ଖୁଦ୍ଦକପାଠ
॥ ନମୋ ତସ୍ସ ଭଗୱତୋ ଅରହତୋ ସମ୍ମାସମ୍ବୁଦ୍ଧସ୍ସ॥
ଖୁଦ୍ଦକନିକାୟେ
ଖୁଦ୍ଦକପାଠ
୧. ସରଣତ୍ତୟଂ
ଧମ୍ମଂ ସରଣଂ ଗଚ୍ଛାମି।
ସଙ୍ଘଂ ସରଣଂ ଗଚ୍ଛାମି॥
ଦୁତିୟମ୍ପି ବୁଦ୍ଧଂ ସରଣଂ ଗଚ୍ଛାମି।
ଦୁତିୟମ୍ପି ଧମ୍ମଂ ସରଣଂ ଗଚ୍ଛାମି।
ଦୁତିୟମ୍ପି ସଙ୍ଘଂ ସରଣଂ ଗଚ୍ଛାମି॥
ତତିୟମ୍ପି ଧମ୍ମଂ ସରଣଂ ଗଚ୍ଛାମି।
ତତିୟମ୍ପି ସଙ୍ଘଂ ସରଣଂ ଗଚ୍ଛାମି॥
ସରଣତ୍ତୟଂ [ସରଣଗମନଂ ନିଟ୍ଠିତଂ (ସ୍ୟା॰)] ନିଟ୍ଠିତଂ।
୨. ଦସସିକ୍ଖାପଦଂ
୧ . ପାଣାତିପାତା ୱେରମଣୀ-ସିକ୍ଖାପଦଂ [ୱେରମଣୀସିକ୍ଖାପଦଂ (ସୀ॰ ସ୍ୟା॰)] ସମାଦିୟାମି।
୨ . ଅଦିନ୍ନାଦାନା ୱେରମଣୀ-ସିକ୍ଖାପଦଂ ସମାଦିୟାମି।
୩ . ଅବ୍ରହ୍ମଚରିୟା ୱେରମଣୀ-ସିକ୍ଖାପଦଂ ସମାଦିୟାମି।
୪ . ମୁସାୱାଦା ୱେରମଣୀ-ସିକ୍ଖାପଦଂ ସମାଦିୟାମି।
୫ . ସୁରାମେରୟମଜ୍ଜପମାଦଟ୍ଠାନା ୱେରମଣୀ-ସିକ୍ଖାପଦଂ ସମାଦିୟାମି ।
୬ . ୱିକାଲଭୋଜନା ୱେରମଣୀ-ସିକ୍ଖାପଦଂ ସମାଦିୟାମି।
୭ . ନଚ୍ଚ-ଗୀତ-ୱାଦିତ-ୱିସୂକଦସ୍ସନା ୱେରମଣୀ-ସିକ୍ଖାପଦଂ ସମାଦିୟାମି।
୮ . ମାଲା-ଗନ୍ଧ-ୱିଲେପନ-ଧାରଣ-ମଣ୍ଡନ-ୱିଭୂସନଟ୍ଠାନା ୱେରମଣୀ-ସିକ୍ଖାପଦଂ ସମାଦିୟାମି।
୯ . ଉଚ୍ଚାସୟନ-ମହାସୟନା ୱେରମଣୀ-ସିକ୍ଖାପଦଂ ସମାଦିୟାମି।
୧୦ . ଜାତରୂପ-ରଜତପଟିଗ୍ଗହଣା ୱେରମଣୀ-ସିକ୍ଖାପଦଂ ସମାଦିୟାମି।
ଦସସିକ୍ଖାପଦଂ [ଦସସିକ୍ଖାପଦଂ ନିଟ୍ଠିତଂ (ସ୍ୟା॰)] ନିଟ୍ଠିତଂ।
୩. ଦ୍ୱତ୍ତିଂସାକାରୋ
କେସା ଲୋମା ନଖା ଦନ୍ତା ତଚୋ,
ମଂସଂ ନ୍ହାରୁ [ନହାରୁ (ସୀ॰ ପୀ॰), ନହାରୂ (ସ୍ୟା॰ କଂ॰)] ଅଟ୍ଠି [ଅଟ୍ଠୀ (ସ୍ୟା॰ କଂ)] ଅଟ୍ଠିମିଞ୍ଜଂ ୱକ୍କଂ,
ହଦୟଂ ୟକନଂ କିଲୋମକଂ ପିହକଂ ପପ୍ଫାସଂ,
ଅନ୍ତଂ ଅନ୍ତଗୁଣଂ ଉଦରିୟଂ କରୀସଂ ମତ୍ଥଲୁଙ୍ଗଂ [( ) ସବ୍ବତ୍ଥ ନତ୍ଥି, ଅଟ୍ଠକଥା ଚ ଦ୍ୱତ୍ତିଂସସଙ୍ଖ୍ୟା ଚ ମନସି କାତବ୍ବା] ,
ପିତ୍ତଂ ସେମ୍ହଂ ପୁବ୍ବୋ ଲୋହିତଂ ସେଦୋ ମେଦୋ,
ଅସ୍ସୁ ୱସା ଖେଳୋ ସିଙ୍ଘାଣିକା ଲସିକା ମୁତ୍ତନ୍ତି [ମୁତ୍ତଂ, ମତ୍ଥକେ ମତ୍ଥଲୁଙ୍ଗନ୍ତି (ସ୍ୟା॰)] ॥
ଦ୍ୱତ୍ତିଂସାକାରୋ ନିଟ୍ଠିତୋ।
୪. କୁମାରପଞ୍ହା
୧ . ‘‘ଏକଂ ନାମ କିଂ’’? ‘‘ସବ୍ବେ ସତ୍ତା ଆହାରଟ୍ଠିତିକା’’।
୨ . ‘‘ଦ୍ୱେ ନାମ କିଂ’’? ‘‘ନାମଞ୍ଚ ରୂପଞ୍ଚ’’।
୩ . ‘‘ତୀଣି ନାମ କିଂ’’? ‘‘ତିସ୍ସୋ ୱେଦନା’’।
୪ . ‘‘ଚତ୍ତାରି ନାମ କିଂ’’? ‘‘ଚତ୍ତାରି ଅରିୟସଚ୍ଚାନି’’।
୫ . ‘‘ପଞ୍ଚ ନାମ କିଂ’’? ‘‘ପଞ୍ଚୁପାଦାନକ୍ଖନ୍ଧା’’।
୬ . ‘‘ଛ ନାମ କିଂ’’? ‘‘ଛ ଅଜ୍ଝତ୍ତିକାନି ଆୟତନାନି’’।
୭ . ‘‘ସତ୍ତ ନାମ କିଂ’’? ‘‘ସତ୍ତ ବୋଜ୍ଝଙ୍ଗା’’।
୮ . ‘‘ଅଟ୍ଠ ନାମ କିଂ’’? ‘‘ଅରିୟୋ ଅଟ୍ଠଙ୍ଗିକୋ ମଗ୍ଗୋ’’।
୯ . ‘‘ନୱ ନାମ କିଂ’’? ‘‘ନୱ ସତ୍ତାୱାସା’’।
୧୦ . ‘‘ଦସ ନାମ କିଂ’’? ‘‘ଦସହଙ୍ଗେହି ସମନ୍ନାଗତୋ ‘ଅରହା’ତି ୱୁଚ୍ଚତୀ’’ତି।
କୁମାରପଞ୍ହା ନିଟ୍ଠିତା।
୫. ମଙ୍ଗଲସୁତ୍ତଂ
୧ . ଏୱଂ ମେ ସୁତଂ – ଏକଂ ସମୟଂ ଭଗୱା ସାୱତ୍ଥିୟଂ ୱିହରତି ଜେତୱନେ ଅନାଥପିଣ୍ଡିକସ୍ସ ଆରାମେ। ଅଥ ଖୋ ଅଞ୍ଞତରା ଦେୱତା ଅଭିକ୍କନ୍ତାୟ ରତ୍ତିୟା ଅଭିକ୍କନ୍ତୱଣ୍ଣା କେୱଲକପ୍ପଂ ଜେତୱନଂ ଓଭାସେତ୍ୱା ୟେନ ଭଗୱା ତେନୁପସଙ୍କମି; ଉପସଙ୍କମିତ୍ୱା ଭଗୱନ୍ତଂ ଅଭିୱାଦେତ୍ୱା ଏକମନ୍ତଂ ଅଟ୍ଠାସି। ଏକମନ୍ତଂ ଠିତା ଖୋ ସା ଦେୱତା ଭଗୱନ୍ତଂ ଗାଥାୟ ଅଜ୍ଝଭାସି –
‘‘ବହୂ ଦେୱା ମନୁସ୍ସା ଚ, ମଙ୍ଗଲାନି ଅଚିନ୍ତୟୁଂ।
ଆକଙ୍ଖମାନା ସୋତ୍ଥାନଂ, ବ୍ରୂହି ମଙ୍ଗଲମୁତ୍ତମଂ’’॥
‘‘ଅସେୱନା ଚ ବାଲାନଂ, ପଣ୍ଡିତାନଞ୍ଚ ସେୱନା।
ପୂଜା ଚ ପୂଜନେୟ୍ୟାନଂ [ପୂଜନୀୟାନଂ (ସୀ॰ ସ୍ୟା॰ କଂ॰ ପୀ॰)] , ଏତଂ ମଙ୍ଗଲମୁତ୍ତମଂ॥
‘‘ପତିରୂପଦେସୱାସୋ ଚ, ପୁବ୍ବେ ଚ କତପୁଞ୍ଞତା।
ଅତ୍ତସମ୍ମାପଣିଧି [ଅତ୍ଥସମ୍ମାପଣୀଧୀ (କତ୍ଥଚି)] ଚ, ଏତଂ ମଙ୍ଗଲମୁତ୍ତମଂ॥
‘‘ବାହୁସଚ୍ଚଞ୍ଚ ସିପ୍ପଞ୍ଚ, ୱିନୟୋ ଚ ସୁସିକ୍ଖିତୋ।
ସୁଭାସିତା ଚ ୟା ୱାଚା, ଏତଂ ମଙ୍ଗଲମୁତ୍ତମଂ॥
‘‘ମାତାପିତୁ ଉପଟ୍ଠାନଂ, ପୁତ୍ତଦାରସ୍ସ ସଙ୍ଗହୋ।
ଅନାକୁଲା ଚ କମ୍ମନ୍ତା, ଏତଂ ମଙ୍ଗଲମୁତ୍ତମଂ॥
‘‘ଦାନଞ୍ଚ ଧମ୍ମଚରିୟା ଚ, ଞାତକାନଞ୍ଚ ସଙ୍ଗହୋ।
ଅନୱଜ୍ଜାନି କମ୍ମାନି, ଏତଂ ମଙ୍ଗଲମୁତ୍ତମଂ॥
‘‘ଆରତୀ ୱିରତୀ ପାପା, ମଜ୍ଜପାନା ଚ ସଂୟମୋ।
ଅପ୍ପମାଦୋ ଚ ଧମ୍ମେସୁ, ଏତଂ ମଙ୍ଗଲମୁତ୍ତମଂ॥
‘‘ଗାରୱୋ ଚ ନିୱାତୋ ଚ, ସନ୍ତୁଟ୍ଠି ଚ କତଞ୍ଞୁତା।
କାଲେନ ଧମ୍ମସ୍ସୱନଂ [ଧମ୍ମସ୍ସାୱଣଂ (କ॰ ସୀ॰), ଧମ୍ମସୱନଂ (କ॰ ସୀ॰)] , ଏତଂ ମଙ୍ଗଲମୁତ୍ତମଂ॥
‘‘ଖନ୍ତୀ ଚ ସୋୱଚସ୍ସତା, ସମଣାନଞ୍ଚ ଦସ୍ସନଂ।
କାଲେନ ଧମ୍ମସାକଚ୍ଛା, ଏତଂ ମଙ୍ଗଲମୁତ୍ତମଂ॥
‘‘ତପୋ ଚ ବ୍ରହ୍ମଚରିୟଞ୍ଚ, ଅରିୟସଚ୍ଚାନ ଦସ୍ସନଂ।
ନିବ୍ବାନସଚ୍ଛିକିରିୟା ଚ, ଏତଂ ମଙ୍ଗଲମୁତ୍ତମଂ॥
‘‘ଫୁଟ୍ଠସ୍ସ ଲୋକଧମ୍ମେହି, ଚିତ୍ତଂ ୟସ୍ସ ନ କମ୍ପତି।
ଅସୋକଂ ୱିରଜଂ ଖେମଂ, ଏତଂ ମଙ୍ଗଲମୁତ୍ତମଂ॥
‘‘ଏତାଦିସାନି କତ୍ୱାନ, ସବ୍ବତ୍ଥମପରାଜିତା।
ସବ୍ବତ୍ଥ ସୋତ୍ଥିଂ ଗଚ୍ଛନ୍ତି, ତଂ ତେସଂ ମଙ୍ଗଲମୁତ୍ତମ’’ନ୍ତି॥
ମଙ୍ଗଲସୁତ୍ତଂ ନିଟ୍ଠିତଂ।
୬. ରତନସୁତ୍ତଂ
ୟାନୀଧ ଭୂତାନି ସମାଗତାନି, ଭୁମ୍ମାନି [ଭୂମାନି (କ॰)] ୱା ୟାନି ୱ ଅନ୍ତଲିକ୍ଖେ।
ସବ୍ବେୱ ଭୂତା ସୁମନା ଭୱନ୍ତୁ, ଅଥୋପି ସକ୍କଚ୍ଚ ସୁଣନ୍ତୁ ଭାସିତଂ॥
ତସ୍ମା ହି ଭୂତା ନିସାମେଥ ସବ୍ବେ, ମେତ୍ତଂ କରୋଥ ମାନୁସିୟା ପଜାୟ।
ଦିୱା ଚ ରତ୍ତୋ ଚ ହରନ୍ତି ୟେ ବଲିଂ, ତସ୍ମା ହି ନେ ରକ୍ଖଥ ଅପ୍ପମତ୍ତା॥
ୟଂ କିଞ୍ଚି ୱିତ୍ତଂ ଇଧ ୱା ହୁରଂ ୱା, ସଗ୍ଗେସୁ ୱା ୟଂ ରତନଂ ପଣୀତଂ।
ନ ନୋ ସମଂ ଅତ୍ଥି ତଥାଗତେନ, ଇଦମ୍ପି ବୁଦ୍ଧେ ରତନଂ ପଣୀତଂ।
ଏତେନ ସଚ୍ଚେନ ସୁୱତ୍ଥି ହୋତୁ॥
ଖୟଂ ୱିରାଗଂ ଅମତଂ ପଣୀତଂ, ୟଦଜ୍ଝଗା ସକ୍ୟମୁନୀ ସମାହିତୋ।
ନ ତେନ ଧମ୍ମେନ ସମତ୍ଥି କିଞ୍ଚି, ଇଦମ୍ପି ଧମ୍ମେ ରତନଂ ପଣୀତଂ।
ଏତେନ ସଚ୍ଚେନ ସୁୱତ୍ଥି ହୋତୁ॥
ୟଂ ବୁଦ୍ଧସେଟ୍ଠୋ ପରିୱଣ୍ଣୟୀ ସୁଚିଂ, ସମାଧିମାନନ୍ତରିକଞ୍ଞମାହୁ।
ସମାଧିନା ତେନ ସମୋ ନ ୱିଜ୍ଜତି, ଇଦମ୍ପି ଧମ୍ମେ ରତନଂ ପଣୀତଂ।
ଏତେନ ସଚ୍ଚେନ ସୁୱତ୍ଥି ହୋତୁ॥
ୟେ ପୁଗ୍ଗଲା ଅଟ୍ଠ ସତଂ ପସତ୍ଥା, ଚତ୍ତାରି ଏତାନି ୟୁଗାନି ହୋନ୍ତି।
ତେ ଦକ୍ଖିଣେୟ୍ୟା ସୁଗତସ୍ସ ସାୱକା, ଏତେସୁ ଦିନ୍ନାନି ମହପ୍ଫଲାନି।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୟେ ସୁପ୍ପୟୁତ୍ତା ମନସା ଦଳ୍ହେନ, ନିକ୍କାମିନୋ ଗୋତମସାସନମ୍ହି।
ତେ ପତ୍ତିପତ୍ତା ଅମତଂ ୱିଗୟ୍ହ, ଲଦ୍ଧା ମୁଧା ନିବ୍ବୁତିଂ [ନିବ୍ବୁତି (କ॰)] ଭୁଞ୍ଜମାନା।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୟଥିନ୍ଦଖୀଲୋ ପଥୱିସ୍ସିତୋ [ପଠୱିସ୍ସିତୋ (କ॰ ସୀ॰), ପଥୱିଂସିତୋ (କ॰ ସି॰ ସ୍ୟା॰ କଂ॰ ପୀ॰)] ସିୟା, ଚତୁବ୍ଭି ୱାତେହି ଅସମ୍ପକମ୍ପିୟୋ।
ତଥୂପମଂ ସପ୍ପୁରିସଂ ୱଦାମି, ୟୋ ଅରିୟସଚ୍ଚାନି ଅୱେଚ୍ଚ ପସ୍ସତି।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୟେ ଅରିୟସଚ୍ଚାନି ୱିଭାୱୟନ୍ତି, ଗମ୍ଭୀରପଞ୍ଞେନ ସୁଦେସିତାନି।
କିଞ୍ଚାପି ତେ ହୋନ୍ତି ଭୁସଂ ପମତ୍ତା, ନ ତେ ଭୱଂ ଅଟ୍ଠମମାଦିୟନ୍ତି।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ସହାୱସ୍ସ ଦସ୍ସନସମ୍ପଦାୟ [ସହାୱସଦ୍ଦସ୍ସନସମ୍ପଦାୟ (କ॰)] , ତୟସ୍ସୁ ଧମ୍ମା ଜହିତା ଭୱନ୍ତି।
ସକ୍କାୟଦିଟ୍ଠୀ ୱିଚିକିଚ୍ଛିତଞ୍ଚ, ସୀଲବ୍ବତଂ ୱାପି ୟଦତ୍ଥି କିଞ୍ଚି॥
ଚତୂହପାୟେହି ଚ ୱିପ୍ପମୁତ୍ତୋ, ଛଚ୍ଚାଭିଠାନାନି [ଛ ଚାଭିଠାନାନି (ସୀ॰ ସ୍ୟା॰)] ଅଭବ୍ବ କାତୁଂ [ଅଭବ୍ବୋ କାତୁଂ (ସୀ॰)] ।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
କିଞ୍ଚାପି ସୋ କମ୍ମ [କମ୍ମଂ (ସୀ॰ ସ୍ୟା॰ କଂ॰ ପୀ॰)] କରୋତି ପାପକଂ, କାୟେନ ୱାଚା ଉଦ ଚେତସା ୱା।
ଅଭବ୍ବ [ଅଭବ୍ବୋ (ବହୂସୁ)] ସୋ ତସ୍ସ ପଟିଚ୍ଛଦାୟ [ପଟିଚ୍ଛାଦାୟ (ସୀ॰)] , ଅଭବ୍ବତା ଦିଟ୍ଠପଦସ୍ସ ୱୁତ୍ତା।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୱନପ୍ପଗୁମ୍ବେ ୟଥ [ୟଥା (ସୀ॰ ସ୍ୟା॰)] ଫୁସ୍ସିତଗ୍ଗେ, ଗିମ୍ହାନମାସେ ପଠମସ୍ମିଂ [ପଠମସ୍ମି (?)] ଗିମ୍ହେ।
ତଥୂପମଂ ଧମ୍ମୱରଂ ଅଦେସୟି [ଅଦେସୟୀ (ସୀ॰)] , ନିବ୍ବାନଗାମିଂ ପରମଂ ହିତାୟ।
ଇଦମ୍ପି ବୁଦ୍ଧେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୱରୋ ୱରଞ୍ଞୂ ୱରଦୋ ୱରାହରୋ, ଅନୁତ୍ତରୋ ଧମ୍ମୱରଂ ଅଦେସୟି।
ଇଦମ୍ପି ବୁଦ୍ଧେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ଖୀଣଂ ପୁରାଣଂ ନୱ ନତ୍ଥି ସମ୍ଭୱଂ, ୱିରତ୍ତଚିତ୍ତାୟତିକେ ଭୱସ୍ମିଂ।
ତେ ଖୀଣବୀଜା ଅୱିରୂଳ୍ହିଛନ୍ଦା, ନିବ୍ବନ୍ତି ଧୀରା ୟଥାୟଂ [ୟଥୟଂ (କ॰)] ପଦୀପୋ।
ଇଦମ୍ପି ସଙ୍ଘେ ରତନଂ ପଣୀତଂ, ଏତେନ ସଚ୍ଚେନ ସୁୱତ୍ଥି ହୋତୁ॥
ୟାନୀଧ ଭୂତାନି ସମାଗତାନି, ଭୁମ୍ମାନି ୱା ୟାନି ୱ ଅନ୍ତଲିକ୍ଖେ।
ତଥାଗତଂ ଦେୱମନୁସ୍ସପୂଜିତଂ, ବୁଦ୍ଧଂ ନମସ୍ସାମ ସୁୱତ୍ଥି ହୋତୁ॥
ୟାନୀଧ ଭୂତାନି ସମାଗତାନି, ଭୁମ୍ମାନି ୱା ୟାନି ୱ ଅନ୍ତଲିକ୍ଖେ।
ତଥାଗତଂ ଦେୱମନୁସ୍ସପୂଜିତଂ, ଧମ୍ମଂ ନମସ୍ସାମ ସୁୱତ୍ଥି ହୋତୁ॥
ୟାନୀଧ ଭୂତାନି ସମାଗତାନି, ଭୁମ୍ମାନି ୱା ୟାନି ୱ ଅନ୍ତଲିକ୍ଖେ।
ତଥାଗତଂ ଦେୱମନୁସ୍ସପୂଜିତଂ, ସଙ୍ଘଂ ନମସ୍ସାମ ସୁୱତ୍ଥି ହୋତୂତି॥
ରତନସୁତ୍ତଂ ନିଟ୍ଠିତଂ।
୭. ତିରୋକୁଟ୍ଟସୁତ୍ତଂ
ତିରୋକୁଟ୍ଟେସୁ ତିଟ୍ଠନ୍ତି, ସନ୍ଧିସିଙ୍ଘାଟକେସୁ ଚ।
ଦ୍ୱାରବାହାସୁ ତିଟ୍ଠନ୍ତି, ଆଗନ୍ତ୍ୱାନ ସକଂ ଘରଂ॥
ପହୂତେ ଅନ୍ନପାନମ୍ହି, ଖଜ୍ଜଭୋଜ୍ଜେ ଉପଟ୍ଠିତେ।
ନ ତେସଂ କୋଚି ସରତି, ସତ୍ତାନଂ କମ୍ମପଚ୍ଚୟା॥
ଏୱଂ ଦଦନ୍ତି ଞାତୀନଂ, ୟେ ହୋନ୍ତି ଅନୁକମ୍ପକା।
ସୁଚିଂ ପଣୀତଂ କାଲେନ, କପ୍ପିୟଂ ପାନଭୋଜନଂ।
ଇଦଂ ୱୋ ଞାତୀନଂ ହୋତୁ, ସୁଖିତା ହୋନ୍ତୁ ଞାତୟୋ॥
ତେ ଚ ତତ୍ଥ ସମାଗନ୍ତ୍ୱା, ଞାତିପେତା ସମାଗତା।
ପହୂତେ ଅନ୍ନପାନମ୍ହି, ସକ୍କଚ୍ଚଂ ଅନୁମୋଦରେ॥
ଚିରଂ ଜୀୱନ୍ତୁ ନୋ ଞାତୀ, ୟେସଂ ହେତୁ ଲଭାମସେ।
ଅମ୍ହାକଞ୍ଚ କତା ପୂଜା, ଦାୟକା ଚ ଅନିପ୍ଫଲା॥
ନ ହି ତତ୍ଥ କସି [କସୀ (ସୀ॰)] ଅତ୍ଥି, ଗୋରକ୍ଖେତ୍ଥ ନ ୱିଜ୍ଜତି।
ୱଣିଜ୍ଜା ତାଦିସୀ ନତ୍ଥି, ହିରଞ୍ଞେନ କୟୋକୟଂ [କୟାକ୍କୟଂ (ସୀ॰), କୟା କୟଂ (ସ୍ୟା॰)] ।
ଇତୋ ଦିନ୍ନେନ ୟାପେନ୍ତି, ପେତା କାଲଙ୍କତା [କାଲକତା (ସୀ॰ ସ୍ୟା॰ କଂ॰)] ତହିଂ॥
ଉନ୍ନମେ ଉଦକଂ ୱୁଟ୍ଠଂ, ୟଥା ନିନ୍ନଂ ପୱତ୍ତତି।
ଏୱମେୱ ଇତୋ ଦିନ୍ନଂ, ପେତାନଂ ଉପକପ୍ପତି॥
ୟଥା ୱାରିୱହା ପୂରା, ପରିପୂରେନ୍ତି ସାଗରଂ।
ଏୱମେୱ ଇତୋ ଦିନ୍ନଂ, ପେତାନଂ ଉପକପ୍ପତି॥
ଅଦାସି ମେ ଅକାସି ମେ, ଞାତିମିତ୍ତା [ଞାତି ମିତ୍ତୋ (?)] ସଖା ଚ ମେ।
ପେତାନଂ ଦକ୍ଖିଣଂ ଦଜ୍ଜା, ପୁବ୍ବେ କତମନୁସ୍ସରଂ॥
ନ ହି ରୁଣ୍ଣଂ ୱା ସୋକୋ ୱା, ୟା ଚଞ୍ଞା ପରିଦେୱନା।
ନ ତଂ ପେତାନମତ୍ଥାୟ, ଏୱଂ ତିଟ୍ଠନ୍ତି ଞାତୟୋ॥
ଅୟଞ୍ଚ ଖୋ ଦକ୍ଖିଣା ଦିନ୍ନା, ସଙ୍ଘମ୍ହି ସୁପ୍ପତିଟ୍ଠିତା।
ଦୀଘରତ୍ତଂ ହିତାୟସ୍ସ, ଠାନସୋ ଉପକପ୍ପତି॥
ସୋ ଞାତିଧମ୍ମୋ ଚ ଅୟଂ ନିଦସ୍ସିତୋ, ପେତାନ ପୂଜା ଚ କତା ଉଳାରା।
ବଲଞ୍ଚ ଭିକ୍ଖୂନମନୁପ୍ପଦିନ୍ନଂ [… ମନୁପ୍ପଦିନ୍ନୱା (କ॰)] , ତୁମ୍ହେହି ପୁଞ୍ଞଂ ପସୁତଂ ଅନପ୍ପକନ୍ତି॥
ତିରୋକୁଟ୍ଟସୁତ୍ତଂ ନିଟ୍ଠିତଂ।
୮. ନିଧିକଣ୍ଡସୁତ୍ତଂ
ନିଧିଂ ନିଧେତି ପୁରିସୋ, ଗମ୍ଭୀରେ ଓଦକନ୍ତିକେ।
ଅତ୍ଥେ କିଚ୍ଚେ ସମୁପ୍ପନ୍ନେ, ଅତ୍ଥାୟ ମେ ଭୱିସ୍ସତି॥
ରାଜତୋ ୱା ଦୁରୁତ୍ତସ୍ସ, ଚୋରତୋ ପୀଳିତସ୍ସ ୱା।
ଇଣସ୍ସ ୱା ପମୋକ୍ଖାୟ, ଦୁବ୍ଭିକ୍ଖେ ଆପଦାସୁ ୱା।
ଏତଦତ୍ଥାୟ ଲୋକସ୍ମିଂ, ନିଧି ନାମ ନିଧୀୟତି॥
ତାୱସ୍ସୁନିହିତୋ [ତାୱ ସୁନିହିତୋ (ସୀ॰)] ସନ୍ତୋ, ଗମ୍ଭୀରେ ଓଦକନ୍ତିକେ।
ନ ସବ୍ବୋ ସବ୍ବଦା ଏୱ, ତସ୍ସ ତଂ ଉପକପ୍ପତି॥
ନିଧି ୱା ଠାନା ଚୱତି, ସଞ୍ଞା ୱାସ୍ସ ୱିମୁୟ୍ହତି।
ନାଗା ୱା ଅପନାମେନ୍ତି, ୟକ୍ଖା ୱାପି ହରନ୍ତି ନଂ॥
ଅପ୍ପିୟା ୱାପି ଦାୟାଦା, ଉଦ୍ଧରନ୍ତି ଅପସ୍ସତୋ।
ୟଦା ପୁଞ୍ଞକ୍ଖୟୋ ହୋତି, ସବ୍ବମେତଂ ୱିନସ୍ସତି॥
ୟସ୍ସ ଦାନେନ ସୀଲେନ, ସଂୟମେନ ଦମେନ ଚ।
ନିଧୀ ସୁନିହିତୋ ହୋତି, ଇତ୍ଥିୟା ପୁରିସସ୍ସ ୱା॥
ଚେତିୟମ୍ହି ଚ ସଙ୍ଘେ ୱା, ପୁଗ୍ଗଲେ ଅତିଥୀସୁ ୱା।
ମାତରି ପିତରି ଚାପି [ୱାପି (ସ୍ୟା॰ କଂ॰)] , ଅଥୋ ଜେଟ୍ଠମ୍ହି ଭାତରି॥
ଏସୋ ନିଧି ସୁନିହିତୋ, ଅଜେୟ୍ୟୋ ଅନୁଗାମିକୋ।
ପହାୟ ଗମନୀୟେସୁ, ଏତଂ ଆଦାୟ ଗଚ୍ଛତି॥
ଅସାଧାରଣମଞ୍ଞେସଂ, ଅଚୋରାହରଣୋ ନିଧି।
କୟିରାଥ ଧୀରୋ ପୁଞ୍ଞାନି, ୟୋ ନିଧି ଅନୁଗାମିକୋ॥
ଏସ ଦେୱମନୁସ୍ସାନଂ, ସବ୍ବକାମଦଦୋ ନିଧି।
ୟଂ ୟଦେୱାଭିପତ୍ଥେନ୍ତି, ସବ୍ବମେତେନ ଲବ୍ଭତି॥
ସୁୱଣ୍ଣତା ସୁସରତା, ସୁସଣ୍ଠାନା ସୁରୂପତା [ସୁସଣ୍ଠାନସୁରୂପତା (ସୀ॰), ସୁସଣ୍ଠାନଂ ସୁରୂପତା (ସ୍ୟା॰ କଂ॰)] ।
ଆଧିପଚ୍ଚପରିୱାରୋ, ସବ୍ବମେତେନ ଲବ୍ଭତି॥
ପଦେସରଜ୍ଜଂ ଇସ୍ସରିୟଂ, ଚକ୍କୱତ୍ତିସୁଖଂ ପିୟଂ।
ଦେୱରଜ୍ଜମ୍ପି ଦିବ୍ବେସୁ, ସବ୍ବମେତେନ ଲବ୍ଭତି॥
ମାନୁସ୍ସିକା ଚ ସମ୍ପତ୍ତି, ଦେୱଲୋକେ ଚ ୟା ରତି।
ୟା ଚ ନିବ୍ବାନସମ୍ପତ୍ତି, ସବ୍ବମେତେନ ଲବ୍ଭତି॥
ମିତ୍ତସମ୍ପଦମାଗମ୍ମ, ୟୋନିସୋୱ [ୟୋନିସୋ ୱେ (ସୀ॰), ୟୋନିସୋ ଚେ (ସ୍ୟା॰), ୟୋନିସୋ ଚ (?)] ପୟୁଞ୍ଜତୋ।
ୱିଜ୍ଜା ୱିମୁତ୍ତି ୱସୀଭାୱୋ, ସବ୍ବମେତେନ ଲବ୍ଭତି॥
ପଟିସମ୍ଭିଦା ୱିମୋକ୍ଖା ଚ, ୟା ଚ ସାୱକପାରମୀ।
ପଚ୍ଚେକବୋଧି ବୁଦ୍ଧଭୂମି, ସବ୍ବମେତେନ ଲବ୍ଭତି॥
ଏୱଂ ମହତ୍ଥିକା ଏସା, ୟଦିଦଂ ପୁଞ୍ଞସମ୍ପଦା।
ତସ୍ମା ଧୀରା ପସଂସନ୍ତି, ପଣ୍ଡିତା କତପୁଞ୍ଞତନ୍ତି॥
ନିଧିକଣ୍ଡସୁତ୍ତଂ ନିଟ୍ଠିତଂ।
୯. ମେତ୍ତସୁତ୍ତଂ
କରଣୀୟମତ୍ଥକୁସଲେନ , ୟନ୍ତସନ୍ତଂ ପଦଂ ଅଭିସମେଚ୍ଚ।
ସକ୍କୋ ଉଜୂ ଚ ସୁହୁଜୂ [ସୂଜୂ (ସୀ॰)] ଚ, ସୁୱଚୋ ଚସ୍ସ ମୁଦୁ ଅନତିମାନୀ॥
ସନ୍ତୁସ୍ସକୋ ଚ ସୁଭରୋ ଚ, ଅପ୍ପକିଚ୍ଚୋ ଚ ସଲ୍ଲହୁକୱୁତ୍ତି।
ସନ୍ତିନ୍ଦ୍ରିୟୋ ଚ ନିପକୋ ଚ, ଅପ୍ପଗବ୍ଭୋ କୁଲେସ୍ୱନନୁଗିଦ୍ଧୋ॥
ନ ଚ ଖୁଦ୍ଦମାଚରେ କିଞ୍ଚି, ୟେନ ୱିଞ୍ଞୂ ପରେ ଉପୱଦେୟ୍ୟୁଂ।
ସୁଖିନୋୱ ଖେମିନୋ ହୋନ୍ତୁ, ସବ୍ବସତ୍ତା [ସବ୍ବେ ସତ୍ତା (ସୀ॰ ସ୍ୟା॰)] ଭୱନ୍ତୁ ସୁଖିତତ୍ତା॥
ୟେ କେଚି ପାଣଭୂତତ୍ଥି, ତସା ୱା ଥାୱରା ୱନୱସେସା।
ଦୀଘା ୱା ୟେୱ ମହନ୍ତା [ମହନ୍ତ (?)] , ମଜ୍ଝିମା ରସ୍ସକା ଅଣୁକଥୂଲା॥
ଦିଟ୍ଠା ୱା ୟେୱ ଅଦିଟ୍ଠା [ଅଦିଟ୍ଠ (?)] , ୟେ ୱ [ୟେ ଚ (ସୀ॰ ସ୍ୟା॰ କଂ॰ ପୀ॰)] ଦୂରେ ୱସନ୍ତି ଅୱିଦୂରେ।
ଭୂତା ୱ [ୱା (ସ୍ୟା॰ କଂ॰ ପୀ॰ କ॰)] ସମ୍ଭୱେସୀ ୱ [ୱା (ସୀ॰ ସ୍ୟା॰ କଂ॰ ପୀ॰)] , ସବ୍ବସତ୍ତା ଭୱନ୍ତୁ ସୁଖିତତ୍ତା॥
ନ ପରୋ ପରଂ ନିକୁବ୍ବେଥ, ନାତିମଞ୍ଞେଥ କତ୍ଥଚି ନ କଞ୍ଚି [ନଂ କଞ୍ଚି (ସୀ॰ ପୀ॰), ନଂ କିଞ୍ଚି (ସ୍ୟା॰), ନ କିଞ୍ଚି (କ॰)] ।
ବ୍ୟାରୋସନା ପଟିଘସଞ୍ଞା, ନାଞ୍ଞମଞ୍ଞସ୍ସ ଦୁକ୍ଖମିଚ୍ଛେୟ୍ୟ॥
ମାତା ୟଥା ନିୟଂ ପୁତ୍ତମାୟୁସା ଏକପୁତ୍ତମନୁରକ୍ଖେ।
ଏୱମ୍ପି ସବ୍ବଭୂତେସୁ, ମାନସଂ ଭାୱୟେ ଅପରିମାଣଂ॥
ମେତ୍ତଞ୍ଚ ସବ୍ବଲୋକସ୍ମି, ମାନସଂ ଭାୱୟେ ଅପରିମାଣଂ।
ଉଦ୍ଧଂ ଅଧୋ ଚ ତିରିୟଞ୍ଚ, ଅସମ୍ବାଧଂ ଅୱେରମସପତ୍ତଂ॥
ତିଟ୍ଠଂ ଚରଂ ନିସିନ୍ନୋ ୱ [ୱା (ସୀ॰ ସ୍ୟା॰ କଂ॰ ପୀ॰)] , ସୟାନୋ ୟାୱତାସ୍ସ ୱିତମିଦ୍ଧୋ [ୱିଗତମିଦ୍ଧୋ (ବହୂସୁ)] ।
ଏତଂ ସତିଂ ଅଧିଟ୍ଠେୟ୍ୟ, ବ୍ରହ୍ମମେତଂ ୱିହାରମିଧମାହୁ॥
ଦିଟ୍ଠିଞ୍ଚ ଅନୁପଗ୍ଗମ୍ମ, ସୀଲୱା ଦସ୍ସନେନ ସମ୍ପନ୍ନୋ।
କାମେସୁ ୱିନୟ [ୱିନେୟ୍ୟ (ସୀ॰)] ଗେଧଂ, ନ ହି ଜାତୁଗ୍ଗବ୍ଭସେୟ୍ୟ ପୁନ ରେତୀତି॥
ମେତ୍ତସୁତ୍ତଂ ନିଟ୍ଠିତଂ।
ଖୁଦ୍ଦକପାଠପାଳି ନିଟ୍ଠିତା।