ଛେ ପିତୁନୋ ପମୋକ୍ଖା ।
ମାତୁ ଚ [ମାତୁଚ୍ଚ (ସୀ॰)] ହେତୁ ପରଲୋକ ଗନ୍ତ୍ୱା [ଗମ୍ୟା (ସୀ॰ ସ୍ୟା॰), ଗମ୍ୟ (ପୀ॰)], ସୁଖେନ ସଗ୍ଗେନ ଚ ସମ୍ପୟୁତ୍ତୋ ॥
ଅହଞ୍ଚ ଖୋ ଅତ୍ତନୋ ପାପକିରିୟଂ, ଆୱୀ ରହୋ ୱାପି ସରେ ନ ଜାତୁ ।
ସଙ୍ଖାତଜାତୀମରଣୋହମସ୍ମି, ୟଥେୱ ମେ ଇଧ ତଥା ପରତ୍ଥ ॥
ଖାଦଜ୍ଜ ମଂ ଦାନି ମହାନୁଭାୱ, କରସ୍ସୁ କିଚ୍ଚାନି ଇମଂ ସରୀରଂ ।
ରୁକ୍ଖସ୍ସ ୱା ତେ ପପତାମି ଅଗ୍ଗା, ଛାଦୟମାନୋ ମୟ୍ହଂ ତ୍ୱମଦେସି ମଂସଂ ॥
ଇଦଞ୍ଚ ତେ ରୁଚ୍ଚତି ରାଜପୁତ୍ତ, ଚଜେସି [ଚଜାସି (ସୀ॰ ପୀ॰)] ପାଣଂ ପିତୁନୋ ପମୋକ୍ଖା ।
ତସ୍ମା ହି ସୋ [ତସ୍ମାତିହ (ସୀ॰ ସ୍ୟା॰)] ତ୍ୱଂ ତରମାନରୂପୋ, ସମ୍ଭଞ୍ଜ କଟ୍ଠାନି ଜଲେହି ଅଗ୍ଗିଂ ॥
ତତୋ ହୱେ ଧିତିମା ରାଜପୁତ୍ତୋ, ଦାରୁଂ ସମାହତ୍ୱା ମହନ୍ତମଗ୍ଗିଂ ।
ସନ୍ଦୀପୟିତ୍ୱା ପଟିୱେଦୟିତ୍ଥ, ଆଦୀପିତୋ ଦାନି ମହାୟମଗ୍ଗି [ମୟା ୟକ୍ଖମଗ୍ଗି (କ॰)]॥
ଖାଦଜ୍ଜ ମଂ ଦାନି ପସୟ୍ହକାରୀ, କିଂ ମଂ ମୁହୁଂ ପେକ୍ଖସି ହଟ୍ଠଲୋମୋ ।
ତଥା ତଥା ତୁୟ୍ହମହଂ କରୋମି, ୟଥା ୟଥା ମଂ ଛାଦୟମାନୋ ଅଦେସି ॥
କୋ ତାଦିସଂ ଅରହତି ଖାଦିତାୟେ, ଧମ୍ମେ ଠିତଂ ସଚ୍ଚୱାଦିଂ ୱଦଞ୍ଞୁଂ ।
ମୁଦ୍ଧାପି ତସ୍ସ ୱିଫଲେୟ୍ୟ ସତ୍ତଧା, ୟୋ ତାଦିସଂ ସଚ୍ଚୱାଦିଂ ଅଦେୟ୍ୟ ॥
ଇଦଞ୍ହି ସୋ ବ୍ରାହ୍ମଣଂ ମଞ୍ଞମାନୋ, ସସୋ ଅୱାସେସି ସକେ ସରୀରେ ।
ତେନେୱ ସୋ ଚନ୍ଦିମା ଦେୱପୁତ୍ତୋ, ସସତ୍ଥୁତୋ [ସସଟ୍ଠକୋ (ସ୍ୟା॰)] କାମଦୁହଜ୍ଜ [କାମରୁହଜ୍ଜ (କ॰)] ୟକ୍ଖ ॥
ଚନ୍ଦୋ ୟଥା ରାହୁମୁଖା ପମୁତ୍ତୋ, ୱିରୋଚତେ ପନ୍ନରସେୱ ଭାଣୁମା [ଭାନୁମା (ସୀ॰ ପୀ॰)]।
ଏୱଂ ତୁୱଂ ପୋରିସାଦା ପମୁତ୍ତୋ, ୱିରୋଚ କପିଲେ [କମ୍ପିଲ୍ଲ (ସୀ॰ ପୀ॰), କପିଲ୍ଲେ (ସ୍ୟା॰)] ମହାନୁଭାୱ ।
ଆମୋଦୟଂ ପିତରଂ ମାତରଞ୍ଚ, ସବ୍ବୋ ଚ ତେ ନନ୍ଦତୁ ଞାତିପକ୍ଖୋ ॥
ତତୋ ହୱେ ଧିତିମା ରାଜପୁତ୍ତୋ, କତଞ୍ଜଲୀ ପରିୟାୟ [ପରିୟଗା (ସୀ॰), ପଗ୍ଗୟ୍ହ (ସ୍ୟା॰ ପୀ॰)] ପୋରିସାଦଂ ।
ଅନୁଞ୍ଞାତୋ ସୋତ୍ଥି ସୁଖୀ ଅରୋଗୋ, ପଚ୍ଚାଗମା [ପଚ୍ଚାଗ (ପୀ॰)] କପିଲମଲୀନସତ୍ତା [କମ୍ପିଲ୍ଲ’ମଲୀନସତ୍ତୋ (ସୀ॰ ପୀ॰), କପିଲ’ମଲୀନସତ୍ତା (କ॰)]॥
ତଂ ନେଗମା ଜାନପଦା ଚ ସବ୍ବେ, ହତ୍ଥାରୋହା ରଥିକା ପତ୍ତିକା ଚ ।
ନମସ୍ସମାନା ପଞ୍ଜଲିକା ଉପାଗମୁଂ, ନମତ୍ଥୁ ତେ ଦୁକ୍କରକାରକୋସୀତି ॥
ଜୟଦ୍ଦିସଜାତକଂ [ଜୟଦିସଜାତକଂ (କ॰)] ତତିୟଂ ।
୫୧୪. ଛଦ୍ଦନ୍ତଜାତକଂ (୪)
କିଂ ନୁ ସୋଚସିନୁଚ୍ଚଙ୍ଗି, ପଣ୍ଡୂସି ୱରୱଣ୍ଣିନି ।
ମିଲାୟସି ୱିସାଲକ୍ଖି, ମାଲାୱ ପରିମଦ୍ଦିତା ॥
ଦୋହଳୋ ମେ ମହାରାଜ, ସୁପିନନ୍ତେନୁପଜ୍ଝଗା [ନୁ’ପଚ୍ଚଗା (ସୀ॰ ସ୍ୟା॰ ପୀ॰)]।
ନ ସୋ ସୁଲଭରୂପୋୱ, ୟାଦିସୋ ମମ ଦୋହଳୋ ॥
ୟେ କେଚି ମାନୁସା କାମା, ଇଧ ଲୋକସ୍ମି ନନ୍ଦନେ ।
ସବ୍ବେ ତେ ପଚୁରା ମୟ୍ହଂ, ଅହଂ ତେ ଦମ୍ମି ଦୋହଳଂ ॥
ଲୁଦ୍ଦା ଦେୱ ସମାୟନ୍ତୁ, ୟେ କେଚି ୱିଜିତେ ତୱ ।
ଏତେସଂ ଅହମକ୍ଖିସ୍ସଂ, ୟାଦିସୋ ମମ ଦୋହଳୋ ॥
ଇମେ ତେ ଲୁଦ୍ଦକା ଦେୱି, କତହତ୍ଥା ୱିସାରଦା ।
ୱନଞ୍ଞୂ ଚ ମିଗଞ୍ଞୂ ଚ, ମମତ୍ଥେ [ମମ ତେ (ପୀ॰)] ଚତ୍ତଜୀୱିତା ॥
ଲୁଦ୍ଦପୁତ୍ତା ନିସାମେଥ, ୟାୱନ୍ତେତ୍ଥ ସମାଗତା ।
ଛବ୍ବିସାଣଂ ଗଜଂ ସେତଂ, ଅଦ୍ଦସଂ ସୁପିନେ ଅହଂ ।
ତସ୍ସ ଦନ୍ତେହି ମେ ଅତ୍ଥୋ, ଅଲାଭେ ନତ୍ଥି ଜୀୱିତଂ ॥
ନ ନୋ ପିତୂନଂ ନ ପିତାମହାନଂ, ଦିଟ୍ଠୋ ସୁତୋ କୁଞ୍ଜରୋ ଛବ୍ବିସାଣୋ ।
ୟମଦ୍ଦସା ସୁପିନେ ରାଜପୁତ୍ତୀ, ଅକ୍ଖାହି ନୋ ୟାଦିସୋ ହତ୍ଥିନାଗୋ ॥
ଦିସା ଚତସ୍ସୋ ୱିଦିସା ଚତସ୍ସୋ, ଉଦ୍ଧଂ ଅଧୋ ଦସ ଦିସା ଇମାୟୋ ।
କତମଂ ଦିସଂ ତିଟ୍ଠତି ନାଗରାଜା, ୟମଦ୍ଦସା ସୁପିନେ ଛବ୍ବିସାଣଂ ॥
ଇତୋ ଉଜୁଂ ଉତ୍ତରିୟଂ ଦିସାୟଂ, ଅତିକ୍କମ୍ମ ସୋ ସତ୍ତଗିରୀ ବ୍ରହନ୍ତେ ।
ସୁୱଣ୍ଣପସ୍ସୋ ନାମ ଗିରୀ ଉଳାରୋ, ସୁପୁପ୍ଫିତୋ [ସମ୍ପୁପ୍ଫିତୋ (ସ୍ୟା॰)] କିମ୍ପୁରିସାନୁଚିଣ୍ଣୋ ॥
ଆରୁୟ୍ହ ସେଲଂ ଭୱନଂ କିନ୍ନରାନଂ, ଓଲୋକୟ ପବ୍ବତପାଦମୂଲଂ ।
ଅଥ ଦକ୍ଖସୀ ମେଘସମାନୱଣ୍ଣଂ, ନିଗ୍ରୋଧରାଜଂ ଅଥ ସହସ୍ସପାଦଂ [ପୋରଂ (କ॰)]॥
ତତ୍ଥଚ୍ଛତୀ କୁଞ୍ଜରୋ ଛବ୍ବିସାଣୋ, ସବ୍ବସେତୋ ଦୁପ୍ପସହୋ ପରେଭି ।
ରକ୍ଖନ୍ତି ନଂ ଅଟ୍ଠସହସ୍ସନାଗା, ଈସାଦନ୍ତା ୱାତଜୱପ୍ପହାରିନୋ ॥
ତିଟ୍ଠନ୍ତି ତେ ତୁମୂଲଂ [ତୁମୂଲ (ସ୍ୟା॰), ଭିମୂଲ (ପୀ॰ କ॰)] ପସ୍ସସନ୍ତା, କୁପ୍ପନ୍ତି ୱାତସ୍ସପି ଏରିତସ୍ସ ।
ମନୁସ୍ସଭୂତଂ ପନ ତତ୍ଥ ଦିସ୍ୱା, ଭସ୍ମଂ କରେୟ୍ୟୁଂ ନାସ୍ସ ରଜୋପି ତସ୍ସ ॥
ବହୂ ହିମେ ରାଜକୁଲମ୍ହି ସନ୍ତି, ପିଳନ୍ଧନା ଜାତରୂପସ୍ସ ଦେୱୀ ।
ମୁତ୍ତାମଣୀୱେଳୁରିୟାମୟା ଚ, କିଂ କାହସି ଦନ୍ତପିଳନ୍ଧନେନ ।
ମାରେତୁକାମା କୁଞ୍ଜରଂ ଛବ୍ବିସାଣଂ, ଉଦାହୁ ଘାତେସ୍ସସି ଲୁଦ୍ଦପୁତ୍ତେ ॥
ସା ଇସ୍ସିତା ଦୁକ୍ଖିତା ଚସ୍ମି ଲୁଦ୍ଦ, ଉଦ୍ଧଞ୍ଚ ସୁସ୍ସାମି ଅନୁସ୍ସରନ୍ତୀ ।
କରୋହି ମେ ଲୁଦ୍ଦକ ଏତମତ୍ଥଂ, ଦସ୍ସାମି ତେ ଗାମୱରାନି ପଞ୍ଚ ॥
କତ୍ଥଚ୍ଛତୀ କତ୍ଥମୁପେତି ଠାନଂ, ୱୀଥିସ୍ସ କା ନ୍ହାନ [ନହାନ (ସୀ॰ ପୀ॰)] ଗତସ୍ସ ହୋତି ।
କଥଞ୍ହି ସୋ ନ୍ହାୟତି [ନହାୟତି (ସୀ॰ ପୀ॰)] ନାଗରାଜା, କଥଂ ୱିଜାନେମୁ ଗତିଂ ଗଜସ୍ସ ॥
ତତ୍ଥେୱ ସା ପୋକ୍ଖରଣୀ ଅଦୂରେ [ଅୱିଦୂରେ (ସ୍ୟା॰ କ॰)], ରମ୍ମା ସୁତିତ୍ଥା ଚ ମହୋଦିକା [ମହୋଦକା (ସ୍ୟା॰ କ॰)] ଚ ।
ସମ୍ପୁପ୍ଫିତା ଭମରଗଣାନୁଚିଣ୍ଣା [କିଣ୍ଣା (କତ୍ଥଚି)], ଏତ୍ଥ ହି ସୋ ନ୍ହାୟତି ନାଗରାଜା ॥
ସୀସଂ ନହାତୁପ୍ପଲ [ନହାତୋ ଉପ୍ପଲ (ସୀ॰ ସ୍ୟା॰ ପୀ॰)] ମାଲଭାରୀ, ସବ୍ବସେତୋ ପୁଣ୍ଡରୀକତ୍ତଚଙ୍ଗୀ ।
ଆମୋଦମାନୋ ଗଚ୍ଛତି ସନ୍ନିକେତଂ, ପୁରକ୍ଖତ୍ୱା ମହେସିଂ ସବ୍ବଭଦ୍ଦଂ ॥
ତତ୍ଥେୱ ସୋ ଉଗ୍ଗହେତ୍ୱାନ ୱାକ୍ୟଂ, ଆଦାୟ ତୂଣିଞ୍ଚ ଧନୁଞ୍ଚ ଲୁଦ୍ଦୋ ।
ୱିତୁରିୟତି [ୱିତୁରିୟ ସୋ (ସୀ॰ ଅଟ୍ଠ॰)] ସତ୍ତଗିରୀ ବ୍ରହନ୍ତେ, ସୁୱଣ୍ଣପସ୍ସଂ ନାମ ଗିରିଂ ଉଳାରଂ ॥
ଆରୁୟ୍ହ ସେଲଂ ଭୱନଂ କିନ୍ନରାନଂ, ଓଲୋକୟୀ ପବ୍ବତପାଦମୂଲଂ ।
ତତ୍ଥଦ୍ଦସା ମେଘସମାନୱଣ୍ଣଂ, ନିଗ୍ରୋଧରାଜଂ ଅଟ୍ଠସହସ୍ସପାଦଂ ॥
ତତ୍ଥଦ୍ଦସା କୁଞ୍ଜରଂ ଛବ୍ବିସାଣଂ, ସବ୍ବସେତଂ ଦୁପ୍ପସହଂ ପରେଭି ।
ରକ୍ଖନ୍ତି ନଂ ଅଟ୍ଠସହସ୍ସନାଗା, ଈସାଦନ୍ତା ୱାତଜୱପ୍ପହାରିନୋ ॥
ତତ୍ଥଦ୍ଦସା ପୋକ୍ଖରଣିଂ ଅଦୂରେ, ରମ୍ମଂ ସୁତିତ୍ଥଞ୍ଚ ମହୋଦିକଞ୍ଚ ।
ସମ୍ପୁପ୍ଫିତଂ ଭମରଗଣାନୁଚିଣ୍ଣଂ, ୟତ୍ଥ ହି ସୋ ନ୍ହାୟତି ନାଗରାଜା ॥
ଦିସ୍ୱାନ ନାଗସ୍ସ ଗତିଂ ଠିତିଞ୍ଚ, ୱୀଥିସ୍ସ ୟା ନ୍ହାନଗତସ୍ସ ହୋତି ।
ଓପାତମାଗଚ୍ଛି ଅନରିୟରୂପୋ, ପୟୋଜିତୋ ଚିତ୍ତୱସାନୁଗାୟ ॥
ଖଣିତ୍ୱାନ କାସୁଂ ଫଲକେହି ଛାଦୟି, ଅତ୍ତାନମୋଧାୟ ଧନୁଞ୍ଚ ଲୁଦ୍ଦୋ ।
ପସ୍ସାଗତଂ ପୁଥୁସଲ୍ଲେନ ନାଗଂ, ସମପ୍ପୟୀ ଦୁକ୍କଟକମ୍ମକାରୀ ॥
ୱିଦ୍ଧୋ ଚ ନାଗୋ କୋଞ୍ଚମନାଦି ଘୋରଂ, ସବ୍ବେ ଚ [ସବ୍ବେୱ (ସୀ॰ ସ୍ୟା॰ ପୀ॰)] ନାଗା ନିନ୍ନଦୁଂ [ନିନ୍ନାଦୁ (ସ୍ୟା॰), ନିନ୍ନାଦଂ (କ॰)] ଘୋରରୂପଂ ।
ତିଣଞ୍ଚ କଟ୍ଠଞ୍ଚ ରଣଂ [ଚୁଣ୍ଣଂ (କ॰ ସୀ॰ ପୀ॰)] କରୋନ୍ତା, ଧାୱିଂସୁ ତେ ଅଟ୍ଠଦିସା ସମନ୍ତତୋ ॥
ୱଧିସ୍ସମେତନ୍ତି [ୱଧିସ୍ସମେନନ୍ତି (ସ୍ୟା॰)] ପରାମସନ୍ତୋ, କାସାୱମଦ୍ଦକ୍ଖି ଧଜଂ ଇସୀନଂ ।
ଦୁକ୍ଖେନ ଫୁଟ୍ଠସ୍ସୁଦପାଦି ସଞ୍ଞା, ଅରହଦ୍ଧଜୋ ସବ୍ଭି ଅୱଜ୍ଝରୂପୋ ॥
ଅନିକ୍କସାୱୋ କାସାୱଂ, ୟୋ ୱତ୍ଥଂ ପରିଦହିସ୍ସତି [ପରିଦହେସ୍ସତି (ସୀ॰ ପୀ॰), ପରିଧସ୍ସତି (କତ୍ଥଚି)]।
ଅପେତୋ ଦମସଚ୍ଚେନ, ନ ସୋ କାସାୱମରହତି ॥
ୟୋ ଚ ୱନ୍ତକସାୱସ୍ସ, ସୀଲେସୁ ସୁସମାହିତୋ ।
ଉପେତୋ ଦମସଚ୍ଚେନ, ସ ୱେ କାସାୱମରହତି ॥
ସମପ୍ପିତୋ ପୁଥୁସଲ୍ଲେନ ନାଗୋ, ଅଦୁଟ୍ଠଚିତ୍ତୋ ଲୁଦ୍ଦକମଜ୍ଝଭାସି ।
କିମତ୍ଥୟଂ କିସ୍ସ ୱା ସମ୍ମ ହେତୁ, ମମଂ ୱଧୀ କସ୍ସ ୱାୟଂ ପୟୋଗୋ ॥
କାସିସ୍ସ ରଞ୍ଞୋ ମହେସୀ ଭଦନ୍ତେ, ସା ପୂଜିତା ରାଜକୁଲେ ସୁଭଦ୍ଦା ।
ତଂ ଅଦ୍ଦସା ସା ଚ ମମଂ ଅସଂସି, ଦନ୍ତେହି ଅତ୍ଥୋତି ଚ ମଂ [ଅତ୍ଥୋତି ମମଂ (ସ୍ୟା॰ କ॰)] ଅୱୋଚ ॥
ବହୂ ହି ମେ ଦନ୍ତୟୁଗା ଉଳାରା, ୟେ ମେ ପିତୂନଞ୍ଚ [ପିତୁନ୍ନମ୍ପି (ପୀ॰)] ପିତାମହାନଂ ।
ଜାନାତି ସା କୋଧନା ରାଜପୁତ୍ତୀ, ୱଧତ୍ଥିକା ୱେରମକାସି ବାଲା ॥
ଉଟ୍ଠେହି ତ୍ୱଂ ଲୁଦ୍ଦ ଖରଂ ଗହେତ୍ୱା, ଦନ୍ତେ ଇମେ ଛିନ୍ଦ ପୁରା ମରାମି ।
ୱଜ୍ଜାସି ତଂ କୋଧନଂ ରାଜପୁତ୍ତିଂ, ‘‘ନାଗୋ ହତୋ ହନ୍ଦ ଇମସ୍ସ ଦନ୍ତା’’ ॥
ଉଟ୍ଠାୟ ସୋ ଲୁଦ୍ଦୋ ଖରଂ ଗହେତ୍ୱା, ଛେତ୍ୱାନ ଦନ୍ତାନି ଗଜୁତ୍ତମସ୍ସ ।
ୱଗ୍ଗୂ ସୁଭେ ଅପ୍ପଟିମେ ପଥବ୍ୟା, ଆଦାୟ ପକ୍କାମି ତତୋ ହି ଖିପ୍ପଂ ॥
ଭୟଟ୍ଟିତା [ଭୟଦ୍ଦିତା (ସୀ॰ ପୀ॰)] ନାଗୱଧେନ ଅଟ୍ଟା, ୟେ ତେ ନାଗା ଅଟ୍ଠ ଦିସା ୱିଧାୱୁଂ ।
ଅଦିସ୍ୱାନ [ଅଦିସ୍ୱ (ସୀ॰ ପୀ॰)] ପୋସଂ ଗଜପଚ୍ଚମିତ୍ତଂ, ପଚ୍ଚାଗମୁଂ ୟେନ ସୋ ନାଗରାଜା ॥
ତେ ତତ୍ଥ କନ୍ଦିତ୍ୱା ରୋଦିତ୍ୱାନ [ରୋଦିତ୍ୱ (ସୀ॰ ପୀ॰)] ନାଗା, ସୀସେ ସକେ ପଂସୁକଂ ଓକିରିତ୍ୱା ।
ଅଗମଂସୁ ତେ ସବ୍ବେ ସକଂ ନିକେତଂ, ପୁରକ୍ଖତ୍ୱା ମହେସିଂ ସବ୍ବଭଦ୍ଦଂ ॥
ଆଦାୟ ଦନ୍ତାନି ଗଜୁତ୍ତମସ୍ସ, ୱଗ୍ଗୂ ସୁଭେ ଅପ୍ପଟିମେ ପଥବ୍ୟା ।
ସୁୱଣ୍ଣରାଜୀହି ସମନ୍ତମୋଦରେ, ସୋ ଲୁଦ୍ଦକୋ କାସିପୁରଂ ଉପାଗମି ।
ଉପନେସି ସୋ ରାଜକଞ୍ଞାୟ ଦନ୍ତେ, ନାଗୋ ହତୋ ହନ୍ଦ ଇମସ୍ସ ଦନ୍ତା ॥
ଦିସ୍ୱାନ ଦନ୍ତାନି ଗଜୁତ୍ତମସ୍ସ, ଭତ୍ତୁପ୍ପିୟସ୍ସ ପୁରିମାୟ ଜାତିୟା ।
ତତ୍ଥେୱ ତସ୍ସା ହଦୟଂ ଅଫାଲି, ତେନେୱ ସା କାଲମକାସି ବାଲା ॥
ସମ୍ବୋଧିପତ୍ତୋ ସ [ଚ (ସୀ॰ ସ୍ୟା॰), ୱ (ପୀ॰)] ମହାନୁଭାୱୋ, ସିତଂ ଅକାସି ପରିସାୟ ମଜ୍ଝେ ।
ପୁଚ୍ଛିଂସୁ ଭିକ୍ଖୂ ସୁୱିମୁତ୍ତଚିତ୍ତା, ନାକାରଣେ ପାତୁକରୋନ୍ତି ବୁଦ୍ଧା ॥
ୟମଦ୍ଦସାଥ ଦହରିଂ କୁମାରିଂ, କାସାୟୱତ୍ଥଂ ଅନଗାରିୟଂ ଚରନ୍ତିଂ ।
ସା ଖୋ ତଦା ରାଜକଞ୍ଞା ଅହୋସି, ଅହଂ ତଦା ନାଗରାଜା ଅହୋସିଂ ॥
ଆଦାୟ ଦନ୍ତାନି ଗଜୁତ୍ତମସ୍ସ, ୱଗ୍ଗୂ ସୁଭେ ଅପ୍ପଟିମେ ପଥବ୍ୟା ।
ୟୋ ଲୁଦ୍ଦକୋ କାସିପୁରଂ ଉପାଗମି, ସୋ ଖୋ ତଦା ଦେୱଦତ୍ତୋ ଅହୋସି ॥
ଅନାୱସୂରଂ ଚିରରତ୍ତସଂସିତଂ, ଉଚ୍ଚାୱଚଂ [ଉଚଂ ନୀଚଂ (ସୀ॰ ସ୍ୟା॰ ପୀ॰)] ଚରିତମିଦଂ ପୁରାଣଂ ।
ୱୀତଦ୍ଦରୋ ୱୀତସୋକୋ ୱିସଲ୍ଲୋ, ସୟଂ ଅଭିଞ୍ଞାୟ ଅଭାସି ବୁଦ୍ଧୋ ॥
ଅହଂ ୱୋ ତେନ କାଲେନ, ଅହୋସିଂ ତତ୍ଥ ଭିକ୍ଖୱୋ ।
ନାଗରାଜା ତଦା ହୋମି [ହୋସିଂ (ସୀ॰ ସ୍ୟା॰ ପୀ॰)], ଏୱଂ ଧାରେଥ ଜାତକନ୍ତି ॥
ଛଦ୍ଦନ୍ତଜାତକଂ ଚତୁତ୍ଥଂ ।
୫୧୫. ସମ୍ଭୱଜାତକଂ (୫)
ରଜ୍ଜଞ୍ଚ ପଟିପନ୍ନାସ୍ମ, ଆଧିପଚ୍ଚଂ ସୁଚୀରତ ।
ମହତ୍ତଂ ପତ୍ତୁମିଚ୍ଛାମି, ୱିଜେତୁଂ ପଥୱିଂ ଇମଂ ॥
ଧମ୍ମେନ ନୋ ଅଧମ୍ମେନ, ଅଧମ୍ମୋ ମେ ନ ରୁଚ୍ଚତି ।
କିଚ୍ଚୋୱ ଧମ୍ମୋ ଚରିତୋ, ରଞ୍ଞୋ ହୋତି ସୁଚୀରତ ॥
ଇଧ ଚେୱାନିନ୍ଦିତା ୟେନ, ପେଚ୍ଚ ୟେନ ଅନିନ୍ଦିତା ।
ୟସଂ ଦେୱମନୁସ୍ସେସୁ, ୟେନ ପପ୍ପୋମୁ [ପପ୍ପେମୁ (ସୀ॰ ଅଟ୍ଠ॰)] ବ୍ରାହ୍ମଣ ॥
ୟୋହଂ ଅତ୍ଥଞ୍ଚ ଧମ୍ମଞ୍ଚ, କତ୍ତୁମିଚ୍ଛାମି ବ୍ରାହ୍ମଣ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ବ୍ରାହ୍ମଣକ୍ଖାହି ପୁଚ୍ଛିତୋ ॥
ନାଞ୍ଞତ୍ର ୱିଧୁରା ରାଜ, ଏତଦକ୍ଖାତୁମରହତି ।
ୟଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, କତ୍ତୁମିଚ୍ଛସି ଖତ୍ତିୟ ॥
ଏହି ଖୋ ପହିତୋ ଗଚ୍ଛ, ୱିଧୁରସ୍ସ ଉପନ୍ତିକଂ ।
ନିକ୍ଖଞ୍ଚିମଂ [ନିକ୍ଖଂ ରତ୍ତ (ସୀ॰), ନିକ୍ଖମିମଂ (ପୀ॰)] ସୁୱଣ୍ଣସ୍ସ, ହରଂ ଗଚ୍ଛ ସୁଚୀରତ ।
ଅଭିହାରଂ ଇମଂ ଦଜ୍ଜା, ଅତ୍ଥଧମ୍ମାନୁସିଟ୍ଠିୟା ॥
ସ୍ୱାଧିପ୍ପାଗା ଭାରଦ୍ୱାଜୋ, ୱିଧୁରସ୍ସ ଉପନ୍ତିକଂ ।
ତମଦ୍ଦସ ମହାବ୍ରହ୍ମା, ଅସମାନଂ ସକେ ଘରେ ॥
ରଞ୍ଞୋହଂ ପହିତୋ ଦୂତୋ, କୋରବ୍ୟସ୍ସ ୟସସ୍ସିନୋ ।
‘‘ଅତ୍ଥଂ ଧମ୍ମଞ୍ଚ ପୁଚ୍ଛେସି’’, ଇଚ୍ଚବ୍ରୱି ୟୁଧିଟ୍ଠିଲୋ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ୱିଧୁରକ୍ଖାହି ପୁଚ୍ଛିତୋ ॥
ଗଙ୍ଗଂ ମେ ପିଦହିସ୍ସନ୍ତି, ନ ତଂ ସକ୍କୋମି ବ୍ରାହ୍ମଣ ।
ଅପିଧେତୁଂ ମହାସିନ୍ଧୁଂ, ତଂ କଥଂ ସୋ ଭୱିସ୍ସତି ॥
ନ ତେ ସକ୍କୋମି ଅକ୍ଖାତୁଂ, ଅତ୍ଥଂ ଧମ୍ମଞ୍ଚ ପୁଚ୍ଛିତୋ ।
ଭଦ୍ରକାରୋ ଚ ମେ ପୁତ୍ତୋ, ଓରସୋ ମମ ଅତ୍ରଜୋ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ଗନ୍ତ୍ୱା ପୁଚ୍ଛସ୍ସୁ ବ୍ରାହ୍ମଣ ॥
ସ୍ୱାଧିପ୍ପାଗା ଭାରଦ୍ୱାଜୋ, ଭଦ୍ରକାରସ୍ସୁପନ୍ତିକଂ [ଭଦ୍ରକାରସ୍ସ ସନ୍ତିକଂ (ସୀ॰ ସ୍ୟା॰)]।
ତମଦ୍ଦସ ମହାବ୍ରହ୍ମା, ନିସିନ୍ନଂ ସମ୍ହି ୱେସ୍ମନି ॥
ରଞ୍ଞୋହଂ ପହିତୋ ଦୂତୋ, କୋରବ୍ୟସ୍ସ ୟସସ୍ସିନୋ ।
‘‘ଅତ୍ଥଂ ଧମ୍ମଞ୍ଚ ପୁଚ୍ଛେସି’’, ଇଚ୍ଚବ୍ରୱି ୟୁଧିଟ୍ଠିଲୋ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ଭଦ୍ରକାର ପବ୍ରୂହି [ବ୍ରୱୀହି (ସୀ॰ ପୀ॰)] ମେ ॥
ମଂସକାଜଂ [ମଂସକାଚଂ (ପୀ॰)] ଅୱହାୟ, ଗୋଧଂ ଅନୁପତାମହଂ ।
ନ ତେ ସକ୍କୋମି ଅକ୍ଖାତୁଂ, ଅତ୍ଥଂ ଧମ୍ମଞ୍ଚ ପୁଚ୍ଛିତୋ ॥
ସଞ୍ଚୟୋ [ସଞ୍ଜୟୋ (ସୀ॰ ସ୍ୟା॰ ପୀ॰)] ନାମ ମେ ଭାତା, କନିଟ୍ଠୋ ମେ ସୁଚୀରତ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ଗନ୍ତ୍ୱା ପୁଚ୍ଛସ୍ସୁ ବ୍ରାହ୍ମଣ ॥
ସ୍ୱାଧିପ୍ପାଗା ଭାରଦ୍ୱାଜୋ, ସଞ୍ଚୟସ୍ସ ଉପନ୍ତିକଂ ।
ତମଦ୍ଦସ ମହାବ୍ରହ୍ମା, ନିସିନ୍ନଂ ସମ୍ହି ୱେସ୍ମନି [ପରିସତି (ସ୍ୟା॰), ପରୀସତି (ପୀ॰)]॥
ରଞ୍ଞୋହଂ ପହିତୋ ଦୂତୋ, କୋରବ୍ୟସ୍ସ ୟସସ୍ସିନୋ ।
‘‘ଅତ୍ଥଂ ଧମ୍ମଞ୍ଚ ପୁଚ୍ଛେସି’’, ଇଚ୍ଚବ୍ରୱି ୟୁଧିଟ୍ଠିଲୋ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ସଞ୍ଚୟକ୍ଖାହି ପୁଚ୍ଛିତୋ ॥
ସଦା ମଂ ଗିଲତେ [ଗିଲତୀ (ସୀ॰), ଗିଲତି (ପୀ॰)] ମଚ୍ଚୁ, ସାୟଂ ପାତୋ ସୁଚୀରତ ।
ନ ତେ ସକ୍କୋମି ଅକ୍ଖାତୁଂ, ଅତ୍ଥଂ ଧମ୍ମଞ୍ଚ ପୁଚ୍ଛିତୋ ॥
ସମ୍ଭୱୋ ନାମ ମେ ଭାତା, କନିଟ୍ଠୋ ମେ ସୁଚୀରତ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ଗନ୍ତ୍ୱା ପୁଚ୍ଛସ୍ସୁ ବ୍ରାହ୍ମଣ ॥
ଅବ୍ଭୁତୋ ୱତ ଭୋ ଧମ୍ମୋ, ନାୟଂ ଅସ୍ମାକ ରୁଚ୍ଚତି ।
ତୟୋ ଜନା ପିତାପୁତ୍ତା, ତେସୁ ପଞ୍ଞାୟ ନୋ ୱିଦୂ ॥
ନ ତଂ ସକ୍କୋଥ ଅକ୍ଖାତୁଂ, ଅତ୍ଥଂ ଧମ୍ମଞ୍ଚ ପୁଚ୍ଛିତା ।
କଥଂ ନୁ ଦହରୋ ଜଞ୍ଞା, ଅତ୍ଥଂ ଧମ୍ମଞ୍ଚ ପୁଚ୍ଛିତୋ ॥
ମା ନଂ ଦହରୋତି ଉଞ୍ଞାସି [ମଞ୍ଞାସି (ସ୍ୟା॰ କ॰)], ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ୟଥାପି ଚନ୍ଦୋ ୱିମଲୋ, ଗଚ୍ଛଂ ଆକାସଧାତୁୟା ।
ସବ୍ବେ ତାରାଗଣେ ଲୋକେ, ଆଭାୟ ଅତିରୋଚତି ॥
ଏୱମ୍ପି ଦହରୂପେତୋ, ପଞ୍ଞାୟୋଗେନ ସମ୍ଭୱୋ ।
ମା ନଂ ଦହରୋତି ଉଞ୍ଞାସି, ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ୟଥାପି ରମ୍ମକୋ ମାସୋ, ଗିମ୍ହାନଂ ହୋତି ବ୍ରାହ୍ମଣ ।
ଅତେୱଞ୍ଞେହି ମାସେହି, ଦୁମପୁପ୍ଫେହି ସୋଭତି ॥
ଏୱମ୍ପି ଦହରୂପେତୋ, ପଞ୍ଞାୟୋଗେନ ସମ୍ଭୱୋ ।
ମା ନଂ ଦହରୋତି ଉଞ୍ଞାସି, ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ୟଥାପି ହିମୱା ବ୍ରହ୍ମେ, ପବ୍ବତୋ ଗନ୍ଧମାଦନୋ ।
ନାନାରୁକ୍ଖେହି ସଞ୍ଛନ୍ନୋ, ମହାଭୂତଗଣାଲୟୋ ।
ଓସଧେହି ଚ ଦିବ୍ବେହି, ଦିସା ଭାତି ପୱାତି ଚ ॥
ଏୱମ୍ପି ଦହରୂପେତୋ, ପଞ୍ଞାୟୋଗେନ ସମ୍ଭୱୋ ।
ମା ନଂ ଦହରୋତି ଉଞ୍ଞାସି, ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ୟଥାପି ପାୱକୋ ବ୍ରହ୍ମେ, ଅଚ୍ଚିମାଲୀ ୟସସ୍ସିମା ।
ଜଲମାନୋ ୱନେ ଗଚ୍ଛେ [ଚରଂ କଚ୍ଛେ (ପୀ॰)], ଅନଲୋ କଣ୍ହୱତ୍ତନୀ ॥
ଘତାସନୋ ଧୂମକେତୁ, ଉତ୍ତମାହେୱନନ୍ଦହୋ ।
ନିସୀଥେ [ନିସ୍ସୀୱେ (ସ୍ୟା॰), ନିସିୱେ (କ॰)] ପବ୍ବତଗ୍ଗସ୍ମିଂ, ପହୂତେଧୋ [ବହୁତେଜୋ (ସ୍ୟା॰ କ॰)] ୱିରୋଚତି ॥
ଏୱମ୍ପି ଦହରୂପେତୋ, ପଞ୍ଞାୟୋଗେନ ସମ୍ଭୱୋ ।
ମା ନଂ ଦହରୋତି ଉଞ୍ଞାସି, ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ଜୱେନ ଭଦ୍ରଂ ଜାନନ୍ତି, ବଲିବଦ୍ଦଞ୍ଚ [ବଲିୱଦ୍ଦଞ୍ଚ (ସୀ॰ ପୀ॰)] ୱାହିୟେ ।
ଦୋହେନ ଧେନୁଂ ଜାନନ୍ତି, ଭାସମାନଞ୍ଚ ପଣ୍ଡିତଂ ॥
ଏୱମ୍ପି ଦହରୂପେତୋ, ପଞ୍ଞାୟୋଗେନ ସମ୍ଭୱୋ ।
ମା ନଂ ଦହରୋତି ଉଞ୍ଞାସି, ଅପୁଚ୍ଛିତ୍ୱାନ ସମ୍ଭୱଂ ।
ପୁଚ୍ଛିତ୍ୱା ସମ୍ଭୱଂ ଜଞ୍ଞା, ଅତ୍ଥଂ ଧମ୍ମଞ୍ଚ ବ୍ରାହ୍ମଣ ॥
ସ୍ୱାଧିପ୍ପାଗା ଭାରଦ୍ୱାଜୋ, ସମ୍ଭୱସ୍ସ ଉପନ୍ତିକଂ ।
ତମଦ୍ଦସ ମହାବ୍ରହ୍ମା, କୀଳମାନଂ ବହୀପୁରେ ॥
ରଞ୍ଞୋହଂ ପହିତୋ ଦୂତୋ, କୋରବ୍ୟସ୍ସ ୟସସ୍ସିନୋ ।
‘‘ଅତ୍ଥଂ ଧମ୍ମଞ୍ଚ ପୁଚ୍ଛେସି’’, ଇଚ୍ଚବ୍ରୱି ୟୁଧିଟ୍ଠିଲୋ ।
ତଂ ତ୍ୱଂ ଅତ୍ଥଞ୍ଚ ଧମ୍ମଞ୍ଚ, ସମ୍ଭୱକ୍ଖାହି ପୁଚ୍ଛିତୋ ॥
ତଗ୍ଘ ତେ ଅହମକ୍ଖିସ୍ସଂ, ୟଥାପି କୁସଲୋ ତଥା ।
ରାଜା ଚ ଖୋ ତଂ ଜାନାତି, ୟଦି କାହତି ୱା ନ ୱା ॥
‘‘ଅଜ୍ଜ ସୁୱେ’’ତି ସଂସେୟ୍ୟ, ରଞ୍ଞା ପୁଟ୍ଠୋ ସୁଚୀରତ ।
ମା କତ୍ୱା ଅୱସୀ ରାଜା, ଅତ୍ଥେ ଜାତେ ୟୁଧିଟ୍ଠିଲୋ ॥
ଅଜ୍ଝତ୍ତଞ୍ଞେୱ ସଂସେୟ୍ୟ, ରଞ୍ଞା ପୁଟ୍ଠୋ ସୁଚୀରତ ।
କୁମ୍ମଗ୍ଗଂ ନ ନିୱେସେୟ୍ୟ, ୟଥା ମୂଳ୍ହୋ ଅଚେତସୋ [ଅଚେତନୋ (କ॰)]॥
ଅତ୍ତାନଂ ନାତିୱତ୍ତେୟ୍ୟ, ଅଧମ୍ମଂ ନ ସମାଚରେ ।
ଅତିତ୍ଥେ ନପ୍ପତାରେୟ୍ୟ, ଅନତ୍ଥେ ନ ୟୁତୋ ସିୟା ॥
ୟୋ ଚ ଏତାନି ଠାନାନି, କତ୍ତୁଂ ଜାନାତି ଖତ୍ତିୟୋ ।
ସଦା ସୋ ୱଡ୍ଢତେ ରାଜା, ସୁକ୍କପକ୍ଖେୱ ଚନ୍ଦିମା ॥
ଞାତୀନଞ୍ଚ ପିୟୋ ହୋତି, ମିତ୍ତେସୁ ଚ ୱିରୋଚତି ।
କାୟସ୍ସ ଭେଦା ସପ୍ପଞ୍ଞୋ, ସଗ୍ଗଂ ସୋ ଉପପଜ୍ଜତୀତି ॥
ସମ୍ଭୱଜାତକଂ ପଞ୍ଚମଂ ।
୫୧୬. ମହାକପିଜାତକଂ (୬)
ବାରାଣସ୍ୟଂ [ବାରାଣସ୍ସଂ (ସୀ॰ ପୀ॰)] ଅହୂ ରାଜା, କାସୀନଂ ରଟ୍ଠୱଡ୍ଢନୋ ।
ମିତ୍ତାମଚ୍ଚପରିବ୍ୟୂଳ୍ହୋ, ଅଗମାସି ମିଗାଜିନଂ [ମିଗାଜିରଂ (ସୀ॰), ମିଗାଚିରଂ (ପୀ॰)]॥
ତତ୍ଥ ବ୍ରାହ୍ମଣମଦ୍ଦକ୍ଖି, ସେତଂ ଚିତ୍ରଂ କିଲାସିନଂ ।
ୱିଦ୍ଧସ୍ତଂ କୋୱିଳାରଂୱ, କିସଂ ଧମନିସନ୍ଥତଂ ॥
ପରମକାରୁଞ୍ଞତଂ ପତ୍ତଂ, ଦିସ୍ୱା କିଚ୍ଛଗତଂ ନରଂ ।
ଅୱଚ ବ୍ୟମ୍ହିତୋ ରାଜା, ‘‘ୟକ୍ଖାନଂ କତମୋ ନୁସି ॥
‘‘ହତ୍ଥପାଦା ଚ ତେ ସେତା, ତତୋ ସେତତରଂ [ସେତତରୋ (ପୀ॰)] ସିରୋ ।
ଗତ୍ତଂ କମ୍ମାସୱଣ୍ଣଂ ତେ, କିଲାସବହୁଲୋ ଚସି ॥
‘‘ୱଟ୍ଟନାୱଳି [ୱଟ୍ଠନାୱଲି (ପୀ॰)] ସଙ୍କାସା, ପିଟ୍ଠି ତେ ନିନ୍ନତୁନ୍ନତା ।
କାଳପବ୍ବାୱ [କାଳପବ୍ବା ଚ (ସ୍ୟା॰), କାଳା ପବ୍ବା ଚ (ପୀ॰)] ତେ ଅଙ୍ଗା, ନାଞ୍ଞଂ ପସ୍ସାମି ଏଦିସଂ ॥
‘‘ଉଗ୍ଘଟ୍ଟପାଦୋ ତସିତୋ, କିସୋ ଧମନିସନ୍ଥତୋ ।
ଛାତୋ ଆତତ୍ତରୂପୋସି [ଆଦିତ୍ତରୂପୋସି (କ॰), ଅତିତ୍ତରୂପୋସି (ସ୍ୟା॰ କ॰ ଅଟ୍ଠ॰)], କୁତୋସି କତ୍ଥ ଗଚ୍ଛସି ॥
‘‘ଦୁଦ୍ଦସୀ ଅପ୍ପକାରୋସି, ଦୁବ୍ବଣ୍ଣୋ ଭୀମଦସ୍ସନୋ ।
ଜନେତ୍ତି ୟାପି ତେ ମାତା, ନ ତଂ ଇଚ୍ଛେୟ୍ୟ ପସ୍ସିତୁଂ ॥
‘‘କିଂ କମ୍ମମକରଂ [କମ୍ମମକରା (ସୀ॰ ସ୍ୟା॰ ପୀ॰)] ପୁବ୍ବେ, କଂ ଅୱଜ୍ଝଂ ଅଘାତୟି ।
କିବ୍ବିସଂ ୟଂ କରିତ୍ୱାନ, ଇଦଂ ଦୁକ୍ଖଂ ଉପାଗମି’’ ॥
ତଗ୍ଘ ତେ ଅହମକ୍ଖିସ୍ସଂ, ୟଥାପି କୁସଲୋ ତଥା ।
ସଚ୍ଚୱାଦିଞ୍ହି ଲୋକସ୍ମିଂ, ପସଂସନ୍ତୀଧ ପଣ୍ଡିତା ॥
ଏକୋ ଚରଂ ଗୋଗୱେସୋ, ମୂଳ୍ହୋ ଅଚ୍ଚସରିଂ ୱନେ ।
ଅରଞ୍ଞେ ଇରୀଣେ [ଈରିଣେ (ସୀ॰ ସ୍ୟା॰ ପୀ॰)] ୱିୱନେ, ନାନାକୁଞ୍ଜରସେୱିତେ ॥
ୱାଳମିଗାନୁଚରିତେ, ୱିପ୍ପନଟ୍ଠୋସ୍ମି କାନନେ ।
ଅଚରିଂ ତତ୍ଥ ସତ୍ତାହଂ, ଖୁପ୍ପିପାସ [ଖୁପ୍ପିପାସା (ସୀ॰ ପୀ॰)] ସମପ୍ପିତୋ ॥
ତତ୍ଥ ତିନ୍ଦୁକମଦ୍ଦକ୍ଖିଂ, ୱିସମଟ୍ଠଂ ବୁଭୁକ୍ଖିତୋ ।
ପପାତମଭିଲମ୍ବନ୍ତଂ, ସମ୍ପନ୍ନଫଲଧାରିନଂ ॥
ୱାତସ୍ସିତାନି ଭକ୍ଖେସିଂ, ତାନି ରୁଚ୍ଚିଂସୁ ମେ ଭୁସଂ ।
ଅତିତ୍ତୋ ରୁକ୍ଖମାରୂହିଂ [ମାରୁୟ୍ହ (ସୀ॰ ସ୍ୟା॰)], ତତ୍ଥ ହେସ୍ସାମି ଆସିତୋ ॥
ଏକଂ ମେ ଭକ୍ଖିତଂ ଆସି, ଦୁତିୟଂ ଅଭିପତ୍ଥିତଂ ।
ତତୋ ସା ଭଞ୍ଜଥ ସାଖା, ଛିନ୍ନା ଫରସୁନା ୱିୟ ॥
ସୋହଂ ସହାୱ ସାଖାହି, ଉଦ୍ଧଂପାଦୋ ଅୱଂସିରୋ ।
ଅପ୍ପତିଟ୍ଠେ ଅନାଲମ୍ବେ, ଗିରିଦୁଗ୍ଗସ୍ମି ପାପତଂ ॥
ୟସ୍ମା ଚ ୱାରି ଗମ୍ଭୀରଂ, ତସ୍ମା ନ ସମପଜ୍ଜିସଂ [ସମପଜ୍ଜସିଂ (ସୀ॰), ସମଭଜ୍ଜିସଂ (ପୀ॰)]।
ତତ୍ଥ ସେସିଂ ନିରାନନ୍ଦୋ, ଅନୂନା [ଅନାଥୋ (ସୀ॰)] ଦସ ରତ୍ତିୟୋ ॥
ଅଥେତ୍ଥ କପି ମାଗଞ୍ଛି [ମାଗଚ୍ଛି (ସ୍ୟା॰ କ॰)], ଗୋନଙ୍ଗୁଲୋ ଦରୀଚରୋ ।
ସାଖାହି ସାଖଂ ୱିଚରନ୍ତୋ, ଖାଦମାନୋ ଦୁମପ୍ଫଲଂ ॥
ସୋ ମଂ ଦିସ୍ୱା କିସଂ ପଣ୍ଡୁଂ, କାରୁଞ୍ଞମକରଂ ମୟି ।
ଅମ୍ଭୋ କୋ ନାମ ସୋ ଏତ୍ଥ, ଏୱଂ ଦୁକ୍ଖେନ ଅଟ୍ଟିତୋ ॥
ମନୁସ୍ସୋ ଅମନୁସ୍ସୋ ୱା, ଅତ୍ତାନଂ ମେ ପୱେଦୟ ।
ତସ୍ସଞ୍ଜଲିଂ ପଣାମେତ୍ୱା, ଇଦଂ ୱଚନମବ୍ରୱିଂ ॥
ମନୁସ୍ସୋହଂ ବ୍ୟସମ୍ପତ୍ତୋ [ୱସମ୍ପତ୍ତୋ (ସ୍ୟା॰ କ॰)], ସା ମେ ନତ୍ଥି ଇତୋ ଗତି ।
ତଂ ୱୋ ୱଦାମି ଭଦ୍ଦଂ ୱୋ, ତ୍ୱଞ୍ଚ ମେ ସରଣଂ ଭୱ ॥
ଗରୁଂ [ଗରୁ (ସୀ॰ ପୀ॰)] ସିଲଂ ଗହେତ୍ୱାନ, ୱିଚରୀ [ୱିଚରି (ପୀ॰)] ପବ୍ବତେ କପି ।
ସିଲାୟ ୟୋଗ୍ଗଂ କତ୍ୱାନ, ନିସଭୋ ଏତଦବ୍ରୱି ॥
ଏହି ମେ ପିଟ୍ଠିମାରୁୟ୍ହ, ଗୀୱଂ ଗଣ୍ହାହି ବାହୁଭି ।
ଅହଂ ତଂ ଉଦ୍ଧରିସ୍ସାମି, ଗିରିଦୁଗ୍ଗତ ୱେଗସା ॥
ତସ୍ସ ତଂ ୱଚନଂ ସୁତ୍ୱା, ୱାନରିନ୍ଦସ୍ସ ସିରୀମତୋ ।
ପିଟ୍ଠିମାରୁୟ୍ହ ଧୀରସ୍ସ, ଗୀୱଂ ବାହାହି ଅଗ୍ଗହିଂ ॥
ସୋ ମଂ ତତୋ ସମୁଟ୍ଠାସି, ତେଜସ୍ସୀ [ତେଜସୀ (ସ୍ୟା॰ ପୀ॰ କ॰)] ବଲୱା କପି ।
ୱିହଞ୍ଞମାନୋ କିଚ୍ଛେନ, ଗିରିଦୁଗ୍ଗତ ୱେଗସା ॥
ଉଦ୍ଧରିତ୍ୱାନ ମଂ ସନ୍ତୋ, ନିସଭୋ ଏତଦବ୍ରୱି ।
ଇଙ୍ଘ ମଂ ସମ୍ମ ରକ୍ଖସ୍ସୁ, ପସ୍ସୁପିସ୍ସଂ ମୁହୁତ୍ତକଂ ॥
ସୀହା ବ୍ୟଗ୍ଘା ଚ ଦୀପୀ ଚ, ଅଚ୍ଛକୋକତରଚ୍ଛୟୋ ।
ତେ ମଂ ପମତ୍ତଂ ହିଂସେୟ୍ୟୁଂ, ତେ ତ୍ୱଂ ଦିସ୍ୱା ନିୱାରୟ [ଦିସ୍ୱାନ ୱାରୟ (ପୀ॰)]॥
ଏୱଂ ମେ ପରିତ୍ତାତୂନ [ପରିତ୍ତାତୁନ (କ॰)], ପସ୍ସୁପି ସୋ ମୁହୁତ୍ତକଂ ।
ତଦାହଂ ପାପିକଂ ଦିଟ୍ଠିଂ, ପଟିଲଚ୍ଛିଂ ଅୟୋନିସୋ ॥
ଭକ୍ଖୋ ଅୟଂ ମନୁସ୍ସାନଂ, ୟଥା ଚଞ୍ଞେ ୱନେ ମିଗା ।
ୟଂ ନୂନିମଂ ୱଧିତ୍ୱାନ, ଛାତୋ ଖାଦେୟ୍ୟ ୱାନରଂ ॥
ଅସିତୋ [ଆସିକୋ (ପୀ॰)] ଚ ଗମିସ୍ସାମି, ମଂସମାଦାୟ ସମ୍ବଲଂ ।
କନ୍ତାରଂ ନିତ୍ଥରିସ୍ସାମି, ପାଥେୟ୍ୟଂ ମେ ଭୱିସ୍ସତି ॥
ତତୋ ସିଲଂ ଗହେତ୍ୱାନ, ମତ୍ଥକଂ ସନ୍ନିତାଳୟିଂ ।
ମମ ଗତ୍ତ [ଭତ୍ତ (ସୀ॰ ସ୍ୟା॰), ହତ୍ଥ (ପୀ॰)] କିଲନ୍ତସ୍ସ, ପହାରୋ ଦୁବ୍ବଲୋ ଅହୁ ॥
ସୋ ଚ ୱେଗେନୁଦପ୍ପତ୍ତୋ, କପି ରୁହିର [ରୁଧିର (ସୀ॰)] ମକ୍ଖିତୋ ।
ଅସ୍ସୁପୁଣ୍ଣେହି ନେତ୍ତେହି, ରୋଦନ୍ତୋ ମଂ ଉଦିକ୍ଖତି ॥
ମାୟ୍ୟୋମଂ କରି ଭଦ୍ଦନ୍ତେ, ତ୍ୱଞ୍ଚ ନାମେଦିସଂ କରି ।
ତ୍ୱଞ୍ଚ ଖୋ ନାମ ଦୀଘାୱୁ [ଦୀଘାୟୁ (ପୀ॰)], ଅଞ୍ଞେ [ଅଞ୍ଞଂ (ପୀ॰)] ୱାରେତୁମରହସି ॥
ଅହୋ ୱତ ରେ ପୁରିସ, ତାୱ ଦୁକ୍କରକାରକ ।
ଏଦିସା ୱିସମା ଦୁଗ୍ଗା, ପପାତା ଉଦ୍ଧତୋ [ଉଦ୍ଧଟୋ (ପୀ॰)] ମୟା ॥
ଆନୀତୋ ପରଲୋକାୱ, ଦୁବ୍ଭେୟ୍ୟଂ ମଂ ଅମଞ୍ଞଥ ।
ତଂ ତେନ ପାପଧମ୍ମେନ, ପାପଂ ପାପେନ ଚିନ୍ତିତଂ ॥
ମା ହେୱ ତ୍ୱଂ ଅଧମ୍ମଟ୍ଠ, ୱେଦନଂ କଟୁକଂ ଫୁସି ।
ମା ହେୱ ପାପକମ୍ମଂ ତଂ, ଫଲଂ ୱେଳୁଂୱ ତଂ ୱଧି ॥
ତୟିମେ ନତ୍ଥି ୱିସ୍ସାସୋ, ପାପଧମ୍ମ ଅସଞ୍ଞତ [ପାପଧମ୍ମଂ ଅମଞ୍ଞଥ (ପୀ॰)]।
ଏହି ମେ ପିଟ୍ଠିତୋ ଗଚ୍ଛ, ଦିସ୍ସମାନୋୱ ସନ୍ତିକେ ॥
ମୁତ୍ତୋସି ହତ୍ଥା ୱାଳାନଂ, ପତ୍ତୋସି ମାନୁସିଂ ପଦଂ ।
ଏସ ମଗ୍ଗୋ ଅଧମ୍ମଟ୍ଠ, ତେନ ଗଚ୍ଛ ୟଥାସୁଖଂ ॥
ଇଦଂ ୱତ୍ୱା ଗିରିଚରୋ, ରହଦେ [ରୁହିରଂ (ସ୍ୟା॰ କ॰)] ପକ୍ଖଲ୍ୟ ମତ୍ଥକଂ ।
ଅସ୍ସୂନି ସମ୍ପମଜ୍ଜିତ୍ୱା, ତତୋ ପବ୍ବତମାରୁହି ॥
ସୋହଂ ତେନାଭିସତ୍ତୋସ୍ମି, ପରିଳାହେନ ଅଟ୍ଟିତୋ ।
ଡୟ୍ହମାନେନ ଗତ୍ତେନ, ୱାରିଂ ପାତୁଂ ଉପାଗମିଂ ॥
ଅଗ୍ଗିନା ୱିୟ ସନ୍ତତ୍ତୋ, ରହଦୋ ରୁହିରମକ୍ଖିତୋ ।
ପୁବ୍ବଲୋହିତସଙ୍କାସୋ, ସବ୍ବୋ ମେ ସମପଜ୍ଜଥ ॥
ୟାୱନ୍ତୋ ଉଦବିନ୍ଦୂନି, କାୟସ୍ମିଂ ନିପତିଂସୁ ମେ ।
ତାୱନ୍ତୋ ଗଣ୍ଡ [ଗଣ୍ଡୂ (ସୀ॰ ପୀ॰), ଗଣ୍ଡୁ (ସ୍ୟା॰)] ଜାୟେଥ, ଅଦ୍ଧବେଲୁୱସାଦିସା ॥
ପଭିନ୍ନା ପଗ୍ଘରିଂସୁ ମେ, କୁଣପା ପୁବ୍ବଲୋହିତା ।
ୟେନ ୟେନେୱ ଗଚ୍ଛାମି, ଗାମେସୁ ନିଗମେସୁ ଚ ॥
ଦଣ୍ଡହତ୍ଥା ନିୱାରେନ୍ତି, ଇତ୍ଥିୟୋ ପୁରିସା ଚ ମଂ ।
ଓକ୍କିତା [ଓକିଣ୍ଣା (ସୀ॰)] ପୂତିଗନ୍ଧେନ, ମାସ୍ସୁ ଓରେନ ଆଗମା [ମାଗମା (ସୀ॰ ପୀ॰)]॥
ଏତାଦିସଂ ଇଦଂ ଦୁକ୍ଖଂ, ସତ୍ତ ୱସ୍ସାନି ଦାନି ମେ ।
ଅନୁଭୋମି ସକଂ କମ୍ମଂ, ପୁବ୍ବେ ଦୁକ୍କଟମତ୍ତନୋ ॥
ତଂ ୱୋ ୱଦାମି ଭଦ୍ଦନ୍ତେ [ଭଦ୍ଦଂ ୱୋ (ସୀ॰ ପୀ॰)], ୟାୱନ୍ତେତ୍ଥ ସମାଗତା ।
ମାସ୍ସୁ ମିତ୍ତାନ [ମିତ୍ତାନଂ (ସୀ॰ ପୀ॰)] ଦୁବ୍ଭିତ୍ଥୋ, ମିତ୍ତଦୁବ୍ଭୋ ହି ପାପକୋ ॥
କୁଟ୍ଠୀ କିଲାସୀ ଭୱତି, ୟୋ ମିତ୍ତାନିଧ ଦୁବ୍ଭତି [ୟୋ ମିତ୍ତାନଂ ଇଧଦ୍ଦୁଭି (ସୀ॰ ଅଟ୍ଠ॰), ୟୋ ମିତ୍ତାନଂ ଇଧ ଦୁବ୍ଭତି (ପୀ॰)]।
କାୟସ୍ସ ଭେଦା ମିତ୍ତଦ୍ଦୁ [ମିତ୍ତଦୁବ୍ଭୀ (ସ୍ୟା॰ କ॰)], ନିରୟଂ ସୋପପଜ୍ଜତୀତି [ସୋ ଉପପଜ୍ଜତୀତି (ସୀ॰ ସ୍ୟା॰ ପୀ॰)]॥
ମହାକପିଜାତକଂ ଛଟ୍ଠଂ ।
୫୧୭. ଦକରକ୍ଖସଜାତକଂ (୭)
ସଚେ ୱୋ ୱୁୟ୍ହମାନାନଂ, ସତ୍ତନ୍ନଂ ଉଦକଣ୍ଣୱେ ।
ମନୁସ୍ସବଲିମେସାନୋ, ନାୱଂ ଗଣ୍ହେୟ୍ୟ ରକ୍ଖସୋ ।
ଅନୁପୁବ୍ବଂ କଥଂ ଦତ୍ୱା, ମୁଞ୍ଚେସି ଦକରକ୍ଖସା [ଦକରକ୍ଖତୋ (ପୀ॰)]॥
ମାତରଂ ପଠମଂ ଦଜ୍ଜଂ, ଭରିୟଂ ଦତ୍ୱାନ ଭାତରଂ ।
ତତୋ ସହାୟଂ ଦତ୍ୱାନ, ପଞ୍ଚମଂ ଦଜ୍ଜଂ [ଦଜ୍ଜ (ସ୍ୟା॰)] ବ୍ରାହ୍ମଣଂ ।
ଛଟ୍ଠାହଂ ଦଜ୍ଜମତ୍ତାନଂ, ନେୱ ଦଜ୍ଜଂ ମହୋସଧଂ ॥
ପୋସେତା ତେ ଜନେତ୍ତୀ ଚ, ଦୀଘରତ୍ତାନୁକମ୍ପିକା ।
ଛବ୍ଭୀ ତୟି ପଦୁସ୍ସତି [ପଦୁଟ୍ଠସ୍ମିଂ (ସୀ॰ ସ୍ୟା॰)], ପଣ୍ଡିତା ଅତ୍ଥଦସ୍ସିନୀ ।
ଅଞ୍ଞଂ ଉପନିସଂ କତ୍ୱା, ୱଧା ତଂ ପରିମୋଚୟି ॥
ତଂ ତାଦିସିଂ [ତାଦିସଂ (କ॰)] ପାଣଦଦିଂ, ଓରସଂ ଗବ୍ଭଧାରିନିଂ [ଗବ୍ଭଧାରିଣିଂ (ସୀ॰ ସ୍ୟା॰)]।
ମାତରଂ କେନ ଦୋସେନ, ଦଜ୍ଜାସି ଦକରକ୍ଖିନୋ [ଦକରକ୍ଖତୋ (ପୀ॰)]॥
ଦହରା ୱିୟଲଙ୍କାରଂ, ଧାରେତି ଅପିଳନ୍ଧନଂ ।
ଦୋୱାରିକେ ଅନୀକଟ୍ଠେ, ଅତିୱେଲଂ ପଜଗ୍ଘତି [ସଞ୍ଜଗ୍ଘତି (କ॰)]॥
ଅଥୋପି ପଟିରାଜୂନଂ, ସୟଂ ଦୂତାନି ସାସତି ।
ମାତରଂ ତେନ ଦୋସେନ, ଦଜ୍ଜାହଂ ଦକରକ୍ଖିନୋ ॥
ଇତ୍ଥିଗୁମ୍ବସ୍ସ ପୱରା, ଅଚ୍ଚନ୍ତଂ ପିୟଭାଣିନୀ [ଅଚ୍ଚନ୍ତପିୟୱାଦିନୀ (ସୀ॰ ପୀ॰)]।
ଅନୁଗ୍ଗତା [ଅନୁବ୍ବତା (ସ୍ୟା॰), ଅନୁପୁବ୍ବତା (କ॰)] ସୀଲୱତୀ, ଛାୟାୱ ଅନପାୟିନୀ ॥
ଅକ୍କୋଧନା ପୁଞ୍ଞୱତୀ [ପଞ୍ଞୱତୀ (ସୀ॰ ପୀ॰)], ପଣ୍ଡିତା ଅତ୍ଥଦସ୍ସିନୀ ।
ଉବ୍ବରିଂ [ଉପ୍ପରିଂ (ସୀ॰)] କେନ ଦୋସେନ, ଦଜ୍ଜାସି ଦକରକ୍ଖିନୋ ॥
ଖିଡ୍ଡାରତିସମାପନ୍ନଂ, ଅନତ୍ଥୱସମାଗତଂ ।
ସା ମଂ ସକାନ ପୁତ୍ତାନଂ, ଅୟାଚଂ ୟାଚତେ ଧନଂ ॥
ସୋହଂ ଦଦାମି ସାରତ୍ତୋ [ସାରତୋ (ସ୍ୟା॰)], ବହୁଂ ଉଚ୍ଚାୱଚଂ ଧନଂ ।
ସୁଦୁଚ୍ଚଜଂ ଚଜିତ୍ୱାନ, ପଚ୍ଛା ସୋଚାମି ଦୁମ୍ମନୋ ।
ଉବ୍ବରିଂ ତେନ ଦୋସେନ, ଦଜ୍ଜାହଂ ଦକରକ୍ଖିନୋ ॥
ୟେନୋଚିତା ଜନପଦା [ଜାନପଦା (ସୀ॰ ସ୍ୟା॰ ପୀ॰)], ଆନୀତା ଚ ପଟିଗ୍ଗହଂ ।
ଆଭତଂ ପରରଜ୍ଜେଭି, ଅଭିଟ୍ଠାୟ ବହୁଂ ଧନଂ ॥
ଧନୁଗ୍ଗହାନଂ ପୱରଂ, ସୂରଂ ତିଖିଣମନ୍ତିନଂ ।
ଭାତରଂ କେନ ଦୋସେନ, ଦଜ୍ଜାସି ଦକରକ୍ଖିନୋ ॥
ୟେନୋଚିତା [ମୟୋଚିତା (ସୀ॰), ମୟାଚିତା (ପୀ॰)] ଜନପଦା, ଆନୀତା ଚ ପଟିଗ୍ଗହଂ ।
ଆଭତଂ ପରରଜ୍ଜେଭି, ଅଭିଟ୍ଠାୟ ବହୁଂ ଧନଂ ॥
ଧନୁଗ୍ଗହାନଂ ପୱରୋ, ସୂରୋ ତିଖିଣମନ୍ତି ଚ [ତିଖିଣମନ୍ତିନୋ (କ॰)]।
ମୟାୟଂ [ମୟା ସୋ (ସୀ॰ ପୀ॰)] ସୁଖିତୋ ରାଜା, ଅତିମଞ୍ଞତି ଦାରକୋ ॥
ଉପଟ୍ଠାନମ୍ପି ମେ ଅୟ୍ୟେ, ନ ସୋ ଏତି ୟଥା ପୁରେ ।
ଭାତରଂ ତେନ ଦୋସେନ, ଦଜ୍ଜାହଂ ଦକରକ୍ଖିନୋ ॥
ଏକରତ୍ତେନ ଉଭୟୋ, ତ୍ୱଞ୍ଚେୱ ଧନୁସେଖ ଚ [ଧନୁସେଖୱା (ସୀ॰ ସ୍ୟା॰ ପୀ॰)]।
ଉଭୋ ଜାତେତ୍ଥ ପଞ୍ଚାଲା, ସହାୟା ସୁସମାୱୟା ॥
ଚରିୟା ତଂ ଅନୁବନ୍ଧିତ୍ଥୋ [ଅନୁବନ୍ଧୋ (କ॰)], ଏକଦୁକ୍ଖସୁଖୋ ତୱ ।
ଉସ୍ସୁକ୍କୋ ତେ ଦିୱାରତ୍ତିଂ, ସବ୍ବକିଚ୍ଚେସୁ ବ୍ୟାୱଟୋ ।
ସହାୟଂ କେନ ଦୋସେନ, ଦଜ୍ଜାସି ଦକରକ୍ଖିନୋ ॥
ଚରିୟା ମଂ ଅୟଂ [ଚରିୟାୟ ଅୟଂ (ସୀ॰ ପୀ॰)] ଅୟ୍ୟେ, ପଜଗ୍ଘିତ୍ଥୋ [ସଞ୍ଜଗ୍ଘିତ୍ଥୋ (ସ୍ୟା॰)] ମୟା ସହ ।
ଅଜ୍ଜାପି ତେନ ୱଣ୍ଣେନ, ଅତିୱେଲଂ ପଜଗ୍ଘତି ॥
ଉବ୍ବରିୟାପିହଂ ଅୟ୍ୟେ, ମନ୍ତୟାମି ରହୋଗତୋ ।
ଅନାମନ୍ତୋ [ଅନାମନ୍ତା (ସୀ॰)] ପୱିସତି, ପୁବ୍ବେ ଅପ୍ପଟିୱେଦିତୋ ॥
ଲଦ୍ଧଦ୍ୱାରୋ [ଲଦ୍ଧୱାରୋ (ସୀ॰ ପୀ॰)] କତୋକାସୋ, ଅହିରିକଂ ଅନାଦରଂ ।
ସହାୟଂ ତେନ ଦୋସେନ, ଦଜ୍ଜାହଂ ଦକରକ୍ଖିନୋ ॥
କୁସଲୋ ସବ୍ବନିମିତ୍ତାନଂ, ରୁତଞ୍ଞୂ [ରୁଦଞ୍ଞୂ (ସୀ॰ ସ୍ୟା॰ ପୀ॰)] ଆଗତାଗମୋ ।
ଉପ୍ପାତେ ସୁପିନେ ୟୁତ୍ତୋ, ନିୟ୍ୟାନେ ଚ ପୱେସନେ ॥
ପଟ୍ଠୋ [ପଦ୍ଧୋ (ସୀ॰ ପୀ॰)] ଭୂମନ୍ତଲିକ୍ଖସ୍ମିଂ, ନକ୍ଖତ୍ତପଦକୋୱିଦୋ ।
ବ୍ରାହ୍ମଣଂ କେନ ଦୋସେନ, ଦଜ୍ଜାସି ଦକରକ୍ଖିନୋ ॥
ପରିସାୟମ୍ପି ମେ ଅୟ୍ୟେ, ଉମ୍ମୀଲିତ୍ୱା ଉଦିକ୍ଖତି ।
ତସ୍ମା ଅଚ୍ଚଭମୁଂ ଲୁଦ୍ଦଂ, ଦଜ୍ଜାହଂ ଦକରକ୍ଖିନୋ ॥
ସସମୁଦ୍ଦପରିୟାୟଂ, ମହିଂ ସାଗରକୁଣ୍ଡଲଂ ।
ୱସୁନ୍ଧରଂ ଆୱସସି, ଅମଚ୍ଚପରିୱାରିତୋ ॥
ଚାତୁରନ୍ତୋ ମହାରଟ୍ଠୋ, ୱିଜିତାୱୀ ମହବ୍ବଲୋ ।
ପଥବ୍ୟା ଏକରାଜାସି, ୟସୋ ତେ ୱିପୁଲଂ ଗତୋ ॥
ସୋଳସିତ୍ଥିସହସ୍ସାନି, ଆମୁତ୍ତମଣିକୁଣ୍ଡଲା ।
ନାନାଜନପଦା ନାରୀ, ଦେୱକଞ୍ଞୂପମା ସୁଭା ॥
ଏୱଂ ସବ୍ବଙ୍ଗସମ୍ପନ୍ନଂ, ସବ୍ବକାମସମିଦ୍ଧିନଂ ।
ସୁଖିତାନଂ ପିୟଂ ଦୀଘଂ, ଜୀୱିତଂ ଆହୁ ଖତ୍ତିୟ ॥
ଅଥ ତ୍ୱଂ କେନ ୱଣ୍ଣେନ, କେନ ୱା ପନ ହେତୁନା ।
ପଣ୍ଡିତଂ ଅନୁରକ୍ଖନ୍ତୋ, ପାଣଂ ଚଜସି ଦୁଚ୍ଚଜଂ ॥
ୟତୋପି ଆଗତୋ ଅୟ୍ୟେ, ମମ ହତ୍ଥଂ ମହୋସଧୋ ।
ନାଭିଜାନାମି ଧୀରସ୍ସ, ଅନୁମତ୍ତମ୍ପି ଦୁକ୍କଟଂ ॥
ସଚେ ଚ କିସ୍ମିଚି କାଲେ, ମରଣଂ ମେ ପୁରେ ସିୟା ।
ସୋ ମେ ପୁତ୍ତେ [ପୁତ୍ତେ ଚ ମେ (ସୀ॰ ସ୍ୟା॰ ପୀ॰] ପପୁତ୍ତେ ଚ, ସୁଖାପେୟ୍ୟ ମହୋସଧୋ ॥
ଅନାଗତଂ ପଚ୍ଚୁପ୍ପନ୍ନଂ, ସବ୍ବମତ୍ଥମ୍ପି ପସ୍ସତି [ସବ୍ବମତ୍ଥଂ ୱିପସ୍ସତି (ସୀ॰ ସ୍ୟା॰ ପୀ॰)]।
ଅନାପରାଧକମ୍ମନ୍ତଂ, ନ ଦଜ୍ଜଂ ଦକରକ୍ଖିନୋ ॥
ଇଦଂ ସୁଣାଥ ପଞ୍ଚାଲା, ଚୂଳନେୟ୍ୟସ୍ସ [ଚୂଳନୀୟସ୍ସ (ସୀ॰)] ଭାସିତଂ ।
ପଣ୍ଡିତଂ ଅନୁରକ୍ଖନ୍ତୋ, ପାଣଂ ଚଜତି ଦୁଚ୍ଚଜଂ ॥
ମାତୁ ଭରିୟାୟ ଭାତୁଚ୍ଚ, ସଖିନୋ ବ୍ରାହ୍ମଣସ୍ସ ଚ ।
ଅତ୍ତନୋ ଚାପି ପଞ୍ଚାଲୋ, ଛନ୍ନଂ ଚଜତି ଜୀୱିତଂ ॥
ଏୱଂ ମହତ୍ଥିକା [ଖହିଦ୍ଧିୟା (ସ୍ୟା॰), ମହିଦ୍ଧିକା (କ॰)] ପଞ୍ଞା, ନିପୁଣା ସାଧୁଚିନ୍ତିନୀ ।
ଦିଟ୍ଠଧମ୍ମହିତତ୍ଥାୟ, ସମ୍ପରାୟସୁଖାୟ ଚାତି ॥
ଦକରକ୍ଖସଜାତକଂ ସତ୍ତମଂ ।
୫୧୮. ପଣ୍ଡରନାଗରାଜଜାତକଂ (୮)
ୱିକିଣ୍ଣୱାଚଂ ଅନିଗୁୟ୍ହ [ଅନିଗୂଳ୍ହ (ପୀ॰)] ମନ୍ତଂ, ଅସଞ୍ଞତଂ ଅପରିଚକ୍ଖିତାରଂ [ଅପରିରକ୍ଖିତାରଂ (କ॰)]।
ଭୟଂ ତମନ୍ୱେତି ସୟଂ ଅବୋଧଂ, ନାଗଂ ୟଥା ପଣ୍ଡରକଂ ସୁପଣ୍ଣୋ [ସୁୱଣ୍ଣୋ (କ॰)]॥
ୟୋ ଗୁୟ୍ହମନ୍ତଂ ପରିରକ୍ଖନେୟ୍ୟଂ, ମୋହା ନରୋ ସଂସତି ହାସମାନୋ [ଭାସମାନୋ (ପୀ॰)]।
ତଂ ଭିନ୍ନମନ୍ତଂ ଭୟମନ୍ୱେତି ଖିପ୍ପଂ, ନାଗଂ ୟଥା ପଣ୍ଡରକଂ ସୁପଣ୍ଣୋ ॥
ନାନୁମିତ୍ତୋ ଗରୁଂ ଅତ୍ଥଂ, ଗୁୟ୍ହଂ ୱେଦିତୁମରହତି ।
ସୁମିତ୍ତୋ ଚ ଅସମ୍ବୁଦ୍ଧଂ, ସମ୍ବୁଦ୍ଧଂ ୱା ଅନତ୍ଥ ୱା ॥
ୱିସ୍ସାସମାପଜ୍ଜିମହଂ ଅଚେଲଂ [ଅଚେଲୋ (ସୀ॰ ପୀ॰)], ସମଣୋ ଅୟଂ ସମ୍ମତୋ ଭାୱିତତ୍ତୋ ।
ତସ୍ସାହମକ୍ଖିଂ ୱିୱରିଂ [ୱିୱରଂ (ସୀ॰)] ଗୁୟ୍ହମତ୍ଥଂ, ଅତୀତମତ୍ଥୋ କପଣଂ [କପଣୋ (ପୀ॰)] ରୁଦାମି ॥
ତସ୍ସାହଂ ପରମଂ [ପୁରିମଂ (ସୀ॰)] ବ୍ରହ୍ମେ ଗୁୟ୍ହଂ, ୱାଚଞ୍ହି ମଂ ନାସକ୍ଖିଂ [ନାସକ୍ଖି (ପୀ॰)] ସଂୟମେତୁଂ ।
ତପ୍ପକ୍ଖତୋ ହି ଭୟମାଗତଂ ମମଂ, ଅତୀତମତ୍ଥୋ କପଣଂ ରୁଦାମି ॥
ୟୋ ୱେ ନରୋ ସୁହଦଂ ମଞ୍ଞମାନୋ, ଗୁୟ୍ହମତ୍ଥଂ ସଂସତି ଦୁକ୍କୁଲୀନେ ।
ଦୋସା ଭୟା ଅଥୱା ରାଗରତ୍ତା [ରାଗରତ୍ତୋ (ସୀ॰ ସ୍ୟା॰ ପୀ॰)], ପଲ୍ଲତ୍ଥିତୋ [ପଲ୍ଲିତ୍ଥୋ (ପୀ॰), ପଲ୍ଲତ୍ତିତୋ (କ॰)] ବାଲୋ ଅସଂସୟଂ ସୋ ॥
ତିରୋକ୍ଖୱାଚୋ ଅସତଂ ପୱିଟ୍ଠୋ, ୟୋ ସଙ୍ଗତୀସୁ ମୁଦୀରେତି ୱାକ୍ୟଂ ।
ଆସୀୱିସୋ ଦୁମ୍ମୁଖୋତ୍ୟାହୁ ତଂ ନରଂ, ଆରା ଆରା [ଆରା ଅରା (ପୀ॰)] ସଂୟମେ ତାଦିସମ୍ହା ॥
ଅନ୍ନଂ ପାନଂ କାସିକ [କାସିକଂ (ପୀ॰)] ଚନ୍ଦନଞ୍ଚ, ମନାପିତ୍ଥିୟୋ ମାଲମୁଚ୍ଛାଦନଞ୍ଚ ।
ଓହାୟ ଗଚ୍ଛାମସେ ସବ୍ବକାମେ, ସୁପଣ୍ଣ ପାଣୂପଗତାୱ ତ୍ୟମ୍ହା ॥
କୋ ନୀଧ ତିଣ୍ଣଂ ଗରହଂ ଉପେତି, ଅସ୍ମିଂଧ ଲୋକେ ପାଣଭୂ ନାଗରାଜ ।
ସମଣୋ ସୁପଣ୍ଣୋ ଅଥ ୱା ତ୍ୱମେୱ, କିଂ କାରଣା ପଣ୍ଡରକଗ୍ଗହୀତୋ ॥
ସମଣୋତି ମେ ସମ୍ମତତ୍ତୋ ଅହୋସି, ପିୟୋ ଚ ମେ ମନସା ଭାୱିତତ୍ତୋ ।
ତସ୍ସାହମକ୍ଖିଂ ୱିୱରିଂ ଗୁୟ୍ହମତ୍ଥଂ, ଅତୀତମତ୍ଥୋ କପଣଂ ରୁଦାମି ॥
ନ ଚତ୍ଥି ସତ୍ତୋ ଅମରୋ ପଥବ୍ୟା, ପଞ୍ଞାୱିଧା ନତ୍ଥି ନ ନିନ୍ଦିତବ୍ବା ।
ସଚ୍ଚେନ ଧମ୍ମେନ ଧିତିୟା [ଧିୟା (ସୀ॰ ପୀ॰)] ଦମେନ, ଅଲବ୍ଭମବ୍ୟାହରତୀ ନରୋ ଇଧ ॥
ମାତାପିତା ପରମା ବନ୍ଧୱାନଂ, ନାସ୍ସ ତତିୟୋ ଅନୁକମ୍ପକତ୍ଥି ।
ତେସମ୍ପି ଗୁୟ୍ହଂ ପରମଂ ନ ସଂସେ, ମନ୍ତସ୍ସ ଭେଦଂ ପରିସଙ୍କମାନୋ ॥
ମାତାପିତା ଭଗିନୀ ଭାତରୋ ଚ, ସହାୟା ୱା ୟସ୍ସ ହୋନ୍ତି ସପକ୍ଖା ।
ତେସମ୍ପି ଗୁୟ୍ହଂ ପରମଂ ନ ସଂସେ, ମନ୍ତସ୍ସ ଭେଦଂ ପରିସଙ୍କମାନୋ ॥
ଭରିୟା ଚେ ପୁରିସଂ ୱଜ୍ଜା, କୋମାରୀ ପିୟଭାଣିନୀ ।
ପୁତ୍ତରୂପୟସୂପେତା, ଞାତିସଙ୍ଘପୁରକ୍ଖତା, ତସ୍ସାପି ଗୁୟ୍ହଂ ପରମଂ ନ ସଂସେ ।
ମନ୍ତସ୍ସ ଭେଦଂ ପରିସଙ୍କମାନୋ ॥
ନ ଗୁୟ୍ହମତ୍ଥଂ [ଗୁୟ୍ହତ୍ଥଂ (କ॰)] ୱିୱରେୟ୍ୟ, ରକ୍ଖେୟ୍ୟ ନଂ ୟଥା ନିଧିଂ ।
ନ ହି ପାତୁକତୋ ସାଧୁ, ଗୁୟ୍ହୋ ଅତ୍ଥୋ ପଜାନତା ॥
ଥିୟା ଗୁୟ୍ହଂ ନ ସଂସେୟ୍ୟ, ଅମିତ୍ତସ୍ସ ଚ ପଣ୍ଡିତୋ ।
ୟୋ ଚାମିସେନ ସଂହୀରୋ, ହଦୟତ୍ଥେନୋ ଚ ୟୋ ନରୋ ॥
ଗୁୟ୍ହମତ୍ଥଂ ଅସମ୍ବୁଦ୍ଧଂ, ସମ୍ବୋଧୟତି ୟୋ ନରୋ ।
ମନ୍ତଭେଦଭୟା ତସ୍ସ, ଦାସଭୂତୋ ତିତିକ୍ଖତି ॥
ୟାୱନ୍ତୋ ପୁରିସସ୍ସତ୍ଥଂ, ଗୁୟ୍ହଂ ଜାନନ୍ତି ମନ୍ତିନଂ ।
ତାୱନ୍ତୋ ତସ୍ସ ଉବ୍ବେଗା, ତସ୍ମା ଗୁୟ୍ହଂ ନ ୱିସ୍ସଜେ ॥
ୱିୱିଚ୍ଚ ଭାସେୟ୍ୟ ଦିୱା ରହସ୍ସଂ, ରତ୍ତିଂ ଗିରଂ ନାତିୱେଲଂ ପମୁଞ୍ଚେ ।
ଉପସ୍ସୁତିକା ହି ସୁଣନ୍ତି ମନ୍ତଂ, ତସ୍ମା ମନ୍ତୋ ଖିପ୍ପମୁପେତି ଭେଦଂ ॥
ୟଥାପି ଅସ୍ସ [ଅୟୋ (ସ୍ୟା॰), ଅୟ (କ॰)] ନଗରଂ ମହନ୍ତଂ, ଅଦ୍ୱାରକଂ [ଆଳାରକଂ (ପୀ॰)] ଆୟସଂ ଭଦ୍ଦସାଲଂ ।
ସମନ୍ତଖାତାପରିଖାଉପେତଂ, ଏୱମ୍ପି ମେ ତେ ଇଧ ଗୁୟ୍ହମନ୍ତା ॥
ୟେ ଗୁୟ୍ହମନ୍ତା ଅୱିକିଣ୍ଣୱାଚା, ଦଳ୍ହା ସଦତ୍ଥେସୁ ନରା ଦୁଜିୱ୍ହ [ଦୁଜିୱ୍ହା (ସ୍ୟା॰ ପୀ॰)]।
ଆରା ଅମିତ୍ତା ବ୍ୟୱଜନ୍ତି ତେହି, ଆସୀୱିସା ୱା ରିୱ ସତ୍ତୁସଙ୍ଘା [ସତ୍ତସଙ୍ଘା (ସୀ॰ ସ୍ୟା॰)]॥
ହିତ୍ୱା ଘରଂ ପବ୍ବଜିତୋ ଅଚେଲୋ, ନଗ୍ଗୋ ମୁଣ୍ଡୋ ଚରତି ଘାସହେତୁ ।
ତମ୍ହି [ତମ୍ହୀ (ପୀ॰)] ନୁ ଖୋ ୱିୱରିଂ ଗୁୟ୍ହମତ୍ଥଂ, ଅତ୍ଥା ଚ ଧମ୍ମା ଚ ଅପଗ୍ଗତମ୍ହା [ଅପାଗତମ୍ହା (ସୀ॰), ଅପଗତମ୍ହା (ସ୍ୟା॰), ଅୱାଗତମ୍ହା (ପୀ॰)]॥
କଥଂକରୋ ହୋତି ସୁପଣ୍ଣରାଜ, କିଂସୀଲୋ କେନ ୱତେନ ୱତ୍ତଂ ।
ସମଣୋ ଚରଂ ହିତ୍ୱା ମମାୟିତାନି, କଥଂକରୋ ସଗ୍ଗମୁପେତି ଠାନଂ ॥
ହିରିୟା ତିତିକ୍ଖାୟ ଦମେନୁପେତୋ [ଦମେନ ଖନ୍ତିୟା (ସୀ॰ ସ୍ୟା॰ ପୀ॰)], ଅକ୍କୋଧନୋ ପେସୁଣିୟଂ ପହାୟ ।
ସମଣୋ ଚରଂ ହିତ୍ୱା ମମାୟିତାନି, ଏୱଂକରୋ ସଗ୍ଗମୁପେତି ଠାନଂ ॥
ମାତାୱ ପୁତ୍ତଂ ତରୁଣଂ ତନୁଜ୍ଜଂ [ତନୂଜଂ (ସୀ॰)], ସମ୍ଫସ୍ସତା [ସମ୍ପସ୍ସ ତଂ (ସୀ॰ ପୀ॰)] ସବ୍ବଗତ୍ତଂ ଫରେତି ।
ଏୱମ୍ପି ମେ ତ୍ୱଂ ପାତୁରହୁ ଦିଜିନ୍ଦ, ମାତାୱ ପୁତ୍ତଂ ଅନୁକମ୍ପମାନୋ ॥
ହନ୍ଦଜ୍ଜ ତ୍ୱଂ ମୁଞ୍ଚ [ମୁଚ୍ଚ (ସୀ॰)] ୱଧା ଦୁଜିୱ୍ହ, ତୟୋ ହି ପୁତ୍ତା ନ ହି ଅଞ୍ଞୋ ଅତ୍ଥି ।
ଅନ୍ତେୱାସୀ ଦିନ୍ନକୋ ଅତ୍ରଜୋ ଚ, ରଜ୍ଜସ୍ସୁ [ରଜସ୍ସୁ (ସୀ॰ ସ୍ୟା॰ ପୀ॰)] ପୁତ୍ତଞ୍ଞତରୋ ମେ ଅହୋସି ॥
ଇଚ୍ଚେୱ ୱାକ୍ୟଂ ୱିସଜ୍ଜୀ ସୁପଣ୍ଣୋ, ଭୁମ୍ୟଂ ପତିଟ୍ଠାୟ ଦିଜୋ ଦୁଜିୱ୍ହଂ ।
ମୁତ୍ତଜ୍ଜ ତ୍ୱଂ ସବ୍ବଭୟାତିୱତ୍ତୋ, ଥଲୂଦକେ ହୋହି ମୟାଭିଗୁତ୍ତୋ ॥
ଆତଙ୍କିନଂ ୟଥା କୁସଲୋ ଭିସକ୍କୋ, ପିପାସିତାନଂ ରହଦୋୱ ସୀତୋ ।
ୱେସ୍ମଂ ୟଥା ହିମସୀତଟ୍ଟିତାନଂ [ହିମସିସିରଟ୍ଟିତାନଂ (ପୀ॰)], ଏୱମ୍ପି ତେ ସରଣମହଂ ଭୱାମି ॥
ସନ୍ଧିଂ କତ୍ୱା ଅମିତ୍ତେନ, ଅଣ୍ଡଜେନ ଜଲାବୁଜ ।
ୱିୱରିୟ ଦାଠଂ ସେସି, କୁତୋ ତଂ ଭୟମାଗତଂ ॥
ସଙ୍କେଥେୱ ଅମିତ୍ତସ୍ମିଂ, ମିତ୍ତସ୍ମିମ୍ପି ନ ୱିସ୍ସସେ ।
ଅଭୟା ଭୟମୁପ୍ପନ୍ନଂ, ଅପି ମୂଲାନି କନ୍ତତି ॥
କଥଂ ନୁ ୱିସ୍ସସେ ତ୍ୟମ୍ହି, ୟେନାସି କଲହୋ କତୋ ।
ନିଚ୍ଚୟତ୍ତେନ ଠାତବ୍ବଂ, ସୋ ଦିସବ୍ଭି [ସୋ ଦିସମ୍ହି (ପୀ॰)] ନ ରଜ୍ଜତି ॥
ୱିସ୍ସାସୟେ ନ ଚ ତଂ [ନଂ (ସୀ॰ ସ୍ୟା॰ ପୀ॰)] ୱିସ୍ସୟେୟ୍ୟ, ଅସଙ୍କିତୋ ସଙ୍କିତୋ ଚ [ଅସଙ୍କିତୋ ଚ ସଙ୍କିତୋ (ସୀ॰ ପୀ॰)] ଭୱେୟ୍ୟ ।
ତଥା ତଥା ୱିଞ୍ଞୂ ପରକ୍କମେୟ୍ୟ, ୟଥା ୟଥା ଭାୱଂ ପରୋ ନ ଜଞ୍ଞା ॥
ତେ ଦେୱୱଣ୍ଣା [ଦେୱୱଣ୍ଣୀ (ପୀ॰)] ସୁଖୁମାଲରୂପା, ଉଭୋ ସମା ସୁଜୟା [ସୁଜୟୋ (ସୀ॰ ସ୍ୟା॰ ପୀ॰)] ପୁଞ୍ଞଖନ୍ଧା [ପୁଞ୍ଞଗନ୍ଧା (ପୀ॰)]।
ଉପାଗମୁଂ କରମ୍ପିୟଂ [କାଦମ୍ବିୟଂ (ସୀ॰), କାରମ୍ବିୟଂ (ପୀ॰)] ଅଚେଲଂ, ମିସ୍ସୀଭୂତା ଅସ୍ସୱାହାୱ ନାଗା ॥
ତତୋ ହୱେ ପଣ୍ଡରକୋ ଅଚେଲଂ, ସୟମେୱୁପାଗମ୍ମ ଇଦଂ ଅୱୋଚ ।
ମୁତ୍ତଜ୍ଜହଂ ସବ୍ବଭୟାତିୱତ୍ତୋ, ନ ହି [ହ (ପୀ॰)] ନୂନ ତୁୟ୍ହଂ ମନସୋ ପିୟମ୍ହା ॥
ପିୟୋ ହି ମେ ଆସି ସୁପଣ୍ଣରାଜା, ଅସଂସୟଂ ପଣ୍ଡରକେନ ସଚ୍ଚଂ ।
ସୋ ରାଗରତ୍ତୋୱ ଅକାସିମେତଂ, ପାପକମ୍ମଂ [ପାପଂ କମ୍ମଂ (ସୀ॰ ପୀ॰)] ସମ୍ପଜାନୋ ନ ମୋହା ॥
ନ ମେ ପିୟଂ ଅପ୍ପିୟଂ ୱାପି ହୋତି, ସମ୍ପସ୍ସତୋ ଲୋକମିମଂ ପରଞ୍ଚ ।
ସୁସଞ୍ଞତାନଞ୍ହି ୱିୟଞ୍ଜନେନ, ଅସଞ୍ଞତୋ ଲୋକମିମଂ ଚରାସି ॥
ଅରିୟାୱକାସୋସି ଅନରିୟୋୱାସି [ଅନରିୟୋ ଚାସି (ସୀ॰ ପୀ॰)], ଅସଞ୍ଞତୋ ସଞ୍ଞତସନ୍ନିକାସୋ ।
କଣ୍ହାଭିଜାତିକୋସି ଅନରିୟରୂପୋ, ପାପଂ ବହୁଂ ଦୁଚ୍ଚରିତଂ ଅଚାରି ॥
ଅଦୁଟ୍ଠସ୍ସ ତୁୱଂ ଦୁବ୍ଭି, ଦୁବ୍ଭୀ [ଦୂଭି, ଦୂଭୀ (ପୀ॰)] ଚ ପିସୁଣୋ ଚସି ।
ଏତେନ ସଚ୍ଚୱଜ୍ଜେନ, ମୁଦ୍ଧା ତେ ଫଲତୁ ସତ୍ତଧା ॥
ତସ୍ମା ହି ମିତ୍ତାନଂ ନ ଦୁବ୍ଭିତବ୍ବଂ, ମିତ୍ତଦୁବ୍ଭା [ମିତ୍ତଦୁବ୍ଭା ହି (ସ୍ୟା॰)] ପାପିୟୋ ନତ୍ଥି ଅଞ୍ଞୋ ।
ଆସିତ୍ତସତ୍ତୋ ନିହତୋ ପଥବ୍ୟା, ଇନ୍ଦସ୍ସ ୱାକ୍ୟେନ ହି ସଂୱରୋ ହତୋତି ॥
ପଣ୍ଡରନାଗରାଜଜାତକଂ [ପଣ୍ଡରକଜାତକଂ (ସୀ॰ ସ୍ୟା॰ ପୀ॰)] ଅଟ୍ଠମଂ ।
୫୧୯. ସମ୍ବୁଲାଜାତକଂ (୯)
କା ୱେଧମାନା ଗିରିକନ୍ଦରାୟଂ, ଏକା ତୁୱଂ ତିଟ୍ଠସି ସଂହିତୂରୁ [ସଞ୍ଞତୂର (ସୀ॰ ପୀ॰), ସଞ୍ଚିତୂରୁ (ସ୍ୟା॰)]।
ପୁଟ୍ଠାସି ମେ ପାଣିପମେୟ୍ୟମଜ୍ଝେ, ଅକ୍ଖାହି ମେ ନାମଞ୍ଚ ବନ୍ଧୱେ ଚ ॥
ଓଭାସୟଂ ୱନଂ ରମ୍ମଂ, ସୀହବ୍ୟଗ୍ଘନିସେୱିତଂ ।
କା ୱା ତ୍ୱମସି କଲ୍ୟାଣି, କସ୍ସ ୱା ତ୍ୱଂ ସୁମଜ୍ଝିମେ ।
ଅଭିୱାଦେମି ତଂ ଭଦ୍ଦେ, ଦାନୱାହଂ ନମତ୍ଥୁ ତେ ॥
ୟୋ ପୁତ୍ତୋ କାସିରାଜସ୍ସ, ସୋତ୍ଥିସେନୋତି ତଂ ୱିଦୂ ।
ତସ୍ସାହଂ ସମ୍ବୁଲା ଭରିୟା, ଏୱଂ ଜାନାହି ଦାନୱ ।
ଅଭିୱାଦେମି ତଂ ଭନ୍ତେ [ଭଦ୍ଦନ୍ତେ (ସୀ॰ ସ୍ୟା॰)], ସମ୍ବୁଲାହଂ ନମତ୍ଥୁ ତେ ॥
ୱେଦେହପୁତ୍ତୋ ଭଦ୍ଦନ୍ତେ, ୱନେ ୱସତି ଆତୁରୋ ।
ତମହଂ ରୋଗସମ୍ମତ୍ତଂ, ଏକା ଏକଂ ଉପଟ୍ଠହଂ [ଉପଟ୍ଠହିଂ (ସୀ॰)]॥
ଅହଞ୍ଚ ୱନମୁଞ୍ଛାୟ, ମଧୁମଂସଂ ମିଗାବିଲଂ [ମିଗାୱିଲଂ (ସୀ॰)]।
ୟଦା ହରାମି ତଂ ଭକ୍ଖୋ, ତସ୍ସ ନୂନଜ୍ଜ ନାଧତି [ନାଥତି (କ॰)]॥
କିଂ ୱନେ ରାଜପୁତ୍ତେନ, ଆତୁରେନ କରିସ୍ସସି ।
ସମ୍ବୁଲେ ପରିଚିଣ୍ଣେନ, ଅହଂ ଭତ୍ତା ଭୱାମି ତେ ॥
ସୋକଟ୍ଟାୟ ଦୁରତ୍ତାୟ, କିଂ ରୂପଂ ୱିଜ୍ଜତେ ମମ ।
ଅଞ୍ଞଂ ପରିୟେସ ଭଦ୍ଦନ୍ତେ, ଅଭିରୂପତରଂ ମୟା ॥
ଏହିମଂ ଗିରିମାରୁୟ୍ହ, ଭରିୟା ମେ [ମୟ୍ହଂ (ସୀ॰ ସ୍ୟା॰ ପୀ॰)] ଚତୁସ୍ସତା ।
ତାସଂ ତ୍ୱଂ ପୱରା ହୋହି, ସବ୍ବକାମସମିଦ୍ଧିନୀ ॥
ନୂନ [ନନୁ (ସୀ॰ ସ୍ୟା॰ ପୀ॰ କ॰)] ତାରକୱଣ୍ଣାଭେ [ହାଟକୱଣ୍ଣାଭେ (ପୀ॰)], ୟଂ କିଞ୍ଚି ମନସିଚ୍ଛସି ।
ସବ୍ବଂ ତଂ ପଚୁରଂ ମୟ୍ହଂ, ରମସ୍ସ୍ୱଜ୍ଜ [ରମସୁଜ୍ଜ (ସୀ॰ ସ୍ୟା॰)] ମୟା ସହ ॥
ନୋ ଚେ ତୁୱଂ ମହେସେୟ୍ୟଂ, ସମ୍ବୁଲେ କାରୟିସ୍ସସି ।
ଅଲଂ ତ୍ୱଂ ପାତରାସାୟ, ପଣ୍ହେ [ମଞ୍ଞେ (ସୀ॰ ପୀ॰)] ଭକ୍ଖା ଭୱିସ୍ସସି ॥
ତଞ୍ଚ ସତ୍ତଜଟୋ ଲୁଦ୍ଦୋ, କଳାରୋ ପୁରିସାଦକୋ ।
ୱନେ ନାଥଂ ଅପସ୍ସନ୍ତିଂ, ସମ୍ବୁଲଂ ଅଗ୍ଗହୀ ଭୁଜେ ॥
ଅଧିପନ୍ନା ପିସାଚେନ, ଲୁଦ୍ଦେନାମିସଚକ୍ଖୁନା ।
ସା ଚ ସତ୍ତୁୱସମ୍ପତ୍ତା, ପତିମେୱାନୁସୋଚତି ॥
ନ ମେ ଇଦଂ ତଥା ଦୁକ୍ଖଂ, ୟଂ ମଂ ଖାଦେୟ୍ୟ ରକ୍ଖସୋ ।
ୟଞ୍ଚ ମେ ଅୟ୍ୟପୁତ୍ତସ୍ସ, ମନୋ ହେସ୍ସତି ଅଞ୍ଞଥା ॥
ନ ସନ୍ତି ଦେୱା ପୱସନ୍ତି ନୂନ, ନ ହି ନୂନ ସନ୍ତି ଇଧ ଲୋକପାଲା ।
ସହସା କରୋନ୍ତାନମସଞ୍ଞତାନଂ, ନ ହି ନୂନ ସନ୍ତି ପଟିସେଧିତାରୋ ॥
ଇତ୍ଥୀନମେସା ପୱରା ୟସସ୍ସିନୀ, ସନ୍ତା ସମା ଅଗ୍ଗିରିୱୁଗ୍ଗତେଜା ।
ତଞ୍ଚେ ତୁୱଂ ରକ୍ଖସାଦେସି କଞ୍ଞଂ, ମୁଦ୍ଧା ଚ ହି ସତ୍ତଧା ତେ ଫଲେୟ୍ୟ ।
ମା ତ୍ୱଂ ଦହୀ [ଜହୀ (ପୀ॰)] ମୁଞ୍ଚ ପତିବ୍ବତାୟ [ପତିବ୍ବତା ସା (ସୀ॰), ପତିବ୍ବତା ୟା (ପୀ॰)]॥
ସା ଚ ଅସ୍ସମମାଗଚ୍ଛି, ପମୁତ୍ତା ପୁରିସାଦକା ।
ନୀଳଂ [ନିଡ୍ଡଂ (ସ୍ୟା॰ କ॰)] ପଳିନଂ ସକୁଣୀୱ [ଫଲିନସକୁଣୀୱ (ସୀ॰ ସ୍ୟା॰ ପୀ॰)], ଗତସିଙ୍ଗଂୱ ଆଲୟଂ ॥
ସା ତତ୍ଥ ପରିଦେୱେସି, ରାଜପୁତ୍ତୀ ୟସସ୍ସିନୀ ।
ସମ୍ବୁଲା ଉତୁମତ୍ତକ୍ଖା, ୱନେ ନାଥଂ ଅପସ୍ସନ୍ତୀ [ଅପସ୍ସତୀ (ସୀ॰)]॥
ସମଣେ ବ୍ରାହ୍ମଣେ ୱନ୍ଦେ, ସମ୍ପନ୍ନଚରଣେ ଇସେ ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି [ତୁମ୍ହଂ ହି (ପୀ॰)] ସରଣଂ ଗତା ॥
ୱନ୍ଦେ ସୀହେ ଚ ବ୍ୟଗ୍ଘେ ଚ, ୟେ ଚ ଅଞ୍ଞେ ୱନେ ମିଗା ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି ସରଣଂ ଗତା ॥
ତିଣା [ତିଣ (ପୀ॰)] ଲତାନି ଓସଧ୍ୟୋ, ପବ୍ବତାନି ୱନାନି ଚ ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି ସରଣଂ ଗତା ॥
ୱନ୍ଦେ ଇନ୍ଦୀୱରୀସାମଂ, ରତ୍ତିଂ ନକ୍ଖତ୍ତମାଲିନିଂ ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି ସରଣଂ ଗତା ॥
ୱନ୍ଦେ ଭାଗୀରଥିଂ ଗଙ୍ଗଂ, ସୱନ୍ତୀନଂ ପଟିଗ୍ଗହଂ ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି ସରଣଂ ଗତା ॥
ୱନ୍ଦେ ଅହଂ ପବ୍ବତରାଜସେଟ୍ଠଂ, ହିମୱନ୍ତଂ ସିଲୁଚ୍ଚୟଂ ।
ରାଜପୁତ୍ତଂ ଅପସ୍ସନ୍ତୀ, ତୁମ୍ହଂମ୍ହି ସରଣଂ ଗତା ॥
ଅତିସାୟଂ ୱତାଗଚ୍ଛି, ରାଜପୁତ୍ତି ୟସସ୍ସିନି ।
କେନ ନୁଜ୍ଜ ସମାଗଚ୍ଛି [ସମାଗଚ୍ଛି (ସୀ॰ ପୀ॰)], କୋ ତେ ପିୟତରୋ ମୟା ॥
ଇଦଂ ଖୋହଂ ତଦାୱୋଚଂ [ତଦୱୋଚଂ (ସୀ॰ ସ୍ୟା॰)], ଗହିତା ତେନ ସତ୍ତୁନା ।
ନ ମେ ଇଦଂ ତଥା ଦୁକ୍ଖଂ, ୟଂ ମଂ ଖାଦେୟ୍ୟ ରକ୍ଖସୋ ।
ୟଞ୍ଚ ମେ ଅୟ୍ୟପୁତ୍ତସ୍ସ, ମନୋ ହେସ୍ସତି ଅଞ୍ଞଥା ॥
ଚୋରୀନଂ ବହୁବୁଦ୍ଧୀନଂ, ୟାସୁ ସଚ୍ଚଂ ସୁଦୁଲ୍ଲଭଂ ।
ଥୀନଂ ଭାୱୋ ଦୁରାଜାନୋ, ମଚ୍ଛସ୍ସେୱୋଦକେ ଗତଂ ॥
ତଥା ମଂ ସଚ୍ଚଂ ପାଲେତୁ, ପାଲୟିସ୍ସତି ଚେ ମମଂ ।
ୟଥାହଂ ନାଭିଜାନାମି, ଅଞ୍ଞଂ ପିୟତରଂ ତୟା ।
ଏତେନ ସଚ୍ଚୱଜ୍ଜେନ, ବ୍ୟାଧି ତେ ୱୂପସମ୍ମତୁ ॥
ୟେ କୁଞ୍ଜରା ସତ୍ତସତା ଉଳାରା, ରକ୍ଖନ୍ତି ରତ୍ତିନ୍ଦିୱମୁୟ୍ୟୁତାୱୁଧା ।
ଧନୁଗ୍ଗହାନଞ୍ଚ ସତାନି ସୋଳସ, କଥଂୱିଧେ ପସ୍ସସି ଭଦ୍ଦେ ସତ୍ତୱୋ ॥
ଅଲଙ୍କତାୟୋ ପଦୁମୁତ୍ତରତ୍ତଚା, ୱିରାଗିତା ପସ୍ସତି ହଂସଗଗ୍ଗରା ।
ତାସଂ ସୁଣିତ୍ୱା ମିତଗୀତୱାଦିତଂ [ମିତଗୀତୱାଦିନଂ (ପୀ॰)], ନ ଦାନି ମେ ତାତ ତଥା ୟଥା ପୁରେ ॥
ସୁୱଣ୍ଣସଂକଚ୍ଚଧରା ସୁୱିଗ୍ଗହା, ଅଲଙ୍କତା ମାନୁସିୟଚ୍ଛରୂପମା ।
ସେନୋପିୟା [ସେନୂପିୟା (ପୀ॰)] ତାତ ଅନିନ୍ଦିତଙ୍ଗିୟୋ, ଖତ୍ତିୟକଞ୍ଞା ପଟିଲୋଭୟନ୍ତି [ପଟିଲାଭୟନ୍ତି (ପୀ॰)] ନଂ ॥
ସଚେ ଅହଂ ତାତ ତଥା ୟଥା ପୁରେ, ପତିଂ ତମୁଞ୍ଛାୟ ପୁନା ୱନେ ଭରେ ।
ସମ୍ମାନୟେ ମଂ ନ ଚ ମଂ ୱିମାନୟେ, ଇତୋପି ମେ ତାତ ତତୋ ୱରଂ ସିୟା ॥
ୟମନ୍ନପାନେ ୱିପୁଲସ୍ମି ଓହିତେ, ନାରୀ ୱିମଟ୍ଠାଭରଣା ଅଲଙ୍କତା ।
ସବ୍ବଙ୍ଗୁପେତା [ପଞ୍ଚଙ୍ଗୁପେତା (ସୀ॰ ସ୍ୟା॰ ପୀ॰)] ପତିନୋ ଚ ଅପ୍ପିୟା, ଅବଜ୍ଝ [ଅୱଜ୍ଝ (ସ୍ୟା॰), ଆବଜ୍ଝ (ପୀ॰)] ତସ୍ସା ମରଣଂ ତତୋ ୱରଂ ॥
ଅପି ଚେ ଦଲିଦ୍ଦା କପଣା ଅନାଳ୍ହିୟା, କଟାଦୁତୀୟା ପତିନୋ ଚ ସା ପିୟା ।
ସବ୍ବଙ୍ଗୁପେତାୟପି ଅପ୍ପିୟାୟ, ଅୟମେୱ ସେୟ୍ୟା [ସେୟ୍ୟୋ (ସ୍ୟା॰ କ॰)] କପଣାପି ୟା ପିୟା [କପଣାପି ୟା (କ॰)]॥
ସୁଦୁଲ୍ଲଭିତ୍ଥୀ ପୁରିସସ୍ସ ୟା ହିତା, ଭତ୍ତିତ୍ଥିୟା ଦୁଲ୍ଲଭୋ ୟୋ ହିତୋ ଚ ।
ହିତା ଚ ତେ ସୀଲୱତୀ ଚ ଭରିୟା, ଜନିନ୍ଦ ଧମ୍ମଂ ଚର ସମ୍ବୁଲାୟ ॥
ସଚେ ତୁୱଂ ୱିପୁଲେ ଲଦ୍ଧଭୋଗେ, ଇସ୍ସାୱତିଣ୍ଣା ମରଣଂ ଉପେସି ।
ଅହଞ୍ଚ ତେ ଭଦ୍ଦେ ଇମା ରାଜକଞ୍ଞା [ଇମା ଚ କଞ୍ଞା (ପୀ॰)], ସବ୍ବେ [ସବ୍ବେୱ (ସୀ॰ ସ୍ୟା॰ ପୀ॰)] ତେ ୱଚନକରା ଭୱାମାତି ॥
ସମ୍ବୁଲାଜାତକଂ ନୱମଂ ।
୫୨୦. ଗନ୍ଧତିନ୍ଦୁକଜାତକଂ (୧୦)
ଅପ୍ପମାଦୋ ଅମତଂ ପଦଂ [ଅମତପଦଂ (ସୀ॰ ପୀ॰)], ପମାଦୋ ମଚ୍ଚୁନୋ ପଦଂ ।
ଅପ୍ପମତ୍ତା ନ ମୀୟନ୍ତି, ୟେ ପମତ୍ତା ୟଥା ମତା ॥
ମଦା ପମାଦୋ ଜାୟେଥ, ପମାଦା ଜାୟତେ ଖୟୋ ।
ଖୟା ପଦୋସା [ଖୟା ଚ ଦୋସା (ସୀ॰)] ଜାୟନ୍ତି, ମା ପମାଦୋ [ମା ମଦୋ (ସୀ॰ ସ୍ୟା॰ ପୀ॰)] ଭରତୂସଭ [ଭାରଧୂସଭ (କ॰)]॥
ବହୂ ହି ଖତ୍ତିୟା ଜୀନା, ଅତ୍ଥଂ ରଟ୍ଠଂ ପମାଦିନୋ ।
ଅଥୋପି ଗାମିନୋ ଗାମା, ଅନଗାରା ଅଗାରିନୋ ॥
ଖତ୍ତିୟସ୍ସ ପମତ୍ତସ୍ସ, ରଟ୍ଠସ୍ମିଂ ରଟ୍ଠୱଡ୍ଢନ ।
ସବ୍ବେ ଭୋଗା ୱିନସ୍ସନ୍ତି, ରଞ୍ଞୋ ତଂ ୱୁଚ୍ଚତେ ଅଘଂ ॥
ନେସ ଧମ୍ମୋ ମହାରାଜ, ଅତିୱେଲଂ ପମଜ୍ଜସି ।
ଇଦ୍ଧଂ ଫୀତଂ ଜନପଦଂ, ଚୋରା ୱିଦ୍ଧଂସୟନ୍ତି ନଂ ॥
ନ ତେ ପୁତ୍ତା ଭୱିସ୍ସନ୍ତି, ନ ହିରଞ୍ଞଂ ନ ଧାନିୟଂ [ନ ହିରଞ୍ଞନିଧାନିୟା (କ॰)]।
ରଟ୍ଠେ ୱିଲୁପ୍ପମାନମ୍ହି, ସବ୍ବଭୋଗେହି ଜିୟ୍ୟସି ॥
ସବ୍ବଭୋଗା ପରିଜିଣ୍ଣଂ, ରାଜାନଂ ୱାପି ଖତ୍ତିୟଂ [ଖତ୍ତିୟ (କ॰)]।
ଞାତିମିତ୍ତା ସୁହଜ୍ଜା ଚ, ନ ତଂ ମଞ୍ଞନ୍ତି ମାନିୟଂ [ମନ୍ତିୟଂ (ସ୍ୟା॰)]॥
ହତ୍ଥାରୋହା ଅନୀକଟ୍ଠା, ରଥିକା ପତ୍ତିକାରକା ।
ତମେୱମୁପଜୀୱନ୍ତା, ନ ତଂ ମଞ୍ଞନ୍ତି ମାନିୟଂ ॥
ଅସଂୱିହିତକମ୍ମନ୍ତଂ, ବାଲଂ ଦୁମ୍ମନ୍ତିମନ୍ତିନଂ ।
ସିରୀ ଜହତି ଦୁମ୍ମେଧଂ, ଜିଣ୍ଣଂୱ ଉରଗୋ ତଚଂ ॥
ସୁସଂୱିହିତକମ୍ମନ୍ତଂ, କାଲୁଟ୍ଠାୟିଂ ଅତନ୍ଦିତଂ ।
ସବ୍ବେ ଭୋଗାଭିୱଡ୍ଢନ୍ତି, ଗାୱୋ ସଉସଭାମିୱ ॥
ଉପସ୍ସୁତିଂ ମହାରାଜ, ରଟ୍ଠେ ଜନପଦେ ଚର ।
ତତ୍ଥ ଦିସ୍ୱା ଚ ସୁତ୍ୱା ଚ, ତତୋ ତଂ [ତ୍ୱଂ (କ॰)] ପଟିପଜ୍ଜସି ॥
ଏୱଂ ୱେଦେତୁ ପଞ୍ଚାଲୋ, ସଙ୍ଗାମେ ସରମପ୍ପିତୋ [ସମପ୍ପିତୋ (ସୀ॰ ପୀ॰)]।
ୟଥାହମଜ୍ଜ ୱେଦେମି, କଣ୍ଟକେନ ସମପ୍ପିତୋ ॥
ଜିଣ୍ଣୋ ଦୁବ୍ବଲଚକ୍ଖୂସି, ନ ରୂପଂ ସାଧୁ ପସ୍ସସି ।
କିଂ ତତ୍ଥ ବ୍ରହ୍ମଦତ୍ତସ୍ସ, ୟଂ ତଂ ମଗ୍ଗେୟ୍ୟ [ମଗ୍ଘେୟ୍ୟ (ପୀ॰)] କଣ୍ଟକୋ [କଣ୍ଡକୋ (ସୀ॰ ସ୍ୟା॰ ପୀ॰)]॥
ବହ୍ୱେତ୍ଥ ବ୍ରହ୍ମଦତ୍ତସ୍ସ, ସୋହଂ [ୟୋହଂ (ସୀ॰ ସ୍ୟା॰ ପୀ॰)] ମଗ୍ଗସ୍ମି [ମଗ୍ଗୋସ୍ମି (ପୀ॰)] ବ୍ରାହ୍ମଣ ।
ଅରକ୍ଖିତା ଜାନପଦା, ଅଧମ୍ମବଲିନା ହତା ॥
ରତ୍ତିଞ୍ହି [ରତ୍ତିଞ୍ଚ (ସୀ॰)] ଚୋରା ଖାଦନ୍ତି, ଦିୱା ଖାଦନ୍ତି ତୁଣ୍ଡିୟା ।
ରଟ୍ଠସ୍ମିଂ କୂଟରାଜସ୍ସ, ବହୁ ଅଧମ୍ମିକୋ ଜନୋ ॥
ଏତାଦିସେ ଭୟେ ଜାତେ [ତାତ (ସୀ॰ ପୀ॰)], ଭୟଟ୍ଟା ତାତ [ତାୱ (ସୀ॰ ପୀ॰)] ମାଣୱା ।
ନିଲ୍ଲେନକାନି କୁବ୍ବନ୍ତି, ୱନେ ଆହତ୍ୱ କଣ୍ଟକଂ ॥
କଦାସ୍ସୁ ନାମୟଂ ରାଜା, ବ୍ରହ୍ମଦତ୍ତୋ ମରିସ୍ସତି ।
ୟସ୍ସ ରଟ୍ଠମ୍ହି ଜିୟ୍ୟନ୍ତି, ଅପ୍ପତିକା କୁମାରିକା ॥
ଦୁବ୍ଭାସିତଞ୍ହି ତେ ଜମ୍ମି, ଅନତ୍ଥପଦକୋୱିଦେ ।
କୁହିଂ ରାଜା କୁମାରୀନଂ, ଭତ୍ତାରଂ ପରିୟେସତି ॥
ନ ମେ ଦୁବ୍ଭାସିତଂ ବ୍ରହ୍ମେ, କୋୱିଦତ୍ଥପଦା ଅହଂ ।
ଅରକ୍ଖିତା ଜାନପଦା, ଅଧମ୍ମବଲିନା ହତା ॥
ରତ୍ତିଞ୍ହି ଚୋରା ଖାଦନ୍ତି, ଦିୱା ଖାଦନ୍ତି ତୁଣ୍ଡିୟା ।
ରଟ୍ଠସ୍ମିଂ କୂଟରାଜସ୍ସ, ବହୁ ଅଧମ୍ମିକୋ ଜନୋ ।
ଦୁଜ୍ଜୀୱେ ଦୁବ୍ଭରେ ଦାରେ, କୁତୋ ଭତ୍ତା କୁମାରିୟୋ ॥
ଏୱଂ ସୟତୁ ପଞ୍ଚାଲୋ, ସଙ୍ଗାମେ ସତ୍ତିୟା ହତୋ ।
ୟଥାୟଂ କପଣୋ ସେତି, ହତୋ ଫାଲେନ ସାଲିୟୋ ॥
ଅଧମ୍ମେନ ତୁୱଂ ଜମ୍ମ, ବ୍ରହ୍ମଦତ୍ତସ୍ସ କୁଜ୍ଝସି ।
ୟୋ ତ୍ୱଂ ସପସି ରାଜାନଂ, ଅପରଜ୍ଝିତ୍ୱାନ ଅତ୍ତନୋ [ଅତ୍ତନା (ପୀ॰)]॥
ଧମ୍ମେନ ବ୍ରହ୍ମଦତ୍ତସ୍ସ, ଅହଂ କୁଜ୍ଝାମି ବ୍ରାହ୍ମଣ ।
ଅରକ୍ଖିତା ଜାନପଦା, ଅଧମ୍ମବଲିନା ହତା ॥
ରତ୍ତିଞ୍ହି ଚୋରା ଖାଦନ୍ତି, ଦିୱା ଖାଦନ୍ତି ତୁଣ୍ଡିୟା ।
ରଟ୍ଠସ୍ମିଂ କୂଟରାଜସ୍ସ, ବହୁ ଅଧମ୍ମିକୋ ଜନୋ ॥
ସା ନୂନ ପୁନ ରେ ପକ୍କା, ୱିକାଲେ ଭତ୍ତମାହରି ।
ଭତ୍ତହାରିଂ ଅପେକ୍ଖନ୍ତୋ, ହତୋ ଫାଲେନ ସାଲିୟୋ ॥
ଏୱଂ ହଞ୍ଞତୁ ପଞ୍ଚାଲୋ, ସଙ୍ଗାମେ ଅସିନା ହତୋ [ଦଳ୍ହଂ (ପୀ॰)]।
ୟଥାହମଜ୍ଜ ପହତୋ, ଖୀରଞ୍ଚ ମେ ପୱଟ୍ଟିତଂ ॥
ୟଂ ପସୁ ଖୀରଂ ଛଡ୍ଡେତି, ପସୁପାଲଂ ୱିହିଂସତି [ପସୁପାଲଞ୍ଚ ହିଂସତି (ସୀ॰), ପସୁ ଫାଲଞ୍ଚ ହିଂସତି (ପୀ॰)]।
କିଂ ତତ୍ଥ ବ୍ରହ୍ମଦତ୍ତସ୍ସ, ୟଂ ନୋ ଗରହତେ [ଗରହତୋ (ପୀ॰)] ଭୱଂ ॥
ଗାରୟ୍ହୋ ବ୍ରହ୍ମେ ପଞ୍ଚାଲୋ, ବ୍ରହ୍ମଦତ୍ତସ୍ସ ରାଜିନୋ ।
ଅରକ୍ଖିତା ଜାନପଦା, ଅଧମ୍ମବଲିନା ହତା ॥
ରତ୍ତିଞ୍ହି ଚୋରା ଖାଦନ୍ତି, ଦିୱା ଖାଦନ୍ତି ତୁଣ୍ଡିୟା ।
ରଟ୍ଠସ୍ମିଂ କୂଟରାଜସ୍ସ, ବହୁ ଅଧମ୍ମିକୋ ଜନୋ ॥
ଚଣ୍ଡା ଅଟନକା [ଅଟନକ (ପୀ॰), ଅକଟନା (କ॰)] ଗାୱୀ, ୟଂ ପୁରେ ନ ଦୁହାମସେ ।
ତଂ ଦାନି ଅଜ୍ଜ ଦୋହାମ, ଖୀରକାମେହୁପଦ୍ଦୁତା ॥
ଏୱଂ କନ୍ଦତୁ ପଞ୍ଚାଲୋ, ୱିପୁତ୍ତୋ ୱିପ୍ପସୁକ୍ଖତୁ ।
ୟଥାୟଂ କପଣା ଗାୱୀ, ୱିପୁତ୍ତା ପରିଧାୱତି ॥
ୟଂ ପସୁ ପସୁପାଲସ୍ସ, ସମ୍ଭମେୟ୍ୟ [ପବ୍ଭମେୟ୍ୟ (ସୀ॰ ପୀ॰)] ରୱେୟ୍ୟ ୱା ।
କୋ ନୀଧ ଅପରାଧତ୍ଥି, ବ୍ରହ୍ମଦତ୍ତସ୍ସ ରାଜିନୋ ॥
ଅପରାଧୋ ମହାବ୍ରହ୍ମେ, ବ୍ରହ୍ମଦତ୍ତସ୍ସ ରାଜିନୋ ।
ଅରକ୍ଖିତା ଜାନପଦା, ଅଧମ୍ମବଲିନା ହତା ॥
ରତ୍ତିଞ୍ହି ଚୋରା ଖାଦନ୍ତି, ଦିୱା ଖାଦନ୍ତି ତୁଣ୍ଡିୟା ।
ରଟ୍ଠସ୍ମିଂ କୂଟରାଜସ୍ସ, ବହୁ ଅଧମ୍ମିକୋ ଜନୋ ।
କଥଂ ନୋ ଅସିକୋସତ୍ଥା, ଖୀରପା ହଞ୍ଞତେ ପଜା ॥
ଏୱଂ ଖଜ୍ଜତୁ ପଞ୍ଚାଲୋ, ହତୋ ୟୁଦ୍ଧେ ସପୁତ୍ତକୋ ।
ୟଥାହମଜ୍ଜ ଖଜ୍ଜାମି, ଗାମିକେହି [ଗାମକେହି (ସୀ॰ ପୀ॰)] ଅରଞ୍ଞଜୋ ॥
ନ ସବ୍ବଭୂତେସୁ ୱିଧେନ୍ତି [ୱିଧନ୍ତି (କ॰)] ରକ୍ଖଂ, ରାଜାନୋ ମଣ୍ଡୂକ ମନୁସ୍ସଲୋକେ ।
ନେତ୍ତାୱତା ରାଜା ଅଧମ୍ମଚାରୀ, ୟଂ ତାଦିସଂ ଜୀୱମଦେୟ୍ୟୁ ଧଙ୍କା ॥
ଅଧମ୍ମରୂପୋ ୱତ ବ୍ରହ୍ମଚାରୀ, ଅନୁପ୍ପିୟଂ ଭାସସି ଖତ୍ତିୟସ୍ସ ।
ୱିଲୁପ୍ପମାନାୟ ପୁଥୁପ୍ପଜାୟ, ପୂଜେସି ରାଜଂ ପରମପ୍ପମାଦଂ [ରାଜଂ ପରମପ୍ପୱାଦଂ (ସୀ॰), ରାଜା ପରମପ୍ପୱାଦିଂ (ସ୍ୟା॰)]॥
ସଚେ ଇମଂ ବ୍ରହ୍ମେ ସୁରଜ୍ଜକଂ ସିୟା, ଫୀତଂ ରଟ୍ଠଂ ମୁଦିତଂ [ପୂରିତଂ (କ॰)] ୱିପ୍ପସନ୍ନଂ ।
ଭୁତ୍ୱା ବଲିଂ ଅଗ୍ଗପିଣ୍ଡଞ୍ଚ କାକା, ନ ମାଦିସଂ ଜୀୱମଦେୟ୍ୟୁ ଧଙ୍କାତି ॥
ଗନ୍ଧତିନ୍ଦୁକଜାତକଂ ଦସମଂ ।
ତସ୍ସୁଦ୍ଦାନଂ –
କିଂଛନ୍ଦ କୁମ୍ଭ ଜୟଦ୍ଦିସ ଛଦ୍ଦନ୍ତ, ଅଥ ପଣ୍ଡିତସମ୍ଭୱ ସିରକପି ।
ଦକରକ୍ଖସ ପଣ୍ଡରନାଗୱରୋ, ଅଥ ସମ୍ବୁଲ ତିନ୍ଦୁକଦେୱସୁତୋତି ॥
ତିଂସନିପାତଂ ନିଟ୍ଠିତଂ ।
ଜାତକପାଳିୟା ପଠମୋ ଭାଗୋ ନିଟ୍ଠିତୋ ।